August Can't Forget BY Puii Kim L (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

August Can't Forget BY Puii Kim L (Completed)

Unread post by Ngaia » October 10th, 2021, 2:06 pm

88w48i9p.jpg
Chapter 1






University atanga ka haw lam, khaw laia ka kal lai chuan tu emaw hi ka hmaah a rawn ding thut a. Tu nge a nih ka hre lo, mah se nin hmel deuhin ka lo en.


"Ka duh lutuk che a, hei hi min pawmsak rawh," tih pahin ka hmaa ding chuan bawm lian vak lo, tuam mawi hi min pek a tum a.


Thil min pek tum chu ka laksak tumna ka nei lo, "Tu nge i nih a?" tiin ka zawt thung.
"Maw?" a lo ti hu thung. Ka zawhna vang chuan mak a tih hmel hle.



Chu pa chuan, "University-ah kan zir dun tawh a, class khatah kan awm bawk. Chu mai ni loin project kan tiho tawh a, thilte pawh kan eiho tawh bawk a," a ti duah a.


"Tu nge i nih ka ti alawm," a thusawi ngai pawimawh lo zetin ka lo tihsan.

A tawng leh hma chuan ka lo tawng khalh a,
"Min duh thu i sawi tiraw? Min duh rei lo ang," ka ti a, ka kalsan nghal daih.







Lawmsangzuali, kum 27, Mizoram University-a thawk lai ka ni. M.Sc ka zo tawh a, professor nih ka tum avangin professor hnuaiah assistant angin kum 1 vel chu ka thawk tawh. Ka bula rawn inpuang an awm leh nawlh zel. Mah se a ngai te bawkin ka hnawl ziah. A chhan chu hetiang inngaihzawnna hi ka tuipui lo, ka tuipui loh bakah min duh tak tak ka ring ngai lo. Ka lan danah chuan ka that hmel a ni mahna, mah se tu pawn chak lohna lai leh chhiatna lai kan nei vek. Heng ka chhiatna lai an hmuh hunah chuan min kalsan leh tho ang. Lalrinsanga tih ang chiah khan.








Inngaihzawnna leh inhmangaihnate nula la ni mah ila ka ngai ho lam ta vek mai. College ka rah tan ve khan mipa duh ve deuh hi ka nei a, Rinsanga a ni. Min then hma khan kar 2 chu kan inzui ve hman.



Kei hi hmeichhe thinchhe tak ka nih rualin ka zakzum ang reng, chu vang pawh chu a ni mahna thian tia sawi tur 1 bak ka neih loh. Thian dang ka neih loh avangin mi hmuhah chuan hmeichhe zakzum tak angin ka lang a ni ngei ang, Rinsanga chuan min bem ta a.



Mah se ka mizia dik tak a hre chho a, min ning nghal thuai. Ka thian tha ber nen chuan min bumin an lo inngaizawng ru a. A ni khan ka hmel chauh a lo duh a, keimahah duh dang engmah a nei lo. Min hmangaih thu min hrilh a, a nih chuan ka hmel chauh kha a lo hmangaih tihna em ni?




He thil thlen hnu atang hi chuan hmangaihna tih vel hi ka buaipui peih lo. Chu bakah inthian thatna tih vel hi ka awih lo. Thian ka nei leh tawh ngai lo. Hmangaihna dik tak a awm ka ring lo chu a ni lo, mah se ka rilru nat leh ka duh loh vang zawk a ni.








Thian ka nei lo ka tih tawh kha, vawiin hi tuman ka birthday a ni tih an hre hauh lo ang. Lo hria pawh nise min wish tu an awm pawh ka ring. Zirlai ka nih ve lai kha chuan kan class-a hmeichhe tam zawk chuan min ngei bakah min hlau hle. Ka mitmei hi an veng reng.








In ka thlen chuan dar 3 chauh a lo la ni. Ka nu chuan TV a lo en a, min rawn en zuai a, a hawisawn leh nghal. A ngaite bawkin min ngai pawimawh lo hle.



A hma kha chuan tiang hi kan ni bik lo. Mah se Usangtei a boral atang khan kan inkar a khi zau hle.
Ka nu dik tak hi kum 15 ka nih laiin a boral a. Ka pa hian kum 18 ka nihin nupui dang a nei leh. Chu chu tuna ka nu, Mazuali hi a ni.


Ka nu hrawn chuan fa bik a nei ve tho a, kei aia kum 2-a upa a ni. U sangtei nen chuan kan inkawmngeih bakah unau dik tak ang chiah kan ni. Ka nu pawh chuan min duat thin hle.


Vawi khat chu Usangtei nen kan leng chhuak a. Khawlaia kan kal laiin motor hian min su dawn a, Usangtein min chhanna lamah a boral phah ta a ni. Ka fimkhur loh vangin ka unaunu neih chhun chu a boral ta a ni.



Chuta tang chuan ka nu hian min haw ta em em a ni. Ka thiam loh a ni tih ka hria mah se kha thil ka tih luih a nih loh bakah ka duh dan a ni bik lo.




......




Lehkha ka zir lai chuan sana ka en a, dar 10 a ri tawh. Professor ni tur hian kawng a lo hahthlak khawp mai. Lehkha ka zir peih tawh loh vangin mu chunga lehkha bu chhiar ka tum a. Lehkha bu thar ka nei lo, ka chhiar hnu vek a ni. Lehkha bu bawm atang chuan lak rem ber 1 ka la chhuak a, 'August' tih lehkha bu a ni a, vawi tam tak chu ka chhiar chhuak ve tawh. Chhiar fo mah ila chhiar leh chu ka tum tho, ka ngaina em bawk a.






Ka lehkha bu chhiar tur chu mut chhuakin min zam avangin chhiar ta loin mut ka tum ta zawk a. Mut chhuak ta viau e ti lo chuan ka muhil thei lawk lo.


Ka mutthilh theih loh changa ka tih thin danin vawi 3 thleng ka chhiar a, ka maimitchhing. Mah se ka bul lawka tawng thawm ka hria a. Tun angah tu nge ka room-ah rawn lut ang.


Ka sirah chuan doctor leh ka pa hi an lo inbia a. Doctor-in ka room-ah eng nge a rawn tih?
Ka pa chuan, "A tha vek tawh inti si a ti nge hetia a awm leh?" tiin doctor chu a zawt a.
Kei min sawina em maw ni le.




Tawng chhuah ka tum chuan ka tawng chhuak thei hauh lo a. Chet pawh ka che thei lo. Maimizial an tih ang khan ka awmin ka hria.


Doctor chuan, "Vawiin lama a thil tawn eng emawin a thawn vang a ni mahna," a lo ti a.

Ka nu room-ah a rawn luh chuan min rawn hmu a, "Bawihi chu a harh tawh a nih saw," a rawn ti a, mak tak maiin ka che ve leh thei hlauh. Ka thaw huai mai.




Eng nge thleng ka hre lo, tun mai khan ka maimit chhing chauhin ka hre si a. Tunah doctor leh ka nu leh pate an lo awm ve bawk si.





"Eng nge thleng? Engtin nge ka awm a?" tiin ka zawt a.
Ka pa chuan, "I dam lohna a rawn chhuak leh thut alawm le. Engmah i hre tawh lo em ni?" a ti a.


Eng dam lohna nge a sawi ka hre miah lo. Dam lohna tia sawi tur ka nei ngai si lo.


"Pa, eng dam lohna nge i sawi? Dam lohna ka nei hleinem, ka tha vek alawm," ka tih chuan ka nu leh pa, doctor te nen chuan mak an lo ti ngei mai.


"Ti nge pa ti a min koh tak mai? Tiang khan min ko ngai si lo a," ka pa chuan a ti a.

"Eng nge maw i sawi le? Ka pa i ni miau alawm," ka ti leh. An 3 chuan an inen hrek hrek mai.





Doctor chuan a torchlight ken chuan ka mit a rawn chhun a.
"I mitmengah dik lohna a awm bawk si lo. Ti nge i patea hi pa ti a i koh tak mai?" a rawn ti a.



"Tu patea maw? Ka pa a nih hi," mak ti deuh hian ka lo chhang.


Ka pa chuan, "Bawihte, kei hi i pa nau, i patea ka ni tih i theihnghilh ta em ni?" tiin min zawt.





Eng nge maw an sawi le? Thil thleng hi engmah ka hre thiam ta miah lo mai. An ni hian min fiam kual chu a ni em lo maw?







Ka nu chuan, "Mental hospital-ah khan a awm leh rih a ngai dawn a ni ang a," a rawn ti a.

Chu veleh kei chuan, "Eng nga? Mental hospital a?" ka lo ti hu. Kei hi mental hospital-ah min dah a tum em ni a?




"A that loh chuan dah leh mai pawh a pawi lo," ka pa chuan a lo ti bawk.


"Tak zet hian! Eng nge thil awmzia? Ti nge mental hospital-ah chuan min dah ang a?" ka lo ti hlar.





Doctor chuan, "Engmah i hre tawh lo em ni?" tiin min zawt a, ka lu ka lo bu nghoh.


"Thla 5 chhung mental hospital-ah i awm a, niminah kan hruai chhuak che a. Mah se hei, i dam lohna a rawn chhuak leh a, i buai leh tawh a," a ti a.


"Eng nga? Thla 5 chhung mental hospital-ah maw? Mah se vawiin thleng khan University-ah ka la kal sia," ka ti a. An 3 chuan mak tihna hlirin an khat.



Doctor chuan ka nu leh pate a en a,
"A rilru chauh niloin a thluak lamah buaina a awm tawh a ni ang. Naktukah hospital-ah rawn kal ula a tha ang," a ti a, a chhuak ta a.



Engmah ka hriat thiam loh vang chuan ka thinrim tun mai. Eng vangin nge mental hospital-a ka awm angin an sawi?



"Eng nge ka chungah thleng? Eng nge awmzia?" tiin ka zawt a.


Ka pa chu ka bulah a rawn thu a, "Engmah i hre lo tak tak em? I tider lo tiraw?" tiin min zawt let a.

"Pa, eng vangin nge ka tih der ang a?" ka lo ti hlar.


"I pa ka ni hleinem. I pa chu i naupan laiin a boral tawh alawm," a ti ta mai a. A thusawi vang chuan ka nui chhuak huk a.



"Ka hmaa i thut reng laiin i thi tawh tih i sawi maw?" ka ti a.



Ka nu chuan, "I naupan laiin i nu leh pate nen car-ah in accident a, ta tang khan i patea nen kan enkawl che alawm," a lo ti ve bawk.


Tuna thleng hi mumang atthlak tak zawng a ni. Mah se a tak a ang si.


Ka nu chuan ka medical record min rawn pe a. Thla 5 chhung mental hospital-ah ka awm tih a inziak. Chu mai ni loin Post Traumatic Stress Disorder (PTSD) dam lohna ka nei tih a inziak a. Kei hi rilru lamah harsatna ka neih avangin mental hospital-ah ka awm maw?



PTSD an sawi chu ka hre fo. Kan thil tawn tawh emaw kan hmuh tawh vanga rilru lama harsatna a ni. Mah se ka neih ngai ka hre si lo. Vawiinah pawh hna ka thawk a, University-ah te ka kal a, kha zawng zawng kha mumang vek a ni zawk em ni?
Tuna mi hi a tak ram zawk em ni ang? Engmah ka hrethiam lo. Professor nih ka tumna kawng zawng zawngte, ka thawhrimnate kha mumang mai maw lo ni a? Ka awih thei lo zawk.







Engmah ka hriat tawh loh avangin ka nu leh pate.......oh......ka puteate nupa chuan engkim chu muang changin min hrilh ta vek a. Kei hi Lawmsangzuali kum 27 mi, professor nih tum kha ka ni tawh lo. Tunah hi chuan Lawmsangzuali, kum 24, M.Sc zirlai, nu leh pa nei tawh lo ka ni. Ti nge ka mumang kha a tak a an em em le?




Ka mumangah khan tuna ka patea, Laltanpuia hi ka pa a lo ni a. Nu Mazuali, ka patea nupui hi ka nu hrawn a lo ni bawk.
Ka nuhrawn nen chuan kan lo inngeih lo hle bawk. Chu vang chu a ni mahna Nu Mazuali hi ka mil lo ringawt mai.







.............






Nu Mazuali'n ka room kawngka a rawn kik chuan ka ngaihtuahna atang ka harh zawk. Ka damdawi eitur min rawn pe a.

"Lo insiam tan rawh, doctor kan pan a ngaih kha," a ti a, a chhuak leh mai. Ka no ken lai chuan vawm pawp chakna rilru ka lo pu, ka mumang vang bawk kha a ni.





Ka wardrobe ka han hawng chu ka phu zawk. Ti nge ka thawmhnaw inkhaiho hi a senno vek a nih a? Ka thawmhnaw dangho chu ka hai chiam a, rawng no tak tak vek a lo ni. Mah se rawng no lam ka ngaina ngai si lo a. College ka kal atang khan rawng no lam ka ha ngai lo tluk a ni.



Leather jacket dum emaw jeans jacket pawl ka ha deuh ziah a. Cotton jeans dum emaw stretch pants dum ka ha a, khua a lum lutuk loh chuan combat boot ka bun ziah bawk. Tuna ka thawmhnaw bawm leh pheikhawk bawm a mi chu ka duhzawmg engmah a awm lo.





Eng nge ka hriat le? Khang ka inthuam dante kha chu ka mumang mai alawm. "Mumang leh a tak ram hriat pawlh suh," tiin ka inhrilh mawlh mawlh.





Kawrfual senno, khup chen vel, nu zet chu ka ha ve ta tawp. Darthlalanga ka inen chuan inhmeh ka inti hlawl lo a ni. Vawiin chu tuar chhuak ila, ka bazar ang. Ka patea a hausa tho.





Nu Mazuali chuan hospital-ah min kalpui a. Test eng emaw hrang hrang kan ti, ka hre seng lo. Ka thluak lam te, ah.,ka taksa pumpui hi an test vekin ka hria.







Test kan neih zawh chuan Dr. Awmpuia, nimina mi hnenah chuan kan kal a. Damdawi min chawh belh a. Ka result chu karleh lama lam turin min hrilh. Insawiselna ka neih leh neih lohte min zawt bawk a.



Ka harh chhuah ka ti mai dawn mi, ka mumang a tak ang deuh atanga ka harh chhuah hnu khan ka lu hi a na reng zel a, a na ut ut a ni ber tihte ka hrilh a. Ka lo sawi ta mai mai pawh a, damdawi eitur ka ngah khawp mai.







Thawmhnaw ka lei dawn avangin Nu Mazuali chu a haw hmasa a. Keimaha min thlah fal chu ngam lutuk lo mah se mahnia bazar ka duh thu ka hrilh. Ka mumang vang bawk khan ka la ngaina thei lo.





..........




Lipstick pakhat ka hmuh fuh chuan ka mit a la ngei mai. Mah se lak ka tum chiah chu tu emaw hian a rawn ban ve a. Ka bula hmeichhe ding nen chuan kan inen a. A kut a lasawn vat a,
"A bula mi ka'n en ang e," a ti a, min nuih sang a.




A nui hmel tha ka tih em avang chuan ka lo en reng a. Kei ai chuan kum 3 kum 4 velin a naupang ang tih tur a ni. Eng nga? Kum 27 mi ka ni emaw ka inti leh tawh. Kei hi kum 24 mi ka ni tak e.







Ka bula hmeichhia nen chuan lipstick chungchang vang ringawt chuan kan titi ta teuh a. Biak a nawm bakah a hmeltha hle. A luck ngawt ang.




"Judy ka nia," tiin a hming min hrilh a.

"Judy tih hi nalh ka ti. August tih lehkha bu ka ngainat deuha changtunu hming a nia," ka lo ti a.

Ka hming chu min zawt a. Hriat chian loh bula hming sawi hi ka duh vak loa, mah se min zawh takah chuan Lawmsangzuali ka ni tih ka hrilh ve a.





Chutia kan inbiak lai chuan mipa 1 dawr chhunga rawn lut hi ka lo en a. Kan lam panin a lo kal, a lo kal pah chuan thil tle sep sep a rawn tla nimai te hian ka hria. A hmel chu a tha hle a, a sangin a pian a nalh bawk. Hmeltha viau mah se a mitmengah chuan nelawmna pakhat mah zu awm lo a.







Kan bul a rawn thlen chuan Judy chu a rawn bia a, "I lei zo tawh em?" tih a rawn zawt a.
Judy chu a lo bu nghoh. Judy chuan,
"A nih phawt aw," a tih chuan chu pa chuan ka awm ve tih hre chiah ang maiin min en ve chauh.


"Nang hi! Hetah eng nge i tih a?" chu pa chuan tiin min rawn en a. Min hmu chu mak a tih hmel hle.


"Ngatan nge i tih?" tiin ka kalsan daih. Ka hmelhriat pawh a ni loa ka biak ve kher a ngaihna ka hre lo.






...........






Dar 8 velah khan ka mu daih a. Tuna ka harh leh chuan dar 10 a lo ri tawh. Ka dang a ro hle a, tui in ka tum chuan ka bottle a lo ruak a, inhnuaiah tui la turin ka chhuk.





Step-a ka chhuk dawn chuan tawng ri ka hria a, ka pateate nupa an nih ka ring.


Ka patea chuan, "I ngaih dan kha a tha ka ti. Mental hospital-a a awm hma khan M.Sc a zir mek kha a nia, tunah zir zawm leh se a tha. Nia, i sawi ang khan a zir zawm duh lo emaw, a tih that peih loh emaw chuan mental hospital-ah dah let leh ila a tha ang," a ti a.



Chu thu ka hriat vang chuan ka rilru a na hle a. Inhnuaia chhuk ta lo chuan thawm dim deuhin ka room lam ka pan leh ta zawk a.



Kei hi mental hospital-ah min dah leh an tum maw? Chutiang hmuna awm ka duh lo. M.Sc chu ka zir zawm ang. Lehkha zirte chu nuam ka ti alawm. Ka mumangah pawh University chhuak tawh, professor nih tum ngat kha ka nia. Mental hospital-ah chuan ka let leh tawh lo ang.






........





Ka patean hmelhriat tha tak tak a neih zarah awlsam tein ka zirna ka chhunzawm leh thei dawn. Tun hi M.Sc ka final tur a ni.





Mizoram University chu kan thleng a. Car atanga ka chhuah hma chuan ka patea chuan, "Buaina siam lo zawngin awm hram i tum dawn nia," a ti a. "Aw" pawh ti lem chuang loin ka bu nghoh a, ka chhuak ta a.




Jeans jacket pawl leh stretch pant ka ha a, combat boot ka bun leh bawk. Hetianga ka inthuam hi chuan ka confi em em mai zelin ka hria. Hetiang hian ka mumangah khan ka inthuam thin a, a takah pawh ka han inthuam chu a nuam hle mai.






August thla a nih angin khua chu a dur deuh khup a, ruah erawh a la sur lo.
Zirlai dang pawh an tai suau suau, an tam khawp mai.




Pan tur ber hre loa ka kal lai chuan tu emaw hian ka hnung atang ka hmingin min lo ko a, ka hawi let a, Judy a lo ni.
"Lawmsangzuali kha i ni tiraw? Dawrah kan inhmuh kha min la hria em?" tiin min zawt a.
"Aw, ni e," ka lo ti ve mai.




Hetah kan inhmuh pawh ka hring lo, hmelhriat ka nei chu a tha tho e. Kei hi tawng tam leh kawm nuam tak ka ni lo, Judy erawh inhre chauh ni mah ila a bula awm nuam ka ti phian.





Kan piah atang tu emaw hian ban vaiin Judy chu a lo ko a. A rawn kal hnai a, a hmel ka hmu chiang chiah chu ka phu nasa ngei mai.
Ka u, Remsangi kha a ni. An hmel a inang chiah chiah, an ruangam zawng zawngte nen chuan. Eng nge awmzia le?



Ni lo! U ka nei hleinem. Usangtei kha chu ka mumanga mi zawk alawm a nih.
"Mumang nen hriat pawlh suh," tiin ka lo inhrilh char char. Mah se ka mumangah khan a boral kha a ni a, tunah a takah ka hmu a, ka tah a chhuak tlat. Khang zawng zawngte kha mumang ni tur chuan a tak a ang lutuk mah mah a ni.






Judy chuan min inhmelhriat a.
"Zorinpuii ka nia," a ti a. A aw te pawh chu ka mumang a mi ang chiah kha a ni, mah se ka ngaihruat pawh a ni mahna.



Kan class tur a lo inan vek a avangin an rual chuan ka kal ve a. Class an tanna hi thla 1 a liam tawh a, in adjust vat ka ngai dawn nih hi.






Professor chu a rawn lut a. Min zirtir nghal mawlh mawlh. Mah se min zirtir dan chu a hlimawm zawng a ni. Min zirtir laklawh laite chuan kan nui leh huk thin.

A chezia leh a tawngkamah chuan 'August' tih thawthua an professor kha min tihre chhuak a, an thusawi te pawh a inang hle.
A class a nawm em avangin a rei lo hle.






Thla 5 dawn chhung lehkha ka zir tawh loh bakah ka patea sawi danin ka tichhe thei hle a niawm a. Mah se mak tak maiin kan zirlai chu ka awlsam phian. Vawi tam tak ka zir tawh hnu ang mai a ni.





Class dang kan lak leh hnu chuan sana ka en a, dar 12 a lo ri tawh. Thil ei a hun tawh dawn a nih hi.





Class a tawp chuan Judy leh Zorini chuan canteen a kal turin min rawn sawm ve a. Zorini chuan kan piaha thu mipa a ko a,
"Rinhlu, canteen-ah kan kal dawn," a ti a.







Chupa ka va en chuan hmannia Judy bula ka hmuh, hmeltha ka tih kha ni tih ka hre ngal. Hmannia min biak dan kha, min hria niawm tak a ni. Kan lo inhre tawh pawh a ni maithei, tunah ka pateate nupa pawh ka nu leh pa emaw ka ti a nia.







Kan 4 chuan canteen kan pan laiin bike 1 hi kan hmaah a rawn ding a.
"Khawiah nge in kal dawn?" a khalhtupa chuan a rawn ti.





A inthuam dan chu, ka duh dan chiah chiah a ni. Leather jacket dum tha tak leh cotton jeans dum a ha a, a hmel that leh that loh chu ka ngai pawimawh lo, a inthuam dan chuan ka mit a la thlawt.






Judy chuan, "Dar engzat nge a nih i hria em? Zing lam class hi i nang hman ngai lo reng reng," a lo ti a.




Bike atang a chhuk a, a helmet erawh a la phelh lo. Min hre ngai lo tih hriat takin min rawn en ha.
"Sangzuali a nih hi," Zorini chuan a lo tivat.
Zorini chuan, "Zodinsanga, mi sual a nih hi," ka bulah chuan a ti a.






Chu thu a sawi zawh chuan ka harh zawk ni berin ka hria. Judy chu ka en vat a,
"I hming pum hi Lalduhsaki a ni em?" tia ka zawh chuan a bu nghoh a, "Engtin nge i hriat zawk a?" a ti a.




Thil ka hre chhuak nghal zawk a. Ka hrilh hai bawk si. Chutih rual chuan ka lu a na hle a, leiah ka thu hniam nghal tawp.



Judy leh Zorini chuan min lo buaipui vat. Ka hmai ka hup a, ka maimit chhing vang vang a. Ka khaw hmuh chu a thim mup a. Judy leh Zorini rak deuh chul chu ka hriat theih awm chhun a ni.









Thil eng ut vang chuan ka meg diar diar a.
Ka bula nurse 1 chuan ka banah a rawn chiu bawk. Ka awmna chu damdawi in a ni tih ka hre nghal mai.





Ka thu chhuak a, ka ku erawh a la na phian. Sofa-ah chuan ka patea nupa an lo thu. An sir lehah chuan Judy leh Zorini an lo awm tel bawk.





Ka patea chuan min rawn pan hnai a,
"Engtin nge i awm a? I tha em?" a rawn ti vat.





Thil thleng chu ka ngaihtuah let a, nikhaw hre loin ka tlu tih ka hre chhuak.



Vawiina ka mi tawnte 4 kha. Judy Lalduhsaki, Lalrinhlua, Zodinsanga leh Zorinpuii te kha, an vai khan ka lehkha bu chhiar thin 'August' a mi nen an inang vek.





Lehkha buah chuan an hmel a lang lo alawm, mah se an hming, an pianziate a inang. Chu bakah Zodinsanga a rawn thlen a Zorini'n a lo biak dan kha August thawnthua chapter 1 laihawl a mi a ni. Tin, professor thusawite kha, August chapter 1 tir lam a mi a ni bawk.




A chapter zat hre vek tur khawpin August kha ka chhiar chhuak ngun. Ka lehkha bu ngainat ber a ni bawk.




Kha thawnthu a mite kha tunah ka hmu a nih chuan kei hi thawnthu-ah chuan ka lut tihna em ni?








Nurse chuan hahdam turin min ti a. Judy leh Zorini'n min rawn biakte chuan ka chhang hleithei lo. Ka rap lek lek.



Nu Mazuali sawi danin darkar 3 vel ka mu tawh a. Judy leh Zorini pawh an lo awm ve char char a ni awm e. Chu vangin Nu Mazuali chuan haw rih turin a ti ta a.







Anniho min biaknate chu engmah pawh ka chiang lo. Ka thil tawn mak lutuk vang hian ka â vek dawnin ka hria.





Tuna ka hun hman lai hi a tak ram a ni lo a, thawnthu a ni. A nih chuan kum 27 mi ka nihna kha a tak tak zawk a ni tihna.


Hei hi thawnthu mai a ni chu ka hlim khawp mai. Tun mai tleng kha chuan PTSD dam lohna nei tak tak ka ni emaw ka inti a. Chu bakah Mental hospital-ah ka awm tak tak lo tihna a ni a, chu chu thu lawmawm tak a ni.



Chuan, tuna ka patea te nupa hi ka pa dik tak leh ka nuhrawnte an ni tihna a ni a. Ka â emaw ka lo intih hman bakah hei hi a tak tak zawk emaw ka lo ti hman a. Tunah chuan ka hahdam huai mai.





He thil thlen hma khan zanah August kha chhiar ka tum a ni a. Kha mi atang khan a intan. A nih chuan hei hi mumang vek a nih dawn hi. Ka harh chhuak leh vat mai ang.


Keimah leh keimah chu ka insik neuh neuh a. Mah se ka la harh chhuak thei chuang lo. Harh rih lo mah ila nakinah ka la harh dawn tho tho. Thil chiang em em chu......hei hi thawnthu ka chhiar thin atanga ka mangphan mai chauh a ni.







Ka ngaihtuahna ti kalthui deuh 1 a awm a. Changtunu chu Judy a ni a, changtupa Lalrinhlua, changtupa thian tha ber leh changtunu lo ngaizawng vetu chu Zodinsanga a ni. Zorini hi mi sualnu ber, changtunu thiannu a ni a, mah se Rinhlua a lo duh ve a, Rinhlua'n Judy a duh si vang vel tea sual ta kha a ni a.





An ni hi kha thawnthua mi pawimawh tak tak 4 an ni a. A nih chuan kei hi tu nge ka nih ve?
Lawmsangzuali tih hming lang ve awm chhun chu.......ni lo.....kha nu kha ka ni tihna em ni?




August a Lawmsangzuali lang ve awm chhun chu Rinhlua cousin, Mental hospital-a awm, a hnua inawk hlum ta kha a ni. Chu chu chapter 5-ah thui vak loin a lang ve. Chu nu chu ka ni tihna em ni? Chapter 8 thlen hunah ka thi dawn tihna em ni?




Lo thi pawh ni ila eng nge pawi? A tak a ni chuang lo. Duh leh thi mai mai ang hmiang.



Lawk! Rinhlua nen cousin maw kan nih. A nih chuan dawra min lo biak chhan pawh kha chu vang ngei chu a nih dawn kha.



Ka lo ngaihtuah mai mai a, vawiina thil thlengho kha chapter 1-na a mi vek a ni a. Naktuk hi chapter 2 tur tihna a nih ka ring. Chuan, chapter 5-ah ka thi anga, ni 4 nghah a la ngai tihna, chuan khawvel pangaiah ka let leh ang.



Hei hi ka ruahmanna a ni. Tluang taka ka thi thei a nih chuan ka let leh thei ang.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 10th, 2021, 2:06 pm

"Chapter 2 (August)




Kan professor class atanga a chhuah hnu chuan Zorini nen canteen-ah kal kan tum a. Ka hnunga thu min lo en rengtu Rinhlua chu lo kal ve tura sawm ka duh deuh a, mah se niminah khan ka chungah a thinrim hle.




A chhan nu an inah a notebook pe turin ka kal a. Kawngka a lo inhawn kau sa deuh avangin in chhunga lut chiah lo chuan ka dak a. Rinhlua leh a pa nasa taka an lo inhau chu ka hmu fuh a. Let leh vat ka tumna lamah thawm ka siam phah a, an 2 chuan min lo hmu a.




Rinhlua chuan thinrim takin min kai nghal hlawk hlawk. An in hnung lamah chuan kan ding a, thinrim zetin min melh.
"Nichin kha.....rawn en che u kha ka tum a ni lo......," ka tawng zawh hma chuan min tawng khalh a.
"Judy, i inrawlh chikim khawp mai. Thil tul loah chuan min rawn be tawh suh," a ti chang fak a, min kalsan nghal.




Chu vangin canteen-a kal tur chuan ka sawm lo mai ang. A thinrim laia min tawng khum ni mahse min tawngkhum nawn leh ka duh bik lo.




Zorini nen chuan thil kan ei a. Ka dang a ro deuh avangin cola ka va lei zuai a. Ka kalsawn tur chiah chu tu emaw hian ka cola ken lai chuan min laksak a, Biaktluangi a lo ni.

"Ka ta a nih kha," ka ti a.
"Ka hria alawm, i ta kher hi ka duh a," a ti a, a thiannu leh a bialpa a bula lo ding vete nen chuan min nuih a.



Chutih lai tak chuan Zorini chuan Biaktluangi kuta cola chu a rawn laksak a,
"I duh chuan lei ve mai rawh," a ti chang rat a, min kalpui nghal a tum a.





Biaktluangi bialpa Chhuanga chuan min lo dang a, "Ka bialnu hi in va tham lo ve" a rawn ti a. Buaina a intan dawn tih ka hrethiam chiah.


Engmah sawi loa kal kan tum pawn an ni 3 chuan min tibuai zel a. Zorini ning lutuk chuan Biaktluangi chu a nam tlu a, Chhuanga a rawn thinrim hle. Zorini ben a tum chuan ka lo indawh vat a, ka maimit chhing nghal. Mahse ben chu ka tawk miah lo, ka han men chuan Rinhlua hian Chhuanga ban chu a lo man bet a. Chhuanga chu a hnek ta chawrh chawrh a. "









÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷

August Can't Forget by Kim L



Chapter 2





Ka class kal tur chu phur zetin ka insiam. Ka thi tep tawh bawk a, rei lo te chiah nghah a ngai ta a ni.


Ka patea(ka pa hmel nen inang mahse patea ka ti rih mai ang) chu ka room-ah a rawn lut a, ka inchei lai min chu min rawn en a,
"Ti nge class kal i tum a? Nimin lawkah nikhaw hre loin i awm a," a ti a.

"Pa...oh, pate, ka tha tawh lutuk. Chu bakah ka kal loh chuan min zirsan hnem bik lutuk ang," ka ti a.

Min zirsante chu e ka hlau teuh lo, vawiin hi chapter 2 na a nih chuan Rinhlua a insual dawn a. An intibuai lai lo en ka chak em a!
Class kal miah loin exam hma chhawn pawh ni ila ka pass thei ang, ka zir hnu vek alawm.







........



Class-a ka luh dawn chuan Zorini nen kan intawk a. Ka tha tawh em tihte min zawt a. A fel khawp mai. Hetianga mi fel mi sualnu bera a chhuak tur hi ka ui lutuk tlat, chubakah ka u nen an hmel a inang miau si a. Eng emaw kawng takin thlak danglam theih dan tur a awm maithei a sin. Zorini thawnthu inziak sa hi thlak dan tur kawng a awm em em ang.








Ka bula thu chuan min rawn sawi chuan ka harh zawk. Ka lo muthlu a nih hi. Eng class nge kan neih zawh chiah pawh ka hre lo.




Sana ka en a, dar 12 a lo pel tawh. Thil ei a hun chu a ni mai. A nih chuan, Judy leh Zorini'n buaina an tawk tep tawh tihna em ni? Phur zet chuan ka kehkha bute khung mawlh mawlh a.




Judy leh Zorini chu ka bulah an rawn kal a, thil ei turin min sawm a. Mahse ka lo hnial. An bula ka awm chuan an intibuai lai tha takin ka hmu thei dawn lo a.







Canteen ka va thlen ve chuan Judy leh Zorini chuan thil an lo ei mek. An intibuai lai chiang taka ka hmuh theihna turah, an mahni hnaih tak chuan ka thu ve a. Thawnthu a mi ang chiah khan heng a changtute hi an hmeltha lutuk. Rinhlua, Judy leh Zorini hi an eng phet phet hian ka hre thin. Zodinsanga kha chu nimin khan a hmel ka hmu ve hman ta lo a.







Judy a thutna atanga a tho ka hmuh chuan buaina a intan dawn tih ka hre mai. Biaktluangi leh a bialpa niawm tak chu an rawn lang nghal reng a.


A bu a mi ang chiah kha a ni. Judy an tibuai lai chu Zorini'n a lo chhan a, Zorini chu a pa reuh hle mai. Rinhlua lo thlen chu ka lo chang a, ka meng kual zek zek. Canteen-a awm ve ho lah chuan an intibuai lai chu an lo en thap.







Chhuanga chuan Judy ban rekah chuan a man bet a, Zorini hmela thinrimna chu ka hmu thei. Zorini'n Judy a pui a nih chuan a man a tuar ngei ang. Rinhlua pawh chu a va rawn lang har ve.




Chhuanga chuan Judy ben a tum, Zorini lo indawh ka hmuh chuan ka thu reng thei lo. Ka thutna atang ka tho a. Ka tray ken lai chuan Chhuanga kut, Zorini kutthlak a tumna ngei mai chu ka va vaw chawrh a.
Chhuanga pawh a lo au deuh thawt.




Zorini leh Judy chuan mak ti takin min lo en a. Zorini bulah chuan, "I tha em? A khawih hman che em?" ka ti nghal chung.


Zorini chuan mak tih hmel hian min la en tho, "Aw ka tha alawm," a ti a. Judy chuan,
"Kha en rawh Sangzual.........!!" a tih that avang chuan ka sir lam ka en a, ka hlauh lutuk vangin ka maimit chhing nghal.





Chhuanga'n chair-a min vuak a tum chu ka lo hmu hman lo a. Mahse ka han men leh chuan tu emaw hian Chhuanga ban chu a lo man bet a, vawi leh khatah a hnek ta chawrh chawrh mai a. A bula hmeichhiaho zawng zawng chu kan lo te leh thawt thin.






Judy leh Zorini chuan chu pa chu an lo thelh a, "Zodinsang, a tawk. Duh tawk rawh," an ti that that ri chu ka hria. Kei erawh ka hlauh lutukna lamah ka awm vuanin ka lo la ding khawng reng.




Tu emaw hian ka darah a rawn vuan a,
"Sangzual, i tha em?" a tih chuan ka harh zawk. Rinhlua a lo ni. Ka kutah mittui a far chuan ka lo tap hman tih ka hre chiah. Rinhlua bulah chuan ka that thu ka lo hrilh a.





Min kalsan a, Zodinsanga'n Chhuanga a hnek lai, Zorini leh Judy'n an thelh theih loh chu a va thelh a.
"Zodinsang! Duh tawk rawh!" a tih thawt hnu chuan Zodinsanga pawh a tawp chat.




Chhuanga a vawnna chu a thlah a, a rawn ding chhuak. Kan lam a rawn hawi a, a nui suk.





Chutih lai chuan security guard ho leh kan professor thenkhatte chu an rawn tlan a. Chhuanga l, thisen nen lo let reng chu an buaipui nghal. A inhnamhnawihho chu an rualin min hruai nghal vek.








Ka pian tirh ata hetiang intihbuainaah hian ka la tel ve ngai lo, chu vang pawh a ni mahna ka awm dan chu a la mumal thei lo.



Chancellor room bulah chuan keini 5 leh Biaktluangite thian dun chu min khung a. Chhuanga erawh damdawiinah an kalpui nghal.




Judy chuan Zodinsanga kut thi chu a rawmawlin tuamsak a tum a, a lo duh lo nasa mai. Mahse Judy chuan a tuamsak lui ta hram a. Zodinsanga sawn eng an pawn duh lo mahse a rukin a lawm tih ka hria.


An ni 4 hi B.Sc an zir atang an inkawm a, khata tang khan Zodinsanga hian a rukin Judy a lo duh char char a. Rinhlua ai pawn a duh hmasa zawk.





Ngawi lawk teh! Ti nge Zodinsanga hi a kut thi zawk a nih a? Rinhlua kha kut thi tur zawk a ni si a.
Canteen-ah khan Rinhlua a rawn lang lawk lo a, Zodinsanga a rawn lang hmasa zawk. Ti nge a inthlak daih le? Kei hi ka lo va inrawlh ve vang a ni thei ang em?



Chhuanga kha tray in ka lo va vua a, min vuak let a tum laiin Zodinsanga a rawn lang ta a. A nih chuan thil thleng ka thlak danglam tihna a ni mai em? Chu bakah, thawnthuah tuna min khung hran lai part hi a awm âwm ka hre lo.






Kawngka an rawn hawng a. Kan professor pakhat a ni. "In chhungte theuh kan ko anga, chinfel kan tum ang."

Kan lo ner nasa hlawm mai. Zorini chu ka ngaihtuah chhuak a. Fa lak a ni a, hetiang buaina a tawh hian a hnuah a pain a vaw ziah. Amah adopt tute hian an tih duhdah vang 1 hi a nia a hnua a sual tak em em ni.







Rinhlua pawh, a nu leh pa inthenna a la rei lo a, a pa nen an inrem thei tlat lo pek a. Chhungkuaa buaina neih hi a lo buaithlak khawp mai.






Kan professor chhuak leh tur chu Rinhlua'n a lo bia a, "Ka pa a zin lai a nia, a aiah mi dang inko thei ang em?" tiin a zawt a. Dawt bak a sawi ka ring lo.
Professor chu a lo bu nghoh a, "A number min pe la," a ti a.




"Sangzuali patea in call dawn em?" a ti leh phawt a. Ngatan nge ka patea chu a tih?

Professor chu a bu leh nghoh. Chu veleh Rinhlua chuan, "Ka putea a nia, amah chu ka lo ring ve nghal mai ang," a ti a.
"Hey, a fair lo e mai aw," ka lo ti nghal.



Professor chuan, "I putea maw?" tiin Rinhlua chu a zawt a.
Rinhlua chuan, "Ka nu nen unau an nia," a ti a. Professor pawh a chhuak ve leh mai.




Rinhlua nen kan lo in cousin dan chu a nu leh ka patea hi unau maw an lo nih a? Kan lo va inhnaih ve.







Zodinsanga chuan, "Unau maw in nih a?" a rawn ti a. Rinhlua nen chuan kan inen a, kan lo bu nghoh.




Ka rilruah chuan Zorini chauh chu a awm rih. Chhungte koh an sawi atang khan a tawng ve leh ta miah lo chu a nia.
A bulah ka thu ve a, "I tha em?" tiin ka zawt leh tawp, zawh tur dang ka hre lo.




"Aw, tha e," tiin min lo nuih sang thung.
"I tha zawk em? Keimahni vangin buainaah i rawn tel a," a ti a. Ka chhan hma chuan kil khat atang Zodinsanga phun ri chu ka hria a,
"Mi i pui ve a, mahni pawh inveng leh thei tawp si lo," ring vak lo hian a lo ti a.


A pawi ka sawi emaw ni le? Zorini leh Judy pawh an inveng thei bik tawp si lo. Khatia min tihbik.
Chu bakah kei hi an niho ai hian kum 3-in ka upa zawk tih an hre der si lo a. Min rualpui en ringawt a.







.............






Kan buaina an chinfel hnu chuan keini chu min kaltir mai a. Zodinsanga erawh Chhuanga kut a thlak nat deuh avangin a chhungte chu an la lungawi thei lo, an la kaltir ve lo.


He miteho hi mihring tak an ni ve em tih ka hre lo, an nih pawh ring lo, thawnthu a mi mai an ni si a. Mahse an tan rilru ka pu chu a nia. Zorini ka khawngaih a, Zodinsanga pawh.





A ziaktu hian Zodinsanga hi a tikhawngaihthlak hrim hrim. A pa a dam loa, kum 2 leh a chanve vel chhung chu a zeng tawh. A damdawi man a toin inenkawlna a hautak hle a. Chu vangin an harsa ta hle. A nu chu dawrah a thawk thin. Tuna a bike neih pawh hi an harsat hmaa a pa lei kha a nia.
Zodinsanga hi zing class a tlai thin chhan pawh zing lamah a lo inhlawh thin vang kha a nia.





Rinhlua chauhin a hria a, a hnauh Judy'n a hre velh. Mahse tih theih an nei bik si lo. Zodinsanga hi chu a thlawna mi puihna dawng duh miah lo ang kha a ni. A vawi khat nan hmeichhe duh a nei ve a, mahse a chang leh ta si lo a. A thawnthu tawp lamah a nu chu hna a thawh rim em avangin a boral lehzel kha a ni a, ka khawngaih thei lutuk. Tunah lah keini hmeichhe 3 vangin buaina a tawk chu a ni si a.








Rinhlua hnenah chuan tihdan ngaihtuah turin ka ti a. Mahse tih dan tur a lo hre bik lo.
Mak tak maiin Rinhlua hi ka be bawrh bawrh, cousin kan lo nih vang a ni mahna.





Zodinsanga chu a nu nen an lo chhuak a, kan thutna atang kan lo ding vat. A nu chu a lo inthiar fihlim vat mai a.
"Thla 2 chhung min suspend, min ngaihtuah duh suh u," Zodinsanga chuan a ti a.





Judy leh Zorini chuan eng emaw sawiin an lo hnem a. Rinhlua nen chuan kan ngawi reng. Zodinsanga chu a kal leh ta vat zawk a. Mi hmaa chak lo taka lan a duh teuh lo mai, a kal khan a tan a nuam zawk ang.




.........





Patea chuan Rinhlua nen min hruai haw a. Haw lamah chuan ruah a sur buan buan. Ruah sur hi chu ka ngaina ngai lo. August thla hi ral vat vat se ka ti ngawt mai.






Rinhlua chu kan inah chaw a lo ei a. Kan reh hlawm ngei mai. Kan in chhungah chuan mi 4 kan awm tih pawh a hriat loh.






Rinhlua chu ka room-ah a rawn lut a,
"Engtik atang nge mental hospital atang ilo chhuah a?" a rawn ti a.

"Ka hre tawh lo. Chuan, mental kha sawi tel tawh lo la ka lawm viau ang," ka lo ti a. A zahthlak ve em alawm.




"Vawiin khan eng nge i ngaihtuah a? Khatiang buaina leh mi thawng thut thei i hmuh changte hian i buai thin tih i theihnghilh em ni a?" tiin min hau titih deuh a.


Chu vang chu a nimaw ka dam lohna a lo chhuah thin ni. Vawiina a lang lo chu a lawmawm khawp mai.





.......




Rinhlua chu a haw dawnin tawite ka thlah a. Ka let leh dawn chuan call a dawng a, "Aw, Judy," a ti ri ka hriat chuan ka ding a. Bang phenah ka biru nghal.


"Khawiah?" a ti leh a. "Ka lo kal ang," a tih hnu chuan a phone a dah a. A kal nghal.
Tunah eng nge thleng tur ka hriat chak avangin ka zui ru a. Taxi a lak chuan ka la ve a, a hnung chiahah ka zui zel.








A chuanna taxi chu restaurant 1 hmaah a ding a. A chhunga a luh hnuah ka chhuk ve chauh.

An tawng ka hriat phak theihna tur laiah ka thu a, min hmuh erawh ka hlau ru hle.





Judy chuan, "Hmanni kha ka tih palh lutuk. I note pe tur chein ka rawn kal a," a ti a. Dawhkanah notebook chu a dah a.


Rinhlua chuan, "Ka...a pawi lo....ka tih...ka tih awmzia chu....," a ti deuh nuai, tawng a harsat hmel hle bawk. "Ka tih palh. Chhan awm loin ka vin che a," a ti chhuak ve thei hram a. Kei pawh chu ka lo thaw huaiin ka hria.





Mahse hemi lai part hi chu chapter 3 a mi tur a ni si a. Eng nge awmzia? Ka chhut dan kha dik lo em ni? Ni khat hi chapter 1 zel emaw ka tia. A thleng deuh zung zung maiin ka hria. Eng nge awmzia pawh ka hre tawh lo.
A nih chuan engtik nge ka thih hun hi ni thei ta ang?








.........





Nizan khan thil hlimawm deuh a thlen ringin Rinhlua ka zui ru ve bawk a, an thusawi a van ho tak. Sawi tur an hre lo ngawt mai.






Bus stand lam ka thlen dawn tepah MZU bus tlan liam chiah chu ka hmu hman a. Han umzui dawn ila ka um pha dawn bawk si lo. A van hahthlak tak.





Taxi a awm bawk si lo a, bus stand ah chuan ka thu tawp a.
Ka epa hmeichhe 2 nui bawk bawk chu ka hmu a, an hlim hmel em em a, ice cream an ei bawk. Saw tianga ka nuih lohna chen pawh ka hre tawh lo. Ice cream tak ngial pawh eipui tur ka nei lo. Ka thian awm chhun lah khan ka bialpa min chuhpui atang kan inkawm leh ta ngai bawk si lo a.






Thiante nena intihhlima, lenho te, thil tui tak tak eite hi ka chak ve thei lutuk. Mahse a hun lai khan engmah ti loin ka awm a, tun hnuah ka inchhir thin. Mahse kum 27 ka nia, kum 30 pawh ka la pel em hleinem. Tunah ngat phei chuan kum 24 ka ni.






Taxi rawn thlengah chuan ka lut a, driver chuan, "Khawi lamah nge?" tiin min zawt a.

"Folkland lamah," ka ti ta zawk a.
Vawi khat na na na chu bar-ah kal a, zu in ka chak ve a ni.
Zu ka in zawhah ice cream ka lei anga, ka bazar bawk ang. Chuan, mipa chhelo tak ka hmuh chuan a number ka dil ve ang.








Chhun lam a ni bawk a bar-ah chuan mi an tam lo. Music ri riai riai lam chu an lo play a. A chhungah chuan ka han lut ve thawr chu a nia.





Zu an lam thinna dawhkan hmaah chuan ka va thu ve tawp a. Bartender chuan min hnung chhawn a, zu um a lo dah tha mek a. A hnung zang zu a hlaiin a lian a, amah pawh hi a sangin a pian nalh khawp mai. Rinhluate chu a khum zan a nih hi. A hmelthat chuan a number ka dil ang.








Chupa chu a rawn hawi a, kan hmel kan inhmu chiah chu kan phu dun nasa ngei mai. Ka thutna atang chuan ka tla lo chauh.


"Min khawngaih avangin min rawn zui em ni a?" nelawm loh zetin Zodinsanga chuan a rawn ti a.

"A teuh lo. Hetah i awm dawn tih pawh ka hre lo!" amah ngaih pawimawh loh hmel chu ka lantir ve a.

"Chuan, chhunah zu in turin i rawn kal maw?" a ti a, awih loh hmel deuh hian a nui a.

"Aw, i ngaih ngaihin ngai rawh,"
"Zu chak ber chi min lo pe," ka ti nghal.



"Tehreng mai," tih pahin a mithmul a kan zauh.






Ka hmaah chuan zu min lo thlit a. A rim ka hriat rual chuan ka hnar ka lo hup.
"Engtin nge mi hian an in peih zawk le?" ka ti nauh nauh. Zodinsanga chu a lo khi suk.




No te reuh te a mi chu vawi khatah ka tlak ve nghal pawp a. A tui lo bawk si nen, ka taksa chhung a lum nghal pup, ka awm a tinuam lo nghalin ka hria.





Ûm a mi chu ka inthlit a, ka tlak leh nghal. Zodinsanga chuan khabe dawm hian min lo en a, "I vawi khatna tih a hriat hle mai," a ti a.

"I duh ve em?" tih pahin no pakhatah chuan ka lo thlitsak a, a hmaah ka nawr phei a, a lo in ve mai.





"Zu hi hetiang hian a lo tui lo tih ka hre ngai lo," ka ti a. No 3-na ka in leh. No te tak te chu ni lo se ka rui daih tawh ang. Zodinsanga pawh ka thlit ve zel a.



"Ti nge ila in reng si?" tiin min zawt a.
"Ka nun hi vawi khat tal chu ka chen ve chak alawm. Ka thi tep tawh sia," ka tih chuan ka hmui ka hup nghal.

Ka rui tan a ni ngei ang sawi loh tur puipui ka sawi chu a.



Zodinsanga chu a nui a, "Intihhlim i tum chu a ni em lo maw?" a ti a. A zawhna chhan ka tum chuan ka uak nghal. Ka inhup a. Washroom lamah ka tlan lut a, ka zu in vang chuan ka luak nghal.





Ka lu lah chu a na em em bawk si. Zu hi chu ka in leh tawh miah lo ang, a tui lo si.
Washroom darthlalang hmaah chuan thei leh thei loin ka vak a phei a. Bang ngheng chuan ka thu hnawp. Ka zawi vek, ka che thei tawh loin ka hria. Ka khaw hmuh lah a vir muai muai mai bawk. A khat tawkin ka uak reng bawk.






Engtia rei nge chutia ka awm ka hre lo. Zodinsanga chu a rawn kal a. Thei leh thei loin ka lo bia a, "Hmeichhe washroom a nih hi," ka ti a. Ka thusawi pawh hria angin a awm lo, min pawm kang nawlh a, min hruai chhuak nghal.






.......





Ka phone ri vang chuan harh a, meng mang loin ka lukham chu ka dap a.
Ka bul maia mipa aw-in, "I rawn harh thei maw?" a tih rual chuan ka meng nghal zawk.



Ka mutna bula Zodinsanga lo thu ve reng ka hmuh vang chuan ka thu chhuak nghal.
"Ti nge hetah i awm? Ti nge hetah ka awm?" ka ti bah nuai.


"Ka thawhna bar-ah i rawn kal kha," a ti a.

Bar a sawi rik takah chuan zu in turin ka kal tih ka hre chhuak a. Ka hriat hnuhnun ber chu washroom atanga min pawm chhuah kha a ni. Ka lu a rawn nat em avang chuan ka mu leh nghal. Zu hi chu ka va han in leh tawh awm lo tak em!





"Mahse hei khawi lai nge?" ka ti leh a.
"Bar-a room to ber a nih hi," a ti a. Min buaipui vek hnuah room to berah min dah maw?


Ka tawng chhuah leh hma chuan min lo tawng khalh a.
"Mahse ngaihtuahna dang nei suh. I wallet-a pawisa hmangin he room hi chu ka book sak zawk che a ni. Ka pawisa a tel lo a nia," a ti a, a nui suk a.




Ha! Chuti em ema gentleman a ni lo a nih chu. Mahse an khawsak a harsa tak e. Min buaipui a ka lawm hrim hrim.

"Min puih vangin ka lawm e," ka ti a.

"Min rinhlelhna i nei miah na nge?" a tih chuan ka bo hle.

"Eng nge i sawi awmzia?"


"Darkar 3 chhung vel i muhil a. Kei, hetah i khum bulah ka thu a, i chungah eng emaw a thlen i ring lo em ni?" tiin min zawt a.


Hepa hian min ît a mawn le? Nge nia min tih thaih a tum? Hetiang mi a ni lo tihte chu August lehkha bu atang khan ka chiang ve e mai.


"Ti nge? Min it a mi?" tia ka zawh chuan a nui chhuak hawk hawk a.
"Eng ang hmeichhia nge maw i nih le?" a ti a.






Room atanga a chhuah dawn chuan a lo hawi let a, "I lo kal ve dawn lo em ni?" a rawn ti a.


"Khawiah?" ka lo ti hu a.

"Lo kal rawh, ka lo thlah haw ang che," a ti a. A chhuak a. Ka nui hak hak a, ka zui chhuak ve ta a.







Kan inkawt kan thlen chuan bike atang ka chhuk a. Luh ka tum chuan min be leh a,
"Eng nge "ka thi tep tawh" i tih kha a awmzia?" tiin min zawt a.



"Ka sawi em ni?" tiin ka zawt let. Ka hre lo der hmak a.
"I hriat tawh loh chuan theihnghilh rawh," a ti a. A helmet a khum tha a, a tlan nghal vang vang.





In chhunga ka luh dawn chuan ka inhnim leh tete a, zu rim ka la nam rum rum mai. Ka intlem tehreng nen.







..................





Phone call ka dawng a. Rinhlua tih a lo lang kuau. Engtik laiin a number ka save ka hre lo. Sana ka en chuan class ban hun a lo pel daih tawh.




"Tunah Judy bulah va kal vat rawh. A hmanhmawh thlak. A awmna hmun chu ka lo hrilh leh ang che," a ti a, a dah leh nghal hmak a.



Ka u a ni emaw a inti emaw ni? Mahse Judy chungah thil thleng a awm em ni?



Judy chunga buaina thlen hmasak ber tum chu nimin kha a ni a, chu chu chapter 2. A nih chuan a vawihnihna chu eng nge ni ang?




August lehkha bu-a chapter ho chu ka ngaihtuah let char char a. Judy'n buaina a tawh lehna hmasa ber chu chapter 4-ah a ni. Chumi tum chu Biaktluangi leh Chhuanga'n phuba lak an tum tum a ni.


Mahse chapter 3 a mi thil thleng lo a la tam ropui si a. Chapter 3 kan kal kân nge ni anga he thawnthu hi a bul atang a inziak tha zawk?






Ka message dawn chu Rinhlua hnen atang a ni. Judy awmna hmun min lo thawn a, kan veng bul lawk a hotel a ni, ka hmuh veleh rang takin ka chhuak leh nghal.




Biaktluangi leh Chhuanga'n Judy hnena ngaihdam an dil duh thu an hrilh a. Judy chuan awihin an ni 2 chu a lo zui ve mai.
Judy chu restaurant-ah an hruai a, a in turah damdawi an pawlh.



Judy a chauh hnuah chuan hotel-ah an hruai a. Biaktluangi thiannu chuan an thil tih chu tha a tih loh em avangin Rinhlua leh Zorini a hrilh a. Mahse an ni 2 chu MZU lamah an la awm avangin Zodinsanga an call a, hemi tum hian Zodinsanga'n Judy chu a chhan hman hlauh a ni.



An hotel kalna kha kan in nen a inhnaih avangin Rinhlua'n min rawn call a ni mahna. He thawnthuah hian lut lo ila chuan min rawn call miah lo ang. A thawnthuah khan Judy chu engtin mah a awm hman lo tih ka hria, mahse a chungah eng emaw a thleng ang tih ka hlau takzet.







Hotel ka thlen chuan an room awmna min hrilh lam chu ka pan nghal. Ka hmanhmawh lutuk avangin ka tlan nghal hlawp hlawp. Room number 475 ka thlen rual chuan kawngka hawn ka tum a. Chhung lama a inkalh tlat avang chuan kawngka chu ka beng ta vak vak a.


Vawi leh khatah Chhuanga chuan kawngka a rawn hawng thut a, room chhungah chuan min pawt lut nghal a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 10th, 2021, 2:07 pm

Chapter 3







Chhuanga chuan ka kut pahnih chu a man bet a. Biaktluangi chuan ka kut chu hruiin a lo tawn nghal. Khum 1 lo awmah chuan Judy chu a lo mu a, an damdawi pek vang kha a ni ngei ang.





Hei hi a thawnthu kal dan a nih tawh loh avangin eng nge thleng dawn ka hre bik lo. An ni 2 hian eng nge an tih dawn ka hre bawk hek lo. Eng vangin atthlak takin he hotel-ah ka tlan luh? A hma kha chuan thil hmanhmawh thlakah pawh atthlak takin ka che ngai lo.






"Nang ni 2 hian eng nge tih in tum a?" ka vin thawt a.

"Ka chunga in thil tih man hi ka rul dawn che u mawle," Chhuanga chuan a ti a. Kei lah chu ka lo tal sek mai bawk nen vawi leh khatah ka hmaiah chuan a rawn beng nghal a.





Biaktluangi chuan camera chu a lo siam tha a, "Dear, video chuan a lak theih tawh e," a rawn ti a. Chu veleh Chhuanga chuan a t-shirt hak lai chu a phelh a.
"Eng thil nge maw tih in tum le?" ka ti leh thawt. Ka tal peih em avang chuan ka keah Biaktluangi chuan a phuar leh a.


Chhunga chuan, "Lo phur viau suh, a dawt lehah i hun a rawn thleng ve ang," a ti leh.




Chhuanga chu Judy mutna lam a pan a,
"A chungah khan engmah ti suh! Ka sawi chu i hria em!?!" ka ti tuar tuar a.


Biaktluangi chuan, "I va ninawm ve a!" tih pahin ka hmaiah chuan a rawn beng nghal mawlh mawlh.
Ka hmui chu a thi a, min benna chu ka biang a sa hut hut a, a vungin ka hria.




"Mi mawlnu! I bialpain hmeichhe dang sex hmanpui a tum laiin i en liam a maw? I hmeichhiatpui chunga a thil tih saw en liam i tum em ni a?" Biaktluangi chu ka melh ran a. Engtin mah min chhang lem lo.





Chhuanga'n Judy kawr phelh a tum lai tak chuan kawngka a rawn inhawng thut a. Zodinsanga chuan Chhuanga thil tum a hmuh rual chuan a hmaiah a hnek nghal. Mahse Zodinsanga chuan police a rawn hruai a, amah chu an lo dang vat.




Judy a hmuh rual chuan a pan vat a, a darah a sawi a, "Judy, harh rawh! I tha em?"


Constable 1 chuan min phuarna chu a phelh a. "I hmai vel kha, damdawi i mamawh dawn nih kha," a ti a. Ka lu a rawn na leh ta vak a, ding thei loin ka thu reng.




Police te chuan Chhuanga leh Biaktluangi chu an rualin an hruai a. Judy nen chuan damdawiinah min hruai dawn a. Ambulance pakhatah chuan kan chuang. Judy chu a mu a, kei erawh a sirah ka thu. Zodinsanga chuan min kalpui bawk.



Damdawiin kan pan lam chuan vurin ka biang vel chu ka dep a. Naktukah a duk vek a nih chuan in atang ka chhuak lo chiang viau ang. Mahse ka hmai ai chuan ka lu hi a na. He thawnthua ka awm atang khan ka lu hi a na reng mai, a na ut ut zel leh nghal.





"Nangmah chauhin thil i chinfel theih i ring em ni a? Mahni pawh i inveng thei lo a," Zodinsanga chuan thinrim hmel zet hian a rawn ti a.

"Ka hlauhthawng lutuk alawm, engmah ka ngaihtuah hman bik hleinem," ka lo ti a.

"Judy chungah khan thil lo thleng hman ta se a nun a chhe vek dawn asin," a ti leh.

"Chu chu ka thiam loh a ni em ni? Ka duh dan pawh a ni bik lo. Ti nge min dem zawnga i tawng reng a?" ka lo ti hlar. Kha lai hmunah khan keipawh a tuartu ka ni ve tho tih a hmu lo em ni? Judy chauh a ngaihtuah a nih hi.

"Ka tihpalh," a ti sup a.
"Ka lu a na, ka tawng peih tawh lo," ka lo tihsan.






..........





Judy-i in tura damdawi an lo pawlh kha a lo chak deuh avangin drip an khai sak a. Kei erawh ka hmui pem velah damdawi min hnawihsak. Engtin mah ka awm ve lo chu ka lawm takzet.



Damdawiinah chuan kan chhungte leh Rinhlua leh Zorini pawn an lo thleng vat a.
Judy mutna lam ka pan chuan a nu leh pate'n lawmthu min lo hrilh mawlh mawlh a.
Zodinsanga hnenah lawmthu sawi zawk turin ka hrilh.



Engmah tih ka nei ve hleinem. Zodinsanga lo kal lo ngat se chu engtin nge kan awm ang ka ngaihtuah thiam lo. Tunah hian kan nun a chhe vek tawh ngei ang.








•°•°•°•°•°•°•°•°•°•°•°•°•°•°•°•°•°•°•°•°•°•°•°•°•°•°•





"Chapter 5. (AUGUST)





Vawiin hi August ni 25, Nilaini, Rinhlua birthday a ni. Kei, Zorini leh Zodinsanga chuan lawmsak kan tum a, mahse amah ber chu a cousin a boral avangin a rawn kal lo.


Rinhlua'n ka bulah vawi khat a sawi tawh a, amah hi a buaithlak chi a ni ve hrim hrim a. Rinhlua sawi dan chuan a zirlai zir zawm tura an tihin a duh loa, buaina hlir a zawn avangin a ma thatna turin a room-ah an khung kha a ni a. Mahse a room-ah ngei chuan a lo inawkhlum bawk si a. An chhungkua chu an inthiam loin an tuar hlawm khawp mai. Amah hi vawi khat ka hmu ve tawh. Nu lian leh hmeltha tak a ni, a hming kha Lawmsangzuali a ni takin ka hria."






•°•°•°•°•°•°•°•°•°•°•°•°•°•°•°•°•°•°•°•°•°•°•°•°•°•°•









Chhuangate nen kan buai atang kar khat a liam tawh, MZU lamah pawh kan buaina tawh chu a lar hut hut khawp mai. Chhuanga leh Biaktluangi lakah thubuai kan theh luta, tunah court lamin an chungthu an ngaihtuah me.

Judy chu kut engmah a tawrh loh avangin class a zawm keh thei mai a, kei erawh....hui.....ka hmai an benna kha ni 3 chhung vel chu ka biang vei lam a vung a, class ka thulh phah.






Kan buaina thlen atanga ni 2 hnu velah Zodinsanga pawh class kal an phalsak leh tawh. Police rawn hruaina chang a hriate kha a fing reng reng hi ka tia.






Zorini hnen atang call ka dawng a. Zorini nen hian kan inkawmngeih tawh hle chuan ka hria.


"Naktuk hi Rinhlua surprise kan duh a, a birthday lawm dan tur ngaihtuahho ila," a rawn ti a.

"Aw tehreng mai," ka ti ve mai. A birthday a ni tih pawh ka hre lo.

Ni tak e, 'August' lehkha bu ah khan August ni 25 a birthday a inti tak e.
August ni 25 chu naktuk a nia, naktuk chu August ni 25.
Rinhlua birthday-ah chuan eng nge thleng?


Rinhlua birthday kha an lawm lo a, a chhan chu a cousin a intihlum vangin. A nih chuan, naktuk hi! Naktukah ka thi tawh dawn tihna em ni?



Ka thi a nih chuan khawvel pangaiah ka let thei dawn tihna a ni a, lawma hlim viau tur ka nih laiin chutiang chuan ka awm hauh lo. A chhan pawh ka hre lo.






............





Rinhlua surprise birthday party rel tur chuan keini 4, Zodinsanga, Judy, Zorini leh kei, restaurant pakhatah chuan kan inhmu khawm a.




An thusawi ka ngaihsak lo, ka thih dan tur ringawt ka lo ngaihtuah.
"Inawkhlum tur ka ni a, a na ang em? Ka thih hunah chuan heng mite hian min hre ve reng ang em? Ka khawvel pangaiah chuan ka let thei tak tak ang em?"






Judy'n ka mit zawna a kut a rawn vai chuan ka phu deuh zuk a.
"Ka biak che chu i hria em?" tiin min zawt.
"Aih eng nge?" ka lo ti hu.



"I ngaih dan rawn thawh ve la ka ti mawle," a ti a.
"Ah....ngaih dan pawh ka nei lo. Chubakah keini 2 hi chu kan innel vak ngai lo, tunah hian kan inkawm ve a ni mai," ka ti ve ringawt a.


"A hmain khawiah nge i awm thin? Ti nge in innel loh?" tiin Zorini chuan min lo zawt a.

"Ih....keichu PTSD lam dam lohna ka neih bakah naupang sual tak ka nia. Thla 5 kal ta chhung kha chu mental hospital-ah ka awm a. Chumi hma chuan engtin nge ka awm ka hre lo, ka hriatna ka hlauh then a," ka ti a.
Ka thi tep tawh tho a, ka thih hnua mak ti taka an lo sawi khawm ai chuan tunah hria se ka duh zawk.







An 2 chuan min khawngaih tih hriat takin min en a, Zodinsanga min en dan erawh a inthlak ve hauh lo, a ngai reng.

Zorini chuan, "Mahse tunah kan bulah i awm a, a lawmawm alawm," a rawn ti a.

"Nia, tiang reng hi ni thei se," ka lo ti a. Tiang reng hian Zorini hi awm thei se ka ti bawk. A sual atang khan amah hian a nihna a hlauh vek, thian a nei tawh lo a, a thil tih avangin miin an hmusit hle. An in lamah thlamuang takin a awm thei bawk si lo. Thlak danglam thei ila ka ti ngawt mai.






Zorini'n Rinhlua a duh tih a inhriat atang khan a vei lehzual nghal em em a. Judy nena an awm dun hlek pawh hmuh harsa a ti a nih kha. A hnuah Judy nen an inngaizawng lehzel chu a hmu thei ta lo. Judy tih chhiat dan tur ringawt a ngaihtuah ta a. Mahse Judy bulah erawh thian tha tak angin a awm der reng thung.




Judy chu mi huat rawntir a duh bakah mualpho taka siam a duh a. Judy ruak lek leka a thlalak chu a tih darh sak ta a nih kha. Chu thlalak chu an riah dun tuma Judy inbual zawh hlima a lo laksak a ni nghe nghe.


Khatiang kha thleng lo se ka duh. Tih theih ka nei a nih phawt chuan ka thlak danglam ang.






........






Restaurant atang kan chhuak a, Zodinsanga chuan min lo be ve khiah.
"I tha tawh maw?" tih min zawt a.

"Min be lo kumkhua dawn emaw ka ti a. Min biak takah chuan ka tha e," ka lo ti a.

"Fiamthu i thawh theih danah i tha a nih kha," a ti a, a bike-ah a lawn nghal.

"Ka thih hunah chuan min ngai ber ang mawle," tiin ka fiam a. Ka fiam ti ila, thutak deuh siin a ni.

"Ti nge thih chungchang hi i sawi leh thin? Intihhlum i tum em ni?" tiin min zawt a.

"Aw," tiin ka lo nui vur vur.

"Mawl lutuk," tiin min tlansan nghal deih.

Nelawm loh deuh hian awm thin mahse a felzia chu ka hria. A nunah hmeichhe duh 1 chiah a la nei a, Judy a ni. Judy hi a vannei khawp mai. Rinhlua ai chuan Zodinsanga hi a thlanawm fe zawk a sin.






............





Dar 1 a ri tawh, ka la muhil thei chuang lo. Nakin lawka ka thih dawn vang a ni mahna le.

Whatsapp-ah chuan ka lut a, mi status chu ka en ta vel mai mai a.

Rin loh takin Zodinsanga message a vawi khat nan ka dawng ve.
"Mutthilh a hun tawh hi," tih zawng a ni.

A message hi a tawng dan chiah a ni, ka bula rawn sawi nen a inang reng.



"Ti nge ila mutthilh bik si loh?🙄" tih ka thawn a.

"Hna ka la thawk," tih leh zawng a ni.

"Bar-ah maw?"

"Aw," tia min reply chuan biak zawm leh dan tur pawh ka hre tawh lo.


Mahse ka thi tep tawh tho a, zu ka in leh chak riau avang chuan a haw lama zu min pe turin ka chah a. "Ok" chu a tih ve mai kha.





Darkar chanve hnuah chuan call ka dawng a, Zodinsanga a ni.
"In inkawtah ka awm, i thil tur hi rawn la vat rawh," a ti a, a dah nghal hmak.


Thawm dim takin pawnah chuan ka chhuak a, Zodinsanga chu gate bulah a lo ding reng tawh. Thu a awih phian leh nghal.




Gate pawnah chuan ka chhuak ve a, a zu khai lai chu min rawn pe a.
"Engzat man tur nge?" tiin ka zawt a.

Mak tak maiin, "Ka thil pekah che ngai rawh," a ti a.
"Nang hi, ka chanchin ka sawi avang khan min khawngaih a ni lo maw?" ka ti a.
A hmel thlak danglam eih lo chuan, "Mi ka khawngaih ve ringawt ngai lo," a ti a.
A dik ang.




Ka luhsan dawn chuan ka hawi let leh a,
"Min inpui duh em?" tiin ka zawt a. A sana bun lai chu a en leh phawt a,
"Awle," a ti a.




Kan in bul lawka thingkung hnuaia thuthleng-ah chuan kan thu a. No kan neih loh avangin a ûm chuan kan inin chhawk a.

"I in(drink) thiam ve tawh kha," a ti a, a nui suk a.
"Mahse tun bak hi ka in tawh lo ang," ka lo ti.

"A hma pawn kha thu kha i sawi a, tunah i in leh a," a ti a, min nuihzat hmel hle.
"Ka ti tak tak alawm. Chu loah tun bak hi chu in theihna hun ka nei tawh lo. Kan indunna hnuhnung ber tur a nih hi," ka ti a.



"Thi tur ang mai hian tawng i ching a," a ti a.

"Naktukah hian thi dawn ta la, eng nge i tih ang?" tih ka zawt a.

"Ka ngaihtuah chhin ngai lo. Mahse min zawh takah chuan......, ka nu hi hlim taka siam ka duh. Ka nu hian kei leh pa min enkawl nan a hun zawng zawng a hmang a, ka thih hmain nuamsa taka siam ka duh," a ti a.



A thusawi avang chuan ka ngaisang ru hle.
Chutih rualin ka nu min ngaih thar tir. Ka nu kha kum 15 ka nihin a boral a, tuna ka awmnaah lah ka nu chu ka naupan lai thoin a boral.



"Ti nge i tah a?" tia min rawn zawh chuan ka mittui ka hru zeuh a.
"Engah mah ngai suh, ka nu ka ngai thut a mawle," ka ti a, ka nui lui a. Ka tawng zawh rual chiah chuan ka hmuiah a rawn fawp a, mahse a inla hrang leh nghal vat.



Ka marphu a buai nghal vek. Ka thin a phu rang em em a, chet ngaihna ka hre lo. Mahse lan chhuah tir loh hram ka tum.



"Ngaih dan dang nei suh, ka rui tan a niang," a ti a.
"Lungngai suh.....Judy i duh tih ka hria alawm," tiin ka lo nui.
"Eng maw?" a tih rualin, "Eng a?" ka tih leh nghal.

"Engmah," tiin engmah sawi lo angin ka awm. Ka lei tak hi chu aw!
"Engmah a nih loh kha," a ti a.

"'Hmeichhe dang duh i nei ang ka ring' ka ti a nih kha," ka ti ta keuh a.
"Mahse 'Judy' tih i sawiin ka hria," a la ti talh.



"Aw...ka tlawm e. 'Judy i duh tih ka hria alawm' ka ti. I lawm em?" ka ti a.

"Engtin nge i hriat?" tiin min zawt.

"A lang vek alawm. Judy i melh dante hi ka hmu vek zel," ka ti a.
A zak ve deuh a niang a lo khuh der a.



"Duh i nei ve tawh em?" tiin min zawt.
"Pakhat chu nei ve tawh e. Mahse ka thian tha ber nen min bum a, an lo inngaizawng ru daih a," ka ti a, ka nui kur kur a, zu chu ka in leh a.



"I na em?" a ti leh.
"Na takzet. Mahse khapa vang ai kha chuan ka thiantha berin min phatsan vang khan ka na zawk. Kha pa kha a lo duh ve reng tih hria ila chuan ka kalsan thei lutuk ang. Mahse ka hnung lamah min bei ta a," ka ti a, zu chu ka in leh a.



A thutna atang a tho a, "Dar 3 a ri dawn," a ti a. Kan lo titi rei hle mai.
Kan 2 chuan kan inmangtha ta a.



A tlan liam tur chu ka thlir zui vawng vawng. Kan inhmuh hnuhnunna ber tur a ni awm si a.




Zu um nen chuan in chhungah ka lut a. Ka lo rui deuh nen ka inpal deuh khut khut.
Ka chhungte an harh ang tih ka hlau tho bawk si. Ka room chu ka thleng ve thei hram.







............





Ka room tukverh atang engin ka mitah tak a rawn chhun vang chuan ka meng diar diar a. Tu nge parda chu lo hlip ni?





Ka thu chhuak chu ka khum mawngah Nu Mazuali chu thinrim hmel deuhin a lo ding a. Tun ang zing zingah eng nge a duh le?

Ka khuma zu um lo awm ka hmuh rual chuan Nu Mazuali thinrim chhan ka hre ta. Nizan khan ka lo paih theihnghilh a nih hi.





"I patea'n a hmuh chuan a thinrim viau ang. Paih bo vat rawh," a ti a.
"Awle," ka ti sep a.
"Eng nge maw i ngaihtuah reng reng le? Ti nge zu i in ve tak mai. I nun hluiah khan let leh i tum em ni?" tiin min zawt a.


Ka nunhlui a tih awmzia chu damdawi ka ruih thin lai a nih chu.


"Aih, chu lam a ni lo," ka ti ringawt. An mahni min hrilh hnuah chauh hetiang nunhlui zahthlak hi ka nei tih ka hre chiah kha a nia. Mahse zu erawh ka in ngai lo.

Nu Mazuali hian a fa a lo chan tawh avangin a fa angin min en tak tak a ni mahna min ngaihtuah e mai.



"A hma ang kha chuan awm tawh suh. I patea hi timualpho tawh suh. Tho vat la, zu um kha paih bo vat rawh," a ti a.



Ka room kawngka bul atang, "Zu um a?" tihna lam chu Nu Mazuali nen kan hawi vat.

"Pate," ka tih rualin Nu Mazuali pawn, "Pa-a," a lo ti ve.


Ka patea thinrim hmel chu ka hlau hle. A mitah pawh ka en ngam lo.


Ka room-ah a rawn lut a, min hau nghal ta chiam chiam a.

"Phalna ka pek leh hma che chu i room i chhuahsan lo ang," a ti a. Nu Mazuali chu room atang a hruai chhuak a, ka room pawn lamah min kalh hnan ta a.

Kawngka bengin ngaihdam ka dil mawlh mawlh. Ka patea hi ka pa ang chiah a nih avangin ka awm dan vang chuan ka inthiam lo hle.





Ka patea min hauhnate avang chuan a zak hle a, khumah chuan ka tap ta a. Mahse ka ngaihtuahnaah thil dang a rawn lang a. Thawnthua Lawmsangzuali kha, a thih hmain a chhungten a room-ah an khalh hnan a, an hawn leh chuan a lo inawkhlum a ni a. Chu chu ka thih dan tur a nih chuan ka duh lo.




Khum atang ka tho a, kawngka min hawnsak turin ka au a. Tumah an lo kal chuang lo. Ka thih dawn darkarah meuh chuan ka hlau ve a nih hi. Ka thih chuan khawvel pangaiah ka let theih ka ring a, mahse let ta lo ila engtin nge ka awm ang?
Zorini hi ka kalsan thei lo, mi sual taka a chhuak tur hi ka en liam thei lo. Chuvangin ka intihlum tur a ni lo, ka intihlum lo ang.







Intihharh ka ngai. Inbual ila ka harh sawt mai ang.
Bathtub-ah chuan tui ka dah a, ka thu lut a. Tui luma ka han inchiah takah chuan ka zia nghal huaiin ka hria.



Mahse mak tak maiin mut chhuak hian min zam nghal chiai chiai mai a, bathtub-a ka thu lai chu ka lo bu leh lawp lawp thin.



Ka phone ri ka hriat avang chuan ka harh zawk a, tui chhungah chuan ka lo inhnim pil hman a, ka harh rual chuan ka chhuak vat a, ka thaw nghal hlawp hlawp. Tlema tlemah ka thi lo chauh a nih kha.





Ka phone ka la a, Judy a lo ni. Mahse ka chhang hman lo chiah chiah. Call let ka tum chuan signal ka nei thei ta miah lo mai a. Thil thlen dan chu a makin ka hlau ru hle.







Face cream ka inhnawih a, a chhin chu ka thloh a, khum hnuaiah a lum lut a. Khum hnuaiah chuan ka kun a, hruai zen chu ka hmu a. Hmannia ka patean dah tha tura min tih kha a ni a, ka lo la dah tha lo tih ka hre chiah.



Hrui zen chu ka la chhuak. In chung lam ka melh a, "In awhhlawm nan a tha ngawt ang," tih chu ka lo ngaihtuah a. Ka hriat chhuah rualin hrui zen chu chhuatah ka paih thla nghal. Ka hlau lutuk chu ka tawlh hnung nghal hrat.




Dressing table hmaah chuan ka thu a, ka han inbeng harh leh rih. Ti nge intihhlum ringawt chu ka ngaihtuah tak le? Thawnthua thi tur ka nih avangin ka thih ngei ngei a ngai dawn tihna em ni?






Intihthawven hram hram ka tum a. Ka makeup chah thar chu parcel-ah a la awm a, ka hawn dawn chuan ka hawng thei lo. Ka drawer a blade chu ka la chhuak a. Parcel hawn ka tumna lamah chuan ka kut zungpui chu ka zai palh a.


Na hre miah loin ka awm, mak ka tih avang chuan ka kut phah chu ka zai leh chhin a. A rawn thi zur zur, mahse na engmah ka hre lo. Ka banrekah zai leh ka tum lai tak chuan ka harh chhuak hlawl.



Ka kut zungpui leh ka kut phah chu a lo thi nasain a thip ngei mai. Tun mai khan engmah ka hre si lo, ka banrek hial zai ka tum hman a. Zai ila chuan ka thi thei hial ang. Ka kut chu ka tuam nghal vat a.


Vawiina thi tur ka nih vang em ni hetia ka awm? Darthlalangah chuan ka inen a, ka hmel lah chu a dang vek a. Keimah leh keimah ka inhlau, ka inrap ngawih ngawih.





Ka nu chuan kawngka a lo hawng a, chaw a rawn dah a. "I patea nen mi kan va vui lawk dawn a, tha deuhin ilo awm dawn nia," a ti a. A chhuah leh hma chuan a banah ka lo vuan a, "Khawngaihin min kalsan suh u. Ka hlau lutuk a nia. Ka chungah hian eng emaw a thleng ang tih ka hlau," ka ti a, ka tap nghal zawih zawih a.




Ka patea a rawn kal a, "Khatianga min tih thaih leh kha i tum em ni? Tun hi a vawi engzatna nge? Intihhlum i ngam tak tak lo," min lo tihsan a. Min kalh hnan leh ta a.





Tih ngaihna ka hre lo, khumah chuan ka mu tawp a. "Tihian nilengin awm ila, vawiin hi ka dam thleng thei mai ang," ka ti a.



Ka phone chu signal a awm leh awm loh ka en sek. Call ka dawng leh hlauh. Zodinsanga a ni.
"Khawiah nge i awm? Rinhlua birthday kha i theihnghilh em ni a?" a rawn ti a.


Ka lawm bawk si, hlau bawk chu ka lo tap a,
"Kan inah lo kal vat teh. Ka chhungten ka room-ah min kalh hnan a, ka chungah hian eng emaw a thleng dawnin ka hria. Khawngaih takin min pui rawh," ka ti nghal a.




A rawn tawng leh hma chuan line a incut a, signal a bo leh tawh. Zodinsanga hi a rawn thleng hman ang em ka hre lo? Mahse ka chhungrilah chuan intihlum tura min nawrtu a awm awm. Ka hlau takzet a ni.





Ka lo muthlu a ni ngei ang ka harh leh zawk a. Mahse ka dinna avang chuan ka te chhuak thawt a. Ka tukverh tlangah chuan ka lo ding a. Kan in chhawng 4 laia sang atang chuan ka lo tla hman tep a ni.




Chhuk ka tum chuan ka rap pial a, pawn lamah ka awm ta a. Mahse vanneihthlak takin ka inham tang hram hram.



Rin loh takin tu emaw hian ka ban a rawn chelh a. Tukverh lam ka en chhoh chuan Zodinsanga a ni. Ka lawm lutuk chu ka thaw huai a. Rinhlua a rawn lang ve leh a, an 2 chuan pawt chho ta a.




An 2-in thil thleng chu min zawt nghal a.
"Ka hre bik lo. Ka chungah hian eng nge thleng ka hre lo. Muhil atang harh chhuak thut ang hian ka awm a, ka harh chhuah chuan ka lo thi tep hman zel a. Eng nge awmzia ka hre lo. Ka hlau lutuk," ka ti a, ka thaw deuh hlawp hlawp.



Rinhlua chuan ka darah a rawn vuan a,
"Kan awm tawh alawm," a ti a. A tawngkam chuan min thlamuan hle.

Zodinsanga chuan min melh rûn a,
"Hei vang hi em ni thihna chungchang i sawi reng? Thih chu i chak viau em ni a?" a ti a, a awkiah chuan a thinrim hmel hle.




"Aih, thih ka duh lo. Thih ka la duh lo," ka lo ti nghal.
Min kuah a, "A that hlauh chu," a ti a. A awmah ka bei chuan ka lungphu a ran rualin ka thla a muang hle. Thlah leh duh tawh lohna rilru chu ka lo pu hman a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 10th, 2021, 2:07 pm

Chapter 4







Rinhlua leh Zodinsanga vangin ka thihna ka pumpelh thei hlauh. A dawtah eng nge thleng dawn ka hre lo. Mahse tuman kan thih hun tur kan hre lo a, thi tur vek kan ni tih inhre reng chungin thlamuang takin kan hun kan hmang thin tho a ni lo'm ni?


Khawvel pangaiah pawh khan ka thih hun tur ngaihtuah loin Pathian kutah ka indah tawp a, khatiang khan thi loin ka la nung ve zel. Tunah pawh hian, ka hun hi tha takin ka hmang ang.




...........






Rinhlua bulah thil thleng kha ka pateate nupa hrilh lo turin ka ngen a, a intiam ve mai. Ka patea chuan engmah hre loin ni 6 chhung chu ka room-ah min khung ve ta.
Ka rin ai ka lung a leng lo. A chhan chu thian 4 fel tak tak ka nei tawh miau alawm.




An ni 4 hian a khat tawkin min rawn be reng a, ka lung a leng hman lo. Rin loh takin Rinhlua'n ka ei chak zawngte min rawn zawt ve leh thin. A nelawm loh tehreng nen kan inpawh phian.







Lehkha bu ka chhiar lai chuan ka patea'n ka room kawngka a rawn hawng a. Mak tih hmel deuhin min rawn en a,
"Lehkha bu i chhiar ve thin tih ka hre hleinem," a rawn ti a. Lehkha bu ka chhiar vang chuan a lawm hmel hle bawk.

"Han chhiar takah chuan a lo nuam em a," ka ti ve tawp a. Dik tak chuan ka hun tam zawk hi lehkha bu chhiar nan ka hmang thin.



A aw a thian kharh a, "I chhuak thei tawh ang. Class i kal dawn nia," a ti a.
"Ka lawm e. Chuan ka tihpalh, khatiang kha ka ti leh tawh ngai lo ang," ka ti a.

"Min tiam thei em?" tiin min zawt a.
"Tehreng mai," phur takin ka lo chhang.






Ni 6 hnuah class ka kal ve leh thei dawn ta.
Vawiin hi September ni 1 a ni a, Fur kan kalpel ta chu a nia, ka lawm hle. He thawnthuah hian thla 1 dawn chu ka awm ve ta, eng tak chu thleng zel ang maw?






MZU ka thlen chuan ka thiante 4 chuan gate bulah min lo nghak thap a. Thian ka neih lohna chen a rei tawh a, a nawmzia ka lo theihnghilh hman a ni.



Judy leh Zorini chuan min lo be bawrh bawrh.
Judy chuan, "Kan zirsan teuh tawh che a nia aw," a lo ti a.
Zorini pawn, "Lungngai suh, Rinhlua kan topper note i copy vek thei alawm," a lo ti bawk.





Gate chhungah chuan kan lut a. Keini hmeichhe 3 chu kan titi char char a, mipa 2 erawh kan hnungah kalin an ngawi reng.
Zodinsanga leh Rinhlua hi heti chung hian bestfriend an ni thei hi a mak ka ti, an tawng tlem dun si.



Rinhlua chuan, "Sangzual, i pheikhawk hrui a inphelh a nia," a ti a.
Kawngsir lamah ka kal a, "Ka rawn um ang che u," ka ti a. Ka pheikhawk suih tumin ka kun hniam a.

Ka tshirt hak a tet deuh avangin ka kun zawng chuan ka ngûm a lang dawn zel a, mi lah chu an rawn kal zel bawk si, an kal liam hun ka nghak a.




Zodinsanga chu ka bulah a rawn lêt a, ka bul a rawn thlen chuan, "T shirt tê deuh i ha a nih kha," a ti a. Ka hmaah chuan thu hniamin ka pheikhawk hrui chu min suihsak a. A chet dan vang chuan mak tak maiin ka lungphu a rang a, a rawn din chhuah leh chuan ka lo en deuh ha, sawi tur ka hriat mai loh avangin
"I lo polite hi le," ka ti a.

A ner nang a, "Kal ang," a ti hmuk. Inla nelawm lo thei ropui si.

"Ti nge i bike i lo ken loh a?" tiin ka zawt a.
"Ngatan nge i hriat duh," tiin min chhang.

"Ka hriat duh vang pawh a ni hleinem. Sawi tur ka hriat loh avangin titi ka vawrh a nih hi," ka ti a.

"Sawi tur i hriat loh chuan ngawi mai la," a tih chuan ka tawng thin dan min tihre chhuak. He a tawngkam hi mi dang bula ka lo sawi thin kha a nia, a ngaithla tu tan a lo nuam lo duh khawp mai.


"Kan 2 in darkar 1 chhung room pakhatah awm ta ila, i ngawi reng dawn mi?" tiin ka zawt leh.

"Aw, a reh hian nuam ka ti," a ti leh. Tawng zawm lehna chi-ah ka ngai lo. Ka ngawi ta reng ringawt.





...........





Kan professor a rawn luh chuan paper a rawn sem nghal mai a.
Judy chu ka zawt a, "Ngatan nge paper hi?"
"Test kan neih tur kha an hrilh lo che em ni a?" a ti a. Kan tawng lo hretu midang 3 chu an inen kual a, a rual thap hian,
"Ka lo theihnghilh daih," an ti hlawm a. Inthurual an ang zawk alawm le.






Question paper chu ka en a, vanneihthlak takin ka thiam zawng tak a lo ni. Nui vur vur chungin zawhnate chu ka chhang nghal a.

He nun hi a lo nuam phian mai. Mi thar ang mai ka ni a, ka la naupang bakah thiamsa ka ngah em em bawk. Ka tan chuan hlawkna tur hlir a ni. Thil hi ka tan a awlsam bawk si, chu mai ni loin, thian ka nei hi ka lawm a ni.






.........





Canteen-ah chuan thil ei turin kan kal a. A hmeichhe 3 bawk chu thil ei chungin ka titi leh bawrh bawrh. Hetianga ka tawng tam hi a vang khawp mai. Rinhlua leh Zodinsanga pawh an titi ve, eng nge an sawi erawh ka hre lo. An han inbiak ve takah chuan thian an ang deuh tawh alawm.






Zorini nen washroom atang kan let a, midang awmna kan pan lai chuan ka be mawlh mawlh a, ka bulah a lo kal ve zel emaw ka tih lai chuan ka han en a, ka hnungah a lo ding a.


Kan hma lam chu a en tlawk tlawk a, eng tak chu en ni maw tia a hawina lam ka en chuan Rinhlua leh Judy lo inkawm chu thik hmel takin a en hi a lo ni a.
Class ka kal loh chhung khan Zorini hian Rinhlua hi a lo duh hman tawh em ni? Engtik atang nge?






Engmah hre lo awmin ka awm a,
"Ti nge i din daih a? Ka be char char che a," ka va tih chuan a harh deuh zawk.
"Aw..engmah," tiin a nui lui a, hmuh hreawm ka ti takzet. A rilru thlaksak theih ka chak ngawt mai.
"Sawtah ka va kal lawk ang," tiin min kalsan nghal. Hun thawl a mamawh a ni mahna.






.............






Class bânah chuan bus lo thlen hun kan nghak a. Bus a lo thlen veleh kan lut nghal sap sap.
Judy chu tukverh bulah a thu chat a, a bula Rinhlua thut a va tum chuan Zodinsanga'n a lo thut khalh hmak mai. Rinhlua pawn engmah sawi loin seat dangah a va thu mai.



Zodinsanga pawn Judy leh Rinhlua inkara inrawlh nawlh nawlh a ching tan. Heng love triangle buai nuai karah hian eng nge ka lo tih ve ni.





Rinhlua chu a hnung ber tukverh bulah a thu a, a bula Zorini thut a va tum chu rang takin ka kal a, ka va thut khalh. Rinhlua nen an inhnaih lutuk chuan a duhzual phah ang tih ka hlau. Zorini leh Rinhlua inkarah chuan ka thu ran mai.



Zirlai dang pawh an rawn lut ve zel a, kan tawt ta hle mai. An ding khat deuh vek. A tlai tawh avangin bus dang nghah pawh an tum lo. Thui vak lo kan tlan tihah chuan bus ka rui tan a, ka lu a har bakah ka luak a chhuak.
Zu ruih aiin motor ruih hi a lo hreawm zawk a nih hi.

Bus atanga zuan chhuah theih chu nise ka zuang chhuak tawh ang. Bus tihdinna lai tur a awm bawk si lo, ka luak chhuak lutuk chu ka insum hram hram. Chhunah khan thil ka ei hnem bawk nen tunah chuan ka awm dan hi a hreawm khawp mai.




Ka luak tak ngiala ka hriat dawn avangin traffic a jam lai chuan bus tawt tak atang thei leh thei loin ka chhuak a.
Rinhlua leh Zorini chuan ka kalna tur min lo zawt. Ka luak a chhuah em avangin ka chhang thei lo.

Bus atang ka chhuk chu ka thawl zia nghal huai. Kawng sir lam chu ka pan a, thir ban nghengin ka ding, ka zawi hman alawm le.

Ka maimit chhing vang vang a, ka han men leh chuan ka bus chuanna chu a lo awm tawh lo, min kalsan daih a nih hmel.



Ke chuan ka kal a, ka piah lawka footpath-ah chuan Zodinsanga ang deuh ka hmu fuh a. A hlat deuh avangin amah a ni em ka chiang lo.
Ka kal hnaih telh telh a, amah chu a lo ni ngei mai.


"Eng nge hetah i tih a? Bus kha a kal daih tawh a ni lo'm ni?" ka ti nghal a.

"I dam lo em ni?" tiin min zawt. Ka thusawi chu a ngaihsak lo khawp mai.

"Dam e, ti nge? Bus-a ka chhuk avang khan min ngaihtuah em ni?" tiun ka fiam tel zeuh a.

"Aw," tih zawngin min chhang, amah lah chu a thutak rûn bawk si, ka nui lai chu ka tawp deuh hmak.


A kalsawn a, a rawn hawi let leh,
"I rawn kal ve dawn lo em ni?" a tih chuan ka zui nghal vat.





Hepa hian min duh a mawn le? A awm danah Judy a duh tih a lang chiang viau si a. Keimah vangin bus atang a rawn chhuk ve a, Judy kal sanin. Awi.....thil ni lo pui pui hi ka ngaihtuah nasa lutuk a ni.


Ka kawng kal lai chu Zodinsanga hnungah ka va intauh a, thil ka lo ngaihtuah nasa lutuk a ni.
"Hey, fimkhur ve ta che," a ti a, a kal keh nghal mai. Engmah sawi lo chuan ka sawi loin a rual chuan ka kal ve a.





Dammsmdawi dawrah chuan kan peng a,
"I pa ta tur a ni em?" tiin ka lo zawt a.
"Ka pa chanchin engtin nge ilo hriat a?" tiin min zawt let.
Ka tawng pawi leh ta, ka lei hi ka veng seng lo reng reng.


"Ka hre lo.....ka hria...pawh a ni chiah lo. Rinhlua'n a sawi thawi zuai e," ka ti bah nuai a.
Chiang deuhin min en a, "Ti nge min hlauh hmel em em a?" tiin min zawt a.

"Darthlalangah i en ngai loh vang nge i hmel awm dan hi i hre lo hrim hrim? I nelawm loh hmel a, tuna min en dana min en ngat phei kha chuan tihsual ka nei emaw ka ti hman thin," ka ti a.

"Anih nangin min nel em?" tiin min zawt a.
"Nel che pawh ka hre lo," tia ka chhan chuan min nuih a.
"Kan inhriat chian hmain min be bawrh bawrh ngam a, min nel tihna a ni mai lo'm ni?" a ti a. Ka nel vang pawh a ni lo, an thawnthu ka chhiar nasat avangin kan inpawh riaua ka hriat vang alawm.



....



"Judy bulah khan i thu emaw ka ti a," ka ti a.
"Thu e"

"Mahse inrawn chhuksan daih sia," ka ti leh a. Free
A kawng kal lai chu dingin min en a,
"Ka ngaihtuah vang che a. Chhuk lo turin min duh a mi? Min ning viau a mi a?" a ti a.

Min ngaihtuah thu a sawi chuan ka lungphu a rang nghal em em. Ka unaupa ai pawn min ngaihtuah daih zawk.


"Ti nge ka nin ang che? I ngawi leh lutuk hi i ninawm deuh thin tih lohah chuan," ka ti a.


"Ok," a ti a, a kal leh nghal. Kan kal rual tih pawh a ngaihsak lo. A kal chak thut thut a, a muang keh deuh thut thin bawk. Hetiang hian Judy nen an kal dun ngai tawp si lo a, min tihah.







........................






Vawiin hi September ni 6, ka û thihcham a ni. Class kal chu ka phur lo hle. Ka û thihcham a nih hian pawnfen dum emaw kawrfual dum ka ha thin, pheikhawk pawh a flat pangai ka bun thin.




......



Bus atang ka chhuk a, kan class a mite thenkhat lo chuan mak tih hmel deuhin min en a.

Ziri chu ka bulah a rawn kal a,
"Ehe! Pawnfen i feng ve thin elo?" a rawn ti a.

"Ka lang mak viau a mi?" tiin ka zawt a.

"Teuh lo! I inhmeh lutuk, tiraw Zodinsang?" a ti a, ka hnugn lam chu a en a.

Ka hawi let a, ka hnungah chuan Zodinsanga min en rengin a lo ding a.

Ziri bawk chuan, "A inhmeh a i ti ve em?" a rawn ti a.

Zodinsanga chuan min thlek vang vang a,
"Mitthi sun tur i va ang ve," a ti duh chauh a. Min fak chu a har viau a ni ange.

"Ka unaunu thih cham alawm," ka tih lai chuan midang 3 pawh an rawn thleng ve.

Rinhlua'n ka thusawi a hriat chuan,
"Tu i unaunu maw?" a rawn ti a.

"I hre ve lo ang," ka ti a.
"Kan chhungah keini 2 bak naupang kan awm lo, i nu lama i cousin maw?" a rawn ti a.

"Chu vang taka i hre ve lo ang ka tih," tiin ka chhang a.






...........





Class kan thlen chuan kan lam chu midangin an lo en lo hrek hrek hlawm a, an inhrilh ru sep sep. Ka inthuam dan a nih loh hram ka beisei.


Judy chuan Ziri chu a va zawt a, "Thil thleng a awm en ni?"

Ziri chuan, "I la hmu ve lo em ni a?" tih pahin a phone ken lai chu a pe a.

Zorini nen chuan kan enpui ve vat, Judy leh kan professor 1 thlalak hi an lo post a, caption-ah inngaizawng angin an chhuah.



Ziri chuan, "In inngaizawng tak tak em ni a?" tiin a zawt. Judy chuan tawng ngaihna a hre lo, a chungah hetiang ti duh an awm vang chuan mak a ti hle a ni ngei ang. Zorini chuan chêt a la tan a nih hmel, Judy'n a thiantha ber a ni tih ngaihna a hre si lo.






Kan piahah chuan hmeiche 2 hian kan hriat than tur siin Judy chu an lo rel a,
"Kan professor subject-ah hian a titha thei ka ti reng a ni,"
"A mizia chu a lo thup thiam khawp mai," an lo ti a.




An bulah chuan thinrim hmel deuhin Zorini chu a va kal a, "In thusawiah khan fimkhur hle rawh u," a ti a.
Lem a chan thiamzia ka hriat phah, ti nge Zorin hetiang hian i awm?






...........





MZU lamah chuan Judy leh kan professor chu an lar hat hat ngei mai. Kan professor Zaia hi la naupang tak a ni a, professor thenkhatte pawn an inngaihzawn an lo ring hman.



Judy sawi dan chuan he thlalak hi thla hmasa a project an neih tum a professor Zaia a va zawh lai a ni awm a. Thawnthuah pawh tiang chiah chuan a inziak, tin, professor Zaia pawn a lo duh tak tak kha a nia. Mahse professor Zaia chuan Judy'n a tuar aiin tiin banna a theh lut a, buaina a awm ta lo kha a nia. Tiang kha a nih hram ka beisei.



Thil thleng tur thenkhat ka hre lawk a, mahse ti nge hetiang thil a thlen loh nan tan ka lo lak loh. Tun atang chuan Zorini hi ka enthlak reng a ngai ang.





......





"I unaunu chu engtin nge boral a?" tia min zawttu Zorini chu ka en vat a.

Zodinsanga chuan, "Ka hre chak ve tlat," a lo ti bawk.

Judy leh Rinhlua chu kan bulah an awm ve lo, khawiah emaw romantic scene an nei a ni mahna.





"A hming chu Lalremsangi a nia, thisena inzawmna nei lo mah ila unau dik tak ang kan ni, kan inkawmngeih hle. A thih chhan chu....umm...keimah vang a nia," ka tih chuan ka mittui tlak loh nan ka insum hram hram.

"Kan la naupanga, kan harh vang bawk si. Nikhat chu kan leng dun a, kawng en lek loin ka kal a. Motor-in min su tur chu min namsawn hman a, a ni erawh a kalsawn hman ta lo a. A nu chuan engkimah min mawhpuh vek a, kan inkar pawh a chhe ta vek a ni," ka ti a.




Kan ngawi deuh vung vung, tumah kan tawng chhuak mai lo.
Mahse Zorini chu a rawn tawng chhuak a,
"Tih takzeta ngaihdam i dilte chuan engtikah emaw chuan a ngaidam thei mai ang che," a rawn ti a.


Zodinsanga chuan, "Ngaihdam i dil em?" tih min rawn zawt.

Chhan ka tum chuan chhan dan tur ka hre lo, a chhan chu ngaihdam ka dil miah lo tih ka inhre chhuak.
Keimah vanga boral a ni a, mahse Nu Mazuali leh Usangtei hnenah ngaihdam ka dil lo. Dil a hnekin Nu Mazuali chungah ka thinrim em em ringawt.
Engti nunin nge ka lo nung thin ni?





Zodinsanga zawhna vang chuan ka awm a nuam thei lo. Usangtei chungah ka inthiam lo thar leh hnuhnawh. Nu Mazuali chungah pawh.





........




In ka thlen chuan Nu Mazuali chuan min lo be vat a.
"I patea a zin dawn a, room-ah a awm mek," tih min hrilh a.

Mahse Nu Mazuali hmel ka hmuh chuan ka tah a chhuak a, ka mittui a lo luang nghal a.

"Ti nge a? Na i nei em ni?" a rawn ti a.
Ka hmui chu ka hup a, ka tap zawih zawih a, min lo kuah vat bawk.

"Ka tihpalh lutuk. Kei hi i chungah ka lo sualnthei lutuk a. Ka tihpalh lutuk, min ngaidam rawh," ka ti a, ka tap chhuak ta hawn hawm a.

"Keipawh ka tihpalh aw. Tap tawh lo la," a ti a. Kan thawmah patea chu a rawn chhuak vat bawk. Thil thleng chu a bo ve hle ang.




......



Khawvel pangaiah ka let leh thei a nih chuan Nu Mazuali hnena ngaihdam dil chu ka tih hmasak ber turah ka dah.

Tuna Nu Mazuali hnena ngaihdam ka dil ringawt hi chu awmzia a awm lo. Mahse khami atang khan kan inngeih phah hle.






Judy leh kan professor chanchin chu an la sawi ve laih laih a. He thil hi chapter 9-a thleng a ni a, chapter 11-ah Zorini'n buaina a siamsak leh a, a thlen loh nan ka vil reng a ngai dawn nih hi.






Library lam panin phur lo zetin ka kal ve boh boh. Ka zirlai bu ken lai chuan min tichau vekte hian ka hria.

Ka kal lai chu Zodinsanga hian ka lehkha bute chu a rawn la a, "Kg 20 vel keng i ang alawm," a ti a, a kal nul nul.

A ruala kal tumin ka kal chak ve sawt, engmah erawh ka sawi lo.

"Vawiin chu i tawng tlem," a rawn ti a.

"Tawng tam aiin a reh hian nuam i ti zawk sia," ka ti a.
"Mahse i tawng tlem phah ngai chuang lo," a ti a.
"Tunah ka tawng tlem tawh dawn lo'm," ka ti leh.
Ngawi rengin library lam chu kan pan leh ta a.



..........




Zodinsanga hian hmun reh nuam a tihzawk avangin library-ah hian a kal nasa. Ka kal apiangin hmuh tur a awm ziah. A lehkha bu chhiar laite hi hmeichhia hian an lo en leh thap zel. A awm hle hle pawn mi rilru a lo hneh thei tho a nih hi.




Zodinsanga nen library-ah chuan a inepin kan thu a, Zorini a rawn lut a, amah chuan min hmu ve lem lo.

Lehkha bu chhiar tur a zawng a, a bulah chuan mi an ding vein ka hria. Ka ngaih a that loh avangin thawm dim deuhin ka kal a.

"Hetah chuan sawi lo ang ka tih kha. Kan inhmuhna hmun tur ka hrilh leh che ang a naktukah kan inhmu dawn nia," Zorini chuan a ti a.



Thil tum tha lo tak a nei leh a nih ka rin avangin ka hlauhthawng ru hle. Min hmuh loh nan ka thutna lamah ka let leh vat.



Zodinsanga chuan zawi te hian min lo bia a,
"Eng nge a?"

"Eng maw?"

"Ti nge i lungngaih emaw i hlim hian i hmelah i tih lan vek zel?" a ti a. Ka hmelah ka lungngaihna ka lo tilang em maw ni?

"Eng nge pawi?" ka lo ti hlak a.

"I lungngaih hian min tihlauthawng thin alawm," a ti a, a chhiar lai chu a chhunzawm leh daih a.





Ka thinphu tirang thei tur thil hi a ti a, engmah ti lo ang maiin a awm leh daih zel. A thleng ngun tawh mak. He pa hi Playboy ah a chhuak ta mawn le? Judy a la duh sia ka chunga a awm dan hi rinhlelh theih tur a ni si a, min tibuai ngawt mai.




Ka lu chu a na hle a, ka lehkha bu chhiar lai pawh chhunzawm peih loin dawhkanah ka bawk a. Ka damdawi ka ken theihnghilh leh nghal, a van pawk tak.




Zodinsanga chu ka bulah a rawn thu a,
"I dam lo em ni?" tih pahin ka chalah a kut a rawn dah a, ka biangah a rawn khawih leh a. Ka maimit chhing lai chu ka meng deuh zawk a.

"Ka tha," tih vat pahin ka thu tha nghal. Ka biang chu a rawn sa hut hutin ka hria, ka thinphu lah a rang em em bawk si. Ka chungah hetia a that leh lutuk chuan a zunah ka uai thei mai ang.


"Anih chu ka kal a nia," a ti a, library atang a chhuak ta a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 10th, 2021, 2:07 pm

Chapter 5






Vawiin hi Saturday a ni, dar 1 a rik chuan class kan zo tawh.
Judy chuan an ina leng turin min sawm hlawm a. Zodinsanga leh Zorini chuan rang fahran hian, "Tih tur dang ka nei," an ti rual a.

Judy chuan, "Hey....a rukin inhmuh in tum em ni a?" tiin a fiam zauh a. An nui lo ve ve, an haw ru phian maithei. Chu chuan ka nuih a tiza tlat pek a, keimah chauh chuan pum dawm meuhin ka nui ta vak vak a. Judy pawn min nuihpui, mahse midang 3 chuan mak tih hmel deuhin min en a.




"Anih nang chu i hman ang tiraw?" tiin Judy chuan min zawt a.
"Teuh lo, tih tur pawimawh tawk ka nei," tiin ka lo chhang. Vawiin chu Zorini ka zui ru dawn alawm.

"Anih chuan kan 2 chiah kan nih chu, kal ang," Rinhlua chuan a ti a, an 2 chuan an kal ta a.

Keini 3 chu an inmelh hrek hrek a, engmah sawi loin kan kal darh nghal. Kei erawh Zorini kal liam veleh ka zui ru nghal.


Taxi a la a, ka la ve a, an hnungah zel ka tlan tir. Tlem chuan inthlahrunna ka nei ve deuh a, mahse mi sual taka a chhuah ai chuan a la tha tho tho.





A taxi chuanna a ding a, a chhuk hnu deuh lawkah ka chhuk ve nghal. Building pakhata 2nd floor ah a lut chho. Ka luh ve chuan music a ri deuh hut hut, bar niawm tak a ni.




A chhunga awmho chu nula leh tlangval hlir an ni. Ka hawi kual a, Zorini'n min hmuh theih lohna turah ka awm zel.
Room 1-ah a lut a, a luh hnu lawkah hmannia library-a a biak nu kha a lut ve.

An awmna room hnaih takah ka kal phei a. Zu in ang deuhin no chu ka keng ve a, mahse ka patea hnenah inlo tura ka intiam tawh avangin in tumna ka nei lo.


Bar chhunga awm hrim hrimte chuan midang an ngaihsak loin an mahni buai buaiin an buai a, chu vangin Zorini luhna room kawngka chu tlem ka hawng kau a. Tumah ka hmuh loh avangin ka lut ve tawp.


A chhungah chuan room hrang 1 a awm leh a, a chhungah chuan an awm ngei ka ring. Kawngka 1 zawk a inrawn hawng a, waiter chu a rawn lut, sofa phenah ka biru vat. Zorini te awmna roomah chuan a lut tlang a, kawngka atang chuan Zorini leh hmeichhe 1 chu ka hmu ta reng a.




Waiter a chhuah leh hnu chuan kawngka chu ka hawng dek dek a, an thusawi chu ka hre pha ta a. An titi dan atang a biak nu hi he bar neitu fanu hi a nih hmel.

Zorini chuan, "Hei hi Judy thlalak chu a nia, tihmualpho dan tur i hriat ka ring, kei chuan tih dan tur ka hre lo," a ti a.

Chu nu chuan, "Ti nge a saruak thlalak i theh darh mai loh?" tiin a zawt a, a nui a.

Zorini chu a hamhaih hle. Hetiang hi a rilruk bik lo a ni ange. "Chutiang em em chu ka duh bik lo," a ti a, tlem chuan lawm rukna ka nei.



"Ngaih dan tha deuh ka nei a. Thian mipa ka ngah a, an kutah ka lo dah mai ang," a ti a.

Zorini chuan, "Engtin? Pawnsual tir chu i tum em lo tiraw?" tiin a zawt a.

"Teuh lo! Thianpa chhelo tawk ka nei a, an 2-in inngaizawng angin kan chhuah dawn nia. I sawi Rinhlua hmuh lai tak turin in kiss se, an inkar chu a chhe vek mai ang. A dang chu i chhunzawm tawh dawn nia," a ti a.


An thawmah an rawn chhuak dawna ka hriat avangin ka tlan chhuak vat a. Room atanga ka chhuak chiah chu mi ka va su dawt a, keimah zawk ka tlu. Min kaih thawh tumin a kut a rawn phar chhuak a, ka en chuan Zodinsanga a lo ni. A kut chu chelhin ka tho vat.


"Min zui ru chu a ni em lo maw?" tiin fiamthu ti tak deuh siin min lo zawt.
Zorini ten min hmuh ka hlauh bawk si avangin a sir lamah chuan ka kai phei vat a,
"Hetah eng nge i tih a?" tiin ka zawt.

"Ka zawhna min la chhang lo," a lo ti thung.
Zodinsanga chuan ka thil tih lai chu a hre chhuak ang tih ka hlau a, Zorini hmuhtir loh hram hram ka tum.

Zorini kal chhuak tur chu ka en a, ka hawina lama hawi ve a tum chuan ka kut 2-in a hmai leh lam lemah ka vuan a, "Hawi sawn suh," ka ti ringawt. Ka kut 2 chu a rawn vawn hnan a, kan hmai inhnaih takin a rawn kun hniam,
"Nang hian min ngaizawng em ni a?" tiin min zawt. Ka thinphu chu a rang hle. Mahse ka nui chhuak ta hawk hawk a.


"Judy i duh tih ka hriat laiin engtin nge ka ngaihzawn theih ang che?" ka ti a, ka kut chu ka la sawn vat bawk. Thil dang sawi tawh loin bar atang ka chhuak nghal.



He pa hian min chhaih kualin ka hria, ka lungphu hi a tirang ziah mai. Min duh si loh chuan hetia ka chunga awm a ngai hleinem. Ti nge kei pawh hi a ni min duh leh duh lohah ka buai em em?



Ka kawng kal lai chu ka lu a rawn nat leh avangin ka ding a, ka kut 2-in ka luah chuan ka vuan a. Mi tamna lai a ni bawk nen mi kawng kal chuan min su min su a.



Ka dara rawn dawmtu chu ka en chho a, Zodinsanga a ni. Ka darah dawmin kawng sir lamah chuan min kalpui a.

"I tha em? Engtin nge i awm?" tiin min zawt.
A ban veilamin ka darah a kuah a, a awmah chuan ka bei deuh a. A rim pa zet chuan min hip hle, ka lu a na tih pawh ka hre chang meuh lo.


"Engtin nge i awm?" tiin min zawt a.

A lak atang inla hrangin a mitah tak ka en a,
"Ka rin dan chuan.....ka ngaih dan chuan ka duh chein ka hria," ka ti chhuak nawlh a.


"A tha alawm. Fiamthu thawh hi hriselna atan a tha alawm," a ti a, min nuih a. Ka fiamthuah a ngai a maw? Ka thutak teh lul nen.

"I awih hman em?" tih ka chhuanlam ta ringawt a.

"Aih, min duhna chhan tur i nei lo," a ti .
Takzet hian. Khang ka bula a thusawi ka thinphu tirang thin leh kha zana min kiss hnuah duhna chhan tur ka nei lo a ti maw? Playboy ah chuan chhuak lo hram ang che.



"Chu bakah, patil i ni emaw ka tia. Chu vang a nia hmeichhe dang aiin i bulah awm a nuam ka tih. Ka tan chuan thianpa ang i ni," a rawn tih leh chuan ka khawng vek. Kei hi patil ka ni emaw ka ti maw? A tan thianpa maw ka nih a? Hmeichhia ka nih hi!





........





Zodinsanga'n ka inpuanna fiamthua min laksak avang leh patil emaw min tih vangin ka rilru a na ru hle. Keimahah hian eng nge dik lo?



Google ah chuan mipain eng ang hmeichhia nge an duh tih ka zawng a. Awm bawr lian, khal lam, mawng bawr lian.....etc...etc......


Darthlalang hmaah ruak vekin ka ding a, ka taksa chu ka en a. Ka awmah pawng tham tur a awm lo, ka mawng bawr lah a dep khawp mai.

Zorini leh Judy pian chu ka ngaihtuah let a, an awm bawr leh an mawng bawrte, an piante a tawk hle. Kei erawh ka sang thlawn a nih hmel. An bula awm chu ka zak leh hnuhnawh.






..........




Judy chu mipa pakhatin a kiss loh nan vawiin chu a bula awm char char ka tum. Zorini dan ka tum a, mahse tih dan tur ka hre si lo a ni.


Judy a kal fal hlek chuan ka zui nghal zel a, a ni pawn ka awm dan chu mak a tih hmel ang reng.
Zodinsanga chuan min lo hrilh ru a,
"Judy hi i ngaizawng ve chu a ni lo tiraw?" a rawn tih chuan thinrim zet hian ka melh a. A hnungah chuan ka beng a, "Patil ka ni lo!" ka lo ti nghek.




Midang chuan a rual hian, "I patil maw?" an rawn ti a.
"Eng nge maw in hriat le? Patil ka ni lo ka ti a nih kha, ti nge a letling zawng chiahin inrawn sawi," ka ti a, ka vui ve ang reng.



Rinhlua chuan, "Patil ka ni ti la chu ka awih tho ang," a ti leh hram.
Tumah hian min hre chiang lo a nih hi.



.....



Judy nen chauha kan thut dun laiin Zorini a rawn kal a, "Sangzual, professor Thanga khan a hmu duh che a," a rawn ti a.

Hmannia kan test-ah khan ka titha ber a, mak a ti deuh nge ni "nakinah kan inbe dawn nia" kha a tia, tunah min ko ve ta hram e.





Phur zetin office lam ka lam a. Ka thlen chuan a assistant chauh a lo awm a.
"Professor Thang'n min ko an ti a?" ka ti a.

A assistant chuan, "An tihder che a niang, chawhmaa class a neih zawh khan thil pawimawh ti turin a kal daih alawm," a ti a. Zak tak chungin ka chhuak a.




Zorini chuan min tihder a ni maw? A nih chuan Judy bula ka kal vat a ngai a ni.


Judy zawng chuan ka tlan kual a, call a chhang thei bawk si lo. Hetiang hunah hian ti nge call an chhan theih loh thin ni?





Judy ka hmu zo lo, Zorini awmna ka hriat a ngai a ni. Zorini chu ka call a, a rawn chhang hram, "Library-ah ka awm, nakinah kan inbe dawn nia," a rawn ti a, a dah leh nghal.


Zodinsanga ka call leh, a ni pawn a chhang vat, "Judy nen inawm dun em?" tiin ka zawt a.
"Aih, ti nge?"
"A chhan min zawt rih suh. Tunah Judy zawng vat rawh. I hmuh hunah min lo hrilh dawn nia," ka ti a, engmah min zawh belh lo. Min zawt lo tura ka tih hian min zawh luih a tum ngai lo, amah ka duhna em em pakhat a ni.







Library lam chu ka pan a, library atanga Zorini leh Rinhlua rawn chhuak lai chu ka hmu.
Zorini chuan, "Sawtah hmun nuam deuh ka hria, lab building hnung lamah khan a nia, kal ang," a ti a.

"Ka peih lo," Rinhlua chuan a ti hmuk.

Zorini chuan, "Judy'n min nghak reng alawm," a ti leh, Rinhlua kal tir dan phet a zawn danah a ruahmanna kha tih a tum tih ka hre nghal. Hmanhmawh takin Lab building lam chu ka pan vat.




Ka tlan kual rei tawh bawk nen ka hah tawh hle, ka tlan thei tawh lo. Chak takin ka kal ringawt. Ka hnung lawkah Rinhlua leh Zorini pawh an awm. Mahse an ni aia thlen hmasak ka tum.



Building hnung ka thlen chuan Judy leh mipa 1 hi thuin an lo titi a. Zorini thiannu sawi ang tak takin a chhelo khawp leh nghal.




Rinhlua leh Zorini pawh an rawn thleng ve nghal. An rawn thlen chiah chuan mipa pakhat chuan Judy chu hnai takah a pawt a, a hmuiah chuan a fawp ta a. Rinhlua chu ka en nghal vat, a lo inhum ruh nasa ngei mai.





Judy chuan chu pa chu a namsawn vat a. Zorini chuan, "Judy, bialpa i nei tih ka lo hre hleinem," a va ti a.


Judy chuan keini 3 min hmu chu a hamhaih hle. Rinhlua chu a en vat a, "In ngaih ang kha a ni lo a nia," a ti a.

"In inngaizawng tih a lan chian kha," Rinhlua chuan a ti a, a kalsawn nghal.


Judy chuan umzui a tum a, Zorini chuan a banah a lo vuan a, "I bialpa hi min inhmelhriat tir dawn na nge?" a lo ti. Zorini chu a vawi khat nan ka ngei em em.

Rinhlua rilru na chu hmuh hreawm tih piah lam a ni, Judy, thiam lohna nei miah lo inthiam lo taka a awm chu hmuh a hreawm lehzual.



Zodinsanga pawh a rawn thleng a, ka hmai zawnah a phone a rawn lek a, "Hei vang hi em ni Judy zawng tura min tih?" a rawn ti a. A phone-ah chuan Judy leh mipa 1 in kiss lai chu a lang a, tu emaw chuan an thla a lo la ru hman a nih dawn hi.


"Thil thleng hi eng nge awmzia?" tiin keini ho chu min zawt a.

Zorini chuan, "Judy bialpa a nih hi," tiin mipa 1 chu a kawk a.

Judy chu tumbur chungin a kalsawn. Zorini pawn a lem chan chhunzawmin Judy chu a umzui leh nghal.



Zodinsanga bawk chuan, "Eng nge thleng hi?" tiin min zawt leh.
"Saw pa sawn Judy duh lo chung a lo kiss alawm mawle," tiin chu pa lam chu ka pan a. A hmaiah chuan ka va beng nghal a,
"Miin an tih tir che tih ka hre vek, tenawm lutuk!" Zodinsanga hriat phak loh tur si chuan ka ti a.




Zodinsanga chuan chu pa chu thawk leh khatah a rawn hnek nghal thuai mai. Dan pawh ka tum lo, ka en ringawt.
Chu pa chuan sual let pawh a tum lo, mi mak tak zawng a ni.



"Kal ang," Zodinsanga chuan a ti hmuk a, ka zui ve nghal.

Kan kal dun lai chuan zawhna min zawt a,
"Mahse engtin nge khatiang kha a thleng lawk dawn tih i hriat?"


"Kei hi min ring tawk em?" tih ka zawt a.
A lu a bu nghoh.
"Anih chuan min ring chhunzawm zel thei ang. Thil awmzia chu ka hrilh theih hunah che chuan ka hrilh em em ang che," ka ti a.





Mahse engtin nge ka sawi ang? Zorini ruahmanna a ni tih ka sawi chuan an vaiin an kawm duh tawh dawn si lo. Ka chunga thil thleng dik tak, thawnthuah ka lut a ni tih hi sawi ta ila chuan mental hospital-ah ka awm leh daih tawh ang. Ngawih hi a tha zawk.





............




Zan dar 7 vel a ni. Zorini chu inhmuhpuiah ka sawm a. Dan dan tur ka hre hlawl lo, a nihna dik tak hriat thu hi hrilh ka rilruk ta a.



Zorini chu rei loteah a rawn thleng ve a. Chaw ka ei loh avangin menu a mi chu ka lo chah teuh. Tui ti takin ka ei mial mial.




Zorini chuan, "Ti nge min koh a?" tiin ngaih that loh hmel takin min zawt.

"Ka ngainat chhan che 1 i hria em?" tiin ka lo zawt let a.

"Aih, eng nge?"

"Umm ka unaunu boral ta kha ila ang chu maw? A ni nen khan in inang lutuk a. In pianhmang te, in awrawl te, in hmelthat dan zawng zawng nen. Kan inhmuh hmasak ber tum pawh khan ka û emaw ka ti hman hial che asin. Chu vang a nia ka ngainat bik em em che, ka unaunu ang chiah i ni. Ka û nen in inah vang chauh pawh ni loin, ka ngaina takzet che," ka ti a.



"Ti nge tunah min hrilh deuh teh thut a?"

"A chhan chu mi sual taka i chhuak tur hi ka hmu thei lo. Vawiina thil thleng kha i tih a ni tih ka hria, tun chauh lo pawh, Judy hi a hnung lam atang i bei reng a ni," ka ti a.



A nui chhuak a, "Phat kual ka tum lo. Chuan eng nge? An vaiin i hrilh dawn em ni?" a ti a, engah mah ngai lo angin awm mahse a thlan fim chu a rawn luang deuh a, a hlauhthawng hle a ni.



"Ka unaunu ang i ni ka tih kha, i chhiatna ka duh lo. Mahse i ti nawn leh a nih chuan ka en liam mai mai thei lo che. Hetianga i awm hi hmuh ka duh lo," ka ti a. Sawi belh tur ka neih loh avangin ka tho sawn a.




Pawna ka chhuah chuan min rawn umzui a, a lam hawiin min pawt hawi dawrh a.

"Judy vang em ni? I unaunu angin min en thu i sawi a, mahse Judy i ngaihtuah vang zawk a nih kha! Ti nge tu pawn Judy hi in thlan reng? Engtik lai pawn a changtunu a ni reng a, keihi a hlimthlaah ka awm reng zel, " a rawn ti chhuak a. A tap lek lek a.



"I ngaih dan kha a dik lo. Nang hi ngaihtuah lo che ni ila chuan hetiang hrilh lo chein Judy ka hrilh zawk ngei ang. Uluk takin min ngaithla rawh. Eng ang pawn i role chu tê tham mahse, i tih tur tha takin ti rawh. Keimahni nunah theuh chuan a changtu ber kan ni vek, i thawnthu chu nangmah ngeiin i ziak thei alawm. Mahse eng ang thawnthu nge i ziah dawn tih chu nangmahah a innghat a sin," ka ti a.

Hetiang hian tawngkam ka thiam tih ka hre lo, a ruk chuan sawi tha ka inti hle. Ka thusawi kha nakina ka theihnghilh loh nan ka rilruin ka lo sawi nawn a.




"Ka hlim ve theih i ring em? Nun nuam tak ka neih theih i ring em?" tiin min zawt a.


"Ngaihtuah let teh. 'Kuminah hian engtik lai nge i nuih nasat ber? Engtik lai nge thlamuang taka i awm?' Chu chu ngaihtuah rawh," ka ti a.


"Ka pa nen kan inhau a, Judy-te inah ka riak a. Chumi tum chuan an chhungkuain card kan deng a, an bula ka awm chuan ka thla a muang hle a, ka pa min hauhna zawng zawng pawh ka theihnghilh hman. Kumina ka nuih nasat ber tum chu thla hmasa khan, nang, Judy leh kei kan lenho tum kha," a ti a. A sawi zawng chuan a mittui chu a luang thla zung zung a.





"I bul lawkah hlimna a awm reng a ti nge tih chhiat i tum? Khawngaih takin inngaihtuah chiang rawh. Rinhlua vangin tiang thleng hi kal suh," ka ti a. Ka kalsan ta a.





A bula la awm chu ka duh a, mahse amaha awm a duh ka rin zawk vangin ka hawsan ta a ni. A tap lai ka hmuh chuan ka rilru a nuam hle a ni.




Nu Mazuali nen hian khawvel pangaiah nufa an nih tho chuan hetah hian ni ve leh se tha tur a nia, an nun a nuam deuh tur.




...........





Kawnga ka kal lai chu Zodinsanga nen kan intawk a, a thaw halh a,
"Ti nge hmun tinah hmuh tur i awm a?" a ti ringawt.

"Nangmah zawk a nih kha hmun tinah awm. Ka kalna apiangah ilo awm ziah mai," ka ti hlar. A hmel ka hmuh chuan ka thinrim thar. Ngam leh ngam loa ka inpuanna kha ka hre chhuak zel.

"Khawiah nge i kal a?" tiin min zawt a.

"I hriat ve zel a ngai lo," ka ti a, ka kalsan nghal. Mahse min rawn zui a.
"I bialnu i hmu em ni?" tiin min fiam a, a nui a.


"A nuihzatthlak loh a nia," ka ti a.

"Ka hria alawm," ti chungin a la nui.

Ka kal lai chu ka ding thut a,
"Ti nge maw min tihbuai reng le?" ka vin ang reng.

"Engtin mah ka tibuai ngai lo che," tiin a pha.

"Tibuai e. Ka bula i awm dante leh min biak dante hian ka thinphu a tirang thin. Chiang taka min en hian ka buai thin. Ka inpuanna fiamthuah min ngaihsak bawk a. Chuan, 'ka tibuai ngai lo che' i ti maw?" ka ti a.


"I fiamthu lo maw?" tiin min zawt. Ka lu ka bu nghoh nghoh a, a mitah tak pawh ka en leh ngam rih tawh lo.

"Mahse Judy ka duh tih........," a sawi zawh hmain ka lo tawng a, "Ka hria. Chu vangin i thinlung dil che ka tum lo. He thu ka hrilh chhan che hi chu min hlat tura ka duh vang che a ni," ka ti a.


"I duh dan a nih chuan le. Lo kal rawh ka lo thlah ang che," a ti a.

"Khawngaihin ka duhna che tizual thei tur thil tisuh," ka ti a, engmah sawi zawm loin ka kalsan ta a.




Min hlat tura ka hrilh atang chiah khan ka lo duh hmanzia ka hriat phah. Mahse engti pawn bei mah ila ka nei thei chuang lo ang. A rilru a pek tawhnaah chuan a pe bur thin bawk si. Tunah chuan Judy lakah a bei nghet tlat a ni.





........


Judy leh Rinhlua chu an la inrem meuh lo. Judy te in kiss lai thlalak chu a lar leh khawp mai. Judy hi a hmelthat avangin mi hriat a hlawh hle a, a chanchin chhe lai hlek awm se an sel nghal zung zung. Vawiin pawh class a rawn kal loh phah.





Library-a ka kal tur leh Zodinsanga rawn chhuak chu kan intawk dawn a. Kan inhmuh rual chuan ka ding nghal chat, a ni chu a rawn kal hnai a, kei erawh hmun dangah ka kalsawn vat, ka pumpelh ngei ngei a ngai.




Zorini message chu ka dawng a, a fala inbiak a duh a. Nizan vang kha a nih ka ring.


A bul ka thlen chuan min en tha ngam meuh lo. Hma lam chiah chu a en a,
"Nizan zankhuain ka inngaihtuah a, i tidik a kei hi ka lo dik lo a ni. Kawng dik lo ka lo zawh a ni," a ti a.

"Tichuan, engtia awm nge i tum?" tiin ka zawt a.

"Ka hre lo le. Min puih theih chuan tha taka nun ka duh," a ti a, min rawn en va hram.

"Tehreng mai," tiin a kutah chuan ka vuan a.

Tehreng ka ti ve ngawt a, keimah pawh hian ka buai tawk tehlul nen engtin nge a ni hi ka puih theih ang. Mahse 'aih' tia chhan ka duh bawk si lo a ni.




Tunah chuan ka tumah ka hlawhtling tain ka hria a ni. Zorini a inthlak danglam thei a nih chuan nun pangai tak a nei chhunzawm thei ngei ngei ang.






..........




Damdawiin lam atang call ka dawng a. Hmannia ka incheck up khan nilainia kal leh turin min hrilh a, vawiin nilaithawhtan a ni tawh, ka lo theihnghilh daih alawm le.



Damdawiin ka thlen chuan inentir an lo tam ang reng a, ka hun thlen hun ka nghak a.
Ka hun a thlen chuan ka lut ve mai a.

Damdawi min chawh teuh lo se a tha vek a ni mai, min chawh hnem thei lutuk a.


Doctor chuan nui sangin min lo bia a, inhma tawna kan thut hnuah chuan a hmel chu thutak fahranin a inthlak nghal.



Monitor chu ka lam hawi zawngin a rawn dah a, "Hei hi thla hmaa kan test tuma mi kha a ni. Pakhat zawk hi en leh la, hmanni a mi kha a ni. A damglamna i hmu thei ang. Tuna chart thar zawkah hian a lan danin i thluakah hian bawk a awm a ni," a ti a.



"I sawi awmzia chu brain tumor maw?" la lo tivat a.

"Aw. Tlang taka hrilh che a thain ka hria. I case hi chu Glioblastoma a nia, cancer-ah chuan a hlauhawm ber pawl a ni ang chu. I lu a nat fo chhan pawh kha a nia. Dam chhuahna chance a sang lo khawp mai. Mahse tunah kan inenkawl nghal a nih chuan i dam rei thei deuh ang," a ti a.



"A nih chuan, engtia rei nge hun ka neih?" ka ti leh a.

"Mihring thiamna atang chuan.....thla 5 vel kan ti thei ang chu. Mahse engkim hi Pathianah a innghat tih i hria ila," a ti a.



Ka thu hriat chuan min deng dawt ni berin ka hria. Thla 5 chauh maw? Pathian chuan thi turin min duh tih a chiang reng alawm ka ti rilru hman a.



"I chhungte a rang lamin hrilh la, inenkawl vat a tha. Chemo i lak vat a ngai ang," a ti a.



.............








Glioblastoma hi eng anga hlauhawm nge a nih ka hria alawm. Doctor sawi dan chuan lu na hi chu a intanna chauh a la ti leh nghal. Ti nge ka vanduai bik em em ni? Thla 5 hnu velah chuan ka thi anga, ka thi hlen dawn nge khawvel pangaiah ka let dawn tih ka hre si lo. Mahse, thih hi pawi ka ti tawh lo. Pathian remruat dan a nih chuan ka pawm mai ang.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 10th, 2021, 2:08 pm

Chapter 6





Ka chhungte hnenah ka cancer tih hrilh miah loin kar hnih ka hmang ral der. Zep chu ka tum hauh lo, mahse sawi harsa ka ti a ni.


Tunlai chu ka lu na a zual a, class pawh ka thulh leh zeuh zeuh thin. Ka thiante nen pawh kan inbe zel a, mahse kha zan bak kha chu Zodinsanga nen kan inbe leh rih tawh lo. A tan a harsa a ni ang e.
Zorini pawh fel a tum tak takin ka hria a ka lawm hle bawk. Tha taka a nun theih ka ring a ni.





Dar 7 chauh a la ni. Ka room kawngka kik ri ka hriat chuan lo lut turin ka ti a, Rinhlua a ni.
"Hey, tha takin class kal i tum a ni lo'm ni?" a rawn ti a.

"Dar 7 chauh a la nih hi eng nge i rawn tih dawn?" tiin ka zawt a.

"Tun thlaah vawi 6 lai class i thulh tawh i hria em?" a rawn ti leh.

"A reng rengah ti nge zingah hian i rawn kal ziah a?"

"Judy leh midang pawn an ngaihtuah che tih i hria em?" tih min zawt leh.


Kan zawhna chu kan inchhansak lo ve ve.
Ngawi reng chuan kan inmelh nghal rûn,
"Ka hua che," kan la ti rual leh nghal.





Ka room atang chhuah pawh a la tum chuang lo, ka teddy chu a lo khal mai mai a, sawi duh a nei tih ka hre mai.
"I sawi duh chu sawi la," ka ti a.

"October ni 5 hi Judy birthday a nia, eng nge ka pek ang?" a ti a.

Rang fahranin a bulah chuan ka thu a,
"Hmannia thil thleng kha insawi fel tawh em ni a?" tiin ka zawt a.

"Sawi fel tur kan nei hleinem," tiin a lo pha ve ngei a.

"Ka hre vek alawm, zep duh suh. Kei chauh lo pawn midang pawn an hre vek," ka tih chuan, "A ni maw?" a ti hluai a, a biang chu a sen deuh a.


"Wow, i lâi ve thei tih ka hre hleinem. Anih engtikah nge bem i tum a?" tiin ka zawt.

"A birthday-ah," a ti awlsam et.

"Eng nga? A van nuam," tiin ka lo phur hle.

"Keiin alawm bem dawn. Ti nge ilo phur chiam a?"

"Ah., ka nghak rei tawh em alawm. Hlawhtling ngei ngei ang che," ka ti a.

"Ka zawhna pawh min la chhang lo," a ti leh a.

"E..... birthday present tih vel hi ka hre ve vak lo, Zorini'n a hria ang," ka lo ti hman pek a, "Zorini chuan a hre leh lo ang," ka lo ti nghal. Zorini'n a thik palh ang a buaithlak.




Kan thianhoa kan awm pawn Zodinsanga chu melh loh hram hram ka tum a, biak pawh kan inbe eih lo. Min en tih hre mah ila ka hre lo der, kan mit a intawng a nih chuan ka hawisawn leh thei tawh lo ang. Hreawm ti mah ila awmzia a awm lo.







Tunlai chu Rinhlua hi a rawn leng ngun khawp mai. A pa nen an inrem loh lai a ni bawk a kan inhmu ngun khawp mai. Kan ina a rawn kal chuan ka pateate nupa nen card kan deng thin a, a nuam thei khawp mai.






Zanin pawh zanriah min kilpui dawn avangin dar 3 vel khan a rawn kal tawh. Ka nutei nen chuan card kan lo deng a.


Rinhlua chuan, "I note ka lo en lawk ang, Judy thawn a ngai a," a rawn ti a.

"Ka room-ah a awm han la rawh. Ka bag-a a awm loh chuan dawhkan vel kha lo en kual mai rawh," ka ti zung zung, ka sa neih that lai a nia card den bak ka ngaihsak hman lo.




Ka patea pawh office atang a rawn haw chiah, Nu Mazuali chuan a lo dawngsawng nghal vat bawk.

In chung atang Rinhlua chu hmanhmawh takin a rawn tlan thla a, chhuata ka thut lai chuan ka hmaah thil a rawn theh thla a,
"Hei hi eng nge awmzia?" tiin min zawt a.




A rawn theh thlak ka chu hmannia ka inentirna kha a ni. A lo han hmu a ni maw.

Patea pawn, "Eng lehkha nge a? In va thutak ve," a rawn ti a. Ka kuta ka ken lai chu a rawn la a, engmah sawi loin ka thu ngawi reng.



Nu Mazuali nen an han en chuan an hrilhhai hle.
Patea chuan, "Ka rei leh! Engthil nge ni ta ngai?" tiin a mittui chu a hru nghal zeuh a.


Sawi tur hre loin ka la thu ngawi reng. Eng nge sawi mai tur ka hre lo a ni.




Rinhlua chuan, "Engtikah nge min hrilh i tum a? I cancer hi zep reng i tum em ni?" tiin min vin deuh hlek a.


Nu Mazuali chuan, "Ti nge engmah i sawi loh?" tiin min zawt a. An 3 chuan ka tawng chhuah hun min nghak thap.




"Tun a mi vang hian mawle, sawi ka tum lo a ni loa, sawi a harsa ka ti a ni. Tunah in hre ta a, keimah vangin in rilru a na nih kha. Engtin nge awlsam takin in hnenah ka thi dawn tih ka sawi theih ang?" ka ti a, an 3 hmaah chuan chak tak anga lan tumin ka nui a. Ka nui lui lo, ka nuih a za lo, mahse ka tah a chhuak tlat lo. Ka cancer tih ka hriat atang ka la tap lo.





Ka thusawi avang chuan an 3 chuan an thaw hawk a, Rinhlua chuan min rawn kuah nghal, ka pateate nupa pawn min rawn kuah vat a, an tap a, kei erawh ka mittui pawh a tla thei lo.




An 3 hmaah chuan result ka hriat hunte ka hrilh a, ka dawnsawn dan te min zawt, thu dik tak ka hrilh. A tirah chuan min thawng khawp mai, mahse Pathian remruatah ka dah.



Nu Mazuali chuan, "Engtin nge chak taka awmin i dawnsawn theih zawk?" a ti a, tap lo turin a insum nasa hle.




"Ka hre lo. Thih ka hlau lo a ni mahna, mahse nangni ka kal bosan dawn vang cheu chuan ka hlau deuh thin," ka tisam et a.


"Khati khan tawng lo teh. Engtin nge thil ho lam tak ang maiin i sawi theih? Tunah inenkawl nghal la a tha ang," patea chuan a ti a. Nu Mazuali leh Rinhlua pawn an thlawp khawp mai.



"Mahse!" ka lo ti hluai a, min en thap,
"Ka thiante nen hriatreng tur thil tih hmasak phawt ka duh," ka ti a, Rinhlua chu ka en a.



Ka pateate nupa bawk chuan, "Inenkawl hmasa phawt la i dam hnuah i duh duh i ti dawn nia," an ti a.



"Thla 5 chiah hun ka nei," ka tih chuan kan in chhung chu a reh nghal thap. Tuman sawi leh tur an hre tawh lo.


"In hriat kha, Glioblastoma chu," ka ti sep a.


Patea chuan, "Thla 5 maw? Chungte chu Pathian thu thu alawm," a la ti talh a.


"Ka hria alawm. Mahse, ka thiante nen hun kan hmanho theih tawh loh takin tih hmasak ka duh," ka ti a.


Rinhlua chuan, "Pute, a sawi dikin ka hria. Chuan, a duh danin ti rawh se," tiin min lo tan a.


Patea chuan remti vak lo mahse kan hmin thei ta hram a.




October thla laihawl vel atang chuan damdawiina luha inenkawl tan kan titlu ta a. Chu vangin ka thiante nen hian hriat reng tur thil tam tak tihho ka duh a ni.



Thiante nena ka tih chak chu list ka siam a, 3 lek a ni.




Ka list zinga hmasa ber chu riahkhawm a ni. Zorini leh Judy bulah riahho ka rawt a, an lo duh ve mai. Hei hi ka chak thin ber 1 a ni. Thiante nena riahkhawm hi. Zodinsanga leh Rinhlua hi mipa ni lo se chu kan pangain kan mu tlar dul tur a nia. Mahse an ni 2 pawh kan ina room hrangah an rawn riak ve tho ang. Anniho hnenah hian ka duhzawng ka tihpui zawh vek hnuah ka cancer hi chu ka hrilh chauh ang.






Kan inah Zodinsanga, Judy leh Zorini chuan zanriah an rawn kil ve nghal a. Chaw kan ei zawh fel hnu chuan ka pateate nupahoin game kan khel a, kan nui nasa khawp mai. Rinhlua leh Zodinsanga pawh an nui nasa phian.






Zorini leh Judy chu room-ah ka hruai chho a, an ni 2 hi thawmhnaw nu tak tak hak ching an ni bawk a ka thawmhnaw sennoho chu ka pe a. Heta ka awm tirha parcel-a ka khungho chu kan la chhuak a, thar hlak la hak miah lo a tam bawk nen an lawm ngei mai.




Ka khumah chuan muin kan hmai chu face mask-in kan chiah a, a dai huai huai mai. Ka thih huna an lo en lêt ve duh takin ka ti a kan selfie teuh bawk. Ka piantirh ata thla ka lak nasat ber tum a ni ngei ang.



............





List 2-na chu picnic a ni. Mahse hun remchang a awm rih loh avangin ka la sawi lo. List 3-na erawh min hriat reng nan, thawmhnaw nalh tak nen thlalakho a ni. Chu pawh sawina hun ka la nei lo.





................






Vawiin hi October ni 4 a ni tawh. Naktuk hi Judy birthday a nih tawh avangin Rinhlua pawh a awm hle hle thei lo. Rinhlua sawi takah chuan, ka cancer tih a hriat atang khan kan inah a awm ve ta char char a, min lo ngaihtuah ve hle a ni tih ka hriat phah a, ka lawm hle.






Library-a ka kal tur chu Zodinsanga'n min lo tiding a, amah en lo chuan kalsawn ka tum.

"Min pumpelh kher a ngai lo," a ti a.
"Ok, min be duh a mi?" ka ti ve.


Midang awm lai chuan a mawi tawkin kan inbe ve zeuh a, kan 2-a kan inhmuh fuha kan inbiak leh hmasak ber tum a ni.




"Eng ang chiahin nge kei hi min hmuh ka hre lo, ka ngai pawimawh lo bawk. Mahse, ka laka i rilru put hmang kha theihnghilh rawh, ka awm a tinuam lo," a ti a, a sawi rual chuan ka awm vel hi a na zawkin ka hria.




Khawvel pangaia ka nun thin dan min tihrechhuak a, ka bula an rawn inpuan apiang hian ka laka an rilru put hmang chu theihnghilh turin ka hrilh thin, tunah ka tawng ve ta, a na ngawih ngawih a ni.




Lan chhuahtir loh hram ka tum a, mahse ka mittui lo luang tur chu ka dang zo hman lo, hnung lam ka hawisan vat.

"Judy i chang dawn lo tih i hre chiang chung pawn ila duh tlat a. A nih, a laka i rilru put hmang hi tunah i theihnghilh thei nghal ang em? A chang chuan Judy hi ka huat phah tep asin," hnung chhawn tlat chung chuan ka ti a. Engmah sawi loin a thaw deuh halh a.



"Ka zawhna kha i chhan kher a ngai lo. Chuan lungngai suh, ka rilru put hmang hi theihnghilh tumin ka bei mek," ka ti a, ka kalsan ta nghal. Engtin nge a hmel a awm ka en lo a, ka hawilet leh tawh lo bawk.







...........




Zan dar 7 a rik chuan Rinhlua nen chuan in atang kan chhuak rual a. Vawiiinah Judy bem a tum vangin a zam deuh nge mawni a ni leh ni lo angin a tawng tam lutuka bus kan chuan chhung chuan ka beng a khat vek mai.




Zorini birthday kan lawmna hmun tur chu kan thleng a. Zorini leh Judy chuan min lo nghak niawm takin an lo ding a, an sir deuhah Zodinsanga a lo ding ve bawk.






Judy chuan thutak fe hian, "Kan inbe thei ang em?" a rawn ti a. Rinhlua nen chuan mak ti takin kan inen a, ka zui ve mai. Kan hnungah midang 3 pawn min rawn zui ve.


Hmun fal lai deuh kan thlen hnu chuan Judy chu a ding a, min enin a thaw halh a. Henu hian ka cancer tih a hre chhuak anga, ka hrilh loh vangin a thinrim ni ang em?





Ka inrin hmain Judy chuan ka hmaiah a rawn beng nghal thuai, ka hrilhhai lutuk vang chuan chet ngaihna ka hre lo.

Rinhlua chuan Judy hnenah, "Eng nge maw tia i inhriat le?" tiin a lo vin a.

Judy chuan, "Amah hi zawt mai rawh. Thil thleng dik tak ka hre vek tawh," a ti a, kei erawh ka bangbo hle.


Rinhlua chuan, "Sangzual, eng nge awmzia?" tiin min zawt a.
"Ka hre bik nang," tiin ka chhang. A awmzia ka hre hlawl lo.


Zorini chu a rawn tawng ve a, "Phat kual tum tawh suh, Judy chunga i tih zawng zawng kan hre vek," a rawn ti a.

"Eng nge? Kei hi maw?" tiin Zorini chu za lo deuhin ka lo nuih.


"Kan zinga i rawn awm ve atang chiah khan Judy chungah buaina a thleng," a ti leh. Zorini chuan a thil tih zawng zawngah mawh min phurhtir a tum vek a ni.




Judy chuan, "Nang hian ka nun i tichhe vek a ni! Ka haw takzet che!" tiin min ankhum a.


Rinhlua chuan, "Judy! I tawngkam kha fimkhur rawh!" tiin a lo vin thak.



Chu veleh Zodinsanga a rawn inrawlh ve,
"I unaunu a nih avang khan lo tan ringawt suh! Thil thleng pawi thuizia hi i hria em?" a rawn ti ve thawt bawk.






Rinhlua chuan Zodinsanga kawr awm chu a tham nghal chawt a,
"Eng thil chu nge thleng a? Kan hriat thiam theih turin sawi reng ta che u!" a ti leh that.





Zorini chuan a phone a rawn phawrh a, ka hmai zawnah chuan thlalak min entir a, Judy a ni. Mahse thlalak pangai ni loin ruak deuh thaw-a a thlalak a ni. Thawnthu a mi ang chiah khan kan riahkhawm tuma a inbual zawh hlim a mi a ni. A tawpa tawpah Zorini chuan a ti leh ta nge nge a ni. Eng vangin dang thei tura ka lo inngaih le?





Rinhlua chuan, "Eng nge ni a?" tiin phone chu rawn lak a tum a, ka lo la sawn vat.

"En suh," ka ti a.



Judy erawh chuan, "I thil tih a nih kha, entir ta che, tu pawn an en vek alawm," a lo ti a.


Rinhlua chu phone chu ka pe a, a en rual chuan thinrim takin a maimit chhing nghal.




"Hetiang thil hi Sangzuali theh darhah inngai a maw?" a ti chang fak a.
He intih buaina hi a thleng zel a nih chuan Rinhlua leh Judy inkar a chhe vek ang tih ka hlau.





Zorini chuan, "Vawiin Judy birthday puala thla kan lak khan Judy chuan instagram-ah post a duh a. A phone battery a low avangin Sangzuali phone a hmansak. A account chu a log out tawh lo, chu chu Sangzuali hian hmang tangkaiin tuna maia inthlalak en kha Judy account atang ngei a post a nih kha," a ti a.




Judy chuan, "Ka hmuh rualin delete mah ila lo hmutu an tam a, an lo theh darh kual hman ta a nih kha. Tu pawn mahni ruak thlalak post duha min ngai ta vek a nih hi," Rinhlua mitah tak enin a ti a, a mittui a luang zawih zawih.





Rinhlua chuan Judy dar lehlam leh lamah chuan a dawm a, "A pawi ka ti lutuk," a ti a, an inkuah a, Judy chu a tap ta zawih zawih a. Engtia lo awm ve tur nge ka hre lo, boruak chu a rit lutuk. Zodinsanga lah chuan min hua tih hriat zetin min melh tlawk tlawk bawk si. Zorini'n thil a ruahman kual nasa si, phat ngaihna pawh ka hre lo.





Rinhlua bawk chuan, "Mahse hei hi Sangzuali tih a ni lo," a ti a. Judy chu a lak atang a inlahrang vat.

"Finfiahna zawng zawng i hmuh tawh hnuah pawh i la tan dawn maw?" a ti that a.


"Hetiang ti thei dunhmun-ah a ding lo. Tih chhan tur pawh a nei lo," a ti a.
Kei erawh kan boruak chu ka zo lo, ka ding ngawi reng reng ringawt.





Zorini chuan, "Judy a hua alawm," a ti a.

"Huatna chhan tur ka nei lo, inhre sual a ni," ka ti ve thei ta hram a.

Zodinsanga chuan, "Huatna chhan tur i nei tih kan hriat kha," tiin min rawn en a.

Zorini bawk chuan, "Zodinsanga i duh tih kan hria alawm. Mahse a ni hian Judy a duh a, huat chhan tur a awm viau a ni," a ti leh.



An thusawi chuan ka nuih a tiza tlat a, ka nui hawk a, "A dik ang ka ring, ni e, a dik ang. Chu vang chuan ka lo hua a ni ang e," ka ti a.

Nui mah ila ka rilru natzia chu ka sawi thiam lo. Engtin nge Zodinsanga hian hetiang mi turah min ngaih theih? A hnenah Judy ka huat tep thin thu ka sawi vang kha a ni thei ang em? Nge nia hetiang mi ang hian min hmu reng zawk?







Rinhlua chuan ka banah a kai a,
"Kal ang. An awih loh che chuan insawi fiah a ngai lo," a ti a.


Judy chuan, "I kal a nih chuan ka be leh tawh ngai lo ang che," Rinhlua hnenah chuan a ti a.

Rinhlua chu ka en a, "A pawi lo, ka lo va haw hmasa ang," ka ti a, kal ka tum chuan, "A ngai lo. Hetiang mi i ni lo tih ka chiang alawm," a ti a. Judy en lo chuan min kalpui nghal a. Judy tap ri chu kan hre pha deuh a, chumi rual chuan a kut a hum ruh nasa hle.






In kan thlen chuan ka room-ah kan inbia a,
"Ti nge i theih chhung phat i tum loh?" tiin min zawt a.

"Awmzia a awm chuang lo ang, ka hre chiang," ka ti a.



"Tuin nge Judy chungah hetiang ti duh ang?" tiin a ngaihtuah a. A tawp a tawpah chuan sawi chhuah thain ka hre ta a,
"Zorini," ka ti sep a.


"Eng nga?" tiin mak tih hmel takin min en.


"A tir atanga thil thleng kha a tih vek a ni. Hun tha ka pek duh avangin ka sawi loa, mahse ka chungah a leih baw leh vek si a nih hi," ka ti a.


"Eng vanga ti nge a nih?" tiin min zawt a.

"A duh lutuk che a," tih zawng ka sawi chuan a hrethiam nghal ta vek a.


"Judy kan hrilh vat a ngai a nih chu," a ti a, call a tum chu ka lo ding a.


"Tun hi a tawp nan chance pek leh ka duh a ni. Lungngai suh, Judy chungah chuan engmah a ti tawh lo ang, tuna a tih pawh hi a inchhir lutuk ang, mahse a tih tura ruat a nih vangin a ti a ni mahna," ka ti a.



"I tha em?" a ti sep a.

"Eng berah?" ka ti a.

"Zodinsanga tawngkam vanga i awm dan danglam kha ka hmuh hmaih hleinem," a ti a.


"A ni pawh ka dem lo. Finfiahna tur ang a awm tha tawk em a ni. Mahse min rinna a neih ve ka lo ring a," ka ti a.


"I pachang lutuk hian min tihlauthawng a nih," a ti sep a, ka lo nuih a. Ka lu na leh luhai vang chuan ka khaw hmuh a fiah lo tial tial a, Rinhlua thusawi pawh engmah ka hre thei lo.








Ka awmah eng emawina delh ang deuh hian a awm a, thawk a ti harsa. Ka meng diar diar a, ka mutna bulah Pateate nupa leh Rinhlua ka hmu, an lo muthlu vek a.




Ka han harh chiang deuh a, oxygen vuah ngai khawpin ka lo awm. Ka awmna room ka en chuan damdawiin a ni tih ka hrethiam a, engtia rei nge hetia ka awm ka hre lo.






Doctor leh nurse rawn lut thawmah ka chhungte pawh an lo harh. Ka harh tih an rawn hmuh chuan min lo pan vat bawk.



Doctor chuan, "In awm kim laiin ka sawi anga. Kan inenkawl nghal ngej ngei a ngai tawh, zual lam a pan tlat. Hetiang reng chuan thla 3 vel bak a daih thei lo ang. Tin, rilru hahnate a neih hian a zual phah thei bawk, fimkhur hle a ngai," a ti a.





Judy chunga thil thleng vang khan ka rilru a nain ka hah hle bawk. Heng vang hi a ni mahna zual lam ka pan ni.

Tunah lah thian tia sawi tur ka nei ta si lo, engtikah mah ka hmu leh theih tawh dawn lo a nih hi.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)