Mama chu ka melh leh țhin dawt sawi hmel apu silo. Ngaihdan ka siam thiam loh rual in nita se tihin ka rilru a luah lo thei lo bawk. Ni e, 'nita se' eng ber nge ka tih ang tihka hrethiam lo. Ka chelh lui hram ang nge? chutiang ni ta se ka va tlawm rawng rawng dawn em? Tinge engkim hi a tluan ve purh mai loh leh!
"Inngaihtuah chiang rawh, i tana țha lo tur kei hian ka duh ngai lo tih i hriat kha, Dinsanga chu a sual hran lo mahse Venpuii kha a thlah tak tak thei dawn chuang lo chuvang chuan rei lo te tana hlimna ai chuan rei lo te chhung hrehawmna leh hlimna tluan tling ni a kan hrilh che lam hi pan mai rawh" tlem a sam deuh zawk chuan a rawn ti leh sup a.
"A fapa chu i hmu tawh em?" ni e, dawt pawh ani mai thei asin! Chu chu ka la beisei fan bawk, Mama hian lo hre dik lo palh hlauh se tih ani ka la beisei fan ni.
"Dawt ka sawi lovang, ka hmu tawh ngei alawm Kum 2 ala tling lo deuh ang, Lunglei ah Venpuii nu leh pa ten an kawl mek" a rawn tih leh rual chuan ka țap chhuak ta hak a, mahse inthunun tum zet in ka in up bet leh vat thung. Ka taksa lah chu ka insum na lamah an khur ti tih bawk.
"Suangtuahna mai ani, chutiang chuan ngai la harh tawh rawh le, mumang ram chu nuam viau mahse a chen reng theih loh tih i hriat kha khatiang ang khan ngai la, khuarei pawh hi khuanu duan tho ania chutah chuan beiseina nei la, engkim a țha leh vek ang" ti a ka bula rawn țhu in ka kut avuan vang vang a. En pawh ka en ngam rawh lo ka mittui ka dang zo miau silo a, a mitmenga min ngaihtuahna hmel ka hmuh leh si chuan ka zuau leh zual dawn tlat asin.
"Mahse u, engtin nge kan fa hi a awm ve tak ang?" țap hlap hlap paha tham chhal a ka tih chuan ka kut a tuai lai chu a tawp chawt a. Min en nghal ngur tih ka taksa hian an feel thei bawk.
"Eng maw? Nau i pai maw?" a aw ah pawh a țhawng tih ahriat reng. Ka nu leh pa khan an lo la hrilh ve hlawm lo aniang, Dinsanga pa kha chuan ka pa a hrilh tih ka hre ngei a.
"Umm naute, kan fa hi thla 1 a tling hial tawh asin" ka tih leh chuan a mitmeng chu a thim leh zual hial in ka hria.
"Zawnga chu le!" tiin a ding uai a, a thinrim inseh ruh țun chu ka lo melh phe ve ruai bawk.
"A thiam loh ani bik lo kan pahnih alawm" tia ka lo sawi leh chuan akawng dawm in a thaw halh halh a. A beng te thleng chuan an pawng țawlh țawlh thei nia.
"Ka thianpa chu ka ti ve sia, i lakah hetiang rilru hi a pu tih a hma khan lo hre daih tawh tur asin" a rawn ti leh nghut a.
"Nang chuan engtin mah lo ti suh aw, a țul leh keiman ka lo bia ang kan pahnih inkar ni tawh rawh se" ka lo tih ve leh chuan a rum deuh hrawih a. A lung a awi meuh lo tih erawh a ti lang chiang viau thung.
"Khawngaihin keiman ka lo bia ang" tiin a dil in ani ka dil tak tawp ni. Mama nen an sawi dun anih chuan engkim a buai zawk ang. Bakah hei chu kan pahnih inkar liau liau kha ani ve tlat....
Mama'n min chhuahsan hnu chuan ka phone ka ban vat a, Dinsanga miss called alo awm reng, ka lo silent vangin alo ri chhuak lo hi alo nia. Mahse ka call back duh rih lo, inngaihtuah fim a dam deuh zawk a thil thlir a țul hun tak ani miau a. Ka thinrimna leh lungawi lohna avanga thuthlukna ka siam thawt thawt anih chuan a țha lam ai mahin a chhe lam boruak in min tinat belh zawk mai mai thei dawn sia.
Dinsanga leh a fapa chu ka ngaihtuah leh țhin! Ka ngaihtuah nasat pauh leh ka awm a hnawh nasa a, ka tawt up up thei hial ani.
Mahse engvang in nge Dinsanga hian a kawl si loh? Ni tak e, tlangval anga ala len duh vang em ni ang? A fapa nu tur a zawng zawk nge? Chutiang anih leh lek phei chuan....
Ka phone message tone alo rik tleng chuan zawi zet hian ka ban a. Au Zela lek!
*I muhil tawh em?* room lehlam lawkah a awm reng sia.
*Ka muhil mek* tia ka chhan chu a run leh khawp ang. Tunah tak hi chuan rilru lak penna tur ka mamawh miau alawm, a rawn lang hun chat chat thei khawp mai. Inngaihtuah tup tup ila nichin ang kha ka inngaihtuah thinrim thei mai dawn si a....
*I muttui hmel khawp mai!* a rawn ti lehvat a. Chutah *Room kawngka lo hawng teh ka lo riak duh, Mama a thaw halh halh reng sia abula awm anuam lo emai* a rawn tih zawm zat bawk.
Hnial ka tum zet nangin ka va hawn sak leh ta zawk a. Rilru la peng tu ah a țha ve lawm.
"Mama khan a hau che law?" a rawn luh hnu chuan min melh vang vang in ati ve nghut a. Aw pawh ti ila engtin nge a tih vak ang ni....ve reuh hian
"Hau nang, ka pangchang lawk anih kha" ka tih chuan a ner leh nung nung a, ka khumah a lawn zui zat bawk.
"Engmah ngaihtuah buai duh suh, sum pawh ka khawl țeuh mai, i uite hi kan hralh bawk anga ropui tawk in pasal i nei tho dawn nia" a rawn ti leh pek. Uite hralh a sawi kher avang chuan room zet hian ka va melh hrawk a, "A lian ve tawh lawm, a to dawn lutuk" te chu ala ti tak deuh deuh. Lalthanzela zet hi zawng!
"Muhil rahhh...i meng rei lutuk naute kha a muthlu tawh bik hial ang" a rawn tih leh pek chuan ka chum țawk a, mipa ve si mak ziah zuah thei lutuk mai.
"A hrim hrim in engtin nge naute chung chang i hriat?" tia ka melh hà chuan alo nui zui kur kur a, ngaithei lo zet a a hnunga ka chum dawt chuan ala nui chhuak ta hawk hawk leh nghal.
"Kha khawvawh deuh zan kha" tiin a mit ko a rawn san uk uk a, khaw vawh deuh zan pawh ka hriat bik si loh, a ngaihna hre lo zet a ka lo melh takah chua anui lai chu tawp chat in min chek khum tlak tlak phawt a, chutah "U Dinsanga nen inlo inawih mut loh chauh zan kha, ka bih thla che u lawm" alo ti leh pek. Ka ngaihtuah let vang vang hian kan inruk hma deuh Kima te lo len zan kha ani ta ber in ka hria. Awww, ni tak ang min rawn tih buai hrep leh pek kha. Lungawi lo zet a ahnunga ka chhum zawt zawt chuan alo indang kual ve nghal a. Thlan hluam in kan mu ta vel a, min ti chau vek zel abula awm hi chuan.
Zing kar erawh inthlahrun awm khawp in ka tho tlai, chaw ei an siam peih hnu ah min lo kai tho chauh a, ahma a ka harh miah lo te kha engti dan tak ni maw? Ka chau ve deuh nge Naute vang leh bawk ni ang ni.
Chaw kan kil lai chuan nidang ang lo takin kan reh diak a, titi a awm lo ani ber. Au Zela a khat tawk a phul ve leh chiam chiam zel tih loh. "Anțam hang te kha hawp la, purun hnah te kha ei bawrh bawrh rawh" tiin ka nu ber chuan ka thlengah purun chu a rawn suak nghal a. Ni dang ang lo takin a hmel pawh adam ve diai mai. Ka sawi awmzia takah chuan a hmel chu a zuai ka tihna ani ber ang.
"Ni e, hmarcha te nen hian thak la" Au zela lo ti ve zat paha hmar cha min lo suah chuan "Naute tan a țha lo anga sin, pe miah suh" Au Valpuia'n alo ti nghal khur khur thung. Min ngaihtuah vek tih ka hriat chuan ka lawm, ka hlimna hian van a tawng lo mahse min fan chhuak thung, ka chhungte an ni miau a.
Mama leh Ka pa erawh ze thuhmun em em tih takah an la ngawi tlat rih bawk. Mahse chutiang in keimah min haw lem lo tih ka hre bawk.
"Zanah Palai an lo kal dawn kha, hetiang anih tawh ber chuan a rang thei ang ber in inneihna thleng se kei chuan ka ti ber a, rei tak nghah ngaiin ka hre lo" tiin ka pa chuan a rawn sawi leh bauh bauh a.
"Pa!" Au Mama'n alo tih zui hrawk chuan ka pa chuan angaih pawimawh hmel teh chiam loh.
"Engpawh chu lo hria la, a duhthlang tu thu thu ani, a nawm sak leh sak lo pawh a thu ani vek tawh, mualphona belh zawnga hun pawh sei viau pawh angai hran lo, innei vat zawk rawh se" ka pa chuan alo ti leh hmuk a. Midang erawh chu kan lo ngawi diak thung.
"Hrehawm takin awm ta se, chutianga a siam mai mai tura kal tir hi ka thei lo ani, a unaupa ka awm hi" alo ti ve leh khauh a.
"Khalam chu ka chingfel thei ang ka tih kha" ka lo tih ve sap chuan min melh tawn chhen hnu ah a kham ta nulh a, nuam lo ka tih hle ringawt.
*_______*_______*________*
Chaw ei khamah chuan in kan tih fel zawk zawk hnu ah ka mu leh duai a, ka nu leh pa an chhuak bawk si midang an awm bawk silo nen mahni chauh a țhut rak rak kha ka peih hek lo. Ka rilru a thil lo lut zuk vang erawh in ka tho rang khawp mai.
"Ro-i, i buai em?" tiin ka țhiannu Venghlun ami chu ka be ta tawp a. Zep țit țet pawb mei lo chuan ka thil duh chu ka hrilh ta nghal mawlh mawlh a. Ani pawn rei fe min nghaihthlak hnu ah min pawm sak ve ta mai bawk.
Alo awl hlauh bawk nen chumi ni chuan min lo han thli thlai sak ta a, an veng a inang nangin anmahni tak a hre lo a, a han zawng buai hrep ani hial awm e.
Mahse a thu rawn sawi leh ah erawh chuan lawmna tur emaw han nuih tak ngial na tur pawh ava vang si ve! Miss Venpuii te nen veng khat annih avangin min lo thlithlai sak tur in ka ti ta tawp kha nia, thil mawi anilo tih hre mahila ti lo thei lo din hmun ah ka ding ve tlat alawm. Mahse ka chhanna dawn erawh
*An chhhungkua 4 annia Miss venpuii kha an mi lai ani bawk, tunah tak chuan an inah anu leh pa leh an pang ber mipa leh naupang pakhat an ni mai a, mipa naupang pawh a awm Johan Lalpekhlua an tia kum 2 leh thla 1na hmang mek ani bawk, chuan naupang chuan Asthma anei bawk, api leh pu hian an duat hle bawk ani awm e, apa erawh Dinsanga tih bakin an sawi lo* ti a message rawn thawn erawh chuan ani ka mood zawng zawng ti chhe vek ni.
Tlai ah a school bang alo peng zawk nangin ka be tui tam thei meuh lo, mahni fapa meuh kalsan han duh mai chu amak ka ti hle bawk ka laka zep anei te hlei chuan min ti thinur a, engtia han awm tur nge pawh ka hrethiam tawh lo.
*Na i nei em ni?* tiin a haw hnu chuan min rawn text zut a. A call ka lak duh miau loh avangin a rawn ti ve leh mai aniang, a mit that lem loh avang hian in text lam hi chu a uar lo khawp mai.
*Nei lo*
* Naute nge thinrim Anu* a rawn tih leh a, a fiamthu tih hre tho mahila a der pawn ka nui peih lo.
*Tumah, zanah ilo kal hman angem? Inbe lawk ang* ka han ti leh a. A seen rang thei mawlh mawlh khawp mai.
"Ok, Min ngai tawh mi? khawiah nge niang?* a rawn ti leh vat a. Nidang chu nise a seen rang ringawt pawh chu ka lawm leh chiam twh ang.
*Hall bulah khan ka lo chhuak ang ilo thlen hunah lo sawi la* ka va ti ve zat a.
*Ok* tih te alo thawn chuan ati tau leh tawh tih ka hre mai. Mahse tun țum chu ka be tui teh chiam lo bawk nen reply ka peih ta ngang lo.
Zanah Palai an lo kal hma deuh in Au Zela nen kan chhuak ta daih a, Dinsanga nen kan inhmuh chhung a țhiante in velah min lo nghak tih thung a. Hall sir a min awmpui ven vawn hnu chuan Dinsanga pawh a rawn lang ve ta nawlh a, Au Zela nen chuan an inbe ve lawk nangin thu pawimawh tehchiam an sawi lo bawka rei lo te ah min kalsan dun nghal mai bawk.
"Enge ni ta le? Ka naute te pahnih chu" ti sup in ka țhutna step bulah chuan a rawn țhu ve zui zat a, kawngpui kan hnaih vak lo bawk nen kan awmna lai chu a thim a a reh ruih bawk. Thla erawh a eng phian thung.
"Sawi duh ka nei a?" ka lo t nghal tawng a. Nui paha bu zeuh in ka dul chu a rawn khawih nghal hram bawk. Nidang chu nise kha thu ka hriat hma te kha ni ngat se kan hun neih chhun hi kan am leh dawn asin le. Mahse tunah erawh!
"I zia dang riau, sawi vat la naute nen hian ka duat chak tawh che u" a rawn ti leh sup a. Thawk ka la hmasa te te thung. Engkim hi lang rat a sawi ka duh siam țhat ngai kai kan siam țha nga adik lo lai kan ti dik bawk ang mahse chutiang tih theih tawh lo khawp a chhia erawh a țangkai tawh lem lo.
"U Venpuii chungchang" tia ka en chuan a ner nghal nung a, mahse engmah a sawi bua hran lo.
"Ani nen khan min tehkhin ngai em?" ka tih rual chiah chuan a rawn rum nghut a. "Khatiang zawng khan sawi ziah suh" a rawn ti nghal hmuk bawk.
"Anih, U Venpuii kha i hmangaih tak zet em?" tia ka melh leh chuan ka thusawi chu ning hmel apu hial in ka hria. Mahse engkim hi sawi se kan nih nih ni ila ka duh zawk sia lawm.
"Hmagaihte chu hmangaih țhin e"
"Țhin?? i hmangaih tawh lo maw?" tiin ka zawt nawn leh ngat a.
"Ka hre lo" tih chauh in min chhang leh lawi. Chu chhanna erawh chuan engtin emaw tak hian min la hliam tho si, thlarau mai mai pawh ka tluk thei silo chu nia!
"Anih, Johan Lalpekhlua i hria em?" tiin chik zet hian ka melh run a. A rawm hawi chhuak rang viau bawk, ka hmuh sual nge a hmel chu a pha nghal dai hian ka hria, a duh loh tawp thu hre ru ang mai ka ni.
"Johan?" a rawn tih ve sup chuan "Yeah, Johan Lalpekhlua Chhakchhuak, Vensangpuii fapa hi tunge?" ti sak sak in chiang zet hian ka melh run a. Min chelhna chu la sawn in a țhu ngil a, a hmel ah chuan mak tihna ka hmu thei bawk. A thuruk tak tak alo nih hrep dawn hi.
"Engtin nge a chanchin i hriat?" a rawn ti ve leh zat lawi a.
"Zodinsang, Tunge Johana?" tia ka melh leh chuan ka mit ah tak chiang zet hian min melh run a, a mitmeng pawh adam tawh teh chiam lo.
"I hre vek tawh ang chu? Ani thleng thleng a ilo hriat theih te chuan" tiin ka thusawi zu la kawi daih nia. Ngei lutuk a ka melhna te chu thinrim mitmeng sen rum hian min lo melh let ve leh thung.
"I kà tang ngeiin ka hre duh lawm? Tunge Johana?" ka ti leh hrawk a. Ka thinrim bawk a ka lum pup pup thei hial ani..
"Ka fapa mawle!" chang kheng khawng zet a rawn ti tak sak ah chuan ka melh ta ngawt ngawt ringawt. Khang hun chhung khan alo la zep ve char char chu nia, kan inneih hnu ah pawh ala zep duh tho ka ring, hetiang anih phei chuan ka lakah hian engzat a tam tak thuruk lo zep ang ni.
"I zep a?" ka rilru ano ringawt. Sawi sa ni se ka tan pawn harsa a awm miah lo min rin zawh loh zia ka hre thar ani ber. Mim ti na hle bawk.
"Sawi vek ngai ka ti lo" alo ti leh nghut thung. A zak lo nge a zak lo der! Ka hmu tui tang hrep lo ve!
"Khawnge i kal dawn" tiin ka pen vut chu min pawt let dawrh a, min lo chelh nghal chat bawk.
"Min thlah teh, ka haw dawn!" ka ti ve hlar zui, bakah ka biak rei phei chuan ka țap thei hial ang.
"I thinrim pawn ka thlem leh theih nan ka bula i awm lai chauh in thinrim rawh" a rawn ti leh hmuk a. A à tawh hial zawk emaw ni!
"Ngawi mai teh, min thlem angai lo kan tawp chiah ti khan, min ring zo lo tu bula ka dam chhung hun hman ka peih ve nek lo" ka ťawngkam pawh duh angin ka fimkhur thei tawh kil kelh lo, ni tawp mai teh se.
"Enge maw i hriat le? Chutiang sawi hun ani hauh lo" alo ti nghal bur ringawt.
"Fel ber awm ang zia zang in 'Pathian ka dem e' te i tia i fel lo zia alo lang ta chu i la na hle mai maw, In thil tih sual rah aniang Pathianin Venpuii pawh alak sak che kha, theih se kan naute pawh hi....." ka tih laia ka hmai thip zawk leh ka lu hai nghal muai avang chuan ka phu zawk a, ka hmai chu ka kut khur ru dar dar a dawm in ka insehruh nghal țeu bawk. Țah ka duh viau lo nangin ka mittui erawh a hnam sawk lo thei lo. Kut min thlak miau alawm!
"A tawk ta viau, kan pahnih a awm ngai lo ang Naute pawh hi rawn ngaihven tawh suh ka enkawl thei ve lutuk ang min rawn be tawh ngai lo ang che" ti salh in ka bianga mittui rawn luang chu ka tuai fai thuak a. Ka bianh thip leh la chhah deuh tup chu dawm in ka inher a ka kal nghal vang vang bawk.
"Nilo, nilo.....Bawihte, ka.....ka tum ani lo" rilru buai hmel zet a a phu bul bul lai pawh chuan ding lo in chak zet hian ka kal a, ka hawi let thei tawh miau lo. Ka awm chhung tawt lutuk te chu ka khuma mut a țah chhuah pui chiam ka chak takzet tawh.
*__________*___________*___________*
(Zawmna)
Au Zela pawh be hman tawh hek lo, mahni in ka haw a, in ka luh lai chuan tumah an lo awm lo teh mial, room lamah erawh thawm a awm thung. Thawm dim zet in ka room lam ka pan a, Dinsanga kha engtin nge awm ka hre lo mahse hre tur pawh ka chak lo em ani, ka hawi let thei lo a ka chapona tlem te neh ve chhun hian min tina tu te hma ah min țah tir thei hek lo, kalsan kha ka tan chuan ka tih theih awmchhun ani rih miau ani. No leh der dep taka ka awm lai min hmu fo mahse amah ngei vanga ka tlu sawp lai a hmu tur in he ka thinglung chapo tak hian a thei ngang lo ani e.
Ka khumah ka bawk thlawp a, ka bengah chuan a thusawi te kha an inrik chhawk nuai nuai ni ber hian ka hria, ka țap țha thei hek lo, ka awm a tawt a, ka insehruh chiam a, ka awmdan chu na tak ti hian a natdan hi a sawi na tawk kher lo ang.
'Tinge fa a neih reng si chuan ka lak atanga mamawh lrh kher nge anih?' 'Ani hian min huatna anei zawk nge?' ngaihtuahna mak sak pui pui nen ka hun tawn mek chu ka hmang a, rin duh viau mahila alakah erawh rinna pawh ka hlawh chhuak ve thei der silo. Nat huam in ka pan ngei alawm mahse a em em lua ani.Mihring dawhtheihna hian chin tawk anei vek chumi tawpah chuan min din pui mek ni mai hian ka hria.
Ka room tukverh bulah chuan khwthlanglam hawiin ka pa chair min siamsakah chuan ka țhu hnawk a, blanket in ka hmalam ka tuam bawk. Ka bengah bawk earphone vuah lut in ka phone nen ka connect a, hla mak sak pui pui ngaithla mahila chung hla te chuan ka rilru an la peng thei hlawl silo. Ka mittui tla chu ka tan dan sen ani lo a hruk sen ani hek lo, ka dawh a, a dam hun ka nghak ta tawp mai a, ka taksa na lo mahse ka taksa te thunun tu hi ana tlat si a ka engkim mai hi ka ta ni mahse ka thunun theih rual ani vek țhin silo.
Engtin tin emaw chu zan khawthiang hnuai a natna leh hrehawmna tam tak ka tawrhna te chu ka hmang liam a, ni thar leh hun thar alo inher chhuak nàng in ka tan erawh natna nen a inpawlh sawp nuai tawh si.
" Nizanah min lo haw san daih a" Au zela chuan a rawn thawhchhuah hnu lawkah a rawn ti su su a. "Nia" tiin tawi te hian ka lo nuih ringawt. Au Valpuia zing chhuak in balhla lian zet zet alo lei ťeuh a a hmin țha hlawm sia a tui dawn lutuk ringawt. Chaw kan la ei si lo mahse ka ei chak zek zek mai si, ka nu lah in chaw ei hma in ei a phal lo bur mai sia, dawhkana kan dah țhut chu a khat tawk in ka melh relh relh ringawt.
"Pakhat ka lo lak ruk ang che aw, room ah lo va phei la" tiin au Zela chuan a rawn ti ta hlauh a, ka nu ka va en chuan dawhkan ah chuan eng eng emaw alo ti leh mawlh mawlh tawh. Au Zela chu buk khum nghut in ka nuih sak a , rang zet in kan room lam ka pan nghal bawk. Ka chak zia mai chu e ka mitthla a alan hian ka chak huam huam ni mai hian ka hria.
Rei lo te ah ka room kawngka chu rawn ri rak in au Zela a rawn nui lut nghal var var a, ka lo pan hnai nghal ruak bawk. A kawr hma chhunga a rawn thuhruk țuț țuț ka hmuh chuan ka nui nghal var var bawk
"Ka nu in min man teuh lutuk alawm, i chaw ei a țhuan awp vaih chuan a ringhlel dawn che nia aw" a rawn ti ve nghal su su a. Balhla pakhat lek a rawn lak ve te chu ban in ka ei nghal mawlh mawlh bawk. A hmin tui si, ka ei lai pawh chuanka la chak huam huam in ka hria. Au Zela lah chuan ti fuh intih hmel zet in min lo en bawk.
*_______*______*_______*
"Inneih chu a hma thei ang ber kha țha kan ti ta anih kha tun atanga kar 3 na ah in inei ang" tia ka pa in chaw ei laia a sawi chuan ka chaw chu ka hak țhelh ani. Mangang ru zet a Mama ka ve en lai chuan min lo melh ve chiah a, a mitmeng chu abuai ve deuh in ka hria.
"Pa, inneih kher pawh angai em ni? Zodinsanga...." tia Mama'n a sawi dek dek chuan ka pa in alo khap hmiah thung.
"Inneih kher angai em ni a? Innei lo se tu zawk nge hmingchhe tur ngaihtuah ve ta che, a bul an țan tawh a an duh ang takin awm rawh se" ka pa chuan alo ti hmuk a. A hma ang khan kei nen tak phei chuan kan inpawh tawh chiah lo bawk nen țik pawh ka ti ngam tawh lo. Ka awm chhung ami erawh hi chu aphu nasa leh viau tawh.
"Dinsanga hi misual chu ani hran lo mahse a nun hmadan kan hria a ka nau neih tur em ah chuan a țha tawk in ka hre lo" Mama bawk chuan alo ti leh a.
"Chungte chu an inkawp hma te khan sawi lawk diam ta che! Tuna taka i rawn chawh thar angai lo, i nau pawh a duhthlanna ania a hrehawm pawn a tuar ve tawh mai ang chu, nun hi anuam reng a thleng turin beisei suh a harsat poh leh a hlu ting zawk ania, nangni pawh hre reng rawh u, a hrehawm lai ber hi kan hringnun a hun ropui ber rawn thlen nana kawng pawimawh ber anih hi, Zoi pawh hre reng ang che, i nu leh pa zahna tam tak i thlen phal hial khawp a i vawn chu i thlah miah tur ani lo, chu chu i nu leh keima duhdan ani" tia ka pa in a sawi leh dap dap lai chuan ka lo țhu kun reng ringawt. Dawhkan hnuai ah Au Zela bawk in ka kut a rawn hum leh vang vang a, min hnem a duh tih ka hria mahse țik pawh kan ti ngam rih si lo.
"A khai! Chaw ei phawt rawh u, hna kal te inngaih kha" tiin ka nu chuan thu dangah a rawn pakai pui ta daih a. Kei erawh ka ei thei tawh meuh lo, ka chhungril hrehawm lutuk vang nge ka hrawk ah chuan ka thil ei vel chu an tawp vek mai hian ka hria.
"Ni e, Zawng kà nei ang mai rak nuai nuai loh tur" Au Zela bawk in a rawn ti ve ta bawk nen boruak rit lutuk chu ka nu nen chuan engtin tn emaw an ti kiang ve leh ra deuh in ka hria. Kei erawh ka awm chhungah hian min hnawh tlat a, ka pangngai thei meuh lo.
"Vawiin chu pangpar i nu sangpuiite inah min han lam sak ang che, pathum lek ania" tia ka nu in au Zela en paha a rawn tih leh chuan alo ner leh nang ka ring mahse ka en lo ka dak chhuak ngam rih lo, ka mit ah hian ka duh aia tam tui a awm miau a .
Chaw ei kham chuan an bo leh diak a, Ka pa leh Au valpuia hna ah an kal a, ka nu lah inhnuai lam hnathawk a vil bawk, Au Zela erawh lui kal ah an rawn sawm a, Valte ring(ring=nghawng, lì pakhat hming sawina) lamah an kal daih thung. Chaw hnulamah an lo haw dawn anih hmel. Ka nu erawh in a vin leh nasa hlak hlak hle.
Mama pawh a țhiante nen ram lamah an chhuak ve daih bawk.
Dinsanga miss called 6 alo awm ve run nangin ka call back hran lo. Zingah pawh min lo wish leh ngei zing dangah kan in wish ve vak ngai lo ka tih kha ka thinrim emaw ka lungawi loh tukah erawh ati ngei ngei thung mahse tun țum erawh ka seen duh țhak lo.
Nizana ka chunga a khawsak dan ka en khan hnaih leh harsa ka ti, dik taka sawi chuan chhungkaw rual țheh țhawh kan ni ve nang hian kut thawh aia țawngkam a chinfel ka nu leh pa in min zirtir nasa bawk a ka unaute hi an țhiante emaw inchhungah pawh kut thawh em a infiam kan nei ngai lo. Ka sawi hmaih theih loh tur chu nizan kha mipa kut thlak ka tawrh hmasak ber ani tih hi, chu pawh ka hmangaih ve ber hnen atangin. Hetiang hunah hian hmeichhe nih hi ka ning țhin kan mittui tla bik ziah te kan natna kan thup thei lo bik te hi.
*Ka tihpalh* tih a rawn thawn ve leh tawp a, ka seen leh ta vek mahse ka reply chak hlawl lo. Kan inkar erawh kan nih nih kan ni zo tawh bawk a, harsa mahse a tawp erawh thlen ka la duh fan.
*Bawihte* tih tawp a rawn thawn leh. Tunah dar 11 a pel chauh ania school a kal lo emaw ni!
*In bia ang? Ka lo call ang che* tih a rawn thawn leh tawp a ka chhiar lai mek in a calm a rawn lut zat bawk . Mahse lak tumna em em ka nei hran lo bawk nen ka reject nghal hmak thung.
*Zanah ka lo kal ang* tih a rawn thawn leh zat bawk. A offline nghal daih zui leh nghal.
Zan alo kal tur thu a sawi vang nge hreh tak te in ka hreh a, abula awm pawh ka huphurh sa ngawih ngawih. Mahse kan bul lo țan ve rawhna avang erawh in hnial thei ka ni ber silo ka pa te an tel ve tlat tawh si.
*_______*_______*________*
Ka pa hna rawn bang chu a kawng a nawm loh thu a sawi ve tehkhiah a, ka nu in damdawi te pe ve mahse ala zia thei vak lo aniang chaw ei khamah amu ta nghal mai bawk a. Mama te ram kal kha chengkawl khawrh an lo tum tlang daih a a țhianpa te leilet ah an awm dawn ani awm e. Au Valpuia leh keini 2 nen chaw eina vel kan ti fel ve zawk zawk a, ka nu in ka pa vil in room lamah an tawm chawt bawk.
"Racquets ka thianpa in min rawn zawrh a, Au Val i duh mial em? Anu adam lo sia pawisa an nei vak tawh lo aniang, an bungrua pawh an hralh nual mai" tia Au Zela'n au Valpuia a biak chuan ka lo melh ve thuai a, au Zela pawh a thu tak ve khawp mai.
"Khawi ami nge?" alo ti teh daih thung.
"Bualpui ami khi nia, college kan kal ho țhin a, niminah kan inhmu nawlh a, Lunglei lama an kal tur nen" alo ti ve leh mai a.
"Lo la la, gpay a khawih chuan pawisa chu ka lo transfer mai ang, a no. te lo dil rawh" tia au Valpuia'n alo chhan chuan ka lo nui sak a, mipa dik tak ani ka ti lo thei țhin lo.
Kawngka an rawn kik lai chuan sitting room ah kan lo țhut ho ve ral lai tak ani a, lungphu dep dep a kawngka lam ka hawi chuan Kima zawk a rawn lut nawlh mai. Thaw huai a lo nuih pahin a hnunglam ka thlek deuh a mahse a țhiante tumah an lo tel ve lo thung emaw ni, amah deuh tlawngin alo kal.
"A teh nawlh che chuan, nangmahin ami ilo kal ve a?" Au Zela chuan alo ti nghal zung zung a. Kan țhutna kiang maia țhut pah chuan a țhiante an hman loh deuh thu a sawi ve mai bawk.
"Ti khan lo inkawm ru, room lamah ka lo va phei hmasa ang" tiin au Valpuia chu ading vat a, Au Zela pawh rei țhu lo in roomah alut bo ve nghal daih a kan 2 chauh in kan ni leh tlawng tawh.
"In chanchin ka lo hria a" nuih vur vur paha a rawn tih ve sup chuan sofa pillow chuan ka vawm nghal dawt a. Alo la nui țhaw zui.
"Thai i chang tawh mai dawn sia, chumi hma zawng ka lo leng tawh ang nu nih huna inrim chu a har tawh dawn si" a rawn tih leh chuan ngeiawm ti zet hian ka lo melh a, kan kawngka alo ri zawm zar bawk nen lut tura ka lo chhawn chuan Dinsanga liau luau ani rawn pen lut leh pek ni! Ka chhungte an awm lo hkaub a azia tak ala awm.
"Khai, lo kal rawh" tia inti neitu zet a Kima chuan lo fiam pahin min rawn siai zuah a ala nui sawng zui. Dinsanga chu rawn pen phei ve khup khup in ka bul lawka a rawn țhu chu kei ka ding vat a. Lungni lo hmel zet hian min rawn melh nghal bawk.
"Kim, thingpui thlum nge hang?" tiin kima zawt chu ka zawt hmasa a, "A hang" a tih sup chuan bu nghauh in Dinsanga ka va en leh chuan min lo melh leh khui tawh. A thil tisual tu zawk emaw ka inti danw dawn alawm le.....
"A hang" a rawn ti ve nghut a. Choka lam ka pan nghal bawk.
Choka țanga thingpui kenga ka phei leh chuan ngawi reng hian an lo la ţhu dun a, Dinsanga hmel tum viau mahse Kima erawh in min lo la nuih sun sun thung.
"Hman ang khan la lum tui tak che maw" Nuih insum zet a a rawn tih chuan no ka dah thlak hnu chuan a dar ah ka beng dawt a, Dinsanga țhutna lama țhu ta lo chuan Kima bulah chuan ka țhu thla nghal zat bawk. Mak alo tih hmel ru viau bawk in ka hria, Dinsanga hmel erawh a chang khel khawl hle.
"Engtik nge tih huk in tum?" Kima hmelah chuan inthlahrunna deuh hmu mahila Zodinsanga ren run erawh saw chuan a hmu thiam leh dawn lo chiang tih ka hria a, ka ti lui zel tho ang.
" Thla thar lamah, nichina i sawi tawh angin pasal neih hma min lo rim thei" ka tih chuan a nui leh vur vur a, Dinsanga erawh a rawn rum hrawih thung.
"I lum tui e, ka haw chho mai ang" tiin ano chu a dah let leh vat a. Kima din rual chuan ka ding zat bawk. Min lo thlah duh suh ti reuh eng ang mahse thlah ka duh teuh lo theih se țhu ve reng se ania ka tih. mahse haw atum miau sia, Zodinsanga nen chiah a awm ka duh teuh lo asin le.
Kima ka thlah lai chuan kawngka ah chuan a rawn chhuak ve leh nawlh thung sia. Kima nen kan lo indin chilhna ran lam chu a rawn pan phei hmawk hmawk bawk.
"Ka kal mai ang, pawimawh a awm thut a" a rawn ti nghal sup a. A hmel lan chang ang hu aiin a aw erawh ati dam viau lawi. Ngai pawimawh awm lo fahran ka lu ka lo buk khum chuan a thaw hawk a, kei lahin engtia han tih mah ka tum der silo.
"Ka lo bia ang che chuan..." tih leh paha ka pum dawm tuma a rawn phar deuh chu ka lo tawlh sawn hrut a, min rawn en nghal vut bawk. A awmdan hi ka hua, engmah thleng lo ang mai a a awm te, min ngaihsak ber leh rinawm ang ber zia zanga a awm te hi ka haw ngawih ngawih.
"Zothan" a rawn ti nghut a, Kima pawh ala ding ve run bawk." Kan naute kha ka lo mangțha ve lawk ang chu" a rawn ti nghet charh a, a aw erawh a thunun viau aniang a khauh viau nangin hriat hrehawm ani hran lo.
"I naute chu Lunglei ah a awm kha" ka lo tih ve sak chuan a thaw nghal hawk a. A kut lehlama a kanwg dawm in lehlamin a hmai a tuai puak bawk.
"Khuta mi nilo in hei hi lawm ka biak duh" a rawn ti ve leh nghut a.
"Alo nih tak chu" ka ti hmuk a, ka inkuangkuah nghak hlan bawk. A kut a ka pum a rawn dawm chuan ka sawi buai hran tawh lo bakah Kima alo awm ve bawk nen, midang hmuh a inhauh bur bur ka duh lo.
"A tawk tawh, tu tu te emaw ni angin an beng leh dawn emaw alo ti palh ang" a kut dah sawn saka ka lo tih leh hmuk chuan chiang zet hian min rawn melh hrawk a. A mitmenga inthiam lohna inpawlh deuh pawh chu ka hmu thiam mai. Țawng tuma aka a an zuau laiin a phone a rawn ri leh vut a. Phun hluk a a ipte atanga a phawrh chuan ka lo mitsir hman hram pek. Hah! Nula bawk.
"Umm, ka lo kal dawn lo awm rawh, ka lo thleng har lo ang" tih vel ani a sawi ve duah ni. Kima lah chu kal mai ala tum bik lo ka mamawh ruk zia a hri nge kaan bulah chuan ading ve run bawk.
"Ka kal mai ang" tih leh vut pahin min rawn hnaih thut a kei lah ka lo petek deuh dawr ani hrim. Kima lama ka tawlh deub rawk rawk chu a ngaihdan anj teh chiam lo aniang a phun hluk a.
"Zothanpui" a rawn ti hrawk bawk. Ka lo melh let ve ngar a "Naktukah kan sawi fel ang, nangpawh haw rawh" tiin Kima chu an melh leh ngawt pek a. Zam lo ve siah.
"Kal thuai mai rawh i nula kha nangmah rawp huam huam a alo rak ruai hma in" ngeiawm zet a ka lo tih chuan min melh rum teh e. Ka thin chhiat a zual lai taka nge maw alo sual em em kher ni.
"Ka lo bia ang che" ti nghut in a motor lam a pan a. A motor a luh rual chiah chuan ngaihdan thar ka nei thut bawk. A motor a start a a tlan chiah tihah Kima hma zawnah tak dingin "Sorry" ti hmasa te te in a hmui leh ka hmui chu ka si hmiah a, duhthawh zet in ka fawp zui nghawng nghawng bawk. Rinsangkima erawh angaihna hre lo lutuk in a dawh mawl tawp. Motor brake ri tuar ka hriat rual chiah chuan ka duh ang takin thil a thleng tih ka hre zawm zat bawk.
*________*______*_______*
*Naktuk zan hi ka lo dah thei dawn nge dawn lo ka hre lo a, Class meeting Miss in a rem dawn chuan neih ngei ngai ati sia, zanlamah comment lam lo check uluk ula kan sawi țha dawn nia aw🥰🥰🥰
Comment ru tih pawh in ngai tawh lo, in rawn comment suau suau a alawmawm vek e......
Ads hi lo click ve leh hram hram bawk ula
) rawn phawrh chhuak in ka lamah a rawn lek vu chu pawt thla leh sawk in ka hmui chu ka hru zui ve mai bawk.
(Mahse keipawh ka thiam chuang lo) Darkar 1 min han pe leh ula a sei ni mai tur
Infuih phur tawn ila, story mood a chen pawh a awl deuh alawm......Love u all....Muttui vek ule