KAN SIR BY Dilbara Khiangte (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: KAN SIR BY Dilbara Khiangte (Completed)

Unread post by Ngaia » December 5th, 2021, 2:54 pm

Kan Sir💌 by Sammy

(Ka story min type sak tu hi a buai si a, lo hrethiam teh u)

Chapter Fifteen√


Sir Reubena Mawizualloa Pov's.



Exam nan kar khat chiah a awm tawh a, students thenkhat chu an thawveng zawk emaw tih turin lehkha zir an tum lo nasa hlawm a, Etheli ala dam lova, nitin damdawiinah ka kal thin. Min hmu duhloin min biak aduh lo a, mahse ka beidawng chuanglo. Achang chuan ka dawhtheihna hian a tlinlo thin a, mahse a damlo hmel ka hmuh hian thinrim khum emaw tawngka vîn a biak hi ka ngam thlawt lo.




Exam a hnai tawh nen ka ngaihtuah viau a, a fail leh mai ang tih te chu ka lo hlauhthawn pui a, kawng engkimah ka ngaihtuah vel vek tawh ani ber mai.



Question paper arawn thlen avangin teachers common roomah ka buai nak nak a, pre atanga higher thleng anih vang hian buai tawh hi chuan buai hi ana thei khawp a, awl bik pawh a awm theihloh hi a ni tawp.



Buai lai lai a ka phone rawn ri sek chu phun hlukin ka pick a, lehlam atang chuan "Sir" arawn ti zawi sat a. "Aw enge ni? Min mamawhna inei em ?" ka âw a ka buai zia tihlan loh hram tumin ka ti dam thluam a. "Min lo awmpui teh" arawn ti leh sep a. Ka ding chhuak ut a, room chhunga awm ho chuan min en deuh thap.




"Aw ka lo kal ang" tiin phone chu ka dah a, "Lo ti lawk r'u aw, thil hmanhmawhthlak a awm a" tiin ka kal chhuak nghal a, Etheli damloin min biak duhlo vang vang hnuah ka awmpui a duh thu asawi ani a, ka tan chuan ka buai thu sawia han pumpelh na chi ani hauh lo.




Damdawiin chu ka thleng rang khawp a, Etheli awmna cabin ka luh chuan amah chiahin alo awm a. Chau zeta hmuh ka inbeisei nen nimin aiin a harh tha in ahmel pawh atha ver vawr khawp mai. Min hmuh chuan "Sir hetah lo thu teh" tiin khum chu a beng thek thek a, ka pan phei vat.




"Khawnge midang hi ?" ka tih chuan "Ka hre lo" tih zawngin min chhang a, engmah pawh sawi zawm lo chuan a duhtawk em em.




"I zia deuh em ni ?" tiin apang chu ka dek a, khawsik anei lo, ka kut chu a rawn man a, ka mita min en kalh in a thin zawnah chuan ka kut chu a dah a, "i hre thei em, a phu nasa i ti em ?" tiin min zawt a, a thin zawna ka kut awm cu en ngurin uluk deuhin ka ngaihthla a, a rawn ri dat dat chu ka hre thei. Ka lu ka bu nghat a, "Achhan i hria em, a phut nasat em em chhan hi? I bulah hian ka lung hi mu leh mal nei lo in a phu thin" a ti a, a sawi tum ka man lo.




"Mahse he lungphu hian rei tak phût na hun a nei tawh dawn lo a!" tiin a nui hak a, "Enge i sawi awmzia ?" ka tih chuan ka zak a zen lutin min kuah a, ka âwmah a bei deuh thlap. A awmdan chuan min ti hamhaih viau mai.




"I tan awmzia a nei viau lo ang ti raw? Mahse i zirlai naupang khawngaihthlak tak, uap lumtu mamawh ngawih ngawih angin min ngai la ka kiangah hian i awm thei angem?" zawi zet hian a ti sep sep a. Kuah let ve mai pawh tum lo chuan, "Ethel, min ti..." Ka sawi zawh hmaa min rawn tawngkhalh in, "Cancer hi i hre ve em ?" a rawn ti leh hlawl a.




"I hre ve em Cancer hi? Zahngaihna nei hlek lo a mi nunna lak ching an sawi thin hi i hre ve tawh em? I hre ve tawh em ka tih chu??" a tawp lam phei chu tap âw in a au tial deuh tuau a, ka kawr hnung a pawt khawm teuh bawk.




"Hahdam rawh" tiin ka kuah a, a ni erawh a inhnit ri hruih a, a tap zui hlawp hlawp.




"Kan pahnih thawnthu hi, zirtirtu leh a zirlai ang ni lova ziah that ka duh a, zirlai naupangin a zirtirtu a ruka a ngaizawng em em ang ni lo a nula leh tlangval inhmangaih tak anga kan thawnthu hi bul tan that ka duh! Mahse....." tiin a ngawi vang vang a. In la hrangin a min en kiau a, a ban a kawr hak in a hliah chu hlim tâwk in "Enteh" tiin duk deuh thleh thluah chu min hmuh a, "Hei vang hian eng thawnthu mah a bul atangin ka tan thei tawh dawn lo"




"Pangngai taka inzawmna neih a, i laka pangchang a i thik tur a awm te, ti tauh a i thlem nih te ka duh a; mahse...." tiin a ngawi leh vang vang a, a thusawi chuan ka chet min ti tawp in a thusawi chu dawnsawn dan ka thiamlo. Hetiang thu dawnin ka damchhunga ka ngaihtuah ngaihloh leh ka dawn ngailoh tura ka ruat ani. Mahse...




Pawt hnaiin ka kuah a, ka thinrim ka hre lo a mahse pangngai tak a awm ahar a, ka insehruh ngawt ngawt mai ni.




Etheli chu a tap muhil thak a, ka mut that tir hnu ah ka en vang vang a, a tah nasat avangin a bui deuh luk a, hmai vung te pawh a ang zawk mah. A ban duk chu ka en a, ka hmai tuai puak in ka thaw deuh hak. Nga tinge? Tinge, tinge, tinge !!!! Ka thluakah hian chu thu lo chu a awm theilo. Tinge midang an tam nen ani kher anih?




A duh ang tho khan pangngai taka inzawmna neih ka duh ve tho asin, ka laka a titauh a thlem te ka chak a, ka laka pangchang taka a awm lai te pawh hmuh ka duh. Tinge ani kher anih?




Etheli Pov's.




"Bawihte hei tal hi ei teh" tiin ka nu in ka kâ zawnah fiante a rawn dah a, ner nang nang chungin ka lo âng ve mai. "Tinge nu ka damloh reng a ?" Ka tih chuan "I khawsik hmasa kha a rawn intham chhuak leh a ni an tia, i thal thoh khan ati zual bawk a" ti a min rawn chhan chuan ka mal chu a rawn na zawk te hian ka hria. Ka damthat theih tehlul nen ka damlo ta reng mai hi nuam pawh ka ti lo, ka nun ram ati nguai in min ti chau zual ngawih ngawih.




Damlo ka ni a, mahse damlo tlawhtu neilo ber ka ni hial ang. Sir Reubena engtiklai pawn ka ngaihtuah a, ka thinphu tin hian a hming an lam emaw tih mai turin ka ngaihtuahna atanga hran lai a nei lo. Chhunah hi chuan mahni pawha ka in awm ve rek rek thei avangin ka nu chu ka tir haw thin a, zan lamah erawh ka pa nen min riah pui ngei ngei thin. Achang chuan UZampuia'n ka nu leh pa chu a rawn chhawk ve thin bawk a, makpa nih tlin hnup hnup kan makpa ka to deuh tawp mai.




Theih dan ang ang in lehkha ka zir ve a, mahse ka thluak hian thil ngaihtuah chiam a zo lo ka ti dawn nge ka zir sawt viau lem lo. Lehkhabu inchhawp ve nuai chungin phone screen tereuhte bihin ka nui leh vun vun thin a, Sir Reubena theihnghilhin khawvel teteuhte ah chuan ka cheng thin.




'The Story Of My Life' Abbra story ka chhiar a, ka chhiar ning theilo. Ka chhiar apiangin ka tap a, he story-ah hian a changtupa ka vei lova, a story hian min hneh ani. 'Pialralah tal' ti a inthlah ngai lo hian thihna hi awm lo se, tupawh hmangaih ber te nen hian ka hlim ni mai tur.




Chunglam melha ka mut men kar lai chuan kawngka a rawn ri rak a, midang thawm rawn awm chu tute nge annih hriat tumin ka hawi phei vat. USiamtea a rawn lut hlawl a, "Aaa, engtin nge i lo kal theih ?" ka lo ti hluai. Pangngai taka min chhang lo chuan "I damlo an ti sia, i va dam hmel si ve ?" a rawn ti nui lut vur vur.




"Tak tak a i nu ka hmu a, i damloh thu min hrilh a ka rawn kal" tiin ka khum bula chiarah chuan arawn thu thla ve mai a. Tawngkaa chhang loin ka lu ka lo bu nghat nghat.




In be miah lo chuan kan thu dun a, phone kan bih ve ve thung. Ani'n eng nge a tih ka hre lo a, kei erawh ka utopia boy tu emaw ber chanchin chhiarin ka khi leh suk suk tawh. Tukverh lam hawi a ka dahchhuah zawk chuan arsi thlawk ka va hmu hman hram a, maimitchhing in duhthu ka sam nghal hmiah mai. Sana ka en leh a, dar 8 a ni der tawh. Ka chhungte hi an rawn kal dawn lo emaw ni le ka tih rilruk reng lai chian UZampuia a rawn lang a, zanin chu aman min riahpui leh dawn a ni mahna.




Mutthilh tumin ka mit ka chhing deuh vang vang a, mahse ka mit thlaah Sir Reubena nen inchunga kan awm laia ka tawngkam vanga a hmel hamhaih lutuk hmel bawk kha arawn lang leh thin a. Ka mu thei dawn chuanglo tiin ka phone bawk ka ban leh a, youtube-ah video ka en ta vel mai mai.




Ka lo muhil ve tho aniang zing ka harh chuan ka nu pawh alo thleng tawh a, a ni leh ni lo in phone a sik ve niap niap. "Nu i va rawn kal hma" ka ti thut chu phu nasa lutuk in a phone ken lai chu chhuatah chuan a thlauh a, "I hrawk then hmasak ve te kha a har em ni ?" a rawn hmak. A phone chu a chhar a, "aww ka vin leh lo che nia, hei phone pawh a chhe lo" a rawn ti tha leh, ka nu thin tak hi chu!
.
.
.
.
Khaw thim hnaih tawh lam a ni a, ka nu te an rawn la kal lova mahni chuan ka thu deuh tlawng a, vawiinah ka harh deuh a, ka tal hah deuh nge mutchhuak arawn kal a, rei lo teah ka muhil vat.



Ka khum bula phun sep sep chu ka hria a, mahse enge asawi tih erawh ka hre theilo. Ka mit chu a inchar emaw tih mai turin men ahar a, mahse a tawpah ka khap ta fak fak a; ka khum bula Sir Reubena lo thu reng ka hmuh chuan min ti phu zawk thei. Ka lawm viau a, mahse kan sir a nihna chu ka rilruah a rawn lian a, ka dam tawh thu hrilhin haw tur chuan ka ti ta daih. Mahse athu tlat a, ka biak duhloh pawn ngawi rengin ka kut vuanin a thu tlat.




Ka nu a rawn thlen takah chuan rei vak lo hnuah a haw hram a, mahse a chhuak tur chu ka en zui leh vawng vawng tho si, Ngaiin thlahlel viau mah ila ka ta lo tur ani tih ka chianna hian hlat duhna rilru min put tir a, mahse amah hlat taka awm hi ka thinlung hian hreawm ati si, engvang kher kher a Pathian pawh hian Sir Reubena zûna min uai tir nge maw anih le.




Sir Reubena chu zantin alo kal ta ziah a, tha taka biak chang ka nei a, lo biak miah lo chang pawh ka nei thin. Zankhat a rawn kal leh chu ka en vang vang a, ka rilruah USiamtea thusawi 'A lo kal chuan lo be tha ve la, dar 10 hnua school arawn pan leh te hian naupang ho a men pui leh a, zingah lah thawh hma angai si. A hah teh ania' a tih kha ka hrechhuak a, ka khawngaih ru ang reng viau mai.




Mahse ka be duh chuanglo, ka nu nen chuan akhat tawkin an in be zeuh zeuh a, kei chu inlukhupin ka muhil hmak.
.
.
.
.
____________________________________


Ka ban rawn duk thluah ringawt chu mak ka ti hle a, ka taksa lah hi khawlai mai pawh hi ana in ka hria. Chaw ka ei theilo hrim hrim bawk nen ka chau ngawih ngawih. Chhan awm silo hian ka tah lah hi a chhuak em em ringawt a.




Chhunah chuan story bawk ka chhiar leh a, mahse a changtunu nû damloh dan a ziah chu ka awmdan nen ka inthekhin a, ka awi lo, kei hi ka cancer tihna mi! Ka inrnghlel a, ka natna ber pawh an hmuhchhuah theihloh dan te hi, ka cancer anih chu ka ring bur.




Tap purin ka nu ka phone a, a rawn thle chuan "Nu ka cancer" ka ti deuh tawp, "Cancer awmzia pawh i hria mi, chutiang sawi tawh reng reng suh" a tih chuan "Aih nu, ka ban duk te leh ka chau ngawih ngawih te hi thisen cancerho awm dan chiah chiah. Intest ka duh nuuu!!" Tap purin ka nu chu ka hrilh mawlh mawlh a, min rawn pan hnaiin min rawm thlem nghal a......


____


"Lawk in" tiin Muanawmi story min ziah, min chhiar chhuah sak leh thlap chu ka ti tawp a, "Muanawm!!!" Ka tih chuan "Enge ?" alo ti bung ve nghut.




"Tinge min cancer tir a, Sir Reubena pov. thleng kha chu ka duh, kan inngaihzawnna pawh engmah i thai lang lo" ka tih chuan "Story a nih hi, a tak a nih loh hi aw. I duhloh leh chhiar tawh lo tawp ila", "Nge min cancer tir kher angai mi, a buaithlak i ti tau hma hi pasal hi nei ve vat la a tha" ka tih chuan, "I ke arh anih chu! Pasal neih tawh vanga indah puitling em em, hmmm ka ei thlawt lo" tia ka sam min then khumin dawr atang chuan a chhuak tau nghawng nghawng a, hnunglam atang chuan ka nuih tawp.




Chibai vek u kum 2021 December thla kan chuangkai ve ta reng mai a, chuang naktuk hi tu birthday nge in hria em, Sir Reubena Mawizuala birthday ania Sir Reubena nena kan chanchin chhiar vek in ni a, in lo wish ve dawn nia.



Muanawmi'n a thiam ang tawka Sir Reubena nena kan thawnthu arawn ziah kha inlo hre vek tawh anga, mahse Muanawmi hian kan inngaihzawnna a rawn thai lang ve duh miahlo a, ngaihnawm intih dawn teh lul nen.



"Enge itih ?" ti a min rawn be thut tu vang chuan ka phu chiam a, "Mawizuallopa" tiin ka phun hluk. A naute pawm lai chuan hnute duhin, "Maa, mama..." tiin min lo ban ve chawng a, "Khawi hnute pe thei awm tak hian i hruai kual ang vak vak a" ti hlak hlak a, ka kawr hlim ka tum mai chu Mawizualloa chuan "Hlim suh" tihpahin a rawn hup a, "Khawmaw teh, naute a riltam tawh a nge maw khatia i lo hup" tiin ka beng a, "Roomah va inhnek tir ru, mi awm laia hnute hnute lang kung kung a" a tih chuan "Awii tupawn an nei vek, ka ta kher an rawn en peihlo, i thikthu chhiat vang anih kha" ti hlak hlak in room lamah chuan ka phei a. Ka hnungah min rawn zui ve zat.



Naute hnek loh lam chu rawn ban ve chhen hi a tum a, phun hlak in a kut ka lo ben sak leh thin chu a phun pui ve hluk zel bawk a. Naute chu a muhil a, phur fe hian a mutna chu a lo siamtha sawt sawt. Naute chu ka mut a, kan fapa Alex Zochhuanmawia muhil thaw sak sak chu inkuah rialin kan en a, "A that dan khu, a kut te khu en teh" tiin a kut a chet ve tual tual chu ka kawhhmuh a, ani lah pek chuan "I tet tehreng nen hian tereuhte te hi i lawm ve ang khanglanga" a rawn ti a, "Ngawi rawh, ka fapa ania ka lawm ve a ni mai lawm" ka tih chuan "A nih chuan adang siam leh ahun chiah" tiin ka hnute a rawn tham a. "I hur" tiin ka beng a, "Naute kha lo veng rawh tangkaina i nei tlem si" tiin ka chhuahsan hmak.




Kum thum lai mai kan innei ve ta. Mahse kan inneih hma chiaha sipai a alo inziah tling ve khanglang vang hian kan inhmu khat vang vang khawp mai. Kan inneih atanga thla hnih velah training turin a kal nghal mai bawk sia, ka rai lah kha a kal hnu deuh lawkah ka hrechhuak a, ka rai thu pawh phone atangin a hria a, mi thinchhia tih takah a awmloh veleh a ka rai thu ka hre chauh te chu a thinrim a, a hlim lutuk min hmu chak rawn haw thei bawk silo chu ka lakah te a titau thul, keilah raino thinchhe ve tho nen kan inbe lo thak zel.




Vawikhat a rawn haw a, ka neu neih min rawn nang hman chiah fanu kan nei a, a hmingah ka nu (Reubena nu) in Orena Lawmzuali tiin a sa a, ka duhthu sam viau lo mahse hming rapawm tak anih lemloh avang chuan pawi ka ti hranlo. Mawizualloa bawk chu ni khawngaihthlak naute a lawm ve hman khanglang sia mahse lungleng tawk leka a kal leh a ngai tawh si a, a kal leh dawn te chuan tap purin min mangtha a, a hriatlohin ka nuih tet tet.




Tuna kan naute hi Bawihtei-in kum hnih a tlin hma vel chiaha kan neih ania, he mi tum pawh hian Mawizualloa chu a titau leh nasa, "Ka rawn haw leh hunah naute pawh ka pai tir tawh lo ang che, ka awmlaia piang duh hlawmlo" a ti a, kan chhungkua in kan nuih.




In a awm tawp aiah tiin thawmhnaw dawr ka hawng ve a, Bawihtei chu a fel tawh a, ka tello pawn a pi te bulah pawh awm thei tak ani. Dawrah Tuaitea hruaiin ka kal nitin ve bawk. Apa hian phone a kan inbiak hian Tuaitea a rawn tih thin avang hian kan ko Tuaitea ve vek tawh. ( *Tuai* tih lai hia mautuai a *tuai* kan lam dang ang hian lam tur aw)




Christmas chawlh a ni a, Mawizualloa pawn a duhthusam ang zanin a fapa pawh a lawm ve thei ta. Bawihtei nen an pahnihin a awm deuh chawt a, a fate pahnih chu a dawlh lo chauh nimai hian ka hria.




Vawikhat dawrah kan chhungkaw li in kan kal a, Tuaitea chu apa chuan tih mut tumin a awi a, Muanawmi leh USiamtea an rawn lut hlawl. USiamtea chuan "Eee, mipa nau awrh chut chut pa rawn tlak an awm ngailo an tih kha" a tih chuan Muanawmi chuan rang fe hian "Chutianga i hmuhna mit kha a fiah lo a nih kha, khap tha leh rawh" a rawn ti a, kan nupa chuan kan nui dun hak.



"Pa rawn tlak tak nihloh hlauh vanga mahni fate duat taka awih mut theihloh ai chuan pa rawn tlak ka ni lo ngam mai ang. Fate duat theihloh a awm te chu fa neih man ava awm dawn lo ve" a rawn ti a, Muanawmi bawk chuan "Kha Mawizualloa chu a changtupa zaih mai" a rawn ti a, "Khatin mi ko ve suh, min û rawh" Mawizualloa'n alo ti vat.




"Etheli pawn a ko bik che em ?" Pakhatin a tih chuan "Ani te chu ka nupui duatlai ania, ka nupui ini em ni?" A ti veleh.





ZAWMNA...... (Chhiar a zahthlak tawp 🤣)



"Inhnial su, in awmdun hlek hian in inhnial reng mai" ka lo ti vat a, Muanawmi chuan a hnar a tum dat a, "Hlawh ka lak hunah engmah ka lei lo nufa ang cheu" a ti deuh hmuk.




"Reuben engtik thleng maw i awm dawn ?" Usiamtea'n a tih chuan kan pa chuan, "Kumthar kum tir lamah ka chhuk leh ang" a ti ve mai a. Tuaitea rawn te that that chu a awi su leh nghal dur dur. Muanawmi bawk chuan a nau awi su dur dur chu a lo la leh a, chek hlak hlak in "Awi awi awi, a hma kum kal ta lam kha chuan thinchhe awrlawk lutuk kha i nia. Tunah ve lem, mahni ai naupang thu thu in kal kual ang zawt zawt a" a ti a, "Ngawih rawh, pasal i nei ve chak anih kha" Kan pa'n a lo ti hluk.




USiamtea bawk rawn tawng leh in, "A va tih zia, zaninah palai an kal nawn leh dawn a, Christmas hmaa tih ngei ka duh. Chhungkaw kim lai leh thiante awm kim lai hian" a ti a. "A thu hrim in Muani USiamtea neih chu i duh reng reng ami ?" ka tih chuan, "Duh nang! Min neih a tum ve ngawt a, a zak lo tak tak a ni. An kawmthlang nuthlawi khan a zar hneh riauin ka hria a, a hnenah khan palai a tir dawn emaw ka tia" a ti tum bar a. Usiamtea chuan Muanawmi bana vawn pahin, "Nang lo duh ka nei hleinem Bawihte, kha nuthlawi kha sawi ve ziah suh" a tih chuan, "I tenawm hlei hlawi mang e, khawmaw min khawih suh" tiin Muanawmi chuan a ban chu a thing a. Awiii ti hian inneih an tum ve tawh chu ani sia maw, han inneih se an chhangche awm!




"Duati, Tuaitea hi va mut lawk ang hmiang" Kan pa in a rawn tih sur sur chuan "Inhau reng su, dawr hi lo nghak ru naute kan ve mut lawk nge" ka ti hlak hlak a. Room, office deuh reuh-ah chuan kan inzui phei a, naute mutna tur ka siam sak lai chuan min rawn keuh leh thin a, a dar a kham tawh a nih ka ring.




Naute a mut hnu chuan, "I dar a kham em, a rit ve sia" ka ti a, a kut lehlama a dar dawma han awm sawi kual vel pah chuan "I tet tet nen engtin nge kg 18 lai hi i lo puak reng theih a ?" a rawn ti hlawl a, ka nuih tawp. Tuaitea hi amah ang rualah chuan lian pawl tak ani a, puak pawh hian dar te hi a kham in a na thei viau reng a ni.
.
.
.
.
"A muhil tawh em ?" tiin ka sir atang chuan min rawn bakbawr sar sar a, "muhil lo, muhil lo, nangmah kha muhil rawh" ka lo ti hlak. Kan mut tirh atangin naute mutthilh leh mutthilh loh ringawt min zawt sek mai.





"Enge naute siam ka duh lawm" a rawn ti chuan, "Naute pawh ka pai tir tawh dawn lo che i tih kha, muhil rawh...." Ka sawi zawh rual deuh thaw chuan " a muhil tawh" tiin Tuaitea hnek loh lam zawk ka hnute chu a rawn hum chawt a, "Lo tawlh rawh" tiin a mutna lamah min pawt phei hrawk a. Naute chu phu zukin a ke a chet deuh a, mahse harh lo chuan a mu tha veleh mai a.




"A mak ngeee? Khawmaw a vawt si" tiin a kut chu lakchhuah sak ka tum a, "Aw ka kuah lum ang che" tiin mim pawt hnai sauh a, min fawp nghal zat bawk. A âwma ka nam deuh avang chuan min a inla hrang deuh a, ka hmui zawnah chuan a thaw lum deuh ham ham. "Naute hi a la mu nghet lo emai" ka tih chuan ka hnunglam chu a melh vut a, "Ninawm!" ti hlukin min fawp tawk a, ka hnute a tham na salh bawk a. A bawp lehlama min khanin, "A khumah ka va mut ang aw" a rawn ti a, chhan pawh ka chhan hma chuan thu chhuak nulhin naute chu dim thei ang berin kan khum bul lawka kan hun ama khumah chuan a va mut a, a phûr lutuk chu khumah chuan a rawn zuang lo chauh.




Min rawn fawp nghal zat a, nichin ang lo takin a duhthawh em em bawk. Keipawn ka thiam ang tawkin ka chhanglet ve a, kan inkeih tawn tawn a ni ber mai. A inla hrang leh hlek a, a hmui huh deuh hliam hnuailam chu seh zauhin, "Ka nupui duhtakte, ka student thiam thei lo nu" a rawn ti kher a, ka tawng ve hman hma chuan nui hakin min rawn fawp leh zat a, ka puan sin laiah chuan rawn lut ve in awlsam fe hian min phelh zung zung a. "Hetiang hi training naah chuan in zir tel em ni ?" ka tih chuan ani pawh anui ve hak.




"Maithei" tiin a thil chu a rawn nawr lut zat a, "hetiang pawh hi" tihpahin a chet chhunzawm nghal mawlh mawlh.




__________________________



"Anu Bawihpui Mama'n a hau" tiin Bawihtei chuan kan room kawngka a rawn lut zawkin a ti a, a kal leh nghal daih. Reiloteah kan room lam pana Bawihpui rawn tap thawm a awm a, a rawn luh hma chuan fiah mang lo hian "Ma, Mama min hau" a rawn ti bai bai. Ka thawmhnaw thleh lai chu dah in Bawihpui min rawn bawh chawt tu chu ka pawm kang a, "Ka naute hi an lo hau maw, Mama'n maw hau che? Khawnge Mama chu kan hau ang" tiin ka pawm chhuak a, Tuaitea chu phakar takin api bulah a lo tap leh chawt tawh. "Tuaia i nau i hau em ni ?" ka tih chuan, a lu a bu nghut a, "Ka toys min chuhpui a lawm" a ti fel then. Ka nu chuan, "Chuti mai mai vanga naute velh tah loh tur, khawmaw ka naute chu ka lo en" tiin Bawihpui chu a rawn ban a, Bawihpui pawh nichin lawka tap e tilo chuan fiah manglo hian, "Api mama hau suh" tiin a u chu a rawn tan veleh ang tum hrang a, ka nu nen chuan kan in en a kan nui dun hak.




Zan lamah chuan kan nufa li in kan roomah kan awm a, Bawihtei te pa min rawn call hun kan nghak ran. Tuaitea leh Bawihpuii'n ka sam an khal a, an nui dun leh ar ar thin. Bawihtei erawhin ka phone a khal a, ka sam an khawih vang nge mut chhuak a rawn kal a, chhing diar diar in ka lo bu leh lawp thin a.




Tuaitea'n ring fe a, "Apa!!" a tih chuan ka harh zawk a, phawk zet in, "Enge !" tiin ka hawi ruai a, ka hmaah chuan ka mi rinloh lutuk mai a lo ding kur mai. Min rawn en hnai lutuk chu, "i mawl ami ?" tiin a hmaiah ka beng pawp a, a faten an lo bawh chuk chuk laia an nu ber in ka lo beng chu a ngaihdan a ni vak lo aniang tum bar in a ding ngil a, a fate chu a lawm nui ve hawk hawk a.




Ka awmdan ngaia ka awm vang vang hnuah ka harh chhuak zawk a, "aaaa engtin nge i lo haw ?" tiin ka kuah ve nghal chuk chuk a, a kungzungchal in ka chalah chuan min nawr sawn a, "Nang chu nakinah a hranpa in ka duat ang che" tiin a fate bawk chu a lawm leh.




Tuaitea chu a rawn thu tau hmak a, "Tinge Tuaite ?" tia apa in a rawn zawh chuan, "Anu pawh i hmangaih ve lo, anu i duhloh chuan ka duhloh che" tiin min rawn kuah a, intithei zetin Kan pa chu ka en a, "A nih an vaiin ka lawm ang", tiin khumah chuan a rawn bawk thla rawp a, kan chhungkua chuan kan ri ta chel chul a.




A tawp ta......



Sir Reuben Mawizualloa te story a tir atanga a tawp thlenga i chhiar avangin kan lawm e 💝


Story changtlung deuhin, ka typer (😆) hian a hman veleh kan rawn dah leh ang ♥️


Chuan Mawizualloa fapa Alex Zochhuanmawia story khi a awm dawn aw 💝


A tawp na te nia comment vek tum ang aw ☺️

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)