MI AMOUR BY SumMer Ralte (Completed)

[Ngaia]

CHAPTER-7





Hun a liam ve zel a, Zama nen pawh kan inkawmngeih tawh viau mai; phaiah lehkha zirin a awm thin a mahse a lo che nasa viau nge ni tur a ni a chhungte chuan helama awm rih tura an tih bakah zir zawm tir an phal rih lova, tihian a duh angin awm se a inhmuhchhuah hunah zir zawm a duh leh a zir ang a, hna a thawh duh leh a thawk dawn a nih hmel








Mipa lakah ka inkharkhip zia chu ka thiante pahnih hian an hrechiang ber awm mange, biak a kawm chu sawi loh a hnaih pawh ka hnaih ngai lo kha a ni thin a; mahse tunah chuan ka zia ve ta hret chuan ka hria, an rin loh tak maia Zama nen a kan inkawmngeih ta viau mai pawh chu an ni tan chuan mak tih tling khawp a ni ngei ang







"Vawiin chu ka lo hruai hman lo mai thei che a, ka u fanu damdawi inah a awm a ka kal ve hmel sia" zinga ka office kal tur min thlah pah chuan a ti a, min lo hruai lo mah se pawi ka ti lem lo; a chhan pawh nitin zinga min hruai bakah tlaiah min thlah leh thlap thin a, ka inthlahrung thin lutuk hian ti tawh lo turin ka ti thin a mahse engah mah a ngai ve lem chuang hlei lova








"A pawi lo mahni pawhin ka haw thei alawm" nuih sang paha ka tih chuan lu a bu nghut a, "Mahse lo hruai dan hram che chu ka lo tum ang" a ti leh a, buai chung chunga inhruai tir reng pawh chu thil mawia ka hriat loh avangin ka hnial ve tak naa ka hnial tlu leh thei dawn chuang lo tih erawh ka hre ran thung







"Lut tawh rawh, keipawh ka kal ang e" ka chhipsam tuar thur pah chuan a ti a, a nui nghal hawk hawk bawk; a tihdan ve ziah a nia, ka duh lo tih pawh a hre reng mahse a tihlui tho zel avangin ngaiah ka nei tawh han ti dawn ila ka la nei hleithei meuh lo chu a nih hi, rum zetin ka en a nuih hawk pah chuan lut turin min ti leh a, keipawh nui chungin ka thlah liam veleh ta tho a







Kan inkawm atanga ka chhut hian hlim lo leh thinrim hmel vawikhat mah min la hmuh ngai lova, nui hmel min hmuh reng thin avang hian a bula awm pawh nuam ka ti reng bawk a; a zaidamin ka tan a inpe em em a, a buai lo a nih phawt chuan min pui turin a awm reng thin, ka lo nel ve ta deuh a ni ngei ang kan chhungkaw chanchin leh ka pa in chhiat a tawh dan te chu ka hrilh a







Pawi min tihpui thu te sawiin beidawng lova beiseina nei reng turte in min fuih ve thin a, mamawhna ka nei a nih phawt chuan amah pun hreh lo turte in min ti ve thin; mipa thian ka nei ngai lo ka tih tawh kha, Zama hi ka thian hmasa ber a ni a, fel ka ti tak zet bawk. Kan inah pawh a rawn leng ve zeuh zeuh thin a, ka chhungte pawhin an lo dawngsawng tha thin khawp mai







Ka tih turte ka tih zawhah ka thiante awmna lamah chuan ka kal a, sweeper hnathawk mai ka ni a hmun phiah leh leh tihfai ngai han tihfai hi chuan tih tur hranpa em em hi ka nei tawh thin lo bawk a mahse chuti chung chuan office hour thleng chu awm tlin ve a ngai thin tho; nidang lo ang takin ka thiante chu an lo buai dun ang reng viau mai a, biak hman pawhin an khawsa meuh lo







Ka thutna ngaiah bawk chuan thu lehin phone chu ka khawih pah mawlh mawlh a, message number hlang atanga a lo thlen avangin ka en nghal vat a; [Khapa kha inhruai tir tawh suh] tih zawng hi a lo ni! Mesaage ka dawn dan atang chuan tunge lo thawntu tur awm ang chu hrilh chawp ngai lovin ka hre thei nghal mai a







Ka ner nghal sawk ringawt a, "I va ner nasa leh tawh ve, engnge thleng a?" Ahmingi chuan min lo hmu hman a ni ngei ang, min lo zawt nghal chat a mahse engmah a nih loh thuin ka chhang thung. Sam hi ka chunga a sual tawh awm ka hre lova, Zama ang thoin ka chungah a tha em em tih pawh ka hria mahse chuti chung chuan ka ngaina ve thei der lo hi mak ka ti







Nui hmel a pu ve mang ngai lova, a tawngkam a bulin amah chu a rorum em em a bakah a ruih ve thin vang pawh hi a ni ngei ang; chhan ngaia ka hriat loh avangin ka chhang ta lova, mesaage dang a rawn thawn tawh bik em lo, office ban dawn tepah Zama chuan min lo call a, "Zualte vawiin chu ka hman ta ngang lo mai, ka u fanu hi a serious reuh lutuk a hei kan la buai ang reng khawp mai" thupha chawi paha a tih chuan a pawi loh thuin ka lo chhang ve vat a







"Naktukah chuan ka rawn hruai hman tawh ang che" inthlahrun hmel taka a tih chuan, "A pawi lo a nia, buai changte chu awm ve tur pawh a nia inthlahrunna tur a awm lo" ti chuan ka chhang let vat a, keimah zawk chu inthkahrung tur ka nih laiin amah zawk a inthlahrung daih chuan nuam lo min tih tir viau a ni








Chutia thlahtu nei reng thin mahni a ka haw thut tur chuan min ti awm thiam lo dawn lek lekin ka hria, pu ber pawh vawiin chu a haw hma a; a kum a uoat tawh ang hu in hna chu a tlin ka ti hle a, a tih tur a zawh hma chu a hawsan ngai lo, pa taima tak a niin ka hria. Mahse vawiin chu a tunu damlo in damdawi inah a awm a, a ni pawh office awm rengna chi ah a ngai lo a ni ngei ang a haw hma ve teh tlat a







Chutia pu ber a haw hma avang chuan keipawh nidang zawng aiin ka haw hma leh theih phah zual dawn a, leh lamah chuan a tha ka ti viau mai; ka thiante nen eng emaw chen kan inbiak leh hnuah ka hawsan a, chhuna kan inhmuh bak hi chu han inhmuh khawmna hun pawh hi kan nei mang ngai meuh lova








In lama buai ve theuh kan lo ni vei bawk nen thil tih ho phei chu nei khat tak kan ni, mahse chuti chung chuan kan inkawmgeih em em thung. Kawng khawhar ka kal tan mek tihah ka hnung lam atang chuan ban tha chak zet hian min pawt dingin alamah chuan min pawt her nghal lawp a, ka inrin loh lai tak a lo ni bawk nen ka nghet lo lutuk chu ka pei nghal khut khut bawk








"Ngati nge ka message i reply duh loh?" Rum zeta min melh pahin a tawngkam chu a bul tak zet bawk, "Chhan ngaia ka hriat loh vangin" ngeiawm zeta ka chhanna chuan a lung chu a ti awi lo zual a ni ngei ang a rum nghal hawk a, "Min hre lo der tawh suh" a ti leh a, a hmel hmasa ai kha chuan tuna a hmel hi chuan khawngaih thla a la mah zawk, a hmelah chuan natna ka hmu telin ka hre bawk







"I hriatsual a nih dawn chu" ka ti leh a, hepa bula ka awm hian ka awm dan chu vawileh khatah a inthlak nghal vek thin a, ka thinte lah chu a phut ran sauh zel bakah ka huat vang ni hauh lo leh ka tih ngai miah loh tawngkam ngeiawm tak tak ka hman thin bakah mak tak maiin ka thinrim tel ziah bawk; "A nih chuan min be ve tawh la" aw dam thluam a a tih chuan khawilai nge tih hriat si loh hian ka taksa chhung hi a khawih dawt zel bawk








"'Khapa kha be tawh suh, mipa thian neih tawh suh, inthlah tir tawh suh, inhruai tir tawh suh' tih message dawn reng chuan engtin nge ka biak theih ang che" ka ti nghla hlak hlak a, ka thinrim nghal em em bawk; a thinrim viau dawn a maw ka tih laiin a hmelah chuan nuihzat hmel ka hmu hlauh zawk a, chutianga a nui hmel ka hmuh chuan ka tawnglai chu tawp hmakin amah chu ka en ta reng a







Hetiang hian nui ve reng thin se la chuan ka ngainat ve mai ka ring, a chhan chu a nui hmel chu a tha lutuk tlat a tin ni mahse a nui hmel aia a hmel rorum tak ka hmuh thin avang zawk hian ka ngaina thei lo mai pawh a! "Nuihna tur thil sawi ka nei em ni" chutianga za lutuka a nuih avang chuan keimah chu ka hrilhhai let ling zawk a







Lu thin nawk pahin, "Awm love" tih zawngin min chhang a, min chhanna chu tawi viau mah se a bul hmuk lem lo, "A nih si chuan tinge i nuih" ka ti leh zel a, a nui lai chu tawp riai riaiin mit la sawn lek lovin min en nghal a; min en dan chuan thu tam tak sawi a neiin ka hria, a ril mai bakah amahah chuan khawharna leh lungngaihna tam tak a awm tih ka hmu a, ni lo ka hmu sual zawk pawh a ni mai thei







"Duh ka nei tih ka sawi kha..." A tih lai mek chuan lo pawt chatin, "I duh chu i hre tawh mi" ka lo ti nghal zat a, "Shhh...!!" Tih pahin a kut tang chuan ka hmui chu a rawn nawr chilh a, ka ngawi chiang khawp mai. Ka thin rawn phu rang ta lutuk chu a ring viauin ka hria a, kan ngawih reng avang chuan ka thinphu pawh chu a hriat phak ka hlau khawp mai







"Ka duh min pek theih nan min be ve tawh la" a duh a sawi dawn a maw tih laiin amah be tur chuan min ti leh a, a duh chu eng ang a to pawh nise ka pe thei dawn a nih phawt chuan biak that pawh chu ka pawi ti lo zawk tawh mahin ka hria, "Ka pe thei ang che tih i chiang maw" ti a ka zawh chuan a ngawi leh ang daih a







Min chhang tawh dawn lo a maw ka tih hnuah, "Ka chiang lo mahse min pek theih nan theihtawp ka chhuah ang" a ti a, a duh ka pek theih nana amah zawkin theihtawp a chhuah tur thu a sawi chuan ka hrethiam lo leh pek khawp mai, "Ngati maw?" Ka ti ha a, "A chhan chu ka duh min pek dawn avangin" a ti leh mai a







"A to viau a mi?" tiin ka zawt leh a, a chhan chu a thilsawi awmzia hi ka hrethiam lo em a tin ni, "To lutuk" a ti leh sup a, eng tiang chiaha to nge maw a nih dawn le, a hma kha chuan a sawi duh miah lo kha a nia mahse tunah a sawi a a to thu nen; "Engzat chiahin nge a to" ka ti leh zel a, a chhan chu zawh ka tumna a rei tawh bawk a, tun hi zawh chhuah hun niin ka hria







"To tak a ni, i sum neih zawng zawng pawh khan a daih lovang" ti a min chhan avang chuan ka rilru a hah nghal em em ringawt a, a duh chu pek ka tum ve tlat bawk si nen chutianga a to viau chuan hna dang zawn tur ka dap mai a ngai dawnin ka hria; tuna ka hlawh ringawt hi chuan inchhung thil bak a daih si lova, "Ngaihtuah vak duh suh" ka ngaihtuahna hria ni awm tak chuan nuih suk pahin a ti a







Ngaihtuah loh chi pawh ni hawt si lo chuan, a to thu a sawi a chu chu neih dan ka ngaihtuah ve angai dawn alawm mawle! "A to i ti sia" ka tih chuan a nui leh ta hawk hawk a, hrethiam lo lutuk a ka lo en mek laiin a kut zungtang chuan na lo te a ka chala rawn nawr pahin, "Helai i thluak bur te reuhte hian thil tam tak i lo ngaihtuah hman a nimaw" a ti a







Nidang lo ang taka a nui hmel ka hmu reng leh chutianga nelawm zeta a awm avang chuan keimah chu ka dik lo leh nghal vekin ka hria a, chhan pawh chhang lovin ngawi rengin amah chu ka en reng ringawt a, "Ka duh chu to mah se, suma lei theih chi a ni lo; chuvang chuan hun min pe la ka theihtawp ka chhuah ang" aw dam thluam leh ril zet chuan a ti a







Tunah hian eng thil nge ka hriat ka hre lo, amah atang chuan ka mit ka la sawn thei thlawtlo a ni ber; a bula awm chu nuam ta riau angin ka hria a, a duh chuan a lo nelawm ve thei tih ka hre chiah bawk, "Khatianga min en reng a nih chuan i haw har lutuk ang, tirawh ka thlah ang che" tih pahin ka kuta chelhin a motor awmna lam chu min pan pui nghal a








Nidang chu nise ka duh lovin ka tang nasa leh viau tawh ang, mahse vawiin chu nidang a nih miau loh avang leh nelawm taka a awm avang chuan ka duh vang ni hauh lovin a awmdan tlemte chuan keimah chu ka pumin min thunun ni berin ka hria; thuawih takin ka zui ve mai a, a motor bul kan thlen chuan kawngkhar chu min hawn sakin lut turin min ti a, chhang lo mah ila luhlul ka chhuah bik lo







Thuawih tak chuan ka chuang lut ve nghal mai a, kawngkhar chu kharin a ni pawh a rawn thu lut ve nghal zat a; Zama pawh khan nui hmel chu min hmuh reng thin alawm, ka chungah a ngilneiin a fel em em a, min ngaihsak em em bawk mahse Sam laka ka awm ang hian Zama lakah chuan ka awm ve ngai hauh lo thung







Nui hmel a put renh vangin ka ngaina tih chu ka pha lo, a bula awm pawh nuam ka ti mahse ka taksa a puma thunun thei tur khawp leh min ti danglam tur khawpin a nui hmel khan ka lakah eng hnathawh mah a nei ve lo thung; Sam chu a nui hmel ka hmu ngai lo chungin a bula ka awm ringawt pawhin ka danglam zia ka hria a, a nui hmel ka hmuh ka laka nelawm taka a awm leh lek phei hi chuan nasa takin min tih danglam zia hrilhchawp ngai lovin ka hre thei bawk








Chhunah kha chuan a thinrim hmel teh reng nen tunah ve lem thinrim hmel a pu lova, a nui leh suk suk thin avang chuan mak ti lutukin amah chu ka en leh ha thin a; chutianga en reng na na na chu a haider thei tawh bik lo a ni ngei ang, min rawn en zawkin a nui a, a dar a chhin nghal uk bawk. Ka awmdan chu zahpuiawm ka in ti leh hnuhnawh khawp mai a, hetianga ka awm chhan lah ka hriat loh mai bakah amah en lo tura ka insum pauh leh amahah chuan thir hip thei chak tak a awm ang maiin ka en lo thei bawk si lo








"Khatianga min en reng a nih chuan ka fawp hreh dawn miah lo che nia" nuih hawk paha a tih chuan rang lutuka hawi let nghal vatin ka ner nghal sawng a, tukverh lam melh pah chuan ka phun nghal sap bawk; "Engmaw?" Ka bia a maw a ti a ni ngei ang, rawn hawi zawk pah chuan a ti a; lu thin khum nawk nawk pahin, "Engmah a ni lo" rang fahrana ka lo chhanna chuan a nuih a tiza leh pek tawh a ni ngei ang hma lam chu hawi leh nghal vatin a nui ta hawk hawk a







Tun anga a awm ang hian awm reng thei se ka ti khawp mai, hetianga nelawm taka a awm hian a bula awm nawm zia chu ka hriat mai bakah a ngaihawm nghal veng vengin ka hre bawk; ngaihzawng ka la neih loh avangin mipa leh hmeichhe inkara induhna lo piang leh an awmdan chu ka hrethiam lova, tuna hetianga a laka ka awmna chhan pawh hi ka hrethiam chuang lo








"I la chhuk dawn lo a mi?" Ti a min rawn zawh avang chuan ka ngaihtuahna atangin ka harhchhuak chiang hle a, engtianga rei nge kan lo din tawh tih pawh ka hre lo; motor atanga chhuk chu ka ui deuh riau pek a, nidang zawng aiin zanin zet chu kan in kal kawng pawh tawi ka ti viau mai






"Engtianga rei nge kan din tawh" keimah chu pangngai takin ka lawm thei meuh lova, ka awmdan danglam ta vek chu a hrethiam ang tih hlau takin thup hram hram ka tum bawk. A hma ang khan vin ka tum viau na chu ka vin thei der lova, ka aw te chu nem ta riau angin ka hre bawk, "Rei chu a la ni lo" a duh hi chuan a tawng duh ve viau thin a, mahse a chang hi chuan a bul leh viau thin bawk







"Ih eng lo kha..." Sawi zawm mai lo chuan ngawi datin amah chu ka en a, ka sawi zawm leh tur nghakin amah pawh chuan min en a, dar chhin uk pahin a mit ko a san nghal ralh bawk, "I duh kha..." Min en reng avang chuan keimahte chu ka zam ta viau a maw tih mai turin ka awm leh ta nghal a







"Chu chu engtin" dawhtheih hmel zeta min zawh chuan, "Ka lo inngaihtuah dawn nia" ka ti leh ta ringawt a, lu buk nghut pahin, "Ka number i hriat tawh kha, thutlukna i siam hunah min lo be dawn nia" a tih chuan ka biak tur thu a hrilhin rei pawh awm tawh lovin motor atang chuan ka chhuk thla nghal vat a







Chhunzawmna....














In ka thlen hnuah ka nu bulah ka nawmsam loh thu hrilhin ka mut rih tur thu ka sawi a, ka nuam sam lo tak tak ni lovin Sam thusawi kha ngaihtuah ka duh vang a nia; ka nu chuan ka nuam sam lo tak tak a maw tiin rem a lo ti khawp mai a, a bulah rei pawh awm lovin room ah chuan ka lut ta nghal a







Ka inthlak fel hnuah khumah chuan mu in ceiling en pah chuan nichin mai a Sam thusawi kha ka ngaihtuah a, engtiang chiahin nge a thil duh chu a to ang? Tinge sumin a lei theih kher lo, engmah chu ka hrethiam lo a ni tawp. Peh hel kual lovin tha takin sawi se la chuan ka hrethiam ve thei mah na le, mahse chutiangin a sawi bawk si lo







Hun pe turin min ti nih kha, pek chu a tha angem tih te chu ka ngaihtuah a; hun chu lo pe ta teh reng pawh ni ila engnge tih a tum ang, ka rilru chu a buai nuai a tih theih ber ang chu. A duh ka pek theih nan keimah zawk hun pe tura dil tur ka nih laiin amah zawk chuan hun pe turin min dil daih bawk si, chu tak chu a ni ka hriatthiam loh chu







Mahse ka pe thei a nih hlauh chuan min tihbuai tawh loh ka ring ve ringawt a, chuvang chuan engpawh thleng dawn se hun chu pek tha in ka hria a; mahse chuti chung pawh chuan ka awm chu a la nuam thei chuang lo, be ta nghal mai lovin khum atanga thochhuakin ka nu pui tur chuan ka chhuak phei ta zawk a







"I nawmsam loh thu kha i sawi bawk sia" ka chhuak phei ka nu bul ka thlen chuan ka nuin a lo ti nghal a, "Ka zia deuh a, ka lo pui ang che" tih pahin ka nuih nghal sang a, rawng kan bawl laite chuan ka ngaihtuahna chu hmundang daihah chuan a awm reng a, thutlukna ka siam hnuah amah be turin ka lo insawi ve lak lawh tawh bawk si a







Mahse biak chu ka hreh tlat pek a, engvang nge tih erawh ka hre hauh lo; tlaia a awmdan kha ka mitthlaah a cham reng a, paih bo pawh tum ila a lo lan zel avang chuan mak ka ti ngei mai. Zama nen ka tehkhin lo thei lova, a chhan pawh ka nunah a vawikhatna atan mipa pahnih mize in perhsan lutuk an lo lang a







Pakhat chu ngainatawm tak a nih laiin pakhat erawh chu nelawm loh tak a ni thung a, Zama chu Sam ai chuan a felin a ngilnei em em a nel zawk tur ka nih laiin Sam chu ka rilru ah a lang tlat thung si! Ka hrethiam lo, Zama bula ka awm angin Sam bulah chuan ka awm ve thei ngai lova; engpawh ti ila ka care hran lo mahse Sam bulah chuan engkim chu a buai zo vek ni ber hian ka hria







"Chawhmeh chhuan liam tir zawih zawih tur khawpin engnge i ngaihtuah a" ka nu in chawhmeh rawn chawk pah chuan a ti a, ka chawhmeh chhuan vil lai pawh Sam vangin ka ngaihsak lek lo chu a ni sia; amah lang kher lo mah se ka ngaihtuahna vang ringawt pawhin min tibuai zo thei chu a ni sia hahthlak thin teh e







"Va hahchawl mai rawh, i chiang kuang lo emai" ka nui chuan nuih hak pahin a ti a, ka zak ang reng viau mai; hetiang hian ka la awm ngai lova mipa vang leh lek phei chuan ka awm ka ring ngai lo mahse tunah chuan ka awm mek chu a ni ta der bawk si! Zanriah eikhamah room ah chuan lut tlangin khuma ka phone dah chu la kangin Sam number chu ka hmetchhuak a








Mahse ka be ngam thlawtlo, ka tawi hrut hrut reng a; biak tuma a number ka hmehchhuah apiangin eng emaw hian min dal ang maiin ka be lo leh thin a, chutiang chuan rei tak ka awm nghe nghe bawk. Kei hi ka zam ve deuh zawk a maw ni! Thutlukna ka siam tawh thu leh hun pek ka tum thu hrilh ringawt turin darkar tam ka bei ta der chu a ni sia!







Zan a rei tial tial a, ka zam tulh tulh a maw tih mai turin ka awm leh nghal a; zaninah chuan hrilh lo phawt a a tuk lama hrilh chu ka tum a, office ka kal leh ngei ang a, a ni pawh kawng khawharah khan a lo awm leh ngei dawn tih ka hria, chutah chuan hrilh mai ka rilruk ra ringawt a







Phone chu dahin khumah chuan ka mu thla nghal zat a, mahse ka muhil thei chuang lo; eng emaw hian min kam tun reng mai hian ka hria a, thuchhuak leh hluaiin thawk chu ka la ham ham a, ka phone rawn ri ral ralah chuan ka phu chiang ngei mai. A number pawh ka save tawh avangin min call mektu chu tunge tih hrilh hranpa ngai lovin ka hmu nghal a







Rei fe ka ring tir hnuah a tawp a tawpah chuan call chu ka chhang ve ta hram a, "I lo ngaihtuah tawh em?" Aw dam thluam a a tih chuan chhang mai lovin ka ngawi reng a, ka awmdan pawh chu ka ngei zawk hial a ni; a ni lakah khan ka zam ve chu a ni sia, "Aww...." Fan ban raih a ka tih chuan lehlama mi chu a nawi hawk hawk a







A nui ri ka hriat ringawt pawh chuan ka taksa zawng zawng chu a fan chhuak hneh chiang kher mai, "Chuan engnge i thutlukna chu nita" a tih chuan chil lem khalh pahin thawk ka lak leh te te hnuah hun pek ka rem tih thu chu ka hrilh a, lehlama mi erawh a ngawi dak thung, "I la awm em?" Zam aw deuh taka ka tih chuan a awm thuin min chhang leh nghal vat ang lawi a








Thu tam pawh kan sawi lo, hun pek ka rem tih avanga lawmthu sawina pakhat mah pawh ka dawng chuang lo; kan inbiakna ka dah hnuah ka tisual angem tih te chu ka ngaihtuah leh a, mahse ka tihsual chu ka ring bik em lo. Ngaihtuahna ka hmang char char a maw ka tih laiin ka lo muthlu a ni ngei ang, ka harh leh chuan khua pawh a eng tha tawh viau mai







__________________________________________________







Khami ni a mipa pakhatin Zualtei bike a a phur ka hmuh khan nasa takin ka thik a, mipa a biak leh a kawm ngai awm ka hre si lova chutianga an rawn thlah ka hmuh chuan mak ka ti hle bawk; chupa chu tinge a ni tih hriat ka duh avangin ka theih dan ang angin ka chhui a







Ka hre hma ang reng viau mai, Zualtei hnathawhnaa an pu ber fapa a ni tih ka hriat chuan mak tak maiin keimahah chuan hlauhthawnna a awm nghal a; a chhan pawh khapa Zama in ti khan Zualtei chu min chhuh sak ka hlauh vang pawh a ni, zing leh tlaiah a hruai tak fo avangin Zualtei hnenah chuan chupa chu be tawh lo turin leh thian mipa nei lo turin ka hrilh a







Min huat vang hrim hrim nge maw ni ka thusawi chu engah mah a ngai lo chiang khawp mai, amah biakna tur hun awl ka zawng reng thin a; khapa kha Zualtei bulah a awm reng avangin biakna tur hun pawh ka hmu thei meuh lo, chu chuan ka thinte pawh chu a tihrim phah em em a, ka chan ang tih hlauhna lian tak ka nei bawk








Phaiah lehkha zirin kum tam tak ka awm a, haw pawh ka haw ngai meuh lo a tih theih ang; ka pa chuan a aiawh turin min duh tawh hle tih ka hria a, chuvanga phaia lehkha zir a a tha thei ang bera chhuah chu ka tum a, ka zir tur ang ka zir zawh hnuah phur takin Mizoramah ka haw a, mahse engkim alo danglam vek dawn tih ka hre hauh lo thung







Ka nu nen chuan kan inbe reng a, a aw atang chuan engmah thleng lo ang maiin a awm thin; phur takin kan in lam panin ka haw a, in ka thlen chuan ka nu hmuh hmasak ber ka tum laiin ka nu ka hmu zo ta miah lo, ka nu leh pa te room atang chuan ka nu ang rual tur awm ang hi a lo chhuak a, min hmuh chuan min nuih nghal sang bawk







Chutianga ka nu leh pa te room atanga a lo chhuak ka hmuh chuan mak tihna in ka khat a, zawhna ka ngah hle bawk; ka nu awmna ka zawh chuan an khuaa a haw tawh thuin min chhang a, a thilsawi awmzia chu ka hrethiam lo hle bawk. Thil awmzia ka zawh chuan ka pa lo haw hun nghak turin min ti leh a, chunu hmelah chuan zamna chhe te mah ka hmu lo bawk







Ka pa lo haw hnuah thil awmzia chu ka zawt nghal a, ka nu nen an inthen tawh thu leh a bula thu chu ka nu a nih tawh thu peh hel miah lova tlang taka a sawi chuan thinrimna in ka khat nghal a, a chhan ka zawh lahin naupang mai ka la nih thu leh nakina min hrilh tur thu a sawi leh lek phei chuan ka thinrim insum zo lo chuan ka pa chu ka khawih mai tih ka hlauh avangin ka thutna atanga thochhuak nghalin ka room lam pan chuan inchungah ka chho ta nghal a








Ka nu khan ka rilru nat a hlauh avang leh lehkha chu ka zir tha thei lovang tih a hlauh avangin engmah min lo hrilh ngai lo chu niin, ka tleirawl chhuah tirh atangin ka nu ka chan a chutah ka rilru ti na belh turin reiloteah ka nu thih thu ka hre leh zel bawk nen dam chakna chu ka nei tawh hlawl lo a tih theih ber ang chu







Ka pa chuan ka lakah thil tam tak a lo zep reng thin a, fa hmasa a nei tih pawh ka nu thih hnu lawkah ka hre nghe nghe bawk; ka nu chu a nupui tak ni lovin a hmei a nih thute chu ka hre leh zel a, ka tum loh deuh deuh thil ka hriat reng avang chuan keimah chu ka chau ni berin ka hria






A hma angin ka pa chu ka en thei tawh lova, amah huatna in ka khat ta a ni ber; ka pa fa hmasa te chu tuna a nupui nen a an fa a ni tih pawh ka hre leh zel a, engvangin nge chutiang thilte chu ka pa chuan a zep ka hre lo, ka pa chu thah chakna in ka khat a atana fapa chhuanawm tak ka nih theih nan tha takin lehkha ka zir ve bawk a mahse tunah chuan amah vekin a ti chhe leh si chu a nih hi








In a awm ka peih lova, inchhung chu a nin in ka ning hluah hluah a tih theih ber ang; zantin chhuakin ka rui ta fo a, mumal lo takin hun ka hmang thin. Zan khat ka chhuak ka haw leh lamah ka ruih tawh em avang leh kan chhungkaw kehchhiat zia te ka ngaihtuah avang chuan ka bike khalh lai chu ka lo ngaihtuah chang tawh lova







Na tuar rum ri ka hriat rual chuan ka harh nghal kawk thei, ka hma maiah chuan patling hi leiah a lo tlu sawp nuai a; a lan danah chuan ka su tih a hriat theih mai bawk, thei leh thei lovin ka bike atanga chhukin chupa chu ka bawihsawm ta nghal a, nikhua a hriat mumal tawh loh avangin a thi ang tih pawh ka hlau kher mai







Taxi lo tlan hmasa ber chu pharin min pui turin ka ti nghal bawk a, taxi chhungah kan in dahfel hnuah damdawi in chu hmanhmawh thei ang bera min pan pui turin ka ti nghal a; damdawi in kan thlen chuan ka pu chu emergency room ah chuan kan kalpui ta nghal a, a lo serious em avangin a chhungte biak an duh thu a sawi chuan tih ngaihna reng ka hre lo







Nurse pakhat chu lo kalin ka pu phone chu min rawn pe a, a chhungte be turin min ti nghal zat bawk; a phone chu la in ka hmet eng a vanneih thlak takin password a lo dah lo hlauh, a nupui ni awm tak hming a save number chu hmetchhuakin kut khur dar dar chung chuan ka call ta nghal a








An lo kal vat tur thu a sawi hnuah call chu ka off ta nghal a, duh lo viau mah ila ka pa biak ngei ngei chu a ngai si; ka pa ka hrilh chuan chiai lo turin leh an lo thlen vat tur thu min hrilh hnuah ka sirah thutnaah chuan ka thu ta reng a, a tu a ve ve pawh chu lo thleng har ka ti tawh khawp mai







Ka harhfim tial tial a, hlauhna in ka khat a ni ber. Ka tleirawl chhuah tirh atangin nun nuam tak hmang thei lo turin ka pa in min siam a, engkim chu min tihchhiat sak vek niin ka hria; nu pakhat hmanhmawh zeta kan lam pana lo kal chu ka hmu a, ka pu nupui kha a nih ka ring nghal hmiah bawk






A hnungah chuan a fanu ni awm tak pawh a tel a, a mita mittui tling piau chungin a nu chu a rawn zui ve hnak hnak ka hmuh chuan inthiam lohna in ka khat nghal a; ka thil tih chu pawi tihna in ka khat tak zet bawk. Ka pa te lo thlen hnuah thil awmzia te min zawtin ka sut dante nen lam chuan ka hrilh a, ka pa chuan thupha te chawiin ngaihdam te chu a dil a







Chu chu Zualtei ka tawn hmasak ber dan chu a ni, ka tawn dan chu lawmawm viau lo mah se ka hmuh vawikhatna atang khan ka mit a lak nghal em em bakah ka ngaihtuahna atang chuan tun thlengin a thi thei tawh lo bawk. An chhungkua ka tihchhiat vek bakah naupang te in a chhungkua chawmin a duh ang pawh ti thei lovin hna a thawh a ngai a







A lakah chuan inthiam lohna in ka khat a, chutih rualin a ni telin ka duh tulh tulh bawk; hnaih loh chu duh viau mah ila ka hnaih lo thei si lova, thlah ka tum apiangin midang ta tur ang a ka chan erawh chuan ka phal thei chuang bawk si lo, a haw kawngah drug addict hovin an tibuai thin tih ka hriat hnu atang phei kha chuan ka theih ang tawka venhim chu ka duh a







Amah ka duh piah lamah an chhungkua ka tihchhiat vang pawh a ni tel bawk, an mahni chawmtu ber a pa chu hnathawk thei tawh lo turin ka siam a; an chhungkaw chawmtu ber Zualtei leh zel chu tawhsual tawh tir ka phal tawh lo bawk. A ni leh zelin harsatna a tawk a nih chuan kumkhua in ka inthiam thei tawh ngai lovang






[Ka story te min lo chhiar sak thin avangin ka lawm a, min lo la chhiar sak zel ula chuan ads click, like leh comment kha min tihsak leh hram dawn nia]

[Ngaia]

CHAPTER-8






"Engnge kan tih dawn?" Hun pek ka rem tih atangin vawiin hi kan inhmuh leh hmasak berna a nia, kar khat dawnah kan inhmuh leh chauh tihna a ni; hepa awmdan hi ka hrethiam lo hun pe turin min ti a ka rem ti ta cheng a, a bo leh hmak bawk si






Ka office bang kawng khawharah ka kal tan mek tihah tu emaw hian ka ban chu hnung lam atanga rawn chelhin min let pui leh nghal dawr dawr a, tunge maw ti a ka en chuan amah lek chu lo niin; ka zawhna chu min chhan pawh a tum chuang lo a maw ni tih tur khawpin a ka chu a chip hmak a







A motor zawn kan thlen chuan min vawnna kut chu paih thlak sak hlawkin amah chu rum zetin ka melh ran a, "Kan kalna tur min hrilh dawn lo a nih chuan ka lo zui nachhan tur che ka hre lo" ka ti bak nghal hlar a, mit tih zim sun paha min enin a kawng chu a dawm pah bawk a; a awmdan hi a chang chuan nelawm thin viau mah se ngeiawm lam a tam zawk mah tih theih tur a ni








Min chhan a tum chuan loh avang chuan in herin kan letna ngaiah bawk chuan ka kal leh a, thui pawh ka kal hmain min pu nghal lawpin motor lam chu min pan pui leh a; a hnungah chuan chumin ka ke chu ka leng vak vak bawk a chuti chung pawh chuan min thlah duh chuang lova, a chang leh ka sik bawk a, na ti ang pawhin a awm lo a kaldan ngai chuan a kal reng zawk!







Ka duh leh duh loh pawh min zawt tawh eih lovin motor ah chuan min chuan luh tir nghal a, amah ka sualna lamah ka hah zo vekin ka hria; ka thaw nghal hlawi hlawi a, a lo thut luh ve hnuah pawh en duh lovin tukverh lam hawi chuan thawk ka la leh hak thin a, kut ka kuangkuah than bawk








A nuih leh hak thin avang chuan rum zetin ka va melh thin a, min en duh der lo leh nghal. Eng chu nge maw a hriat a, a ngeiawm em emna chhan pawh hi ka hrelo; theih ngat sela chuan a sam ah sawn ka tham nawk nawk tawh ang, mahse chutuang em chu a thlen loh nan ka insum hram hram zawk a ni








Eng emaw chen kan tlan hnuah kan ding ve thei ta hram a, motor atanga kan chhuk chuan kan hma zawna building in tiang urh mai chu ka en chho nghal ha bawk; ngawi teh a ni hian thil tha lo tih a tum chiang mai, hotel ah min thlenpui a tum tihna em maw ni? Ka duh lo chung ka thianghlimna min laksak te hi a tum tihna zawk a ni!







Ka rilruah thil chi hrang hrang chu a rawn lut nghal zut zut a, chutiang a tih em chu ring bik lo mah ila ka ngaihtuahna hian min hruai peng vek tawh niin ka hria; ka lu chu thing nawk nawkin ka tukhum chu ka beng leh nawk thin bawk, eng ang ngaihtuahna tha lo nge lo lut ta hi! "Khatianga i awm reng a nih chuan sawng ho sawn mi ang lo a maw an ti mai ang che"a nui zuk hawk a, rum fein ka melh nghal hraw bawk








Min ngaihsak map lovin a chhungah chuan a lut a, ka zui ve nghal tak na chu a ke pen a zau mai bakah a kal chak bawk si a; a hnungah zel chuan ka um ve dat dat bawk. Room pakhat zawnah chuan dingin chahbi chu phawrhin a hawng nghal a, lut tura min mit mei hnuah hnial lovin ka lut ve mai bawk







A chhunga ka luh rual chuan ka hawi nghal ha ringawt a, hotel pawh a ang lo mimal in pangngai hi a ang zawk mahin ka hria; engkim chu a felfai thlapa hnawk pakhat mah hmuh tur pawh a awm lo. Mipaah chuan che fel ve tak chu a ni dawn a nih hmel, in pangngai a nei ve awm tho si a hotela cheng tlat tur a nih chuan sum a ngai hnem viau ang








Chu chuan a hausak dan tur chu a chiah hre thei lo mah ila a awm ang tur chu ka hre thei nghal mai, " Ka haw peih loh changin hetah hian ka riak thin" ka ngaihtuahna hria ni awm takin a ti a, ka phu chiam leh nghal. A chhan chu room ah khan a awm a maw ka tih laiin ka hnungah a lo ding leh vang tawh a, inhera chutianga a lo tawng thut avang chuan hauh ka tum a






Mahse a hmel ka hmuh rual chuan tawng tum a ka ang zuau tawh pawh chu ka chip rang leh khawp mai, a hmelah chuan a hma ang tho a ka hmuh thin lungngaihna tam tak leh khawharna te chu ka inhmuh chhawk zut zut nimai in ka hria; "Aaaa...in i nei ve awm tho sia" inthlahrung deuh taka ka tih chuan a bu nghut a, chik leh ril zeta min enin, "Ka nei alawm" tih zawngin min chhang thung







A mi chhanna chu ka duh khawp lo hle a, a nei dawn tih chu ka hre tho a mahse engvanga haw peih lo nge a nih? Kei ve chu mahni in ka thlahlel zawk em em a, ka nu leh pa te ina an awm tih ka hriat avangin haw vat vat chu ka chak thin zawk a nia, tinge a chak ve loh? A nu emaw a pa in an be tha duh lo zawk a maw ni dawn le







"Tinge?" Ka ti leh tawl ringawt a, "Khatia i din reng chuan i ke a kham ang, han thu ve phawt la" ka zawhna chhang lovin a ti ta zawk a, amah pawh chu a thu thla ve nghal zat bawk. Thu ve in ama lam hawi chuan ka insiam rem leh nghal vat a, min chhan hun chu ka nghak ta ran bawk







"I sawi dawn lo a mi?" Kan ngawih rei tak em avangin ka zawt ta tawp a, lu buk nghut pahin, "Tangkaina awm lo" a ti bul leh hluk ringawt a. Min hrilh lo mah se pawi ka ti lo mahse chutih rualin ka hre chak tho bawk si a, amah lah chu zawh nawn chakawm tawh loh leh inthlahrun thlak khawpin a tum hmuk leh nghal







"In tur i duh em?" Tih pahin a tho a, ka chhan ve hma hauhin choka lam chu a pan zawm nghal a; eng emaw sawi duh nei mahse sawi thei si lo hi a ang ka ti ber a, kei lah chuan ka zawt ngam tawh der bawk si lo. Inthlahrung dak chuan ngawi rengin ka thu ta reng a, in tur kenga a lo let leh hnuah pawh a hma a ka tih thin dan ang khan ka ti tawh bik lo







Thei tui intur min pek chu vawikhatah ka tlak nghal map a, a chhan chu ka tui hal tawh em bawk a ni, "I inzo nghal vek elo" mak tih hmel zeta ka no ken lai en pah chuan a ti a, ka thenkhum tha ringawt thung. Tuna kan awmdan hi hahthlak ka tih chi zawng tak a ni, engkim mai chu a ni deuh ha hian ka hria; a hmaa a laka thinrim reng thin kha tunah lem sawi tur a lawi pawh hre lovin ka awm mek a, chutah ka zam ve deuh a maw ni







"Aaaa...aw...ka tuihal a" bah deuh nawk a ka tih chuan a nui hawk a, "I tuihal te chuan i sawi vat lo a nih chu, tui intur te chu ka nei ve reng a nia" ngeiawm zeta tiin a mitko min san khum nghal pah uk a, ka lo khawngaih ve hman tawh teh reng nen ka ngei leh nghal vekin ka hria; ka ner nghal nawk a, a ni lah chu a lawmah a tla ta a maw tih mai turin a nui zui hawk hawk a, chutianga a nuih tak hawk hawkah chuan keipawh ka nui ve ta ringawt a








"Ih...ka chhungte engmah ka hrilh si lova, ka haw har lutuk chuan min lo ngaihtuah ang" amah en pah chuan ka ti a, "Aw ni dawn tak, helai hmuna ka hruaina chhan che chu" tih pahin a tho leh nghal vut a, a chet dan leh awmdan chu a zam ve deuh zawk a maw ni! Thil pawimawh deuh min pe dawn a maw tih laiin a rawn let leh hnua a thil min pek avang chuan ka nui chhuak hak a







Engtin nge ka rawmawl hi a lo kawl daih theih? "Hei hi engtin?" Lek kan va paha ka tih chuan a nui suk a, "I thlauh a" tih zawngin min chhang leh tawh. Tawngkam hi a nei tawk thei thin khawp mai nge ni a, a sawi thui peih vak lo thung pawh ka hre lo, "Mahse...ka van hre tawh lo" ka ngaihtuah tak ngial pawhin ka thlauhna tur awm ang lai chuka hre thei lo a ni








"Sawlai kawngah khan" a ti bul leh hmuk a, sawlai kawng a tih chu kawng khawhar a sawina a ni ngei ang, "E...kawng khawharah khan maw, mahse engtin nge ka thlauh a" ka ti leh hram a, kawng khawharah te chuan nitin ka kal ziah a, thlauh pawh ni ila ka hria ang mahse ka thlauh lai tur awm ang ka ngaihtuah pawhin ka hre thei tlat lo a ni








"Addict hovin an tihbuai zan che kha" a ti leh a, ka hre ta uar uarin ka hria, khang lai khan min tibuai fo mah se khami zan min tlanchhiat pui hrep zan kha a nih ka ring thiam nghal mai a, "Eee...ka thlauh tih pawh ka lo hre hleinem, min pe let leh a ka lawm lutuk e" tiin lawmthu te chu ka sawi leh hnuhnawh a, min en ren rawn hnuah a bu ve nghut a







Sana chu ka en leh thin a, ka duh ai chuan ka awm rei tawh viau in ka hria; tiang hunah chuan ka nu rawngbawl ka pui a nih loh chuan ka khuma hahdam takin ka mu leh der der tawh ang chu mawle. "Ih...ka haw tawh mai dawn asin, tih tur dang a awm loh chuan" ka ti leh a, han sawi mawi vak dan tur pawh ka hrelo, "Ka lo thlah ang che" tih pahin thuthleng bang a a kawr khai chu lak pahin ka chhip sam chu min rawn tuai thur sak nghal a







Ka nel ve dawn chauh tih hian ngeiawm takin a awm leh thin a, duh ang pawhin ka nel ve hleithei der lo mai; ka phone rawn ri chhen chu lak ka hreh viau a, ka nu a nih ka rinn avangin la duh lovin ka kutah chuan ka hum reng a, "I phone kha chhang rawh" rawn melh zawk pah chuan a ti a








Ka phone khup zawnga ka dah chu hreh tak chungin ka en a, ka thaw nghal huai theiin ka hria; ka nu phone call chu khawilamah Zama zawk chu lo niin phur lutukin ka chhang nghal a, ka bula mi chuan a hriatthiam loh hmel kher mai. Hlauthawng hmel taka awm reng chutia phur ta thut chu mak tih loh ngaihna a awm lo ve bawk em a ni








"Khawnge i awm?" Leh lama mi chuan a ti a, "Vawiin chu ka haw hma a, ka kal kawi zawk mawle engnge ni ta" tiin ka chhang a, "Ka nghak che tih i hre tawh lo a nimaw" a tih chuan ka harh chhuak nghal zawk thei. Damdawi inah mamawh pe lawk tura a kal dawn thu leh amah nghak tur khan min hrilh tak kha mawle







Lei chhuah tut pahin thupha te chu ka sawi leh rih a, eng eng emaw te sawiin ka nui leh hak hak thin chu ka bula mi chuan ngaih that loh hmel zetin min melh zuk zuk reng a, "Tunge?" Zama nen a kan la inbiak lai mek chuan min rawn zawt a, "Zama" tih zawnga ka chhang chu a duh vak lo a ni ngei ang







Eng emaw sawiin a phun nghal hluk a, ka inrin hma hauhin ka phone chu min lak sak a, "Mipa thian nei lo turin leh be tawh lo turin ka hrilh tawh che" ti hlukin ka phone chu a hmet thi zui hmiah a, a rawn awmdan teh thut avang chuan min tih hrilhhai viau leh nghal a; chhan mai dan tur pawh hre lovin mak ti zetin amah chu ka en ha ringawt a







Chhunzawmna....














"Engnge i hriat!??" Ka phalna la miah lova ka phone min chhuh bakah mi ka bia tih hre reng chunga a off hmak chu mak ka ti em a, ka zawt ta nghal reng bawk a; mahse lungtum bia ang mai niin ka in hria, tawng chu sawi loh ngawi rengin hma lam melhin motor chu a khalh a








"Ka zawhna che chu chhang rawh" ka ti vin that a, thawk hawk pahin min lo en a, "Khapa kha be tawh suh tih ka hrilh ngun viau tawh che chuan ka hria" a ti a, chhan let ngaihna pawh hre lovin hma lam chu ka hawi san ta ringawt a; kan boruak a that lai mek a phone call pakhat ka chhan avanga chhe ta vek chu ka haw kher mai







Hepa hi chu nel tum viau mah ila ka nel hleithei der lo, pangngai takin a awm reng a maw tih lai hian a lo thinrim leh thut thin a; ka nel sual fo ka ti lo thei lo bawk. Nel tum lo law law ila a that ber pawh ka ring, a chhan pawh nel ka tum a, ka hnaih ve deuh apiang hian ka chungah eng emaw vangin thinrimna a neih ziah vang a ni






Kan in kawt kan thlen rual chuan min be hman ang tih hlau ni awm fahranin motor atang chuan chhuk thla nghalin, ding kawi lovin in lam chu ka pan ding nghal a; engtin nge a ngaih ang tih pawh ka ngaihtuah peih chuang lo, ka bialpa a ni lova ka tan engmah a ni chuang lo mahse chuti chung chuan ka chungah thuneih a tum ve ziah leh nghal







In ka luh rualin ka nu chuan ka haw tlai chhan chu min zawt nghal pang a, a hmel pawh en tha ngam lovin ka kal kawi thu leh ka hrilh hmasak loh avang chuan ngaihdam te chu ka dil leh rih bawk a; min vin emaw min hau hrep dawn emaw tih laiin aw zaidam tak chuan inthlak turin leh chaw ei nghal turin min ti a, amah ka en chuan thinrim hmel awm ang hmuh tur pawh a awm lo







Engmah ei lo mah ila ka ril a tam tlat loh avangin khumah chuan ka mu tlang a, chaw eitura min koh pawhin ka ei loh tur thu hrilhin ka mut nghal tur thu ka hrilh a; hetianga ka awm chhan pawh chu ka hre lo, reilote hnuah ka phone chu a ri a ka en chuan Sam a lo ni, la lovin ka ring ral tir a







A rawn tih nawn leh pawh chuan ka la duh ta chuang lova, a beidawng a ni ngei ang a hnuah chuan message a hnutchhiah a; ka en lovang ka ti tak na a engin nge min mawlh ka hrelo, a message hnutchhiah chu chhiar chakna in ka khat tlat pek a nih chu! [Nichin vang khan min ngaidam dawn nia...] Tih zawng chu a ni







Engnge rawn thawn se tih chu ka beisei vak le, ka chhiar zawh rual chuan ka nuichhuak nghak hak a; chhiar loh tawp tur hi a nia, a rawn ti leh a, chupawh chu ka seen leh ta ringawt a. A message chhiar chak tho siin amah ka be peih chuang bawk si lo, ka awmdan chu amah lo ni ta ila a ngeiawm viau ta ve ang






Engtik lai atang khan nge ka hre bik lo, Sam chu ka tum loh deuhin ka lo ngaihtuah leh thin a duh lo viau mah ila ka rilruah hian amah bak a lang thei si lo; amah hmuh chakna in ka khat a, hmu ila sawi tur ka hre leh dawn chuang lo tih chu ka hre tho bawk si. "Tunlai chu i mizia hi a dang e" Tluangzeli chuan chik zeta min en pahin a ti a







"Keipawhin ka ti, dan ve deuhna lai chu a awm a ni lo maw" nui hak hak pahin Ahmingi chuan a ti a, lu thin nawk nawk pahin, "Aih teuh lo" uar fe a ka tih chuan ka thiante pahnih chuan chik zetin min en dun ta reng a, "Tu vang nge" Tluangzeli bawk chuan a ti leh a, mi a chik bawk a eng emaw danglam hlek chu hre tur reng bawk a ni







"Chutiang engmah a awm lo, tunlai chu ka chau ve deuh a niang" ti ve mah ila ka danglam chhan chu kei tluka hrechiang an awm hauh lovang le, "Chhelo deuhpa kha tunlai chu ka hmu ngai lo reng reng" a ti leh zel a, ka lo ngaihtuah miah lova kan office leh a chheh velah hian ka hmu tawh ngai lo reng a ni







"Zama nen hian in ni ve deuh em? Tunlai chu hmuh tur a awm reng a" Ahmingi chuan a ti a, "Ka thian alawm a ni te chu chutiang engthil mah in ngaihtuah ang kha a awm lo" ka tih chuan lu a bu nghat a, a hmelah chuan awih chiah lo mah se ka sawi a nih avangin a pawm tho chu a ngai a ni







"Chhelo deuhpa ai kha chuan Zama hi ka duhpui zawk che, a fel bakah a ngaihsak che bawk sia" Tluangzeli'n a tih chuan ka nuih san ta ringawt a, a duh duh hi a sawi ve tawp zel a, Ahmingi nen chuan thu tak hla takah pawh kan lak sak ngai meuh lo thung. "Vawiin chu kan haw hma a ngai dawn a, i haw hunah chuan kan lo inkhar tawh mai thei a ni" Ahmingi chuan a ti leh a








Haw rual ngai lo mah ila haw dawna ka tlawh kawi ziah avangin chutianga an haw hma tur chu ka ui ru ang reng viau mai, "Hmeichhe thusawi chu koh aiin a hnai an ti em kha" kan thusawi lai mek nen a inrem lo zetin Tluangzeli chuan a ti a, pawn em pahin mit ko a san ak ak bawk. Ahmingi nen a kan hawi phei nghal vat a, Zama lo lut chiah chu kan hmu dun nghal zat bawk







"I hman tawh em?" Keimah min en pah chuan a ti a, "Ka la haw thei lova" tha takin ka lo chhang ve vat bawk, lu buk nghut pahin, "I bang har angem?" Tiin min zawt leh a, "Ka hrelo le, ka hun neih dan tur" ngaihtuah paha ka tih chuan ka chhip tuai zeuh pahin a nui hawk a, "Ka lo nghak ang che" a tih rualin ka rilruah Sam a lo lang nghal ringawt a







Tu mipa mah biak a phal tawh lo a nih tak kha mawle, "Min lo nghak duh suh, keimahin ka haw mai ang" inthlahrung deuh chuan ka ti a, "Tih tur dang i nei leh dawn a mi?" A tih chuan han chhan mai dan tur pawh ka hrelo, tih tur hranpa em em ka neih ka hre lova; inthlah tir chu a awlsam zawk teh reng nen ka duh lohna chhan pawh chu ka hre bik chuang lo







Ka tan engmah a ni lo ka tih tawh kha, mahse ngati nge tuna taka a thusawi kha la thutak ta viau nge ka nih ka hrethiam lo; "Aww..." Fan raih a ka tih chuan ka thiante pahnih chuan, "Maw!??" An lo ti dun ha a, a chhan chu ka sawi lawk te a nih chuan ka haw nghal thin tih a hriat ve vek vang a ni







"Khawnge i kal dawn?" Tluangzeli chuan a rawn ti nghal a, "Thil pawimawh" tih zawnga ka chhanna chuan an awi lo leh zual niin ka hria, dawt ka sawi thiam lo tih an hriat ve vek avangin ka thusawi chu ka thiante pahnih chuan an awih pawh ka ring lo, "A nih chuan naktukah ka lo hruai ang che, mahse i tih tur pawimawh chu vawiinah lo ti zo hman vek la" min nuih sang paha a tih chuan ka inthiam lo ru hle a








"Awle" ka tih hnuah Zama chuan min chhuahsan leh nghal mai a, a chhuak fel chiah tihah ka thiante chuan, "Nang hi dik lohna i nei chiang alawm, Zama kha i hnial ngai si lova; in haw kawng hlauhawm zia pawh i hre ve vek a eng vanga hnial tlat nge i nih?" Tiin min zawt a, sawi mai dan tur pawh ka hre leh pek chuang lo







Sam vang a ni tih ka sawi ngam bawk si lo, ka ngaizawng chu ka ti dawt thei lo; a chhan pawh ka ngaizawng miau si lova mahse a thusawi ka awih tlatna chhan lah pawh chu sawifiah dan ka hre bik chuang lo. Ka thiante chuan min zawt leh reng dawn tih ka hriat avangin ka chhuahsan ta vat a, ka rilru a nuam bik lova Zama chu ka tan a that mai bakah thian nih a tlin em em a







Chutianga min thlah tur ka duh loh ngawtna pawh chuan ka rilru chu nasa takin a inthiam loh tir a ni, ka ban hnuah keimahin kan in lam pan chuan ka haw ve hnak hnak a; Zama min thlah tur ka lo duh lo te kha pawi ka ti leh hnuhnawh viau a, ka awmdan chu ka haw tak zet bawk







Kawng khawhar ka kal lai mekin ka hnung lam atang chuan, "Khapa kha i inthlah tir nange?" aw thum bulin a tih chuan ka kal lai chu ding chawtin a lam chu ka hawi nghal vat a, "I hmuh ang hian ka inthlah tir lo chu a nih hi" dar chhin ak paha ka tih chuan a khabe tuai zeuh pahin a nui zui hawk a, "Hmeichhia mahni chauha haw a tha lo ka tih tawh kha" a tih leh chuan ka hrethiam chiah lo a thilsawi awmzia chu








"Engnge i sawi tum" ka tih chuan ka thaw halh a, "Nangmaha i haw ai chuan inthlah tir tur che lawm" a ti leh ang lawi a, ngati nge hepa hi a duh duh hunah a mizia hi a tih danglam thiam bik. A hma in tumah be lo turin min ti a, mipa thian ka neih tak ngial pawh a phal lo a nih kha mahse tunah ve lem inthlah tir turin min ti leh si a khawlhkham reuh lutuk mai








"'Mipa thian nei suh, be suh' i ti a tunah 'Tinge i inthlah tir loh' i tih leh si" ka ti bak nghal hlar chu eng atan mah a ngai leh bik lo a maw ni tih theih turin a hmelah chuan danglamna pakhat mah ka hmu lova, "Ka ti alawm mahse nangmaha i haw ai chuan..." a tih leh lai mekin ka lo pawt chat nghal vat a







"Hei hi ka nun a nia, thuneihna pakhat mah i nei lo. Ka duh duh danin ka ti ang, engmah sawi theih i nei lo" ka thinrim em avang chuan ka ti leh nghal phiar phiar a, ka thinrim lutukte chu ka puak keh lo chauh ni berin ka hria, "Ka lo thlah ang che" rei fe kan ngawih hnuah a ti a, ka kut chu a rawn chelh nghal zat bawk








Lu thin nawk nawk pahin min chelhna chu ka paihthlak sak nghal pawp a, "A ngai love, keimah pawhin ka haw thei" tih leh inherin hma lam pan chuan ka pen nghal pawk pawk a, ka kut chu ka hum ruh nghal teuh bawk. A thusawi ka lo aaih ve ringawt avang chuan keimah pawh chu ka inhaw hlur a, eng atan mah min ti tak tak lo a ni tih ka hrechiang viau bawkin ka hria







Engtik laiin nge in ka thlen pawh ka hre lo, kawngkhar chu na zetin ka khar ri nghal bur a, "Enga tinge?" Ka nu chu ka bulah lo kal vatin min ngaihtuah hmel zet chuan min zawt nghal a, ka nu enin ka pa leh ka nau te chu ka en nghal a; mak tih hmel em em a min lo en reng ka hmuh chuan ka inthiam lo veleh ta deuh






"Engmah a ni lo" ti bak hlarin zah pawh dawn lovin room lam ka pan nghal a, khuma ka thu fel chiah tihah Noi chu inthlahrung deka lo lutin, "Aû a pa in a au che" a ti a, min kohna chhan chu ka hrethiam nghal mai, ka nu mawi lo taka ka chhan avang leh thil awmzia pawh sawi lova room a ka luh tlang nghal avang chuan min hau dawn tih chu ka hre nghal mai






(Ka story te min lo chhiar sak thin a, ka lawm lutuk a nia chuan ads click, like leh comment kha min lo tihsak leh hram ula ka lawm leh zual ngawt ang)

[Ngaia]

CHAPTER-9





Ka pa te awmna lamah ka phei hnuah ka pa chuan thu thate min hrilhin ka awmdan chu mawi lo a tih thute chu a sawi a, a dikna lai chen chu awm ve bawk mah se naupang ka ni tawh lova mawi leh mawi lo te chu ka hre ve bawk chuan ka inhria






"Pa naupang ang maiin min chei bawl thin a, tunah chuan ka puitling tawh. Ka naute ang hian min treat tawh suh" ka thinrim la reh chiah lo bawk nen ka pa chu chhan duh lo viau mah ila a ngai tho bawk si, ka nu chuan, "Paa i ti mah mah ve deuh alawm, i ngai thu tak leh lutuk a tin nih kha mawle; bawihi sawi pawh a dik a tunah chuan chhungkaw min chawmtu ber a ni tawh a, mawi leh mawi lote chu a hre ve bawk alawm" a ti ve bawk a







"Mahse khati bur bura i rawn luh chhan kha hriat chu kan phu ve chuan ka hria" ka nu chuan min rawn en pahin a tih zawm leh nghal zat a, chhan dan tur ka ngaihtuah nghal a mahse a vang pharh leh nghal, "Englo a nia sawlai kualah sawn ka rawn inchhuih pek alawm mawle" ka hriatchhuah hmasak ber chu ka sawi ta ringawt a, an awih leh awih dawn loh pawh ka hrelo








"A va ho thin ve mawle aw, chutianga rawn thinrim luh pui chiam atan chuan" ka nu leh pa te chuan an awih a ni ngei ang, ka pa chuan nuih huah huah pahin a ti a; za viau lo mah se ka then khum ve sak sak ringawt a, "Chaw chu i ei dawn em?" Ka nu in min rawn zawh leh chuan rang lutuk a lu thin khumin, "Zanin chu ka tam lo emai ka ei lui thei chuang lovang" tiin ka chhang let nghal vat a








"A nih chuan lo thu ve rih la" ka pa in a tih tlat avang chuan peih vak lo mah ila an bulah chuan ka thu ta ve reng a, an tv en lah chu ka en peih zawng a ni hauh lo leh nghal. Mut a tichhuak vek thei ni berin ka hria, nu leh pa te leh keini en duh zawng hi chu eng emaw riau a nih loh chuan enpui hi a har ka ti thin, tui taka an en theih laiin kei erawh ka mut a tichhuak nghal der thin








Ka mut phei tur thu hrilhin reiloteah chuan mu turin ka luh san a, khuma ka mufel chiah tihah ka message tone a rik avang chuan ka en leh rih thin a, [Lo chhuak lawk teh] tih zawng chu Sam atanga ka dawn a ni, [Ka mu tawh] tih chu ka thawn let veleh nghal zat a, min rawn chhang mai dawn a maw ka tih laiin a reh leh daih ang lawi a








[A rei lovang] 5mins hnu velah chuan a rawn thawn leh a, chhuah chu ka peih viau tawh lo asin mawle; bakah ka nu te an la mutfel loh phei chuan mu turin ka lut chiah bawk si a, an ngaih a tha lo leh hman ang tih pawh chu ka hlau ve reng bawk a ni a rawn tih leh takah chuan chhuah lohna chi pawh ni tawh lo chuan







Ka lum vek tawh chu thawhsan ka ui ang reng viau mai mahse pawn lam atanga turtu a nat em avang chuan thawh san loh ngamna chi a ni bawk si lo, peih lo zetin ka khum atang chuan ka thochhuak tuah tuah a; ka nu te bula ka sawi dan tur chu ka ngaihtuah pah reng bawk, ka sawi tawh angin mipa ka la hnaih ngai loh chu thuhran zan chhuah hi ka tih ngai loh bawk avangin eng emaw danglam hlek a awm tawh hi chuan a chhan hriat an duh ngei ngei thin a








A nihna ang rawt a ka sawi a nih chuan an rem tih loh ka hlau ve bawk nen chhuah chhan tur tha tak ka ngaihtuah chu a ngai ngei ang, room atanga ka chhuah pheiin ka pa chuan tv chu a la entui ang reng viau a; ka nu ka hmu mai lo nen ka zawn kual lai takin choka lam atang chuan a rawn chhuak hlauh a, ka lawm kher mai







Ka nu chu auin ka lama lo kal tur chuan ka hui zeuh a, a ni pawh chu a lo kal ve mai bawk a; ka chhuah tur thu ka hrilh chuan ka rin ang ngeiin a chhan min zawt nghal zat a, ka thiante an lo kal thu leh min hmuh kawi zawk duh thu ka hrilh chuan a phal ka rin loh teh reng nen a lo phal ve hlauh a, mahse rei lo turin min chah thung







Ka nu nen kan inbiak zawh hnuah pawnah chuan ka chhuak a, ka hmuh mai loh avangin tlem chu ka kal leh hret a; kawngchhaka a ding ka hmuh chuan ka pan nghal vat a, a bul ka thlen chuan, "Ka mu tawh sin, tinge min koh chhuah" ka ti nghal zat a, min en vung vung hnuah a khi suk a, "Tlaiah khan engmah ka eipui hman ta si lo che a" tih leh a thil khai lai chu a rawn lek kang a







"Hei hi engnge?" A thil khai kawh pah chuan ka ti a, "Eitur" a va bul thei tak, a chang hi chuan thil thui tak sawite hi a hlau zawk thin a maw tih mai tur hi a ni, "Arsa bawp i ei duh takin ka tia" min chhan danah chuan a inthiam lo ve deuh hlek a ni ngei ang a hnuah chuan a ti leh a, "A la lum ther ther ang, i luh veleh i ei nghal dawn nia mahse nangmah chauhin ei ang che" ka chhan mai loh avang chuan a tih zawm leh nghal zat a







A thusawi chuan ka nuih a tiza viau leh nghal, midang ei tir chu a ui hmel viauin ka hria, "Chu midang ei tir ve i phal nange" nuih hak hak paha ka tih chuan lu buk nghat pahin, "I ei tura ka lei alawm, midang ei tur ni lovin" a ti bul leh hmuk a, mai mai thin a a awmdan chuan ka nuih a tihzat mai bakah ka lawm riau peka, ka chan ber chu mipa naupang a thil eitur chuhpui hlau tak hi a ni







"Duh lo ta ila" mit ko san khum ak paha ka tih chuan a rum nghut a, "Ka la let leh ang" a ti leh hmuk a, kei erawh za lutukin ka nui thung. "Nuihzat tur sawi ka nei em ni?" a tih chuan lu ka thing mat mat a, mahse ka nuih a za ve bawk em a ni; "I ei duh loh chuan ka ei duh tho a nia" a ti leh a






In pek vek tawh chutianga in lak sak leh chu a, keipawhin ka ei ve duh tho a ka phal bik teuhlo mai; "Ngai lo ka ei ve duh tho alawm" tum bara ka tih chuan a nui suk a, "Midang i pe ve dawn em?" Mit tih zim sun paha min enin min zawt a, min laksak tak tak ka hlauh avangin rang fahranin lu ka lo thin khum vat a







"Ka pe dawn lo keimahin ka ei dawn" ka tih chuan lu buk nghut pahin a khabe chu a tuai pah zeuh a, "I duh chuan pe ve la, nichin kha chu ka fiamthu a nih kha" nuih sun sun pah chuan a ti leh a, a chang hi chuan a nelawm viau thin ka tih kha; ka nel sual leh mai ang tih chu ka hlau kher mai. Hetianga nelawm taka a awm hian a bula awm nuam ka ti a, eng emaw ka hriat si loh hian amah hnaih chakna in min tuam thin bawk








"Lut tawh rawh keipawh ka haw nghal ang" aw dam thluam a a tih chuan, "Hotel ah khan maw" ka lo ti leh hmanhmawh pek a, lu thin nawk nawk pahin, "Zanin chu inah ka haw ve ang" a tih chuan a chhan sawi tur hranpa em em pawh hriat si lovin ka lo thaw ve huai thei ringawt a, "Ih..." Kal ta mai lo chuan ka ti leh rih thin a







A eitur min rawn lei sak ve vang vang pawh lawmthu ka la hrilh lo tih ka hrechhuak a, mahse lawmthu han sawi mai dan tur chu ka hre lo a ni bakah a hnena lawmthu hrilh chu ka ngam lo ka ti dawn nge sawi ka hreh deuh tlat pek a; "Aw engnge sawi la" dawhthei hmel zeta tiin keimahah chuan a mit chu a fu reng a, ka zam leh nghal ringawtin ka hria







"Ih...." Ka sawi dawn a mahse sawi tan dan tur pawh ka hre chuang lo, "Immm..." A lo ti ve mai a, thawk lak hak pahin amah chu ka en ve ta reng a, "Hemi vang hian ka lawm lutuk aw" tih pahin a thil min rawn leisak chu ka lek kang va a, lu bu nghut pahin a nui suk a, "I lo ei teuh dawn nia" tih pahin ka chhip sam chu min tuai thur sak a








Tuai vut vut a ka melhrum ram ram lai chuan ka rin loh lutukin ka chalah a rawn fawp a, che chang lova dingin vur ang maia khawngin ka ding reng a; min thawn mai bakah ka pian a hnu lama mipa min fawp hmasa bertu a ni, a ni lah chu a nui hawk hawk a kei erawh min la thawn em avangin ka din ngai chuan ka la ding reng thung








"Kal rawh le, i luh hunah keipawh ka haw ang" aw dam taka a tih leh chuan mit khap fap fap pahin amah chu ka en chho ha a, "Aa...aw...ka kal ange" min lo la en reng avang chuan ka ti bah nawk a, a nui leh a. A nui hmeltha lutukka hmuhte hian ka taksa chhung khawi emaw lai hi a nghawr nghing thin nimai in ka hria







In lam pana ka let leh pawh chuan a khat tawkin ka hnung lam chu ka hawi let leh zeuh thin a, ka hawi let apiang chuan min lo nuih pahin a kut chu chung lama pharin a lo vai thin a; ka nui ve ta ver ver mai. Hetiang hi mi hmeichhiain mipa an duh dan thin chu ni ta ang? A nih chuan kei hian Sam hi ka duh ve ta deuh tihna em maw ni dawn le? Mahse chupawh chu ka la chiang ta chuang lo






In chhung ka luh hnuah ka thil hawn chu ka chhungten an lo hmu ve ang tih hlau takin a ruk thei tur ang ber chuan ka thuk ru a, vanneih thlak takin tumah an lo meng tawh lo hlauh a; dim thei ang ber a kawngkhar ka kalh fel hnuah choka lam panin Sam an a thil min rawn lei sak chu phawrhin fridge a hmarcha chu ka la chhuak a








Arsa bawp chauh a rawn lei dawn a maw tih laiin a chhungah chuan intur a lo awm tel bawk a, zanin chaw ka ei hman lo chu a vanneih thlak khawp mai; nge ni a hetiang a ni dawn tih ka pum hian a lo hre lawk zawk a maw ni ka ei teuh a, ka duh aiin ka puar leh ta mah mah zawkin ka hria








Khuma ka mut hnuah pawh Sam chu ka ngaihtuah a, a thil min lei sak leh ka chala a fawh velte ka ngaihtuah chuan ka hriat loh laiin ka lo khi leh vur vur thin a; a chet dan lawmawm zet chuan amah chu min hmuh leh tir chak ni berin ka hria. Zep loh chuan a bula awm kha nuam ka ti a, ka thian dangte a hlimna ka ti dawn nge ka neih ngai loh a bulah chuan nei tlat a








A changin nelawmin nelawm loh thin viau mah se, a bula awm chu ka chak reng a maw tih mai tur a ni a; a nui hmeltha tak hmuh leh te chu ka chak et et bawk. Hetianga mipa vanga ka awm tawh ngai hi ka la hre lova, ka la awm ngai hek lo mahse ka awm ve ta reng chu a ni a; chupawh addict lakah leh nghal









A tirte kha chuan ka duh ngai pawh ka ring lova, ka duh theih pawh ka ring ngai lo a nih kha mahse tunah chuan phat rual lovin Sam chu ka duh tawh tlatin ka inhria a; chutianga ka awm ve ta mai chu a ngaihna ka hriat loh mai bakah ka hrethiam lo hle bawk. Kan chhungkaw khawsak dan nen a ka ngaihtuah chuan addict ka duh ta mai pawh chu ka inthiam lo ru ang reng viau a mahse ka duh vang a ni bik hauh si lo








Chhunzawmna...













Tuk dang zawng aiin tukin chu ka tho hma ve teh tlat a, ka nu rawngbawl pui tura ka va phei te chuan mak a lo tih zawk hmel em em mai leh nghal; "Thil tha tak tawn nei ang mai" a ngaihna hriat loh hmel zetin ka nu chuan a ti a, a chhan pawh ka lo khik leh vur vur thin vang a ni






"Tawn ka nei pawh a ni mai thei" mitko san khum ak paha ka tih chuan ei loh hmel zeta hmui min tihpawrh khum pahin ka nu chuan, "Kan hriat ve chi a ni nange chu" a ti a, ka zak leh hnuhnawh zawk ang reng viau mai, inrinni a nih avangin vawiin chu hna kal a ngai lova; inah awmin a tul ang ang hnathawk tur chuan ka inbuatsaih a







Sam chuan min rawn biak zawm leh ka rin teh reng nen a ni lah chu a reh daih leh nghal a, ka lungawi lo dawn lek lekin ka hria; min lo biak deuh ringin ka phone chu ka bih leh thin a, a reh vung vungte chuan ka khua a ti har zawk mahin ka hria, "I phone a ri a nia" Tetei'n a rawn tih chuan ka ngaihtuahna atangin ka harhchhuak hlawl a







Phur lutuk a ka phone chu la in tunge min lo call tu chu ka en nghal vat a, mahse screen a hming lo lang ka hmuh rual chuan ka nui lai chu a tawp nghal riai riai a; ka phurna zawng zawngte kha a reh nghal vekin ka hria, phur vak lem lovin call chu ka chhang ta tho a, "I va la har ve" ka lak rualin leh lama mi chuan a lo ti nghal a







"Nia...ka buai deuh hlek a" ka ti tha ve mai a, ka tawngkam atang chuan ka biak chak loh zia pawh a lan theih ka ring hial a ni; "Vawiin engnge i tih dawn, i buai viau angem?" A rawn ti leh a, a awmdan atang chuan a hma ang chiahin a thawven leh hmel khawp mai a aw pawh a zangkhai vah bawk, "Aw ka hre chiah lo...in lamah hna ka thawk ang chu ka tia" ka tih chuan leh lama mi chuan min chhang hran lova







"Min bazar pui zuai la ka ti sin maw le" ka rin danin a hmel chu a ti nur leh nasa viau tawh ngei ang, ka thian a ni a ka mamawh hun apianga a awm thin avang leh a hma ni chiah a min thlah tur ka lo hnar avang khan ka inthiam lo deuh chu chhuahpui ka remti ve ta hram a; mahse ka tih tur ang te ka tih zawh hunah a ni thung ang






Tih tur a nei ve lem chuang lova, a hman bawk nen min lo nghak rei ve deuh tawh ang a nimai; ka tih tur thenkhat ka tih zawh hnuah ka nu chu hrilhin ka thiante ka bazarpui tur thu ka hrilh chuan rem a lo ti ve khawp mai a, phur vak lo mah ila kalpui chu tha a ka hriat ve tlat avangin insiam turin room lam ka pan ta nghal a







Sam chuan chhuahpuiah min sawm sela chuan kan phur nasat dawn teh reng nen mahse amah a nih miau loh avangin phur erawh a har viau mai, kan inkawt maia a awm tawh thu a sawi avangin ka hmanhmawh ru ang reng viau mai a; ka insiam te pawh chu ka confi loh phah vekin ka hre bawk, pawn a ka chhuah rualin Zama hmel hmuh tur a lo awm nghal var a






Min hmuh rualin min lo nuih nghal sang bawk, "Engnge lei ngai i neih a" bike a lawn kai pah chuan ka ti a, "A nu in min tir pek alawm mawle, ka û fanu kha damdawi in atang a chhuak tawh a naktuk hian haw nghal an tum a; an mamawh vel leisak turin min tir a" a ti a, a aw ah chuan phur lo hmel a lan awm ka hre lova; engtik lai pawhin mi pui tur hian a inpeih at reng a maw tih mai tur zawk a ni







Chubak chu kan inbe leh ta rih miah lova bakah ka tawng peih vak lo bawk nen min biak pawh chuan a rul tawk bakin ka chhang ngai lova, chuvang pawh chu a ni mahna min be leh ta rih lova; bazar kan thlenin lei ngai tur an sawi te chu chhinchhiah pui turin min ti a, min hrilh thla pah mawlh mawlh bawk







Ka hriat ang ang chu lo chhinchhiah ve in chung ho chu kan zawng tan a, thil vang tak a ni hlauh bawk a lei tur chu kan hmu ve thei zel mai; "Kan in lei zawhah ka treat ang che" min nuih sang pahin a ti a, engtik lai mai pawha a phur reng thin chuan a bula awm a tih nawm phah thin nimai in ka hria; ka rin aiin kan inlei zo hma ang reng viau a







Lei ngai pathum a la awm tih loh chu kan in lei kim thawkhat tawh viauin ka hria, "I hah em, kan kal kual nasa sia" tih a min zawh chuan lu thin khum mat mat pahin, "Hah nang le aw, i lo inthlahrung lutuk ang e" tiin ka nuih let ve sang bawk a, a bu nghut a, "Ka inthlahrung chuang miah lo a nia" tih leh pahin a nui hawk hawk bawk







Eng emaw chen kan kal kual leh hnuah restaurant pakhatah chuan min luhpui a, a changkang lutuk chu ka inthlahrung zawk; "I duh duh kha chah rawh" a tih chuan ka en ve tak ngial a, chah pawh ka chah ngam ngawt dawn a maw ni le; a tui hmel viau hlawm na chu a man a to hlawm phian mai leh nghal a, "A man kha en lovin i duh kha chah rawh" a ti leh a







A lo hmu a ni ngei ang, amah then khum sak pah chuan ka chah ve ta hram a, "Hetah kher lo pawh a chawlh theih tho asin" waitress kal hnuah chuan ka ti nang nang a, nuih hawk hawk pahin, "An thilsiam hi a tui lutuk a nia" a la ti tak deuh deuh leh nghal a, tlawm te tui deuh pawh a awm ve reng a; puma pai tawih leh tur tho to tak han ei kher chu tul ka ti fahran lo khawp mai






Eitur chah kan nghah laiin a chhung chu hriat chian ka chak em avangin ka hawi kual hrut hrut reng a, a chhung chu an cheimawi phian leh nghal a; ka bula mi chuan min hauh a tum hran lo bawk nen bakah ka kal nawn leh tawh loh takin tih thuah ka hawi kual reng a, mahse ka piah maia ka thil va hmuh avang chuan chumi lam chu ka en ta reng a







Pawn lama dawr pakhatah chuan Sam ni awm tak leh hmeichhe pakhat inzui lut lai hi a ni, engnge an tih ang? Tunge khanu kha ni ta ang? Engvanga inzui ve ni ang tih zawhna chu a lo lut nghal zung zung a, mahse a chhanna ka nei hauh si lo; ka phone chu rang zetin ka bag atang chuan ka phawrh chhuak nghal a, mahse Sam chuan min la be lo tih ka hmu thei nghal a








Chumi vang ringawt pawh chuan ka lungawi lo tan lek lek tawh, eng emaw chen kan nghah hnuah kan eitur chah pawh chu a lo thleng a, "Min kalpui hah bawk sia tui deuhin i ei dawn nia" ka bula mi chuan nuih sang pahin a ti a, nuih sak pahin ka eitur chah chu ei nghal a mahse ka eitui leh tui loh pawh ka hre lo







A da duap ni ber te hian ka hria,a kan ei zo kan chhuak tur chiah leh Sam te lo lut tur chu kan intawk a; hmu lawk lo ila chuan mak ka ti ngei ang mahsr ka hmuh lawk tawh miau avangin engtin mah ka awm lo hlauh a, a ni erawh mak ti lutukin min en zawk a







"Hetah engnge i tih a?" Lungawi loh hmel taka a tih chuan chu chu keima zawh tur awm zawk tak niin ka hria, hmeichhe dang a chhuah pui a tunge a ni tih pawh ka hre lova; a ni chuan tunge ka chhuahpui hi chiang takin a hria tih ka hria, lungawi lo zawk tur ka nih laia min lungawih loh khum hmasak zawk avang chuan tihngaihna hre lo zetin ka nui chhuak hak ringawt a








"Kal ang" amah pawh chhang lovin Zama chu enin ka ti a, a kawrah pawta kal pui nghal mai ka tum chu, "Thlah rawh" vin thata ka hnunga miin a rawn tih chuan ka phu zawt nghe nghe, "Khapa bulah khan kal miah suh" a tih chuan zak thei lo hi kan ti mai mai khawp a, chhang lova kalpui mai ka tum chu ka bula mi lah chuan a lo ti thei thak lo chu niin







"Khapa ka ni lo, hming ka nei chuan ka bula kal leh kal lo tura hrilh tur hian tunge i nih?" A hmelah chuan thinrimna a lang lo mahse a tawngka chhuak erawh a bulin a hlauhawm viau thung a, ka hnunga mi chu rawn nui chhuak hawkin, "Tunge ka nih ka sawi kher ngaiin ka hre lo" a ti a, an in din hnaih nghal ta viau mai







Helai hmunah hian an inkhawih duh mai ang tih ka hlauh avang chuan ka theih ang tawkin Zama chu a kawr hnungah ka lo pawt ve a, mahse ka tha tawpa a ka vawnna te chu atan eng thamah a nih loh zia a lang chiang viau mai, "Kal ang" ka tih pawh chuan la in din hnaihin an in en dun reng a, ka thinphu nasa tawh lutuk leh tha khur tan pawh chu ka hriat hmaih hauh lo







Ka tha neih zawng zawng chuan ka pawt leh a, a che ve ta hrut chu ka lawm ru kher mai, "Zama khawngaihin kal ang" ka tih leh tak tuau hnuah chuan min rawn en ve ta nge nge a, min nuih suk pahin pawn lam pan chuan a chhuak ta nal nal a; Sam chu rum zeta ka melh hrawk hnuah pawn lamah chuan ka chhuak ve ta nghal a







Ngawi rengin a hnungah chuan ka zui dat dat a, a thinrim leh rim loh ka hre bawk si lo; biak mai dan tur lah ka hre chuang bawk si lo, a lakah chuan ka inthiam lo ve em em ringawt a. Khapa teh hrep lah kha, duh chuan tawng ve thei reng ka ni mahse buaina a pun lun ka hlauh avangin ka tawng lo mai zawk a, hmeichhe kalpui ve tho si ka thianpa ka kalpui ringawt pawh a lo hmumawh bik a nia







"Ka tihpalh lutuk aw" ka tichhuak sep a, "Engvangin maw" a aw chu dam viau mah se a thinrim em tih hre turin a hmel ka hmu thei bawk si lo, "Nichin vang khan" ka tih chuan nuih hawk hawk pahin a ding a, ka lam a lo inher pahin, "Engmah a ni lo, ka thlah ang che" a tih zawm nghal zat a, lu ka lo buk khum ta ringawt







Ka tawng leh ngam tawh lova, ni lo sawi tur dang ka hriat tawh loh avangin a bike awmna thleng chuan ngawi rengin ka zui a; bike a a thut hnuah, "Lo chuang rawh le" min nuih sang paha a tih chuan nuih let ve sakin ka chuang ve nghal vat a, chubak chu kan inbiak zawm leh awm pawh ka hrelo






Zama lakah chuan ka inthiam loh mai bakah ka inthlahrung hle ringawt a, amah lah chu engtin mah awm angin lang lo mah se Sam an a tih dan avang khan a lawm chiah lo tih chu a hriat theih viau mai a; in thleng min thlah hnuah engmah sawi zawm lovin a tlanchhuak leh nghal daih a, ka rilru nuam thei ngang lo chu ngaihdam ka dil nawn leh mai dawn a maw ni le aw tih te chu ka ngaihtuah rum rum a






[Ka story te min lo chhiar sak thin avangin ka lawm e, chuan min lo la chhiar sak zel la ka lawm leh zual ang. Cuan ads click, like leh comment kha min lo tihsak leh hram bawk la]

[Ngaia]

CHAPTER-10






Zama chu ka va be ta hram a, a chhan pawh ka inthiam theih ngang loh vang a ni mahse min lo hrethiam khawp a, ka thiam loh a nih loh thute leh a thinrim loh thute, engah mah a ngaih loh thute a sawi chuan ka thaw huai theiin ka hria; ka inthlahrunna berin thinrimna a neih loh chuan tui takin ka mu ve thei ang chu tih nak alaiin ka call dawn chuan min ti thinrim leh ni berin ka hria







Vawihnih a rawn call hnuah pawh ka la la duh ta chuang lova, bakah lakna chhan tur ka nei tawh lovin ka hria; hmeichhe dang nei reng siin min tibuai reng a zah pawh a zak lo zawk a maw ni ka ti hial a ni. A beidawng a ni ngei ang, min rawn call nawn leh tawh lova mahse message erawh a hnutchhiah hram a







Hawn loh ka tum viau laiin a insawifiahna tal hriat ka duh leh zawk si avangin a message chu ka hawng leh ta hram a, a rawn insawifiah dawn a maw tih laiin pawna a awm thu leh ka chhuah hma chu haw a tum loh thu hi a lo ni; mahse chhuah ka tum hran lo a duh leh pawnah chuan awm tleivar thak mah se pawi ka ti lo nasa viau bawk







Dar12 a ri hnai tawh a, call leh message ka dawn tawh loh avang chuan a haw ni tawh turah ka ngai a; ka muhil thei tawh lo ting tang bawk nen tui in turin choka lamah ka chhuak phei a, engin nge min mawlh teh reng ni pawh ka hre lo pawn chu ka en chak tlat pek a, parda chu dim te a keu hawngin pawn lam chu ka en a







Min lo biak atang khan darkar engzah nge liam tawh pawh ka hrelo, a awm tawh lo ka rin teh lul nen kan kawt piah lawk stepah chuan a lo la thu reng a; a lan danah chuan vawt a tih hmel em em mai leh nghal, ngaihsak lova room a luh san leh mai ka tum chu a dam loh ka hlau leh bawk si avang chuan hmanhmawh lo zetin ka bottle chu dawhkana dahin kawngkhar chu ka hawng a







A phu ve reng ang a ngaiin ka hmanhmawh duh hran lova, muang changin a awmna lam chu ka pan phei a; a zawn ka thlen chuan, "Haw rawh, lo kal tawh suh" ka ti nghal tawng a, a thinrim viau ka rin teh reng nen min hmuh rual chuan a nui suk a; keimah zawk chu min ti hrilhhai let ling zawk khawpin ka hria, "Ka chang chhuak ta che" a ti leh sup a







"Haw rawh" ngaihsak ru viau mah ila tih lan ka duh loh avang chuan ka ti leh hram a, harsa tih hmel zeta rawn thochhuakin min en chhuk nghal run a; lu thin nawk pahin, "Tinge khapa nen khan inchhuah" a ti a, vawiinah hmeichhia a chhuahpui a insawifiah zawk awm tak a nih laiin keimah zawk chu thiam loh min chantir zawk a maw ni!?







"Huh...! Nangpawhin i chhuahpui ve tho kha, min thiam loh bik thei lo" ka tih khum ve nghal tawng a, nuih hawk pahin, "Khate kha chu" hrechhuak ni awm taka a tih mek lai chuan lo pawt chat vatin, "Ka hmu duh tawh lo che, haw rawh" a hma ai khan ka aw pawh chu a vin lek lek tawh a, mipa dang ka kalpui hmu thei lo si hmeichhe dang a chhuah pui leh thei daw daw tho si chuan ka thin a tirim ve bawk em a ni







"Ka sawifiah thei" a ti leh a, ka kut phar chhuakin lu ka thin khum a, "I insawifiahna ngaithla tura lo kal ka ni lo, haw tawh tura hrilh tur chauh chein ka lo kal" ngeiawm zet chuan ka ti leh kher a, min chhang lovin ngawi rengin min en a; min en dah lah chu ka hrethiam mai lo. A ril mah mah em a tin ni, "Haw duh lo ta ila" dar chhin uk paha a tih chuan hahthlak tih hmel zeta enin thawk ka la kawk a







"I thu lawm" tih leh inhera kal mai ka tum chu ka bana lo chelh pahin, "Zualte ka insawifiahna chu ngaithla ve phawt la" a ti leh a, eng insawifiahna nge ngaihthlak tur awm pawh ka hre lo; a tihsual hre ve hauh si lovin keimah zawk chu thiam loh min chan hmasak te te hnuah a insawifiahna ngaithla leh turin min duh a maw? Ka ngaithla awm lo emai






"Eng insawifiahna mah ngaihthlak tur ka neiin ka hrelo" ka ti leh vat a, ka inrin hma hauhin a lamah chuan min pawt hnai hrawk a; "Ka sawi dawn alawm" a thinrim hman a maw ka tih tawh laiin a aw erawh a dam leh thluam bawk si chu ka hrethiam lo lek lek zawk a ni, ka chhan let veleh hma hauhin a motor awmna lamah chuan min kalpuiin a chhungah chuan thu lut turin min ti a







Duh lo pawh ni ila min tilui leh dawn tho tih ka hriat avangin rum zeta ka melh hmasak leh te te hnuah motor chhungah chuan ka thu lut ve ta hram a, reilote hnuah lo lut vein a ngawi leh daih ang lawi a; ka la thinrim em avangin tawng ka tum lo bawk nen motor chhung boruak chu a uap mai bakah a rit churhin ka hria, "Sawi la" tawng mai a tum loh avang chuan ka ti ve ta nge nge a







"Khanu kha tumah a ni lo" a tih chuan ka nuichhuak hak a, teh tawl chuan! Engnge a nihna hriat ka tum lo a insawifiahna ngaithla turin min ti a chu chu ngaithlak ka tum zawk a ni, "Chu chu maw i insawifiahna" tih pahin amah chu ka en chho nghal ha a, min rawn en zuk pahin lu a bu nghut a; "Aw ni e" a tih chuan awih loh hmel fein ka en leh ringawt a





A sawi peih lo ve hrim hrim nge, sawi dan tur a hriat loh vang zawk pawh ka hre lo; a awmdan chuan ka haut tawh a ti tling em em a, thinrim tawh sa nen min ti thinrim belh ni maiin ka hre bawk. "A nih chuan ka chhuak dawn" ka ti hluk chu ka bana rawn chelh vat pahin, "Ngati nge?" Hriatthiam loh hmel fe in a ti a







Ka chhang let hran lo, "A nih chuan khapa i chhuahpuina chhan kha sawi ve tawh la" a tih chuan a tum ka hre ve chiah, Zama ka chhuahpuina chhan a hriat duh vangin a insawifiahna ngaithla turin min ti ve mai mai chauh a ni tih ka hriat chuan ka thinrim lutuk tawh chu ka insum zo lo mai ang tih pawh ka hlau zawk; "Zama ka chhuahpuina chhan ka hrilh ve kher ngai chein ka hre lo" ka tih chuan a rum nghut a







"Sawi la, keipawhin ka hrilh che kha" a aw chu tih dam hram hram a tum tih a awm dan atang chuan ka hre thei a, a chhan pawh a bek pawng tawlh tawlh leh min vawn lohna lama a kut hum ruh danah chuan; "Khanu kha engmah a nih loh ang chiahin a nimai" ka tih chuan mak tih hmel lutukin min en haw ringawt a, "Lalhluzual, tha takin min hrilh rawh" ka chhan dan ngeiawm zet avang chuan a insum thei lo thelh a nih hmel






"I sawi ang chiahin ka sawi a, chubak sawi leh vak ngaihna ka hrelo" ka ngeiawm chhuah a ka tih chuan a nuichhuak hawk a, "I luhlul tak zet" a tih chuan pawm lutukin lu ka lo buk khum nghat nghat a, sawi leh tur chuang a hre tawh lo a ni ngei ang a ngawi ta hle hle a; chutiang chiahin keipawh a bulah ngawi rengin ka lo thu ve bawk a, chutianga awm reng pawh chu ka ning tak zet a ni







"Sawi tur dang a awm tawh loh chuan ka lut dawn" ka ti chu min rawn en leh haw a, a awmdan chu mi ang lo te pawh a ang dawn alawm mawle; ngaihtuah nei ni awm takin a awm a, ka thilsawi apiangin min rawn en leh haw thin a, a awmdan teh haw avang chuan ka thinrimna te pawh ka theihnghilh hman thelh a ni







"Timaw?" A tih chuan engnge ni vak se a tih? Ka khum lum ka ngai ve tawh tih te pawh chu a hrethiam lo a maw ni zawk le? "Engvak nge nise i tih? Ka mut a chhuak tawh" ka tih chuan a bu nghut a, "Naktukah hna i kal dawn em?" A tih chuan ka nuichhuak ta hak hak a, ka bula mi erawh chuan a ngaihna a hriat loh hmel viau leh nghal







"Kal lovang, sunday a nia tiang hunah chuan kan chawl ve thin" ngeiawm zeta ka tih chuan min en run run a, "Chimawm lutuk" ti hlukin leh lam a hawi nghal hmak a, nui chhuak lo tura ka insum nasat teh reng nen a ti ho zo vekin ka hria; "Ka kal dawn" ka tih leh takah chuan min ui tung tawh bik lova, tha taka min thlah hnuah motor atanga chhukin kan in lam pan chuan ka kal nghal nal nal a







Inchhung ka luh rualin ka ngaihtuah let a, ka nuihza lutuk chu nuih nghek ka duh a mahse ka chhungte ka tiharh tih ka hlau bawk si chu nuih pawh ka nui tha ngam meuh lo; dawhkana ka bottle dah chu la in room lam ka pan a, ka mufel deuh chiah tihah ka phone a rik avang chuan ka en nghal vat a [Muttui le] tih zawng hi a rawn thawn a ka nui nghal vur vur bawk







A lakah khan ka thinrim viau a maw ka tia, engtik laiin nge a lo reh leh hman pawh ka hre lo; hepa hi chu eng emaw tak chu a niin ka hria. Nel ka tum apiangin nel hleithei lo turin min siam a, hlat ka tumin min hnaih a, ka thinrim a maw ka tih viau laiin a reh lai ka hre leh bawk si lova; mi mak tak chu a ni ve thlawtin ka hria, a message chu chhang let tawh lovin ka mu ta nghal a







Chawlhni hi chuan zing leh chhuna han inkhawm bak loh hi chu tih tur hi a awm vak lo thin a, chawhnu inkhawm banah ka mu mai mai a; ka thianten an lo len tur thu an sawi chuan ka phur viau mai, mi buai inkawm khawm tih takah hnathawhnaa kan inhmuh a kan inkawm bak han inkawm hlimna hun hi kan nei lo ve em bawk a ni







An lo kal dawn chuan tiin eitur te chu ka chah teuh a, an lo thlen hmain ka lo intifai thlap bawk; an lo thleng har lutuk lova kan han inawm khawm chu kan phul hlut a, kan ri nghal chel chul bawk. Ka nau te pawh chuan nuam an lo ti ve khawp mai a, kan thian ho bulah awm ve in an titi ve siam siam bawk, ka nu leh pa te chuan tv an en thung a







Ka thiante hian ka chhungte hi an nel bakah lo leng khat mah se an tlangnel nghal em em a, a in neitu ber ni mah ila engmah kati ve hman meuh lo a tih theih ber ang chu; eitur pawh chu an mahni vekin an siam a, an bulah ka lo thu ve ringawt thung. Ka nau te pawhin nuam an ti ve em em a, ka thiante hian an duat thiam bawk nen an lo kal ve chhunah hi chuan an bulah an awm deuh chawt zel







"A û i thiante an lo kal" Tetei lo pheiin a tih chuan thiandangka neih awm ka hre si lova, kan thian ho chuan kan in en ha ringawt a; "Tute nge lo kal a Tete" Ahmingi'n a tih chuan va let lehin reiloteah a lo let phei leh vat a, "Mipa pahnih an nia" a ti leh mai a, ka rilruah Sam leh Zama chu an lo lang nghal a mahse lo kal dun tur khawpin an innel awm ka hre bawk si lo







"Min hai a nih dawn chu" ka tih chuan lu thin mat mat pahin, "'I û Zualtei a awm em?' An tia lawm" a tih chuan chet mai nachang pawh ka hre lo, a chhan pawh mak ka ti ve em a ni; "Lo luh tir rawh kan thiante a nih dawn chu" Tluangzeli'n a tih chuan Tetei chu a phei leh nghal a, reiloteah ka nau chu lo let lehin a hnungah a sawi ang chiahin mipa pahnih chuan an lo zui ngei a







Engtin nge a nih theih? Sam leh Zama hi an lo kal rual a maw!? Niminah te kha chuan an inti thiam vak lo kha a ni sia mahse tunah hetah kan inah an pahnihin an lo kal chu a ni sia, ka thiante chuan thu tura an tih avangin an rawn thu thla ve nghal mai a; ka bula thut an inchuh nghal ringawt bawk! A tu a te mah chuan in ken an tum bawk si lo, thuthleng chu an in chuh a ni hawt mai







An pahniha min melh run run pah chuan ngawi rengin thutna chu a changtu zawk nih tum ni awm fahranin an inchuh kawi reng a, ka thiante pahnih chuan an nuih tet tet reng a; ka nau te pahnih lah chuan mak tih hmel zetin an lo en ha bawk. "Sam sawtah sawn va thu mai la" then khum sak paha ka tih chuan a rum nghut a, sawi sual ka nei ta a maw ka ti hman hial a ni







Ka ngaihdan chuan Zama chu thu sawn tura ka tih chuan a zah ka hlau a, Sam chuan zah a hriat vak loh avangin a zah pawh ka lo ring hran lo kha a ni a mahse ka ring sual zawk dawn a nih hmel; Zama chu a titi nghal bawrh bawrh a, engmah thleng lo ang maia a awm laiin Sam ve thung erawh chu a ngawi kar reng a, kan fiamthu thawhah a lo nui ve suk tih mai loh chu a tawng ve lo pawh a tih theih ang







Chutianga a awm tak siah chuan ka inthiam lo leh hnuhnawh viau a, ka mitsir reng bawk; Zama chuan eng emaw sawi pahin ka dara rawn kuah leh zauh a ching thin a, nuam ka ti lo lek lek zawk a a chhan chu ka bul maiah Sam a awm a, ka veng thawng ve pah deuh a ni. Zama min kuahna chu paihthlak sak dawt lovin ka awmdan chu ka siam tha pah a, chutia ka tih takah chuan a ni pawhin a la thla ve mai a








Chubak chu min kuah leh tawh chuang lo, tha takin kan inkawm tlang a maw ka tih laiin Sam chu a ding thut a; mak ti lutukin kan en hlawm ha bawk, "Khawnge i kal dawn?" Inhera kal mai a tum avang chuan ka lo ti vat a, "Ka haw dawn" ti hmukin ka chhan let ve pawh nghak miah lovin a kal nghal daih a, a awmdan avang chuan nuam lo ka tih phah hle a







Ka zui ve nghal vat bawk, motor a a lut mai tur chu lo pawt dingin, "Tinge?" Ka ti a, ka vawnna chu paihthlak hlawk paha luh leh mai a tum chu, "Tinge i haw dawn" ka tih leh avangin rum nghut paha min lo enin, "I duh chuan khapa bulah khan i awm reng tawh dawn nia" ti bul hmukin motorah chuan a lut zui nghal a








Chhan ngaihna pawh ka hrelo, chechang lova ka dinna ngaia ding reng chungin a tlan liam thleng chuan ka en zui ta reng a; ka thil tih dan kha a lutuk mah mah em maw ni le aw tihte chu ka ngaihtuah let a, mahse a lutuk vakna lah ka hre bawk si lo. Thu hrang tura ka tih avang khan a thin a rim tihna a maw ni le? Ka awm chu a nuam thei ta reng reng lo mai a, inthiam lohna in ka khat nghal vek bawk







"Tinge khatah i la din, lo lut vat rawh eitur saw i chang lo ang e" Tluangzeli'n a tih chuan ka la ding reng a ni tih k hrechhuak veleh chiah a, inthiam lo ru tak siin inchhungah chuan ka lut ve ta nghal a; Sam laka ka inthiam loh em avang chuan kan thil tih lai mood ah pawh ka cheng thei tawh loh a tih theih ber ang chu, ka ngawi chawi ta lutuk chuan ka thiante ngaih ka ti tha lo leh zawk a maw tih theih hial tur a ni








Ka thiante haw hnuah pawh ka nuam lo tihna chu a la awm reng a, biak em chu ka hreh ve tlat bawk si; mahse ka ngaihdan pawh kha dik ve tho in ka hria a, mahse Sam hi a zah ve theih ka ring lova. Ka rin loh dan ang takin amah zawk chu a zak daih a, Zama erawh a zahzum hmel viau lo thung, ka rin loh dan ang zela a awm thin avang hian ka ring sual fo dawn tih ka hrethiam nghal mai bawk








Ngaihdam dil ngei chu tha ka ti a mahse ka biak a ngaihdam ka dil chuan ka tih thinrim belh ka hlau bawk si, a mizia ka la hrechiang lutuk lo bawk nen chutah thinrim thut a ching bawk si a chu chuan min biak hreh tir ni berin ka hria; inhmuh leh hun kan la neih tho chu ka ring a, chumi huna ngaihdam dil atan chuan ka ti ta ringawt a a pawi em pawh ka ring bik lo








__________________________________________________








Emilia in bazar puia min sawm tlat avangin phur lo zetin ka chhuahpui ve a, ka school kalpui hlui a nih mai bakah naupan lai atanga ka thian a lo nih ve tawh avangin a mi sawmna chu tihpui tlinsak chu ka tih mak mawh ni ve bawkin ka hria; Zualtei ka biak hman loh avangin tlaiah ka tlawh kawi ang chu ka tih laiin khapa nen khan ka hmu dun a








A thianpa a ni tih hre mah ila, Zualtei bula a awm dan leh a en dan hi tu mipa pawhin a duh tihte chu an hriatthiam ve vek ka ring; chuvang tak reng chuan a bulah hian awm tam lo se ka ti a, min chhuh sak ang tih ka hlau hle bawk a nih kha, mahse Lalhluzuali ve hi chuan ka thusawi pakhat mah a awih duh loh chu thuhran min ngai sual ve bawk em a tin ni








Ka nelawm hran lo tih ka hria, tawngkam pawh ka hmang duh dah viau tih ka hria mahse atan hian ka theih tawp chu ka chhuah ve viauin ka hria; a ngaih em em a sual ka nih loh zia hi hria sela chuan min nel ve mai pawh ka ring, ka ngaih a that loh em avang leh amah hmuh ka chak em avangin amah hmu turin ka kal a







Ka call a chhan duh loh mai bakah ka message pawh a reply duh lova mahse a lo chhuah hma chu awm char char ka tum thung, a lo lan loh leh helai hmunah hian ka awm reng ang a nimai; darkar a liam hnuah pawh a lo la lang lova, an awmna lai bik chu a vawt em em a, kawrlum ka lo ha lo vei bawk nen khawvawt tawrh chu thil nuam tak a ni hran lo







A tawpa tawpah a rawn lang ve thei ta hram a, mahse a tih thin dan ang thoin a tum leh nghal bur tawh; haw turin leh amah hmu tawh lo tura min tih chuan ka theih loh tur zia ka hriat avangin ka insawifiahna ngaithla turin ka ti a, a duh chiah lo tih hre mah ila sawi chu ka bat ni a ka ngaih avangin ka tilui ve tlat thung







A hnuah chuan a duh ve mai a, mahse bul han tan dan tur leh sawi tan dan tur mai ka hriat loh avangin ka ngawi reng a; Emilia-i chu ka tan engmah a nih loh thu ka sawi chuan a awih loh hmel kher leh nghal, zawh ka tum hran lo mahse ka rilru a a lan thut avangin khapa nen a an chhuah chhan ka zawh chuan ka tum reng vang a nih thu a sawi daih a








Eng chu nge ka tum reng tih pawh ka hre lo, a thil sawi awmzia chu ka hre lo tak zet bawk; a tuka hna a kal dawn leh dawn loh thu ka zawh chuan ngeiawm fahran a a kal dawn loh tur thu leh sunday a nih avanga an chawlh thu a sawi chuan chimawm ka ti tak zet. Mahse amah ti duhawmtu ber a ni thung, a tukah chuan len ka tum a mahse ka hrilh lawk lem lo







Amaha awm tir ka tum tawh lova, khapa khan a lo zar buai ve sek bawk nen Zualtei lah chuan a ngainat hmel fu leh nghal a chuvang chuan ka hnaiha awmtir chu ka tum tawh bur a ni; khapa kha ka thik lo ka tih chuan dawt sawi ka ni ngei ang, a nihna takah chuan ka thik tak zet, a chhan pawh keimah ai Zualtei hian khapa kha a ngainat zawk tlat vang a ni








Chawhnu inkhawm ban awm hun velah chuan an in a len tumin ka insiam a, ka hmanhmawh hran lem lo bawk; amah hmuh hlan erawh ka nghakhlel viau tawh a, an in lam pana ka tlan lai pawhin phur tawh tak chu ka ni mahse an inkawta ka mi hmuh vang erawh chuan ka thinrim leh nghal hlur tawh a







A ni leh zel helai hmunah hian engnge maw tih a tum teh chai ni, amah hmu lo hian ni hi ka hmang thei thlawt dawn lo a nih hmel; Zualtei hmuh tum apiangin hepa lah hi a lo awm ve hman ziah a, ka kham tawh tak zet. An in lam pana ka kal lai chu ngawi rengin min lo en a, kei erawhin ka hrelo der thung







Inchhung kan luh hnuah Zualtei bula ka thu dawn tih a hriat vangin thutna chu min chuh a, ka kian duh bik thak lo; engti kawng zawng mahin Zualtei bula awm tir ka tum tawh lo hrim hrim mahse Zualtei zawk chuan thu sawn turin min ti a, ka zak hran lo mah se ka chunga chutianga a tih zawk avang chuan ka thin a rim hle thung







A thilsawi laia ka hmuh tur khera a chet te, Zualtei a kuah kher zelte chuan insum theihna min thiah sak thelh thin a; ka thinrim insum zo lo hian ka khawih duh mai ang tih pawh ka hlau viau bawk, mi ina buaina siam duh tur khawpin ka mawl bik lova chuvang a la insum hram hram zawk chu ka ni







Zualtei lah chuan engtin mah a ti ngai bawk si lova, ka mit chu an tikham ru viau tawh a; ka chet chhuah thut loh nan ka inhumruh nasa hle thung a mahse ka dawhtheih tawh thlawt loh avangin haw san chu thain ka hre ta zawk a, a pa chungah thilsual lian tak ka lo ti tawh a tunah leh zel an inah buaina ka siam leh a nih chuan hmuh pawh ka ngam tawh lovang







Chuvang chuan keimah zawk chu inthiar fihlimtua tan hmasak zawk chu a fin thlaka ka hriat avangin ka thutna atang chuan ka thochhuak a, kal mai ka tum chuan a chhan min lo zawt a; ka haw tur thu hrilhin min chhanna pawh nghak zo lovin an in atang chuan ka chhuak ta nghal a, min lo zui a ni tih reng ka hre lo






Motor a ka lut tur chiah min lo biak leh chuan min lo zui a ni tih ka hre ve chiah, ka haw na tur chhan min zawt leh a mahse ka chhang lo; hmeichhe ngeng tak leh luhlul tak a nih avangin a chhan min zawt nawn leh kher a chutah zet zawng insum zo lovin khapa nen a awm dun tur a ka tih hnuah motor ah chuan lutin ka tlanchhuak ta nghal a






Kei hian ka huang lo tur ka lo nawr reng zawk a maw ni tih te chu ka ngaihtuah a, Zualtei hi ka phu loh zia ka hria mahse chuti chung chuan ka duh em avang leh ka hmangaih em avangin ka thlah phal chuang bawk si lo; hlat ka tum apiangin midang ta tura ka chan hian ka phal lova, ka hnaih leh thin. Min ngainat loh zia ka hria mahse chuti chung chuan min ngainat ve theih nan ka theih tawp ka chhuah a







Keimah vekin ka tichhe leh thin si, ka thik thu chhiat lutuk chu thuhran ka huam hauh em vanga a laka ka chet dan thin avang ringawt pawh chuan min ngaina dawn lo tih chu chiang sa a nu a; min ngaihsak loh zia ka hre bawk. Mi duh loh chung induh luih tir chu mihring mihrinna atanga chhut pawhin a tlawm thlak ka ti ve thin mahse amah ka duhna hian chapo zo lovin min siam leh zawk si a








Tunah chuan a duh ang taka hun a hman theih nan thlah zalen ka tum tawh a, harsa dawn hle mah se keiman bul tan hmasak a ngai tih ka hria chuvang chuan hnaih loh hram hram chu ka tum ta zawk a; ka thei meuh angem tih chu ka hre lo mahse ka tih angai miau si a, venhima a hlimna siam kha ka duh ber thin chu a ni a







Ka bulah awm se ka duh bawk mahse ka bula a awm chuan a hlim loh zia ka hria a, engtik lai pawhin a thinrim hmel hmuh tur a awm zawk thin a nih kha; ka bula a awm loh a a hlim thei dawn a nih phawt chuan ka tan chuan chu tluka lawmawm chu a awm thei chuang lovang







Ka hmangaihte hlim lo lai hmuh reng chu tuman nuam an tih bik ka ring lo, khapa bula a hlim zawk a nih chuan harsa viau mah se ka thlah a ka pawm thiam a ngai zawk tih ka hria; mahse engtik niah emaw chuan hetianga ka tih chhan hi a la hriatthiam ve ngei ka ring, chutih hunah chuan ka bula awm a thlang a nih a min lo pawm ve ta a nih chuan engtik lai pawhin ka inpeih reng thung ang






__________________________________________________







Khami ni atang khan Sam chu hmuh tur a awm tawh ngai lova, biak ka tum lahin ka be tlang thei tawh lo bawk a; hrehawm ka tiin ka inthiam lohna chu a nasa tulh tulh a, hna ka ban te hian a lo awm tak mialin tih thuah Zama'n min thlah a tum pawhin ka hnial tang tang thin a







Kawng khawhar ka thlen chuan ka hawi kual nghal ruai thin a, khawilai emaw atanga a lo lan hlawl ka rin vang pawh a ni mai thei; mahse a hmel hmuh tur chu sawi loh a rehin a reh tlawk tlawk a tih theih ber ang chu. A awmna tur bera ka rinah a awm loh miau avangin a awmna tur awm ang lai rin zawn tur ka hrethiam lo hle a







Han zawn vak ngaihna ka hre lo bawk, Zama chu ka huat vang ni hauh lovin biak that chu har ka ti sawt hle a; min biak pawhin a rul tawk bakin ka chhang ngai meuh tawh lo, zinga hna kal tur a min lo hruai a tum pawhin ka duh tawh lova, chutiang bawkin tlaia min thlah a tum pawhin ka duh tawh chuang lo







Zama chunga hetianga ka awm ta mai hi keipawhin nuam ka ti bik lova, ka inthiam lo ve reng tho mahse Sam chuan ka rilru a luah hneh zawk em avanga be tha thei tawh lo pawh ka ni zawh mah ang; a laka ka inthiam lohna chu a nasa tulh tulh a a ni lah hmuh tur a awm ngai hauh lo thung, hrehawm ka ti a ka awmdan tak pawh chu ka sawifiah thiam lo bawk







Ka sawithiam dan berin Sam chu ka ngai a, hmuh ka chak ngawih ngawih ni berin ka hria; ka thiante pawh chuan ka awmdan danglam ta chu an hrethiam ve a ni ngei ang, a chhan min zawt thin a mahse sawi erawh ka sawi duh lo thung, sawia min puih theih dan kawng an hriata min puih tur thu an sawi pawh chuan ka sawi duh chuang lova







A ni pawhin a ngaihna an hre tawh lo a ni ngei ang min zawt nawn tawh bik chuang lova mahse min ngaihtuah zia erawh ka hre reng thung, thiante nanana hi chuan mi hi chu an hre ve thin khawp mai a; puih pawh inhuam viau mah se keimah zawkin ka duh miau loh avangin tihngaihna a awm miau lo a ni, engtikah emaw chuan ka hmuh leh ngei ka ring a, chutih hunah chuan ngaihdam ka dil ang a ka awm a nawm phah pawh chu ka ring







Sam chu ka duh tawh zia ka hria a, chuvang chuan hmuh vat pawh chu ka duh bawk; a laka ka inthiam loh zia te chu hrilh ka duh a, ka duhzia pawh chu hrilh ka duh bawk. Ka thei angem ka hre lo mahse hun remchang a awm chu ka ring a, chumi chu ka lo nghak tawh mai a niang chu, ka duh zia hrethiam hauh lovin a lakah ngeiawm takin ka lo che thin a chupawh chuan a lakah inthiam lohna tam tak min insiam tir bawk







[Ti zawng hi ni mai teh se aw, min lo chhiar sak leh theuh ula chuan ads click, like leh comment kha min lo tihsak leh hram dawn nia. Ka story te min lo chhiar sak thin avangin ka lawm thin lutuk bawk e]

[Ngaia]

CHAPTER-11






Nitin hna ka kal a, keimahin ka haw ziah tawh bawk a; ka thiante bulah awm ve reng mah ila ka rilru erawh hmundangah a awm daih thung. Engmah hi nuam ka ti tak tak thei tawh lo a tih theih ber ang chu, Sam chu a rehin a reh tlawk tlawk a biak ngaihna lah ka hre der bawk si lo






Tlaiah ka nu in ka haw paha elastic leh khawl la lei haw tura min tih avangin haw tlang lovin bazarah ka kal kawi a, ka dawr berna thin dawr neitu nu a dam loh avangin dawr chu an lo khar a; hmundangah ka lei ngai bawk si lo nen ka kal kual ve deuh chu a ngaih hmel khawp mai, thui pawh ka kal hmain dawr dang chu ka hmu ta vat a







Ka let leh hnuah kawng khawhar ka thlen hma chiahin Sam leh hmeichhe pakhat dawr atanga lo chhuak chu ka hmu a, a hmeichhe kalpui chu a hmaa ka hmuh tho kha a ni; mahse thinrim ai mahin Sam ka hmuh avang chuan ka lawm hle a, an awmna lamah chuan kal vatin Sam chu ka ko a mahse hmelhriat loh ang maiin min en thung







Ka nuih sang a, khawnge an kal tih te chu ka zawt a min hre lo angin lang mah se ka ngai pawimawh thei lo mahse min chhan tum lo tih hriat zetin a ngawi ngal a; a bula kal lah chuan mak tih hmel zetin min en tawn dun sek bawk, "Sam i hmelhriat a mi?" A ti a, Sam chuan chu a kalpui nu pawh chu chhan a tum chiah lo tih hriat takin a ngawi reng a







"Min lo hrethiam la, kan kal a ngai tawh a nakinah hman veleh kan la inbe tha leh dawn nia" chunu chuan min nuih sang pahin a ti a, Sam chu a kalpui nghal ta daih a; a ngaihna hre lo zetin an pahnih chuan ka en ta reng a, Sam khan min hre tawh lo nge min hre lo der zawk? Nge ni a a chunga ka thil tih avang khan a la thinrim zawk pawh ka hre tawh lo







Hrilhhai zet chuan ka haw a, kawng khawhar ka thlen chuan hun rei tak ka hmuh tawh loh addict ho pawh chu ka hmu leh tawh a; hlauh enah pawh ka en tawh lo, an mahni hnaih lo thei ang ber chuan ka kal ta tho a, "A ngaizawng peih ka ti reng a ni, hetiang mahni hmasial amah ngaizawngtu pawh hrethiam lo hian khatiang mi kha chu an phu ve lo reng a ni" an zinga tu emaw ber chuan a ti a






Mipa ve si tawng thei reuh lutuk, mipa mi rel zet zet reng hi chu an rilru pawh a that ka ring hauh lo; "A tan engmah a ni tawh chuang lova, tunah chuan kan ta a ni leh tawh" ka hnunga min lo zui ve zel pahin tu emaw ber chuan a ti leh a, an nuih zawm nghal zat bawk; tu chanchin nge an sawi pawh ka hriat loh ang bawkin an sawi awmzia pawh chu ka hrethiam chiah lo bawk








An tawng hnem ta lutuk chu ka ning deuh hlek tawh a, ka hriat tur kher a sawi an ni tih pawh thil chiang sa lutuk a ni; ni lo se zawng ka hnungah hian an kalin min zui reng hauh lovang. Ka ding thut a inherin an mahni lam chu ka hawi nghal vat a, "Khawngaihin min lo zui tawh su" vin chuang hauh lovin mahse ka tawngka chhuak erawh a chang fak thung a







"Kal reng ta che" pakhatin min lo tih chuan ka nuichhuak hak a, "Ka kal reng alawm, min lo zui tawh lo ula" ka ti leh a ka thusawi chu engah mah an ngai lo tih hriat zetin a hma ai chuan min rawn hnaih ta a maw tih mai turin an rawn awm hnai a, min khawih mai ang tih hlauin ka tawlh hnung nghal hrut bawk; "Hmeichhia te te si, khatianga min biak ngam le" tih pahin ka inrin hma hauhin ka tukhum samah min tham a







Ka na ti lutuk chu mitchhing nghal sawkin ka then nghal chat chat a, ka sam min tham sakna kut chu ka kut pakhata dawmin paihthlak sak ka tum a mahse a tang zual sauh a maw tih mai turin min thamna chu a ti nghet sawt a; ka mittui khap per fap fap pahin min thlah turin ka ti a, "Khapa vang mai mai a, hnaih ngai lo che kan ni tih hria ang che" a tih chuan tunge a sawi ka hre lo








"I sawi awmzia ka hre lo, khawngaihin min thlah tawh rawh" ka ti leh a nuih hawk pahin, "Hriat loh der vel kha a tul lovang" tih leh pahin min phih dak awrh a, ka te nghal that bawk. An eng pawi nge maw ka sawi a heti em em a ka chunga an nunrawn thinna chhan pawh hi ka hre lo; "Thlah nghal vat rawh u" rawn ti thattu lam chu kan hawi phei rual nghal vek a







Thinrim hmel em em a Sam lo ding ka hmuh chuan ka tah a chhuak tlat pek a, heng mite hmaa tap lo tura ka lo insum ve nasat teh reng nen Sam hmel ka hmuh rualin ka lo insum ve na zawng zawngte kha khawnge an awm tak ttih theih turin ka mit atang mittui a lo luang nghal ngiai ngiai a; "Thlah turin ka ti che u a ni lawm ni" a tih leh chuan ka sama tham tupa chuan na zetin ka sam atang chuan a kut chu a phih thla a







Ka sam eng emaw zah chu a pawtthla mai thei tih tur hial a ni, "A ni kha hnaih tawh lo turin ka ti che u a ni lawm ni" nichin ai kha chuan tlemin a aw chu zia tawh deuh mah se a thinrim zia a la hriat mai bakah a chang tha em em bawk, "Henu hi i tan engnge a pawimawh viauna" pakhatin a tih chuan Sam chu a rum nghut a, an mahni chu chhang lovin keimah zawk chu min en reng a







"Sam" mittui tling pam chunga melhin ka ti pah nghal tiau a, tinge tuna taka hetianga ka awm chhan hi ka hrethiam bik lo; amah ka hmuh hian ka rilru no a lo chhuak a, a lo lan hma zawnga tah chhuak eng ang pawh ni ila tah tum miah lo kha a lo lan veleh ka tap chak bawk a






"In tibuai nawn leh a nih chuan ka chhuah tawh hauh lovang che u" ka lam lo pan pahin ka bul a lo thlen chuan duat taka a lama min pawh hnaih pahin min kuah a, ka inhnit nghal hrawih bawk; mahni inkhawngaihna in ka khat a, an chunga thil ka tihsual tawh awm ka hre ngai lova, hna ka thawh atanga tun thleng hian min tibuai tu zawk an ni thin







Sam chuan a hma in engtin nge a lo tih ka hre lo, chutianga a sawi avang chuan an hlau ka ti dawn nge engmah sawi buai nei hauh lovin kan pahnih chuan min kalsan a; "I tha em? Na te i nei em?" A tih chuan chhang lovin a awm ka hmai la phum reng pah chuan ka theih tawka ringin ka tap ta vak a, "Akhai...naupang chhia pawh i nih tawh loh kha" tih pahin a nu erawh a nui hawk hawk a








Min nuihsawh vang ni lovin min tih nuih a tum vang tih hre tho mah ila ka insum thei lo chu a nih ber hi, "Kal ang le, ka lo thlah ang che" dam duam a ti lehin ka banah chuan a chelh a, a motor awmna lamah min phei pui nghal a; ka tawng tawh lova motor chhunga ka luh hnuah pawh ka la ngawi ta reng a, kan inkawt kan thlen chuan chhuak mai lova ka thut reng avang chuan ka bula mi chuan mak tih hmel zetin min en reng a







"Sawi duh i nei em?" A ti a, sawi duh chu ka nei tak meuh mai ni lo ka ngah lutuk zawk; mahse engmah ka sawi thei lo ka tawngchhuak a nih chuan ka tah leh mai ka hlauh avangin chhang lo chuan lu ka thin khum ta ringawt a, "I la pangngai chiah lo a nih hmel, tikhan i duh chen chen thu la i zia awm deuh hunah i haw chauh dawn nia" dam thluam a a tih leh chuan lu ka buk khum leh ta ringawt a







Eng emaw chen kan thut hnuah pawh ka la pangngai hlei thei meuh lova, nichin mai a ka thil tawn chu ka ngaihtuah chhuak leh thin a; ka ngaihtuah chhuah apiangin ka tah a chhuak a mahni inkhawngaihna lian takin ka khah phah thin bawk, "I zia awm deuh tawh em?" Ka lam lo hawi paha a tih chuan thawk lak hluai pahin lu ka thin khum a







"I lu hmang chauha min chhang lo khan eng emaw tak sawi ve la" a tih chuan amah chu ka en nghal vat a, ka ngaih rual rualin nichin a ka chunga a chet dan avang khan ka huain ka ngei thar leh bawk a; "Tinge nichin khan hmelhriat loh ang maia ka laka i awm?" Chu thil ka sawi zawng ringawt pawh chuan ka rilru hi a na thar leh niin ka hria







Min chhang lovin muk zetin min en reng a, khawdang mah hawi lovin amah chu ka en ve reng bawk; "Ngatan mah min ngai ve si lova" tih pahin a nui hawk a, a fiamthu tih hre mah ila a hmel erawh a thutak em em thung. "I hria mi" tih zawnga ka chhan chuan dar chhin uk pahin, "A hriat mai alawm" a ti veleh mai a, ngatan mah ti lo chu ni ila ka ngaiin ka hmu chak dawn a mi?







"Eng chu maw i hriat a" ka tih leh ha chuan, "Min be duh si lova" a tih chuan amah chu rum zetin ka melh nghek ringawt a, a ngaihdan atang chuan ka awmdan tur chu ka hriatthiam pui ve tho a; a lan danah chuan be duh lo kha ka ang ve dawn em a mahse engmah hi a nihna tak a hre si lova, ka duh zia te, ka ngaih thin zia te leh ka hmuh chak zia te pawh hi







"Engmah i hre lo tawp a nih chu" ka ti hmuk a, mit tih zim sun paha min en reng hnuah a nui ta hawk hawk a, "Hriat tur dang a la awm a mi, a awm chuan min hrilh ve la" a ti a, a la thutak lo lutukte chuan ka thin an tirim leh zawk dawnin ka hria, "Khanu kha tunge?" Ka tih chuan, "Hmmm..." A lo ti ha a, "Khanu kha tunge, nichina i chhuahpui kha" ka tih leh chuan eng emaw ngaihtuah hmel hi a pu a







"Emilia-i kha maw, ka thiannu a nih kha" sam zeta min chhan avang chuan ka duh khawp chhanna ka hmu zoin ka inhre leh chuang bawk si lo, "I tan engnge a nih?" Tiin ka zawt leh a, "Naupan lai atanga ka thian a nia, ka tan chuan a hlu lutuk" a ti leh mai a, mahse a tana hlu lutuk ti a min chhan avang chuan chunu chu ka thik nghal em em ringawt a







"I bialnu mi?" Ka ti leh zel a, "Ni lo" tih zawngin min chhang a, a chang hi chuan min chhang pangngai ve thin viau mah se a tam zawk erawh a tawi tha thei thin khawp mai, "A tha nih chu" ka tih chuan a bu nghut a, "A dang a la awm em?" A tih chuan lu thin khum nawk nawk pahin, "Awm tawh lo" ka tih chuan nichin a ka chhan dan ang chiahin, "A tha nih chu" tiin min chhang let veleh kher a







Chhunzawmna....












"A nih chuan ka haw thei a nih chu" ti ve hmakin motor atanga chhuah ka tum chuan min lo chelh vat a, "Tunah chuan ka tibuai tawh lo che ang a, i nun hlim takin i hmang tawh dawn nia" thu tak fe a a tih chuan amah chu ka en ha ringawt a, chutiang thu chu engvanga sawi ringawt nge a nih ka hrethiam lo








"Engnge i sawi awmzia?" A fiamthu lo tih hriat takin a hmel chu a thu tak em em a, muk zetin min en reng bawk chu chuan ka awm a tinuam lova; a thusawi kha tih tak tak a tum niin ka hre bawk, "I hmuh turin ka awm tawh lo ang a, ka lo be tawh lovang che. Ka awm ve chuan nun hlim takin i hmang thei lo tih ka hria, chuvang chuan hlim tura ka duh che avangin ka tibuai tawh lovang che" a thusawi hnem ber ni mah se a thilsawi ho erawh chuan min ti hrehawm thung a








"Aih min tibuai lo" ka aw te chu a rawn khur nghal dar darin ka hria a, keimahah chuan hlauhthawnna tam tak a awm nghal bawk; ka hlauhthawn chhan ka hre lova mahse chu chuan nasa takin min ti ipik mai bakah thawk te nen lam chuan a ti harsa ni berin ka hria, "Lut tawh rawh le, i chhungten an lo ngaihtuah tawh lutuk ang che" ka tukhum sam chu duat taka chul pahin min nuih pah suk bawk a








Chutianga a awm te chuan ka tah an tichhuak tlat a, dam deuha min biakte, duat tak leh dim taka hetianga a awm te hian ka rilru a tih no mai bakah ka thlakhlelhna chu a pun phah sawt zel hian ka hre thin; "Ka duh lo" ka tih tiau chuan a nui hawk a, "I kalna chin an hre dawn si lova, an ngaihtuah dawn che sin" min ngaihtuahpui ve hmel zeta a tih chuan tah khum hrep mai chu ka duh tawh a








"I kal bo dawn a maw" thudang daih sawi tawh mah se nichin maia a thilsawi khan ka rilru a la luah khat tlat a, rilru nuam tak pawhin ka awm thei lo; "Kal bo hlen dawn love, min mamawh hunah chuan ka awm ang" a ti a, ka tahte chu a chhuak tulh tulh a maw tih mai tur a ni, "Kal suh" ka tih chuan a nui hawk a mahse thu tak fe in min en thung








"Mahse ka bula i awm chuan i hlim si lova" a ti a, chutianga a tih avang chuan mahni inthiam lohna in ka khat nghal a, "Mahse kal turin ka phal lo che alawm" sawi tur dang ka hriat tawh loh em avang chuan ka ti a, "Chhan te a awm em?" Fiamthu ti tak deuh si a a tih chuan ka ngawi vang vang a, ka duh tih hi hrilh chu ka duh a mahse ka huaisenna hian a ngam rih bawk si lo








"Kal tawh rawh le" a tih chuan ka thinte a rim ur tawh a, tinge maw kal tur a min duh tak em em a chungah khan ka lo sual thin lutuk a, ka bula awm pawh a duh tawh lo a ni ngei ang; "Tinge kal tura min tih chhen, ka kal chu i duh viau a mi" ka ti , ka aw pawh a vin lek lek tawh a tih theih ber ang chu, "Chutiangin ka tih loh kha, i haw chuan i chhungten an ngaihtuah dawn che asin" pawh ti mah se ka rilru chu a kawi tawh tlat a ni







"A nih chuan ka kal ang, ka kalbo ang" ka ti nghal phiar phiar a, a thilsawi awmzia chu hre mah ila keimah zawk chu ka dik tawh lo a tih theih ber tawh ang chu; "Ka thilsawi hi lak kawih zel tum lo la, chutiang rilru pu a sawi pawh ka nih loh kha mawle" hahthlak tih hmel zet chuan thawk a la nghal hrawk bawk a, mahse ka dik tawh loh em avang chuan engkim chu ka la kawi vek tawh a ni








"Kal turin min duh a ni lawm ni, i duh ang ngei chuan ka kal dawn reng alawm" ka ti leh chuan ka dar tawn tawna vawn pahin min thing nawk nawk a, "Lalhluzual, engkim hi lak kawih tum suh. Hriatthiam tum ta che mawle" a tawp lam chu a zawi tawh lutuk a ni, min vawnna chu thlah lehin a sa chu tham khawmin chung lam hawi pah chuan thawk a la sek ringawt a







Ka mittui chu rawn luang nghal ngiai ngiaiin amah chu ka en reng thung a, "Khawngaihin min kal tir suh" ka ti chuai raih a, min chhang lova min en hek lo seat hnung chu nghen pahin dak vah pah chuan mit a chhing reng a; "Kal suh" ka ti leh chuan rawn thu tha in min en theih tur chuan a insiam rem nghal a, min rawn enin, "Kal ka duh lo, mahse kal turin min ti a ni" a ti a







Insum zo lek lovin ka tap chhuak nghal hawk a, tinge tun hnai te hian ka tahbelh tak em em a chhan pawh Sam vang vek hi a ni; "Ka duh che khawngaihin kal suh" a kalbo ka hlauh lutuk avang chuan ka ti ta thlawt a, a ni erawhin eng thawm mah a chhuah ve lo thung. Chutianga a awm avang chuan min hnawl niah ka ngai a, chu chuan min ti hnual viau bawk








"Han sawi nawn leh teh" a tih chuan amah chu ka en a, "Sawi leh teh nichin a i thusawi kha" a tih chuan ka sawi nawn leh a, nuih hawk hawk pahin min rawn kuah a, "Keipawhin ka duh che" a tih chuan ka nui ve ta ringawt a, ka hlauhthawn ve hman tawh tehreng nen ka hahdam nghal huaiin ka hria mahse tah erawh ka la tap chak tlat a ni








"I haw har lutuk chuan i chhungten an ngaihtuah tawh lutuk ang che tunah chuan haw phawt la" a tih chuan min kuahna atanga tal hrang vatin, "I chhungte ti reng suh, naupang pawh ka ni tawh lo" ka ti bak nghal hlar a, tupawh mai hian tinge naupang en a min la en reng ka hrethiam lo







"A nih chuan i duh chen chen i awm dawn nia" nuih suk paha a tih chuan ka ngei leh nghal vekin ka hria, a thusawi ang ngeiin chhuak lovin motorah chuan ka la thu ta reng a; kan inbe chuang lova chutianga ngawi renga kan thut avang pawh chu a ni mai thei, boruakte chu a rit leh hle tawhin ka hria a, a uap churh bawkin ka hria. A bula ka awm hian nuam ka tih rualin boruak rit tak hi a awm tel thin niin ka hria a








Mahse a nawm loh phah chuang lo, duat leh dim dawi taka min chei bawl te, min ngaihsakna a tih lante hian ka rilru a ti no bakah a laka panchan ka chak bawk; "Englo" kan ngawih rei tak em avang chuan ka ti a, ka tih rual chiahin amah pawhin a lo ti ve bawk. Kan thusawi inrual em avang chuan in enin kan nui dun ta ringawt a, keimah pawh chu ka lai lek lekin ka hria








Kan awmdan chu a naupang chhiat thlak ka ti hle a, nuih a tiza viau bawk; "Ih...ka haw tawh mai dawn asin" sawi tur dang a awm loh em avang chuan ka ti ta ringawt a, lu buk nghut pahin, "Awle, naktukah ka rawn lam dawn che nia" a tih chuan ka bu nghut a, thildang pawh sawi tawh lovin ka chhuak ta nghal a







In chhung ka thlen chuan ka rin loh lutukin ka chhungte chuan engmah an sawi lova, ka nu thil min chah ka pek laite chuan eng emaw a sawi ringin ka ngaichang reng a mahse engmah a sawi loh avang chuan, "Nu eng emaw sawi tur i nei em?" Ka ti ta ringawt a, ka nu chuan min rawn enin, "Neih pawh ka hre nang" a ti tha ve mai a, "Tinge sawi duh i nei a mi?" A tih chuan lu ka lo thin khum nghal vat a







__________________________________________________








Hun rei tak hnuah Zualtei ka hmuh chuan ka awmdan chu ka thup hman lo tep a ni, ka lam pana a rawn kal lai te chuan biak ka chak hle a; nidanga min hmuh ang loh takin kan bul a lo thlen chuan min nuih sang reng a mahse ka be leh a nih chuan ka hnaih leh dawn tih ka hriat avangin ka be ta lo kha a ni a







Mak a tih zia leh a hrilhhai zia ka hmuh khan hrehawm ka ti a, nuam lo ka ti viau bawk; ka inthiam theih ngang loh avangin Emilia-i chu hrilhin min lo va haw san tura ka tih hnuah Zualtei hmu tur chuan ka let nghal a, kawng khawhar ka thlen chuan addict hovin an lo tibuai tih ka hmuh chuan ka thin a sa nghal phat a







Thlah tura tiin hnaih leh tawh lo turin ka ti a, ka tan engnge a ni chu a pawimawhna ti a min zawh chuan chhan ngaia ka hriat loh avangin ka chhang ta lem lo mahse Zualtei chu hnaih tawh lo turin ka ti nawn leh a, min hnial buai lem lovin an ni pawh an kal ve ta nghal mai a







Hlat ka tum apiangin ka hnaih zual sauh a, biak loh ka tum apiangin biak chakna in ka khat thin; a tawp nan tiin an inthleng chuan ka thlah leh ta hram a, a tawpna tih fo hi a van ngai ngun dawn tak em! Motor atanga chhuak nghal mai lovin a la thut reng avang chuan mak ka ti ang reng viau a, ka en nghal ha bawk







Ka laka thikthu chhiat hmel zeta a awmte chuan ka lawm ru ver ver thei a mahse min duh lo a ni tih ka hriatchhuah leh avangin ka hnual leh nghal vek theiin ka hria, eng eng emaw kan sawi hnuah motor atanga a chhuak tur chu chelhin ka hmuh tawh ngai loh tur thu leh ka tihbuai tawh loh tur thu ka hrilh chuan a ngaihna a hriat loh hmel kher mai






A chhan min zawt a tha takin ka chhang bawk, eng emaw sawi chak nei niin ka hria a mahse a sawi chuang lo; haw tura ka tih tawh hnuah pawh a duh lo tlat a, kal lo tura min tih rualin amah leh amah chu a inti thinrim ni berin ka hria, ka thusawi apiang mai chu a la kawi zel a, a aw pawh a vin tha tawh tak zet bawk








A nu leh a pa ten an ngaihtuah zia ka hria a, a haw tlai lutuk a nih chuan a chhan an lo zawt ngei ang; keimah vanga an lo hauh phah a nih leh lek phei chuan ka inthiam thei dawn ngang a ka hriat loh avangin haw turin ka ti leh a, mahse engti kawng zawngin nge a lo lak pawh ka hre lo, a thin a rim tulh tulh a maw tih mai turin a awm a, a kal bo tur thu a sawi chuan chutiang lama ka sawi loh thu leh la kawi lo tura ka tih hnuah pawh ka thusawi chu a bengkhawn vak lo tih a hriat theih hle a







Chutianga eng emaw chen kan awm hnuah min duh thu a sawi chuan ka hresual ta a maw ka ti hial a ni, Zualtei bulah chuan sawi nawn leh turin ka ti a; ka hresual lo chiang a ni Zualtei'n min duh ve tih ka hriat tluk a ka hlim kha ka piantirh ata ka hre lo hial zawk ang chu mawle, ka beisei thin mahse ka beisei ngam ngai loh kha tunah chuan a takin ka tawng ta








A hnen atanga ka hriat ngai pawha ka rin loh ka hriat avang chuan ka hlim hle a, sawi tur mai pawh hre lovin ka ngawi reng a, a ni pawhin sawi tur a hre vak bik lo a ni ngei ang kan ngawi ta reng a; eng emaw chen kan ngawih hnuah a haw tur thu a sawi chuan a tuka ka hruai tur thu hrilh ve vatin kan inthlah ta a, inchhung a luh hnuah hotel lam panin ka in khalh chhuak ve ta nghal a





[Min lo chhiar sak thin a ka lawm lutuk a nia, min lo chhiar sak zel turin ka rawn sawm nawn leh che u a chuan ads click, like leh comment kha min lo tih sak leh hram bawk dawn nia]

[Ngaia]

CHAPTER-12





Sam nen pawh kan inkar a tha chho tan ve zel a, in a leng tura ka sawm apiang hian min hnial dawt lo mah se eng eng emaw chhuanlam a siam ziah thin erawh ka hrethiam lo thei hle thin a; a chhan ka zawh lahin a la hma rih thuin min chhang mai thin a, lungawi chiah lo thin mah ila inhauhpui nan a ka duh loh avangin ka pal zut leh mai thin







Zama chuan min rawn be ve reng thin mah se a nazawngin ka be tawh lova, bakah Sam hian a thik tlat avangin biak pawh a inthlahrunawm zawk khawp tih theih tur hi a ni thin a; mahse chuti chung chuan ka chungah a tha reng thin a, min be chhe ngai lova







"Naktuk chu lo kal ve la" motor ka thut luh hnuah a tlan chhuah hmain Sam chuan a ti a, "Khawiah maw" ka lo ti vat, "Kan thianpa piancham kan lawm dawn a" a tih chuan min sawmna chu pawm tur nge hnawl tur tih pawh ka hrethiam chiah lo, "A chi ka van ring lo" ka ti nang nang chu nuih hawk paha min enin a chhan min zawt a






"In thian zingah pawh ka tel ve si lova" inthlahrung lutuk a ka tih chuan, "Ka bula i awm chuan ka thiante chu i thiante an ni vek alawm" a ti ve mai a, mahse chuti chung pawh chuan ka kal theih tur thu in ka la chhang chuang lo; "Ka chhungte ka lo dil ve phawt ang" ka tih takah chuan a nui ta hawk hawk a, hriatthiam loh hmel zeta ka lo en ha lai chuan min en ve chiah bawk a







"Naupangte" ti supin ka chhip sam chu min tuai thur sak a, tuai zui nghal nauh nauh pahin rum zetin amag chu ka en a; "Naupang ka ni tawh lo" ka ti bak nghal hlar chu a lawm zawk a maw tih mai tur a ni. "Zanah min lo hrilh leh la" a tih chuan lu ka buk khum ta nghat a, thildang sawi tawh lovin a tlanchhuak nghal a; kawnga a tlan laite chuan a kut pakhatin ka kut chu a chelh pah reng a







Ngaihzawng la nei ngai lo tih takah kan awmdan chu ka tan chuan thil thar vek a ni a, hetianga inngaizawngte an awm thin a nih chuan thil nuam lo zawk zawk chu a lo ni bik dawn lo a ni tih ka hria a; "Tinge i nuih vur vur a" a tih chuan ka ngaihtuahna atangin ka harhchhuak chiang hle a, ka lo nui tih pawh ka hre lo hrim hrim, "Engmah a ni lo" ka tih chuan mit tih zum sun paha min rawn en zawkin kawng lam chu a en leh nghal a







"Min hrilh ve la" nuih suk pah a a tih chuan ka thil ngaihtuah ho lutuk chu hrilh chi a ni pawhin ka hre lo, "Thil ho te maw le" ti a ka chhan ringawt avang chuan a lungawi hmel chiah lo na chu engmah a sawi chuang lova; kan in kawt kan thlen chuan chhuk mai ka tum chu, "Zanah chuan min rawn hrilh theihnghilh lo la" a ti leh a







Ka hrilh tur thu sawiin ka chhuk nghal vat a, inchhung ka luh rualin a tlanchhuak thawm ka hre zui nghal zat bawk; "Tunlai chu i hlim thei riau mai" ka inthlak zawhah ka nu pui tura ka kal chu a bul ka thlen rualin a lo ti nghal var a, nuih ver ver pahin, "Ka hlim sa reng alawm" ti a ka chhan chuan a awih hmel teh chiam lo khawp mai






"Nu a û hian bialpa a nei a nia aw, an lo thlah ziah a nia" Tetei'n a tih chuan ka mit mei nghal vat a mahse min en tha duh der lo leh nghal, ka nu chu a tawng miah loh avangin min hauh chu ka ring nghal a mahse min hau lo chu mak ka ti zawk, "Nei ang hmaing nula a ni ve tawh alawm" a tih chuan inti thei zeta ka nau chu enin ngeiawm fahranin mit ko ka san khum nghal ak a








Ka nau kal hnuah ka nu chuan, "I lo nei tak tak em ni?" Hriatchian chak hmel zeta a tih chuan tawngka a chhan ka hreh deuh tlat avangin lu ka buk khum nghat a, "Eng ang mi nge ni a, a fel em" a tih chuan a fel thuin ka lo chhang nghal vat a, "A fel chuan a tha a nih chu, tunlaiah mipate hi an sual tawh a; inngaizawng pawh ni ula fimkhur tluk hi a awm lo a nia" tiin ka hriat tur ni a a hriat thu tha ho chu min hrilh nghal luam bawk a







"Ka hria lawm, min ring rawh u" ka tih chuan lu buk nghat nghat pahin, "Kan ring che alawm, min tih beidawn ka ring ngai lo" nidang lo ang takin ka nu chu a thu tak tlat a hriatna ka nei a, ka ngaihzawng neih vang pawh hi a ni mai thei; "Taka nu naktukah birthday lawm naa kal ka tum a rem in ti angem?" Ka hriatchhuah thut avangin ka zawt a







"Keima lam atang chuan rem lohna a awm lo mahse i pa kha han dil veleh reng reng la" a tih chuan nakina ka biak tur thuin ka chhang a, ka nu in rem a ti a nih chuan ka pa chuan rem a ti nghal dawn tih ka hriat sa vang pawh a ni mah na; zanriah eikhamah chuan ka pa chu ka dil ve reng reng a, a lo phal ngei a, "Naupang in ni tawh lova, in duh chu in ti thei alawm mahse a hun leh a hmun hriat hi a tha a nia" a ti bawk a








Mu tura room a ka luh phei hnuah Sam chu bia in ka hman theih tur thu chu ka hrilh a, thildang kan sawi leh teuh hnuah kan inbiakna chu ti tawpin ka mu nghal a; ka chhing diar diar tawh tihah ka phone a lo rik leh avang chuan ka la a, "Ka ngai che a" call ka lak rual chuan a rawn ti nghal zat a, kei ka lo nui thung. "A la rei loh em kha" ka tih chuan, "Naktuk thleng tawh se" a ti leh daih ang lawi a







"Timaw?" Nuih sak paha ka tih chuan, "Ka hmu leh thei dawn che a" a ti leh a, eng eng emaw kan sawi leh teuh hnuah kan inbiakna chu kan ti tawp ve thei ta hram a; ralkhat atanga ka lo hriat dan kha chuan misual tak a nih ka lo ring thin mahse tunah chuan khang ka ngaihdan te kha a inthlak hlawk tawh a tih theih ber ang chu







Sam hi ka nuna ka mipa lak luh hmasak ber leh nun thar min kai puitu a ni a, kan tawn chin a piangah hian hlimna min thlen reng thin; inngaihzawnna lam pang engmah hriat ka la neih loh avangin engkim hi ka tan chuan thil thar vek a ni a, a chang chuan dawnsawn dan tur pawh ka thiam lo lek lek thin a tih theih ber ang chu







A bula ka awm hian ka hlim a, ka hahdam a, ka thla a muang viau thin bawk; hetianga kan inhnaih hnu hian a ruih ngai awm ka hre lova, a hmelah pawh a lang ngai chuang hek lo. Ka bula a awm vang hian a rui lo zawk pawh a ni mai thei, a chang hi chuan ngui hmel a pu thin a; khawharna tam tak nen ka hmu tel thin, a chhan zawh ka duh a mahse zawh chi a ni angem tih erawh ka hrethiam chiah lo







Hna kal tura ka insiam laiin ka phone chu a ri a, ka lak rualin kan inkawta a awm tawh thu min lo hrilh nghal zat bawk; ka inpeih tep thu hrilhin kan inbiakna chu ka ti tawp a, ka hmanhmawh ang reng viau mai. Vawiin chu nidang zawng aiin a rawn hma leh nghal a, ka duh ang pawhin ka insiam thei dawn lo a nih hmel viau mai







In atanga ka chhuah hnuah a awmna lam pan chuan ka kal nghal a, min lo nghah thinna ngaiah bawk chuan a lo awm leh vang tawh; "Vawiin chu i va rawn hma ve" zangkhai vaha ka tih chuan, "Ka hmu chak tawh che a" nuih suk pahin a ti a, "Hmmm..." Ti chungin ka lo nuih let ve seih bawk, motor a kan chuan luh hnuah zanin kan awmdan tur chu ka zawt a








"Tlaiah tih tur dang i nei em?" Ti a min zawh chuan ka neih loh tur thuin ka chhang vat a, "Min lo nghak la" a tih chuan, "Engnge kan tih dawn" ka lo ti let ve vat a, khawiah emaw kalpui turin min sawm a; kan kalna hmun tur ka zawh lah chuan a sawi tha duh der lo leh nghal. Office kawt kan thlen chuan tlaiah chuan ka hman tur thuin ka chhang a, "Kan rei dawn lo nia" a tih avang chuan kan rei ka ring bik chiah lo







Ka tih tur ang ang te ka tih zawhah ka thiante awmna lamah chuan ka phei nghal vat a, "Tunlai chu chhelo pa nen khan in inhnim hnai riauin ka hria" Tluangzeli'n a tih chuan ka nui ringawt a, "In la tha zel em?" Ahmingi'n a tih chuan lu buk nghat pahin, "Kan la tha ve zel chu a nih hi" tiin ka chhang a








"Engnge zep ruk inneih, min hrilh nghal rawh u" lungawi loh hmel zetin Tluangzeli chuan a ti a, nuih hak hak paha ka hrilh chuan phawk fein min en a; "A ni maw? Engtikin? A rei tawh em?" A ti nghal zung zung a, ka rindan ang ngeiin zawhna a ngah reng bawk a; "Hrilh che chu ka tum reng alawm mahse kan la rei lo em a, thil danglam a thlen ka rin vangin ka sawi lawk duh lo a nih kha" ka tih chuan a bu ve nghat a







"Ahming i hriatna a rei tawh em?" Ahmingi lam hawi chuan a zawt nghal a, lu thin pahin, "La rei bik nang, nizan khan min hrilh ve chiah alawm" a tih chuan hmui ti pawrh tarha min rawn en pahin, "Min hrilh rual ve awm che, a hnuhnung zawkah hian ka tang bik ziah a" a ti nang nang a, ka inthiam lo ru ang reng viau mai







"Biak theih i ni thin lova" mahni inthiam chawp tak si a ka tih chuan, "Ka buai zia te chu i hriat ve vek kha" a ti a, thupha te ka chawi leh luam hnuah, "Ka ngaidam mai ang che" nuih vur vur pahin a ti leh ang lawi a, a thinrim rei ngai lo tih ka hriat avangin tlem chuan ka awm a nuam leh ta deuh a; hrilh tum lo pawh ka ni bik chiah lova a buai thin em vang zawk hian tihbuai ka inthlahrun zawk vanga hrilh lo pawh ka ni ve pakhat a







Tlai ban a hun chuan hmanhmawh zetin ka tih tur ho chu ka ti nghal zung zung a, nghaktu nei ka ni tih ka inhriat avangin ka hmanhmawh viau a, a chhan pawh innghah rei tir ka duh thin loh vang a ni; ka zawh hnua ka chhuah chuan ka thiante pawh an lo inkhar fel ve chiah bawk a, "Vawiin chu ka hmanhmawh deuh a, ka kal nghal mai dawn asin" A piah lawkah Sam a din reng tawh avangin ka thiante bulah chuan ka ti a







An lo hmu ve chek a niang chu, "Hmang nuam lutuk lo ula aw" Tluangzeli chuan a ti hman hram a, nuih sak pahin lu ka buk khum nghat a; an bulah pawh awm rei lovin Sam awmna lam chu ka pan phei ta vat a, "Min lo nghak rei tawh em?" a bul ka thlen rual chuan ka ti a, lu thin nawk pahin, "Ka thleng ve deuh chiah" ti supin min nuih nghal suk bawk







"Lut la" a tih avang chuan thildang pawh sawi zawm lovin motorah chuan ka lut nghal a, reiloteah a ni pawh a rawn lut ve nghal zat bawk, "Khawnge kan kal dawn?" ka tih chuan min rawn en zawkin, "I hre mai ang" a ti leh sup a, a hmelah leh a aw ah chuan a phur hmel tak zet a; chu chuan keimah pawh chu engtin emaw riau hian min ti phur tel ve bawk







Motor chu tinungin a tlanchhuak zui nghal a, vawiin chu a mood a fuh ve hle a ni ang vawiina a hun hman dan thenkhat te chu min hrilh ve luam a; keipawhin ka hrilh ve bawk, "Khawiah nge kan kal dawn, kan thleng har tawh e" ka tih chuan a nui suk a, "Kan thleng tep" ti lehin a ka chu a chip hmuk a, a thin a rim a maw ka ti hman hial a ni







Chhunzawmna....












Thui vak lo kan tlan leh hnuah dawr pakhat kawtah chuan kan ding a, "Chhuk la" min rawn en pahin a ti sup a, keipawh motor atang chuan ka chhuk thla ve nghal vat a; a ni pawh rawn chhuk ve vatin ka dinna bul a lo thlen chuan ka kuta chelhin dawr chhungah chuan min luh pui a, a chhung kan luh rualin mi a ang mai chuan hawi kual nghal ruai in ka en kual deuh chhen bawk a








Dawr changkang takah ka la kal ngai loh avangin kan dawr luhna pawh chu a changkang ka ti hle a, "Engnge kan tih dawn?" A beng bul hnai setah chuan ka ti a, "Zaninah i hak tur kan en dawn" a tih chuan tul ka ti chiah lo kher mai, hak tur awm mawi tawk te chu ka nei ve reng a; chutianga zan khat atan chauh leh nghal kawr thar lei chu ka ui ru viau a, kawr ai chuan a pawisa in min pe zawk se ka lawm zawk ang








"A ngai kher a mi" ka tih chuan a bu nghut a, "Hmeichhia ka chhuahpuina hmasa ber tur i nia, i nalh hle ringawt tur hi a ni" in ring tawk zeta a tih chuan ka nuih ta ringawt a, dawr a thawk hmeichhe hmeltha leh chhelo zet chu kan lam panin a lo kal a; kan mamawh vel min zawt a Sam chuan kawr kan en duh thu leh keimah min rawn en zeuh pah chuan ka hak theih tur ang chu zawnpui turin a ti nghal zat bawk







Chunu chu ka bulah lo kalin kawr chu min enpui nghal a, a mawiin a nalh hlawm tak zet. Sam chuan ka duh ber thlang turin min ti a, kawr chu ka ha den den bawk; ka hak hma chuan a man zat an tar chu ka en pah zel a, hak chhin ringawt pawh inthlahrun thlak khawp a to an ni. Chu chu a lo hrethiam a ni chek aniang chu ka piaha mi chuan a man zat en tawh lo turin min ti a, ka then khum tha ringawt thung








Inhmeh ka tih ve apiang chu duh aia a chhin loh leh a bul mah mah thin a, a pangngai ve te lah ka duh aiin an fual leh zel bawk nen thlan thiam har ka tih mai bakah eng ber chu nge ka tih dawn pawh ka hrethiam lo; "Thlan ber tur pawh ka hre lo" a lam hawi paha ka tih chuan a nui hawk hawk a, "Engpawh kha thlang la i inhmeh vek" a tih chuan hawi let leh nghalin nichin a ka mit la ve deuhtu chu ka ban nghal chat a








Ka en thin a chhin bakah a bul reuh bawk si a, mahse chumi chauh chuan ka mit a la bawk si chu ka lak leh lak loh tur ringawtah chuan ka rilru a inkhap buai a; thildangah ka lung an dum zan loh avangin ka mit la ber tu chu ka la ta nge nge a, "Mahse a chhing lutuk a" ka tih nang nang laiin, "Eng emaw pek tur dang che ka la nei alawm" min nuih sak pahin a ti a







Dawr atanga kan chhuah hnuah, "Zanin chu inpeih hma teh chiam pawh a ngai lovang, mahse ka rawn lam har lovang che" a tih chuan lu ka buk khum nghat a, kan in lam pana kan tlan hnuah chuan kan tawng tlem dun tawh ang reng viau a bakah sawi tur em em pawh a awm lo ve bawk em a tin ni; in kawt kan thlen chuan ka chhuk hmain, "Seat hnunga bawm pahnih kha lo la lawk teh" a tih avangin hnung lam chu ka hawi phei vat a







Bawm pahnih nalh tak mai chu ka la chhuak a, "Kha pawh kha i ta tur a nih kha" a tih chuan phawk zetin ka en ha ringawt a, "Ka ta tur maw" rinhlelh hmel lutuk a ka tih chuan nuih suk pahin a bu nghut a, "Tunah lo, ina i luh hunah i hawng dawn nia" a tih chuan bawm chhungah chuan eng tak chu awm ang maw, ka hmu chak tawh viau leh nghal








In ka thlen hnu chauha hawng tura min tih avangin hawng chak tak chung si chuan ka pawm ta reng a, "Kal tawh rawh le" tih pahin ka bek tawn tawna dawmin min kuai kun pah nghalin ka chalah chuan a fawp zui nghal zat a, min thlah leh hnuah min ka nuih seih a; "Engtikah nge i lo kal ang" ka tih chuan ngaihtuah vung vung nei hmel a pu a







"A hun tak ka sawi thei lo na chu lo inpeih hma tho la tiraw" a tih chuan ka bu nghat a, "A nih chuan ka lut dawn aw" ka tih chuan lut turin min lo ti ve vat a, in chhung ka luh hma in ka hawi let leh hram a; a kut chung lama pharin a vai pah zeuh a, keipawhin a tih ang chiah chuan ka ti ve bawk. In chhung ka luh hnuah ka in pawm bawr em avangin ka nu chuan eng thil nge ka pawm chu min lo zawt nghal vat a







Thil pek a nih thu sawiin ka nui nghal var var chu ka nu chuan mit tih zim san paha min enin, "Nuam hi i ti viau mai a" a nui pah nghal hak hak a, engmah an hre ve lo tih hre reng mah ila keimah zawk chu ka lo lai chhe hle ringawt a; hetiang nen a ka la chhuah ngai loh avangin zanin kan kalna tur pawh chu ka phur viau tawh leh nghal








Room ah lut tlangin ka inthlak hma chuan Sam-a bawm min pek chu ka hawng nghal mawlh mawlh a, ka rin loh piah lam daih thil a ni! Pheikhawk mawi tak mai bakah clutch simple em em te fel at bawk si, leh coat chu a lo awm a. Hetiang ang thil pek hi ka la dawn ngai loh avangin han lawm dan tur vak pawh ka thiam lo, phulo ka inti a, hak pawh ka ngam dawn zawk a maw ni







Ka phone chu la chhuakin Sam chu ka call ta nghal vat a, a lak rualin, "I rawn ti teuh duh a, ka van inthlahrung" ka ti nghal tawng a, "I duh zawng a ni em?" Nuih hawk pahin a lo ti ve zui nghal zat a, "Aw...ti lutuk mahse i inseng hnem dawn lutuk a ka inthlahrung zawk" ka ti leh nang nang a, a ni chiah reng bawk a en ringawt pawh hian a to tur zia ka hria; tlaia ka kawr hak tur min enpui ringawt pawh khan an to hlawm zia chu ka hre ve vek tawh a







"Zanin chu i nalh ber dawn a nih hmel" a aw chu a zangkhai vah reng a, a phur tawh hmel em em bawk; "Kan haw tlai angem?" Tiin ka zawt ta daih a, a ngawih vang vang avang chuan ka inthiam lo leh deuh a; kan chhuak dun ngai lem lova zinga ka hna kal tur min rawn hruai leh tlaia min thlah tih loh hi chu kan awm dun vak ngai lova, chuvang chuan zanin pawh hun hman dun a duh ka ring leh ta deuh a








"Rei lo turah ngai ang" eng emaw chen a ngawih hnua a tih chuan ka thaw huai theiin ka hria, "Ka lo inpeih vat dawn nia" ka tih tin leh zet hnuah kan inbiakna chu ka ti tawp a, ka phur tawh vang nge maw ni zanriah ei turin ka chhungte chu ka tur sek a; ka helhhawlh ni ta berin ka hria. Ka tum ang em chuan ei hma lo mah ila, Sam khan a hman hma loh tur thu a sawi lawk tawh avangin eng emaw chen chu insiamna hun ka la nei tih ka hria a, a zia phian








Dar riat(8) a ri hnai ruak tawh tihah pawh a la rawn lan mai loh avangin ka rilru chu a hah ru tawh khawp mai a, a ni hian min hrilh miah lovin a lo thulh fel hman der tawhah te pawh ka ngai hman hial a ni; ka chhungte pawhin ka kal tawh dawn lo maw an ti a ni ngei ang ka nu chuan, "I incheina a rei tawh sia, kha i kal leh dawn nange" a tih chuan hmai a uang vak tawh lo kher mai







Za lo zeta nuih sak pahin, "Kal dawn e mahse kan hmanhmawh vak lova" te chu ka ti ve tak na a kan kal chu ka ring chiah tawh lo a ni, "In kal tlai lutuk chuan in rawn haw har ange aw, tunah pawh dar riat a ri tawh a nia" sana en pah chuan a ti a, "Engmah thil danglam thleng tur a awm chuang hleinem nu, min ring tawp rawh u" ka tih chuan a bu nghat a







"Engpawh nise i thianpa pawh chu a va rei ve" a tih lai mekin kan kawngkhar chu tu emaw chuan a rawn kik ri dat dat a, ka nu in lut tura a sawm chuan Sam chu a rawn lut a; ka hmuh rual chuan ka lo melh rum nghal nghek ringawt a, "Mate hei i thianpa pawh a lo kal tawh hi kal ula, nuam takin hun in va hmang dawn nia" min nuih sang pah chuan a ti a








Kei erawh zantir lama ka phur ang ai kha chuan ka phur teh chiam tawh lova, kal loh aia kal tak meuh meuh ka ni tawh ni berin ka hria; "I awm a nuam lo a mi" motor a kan thut luh tawh hnuah chuan a ti a, chhang lovin lu ka thin khum bawk a, "Lungawi lohna i nei a mi" a tih leh chuan amah chu ka en nghal hrawk a, "I rei lutuk a kan kal tawh dawn loa maw ka ti hman alawm" ka ti nghal tan tan a








Nuih hawk hawk pahin, "Hma deuha kan kal chuan nuam lo i tih hma ka hlau a" a ti a, kei erawh chuan hmui ka lo tih pawrh khum tarh thung. Ka chak tawh bakah party tihna velah ka kal ngai lova, birthday lawm phei chu ka ti ngai hek lo chuvang chuan ka phur a ka helhhawlh viau reng a nih kha; nuam lo tih te chu khawi lam nuam ka ti lutuk zawkin a nia ka rin ni








"I mawi lutuk" tlanchhuak ta mai lo chuan a ti leh a, ka lu chhip atanga ka ke ler thleng chuan min en leh diat diat a; ka lai leh nghal em em ringawt tawh. A hranpa takin Sam nen la chhuak dun lo mah ila kan chhuah dunna hmasa ber tur a nih avangin ka in chei uluk ve viau reng bawk a







"A nih chuan kal ang aw" tih leh pahin motor chu a tinung nghal vut vut a, kan tlanchhuak nghal zat bawk. Kawnga kan tlan lai te chuan a tih thin dan ang bawkin a kut pakhat zawk chuan ka kut chu a hum leh ran tawh a, kut khing khat chauha motor khalhte chu zei tak a ni; a buai hauh lo leh nghal a, "A hmun kan thlen hunah hmel hriat ka neih ve dawn loh avangin ka bulah awm reng rawh aw" phur viau e ti lo chuan hmel hriat ka nei dawn lo tih ka hriatchhuah leh avangin a bulah chuan ka ti a








"Ka awm renh dawn alawm" a ti sup a, chu chuan ka thla chu a tih muan phah ve em em ringawt a, "Khawi hmunah nge birthday chu an lawm dawn a" tiin ka zawt leh nghal zat a, a chhan pawh kan tlan thui tawh mai bakah kan tlanna lamah chuan in hmuh tur a van tawh em vang a ni ve pakhat







"Ka thianpa te huanah a nia, a nuam viau ang" min rawn en zawk pahin a nui zui suk a, ka chhang tawh lem lo; eng emaw chen kan tlan leh hnuah kawng peng lo awmah chuan tlan pheiin thui lo te kan kal leh hnuah motor chu a ti ding zui zat a, a ngaihna hriat loh hmel fe a ka lo en laiin, "Kan thleng ta e" a tih chuan ka hawi chhuak nghal vat a








Kan kalna hmun chu huan pawh a ang ka ti chiah lo, a hmun chu a faiin a thianghlim sar a; kalna tur bik chu lungphah mawi zet an phah bakah a sirah chuan pangpar mawi zet an par vul chuk bawk, "Kan kal dawn a mi" a tih leh chuan Sam chu en vatin ka nuih seih a, motor atanga kan chhuk hnuah chumi lam pan chuan kan inzui phei nghal a, kan kal laite chuan amah zawk chuan ka kal hran lo ni awm fahranin ka kutah chuan nghet takin a chelh tlat reng bawk a







[Zanin atan chuan ti zawng hi ni leh rih phawt se, naktuk zanah chapter thar nen kan inhmu leh dawn nia. Ka story te min lo chhiar sak thin a ka lawm lutuk, min lo chhiar sak leh zel ula chuan ads click, like leh comment kha min lo tih sak leh theuh dawn nia]