OUR MARRIAGE By CVL Awmpuii (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: OUR MARRIAGE By CVL Awmpuii (Completed)

Unread post by Ngaia » January 9th, 2022, 1:05 pm

OUR MARRIAGE
By CVL.Awmpuii


Chapter 7



Hotel kan va thlen chuan an lo zi mur mur tawh. Ka rinai daihin an thahnem, keimahni chauh kan ni lo tih ka hre nghal mai. An hotel ah hian keroake room a awm nual a. Chung zingah chuanmi zawng zawng nena inchiah piah theih, zau tawk tak pakhat hi an dah tel a. Chumi hmun khera kal chu ka hnathawkte duhdan a nih miau avangin midang min chiah piahtu an awm nual dawn anih hmel.






Kan va luh chuan Remsangan kut min lo veikhum zauh a. A awmna lam kan va panphei a, ka bul ami chu a kutah nghet takin ka chelh nghal hmak. A tirah min rawn en deuh ha a, mahse min hnial lovin a awm tha ve leh mai.




"In va lo thleng har ve" a awmna kan thlen phei chuan a lo ti hluai a.
"Tlai a awm chuang hlei nem" ka lo ti sam et. Ka bula ding nu lah chu zah hmel deuh hian a hawi kual hrek hrek. Hetiang hmunah hian a la kal ngai lo zawk emawni.




"Puipui, ka thianpa chuan a duat bawk che em" nui tha chung hian Rinhlupuii chu a melh a, a zawhna tul lo lutuk vang chuan ka lo rum nghut. Ka bul ami erawh a phu deuh dat. "Ahh...imm...aw..." a ti ban charh a, a nui lui deuh sak bawk.




Kan thian dangte an lo thleng a, Rinhlupuii chu fiam tih takah an nei a. A lai chhe lutuk chu a khawngaihthlak zawk. A hmai a sen hlar a, a hnâr a sen tek bawk si. A zak thin lutuk chuan ka kâwng a rawn hmer leh vak thin, ka kamis sir chu a hmerna lamah a chuar tawh viauin ka ring.
"Sawmdawnga chu a fit bawk sia, i rim viau em?"
"Naute nei vat ru aw"
"A tih muthilh hman che pawh ka ring lo"
Hetiangte hi an fiam duh dan ania. Ka lo melh rum deuh ngur ngur hlawm nain an hrelo der hmak. Mahse tihelna lam zawng engmah a awm lo. Rinhlupuii lai chhe lutuk chu an lawm ni berin ka hria.





"Tak taka Sawmdawnga chuan nupui a nei fu hle mai che, i hmeltha bawk a, i hmel atang rengin i sual dawn lo tih a chiang sa a. Nupa hlim tak in ni dawn nia" a tawp a tawpah chuan thutak deuh zawkin Zira chuan a lo ti dap dap a. Midang ho paw'n fiam zui tawh lovin an lo pawm tlan hmel khawp mai. Ka bula ding nu pawh a thaw chhuak hak a, a nui lui ve var var.





Ka hnathawk ten thil pawimawh sawi lawk ngai a awm thu min rawn hrilh chuan Rinhlupuii chu kan awmna ngaia lo awm rih tura hrilhin min lo kohna lamah chuan ka kalsan a.





Kan sumdawnna lama thawh hlawk em em mai Mumbai atangin a lo kal ve hi a lo nia. Vai a ni a, ka pa hunlai atang tawha kan customer hlun a ni. Lirthei chungchangah buaina an neih hlek chuan kan Office hlir an lo pan thin. Mizoram an lo kal chhan te zawtin eng eng emaw kan sawi luam a. Darkar khat dawn kan inbiak hnu chuan min hawsan a, keipawh kan thiante awmna lamah ka va let phei veleh nghal a.





An awmna ka va thlen chuan Rinhlupuii kha a lo awm tawh miah lo. Khawiah nge maw a lo kal hman ni. Amah zawng in ka hawi kual thuak a, ka thil hmuh avang chuan ka ding chawt. Chu doctor pa bawk chuh. A sir kil deuh laiah chuan Rinhlupuii chu kha doctor pa tlak tlai lo zet nen khan an lo dingdun a. Rinhlupuii nui hmel te hlei hlei chuan keimaha thinrimna a rawn chawk tho chiang kher mai.





Hmun ualau taka inhmu dun lo turin ka hrilh nawn fo si a. Hei vang teh hrep hi a ni mahna Mawimawiin a chei pawh khan engmah a sawisel loh ni. A bialpa tlak tlai lo zet nena inhmuhna chance an lo zawn vang bak va ni suh. Ka ngaihtuahna vang chuan ka sa chhuak vek thei. Tunah hian helai hmun hi ka chhuahsan lo anih chuan an pahnih sawn ka phih pawp thei hial mai ang.





Hotel sira ka car park chu ka lachhuak vut a. Steering ka chum nghal pawp, mitchhingin ka thawchhuak nghal hrawih bawk. A hmel pawisawi lo tak anga lang, a chhungril tenawm ru zek si chuan ka thin a tirim hlur. Ka kawchhung hi a che rawih rawih nimai hian ka hria. Tenawm lutuk mai, lo ngawi tak rawh se a beisei phak bakin ka che ang. Zirtirna pek hlak a ngai ani. Ka ngaihtuahna avang chuan ka sa chhuak vek thei. A hre khawp ang !





Kan in lam panin ka tlanchhuak nghal a. Duh leh kha doctor tlak tlai lo zet khan rawn thlah haw rawh se, ka buaina tur a ni tawh lo. Ka chhungte bulah chuan chhuanlam ka siam mai ang.





Kan in ka thlen chuan dar 9:30 a ri thuak tawh. Vanneih thlak takin ka chhungte an lo mu vek tawh hlauh. Inchungah ka chho a, room-ah lutin ka thawmhnaw ka phelh nghal sawk sawk a. Bathroom panin shower hnuaiah ka ding far tluk tluk. Ka thin hi a ti so bulh bulh thei hialin ka hria kha mi tenawmnu khan.




Ka khumah ka lawnkai a, ka bawkkhup vang vang. Dar 10:30 a ri tep tawh a, Rinhlupuii chu a lo la haw lo. Kha doctor nen khan eng emaw an la ti dun dawn ani mahna. Kan chhungkaw hmingchhiatna tur a thlen anih chuan a chaklo khawp ang.





Dar 12 a ri tep tawh, tun thlengin Rinhlupuii a lo la haw ta lo cheu. Tlem chuan ka ngaihtuah ve deuh tawh. Mahse kha doctor nena an awmdun tur anga ka ngaihtuah chuan ka thinrimnain mi la hneh tho. Rinhlupuii ka duh vang a ni hauh lo, chhungkua tihmingchhe zawnga a khawsak ka duhloh vang zawk ania.





Thli a thaw vuk vuk a, khua a dur deuh khup bawk. Thlasik kan kai chho tep tawh bawk nen boruak a vawt deuh lek lek tawh.





Ka dawhtheihnain a tlin ta thlawt lo. A number ka dial a, 'switch off' a la inti tlat zui. Dar 12 a pelh hnu chuan Remsanga te hotel lam panin ka inkhalh chhuak leh ta nge nge. Ruah lah chu a sur bur bur tawh mai bawk si. Misual te hi a lo tawng a ni zawk emawni le. Kha doctor pa pawh khan lo thlah vat tur ania. Keia pawh tinge maw ngaihtuah hmasa miah lova ka lo hawsan thawt thawt ni. Misual te lo tawkin lo khawih tum ta se...ka ngaihtuahna avang chuan ka speed ka san zual sauh. Duhin hmangaih lo mah ila thil thalo tak a tawh chu a pasal ka nihna ang pawhin ka duh bik lo.





Hotel awmna leh kan in chu a inhlat ve tehlul nen ka speed a sang bawk a, ka va thleng thuai. Ruahsur pawh ngaihtuah ta lem lo chuan ka car atangin ka chhuak a. Huh deuh phungin reception lamah ka va phei a, thil awmzia ka sawifiah hnu chuan zanin party kan neihna room lamah chuan ka lut phei a. Mahse ka mi zawn hmel reng reng ka la hmu ta lo fo.





Beidawng zetin hotel chu ka chhuahsan a. Ka car a ka lut leh mai tur chu ka thil hmuh avang chuan ka tawp deuh chawt.




Rinhlupuii chu hotel bathlar, ka awmna atanga hla si, thim lai deuhvah chuan amahin a lo ding anih chu!




Hmanhmawh zetin ka va pan phei a "Rinhlupui" ruah a sur nasat em avangin ka tawng a hriat phak loh ka hlau a, ka au ring viau. Ka kohna hriain a lo hawi zawk a. A mi nghah tak lo thleng thut ang mai hian a rawn tlan phei a. Min rawn kuahin a tap chhuak nghal hawm hawm.





Ka kawrah na zetin a hmer ngawt ngawt a, nghet zetin min kuah bawk. Chuti taka a rawn awm avang chuan a mangang hle niin ka hria, hnem tum takin ka lo kuah let ve a, a hnungah ka chul hliau hliau bawk.




Chutah inlahrang hlekin a hmai zartu a sam hnawk niai chu ka tuai thuak thuak a. "Hahdam rawh le, kan haw dawn nia" ka âw dam ta lutuk chu kei ngei pawhin mak ka ti. "Ka lo nghak che a" a tawng tha hlei thei lo. "Imm, ka lo phone che a, i pick up lova" hnem tum tak chuan ka ti a. "Ka phone a thi daih alawm" a rawn ti tiau.




A mit a sen ram a, a hnar a sen tar bawk. A ding khur dar dar a, kaihsawn ka tum chuan a kal lawk thei lo. A khur nasa lutuk tlat. Ka pawm kang nghal nawlh a, a te that mai, mahse min hnial bik lo, a kal tha thei dawnlo tih a hrechiang a ni mahna.





Car-ah chuan dimtein ka nghat a, a taksa a zawi deuh ngiai mai. Engtia rei nge khalai hmunah khan a lo thut tawh ang? A hlauhthawn dan tur te ka ngaihtuah chuan ka lainat reuh lutuk. Min lo nghak ve ngat ngat chu a ni awm sia.




Kan inpui lam pan lovin Durtlanga ka in lam ka panpui daih. Hotel nen a inhnaih zawk a, kan thleng vat zawk ang. A thuttir ang ang khan a mu zawi nghiai a, a chau hle anih ka ring. Bathlar ah khan lo ding ve bawk mah se ruah a sur nasa sia, a theh huh vek tho.




Motor ka tihdin chuan a rawn meng diar diar a. Ka dinna lai a hmuh chuan min rawn melh zawk. "Helai hi a hnai zawk a, tah hian zanin chu riak mai ang aw" ka tih chuan a bu nghat a. Ka chhuk a, a thutna lam ka pan phei chuan kawngkhar a lo hawng ve mek. Ka va ngaihtuah vat a, mahse rang deuhvin a rawn ding chhuak zawt. Ka pawm leh a hlau ni hmiang. Naupangchhia reuh lutuk.





Inchhungah kan inzui lut a, room lam ka pan chhoh pui a, engmah sawi lovin min lo zui chho ve det det. Room ka luh chuan kawngka zawnah a ding deuh dat "Lo lut la" zanin ka tawngkam nem lutuk hi ka inawih lo hial zawk. Hawikual deuh thuak pahin a lo penlut a.




Helama ka riah deuh zeuh zeuh vang hian ka kawr thenkhat pawh a awm sa nual a. Ka drawer hawngin ka Tshirt pakhat leh kekawr lum chu ka la chhuak a. Ha tawk dawn lo mah se kawr huh hak reng ai chuan a tha zawk tho tho.




"I kawr kha a huh nasa emai , i hak reng chuan i dam lo ang. Heihi la la va inthlak rawh" ka thil ken chu ka lekchhuak a. A lo ban vat. "Sawmdawng..." ka hming a rawn lam ve sap. A ngawi leh daih sia "Sawi la" drawer khar pah chuan a lam ka hawi a. "Heta kan riah daih chuan ka nu leh pa te kha an ngaih a thalo ang e, kan awmna an hre dawn si lova" a rawn ti sep a.
"Ngaihtuah suh, ka lo hrilh mai ang. Va inthlak tawh rawh le" bathroom lam chu ka melh zeuh a. Engmah sawi tawh lovin a lut zui ve mai bawk.




A inthlak chhung chuan keipawh ka lo inthlak ve a. Puansin tur lachhuakin khumah chuan ka dah a. Ka lukham leh puansin tur chu couch lamah ka theh phei bawk. Zanin chu couch ah hian ka mut mai a ngaih hmel.



Mawimawii chu message in Durtlanga kan riah thu ka hrilh a. Naktuka hmuh mai tur kan lo awm loh chuan an lo mangang lutuk palh ang.



Bathroom atanga a rawn chhuah hmain ka lo mufel vat a. Ka ban pahnih khamin zangthalin ka mu a, mit ka chhing vang vang.




Helai hmuna ka kal hnuhnun ber tum kha ka ngaihtuah chhuak lo theilo. Rinhlupuii nen tho anih kha kan awm, buaina a lo tawh zan kha. A hmaa kan kal dan leh tuna kan kaldan chu a inang lo khawp mai. Tunah chuan nupa angin kan kal tawh tlat.





A inthlak rei em em mai lehnghal a. Mahse hei chu hmeichhe danah ka ngai tawh. An insiam chhungte, an inchei chhungte hi a rei thei ngat ngat khawp mai. Eng em em nge maw an tih bik thin ni.




Bathroom kawngkhar a rawn ri khep a. A hnu rei vak lovah a ri deuh set set a, khumah chuan a mu ve nghal niin ka hria.




"Sawmdawng... Sawmdawng..." min sawi det dettu an awm avang chuan zawi muangin ka mengchhuak a. Rinhlupuii nen kan mit a intawng nghal siah. "I phone saw a ri char char a, a ri ngun bawk sia. A pawimawh anih ka ring, tunah khan a tawp chiah" a ti a. Ka tho chhuak a, ka mutna bula ka phone dah chu ka ban nghal vat.




Rinhlupuii pawh chu a kalsawn ve nghal a, ka t-shirt a hak chu a lian khawp mai, ka kekawr a hak lah chuh! Sawi lo zawk teh ang, nu tê zawk zawk a nih pawh ka hre miah si lova. Mahse ka thuamhnaw chu a thawl mah mah ani, a ha pawh a nilo. Ka thawmhnaw in a ha a ni zawk mah.





A mutna chu a thlep fel nghal mawlh mawlh a. Ka phone a rawn rik leh chiah chuan Rinhlupuii hlir ka lo en tih ka hrechhuak chiah. Ka lu thing nghutin ka phone chu ka en a, hna thil lam a nih hmel.





Phone ka hman zawh chuan dah mai ka tum a, mahse a rawn rik zawm leh zat. Tun ami chu ka nu a ni ve thung. Ka pick up nghal vat a.



"Aw..."
"Bawiha, in tho tawh em?"
"Aw, tho tawh e"
"In thawh tawh tho chuan khawmuang lovin in lam in lo va pan phei nghal mai dawn mi"
"Inah in awm lo ami"
"Aw...Tukin zing khan i pu bathroom ah a tlusual a, hei damdawiin ah kan vaiin kan phei ve nghal daih a. In nghaktu an awm si lova, in hmanhmawh theih chuan lo va phei vat rawh u" a rawn ti zung zung a.
"A va zialo ve, tunah eng nge a an a" Rinhlupuii ka mutna siam fel mawlh mawlh chu a lo hawi zawk a.
"Ngaihtuah awm em em chu a ni lovang, doctor ten an la en mek a. I pi hi a mangang deuh a, kan lo hawsan thei rih lo" a rawn ti leh zung zung a.





"Kan lo kal ve zawk dawn mi" ka tih chuan in lo nghak zawk turin min ti a. Phone kan dahfel hnu chuan Rinhlupuii chu thil awmzia ka hrilh ve luam a. A pawi tih thu a sawi ve nang nang.




Muangchang hman kan nih loh vangin haw turin kan intifel zung zung a. Rei vak lovah kan in lam kan pan nghal.





Motor chhunga kan luh hnu chuan ka pu chungchang chu a sawi a sawi ve mai. "Kum upa lam an ni tawh bawk sia fimkhur tur asin mawle, a zialo ka ti e" a ti leh nang nang thin. A ngaihtuah ve takzet tih ka hria a. Mahse han sawipui ngaihna vak ka hre bawk si lova ka lo umm e liam vel a ni tawp.




Rinhlupuii mak na em em chu ka chhungten an kawm nel nghal thei vek a. Amah paw'n a zahthiamin a nel thiam em em bawk. Ka pi leh pu pawh hi an kum ang mil hian a kawm thiam tlat. Nurse anih vang pawh a ni mai thei.





In kan thlen chuan eirawng a bawl nghal mawlh mawlh a. Ka nu nen pawh phone in an inbe ve luamin ka hria. Keichu Library ah ka chho tlang nghal a, hna tlem khawih tur ka nei tlat.




Ka pa te lo haw thu Rinhlupuiin min rawn hrilh chuan inhnuai lamah ka zui thla ve nghal a.




Ka pi leh Remruata pawh an lo awm ve a. Ka nu chu chanchin ka zawt ve luam. Ngaihtuah awm lutuk anih loh thu leh ka putea te nupanin an awmpui rih thu a lo sawi chuan ka thaw ve huai mai.




Ka pi leh Rinhlupuii chu an titi nghal siam siam a. An lo thlen tirha ka pi mangang lutuk hmel pawh kha hmuh tur a awm leh mang tawh lo. Rinhlupuii hi mi mak tak chu a ni ve chiang a ni. Ka pi titipui dan lah chu a hre phian mai bawk sia.



Remruata leh Mawimawii pawh a ngai tetein an inkhawih te leh teng tung tawh. Inngai hle si hi an awm dun hlekin an inti te nghal teng tung zel mai.



Ka nu leh pate intihfai zawh hnuin tukthuan kan ei ve ta chauh. Rinhlupuii hian ka rinaiin eirawng bawl a thiam zek. A thil siam reng reng hi a danglam nalh zel. A eisiam a hriat ka ti mai, a tui danglam bik thin.




"Nurse hmeltha-i chu eirawng bawl pawh a lo va thiam em em" Remruata chuan a ti hluai a. Hetia a ko ziah hi ka duhlo, a chhan pawh ka hrelo, ka duhlo ve tawp a nimai.
"Khatin ko ziah suh" Mawimawiin a lo ti bak leh hlar tawh.
"I hmeltha ve si lova i lo thik em ni? Mawihmeltha tih ve te kha i lo phut ange Mawihmelchhia" an tan leh dawn ta e.
"I zak lo lutuk. U Puipui ti ve mai rawh" a melh pah ram ram a. Remruata lah chuan ngeiawm deuh hian a mit a siai khum zuk. Pakhat nu ngei tawk a lo tling leh em em mai ni.




An inhnial leh tak tak hmain ka pi chuan a lo khap vat a. An tawp ve ta hram.




____*____*____*____




Ka pu pawh karkhat tha zen zawn damdawiina a awm hnu chuan a chhuak ve thei ta hram. Mahse kum upa lama chesual a nih vangin a hma ang em em kha chuan a chak tha thei tawh dawn lova , fimkhur chhunzawm zel turin doctor pawhin a chah zui nasa khawp mai.





Rinhlupuii pawhin vawiin atangin a hna a zawm veleh tawh a. Zing lamah ka thlah a, haw lamah pawh ka lam leh ang. Nupa kan ni ve miau sia, hetiang tala kan awm ve chu a ngai tlat alawm.





Ka pu damdawiin chhuah lawmna ni pah fawmin an in lamah kan chhungin chaw kan ei phei dawn a. Office pawh ka chhuahsan hma khawp mai. Tihian Rinhlupuii ka lam phei ang a, ka pu te inah kan tlang nghal ang.





Hospital ka va thlen chuan an lo vei suau suau a. Hnathawkte leh damlote an insut pel zung zung a, an buai hmel hlawm sap sap khawp mai.





Nurse duty na lam ka pan phei chuan min lo en deuh thap a, an inhrilh ru leh ser ser thin, hmeichhe ho tak hi chu a, thil mak pawh va ni suh.




Chu doctor pa bawk chuh ! Rinhlupuii chuan thil a ziak mawlh mawlh a. A bula dingpa chuan eng emaw ni hi a hrilh mawlh mawlhin ka hria. Ka kham zozai ta khawp mai. Mahse tun tum chu an hriat lohva kalsawn mai mai ka tum tawhlo.




"Bawihi" sawpa sawn mi nupui a ni tih hi hre teh se. Ka lam an lo hawi rual zawk a. Rinhlupuiin min rawn hmuh chuan a meng buai deuh nak a, mahse a rei lo, a insiamtha leh vat.




"Bawihi...i hman tawh chuan kal ila" an lam pan chuan ka ti leh kher. Ka koh dan chu mak a ti tih a mitmeng bah deuh nak danah hai rual a nilo. "Imm...aw...hman a nimai" a thiltih lai dahfel sawk sawk pah chuan a ti a.




"Doctor Rinpui, Ruati ka lo kohsak mai ang che aw. Ka kal a ngai tawh sia" a bula mi melh pah chuan a ti a. Chutia a sawi kher vel chu tullo ka lo ti khawp mai. "Aw, keiman ka lo tifel tawh mai ang, kal rawh" doctor pa chuan a lo ti tha ve mai.





"I hna hi bansan i duh anih loh chuan fimkhur tawh ang che" motor khalh pah chuan ka ti nghet churh a. Ka thusawi chu mak a ti hle ni tur ani, hrilhai deuhvin min melh kiau a, engmah a sawi lem hlei lova. A ngawi reng mai te hian ka thin a tirim thut thin.




"Doctor Rinpuia vanga khatiang thu kha sawi i nih chuan engtin mah kan awm lo. Ka hnathawhna hmuna kan doctor ve mai a ni. Thian kawmin min kawm a, chu zawng chu a nimai" a rawn ti a. Ka pu te in kan thleng tawh a. A rilru nuam zan lovin a rawn sawi chhuak a ni mahna.




"Insawifiah vak kha a ngai lovang. I duh leh i kawp thei ka tih tawh kha. Mahse hmun ualau ah ni lo" ka aw chu a chang tha beng bawng khawp mai. A rawn thaw chhuak hak a. Hahthlak tih hmel fe hian min melh bawk. "Kan inkawp lo" ti ve nghatin car atang chuan a chhuak a. Ka pu te in lam a pan zui nghal dawr dawr. Phat buai chu a tum ve nasa khawp mai.






Inchhunga luh ve mai ka tum chu ka phone a rawn ri a. Caller ID ka en chuan ka phun hluk.
"Tinge tunlai biak tlang i va har ve" ka beng a ka nawr rual chuan a rawn ti nghal that. A âwm ve tho, a phone call ka chhang ngai miau lova.
"Pawimawh a awm em" ka âw atang pawh hian ka nin zia hrethiam se ka ti khawp mai.
"Ti teh Dear...tinge min lo biak i tum miah loh" Thari chuan a rawn ti nar nar a. Ka engah mah zu han thawk pha lova mawle.





"Biak chhan tur che ka nei em" ka ti let khauh.
"Khati kha chuan awm teh suh. Mizoramah ka rawn haw leh tawh ania. I awm chhung chu ka awm ve char char tawh rih ang" a rawn ti a. Engah teh vak ka ngai leh chuang lo.
"Chuan..." Inchhung luh vat vat ka duh tawh.
"Naktuk tuk hi ka nu birthday ania, naktukah min bazar pui rawh" pangchang aw deuh tak hian a rawn ti ner ner a. Ka hnial zet a mahse min tur leh et et tawh. Ka nin em vangin ka bazar pui tur thuin ka chhang ta ngawt. Thil sual pawh a ni chuang hlei nem.





Chennai kan awm lai khan khati khawp khan min zar buai hneh a, mahse tun thlengin keimahah nghawng a la nei thei thlawt lo. Ka tan a inhawng a, a inphal em em a. A taksa a nalh a, hmeichhe vantlang chunglam kan tih ang chi kha a nia. Duh lo mahila min zar buai hnehtu leh zam hauh lova min sawm hmasa thintu na na na chu keini ang mipa thisen lum tan chuan hnar reng a theih bik ni hek lo vawi tam khum mi tawmpui tawh.






Mahse tunah chuan nupui nei tawh ka ni a. Duh taka ka neih ni lo mah se hmeichhe dang lakah inhambuai ka tum lo. Ka pa thu min chah kha ka hre ve reng tlat.





Phone ka dah hnu chuan tawi khawmuang tawh lovin inchhungah ka lut vat a. Ka pi chuan min lo lawm leh chul tawh. Ka pu chu a la kal tha thei vak lova, tiang hawl pah chuan a kal ve thei mai.





Ka chhang chiah Sangtei te nupa pawh an lo awm tawh a. Ka cousin te ho pawh an lo awmkim thawkhat tawh chuan ka hria. Ka sawi tawh kha ka nu te lam hi chhungkaw hung pangngai tak an nia. Hetia kan han inhmukhawm nak nak tawh hi chuan kan ri ve le lu zel.




Rinhlupuii zawngin ka hawikual deuh na a, ka hmu mai lo. Choka lamah eirawng bawl a pui pawh a ni mai thei. Ka nu ûnau te nen chuan hna chungchang vel kan sawiho a. Ka pa pawhin kan hna hmachhawp te chu a sawi ve charh charh. A hmaa ka sawi tawh ang khan ka pa hi chhungkaw belh mumal pawh nei lova rim taka thawk a rawn hlawhtling chho ta ania. Ka nu te lam thung chu chhungkaw khawsak sang pangngai tak an ni thung. Amaherawhchu ka nu unau te hian ka pa hi a hmusit zawngin an tawngkhum ngai hauh lo. Pangngai takin an inkawm nel vek thei.





"I lo tihpui duh kher kher anih kha, khawi helamah lo kal rawh" choka atangin Sangtei chuan Rinhlupuii a rawn kai phei dat dat a. A kut dinglam a khaisan sak va bawk. An hnungah ka pitein a lo zui a "Kan room ah first aid box a awm ka han la ange tikhan lo khai kan sak rih rawh" a rawn ti zung zung.





"Nga tinge a?" ka pi chuan thil awm zia a lo zawt thuai a. "A thil channa lamah a kut a zei thi alawm" Sangtei chuan pawitih hmel zet hian a lo ti zung zung a. Ka pi chuan a va pan phei a, keipawh ka phei ve vut.




"A na miah lo ania, min ngaihtuah lutuk anih kha" Rinhlupuii chuan ka pi en pah chuan a ti nang nang a. Mahse ka pi chuan a ngaihtuah hmel tho mai. A kut chu a lo bansak vat a. Ka va hmuh ve chuan ka rinai daihin a lo thi nasa.




Ka pitei chu rei vak lovah a lo let thuai a. First aid box a rawn ken chhuah chu ka lo ban sak vat. Rinhlupuii chu ka thutna lamah ka kai phei nghal a. Ka pi te pawhin min lo zui ve nghal a, 'a va zialo e aw' ti nang nangin a chet leh tlak tlak thin.





A kut hliam chu rinai takin a kak thuk zek a. A kutzungpui a nia, a zai fuh ve hle anih dawn hi. Ka tuam sak mawlh mawlh lai chuan min lo melh kiau a. A ner leh sak thin, a na deuh a nimai thei " A na viau em" ka ti sup a. A lu a lo thing vat. Mahse a hmel landan atang chuan a na reng tih a hriat mai. Fimkhur ve tur ania, engmah lo tihpui ve pawh an ngaih loh nen buaina min thlen reng mai.





"Nurse hmeltha, i kut kha chawhmeh emaw i tia mi" thawveng zet hian Lalremruatan a lo ti leh hman tawh. "Sawi tur tha i hriat thlawt loh chuan lo ngawi mai mai rawh" Mawimawii paw'n a dan ngai têin Rinhlupuii thlavang a lo hauhsak leh vat. Lalremruata hian an inhmuh apiangin Rinhlupuii chhaih buai hi a tum ziah a, Mawimawiin a thlavang a lo hauh vat zel. Unau dik tak ni zawk awm an ni.






"Tak taka, a na viau em" a rawn ti tha veleh mai a. Ka bul ami chuan nui sangin a nat loh thuin a lo chhang vat. "Lalrinmawii te hi inzai zawk se tha tur ania" Mawimawii a lo teu hlar a. An in umkual leh nghal. Kan la chhangchhe ang reng viau chu ani.





Rinhlupuii POV



A châng lah hian min thinrim khum chiam a. A châng lahin min ngaihtuah awm ang takin a awm leh a. A awmdan hi hriatthiam a har thlawt. Malsawmdawnga mizia hi ka hrechiang thei dawn lo anih hi.




Doctor Rinpuia nena kan awmdun lai lah hi min lo hmufuh thei phian bawk si. Kan inkarah engmah awm lo mah se ka pasalin mipa dang nena min hmu ziah chu ka awm a nuam lo ve ringawt.




Vawiinah pawh khan min rawn hmu fuh leh chat anih kha. Chuan, engtin nge min rawn koh kha 'Bawihi' min rawn ti anih kha. Ka ngaihtuahna zet chuh! Ngaihtuah zawm duh lovin ka kut min tuamsak tu chu ka melh ta kiau a.




Ka kut min tuam sak zawh hnu chuan choka lama phei an phal tawh miau loh avangin a bulah ngawi rengin ka thu tlang ve ta zel a. Hna chungchang hlir an sawi, ka hrethiam ve teh teuh lo. An zavai mai khan ka kut thi hlek mai mai kha min buaipui khu chuk mai ania. Chhungkaw fel tak zawng an ni, ka pasal ber hi ka duh tak ni phei sela chu duhthusam a ni ringawt ang.





Sawmdawnga chhang chiah U Sangtei te fanu naupangtê chu ka malchungah a thu at a. Ka phone ah YouTube a en melh melh a. A khat tawkin a hriat loh min zawt leh zeuh thin, tha takin ka lo chhang ve zel bawk. Mak deuh mai chu naupangte nisi min nel ve nghal em em a, a nu pawhin mak a ti. "Kan chhungte min rawn tlawh rengtute pawh a nel mawh tehlul nen nang chu a vawikhat hmuhna che atangin a nel nghal mai che ania" a ti ve hial anih kha.





Chaw ei an peih fel hnu chuan kan va phei ve vat a. Kan nupain dawhkan min kil tir ve thlap, thutna kan indaih viau lo nen inchawi sawn pawh kha ka pawiti miah lo ania. Mahse upa zawkten kan nupaa kil dun ve tura min tih tlat avangin kan hnial lui ta bik lo.





An zavai mai chuan min duhsak a, ka beisei phak bakin an fel vek. Ka huphurh ang em em kha chu a ni lo. Remruata lah khan min fiam kual reng a. Ka hmuh tirh kha chuan zak thei lo leh sual zet turah ka lo ngai kha ania. Mahse a fel lutuk ringawt, fiamthu a duh laileng khawp a. An chhungkaw tihlimtu ber chu a ni pakhat ve dawn nih hi.




"Nurse hmeltha, naute in neih hunah a hming ka phuah ang aw" Remruatan a rawn tih chuan ka ip chawih mai. Ka bula thu pa lah chuan ngaihtuah lo zet hian phone a hmet mual mual a. "I zak theilo ve chiang e" lo titu chu Mawimawii bawk a ni. "Naute pawh a awm hma hauha chutiang lo sawi" pitei, Remruata nu chuan a lo ti nang nang a.




"U Sawmdawng, nei ve vat ru i faten ka fate an ngam lo nasa dawn si" Sangtei pasal chuan uang deuh hian a rawn ti hluai a. Sawmdawnga pawh a lo hawi chhuak ve vat. Kan inmelh chiang teh asin. Chutah Sawmdawnga chuan "Kan hmanhmawh lo" a lo ti chhuak sup.




Ka pi a lo tawng ve ta vat a " Bawiha chutiangin an ti ngailo. Neih vat theih chuan a tha, i pu nen phei chuan kum upa lam kan ni tawh a. I fate hmel hmu lova kan liam a hlauhawm" a rawn ti dam dap a. Ka pu pawhin a lo thlawp khawp mai.




Naute neih chungchang an sawi deuh char char a. Kan nupa chu min fiam leh nak nak thin. Kei erawh an thusawi vel avang chuan ka lo sa hat hat thei. Ka bula thu pa lah chu a ngawi ngul a. Eng nge a ngaihtuah tur awm ang ka hrethiam lo.





Chaw kan eikham hnu chuan rei kan awm tawh lo. Kan in a inhlat deuh bawk nen kan awmrei chuan zan a rei hman lutuk ang.



Kan bulah Mawimawii a rawn chuang haw ve a. A ri leh barh barh tawh. A tawngduh a, mahse tawngthei kan tih an chi kha a ni miah lo ania. Amah hi mi harhvang chi ve hrim hrim a nia. Ka ngainat zawng tak a ni bawk. Remruata chanchin ngawt a sawi a, a insawh thinrim vel ni berin ka hria. Ka lo nuih leh hak hak thin.


___*___*___*___*___

(A plot hi ka duan lawk sa diam tawh a. Reader's te ka ngaih pawimawh loh vang che u ni miah lovin in duhkhawp loh lai leh chutiang khatiang chuan awm se in tih lai te kha han siamrem mai a harsa rih a, ka lo duan sa a buai mai ka hlau bawk si. Mahse theihtawpin in duhdan turin siamrem ve ka tum zel tih min hriatsak ve ru aw. In chungah ka lawm thin e♥️)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:05 pm

OUR MARRIAGE

By CVL Awmpuii




Chapter 8




Sawmdawnga POV



Kawngka kik thawm ka hriat chuan ka lo chhawn vat a. "I hman tawh em?" âw tliang ral hian Thari chuan a rawn ti lut a. A tirah ka bangbo deuh na a ka hrechhuak leh zawk. A nu birthday party na tur vela bazar puiah min sawm tak kha. Lo kal lo sela chu ka lo mangnghilh daih dawn nih hi.




Ka phur fahran lo khawp mai. Engtin nge maw a lo luh tlang theih reng reng ni. Ka secretary pawhin a lo dang lo emawni. "Kal vat ila" a rawn ti leh nar nar tawh. Ka kalpui vat loh chuan min zar buai reng ang a, kalpui vat kha a tha zawk ang.




Bazar tawt zetah chuan kan inhnawh phei a. Intineitu zet hian ka banah min chelh ran bawk. Ka dang buai peih lo. Thari hi chu mi pakhat a tling kan tih ang mizia nei kha ania. An khawsak theih mai bakah hlauh vak hi a nei lova han zah pah vak lah a nei hek lo.




Kan mi tawhte nen kan insut buai deuh apiang chuan a phun leh hlak thin. Dawr lian zetah hian min luhpui a. A neitunu nen min inhmelhriattir danah dawr neitunu chu a cousin a nih hmel. Birthday baloon eng eng emawni a lei tun a. A thil duh ho a kawk kual zung zung bawk. Nutling pui birthday lawmna tura baloon han lei tawp mai chuh. Tunlai milianho khawsak dan pawh hi a uchuak mah mah thin zawng a ni.





A cousin dawr atanga kan chhuah dawn chuan nidang pawha kal leh ziah turin a mimal tak pawhin min sawm nasa khawp mai. Ka lo umm e liam vel mai mai ringawt.





"Ka ril a tam, thil ei leh lawk ila kan haw dawn nia" a rawn ti leh ngher ngher tawh. Dawr pakhat pangngai ve takah hian ka luhpui a. A thil ei duh zawng chu a ziak thla mial mial a. Ka ei duhzawng min lo zawh ve chuan ka lo sawi ve sup bawk.





"Heihi kan chah reng reng lo" kan eitur an rawn dah chuan Thari chu a lo teu hlar mai. "Mahse heihi table 5 a ni bawk sia" hriatthiam loh hmel zet hian eitur min lo petu, nuvalai lam tawh lek lek chuan a rawn ti chhuak sep a. "Table 5 a nih leh nih lohah ka buai lo, heng hi kan thil chah a ni lo la let leh vek rawh" a hma ai mahin vinin a ti leh a. Mi mit chu kan chungah a fu deuh far tawh.





"Kan tihpalh ani. Order dang lo ziak leh mai la, kan lo pe leh mai dawn che u ania" inthlahrung tak hian a ti leh zung zung a. "Ka ziah sa ang kha kan duh. Fimkhur lo lutuk mai. I hnathawhah chiang ta che" a ti let leh zek. "Kan lo fimkhur tawh dawn nia" a ti zawi leh sep a. "Khatia thupha chawi reng lo khan kal vat ta che. Nangni ang hnathawk ho lah hi..." a tih leh lai mek chuan khap ka lo tum a, mahse min chet khalhtu an rawn awm.





"Hey, ngaihdam a dil mawlh mawlh che a ni lawm ni. Tinge i hauh duah kher a?" eitur min lo petu bulah chuan a rawn ding nghal zat a. Thari chu chiang takin a melh kalh a, a hnuah ka lam a lo hawi veleh a, thip zet hian min melh. Rinhlupuii thiannu Ruati kha a ni. "I lo inrawlh ve na tur a awmlo" thamlo zet hian Thari chuan a ti let ve sak a. An inmelh thip dun ren rawn viau.






"I nu rual anih hi i hria em? An tihdik lovah ngaihdam a dil che a, tha tak khan lo dawngsawng mai ta che. A hna chungchang lehzel i sawi kai kha a tulna pakhat mah a awm lo" Ruati chuan a ti let leh sak. Thari chu a mitmeng atang ringawt pawhin a tek hlar hlar tawh viau tih a hriat theih. A tum tawk a tawng ta angah ka ngai hmiah. Inrawlh buai ka tum lo, hmuhnawm thlirin ka lo thlir tawp.





"Nangni ang mi tenghneng ho lah hi kan intan kual e te in ti ve khanglang a" a sawi zawh rual rual chuan a kawr awm a huh nghal that. A rawn dingchhuak hluai a, Ruati chu ban mai a tum a. Ka lo che chhuak ve ta vat. Buaina tam zawk a thlen belh chuan mualphona a tam mai mai.




"Engtin nge khatiang a min tih ngam zawk a" ka man behna atang chuan talchhuah a tum fat fat a. Mahse ka man hneh lutuk tlat. "Heng mi tenghneng i tihte zara ei leh in hmu a, nuam taka khawsa thei i ni tih lo inhre ve mai mai ang che" Ruati chuan a rawn ti leh sak a.





Chutia kan buai deuh takah chuan dawr neitunu te an lo kal vat a. Thupha an rawn chawi luam a, Thari chuan a la duhkhawp lo hle mai. Mahse kan chhuahsan vat a tha zawk ang.



Dawr atanga ka pawt chhuak tur chu kawngka sir deuh a ka mi hmuh avang chuan ka ding deuh dat. Rinhlupuii chuan kan chezia min lo en ve kal anih chu. Mahse ka va melh ve takah chuan a hawisawn vat a, a thiannu lamah khan a kal ta daih.






Ka inthiamlo deuh viau dawn naa ani pawhin Doctor Rinpuia a neih kha maw tiin ka inthiam chawp leh ta daih. Chuloah ngaihzawng nei pawh ka ni chuang hlei nem.




Office-a ka let leh hnu chuan ka boruak tawnin a zir lo bawk nen ka thinchhe hlur mai. Ka secretary chu ka ko lut vat a. Ka phalna tellova tumah lo luhtir tawh lo turin nghet takin ka chah a. Thari a lo luhtir chhan pawh kha a lo tihluih tlat vang a ni awm e. Henu hi chu a ngaihna a awm hlawl lo a ni.





Hna pawimawh zual ho chu ka tifel zung zung a. Haw vat vat ka duh, vawiin ka hun tawn zet chu ka hne lutuk tlat. Ka lu a na deuh ngut ngut bawk si, ka awm a nuam chiah lo.






Kan in pana ka tlan lai chuan car steering sira ka dah ka phone a rawn ri a, ka ban chuan Hruaia a lo ni, min lo call tehnawlh chu mak ka ti lek lek.
"Aw, Hello" pangngai tak chuan ka ti a.
"Sawmdawng, tunlai in dam tha em?" a rawn ti dam thluam a. Kan dam that thu hrilhin eng nge an an ka zawt let ve luam bawk.




"Zanin chu lo leng phei ula" a rawn ti leh a. Ka ngawi deuh vung vung. "I nau hrilh chhin la" tha deuh chuan ka ti ve mai a. "Ka sawm alawm. Nangmah zawt tur chein min tia 'Sawmdawnga thu thu a nimai' a tih ve kha" a rawn ti let vat. Engtin emawni tak hian ka awm. Chutia ka thu a lo ngaichang chu mak ka ti angreng viau, mahse ka chhungril tak chuan ka lawm khawp mai.





Zanah chuan kan len phei tur thu hrilhin kan inbiakna chu kan titawp a. Haw vat vat duh hle si kha vawiin Restaurant a thil thleng vang khan Rinhlupuii chu ka hmu hreh tlat pek anih chu. Eng sual mah ka ti miah lo, mahse hmeichhe dang nena min hmuh vang khan a lo ngai kawi viau mai thei ani.






In ka thlen chuan motor hung remin inchhungah ka pen lut vat a. Ka nu nen choka ah eirawng an lo bawl mek niin ka hria. An titi sep sep ri chu ka hria, mahse an thusawi tak ka hre thei lo. An rawn nui chhuak leh hak thin.





"Sawmdawng, i lo thlenna a rei tawh em?" inchung ka chho tur chu ka nuin min lo au ding leh rih. "Ka lo thleng chiah" ka ti tha ve mai bawk a. "Puipui, kha chu ka lo ti ang. Hei lo phei rawh in pa a lo haw ania han inthlak pui rawh" choka lam hawi chuan a ti lang lang a. A va tullo mai mai tak.





Rinhlupuii chu choka atangin a lo chhuak phei vat a. Ka nu pawh choka lamah a let phei ve nghal. Inchung lam pana ka chho chu min lo zui ve mai a.





"I û in min lo bia a" room kan luh hnu chuan ka ti a, ka kamis kawrkilh ka phelh pah mawlh mawlh bawk. A lo hawi vat a, mahse ka kawr ka lo phelh vang chuan a hawisawn lehnghal. Nurse a ni a, mipa taksa te chu a hmu fo awm sia, mahse hetia ka awm hian a chelai vek zel.




"Eng nge a lo sawi a" khuma ka kamis theh thlak lak pah chuan a rawn ti ve sep a, min en chuang lo. "Zaninah kan va leng phei dawn em ni ang?" ka ti a. "I thu thu a nimai" ka kamis chu balbawmah a khung nghal a. "Anih chuan kan va leng dawn nia" tha deuh hian ka ti a. Bathroom luh ka rual nghal bawk.






Kan inneih atangin an in lam pawh ka la tlawh pui miah lo tak alawm. Va len phei pui ve kha a tha hrim hrim.




Chaw kan ei lai chuan zanin len kan tum thu chu ka chhungte chu ka hrilh ve luam a. Anni pawhin an lo remti khawp mai. Ka nu phei chuan len phei pui vat nachang ka lo hrelo chu min zilh deuh lek lek mai.





Chaw ei kham hnu rei vak lovah chuan kan kal chhuak ta nghal a. Kan veng hi inhlat lutuk ni lo mah se hnai tak ti a sawi tur chu a ni lo.




Motor-ah chuan ngawi rengin kan thu a. Ka bul ami chu car tukverhah dakin pawn lam a thlir vauh vauh a. "Vawiinah khan eng nge in tih a" ka ti chhuak ta nge nge. "Khawiah maw?" ka lam a lo hawi vat a "Restaurant ah khan" ka lo ti sup. "Ee...Ruati kha ka kalpui lawk a, a pi thil tur kan la a" tha deuh chuan a rawn ti ve mai bawk.




"In inhmeh lutuk" kan ngawih deuh vang vang hnu chuan ka lam hawiin nui sang hian a rawn ti a. Ka hrethiam chiah lo mahse ka va melh chuan vawiin chungchang a sawina a ni tih ka hrethiam chiah, Thari nen min hmeh bel tihna anih chu.






"Thil hi kan hmuh ang vek a nilo ania" ka lo ti let daih. Hmeichhe dang nen min hmu kha ka rin ang em em in amahah nghawng a neilo anih hmel. Mahni pasal te hmeichhe dang nen an inzui lai hmu a inhmeh titu awmchhun a ni hial ang.




Ka puzawn te in kan thlen chuan min lo lawm thiam khawp mai. Hruaia fapa kha a lo tlan ter ter a, a nitei a lo kuah thak. Rinhlupuii pawhin duat zet hian a lo kuah let ve a. A vahpa chuan thil a hrilh nghal niap niap mai.




"Bawihte, a nitei te kha lo thuttir phawt la" Hruaia nupui Nu-i chuan a lo ti vat a, a kutin a fapa chu a hui zauh bawk. Rinhlupuii chuan a vahpa chu a pawm nawlh a, thutkhawmna lam kan pan phei nghal.





"In lo lang har kan lo ti khawp a" ka puzawn chuan a lo ti ve chuar chuar a. "Hna ah kan buai dun deuh a, nachang ka lo hre vat lova , a zialo tak tak" thupha ka lo chawi ve luam.





"Mambawih, i thingpui lum kan in khat tawh. I pa pawhin a sawi sawi a, i lum angin kan thiam ve si lova va lum ta che, in pa pawh hian a duh ang" nui hak hak pahin ka pizawn chuan a lo ti vat a. Rinhlupuii chu a tho vat a, a vahpa kai chungin choka lamah an kal phei nghal.





"Mambawihi chu a buaithlak viau em?" ka puzawn chuan a rawn ti a. "Engti zawngin?" ka lo ti vat. A sawi tum ka man chiah lo. "A awm ngai lohnaah chuan a tlangnel mawh khawp a. Engmah inhriatchianna hman em em pawh awm lovin in inneih ta bawk sia. Inchhung lamah tih a harsa viau em? A buaithlak deuh chuan in lo hrethiam hram hram dawn nia. I chhungte nel mai pawh a harsat deuh rih ka ring a" a rawn ti ta duah a. "Harsa love, engmah buaithlak a awm lo an innel tawh hlawm khawp asin" ka lo ti ve vat. Ka ti tak tak, amahah sawiselna tur ka chhungte hian an neih ka ring lo. An nel em em zawk anih kha.






Hruaia nen chuan hna chungchang vel kan sawi luam a, ka puzawn pawhin thurawn te min han pe ve luam bawk.





Rinhlupuii chu a vahpa nen an in chhaih nui har har reng a. A hlim hmel khawp mai, sawti taka a nui hmel saw ka la hmu ngailo.




Kan haw meuh chuan zan a lo tlai ve duak tawh. Kan chhungte pawh an lo mu vek tawh.



Kan han mu tur chu couch ah ka puansin nen ka phei leh a. Rinhlupuii pawh bathroom atanga rawn chhuakin mu turin a insiam fel ve zung zung a.



"Sawmdawng..." kan mut hnu rei vak lovah chuan a rawn ti chhuak sep a. Khumah a mu a, kei couch ah "Umm..." meng chuang lo hian ka lo ti fan ruih a. "Ka lawm e aw" a rawn tih leh sep chuan ka meng chhuak vat a. Khuma saisir pahin a mitmeng fiah zet hian min lo melh kiau. "Engvangin" ka ti chhuak sup "Kan inah min lenpui a ka lawm" a rawn ti reuh anih chu. "Ka tihtur alawm" ka lo ti tha ve mai a "Muhil rawh" ka ti zui leh sup. A ri set set a, a mu rem niin ka hria. Engmah a sawi zui tak lovah chuan a muhil zawm ve maiah ka ngai.






"Sawmdawng... Sawmdawng" tia min rawn sawi dat dattu an awm avang chuan chiang lo ruaiin ka harh a. Ka lu a na ngut ngut mai. "Sawmdawng, hnaah i kal dawnlo ami" Rinhlupuii chuan a rawn ti leh sep a, ka darah min sawi deuh dat dat bawk. Ka pang a rawn dek leh a "Ehe, i khua a sik anih hi" a rawn ti leh hluai. A tho kang zui vat a, keipawh thut chhuah mai ka tum a, mahse ka lu a rawn hai muai muai mai. Ka mu thla leh dawt.





Rinhlupuii chu damdawi leh tui kengin a rawn let leh vat a, couch ah chuan thei leh thei lovin ka lo thu bawk. Ka lu na ngut ngut chu a ngaihna ka hrelo kher mai, ka dawm ngawt ngawt tawp.




"I khawsik hi a sâng lutuk" a kut nem thep chuan ka chal a rawn dek leh a. "Kha damdawi hi ei la, a chhawk vat mai ang che" damdawi leh tui chu ka hmai zawnah a rawn lek vat a. Ka lu ka lo thing nghut.





Pathian zarah ka vannei ka ti dawn nge dam sam loh em em hi ka nei ngai lo. Na deuh hlek ka neih pawhin ka nghak a, a reh veleh mai zel. Chuan, damdawi ei hi ka hreh tlat.





"Sawmdawng, ei la a reh vat zawk dawn alawm" a rawn ti veleh bai bai a. Eng nge maw mi ngaihsak deuh teh vawt ni. Chutia mi tur deuh sek takah chuan a kuta damdawi chu lain ka hmawm nghal a. Tui pawh chu ka in nghal khawlh khawlh bawk.





"Mu leh la a reh mai ang" ka puansin chuan min rawn khuh tha a. Ka lu chu a la nat em vangin hnial buai lovin thuawih deuh chuan ka mu thla veleh mai bawk.




Ka harh leh meuh chuan ni a lo tlang sang vut tawh. Ka lu na pawh chu a reh deuh huai mai. Tho vatin bathroom lam ka pan nghal a. Ka intihfai zawh chuan inhnuai lamah ka zuk chhuk thla nghal a.





Ka nu chuan thutkhawmna pindana a plants khawi ho chu a lo hrufai mawlh mawlh a "E, Bawiha i lo harh tha tawh maw? Puipuiin i khua a sik thu a sawi a. Hna pawh kal rih lo mai rawh, i pa pawhin vawiin chu chawl mai rawh se a tih che kha" min rawn hmuh veleh a lo ti zung zung a. Ka that tawh thu ka lo hrilh let sup.





Choka lamah ka phei a, Rinhlupuii chu gas bulah a lo ding a, eng emawni hi a chawk malh malh bawk. A thilsiam chuan hnar a verh zar mai, a rimtui hrep lehnghal. Min hnungchhawn zawnga ding anih vangin min hmu ve lo.




Chutia hna kal lova ina a lo awm chu mak ka ti viau. A duty hun niin ka hre bawk sia.
"I duty hun a ni lo em ni?" a thil chawk lai chu a phu deuh zawk, ka lo phun hluk. A rawn hawi vat a "I khawsik chu a ziaawm tawh em?" a rawn ti let daih. Ka lo bu nghut a, fritch chu hawngin tui ka in zui khawlh khawlh.





"Tinge hnaah i kal loh a?" nichina min chhan loh avang khan ka zawt nawn leh, dawhkan bula chair pawhchhuah ka rual zat bawk. "I damlo sia, ka chhuak ta lo law law" a lo ti tha ve mai bawk.




Chutia ka dam sam loh vanga hna a lo chawl ngawt chu mak ka ti viau dawn na a ka chhungte mitmei a ven deuh vang a nimai thei.




"Kha thingpui aw" dawhkana no rawn dahthlak pah chuan a ti sep a. Henu hi nizan atang khan enge maw a hriat reuh ni. Nidang zawnga ngawi reng thin kha min be reng peih.





"Ka nuin mushroom soup tui i tih thu min hrilh a ka lo siam a. Kha kha in zo la chaw ei ka lo siam ang che" a thilsiam chawk pah chuan a rawn ti a. Nupui tak takte pawh a ang ve lutuk.




Chawei chu min siam zung zung a, a thilsiam chu a tui hrep lehnghal. Eirawng bawl a thiam pawh ka rin loh nen.




Chawei kham hnu chuan room ah ka chho nghal a. Hna kal turin ka insiam mawlh mawlh. Engmah nâ ka nei tawhlo bawk a, chawhnu lama va kal hrim hrim pawh kha ka duh. Tunlai kan buai lai tak a ni bawk si. Hna thulh mai mai thei ka ni tlat lo.




Ka insiam mawlh mawlh lai chuan Rinhlupuii a rawn lût a. A kutah chhuat nawhna a rawn hûm vâng bawk. Chutia ka lo insiam mawlh mawlh min hmuh chuan a meng deuh awk a "Office ka kal dawn" ka lo ti sup. "I damlo sia a chi dawn mi" a rawn ti a. "Ka tha" ka ti leh tawp.




Engmah sawi zui tawh lovin chhuat nawhna chu room kil lamah a va lek phei a, a nawt nghal mawlh mawlh. Eng nge maw ti a a inhriat reuh ni.




Office ka thlen chuan ka secretary in lehkha ka dawn thu a lo sawi vat a. Ka han hawn nak chuan Invitation card a lo ni. Chennai-a ka college kalpui thinte khan Re-union nei tura sawmna min lo thawn hi a lo nia.




Ka en zawh chuan thlep thain drawer ah chuan ka dahlut nghal a. Ka phone phawrha off ka tum chiah chu a rawn ri nghal zat.




"Hello"
"Invitation card kha i hmu ve tawh em?" Hminga chuan a rawn ti nghal lung lung. Chennai kan awmlaia ka thian pakhat chhar thar a ni ve a. Tawng ring leng lung thei deuh mai hi ania, a thawveng viau bawk.




"Ka lo hmu chiah a" ka ti sup a.
"Kal ve ngei ngei tur anih kha aw. Rawn kal ve ang che, hei keipawh Chennai lamah ka la awm ania " a rawn ti leh zung zung a. "Hna kan buai lai tak ania ka hrelo le" ka ti leh a. Kal pawh ka rilruk chiah lo kan buai bawk si.
"I chhuanlam mai mai anih chu, in nu kha kalsan i hlau anih chuan lungngai suh. Kawppui nei tawh chuan hruai vek tur an tih kha" uang zet hian a rawn ti a, min chhaih a tum ve emawni.





"Chuloah in nu chu ka hmu ve duh. Lalnunsiamin a hmelthat thu ngawt a sawi teh vawt lehnghal a" a rawn ti leh a. Lalnunsiami pawh hi, inrawlh chikim thit thet lutuk mai.




Chhungte ka lo râwn tur thu hrilhin kan inbiakna chu kan titawp a. Mizoramah thla hnih dawn ka awm leh tawh a. Chutia Reunion te an tih takah chuan Chennai kal lehna rêmchang ah pawh a tha dawn khawpin ka hria.




Chaw eilai chuan ka chhungte chu ka hrilh ve luam a. Ka rin loh takin an lo remti khawp mai. Ka pa hlei hlei chuan "Honeymoon pawh in hmang ta si lova in hmang nghal dawn a nimai lawm. Puipuii pawhin rei deuh tak chawlh la sela. Kar khat vel tal zuk châm rawh u" a ti zung zung a. Hna chungchang ka sawi chuan ka pa bawk chuan a lo ngaihtuah vek tur thu a sawi vat a. "Chennai lam kan sumdawnna enfel pah a ni leh mai a" a rawn tih leh chuan a remchang viauin ka hre tawh.





Hna tlem khawih fel lawk tur ka neih avangin Library ah ka lut zuai a. Reunion chu kal kan tum ve dawn phei chuan inhmakhua ka ngai nasa khawp ang.




Ka hna ka khawih fel chuan zan dar 9 a lo pel lek lek tawh. Ka indahfel a, room lam ka pan phei vat.





Room ka va luh chuan Rinhlupuii hi couch nghengin a lo muhil bel a. A lehkhabu chhiar lai chu a la vuanbet ve tai a, mahse a muttui hmel lutuk.




Mutkawr fual dir der pan tê hi a ha a, a mut sawih deuh vangin a mal var har chu a lang chiang hle bawk.



Ka va panphei vat a, couch bulah chuan thu hniamin chiang zet hian a muhil lai chu ka thlir a. 'Hmelchhia' han tih tur chu a ni mawlh lo mawle. Huhh ka ngaihtuahna zet chuh!



A lehkhabu kenlai chu laksakin side table ah chuan ka khup tha a. Tihharh hlau zet hian dimtein ka pawmkang a, duhaiin a zâng tlat. Khumah chuan dimtein ka nghat a, a sam a hmai zar hnawk niai tu chu ka tuai fai nghal bawk.




Tun hnaite hian ka hmu tha zual a. Ka ngaihven ve deuh bawkin ka hria. Kan inchenchilh vang pawh a ni mai thei.





Rei tawk fang a muhil lai ka thlir hnu chuan couch lam ka pan a. Rei meng tawh lovin ka muhil zui ve nghal mai bawk.




Rinhlupuii POV




Zing ka harh chuan khumah ka lo mufel than a, mak ka ti angreng viau. Couch ah khan Lehkhabu chhiarin ka thu sia, engtin nge khumah ka lo mut daih theih. Couch lam ka hawi vat a, Sawmdawnga chu mutui tih hriat zet hian a lo thaw sak sak a. Ani hian mim sawn tihna a mawnle. Aa... ngaihtuah buai lo phawt ang.




Inhnuai lamah chhuk thlain choka lamah ka lut nghal a. Tumah an lo la tho lo. Thingpui te chuangin chawhmeh siamtur ka la chhuak nghal zung zung a.




Rei vak lovah ka nu a lo tho chhuak a, ka tho hma lutuk chu min hau leh tawh "Eng vak tihtur a awm chuang lova tho hma lutuk duh thin suh ka tih kha. I harh anih pawhin khumah mu meng kar mai rawh. Dar 6 vela thawhchhuah chu a tawk viau ania" a rawn ti zung zung a. Ka lo nuih liam mai mai ringawt.





Vawitam tho hma lutuk tawhlo turin min ti tawh, mahse ka sim theilo.




Sawmdawnga chu thlan tla hluamin chokaah a rawn lut phei a. A taima ka lo ti leh hmanhmawh. A taksa nalh lo lai leh han sawisel tur awm miah si lo hian tuktin exer zu la peih a mawle.




Inhnuaiah hian gym room a awm a. Exercise lakna hmanrua neuh neuh pawh a awm nual. Chutah chuan tuktin exer a la ziah thin.




Fritch chu hawngin tui a inzui khawlh khawlh a, a tui lem zawnga a hrawk bawk che ralh ralh pawh a chiang ngang mai.




Dining Chair-a a rawn thutthlak chuan thingpui ka lo pe vat a. Engmah sawi buai lovin a lo ban ve mai bawk.



"Leave i la tawh em" alu ka vel mawlh mawlh lai chuan a rawn tichhuak sup. "Eng leave" ka ti deuh ha. A ngawi run run a, chutah "Chennai kan kal dawn chuan leave i lak a ngai ang chu" a rawn tichhuak sup a.




Ni dawn tak e. Chennai kal kha an sawi tak alawm. Mahse kal em em pawh ka lo tum miah lo. Amahin kal se nuam a tih zawk ka ring.




"Kal ve pawh ka lo tum chiah lo asin" ka ti hul hak a. Ka nu a lo inrawlh vat "I kal veloh te'n le. In damdawiin chu Sawmdawnga biak tir mai rawh. In nupa zinchhuahna chance a ni dawn a. Chuloah Sawmdawnga tan pawh a thian hluite bula a nupui hmelhriat tirna hun a nimai a. Kal ngei ngei zawk tur" a lo ti ve ta duah a.





Han hnial vak ngaihna ka hre ta lo. "Vawiinah in Medical Superintendent ka lo bia ang" Sawmdawnga chuan min melh ngur chung hian a rawn ti nghet charh a. Mahse ka lo hnial vat. Keimaha ka lo biak mai tur thu ka hrilh. Pasalte hmingthatna hmang tangkaia leave lak mai chu ka duhdan a nilo.




"Sawmdawng...ka lo kal ve kher a ngai ami" room kan luh chuan ka ti hap a. A insiam mawlh mawlh a, khumah fel thanin ka thu thung.



"In buai viau ami" a rawn ti chhuak sup. Damdawiin hnathawk nih chuan buai hi a tawp theilo. Nitin damlo , natna chi hrang hrang rawn lut reng an nia. Hnaah ka buai chu thuhran inneih boruak vel vangin chawlh la la rei tawh si a. Ka inthlahrung ve tlat tawh.




"Tunlai ka chawl nasa sia, chawlh dil reng kha nuam ka ti lova. A inthlahrun awm duh lutuk a" ka ti chhuak sep a. Ka ngaihdan dik tak ka sawi chhuak.





"Lo ngaihtuah buai suh, keimah ka dilsak mai ang che" a rawn ti bung nghut, a kamisz a kilh mual mual bawk. "Aa...a ngai chuang lo, ka lo kal a ngaih ve tlat si chuan keiman ka dil mai ang" inthlahrung deuh chuan ka tichhuak sep.





"Ka dil sak mai ang che a chiang em" a rawn ti nghet churh a. Hnial zui chi-ah ka ngai ta lo mai.





Sawmdawnga chhuah hnu chuan hna kal turin ka insiam ve ta chauh. Tun hnu hian hna hi Bus - in ka kal mai zel a. Sawmdawngan min thlah zeuh chang a nei bawk. Mahse keichuan bus a kal mai kha ka duh zawk thin. A car a min thlahin kan inbe ngai chuang lova tang tungin ka thu thin bawk si.




Hospital ka va thlen chuan an lo zi leh mur mur tawh. Keipawh inthlakin ka tihtur ka ti ve zung zung a. Ka thawhna a rei ve tawh bawk nen ka hnehsawh ve tawh viau. Ka nuam tih ber hnathawk ka ni bawk a. Buai thin viau mah ila hlimna tam tak min pe thin.





Thlasik a intan chho tep tawh a, ni pawh a rei tawh meuh lo. Ka duty zawh hnu chuan hospital kawtah bus ka chang leh a. A lo thleng har phian lehnghal. Ruati chu a pi a tha hlei thei meuh lova. 'Ka thlah ang che' ti viau mah se ka pawt buai lui duhlo. Kan veng a inpersan ang reng sia haw vat a duh dawn bawk si.




"Puipui" ral lehlam atanga min rawn au tu an awm avang chuan ka hawi chhuak vat, Doctor Rinpuia a ni.




Kawng a rawn cross a, ka dinna lam a lo pan phei vawk vawk bawk.



"I haw tawh dawn mi" ka bul a rawn thlen chuan a ti sup a.
"Aw, bus ka chang a"
"Ka lo thlah ang che"
"Aa...ngawi rawh, ka'n chang rih zawk ang e, a lo thleng tep tawh ang" ka ti chhuak sep. Doctor Rinpuia hnaih hi ka inthlahrung tlat.
"Puipui..." a rawn ti chhuak hulh, ka lo melh ve ngar a. "Kan sawifel tawh kha, min pehhel tawh suh" a rawn ti chhuak hulh a. Ka inthlahrung ru ang reng khawp mai. "Chutiang lam pawh a nilo" ka ti hul hak a, ka riat nawi ta mai mai.





"Anih chuan lo kal rawh ka thlah ang che a harsa hlei nem" a rawn ti dam leg dap a. Bus a lo thleng har bawk nen ka hnial duh ta bik lo.




A car a rawn lakchhuah chuan ka lut ve vat a. Kan tlanchhuak dawn chiah tihah Hospital sira ding ngur chu ka va hmu ta mai. Sawmdawnga hi a car nghengin a lo ding tlawn zuah a, min melh khui bawk. Ka lo ip deuh chawih. Engtin tak haw hunah min ti leh ang maw.






Doctor Rinpuia chu a titi mawlh mawlh a, a thusawi te chu hriat a mang pawh ka neilo. Ka ngaithla liam mai mai ringawt a ni ber.





Ka ngaihtuahna chu Sawmdawnga ah ringawt a awm. Heti taka ka tih mai hi ka inhrethiam lo. Ka pa leh ka û, ka mipa hnaih ve chhunte nen an mizia a dang hlak vang pawh a nimai thei. A tawhkhirh em em ringawt mai ni.




Kan veng kan tlan lut chiah chu car pakhat chak zet hian min rawn tlanpel fua a. A car atang chuan tunge a nih ka hrechiang lutuk tlat, Sawmdawnga a ni.





In kan thlen chuan Sawmdawnga car a lo inhung vang tawh. Doctor Rinpuia chu a tlan let leh thlengin ka enliam a. Inchhung luh chu ka va hreh tak e aw.




A lo reh thiap a. Vawiin lam chu kan chhuak vek a. In nghak ber thin ka nu pawh Mawimawii dawr lamah a zui ve daih a. An lo la haw lo anih hmel. Sawmdawnga nen chauhva awm chu ka hreh hlur mai.





Kan room kawngka chu ka hawng ri rak a. Chhuat-a ka make up tla keh ka hmu nghal zat. Sawmdawnga chuan couch ah whisky a lo in mek bawk.




Engmah sawi lovin ka lut a, chhuata ka make up tla chu ka chhar khawm a. Bawlhhlawh bawmah ka paih nghal bawk. Engtin mah ka tih let loh hi thil tha ber niin ka hre tawh. A ni a lo thinrim a, kei ka lo thinrim veleh zel chuan kan inhau buai ang a. Tha ah ka hneh dawn chai silo, pawisak a nei dawn bawk silo. Ka tihlet loh hi ka him ber na tur niin ka hria. Chuvanga hnial let duhlo thin chu ka ni.





"Kha mi tenawmpa kha i va thlahlel awm ve" zawi si, fiah chang bawl hian a rawn ti chhuak hrawih a. Thaw chhuak hulhin "Khapa vang kha em ni zin pawh chu i lo hreh em em" a rawn ti leh khawl a. Chiang zet hian min rawn melh khui a, keipawn ka melh let ve kal.





"Chutiang a nilo Sawmdawng" ka ti ve nghat. "Huh, phat buai chu tum lo mai teh" a rawn ti leh hluk.





Ka thin a rim ve lek lek tawh. Engtik lai mai pawha Doctor Rinpuia nen min hmehbel reng mai hi ka kham takzet.




"Enteh, ka hrilh ang che. Doctor Rinpuia nen kan inkarah hian inthian thatna bak a awm lo. Thian kan nihna angin min rawn thlah ve a a nimai" ka insawifiah chhan pawh chu ka hre chuanglo. "Phat buai tum tei vet suh. Lo ngawi tak rawh, Chennai ah chuan kan kal khawp ang. Kha mihringpa hlat takah khan" a rawn ti chhuak hrawih a. A whisky bur ruak chu a vawm keh chuaih bawk. Ka lo phu dawrh thung. Tinge a thinrim hian thil vawm zawnga a khawsak tlat thin ni.





Min rawn pan phei chhur chhur a. Ka hamhaih lutuk chu lo tawlhsawn nachang pawh ka hrelo.




"Naktukah kan kal ang" ka hriatfiah loh hlau awm fahrana chiang hian a rawn ti nghet churh a. Inherin a chhuak nghal vut.



____*____*____*____


(Zanin chu ka lo dah hma si, a thui tha bawk sia, comments vek ang u aw. In lo chhiar ve avangin ka lawm em em e💗.)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:05 pm

OUR MARRIAGE
By CVL.Awmpuii



Chapter - 9




Kan zin tur ka in pack te chu ka va phur lo mai mai tak e aw. Tum dang ka zin tur nen a inang thei mawlh lo. Vanlalruati nen chuan ni dawn ila ka phur ve viau ang. Mahse tun tum chu ka kalpui tur a dang tlat.




"Awi, keichu lo kal ve daih ka van châk tak" Mawimawii chuan a rawn ti chhuak sep a. Ka insiam tirh atang khan kan room ah a awm ve char char tawh a. A kal chak ve thu ngawt a la sawi. 'Lo kal ve mai la' ka tih lahin a dawr a ngaihtuah ve bawk si. Lo kal ve thei sela chu ka tan pawh a nuam deuh tur ania.






Sawmdawnga chuan a sawi ang ngeiin leave chu min laksak a. Hnial zui vak kha thil tihchi a ni tawh bawk silo. Chawlh chu ka inthlahrung viau nain kan Medical Superintendent chuan a lo hrethiam khawp mai.




"I insiam zawh chuan kan kal thei" Sawmdawnga chuan room kawngka a rawn dah pah hian a rawn ti chhuak sup a. Ka lo bu nghat nghat a, ka suitcase chu a zip phui nghal bawk.




Kan chhungte chuan Lengpui thleng min rawn thlah a. Kal lamah Sawmdawngan motor a khalh a, ka pain a khalh haw dawn thung.




Kawng lakah chuan hmun nuam tak tak min fanpui turin ka nu leh pate chuan Sawmdawnga chu an chah nasa khawp mai. Pakhat pa lah chuan tawngkaa chhang hlei lovin a bu nghut nghut a. Mawimawii chuan a kal ve chak thu bawk ani a la sawi ni. Ka nu leh pate chuan nakinah a hranpaa an la zinpui tur thu an sawi ta ngawt.





Lengpui Airport kan thlen chuan dar 10:00a.m vel chiah chiah a lo ni a, tawi khawmuang tawh lovin kan ticket te kan tifel a. Kan flyte tur kan panzui a ni nghal deuh mai.



Mizoram atanga Chennai hi flyte chuan darkar 5 atanga darkar 6 kal bawr vel a ni a. Thlawhna chhungah kan chuang rei ngat ngat dawn khawp mai.




Sawmdawnga nen chuan nizan atang khan kan la inbe leh lo hrim hrim. Zanah phei kha chuan room ah a rawn riak ve lovin ka hria.




Tlai dar 4 velah Chennai International Airport chu kan thleng ta. Thlawhna kan chuan chhung zawng khan Sawmdawnga nen kan inbe miah lo. Tukin zing atang tawh khan awm ve lo angin min ngai hmiah a tih theih ang.




Kan bungrua vel chu amah vekin a la a. A kalna lam apiangah chuan ka zui ve tawp.




Airport atanga kan chhuah chuan car pakhat lo inhunna lam hi min panpui nghal a, a bulah chuan driver ni awm tak hi a lo ding bawk.




Sawmdawnga nen chuan sawi sup hian an inbia a, an sir deuhvah ka lo din avangin an thusawi ka hre ve theilo.



A hnu rei vak lovah driver chuan car chahbi chu a pe a, a kal nghal daih bawk.




"I ril a tam em?" kan bungrua vel car hnungah a dahfel chiah tihah chuan a rawn ti chhuak sup. Nizan a thinrim vak hnu atanga a vawikhat min biak leh na chiah a ni.




"Thil ei lawk ila, ka inah kan tlang dawn nia" a rawn ti leh sup a. Ka banah kaiin restaurant awmna lamah chuan min kai phei nghal dawr dawr a. Engmah sawina hun pawh a awm lo.




Thil chu kan ei mial mial a, ka rinaiin ka ei puar daih. An thilsiam a lo tui phian bawk si, ka riltam em em pawh ka hriat loh nen ka ei tui ta phian.




"I ei puar em?" ka thlenga thil awm ka ei zawh chuan a rawn ti sup. Ka puar thuin ka lo chhang vat. A âw ka a dam ruih mai bawk si, nizan nen kha chuan inang lo tak ani. Ka laka tawngka vin a hman chiamin ka hlau a, a dam dup lahin a ngaihna ka hrelo a, a va hahthlak tak.




Thil kan eifel hnu chuan kan chuanna car tur lam kha kan pan leh a. Tawi khawmuang tawh lovin kan awmna lam tur kan pan nghal.




"Office chu ka lo tlang rih lo mai ang" Sawmdawnga chuan phone a hmang a.
"Ka in chu in lo peih fel em"
"Ok, kan rawn tlang nghal" a phone chu a off a, car steering hmaah chuan a dah leh.




Gate lian zet hmaah hian min tlanpui a, security guard a lo awm a, gate a lo hawng nghal sawk sawk bawk.




Gate chhung kan tlan luh chuan in pakhat lian tawk tak hi a lo awm a. Garrage lamah min tlan luhpuiin motor chu a dahfel a. Ka lo chhuk ve tharh.




Kan bungrua chu amah vekin a la chhuak leh a. Puih ka lo tum chu chahbi pakhat min pein "Lo va hawng rawh" a ti a. I he lovin kawngkhar lam chu ka pan a, ka lo va hawng a. Bungrua chu security guard nen khan an rawn la lut.





Inchhung kan lut chu engkim mai hi a lo inremfel thlap a. A chhunga thil awm reng reng chu a changkang hlawm hi a ni tawp. Mahse Mizorama an in kha a la tluk chuang lo.




Inchung lam room ah chuan kan buangrua te chu an dahfel a. Sawmdawnga chu security guard nen chuan an inzui thla leh a. Kei chuan kan bungrua vel ka lo remfel nghal zung zung.




A hnu rei vak lovah Sawmdawnga chu a rawn chho leh a. Towel la in bathroom a pan nghal, room-a a inhlip lo chu ka lo lawm hle ringawt.




A inbual zawh chuan boxer nen a rawn chhuak a, a towel awrh chuan a lu a hru mawlh mawlh bawk. Ka lo zak duhlo lui ve tlat tawh. A taksa lian leh dik thlup mai chu hmuhnawm tham a ni, a palen ngaihtuah in thau chhia zu han nei map lova. Ka ngaihtuahna zet chuh.




Wardrobe chu hawngin a coat suit ka lo khai chhuah sa chu a la chhuak a. A kamisz ban dinglam kilh a tum chu a kilh hlei theilo. A phun leh hluk thin.




"Khawi keiman" ka lo ti vat. Ka thawmhnaw thlehfel chu dahin a dinna bulah chuan ka va ding ve a. A kamisz ban ka kilh tur chu min lo hnial bik lo. A vei lam chu a rawn dawh leh a, ka lo kilh sak veleh mai bawk. Min en deuh vung vungin ka hria.




"Office ah ka kal dawn a" a rawn ti chhuak sup a. A lam ka hawi vat, hnai zetin kan inmelh kalh mai. Chutah hawi sawn vatin khum lam chu ka pan a, "Imm...i rei ang em?" ka thil thleh lai thleh zawm mawlh mawlh pah chuan ka ti a. A ni chu a dinna ngaiah a la ding luah.




"I lo kal ve duh em?" a rawn ti leh daih. "Aa...ka tibuai mai mai zawk ang che" ka ti niah niah a.
"Insiam la, inhnuaiah ka lo nghak ang che" a coat hak pah chuan kawngka lam a pan nghal a. A chhuak tawh tur chu rawn inher lehin "Khang kha chu tikhan dah rih mai rawh" a rawn ti leh sup a. A chhuak zui nghal daih.





Keipawh chu in-a mahni chauh a awm ai chuan tiin ka intifai a, ka insiam ve nghal. Khua a vawh deuh vuk avangin over coat ka ha a, pheikhawk smart zet ka bun bawk.




Inhnuaia ka zuk chhuk thlak chuan phone a lo be mawlh mawlh a, hna chungchang vel an sawiin ka hria.




Ka chhuk thla min lo hmuh veleh chuan phone la hmang reng chung chuan min lo hui zeuh a. Kan inzui chhuak nghal.




"Heihi lo keng rawh le" ka hmazawna a phone rawn lek chhuah pah chuan a ti sup a. I he lovin ka lo laksak vat. Car start in a Office lam chu kan pan zui nghal.




Side glass-a ka dah veuh veuh lai chuan car tukverh darthlalang chu a rawn inkhar riai riai a. A ngaihna hrelo zeta Sawmdawnga ka va melh chuan "I hritlang ang" a lo ti sup. Vawiin a awmdan hian sawi tur pawh min ti hre lo.




A phone ka kenlai chu a rawn ri ral ral a. Ka lo en vat, caller ID ah chuan 'Thari' tih a lo inziak a. A mitmeiin lo call tu chu min zawt a, a hmai zawnah chuan a phone chu ka lek a. Caller ID a hmuh chuan a phun hluk, "Pick up duh suh" a rawn tichhuak sup a. A sawi ang chuan ka pick up ta lo.




Mahse vawithum a rawn rikna ah chuan ka ning ve deuh hlek tawh "Chhang lawk mai la" ka ti chhuak sep a. Park ah chuan motor dintir in a phone chu a rawn ban a. "Tikhan lo thu lawk rawh" tih leh car atanga chhuah a rual nghal.




Rei vak lovah a rawn let a, a hmaa a hmel pangngai tak kha a bo leh vek tawh. A hmel a chang run a, thinrim teuh a ang ber. Thari kha tu tak chu nimaw.




Office Building lian zet hmaah hian kan ding a. Kan va luh chuan chibai min lo buk sap sap a. Pakhat pa lah chuan ka banah nghet zeta min chelhin min kalpui pawk pawk a. A hnathawk te chibai lo bukna pawh chu engtin mah a chhang let lem hlei lova.





Mi pakhat hian file nen min lo zui a, a hmel atang chuan Mizo a niin ka hria. A office ah min hruai lut a "Hetah hian lo thu rawh hna thil kan han sawi lawk ange" ti supin couch lam chu min mitmei a, ka thu thla nghal tharh.




Hna thil vel an sawi lai chuan a office chhung chu ka lo melh kual a, a zau ang reng khawp mai. A faiin a thianghlim zek lehnghal.



An inbiak lai chuan ka phone phawrhin ka lo hmet mial mial a. Kan thlen tawh thu kan chhungte kan la hrilh miah lo tih ka hrechhuak nghal zat.




"Sawmdawng" a rawn hawi vat a "Pawnah ka nu te ka va be lawk ang aw" ka ti chhuak sep a. Min melh vung vung hnu chuan a bu ta nghut.




A office atanga ka chhuak chiah tihah ka nu (Sawmdawnga nu zawk aw) chu ka call nghal zat a. Rei a ring lo "Aw, Puipui" zangkhai vah hian a rawn ti a. "Nu, dar 3 vel khan kan thleng tawh aw" ka ti nghal sep a. Eng nge kan tih min rawn zawh chuan Sawmdawnga office a kan awm thu ka hrilh a. A rawn ang nghal hlak hlak.




"Tinge hnaah te a kalpui nghal daih che a. Hnathawk tura kal pawh in nih loh kha. An college Reunion leh honeymoon hmang tura kal in nih kha. Bawiha chu hauh a ngai anih chu" a rawn ti hlak hlak a.




Office-a kan awm thu ka lo hrilh chu ka inchhir dawn lek lek mai. Ka nu hian min ngaihtuah ve takzet tih ka hria a. A fapa nen hian inrem taka kan awm a duh bawk.



Sawmdawnga office atang chuan nichin a min lo zui lut tu kha a rawn chhuak a. Ka nu nen pawh rei kan inbe tawh lo.




Office ka va luh leh chuan Sawmdawnga chuan paper ah thil a lo ziak mawlh mawlh a, min hmu ang pawhin a awm lo. Ngawi rengin ka thutna ngaiah khan ka va thu veleh mai a.




"Sign ngai tlem a la awm a, ka zawhah kan haw thei ang" a rawn ti chhuak sup a. A lam ka va hawi chuan min en lem lovin a thil sign lai chu a sign pah mawlh mawlh thung.




Tihfel ngai a tihfel zawh hnu chuan ka thutna lamah a lo kal a "Kal ang le" tih leh ka hmaa a kut rawn lek a rual a, ka ban hma hauhin ka malchunga ka kut dah chu a rawn hûm leh hmiah.




Office atangin kan inzui chhuak a. Ngawi rengin a car chhungah chuan kan lut a. A tih ang ang chuan ka awm ve tawp.




"Eirawng bawl buai ai chuan thil ei nghal ang aw" car steering herh pah chuan a rawn ti chhuak sup a, a âw a dam dap mai. Ka lo bu nghat nghat.




Restaurant changkang zet pakhatah min hruai lut a. Thil kan ei nghal zung zung.




In kan thlen leh meuh chuan a lo tlai ve duak tawh. Ka chau ve nghulh thei, kan thleng chiah a, kan chhuak leh nghal bawk sia.




Ka intifai hmasa a, ka inthlakna tur ka keng lut nghal vek. Sawmdawnga chu in kan thlen rual khan laptop hmaah a thu nghal run a, hna thil bawk aniang chu. A hna hi a atchilh ve chiang a ni.




Bathroom atanga ka chhuah chuan khumah a bawkkhup zawngin a lo mu duai a, a thuamhnaw engmah a la inthlak lo.




Ka thawm a hriat chuan a rawn tho chhuak uaih a, a muhil lo anih hmel.



"Ka'n intifai ve lawk ange" a ti sup a, towel batin bathroom lam a pan ve vat.


Ka indahfel chiah tihah ka phone a rawn ri ral ral a. U Nu-in min lo video call tehnawlh, Bawihtean min be duh pawh a nimai thei.



Ka pickup nghal vat a, khumah ka thu rem sat sat bawk.



"Ate...." Bawihtea chu a rawn chiau chul a. A phur lutuk chuan phone pawh chu a keng tha hlei theilo. A chezia lawmawm thei lutuk chu ka lo nuih hak hak.




"Ate...nau ka nei dawn" a âw atang ringawt pawhin a phur zia chu a hai theih loh. "Bawihte, sawi chiang la" phur zet hian ka lo ti vat a.



Chutah U Hruaia zawk chuan "Mambawih, Amos-an nau a nei dawn, i û Nu-i a rai" nui vur vur chung hian a rawn ti a. Ka lo phul ve hlut mai. Ka phur zia chu pui tak ani. "Tak tak em" U Nu-i chu a rawn bu nghat nghat, a biang a sen tar bawk a, a lai viau anih ka ring.




Bawihtea chuan a nau nei tur vel chu a thiam ang tawkin phur zet hian min hrilh a. A la tawngfiah hlei thei mang bawk si lo ka nuih pui leh hak hak thin.




Kan inbiak laklawh lai chuan Bathroom atangin Sawmdawnga a rawn chhuak a, boxer a ha, kawr ha lovin towel a bat tawp.




"In zinna chu a nuam bawk maw" U Hruai a chuan thutak zawk hian a rawn ti chhuak sup a. "Naa... vawiinah kan thlen ve chauh hi" ka lo ti nang nang a. Â intih hmel zet hian a kiai suk, a nupui naupaiin a ti helhhawlh zo ni berin ka hria.




"U Nu, huat zawng te i nei em?" u Nu-i chu ka zawt vat a. Amos a pai lai kha chuan a thil ei a tui em em ringawt a, mut a duh em em bawk, raino kha a haw vak lo niin ka hria.




"Tun tum chu ka haw dawn a ang ka tia, ka ni deuh nghulh reng mai. Kan hriatchhuah dan pawh awmze nei lovin ka uak vak vak reng a. Ka awm a nuam zan si lova i û in inentir turin min hruai ta tawp a. Kan hre ve chauh alawm" a rawn ti duah a. Ka khawngaih ang reng khawp mai. Experience la nei ve lo mah ila nurse ka nihna atangin a awm nawm loh dan tur chu ka man ve rei ruai.





"Thla engzat nge lo ni tawh a" zangkhai vah hian ka ti leh a. Pakhat pa chuan ka mi biakte chu a ngaihsak lem lo anih hmel wardrobe hawngin a thuamhnaw a la chhuak dan dan. "Thla khat leh tlem" a rawn ti a.





Chutah ka û chu a lo inrawlh vat "Sawmdawnga a awm lo ami?" a rawn ti hluai a. Pakhatpa chuan a tawngri chu a lo hre ve aniang a rawn hawi vut a. Zawhna mitmenga min rawn zawh chuan "U Hruaia" ka ti sep.




"Awm ve e, a intifai zo chiah a, a inthlak mek" ka û chu ka chhang leh a. "Khawi maw ka lo be ve teh ang" a rawn ti lehzel a. Inthlahrung deuh tak hian Sawmdawnga chu ka va en a, min lo melh ve chiah bawk.




A kut a rawn phar chhuah chuan ka pan vat a, phone chu ka pe nghal. "Naute thar in nei dawn a maw" a tichhuak sup a. "Nei dawn e le. In pai ve hmain pathum vel kan lo nei hman mai thei" ka û chuan a rawn ti hluai a. U Nu-in "Lalhruaitluang" a ti hlar ri chu ka hre thei. Ka û chu a nui zui huah huah a.





"Taktaka Sawmdawng, ka nau kha Nitei ringawt chu nihtir tawh lo teh. 'Nu' nih tir ve tawh teh" a rawn ti chhuak thawr a. Ka lo ip chawih. Sawmdawnga chuan min lo melh zawk a, "Putea i ni ve vat ang" min melh reng chung chuan ka û bulah a ti anih chu !




Ka hmai a sa hat hat tawh. Ka awmdan chu a lai kual vel vek hi a ni tawp.



Ka û chuan lawm lutukin a nui hawk hawk a. U Nu-i nui ri hak hak ri pawh ka hre thei. "Ate" Bawihtean a rawn tih leh chuan phone chu min pe vat a , ka lo thaw huai mai.




Phone kan dah veleh chuan Sawmdawnga thusawi vang khan chet ngaihna ka hrelo. Khum tlangah chuan ka thu ngawi kar a, ka zahzelah ka phone chu ka tuai let mai mai. A sam chu a hru tawk tawk a, khumah chuan rawn lawnin a rawn thu thluang duai a, a tukkhumah a kut veilam chu suihin kham a, a chhing zui vang vang bawk. Rawn mut ve ringawt a tum a mawnle. Khum khatah kan riak dun dawn tihna ami?! A theih loh, ka ngam teuh loh mai.





Ka thutna atang chuan ka tho chhuak vat a, a lukham kham loh lam chu laka couch a mut mai ka rilruk tawh.




"Mu rawh" lukham lak mai ka tum chu a mit meng chuang lo hian a rawn ti chhuak sup. "Couch ah sawn ka mu zawk mai ang" ka ti chhuak hliai a, ka zam zia chu ka âw ah a lan loh hram ka beisei.




"Rawn mu rawh" a rawn meng a, chiang zetin min melh bawk. "Sawmdawng..." sawi tur ka hre leh si lo chu ka ngawi leh daih. "Min hlau ami?" a rawn ti sup a. Ka lu ka lo thing rang teh asin. Dik tak chuan ka hlau alawm, mahse tunge hlau ti duh bik ang. "Ok, anih chuan rawn mu rawh" a rawn ti chhuak leh sup a.




Ka ngawi deuh vang vang chu min rawn pawt mu thut a, ka lo te that. Ka mu fel nghal der, min bawh deuh titih hian a rawn awm a. Kan hmai chu a insi lo chauh, chiang zetin kan inmelh bawk.




"Muttui" ti chhuak supin a inlahrang vut a. Puan chu min sintirin ani pawh chuan a sin ve nghal a, min hnungchhawn nghal zat. Kei erawh ka la mu khawng lah thung. He mihringpa mize mak sak lutuk hi ka hriatthiam theih pawh ka ring lo.





Zing ka harh leh chuan keimah chiahin ka lo mu tawh. Ka awmna ka hai thelh bawk, kan zin daih tak kha maw.




Inhnuai lamah ka chhuk thla a, thil rimtui zet hian ka hnar a verh nghal zar mai. Choka lama ka phei chu Sawmdawnga hian gas bulah thil a lo chawk mawlh mawlh a. Joger pants grey rawng leh tawnzau var a ha a, amah a palian bawk sia engkim mai hi a inhmeh nghal thlup zel anih ber mai hi. Ka ngaihtuahna avang chuan ka lu ka thing nak nak.





"Min kai tho mai lova" inthlahrung deuh tak chuan ka va ti a. A rawn inher vut a, min melh leh vung vung tawh. Hetia min melh hian nuam ka ti lo, a mi uap a na cherh churh lutuk tlat.





"Ka tho alawm" a lo ti ve mai a. Sawi ve tur ka hre lehpek tawhlo. A eitur siam chu a rawn chhawp a, ka lo enkual vat. A tui hmel hlawm lutuk.



"Heihi i siam vek maw" mak ka tihzia chu ka âw atanga a hriatthiam mai ka ring. A lo bu nghut ringawt.





Ka rinai daihin eitur siam a lo thiam. Ni lo, eitur a siam ve thiam pawh ka ringlo ania, kei ai daihin a siam thiam. Ka eitui khawp mai.




Thil kan eizawh chuan kan eina vel te chu ka seng fel sawk sawk a. Vawiinah hian eng nge tihtur kan neih ka la hrelo. An College Reunion party kha chu naktuk zan lam a ni bawk sia. Vawiin lamah eng tak chu kan ti dawn nimaw.




Thleng ka sil lai chuan door bell a rawn ri ral ral a. Ka kut hrukfai a va hawnsak mai ka tum chuan Sawmdawngan "Keiman" a lo ti sup a. A phone chu dining table a kalsanin kawngka lam a va pan a.




A hnu rei vak lovah chuan thawm a rawn awm hluai.



____*_____*_____*_____

(Tlai si, tawi bawk si...ka hria ka hria e. Min hrethiam ru aw. Hei, Christmas te a hnai ve tawh bawk si a, Kohhran thil pawimawh ah ka buai ve hle a. KTP hian tihtur neuh neuh kan nei ve reng bawk sia, a pawimawh thin si a. Min hrethiam hram hram ru aw. In lo chhiar ve zel thin avangin ka lawm tih in hriat kha, ka lawm e💜)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:05 pm

OUR MARRIAGE

BY CVL.Awmpuii



Chapter 10



"I va rawn hawng har ve" ti hluai thawm chu ka hria, a aw atang chuan hmeichhia niin ka hria. "Khawnge in nu chu" chu aw bawk chuan a ti leh a. Inchhung rawn lut thawm a awm nghal zat, thawm atang chuan pakhat chauh an ni lo tih a hriat theih.





Choka lamah an rawn lut phei a, thleng ka lo sil zo ve chiah bawk. Ka kut ka hrufai thuak thuak a, an lam chu ka hawi vat.




Sawmdawnga chu hmeichhe pakhat leh mipa pathumin an rawn zui lut a. An rawn tawng phei nak nak bawk. Hmeichhia saw chu kan inneih ni khan ka hmu tawh thanin ka hria, Sawmdawnga lo fiam reng tu kha ni tlatin ka hria.




Sawmdawnga chu zawhna mitmenga ka lo melh chuan " Bawihi, ka college kalpui thinte an nih hi" a rawn ti chhuak sup a. Tunah khan 'Bawihi' tiin min ko leh tawh. A hma pawh khan min ko tawh.





A thiante nen chuan min inhmelhriattir liam liam a. A hmeichhe awmchhun chu Siamsiami a ni a. Midangho chu Hminga, Rema leh Nathan-a te an ni. Sawmdawnga rualpui an nih chuan kei aiin an upa daih dawn tihna ania, û tawp vek ila a that mai ka ring.




"Lalnunsiami thusawi kha ka va thlawp ta ve" UHminga chuan a rawn ti hluai a. "Tha ka tih hi chu an tha a nimai" U Siamsiami chuan a lo ti nghal vat.




"Lalnunsiami thil sawi uar tawh zawng zawng zinga sawi uar phu ber a lo nih ngei hi" U Hminga chuan a rawn ti leh a. U Siamsiamin a melh ram ram lai chuan midang ho chu an lo nui hawk hawk thung.




Sawmdawnga chu chair ah a thu run a, a thianten min fiam nak nak lai chuan min lo melh leh vung vung thin.




"Coffee in ru aw ka lo siam ang" ka tih chuan an lo bu nghat nghat. An college kal lai chanchin vel sawiin an titi a. U Hminga leh U Siamsiami chu an phawk dun khawp mai. Titi vawrhtu ber an ni a. USiamsiami chetchhiatna vel an sawi chuan keipawh ka lo nui ve hak hak mai.




Coffee chu ka pe liam liam a, an lo la vat.
"Puipui, bazar ang u aw. Nak zana kan inthuamna tur ka'n lei dawn nia" U Siamsiami chuan a coffee dut hlak pah chuan a rawn ti a. Kei hi ka lo ngaihtuah miah lova. Mahse hak tur chu ka thuamhnaw neihsa atanga ka neih mai ka ring.





"Aaa...U Siamsiam, ka van hre mai lo" ka tichhuak hap. "Min û lo teh, ka senior hmel lutuk" a rawn ti hlak a. "I si ve tawh alawm" U Rema chuan a rawn ti kher a. U Siamsiami thinrimna tur tawk a tling leh em em mai ni.






"Bazar chu aw...engmah ngaihtuah buai a ngailo in pa hi a hausa lutuk ti hek hrep rawh" nui hak hak chung chuan a rawn ti leh a. Mipa ho chuan phone an hmet mual mual a, kan tawng hre awm pawhin an lang lo.





"U Sawmdawnga thu thu a nimai" ka ti ta tawp. A thiante bulah chuan Sawmdawnga chu ka û a, kan chhungte bulah pawh ka û tho. Ka û nen an inrual miau a, kan pahniha kan awmlai chauhva 'Sawmdawng' tiin ka ko.





"Sawmdawng" U Siamsiamin a koh chuan a lo hawi chhuak vat. "Bazar ang u, Puipuii hi ka hruai kual chak" a ti deuh thawr a. Sawmdawnga chuan min lo melh ve vat a, ka hmui ka lo pet ringawt.





"Kan bazar dawn nia" a rawn ti chhuak sup a, U Siamsiami chu a phur ngang mai.




Kan nupa chuan room lamah insiam turin kan chho a. Midangho chuan inhnuai lamah min lo nghak.




"Sawmdawng, bazar chu a ngai kher dawn mi" ka drawer hawn pah chuan ka ti hap. Ka peihloh em em vang pawh a ni chuang lo, mahse Sawmdawnga pawh buai chu ka hreh tlat.





Couch ah a thu a, a phone chu dahin min lo melh vat "I duhlo ami" a rawn ti chhuak sup a. "Aaa...duh loh lam pawh ni chuang lovin i hnaah i buai awm..." ka ti niah niah a, "Buai lo ve kan bazar dawn nia" a rawn ti dam thlup a.





Nimin atang tawh khan ka lakah a dam thlup mai a. Zin ka huphurh ang em em kha chu a la ni rih lo. Kan kal dawn nena kan awmdan ngaihtuah chuan tuna a tawngka dam ta lutuk te hi mak ka ti hial zawk.





Insiam tur chuan bathroom ah ka lut a, ka va chhuah leh chuan ani pawh a lo inthlak fel tawh. Ka banah min chelh leh hmiah a, inhnuai lamah min kai thla nghal.




"In va rei em em ve" U Siamsiami chuan ding uaih pah chuan a lo ti hluai a. "Nupa chauhvin a an tihtur an ti lawk aniang" U Hminga chuan a rawn ti chhuak phawng a. Midang ho an lo nuih tiah tiah lai chuan ka zak lutuk chu ka lo sa hat hat thung. Sawmdawnga chuan eng ah mah a ngai ve lo aniang, engtin mah a awm ve lo.





"In tilai zo dawn, hei a sen vek tawh hi" U Siamsiami chuan a rawn ti a. Ka lo lai zual ting, Sawmdawnga hnungah chuan dingin a hnung si chetin ka lu ka nghat tawp tawh. Ka zah zia chu pui tak hi a ni ringawt.




"Ngawi tawh teh u" Sawmdawnga chuan a ti hluk a. A hnunga amah si cheta ka lo ding chu a rawn lehhawi a. Ka zah em avangin ka kun deuh ngal a, min kuai dakin ka sam chu min chul mam sak thuak thuak a.




"Bawihi, le awm pangngai tawh rawh le" a rawn ti dam thlup a. Ngah nge maw ka laih chhiat em em mai ni. Khatianga lai rual pawh ka ni tawh lo tiin ka intipaukhauh lui ve ta tlat. Ka hawi chhuah chuan a thiante ho chu an lo la nui rah rah tho mai.





U Siamsiami chu kan bulah a chuang ve a. U Rema leh U Hminga kha chu U Nathan-a car ah an chuang thung.




U Siamsiami chuan min be seuh seuh reng a. A thawveng em em a, a tawngduh a, nuih a duh bawk si ka ngaina nghal ve khawp mai.




"Melody-i hi a lo kal ve angem aw" a rawn tichhuak hap a, awmze nei deuhvin Sawmdawnga chu a melh rah rah bawk.




"Ih maw, Puipui, Melody chu tu emaw ex hi ania" a rawn tih leh chuan Sawmdawnga chu a lo rum nghut. U Siamsiami chu a nui chhuak awr awr mai. A ngaihna ka hrelo lutuk chu ka nui ve ta ngawt.




Bazar kan thlen chuan motor te chu kan han park fel a. U Nathan-a te chu an lo thleng tawh a. Parking ah min lo nghak mek.




Bazar-a kan han lut tur chu Sawmdawngan ka kut a chelh leh hmiah tawh. A thianten min fiam leh vak ka hlauh vangin ka kut chu laksawn ka tum a , a hum nghet teivet lehnghal "Awm mai mai rawh" zawi sup hian a rawn ti hluk. Midang pawh chuan chutia min kai chu an ngaih pawimawh hmel em em loh an titi mawlh mawlh avang chuan ka awm ve hle hle ta ngawt.




Dawr changkang zet chhungah chuan kan lut a. A thawmhnaw khaichhuah ho chu a changkang hlawm takzet. En reng reng pawha man to fe fe turte an ni.





Dawr nghaktute chuan min lo chiau au vat a. Kan enkual nghal zung zung. "Puipui, heihi i inhmeh viau ang" kawrfual pante pakhat hi U Siamsiami chuan a rawn khai va va a. "A pan lutuk" ka bul ami chuan a lo ti hluk. Chutah U Siamsiami chuan nui rah rah chung hian "Over protective ta ve" a ti hlak a, Sawmdawnga lah chuan U Siamsiami thusawi chu a ngaih pawimawh hmel fahran lo khawp mai.




Hmeichhe kawrfual ho awmna chu a enkual a enkual ve mai a , a hnuah kawrfual sen duk nalh zet hi a rawn khai chhuak nawlh "Hei hi va ha chhin rawh le" a rawn ti sup. Phur zet hian ka lo laksak a. Inthlakna ah chuan ka va inthlak thuai thuai a.




Ka khup hnuai chen vela fual a ni a, a ban tlawn. En mai a simple changkang zet kan tih ang chi hi a ni.




Ka va chhuah leh chuan U Siamsiami chu a lo phul hlut "Awi...Sawmdawnga chu hmeichhe kawr thlan te a lo thiam ve a nimaw" a rawn ti hluai a. Sawmdawnga lam ka va hawi chuan min lo melh vung vung. Ka ke atanga ka chhip thleng min entlang tum awm fahran a chiang hian min lo en a, a hnuah a kiai suk anih chu! Ka hawisawn leh vat.





Mipa ho pawh chuan an duhzawng an hmu ve aniang, an pack tir ve zung zung a. Sawmdawnga chuan coat awmna lam a lo la en. Ka kawrfual an pack lai ka lo nghah chhung chuan min rawn hawi zeuh a. Ka va pan ve mai bawk.





"Min thlan sak la" a bul ka va thlen rual chuan a lo ti sup a. Ka enkual sak ve zung zung a. Coat sen duk chu ka lachhuak ve vat. "Heihi" nui sang pah chuan ka ti a. Rang zet hian a rawn la a, a en vung vung a. "Twining" ti sup pah hian min nuih suk anih chu! A nui leh tawh.





Min nuih apiang khan keimahah che dawt a lo awm thin. A rum theih em vang pawh kha a ni mai thei.



A hak chhin vel chuan a lo tawk thlap a, a ingmeh khawp mai.




Kan pack fel tir chhung chuan midangho chuan pawnah min lo nghak a, an duhzawng an hmu kim tawh aniang.




"Ka kawr tur hi chu ka pe mai ang" ka ti chhuak sep a. Pawisa a nei dawn lutuk tih chu ka hria, mahse tihbuai ka duhlo pawisa kawngah pawh ni se.




A lo rum nghut "I pasal ka nih hi" a ti ringawt a. Pawisa pawh chu amah vekin a tifel leh ta vek. A thu a duh em em a, a duh loh kawng zawngah chuan mawr luih chi a ni tlat lo.





A thiante chu kan ina rawn peng tawh lovin an haw tlang a. Keini pawh U Siamsiami a apartment ah kan thlah a. Kan haw tlang ve ta nghal.




Ka intihfel zawh hnu chuan eirawng ka bawl nghal a. Sawmdawnga chu room ah ngun thluk zetin laptop a bih nghal ngur a. Hna thil bawk anih ka ring.





Juice ka lo in mek lai chuan choka ah a rawn chhuk thla ve a. Fritch hawngin tui a rawn in khawlh khawlh. "Juice i duh ve em" ka lo ti vat a. A lu a thing leh mai a.




Ka thutna bulah chuan a rawn thu thla ve a. A phone phawrhin a hmet nghal mual mual.




"Sawmdawng" ka lam a rawn hawi vat.
"Hetah hian ami a hma khan i awm thin" a in enkual thuak chuan ka ti a. A hmaa thinrim rum ul anga a awm tawh loh avang khan zawhna zawh hun tak niin ka hria.




"Awm...awm ti ila a chang zeuh zeuhin ka haw" a rawn ti tha ve mai a. Anih chuan a haw lohvin khawiah nge a awm thin ang tih ka lo ngaihtuah hmanhmawh. "Ka office ah ka riak tam zawk thin a" ka ngaihtuahna hre awm tak chuan a rawn ti a.





"Anih leh Chennai-a in sumdawnna leh Mizoram-a in sumdawnna hi a inang ami" ka ti leh a. "Inang chiah lo. Mizoramah chuan workshop leh motor showroom ngawr ngawr ang kha ania. Hetah chuan sumdawnna hrang hrang kan buaipui" a rawn ti tha veleh mai a ka lo bu nghat nghat.




"Kan sumdawnna nen enge a inkungkaih ve na le. Ka sawi awmzia chu ka pa hna leh ka û hna nen" ka pa in min neihtir chhan hi ka hriat duh vanga zawt ka ni. Sumdawnna vang anih dawn chuan kan inkungkaihna hriat a ngai ang chu.





"Chennai-a kan bungrua ho hi in company ah kan pe chhawng thin" a rawn ti tha leh mai a. Ka hrethiam ve em em lo. Han zawh zui zel lah chu ka hreh ve tawh bawk nen ka ngawi ta daih.




"Ka pa leh i pa hi tleirawl chhuah tirh atanga inkawm thin an nia" a rawn tih leh chuan ka lo meng deuh awk.



Chutah a pa chanchin te chu min hrilh ve a. Fahrah a nih thu leh theihtawp chhuaha company a din chhoh dan te nen lam chuan min hrilh. Ka nu nen an inhriat chhoh dan pawh chu min hrilh ta zel a. Ngaihnawm ti deuh hian ka lo ngaithla a. An chhungkaw chanchin a sawi ve ta duah te chu mak ka lo ti khawp mai.




A pa beihna vang a lo nih dawn hi hna pawh a atchilh em em a theihtawp a chhuah ni.





Eirawng ka bawl fel hnu chuan chaw kan ei zung zung a. Kan eikham hnu pawhin min lo tihfel pui ve zel. Kan zin hnua a awmdan hi ka mak thlawt ani.





Thleng ka sil lai chuan room ah thil a lak lawk tur thu sawiin min chhoh san a. A chho chiah tihah chuan door bell a rawn ri a. Ka kut hrufai thuak thuakin kawngkhar awmna lam ka pan vat.




Ka hawng chiah chu hmeichhe pakhat inchei zet hian a lo ding a. Kawr tight tha zet hain pheikhawk sang zet a bun bawk. Ka hmuh tawh hnu a ang lutuk. E...ni tak e restaurant-a Ruati hauh chiam hnu kha a ni chiang lutuk.




"Mami, khawnge in pu" ka en reng lai chuan a rawn ti a. Sawmdawnga a sawina niin ka hria. Min biak dan atang chuan housemaid emaw min ti a nimai thei. Appron ka la hreng bawk si.




"Ka zawhna che kha min chhang teh" a rawn ti hlak. Ka lo la ngawi reng tih ka hriat zawm zat bawk. "In chungah a awm a, ka han ko ang e" ka tih chuan a ban a lo vai vat a "Ka han kal mai ang" a ti a.




Chutia kan indinchilh reng lai chuan Sawmdawnga chu inchung atangin a rawn pen thla a. Kan han hawi chho vat bawk. Kan indinchilh ran min rawn hmuh chuan a ding deuh chawt.




Mahse a insiam tha vat a, a rawn pen thla deuh pawk pawk. Kan lo din dunna lam chu a rawn pan a, min rawn melh deuh vung vung a. Eng nge a ngaihtuah awm ka hrethiam lo.




"Dear, helama i awm thu tinge min hrilh loh" ka bul ami chuan a ti vat. A koh dan chuh ! Ni tak, Sawmdawnga bialnu a ni tak ang.




"Ih...khitah room ah thil ka han ti lawk ang aw" Sawmdawnga ka bula a rawn din chuan ka lo ti bah deuh niai a. Mahse ka kalsawn tur chiah chu ka kutah a lo hum leh hmiah tawh. Hmeichhia chuan min vawnna chu a lo en chik khawp mai.





"Eng nge i duh" kawngka bula ding nu bulah chuan a ti sup a, a mitmeng a rum leh ul tawh. Pakhat nu lah chuan nui sang chung hian "Ka lo kal" a ti var a.





An inbiakna kara lo awm ve zel kha ka duhlo. Sawmdawnga min vawnna chu ka thing thla vat a, min lo vuan nghet lo bawk nen ka pit thla rang khawp mai.




"Inchungah ka lo han awm ang" tih leh kal ka rual a, ka appron chu phelhin chokaah chuan ka dah lut a. Ka va let leh chuan hmeichhia khan thip zet hian min lo melh. Sawmdawnga pawh chuan min lo melh ngur, ka kalsawn lui chu a duh viau lo anih hmel.






Room ka thlen chuan kawngka ka khar a, ka âwm ka dawm vang vang. Tun hnai chho ka mi tawnte vanga ka awm chhung phu dawt dawt thin hi ka hrethiam theilo.




Khumah thuin ka phone ka han en chu Ruati message a lo awm vang mai.
*Kha, ka sawi reng kha* a rawn ti ringawt.
*Eng chu maw?* a rawn sawi tum ka man lo.





*Hrehawmin i awm dawn lo ka tih kha* a rawn ti a, typing...a intih zawm leh.
*A engamah hmain a zinpui nghal ringawt che ania. Thil a lei hnem awm che si, hun nuam deuh deuh te in hmang vel ang a. Sawmdawnga neih hi a tha ka tih kha i ring tawh mai em* tih hi min lo thawn leh a. A ngaihtuahna ah hian sum chauh a awm emawni.
*Zin mai mai kan ni lo, an college Reunion a kal tur alawm kan nih* tih hi ka va thawn let a.
*Mawimawiin min hrilh vek. Honeymoon in hmang dawn. Naute rawn pai haw rawh aw🙈🤭* a rawn ti leh duah. Tinge maw tupawh mai hian naute ringawt an ngaihtuah ni. Ka reply leh dawn lai tak chuan inhnuai lamah thawm a rawn awm a.





"Khitiang naupang khi engatan nge i tih" hmeichhe awki sang vah hian a ti a. A âw atang pawh chuan a thinrim zia hai theih a nilo. "Ka nupui anih khi" Sawmdawnga chuan a ti hrawk. A hnu a an thawm lehzel chu ka hre leh tawh lo.





Rei vak lovah Sawmdawnga a rawn chho a. A hmel a rum ul mai bawk si a hlauhawm lutuk.




"Lo chhuk tawh la movie en ang" a rawn ti chhuak sup. A hmel en aiin a âw chu a dam thlup lawi a.




Khum atang chuan tho chhuakin inhnuai lama a pen thla chu ka zui a. Tv a lo 'on' fel vek tawh.




"Coffee ka va siam ang e" tih leh choka lam pan ka rual a. Ka siam zo ka va let leh chuan TV hmaah a lo thu vang tawh.




Coffee ka pek chuan a lo ban vat a. A thutna lo lam chu ka pan a. "Hetah lo thu rawh" ka thu dawn chiah tihah chuan a bula thutna awm beng thuk thuk pah chuan a rawn ti sup a. Hnial ta lem lo chuan ka pan ve mai bawk.





A bulah chuan ka thu a, khua a vawt deuh naa a pangtilum ringawt chuan min uap churh thei.




Ngawi rengin movie chu kan en dun a. Rei vak lovah mutchhuakin min rawn zem chiah chiai a. Mumang ramah ka liam riai riai.




Chiang lo riai in ka harh a. Ka thil delh beh mek chu a lum nuam lutuk a, ka meng hlei theilo.




Ka che talh talh a. Ka thil delh beh mek chu mihring taksa niin ka hria. Nilo kei hi ! Ka harh chhuak zawk. Sawmdawnga âwmah lu ka nghat a, a kut vei lam ka kham a, a dinglamin min kuah bet run mai. Ka chesawn ngam tawhlo.




Nizan khan kan movie en lai kha ka lo muhil tlang daih anih hi mawle. Min kaihthawh mai tur ania. Ka chesawn ngam tawh bawk si lo.





"I harh tawh tih ka hria ania" a rawn ti thum dut, ka phu deuh zawk. A awm zawn atang chuan ka han hawi chhuak riai riai. A landan chu a dam thlup a, thalmuanpui awm hliah hliah kan tih ang tur kha a ni. A mit a la chhing reng a, chutia ka en reng lai chuan a rawn mengchhuak a. Ka hawisawn rang teh asin.




"Min delh bet reng dawn mi" nuihzatna âw ka hre thei. Rang deuh chuan ka tawlh sawn vat a. Ka tho chhuak nghal uaih. Sawmdawnga chu a rawn nui chhuak hawk.




Ka thuamhnaw chu ka pawt mar vat a "Min kaitho lova..." ka ti niah niah. "Kha i tho tawh alawm" a rawn ti duh lek chauh. Hahdam hmel zet hian a la mu a, a ban vei lam chu a kham bawk. Min en vung vung thin hi nuam ka tilo, ka sa chhuak vek zel. "Inhnuaiah ka chhuk dawn aw" ka ti niah niah a, a bula awm chu ka hreh rih tlat. "Ka lo chhuk ve vat ang" tih pahin a rawn tho chhuak ve uaih a. Room kawngkhar panin ka tlan chhuak nghal titih. A nui ri hawk thawm chu ka hre thei.






Ka zak lutuk chu ka sa chhuak vek maiin ka hria. Han tawng tam em em lo mahila mi zakzum ti a sawi tur chu ka nilo asin mawle. Mahse Sawmdawnga chungchang anih chuan ka zam chhe nghal vek zel, a chhan pawh ka hrelo.





Eirawng ka bawl lai chuan a rawn chhuk thla a. Inbual zo chiah tih hriat zet hian a sam chu a hnawng chhap a. A rim pa hrak chu ka lo hip lut hmanhmawh.




"Tihtheih ka nei ve em?" a rawn ti chhuak sup a. A hmel chu a zangkhai vuh, hmuh a nuam takzet. Huizz, ka ngaihtuahna thin zet hi !




"Aih, ka zo a nimai" ka lo ti let thuai a, zah chhiat vak kha ka duh tawh lo. Min nuih nasa emai.




Chaw kan ei chuan ngawi rengin kan ei duh mawlh mawlh a. Awmdan thiam a har khawp mai.




"Insiam ila" room a rawn luh rual chuan a rawn ti deuh thawr a. Zawhna mitmenga ka lo en chuan "Vawiin chu ka lenchhuah pui ang che" a rawn ti leh sup. "I buai lo ami" ka ti hap, tihbuai chu ka inthlahrung ve tlat.




"Buaina tur a awm hlei nem" a lo ti leh mai a. Wardrobe chu hawngin a kawr hak tur vel chu a la chhuak nghal a. Keipawh chu ka che chhuak ve vat.




Ka rin ang em emin Sawmdawnga bula awm chu a hrehawm dawnlo anih hmel e.



____*____*____*_____

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:06 pm

OUR MARRIAGE
By CVL.Awmpuii




Chapter 11



Sawmdawnga chuan park nuam zetah min hruai a. Ka hlim lutuk chu ka nui var var reng mai ni.




Nupa tak takte pawh kan ang ve hial mai.
"I ril a tam em?" pangpar thla ka lak mawlh mawlh lai chuan ka bula dingin a rawn ti thawp sut a. Nui sangin ka han melh, hmuhnawm tih hmel zet hian min lo melh ve bawk.





"Tam tho mai" kan chhuah atang khan thil ka la ei miah lova. Lunch ei zawk pawh chu a sual tam lovang.




An park chhunga restaurant pakhatah chuan min chawlh pui a. An thilsiam a tui bawk si, ka ei hnem zek. Sawmdawnga pawh chuan a ei ve nualin ka hria.




"Khawiah nge kal leh i duh" dawr atanga kan chhuah rual chuan a ti sup a. Ka kut a kai leh chawt tawh. Min kaiin kan taksa insi ve fo tawh mah se a mi tawhna hi ngaia neih a har.




Chuan, thil mak deuh pakhat chu a bula ka awm hian ka thla a muang tlat zel. A mi uap a nat em vang pawh a ni mai thei.





"Ka hrelo " ka ti hap. Hmun thenkhat ah zin ve fo tawh mah ila Chennai hi chu ka vawikhat zinna liau liau ania, han tlawh kual mai tur pawh ka hrelo.





Thil ngaihtuah vung vung awm ang deuh hian a awm a. "Ummm, kalna tur ka hria e" tih leh min kalpui a rual nghal.




Car chhungah chuan kan chuang thaw veuh veuh a. Kan kalna lampang chu khaw chhung a ang vak tawh lo. Hmun reh lam min panpui zel a. A hnu rei vak lovah chuan hmun thengthaw nuam zetah hian min kalpui a.




Tuipui zau deuh mai hi a lo awm a. Mihring tlemte an lo awm a. Lawngleng panga vel a lo awm bawk. Car chu a sir deuh laiah a park a, ka lo chhuak ve vat. Ka awmna lama rawn pheiin ka kutah min vuan leh chawt a, min kalpui nghal.




"Lawng a chuan i hlau em" a rawn ti sup a. Ka sira a ding chu ka en chho deuh ha. Ni tla tur chuan a hmel a chhun eng deuh phut a, ka hmu tha zual takzet.




"Ka hlau lovang" nui sang hian ka ti a. Min lo melh chhuk run a. Ka sam thliin a chhem thawt chu a rawn hui kiang thuak thuak pah a. Ka lo melh mawl deuh tawp. Ka biang a sa leh hat hat tawh.




A rawn kiai suk a, "Kan chuang dawn nia" a rawn ti sup a.




Lawng kartu chu a ko vat a. Life jacket nen a lo phei vat a. Kan hak fel hnu chuan lawngah chuan kan lawn a.



Sawmdawnga chuan ka lawn tur chu min lo pui vat a. Ka zakah min pawm deuh titihin min hlang deuh nawlh mai.




A rawn chuang ve nghal a. Lawng hmawr lamah a thu a. Keichu a lai deuh hlekah ka thu thung.




Lawng kartu in a han kar chiah chu a che deuh laiah, ka tla hman tep. Mahse Sawmdawngan ka kawngah min lo chelh vat.





Pangngai taka lawng a kar hnu pawh chuan min thlah tawhlo.




Tuipui chu a zauvin hmuhnawm tham a tling. Hmun hla taka tlang sang tak tak pawh chu ka hmu pha. Tunah tak hi chuan ka hlim thlawt ani.





Tui khawih ka tum chiah chu Sawmdawngan ka kut a lo chelh vut. Ka hnung lam chu hawiin ka en deuh ha a "I tla ang" a rawn ti sup. Ka kut chu a chelh nghet em em mai lehnghal.





"Ka khawih chak alawm" ka ti nang nang a. Ka âw-ah chuan pangchanna a lang tel riau bawk. Keipawhin mak ka ti, hetia awm hi nuam ka ti tlat.






"I tla mai ang" a rawn ti hluk. "Sawmdawng..." ngenngawl deuh tak hian ka ti nang nang a. "Ok, mahse nghet deuhvin ka kut hi chelh la aw" a ti a. Ka lo bu rang teh asin.





Min chelh reng pah chuan tui chu min khawih pui a. A vawt deuh surh mai. Ka kut chu nghet zetin a hum run a, a kut lehlamin ka kawng a chelh run bawk.




Ka hnung maiah a thu bawk nen kan inhnaih hle tawh.




"A nuam em?" ka beng bulah chuan a rawn ti thum sup a. Hlim zeta a lam hawi pahin ka bu nghat nghat.




"Khalai hmun kha engtin nge i hriat a" kan haw leh tawh a, motor ah kan chuang mek.
"Ka secret place anih kha" hmalam melh reng chung chuan a rawn ti chhuak sup.




Chutah sawi zawm lehin "Chennai ka awm tirh hian ka thaw a ipik thei lutuk a. Tlaikhat intithawveng tura ka chhuak chu khalai hmun kha ka thleng hlawl a. Chuta tang chuan ka tlawh zeuh zeuh thin Hna thila rilru buai deuhna ka neih chang hian ka kal tlangpui" a rawn ti leh a.




Lo bu nghat nghat pah chuan "A nuam lutuk tlat" ka ti sap a, ka âw atang ringawt pawh chuan ka hlim zia a hriat theih ka ring.




"Kan zin leh hunah kan kal leh dawn nia" a rawn ti sup a. Ka lo melh vat. Kei leh Sawmdawnga kan zin dun leh dawn a maw. Tunah khan 'kan zin leh' tih tawngkam a hmang.




In kan thlen chuan a lo tlai ve tawh angreng. Zan lam chhuahna tur kan nei bawk nen eirawngbawl chawp ngai lo turin pizza leh eitur hrang hrang kan hawn nghal a.




Kan intihfai hnuin kan thil lei ho chu oven ah ka tilum a, kan eizawm nghal.




Room-ah insiam tura kan lut chiah tihah Sawmdawnga phone a rawn ri ral ral a. A kekawr ipte chu zenin a pickup nghal zat.
"Aw, ka nu" a ti chhuak sup a. Drawer hawngin kan thawmhnaw hak tur ka lo lachhuak nghal.
"Aw, a va zialo ve" a lam ka hawi vat. Sawmdawnga pawh chuan min lo melh vat a. Engthil nge mawnile.
"Kan rawn haw mai dawn mi"
"Umm...a pawilo ang maw"
"Anih le tluang deuhvin in kal dawn nia" phone a dah rual chuan "Ka pu a thalo ami" ka lo ti vat.





"Tha e...Lunglei lamah ka nu te an kal thut a ngai dawn nih chu. Ka pa unaupa, unaupa tih lemah ka nu nen an inneih dawna pa-a a zawn, chumi fapa chu a boral deuh thut a" a rawn ti sup a.




"A van zialo tak" ka ti niah niah a, "Mawimawii amah chauhvin a awm dawn tihna ami" ka tih zawm leh a.




"An hruai ve mai dawn nih chu" a rawn ti leh mai a.




Ka pa chu ka va khawngaih reuh tak. Thisenah inzawm lo mah se thihna hi chu kan hnaivai ami an nih hrim hrim tawh chuan an khawngaih thlak takzet. Intawrhpui bak tihtheih kan nei tawh thin bawk silo.





Sawmdawnga insiam lai chuan Ruatin min lo call a. Kan han inbe leh rih.



"Engtikah nge in lo haw dawn" a rawn ti lang lang a.
"Naktuk tuk velah aniang" ka ti hap.
"In cham rei bawk a, nutei ka nihna ni a hnai tawh viau in ka hria" a hmel tur awm ang ka mitthla thei, mitko min han san leh zeuh zeuh ang a, min chhaih laih a tum leh nasa dawn lutuk.




"Ngawi mai mai teh" ka ti hlak.
"Ka sawi dik hi ti viau suh" a rawn ti leh har har a. "Vanlalruat" ka ti hluai ringawt. Pakhat pa chuan kan inbiakna chu ngaihtuah awm pawhin a lang lo, a insiam mual mual ringawt.





Kan inbiak zawh chuan Sawmdawnga chu a lo insiam zo tawh a ni deuh mai.





Ka hma zawnah a kut a rawn lek a. Ka lo en deuh ha chuan "Lo kilh lawk" a ti sup a.




A hma khan engtin nge maw a lo insiam thin ni. Kamisz ban kilh thiamlo tur chu a ni mawlh lo. A hma pawhin coat suit nen a inhak zaih zel kha. Mahse engmah sawi buai lo chuan ka kilh sak ve mai bawk a.






"Inhnuaiah ka lo zuk nghak ang che aw" a ti sup a. Ka lo bu nghat.




Sawmdawnga kawrfual min leisak khuma ka dah pharh chu ka ban vat a. Ka inthuam nghal mawlh mawlh bawk.




A thlang thiam ka ti angreng khawp mai. Engtin nge maw hmeichhe thuamhnaw mawi a hriat theih zawk ni. Aw...a hausa bawk a a ngaihzawngte pawh a lei fo ang chu.





Ka ngaihtuahna chu duh lovin ka lu ka thing nak nak. Lo buai ve tur pawh ka nilo.




Make up tlem ka hmang ve a. A college kalpui thinte bula mawilo taka lan chu ka duh bik lo. Amah a palian angreng ropui sia, duhtu pawh a ngah dawn si. Ka pasal mualphona tur zawnga awm chu ka duh bik lo.





Ka insiam zawh hnu chuan bag akin inhnuai lam chu ka pan thla a. Sofa ah a lo thu run a, phone a lo hmang mek bawk.




Phone hmang reng chung chuan a rawn hawi chho a. Kan mit a intawng siah, min melh run run chu nuam ti lovin ka nuih sak a , a rawn kiai ve suk.




A bul ka thlen thlak chuan "Kan lo kal dawn chiah e" a ti sup a. Phone chu a ak tha zui nghal.



Kan inzui chhuak a, boruak a vawt deuh var vang chuan shawl hi ka bat deuh hlun a, party na hmuna hlih thlak leh theih turin ka ti.




Car-a kan luh rual chuan ac a on vat a, a rawn lum ham ham mai.





Building lian zet hmaah hian min dinpui a. A pawn lam landan atang chuan mi in luah lai a ang.




Kan inzui luh chuan an lo phe deuh suau suau a. Glass no an dawm far a, a then an ding a. Mipa leh hmeichhe thenkhat chu sofa ah insi chet chetin an thu bawk.




Chuan, ka rinai daihin Mizo ka hmu hnem. Hnam dang deuh vek an nih ka ring ania.




Sawmdawnga chuan nghet zeta min chelhin a thiante awmna lamah chuan min kai phei a.




U Siamsiamin min rawn hmuh chuan a rawn phul hlut.




"In lo thleng tluang thei maw, ka lo nghak char char tawh che u lawm" ka kut vawn pah chuan a rawn ti sawk sawk a. Nui sangin kan thlen tluan thu ka lo hrilh vat.





Sawmdawnga chu a thiante nen an inbe luam a. Keipawh U Siamsiamin min titipui deuh char char.





Rei pawh kan la awmlo tihah chuan kan hnung lam atangin Sawmdawnga chu âw fiah zet hian an rawn ko a. Hmeichhe âw niin ka hria.




"U Sawmdawng" kan inher vat a. Hmeichhe pakhat hleitling zet, pian fu zet hi a lo ding vang a. Kan awmna lam a lo pan mek bawk.




Kawfual tight gold rawng hi a ha a, a vun nalh zet chu a lang chiang kher mai. Pheikhawk sang pangngai tak a bun bawk a, a kutah glass a hum ran bawk.





Sawmdawnga bulah chuan a kal chawt a. A nek deuh talh talh mai.




Eng emaw sawiin chunu chu Sawmdawnga beng bulah chuan a phun ser ser a. Sawmdawnga hmel atang chuan eng nge a ngaihtuah awm ka hrethiam lo. Ka lam a lo hawi thut a, rang zetin ka lo hawisawn vat.





"Melody anih saw. Hemi hi an in ania, kan thianpa nau ania. Sawmdawnga nen hian college kan kallaiin an inngaizawng thin. A ngaizawng thin a ni zawk mah. Sawmdawnga hi chuan duh tak tak chuang lovin a kawp ve mai mai niin ka hre thin. Engah mah ngai duh suh aw" U Siamsiami chuan ka beng bulah a rawn ti sar sar a.





A hmelah chuan Sawmdawnga ring tura min duhzia ka hre thei. Ka lo nui lui sak a "A ho lutuk" ka ti sap.




Dik tak chuan eng nge ka rilruah awm ka hrethiam lo. Mahse U Siamsiamin 'Sawmdawnga ngaihzawng hlui' a tih khan ka beng a luah tlut tlut mai. Keimahah hian che dawt a rawn awm leh tawh.





U Siamsiami chuan washroom a hman lawk duh thu sawiin min kalsan a. Sawmdawnga te kha khawnge an awm ka hrelo, ka hmu leh tawhlo.





Keimaha ka lo din lai chuan ka bulah mi pakhat hi a rawn kal a. "Sawmdawnga nupui maw i nih a" a âw atang chuan Sawmdawnga chu a ngaihnep hmel lutuk.




"Aw ni e" ka lo ti tha ve mai bawk a. Min rawn hnaih sauh a, a rim chu a hai theih loh zu rim a nam rum rum mai.




Palian ve pangngai tak a ni a. Mahse a hmel chu ka ten zawng tak. Ka sawi thiam lo ka rap zawng tak hmel a pu.





"Huh...ka lainat hle mai che" a rawn tichhuak nghut a. A hmel ah chuan min ngaihnep zia ka hmu thei.



"A ni ai chuan ka tihlim zawk ang che" min rawn pan hnai a, ka darah a rawn kuah thuak bawk.




"Khawngaihin min thlah rawh" ka ti fiah ta fak. Ka pasal chanchin chutia a sawi chu ka ngaihdan a ni tlat lo. A hming maia ka pasal ni mah se a lam tan chu ka tihtur a ni tlat.




"One night stand a nimai" min rawn hnaih leh sauh a. A hmel chu ka ten hi a ni tawp.




"Engmah a hrelo ang, tunah pawh a kalsan daih che hi" a rawn ti leh a.




"I sawmna chu ka hnawl nimai rawh se" ti kha fakin a lak atang chuan ka petek ta dawrh. Ka kalsan nghal nal nal bawk. Min rawn umzui lo chu ka lawm tak tak ani.




Khawnge Sawmdawnga pawh kha a awm daih ni?




"I lo kalsawn daih a" U Siamsiami chuan ka lam pan pah hian a rawn ti a. Ka lo nuih tlawn ta vel ringawt. A titi chhunzawm lehnghal ringawt



"Bawihi" Sawmdawnga chuan a rawn ti thum dut a. Ka hnung lam ka hawi vat.



"I lo kalsawn daih a" a rawn ti sup a. Ka lo nuih tawi tak ringawt.





"Ka bulah a awm hi ngaihtuah tur a awm hlei nem" U Siamsiami chuan a lo ti hlak hlak a. Sawmdawnga chu a lo rum nghut.




Min ngaihsak ve takzet. Hrehawm ka tih leh tih loh min zawt awl lo bawk a. Nuam ka tih thuin ka lo chhang ve vat zel.




"Sawmdawng, i hming a lam char char ania" U Hminga chuan kan bulah rawn kalin a rawn ti a. A thusawi chu ka hrethiam chiah lo.




Sawmdawnga chuan U Hminga chu a melh deuh run run a. U Nathan-a chuan "Va kal a ngailo, a duh duhin rak mai mai rawh se" a lo ti hluk.




"Lalrammawia hi chu a hahthlak thin ngawt mai" U Siamsiami chuan a lo ti hlak hlak a. Eng nge an sawi awmzia ka hrethiam ve lo.




" A cho ar ar khawp mai che" U Hminga bawk chuan a rawn ti leh hluk a. Sawmdawnga chu va kal ngei se a duh hmel ngawih ngawih hian ka hria. In cho chhuahna lampang anih chuan thil tha anih ka lo ringlo ve tawp.




Sawmdawnga chuan min melh vung vung a "Bawihi lo awm lawk rawh aw" tih leh pen sawn vut a rual a. A thiante koh letna chu hre zui awm pawhin a lang lo. A kalsawn nghal vut.





Ka ngaihtuah ve ang reng, thil tha anih ka lo ringlo ve tawp. Lo chotute hi an awm a mawnle ka ti rum rum.





Ngaihtuah hmel zeta a kalsawn ka enlai chuan U Siamsiami chuan "Ngaihtuah suh, a chingfel mai ang" a lo ti sam et a. Chutah sawi zawm lehin " Lalrammawia hian a tibuai peih thin lutuk a. Mahse a hai der zel a. Tikhan va chingfel lawk rawh se " a tih zawm leh zat a.





Ka ring sual love , lo cho chhuaktu an awm ngei anih chu. Sawmdawnga chu a ngaihtuah awm ka ring chiah lo naa ka ngaihtuah tho mai. Ka pasal a ni ve miau si a.





Sawmdawnga thiante titi chu ka ngaithla reng a. U Siamsiami leh U Hminga phawk a chhuak leh a, an thusawi vang chuan ka lo nui ve hak hak thin.





Mipui au thawm a rawn ri hlut a. Thawm awmna lam chu kan pan phei ve vat.




Mipuiin an lo bawr luai luaina hmun kan va thlen chuan Sawmdawngan mi pakhat hi chhuatah thut betin a lo hnek chawrh chawrh anih chu !




Ka che thei tawh lo. Ka khur nghal hlawk hlawk thei, hetiang hian ngialngan lutukin mipa insual ka la hmu ngai tlat lo.





U Nathan-a, U Hminga leh U Rema te chu an che chhuak vat a. U Siamsiamin ka lo ding khur deuh dar dar chu min lo chelh vat bawk.




A thiante chuan Sawmdawnga chu pawh then an tum ngat ngat a. Mahse ramsa ang mai hian a mi thutbeh pa chu a sawisak zawm mawlh mawlh thung.





"A tawk tawh Sawmdawng" u Nathan-a chuan a ti that a. An pawt hrang nghal hlawk bawk.




Kan lam panin an lo hruai a. A mi sawisak pa chu nichin a nawmnah taka min lo betu pa kha ani. Lalrammawia an tih kha a nih ngei dawn hi.





A sawisa na tih chu hai theih rual a nilo. A hmai a thi hnuang a, a taksa chu a zawi hmel ngawih ngawih bawk.





Nurse ka ni a, thisen te chu ka hmu zing lutuk. Vawi tam inzaina room ah pawh ka lut ve fo. Mahse tun tum chu ka thau ah min man tlat a, ka buaipui thei lo. Ka khur hlawk hlawk anih tawp.





Sawmdawnga chuan min rawn melh khui a, ka lo melh ve chiah bawk. A hmel atang chuan a thimrim zia hai theih a ni lo.




A rawn tawlh hnai vut a. Ka lo ding khawng nghal deuh lah chu ka kutah min rawn ban chawt a. U Siamsiami min dawm behna atangin min pawt hrang nghal hlawk.





Pawn lamah min kaichhuak dawr dawr a, tunah tak hi chuan a bula awm ka duhlo ka hlau lutuk ringawt.





"Sawmdawng " mangang aw khur chuan ka ti dar dar a. Mahse hrelo ang hmakin min penpui pawk pawk thung.




Car-ah min hnawhlut tawp a, ring zetin kawngka a rawn khar a. Ka lo chhing sawk. Driver seat lamah chuan a rawn lut a. Steering hnehsawh zeta kuai herin vung zet hian min tlanchhuah pui nghal.





A lam ka va hawi chuan car hmalam a melg ngur a, a bek a pawng tawlh tawlh bawk.





Dawr pakhat zawnah hian car chu a tiding dawt a. A ri tuar thei, hmalamah ka bu deuh lawp, mahse ka intauhna lo.




Ka thutna lam chu a rawn hawng a, car atanga min kaichhuak in Undergarments dawrah chuan vung zet hian min luhpui a. Thong sexy zet chu pawt thla hrawkin a lo nghaktute chu pawisa a hmehbel nghal chawt a.





Dawr nghaktuten "Ka pu pawisa kir" ti-a vai tawnga an auh letna pawh chu hre awm pawhin a lang lo. Car-ah min hnawh lut leg a. Chetsawn nachang pawh ka hrelo. Ka hlauh em avangin ka bing mup mup a ni ber. A thong lei chu car hnungah a thehphei pawp a. Vung zetin min tlanchhuah pui leh nghal.






Kan in kawta ding dawtin min kaichhuak lehnghal a, a thong lei pawh kha a la tel ve zel. A car chu garrage ah pawh a dahlut lo. Room lamah min kaichho dawr dawr a. "SAWMDAWNG" ti-a hlauthawng zeta ka koh lawm lawmna pawh chu hrelo angin a awm hmak.






Room ah chuan min theh lut tawp a, ka tlu thelh zui. Kawngkhar a kalh nghal zat a. A rawn lehhawi vut a. Min melh khui a, a hmel dur khup chu tawrhhlelhawm tak a ni. Hlauhnain min rawn tuam nghal tup tup mai.





Min rawn pan phei a, ka lo tawlh hnung ve zel a. Khumah chuan inpalin a zangthal zawngin ka tlu thlawp.





"Lalrammawia nen chuan engtin maw in lo khawsak a, zankhat thil thu lek ah, chu pawh ka lo awm loh chhung second reilote chhung khan" sehchilh zet hian a rawn ti chang bawl a. Ka hlau lutuk chu ka lo khur dar dar.





Chutah a thong lei chu khuma rawn thehthlain "Ha rawh le, zanin hian i pasal chu tunge i hriat a ngai" a rawn ti chang leh bawl anih chu !



____*_____*_____*_____



(Ka tlai, mahse a thui ve ania aw. Tunlai Kohhran thilah kan buai em em a. Ka lo tlai emaw, a lo tawi deuh thin anih pawhin min lo hrethiam ve hram hram thin ru aw. In lo chhiar ve avangin ka lawm awn awn thin a, in lo comments a, in duhdan leh ngaihdan te in lo sawi ve thin phei hi chuan ka lawm lehzual🥰)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 9th, 2022, 1:06 pm

OUR MARRIAGE
By CVL.Awmpuii





Chapter 12




Vawiin chhuna min duatna âw ka te, min ngaihsakna leh a hmel dam thlup te kha tun hun reilote chhung khan a reh nghal vek.




Thinrim bek pawng tawlh tawlh hian hnai zetah min bih a.




Min pawt tho lawpin a thong lei chu min hmehbel chawt a "Ha rawh" a rawn ti chhuak leh khui. Kei erawh chu a thong lei keng chung chuan ka ding khawng lah thung.




"Sawmdawng" hlauthawng âw khur dar dar chuan ka ti a. "Khatianga awm kual vel kha a tullo ang. Lalrammawia bulah kei hi mipa pawh ni lo angin min lo sawi a ni lawm ni" a rawn ti chhuak leh hrawk a, a thusawi tawp lam chu a ring tha leng lawng viau tawh.





"Chutiang ka sawi lo" ka ti vat. A kut a rawn vai thuak a "Le...i taksa chu lo enchiang chiah ila, mipa ka ni nge ni lo chu i hre dawn alawm" min ten hmel zet hian a rawn ti kha leh fak a.




Ka rilru na lutuk chu ka hrawkah a inhnawh tup tup mai.





"Ka ha dawn lo" zawi te hian ka ti sep a. Hetiang hi a hmaah ka ha dawn lo hrim hrim. Eng ang mi ah chiah nge min ngaih ka hre thin lo. Tawngkam dengkhawng tak tak ka bula a hmang fo mai hi hrehawm ka ti thlawt ani.




A awmdan a inthlak zung zung a. Na tak takin min siam a, a chang leh min duat awm ang tak hian a awm leh a. A mizia hi hriatthiam a har thlawt alawm.





"I ha dawn lova" ka lam pan pah chuan a rawn ti chang bawl a. "Ka ha duhlo" tah insum zet hian ka lo ti.




Khum bula vase chu a paih keh chhuai a, ka lo phu nghal dawrh.





"A tha e" ti nghut ka lam ah a rawn tawlh nghal vut a.




Hneh zet hian min rawn man a. Khumah chuan ting awlh khawpin min namthlu nghal pawp.




Rang zetin ka lo tawlhsawn a. Ka tho tur chiah chu min rawn bawhbet nghal run. Ka hlauthawng tawh lutuk takzet. Ka chiai zia chu ka hmelah pawh chiang taka a lan theih ka ring.




"Sawmdawng " ka ngen a ni ber. Ka hlauthawng lutuk chu ka â ruai in ka hre hial mai.




Hneh zetin ama kawrfual min lei ngei kha a rawn hlim chho pawk a. Indan tumin ka lo chum let ve pawp pawp a. Mahse chung chuan awmzia a nei lo khawp mai. A chet a thulh phah chuanglo.




A rawn ri thawt a, ka kawrfual chu a pawt tet tih ka hre zawm zat. Hnehsawh zet hian a hlip nghal tawk a. Ka kekawr bul pawh thlak a tum leh lai chuan ka theihtawpin ka lo indang a. A pawtthla mai thei biklo.





Ka lo chumna chu ngai thei lo tih hriat zet hian ka kut chu ka lu chungah min vawnbeh sak a. Khum lu bula ka kawr tet a paih kha lain ka kut chu min tawn behsak nghal hmak.





"Sawmdawng...khawngaih takin min thlah hram rawh" âw tial ruai chuan ka ti a. Ka mittui vang chuan a hmel pawh ka hmu tha thei tawh lo.





Elhsen zet hian min nuih hawk a "Lalrammawia chuan tihian a khawih che em" tih leh ka bra chhana ka hnute tham a rawn rual a. Ka tal leh phat phat.





Bra leh kekawr bul nen chauh ka awm tawh a. Hlauh namen lohvin ka hlau tawh.




Min delh bet reng chung chuan a kamisz leh coat chu a phelh pawp pawp a. A kekawr phelh a tum leh chiah chu ka lo tal leh phat.




Phelh ta lo chuan a aia na zawk mah hian min rawn bawhbet leh a. A hmuiin ka hmui a rawn si a, na zet hian min fawp nghal ngawng ngawng. Ka hmui ka lo chip tlat thung.




Chutah inbeng khalhin a kekawr chu phelh a tum leh a "Sawmdawng, pawngsual ka duhlo" ka âw a ri chang chang tawh. A thiltih lai chu a tawp chawt a. Kei erawh ka tap baw nghal hawk thung.





A inlahrang nghal hlawk a, a tho zui vut bawk. Keichu khumah ka mu kawm chal a, ka rilru na lutuk chu ka hrawkah a inhnawh tup tup thei hial.





"Lalrammawian a khawihna che chu mamawh inphuhru tawn a nih laiin ka khawihna che chu pawngsual a ni ang maw" a rawn ti kha fak, a nui tel hawk bawk. A nuihzat vang erawh a ni hauh lo.





"Inha rawh" tih ri ka hriat rual chuan na zeta kawngkhar in khar thawm ka hre zawm zat.




Zawi zetin ka mengchhuak a. Min tihdan vang khan ka rilru a na lutuk. Min khawih chhe hman lo mah se ka rilru natna chu thuk tak ani.




Mipa tumahin khatiang khan min la khawih ngailo. Vawikhat tawhsual ka tawh tep tih loh kha chu. Mahse khami tum khan tuna min khawih luih tumtu ngei hian min rawn chhan anih kha.





A hmaa min chhantu kha ka tan hlauhawm a rawn chang ta anih chu.




Rizai chu pawtkhawm vekin ka tap chhuak nghal hawm hawm. Tinge khatiang khan Sawmdawngan min tih. A thusawi dengkhawng zet zet te kha ka ngaihtuah let a, keimah intennain ka khat vek lo chauh.




Washroom ah chuan kalin darthlalang hmaah ka inen a. Ka âwm leh hnute hnuai duk chur te chu ka hmuh hmaih lo. Ka mittui a rawn luang leh ngiai ngiai a. Khatianga min titu kha ka pasal a ni tih ka rilruah a rawn lut a. Ka inkhawngaih thar ta riau lehnghal.






Zing ka harh chuan ka mit a thip thum mai. Nizan boruak kha ka ngaihtuah chhuak nghal zawk a. Ka thin zawn a na ngut ngut hial thei.





Sawmdawnga chu min chhuahsan hnu atang khan a lo let leh tawhlo. Khawiah nge a kal ka hrelo va, a awm rih lo chu ka lawm tawk viau ani.





Inhnuai lamah ka hmu lo lehzel bawk nen ka thaw huai thei. Ka ril chu tam lo viau mah se ei luih hram ka duh. Chaw ei that loh chu taksa tan a pawi zia ka hrechiang tlat.





Chawhmeh pawh siam em em lovin Artui awm sa chu ka kang tawp a. Tam deuh ei tum pawh ni ila tuna ka dinhmun angah hi chuan ka ei thei lo sa.





Ka ei hmun ka sengfel mawlh mawlh lai chuan ka nu in min lo call a. Chutia caller ID a a hming ka hmuh ngawt pawh chuan ka hnuk a ulh nghal teuh ringawt.




Ka pickup rual rual chuan "Mambawih, i dam tha em" a rawn ti dam nghal raih a. Chutia ka nu âw dam lutuk te chuan nizan thil thleng min ngaihtuah chhuah tir a. Haw daih ka chak rum rum mai.





"Aw, dam tha lutuk. In dam zawk em" ka ti nghal zat a. Ka âw khur tur chu ka thunun viau bawk.




"Dam tha e. I u Nu-i hi a buaithlak anih hi. Raino a haw lutuk a, a uak reng a. A khawngaihthlak tak tak ani. A cher zo vek tawh. I û lah hian a ngaihtuah em em mai bawk sia. Hna pawh nihnih ngawt a chawlh phah tawh" a rawn ti mawlh mawlh a.





Ka û buai phili vel tur chu ka mitthla ah a rawn lang a. Ka nui chhuak hak.




U Nu-in Amos-a a pai tirh khan a'n che over thei mai mai khawp a. Inhnuai atanga a rawn chhuk turte kha a rawn pawm thla kher zel. U Nu-i kha a zak thin bawk sia, a melh leh ram ram thin a. Ka û lah khan a haider hmak zel bawk si.





"A va zialo ve" ka ti ve vat a. Ka khawngaih angreng khawp mai. Amos a pai lai khan huat a neih awm ka hre bawk si lova.




Bawihtea chuan a pi phone chu a lo chhuh vat a. "Atee..." a rawn ti nghal raih.





Ka chhungte nen kan inbiak zawh hnu chuan ka lung a leng thar hrep lehnghal.




Room-ah chuan keimahin ka tap deuh chawt a. Tihtur ka hrelo khawp mai. Sawmdawnga awmna chin lah ka hre bawk silo. Ka rilru a buai takzet.





Ka thuamhnaw vel ka lo thleh fel lai chuan inhnuai lamah door bell ri ka hre zawm zat a. Rang zetin ka chhuk thla a. Sawmdawnga chu anih ka ring lo, ni se door bell rawn hmeh ngawt thu a awmlo.






Ka zuk hawn chuan U Siamsiami lo ni rengin, a rawn nui var var a. "U Siamsiam..." ka lo ti raih.
"Tihtur ka hrelo lutuk a ka lo kal ringawt" a rawn ti a. Ka lo nui hak.





Inchhungah chuan kan inzui lut a, a han hawikual vel a. "Khawnge Sawmdawnga" a rawn tih chuan chhan mai dan tur ka hrelo. Ka ngawi deuh vang vang phawt a.





"Hnaah an buai deuh a" ka ti ta tawp. "A mak, Malsawmdawnga em em hi chu, hna ti reng mai" sofa a thut pah chuan a ti hlak hlak a. Ka thusawi kha a awih nghal thlap anih hmel, ka lo thaw huai.





"Nizan ah lah khan a che mak sak si, mahse ka dem miah lo" thutak deuh zawk hian a rawn ti leh a.





Nizan chungchang a rawn sawi chuan ka lo ip chawih "Coffee ka lo siam ang che aw" a thusawi chu sawi zawm duh lovin ka ti ta daih. Nizan thil thleng vel kha chu sawi let pawh ka duh tawh lo. Ka ngaihtuah zawng ringawt pawhin ka bing mup mup thei.





Coffee chawi chuan ka va let leh a, a lo ban vat.





"In haw tluang maw" a rawn ti leh a, sawi ka duh tawhloh nen ka lo bu nghat a.




"Lalrammawia khan buaina a chawk chhuak reng zel a. Sawmdawnga hi a er tlat a, mahse in pa hian engtin mah a ti buai duh ngai lova nizan kha chu a dawhtheihna in a tlin ta bik lo aniang a khawih nasa emai" a rawn ti leh zat zat a. A hmel atang chuan Lalrammawia chu a ngei hmel lutuk.





"A pawi e, in party a buai phah ta sia" ka ti ve hap a. "A ho lutuk, Lalrammawia vang vek anih kha. Sawmdawngan a khawih nghek kha ka lawm naklaia " a rawn ti daih.





U Siamsiami hi chu college an kallai pawhin a kawlhrawn ve thawkhat viau ka ring. Mahse misual chu a ni hauh lo thung.





Thildang sawiin kan titi ta daih a. Chennai ah hian college a kal atangin a la awm char char thu te min hrilh a. A pa sumdawnna pawh a awm tho avangin a awm tlang ta rih niin a sawi. Mizorama rawn haw zeuh chang a neih ve thu chu a sawi. An khawsak a harsat vak ka ring hran lo. Mahse a chapo miah lo thung.






U Siamsiami chu nilengin a lo leng a. Kawm a nuam bawk si min tihlim ta phian.




Tlai dar 4 vela haw a tum chu Sawmdawnga a rawn haw hlawl. U Siamsiami a hmu chu mak a ti ve deuh aniang, a en deuh ngur ngur a. Min rawn melh ve chiah chuan ka lo hawisawn vat.





"Hna hi atchilh lutuk suh. Puipuii a khua a har ang asin i kalsan daih a. Lo leng lo phei ila chu a khua a har viau ang" ka bul ami chuan a lo ti nghal hlak hlak a. Sawmdawnga chu a ngawi ngul ringawt.





"Ngawih ngul reng pawh kha a ngailo" U Siamsiami chuan a ti leh hlak.




Sawmdawnga chuan a melh run run a, "Ka inthlak dawn" tih leh inchung lam pan a rual nghal daih.




" A mak ngel ngul thin ania Malsawmdawnga hi chu. Puipui, hrethiam hram hram rawh aw a luhlul thin lutuk a. A hna thilah a buai a nimai thei a mood a fuh hmel zan lo" U Siamsiami chuan ka zai ngai tak chung hian a rawn ti a. Lo nuih lui seihin ka bu nghat nghat.





"Anih ka haw ang aw. Min lo thlah kher pawh a ngai lo, in pa kha han ngaihven rawh " inchung lam min mitmei pah chuan a ti leh a.




Ka lo hnial vat " Pawn thleng ka lo thlah phawt ang che" ka ti ve tlat a. Min hnial zui bik lo.





U Siamsiami haw hnu pawh chuan inchung lama chhoh mai ka hreh tlat. Sawmdawnga kha a lo awm ren run awm si a, ka hmu hreh tawh takzet.





Chokaah lutin eirawng ka bawl zawm daih. Siam tur em em pawh ka hre chuang lo. Tun a ka duh ber chu ina haw daih ka chak. Kan in pangngai anih loh pawhin Sawmdawnga te in pangngai tala awm daih kha ka chak. Kan pahnih chauhva awm chu ka duh tawhlo.





Door bell a rawn ri a, ka thiltih lai chu dahin kawngkhar lam ka pan a.




Ka va hawn chuan hmeichhe pakhat hmeltha zet hi a lo ding a. Nizan ami kha niin ka hria. Tunge a hming khale...aw U Siamsiami min hrilh kha, Melody kha a ni.




"U Sawmdawnga a awm em" nui var var hian a rawn ti a. Ka chhan hma hauhin ka hnung lam atang chuan "Rawn lut rawh" Sawmdawnga chuan a rawn ti a.




Ka hnung lam ka hawi vat. Sawmdawnga chu a lo ding run anih chu.





Rang zet hian Melody chu a rawn pen lut a. Sawmdawnga chu a nuih nghal sang.




"Melo-i hian chaw a rawn ei dawn" Sawmdawnga chuan min melh pah chuan a rawn ti nghet charh. A tirah engmah min hrilh bawk si lo eirawng ka lo bawl fel thuak tawh bawk si.



"I sawi lawk si lova" ka ti sep a.
"Tunah ka sawi alawm" a lo ti leh mai a. Hnial zui tawh lo chuan "Imm...anih chuan ka siam belh leh mai ang" ka ti nghat a.




"Nidangah kan ti zawk mai dawn mi" inthlahrun hmel taka Melody in a rawn tih chuan Sawmdawnga chuan "A siam belh leh dawn chu" a lo ti nghut.




"Nia, a harsa hlei nem ka siam leh mai ang. Lo thu la" nui var var pah chuan ka lo ti ve vat. "Min lo zui chho rawh" Sawmdawnga chuan Melody melh pah chuan a ti sup a. Ka lo meng deuh ak.





Sawmdawnga chu a pen chho nghal pawk pawk a. Melody chu a kal ve mai dawn emaw ka tih laiin ka lamah a rawn pen phei a. "Sawmdawnga nen hian kan inngaizawng thin a" a rawn ti ringawt a. "Ka hria alawm" ka lo ti ve mai, ka chhan dan chu a beisei lawk lo nge ni a meng buai deuh nak.





Chutianga a sawi ngam zawk chu mak ka ti. Chu pawh kei Sawmdawnga nupui bulah lehnghal. Mi pangngai tan chuan 'a nupui ngaih ka titha lo ange' ti-a sawi lan pawh duh awm loh zawk tak ania.





"Ka hrilh nawn che anih chu" a rawn ti leh hlak a, a hmel atang chuan min elhsen zia ka hmu thei.
"Ka lo hre nawn alawm" ka ti veleh ngat. Han hnial zui chiam duhlo mah ila min tham lo lutuk chu ka duh bik lo.





"I zam lo hle mai. Ka ta hi ka la let leh vat ang" a rawn ti fiah fak a. "Ka neihsa la let turin ka bei ve ngai lo" ka ti let sak. Ka chhang zui duh tawhlo. Choka lamah ka kalsan nghal nal nal.




Khatiang khan mi ka vawikhat chhan letna a ni, ka inawih theilo hial zawk. Min tham lo lutuk kha ka tilet ve chak hrim hrim alawm.





Melody eitur chu ka siam mawlh mawlh a, chaw chu a lo ei ve ta poh aniang chu.





Ka siam zawh hnu rei vak lovah insi chet hian an rawn inzui thla a, Melody chuan hnehtu chan chang inti zet hian min lo melh kalh bawk. Engah mah ka ngai buai duhlo lui hmak.




Eitur chu ka lo chhawp a, an rawn thu dun ringawt a. Keipawh an thut lohna lampangah thuin ka kil ve nghal.




"U Sawmdawng, zanah ka thiannu birthday ah min kalpui la" Melody chuan a rawn ti a. Sawmdawnga nen chuan kan inmelh vat. Engtin nge a chhan ang tih ka lo ngaichang hmanhmawh.




"Kan kal dawn nia" a tih chuan mit ka lo chhing sawk, ka awm lai em em te chuan a hnial der ve ka ring asin mawle. Mahse a pawi lo e, keimahin ka awm leh theih phah zawk ang a a tha mai zel e.




Room-a a insiam mawlh mawlh lai chuan ka va lut a. Khuma ka thil tihfel hmabak ho chu ka thlep leh mawlh mawlh.




Melody khan inhnuaiah a lo la nghak ran a. Ka ngaihtuah chiang a, engtin mi pasal khatianga a sawm mai theih zawk ni. Ka pasal tak chu ni chuang lo mah se khatia hmeichhia zawkin a sawm kha mak ka ti. Tin, Sawmdawngan a lo hnial miah lo pawh kha thil mak ani. Heiham... ngaihtuah buai tawh lovang.




A insiam zawh a a chhuak tur chu "I rei dawn em" ka lo ti sep, a lo haw hun tur hriat ka duh. "I hriattur tula ka duh chu
ka hrilh mai ang che" a rawn ti nghet churh. Ka lo thaw hap ringawt.





Vanduai ka va inti tak em aw !





Sawmdawnga chhuah hnu chuan khumah keimahin ka mu meng kar a, ka ngaihtuahna in thil tam tak a tin zawn.




Khanu nen khan engtin nge an awm ang? Sawmdawnga hian a la duh ve reng em ni tihte chu ka ngaihtuah a, ka bing mup mup hial thei.




A chungchang chu ka lo ngaihtuah buai tur awm ve miah lo mah se ka ngaihtuah tho bawk si.




Min duat chhung reilote pawh khan ka thla a muang em em anih kha. Khanu kha a duat ve ang em? Ka thik tihna ami? Ni lo ka thik chhan tur a awm lo.




Thil ri rak thawmah ka harh a. Ka lo muhil daih tih ka hrechhuak chiah.



Chhin leh mai ka tum chu a rawn ri leh rak a. Sana ka en chuan zanlai dar 1 a lo ri tawh. Chuan, Sawmdawnga hi a lo haw tawh ang em?




Ri lo chhuak chu belchiang turin room kawngka chu ka hawng de de a. Ka thil hmuh avang chuan ka khawng awt thei.




Kan room rawn pan chhohna step bulah chuan Sawmdawnga leh Melody an rawn infawp ngawng ngawng anih chu!




Duhthawh zetin an infawp a, Melody kawrhak pan zet chu a malah a tawm chho tawk a. An inkeih deuh ngawng ngawng a ni tawp.




Rei en duh lovin khum lamah chuan ka let vat a. Ka lung a phu dup dup mai. Eng ang takin nge ka awm ka hrethiam lo. Mahse ka hrawk rawn inhnawh tup tup avang chuan ka tahchhuah mai loh nan ka hmui ka pet fan fan.




Zing ka tho chu ka lu a na bur mai. Nizan khan ka tap chiang alawm. Heti taka ka zuau ta mai hi ka hrethiam bik lo.




Tun hnai hian ka tap zing malh malh khawp mai. Chu pawh mi pakhat vang vek lehnghal in.




Ka hmai ka phihfai hnu chuan inhnuai lamah ka chhuk thla a.




Choka ka lut phei chiah chu Melody a lo awm vang mai. Gas bulah a ding a, Sawmdawnga TShirt lian zet a ha a, kekawr bul pan te a ha bawk.





A rawn hawi phei a, min nuih sak. Ka lo melh tawp ringawt.





"Sawmdawnga khan riak turin min ngen nasa sia ka rawn riak ta mai" a hmui petsawi zeuh pah chuan a rawn ti a. Ka rinlawk chu ni deuh tho mah se a sawi chhuah kher takah chuan ka thinlung a che leh dawt tho mai.





"A tha alawm" ka ti nghat a, a meng deuh awk. Ngai pawimawh lo zet hian gas bulah chuan ka va kal a. Tui ka chhuang zui zat.





"U Sawmdawng..." a tih ri ka hria a, mahse ka hawi let duh lo. An pahnih hian ka hmu peih lo.




"Ka va thlah ang che" Sawmdawnga chuan a ti sup a. "Puipui..." Melody in min rawn koh kher avang chuan ka lehhawi a. Sawmdawnga a nek leh talh talh tawh.




"U Sawmdawnga hian min va thlah lawk mai rawh se aw" min ngai pawimawh ve awm tak hian a rawn ti a. "A tha alawm" ka lo ti tha ve mai. Mahse ka rilru chuan 'a ngailo' a ti thung.





An inzui chhuah hnu rei vak lovah Sawmdawnga chu a rawn let leh nghal a.




"Vawiinah kan haw a ngai. Ka pa a awm silo va, office an buai" a rawn ti nghet churh a. Ka hlim lutuk chu ka auchhuak lo chauh.





Helai hmunah hian ani nen nikhat chhung lek pawh kan awm leh anih chuan ka â thei mai ang.





Kan thuamhnaw vel ka siam chhung chuan Sawmdawnga chu room dangah hna a thawk mawlh mawlh a. Phur zetin ka lo insiam mawlh mawlh thung.




Ka phone a rawn ri a, caller ID ka en chu Doctor Rinpuia a lo ni.



"Hello" kan haw tur ka phur lutuk vangin ka aw chu a zangkhai vahin ka ring.
"In zin thu pawh min hrilh ve lova" a rawn ti sup a. Ka lo nui tawi tak , min hmu thei lo tih ka hriat rual chuan tawngkain ka chhang vat a.
"Kan kal deuh thut a, vawiinah kan lo haw dawn" ka ti vat a.





Rei kan inbe lo kan inbiak zawh hnu chuan thawmhnaw chu khung fel leh mai ka tum a. Ka inher chiah chu kawngka bulah chuan Sawmdawnga a lo ding run anih chu! Min melh leh khui tawh. Mahse a mitmeng atang chuan a ngaihtuah awm ka hrethiam lo.





A rawn pen lut a, washroom ah a lut tlang nghal daih. Engmah a sawi lo ringawt pawh chu ka lo lawm hman em em. Ka mood fu ve tan chauh hi a tawngkamin a rawn tihchhiat ka phal rih lo.





A rawn chhuah leh chuan ka lo insiam zo tawh.





Rei rial lovin Airport lam kan pan nghal a. Mizoram kan thlen hnu thleng pawh chuan kan inbe lo.




Kan chhungte chu Lunglei lamah an la awm miau vangin kan pahnih chauhvin kan awm leh rek rek phawt dawn chu ania. Mahse mahni ram ngei a ni tawh tho a, a dan a dang deuh.




In kan thlen meuh chuan ka chau ve hnawk thei. Sawmdawnga chuan kan bungrua chu inchungah a dah chho leh vek a, ka tihpui peih rih thlawt lo.




A hunfel zawh hnu chuan office lama a tlang tur thu sawiin min chhuahsan lehnghal daih. Ka lo thaw huai ringawt, mahnia hahdam taka awm ka chak miau a.





Ka inbual fai zawh hnu chuan kan thuamhnaw chu wardrobe chhungah ka dahtha nghal vek a, chau viau mah ila nakina tihah ka khek thiam lo.




Zanriah chu dawr a kan ei nghal daih avangin eirawng bawl a ngai lova. Ka mu tlang nghal daih.




Ka hmui chu thil lum thar tharin a rawn si a, ka biang pawh kutphah hlai zet hian a khuap run bawk. Ka chauh em avangin ka meng thei lo. Ka mumang anih ka ring.




Ka chal, ka hnar, ka biang leh ka hmui te chu thil lum ther ther hian a rawn si thuak thuak a. Ka thlawk delh delh nimai hian ka hria.



____*____*_____*_____*_____

(In hmanhmawh thei si 😆. Ka rawn hmanhmawh ve e ka tia, a ngaihnawm loh mai thei. Pathianni chu Pathianni anih miau avangin kan chawlh thin kha aw. Weekend te a ni bawk a, lo comments ve duah teh u ❤️.)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)