THE HOODIE GIRL BY SumMer Ralte (Completed)

[Ngaia]

THE HOODIE GIRL

Tunge Hoodie Girl chu? Engvanga chutianga Hoodie Girl ti a ko chu nge an nih? Hmeichhe thinlung vawt tak leh nun khawhar tak, a bula awm inthlahrun thlak khawpa hmeichhe nelawm lo, khawlum lai pawh sawi lova kawrlum ha reng thin a ni a mahse chu a mize maksak tak avang chuan tu emaw mit la tu tak ni ta daihin chuta tanga inkawm chho zelin thian inkawmngeih tak atanga Hmangaihna lo pianchhuah dan chu a ni

'Khawvela min hmangaih tu awm chhun leh ka thiantha tak chu ka chhung te leh ka neih chhun he ka guitar chauh hi an ni'


CHAPTER-1



"Hrehawm i ti angem? I tih chuan in atang pawhin kal dan kan ngaihtuah anga" college a min thlah pah chuan min zawt mawlh mawlh a, lo nuih sukin "Hrehawm tihna chhan tur a awm hleinem" ka ti a "Ka ngaihtuah deuh vang che a nia, i kal hreh viau chuan inah online in class i la anga dil dan te kan ngaihtuah anga" a ti leh zel a



"Ngai lo ang pa, min ngaihtuah suh puitling ka ni ve tawh alawm" ka tih chuan, min en vung vung a "Ka ring che lawm" ti sup in hma lam chu a melh leh nghal a



College kan thlen chuan motor atanga chhuk vat in ka pa chu ka nuih a "In banah min hrilh la, ka lo lam leh dawn che nia" a ti a "Awle kal tawh rawh, ni hman nuam aw" ti leh supin ka in her san a gate ah chuan ka lut ta nghal a



Vawiin hi college a ka ni hmasa ber tur a ni a, ka zam in ka huphurh ru ve khawp mai; kum laklawha lut ka nih avangin ka zam leh zual, hmelhriat sa ka nei lo a chutih rualin Aizawla kan in sawnna pawh kar hnih liam ta mai kha a ni bawk



Ka kal lai te chuan min en hrek hrek a, hawi chhuak ngam lovin ka kun ngal bawk; office ka thlen chuan luh ka dil a teacher ka hmuh hmasak awmna lam pan chuan ka phei ta nghal a, student thar ka nih thu leh ka subject core te chu ka hrilh nghal a



Teacher chuan tu emaw chhuak tur hi a au a "Hei i zirlai thar tur" tih pahin "Miss saw va zui la, in psychology teacher tur a nih saw" a ti zui nghal zat a



Min nghak tu awmna lamah chuan ka phei nghal vat a "Tunge i hming?" Min nuih sen sen pah chuan min zawt a "Stella Lalnunhlimi" ka ti a "Miss Zotei ka nia" a tih chuan ka chhang tawh lem lo



Classroom kan thlen chuan midang ho chuan an lo wish a, min hmelhriat tirna te a neih zawh hnuah ka thut na tur min kawh hmuh na lamah chuan ka phei a, ka phei lai te chuan tu hmel mah ka hmu lo



Ka thut hnuah class chu kan tan a, Miss in min zirtir lai te chuan ka bula mi chuan min hmuh chian chak hmel ni awm fahranin min rawn bih leh duk duk thin a, min hmu ang tih hlau reng rengin kei ka lo kun ngar ngar thung



"Hi..." Miss chhuah hnuah chuan a rawn ti a, ka chhang lo "Will Zomuanpuia ka nia" a rawn ti leh a, ka la chhan tak chuan loh avangin a beidawng a ni ngei ang thaw hakin a thiante auh na lamah chuan min kalsan ta a



Teacher dang te pawh an rawn luh leh hnuah break in a zui nghal a, canteen lamah kal in a hnung ber kil chu ka pan rang khawp mai; ei tur chah ka nghah lai chuan Will te thian ho kha an lo lut ve a, kan hma maiah chuan thu in an ri nghal hlut a



"Lo lut thar nu kha a at hmel ka ti" tu emaw hian a ti a "Nia..! Tun ang khaw lum lai leh nghal hoodie nen rawn ti deuh thlap" pakhat chuan nuih hak hak pahin a lo tuihnih ve bawk a



"Chicks deuh a rawn lut dawn emaw ka tia, mahse a chicks vak hmel loh" a dang leh chuan a ti a, an hnungah ka awm ve a nih tih hre lo lekin ka chungchang an sawi a ka tawn fo tawh thil a ni na chungin ngaiah ka nei hlei thei der lo



Ka mittui a rawn hnam tiam tiam a, midangin min hmu ang tih hlau in ka kun ngar ngar bawk; "Engtin nge i thutpui peih zawk reng reng a" an bula hmeichhe awm ve chuan a ti niah niah a



"Will thutpui hrehawm i ti em? I duh chuan a thut na kan sawn sak anga ka lo thu zawk mai dawn ami" hmeichhe dang leh chuan a ti a mahse Will chuan "hrehawmna a awm lo" tih zawngin alo chhang let thung



"Hei aw i eitur chah kha" tih pahin hmeichhia keimah ni ang rual chuan min nuih sang pahin a ti a chu veleh ka hma mi te ho chu an rawn hawi thap a, min hmu ang tih hlau in ka lukhum khum lai chu siam that mawlh mawlh pahin ka eitur chah chu ka ei a



Hawi chhuak leh tawh lo in ka ei lai chu ka ei mawlh mawlh a, ka hma mi te ve thung chuan ka awm tih an hriat tawh vang te pawh a ni ang ka chungchang engmah sawi nei tawh lo in thudang vawrhin an titi chhunzawm leh nghal mawlh mawlh thung



Ka ei zawh rual chuan ka tho chhuak nghal a, a man ka pek fel hnuah rang lutuk in canteen chu ka chhuah san ta nghal a; chawhnu period ala awm avangin ka phur fahran tawh lo khawp mai



Ka ni hmasa ber atangin sawi ka hlawh nghal pang chu a nia! A nuam duh lem lo khawp mai, kan ban chuan ka pa chu ka be nghal a, alo thlen vat tur thu min hrilh hnuah call chu ka hmet thi nghal a



Gate ah chuan ka pa lo thlen hun chu ka nghak a, chutia ka lo din lai chuan Will te thian ho chu an rawn in zui diah diah a, ka hmel hmuh an chak tih hriat fahran hian min rawn thlek leh da da thin a mahse kei erawh ka kun thung



Rei lo te ah ka pa chu a rawn thleng a, motor a ka chuan luh hnuah kan haw dun a "Vawiin lam te enge a an? I college thar chu nuam i ti em?" tiin min zawt nghal siam siam a "Immm... Nuam a nimai" tih zawngin ka chhang a



"I kal rei tial tial anga thian i la nei vat mai ang" a ti leh a min nuih pah reng bawk, kei chuan ka ring lo tun a ka awm dan ringawt ah pawh hian sawi sep ka kai tawh a nia, ka hmel hmu leh lek phei se la chuan min kawm chu sawi loh ka bul hnaia awm pawh an duh lo ngei ang!



In kan thlen chuan ka room ah ka chho nghal a, ka luh rualin ka hoodie chu phelhin ka hmaa darthlalangah chuan ka in en nghal a; ka mittui a rawn hnam nghal tiam tiam bawk



Ka lu khuh tu sam nei lo chul chu ka chul thuak a, ka hmai leh ka ban chu ka en nghal bawk; nuih luih ka tum a mahse ka thei lo a harsa ve thlawt ani, hetiang taksa ka put hnu atang phei chuan!



Ka khum awmna lamah chuan let pheiin ka thlalak bawm chu ka la a, khumah chuan thu thla in ka thlalak hlui te chu ka en a; ka in rin hma in ka biangah mittui a rawn luang nghal ngiai ngiai bawk



Kawngkhar ri rek ka hriat chuan ka leh hawi vat a, ka nu ka hmu nghal zat bawk ka mittui chu hru hul mawlh mawlhin ka nu ka lam pan a lo kal chu ka lo nuih a, ka bulah rawn thu thla ve in ka thlalak en ho chu a rawn bih ve nghal vut a



"Ka hmeltha tiraw hetah hian" tih pahin ka thlalak chu ka kawk a "Tunah pawh ila hmeltha reng alawm" min tih chuan ka lu ka thing vat a "Tunah chuan phung ka ang tawh" ka tih rual chuan kan nui chhuak dun hak a



"Tiang hian engtikah nge ka awm leh theih ang le?" ka tih chuan "I awm leh vat dawn alawm" tih pahin ka hnung a chul hliau hliau a "I ring em?" ti a ka zawh chuan a lu a bu nghauh nghauh a, ka lo nuih sen sen thung



"Chhuk ila, thingpui in tur a lo koh che ka tum a" a tih chuan kan thil en lai chu dahin ka tho chhuak nghal a "Kal ila" tih leh kawngkhar lam pen chu ka rual a



Engmah pawh sawi lovin min rawn zui ve nghal a dawhkan kil a ka pa lo thu chu zawm ve nghal vatin "Pa ilo haw tlang ve daih sia, office lamah in buai lo ami?" Tiin ka zawt nghal a "Vawiin chu kan buai vak lo" tiin min lo chhang let ve nghal zat bawk



Ka nu chuan min rawn zawm ve nghal vatin kan college chungchang te chu min zawt nghal luam bawk a, 'nuam ka ti em' tih thu vel te chu min zawt a "aw" tiin ka lo chhang ve mai bawk a



"Nuam ti rih lo mah se a kal rei anga thian a nei vat mai ang" ka pa in alo ti nghal bawk a "Lut thar a nih mai bakah kum laklawha lut te a ni sia hrehawm a ti ang tih kan hlauh pui mawle" min ngaihtuah hmel fe in ka nu chuan a ti a



"Nia a la rei lo ve bawk em a, ka nei vat mai ang" ka tih chuan "Ni e mawle, i ngaihtuah leh thin lutuk a" ka pa chuan ka nu chu a lo ti ve bawk a; thingpui kan in zawh chuan ka nu rawngbawl lai chu ka theih ang angin ka pui ve nghal bawk a



Zan riah eikham hnuah ka nu chu ka tihfel pui leh te te hnuah inchungah ka chhoh san a, kan unau hi pathum kan ni a, ka u hian pasal a nei tawh a, ka nau hi hostelah a awm ve thung a kei a mi lai ber hi a nu leh pa te bulah ka awm thung



Hmeichhe hmeltha lutuk ti a han sawi em em tur chu ni lo mah ila, ka hmel a faiin ka mit mu a lian a ka ngo ve veng thin mahse he natna ka neih hma zawng kha chuan!



Pawl11 ka nih kum laklawhah a chhan sawi tur hriat si lo in ka taksa a rawn bawl chhuak vek a, a vual tut bawk a a thak mai bakah a thip na tel bawk a; ka allergy ah ngaiin ka ngaihsak lem lo mahse a rei tial tial a ka taksa mai bakah ka hmai te thleng chuan a rawn ni chho a



Ka vun chu a phuhlip mai bakah bel kang ang maiin a rawn awm ta tuarh a ka ngaihtha lo in ka nu ka hrilh a, a rang lama in entirin ka natna an hmu chhuak thei mai bawk si lo; chu mai pawh duh tawk lo in ka thawk lam thleng chuan harsatna ka nei zui ta hial a



Doctor te tih ngaihna hre lo in hmunpui(phai) lamah min refer a, thla khat zen zawn result nghak a kan awm hnuah Eczema natna ka nei tih hmuh chhuah a ni a, kan vawikhat hriatna a nih avangin mak pawh kan ti hle a



Doctor te sawi dan chuan vun natna a nih thu min hrilh a, tha taka treatment te kan lak a kan in enkawl chuan ka that leh vat theih tur thu min hrilh a; chuta tang chuan school pawh kal mumal thei lo in treatment ka lak a ngaih phah a


Ka sam mai bakah ka mithmul sam thlengin a tlak kawlh phah vek bawk a, ka biang te chu Eczema natna vangin a sen tai hlar bawk a; ka vun te lah ni se khawi lai mai chu a phuhlip mai bakah a sen tut bawk a



Chuvang chuan ka duh vang ni hauh lo in khaw lum emaw khaw vawtah pawh ni se, in a ka awm te a nih ngawt loh chuan kawrlum lian tak ka taksa khuh bo vek thei leh miin ka hmel an hmuh a thin hrik ka nih mai loh nan lukhum awm tel kawrlum ka hak a ngaih phah a



A chang chuan hrehawm tih chang ka nei ve thin, ka thian tha tak anga ka ngaih te lahin ka natna an hriat rual leh ka taksa danglam an hmuh rualin min kawm an hreh phah a; midang bula an thian ka nih ve thu te chu sawi ngam lo in min zahpui bawk a



Ka dem hran lo, ka rapawm ve em bawk a ni! Treatment la tur a hmunpui lama kan kal a ngaih reng vang leh in enkawl ka ngaih reng avangin ka pa chu a hnathawhna sawn sak turin kan dil ta tawp a



Thingtlang atangin Aizawlah kan in sawn a, vun doctor thiam tak leh hetiang natna enkawl thin doctor hi Aizawlah pakhat chiah a awm vanga Aizawla insawn dil pawh kan ni a mahse sawi tawh angin hmanrua kan la nei tha lo a, a theih ang tawk chuan min enkawl ve mah se ka taksa na a zual changin phai ah kan kal a ngai tho zel




Ka room bathlarah chuan thu chhuakin van a thla leh arsi mawi tak chu thlir in ka in awm hlimna leh ka thiantha neih chhun ka guitar chu perh pahin ka zai rat rat a, 'Celine Dion' hla 'I Love You' chu ka sa pah bawk a



Hmanah chuan ngaihzawng te pawh ka nei ve thin a mahse min zahpui vangin inthenna mumal pawh awm lovin min tha then a; a chhan sawi pawh ngai lo in a chiang viau a ni, ka mittui rawn hnap sawk chu kap let sak sak pahin aw khur der der in ka sak zawm zel a



Kum a liam tawh na chungin ka theihnghilh thei thlawt lo a ni ber e, ka thianten min zahpuiin min kawm duh tawh lo pawh ni se; ka mipa duh berin min kal san ka ring ngai lo mahse a thleng miau mai si a



Chuta tang chuan mumal taka nun hman ka nei thei tawh lova, mah ni in sitna lian tak leh in hmuh hniam na lian tak ka neih phah a; khawvel atang in la hrangin tumah ka bia in ka kawm tawh ngai lo ka thian neih chhun leh min hmangaih tu awm chhun chu ka chhungte leh ka guitar te chiah hi an ni



Veng thar, in thar leh college thar mihring thar awm naah chuan tuman ka nihna an hre lo ang a, kawm tur pawh nei lo mah ila ka natna avanga min chhaih tu tur an awm tawh dawn loh avangin keimah ngei chuan fight chhuah ve ka tum a, ka nu leh pa te chuan min ngaihtuah tih ka hria



Mahse ka tum ve tlat avangin in atanga kal lovin college a kal ka thlang zawk ta reng kha ani a, a tirah chuan min en hrek hrek in ka chungchang sawi nei deuh mah se khawpui a nihna angin an rilru a zau kan ring ngawt pek a, chuvang chuan min sawi reng an peih loh pawh ka ring ve ngawt a ni



Sak chhunzawm thei lo in ka guitar chu ka thutna bulah chuan dahin ka hnung nghen chhan chu nghengin maimitchhing chungin van lam ah ka dak a, hun kal tawh te chu ka ngaihtuah kir neuh neuh bawk a



Rei tak chutia ka awm hnuah chuan ka nu in min rawn auh tak avangin ka mit chu ka meng a "A tlai tawh sia, mu tawh la tih ka rawn tum a pawn a i awm reng chuan i dam lo mai ang" min ti nghal siam siam a "Awle" tih paha tho in chhungah chuan ka lut ve ta nghal a



"Damdawi i ei tawh em? I inhnawih tawh em?" Ka room atanga chhuak ta mai lo chuan ka nu in min zawt nghal bawrh bawrh a, ka theihnghilh ang tih a hlau thin hian min zawt reng thin a min ngaihtuah em em bawk "Aw ka ei tawh a chuan ka inhnawih tawh bawk aw" nuih suk pahin ka ti a



"A nih chuan ka chhuahsan ang che, tui deuhin i mu dawn nia" tiin ka chalah chuan min fawh sak a "Nangni pawh muttui ule" tiin ka lo chhang let vat a, min chhuah san zui nghal mai bawk a engmah pawh tih zawm tawh lo in ka muhil ve ta nghal a

[Ngaia]

CHAPTER-2



Ka harh leh chuan a la hma ang reng khawp mai, ni in ka room a rawn en de sar sar a tho chhuak nghalin ka in tifai hmasa leh te te phawt a chutah exercise la tur in pawnah ka chhuak a



Ka zawh a inchhunga ka luh chuan ka nu pawh a lo tho tawh a "Morning, i mutui em?" Min lo ti nghal var a "Imm... Tui lutuk, nang zawk?" Tiin ka lo chhang let ve vat a "Tui lutuk, han inthlak la thingpui kan lo lum ange, i pa pawh alo tho tep ang" a ti nghal zat a



"Aw le" tiin inchung lamah chuan ka chhoh san a, ka chhuk leh chuan ka pa pawh alo tho tawh a chaw ei dawhkan kil in chanchinbu alo chhiar a, va zawm ve vatin "Morning pa" a dar a kuah pah chuan ka wish a "Imm... Morning, nizan lam te i mutui em?" Tiin min zawt a "Aw ka mutui lutuk" tih pahin dawhkan chu ka kil thla ve nghal vat bawk a



Thingpui kan in zawh hnu rei lo te ah tuk thuan kan kil nghal a ei sawk sawkin college kal turin ka insiam nghal a "Stella i va hmanhmawh ve" ka nu in a rawn tih chuan "Ka tlai ka hlau a" ka lo ti tha ve mai a "Bawihi ka thlah dawn che nia" ka pa in a lo ti veleh bawk a



"Thlah ka ngai lo ang vawiin chu ke a kal ka chak deuh a, hmun hriat chian nan hrim hrim pawhin" ka tih chuan "Ka thlah chu i duh lo tak tak a maw?!" Mak tih hmel takin ka pa chuan min zawt leh a "Aw pa vawiin chu ke in kan kal ve ange" tiin ka nuih suk a "A nih leh in banah min lo bia la ka lo lam dawn che nia" a ti leh hram a



Keimah hian min tlat fal tir ngai lo a ni ber, min ngaihtuah em em zel a tiang a nih reng chuan ka puitling thei ngut dawn a maw ni le! "Aw le a nih ka kal aw" tih leh in atanga chhuah ka rual a, tunah chuan keimahin ka kal ve dawn ta, ka nun tharah hian mahni a pawn lam a thil tih thiam ka zir ve te pawh a ngai alawm mawle



Muang changin ke in ka kal a, thui pawh ka kal hma in chak lutuk tak maiin bike in min rawn tlan pel fua a, tlem tlem a min su lo chauh alawm! Mawl ka ti hle ringawt a, tlan liam daih tawh mah se a tlan na hnu chu rum lutuk in ka melh nghek ringawt a, awmzia phei chu a awm hran lo



College ka thlen chuan min lo tlan pel fua tu bike kha ka hmu a, ka en chian chuan bike chunga thu chu 'Will' a ni tih ka va hre thei mai a; khatiang leh lutuk a a khalh chak chu ka haw ve hran pa hrim hrim ringawt bawk



Classroom lam pana kal ve tur chiah an ni tih hriat takin an lo tho chhuak hlawm a, an kal chiah tih chuan chak lutuk a pen phei hlawk hlawkin ka va su ve nghek ringawt a, eng ka hria chu ni maw!



Chhuatah chuan enge maw hi a tla ri bal a, ka ding dat a rei pawh ding lo kal leh mai ka tum chu thinrim tih hriat tak hian min rawn au a "Heih! Nangnu kha ding rawh" a ti vin hlar a, ngai pawimawh lem lo chuan ka kal lui zel a "I va polite lo reuh tak, ka helmet i tih ran hi ngaihdam min dil ta che" a ti leh a



A hmuh loh lam atang in ka lo ner nang nang thung, engah nge nichinah chak lutuk a a rawn tlan teh reng ni hawi let lo in ka kut chung lama pharin ka vai a, a ngei tawk a tling a ni ngei ang a rum nghut a "I chak dawn lo" te chu ala rawn ti tak tal a kei ka lo khi vur vur thung



Mahse le, ka khi rei lo khawp mai a bulah ka thu dawn tih ka hriatchhuah rual chuan ka hlauthawng leh hnuhnawh a; tih ngaihna a awm tawh der bawk si lo, class a a rawn luh hun te chu huphurh tak te in ka huphurh a



Class a an rawn luh rual chuan mi rawn melh nghal ram ram reng a, ka hre lo der hmak thung! Ka lam pan a a rawn phei lai te chuan ka ip chawih chawih hi a ni ber, a rawn thut thlak rual chuan "Heih mi tharnu ka helmet i ti rang tih i hria em?" Tiin min zawt a, ka chhang lo



"Van nghal reuh tak" a ti leh a, kei ka lo nui sak thung "Ngaihdam te min dil ve la" a tih leh pawh chuan ka la chhang duh ta chuang lo, a thinrim a ko chhuak a ni ngei ang "Aaa.... I mawl an tih kha a lo ni tak tak dawn a nih hi" a ti leh hluai a



Break ah chuan library ah ka kal a, thian ka la neih loh avangin mah ni a awm hlimna ka zawng a ni ber; lehkhabu chu enkual in ka chhiar duh zawng lah chu a vang hrep leh nghal class tan leh hma a class a lo awm ka peih loh avangin enge maw ber chu chhiar turin ka la a



Chhiar tak tak tur pawh ni hlei lo in thutna lo awm ah chuan thu in ka duh duh na lai chu ka keu ve thawr a, class tan hma chu ka nghak a ni deuh tawp mai mahse ka chhiar zel a ka tui ta deuh nge sana ka en chuan ka tlai duai tawh hmanhmawh lutuk a lehkhabu chu dahtha sawk sawkin classroom lam pan chuan ka tlan phei nghal hlawk hlawk a



Ka thlen chuan tumah an lo awm tawh lo, kan lo bang fel der tawh chu niin chawhnuah 1st period chiah kan nei a, tunah dar2 leh chanve a ri thuak tawh; ka ni hnihna atang class ka bunk chu a ni ta der! Zia lo thin khawp mai



Rilru nuam lo tak chung chuan step ah ka chhuk thla hnak hnak a, mah ni a haw leh ka tum avangin ka pa biak buai hran pawh ka tum lo; gate ka thlen chuan Will te thian ho kha an lo la awm a, kal pel ka tum chu "Heih!" A rawn ti leh a, ka ding dat a a tawng hun tur ka nghak a ni ber



Engmah a sawi tak mai loh avangin kal leh mai ka tum chu "Hoodie Girl!" A rawn tih leh takah chuan ka leh hawi a "Sawi la" bung nghutin ka lo ti thung "Ngaihdam chu min dil dawn lo ami?" A ti leh a, a helmet chhe te a a ran vang mai a ngaihdam min dil tir phet han tum tlat chu!



"Tikhan kan in rul tawk chiah" tiin ka leh hawi leh vat a "Enga!?" Hriatthiam loh hmel taka a rawn tih chuan "Zinga min sut tep man" tih leh kal ka rual a, a ngaihna a hriat loh hmel tak zet; a ngawi reng a engtin mah pawhin min chhang zui tawh chuang lo



Haw kawngah chuan earpod ah hla ka ngaithla pah a, kan in leh college hi a hlat tham ve deuh avangin ka kal chak peih lo bawk; chutia ka kal lai chuan thawk leh khatah ka hnung atang horn an rawn pe vak a, ka phu nasa kher leh nghal kawng sir lam chu chuh nghal rawk rawkin ka hnunga horn pe tu ka en nak chuan tudang ni lovin Will a lo awm ve reng chu niin!



A kal hun nghak in kawngsirah chuan ka ding ta reng a, kal ta mai lo chuan a ni pawh chu a ding ve reng a; a kal dawn lo tih ka hriat hnuah in siam tha in kal leh mai ka tum a "Heih! Hoodie Girl" tih bawk chuan min au leh a, chutiang pawh chuan nge maw min auh reng le!



"Hming ka nei ve" ka ti bung nghut a "I hming ka hre hleinem" ngeiawm lek lekin a khi zui suk bawk a, ka huat tawk a tling viau thung; kan ni hnihna atang pawhin kan inhnial nghal der chu a nia, min nel mah mah nge ka nel zawk pawh ka hre lo e a!



"A nih tak chu" tiin ka kalsan a, min tlan pel mai lo chuan ka hnungah muang changin alo kal ve zel a chutianga a ti reng chu ka duh hauh lo, in hmelhriat tha pawh kan nih loh mai bakah vawi hnih chauh kan la in hmu a chutia min nel hmel tak a a awm chu ka duh fahran lo khawp mai



"Enge min zui reng a" leh hawi meuh a ka tih chuan a dar a san ak ringawt a "I lo chuang ve duh em?" Tha deuh chuan a ti leh reuh a, rum lutuk a melh vakin "Duh mai mai lo" tih pahin ka kal chhunzawm ve zel a "Lo chuang rawh, ka haw kawng ve tho a nia" a tih pawh chuan ka chhang duh tawh lo



Chutia nel taka min bia chu ka duh lo khawp mai, mi in nel taka min biak leh ka chunga hetiang a an awm lohna a rei tawh lam chu thuhran ni se, keipawhin tumah ka biak tawh ngai loh avangin ka dawng sawng thiam lo te pawh a ni mai thei mahse min nel lo se ka duh zawk mah a chhan chu ka nihna an hriat rualin tunge min kalsan leh daih duh ang tih sawi thei!



"Kal tehhh...!" Ka ning ta lutuk chuan ka ti bak hlar a engah mah a ngai lo tih hriat lutuk takin a lo nui mai mai thung a, min run leh chiang khawp mai "Engeee...!?" Ding meuh a ka tih leh takah chuan ding ve in "Engmah" alo ti awlsam et a, thaw hakin ka earpod chu vuah tha sauh sauhin ring lutuk tak maiin hla chu ka play bawk a



Kan in lam panin ka pen pawk pawk a, ka tlan ti tih a ni ber ang chu min rawn zui ve zel tih chu hre mah ila ka hre lo der tlat tawh thung, chutah ka in rin hma hauhin chak lutuk in min rawn tlan pel leh ta fua a, a mawl ka ti tak zet!



Kan in zawn ka thlen chuan a ni pawh chu a lo awm ve reng tawh a, hepa reu ruau hian min zui a maw ni dawn le? Nge ni a ngaihdam ka dil loh avang khan ngaihdam min dil tir a la tum fan zawk ni ang?



"Tinge min zui zel a?" A ngaihna hriat lo hmel taka ka zawh chuan "Ka zui bawk lo che, ka haw ve a nih hi!" A ti duh lek chauh a, ka awih lo lutuk chu ka lo ner nang nang a "Min zui lo ni la helai thleng thleng i rawn kal nang" te chu ka la ti ve fan a "Ka zui lo cheee..." Min nin hmel zetin alo ti thung



A bike chu park tha in, bike atang a a rawn chhuk chuan in a luh mai na chang pawh ka la hre lo amah chu ka la en ve ran a "A nih leh aw" tih pahin ka tih dan ang chiahin chung lamah a kut dah chho in a rawn vai a, kan in bul lawk in a a lut ta daih chu ka hau in ka lo en thung!



Keipawh chu ding khawmuang tawh lo in ka lut ve ta nghal a, inchhung a ka luh chuan ka pa pawh alo haw tawh a "Min lo be lo a" a ti nghal reng a "Nia mahni a haw ka chak deuh a" ka ti tha ve mai a, naupang ber ni si lo hi min ngaihtuah leh thin lutuk a natna ka neih vang te pawh a ni mai thei a ni



"Han inthlak la" ka nu in a tih chuan lu buk khum nghauh pahin inchung lamah ka chhoh san ta a, inthlak nghal ta mai lo chuan khumah ka mu a ka kal hah ve deuh vang nge ka thawk chu a rawn hah deuh a, ka lukham hnuai a inhaler ka dah chu la vatin ka ka chhungah chuan ka kap lut nghal a



Ka nu in min auh leh takah chuan in tifai zung zungin inhnuaiah chuan ka chhuk thla vat a, thingpui te kan in zawh a zan riah pawh kan eikham hnuah ka dan ngai te ang bawk in ka room bathlarah chuan thu chhuakin 'Michael Learns to Rock' ho hla 'Ghost of you' chu ka ngaithla a



Ka guitar chu la chhuak nghal vatin perh pahin ka sak pui leh rat rat tawh a, tiang a awm hi a nuam ka ti ber a; tun a ka awm dan hi tam tak chuan an peih loh in boring pawh an ti viau ang mahse ka tan chuan ka khawvel thian neih chhun leh ka inkawm tlei na a ni ve tlat!



Aizawla kan in sawn hma kha chuan inah ka awm chawt a, treatment lak ngai reng ka nih avang in school ka chawlh phah hial a mahse kan zirtir tu ten min hre thiam hlauh a class11 leh 12 pawh an mahni puihna a zarah tha takin ka pass ve thei tawk a ni ber ang chu



Ke a ka kal tawh lohna pawh kum a tling tawh; ka nu leh pa te hian engkim ah dim dawi takin min enkawl mai bakah thil hahthlak leh hau tak min tih tir tawh ngai lo, ka nau hi mipa niin Aizawl kan awm hma zawng kha chuan ka driver hi a ni ringawt bawk a, a chang chuan han nin chang te pawh ka nei ve lek lek thin reng a ni



Rei pawh awm lo in mu turin inchhung ka lut a, damdawi ka ei tawh avangin a inhnawih chi chu ka mut hma in ka inhnawih leh phawt a vawiin ka kal hah ve deuh vang nge ni tur a ni ka chau deuh riau pek a, khum a ka mut fel hnuah ka lu in lukham a deh rual rual chuan ka muhil nghal ni maiin ka hria, ka harh leh chuan a lo tlai ve tawh kher mai



Nidang lo ang takin tukin chu ka tho tlai a, nimin lam vang te pawh kha a ni mai thei mahsela nidang zawng aiin ka mutui hle thung, inhnuai a ka chhuk chuan phawk lek lekin ka nu chuan min lo en a "Ehh...! Exer i la mek ang chu ka lo tia, i tho ve chiah ami?" Tiin min zawt nghal reng a



"Aaa...aw, ka mutui lutuk a thawh ka hai a" ka tih chuan "Vawiin class i kal dawn em?" Tiin min zawt daih a "Kal ang, ka lut tlai sia kal loh nghal ngawt pawh a nuam lovang mahse tinge min zawh?" Tiin zawhna ka lo siam sak vat a "I tho tlai em a, na i neih ka ring ringawt" a tih chuan ka nuih a za kher mai



Dar8 a pel fel der tawh a, ke a kal ka duh leh avangin ka nu pawh pui buai tawh lo in insiam turin inchungah ka chhoh san ta nghal a



Vawiin hi eng ka hria chu nimaw! Inchei a lang ve tlat a, ka mithmul sam tlak kawlh vek tawhna chu a awm ang thei tur berin ka line ve a, ka sam lem rei tak ka hman tawh loh chu la chhuakin ka khuih mawlh mawlh bawk a



Ka hmaiah engmah ka hnawih theih loh avangin cream chauh ka hnawih a, ka sam khuih mam sa chu uluk takin ka lu khuhtu sam nei lo ah chuan ka khum bawk a, mahse thlah ta mai lo chuan ka chhipah ka zial tawm vek thung



Ka hoodie neih zing a ka duh ber leh ka ngainat ber var thianghlim sar 'Champion' brand ngei mai chu ha in pants tial ka ha bawk a, a ti rem leh zual turin 'Nike air force' var sar chu ka inthawlh bawk a, ka room ka chhuahsan hma chuan uluk zetin ka in en leh te te phawt a ka hmuiah engmah ka la hnawih lo tih ka hriatchhuah avangin ka biang sen tuk nen a inrem turin lipstick mad chu tlem ka inhnawih bawk a



Inhnuaia ka thlen thlak rualin ka nu leh pa te chuan ka hau in min lo en a, nuih tlawn ti tihin "Tinge?" Tih leh ka awm danah dik lo a awm a nih ringin ka in en kual nghal vat a "I va hmeltha ve...!" Ka nu chuan a ti hluai a nuih hak hak pahin "Ka phur thut a" ka ti ve mai a



"Lo haw nachang te kha hria la aw" min fiam pahin ka pa chuan a lo ti ve bawk a, lu buk khum nghauh nghauh pahin "teh reng mai" ka ti a "Hruai i ngai dawn em?" Ka pa bawk chuan a rawn ti leh a "Ngai lo ang, min ngaihtuah duh suh u" tiin ka lo chhang thung



"A nih chuan fimkhur la aw, inhaler te kha i pai em?" Ka nu in a tih chuan "Pai e, min ngaihtuah duh suh u rilru dam deuh khan awm rawh u" ka ti a, an rilru a nuam zan lo tih chu hre reng mah i la, helai hmun a kan awm chhung chu ka natna theihnghilh thak khawp a awm ve ka duh a ni



"A nih chuan kal tawh rawh, ke a kal i duh tlat si a kan ti khaw tlai rei mai mai che" an tih takah chuan engmah pawh sawi zawm tawh lo in ka chhuahsan a, kal kawng a ka kal lai te chuan keimah chu ka confi ve em em ringawt a lukhum khum a ngaih loh vang nge ni a nga sam lem ka vuah vang zawk pawh ka hre lo!

[Ngaia]

CHAPTER-3


College ka thlen chuan dan ngai te ang bawk in min en leh hrek hrek tawh a, 'Aaa... Engtin pawh hian inchei ila min en hrek hrek tu hi chu an awm ve ngei ngei a nih dawn hi!' Ti rilru neuh neuh in classroom lam ka pan ding ta nghal a



Classroom ka thlen rual a, phawk fe a min lo en tawk lah bo lo hahthlak hlawm hian! Ka thutna lamah chuan pheiin ka thut fel rual deuh thaw chuan tu emaw hi a lo kal a



"Mi tharnu vawiin i chicks ve deuh alawm" a rawn ti hluai a "Zawma tunge i lo va biak leh hman daw daw a" tih pahin tu emaw hi a phei a, a hnungah Will an a lo zui ve bawk



"Eheee.... Mi tharnu i va chhelo ve" kan bul a lo thlen rual in chupa pawh chuan a rawn ti ve nghal a, e nge maw an hriat teh hrep hlawm ni! "Mi tharnu hei hi Zawma a nia chuan kei chu Remmawia" a rawn ti leh nghal zung zung a, a va mak teh chhen ve le aw



"Chuan" ka lo ti bul nghut a "Aaa... Engmah ka sawi ve mai mai" tiin a lu a hiat nauh nauh a "Vawiin chu khawi lamah nge ni ang?" Will chu a biak chhun zawm ta daih a, ka ngaihsak zawm tawh lem lo



"Mi tharnu kan inhmu leh dawn nia" a kal hma chuan a ti leh hram a, hemi te ho hian e nge maw an hriat a ka hming a min koh theih reng reng loh hlawm ni! Ka chhang buai peih lo... Ni lo chhan tlakah pawh ka ngai lo a ni zawk mah



Will rawn thu thla ve pawh chu ka lo ngaihsak teh chiam lo a chutiang bawk in amah pawh chuan min ngaihsak vak bik lo tih a hriat, "Will vawiin tlai chu i hman thei dawn ta em?" No fahran a hmeichhe pakhat in a rawn biak chuan ka lo nui hak, an pahnih chuan phawk fe in min lo en dun a



Hre lo derin ka phone chu ka khawih chhun zawm daih thung "Ka hre lo le" pakhata lah chuan a tih san thung "Awi hman lo tum la, i thian te vang chuan kan tih tum hi thulh tawh lo ila" ngen ngawl zet a a tih leh chuan "Kan ti dawn nia" tha tak chuan a chhang veleh mai bawk a



"Ka ring che nia aw, keipawh ka thian te nen a kan tih tum ka thulh ve phah a nia" vau aw ka lek lek a a tih chuan "Ka hria lawm, kan ti dawn nia" a ti leh a, chunu chu lawm tih hriat takin nui vur vur chungin a thutna lamah a phei nghal a, an awm dan chu an inngaizawng ve deuh a ni ngei ang



Rei lo te ah lecturer a lo lut a, a thil explain lai te chuan ka mutchhuak lutuk chu ka bu ka bu leh thin a; a tawng muang ang reng bawk sia chuta karah kan zirlai chhung a lut ta mai lo in a sawi kual peih em em mai leh nghal



Ka lo thle leh bak bak thin a, a hnung lama thu ka nih avangin ka muthlu lai pawh chu min hmu mai bik lo a ni ngei ang, ka hma mi te min hliah thei tur ang ber chuan ka awmdan chu ka siam rem sauh sauh a, dawhkan bawh meuhin ka mu a



Min sawi nak nak tu ah chuan ka harh a "Miss Zotei'n ding tur in a ti che" a tih avangin peih lo zet in ka ding a, phawk fe in midang ho chuan min lo en thap a Miss Zotei tak ngial pawh chu a thil sawi lai chawl meuhin min lo en ve ran a



Chutia min en thap chu ka bang bo ang reng hle thung a "Harsatna i nei ami?" Miss in a tih chuan a sawi awmzia lah chu ka bo telh telh thung a, ding turin min tia ka ding a harsatna ka neih leh neih loh min zawt leh daih chu mak ka ti khawp mai



"Ding turin min ti bawk sia..!" A ngaihna hriat loh hmel tak a ka tih chuan midang ho chu kan lo nui huk a, Miss ka en lah chuan nuihza hmel a put ve awm pawhin ka hrelo



Ka bul a mi chu rang lutuk in ka en thla vat a, nuihza in sum tih hriat takin a hmui a lo pet ngar ngar a, 'Ngawi teh hepa hian min tih der chiang a ni!' Ka ngei lutuk chu ka melh rum nghek ringawt a, a ni lah a nuih a za zual ting emaw tih mai turin a lo awm thung



"Class lak laiin i lo muthlu a ni maw?" Ti a min zawh leh takah chuan zah lutuk vangin ka hmai sen sa chu a sen belh tawn tawn ta veng ang maw le, ka zah luatah leh ka mutthluk ngei avang chuan chhan dan tur mai ka hre lo a



Ka ngawih tak reng avangin "Thu la, nidangah chuan mutthluk tawh loh tur aw" tha deuhin min hrilh a, a sawi zawh rual deuh thaw a thu thla vat in ka bul a mi chu kan melh rum leh nghek ringawt a



Ni thum ni ah pawh kan la in mil ta lo fo zel chu a nih hi, ni lo ni khatna atang khan ka mil tawh lo sa hrim hrim "I mutui bawk maw" nui ruh ruh pah a a tih chuan chhan en ah pawh ka en lo ngei hi tawng kam hi sawifiah ngai se amah hian an kim vek ang chu maw le



Class kan bang chiah tih chuan phone call ka dawng a ka en chuan ka pa a lo ni "Aw pa" ka ti nghal a "Lam i ngai dawn em?" Leh lama mi chuan min rawn zawt a "Ngai lo ang keimah in ka lo haw ang" ka tih hnuah eng eng e maw te chu a sawi leh duah a, fimkhur tur a min tihna vel te chu a ni kan inbiak zawh chuan call chu ka off a




Ka kal leh tur chiah chu bike hian chak lutuk in min rawn tlan pel leh a, tunge a khalh tu tih chu ka rin thiam nghal ruak mai; a hrim hrim in hepa hian nga ti nge ti em em a chak a a khalh ziah leh, min su tep ziah leh nghal!



Gate pawn ka thlen chuan a kal daih tawh ang chu tih nak alaiin a lo ding reng a, ding leh tur tho si khati vak a tlan chak kha a tul hi kan ti lo mai mai khawp a; kal pelin thui pawh ka kal hma in ka hnung atang chuan "Engloi" a rawn tia



"Aw nangmah kha, kal zel kha" a ti leh a, tu ber nge a tih pawh ka hre lo mi chu an kal ve tho bawk sia "Engloi" a rawn ti leh a, keimah a nih ka la rin chuan loh avangin ka kal zel tho a "Hoodie Girl" ring tawk taka a rawn tih leh takah chuan kal luih zel na chi pawh a ni tawh lo



Ngawi teh nichin khan engtin nge min koh kha "Engloi" min ti maw! Ka ding chawt a, a lamah chuan ka inher vat a "Engloi, ka rual a haw i duh em?" Ti a min lo zawh chuan ka bul vel a mi te chu an nui huk a



"Hming ka nei ve, i duh duh danin min ko ziah suh" ka lo ti bak hlar a "I hming ka hre lo ka tih tawh kha" dar chhin ak a a tih leh chuan kei ka lo thaw hak thung "I chuang ve duh em" thum dut a a tih leh chuan "Duh mai mai lo" ka ti a, in her in ka pen nghal pawk pawk bawk a



A lak a nelawm tak a ka awm lai pawh ka hre si lo a, min nel em em ringawt bawk si kei ni lo in amah zawk hi a mawl tak tak zawk a niang! Min rawn hmu hman ang tih ka hlau lutuk chu pen mai pawh duh tawk lo in a tlan in ka tlan a, min hmu thei tawh lo ang tih hun awm ah chuan ka ding a



Ka thawhah lo chhuak leh bawk nen ka bag chu hma lama kuai pheiin inhaler chu ka la chhuak rawk rawk a, ka ka chhungah chuan ka kap lut nghal a; maimitchhingin van lam ka hawi a thawk ka la nghal pawk pawk bawk a



Ka zia deuh hnu chuan muang changin ka kal chhunzawm leh a khawi lai emaw atang hian a rawn lang leh hlawl ang tih hlau chuan ka kal pahin ka kiang vel te chu ka melh zak zak bawk a, thlamuang tak pawhin ka haw lo a tih theih ber ang chu! Kha mi mawl lutuk pa vang vek kha



Thlamuang takin ka haw ve tawh dawn emaw tih nak alaiin kan in thlen hma chiah kawiah chuan a lo ding vang tawh a, tinge hepa hi khawi hmunah pawh hmuh tur a awm a! Ka tah te lam lam pawh a tichhuak mai dawn



Amah kal pel te chu ka huphurh zo vek tawh a mahse ka hawnna kawng a ni miau bawk si, hel dawn lahin kalna kawng dang ka der bawk si lo; huphurh ru tak chung chuan ka kal ve ta zel a, a zawn ka thlen chuan mak deuhin min be lo ve ngei a



Ka thaw huai a ka lawm ve hman tawh teh reng nen "Engloi" a rawn ti thum leh dut a, a enga mah hma hma chuan "Ka be peih lo che" ka lo ti nghal tawng a, khik suk pahin "Ka hlauhawm vak lo a nia" a rawn tih chuan rum lutuk in ka lo melh thung



"Engloi tih i duh loh chuan thenawmnu ka ti mai ang che" a ti leh hram a, a ngaihna a awm thlawt lo thaw hak pahin "E nge i duh?" Ka ti a "Engmah" a ti sam leh et bawk si, awi a awmdan hi ka hrethiam teh nuaih lo, min chhaih nuam a ti ve hrim hrim niin ka hria



"A nih chuan ka kal thei tawh angem?" Insum lutuk a aw pangngai thei ang ber a ka tih chuan "I thu vek" awlsam zet hian a ti leh a, a ngalah tak sawn ka pet chawrh loh nan ka in sum hram hram a ni ber



Awi hepa hi ngati nge a chimawm thiam em em mai le? Hahthlak zawk hian! Mah se vawiin a in chei dan kha chuan ka mit a la ve thlawt, a body nen zawng zawng khan inhmeh tak hi a ni ringawt



Leader jacket dum hnuaiah tshirt var a ha a, a jeans khup tet hnuang te leh a kicks dum bun te chuan a ti lang pa tawp mahse a chimawm tih mai loh chu! In a ka luh chuan "Mate, monday kha in treatment la tura kan kal hun kha a ni leh tawh a" ka nu in a tih chuan ka hnual leh nghal vek in ka hria



"Nu phai lama kal buai zel ngai lo hian he lamah tih dan a awm mai lo a mi? Tunah college ka tan veleh chiah a, kar pawh ka kal tlin hma in ka chawlh a ngai leh nghal ringawt dawn a" ka tih chuan "Ka hre lo le, kal phawt ila i awm dan a zirin he lama in enkawl dan te kan ngaihtuah dawn nia" a ti a



Hmunpui lama kal zel ngai lo a heta kan in enkawl thei dawn a nih chuan chu chu ka duh daih zawk, school ka kal lai pawhin chawlh ka ngaih phah a engmah pawh ka ti ve hman tak tak ngai lo a tunah college ka kal ve leh thei chiah a kar pawh ka kal tlin hma in treatment la tura kal leh angai tawh a



Heta kan in enkawl thei a nih chuan college pawh ka kal chhunzawm reng thei dawn a chu chu a zia ka la ti daih zawk bakah tuar thei lo khawp khawp a han na em em ka ni hran lo a, tuna ka buaina awm chhun chu ka thawhah hi a ni mai a



Mahse chupawh ka hah chang chauh in a nia, hah eng ang mah ila inhaler a awm chhung chuan ka ngaih a ngam ve tho bawk, haw chauh e ti lo chuan insiam turin inchung lam chu ka pan ta nghal a



Han ken em em tur ka nei loh mai bakah taksa lang thei kawr pawn lama ka hak chhuah ngai loh avangin tshirt tlem leh hoodie ho chu ka khung khawm mawlh mawlh a, pants hak nuam thei ang ber nen tichuan ka insiam zo chu a ni der



In lamah hi chuan tuman min hmuh dawn loh avangin tshirt lian pui leh boxer hi ka ha mai zel a, chutia inthuam chu ka tuam tih ber a ni bawk, ka ken tur ho ka khung fel zawh chuan in tifai turin bathroom lam ka pan a



Ka in tihfai zawhah zanriah kil turin inhnuai lam ka pan thla ve ta nghal a, chaw ei lai te chuan he lama in enkawl ka duh tawh thu chu ha hipin ka sawi a; a nih na takah chuan ka kal peih tawh lo a ni ber ka nu leh pa te pawh chuan tih dan an ngaihtuah tur thu te chu an sawi ve bawk a, tlem chuan thawk khat chu a veng ve ta deuh e



Chaw te kan ei kham a, ka nu ka tihfel pui hnuah ka room lamah ka chhoh san a, bathlarah chuan chhuakin ka dan ngai te in hla ka play leh a; zanin chu guitar ka la chhuak lo ve teh mial bawk



Ka hla ngaihthlak pah chuan van lam hawiin ka maimitchhing a, ka hla ngaihthlak chu feel ka tum a ni ber mahse ka mitthla ah mi mawlpa a hlir kha zu han lang a! Vawiin a a inchei dan mawlh mai chu mitthla ah a rawn lang chuai chuai a, a inhmeh tak zet a ni



Tuma lawm si lo in a vawikhat na atan mahni chuan ka khi leh suk suk thin a, a inhmeh ve bawk em a ni; amah ah khan sawisel tur lai reng a awm pawhin ka hre lo, a palian bawk sia chuta karah a hmel a vai veng leh nghal a



Chutia ka ngaihtuah veng veng lai chuan khawilai emaw atang hian 'thenawmnu' a rawn tih thum dut rual chuan rang lutuk a mengin min ko tu awmna lam ni a ka hriat chu ka hawi a, tumah phei zawng ka hmu lo



Kei hi ka ngaihtuah nasa lutuk a nga min au aniang ka ti ta ringawt a, ka thutna chu siam rem leh sauh sauhin ka awmdan ngai ang chiah chuan ka awm leh a, ka maimitchhing leh diar diar tihah nichin a min rawn koh dan ngai bawk khan min ko leh a



Tuna aw ka hriatna phei hi chu nichin ai mah khan a hnai leh tawh zawk "Tunge?!!!" khur ti tih a ka tih chuan min chhang tu an awm leh ta lo, ka hlau tan ve lek lek tawh ka hawi kual lahin tumah ka hmu bawk si lo, a thim lam chu thuhran nise zanlamah hian ka khaw hmuh a fiah tel lo leh zel bawk nen



Light hnuaiah a nih ngawt loh chuan tun ang thim lutuk karah hian tumah ka hmu thei ngai lo, light lah ka lo off khanglang bawk nen ka awm chu a nuam lo tan der tawh a; duhdah zet a ka thut ang pawh khan ka thu ngam tawh lo



Ka hawi kual hrek hrek reng a engmah thildang phei zawng hmuh tur a awm hran lo chutah ka phone ri thut ah chuan ka phu chiang kher mai, ka thutna atang chhuatah ka tla thum bal a rang lutuk a tho nghal vatin ka phone chu ka ban nghal rawk rawk a



'Company call' lek chu niin! Hlauh lai lai a chutia hun lo lutuk a company call lo kal te chu a huat hian ka haw hlur ringawt a hahthlak zawk hian! Ka rilru a nawm theih tawh ngang loh avangin luh mai tum a ka inher chiah chu ka hnung atang bawkin 'thenawmnu' a rawn ti thum leh dut a



Ka leh hawi a mahse tumah ka hmu leh ta chuang lo, lo kal vaih teh se ka khawng thlu lawlh ang tih rilru pu in nghet lutuk in ka phone chu ka hum nghet sauh a; khur hlawk hlawk a ding ve ran chung chuan tawng lo chhuahna tur lam chu ka ngaithla ran a



"Tunge i nih? Lo kal ta che" tih pahin ka hma leh sir vel te chu ka rin vai thuak thuak a tumah an awm lo phawt chu a nia nga ka vai fuh loh danah "Lo kal ta che, min cho a mi" tih leh ka posi chu in sual peih at in ka siam rem nghal bawk a



Mahse ka tum loh deuhin nui ri ka hre zawk a! "Hei ka awm reng hi min hmu na nge" tih pah chuan a nui kur kur a, a nuihna lai hriat tum a ka beng ka dawh pawh chuan ka hre thei mai lo chutah light chu a rawn in on a



Hnung lam ka hawi rual a ka thil hmuh chu! Min hmuh rualin amah pawh a nui lai a tawp riai riai a, nui hmel kha mak tihna in a inthlak tawh zawk chetsawn na chang hre lek lo in ka din ngai a ding reng chungin amah pawh chu ka en ve ran a



"Aahh... Tinge i lu chu?" Phawk lek lek a hriatthiam loh hmel zet a mih zawh chuan harh chhuak vatin ka lu chu ka khawih a, ka sam lem khum kha ka phelh tawh tih ka hre chhuak nghal zat; ka lam pan a a rawn kal chu kei ka lo tawlh hnung thung a



"Thenawmnu khawnge i sam?" Ti a mak tih hmel tak a min zawh leh pawh chuan chhan ngaihna ka hre lo a hmela mak tihna lo lang leh a thil min zawh dan te avang chuan ka tah a chhuak ringawt a, ka biangah ka mittui a far thla nghal zawih bawk a



Min rawn khawih a tum chuan lo awm sawn nghal vatin ka mittui chu ka hru nghal tawk a min lo pan a tum leh chuan "Ding rawhhh.." Ka ti vin nghal tuarh a, a hma aiin a hrilh hai hmel tawh zawk, hrehawm ka ti lutuk leh ka zak lutuk chu awmngaihna pawh ka hre tawh lo!



[Ads kha min lo click sak ve hram ula chuan ka story te ngaihnawm in tih a in ngaihnat zawng a nih ve chuan like leh comment kha min lo tih sak ve hram bawk ula🤌]

[Ngaia]

CHAPTER-4


Thla khat lai treatment la a kan awm hnuah vawiin hian Aizawlah kan haw chho leh tawh a, chutia harsatna ka neih vak loh avang leh Aizawl lamah pawh kan in enkawl theih tawh tur thu doctor in min hrilh bawk a, ka hlim tak zet



Mi pangngai ang kan nih lohna chen a tam a, in uluk kan ngaih bik bakah mi tih ang zawng zawng kan ti ve vek thei lo a eitur lam thleng pawhin thlan uluk a ngai thin khawp mai, bawnghnute leh artui duh lutuk ka ni thin a mahse he ka natna nen a a in hal tlat avangin ka ei thei tawh bawk si lo a



A chang chuan tah te hi a chhuak ve thin, dam tawh ila tih chang te ka nei ve thin a mahse a dam hlenna tak tak a awm bawk si lo; a zualpui tur ven nan damdawi hnawih that kha a ni mai a, a chang chuan a buaithlak ve lek lek thin reng a ni



"Mate i duh leh lo han mu hahchawl la, kan thil hawn ho hi kan tifel nghal lawk ange" ka nu in a tih chuan ka hnial hran lo, ka chau ve bawk nen mut pawh ka pawi tih loh avangin ka thlang ta zawk a mu turin ka luggage nen chuan ka room lamah chhoh san a



Ka thawmhnaw ho pawh dahtha hmasa lo in khumah chuan a zangthal zawngin ka let thla nghal tawp a, ka mut a chhuak viau na chu kan kal hma zan kha mitthla ah alo lang a mak a tih zia leh a hrilh hai hmel mawlh mai te kha nizan ang maia chiangin ka mitthla ah chuan a rawn lang zut zut a



College kal pawh ka huphurh zo vek tawh, engtin nge ka tih ang hrehawm ka tih rualin ka zak a ka nihna zawng zawng a hre tawh ni maiin ka hre bawk a chu chuan ka awm a ti nuam hlui thei mai, tihngaihna lah a vang ropui mai bawk si




Ka kawngka ri dat dat thawmah chuan ka harh hlawl a "Mate, chaw kan ei tawh dawn a tho tawh rawh" ka nu in a rawn tih chuan ka muhil tih ka hre ve chiah, ka thil ngaihtuah lai khan ka lo muhil a ni ngei ang tho chhuak vatin inhnuai lamah ka chhuk thla ve ta nghal a




"Naktukah i nau pawh hostel atang alo chhuak dawn a, kan hruai chhungin in i lo nghah angai ang" ka pa chuan zan riah kan kil lai chuan a ti dap dap a "A dam nange?" Tiin ka lo zawt ve nghal vat a "Dam e, an exam zo tawh a" ka nu in a lo tih chuan ka hre ve chiah ka nau pawh rilru ah a lang hman tawh hleinem le



Kan unau hi kan chhang a khat hlawm em em mai leh nghal a, ka u hian pasal nikum khan a nei a kei college ka kal ve mek bawk a chutih rualin ka nau ve thung chu class11 a ni mek bawk "Ka ngaih zia hi a awm rei leh awm si lo a" ka ti niah niah a




"Heta a awm chhung chuan i class kal tur pawh a thlah hman ang che chu" ka nu in a ti leh a, a pawi ka ti miah lo hman zan atang khan ke a kal pawh ka phur leh vak tawh lo haw kawngah min zawh tum phet hian min zui ang tih te a nia ka hlauh ni




Chaw kan eikhamah ka nu chu ka tihfai pui a, chawl tura min tih pawhin ka duh bik lo na deuh ang hian min treat tlat zel lai hi a buaithlak na lai a ni ve a; thil pawh ka tih tum angin ka tih theih loh phah fo reng ani, ka zawh hnuah room a chho lo in sitting room ah chuan ka awm ve reng a



Ka pa chuan inkhel a en a, ka nu nen chuan inkhel en hi kan tui ve vak lem lo thung, ka nu malchungah chuan mu in instagram ah lutin explore ah chuan thil ka en en mai a; chutia mi thlalak ka en kual mai mai laiin thlalak pakhat chuan ka mit a la riau pek a, enchiang turin chu thlalak chu ka hmet a




'Will Zomuanpuia leh a bula ding chu a bialnu ni awm tak te an ni' caption lah chu an thlum tha em em mai leh nghal a, a bula a lakpui nu chu ka hriat sa tho kha inla tawngno fahrani kha a ni, chhuak leh nghal vatin thildang chu ka en leh ta daih a bialnu nei reng si a min chhaih reng te chu a bialnu in a hre ve lo a maw ni dawn le?!




A rei deuh ah chuan mu turin ka chhoh san a ka thawmhnaw engmah ka la dah fel loh avangin ka tifel hmasa leh te te phawt a chumi hnuah inbual turin bathroom lam ka pan leh ta a, ka inbual lai chuan ka piah mai in atang chuan tu emaw hi ring leng lawngin tial lutuk tak maiin a zai ruah ruah a




A zaithiam loh dan chu pui tak a ni, a zai ni pawh in ka hre chiah lo a au in a au ni berin ka hria, speaker ah a play bawk si a music lah chu a ri dum dum leh nghal a beng a fah fahran lo khawp mai, kei ve lemin hla hlui lam nalh kan tih reng nen a chhan pawh a hla hian lung a kuai ka tih bik bakah a music ri del del te vang hi a niang



Feel pawh a awl bik alawm! Ka chhuah hnuah damdawi chu ka inhnawih leh te te a, mu turin ka khumah chuan ka lawn ta nghal a ka mu fel awrh tihah chuan bathlar lamah chuan ri leh rek rek hi ka hre thin a, ka thu chhuak nghal vat a



Eng e a ni tih fiah turin ka chhuak phei ngam der bawk si lo chupawh hman zan vang vek kha a ni ngei ang, a lo awm leh ka ring tlat pek a; thawm engmah a awmzui leh tak lo ah chuan ka mu tha veleh a mahse thlamuang pawhin ka mu lo thawm a awm leh awm loh chu ngaithla pahin ka mu meng kur a



Mawl lutuk khapa vang vek kha, awm nuam pawhin min awm tir thei lo ka hlau chu ka ti lo mahse ka ngaih a tha zan tawh lo a ni ber. Thawm ka ngaithla reng emaw ka tih laiin ka harh leh chuan zing a lo ni tawh a, tho chhuakin ka in tifai hmasak phawt hnuah inhnuaiah ka chhuk a



Tumah an lo la tho lo, an chau ve a ni ngei ang ka tih theih tawk hmun te chu ka phiat a ka zawh hnuah chaw ka chhum a, ka chhuang fel awrh tihah ka nu chu a lo tho a "Morning i va hma ve" min tih chuan "Morning, nizan ka hmu hma lutuk a" ka ti ve a



Rei lo te ah ka pa pawh a rawn tho chhuak zui ve nghal a, vawiin ah ka nau Lallawmawma naupang chimawm leh nghal a lo haw dawn a ka phur tawh tak zet, ka mal tawh lo deuh dawn tihna pawh a nia tuk thuan eikham atang chuan ka nu leh pa te chu ka tur sek a han kal tur in a la hma an ti bawk si



Thil thar nei tur ang maiin kei ka lo phili buai leh vek tawh, ka awm cheng cheng a ni ber ka nau neih chhun ve em em a lo haw dawn a ka phur lutuk tawh tak zet, a tawp a tawpah chuan an chhuak ve thei ta hram a; an kal hlan te chuan ka tih tur hre lo lutukin a room chu vawi hnih lai ka han tifai tawh a sana ka en lahin dar12 a pel tawh bawk si an rei hi kan ti tawh mai mai khawp a



Ka ning tawh lutuk chu tum burin thuthlengah ka mu tau sawk a, rei vak lo ah chuan kan kawngkhar a rawn ri ta khep mai rang lutuk a thu chhuak in kawngkhar lam chu ka melh vat a ka rin ang ngeiin a rawn haw ta, ka thutna atanga tho chhuakin an lam ka pan a ka nau chu ka kuah nghal bawrh bawrh a



"A na min thlah tehhh" a tih pawh chuan ka la thlah duh lo "U min kuah nghet lutuk ka thaw tha thei lo a nia" a tih takah chuan ka thlah ve ta hram a, ka nu leh pa te an lo nuih hawk hawk laiin Lawmsabengtunga lah chuan rum lutuk min lo melh khai khai thung a



"Khatin mi melh ziah suh, Sabengtung" ka tih chuan a lawm loh hmel kher mai "Sabengtung mi ti ziah suh a thing si" a ti nghut a "I nihna chiah alawm, sang si, zawr bawk si" ka lo ti nghal zat zat a "I ninawm" a ti leh hluk a "Min ngaih em kha" tih leh ka mit ko ka san khum ak ak a



"Kha in inhnial leh tan dawn, duh tawk teh u" ka nu in nui chunga a tih ve takah chuan min melh rum khai khai paha luh mai a tum chuan "Blehh i hmelchhia" ka lo ti hman hram pek a "Zawnghmaisen" tih leh min luh san a rual a, ka va han ngei mai mai tak! Ka biang sen vang vekin 'Zawnghmaisen' tiin min ko ve ziah leh nghal a




Inchhung kan luh hnuah ka pa chuan a exam chu a tih that leh that loh a zawt a "Eee... Lungngai suh pa, kei i fapa rangkachak chhuanvawr hi maw pakhatna ka ni dawn" in ti thei zet a a tih chuan ka ei lo nasa mai, ner khum nang nang pahin "Awi nang kha engtik khawtikah mah pakhatna i ni lova nge" ka lo tih khum a "I hre bawk lo" a tih chuan "Inchawi ila" ka ti leh a



"A nih pakhatna ka nih chuan eng e min tihsak ang" te chu a la ti tak deuh deuh a "I duh duh, mahse i nih loh chuan i hoodie kha min pe thei" ka tih chuan "Ka peih leh lo" zu han ti hmak a! Kha thil kha chu a roh ve thlawt alawm, a bialnu in a a birthday a a pek ve kha a nia, a nalh ka ti sia hak ka dil lahin a phal ngai lo reng reng



Tlaiah ka nu ei rawng ka bawl pui a, ka pa thilsiam ka nau in alo pui thung chaw ei kan peih meuh chuan dar6 leh chanve a lo pel tawh a "Nu ka ril a tam tawh nia chaw ei siam vat teh u" a rawn ti lut bui bui a, a lo haw khan rei lo te kan thu chawl a, ka pa in a thilsiam naah pui tur a a phut ve tlat avangin a hnial ngam si lo a an inpui kha a nia, engmah a la ei bawk si lo nen a ril chu a tam ve tawh ngawt ang



Chaw kan ei lai chuan "U a nuam em, in college thar chu" tiin min zawt ve ngei a "Aw a nuam lutuk" ka ti a "Chicks an tam awm" a tih chuan ka nu leh pa te an lo nui hak a "Awi i zak lo naupang mai ila nih kha" ka lo ti khai khai a "A ho e, chicks an tam awm ka ringawt alawm" ngaihsam zet chuan a ti liam leh puat a, a thawveng lutuk leh ka nu leh pa te hma a sawi awm leh awm lo a hre lo lutuk hi ka lo zak zawk thin




"Nih chicks an awm i hriat duh chuan min thlah la" ka ti leh a, a lo phur hmel nasa mai keipawh ka nuih rik ngawt phah alawm, chaw eikham ah ka nau chuan min awl ve ngei a kei room lamah ka chhoh san thung; ka tawng tam vak lo bawk nen thutpui ve mah ila han sawipui tur hi ka hre ngai thin lo a, ka nau alo haw tawh bawk a, ka nu leh pa te chu a titi pui leh teuh thei ang chu maw le



An khawhar na te pawh a hnem ve deuh bawk ang a, kei ai thlawt chuan a ti hlim thiam reng bawk a kei chu an rilru hah na thlen tu mai niin ka in hre thin a chang hi chuan khumah a zangthal zawng a mu in hla ka ngaithla a, ka kawngkhar chu an rawn kik ri ah chuan ka tho a ka hawn chuan ka nau a ni



Bathlar lamah kan inzui chhuak a, ka nau a awm ta bawk a ka ngaih a ngam deuh e "Bialpa i nei ve tawh em?" Thu tak zet a min zawh chuan ka lo nui hak hak thung "Nei hmel ka pu mi" ka ti liam satliah a "Hre nang ka zawt ve mai mai che" a tih chuan a ti awm ang lo hi kan ti khawp a "Min en la, bialpa nei thei pawh ka nih loh hi!" Ka tih leh chuan "A ho e, nangmah duh tak tak tu che chuan maw i awmdan a care lovang" te chu a ti ve ngei a



A dar a ben sak thak thak pahin "Ka nau hi hmuh loh chhungin alo va puitling ta ve" ka ti hluai a, tiang thu hi a sawi ngai lo a mak pawh ka ti reng a ni "U in college ah chuan miin an chhaih che a, an ti duhdah che a nih chuan min hrilh rawh aw" a ti leh a "Ngatan nge i tih?" Ti a ka zawh chuan "Eleee... Ka lo kal ang a ka rawn sawisa ang" a tih chuan za lutuk in ka nui chhuak a



Mak tih hmel fe in min lo en thung "Eng e a ni lawm, i nau hian ka chhan zel ang che" te chu a ti leh a, nia min chhan tak tak reng thin bawk a Aizawl a kan in sawn hma pawh khan school ah he natna vang khan chhaih nawm nah ka ni thin, natna in kai chhawn theih ang ten an ngai a ka hnaih ah pawh an awm ngam loh chu sawi loh phar chhuah in min chhuah thin



Kum lamah chuan ka nau ni mah se, ka tan a ding tlat thin a min chhaih nawm nah tih a hriat chuan min chhan ngei ngei zel "A ho lutuk, college zirlai ka nih ve tawh hi khang hunlai ang kha chuan min ti bik nang bakah thingtlangah pawh kan awm tawh lo a, khawpui mi te chu an rilru a zau alawm" ka ti duah a, engmah phei chu a sawi chhunzawm tawh lem chuang lo



"Mu ila, naktuk min thlah a ngaih kha i mut har chuan thawh i hai ang" ka tih leh takah chuan min hnial bik em lo hei hi a nia ka nau ka ngaih em em na chhan tuman kan unau khan min cho ngai lo kan tetlai a, a tan tu zawk leh ka nau hmaa ding thin kha tunah chuan ka hmaah ka nau a ding ve tawh thung a min ti na tu an awm emaw min chhaih tu an awm chuan ka tan a ding thin



"Mate, class i kal dawn em?" Ka nu in ka room kawngkhar kik dat dat pah a a rawn tih chuan phak chual in ka meng a "Tho tawh rawh, class i kal dawn chuan a tlai tawh a nia" a ti leh a "Aw ka lo tho" tih leh ka lukham hnuaia ka phone dah chu ka la chhuak a, sana ka en nak chuan dar8 leh a chanve a lo ri hnai thuak tawh, hmanhmawh lutuk a tho in ka in tifai zung zung a



Ka insiam nghal a, phur fahran lo mah ila ka sam lem chu ka khum ta tho a inhnuai ka chhuk chuan ka nu pawhin chaw ei a lo peih fel der tawh a "I tlai ang ei nghal mai rawh" min tih chuan an lo ei ve hun pawh nghak tawh lo in chaw chu ka bar nghal mawlh mawlh a, ka hmanhmawh bawk nen ka helh awl awl leh nghal



Ka nu chuan tui min rawn pek vat pahin ka hnung min zut sak a "Muang chang khan ei rawh, i nau in a thlah dawn che ni lawm ni" a tih chuan ka hrechhuak veleh chiah "Khawnge?" Chaw hmuam tun pah a ka zawh chuan "A la tho lo in ka hria" te chu a la ti tak deuh deuh a, hmanhmawh lutuk a khamin inchungah ka tlan chho a, a room kawngkhar sawi nawk nawk pahin "Sabengtung tho rawh ka tlai" a ti chel chul a



A thawh mai theih loh avangin ka chum bawk a, a rei a reiah chuan "Awww... Ka lo tho" peih lo hmel zetin a la ti bai bai zui, inhnuaiah chuan ka nghak a a hman har hrep leh nghal, bui luka inchung atanga a lo chhuk chuan "Hmanhmawh rawhhhh..." Ka lo ti bak hlur a "Zawnghmaisen, min lo tur sek suh" min la ti let er zui



College kan thlen chuan ka la tlai lo hlauh, tlai a lam ka ngaih leh ngaih loh tur thu min zawh chuan ka ngaih thu a hrilh in ka kalsan a class ka thlen chuan tlar hmasa ber a thu chu bia in thutna inthlak thleng puiah ka sawm a, a lo rem ti ve mai a a kal sawn hnu chuan tlar hmasa berah ka thu ve ta thawr a



Will a lo luh hun tur mawlh chu ka huphurh ru tak zet a, ka lo thaw dep dep hi a ni ber; rei lo te ah a ni pawh chu a thiante ho nen an rawn in zui lut a, tlar hmasa ber a ka thu min hmuh chuan a meng phawk ve lek lek a mahse insiam tha leh nghal vat in min kal pel in a thutna lam a pan ta daih a



Min biak ka rin teh reng nen min hre lo ang hmak a awm leh min be miah lo a min kal san daih chu ka rilru a na ru khawp a, ka rin dan ang chiah a ni; tunah chuan ka nihna a hre tawh bawk a, biak en ah min en tawh lo te pawh a ni ngei ang ka zak in ka tha a na riau pek a, hrehawm ka ti tak zet bawk.




[Ads click kha theihnghilh lo hram ila, chuan ka story te in ngaihnat zawng leh ngaihnawm in tih zawng a nih chuan like leh comment kha min lo tih sak ve hram hram bawk ula]

[Ngaia]

CHAPTER-5



'A pawi lo ve e, a duh leh min be lo se a ni min biak loh avanga ka rilru natna chhan tur a awm lo emai' ti rilru nauh nauh chung chuan ka thu tha sauh sauh a, a reng reng thuah kei hian min biak ka lo phut a maw?! Huh... Awm ang lo leh lutuk mai, mawl te chu ka in ti tha leh hnuhnawh khawp a



Break a nih pawh chuan min la be ta lo fo a, a melh pawh min melh eih lo nia maw le! Ka awm ve lo ang hmak a a ngai chu ka ti thei leh thak lo, sam ka nei lo tih a hriat vangin min be duh lo tih ka hrethiam mai, ka rin dan reng pawh a ni. Chutiang vang mai mai a inbiak duh loh chu a ho ka tiin ka run khawp leh nghal a



Keimah atanga chimawm chakna thlipui lo lut mek chuan min tur et et reng a, sual thiam ka chakna thlarau in min man tlat pek a nih chu mawle! "Zomuanpui lo ngai reng mah rawh i chak lo teh ang chu" mahni leh mahni chuan ka phun ser ser a, ka chak lutuk tawh te chu a zat in ka za cheng a nia ka hriat tawh ni



Class banah gate bulah ka nau chuan min lo nghak vang tawh a, a bul ka thlen rual rual in "Khawnge chicks chuu...?" A lo ti nghal tawng a, he nau han lerh em em dan hi chu! chicks buaiin a buai "Ka hre nang, zawng la i hmu mai ang chu" ka lo tih san hmak a "Van skew reuh tak" te chu a ti leh nghal a



Bike a chuan mai ka tum chu, kan piah lawk a Will bike lo ding ka hmuh chuan eng e maw tak hian min mawlh a, engtin a maw tak a a bike tih chu ka chak riau pek a; a helmet tlem te a ka tih ran sak pawh kha a thinrim pui tawh a nia, tun a ka tih tum phei hi chu a thin a rim pui leh dawn tih ka hriat rual chuan mahni in ka nui kar kar a



Ka bula mi lah a hawi hai nasa hle thung, bike a chuang ta mai lo chuan "Min lo nghak lawk aw" tih leh kan piah lawk a bike din na lama kal chu ka rual a "Eng nge i tih dawn?" Ti a min zawh pawh chuan "I hre mai ang" tih chauhin ka lo chhang thung



A bike bulah chuan ka ding ta vang a mahse han tih dan tur chu ka hre mai lo, ka kut lawng chuan engtin mah ka ti thei dawn lo tih ka hria a; ka bul a lei ah chuan eng nge maw hriam a awm ringin ka kun nghal duk duk bawk a



Ka nau lah chu a hlauhthawn nasat tawh hmel kher leh nghal a "Û... Lo kal rawh, mi'n an lo hmu che nge" a ti sek a "I ninawm, lo nghak mai mai teh" ka lo ti bak hlar a, chutah ka piah lawk a perek lo awm vang chu chhar in ka nui ver ver a



"Lo en rawh, he thil te reuh tê hian eng nge a tih theih kan hmuh ang che" ka nau awmna lam a in her pahin perek chu ka hmuh a "Eng nge maw tih i tum le, a nei tu in ka hriat vaih chuan min hau ngei ngei ang" hlauthawng zetin a lo ti leh a "Ka hlau lo ve e, a ni te mai mai" tih leh Will bike awmna lamah chuan ka in her san a



Thu hniamin perek chuan a bike ke hma chu tih thep sak ka tum ve rawk a mahse a harsa phian leh nghal, rei fe ka beih hnuah ka hlawhtling ta hram a; ka thawh chhuah rual chuan kan hnung lam atangin "He..Heih nangnu kha!" A rawn ti hman tawk, leh hawi ve nghal in lei ka chhuah khum vak ringawt a



"Thenawm" a tih rual chuan a chawl dat a "Engloi lo kalsawn miah suh, i dinna ngaiah khan lo ding ang che" min kawk meuh a a tih rual rual chuan hmanhmawh zetin bike ah ka lawn nghal a, ka nau chu tlan turin ka tur sek a "Kal suh ka tih che kha ding rawh!" A ti vin leh tuar a



Kan tlan chhuah hmaa ka va hawi phei leh chuan kan bul alo thleng thuak tawh, a hmel te lah chu to haw tur ang maiin a dur khup leh nghal a, hawi let leh vatin "Tlan rawhhh" ka ti vak a, hmanhmawh lutukin ka nau pawh chu a tlan ve ta nghal a



"Thenawmnu, chinawmnu i chak dawn lo" a tih ri chu ka la hre pha tho a, min lo um pawh tum se a bike ke ka tih thep sak miau avangin min um ngaihna a awm dawn lo; thui fe kan tlan hnu chuan ka nui vak vak a ka nau lah chuan hriatthiam loh hmel zetin min rawn en leh zuk zuk thin bawk, bai chhuan so bawrh bawrh ang vel in a thinrim hial a nia ka rin ni. E.... Ni leh lo, a liamin a liam zawih zawih ang chu maw le



"Tunge khapa kha û?" Ka nau in min zawh chuan "mi nghal leh chimawm eltiang a nih kha" ka lo ti vei hmak a "Nangpawh i chimawm ve tho kha" nui ruh ruh chung a min lo tih chuan ka melhrum nghal vak ringawt a "Sabengtung ngawi mai teh" tih leh a helmet ah chuan ka chum sak a "Ana nia" a rawn ti nang nang a "Khalh mai mai teh" ka lo tih san thung



In kan thlen chuan ka nuih za pawh a la reh thei lo inchhung kan luh rual rualin ka tum nghal vak vak a "Tinge i û saw?!" Ka nu in mak tih hmel lutuk a ka nau a zawh chuan "A a tawh a nih saw" tih leh ei loh hmel zet in min lo en a, ngaihsak lo in inchungah ka chhoh san daih thung, naktuk 'Inrinni' a ni hlauh chu a tihzia khawp mai



Ni lo se zawng ka chan tur chuan maian chan pawh a tluk pha lovang "Û tunge khapa kha?" Ka hnung lam atang a a rawn tih chuan ka phu zawk mai, min lo zui ve awm lai reng reng ka hre miah lo "I hriat ve zel a ngai lo" ka tih san hmak a "Min hrilh loh chuan a bike ke i tih thep sak kha ka nu ka hrilh a ni mai" tiin min vo ve khang lang a, a sawi tak tak a nih chuan ka tih chhan min zawt a nga min hau dawn tih ka hrechiang bawk si



"Mi nghal a nih kha" ka tih chuan awih loh hmel fe in min en ren rawn a "Ngee... I awih lo ve khang lang a mi a?" Cho ar a amah en pah a ka tih chuan "I duh chiang" a ti leh hram a, he nau nghal leh chimawm lutuk hi chu! Zomuanpuia nen awm dun se an inhmeh tawk chauh ang chu maw le



"Kal teh, ka inthlak dawn" ka tih chuan a kal veleh mai bawk a, ka nau nen a kan awm dun tawh hi chuan inhnial inpeih at hian kan awm a maw tih mai tur hi kan nia, sawi tur a hre leh lutuk hi a tawp ah a tlawm zawkah ka tang leh nge nge zel



Zanriah eikham ah ka nu leh pa te dam lo kan a an chhuah avangin ka nau nen chuan ka room bathlar lamah kan awm dun a, a bialnu chungchang te chu min hrilh vei luam a; an inhmeh ka ti tak zet, a mawl ang ai hian a bialnu nen an ni rei ve phian tawh leh nghal a, kum thum dawn chu an in zui ve tawh bawk



Sabengtunga mawl vang ka ti dawn nge? A bialnu fel zar a zo ka ti zawk dawn pawh ka hre lo. "Khaw maw i phone kha min lo pe teh, i hla ngaihthlak kha a thing si hla hlui kan ngaithla dawn ro ro a nih chuan hei hi a nalh zawk" tih leh ka phone chu ban a rual a 'Elvis Presley' an 'Can't help falling in love' tih a sak chu a play ve ngei a, ka nuih a ti za ru khawp a hetiang hla a hriat ve pawh ka rin loh teh reng nen a hre ve khang lang chu a ni sia



Ka nau nen chuan hla dang dang te play in kan sak pui a, chutia hlim deuh a kan awm lai chuan a vawikhat na a tan ka message ringtone chu a rawn ri vat vat a, ka hawn a ka en chuan number hlang hi a ni. "Tunge maw ni dawn le?!" Ti niah niah chungin message chu ka hawng a



Awi leh hei chu ka duh dan a ni hauh lo! Kan mawl muk a a ni tih hriat lutuk in message ah chuan "Thenawmnu ka bike ke i tih thep man kha i la hre dawn khawp" tih hi min lo thawn a, ka chhiar zawh rual in ka chil ka lem khalh a ka hawi kual nghal ruai bawk a



A chhan chu kan bul hnaiah a lo awm leh hlawl ang tih ka hlauh vang a ni, ka phone chu dah rawk rawk in ka nau bulah chuan "Lut ang" ka ti nghal chung chung a, a ni lah a lo awm nuam hman tawh a ni ngei ang "Engeee..?" Mi tih sak duh lek chauh a



"Min hnial lo khan lut ang" ka ti leh a "Eng nge maw i hriat le, a la nawm em hi" a tih chuan "Lallawmawm mi hnial suh lut ang" ka ti bak hlar a "Zawnghmaisen i duh leh lut la, ka la awm duh alawm mawle" min nin hmel zet hian a ti leh a, kei ka lo thaw hak thung



"Thu mai mai teh, awmzia awm lo ah i phi cheng zel mai" min rawn tih leh chuan, melh rum khai khai pahin ka thut na ah chuan ka thu tau sawk sawk a "A eng nge maw i hriat le" min rawn thlek deuh ha pah a min tih leh chuan "Aw i hmelchhia" lo tih san hmak in leh lam ka hawi nghal a, a la nui tak ang vur vur a khawn thluk pawp hi a chakawm rum rum zel



Rei pawh ka thut hma in ka message ringtone chu a rawn ri leh a, ka en chak bawk si ka ngam chiah bawk si lo chu ka phone ka tuai ka tuai a "Message i dawn kha en ta che" ka nau in a rawn tih chuan "Ka hriaaa.." Ka lo ti bak hlar a, nuih hak pah in "Nu te thinawrh nu" min la ti let erh zui nia!



Ka phone chu on in phur fahran lo chuan message chu ka hawng leh a "A hma a ka helmet i tih ran nen khan i chak dawn lo THENAWMNU" chiang zet in a rawn ti leh a "Kut thlawn ka ba ngai lo" tih te mai hi ka thawn let ve ta nge nge a



Message chu a rawn thleng leh nghal zat a "Kut thlawn ba lo tur in i lakah tih ka neih awm ka hre lo" tih hi a rawn thawn leh a, nghal lutuk!


"Ka number i neih dan sawi rawh" a thil rawn sawi chhang lo chuan ka number a neih dan chu ka lo zawt daih thung a, tuman an neih ka rin loh teh reng nen engtin nge he pa phiangsen hian a neih pawh ka hre nek lo e a!



"Ka neih dan hriat i duh chuan engvanga ka bike ke ti thep kha nge i nih sawi phawt rawh" a rawn ti leh nghal kher a, mai mai chuan ka chhang awm lo e ti chungin phone chu ka hma dawhkanah chuan na zet in ka nghat chawrh a



Ka nau lah chuan phawk fe in min lo en ve bawk "Tinge a?" A rawn tih chuan "Tu emaw ramhuai zawl in min rawn bia" ka ti hmuk a, nuih hak hak pah in "Ramhuai zawl in an rawn be thei che chu a va mak ve" min tih sak a, a ni pawh hi ka chhang peih lo



Thinrim leh hlauh in pawlh nen ka nau thusawi pawh chuan min ti thinrim belh vel vek tawh, message chu a rawn thleng leh a; kan hawn leh tak tho kha! Hahthlak hian! "I sawi duh loh chuan ka sawi dawn bik lo" tih leh emoji chapo hmel zet hi a rawn dah tel kher a



Chhe hri hre reuh lutuk mai "Ninawm ka mu dawn" tih leh inchhungah chuan ka nau chu ka luh san ta daih a, eng khaw sawi set set lo in ka khumah chuan ka let thla nghal tawp bawk a; ka thinrim lutuk chu ka badsheet ka tham nghek nghek ringawt bawk



"Zomuanpui hmelchhe in la cham pa, i ngam ngam ka ngam" tih hmarh hmarh pah chuan ka lukham te chu ka pawt sawi leh nawk nawk bawk a, amah vangin ka badsheet leh ka lukham in a tawrh hrep phah!



Ka lo muhil tlang a ni ngei ang ka harh chuan a la hma ang reng khawp mai, tun lai chu thawh ka hai reng a exer pawh ka lak that loh phah a tukin chu lak ka tum ruh ve khawp mai; tho chhuakin bathroom ah ka va in tifai hmasa leh te te phawt a, chumi hnu chuan exer la turin in atang chuan ka chhuak ta nghal a



Ka tlan hah theih loh avangin chak deuh in ka kal a, kawi ka thlen atang chuan ka hnung lamah min zui tu awm ang tlat in ka hre leh pek tawh a mahse exer la ve tho a nih ringin ka ngaihsak duh lem lo, chutah leh "Thenawmnu" ka hnung lam a mi chuan thum dut in a rawn ti leh a



Tunge a ni tih hrilh hranpa ngai lo in ka hre nghal Will Zomuanpuia ngei a ni! Ka chil ka lem kharh a, a hma aiin ka kal chak zual sauh bawk. Tinge he pa hi keimah a ka awm lai kher a ka nan thin le hahthlak zawk hian!




"Thenawmnu" nui suk a a rawn tih leh chuan ka thau ah a man tlat tawh, a in rin hma chuan posi la sauh sauh in ka tlan thut a "Ding rawh" tih leh min rawn um a rual ve nghal a, awi a tlan chak ropui si ka leh hawi a piang lah chuan min um pha tep mai leh nghal



Hah viau tawh mah i la ka ding duh bik lo, ka din rual a ka chan tur chu ka hre ve kar bawk si; thawk lak belh sauh sauh in ka tlan leh a min rawn um phak hma in kawia ka liam hman ka in ring a, tum ang ngei in kawi ka thlen chuan ka leh hawi leh a, a hmel ka hmu mai lo chu ka lawm tak zet. Motor kawngsir a lo in park ka hmuh rual chuan chu mi lamah chuan ka tlan phei nghal rawk rawk a



A hnungah chuan ka bi ru a, motor zawn a rawn tlan thlen chuan ka bi ru tih a hre lo a ni ngei ang a tlan zel a, a liam tep tih ah chuan chhuak nghal vat in "A nih leh mai aw" ngeiawm zet a a hriat tur a ti leh kher in kan in lam a tlan let leh ka rual a "Chimawmnu i chak dawn lo, ding rawh" tih leh min rawn um let ve leh a




Exer ka lak tawh zawng zawngah chuan ka la hah ber tum a ni hial ang chu maw le! Ka hah mai pawh a ni lo, ka tlan chak ber tum pawh a ni ang, ramhuai speed nen a min rawn um a nih ngawt loh chuan min um pha hman teuh lo, ka tlan chak ve e



Ka tha ka thlah duh bik lo a, ka tlan ngar ngar a ni ber; kan mi mawl lianpa vang vek chutah ka thaw a rawn hah tan a, ka tlan tha thei tawh lo. Ding dawn i la min rawn nang chin ang tih ka hlau ve bawk si, chak deuh a tlan erawh ka thei tawh lo ka hnung chu ka hawi leh zauh zauh thin a min rawn um phak leh phak loh ka ngaichang a ni ber



A rawn lan tak mai si loh avang in ka tlan muang ve ta deuh a, ka la ding duh chuang lo van lam hawiin tawk ka la leh kawk kawk thin a; ka awm dan chu a nuam tawh lo tak zet, ka awm te hi a sak ve tawh in ka hria



Ka thaw hlei thei tawh meuh lo a, ka thin zawn te chu a na thip veng veng tawh a chutah ka khaw hmuh chu a rawn chiang lo leh zel nen, ka hai chhulh tawh a ni ber. A hrehawm lutuk leh ka thawk sak tawh lutuk chuan ka taksa zawng zawng chu a ti zawi vek in ka hria a, tlan pawh tlan tawh lo in ka kal a ni tawh zawk mah ang chu



Ka tlu tep tep a, kawngsir a footpath ah chuan kal in railing chu vawn chhan pahin ka kal a inhaler ka keng bawk si lo nen thih chiah ka hmabak tawh ni in ka hria chutah hah tih hriat zet in ka hnung lam atang chuan "Ka um phak loh che hi i ring ami?" Thinrim seh chilh nak a a rawn tih chuan tlan leh turin chak na ka nei tawh lo



Ka awm dawm vang vang pahin ka thaw hlawi hlawi a "I chimawm hle mai, i la kal lui zel a" ka hnunga kal ve zel pahin a rawn ti leh a; engtin mah min tih chu a tum mai bik loh hmel, a hah ve vang pawh a ni mai thei zawk



"Chimawm chhuah tawh lo khan ding rawh" vin that a a rawn tih leh chuan ka hlau lutuk chu ka khawng nghal vek in ka hria, ka awm a na tawh bawk nen boruak kham khawp hip tur ka nei tawh lo a ni ber, ka awm dawm reng chung chuan ka mittui a far fep fep bawk a



Ka awn riai riai a, leiah ka tlu tawh dawn a maw ka tih laiin kut hrawl leh lian zet hian min rawn dawm a; min dawm tu hmel ka en chuan Zomuanpuia a ni! mittui luang ngiai ngiai pah chuan "A na....a na lutuk" thei leh thei lo hian ka ti chhuak a



A mangan hmel tak zet "Khaw...khawilai nge na?" Ti a min zawh chuan "A na" tih chiah in ka sawi thei, a na ve bawk em a ni; "Nang hi min tih der i tum a mi?" A rawn tih leh chuan ka thin a rim tak zet, ka hmel atang pawh hian ti der hmel ka pu in a hria a maw ni le!



[Ads click kha theihnghilh lo ila, chuan ka story te ngaihnawm i tih zawng a ni a, i ngainat zawng a nih chuan like leh comment kha min lo tih sak ve hram hram bawk la]

[Ngaia]

CHAPTER-6



Ka awm dan a hmuh atang chuan ka tih der loh zia a hre ve tawh a ni ngei ang, a hlau thar leh ta lutuk chu over hi kan ti hnuhnawh leh khawp a; theih chang lul se zawng north pole atangin south pole ah ka pet leng dawr duh hial in a nia ka rin ni



"Damdawi inah ka hruai ang che" a tih chuan lu ka thing a "In inah ka hruai haw mai ang che aw" a tih leh pawh chuan ka la duh ta chuang lo, a na bawk si ka thawk harsat tawh lutuk avang leh ka ka ang meuh a ka thawk takah chuan a ngaih a tha tawh lo tak zet tih ka hria mahse min hruai haw ta se ka chhung te hlauhthawn tur zia leh mangan tur zia ka hre ve kar bawk si



"I duh lo zel a, engtin nge ka tih chuan a nga?" Hlauthawng zet a a tih chuan thei leh thei lo in ka nui hak a "Tiang i ni tawh chung pawhin i la nui thei a nia, eng ei chi nge maw i nih le?" Min tih chuan ka melh rum nghal vak ringawt a, ngeiawm leh lutuk mai!



Chhang turin tha tak ngial pawh ka nei tawh lo, ka thawk harsa lutuk leh ka awm na vawng vawng chu a hrehawm tawh tak zet a, ka kut pahkhat in ka awm chu ka dawm a pakhatin a kawr ban chu ka tham a engmah ka sawi thei tawh lo chu ka mittui a luang ngiai ngiai bawk a




Amah chu min pui hram tur a mit mengin ka en tlawk tlawk a ni ber tawh, han tih vak dan lah a hriat loh hmel bawk si; ka thi thei tak ngial dawn in ka hria a, a kawr ban chu a ai nasa chuan ka tham vak a "Mi... Min pui rawh" thei leh thei lo in, harsa ti lutuk chuan ka ti chhuak thei hram a



Damdawi in a min kalpui a tum lah in ka duh bawk si lo, min haw pui a tum lah in ka duh chuang bawk si lo. A thiam ang ang chuan ka hnung te chu zut ve bawk mah se, a pui lem lo khawp mai ka tawt up up tawh a chutah hriat chhuah nei ni awm takin a kut leh lam zawk chuan a kekawr ip te chu a zen rak rak a



Chumi hnuah a phone chu phawrh chhuak in tu emaw hi a call a "Lala thawhah hi engtia buaipui tur nge?" Tih vel te chu a ni a zawh ni mahse tunge "Lala" a tih pawh chu ka hre chuang lo, a ngaihthlak uluk hmel khawp mai lu a bu leh zauh thin a




An in hrilh zo tawh a ni ngei ang, phone chu a kekawr ip te ah bawk chuan a dah leh nghal vat a chutah min pawm in mi min hmuh vak theih loh na turah chuan min kal pui nghal hlawk hlawk bawk a, tu te emaw garage ah ni mai in ka hria min kalpui a



Lei ah chuan min nghat hmasa phawt a chumi hnu chuan a hoodie hak lai chu phelh leh nghal sawk sawk in ka kham theih tur chuan a rawn dah a; min tung tho leh in ka bra kilh na chu a phelh ta mai! eng nge a tih tum ka hre bawk si lo min ti hlauthawng tak zet a chutah ka hoodie hak lai rawn phelh leh a tum chuan thei leh thei lo in ka lo in dang ve tun bawk a



Min nuih suk pah in "Engtin mah ka ti lo ang che" a ti a, ka kawrlum hak lai chu phelh lo se ka ti tak zet. Phelh leh a tum pawh chuan ka lo la vuan ve tang a "Min ring rawh" ti leh sup in min phelh sak a, a chet dan chu mak ka ti tak zet mah se min pui tu awm chhun a nih avangin ka hnial thei bik si lo



A phelh rual a ka ban a hmuh chuan a phawk kher mai, ka vun phuhlip nuaih leh beng kang mai a a tih sen tawl tawl te chu a hmuh hmaih bik lo tih ka hria; insiam tha leh nghal vat in ka kekawr kawng suihna chu min phelh thawl sak leh a




CPR chu a hniam ang tawk in min pe ve a, a changin ka kawrlum chuan min zap leh thin a; rawn thu hniam leh in min thut tir a ka hnung chu dim te in a zut a, min mut that tir leh in min siam rem leh nghal zat a, min zah chhunzawm leh nghal bawk



Tiang chuan rei fe a tih hnuah kei pawh tlem tlem in ka pangngai chho ve hret hret a, ka lawm tak zet. "I zia awm deuh tawh em?" Min ngaihtuah hmel tak a a tih chuan lu ka buk khum ringawt a, a hmel ka en chuan a hlauthawn zia ka hmu thei a min ngaihtuah hmel tak tak bawk



Ka hnuk a ulh thut a, ka tah a chhuak tak zet bawk. Ka kekawr kawng chu tha tak in min suih sak leh thlap hnuah a ngai ang bawk in min thut tir leh a ka bra chu min kilh that sak leh thlap bawk, chutiang a dim dawi tak leh duat hmel tak a min ti chu ka lawm rualin hrehawm ka ti a, mahni in khawngaihna in ka khat a ni ber




Ka in hnit hrawih a, ka kawrlum chu chhar in min ben fai sak thak thak a; min hak tir leh hnu chuan a kawrlum chu chhar ve vatin in tifai tawh lem lo chuan a ha nghal thung. Leiah chuan min awm tir ang ang in ka la awm a, a hmel pawh ka en ngam tawh lo



"Lo kal rawh le, haw tawh ang" tih pah a a kut min rawn pek chuan ka tah chhuak tawh lutuk chu ka in sum zo lo a ni ber, ka kun tlat a ka mittui chu a far fep fep bawk; ka chhang lo a, che chang lo in ka awm reng a rawn thu hniam in a kut pahnih a ka biang a rawn dawm in amah ka en theih tur chuan min kuai dak a




Ka mittui tla a hmuh chuan a nui suk a "Hmeichhe chhel tak i ni" min rawn tih chuan ka tah a chhuak zual sauh a maw tih mai turin ka mittui chu a luan in a luang a "Lo kal rawh le, haw tawh ang" min duat hmel zet in a ti leh a, min kai tho nghal zat bawk



Haw kawngah te chuan a tu a mah mah chu kan tawng lo a, ngawi rengin kan kal a ni ber ang chu; sawi tur ka hre lo a, chutiang bawk in amah pawh chuan a hre lo ve tho a ni ang. Tinge he pa hian ka chak loh na lai hi thil ho te vang in min hriat sak reng mai le?




Kan in zawn kan thlen chuan hreh tak chung a en in "Ihh... Nichin vang khan ka lawm e" ka ti zawi sap a "In enkawl tha la, lut tawh rawh" min nuih sen sen pah a a tih chuan ka chhang tawh lo, min kuah na atanga in la hrang vatin in ah chuan ka luh san ta nghal a



In chhung ka luh chuan ka nu pawh a lo tho tawh a "Vawiin chu exer i va la rei ve" ti a min zawh chuan sana ka en nghal vat a dar8 a lo ri hnai thuak tawh "Nia, ka kal thui deuh a" tiin ka chhang ta ringawt a, nichin a ka thil tawn zawng zawng te avang khan ka tawng peih viau rih lo a ni



Engmah pawh sawi chhunzawm tawh lo in inchungah chuan ka chhoh san a, room ka thlen rual in khumah chuan ka let nghal tawp a; ka awm chu dawm vang vangin ka maimitchhing a, nun pangngai tak leh dam tha tak ang a ka awm ve dawn apiang in keimahah hian harsat na dang a rawn thleng ziah a, ka hne tawh tak zet



Ni leng chuan ka room pawh chhuah san lo in room ah chuan ka tawm reng a, chaw tak ngial ei tur pawhin inhnuai ka chhuk peih thlawt lo; Sabengtunga chu eitur ka in pek tir a, a chhan min zawh lah in assignment kan ngah thu in ka hrilh ringawt thung



Tumah an lo luh theih loh nan ka inkalh khum tlat a, khumah chuan mu in zing lama ka thil tawn vel te chu ka ngaihtuah let a, ka zah rualin ka lawm a mahse hrehawm ka ti tel tho bawk si; mak ka tih em em chu ka taksa a hmuh khan min ten ang a khalai hmunah khan thi tur in min kalsan daih ka ring a



A ni hauh lo, min ten a hnek in ka vun phihlip leh bel kang ang mai a ka vun sen hlur te chu a hmuh loh awm hmiah hmiah a, min khawih bawrh bawrh te chu mak ka ti tawp thei lo. Mi fel tak niin ka hriat bakah a rilru pawh chu tha ka ti thar hle a, tlem chuan amah ka ngaihdan a dan hret phah bawk



Amah ka en chian khan a hmeltha tak zet, a kut zung tang sei leh zen thlarh te, a hmelthat ang chiah a a pian nalh tak te kha a hma khan engtin nge ka lo hmuh loh theih thin zawk le; ngo ti a sawi tur ni miah si lo in a hang leh chuang miah lo bawk a



Zo lutuk a min pawm a min kal pui hlawk hlawk lai te khan eng nge maw a ngaihtuah ve chiah ang le? A hlauthawng hmel te kha! Awi kei hi ka a tak zet tawh. A ni kha ka ngaihtuah a maw? Hmeltha te ka ti leh nghal hahthlak zawk hian!




Amah ngaihtuah in ka nui vel a nia, awi leh ni lo... A ni thei lo kei hian Zomuanpuia hi ka duh tihna em maw ni dawn le? Chu zawng a ni thei lo ang, nghal ka tih em kha! Mahse tun a ka awm dan hi chu mi in duh an nei a an awm dan ang chiahin a ni ka awm ni



Mawl min tih kha ka mawl tak tak zawk a ni ang a! Duh ang a ka in hria chu ka duh lo khawp a, ngaihtuah loh ka tum a piang lah in mitthla ah tuk in zing a a chet dan mawlh chu a lang leh thin a, ngaihtuahna dang pu thei lek lo a amah chauh ka ngaihtuah zel mai chu ka in hrethiam tawh bik hauh lo



Zanah pawh chuan Sabengtunga'n chaw min rawn pe leh a "Nang hi i bialpa nen in in then a mi?" Ka chaw eitur dah pah a min zawh chuan "A teuh lo" ka lo ti teu hlar a "In zep buai tum lo mai rawh, i awm dan atang khan ka hre vek" in la hre zet a mithmul min san khum zeuh pah a a tih chuan "I hre lo tawp a nih chu" ka lo ti bung leh nghut a



"Ka nu leh pa ten an hre tawh em?" Te chu a la ti tak deuh deuh a, bialpa tur pawh hmuh zawh loh nak a laia chutia min tih chhen le "Hre tur pawh in ka nei miau si lo a" ngeiawm lek lek a ka tih chuan "Nu tê thinawrhnu" mi ti zek a, a va buaithlak thin tak!




"Kal mai teh" melh rum tak a ka tih leh chuan "In la thu ve sia maw" a ti leh hram a, awi he naupang han nghal em em dan hi chu aw! Tu nge maw a chhun em em mai le, ka nu emaw ka pa emaw te naupan lai a chhun fuh a nih ka ring hial, ka chapal chu la kang in ka tin uai a "I kal dawn nge dawn lo?" Rum zet a ka tih chuan "Ka kal ka kal thinawrhnu in awrh zo vek rawh" nui thaw chungin a rawn ti leh hram a




A chhuak zet a, a kal tlang tawh mai dawn a maw ka tih laiin kawngkhar ah chuan rawn dak leh hram in "Zawnghmaisen" a tih rual rual in ka chapal chuan ka vawm a, a lo in dang hman hram pek a! He nau chimawm leh nghal lutuk hi chu nakinah ka la tuk zal ang maw le



Ni leng a room a tawm reng chu ninawm lamah a kal tan lek lek tawh zawk, ka khum atanga tho chhuakin bathlar lam chu ka pan a; ka thut fel hnu chuan hahdam zet a nghen chhan ngheng ar ar pahin van lam chu ka thlir a, hmuh a nuam tak zet boruak a thiang in thla leh arsi phe tuarh te chuan ngaih tur em em pawh nei si lo in ka lung a ti leng hle ringawt a



Chutia van lam hlir a ka awm mek laiin ka phone chu a ri a, ka en chuan number hlang a ni. Lak loh ka tum zet na chu thil pawimawh a nih ringin ka la a "Hello" ka tih rual in leh lam a mi chuan "Lo hawi teh" a ti a, mi pangngai ve tak ka be dawn a maw ka tih laiin Zomuanpuia lek chu lo ni in! A number ka la save lo tih ka hrechhuak leh chiah bawk



"Lo hawi teh" a tihna lam ka hawi phei chuan ka piah lawk ah a lo awm a, min en lem lo in van lam a en daih thung "Eng nge?" Ka tih chuan "A mawi asin" min la en chuang lo in van lam la hawi reng chung chuan a ti leh a, chhang lo in van lam chu ka en ve nghal vat a



"Immm... A mawi tak zet" ka ti ve sap a, leh lam a mi erawh a ngawi reng thung "Zanin hi a mawi zual bik" a tih chuan ka phu dawrh thei, ka bul maiah chuan a lo thu vang tawh "I van mawl tak, min ti phu lawm" phone pawh dah bik ta chuang lo in ka benga dawm reng chung chuan ka ti a



Nuih hak hak pahin "I en tui lutuk a, ka lo kal lai pawh i hre tawp nang" a tih chuan "Chimawm" tih zawngin ka lo chhang a, ka bula mi ve thung erawh chu a la nui hak hak reng a; khawdang hawi lek lo in amah chu ka en reng a, a nuih hian a hmeltha tak zet tih ka hrechhuak tel bawk



"Khatia min en reng a nih chuan ka hmeltha tak hi i en chuai vat mai ang" in la hmeltha zet a a rawn ti leh chuan rum lutuk in ka melh nghek ringawt a, chimawm taka a chet thiam mai bakah mi tih zah dan pawh a thiam tel leh zel a nih hi! Phone ka la dah lo tih ka hriat chuan rang lutukin ka hmet thi nghal vat a



A ni pawh chuan a dah ve mai bawk a "Zan in hi thla hlei nga zan a nia, thla khi en teh zan dang zawng aiin a bial nalh bik a sin" tiin van lam chu a thlir ve reng a, ama lama in her in amah chu ka en reng a "Tiang hi mawi i tih zawng a ni ve tho a mi?" Ti a ka zawh chuan min chhang lo in lu min buk khum ringawt a



Van lam pawh la en ta chuang lo in amah ngawt chu ka en reng a, tinge ka hmuh hmelthat tial tial mai le? 'Tukin vang tho kha a la ni ngei ang, a rei ang a nakinah chuan hmeltha ka ti leh tawp lo ang' tiin mahni leh mahni chu ka in hrilh mawlh mawlh reng a



Chutia ka en reng lai chuan min rawn melh ve chiah a, kan mit leh mit chu a in tawng chiang kher mai; rang lutuk a hawi sawn vatin "Aaa... Ihhh... Nia, a mawi a lawm" ka ti bah nuaih a, a nui suk ri chu ka hre nghal bawk "Hlimhlim" ti a min koh chuan phawk zet in ka en a



"Maww...??" Ka ti ha a "Ka ko che maw le" a tih chuan ka ngei leh pek tawh hle, mahse tuman 'Hlimhlim' tiin min la ko ngai lo a, amah chiah hi min la ko tu awm chhun a ni bawk "Ka hria lawm" tha tak chuan ka ti ve mai bawk a



Ka tih tur hre lo leh ngawi reng a kan awm tak reng avangin ka phone chu la in youtube-ah chuan 'Lionel Richie' an 'Stuck on you' tih hla a sak chu ka play a, mahse ka rin aiin ka feel phian



Stuck on you, I've got this feeling down deep
In my soul that I just can't lose
Guess I'm on my way, needed a friend
And the way I feel now I guess
I'll be with you till the end
Guess I'm on my way
Mighty glad you stayed



Chang khatna a sa zo chiah tih chuan Will chu ka lam lo hawi in min lo en a "Hlimhlim thian kan ni thei angem?" A rawn ti teh hlawl a, ka mak ti lutuk chu ka hau in ka lo en thung, a chhan chu kum tam tak thian ka neih tawh loh hnuah a vawikhat nan thian atan a min sawm tu ka neih vang te pawh a ni ang



"Min hlau lo a mi" amah pawh en tha ngam lo a ka tih chuan "Hlauhna tur i awm a mi?" A ti a "Ka hre lo mahse..." Ka tih leh chuan "Mahse eng nge?" Tiin min zawt let veleh khauh a "Kha mi te ang khan nakinah min zah puiin min kal san veleh duh mai ang tih ka hre si lo a" ka ti zuai raih a



"Kha mi te i tih chu hre ve lo mah i la, an ni ang kha chuan ka phat san ve hauh lo ang che" a ti leh a, ka lawm vang nge ka lungchhiat vang pawh ka hre lo ka hnuk chu a ulh leh tun ringawt tawh a


Van lam hawi a dak in ka mittui tla tur chu ka khap let sak sak a "I hria em, chhunah chuan van te khi a mawi in en na min pe tu a ni a, chhum te khian hahdamna tam tak min pek bakah amah vangin kan duh kan tih theih phah thin mahse thawk leh khatah kawl a lo phe a, tek a tla a van a chhum mawi tak tak te kha chhum dum in a rawn hliah khuh a rei lo teah ruahpui van awn a rawn sur thin" ka tih chuan hriatthiam loh hmel zet in min en a



"Tunah min zah pui lo mah la, ka nihna dik tak hi thup hlen theih a ni dawn lo nakinah chuan hmeichhe pangngai tak ang a an hriat thin kha sam nei lo a ni tih an la hria ang a, chu mai pawh ni lo in a taksa pum pui chu natna in a bawh khah luk chumi avanga mawi lo tak a awm a ni tih an hriat chhuah hunah chuan min la zah pui ve mai lo maw" ka ti leh duah a



"Mi lo ngaihdan tur che chu engpawh ni se, i thian atan a min pawm chhung leh min rin chhung chuan ka phatsan ngai lo ang che" a ti a. Ni e, hei hi a ni ka duh chu ka nihna ang ang a min pawm thei tu tur thian hi a ni ka lo nghah reng thin chu!



Ka tak a chhuak a, ka tawng leh a nih chuan insum zo lo in ka tap chhuak mai ang tih ka hlauh avangin ka hmui chu ka pet ngar ngar a; tun dinhmunah chuan hrehawm tih vang ni tawh lo in ka lawm lutuk vang zawk a tah chhuak ka ni ber



"Nangmah chauh i ni tawh lo tih in hria la, i kiangah ka awm ve reng tawh dawn tih hria la ka duh" a tih chuan ka tah nuih ta hak hak a, a ngaihna hriat loh hmel zetin min lo en thung


A lam a inher in thaw ka la hak a "Hetiang ka nih tawh hnuah pawh miin ka chung a ngilneihna an lan tir leh na hmasa ber a nia ka lawm tak zet" ka tih chuan ril lutuk in min en reng a mahse a hmel awm dan chu ka hrethiam lo, engmah phei chu a sawi chuang lo a



[Zanin chu tlem in ka rawn dah tam ve deuh e, naktuk zan lam chu chawlhni a nihna angin chawlh ve ka tum a chuan ads click kha theihnghilh lo hram hram ila, ka story te ngaihnawm in tih zawng a nih a in chhiar duh zawng a nih chuan like leh comment kha min lo tih sak ve hram hram bawk u la]