MI AMOUR BY SumMer Ralte (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: MI AMOUR BY SumMer Ralte (Completed)

Unread post by Ngaia » January 16th, 2022, 1:23 pm

CHAPTER-19






"Sam chu biak i tum leh tawh em?" Ahmingi'n a tih chuan lu ka lo thin khum a, "Aih, ka be tlang thei lo" zawi zetin ka ti a, ka biak theih loh thut chhan chu ka ngaihtuah let neuh neuh a; mak hi ka la ti tawp thei lo a ni, khami ni pawh khan office atanga ka haw kha in thleng min thlah kha a ni a, a zana biak theih loh a a awm nghal tawp chuan ka ngaihte pawh a ti tha lo tulh tulh bawk








"A nih leh a chanchin thar ber kha i hre tawh em?" Eng emaw chen kan ngawih tlan hnuah Tluangzeli chuan a ti a, amah chu en nghal vatin, "Eng a chanchin thar ber maw" ka hriat loh em avang chuan ka ti ha a, ka thiante pahnih min en dan chu ka duh miah lo; min en dan atang chuan thil tha a thleng dawn lo tih ka hre thei, khawngaih hmel zeta min en avang chuan ka thin te pawh an tirim dawn lek lek mai








"Sawi ta che u, Sam chuan eng chanchin nge a neih" ka aw pawh chu a vin lek lek tawh a, an pahnih chuan ka en reng bawk, "Nupui a nei dawn" Ahmingi chuan zawi te in a rawn tichhuak sep a, "Sawi tha leh teh u, tuna in sawi kha engnge a awmzia" ka hre lo a ni miah lo mahse Sam chuan nupui a nei ang maw? Engvangin? A ni chuan min kalsan loh tur thu kha a sawi vek si a, ni lo nupui min neihsan ngai lovang








"Emilia-i tih nen khan an innei dawn, thlaleh thla hmasa ber karah" Ahmingi bawk chuan a ti leh a, a sawi zawh rual deuh thaw in chhuatah ka thu thla hnawk a; ka thu hriat kha thudik a ni thei lo, Sam chuan nupui min neih san ka rem ti ngai lovang, ni lo ka phallo, "Khawngaihin a bulah min hruai rawh u, amah chu biak ka duh" chhuat melh reng chungin ka thiante bulah chuan ka ti a







"I hmu thei lovang, thu kan hriat tirhin keini pawhin hmuh kan tum a mahse min hmu duh lo" Tluangzeli chuan a ti ve bawk a, hetiang ringawt hi chuan a ni thei lovang; kan in ka chan a tunah amah leh zel ka chan ang maw? Chung lam roreltu khian ka chungah hetiang harsatna zozai hi eng vanga ka chunga thlen tir nge a nih? Tinge ka vanduai bik em em ni








Ka tah a chhuak thei lova, ka melh ngai ka melh tlawk tlawk a; thochhuak tur tak ngial pawhin chakna ka nei lo a ni ber. Ka ngaihzawng hmasa ber, ka rilru zawng zawng ka pekna leh ka ta tur chauha ka lo suangtuah thin kha ka ta a ni ve thei ngai dawn lova; hmu reng mah ila ka khawih thei tawh dawn lova, ka ban phakah awm mah se ka hnaih thei tawh dawn lo bawk







Awm dan tur chu hriatthiam har ka ti a, ka chawmawlh vek ni maiin ka hria ka thu hriat takte kha dawt nise ka ti a mahse thudik a ni ngei bawk si; min kalsan ngailo tura in sawi thin khan chhan leh vang awm hauh lovin zankhat thil thuah ka hriat loh laiin min lo kalsan fel der tawh tih ka hriatchhuah leh lek phei chuan ka na em em a, ka awm atanga na rawn chhuak thip zawk zawk leh vilh ngut ngut chu ka chum ka chum a








Ka thin zawn nat lutuk vang chuan thawk min ti harsa a, ka thaw nghal hrawih hrawih bawk, "Zualte i tha em?" Ahmingi chu rawn thu thlain ka dar tawn tawna dawm pah chuan a ti a, ka chhang thei lo a na em a ni; thawk chu harsa ka ti tial tial a, ka thi thei mai dawnin ka hria, "A hnung kha zut sak rawh a hnang a nih hi" ti ri te chu an hla tial tialin ka hria a







Ka hnung chu min zut sak ngei tih ka hria, mahse engkim chu a thim tial tialin ka hria a; ka thawk te pawh chu a tawp ni maiin ka hria, tu emaw ban tha chak takin min pawm kang nawlh tih ka hriat bak chu a reh ta thuap a, engmah ka hre tawh lo. Ka harh leh chuan damdawi inah ka awm tih ka inhrethiam nghal mai a







Ka hawi kual nghal vat chu Tluangzeli chuan min hmu in min rawn pan phei vat a, "Engnge i an? I zia deuh tawh em?" Min ngaihtuah hmel zetin a ti nghal mawlh mawlh chu lu ka lo buk khum nghat thung, Ahmingi awmna zawh tuma ka ka ka ang chiah tih chuan Ahmingi leh Sam te rawn inzui lut ka hmuh avang chuan ka chip leh nghal hmak a







"I lo harh tawh nimaw i tha em, na te i la nei em?" Min hmuh rualin Ahmingi chuan a ti nghal a, Sam ve thung erawh chu bang nghengin ngawi rengin a lo ding thung. Chutianga a awm ka hmuh chuan min ti na thar leh nu berin ka hria a, tinge hetianga a awm tak tlat; a hma kha chuan chhete na ka neih pawhin a buai ber berah a tang ziah thin kha a ni sia, tunah chuan hmelhriat loh enin min en tawh thung







"Engtin nge hetah ka awm theih?" Sam hmel chu en rei duh lovin ka thiante lam chu ka hawi nghal vat a, ka hriat hnuhnun ber kha chuan dawrah kan awm tih chiah ka hria mahse engtin nge hetah ka awm theih? Ka thiante pahnihin min hruai dawn pawh nise an pahnih chauh chuan min zawh ka ring chiah bawk si lo, "Sam hian a hruai che a" a tih chuan amah chu ka en nghal vat a








Min enin a nui suk a, a nui hmel mawi tak te saw ka hmu leh tawh awm si lova! A hma zawnga tap thei hauh lo kha Sama nui hmel ka hmuh rual chuan ka in rin hma hauhin ka biangah mittui a luang thla nghal zawt a, rang takin ka hru hul nghal vat bawk; "Kan lo chhuahsan rih phawt ang che u, eng emaw sawi duh innneih takin" ka kut hum vawng vawng pahin Ahmingi chuan a ti a








Ka chhan hma hauhin rang lutukin Tluangzeli nen chuan an chhuak dun nghal zat bawk, nidang chu nise sawi tur ka hriat dawn tehlul nen tun tum zet zawng a dan a dang khawp mai; sawi tur ka hriat loh avangin ngawi rengin khumah chuan ka thu a, ka kutzung tang ka khalh pah niap niap bawk. Chutiang chiahin Sama pawh chuan sawi tur a hre biklo a ni ngei ang a ngawi ve reng a








Boruak chu rit ka tiin ka thawk te pawh chu a sak leh tan ni maiin ka hria a, min ti ipik tak zet bawk; ama lam ka hawi ngam lova ka hawi chhuah ruala ka hmuh chuan insum zo hauh lovin ka tap dawn tih ka hriat chian vang pawh a ni ang, "I lo dam em?" A tawngkam chu kum tam tak inhmu tawh lo, inhmu leh thut hi a ang ka ti ber a, chhang lovin lu ka lo buk khum nghat thung









"Ka chanchin i hriat vang a ni tiraw" a tih chuan amah chu rang lutukin ka en nghal vat a, a thusawi dan atang chuan amah pawhin phat a tum lo tih a hriat theih viau a; sawi se ka tih rualin sawi lo se ka ti zawk mah, mahse thudik a nih leh loh hriat chu ka chak tho bawk si, "Ka tihpalh" a ti leh sup ringawt a, tawng ve nachang pawh hre lovin amah chu ka en tlawk tlawk reng a, "Hetianga ka tih mai loh chuan putara hian eng thil nge a tih leh zel dawn tih ka hre si lova" a ti a








A thusawi chu ka hrethiam hauh lo mai, engthil nge Sama pa chuan a tih? "Engnge i sawi awmzia" aw lawi rat chuan ka ti chhuk sep a, Sam ve thung erawh chu a thaw chhuak hawlh thung. A awmdan chuan ka ngaih a ti tha lova, engkim chu a buai zo vek ni berin ka hre bawk, "Ka thiam loh a ni min ngaidam rawh" a ti leh ringawt a, ngati nge ngaihdam pawh chu min dil reng ni ka hrethiam lo








"Min kalsan loh tur thu kha i sawi a maw ka tia" amah en pah chuan ka ti ha a, ka mittui ka far nghal fap bawk; "Mahse i thusawi chu nangmah thoin i ti chhe leh a" ka tih zawm leh nghal zat bawk a, Sama chu a ngawi reng a min en reng bawk. A hmel awmdan chu ka hrethiam chiah lova, eng ber nge a ngaihtuah pawh ka hrethiam chuang lo







"Min ngaidam rawh tih theih ka nei tlem em a ni, kei ang mipa lak tlak lo leh mahni thusawiah pawh ding nghet zo lo i tawn avang pawh hian" a ti a, ngati nge chutiang thute chu a sawi min lo hmangaih ve thin a maw ka tia mahse min lo hmangaih ngai tawp lo a nih dawn hi! Ka ngei a, ka hua a mahse chuti chung pawh chuan ka ngai em em tho si








"Hetianga i tihna chhan hi min hrilh ve i tum miah lo a mi" ka ti leh hram a, a chhan hriat chu ka phu ve chuan ka inhria a chuvanga zawt pawh chu ka ni; lu a thing nawk nawk a min rawn en lehin chil a lem khawlh a, kei ve thung erawh chuan a thusawi tur chu ka lo nghak ve reng bawk, "Hre lo zawk la i na lo zawk ang" min chhan dan chu ka duh khawp lo viau a, min chhan danah chuan ka lungawi lo hle bawk







"Misual tak i ni ka hua che" ka tichhuak a, ka mittui a luang nghal ngiai ngiai bawk; engvanga chutianga awm tlat chu nge a nih ka hre bik lo, engmah kan sawifel thei dawn lo tih ka hria a, hetianga a awmna chhan pawh chu ka zawt chhuak thei dawn lo tih ka hria. A chhan pawh a luhlul zia ka hriat bakah ka awmdan nen hi chuan engti kawng mahin kan inzawt chhuak dawn lo bawk








"Min lo hmangaih ve tak tak thin a maw ka tia" ka ti leh a, ka na lutuk chu sawifiah ngaihna pawh ka hrelo, "Ka hmangaih che alawm, ka hmangaih i ni reng bawk ang" a ti a, chuti si tinge min kalsan a tum tho ka hrethiam lo; a awmdan chuan min ti bangbo tak zet a, engmah chu ka hrethiam lova thil kal dan leh thleng mek hi ka hrethiam lo hle bawk







"Mahse min kalsan i tum tho bawk si" ka ti leh a, "Ka duh thu chu nise ka kalsan hauh lovang che" lu buk nghut pah chuan a ti a, a awmdan chuan pawi tihna a neih loh hmel mai bakah a thusawi pawh chu a sawi liam ve mai mai niin ka hria a; chu chuan min ti na tak zet bawk, "Khawgaihin min chhuahsan tawh rawh" ka tichhuak sep a








Vawiin atan chuan a tawk viauin ka hria, engtin nge a awm tak zel ka hre lova a chhuah leh chhuah loh pawh ka hre chuang lo; a lam hawi lo zawng chuan ka mu a, ka lo mutthilh san daih ni ngei tur a ni thawm ri nak nakah chuan ka harh a, "Bawihi engtin nge i awm i tha em? I thiante hian damdawi ina i awm thu min hrilh a, min ti hlauthawng hman lutuk alawm" ka harh min hmuh rualin ka nu chuan a ti a







"Ka tha lawm in lo kal kher duh a" thenkhum sak pah chuan ka ti a, an vai lo kal nan chuan a ho ka ti tak zet, "Kan ngaihtuah zia che hi i hre lo a mi" a ti leh tawp a, ka nu chu a rilru a hah ve tawh chinah chuan sawi tur a hriat loh mai bakah a thusawi te hi a nawi thin viau bawk, "Ka hria lawm, ka tha tawh lutuk ka haw thei tawh reng asin" ka ti a, la chau ang reng viau mah ila ka chhungte bula tih lan kher chu ka tum lo







Chhunzawmna...












Damdawi in atanga kan in hmuh bak kha chu Sam nen pawh kan inhmu leh ta rih lova, ka mamawh ber laiin min kalsan a, ka ngaih ber laiin ka kianga a awm loh avang chuan ka ngei a ka haw em em bawk; mahse chuti chung chuan midang ta ni tura ka suangtuah thin apiangin ka phal thei ngai chuang bawk si lo








Office chu kal ve reng thin mah ila ka hun hman dan chu a mumal lo em em a, thil ka ei chhe em em bawk a hmuh theih khawpin ka cher tawh em em bawk; "Phone call i dawn kha chhang rawh" dawrah chuan ngawi rengin ka thu a, engmah ngaihtuah nei lo mah ila ka awm dan erawh chu a dik lo em em thung a, number hlang atangin phone call ka dawng tih chu ka hmu nghal zata








Tawng peih viau lo mah ila eng emaw thil pawiamwh a nih takin tih thuah ka la ve hram a, "Zualte keimah Emilia-i kan inhmu lawk thei angem" aw dam thluam hian a rawn ti a, chhang lovin ka ngawi reng a, "Inhmuhna tur kan ruat ang e, office lamah khan ka lo kal zawk ang" a ti leh zel a, henu pawh hi tunah tak chuan ka hmuh peih loh ber te zinga mi a ni hial ang







Office a a lo kal chuan ka thianten kan inbiakna an hre ve vek ang a, an lungnih lohna tur eng emaw thil sawi a neih chuan kei min tan lutuk na lamah an khawih hrep duh mai ang tih ka hlauh avangin inhmuhna tur hmun sawi tur chuan ka ti a; a sawi hnuah ka kal tur thu sawiin kan inbiakna chu ka ti tawp a, "Tunge a" Ahmingi chuan a lo ti nghal zat a








"Tu emaw hmuh lawk tur ka nei a, ka lo let leh vat ang" tiin ka chhang daih thung, an rem ti vak lo tih chu hre reng mah ila ka kal tur thu ka hrilh tawh avangin kal ngei ngei ka tum thung; "Kalpui i ngai em?" An tih chuan a ngaih loh tur thu sawiin ka nuih sak a, awm khawmuang tawh lovin ka thiante hnen atang chuan ka chhuak ta nghal a








Thui tak a nih loh avangin ke in ka thleng thei a, chuvang chuan muangchangin hmanhmawh lem lo chuan ka kal a; rei pawh kal lovin ka thleng ve vat bawk, tun tum chu zawn vak ngai lo turin hmuh theih nghal mai tur chuan a lo thu lang ve teh tlat a, inchhung ka luh rual chuan ka hmu nghal zat bawk. A awmna lam chu ka pan phei nghal vat tih a hmuh chuan min lo nuih sang a, kei rawh chuan ka nuih let ve hran lo








"Ka rin aiin i lo thleng hma daih" ka thut thlak rual chuan a lo ti nghal var a min nuih pah sang reng bawk, "I sawi duh chu sawi la" hawihhawm chhuah pawh ka tum hran lova, Sam an Emilia-i a nei dawn tih ka hriat avangin amah pawh chu ka be tha peih lo viau bawk; "A nih chuan peh hel kual lovin ka sawi nghal mai ang aw" a tih chuan lu ka lo buk khum nghat a








"Min pui turin ka ti che a, engmah ti duh lovin i ngawih bo pui daih a" chutianga min dem aw ka lek leka min tih chuan ka ngei ru viau mai a, chutiang thusawi pawh chu a zak lo ka ti hle bawk; "Min puih duh tak si lohah chuan kawng ka dap a ngai ta si a, i laka sual taka awm hi ka tum hran lo asin mahse Zualte nangmah vang vek a ni" a ti leh a, ka lo nui ro nghal hak thung








"Keimah vang a nihna pakhat mah ka hre lo" ka thinrim em avangin ka tawngchhuah zawng ringawt pawh chuan ka aw chu a khur dar dar thei hialin ka hria, ka in humruh nghal vak bawk a; "Nang hi awm lo ta la chuan Sam pawh hi awlsam takin ka nei thei ang mahse nang hian engkim i ti buai zo vek" a ti leh a, a tira min en dan leh tuna a awmdan chu dang tawh tak a ni








"Mahse tunah chuan Sam chu ka ta a ni tawh dawn, nang a kalsan theih nan che hian thil tam tak ka tih phah bawk asin" a ti leh a, a tawng chu ngawi rengin ka lo ngaihthlak sak hi a ni ringawt; "Mahni hmasial tak i ni" sawi tur ka hriat loh em avang chuan ka ti ringawt a, ka thusawi ve chu a engah vak a thawk ve lo a ni tih hriat takin a hmelah leh a awmdanah chuan danglamna a awm hauh lo bawk








"Kan duh kan neih theih nan chuan mahni hmasial chang a awm te pawh a ngai ve ang chu" hahdam hmel zeta tiin dawhkana tui no awm chu la in a in nghal khawlh a; kei ve thung erawh chu ka lo thawchhuak halh thung, "Sam i nei tawh dawn tih i inhriat tawh te chuan engthilah nge inhmuhpuiah min sawm leh kher" ka ti a, ka taksa chak that lai chu nise ka thinin a tuar loh chinah chuan ka khawih duh hial ang tih theih tur hi a ni







"Chu tak chu ka hmuh duh chhan che a nia, saw in ram te reuhte saw hman tangkai ka tum viau teh reng nen a te lutuk a, khawih lova dah reng ai chuan ka pe let leh ang che u ka ti mawle" zamna nei hauh lovin a ti a, tuna ka hmel hi chu ramhuai hmu ang mai ka nih hial ka ring; engtin nge kan in saw henu kutah hian a awm daih theih, "Engtin nge i kutah a awm theih?" Ka ti a, ka hma mi erawh chu a nui hak hak thung









"Ka neih dan i hriat kher erawh a ngaiin ka hre lo, saw in inchhe te vang sawn Sam hian inneih a rem tih phah a" a ti leh a, ka khawih mai loh nan a ka inhumruh nasat em avang chuan ka kut zungtang te leh a phah te pawh chu a na vek tawhin ka hria; Emilia pawn lam atanga hmeichhe nunnem leh ngaihno bei chuk ang a lang si kha, a chhung lam erawh khakna hlirin a khat thung








"Hmeichhe rapthlak tak i ni" sawi tur hi ka hre thlawt lo, ka thinrim lutuk leh ka tlawm lutuk chuan min ti na a; kei aia û daih a nih avangin tawngkamah pawh ka hneh lo viau bawk, mi hausa leh mi rethei te kar inhlat zia chu tunah hian ka hrethiam ve chiah bawk. An duh duh an neih theih avang hian keini ang te hi chu chep takin kan awm thin phah a, chuti chung pawh chuan zahna an neih phah chuang hauh lo bawk








"Zualte sual viau angin min ngai pawh a ni thei, ka chet dan pawh hi a dik lo tih ka hria mahse Sam hi ka duh a, ka hmangaih bawk a kum tam tak ka lo nghak tawh amah vangin nula senior tiin min chhaih phah fo thin reng bawk a, nang chu i la naupang a hun pawh i la ngah bawk a chuvang chuan a ni aia tha hi i tawng leh thei tih ka hria" henu hian mizia engzah fa ko nge maw a neih le, nichin maiah kha chuan hmeichhe rapthlak tak ang mai a ni a









Tunah ve thung erawh chuan hmeichhe nunnem leh derthawng em em ang a ni leh lawi si, ka hrethiam lova ka lak atang hian eng chiah nge a duh tak tak tih pawh ka hrethiam chuang hek lo; Sam a duh tih ka hria, neih a tum zia pawh ka hria tunah a duh chu a thleng mek a ni a duhtawk ve mai awm a nih laiin min hmuh a duh tho bawk si, hmeichhe mize mak tak leh hriatthiam har tak chu a ni ve thlawt alawm







"Sam vanga ka tawrh tawhna zawng zawngte hi nang chuan i hrethiam ve kher lovang, tunah chuan ka ta a ni thei tawh dawn a ka lawm tak zet asin; chuvang chuan nangpawh inthiar fihlim la Sama hmuh phakah lo in lan leh tawh suh, i lang zel a nih chuan ka chan leh mai ka hlau a ni" a ti a, ngeiawm tak taka tawng dan pawh a thiam kher mai ka insum zo tawh ngang lo chu dawhkan atanga ding chhuak vutin Emilia-i chu ka melh pah reng bawk a







"Mahni hmasial tak i ni, i duh i neih duh luatah midang rilru mai bakah mi chhungkua na takin i hliam a; i hlim bik hi ring ngai suh, i tluang bik chuang lovang" ka rilru a a landan ang ang chuan ka ti a, hawi let tawh map lovin ka chhuak nghal nal nal bawk. Khalai hmunah khan ka lo tang hle a ni tih hriat takin pawn ka chhuah rual chuan ka thaw nghal huai a







Ka taksa tang lutuk pawh chu tlemin ka inthlahdul ve thei ta deuh bawk a mahse chuti chung chuan chhung lama min hnawh ut ut tu leh thinrimna rawn in mung tup tup erawh ka tireh thei mai bik lo, office lam pana ka let leh lai te chuan mahni leh mahni chu ka inhrosa nghek ringawt a; tih theih lah chu a tlem viau thung. Ka tlawm lutuk chuan min ti na zual ber a, Sam pawh chu ka haw ngawih ngawih bawk








Ka let leh hnua ka thianten chanchin min zawh pawh chuan ka chhang mumal lo tih ka hria a, an thusawi pawh chu beng lehlama chhuak nghal ang maiin hriat a lawi ka nei lo bawk; ka khawvel hi ka ning a, engkim chuan min ti na a ka vanduai zia ka ngaihtuah chhuah phei hi chuan hrehawm ka ti ngawih ngawih bawk








Ka mipa duh leh hmangaih hmasak berin min kalsanin nupui a nei dawn a, ka nat tur zia te hi a ngaihtuah ve hauh lo zawk a maw ni le; office a awm pawh chu nuam ka ti lova, ka thiante bulah pawh ka hlim zo chuang lo, inah lah nise chhungrilah hian ka ruak ngawih ngawih bawk a. Engmah ka eiin ka in thei lo bawk a, office tak ngial pawh ka kal peih lo bawk a, ka chau hi a ni tawp mai








Ka nunah hetiang ang em em a natna hi ka la tuar lova, a tawrh dan pawh ka thiam chuang hek lo; ka ta tura ka lo ruat ve thin leh ka lo suangtuah ve thin kha tunah chuan a tak ram pawh a chan hma emin suangtuahnaah bawk a let leh dawn chu a ni sia, ka hlim ve dawn apiangin ka nunah hian buaina eng emaw ka tawk ziah a, ka dan chuan nun hi a fair lo ve thlawt a ni








Mi chuan an duh an neih theih laiin kei chuan ka beih fe hnuah pawh ka nei thei ta chuang lo chu a ni sia, chaw chu sawi loh engmah ka ei ngai loh avang chuan ka taksa a chak loh bakah ka chau telh telh a; damdawi inah te hial ka awm a ngaih phah a, ka na tawrh hi a nat em avangin mahni chauha vawn atan chuan ka thei tawh bik ngang lova, ka nu ka hrilh a ka hrilh ni a khawngaih hmel taka min en khan min ti na zual zawk ni berin ka hria








Pachang taka awm chu ka tum ve a mahse a harsa lam mah thin a ni, mahse chuti chung chuan ka tap thei chuang miah lo; ka nat lutuk vang zawka tap thei lo nge ka nih pawh ka inhrethiam lo, ka nu chuan min awmpui chawt a, ka thiante pahnih pawhinmin rawn tlawh awl lo bawk. Sam chu a lo kal dawn lo tih hre reng mah ila ka thinlung erawh hi chuan a beisei fan bawk si chu ka hahna a ni








Thil ka ei theih loh avangin ei luih ka tum pawh chuan ka luak chhuak leh nghal zel thin avangin drip chu ka khai awl lova, zun leh thiak tura thawh pawh thil harsa tak a ni; ka chauin ka zawi ngawih ngawih a, nung reng chunga thi reng ni ang maiin ka in hre bawk. Engtik lai pawhin ka room kawngkhar chu thlirin min lo tlawh tura a lo kal ka beisei em em thin a, mahse chu ka beiseina pawh chu thamral leh mai tur tih ka hre reng bawk si







Mihringin natna khirh tak an neih ai pawhin ka na chu na ka ti bik em em a, ka tan chuan engkim hi a tawp tak zet bawk; ka na tawrh mek hi midang tawrh tur chu nise ka phalsak hauh lovang, a chhan chu a na em a ni. Ka nu lahin min hnem vak ngaihna a hre lova mahse bang lovin ka tan min tawngtai sak thin tih ka hre thung







Ka tana awmze nei tawh lo tura nat vak chu engnge hlawkna awm, ka nat avang khan Sama chu a lo let phah dawn pawh a ni lova; ka hlim phah dawn pawh a ni chuang lo, amah avanga hetianga ka awm mek laiin a ni ve thung erawh chu inneihna tur lam buaipuiin a buai vel mek awm si a, min ngai lo tu leh min hmangaihlo tu laka lo nat ve vak chu a tulna ka hre lova, ka theih ang angin amah chu theihnghilh ka tum a, ka na te pawh chu tih reh ka tum ve viau bawk







Ka thei angem ka hre lo na chu ka tum a, engtikah emaw chuan he ka tumna hi hlawhtlin ve ngei ka ring bawk; amah vanga nat nawn leh chu ka tum tawh lova, theihnghilh a hma lam pan a a hmaa ka nundan thin pangngai a awm chu ka tum ve viau bawk. Ka thei angem ka hre lo mahse engtikah emaw chuan ka la thei ve ngei ang







[Ka story te min lo chhiarsak thin a ka lawm lutuk, min lo chhiarsak zel ula in chhiar apiangin ads click, like leh comment kha min lo tihsak leh hram hram dawn nia🤗]



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 16th, 2022, 1:23 pm

LAST CHAPTER







Hun a kal ve zel a, ka tuar thiam ta e ka tihna a ni hauh lo mahse tunah chuan ka tuar thiam ve tawh a; ka dam loh chhung zawngin ka thiante leh ka chhungte ka bulah an awm reng a, ka khawharna leh ka lungngaihna te min hnem thin a chu chuan min tih hahdam phah viau in ka hria a mahse ka tihsual chang erawh chuan tah nilen chang chu ka la ngah ta fo ma








Sama chungchang reng a theih phawt chuan hriat loh bakah ngaihven ka tum lova, ka tum lutuk vang nge ka hre ngai ta mang hauh lo bawk; a chang chuan nun hi fair lo ka ti thin a, khawvelah hian engvang teh fa ko a piang ve nge ka nih ka in zawh phah fo thin bawk, mahse leh lam zawng taka ngaihtuah thung erawh chuan nunah hian inzir tur ka ngah phah ka ti thin fo bawk








"Mate hei lehkha pawimawh i dawng a, i lo en dawn mi niang" ka nu in room a lo luh pah chuan a ti a, khawi atangin nge lehkha pawimawh te ka dawn ve ang tih pawh ka hrethiam lo, "Lo dah la ka hman veleh ka lo en dawn nia" ka ti a, ka hnathawhna lama kan pu ber thuawihin lehkha chu ka zir zawm a, graduate pawh ka tum ruh viau a ka lehkha zir laiah chuan ka rilru pawh ka pe viau










Kan exam a hnai tawh viau mai a, ka dam loh avang khan hun rei tak ka zir theih tak loh avangin tan pawh ka tang viau mai; ka nu lehkha pawimawh min pek pawh chu ka lo ngaihtuah leh tawh miah lova, ka chawlh hnuah ka hmu veleh chiah bawk. Lehkha pawimawh chu eng ang chiahin nge a pawimawh tih hre turin dawhkana ka nu dah tak chu ka la a, ka hawng nghal zat bawk







Mahse a chhung ka hmuh rual a ka thil hmuh avang chuan ka natna zawng zawngte kha an lo let leh ta mai ni hian ka hria a, dam tawh anga ka lo inhriat ve na te kha engmah a nih loh zia leh ka lo la dam fel loh zia ka hre leh chiah bawk; engtin nge an theih zawk hi ka ti khatiang teh hrep thil kan tawn hnuah leh ka awmdan zawng zawng an hriat hnuah pawh engtin nge zahna leh inthlahrunna nei hauh lova an inneihna chhim ve tura min la sawm ngam zawk








Tap lo turin ka insum tang tang a, ka hmui ka pet fan fan bawk chutianga ka awm avang chuan ka lehkha ken lai pawh chu ka lo hum khawr vek tawh tih reng ka hre lova; ka nu lo kal chuan lehkha chu engnge a ni tih min zawh chuan ka hre ve chiah bawk, "I kal dawn em?" ka nu chuan a ti a, ka chhang lova chung lam hawiin mitchhing chung chuan ka nui ro nghal hak a, ka men chhuah leh rualin ka mittui chu ka biangah a luang thla nghal zawih bawk









"Eng ang mihring nge maw an nih le, ka fanu hetiang taka a rilru an tihnat sak tawh hnuah pawh zam map lova an inneihna a kal tura an la sawm ngam zawk" ka nu chuan ha seh chilh bap bap pah chuan a ti a, ka nu chu hetiang renga a thinrim hi ka la hre ngai lova mak pawh ka ti viau reng bawk a ni; ka nu pawh chu hnem ka tum chuang lova, keimah vanga ka nu rilru nat zia ka hmuh hian min tih nat belh ni maiin ka hria









"Engnge ni leh ta, in lo tah leh tak" ka pa mangang chu room ah a rawn lut a, ka nau te pahnih pawhin an rawn zui lut a; ka nu nen a chutianga kan lo awm dun chiam min hmuh chuan angaihna an hriat loh hmel hle a, min en dun ha bawk. "Enteh i fanu hi eng angin nge an ngaih? Kan hmangaih ve tho a ni tih te hi an hre lo a mi, na taka an hliam hnuah tinge a natna tih belhchhah sak tura hetianga an rawn chet leh" ka nu chuan ka pa bulah a ti leh nghal bawrh bawrh a, ka pa erawh a ngawi reng thung







"Duh i thlang tawh a nih chuan sawisel che ka tum ngai lo ka fanu, i duh a i hmangaih a nih chuan i nun tihbuai sak che ka tum ngai lo mahse hei hi i hre reng tawh dawn nia, keini ang leh mi hausa inngaihzawn chu thil hau tak tak a ni a, inhmuhsitna pawh a na viau thin bawk asin. Mi zawng zawng ka tihna ni kher lovin kan tawngsual hlauh a nih chuan damchhung hrehawmna thlentu a ni a, lo tluang zel ni ula chuan i tawrh tur ka ngaihtuah hian ka ngaingam dawn lo, tuna in inthen pawh hi ka lawm asin" ka pa chuan amah lo ang takin a rawn ti chhuak a







"Tunah i na rih pawh a ni mai thei mahse a rei ang a i la dam em em ang, ka fanu nat reng hi ka phal bik hleinem...inneihnaah chuan i kal duh leh kal la, i duh loh pawhin i thu a ni tho, nangma duhthlannaah a innghat. I kal a nih chuan amah leh i nun atanga i thlahna ni ni nghal bawk rawh se" ka pa chuan a ti leh a, min hau lova tawngkam vin a hmang lo bawk. Mahse a tawngka chhuak tinreng chu thinrimna leh huatna in a khat a, a nghet charh bawk








Ka pa thusawi chuan ka rilru a luah khat hneh em em a, ka pa hi tawng tlem tak leh tawngchhuak ve mai mai ngai lo a ni a; a tawngchhuah ve tawh chhunah erawh dik lo a awm ngai lova chuvang chuan ka pa hi ka zah a, ka thei a nih phawt chuan a thu zawm zel ka tum thin bawk. Ka pa sawi ang khan lo tluang zelin nupui pasal te hial pawh lo innei ni ta tehreng ila hmuhsitna leh endawngna ka dawn phah zawk chu ka ring a








Sama pawh chu ka haw tawh lo han ti ila, engmah sawi chian hmasak awm lova min kalsan vang hian engtikah mah ka ngaidam thei chuang lovang mahse hetiang chhungkuaa a awm erawh ka khawngaih hle thung a; mahni pa hmasial tak leh a duh a neih theih nan chuan a fapa hlimna pawh ngai pawimawh lova siam thei tu pa a nei pawh hi ka khawngaih tel hle bawk







Zanriah kan eikham hnuah lehkha zir turin room ah ka lut a mahse engmah ka rilru ah a lut thei lo, ka chhiar ve tak ngial pawhin leh lamah a chhuak leh nghal zel a maw tih theih mai turin ka vawng thei reng reng lo bawk a; ka rilruah a lut thei tawh dawn chuang lo tih ka hriat avangin mut zai chu ka rel ta daih a, Sama te inneih ni chu ka exam tawp ber ni a ni nghe nghe bawk








Ka kal ang nge, kal lovang tihah chuan ka rilru a insual buai nasa em em a, ka kal ta a nih chuan ka pa sawi ang ngeiin Sam leh ka nun atanga ka thlahna ni ang a, ka kal lo a nih chuan ka rilruah hian a la awm reng angem? Chu erawh ka hre hauh lo. Hun in a la hril ang a, ka kal leh kal loh tur chu a hriat mai ang, mahse tunah rih chuan amah lam reng ngaihtuah rih loh chu ka duh a








A nih loh chuan ka lehkha zir laiah ka rilru ka pe leh thei dawn lo tih ka hria, chu mai bakah exam pawh ka tih that loh phah mai ang tih ka hlau hle bawk; ka mu thei lawk lova ka rilru chu nasa taka a insual buai mai bakah eng eng emaw chu ka ngaihtuah reng bawk a, ngaihtuahna pawh a kal thui duh thin viau mai. Engtik laiin nge ka lo mutthilh tih ka hre lo, ka harh leh chuan khua pawh a lo eng uai tawh a, thawh peihawm viau lo mahse zan hmasa lamah engmah ka zir theih loh avangin tlem tal in en chu ka duh a









Peih lo taka khum atanga thochhuakin ka lehkha zirna lam chu ka pan a, nizana ka pharh ang angin a la awm a; ka chhiar ve tak na chu rilruah pawh a lut mawh duh khawp mai, mahse an ni ho ngaihtuah ai chuan ka chhiar lui ta tho a. Ka nu rawn thawh hnuah thingpui leh chhang chu min rawn en pe a, eng emaw sawi duh a nei tih hriat lutukin min en reng bawk, "Sawi duh i nei mi nu" amah en paha ka tih chuan ka sam chu duat taka chul pahin min nuih seih a









"Mate i tha tiraw?" a tih chuan nimin lam vang a ni tih ka hrethiam nghal mai a, lu buk khum nghat pahin ka that thu ka hrilh a, "A that chu an mahni ngaihtuah lovin i lehkha zir laiah rilru pek tum tlat la aw" min ti leh a, min ngaihtuah zia ka hria a chhan pawh ngaihzawng ka la nei ngai lova; ka neih ve chhunah leh ka neih hmasak ve berah hetiang teh hrep buaina leh natna hi ka tawng chu a ni sia








Ka nu chhuah leh hnuah pawh Sama te lam ngaihtuah loh luih tum chuan lehkha chu chhiar lui ve viau mah ila a harsa lampang hret chu a ni, chutiang chuan nitin hun ka hmang a ka lehkha zir laiah rilru pek a ngaih viau laiin Sama ringawt ka rilru a a awm chu ka duh lo viau mai; mahse ka duh vang a ni hauh si lo. Ngaihtuah loh tum pawhin a lo lang leh zel te chu keimah leh keimah pawh kan inhaw letling tawh zawk hial a ni








Ka nun a a lo lan atang hian mi tihbuai bak thiam a nei lo, engtik lai pawhin ka rilru hi min chawh buai sak a; min kalsan hnu thleng pawhin amah chuan min la tihbuai chhunzawm zel chu a ni a, ka hmangaih hmasak ber leh ka nuna ka lo dah pawimawh ve ber thinin min lainatna leh min khawngaihna nei miah lovin min kalsan a, nunrawng ka ti tak zet a, ka dam chhung chuan ka ngaihdam leh theih tawh pawh hi ka in ring lo








"Misual tak i ni Samuel" ka ti leh ringawt thin a, hre ve dawn lo mahse ka rilru chuan chu thu chu nitin a chhakchhuak thung si! Ka nunah hian lo lang lo law law se a tha ni mai tur hi a nia, a nih loh vek pawhin lo duh let ve lo ila chuan heti khawp hian ka na bik lovang mawle; tunge thiam a tunge thiam lo zawk pawh ka hre lova, dem tur ber pawh ka hre lo bawk. Keimah zawk chu dem tur niin ka inhria a, ka engmah tih chu a nuam thei lo bawk









Ka thiante chu ka ngai viau a mahse lehkha ka zir tih an hriat avang leh min tihbuai an hlauh avangin an lo kal duh rih lo tih hre mah ila tunah tak chuan ka bulah awm se, min tihlim tur tal pawhin ka duh viau mai; ka nu chu ka hrilh a, ka nu pawh chuan rem a lo ti khawp mai a ka thiante chu be nghalin leng turin ka sawm ta tawp a, an ni hi chu awm lo se la chuan ka awmdan tur pawh ka hrethiam lo zawk








__________________________________________________









Ka pa in Zualtei te in neih ve chhun a lei thu min hrilh chuan ka thin a rim hle a, pe let leh tura ka tih pawhin Emilia-i ka nei dawn lo a nih chuan a pek let tawh ngai dawn loh thu a sawi mauh mai si a; luhlul chhuahin neih tum lo viau pawh ni mah ila keimah avanga Zualtei mai bakah a chhungte leh zelin an tawrh chu ka duh bik lova ka rilru chu a buai tak zet bawk








Emilia-i nei tura thutlukna ka siam a nih chuan Zualtei chu ka biak a rem tawh dawn loh tur thu a sawi leh zel avang chuan ka pa chu a huat hian ka haw ngawih ngawih a, mahni nawmsakn ngaihtuah luat lutuk vanga a fapa hlimna pawh ngaihsak zo lova a ball ang maia min tikual chu ka rilru a nat mai bakah min lo hmangaih ve ngai tak tak lo a ni tih ka hriat chhuah phah bawk








Kar khat dawn ka room ah chuan inkhungin tuma biak pawh ka duh lova, ka phone pawh chu ka switch off hmak bawk; ka rilru chu nasa takin a buai tak zet a ni, ka hmangaih ngai miah lo damchhunga nupui a nei a, chenpui chu ka thei angem? Ka theih pawh ka ring lo. Zualtei chu thlang zawk pawh ni ila, engtikah mawh an in leh lo chu an neih let leh tawh dawn loh bakah an chhungkaw khawsak ka hre ve kiau bawk si








Ka hmangaih hlim taka a awm theih nan leh an neih ve chhun an in leh lo neih let leh nan Emilia-i chu nupuia neih ka thlang ta ringawt a, ka inthiam thei ngai dawn lo tih ka hriat rualin Zualtei pawh chuan min haw hle dawn tih ka hria a; min hmuh pawh a duh leh tawh kher lovang tih pawh ka hria mahse amah leh a chhungkua an hlim nan chuan hetiang thil tih hi ka ngai bawk si









Nupui ka neih hma a vawikhat tal hmuh leh ka duh avangin an office lam pan chuan ka inkhalh chhuak a, tum loh deuhin Zama pawh ka hmu nghe nghe. Zualtei thiantha tak a ni tih ka hriat avangin Zama zawk chu ka pan a, min hmuh rual chuan engmah sawi lo mahse min ngei viau tih a hmel awmdan atang chuan ka hre thei mai bawk; "Hetah engnge i rawn tih dawn" a aw chu a chang viau bawk a, kei erawh chuan chhang mai lovin ka lo nuih suk thung









"Hun ka nei rei lo a nia, i sawi duh chu sawi vat rawh" a ti leh a, min ngei pawh hi a awm viau mai a chhan pawh Zualtei hi a duh ve tih ka hria a; hetiang teh hrep buaina hi tawk dawn lo ni ila chuan ka pe hauh lovang, a lak atanga la hrang pawh kha ka ni reng a. Sawi hreh viau mah ila engkim chu ka hrilh a ngai tho bawk si, a bul atang chuan ka hrilhfai ta vek a; Zualtei pawh chu min lo ngaihven sak turin leh a kianga awm reng turin ka ngen bawk










Ka sawi zawh rual deuh thaw chuan ka hmai chu a ri sawk a, ka pai nghal khut khut bawk; mipa ve tho ka ni a, kei aia naupang daih kut tawrh phei chu ka lak nat zawng tak a ni bawk. Mahse engkim hi keima thiam loh vek a nih avangin ka khawih let ve a thiang lova, a rukin ka kut erawh ka hum ruh ngawt ngawt thung, "Ti na leh mai mai tur si engvanga kalsan nge i nih?" A ha chu a sehchilh bap bap a, a thin a rim viau tih pawh ka hrethiam









"Ka duhthu chu nise ka kalsan bik hauh lovang" ka ti a, ni e hethu ah hi chuan ka chiang ngam ve thlawt a ni; ka thu nise engtikah mah Zualtei hi ka kalsan ngai lovang, ka hmeichhe hmangaih hmasak ber a nihna avang hrim hrim pawh hian, "I kalsan tawh a nih chuan engtikah mah a hmuh theihin rawn in lan leh tawh ngai suh ang che, i rawn inlan leh a nih chuan pawn chhuak ngam tawh lo tur khawpin ka sawisa ang che" a ti a, a thianthu a chhanna chu a pe na ve khawp mai









Ka let leh lamah a tawp nan ti a Zualtei awmna lam ka pan ta tho a, amah ka hmuh ruala a awmdan chu a dik lo riau in ka hria a a awn lek lekin ka hre bawk; thil awmdan chu a tha dawn hauh lova ka hriat avangin ka tlan phei ta vat a, a bul ka thlen rualin leiah a lo tlu fel der tawh. Pawm kang vatin damdawi in lam chu ka pan pui ta vat a, hetianga a awm ka hmuh hian hrehawm ka ti a nasa takin ka inthiam loh phah hle bawk








A thiannu Ahmingi chuan min biak a duh thu sawiin pawnah chuan a chhuak zui a, keipawhin ngawi rengin ka zui chhuak ve vat bawk; Zualtei ang lo takin a puitlin mai bakah min hua ang pawhin a awm chuang lo tha takin thil min sawi pui a, hetianga a awmna chhan pawh nupui ka neih tur thu a hriat vang niin a sawi bawk. Hrehawm ka ti a, keimah vanga hetianga na tak a tawrh reng hi ka phal lova hmuh harsa ka ti takzet bawk








Engkim hre hriat ve thaa ka hriag avangin ka hrilh ta vek a mahse Zualtei laka zep tlat turin ka ti bawk, Zualtei chu lo enkawl tha turin leh a bula awm tlat turin ka ngen bawk a; min lo hrethiam khawp mai a bula an awm reng tur thua min hrilh hnuah a inchhungah chuan kan inzui lut leh a, a lo harh ve chiah bawk. Kan inbiak duh an rin avangin a thiante pahnih chuan min chhuahsan zui leh nghal zat a, an chhuak ta daih chu a reh tlawk tlawk hi a ni ber









Sawi tur a van mai bakah bul tan dan tur ka hre lo, a rei deuh hnuah chuan kan inbe ve thei ta hram a, a awmdan atang chuan nupui ka nei tur chu a la awih lo tih pawh a hriat theih viau bawk; eng atan maha ngaih loh der chu thil harsa tak ni mah se ka awm a ngai bawk si, ka awm dan chuan a tihnat belh dawn tih hre reng mah ila hetianga ka awm lo a nih chuan amah mai pawh ni lo, a chhungte leh zelin an tuar ka duh tawh loh vang pawh a ni pakhat








Chumi ni atang chuan amah hmu turin ka kal leh tawh ngai lova, hmuh chak viau mah ila ka thei tawh si lo. Midang ho chu inneih lam hawiin an buai suau suau tawh a kei ve erawh chu inneih lam rengin ka rilru a luah khat hneh zo lo, Zualtei ni zawk ta se tiin ka ngaihtuah fo thin a; a ni chu ni se ka phur tur zia leh a che nasa bera ka tan tur zia pawh ka hria mahse Zualtei a ni dawn lo tih ka hriatna chuan min ti thinrim leh thin








Min hmu turin nitin Emilia-i chu a rawn kal thin a mahse tunah rih chuan a hmel hmuh pawh hi ka peih thlawtlo a ni ber, nakin lawkag chuan ka nupui a ni dawn a peih lo viau mah ila ka la hmuh reng tur a nih avangin a theih chhung chuan hmuh loh rih pawh ka pawi ti lo zawk; ka pa nen thuhmun reng an ni mahni hmasial tak leh an duh an neih theih nan a mi tihnat pawh hreh lo an nih avang hrim hrim pawh hian ka haw ngawih ngawih









Zama nen pawh tha takin kan inbe tawh a, a tirah kha chuan thinrim ve hle mah se mi pangngai a nih miau avangin min hrethiam vat a; a ni hnen atangin nitin Zualtei chanchin hriat tur ka neih phah ka lawm viau bawk, Ahmingi pawhin a hriat ang ang min hrilh bawk a Zualtei laka ka sual teh lul nen ka chunga an tha lutuk chuan nasa takin ka inthlahrun phah a, ka inthiam lohna chu an tizual bawk









Inneih ni a hnai tial tial a, ka huphurh tulh tulh a engkim chu mumang ni vek thei ka ti thin khawp mai mahse mumang ni lovin a tak vek a ni bawk si; ka pa leh Emilia-i hlim hmel ka hmuh ringawt pawhin ka thinrim lutuk chu ka chet chhuah phut loh nan nasa takin ka inhum ruh teuh a ngaih phah thin a, ka hmangaih ngai miah lo nei tura thutlukna ka lo siam ta kher kher chu ka inchhir mai bakah mipa nep tak ka niin ka in hre bawk









Mipa mah ni ila thih daih te chu ka chak rum rum thin a, nitin ka room ah chuan inkhungin zu ka in tlawk tlawk a; nun chakna leh dam chakna hian ka khat tawh lo a ni zawk mah, Zualtei chu hlim takin awm se ka duh a keimah avangin na tawh ngai lo bawk se ka duh bawk. Ka pek theih loh tak tam tak kha amah hmangaih deuh tu a tawn hunah chumi ngei chuan pe se ka duh a, mahse ka pe ve thei ta lo tur erawh ka inhuat phah hle thung









Hlimna ka pek zawh tak loh te, hmangaihna tam tak ka pek hman tak loh te kha chumi chuan pe se ka duh a; hlim zawng zawng chang ngei turin duhsakna ka hlan a, kei chu a nun atangin min paih bo se mipa tha tak tawng ngei turin duhsakna ka hlan bawk, a hlim hmel chu ralkhat atanga hmuh ve fo ka duh ngei ang a a hlim a nih chuan a tha vek. Duh ka thlang sual tawh a kei chu engtikah mah ka hlim ve tawh ngai lo bawk ang, inchhirin leh inthiam lohna hlirin ka nun ka hmang ve tawh thung ang






__________________________________________________








Vawiin hi Sama nupui neih ni a lo ni ta reng a, tun thlengin ka kal leh kal loh turah chuan ka rilru a la buai viau mai a; kal ka duh rualin ka insum leh thei lovang tih ka hlau a, mahse ka kal a nih chuan ka nun atangin ka thlah hlen tawh ang tih ka hrechiang viau bawk. Ka exam tak zawng zawngte kha ka ti tha em tih ka hre lova, a chhan pawh ka zir ngai lo tluk a tih theih ang







Chhiar ve thin mah ila rilruah a lut thei ngai lova, zir pawh ka phur loh phah viau a nih kha mahse ka tih tawh avangin ka pass emaw pass lo emaw pawh ni se exam chhuah ve hrim hrim ka tum avangin ka tilui ta tho kha a nia; ka pass ta lo a nih pawhin pawi ka tih loh chu a ngai ta ve ang, "Vawiin hi in exam hnuhnung ber tur a nia, tha takin exam va pe la he lamah kan lo tawngtai pui reng che tih i hre dawn nia aw" ka nu chuan a ti a, lo nuih sang pahin lu ka buk khum nghauh nghauh bawk








Ka exam zo hall atanga ka chhuah chuan dar khat a lo ri chauh a, dar hnih inneih tan a nih avangin ka thleng hman dawn tih ka hria a mahse tun thleng pawhin kal chu ka la tum chuang lo; taxi la in in lam pana haw chu ka rilruk a, khuma engmah ngaihtuah lova mutthilh hmak chu ka duh dan a ni zawk mah mahse engin nge min mawlh tehreng ni pawh ka hre lo, biakin lam pan tur chuan taxi driver chu ka hrilh a









A ni pawhin mak a ti ve tih hriat takin min en deuh ha bawk, biak in kawt kan thlen rualin driver chu pawisa pe in taxi atang chuan ka chhuk thla a; biak inah pawh lut mai lovin thawk lak halh pah chuan ka en reng a, engvanga helai hmuna kal ta mai nge ka nih pawh chu ka in hrethiam lo, ka kal tawh ta sa sa a chhung chu thlen ngei ka duh a mahse ka zam a ni








Ka kawr sir tham khawm vak chung chuan biak in chhung lam chu ka pan a, kal tum lo ka nih avangin ka inchei dan pawh chu a inneihna a kal tur pawh ka ang lo viau mai; inneih hun serh an lo tan tawh avangin a hmung berah chuan ka thu a, ka rin aiin ka insum thei phian bawk, mahse ka tah erawh a chhuak ut ut a ka tah chhuah hawk loh nan ka hmui ka pet fan fan bawk








Thu an chham lai te chuan ka thin chu vih sawk sawk ang maiin a na a, thawk te pawh chu a tihah lek lek zawk a ni; zungbun an in bun tir dawn lai chuan ka tha nasa takin a khur a, chhuah mai chu ka duh tawh a mahse tinge ka chet theih loh? Eng hian in nge min mawlh tlat tih pawh ka hre lo, ka awmdan chu a dik tawh lo viau tih pawh ka hria mahse che sawn turin tha leh chakna reng ka nei der bawk si lo







Kei min hnawlin Emilia-i a thlang zawk chu ka nat thar pui em em a, tunah chuan nupa dik tak an ni tawh bawk a engtikah mah ka tan a lo let leh tawh ngai dawn lo tih ka hria; amah thlah tuma helai hmun hi thleng ka ni asin mahse tinge ka nat em em? Tinge ka chungah hian khawngaihna pakhat te mah pawh a lan tir loh, ka na a ni ka na tak zet








"I liam dawn maw? Engtikah mah ka ta i ni thei tawh dawn lo tihna mi? Tinge kei min hnawlin midang i thlan. Sam...ka mamawh che sin, ka hmangaih thu che pawh ka hrilh hma che in nang chuan midang min neih san leh si, ka na asin ka na tak zet" ka rilru chuan tiin ka awm chu ka chum ka chum a, ka thawk sak tial tial pawh chu ka hriat hmaih hauh lo bawk; ka mittui vanga ka khawhmuh phe ta vek pawh chu hruk hul ka tum chuang lova, ni e tunah hian damlai lu ka sun mek a ni. Na ka ti a, in hremna zawng zawnga tawrh harsa ber niin ka hre bawk







Engmah hriat a lawi ka nei tawh lova, biak in chhung atanga ka chhuah lai chu chiang lo ruaiin ka la hria a bak chu a thim mup a; mahse ka dam phah in ka hre zawk. Ka harh leh chuan Zama hmel ka hmu hmasa ber a, ka hawi kual nghal ruai a inah kan awm tih chu ka hria mahse tute in nge a ni tih ka hre lo thung, "E..engtin nge hetah ka awm theih?" Bangbo zet chuan ka ti a, ka tahna avangin ka mit pawh chu a bui luk a men pawh a ti harsa lam hret a ni









"Kan inah ka hruai che a" min nuih suk pah a a tih chuan ka bang bo viau a, inneihnaa a kal ve thu leh ka piah mai a a thut thu te chu min hrilh a; biak in atanga ka chhuak chiah chu ka tluk tawp thu min hrilh bawk, engvanga inneihnaa kal ve nge a nih chu ka hre bik lova ngaih ruat dan pawh ka thiam chuang lo mahse helai hmunah min kalpuiin khalai hmuna mualpho lutuk a ka awm tur min ven zawk avang chuan ka lawm daih thung







Kum khat hnuah(One year later)....







Khang kum kal ta chhung khan engkim chu inrin hma hauhin a thleng duak duak ni berin ka hria a, tawrh pawh ka tuar viau reng bawk a; tunah hian ka dam tawh em tih min zawt ta se ka la dam lo tiin ka chhang ngei ang mahse chu ka dam lohna chu inhneh tir ka tum lo thung, ka nat avanga ka lo tawrh ve chiam avang khan Sam chu a rawn let leh phah dawn tihna a ni lova, a ni chuan kumkhua atan min kalsan tawh zawk a ni








Tha takin ka graduate a, thla liam ta mai khan hna nghet nei turin pu berin a hnuaiah min thun nghe nghe bawk; kan in pawh kan nei let leh tawh a, kan hlim tlang viauin ka hria, ka pa pawh tunah chuan enkawlna tha tak a dawng thei tawh ang a chu chuan tlemin a kal harsa ti lutuk pawh a tihzia pha ka ring bawk. Ka nau te pawh tlema an lo puitlin ve deuh tawh avangin inchhungah pawh an chhawr tlak ve tan tawh viau a, Nonoi chu ka thachhang dawltu ber a ni bawk








Hna lamah ka buai thei thin em em a, tih tur a lo tam thin bawk nen ka indaih ngai lo tluk a tih theih hial ang mahse kei chuan chu chu ka duh zawk a; a chhan pawh ka awm mai mai a nih chuan kum kal ta a ka thil tawnte kha ka ngaihtuah chhuah leh thin avangin ngaihtuah loh ka duh chuan buai chu ka thlang zawk a ni, Zama pawh ka thawhnaah tho chuan a thawk ve a, kan inhriattirh atangin ka tan thiantha tak zawng a la ni reng a








A bulah chuan ka awm ang angin ka awm thei a, ka rilru hahna te leh ka lungngaihna te, hrehawm ka tihna leh ka hlimna te a hnenah ka thlen thin a; thiantha tak kan ni ang tih ngaihna reng ka hre lo mahse tunah chuan ka thiantha tak bakah ka û ang maia engkim ka rawn leh ka rin ber a ni tawh thung. Ka thiante pahnih pawhin an dawr chu an zauh zel a, tunah chuan a hma ai thlawt chuan an lun ve tawh em em a, customer an ngah lutuk te chu ka lawmpui viau bawk








Tluangzeli erawhin dawr dang hawn a tum leh mek a, a chak ber thin amaha sumdawn chu tih puitlin a tum viau a; a inkhawl hnem tawh pawh a ni mai thei. A tipuitling thei a nih chuan ka lawmpui viau ang, a chhan pawh a tumna a rei tawh bawk a kan thian ho zingah chuan khawsa thei ber ni mah se amaha a din theih nan a chhungten hetiang thil hi an tih tir a tunah chuan a puitling ka ti tawh tak zet bawk








Hna bak ngaihtuah ka nei ngai lova, ka hna a nih loh chuan ka chhungkua leh ka thiante an ni leh mai a; mipa lam reng rengin ka rilru an luah khat hneh zo tawh lova, ngaihzawng neih leh pawh chu ka tum tawh viau lo bawk mahse a chang chuan tah tlaivar thak changte ka nei thin a, ka sawi tawh kha ka la dam lo a ni tih hi








Ka dam hlen theih tawh pawh ka ring lova ka theihnghilh thei tawh ngai lo bawk ang mahse ka tum phawt chuan hma lam chu ka pan theih ka ring a, chu chu la tum tlat bawk. Ngaihtuah loh ka tum a, a chanchin hriat loh ka tum thin viau na chu ka ngai thei thin hle a; a tel lo chuan nun hian awmzia a nei lo ka ti a, pawn lamah hlimin nui thin mah ila chhungril erawh a rum a, khua a har a, a hmangaih kha he ka thinlung hian a ngai fo thin a, engtikah mah a theihnghilh thei tawh ngai lovang







[Ka story te min lo chhiarsak thin a ka lawm lutuk, min lo chhiarsak leh zel ula story thar pawh lo dah leh vat ka tum ang a, in chhiar duh zawng a nih ngei beisei leh ang aw. Chuan in chhiar apiangin ads click, like leh comment kha min lo tihsak leh hram dawn nia😊]

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)