OUR MARRIAGE By CVL Awmpuii (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: OUR MARRIAGE By CVL Awmpuii (Completed)

Unread post by Ngaia » January 9th, 2022, 1:10 pm

OUR MARRIAGE

By C.V.L. Awmpuii




Chapter - 25




Engkhaw sawi set set lovin ka malchungah ka hlang kang nawlh a, a lo rak that chu ka nuih hawk. A bula awm reng chunga ka si hlei thei miah lote hi hrehawm ka ti tawh, ka ngai tawh takzet bawk.



"Sawmdawng..." talsawn a tum bat bat a, ka kuah nghet tulh tulh thung. "Min thlah rawh" sehchilh zet hian a rawn ti a, "Awm hle hle rawh" ka lo ti hluk. A rawn tal leh bat bat a, mahse ka kuah nghet sauh sauh thung.




"Bawihi, i pumchhung ami nen hian ka ngai tawh viau che u ania" pangngai zawk chuan ka ti sup a, ka kut lehlamin a dul ka dawm nghal zat. "Ka pumchhung ami chungchang hi sawi ve tawh suh" a âw chu vin tha tek tawk tak ani, a rawn thaw chhuak hak a, ka biang a lo lum nghal hak.




Thawchham ang mai hian thaw kawk kawk a, a awmdan a dik miah lo tih ka hre zawm zat. Ka kawr nghawngah nghet zeta thamin a thaw kawk kawk a, a hmai chu a rawn thlan nghal tiam tiam.




"Bawihi...i tha em" a biangah ka khuap nghal run a, mittui tling pamin min melh, a hmel landan mawlh chu hmuh hrehawm ka ti. A thawchhuak hlei thei lo ni berin ka hria. "I tha miah lo" ka ti sup a, thawhchhuah ka tum chu min tham nghet sauh avangin ka tho chhuak theilo.




"Bawihi... Doctor ka phone dawn alawm, min thlah la ka lo let leh nghal dawn" ka sup a, harsa tih hmel zet hian a lu a rawn thing nak nak. Nghet zeta min tham chung chuan a la thaw kawk kawk a, hmuh hrehawm ka tih lutuk vangin ka thaw chhuak hrawih.




"Ka duat, hahdam rawh le" a bianga khuap run pah chuan control tum takin ka ti a, mittui tling pama min melhin a thaw chhuak ham ham a, a hma ai chuan a zia tawh. "Zawimuangin thaw chhuak rawh le" ka awmah chuan ka pawmbet a, a rawn thaw chhuak siai siai chu a samah ka lo fawp leh tawk thin.



Tinge maw hetianga a awm thut le? Nakinah Doctor pan pui leh ngei chu a ngai ang. Ngawi rengin ka kuahbet a, ani pawh a rawn pangngai chho tial tial.



A hnu reivak lovah chuan a taksa a rawn khur dat dat a, a tap niin ka hria. "Ka duatnu..." a hmel en tuma pawhhran hlek ka tum chu min lo kuahbet tlat avangin ka inlahrang theilo. "I tha tawh em?" ka ti sup a, ngawi rengin a la khur dar dar. Ka kawr âwm chu a hnawm deuh chapin ka hria.




"I sual lutuk" a rawn tawng chhuak ve ta sep, a âw chu a khur deuh dar dar a, ka awmah a hmai a phum tlat avangin a hmel ka hmu theilo. "Ka hmangaih che" a sama fawp tawk pah chuan ka lo ti sup.



Chutah chhuak zet hian a rawn tap chhuak rawng rawng a ni ber. A awmdan chuan min tihrilhai ang reng viau. Ka pawthrang hlek a, hmeichhe naupang huai bak ang mai hi a ni. Ka tihngaihna hrelo chu ka kuahbet leh tawp a, a samah ka fawp leh tawk thin.



A hnu rei vak lovah chuan a rawn inhnit feih feih a. "I tha em" ka lo ti leh sup, min chhang duh leh tawhlo. A raino rilru no inbunruak te emawni ka ti hial. "I sual lutuk" chu thu bawk chuh. "Ka hmangaih che" ka tih leh sup chuan ka awm a rawn sik vak a, a chetdan mak sak zet avang chuan ka lo nui chhuak hawk. Chutah a inlahrang hlek a, thip zetin min melh ram ram, a hmuiah ka lo fawp zeuh. Chu thil chu duhlo zetin a hmui a tuai nghal tawk a, ka lo rum nghut.




"I tah chhan kha sawi rawh le" ka ti sup a, ka thusawi chu hrelo ang hmiahin min melh ram ram reuh anih chu ! A hmelthat reuh zia chu a.



Ka chhip sam buk laiah chuan a rawn tham vak a, ka lo dawh tawp. Ka sawi tawhin ka hria a kutthlak nat loh zia chu, ka tan ngat phei chuan.



Ka sam a thlah hnu chuan a mittui a lo tling leh pam tawh. A biangah khuapin lungchim zet hian ka melh a, a mit a chhin rual chuan a mittui a rawn luang nghal pap. Thaw chhuak hawkin a mittui luang chu dim zet hian ka fawp a. Hmangaih leh duat a ni tih hi inhria se ka duh ber.



Ka tluk zal pui a, ka taksa chanveah muttirin nghet zetin ka kuah bawk. "Ka hmangaih che" a samah ka fawp leh tawk, he thu hi hrilh reng mai ka duh. Keimaha hmangaihna awm zawng zawng hi a phawrh chhuak vek emaw tih hial tur a ni. Engtin nge heti em em hian ka thinlung a sawi nghin theih ka hre bik lo.



"Tinge 'I pumchhung ami kha tu fa nge' min tih" a âw chu a lawi leh rat tawh. Nichinah pawh khan min zawt tawh, a lo la na ngang anih dawn hi. "Ka fa chauh anih hi" tah aw teuh hian a rawn ti leh a. Khatiang zawhna atthlak lutuk ka lo zawt kha pawi ka ti vawng vawng. A chungah tihluihna ka hmang a, ka fa a la pai zui. Chutah titla duh miah lovin a vawng ve tang tang a. Kei lah pek chuan zawhna dengkhawng zet ka lo zawt ania !




"Bawihi..." rilruih chuan ka ti sup a, ka thaw chhuak suai suai bawk. "Ka fa chauh anih hi" a pum dawm pah chuan a rawn ti leh tiau. A tahbelh thar ta lutuk te hian duat mi ti châk zual.




"Midang bum kual theiha ka lo awm kha pawi ka ti" keimah leh keimah inbia ka ang zawk mah. Ka âwm zawna Bawihi mu thlar chu tlemin ka pawt chho deuh hlek a. "Engkimah ka thiamlo, chuvangin engkim ka siamtha ang" ka ti nghet charh.




Darkar chanve chuang Bawihi muhil hmel chu ka thlir tawh. Tap tih hriat zetin a mit chu a bui lak a, a hnar a sen ter bawk. Mahse a duhawmna a bo chuang lo, a duhawm zual sauh emaw tih mai tur a ni.



Zing dar 8 a ri dawn tawh a, kaitho duh lovin ka la thlir reng. A rawn che deuh talh talh a, a rawn meng chhuak riai riai. Chutia inbengkang meuhva ka thlir min hmuh chuan a phawk nghal hra a, nuih sukin a hmuiah ka fawp nghal zeuh. Chetsawn nachang pawh a la hre chuang lo, lawmawm reuh lutuk mai.



"I tho nuam em?" a beka a sam zeh that pah chuan ka ti a, "Dar engzat nge?" ka zawhna min chhang lovin a rawn ti daih. "Dar 8 a ri tep, i mu tui em" ka ti leh a, a lu a rawn bu nghat.



A dulah insawn thlain a kawr chu ka hlim tawm tawp a, ka kutphah hlai hlup chuan ka dawm bet nghal run. Min lo dang bik lo.



Nizan khan thil engkim ka chinfel tur thu ka hrilh anih kha. Chuan ngaihdam ka dil mawlh mawlh bawk, min chhang tha lo mah se a rilru a nem tawh tih ka rilru chuan ka hre ve kar.



"Ka naute, anu hi tibuai rei lo la lo chhuak vat rawh aw" a pum chul pah chuan ka phun sup sup a, ka chezia chu Bawihi chuan min lo thlir reng. Ka han nuih suk chuan min lo melh kiau a "Tinge Office i la kal loh" a rawn ti sep a, "Ka chawl dawn" ka lo ti mai a, a meng deuh ak a, mahse engmah a rawn sawi zawm lem lo.



Thawh chhuah a tum chu ka lo dang vat, 'eng nge' ti ang hrim hian min melh a "Bed Rest" thutak zeta ka tih sup chuan a rawn nui hak, a nuih lah chu a'n zat hmel em em mai lehnghal a. A ngaihna hrelo zeta ka melh chu "Mut reng a ngai kher hlei nem" a rawn ti nang nang a, ka lo kiai suk. Keipawh hi enge maw ka ngaihtuah ni, niminah pawh a thochhuak tho sia hriat ve awm tak ania.




RINHLUPUII POV


Kan thawh fel hnu chuan inhnuai lamah kan inzui thla a, ka bul ami lah ren run chuan min veng deuh run hi a nimai. 'Ka pawm thla ang che' a ti thul. Heti em ema Malsawmdawnga phili hi ka la hrelo.



Min tina thin, mahse ka natna tuam dam tu chu amah bawk hi a ni leh thin. Tunah hian ka rilru tak chuan ka ngaidam tawhin ka hria a,mahse ka la khauh lui ve tlat dawn.



"In mutui maw" inhnuai kan thlen thlak hnu chuan Pi Mafeli chuan a lo ti vat a, kan muttui thuin ka lo chhang ve vat. Pi Mafeli hi Sawmdawngan heta kan awm chhung zawnga kan eirawngbawl tu tura a lak ani. Amah hi nu fel deuh, dam thluam kan tih ang chi kha ania kan vawikhat inhmuhna ah ka ngaina nghal.




Pi Mafeli thilsiam rim ka hriat chiah chuan ka riltam zia ka hrechhuak. Chawei min siam nghal a, lo tihpui ve ka tum lah chuan min dang tlat bawk si. Sawmdawnga chuan call pawimawh a dawn avangin pawn lamah phone a va hmang lawk a. A rawn luh hnuah chaw kan ei nghal.




"Ei ve ta che" ka bulah thuin ka thil ei lai chu min en run run bawk sia ka pasal mah nise nuam lo ve duh tak ani. "Heti hian ka puar" ka sam ka benga rawn zeh pah chuan a ti sup a, a nui deuh suk bawk. Ka lo ner nang nang a, min nuih nghal hawk hawk. "Ei ve rawh" ka tih nawn leh takah chuan a chaw chu a bar ve ta hram. Chaw chu ka eitui ngang mai. Ka pum chhunga naute awm vangah ka puh ta ngawt.



Chaw kan eikham fel chuan door bell a rawn ri a, ka va hawn chuan U Siamsiami te an lo ding heu mai. Min hmuh chiah chuan a ri nghal hlut a, bangbo deuhvin ka lo en heu mai. Ka hmu thut chu mak ka ti em ani.



"Lut turin min sawm dawn lo ami?" U Hmingan a rawn tih ham ham takah chuan ka harhchhuak zawk a, an lo lut nghal. "Khawnge Sawmdawnga" hawikual pah chuan U Nathan-a chuan a ti a. Room-ah a chhoh lawk thu sawiin han ko turin room lam ka pan ve nghal.



Sawmdawnga chu ka han ko a, U Siamsiami te lo kal thu ka hrilh chuan a ni pawh a bangbo ang reng viau, an hrilh lawk bik miah lo anih dawn hi.



"Teh hlawl che u chuan" inhnuaia kan inzui thlak hnu chuan Sawmdawnga chuan a ti sup a. An lo nui nghal var var. Mizoramah min rawn tlawh tur hrim hrimin an lo haw hi a lo ania. Nau ka pai thu an lo hre lehzel te chu mak ka ti angreng viau. Taka, Sawmdawngan a lo hrilh ve pawh a ni mahna.



"Rin aiin in pai hma" nui put put chung hian U Hminga chuan a rawn ti a. Ka lo sa leh hat hat tawh. A phawk a chhuak leh ang tih ka hlau, thil ni lo pui pui sawiin min tizak leh mai ang. U Siamsiami lah hian sawi hreh sit set a nei bik bawk silo a. Sawmdawnga chuan nui sukin min rawn en a, ka lo meng kalh ralh chu a rawn nui huk. "Kan kum ang rual hi chi chak hunlai" U Nathan-a chuan a rawn ti a. An tan leh tak tak tawh dawn niin ka hria.




"In faten ka fate an ngam dawn lo" nui ruh ruh chung hian Sawmdawnga chuan a rawn ti a, za zetin an rawn nui chhuak hawk hawk. "Leng rei ber tura kan ngaihin i nei hma ber ta sia" U Siamsiami chuan a rawn ti a. Midang pawh chuan an lo sawi zawm ve nak nak a, an nui leh dar dar thin.



Zanriah ei ve nghal turin kan sawm a, an rawn insawm chawp a ni zawk mah. Chawhmeh turte pawh an rawn keng thlap. U Siamsiami nen kan awm tho a, Pi Mafeli chu kan haw hma tir ta daih. Hmeithai a ni a, a fate pahnih la naupang tete amahin a chawm vek a. Kan hnathawk mah nise theih chen chenah puih ve ka duh.



"Bawihi..." vawi nga min rawn kohna a ni tawh. Choka-ah U Siamsiami nen eirawng kan bawl a, thutkhawmna a lo inkawm hlim turin kan kalsan a. Choka-a ka awm hi a hmu thei thlawt lo ni berin ka hre tawh. Tunah pawh dawhkan bulah ka salad chanlai chu min lo dinchilh leh run tawh. "I thiante bulah lo va awm ve rawh ka tih chu" ka tih lah chuan naupang chhia ang mai hian a rum leh nghut tawh. Nichinah pawh heti chiah hian kan inthlah a, a va phei ngial a, minute 5 pawh a va awm tling theilo ka bulah a rawn kal leh nge nge zel.




U Siamsiami chuan kan chawhmeh chuan a chawk a, a hnunglam khurh dar dar danah nuih insum zetin kan pahnih awmdan chu a lo bengkhawn hle tih ka hre thei.



"Lo phei mai rawh" pakhat pa lah chuan ka bula ding run chungin a rawn ti leh thlawt a, rum zetin ka lo melh. "Eirawng bawl kan ngai alawm, kan hman hunah kan rawn phei ve mai ang" ka lo ti ve tlat. A ngawi deuh run run a, a phone rawn phawrh pahin "Pi Mafeli kha ko leh mai ang" a rawn ti nghut. "A tullo" tih hlak pahin a phone chu chhuhsak ka tum a, ka ban phak loh turin a lu chungah a keng kang nghal daih, rum zeta ka melh chu min nuih suk duh lek chauh.




"A ninawm emai... Puipui va kal mai teh keimahin ka lo ti mai ang" U Siamsiami chuan a rawn ti ta thlawt a, "A ngai lo... Sawmdawng lo va kal rawh" thutthlengah chuan ka thu leh tharh a, salad chu ka chan zawm leh mawlh mawlh. Pakhatpa lah chu a lo ding ngawi ngul a, min melh run run, ka mitsir atang chuan ka hmu thei.




"A ngaihna a awm thlawt lo, hna a sawt lo zawk ang Puipui min hnial lovin va kal mai rawh" U Siamsiami chuan a rawn ti leh hlak hlak a. Pakhatpa lah chuan min lo vuan nghal chawt. Ka hnial lui duh ta bik lo, hepa pui roh hi enge maw a hriat ni.




Thutkhawmna lama min kaih phei chuan a thiante lah chu an lo bo diak ang lawi a. "Khawiah nge an awm vek a" a ngaihna hrelo zeta ka tih chuan thlang lam veranda-a an awm thuin min chhang a. Chulam chu min panpui ve mai dawn emaw ka tihlaiin inchung lamah min kai chho ta daih. Ngawi rengin ka zui ve mai bawk a, kan room-ah min luhpui chuan a ngaihna ka hrelo hle tawh.



"Eng nge kan tih dawn..." ka tih rual rual chuan room kawngkharah min nam bet a, ka hmui a rawn khar nghal hmak. Duhthawh zet hian min fawp ngawng ngawng a, ka lo thaw chhuak hak chu remchangah la-in a lei a rawn tiche nghal zat. A duhthawh lutuk chu lo chhan ve ngaihna pawh ka hrelo. A hnu deuhvah chuan ka hmui hnuai a rawn pet ngawng ngawng a, zawimuangin a hmui chu a la sawn a, hmui huh hliama ka ding ngawng deuh chhû chu min nuih ri suk.




"Khami ti tur khan" ka hmui bul chetah chuan a rawn ti sup a. "Vawikhat leh chiah" ti supin min rawn fawp leh a, chhanlet ngaihna pawh ka hrelo, a che thut thut zel bawk si, min thawng thin mah mah a ni e.



"Min chhang let rawh" inlakhran hlek pah chuan a rawn ti nghut a, tawngna hun pawh min pe lovin ka hmui a rawn bawhthuah lehnghal zat. Ka thiam ang tawkin ka hmui chu ka lo tiche ve a, chu chuan a tiphur zual sauh nge ni duhthaw zet hian min fawp zawm ngawng ngawng a. Min pawmkan nawlh rual chuan ka lo rak that, tlak hlau takin a nghawngah ka lo vuanbet nghal tai.




Khum dup nuam zetah chuan min muttir a, min rawn delhbet nghal zat. Ka hmui bawk chu a rawn bawhthuah leh a, nui sak chungin ka lo chhanglet veleh vat. A chezia reng reng chu a zei a ni tawp. Ka hmui a thlah rual chuan ka lo thaw chhuak hak a, ka kawrfual hak lai chu ka âwmah a rawn hlim chho tawm tawk a, ka bra haklai pawh a hlim tawm nghal vek. Hmuhnawm tih hmel zet hian min thlir vung vung a, hnuai lam chuan min do run bawk nen ka lo sa chhuak vek thei.



"Ka fawp dawn" tih tuak pah chuan ka hnute chu a rawn hmuam nghal zat a, ka thawk ka lo hip let kawk thung. A kut lehlamin a hûm tai bawk a, duhthawh thiam lutuk mai. A sam buk laiah chuan thamin ka lo thaw halh halh.




Ka divide a rawn hlip tur chiah chu room kawngka a rawn inkik a, ka phu nghal dawrh, Sawmdawnga erawh a rum nghut thung. "Lo chhuak teh u" U Hminga âw a ni. "Hepa hi chuh..." tih nghut pahin Sawmdawnga chuan ka chalah a rawn fawp tawk a, ka kawrfual leh bra chu min siamrem sak nghal zat bawk. Ka lo meng phelh phang min hmuh chuan a nui suk a, lai zetin a samah ka kek vak a, a rawn nui chhuak nghal hawk hawk.




"Lo chhuak teh u..." U Hminga bawk chuan kawngka a rawn kik leh a, Sawmdawnga chu phun hluk pahin a tho a, dim zetin min kaitho ve nghal zat bawk.




Kawngka kan hawng chiah chu min hmuh rual rualin a lo nui heu mai. Ka zah lutuk vangin Sawmdawnga kawngah chuan ka tham a, a hnungah ka biru daih bawk. "Eng nge" bul zet hian Sawmdawnga chuan a ti hluk a. "Ka lo kik mai mai" ngaihsam zet hian U Hminga chuan a ti mai a. Sawmdawnga erawh a lo rum nghut.




Inhnuai lama kan inzui thla chu min lo en thup a, an nuih a zat hlawm hmel viau bawk. "I han kal tak tak elaw" U Siamsiami chuan a lo ti a. "Ka kal ngam ka tih mawlh mawlh kha" U Hminga chuan a lo ti vat. An han nui thaw hlawm lehnghal a.



"Ka han tibuai teh ang a tia a rawn ko che u anih kha" U Nathan-a chuan a rawn ti a, Sawmdawnga chu a lo rum nghut. An va han naupang chhia hlawm mai mai tak e aw.



______________________



Ka nau pai chu a hrâm chho ve tial tial a, tunah chuan thla nga a ni ve der tawh. Kan in pangngai lamah kan let leh tawh a. Ka lo rindan chiahin Sawmdawnga bawkin awmngaihna a hrelo leh tawh. Ka dul a len hma pawh khan khati khawp khan a phili a, tunah phei chuan tihngaihna hlawl a awm thin lo. Ka nu leh pa te phei chuan a fa hmasa ner tur a ni a a phur ang ang khan phur tir mai teh min ti tawp tawh. A ni telin min duat zual tawlh tawlh a, raino ka pel tawh bawk a luak chhuak leh insawiselna em em pawh ka nei tawh lo.




"Mipa nge hmeichhia anih i rin" ka dul puar ve lah tawh chul tupa sama tham sak zeuh pah chuan ka ti sep a, "Ka hrelo le... hmeichhia a ni emaw mipa a ni emaw ka duat ve ve dawn tho" a rawn ti sup a, ka dul zawn atanga rawn hawichhuah pah chuan min rawn nuih suk, a va han hmeltha chiang tak.




Ka dul chu a fawp vang vang a, "Ka naute lo chhuak vat rawh aw" zantin heti hian a be ziah thin. 'Engmah a hrethiam ve si lova' ka tih lah hian 'Ka be duh alawm' a ti mai zel. A lo pian hma hauh pawhin heti khawp hian a ngaihsak a, a lo pian chhuah hunah phei chuan engtin tak han inawm pafa thin ang maw.



Rawn tho kangin puan chu min sin thattir a, ka bula a rawn inthawlh rual chuan ka lo kuah nghal sat sat. A âwm ah min kuah bet leh hlu hlu tawh, hetianga ka awm hian ka thlamuang thin.



"Naktuk kha check up ka neih ni tiraw khah" ka tih sep chuan ka samah a rawn fawp vang vang phawt a, "Umm...ka hruai ang che" a rawn ti sup. Vawitam ka nu nen kan kal ve mai theih thu ka hrilh thin. Mahse a phal thak lo, aman min hruai kher zel. Hna thila a buai viau pawhin ka check up ni kher kher hi chu hunawl a insiam hram hram thin.




"Naktuk chu zawh that a ngai ani" ka dul chul pah chuan a rawn ti sup a, a thusawi awmzia ka hrelo, a awm zawn atang chuan ka han melh a, mit a chhing daih thung. "Eng maw" ka tih ha chuan a rawn meng chhuak a, ka lo melh deuh ha min hmuh chuan min nuih suk a, "Insûm hi mawle" a chunga min pawh kai rual chuan hnuai lamin min do deuh salh a, a thusawi awmzia chu ka man tawh lutuk tlat. "Sawmdawng..." sawi tur ka hre leh silo rum chhar chhar vel chu min lo nuih hawk hawk.




Bed Rest hnua kan in check up leh khan naute insiam hunlai anih avanga insum rih turin Doctor in min ti a. Thla hnih chhung vel chu kan insum tawh, mahse zanlaiah washroom a hmang zing mah mah thin. 'Kan mu hrang rih mai dawn mi' ka tih lahin a duh ngai bawk si lo. A chang chuan ka pasal a nihna anga a mamawh ka pe theilo chu ka khawngaih a, ka inthiamlo thin.




Vawikhat pawh hrehawm ka ti lutuk ka lo tap tawp a, room-a keimaha ka awm laiin ania, a office a rawn ban hma tum tak a ni bawk si a, min rawn hmufuh ta anih kha. Zawhna chi hrang hrang min zawt a,
"Tinge i tah?"
"Ka duatnu an hau che ami?"
"Na i nei ami?"
"Bawihi, tinge i tah?"
A âw a duatnate avang khan ka insum zo lova ka sawi ta tawp anih kha. A hnuah chuan tihian min hrilh "I lakah hian sex chauh ka duh hlei nem. Nupa nun tihnghehna pakhat ve mai a ni a, nakinah khatiang kha chu hun kan la ngah dawn lutuk. I tah hian hrehawm ka ti ber zel ania. Chuvangin tap tawh suh aw. I tana thalo tur engmah ka tihpui duhlo che, ka insum thei lutuk. Ka hmangaih che ka tih tawh kha" tiin min hrilhfiah ta duah anih kha.



_____*_____*_____*_____*______



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:10 pm

OUR MARRIAGE

By C.V.L. Awmpuii




Chapter - 26



"Puipui, check up tur chuan ka kalpui ang che aw" tukthuan eilai chuan ka nuin a rawn ti a. Sawmdawngan a lo hnial leh vat tawh "Ka kalpui dawn, ka hman alawm" a rawn ti a. Ka lo inthlahrung leh em em tawh. Mahse tihngaihna hlawl hi a awm thin bawk si lo. Ka nu pawh chu nui var var pahin a ngawi ta tawp, a fapa chu a tilui thei dawn lo tih a hrechiang hle ani mahna. Mawimawii leh ka pa pawh an lo then tha a. Pakhatpa lah chuan ngaihtuah lo zet hian a chaw bar lai chu a bar zawm mial mial thung.




Kan in check up dawn apiangin ka nu hian 'ka lo kalpui ang che' a ti ziah a, a fapa ber bur hian a lo hnial ziah bawk. A châng chuan ka nu hian a tilui thin niin ka hria. A fapa chhaih buai nan a rawn sawi thin ni berin ka hre tawh.



Bathroom kawngkhar rawn ri rak atang chuan Sawmdawnga chu boxer nen a rawn chhuak a, towel-in a lu a rawn hru pah mawlh mawlh bawk. Ka lo awmdan min hmuh chuan mit tizim sun hian min rawn melh a, ka lo meng kalh ralh chu a rawn nui chhuak hawk.




Ka hak tur zawngin bra leh panty nen chauh wardrobe bulah ka ding a. Min rawn hmutu chu ka pasal mah nise ka la zak tho, ka biang a sa leh hat hat tawh. Ka lam panin a rawn kal phei a, min melh deuh ngur bawk si, ka lo sa pup pup a ni ber.



"Ka hâk tur ka zawng a..." ka zahzelah ka lo ti bah nak a, a mit chu ka taksaah a fu ngur. "Heihi aw...ah...ih...anih loh pawhin heihi" kawrfual pahnih khai tawn pah chuan ka ti bah nawk nawk a. Ka bul a lo thleng fel der !



Ka kawngah a rawn dawm rûn a, ka zak lutuk chu zahzelah ka lo nuih lui tawp, a kiai ve suk. Ka kawrfual khai pahnih chu khumah a thehthla tawp a "Ka fawp phawt ang che..." ti supin ka hmui a rawn khar nghal hmiah. Zei zet hian min fawp ngawng ngawng a, ka hmui ka tiche ve dawn chiah a a inlahrang daih, ka kawngah a la vuan reng thung.




"I inhâk vat loh chuan eng emaw ka ti duh mai ang" a ti sup a, za lo zetin a kiai suk bawk. A taksa tang mar lutuk chuan a thusawi chu a nem nghet. Ka lo nui lui ve hak. Kawrfual par sen ka dul len hnu-a min leisak chu min lakchhuah sak a, rang zetin ka lo inbel ve vat.




Doctor kan hmu zo chu a nui leh vur vur thin. A motor khalh laite chuan min rawn nuih leh ruh ruh thin a, ka lo meng kalh ralh min hmuh chuan za zetin a rawn nui chhuak leh hawk thin. A ngaihtuahna ka hrechiang lutuk tlat. Doctor Tetea kan pan leh a, a thianpa em em chu thil zawh hreh te a neih ve ka ring ania mahse a ni hauh lo, a thianpa pawh a zah zo chuang lo. A duhnaah chuan Malsawmdawnga hian zah a hre thlawt lo.



"I ril a tam em?" motor steering chu hneh zet hian a tuai vir a, "Tam em em pawh ka hrelo" ka lo ti sep a. "Ei chak i nei em?" a rawn ti leh hram. Ka ngaihtuahnaah momo sa tha ver vawr a rawn lut thut a, ka pumin a hre zawm zat. Zawhna mitmenga mit a rawn kan leh ak takah chuan momo ka eichak thuin ka lo chhang vat a, a lo bu nghut.



Kawngsir vela an lo thutpui chu min eipui mai dawn emaw ka ti a, mahse a tlanpel zel. "Sawtah pawh an zawrh reng kha" ka insum thei tawh thlawt lo, ka ei chak zawng min zawt a, ka sawi ta cheng a min lei a tum leh bawk si lo, ka lo ei chak ve tawh bawk nen ka ril a tam vek tawhin ka hria.




Ka thusawi avang chuan ka lam a lo hawi vat a, "Kawngsir ami thil an ei ngailo" a rawn ti sup. A van ho mai mai tak e aw, dawr changkang tak tak ami thil ei ai chuan kawngsir vel ami hi tui tih zawk chang ka ngah mai. "A tui tho alawm" ka lo ti nang nang, min rawn melh zawk a "I va ei chak tawh awm veleh" a rawn ti hluai a. Kawngsir rem lai deuhvah chuan motor chu a tiding a, "Lo nghak lawk rawh" ti supin motor atang chuan a chhuak a. Rei vak lova a lo let leh chuan box panga hi a rawn kenglut tun a, mak ti deuh taka ka lo melh chuan a rawn nui suk.




"Motor seat hnungah hian lo kal rawh le" ka thutna lam kawngka chu a rawn hawng a, dim zetin min kaichhuak nghal bawk. Seat hnung lam kawngka chu a hawng a, ka thulut fel chiah tihah a rawn lut ve a, a chezia chu ka lo en reng. Box a rawn hawng chiah chu momo rim a rawn nam nghal châk châk mai. "Ei teuh rawh le" ka lama rawn lek pah chuan a ti sup a, rang zetin ka lo ban nghal.




Ka ei chhung chuan ka sam chu ka bengah a lo zep tha leh zeuh zeuh thin a, ka lo nuih leh sen sen thin. Box pahnih ami chu ka eizo tawh a, mahse ka la eichak zel tho anih chu !



"I puar tawh em? Puar loh chuan kan lei leh dawn" ka sam chul pah chuan a rawn ti sup a, a âw a dam thluam bawk. Box pali ami ka ei zawh meuh chuan puar tawh tak ka ni. Box pakhatah piece 6 zel a awm ania , momo chu hne a awl tehlul nen engtin nge khatiang zat em em kha ka ei theih pawh ka hrelo. "Ka puar tawh lutuk" bu nghat nghat pah chuan ka ti sep a, ka thil eilai chu ka la thial deuh bawk. "Naute a puar em?" ka dul rawn dawm pah chuan a ti leh sup a, ka lo bu nghat nghat.



"Anih chuan apa chauh a ril a tam a nimaw?" a rawn tih chiah chuan 'ei ve rawh' pawh ka lo ti miah lo tih ka hrechhuak zawk. "Box pakhat ami hi ei ve rawh" inthlahrung ru deuh taka ka tih chuan a lu a lo thing mai a. "I ril a tam kha..." ka tih deuh nang nang chuan "Keichu haw hunah" a lo ti mai a, kawngsir ami chu a ten pek anih ka ring.



"A tenawm loh" ka lo tih hlak chuan a rawn nui chhuak hawk, a ngaihna hrelo zeta ka lo en chuan "Eitur tamin a tam lova" a rawn ti sup, a mitmeng ka en chiah chu a sawi tum ka man lutuk tlat. "Sawmdawng..." ka melh deuh khai khai a, a nuih a za zual sauh emaw tih tur a ni. Min rawn kuahin ka samah a rawn fawp tawk a, "Haw vat kan ngai ania" a rawn tih leh sup chuan a kawngah ka lo sik vak.



In kan thlen chuan ka nuin chanchin min lo zawt vat a, naute that thu leh keimahah pawh insawiselna ka neih loh thuin ka lo chhang ve vat.



Ka pum len hnu hian Sawmdawnga mai bakah ka nu leh pa, Mawimawii leh U Sangtei te thleng hian min duat em em vek a, hetiang chhungkua a ka lawi lut hi ka vannei thlawt. Ka pi te pawhin an theihna kawng kawngah min rawn ngaihtuah a, tu hmuh hmasak ber tur ni si lovah chuan min duat hlawm lutuk tlat.



"Khati khan min melh tawh suh" ka melh ve ngar a, khumah chuan thu thluang duaiin a rawn nui hawk hawk. Min melh dan saw awmzia a nei, ka duhlo, ka che zawng zawng min tilai vek. Tunah pawh inbual tura bathroom a luh ka tum a, chesawn hlei thei lovin ka zahzelah wardrobe ka hawng ka hawng ringawt. "Engtin nge ka melh che a" nuihza insum zet hian a rawn ti a. Ka bathrobe kenlai chu ka hlawm sawk sawk a, a lamah ka va vawm nghal tawp. A lo hre lawk emaw tih turin a lo man chat lehnghal.




"Ka lo bual mai ang che" ti supin a rawn tho chhuak hluai a, min rawn pawmkang nghal uaih, tlak hlau zetin a nghawngah ka lo vuan bet nghal. "Ka nu ngaih a thalo ange" ka rak teng tung chu min lo khap vat. Keipawh ka ngaihtuah chhuak zawk a, ka ngawi nghal dak.





Bathroom chhuat vawt thlerah chuan min dintir a, shower a rawn on nghal zat, "Bawihi i thawmhnaw hi i hlip dawn nge ka hlihsak dawn che" ka lo ding khawng lah chu nuihza insum zet hian a rawn ti a. Rum zetin ka lo melh thung, tinge maw a chimawm thar em em mai le.




"Sawmdawng ka inbual duh ania" a mitmenga min chhaih na chu haiderin zak lo tak anga lang chungin ka ti sep a. A ngai pawimawh duh der lo, ka kawngah a rawn chelh a, a lamah min pawt nghal dawrh. "Khati khan che thut thut zel suh..." a mitmeng ka hmuh avang chuan ka âw a zuih ral daih.



A mitmeng zet chuleh ! Ka sawi chhuak lo zawk mai ang. "Ka hmangaihnu" rilruih hian ka hmai bul setah a rawn ti a. Ka tawng chhuak ve ngam tawhlo reng reng. Shower hnuaiah kan la ding reng a, kan thuamhnaw pawh a huh vek tawh.



"Sawmdawng..." ka hmui a rawn si hman lo chiah chiah. "Sawmdawng..." kan room kawngka kik pah chuan ka nu chuan a rawn au leh a, Sawmdawnga chu a lo phun hluk kei erawh ka lo nui hak thung. Ka nuin a rawn koh leh takah chuan a thaw chhuak hrawih a, chimawm zetin ka lo melh chho kar a, lei ka chhuah zeuh a, ka lei chu a rawn pet anih chu !



"Va chhuak mai rawh aw" a nghawngah chuan ka hmui ka nawr a, min man ngheh a tum leh chiah chu chimawm chhuah ka petek daih. Min melh deuh run run chu nuihza insum zetin ka lo melh thung. "I hre khawp ang" ti hlukin a chhuak ta hram, duhthawh zetin min fawh hman hram pek kha.



Ka intihfai zawh chuan inhnuaiah ka zuk chhuk thla a, ka hawikual a, Sawmdawnga chu ka hmu mai lo. Choka lamah chuan ka nu a lo ri leh rak rak tawh. "Khawnge Sawmdawnga kha?" ka hmuh mai loh avang chuan ka zawt a, "Library lamah an rawn chho anih kha hna thil aniang, patling pahnih an rawn kal a" tiin ka nu chuan min lo chhang zung zung a ka lo bu nghat nghat.




Ka nu nen maian kan hih lai chuan Sawmdawnga te chu choka lamah an rawn pen lut a, min rawn hmuh chuan ka bula rawn kalin a rawn kun hniam a, ka chalah a rawn fawp zauh. Ka nu te awmlai chuan heti hian ti tawh lo turin ka hrilh ziah a, a zawm duh der lo. Kan chhungte pawhin eng teh ualah an ngailo a ni mahna min bengkhawn vak ngailo.



Patling pahnih rawn zui luttute chu min inhmelhriattir zung zung a, pakhat chu U Siamsiami pa a lo ni reng a "Matein 'Sawmdawnga nupui chu a hmeltha lutuk' tiin a lo sawi chamchi a, thil a sawi uar theih lutuk vang hian kan lo uksak vak lem lova mahse i lo hmeltha em lah tak anih hi" min chibai pah chuan a ti sup sup a, ka lo lai leh em em tawh. Fakna dawngtu nih hi a nuam a, a lawmawm bawk. Mahse ka nihna bak baka min fak ni a ka hriat hian ka zak ngawih ngawih zel.




Sawmdawnga chu naupang chhia ang mai hian intithei hmel a lo puin ka hria. "U Siamsiami te an lo kal ve nange" thu dang ka lo zawt vat a. "Chennai lamah a awm leh tawh, mahni ram ngaih nachang pawh a hrelo" a lo ti leh duah a. "Mahse in fa chu hmuh a tum ruh khawp mai" nui huk huk chunga a rawn tih chuan ka lo nui ve hak hak. Pa fel tak a nih ngei ka ring, a fanu pawh a fel emai.




Ka pa leh Sawmdawngan hna thil an sawi rih avangin keimahin room ah chuan ka lo awm a, ka lo mufel than tawh. Ruati nen kan inbia a, tinge henu hian min chhaih laih a tum tlat thin le aw? A thil nuam tih ber pawl niin ka hria.
"A bual thin lo che maw... Malsawmdawnga her hawr khan" a nui zui awr awr a, ka lo ner nasa, min hmu thei tawp silo. Sawmdawnga sawi nana 'her hawr' tih tawngkam a hmang tel kher chu a inhmeh ka ti letling phian. "Pasal i nei ve chak anih kha" ka tihngaihna hrelo chuan ka'n ti ngawt pek a, a rawn nui nasa mai.



Kan inbe zo chiah tihah Sawmdawnga chu a rawn lut a, ka lo nuih var var. "I lo muhil nange" ka lam panin a rawn kal vat a, ka chalah a rawn fawp zauh. "Naute in kuah lum a duh a" ka lo tih let vat rual chuan a kawr phelh pahin a nui rawn nui ro hawk. Khumah hian boxer nen chauh a mu thin a, a âwm lum nuam lutuk ngheng chiala mutthilh chu thlamuan thlak tak ani.




Ka bulah chuan a rawn inthawlh nghal zat a, zantin a tih thin dan angin a âwmah min pawmbet leh hlu hlu tawh "Ka naute chuan lum nuam a ti em?" min duatna âw ka a rawn tih sup chuan a lam ka han hawi vat a, a hmuiah ka fawp zeuh, rang zetin a âwm ah ka bei leh nghal, a rawn nui chhuak hawk hawk thung.



"Bawihi..." ka sam chul heuh heuh pah chuan a rawn ti sup a. "I muhil tawh ami" a rawn tih leh sup chuan "Aih" tiin ka lo chhang vat. Chumi rual deuh thaw chuan min hnuk chho deuh hrawk a. Ka tawng tur chiah chu hnuai lam rawn tang mar tawlh tawlh ka hriat vang chuan ka thaw chhuak hak.



"Ka mamawh che..." a thaw hawk a, keipawh ka danglam tual tual. "Keipawhin, mahse ka dul a lian tawh sia ka chetpui..." ka tihlai mek chuan "Ka awl vek ang che" a rawn ti sup a, ka lo nui hak, a ni pawh a nui ro ve hawk tho. Vawiina Doctor Tetean naute a insiam tawh bawk a a pawi tawhlo a tih kha a lo la hre kar anih dawn hi.



Ka hmuiah dim zetin a rawn fawp a, ka lo chhang let ve vat. Zei zet hian a rawn chet zawm a, chetpui ve thei lo mahila ka theih tawkin ka lo dawngsawng thung.



Thlan tla dapin a âwmah chuan ka bei thlar a, ka dul a lian ve tawh bawk nen ka chau ve hnep thei. "Ka tina che em?" min ngaihtuah zeta a rawn tih chuan ka thawk a la pangngai vak lo nen ka chhang mai theilo. "Bawihi..." a rawn tih leh sup chuan ka lu ka lo thing vat.


_____________



Ka pum rawn na leh tial tial avang chuan ka kut khuap runtu chu nghet zetin ka chelh a, "A na leh tawh ami?" a âw chu min ngaihtuahnain a khat, chu chuan min tizuau sawt lehnghal a, mittui tling pama melhin ka buk nghat rual chuan hrehawm tih hmel zet hian a thaw chhuak hrawk.




Nizan dar 9 vel atang khan nau ka vei tan a. Tunah vartian a ni tawh a, nau a la hnai chiah lo an ti bawk si darkar sarih vel zet ka vei tawh. Nurse niin nau vei na tuar lai chu ka lo hmu fo tawh a, a nat zia an sawi pawh ka lo hre fo tawh. Mahse mahni chunga a rawn thleng chiah chu a natzia hi ka sawifiah thiamlo zawk. Nu te lo tawrhchhel zia ka hrefiah uar uar mai.




Sawmdawnga mipa ah pawh pa ve tawk tak, luhlul leh tak ngul mai kha a nupuiin nau ka vei meuh chuan awmngaihna a hre hlawl lo a ni ber. Ka kut chu chelhin a fawp leh tawk thin.



"Naute lo chhuak tawh la..." ka dul chu a kut lum thur thur chuan a rawn chul a, na tuar rum ngawt ngawtin awm mah ila chu ringawt pawh chu ka thlamuanpui hliah hliah. "Bawihi...tuar fan fan rawh aw i bulah ka awm reng dawn ania" min duat zet hian a rawn ti thum bul bul a, ka pum a na bawk nen ka chhang peih rihlo.



A tihngaihna hrelo chuan a thianpa Dr Tetea chu a phone leh ngawt pek a, "Rawn kal mai rawh...anih loh chuan zai mai rawh...na a ti tawh alawm...i rawn kal lo anih chuan..." chutiang vel chu a sawi teh duahin ka hria, ka pumna lutuk vangin a thusawi chu ka hre mumal theilo.



Rei vak lovah Dr Tetea chu a rawn thleng a, min rawn check leh chuan nau a hnaih tawh thu a rawn sawi a, nau neihna room lama min nawr phei vat turin nurse te thu a pe nghal bawk. Min nawr phei chhung zawng chuan Sawmdawnga chuan ka kut chu nghet zetin a la chelh a, keipawn ngjet zetin ka lo hum ve bawk.




Min nawrlut dawn chiah tihah chuan eng emaw a rawn thleng leh ta tlat, Sawmdawngan min dang ta tlat mai le! Dr Tetea rawn lut ve tur chu a lo dang ani zawk mah. A ngaihna hrelo zeta Dr Tetean a melh chuan "Nang chuan buaipui suh?" Sawmdawnga chuan a ti sup a, "Min ring lo em ni?" Dr Tetea chuan a ti hluai. Chutah Sawmdawnga chuan a ngawih run run hnu chuan "Hmeichhe doctor buaipui tur an awm lo ami" a rawn ti sup anih chu ! Dr Tetea chu a nui chhuak ta hawk. Keipawh na tuar e tilo chuan ka nui tawp. Hepa em em hi chu tihngaihna a awm hlawl lo. Rei vak lovah Dr Cindy-i chu a rawn kal a, min rawn buaipui ta vat.



Darkar khat dawn theihtawpa ka beih hnu chuan fanu duhawm em em mai kg 3 leh gram 500 ka neih thu min rawn hrilh ta, lawmna avangin ka biangah mittui a luang thla pap thei.




Nau neihna ward atanga min nawrchhuah chuan Sawmdawnga chuan min lo pan vat a, kan chhungte an lo nui ri hak. "Bawihi..." ka kuta min chelhin lungchim zet hian min en a, ka lo nuih var var. "Fanu duhawm lutuk min pek avangin ka lawm e" ti supin ka chalah a rawn fawp vang vang.



Cabin lamah min dah lehnghal a, Sawmdawngan a fanu hmel a hmu chiah chu awmngaihna a hre hlawl lo a ni ber. A en ngawih ngawih hnu chuan vanvadakin a nui hawk hawk a, a ni ang palian , aw awl lian bawk si kan cabin zimtea a nuih chhuah meuh chuan a khawk rum rum thei. Kan chhungte pawhin lu thing nak nak chungin nui sangin an lo en tawp.




"Goldie...ka rangkachak, ka lunghlute" a fanu chu a pawmbet hlun a, a phun zui sup sup. A chezia lawmna avanga awmngaihna hrelo zeta a fanu a pawmbet hlun chu nui sang chungin ka lo en tawp. Malsawmdawnga hi a lungawi takzet niin ka hria.



Kan chhungten an han pawm turte chu a pawmbet tung anih chu ! A ni ang patling pui tawh hian a fanu chu midang pawm a phal tlat lo. Mawimawii phei chuan rum zet hian a melh tawh. "Sawmdawng...i nau kha pawmtir ve phawt teh" ka pain thutak zeta a rawn tih sup takah chuan a nau a melh run run hnu chuan a phal ve ta hram.





A fanu chu a nau a pawmtir hnu chuan ka mutna lam a rawn pan a, nui sanga ka lo melh chu hmangaih hmel zet hian min rawn melh a. Ka kut a rawn hum nghal run, "Ka hmangaih che" a rawn ti nghet charh a, "Keipawhin" ka lo ti ve sep. "Ka thinrim rah chu a hmeltha khawp mai" nui ruh ruh chung chuan a rawn ti lehpek anih chu ! Rum zet hian ka lo melh a, ka kut chu a rawn fawp tawk duh lek chauh.



"A hmeltha e..." a khat tawkin Mawimawii chuan a vahnu a pawmlai chu a rawn ti leh thin. "I tetlai a ang" ka nu chuan a lo ti a, Mawimawii mitmeng chu a nung nghal sarh "Kan inang maw" a rawn ti hluai a, a nu chuan nui hak hak chung hian "In hmaifang a inang, mahse a mitmeng kha chu Sawmdawnga chiah chiah" a rawn ti leh a "Ka fanu a ni miau alawm" ka bula mi chuan a lo ti sup, hmanhmawh thin hian a, a fanu a nilo pawh an ti tawp silo.




Vanlalruati a rawn thlen chiah chuan a rawn ri nghal thawr thawr "A pa in a siam laiin a uluk aniang a hmeltha tlat" sawi awm leh awm loh hi a hre si lova maw. Tunah pawh ka chhungte awm kim thap laiin a nih hi a rawn pawk chhuah leh pawp pawp tawh, kan chhungte pawhin a zia hi chu ngaiah an nei tawh a, an lo nui dar dar. Ka erawh ka zak lutuk chuan Sawmdawnga hnungah ka tham vak a, ani pui roh lah chu a nui ruh ruh duh lek chauh, hahthlak hian.



Ni hnih hnu chuan insawiselna em em ka neih loh avangin damdawiin atang chuan kan chhuak a. Sawmdawngan min hruai haw a,midang zawng chuan in lamah min lo nghak thung.



In kan thlen chuan mak tak maiin U Siamsiami te ho an lo awm tehmial anih chu . Kan fanu hmel a hmuh chuan a rak chul a, nula senior pui e tilo chuan naupangchhia zet hian a awm ka ti mai.



Lalremruata lah chuan "Keimah min chhûn" a'n ti tlat pek anih chu ! A û Sawmdawnga chu rum tha el ul tak ani. "Ka tetlai ang chiah chiah a ti ka nuin...chuan a mitmeng chu U Sawmdawnga chiah chiah, chhunna lai che a nei velo" Mawimawii chuan a lo ti zat zat a. Lalremruata lah chuan a pawm duh der lo. "Min chhun ve chiang e" a la ti fan fan anih chu ! Mawimawii nen an inhnial leh rak rak tawh.




Choka lama an inzui phei hnu chuan ka bul ami chu a fanu pawm chung chuan a phun bul bul a, "Lalremruata kha a chhun lo nasa...engtin nge a chhun ang ka fanu anih hi, a teuhlo a chhun lo nasa lutuk... Goldie ka rangkachak ka lunghlute" amah leh amah chu a inbia a ni ber. Nuihza insum zetin an pafa inpawm chu ka lo en tawp. Tunah hian Lalremruata tum a hlawhtling, a û Sawmdawnga chhaih buai phet hi alawm a tum chu.



Ka nu (keima nu) chuan kan fanu chuan ka hmui a chhun thu a sawi a, chu chauh chu kan inanna a sawi thei, hmeichhia mahnise Sawmdawnga a ang an ti zel, a hmel a pâ tihna ni lovin Sawmdawnga fa ani tih hai theih loh tawp ang chi kha. Mahse ka lawm zawk ka fanuin mipa dang a chhun daih chuan ka rilru a nuam miah nang.



Ka pa (Sawmdawnga pa) chuan kan fanu hmingah kan nupa hming chawiin 'Malsawmhlupuii' tih a sa a, Sawmdawngan 'Goldie' tih a belh bawk, rangkachak tihna a ni.


________*_______*_______*_______


(Duhtak te u ✨ in zar ka va zo nasa ve ! Ka beisei phak bakin in mi support na ka dawng tha a ka lawm lutuk ka sawi thiamlo zawk. December thla hlawh hnem ber ka lo ni hial anih chu ! Ka tih ni lovin in zar liau liau ani tih ka hrechiang. He thawnthu ka ziah tirh hian hlawh lam reng reng ka lo ngaihtuah lova, ka suangtuahna dinchhuah pui ve mai kha ka tum a ni a. Mahse nangmahni zarah ka beisei miah loh thil a rawn thleng ta nawlh anih hi. Ka lawm em em vek aw❤️.)

*Naktukah tihtawp ka tum tawh a, lawmthu sawina chipchiar zawk pawh kan la nei dawn nia💖*

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:11 pm

OUR MARRIAGE

By C.V.L. Awmpuii


(A tawp note khu min chhiar zawh sak hram ru aw)

LAST CHAPTER


"Duhthawh ve reuh lutuk" a fanu hnute hne ve dek dek rawn bih pah chuan a rawn ti sup a, ka lo nui hak. Inhnuai lamah an la ri nak nak hlawm a, kan thawmhnaw dahfel pahin room lamah Bawihtei hnute ka hnek tir mek a, a pa lah chuan min thutchilh run a, a fanu ka hnute hne ve dek dek chu hmangaih hmel zet hian a melh leh ngawih ngawih thin.



"A puar tawh chuan ka lo pawm ang" kan fanu chu a puar tawh ni awm tak a ni, a hmui che chu a tawp ve det a. Sawmdawnga kut rawn phar duai chu dim zet hian ka pawmtir a, inhnuai lamah muang changin kan inzui thla nghal.




"I û te pawhin an hmu chak tawh khawp mai" ka nu chuan a rawn ti a. "Eng nge an an tawh a" ka lo tilet ve vat. Thla hmasa lawk khan nau an nei ve leh a, mipa bawk a nei leh. Tun tum chu a inhliam nasa deuh nen chetsawn a la rem lutuk lova tunah pawh kan fanu min rawn la hmuhpui theilo, phone call hmang chuan kan inbe reng tho. "A ziaawm tawh lutuk, i û bawk a phili leh tawh, hna pawh a chawl rei tawh khawp mai" ka nu chuan a ti leh hlak hlak a, ka û chebuai leh vel tur chu ka mitthla ah a rawn lang a, ka lo nui hak hak.




"Bawihte...nanau chu lo enchhin la" Amos-a chu ka nu bulah fel than hian a thu reuh a, a awmdan chu a lai reuh emaw ni. Chutia ka koh takah chuan rangzetin kan thutna lam a rawn pan a, apa Sawmdawnga bulah inthlahrung dekin a rawn thu a, "Nanau chu hmeltha i ti em?" Sawmdawnga chuan naute entir pah chuan a ti sup a, Amos-a chu rang zetin a bu nghat nghat, "Eichu nau ngah tawh e, two ka nei tawh" phur zet hian a rawn ti reuh a, a kut pahnih a rawn tipir nghal veu bawk. A chezia lawmawm lutuk avang chuan kan lo nui hak hak.



"Mos-te nangma nau nge anitei naute hmeltha" Mawimawii chuan a lo ti vat a. Amos-a chu a ngawi deuh vang vang a, a ngaihtuah ve reuh emawni. Goldie tih loh a hreh bawk si a nau hmeltha tih a duh ve tho bawk si inngaihtuah buai lai vel chu nuihza insum zet hian kan lo en a. A hnu rei vak lovah chuan "Baby boy ah keima nau Gerrard hmeltha, baby girl ah keima nau Goldie tho" a rawn ti reuh anih chu ! Engtin nge maw chutianga sawi nachang te a hriat reuh ni. Kan lawm reuh lutuk chu kan lo nui dar dar.



Kan fanu chu Pathian zarah a tlei reuh phian a. Tunah chuan thla thum lai a ni ve tawh. A tap ngai mang lo tih theih a ni, a ni Mawimawii phei chuan 'A fel lutuk hi a khawngaihthlak zawk' a ti hial thin. U Sangtei te pawhin an lo len phei changin 'Goldie bawihte tap ve thin la' a'n ti ringawt zel pek anih kha.



A pa hian a atchilh em em lutuk a, a hmaa hna atchilh bur thin kha office a rawn haw hma ta ziah a, mahse ka pa chuan a khap duh chuang miah lo. 'A fa hmasa ber a ni a, tikhan enliam phawt mai rawh u' a ti tawp ! Fa lo neih belh lehzel pawh ni ila heti tak hian a atchilh tho keichuan ka ring.



"A fel reuh e tikhan a muhil ve tawp mai ania" U Nu-i chuan a fapa pawm pah chuan a rawn ti nang nang a, Bawihtei ka malchunga mu sam chul sak pah chuan ka lo nui hak hak.



Vawiinah an nufain an rawn leng phei a, Amos-a an rawn hruai tel lo tehmial, 'tinge' ti a ka zawh chuan "Nau a neih hnu hian a inti tlangval thar lutuk a, a hahthlak zawk. Vawiin pawh 'Papa hna ka thawhpui dawn' a ti tung a, a pa lah a lo phur bawk sia office ah an inzui anih kha" a ti hlak hlak a, ka lo nui tha. An pafa han inbuaipui vel tur chu ka mitthla in a tin zawn ruai ruai thei.



"Zanah a mu tha em?" Amos-a nau melh pah chuan ka ti sep a, a lu a thing nghal nak nak "A sual lutuk, tihian chhunah a ngawi kar a, zanah a meng leh kar a a tap vak zel" a rawn ti hlak hlak a. "I û in a awi mu thin" nuihza insum zeta a rawn tih leh chuan ka nui chhuak ve hak hak.



U Nu-i haw hnu chuan eirawng ka bawl vat vat a, ka nuin Bawihtei a lo pawm thung. "Ka rangkachakte..." thutkhawmna lam atanga thawm ka hriat chuan ka chawhmeh chawk lai chu lawm lohvin ka nui nghal ver ver. Ka sawi tawh kha a fanu vang hian hna pawh a thawk mumal thei thin lo. A fanu chuan a pa kohna chu a hre ve emawni tih turin a lo rak ve tung a. Eirawng bawl pah chuan an inlawm ri chu ngaithla in ka lo nui var var.



"I lo chau em?" ka hnung lam atang chuan ka kawngah nghet zetin min rawn kuah hlun a. Ka fian kenlai chu dahin a kut chu ka lo vawn hnan ve tai a, a lam hawi tur chuan ka inher vat. "I chau zawk em?" lu thin pah chuan ka lo ti sep a, a tih thin dan ngai tein "In hmel ka hmu a ka chau a reh vek" a ti leh tawh. Ka lo nui ri hak chu ka hmuiah a rawn fawp zeuh a, ka hawikual nghal ruai min hmuh chuan "Thlang lam Veranda ah Bawihtei a pawm" a lo ti sup. Ka nu te hi a hmaizah ve lo zawk emawni an awmlai pawh ni se a duhdan tak hian a che tawp zel mai.



"Min inthlak pui lawk la" a tih sup chuan ka thil chhuan lai chu ka off vat a, thutkhawmna lama kan inzui phei chuan ka nu leh Bawihtei pawh an lo awm leh tawh. Bawihtein a pa a hmuh chuan hre ve ni awm tak hian a kut a lo phar a, rei ngial an inchhaih leh hnu chuan Sawmdawnga chuan "Kan han inthlak lawk ang" ka nu bulah chuan a ti sup a, ka nu chu a lo bu nghat a, kan inzui chho nghal.




A kamisz kawrkilh ka phelh sak lai chuan a kuthlei zetin ka mawng bawr chu a rawn hrawm leh tawk thin. "Ding tha rawh" rum zetin ka melh kha kha a, engah mah ngai lo tih hriat zet hian a nui suk duh lek chauh. A kamisz bân ka phelh dawn lai chuan a kut lehlamin a hnute a rawn tham tawk a, "Malsawmdawng..." ka te nghal that, chimawm zet hian min rawn nuih suk anih chu ! Hepa em em hi chuh !




"Tikhan nangmahin inthlak rawh" tih hlak pah chuan kalsan ka tum a, rang zetin min pawtlet nghal dawrh. Ka lo inring hman bawk si lo nen a awmah chuan ka bawh nghal rawk rawk. Nghet zetin ka kawngah chuan min chelh a, min melh ngur bawk, a mitmeng awmdan chu sawi lo zawk ang. A taksa tang mar talh talh chu ka hre rang ngang mai.




"Min lo ngai em?" ka hmai chu a hmuiin a rawn nul thuak a, "Ngai vak lo ta che ila" chimawm chhuahin ka mitko ka san ak a, aw rawl thum dutin a rawn nui chhuak hawk hawk. Chutah chiang zeta min rawn melh lehin "Ka ngai thung che alawm" ti leh supin engmah ka sawi ve hma hauhvin ka hmui a rawn khar chilh leh hmiah tawh.




"Chhuk tawh ila" ka ti sep a, khumah thuin naute ang maiin a malchungah min pawm leh hlu hlu tawh. Chutah inlahrang hlekin "Ka fawp leh phawt ang che" a ti sup a, min rawn fawp zawm nghal zat. Rei ngial uluk fahrana min fawh hnu chuan "Ka kham thei ngai dawn lo che anih hi" a ti sup a, a kiai tel suk bawk. A van pa chiang tak.




Kan inzui thlak chuan Bawihtei pawh a lo la tlei khawp mai. Ani Mawimawii leh apu an lo haw tawh a, an lo in lawm rak leh chul tawh. Mawimawii pawh hian a atchilh thaw thang a ni a, Bawihtei awm hnu atang hian a dawr pawh a khar hma phah ta reng mai ni.




"A muhil tawh em?" Laptop atang chuan a mit lasawnin chiang zetin min rawn melh a, ka lu ka lo thing nak nak, a rawn thaw chhuak nghal hawk a, nuihza insum deuhvin Bawihtei chu hnute ka pek zawm mawlh mawlh. Bawihtei nen chuan khumah kan mu tawh a. Sawmdawnga chuan couch ah hna tul pawimawh a la ti a, laptop a la bih ngur, a khat tawkin tuna a zawhna ngai bawk kha min rawn zawt deuh sek bawk.



A tuar thei tawh thlawt lo aniang a laptop chu a khup thawk a, kan lam panin a rawn kal a. Ka bulah a rawn inthawlh nghal zat, rawn inbengkangin Bawihtei hnute hne dek dek chu a melh ve ngur a, min rawn kuah chungin a fanu sam chu a rawn chul sak a "Goldie...muhil tawh rawh" a'n ti ngawt pek a, a fanu chuan a hrethiam awm der silo. "Engmah a hrethiam lo" nuihza insum deuhva ka lo ti chu ka bengbulah a rawn rum nghut. "Anu hi ka duat ve duh tawh a, muhil tawh la" a rawn ti nghet leh churh a, "Khatiang fate bulah an sawi ngailo" ka lo tih hlak chuan ka tihdan ang chiah in "Engmah a hrethiam lo" a rawn ti ve hluk anih chu ! A va han nghal mai mai tak e aw.




"A mu nghet tawh ang" tih nghut pahin ka hnute a rawn tham tawk a, ka lo melh kha kha chuan "Ka ta ve tho anih hi" a rawn ti leh nghut. "Mak viau zel lo teh" ka lo ti ve hlak a. Min nuih liam mai mai lehnghal a.



Ka taksa a chul kual vel ruai takah chuan ka lo danglam veleh nghal vek tawh. "Ka mak viau ami?" chimawm zet hian a rawn ti a, ka taksa danglam vel chu a hre hneh lutuk tlat. A zawhna pawh chhang hlei thei lovin ka thawchhuak halh halh a. Rang zetin ka kawrfual chu a rawn hlim chho tawk a, min melh leh ngur ngur tawh. Vawitam heti hian awm ve tawh mah ila ka zam hi a la reh hlei theilo.



"Bawihtei...a...a harh ange" thei leh thei lo chuan ka ti chhuak sep a, a rum nghut. Thawmhnaw inbel kan nei tawh lova saruak ngal ngatin kan awm tawh, engtikin nge ka mutkawr kha a lo hlih hman pawh ka hre lo. Ka thusawi ngai pawimawh lo zet chuan chet a lak zawm ta tho. Bawihtei pawh a lo harh em bik lo.




A ni telin Sawmdawnga chuan min duat tial tial ka tilo theilo. A tira inneih ka hreh zia te kha ka ngaihtuah let chang hian ka lo neilo ang tih ka hlau leh ngawih ngawih thin. Kan nufa tan ani tluka pa tha an awm leh thei tawh ngailo ang. Keh thei dawm tak meuh meuhvin min dawm a. Ka tum loh deuhvin a bulah chuan ka pangchang tlat zel.




Bawihtei muthilh lai chuan Vanlalruati nen kan inbia a, a thu rawn sawi chuan min thawng kher asin. Ka hamhaih lutuk a, awmngaihna pawh min ti hrelo, ka nghilh deuh dup maiin ka hria.
"Puipui..." a rawn tih fan leh raih takah chuan ka harh chhuak leh chiah. "Amah i hrilh tawh em?" ka rilrua awm hmasa ber chu ka zawt tawp a, a ngawih deuh vang vang hnuah "La hrilh lo" zawi zet hian a rawn ti sep. A âw ah chuan a tap chiang a ni tih ka hre zawm zat bawk. "Ruat... hlauthawng miah lo la kan inah lo kal phawt teh chuan pangngai zawkin kan sawi dawn nia" ka ti zung zung a. "I chhungte an awm ang?" a rawn tih chuan an awm loh thuin ka lo chhang vat. Ka nu chu ka pi te in lamah a leng phei lawk a, midang zawng hnaah an kal thung.





A lo kal tur thu min hrilh hnuah kan inbiakna chu kan titawp a. Ka ngaihtuahnaah chuan thil tam tak a rawn lut nghal zut zut a ni ber. Engtin nge hetiang hian a thlen theih zawk? A rai thu min rawn hrilh, chu pawh Dr Rinpuia fa lehnghal !



Ruati nghak tur chuan inhnuai lamah Bawihtei chu ka paw thla a, tui zetin a la muhil siai siai.


Ruatin min hmuh veleh chuan min kuah nghal thlawp a, ka lo kuah let ve vat. A mit bui lak atang chuan a tap nasa takzet tih ka hre nghal mai. "A muhil elaw" puak puan rawn keu pah chuan a rawn ti sep a, ka lo bu nghat. "Lo lut la" ka tih chuan min rawn zui lut ve mai a.



Sofa ah chuan a thu kun ngal a, Bawihtei awi chung chuan a bulah ka lo ding ve ran. "Han sawi chiang teh" ka tawng chhuah hma chu tawng a tum miah lo niin ka hria. A rawn thaw chhuak halh a, a rawn hawi chhuah chuan a mittui a lo tling leh pam tawh. A thusawi tur chu ka lo ngaichâng ran.



"Ih... Hospital Doctor leh staff te zawng zawng intihhlimna kan neih tumin ania..." a hmui a pet deuh fan fan a, chumi ni-a thil thleng chu a ngaihtuah ni awm tak ani. "Picnic spot ah hun kan hmang a, zan khat riak turin ania kan kal. Tupawh khan nuam kan ti vek a. Hotuten zu leh beer, ruihtheihthil hrim hrim ken luh loh tur an ti a, a buaithlak zawnga khawsa tumah an awm lo. Chuan, Doctor Rinpuia nen pawh chuan zing lamah chuan zangkhai deuhvin kan inbia a, kal lamah pawh hospital staff te bula kal ve lovin a car-ah min phur nghe nghe. Tlai lam a lo nia, ka awm a nawm loh deuh avangin ka room tura kan book sa lamah khan ka tawm deuh chawt a. Ka muhil dawn lek lek tihah kawngka an rawn kik a, ka va hawn chuan Dr Rinpuia a lo nia, min nuih vur vur a, zu rim a nam bawk. Chuan...luh min dil a a tirah chuan ka remti lo dawn dawn a, mahse ka luhtir ta tho a...A...Puipui, a thleng deuh tawp a nimai. Ka inten lutuk" chhuak zetin a tap deuh hawk a, a bulah thuin a darah ka lo chul vat.





"A rei tawh em?" a inhnit deuh faih faih hnu chuan ka ti chhuak sep a. A lu a lo thing nak nak "Rei lo, rei lo tihah kar thum vel a liam tawh. Khami tuka ka harh leh khan Dr Rinpuia chu ka bulah a lo la mu a, tihharh hlau deuhvin ka thawh san a, Medical Superintendent bulah ka dam sam loh thu chhuan lamin ka haw daih. A tukah Hospital atanga banna ka thehluh zawm nghal a, chumi ni pawh chuan Dr Rinpuia chu ka hmu, mahse hmeichhe pakhat nen an awmdun lai ania rang deuhvin ka kalsan nghal daih, min rawn hmu hman thovin ka hria" a rawn ti leh duah a, a thaw chhuak deuh ham ham.



"Dr Rinpuia chu i biak ngei a ngai anih chu" ka ti nghat a, a lu a thing nghal nawk nawk "Ka duhlo ka hmu ngam tawhlo. Eng angin nge min ngaih ang a. Kha zan khan ani chu a rui a, keichu ka harhfim tal a, lo dang tur zawk ka nih lai khan a khawih dan ang angin ka lo awm tawp a, ka sihhnip hmel dawn em asin" a rawn ti tiak a, a tah a chhuah leh hmel viau tawh mai. Ka lu ka lo thing nak nak a, "Kan hriat kha Dr Rinpuia chutiang mi a nilo. I rai tih hre phei se chu a lawm viau zawk ang" ka tih lai mek chuan a phone a rawn ri a, 'Dr Rinpuia' a ni. Call chu rang zetin a off daih.




A ngaihna hrelo zeta ka en deuh ha chuan "Hnaa ka ban atang khan min rawn biak a tum thin a, ka be ngam thlawt lo alawm" a rawn ti a. Tunah chuan ka fiah deuh uar uar tain ka hria. Dr Rinpuia hian Ruati hi a lo duh ru reng tawh a ni thei, Ruati hian a hlauhthawn vang mai maiin a be ngam lo niin ka hria.



"Dr Rinpuia hi i duh em?" chiang zetin a mitah ka en a, a mitmeng pha nghal dui atang chuan a haw zawk zawk lo tih ka hriat zawm zat. "Aa...khami zan kha chu a thleng thut alawm" a rawn ti daih, a mitmeng atang chuan a duh tih ka hai lo nasa.




Ruati haw hnu chuan thil chi hrang hrang ka ngaihtuah a. An inkara lo inrawlh chu duhlo viau mah ila ka chet chhuah ve ngei a ngai dawn ta tlatin ka hria. Tunah phei chuan an inkarah fa hial a lo awm tawh dawn lehnghal a, an buaina chinfel pui chu ka batah ka ngai zawk hmiah tawh.




"Bawihi...eng nge i ngaihtuah" hnai zetah Sawmdawnga chuan min rawn bih a, ka ngaihtuahna ka lo kawm char char tih ka hre zawm zat. Khumah chuan a rawn inthawlh ve nghal a, min rawn kuah leh hlun tawh. Bawihtei a mutui bawk a, a lam hawi zawng chuan ka inher sat sat a, a awmah ka hmai ka phum zui kak, a rim pa zet chu ka hip lut nghal vang vang.




"Engmaw i lo ngaihtuah a" ka sam chul pah chuan a rawn ti leh sup a. Sawmdawnga hi hrilh ta mai ila tihdan kawngte a lo hre mial angem? Mipa anih na angin thil zawh duh pawh ka nei tho a, hrilh chiah lovin thu kalphung sawi ta mai ila, "Ih maw..." ka ti sep a, ka thusawi a ngaithla tih lantir nan ka sam a rawn fawp tawk. "I ruih vangin zankhat thil thuah hmeichhe thianghlim pakhat hi lo chetsual pui ta la, a hnuah lo rai leh ta si se engtin nge i tih ang?" ka ti deuh thawr a, ka zawhna teh thut chu mak a ti viau aniang a ngawih deuh vung vung hnu chuan "Ka hrethiamlo, mahse ka fa chu a pa ka nihna angin a laka ka mawhphurhna chu hlen ngei ka tum ang. Aaa ...a hmeichhia azir te pawh a ni ve ang chu" a tawp lamah chuan a nui tel suk.





Ka lo buk nghat nghat chuan "Tinge chutiang te min zawh a?" a ti chhuak sup a. 'Ka zawt mai mai che' han ti dawn ila a awihlo nasa dawn bawk si. Tunah hian hrilh ta mai ila a pawi viau angem le? Dr Rinpuia leh Ruati an ni tih a hriat chuan ngaihdan a siam ve theih mai ka ring. Hrilh mai chu ka pawi ti ta em em bik lo.



Dr Rinpuia leh Ruati chungchang ka sawi lai chuan uluk zetin min lo ngaihthlak sak a, a lo bu deuh nghut nghut bawk. A tawpah chuan "Eng nge i ngaih ve dan" ka ti chhuak sep a. Min kuah tha sauh sauh pah chuan "Dr Rinpuia chuan a duh viah che khan ka hre sia" nuihza insum deuh hian a rawn ti a, ka lo ner nang nang, a rawn nui chhuak hawk hawk.



A hnu deuhvah chuan pangngai zawk hian "Dr Rinpuia chu mi thalo tak niin ka hre lem lo. Ruati a rai tih a hriat chuan a lawm viau zawk lo maw te ka ti" a ti chhuak sup a. "Ruatin a hrilh ngam lo tlat a" ka lo tih hap chuan "Fa a nei dawn tih hriat chu a phu ve" a lo ti vat. A sawi dik ka ti khawp mai.



Rei ngial kan titi hnu chuan rem min ruatpui ta a, tha ka lo ti khawp mai. Dr Rinpuia leh Ruati te chu chawei ah kan sawm a, kan sawm ve ve tih an inhre tawn lo ve ve thung. Kan chhungte dang awm loh lai chu remchangah kan la a, ka nu leh pa leh Mawimawii te chu dine out turin an chhuak.



Dr Rinpuia chu phone call hmangin ka sawm a, mak a rawn ti viau mai. "In pa a rum el ul si" a rawn ti uang ve ngial a, min chhaih ve deuh emawni. Ruati chuan a lo hnial em em lo.



Ruati a rawn thleng hmasa a, Bawihtei a lawm nghal hlut, Bawihtei pawhin a lo hmuh than avangin a hre ve viau tawh. Dr Rinpuia a rawn thlen chiah chuan an inmelh phawk dun angreng hle, an inmelh vang vang a, chumi hnuah Sawmdawnga leh keimah min rawn melh tawn zak zak.


Ruati chu a che vut a, sofa-a a purse dah chu a ban nghal a, chhuah mai a tum chu Sawmdawnga thu rawn sawi avang chuan a ding dat, "I pum chhunga naute chungchang kha a pa hian hriat ve a phu ania" a rawn ti nghut a. Dr Rinpuia mit chu Ruati pum zawnah a fu nghal ngur a, Ruati chuan rangzetin a pum chu a hup nghal hmak.


Ruati chuan chhuah luih a tum a, mahse Dr Rinpuia chuan a kutah a lo man hmiah "Sawidun tur kan nei" a ti nghut a. Kan nupa min rawn melh chuan Sawmdawnga chu a lo bu nghut. "Room-ah lo han awm ang u aw" tiin a fanu chu a pawmkang nghal a, ka kawngah min rawn kuahin kan inzui chho nghal.



Room-ah chuan ka vei tawn sek a, Sawmdawnga chuan a fanu chhaih pahin ka chezia chu min lo nuih ri leh suk thin. "Titeh Bawihi naupang chhia pawh an nih tawh loh kha" a rawn ti dam thluam a, mahse ka rilru a hah tho bawk si.




Ka phone a rawn rik chuan rangzetin ka pick up a, "Rawn chhuk tawh ru" Dr Rinpuia chuan a rawn ti sup a, a dah zui nghal daih.



Sawmdawnga ka hrilh chuan a nui suk a, a ngaihtuah tur awm ang ka hrethiam lo. Inhnuai lama kan inzui thlak chuan sofa ah insi rialin an lo thu a, Ruati kut chu Dr Rinpuia chuan a hum deuh hlun bawk. An sawifel thei ta angah ka ngai hmiah.



"Chuan..." kan zuk thutthlak ve hnu chuan Sawmdawnga chuan a ti sup a. "Ka ru haw mai ang" Dr Rinpuia chuan a ti sup a, Ruati nen kan hawi nghal dawrh. "Chutiang ngawt te chu..." Ruati chuan a ti hluai a, ka bul ami pui roh lah chuan "A that hlauh chu" a lo ti sam et.



"Chutiang ngawt a tihchi loh, thil pakhat in tisual tawh a, tihpun lun belh kha a thalo. Ruatin a rai thu a chhungte bulah lo sawi sela nangpawhin i chhungte bulah lo sawi ve bawk la, inneih in duh thu i sawi tel bawk ang a. Chutiang chuan chhungte nen rem ruat zawk rawh u" Dr Rinpuia bulah chuan ka lo ti ve duah a, ka bul ami chuan nui vur vur chungin min lo en.




Mipa hi chuan thil an lo ngaihtuah tlem asin, an puitling mawh an tih hi a lo dik anih dawn hi.




Rin ai takin kan chawei khawm chu kan hlim ta phian. Sawmdawnga leh Dr Rinpuia pawh an lo inkawm thei zek lehnghal a.





"A zei hawr hawr viau lo maw?" min chhaih laih dan kawng ringawt a zawng thin bawk a, ka hun a intan ve tawh, phuba lakna hun tak a ni. Vanlalruati chu ka zawhna avang chuan a lai ve khanglang emawni min han beng deuh thlawp ringawt ah. Mi a han chhaih kual nasat theih nen heti hi chuan a hrethiam ve tawh ang chu.




"Ka tan theihtawp a chhuah thin a, rilru na a ka awm lai pawhin ka bulah a ding zel thin. Tina ngai hauh suh ang che aw, ka tan theihtawp a chhuah thin ang hian a tan ka inhuam ve ania" Dr Rinpuia bulah chuan Ruatin Sawmdawnga malchunga ka fanu thu a chhaih lai melh pah chuan ka ti nghet charh a. Dr Rinpuia pawh a lo bu nghut, "A neih hlu ber min hlan a, ka tina palh anih pawhin keimah bawkin ka tuam dam leh ang. Ka fa lo piang tur nen chuan hmangaih takin ka enkawl ang" a rawn ti nghet ve charh. A thusawi chu a ti mai mai lo tih ka hria. Ka thiannu tan hian Dr Rinpuia hi ka ring tawk bawk.




Nau hial an pai ta bawk si a, an chhungten an han hriat chuan inneih an ti nghal deuh rum rum hi a nimai. Ruati chu a nu leh pain tawngkam hnih khat chuan an zilh a, nu leh pa an nihna anga an tihtur pakhat ni-ah ka ngai, Ruati pawhin a la na lem lo, tawngkam dengkhawng lutukin an fanu neihchhun an hau phal dawnlo tih ka hre ve tlat. Dr Rinpuia chhungte chu an lawm zawk emaw tih tur a ni. A awm ve tho senior lamah an fapain nupui a nei dawn ania, naute a la chhawm dawn zui.



Chhungkaw khawsak harsa an ni lemlo ve ve bawk a, dan hnihnaa innei mah nise an bei pui angreng khawp mai. Keipawh buai chung chungin mo thianah ka tang, Bawihtei chhuanlama ka hman pawhin Vanlalruati hian a ti tung reuh bawk si a. Ka chhungte pawhin an lo support rapthlak mai bawk si. Inneih ni chu kan tlingtla ve ta hram. Bawihtei pawh a tlei chi tih takah ani Mawimawii bulah a awm ve chawt a, hnute ka pe tih loh chu an la hrang nghal zel ani ringawt.




"Vawiin zet kha chu mo thian zunah hian ka uai" ka bengbulah chuan a rawn phun sup sup a, ka lo sa pup pup thei. Bawihtei muthilh lai a ni bawk nen kan inbual dun a, bathtub chhungah min pawm anih chu! Thawmhnaw engmah inbel lo lehnghalin. Chau viau e tilo chuan ka lo dawngsawng tha leh em em thei tho. Ka pasal Malsawmdawnga kha a ni miau a.



______________

Test Kit chu ka hum deuh vang vang a, ka inrinhlelh lawk ang ngeiin ka rai. Ka hlim rual rualin ka zak. Bawihtei pawh kum 1 a la tling silo thla 11 na a hmang mek a, chutah nau ka keng lehnghal mai ania.



Zing luak chhuak deuh hlui ka neih thin avangin ka inringhlel a. Vanlalruati lo leng tur chu test kit ka chah a, phur zetin min rawn lei anih kha. Tunah hian kan room-ah Bawihtei a lo awmpui a, ka rai tih hre leh phei se chu engtiang takin nge min tihzah leh ang ka ngaihtuah thiam lo zawk.




"Chuan..." bathroom atanga ka chhuah chuan a mitko min lo san khum ak ak a, Bawihtei a pawm bawk. "Rin sen pahnih" ka tih sep chuan a meng kalh nghal ralh. Aw...sawtiang hmel saw alawm ka hmuh duh loh chu, "Vanlalruat engmah sawi suh" ka ti nghal that a, "Engmah ka sawi loh kha" za zetin a rawn nui chhuak hawk hawk. Engmah sawi lo mah se a mitmeng khan min chhaih, nghal chikimi ka ti mai.




Ruati haw hnu chuan ka nu chu ka rai thu ka hrilh nghal a, a lo lawm ngang mai. Sawmdawnga phone nghal a tum ut ut a, mahse a rawn haw rum rum ka hlauh avangin ka lo dang vat, a call nghal em bik lo.




Sawmdawnga rawn haw hnu chuan room ah kan inzui lut a, Bawihtei chu ka nuin a lo awmpui. A tih thin dan angin min fawp vawng vawng a. Ka inlahrang hlek chu mit min san khum ak a, drawer a test kit ka dah chu lachhuakin ka hmuh a, a tirah chuan a hamhaih hmel, mahse a hnu lawkah min rawn kuah thlawp a, lungchim zetin min melh leh vawng vawng tawh. A mitmengah chuan a lawmzia hai theih a nilo.




"Ka hmangaih che" ka chalah a rawn fawp vang vang a. "Keipawhin ka hmangaih che" ka lo tichhuak ve sep.



Kan chhungte dangin an han hriat leh chuan Bawihtei ka pai lai ang chiah khan an phur leh em em a. Sawmdawnga pawh phur leh hawrh hawrh tawh tak ani.



"Goldie, anu pum chhungah hian i nau tur a awm ania aw" a fanu hnute tui ka pelai chu a rawn be mawlh mawlh a, ka lo nui sang thung. "Sawmdawng..." ka sam chu ka bekah a rawn zep tha a, "Sawi la" a rawn ti sup. "A lawmawm tho a, mahse a zahthlak e" ka tih deuh nang nang chuan a ngaihna hrelo zetin min melh a, "Ih...Bawihtei pawh kum 1 pawh a la tling silo a, nau ka keng leh nghal sia" ka tih hap chuan a rawn nui chhuak hawk hawk. "Hei chu uluk deuhva ka siam ania" a rawn tih chuan ka melh nghal ram ram, a nuih a za zual sauh emaw tih tur a ni. "A pian hunah invenna kan hmang rih dawn nia" a rawn ti leh chuan ka beng nghal thlawp. Tinge a chimawm thin em em mai le?



Ka naupai chu Bawihtei ka pai lai ang lo takin huat ka nei lem lo. Tluang deuhvin ka pai a, ka chhungten min awl hneh si a, ka thau deuh kung kung mai. Bawihtei pawh kum 1 a tlin atang chuan a niin a chang deuh chawt a, dawrah pawh hruai zeuh zeuh chang a nei, hnute a hne tam vak lo bawk nen buaina em em kan nei hran lo, nileng pawhin a tlai ve thei viau zel.



Sawmdawnga chuan min duat sauh sauh a, zanlaiah Bawihtein tlei loh zeuh chang a neih pawhin aman a buaipui mai zel, thawh ve ka tum lah hian a phal tlat thin bawk si lova, tihngaihna hlawl a awm thin lo.



Lalremruata lah hi a lo phi ve cheng zel , nau ka pai tih a hriat tirh atangin a lo leng deuh zut a, "Min chhun ve tawh awm e" a rawn ti tlat pek thin anih kha! A û Sawmdawnga a rum tha ngel ngul thei khawp mai. Hetia a unaute chhaih kual vel hi nuam a ti ber niin ka hre tawh.



Ka rai atanga thal kua a liam meuh chuan fapa duhawm zet mai ka nei leh ta. Min chhun ve tawh ka ring ania hei phei chuan min chhun lo nasa lutuk, "A pa ang chiah" tu mai pawh chuan an ti vek a. "A pa ka ni miau a" pakhat pa lah chuan intithei zet hian a lo ti ta thin anih kha !



Lalremruata bawk hi ani, a lo lungawi lo ve ringawt, "Min chhun ve tawhse ka tih nen" a ti leh bul bul thin. Mawimawii pawhin hnial enah a en tawh lo, a nuih liam ringawt tawh.



Kan fapa hmingah chuan 'Brandon Lawmsangzuala' tiin ka pa (keima pa) chuan a sa a, kan lawm a ti kim em asin.


Bawihtei pawh chuan nau a nei tih a inhre thar ve reuh a, la naupang tê ni ve tho mah se a nau chu duat thiam ve tak ani. Engkimah a duhsak ve tlat.


________________

"Ama tihharh loh tur aw" phun sur sur ri chu ka mang hriat ruai ruai. "Bawihte nanau kha api te bulah lo zu chhuk pui rawh le" a ti leh sur sur a. An ri deuh set set a, chumi hnu chuan hmui lum thar tharin ka hmai a rawn si nghal dun dun. "Bawihi..." Sawmdawnga âw rilruih ka hriat zawm zat. Ka kuah hnai sauh sauh chu a rawn nui chhuak hawk.




"Khawnge naupang" ka men chhuah hnu chuan ka ti sep a. "Api te bulah ka tir thla tawh" ka hnute rawn hup pah chuan a ti leh sup. Sana ka en chuan dar 5:30 chiah, "A va la hma ve" ka ti sep a. "Kaihthawh hma chhan che ka nei alawm" a tih sup rual chuan ka kawr a rawn hnawl tawm chho nghal vek. "Keichuan mut ka thlang zawk" ka fiam deuh hlak a, rum nghutin ka hmui a rawn khar chilh nghal hmiah, nui var var chungin ka lo chhanglet ve vat.




Inhnuai kan inzui thlak chuan thlang lam veranda lamah naupang nui hawk hawk thawm a rawn awm a, Brandon-a nui ri ani, a hmelah a pa a chhun chu thuhran, a aw rawlah lehzel pawh a pa siar a pa siar. Za zeta a nuih ve tawh hi chuan inchhung a ri huk huk zel.



Thlang lam Veranda ah chuan kan inzui phei a, Sawmdawnga chuan ka darah min kuah deuh hlun bawk.



A pi leh ani hovin an lo awm a, pangpar an lo khawih nasa mai. Bawihtei pot chawi tur tlu der vel chu Bawihpuian a lo nuih nasa lutuk hi a lo nia. Bawihtei pawh chuan a nauvin a lawm tih a hriat chuan a tilui zel a, hmuhnawm tak an ni.



"Ka duatte u" a pa âw an hriat chuan rang zetin an rawn tlan a, Bawihpuia chu thei leh theilo hian a ke chum biang nen chuan a rawn tlan ve chawn chawn, a û chu a lo tlanmuang der ngei a. Bawihtei hi kum 3 a tling ve tawh a, Bawihpuia kum 2 , kum khat vel chauhvin inthlau mah se Bawihtei hian a nau a duat thiam lutuk tlat, mak ve reuh tak chu an ni. Mahse ka lawm takzet, tette atanga inhmangaih nachang an hria hi. Bawihtei hian a zir phawt chuan a nau hian a rawn zah chho dawn lutuk tlat.



"Pa..." aw rawl lian zet hian Bawihpuia chuan a ti ruah ruah a, a pa chuan thuhniamin a lo kuah vat. Bawihtei pawh a rawn phei a, apa chuan a biangah a fawh sak zeuh, nui sen senin min rawn melh a, ka lo nuih ve sâng.



"Pawn lam chu ni a sa inchhungah lut ang u" ka nuin a rawn tih takah chuan kan inzui lut a. Bawihpuia chu a pain a pawm kang lawp a, a nui leh ruah ruah tawh, intithei zetin a pa darah a bei nghal tharh. Bawihtei chu pawm ve mai ka tum a, a lo duh hauh lo, ka kutah min kai nghal tharh. Inti nula ve reuh lutuk mai.



Chawei lai chuan ka pa chuan Chennai lama hna pawimawh a awm thu a sawi a, kan chhungkaw tê chuan hawi khawthawnna ni pah fawmin hnialna em em kan neih hran loh chuan kal turin min ti a. Sawmdawnga chuan tha a lo ti khawp mai, ka nu leh Mawimawii pawhin kal ngei ngei turin min lo ti ve vat.



A tukah chuan Chennai kal tur chuan kan inruahman zui nghal a. Bawihtei chuan a hrethiam ve reuh a a phur ngang mai, Bawihpuia pawhin a û phur lutuk lam kual vel a hmuh chuan a lo su ve dup dup a, a pa in a lawm teh asin.



Chennai kan thlen chuan zan lam a ni tawh a, kan fate pawh kan kal dawna phur em em si kha an chau ve ngang aniang an muhil bam mai. "Bawihi i chau em?" Sawmdawnga chuan a rawn ti sup a, ka lu ka lo thing mat mat.



Kan kal hmasak tuma kan awmna Sawmdawnga inah khan kan innghat leh a, thil a lo tihfel tir leh diam tawh. Kan intihfai zawh hnu chuan kan zinkawng a thui ve bawk nen kan fate bulah chuan kan muhil ve nghal.




A tukah chuan Sawmdawnga office ah a kal zuai a, rei a kal lo, a rawn haw veleh kan chhungkaw tê chuan kan inzui chhuak nghal a. "Apa eng nge" a faten an thil kawh apiang chu a hrilhfiah zel a, thiam ang tawka an thusawi ho ve tete te pawh chipchiar zet hian a ngaihthlak sak vek.




Kan kal hmasak tuma min hruaina, lawngleng awmna hmunah khan kan kal nawn leh a, kan fate chuan nuam an ti ngang mai. Lawnglenga kan chuan lai chuan Bawihtei ka pawm a, a niin Bawihpuia. "Heta tang hian a intan" ka bengbula a rawn tih sup chuan a ngaihna hrelo zetin ka han melh a, "Ka hmangaihna che" a tih sup chuan mak ka ti zual deuh deuh, "Ka lo hrefiah lawk lova, ka tina thin che. Mahse ka lo hmangaih daih tawh che" a rawn tih leh sup chuan ka lo nui ta hak.



Kan fate hmuh hlau tak chuan a hmuiah ka han fawp zeuh a, "Ka hmangaih lutuk che" ka ti ta thlawt. A ni hi ka tawng lovang tih ka hlau ngawih ngawih.


"Min hmangaihna aia nasa khan ka hmangaih che" a rawn ti nghet charh a. Malsawmdawnga hmangaih ka ni thei hi ka lawm asin. Kan inneihna kawng intan dan kha duhthusam ni lo mah se kan inneihna vang hian Pathian hnena lawmthu sawi mawlh mawlh ka ba, a chhan chu tun dinhmun hi min thlentir miau a. Malsawmdawnga hmangaih ka ni tlat !




A TAWP TA



_______*_______*_______*_______

(A tawp zan anih bakah a thui tha vawng vawng bawk a, zanin chu thu min hnutchhiah ve ru aw🤩💌)


💝💝💝💝💝💝

Ka story ziah beitham zet in lo chhiar ve avang hian ka va lawm tak em ! Ka beisei phak bak min thlenpui ka ti lo theilo. Nikum August thla vel khan chapter 1 hi ka ziak chhin a, a tirah chuan rawn post chhuah hi ka tum miah lo, mahse ka thiannu, story chhiar ve thin pakhat, a hming pawh han sawi ta mai ila Masangi Pachuau hi chapter 1 ka ziah sa chu ka chhiar tir chhin a. Chuta tang chuan post turin min tur ta ut ut a, thla hnih vel zen zawn min thlem hnuah ka rawn post ngam ve ta hram anih hi ! (Masangi chungah lawmthu ka sawi nghal mawlh mawlh e💖)




Ka suangtuahna rawn dinchhuah pui ve mai kha ka thil tum a ni a. Like leh comments vel phei chu ka beisei buai lo hrim hrim. Mahse in fel em a , ka beisei hauh lovin min lo ngaihhlut sak a. Hlawh te phei kha chu ka ngaihtuahnaah a awm pha lo hrim hrim. Mahse ka ngaihtuah phak bak ramah min hruai kai ta dawrh anih hi !



'A awm dawn em' , 'Dah tep tawh em' , 'Awm har tawh ve' hetiang lampanga in rawn tihte hian ka lungphu a rang dawt dawt thei. In lo nghakhlel ve ani tih ka hriat khan ka hmanhmawh ta viau thin a. Nangni ai ai hian ka lo phur thinin ania ka rin ni😅.




Tin, keimah hi lai rual an tih ang kha ka la nia😅. Tleirawl tih dawn a tleirawl ni tawh si lo Nula tih dawn a lai deuh tlat bawk si ang rual kha ka la ni ve a, mahse puitling chu ka ni ve zan tawh ania😂. Lo chhiartu tam zawk hi kei ai in upa ang. Eng emaw lai deuh ziah a ngaih chang a lo awm ve thin si a, khitiang lai velah khian ziaktu dang ho ziah ka va en tha leh thin, copy deuh tawp pawh ka nei😂. Ka innocent e ka tihna lam ni lovin ngaihzawng la nei ngai miah lo tan chuan ziah har tha ve ngeng ngawng tak ani😂



Ka hmelhriat thenkhat ten an lo hriat ve khan ka zak ta vel thin pek anih kha😂. Mahse hei zak chung chungin ka rawn complete ta tho.


Story dang nen lo let vat chu duh viau mah ila zirlai mai ka la ni a. Tun thla tawpah hian exam hmachhawn tur ka nei a, chumi zawh lamah chuan inhmuh leh kan tum dawn nia. Hei pawh hi chapter 30 vel han hawlh thlen zak zak ka tum ania mahse zirlaiah concentrate ka duh si a, ka kaih tawi ta tawp anih hi.



Ka story ziah ve hmasak ber a nihna angin keima tawkah ka ngaihlu ve em em a. Chu mai piah lamah min lo like sak a, min lo comment sak tute zawng zawng, regular taka lo comment thintute kha ka theihnghilh tawh ngai lovang che u. Ka tana mellung pawimawh lutuk in ni.


Lawmthu sawi eng ang pawh ni ila ka sawi kim seng lovang. Chhiartuten ziaktute 'Boss' in ti thin nain 'Ka boss te' in ni zawk e.


Duhtakte u, Ka lawm a ni tawp mai 💖.


*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)