OUR MARRIAGE By CVL Awmpuii (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

OUR MARRIAGE By CVL Awmpuii (Completed)

Unread post by Ngaia » January 9th, 2022, 1:04 pm

egfhvq1o.jpg
egfhvq1o.jpg (20.06 KiB) Viewed 47432 times
#PROLOGUE🌻

"Rinhlupui eng thil phiangsen nge i tih" kan room kawngkhar a ri nghal bur, a âw atang chuan tunge anih hrilh nawn ka ngai lo. Ka pasal... hah...a hming maia ka pasal ngei kha ani.

"Eng thil nge i tih ka tih chu" aw râwl chhuah meuhvin a ti hrawk a. A zawhna ngai pawimawh lo zetin ka luggage ah chuan ka thawmhnaw ka thun khawm mial mial.

Nidang ang kha chu nise a aw ka vin zet chuan hlau thlabarin min siam leh ngei ang. Mahse tun tum chu mak tak maiin ka hlau miah lo.

Mirhing hian dawhtheih chin kan nei theuh. Mi zaidam leh zawldawh tak ni a kan hriatte pawh hian tih theih loh chin an nei. Keipawh min hretute apiangin mi zaidam, zawiawi leh dawhthei takah min ngai thin. Mahse tun tum chu ka dawhtheih chin a pel ve te pawh aniang, ka ning takzet.

Thil tla keh chuai ri chuan ka ngaihtuahna atangin min kai chhuak zawk a. Hei pawh a tih loh dan a nilo, mak ka ti vak lo. A thinrim insum zo lo hian vawitam thil a vawm chhe tawh. Tunah pawh hmannia kan room-a ka pangpar khawi a vawm tla keh darh leh vek tawh.

Ngai pawimawh lo zet hian ka thawmhnaw chu ka khungkhawm mial mial a. Min melh ngur reng tih ka hria, mahse ka haider lui ve tlat. A thinrim hlekin ka hlau em em thin anih kha, mahse tunah hi chuan ka hlau eih lo anih chu!

Dâwtin min puh reng a, mi tenawm tak ang maiin min chhuah reng thin anih kha. Hmangaih vanga innei ni lo mah ila ka theihtawp chhuahin nupui tha nih ka tum ve takzet thin. A tawngkam chhe tleuh nan tak min hmang a. Mi lepchiah tak angin min chhuah awl lo bawk. Amah zawk hi ngaihzawng nei reng chu a ni si a. Tinge keimah hi min puh let tlat ni. Ka tuarchhuah ve theih mai ka ring thin a, mahse ka thei tawh thlawt lo.

Khum bul side table chunga ka phone dah chu ka ban a, ka û number ka dial nghal zat bawk. Rei a ring hman lo "Aw, Mambawih" a rawn ti dam thluam a. A âw dam lutuk chuan min ti zuau thar tlat. Ka tawngchhuak mai dawn a, ka hrawk a inhnawh tlat.

Pakhat pa chu a dinna ngaiah a la ding khup a. A mitmeng chuan hmun dang rêng a la hawi leh lo, keimahah a la fu ngur. "Mambawih, ka tawng i hre thei em? Ka ngaithla ania, sawi la eng nge ni?" ka tawng mai loh vangin ka û chuan a rawn ti leh a.

Ka thaw chhuak ham ham phawt a, ka âw thian kharhin "U...min lo hruai..." ka sawi zo hman lo. Malsawmdawnga chu a rawn che vut ani ber.

Ka phone hmanlai chu a rawn phih pawp a, chhuatah a vawm tla keh darh nghal chuai. Ka darah na zetin min hmer a, a hmêl chu a râpawm lutuk.

A hmaa ka hlauhna thin bawk kha a rawn lang leh ta. Nichin mai kha chuan ka ngai pawimawh miah lova, mahse tun second reilote chhung khan hlauhna in min rawn tuam nghal tup tup. A hma zawng zawng ai khan a hlauhawm zawk.

A hmel landan atang chuan engpawh a ti duh ang. Pawisak nei hmel a pu lo!



Our Marriage
By CVL Awmpuii



Chapter 1



"Ate...pipi in tho lawh ti" ka puansin rawn ben thak thak pahin ka û fapa kum 3 mi chuan tawngfiah mang hlei lo hian a rawn ti lang lang a. Ka zik mar talh talh hnu chuan "My boy, lo kal teh le" tih pahin ka puansin chu ka hlim a. Ka malchuanga rawn lawn thak pahin "Pipi in tho lawh ti a" nui sen sen pah hian a ti leh sap. A van lawmawm chiang tak.



Room atanga pawm chhuakin inhnuai lam ka pan thlakpui nghal a. Choka lam atanga ka nu zai rât rât ri ka hriat chuan ka pan phei nghal zat . "Nu min lo kaih thawh vat mai tur ania, i lo buai em" chair pawh chhuah pahin Bawihtea chu ka thuttir a. "Buai lo ve, vawiin chu i day off ani bawk a, i chau thei sia ,ka kaitho hma duh lo che anih kha" nui sangin a rawn ti nghal var a. Ka nu hi chu a van fel ve chiang tak aw.



"Khawnge ka û te hi" U Hruaia te nupa ka hmuh mai loh vang chuan ka zawt a. "An nu chawhmeh leia bazar tur kha a zui ve daih alawm" nui hak hak pah chuan a ti a. Ka û te nupa hi chu an inhmangaih hliah hliah. Nupa awhawm tak chu an ni.




Ka pa walk leh ka û te nupa an lo haw hnu rei vak lovah chuan chaw kan ei nghal a. Ei hmun vel U Nu-i ka seng fel pui hnu chuan ka room lamah Bawihtea ka chhohpui nghal. Vawiin chu ka day off ani bawk a, kan in awm nileng mai aniang chu .



Rinhlupuii ka ni a, tunah hian nurse hna ka thawk ve mek. Unau pahnih chauh kan ni a, ka û Lalhruaitluanga nen hian kan kum a inthlau ang reng kei kum 23 chauh ka la nih laiin ani chu kum 33 ani tawh, kum 10 in kan inthlau tihna anih chu. Tunah hian company lamah ka pa puiin an buai thei hle.U Nu-i nen hian kum 4 liam ta khan biakin hawng ngeiin an innei a. Tunah hian fapa pakhat Amos an nei a. Ka vahpa neihchhun anih vang nge ka duat takzet. Kan chhungkaw tihlimtu ber a ni ve bawk.




Ka bookshelf-a lehkhabu vel ka rem fel lai chuan khumah muin ka phone-ah nursery rhymes a play a, a zaipui ve rat rat mai, ka khi leh sak sak thin. A lawmawm thin ania.



Ka room vel ka tihfel hnu chuan inhnuai lamah ka nu leh U Nu-i pui turin Bawihtea chu ka chhuk thlakpui nghal a.



"U Nu , Bawihtea hi a mut a chhuak tawh aniang a ham bai bai reng mai, lo va timu la keiman ka nu chu ka lo tihpui ang" kan veranda-a pot an lo hung tha lai chu ka va pawh nghal a. U Nu-i chuan Bawihte-a chu a rawn pawm nghal, a lo muthlu reng chu niin. A harh hlau zet hian a kalsawn pui a.



"Nu khawi keiman ka lo ti ang" ka nu pot chawi tuih tuih chu ka va ti a. "Mambawih a ngai hlei nem, nitin hospital ah in che buai a, i day off ah hi chuan lo han hahdam mai mai rawh" tiin min lo hnial zung zung a."Nu engmah tihtur ka nei chuang hlei nem, awm mai mai chu a ninawm alawm. Nitin hospital ka kal daih zel sia, in a ka awm ve chhunah puih ve che u ka duh lawm" ka ti ve tlat a Tihngaihna hrelo zet hian"Nang tak hi chu aw" a ti leh ringawt tawh.


Hospital a ka kal daih thin vang hian duh angin in lamah ka tangkai lovang tihka hria. Chuvangin ka day off leh ka chawlh ve chhunah hi chuan theihtawpin in lamah tangkai ve ka duh thin. Awm mai mai ai chuan nuam pawh ka ti zawk. Ka nu leh U Nu-i chu awm tho mah se rin reng ka duh bik lo. Hahchawl tura min tih pawn ka hnial mai zel a. "I pasal tur hi chu a vannei ngawt ang mawle" tiin min fiam ziah zel.




Pangpar leh pot vel kan hûn that hnu chuan ka room lamah chho in ka inbual fai nghal a .


Ka chhuk leh chuan ka pa leh ka û te pawh an lo haw tawh. Chaw ei lai chuan nidang ang lo takin ka pa leh U Hruaia chu an chauh hmel ngawih ngawih. An hlim hmel hlawl lo a ni ber zawk. Nidangah chuan chau deuh mah se hetiang em em hian an awm ngai lo.



Chaw ei hmun kan seng fel lai chuan ka pain "Mambawih in tihfel zawh hunah kan pindan lamah min lo hmu lawk ta che " a rawn tih chuan ka bu nghat a.



Kan tihfel zawh hnu chuan ka pa te pindan lam chu ka pan phei nghal a. Kawngka ka kik karh karh a, ka pain min lo chhawn hnu chuan ka lut zui ve nghal mai bawk. An khum bula couch ah hian rilru hah hmel zetin a lo thu run a. Ka nu chuan a hnung a lo hmehsak bawk.



"Mahlu, min lo va chhuahsan lawk ta che , bawihi hi a falin ka'n be lawk ang e" a tih chuan ka nu chu a chhuak ve nghal mai bawk a . "Mambawih hetah hian lo thu teh" a bul a thutna chu a beng thek thek a, ka va thu nghal a.


Ka kut rawn hmer salh pah hian dak vahin a thaw chhuak hawlh phawt a. Tunah hian kan boruak hi a tang takzet , chuan ka zam hle bawk.



"Mambawih ka thusawi hi ngun deuhvin lo ngaithla rawh aw" a tih chuan ka bu nghat a. "Ka fanu neih chhun i ni a, ka hmangaih che tih i hria tiraw" a mit a chhing vang vang a. "Ka hria alawm pa, i sawi duh tak chu sawi la, puih theihna che ka nei em" ka lo ti nghal vat a.



"Nula puitling i ni ve tawh a, pasal nei rual i lo ni ve ta. Ka hrechiang che a, mipa hi i ngaihsak lo ani tih pawh." Ka lo nui nghal hak a. A sawi dik nula puitling ni ve tawh mah ila mipa hi ka ngaihsak lo, bialpa pawh ka la nei lo. Min beiseitu an awm loh vang chu a ni miah lo, ka duh tak ka la tawn loh vang te pawh a ni mahna.



"I pa Tluangtea hmanni a kan ina lo kal tawh kha i la hria em" a thu sawi inpersan lutuk avang chuan ka lo meng deuh awk a. "I hria em" a rawn tih leh sup chuan "Aw, hria e, mahse tinge i lo sawi chhuah daih daih a" ka tih chuan ka kut hmer na zual salhin "Ani khan fapa a nei a, Chennai lamah an sumdawnna enkawlin kum 5 zet a awm tawh. Tunah hian Mizoram lamah a lo haw tawh a, helama an sumdawnna a enkawl tawh dawn. Tichuanin Mambawih ka sawi tlang tawp mai ang a. A fapa Malsawmdawnga nen chuan innei turin kan duh che u a ni."



Ka nghing lawih mai, eng thu nge maw a sawi le. Ka pa hi a chiang vak lo a mawnle ka ti hial mai.


"Pa eng thu nge maw i sawi le" ka aw khur dar dar chu ka thunun zo thlawt lo. "Ka thusawi hian a thawng ang che tih chu ka hria. Mahse kawng dang a awm lo ani, i Pa Tluangtea nen pawh kan sawi dun tawh a. Kan company tan in inneih ngei ngei a ngai ani" ka mumang chu a ni silo.




Ka pa min hmerna kut chu ka la sawn riai riai a, ka nghilh dup ni berin ka hria. Engmah ka ngaihtuah theilo. Zawi muangin ka ding chhuak a, ka pa chuan min en tlawk tlawk tih ka hria. An room atanga ka pen chhuak dawn chiah tihah chuan "Min ti beidawng lovang tih ka hria. Ka fanu fel tak leh thuawih thei tak i nih kha. Khawngaih takin min ti beidawng suh aw" a ti leh sup a. Hawi let tawh lovin zawi muangin ka chhuahsan.




Engtik laiin nge ka room ka thlen hman ka hrelo. Khumah ka bawk thlawp a. Ka tap chhuak nghal hawm hawm mai. Ka thinrim thei lova, mahse ka chhungril hi a tawt up up mai.



Vawikhat mah ka la hmuh ngai loh leh a piang ve ani tih pawh ka hriat loh pasala nei tura ka insuangtuah ringawt pawhin ka puak keh mai dawnin ka hria.



Ka theilo ka ti thei lovang. Ka pa chu zah viau mah ila ka thei lovang. Inneihna hi thil ho lam mai mai a ni tlat lo.



Ka tah nasat lutuk avanga ka mit bui luk chu bathroom ah ka va phih a. Khum a mut paha inngaihtuahin ka rilru ka siam fel ta. Naktukah ka pa ka bia ang a, ka duh lo chung chu min tilui lovang. Ka pa chuan min hmangaih a, min duat bawk. Ka tette atangin a thu ka la hnial ngai lova. Tun tum chauh chu ka thusawi a pawm em em ang.



Zing ka harh chuan dar 6:30 a lo ri tawh a. Nizana ka pa thusawi kha mumang mai ni se ka ti takzet. Mahse ka mit bui luk leh thip zet vang chuan nizana ka tah nasat zia ka ngaihtuah a, mumang anih loh zia min hriattir zual sauh.



Ka û te chu an chhungin hna thil vangin Delhi lamah tukin khan an zin a. Bawihtea a awm bawk si lo. Kan in chu a reh ruih mai.



"Pa biak lawk che ka duh a" an room kawngka hawn rik rak pah chuan ka ti a. Hna kal turin a lo insiam mek anih hmel. Ka nu chu chawhmeh vel chhuang lum a la buai a.



"Lo lut ta che" a kamis kilh pah chuan a ti sup a. Kawngka chu ka kalh nghal a. A bula va ding pah chuan "Pa, nizan a i thusawi kha ...ih...pa ka tette atangin i thu ka la hnial ngai lova....pa.... khawngaih takin i fanu hi pasal nei turin min tir lui suh" ka huaisenna zawng zawng sawm khawm chuan ka ti ta sap a.




"Company ka ngaihtuah vang ngawr ngawr ni lovin i tan pawh a tha tur ani. I Pa Tluangtea te saw mifel tak an ni a. Hrawn an harsa lovang, Sawmdawnga pawh misual a ni lovang. Ka thusawi i hrethiam tiraw, i neih ngei a tul ani" hlauhawm ni si lo, hnial harsa zet si, nghet churh hian a rawn ti a. "Pa..." "Mambawih ka tlai dawn tlat, ka kal mai nge" ka hnial leh hlau awm fahranin a bag khaiin a chhuak zui nghal daih.



Ka thu thla hnawk, ka rilru a van hah tak em. Ka awm a rawn tawt leh tup tup tawh. Kei hian ka neih ngei a ngai amaw. Tunah tak hi chuan hmangaihtu nei lo ang mai niin ka inhria. Ka in khawngaih takzet.




Ka room lam panin ka chho bek bek a, ka tha te hi a zawi vek. "Mambawih kan inbe lawk dawn mi" ka room kawngkhar ka hawng tur chiah chu ka nuin min lo bia a. "Lo lut la" room ah kan inzui lut nghal.



"Kan fanu neihchhun i ni a. Kan hmangaih hle bawk che". A chawl dat a, ka kut a rawn chelh a, ka lo dawh mawl tawp. "I pa hian i tana thalo tur engmah a ti ngai lovang tih hi ring tawp rawh". "Nu, nang pawh hian pasal nei tur chuan min duh ami" ka biang a lum thla nghal pap. Ka mittui ka dang zo lo.



"Fanu fel tak i ni a, kan thu chu i hnial lovang tih pawh ka hria" nghet charhin a rawn ti leh. Ka awih thei lo, ka nu tal chuan ka pa hnialin ka lam a tan ka ring asin.



"Nu, min hmangaih miah lo ami" ka ti ta thlawt. "Ka thusawi hi hriatthiam tum rawh, chhan tha tak vanga ti kan nia sin, i tan veka ti kan ni tih hi ring tawp rawh".



Ka harh leh chuan tlai dar 4 a lo ri thuak tawh. Ka nu min chhuahsan atang khan ka lo muhil daih anih dawn hi. Nizan ka mu tha si lova ka mutui phian mai. Tunah chuan ka rilru ka tihah duh lo. Bathtub ah chuan ka inchiah vang vang a.



Ka T.Shirt grey lian hnek hnawk leh kekawr bul ka khup chin vel ka hak hnu chuan inhnuai lamah eirawng bawl turin ka chhuk thla nghal.



Choka lama ka phei tur chiah chu thutkhawmna pindana ka pa thu chuan min lo ko a. Min hnungchhawn zawngin mi pakhat palian zet hi a lo thu bawk. Ka va kal ve mai bawk a. "Bawihi ani hi Sawmdawnga anih hi, i pa Tluangtea fapa" a rawn tih chuan ka nghing lawih mai.



Ka pa hawina lam chu ka en a, min lo melh ve chiah bawk. A hmel chu a chang lam mah mah a ni, a rum deuh ûl maiin ka hria. Hang ni miah si lo hian a vun rawng chu a uk deuh kharh a. Hmun dang daihah chuan hmu ila tha ka ti mai thei. A nelawm thlawt lo hi a ni tawp. Coat suit hain smart zet hian a inchei a. A palian bawk si. Naupang zawk zawk chu a ni tawh miah lovang, ka û nen hian an inrual vel ka ring.



Chutia ka en reng lai chuan a kut a rawn pharin "Rinhlupuii maw" a mitmeng tizim sun hian a rawn ti a. A kut chu ka va ban a, ka la let leh rang lutuk. Ka chibai rei ngam lo.


Ka pa chuan "Chaw a rawn ei dawn, i Pa Tluangtea te nupa an zin daih sia, in pahnih inhriat chian nan pawh a tha ang chu" a rawn ti leh charh charh a.



Ka nu eirawng bawl chu ka pui ve nghal sawk sawk a. Ka pa te chu business thil vel an sawi anih ka ring. An titi muk dun hmel khawp mai.



Chaw ei vel kan peih hnu chuan chaw kan ei sawk sawk a. Mahse ka hma a thu run avang hian ka ei tha ngam lo. Mahni in ngeiah ka zam tlat anih chu.



Room ka luh rual chuan ka phone khum a lo ri reng chu ka pick nghal a. "Puipui tinge vawiinah i rawn duty loh va, engmah min hrilh si lo, i dam lo ami, phone lah i pick up lawk thei silo" a rawn ti nghal zung zung a. Ruati hi chuan min ngaihtuah thin ania. Thiante hi an hlu takzet. "Puipui, ka tawng i hria em" ka ngawih reng vang chuan a rawn ti leh a.



"Tawng na hun te min pe ve phawt la" ka ti a, kan nui leh hak hak. "Ka nuam sam lo lutuk a" ka tih rual chuan "I damlo mi, ka lo kal ang" ka nui leh hak. Mi hi a ngaihtuah thin ania "A ngai love, ka dam alawm, nuam sam lo mai mai ania. Naktukah chuan ka lo kal tawh ang".



Eng emaw neuh neuh kan sawi hnu chuan ka inbiakna kan ti tawp a. Khumah ka lawn nghal thak a, tunah chuan engmah ngaihtuah rih lova hahchawlh ka duh ber. Sawmdawnga kha chu chaw eikham khan hna pawimawh a neih avangin a haw leh nghal a. Ka lawm ru ang reng viau.



Ka û te anga nupa hlim tak ni turin ka lo in suangtuah ve thin ania. Ka û ka ngaihtuah chuan thil ka hrechhuak zawk. Pasal min neihtir an tum tih hi a hre ve ang em.



Phone nghal ka tum ut ut a. Mahse an lo haw hunah sawipui ka tum leh ta zawk.


Ka û ka sawipui ang a, ka lam a a tan ngei pawh ka ring. Kan tanrual tlat chuan ka pa chuan a thu a sawh sawn ngei ngei ang. Ka û chauh ka beiseina a ni ta.



Tunah rih chuan engmah ngaihtuah buai tawh rih lovang.



Ka hna kal tura ka insiam lai chuan ka room kawngka a rawn inkik ri karh karh a. "Mambawih Sawmdawnga a lo thleng tawh aw, i hnaah a hruai dawn che a" ka room kawngka pawn lam atang chuan ka nuin a rawn ti a. Ka meng phawk nghal hra mai. Tinge engmah an sawi lawk si lova. Sawmdawnga chuan inneih inremsiamna hi a hre ve ang em. "Ka tawng i hria em" ka ngaihtuahna ka lo kawm leh hman tawh. "Aw, ka hman a nimai".




A car chhungah chuan ngawi rengin kan thu a. Ka hnathawhna hospital min zawh a ka hrilh bak kha kan la inbe leh lo. Muk zetin hma lam a bih ngur a. Eng nge a ngaihtuah awm ka chhiar thiam lo. Coat suit nen smart zuih hian a rawn inthuam leh a...oh...engtik lai khan nge mipa inthuamna ka lo chik tak viau ni .Mi han be bawrh bawrh a, tawng zawk zawk chi ka nih loh vangin biak pawh ka tum lem chuanglo.




Hospital kawtah chuan car a tiding dat a. Chhuk mai ka tum chu a thusawi avang chuan ka chawl dat. "Zanriah kan in lamah min lo kilpui a ngai dawn nia" hmalam melh ngur chung chuan a rawn ti sup a. "Maw..." ka ti bah nak, a thusawi ka hriat loh vang a ni miah lo. "Zanriah kan in lamah kan kilho a ngai ka ti anih chu, i duty zawh awm hun velah ka lo hruai leh ang che" nghet charh hian a tih zawm zat a. Ngawi rengin ka chhuak deuh tawp.





Ka hnaah pawh rilru ka pe theilo. A tul tul chu ka ti mawl ve deuh tawp nimai hian ka hria. Ruati lah chu ka bulah a tawng siam siam reng a. A thusawi ho pawh ka hre chuang lo. Ka rilruah chuan kha Sawmdawnga te ina zanriah ei ringawt kha a awm.



"Puipui...ka thusawi i ngaithla miah lo" Ruatin min rawn nghawk zauh paha a tih chuan ka harh zawk mai. Ka nuih lui sak ringawt chu chik fe a min melh hian "Rilru hahna i nei ami" a rawn ti sap a. "Ah...a..aih nei lo e, ka tha lutuk" ka tih hliai pawh chuan a awih hmel vak loh, mahse min zawt lui tawh lem lo.





"Scooty i rawn keng lo ami" kan duty zo hospital a kan chhuak chiah chu min zawt nghal a. "Keng lo, a chhia a" ka thiannu bulah dawt ka sawi ringawt. Engtin nge Sawmdawngan min thlah vangin ka ken loh thu ka hrilh ngam ang.



"Lo chuang la, ka thlah ang che" a scooty tihnun pah chuan a ti nghal zat a. "Ah...a..ngailo mai pen kawina tur ka nei bawk sia taxi ka lo chang mai ang" chik fein min en leh ta. "Pui...i thalo takzet min hrilh duh chuan ka awm ania aw...mahse ka nawrlui lo che" ngaihtuah hmel fe hian min ti a. Nui lui sakin ka lo bu nghat.


Ka thiannu tlan liam ka thlir reng lai chuan "In inthlah fel tawh chuan lo kal la, a hma viau tawh lo ania" hnung lam atanga rawn ti sup tu avang chuan ka hawi let thuai a. Ka zui phei ve mai bawk a .



Kan in lamah min inthlakpui hnuin an in lama chaw ei tur chuan a car chhung boruak rit zetah kan thu lut leh ta. Ka nu leh pa te pawn an lo hre vek tawh a nih hmel kan haw pawh khan eng vak an sawi lo tlat.



A tu a mah inbe lovin an in lam panin kan tlan a. Gate lianpui hi a lo inhawng a. In lianpui hmaah kan ding ta ran mai. Car atang chuan ka chhuak vat a. Kan in hi a te chhe vak biklo ania. Mahse ka hmaa in ding hi chu beisei phak bak ani. A ban lah chu a ngheh hmel churh lehnghal a.



"Lut ila" zawi supa ka hnung lam atang hian a rawn ti a. Pen thawm a awm zui zat bawk. Lu bu nghatin ka zui nghal a.


Chaw ei tur chauh a kal kan nih vangin kawrfual par sen ka ha a, slim bag akin sandals ka bun leh tawp.



Hmeichhe pakhat hmeltha zet, la upat hmel lutuk lo hian kawngka a rawn hawng a "Nu ka û te an lo thleng" choka lam thlek hian a ti lang lang a. Kei ai a naupanna chu a tlem viau ang. Choka lamah chuan a va kal phei nghal mai bawk a.



Inchhung kan lût a, an in chu pawn lam pawh a pui tawh nak laiin a chhung lam phei chu a pui lehzual, a lianin a zau ropui si.


Thutkhawmna lamah chuan hmeichhe pakhat nichin a kawngka min lo hawn tu ang deuh kha a lo awm bawk a, mahse nichin ami ai kha chuan a upat hmel, a malchungah chuan a fapa ni ngei tur mipa naupang hmeltha zet hi a lo pawm bawk a, min melh kiau mai, a duhawm lutuk.


"Sangte khawnge in pa" an lam pan phei pah chuan Sawmdawngan a zawt sup a. Chutah kan lam lo hawi vatin ngainat awm zet hian min lo nuih bawk "Office-ah an la buai deuh a, kan lo kalsan tawp, a lo thleng tep ang" mitmeng nung sarh hiana ti a.


Thutkhawmna lamah chuan kan va zawm ve a. "Ehe...Puipui in lo thleng elaw" pa Tluangtea chuan room atanga rawn chhuah pahin tha tho zet hian min lo be nghal a.



"Awi...Bawiha in lo thleng thei maw, Floria hi chem te dawhkan a kan dah kha a lo ban a, a intipalh alawm le. Kha Mate lo pawm teh, khawi Bawihpuia kha" nu pakhat choka atanga lo chhuak chuan a rawn ti zung zung a. Sawmdawnga nu a ni ngei ang. Floria a tih chu a rawn pawm phei bawk a, tap tih hriat deuh hian a insut hlap hlap mai. A hnungah nichin a hmeichhia khan a rawn zui bawk a.



An che vel chu ka lo en deuh tawp. Kan thu deuh thap a. Ka zam lek lek mai. Pa Tluangtea chuan min inhmelhriat tir zung zung a. Sangtei an tih leh kawngka min lo hawntu kha Sawmdawnga naute an lo nia. An tawng duh bawk sia, min be bawrh bawrh mai. Tha deuhvin an zawhna te chu ka chhang ve mai zel bawk a.


A nu pawh a tawngduh, ka ngainat zawng tak tur niin ka hria, an nufa thum chuan min be bawrh bawrh a. Sangtei fate pahnih pawh chu an hmeltha dun bawk sia. An lai ve deuh emaw ni , lawmawm dun reuh lutuk. Ka bulah Sawmdawnga a la thu reng a, phone a khawih mual mual a. Kan titi pawh a ngaihtuah hmel chuang loh.




Sangtei pasal a lo thlen hnu chuan chaw kan ei a. Kan eikham hnua tihfel pui ka tum pawn an phal tlat lo. Nu Mami (Sawmdawnga nu ) chuan "Vawiin chu kan VIP alawm i nih" min ti tlat a. Engmah pawh ka ti lo, awm dan thiam a har.




Ka rin ai daihin nuam ka ti, an fel hlawm bawk si. Tha deuh deuhin min bia a, an nelawm hlawm bawk si, Sawmdawnga tih loh.




Thutkhawmnaah rei vak lo kan thut leh hnu chuan car boruak uap churh a Sawmdawnga nen chauh kan thu leh ta.




"Engtikah nge palai ka lo tirh ang" ka phu zawk mai. Hmalam a melh ngur bawk sia, ka hriat sual emaw tiin car tukverhah chuan ka dak heuh heuh a. "Ka thusawi i ngaithla lo" a ti leh nghut a. Ka hriat sual a ni miah lo.



"Ah...ih...ka hrelo" bah niai hian ka ti hul hak a. "Ka thusawi hi ngun takin ngaithla ang che. I pa leh ka pa vanga innei tur kan ni tih i hriat tho ka ring a. I beisei kha ti sang suh ang che. Ka pa hian eng vangin nge nang ang hmeichhia hi ka nupui turin a thlan pawh ka hre hrep lo. Nang ka neih che hian kan company hamthatna tur lah ka hre hek lo. Mahse kan chhungten an ti miau sia kan inneih ta poh aniang chu" a ti chang bawl a. Sawi ve tur pawh ka hrelo, hmàlam a en ngur bawk si. Mak ti zet hian a hmel chang run chu ka en tlawk tlawk tawp.



Ka tah mai ka hlauh vangin ka hawisawn vat a. Car tukverhah chuan dak lehin ka mittui luang tur chu ka hru tawk mai.



Kan in kan thlen thlengin engmah kan sawi leh tawh lo. Chhan let ve chu ka duh ngei alawm mahse ka thei lo. Ka thinah hian min vilh ngulh ngulh mai ni.


Hmeichhe thinchhia leh nasa tak nih ka chak tum ber a la ni hial ang.



Zanlai dar 1 a ri tep tawh. Khumah ka let ka let a, ka muhil thei lo. Tinge inneih kher chu a ngaih le. Zanin a min tih dan zawng zawngte kha ka ngaihtuah let phei chuan neih ka duh lo mai pawh ni lovin ka hlau a, ka tih bawk. Ka mipa lo suangtuah ve thin gentleman leh hmeichhia te hrethiam deuh ang nen kha chuan a inpersan lutuk.



"U lo haw vat teh u" ka ti sap ringawt. Anni chauh hi ka innghahna an ni ta. Engti kawng mahin khapa kha neih ka duhlo.


Sawmdawnga te in a chaw ka ei atangin ni 3 a liam leh tawh. Ka theihtawpin hnaah ka buai a, thil dang ngaihtuahna hun insiam ka duh lo. Khami ni atang khan Sawmdawnga pawh ka hmu leh tawh lo a, ka nu leh pa pawhin inneih chungchang an sawi lang leh tawh lo.






A ruk chuan ka lawm lutuk. Mahse thlamuang takin ka la nung thei chuang lo.





Vawiin hian ka û te an lo haw tawh dawn a. Ka lawm takzet, Bawihtea pawh ka ngai tawh. Tunlai ka nun zuai zet pawh hi a awm chuan a reh deuh mah na.





"Ate...." ka room kawngka lam ka hawi vat. Ka vah pa hmeltha zet chu a rawn tlan lut a. Tun kar khat chhung khan a lo chum hman reuh lutuk.





Ka lo ban vat a "My boy...i va lian tawh ve a...atei hi min ngai em" pawm kan lawp pah chuan ka ti a. A nui var var mai.





Inhnuai lamah ka û te chuan an thil hawn vel an lo dahkhawm ruih a.


"Awi...Bawihtea chu atei bulah a awm tawh a, a lawm em" u Nu-i chuan an thil rawn hawn dah that mawlh mawlh pah chuan a ti a.





Bawihtea chu phur zet hian a bu nghauh ngauh a.



"A ngai tawh lutuk che a, kan rawn thleng chiah chu i room-ah a rawn tlan lut nghal anih kha" u Hruaia chuan a lo ti ve bawk a.





Tunah chuan Bawihtea a awm leh ta bawk a kan inchhung pawh kan ri ve leh laih laih tawh mai.





Zanah chuan Bawihtean ka bula mut a ngen tlat avangin a mu ve ngat a. Ka tuai mutthilh hnu chuan inbual turin ka thawh san a.






Ka inbual zo khumah ka inthawlh ve nghal a. Ka phone ka on chiah chu missed call pathum a lo awm. Mi pakhat vek hnen atangin a ni leh nghal.





Thil pawimawh anih takin tiin ka call back vat a. A pick up tawh dawn lo emaw ka tih hnuah a pick up ve ta hram "Hello" aw thum bul hmuk hian a rawn tia.







Ka aw ka thian kharh a "Min lo call mial em le ih englo... missed call a awm a" ka ti bah deuh niai a.






"Ka rawn call lo che" ti bul hmuk pahin a dah hmak anih chu. A van polite lo reuh tak.


WhatsApp ah lutin message pawimawh ho ka reply zung² a. Dar 11 velah chuan ka mu hman ve hram e.





Sawmdawnga POV



Khumah chuan ka mu meng kar a. Khum zawna ceiling chu ka melh ngawt ngawt. Engvangin nge maw ka pa hian khanu kha nei tura min tih ka hrethiam thei lo.





Malsawmdawnga ka ni a. Ka nu leh pa fapa neihchhun ka ni. Nau hmeichhia pahnih ka nei a. Ka chhang chiah Sangtei chuan pasal tha tak leh fa pahnih duhawm zet zet neiin chhungkua an din ve tawh. Kan naupang ber Mawimawii hi kum20 a ni ve tawh a. Mahse inchhung lamah chuan kan naute neihchhun anih vang nge a pangchang viau, duat pawh kan duat khawp mai.





Mizoramah ka awm peih thlawt loh avangin Chennai-ah kan sumdawnna enkawlin ka awm char char a. Ka chhungte chuan an remti chiah lo. An hlata ka awm kha an duh lova. Mahse ka duhthlanna an ngai pawimawh a, min hnial lui ta bik lo.





Tunah ka pa in thil pawimawh tak a awm a tih vangin Mizoramah ka lo haw a. A thusawi ka hriat khan min thawng lutuk.




Ka hnial nasa ngang mai. A vawikhat nan ka pa nen kan inhauh vak phah lehnghal a. Mihring luhlul leh mahni induhtawk ve tak ni mah ila ka pa hi chu ka zah ve viau thin. Tun tum erawh a dan a dang tlat a ni.





Pa Rama fanu chu a tet deuh lai khan ka hmu tawh. A û Hruaia nen khan high school kan kal ho thin a. Chunglai chuan ani chu naupangte mai a la ni. Ka ngaihtuah zawng chuan ka nui hawk. Ka pa hian eng nge a hriat a, naupang mai min neihtir a tum ni ka ti hial anih kha.





Neih tumna pakhat mah ka nei lo kha ania. Mahse ka nuin "Bawiha, i pa hian i tette atangin i duh apiang a tihsak che a. I duhthlanna pawh a zahsak thin che a. A duh loh dana awm chang nei mah la a hau phal ngai lo che. Chuvangin tun tum chiah chu a thu zawm tum rawh aw" a tih dam hliai takah chuan ka nem ve ta deuh kha ania. Nupui chu ka nei ta poh aniang chu.





Ngaihzawng hranpa ka nei ngai lova. Hmeichhia erawh ka tlachham lo nasa. Tlangval thisen lum rual ka nih vangin ka hnena an lo kal chuan an duh ka lo pe mai zel. Mamawh kan inpe tawnah ka ngai hmiah.





Ka phone rawn ri chuan ka ngaihtuahna atangin min pawt hrang nalh. Caller ID ka en chuan amah Rinhlupuii kha a ni. Pick up loh ka tum zet a, a call hmasatu ka nih avang khan ka la ta tho. Mahse eng nge ka hriat pawh ka hrelo vawi 3 ka call hnua min chhan loh avang khan ka call loh thu sawiin phone ka hmet tawp hmak.







Ka call chhan pawh naktukah ka pa in min hmuh dun duh vang a nia, kan inneih tur chungchang velah. Hrilh lawk ka tum kha ania. A pawilo, naktuk zingah ka va thawng dawt tawh mai aniang chu.






Ka thawh veleh ka intifai sawk sawk a. Dar 7 veleh car lachhuakin Rinhlupuii te in lam chu ka pan phei nghal. Ka va thlen chuan Nu Mahlui (Rinhlupuii nu) chuan choka ah eirawng a lo bawl mek.





Ka va khuh kharh kharh a. "E, Sawmdawnga chu eng nge i lo tih dawn a" tiin min lo chhawn vat. "A...eng ni love Pa Rama biak lawk ka duh a" ka ti ta ngawt. Rinhlupuii hming ka lam mai thei lo. An koh thin dan ka hre bawk si lo. Hmingpum a han koh deuh lawl chu ni theiin ka hre si lo.






"A ni maw, lo nghak lawk rawh, i pa Rama hi chu hriselna hi a ngai pawimawh viau a. Hruaia nen Exer an la a, an lo haw tep ang. Lo thu la thingpui ka lo lum ang che" a ti zung zung a. Ngawi reng chuan ka thu thla a.






Thingpui min pek hnu rei vak lovah chuan ke pen thlarh thlarh thawm a rawn awm a. Ka lo awm ve tawp chuan a thawng a ni ngei ang. Choka kawngka bulah ka ding deuh chawt. Phawk fe hian min rawn en a.Tshirt pink lian lam lek lek a ha a, kekawr bul kekawr bul tihah bul lutuk lo, a khup khuh mawi tawk leka tight chu a ha bawk.






"E, Mambawih i lo tho tawh maw...hei Sawmdawnga a lo leng a, thutkhawmna lamah sawn lo va inkawm rawh u" Nu Mahlui chuan a ti leh zung zung. Chutah harh chhuak thut ni awm tak hian "Nu khawi keiman ka lo bawl chhunzawm ang" rawn pen phei pah chuan a ti bah deuh niai. "Ka zo tep tawh alawm, va phei rawh u, i pa te pawh an lo haw tep tawh ang" a tih deuh tlat avang chuan a hnial ta bik lo.






Thutkhawmna lamah kan phei a. Ka ep chiah sofa ah kut tawm chal hian a thu a. Min hlau emaw ni. "Ih...eng nge i lo tih" min rawn melh zawk. "Vawiinah ka pain kan pahnihin min hmuh a duh a. Office lamah kan va hmuh a ngaih hmel" melh ngur pah chuan ka ti a.




"Maw...ah...ih... tinge min hmuh chu a duh a"

"Kan hmuh hunah kan hre mai ang chu".

"Mahse i lo sawi lawk lova". Nizanah call i pick up lo anih kha ka ti tep. Mahse min lo call back pawn ka chhang tha lo tlat.

"Hei ka rawn sawi lawk alawm" ka ti bul vut.

"Mahse..."

"Ehe, Sawmdawnga chu helama i awm lai elaw" Hruaia'n kan lam pana a rawn tih takah chuan a ngawi ta daih. A hnungah pa Rama'n a rawn zui bawk.



"Aw, anih hi helamah ka awm tawh dawn a" ka lo ti mai.

"Chutia law...a tha khawp ang chu. Mahni ram hi a lo nuam ber thin ania" a tih leh chuan ka lo kiai suk.

"Ka chhoh san ang che u. Ka han intifai lawk ang e. Ka duatte pawh an la mu anih hmel" hlim zet a tiin inchung lamah a chho nghal.





"Sawmdawng eng nge ni ta a...i lo leng mai mai nge...zing lamah te" Pa Rama'n ka thutna ep Rinhlupuii bula thu paha a tih chuan "Ka pain kan pahnihin min hmuh a duh a" Rinhlupuii melh zauh paha ka tih chuan a hrethiam nghal mai.






Thildang neuh neuh kan sawi lai chuan bet zan lo hian Rinhlupuii chu a lo thu ve ta reng. Chaw ei turin min sawm urhsun viau nain ka ei ta lo. Chaw eikham a va lam leh turin ka haw ta zawk.






Rinhlupuii's POV


Phur lo zetin chaw kan eikham chuan room ah ka insiam malh malh a. Tinge a pa chuan min hmuh a duh le? Inneih chungchang kha an sawi leh dawn a mawnle. Taka ka û ka la be miah lo. A reh daih vanga ka û bulah pawh sawi ta lo kha ka nia.





Mahse engtin nge ka û nen khan an inhriat le. An inpawh hmel fu bawk si.




Aaa... ngaihtuah buai tawh lovang. Ka insiamfel zawh chuan ka room atangin ka chhuak thla a. Thutkhawmna ah ka chhungte nen an lo inkawm mawlh mawlh tawh. Min lo koh ve mai awm ania.






"E khi Mambawihi pawh a inpeih tawh alawm, va kal vat rawh u" ka pain a rawn tih chuan a tho vut a. Kan inzui chhuak nghal.






Car chhung boruak ipik zetah kan thu dun leh ta ran mai. Hmalam a melh ngur a. Keipawh thil dang ngaihtuah duh lovin pawn lam ka thlir veuh veuh.






An in lamah min hruai dawn emaw ka tih laiin an company lamah min hruai ta daih. Hnathawk ho chuan kan inzui lut chu min lo en duh ngang mai.






"Lo lut ru" office chhung atanga min lo chhawn chuan kan inzui lut a. Pa Tluanga chuan ngainat awm zet hian min lo nuih a, ka nui ve sak mai.






"Kha, Bawiha tah khan lo thu ru. Heihi ka sign lawk ang a, kan inbe dawn nia" a ti zung zung a.






"Puipui, i pain a hrilh tawh tho che chu ka ring a. Tunah Sawmdawnga nen ka koh chhan che u chu in inneihna tur chungchang sawipui che u ka duh a" ka hmai a sa hat hat mai. Heti deuh teh tawpa han sawi chu min tihrilhai deuh a ni. Ka pa bulah pawh ka pawm thu ka la sawi tawp silo.






Ka lungawi lo ru tun mai. "Pa kha lam kha chu in thu ni rawh se" chhan mai ka tum chu Sawmdawngan min lo chhan khalh avangin ka ngawi ta zawk.





Haw kawngah pawh chuan engmah ka ngaihtuah theilo. "Inneih hi ka duh bik zawk zawkah ngai miah suh. Ka pa thu zawm ka duh vang chauh anih hi hria ang che" ka ngawi reng. Ka hnial chuan ka tah ka hlau. Hepa bulah hian ka mittui tih tlak ka duhlo.






Chawhnu lam ka duty anih tho avangin ka room-ah ka awm deuh chawt a. Ka engtih tha mah a tho lo a ni. Ka nu pawn a hrethiam a ni chek ang chu min rawn ko miah lo. Chaw kan eikham hnu khan U Nui leh Bawihtea chuan ka û in a tih tlat avangin office ah an zui daih.






Ka ngaihtuah chhuak thut. Ka û ka la sawipui miah lo. Zaninah chuan ka sawipui tawh ngei ngei ang.





Khuma ngaihtuahna kawma ka mut vang vang lai chu ka phone riin min kai harh zawk.




Caller ID ka hmuh chuan ka nui sak, Ruati a ni.

"Min ngai sia" ka ti nghal zat.

"Min ngai ve bawk si lova" a rawn tih chuan kan nui dun leh hak hak.

"Tak taka hei in veng lamah ka rawn kal a, lo pen kawi ka tum deuh a, inah i awm em"

"Awm chiang e lo kal rawh"

"Yassi"





Rei vak lovah a lo thleng a. Noodles chhum tur a lo lei teuh mai.




"Khawnge i chhungte" eitur dawhkan a dah pah chuan a hawi kual a.





"Ka pa chu office, ka nu chuan ka pi te a va tlawh a. U Nui leh Bawihtean Û Hruaia office-ah an zui" ka ti zung zung a.

"U Hruaia te nupa tak hi chu an awhawm mange, i û ang mipa hi pasalah ka duh" a'n ti ngeiah. Kan han nui leh rih.





Ka khumah kan mu a. Thil ho tete sawiin kan nui leh hak hak thin.

"Khawi, insiam tawh rawh, hei dar 1 a ri tep. In in atangin inpeih sain chhuak ila. Ka insiam lai min lo nghak ve thung ang a. Hospital kan tlang nghal mai dawn nia" a tih takah chuan ka tho ta vat.






Hospital kan thlen chuan kan buai leh nghal char char. Kan thawhna Hospital hi Synod Hospital, Durtlang a awm a ni a. Hnathawk thahnem viau mah ila buai nilen thak chang kan ngah. Damlo tam takin an lo pan ve thin a. Hospital fak hlawh leh thawktu fel awm khawmna ti a sawi anih vang pawh a ni mahna. Keipawh hian ka hnthawhna a nih vang pawh ni lovin ka fak viau. Doctor leh nurse te hi hah hle thin mah se nui hmel pu reng chungin damlo te an lo dawr thin a. Ka thawk ve thei ringawt pawh hi ka lawm.







Ruati'n scooty a ken loh avangin ka thlah kawi a. In ka thlen chuan dar 5:30 pm a lo ri thuak tawh. Ka nu leh u Nui eirawng bawlin chokaah an lo titi siam siam a.







"Nu ka lo haw"

"E, aw i chau em? Han inthlak vat la. Vawiin tlai chu i behlawi bai kan ei chak ania" a lo ti zung zung a.






Ka intihfai hnu chuan inhnuai lamah chhukin ka nu te eirawng bawl chu ka pui ve nghal a. Bawihtea muhil a rawn harh vangin u Nu-i chu an room ah a awm leh rih.






Zanin chu ka û ka be tawh ngei ngei ang. Ka tana beiseina awm chhun a ni rih tlat. Chaw kan eifel hnu chuan hun thawl ka chang ve ta ran a. Ka room dawt chiah hi mikhual room a ni a. A dawt lehah ka û te room hi a awm a. An lo chhoh hun nghakin khumah ka mu meng kar.






Pen thawm ka hriat veleh chuan ka room kawngka ka hawng ta nghal a.





"U, biak lawk che ka duh a" a ding chawt a. U Nui pawn min lo en hau mai.

"Eng nge ni Mambawih sawi la"

"Papa, Bawihtea a mu tawh sia. Ka lo va kalsan mai ang che aw" sawi hreh hmel deuh a ka ding chu u Nui chuan a hrethiam a ni chek ang chu.

"Awle ka lo zawm vat ang che u" u Nui chalah a fawp zauh a.


"Lo lut la" engmah sawi lovin a lo lut ve mai bawk a.







"Eng nge ni Mambawih, a va pawimawh hmel ve" ka khum bul couch a thut thlak pah chuan a ti sup.

Engtin nge ka sawi tan ang aw. Imm...sawi tlang tawp mai ang.

"U, ih...englo ania in zin hlan khan ka pain pasal ka neih a ngaih thu a sawi a. Û pasal neih ka duhlo khawngaih takin ka pa bulah min sawisak rawh. Ka nu lahin min ngaithla duh si lova. Tihngaihna ka hre tawh lo" ka ti ta tawp.







A ngawi vung vung a. Engmah a sawi dawn lo emaw ka tih hnua a thu rawn sawi avang chuan ka nghing lawih mai. Ka û hi ka innghahna a ni tawh asin.



___*___*___*___


(Chapter hmasa ber a nihna angin a thui ve viau chuan ka hria. In fel hlawm sap sap bawk si, in beisei a phak loh te ka hlau. Ka theihtawp ka chhuah ve tih erawh min hriatpui ula aw. Bul min tanpui ta sa sa a tawp min thlenpui ngei ka beisei ania. Regu deuhva dah ka lo tum dawn nia, mahse Pathianni chu Pathianni a nihna angin kan chawl thin ang aw.)

In lo chhiar ve avangin ka lawm em em e🥰.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:04 pm

OUR MARRIAGE

By CVL.Awmpuii




Chapter 2


Beidawng zetin ka û chu ka en tlawk a. A thusawiah a uan loh zia chu a mitmengah a lang chiang ngang bawk si.



"U..." ka ti fan raih.



"Mambawih ka sawi chu ka pa thu chu zawm mai rawh. Chuloah Sawmdawnga hi a innghahna tlak dawn tih ka hrechiang. High School kan kal ho thin a. Mahni mawhphurhna ngai pawimawh mi tak ania. I tan chuan ani tluka tha an awm lovang"



Mittui tling pamin ka en vang chuan a thaw halh a. "Nge ni a ngaihzawng i lo nei em ni" a rawn ti leh sup. Ka lu ka lo thing vat "Chuti chu nei rawh. Ka pa duhdan anih a, ka nuin a hnial loh bawk chuan. Chuloah naupang chhe zawk zawk i ni tawh lo bawk a. Sawmdawnga chu..."




"Mahse û inneihna hi sawirem mai mai chi a ni hlei nem, damchhung daih thil anih hi" ka lo pawt chat.



"Ka naute hian a lo ngaihtuah thui ve reuh hle mai a" ka sam chul pah chuan a rawn ti daih.




Khumah ka mu meng kar a. Ka rilru a mangang tawh lutuk. Ka û takngial pawn ka lam a tang duh lo.




Ka pa ten inneih chungchang lam engmah an sawi tawh loh vang khan ka lo thlamuang ve ringawt a. Mahse Pa Tluanga khan vawiinah a rawn sawi chhuak leh bawk si. Ka ngaihtuahna a kal thui khawp mai. Awm dan tur lah ka hre bawk si lo.




"Mambawih, nimin lam i pa Tluanga in va hmu chu eng nge a an? A lo dam tha em?" chaw ei laia ka pain a rawn tih chuan thin phu dep dep chungin a that thuin ka lo chhang ve mai a.




"Palai chungchang chu engtin nge Sawmdawnga nen in sawi dun tawh em?" a rawn tih zawm leh nghal zat chu ka chaw ei lai ka hak thelh. U Nuin ka hnungah min lo chul vat.


"Pa...ka duhlo..." ka ti sap.



"Nakinah i pa Tluanga nen chuan kan lo sawi tha mai dawn nia. In chinfel turin kan lo dah deuh a. Mahse kan inrawlh a ngai dawn a nih hmel riau mai" ka thusawi haider hmak in a chaw ei lai bar zawm mial mial pah chuan a ti nghut a.




Ngawi rengin ka pa chu ka en tlawk tlawk. Ka rilru a na bawk si. Tih theih dang ka nei chuang silo. Ka tah chhuah mai ka hlauh vangin ka thleng chawiin silhmun lam ka pan ta daih. Ka nu leh u Nuin min lo melh reng tih ka mit sirin ka hmu thei. Ka pa leh ka û chu engmah hrelo ang maiin an chaw eilai an ei chhunzawm mial mial.




Hna kal tura ka insiam lai chuan Bawihtea chu ka khumah a lo let leh tap tap tawh. "Ate, hla play" ka hmazawna phone rawn lek pah chuan a rawn ti a. 'Anite, hla min lo play' a tih ve na anih chu. 'Anite' tih hi a lam thiam lova tun thlengin 'Ate' min tih phah ta anih hi. Phone chu lain nursery rhymes ka play sak a. Khum lamah tlanpheiin a va lam leh terh terh tawh. Lawmawm reuh hian !





Hospital ka thlen hnu pawhin ka rilru ah thil dang a awm thei lo. Ka hnathawh tur tul ang ang chu ka ti mawl ve tawp maiin ka hria.



"A mak thin e, Puipui ka biak che chu..." Ruatin ka hnungzangah na lo tea min ben paha a rawn tih chuan ka ngaihtuahna atangin ka harh chhuak zawk.




"Ah...eng nge i sawi a" bah niai a tiin ka nui lui sak.



"Theihnghilh rawh, tinge tunlai i awmdan hi mawlhtu lian tak i nei niin ka hria. Ka biak che lah hian i melh ngai i melh vung vung a. Ka thusawi pakhat mah i hre ngai bawk si lo" min en kal hian a ti a.




"Aa...engmah a nilo, ka hah deuh ani mai thei" ka nui lui leh hak a. Mahse ani chuan thutak zet hian min lo en kiau mai.




A mak hran lo tun karkhat liam ta chhung khan ka nunah thil tam tak, mak tak tak a thleng nasa em a. Chu chu ka thiannu tan hian haider theih a ni hauh lovang.




"Enteh, tunah hian i buaina chu sawi tlang law law teh ang. Min hrilh duh hun ka nghak kha ania. Mahse ka tur loh che chuan hma i sawn dawn lo tlat. Han sawi la, buaina i nei em ni? " ka mitmeng chhiar tum ang hrimin chiang takin min melh a.




"A pawilo , sawi lo mai rawh. I buaina hrilh tlak loh khawpa thian rintlak loh ka lo ni ania nge" lungawi vak lova a rawn tih ngat takah chuan insum zo lovin ka mittui a rawn luang thla ta pap mai.





Chutia ka mittui tla a hmuh takah chuan min rawn kuah vat a. Ka hnung zangah a chul hliau hliau a. Insum zetin ka tap khur ta ngat ngat a.




Vawiin chu nidang ang lo takin kan awl phian a. Chhun chawlh lawk pahin Hospital hnung lam thingbuk hnuai daihlim nuam zetah kan thu dun a, vei vak awm lohna lai, hmun reh lai a ni bawk a. A zia phian mai.





Ka mittui hruk pah chuan ka inla hrang vat a. "A zia lo hle mai, ka tihrilhai viau ang che a" ka hmai tuai pah chuan ka ti sap a.




"Ka bulah chuan inhawng takin i awm thei alawm" a lo ti vat. Hetia ka awm chhan hi a hre duh tih a mitmeng atang chuan ka chhiar thiam mai.




Ruati hi ka thiannu neih ve chhun ka kawm ve ber ani a. Ka tan a inhawngin mi a ngaihlu thiam thin a. Ka tan pawh a hlu takzet. Thil tam tak kan in share thin a. Tun hunah hian ani tluka rintlak tur hi ka hmu ta biklo. Engvangin nge ka thiannu min ngaihtuah em em tu bulah hian ka harsatna chu ka hrilh mai loh ang.




Hmaih nei miah lovin ka pa thusawi zawng zawng leh ka nu leh ka û pawn ka pa an thlawp thu vel chu ka sawi ta vek a. A khat tawkin a lo thaw leh hak thin.




"Tikha chuan ka thawl ve deuh hawkin ka hria" ka nui lui seih a.




"Min hrilh hi ka lawm ania. I chhungte chu an ti mak ve deuh reng reng anih chu, hriat ngai miah loh pasala han neihtir tawp che an tum mai chu" lu thing mat mat pah hian a chet hlak hlak a. "Tihdan kan ngaihtuah dawn nia" a rawn tih zawm leh zat a.





"Hawh, duty na lamah let tawh phawt ang. Nakinah kan sawi zawm leh dawn nia" zâng vaha ka tih takah chuan engmah sawi zui tawh lem lovin hospital chhung kan pan dun nghal a.





Sawmdawnga POV


"Lo lut rawh" kawngka kik thawm chu ka chhawn vat. "Sir, hei an be duh che a" ka Office chhunga lo lut pahin ka secretary chuan a rawn ti a.





"Tunge" a phone ken lai melh pah chuan ka ti nghut. "Thari a inti in ka hria" ka hmeichhe kawp thinte zinga pakhat a ni. Hmeichhe dang lakah min hauh ve em em ringawt zel a. Hmeichhe duk dak lo zet zet min rawn pan tute hi a lo chingfel hmiah zel, min ta chei viau thin hi a chang chuan ka hne thin.





"Ka buai rih a, nakinah ka biak tur thu lo hrilh mai ta che" ka ti sup a. "Awle, sir" tiin a chhuak zui nghal.




Chennai-a ka awm lai khan hunawl ah chuan Party hi ka kal ve zeuh thin a. Keimah tak hian nuam ka tih pawh ka hre chuang lo. Mahse ka thiante khan min sawm nasa thei em a. Chuvanga zui ve mai thin chauh kha ka ni. Chuta tang chuan Thari nen hian kan inhria a. Amah a chhiat loh bakah an hausa a, a chapo viau bawk. Kan inhriat tirh atangin min zar buai char char ti ila ka sawi sual tam lovang.





Kan party na hotel room ka book saah saruak ngal ngata awmin min lo nghak a. Chuti na na na chu kei mipa ah pawh pa tawk ve tak, thisen lum rual , rui tawh bawk si khan engmah ngaihtuah buai lovin ka khawsak pui chiam ta kha ania.





Heta tang hian min ta chei ta ringawt. Ka zep lo, vawi tam kan mudun tawh , ani tluka zei ka la hrelo. Mi chawhphur dan a thiam riau a. Mahse ka duh chi a ni chuang miah lo. Hmeichhia leh mipa kan nihna angin mamawh kan inpe tawnah ka ngai hmiah.





Kan Office hi Mission veng-a awm a ni a. Ka pa sumdawnna bul tanna anih avangin a ngaihlu viau bawk.




Ka pa hi a tleirawl chhuah hlim hlawtin a nu leh pa (ka pi leh pu) ten Motor accident vangin an boral san a. Chhungte belh tur dang nei ta lo chu amahin ei a zawng ta a. Electronics lampang hi a khawih thiam fu mai a. Motor fu lo leh chhia han siam mai te kha a chemkalna lam tak a lo ni bawk nen helai hmun, tuna kan Office ni ta ah hian workshop tenau a hawng ve ta rawih a.





Ka nu te lam hi chu Aizawl khawpuiah pawh khawsa thei pawl tak an ni a. Ka pa workshop a motor siam tir tuma an kal kha ka nu leh pa intawnna hmasa ber a ni. A hnuah an inhmu fuh ta zeuh zeuh a, lo inhmangaih chho ta a. Ka nu te lam hi hausa viau e tilo hian mi inngaitlawm ngang an ni a. An inngaihzawn lai paw'n chhungte do an tawk lem lo. Chu chuan ka pa phurna a pe a, rintlak ni ngei turin a bei a. A tirah hlawk em em lo mah se a pawisa hmuh hmasak apiang ren taka hmangin a khawl zel a. Rilru a nei bawk a, kum 5 a liam leh meuh chuan Motor Showroom hung zet a hawng ta hem mai ni.




Tichuan sumdawnna pawh ramdang nena inthlun zawmin a zauh ta zel a. A hlawhtlin vek hnuah chuan ka nu nen an innei ta chauh. A hlawhtlinna phenah chuan ka nu hi sawi hmaih chi a ni lo. Amah fuih phur a, chakna pe thintu chu ka nu a ni miau a !





Ka pa thawhrimna vang liau liau a keini unau pawh nuamsa a awm thei kan ni tih ka hrechiang a. Chuvangin kan unau paw'n kan theih chin chinah nu leh pa te kan duat ve viau chuan ka hre bawk.




Mizorama ka rawn haw hnuin kan Motor Showroom hi ka enkawl ta ber a. Ka pa erawh kan veng , Dawrpui lama kan Office ah a thu ta thung. Upat lam a lo pan ve zel bawk nen kan veng lama kal a ni ta bawk a. A zia viau mai.






Kan naupang ber hi a tet te atanga designing lam a tuichilh vangin kum naupangtein Designing a zir zo a. Tunah hian kan veng , Dawrpuiah tho chuan Dawr kan hawnsak ve bawk a. A tul tulin a lo buai ve bap bap zel mai ni.






Office thil neuh neuh ka tihfel hnu chuan in lam pan turin ka insiam fel a. Ka phone drawer chhunga ka dah chu ka ban vut. Hna thil pawimawh khawih laia intihbuai ka duh loh vangin ka phone hi Office hours-ah chuan ka off hmak thin.





On tawh lem lovin ka kekawr ipte ah chuan ka dah a. Car chahbi lain Office atang ka chhuak zui vut.




Traffic jam karah chuan ning zetin ka steering chu ka beng leh dawt thin. Hei tak hi alawm Mizoram ka nin na chu, kan kawng a chep thin si a. Hmanhmawh deuh pawh ni ila kan tum ram hi thlen vat a harsa thin. Hui... ngaihtuah buai lo zawk teh ang. Hmasawnna tur kan la ngah khawp mai kan ram hian.





Dawrpui lama kan in pan hmasa lovin keimaha ka awm thinna ka pawisa ngeia ka lei ve Durtlang lama ka in chu ka pan ta zawk a.





Ka in ka thlen veleh ka nu phone in ka haw loh tur thu leh helama ka ina ka awm thu ka hrilh nghal "Mahni a awm ngawt te chu a tha hlei nem mawle. Helam i awmna pawh a la rei lova kan ngai ve che a," lungawi lo deuh hian a rawn ti ngat a. Mahse a tawp a tawpah chuan kan in thlem lungawi thei ta hram.





Nu hi chu nu an ni a. Fate ngaihtuah an pe na a, puitling nih tawh pawh hian naupang en a min en chang an la nei thin.






Ka intihfai zawh hnu chuan rin tur dang nei hek lo. Mahniin eirawng ka inbawl chawp a. Nimin lawka ka kal avangin chawhmeh dahthat sa ka la nei nual a. Chungho chu ka siam mial mial. Chennai-ah khan mahni a awm ka ni bawk a. Awmpui chu la ve tho mah ila eirawng bawl tak hi chu keimahin ka ti ve thin a. Ka thiam viau.





Chaw ka eikham fel hnu chuan vawiin lama ka hnathawh enfel leh thuak thuak turin ka room lamah ka chho leh vat.





Zan lam boruak mah ni se nipui lai a nih vang nge khua a lum uap up up mai. Ka laptop chu khupin balcony ah pawn lam boruak hip turin ka va chhuak a.





Ka maimitchhin vang vang lai chuan kawngpui lama te thawt thawm a awm avangin ka hawi thla vut. Ka in gate zawn takah chuan mipa pakhat a chezia ah pawh zu rui tih hriat reng reng hian hmeichhe pakhat hi a lo kuah bet tlat a. A ka a hup beh sak tlat bawk. A thim deuh hlek avangin ka zuk hmu chiang theilo.







Eng khaw sawi set set lovin room-ah ka lut a, hmanhmawh zetin inhnuai lamah ka tlan thla zui vut.





An awmna ka va thlen chuan chupa, hmeichhe pakhat lo kuah bettu chu ka hnek thal nghal tawp. Muang chang hian rawn thawh a tum a. A thal leh nghal tawp. Tihluih na hmanga hmeichhe awm nem zawk khawih hi ka huat zawng tak. Pawngsual pawh hi ka thil ten ber pawl a ni. Mipa min timualpho tute an ni bawk.






A hmeichhia chuan min rawn kuah nghal thlawp. A tap zui hawk mai. Ka awma hmai a phum tlat avangin a hmel ka la hmu theilo. A mangang lutuk chu ka khawngaih zawk.





"Shiii...a tha vek" ka kawr awmah thamin a tap hliam hliam a. A samah chulin ka kuah bet tlat bawk.





Khawnge khapa kha a awm tak. Kawngpui lam ka va en chu a lo kalsawn hman. Hla fe a lo kal hman anih chu. Ûm zui ka tum zet a mahse ka awma tap lah chuan min tham nghet ve tai bawk si.






A tah ban deuh hnu chuan a inthlahdul ta deuh a. A inlahrang chiah chu mak ti zetin kan inmelh tawp. Khanu kha ani, Rinhlupuii kha. Ka makti hmel chu ka insiam tha vat a.





"Tun ang zanrei tawh ah nangmah chauhvin eng nge helai hmunah hian i tih a"? ka aw chu a chang tha beng bawng khawp mai.





"Ih...ka duty hun a zo chiah a, haw ka tum a...chuan...ih...khapa..." a ngawi dat a, a aw atang ringawt pawh chuan a tahchhuah zia a hriat theih.



"Inchhungah lut phawt teh ang"

"Mahse..." a hawi kual ang he haw a.

"Lungngai suh, ka in anih hi keimah chiahin ka awm" ka lo ti chhum vut.




Engmah sawi buai lo chuan min zui lut ve mai bawk a.



"Tah khan thu rawh" sofa ah chuan bet zan lo hian a thu a. A dar vei lam chu a kut pakhatin a han khawih leh thin. A pawt khawm deuh tlat a.




"Tinge, i tina ami" a lu a lo thing vat. "Anih chuan tikhan tinge i khawih char char a, thlah teh" ka ti bul vut. "Aih engmah a nilo".




A thutna lam ka va pan vut. A kut a dar a vawn tlatna chu ka dahsawn vut a. Mahse a hup leh rang lutuk. A kawr a lo thler chu niin a brazier var hrui a dara invet pawh a lang chiang ngang mai.





Ka rum nghut. "A tir khan sawi mai tur che alawm, tikhan lo thu lawk rawh" tih pah chuan ka tho vut. A kun ngal mai, a hmai sen awp awp chu hmuhnawm tak a ni. A zak a ni ngei ang.




Room lamah chhovin ka Tshirt te ber tur awm ang chu ka la chhuak nghal a. A te ve ang reng bawk sia, ka tshirt te ber pawh hi a ha thawl viau ang.





Inhnuai ka chhuk thlak leh chuan a thut ngaiin a lo la thu ngal a. A dar pawh a lo la pawt ve tang tang mai.




"Kha heihi ha rawh" a lo hawi chhuak ve ta alawm. A ban ve mai bawk a.


"Khawiah nge..."



"Saw lamah sawn bathroom chu a awm" ka ti zui leh zat.





Engmah sawi tawh lovin bathroom awmna lam chu a pan nghal a. Sofa ah chuan hahdam zetin ka lo thu awn duai a. Ka mobile phone chu la chhuakin News chi hrang hrang chu ka en kual thuak thuak a.





Bathroom atanga Rinhlupuii a lo chhuah leh chuan ka nuih huk loh nan ka insum nasa lutuk. Ka Tshirt te ber thlang chhuak ve mah ila atan chuan a lian mah mah ani. Mahse lehlam kawng zawng taka ngaihtuah chuan a jeans hak nen pawh a inhmeh phian mai.




Nichina a tah nasat avang khan a hnar a sen tar a. A mit a bui lap a, mahse a inhmeh phian lawi a. Ka ngaihtuahna zet chuh. Ka lu ka thing vut.




A T-shirt hak hmawr chu a pawt deuh tai "Ka û ka hrilh tawh a...min lo lam dawn a...chumi hma chu hetah hian ka lo awm lawk thei ang em" min en kiau pah chuan a rawn ti sap a. Ka lo bu nghut thung. Kawngka bulah chuan tih tur ber hrelo hian a ding deuh ngar a.





"Hetah lo thu la"
"Aih, a ngai lo. Tihian ka lo nghak lawk mai ang" a inthlahrung hmel chu a khawngaihthlak zawk.




"Lo thu rawh" ka tih leh nghut takah chuan zawi muangin ka thutna ep chiahah chuan a lo thu ve leh mai bawk a.





"Tinge nangmah chauhin i haw reng reng a" minute3 vel ngawi renga kan thut hnu chuan ka zawt a.





"Ka thiannu duty hun tur zawk ania. A pi a dam loh thut avangin hmanhmawh deuhin a haw a ngai a. Scooty a ken loh ni tak a ni bawk sia. A hmanhmawh thlak tawh si nen ka scooty ka hman tir ta tawp a. Chuan kan duty hun kan inthlak tawp a" tha deuh chuan min chhang ve mai bawk a.



"Anih chu, tun hnuah chuan fimkhur tawh ang che"



"Awle, chuan...ka lawm lutuk ania aw. Awm lo la chu tunah te hian engtin nge ka awm ang le, ka lawm takzet ani" a tih sap chuan ka lo bu nghut a.





Engmah sawi tawh lem lo chuan kan thu ngawi kar a. Minute 5 vel hnuah chuan a û a lo thleng a. Hruaia pawn lawmthu min hrilh sup a. Zan tlai lam anih tawh avangin an haw zui nghal mai bawk a.





Khumah chuan ka mu meng kar a. Thil hrang hrang ka ngaihtuah nasa khawp mai. Hmeichhe vun no nalh tak leh hmeltha ve tak chu a ni. Mahse a zei viau lovang. What!? Tunah hian Rinhlupuii ka ngaihtuah char char a maw. Ka lu thing ngut ngut pahin ka nui chhuak hawk hawk. Tunah hian midangin min rawn hmu sela chu mimawl emaw min ti ngei ang.








Zing ka harh chuan dar 6:30a.m a lo ri tawh. Ka puansin ka theh hlim tawp a. Khum atanga tho chhuakin bathroom lam ka pan zui vut. Shower hnuaiah ka inchiah vang vang a. Nizan thil thleng velin ka ngaihtuahna a rawn luhchilh leh nghal zat. Rinhlupuii bawk a ni, hmeichhe naupang ang mai a ni. Ka pa hian eng vanga nei tura min duh nge maw anih le. Ka lu la thing leh ngut thin.






Bathroom atanga ka chhuak chiah chu ka phone a lo ri ral ral a. Caller ID ka hmuh chuan ka rum nghut. Ka pick up ve mai bawk a.





"Dear, nimin khan ka lo call char char che a. I pick up lova" Thari a ni. Min rawn ta chei leh ta ngawt. "Mizoramah ka lo haw ania" ka ngawih reng vang chuan a rawn tih zawm leh zat a.





"Chuan..." ka ti ringawt.
"Ti teh, dear inhmu ang. Ka ngai tawh che ania" a rawn ti leh har har a.
"Hna ka ngah, ka buai khawp mai"
"In office awmna ka hre tawh a. Ka lo kal mai ang" a tih leh chuan chhang buai lovin phone ka dah hmak.




Ka engmah ni hlei lo, min ta chei ringawt mai hi ka ngaihdan a ni viau thin lo. Office kal turin ka insiam mawlh mawlh a. Tunlai hna kan buai zual lai ania. Company kan zauh ve zel bawk nen hunawl pawh ka nei tam lo. Ka tan chuan chhungte leh ka hna hi an pawimawh ber.






Office ka thlen meuh chuan dar10:00a.m a lo ri thuak tawh. Ka Office landline a rawn rik chuan ka ban vat "Sawi rawh" file sign mawlh mawlh pah chuan ka ti a.





"Sir, Thari intiin hmuh che a duh a. Appointment a nei bawk si lova. Hrilh rawh a ti tlat sia" inthlahrung zet hian ka secretary chuan a rawn ti a. Ka lo thaw hrawk thung.

"Lo luh tir mai rawh" ka dah zui vut.






"Dear, ka lo kal" a chhelo leh pek khawp mai. Kawrfual mar tight tha zet a ha a. Pheikhawk sang a bun vah bawk. A rawn pen lut nghal zat a.




"Eng nge i lo tih dawn" ka lo ti nghut.
"Ka ngai tawh che alawm" ka bula rawn kal pah chuan a ti har har a. Ka biangah a rawn fawp zauh. Engah mah ka ngai hran lo.




"Vawiin chu dinner eidun ila tiraw" min thawk khum ham ham pah chuan a rawn ti leh a. "I hmuh ang hian ka buai khawp mai"
"Ka lo nghak ang che" thutthlengah chuan thuin ka thil sign fel lai chu min lo nghak a.




"Dear, ka ril a tam tawh ania" ka bula rawn kal hnai pahin ka mal a zut kual zan zan a. Henu hi chu a zei ka tih tawh kha. Ka thaw leh hawk thin. "I duh chuan chauh rehna ka hria ania" ka hmui bulah chuan a rawn ti sar sar a. Ka mipatnain a lo hre rang ngang mai. A hmuiin ka hmui a rawn nul thuak thuak a. Ka pen hum lai dahin ka chawi nawlh a. Ka fawp nghal ngawng ngawng bawk. Sofa lamah chawi pheiin ka bawh bet nghal zat. A nui ri hak a, ka hnung zângah kuahin min lo fawp let tan tan bawk. Enge a duh ka hria alawm.






"Phelh rawh" ka ti nghut, a nui ri hak a, engmah sawi buai lovin a inphelh sat sat a. Ka kekawr chu phelhin duhthawh zetin kan che zui ta buan buan a...






"In ha tawh rawh" ka kamis kilh that mawlh mawlh pah chuan ka ti a. "Dear..." "In ha tawh rawh ka tih chu" ka ti leh nghut. A la beisei tih ka hria. Mahse tih nawn pui tumna ka nei lo.





Hna pawh thawk ta lo chuan dinner ei turin kan inzui chhuak ta nghal a. Hnathawk ho lah chuan min lo en duh hrep lehnghal a. Intineitu zetin ka banah min lo chelh ve tlat bawk nen.





Rinhlupuii's POV



"Hey...tinge engmah min rawn hrilh miah lova" ka room rawn luh pahin min ti nghal thawr a. Ka lo nuih var var thung. Ka khumah thu mu deuh ti tihin laptop-ah movie ka lo en a.




"I nuin min rawn hrilh lo sela chu engmah hre lovin ka awm dawn tihna ania. Ka ngaihtuah zia che hi" ka khuma rawn lawn kai pahin a ti leh sap.





"Ruat...ka that vek hi" a kut a chelh pah chuan ka ti ve ta.
"Chu pawhnise ka thiam loh vek a ni. Ka haw san daih che a. Eng emaw i chungah thleng ta se..." A inthlahrun hmel lutuk chu ka khawngaih zawk.





"Ti teh engtin mah ka awm loh hi ka tha vek tawh alawm" kan han inkuah leh rih. "Nanghi i chawl ve ringawt ami a" inlakhran pah chuan ka ti nghal vat a.




"Chawl chuang lo ve, ka duty laiin i nuin min lo bia a, i chanchin min lo hrilh a. Kawm tur chein hospital atangin ka lo tlanchhuak nghal mawle. Chhuanlam ka siam a." nui rah rah chung chuan a ti a. Keipawh ka nui ve ta ngawt.



Nizan thil thleng vel vang khan hna kal turin tha ka nei thlawt lo. Ina kan lêt hnu khan ka nu leh pa pawh an lo la meng a. Min lo ngaihtuah ngang mai. Police-ah report kan tum hial kha ania. Mahse khapa min khawih tum tupa hmel kha a thim em avangin ka hmu chiang lo bawk nen. Kan report em ta bik lo. U Hruaia chuan a hnu lehzelah pawh fimkhur turin min chah mawlh mawlh reng a. Mahni a haw ngawt tawh lova haw na tur neih loh chuan amah be turin min chah reng bawk.






Ruati lo leng chu ka hlimpui ta phian mai. Ka laptop-ah movies kan en dun a. Kan titi pah reng bawk a. A bula awm hi chuan thil dang zawng zawng theihnghilh thak khawp hian ka awm tlat zel a. Ka tana thian tha leh hlu tak hi chu a ni ve chiang a ni.








Ka nu nen chaw ei tura kan tihluih tlat avangin zanriah min kilpui ve dawn a. Eirawngbawl pahin kan titi leh melh melh tawh. Fiamthu a thawh deuh char char a. Kan nui leh nasa tawh mai.



"Enteh Puipui, inneih chungchang kha engtin nge ni ta zel..." salad a chan mek a. Keiin arsa ka kang mek thung. Chutiang thu min zawh deuh thut avang chuan ka melh zawk a. Ani pawn min ngaihtuah tih hriat zet hian min lo melh ve bawk.





"Aa...engmah chu an sawi rih tawh lo" ka lo theihnghilh hman tawh a. A rawn sawi thar leh takah chuan ka rilru a hah thar leh ta khawp mai.




"I rilru a hah viau chuan nangmah chauh a inngaihtuah ngut ngut tawh lovin min hrilh ve zel tawh rawh aw..." a rawn ti leh sap a. Nui var varin ka bu ta nghat nghat.






Chutia eirawng kan bawl buai lai chuan sitting room lamah thawm a rawn awm a. Ka pa te an nih tawh ka rin vangin ka chawhmeh chawhna fian kenlai nen rang zetin ka va phei a.






Mahse ka thil hmuh avang chuan ka ding dat. Ka meng deuh kawk bawk. Ka pa chauh ni lovin a hnungah chuan Malsawmdawnga a rawn lut ve nghal zat.




Chiang fahranin min lo melh a. Ka ke ler atanga ka chhip thlengin. Legins leh kawr lian hnek hnawk ka ha a, eirawng bawl lai ka nih vangin apron ka hreng bawk.




"Mambawih, hei Sawmdawnga hian zanriah min rawn kilpui dawn a, kan rawn inzui haw nghal anih hi" ka pa chuan a rawn ti dam thluam a. A hnung ami pa lah chuan mit tizim sun hian min lo melh ngur bawk si. "Ah...aw...anih chu" ka ti bah niai. Ka fian kenlai chu ka kut pahnihin ka hum nghet sauh sauh a.






"Sawmdawng, i duh leh choka lamah khan lo va inkawm rawh u...saw a eirawng bawl laklawh lai anih hmel" nui hawk hawk chung hian a tih zawm leh zat a. Sawmdawnga pawh a kiai ve suk mai. Kei erawh lai lutukin choka bulah ka lo ding thung.





Ka nu awmna min zawt nghal zat a. Room lama a awm thu ka sawi rual chuan room lam a pan ve nghal zat bawk. "I tha maw" mit tizim sun hian min en a. Nizan chungchang a sawina ani tih ka hre nghal zat bawk. Ka bu nghat nghat a.






"Puipui, i pa te chu an lo haw ami?" Ruati chuan ka hnunga din pahin a rawn ti a. Malsawmdawnga a hmu ve chiah chu a phu deuh awk mai. "Ah... ih...lo kal la, chokaah hian" Malsawmdawnga en pah chuan ka ti deuh hliau a.




Engmah sawi tawh lem lovin a bu nghut a. Choka lam a rawn pan phei ve nghal mai bawk.




Ruati nen chuan kan eirawng bawl lai kan chhunzawm leh malh malh a. A khat tawkin zawhna ngah mitmeng zet hian min melh leh ngar ngar zel. Mahse tun hun hi kan duh duh sawia titi nan a rem teuh bawk silo. Sawmdawnga erawh chuan kan pahnih thiltih ngaihtuah hmel lo zet hian dining chair ah thuin a phone a hmet mual mual thung.





"Ehe, Sawmdawnga chu i lo kal tih i pa Raman a lo sawi a i dam tha maw" ka nuin choka a rawn luh rual chuan a rawn ti hluai a. Sawmdawnga pawn a dam that thuin a lo chhang ve mai bawk .



"Kha, nizan lah kha nang awm lo la chu engtin nge Mambawihi hi a awm dawn kan hre si lo. A hna hian a pawt buai ve thin sia. Zan lam duty tum hi an nei lo thei bik bawk si lova. Chanchin engmah a rawn sawi si lova. Zan dangah pawh tha takin a lo haw zel mai sia. Ngaihtuah thui nachang kan lo hrelo a. A zia lo tak tak a ni. I lo awm hlauh chu a tihzia tak tak ani" a rawn ti leh nghal bawrh bawrh a.





"Durtlang lama ka riah chhoh zan tak ania. Kan in nang fuh ta anih kha" a lo ti ve mai bawk.




"Hmeichhia hi chu fimkhur kan ngai khawp a. Zanrei tawh lamah phei chuan chhuah vak hi a tha lo. Kan hmingchhe hma sia, a awm nem zawk kan lo nihna laiah pawh hian fimkhur nasat kan ngai. Mambawihi hi chu a inthlahrung thei lutuk a. Nizan pawh a scooty in a rawn haw theilo anih pawhin a û rawn call mai tur ania. An inchah uluk tawh viau kha" a ti leh barh barh a. Sawmdawnga pawh a lo bu nghut nghut mai. Ruati erawh nichin atang tawh khan min zawh duh a ngah tawh tih hriat zet hian min la melh ngar ngar thung. Chaw eikham lamah chuan zawhna chhan sen loh ka dawng leh ngei dawn e.







Ka pa a rawn kal ve takah chuan sitting room lamah ka nu hovin an inzui phei a. An phei rual rualin "Eng nge thil awmzia hi" ka beng bulah Ruati chuan a rawn ti nghal sar sar. A insum rei tawh kha ka ti reng ani. "Nakinah chaw eikhamah kan sawi dun dawn nia" ka tih chuan rum zet hian min melh a. Mahse min zawt lui tawh bik lem lo.






Ka û te chhung chu u Nu-i te in lamah chaw an ei phei a. Thla khatah vawikhat tal ka û hian an nû te in lama chaw ei pui hi a tih than dan ania. Ka nu leh pa te pawhin an pawmpui viau. Engmah an sawisel lem lo.







Chaw kan eilai te chuan Vanlalruati pek hian min rawn sik leh nawk thin. Eng a hria nimaw, a za cheng mai ni. Ka pa leh ka nu chu an titi mawlh mawlh a. Ruatin a lo zawm ve zauh zauh bawk a. Sawmdawnga pawh sumdawnna chungchang vel an zawt pah luam bawk. Ani pawhin tha deuhvin a lo chhang ve zel mai bawk a.





Chaw te kan eifel hnua hmun kan tihfel laite chuan Vanlalruati a za cheng tawh mai. Min tur deuh sek lehnghal. Chaw eikhama room a han luh nghal daih kha a tihchi chiah bawk si lova. Thingpui te lum sakin kan la tawi khawmuang ve rih. Dar 7:00 velah chuan a haw ve ta hram.







"Eng nge thil awmzia hi, sawi nghal char char rawh" ka room kan luh rualin Ruati chuan a ti nghal zak. A kawng dawm meuhvin min melh ngar bawk.





"I hmuh ang kha a nimai" kei lah pek chuan ka khuma thut pahin ka lo ti ringawt. A run tawk a tling leh teh e.




"Engtin nge Malsawmdawnga nen khan in inhriat a. Chuan i nu sawi dan kalhmangah kha chuan nizana lo chhantu che kha a nih hmel viau bawk si" a ti leh nghal zat a.




"Ania lawm, amah khan alawm min lo tanpui"
"Anih chuan...i sawi awmzia chu amah kha maw i pasal tur chu" phawk ring zet hian a rawn ti leh. Pasal tur han tih nghal deuh tawng mai chuh.




"Pasal tur ni kher lovin ka chhungte'n ka pasal atana min neihtir an tum chu ani kha alawm" ka ti ta sap.





Chutah meng deuh kawk hian phur hmel zetin a hmai a hup a. "Awi awi awi ka thusawi a hma ami kha ka sut leh ni rawh se, nei ngei ngei rawh" a rawn ti ta bauh mai.


____*____*____*____


(Ka edit hman lo ka lo vawm lut thuai aw. Typing mistake vel a awm chuan min lo hrethiam mai dawn nia. In fel hlawm si...in lo chhiar ve avangin ka lawm em em e ❤️)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:04 pm

OUR MARRIAGE

By CVL.Awmpuii



Chapter 3




Enge maw a hriat ni? Ka hrilh hmasak tumin min lungawi loh pui viau a. Tunah lah nei ngei ngei turin min ti tak deuh deuh a.
"Eng vang ngawt chuan maw?" ka ti ta nghat .




"Rinhlupui, Malsawmdawnga kha i hre miah lo em ni? I hriat loh chu ka ring bawk si lova" mak ti hmel deuh hian min en kal a.
"Ka hriat zawng chu Pa Tluanga, ka pa thianpa fapa ani tih hi a nimai. Chuan, sumdawnna an nei ve bawkin ka hria" ka ti deuh tawl a.
Mawl min tih hmel zet hian min melh ngat ngat a. Chutah "I va hahthlak tak. Malsawmdawnga te lo la hriat loh tlat mai chu. Keipawh hi engtin nge a chanchin i bulah sawi lova ka la awm theih zawk le" min bia pawh a ang tawh lo. Amah leh amahin thil a sawi tawh nimai in ka hria.







"Eng nge hriat tur vak la awm chuang a" ka ti ta hliai a. "Malsawmdawnga te chu a... mi vantlang chunglam alawm an nih le. An sumdawnna an zar pharh nasa bawk si. Mizoram chauh ni lo Chennai lamah te pawh sumdawnna an nei alawm. Mizoramah hi chuan Mission Veng-a Motor Showroom hung zet saw an ta ania. Dawrpuiah pawh Office hung deuh mai an nei alawm. Amah lah hi a chhelo bawk sia, Mizoramah hian a Hmeichhe duh duh a thing thei ang chu le" phur zet hian a ti ham ham a.





"Chutiang mipa te chu a tha e, vannei inti hle ta che. Nei hmak mai rawh" ka khuma mut thlak pah chuan a rawn tih zawm leh zat a. A ngaihsam lutuk chu ben chawrh mai ka châk rum rum.





"Chutiang ngawt a ni thei hlei nem. Hriat ngai loh leh hmangaih miah loh pasala neih te chu ka duh teuhlo mai. Chuloah amah kha ka ngainat zawng chi a ni lo" ka ti ngat a.





Ruati haw hnu pawh chuan thil ka ngaihtuah nasa ngang mai. Chutiang taka hausa leh thil tithei chu engvang nge a chhungte pawh chuan kei kher min neihtir an tum le? Min neih hian eng nge an sumdawnna ah hlawkna an neih ve dawn ? Vanlalruati lah khan thawveng zetin nei turin min ti hmak mai bawk si. Tumah lam tang nei ta lova ka inhriatna chuan ka hnuk a ti no dawn tlat pek. Inneih hi chu damchhung daih asin mawle.







Zing ka harh chuan dar 6:30 a lo ri tawh a. Vawiin chu sawrkar chawlh anih vangin Hospital-ah kal ka ngai lo bawk a. Ka tho hma duh ta bik lo kha ania.





Intifaiin inhnuai lamah ka chhuk thla a. Ka vahpa duat em em paw'n sitting room ah a toys a lo la chhuak a. A lo inkhalh nasa mai. Min hmuh veleh min lo ko a, va pawm vatin kitchen lamah ka luhpui nghal bawk.






"Puipui, i tho nuam em" U Nu-i chuan min lo zawt vat a. Ka that thuin ka chhang ve nghal zat bawk.




"Khawnge ka nu hi?" a tho tlai ngai silo a, ka hmuh mai loh vanga zawt ka ni. "Ka pa leh i u Hruaia exer la a zui ve anih kha" a nui zui kar kar a. Keipawh ka nui ve hak mai.






U Nu-in 'Puih ka ngai lo, ka zo a nimai' a tih tlat vangin Bawihtea chu sitting room ah let puiin a toys vel ka khalh pui a. A nui leh hak hak thin.






Rei vak lovah ka pa te exer la pawh chu an lo thleng a. Chaw kan ei nghal zung zung a. Vawiin sawrkar chawlh ni mah se ka pa leh ka û chu Office lam an buai lai tak anih vangin hna kal turin an chhuak a. Keiin Bawihtea ka awm ang a. Ka nu leh U Nu-in pangpar vel an khawihfel leh dawn anih hmel.







Bawihtea pawmin ka room lamah ka chho a. Kawngka ka hawng chiah chu ka phone ri a lo tawp chiah mai. Thil pawimawh anih ringin ka pan nghal vat a. Bawihtea khuma ka thut tir hnu chuan ka en nghal vat a. Number hriat loh ani. Hman zana min lo call tu bawk kha niin ka hria. A pawimawh ka rin chuan loh vangin ka khum bula side table-ah chuan ka dah a. Bawihtea ka chhaih nui ta har har a. Reilo te hnuah ka phone bawk chu a rawn ri leh nghal a. Ka va ban chuan number ngai tho kha a ni tih ka hria. Pick up loh ka tum zet a, mahse chutia min lo call buai reng na na na chu tiin ka pick up zui a.





"Hello" a reh leh ta daih e. "Hello" ka ti nawn leh sap a. Lehlam ami chu a rawn thaw chhuak huk a.







"Vawiin tlaiah lo inpeih ang che. Kalna tur kan nei. Dar 3:00 velah ka lo lam ang che" a rawn ti nghut anih chu. A aw chu ka hriat tawh hnu a ang riau lehnghal.





"Min hrethiam la, tunge i nih ka van hre mai lo che ve" ka ti hliai a.
"Sawmdawnga" a ti rum nghut. Ka phu dawrh hi a ni ringawt. Phone chu ka hmai zawna lekin ka en ang he haw a.





Chutah "Ka thusawi chu i hria em. Dar 3:00 anih chu, lo inpeih ang che" ti leh nghutin phone chu a dah hmak anih chu. Engmah ka sawi ve hma hauhin a duh duh a rawn sawi a. Kan thiltih tur pawh sawi lova chutia a rawn ti ringawt chu polite lo ka ti khawp mai. Phone min la dah san hmuk lehnghal a. Tlai chu lo thleng mawlh rawh se, ka va han kal awm lo e aw. Eng nge khatia a rawn tih ngawt ni.






Bawihtea chu khumah thutpuiin Laptop-ah Nursery Rhymes ka ngaihthlak pui a. Kan rak teng tung mai. A la tawngfiah hlei thei chiah bawk si lova. A lo sakpui ve nasa thin mai sia. Video in a Rhymes sa lai te chu ka lak sak a. Min tihlim ngang mai.






A chhun thil vel ei tura ka chhukpui hnuin ka room-ah bawk ka chhohpui leh a. Ni hi a la vui zo chiah lo bawk nen Dar 1:30 dawnah chuan a muthlu ta lap lap a. Khumah mutpuiin nau awih hla ka sak sak rat rat a. Rei vak lovah chuan thaw sak sakin a muhil ve mai bawk a.






Ka room kawngka inkik karh karh chuan min tiharh deuh riai a. Ka chhing leh chiah tur chu "Mambawih" ka nu aw in a rawn tih leh vangin ka harh deuh zawk. Ka bula muhil thaw sak sak chu ka en leh a. Bawihtea ka mutpui kha ka lo muhil ve daih anih hmel.





"Mambawih" ka nuin a rawn tih leh chuan ka lo chhawn vat a.
Room kawngka ka va hawn chuan "I muhil lai ka lo tiharh che elaw, i la inpeih lo em ni" ka taksa en pah chuan a rawn ti nghal zat a.





Bo deuh a ka lo en chu a hrethiam ni hmiang "Khu, Sawmdawngan a nghak reng tawh che ania, insiam vat rawh" a rawn tih leh chuan ka hrechhuak zawk mai. A lo kal tak tak a nimaw. Chhuah ka tum miah lo asin le.






"Minute 10 vel a nghak tawh che ania. Tinge dar 3:00 ah chhuah in tum a ni lawm ni. Ka hrilh sa vek a ti che sia. I lo la inpeih bawk si lova" a rawn ti leh a. "Ka lo muhil daih alawm" ka ti tha ve mai bawk a.







" Bawihtea saw chu tisawn la mu rih rawh se. A nuin a rawn ngaihven mai ang. Va insiam vat la" ti leh zung zungin min kalsan leh daih. Engtin nge maw ka tih dawn le? Sawmdawnga hmel kha ka hmuh duh loh tehlul nen, ani nena car khata chuan dun leh ngat phei kha chu ka ngaihtuah zawng ringawt pawhin ka thawk a chham nghal.







Mahse le, tihtheih dang nei ta lo chu ka insiam leh ta phawt chu ania. Kekawr tight , jeans tih vel hi ka ngainat chiam loh vangin ka kawrfual par hak nuam deuh, simple zet chu ka ha a. Sandals ka bun leh tawp a. Ka bag la lehin inhnuai lamah chuan ka chhuk thla a. Sawmdawnga chu min hnungchhawn zawngin sofa-ah chuan phone hmet mual mual pahin a lo thu a. Step-a ka chhuk thla ri chu a hria ni hmiang a lo hawi vut a. Kan mit leh mit chu a intawng siah mai. Rang deuh hian ka hawisawn vat a. A mitmeng fiah zet leh rum ul hian min ti tim tlat thin. Ani pawh a rawn tho chhuak vut a.







Kitchen lam pan hmasain U Nu-i eirawng lo bawl tan mek tur chu Bawihtea ka khumah a la mut thu ka hrilh a.





Kan inzui chhuak chiah chu ka nu chuan pawn lamah pangpar a lo buaipui leh tawh. "Sawmdawng, lo thlah leh har lo la aw. Nuam deuhvin hun in va hmang dawn nia" a lo ti zung zung a. A biakpa pui roh lah chu a bu nghut ringawt a.







Ka thut luhna turin car kawngka chu min pawh hawn sak a. I he lovin ka thu lut ve mai bawk a. A car chu rawn kal hualin driver seat lamah chuan a rawn thu lut vut a. Amah a palian bawk si, coat suit in a inthuam zuah zel bawk sia, a mi uap a na churh churh thin khawp mai.
Ngawi rengin a car chhungah chuan kan thu leh ren rawn ta phawt chu ania. Kan kalna tur pawh ka zawt ngam eih lo.









Sawmdawnga POV





Steering herh kualin hmalam ka bih ngur a. A khat tawkin ngawi renga ka bula thu chu ka mit sir leh zeuh zeuh thin.




Ka pi leh pu (ka nu lam) ten hmuh ve an duh avangin an in lamah lenpui ka tum a. Ka putea te nupa leh an fapa hi inpui nghakin ka pu te nen an cheng ho mek. Ka pi leh pu, putea leh pitei te mithmuhah chuan inhmangaih tak anga awm kan ngaih hmel. Suih zawm tur kan ni tih an hre ve lova. Nupui nei tur angin min ngai hmiah tawh.



"Khawiah nge kan kal dawn a?" a rawn ti ta sap. Min zawt har tawh ka ti tawh reng a ni.
"Ka pi leh pu te inah " ka ti ringawt. Hetia ka tawng nghut nghut thin hi ka chhungte paw'n min hau nasa tawh lutuk. Ka tawng nghut thin pawh ka hre lem chuang lo, mahse a lo dawng sawng tu tan a nelawm loh viau a nimai thei. Kan naupang ber phei chuan a thianten min hlauh vek thu a sawi zauh tawh nghe nghe. Mahse ka sim thei lo, ka mize pakhatah ngaiin ka chhungte paw'n min hrethiam vek tawh.






"Eng nge kan tih dawn a?" zawi sap inthlahrun hmel deuh hian a rawn ti leh a. A va dilchhut reuh tak. "Ka nupui turte chu hmuh ve an ngai ang chu" ka ti leh charh charh a. A lam ka va hawi zawk chuan a meng kalh ralh mai. Zam hmel taka a awm reng thin mai hi ka hrethiam lo. Ka bula a awm hian a kut suihzawmin a kheuh neuh neuh zel mai.






Ka pu te in kan thlen chuan ka putea nupuiin kawng min lo hawn a. "E Sawmdawng in lo thleng thei maw lo thu ru ka nu ka va ko ang e" ti zung zungin ka pite mut pindan lam chu a pan a. Inchhung kan luh dawn chuan ka bula zahzum hmel deuhva ding chu a kutah ka vuan nghal hmiah. Phawk deuh hian min rawn en kal mai. Mahse ka ngai pawimawh lem lo. A kut pawh chu a tir lamah tal deuh laih mah se ka vawn ngheh em avangin a tang buai peih ta lem lo aniang. Ngawi renga inkai chungin kan inzui lut a.




"Ka pi leh pu te hian engmah an hre ve lo, chuvangin tha takin ka nupui tur angin awm ang che" ka ti leh charh. Engmah sawi tawh lem lovin thutkhawmna pindan lamah ka kalpui nghal a.





"Bawiha in lo thleng tluang maw" ka pi chu ka thutna lampangah a rawn kal vat a. Kum upa lam tawh mah nise in uluk chi leh nulat lai pawha ram hna hram thawk ngailo a nih vang nge a kum ngaihtuahin ka pi hmel hi a la tha a, a la valai reuh zek bawk. Mahse a hma ang em em chuan a chak vak tawh bik lo.



"Tluang a nimai e" ka lo ti ve sup a. Kan thutna ep chiah sofa ah chuan a rawn thu thla hnak a. "Kan Sawmdawngan nupui hial neih duhna thinlung a put theih chhan chu i ni ang maw" Rinhlupuii en vang vang pah chuan nui var varin a rawn ti chhuak a. Ka bula thu nu chu a rawn hawichhuak vat a. A zam hmel lutuk chu a khawngaihthlak zawk. Chutah "I lo hmeltha em anih hi le" ka pi chuan a rawn tih zawm leh zat a. Nui lui sakin Rinhlupuii pawh chuan lawmthu a sawi ve sep bawk.







"Khawnge ka pu te, ka putea pawh" thu maksak pui pui a lo sawi leh hmain ka lo zawt vat a. Chuti lo chu ka bula mi hi a zam chhe dawn lutuk tlat. Ka pi ka fak ve na em em chu an khawsak hi mi pangngai chunglam mahnise mi tupawh nel takin a kawm thiam vek a. Mi thatna a hmuhin a fak hreh ngai lo. Mahse a tih tawh loh chinah chuan tuman kan tawnlui ngam ngai lo. A ngaihdan ni tawhlo chinah chuan den fia fia tak ani.
"In chung lam bathroom tap a chhia a, i putea nen an han siam lawk anih kha, in lo kal dawn vangin Office pawh an thulh daih ania. An lo phur surh surh lutuk a" nui hak hak pah hian a ti a.





"Mamuan , in pa te chu han ko la" ka pitei hnenah chuan a tih zawm zat a. Pitei pawh inchung lamah Putea te ko turin a chho ve nghal zat.




Ka pi chuan kan chhungkaw chanchin a hrilh mial mial a, a khat tawkin a chanchin a zawt ve melh melh bawk. Rinhlupuii chuan nurse hna a thawh thu vel chu tha deuhvin a hrilh ve zel mai bawk a. Ka pi mitmeng atang chuan Rinhlupuii hi a duhzawng tak a ni tih hai theih rual a nilo. Lungawi hmel hliah hliah hian a en leh vang vang thin.





Ka pu leh putea an lo chhuk thlak chuan Rinhlupuii chu chibaiin an be ve luam a. Felfai deuhvin a lo chhang ve zel bawk. Ka chhungte chu Rinhlupuii ah hian an lungawi hmel thawkhat viau chuan ka hria a ni.





"Nang meuhvin nupui neih duhna rilru te i han pu ta mai ania. I nau pawh kan chah haw ngei a ngai dawn nih chu" putea chuan nuih huah huah pah hian a rawn ti a. "Kan Remruata hi zawng mahni ram ngaih nachang pawh hi a hre lo. Lehkha zir turin ka awm e a tia. Min rawn biak a, a zirlai sawipui tum lah hian thudang min sawipui nghal daih zel a" ka pi chuan a lo ti hlak hlak a.




Remruata chu ka putea te fapa neihchhun ani a, kan naupang ber Mawimawii nen hian kumkhat chhuak an nia, an awmdun chuan an inhnial reng, mahse an inngai leh ber tho thin. Duat rawn an ni tih an inhre khawp a, kan Mawimawii ang chiahin Remruata pawh hi a pangchang thiam thin. Kei ang lo takin tupawh mai hi a kawm nel nghal zung zung thei a, a nelawmin thian pawh a ngah phah hle. Kan chhungte pawhin hei vang hian Remruata leh Sawmdawnga mizia chu chhim leh hmar ang an ni an ti hial thin.





"In inneih dawnah chuan chah haw ila, helamah awm ve daih tawh se a tha ang. I nau chu nang baka kaihruai thiam an awm lovang, helamah i lo awm tawh dawn bawk a" ka pu chuan a rawn ti ve leh charh charh a. Ka putea te nupa pawhin an thlawp hmel khawp mai.





Kan haw dawn meuh chuan dar 5 a lo ri dawn thuak tawh. "Puipui, Sawmdawnga tello pawhin lo leng ziah rawh aw. Hei, i pitei nen chauh hian in lamah kan awm thin sia. A khawharthlak thin ania. I in a ni ve tawh tho a, i lo leng ziah dawn nia" ka pi chuan a ti leh sap sap a. Rinhlupuiin a ngaihna hrelo hmel zeta min rawn en chu ka lo buk khum nghut. "Ka lo tum dawn nia" nui hul hak chungin a ti ve mai bawk a.




Car steering chu nghet taka humin hma lam ka melh ngur a. Sawi duh nei hmel zeta a rawn hawi leh thin ka bula mi chu mit sirin ka va hmu leh thin. "Sawi la..." ka ti sup, a inthlahrun hmel mai bawk sia, a sawi duh chu sawi mai se. Hetiang hmeichhe kimki deuh hi treat dan ka thiam thak lo. "Keini pahnih hi kan innei tak tak a ngai ami" a rawn ti zawi sap. "A ngai lo ami?" ka zawt let khauh. Harsa tih hmel zet hian a thaw chhuak hak a. Engmah a rawn sawi zawm tawh lem lo. Inneih chu a hreh hmel ve hle mai maw.






"Kan inneih chu a ngai ngei alawm. Mahse lungngai suh, a hming mai chauhvin a ni dawn a. Min beisei sang lo la keipawn ka beisei lem lo che ania, a hminga insuihzawm kha a nimai" an in kawta motor tih din pah chuan ka ti sup a. Engmah sawi tawh lovin a chhuk a, an in lam pana a kal hnak hnak chu ka enzui reng.




Hmangaih ka nei chuang lo bawk a, nupui nei turin ka naupang chhe zawk zawk tawh bawk lo nen a tirin ka pa thusawi kha chu duhlo viau mah ila tunah chuan zawm ka tum nghet charh tawh. Rinhlupuii hi hmeichhe nasa tak ang kha chu nise ka pawm kher lo ang. Ka hmuh ve chinah chuan hmeichhe nasa lutuk ang kha chu anih hmel loh. Mahse hetia ka pawm a, ka hnial tak loh vang mai hian ka duh tihna chu a ni hauh lo. Ka nupui anga en pawh ka tum kher lo. A hming chauhvin ani kan inneih dawn ni.






Kan in lama ka let leh meuh chuan chaw ei a lo hun der tawh. Ka room lamah chhovin ka inbual fai hmasa te te a. Towel venga Bathroom atanga ka chhuah rual chuan ka perfume rim nam cham cham in ka hnar a verh nghal zar mai. Thil pakhat bak a ni theilo, ka ngaihtuahna avang chuan ka nui hawk "Û heihi min pe tawh mai rawh" ka rindan chiah. Ka bawm a lo phawrh darh leh vek tawh. Ka perfume lachhuakin darthlalang hmaah a lo remkhawm leh dal tawh. Nula ve uai tawh si hi naupang chhia ang mai ani ka tih tawh kha.





"Ka phal laiin i la daih lo anih kha" nui suka tiin ka thuamhnaw bawm ka hawng nghal a. Hmeichhia si mipa perfume rimtui a ti tlat a. Ka perfume thar apiang a lo la chhuak a, min lo chuhpui ve zung zung zel. "Ka duh lai hian phal mai rawh aw" tifuh intizet hian min nuih tlawn leh tawh. "Ka phal emaw phal lo emaw i la leh dawn tho sia" nui hawk chung hian ka ti a. "I tidik chiah" perfume chu a han kap kual leh vel te te a. Chutah "Anu ten han ko rawh an tia, inthlak zo la lo chhuk vat rawh aw" tiin min chhuahsan zui a.







Chaw kan eikham fel hnu chuan ka pa nen library-ah kan inzui lut a. "Palai chu engtikah nge kan tirh ang" chair-a thutthlak pah chuan a ti a. "Kha lam chu in thu thu a nimai lawm, in duh duh dan kha a nimai" ka ti tha ve mai bawk. "A rang lamin i pa Rama nen hi chuan kan duh a. Naktuk zanah kan tir nghal mai dawn em ni" ngaihtuah zui niawm tak hian a ti charh charh a. "A pawi hlei nem" ka lo ti tha ve mai bawk.





"Bawiha, nupa chu pumkhat an ni tawh thin ania. Tunah i nung ho e ka tihna lam ni lovin tuna i awm ang tawp hi chuan nupui i neih hunah i awm thei dawn lo ania. I duh reng vanga nei tur ni lo mah la pasal i nihna angin engkim tha takin hlen chhuak la ka duh.Tunah kawplai i nei lo tih chu ka hre tho nain nakin zelah pawh uire miah loh tur. Pathian hmaah in intiam dawn a, mipa chu thutiamah din ngheh hle tur" a ti leh charh charh a. Ka lo bu nghut ringawt.






Ka room-a ka let leh hnu pawh chuan ka pa thusawi chuan ka ngaihtuahna a tithui ve angreng khawp mai. Nupui neih lam hi ngaihtuah pawh ka la ngaihtuah chhin ngailo. Tihian hmangaihna tel miah lovin ka nei ve tawp dawn chu ania. Mahse ka zalenna thenkhat hi chu in rahbeh tir ka tum lo bur.







Rinhlupuii's Pov






"Mambawih, zanin i duty hun a nilo tiraw" ka pain tukthuan kan eilaia a rawn tih chuan a lam ka hawi vat a. "Ni lo e, chawhma lam hi ka hun ania" ka lo ti ve vat a. "Umm, a that nasat chu" a ti leh churh a. "Mahse tinge pa, tihtur pawimawh a awm nge?" tiin ka zawt vat a. "Zaninah Sawmdawngan palai a rawn tir dawn" a rawn tih churh chuan ka chaw bar lai tawp chawtin ka han melh a. A thusawiin min thawn zia chu pui tak ani.






"Pa..." ka ti fan raih, sawi mai tur pawh ka hre tawh lo. Pasal neih chungchang chu lo sawi tawh tho mah se heti tut tut anih ka ringlo. Chuloah ka la inpeih lo nasa lutuk ringawt. "Ka pa, a la hma mah mah lo maw" min hrethiam tak hian ka û in a lo ti vat a. "Hma tawh hlei nem, an innei dawn tho a, a rang lama tih theih kha a tha" hnial theih miah loh tura khauh hian a rawn ti nghet churh a. U Nu-i chuan lainat hmel zet hian min lo melh a. Midang ho chuan ngaihtuah zui hmel pawh pu tawh lovin an chaw eilai an eizawm mial mial thung.






Damdawiin ka thlen chuan Ruati pawh a lo thleng leh der tawh. Kan thiltih tur tih pahin a titi mawlh mawlh a. Nidang chu nise sawi zawm tur ka hre ve ngei ang, a fiamthu pawh ka nuihpui nasa ve leh viau ang. Mahse tun tum chu ka rilru kamtu a awm tlat avangin thildang ka ngaihtuah hlei thei meuh lo.






"In va sawi tui awm bawrh bawrh ve" kan titi mawlh mawlh lai chuan kan sir lam atangin mi pakhat hian a rawn ti a. "Euu, Dr.Rinpuia chu engtikin nge i lo haw a" Ruati chuan a lo ti nghal var a. "Nizan khan ka lo thleng chiah" kan lam pan pahin a rawn ti ve vut a. "Ka awm loh chhungin in lo buai em" a ti leh hlut a. "Kan lo ngai lutuk che tih loh chu buaina em em a awm lo ve" Ruati chuan nui hak hak pah hian a ti leh a, Dr Rinpuia pawh a nui ve suk mai.







"In duty hun a zawh tawh dawn tho chuan lunch ka treat ang che u, ka lo haw manah" nui var pah hian a ti leh a. "Kan dose a sang teh ania aw " uang zeta Ruatin a rawn tuh chuan a nui chhuak hawk hawk mai.






Canteen lamah kan inzui thla a. Ka bul ami te pahnih chu an titi bawrh bawrh a, Ruatin a zinna chanchin vel a zawt malh malh a, kan nui leh hak hak thin. Dr. Rinpuia hi kan thawh hma atanga lo awm tawh ania. Amah hi palian deuh hmel sir vur ang chi kha ania. An khawsak theih ngaihtuah hian a chapo ngai lova. Mi tupawh mai tan hian a nelawm em em reng bawk. Uang ve thei deuh, titi vawrh thiam deuh mai hi ania. Damlo te pawhin an ngaina viau. Hmeichhe lamah pawh a tla na ve thawkhat viau chuan ka hria. Mahse ngaihzawng a neih awm ka hrelo. Kar hnih vel zet Delhi lamah training a zuk nei a, nizan lamah a lo haw thla veleh chiah anih hmel.






"Puipuii chu ka lo haw hi a lawm ve vak lo a va ang ve" nui suk suk chung hian min rawn melh a. "Chutiang lam pawh a nilo, kan lo lawm lutuk che alawm" nui lui sak pah hian ka ti ve zat a. Kan eitur chah a rawn thleng zui zat bawk. Chutah Ruati chuan "Ka kham loh chuan ka ei belh leh teuh ang, vawiin chu kan doctor hausa hi ei hek hrep ang aw" nui hak hak pah hian min rawn ti a. Ka lo nui tawi tak ringawt. Kan eitur te kan ei mial mial a, kan titi melh melh pah bawk a, Vanlalruatin fiamthu a thawh pah reng bawk nen kan nui ri leh hak zel.


Thil kan ei zawhfel hnu chuan haw turin kan inbuatsaih chhunzawm a. Dr Rinpuian min thlah dun dawn bawk. Damdawiin atanga kan inzui chhuah meuh chuan dar 2 a lo ri tep tawh.




Dr. Rinpuia car park na lamah kan inzui phei a. Mahse car parking kan va thlen chiaha ka mi hmuh avang chuan ka ding chat mai. Sawmdawnga chu a car nghengin a coat suit dak zat nen a lo ding rum ul anih chu ! Amah a palian bawk nen a hmel a rum bawk sia, min lo melh chiang ngang bawk nen ka pai awt lo chauh. Mahse ka insiamtha vat a, hmu lo derin ka thiante kalna lam chu ka pan ve vat.





"Rinhlupuii hi ka rawn hruai dawn" rawn ti nghet churh ri avang chuan kan ding dat a. Dr Rinpuia car hawng lai pawh chu a rawn hawi ve vut. Sawmdawnga chu kan lam panin a rawn kal hnai a. "Min rawn zui rawh" kan bul hnai a rawn thlen rual chuan ka kut a chelhin a rawn ti leh. Dr Rinpuia leh Ruati chuan a ngaihna hrelo zet hian min en ha a. Mahse engmah ka sawi thei bik lo, hetia a rawn awm ringawt chhan hi ka hrethiam lo.





"Lo thlah ka tum a" Dr Rinpuian a lo ti ve vat. Ka kut Sawmdawngan min vawnna chu a melh ngur bawk. Chutah "Ngailo mai rawh se" Sawmdawnga chuan a rawn ti hluk. A melh ngur bawk a, Dr Rinpuia lah chuan tham lo hmel zet hian a khik khum suk a. Ka lo hlauthawng hmanhmawh "Min lo va kalsan mai ru" ka thiante lam hawi chuan ka ti sep a. Hetia ka tih mai loh chuan thil pawi lutuk a thlen palh ka hlau. Dr Rinpuia chuan hriatthiam har tih hmel zet hian min melh a. "Dr Rinpui lut ila nangni pawh Puipui kal vat ru " kan boruak tang tha lutuk hrethiam zet hian Ruati chuan a rawn ti nghal sawk sawk a. Dr Rinpuia chuan min melh vung vung hnuah car chhungah a lut ve ta hram.





An tlan chhuak chiah tihah chuan ka bul ami chuan a car awmna lamah min kai phei nghal hlawk hlawk a. A pen zau bik si, a kal chak bawk sia keilah ka lo lian zawk zawk lo nen ka tlan dawr dawr hi a ni ringawt. Car chhunga min thutfel tir hnu chuan a seat lamah a kal phei pawk pawk a. A rawn luh ve meuh chuan boruak a rit tha leh nalh nalh tawh viau mai. Hneh zetin steering chu a herh kual pap a. Ka thinphu ran dan chu pui tak ani. Amah a nelawm loh sa nen tunah phei hi chuan a rum zual bawk si 'dek' pawh ka ti ngam lo. Ka tih hluah hluah hi a ni tawp mai.





"Zaninah palai an lo kal ang" rei fe kan tlan hnu chuan a rawn ti nghut a. "Ka pain a sawi alawm" ka lo ti ve sap, han sawi mai tur ka hrelo. "Duh lo viau mah la min nei dawn tho sia" ner nak pah hian a rawn ti leh a. A thusawi tum ka hrethiam pha chiah lo. "Tihdan dang a awm thlawt lo ami" ka lo ti veleh. "Ka rin ang i ni dawn lo tawp mai" a rawn ti leh daih. A sawi tum ka la man pha chuang lo.






"I sawi awmzia ka hrelo" ka ti hliai a. A ngawi leh daih ang lawi a. Hepa hi ka hrethiam thlawt lo. Engtik lai pawhin a nelawm loh em em a. A duh a sawi leh tawp a, midang thusawi a ngaih pawimawh hmel tehchiam lo thin. Heti chung hian ka pasal tura ka pa ten an thlan chu a ni sia. Ka mipa lo suangtuah ve thin te nen kha chuan an danglam lutuk tlat.






Chutah a ngawih vung vung hnu chuan "Ka thusawi hi chiang takin lo ngaithla ang che. A hming chauh a innei tur pawh ni mah ila kan inneih hunah chuan tuna mipa dang i lêmkual ang mai mai hian i awm thei tawh dawn lo ania" min ten hmel zet hian a rawn ti kha fak a "Tun atang hian fimkhur nghal ang che. Eng ang pawhin tunah hian zalen takin lengkual mah la, nakinah chuan i thei tawh dawn lo tih ka hrilh lawk ang che. Fimkhur tak chuan i duh leh kawp la, mahse ual au takah tu mipa mah kawp suh ang che. Mite hriatah kan chhungkaw mi i ni ve tawh dawn a. Kan chhungkua tihmingchhe tur zawnga khawsak a theih loh bur ania. I hna hi chu zawm ka phal sak ang che, mahse chhungkaw hmingchhiatna tur min thlen hauh suh ang che" a rawn ti chang leh fak.



Sawi tur reng reng ka hrelo. A thusawi duh dan chu mak ka ti hle bawk. Eng ang mi ah nge maw min ngaih le. Thinrim ai mah chuan tlawm intihnain ka khat nghal. Heti khawpa a ngaih lepchiah tur hian engtin tak nge ka lo khawsak ni. Heti chung hian nakin lawkah chuan ka pasal...ni e...ka pasal a la nimai dawn sia.


___*___*___*___*___


(Ka ennawn ka ennawn hian ka va sit tak em! A boring ka hlau bawk si. In lo chhiar ve hrim hrim avangin ka lawm aw💗)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:04 pm

OUR MARRIAGE
By CVL.Awmpuii


Chapter 4




Ka pa sawi lawk ang ngeiin zanah chuan palai hmel kan hmu ta ngei a. Lo awm ve reng nuam ka tihloh vangin Bawihtea pawm chhovin ka room lamah ka tawm pui daih. Laptop ah Nursery rhymes bawk ka play sak leh a, a kut chum biang chu a vei leh lup lup tawh. Amah a chum reuh sia chutia a lam vel chu a lawmawm tak tak ani. Ka phone phawrhin thla ka lo lak sak mawlh mawlh.




"Bawihtea chu Anitei nen an lam a nimaw" ka room chhunga rawn luh pahin U Nui chuan a lo ti var a. Chutia a nu lo kal a hmuh takah chuan a'n lam uar sawt vel a. Kan nuih pui nasa mai. Chutah U Nui chuan min rawn melh pahin "Ka pa in 'lo chhuk thla ve lawk rawh' a ti che a, Bawihtea hi chu hetah ka lo awmpui rih mai ang zu chhuk ve lawk la" a rawn ti sap a. Ka melh deuh ak a "Palai ten i hmel an hmu ve chak hrim hrim anih hmel" a rawn ti hul leh hak.




Tih theih dang nei hek lo inhnuai lamah chuan zawi muangin ka chhuk thla a. Min hnungchhawn zawng sofa ah chuan patling pahnih an lo thu a, ka chhuk thla ka pain min lo hmuh chuan thingpui lum turin min tir nghal zat a.



Choka lamah ka lut tlang ve mai bawk, thingpui ka lum zawha ka va let leh chuan patling pahnih lo thu ve te khan nelawm deuh hian min lo nuih var var a. Ka lo nui tawi tek ve ringawt, nuih luih chu har ve deuh asin. "Kan Sawmdawngan nupui a lo neih duh chhan chu ka hrethiam ta chiah mai. Hmuh tha a lo hmu chiang em anih hi" min nuih vur vur pahin pakhat zawk chuan a rawn ti hluai a. "Pu Rama te chu fanu in lo nei hmeltha hle mai a" pakhat zawk chuan a rawn ti ve leh hluai bawk. Ka pa chuan chhuan hmel deuh a min melh pahin "Kan fanu a ni na vang vang a a hmel hi chu tha kan ti ve ania" a lo ti ve luam a, a nui sun sun pah bawk.




Thingpui an in lai vel chuan thu ve rih tura min tih tlat avangin ka nu bulah chuan ka thu ve ran a. Min fiam leh zuk zuk thin. Han chhan vak ngaihna ka hre si lova ka lo nui tawi tek tek thei khawp mai.




Khumah ka mu meng kar a, ka ngaihtuahna chuan hmun tin kil tin a chhui kual vel hi a ni ringawt ka muhil thei thlawt lo. Vawiin khan mi lepchiah ber chhuahin min chhuah anih kha, ka zak a, tlawm ka inti a, na ka ti bawk. Khatiang khan tumahin min la tawngkhum ngai lo. Engkim hi ka lo suangtuah ve dan nen chuan a inpersan mah mah ani.




Ka day off anih vangin chhunah chuan keimah chiahin inah ka awm a. Ka chhungte chu nizan palai hmel kan hmuh chungchang vel ah ka pu (ka pa pa) te in lamah chhungkaw inrawnkhawm turin an kal vek thung. Kal ve turin min duh viau mah se ka duh tlat loh vangin min nawr lui bik lo. Ka duh thua pasal nei tur ni miau hek lo le.




Mahni chauha awm ai chuan tiin Ruati chu leng tura sawm ka rilruk a, palai chungchang vel hrilh ve ka duh vang a ni pakhat. Ka va call chuan a lo phur leh harh harh khawp mai. Ani hi zawng ever ready kan tih ang chi kha ania, a rawn kal nghal tur thu min rawn hrilh nghal zat kha. Kan duty hun a inang chiah zel hi kan vanneihna, kan kal rual thei a, kan haw rual leh thei a. Day off ah pawh kan chawl rual leh a. A nuam ve hrim hrim.




A lo thlen rual rual chuan ka room lamah min kai chho nghal nawk nawk a. Biak pawh ka la be hman lo, a thaw nasa em em mai lehnghal enge maw a hriat ni. "Tinge khati vak vaka i awm a" a awm dawm vang vang melh pah chuan ka ti thawr a. A kut vaiin min lo khap "Sawm...Sawm... Sawmdawnga kha..." a thaw leh hlawp hlawp phawt a "Sawmdawnga kha ka hmu a, sâwtah in veng tawntirh reh deuh laiah khan " a rawn ti nghal hlap hlap a. Enge maw Sawmdawnga a hmuh vanga heti teh vak vaka a rawn awm ni.





"I hmu fuh ve a nimai a" ka lo ti sam et a. "Chutiang a ni ngawt lo aw, ka hmu satliah hlei nem. A car ah hmeichhe pakhat nen an infawp ngawng ngawng alawm" a rawn ti teu hlar mai. Ka lo meng deuh ak mai, ngaihdan ka siam thiam lo. "I hmu sual aniang" ka lo ti sep. "Ka hmu sual lo, ka hmu chiang alawm, amah a ni chiang lutuk, a car pawh kha a ni alawm. Mahse a hmeichhia zawk kha chu ka hmu theilo a" hrechiang inti zet hian a ti zui leh hlak hlak a. Engtiang teh vakin ka danglam lo. Mahse mak chu ka ti ve deuh, ngaihzawng chu a nei ve ngei tihna ania nga, tinge a pa bulah min neih duh loh thu sawiin ngaihzawng dang a neih thu a sawi mai loh le. Tichuan kan zalen tawn ni mai tur.





"Ngaihzawng nei reng si tinge a pa bulah min neih duhloh thu a sawi mai loh le" ka ngaihtuahnaa awm ang chu ka sawi chhuak sep a. "A mak ka ti e..." sawi zui tur hre si lovin a rawn ti fân ve raih. "Puipui, nei leh lo daih rawh" a rawn ti leh khawl mai.




"Tunlaiah nupui pasal neih hnua ngaihzawng inneihsan ang hi an tam tawh sia. A bikin mipa hian an hrat zual, nupui nei reng siin mahni nupuite kham khawp lovin hmeichhe dang an melh kual a. Hmeichhe thenkhat zah nachang hrelo lah hi an lo tam si. Mi pâ an ni tih hre reng chung pawhin an kherh ngat ngat hreh miah lo ania. Chutiang i tawn chu ka hlauh pui tlat che. Lo innei ta pawh ni ula in buai nuaih ka hlau ta tlat" a rawn ti leh duah a.





"Nizanah palai an lo tir asin" kan ngawih vang vang hnu chuan ka ti zawi sep a. "An lo tir maw ! " mak tih hmel fe hian a rawn ti hluai. Ka lo bu nghat, a hui pap pap reuh a. Ka thiannu hian min ngaihtuah ve takzet tih ka hria a. Ka tan a rilru a hah ve hle ang tih pawh ka ring bawk.





"Tihngaihna a vâng e..." sawi tur hlawl a hre bik lo aniang. Ka lo nui tawi tha tek tawk khawp mai. "Ka pa hi vawikhat chiah biak leh ka tum ang ka lo tia, a bak chu tihngaihna a vang tawh viau ang. Min tir lui ta anih leh ka nei tawh mai ang chu" ka lo ti lawi rât a. Engmah sawi zui lovin min kuah nghal thlawp a, ka hnung a chul hliau hliau bawk.





Ruati haw tur chu inhnuai lamah kan inzui thla a. Nidang ang lo takin vawiin kan inkawm chu kan hlim hlawl lo a ni ber e. "Tlanbo daih la " kawngka bul kan thlen thlak chuan mittui tling pam hian a rawn ti a. Lungngai viau e tilo chuan ka lo nui hak mai. A ngaihtuahna te hi a sial thei ania. Naupang chhia deuhva awm chang hi a nei leh thut thin. "Hey, ka ti tak tak ania, tlanbo daih rawh. Ka pui ang che" a rawn ti leh hluai a. A sam tuaiin nui var var chung hian lu ka lo thing mat mat ringawt. Chutah ka ban rawn vuan thlain "Keichu ni ila ka tlanbo nal nal duh ang" a rawn ti leh talh. A ngaihna hi a awm hlawl thin lo kan Vanlalruati hi zawng.





Ruati haw hnu chuan ka nu pangpar pot bula hnim to vel ka thlo fai thuak thuak a. Mahni chauha awm a, engmah ti lova awm chuan ngaihtuahna kawm melh melh a awl a. Thil ni lo pui pui ngaihtuah a awl mai bakah ngaihtuahna a kal ding duh lutuk a. Ka chhungte an awm rih bawk si lova chhuat te nawtin darthlalang te ka hrufai a. Ka duh ang zana in ka khawih fel hnu chuan ka room ah chhovin ka inbual fai nghal a. Ka zawh meuh chuan ka chhungte pawh an lo haw ve tawh.





"I pu te pawh kan bia a, pasal nei lo rual i ni tawh bik lo bawk nen an lo remti tlang khawp anih chu" ka pa chuan a lo ti dap dap a. Ngai pawimawh vak lo in choka lamah ka luhsan daih. U Nu-i leh ka nu eirawngbawl chu ka pui ve vat a. Bawihtea chu an va lennaah a tal chau deuh a a mut thu U Nuin min hrilh.




_______________________




"Ka pu, a that theih mai hmel em?" ka scooty siam mawlh mawlh tupa chu ka zawt a. "Minute 15 vel chu check ka la ngai ang" scooty ke thiah mawlh mawlh pah chuan a ti a. Ka hmanhmawh takzet tawh.




Tukin chu thawh ka hai ve teh tlat a. Ka thawh chuan dar 8 a lo ri tep tawh. Chawhma duty ka neih vangin dar 9 :30 hmaa Hospital thlen ngei ngei ka ngai bawk si. Hmanhmawh tawh nak laiin kawng lakah ka scooty a la chhe zui. College tlangval pakhatin min lo buaipui hlauh a, workshop ah min nawr chhoh pui hlauh zawk a.




Ka sana ka en chuan Dar 9 a lo ri thuak tawh. Ka scooty siamtu hnenah chuan tlai lama ka lam leh tur thu hrilhin kawng ânah taxi ka châng ta tawp. An rawn tlân zut zut tho nain passenger an chuang khat vek zel bawk si, rilru buai tawh tak ka ni.




Chutia ka lo dinlai chuan ka zawnah car pakhat hi a rawn ding ta hlauh. A glass a down chuan min rawn nuih vur vur a, Dr Rinpuia lek chu lo niin "Eng nge hetah te i tih daih daih a" a rawn ti sup. "Ka duty hun ania, kawng lakah ka scooty a chhe daih a. Taxi ka lo châng tawp anih hi" ka ti ve vat a. Chutah "Lo chuang rawh, keipawh hospital-ah ka kal dawn tho alawm" a rawn ti zung zung a. "Vawiin i thut loh ni a ni lawm ni" tiin ka lo zawt ve vat. "Nia, mahse tih tur pawimawh ka nei a. Lo chuang vat rawh , hei a tlai tawh ania i tlai palh ang" a sana en pah chuan a ti leh zung zung a. Duhthlan tur dang nei ta lo chu car chhungah chuan ka lut ve ta vat.




Kan tlân chhuak dawn chiah tihah chuan ka scooty an siamna workshop building chung tukverhah hian Malsawmdawnga a lo ding rûn anih chu! Tukverh atang chuan thîp zeta min melh khui hi ka han hmu ta mai. Ka phu chiang kher asin! Ka melh phawk hra a,mahse ka insiamtha leh vat. Ka hawi sawn nghal rawk rawk bawk.





"Puipui, ka bia che a" Dr Rinpuia chu ka melh vat a " Ahh, e aw eng nge ni" ka ti bah niai , za lo zet hian a then suk "Eng nge i ngaihtuah veng veng a , ka be mawlh mawlh che a min chhang thei miah lova" a rawn ti dam leh dap a "Thil ho mai mai ka lo ngaihtuah daih a" ka ti hul hak, a kiai suk ringawt.






Hospital kan thlen chuan dar 9:25 a lo ri vel chiah, minute 5 in ka tlai lo vel chiah tihna anih chu, ka thaw huai mai lawm. Car atanga ka chhuk dawn chuan lawmthu ka sawi hliai a. Ka chhuak tur chiah chu ka banrekah min lo chelh vut , a ngaihna hrelo zet hian Dr Rinpuia chu ka melh ran a. "I lawm tak tak chuan lunch min eipui la" nui suk chung hian a rawn ti sup. Min melh ngur bawk, a mitmeng chu ka chhiar thiam lo. Ka ngawih ran takah chuan "Ok, i hreh viau chuan ka tilui lo che" min vawnna thlah pahin a ti leh thlup a. Nuam lo chu ka ti ve det, amah vang liau liauin a hun takah Hospital ka thlen theih phah a enge maw lunch eipui mai mai pawh chu a har viau ang ni "Min lo nghah peih chuan ka hman tho a" ka ti ve ta nge nge. Nui vur vur chung hian a lo bu nghat a. Lunch ei dun turin kan inthlah liam thlap.





Ka duty na tur ka thleng chu an lo che suau suau a, Ruati pawh damdawi vel chawiin a lo phe ve vat vat mai. Mahni tawkah an buai hmel hlawm khawp mai. Indahfel sawk sawkin ka che ve zung zung a. Vawiin chu kan buai viau dawn anih hmel e.





Ka hman meuh chuan dar 1:30p.m a lo ri thuak tawh. Hospital atanga ka chhuak chiah chu garrage lam atang hian Dr.Rinpuian nui vur vur pahin kut a lo vei zauh a. " Min lo la nghak elaw" a awmna lam chu ka va pan phei vat. "Ka nghak ang che ka tih kha" a nui leh vur vur tawh. "Le, lut rawh le" thuawih tak chuan ka lut ve mai bawk a.





Restaurant changkan hmel zet kawtah hian min dinpui a. Hospital bul hnai maiah kan kal mai dawn emaw ka tih laiin min hruai hla ta zek. Dawr chhungah kan lut chiah chu a pawn lam landanah pawh a naran loh tehlul nen a chhung lam phei chu rinphak bakin a lo nuam phian.




Thutna kil lamah kan inzui phei a, kan duhzawng te kan chah hnuin kan ti ti mial a. Dr. Rinpuia titi ka lo ngaithla a ni zawk mah. Kan thil chah a lo thleng a, ka rinaiin ka ei hnem zek.




Dawr atanga kan inzui chhuaha kan mi tawhte avang chuan ka ding dat. Sawmdawnga chuan a hmelhriat ve ngai loh ang mai hian min kalpel a, a kalpuinu lah chuan intineitu zet hian a banah a kuah chial bawk. Ruati thusawi kha ka ngaihtuah naah a rawn lut zawk a, zawhna tam tak ka thinlungah a rawn lut nghal bawk. Tinge ngaihzawng nei reng chungin inneih inremsiamna hi a tihtawp mai loh?




"Ka lawm tak tak ania, an thil siam a tui hlawm sia, tun hnaia ka thil ei hnem ber tum a ni hial ang" nui var var pah hian Dr Rinpuia motor khalh lai hnenah chuan lawmthu ka sawi mawlh mawlh a. "I ei puar viau chuan a tha anih chu. Chîng zawngchhang la ka ti khawp" min rawn melh zawk pah hian a ti leh a. Sawi tur mai ka hre tawh lo.





Kan inkawt thleng min thlah a "Puipui..." a sawi zawm mai loh vangin enge tih nan mit ka san zeuh a. A lo thaw chhuak hawlh thung. "Ka awmdan atang hian i hrethiam mai lo em ni" harsa tih hmel zet hian a rawn ti chhuak sup a. "Eng nge i sawi awmzia" ka hriatthiam mai loh vangin ka zawt. "Puipui...ka duh che" ka meng deuh awk mai "Ka duh che" a rawn ti leh sup.





Han chhan mai dan tur ka hre lo. A car atanga ka chhuk tur chiah ani bawk nen ka awmdan chu a lai vel vek hi a ni tawp. "Ka hmuh tirh atang che khan tun thlengin ka ngaihtuah na atang ka la paihchhuak theilo che" thil ngaihtuah zui vang vang awm tak hian a rawn ti leh a. Chutah "Ka awmdan atang hian i hriatthiam mai ka ring thin a, i hrethiam thei bawk silo a. Ka sawi tawp anih chu, mahse i ngaihtuah na kha tibuai lutuk duh suh. Ka duh che a, chu chu min hriat sak rawh aw. I rilru ka lak theih nan ka bei ang" nui suk chung hian min rawn en a.





Khumah chuan ka ngaihtuahna kawmin ka let kual sek a. Tunlai ka hun tawn hian min hmet chau zo, min thawng dawt dawttu thil ka tawng mawlh mawlh mai. Inneih chungchang te, khang Sawmdawnga hah...mi lepchiah tak anga min ngaitu kha, tunah Dr Rinpuia a ni leh a. Engmah sawi zui lovin ka hawsan ta tawp kha ania.





Palai lo kal atang khan ni 5 a liam leh tawh a, khami zan atang khan ka chhungte ka be tha thei meuh lo, a bikin ka pa, min biak paw'n a rul tawk tetein ka chhang ringawt. Ka duhdan a ni bik miah lo, mahse min tihdan ah hian ka lungawi thei thlawt lo. Ka tette atangin an thu ka hnial ngailo, mahse tun tum chu ka pai dai thei thak lo. Damchhung daih thil a ni miau a.




"Mambawih...ka lo lut ania" ka room kawngka inhawn rualin ka pa a lo lut zui zat. Ka melh zawk a, laptop ah ka movie enlai ka enzawm leh nghal daih. Ka khumah a rawn thu tih ka mitsirin ka hmu thei. "Inbe lawk ang hmiang" a âw chu a inthlahrung riauvin ka hria. "Sawi la..." amah pawh melh chuang lem hlei lo hian ka ti sap a.





"Mambawih" a ngawih leh daih vang chuan ka laptop khup thawkin a lam ka hawi ve ta nge nge. A kutin a hmai a tuai pawk a "Sawmdawnga chu i nei hreh viau ami" harsat hmel zet hian a rawn tichhuak hulh a. "Ka thutlukna a pawimawh hlei nem in thu thu alawm" ka lo ti ve hmak. Hetiang hian ka pa ka la chhang ngai lo, ka chhan ngai pawh ka ringlo. Mahse tun tum chu ka lungawi lo ve thlawt ani. "I tette atangin kan thu i hnial ngai lova, tunah pawh zawm leh hram la. Hetia min pehhel reng hian nuam ka ti miah lo ania, i nû leh i û te paw'n hrehawm an ti ania" a rawn ti dam leh thlap a, tlemte chuan ka inthiamlo ve ta deuh. "Pa, inneihna te chu ho mai mai a ni hlei nem. Chuloah Sawmdawnga kha ka ngainat zâwng a nilo" ka ngaihdan dik tak ka sawi.




"I hrechiang lo mai mai nih chu, Sawmdawnga te chu mifel tak ania sin. A puitling a, a rintlak khawp asin. Amah hi a tak run ve hrim hrim a, nelawm loh deuh angin a lang anih hi. In innei anga , nakinah i la hrechiang chho zel mai ang. Hmangaih takin a enkawl ngei ang che tih hi ka ring tlat asin" a ti leh dap dap a. Engtin nge hetiang em em hian Sawmdawnga hi a rin pumhlum theih ka hrethiam lo.




"Pa, ngaihzawng a nei alawm. Ruati paw'n hmeichhe pakhat nen a hmu tawh" ka pa hmin tum tak chuan ka'n ti leh a. " I thiannu chuan a hmusual mai mai anih dawn chu. Ngaihzawng a nei reng reng lo. Ani chuan in inneihna tur pawh hi a pawm nghal thlap zawk asin" ka lo meng deuh ak. Sawmdawnga chuan kan inneihna tur hi a pawm nghal thlap maw. Mahse engvangin?



"Mambawih, tun chiah hi kan thu zawm leh hram la. Fanu fel tak i nih kha, ka fanu neihchhun i ni a, i tana thalo tur engmah ka ti dawn lo tih i hriat kha. Keimah hi min rinchhan tawp la, ka thusawi hi zawm hram hram la aw... Sawmdawnga tluka i tana tha tur hi an awm miah lo ania" a ti leh tlat tawh. Chutiang taka ka pain a rin bawk si chuan ka tan kawng dang a awm lo. A thusawi hi ka zawm tawp tawh mai ang. Lo sual viau mah se ka tuar ang a, ka tuar chhuak em em ang. "Mittui tlaa ka rawn haw leh anih chuan a bula let turin min tir lui tawh suh ang che" ka ti nghet ve ta charh.




Ka pa nen kan inbiak zan atanga ni hnih a liam leh meuh chuan a vawihnihna atan palai hmel kan hmu nawn leh a. Sawmdawnga erawh ka scooty chhiat ni bak kha ka hmu leh ta lo . Kan Inneih ni tur an ruat fel ta der mai. Thla leh August ni 3 ah kei hian pasal ka nei ve dawn nih chu!!! Thil zawng zawng hi pangngai takin kal se , ka hmangaih tak nei tur ni ila ka hlim ngawt ang. Mahse ka lungngaihna intanna ni tur a ni tlat si.




Vawiin pawh a ngai tetein kan buai leh ta khawp mai. Mahse ka hna nuam tih ber leh hman atanga nih ka lo chak thin hna kha ka thawk miau a, hreawm ka ti ngai hran lo. Damlo te enkawl a, an tana hnathawh hi nuam ka ti a, an taksa mai bakah an rilru dam nan tha taka ka hna hlenchhuah ka tum thin.




"Helamah lo nawr phei vat rawh u, tuna kan zai nghal loh chuan naute leh a nu tan hian a pawi dawn nia" nau vei pakhat hi hmanhmawh zetin an rawn nawr lut a, U Marema, kan doctor senior in a lo buaipui zung zung bawk. Ruati nen chuan Operation Theatre nau neihna room-ah chuan kan zui lut ve nghal vat.



"Puipui, pawn lamah khan a rawn hruaitu a pasal aniang, chumi chu a awm a. Chanchin lo va hrilh la, thil sign fel ngaite kha lo va buaipui zawk rawh. Hei chu kan lo khawih ang, kan zai nghal loh chuan naute leh anu dinhmun hi a derthawng dawn viau ania" U Marema chuan a ti zung zung a. Engmah sawi buai lovin a thusawi ang chuan OT atangin ka chhuak a. Damlo pasal awmna lam chu ka pan nghal zat.




Pawn lam ka va thlen chuan min hnungchhawn zawnga ding, chêr sang lampang deuh hi ka va hmu nghal a. Phone a lo khawih mual mual bawk.



"Ka pu, hetah hian thil i sign lawk a ngai a" ka va tih sep chuan zawi muang hian a lo hawi a. A la naupan hmel angreng viau, Cargo dum, a khup chen vel a ha a, jacket lianpui hain cap letling zawngin a khum, a beng vei lamah bengbeh a bet chi ang kha a la beh zui. Sneakers lawk zet hi a bun bawk a, a va sual hmel tak.
"Keimah hi maw" hriatthiam loh hmel zetin amah leh amah chu a inkawk va mai. "Aw, i nupui chu zai nghal vat a ngai a, doctor in a zai mek. Chuti lo chu naute leh anu tan a hlauhawm..." thîp zeta min melh ren rawn avang chuan ka tawng a zuih ral daih.



"Ka nupui a nilo e ah" a lo ti hluk.
"Nangma rawn hruai a ni lawm ni?"
"Sawlai kawngah sawn ka hmu a, a pum a lo dawm vawng vawng a, ka rawn hruai anih kha" ngaihsam hmel fe hian a rawn ti a. "A hrim hrim in 'ka pu' tih tur hmel ka pu ami" pu ka ti chu a lungawi lo ve hle aniang, min melh deuh ram ram a, ka sawi thiam dan ber chuan a cute letling phian. Ka nuih a tiza tlat pek.



"I rawn hruai a ni sia, i nupui emaw kan lo ti mai sin" nui pah deuh hian ka ti hul hak. "Naaa...khawi sign ngai chu ka lo sign sak mai ang, amah a la biak theih rih awm si lova a lo harh hunah a chhungte pangngai chu be mai rawh u" tih pahin ka kuta paper leh pen chu a rawn la a, sign ngai vel chu a sign zung zung a.




"Hmeltha lo la chu pu min tih avang khan ka thing nek ang che mawle" min melh kha kha pah hian a rawn ti leh a, a hmel atang chuan a uang ve ngei ani tih ka hre thei. "I lo awm hlauh chu a tihzia hle mai. Naute leh a nu pawh an tha turah ngai ang" ka ti ve leh ngial a. "Anih ka hmanhmawh deuh sia ka kal phawt ang aw nurse hmeltha te" nghal zet hian mit a rawn siai zeuh a. A inher nghal vut a, a kal nghal nul nul. Tleirawl harhvang tak anih dawn kha, a ngaihna ka hrelo lutuk chu nui chungin ka lu ka thing mat mat tawp.





"Pasal neih te i lo tum thut a" hnung lam atanga âwin a rawn tih chuan ka thil ziah lai ka tawp dat. Damlo bill vel siamfel sakin ka lo ziak mawlh mawlh a. Zawi muangin min rawn betu lam chu ka hawi phei a, Dr Rinpuia chuan min lo nuih nghal suk.




" Engmah pawh min hrilh ve lova" ka lam panin a rawn kal a. "Ahh, nia sawina hun a awmlo em a" inthiam chiah lo hian ka lo ti hliai. "Ok, a pawilo...Ruatin min hrilh a" a rawn ti leh sup. Hetiang hunah hian han sawi mai tur ka hre ve ngailo. "Anih chu" ka lo ti leh tawp. "Kha kha i tihfel zawh chuan i duty hun a tawp tawh dawn tho a,tifel la, kan inbe lawk dawn em ni ang, kan rei lovang " ngen ngawl zeta a rawn tih avang chuan ka lo bu ve nghat a.



Dr Rinpuia hian min duhthu a sawi ni atang khan a hma aiin min ngaihtuah nasa a, kei erawh chuan pehhel dan ngawt ka zawng thung. Hetiang taka min ngaihsak hian nuam lo ka ti a. Ka duh ve miau loh avangin beiseina thlawn siamsak ka tumlo bur.



Ka ziah fel sawk sawk hnu chuan damdawiin sir thingbuk hnuaia bench an siamah chuan kan thu a. Veivak awm vak lohna lai ania, helai hmun hi chu nuam ka ti ve hle thin.





"Pasal neih tut tut i lo tum daih a, bul kan tan dun ang chu ka lo tih ve rauh rauh laiin" a hmazawn melh ran chung hian a rawn ti a, a nui suk bawk. Chutah "Hmun hla deuh , tuma hriat ve lohna tur hmunah ka tlanbo pui daih ang che i duh em?" a rawn tih leh chuan phawk hra hian ka va melh a. " Mak ti vak teh suh, engkim ka hre vek alawm. I duhthlanna a pasal nei tur i ni lo. A dik em?" a rawn tih leh chuan ka hamhaih hle ringawt tawh " Ruatin min hrilh vek alawm. Chuloah ngaihzawng i neih awm ka hre bawk silo a. Pasal i neih thut chhan tur hi ka hrelo. I duh chuan ka tlanbopui daih ang che. Min duh ve kher pawh ka phut lo, i duhthlanna ni miah lova pasal nei tur chuan ka phallo che. I hlu mah mah. Tlanbo daih ang hmiang" a rawn ti leh a. Ka lu ka lo thing bah nak.



" Pasal chu ka nei dawn" ka ti ve ta charh. "Ka duhthu ni lo mah se ka nei tho ang" ka tih zawm leh zat chuan hriatthiam har min tih hmel zet hian min melh leh vang vang a. "Hawh ka thlah ang che" kan ngawih vang vang hnu chuan a rawn ti hluai a, a kal nghal vut chu ngawi rengin ka zui ve nghal mai bawk.



Kan in gate bul thleng min thlah a, ngawi rengin ka chhuk a, ka chhuk rualin a tlan thaw nghal fua. Ka ngaihtuahna a vak thui khawp mai "I duh phawt chuan ka tlanbopui thei reng che ania" min ti anih kha. Mahse chutiang ti tur chuan huaisenna ka nei thlawt lo. Ka chhungte buaina thlen hi ka thil hlauh ber pakhat ani a. An tan theihtawp a fanu fel nih hi ka duh ber thin. Ka pa khan ngenngawl zetin Sawmdawnga nei turin min ti anih kha , chuvangin ka rilru ka siamfel tawh.



"Kan Doctor-a chuan i kham khawp a pe bawk che em" ka phu dawrh lo chauh. Ka va hawi phei vat a. Sawmdawnga chuan kan garrage bang ngheng pahin tur khui hian min lo melh anih chu!



Eng nge tun ang hunah kan inah tih tur a neih. "Hnathawk miah lovin doctor i ûm kawi mai mai tih hi i chhungten hre ta se engtin nge an tih ang che" ka lam pan pah hian a rawn ti leh khawlh a, a mitmengah chuan min ten hmel hle bawk. "Eng nge i rawn tih" sehchilh zet hian ka ti ve sak , chiang zetin ka melh ve kalh bawk. A duh duh anga min ngai kual vel hi ka ning tlat.



"Oh, ka nupui tur hmu turin ka rawn kal ti ta ila" tifuh inti zet hian a rawn ti a, a kekawr ipte zen pahin min melh run bawk. "Ka sawi kha hre reng rawh, kan chhungkua timualpho tur zawngin khawsa ngai suh ang che, chuan...kha doctor pawh kha i duh anih chuan i la hmu zel thei ang , mahse hmun ual au lo laiah ni rawh se" chang tha beng bawng hian a rawn ti leh a. Ka ter ve ta at " Ka duh duhna laiah ka hmu ang, ka nun ania lo inrawlh buai ve duh suh" hnai set sawtah kan inmelh tawh, ka hawisawn duh bik der lo.




"Han sawi nawn leh teh" ka dara rawn hmer tawn vak pahin sehchilh zet hian a rawn ti leh a, a tawng a zawi viau nain a chang tha beng bawng hle. A ngaihdan a nih loh hmel hle bawk. "I ngam chuan han sawi nawn leh teh" a rawn ti leh khawlh a. Ka tlawm dawn bik lo, a duh duhin min palzam a, mi lepchiah chhuahin min chhuah ziah lehnghal. A duh duha a tihkual theih ka nih loh zia hi hriattir ve ka duh.



"Ka duh duhna laiah ka hmu ang, ka nunah i lo buai ve a ngailo ka ti anih chu" min melh tur khui a, a bek a rawn pawng nghal tawlh tawlh, mahse ka haider lui ve hmiah, sawi zawm lehin "Ka mipa kawp turah ngat phei chuan ro rawn rel tum reng reng suh. Zalên ka ni a, ka duh duh ka kawp ..." ka sawi zawm thei tawhlo. Engthil nge a rawn tih hi...!!!



___*___*___*___*___


(An la innei thei thlawt lo, next-ah chuan kan inneih tir tawh dawn nia. Ngaihnawm i tih zawngte anih chuan comments lamah feedback min lo pe ve la😉. In lo chhiar ve avangin ka lawm awn awn e💖)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:04 pm

OUR MARRIAGE
By CVL Awmpuii



Chapter 5




Inlakhran tumin ka tal bat bat a, chu chuan a tiphur zual sauh zawk nge ni a aia na zawkin ka hmui hnuailam chu a rawn pet lui ngawng ngawng mai. Tal sateh mah ila mipa tha zawk na na na chu ka hneh thei lo. Mipa anih chu thuhran, mipa ah pawh mipa satliah nilo, sa tha leh palian em em mai hi kei hmeichhe lian ve lem lo tak tan chuan hneh har tak ani.




Thawchham lek leka min fawh ngawng ngawng hnu chuan min thlah ve ta hram. Ka thaw chhuak nghal ham ham mai. Ka ding khur dar dar a, ka ngaihtuahna a chawl dup bawk.




"Ka thusawi kha hre reng ang che. Kan chhungkaw timualpho zawnga khawsak chu tum buai duh suh" rawn ti nghet churhin a inher nghal vut a. "Eng chiah nge ka lakah hian i duh" a pen vut tawh chu a rawn inher leh a. Taksa khur dar dar leh hmui huh hliama ka ding chu chiang zet hian min rawn melh ngur. "Enga tinge bialnu nei reng siin he inneihna tur chungchang hi i hnial ve miah lo" zanin hian a chhan hriat vek ka duh. Ngaihzawng nei reng siin engvangin nge he inneihna tur hi a hnial ve eih loh. "Chu zawng i hriat ve zel a ngailo e" ngeiawm zet hian a rawn ti a.




Gate pawn lam pana a pen pawk pawk chu ka thlir mawl tawp. Harh chhuak thut in ka hmui min fawhna chu ka tuai nghal tawk a, inchhung lamah ka pen lut a. Ka chhungte min lo biakna pawh chu mumal lo deuhva chhangin ka room lamah ka chho nghal hlawk hlawk.




Tu mipa lakah mah zuamawma ka awm ka la hre ngai lova, ka thil duhloh ber a ni bawk. Mahse kha Sawmdawnga khan engtin nge min zah pahna nei miah lova min fawh ringawt theih. Atan chuan thil ho tham tak angin lang mah se ka tan chuan thil liantham tak a ni, a chhan chu tu mipa mahin ka hmui hi an la tawk ngai lo. Ka rilruah zawhna ngai bawk a rawn lut leh ta. Eng ang hmeichhia ah chiah nge maw min ngaih le? Hetiang em ema a ngaihnep tur hian zuamawmin ka lo awm ami.





Mo kawr tur kan en te chu phur lo tak hi ka ni ringawt. U Nu-i leh Ruati te nen kan kal a, an pahnih chuan an titi siam siam a, engmah lo sawi ve tur pawh ka hrelo. Vanlalruati her hawr pawh hi mumal lo lutuk mai. Nei ngei ngei rawh min tih hnuah hmeichhe pakhat nen an infawp lai a hmuh vangin nei reng reng suh min ti leh a. Tunah lah a phur ber berah a tang leh ang lawi a.




Doctor Rinpuia bula engkim a lo sawite kha ka hauh lahin "A chhan theih che ka ring alawm. Chuloah a duh che tih hi ka hai reng reng lo. Pasal neih i duh bawk si lova a chhan theih che ringin ka lo hrilh ve anih kha" a ti sam et a. A thluak hi chu a chhah ve ngawt mai. Ka tana a lo sawi chu a ni ve ngei awm sia. Hauh dan vak ngaihna pawh ka hre tawh lo anih kha.





"Puipui, sawtah sawn i û pheikhawk tur en lawk ka duh a, Ruati nen hian lo va lut lawk mai ula" mo kawr kan enna tur hmun kan thlen chuan U Nu-i chuan min râwn ni pah fawmin a lo ti hliai a. "Va kal rawh U Nu, kan lo en thei alawm" a biak loh zawk Vanlalruati bawk chuan a lo ti leh zung zung tawh. U Nu-i pawh chuan engmah sawi zui lovin a dawr sawina lampang chu min pansan nghal a.



Chu veleh ka bula ding nu chu ka melh nghal rawm rawm "Eng nge..." min nuih tlawn pah hian a rawn ti nang nang a. "I awm dan hi hriatthiam a va har ve. Nei rawh min tia, nei suh min ti leh a. Tunah lah a phur ber berah i tang leh a. Eng nge i awmzia Vanlalruat" melh ram ram pah hian ka ti hlak hlak a.





Chutah "Awww..eng ang paw'n sawi ila i neih tho tho a ngai tawh alawm. Chuvang chuan intiphur lui ta che. Chuloah Malsawmdawnga neih chu a hreawm dawn loh chiang sa, an hausa si, nuamsa deuhvin i mo dawn tihna a nimai lawm. Mi sawi dan atang phei chuan a chhungte ah hrawn hreawm tur an awm lo lehnghal. I vanneihna hi chhiar thiam rawh" min ti let zek. "Hawh, mo kawr chu en vat vat ang" thip zeta ka melhna chu haiderin a rawn tih zawm leh zat a. Engmah ka sawi leh hma hauhin dawr chhungah chuan min kai lut nghal dawr dawr bawk.




Dawr nghaktute chuan min lo chiau au vat a. Engmah ka tih buai ve hi a ngailo reng reng. Vanlalruati chu a phur harh harh bawk a, a duh duh min hak kual tir chhin hi a ni ringawt. "Hei bak chu ka ha tawh lovang ang, thlang fel tawh ang che" ka ti hlar tawh, ka dawhtheih na in a tlin tawhlo tep ani.




Ka hak tawh zinga inhmeh min tih ber chu min thlan chhuah sak a. Dawr nghaktute paw'n ka inhmeh thu leh hmeltha min tih thu an lo sawi ve hliai hlawm mai. U Nu-i lo thlen ve hnu chuan kan han entir tha leh a, ani pawhin nalh a tih thu leh ka inhmeh dawn thu a sawi ve hluai a. Rem kan ti tlang ta bawk a. Kan pack fel tir nghal thlap.




Dawr atang chuan kan inzui chhuak leh hnak hnak a. Kan dawr kalna piah deuh hleka ding pa ka hmuh chuan ka tawp chawt, ka bula kal pahnihte pawh chuan an lo hmu ve ngei aniang, keimah ang thovin an tawnglai an tawp a. Min hnungchhawn zawngin a ding luau a, coat suit a inbel leh thlup tawh, a awmdan atang chuan phone a hmang anih hmel, kan lam hawi zawnga a din miau loh avangin min hmu ve thei lo.




"Sawmdawng" U Nu-i harhchhuak hmasa berah a tang a, a au zui vat. A va tullo mai mai tak e aw. Kan kal tlang thei reng sia. Pakhat pa chu a benga phone nawrbet reng chung chuan a rawn hawi vut a, chiang fahran hian min rawn melh nghal bawk. "Nakinah kan sawi tha leh dawn nia" a tih sup ri chu kan awmna a inhnlat lem loh avangin ka lo hre pha. A phone ah that leh kan lam pan a rawn rual a.



"Mamawh in lei zo tawh em?" zawh bik em em pawh nei lo hian a rawn ti sup a, kan kuta kan thil khai laiah a mit a fu ngar bawk. "Aw , lei zo thuak chu a nimai haw kan lo tum tawh a" ka chhan mai loh vang chuan u Nu-in a lo chhang nghal vat a. Vanlalruati lah hi a hma a tawng zawt zawt si tunah chuan a ding khawng deuh lah mai.




"Ka rawn hruai lawk dawn a" min melh zuk pah chuan a ti leh tawp a. U Nu-i chuan a hrethiam ni hmiang "Aw, kal rawh u. Khawi Puipui, i thil khai lai kha kan lo va hawn ang" ka thil khai lai chu min chhuh sak zung zung a. Ka hamhaih deuh em vangin hnial buai nachang pawh ka hrelo. "Ruati kan pahnih in lo va haw mai ang aw, U Hruaia ka'n call ang e, Sawmdawng, lo va kal daih rawh u" tih leh a phone phawrh a rual nghal zat a. Ka û a phone nghal anih ka ring.




"Kal ila" a rawn tih sup chuan tih theih dang nei hek lo, a car awmna lamah ka zui phei ve vat.



"Ka pu te inah khan kal leh lawk a ngai" rawn thut luh pah chuan a ti sup a, engmah ka sawi lem lo. Car a start a, kan tum ram lam kan pan nghal.



A pu te in kan thlen chuan a pitei leh a pi te chu an lo awm a, a pi khan min lo lawm leh chul tawh. Kum upa lam hi ka ngaina a, an bula awmte hi nuam ka ti. An vanglai chanchin, hmanlai chanchin sawi te hi nuam an ti a, ngaihthlatu an mamawh ve niin ka hre thin. Chumi hre ran chung chuan kum upate hi ka ning ngai lova, an thusawi ang ang lo ngaihthlak sak te hi nuam ka ti, ka tihtheih tawkah ka ngai bawk.



"Bawihpui, i û Sawmdawnga te an lo kal ania" inchung lam hawiin Sawmdawnga pi chu a au lang lang a. "Mamuan, i fapa chu han ko la" a tih rual chuan Sawmdawnga pitei chu inchung lamah a chho vat a.



A pi chuan min biak zawm leh malh malh a, a tupa, Sawmdawnga putea te fapa Remruata lo haw thu vel chu min hrilh ve luam bawk. Ka bula mi chuan ngawi ngul hian a phone a khawih leh mual mual tawh.



"Pi Hliri chu i tupa mutui lai tinge min rawn kaih thawh tir a" inchung lam atang hian mipa âw ring lampang hian a rawn ti lung lung. "Lalremruat, khatin i pi hming lam kher zel suh" a hnunga rawn zui thlain a nu chuan a lo khap nghal hlak. Ka han hawi chuan a mit a lo la nuai mual mual mai.



A rawn thleng thla, min rawn hmu chiah chu a meng deuh ak mai. Keipawh mak ti deuh tak hian ka lo en deuh ha . "Ehee, nurse hmeltha-i kha" nui tha chung hian a rawn ti hluai a. Ka bula phone hmet mual mual pa pawh a lo hawi chhuak vut. "In lo inhria em ni?" ka pi chuan mak tih hmel deuh hian min zawt tawn a. "Pi, sawnu saw alawm damdawiina 'ka pu' min ti tu nurse hmeltha-i ka sawi kha" a rawn ti hluai a. A pi bula thutthak a rual nghal vat bawk.




Kan inhriat dan vel kan han sawi chuan a pi chu a nui ta hak hak a. "Rinhlupuii Puipuii, i û Sawmdawnga nupui tur anih hi" a tih chuan Remruata chuan a hmui a lo pet sawi zeuh a, a ner nang nang bawk.




"Engtin nge U Sawmdawnga hi i duh theih zawk a" thutak deuh tak chuan a rawn ti hluai, ka bula thu pa chu a lo rum nghut. A nuin a hnungah a beng kawrh a "A duh chhan ka zawt ve mai lawm" a nu melh ram ram pah chuan a ti leh hlur. "Chupawh nise zah deuhvin be rawh, i û tur tihna anih hi" a ti leh kha kha. An thusawi vang chuan ka lo sa hat hat thung.




"Puipui, engah mah ngai suh. Lalremruata hi chu naupang â ang chiah hi a la nia" a nu chuan a lo leh zung zung a. Ka lo nui lui seih ringawt.



A pi chuan Sawmdawnga sumdawnna chanchin vel te a zawt leh a, a pi zawhna chu dawhthei takin a hriatthiam theih turin pakhat pa chuan a lo chhang ve zel a. A pi bulah chuan a tawngkam pawh a dam thluam mai. Kan inneihna tur thil vel pawh kan sawi ve luam a, a pi chu a phur sarh sarh khawp mai. Remruata kha a pi bulah a la thu ve reng a, phone a khawih mual mual a, kan inmelh fuh apiangin mit min lo siai suk suk a, ka sawi thiam dan chuan a mitmeng chu a lerh lutuk. A ngaihna hrelo deuhin rang zetin ka hawisawn nghal daih zel.



"Nurse hmeltha, u Sawmdawnga ai khan min nei daih rawh" kan haw dawn hnaih chuan uang zet hian a rawn ti chhuak phawng. A nuin harsa tih hmel zet hian a melh ngar ngar. A pi erawh a lo nui hak hak a, ka bula mi lah chuan a melh deuh ngur ngur mai.



"Kha kha kha, a rum el ul si, ani ai chuan ka duat daih ang che. Keichu ka hmeltha a, ka nelawm zawk" uang zet hian a rawn ti leh nang nang a. Ka bul ami chuan "Haw ang" tih leh din vut a rual a , ka banah min chelh nghal vut bawk. Remruata erawh kha chu a lo nui tet tet mai.



A pi chuan kan kal leh veleh a chawei ngei ngei turin min chah lawm lawm a. Kan inzui chhuak veleh thei ta hram e. Haw kawng tluanin kan inbe lova, min thlah hnuah vung zet hian a tlan chhuak leh nghal tawp.



_____*______*_______*_______



Man hlanni chuan a pui thei ang berin ka chhungten thil an buatsaih ve a. An fanu neihchhun ka ni bawk a. Inseng hnem ve hem hem tak chu an ni. Mahse engmah ka sawi buai peih lo. An tih ang ang chuan ka lo awm mawl ve tawp a nimai. Vanlalruati lah chu a'n phur em em mai khawp a. Ka ngei dawn lek leka mahse hetia a awm hi a tha phian, ka hlimlo pawh min hliahkhuh zel a. Tawngkam a thiam bawk a, mikhual vel lo dawnsawn kawngah pawh ka thian nih chu a tlin khawp mai.




Sawmdawnga nen chuan kan inbe lo tih theih vel ani. A khat mawi tawkin mi mithmuhah induhtawn hmel takin kan awm a, chu zawng chu a nimai.




Doctor Rinpuia pawh a lo kal ve ngei a. Min lo melh leh vung vung thin chu nuam ka ti lo khawp mai. A haw dawn chuan thlah a phut deuh tlat avangin kan in gate bul thleng ka va thlah a. Ka let lehlama min lo melh ngur tu ka va hmu chiah chu ka phu chiang asin! Kawngka bang nghengin a lo ding tlawn zuah a, min melh deuh khui bawk.



Ka mitmenga mak tihna chu ka siamtha vat a, ngawi renga kalpel mai ka tum chu "Mikhual la awmlai em chuan insum ve ula" khauh zet hian a rawn ti hluk. "Naktukah chuan ka nupui i ni tawh dawn sia, kan Doctor-a chu ka va lainat ve aw" ten hmel zet hian a ti leh a. Ngawi rengin ka kalpel hmak, ka chhang buai peihlo. Chhang lo ila ka tan a tha a nimai, tih hreh a nei bawk silo.




Naktuk ka pasal neih ni a nih tawh miau avangin Ruati a rawn riak dawn a. Ka room-a thil ho mai mai kan sawi melh melh lai chuan ka nu leh pa an rawn inzui lut hlawl "Ruati, i thiannu hi thil kan lo sawipui lawk ang chu" ka pa chuan a rawn ti dam thluam a, hrethiam takin Ruati chu ka room atang a chhuak vat a.




Ka khum tlang lehlam lehlamah an rawn thu a. "Kan fanu neihchhun hian naktukah pasal min neihsan mai dawn chu a ni sia aw" ka nu chuan a rawn ti hap a. An pahnih chuan min melh deuh vang vang bawk.



Ka pa chuan "Mambawih, i tette atangin kan thusawi pakhat mah zawm loh i nei ngai lova. Tunah pawh i zawm thlap hi ka fanu i nih vang hian ka chhuang che ania. I tana tha ber tura kan hriat vang ani tih min hriatsak la aw" a rawn ti dam ve thluam a.




"Hmeichhia chu mi ina kan lawi luh tawh chuan mahni in lam tlawh sek te hi a mawi lo a. Tunlaiah mo sual, an pasal chhungte ngaithei miah lo hi an awm thin a. Khatiangte kha nih ve miah loh tur. Sawmdawnga nen pawh inhauh chang in nei ang, mahse chutiang hunah chuan tlawm zawka tan thiam te hi a tul thin ania. I duh reng vanga nei tur ni miah lo mah la nupui i nihna angin engkim hlenchhuah tum ang che aw. Kan fanu hi kan ring tawk che ania" ka nu chuan a lo ti ve leh deuh luam a. "Ngaihtuah awm i ni dawn miah lo tih chu hre tho mah ila nu ka nihna angin ka hrilh hre hrim hrim che anih chu" nui sang hian ka sam tuai pahin a rawn ti leh sep a.




Awmdan mawi leh tha, pasal chhungte bula awm dan tur te min hrilh luam a. Ka pasal tana nupui tha tak ni turin min chah lawm lawm bawk. Engmah sawi lovin ka lo ngaithla kar ringawt. Mahse an thusawi chu zawm ngei ka tum tho. Ka ti ta sa sa theihtawp ka chhuah ang chu.



Ka nu leh pate chhuah hnu chuan Ruati nen kan awmdun leh chawt a. Kan muhil thei meuh lo, sawi tur kan ngah dun mawlh mawlh lutuk a. Kan college kal lai te kan sawi a, za zetin kan nui leh kar kar thin. Zinglam dar 2 velah kan muhil ve ta hram.




____*____*____*____



Zingah chuan zan kan menrei em avangin thawh kan hai thelh. Dar 11:00a.m ah inneih hunserh tan a ni dawn a. Thawhhlim atangin kan buai nghal map map khawp mai. Kan chhungte, inneihna hmang tura lo zin te pawh an lo thleng sap sap hlawm tawh a. Kan ri ve laih laih mai.



U Nu-i a buai bawk nen Bawihte Amos-a chu min chei laiin ka bulah a tap ve chawt a. A nu chuan coat suit hi a hak tir ve at a, necktie aiin bowtie a awrhtir a, a cute lutuk. Ka sawi thiam dan ber chuan khawte pastor kan tihfiam ang chi kha a nih duh hmel lutuk.




Min cheitu chuan chei ka nawm thu leh hmeltha min tih thu a sawi reng a. Fak derna mah nise a lo dawngsawngtu nih chu a nuam ve reng mai. Vanlalruati lah hi a lo uang ve em em hman ziah, mahse kan hlimpui thei phian.




Biakin dar a ri ral ral a. Ka hlimna nge ka lungngaihna rawn herchhuahpui tur dar anih ka hrethiam lo. A hun a thleng hnai telh telh a, ka zam telh telh bawk. Ka chhungte kalsan ka hreh a, chutah ka hmangaih miah loh ka pansan dawn chu a ni sia. Mahse an duhdan a ni a tiin ka infuih ru mawlh mawlh. Ka hnuk te lam a ulh rum rum.



Biakin chhungah chuan ka pain min kailut a. Maicham bula ding ka hmuh chuan ka hreawmna a rawn zual sauh nimai hian ka hria. Min melh vung vung a, a ngaihtuah tur awm ang ka hrethiam lo. Ka pain Sawmdawnga kuta min hlan dawn chuan eng emawni hi a sawi sup a, Sawmdawnga chu a lo bu nghut. Ka ngaihtuahna kal ding lutuk vangin enge a sawi ka hre ta lo.




Mo thianah kan inneih hma lawka min inhmelhriattir pa Remsanga a hmang a. Keiin Ruati ka dinpui thung.



Inneih thutiam kan chham laite chuan ngaihtuah ran chung hian ka chham tluan ve zak a. Nizana ka nu leh pa thu tha min hrilh zawng zawngte kha ka ngaihtuahnain a chhui let pah roh roh bawk.




Kan inneih min lawmpui tura lo kal te chu ka beisei phak bakin an thahnem. Mahse a mak hran lo, Sawmdawnga te hian sumdawnna an zar pharh nasa a. Keini lam chhungkaw hung pangngai kan lo ni ve bawk nen kan thahnem viau pawh chu awm ka ti ve tho mai.




Thlalak chhung a rei phian a, hlim tak anga awm a lo ngai veleh zel bawk nen ka chau ve nghulh mai, nizan lamah kan mu tha bawk si lo.



Tunah chuan ka pasal te in, vawiin atanga ka in ti a ka sawi ve tawh turah ngei mai ah chuan ka lawi lut ta.



Eng eng emaw sawiin kan chhungte chu an la titi siam siam a, an nui leh dar dar thin. Ruati leh Sawmdawnga te unau zinga naupang ber Mawimawii te'n ka thawmhnaw neih ang angte Sawmdawnga room kan nupa room ni taah chuan min remfel pui mawlh mawlh a. Tawng duh ve ve an ni bawk a. An pahnih chuan an titi reng a, fiamthu thawhin an nui leh ngat ngat zel. Keipawh ka nui ve sak sak mai.




Sawmdawnga chu ka lawi luh hunserh zawh vel atang khan a bo nghal daih a. A awmna pawh ka hre lo, mahse hmuh tur a awm miah lo chu ka thaw huai zawk. A mi uap na zet khan ka awm a tinuam thin lo.



Ka chhungte an haw dawn chuan a lo lang veleh hlawl a. Ka pa nen dingdun ren rawnin an titi sup sup a. An thusawi kan hre pha ve lova, an bengkhawn chiam lo bawk. Chumi hnu chuan kan inthlah fel a. Ka chhungte nen kan inmangtha fel chiah chu ka ruak huai mai hian ka hria. Ka duhtak pasalah nei ila chu heti em em hian ka awm ka ring bik lo.



Ka huphurh ang ngeiin room ah kan pahnih chiahin kan awm ta. Chhuanlamah ka thil la remfel loh ho chu ka remfel mawlh mawlh a. A ni erawh couch ah vanvadakin a thu thluang duai a, mit a chhing vang vang bawk. A kamis nghawng kilh chu a pawtphelh tawh a, necktie pawh fual deuhvah a awrh tawh.




Chutia a thu awn duai reng chu a rawn ding chhuak hlaui a. Ka thil lo remfel mawlh mawlh chu min lo melh deuh khui a. "Kha kha dah la, va intifai rawh" a rawn ti hluk. "Ka'n tizo law law ang. Nakina buai ai chuan" ka lo ti sep a.



Engtik laiin nge ka puan thleh lai min rawn chhuhsak hman ka hrelo. "Dah rawh ka tih chuan dah mai rawh" ka ban tawn tawnah na zetin min hmer a, a tawng chu zawi hle mah se a sehchilh rap rap khawp mai. "Va intifai rawh" min thlah thut vangin ka pai deuh dawrh. A pen chhuak vut a, room kawngka inkhar bur ri tih loh chu a reh deuh tlawk tlawk mai.




Ka nu leh pa, ka û , U Nu-i, Bawihtea pawh...an vai mai chuan ka ngaihtuahna ah an rawn lut zut zut a. Ka ngai nghal vawng vawng mai. Intih paukhauh luih ka tum hram hram a. Mahse ka biang rawn lum thla pap chuan ka hlawhchham zia min rawn hriattir ka ti mai. Tap duh lovin ka mittui chu ka tuai hul tawk a.



Ka intihfai lai te chuan ka ngaihtuahna bawk ka kawm leh melh melh tawh. Hetiangte chuan engtin nge tha takin ka awm theih ang. Kan innei rei thei dawn em ni. Ka chunga a chet duh dan te kha ka ngaihtuah let a. Tlawm intihna bawkin ka khat leh tawh. Ka nun pangngai ve tak ni thin, tun thla liam ta rei lote chhunga inchinglet kual ta vak mai chu ka hrethiam hauh lo.




Zingah chuan ka nu (Sawmdawnga nu) in thawh hma a ngaih loh thu nizan lamah min hrilh ve bawk mah se thawh tlai kha thil tih chi niin ka hre lova, dar 6:00 ah ka tho chhuak a. Washroom ah lutin ka inphihfai nghal sawk sawk a. Inhnuai lama chhuk thla turin ka intintuah vat bawk.



Nizan zankhua khan Sawmdawnga room chhunga a rawn luh lai awm reng reng ka hre leh tawh lova. A rawn haw lovah ka ngai hmiah mai.



Inhnuai lama ka chhuk thlak chuan a lo la reh thiap a. Ngawi rengin choka lam ka pan phei zal zal a. Tumah an lo awm chuang lo, an la mu vek anih ka ring. A awm ve tho mai, nimin lam boruak in a hmet chau zo ve hlawm aniang.




Tih hmasak ber tur hrelo in cupboard te chu ka hawng kual dan dan a. An thil dahna vel chhinchhiah nghal vek ka tum bawk, nakin zela ka chet buai loh nan pawh a tha reng reng.




Gas bula an Kattle hunchhuah saah chuan thingpui tur ka chhuang tawp. Chini vel ka lakchhuah laiin Mawimawii a lo tho a "U Puipui, i va tho hma awm" a lo ti var a. "Harh reng chunga mut reng chu a ninawm lutuk a" ka lo ti ve nghal vat.



Mawimawii hi chuan kan inhmuh tirh atang tawh khan min ngaina nghal ve em em a. Kum 20 tling ve uai tawh mah se min biak dan leh a awm dan vel hi chu naupang chhia ang chiah a ni, duat rawn anih vang pawh a ni mai thei. Amah hi a fel ve hrim hrim a, a tawngduh reuh bawk a, kawm nel a harsa lem lo.



"Keichu ka tho hma theilo reng reng" naupangchhia zet hian a rawn ti a, a ham bai bai bawk. A hmeltha reuh sia, a lawmawm tak tak ani.
"Thingpui ka siam ang che aw"
" A pawi miah lo"
Thingpui in dunin thil ho tete kan sawi a. A dawr chungchang velte pawh min hrilh ve nual.




A hnu rei vak lovah ka nu a lo tho chhuak a. "Thawh hma a ngailo ka tih kha i tho hma duh anih kha" a rawn ti lut zung zung a. Ka lo nui tawi tak tak ringawt. "Sawmdawnga hi a la tho ve lo ami" ka nuin a lo tih chuan han chhan mai dan tur ka hrelo.



"Heta hi ka awm" choka rawn pen luh a rual a. Tawnzau leh kekawr bul a ha a, Sneakers a bun a, a thlan a tla hluam bawk. Fritch atanga tui lachhuakin a in nghal khawlh khawlh a. "Inneih tukah em em te chuan exer lak loh ve awm che" Mawimawii chuan a lo ti hlak.



"Min lakpui peih si lova, kei talin ka lak ziah a ngai alawm" Mawimawii sam tuai thur pah chuan a ti zauh a, a lo ner nang nang. "Keichu ka hmeltha a, ka pian a nalh sa a, exer lak ve ka mamawh lo" sawifuh inti zet hian a ti zat zat a. Sawmdawnga a lo nui hawk. Tunah khan a nui ve anih chu... Sawmdawnga a nui ve thiam.



"I pa chu a chau ve deuh a niang ani leh ni lo angin a la mutui khawp mai" ka nu chuan a rawn ti veleh a. "Thawh chu a hun tawh tho mai ka va kaitho dawn chhin ange" tih leh thawh a rual a. Mawimawiin a zui ve nghal daih bawk.




"Thingpui i duh ve em?" bengvar chhuahin Sawmdawnga chu ka lo zawt vat. Ngawi renga awmdun deuh run run chu nuam ka tilo. "Ka han intifai lawk zawk ange" a rawn ti ve mai bawk a. Ka lo bu nghat.




Ka pa lo thawh hnuah chaw ei te kan siam zung zung a. "Vawiinah tihtur pawimawh ka nei a ka chhuak lawk dawn nia" chaw bar mawlh mawlh pahin Sawmdawnga chuan a rawn ti a. "Nimin lamah in innei chauh a, enge tihtur pawimawh awm chutia chhuah lawk ngai chu" ka nu chuan lungawi vak lo hian a lo ti vat a. Ka pa leh Mawimawii chuan an ngaihtuah vak hmel loh an chawei lai an bar zawm mial mial. "Hna thil ania vawiinah chinfel ngei ngei a ngai" Sawmdawnga chuan a ti leh a. A kham zui daih bawk. Ka nu chuan harsa tih hmel fe hian room lama a chho tur chu a enzui vang vang.




"Puipui, Bawiha hi chu hna atchilh mi deuh mai hi a nia i hriatthiam deuh reng a ngai dawn nia" inthlahrung deuh tak hian ka nu chuan a rawn ti ve ngial a. "A pawi lo, hna chu a pawimawh alawm" nui seih pahin ka lo ti ve bawk.



Ka nu leh Mawimawiin thleng seng leh sil vel an chuh tlat vangin ka tilui theilo. "Inchung lamah in pa hna kal tur chu han buaipui zawk rawh" ka nuin a tih tlat vangin kan room lamah chuan ka han chho a.




Zam deuh taka room kawngka ka hawng chu a lo ruak hiang mai. Mahse bathroom ah thawm ka hriat chhunzawm vangin Sawmdawnga chu a inbual anih ka ring.




A inbual zawh hma ngeiin a kamis hak tur vel lo dahchhuah sak ka tum a. Wardrobe hawngin ka enkual dan dan a, kamis senduk chu lachhuakin necktie senduk tial chu ka la chhuak nghal vat bawk. Khumah ka lo dahchhuak a, han tih leh mai tur dang ka hrelo.



Chutia tihtur hrelo a ka wardrobe vel ka hawn kual sek lai chuan bathroom kawngka ri khep thawm ka hria a. Bathroom lam ka hawi phei a, mahse ka hawi let leh rang lutuk. Sawmdawnga chu towel chauh vengin a lo ding teu anih chu!



Ka hnung za deuh mer mer atang chuan min melh reng tih ka hre thei. Chutia a taksa ruak deuh thaw a a awm chu a zahpui vak lo anih hmel.




"Hei, i kamis hak tur ka dah chhuak tawh aw" amah en mang hlei lovin khum lama a kamis ka dahchhuah sa chu ka mit sir a. A rawn pen phei vat a, a kamis ka dahchhuah sa chu en vung vung in a la ve mai bawk. A towel ven lai chu phelh a tum ta mai "Bathroom ah ka va intifai ve lawk ang e" hmanhmawh zetin bathroom lam ka pan phei nghal rawk rawk. A chhung ka lut chiah chu ka thin a phu dup dup mai.


_____*_____*_____*_____

(A thawnthu hi a kal chak hlei thei thlawt lo, a boring châng a awm deuh mai thei. Hmanhmawh lo mai ang u aw. In lo chhiar ve avangin ka lawm em em e ❤️.)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:04 pm

OUR MARRIAGE
By CVL.Awmpuii



Chapter 6



Rei tawk fang bathroom-a ka awm hnu chuan room a chhuahsan tawh ringin bathroom kawngka chu ka hawng dek dek a. Khum bul lam lo ruak huai tawh ka va hmuh chuan ka thaw huai mai. Ka taksa tangmar lutuk pawh ka inthlahdul ve hret hret.




Nupa chu ni ve mah ila a hminga nupa mai kan ni a, nupa dangte anga khawsa kan nih miau loh avangin engkimah ka tîm a. A taksa hmuh phei chu...argg ka ngaihtuahna zet chuh ! A ni pawh ka awmlaia inphelh han tum reng reng, a thiamlo ve hrim hrim.




Inngaihtuah buai duh tawh lovin inhnuaiah ka chhuk thla leh a. Kan inneih tuk chauh a la ni bawk nen inleng neuh neuh kan neih ve ka ring. Vanlalruati pawh a lo phei leh dawn tak alawm.




Sawmdawnga chu a kalchhuak tawh anih ka ring. Inhnuai ka zuk chhuk thlak chuan ka hmu tawhlo. Inlêng thenkhat an lo awm nual, inleng tih lemah Sawmdawnga te chhungkhat laina ho an ni zawk mah. An lo che suau suau a, an ri leh laih laih tawh. Ka pi (Sawmdawnga pi kha tihian ka sawi ve tawh mai ang) pawh kha an lo awm a. Ka chhuk thla min lo hmuh chuan ka piin min lo hui vat. Nui sangin ka va pan ve vat bawk.



"Khawnge midang, an lo kal ve nange" ka ve ti hliai a. "I pu leh i putea te chu hna thilah an buai deuh chawt a. I pitei pawh in ka lo nghak zawk ange a tia kan lo kalsan ta anih kha" a ti luam a. A bula ka va thut chuan kan titi a ni deuh nghal mai.




Ka pi hi chu ka ngaina ve takzet a. Kum upa lam tawh e ti lo hian min rualpui kawm thiam ka ti mai. Thil a hre zau sia, keini ang rual tan pawh kawm nuam tawk tak chu a ni.





"Lalremruat, i ninawm emai aw. Min tibuai reng suh, i hma zawn ami kha ei ve mai rawh" ti vin hlak hlak ri chu choka lam atangin a ni, Mawimawii âw niin ka hria.
"I duh leh ka hma zawn ami chu rawn ei ve mai la" pakhat pa chuan a ti ve lung lung a. An in chhang tawk tiu teu khawp mai.




"Lalremruata hi chu aw...Mawimawii tihbuai reng hi a thil nuam tih ber pawl ania" ka pi chuan choka lam en pah hian a ti nang nang a. Choka lam kan hawi nain anmahni tak kan va hmu thei chuang lo. An inhnial leh bap bap thin chu ka pi nen kan lo nuih tha tha ringawt.




"Bawiha khi khawnge a kal dawn a?" ka pi hawina lam chu ka hawi chho ve vat a. Sawmdawnga hi inchung atangin zangkhai vah hian a rawn pen thla pawk pawk. A kal daih tawh emaw tia khawiah nge maw a lo awm ni.




"Office kal a tum em ni?" ka pi chuan ka chhan mai loh vang chuan a rawn ti leh a. "Imm...ni deuh mai, vawiina tihfel ngei ngei ngai thil hmanhmawh thlak a awm a" ka lo ti ve sep a. "Chuti taka thil pawimawh chu eng nge a? Nupui neih hlima lo chhuahsan daih, inneih tuk chauhah lehnghal" a rawn ti hlak hlak a, a lungawi vak loh hmel hle bawk.





"Sawmdawng, hetah rawn kal teh" choka lama a lut phei tur chu ka piin a lo ko vat a. A rawn hawi phei a, min melh danah min hmu ve chiah anih hmel. Engmah sawi buai lovin a lo phei ve mai bawk.




"Khawnge kal i tum, nimin lawkah nupui i nei a. Tunah chhuah nghal i tum daih a. Thil nih dan tur pawh a ni lo" a lo ti hlak hlak a. "Hna thil ania, vawiina tihfel ngei ngei a ngai alawm" a ti dam thluam. A hmel en aiin a aw chhuak chu a dam ang reng viau. "Hna thil pawh ni se dahthat ve rih mai tur alawm. Puipuii tan pawh a nuam nang. Inleng neuh neuh te an la awm hmel si, hmeichhe tan chuan nuamlo ve deuh duh asin" a ti leh duah a.




"Ka pi kan sawifel vek tawh alawm. Ka rei dawn lo a tha em" chiang zet hian a ti veleh a.




Choka lam ka va hawi phei chuan Remruata khan kan awmna lam a lo pan phei a. Nichina Mawimawii vin hlak hlak kha amah ngei a lo nih dawn hi. Chocolate, ball tereuh tete anga an siam ang chi kha a rawn vawr pah a. Kan zawn a rawn thlen chuan a kheh mual mual a, a hmawm zauh. Ka pi leh Sawmdawnga inbia chuan an bengkhawn tehchiam hmel loh khawp mai.




"Nurse hmeltha, tinge mo thar tukah te thawh i hai a" ka bul a rawn thlen rual chuan a rawn ti lung lung a. Tinge maw a tawng rin em em zel le. "A thawhna a rei tawh, ka û a insiam pui anih kha" min chhan zet hian a hnung lam atangin Mawimawiin a lo ti ve zat.




Sawmdawnga leh ka pi inbia pawh an tawp dat a. Sawmdawnga chuan min melh leh ngur tawh. "Nurse hmeltha i mutui em" ka bula rawn thutthlak pah chuan a ti leh daih. A mitmeng chuan min chhaih ve deuhvin ka hria. A ngaihtuah awm ang tur chu ka hrethiam mai e. Lehlamah Sawmdawnga a thu a, min karcheh a nih ber chu. A zawhna min zawh avang chuan nizan lamah engmah thleng hawt si lo ka lai ve em em ringawt, ka hmai a sa hat hat mai.





"Remruat, khatiangin ko tawh suh. I û nupui anih hi, û ta che" ka pi chuan a lo ti hlak a. Thildang daih a lo sawi chu ka lawm ngei mai. "Nurse hmeltha-i alawm anih" ngaihsam zet hian a ti leh then.





Sawmdawnga chu a tho vut a. "Ka kal a hun" min melh chhuk run pah hian a ti sup. Ka pi a awm ve avangin a hna kal tur chu ka zui chhuak ve a. Car ah a lut vut a, a tlan fel hnu chuan inchhungah ka let ve ta chauh.




Inleng neuh neuh kan nei ve pheuh pheuh a. Thingpui lumin ka buai em a ka chhungte ka ngai lutuk tur pawh a zia phian. Remruata kha a ngainatawm phian mai, titi a vawrh thiam a. A uang reng mai bawk si. Min han ngam em em mai khawp a. Min fiam awl lova keipawh ka nui ve hak hak mai.




Mawimawii nen an inhnialna te chu kan nuihpui nasa khawp mai.
"I lerh ropui si"
"Ka lerh vang a ni lo. Ka hmeltha em a, ka hmu zo em alawm"
"Tha emaw i inti mai mai nih kha. I tlaw tlaw nen"
"Bialpa tur i hmuh zawh loh vang mai a. Mahse a awm ve tho, i hmel ang kha chu mipain kan duh lo" a va nghal mai mai tak e aw. Mawimawii tihngaihna hrelo chuan a sam buk laiah a kek ringawt. Pakhat pa lah chuan a lawm zawk emawni tih turin a nuih hawk hawk thung.





"Khaih khaih khaih, duhtawk tawh teh u. Remruat i haw phei teh ang. Nula tlangval pui tawh si in inti tap leh mai ang" ka pi chuan a lo bengdai vat a. "Pi, i lo kal leh dawn paw'n Lalremruata kha rawn hruai tawh suh aw" pangchang zet hian Mawimawii chuan a ti nang nang a, Remruata a melh rum hlar bawk. "Min ngaih theih em kha" pakhat pa lah chuan a lo ti hmanhmawh. An inban buai leh dawn uaih a, mahse ka pi hnungah Remruata a din tlat vangin Mawimawii chuan a va ban mai thei lo.




Midang chu an lo nui hak hak a, an han inhnial bap bap te chu an ngai neih tawh pawh anih hmel. "Mawimawi, lo kal tawh rawh. Kha i pi a haw duh tawh kha" ka pa chuan a lo ti ve ta vat a. Mawimawii pawh chuan a ban buai zui tawh lem lo.






Ka pi te haw hnu chuan inchung lamah ka phone la turin ka chho zuai a. Zing atangin ka buai ve reuh lutuk a, room-ah ka dah deuh tawp kha ania. Ruatin a lo kal tur thu min hrilh bawk a, ka thawmhnaw la remfel loh thenkhat pawh chu ka khawih buai rih lo. An lo kal huna min tihpui law law atan ka tih vang a ni pakhat.





Dar 1:30 velah a lo thleng a. Doctor Rinpuia nen an lo kal teh nawlh. Ka nu te bulah ka thawmhnaw vel Ruatin min tihfel pui dawn thu ka hrilh chuan an lo remti khawp mai. "Han inzui chho rawh u. Nakin deuhvah in thil ei tur in lo la dawn nia. Doctor Rinpui, i duh leh zui chho ve daih rawh. An mut pindan te pawh han hmuhpui ve la" ka nu chuan a lo ti zung zung a. Doctor Rinpuia kan room-a han hruai chhoh ve zel chu ka hreh deuh tlat. Mahse ka nu berin a tih miau avangin ka hnial lem lo. Doctor Rinpuia pawh chu a tho vut a, min lo zui chho ve nghal.





"Ka pi damlo a buai deuh hlek a kan lo kal hma thei lova, a zialo tak tak" room kan luh rual chuan Ruati chuan thupha a chawi nghal zung zung a.
"A pawilo, eng nge a an tawh a. A damlo chungte chu in lo kal duh anih chu mawle"
"Tunah chuan a tha tawh, kum upa lam an ni ve tawh a. Dam sam loh hi chuan a kiansan thei tak tak tawh lo" a ti leh bawrh bawrh a. Ruati pi hi kum 90 ralkai chin a ni ve tawh a. Chuti chung chuan a la hrisel tha em em a, mahse kumin kum tir lam khan a dam sam lo ta zeuh zeuh a. A dam tha tak tak hlei thei tawhlo.





Ka thawmhnaw vel remfel chung chuan kan titi pah reng a. Damdawiin chungchang kan sawi a. Damlo enkawl dan chungchang te. Doctor biak har deuh deuh lo awm thinte hi damlo vengva vak lo tan chuan a hrehawm dan turte kan han sawi ve luam a.




Doctor biak harsa deuh hi an awm ve thin a. Damlo te tana inhawng lo lutuk, thil zawh ngam loh khawp hi awm ve theih ania. Damlo te damna tur tak tak chuan an rilru nawmna thlen sak te hi a pawimawh. Taksa damlo bawk, rilru damlo bawk a kan chhuah chuan kan mawhphurhna kan hlen dawn lo emai. Eng ang natna pawh nei ila rilru dam deuh dan hi a awm ve ania.




"Heiham, Doctor Rinpuia ang veka biak nuam te hi nih ve tur ania" Ruati chuan a rawn ti hluai. Doctor Rinpuia chu a lo nui hawk a "Ruati thin hi a. Tak taka in han sawi takah chuan doctor te hi kan pawimawh ve a. Damlo zawng zawng damna kan thlen thei vek bik lova, mahse an rilru hlimna tur tawk hi chu kan siam sak ve thei. Doctor biak harsa lutuk nihte hi ka duh loh zawng tak ania. Inla vung a, intiveivung tur pawh kan ni lo, mipui rawngbawltu kan nia. Kan sum hmuhna, kan hna a ni ve pakhat a. Damlo te hi kan VIP zawk te an nia. Nangni pawh hre reng rawh u, nurse ho hian mawhphurhna lian deuh in nei ve a nia. Ward kan fan aia tam hi damlo bulah in kal zing zawk a. In nui hmel ringawt pawh kha an lo dampui thei ania" a ti ta duah. A sawi dik ka ti khawp mai.






"Ekhai, kan va sermon thiam veleh" Vanlalruati tak hi chu aw, kan nuih ta tawp.




"Ka ril a tam tawh. Sawmdawnga nu khan 'In thil ei tur in lo la dawn nia' a tih tak kha maw, ka zuk la lawk ang aw" tih leh a malpui chunga ka kawr ho chu dahthlak a rual a. A tho kang zui a, room a chhuahsan nghal vat bawk.





Ruati chhuah hnu chuan Doctor Rinpuia nen chauh kan awm ta ran mai. A nuam duh fahran lo khawp mai. Amah bengkhawn lo ang thei ber tur chuan ka thil thleh lai chu ka thlep mawlh mawlh a.






"Puipui, i rilru a la ngai reng em ni" min melh reng tih ka mit sir atang chuan ka hmu thei. "Eng nge i sawi awmzia" a sawi tum ka man chiah lo. "Tlanbo kha i duh chuan ka la inpeih reng ania. Ka la pui thei reng che" a rawn ti leh sup a.




Hemi chungchangah kher hi chuan ka rilru ka siamfel tawh, ka hmazawna thil lo thleng tur tlan bosan tur khawpa mi dawihzep ka nilo. "Ka hnial leh che ni mai rawh se" ka ti sap. "Enteh, Doctor Rinpui hmalam pan rawh keichu mi nupui ka nih tawh hi. Duh reng vanga innei pawh ni lo mah ila ka pasal tana rinawm tlat hi ka duh. Pasal pakhat chauh neih ka tum bawk. Chu chu thil nih dan tur pawh a ni. Nang chu tlangval fel tak i nia, kei aia tha hi i hmu zo dawn lutuk. Chiang deuhvin ka sawi tawp ang, pasal pawh nei lo ta ila ka chhanna tur che chu a la ngai tho. Thian ni reng zawk ang" ka ti leh duah.






Ka rilru zawng zawnga sawi ka ni bawk. Doctor Rinpuia hi mifel tak, tlangval ah pawh tlangval naran lo tak mai ani tih ka hria. Mahse ngaihzawng lam hawiin vawikhat pawh ka la en ngai lova, ka en ngai dawn lo bawk. Hetianga mipa tha lutuk hian hmeichhe tha tak, amah hmangaih em em tu tawng se ka tihpui takzet. Chuan, thil pakhat , ka pasal hi phatsan ka tum lo tak tak bawk. Harsa hle mah se ka tuar chhuah theih ka ring. Ka hmangaih lova duhna chhete mah ka neilo, nupa anga khawsak ka duh tihna pawh a ni chuang lo. Mahse nupui ka nihna anga nupui tih tur hlenchhuan ka tum ve takzet.





"Puipui..." a rawn ti chhuak hulh a, a ding zui vut, a hmai a tuai puat a. A thaw a ipik hmel takzet bawk.




"Ngaihzawng angin ka en thei ngai dawn lo che. Mahse i thian ka nihna angin i tana tha ber tur ka duhpui ve takzet che" a mita melh chho ran pah chuan ka ti leh sep a. Ka mitmeng atang chuan ka thusawi hi hrethiam se ka duhzia a chhiar thiam ngei ka ring.




"Ok. Ka tum ang. Mahse min pui tho ang che. Thian tha tak ang talin kan awm ang. Min pehhel tawhlo bawk la" a rawn ti chhuak ve ta nge nge. Ka lo thaw huai mai. Ka thutna bulah a rawn ding a, ka dar tawn tawnah min han hmer vang vang a "Kan tha tiraw" nui sangin ka lo melh a, ka bu nghat, a lo kiai ve suk bawk.




Chutih lai tak chuan kan room kawngkhar a rawn inhawng a. Sawmdawnga nen kan mit a intawng siah. Chutia Doctor Rinpuia nen min hmu chu a beisei loh hmel khawp mai. A mitmeng a thim khup a, chiang fahranin min melh ngur bawk, ka tim chawih thei.





Doctor Rinpuia chuan ka hawina lam chu a hawi phei ve ruai ruai a. Sawmdawnga a hmuh chuan min thlah ve mai a "Inhnuai lamah ka lo zuk chhuk ang e" tih leh inher a rual a, Sawmdawnga kalpelin a chhuak zui vut bawk.





Pakhat pa chu kawngka bul deuhvah a la ding ngur a, min la melh ngur bawk. Ka sa chhuak pup pup nimai hian ka hria. Kan lo awmdanah khan ngaih kawih tur chu a awm emin ka hrelo a. Mahse kan nupa room-a khatia mipa lo awmpui chu a ngaih kawih ve theih viau ang.





"I lo haw na a rei tawh em" ka sawi tur hrelo lutuk chuan ka zawt tawp. Min melh ngur bawk sia, nuam ka tilo. Engtin mah lo awm lo mah ila min melhna vang chuan thil sual lian tak ti ang maiin ka inngai thei hial. "Tenawm" a ti zawi sup, ka ip chawih mai. Ten hmel zet hian min melh a. A rawn pen lut a, a coat phelhin a nectie a pawt thawl zui zat.





"Chhuak rawh" min melh lova, a thawmhnaw bawm a hawng kual rawk rawk. Chhuak turin min ti tih ka hria a, mahse ka chesawn hlei theilo. A mitmeng rum lutuk leh min tenna mitmeng khan min tham ka ti mai. Ka tiril a khur hial thei anih chu!






"Chhuak rawh ka ti em" a rawn che vut a ni ber. Darthlalang hmaa ka perfume hun chu a rawn paih keh chuaih a, ka phu dawrh thei. "Kut thlak i duh loh chuan chhuak rawh" sehchilh nawk hian a ti leh a. Hrilh nawn ka ngai tawh lo chiang asin ka harhchhuah leh chuan inhnuai ka thleng thla der tawh.






A mitmeng rum ul te, a tawngkam na tak takte kha chu ka dawngsawng ve fo tawh a. Mahse khatiang zawnga a chet kha ka vawikhat hriatna. Ka hlauh tawh sa nen ka rap lek lek tawh.





"I tha em" choka lam ka phei chuan Doctor Rinpuian a lo ti sup a, nui lui sakin ka lo bu nghat. Ruati chuan noodles a lo ei mial mial a, tihsual nei hawt si lo ka thin a tirim tlat. "Tinge i lo va chho leh har ve" chair-a thut thlak pah chuan ka ti a.
"Ka ril a tam tawh sia, siam chawp a lo ngai a. Rawn chhoh ka tum chiah a Doctor Rinpuia a lo chhuk thla anih kha. Sawmdawnga rawn haw lai pawh ka hre miah lo" thil ei mawlh mawlh pah chuan a ti zat zat a. A nun hi a nawm hmel ve ngawt mai, lungkham nei hmel pawh hi a pu lo.




"Khawnge ka nu kha"
"Bazarah chawhmeh lei turin a kal lawk"
"Awww...a van zialo tak min tirh mai tur ania" ka ti nang nang. Ka rilru a nuam lo ve det, mo ka ni ve a, mahni pasal nu te anmahnia la bazar tir reng kha ka rilru a nuamlo.
"Lungngai vak duh suh, ina lo awm turin a duh zawk che alawm" a ti sam leh et tawh.
Pakhat pa chuan kan thusawi chu a bengkhawn ve hmel lem loh a phone a tuai kual a tuai kual mai.




Doctor Rinpuia chu emergency a awm avangin an rawn phone a. Ruati thil eizawh hnuin hmanhmawh deuhvin an haw ta nghal.




Mawimawii chu chawhnu lam khan a dawr hawn lawk a duh sia, a chhuak daih a. Ka pain a hruai a, ka nu a bazar leh daih bawk si. Sawmdawnga nen chauha awm dun chu ka van hreh tak.



Ruati thil eina ka sengfel zawh chuan tihtheih dang nei hek lo room lamah bawk ka chho leh a. Ka zam lutuk chu ka khur der der thei hial. Mi pasal nei ve te chu an pasal te an thlahlel em em a, kei ve chu a, thlahlelh chu sawi loh ka pasal hmuh pawh ka hlau ania.





Kan pindan kawngka ka hawn hma chuan thawk ka'n la leh te te phawt a. Aaa...engmah tihsual pawh ka nei hlei nem tiin ka inthiam chawp ta tawp. Ka hawng tawp a. Sawmdawnga chu a lo inthlak fel tawh, T shirt dum leh jocker pants dum a ha a, khumah ke thluang duaiin a lo thu. Thawmhnaw pangngai a inbel hian a lang lian lehzual emaw tih tur ani. A malchunga laptop chu a hmet mawlh mawlh a. Ka thawm chu hria ang pawhin a awm lo.




Ka thawmhnaw khum sir vela lo tla hnawk nuai chu ka chhar khawm a. Ka thlep fel nghal sawk sawk, ka awm ve chu hre awm pawhin a lang lo. Ka wardrobe chu hawngin ka khung fel a.




"Sawi ngai sawi nawn hi ka kham fu. Ka inah lehnghal min bum tum reng reng suh" a rawn ti chhuak nghut a. Ka lam a rawn hawi chuang lo, laptop a la bih ngur a, a bek pawng deuh tawlh tawlh atang chuan a lungawi vak lo ani tih ka hrethiam mai.




"Bum che ka tumlo" a lam hawi chuan ka ti sap. Zawi muangin a rawn hawi chhuak a, a laptop chu a khup thak a. Min melh ngur bawk. "I hmu duh anih pawhin in hnathawhnaah khan duhtawk rawh u" chiang zet hian a rawn ti a. "Thian chauh alawm..." nin hmel zeta a kut a rawn vei thuak avang chuan ka ngawi daih.





Chutah a rawn tho chhuak uaih a, ka lam a rawn pan a, ka lo tawlh ve zel. A mitmeng chu ka chhiar thiam lo, mahse a rum tha hrak hrak hle thung. Bang vawt thler ka sik takah chuan tawlh sawn ngaihna a awm tawh lo.





A kut vei lamin bangah chuan min nemkhalh a, a mitah ka melh ngam ve tawh lo, a awmzawn ka en tawp. "Insawifiah vak kha a ngai lo. Thian in nih leh nih lovah ka buai lo. Mahse khapa khan kan room chhung hi a rawn rap leh tawh tur a nilo" zawi si, sehchilh zet hian a rawn ti chhuak leh khawl a.





Inla hrang vutin a kuangkuah ut " A chiang em" a rawn tih leh chuan ka bu nghat ringawt. A awmdan atang khan hnial zui zel chi a ni tlat lo.




"Library ah hna ka thawk dawn nia" tlem chuan a aw pawh a pangngai ve ta deuh. Ka chhanna pawh nghak ta lo chuan a laptop khuma a dah chu a la vut a, a chhuak zui nghal daih.





Room atanga a chhuak chiah chu ka thaw huai mai. A mi uap na cherh churh lutuk hi a mak. A thinchhe ve ropui sia, a thinrim tawh lah hian ka thunun theih loh khawpin ka chhung lamah hian khur dar dar a rawn awm thin.




Ka pa leh U Hruaia hi tawngtam tak ni lo mah se Sawmdawnga ang em em hi chuan an rum lo. An polite a, hmeichhia an zah thiam em em bawk. An thinrim ka tawng ngai lo tih theih tluk ani a, chuvang ani mahna Sawmdawnga thinrim hi ka hlauh em em.




Ka intihfai zawh hnu chuan inhnuai lamah eirawng bawl turin ka chhuk thla a. Ka rin ai daihin ka nu chu a lo haw har. Ka pa pawh chuan Mawimawii chu a nghak nghal daih anih ka ring. A va thlahna kha a rei leh tawh emai.





Chaw ka chhuang fel vel chiah tihah ka nu chu a rawm haw a, a rawn inkhai bawr tun mai. "Awi, ka duhaiin ka rei. Bazarah i pitei nen kan inhmu a, peng kawi turin min ti deuh tlat sia, ka zui haw a ka va awm rei ta phian sia" a ti zung zung a. A sawi kalhmangah Remruata nu a sawina ani tih ka hrethiam mai.





"Min tir mai la, keimah ka lo bazar mai tur ania, a nachang ka lo hre lova a zia lo tak tak" a thil rawn khai haw chu ka dahfel pui mawlh mawlh a. "A harsa hlei nem, nakinah chuan kan bazar dun tawh dawn nia" nui var var pah hian a ti leh a.




"I thiante chu an lo haw hman elaw" hawi kual pah hian a ti a. "Damdawiin lamah emergency a awm thut a, hmanhmawh deuhvin an chhuak ta anih kha" ka lo ti a.
"A va zialo tak, chaw ei ve nghal se tha tur ania" a ti nang nang.





Sawmdawnga chungchang min zawh chuan a lo haw tawh thu leh library-a a awm thu ka lo hrilh vat a. Kan pahnih chuan eirawng kan bawl dun a. Ka nu chu ka rinai daihin a lo tawngduh, an tleirawl lai velte sawiin a titi barh barh a, kan han nui dun leh rih thin. Amah a nelawm sia, min biak tawng dan a thiam bawk a, kan innel nghal sarh sarh khawp mai.




"Puipui, Bawiha chuan thingpui a in duh ang, siam la, han pe lawk la" ka thil kan lai chuan a rawn ti a. Hnialna chi ni hek lo thingpui chu ka chhuangso nghal zung zung a. Chutih lai tak chuan ka pa leh Mawimawii te an lo haw a, an thingpui in tur ka lo chhuang ve nghal zat bawk .





Ka pa te thingpui ka pek hnu chuan Sawmdawnga thingpui tur kengin Library awmna lam chu ka pan chho ta nghal a. Sawmdawnga te in hi a zau tha hem hem viau mai a. Inhnuai lamah hian ka nu te room leh room awl pahnih a awm a. Inchung lamah hian room pali a awm thung a. Kan room awmna hi a va kilkhawr deuh hlek a, kan room dawt chiahah mikhual room a awm a. A dawtah Library, step hnaih berah Mawimawii room a awm bawk.





Sawmdawnga POV


Kawngkhar kik ri dat dat thawm chu ka hre reng. Mahse ka lo chhâwn duhlo, tunge anih ka hrechiang lutuk tlat. Ka lo chhawn mai loh vang chuan a rawn hawng de de a, a kutah thingpui ni ngei tur hi a rawn keng bawk.




"Thingpui ka lo pe dawn che a" tim dai hian a rawn ti a. Thinrim hmai chang ralh ralh chunga ka awm khum thin chung pawh hian aw ka dam zeta min la chhawn thei zel hi thil mak tak a ni. Mahse a that derna vekah ka ngai hmiah. A tirah khan mi inthlahrung chi, zawiawi deuh turah ka ngai ngawt a. Mahse a landan ang ngawt hi chu a nih ka ring lo. Kha doctor pa...huhh...kha doctor pa laktlak loh zet kha, khapa nena ka hmuh atang khan ka hmeichhe lo kawp tawh thinte ang chiaha lepchiah a ni tih ka hmu thiam nghal.





"Ka rawn kik a, i hrelo anih ka ring a, ka lo lut tawp a" ka lo melh ngur vang chuan nuam ti lo hmel a pu. "Thingpui ka duhlo" ka lo ti a. A rawn meng deuh ak "Tui min rawn lak rawh" eng nge ka rilrua awm hi ka hrethiam lo. Han tirhkual vel ka chak tlat.





"Awle, inhnuaiah ka zuk la mai ang" a thingpui rawn dah sa chu a chawi chhuak leh a. A tirah khan ani neih hi ka duhlo bur. Mahse a min cho tlat ni mai hian ka hria. Ka chezia engmah a chik miah lo te, min ngai pawimawh lo ang taka a lang te kha ka ngai thei thak lo anih kha. Hmeichhia min ngai pawimawh lotu ka vawikhat tawnna a ni hial ang chu. Chuvanga nei chu ka ni pakhat. A chezia zawiawi ang taka lang mahse lepchiah ru zek si tur anga ka ngaihna hian min cho chhuak tlat.






Tui a rawn lak leh hma chuan Library chhuahsanin kan room ah ka kalsan daih...aw...kan room 'kan' tih tawngkam kha hman ve a ngai tawh tlat. Ka ngaihtuah chian chuan ka nui hawk. Kei hian nupui ka nei ve anih chu, ka room min tawmpui tur. Ngaihtuah zui duh lovin ka lu ka thing nghut.




Room ka luh chuan ka hnathawhna thil vel chu ka dahfel nghal a. Ka tihfel hnu chuan Rinhlupuii rawn chhoh leh hmaa chhuk thlak vat tumin kawngka lam ka pan a. Mahse kawngka bulah kan inhmachhawn leh ta ran mai "Hetah i lo awm daih a , kha tui chu" tuium chu ka hmazawnah a rawn lek nghal vat a. "Kha pawh ka duh leh lo nimai rawh se" tiin ka kalpel leh daih. Ka awmdan chu a va naupangchhia mai mai tak e aw.




Inhnuaiah chuan kan inzui thla a, an lo awm kim thap tawh.
"Û, vawiinah ka dâwrah maw U Siamsiami te an lo kal a. U Puipuii hmeltha an tih thu an sawi nasa lutuk" intithei fe hian Mawimawii chuan a rawn ti barh barh a. Siamsiami chu Chennai-a kan college kalpui thin ania. Mi harh vang tak mai ania, kan thianho zinga hmeichhe awmchhun ania. A hmeichhe awmchhun ber e tilo hian buaina chawk chhuaktu a ni ziah, a nghal lutuk vang a ni ber.





Ka bula ding nu chu a biang a sen hlar mai. Mawimawii thusawi vang khan a lai a ni ngei ang. Kei erawh chu ka lo nui suk thung. Ka zep lo, Rinhlupuii hi chu a hmeltha ka ti keipawh in, mahse ka duh chi a ni lo.




"U Siamsiami chuan maw 'I û chu a vannei hle mai, college kan kallaia a ngaihzawng te hmelchhiat theih theih nen, nupui a nei fu phian a ' a ti ania aw" a nui zui har har a, ka lo rum nghut. Lalnunsiami mai mai chuh, a nghal lutuk hi chu engtikah mah a sim thei dawn lo anih hi.




"Zaninah kan chhuah lawk a ngai dawn nia" room-a kan luh rual chuan ka ti deuh tawl a. Office-a kan hnathawk thenkhat te bulah ka nupui hmelhriat tirna ni pah fawmin zan lam party ka lo sawi hmawr hmuh ve ting tang tawh sia. Vawiin lam khan zanina huaihawt ngei ngei turin min nawr ve tumhrang bawk nen zanin ngei hian kan kal a ngaih hmel.




"Khawiah maw" mak tih hmel deuh tak hian a rawn ti chhuak sap a. "Office-a ka thawhpui thenkhat te nen inhmelhriattir na ni pah fawmin party tenau an buatsaih a, kan kal a ngai" ka ti ve deuh duah. "Mahse ka pa te kha..."
"Ka hrilh vek tawh" ka lo ti sam leh mai a.




Kan chhuak dawn tih Mawimawiin a hriat chuan kan room-ah a lo tap ve chawt. A unaupa nupui hi chei a tum tlat anih hmel. "U Puipui, i inha zo tep tawh em" vawi engzat a zawhna nge pawh ka hre tawh lo. Bathroom chhunga insiam nu lah chu a la insiam zo thei mai bik silo.




A hnu rei vak lovah chuan a lo chhuak a, a inthuam dan ka hmu chiah chu ka nectie suihlai ka tawp dat. A kawrfual hring duk nghalh hak chuan a taksa vun no chek chu a tilang no zual emaw tih tur ani. A mal thui vak lovin a kak a, chu chu a zak deuh nge a rawn pawt deuh chawih chawih mai. A nghawng lam chu a phui tha viau thung.




"Mawimawi, kawrfual pangngai ka ha zawk mai ang"
"Aih, tihian i mawi alawm, lo kal rawh le i hmai chei tawh ang" Mawimawii chuan a ti sam leh et a, dressing table hmaah chuan thuttirin make up eng eng emawni a hnawih nghal mawlh mawlh a, a khat tawkin "U Puipuii chu i hmeltha e" a ti leh hluai thin, pakhat nu lah chu a lo nui mai a. An bulah chuan ngawi rengin ka lo insiam ve mawlh mawlh.




Mawimawii lah chu a lo tang mai sia, min dindun tirin thla te min han lak leh te te a. Kan chhuah meuh chuan dar 7 a lo pel deuh thuak tawh.




Remsanga te Hotel-ah hun hman kan tum a. Hmanni lawka an hawn thar a ni a. Amah lawmpuina ni pah fawmin ka hnathawkte ka hruai dawn anih ber mai chu.


___*___*___*___*____

(Naktuk chu Pathianni ania, chawlh kan tih tawh kha aw. In lo chhiar ve avangin ka lawm em em e💖)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)