PROMISE BY SumMer Ralte (Completed)

[Ngaia]

CHAPTER-16




"Vawiin chu i va tei chhuak ve dawn a mi, i lo haw atang i la chhuak si lova" ka nu in a tih chuan ka chhuak chak a ka chak loh pawh ka hrelo "Mahse ka pa hi..." Ka ti dek dek chu "Hei zia awm lam kan pan tho a, va chhuak harh rawh bakah chawhmeh lei te kan ngai a va bazar pah la a tha ang" a tih leh zel tak avangin ka hnial ta lo





Phur fahran lovin bazar turin ka chhuak a, ka haw atang ka chhuak ngai lo bawk a; bakah Aizawl ka awm hnuah ka haw khat bawk nen bazar pawh a lo changkang ve tawh khawp mai, "Kan in hmu leh ta" ka hawi let nghal vat a, ka hnung maiah chuan Lawmawma a lo ding reng chu niin





"Nang hi min zui ru a mi? Ka kalna apiangah i awm reng a" ner sak paha ka tih chuan a kiai suk a "Ka kalna apiangah i awm zawk a nih kha" mit ko san ak paha a tih chuan kan in melhno fahran tawh lo khawp mai "Tak tak a na ka nu ka bazar pui a, hetah engnge i tih ve zawk" pangngai taka min chhan takah chuan keipawh ka awmdan siam rem ve vatin ka chhang ve vat




"Ka bazar a" ka tih chuan a nui suk a, tawng leh tum a a ang zuau chu a nu a lo kal tak si avangin a chip leh hmak thung. "Hlutei chu hetah engnge i tih ve a" nuih sang paha a tih chuan "Nia hei ka bazar ve a" tiin ka lo nuih let ve seih chu, kan bula mi pah lah chuan min ei lo hmel takin a hmui a pet sawi nang thung




"A nih tak chu mawle, i kal chauh nge i haw tawh dawn?" Tiin min zawh chhunzawm leh nghal zat a "Ka kal chauh tih tur a awm lo em a, kan hawi khawthawng ve ange ka tih pah bawk mawle" ka tih chuan "Ni e, rilru tih thawven ve te hi a ngai a nia. Ti daih ila tunlai i pa engnge a an a, in thenawm hnai te e ti lo chuan kan la rawn kan hman bawk si lo" a ti a





"Tunlai tak chu a zia e, buai hi chuan thenawm lek pawh hi kal har deuh mai a nia; inthlahrung reng reng su" hawihhawm taka ka tih chuan ka bula mi pa lah ta pek chuan "A inthahrun thu a sawi loh kha" ngeiawm fahran tiin a khi suk leh nghal, ka ngei lutuk chu ka melhrum nghek ringawt. Tawng chak viau mah ila a nu a awm tlat avangin ka insum leh rih





"Hman veleh kan la rawn kan dawn nia, a zia lo emai lo dam vat teh se" a ti leh luam a "Nia, a dam vat ang" tiin ka lo nuih sang "Ni ngawt mai, hei keini chu kan bazar zo tawh a; kan lo va haw san phawt che nge" a tih chuan chhang lovin ka bu nghat a, Lawmawma nu chuan "Sabengtung hei hi min lo khai pui ve teh" a tih chuan ka nui hak chu rum lutuk in min rawn en a "Mi hmaah khati khan min ko ziah tawh suh" a tih chuan ka nuih a za tulh tulh mai




An kal liam tak hnuah keipawh chawhmeh lei ngai ka nu in a sawi leh lei ngaia ka hriat ho chu ka lei a, la haw nghal vat ka peih loh avangin restaurant ah ka chawlh leh te te hnuah ka haw veleh chauh; "Hman ni lawkah min then chauh emaw tia, nge ngaihdam min dil leh" kan in thlen hma chiah kawiah chuan Lawmawma leh hmeichhe pahkhat ka hmu dun a, an thusawi lah chu a ril hmel phian leh nghal





"Ka tihpalh khawngaihin min ngaidam rawh" chunu chuan a ti a, Lawmawma chu lo nuih hawk pahin "Ka ngaidam che mahse min then tawh a ka lo let leh beisei tawh suh" thu tak hmel fahrana a tih chuan ka nuih a ti za angreng, kei lah ta pek hi tum loh deuhin mi inbiakna hi ka hre fuh phian leh nghal a; tihpalh thil thu vang nge ka beng ri hriatna that ve hrim hrim vang pawh ka hre lo





Kal pelh ngei an ngaih avangin ka kal lo thei si lova, zam ru tak si chuan an mahni lam pan chuan ka kal phei zel a; an zawn ka thlen a an lo ngawih dak avangin Lawmawma lam chu hawiin "Engmah ka ngaithla lo a nia, in chhunzawm leh thei" mit ko san ak paha ka tih chuan a thinrim nge mak a ti hmel pawh ka hrelo, ngawi rengin min en reng ringawt




In ka thlen hnuah ka thil lei ho chu dawhkanah dahin ka nu leh pa te room ka pan ding nghal a, ka luh chuan ka pa pawh a lo thu harh peih ve a ka lawm khawp mai; "Engnge i rawn lei" ka nu in inhmuh rual chuan a lo ti nghal vat a "Lei tura min hrilh ho leh mamawh zualpui ho ka lei a" ka tih chuan a bu ve nghat mai





Inbual turin ka room lamah ka chhohsan leh nghal vat a, ka zawh hnuah ka kekawrte leh bra pho tura bathlara ka chhuak chu "Mi inbiakna ngaihthlak ching hmeichhia hi ka hua a nia" ti thum dut tu lam chu ka hawi phei nghal vat, engtik laiin nge alo kal ka hre lo mahse ka hnungah a ding reng tawh





Bathrobe nen chauha la awm ka nih avangin ka au thawt a "I engmah kha ka hmu peih lo" ei loh hmel zeta min tih chuan ka va han ngei mai mai tak "Kal mai teh" ka ti bak hlar chu ngai pawimawh lo hmel zetin mit tih zim sun pahin min en a "Eng lai atang khan nge kan thusawi i hriat hman?" Hriat chak hmel fe a min zawh chuan ka ngawi hmak thung




"I sawi loh chuan i lut dawn lo a nia" luhlul zet a a tih chuan ka thaw hak a "A vaiin" ka tih chuan min rawn en nghal kawk mai "Engvanga ngaithla nge i nih?" Rum zeta min tih leh chuan "Naupang te te si min zah lo lutuk kal mai teh" ka ti leh nghal tawng a, a nui suk duh lek chauh leh nghal




"Ka kal hma in i ngaihthlak nachhan i sawi phawt angai" ngeiawm zetin a ti leh a, ka melhrum tawh ngang mai "Ka kal na tur taka in awm avangin tum reng vang pawh ni hauhlo in ka hria" tih leh amah chu kal pahin ka nek sawk a, a nui hawk ri ka hre zui nghal zat bawk. Inchhung ka luh hnuah inthlak ta mai lovin khumah ka thu a, kei aia naupang fe in a a rualpui ang maia tham lo taka min ti chu ka tai thei thak lo





Chumi ni atang chuan Lawmawma nen kan inkawm chho tan a tih theih ber ang chu, amah a lo nelawm ve hrim hrim bawk nen; kar lo ah kan inkawmngeih der a tih theih ang. A sawi danah a û chiah nen kan in an thu a sawi a, chumi vanga min nel nghal em em bawk a ni; unau nei lo tih takah keipawhin ka nau ang maiin ka en a, kan innel tawh khawp mai





Luca pawhin min rawn biak a tum thin a mahse ka be duh tawh bik lo, a duh duh a mi tih kawi theih ka ni pawhin ka hrelo; duh a thlang tawh a chuti a nih chuan a duhna lamah chuan a rilru a pe tawh turah ka ngai. Ka ngai a, biak pawh ka chak ve tho mahse tunah chuan theihnghilh ka tum tawh zawk ang; kan thu tiam kha leh chen ka vawn him kha a ni chuan enga tan mah a ngai ve lo niin ka hre bawk





"Krismas a hnai tawh sia, bazar ve te pawh i duh lo a mi?" Ka nu in a tih chuan chhuah lam reng reng ka rilru ah pawh a awm lo "Chhuah lam pawh ka lo rilruk vak hleinem bakah lei tur pawh ka hrelo" ka ti niah niah a, kan buai bawk nen rilru in Krismas lam reng a hawi thei lo a tih theih ber ang chu





Kar hmasa atang khan ka pa pawh tlemin a tho kang peih veleh ta deuh a, mimal, chhungkua leh kohhran mipui te min tawngtai puina rah ka ti lo thei lo; dam var chu ni lo mahse a hma ang em em a buaipui ngai leh rilru tihah zawngin a awm lova chung ringawt pawh chu kan chhungkaw tan chuan malsawmna vawrtawp a tih theih hial ang chu





"Lawma hei Hlui hi lo chhuah harh pui ve teh, a rawn haw atang a pa bulah a tap chawt a; Krismas hnai tawh bawk nen i va chhuahpui ve dawn a maw ni chu le" Lawma thil rawn dah tur kan in a lo luh rual rual chuan ka nu in a lo ti a, ka mit mei nghal vat. Ka chhuah dawn rau rau chuan mahni a chhuah ka duh zawk, chutia mahni pawha chhuak thei lo rual pawh ka ni bik lova ka nu tih dan chuan min ti zak lek lek alawm mawle






"Keimah pawhin ka chhuak thei reng alawm, midang tih buai kher a ngai lo" ka lo ti nghal vat a "Chhuah ka lo tum hrim hrim alawm, a chhuah ve dawn te chuan kan kal rual thei ang" pakhata lah chuan a lo ti vat chu ka ngei ru ang reng khawp mai. Zanah Dinmawii nen kan inbia a, a lo haw tur thu a sawi chuan ka phur tawh tak zet; mahse Krismas a hnai tawh a, a dawr lun lai tak tur a nih avangin ni24 zanah emaw amaha rawn haw a tum thu a sawi a





A chang hi chuan a huai ka ti thin khawp mai, hmeichhia mahni chauh a kan khua leh Aizawl inkar a rawn tlan tur chu ka ngaihtuah ang reng khawp mai; "Rawn haw rual pui tur te zawng zawk la" ka tih chuan "A ho mai mai, lir thei ka nei a mahni pawhin ka rawn haw thei alawm" a ti tlat a, sawi sawi mah ila a duh dan bik te a nih loh chuan ka hnial thei dawn lo tih ka hria





Ka nu in a tih tak tlat si avangin Lawmawma nen bazar tur chuan kan chhuak ta nge nge a "Krismas ur lawk leh kum hlui thlah zan chu kan inah hmang ila, ka thiannu pawh a lo haw dawn a kan pathum in kan hmang ho dawn mi niang?" Kan kal paha ka zawh chuan a lu a bu nghauh nghauh a "A tha khawp ang, mahni tlawng a hman ai chuan a nuam phian zawkin ka hring" a tih chuan ka lawm ru ang reng khawp mai





Kan chhuak ve ta cheng a kan pahnih chuan lei tur a bar pawh kan hre lo, in enin kan nui leh ringawt thin a; mamawh kan neih thu kan sawi a mahse bazar chhung kan thleng a, a bo duak mai hian ka hria "Aaa... Engpawh chu nise thil ei phawt ang, ka ril a tam vek tawh" Lawma zawk chuan a ti ta nge nge




Lei tur zawngin kan vak kual nasa bawk a ril pawh a tam hman alawm, restaurant pakhatah min chawlhpui a "Ka û nen chuan hetah hian kan chawl thin, a restaurant duh ber a nia" a tih chuan ka bu nghauh nghauh mai, a û chu a ngai ve hle in ka hria "I û chu i ngai ve hle a nimaw" ti a ka zawh chuan "Ngai ve bawk e, tunge mahni unau te ngai lo awm ngai" nuih hawk paha a tih chuan ka lo ner khum nang





"Kei chu ka hrethiam ve lo, unau ka nei ve lova" ka tih chuan chik zetin min en vang vang a "Tunah te chuan ka nei tawh bik hleinem" a tih chuan ka en ha ringawt "I nei reng alawm" ka tih chuan a lu a thing vak a "Midang ta an ni tawh alawm" a tih chuan inla puitling ka ti leh hle ringawt tawh, nuih huah huah pahin "Eng eng emaw hi i hre ve nual a, thu khuh deuha thilsawi vel hi i inhmeh ve lo" ka tih chuan a hmui a pet sawi nang duh chauh leh nghal





"Tak tak a na, ka û nen kha chuan kan inkawmngeih ve a; amah a dam tha bawk si lo nen a pasal nen a an intawn hma kha chuan a unaupa mai bakah a thian kha ka ni tel ve a" a tih chuan an awmdan ang chuan awm ve ka chak tak zet, û emaw nau emaw tal nei ve ila; thian ka kawm pawh ka ring lo




"Pasal a neih hnuah in inbe tawh ngai lo a mi?" ti a ka zawh chuan a nui suk a "Be thin tho e mahse pasal neih tawh chuan mahni in lama kal reng te a mawi love a" thu tak fe a a tih chuan a thusawi chu ka pawmpui ve tak zet, hmeichhia in pasal a nei tawh a nih chuan mahni inlama kal zul te hi a mawi lo ve a; pasal te nen a an leng emaw pawimawh fet loah chuan haw mai mai hi thil tih chi a niin ka hrelo





Bakah pasal chhungte tan a inthlahrunawm dawn bawk a, pasal ten phal viau mah se a nazawnga kal reng erawh thil tih chi ber a ni lo thung; ka nu chuan "Pasal i nei ve ngai te a nih chuan pawimawh thilah lo chuan i lo haw ka phal lovang, i pasal a sual emaw a fel emaw a tlan te hi thil tih chi reng reng a ni lova; i tuar theih chhung chu tuar zawk ang che, i rawn tlan a nih erawh chuan i let ka phal tawh lovang. Pasal te leh chhungte lakah i in ti zahawm loh tihna a nimai" a ti thin





Mihring chuan limit kan nei theuh va, kan tuar theih chhung chu tuar hi a tha; a tuar chhuak peih apiang dingchanna a ni mai mahse chutih rualin tuar theih chin bak hi a awm ve thin a, pasal te sual mah se chhungte an fel chuan a tuar ve theih mai a chutiang pawh ni si lo, pasal te bakah chhungte leh zel an sual tel chuan tuar reng erawh thil hrehawm tak a ni thung ang





"A pasal chu a fel hmel hle mai" ka tih chuan a bu nghat a "Ka û tan chuan a engkim a ni mai" a û chu a ngaihsak hle in ka hria, Lawmawma vangin unau neih ka chakna pawh neih chak leh zualna min pe a; ka nu leh pa te kha lo inneih hma deuh ni se la chu unau pakhat tal ka neih ve mai te pawh ka ring hial a ni. Senior lama inneih an ni bawk a, keipawh harsa tak chunga min nei kha a nia; fa dang nei leh tur chuan ka nu khan a tlin tawh lo hrim hrim bawk






Kan eitur chah a lo thlen chuan kan ei nghal a, ei pahin kan titi pah mawlh mawlh; "Ti daih ila i bialnu nen chuan inla inthen tluang zel a mi?" Ka tih chuan "Then tluang zel chu a nih hi" a ti nghut a, ka nuih a za ang reng. A bialnu chungchang sawi chhuah tawh hi chuan a thinrimna ti lang chiah ngam lo mahse a tawngkam atang hian a hriat theih vek





Kei lah ta pek chuan ngeiawm chhuahin a khat tawkin ka lo sawi ve sek bawk nen a nin hmel em em mai leh nghal "Ka û nen a in ang ka tih na che u pawh, in chimawm dun lutuk hi" nuih hawk paha a tih chuan keipawh ka nui ve, in anna kan nei tha vak lo khawp mai. Hmelthat lamah emaw piannalh lamah in in ang te chu min ti se ka la hrethiam, chimawm lama in ang han nih mai chu(h)!





"I ei zawh tawh chuan kan kal dawn mi, chhuah ve rau rau a engmah lei lova haw chu a tih chi vak lovang" a tih chuan ka pawmpui khawp mai. Restaurant atanga kan chhuah hnuah bazar chhungah bawk kan lut leh a, kut ruaka haw tawp ai chuan tiin ka nu leh pa tan mawza leh kawrlum ka lei sak a; ka tan erawh engmah ka lei lo thung, mamawh nei nualin in hre mah ila lei tur ka hre tlat lo a tin ni





Ka tum ai hma in Dinmawii pawh a lo thleng a, ni24 a lo haw tur ang a insawi si khan a hma ni chiahin a rawn thleng a; kan han inhmu chiah chu kan te teng tung mai, a rawn thlen zanah chauh pawh sawi lovin a rawn leng nghal a. Ka kim leh sawtin ka hria "Mate mikhual i nei a nia" room a Dinmawii nen kan inkawm laiin ka nu chuan a rawn ti a, ka bangbo tak zet





"Nu i hresual a ni ang, chutiang mikhual tur tumah ka nei lo" a ngaihna hriat loh hmel zet a ka tih chuan "Aww... Rawn kal la i hre mai dawn alawm" nuih sang pah hian a ti a "Room ah tawm reng lovin rawn chhuak vat ru aw" a tih leh zet hnuah min chhuahsan a, a chhuak chiah chu Dinmawii nen kan in en ha ringawt "Tunge, lo kal tur an awm a mi?" Dinmawii'n a tih chuan "Chutiang pawh ka hrelo" amah ai chuan ka bo zawk ang tih theih hial tur a ni





"Chhuak phawt ila tunge kan hre mai dawn alawm" a tih takah chuan ka bu nghat a, inhnuai lamah kan chhuk thla nghal vat. Thutkhawmna pindan kan thlen ruala ka thil hmuh vang chuan ka ding chawt a, phawk zetin thuthlenga lo thu chu ka en ha ringawt "I rawn kal tir a mi?" Dinmawii pawhin bo hmel zet a min zawh chuan chhan mai nachang pawh ka hrelo





Ka hma thuthlenga thu chu ka en ngawt ngawt ringawt, ka in humruh nghal vak a thinrimna in ka khat nghal a tih theih ber ang chu; ka lam lo hawiin min nuih a mahse ka nuih let ve lo ka nu lo kal phei mek chu rum lutukin ka en a "Tu mikhual mah ka nei lo thu ho mai maiah min lo ko tawh suh" ka nu pawh zah zo lovin Luca vangin ka thinrim em a, a hriat tur kher pawh a ka nu bula sawi ka ni tih hrethiam se ka duh khawp mai






"Kan awmna a rawn zawng hmu a, i pa a ngaihtuah bawk a; Krismas leh Kumthar a cham dawn bawk a a lawmawm asin mipa kan neih loh hi tihian min puitu tur Pathianin min rawn pe a lawm zawk ta che, i thian a nih kha hrim hrimin khati khan an ti ngailo thil mawi pawh a ni lo" ka nu chuan min zilh nghal malh malh a, a hriat lai ber kher a chutiang a sawi chu ka duh lo khawp mai





"I mikhual a nia nangman ngaihven rawh, kei chuan mikhual ka nei love" ka nu bulah chuan ka ti leh kher a, Dinmawii chu inchungah ka chhohpui nghal hlawk hlawk; "Engnge in awmzia hi?" Hriatthiam loh hmel zetin room kan luh hnuah min zawt a "Engmah a ni lo, ngaihven duh suh" ka nuih lui ve tak ngial na chu ka hmelah ka la thinrim reng tih a hriatthiam ngei ka ring






Ka harh chuan a hma vak tawh lo, khum atanga tho chhuak vatin ka in phihfai sawk sawk a; inhnuai lam ka pan nghal a, choka ka thlen ruala ka thil hmuh vang chuan ka ding chawt phawk hra in ka hma maia ka nu nena thu dun chu ka en mawl tawp. Nizan ka thilsawi vang khan inthlahrung a a haw daih kha ka ring a nia, mahse a ni lo ka nu bulah thu in thingpui te a la in ngam a nia!






"I tho nuam em? Thingpui ka lo siam ve nghal ang che aw" ka nu in min hmuh rualin a ti a, chhan pawh ka chhang lo; a bula thu chu enin a lam pan chuan ka kal a "Helaiah hian kan mikhual peih lo che, haw leh la i ti tha zawk ang" ka ti nghal tawng a, a hmelah chuan inthlahrung hmel te ka hmu ve deuhin ka hria min chhang lova ngawi renga a awm te chu ka ngei tawk a tling em em a ni






"Bawihi tih mawh viau thin lo teh, keiman haw ka phal loh vang zawk a nih kha" ka nu in a tih chuan ka thawchhuak hak, ka nu leh zel pawh a lam tangah a siam tawh chu a nia! Thingpui min rawn pek lai chuan tawng tumin ka ang zuau a mahse Lawmawma a lo kal tak avangin ka chip leh rih





"Vawiin engnge i tih dawn?" A tih chuan "Tih tur a awm pawhin ka hrelo tinge?" Tiin ka lo zawt let a, ka pa damdawi tur rawn dah pahin "Chhuak mai mai ila ka ti deuh" a tih chuan peih lo viau mah ila tun dinhmunah chuan Zoremsanga ka kal bosan theihna hmanraw tha tak niin ka hria





"Nu Mathleng vawiin chu Hlui hi ka lo hawh leh dawn a nia" fiamthu ti tak deuh si a a tih chuan "Nia kan chhuahpui lawk ang" ka ti a, ka nu pawhin a lo rem ti ve mai mahse a bula thu pa erawh chuan chik zetin Lawmwma nen chuan min en dun reng a; a tawng lova thil ngaihtuah nei hmel a pu zawkin ka hria, khang hun chhung zawng khan keipawh na takin ka awm alawm





Bialnu nei lai reng chu si a, Krismas leh Kumthar hmang tura a rawn zin pawh hi ka hrethiam teh hrep love; tuk thuan eikhamah ka insiam nghal mawlh mawlh a, a rang thei ang bera kan in ka chhuahsan lo a nih chuan nilengin ka mood hi a chhe dawnin ka hria. Ka kawngkhar an rawn kik a, lut turin ka lo ti ve mai, ka hawi phei chuan ka nu a lo lut dawn emaw ka tih laiin Luca bawk!





"Engnge i duh?" ka ti nghal tawng a, kan in a a awm ve pawh tih tawh nak alaiin ka room ah leh zel a rawn kal ngam chu zak thei lo ka ti ngawt mai"I bialpa mi?" ka zawhna pawh chhang lovin zawhna min siam sak zawk a, ka thaw hak a "Aw ka bialpa a nih kha" a ngei tur kher a tih chu ka chak viau na in ka ti ta lo "I hriat tur a awm lo" tih zawngin ka chhang a, a nui nghal suk mai





"Thu ho te sawi tura rawn kal i nih chuan ka hman ve lo a nia, khawngaihin i sawi tur i sawi zawh tawh chuan i lo va chhuak leh tawh mai dawn a mi" kawngkhar lam kawk va paha ka tih chuan a kekawr hma ipte chu zenin mit tih zim sun pahin min en reng a, ka la danglam lo he a mit thil ti thei taka min en chuan ka zam chhe nghal rawih rawih zel






Ka mit mengah a hriatthiam ka hlauh avangin ka hawisawn vat "Khawngaihin chhuak rawh, insiam ka la duh a nia" ka tih leh chuan a rum nghut a, engmah pawh sawi lovin a chhuak ve mai. A chhuak chiah chu khumah ka thu thla hnawk a, ka room a a rawn awm chhung rei lo te pawh khan boruak rih zia leh uap zia kha a hrethiam ve angem le





Ka insiam zo inhnuai ka chhuk leh chuan Lawmawma pawh a lo awm tawh, min rawn hmuh rualin ka lo nuih sang a; ngeiawm chhuah ka chak tlat pek, a bulah chuan kalin ka bialpa ang mai chuan ka ngaihsak a a banah kuahin "I lo thleng hma lutuk a" no fahrana ka tih chuan a ngaihna hriat loh hmel zetin min en ha ringawt. Kan bul lawka awm ve lah chuan kan pahnihin chik zet chuan min en reng a, Lawmawma awm dan chu a hrethiam ang tih ka hlau hle






Ka mit mei vat a, a hrethiam ve nge a nui suk a inla zei fahranin ka sam chu ka benga zeh pahin "I hmeltha lutuk hi hmuh vat vat ka chak tawh a" a tih chuan nui lo turin ka insum tang tang, khawi emaw function velah pawh chawp drama siamin amah hi ko thut ta se a hnehsawh kher ang chu "Kan kal dawn a mi" nuih seih paha ka tih chuan nuih ve suk pahin a lu bu ngat a






"Nu kan kal a nia chuan ka rawn haw tlai mai thei aw" ka nu pawh en lovin Luca ringawt chu ka en a, nichin atang tawhin a awmdan a la thlak lo; a din ngaia din reng pahin thil ngaihtuah nei hmel pu teuhin ngawi rengin min en char char thung, min rawn nuih suk chuan ka hawi let leh rang chiang khawp mai





Lawmawma chu ka pawtchhuak nghal dawr dawr a, kan in atanga hla deuh hlek kan thlen hnuah "Nichina i awm dan kha engnge a awmzia" min pawh din dawt pahin a ti a, ka lo thaw hluai "Krismas leh Kumthar bawr vel chu nichina ka chet dan ang chiah khan ka la hmang tangkai dawn che tih lo hre tawp rawh" tih pahin ka kalsan nul nul a, a nui hawk ri ka hre zui nghal zat bawk





"Kha pa kha i tan a hlu hle a ni ang maw" ka dara rawn kuah pah a a tih chuan ka ner nang a "Ka hrelo le, hmanah chuan a ni thin ngei a tunah ala ni em tih erawh ka hre tawh lo" ka tih chuan a bu nghauh nghauh a "Tunah pawh a la ni zel a nih kha" a tih chuan ka en ha ringawt, a sawi chhunzawm dawn emaw ka tih laiin ngawi rengin a kal leh daih ang lawi a(h)!






"Dinmawii sawm ve ang, kan pahnih chauh chuan ka peih lo" ka tih tlat avangin a ni pawhin a rem ti ve mai, Dinmawii te inah kan kal a kan chhuah tur thu ka sawi chuan phur lutukin a insiam nghal chu Lawmawma nen in enin kan nui dun tawp. Chhuah a nih tawh phawt hi chuan a nuam emaw a hrehawm dawn emaw pawh nise Dinmawii hi chuan a phur vekin ka hre mai





Khawi khawiah emaw kalin hun kan hmang a, bazar pawh a lun tha ang reng khawp mai; Dinmawii phusa lutuk chuan ka mood chhe ta zawng zawng te kha a ti tha leh vek nimai in ka hria "Zanin chu kan inah kan hman dawn kha aw, rawn thleng har miah suh ang che u" tiin ka hrilh lawk a, an pahnih pawh chu an phur hmel tawh tak zet






"A nih chuan zana kan ei tur vel kan lei lawk dawn mi niang?" Dinmawii'n a tih chuan ka bu nghat "Chips leh drinks vel kha nimai lawm" Lawma pawhin a lo ti a "A ho tha emai, eng eng emaw kan lei teuh dawn nia" tiin a lo hnial vat "Kan ar pakhat kha zanin atan kan talh dawn nia, lei chiam lovang eitur kan tlem dawn tho bawk a; kan ei zo seng lovang" ka tih takah chuan min hnial ta em bik lo





Kan haw meuh chuan a tlai tawh ang reng khawp mai, ka inthlak zawhah ka nu chu zanin atana kan ei turin ar talh ka sawi chuan min phur pui phian a; lo in hma khua lawk ka duh avangin talh ka duh nghal thu ka sawi chuan a lo rem ti mai mahse a talh ber thin ka pa a dam loh miau avangin ka nu chuan talh a tum a, ar inah lut in a lian tha ber chu min lak sak a talh tum a a tin uai tawh chu Luca chuan a talh tur thu a hrilh a, ka nu pawhin a pe veleh mai





"A nih chuan tikhan lo in buaipui ru aw, ka rawngbawl lai ka han chhunzawm lawk ang e"ka nu chuan tiin min kalsan daih a, sawi tur a vang nghal pharh mai. A ar talh lai te chuan a bulah ngawi rengin ka lo awm ve reng a, ka be lova a ni pawhin min biak a tum chuang pawhin ka hrelo





"Tui lum a awm sa chuan a hmul hi kan pawt thla dawn nia" min rawn nge a thuphungin a sawi ve mai mai tih pawh ka hrethiam lo, chhang lovin inah ka luh san a ka nu tuilum a awm leh awm loh ka zawh chuan a awm thu min hrilh a; chawhtawlh lian zet la chhuakin bucket ah tuilum chu a chhung leh a "An pahnih hian keng la Luca bawiha kha i theih ang angin i pui dawn nia" a ti a, ka lo nuih ringawt thung






Ka pa a dam tha lova, buaipui ngai khawp ni tawh rih lo mahse inkhawm san erawh a har viau thung. Ka thiante inkhawm bang chu ka lo nghak a, ka ni te leh ka nu te an awm ve vek avangin ka room ah ka awm san daih thung; Luca pawh engtin nge a awm zel tih pawh ka hrelo, ka ngaihven lo bawk a a awm dan ang angin lo awm mah se pawi pawh ka ti lo






Dar sawm(10) pelh hretah Dinmawii leh Lawma te pawh an rawn thleng a, kan ri nghal chel chul mai; thil ei siam nan a a hma deuh avangin inchung zawlah mei chhep pahin kan zai ho mai mai a, ka nu in Luca pawh tel ve rawh se a tih tlat avangin kan bulah a awm ve reng a mahse hmana ka hriat thin Luca erawh kha chu a ni lo emaw tih mai tur a ni






Ngawi rengin kan bulah a awm ve chet chet reng a, fiamthu kan thawh lahin a lo nui ve suk suk bawk "A va inthlahrung ta ve" min rawn nghawk zeuh pahin mit ko san ak pahin Luca lam chu a hawi a, kei ka lo ner sak thung "Tisawn a awm awmin awm rawh se, induh chuan be ru kei chuan ka be dawn lo a nia" tiin ka luhlul ka chhuah ve tlat, a chetdan mak sak pui pui hi ka ril rem zawng a nih loh vang te pawh a ni mah na!






Eitur kan siam lai te chuan kan mipa pahnih te chu kan kalsan a, engtin nge an lo inkawm ang tih erawh ka hre lo mahse an tawng tam lo dun ve viau ang chu le; eitur keng chho in inchungah chuan kan chho leh a ka rin ang tak takin thu dun e ti lo chuan ngawi rengin an lo awm Lawma chuan guitar perh pahin zawi te in a phun sup sup a Luca erawhin mawlh te in mei chu a lo chhaih kual thung





[Hma hram kan tum ang a, thei ta ngang lo a ni pawhin kan inhrethiam zel turah ka ngai. Chuan ads click, like leh comment mawlh kha aw]

#Ads click lo in tam thei eee, lo click ve tawh ula, in fel sia

[Ngaia]

CHAPTER-17





Kan thil ei lai te chuan kan bulah ngawi rengin a awm ve a, ka chan ber chu naupang thuawih leh fel deuh te pawh a ang ve in ka hria; be chak viau mah ila hrem rih ka chak tlat. Midang ho hnenah be tura ka hrilh avangin Lawma leh Dinmawii te chuan an bia a, a tawng tam lem lova mahse an biak ang ang chu tha takin a chhang ve mai





Khawngaih ve viau mah ila a hmel ka hmuh hian thinrimna in ka khat leh thin a, ka be hlei thei rih tlat lo a tin ni. Ka chhungte inkhawm thei an awm lova, zing tal chu inkhawm ve tha a ka hriat avangin kei erawh ka inkhawm dawn thung, ka nu in Luca kalpui tur a min tih tlat avangin ka phur fahran lo khawp mai





Ka thiante pahnih te nen kan kal ho a, biak in chhungah pawh ngawi rengin a awm ve zel a; ka kalna apiangah min zui ve reng chu ti lang lo mah ila ka nuih a za tlat. "I ti khawngaih thlak, be tawh mai rawh" Dinmawii'n a tih chuan "Tihian thuawih taka a awm hian a nuam zawk" ti a ka chhan chuan hahthlak tih hmel zetin min en ha ringawt





Kumthar tukah a ni pawh a haw a, a haw chiah chu ka ruak nghal huaiin ka hria; khang rei lo te chhung khan be duh lo mah ila a ruk tak chuan ka hlim a nuam ka ti ve reng mai. "Karlehah chhuk ka tum a" Dinmawii pawh a lo haw atang kan inah a tap deuh chawt a, chutia Aizawl a chhuk thla leh mai tur chu kal lo mai tura hrilh ka duh viau na in a dawr a ngaihtuah awm ve bawk nen chutia keiin "Kal suh" ka tih theih ngawt pawh a ni si lova






Ka pa pawh tha vur ni thei rih lo mahse zawi zawiin hma a sawn ve zel a, a hma ang em em a ngaihtuahawm ngai khawp a a awm lo chu a lawmawm tak zet; ka ni te chhungkua leh ka nutei te chhungkua pawhin min haw san a, chutia pa ber ngaihtuah awm a a awm tawh loh avangin an ni tan han awm rengna chi zia zang ni hek lo






Tih bek bek chhungin Dinmawii pawhin Aizawl lamah min chhuk thlak san leh tawh a, Luca leh Dinmawii an han awm lo chiah chu a ruk tak chuan ka khua a har a ka ruak vek bawkin ka hria; "Ka û te chhungkua an lo zin dawn a, zanah lo leng ve la" ka room bathlar lamah awmin Lawmawma nen chuan kan inkawm a, chutia a û te lo zin tur a sawi chu ka lo hlimpui ve tak zet






Chuti khawpa in ang min ti tu chu hmuh ve ka chak tak zet bawk "Engtikah nge an lo thlen dawn a?" Ti a ka zawh chuan "Ka hrelo, kawng lakah chawlh an nei loh chuan an lo thlen har ka ring lo" a ti a, lu ka lo buk khum nghauh nghauh "Lo kal ka tum dawn nia" ka tih chuan chik zetin min rawn en vut a, hriatthiam loh hmel fe in ka lo en ve bawk






"Luca kha be tha rawh, mi fel tak a niin ka hria" a ti a, kan thusawi lai nen a inrem lo lutuk a rawn sawi chhuak hlawl chu mak ka ti ang reng viau "Timaw?" Nuih hak paha ka tih chuan a ngawi leh zui rauh rauh a "A duh hle che niin ka hria, a rintlak ang tih pawh ka ring" a ti leh zel a, ka lo ner nang thung






Rintlak chu nise tun ang hian kan awm tawp nang, kan inkar that lai reng a sawi lawk pawh awm hauh lova a bialnu hlui bulah min kalsan duh tu kha a ni miau a "Engmah i hriat ve loh vang a nih chu" nuih hak paha ka tih chuan "I hre lo zawk a ni maw?" Mit ko san ak pahin a ti a, ka ring love a thiam lo zawk ka nihna ka hre ve hauh lo kei chuan





"Ka hriat vang alawm tianga ka awm" ka tih chuan a nui suk a "I hriat hunah a hunlai a i be lo kha inchhir miah suh" a tih chuan "In chhirna chhan tur ka hre lo" uar fein ka ti a, a dik ngei bawkin ka hria. Keimah ni lovin amah zawk kha inchhir tur zawk niin ka hria "Tunah chuan i rilru a sak rih mai mai a nih kha" a tih leh chuan thawk ka la nghal hak, eng chu nge maw a hriat ni!






A bula Luca chungchang ka sawi ngai lova, a hming vawikhat pawh ka la lam ri euh lo chung hian hre thang tawh ang maiin a tan nghal em em chu a nia! Kha mi zan eitur kan siam san zan khan Luca hian Lawmawma hi eng emaw tak chu a lo hrilh hman a ni ngei ang "Naupang te te si" nuih hak pahin a lu ah chuan ka nem bu lawm a, a na lo tih hre reng mah ila nat tih hmel em em in a lu a tuai nghal vut vut a, nur nangin min rawn en bawk







"A mak e, ka hriat vang alawm mawle ka hrilh che" a tih chuan ka nui ta hak hak, zantir lamah Lawmawma û te pawh an lo thleng a; kal ve tura min duh ngei angin ka kal ve a, û hmeltha tak a neih bakah pasal hmeltha tak leh fanu duhawm deuh deuh pawh a nei chu vanneih ka ti bik kher mai. Kan vawikhat inhmuhna chauh e ti lo chuan kan in nel nghal em em a, Lawmawma û sawidanah Lawmawma chuan ka chanchin a lo hrilh nasa viau ni tur a ni






Min duh vang ni lovin û ang a min en thu te leh min nel thu te chu a lo hrilh luam a, ka chanchin sawi tlak awm lo mahse chutianga a lo sawi chu ka lawm ve tak zet; dar sawm(10) bawr thleng ka awm hnuah ka haw san a, in ka luh rualin ka nu chuan an room a kal turin min au vat a, an room ka thlen rualin ka pa chuan "I lo leng bo daih a" thei leh thei lova min nuih pah hian a ti a, keipawhin ka nuih let ve seih






"Nia Lawmawma û te an lo zin a, leng ve turin min sawm a ka va kal ve lawk a nin kha" ka tih chuan a bu nghat nghat a "I awm loh hi chuan ka ngai hman thin che a" a tih chuan thut hnaih sauh pahin a kut chu ka chelh sak nghal vat. Ka pa tan chuan a fanu neih chhun leh a duat em em kha ka nia, min ngai pawh hi a awm lo hran lo mahse a nat hnu a min ngai leh lutuk hi chu a chang chuan ka ngaih te pawh a tha lo hman rum rum thin





"Ka kal bo tawh miah lovang" nuih sang paha ka tih chuan a thaw hak a "Ka awm loh hunah pawh i nu hi tha takin lo enkawl ang che aw" ka pa chuan ka nu bulah min biak duh thu a sawi avangin a ni chu sitting room lamah a awm thung. "Pa chutiang an sawi ngai lo, tha takin kan in enkawl ang a Pathian zarah i dam leh vat dawn alawm" ka tih chuan a kut zur tawh tak leh chuar tap chuan ka kut a hum ruh vang vang a, a mit a chhing vang vang bawk






"Ka kal har tawh dawn lo tih ka hria, i nu ka la ngaihtuah em vang chuaha la thaw ve tawk tawk hi ka ni tawh, ka fanu neihchhun i ni a ka tha chhang dawltu pawh i ni bawk. Ka awm loh hunah chuan i nu hi a khua te pawh a har ang a, hnemtu a mamawh ang pachang takin awm la i nu tan in nghahna tlak ni zel ang che" a tih chuan ka mittui a hnai nghal rual, chutiang thu ka pa in a sawi ta mai chu hriatthiam har ka ti tak zet bawk






"A mak e pa sawi tawh suh ka tih che kha" mittui tling pam chung chuan ka ti a, ka pa hmaa han tah em chu ka hreh avangin tap lo turin ka insum tang tang "Tun bak hi sawi lehna hun ka nei tawh lo mai thei asin" min nuih sang pah chuan a ti a, kei chu ka thin a rim hlur tawh. Keinin a dam kan duh em em laiin a ni chuan kal tawh nghal mai tur angin a awm a, a thusawi apiang te hian min deng dawt dawt hian ka hria






Engmah ka sawi thei tawh lo, ka tawng chhuak leh a nih chuan insum hman lo lek a ka tah khum vak ka hlau a ni; thildang dangmin hrilh leh nual mahse engmah chiang taka hriat a lawi ka nei tawh lo. An room atanga ka chuah hnuah ka nu chuan min rawn pan vat a "Ka tel lovin i pa nen engnge in sawi dun vel a" min fiam pah chuan a nui huah huah a kei chu ka nui ve hlei thei der lo, ka nu chu ka en thin a ka khawngaih em a ni






Ka pa thil min hrilh atang pawhin kar khat lai a liam leh tawh an bulah nui ve thin mah ila chhungril tak erawh chuan hlauhthawnna in ka khat thung, Lawmawma chu engkim ka hrilh a; ka nu hnem tura min ti zawk pawh hi hnem ngai ka ni tih hi ka pa hian a hre lo zawk a maw ni! Lawmawma bulah chuan ka i pikna leh ka rilru hahna te chu ka thlen thin a, tlem chuan ka zia phah ve hawkin ka hria





A ni pawhin a theih ang angin min hnem ve thin a, zantin kan inah a lo leng ziah a; min kawm hlim tura rawn leng ni berin ka hria "Mahni in awm lo la, mahni a i awm chuan i inngaihtuah ngut ngut ang a kha kha thil tha ber a ni lo" a ti thin, a dik chiah reng a mahni a ka awm tawh chuan thil chi hrang hrang ka pa in min kalsan huna kan awm dan tur ngaihtuahin hun ka hmang thin, a tawpah ka hah leh em em ringawt a chu chu a tha lo a tih ber pawh kha a ni






Zan khat ka room bathlarah bawk chuan kan inkawm a, ngawi reng a kan thut dun reng laii ka phone chu a ri a; ka en chuan U Siampuii a ni! Ka haw tirha kan inbiak bak kha kan inbe leh tawh lo tih ka hrechhuak nghal zat bawk. Tun ang zana min rawn call hlawl pawh chu mak ka ti khawp mai





Ka chhang vat a "Aw U Siampuii" ka lak rualin ka ti a "Hlute engnge i tih i buai em?" Aw zangkhai vah hian a rawn ti a, a aw ka hriat lohna a rei tawh bawk a; chutia min rawn biak leh chuan a hmel awm dan tur te nen ka mitthla ruak thei a nui leh sen sen emaw kha a nia nga, ka nui suk a "Buai love engnge ni ta" ka lo ti let ve vat






"Eng lo a nia, ka thil hrilh tur che hi nangmah tihbuai ka tumna a ni lova mahse hrilh tha che a ka hriat vang zawk a hrilh tum che ka nia" a tih chuan han rin chhin ngaihna pawh ka hrelo, sawi leh sawi hnu kan inbiak lohna a rei tawh bawk nen ka bangbo ang reng viau a ni "Aw sawi la engnge ni ta" ka ti leh a, leh lama mi erawh a ngawi zui rauh rauh thung





"U Siampui" ka tih leh chuan thawm a ri hrut hrut a "Aw Hlute, damdawi inah kan awm a" a tih pawh chuan ka la hrethiam lo "A va zia love, tunge awm a" tha tak chuan ka chhang veleh mai. "Eng lo a nia, Luca hi damdawi inah a awm a; kar hnih dawn chu a ni tawh" a tih chuan mak tihna in ka khat nghal vek, a dam tha viau a maw ka tia mahse kar hnih dawn damdawi ina a awm tawh tih thu chuan min thawng lutuk tlat a ni





"A va zia love lo dam vat rawh se" ka rilru chuan ngaihsak viau mahse ka ti lang duh lo "In inkar a tha tluang zel emaw ka tia" leh lam atang chuan a nui hak a, a nui na ri erawh min demna a lang lek lekin ka hria "Aaa... Nia" tih bakin ka chhang thei lo "Krismas leh Kumthar hmang tura rawn zin a tum pawh khan kan phallo a, mahse a ngaih em vang che in a rawn kal lui ta tho a" a tih chuan sawi tur ka hre tawh lo






"Pawi ka ti khawp mai" ka tih chuan "In hmuh thiam lohna in nei niin ka hria" a tih leh chuan ka ning tan ta deuh "U Siampui, khatiang lam kha khawngaihin kan sawi lo thei angem Luca chu a bialnu bulah a awm leh tawh kha, a duh a thlang tawh a nih chuan hlim taka awm turin duhsakna ka hlan zawk e" ka chang bal a, ka rin loh lutukin leh lama mi erawh a nui thung






"Chu chu lawm ka sawi, i ngaih ang khan engmah thleng a awm lo" nghet charha a tih chuan "Engnge awmzia?" Ka lo ti vat. "Hman atang tawhin Luca hian a theihnghilh ngai lo che chuan a bialnu hlui nen khan an inzui lohna a rei tawh lutuk. In tih hluma a vau thin vang chauha a kianga awm a ni a, a nihna takah chuan bialnu en in vawikhat te mah pawh Luca hian a en ngai lo" a tih chuan a thilsawi chu mak ka ti tulh tulh





"Mahse tinge biak ka tum apiangin khanu khan a lo chhan thin" ka ti vin hlar a, U Siampuii pawh chu ka ngei dawn dawnin ka hria; Luca thil tihsual thup sak a tumna angah ka ngai a, chu chuan min ti thinrim hlur bawk. A nau pawh ni mahse a thil tihsualah kher chuan tan lo se ka ti, a ngawi zui daih a kan inbiak dan pawh chu ka kham tak zet tawh ka thawchhuak hak a





"Remchangah kan inbe leh dawn nia" ti a call dah mai ka tum chu "Lawk la dah lo teh" a ti leh a chhang tawh lo mah ila a sawi hun erawh ka chang reng thung. "Luca hi a dam lo nasa lutuk" rei fe a ngawih leh vang vang hnuah a rawn tichhuak a "A dam loh vangin damdawiinah a awm reng alawm" tih chu ka chak khawp mai






"A kal (kidney) a tha lova, thlak a ngai a mahse a kal mil tur kan la hmu lova kan nghak mek" a tih chuan ka awih lo nasa, a ni chu a dam reng mipa hrisel tha tak leh in fit tak kha a ni alawm "Engtik atangin" ti a ka zawh chuan "A rei tawh, dialysis a ti reng a nia Krismas hmang tura lo kal a tum pawh khan a chau lutuk mahse a hmuh chak em che avangin kan phal lo chung a vawikhat nan a pa thu hnialin hmu tur che in a rawn kal" a in hnut nghal hrawih a, a thu sawi chuan min deng dawt ni maiin ka hria






"Luca ni lovin nangmah zawkin a ni ngaihzawng neih san chu mahse i hlim a duh avangin engmah a sawi lo" min huatna leh demna a aw ah chuan a lang ni maiin ka hria, ka thu hriat chuan min thawng tak zet engtia han dawn sawn tur nge pawh ka hrelo. Rang lutukin Lawmawma lam chu ka hawi phei nghal vat a, a ni erawh chuan a guitar chu perhin a lo phun pui sup sup a, kan tawng chu hre ve lo ang maiin a awm thung






"Tinge a tir atang khan min hrilh loh" ka ti leh tawl a "I nat a hlauh avangin, i bula awm chu a chak ve thin alawm mahse nakinah a nat tak tak hunah a kalsan theih loh che a hlauh avangin a hnaih ngai lo che, thu engmah pawh a tiam ngam hek lo che" a ti leh zel a "Chu chu eng vanga min hrilh nge i nih" tiin ka lo zawt leh daih thung, a hma atang daih tawha min hrilh thei reng si tuna taka min hrilh chu ka lawm lo tak zet bawk





"Engkim hi zep tura min tih avangin a tir atang engmah ka hrilh ngai lo che, mahse tianga na taka a awm reng hmuh hi ka thei thlawtlo. A damna ber i ni thin mahse ngaihzawng i nei tih a hriat khan... " ka ngaithla thei tawh lo, a pawi hi ka ti vawng vawng emai "Sawi tawh suh" ti tuarin kan inbiakna chu ka dah a, ka awm hi a na nghal ngut ngutin ka hria






A tir khan tinge min hrilh mai loh? Engvanga zep tlat nge a nih? Min hrilh nise a bulah ka awm reng tur hi a nia, Lawmawma'n "I hriat hunah a hunlai a i be lo kha inchhir miah suh" a tih te chu ka hrechhuak a, tunah chuan inchhir tawh tak ka ni "Tinge engmah min hrilh loh" ka ti vin that a, hre lawk ni awm takin hahdam hmel em em in muangchanga ka lam lo hawiin ka mitah tak min en kal leh nghal





"Ka tum alawm mahse tunge ngaithla duh lo tu zawk kha" bul zet a a tih chuan ka awm ka dawm ngawt ngawt tawh, ka tah a chhuak a mahse ka tap thei lo ka awmah hian a inhnawh tawt vek niin ka hria ka hrawk te lah chu a kham na vek bawk. "Ka ngaihthlak duh loh pawhin sawi ta che" keimah zawk hi in dem tur ka nih laiin tinge Lawma zawk chu demna ka zawn ka hrethiam lo





A kiai suk a, ka lama rawn awm hnaih pahin muang changin a kut chuan min kuah hnai a a awmah min bei tirin duat takin ka hnung a chul hliau hliau bawk "Kei chuan i thu ka zawm mai a ni" a tih chuan ka tap chhuak ta hawk hawk mai. Ka thinlung duh dan zawm lovin ka ngaihdan zawk ka zawm ta zawk chu ka inchhir a, ka thinlungin amah hnaih tur a min tih laiin ka luhlul na avangin ka hlat zawk si





"A na, he lai hi a na tak zet" tiin ka awm chu ka chum dawt dawt a, min hnawh nasat em avangin ka thawk pawh a buai tan viau; hahdam tura min tiin ka hnung chu a chum dat dat a, mahse ka mittui hi dan rual lovin a luang zung zung thung





Keimah chu in khawngaihna in ka khat a, tinge ka chheh vela mi ka hmangaih tak tak te hian na tak an tuar tih chu ka ngaihtuahna a lang hmasa ber a ni bawk; ka pa natna ka hriattirh a ka tuar ang tho khan a ni tunah pawh ka tuar "Hmuh ka duh khawngaihin" thei leh thei lo chuan ka tichhuak leh a "I kal duh a nih chuan ka kalpui ang che" Lawmawma chuan a ti a






Zanina kal nghal rum rum chu ka duh a mahse hahdam phawt turin leh in bengdai rih phawt turin min tiin naktukah zawk kan kal tur thu min hrilh bawk. Zanah chuan ka mu thei lova mahni inthiam lohna hlirin ka khat a tih theih ber ang chu, hrehawm ka ti a; Luca ka hmuh hunah engnge ka sawi ang tih thleng te chuan ka ngaihtuah chhuak vek bawk






Heta a awm chhunga a ngawih chawih zia leh a tawngmawh zia te, amah hrim hrim kha a harhvang loh zia te chu ka ngaihtuah chhuah rualin ka mittui in a zui ve nghal zat bawk; amah pawh chu ka ngaihtuah rualin ka haw tak zet, eng angah nge min ngaih? Engmah hrilh tlak lo ang a min ngai pawh chuan ka thin a ti rim tawh tak zet






Lawmawma'n ka nu min hrilh sak avangin ka nu chuan kan kal dawnah pawh tawngtaina in min thlah thlap a, Aizawl lam pana kan tlan lai te chuan kawngte hi a thui riau in ka hre bawk. Tlan chak turin ka tur chhen a, keimah zawk chu ka buai vek tawh ni berin ka hria





Ka mumal loh em avangin leh ka rilru a mang vek avangin engnge tih a tih loh tur pawh ka hrelo, Lawmawma chuan Dinmawii chu chanchin a lo hrilh vek a; an damdawi in awmna thlengin min lo hriat sak vek bawk, engkim chu rei ka ti fai vek tawh. Tlan chak tura a khat tawka ka tur chhen avangin ka bula mi pa chu a thaw hak a, min rawn melh leh ralh thin






"Hahdam teh... Engtin mah a awm lovang" tih bakin sawi tur a hre bik lo. Hahdam tura min tih rualin ka rilru erawh a hmanhmawh em em a, ngaihdam dil mawlh chu ka rilru ah a lang reng bawk; kan tlan chak bakah khawkar kawngah kan chawl eih lo bawk a zan dar sarih(7) velah Aizawl chu kan thleng der






Dinmawii in lamah pawh peng kawi lovin damdawi in pan nghal ka duh avangin chumi lam chu kan pan nghal a, damdawi in kan thlen rual chuan motor atangin ka chhuk bmthla nghal vat. Luh mai ka tum chuan security guard in luh min phalsak lova, emergency a nih loh chuan damlo kan hun a tawp thu min hrilhin min lo dang tlat






"Khawngaihin min luh tir hram rawh" ka tih pawh chuan lu thin pahin "A theih loh ka tih tawh chu" a lo ti bung nghut a, gate chu vuanin ka ding tlat a; security guard erawhin min ngaihsak chhunzawm tawh lovin min kalsan hmak thung. Dinmawiinleh Lawmawma chu lo kalin naktuk lama kal leh mai tura min tih chuan ka duh lo






"Lalrinhlu luhlul chhuahna chi a nih loh hi, dan a awm a an zawm a ni mai; naktukah pawh hmu turin kan kal thei reng alawm. Nilengin i awmpui thei zawk dawn alawm" Dinmawii'n a tih pawh chuan lu ka thing tlat "Zaninah ka hmuh ngei ngei a ngai" tiin luhlul ka chhuah ve tlat





"Luhlul lo teh, nangpawh i chau lutuk ang mu hahdam phawt la naktuk lamah tha takin i hmu thei zawk dawn alawn" a tih chuan ka tap chhuak hawk a "Engmah ka hre ve lova, min hrilh pawh a tum lo. Tunah na takin a awm tih ka hre ve chauh a engtin nge ka kalsan ngam tawh ang mawh min chhang teh, a bulah khan ngaihdam dil te pawh ka duh asin; zaninah ka hmu lo a nih chuan keimah zawk hi ka a thei mai ang" tiin leiah ka thu thla hnawk a






Rawn thu thla ve nghal zatin min kuah a, ka tap nghal hawm hawm. Dinmawii pawh in hrut ve hruih pahin "Ti hian awm lo teh Hlu, tih sual i nei hleinem engmah i hriat loh vang zawk a nih kha" a tih chuan lu ka thing nar nar a "Aih ka tihsual lian ber chu maw ka thinlungin zawm tura min tih zawm lova ka ngaihdan dah pawimawh zawka ka kalsan kha ka tihsual lian ber a ni" ka tih chuan min chhang lo mahse ka hnungah min chul sak hliau hliau






"Tinge ka lam hnaih a mi te hian natna khirh tak an tawh, ka hmangaih te hi tinge chan zel ka ngaih" ka na ngawih ngawih, a hma in ka pa tunah Luca an pahnih hian min kalsan ta se engtin nge kei hi ka awm ve ang a; inthiam lohna hlira khatin khawvel min hmachhawn tir an tum hi a fair lo ka ti tak zet bawk





"Ka pu zaninah hian a hmuh ngei ngei angai, khawngaihin phalsak hram rawh u" Lawmawma chuan security guard hnenah chuan min dilsak a, a tawp a tawpah chuan min phal sak hram. "I tan a pawimawh hle dawn a nih kha, a nih chuan kal ta che" tiin guard pa chuan a ti ve ta hram a "Ka pu ka lawm lutuk" tiin thei leh thei lovin mittui kar atang chuan ka nuih a thaw hawkin "I tana mi pawimawh tak chu a dam leh vat theih nan duhsakna ka hlan a che" min nuih let ve suk bawk






U Siampuii chu Dinmawii chuan min biak sak a, an awmna floor leh ward thlenga min hrilh hnuah chumi lam pan chuan kan kal nghal a; Luca awmna ka hnaih tulh tulh tih ka hriat rualin ka thinphu pawh phat rual lovin a rang tulh tulh bawk. An awmna kan thlen chuan ding dat a thawk ka la ham ham, min rawn zuitu te pahnih pawh ka hnungah an ding ve bawk





Ka kutah kaiin Dinmawii chuan min nuih seih a "Kal rawh lut ang le" a tih chuan ka bu nghat a mahse ka zam tak zet, ka tha te nen lam a khur tel vekin ka hria. Lawmawma chuan kawngkhar chu mij hawn sakin min luhpui a, khuma eng eng emaw a taksa a inzam hnuai paha dang bela lo mu ka hmuh rual chuan ka pen tawp chat




Ka hmangaih hi sawtiang em em sawn nimaw a lo nat, a van hrehawm teh lul em. Nu Mapuii (Luca nu) in min hmuh rual chuan mak tih hmel zetin min en a, mittui luang zawih zawih pahin muang changin ka pan chhat chhat a a bul ka thlen rualin a kut ka hum sak nghal vawng vawng bawk





"Ka lo kal a nia, Luca tho tawh rawh mawh harh teh ka lo kal ka tih chu tinge i mit kha i chhin reng" tiin insum zo lovin ka tap leh a, ka bulah Dinmawii chu lo kal vatin min kuah nghal a "Enteh Din" Luca lam chu hawiin ka tap nghal hawm hawm a "Hlutei kha i ni tiraw, nangmah kha i ni em?" Nu Mapuii'n a tih chuan "Aw ka ni lawm" ka ti a "Luca hian i lo kal hun a nghak reng asin tunah chuan a hlim tawh ngawt ang" tiin ka kut hum vang vang pahin a beng thak thak a





Luca mutna bulah chuan thu in a kut chu nghet takin ka chelh sak reng bawk a "Tunah chuan khawiah mah ka kal tawh lovang, chuvang chuan lo harh tawh" tiin ka phun sep sep reng a, a harh har ka ti tawh tak zet bawk




"A la harh lo a nia ngati nge?" Ka piah lawka thu te lam hawi chuan ka ti a, ka mittui bawk chu a luang leh tawh. Ka rilru a mang bakah a buai em em a, keimah chu hlauhthawnna hlirin ka khat bawk "Damdawiin an chiu mu rih a, a la harh mai lovang"





Nu Mapuii'n a tih chuan Luca lam bawk chu hawiin a hmai dang bal chu chul sakin "Tinge engmah min loh, tianga i awm hnuah chauh ka hria a na ka ti daih zawk tih hi i hre miah lo a mi?" Ka hma maia engmah hre lova mu chu mi a ang maiin ka be mawlh mawlh reng a "I ti ang lo khawp mai, i lo zin lai te khan min hrilh thei reng asin mahse engmah sawi lovin i ngawi reng a kei chuan..." Ka sawi chhunzawm thei lo






Ka in hnit leh hrawih a "Ka chhawr che a, ka be duh lo che a... I na tih hre lovin engtin nge ka tih theih zawk min ngaihdam rawh aw" ka ti a, mahni inthiam lohna tam tak neiin hun ka hmang mek tih hi hria se engtin nge a tih ang "A kal thlak tu tur chu in la hmu thei lo a mi?" Ka ngaihtuahnaa lang hmasa ber chu Nu Mapuii ka zawt a





"A mil pui kan hmu thei mai lo hi kan buai tawh tak zet, tuna a kal hian rei a daih tawh dawn lova kan hmanhmawh tak zet bawk" a tih chuan ka thaw hak a, engmah ti ve thei lo mah ila chu a thusawi chuan min ti na em em thung si




"Kan hlim ve tan dawn chauh asin le" ka ti zuai raih a "A tha lutuk a nia ngaihtuah reng reng suh Hlute, a kal mil pui kan hmuh veleh kan thlak ang a a dam leh vat mai ang" a tih pawh chuan ka rilru a hahdam thei meuh lo a ni e "Engpawh chu nise kan haw san phawt ang che u, naktuk lamah kan rawn kal leh ang" Dinmawii'n a tih chuan ka thutna ngaiah thu in ka che sawn eih lo





"Hlute haw phawt ila naktukah kan kal leh dawn nia" a tih pawh chuan ka la chesawn lo, nghet takin Luca kut chu ka vawn sak tlat a "Ka haw dawn lo" bung zet a ka tih chuan a thaw hak a "Luhlul chhuah fo thin lo teh, i chauh em kha mut hahdam te pawh i ngai alawm" min ngaihtuah vanga ti ni mahse haw ka tum lo bur





Helai chen chen ka kal tawh a, vawikhat pawh kalsan leh tura helai hmun hi thleng ka ni lo; "A lo harh hma chu hetah hian ka awm dawn" ka tih tlat avangin tihngaihna an hre ta bik vak lo, min haw san mai chu an hreh ve tum hrang bawk si nen chuan bet lo zetin an awm leh ta reng a





"Engpawh nise va haw san rawh u, kha inthianpa pawh kha a chau lutuk ang" Nu Mapuii chuan a ti a, mahse kal ta mai lovin keimah bawk chu min ngai chang leh tih a hrethiam te pawh a ni ngei ang "Hlutei hi chu hetah awm rawh se, Luca pawh a lawm zawk daih ang" a tih tak avang chuan an hnial ta bik lo





"Naktukah kan rawn kal leh dawn nia" tiin tha taka an inthlah hnuah room chu an chhuah san a, an chhuah hnuah pawh Nu Mapuii nen pawh kan inbe zui chuang lo. Luca chu ka en ngawih ngawih a, na nei reng si a dam ang tak a awm thinna te chuan ka thin te an ti rim thar leh ang lawi a "Mi mawlpa lo harh vat rawh" ka ti sup a






[Engpawh nise ads click, like leh comment kha ti leh hram hram ila]

Ads kan click atang hian writer ten hlawh tlem te te an lo neih phah ve thin a, khawngaihin ads click hi i ngai pawimawh hram hram ang u

[Ngaia]

CHAPTER-18




Zan lamah ka mu tha bawk si lo nen nilengin motor ah ka chuang vei bawk nen ka chau ve deuh nge ni tur a ni, ka hriat hnuhnun ber kha chuan Luca kut ka vuan tih chiah ka hria; ka hmaiah eng emaw vawt thler hian a rawn deh avangin ka harh hlawl a, ka men chhuah ruala ka thil hmuh vang chuan lawm lutuk vangin ka zuang lo chauh





Luca chuan min ka hmai dawmin min nuih suk a, a kut vawt ta lutuk chu a ngaihna ka hre lo "I lo harh har lutuk a" ka tih chuan "Engtik in nge i lo kal?" A ti a, a aw te lah chu a tham chhal leh nghal "Nimin ah ka lo kal a" ka ti leh tiau tawh. Tunlai chu tahna tur hlir hian min hual vel a, ka tahbelh zo vek tawh ni berin ka hria





"Damdawi inah ka awm tih engtin nge i hriat?" A ti leh a, a hmelah chuan lawm vak hmel a pu lovin ka hria "U Siampuii'n min hrilh a, tinge ka lakah i zep a tir atang khan min hrilh thei reng sia; engmah hrilh tlakah min ngai ve lo a mi" ka ti nghal hlak hlak a, ka thinrim thar leh thut "U Apuii chu aw hrilh lo tur che in ka ti mawlh mawlh sia" a ti vawng vawng a, chung te leh lek phei chuan ka lung an ti awi tawh lo





"Engah mah min ngai ve lo tihna a mi?" Hriatthiam loh hmel fe a ka tih chuan lu a thing a "Khatianga i awm ka hmuh duh loh avang khan alawm ka hrilh duh loh che, i pa a damlo mek a engtin nge ka hrilh theih ang che" a thawchhuak nghal hak a "Ka pa dam loh hma pawhin min hrilh thei reng" amah dem zawng hlir chuan ka tawngchhuak a tih theih ber ang chu





"I na hmel hmuh ka duh lo" ti leh hmukin a mit a chhing nghal vang vang a, a kut a vawn sak pahin "Khawiah mah ka kal tawh dawn lo, ka kal san tawh lovang che" ka tih chuan phawk zetin min lo en a "I bialpa kha...?!" A tih chuan ka bang bo ang reng viau "Tunge ka bialpa" tiin ka zawt let veleh a "Hman ni mi kha" inthlahrun hmel zet a a tih chuan Lawmawma a ni tih ka hre thei mai, ka nui chhuak ta hak hak





A ngaihna hriat loh hmel zet a min en chuan zawhna mit mengin min en tel bawk "A ni lo ka thian a nih kha" ka tih chuan thaw huai hmel a pu in ka hria, kawngkhar a ri rak a kan hawi phei rual nghal that "Nangmah vang hian mut pawh ka mu thei lo" Dinmawii chuan a rawn ti lut nghal bawrh bawrh a, a hnungah Lawmawma'n a lo zui ve bawk





"Keini chu tui deuhin kan lo mu asin" Luca in a fiam ve chuan a ner nang a, eitur leh eng eng emaw an rawn ken chu khum bulah dawhkanah chuan an dah a "I inbual duh ka ring a, nizanah i intifai hman si lova" tiin ka kawr hak thlak tur leh towel tih ang reng vel chu min lo ken sak a, inbual turin ka luh san nghal vat





Kan awm avangin Nu Mapuii pawh an in lamah a haw rih a, nilengin Dinmawii leh Lawmawma te chu an awm a; an tawng duh barh barh bawk a, a deh viau lo khawp mai. Ka ngaih bel nge pawh ka hrelo ka awm atang chuan Luca pawhin hma a sawn ve zel chuan ka hria, ka nu te pawh chanchin ka zawt ve reng a ka pa pawh ngaihtuah awm a nih loh thu te min hrilh bawk





Kan rilru tihah tu ber chu Luca kal thlak sak thei tur kan hmu thei lo hi a ni, a zia viau laiin a na a chhuah tak tak phei hi chuan bei a dawng rum rum zel; tlangval chhelo leh hmeltha tak ni thin kha tunah chuan khatiang hmuh tur kha a awm tawh lo a tih theih ber ang chu. A ke lah a vung nasa bawk si a, ka rilru chu a lo hmanhmawh ve em em ringawt mai





Na a neih pawhin a tawrh theih chin bak a nih loh chuan ka hmuhah a lan tir ngai lo tluk a ni, a tuarchhel em em a; engtik lai pawhin hlim hmel min reng thin bawk. "Lawma i tih ve ziah kha, a bulah awm tawh suh" a ti hmuk a, a ngaihna ka hre lo tak zet "Ngati maw" ka lo ti ha a "Mipa a nih kha, a bula awm reng pawh a ngai lo" a ti leh a, a thilsawi chuan a ngaihna min hriat loh tir hle





"Ka bialnu i nih kha chuvang chuan mipa dang bula awm kha a ngai lo" a tih chuan "Lawma te chu ka nau alawm" ka ti a, nau ang baka ka en loh bakah a ni pawhin û ang bakin min en lo tih ka hria "A tul lo ka tih chuan a tul lo a ni mai" a tih leh chuan hriatchhuah ka nei thut. Ka nui ta ver ver chu mak tih hmel zetin min en a "Nuihzathlak ka sawi a mi" a tih chuan lu ka thing nar nar





"I thik chiang lutuk" ka tih chuan a hmui a pet sawi nang a "Ka thikthu a chhe ve lo" ti leh hmukin tukverh lam chu a hawi vei hmak a, ka nuih a za tulh tulh leh nghal "I thik a nih kha, sawi teh dawt sawi lovin i thik tiraw" nuih huah huah pah chuan ka ti a, a nui duh der lo leh nghal "A mak e ka thik lo ka tih chu" a ti bul bul a, a tawngkam in "Ka thik lo"ti mahse a hmelin a hrilhfiah nasa mai si






"I thik chuan si loh chuan a bula ka awm lohna chhan tur ka hre lo a nih chu" mit ko san ak paha ka tih chuan rang lutuk in a rawn hawi vut a, a hmui pet sawi nang pahin "Lalrinhlu min runluih miah suh" chang zetin a ti leh a, a thinrim tak tak a maw ni! A hmel rum ta lutuk vangin ka nui ngam tawh lo, tiang em em hian a thikthu a chhia ang tih ngaihna pawh ka hrelo






Kar khat zen zawn chu ka awm leh tawh, Nu Mapuii lah chu a rilru a hah tulh tulh emaw tih mai turin a hmel a ngui thei em em a; Luca vang a ni tih hai rual a ni lo "In la hmu ta chuang lo a mi" Luca mutthilh lai chuan ka zawt a, lu buk nghat pahin "Thei lo chu a nih ber hi ka rilru a hah tawh khawp mai Hlute" a tih chuan keipawh chu ka rilru a lo hah ve hlui thei






"I pa a damlo tih te ka lo hria a, i rawn kal duh kher kher a ni. Keini chu ngaihtuah awm pawh kan ni lo a nia, a kal mil kan hmuh veleh kan thlak nghal mai dawn a" inthlahrun hmel taka a tih chuan "Inthlahrunna tur a awm lo a nia" tih bakin hnem dan ka hre bik lo





Dik tak chuan ka rilru a hah ve tho, rilru phir takin ka awm a leh lamah ka pa ngaihtuah a ngai a, leh lamah Luca. An pahnih a chan ve ve ka duh loh rualin tu zawk nge ka thlan ang tih ka hre lo bawk, ka pa min hmangaih em em tu leh ka tana a theih tawp chhuah thin tu a dam loh mek laiin ka thinlung zawng zawnga ka hmangaih leh ka engkim ni bawk chu tunah a dam lo ve mek bawk si






An pahnih hian ka hmangaih dan a nep phah lova, hmangaih bik pawh ka nei chuang lo; theih nise an pahnih a an dam leh chu ka duhthusam ber a ni bawk. Ka phone a lo rik tak sek avang chuan inthiam lo takin Nu Mapuii chu ka thawh san a, ka phone screen ka en chuan ka nu a lo ni "Aw nu engnge ni ta?" Ka lak rualin ka ti a






"I pa hi a tha vak lova ka hlauthawng tak zet" a tih chuan ka chiai leh vek tawh ni berin ka hria "E...engtin nge a awm?" Ka aw chu a khur nghal dar dar a "Chawhnu lam khan a rawn zual deuh thut mawle a lam a lam che a, i awm si lova" a aw ah chuan a tap zo chiah tih hriat takin a lawi rat a, ka awm lo bawk nen ka nu chu a mangang viau ang






"Ka lo haw dawn" tih leh phone chu dah ka rual a, a tawp nan tiin ka lut leh a Luca kalsan chu ka hreh rualin min hringtupa kal thei mai din hmuna a awm tawh avangin ka kal lo thei si lo; a hmai chu dawm sak vawng vawng pahin a chalah chuan ka fawp a, Nu Mapuii chu thu awmzia hrilhin a ni pawh chuan tluang taka kal turin leh min lo tawngtai pui tur thu a sawi a






Lawmawma chuan ka pa chanchin chu a lo hre leh hman tawh a ni ngei ang, damdawiin ka chhuahsan rualin a hmel ka hmu nghal zat a; a hmelah chuan hmanhmawh hmel a pu bawk "I hre tawh a mi?" Ka tih chuan a bu nghat a, ngawi rengin a motor awmna lam kan pan nghal






"Thiannu hlauthawng lo la, ka pa chu a tha em em ang" kan kal dawnah chuan Dinmawii chuan min hnem a, a ni pawhin min rawn zui vat tur thu a sawi bawk. Thlamuang tak hian awm hi a har a ni, engmah ka sawi thei lova tlan chak tur pawhin ka tur lo; ngawi rengin ka kut chu ka khal niap niap a, ka mittui rawn far leh zeuh thin chu ka hru khat tawk reng bawk






Ka pa chu ka hmu hman lovang tih mawlh ka hlau a, ka rilru in ka tawngtai bang lo bawk. Min lam laiin a bulah ka awm lova, vawikhat tal a tawp nan pawh nise nung dama la hmuh leh chu ka beisei tlat a ni; Lawmawma min biakna pawh ka chhang lo, mi a ang maiin ka ngawi kar a ka tawngchhuak a nih chuan motor chhungah kan awm tih theihnghilh thak khawpa ka tah ka hlau a ni ber





Tunlai ka hringnun hman dan zet chuan min ti chau tak zet, inhnaih taka awm kan ni lova Luca emaw ka pa emaw pawh chu nise an bula kal dawnin kawng thui tak kal vang vang ngai thin te chuan ka thin an ti rim a; in hlat taka kan awm pawh chu ka lawm lo thar hle bawk





"Insum angai lo a nia, i tah duh chuan tap rawh. Mi awm loh lai i duh chuan tun baka hun tha hi a awm lovang" ka bula mi chuan a ti a, ka awmdan chu min hriatthiam pui ve chek a ni ang chu; mahse tap tur pawhin tha ka nei lo, a chhuak thei lo a ni ber ang chu






Kan thleng har ka ti tawh lutuk chu ka che sek a, ka awm mai mai thei tawh lo. Ka nu chuan a khat tawkin min rawn be ve reng bawk a, midang ho chu kan inah an awm mek tawh thu leh kan inpawh an sing sa mek tih te nen lam min hrilh tel bawk a; chu chuan nasa takin min ti hlauthawng bawk





Sawi tur ka hre lova, ka nu nen a kan inbiak lai pawhin tawng ngaihna hre lovin a thusawi chu ka ngaithla mawl tawp a tih theih ber ang chu; ka nu nen kan inbiakna kan dahna pawh rei a nih hma in min rawn call leh a, ka lak ruala ka thil hriat chuan min ti bing mup mup a nimai






"Sawi ta che" ka ti vin tuar chu ka bula mi pawhin phawk zetin min rawn en ha ringawt, ka nu chu tah ri bakah midang tap hawm hawm ri leh ka pa hming an lam rik chhawk te chu a in pawlh nuaih mai. Chu chuan sawi kher ngai lovin engnge thleng tih chu chiang takin hre mah ila ka nu chu ka zawt tho





"I pa a awm tawh lo" sawi chhunzawm thei lovin a tap a, phone hum ngar ngar pahin an tap thawm chu ka ngaithla reng; ka pa a awm tawh lo, he khawvelah ka hmu leh tawh ngai loh turin min kalsan a nih chu. A dam leh beisei in hun kan hmang a, kan tawngtai thin mahse a dam hlenna tur zawkin Pathian a hnenah min lak sak zawk si





Ka kalsan dawn a thei leh thei lova min nuih sun sun lai te kha ka mitthla ah a rawn lang a, ka kal bo hlekin ka nu bulah min zawng thin; a bula ka awm apiangin min ngaih thu a sawi reng a, ka kalsan kha a phal ngailo. A lo hetih dawn vang hi em ni khati em em a min ngaih? Cham hlen tura kalsan ka ni lo asin le






A bula ka awm loh lai ber kherin tinge ka pa chuan min kalsan hrehawm hi ka van ti tak em, a bula awm kha ka la kham lo asin mawle; "Engnge thleng i pa chu engtin nge a awm?" Ka awm dan avang chuan ka bula mi pawh a ngaih a tha tawh lo tih a hriat, mahse min zawhna pawh chhang turin chakna reng ka nei tawh si lo





"Hlute" a rawn ti leh rualin ka tap nghal hawm hawm, aw rawl chhuah meuhin ka tap a; hrehawm hi ka ti em a ni. "Pa" tih bak thildang sawi theih ka nei lo, ka pa hming lamin ka tap a in thlen hlan chu ka nghahhlelh rualin ka pa min chhang tu tur awm tawh lo ka ngaihtuah chhuah rualin ka huphurh tel tak zet bawk






Khawvela ka pa neihchhun chu laksak ka ni tawh, ka rilru a mang a, ka phi ruai bawk. Ka melh ngai melhin ngawi rengin ka thu a, Lawmawma pawh sawi ngai lovin a tlan chak viau bawk. Nidang zawng aiin kan thleng hma a, mahse motor atanga chhuak turin tha ka nei lo ka chawmawlh vek nimai in ka hria





Lawmawma chu motor atanga chhuakin min rawn kai chhuak ve a, ka tlu thelh leh nghal; min dawm bet hman lo se chu leiah ka tlu sawp nuai tawh ngei ang. Amah rinchhanin kan inah chuan kan lut a, rap ri leh ka pa hminga an kohna ri te chu a hnai tulh tulh a, ka tha khur leh thinphu pawh a hma aiin a rang zual sauh bawk






Ka nu leh pa te pindan ka luh ruala ka thil hmuh chuan ka lung hi a van ti awi lo tak em, muangchangin engmah hre tawh lo khuma an muttir ka pa lam chu ka pan chhat chhat a; ka nu leh ka ni in min hmuh rualin min rawn panin "Bawihi i pa a awm tawh lo" tiin an tap a, min hnawh tu a nasat vang nge ka tap ve mai thei lo thung






Ka pa chu coat suit mawi tak hak tirin puan var mawi tak an lo sin tir a, a inhmeh tak zet; a bul ka thlen chuan ka kut vawt thlar lumna reng reng nei tawh lo leh dang bel mai chu vuanin "Pa ka lo haw a nia, mu reng lo khan lo harh tawh la" ka mittui a hnap nghal tiam tiam a





"Min ngaih thin em kha, tunah i bulah ka awm tawh hi lo tho tawh rawh i muhil rei tawh lutuk" ka ti leh a, mahse min chhangtu an awm tawh lo. Ka pa chu chesawn eih lovin a mut ngaiin a mu reng a, chu chuan ka hrilh a ti hai tak zet; a thi tawh tih hre reng mah ila thinlung hian a awih phal bawk si lo





"Ka pa tinge? Lo tho tawh rawh ka tih che chu, mu reng tawh suh mawh tho rawh" tiin ka tap chhuak ta hak a, a va na tehreng ngai em. Ka nu chu ka bulah lo kal vatin min kuah a "Ka nu ka pa hi kai tho rawh, a mu rei tawh lutuk min ngaih thu a sawi a tinge min chhang tur a awm leh si loh" ka nu chu kuahin ka tap hawm hawm a, ka nu chuan min chhang lo mahse ka hnungah duat takin min chul thung






"Ka pa hetiang hian awm suh...ka pa hi ka ngei emai, tinge tiang hian a awm tlat" ka pawm thei thlawtlo ka pa hmai chu vawn sakin a hming lamin ka tap leh rih thin, tawp thei zawng zawngah thihna hi chu a va han tawp chiang tak em; an damlai hmel vawikhat mah kan hmu tawh ngai lo tur te leh kan biakna te vawikhat mah min chhang tu awm tawh lo tur te ngaihtuah hi chuan thihna hi zawng a huatthla la awm ngawt mai






Ka ni te leh chhungte dangin ka nu chu ka bula mu turin an ti a, a chhan pawh zanin bak chu ka nu hian ka pa a mutpui theih tawh dawn loh vang a ni; ka pa ruang bulah chuan ka nu chu a mu ve a, ka pa chu kuahin a tap leh rih thin. Ka pa kut ka vawnna chu vawikhat te mah ka thlah lova, a kut khawng vek tawh leh vawt thler te pawh chuan min ti danglam zo meuh lo






"Awi ka pa hi ka haw emai" ka tichhuak leh hluai thin a, min kalsan ngawt hi pawm harsa ka la ti te pawh a ni mahna; zankhua in chhing khat te mah ka chhing lova, ka nu chu muhil ve bawk mahse a mu nghet lo tih hriat takin a rawn harh leh thin, a harh rualin ka pa chu ko in a tap leh thin bawk a





Zan zawng zawnga zan hrehawm ber ni mahse he zan hi tawp thei lo se ka ti kher mai, ka pa te nen a kan awm ho tawpna ber a ni tawh dawn tih ka hriat chian em vang pawh a ni; kan chhungkua in kan tawng ang tih leh vengchhung au rinna hmanga an puang ang tih pawh kan la rin phak loh kha kan chhungkaw chungah a thleng ve ta si





Zingah chuan mi pawh an lo kal khawm tak tak a, mawi tak maia coat suit a hakna ngei mai chu kan in pawn bangah an tar va bawk; ka rin ai daihin ka pa vui tura rawn kal pawh an thahnem khawp mai, inchhung leng lo khawpin pawnah an thu khat hnur bawk a, ka pa hian heti zat ui tu a nei tih hi hria se a lawm ve ngawt ang tih te chu ka ngaihtuah






Ka pa thlahna thuchah sawi a hun chuan ka nu chuan a sawi theih loh ka rin laiin tha tak maiin a sawi thei chu Pathian in a awmpui ka ti lo thei lo, vuina hla ah ka pa hla duh ber 'Thihna lui ral ka lo kai ta' tih kan sak lai te chuan insum a har tak zet, biangah mittui a luang zung zung mai a ni





Ka pa kuang chhin a hun chuan min lo nghak turin kan ti leh a, an han chhin dawn meuh chuan thla a van phang duh tak em! A hming lamin kan tap a, ka pa hmai vawn pah chuan ka tap a "Ka pa mangtha aw, ka van ngai dawn tak che em" chu chauh chu kan sawi theih a ni tawh si [Ni kum August thla khan ka pu (ka nu pa) in cancer vangin min boral san a, ka pi leh ka nu awmdan ang chiah a ni bawk; chuan hla pawh khi ka pu hla duh ber a ni bawk]






Ka rin ai daihin ka nu chuan a tuar thiam a, ka pa bungrua han tihfel chang erawh chuan insum a har tak zet; tum loh deuhin kan tap leh rawih rawih thin a, chutiang chuan kan nufa in hun kan hmang ve zel a... Lunglen chang chu nei ve thin bawk mah ila, rin ai tak chuan thenawm khawveng te leh chhungte vangin khua te pawh a har ve lo deuh






Ka inbual zo ka inthlak lai mekin ka nu chu room ah a rawn lut a "Bawihi in leng i nei a, han ti vat vat la ll chhuk vat ang che aw" a tih chuan lu ka buk khum nghat a, engmah dang sawi tawh lovin min chhuahsan veleh nghal mai bawk. Inleng ka neih thu a sawi a, ka ngaihtuah hian tunge a nih ang tih erawh rin thiam ngaihna ka hrelo






Dinmawii ti dawn ila, nimin piah maiah Aizawlah min chhuk thlak san leh tawh a; Lawmawma ti dawn ila a rawn len dawn chuan ka room ah a rawn kal nghal mai thin bawk sia, ka bangbo tak zet. Ka inthlak nghal sawk sawk a, inhnuai lam chu ka pan ve vat mahse thutkhawmna pindan ka thlen ruala ka thil hmuh avang chuan min thawng tak zet thung






"He...hetah engtin" ka sawizawm thei lo mak tihna in min la tuam hlup hlupin ka hria, a bulah chuan ka phei ve vat a thu tura min mit mei avangin a bulah ka thu thla nghal zat bawk "In chanchin ka lo hria a, ka rawn kal vat theih loh avangin min ngaidam dawn nia" a tih chuan lu ka thing vat, dam lo zawk a ni a kal vak vak lo tur a nih laiin tunah a rawn lang leh hlawl tawh chu a nih zawk hi!






"Tinge i lo kal duh, dam pawh i la dam loh kha" ka lo ti nghal hlar a, a lo kal hi ka lawm lo ni lovin ka ngaihtuah vang zawk a ni; ka lawm a mahse a na a chhuak ang tih erawh ka hlauhpui tak zet thung "Kei chu ka tha alawm, nangmah zawk kha i tha em?" Tiin min zawt a, ka that thua ka hrilh chuan min nuih sun sun ringawt






"I lo thlenna a rei tawh em?" Tiin ka zawt leh nghal vat a "Ka lo thleng deuh chiah" dam dupin a ti sup a, ka ngaihtuah tak zet zankhua in motor ah a thu reng dawn tihna a nia "Engtikin nge i lo kal" tiin ka zawt leh a "Ka hriat rualin" ti a min chhanna chu ka duh khawp lo hle mai "Dar engzah bawr velah" ka ti leh zelah hahthlak tih hmel zet a min en in a thaw hak a






"Ka lo chhuah kha chuan dar sawmpahnih(12) a la ri lo deuhin ka hria" a tih chuan ka bu nghat a "Tu in nge motor chu khalh" ti a ka zawh leh chuan mit ti zim sun chung hian min en reng a "Chung te thleng thleng" a tih lai mekin ka lo pawt chat vat "I khalh nge midangin khalh" ka tih leh hmuk takah chuan a kiai suk a "Keiman" tiin min rawn nuih tlawn nghal






"I dam lo tih i hre ve reng a, nangmah kha in ngaihtuah zawk ta che" ka ti hlak hlak a, aman motor a khalh a nih chuan tun ang huna a lo thleng pawh hi awm lo ka ti hran lo; a chhan pawh a hma ang khan a khalh chak thei dawn lo hrim hrim tih ka hriat vang a ni "Ka ngaihtuah che a ka lo kal" a tih chuan "I na kha rawn chhuak leh ta se engtin nge i tih ang" ka lo ti bak hlar a, hahthlak tih hmel zetin min en ha ringawt






"Ka lo thleng ve chauh a, min hau nghal lo la ka chau a nia" duat phut tak zet a a tih chuan ka nui hak, pangchang thiam leh lutuk mai "I lo kal hi ka lawm lo a ni miah lo mahse ka ngaihtuah vang zawk che a nia, i na kha chhuak leh ta se a hrehawm dawn em asin keimah vang" ka tih lai mekin "Shhh...nangmah vang chuan engtin mah ka awm lovang, ka ngai che a hmuh ka chak vang che in ka lo kal a nih hi" a tih chuan amah chu ka en reng ringawt






Ka room lamah ka chhohpui a, mut hahdam a duh takin tih thua hruai chho ka ni; "Mu hahdam phawt la, nakinah mumal deuhin kan inbe dawn nia" ti a kal sawn mai ka tum chu ka kuta chelhin min pawt phei dawrah, a awm ka va bawh nghal rawk rawk chu a lo inring hman chiah bik lo a ni ngei a khuh nghal bawrh bawrh a; kei ka lo nui hak hak thung






"Ti vaka in pawh tur a ni hleinem" ka tih chuan a ner suk a "Ka bulah awm rawh" tih pahin min kuah nghal a, a mit a chhing nghal hmak mai. "In lengte thingpui lum sak ka ngai alawm, ka awm reng thei lo" ka tih chuan "Mikhual i nei chuvangin an hrethiam ang che" a ti tlat a, a chetdan chu a naupang chhia ka ti tak zet






Tal pawh tum ila min kuah ngheh em avangin min kuah ang ang chuan ka awm a, a mutthilh hun ka nghak a tih theih ber ang chu; rei vak loah chuan a muhil ta ngei a, a mutthilh ngheh hnuah dim te in min kuahna chu phelhin inhnuai lamah ka chhuk thlak san ta daih





Midang pawh awm tho mahse awl bik nih erawh ka hre ve tum hrang tlat a ni"Luca bawiha chu i rawn kalsan daih a mi" ka nu in a tih chuan ka bu nghat a "A muhil a, a lo kalna lamah a chau ve deuh a ni ang" ka tih chuan "A dam that loh em kha, i rawn kalsan duh a nih kha mawle hei i unau te leh i ni te pawh an awm a, an chhawk vek thei tho che a" a tih chuan nuam ka tih loh thu leh awl bik nih ka duh loh thu chu ka hrilh a, min hnial ta em bik lo






Tlai zanriah ei hma hretin inchungah ka chho ve hman chiah a, ka room ka luh rualin rum zetin min lo melh kal a "I mutui em?" Nuih sang paha ka zawh chuan "Ka mut hlanin i kal daih a" a ti a, ka nui hak chu a ni pawh a nui ve tho. A bulah chuan thu in eng eng emaw kan sawi dun a, a kal mil pui pawh an la hmu ta lo cheu a nih hmel e






A blood group ka zawh chuan ka rin loh deuhin AB+ a lo ni a, chutiang mi chu an vang viau te a ni ang, a blood group mil pui an hmuh lahin eng eng emaw thildangah in mil lohna a awm zel a; a ni pawh a bei a dawng hmel tawh tak zet mahse chutih ruala ka thil hriat chhuah erawh min ti nui vur vur thung. A thei dawn em tih hre lo mah ila, a theih ka ring tlat thung engvanga inringtawk em em nge ka nih ka hrelo mahse ka thinlung hian a ti rem tlat a ni





[Ads click, like leh comment te chuan ngaihnawm in tih zel ka beisei A mood a chen lak lawh hi chuan ziah that a har thin, mit lamin ro a rel tawh hi chuan tum loh deuhin kan mit a thlan dup zel a buaithlak tlat]

[Ngaia]

CHAPTER-19





Luca haw hnuah ka nu chu ka bia a "Nang leh zel chu chan che ka duh lo a nia" ka nu in a tih chuan a kutah nghet taka vawn sakin "Min chan dawn hleinem, ka awm reng dawn alawm" ka tih chuan hlauthawng hmel a la pu in ka hria "I duhthlanna a ni" ka nu in a tih chuan ka bu ta nghat






Khawvelah tumah kum hlun tur kan awm hleinem, Pathian pawhin keini mihring te min hmangaih em avangin min chhandam nan leh kan la dam theih nan a fapa mal theih chhun min tlan turin khawvelah a rawn tir a; chuvangin keipawhin ka hmangaih na tuar lai hmel hmuh reng hi hrehawm ka ti, ka thei a ni phawt chuan keimah hian ka pe ang






"I chiang chiah maw" Lawmawma nen ka room bathlar lamah thuin kan inkawm a "Aw ka chiang alawm, lo thi ta se inthiam lo reng renga hun hman ai chuan ka ngei leh tur tal pawha a dam hi ka duh zawk" ka tih chuan rawn nui sukin "Hmangaihna" a ti sup a, kei erawh chuan a thil sawi chu hriatchian tum ni awm fahranin ka en chik hle thung






"A tha lawm i duhthlanna chu ti la, i kiangah ka awm reng ang" a tih chuan ka kuah nghal thlawp a "Ka lawm e" ka ti a, rum nghutin "Hmangaihna hi ka hua" a ti bul hmuk chu rang lutuk a thlahin amah chu ka en nghal vat "Ngati maw?" A ngaihna hre lo zet a ka zawh chuan a khi suk duh chauh





"Sawi la" ka tih leh chuan "Hmangaihna hian ka û neihchhun leh ka thiantha em em min laksak tawh a tunah unaunu thar ka nei leh chiah a Hmangaihna vang bawkin laksak in ka awm leh dawn nih hi"a ti a, ka ngawi kar thung. Sawi tur pawh ka hre ve lo, amahah chuan khawharna tam tak mal ni tih in hriatna tam tak ka hmu thei bawkin ka hria






"Naaa...i van ho tak, khawiah mah ka kalbo dawn pawh a ni hleinem" amah ti hlim thei tur ang ber chuan ka ti a mahse a hmelah chuan danglamna hmuh tur a vang ang reng viau thung "Tum reng lo teh ka tan a nuam lo a nia" ka ti ta nge nge a, min rawn en zukin a kiai suk a van lam hawiin a mit a chhing reuh hmak a nih chu!





"In hlim hi ka duh ber mahse in hlim rualin a tawpah kalsan ka ni leh ang a, mal takin ka hringnun hi ka hmang leh ang a" a ti a, ka khawngaih tak zet. A nu leh pa te hian an duat viau a maw ka tia mahse a chhungril ruak an hnawh khah sak zo lo te pawh a ni mah na le "Khawiah mah ka kal ve lovang" a hnunga chul pah chuan ka ti a, ka nuih seih bawk






"Ka sawi mai mai angah min ngaihsak theihnghilh vek rawh" a sawi zawh vek tawh hnuah chutianga a ti leh chu a khawlhkham ka ti tak zet, ka ner nghal sak a "In hrilh hriat vek tawh hnua chutia in tih" ka ti nang nang chu ka biangah piai zeuhin "Ti teh naktuk lama Aizawl kal kan ngaih chuan mut hma kan mamawh a nia, kan lut tawh mai dawn a mi" a tih chuan ka bu ve ta nghat






Ka nu chuan min ngaihtuah tih ka hria, tuna ka ti thawt thawt pawh hi ka inthlahrung ve tho; a chhan pawh ka pa thihna a la rei lova inleng te pawh an rem hma hauhin hetiang thu thlukna ka siam veleh zel bawk nen, ka nu tan chuan a rilru hahthlak ta viau ve ang mahse Luca tan chuan thil hmanhmawh thlak tak a ni bawk si a tin ni






Nu Mapuii ka hrilh lawk tawh avangin test kan neih dawn hunah pawh amahin min buaipui vek dawn a, Luca hrilh a chak viau na chu hrilh lo tura ka tih tlat vang erawh chuan a hrilh ta em bik lo. Hrilh ta se, ka hnen atang hian kal(kidney) a dawng duh dawn lo tih ka hriat chian em vang te pawh a ni mah na






Zanah chuan ka insiam mawlh mawlh a, Aizawl ka awm chhung a ka hak thlak tur tlem a zawng chu ka rucksack ah chuan ka khung a; chutia ka lo in tihfel lai mekin ka room kawngkhar a rik tak khep avang chuan ka hawi chhuak ve nghal vat. Ka nu chu kawngkhar bulah a lo ding reng tawh a, amah ka hmuh rual chuan min nuih nghal sen sen bawk





"Lo kal rawh nu, inhnuai lamah i awm peih vak tawh nange? Nge ka ni ten an mutsan leh tawh zawk che" ka lo ti nghal var a, a ni chu a ngawi rauh rauh thung "Tlema zawng ka insiam ve e ka tia, awm rei dawn lo mah ila...ka insiam zo tep a nia chuan kan mu dawn nia" ka ti leh nghal zung zung a, ka kawr ka thleh mawlh mawlh laiin ka nu chuan ka ban a rawn vuan a ka tawp chiang khawp mai






"Bawihi dam takin lo haw leh ngei ang che aw" ka nu in a tih chuan ka thaw hak a, ka nu chu kuahin "Nu dam tha takin ka lo haw leh dawn alawm, test nei tur chauha kal tur alawm ka nih rih tunah chuan engmah hlauh tur a awm lo a nia" tiin ka hnem mawlh mawlh a, ka nu hlauthawng lutuk leh min chan mai ang tih hlauhna a hmela lang chu thup tum viau mahse a thup thei lo tih a hriat theih hle bawk






A tukah Lawmawma nen chuan Aizawl lam panin kan kal a, hmanhmawh ngai viau mahse ka rilru erawh mak tak maiin a hahdam viau thung; ka thinlung hian a in mil dawn tih a hriat chian em vang te pawh a ni mah na. Kal kawng tluanin ka muhil a tih theih ber ang chu, Lawmawma nen pawh kan inbe khat viau a; zun ram thiar leh thil ei tura kan chawl tih loh chu chawlh kan nei mang meuh lo





Zanah kan thleng a Dinmawii inah kan innghat nghal bawk, Nu Mapuii chu bia in kan thlen tawh thu leh a tuk lama test ka neih nghal theih tur thu ka hrilh chuan lawmthu min hrilh mawlh mawlh a; a hnuk a ulh ve hle a ni ngei ang, a thusawi lai te chuan insum zo lo leh thinin a in hnit leh hrawih thin bawk





Zanah Dinmawii pawh chuan midang min zawh ang tho chu min zawt leh a, ka duh tih thu ka hrilh chuan min hnial lo mahse min hlauhthawn pui ve khawp mai; ka pa ka chan tawh a, Luca leh zel chu chan ka tum tawh lo bur. Ka pa ngaia lusun reng hman ka ni lova, ka ngai lo ni lovin ngaihtuah loh ka duh vang zawk a ni





Ka ngaihtuah reng chuan lungngaiin ka in dawm kun ang a, kan ngaiha ber te lah min chhang tur an awm tawh dawn chuang bawk si lo; mahni leh mahni rilru hrehawm taka kan insiam bakah midang rilru kan ti na tel mai maiin ka hre bawk





A thi tawh te kan va ngaihtuah vak khan kan nunah eng sawtna mah a thlen lova, a damlai a te bawk kan in ngaihsak hian chu tluk a hlu chu a awm lo; khawvelah tumah kum hlun tur kan awm lova, kan thih hnuah vanah hlim takin nat leh hrehawm tuar tur awm tawh lohna hmunah kan la in tawk khawm leh ngei dawn, chumi a thlen theih nan chuan kan dam chhunga thil tha tih leh Pathian duhzawng ang a kan nun hi a tha ber






Keimahah chuan thlamuanna mak tak mai hi a awm a Pathian hian ka Luca hi min tih dam sak leh dawn tih ka chian vang te pawh a ni mah na. A tukah tuk thuan eikhamah chuan kan insiam a, ka bula awm reng leh min kalsan ngai lo tu ka thiante pahnih pawhin min kalpui dawn bawk a; hlauhna ka nei hran lo





Damdawi in lam pana kan tlan lai te chuan kan titi bawrh bawrh a, nidang lo ang tak maiin kan hlim tlang phian; damdawi in kan thlen chuan kawtah Nu Mapuii'n min lo hmuak a, test hrang hrang nei turin kan inzui lut nghal zat bawk. Eng eng emaw test kan neih zawhah Luca awmna lam kan pan leh nghal a, nachhawkna a an lo chiu avangin tui takin a muhil thung





Ka hmuh hmasak ngawt ai kha chuan ka hmu tha ve ta deuh a, ka lawm tak zet. Eng eng emaw sawi a kan titi leh luam hnuah kan haw a, ka chau deuh nge in kan thlen rualin ka chat thla nghal a tih theih ber ang chu; zan riah ei dawnah chauh min kai tho a, ka inthiam lo ang reng khawp mai





Ka rin ang ngeiin Luca nen chuan kan kal a in mil a mahse amah a that rih loh em avangin kan nghak phawt ang a, chumi hnuah chuan phai lamah kan kal ang; "Thu lawmawm hrilh tur che ka nei" damdawi inah amah hmu turin ka kal a, a hmel pawh a eng sarh mai "Eng lam nge min hrilh ve teh" a phur hmel lutuk chu keipawh min ti phur tel ve vekin ka hria






"Ka kal mil pui kan hmu tawh a" amah chu a nui sun sun a, a hmel atang ringawt pawhin a hlim tih a hriat; keipawh ka nui ve var var mai "Ka lawmpui lutuk che" ka ti a, a lu buk nghauh nghauh pahin "Mahse ka kal min pe tu tur hi tunge a nih ka hre lo mah ila ama nunna pawh dahtha a, ka tana a in phalna hi ka lawm khawp mai" a ti a, chuti khawpa a lawm chu keimah thleng pawhin min ti hlim ve tak zet






Hre lo ang a awm chu tunah chuan ka tih theih a ni rih si a, a hre hlauh a nih chuan a duh dawn loh zia ka hriat chian em vang te pawh a ni ta ve ang; "A nih chu mawle" tiin ka nuih seih a "Ka dam veleh ka zawng chhuak ang a, ka tana a thil tih ropui tak hi ka la rul let ve ngei ang" a tih chuan ti lo se ka ti khawp mai, min hriatchhuah hi ka duh lova ti hian hlim takin a nun hman chhunzawm zel se ka ti zawk






"Engtikah nge i kal ang" tiin ka zawt ta daih a "Tunah chuan ka la tha chiah lo an tia, tunkar kan nghak ang a ka zia chuan kan chhuk ang" a tih chuan ka bu nghat. Rei tak awm lovin ka haw san a, ka haw san dawn a min thlakhlelh hmel leh ka haw tur ui hmel mawlh kha ka mitthla ah a la cham reng a; ka khawngaih viau na chu ka chau ang reng viau a tin ni






Keini pawh cham reng thei kan nih loh avangin kal thlak tura phai a chhuk hma in kan khaw lamah Lawmawma nen pawh kan haw leh tawh a, kan kal a in mil thu leh a taksa chak that deuh huna kan chhuk tur thu ka nu ka hrilh chuan a huphurh ve tih hriat mah se tih lan loh hram hram a tum thung. "Ka kal pui ang che" a tih tlat avangin ka hnial bik lo






Khung lai mi hriat loh karah mahni a damdawi ina awm chu ka zuam chiah bik lo a ni, Nu Mapuii te pawh awm dawn tho mah se a zawng zawngin min buaipui thei lovang bakah keima thu in pui turin ka ti dawn hauh lo bawk tih ka hriat chian em avangin ka nu chuan min kalpui mah se pawi ka ti lo daih zawk





Kan vawk vulh lai te pawh a then hralhin a talh thei ho chu kan talh bawk a, kan kal hma in tih fel ngai awm apiang chu ka nu nen kan ti a; "Bawihi i hlau em?" Zantin ka nu chuan chu thu chu min zawt thin, ka pa a chan zo chiah a eng emaw tih sual vangin kal ve thei mai ka nih zia pawh ka hre reng mahse tuna ka thil tih turah hian inchhirna ka neih loh rualin ti thei a ka awm hi ka lawm zawk daih a ni






"Aih hlau love, nang i awm a min tawngtai pui reng chuan ka tha leh dawn tih ka hria" a lam hawiin ka nuih seih a, a ni pawhin min nuih ve bawk. Kal thlak thei tur an hmuh tak vang nge Luca pawh hma a sawn chak ang reng viau mai, a hlim hmel hmuh tur a awm reng a; a takah in hmu thei rih lo mah ila video call in min be awl lova a hmel cher ruak thin te kha tunah chuan a mar ve tan tawh tih ka hmu bawk a, ka lawm ve em em ringawt mai a ni






Luca te chu kal hmasa in a tukah kei ni pawh kan kal ve ang, vanneih thlak takin fight ticket man min tum sak hlauh bawk a; keini nufa tan chuan han tih vak tur a vang ang reng, khuta kan thlen hnuah pawh kan hotel awmna tur nen lam min book sak vek bawk a, chung leh zel an ti erawh chu a inthlahrun thlak ka ti tak zet





Kal thlak hi thil na mai lo tak a ni a, a senso pawh a hautak viau bawk tih ka hriat avangin kan thlenna man tur tal chu kan nei ve tho asin mawle! "Naktukah kan kal tawh dawn a, ka awm loh chhungin lo rinawm hle ang che" a tih chuan ka nuih a za ang reng "Teh reng mai" tiin ka nuih var var a, a ni pawh a nui ve suk suk mai






"Ka dam hunah chuan video call chauh ni tawh lovin ka bula awm turin ka nei ang che" a ti a, ka nui hak hak "A va nghahhlelh awm tawh ve, i dam that vat a ngai a nih chu" ka tih chuan a bu nghat a "Mahse ka huphurh ang reng khawp mai" tiin a hmel chu a ngui nghiau reuh a "A lawmawm teh lul nen tinge i huphurh duh" ka lo ti ve vat





"Ka hre lo, ka hlim rualin ka huphurh" a ti leh a "Pathian kan lamah a tang tlat dawn alawm chuvang chuan hlau lo la, ka tawngtaipui reng dawn che nia" ka ti a, a bu ve ta nghat mai. Kan inbiak zawhah keipawh chu engmah ti kawi tawh lovin ka ve ta nghal





An kal dawnah chuan kan inbe leh a, tiang ang em em a Luca phur hi ka la hre ngai lo chuvang tak reng chuan a ni ka thil tih tumah hian inchhir na ka neih loh chhan pawh; kan han dam loh hi chuan puitling pawh ni mah ila pangchan a awl bakah min duattu te hi kan hre hlur bawk a, kan naupang tha leh nimai te hian ka hre thin





A hunlai a inla pa ka ti dawn nge, khirh em em leh ngeng ngulh te, nelawm loh thin em em kha a han dam loh chuan mipa naupang ang mai a ni; nilengin an chanchin ka ngaihven ve reng a, an thlen hunah min hrilh tur a ka tih avangin sana chu a khat tawkin ka melh sek bawk. Ka nu chuan khu lai kan awm chhunga kan mamawh tur tiin bazar a rawt a, ka kalpui ve mai






Eng chen nge kan cham dawn kan hriat loh avangin kan in lei duh thawh ang reng viau mai, kan haw theih meuh chuan khua a thim ruai tawh; ka phone ka bag a ka ah chu a vibrate reng tih ka hriat rualin ka la chhuak vat a, phone screen a hming lo lang ka hmuh rualin ka nui chhuak nghal hak bawk





"Call i va la thei love" lungawi lo tih hriat takin a rawn ti a "In thleng tawh a mi?" Ka tih chuan bung zeta min chhang chu ka hrethiam lo ang reng viau "I lungawi vak nange?" Ka tih leh chuan "Vawi eng zah nge ka lo call che, chawhnu tirah khan kan thleng daih tawh alawm" a tih chuan ka nu nen kan bazar thu leh engmah ka hriat loh thu hrilhin thupha te chu ka chawi hmasa leh zet





"Engtikah nge damdawi in in luh dawn nge in lut nghal dawn?" Tiin ka zawt leh a "Naktukah kan lut ang, ka kal min thlak sak tu tur te pawh an lo la thlen ve loh thu ka nu in a sawi a hmuh ka chak teh lul nen amah lah khan a duh tlat lo a nih hmel, lawmthu hrilh te pawh ka ba ve asin mawle" a ti niah niah a, chu thil ringawt chuan a rilru a luah a nih hmel





"I hmuh chuan a lawm vak dawn lo a nih chu, hmuh talh tum lo la" a luhlul tih ka hrechiang ve thawkhat a chuvang chuan zawn chhuah a duh tak tak tih ka hlau ve a tin ni, "Ka nunna keng tu a nih avangin lawmthu hrilh ka duh vang mawle" a tih chuan "A lawm tawk tawh sa hrim hrim ang" ka ti a, a ni erawh chuan a la pawm thiam vak lo hmel






"Ka hman veleh ka rawn be leh dawn che nia, hei kan haw mek a phone hman reng chu a chi vak lovin ka hria" ka tih takah chuan min hnial lovin a aw ve mai a, kan inbiakna ka dah hnuah ka nu nen in lam panin kan inzui haw nghal hnak hnak





Lengpui Airport kan thlen chuan ka zam ve deuh tanin ka hria, ka awm mai mai thei lo chu ka kut ka khal niap niap a; a tirah engtin awm lo mah ila a hun a thlen hnaih tak tak chuan a lo zam ve theih khawp mai. Ka nu chuan a hrethiam a ni ngei ang, ka kut chu min vawn sakin min nuih ver ver a "I sawi ang khan i bulah ka awm tlat dawn a nia" a ti a nuih let seih pahin ka bu ve nghat





Thlawhna a kan chuan chhung zawng pawhin ka thinphu chu a rang tha kher mai, kan thlen chuan ka nu chuan ka kutah min chelh sak tlat a; hotel a thlen leh ai chuan damdawi in lam kan pan tlang nghal a, Nu Mapuii chuan min hmuak a, min ngaihsak tha bawk a kan nufa tan chuan buaina tur vak a awm lo zawk a a zia thin khawp mai





"Luca hmuh theih loh tur a awm ka duh a nia" a chhunga kan luh pah chuan ka ti a "A hran ve ve in in awm dawn alawm, hlauthawng suh engmah a thleng lovang" a tih chuan ka thaw huai thei. Eng eng emaw tih fel neuh neuh ngai a la awm avangin in zai pawh an la ti mai thei lova, Luca nen inbiak kan thulh phah chuang lo mahse chutih rual erawh chuan video call ka duh rih loh thu ka hrilh chu a hrethiam lo kher mai






Ka net chhiat ka chhuan lam a, ka thusawi a nih avang nge ringhlel hmel a pu chiah lo niin ka hria; kan thusawi tam ber pawh a huphurh leh a phur thu vel bak a ni lo, a rilru a luah khat ve ngang te pawh a ni mah na. Ka thiam ang angin ka hnem ve bawk a, ka thei dawn lo tih hre reng mah ila ka tawngtai pui reng tur thu ka hrilh ve thin bawk






Kar khat zen zawn kan hriselna te min en dik sak hnuah in zai hmachhawn turin kan inpuahchah tan a, ka nu pawh a zam ve tan a ni ngei ang zana a mu te hi a harh leh hlawl thin a; min chan ve ang tih a hlauh thu mawlh chu min hrilh thin. Hlauthawng lo turin leh ka that leh vat tur thu in hnem ve bawk mah ila kei ngei pawh hi ka zam ve tawh tak zet






A ruk thei ang bera engkim ka duh avangin doctor te pawh an lo hrilh diam nge ni tur a ni, in zaina room a min nawr luh lai te chuan Luca chu an nawr luh tawh thu leh engmah hlauhthawn tur a awm loh thu te, kan inkarah parda an zar tur thu te nen lam chuan min hrilh bakah an theih tawp an chhuah tur thu leh kan that leh vat tur thu te chu min hrilh phei mawlh mawlh a






Chu chu keipawhin ka beisei tlat a ni, min nawr luh hnuah hnim hlum min hnim tir atangin ka khawhmuh leh ka ri hriatna te chu an hla tual tual a; engmah ka hre zawm tawh lo, engkim mai chu a reh thuap a, a thim vek bawk





Phul hmun nuam takah ka pa chu ka hmu a, a hlim tih a hmel atang chuan ka hre thei bawk "Pa" ka ti a, min chhang mahse min nuih vur vur thung. Ka lama lo kalin ka bul a thlen chuan a tih thin dan ang ziahin ka kut hum vawng vawng pahin a beng thak thak a "Pa ka ngai thin lutuk che" ka mittui a tling nghal pam bawk





"Ka fanu ka chhuang lutuk che" tiin min nuih leh suk a, ka naupan lai ang maiin ka pa chu a la thalai em em a; a taksa leh a hmelah chuan na hmel hmuh tur a awm tawh lo. A hlim em em a, a nui reng bawk "Pa lo haw tawh rawh, ka nu pawhin a ngai lutuk che asin" ka tih chuan a hlim hmel zawng zawng kha zawi zawiin a chuai riai riai a, lungngai hmel a pu tawh thung






"Pa haw rual ang aw" ka ti leh a, lu min thin khum vat thung, amah chu hriatthiam loh hmel zetin ka en ha a "Ka kal a hun tawh" a tih chuan a kuta vuanin lu ka thing a, ka tap nghal pur bawk "Kal suh, min kalsan tawh suh. Ni lo i bulah min hruai ve rawh" ka ti tiau a, ka pa chuan min nuih sun sun pahin ka sam chu duat taka chulin "I hun a la thleng ve lo bawihi, i nu kha hmangaih takin lo enkawl la ka pek hmabak hlimna tam tak kha lo pe ang che aw; in pahnihin ka hmangaih lutuk che u tih hre bawk la" a ti a






A kut ka vawnna chu thlahin hma lam eng tak lamah chuan min kal san a, ka pa chu ka au a; mahse vawikhat te mah a rawn hawi let leh tawh lo. Ka tap a, kal lo turin ka ngen lawm lawm bawk; ka pa kha ka ngai a, ka nu nen kan la mamawh tak zet






"Pa a vawi hnih nan tinge min kalsan leh" tiin ka tap a, a ni erawh chu hmuh tur a awm tawh lo. "Thisen a hlauh hnem lutuk, a phar phu kan hmu lo zeuh zeuh" tih te chu ka hre riai ruai a, engkim chu a in pawlh nuaih in ka hria. Ka mumang nge a tak tih chu engmah ka thliar hrang thei lo






"Doctor kan ti lui zel a nih chuan a nunna hi a chan thei a nia" tih ang reng vel chu ka hre leh a "A lo harh in ka hria, hnim hlum kha rawn la rawh u" tih chu chiang lo ruai a ka hriat hnuhnun ber a ni, engnge a hnu leh zelah thleng a engtin nge ka awm zel dawn tih chu hre zawm leh tawh hauh lo turin vawi leh khatah ka hriatna zawng zawng chu a tawp hmak bawk







CHAPTER-20




Luca *Pov*




In zaina ka hmachhawn hnu atangin kar khat lai a liam tawh, ka la chak lo em em a; mahni pawhin engmah ka la ti thei rih lo bawk. Ka harh chhuah rual a ka rilru a lang hmasa ber chu Hlutei kha a ni, ka nu bulah chuan min biak sak turin ka ti a mahse a biak tak leh tak loh erawh ka hre lo; ka la vai ruai a ka hriatna pawh chu a chhum bung em em bawk





Chiang taka ka harh chhuah hnuah keimah ngeiin Hlutei chu biak ka tum a mahse switch off a in ti tlat chu ka hrethiam lo ang reng khawp mai, a buai a nih ringin nakin deuha biak leh turin ka phone chu ka dah ta rih. Ka nu chu a hlim viau dawn a maw ka tih laiin chhungrilah erawh hrehawm tihna leh inthiam lohna ka hmu tel tlat thin chu ka hrethiam lo viau bawk





Ka pa nen chuan hlim hmel min hmuh reng thin mah se, an mahni ah chuan kim lo riau awm tlat a hriatna ka nei hi keima la dik loh vang nge pawh ka hre lo; Hlutei biak ka tum apiangin switch off a in ti tlat mai mai chu ka thin a rim lek lek tawh. Ka inzai na hi hmang tangkaiin min kalsan a nih te ka ring hial tawh zawk





"Nu Lalrinhlui kha i phone atangin han be teh, ka be tlang thei lo" ka beidawng tan chuan ka nu bulah ka ti a, min chhang lo mahse a nui suk a "Ti tut tut lo la bawiha, nakinah chuan amah zawkin an rawn be em em ang che" a tih chuan ka dawhtheihna hian a tlin lo tan lek lek tawh tih a hrethiam lo a ni ngei ang





"Engmah tih ka tum lo, ka that thu hrilh mai chauh ka tum a ni" ka tih chuan "Keiman ka lo hrilh sak dawn che nia" a ti a, ka bu ve nghat tho. Chutiang chuan biak ka tum apiangin a biak tur thu sawiin ka biak a phal ngai lo chu mak ka ti viau tawh, ka ngaih bel nge ka nu leh pa te hian ka lakah zep ruk an nei tlat a hriat ka nei chu zawh tawp tur em maw ni dawn le tih te chu ka ngaihtuah rum rum tawh






Ka harh chhuah chhan ber biak theih a a awm tlat loh avangin engkim chu ka hne tawh tak zet, dam that vat vat a kan haw veleh Lalrinhlui hmu tura kal chu ka ngaihtuahna a lian ber a ni bawk; a ni hian min phatsan a midang min neih san vaih a nih erawh chuan a chak lo khawp ang





Ka hmangaih hi tuman min lak sak a thiang lovang, ni lo an nei a nih pawhin nei let leh turin ka bei fan fan ang; a hma kha chuan thu tiam thei lo in, rilru hah na leh natna tam tak ka thlen tawh pawh a ni mai thei mahse tunah chuan chan ka tum tawh lo bur hi a tawp. Ka nei let leh ngei ang, a rawn let leh ngei ngei ang tih pawh ka chiang viau bawk






Khuma awm ngut ngut ka nin tak em avangin in tih harh ka mamawh tak zet, ka nu bulah chuan sawiin damdawi ina hnathawk ho bulah chuan wheelchair tal min dil sak turin ka ngen a; min hnial bik em lo chuan a kal ve mai, a rawn let leh hnuah damdawi in chu ka nu nen kan fang kual a, inbe lovin min nawr kual vel mai mai niin ka hria





A chhung a zau bawk a, damlo a in entir te pawh an kat nawk mai; kan let leh tur chiah ka sir lam ka hawi phei chuan ka hmuh sual nge Hlutei nu hmu ang tlat a hriatna ka nei chu ka nu bulah ding turin ka ti a, a ni pawh a ding ve mai; ka hawi kual hnu pawhin engmah ka hmu leh ta chuang lo





"I lo hmu ve em?" Ka nu bulah chuan ka ti a, a ngaihna hriat loh hmel zeta min rawn en ha pah chuan "Tumaw?" A ti he haw a "Hlutei nu ka hmu" ka tih chuan a nui hak a "I ngaihtuah nasa lutuk a nih kha, engtin nge hetah an awm daih theih ang; an ni te chu Mizoram ah daih alawm an awm" a tih chuan a ni viau in ka hre bawk si mahse ka hmuhsual ti dawn ila Hlutei nu nen an in ang lutuk mah mah a ni






"Let tawh ang aw, i chau ang" a tih chuan ka bu nghat a, ward lam panin kan in phei leh ta nghal; khuma ka mut leh tawh hnuah pawh ka ngaihtuahna chuan nichin a ka thil hmuh ngawt mai chu a la ngaihtuah a, hmuh sual ni mai mai theiin ka hre ta hauh lo. Mahse Hlutei nu ni dawn pawh nise hetah engnge an tih ang tih chuan ka rilru a tibuai tak zet bawk





Ka nu rawn let leh chu ka zawt a, ka ngaih bel nge a mitah chuan tlanchhe nghal duk hmel a pu chu ka hrethiam lo ang reng viau "Zep in nei tih ka hria" ka ti tawl a, an nei tak tak em tih phei zawng ka hre hauh lo na chu an awm dan hian ngaihbel lo thei lo turin min siam tlat bawk si





"Min hrilh rawh" ka tur tak chhen avang chuan a thaw hak a, min rawn en leh chuan ka phu zuk thei hialin ka hria; ka nu mitah chuan mittui a tling pam a, a thusawi tur chu engpawh nise a tha viau dawn lo tih ka hrechiang nghal em em bawk "Lalrinhlui'n ngaihzawng dang a nei a mi? Nge pasal a nei" ka nui hawk a, a lo nih tak tak phei chuan ka awm zel dan tur ka sawi lawk thei hauh lo





A lu a thing nar nar a, min rawn en lehin "Bawiha khawngaihin min ngaidam rawh ka hrilh loh che avangin" a tih leh lek phei chuan keimah tak ngial pawh hlauh rukna in ka khat tawh a tih theih ber ang chu "Pehhel kual lo khan, sawi vat ta che" ka dawhtheihna te lah chu a pan tan viau tawh bawk "I kal(kidney) thlak sak tu che kha tudang ni lovin Hlutei a ni" a tih chuan ka bing nghal mup mup in ka hria





Ka awih lo lutuk chu ka nui ro nghal hak "Dawt i sawi em?" Ti a amah ka en chuan dawt sawi hmel erawh a pu hauh lo "Engvanga min hrilh lo nge in nih?" Thinrim insum taka ka tih chuan "Aman hrilh lo tur che in min ti a, i hriat a duh loh vang zawk a ni" a tih leh lek phei chuan thinrim lutuk vangin ka puak keh lo chauh





"Keimah vangin a nunna derthawngah a dah tih in hre chung pawhin min hrilh in tum miah lo a maw" ka ti leh a "A hriat vangin alawm hrilh che a duh lo, dam leh vat la kan duh a hun rei tak i kal milpui kan zawng tawh kan hmu thei lo nangpawhin i hriat kha, Hlutei nen in lo in mil ta si a, chuvang chuan he thuthlukna hi kan siam lo thei lo a ni" in hnit hruih hruih pah chuan a ti a, ka lo in hum ruh hle thung





"Khawnge amah chu a awm?" Ka rilru a lang hmasa ber ka zawh chuan min chhanna erawhin mu leh mal min hriattir thei hauh lo thung "Thisen a hlauh hnem avangin ICU ah a awm mek" zuai raih hian a ti a, ka thu hriat chuan min thawng tak zet; amah ka hmuh duh thu ka hrilh chuan hmuh a theih rih loh thu a min chhan avangin ka thinrim lutuk chu ka puak keh thei mai dawnin ka hria





"Hetiang zo zai hi ka lakah in zep a maw, eng ang nu leh pa nge maw in nih le" ka thin chu a chhan hriat si lovin a na ngut ngut a, ka hmeichhe hmangaih atana rinawm taka ka lo awm ve thinna ngei mai kha tunah keimah vangin, ka dam leh theih nan a nunna a thap a; chutiang ka hre chung pawhin engmah ka ti thei chuang si lo chu nep ka in ti tak zet





"Ngati nge a ni kher a nih, midang an awm thlawtlo a mi" ka ti leh a, a theih loh thu a min hrilh te chuan inthiam lohna tam tak min neih belh tir bawk. Rilru hahna leh natna tam tak ka thlen sak tawh hnuah pawh a nunna derthawng taka ka siam leh zel chu nep ka in ti a, mipa lak tlak loh tak ka ni hial in ka hria





"A bulah chuan min hruai rawh u, tunah hmuh ka duh" bul zetin ka ti leh a, a theih loh thu sawi mah sw hmuh ka duh thu ka sawi tlat avangin thawk hak pah chuan Hlutei awmna lam chu min hruai leh ta nge nge. ICU bul kan thlen chuan Hlutei nu leh ka pa lo inbe mek ka hmuh chuan ka ding chawt, ka nu min vawnna chu paihthlak sakin bang rin chhan chuan an lam chu ka pan ve chhat chhat






Min hmuh rual chuan ka pa nen phawk zetin min en a, ti duk hmel an pu bawkin ka hria "Khawnge amag chu" ka aw te pawh chu a lawi ve rutin ka hria "Luca bawiha" Hlutei nu chuan tah insum taka a tih chuan ka inhum ruh nghal teuh "Khawngaihin hmuh ka duh" engmah dang ka sawi thei lo, Hlutei mawlh chu a ni ka hmuh duh chu ni





"A luh theih rih lo" ka pa chuan a ti a, a lam chu hawiin rum zetin amah chu ka en nghal a "Hmuh ka duh chu chu in hriatthiam chuan tunah min hmuh tir rawh u" bul zet a ka tih chuan ka pa chu tawng leh tumin a ang hman zuau a mahse ka nu a lo dang vat thung "Doctor ka dil sak ang che" ti hmukin ka pa chu doctor be turin a kal nghal a, a kal liam hnuah thutna awmah chuan thu tura min tih avangin ka thu thla ve nghal zat bawk






Ka na rawn chhuak leh tur ut ut chu hre reng mah ila, tunah chuan pawimawh ka ti hran lo; tuna ka na rawn chhuak te pawh chu Hlutei tawrh ai chuan nep ka ti tawh tak zet. Reilo te hnuah doctor leh ka pa chu an rawn in zui phei a, kan bul an lo thlen chuan doctor chuan "In dim i la mamawh viau asin" a tih te chuan ka lo ner sak, tunah chuan a pawimawh ber lo ka tih tawh kha





"Doctor ka fapa hian luh a duh a, khawngaihin phalsak hram rawh" ka nu in a tih chuan hahthlak tih hmel zetin a thaw hak a "Rei tak a awm theih dawn lova, chhuak tura ka tih hunah che i rawn chhuak dawn nia" a tih chuan ka bu nghat, rei lo te tal pawh nise hmuh ka duh tak zet tawh





Ka pa leh doctor chuan ka ban tawn tawna min vuanin ICU chhungah chuan min luh pui a, min kalsan tura ka tih avangin min chhuahsan leh nghal vat bawk. Ka hma maia ka hmangaih engmah hre lova mu chu ka en tlawk tlawk a, a taksa khawi hmunah pawh chuan eng eng emaw an zam khat teuh bawk





Engvanga hetiang thil hi tinge ka la hrethiam thei ta chuang lo, a na hmel hmuh fo ka duh loh avangin ka na pawh hrilh duh lovin ka hlat hram hram zel thin a nih kha mahse tunah na tak tuarin ka hmu leh si; a nat ruala min tih nat ve zia hi hria se a lawm bik ka ring hauh lo






"Lo harh tawh la, ka hau duh che nia" a hmai dang bel chu chul sak pahin ka ti a, hrehawm ka ti tak zet "Natna in siam sak tawn reng lovin hlim takin kan awm tawh dawn nia, chuvang chuan Lalrinhlu i lo harhchhuah vat angai" ka ti leh a, ka hma mi erawh chuan harh pawh tum lo tih hriat takin a mit a chhing tlat thung





Ka insum na zawng zawngte chu thiah in a awm ta emaw tih mai turin aw rawl chhuah meuhin ka tap a, hrehawm ka ti tak zet; ka thawm an hriat rualin doctor leh ka pa chu rawn lut vatin min hruai chhuak nghal a, duh lo sa teh mah ila tang turin chakna ka nei rih der si lo. Hlutei nu chuan engmah sawi lo mahse min khawngaih hmel em emin min en a, a mittui far chu a hru leh zeuh thin bawk






Doctor leh Hlutei nu bula ngaihdam ka pa in a dil leh zet hnuah ka nu nen ka room lam panin min hruai phei a, tawng lo mahse an rilru a hrehawm ve hle tih chu ka hria. Nitin ICU bulah chuan ka nu nen kan kal dun thin a, Hlutei nu pawhin ngaihtuah lo turin leh a lo harh chhuah ve tep a rin thu te chu sawi mahse a hmel erawhin a beisei vak lo tih a hriat theih





Sawi ve tur ka hre lova, ngawi rengin an bulah chuan ka lo awm ve tawp a tih theih ber ang chu; an nufa laka ka inthiam lohna chu a ni telin a pung zel a chutih rualin Hlutei hnaih ka duhna leh ka hmangaihna erawh a ni telin a pung tial tial thung





Ni a ral a, kar a liam a, thla hial a ral leh meuh chuan keipawh ka tha tawh viau; a tuk maiah damdawi in ka chhuahsan theih tawh thu doctor in min hrilh chuan lawmawm viau mahse lawm a kim thei tak tak chuang lo. Hlutei lahin hma a sawn thei lova, a ngai rengin hun a la hmang thung; rawn harh chang chu nei mahse a mumal thei tlat lo thung





Damdawi in ka chhuah hnuah pawh la haw mai lovin Hlutei lo harh hun chu kan nghak a tih theih ber ang chu, ka chhuah atanga a kar khatna ah chiah thu lawmawm tak Hlutei nu hnena kan hria chu ka lawm tak zet; hmanhmawh lutukin ka nu leh pa te nen damdawi in lam pan chuan kan nghal ta nghal a

__________________________________________________




Ka harh chhuah ruala ka thil hmuh avang chuan a tirah ka bo hman viau a mahse damdawi inah ka awm tih ka hre zawm leh nghal zat thung, doctor lo lut chuan ICU a ka awm thu min hrilh a; engtia rei nge ka awm tih a ka zawh chuan thla khat chuang lai ka awm tih ka hre leh zel a, dam tha taka ka harh chhuak leh chu ka lawm khawp mai





Ka nu lo luh hnuah Luca chanchin ka lo zawt nghal vat a, a ni chu a dam that thu leh damdawi in a chhuahsan tawh thu te min hrilh chuan ka lawm lutuk chu theih nise zuan vak vak mai te ni ka duh hial ni. Min check hnuah that lohna em em ka neih loh avangin ward pangngaia min sawn vat tur thu min hrilh a, damdawi in erawh ka la chhuahsan ve mai theih loh hmel





Ka nu chhuah hnu lawkah kawngkhar a rik leh khep avangin chumi lam chu ka hawi phei vat a, ka tum loh deuh ka hmuh vang erawh chuan ka phawk nghal hra thung "Ehhh...he...hetah engtin nge ka awm tih i hriat?" Bah deuh nuaih a ka tih chuan ka lam panin a nui suk a "Mak i ti em?" Ti a min zawh chuan mak ka ti ngei mai lu ka lo bu nghat nghat a






"Nangmah hi maw i lo nih, ka kal min thlak sak tu chu" a khi suk a, hnuai lam bihin a hmui hnuai lam chu a pet zauh bawk "Hre tur i ni lo asin" ka tih chuan rang lutukin min rawn melh nghal vut a, mit tih zim sun pah a min enin "Keimah vangin i nunna derthawng takin i siam tih i hria em?" A ti a, a thinrim leh rim loh a hmel awmdan atang chuan ka hrethiam mai thei lo





"Ka hria lawm mahse min kalsan daih la engtin nge ka awm ang, ka pa ka chan tawh a nang leh zel chan ka duh hleinem" ka mittui chu ka bekah a luang thla zawih bawk. Ka pa hlim hmel leh dam tak a ka hmu te, tar tak ang ni lova la thalai taka ka hmuh te kha ka mitthla ah an rawn lang nghal kuar kuar a, chu chuan ka tah a tichhuak tak zet





"Shhh...ka hau lo che nia" a tih chuan ka tah nuih hak "Keimah vang chuan na tawh suh, ka duh lo a nia" ril leh tuk zeta tiin min melh nghal run a "Dam taka ka hmu leh thei che hi ka lawm tak zet" ka tih chuan a nui suk a "Tunah chuan i na leh tawh ngai lovang tih ka tiam a che" ka biang chul zeuh pahin ka chalah chuan a fawp vang vang a






"Min kalsan i tum a mi?" Hlauhthawnna in ka khat nghal der, lu thin pahin a nui hawk a "Ka nei dawn che mawle" a tih chuan ka nui ve ta hak hak mai, rei tak a awm theih loh avangin a chhuah leh dawnah ka hmuiah lungchim zetin min fawp vawng vawng a, hreh hmel zetin min chhuahsan nghal





Keipawh ward pangngai ah ka insawn tawh a, ka la chak tha lutuk lo bawk nen mahni a chet sawn ringawt pawh thil harsa tak a ni; thisen ka hlauh hnem thu an sawi bakah ka thi hman thelh tih an sawi chuan ka mawng a za mer mer thei in ka hria "Thihna ka tem zuai tawh" fiamthu a ka tih apiangin ka nu leh Luca chuan rum zetin min melh thin a, an lawm lo hmel chu hmuh nuam ka ti tlat pek






"Khatiang thu kha vawikhat mah sawi tawh ngai suh" ka nu chuan a ti bak hlar a, ka inthiam lo leh ang reng thin khawp mai; ka pa'n min boral sanna pawh kum em a la liam lova, kei leh zel min chan chuan kum khatah lu pahnih a sun dawn tihna a nia, ka nu tan chuan a na dawn lutuk hian ka hria





"Thihna" ka sawi apiangin phat rual lovin ka nu hmelah chu a danglam nghal bakah a dang nghal sawp sawp thei in ka hria, Luca pawh la in dim a ngai viau na chu lo kal a thulh phah chuang lova; nitin eitur tui tak tak kan nufa tan min lo ken sak ziah bawk





Dinmawii leh Lawmawma te pawh ka chanchin ka nu in alo hrilh thin a, ICU ka awm lai zawng khan min ngaihtuah em em tih te ka hriat bakah min lo tawngtai pui ve thin tih ka hre tel leh zel chu ka lawm tak zet "I lo haw hunah i dam leh lawmna ruai kan theh ngei angai ang" nuih hak hak pahin Dinmawii chuan a ti a, keipawh ka nui ve hak hak mai






Luca nen pawh a hma zawng aiin kan inkar a that bakah kan inhnaih phah sawt bawk a, min ngaihtuah em em bakah engkim min tih sak a tih theih ber ang chu; Luca zarah eitur ka ei that bawk a ka taksa pawhin hma a sawn chak khawp mai, doctor in kan chhuah theih tawh thu min hrilh chuan Luca pawh a hlim tak zet





Mahse in dim turin leh hna la thawk rih loh turin min hrilh thung, kan haw hma niin bazar an rawt a ka kal ve thei lo tur chu hrehawm ka ti ang reng; Luca nu leh pa te pawh an lo la haw bik lo tih ka hre leh zel a, ka chunga an tha lutuk chu ka inthlahrung let zawk hialin ka hria






"Kal rawh u, hetah ka lo awm ang ka duh ang thala intihfai te ka duh. Ka inbual lohna a rei tawh si" keimah vanga an thulh ka hlauh avangin ka ti a, Luca pawh kal ngei ngei turin ka hrilh bawk. "I tel lo chuan a va nuam awm love" a ti hluai chu ka nuih a za angreng viau mai "Min ngaihtuah lo la hun nuam tak va hmang rawh u, intihfai te ka duh a hetah ka lo awm zawk ang mahse eitur tui deuh min lo hawn la aw" dam dup a ka tih chuan a bu ve nghat mai






"Engnge i ei chak sawi la ka lo hawn ang che" phur hmel zeta a tih chuan "Ei chak ber ka neih pawh ka hrelo, i duh duh rawn lei la ka ei thei vek zawk ang" ka tih chuan ka hmuiah a fawp leh a, ka lo chhang let vat "Engtikah nge ka ta tak tak i nih theih ang aw" a tih chuan nuih hak hak pahin "I fel viau chuan ka ni vat ang" tiin ka chhang a, a nui ve suk mai






A tawi khawmuan reng avang chuan ka nawr chhuak a "Midang in nghah tir reng chu a inthlahrun awm kal vat rawh" ka tih chuan ka lam a rawn inher vutin ka biang tawn tawna dawmin ka chala a fawh leh hnuah min chhuahsan ta nghal a, a chhuak ta chiah chu ka ruak nghal huaiin ka hria






Mizorama kan haw dawn chuan kan phur tawh tak zet, Dinmawii leh Lawmawma te pawh in thurualin min lo nghak dawn a nih hmel bawk a; chu chuan min ti phur leh zual. Kan tana thiantha tak tak te hlutna chu engpawh tawk ila, min tuar pui bakah kan kiangah an awm reng thin





An tih ve theih chhun chhunah min kalsan ngai lova kan tan an din tlat thin bakah an tih theih chin piah lamah pawh min ngaihtuah zia hriat hian unau nei lo mah ila thian neih hlutna ka hriat bakah ka unau neih chhun te chu an mahni hi a ni bawk






Lengpui airport kan thlen chuan vai ram ang mai khua a lum em em a, kan thlan nghal dup theiin ka hria; pawn kan chhuah rualin kei leh Luca hming chuang ngei maiin Dinmawii leh Lawmawma te chuan lehkha hlai zet hi an lo lek va va ka hmuh chuan ka nui chhuak. Ka bula awm ve te lah chuan hriatthiam loh hmel zetin min lo en ha hlawm a, ka kawhna lam an hawi ve rual chuan an nui ve nghal hak hak tho






Dinmawii chu kan lam lo panin a rawn tlan phei a, ka bul a thlen rualin min kuah nghal thlawp a; ka tlu thelh leh nghal. "Min kalsan ang tih ka hlau hman lutuk" tiin a in hnit zui nghal hrawih a, min kuah nghet lutuk vangin ka thawk a chham lek lek hial a ni "Min kuah ngheh lutuk vang hian ka kalsan thei zawk hial ang che" thei leh thei lova ka tih chuan inla hrang nghal vatin ka ban puamah tak mai chuan a chum chawrh a






"Sual thiam lutuk" a tih chuan kan lo nuih hak hak, haw tlang mai lovin Dinmawii in lam kan pan nghal a; Luca te pawh an driver in a rawn hruai avangin kan chuanna erawh a in ang ta lo mahse an in a lang tlang hmasa lovin Dinmawii inah chuan an rawn peng hmasa ve phawt a, thingpui te in a rei fe kan titi hnuah min hawsan veleh chauh





Ka chauh em avangin ka mu thung, zan riah ei dawnah chauh min kai tho a; dam taka helai hmun ka thleng leh thei ringawt pawh hi ka lawm tak zet. In zaina room a kan awm laia ka pa ka hmuh kha ka mitthlaah hian chiang takin a lang leh thin a, ka nu hmangaih taka enkawl tura min hrilhna leh kan pahniha min hmangaih thu a sawi te chu a tak ang mai chiangin ka hre thei bawk





Ka pa chu ka ngai tak zet, khawvela kan awn chhung chuan vawikhat mah ka hmuh leh thei tawh ngai dawn lo tih ka hriatchhuah rual apiangin lungchhe vankaia tah hawm hawm chak chang lah ka ngah; mahse ka nu ven thawn ve a ngaih avangin ka tih lan erawh a rem si lova





Ka pa, min hmangaih em em tu leh keipawhin ka hmangaih em em chu ka chan tawh a, engtikah emaw chuan kan chhungkua a hlim taka kan in tawh khawm leh ngei ka ring bawk. Chutih rualin ka hmangaih em em nun chhan thei a ka awm hi ka lawm a, hmangaihna chauh lo chu tuma engmah ba lo tura min hrilh tu hi a danglam ve ngai lova a hun taka che thin a nih zia chiang takin ka hriat chhuah phah bawk





Nunah chuan harsatna tam tak tawk thei reng kan ni a, thlemna pawh tam tak tawk thei reng kan ni mahse chutih rual erawh chuan tlan chhuahna tur kawng min siamsak hi hmu thiam a zawm thiam apiang te tan nihlawhna a nih zia te tan a nih bakah a tuar chhuak apiang te tan a ni bawk





Kan in lam a ngaihtuah awm tawh avangin Aizawlah rei pawh cham lovin Dinmawii chu kan haw san ta vat a, mahni in ngei a han awm leh chu thla a muang huaiin ka hria; ka ni in kan in chu kan awm loh hlanin min lo enkawl sak a, ka pa te unau ah chuan pasal la nei lo awm chhun a ni bawk





Chhung inkhawmna neiin tluang taka kan in kan thlen leh theih avang leh keipawh dam taka ka harhchhuah leh theih avangin Pathian hnenah lawmthu sawi te chu ka nu in a sawi mawlh mawlh a, ka ni thlarau lam mi hriat ka ti dawn nge ni in rin loh lai takin a "Amen" leh thuai thuai zel thin chu ka phu chiam zel leh nghal. Tawngtai pawh rilru ah lang thei meuh lo, nuih te lam lam chu a za hial tawh zawk





[Group member pahnih te vawiin an birthday a nih avangin an tan liau liau chapter2 ka rawn dah sak a, nangni pawhin ngaihnawm ti taka in lo chhiar ka beisei. Chuan ads click, like leh comment te pawh kha theihnghilh lo hram ila]

[Ngaia]

CHAPTER-21




Kan Amen rual chuan ka thaw huai thei in ka hria, ka ni lam ka hawi chu nui lo turin ka insum nasa kher mai; mittui nen a lo in chiah piah leh nuai tawh hi a lo ni, eng ang pawhin tawngtai naah tel se a ril emaw ril lo emaw pawh ni se a ni hi chuan a dawng fal thin bik a maw tih theih khawp tur hian a lo tui fal hman ziah zel





Ka ni pawhin min haw san leh tawh a, ka nu nen chauh awm mah ila kan hlim dun ve em em tho; kan thil ei a hau tak lova Aizawl ka awm lai ang bawkin kan chawhmeh pawh a ho tham viau na chu a tui thei hle thung. In dim tur leh hnathawh an la phal loh avangin ka nu chuan engmah ka tih a phal rih lo a, chu erawh zawng ka inthlahrun phah hle thung





Luca pawh a rawn lang zut reng a, kar khat dawn te rawn chamin a haw leh mai thin; ka nu tan a in pe zo em em a, a rawn zin tawh vek vek hi chuan ka nu hian chhawr tangkai a lo tum nasa mai a Luca pawhin pawi a ti bik lo a ni ngei ang, ka nu pangpar chin te a tihfai pui loh leh eng eng emaw siam ngai awm chu a thiam ang tawk leh a phak ang tawkin a tih sak thin ve bawk





Ka nu chu zanah ka mutpui thin a, a tih fuh loh chang phei chuan ka pa ngaiin a tap leh rawih rawih thin chu hrehawm ka ti thin khawp mai; han hnem dan vak ka hre bik si lo nen hmeichhia hi chuan eng harsatna pawh tawk ila kan in hriatthiam pui vek zel thei tih tur ang mai hian ka nu a tah tawh hi chuan mittui a hnai ve kuar zel





Ka pa khan a duat bawk a, ka pa awm lai kha chuan eng vak a tih a phal sak ngai lo; ka nu tan chuan ka pa kha pasal leh thian a nih mai bakah a pa a ni tel bawk a, ka pa in a kalsan ta mai bawk nen ka nu atang hian kawppui in kalsan nat zia ka hriat chhuah phah bawkin ka hria





Amaha awm tir ka duh lova, eng emaw ka tihsan chhung lekin ka pa nen a an thlalak chu enin a lo tap leh thin avang hian a bul hnaia awm hram hram ka tum bawk "Vawiin chu i pa thlan va tifai ila" nitin kan kal chung pawh hian a kham thei lo a maw tih mai tur hi a ni "Niminah kan kal zawh chiah kha, a la bal hman lovang" ka tih chuan min hnial bik em lo





"Nu hrehawm i ti tiraw" ka tih chuan min en vang vangin min nuih seih a "I pa kha ka ngai em a tin ni" a tih chuan ka khawngaih tak zet, hun rei tak lo in zui tawh in ka pa nen an inneih hnu thleng pawhin an pahnih in an awm dun chawt a, khawi i lo an chhuah vah naah pawh an in kalsan ngai lo





Engkim chu an pahnih in an ti dun thin a, an hlim dun thin em em bawk; ka pa ang tak kawppui neih kha ka chak thei hle thin a nih kha "Hetianga i awm hi ka pa in hmu se a lawm i ring em?" Tar a hnu lamah ka pa in a kalsan bawk nen a tuar hle dawn tih hre reng mah ila, hetianga a awm hi hmuh reng ka duh lo






Ka pa bula a kal chak vang hian kei min ngaihtuah lek lovin mal taka awm turin min kalsan ve mai ang tih chu ka hlauh ber a ni, "Nu ka pa i ngaih vang ngawt khan min ngaihthah bik lo la, keipawhin ka pa chu ka ngai lutuk; a awm lo hi hrehawm ka ti ve lutuk, nang leh zel tianga i awm a nih chuan mal taka ka awm tur hi nuam i ti bik dawn a mi" ka ti ve ta nge nge





"Ka lo ti leh vak thin a tin ni bawihte min ngaidam rawh, i pa ka ngaih lutuk avang hian ka lo hre chang thin lo che a" a tih chuan ka thaw hak a, kan nufa chauh a tiang a hun kan hmang reng a nih chuan ka nu hian a tawrh phah mai dawn a ka hriat avangin ka nu hriat loh turin ka ni chu ka be ta ringawt a, rei lo te chhung an chhungkua a min lo awmpui turin ka ngen tawp bawk





An fate nen a kan awm ho a nih chuan a khawhar lutuk tur pawh a zia phah deuh ang a, naupang in min chim buai na na na hi chuan rilru a hruai peng lo thei lova, chuvanga ka ni te chhungkua pawh min awm pui rih tur a ngen pawh chu ka ni. "Ka pa in 'Ka awm loh hunah pawh Pathian ah vui lo ula, dem lo ula amah hnaih phah nan hmang rawh u' min tih kha chuvang chuan kan nufa tan Pathian hnenah kan tawngtai angai a, ka pa hmun ruak min luah khah sak tur hian dil kan mamawh zawk in ka hria" ka tih chuan a bu ve nghat nghat mai





Sawi tawh angin thihna hi chu a tawp ve chiang em a, khawvela kan awm chhung hi chuan kan inhmu leh tawh ngai dawn lo tih pawh hi tupawhin kan hriatthiam vek ka ring; ka pa kha ngaiin au mah ila a lo kir tawh dawn lo, min hnutchhiah leh keinin kan hriat reng tawhna tur chu heng a thlalak te leh a thil neih tlem kan la kawl te hi a nih ka ring





Ka ni te chhungkua lo awm taka chinah ka nu pawhin hma a sawn ve zel a, ka ni fate lah lawm rual lek lek an la ni vei bawk nen ka lawm angreng viau mai; Luca erawh hna lamah a buai rih viau a nih ka ring a reh leh vang vang tawh a, phone ah erawh kan in be zeuh zeuh thung





Lawma pawhin bialnu thar a neih a chinah a induh ka ti dawn nge a bialnu tan a rinawm vang ka ti zawk dawn, kan inhmu khat angreng thin khawp mai; zanah a hman chang apiangin a rawn leng a, ka room bathlar lamah thu chhuakin kan zai dun mai mai thin a, a eng emaw tih nawm riau ka ti bawk





"Mate ka lo haw dawn sin" Dinmawii'n a tih chuan "Engtikah?" Ka lo ti nghal vat a, a lo haw tur a sawi rual chuan ka phur nghal surh in ka hria; "Tum dan chuan naktuk tuk lehah a nia, a remchan taka leh naktukah pawh ka rawn haw mai thei" a tih chuan ka phur lutuk chu ka te nghal teng tung mai





"Lo haw vat vat rawh kawm tur pawh ka nei lo a nia, kan Sabengtunga lah hi a in la bialnu nei lutuk a a kawm hman meuh lo" lungawi lo aw lek lek a ka tih chuan leh lama mi chu a nui huah huah a "Ka lo haw hunah kan hau hrep dawn nia" a tih chuan a ti leh duh tak tak dawn tih ka hriat avangin pawi ka ti lo nasa khawp mai





"Hau tak tak teh ang, ka damlo min duat ve em em dawn emaw ka tia bialnu min neih san daih leh nghal" ka ti nang nang laiin "Tumaw in hauh dawn" rawn ti thum dut tu lam chu phawk zetin ka hawi phei nghal. Ka hnungah Lawmawma chu nui sangin a lo ding reng tawh chu niin




"Nakinah kan inbe leh dawn nia" tiin kan inbiakna chu ka dah ta nghal a, ka hmaa ding mipa chu rum zet a melhin inchhung lam ka pan nghal nal nal. Khuma ka thut rualin a ni pawh a thleng chawp chilh veleh nghal a "Tumaw in hauh dawn sawi teh" a rawn tih chuan "Nangmah" bung zet a ka tih avang chuan a nui hak hak a





"Nangpawhin i nei tho alawm" ngeiawn zeta tiin a mitko a san ak bawk a "Mahse nang ang em emin ka nei hleinem" ka tih chuan a nui ta hawk hawk "Ka û ve em em te thinrim lo la, ka bialnu pawh i hre ngawt a mi" a tih chuan a bialnu ka la hre miah lo tih ka hrechhuak nghal zat bawk





"Tunge?" Ka ti vat a "I hre mai ang" a tih chuan "A chhe lo em, eng ang hmel pu nge, khawia mi nge a nih?" Ka lo ti leh nghal zung zung chu ka bianga piai zeuh pahin "I hriat sa a ni" a ti a, ka hriat sa a nih chuan tunge ni ang tih rin ngaih thiamna ka nei hauh lo





"Ngaihtuah vak vak duh suh, ka rawn hruai hunah i hre mai dawn alawm" a tih chuan a rawn hruai hun tur chu ka nghakhlel tawh khawp mai. "Naktukah Aizaw ka kal dawn a" kan ngawih leh reng hnuah chuan a rawn tichhuak hlawl a, a lam chu hawi vatin "Engnge i tih dawn?" Ka lo ti nghal vat a




"Eng emaw tih tur pawimawh a awm a, ka kal lawk angai a" a tih chuan ka bu nghat a, miin an hire leh tawh a nih ka ring a chumi vanga kal tur pawh chu a niin ka hria; eng eng emaw thildang sawia kan titi leh luam hnuah min haw san a keipawh zanriah eitur inhnuai lam ka pan ve nghal zat bawk





Zanah Luca nen kan inbia a, a aw ah chuan a hlim a ni tih ka hre thei; kan in biakna pawh nidang zawng aiin a zangkhai vah te chu a mak zawk hial a ni "Palai ka rawn tir dawn nia" a tih chuan ka awih loh lutuk vangin ka nui chhuak hak "Engtikah?" Tiin ka zawt let vat a "Tunkar tawp lam a nih loh chuan kar leh lamah pawh a ni mai thei" fiah zet a a tih chuan ka la awih phal chiah lo





"I ti tak tak a mi?"tiin ka zawt leh kher a " Ti tak tak e" nuih zat hmel zet a a tih avang chuan awi leh awih lo inkarah ka awm a tih theih ber ang chu "I awih vak nange?" Ka rilru hria ni awm takin a rawn ti leh a "Awi vak nang" uar fe a ka lo tih avang chuan a nui ta hawk hawk mai





"An rawn kal hunah i awih theih mai dawn chu" ngeiawm zetin a ti leh a, ka hmuh theihah awm ngat phei se la chu a mit ko san ak pahin a nui leh suk ngei ang; "A in tihder na chi loh emai" ka ti leh hram a, ka awih thei ngang lo pawh a ni mah na





"Ti der hmel ka pu in i hre reng reng a mi" a aw chu a hma aiin a thutak zawk bawk "Aaa...ka hrechuang nang" ka tih chuan a nui hawk ri ka hre thei "An lo kal hunah i awih mai ang" a ti leh a, ka lo um e liam ta mai mai. Kan inbiak zawh hnuah keipawh mu turin ka inbuatsaih a, khuma ka mutthlak tawh hnuah pasal nei ve mai tawh tur angin ka suangtuah a, ka huphurhna leh ka phurna chu a inzat ve hial ta ve ang





Ka lawm rualin leh lamah ka nu ngaihtuah tel a lo ngai ve zel bawk nen ka huphurh leh rum rum tawh, ka awm loh huna ka nu mal taka a awm tur ka ngaihtuah te chuan pasal neih leh loh mai te chu ka duh rum rum a, chutih rual erawh chuan ka hmangaih ber bula awm tawh tur a ka inchan chuan ka phur leh ang viau lawi a, ka rilru pawh a insual buai nasa ang reng viau a ni





Dinmawii pawh a lo haw tawh a, Lawmawma nen an inngaizawng tih ka hriat chuan mak ka ti viau; an pahnih a an awm dun tur ka ngaihtuah chhuah apiangin ka nuih a za tlat a, mize in ang lo lutuk an nih vang te pawh a ni ang




Pakhat a ngawichawi em em a, pakhat lah mi ti phawrh phawrh chi a lo ni vei bawk nen mahse mi tam tak sawi dan chuan mize in ang lo tak an awmdun hian an inngeih phian an ti thin a, an ni pawh chutiang chu a ni ka ring tawh hial zawk a ni




Dinmawii lo haw a chinah kan pathum chuan engtik lai pawhin kan awm ho reng a, kan in chu inkawm khawm nan kan hmang a tih theih ber ang chu; an lo len tawh hi chuan ka nu pawh a phur thin ngei mai, eng eng emaw te sawi hovin ka nu chu hma kan thawhpui thin a chumi vang pawh chu a ni ang ka nu pawhin nuam a tih theih thin em em ni






Luca sawi ang tak takin palai chu kar tawpah an rawn kal ta ngei a, mahse ka nu chauh a nih avangin ka nu chuan chhungkua an lo in rawn khawm tur thu chu a thuphungin a hrilh a; rawn kal nawn leh tura an in tih hnuah min haw san leh ta nghal a, ka nu chuan "Fanu pasal nei thei tawh kan nei der che chu a nia" tiin min fiam ve ngei a, a huphurh em ti a ka zawh chuan a huphurh a a phur thu min hrilh bawk






Kan thiante pahnih lah chuan min phur pui thiam em em a, an hriat ang ang thu tha te chu min hrilh ve luam thin bawk a; a hlawk thlak ang reng, an ka atanga a chhuak ang tih ka rin ngai loh a chhuak ve ta fo chu a nia leh lam zawng tak chuan nuih a za thung. Luca nen mut dawnah kan inbia a "Ka tih tak tak leh tak tak loh chu tikhan i hre tawh em" nui ruh ruh chunga a tih chuan min hmu thei lo mahse ka ner nasa viau thung






"I sawi dan atang kha chuan ti tak hmel i pu lo em a tin ni" ka tih chuan "Ka thil sawi tawh ti lovin ka awm ngai a mi" a tih chuan sawi dik ka ti leh viau bawk si a, chhan ngaihna ka hriat loh avang chuan ka ngawi rauh rauh thung. "Tunah chuan ka ta i nih hun tur chiah ka nghakhlel tawh" a tih chuan ka nui hak hak "Keipawh" ka tih chuan "I va chak chiah loh hmel ve" a ti leh a, chak te chu ka chak lutuk mahse ka nu ka ngaihtuah ve tho bawk si a





Fanu mal ka nih avangin kan in enkawl tur an awm lova, chutiang bawkin Luca pawh fa naupang ber leh inpui nghak tu ber tur a nihna chuan rilru a tibuai ang reng viau mai; "Ka nu hi ka ngaihtuah deuh a, amah chauha a awm tur ka ngaihtuah hian ka zuam lo leh thin" ka tih chuan a ni pawhin a ngaihtuah ve a ni ngei ang a ngawi zui hmak a





"Chu lam reng reng chu ka lo ngaihtuah hleinem, lungngai lo la a tul a nih leh i nu chu kan awmpui dawn nia" dam dup a a rawn tih chuan "Nangpawh inpui chang tur i nia, a theih bik nang" ka ti a, dik pawh a dik chiah reng a "I rilru tihah lo la, engkim ka lo ngaihtuah dawn nia" a tih leh avang chuan ka hnial ta em bik lo






Tih dan tur a hria emaw hre lo emaw pawh nise, a ngaihtuah tumna hrim hrim khan min ti lawm tawk tawh hrim hrim; palai chu an lo kal leh ngei a, tha taka lo chhangin inneih ni tur hun te chu an ruat fel nghal a. Thla leh thla tawpa innei an rawt chu hma ka ti ang reng khawp mai, an hmanhmawh ka ti em em a; duh angin kan in buatsaih thei lovang tih pawh ka hlau ang reng khawp mai






Ka thiante pahnih pawh a rawn phul hlut a, engtik lai pawhin min rawn awm pui thin a; an inngaizawng ve chauh emaw ka tih laiin damdawi in a ka awm chhung zawng pawh khan an lo inngaizawng daih tawh tih te ka hre leh zel chu mak ka ti thar leh ngei mai





"In lo inthup thei khawp mai" vui aw ka lek lek a ka tih chuan "Hrilh tur che in damdawi inah i awm alawm" Dinmawii'n a tih chuan "A hnu leh lamah pawh in thei tho alawm" ka ti veleh a "Hun a awm lo ve em a ni Mate min ngaidam rawh" a ti a, kan nui leh ta hak hak hlawm mai. Hlim chuan nun pawh a hlim a, engkim hi a lo nuam vel vek mai a ni






Ni a liam zel a awm mai mai a theih tawh lo, keini lam pawh inneihna lam kan buaipui chho tan mek a; ka ni in ka man ei tur an siam tak tak mai chu A4 paper a leng lo khawp khawpin alawm mawle a ziah ni,ka inthlahrung lutuk chu ka cut then tir bawk a. Tu te mai pawh chu an phur tlang a tih theih ber ang chu, ka nu tak ngial pawh a hlim em em a; ka pa min kalsan hnuah a hlim leh ka vawikhat hmuhna a nia ka thinlung chhung takin ka lawm ve tak zet






Dinmawii chu thianah ka hmang dawn a Luca pawhin Lawmawma thianah a hmang ve bawk ang, a thik viau a maw ka tia; Dinmawii nen a an inngaizawng tih a hriat ve meuh chuan thik chu sawi loh be tha tawh tak hi a ni. A chet dan naupang chhia zet chuan ka nuih a ti za thei thin hle a, kan inhnaih pauh leh mi nelawm tak leh a naupan lai ang maia mi nuntluang tak a ni tih ka hriatchhuah leh phah bawk






Ka nu leh ka thiante pahnih chuan thuam chhawm tur min lei pui a, an phur fal deuh bik ni tur a ni; naute kawr chu an en chhen a, an mahni tan an en lawk a maw tih laiin tha hnem tak an lei hnuah min pe khawm ruih a "Naute in neih huna mi tur" an tih chuan ka nu nen in enin kan nui dun ringawt, inneih pawh kan la neih hma hauh a naute kawr kan nei nghal ringawt chu chhawm pawh ka chhawm tel ve ngam dawn a maw ni!






Man hlan hma chu Luca pawh a rawn kal tawh ngai lova, inbe reng thin mah ila kan inbe khat ang reng viau; an inbuatsaih ve mek a nih ka ring a, zan rei lama kan inbiak hian a aw ah a chauh zia ka hre thei thin bawk. Engtiang chiahin nge an in buatsaih ka hre lova mahse fapa mal a nih ve tho avangin a nu leh pa te chuan an buaipui nasa ve hle a ni ngei ang





Kan duh dan tak phei chuan ropui taka tih hluai kan tum lem lova, ngaiah pawh kan ruat hek lo mahse ka nu chuan "I pa nen a kan neihchhun i ni a, i ni ropuiah hian ho lam mai mai a thlah che chu ka phal lo; i pa pawhin a duh ka ring lo" a tih ve tlat avangin hnial hleih theih pawh a ni lo






Inneih boruakin min nang chho tan a, kan in pawh a khat tha thei hle; chhungte mai bakah thenawm khawveng rawn leng lut tawk lah an bang lova, chutianga min lawmpui thiam lutuk leh inleng kan ngah thin zia ka ngaihtuah chuan mak ka ti a, phu ka in ti loh rualin rilru in ka pa a hrechhuak lo thei lova, a thil tha tih thin leh pa in ngaitlawm, mi te tana inpe a nih thin zar kan zo mai mai niin ka hre thin bawk






Ka nu leh ka ni te, chhungte duh ang ngeiin man hlan ni a ka hak tur kawr min thui sak bakah inneih ni a ka pasal turte in a ka lawi luh huna ka hak tur te nen lam chuan min buaipui sak vek a, ka tih ve erawh a bei tham hle thung. Aizawlah bazar turin ka thiante pahnih nen kan chhuk thla a, ka nu pawh lo kal ve a duh viau nain in lamah tih tur neuh neuh a awm avangin min kalpui thei lo thung






Dinmawii in luahah kan in nghat a, kan thlen zanin Luca pawh a lo leng a; a hah ve a ni ngei ang a hmel chu a bawr chhawr tlat ka hriat ve chu ni! Eng eng emaw te sawiin kan titi tlang a, Luca pawh ka bulah thu in ka kut a khal niap niap reng a, thiante bula chutianga han awm chu ka zak ve lek lek mai






In la zei takin hun min pe dun ve ngei a, veranda thlang lamah awmin min kuah hlu hlu reng a; a palian ka tih tawh kha ka bula a awm a, min kuah leh lek phei hi chuan ka te chem chem zel hian ka hre thin "Duh tawka duat che ka chak tawh" nuih suk paha a tih chuan ka nui ve suk tho "Inneih zan chu ka mutthilh san daih ang che" ka tih chuan amah ka hmuh theih turin min kuai her nghal lawp a






Lungawi loh hmel fe a min en in "Engvangin maw?" Hriatthiam loh hmel fe hian a ti a "Chauh a na dawn em a, ka mut te pawh a chhuak hma ang a" ka tih lai mekin "I mut ka phal dawn miah lo, mu lo turin lo in dah tawp rawh" ti fuh in ti zeta hawi san vah pahin a chal a ti chuar tap a, ka lo en ha ringawt thung






"Chu ka chau chhe der dawn tihna a nih chu" ka tih chuan a kiai suk a "Ka duat dawn che lawm, i chau lovang" a tih chuan ka nuihza lutuk chu ka insum zo hman thlawtlo, ka nui ta hak hak a "Chu in huam a va ngai dawn ve" mit ko san ralh paha ka tih chuan a dar a chhin uk a, min kuah leh nghalin "Thlaleh atang chuan kumkhua in ka ta i ni tawh ang" nghet charha a tih chuan min kuah na kut chu ka hum sak vawng vawng a, chumi hun chu keipawhin ka nghakhlel tawh tak zet







Pheikhawk sang tak ka bun ngai loh avangin pheikhawk zawnga bazara kan kal kual lai pawhin a hniam lam hlir ka melh thin chu Dinmawii ngaihdan a ni vak lo ni ngei tur a ni, ka thlan apiang chu pitar min tihsak zel a; ka nalh tih apiang a sawisel zel avangin ka tui tawh lo kher mai. Ngawi rengin ka zui a, engmah pawh ka en tawh lo a duh ang pheikhawk a lei tawh a ka pheikhawk tur kan zawn pawh chuan ka en duh tawh tlat lo






"I lungawi vak nange" ka beng bul hnai setah rawn kun hniam Luca chuan a rawn ti sa sa a "Ka pheikhawk nalh tih apiang pitar an ti zel a, pasal ka nei leh lo mai ang ka duh ang zawng pawh ka hmu lo" tum bar a ka tih chuan a nui hawk a, mit tih zim sun paha min rawn enin "I duh duh lei rawh, a buntu tur i nia i thu ber. Engtin pawhin inchei la ka mitah chuan i mawi vek tih hre reng rawh" min nuih suk pah chuan a ti a






Ka thinrimna te kha a bo nghal vekin ka hria, mi dahsan dan leh hlu bik ang riau a min dah thiam em avang hian a bulah chuan kim lo hle ang a inhre thin kha ka kim ber zawkin ka hre thin; rei ve kan kal kan kal hnuah ka mit la ber pheikhawk ka hmu a, a san avangin lei leh lo mai ka tum chu "Kha kha la rawh, i inhmeh viau ang" Luca in min tih avangin huphurh ru tak siin ka la a, kei ngei pawhin nalh ka ti ve tak zet






Rei pawh cham lovin kan haw leh nghal a, kartawpah man hlan a tih tawh dawn avangin kartawp thlen nan ni khat(1) chiahin a dan tawh vang a ni bawk; kan haw tur te chu min ui hmel hle hian ka hria "Tianga haw i ngai ziah hi ka ning tawh khawp mai" a ti hluk a "Ka haw a ngai sia" kuah paha ka tih chuan a rum nghut a






"Ka ta i nih hunah chuan khawiah mah i kal bo ka phal tawh lovang" a tih chuan ka nui ta hak hak. Man hlan ni chuan mi pawh an tha hnem khawp mai, ka ni te tan chuan an vahnu neih chhun ka ni bawk a kan in pawh an cheimawi khawp mai; "Ka ta i ni tep tawh a nia" ka beng bul hnai setah rawn tiin a nui suk a, keipawhin ka nuih let ve seih





Tih nek nek chhungin hun a kal duak duak a, naktuk tuk leh mai chu kan inneih hun a lo ni ve reng tawh mai; Aizawl lama chhungte inah midang pawh an thleng khawm tak tak a, ka nu erawhin Dinmawii in luah a duh tlat avangin keini nufa leh Dinmawii te chhungkua in chutah chuan kan innghat thung





Luca te chuan bachelor party a cousin te nen an nei tih min hrilh a, kal ve turin min sawm tak na chu kan thlen ve chauh avangin ka chau ve bawk nen kal chi a ka ngaih chiah lo bawk avangin ka hnial thei hram; zanah Dinmawii nen mut hmunah eng eng emaw sawiin kan titi teuh a "Tihian pasal chu i nei tawh mai dawn sia, ka ngai awm reuh che" a tih chuan ka nui hak a, kei tak hian nia ngai dawn chu






"Kei deuh hian sin ngai dawn che" ka tih chuan min rawn kuah sat sat a "Zanin chu rei deuh meng ang, naktukah chuan mi ta i ni tawh mai dawn sia" nuih huah huah pahin a ti a, ka hnuk a ulh deuh tlat pek. Mi ta chu ka ni ngei tawh dawn chutih hunah chuan nulat laia kan tih theih ang zawng zawng kha nu nih tawh hunah chuan a theih tawh kher awm si lova






"Tho rawh, kan tlai dawn nia" min sawi tak nawk nawkah chuan phak chualin ka meng ve thei hram "Dar engzah nge ni tawh?" Mit nuai chat chat pahin ka nu bulah chuan ka ti a, chek tlak pahin "Dar kua a ri tawh dawn, tiang ang em em a rei mut tur a ni ngai a mi? Mi te chu an ni pawimawhah an tho hma ngai a nia nang ve chu(h)!" Tih pahin zawi zet a ka la mu chu min tung tho lawp leh nghal






Laldinmawii vang vek, ka mutchhuak tawh chung chung pawh min menrei pui lutuk a; mut ka kham thei mawlh lo a ni ber, a ni ve lah chuan min thawh san daih tawh a a hmai an chei mek tih ka hriat leh lek phei chuan chum tawlh mai a nia ka duh. Ka tho hma thei lo tih a hre ve reng a, a thawh hma chuan mi te pawh hi kaihthawh ve thin tur a nia buaithlak thin lutuk






Mut kham bawk nen, ka mit te chu a thial ul hian ka hria ka hmai an chei lai te chuan ka tum bar reng a "Nui rawh, vawiin chu a nuam dawn nia" min nuih sang pahin Dinmawii chuan a ti a, chhan pawh ka chhang peih lo. Dar sawmpahnih inneih tan a ni a, a hnai tulh tulh a ka huphurh lutuk chu inneih thulh leh mai te chu ka duh rum rum hial a ni






Ka che muang lutuk chu tupawh mai chuan min tur chhen a, an inpeih vek tawh a ka nu tak ngial pawh a inpeih fel at tawh mai; hmeichhe lamin rawng sen no lam theme ah kan hman laiin mipa erawh chuan baby blue (a pawl dal) theme ah an hmang ve thung a nih hmel, a inchawih mawi tawk viauin ka ring






Ka mo kawr leh pheikhawk Luca in a duh taka min thlan sak ngei mai chuan ka inthuam peih ta at mai, ka nu pawhin mawi min ti ve ngang a ni ang a nui a nui hmel han hmuh chu hah a dam sawng sawng thei hialin a nia ka hriat ni; Dinmawii pawhin min en leh vung vung thin a "Ka la awih thei chuang lo, pasal nei chu i ni ve tawh mai dawn si a" a tih chuan chung lam hawiin mit a khap fak fak a





Keipawh ka hnuk a ti ulh ve tak zet "Nangni thian dun kha thu lungchhiat thlak lo in fah su, in hmel a chhe vek ang" Dinmawii nu chuan nuih huah huah paha a rawn tih takah chuan kan han nui leh ang lawp lawp bawk a. Reilo teah min rawn hruaitu tur motor pawh a rawn thleng a, Luca a rawn luh lai te chuan a chhe lo nangiang mai




Midang ho chuan an lo chhaih laih laih lai te chuan a lai ve deuh a maw ni, a nui ve suk suk a; a hmeltha tak zet. Coat suit hak inhmeh zet leh a khabe hmul te, a sam tih dan te chuan a ti lang thianghlimin a ti pui ka ti khawp mai, min rawn nuih suk pahin "I nalh tak zet" a ti a, kan laih ve ngawt pek kha!






Biak in dar a ri a, vawiin hi ni bik a nih angin tupawh mai chu an lawm a, an hlim hle bawk mahse chutih rual erawh chuan rilru in ka pa a ngaihtuah chhuak lo thei lova; tunah tak hian ka ngai tak zet, a ni kha chu la dam se ka kut vawn pahin duat takin min ben sak leh thek thek ang a "Ka fanu i mawi tak zet" min ti ngei ang. Biak ina min kai lut tu tur pa ka nei ve tawh lova, ka pa aiawh tu tur unaupa ka neih loh avangin Luca pa chuan min kai lut a, ka hnuk a ulh tak zet





Ka pa kha lo let leh mai se tun hunah hian ka ti khawp mai, ka lawm laiin lawm erawh a kim thei lo; ka pasal tur lam pana kan kal lai chuan ka nu chuan mittui hruk zeuh pahin min rawn nuih sen sen a, a ni pawhin ka ngaihtuah ang chiah chu a ngaihtuah ve tho niin ka hria. Ka pasal tur bul ka thlen chuan min nuih sukin ka pa (Luca pa) lak atang chuan min la hrang a





[A van tawp teuh tawh tak em, story tharah kan inhmu khawm leh tham tham dawn nia aw. Hei aia ngaihnawm rawn tih chhuah zel ka tum a nia chuan nangni pawhin like leh comment ah tan min lakpui ve zel ang a, ads click kha theihnghilh lo bawk ila]

AN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E

[Ngaia]

CHAPTER-22




Thu kan chham lai te chuan Luca chuan min en reng a, min nuih suk zel thin chu ka lai ru ang reng thin khawp mai; ka zam tih a hria a ni ngei ang, ka kut chu Pastor hmuh loh theih tur ang berin min vawn sak a, chu chuan inrintawkna min pe leh ni maiin ka hria





Thla kan lak lai te chuan lakpui tur an tha hnem ang reng phian a, pheikhawk sang ve tak ka bun ngai lo ka tih tawk kha ka ke te chu a na ut ut tawh a; phelh chi ni nghal ngawt lo chuan. Ka lo beisei leh ngaihtuah ai daihin a ropui bakah biak in leng lo khawpin kan inneih min lawmpui tu te chu an lo kal a, lawmna aiin mak ka tihna a tam zawk ta ve ang





An in lama ka lawi luh hnuah pawh in leng an la tha hnem hle a, nileng deuh thaw in thlalaknaah kan ding tawh bawk nen ka chau tawh ang reng khawp mai; mahse in leng te awm laia mut san ngawt lah thil tih chi ber a ni bawk si lo chu kan la awm ve ta reng a, ka ke na kham lutuk reh thei lo chu a khat tawkin ka hmet leh thin bawk





Keini pawh awm rei lovin kan pindan tharah chuan mu turin Luca nen kan inzui chho a, thawmhnaw leh ka thil chhawm vel te pawh engmah kan la tifel lo; ka chau ve deuh bawk nen mut chiah chu ka thlakhlelh ber ni tawhin ka hria. Khum ah ka let thla nghal tawp a, intifai tura thawh leh pawh a peihawm loh lek lek zawk dawn alawm mawle





"Inbual rual ila" a tih chuan ka en ha ringawt a "Ah!...ka duh lo" ka tih chuan "Ngati maw, nupa kan ni tawh a zah tit tet neih a ngai tawh hleinem" ngaihsam hmel fe a a tih chuan ka duh lo lutuk tih lantir nan lu ka thing nghal nawk nawk a, a nui suk duh lek chauh leh nghal





Nupa pawh ni tawh mah ila, inbual rual kher chu ka zak tlat a ni; "Lo kal mai mai teh, kan rei leh i mu har ting a ni mai" kiai suk paha a tih chuan "Ka inbual hmasa ang a, ka inbual zawhah inbual ve zawk rawh" ka ti leh hram chu rum fe in min melh a "A nih inbual rawh" ti hmukin khumah chuan a mu nghal hmak chu ka nuichhuak nghal hak mai





Ka inbual zawhah kawr hak nuam thei ang ber chu ka ha a, a chau ve deuh nge a muhil tlata ka hriat avangin a mut leh mut loh enfiah tura ka kal chu a bul ka thlen rualin ka inrin hma hauhin khumah chuan min kuai mu a; ka te nghal that chu a nui suk a, "Mut hahdam inring suh, ka duat phawt dawn che ka tih tawh kha" a tih chuan khawngaihthla la zeta melhin "Zanin chiah chu min hrethiam la, ka chau bawk sia" ngen ngawl zet a ka dil chuan lu min thin nghal hmak nia!






"A rei lovang" ti supin ka hmui a fawh a rual nghal a, ka chhang rang teh asin aw; ka chau ka ti zo chiah a, min fawh ruala ka chhang nghal thei mai chu kei ngei pawhin a ngaihna ka hre der lo. A nghawngah chuan ka kut chu suihin ka fawp let nghal tan tan chuan a ti phur a ni ngei ang, a hma aia uar leh duhthawh zawk chuan min fawp a





Min fawh pahin a kut chuan ka taksa khawi hmun mai pawh chu a dap nghal ruak bawk, heng a mit meng thil ti thei taka min en te hian ka buai a, a hmui leh a kut te pawh hian rilru fim min put tir thei lo ni berin ka hria; kan duhthawh dun telh telh a kan thawk pawh a pangngai lo chho tan viau tih pawh chu kan hrechiang dun kher ang





Ka hmai zawnah chuan a rawn thaw lum leh hak thin a chuti chung chuan a min fawh a bansan loh mai bakah a kut pawh a awl lo kher mai, ka kawr chhungah a kut chu zen lutin ka bra a phelh nghal a; la duh tawk mai lovin ka hnute a rawn tham chuan ka thawchhuak nghal hak. A awmdan engkim zei zet chuan ka ngaihtuahna a tih nut bakah insum ve thei thin tak hmeichhia kha insum zo lek lovin min siam ka ti thei ang





Ka taksa hrang hrang chu chulin a fawp pah den den bawk a, a mi tawhna apiang chu ka tek nghal chhuai zel maiin ka hria; ka thaw leh hak thin a min rawn enin a nui suk a "Ka sava note i chhelo tak zet" ti supin a hmui bawk chuan min rawn fawh zawm leh nghal a, mipa mamawh ngai lo ang a ka in hriat ve thinna te mipat hmeichhiatna pawh ka hmang ang tih ka rin ngai loh leh a nawm ka rin lohna zawng zawng te chu zanin hian thiahin a awm vek ka ti thei hial ang






Saruak vekin a hmaah chuan ka mu a, ka taksa te chu hriatchian tum ni awm takin a en kual den den a; lungawi hmel zetin a nui leh suk thin bawk, "A na mai thei aw i inring em?" Min ngaihtuah hmel zet a a tih chuan chhan nan tha ka nei tawh lo a maw ni tih mai turin ka tawng thei tawh lova, men pawh ka meng thei tawh chuang lo. Ka rilru fim lo zet leh tuna nawmna vawrtawp ka chan mek hi a reh ka phal loh vang te pawh a ni ang





Ka hmuiah chuan rawn fawp lehin ka sam ka hmaiin a khuh chu hui kiangin ka bengah min zeh sak a, ka hnute chu tham lehin a fawp a chumi zawh chuan ka chhungah zawi muangin a ti lut chu ka ip nghal chawih. Ka harh nghal kawkin ka hria, a na lutuk chu ka then nghal chawt chawt a ka mittui a luang nghal ngiai ngiai bawk





"A na mi?" Inthiam loh hmel zet a a tih chuan lu ka bu nghat a, ka mittui luang chu duat taka min hruk sak pahin "A na rei lovang" a ti a, keipawhin a tih ang ang chuan ka dawh mawl tawp. A duh tawk chen a hmuh hnuah ka sirah chuan rawn mu ve nghalin a lamah chuan min pawt hnai salh a, min kuah pahin ka chalah a fawp nghal vawng vawng bawk





"Ka hmangaih che" a ti sup a, ka chhang lo. Chhang turin chakna leh tha reng reng ka nei tawh lo, ka mit ka chhing tlat a, a nat lam chu thuhran nise ka zah thar thut avangin Luca hmel ka en ngam lo a tih theih ber ang chu. "Ka va inbual ve lawk ang e" a tih chuan ka lu ka buk khum nghat a, min kalsan hnuah pawh ka awmdan ngai ang chuan ka la awm ta reng a, ka chesawn peih thlawtlo a tin ni





Reilo teah bathroom atang a rawn chhuak leh nghal vat a, boxer ha in a chungah engmah a ha lo thung; engmah ka la inbel lo tih a hriat avangin kawr chu min hak tir leh te te hnuah ka bulah chuan rawn inthawlh ve nghal zatin min kuah leh nghal hlu hlu a, "Tun ang hun hi ka nghahna a rei tawh lutuk" ti supin ka bekah a fawp leh a, ka chauh em avangin ka chhang peih tawh thlawtlo





Zing ka harh chuan sana ka en vat a, dar li(4) chauh a lo la ni chu hma ka ti ang reng viau; mo thar tuka thawh tlai ka hreh em avangin ka mu nghet meuh lo a tih theih ber ang chu, mut tha leh dawn ila thawh ka hai ang tih ka hlauh avangin mut leh ting tang ai chuan thawh tlang ka tum ta zawk a, Luca tih harh hlau zeta dim te a thawh ka tum chu a lamah min pawt phei nghal dawr chu ka phu chiam leh nghal





"Ka ti harh che mi" tiin ka zawt vat a, lu thin pahin "La tho lovang a la hma lutuk" la meng chuang hauh si lova tiin ka thawhsan hlau ni awm ang hrimin min kuah nghet nghal sauh chu ka nuih a za ang reng "Ka mut leh chuan thawh ka hai ang tih ka hlau a bakah mo tuka thawh hai nghal chu a tih chi dawn loh emai" ka ti niah niah chu a ngaih pawimawh hmel fahran lo khawp mai





"Min thlah te ka tho duh a nia" ka tih chuan a chesawn duh eih lo leh nghal "An hrethiam em em ang che, hlauthawng vak duh suh" ngaihsam zeta a tih leh avang chuan ka thawchhuak hak. Eng ang pawhin tal tum mah ila ka thei dawn lo tih ka hriat chian em avangin ka mu leh ta ringawt chu a nia






Luca nen kan inneih atang thlakhat lai a lo liam ve ta reng mai, a ni pawh kan khaw lamah an transfer a; "Engkim ka lo buaipui vek ang?" Tiin a hma khan min hrilh a, an sawn ve hrim hrim nge a in sawn tir tih zawh ka tum lahin min chhang tha ngai lo miah lo leh nghal





A û chiah pawh helamah a rawn awm chho tawh a, Ebenezer Hospital ah a thawk tawh dawn a nih hmel; keini pawh kan inlamah kan awm a, ka nu bulah kan sawi lawk bawk si lo nen kan thlen tirh phei chuan mak a ti ngang mai. Engkim chu ruahman sa ang thlapin a awm a, kan thlen atangin ka nu pawh hmuh a nuam viau bawk





In lamah lo awmin a tul ang ang chu ka nu nen kan ti a, Luca erawh a buai thei hle thung. A phunnawi ngai lova, ka awmdan min hriatthiam em avangin ka tan engkim min tih sak a; mahni in a awm thei reng si kha kan khuaah ka nu bulah ngei min awmpui a, keipawhin nupui tha tak nih tumin ka theih tawp ka chhuah a







Ka thiam ang angin ka duat ve hle thin bawk. "Ka duat leh chak tawh che a nia" zan mut dawn apiangin a ti ziah a, nuih huah huah pahin "Zanin chu ka chau a nia, awl rih ila" ka tih apiangin nur nanga min melh pahin "A theih loh" a ti ve ziah leh nghal a, a tawpah kan hmang leh nge nge zel





"Luca..." Ka tih chuan
"Immm..." Tih chauhin min chhang a, min kuah pahin mit a chhing tlat thung





"Naute hi lo pai thei lo ta ila min kalsan angem" ka tih chuan amah ka hmuh theih nan min kuai her nghal lawp a, a kut pakhat a beka dawm pahin pakhat zawk erawh chuan min la kuah reng thung. Mit tih zim sun pahin min en reng a "Ka kalsan che i ring em?" Ti a min zawh chuan sawi tur ka van leh ta khawp mai






"Naute vang chauha duh turah che min ngai a mi?" A ti leh zel a, lu ka thin khum nar nar thung. Nui sukin ka sam ka hmaiin a zar buai chu ka benga min zeh luh sak pahin "Nangmah hi ka duh ber, nau kan nei thei emaw thei lo emaw pawh nise ka kianga i awm chhung chuan ka kalsan ngai lovang che" a ti a, ka nuih nghal sen sen mai






"Thu tiam chu thu tiam, Joni anga min kalsan ve loh chhung chuan i tan ka rinawm tlat ang" ti lehin ka chalah a fawp nghal vang vang a, min kuahna atanga awm hrang nghal vatin amah chu phawk zetin ka en ha a "I la hre reng maw?" Ti a ka zawh chuan a bu nghat a "Dawn lawm ni" ti lehin a kiai zui suk bawk





"I theihnghilh daih tawh ka ring a" ka tih chuan a chal a ti chuar tap a "Thu ka tiam tawh ka sut ngai lo" bung zet a a tih chuan a thinrim emaw ka ti hman hial a ni "Mahse i bialnu..." Ka ti dek dek chu rum nghutin min lo pawt chat nghal vat a "Ka bialnu a ni ngailo" a ti hluk chu ka nuih a ti za ang reng khawp mai






"In in zui nasat ve em kha" mit ko san ak paha ka tih chuan mit tih zim sun paha min enin "Sawi tawh suh" ti leh hlukin leh lam a hawi ngat a, a duh lo ve hle chu a ni ngei ang. Min hnungchhawn zawng a mu a nih avangin a hnung lam atang chuan ka kuah a "Mahse a hnenah khan lawmthu hrilh ka duh a ni" ka tih chuan rawn hawi let leh nghal vutin hriatthiam lo hmel fe in min en a, ka nuih seih thung






"Nang ka neih theih phah che a" ka tih chuan thinrim hmel a pu leh tawh lo, min nuih suk pahin min kuah a "I danglam bik em avang hian lawm ka kalsan theih loh che" a tih chuan ka nui ta hak hak. Hetiang ang reng a ka hlim hi ka la hre lo, ka pasal a ni angem tih pawh ka rin phak ngai loh kha tunah chuan ka pasal a nih tawh mai bakah a bula ka awm reng thei hi ka hlim tak zet a ni





Kar tawpah Luca te in lamah kan haw thin a, kan haw apianga ka nu in beiseina mit meng nen a min en thin hi chu hrehawm ka ti ru tak zet thin; a sawi dawt bik lova mahse a mit meng atang erawh chuan nau ka pai leh pai loh hriat a chak thin hle tih ka hre thung. Tlai khat rawng kan bawl dun laiin a sawi chhuak ta reng a "Hlute thu thar hriat tur te a awm tawh em?" Min nuih sang pahin a ti a






"Eng lam nge ni ta?" Hre reng mah ila hriat loh der ka thlang zawk tlat "Naute lam mawle" a tih chuan ka ip nghal chawihin ka hria; thla hnih a ral leh hnuah pawh ka in test ve thin a mahse chutiang awm lam reng reng erawh hriat tur a la awm lo chu kei ngei pawh hi ka mangang ru tawh tak zet






"La pai chiah lo" then khum sak paha ka tih chuan a bu ve nghat a "A la hmanhmawh thlak hleihnem tiraw" ka rilru dam nan ti mahse a mit meng erawhin tu a neih chak tawh zia min hmuh fiah tir tlat thung bawk si. "Pathianin hun a tihah chuan kan nei ve mahna" ka tih chuan "A dik alawm, in entir ve hrim hrim la... Ka rinhlelh vang che ni lovin in check chian tir ve hrim hrim pawh hi a tha a nia" nui sang chunga sawi ni mahse dawnsawn erawh nuam ka ti chiah lo






Zanriah kil laiin ka nu bawk chuan a rawn sawi chhuak leh a "Bawiha gyne ah hian in entir ve renh reng teh u a, that lohna in nei ka tihna ni lovin nau in pai har riau a; tu hmel hmuh kan lo chak ve tawh bawk nen va in check tir ve reng reng teh u a" a tih rualin Luca chuan min rawn en nghal vut a, keipawhin ka lo en ve chiah bawk






Ka nui lova, ka thinrim chuang bawk lova mahse ka hmelah chuan nuam ka tih loh zia a hriatthiam ve ngei ka ring "A ngai ka lo ti vak hleinem" dam thluam a a tih chuan "In check tir ve hrim hrim ru, engnge in dinhmun pawh hriat tum ve reng reng ula" a ti a, sawi mai mai chu a ang tawh hauh lo






A turin min tur a tih theih tawh ber ang chu, hawi pawh hawichhuak ngam tawh lovin ka chaw bih ngar chung chuan ngawi rengin ka bar mawlh mawlh a; ka lo hmuam nge ni tur a ni ka hak nghal bawrh bawrh chu ka hnunga min chum sak pahin tui chu min in tir a, zan in ang reng a ka zah leh hrehawm ka tih hi ka la hre lo





"Hmanhmawh lo ula a hunah chuan kan nei ve mai ang" tiin hrilh ve bawk mahse ka nu chuan a tih tlat avangin a tuk lamah in entir tur chuan kan kal dawn tho a nih hmel, khuma kan mut hnuah ka ngawi reng a; nichin maia ka thil tawn avang khan tawng pawh ka tawng peih meuh lo a tih theih ber ang chu





Zantin deuh thaw hmang ve thin mah ila nau ka la pai lo hi kei ngei pawhin mak ka ti a, keimahah chuan that lohna a awm a nih ka ring hial tawh zawk reng a; ka nu sawi ang khan in entir ve hrim hrim pawh chu pawi ka ti ta bik chiah lo "I va ngawi thei ve, ka nu thilsawi vang khan a mi?" Min ngaihtuah hmel zeta a tih chuan lu ka thin khum ringawt a






Min rawn kuah ngheh sauh pah chuan "I rilru tihah lo la, a hunah chuan kan nei ve mai ang ka tih tawh kha. Kan pai thei ta lo a nih pawhin a pawi lo a nia ka iai phah lo che tih hre reng ang che" tih pahin ka chalah a fawp zeuh a, ka thenkhum sak thung





"Zantin deuh thaw kan hmang ve ziah a, tichunga ka la pai thei lo hi keipawhin mak ka ti ve tho mahse ka nu leh zelin min nawr reng a nih chuan ka tan a hrehawm tur zia i hrethiam lovang" ka ti a, ril leh thuk zeta min en vang vang hnuah "Tu hmel hmuh vat vat an chak tawh vang a nih kha, ka nu thusawi te chu engah mah ngaihsak duh suh. A rilru a a awm lai hian a sawi a mahse a hre rei ngai lo a nia nakinah chuan a theihnghilh ve vat mai ang" tiin a thiam ang tawk chuan min hnem ve bawk mahse hrehawm ka tihna a nep phah chuang hauh lo






A chhan chu kei ngei pawh hian nau chu ka awt ve tawh bawk em a ni. A tukah chuan kan in entir ta ngei a, keimahah chuan harsatna ka nei loh bakah engkim chu a tha vek a mahse Luca erawh a chi a chak vak loh thu a sawi thung; damdawi te min chawh bakah a tam thei ang ber nupa nun hmang turin doctor chuan min hrilh a, keimah zawkin harsatna ka neih loh avang chuan thawk khat chu a veng ve deuh






"Engnge chanchin?" In kan luh rualin ka nu chuan a lo ti nghal var a "Hlutei hi chuan harsatna a nei lo, keimah zawk ka chi a chak loh vang zawk a nia" tiin thu awmdan vel chu Luca chuan ka nu chu a hrilh nghal mawlh mawlh a "Tih dan te a awm em?" Ti a a zawh leh chuan "Damdawi te min chawh nual kha, ka ei that chuan kan nei ve thei mai ang" dam thluam a a tih chuan ka nu pawh a bu ve nghauh nghauh mai






Kan inlamah kan haw leh tawh a, a ngai te ang bawkin Luca pawh a hna lamah kar laklawh hi chuan a buai thei em em a; ka nu nen inah lo awmin ka theih ang angin ka pui thin a, ka hmel a lo ngui deuh nge ni a chhan min zawh chuan engmah a nih loh thu in ka hrilh ve mai a





Mahse min hringtunu na na na chuan min lo hrechiang ngang mai "Zep i nei lo tak tak maw" a tih chuan ka thawchhuak hak a, hrehawm ka tih zia chu ka thup seng tawh bik ngang lo "Naute ka la pai thei lova" ka nu bula ka tih chuan "I hmanhmawh a nih kha, hmanhmawh lo la engkim rel fel thintu hnenah inhlan tlat thin la a ni'n rem a tih hunah chuan a pe em em ang che u" dam dap a a tih chuan ka hnuk a ulh nghal ringawt






"Aizawl a kan haw apiangin ka nu hian min zawt reng thin a, thu thar engmah kan la neih loh thu hrilh reng pawh hi hrehawm ka ti; tu hmel hmuh an chak thu an sawi reng bawk si a" ka nu bula ka sawi chuan ka chhungril ipik na leh hah hi a reh ka rin ve deuh avanga hrilh ka ni. "Dem chi pawh an nih loh chu, keimah ang chiahin an ni pawhin tu hmel an hmuh ve chak tawh vang a nia" a ti leh a, ka nu bik thin hi chu aw tumah a tur ve ngai loh bakah engpawh ti ila kan duhthlanna a ngai pawimawh ziah zel hi ka ngaihsanna lai tak pawh a ni






Nitin ka nu chuan min fuih reng a, tawngtai tam turin min ti ziah bawk; Luca pawhin naute a awt ve tih ka hria keiman harsatna ka neih loh avangin a sawi chhuak ngam lo zawk ni berin ka hria, zantin damdawi a ei zawh hnuah nupa nun kan hmang thin a. A chang phei chuan ka ning ve lek lek zel, ka beidawnga nah nei ve thei lo turah ka in ngai hmiah tawh






Dinmawii pawh helamah a awm tawh bakah helamah dawr a nei tawh thung a, a ni chu a buai ngaiin a la buai reng a; Lawmawma nen pawh an la inzui tluang zel chu ka thinlung takin ka lawmpui tak zet, a chhan pawh a hmangaih ber a chan tawh a, hmangaih dang a neih leh theih tawh a rin loh laiin Lawmawma a a tawng chu phat rual lovin ka lawmpui tak zet a ni





A khat tawkin an rawn leng thin a, a hma ang chuan rei tak an rawn leng tawh bik em lo; in a awm ngawr ngawr ka nin chang chuan a dawrah ka leng thin a, hman leh lutuk chuan tih tur a vang a thil hrim hrim hi ninawm a chang hma thin chuvang chuan buai deuh a awm nuam ka ti zawk






"Nau lam te hi in pai ve tawh em?" A dawra lengin tih tur awm chu ka tihpui a "Sawi lo mai teh, ka beidawng tawh" ka tih chuan a ner nang a "Ngati maw" ti a min zawh chuan thil awmdan chu a thu phungin ka hrilh a, lu buk nghauh nghauh pahin "I beidawng hma emai, mi mah an pai theih loh pawhin pai dan kawng zawngin kum tam tak hun an seng ral alawm mawle, kum khat(1) em pawh inla inneih loh hi, nghak la a hun takah chuan i nei ve mai ang" a tih chuan ka pawmpui zawng tak a ni






Ka nu tu hmel hmu chak tawh lutukin min nawr sek avangin hrehawm ka ti a, ka rilru a hah hman reng a nih kha; mahse ka nu (keima nu) leh Dinmawii'n thiam taka min hnem takah chuan ka thawveng huaiin ka hria, kan lo hmanhmawh lutuk vang te pawh a nia nga a nghak peih apiangte chuan a tawpah hlimna an chang thin tih a nih kha chuvang chuan hmanhmawh lovin engkim rel fel tuin hun a tihah chuan min pe ve mai ang






Tih nek nek chhungin kum a liam veleh reng tawh mai, nau erawh kan la pai ta lo fo a; rilru hah chang leh hrehawm tih chang nei thin mah ila Luca hmuhah tih lan ka duh lem lo, amah vanga a ngaih chang a tam bakah ka chungah te thleng chuan inthlahrun chang a ngah a, nupa nun pawh kan hmang khat viau mahse chutih rual erawh chuan kan hlim loh phah chuang lova kan hlim reng tho






Kan nupa inkar a tihbuai phah loh avang erawh chuan ka lawm zawk khawp mai, mi tam tak chuan nau an pai theih loh avangin an nupa kar a chhiat bakah inthen phah te pawh an awm chawk a; chutiang ni lova kan la that reng avang chuan Luca pawh ka duh zual bakah ka hmangaih zual phah sawt bawk





Tlai khat ka nu nen a rawng kan bawl laiin ka nu bai siam chuan ka luak tichhuakin vawi leh khatah ka pum chu a in let nghal but but a, bathroom lamah tlan phei nghalin ka uak tuar tuar na chu luak chhuah tur a lawi ka nei lo thung a; ka awm chu a nawm loh bakah ka lu a hai mual mual reng chu ka hrethiam lo ang reng viau mai






Zanriah kan ei lai pawhin bai rim chu ka haw tlat a, ka pum a in let leh nghal but but chu insum a hrehawm tak zet; ka ti thei ngang lo chu ka kham san a, ka zawi ngiai bawk nen mu turin kan pindan lam ka pan ta ringawt a, engmah ka ei loh avangin ka ril chu tam hle mahse tho leh turin ka lu a hai tawh lutuk tlat






Ka awmdan dik loh em avangin reilo teah ka nu chu a rawn lut a, harsatna ka neih leh neih loh min zawh chuan ka awmdan ka hrilh chuan a nui ta ver ver chu ka hrethiam lo ang reng viau a; zawhna mit menga ka en chuan "Nang hian nau i pai tihna a ni thei em" a tih chuan mak ka tih lutuk avangin ka hau ringawt a






Kum khat chuang kan nghah tawh hnuah ka nau pai thu min hrilh chuan awih a harsa ve tak zet, "I hre sual a ni ang" ka tih pawha a inringtawk lutuk chuan min ti hrilhhai tak zet "Tunah khan eng thu nge in sawi kha" Kawngkharah Luca chu a lo ding reng a, kan thusawi a hre hman ngei a ni tih hriat tak zetin a awm a "Nau i pai maw?" A tih chuan "Ka la chiang bik lo" inthlahrung zet chuan ka nuih a






LAST CHAPTER





Kan in test ang ngeiin nau chu ka pai ta tak tak a, Luca in a hriattirh pheia a lawm hmel lutuk kha ka theihnghilh theih tawh pawhin ka ring lo; ka nu leh pa (Luca nu leh pa) te pawh kan hrilh hre ve nghal a, a rang lama an lo kal tur thu an sawi a. An ni pawh an lawm ve hle in ka hria, kan nghak rei ngar ngar bawka a tawpah chuan kan pai ve thei ta hram chu keipawh ka lawm tak zet






Naute chu engtianga upa nge a nih tawh tih ka nu in hriat a tha a tih tlat avangin kan in entira, kar li chauha upa a nih thu a sawi bakah indim turin leh in uluk turin thu min rawn nghal chu Luca chuan a la fuh khawp mai a, engmah ka tih a phal meuh lova; hmun phiah a ni emaw ei rawngbawl pawh nise engmah tih min phalsak loh tawp mai chu ka haw ang reng khawp mai





A hna ban apiangin eitur chi hrang hrang min rawn hawn bakah naute tana tha tura an tih apiang chu min leisak thin a, ka ei sen loh zawk hial a ni a rawn hawn thin ni; "Nangmah vang liau liau in tunah chuan pa ka ni ve tak tak dawn ta" tiin ka chalah a fawp vang vang a, ka lo nuih ve seih bawk





Dinmawii te pawh an rawn leng awl lova Luca in hnathawh min phal sak loh miau avangin ka tan chuan room a inkhung chawrh chawrh chu a ninawm ve tak zet a, chutia ka khawhar min hnem tura an rawn leng thin pawh chu a zia tak zet; "In pa hi chuan a duat ve ngawt mai che, pasal ka neih hunah ka pasalin min han duat ve lo na teh se a hre ve viau ang" Lawmawma melh ralh paha a tih chuan a hmui a lo pet sawi duh lek chauh chu ka nuih pui huah huah a






Ka nu leh pa te pawh an rawn phei tawh a, Pathian hnenah lawmthu sawina te neiin chhungkaw chaw eikhawm an rawt leh bur tawh a; ka zak ang reng viau na chu "Beidawn hnua Pathian pek che u a nih avangin lawm in phu ve hrim hrim" an tih tlat avangin chhungkaw chaw eikhawm chu kan kal tlangpui dawn a nih hmel





Hnathawk lo na na na chu ka thau chak khawp mai a, ka kawr neih sa ho pawh ka ha tawk mang tawh hauh lo chu ka lungawi lo ru ang reng khawp mai; naktuk mai chu Dinmawii te inneih ni a nih tawh avangin kal ve ngei ka duh bawk si a mahse ka kawr neih sa te lah chu a mar vek bawk nen ka phur tawh lo khawp mai






Room a Luca rawn luh rual chuan nur nang a en pahin "Min en teh tiangte chuan engtin nge naktukah inneih naah ka kal ve theih ang, hak theih pawh ka neih tawh lo hi" ka ti nang nang a, nuih hawk hawk pahin "Engpawh ha la i nalh vek alawm" a tih chuan ka ner nghal nang mai






"Engpawh ha turin pakhat mah hak tawk ka nei tawh lo, nang chu mopa thianpa ah i tang ang a nalh takin i kal ang a; kei ve chu ka thau bawk si ka vung nasa bawk si, mi hmuhah engtin nge ka awm ngam ve ang" tiin khumah chuan thu tau nghal sawkin ka tum nghal bar bawk






"Pa ka nih tawh hi, mopa thianpa pawh ni mah ila ka fa pai mek tu ka nupui bak lo chu duh dang ka nei lo" nuih suk paha a tih chuan ka melhrum nghal ram ram a, "Naktuk chu nangmahin kal mai rawh, ka kal ve lo mai ang" ka tih chuan mit tih zim sun pahin min en a, keipawhin ngawi rengin rum zetin ka en ve kal bawk






"I kal ve loh chuan i thiannu rilru i tih natsak dawn asin" a tih chuan chutiang lam reng reng chu ka lo ngaihtuah tawh lo reng reng, ka thau vangin ka thiannu reng hrechang tawh lo lek a ka awm chu ka inthiam lo leh hnuhnawh khawp mai; "A nih chuan hak tur ka nei si lova" ka tih leh chuan kiai sukin "Vawiin chu bazar kan ngai dawn tihna a nih chu" a ti sup a






Kan bazar ta ngei a, kawr hak nuam tak tak kan lei bawk a ti hi chuan tlemin a zia ve ta deuh; a tuk a lo thlen chuan inneihna a kal turin kan insiam mawlh mawlh a, nimin maia min leisak kawr a mawi ka tih ve ber chu ka ha a, ka pianah duhthu sam chiah lo mah ila hak tawk ka nei tawh chu ka lawm tawk viau





Inneih inkhawm zawha thlalak lai te chuan hmuh an nuam hlawm tak zet, ka lo tawn ve tawh a nih avangin a hahthlak tur zia chu ka lo hriatthiam pui a; mi hriat loh tura Dinmawii then leh chak chak thin chuan ka nuih a tiza khawp mai, ka ke a vun nasat avangin ka ding reng thei lova chuvang chuan an piah lawk thut naah chuan thuin an mahni chu ka thlir ve pah reng bawk a





Ka ke kham lutuk chu chum tarh tarh pahin an zawh hun thleng chuan ka lo nghak ve reng a, an zawh meuh chuan ka ning hman tawh kher mai; Luca chu ka lam panin a lo kalin min nuih suk a, keipawhin ka lo nuih let ve seih bawk "I ning tawh em?" Ti a min zawh chuan lu ka thin khum ringawt a "Reilo te lo nghak leh lawk rawh aw, a rei tawh lovang" tiin ka chalah a fawp pah zeuh bawk





"Ka rei tawh lovang" tinawn leh supin Dinmawii te awmna lamah a phei leh nghal a, tleirawl leh nula chhelo tak tak te hovin Luca an biak te chuan a chhan sawi tur em em hriat si lovin ka thin a lo rim hlur a; Luca bula an awm lai te chuan nui sangin a lo be thin a, ka duh lo hle chungte hlei hlei chuan Luca chu min huat tir dawn dawnin ka hria






Ka bula a lo kal tawh hnuah pawh be duh lovin ka tum khum bar reng a, a hmel ka hmuh ringawt te pawh chuan ka luak a tichhuak hlui theiin ka hria; "Lungawi lohna i nei a mi?" Ti a min zawh pawh chuan chhang duh lovin ka hawi san hmak zel a chu hriatthiam loh hmel fe in min lo en thung





Lawmawma te ina a Dinmawii a lawi luh hnu thleng pawhin ka be duh lo chu a ngaihna a hre lo tak zet tih hriat takin min en leh ha thin a, "Lawma kan haw phawt ange, Hlutei hi a nuamsam chiah lo bawk nen min hriatthiam mai a ngaih hmel" a darah ben thak thak pahin a ti a, a ni pawhin hriatthiam hmel zetin a lo bu ve nghauh mai





"Va haw tawh rawh i chau lutuk ang, in thenawm maia ka rawn lawi tawh bawk a a hma aiin ka rawn lang ngun ngawt ang" nuih huah huah pahin Dinmawii chuan a ti a, nuih let ve seihin "Min hrethiam dawn nia, ka chau tawh lutuk a" inthlahrung taka ka tih chuan a ni pawhin min hrethiam tak zet tih lantir nan a lu a bu zeuh bawk





Kan mut hnu thleng pawhin ka la be duh lo ta fo chu a ngaihdan a ni chiah tawh lo a ni ngei ang, a lamah chuan min kuai herin chik zetin min en a "I lungawi loh chhan chu sawi la, khatia ngawi renga i awm a nih chuan engtin nge ka hriat ang" dam thluam a a tih chuan "Khang tleirawl leh nula chhelo tak tak bula nuih thaw kha a ngai a mi" ka ti bak hlar chu a ngaihna hriat loh hmel zetin min en a





"Hriat loh der vel kha a ngai lo thlalak lai kha nih chu ka sawi" ka tih leh chuan a nuichhuak ta hawk hawk a, keimah zawk chu a awmdan chun min ti hrilhhai letling zawk daih mai; "Tunge chhelo i tih chu ka hre ve hauh lo, nang tih loh chu hmeichhe dang zawng zawng chu zikhlum leh parbawr hmuhin asin ka hmuh" a tih chuan ka ner nghal sak a, "Over lo mai teh" ka tih chuan ka hmuiah a rawn fawp nghal a, thinrim viau e ti lo chuan ka chhang let veleh nghal vat





Tih nek nek chhungin nau ka neih hun pawh a hnai tawh tak zet, ka pum puar luah leh kawh vu mai chu darthlalangah enin ka chul ka chul a; a hma kha chuan ka cher ve thei thin khawp mai mahse tunah chuan vawkpui ang maia thau ka ni tawh. Ka ner leh sak thin chu Luca chuan min lo hmu a ni ngei ang, a nui leh hawk thin a





Hnuchhawn zawnga ding ka nih avangin ka hnungah chuan rawn dingin min kuah a, a kut pahnih chuan ka dul chu a chul zui nghal hauh hauh bawk; "I mawi tak zet" ti supin ka bekah a rawn fawp zeuh bawk a, lo nuih seihin "Engtin nge a hmel a awm ang le?" Ka tih chuan ngaihtuah neih hmel zetin a ngawi rauh rauh a





"Hmeichhia a nih chuan a nu ang maia hmeltha leh chhelo a ni ang a, mipa a nih chuan a pa angin a sang a mahse hmelah a nu a chhun tho ang" nuih suk paha a tih chuan "Awi i sawi uar mah mah lo maw" nuih hak hak pahin ka ti a "A nu nihna chiah ka sawi a, kan fa lo piang tur pawh hi a nu ang chiahin a hmeltha ang tih ka chiang ani" a ti leh chuan ka lai chhe leh nghal derin ka hria





"Kei chuan min chhun lo se ka ti, a vai hian a pa chhun se; hmelthat naah te, piannalh lamah te, engkimah" uar fe a ka tih chuan nuih hawk hawk pahin "Ka fa lo piang tur nen ka hmangaih che u" tiin a lamah chuan min kuai herin ka chalah chuan a fawp vang vang a, "Keipawn ka hmangaih che" ka tih chuan khi sukin ka hmuiah bawk chuan min fawh zawm leh nghal a






Kan duh tawk chen kan infawh hnuah min thlah mai lovin a chal chuan ka chal la sik tir reng chung siin "Ka nupui i ni lovang tih ka hlau ta ber mai" a ti sup a "Kei fe hian ka pasal i ni lovang tih hi ka hlau asin" ka tih chuan in enin kan nui dun ta hak hak a





Damdawi inah kan lut tawh a, zan hmasa lam atangin nau ka vei tawh a; a hrehawm tawh tak zet, ka kawng te chu a tliak thei mai dawnin ka hria. A na a rawn chhuah phei chuan mittui kan khap per sak sak thei maiin ka hria, ka nu in min awmpui ve bawk mah se Luca pawh a bang bik chuang lo






"Ka hnung chul pah chuan i tha leh vat dawn nia, kan naute lo piang tur tan theih tawp han chhuah teh" hah hmel zeta a tih chuan ka nuih a za viau na chu ka nui hlei thei der lo, ka neih hun a hnai zela a na pawh chuan min tur et et ka ti dawn nge sawithiam vak ngaihna ka hrelo, a na hi a ni tawp





Doctor ten nei tura min tih dar zat a lo thlen chuan nau neihna room ah min nawr dawn lai chuan Luca chuan kal ve a chuh tlat a, a kal ve theih loh thu hrilhin pawna lo nghak tura an tih pawh chuan a duh lo chu min chelh ding ve reng bawk nen; chutah lah a na tawh lutuk chuan Luca zawk chu ka ngei hial a ni





"A luh ve theih loh an tih mawlh mawlh kha" ka ti vin hlur a, a hrehawm tawh lutuk chu luh vat vat ka duh tawh vang pawh a ni pakhat; "Mahse..." A tih leh chuan thaw hakin thei leh thei lo chuan "Min kal tir tawh rawh, a na tawh a nia" seh chilh naka ka tih takah chuan hreh tih hriat takin min thlah ve ta hram






"Sang rawh, a lo chhuak tep...tlem han sang leh teh"


"Aw hei a lu a lo lang tan, thawk la hmasa leh phawt la chumi zawhah han sang leh vak teh"



Reilo teah naute tap ri ka hriat chuan ka hahdam huaiin ka hria, ka thi dawn a maw ka ti hman hial a ni; ka naute ka bula an rawn dah chuan ka na te zawng zawng kha vawi leh khatah lak bo sak ang maiin a reh nghal duakin ka hre bawk





Fapa duhawm tak Pathianin min pe a, a hmeltha in ka en ning thei thlawtlo; a pa ang chiaha hmeltha a ni bawk. Min nawrchhuah lai chuan Luca chu ka bulah a rawn tlan phei vat a, ka bula mu naute a hmuh chuan vawikhat mah ka la hmuh ngai loh a mit atang chuan mittui luang ka hmuh chuan lungngaih vang ni hauh lovin lawm vang a ni tih ka hriat avangin keipawh ka hnuk a ti ulh khawp mai





Ka chalah fawh zeuh pahin "Ka lawm e, fa duhawm tak min hrinsak avangin" a ti sup a, ka chhang lo na in ka mit atang mittui a luang thla ve ngiai ngiai bawk. Ward a min sawn hnuah ka chauh em avangin mutthilh ka duh viau na chu naute hnute pek a ngai a, kan zei lo lulai khawp a ka nu chuan a tihdan tur min hrilh pah zelin amahin a ti zel a, chu chu ngun takin ka lo en bawk





Luca chuan naute chu a pawm reng a, hnute pek tura laksak pawh a inthlahrun thlak rum rum hial a ni; naute hnute ka pek lai te chuan hmuhnawm tih hmel zetin a thlir dauh dauh chu a hmuhnawm piah lamah nuih a ti za ang reng khawp mai "Khatia i en reng chuan naute hi a zak lutuk ang a sin" nuih hak paha ka tih chuan "A te reuh lutuk, tihian a kim ve biai bawk sia a hmuhnawm tak zet" a tih chuan ka nui hak hak





"A pa a chhun a a hmeltha a nih hi" ka tih chuan a chal a ti chuar tap a "A nu leh a pa a chhun kawp a, a hmeltha a len hunah keimah ang chiahin a la luck ve ang" a tih chuan rum zetin ka melh nghal hrawk a, a nui nghal hawk hawk thung. "Han lerh vaih teh se, a mawngah ka vaw er zawt zawt mai ang" ka tih chuan dar chhin uk pahin "Hauh ka phal dawn lo nasa" uar fe a a tih chuan ka nui ve tak hak hak





Damdawi in atanga kan chhuah hnu thleng pawhin amah chuan naute chu a pawm reng a, ka nu pawm chhawk tir ve lawk tura kan inhnial hrep hnuah a pawm tir ve duh chauh zel chu chum chawrh ka chak thin; chhia leh tha a hriat hma atang hauha tianga a duat a nih chuan thil a hriat theih hun tur chu ka huphurh lawk tak zet





Kan fa hmasa ber a nihna angin ka nu leh pa te chuan ka nu(keima nu) chu hming phuah sak turin an ti a, rei fe a ngaihtuah hnuah "Rei tak kan nghah hnuah kan lawmna tikim turin a lo piang a, chu mai pawh ni lovin hlim na tam tak min siam sak leh zel avangin a hmingah Lawmsangzuala ka phuah e" a tih chuan tupawh mai chuan hnial kan tum lo a ni ngei ang





A hming chu a nalh kan ti tlang a ni ang, kumkhuaa pu hlen turin a hmingah Lawmsangzuala ka nu min phuahsak ngei mai chu lawm takin kan pawm tlang a, a nu leh pa te beidawn hnuah an hlimna siam sak tura a lo pian ve hrim hrim avang pawh hian duat chu a phu ve reng a ni





Kum a ral leh meuh chuan chhaih tham a lo ni ve tawh a, an pafaa khuma an infiam lai han hmuh te chuan lawm lovin kan lo nui leh var var thin; hauh a hre tawh em em a,bawk hau hlek ila la tawng thei mang si lo hi a pa bulah bawk vak pheiin min rel ni awm tak hian tap chunga a rak ve nawk nawk thin chu nuih a zat rualin ka haw lek lek zel





"En rawh, i duat lutuk a tawng a thiam hma hauhin min zualko zet zet tawh kha" tum bara ka tih chuan a lama min pawh hnai pahin min kuah bet nghal thlawp a "Nu ber a titau leh dawn a nimaw" nuih suk paha a tih chuan ka lo ner nang thung. Zantin hian ka sawi ve ziah a, a duat zual phah sauh emaw tih mai tur hian a awm thin chu ka ngei tak zet bawk





An pafaa an awm dun tawh chuan ka awm ve tih hrechang lek lova an awm thin chu a chang phei chuan ka fapa chu ka thik lek lek zawk hial a ni, ka tum bar tawh hi chuan Luca a buai thei em em thin a; min thlem a tum vat vat thin chu min hriatchhuah awmna chhun a ni ka ti thei hial ang chuvang chuan ka titau reng zel bawk





Ka nu pawh ka niin a awmpui a, keini pawh Aizawl lamah ka nu chu kan haw san tawh a; khawi hmunah pawh awm se pi leh pu duattu tur a nei chu a lawmawm rual rualin an duat sual mawlh ang tih ka hlau thin a, naupang duat leh lutuk chuan kan ti luhlul zo thin bawk nen keimah zawk chu ka lo hah hlui thei





"I ngaihtuah leh lutuk a nih kha, a sual lovang naupang fel tak a la ni ngei ang lo ngai reng mah rawh" tiin Luca chuan min hrilh ve thin bawk mah se, zawm erawh a har viau thung. Kar tawpah leh hman chang apiangin ka nu tlawh turin kan zin thin a, kan fapa pawhin a pi chu a lo la hre thei hle thin a; a pi nen an awm dun tawh hi chuan eitur an in pek reng bakah thawnthu an inhrilh thin a





Ka nu pawhin a hlimpui ve tak zet "I pa kha chu la dam se chuan aw, a tupa hmeltha zet hi a lawm ve ngei awm si a" kan fapa en chuan a ti vang vang a, a mit chu a hru pah zeuh bawk "A duat ve ngawt ang, hetah kan bulah awm tawh lo mahse a ni chuan van atangin min rawn thlir ve reng thin ang a, kan hlim tih a hriat chuan a ni pawh a hlim ve viau ang" ka tih chuan a bu nghat nghat a, "Tu hmel kan hmu ve ta der chu a nia, kan lo upa ve ta hle mai" a tih chuan ka nuih sen sen





Tunah chuan kan fapa duat em em Lawmsangzuala, a ko duat nan han ti ila hmingpum lo deuha kan koh thin danin Lawmzuala pawh kum li(4) lai a lo ni ve ta reng a; naupang harh vang tak a nih bakah a fing em em a, thil ho te te a ni in a zirtir chu a tukah theihnghilh miah lovin a sawichhuak nghal thei chu mak ka ti hle nain ka chhungte erawh chuan mak an ti vak lo





"A pa naupan lai a chhun a nih hi, a len hun chuan a luck viau ang" fiamthua an tih chuan Luca chu chhan awm lovin ka melhrum nghek zel chu dar chhin ak pahin a nui suk duh lek chauh zel a, kan fapa vangin chhungkua kan hlim a, chhungkaw min khaikhawm tu ber leh min ti hlim tu ber a ni bawk





Tunah chuan Lawmzuala nau tur ka pai leh mek tawh a, Luca chuan a hma ang bawkin indim turin min ti ve bawk mahse a hma ang em em kha chuan a thu ang diak diak chuan ka awm tawh bik lo; kan inah ka awm tawh lova tunah chuan ka pasal inah ka awm tawh avangin lo awm awl mai mai chu ka duh bik hauh lo





Hahthlak loh te te chu ka ti ve thin a, chhungte hmuhah min hau lo mahse zan mut naah min zilh nan hun a hmang ziah thung; tunah chuan chhungkua tak tak kan din ve ta reng mai, ka hlim a kan awmdan chu story ziak tuin a duh ang thlapa a duan leh remkhawm ang mai a ni





Kan naupan chhiat lai maia kan thutiam tak kha a tu ve ve mahin kan sut loh bakah inhmu lovin hmun hranah awm mah ila kan vawng him reng a, kan len hnu thleng pawhin chu thutiam chu chhawm nung zelin "THUTIAM" a nihna ang ngeiin chu "THUTIAM" chu a nem ngheh nan kumkhua in Pathian leh kohhran mipui hmaah thu kan tiam tawh a, chu chu engtikah mah a chhe tawh ngai lovang






Joni ang lo takin kei chuan Luca ka phatsan ve ngai lova, Luca pawhin min phatsan bik ngai chuang lo; mi pahnih in hmangaihna kha a tirah hrethiam lovin hun kan hmang pawh a ni mai thei mahse chu hmangaihna chu rawn alh zelin hmun hrang hrangah a kang kai zel a, chhem mih theih mai mai theih tawh loh tur khawp hiala chak a ni tawh tlat





Luca ka hmangaihna hi engtikah mah a reh tawh ngai loh tur ang bawkin a ni pawhin min hmangaihna hi engtikah mah timih tir ka phal tawh ngai bawk hek lovang. Hmangaihna chuan a dawhthei a, ngil a nei bawk thin; engkim a tuar hram hram a, engkim a ring a, engkim a beisei a, engkim a tuar chhuak thin





Khang ka lo tawrh tak zawng zawng te kha tunah chuan ka tuar chhuak tawh a, a rah ka seng tak chu hlimna mai piah lam bakah chhungkua ka nei a Pasal min hmangaih em em tu leh ka tana engkim tih huam, leh inpumpek reng thin ka neih bakah fapa duhawm tak ka nei a; tunah chuan a pahnihna ka pai leh mek ka tih tawh kha






Kan hma huna thleng zel tur ka hre rih lo mah ila tunah rih chuan ka tawn chin apiangah ka hlim mai bakah vanneih ka in ti tak zet, a bulpui ber chu ka tana awm reng min kalsan ve ngai lo tu leh a hun taka che thin tlai ngai lo Pathian ka neih tlat vang a ni bawk. Hmangaihna chu engtikah mah a reh ngai lovang





[Promise story chu kan lo zo leh ta reng mai, next story ah kan inhmu leh theuh dawn nia. Ads click, like leh comment kha theihnghilh lo hram ila]