ELEAZER_LALPEKHLUA By Lalremruati Hnialum (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: ELEAZER_LALPEKHLUA By Lalremruati Hnialum (Completed)

Unread post by Ngaia » October 24th, 2021, 2:53 pm

Chapter - 13





Ner sawk in ka thochhuak vut a, Tap ah ka kut ka sil nghâl mawlh mawlh bawk, ngun zetin dawhkâna chawkîl dûn pahnih te chuan min en tih ka hre ru reng, ka enlêt tâk ah "lâi tel kher lo la," Papuia'n atih sup chuan ka ner ru sawk "chaw ei thlêng i sil thei ang," tiin ka kalsan daih. An kianga awmve reng hi nuam pawh ka ti lo e.










Ka Room ah Computer games khêl in ka awm rên râwn a, reitâwk fang ka ṭhut hnu ah Lalnoi Bengbeh ka Jacker ipte ah ka ak tih hrechhuak in ka tho chhuak vata, ka enlêt vang vanga, ka ngâi ru veng veng mai ka ti. 'Khawi ah emaw chuan hmuhtawh na che ka nei ani; mahse, ka hrechhuak thei tawh mailo, he Aizawl khaw zîmte ah hian ka la hmu leh ngêi ang che' ti zâwi sup in ka Wardrope safe ah dahṭha in ka khungṭha thlap.








"Enga ti nge room ah i tawmsen reng?Damdawiin a kaltur chuan insiam rawh, ka in ah ka pên zuai angâi dawn bawk ania," Papuia ṭawngri ka hriat chuan ka in thing harh vata, "minlo nghâk lawkla," tiin Shower nei zuai tur in Bathroom ah ka lût zui vata. Tshirt dum in thawlh sawk sawk in Michigan Cargo dum ka in thawlh leh sawk sawk a, chutiang in pheikhawk dum bawk nen.









Damdawiin lam panin kan in phur chhuak nghâl a, Papuia inah a inthlâk chhûng kan han awm leh rênrâwn a, "naktuk kha presentation kan neih hun anih kha i hria ang chu tiraw?" Ka tih chuan "ka theihnghilh mai mai lo, zo vat vat ila hahdam veng veng ka duh," room aṭang chuan alo ti lét ve sup sup a. "Rilru a aluhloh laklawh lâi chuan tihsual duai hi a awl ania, ka tisual tawh, anuam fahran lo khawpmai" tiin anui pah hawk hawk a.








Nia, chu chu ka ring ani, rilru ah helhkam rûn nei chung chuan tih ṭhat aharsa viau ang. "Miss Michelle kha ahawphei dâwn khân i thlah abeisei ru lutuk a, nanglah i tawmbo tlat sia 'ka han ko ang' ka tihche lahkhân aduh bîk si lova, alungawi hmelloh teh ania," room aṭanga rawn chhuaka atihleh sup sup chuan chhân ka tum buai lo, "i va thlahphei mailo nia," ka tih chuan aner nâwnga.








"Tehsuh ei, keia thlah te chu mawi pawh a mawilo, bakah amah pawn duh pawh aduhlo ang, arêng rêng thu ah ipi damlo kanin alo kal vang vanga, thlah haw chu itih mâkmawh ani asin," ati leh sup sup tawh. Ka in thiam lo leh hnuhnawh; mahse, achêtdân kha ka rîlrem zâwng ani tlat lova, a tisa zâwng tak hi chuan ka duh ani tihhi ka pha buailo; mahse, tisa induhtawnna ringawt chuan rei adaihlo. Mualphona zakhua thlentu mai ani dâwn tlat, nakin hnu ah lehzêl pawh ka tân tak pawh buaina mai ani lo ang tih tu nge hria?









Damdawiin kan thlen chuan ka pi pawh azia lutuk tawh, amah in atei atei ve tawh; mahse ka pu in a vil deuh chawt ani mai. "Zanin chu ka riahchhâwk ve tawh ang che chu," ti a ka pu ka zawh chuan "i rintlâk leh âwm hleilo emmai, kaihthawh theihloh tûr khân imu nghet leh emaw anianga, bâkah zunram inthiar vêl ah i buaipui thei vek dawnlo," a tih chuan Papuia alo bu nghat nghat a.









Chawhnu her ah kan hawphei a, kan hawphei dâwn lâitak in putar luṭuak pheuh pheuh tawh, palian angreng tak ka pu aia la naupang daih tûr, hmel tak rûn hi alo lût a, alu zawhdân vehvawh aṭang leh a hawiher aṭang chuan pa luzo leh mahni tihtur ko a tla tawh chu hlenchhuak zêl mi ani ngei ang tih ahriat. Dâk vah in ania akal vawh vawh ni. Rei awm loin kan chhuak ta nghâl daih a.









Papuia pawn minla riahpui ve zêla, a inluah ah amah chauha riak ani tho bawk nen, hetah nise keimah chauh kala ni ve tho bawk nen, "i pi damṭhat hun ah, exam zawh remchân hun ah ramvah chu sawiṭha ang u, Silai hman i thiamve loh pawn ipu nen kan Sava kahthlâksa ilo chhar zel dawn nia, ka pu pawn achâk êm kha" tiin a in sawiphúr nasa mai a, ka ne pawh akhawih che eihlo, ka bûk liamsak vêl mai mai.









Zîng hma takah ka tho ang chu tih laiin nizân Papuia Sava veh chungchâng ah atiti tui lutuk a, muthilh lam rêng kan ngaihtuah thei lo nen, zîng ah luna bûr in tlâizet ah ka thawh phah, class kal ka tlâi ṭhelh ani, mi in chengvawng mahni a awmṭhang tih tak ah Papuia chu thawh ahai ve chhin miahlo. Ka thawh chuan kan tûkṭhuan tur alo siamzo diam a, ka va tluklo lehpek êm!!









Nimin tlâi a a inluah a kan pênkawi khân vawiin ah class kaldâwna ahranpa a va kalleh ai chuan tiin athawmhnaw hâk túr a kengphei sa vek a, atihzia phian mai, a inlama kan tlânkâwi leh anih chuan HOD class kha kan tlâi emaw anianga, a remhre roh hi ka tia. Ka pu in "kum inrual reng si ah chuan i tluk hlawllo, a né pawh i tluklo," a ti fo ṭhîn kha ania, adik viau in ka hria. Kum inrual ṭheuh ṭheuh pawh hi alo in tlukloh theih khawpmai.









Class kal tur kanni bawk nen ka thawh hnu reilo te ah tûkṭhuan kan kîl vat a, Sausage hi alo siam a, asiam thiam roh zêk a, mipa si engtin nge hetiang siamte a thiam ni? Ka tuiti hmêl ahmuh chuan nui ruh ruh in "i lei kha ilem tel ange," tiin inti thei fe hian min en a. "Ka eisak loh che chuan i vui leh viau maitur asin, kei lo eisak tu che pawh i neihloh hi, ka eisak peih che chu lawm hle rawh," ka ti lêt ta zêk a, a nui hawk hawk mai.










"Vawiin chu chawhnu ah ka pu te anlo chhuak dâwn si a, chawhnu chu Presentation zawh hun ah ka off maidâwn emaw ni ka tia," tiin ka hrilh a. "Keimah chauh in ka kal peihbîk lo, ka châwl ve ang, kan châwl rual dawn nia," ti sam ét in a thochhuak vut a. "Thlêng hi chu haw huna sil ah dah mai ang, inha sawk sawk ila kal nghâl mai ang aw," tiin ka tho zui ve nghâl a.









Bike ka start vut vut laiin Papuia alo pênchhuak a, ka Bike lo paw deuh rám ka hmuh chuan ka hrupah thuak thuak a, ka hawilêt zawk a, ahmel ka hmuh chuan anui ṭhaw a, nuihzat tûr alo hmuleh bîk emawni; mahse, ka bul arawn thlen a a thawmhnaw hâk ka en chuan keipawh ka nui tawp, dum suit vek hian kanlo in chei alo ni, Hoodie dum kan ha ve ve a, chutiang bawk in ahnuailam pawh. Kan Rucksuck rawng chiah a danglam alo ni.








"Va inthlâk lehrawh," ka tih chuan "ka in a kan pêngleh anih chuan kan tlâi mai mai, nang ahnai zâwk inthlâk zâwkrawh," tiin anui vur vur a. Kan tlâi hma in ka tlân chhuahpui vat a. Kan tlâilo hlauh e, tihzia lutuk, Hmeichhe Toilet mawlh kha ka tifai leh ang tihhi ka hlau. A rim atuilo nasa mai si, a zawngchhang thlâkloh êm asin!








Lunch Canteen ah kan ei mawlh mawlh lâi chuan râl lehlama ka mi hmuh te pahnih avâng chuan, ka thil eilâi ṭhulh meuh in ka en vawng vawng mai. A ni saw ani lâwmni Damdawiin ah pawh ka zawnrûk reng ṭhin, Tetakte, thinchhe zet, a Bengbeh ka kawlsawl reng kha.







Ka vei lutuk hian hmusual ani mai lo'ng maw? Hmuhtawhna ka nei ka tih kha kan College ah alo kal ve reng vâng anihhi. Umm, anih chiahhi, a hmêl hmuh anuam in a hahdam thlâk ngawih ngawih, kan awmna lam rawn pan in Aldrin-a bul ah a kala, a nuipah sâng bawk, ka hmuh hnuhnun ber ang chiah in Puanfen khupkhuh hnawk fêng in Tshirt ze nei a ṭial leh Chapal kaih abun leh tawp, ava mâwi lehpek êm!







Duhâm ṭhîn he thinlung hian a taksa mai nilo, a thinlung leh ngaihtuahna thlenga neihsak vek ava châk si êm!



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2021, 2:53 pm

Chapter - 14





"Tu nge khati fa kova a i thlêk vung vung a?" Papuia'n a tih pah chuan ka enna lam chu a en ve nghâl a. Chutih laitak chuan Lalnoi'n Aldrin-a bân ah vuan in a phun sep sep a, a thusawi kârlak ah anui leh hak hak ṭhîn. "An in pawh hmêl hle mai," ka rilru chhungril hrelo zet a Papuia'n atih chuan ka ner sawk, reilo te ah Canteen anlo thleng chawpchilh ve nghâl mai a, "hetah lo ṭhu ve ru, inla leng chiang ania" Papuia lehbawk ani.








Ka hmazâwn ah tak ṭhuthmun rem in anlo ṭhu ve nghâl a, ka zâwn ah tak ani Lalnoi chu aṭhut ni, min en leh zoh zoh ṭhîn a, alâi nge mawni min enrei lovin hmundang enin titi avawrh nghâl daih zêl. A ṭawngduh in sawitur ahre hle, thu ho te te sawiin anui duh hle a, ka hmuh hmasak ber kha chuan nui ve ngâi hmêl apu lo, thinchhe zet tetakte ni chunga mahni aia lianfe pawh ti ve ár ár chi ni khân ka hria.






Ani hian min hre tawhlo em ni ang? Nge min hrelo der zâwk?









Chawhnu Class la zo lo in kan haw ta daih a, ka pi leh pu te Damdawiin aṭanga anlo chhuah dâwn vâng pakhat ani, "vawiin chu Miss Michhelle hmuhtur ava awmlo ve? Ve tehtlat in," nui huk huk paha Papuia'n a tih tâk ah chuan ka lo ngaihtuah miahlo. A sawi ang tak tak in vawiin chu a hmêl hmuhtur a awm miahlo, ani leh nilo ang in. "Enge achhan ni ang aw?, nidanga hmuhtur a tam theih tehreng nen," a tizui leh sup sup a.









"Ho mai mai, i bialnu ani lova, ka bialnu lah ani heklo, lo ngaihven khuchûk tehsuh," ka tih chuan anui mai a, "chuti chu ngaihven tur in, bialnu a nihvat angâidawn anih chu" Chimawm zeta min melh paha atih chuan ka melh vak a, ala nui liam mai mai zui.








In kan thlen hnu reilo te ah ka pu te hruai tûr in LRM Hospital pan in kan tlân leh vang vang a, damlo hruai haw tur kanni bawk nen ka Bike dah in ka pu Car chhuanvawr, Hyundai Creta keng in Damdawiin kan pana, kan thlen chuan tlâilam dar 2:00 pm a ri vêl chiah bawk. Ka pi chhuakchâk lutuk chu khum ah pawh mu hleithei lovin darkar thum liamta vêl aṭang khân amutpuan thlep fel in alo dahṭha thân tawh tih ka pu in min hrilh chuan ka khawngaih ru kher mai, Damdawiin hi kan lût khât ve êm bawk a tinni.









Keiin motor ka khalha, Papuia front seat ah aṭhu a, ka pu in ka pi a hnung kuah chial in a ṭhutpui ve thunga. In ah kan drop felvek hnu ah tlâilam chawhmeh tur bazar angai sia, Papuia nen bawk kan bazar leh ta poh a.








"Bawngruh hi lei ila chhumsak ila ahâng hi ka pi in hâwp se aṭhatpui ka ring, ani pawn a eichâk tho bawk anga," Papuia'n atih avâng in kan lei a, sa lam duh ang thâl a kan en zawh hnu ah thlai hnah hring lam leitur in sa zawrh na kan chhuahsan a. Thlâi hnah zawrh na sîr killam deuh a hmeichhe chawhmeh zuar, lo au deuh lauh lauh ri ka hriat chuan in her in ka enphei vat a.








A thawmhnaw hâk te rêng rêng chu abàl in aṭet deuh hnuang bawk a. Amah ani ang tih ngaihna rêng ka hrelo, Lalnoi ngêi chuan thlâihnah hi lo ṭhutpuiin, lo dâwr ve tur a sâwm in, kawngkal ho chu alo au lauh lauh hi ani. Mak ka ti lutuk a ka âng phuau mai.






Engvânga khitiang a chawhmeh zuar nge maw anih le? Pan hnâi vat in a chawhmeh zawrh hma ah tak chuan ka va ding chawt a, "ka pu, minlo dâwr ve rawh, i lâktam dâwn chuan ka pe tlâwm thei che ania," tiin nui var var in minlo en chho a. Ka hmel ahmu chiah chu chawpchilh in anui hmêl areh ta riai riai mai.








"Engzâta tlâwm in nge min pêk theih dâwn le?" Tiin a chawhmeh zawrh ho chu ka en diat diat a, a thar lemlo hle tih ahriat. "Enge hetah ilo tih ve?" Ti chakfak in min melh chho a "enteh ka pi, ke ka nei a, ka duh duh na ah ka kalve bawk ang chu, ka tihtur ka hrilh zêl na chhan tur che lah ka hrelo tlat," ngeiawm zet, khisuk paha ka tih chuan, athinrim hmêl kher mai.






Min melhchho khâi khâi chung in, "hetiang mipa hawih hâwm lo hi khawi aṭanga lo kal nge maw inih le? Hmuhnawn leh che hi ka duh tawhlo ang," ati chang leh fak a. Reuh tak chuan a "chawhmeh hi i zuar dâwn anih rau rau chuan, leitlâk tharlâm deuhte zuar tûr alawm, hetiang chawhmeh, Vawkchaw ang zet zet ho hi khawi aṭanga i khârchhâwn nge?" A zawhna chhâng lo a ka tih chuan a nui hak a.








A nuih zat vânga nui ni lo in a thinrim vânga nui zâwk ani. "nang.... Dude, enge itih a?" Min chhâng dâwn chiah Papuia aw ahriat chuan angâwi ka dat a. Min melh leh râwm râwm hnu ah hmui ti sawi sawk in lehlam ahawi ta hmak a. A thinrim hmai sentar leh sam thur hîang mai te hi hmuhnuam ka ti tlat pek.








"Enge hetah itih daih kan chawhmeh leitur,.." a sawizo hman lo Lalnoi hmêl ahmu chu ani pawh aphu ve zawk mai. "E, nangchu hetah enge itih a?" Tiin a en deuh ngur ngur a. "I zawhna amâwlmang emmai helai hmun hi chawhmeh zawrh na ani a, chawhmeh ka hmazawn ah ka dah a, i hmuve tho in ka ringa, chawhmeh ka zuar ani tihhi i hai ka ringbîk hauh lova," alo tilêt khauh mai a.








Papuia adang dêr, "hetah enge intih Elea,?" Tihri ka hre chiah ka bân ah akut lo rawlhlût in, arawn vuan nghâl zat bawk a. Tu nge anih ka hailo chiang kher mai.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2021, 2:53 pm

Chapter - 15





"Nangmah ang deuh ka hmu in ka hre rêng ani, ka lo umzui vat che anihhi," ti a nuisâng in min en chho heu a. Chawhmeh lei itum em ni? Sawlam ah sâwn a thlengthar a awm ṭeuh asin," tiin anui sânga, "Vawiin class ka lo kallo a, ka kalloh chhan te min zâwt dawn lo em ni?" A tizui leh sap sap a. Khawi lai aṭang hian nge mawni alo chhuah nawlh ṭhin ni.







Ka hmazâwn ami chuan min eiloh hmêl zet in a hmui ati sâwi nâng a. "Ka pi i ṭhiante annih chuan khawngaih in i kalsawn pui thei angem? Ka customer an hnawt bo vek," ti vinhlar in keini pathum chu min en a. 'I chawhmeh..' ka sawizawh hmanlo nui var var mitmeng nung sar chunga ka hnunglam a en tâk ah chuan ka ṭawng tawp chiang kher mai, a enna lam chu ka en vat bawk a, tu dang ni lovin Aldrin-a ani.









"Michelle i lo in hralh thei em?" Tiin kan bulah alo ding ve nghâl a, keini min hmu chu aphu deuh zawk a, "nangni maw? In bazar ani ang maw?" Tiin anui pah deuh a. Oh. Miss nangpawh maw?" Tiin a âng deuh hau a, mak ati tihlah hriatreng, mak tihloh na chi pawh nilo chuan, Michelle'n ṭawngka a chhâng lovin a bu zoh a, adân ngâite in a nui leh sâng bawk.







Lalnoi hming pawh Michelle ve tho ani tih ka hrechiah. "Tinge ilo kalduh a, kala in hralh zo lo asin," ti a Lalnoi'n laih hmêl zet, hmai sen ap ap chunga a chhân chuan ka lo na ru veng veng mai.








A mitmeng a Aldrina aduhna mitmeng hi kei hian ka hmuhhmaih thei dâwn em ni? Engtin nge hetiang thil hi anih theih? Engchena thui nge an kal tawh ang? Ka rilru ah zawhna a rawn lût zut zut mai. Ka kuttum ka humruh ṭeuh mai, ka tha ana bawk. Aldrina zawhna pawh chhâng lovin ka kalsan ta daih a. Ka hnung lama min kohna ri pawh ka hria; mahse, chhân châkna rêng ka neilo, ka hmalam a kal leh ka sir vêla kal pawh ka su phei deuh dâwr dâwr in ka hria, pên deuh hmawk hmawk in Motor dahna bul ka thleng a.









"Enge maw kan hriat leh tâk aw? I in hauhpui te te a, nangmah i thinrim zâwk chu ani êm lo maw? Khatia i kal tâk nul nul a?" Tiin Papuia'n ka dâr ah min kuah in anui vur vur a. Lalnoi ka inhnialpui vânga thinrim ah min ngai anih hi. 'Engmah lah hi i hreve dér silo a' Hrep a.








Thlai hnah hring pawh lei ta lêmlo chuan kan tlânchhuak ta daih a, Miss Michelle pawh kan rual in ahaw ve nghâl a, an in thlenga thlah haw abeisei loh hrâm ka beisei, kan tlan chhuak chiah tihah Papuia phone ah ka pu in arawn call a, 'Eleazera'n call a pick up thei lova, Damdawiin ah khân theihnghilh kan nei hlauh mai, lova lam pah rawh u' alo ti ani.








Kawngtluan in ka ṭawng lova, ka bula mite pahnih erawh an ṭawng leh barh barh tawh. Rei awmna chhan a awmlo bawk a, kan thil theihnghilh la vat in kan tlân haw leh vata, Miss Michelle pawh "Hmeichhe mamawh lei ngâi ka nei a, bazar remlai ah ka chhuk ange," tiin a chhuk a, motor tihdinna maitur ka hmu silo a, kan tlanna hmasa lam ah bawk chuan kan tlanphei leh a.








Kan tlanlêt dawn laitaka ka thil hmuh avang chuan ka thin zâwn hi ana veng veng mai, Lalnoi leh Aldrin-a kut inkai riala anlo kalphei ka hmuh chuan, hmulo zâwk law law ila ka va ti êm! Steering ka chum ri dawt dawt, thîkna nasa tak, ka kawchhûng aṭang in chawp leh chilh in arawn so chhuak.









Hai rualloh in he khawvela ka thinlung neitu ka hmeichhe duh ve hmasa ber chu, ka tân ni lovin midang tâna khuanu duan zâwk alo ni. Chupawh tudang ni lovin ka ṭhian hnaivai tak lak ah ngei mai ani.








'Nilo, ani kha chu ka duh lo ang, ka duh thei lo ang, ka khawngaih vâng mai mai zâwk ani. Ni e, ka duh lo' tiin ka hriat tawk in ka phun mawlh mawlh a. Rilru khingbâi zet in inlam ah kan tlânhaw a, Papuia makti hmel chu a nuihzatthlak lek lek, hundang chu nise ka nuihpui chiam ngei ang; mahse, hundang ni lovin tunhun ani tlat.








Hun aral ve zella, naktuk mai kan exam hun ani tawh, Papuia rilru an hah khawp a, a lehkhazir a tlaivar ti tih deuh ziah, a rilru hah zualchâng phei chuan minlo call tluk tluk mai ṭhîn, kei thiam neilo, lehkha zir ngâi bawk silo a hian ka va huphurh silo êm!








Exam hunlai ani bawk a, Lalnoi ka hmu ngâi meuhlo, Semmester a in ang lo bawk nen, a hmel hmuhtur awm ta lo chu ka zawng ru deuh ziah a, axialo ka ti Aldrina ka hmuh apiang lah hian ka rilru a lo lût hmasa ber chu tudang ni lovin Lalnoi ani. A bengbeh ka kawlsak tihte hi ahria angem le? Hun remchâng ah kala pe ngei ang chu.







Thlakhat dâwn kan exam hnu ah, Pathian zar ah kan zo ve hrâm a, exam leh exam loh hian kei ka nunphung a chawkbuai pha ve eihlo. Ka nundan ngaireng in ka nung a, ka lehkha zirdân lah achuti tehlua ngâilo bawk. Papuia erawh a tla deuh dâwk mai, a tlaivar zing bawk êm ani, kan zo tawh bawk a athawveng huai ang chu, a rilru kamtu ber a kiangtawh miau a.









Ka pi pawh adamṭha ve zêl a, Damdawiin luh ngâi khawp in ana tawh lova, lungnatna anei ani tih Doctor in check up aneih hmasak ber khân asawi a; mahse, ani chu enkawl ngai leh ngaihtuah ngâi khuchûk ani hran lova, ala zia phian.








Exam zawh zân ah Papuia chaw eitur leh riak tur in ka sawm a, alo 'aw' rang khawpmai, "ka pu sawipui tur pawimawh ka nei tlat," a ti deuh chhên a, engtak infah ang maw? Ka pi inchhungkhur enkawl thei chi anih tawhloh avang in lângkal michhawr kannei a, anin eirawng bawl in, inlam chet ngai zawng zawng akhawih mai ṭhîn a, chawhmeh siam athiam bawk si, kan in a alo kal chinchu ka thau ṭul tawh mai.









Chaw ei a Dawhkan kan kilṭhap laiin "ka hawchhoh hma in Sava chu veh ang u ka pu, i silai kha ka hmangchhin châk," tiin Papuia a nuisûnga, "ni e, a châkawm khawp mai, Sava veh chu anuam asin ipi hi ka kalsan hreh tihmai loh chu," ka pu in ati let ve chuar chuar a, a enge maw mi awmṭha hle hle lai kah an tum ngawt ni.








"E, ngaihtuah ka ngai reng reng lo, in ah Mapuii nen kanlo awm anga, mipa ho zawng chu in kalvek thei ang," ka pi in atih sap chuan "nang Elea, mipa nge inih ve dawn hmeichhia?" Mitko minsân khum âwk âwk chunga Papuia'n atih chuan ka ngâwi daih, mipa nge hmeichhia tih kawng ah chuan mipa ka ni ngei mai; mahse, ami zawh dan kha chuan thildang akawk daih, 'mipa inih chuan Sava veh in ikal anga, hmeichhia inih chuan inah ilo awm ang' a tihna tluk ani.









Ka in ngaihtuah vang vanga hmeichhe nih chu ka duhbík der silo; mahse, Sava veha kal ka peih eih silo. Ka chhungte anlo nui dar dar thâwm ka hriat chuan ka hawichhuak vata, "mipa le," ka tih chuan an nui chhuak hawk hawk hlawm mai, a engah chuan nge nuihzat tur awm pawh ka hriat ve siloh.








A tuk zing ah varṭian ah tho in mipa pathum te chu ka pu silai thûlkhung la chhuak in ka kal ṭham ṭham a, a thlasik ṭan tawh nen a vawt deuh vur mai bawksi, hnar leh beng avawt var mai, ava nuamlo ber. Ka pi kan ngaihtuah viau a; mahse, umapuii tukdang aia lo kal zîng tur in kan hrilh a, alo thlen veleh keini kan chhuak thung, an ngaihtuahawm êm lo tur ah kan ngai.









"Hman anuam asin, ka leina arei tawh deuh na in ka uluk a, a khâttawk in oil nen ka tifai reng a, a tuiek hman meuhlo, ka hmang ngai lemlo bawk a," tiin hmakal te an phûr dun hle a, an hnung ah anṭawngti hrepha chiah chiah in ka kal ve zell a. Ka ammve tihpawh an hrelo aniang, "a ngul seizawng hi 500mm ani a, a kawdâwt zaulam hi 4.5mm ani bawk a, ka roh ve hle asin. Kapthla ṭeuh ang che," tiin ka pu in Papuia hnung ah abensak thak thak a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2021, 2:54 pm

Chapter - 16




Zing varṭiana chhuak kanni bawk a Sava hrâm hriattur atam khawpmai, an hlim chiar ri te chu ngaihnawm mai nilo hmuhnawm a tling hial ka ti lo theilo.







Kan huan, hnathawktu ruaia kan enkawltîr ani bawk a, inthlahrunna tur a awmlo bawka tiin huan kan thleng thla chu fankual pah tiin ka pu te pawh nghâk hranlo in ka kal pêng ta daih a. Ka nu leh pa damlaia an roh em em leh an ngainat a an hlut huanram ani bawk a, ka ngai ru khermai. Ka nausen deuh laiin he huan ah ngei hian kal in chhungkaw intihhlim nan, hunpui emaw nibîk chhungkaw bilin kan hmang ṭhîn ani tih thlalâk hlui aṭang leh ka pi in min hrilh aṭang in ka hria.









Ramvah emaw huankal tih vêl hi ka tuipui zâwng anih hlawlloh avàng in ka kal ngailo bawk, vawiin erawh anuam ka ti vei phian mai. Ka pu pa te aṭang tawh a kan in rochun huan ani bawk a, enkawl tu ṭha nei tih hriat tak in ahmun afelfai in hawi khawthawn anuam takzet.









A thlangzàwl lai deuh ah Aidu kung buk laih ka hmuh chuan ka mit ala chat a, pan hnaiin ka kalthla vat a, abul lawk ah Dil alo awmbawk anihhi, ka pu khân a sawi tawh tak kha maw, ka lo hre lehpek lo anihàwm hi. Sangha pawh an awm ve anihhi ka hmu pheuh pheuh mai; mahse, antam fahranlo anih dawn hi, dah ro ro chuan alian te dah àwm chuan, hei aia tam hi awmse an hmuhnawm zual in ka ring bawk, ka pu zawhchian tur anihhi.










Ka kal peih leh lawk tawh in ka ring si lova tiin ka vákkual char char a, thlasik inṭan chhohlai ani bawk a dài tla atam khawpmai, khùp achin hnuailam phei chu hnim a dàitla chuan pèn záwng in a ti hnawm vek bawk si, avawt lek lek ani. Serthlum pawh arah tam khawpmai lehnghâl a, an hrisel ṭha bawk a thlum tui ngawt in ka ring.









Serthlum rah pakhat sen tái ka hmuh chuan ka ît viau, lawh ngei ka duh bawk; mahse, a rahna berkher khi alér ah ani tlat, làwnchilh dawn chuan akung ate reuh si a, akua inhnawh na tur îk a awmlo a ka lenglo chiang, bakah akung asin rilrel lutuk a, min dâwllo sa hrim hrim bawk.









'Pawilo, lung in ka vawmthla mai ang,' ti rilru chung in ka piah a lung lian deuh tak chu chhar in ka'n vawm ri ṭhak a, ka vawm zawh rual chiah in Silai ri in azawm ve nghâl zat bawk. Silai ri ka hriatna lam chu ka hawiphei nghâl vat a, Papuia leh ka pu in rum zet in minlo en dur khup mai, an Sava kahtum ka lung vawm vang in a thlawk ta ani chêk ang chu.








Ka Serthlum vawkthlâk kan en chu ka vawmloh hlir alo la tla niin, 'ka vawmthla awmtho emmai che,' ti rilru in ka vawmṭha leh ngat a, ka vawm na bawk a, atla chiang khawpmai. A tlâkloh ka hlauh lutuk na lam ah ka tha ka pe na deuh nen ala lumthui hrep lehnghal a, ka chhar meuh chuan alo phel ti tih lehnghal a, ka pi hawnsak ka tum nen, Fanghmir in an bâwm hman èm lo ang chu.









Ka Serthlum vawmthlâk te chu ka ak ṭha sauh sauh a, thlâm lam panin ka chho ta nghâl a, a chhûng ka luh chuan kan huan enkawltu te nupa anlo awm vâng a, Thingpui an in ni âwmtak ani No anlo dawm dun var a, lêtleh dawn in ka lût tingtang tawhsi, biak dâwn lah in an hming ka hre dérlo lehnghâl, azialo ṭhîn mange "Eleazer-a kha ini tiraw?" Tiin anupui chuan minlo zawt vat a, 'aw,' tihnan ka bûkkhum zoh a.









"Lo lut la lo ṭhu rawh, Thingpui ka lo siam ve ang che," tiin thingpui no la in asiam nghâl sat sat a, "i lo lian ta hlemai, i hmel pawh ala ṭha rengmai, i naupan lai pawn mipa naupang hmelṭha tak kha ini ṭhîn rêng ani," tiin Thingpui no min pe in anui zui var var a. "Anu leh pa pawh an hmelṭha alawm, aṭhalo theilo," anpa in alo ti zui ve a. "Ka lawm e," tiin thingpui chu ka in hlak a.








Ka pu leh Papuia pawh anlo lût ve nghâl vat bawk a, Chepa pali leh Sava rawng mawi deuh deuh anlo kâpthla nual a, Sava hming erawh ka hre hlawm lo. "Inva hlawhtling ve, Thingpui kan lo in mêk a in ve nghal rawh u, in chhâwl ahàl tawh ang," tiin huan enkawltu te nupa chuan anlo be sawk sawk a.









"Eleazer-a abengchheng lutuk a, kan kah tum ang pawn kan kâpthla lo zâwk anihhi," Papuia'n atih chuan, ka âng zuau a 'in bulah ka awm reng renglo,' tih ka tum ani; mahse, nichin khân ka Serthlum vawmna lam ah thâwm kava neih tak kha mawle, kha kha asawi chiang mai. "Nidang ah chuan kan hruai ve tawh lovang, Sava ati thlâwk zèl ṭet ṭut hian," ka pu in ati hluk a, huan enkawl tute nupa anlo nuidun kar kar mai, ka peih vanga zui pawh ka ni tawp silo a.









Dam chuan hun leh ni aral ve zel a, Papuia pawh an khawlam panin a haw ve ṭep tawh, naktuk hian a u Hmeichhia HATIM a College kal khân Aizawla bazar pah tiin alo hruai dawn ani. Zanhnih chauh a awm tawhdawn nen kan in lamah a tàp deuh chawt a, ka pi leh pu ten a inluah lama kal an phal rih lo ani, "hetah kan khua ahar, nangpawh chuti tho, haw phei haw phei angailo," an tih vang ani.









A tuk chawhnu ah Lunglei Sumo counter lam panin kan kal leh ta vang vang a, ka Bike chuan in triple chi ani dawnlo nen tiin ka pu car Creta dum tliang tle hlarh mai chu ka khalhchhuak leh ta poh a. A u chuan hrehawm ati êm lo ang chu maw, kan in lamah kan hruailut phawt anga nuamlo atih tâk leh Papuia in luah lam ah an unau in kan thlahphei leh aniang chu, chu chu ka pi leh pu leh amah Papuia ngei paw'n an ti ti dan ani.










Counter lam pana kan tlan laiin Aizawl kan lo lût tawh atih vang in kan hmanhmawh ru viau mai, Counter kan thlen hnu ah rei kan nghah hma in anlo thleng ve nghâl vat a, azia phian, ahmel lahchu ka hmuhtum loh deuh ala nizui, sa ṭha ve pangngai tak cher lam aia thau lam apâwl mah ka lo ring ve ngawt a. A ni îkhaw lo mai, ria ngo vang te hi alo ni roh a, a hmel en ngawt phei chuan Papuia a upat hmêl zawk ka ti, vun ngo nge nge hmuh anuam ahmelṭha phian mai.








Papuia'n kan ina innghah chungchâng alo hrilh ve nual tawh bawk a, kan in lam panin kan tlân ta nghal vang vang a, ahming chu Lalhmingsangi ani a, a ṭawngduh in anui duh hle, vawikhat in hmuh na e ti lo chuan kan in nel nghâl em em mai, amizia a ṭawng barh barh ṭhîn hian Lalnoi minti hrechhuak lo theilo, chutah ala nuiduh em em bawksi, hmeichhe rilru tluang tak ani ngei ang.








In kan thleng phei a, a hreh em tih ahmel aṭang in ahriat miahloh, Garrage ah motor dahlut in Hmingsangi'n a thuamhnaw tlem azawng alo ken nen inchhung lam panin kan in zuilut ta diak a, common room a miss Michelle lo ṭhu vâng mai ka hmuh chuan ka ding chawt mai enge hetah alo tih?









Note: kar hnih chuang ngawt mai ka damloh avang in ka châwl a, lo dahleh pawh a in thlahrunawm khawpmai, ka hmaizah takzet che u a, thupha ka chawi mawlh mawlh bawk e, tin kan chhungkua a positive kannih avang in abuai ve nak nak theih hle a, inmi ṭawngṭaipui na azar ah kan ṭha chho zel bawk e. Vawiin aṭang 2nd internal test kan nei a, in hmai ka zah êm avangin ka lo dahlo ngamtawh bîklo ani, ka ngaipawimawh hle che u tihhi min hriatsak ve bawk dawn u nia, tin, November hi thlapum kan exam dawn avang in chawlh leh tih vêl ai chuan November thla hma a complete hman hram kan tum bawk dawn nia, kar khat ah vawithum chauh dah lovin remchan dan azir in vawithum lo deuh pawh kan dah tawp mai dawn nia. Angaihnawmloh intih pawn ka dem miahlo che u, rilru pek aharsa ve reuh lutuk a, kan ṭang chho zel ang.


E, chuan thla hmasa nita in ka hria Darxika kheuhbeuh(Pc malsawmzuala) mizo thawnthu in ziahsiak abuatsaih a ka telve a, Pathian zar ah lawmman pahnihna ka la ve hlauh maia, top 3 chin te a youtube channel ah adah a, in peih chuan inva ngaithla ve dawn unia, CHHAILAI DI tih ani e aw.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2021, 2:55 pm

Chapter - 17




"Inlo thleng ta maw? In tlântluang em Hmingsang?" Tiin ka pi leh pu in min hmuh rual chuan anlo zàwt vat a, "hei, inlêng kannei bawk a, Eleazer-a College luhna a an zirtirtu anih bâkah, kan ṭhian Sanga fanu anihhi, tiin hlim nuisâng hian ka pi in atih zawm a, an in chibai liam liam a, Hmingsangi pawh aṭawng duh barh barh bawk a, a inthlahrun ka ring chiah biklo.









Common room ah ṭhukhawm in kan ti ti a, Hmingsangi'n a College kalna chanchin leh an chhungkaw chanchin asawi kan ngaithla ani mah, ani zawng upa deuh tihtak ah arilru pawh apuitling ngangmai, tun ah BSW result anghâk a, achhuah ṭeptawh bîk a, Papuia nen kan thîk ru viau mai. College chhuaha degree neih vat vat kha kan châk ani.








Ka pi leh pu Couch pakhat ah an ṭhudûn a, Papuia te unau chuti bawk, Coutch pakhat ah Thingpui min pêkpah in nu Mapuii aṭhu bawk si nen Miss Michelle bul chiah ṭhutna ruak a awm si abul ah ka ṭhu leh ta poh a, a theihhrâm chuan ani hnaiha awmloh hi ka duh, min sawiril pui leh viau ang tih ka hlau ani, hmeichhia mi pàkhuam ṭhîn hi ka ngaithei lo.









A mawi ah chuan kan be ve bawk a, min chhâng ṭhathei viau bawk, lo kal tamlo se tihhi ka duh, hun remchâng azawng hmu thei bîk si, tlanglam Darthlalang nawrlirhtheih bula ṭhu kan ni bawk a, tu khaw kha in min ngaihsak lo, Hmingsangi mikhual lo thleng hlim chu an chiàu ve bawk si atinni. Ka hnunglam Jacket hâk alo zût riak riak chuan ka phu zawk lehnghâl, amit ah chiangzet a en in ka tui in chhuanlam in Choka lam ka pansan ta daih. Hneawm lam ah akal.









Fridge hawng in tui vawt ka in khawlh khawlh phawt a, ka lu ka thing nghut bawk, "in innei nuam hle mai, ka rinsa ni tho mahse," tiin Hmingsangi alo lut ve tharh a, a lawmawm e, zanah pawh in riak ang chu tiraw?" Tiin ka lo zâwt lêt ve vat a, nui var var in "a in thlahrunawm dâwn e, i pi leh pu an fel bawk si, an zahawm ka ti," alo ti lêt daih thung.








Ka chhanlêt hma in Miss Michelle alo lut ve a, "i hmelṭha hle mai, HATIM ah maw College i kal a?" A lo ti lut ve nghâl zat a, "aw ni e, ka lawm e, kei aiin i hmelṭha daih zawk," tiin nui var var in pakhat in alo chhanglêt a, "HATIM ah chuan ka cousin pakhat athawk ve asin; mahse, ani chu Philosophy department lam daih ania, ka hmanhmawh ta deuh riau, ka haw tawh mai ang, kanla in hmu leh dawn nia," tiin nui var var in achhuak ta daih a, minti hamhaih letling alawm mawle.









"Ka u hi athîk chu ani êm lo ang chu tiraw?" Papuia'n alo tisup, Hmingsangi common room lamah aphei hman a, atihzia phian. "Zanin leh naktuk zân chauh ani bawk a, hetah in riaktlâng law law ang chu tiraw? I u hian ahreh viau angem le?" Tiin a thilsawi ngaihsak lo chuan ka zâwt a, "hreh dawn mi, chaw te ei phawt ila ka hremai lo le," ati ve sup sup a, ani hi chuan heta awm tlang hi pawi atilo mawle; mahse, a û in ahreh tlat erawh chuan tihluih chi ani miahlo ve thung ang.








Nu Mapuii eirawngbawl in abuai viau mai, Hmingsangi'n puih ve phêt atum a, a in thlahrung deuh emaw ni; mahse, keinin kan phallo ve thung, zanriah tuihnâi zet kan kîl ho a, kan tlêm ṭhang lutuk a zanin erawh Papuia te unau vâng in kan ri laih laih a, anuam ka ti lutuk tlat. "Zan hnih chauh ani bawk a hetah awmtlang chu in hreh viau em? In hreh viau chuan tihluih chi inni miah lova, i nu leh pa te pawh duhleh kan be mai anga, enge in ngaihdân?" Tiin ka pu in Hmingsangi en chung in azâwt a.








Papuia hi chuan ahrehlo a nuam ti zawk daih, "hreh love, Papuia inluah a khawhar deuh a kan unau chauh a va awm rak rak ai chuan heta awm chu azia zâwk daih ang; mahse, naktuk lam ah erawh a inluah va en hrim hrim chu ka duh anga," alo ti lêt ve a, kan hlim dar dar viau, abîk in ka pi in nuam ati zual in ka hria, Hmingsangi chezia chîk zeta en a, a mittui tling pam ṭhîn te chuan enge a rilru ah awm tih ka hriat thiampui mailo.









Zan ah common room ah ṭhu in kan ti ti leh a, mut nan ala hma êm atinni. "Nikum SLTC Camp HATIM in kan dâwl a, kan thlalak ho ka hmuhtir ang che u," tiin phûr zet in Hmingsangi'n a phone aphawrh sat sat a. Kan college aiawh in mi pariat kan tel a, anuam dangdai asin aw, tiin an thlalâk chu zawng in athai kual chiam a, ahmu mailo aniange.







"Ngawilawk IG lamah kan enlêt mai ange," tiin a phone chu ahmet leh sat sat a. "Hei, Candle Night Dinner kan neih zân anihhi," tiin pic chi hrang hrang min entir a, Hmingsangi pic ho chu Papuia nen uluk zet in kan en diat diat a, ahnuai caption ah "1 year ago" tih alo awm vâng hlawm mai. Pic mai bakah video te ani nawk hlawm a, Leadership trainning nimahse, an leads chhan bertur chu Pathian lama kawng bote hruai tu tur leh Pathian thu hrelo te hnena hrilha fuihkal tu tur anni si a.







Pathian faka hlim tak enghelh nei miah lova, ban phar a an lam bu siai siai ka hmu chu a hmuhnawm ka tiin ka telve châkna tak ani roh a. "Ka lung an tilêng takzet hlimtla enlêt mai loh chu tih theih kannei dêr si lo, Pathian zar ah result achhuaka ka pass ve hlauh chuan ka chhuahsan ve ngei tawh dawn si a," ati ve sap sap a. "GRAND DINNER inneih chuan chupawh chu min en tir law law la, kan la hman ve tur tho ania kan hamhaih lutuk loh nan" tiin Papuia'n nuisûng in a zawt a.








"Naktuk lamah ti tawh mai ang u hmiang, atlái tawh zîng aṭang bazar angai dawn si a, mutawh ang u lem," tiin naupangchhe ṭît tak hian min ṭreat a. Zan ah Papuia nen ka khum ah kan mu tlâng leh a ka room dawt chiah mikhual room atâna kan hman ṭhin ah Hmingsangi amu ve thung, a hlau êm lo ang chu maw? Nula mahni a hostela awmṭhang ani bawk a, ahlauh kher ka ringlo.








Zing ah Papuia in lam ah tihfel ngai ang zawng zawng Hminhsangi'n atihfel sak vek a, keini chu kan kal ve na a tihtur alawi kan hrelo kan hruai ani mah. Chaw eikham aṭang in kan bazar dawn ani, kum in atan vawiin chiah Aizawl an awm tawhdawn si a, Krismas thawmhnaw vel kan en dawn ani deuhber e.








Chaw eikham phat aṭang in bazar tur in kan chhuak a, bazar mipui tawt zet kar ah kan in rawlh ve zel. Hmingsangi hi aria ka tihtawh kha achâng leh mi kara a inzeh na lamah apetek dâwrh zel a, Papuia nen kan nui nasa thei khawpmai, achângleh ate lutuk hi a in hnawhbo leh daihzel a kan zawng leh chiam zel.








Anau thawmhnaw tur an ensak vek hnu ah api leh pu thawmhnaw tur te eng eng nge maw alei kual nuai mai, kei pawh ka pi leh pu thilpek tur ka leisak ve diam, ṭha an ti maithei ani. Mipui zi nuai nuai kar ah kan in hnawh nasa bawka achauhtheih ngeimai, in hnawhpuar tur in Restaurant ah kan lut ta diak a. Restaurant changkang ve pangngai tak anih dawn hi Cabin annei hrang thlap.






A chhung kanlut fel chiah tih ah Miss Michelle'n ka hminga min ko ri ka hre ruai in ka hria, 'alo kal lehpek,' ti rilru in phur lo zet in ka hawi kual ṭhîn, ahmel ka hmu meuh silo, 'ka hriatsual ani ang,'lu thing nawk in ka luhsan ta daih a.






Cabin chhung chu AC hnuai ani bawk nen hah adam sawng sawng mai. Kan ṭhufel âwrh tihah Miss Michhelle ngei chu alo pênlut zan zan mai, "ka lo zawm ve dawn che u apawi em?" Tiin ka bul alo thlengfel der tawh. 'Aih' tihchi pawh va nisuh ka bul ah ṭhuthmun rem in a nui var var mai. Nichin kha ka hriatsual emaw ka tia ka hresual lo chhiava.







Hmingsangi a ṭawngduh barh barh bawk a inkâwm tehse, Eitur order la tur a hmeichhe tleirawl lo lût ka hmuh chuan ka en mawl tawp, he hmeichhia hian hna chi tinreng athawk emaw ni ka ti hial. Ngaihdan dang daih min neihtir bawk he hmeichhia hi chhungkaw eibêl em ni ang? Heti tak maia hna athawk hi ka hrethiam lo, tunang hun te chu tleirawl tan chuan mahni duhzâwng chanloh hlauva bazar hun ania sin. Engang chhungkua nge aneihbîk ang le?

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 24th, 2021, 2:55 pm

Chapter - 18






"Enge in order duh ang le?" Tiin akut hmalama suih bet in biangsûm lang kalh hian anui a, ava hmelṭha chiang tak! 'Entawh pawh a ennawn leh ṭul,' ti a ka lo suangtuah fo ṭhin hmeichhia ngei ani. "Enge kan chah ang le?" Tiin Hmingsangi'n paper them leh pen ahùm ràn a, "i chah ang ang kha ka ei thei e," tiin Lalnoi chu ka en rân a, min enlêt duh ṭhak nâng.









"Sausage leh Chicken momo ka duh e," Miss Michelle'n alo ti ve bawk a, "awle, Papuia leh Eleazer-a chu ka chah ang ang hi ei mai ru aw, ka chah hnem teh ania," tiin nui var var in a paper them chu Lalnoi ape nghâl a. "Ngawilawk, Michelle kha ini em?" Hmingsangi'n phâwk ru zet a Lalnoi en paha atih chuan kan en rual ṭhap!








"Ahh... aw ehe! U Hmingsangi kha ini tiraw?" Lalnoi'n bahnak a atih ve sap chuan aṭhuthmun aṭang in Hmingsangi atho nghâl vata, ava kuah ta thlawp mai. "Engmah sawi loin in bo ta daih sia, ka ngaihven ru reng ṭhîn che u asin, Aizawl ah hian in awm tihna anianga, kan ngaihtuah thei lutuk che u, in damtlâng maw?" Tiin zawhna azâwt ta nghâl mawlh mawlh a.








An chhungkaw dinhmun leh an chhungkaw chanchin chu hriatchian ka duh avang in an lamah beng ka chhi ru ràn a, hriat kimloh ka hlau atinni. "Kan chhungkaw dinhmun chu ahma ang tho kha kanla nimai, ka pa Damdawiin ah alut reng a, midang chu kan damṭha e," alo ti let ve vata, a hmêl chu rilru helhkam nei ang mai in a kûn deuh chhal a.









"U Hmingsang, inhlawh mai ka ni sia, ka kal phawt ange, inthil order hi ka lo pe nghâl ang che u," tiin hmanhmawh zet chuan achhuak ta nghâl a. "U kha hmeichhe tleirâwl te kha i hrengai maw? Engtin nge i hriat daih daih a?" Papuia'n alo ti haw a, "i hrelo em ni pu Muanpuia te chu? Kan in piah ah an awm reng ṭhin kha," â tih hmel zet chuan Hmingsangi'n alo ti let a.








"Hre mai nâng apa hming i sawi pawh chu ka vawikhat hriatna," Papuia'n alo ti thên mai. "An chhungkua hi berh ve tak annia, apa ber hi enkawl ngâi chawt ania, Kal ṭhalo anih avang in kartin Dialysis tih ngâi ania, kar khar ah vawihnih tih ngei ngei angai ṭhîn. Vawikhat Dialysis tihna pawh Sangsarih chuang fe ania, kar khat ah vawihnih Dialysis tih angai nen chhungkaw mamawh engmah tiam miah lovin kar khat ah Singkhatsangli chuang chu apa enkawl nan pawisa an thehchhuak ziah tihna anihchu," ati ta sap a.










"Ekhai! Anu in enghna nge athawh? Alo ti leh zoh a, "engmah athawklo, zonu kan tihmai ang hi ania, engtin nge an khawsak zêldawn ni? An chhungkua ka ngaihtuah chhuah châng hi chuan ka thaw hi alo pik ve em em ringawt zel, an retheih êm avang khan Serchhip an awmlai pawh khan YMA leh mi tlawmngai ten bâwm te andawhsak tawp alawm," tiin khawngaih hmêl zet hian a mittui atling deuh pam a.








"An unau lah hi an rual roh phian a, unau panga niin Michelle kha a upa ber ania, anu lah khân aduat fahran silo nen, khawlai a achhuah ve châng pawh hian anau pakhat pua in apkhat kai chung in an kal hnak hnak zêl. Chuti chung te chuan Chawhmeh zuar in a thim avar pawh thlu lovin varṭian ah achhuak ṭhîn," ati leh zat a.









"Ka khawngaih asin aw, an chhungkaw tân hian tihsak theih nei ila ka ti ṭhîn, antan tihtheih lah kei châwmhlawm ve mai lah hian ka neidêr silo, vanduai ber emaw tiin ka nu in min tlân bosan khân ka lo in ngai ṭhîn a; mahse, Michelle te chhungkua ka ngaihtuah chhuah châng hi chuan kan vanneih zia ka hrechhuak ṭhîn," ati leh sap sap a.








Alo ni maw? Chuti khawpa chhungkaw baihvâi aṭanga lo chawrchhuak chu maw lo ni a? Ka va khawngaih tak! An chhungkaw dinhmun hrelo lêk in bazar mipui awmtam na laiah te khân kalo in hnialpui chiam kha ani si a, ava zialo tak!









Kan thil eitur alo thlen hnu chuan ngawireng in kan ei mial mial a, ka thil ei erawh atui fahranlo khawpmai, nichin lawka Hmingsangi thilsawi ka hriat vâng ani pakhat. A tan hian tihsak theih neih ka châk takzet; mahse, engtin nge ni ang? Min ngaina lo mai pawh ni loin ka hmel ahmuh in athimrim ti tih zel sia. Hmalâk ngaihna ka hrelo Huizzz.









"Zanin chu farewell kan nei ang chu tiraw?" Papuia'n alo tihsap chuan ṭha dawn riau in ka hria, zanin chiah Aizawl ah an awm tawh dawn a, kumthar ah bak kan in hmutawh dawn si lo a. "Eng farewell maw?" Miss Michelle'n alo tih chuan "zanin chiah Aizawl ah kan awm tawhdawn a, in thlahna hman an tum deuh aniang," Hmingsangi'n alo ti vat.









Dawr aṭanga kan chhuahfel hnu ah inlam panin kan tlan haw ta vang vang a, November thlasik inṭan chhoh lai ani tawh bawk nen, tlai dar 3:00pm chiah la ni mahse avawt roh khawpmai. Kan chawlhna dawr lah ni êng hmulo ani bawk nen, vawt var var tak ani.








In kan thlenfel hnu ah Hmingsangi leh Papuia in ah ka drop fel vek hnuah dawr kan chawlhna lam bawk chu ka pan leh a. Lalnoi kha hmuh ngei ka ngai ani, dar engzah ah nge dawr an khar ka hre chiahlo; mahse, Krismass dawn hnaih ani bawk nen an bântlài ka ring ve ngawt a.









Dawr aṭanga alo chhuah hun ka châng tawp mai ani. Dar 4:00pm ari a, dar 5:00pm ah pawh alo la chhuak chuanglo, dar 6:00pm apelh pawh chuan alo chhuak thei mailo. Bân ahun tawh em em lo maw? Tiin dawr ah ka va lut ta râwih a, an manager leh hna thawktu mipa pahnih bak an awm lo, an manager chu ka zawt ta tawp a, ani chuan tlailam dar 4:00pm khan ahaw tawh thu in minlo chhâng ta thên mai.








Ka vawikhat na ah ka fail nghâl pang mai ania, ka thinrim ru kher mai, tihtheih awm heklo le, inlam panin ka tlânhaw ta vat a. Inlam pana ka tlán haw laiin ka pu in "lo haw vatrawh, chaw eitur in kan nghâk reng che," ti hluk in phone call ati tawp ta hmak a, ka speed ka sân sauh, zanin chiah Papuia te an awm tawhdawn a, keilah hetah ka kalta daih si, atihchi loh hle mai.









Zanriah kan eikham hnu ah "zanin chu pawn ah mei chhep ang u aw," tiin Papuia aphúr khawp maia, ni e, anuam ngawt ang. Thla a éng ruih bawk nen a lunglen thlâk hle mai. Pawn ah meichhep in kan ṭan kaia "ka lakah hian i in zéprei thei hle mai?" Papuian atih chuan ka en vata, "i lak ah maw? Engmah zep ka neilo," ka tih chuan anuisuk a.









"Michelle i endân hi ka hrelo emaw iti em ni? I mitmenga i duhna kha ka hmuhhmaih hauhlo ania, min hrilh hun ka nghâk renga; mahse, i thumai chuan min hrilh mai hmêl siloh a," a ti leh sup sup a. A chhelo chiang alawm, a mawngbawr lianṭha nelhnulh leh a âwmbawr kawhlah te khân mipa ka nihzia min hriattir; mahse kha chu tisa in ît na mai ani.







Ka nui hawk, "i hresual anih chu," tiin ka kiai suk a, "vawiin a ka u in an chhungkaw chanchin asawilai a, i kuttum i hûmruh ṭung te, bazar ah Aldrina nen inkai riala an kaldûn lai a i thinrim inhrosa te, khâng zawng zawng kha ka hmuhhmaih hauhlo ania," ati leh vut a. Lalnoi chungchâng zawk asawina alo nimaw? Nuih aza lo kher mai.







"Aldrina nen hian kum tihtham fe an in zuitawh, vawiin a ka u in an chanchin asawi khan ka hrechhuak chiah, ani chu beisei bo mai ani, i beisei tisâng lutuk suh," tiin ka chhân leh hma chuan i hria em "kumhnih chhûnga i hmeichhe duh ka hriat hmasak ber ani," nuihzat hmel zet a Papuia'natih chuan ka nui ve suk. "Ka piantirh ata hmeichhia, tihtak zet a ka duh awmchhun zâwk mawle," ka ti a. Nui vur vur in atho ta nulh a.







Ka Acoustic Guiter Cabin chhûnga ka dah chu lo la chhuak in, "zanin chu kan zai nasa ang," tiin ṭhuthmun arem sauh sauh a. A ep ah chiah Hmingsangi nen kan ṭhu ve thung, ka oi leh pu erawh pâwn khawvawt a awm chi annihloh avang in inchhung lam ah an awm thung.




You're my bread when i'm hungry
You're my shelter from troubled winds
You're my anchor in lifes ocean
But most of all you're my best friend.



Don Williams a hlasak chu mawi lungrun zet hian asa a, asak zawh chuan Hmingsangi nen kut kanlo beng dar dar a. "Tunah Eleazer-a hla kan sak sak ange," tiin Valzotea hla phuah NGAIHLUNGRUN tih hla C. Sanga'n mawizet a asak chu asa leh ta a.





Nang ngaih vânga ka ṭah hi
Bangthei reng hian ka mawilo NGAIHLUNGRUN;
Min dawn ve ṭhîn em? Ariangte luaithli nûl a lêng vèl hi
Nang ngai reng reng hian e, tlaini ka lêng ta nge.





A sa zo chu Hmingsangi anui nasa mai, "tunge chu mi vanduai chu ni a? Ka nau Eleazer-a duhlo a lo hnâwltu chu tu hmeichhia nge ni?" Tiin pum dawm meuh hian anui ta hak hak a. "Û vawiin a restaurant a i biak hmeichhe tlerawl te kha ania," hepa ṭawngtheih zia hi! Ava mawl tak "Michelle maw?" Tiin anuitâwp ta daih a.








"Michelle helam ah lo kal rawh," Hmingsangi au lâng lâng ri chu ka hriat chuan ka hawilêt zawk. Intur la a inchhunga ka luh hlân ani, Lalnoi ngeimai chu Polar kekawr lum ha in jacket vawt thlur ang chi kha aha a, lukhum lum akhum thên bawk, asam adar chenlek te chu a thlah hniang bawk a, zan thla eng hnuaia a hmel ka hmu chu, khawdang rêng ka hawisan theilo.







Chelhdingin vuan zel ta che ila, a chelhding tu che kei hi thlah lovin min vuanlêt ve duh angem? Ka pèn ruala pèn in ka ruala kal i thlang angem? Tawnleh tur awmlo in bo hlen ta ila, mangang in i buai ve angem?

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)