THE HOODIE GIRL BY SumMer Ralte (Completed)

[Ngaia]

CHAPTER-14



Ka kawngkhar rawn kik ri dat dat thawmah chuan ka harh a, ka lo muhil tlang ni ngei tur a ni nizana chhuat a ka thut ang ang khan ka lo la awm a; ka taksa kham leh na lutuk chu dinchhuah pui a har talh leh nghal "Bawihi, class i kal dawn em? I kal dawn chuan hei i tlai mai dawn a nia" kawngkhar chhan atang chuan ka nu in a ti a




Ka khum a mut rem sauh sauh pah chuan "Nu vawiin chu ka kal lo ang, ka nuamsam lo emai" ka ti a "I eng nge na, khawmaw kawngkhar hi lo hawng teh" a ti nghal sawt sawt a, hei hi a nia ka dam lo emaw ka nuamsam lo emaw pawh ni se ka nu leh pa te hrilh loh hram hram ka duh thinna chu min ngaihtuah leh lutuk hi a buaithlak thin zawk a ni





"Chutia ngaihtuah awm ka ni lo, nizanah lehkha ka zir a ka meng rei nen ka lu a na mai chauh a lawm" chhuanlam tha tawk tak ka siam loh chuan an awm a nuam leh dawn chuang lo tih ka hriat avangin ka siam ta nge nge a, a awih ve ni hmiang engmah pawh sawi zawm tawh loin inhnuai lamah a pen thla ve nghal tih hriat zetin kailawn chu a rik zawm zat a




Engmah pawh ngaihtuah ka peih lo, ka thluak chhunga eng eng emaw awm paih bo nan hian mut hmak a nia ka duh ni; keima cho chhuah ngei ka tuar leh thei lo chu nep ka inti ru tak zet, min hmet chau vek ni berin ka hria engmah ngaihtuah loh tum chuan mit ka chhing ta vang vang a



Will Pov



Thazuali bula ka chet dan kha Stella chungah hian engtin mahin a thawk ve lo tihna a maw ni le; dik tak chuan tuna ka thil tih hi tha ka ti bik lo a ka duh dan pawh a ni ngai hek lo mahse Stella hian ti lo thei loin min siam zawk a nih ber hi



Thazuali hi kawp leh ta ka ni lo a, vawi tam Stella hi biak pawh ka tum mahse min peh hel a min biak duh loh chu thuhran ka bul hnaia awm a duh loh avang hian hetiang thil hi ti ta mai ka ni; ka lak let theihna kawng awm chhun ang a ka hriat vang chauh a ni bawk mahse a thik ve lo a maw tih tur khawpin a hmelah a lan tir ngai lo chuan min tibuai ru khawp mai




College ka thlen chuan hmuh ka in beisei teh lul nen a hmel hmuh tur pawh a awm hlek lo, a dam lo leh tawh a maw ni zawk dawn le; ka thin a rim nghal tung a, dik tak chuan 'A theih loh' a tih chhan kha ka la hrethiam thei tlat lo a ni, eng ang buaina nge min siam tih lah ka hre bawk hek lo



"Bawiha, hetiang reng chuan in that phah chuang lo ang Thazuali hmang tangkai lo hian tha takin Stella chu be zawk la, a hnar nachhan che hre turin tha tak a inbiak tum rawh u" Remmawia chuan a ti a, nia chu chu keipawhin ka duh alawm mahse le, hmeichhe luhlul leh ngeng tak hian a duh dawn lo tih ka hria




Ka chiang ve em a ni, a chhan chu a duh lohah engtin pawhin tih tum i la tih luih theih a nih loh zia kei tluk a hrechiang an awm lo ang; tuna ka awm dan hi mi tam tak chuan min dem in pa lo pawh min ti a ni mai thei mahse hmeichhe luhlul tak thinlung neih sak tur chuan engpawh tih a ngai si chu a nih ber hi!




"I hriat kha, tih luih a theih loh zia pawh"

"Kan hria, mahse tuna i awm dan leh a awm danah hi chuan in hlim loh zia in hmel atangin a hriat vek alawm, in in ti na tawn mai mai"

"A biak theih loh chu a nih si hi" ka in hum ruh nghal tung a

"Chu i beidawng nghal mai tihna em ni?"

"A teuh lo, ka thih thlengin henu lakah hian beidawn ka tum lo, ka hnena rawn let leh ngei ngei turin ka siam dawn" za lo lutukin ka nui ro halh a, ni e ka la beidawng reng reng lo ka chiang hle bawk a ni Stella hi a rawn let leh ngei ngei ang




"Ok... Tha lawm, i tum ang chuan han che phawt teh" thaw chhuak halhin Remmawia chuan a ti ve bawk a, chhang tawh loin ka lo kiai suk thung; nilengin kan class lakah chuan rilru ka pe thei lo a, dik tak chuan a dam reng emaw ka tia hetia a lo kal lo thut hian ka ngaih te pawh a ti tha lo dawn dawn mai




Ka phone chu ka phawrh a, a number chu ka hmetchhuakin call ka tum uk tawh chu ti leh loin ka hmet thi ta zawk a; rilru nuam zan loin ka haw a, in ka thlen rualin ka room lamah tumah pawh be loin ka chho nghal a, bathlar lamah chhuakin Stella room ah chuan ka kal a




Vanneih thlak takin kawngkhar a lo in kalh lo hlauh a, thawm chhuah thei lo ang berin ka lut a; ka hma a hmeichhia awm dawm pah a lo muhil sek sek ka hmuh chuan ka khi suk a, a bulah chuan pheiin tih thawh hlau takin amah chu ka thlek reng a




A chala fawh sak zeuhin dim te chuan bathlar lam ka pansan leh ta zawk a, ka room a ka luh leh hnu chuan a khum bula couch ah chuan ka thu thla nghal hnawk a; min be duh loin min hmu duh lo mah se a ruk a a hmel ka hmuh theih chhung hi chuan ka hlim tawk rih em em zawng a nih hi




"Stella, min kalsan dawn lo i lo let leh dawn" ti sep in ka thochuak a, ka kawr ka phelh a chutiang zelin kekawr pawh tichuan in tifai turin bathroom ah ka lut tlang nghal a; ka chhuah leh chuan kawr pawh ha peih loin ka boxer nen khumah chuan ka let thla nghal a, ka chau a ni, ka chau tak zet ka taksa ni loin ka thinlung leh rilru hi a chau tak zet




Stella Pov



Tu emaw hian ka chalah a fawp a, min lo nuih sen sen lai chuan zawi zawiin a ral tial tial a; chiang lutuk a harh kawk in ka khum atang chuan ka thuchhuak nghal a, ka ngaihtuah leh a ka manga ka hmuhpa hmel kha ngaihtuah chhuah leh ka tum pawhin a hmel tur awm ang reng reng ka ngaihtuah chhuak thei tawh lo




Mahse hei zawng ka hrechiang a ni, a ni kha a hmeltha tak zet a nui hmel leh a ruangam te chen khan phat rual lohin Will nen an in ang tak zet, ughhh... Engthil nge maw ka ngaihtuah chu le, Will ngaihtuah chhuah tawh loh tum laiin ka manga ka thil hmuh vang vek a kan ngaihtuah chhuah leh chu!




La thochhuak peih ta chuang loin khumah chuan ka la mu ta reng a, ka ngaihtuahna kal bing lutuk tur tih ziaawm nan youtube ah chuan thil ka en lai chuan message a lo thleng a, ka phone screen chu hui thla in eng message nge ka dawn chu ka en a




Mahse number hlang a ni, chat a ka luh peih loh ting tang avangin noti atang chuan ka chhiar a "Will i kalsan kha thil tha tak i ti a ni, chuan ka bulah a lo let leh phah a lawmthu hrilh che hi ka ba nasa" a rawn ti duah a, tunge a ni tih hrilh hriat hranpa ngai loin min rawn thawn tur awm ang chu ka hre mai




Hetiang a min ti duh tu pawh hi hai theih rualin pakhat chiah an awm chu chu Thazuali a ni, za lo lutuk a nui chhuak hawkin chat ah chuan ka lut a; chhan ngai a ka hriat loh avangin message chu ka delete nghal a, ka mood kal dik tan pawh khanu phiangsen khan a rawn ti chhe leh nghal vekin ka hria



Phone khawih pawh ka tui loh phah vek a, ka bul maia chuan dahin phur lo zeta thochhuakin bathlar lam chu ka pan phei a; tunah tak hi chuan ka bulah ka nau awm se ka ti tak zet, engmah hrilh ve vek kher lo mah i la ka hlim lo a ni tih a hriat chuan min tih hlim dan tur a zawng leh nghal vat dawn tih ka hriat avangin ka tun dinhmunah chuan hostel atang va lak chhuah mai te ka duh rum rum a ni




Lut leh in ka guitar chu ka la chhuak a, hei hi ka tih dan ziah a ni. Harsatna emaw ka khawharna emaw ka neih changin guitar perhin ka zai thin, min chhawk ve hle thin chuan ka hre bawk; la perh mai ta lo chuan ka han kuah leh rih a "Nang chu ka thian rinawm i ni reng dawn a nih hi tiraw" tiin ka guitar chu ka be mawlh mawlh a




Hman atang tawh ka thian tun atang leh nakin zel atan pawhin a ni reng ang. Eng a tinge a inngaihtuah hnim ziah, hmalam panin kal zawk tur tak a ni, hmeichhe chak lo tak a ni min tih pawhin tupawh chu ni se ka dem lo; mahse hei erawh an hre lo, eng thil hrehawm leh harsa nge tun hun thleng tur hian ka paltlang tih hi





An rin phak bak hian ka paltlang hnem ve asin, he ka natna ka hriatchhuah tirh khan hrehawm ka ti a tu chungah pawh, ka chhungte chhungah tak ngial pawh ka inthlahrun bakah ka in kiltawih phah em em a; school te kal ve bawk thin mah ila he ka natna in ka taksa a a rawn lan chhuah tir phuhlip leh belkang ang maia bawl vual tut leh sen tawl te vangin tihduhdah leh hmuhsit nih ka hlawh a




Endawng leh khawih thiang lo ang mai nih hial pawh ka tawk, hrehawm ka tiin thih chang chang ka ngah ve mahse ka nu leh ka pa, ka u leh nau te ka ngaihtuah a tun hun ka thlen theih nana an hun leh tha tak meuh meuh seng a min ngaihtuahna leh min hmangaihna an lan chhuah tirna hi engtin nge keima hmasial vanga ka tih tawp san ang?




Chutih rualin hmeichhia rilru no leh thinlung na ve thei ka ni miau a, kum tam tak hnuah hmangaih ka nei veleh thei chauh a mahse he ka natna vang hian ka hnawl a ngai leh si a; ka hma sial vang bawk a ni thei angem? Hetiang thil ka tih hi? Ni e, tam takah chuan ka hma ka sial vang pawh a ni thei mahse ka duh ber chu tumah hi keimah vangin na tawh lo se tih hi ka duh vang mai a ni





Ka guitar ka kuahna atanga la thla in perh rem thei tur chuan ka malah ka dah a, ka rilru a lang hmasa ber leh ka hla duh em em 'Celine Dion' in 'I Love You' tih hla a sak chu perhin ka hriat tham lek chuan ka sa a, tuna ka awmdan nen hian a inrem mai bakah helai a chang



I wish, I could go back to the very first day I saw you
Should've made my move when you looked in my eyes
Cause by now, I know that you'd feel the way that I do
And I'd whisper these words as you'd lie here by my side


Ka duh zual bik a, Will nen college a kan inhmuh hmasak ber ni te ka laka a awmdan engkim te, kan inkawm ni atanga min duhthu a sawi zan thleng te khan khang hun a kir leh kha ka chak a; a bul a ka hlim thin zia te leh ka thla a muan thin zia te kha




A ni kha ka duh satliah mai ni loin ka hmangaih tawh ni maiin ka hria, a hmel hmu lo a awm hrehawm ka ti a, ka ngai a, a bula awm leh kha ka chak a mahse kan karah hian bang lian takin min dang si. Chumi thiat tur chuan risk tam tak ka lak a ngai tih ka hria, ka natna chhuanlam hian ka hnial tlang dawn nge theihnghilhin amah ka pan zawk ang




Ka rilru a buai a, ka thinlung chuan amah pan turin min ti a mahse ka taksa leh ka rilru chuan he ka natna vanga ka la tihnat theih tur zia min hrilh bawk si; ruah rawn sur thut vangin rang lutuk in inchhungah ka lut nghal vat a, ruah rawn baw hawk tih takah tlem chu ka huh hman a towel la vatin ka sam huh hman hram chu ka hru hul a




Ka kawr hak pawh ka thlak leh nghal vek a mahse engin nge min mawlh teh reng ni Will hmuh chakna in ka khat tlat a, ka closet hawngin cardigan fual leh lian tha tak chu ha nghal sawk sawkin inhnuaiah ka chhuk a, kawngkhar lam pan ding nghalin chhuah mai ka tum chu "Tun ang ruah sur laiin khawnge kal i tum" ka nu chuan min rawn ti a




Ruah sur buan buan laia chhuah ka tum chu mak tih loh rual chi ni lo chuan, a lam chu hawiin ka nuih suk a "Ka chhuak lawk ang, ka lo haw har lo ang" tih leh inher let leh nghal vutin tlanchhuah ka rual nghal a, gate atang ka chhuak fel chiah tihah nihliap ka ken theihnghilh tih ka hrechhuak a mahse let leh turin Will hmu tura min tur tu nat zawk vang chuan let leh lo chuan ka hma lam chu ka pan ta zawk a




An in ka thlen chuan call mai ka tum a, ka room ah ka phone ka theihnghilh tih ka hrechhuak leh nghal zat bawk a; engtin nge engmah ngaihtuah chhuak hmasa miah lo a ka chet buan buan theih zawk! thlakhat zet Will lak atanga ka in lak hran hnuah amah hmuh chak vangin atthlak takin ka che chu a ni sia, chutiang a atthlak taka ka chet avang chuan keimah zawk chu ka nuih a za leh ang lawi a




An in kawngkhar chu ka kik a, rei pawh ka nghah hma in Nu Zuali chu a rawn chhuak a "Ehh... Hlimhlim, tun ang hunah eng nge i rawn tih dawn?" Mak tih hmel takin min rawn en a, mak ti awm reng pawh a ni lawm huh hnuangin an inah ka kal a nia! Nuih sukin "Nu Zual, Will hi a awm em?" Zah pawh dawn loin ka zawt nghal thawr a




"Aw...ih...ahhh nichin mai kha chuan a room ah a awm a" a tih chuan "Khawngaihin ka hmu thei angem?" Ka ti leh a, tunah chuan hmuh ngei ngei ka ngai a bialnu ni tura min sawmna kha ka pawm tawh thu hrilh hi ka duh, naktuk ka nghak thei lo ang bawkin nakin pawh ka nghak thei lo; tun hun, tun darkar ah hian hmuh ngei ngei ka ngai zawk a ni




"I va vang ve, a thla a thla lai i bo hmak a tunlai i dam meuh a maw" a rawn tih chuan "Aw ka dam lutuk, ka buai lutuk a lo kal na hun ka nei meuh lo zawk a tin ni" tiin ka chhang ve mai a, Will nen kan inkar ka sawi a nih zawngin puitling hmaah leh nghal thil tha tak pawh va ni suh




"Lo nghak rawh, Will chu ka han ko ang e" engmah dang pawh sawi loin min ti nghal a, chutia engmah dang a sawi belh lo chu ka thaw huaiin ka hria; an varenda a thutna an dah ah chuan thu in ka lo nghak a, ruah in min nan huh hman bawk nen thli leh ruah chu a la tam vei phian bawk nen vawt chuan min hmet tan ti tih a




Mahse heti chen ka thleng ve tawh a, haw leh nghal tur em chuan ka duh bik bawk si lo; thu tawm deuh chawihin ka in khuah khawm a Will lo chhuah hun chu ka nghak ta fan a 5mins pawh ka nghah thlen hma in Will chu a rawn chhuak a, min rawn be mai dawn emaw ka tih laiin ka lam rawn hawi miah lo chuan kawngpui lam pan chuan a kak nghal nul nul a



Mak tih lutuk vangin ka hau hian amah chu ka en a Nu Zuali lo chhuak ve nghal vut in "Stella bawihi, ka be hman lo hmanhmawh lutuk in a rawn tlanchhuak nghal vut a, a chhuah hmain va um rawh" hmanhmawh hmel fe a min hrilh chuan chet mai nachang pawh ka hre lo, a awmdan hmanhmawh hmel lutuk leh mangang hmel lutuk khan ka ngaih a ti tha lo vei bawk nen




Nu Zuali'n min rawn sawi leh takah chuan harh chhuak zawkin, Nu Zuali nuih suk pah chuan Will chu ka um ta nghal a thui pawh ka tlan chhuah hmain an in chhak lawka street light hnuaiah chuan tu emaw phone a bia in a lo ding a; a kal thui hman lo chu ka lawm ru hle bawk




Ka tlan dan chu thlak in amah pan chuan muangchangin ka phei ta zawk a, amah nen a kan inkarah hlam hnih vel chauh a awm tihah chuan ka ding a thawk la hmasa leh te te in ka nui suk a chutah Will lama hawi lehin amah chu ka ko a



Ruah sur nasa bawk nen ka kohna chu a hre mai lo tih ka hriat chuan a aia ring deuh zawk chuan ka ko a, rang lutuk a lo hawi vutin min hmu thut chu mak a ti tih hriat takin phawk zetin min rawn en a; "Ee... Eng nge hetah i tih?" Bah zetin a ti nuai bawk a, ka lo nui hak thung




"Will...?" Duh tawk mai loin ka kut pahnih ka ka bula dahin a aia ring chuan ka ko leh a, min chhang lo mahse a bike atanga rawn chhukin muangchangin ka lam a rawn pan thung ka hmuh chuan ka lo nui sen sen a




"I huh vek hi, i dam lo ang a sin" a hmel atanga min ngaihtuah hriay zet hian a ti a, ka lo nuih suk thung; chhang let loin ngawi rengin ka pan hnai leh hret a, a kawngah chuan kuahin a awmah chuan ka hmai ka phum vang vang a tunah tak hi chuan ka thla a muangin ka hlim tak zet, a ni pawh chuan engmah sawi loin ka awmdan ang ang chuan min lo kuah let ve mai bawk a




Chutianga rei tak kan awm hnu chuan ka kuahna chu phelhin a inla hrang deuh a chutah min en thei tura in siam remin "Tinge tun ang ruahsur hnuaiah te i lo kal?" A tih chuan amah chu enin "Nangmah hmu turin ka lo kal a" tha deuh chuan ka ti ve bawk a



"Mahse i huh vek hi?" A tih leh chuan "Tunah chuan pawi ka ti lo" ka ti leh a, ngaihna awm lo tih hmel takin mit tih zim sun pah chuan min en vang vang a chutah thawk a la hak a, min chhan tum a a ang zuau chu phone call a lo kal avangin min chhang leh ta lo chuan a kekawr ipte a a phone dah chu la chhuakin call chu a chhang a




"Ka lo kal ang" tih leh phone chu a dah a, 'ka lo kal ang' a timaw khawnge a kal ang? Kei min kalsanin maw ka biang tawn tawn a, ka kut lian leh hrawl zet pahniha min rawn dawmin amah ka en theih tur chuan min kuai dak a "Ruah a sur nasa si a, tunah chuan lo va haw phawt la chuan inti lum bawk rawh aw" min nuih sen sen paha a tih chuan "Khawnge i kal dawn" tap deuh pur hian ka lo ti a




"Ka chhuah lawk ka ngai a, a hmanhmawh thlak lutuk a" aw ki dam thluam chuan a ti leh a "Thusawi awih la, lo va haw rawh aw" a tih chuan lu ka lo thing nar nar a "Thuawih la, ka lo haw veleh hmu tur che in ka lo kal ang nge ka thlah phawt ang che aw" a ti leh zel a "Aih thlah ka duh lo" ka ti leh ang lawi a




"Stella hun ka nei tam tawh lo a, thuawih la lo va haw phawt rawh ka haw veleh hmu tur che in ka lo kal ngei ngei ang" tiin ka chala fawh a rual a, inher a kal mai a tum chu a kawr hnungah ka lo pawh sak a "Kal suh" ka ti leh tiau a, lo hawi leh in "A hmanhmawh thlak lutuk a ka kal ngei ngei a ngai alawm" a ti leh a, ka pawhna chu phelhin a bike lam chu min pan san ta nghal a




A bike awmna a thlen hma chuan "Thazuali bulah i kal dawn a mi?" Rilru na leh thinrimna avang chuan ka vin lek lek a, lo hawiin "Damdawi inah a awm a, ka kal ngei ngei a ngai a lo va haw la chuan ka rawn haw veleh ka hmu ang che ka tih tawh kha" a ti leh a "Kal suh ka tih che kha, kal suh khawngaihin min kalsan suh" ka ti a "A pawimawh lutuk Stella ka kal ngei ngei a ngai, ka haw veleh ka hmu ang che ka tih kha" nin tawh hmel zet a thaw lak hawk paha a tih chuan ka ngaihdan a ni tawh lo khawp mai




"Kei min kalsanin Thazuali i pan dawn maw?" Ka tih chuan a kal leh zet tawh chu dingin ka lamah a rawn kal a, ka dar tawn tawn a min vuanin "Ngaithla teh, engmah a thleng dawn lo damdawi inah a awm a, ka kal ve ngei ngei a ngai a lo va haw phawt la chuan ka rawn haw veleh ka rawn hmu ngei ngei ang tih ka tiam a che ka sawi tawh kha thuawih lo a heta i awm reng chuan i dam lo mai ang, ka thusawi awih la lo va haw phawt rawh" ti leh duahin ka chalah a rawn fawp leh a




Ka lam pawh rawn hawi let tawh loin a bike awmna lam chu a pan ding ta nghal a, a bika chuangin kal mai a tum chu "Will ka duh che, ka duh lutuk che!" Ring zetin ka aw rawl tawp chuan ka au a, a bike engine a tinung vek tawh chu ti thi lehin ka lam a rawn hawi a "Ka duh che chuan khawia mah min kalsan suh" ka ti leh a mahse chhanna ka dawng lo



Hawi let leh vatin a bike chu a ti nungin a kal leh mai tur chu "Thazuali i pan dawn a nih chuan zanin atangin ka hmu leh tawh ngai lo ang che" ka ti leh a mahse a kal ta tho, ka chhungril na lutuk leh ka thin, ka awm na ngut ngut chu dawmin leiah ka thu thla hnawk a chhuak lutukin ka tap a, ruah te chuan ka natna min tawmpui ve ni awm takin a hma aia nasa chuan a rawn sur belh leh a




[Ads mawlh kha click threihnghilh lo i la, zanin chu sunday special angin ka rawn hlui hluai che u a chuvang chuan like leh comment kha min han tih sak veleh hram bawk u la]

[Ngaia]

CHAPTER-15




Engtin nge mihring hi ti em em a a lo nunrawn theih? Amah kha ka ring ve asin, mahse zanin hian amah ka rinna zawng zawng chu min tih chhiat sak vek a ni; rei tak ka tah hnuah in lam panin ka haw ve ta nge nge a, ruah pawh a han tawh bawk mah se chuti chung ka kal chak thei lo ka ke pen te chu a sak vek ni mai hian ka hria




In ka thlen chuan ka nu leh pa te an mu tawh tih hriat takin a reh thuap a, dim tê a kawngka ka kalh that leh thlap hnuah inchungah ka chho ve ta chiah a; room ka luh rualin ka lungchhiat a zual leh a, hetiang em em hi chuan ka nunah tawrh ka la nei ngai lo asin maw le, ka natna kan hriatchhuah tirh leh mi endawng, hmuhsit leh phatsan ka nih lai ai mah khan tuna ka thil tawn hi na ka ti fe zawk engvang nge a chhan erawh ka hre lo!




Ka kawr, ruahin a nan fuh vek chu phelhin in tifai turin bathroom lam kan pan phei a; ka chhuah leh hnu thleng pawhin ka hahdam a ka thawk a ven phah hawk pawh ka hre chuang lo. Ka phone khum a ka dah chu a ri ral ral a, phur lo zet a pan pheiin phone chu ka la kang a screen a "Chhelotea" tih lo lang kulh ka hmuh rual chuan rilru nat na aimahin thinrim na in min rawn hual tup tup ni maiin ka hria




Chhang loin ka hmet hlum a, khumah bawk chuan ka thehphei leh nghal a; kawrlum leh leh kekawr lum ka ha tawh chung pawhin vawtin ka taksa chu a la chenchilh tlat, engmah pawh ti khawmuang tawh loin nu turin ka khum lam chu ka pan ta zawk a. Ka mutfel rualin ka bathlar chhuahna kawngkhar chu a rawn kik ri dat dat a, chhan tumna ka nei lo chumi lam chu ngawi rengin ka en reng ringawt thung





Midang hriat hlauh hmel tak siin pawn lama mi chuan kawng hawnsak turin min ti a, chetsawn erawh ka tum bo lo; "Stella i la mu lo tih ka hria a nia, kawngka hi lo hawng rawh" ka kawngkhar rawn sawi dat dat pah chuan a ti leh a




Engah nge ka hawnsak bik ang? Kal suh ka tih lai khan ka bula awm loin a kal ve tho a ni lawm ni? Ka hrilh vek tawh, Thazuali hmu tur a a kal a nih chuan zanin atang la la a ka hmel a hmuh tawh loh tur thu pawh




Min ngai pawimawh loin a kal a chupawh ama duhthlanna ngeiin chuvang chuan keipawhin ka sawi ka zawm ve tihna a ni mai, "I lo hawn hma chu helaiah hian ka awm reng dawn a nia" a ti leh zel a, a duh leh zankhua pawhin awm se pawi ka ti ther te lo e. Ka mutna siam tha sauh sauhin chhak lam hawi chuan ka mu a, pawn lam thawm pawh a reh zui ve mai bawk chu ka awm a nuam huaiin ka hria





Ka chhing siar siar tihah chuan pawn lamah thawm ri sat sat ka hriat leh tak avangin ka meng kawk a, hepa hi a la awm tak tak a maw ni le? Dim thei ang bera ka mutna atanga tho chhuakin ka bathlar chhuahna kawngkhar bul chiah tukverh lam chu ka pan a, parda ka han keu nak chuan kawngka ngheng a thuin Will chu a mit a lo chhing a, beidawn chu a tum loh hmel khawp mai





Ka piah lawk a couch lam chu ka pan a, va chhuah mai tur em maw ni dawn le aw ka tih rilruk laiin thawm chu a ri leh thin a; ngaihsak loh viau tum eng ang mah i la, ka rilru chuan pawn lama awm chu a ngaihven tho bawk si. Ka ding hluai a, kawngka zawnah chuan thut hmun remin kawngka biang ngheng chuan ka thu ve ta zawk a




A thawm a hria nge maw ni, ka thutfel rual chuan "Kawngka hi lo hawng tawh la, ka hmu chak che a nia" a tih chuan a hmuh loh lam atangin ka lo ner nang thung; "I awm tih ka hria a nia, vawikhat tal chu min be ve la" a rawn ti leh a, a la nui ri suk thung chungte chuan ka thinrimna an cho chhuak mai dawn hian ka hria




"Haw tawh rawh, a tlai tawh" tih zawngin ka chhang thung. Hmuh ka chak a, a bul a awm te pawh ka chak alawm mahse ka chapo na hian amah hnaih tir lo turin min ti tlat bawk si! "Inbia i la" a rawn ti leh a, hahthlak tih hmel zetin ka lo thaw hak thung "Inbiakna chhan tur kan nei tawh hleinem" ka ti a




Leh lama mi chuan min rawn chhang leh vat dawn emaw ka tih laiin a reh ta hmak a, ka ngaih erawh a tha lo nghal dawn dawn mai; che chang loin ka thutna ngaiah chuan ka la thu reng a, engmah thawm dang hriat tur a awm tak si lohah chuan ka khum lam pan leh mai tum a ka ding chu "Nichin vang khan ka tihpalh aw" a rawn ti leh sup a





Ding ta em lo chuan ka thu leh ta zawk a mahse chhan erawh ka tum hran lo, ngaihdam min dil ve tur chu a niin ka hria; kal suh ka tih lawm lawm laiin a kal miau a "Stella kawngka hi lo hawng la inbia ang, kan sawi dun dawn nia" a rawn ti leh a "Aih ka duh lo, nichin a ka thusawi kha i hre tawh lo a mi" ka ti ve ta nge nge a




"Ka hria... Ka hria lawm, engvanga Thazuali pan nge ka ni tih te i hre duh lo a mi khatia min hmu duh lo nghal ringawt lo khan" a ti leh zel a, chhan dan tur pawh ka hre lo; ka tawt leh up up tawh a, ka tah a rawn chhuak nghal ringawt bawk. Tinge Zomuanpuia bula ka awm apianga naupangchhia ang maia ka tah a chhuah em em thin mai le?




A hriat hlau tak chuan ka hmui ka hup a, thawm dim thei ang berin ka tap bawk; "Stella vawikhat chiah ka sawi hi ngaithla rawh" a rawn ti leh zel chu kei hian ka hawnsak duh mai ang tih hlau takin ka inhum ve nghal vak bawk a "Will haw tawh rawh a tlai tawh, lo kal tawh suh" ka ti tiau a, lo kal tawh lo se ka ti tak zet bawk




"I hmel ka hmuh hma chu ka haw dawn lo" a ti veleh tlat bawk si, thawk ka la hawk a kawngkhar biang chu nghenin "I hria em? Khuanu ruat kan ni ve lo a ni ang, buaina kan ngah dun emai" ka ti chhuak hlawl a, ka ngaihtuahna tak phei chu ni lo mah se chutiang thil ka ka atanga a chhuak ringawt chu kei ngei pawh hian mak ka ti a ni





"Nichin vang khan i la thinrim reng a ni maw" tiin a nui ri leh suk a "Ni lo, ka uang lo a nia Will" ka tih takah chuan thaw a lak hawk ri chu ka hre thei, a rawn tawng leh mai ka ring a nia mahse a ngawi leh daih tawh; hetianga kan awm reng a nihz dawn chuan khua a var vat dawn tih ka hria chuvang chuan keimah tal ka tawng chhuah a ngai




Thaw la veleh hawkin kawngka lam hawi chuan ka thutna ka siam rem a, kawngka bianga ka hmai dahin "Will haw tawh rawh chuan khawngaih takin min hmu turin lo kal tawh suh" ka ti ta nge nge a, leh lama mi erawhin thawm a chhuah leh tawh lo chutah eng nge maw hi a ri pawp a ka phu dawrh leh nghal "Hmu tawh lo tur che in min ti ziah suh Lalnunhlim" thinrim aw ka lek lek a a tih chuan ka tim nghal ur ur theiin ka hria




Ka thilsawi englai khan nge ti thinrim ber tih pawh ka hre lo, keimah zawk thinrim tur ka nih laia amah zawk a thinrim ta daih chu mak ka ti a; ka hau in kawngkhar chu ka melh tlawk tlawk ringawt, "Ka hmuh hma che chu, ka kalsan dawn lo ka ti tawh a ni lawm ni" a rawn ti leh hrawk a, vawikhat mah thinrim taka a vin ka la hre ngai lo




Chutia a awm thut chuan min ti hlau a, ka tha te chu a khur dar dar hial a ni "Kal suh ka tih lai khan min ngai pawimawh bik em? Ka ngen lawm lawm che a ni lawm ni, min ngai pawimawh loin i bialnu hlui leh nghal chu i pan duh zawk a; i kal hma in 'min kalsan a nih chuan zanin atang ka hmuh leh tawh ngai loang che' ka tih lawm lawm chung pawhin i kal lui tho chuvang chuan hmuh che ka duh tawh lo" ka aw chu a ring hran lo mah se ka aw atang chuan ka na a ni tih a hriat theih thung ang




"Engmah i hre lo Stella, ka kal na chhan kha engmah i hre lo... Ni lo, i hre duh lo zawk" a rawn ti vin leh a "Kal mai rawh Will, hetianga i awm hian min ti na belh mai mai" in hnit hlawp hlawp chuan ka ti leh a, heta a awm reng chuan ka nem vat mai ang kal se ka duh loh rualin kal lo tura ka ngen laia a kal lui lai ka mitthla apiangin kal se ka duhna a tam zawk ta ve ang




"Hrep tak che hian Stella!" A ti leh hluk a "Stella lo hawng rawh, khawngaihin inbia ang" a aia zaidam deuh zawka a rawn tih leh takah chuan ka hawnsak ta hram a, ka hawn rual a ka hma a mipa huh vek a ding ka hmuh chuan insum zo loin amah chu ka kuah thlawp a "Mawla, i mawl lutuk tinge i mawl em em" tiin a awmah ka chum sak a




A nui ri suk a, min rawn kuah let ve nghal a "Ka dam sawng sawngin ka hria" tih zawng a sawi thung, ka kuahna atanga in la hrangin "Min hmu turin lo kal tawh suh, kan rem ve thei tak tak ngai dawn chuang lo" tiin hnung lam ka hawisan leh nghal vat a "Kal rawh" ti leh supin engmah pawh a sawi hma in inchhungah lut nghal in kawngka chu ka kalh nghak rawk rawk a





Chhuatah thu thla hnawkin kawngka biang nghengin insum lutukin ka tap a, a hrilh hai tur zia leh ka awmdan mak a tih tur zia te kha mahse kan rem ve thei ngai dawn lo tih ka hriat hian ka na fe zawk; thinrim tih hriat takin eng nge maw ri chawrh ka hria a, ri dang ka hriat leh zawng chu leh lam bathlar a thawm chu a ni tawh mai





Will Pov




Kar kal ta mai khan Thazuali'n nau a pai thu min hrilh a, a bialpa nen an inthen tawh bawk nen amah hrilh sak turin min ngen a; chutianga min ngen chiam avang chuan tiin a bialpa chu ka hrilh sak a, mahse a bialpa chuan a fa a nih loh thu leh a duh loh thu a lo sawi tlat mai bawk si




Chutianga a pa berin a duh tak si lohah chuan Thazuali rilru hah leh a chhungte hrilh ngam lo chu inthah a tum a, vanneih thlak takin kan chhan hman hlauh a; zanin pawh khan kal tum ka ni lo, Remmawia ten damdawi in a kan an sawi pawhin ka tel ve a tulna ka hriat loh vangin kal ngaiah pawh ka ruat lem lo




Mahse min rawn call in a tawp nan chauh min hmuh leh a duhthu a sawi vangin phur lo taka insiam in damdawi in lam pan turin ka chhuak zui a; ka bike chu ti dingin Remmawia chu ka be leh phawt a chutia kan inbiak mek laiin min au tu an awm avangin ka leh hawi leh a Stella ka hmu chu mak ka ti kher mai




Engtin nge hetah a awm theih? A awm ve lai ka hre hauh lo phone chu ti thi vatin a awmna lam chu ka pan ta nghal a, min duh thu a sawi chuan ka hlim ru ve tak zet; mahse phone call a lo kal leh tak si avangin Thazuali chuan zanin a min hmuh ngei ngei a ngaih thu leh min tihbuai tawh loh tur thu a sawi a, ka kal lo a nih chuan inthah ah min vo bawk si




Ka hmaah Stella a awm a, leh lama min hmu thei lo a nih chuan thaha min vo tu an awm bawk si; dik tak chuan rilru chu a phir ve tak zet, Stella huh hnuang tawh chu ka ngaihtuah em avangin lo va haw mai turin ka hrilh a mahse a duh hauh lo, ka haw veleh a ka hmuh ngei ngei tur thu ka hrilh pawh chuan a la duh chuang lo




Stella chu ngaihtuah zawk fe mah i la, mi pakhat keimah vanga a in tihlum a nih chuan engtikah mah ka inthiam thei ngai dawn chuang bawk si lo; haw turin ka hrilh leh a, in ka thlen veleh a ka hmuh ngei ngei tur thu ka hrilh leh zet hnuah ka bike awmna lam pan chuan ka kalsan a, dik tak chuan ka rilru a nuam bik chuang lo




Helaiah ka hmeichhe duh em em in kal lo turin min hrilh a, kalsan kha ka duh dan a ni bik lo; damdawi ina kal chu ka phur bik loh zia leh ka kal lo a nih chuan tu emaw nunna ka kutah a awm tih hre ngat se la chuan min hriatthiam ve tho ka ring a, ka haw veleh a thu awmzia ka hrilh theih takin ti a kalsan ka ni




Kal lo turin min ngen lawm lawm a, Thazuali hmu tur a ka kal a nih chuan zanin atanga min hmuh tawh loh tur thu a sawi chuan ka rilru a buai leh tak zet tawh; let a a bula awm mai ka rilruk a mahse ka ti thei si lo, nakinah ka hrilhfiah ang a min hrethiam thei mai ang tih rilru pu in ka kalsan lui ta tho




Damdawi in ka thlen chuan khumah chauh hmel zetin a lo mu a, a bulah Remmawia leh Zawma te pawh an lo thu ve bawk; an bula kal ta mai lo chuan kawngka bulah bang nghengin ka ding reng a, a lo harh a min hmuh rual chuan min ko vat a, tun ang hun takah Stella nen kan that dawn veleh a hetia a awm tlat vang hian ei lo zetin ka lo ner nang thung




Chhang loin ka awm ngai chuan ka awm reng a, Remmawia leh Zawma te chuan min hriatthiam hmel zetin pawn lamah min chhuahsan nghal a; chuti chung pawh chuan amah va hnaih tumna ka nei lo "Min hmuh duh chhan chu eng nge?" Nelawm fahran lo a ka tih chuan nui sukin a hmel dawldang zet nen chuan min rawn en a




"Ka hmuh duh nachhan che chu i laka ngaihdam dil ka duh vang a ni" zuai raih hian a ti a, a hmelah chuan hrehawm ti hmel leh inchhir hmel a pu in ka hria "I lakah thil tam tak ka ti sual a" ti lehin hnuai lam bih nghal vatin a mittui chu a hru zeuh a, kei ka lo rum nghut thung





"Will thil tam tak i chunga ka lo tihsual tawh naah khan khawngaihin min ngaidam hram rawh aw" mittui parawl kuang chunga min en paha a tih leh chuan ka lo thaw hak a, a lam chu pan pheiin a khum bula thut na awmah chuan ka thu thla ve nghal zat a




"Nang kha kalsan lo che ni i la chuan hetiang thil hi ka tawn a ngai lo tur a nia; tunah chuan ka tihsual rah ka seng mek a nih hi, i lakah pawh ka inthlahrung lutuk mahse zanin ah ngaihdam ka dil lo che a nih chuan ngaihdam dil tur che in engtikah mah ka be leh ngam awm si lo che a" a ti leh duah a, amah en run chung chuan "Chutiang thil chu engvanga sawi nge i nih?" Ka bul leh nghut a





"I hria em? Min kalsan ni atang khan hlim takin ka nun ka hmang ngai lo, ka inthiam lo a hrehawm ka ti bawk; ka thil sual siamthat nan neih let leh che pawh ka tum a mahse khanu kha i duh tih ka hriat khan hrehawm ka ti a, ka nei thei tawh dawn lo che tih ka hriat vangin nangmah theihnghilh nan ka bialpa kha sex ka hmanpui a" tiin a nui suk a chutah min hnuai lam bih leh nghalin "Mahse a hnu lawkah min kawp tih ka hrechhuak a, chhan awm loin min then leh nghal a" a tih chuan a inhnit hraih a





"I chungah ka tih ang chiahin ka chungah a thleng let ve a nih hi! Ka la na hran lo mahse a hnuah nau ka pai tih ka hre leh a, pai tlang tur nge tur lohah ka rilru a buai em em a amah lah ka hrilh ngam bawk si lo, nangmah ka rawn pun tawp che a mahse a fa a nih loh thu leh min duh loh thu a sawi khan mualpho ai chuan thih a that zawk ringin intih hlum ka tum a, nangmah tho in ka nunna min chhanhim sak leh a" sawi tur pawh hre loin amah chu ka en reng a




"Zanin chiah hi ka tibuai tawh ang che, min hmu tur a i lo kal avangin ka lawm lutuk a nia; Stella nen hlim tak a awm turin duhsakna ka hlan che aw chuan keimah lo ang takin Stella chuan a kalsan ve dawn lo che tih ka hria, a ni ang hmeichhe rilru tha tak leh fel tak khan i chunga ka tih ang hian a ti ve ngai dawn lo tih ka hria" a tih chuan ka khi suk a, a nih ngei pawh ka ring Stella hian min kalsan dawn lo tih ka hria





"Khawngaihin min ngaidam rawh aw" a ti leh chuan ka bu nghat a "Tu emaw vangin i nunna lak tum tawh lo la, chuan ka ngaidam che ni rawh se" ka tih chuan mittui parawl kuang chungin min rawn nuih ver ver a "Kal tawh rawh, a lo nghak reng tawh ang che" a tih leh takah chuan "Ka lawm e" ti supin damdawi in chu ka chhuahsan ta nghal a




In ka thlen chuan inthlak loin Stella room lam chu ka pan ta nghal a, a bathlar kawngka ka kik chung pawhin chhanna ka dawng lo; a la muhil lo tih hre reng mah i la, a la lungawi lo hle a nih ka ring ringawt a mahse kalsawn ka tum chuang lo



A kawngkhar ngheng a rei tak ka awm hnuah kawngka bula thawm ri sat sat ka hriat takah chuan a awm ve tih ka hre nghal a, kawngkhar hawnga biak ka duh thu ka sawi pawh chuan a che chang hauh lo; min hmuh a duh tawh loh thu leh haw tur a min tih chuan ka thin a rim nghal tung a




Rei fe ka nghah leh hnuah kawngkhar a rawn hawng ve thei ta hram a, min rawn kuah a a tap nghal hlawp hlawp a; a thinrim hle a ni ngei ang ka lo nuih suk a, amah ka hmuh hi chuan ka hahdam sawng sawng thin a chhan chu amahah hian hahdamna ka hmu tlat thin a ni




Min kuahna atanga in la hrang leh vutin vawikhat mah amah hmu tawh lo tur a min tih zet hnuah inher in kal turin min ti leh a, rawn hawi let tawh hauh loin inchhungah a lut nghal a; kawngkhar a kalh leh nghal vek bawk, a thilsawi chuan min thawng a ka hrilh a hai hle bawk




Engmah tihna chang hre loin kawngkhar chu ka melh tlawk tlawk a, kan tha tawh dawn emaw ka tia mahse a tawpna chu amah hmuh tawh lo tura min tihna bawk a ni; a ngaihna ka hre lo a, ka thin a rim hle bawk chu thutna sir maia an pangpar khawi pot chu chhir nghek in ka room lam chu thinrim zetin ka pan a





[Ads kha click theihnghilh lo hram i la, chuan comment leh like ah hian tan min han khawhpui leh sauh sauh u la ka va lawm dawn si em]

[Ngaia]

CHAPTER-16



Will nen kan in tawh chang pawhin ka peh hel hram hram thin a, hmuh loh hram hi ka duh dan ber a ni; min hnaih a tum pawhin amah hnaih loh hram hram ka tum thin, ka sual pawh min ti mai thei mahse nat nawn leh ka duh tawh loh vang zawk mai chauh a ni




Ka sawi tawh kha kei chu ka hma ka sial a, keimah vanga mi an nat ka duh loh rualin Will laka rilru nat pawh ka duh chuang lo; ka nunah ka thil tihsual lian ber chu tu emaw ka duh satliah ni lo a ka hmangaih hi a ni! Mahse a bula ka awm lohin ka khua a har a, mal leh ruak ngawih ngawih angin ka in hria a, a bula ka awm lahin ka na leh tho bawk si




"Vawiin class i kal dawn em?" Ka nu in a rawn tih chuan ka thingpui no tlang zut kual pahin "Ka hre lo" tih ngawtin ka chhang a, "Tunlai hi class i kal chhe riau mai, kan hriat loh hian na i lo nei reng te hi a ni lo maw" a ti leh a "Nei nang, class te chu ka kal tha reng alawm tunhnai chho hian ka thulh ve zeuh a ni mai" ka tih chuan awih loh hmel fe in min en a




"Class i kal dawn lo a nih ro ro chuan vawiin chu inchhung bungraw lei tur en pahin i doctor va hmu i la a tha ang; tunkar i in checkup hun a ni tho bawk a, hetia class i chawlh dawn chuan" a ti leh sep a


"Tha lawm kan kal dawn nia"



Tuk thuan eikhamah ka nu nen bazarin kan chhuak a, eitur neuh neuh leh bungraw thenkhat kan mamawh ang a a hriat ho a duh ang thal a kan en a kan lei hnu chuan doctor hmu turin kan kal a, zep loh chuan ka huphurh tak zet a chhan chu ka doctor min enkawl tu ber hi Will û a nih vang pakhat pawh a ni ta ve ang




Damdawi in kan thlen chuan in entir tur an tha hnem ve phian a, darkar chanve dawn kan nghah hnuah kan lut ve thei ta hram chu a lawmawm tak zet; ka nu leh U Lala-i chu an inbe nghal luam a, eng eng emaw te sawiin an nui leh rih a kei ve thung chu an sira thu in an thusawi ka lo ngaithla ve hi a ni ringawt




An duh ang chen an inbe ta maw tihah ka nu chuan pawn a min lo nghah tur thu sawiin min chhuahsan a, theih se zawng min awm pui turin ka duh daih zawk. Dik tak chuan han biak dan tur leh han sawi tur ka hre hlawl lo, Will nen kan inkar a chhia chu sawi loh amah hmuh leh an inah pawh ka kal ngai meuh tawh lo kha a ni sia




"Tunlai te in sawiselna eng e maw te i nei em?" Ti a min zawh chuan "Neih em em pawh ka hre lo mahse tun hnai tak hian ka thawhah hi a rawn nasa zual a" ka tih chuan "Ngaihtuahna te hi hman lutuk tur a ni lo a bakah i taksa kha hahin siam lo la, i theih ang angin i taksa leh i rilru kha tih hahdam tum la" a ti leh duah a, chhang loin ka bu nghat thung




"Thawhah tih loh eng e maw in sawiselna dang i la nei em?" Min zawt leh a, chumi tih loh han in sawiselna tur dang ka hriat loh vangin ka neih loh thu in ka sawi a, chhuak mai tura ka ding nghal uai chu ULala-i chuan min ko ding leh a; a lam ka hawi chuan thu leh tur a min tih avangin ka thu leh rih a




"Stella tunlai hi Will nen in inkar a tha lo tiraw, zep lo la in chungchang ka chik zia i hriat kha" min zawt pawh a ni chiahin ka hre lo, ka lo nuih ringawt a "Will nen in awmdan ka chik che u hian in inbe khat tih pawh ka hria, Will hian i chungah thil tha lo tih a nei em ni?" A ti leh a "Awm lo e, chutiang engmah a awm lo" ka tih chuan thaw huai hmel a pu a




"A nih chuan engvanga hetianga awm hi nge in nih sawi la, Zomuana û ka nih vang ngawt hian ka tan dawn tihna a ni lo a; harsatna i nei a nih chuan min hrilh hreh suh, û ang a min en ve a nih chuan Zomuana ka hrilh bik ngai lo a nia" ka rin theih nan takin a ti leh a, ka ringhlel lo ULala-i hi û angin ka en ve tho bakah thu zep thei tak a ni tih pawh ka hria




Hrilh mai tur em maw ni le aw ti a ka ngaihtuah laiin "Will pawh zantin a chhuak thin kha nangmah vangin a chhuak tawh ngai lo sin; sawi hun a ni em tih hre lo mah i la tun lo hi sawina hun ka nei dawn ngai si lo, i rawn lan hma kha chuan Will lakah hian a rukin kan rilru a hah thei thin hle a, sual vur lo mah se zan chhuah a chin mai bakah rawn haw loh chanh pawh a nei thin chuvang chuan ka nu leh pa te rilru a hah ru thin lutuk" chutiang thu te chu engvang a min hrilh duah nge maw a nih ka hrethiam hauh lo




A thilsawi lai chu chawl datin a kut pahnih chuan ka kut chu rawn vuanin a hum leh vang vang rih a "Stella, he thu ka hrilh tur che hi Will pawhin a hre lo a hriattir pawh kan duh lo, Will hi ka nau dik tak ni loin fa lak a lak ni mahse ka nu leh pa leh kei te hian kan en hrang ngai lo a; fapa leh unaupa ang takin kan en bawk, kan naupang ber kha thla kim loin a piangin darkar1 bak a dam lo a, a thi zui mai bawk nen ka nu leh pa rilru a na em em a ka nu phei chu nau nei hlim bawk nen a chauh phah hrep bawk. Mahse kan lehlamah nau nei te an awm ve a, chunu chuan a fapa chu a duh loh thu nurse te bulah a hrilh a chu chu remchangah la in keinin kan la ta a ni" tiin hnuai lam bih in a thaw halh a, a mittui a hru pah zeuh a





Will chu chutiang mi chu maw a lo nih! U Lala-i thilsawi vang chuan ka kawchhung khawilai emaw hi a na thip ka ti dawn nge, a lo na ve vawng vawng a; "Stella khawngaihin Will hi kalsan suh, i duh tih ka hria tunah in inkar chhe rih mah se Will hian a duh ve che tih ka hria, ka nau hi khawngaihin kalsan lul suh" hmui pet fan nghal tungin a tap chhuak hawk ang tih hlau takin a inhnit zui hraih a, sawi ve tur pawh hre loin a bulah chuan thuin tha insum takin ka inhum nmruh ve nghek thung




"ULala, Will hi ka duh mai pawh ni loin ka hmangaih a ni mahse ka chungah engpawh thleng thut thei a ni; chutih hunah chuan Will rilru na hmel tur hmuh hi ka duh lo, keimah vanga rilru na tak a a awm tur te, hrehawm ti taka a awm tur hmel te hi hmuh ka duh lo chuvang chuan min duh ve hma a ka kalsan hi a tha zawk" ka tih chuan mak tih hmel takin min en a "Mahse Stella..." Khawngaihna mit meng nen a min en chuan hmuh hrehawm ka ti tak zet




"A bula awm a, kumkhua a amah nen a hun hman dun te chu ka chak lutuk mahse hlimna tluan tling pe thei lo leh i la, a lakah hian ka inthiam thei dawn ngai lo asin; chuvang chuan keimah avanga hlim lo a a awm ai chuan kei min theihnghilhin min hriat hma nunah khan kir leh zawk se ka duh" ka tih chuan engmah sawi loin min en reng a, hrehawm ka ti ve tak zet U Lala-i ngeiin khawngaih min dil chung pawha a mi ngenna ka tih hlawhtlin sak thei lo tur chu!





"Aaa.... Nia, i thu vek alawm keini lo sawi theih pawh a ni tawh hleinem tiraw" mittui kar atanga inthiam loh hmel taka min en chungin minnuih ver ver a, nuih let ve har ka ti tawh tak zet; tuna kan awmna room chhung hi a uapin thawk a har ka ti tawh lutuk, kan boruak chu a tang tha at at khawp mai "I hun hlu tak ka pawh pen sak teuh che sia min ngaidam dawn nia, tluang takin in haw dawn nia aw; E.... Chuan ka thilsawi kha chu ngaihtuah lutuk duh suh, i taksa tan a tha dawn lo a nia" a ti leh a





He mi te unau hian inthlahrung takin min siam reng mai dawn chu a nih hi! Chhang loin lu ka buk khum nghat a, harsa lutuk a nuih let ve sukin room chu ka chhuah san a; ka chhuak chiah chu ka tan zia leh ka in hum ruh zia ka hre ve chauh, kal mai loin kawngkhar bulah chuan ka ding reng a




"Bawihi thil tha lo a awm em ni?" Ka nu ka lam pana lo kal paha ngaih that loh hmel zet a min zawh chuan lu thin khum nar nar pahin "Awm lo e, ka thawh thut vang a ni ang ka lu a hai ve deuh a" a awih thei tur ang ber a sawiin ka nuih a, a awih ve ni ngei tur a ni min lo nuih let ve vur vur a




"A nih chuan haw i la, tlai rawngbawl kan tlai lutuk chuan zaninah i pa damlo kan a a chhuah a ngai dawn si" a tih takah chuan kan inzui chhuak ta nghal a, ka awm dan chu a lai kual tak zet tawh in kan thlen hnu thleng pawhin ULala-i thil min hrilh ringawt kha ka rilru ah a awm a, tuna ka thuthlukna hi a dik chiah em tih ka hre tawh lo




Ka rilru a buai ru hle a, ka natna chhuan lam hian hma ka sial mah mah em aw tih te chenin ka ngaihtuah a; ka nu min biakna pawh ka chhang mumal tawh meuh lo, inchungah chho vatin room ka thlen rual chuan khumah zawi lutuk in ka mu thla hnawk a awmdan tur pawh ka hre tawh lo




Zanriah eikham hnu thleng pawhin ka ngaihtuahna a la luah a, ka thaw i pik lutuk leh nung lutuk chu ka awm thawlna leh hahdam taka ka hun hman theihna ka bathlar lam bawk chu ka pan leh a; thut naa thu rem sauhin ka thu awn duai a mitchhingin vanlam hawi chuan ka awm ta vang vang a, thlifim thaw heuh heuh leh boruak vawt leh dai nuam tak te chuan min tidam sawng sawngin ka hria




"Min ngaihtuah a ni maw?" Min ti tu an awm avangin chiang lutukin ka harh zawk a, ka hawi phei chuan Will ka piah lawk ah a lo ding a; min nuih suk bawk, "He...hetah eng nge i rawn tih dawn?" Ka ti bak nak a "Min ngaihtuah tih ka hria a, chuavangin ka lo kal" a kiai suk a, ka lo ner nang nang thung




Ngaihtuah chu ka ngaihtuah reng alawm, tunah chauh pawh ni loin engtik lai pawhin amah ngaihtuah loin ka awm ngai lo "Tunah pawh min ngaihtuah mek" a tih leh chuan phawk zetin ka lo en ha a, hepa pui reuh hian ka ngaihtuahna te hi a hmu tlang vek thei zawk a maw ni le? "A awihawm loh lutuk, ka ngaihtuah thlawt lo che" ka tih chuan nuihza insum tih hriat tak hian sexy lutuk a hmui hnuai lam a pet a




"Ka lo thu ve thei angem?" Polite tak a min zawh chuan ka lo rem ti ve mai a, rawn thu thla nghal vatin van lam chu a thlir nghal dauh dauh a "Van khi i hmu em?" A tih chuan, ka mit a del a maw a ti maw ni reuh le "Hmu e" tha tak chuan ka ti a, a lo nui suk thung




"A thla khi i hmu em?" A ti leh a, hahthlak tih hmel zetin ka lo en thung "Ka hmu thei, ka mit a del lo a nia" ka lo ti bak nghal hlar a, rawn nui hak hakin "Shhh..." Tih pahin ka hmuiah a kut a rawn dah a "Ka nu tê thinawrhte, lo nghak rawn ka hrilh dawn che alawm" ngaihno bei zet a min rawn melhin a kiai suk a, keiin ka lo melh ram ram thung




"Thil pakhat leh chiah, a bula arsi khi i hmu leh ang tiraw?" A tih leh chuan chhang loin ka lo bu nghat thung "Van hi amah chauha a awm chuan mawina a nei hran lo, a thim a thim tak a ni mahse amah timawi turin a bulah thla a awm a chung mite pahnih mawi na tih belh chhah turin an kiang velah arsi a awm bawk a" a tih chuan eng a sawi tumna nge ka hrethiam lo





Amah chu ka en reng a, engmah sawi leh tawh loin van chu hmuhnawm tih hmel takin a thlir reng a "Chu thu chu engvanga sawi nge i nih? Ka hrethiam ve lo a nia" bo tak a ka tih chuan thawk a la hak a, van lam la thlir ta reng chung chuan "Van dum vek khi keimah ka nia" tih pahin a kawk a, keipawh chuan ka lo en ve zel a "Thla khi chu nangmah i ni" tiin a nui ri hak a





Ka la hrethiam ta chuang lo, a sawi tum hi ka man hlawl lo bawk; zawhna mit menga ka en reng tih a hriat chuan "Ka nun a i lo lan hma kha chuan ka nun hi khing van dum vek ang khi an ni mahse i lo lan chinah zawi zawiin a lo êng a, arsi te khi chu i nui hmel te, i chimawmna te, i duhawmna te an ni chu chuan ka nun hi tam takin khing thla leh arsi te ang khian min tih ên sak a ni" a tih leh chuan ka la hrethiam ta chuang lo





"Zanin hi eng nge i hriat a, rawn inlak romantic i tum tihna a mi" nuih hak hak pah a ka tih chuan min en run a, a hmelah chuan thinrim leh lungawi lo hmel pu lo mah se a hmel chuan a thutak zia leh eng e maw min hrilh tum ni awm tak mit mengin min en nimai hian ka hria; a thuk a, a ril bawk a, chutiang mit meng ang reng reng chu Willa hmelah hian ka la hmu ngai lo





Ka nui lai chu a tawp riai riai a, amah chu ka en ve ta reng a; zawi muang a min rawn hnaih hretin a rawn kun hniam a, ka beng tawn tawn a a kut rawn hupin a chal leh ka chal chu a sik tir a, ka lo ip chawih thung la awm sawn chuang hauh loin "Stella min peh hel tawh suh, min peh hel reng hian hrehawm ka ti a nia" thuk ruih a a tih chuan ka taksa zawng zawng hi min fan chhuak ni mai hian ka hria





A awmdan thut chuan min tih hrilhhai bakah min ti lai tak zet a, awmdan mai tur pawh min hre lo; ka chil ka lem khalh a "Wi...Will...." Ka tham tiak a, a chala ka chal la sik tir reng chung chuan "Immm..." Tih zawngin min chhang a, mit min chhin san daih thung "Aaa.... Ihhh.... Eng lo" ka aw te chu a khur vek tawh, a mi uap na lutuk leh a pangtilum ka taksa rawn ur pha ham ham te chuan ka thluak hi a bual a zo vek ni berin ka hria




Engmah pawh sawi tawh loin min awmpui ang ang chuan ka awm ve ta ngawt a, chutianga ka awm vawikhatna a ni bawk a min ti lai hu a ka hriat rualin nuam ka ti tho bawi si; ka beisei loh lutuk a nih vang pawh a ni mai thei, mahse Willa bula ka awm hian ka thla a muan zia leh ka hahdam zia ka hrechhuak thar awn awn thung





Chutiang ang a rei fe kan awm hnuah min thlah ve chauh a, mahse ka awmsawn hlau ni awm ang hrimin ka darah chuan min kuah leh nghal zat thung; a hnunga nghenna chu rawn nghen ve in tawng loin van lam chu a thlir leh nghal a "Will...?" Ka ti leh hap a





"Shhh... Stella rei lo te, i bulah hian hahdam tak a awm ka duh tihian rei lo te awm rih lawk ang" min en zawkin a kiai leh suk a, zanin hian eng nge tih a tum hepa hian kalsan ka tum tih hi a hre lawk zawk a maw ni le? Hetianga zûn nei tak tura a rawn chet tak mai!




Ka hnial duh ta em bik lo, ngawi rengin van lam chu ka thlir ve ta reng a; a rei leh tak hnu chuan ka ning leh deuh si chu ka che sek a, a ni erawh nichin a a awmdan ang ngai khan a la awm reng, min kuahna atanga inla hrang deuh chuan amah chu ka en a mit a chhing daih a, a muhil zawk a maw ni?





Tlem a ka thut dan siam tha in amah ka hmuh chian theih tur ang chuan ka thu tha a mahse ka inrin hma chuan a lama min pawt hnai dawrhin ka lam hawi deuh chuan a rawn sei sir a, la meng ta chuang loin min kuah nghet sauh thung





Amah chu ka en reng a, a hmeltha takzet; mipa a nihna hi khawi hmunah pawh a ti lang nimai hian ka hre thin. Chimawmin nghal thin mahse tawngkamin mipa a nihna a ti lang ve ngai lo a, a che zia pa leh cool ruih te chuan an ti lang zawk thinin ka hria; hetiang ang em em a tha bik tur hian engtin nge khuanu khian a siam thiam zawk le?!




Mizo a ni ta lo em maw ni chu le aw tih tur khawpin a ni a awm ni, tribal hnar a ni tih hriat ve mah se midang lo ang takin a hnar ngul chu a nalh em em a, a zum sat reuh a chutah lah a hmelthatna tibelhchhah turin a khabe ruh te chuan an ti lang sexy tak zet bawk




Amah ti lang pa leh zual turin a banah te chuan thisen zam a inzam duah a, chung zawng zawng ti langmawi turin a ban veilamah sana a bun bawk; mipa sek leh in phiar fat tih a sawi tur a ni hauh lo nachungin a pian a nalh tak zet, a sek dan chu a tawk chiah an sawi thin ang mai a sawisel bo an tih chu a va ni si em




A harh hlau tak siin ka kut chu ka phar chhuak deuh a, ka kut zungchal chuan a hnar zum ve tak chu ka hriatchian tum ni awm takin muangchangin a chal atang chuan ka thai thla a; kalsan a hnaih loh ka tum apiangin a zûn ngah tak hmang tangkai hian a hnen lamah min hnuk hnai leh si chu a nih ber hi maw!




Khawvel mi ve viau mah se a sual hran lo, hetianga a hmeltha chung pawh hian a chapo phah lo bawk; engtin nge ka sawi ang a nun hi maw a tluangin a rilru a that bakah mi hriatthiamna a ngah em em bawk, a bula awm nuam ka tih thinna em em chu engtik lai pawh hian min tih hlim dan tur leh min tih nuih dan tur a hre tlat zel te, ka thinchhiat ang hu hian min dawngsawng let thiam a





A dawhthei a, mi ngilnei tak a ni pawhin ka hria; a awih emaw awih lo emaw, a rilrem zawng a ni emaw ni lo emaw a nu leh pa thusawi a nih tawh phawt chuan a chhang let ngai lo; amah hringtu a nu leh pa tak tak te bulah khan a hminga lawmthu sawi hial a nia ka nap tak ni




An duh loh an fapa, fahrah tur a an kalsan hi; nu leh pa fel tak a neih bakah amah hmangaiha ngaihtuah em em tu Û fel tak a nei bawk a, hetiang chhungkua a nei hi hre ve lo mah se ka lawmpui zawk a; amah duh lo tu a nu leh pa ten an pek theih loh hlimna tam tak kha tuna a nu leh pa, a û te hian an pe a




An hmangaih zia an lan tir bawk, hlim reng se ka duh pui a, hlim hi a phu ka ti tak zet bawk; fahrah a ni tih leh fa lak a ni tih hi hrechhuak lo se ka ti a, tuna a hlim ang hian hlim takin awm reng rawh se. Ka ngaih ve danah chuan tuna a nu leh pa te, a û te hi Pathianin a tana a ruatsak liau liau a niin ka hria




Chutia ngaihtuah paha a hnar ka thai thak lai chuan a rawn meng thut a, ka phu chiam leh nghal; tawng loin mit khap lek loin min en reng a, ka mit takah min melh reng chuan min melh zam thei mai dawnin ka hria. Ka chil ka lem ri khalh a "Ihhh... I muhil a maw ka tia" amah tlawn pah si chuan ka thenkhum sak a




Min la chhang ta chuang lo, min melh ngai chuan min la melh reng thung; ka zam lutuk leh lai lutuk vang chuan ka thlanfim te chu an rawn chhuak talh talh a, hawisawn tum mah i la lu si lo chauha min melh reng avangin hawisawn ngaihna a awm hauh lo




"Wi... Will.." Ka ti tham leh tiak a chutah vawikhat mah ka la hmuh ngai loh sexy leh zûn nei tih hriat lutuk chuan a nui suk a, keipawh ka then ve thaw ringawt tawh. Min kuahna atanga inla hrang hretin a kut pakhat a ka khabe rawn dawmin amah ka hmuh theih tur chuan min kuai dak a




Ka meng ngam tawh lo, ka zam vel vek tawh mahse engmah ti leh chuang si lo chuan a nui huk ri chu ka hre ta zawk, ka zak lutuk chu insehruh teuhin ka meng leh nghal vat a mahse le, ka men rual chuan ka hmuiah a rawn fawp ta mai! Chhin leh nachang pawh ka hrelo, min thawng ve bawk em a tin ni




A nui suk a, a hma a a tih dan ang bawkin a kut lian leh hrawl zet pakhat chuan ka mit chu min hup beh sakin min fawp nghal tawn tawn a, tunah zet zawng ka insum tawh bik em lo e; ka thiam dan ang ang chuan ka lo chhang let ve a, chu chuan a ti phur zual sauh emaw tih turin a hma aia uar zawk chuan min rawn fawp lehin ka hmui hnuai lam chu a fawp dawk dawk bawk a




Tun tum zet zawng a nuam bik kher mai, Will nen vawihnih kan infawhna chiah ni bawk mahse a zeiin a mi fawhna dam thlup te chuan zûn a ngah tak zet; ni lo, a engkim hian zûn an ngah vel vek ni mai hian ka hria. Hetiang em em a, mipa perfect lutuk hi engtin nge khawvelah an lo pian theih zawk ni!




[Ads click theihnghilh lo hram i la, like leh comments lamah tan min han lak pui leh theuh bawk u la ka va lawm si dawn em]

[Ngaia]

CHAPTER-17



Min fawhna a thlah hnuah awm hrang ta mai loin a chal chuan ka chal chu a la sik tir reng a, a thaw lum ham ham in ka hmai a rawn thawk khum chuan ka mur chuai chuai thei; "Ti vat tawh tur hi lawm, luhlul leh lutuk mai" ti supin a kiai suk bawk a, chhan ve ngaihna reng ka hre lo




"Will...?" Ka ti thawp sat a
"Immm..." Tuh zawngin min chhang thung




"Tinge min duh?" Ka ti thawr a, a chhan chu engtianga nasa pawhin hel tum mah i la ka theih chin piah lam thil hi a thleng ve ziah; keima thu ngeiin kalsan ka tum a, keima thu vekin a amah ka pan leh si chu a nih hi!




"A chhan chu ka tana thla êng mawi tak i nih vangin" thuk ruih hian a ti a, ka lo ip chawih thung. "Engtin nge ka nih theih? Kei chuan rilru hahna bak ka thlen si lo che a" ka ti leh a, a nui ri hak a "Chu engtik laiin ka rilru i tih hah a?!" Ngeiawm lek lek a a tih chuan, min chelh behna atang rang lutukin ka in la hrang nghal vut a




Thip zet a ka melh ram ram laiin a ni chuan nuihzat insum tih hriat taka a hmui peh pah chuan min en a "Eng ngee...?" Ka bak nghal hlar a, "Zaidam hi chu i zaidam ve chiang a ni tiraw" a ti leh hram pek a, ka ngei tawk a tling leh nghal em em tho





"I nihna chu engpawh nise, kei chuan i helai hi ka duh" ka awm zawn rawn kawh paha thu tak hmel fe a a tih chuan ka hau in ka lo en thung "Ka duh lohna tur che chhan tha tawk min hrilh thei a nih loh chuan ka kalsan che hi ring suh" a ti nawn leh sap a, sawi ve tur reng ka hre lo





Ka natna ka chhuanlam chuan a ni hian a awih dawn lo nasa, chutih rualin duh ka nei tih thu hrilh i la chupawh chu a awih chuang lo ang a chhan chu amah tih loh mipa biak ka nei ngai lo tih hi a hre ve chiang em a tin ni; "Ka englai pawh hi duh tlak a ni lo ti ta i la" kut kuangkuaha mit ko san khum ralh paha a ka tih chuan mit tih zim sun pahin thutak fe in min en reng a




Zam duh bik chuang miah loin a mitah tak ka en let ve ran a chutah a rawn nui chhuak hawk a, phawk fe in ka lo en thung "Eng nge nuihna tur sawi ka nei a mi?" Ka ti leh nghal kha kha a, nui chung zel a a lu thin pahn "I lawmawm" tih zawng a sawi a, ka awih lo lutuk chu za lo tih hriat lutuk leh tih el nan ka lo nuih let ve hak a




"Nangmah chawp tawp hi ka duh ti ta i la?" Ka tih ang chiah a in kuangkuah a, mit ko min san khum ve ralh pah a a tih chuan ka lo ner nghal nang nang a "Dawt i sawi" ka ti leh hram a, min ben chawrh duh hmel pu a tur fe a min en hnuah "Dawt sawi hmel ka pu a mi?" A ti khur khur a, ka zam leh nghal vekin ka hria




Hetianga thu tak deuha min en hian ka zam chhe nghal vek zel, "Haw rawh, ka mu dawn ka mut a chhuak" tih leh thawh ka rual a, inchhung pan mai tum a ka pen tur chiah chu ka kawng hma lama a kut pahnihin a suih kawkalh a ka darah a khabe nghat dat pah chuan nghet lutukin min kuah nghal zat bawk; ka awmdan lai lutuk leh in ring lo lutuk chu ka tang tung a




"Inthlah dul rawh, engtin nge ka ti lo ang" min thlakhlelh hmel fe a a tih takah chuan zawi muangin ka inthlah dul ve ta deuh a, ngawi rengin chutiang chuan kan awm dun reng a; a tu a mah chu tawng kan tum lo ni berin ka hria, mit ka chhing a ka kawng hma lama min kuahna a kut chu ka kutin ka vawn sak ve bawk




Tunah tak hi chuan van a thlawk ang mai niin ka in hria, thli thaw heuh heuh leh boruak thiang tak te leh kan awmdan thleng hian engkik chu a dik a, a nih dan tur ang thlapa awm ang vel mai chu a ni; nidang zawng aiin zanin a awmdan bik chu mak ka ti leh zual, nui ve bawk mah se a hmelah a hma ka hmuh thin ang hlim hmel a pu lo thung





A vawiin hun hmang a dik chiah lo a ni ang ti dawn i la, tunah tak hi chuan min thlakhlelh hmel em em mai bawk si; Aaa... Ka rilru hi! Ka ngaihtuah thlen loh tur pui pui ka lo ngaihtuah leh chiam zel thin a buaithlak mahse ka ngaihtuah tho bawk si! Thli thawt dan chu a rawn na tan tial tial a, van lam ka en chuan ruah sur hmel a pu arsi nichin maia lang pawh kha a lang leh tawh lo reng reng





Ka chesawn thei bawk si lo a, ka hnunga mi lah hian min kuah nghet nasa mai bawk si a; kawrlum ka ha lo a, tshirt lian leh boxer chiah ha ka nih vangin vawt ka ti chu ka khur ti tih der tawh leh nghal, ka khur chu tih tawp tum sateh mah i la vawt ka tih miau vangin chuti maiin ka ti tawp thei ngawt bik si lo chu a hre ve tawh ni ngei tur a ni a hma ai chuan min rawn kuah nghet leh nghal a





Eng a thawh vak pawh ka hre lo, vawh ka tih ngaiin vawt ka la ti tho tho; mahse a rei tak hnu chuan a pangtilum chuan min rawn ur a, tlem chuan a zualpui chu a tireh ve deuhin ka hria. 1sec lek pawh che lo a awm thei lo hian tuna kan awm dan hi nuam eng ang rih viau mah se ka ning leh tan nghal der tawh!





Ka hnungte hi a kham vekin nia ka hriat tawh ni, hahthlak hian! Romantic tum ve lai laiin rei lo te che lo a awm hlek pawh ka theih loh vangin a ti ho zawk vek dawn a nih hmel e; "Ih... Will?" Inthlahrung deuh tak a ka tih chuan "Aw engnge?" A ti ve teh mial a "Ih... Inthlahrung deuhin tuna kan awm dan hi ka ning tawh e" ka then nghal sawng bawk a, min hmu lo mahse ka inthlahrung ve tho alawm, a rawn nui ta hak hak a





Min thlah ve nghal mai bawk, a lam a inher nghal vutin ka inthlahrung lutuk chu "Ihh... Ka ning ka tih awmzia chu khatiang lam kha a ni lo a, 1sec lek pawh che loa ka awm hian ka buai vek nimai in ka hria, ni lo ka chiri dawnin ka hria a chuvang chu lawm" ka nuih tlawn pah bawk a, a ni lah a thinrim ang chu tih nak alaiin a nui suk a "Ka zawngte hmaisen" ka lu chul paha a tih chuan ka duh lo nasa





"Tu...tunah khan engtin maw min tih? Zawnghmaisen min ti maw?" Thinrim aimah chuan engtin nge ka nau in min koh dan ang chiah a min koh theih, Sabengtunga kha chuan mi hriatah "Zawnghmaisen" tiin min ko ngai bawk si lo a, ka mak ti lutuk chu amah enin ka ang phiau a ka mit ka khap fek fek bawk




"Aw ko e, che thei loin i awm rei thei lo a zawng te pawh che loin an awm rei thei bik lo a" a ti leh zel chu rum lutuk ka melh nghal hrawk a, ramsa dang in tehkhin tur awm laia a chhe ber zawng nen a min tehkhin daih chu a ti awm ang lo hi ka ti lutuk ringawt; tuman vawk aiin zawng an an duh bik teuh lo mai





A ngalah chuan ka chhir sak hrep a, na tih hmel taka kunin a tuai zui nghal a; "Vawiin ah mi min sual naah min vua asin maw le" na tih hmel lutuk a a tih chuan ka hlauthawng leh ang reuh sia thuhniam ve vatin "Khaw...khawlaiah hian, tinge an sual che? Tu ten nge sual che a?" Ka lo ti nghal zung zung a, tih theih nei lo mah i la a ke a tuaina chu pawi tih hmel lutukin ka lo thlek sak chhen ringawt





"Ka hmai pawh hi en la" a tih rual deuh thaw chuan ka hawi chho nghal vut a mahsee.... Ka inrin hmain ka biangah a rawn fawp a, min thawng lutuk chu chet mai na chang ka hre lo; a tho tharh a, nui ruh ruh chungin "Muttui aw, i mangah khan min hmuh phet kha tum tawh lo la" a tih chuan ka ding ve nghal vat a, awihawm loh lutuk mai vawikhat mah ka mangah amah hmuh ka tum ngai lo hrim hrim




Hmuh ka tum lo a mahse amah zawk a duh thu in ka mangah a lo kal thin a nih kha! "Hmuh ka tum ngai lo bawk che" ka ti kha kha a "Min hmuh nasat theih em kha" in tih theih hmel fe a a rawn tih leh takah chuan hepa hian keimah hrim hrim hi min hrechiang tawh ni berin ka hria, ka khawchhung leh ngaihtuahna zawng zawng hi a hmu tlang vek thei tihna em maw ni dawn le?





Harh chhuak thutin ka hnute zawn leh ka kap zawn chu ka kut chuan kan hup bet ringawt a "I hmu tlang vek thei tih sawi miah suh" ka tih chuan hriatthiam loh hmel fe in min en heu a "I eng maw ka hmuh tlang vek theih?" A rawn ti he haw a "Hre lo der suh, ni lo se i hre vek thei lo" ka tih chuan a la hriatthiam hmel chiah lo, tawng leh tum a a ang zuau hman chu a chip leh nghal hmak a ngaihtuah nei ni awm takin a awm ta zawk





Chutah hriatchhuah nei ni awm fahran hian a nui ta hak hak a ka sam to thar tir rawn phir seng seng chu rawn tuai vutin "Lawmawm" a ti sup a, lo melh ram ram pah chuan "Chimawm" ka lo ti let ve nghal vat thung, eng nge min hmu tlang vek ang mai a ka mumanga ka hmu tih te a hriat vek theih teh reng ni!





Ka hnung lamah a rawn kal a, ka lo la inveng ve ran thung; ka dar tawn tawna chelhin inchhung lamah min nawr kal dat dat a "Mu tawh rawh, a nih loh chuan i inrin hma in ka hmu tlang leh vek mai ang che" nui ruh ruh chunga a tih leh chuan ka zak tawh kher mai, inchhunga min nawr luh hnuah "Muttui le" tiin a kiai suk a, rawn hawi let tawh loin a room lamah a phei tlang nghal a




A liam chiah maw tihah rang lutukin kawngkhar kalh sawk sawk a, khum lamah ka phei nghal rawk rawk bawk; ka let thla nghal tawp a, ka zak lutuk leh nuam ti lutuk chu au chiam chiam mai hi ka duh, ka rizai chu pawt chho in ka hmai hup nan ka hmanga ka ke te chu ka leng vak vak bawk





Tiang ang reng reng a, hlimna hi ka la neih ngai pawh ka hre lo; mahse zanin ni leh lo nichin a kan awmdan kha chu a nuam ve thlawt alawm, ka ngaihtuah let pawhin ka la mur seng seng theiin ka hria mahse kan in ngaizawng ta em tih erawh ka hre hauh lo. Ughhh... A van ho tak, nichin maia kan awmdan kha kan in ngaizawng em le?





Kalsan ka tum tawh bik lo, amahin ka pum a a duh thu a sawi tawh miau alawm a nih te chuan tinge lo in lak hran ve vak ka tum ang? Mahse kan inngaizawng nge inngaizawng lo tihah chuan ka buai, a buai zawkah ka tang leh tho si. Cheng chawng reuh hian! Chutia ka ngaihtuah mek laiin rei tak hnuah ka message tone a rawn ri tlang, ka en chuan "Chhelotea" kha a ni, ka hawng nghal vat a naktuk college kal rualpuiah min lo sawm chu niin





Ka kal rualpui chiang teh ang chu aw, ka hmaih phal bik teuh nang le; mut mai ka tum chu ka muhil thei lo leh nghal, ka in let chhen a ka in lehna lamah ka hnung te hi a kham vek tawh hialin a nia ka hriat ni. Ka thuchhuak leh hluai a, pawna chhuak turin tunah dar1 a pel tawh bawk si; ka chhuak ngam chiah lo a chhan chu ka hlau a, hmanah thingtlang kan awm laiin zanreiah ka muhil thei lo inlet sek ka tho kha ka khum tukverh bula tu emaw dum deuh lo ding run hi ka hmu tawh a





Thlahrang emaw ramhuai emaw chu a ni ka ti miah lo mahse kha thil ka hmuh kha misual rukru a nih ka ring; ka pa damdawi ina a awm lai a ni a, ka nuin a riahpui daih bawk si, ka û lah nise a lehkha zirlai niin hostela min awmsan a ni leh zel bawk a, ka nau nen chauh kan nia kum17 lai ni ve tawh mah i la khang lai khan ka hlau tho





Min lo that ta se, engtin nge ka nau kha a awm ang tih te chenin tun hnu hian ka ngaihtuah leh thin; thawm dim thei ang berin ka nau chu ka kaitho a, a la tho mai thei lo leh nghal. Ka sawi ka sawi takah chuan nur zetin a rawn meng a, a thinrim zawk em maw ni! Khum hnuaiah pawh a kil lamah ka biruk pui nghal sawk sawk a, kan biru fel awrh tihah chupa chu tukverh atangin a rawn lut nghal a





Min hmu hman lo kha ka lawm tawp a ni mai, eng eng emaw chu hai ve bawk mah se a duh ang a hmu lo a ni chek ang chu rei pawh awm loin a chhuak nghal a; mut chhuah chu khawilam ka nau pawh a harh chiang tawh kher mai, a lo kal leh mawlh ang tih kan hlauh vangin ka nu te lo hma chu khumhnuai chhuat vawt lutukah ka nau nen kan tawm tlaivar thak kha a nia





Kha thil ka ngaihtuah let apiang hian hlauhna hian min la man thin, tu emaw hian min lo bih kur ang tih te hi nia ka hlauh ni! Chuta tang chuan dar11 hnu lamah hi chuan pawn chhuah pawh ka ngam tawh lo, mahni ngat phei chuan min veng thei tu an awm dawn si lo a mahse vawikhat chu dar11 hnu lamah ka chhuak ve tawh ngei alawm chupawh Will nen kan sneak out zan kha





Chumi ka ngaihtuah chhuah chuan ka khi suk a, ka ngam lo ka ti tak naa duh naah hi chuan ngam loh pawh a lo awm thei lo a nih ber mai hi; Will khan min sawm lo ni se la chu ka chhuah ka ring chuang lo, ka sawi tum tak zawk chu amah ka rinzia ka hriatchhuah phah thung alawm





Thil chi hrang hrang in tuha lo deuh deuh ka ngaihtuah chhuah kim deuh thaw thang takah chuan ka chhing diar diar a, ka kawngkhar kik ri leh vang bawk chuan ka harh leh nghal; ka muhil ve chiah a maw ka tia, ka tum nghal bur bawk. Hun lo thei lutuk "Class i kal dawn em? A ni em em tawh lo tho vat rawh" nidanga ka la hriat ngai loh ang takin ka nu chu a vin tha kher mai




Tukin zing a tho fu lo a nih chuan nizan lam a mumangah ka pa in a hau a ni chiang ang, a vin emai "I tho tawh emm..?" A ti leh khur khur a, mutkham lo lutuk a min siam avang chuan ka chhang duh lo, a thinrim tawh hle a ni ngei ang ka kawngkhar chu a rawn sawi nawk nawk a "Lalnunhlim, kawhmawh bawl lo khan class i kal dawn chuan tho vat rawh, zingtin kaihthawh ziah che ngai mai a nihin a ni em em lo tho vat rawh i tlai leh vek tawh a nia" a ti hlak hlak a





Thinrim ai mahin ka nuih a za, hetiang em em hian a thinchhe thei tih ka hre lo; tukin chu nizan lam ruahsur bawk nen tekin a deng a ni ngei ang, tekhmuam dik tak a ni chiang alawm "Aw le, pi ber ka tho" zaidam leh nem fahrana ka tih chuan "Min tlawn tum hlek suh, rawn chhuk vat ang che 10mins chiah chaw ei nan nen hun i nei, i inpeih fel hman loh chuan nilengin ka hrem ang che" a ti nghal leh zat a





Kan naupan lai ang chiahin a strict thar leh dawn em maw ni chu le? Engvangin maw? Zing thawh ka hai tak ziah vang hi a ni ngei ang, hnial ngam hek lo a mi hrem dan lah kan hriat than a ni bawk nen thil nuam zawk zawk tak chu a ni lo ve chiang alawm; ka insil te chu ka in leih puat puat a ni ber, ka fai em pawh ka hre lo




Ka chhuak a, ka taksa ah cream ka hnawih thuak thuak a ka kawr hmuh hmasak sak chu ka inbel nghal a inhnuai lamah hmanhmawh zetin ka chhuk a, chaw ei a lo peih fel der tawh; sana ka en chuan 2mins chiah ka nei tawh, chaw ei loh sawi i la ka nu hian a phal dawn lo nasa tih ka hriat chian em avangin ka ngei lutuk chu ka melhrum nghal ram ram a min hmu ve lem hlei chuang lo





Tlem te tak tak ka bar a, ka hmanhmawh luatah ka helh awl awl leh nghal; ka khan chiah chu sana ka en leh nghal vat a, hun a zo chiah chiah bawk, tiang ang em em khan ka che rang ang tih ngaihna pawh ka hre lo mahse ka kawr hak te reng reng chu duh tawka sawisak a maw tih mai turin a chuar em em a, nawh na hun awm tawh miau hek lo le





Class kal tur a chhuah mai ka tum chu "Hun hman nuam aw" nem fahranin a rawn ti leh a, chhan chu sawi loh ka hawilet tawh lo chiang teh e; class kal loin ka bunk mai dawn em maw ni chu le aw ka ti deuh a, a chhan chu hetiang kawr chuar lutuk nen a class han kal chu ka hreh ve bawk em a tin ni; ka in en thin, a chuar dan lah chu a na mai bawk si lo, vawiin zet zawk ka zak chem chem reng dawn a nih hmel hle mai





Rilru khap buai tak a ka kalna kawng pawh en mang hlei lo a ka kal laiin horn an rawn pe tuarh a, ka phu dawrh leh nghal; kawngsir lam ka chuh nghal rawk rawk a, min hau chiang teh ang chu ka tih rilru mawlh mawlh laiin Zomuanpuia lek chu lo niin "Engnge i ngaihtuah leh tak veng veng a" a ti a "Eng ka ngaihtuah pawh ka hre lo" ka lo ti bung nghut thung





"Kan kal rual dawn tih te i hre tawh lo a mi" a tih chuan ka hrechhuak leh chiah, ka nu vang vek min tur hmanhmawh lutuk a ka mood a tichhe zo hman vek dawn alawm le; vawiin te chu ka phur phur nen nizan ka mut theih loh chhan pawh a ni reng a, chutia ka nu vanga ka theihnghilh tep chu ka lungawi lo let tep a ni





Lei ka chhuah tut a "Ka theihnghilh daih" za lo lutuka then sawk pah a ka tih chuan "A nih ka ring, inkawt atang ka au tawh che i hre lo hi a mak ka ti" ngaihna awm lo tih hmel taka ner deuh sak paha a tih chuan "Eng ngee..?" Ka lo ti leh nghal tawng a, a nui suk a "Lo chuang rawh" a ti a, ka hnial lo chiang teh asin aw






Engkhaw sawi set set loin bike ah chuan ka chuang nghal a, a tlanchak bawk a kar loah college kan thleng nghal; kan tih thin dan angin a bike garage a a hun fel chhungin ka lo nghal a, mi lo kal te reng reng chuan min en duh riau hian ka hre pek leh nghal





A rawn let leh lam chuan min rawn nuih ve ngei a mahse a nui rei lo chiang teh e, mit tizim sanin min en a ka bul a lo thlen rual chuan ka chal a rawn dek nghal vut; "I dam lo si lo" ngaihtuah neih hmel zet a a lu thin deuh pah chuan a ti niah niah a "Tinge?" Ka lo ti he haw, a awmdan rawn mak thut chuan min ti hrilhhai dawn dawn alawm





"I tho a em?" A ti leh zel a, ka dawhtheihna in a tlin leh ta ngang lo "Eng nge tho a hmel hmuhin mi min hmuh" ka ti bak hlar a, a kiai suk duh lek chauh leh nghal; "Kal ang" min kuai herin min nawr dat dat a, eng a hria chu nimaw engmah a sawi leh duh tawp si lo; min ti helhhawlh zo ting tang a, hre chak zek zekin min siam thung





Ka ding thut a, rang lutuk a a lama inher vutin "Sawi rawh, eng nge maw zep i nei chiang lutuk i sawi lo a nih chuan ka be tawh miah lo ang che" tiin ka vo nghal khur khur a, a nui tut tut a chutah rawn kun hniamin "Ka hrilh che a nih chuan min be zel dawn tihna mi?" A tih chuan ka lo bu nghauh nghauh a





"Ka hrilh che a nih pawhin a tuar tu a tan ka peih lo a nia" a ti leh nghal zat a, ka beng a ti vir laklawh tawh bakah sawi mai lo a a peh hel reng chu min ti chiri mai dawnin ka hria "Aw...aw... aw sawi vat mai teh" ka vin leh a, amah lah chu a nuih a zat tawh hmel nasa mai si




Chutah a aia hnaia ka beng bula a hmui rawn dahin "Pheikhawk inkhing lo i bun" a rawn ti ta mai, rang lutuk a nem sawn dawrhin hnuai lam ka bih nghal vut a, a sawi ang chiahin pheikhawk inkhing lo ka bun chiang e; mi min en duh chhan pawh hei ngei hi a ni tih ka hre zawm nghal zat bawk, awi ka zak lutuk tunah hian thlawh bo theih chu nise zah lutuk vangin ka thlawk bo hial duh ang. Engtin nge pheikhawk in khing lo ka bun tih ka hriat loh theih zawk?!





Ka thiam loh pawh a ni lo, ka nu tekhmuam thuti vang vek, ka mumang chhiat vangin keiin ka tawrh phah a; ka chhuah hma te khan mi te hrilh ve duh a nia, engmah a sawi bawk si lo ka hoodie pawh a chuar tih tawh nak alaiin pheikhawk leh zel maw, a va buaithlak tak!





[Ads click theihnghilh lo hram i la, like leh comments lamah pawh tan min han lak pui leh sauh sauh bawk u la ka va lawm dawn si em]

[Ngaia]

CHAPTER-18




"Engtin nge ka tih a nga, hetiang te chuan nilengin class pawh ka kal ngam dawn a mi" ka ti nang nang a, ka hnuai lam chu ka bih thin a ding lam zawkah 'Nike air force' ka bun a leh lamah 'adidas superstar' ka bun vang bawk si, a rawng lah a dum leh var a la ni zui bawk a en reng reng pawhin a in ang lo tih a hriat mah mah em a ni





"Style thar i tichhuak tihna a nimai" nui huah huah chung a ka bula miin a rawn tih chuan ka lo melh rum nghal ram ram a, a ni em em lo alawm; ka bun lai pawh khan a in ang hmuhin a sin ka hmuh ni mahse engtin nge hetiang daiha ka bun chhuah theih pawh ka hre lo





"Miin min en duh em hii...!" Nur nang a ka tih leh chuan "I tho a emaw ka ti" nui ruh ruh chungin a ti leh a, ka nu lah chu ka huatna a zual tulh tulh thung; kha leh chen inhrilhna hun a awm a, engmah a sawi duh loh chu thuhran nuih pawh a nui eih lo kei lah hmanhmawh vangin ka in en si se hman tawh bik si lo





"Ka nu in tek a hmuam thut a, chuvang vek" lungawi lo lutuk a ka tih leh chuan "Tekhmuam turin thu i awih lo a niang chu" a lo ti sam leh et a, thinrim tawh nak alaia min chhan dan ho lam theih lutuk vang chuan ka ngei tawk a tling leh em em ringawt tawh "Chimawm" ti hlukin hmanhmawh lutukin class lam panin ka phel nghal hmawk hmawk a





"Min lo nghah rawh" ti ve mahse nghah ka tum ther te lo, kan inkar a tha ve tan chiah a; vawiin phei chu hman nawm kan tum tehreng nen ka nu tekhmuam thuti vang vekin a ho zo leh vek dawn a nih hi! Will lah a chimawm a chhuah veleh khanglang bawk si




Class lak lai te chuan ka thinrim reh thei lo leh ka zak lutuk chu keima tawkin ka in hrosa nghek nghek ringawt a, eng kawng ro mah su hek lo chu ka bulah mi lahin min nuih reng bawk si; nizan kan awmdan tur ka suangtuahna nen chuan in perhsan tawh tak hi a ni ringawt





"Nui suh" ti ve bawk mah i la min en apiangin a nuih a za tulh tulh tih ka hria, vawiin phei chu class banah restaurant velah chawlh pui mai mai ka tum asin maw le mahse hetiang teh hrep nen chuan ka chhuak dawn teuh lo




Nilengin class ah ka thu reng a, zung tur tak ngial pawhin ka chhuak ngam lo; ka ni hman tawh a zawnga ni rei ber a la ni hial ang chu maw le! Break ah pawh ka chhuah duh miau loh avangin Will an chips leh frooti tih ang reng vel chu min lo lei a, a hmel phu loin a lei naupang chhia zek leh nghal mahse tui ka ti reng min lei hrim hrim a nih vang te pawh a ni ang




Tlaiah khawidangah mah kal kawi loin kan haw tlang a, in ka luh rual rualin na zetin ka nu chu ka melh nghal rawm rawm chu a hrelo der hmak leh nghal; min biakna pawh chhang duh loin room ah inthlak turin ka chho tlang a, ka intihfai zawh hnuah pawh ka chhuk duh lo




Amah vangin college ah zak takin ka awm phah a, ka haw ve hranpa hrim hrim; min tur chhen lo se la chu pangngai takin ka kal ve thei ni mai tur. Min rawn ko a, ka chhan loh avangin ka room rawn sawi dat dat paha min koh leh takah chuan tho tuah tuahin peih lo zetin inhnuai lam ka pan thla ve ta nge nge a





Thingpui min pek pahin engmah thleng lo leh hre lo ang hmakin a titi siam siam a, a titi lai te chu ka ei tawh lo laklawh a tekhmuam thut vanga ka tawh zo zai kha theihnghilh harsa ka la ti fan; "I va tum ber bur ve, college ah thil thleng a awm a mi?" Min zawt ve ta nge nge, ka hma zawn a chair chu pawt chhuakin a thu thla ve nghal zat a





Chik zet a min en in college ah thil thleng a awm leh awm loh min zawt nawn leh a, a thleng ni a a hriat te chuan nge maw min zawh sek chu le "Awm e" ka lo ti bung nghut a "Eng nge thleng han sawi teh" a ti leh zel, thawk lak hak pahin "Nangmah vangin college ah zak takin ka awm tih te mai hi" ka tih chuan hriatthiam loh hmel tak leh zawhna mit mengin min en a





"I hun min pek rei lo lutuk vangin ka kawr hak a chuar vek a, ka tshirt chu ka hoodie in a khuh vangin an hmu mah mah zawk; ka kekawr hak pawh tial lo se chuan ka hmingchhia ang. Ka hoodie hak a chuar chu thuhran ka pheikhawk pawh in khing loin ka bun a mi zawng zawngin min en a min nuih phah" ka ti nghal hlak hlak





"Thawh tlai tawh loh tur tihna a nih kha, nitin kaihthawh ziah i ngai a nidangah i awm ngai lo a na i nei a nih hial te ka ring zawk" a ti leh chu ner nang nang pahin "Na ka nei ni ang a i hriat te chuan khati vaka hmanhmawh a min siam kher kha a ngai a mi" ka ti leh zel a, ka lungawi thei thlawt lo a ni





"Na i nei lo, i muhil har a thawh i hai a nih kha" chang fak a a tih chuan,"I fanu hi miten an nuihzat i phal reng tihna a nih dawn chu" ka ti leh hram; "Lalnunhlim, khatiang kha nu te chhan dan tur a ni a mi" a ti khui khui a "Nizanah eng rauin nge man che ka hre lo, tek i rawn hmuam thut a; college ah zak takin ka awm phah" ti leh hlak hlakin ka thingpui chu ka tlak nghal pap a, engmah pawh sawi tawh loin inchungah ka chho nghal





Ka chhoh lai te chuan a nui hak hak ri chu ka hre pha vuai a, min run tak zet; zanah pawh chaw eitur a min rawn koh pawhin ka chhuak duh tlat lo a, ka titau laklawh ve tlat, ka pa mangang tihngaihna hre lo chuan "Mambawih rawn chhuk mai mai teh, tihtauh na hun pawh a ni tawh lo i ril a tam mai ang a sin" a rawn ti ve tak na a, chhuk ka tum bau lo





Dar8 a rik meuh chuan ka ril a tam tawh bawk a, ka pum a ri ruih ruih tawh mai mahse inhnuaia chhuk ka la tum lo fan; ka duh loh thil a thlen tawh chuan tih luih theih ka ni lo tih an hriat chian em avangin ka nu leh pa te pawhin min rawn koh an tum tawh bik lo, ka lungawi hun hun a ka chhuk thlak ve mai an ring tawh a ni ngei ang





Ka riltam bawk si, inhnuai ka la chhuk duh tlat loh avangin mut mai ka tum a; khum a ka mu fel awrh tihah ka bathlar panna kawngkhar chu a rawn ri dat dat a "Stella i mu tawh em?" Pawn a mi chuan za rawn ti thum dut dut ka hriat rual chuan ka titau tih theihnghilhin ka lo khi nghal sang mai





Rang lutuk a khum atanga in perh tho nghal vatin kawngkhar chu ka va hawng a, Will hmel ka hmuh hian ka dam nghal sawng sawngin ka hria; bathlar lamah inzui chhuakin kan thu ta reng a, zan danga sawi tur kan ngah theih teh lul nen nizan vang kha a ni ngei ang a tu a mah mah chuan sawi tur kan hre hlawl lo nia maw le!





Kan thu ngawi dun reng a, kan in melh fuh apiangin kan in nuih leh tawp zel; tawng tawmin kan ang zuau zuau hman thin a mahse sawi tur a bo vek ka ti mai, kan awm dan chu a lai tak zet. Inngaizawng te pawh kan ang hman hial alawm maw le! Chutia ngawi renga kan thu rauh rauh lai chuan ka in rin hma hauhin ka pum chu a rawn ri ta mai




A hriat loh ka rin teh lul nen a hawi ngual nghal vut vut a "Chu chu eng thawm nge?" A ngaihna hriat loh hmel zet a a tih chuan ka nui tawi tak ringawt tawh; engmah pawh ka sawi ngam tawh lo, a ruk thei ang berin ka pum chu ka dawm nghal, 'Khawngaihin ri tawh suh, khawngaihin' ka rilru in ka pum chu ri tawh lo turin ka ngen mawlh mawlh





Kan tui inchhawp chu rang lutuk a ban vutin ka in nghal khawlh khawlh a, a chhawk ve deuh chuan ka hria; a ri tawh lo chu ka lawm kher mai, ka pum dawmna kut chu ka phelh riai riai a, tun lawk kha chuan ka hlauthawng ve hman viau na a tui ka in takah chuan a rik leh tawh mai loh avangin ka lawm ru kher mai





Rei tak kan ngawih leh vang vang hnuah Will chu min hmachhawn zawnga thutna siam remin "Stella" a ti sup a "Immm..." Ka lo tih chuan amah ka en theih nan ka khabe ah a kut dahin min kuai dak a, sawi chawp ngai loin a tih tur ka hre chiang kher mai min fawh a tum chiang alawm; ka zam rual rualin nuam ka ti tho bawk si





Chutah ka kawngah a kut pakhat a min kuah in min phawt hnaih hrawk, min fawp tuma a rawn kun lai chuan men pawh ka meng ngam leh tawh lo; mit ka lo chhing vat a, a hmuiin ka hmui a rawn si tawh tih chuan hun lo lutukin ka pum chu a rawn ri leh ta rawk rawk mai, nui sukin a in la hrang nghal a





Ka zak lutuk chu awmngaihna pawh ka hre lo, a in lak hran rualin rang lutuk a ka pum dawn vatin "Tinge i rik leh ri tawh suhka tih che kha" ka rilru in ka pum chu ka hau nghal mawlh mawlh, tawng lo a rei tak kan awm hnuah kan che romantic ve dawn chauh a ka pumin a rawn ti bam vek alawm zahthlak hun lo thei thin e, ka tihtauh vanga chaw ka ei lo chu ka la inchhir ber tum a ni hial ang






"I ril a tam a mi?" A ti sup a, ka nui tak tak ringawt a chhan tumna pawh ka nei lo; "Chaw i la ei lo a mi?" A rawn ti leh a "Aaa.... Aw, ka titau a" ka then khum vak ringawt chu a nuih a za kher a ni ang, a nui hak hak a; "Tihtauh vanga chaw ei loh mai mai chu thil tha a ni ngai lo" ti lehin "Lo nghak lawk, ka lo let leh ang" tiin a room lamah min pheisan nul nul a





A kalna lam chu ngawi rengin ka thlir mawl tawp, a liam ta maw tihah na lutuk a ka pum chu bengin "I mawl lutuk, lo insum ve tur che a nia min tizak lutuk ri tawh suh ka tih mawlh mawlh che kha maw le; min tihbuai i tum ve hrim hrimah ka ngai, nghal lutuk mai" tiin ka pum chu beng chawrh chawrh in ka hau mawlh mawlh a, ka beng na leh si chu ka pum dawm meuhin ka kun nghal





Riltam lai nen inrem lo lutuk! Ka ril tam tawh bawk si, min lo nghak rawh a tih vangin ka nghak lo thei si lo chu ka vei tawn sek a; kan tui inchhawp ve lah ka inzo vek tawh leh nghal, ka zun te lah chu a chhuak em em mai leh nghal a, ka phing te chu a puar mar tung tawh





A la rawn let mai a ka rin loh vangin inchhungah zung turin ka lut a, bathroom ka thlen rualin ka kekawr chu ka phelh nghal sawk sawk; ka zung chiah chu ka nuam sawng sawngin ka hria, ka ip rei bawk a ka zung rei kher a sin. Ka chhuah leh chuan Will chu a lo awm tawh a min hmuh ruala ka lam lo pan nghal vutin "Min mutsan daih a maw ka tia lawm" a ti a, lo nui ver verin "Ka zung a" ka lo ti ve mai bawk






"Lo kal teh" tih leh ka bana vawn a rual a thutna lamah min kai phei a "Thu rawh" a tih chuan thuawih takin ka thu ve mai bawk "Kha hei hi ei rawh" a tih chuan phawk zetin ka en chho ha a, a lo kiai suk duh lek chauh. A thil min rawn ken ka en chuan a tui hmel tak zet, chaw, mai kan, alu kan ro rap leh bawrhsaiabe hel leh tomato chu min rawn ken a





"Hei hi ka ei turin i lo keng maw?" Ka ti leh hap a, lo buk nghauh nghauh pahin "Ei teuh rawh" a ti a mahse bawrhsaiabe hel ber kher min rawn ken sak chu a hmawr a keng kangin ka ner nghal sawk "Hei hi a hlanga eiturin min ti mi" ka tih chuan "Ei rawh, thlai hel ei tam hi hriselna atan a tha" a lo ti sam et a, ka hmuh ringawt pawhin ka tim thei a tui loh hmel ropui mai si





"Thlai dang a hel a eitur a tam tam nen tinge bawrhsaiabe ber kher?" Ner nang nang a ka tih leh chuan lo nui sukin "Ei la i hre mai ang" a ti leh a, tui lo zetin ka dah thla leh riai riai ringawt, eitur a min tih nawn leh hnuah chaw chu ka ei a rin aiin an chaw leh chawhmeh te chu a tui phian





Mai phei chu, purun var, purun sen, sawhthing, leh bahkhawr te nen a kan mawlh a nih vangin a tui tih piah lam chu thuhran ni se a rim pawh a tui tak zet; tomato chu ka duh ber a nih vangin ka ei zo rang kher mai mahse a bawrhsaiabe min rawn ken erawh ka la khawih che ta chuang lo chu a hmu ve ngei ni tur a ni "Hei hi ei rawh a tui lutuk ka tih chu" a rawn ti leh a




Mi ei duh lo nanana ei tur a han in tih tlat, a awm hian a ang lo lutuk "Ka duh ngawt hleinem" ka ti bui bui a "Ei rawh ka tih chu" a ti bul nghut a, amah zawk chu a lungawi ni te in ka hria; a van ho mai mai tak bawrhsaiabe ka ei duh loh vang mai a han thinrim chu, naupan chhiat thlak hi ka ti lutuk ringawt





Ka ei duh ta lo fo chu a lawm tawh lo kher a ni ang, leh lam hawi hmakin a thu reuh a; ka biak pawhin min chhang duh tawh reng reng lo, a tawpa tawpah ka tih ngaihna hre tawh loin hnar hup meuhin bawrhsaiabe chu ka ei a mahsee... Ka rin ang a ni ta hauh lo, a tui lutuk ringawt. A hel hian vawikhat mah ka ka la ei ngai loh chu thuhran an chhum pawhin ka ei duh lo, kan tak ngial pawn... Ni lo, bai a an thlak pawhin




A tawp khaikhawm nan chuan engti kawng zawng pawha an siam in ka ei duh ngai lo a chhan chu a fan dei duai lutuk a, a tui pur bawk si hi ka ten a chuvang a ei duh lo ka ni; mahse a hel a ei chuan khatiang kha a awm lo a tui ka ti ve takzet, ka ei min hmuh meuh chuan ka lam hawiin a rawn thu leh a "A tui em" tiin min zawt sap a, a tui thu a ka chhan chuan a lawm hmel kher leh nghal





Ka nui hak a, hriatthiam loh hmel fe a min enin "Tinge i nuih" a ti ha a, ka hriat ngai miah loh chu tlangval ve uai tawh si bawrhsaiabe vanga a thinrim chu a ni; ho ka ti bawk si, naupangchhia ka ti bawk si chu ka nuih a za tlat a a hmel nen pawh hian a in awm lo lulai ve bawk em a tin ni. Bawrhsaiabe vanga tlangval thinrim ka hriat vawikhatna a ni hial ang!





Ka ei zawh meuh chuan ka puar tha tawh kher mai, tikha chuan in lak romantic tum leh pawh nise ka zuam tawh zan; a romantic lai ber kan thlen dawn hunah min tibuai tu tur an awm tawh miau lo a.... Ka thil eina dah tum a a kal tur chu lo ko dingin "Tui lo thun nghal teh, inhnuaiah ka la chhuk duh lo" ka tih chuan a bu ve nghat a, ka bottle pek chu a la ve mai bawk





Rei vak loah lo lang nghal vatin ka hawi phei rual chuan min nuih suk a, keipawhin ka lo nuih let ve var var; bottle min pek rual chuan hawngin tui chu ka in nghal khawlh khawlh, ka nuam sawng sawngin ka hria... Kan thut dan ngaia kan thut leh hnuah van lam a thlir dauh dauh a, keiin amah ngawt chu mit tla lo lekin ka lo en thung





"Ka zin mai thei" a rawn tih chuan ka suangtuahna atanga harh chhuak zawkin "Mawww....?!!" Ka ti chiam a, min lo melh vut a a kiai sukin a hawina lam chu a hawi leh nghal a "Engtikahhh...?!!" Ka lo ti leh nghek, tunah kan tha ve tan chiaha a zin tur thu min hrilh leh nghal chu ka ruak nghal vekin ka hria





"A la hla ang, ka la chiang bik lo a ka pa pension a hnai tawh a chumi buaipui leh a bungraw lakpui tur velin a thawhna lamah ka zin a ngai dawn a" a ti leh hap a, a ruk tak chuan ka lo hnual rawih thei; kal suh in tihna chi ni hawt lo chuan pa te pension tur buaipuia kal tur a nia keiin a kal suh ka tih theih ngawt pawh a ni lo





"I awm rei angem?" Ti a ka zawh leh chuan "Ka hre lo le, kan hun hman dan a zir a nimai" a ti a, a ni pawhin an awm dan tur a hre lawk bik lo a ni ngei ang "Tu nen nge in kal dawn?" Ka ti leh a "A chiang lo, ka nu nen kan kal ang chhungkua a kal chu chakawm viau mah se Lala-i damdawi in lamah a buai sia a ni chu a lo kal ve theih loh hmel" a sawi dan atang chuan a kal chak tawh hmel kher mai






"I van kal chak hmel" ka ti leh kher a, min ngaih loh hmel tak a an zin tur leh a chak zia ka hriat chuan an zin na tur khua te chu a khaw pumin ka thik dawn dawn mai! "Chak ve tho e, Lala-in hna a thawh hnu chauh ah hetah kan awm a; hmanhmawh chuk chukin tuna kan awmna ram hi kan lei a, kan naupan lai a ta tawh ka pa thawhna khuaa awm char char kan nia, hmuhna remchang a nih dawn te chuan hmuh leh te pawh a chakawm ve alawm" a ti duah





Ka thik tih leh ngawt theih pawh a ni lo, a than lenna hmun a nia ngaih te pawh a ngai ve ang chu; keipawhin Aizawla kan insawn hmaa kan awmna khua kha ka la ngai ve reng, ka pian ka seilenna hmun a nia ka natna vanga chhuahsan kan nih vangin ka la ngai ve veng veng tho. A hmun kha a nuam in a khawchhung a fai a, thingkung lah a tam si, phul hring dup te awmna te a tam bawk a chuvang chuan ka ngai ve tho






"Chuti a nih chuan kan va inhmu lo rei awm ve" ka ti leh hap a, ka lo huphurh lawk ve tak zet; tuna kan awmdan hi inngaizawng kan ni tawh tih ka hre lo, engmah sawi zui na a awm hran lo mah se inngaizawng te awm thin dan ang chuan kan awm ve ngei chuan ka hria





"Kan ni tawh em?" Ti a zawh chi ni ngawt lo chuan, sawi ta i la eng angin nge min ngaih ang; kha leh chen ka peh hel kual a, tunah a thlahlel berah leh inngaihzawn loh hlau leh ber berah ka tang a, ka rilru han le loh zia hi chu aw! Ka ngaihtuahna vang chuan ka lu ka thing leh nar nar thin a a chang leh ka beng dat dat bawk





Chutia ka awm reng vang nge ka lu ka beng leh tur chiah chu ka banah a rawn vuan thut a, ka phu chiam mai leh nghal; "A mak mawlh mawlh lutuk, i thluak kha ben chhuah i tum a mi" nui ruh ruh chung a a tih chuan chhang loin ngawi rengin ka en reng a "Min ngai angem?" Thuk ruih a a rawn tih chuan, ka hawisawn rang chiang teh e




Hepa lah hi min ti lai hnehsawh thei leh lutuk mai, ka laih leh zah vangin ka biang pawh a rawn sa leh hat hat tawh, a kut pahnih lian leh hrawl zet a ka biang tawn tawna rawn khuapin ka en turin min kuai phei a "Min lo ngai hle rawh, ka ngaihawm dawn si" ngeiawm lek lek a kiai suk paha a a tih chuan "Ka ngai awm lo ve chiang che e" ka lo ti kha kha a




"Chiah maw, min ngai lo ang maw a nih chuan ka zin chhungin bialnu tur kan melh daih teh ang" a tih chuan ka thin a tirim thut a, a ban puam laiah na tawk a hnekin "Bialnu chu zawng mawlh rawh, sing chuang pawh nei mah la ka ngai chuang lo ang che" ka ti leh hlak hlaka, a ni veng thung chu a lo nui suk suk duh lek chauh leh nghal





Ka melhrum nghal ram ram a "Nuihna tur a awm a mi?" Ka ti bak hlar a, lu thin pahin "Tunah pawh khan min ngai nghal der tih ka hre reng a nia aw" tiin a la nui tak ang deuh deuh a, sawi ve leh tur reng ka hre tawh lo; ka duh aiin hepa hian min hrechiang mah mah deuh chu a ni, a buaithlak insawifiah tum ve pawh hian ka chetdan engkim hian a ti lang ka ti dawn nge min hrechiang hnehsawh thei lutuk






"Ka nu tê thinawrh te, i thin a in awrh tak tak hma in min ngai leh lo ni mai rawh se" nui ruh ruh chung a a tih leh chuan, a aia nasa in ka lo melh leh nghek; thinrim dawn pawh hian a thinrim hleih theih loh, ka dam leh nghal vek tawhin ka hria tunah pawh hian





"Lo kal teh" a tih chuan che sawn duh loin ka awm ngaiin ka awm reng a "Lo kal teh" ti nawn leh hapin a lamah chuan min pawt hnai dawrh a; ka in ring hman lo bawk nen ka bawh thlu lo chauh leh nghal, a kiai suk a a hmaah chuan min thut tirin a ban lian zeta min kuah nghal hlun in "Van khi en teh" a tih chuan thuawih takin ka en ve mai





"Arsi te khian thla an hnaih chhung chuan an mawina a bo thei lo, mawina an inpe tawn a tute mah khi an in phatsan ngai lo; pakhat zawkin a phatsan hlauh a nih chuan kan khawvel a chhe nghal vek dawn tih i hre ve tho tiraw" a tih chuan lu ka lo bu nghauh nghauh a "Chutiang bawkin ka bula i awm chhung zawng chuan ka phatsan ngai lo ang che, ka kianga i awm tlat a, min phatsan lo a nih phawt chuan keipawhin ka phatsan bik lo ang che" a ti leh hap a





"I thusawi chu..." Ka sawi zawh hma in a lamah min kuai her dawrh a "Immm.... A dik, min phatsan a nih chuan ka khawvel lo hman ve thin te hian awmzia an nei lo ang, ka kiangah awm reng la min phatsan loh chhung chu keipawhin ka phatsan bik lo ang che" a tih chuan ka mittui a ko chhuak mai dawn alawm le, hepa han ril em em zia hi!




Chutah ka biang tawn tawna a kut rawn dahin tlemin min kuai dak deuh a, rawn kun hniam ve nghal zatin min thlahlel tih hriat lutuk takin min fawp a; a kut pakhat chu ka kawnga rawn kuahin pakhat zawk chu ka tukhum lamah a vuan thung a, keipawhin a dar hnung lama ka kut suih zawmin ka thiam ang tawk chuan ka lo fawp let ve tan tan a




Nui hakin a chawl dat a, keipawhin bang bo zetin ka lo en ha bawk "Duhawm lutuk" ti leh supin min pawt hnai leh a, a hma aia duhthawh zawk leh na zawk chuan min fawp leh nghal tawn tawn a; hnial bik lo nanana chu keipawhin ka chhang tha kher mai tichuan Will nen vawithum kan infawhna a ni leh chiah, nichin khan lo in fawp hman i la chu vawi li na tur a ni sin maw le.... Ka la ui tho tho!





[Ads click theihnghilh lo i la, han ti hmasa leh phawt i la chuan ka thawnthu te ngaihnawm in tih a in chhiar duh zawng a nih chuan; like leh comments kha min han tih sak leh chur chur u la, ka va lawm si dawn em]

[Ngaia]

CHAPTER-19




Zing ka tho inhnuaia ka chhuk thlak rualin ka nu chuan "Ehhh...! I tho a mi?" A ti hluai a, khawia thawh at tir nge maw min tum chu le! "Tinge?" Ka tih chuan "Kaih thawh i ngai lo a, tuk dang aia hmaah i rawn tho a" a ti leh a, ka hmui ka lo tih pawrh khum tarh ringawt. "I tho hma bawk a, tukin chu inchhung tan thil tha han ti ve teh" a ti a





"Eng nge thil tha ka ti ngai lo a mi" ka tih kha kha chuan "Zingah kaithawh ngai bakin i awm lo chuvang chuan inchhung leh pawn hmun lo va phiat fai hliau la i thingpui tur ka lo siam ang che" a ti leh nghal zat a, mi tlawn dan leh a tul hunah hi chuan mi duat dan te hi a thiam thei hlarh hlarh a nia, hnial bik em loin hmun chu ka phiat ve ngei bakah thil harsa tak pawh a ni lo a






Ka phiah zawh vek hnuah chhuat ka nawt leh thlap a, tihfai tawh vek vek hi chuan han fai tha em em thin mai se a tha ber; choka ah ka phei tlang a, dawhkan hnuaia chair chu pawt chhuakin ka thu ve nghal zat. Ka nu in thingpui min rawn pe a, rawn thu thla ve nghalin "I thawh hma nachhan ka hria" inla hre lutuk a nuih insum ti tih deuh a a tih chuan "Sawi la" tiin ka lo chhang let vat





"Pheikhawk inkhing lo bun i hlauh vang" tih leh min en in a nui nghal kur kur a, a duh hunah hi chuan ka nu pawh ni mah se a chimawm thiam thin hle; kan naupan lai atang tawh rengin min vaw lo mah se mi hrem dan hi a hre em em zel, ka nau Sabengtunga nen phei chuan kan zak zing thin teh asin aw chuvang chuan ka nu duh loh zawng thlen tir hi kan tum ngai lo






"Naaa.... Sawi tawh suh, ka zak a nia" ka ti nang nang a "I tho tlai leh a nih chuan i zak reng dawn tihna a ni mai a chuvang chuan thawh tlai duh tawh reng reng loh tur" nuih la insum zetin ngeiawm lutuk in a ti kher, a chhan chu thawh tlai ka hlau tawh dawn tih a hriat vanga sawi pawh a ni mahse kei hian engtin nge thawh hma ka theih reng ang?!






Tukthuan ei khamah insiam turin ka chho nghal a, nimin lamah ka lo zak hmingchhe ve ting tang tawh bawk si nen vawiin parh harh a nalhin inchei ka tum ruh viau; nidang zawng aiin ka hoodie hak pawh a lian hnik hnek tawh lo a, crop chiah ni lo mah se inhmeh a awl phian a, ka jeans a hmawr ribbing awm lo pawr deuh hrap mai chu ka ha ve ngei bawk






Tlemin a tawi deuh a, ka ke rek leh ka chawn hnuai deuh chiah thleng vel a ni; ka phur leh hiam hiam tawh kher mai a chhan chu Will ka hmuh chak tawh vang pawh a ni thei ang, hetianga kan inkar a that leh tak hnu hian a hmel hmu lo a ka awm hlekin ka ngai nghal veng veng zel mahse ka hmuh chuan a chimawm thin lutuk hi ka thinchhiat a kai chhuak thin leh ang lawi a






In ka chhuah chiah chuan kawng chhak deuhah a lo ding vang tawh a, min hmu chu phung hmu ang mai a meng kawk a chutah pawh a ang phiau leh nghal; ka lo nuih vur vur a "Engnge khati vak a mi en?" Ka tih chuan insiam tha nghal sawk sawkin min la en reng a "A hma daih tang daih tawhin tiang khan in chei ta che" a ti chhuak hluai chu ka lo nui hak hak





"Chhelo min ti mi" in ti thei fahran a mit ko san ak ak pah a ka tih chuan lu buk nghauh pahin a zungpui a ti pir nghal vang a "Lutuk tlat, sawisel bo" a ti ve ngei, ka nui chhuak ta hak hak thung. Mi hi a fak khat ve sia, chutia amah meuhin 'Sawisel bo' a tih te chuan ka chhelo thaw khat veah ka in ngai hmiah





"Khatah khan in ti thei zet a din reng i tum nge i rawn chuang dawn" a ti leh nghal hluk a, mi fak rei lo ve sia maw ner khum nang nang pahin a bike hnung seat sang zetah chuan ka lawn veleh ta nge nge; kal lamah te chuan a nui tih hriat takin a taksa chu a che leh dat thin a, a tlan chak bawk si chu ka kuah nghet tha angreng viau chuvanga hre thei pawh chu ka ni






"Eng nge i nuih reng" a ngaihna hre lo zetin ka zawt a "I chhelo ve thei ang tih pawh ka ngaihtuah lo reng reng" a ti chu ka ngei leh pek tawh kher mai, a helmet ah ka kuk sak lawlh a "Thinawrh tê" la nui reng chung chuan a ti duh lek chauh a, hepa hian mi tih thinrim a hnehsawh vei nen ka ti thinrim ve thei ngai lo reng reng





"Ka chhe lo a mahse ka in la chhelo duh loh zawk asin" ka ti ve nghal pang pang a, nui hak hak pahin "A nih ka ring mahse hoodie lian hnik hnek kha i inhmeh ka ti feeee zawk" a ti leh a "Engvangin" ka lo ti ve vat "A chhan chu...." Tiin ka ngawi vang vang a "Naute lem hmelchhe deuh mahse cute deuh i ang" min tih chuan ka duh lo kher mai





"Chu ka hmelchhia i ti chiang" lungawi lo fe a ka tih chuan "I hmeltha lawm mahse hoodie lian i hakin naute lem i ang a" a ti dam thluam a mahse ka duh lo hmelchhia min ti tih hriat reng reng, ni lo se naute lem hmelchhe deuh cute deuh ang min ti teuh lo mai "Hmelchhia min ti tho alawm" ka ti leh hram






College kan thlen hnuah pawh nghak duh loin classroom lam panin ka kalsan daih a, min rawn um hlawk hlawk mah se ka va han nghak awm hlei lo tak; "A mak e, lo ding teh" a rawn ti a, ding duh miah loin ka kal ngaiin ka kal char char bakah ka kal chak lo hrim hrim bawk





Rei vak loah min rawn um pha reng a, ka dar min kuah nghal a; a rawn tlan pah ni bawk nen kei a lo in ring chiah lo bawk nen min rawn kuah na lutuk chu hma lamah ka bu dawrh leh nghal, rum lutuk a melh nghal vakin "Nge ka bulah i lo kal, hmelchhia min tih kha" ka lo ti bak hlar a, a nui suk duh lek chauh





"I hmelchhia ka tih loh kha" hmui min rawn tih pawrh khum ve ngei hnuah a khi leh thaw "I ti reng, naute lem hmelchhe deuh i tih kha" ka lo ti vin leh hlar a "Hmmm... Chu nautelem kha i lo in chan tih na a mi" a ti daih, hrethiam lo lutukin ka melh chho ha a "nautelem alawm hmelchhia ka tih nang chu chhia ka ti ve chuang hleinem che" a ti leh a, ka va han awih hlei lo tak





"Nautelem hmelchhe deuh cute deuh ang min tia, chuti a nih te chuan hmelchhia min ti ve tihna a ni mai lawm chu bak bak" ka ti leh zel a, ka lawm lo chu ka tum nasa tawh kher mai; a ni ve lah a nui ri suk duh leh chauh a, hetia min chhang lo a a nuih hian ka ngei a tizual ka thin a tirim tlat zel





"A nih chuan hmeltha min ti tu tur bialpa kan zawng daih teh ang" tih leh min kuah na paih thlak sak pahin chak zetin ka kal nghal hlawk hlawk a, a rum nghut ri chu ka hre hman tho; thui pawh ka kal hma in min rawn um pha leh tho "I ngam chuan bialpa dang han melh teh" a rawn ti nghal tawng a





"Ka melh chuan engtin nge min tih ang?" Ka lo ti let ve nghal kha kha bawk "Ka chhir er zawt zawt ang che" a tih chuan ka nui chhuak hak a "Ti la, keipawhin bialpa dang ka nei ngam tho alawm" ngeiawm zet a nuih in ka ti let ve kher a, min melh run run in hma lam a hawi vut a a kal nghal nal nal a nih chu!






A van thinchhe reuh tak, thinawrh min ti ve ziah a amah zawk hi thinawrh chu a ni reng zawk sia; "Min lo nghak teh" nui lek lek a ka tih chuan "I bialpa thar tur bulah i innghah tir dawn nia" a ti leh reuh a nih chu. Huhh... Thikthu chu a pe chhe ve mai mai, a hnungah ka um phei dat dat a; ka um tih a hriat veleh a kal chak zual sauh zel chu ka ngei ru khawp mai





Engmah hre ve dawn hlei lo mahse a hnung chu na zet a melhin lei kan chhuah khum ringawt; class lak chhung zawng pawhin min be duh thak lo a, ka sawi sual zawk em maw ni le aw ka ti hman hial; khatiang ho te vang a a thinrim kha ka ring miah lo, Aaaa.... Ni lo, thinrim tur chu keimah zawk daih asin nge nautelem hmelchhe deuh nen min tehkhin kher





Ka hmeltha lo tih chu ka in hre ve kar mahse chu ti em a chhia chu ka ni bik lo tih pawh ka in hre ve chiang alawm; min be duh lo nanana tiin kan class a hmeltha ve ber leh luck ve ber Hriatpuia bulah ka thu thak a, amah lah chuan mak tih hmel lutuk in min lo en a; nuih tlawn pahin "Vawiin atan ka lo thu dawn" ka ti tha ve mai a, amah pawh engmah sawi lem loin a lo bu ve nghauh mai





Will toilet a kal a ni bawk a a rawn let leh lamah Hriatpuia bula ka thu daih min hmuh chuan a rum nghut a, eng emaw a sawi ka rin teh reng nen engmah sawi loin a thutna lam a pan nghal nul nul a; min ti hrilhhai zawk dawn lek lek alawm! Lecturer lo lut zui mai bawk nen class kan la leh nghal mawp mawp a





A thik tur kherin Hriatpuia chu ka be reng a, a chhan chu a thutna atang kan lang chiang tih ka hriat lutuk vang te pawh a ni ang; a chang leh ka nui vel a mahse a nihna takah chuan kan titi dun mai mai zawk, Hriatpuia phei chuan bialnu a nei leh nghal chupawh school kal lai




Chutiang min hrilh ve ngawt chu mak ka ti nasa "Tinge min hrilh" ka ti he haw a "Ka hrilh ve mai mai che" tih zawngin min chhang, kawm nuam tur chi tak a ni pawhin ka hria; bakah kan inbe vak ngai lo a, kan inbiak ve chhunah min hrilh a nih chuan a rilru a tha a nih loh vek leh a mawl ve hrim hrim a ni ang





Lecturer chhuah rual rualin Will chu kan lam panin a lo kal a ka hmu lo der hmiah thung, ka banah rawn vuanin "Thut sawn kher a ngai lo" tih leh ka bag lak a rual a, kan thutna lamah bawk min hruai phei leh; engmah ka sawi lo amah pawhin engmah a sawi bik lo mahse Hriatpuia kha a thik ve hle a nih ka ring, chu thil ka ngaihtuah zawng ringawt pawhin ka nuih a ti za





Ngawi rengin a thu tum bar a, kei nuih chhuah hlau tak siin ka lo nui kur kur thung "I thik chiang" ka va ti hram a, min rawn melh nghal vutin "A teuh lo, a thik tlak loh emai" a ti bung nghut a mahse a thik tih ka hrethiam ve tho chu chuan ka nuih a ti za zual pek a "I thik reng kha" tih leh a kiu ah ka va nghawk pah zeuh zeuh "A va ninawm e aw, ka thik mai mai lo" a ti leh a mahse ka nuih a ti za zual ting thung






"I thik loh leh ka va thu leh teh ang" ka ti lui kher a rum nghut pahin "Thik lo pawh ni i la, i thutna sawn kher kha a tul lo" a ti leh hluk. Ka nuih la za viau mah se, ka titau der a ka tum ve hmak; ka tawng tawh lo a ka awm vel tawp a ni mai, amah zawk chu awm leh thei loah tangin min rawn be leh daw daw a ka nui chhuak lo chauh





Class ban thleng pawhin ka be duh ta thak lo a, a chhuah hnuah pawh ka chhuak mai duh lo; thui tawk a kal tawh ang tih velah ka thutna atang tho chhuak talh talhin muangchangin ka kal a, gate pawn ka chhuak chiah chu "Rawn chuang rawh" tha tak hian a rawn ti a, melh ve zawk mah i la ka hmu duh lo der ve tlat thung





Min thinrim khum char char bawk a, tunge thinrim rei thei thei ti i la nimai mahse ka thin a rim tak tak lo; ka fiam ve chak hrim hrim, ka kal vei hmak a thui pawh ka kal hmain "Rawn chuang rawh" a ti leh a, hmui lo tih pawrh khum tarh in ka kalsan leh a, a nui hak ri ka hre zawm nghal zat chutah ka hma takah a rawn ding thut a ka phu chiam leh nghal





Ka lo melhrum nghal ram ram a "Nu tê thinawrh i rawn chuang dawn nge ka kalsan dawn che" khauh fak a a tih takah chuan min kalsan tak tak ka hlau hnuhnawh leh si chu, ka chuang veleh ta nge nge. "Min vuan nghet rawh" a ti leh a, ka vuan duh lo lui leh ngat; bike thung chu ka vuan tung a, 'A tha lawm' ti awm ang hrimin a tlan thut a ka eu dawrh leh nghal





Ka hlau lutuk chu ka vuan nghal rawk rawk a, a taksa che dat atang min nuih tih ka hre reng "Khati daih tawh tur kha lawm" nui ruh ruh chung a a tih chuan "I thinrim a maw tia" ka lo ti he haw a, a thinrim a maw ka ti tak tak a mahse tunah zaidan takin min be leh tho bawk sia. Awii... Hepa hian min fiam a ni chiang! Min tih thinrim leh a tum chiang lutuk





"Ka thinrim maw?" Ngeiawm zet a a rawn tih chuan "Ka hrenang i thinrim leh rim loh te chu nangman i hria ang chu" ka lo tih san hmak a, a nuih ka ti za leh pek tawh a ni ngei ang; a taksa chet nasat danah a nui nasa viau a nih hmel, kan in kawt a a din rualin rang fahranin ka chhuk nghal tharh





"Zanin chu lo kal ve rawh aw" a tih chuan bang bo zetin ka lo en a "Hman zan a kan kal naah khan kan kal leh dawn nia" a tih leh chuan ka hrethiam nghal kuar, bike in tlansiak naah khan min hruai leh a tum tih ka hria "I kal tawh lo emaw tia?" Ti a ka zawh chuan "Kal tawh nang" a ti leh ang lawi a "Chuti a nih si chuan nge kal kher angaih" ka ti leh hram





"A tawp nan kan kal dawn nia" a ti leh a, zep loh chuan ka kal chak reng a chhan chu zan chhuah ruk kha a nawmna riau a awm a; ka kal tur thu ka hrilh hnuah luh san leh mai ka tum chu a lamah min pawt hnai hrawk a, phawk fe a ka lo en laiin a kiai suk a "ka nautelem hmeltha tê" tih leh ka hmuiah a rawn fawp zeuh





Khaw en lai a ni bawk nen miin min hmu tih ka hlauh avangin ka nam sawn nghal rawk rawk a,a la nui ri hak zui; "Miin min hmu ang a sin" ka ti nang nang a "Min hmu se a pawi a mi" a ti nghut thung "Aw zahthlak ve e, a zahthlak alawm" ka tih leh chuan nui sukin "Lut tawh rawh, zanin chu in ha lum deuh la aw" a ti leh a, chhang loin ka lo buk khum nghat thung





Zanriah eikham atang ka in hak dan tur mawlhah chuan ka buai ve hle a, eng dang vak hak tur nei mang hlei lo hi ka buai ve em em ringawt chu a nia; zantir atang ka phur nghal em em ringawt a, dar12 a ri har ka ti tawh ngang mai, tunah dar8 chauh a la ni zui






Tlaia kan inbiak bak kha Will nen pawh kan inbe leh tawh rih lo a, a inbuatsaih ve ni hmiang ka ti mai; keimah zawk chu ka phur cheng chawng tawh lutuk a, ka mawngah hian min hawlh tu awm ang maiin ka za cheng tawh leh nghal. A chang leh bathlar lamah ka chhuak thul, a chang leh inchhungah lutin ka khum bulah ka vei tawn sek bawk






Chutianga rei tak ka awm hnuah ka ning tawh lutuk chu khumah a zangthal zawngin ka let thla tawp a, min hrilh lawk lo ni se tha tur; thil ka hriat lawk ve hi chuan ka buai cheng zel a chhan chu ka lo phur fal thei thin bik lutuk a, ka chhungte pawhin engmah min hrilh lawk duh ngai meuh lo inti hlim tur a kan chhuah dawn pawhin a hma zanah bak min hrilh ngai lo





Ka phurna a reh tan a, mutchhuak in min rawn zem riai riai tawh in ti harh luiin han men tum ve thin bawk mah i la, ka chhingmit kawpza hi e a rul hneh tawh lutuk tlat; zan danga muhil thei mang hlei lo kha zanin chu a chhuak ngawih ngawih engvang nge pawh ka hre lo, ka phur lutuk vang pawh a ni mai thei







Ka chhing nghet dawn chiah tihah ka bathlar lam kawngkhar chu an rawn kik ri dat dat a, ka meng kawk thei; rang lutuk a tho vatin kawngkhar ka va hawng nghal a "I hman tawh em?" Ka hmuh rual chuan a rawn ti thum dut a "Aw hmanna a rei tawh rapthlak, zantir atang ka hman tawh" ka tih chuan a nui suk a "I hman chuan kal i la" a ti ve nghal vat





Lu buk khum nghatin kan inzui chhuak ta nghal a, ka nu leh pa te chu dar10 velah an mu daih tawh thin; thawh pawh an tho hma reng a chuvang chuan an ni lam chu ka veng thawng lutuk lo, an in lamah kan lawn kai hnuah dim te in inchhungah kan lut dun zal zal a, inhnuai pana kan kal tur chiah chu U Lala-i inhnuai atanga rawn chho hlawl nen kan in tawk chiang ngang mai






Ka zak lutuk chu Will hnungah ka biru nghal rawk rawk a, dah chhuah pawh ka dak chhuak ngam meuh lo; "Khawnge in kal dawn?" Tiin a phun ser ser a "Kan chhuak lawk dawn a, ka nu te lo hrilh miah suh" Will chuan a lo ti ve nghal vat. "Thio tha lo te kha in va ti ang e aw a chi miah lo ang, a bikin Stella tan phei chuan" a ti leh ser ser a "Teuh lo kan in ti thawveng dawn" tiin a lo chhang let ve vat






"Aw a nih chuan fimkhur u la aw" a ti leh a, Will a lo bu nghat kan kal mai tur chu "Lo ding lawk teh u" a ti leh a, kal leh ta mai lo chuan inher meuhin kan ding leh rih a; Will lahin ka banah min chelh tlat reng a, ULala-in min hruai hran daih a hlauh vang a ni ang, ULala-i pawh a nui ve suk mai





Chutah keima lam lo hawiin a scarf awrh lai chu a phelh a, min lo pan hnaiin "Kha hei hi awrh rawh, zan a rei tawh a vawt i ti lutuk palh ang" tiin min awrh tir nghal mawlh mawlh hnuah nui ver verin "Nuam deuhin hmang ru aw, va che nasa lutuk lo u la" a ti leh sup a, ka zak lutuk chu tawng mai nachang pawh ka hre lo ka lo nuih tlawn ve ringawt






'Va che nasa lutuk lo u la' a tih chhan chu eng nge maw ti viau turah min ngai a ni nge ang "Lala, kan kal aw, kawngkhar hi lo kalh lo la kan lo haw har lo ang" Will an a tih leh zet hnuah inhnuai lam panin kan inzui thla nghal a, kan chhuak chiah chu ULala-in min lo zui a ni tih ka hre ve chiah "Lo haw har su aw" a tih hnuah kawngkhar a khar zui






A tih dan ngai bawkin kawngchhakah a bike chu a lo hung fel leh hman vek tawh, a chuan hnuah "Rawn chuang rawh le" a ti sup a, ka chuang ve nghal mai bawk; a ruk a thil ti ni mah i la, kan awm dan te chu a nuam ka ti. Hlauthawng tur viau ka nih laiin ka hlau miah lo thung a chhan pawh Will ka bula a awm vang a ni ngei ang






ULala-in min hmuh khan min hau hrep dawn a maw ka tia, ka tang ve hman em em a mahse min hau miah lo leh tha taka min thlah kha mak ka ti zawk; a scarf min awrh tir lah a rimtui chek chek leh nghal, cherry blossom leh strawberry tih ang reng vel rim a nam chuk a min ti hahdam vek theiin ka hria





Thui vak lo kan tlan hnuah Remmawia leh Zawma te pawhin kawng chhak lamah min lo nghak ve reng a, an bul kan thlen chuan kan ding dat; "A la thui viau em?" Tiin Will chuan a zawt a, kan kal na tur hi a hre bik chiah lo a ni ngei ang "La hla ve ang reng" tih zawngin Remmawia chuan a lo chhang





"A nih chuan Zawma nen hma hruai u la, kan lo zui ve nghal ang che u" a tih hnuah kan tlan chhuak leh nghal a, Will chuan min ngaihtuah ve hmel fe in vawt ka tih leh tih loh min zawt reng a; vawt ka tih loh thuin tha takin ka lo chhang ve zel bawk





A hmun kan thlen chuan kan kal hmasak ang ai khan mi hmuh tur an awm miah lo chu mak ti fe in ka hawi kual nghal ruai a; "Lo kal rawh" min nuih suk pahin ka kut chu a rawn vuan leh nghal chat tawh, engmah sawi loin ka zui ve mai bawk




Kawt zawlah kan phei dawn emaw tih laiin a piah zawk tlang lam ni awm tak pan chhoh naah chuan min hruai ta zawk a; a thim tha bawk si chutah lah a reh em em mai leh nghal, tlem chuan ka hlau ve det tawh "Khawnge kan kal dawn, ka hlau a nia" ka ti nghal tawng a, min rawn nuih sukin "I hre mai ang" tih zawngin min chhang a, keimah chiah hmeichhia ka awm bawk si chu hlauhna in min man a ni ber tawh





Will ka ringhlel ni loin hmeichhia keimah chauh ka awm vang te pawh a ni ang, thui vak lo kan chhoh hnuah phul hmun nuam zet mai kan thleng a; kal leh deuhin a piah lawk a thutna awmah chuan kan thu a, kan thut fel rualin ka hawi nghal vual a mahse Remmawia leh Zawma te hmel hmuh tur reng an lo awm tawh lo





"Khawnge?" Ka ti chhuak a "Tu te?" A lo ti ve nghal vat bawk "Remmawia leh Zawma te kha" ka tih chuan "Ngaihtuah suh an ni chu nakinah haw dawnah an lo lang leh mai ang" a ti liam puat a, ngaihtha viau lo mah i la a eng nge maw tih nawm riau leh nghal chutah a lamah min pawt hnai hrutin min kuah nghal hlun hlun a, a vawt deuh pawh tlemin a zia ve chuan ka hria





A kawrlum hak ipte chu a zen rak rak a, a phone a phawrh dawn emaw ka tih laiin eng emaw hi a rawn phawrh chhuak a, zawhna mit meng a ka lo en laiin min nuih suk pah chuan hma lamah min hawi tir a "Zanin hi eng zan nge a ni tih i hria em?" A tih chuan ka bo chiang viau a ni "Hre nang" ka ti a "Zanin hi kan inhmuh hmasak ber ni kha a nia" a tih chuan "Kan in hmuh sak ber ni engtin nge a nih theih ang" ka lo ti ha a







"Ni 13 vawiin angah hian college i rawn tan" a tih chuan ka hrethiam ve chiah "Chuan..." Ka lo ti nghal vat a "Chuan zanin atang ka kalsan dawn ngai lo che tih chhinchhiahna leh keima ta chauh i ni tih chhinchhiahna ni a ni bawk ang" tih leh a thil rawn phawrhchhuah kha min awrh tir a, thi mawi tak niin thla lem chhungah arsi a awm kiau bawk "A nalh tak zet" a thi min awrh tir chu khawi niap niap pahin ka ti chhuak sep a






[Ads mawlh kha aw, han click leh zel phawt i la chuan ka story ngaihnawm i tih a, i chhiar duh zawng a nih chuan like leh comments kha min han ti veleh sak hram bawk u la]