SWEETHEART BY APUII TLAU (Completed)
Posted: November 28th, 2021, 1:54 pm
Zothanpui (POV)
" Ui(Dog) ka duhhhh....mawhhh please please please " in la khawngaihthlak zet chuan ka ti ngher ngher a. Ka dil pa lah chuan melh pawh min melh duh lo in Paper min check san mawlh mawlh thung. Amah hi ui chei bawl in ka chei bawl dawn emaw ni re ru mai.
" Vawiin atang chuan kan chaw hmeh apiang a thak tak tawh ang " ka tih pawh chuan min melh duh hauh lo. Ngam ngawt ila chuan ka nam bu lawp tawh ang mawle. Apa dil dawn ila Anu thu hmu lo chuan min lei dawn bawk silo, Anu lah in phal dawn lo chiang nasa si......
" Mawhhh, Mam an cute teh mai nia, tiang tiat te, a ai te deuh te a chum chi te an awm teuh ania, an hmeltha hlawm si an leih zawh hma in..." zai zir meuh in naupang chhia ang zia zang chuan ka ngeng ngher ngher a. A nui suk duh chauh lehnghal.
" Chaw ei han siam rawh le, a tlai tawh ania" nui suk chunga min rawn en paha tih chuan " Pawnga " ti vak pahin choka lamah ka phei tau nghawng nghawng a. Ka che tau sawk sawk leh thawm dim lo lutuk te chu eng atan mah ngai lo awm ang zia zangin min rawn ngaihven duh miah lo lehnghal.
Chaw ei lai pawh chuan ka tawng duh miah lo a, min be ve luam mahse a rul tawk bakin ka chhang duh tawh der lo. Anu nen hian kan chhungkua ah min duat lo ber, aaaa...ka ning.
Zothanpuii ka ni a, Lunglei government college ah Final sem ni mek in Education subject ka la bawk. Dik tak chuan lehkhazir ka chem kalna ni bau lo a, class - xii thleng pawh tha taka ka pass ve chhan pawh Kimkimi vang chauh ani. Lehkha zir peih deuh kawm chuan lehkha a zir loh theih bik loh a bakah min pui nasa in a pawimawh tura rin min hrilh nasa bawk a amah vang chauh ani ka ti lo thei lo. Byheart lam ah ka chak ve pangngai bawk nen a zia tak ala awm nilo se zawng ka thiannu lakah ka inthlahrung thei ngawt ang, thiam deuh kawm chuan thiam lo bik nih a nawm loh zia chu hrilhfiah pawh ka peih lo.
Lunglei ah hian kan upa ber nen in kan luah a, U Chhantluanga hi kan college ah hian lecturer in a thawk ve mek a, kan subject erawh a inang lo thung. Ka nu leh pa awm lo inlak free tum ve pawh hian ani pui hi a strict re ru reuh sia thawveng over pawn ka awm thei tak tak chuang lo. Bakah enge maw Ui lei chu a duh lo em em le.....an cute theih nen nen.
Thleng ka seng a aniin alo sil leh mawlh mawlh thung. Mipa e ti lo hian inchhung khur ah pawh a chet ngai ngai hi an ti ve mai zel a ka u dang te nen hian an fel ve na ka ti lo thei lo, a hmeichhe awmchhun hi min awl ve tlat zel.
" Miau-pui " Ka room kawngka bul atang chuan a rawn ti dut a. Kan in hi ka pa cousin te inhnuai niin a zim lutuk lo ti ila room hran ve ve kan nei thei a, kan room thlang lamah hian Balcony in zawm kan nei bawk. Choka leh sitting room bathroom pakhat nen a tawk fu ani. College veng a awm niin kawngpui àn ni mahse a reh nuam ruai ruai thei khawp mai.
" Miau-pui, i ti tau ami? " nuih zat hmel zeta a rawn tih leh chuan en duh miah lo in ka lehkha ziah lai chu ka ziak lui ngar ngar a. Miau-pui a tih awmzia tak hi chu kan naupan lai deuh khan zawhte hi ka at chilh thawthang thin kawnglai a ka hmuh te hian ka chawi haw tawp zel a, ka nu hi lo thinrim thei sia mahse kan enkawl ve leh tho zel a rei deuh ah erawh an vak an vak a an bo daih zel. Chung vang te pawh chu niang ka u te hian inchhung lamah hi chuan min miaupui vek zel.
" Thingpui min lo lum la, dawr ah ka kaldawn ania duh te i nei em?" a rawn tih leh chuan ka rilru ah ka ei chak ho zawng zawng an rawn lang leh nghal zawt zawt ka sawi chak bawk si ka lo ti tau ve hman bawk si......aaaa ka ning thei e. Sawi duh viau mahila ka ti tau laklawh tlat ka ngawi ve ran a a ruk erawh chuan sawi chak zek zek tak ka ni.
" Final semester exam inneih tep hi, 1st a i pass chuan ka lei dawn che nia " a rawn ti chiah chu ka en nghal vut a. " I ti tak tak em?" ka tih chuan a hmui hnuai lam pei kawi zauh in alo bu nghat nghat a. Chutah nui var var chuan ka pen chu dah in a thingpui tur tui tawk lum tur chuan ka tho nghal vat bawk.
" Cake kan nei tawh lo nia, chuan waiwai bawl tur ka duh bawk Pepsi nen..." ka ti phei nghal zat zat chu min nuih tawp min hnial lem lo bawk bakah min lei dawn tih ka chiang. An farnu neih chhun hi sual in han ti tau ve bur bur thin mahila min hmangaih zia ka hre ve tho. In a ka awm a ka tawng zat zat pawn ka ute pathum ho chuan an lo ngai thla ve kar a, keima fiamthu thawh ho zet zet ah pawh min nuih pui chiam zel an nui lui hmel lah hi ka hre ve thei riau zel bawk sia.
Kan inchhak lawk dawr ani bawk a , a rei hran lo khawp mai mahse thingpui ka lo peih vek hman tho. Vai cake 2 leh waiwai alo lei nual a pepsi pawh alo lei tho, a vawt ngat lehnghal nuam thei. A thingpui la in kan sitting room ve reuh ah chuan a phei leh thuai a, keipawh waiwai pahnih chu tel leh hmarcha te nen bawl in pepsi nen chuan ka in kengphei ve ur ur a. A thutna bul chhuah ah chuan thu in side table ah chuan ka hung sawk sawk a, a laptop ah chuan hla nalh zet play in kan unau ringawt pawh chuan kan tlei leh hle tawh.
Mut hmun ah chuan ka meng leh kar a, ka u ka room piah chiah a awm erawh a hnar leh suk suk tawh, playwood chauh a kan room hi pindan anih vang te hi niang thawm pawh a inhriat pawh theih viau zel.
Ka rilru a awm leh pa bawk chu ka ngaihtuah leh melh melh a, engtia a hla emaw tlang engzat leh lui engzat pawh in mindang mahse ngaihtuahna erawh dan phak rual ani hauh lo. High school kan kal laia star hre rual kan nih atang ka mit la ve tu ber ani, zep miah loh chuan tun thleng a bialpa nghet ka la neih loh chhan pawh amah vang tho, ka nei ve uk te hian amah nen tul lo pui ah ka tehkhin ziah a, ka kawp rei thei meuh lo. Bialpa 2 bialpa tia sawi tur nge pawh ka hre teh nuai lo chu ka nei ve hman mahse thla 1 pawh kan nih hma in kan tawp leh vat. Chu pawh keimah vang an mahni ah rilru engmah ka pe lo a, min khawih an tum in ka tang tak bawk sia an tan pawn ka hahthlak ve fu ang.
Midang aia a that bik vak na sawi tur ka hre hauh lo, mahse amah hian min hip tlat ani ber ang chu a englai mah hi han duh bik emaw tha han tih bik hliah hliah lai ka nei lo amaherawh chu alakah hian ka hmin zan tho.
A phone no.pawh ka nei ve reng mahse be tur in ka la huaisen tawk lo bakah exam hma chhawn mai tur ka ni bawk a exam zawh lamah erawh ka awmdan tur ka sawi lawk thei lo, ka mizia angah hi chuan phur thut chang nei chulai mood ah erawh chuan engmah hreh hran emaw ka nei ngai lo chumi hun erawh tum loh deuh in alo thleng thut ang tih ka hlau ve tho........
Hmeichhe huaisar tak ka ni lo chuan ka hre nangin ka duhna kawngah erawh rilru nghet tak pu ka ni thung, tum a hma a theih loh tih erawh ka thupui teh chiam lo.
•••••••••••••••••••••••
"Miaupui tho tawh teh, tui ka lum vek tawh nia va inbual rawh i tlai ange" ka dar a rawn sawi paha a rawn tih chuan ka meng diar diar a, ka tukverh pawh ni in a rawn chhun eng leh phut tawh ani pek hi. Ninawm zan hi a rei lo thei si.
"Vat....tho teh le 8:30 a ri tep tawh ania, chaw ka chhum tawh a, chawhmeh thing rin tur ala awm bawk, va inbual vat la che vat vat ang, kan tlai palh hlauh ange" a tih leh vut vut chuan peih lo zetin ka in let thawk a, nitin hi ka tan chuan ni sakei vek ani mai hian ka hria.
Peih lo zet a tho chhuak in Towel leh ka thawhnaw tlem nen chuan bathroom lam ka pan chhat chhat a, tuilum pawh alo awm diam e, fel thei sia keima Ù-a hi chu! Tui vawt a inbual te chu a, tahna ram kawngka ani ringawt dèn emai!
Chaw te eia kan in siam fel zawh meuh chuan 9:30 a.m a pel tep tawh. College lam pan chuan kan inzui chho leh det det a. Bike chu kawl ve mah ila kan in leh college a inhnaih tho avang hian kan keng ngai vak lo, ke in ti hian kan chho dun hnak hnak zel. 3rd sem kan zir kum atang chiah khan u Chhantluanga hi chu lo thawk tan ani a, college kan kal dun te hi kan inngaizawng emaw ti tawk an lo awm thin, hahthlak thei ania, hmeichhe thenkhat lah hian min han melh nghal hrek hrek a, eng atan mah ka ti der silo a. Unau kan ni tih a nawl puiin an hriat hnu ah erawh hmelhriat a mual mual ka ngah phah viau thung chu erawh ka tan ninawm lam lek lek ani.
"I haw dawnah min lo text la aw, chuan pocket money i la nei em?" gate kan thlen dawn tep chuan a ti sup a, a in dap nghal ruk ruk bawk. 500/- chu ka la nei ve, a bak zawng ka pa te min lo thawn ve chu ka khawl bawma ka thlak, chu pawh he pa ber bur a hian min pe leh dawn tih ka hre khiau a. A jacket chhung ipte atang chuan a wallet chu rawn phawrh chhuak in 500/- min pe a, tunkar daih tur. Hmmm, Jeans lei ka ngai asin le kinah engtin tin erawh dil leh dan a awm mai ang.
Lawmthu sawi sap pah chuan gate ah chuan kan inzui lut a, student then khat in an rawn wish sap sap bawk. Kan subject a in ang lo ka tih kha an building lam pan chuan min kalsan ta thuai a keipawh kan room lampan in ka chho ve leh hnek hnek tawh.
Harh viau e tilo hian kawm bul fuk teh chiam ka nei lo a, class ah erawh thut pui than ka nei hrang vek thung, lunch dawn ah pawh ka thut pui te ho hian min sawm ve sap sap zel a ka zui ve tawp zel kan innel tho hlawm bawk nen, Final sem e tilo hian kawm mumal bik hliah hliah han duh bik ka nei lo hi keipawn mak ka inti. Ka thian ve deuh ho zingah chuan Sentei hi thingtlang lam mi ve tho niin mi inthlahrung leh biang biak chian peih chuan fel deuh mai ania, ti ti pui anuam ka ti ber ve teh khiah.
Lo theih loh vang ni hauh lo in sual hnathawh tih hre reng chung pawh a ka do zawh tak tlat si loh ah chuan chawhnu class ka bunk leh ta nge nge e. Ka thiante an fel a ka roll no. erawh engtin tin emaw min lo present sak leh thei mai dawn tih ka hria. Edu subj core hi kan tam hrim hrim a a theih chu ka ring. Mahni chauh a tei ruk ruk aiah tiin Senteii duh vak lo chung ka hruai lui a, kan chhoh paha college lam a hawi tla leh ruk ruk te chuan nuih lam ati za deuh.
"Khawi khua nge i nih kha, ka hriat pawlh ziah lungleng ami kha?" tia kal paha ka en chuan nui chung hian alu thing bak bak a. An khaw hming hi vawi 3 vel zet chu ni mai thei ka zawt tawh amah pawn vawi tam a sawi ve tawh tho, mahse ka hre thei lo, zan 2 emaw 3 aliam chuan a bul tan hawrawp chu ka hre deuh tih chauh hi ka ni tawh thin.
"Lungdai" a rawn tih dat chuan ka hre ve leh deuh si. Khawthlang lamah khuan a awm tlat a ka hriat leh nghal ni, kei mi ropui lo hian.
"A nuam em? Ka lo zin ang" kan ti thla ve nghal rawk a. Hetiang privacy lam deuh a inbiak hi kan nei mang ngai lo nia, neih chhunah hi chuan zawh ve ngei ngei tur, han zin tak tak erawh rilru chuan duh mahse Ralte pa leh chi leh kuang te hian an phal dawn lo ti erawh ka hre ru rauh rauh.
"Ka hre lo le, nuam inti vak lo mai thei ni national highway in a paltlang ni ve lo ta chu khaw han than te pawh a har ve a henglai hmun te nen chuan lung satliah leh lunghlu ang vel aniang...... Amaherawh chu ti leh hluai ve ringawt ila.... kan pianna leh kan seilenna, thil thar tam tak kan zirna hmun chumai nilo kan hmangaihte awmna hmun anih vang te pawh niang ka tan chuan a hahdamthlak a, a nuam ka ti bawk" nui var var chuan min chhanga, an khua a chawisang thiam ka ti, ni mai lo mi dang lakah pawh a zahpui loh zia ka hre bawk. High school atangin tunthleng helamah school ala kal char char a, miin a awm lehnghal a, mihring ropui tak pakhat chu ani ve chiang alawm.
"Enge bazaar ah chuan i tih dawn reng reng a?" tiin kan thu khel lai chu a rawn thlak ta daih a. Amah hrim hrim hi nula lian fa lua lo ti ila kan inchen thuak tho awm e, ft 5'2 vel anih ka ring kei ft 5'3-4 vel bawr ka nia, tlem in kei aiin a tawi deuh, thau lam ai mahin cher lam a pawl mah zawk bawk, a vun chu mam hle mahse a ngo lutuk tia han sawi tur ani lo a, hang chhia erawh ani bik hauh lo, ngaihno bei tawk vel anih duh hmel ang ka ring....Engmah hi ka hre tak tak lo, han ti ve duah thin mahila...
"Second hand vel ka en duh a, a awm tak in" ka ti let var a. Ready made thawmhnaw hi inbel khat ve tak ka ni, second hand tha ve deuh deuh alo tam ve ta bawk nen ready made tlem te lei nan a pawisa tam deuh hman ai chuan second tha si tlawm si lei teuh ka duh daih zawk.
Bazaar kan han chhuah chhoh chuan mi an lo tam lutuk lo, inpho erawh an lo awm ve dul tho. Kawng sir deuh laia sneaker an lo vawm khawm ani mai ang chu, chumi chu en chuan ka din pui ran a, tha deuh deuh hnuai lamah chuan alo awm nual mai. An rawn dah chhuah thar nge rawn en pawh an la awm vak lo, rei fe chu kan hai let kual vel a, addidas superstar tlem a bal ve deuh ka phawrh hlawl mai, va tih chi tak! A khinh ka zawng nghal alo awm ve leh mai bawk. Uk 4.5 chiah chiah aaaaa 450 in an la ti zui, lei khauh teh ang, U ber an pawisa min pek ve tak kha! Senteii chu en ve rawh ka tih pawh chuan a mamawh loh thu alo sawi mai a.Mahse zep loh chuan college kan kal ho chhung khan sneaker 3 bak ala bun lo a inchhawk in, ka va hmusit lam nilo in eng vak ni bik lo mahila ka khawngaih ve em ani.
Kan size chu a inang tih ka hria a hma in a sawi lang ve zauh tawh. Ka han dap kual leh dun dun a, converse dum alo awm leh nawlh mai, a size chu Uk5 ani nangin a bun theih mai ka ring, rin aiin a thar bawk nen hmel hemna a nei bawk silo, a pahnih chuan khai va va in a piah lawka a pho tunu bulah chuan ka va phei a. Lunch leinan 80 vel ka lo hmang ve tawh bawk sia, a pumpui ah a cash in 920 bak ka nei tawh lo, 450 man ve ve ania, chuti nih chuan 900/-. CHENG 20 chauh ka nei dawn tihna. Pawi lo mai, thiante an hlim tal dawn alawm.
A ta tur zawk chu pe mai loin ka khai tir a, kan vak kual dun leh hrep bawk. Feb thla lai hawl tih tak ah ala vawt viau mai bawk nen kawng sir a vainu pakora kan chu kan han ei leh vel a, ka cheng 20/- pawh a zo leh ta.
"Zoi" rawn ti thum dut tu avang chuan kan ding dun chawt a. A aw chu ka hriat hnu a ang, kan kalna footpath kiang maia dawr awm lam kan hawi chhoh chuan zan mut dawn apianga ka tawngtai sak ziah pa hmel chu ka hmu chiang kher mai. Ka mit vai ani hauh lo bawk, a chhan pawh vawikhat mah mit vai in ka la hmu tlat lo.
Chu dawr lah chuan EXIDE tih banner sen lianpui an tar kuau bawk.
"Enge tih ve a?" Ka kalsan phal hauh lo ni e, chu dawr step ah chuan pen chho hlek in mi kawngkal dang lo tur zawng chuan ka han insiam rem a, Sentei pawh ka bulah alo ding ve vat bawk.Tawngkam tlem tal in min be ve se tih hi ka duh ber kha ani bawk reng ani
"Inverter baterry ka lei dawn a, class?" a rawn tih sup chuan ka lo melh ve kal a.A hma aiin a cher tlat in ka hria, a hmai chu adang deuh in a mit khur a thuk hle a, a meng hnim raih bawk.
"Ih...kan bang tawh a, bazaar vel ah kan kal kual mai mai anih hi" ka han ti ve vat a, ka dawt sawi vang nge ka melh tha ngam lo ringawt, ani lah hi mi an zak ve thei tih a hre lo nge mawni a melh kul zel mai bawk si. T.shirt chuanga addidas jacket a dum a dar pawl rawng ha in, cotton jeans dum a ha leh tawp a, sneaker dum nen a chhe lo viau tho. He lai a hmuh ka inrin loh lutuk vang nge engtin emaw tak hian ka awm a ka sawifiah mai thiam lo, phur ru si nuam ti bawk si tilang hreh si vel inpawlh nawk te pawh ani ta ve ang.
Ka thusawi vang nge alo bu deuh nghut nghut a, chutah "Ka zo tep asin, inhman tawh chuan min lo nghak ula in in a rawn kal pawh ka ngai a, i u awm ang tiraw?" a kekawr ipte a kut pahnih a zen hlun paha min melh leh run chuan ka lu ka lo bu tawp.Tawng mai turin ka aw te thleng hian a khur dawnin ka hria, a huhang chu ka tan chuan thlipui ang vel ana ani, na riap riap tak ani ringawt mai.
Rei lo te ah Inverter baterry sen ngei mai lian tha ve zet mai chu tlangval pakhat nen hian an rawn zawn chhuak a, Kawng chhak lama parking area ah chuan kawng cross chho in Scorpio var hnung chu hawngin baterry chu an dah lut te te a. A hmel ang mai a motor chu a fai veng lehnghal.
"Tunge a? A pa ka tih chi?" Sentei'n alo tih ruk sar sar chuan "Bialnu nghet anei,lo hmu tai suh" ka ti nghal vut a.A nei tak tak tawp silo a.Engvanga sawi nghal ringawt nge ka nih pawh ka hre lo, kan Sentei lah chuan ala thlir dauh dauh zui. A mit te chu hup sak mai ania ka duh ni.
"In inbul hnai vel ah motor khi park na rem chang a awm angem?" an rawn chhuk thlak leh hnu a a tih thum dut chuan kan inhnaih bawk a a rim tui ngei mai,kan ngaihtuah let chiam a chutah-
"Kan inchhak kawngkawi bulah zau lai kha chu awm a, midang pawn an park mai zel" ka ngaihtuah chhuah rual rual chuan ka ti ve vat a. Motor chuan kan inphur thla ve ta dat dat a. Kum 30 ral kai tawh mahse a tha tulh tulh zawk in ka hria, a hmai vun uk kharh te, a hmui hmu leh khabe hmu rawn to siar siar te nen chuan an tha vel vek mai. Sawi tur kan hre hlawm lo nge kan ngawi kar hlaem mai, a tawng duh ber kei lah ka lai ru ve tum hrang rih bawk si. Bakah a hmel ka en hian nichin maia tha taka min be tu pawh kha anih duh tawh loh hmel, a meng thim deuh khup sia, misual sual hmu ang maiin hmalam a en run bawk si.
College gate chhak deuh ah chuan din tirin Sentei chu a chhuk tharh a, Venghlun lam ah a awm vang in ani ber ang ang chu. Converse a khai zawk chu bel luiin ti khan lo kawl rih rawh ka ti teh tlat a, hriatthiam loh hmel fe in a inkhai thla ve ta mai bawk.
"I zir nasa tawh em?" Kan tlan chhuah leh hnu a front mirror atanga min rawn melh zawk paha a tih chuan 'A teuh lo' tih chi ni nghal loh chuan, "Aw, tlem chuan" kan ti ve sa sawi a. Hun dang aiin ka la zir nasat pawh ka hre chuang lo, angai reng mai.
"I u in YMA intihsiakna hnuai a a Article ziah ve kha ka mamawh deuh a" a ti ve bauh a.Min hrilh ve chu ni maw! Sawi zawm tur ka hre der lo, thut mawi loh te, ka awmdan engkim mai chu a dik angem? tih ngaihtuah tel ka ngai vek si, ka lum pup tawh in ka hria.
Kan inchhak deuh kawng kual zau lai ah chuan ka din tir ta a. Kan in pana kan chhuk thla te chu mumang atan pawh ka phal hauh lo, a tha hleuh hleuh em asin. A ni erawh a tawng lai chauh hian a hmel hmuh anuam , a rum lam deuh a pe na ve tlat.
"Zobawih, i bang tawh mi? Lo peng lawk teh" Nu Chhuani Patea nupui'n an inchung atanga min rawn auh chuan ka melh chho vah a. A plant khawih lai dah chuan ani pawh inchung zawl atang chuan a rawn chhuk thla nghal bawk. Ka bul a ding pa ka han melh leh vat chuan, a palian khep khup si dah deuh vah angai lehnghal "Lut rawh" ti ang hrim chuan a lu chu alo thle bak a. "Ka rei lo ang" ti sap pah chuan Patea te inah chuan ka chho nghal bawk.
"Suji ka siam mawle, i duh thei si, kha plate sen a ka chhin zawk kha la thla rawh, I pa Changa'n tumbu alo lei haw bawk a tlai ah ka vaipa den anga in rawn suak dawn nia, balhla um pawh kha ahmin tawh tak asin" alo ti nghal siam siam a. Nu tha tak ani ka ti lo thei lo, a fate ang pawn min ngai lo min rual pui kawm bawrh bawrh chang lah angah, a fel si a rilru zau bawk si, a bula awm anuam thei ania, min duhsak thei ropui lehnghal.
"Awii, ka van lawm tak a tui leh dawn si, Balhla chu kan la nei ve in ka hria, Au Mama hi alo haw tawh hrim² em?" Suji lak paha ka tih chuan tap ah chuan kut a sil mawlh mawlh a. Ei siam a thiam leh zel bawk nen a nun hi chu a awh awm bik ka ti lo thei lo, fa 3 nei tawh mahse ala thalai em em a, a fate pawh college hial kal an awm ve tawh, amah ah chuan a vun chauh dik lo a awm ang ka ti ngam sak a bak zawngah chuan tha tawk tak ani.
"Haw tawh in ka hria, tunge i rawn kal pui kha?" Kut hruk mawlh mawlh paha a tih leh chuan "Au Mama thianpa ania, ka chhuk phawt mai ang, tumbu chu a suah theih hunah min lo ko mai rawh" tih pah chuan ka chhuah san leh a. Kawt ah chuan alo la ding vun mai.
Kan in step chhuk thla ve hlek ah chuan chhuk thla in Mama pawh alo haw tawh ngei e, an han ti ti ve nghal luam a. Kei erawh suji chu choka ah dahin sitting room a thu te chu ka va melh leh zauh zauh thin.
"Miaupui, inthlak la thingpui min lo lum rawh aw" Mama'n a rawn tih chuan ka hawi phei lai tak ani bawk nen Dinsanga nui suk chu ka va hmu hman. Lalchhantluanga tih awm ang loh zia hi inleng awm lai lai a, khatia inkoh kher. Nidang a ti ngai tawp silo.....Min ti zak ru chem chem!
Ka u nen chuan an inkawm rei ve fu mai, kei erawh tih tur ber hre lo in choka ah ka awm tawp a va pawh ve rawt chi ah ka ngai silo eirawngbawl dawn lah in ala hma ropui si. Ka phone khawih te chu nidanga nuam ti em em thin kha khawih tur ber pawh hre lo in ka thai kual vel mai mai ani ber tawh.
"A nih ka chho dawn ang, dar 4 a rik hnai tawh sia ka tlai lutuk ange" a sana aban ami bih vut paha a tih chuan ka u pawh chuan "Ni e, tunlai khua a tlai chak si, soft copy in ka lo thawn mai ang che" ti pah chung chuan an inthlah chhuak ta a. Kawngka bul atanga rawn leh hawi paha min rawn melh deuh run a, nui let var var in ka ban ka lo vai thuak a, an chhuak zui chu ani mai. Ka ruak huai hian ka hre ve ringawt, zak thei lo inti rilru deuhin.
"Tu emaw chu a lung a leng em ni?" ka u in lo luh paha chimawm zet a atih chuan ka lo melh rawm rawm a.Hmanah Kimkimi nen phone a kan inbiak a ka sawi lai alo hrefuh palh a, khata tang khan min chhaih ve leh zauh hi aching a, nichin a 'Miaupui' min rawn ti pawh kha ati lui chiang lutuk! Suala hi!
"Leng lo leng lo, leng lo lutuk mah mah" ti chiam pah chuan room ah ka lut daih a, a nui hawk pawh chu ka hre lo der ve leh ta tawp. A taksa khan hun dang a tluk pha tawh lo viau a, a sa tha leh inphut mawi tak thin kha a cher lam ve det tawh, a hun tawn ka ngaihtuah pui hian achang chuan keimah zawk a tuar tu ang hrim in ka inngaihtuah khawl lo a, tap teu a awm chang ka ngah mai.Midang hma ah tilang chiam lo mahse a chhungril takah a tuar tih erawh a mitmeng leh a taksa lam thlengin an ti lang a, ni e zep thu cheng lo Ka khawngaih em asin!
"Pheikhawk hi ka lo su dawn em?" Sentei message chu rilru lak pen tum in ka reply nghal vat a "Aw, i thu thu i ta tur anih kha" ka va ti nghal vat a. Kei chuan zep miah loh chuan ka mamawh ang tawk chu ka nei tawh viau Fanu mal ka nih angin kan neih tawk tawk ah tupawh maiin min duat thiam em em vek a, ani erawh duat duh hle mahse kut hnathawktu mai an lo ni bawk nen ka va hmusitna lam nilo in duat alo har ve thin a,naute alo nei ve duah duah bawk nen hetia tlem tlem a ka lo tih hlim ve theih hi chuan ka lawm. Bakah ka lo hrechhuak har hrim² bawk.
"A to si, angai lo ania" a rawn ti ve tak na in "Inhriat reng na tur atan te pawh" ka ti ve leh tlat a, a tawp a tawp ah lawmthu sawi mawlh mawlh in kan inthlah thei hram. Ka ta tur a ka thil lei ai mahin ka hlim in ka hre hial ani.
"Sakei à! Sakei à!" tia an inchung tukverh atanga Nu Chhuani Fapa Muaneka a rawn au chuan room tukverh a va dak ve vat in
"Enge, Muanek" ka va ti ve chiam a. Sakei à hi min ti ve ringawt zel, ani aiin kum 2 in ka upa, min u hle tur anih lai hian min heti mai mai chu nia.
"Anu in tumbu suahna lo keng la lo chho rawh ati, kimchi pawh i duh chuan" Nui thaw a alo tih chuan "Vawikhat mah khatiang khan min ko tawh suh" ti hlar in tukverh chu ka khar chawrh a. Sakei à pawh ka ni lo!
Room atanga ka chhuah chuan "Muana mai mai hi chu" thingpui no chawi a nui vur vur a Mama'n alo tih chuan "Khipa khi angaihna awm lo" kan ti ve ngial a. Mama lah chu anuih ala zat hmel em em zui.Fa U ber si fing ber tur a dah a à ber daih a, a rilru erawh a tha phian thung, Nu Chhuani sawi dan chuan a tetlai hian natna benvawn a nei ani awm e Doctor ten tih ngaihna an hriat loh kha tawngtai rawngbawlna nei thin pakhat an pan ve rawih a, chuta tang erawh chuan adam ve leh ta chauh ani awm a, mahse an unau ah chuan a à ber thung!
"Tumbu ka suak dawn nia Nu Chhuani'n a vaipa den a a tui leh dawn mai siah, Kimchi pawh min pe dawn" tih mawlh mawlh pah chuan plate chu la in ka chhuak phei nghal a "Lawmthu te kha i sawi theihnghilh leh ange" tia Mama'n min lo auh zui pawh chu ka chhang peih tawh lo.
••••••••••••••••
"Kar tawp haw chhoh i tum em? Pa ropuia te sangha an sah dawn tak kha" Chaw ei paha a tih chuan ka melh vat a. Chutiang te nih chuan haw dawn chiang lutuk, dil kal an phal khat si, a theih ve chhunah hi chuan ka kal dawn chiang.
"Dawn ang, kan haw ang chu" chaw khawrh belh sak paha ka tih chuan "Kei chu ka hman dawn lo nangmah a i chhoh a ngai ang, college lamah meeting neuh neuh a awm dawn a" a ti ve thluam a. A hah ve thin lutuk tih ka hre ve reng chuvang chuan han hau bawrh bawrh ve mahila ei tur tui deuh deuh ka siam tho zel ka thiam tawk in. Chhunah class kan kal a, zanah a tuka an zirtir tur en lawk angai a, test paper leh assignment paper tih vel check tur an ngah thei si, ka puih a rem ti lo ve tlat bawk thin sia theih ang tawk a puih ve dawn hian.Mahse hetia atihna chhan pawh ka tan a tha zawk anih vang tho tih pawh ka chiang.
"Sumo in ka chho mai ang, i lung lo ti leng lo la!" ka ti chuan hmui pet sawi zauh hian min han melh khui vel a, kei in chaw hmuam tun in ka lo nuih thung.
"Sumo ngai lo ang, ka thiante motor a awm dawn a a nuam zawk ang" a tih chuan pawi ka ti lo khawp mai sum safe na ni mai, Ka nu inren tei erawh sumo fair tur ka han dil hram ang, pawisa ka neih tawh teuh silo. Ka pa pawh dil ila phal deuh in min pe nghal mai dawn tih ka hria mahse Ka nu dil hrim hrim hi ka duh ve a inren ve sia, tih buai anuam ve pah bawk ka ti buai khat tawh emai.Hlik hlek reuh hian!
● Muang changin kal bek bek ang u aw, hmanhmawh fal in lo awm pawn kan muang tho ang Tak tak in, Zantin nge Zankhat dan thlang ru? Chuan comment lamah kan inhmu leh dial dial dawn nia.
In fel viau phei chuan kan happy hrim hrim ang Ka ring
Chuan Ads khu zanin ah eng story pawh chhiar ula vawikhat tal lo click ve lawk ru aw, second 10 vel lek nghak bawk ula, infel em kha.....