MI AMOUR BY SumMer Ralte (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

MI AMOUR BY SumMer Ralte (Completed)

Unread post by Ngaia » January 16th, 2022, 1:13 pm

b2uq7ee9.jpg
b2uq7ee9.jpg (14.17 KiB) Viewed 13109 times


CHAPTER-1






"Kan rual chuan i lo haw duh lo tak tak maw?" Ka bula kalin min zawh chuan lu ka buk khum nghat a, "Aw kan haw na tur kawng a in ang si lova" inthlahrung deuha nuih pah chuan ka lo ti let nghal vat a, "Kan thlah thei reng che alawm"a tih pawh chuan ka duh lo, " In haw na tur kawng a thui mai mai, min ngaihtuah suh u" nuih tlawn paha ka tih leh chuan hahthlak min tih hmel zetin a thawchhuak nghal hak a







"A nih chuan naktukah kan inhmu dawn nia" a tih leh takah chuan uar fe in lu ka lo buk khum leh a, an tlan liam chiah chu thawk ka la hak a; ka haw na tur kawng hi mahni chauh chuan kal ka hreh tak zet mahse ka haw hreh vang ringawt khan ka thiante ka pun thei chuang bawk si lova, a chhan pawh kei aia veng hla daiha an awm hlawm vang a ni







Phur lo zet chuan kan in lam panin ka kal ta hnak hnak a, kan veng thlen hma hian kawng reh leh thim ruih kal tlang a ngai ziah a; chulai hmunah chuan misual tam tak leh addict hovin awm hmun khuar nan tak an hmang leh nghal a, ka huphurh mai bakah chulai hmun kal pel chu ka peih lo tak zet mahse haw ka duh chuan kal tlang tho chu a ngai si a







Scooty te chu nei ve bawk mah ila, learner emaw licence emaw pawh ka neih loh avangin traffic awmnaah hi chuan ka pa in khalh chhuah min la phalsak lova; bakah ka khalh thiam lo hrim hrim bawk. Tuna ka inhlawhna chawlhsan ngawt ka ui ve tho bawk sia, hlawh a that mai bakah min duhsak bawk a







Chu lai hmun reh lutuk ka thlen dawn chuan ding deuh datin thawk ka la ham ham a, ka hma zawn street light eng dim ruih leh thim lutuk chu ka en a; hmeichhia mahni chauha kal nan chuan a hlauhawm ve bawk em a tin ni, muangban chap chuan ka hma zawna kawng thim ruih chu ka pan phei a, ka kal pahin ka sir tawn tawn chu tu emaw an awm ang tih hlau takin ka mitsir pah zeuh zeuh bawk






Eng emaw ri rak a awm chuan ding chawtin thin phu dep depin ka hawi kual leh hruk hruk thin a, kal chak emaw tlan emaw duh viau mah ila ka tha khur nasa thei thin lutuk avang chuan ka kal tha hleithei lo a tih theih ber ang chu; chulai hmun ka kal pel tep tihah chuan nidanga an la awm ngai reng reng lohna hmunah chuan addict ho chu an lo awm reng hi a lo a ni a







Thlamuang taka ka kal ve hman tawh tehreng nen ka hmu thut chu ka phu nasa kher mai, an mahni hnaih lo zawng thei ang ber leh hmu lo der hram hram chung chuan ka kal phei ve ta zel a; ka kal pel fel tep tihah chuan tu emaw hian ka bag ah laiah chuan lo man betin an lamah chuan min hnuk phei dawr a, ka lo inring bik si lo nen pai khut khutin leiah chuan ka thu thla nghal hnawk a







"A bag kha check sak rawh u" ka lam pana lo kal mek chuan a ti a, ka bula awm pahnih chuan, "Hei chu hmeichhia a ni sia a tih chi dawn a mi" an tih chuan, "Chi e, hmeichhia hlei hlei kha nia tha chu" min tham loh hmel zetin a ti leh a, ka hlau lutuk leh khur nasa bawk si chu a hrehawm tak zet, ka bag chu min laksak theih loh nan nghet zeta pawm betin an mahni chu khawngaih ka dil a







"Khawngaihin min kal tir ru, tuma hnenah ka sawi chhuak lovang" harsa ti taka tawngchhuakin ka aw pawh chu a khur dar dar a, "I sawi leh sawi lovah kan buai lo, pawisa engzah nge a neih en sak vat ta che u mawle" tih zawm leh nghal zatin ka bula thu te pahnih chu a vin nghal that a, ka bag lo lak an tum chuan ka pawm nghet zual suah a







"Hmeichhia pawh inhneh na nge" a thiante hmuhsit hmel zetin chupa chuan a ti leh a, "Khawi keiman ka lo laksak ang" a thiante pahnihin an chhan mai loh avang chuan dawhtheih loh hmel zetin a ti a, ka lam pana a rawn kal hmawk hmawk lai chuan ka lo tawlh hnung ve hret hret zel a, min ven hneh em avangin tlanchhiat pawh tum mah ila ka thei dawn lo tih ka hria







A chhan pawh min man leh nghal thei dawn tlat a ni, "I bag kha min pe dawn nge chhuh sak kher i ngai" ka bul a lo thlen chuan a ti nghal tawng a, lu thin nawk nawk pahin, "Khawngaihin min kal tir rawh u" ka ti tham tiak a, ka hlauh lutuk avang chuan ka mittui te chu a pawrawl kuang tawh a, "Hmeichhe tahbelh lutuk" a ti leh hlak a







"Min kaltir rawh khawngaihin" ka ti leh a, "I bag kha tha deuhin min pe la engtin mah kan ti lovang che" nichin ai kha chuan tlemin a aw pawh a ti pangngai ve ta deuh a, mahse chungte leh lek phei chuan ka hlauhna an ti zual zawk, "Khawngaihin" ka mittui tla chu khap per nghal chhak bawk a, "Tei vet che hian! I bag chu min pe mai rawh, khatianga in lak khawngaih thlak vel kha a tul fahran lovang" a ti leh a







A rui tawh bawk si nen chuan a mit te chu a sen ram a, zan thim reh ruih hnuaiah phei chuan hlau tawh tak hi ka ni ringawt; ka bag min lak sak a tum chuan ka lo pawt let hrawk a, a lo inring bik si lo nen chuan leiah a thu sawp nghal nuaih a, "Hmeichhia te te si i va chal tlai reuh ve" tih paha min rawn hnek tum a a kut phar zuau chu ip chawihin mit ka lo chhing nghal sawk a







"Hmeichhia in 'min kal tir u' a tih chuan kal tir mai rawh" aw thum dutin a rawn tih chuan phawk zetin ka hawi chhuak nghal vat a, a hmel chu hmu chiang thei lo mah ila helai bawr velah hian ka la hmuh ngai awm ka hre miah lo; a ruih ve hmel tho na chu helai hmuna mi thar a nih ka ring nghet nghal hmiah







"Tunge i nih? Min thlah vat rawh" min khawih tum tu pa in chupa chu pawr zeta a tih chuan a nui ro nghal hawk a, "Hmeichhe kut thlak i tum a maw" a aw chu a nelawm leh tawh lo viau mai, "Hrep tak che hian nangpawh khawih ve i duh loh chuan min thlah la, khanu bag kha rawn la la tichuan in kal dawn nia" zamna leh inthlahrunna chhe te mah nei hauh lo chuan a ti leh a







"Kal rawh" chupa chu chhang lovin keimah zawk min en reng chung chuan a ti a, ka ham haih lutuk chu chet maina chang pawh ka hre lawk lo leh nghal, "Kal ta che" min vin leh thawt takah chuan hmanhmawh lutuka thoin ka bag chu ka ak tha sawk sawk a, kal mai ka tum chu, "Khanu kha kal tir hlek suh u man rawh u" a tih rual chuan hmanhmawh lutukin ka tlan a







Hnung lam ka hawi let ngam tawh lova, chutih rualin ka ding ngam tawh chuang lo; ka hah em tih pawh hre lek lovin ka theih ang a chak chuan ka tlan ta char char a, thui tawk fang ka tlan ang tihah chuan ka hah tak em avangin thaw hluam hluam chung chuan ka ding a, hnung lam ka hawi chuan tumah an lo awm tawh lo






Ka tlan khan min lo um zui ve nghal em tih pawh ka hre lova, engtin nge an in tih tak zel ang tih pawh ka hre tawh hek lo; rei pawh chawl lovin kan in lam pan chuan ka theih ang tawka chak chuan ka tlan zawm leh ta zel a, in a ka lut chiah chu ka thaw nghal huam huam a, chhuatah chuan ka thu thla nghal hnawk bawk







"I va hah hmel em em ve ngati nge?" Ka nu leh pa leh ka naute pahnih chuan min lo en reng a, tawng pawh ka la tawngchhuak thei lo; ka dang ro huam huam leh ka hlauhna la reh loh vanga ka tha khur te chu tih tawp tum sateh mah ila ka ti hleithei der lo leh nghal. "I tha em?" Ka pa chuan a rawn ti a, chil lem khawlh paha thawk leh ham ham pahin lu ka buk khum ta ringawt a







"Va inthlak la, nono i û hi chaw ei lo va siam ta che" ka nu chuan a ti a, ka thutna atanga ka la thawh mai loh avangin ka nu chu ka lam pana lo kalin min rawn kai tho a, "Eng nge maw i tawn chu le, ti em em a i hah" ngaih that loh hmel taka min en pah chuan a ti a, za lo lutuk a nuih luih pahin, "Sawlai hmun thim lutuk kha ka hlau a" tha tak chuan ka ti ve mai a







Nuih hak hak pahin, "I puitlin tawh em kha, thim te mai mai chu hlauh tur a ni hleinem" a ti a, ka nu bula ka awm hi chuan ka hahdam mai bakah ka thla pawh a muan phah em em thin a, room a inthlak tura ka phei hnuah min rawn ngaihsak zui leh tawh chuang lo. Khumah chuan thu in ka hnathawh lai hi ka bansan mai dawn em maw ni le aw ka ti hman thut thut a, mahse bansan ta ila kan chhungkua hian engnge kan ei tak ang?







Kha lai kawng reh ruihah khan drug addict an awm thin tih hrilhin min tibuai thin tih hi an kiangah sawi ila chuan min ban tir ngei an tum dawn tih ka hria, mahse kan chhungkua ka en a sawi thei ka ni lo; keimah talin hna ka thawh loh chuan ei tur kan nei dawn lo tih chu chiang sa a ni







Kum khat liam ta khan ka pa kan chhungkaw min chawmtu berin accident a tawh avangin a nerve a that loh phah a, chuvang chuan hna ro rum tak a thawk thei tawh lova, ka nu erawh ka nau te school ah sweeper in a thawk thin a, kei erawh chu office pakhatah ka nu thawh ang tho chu ka thawk ve bawk







Hlawh tam lo mah se, ka nu nen a kan thawh hlawh atangin chhungkua kan enkawl a tih theih ber ang chu; ka nau te school fee chu a tam tham ve em em a, ka nau te school a ka nu a thawh avangin a hlawh atanga a chanve chu cut sakin ka nau te fee erawh an hniam thung a, ka nu hlawh atang chuan chhungkaw eitur kan hmu tawk ang chauh a ni







College kal chu chak ve thin viau mah ila chhungkaw sakin a zir miau si loh avangin ka chawlh san a ngai thung a, ka pa accident hma kha chuan ka kal ve zuaih hman a mahse hetiang teh nuaih kan nih takah chuan kal chhunzawm pawh a theih tawh loh a tih theih ber ang chu






Ka pa chuan hrehawm a ti thei hle thin a, kan unau leh ka nu lakah chuan a inthiam lo thin em em bawk; mahse tih luih vang ni lovin tihpalh thil liau liau piah lamah tu emaw fimkhur loh zar kan zo zawk a ni a, ka pa thiam loh pakhat mah a awm lo tih chu kan hre chiang viau bawk a, chuvang chuan dem thei kan ni lo







Ka pa chuan in a lo nghak thin a, ka nau te school bang chu a theih ang tawka lo buaipuiin eitur a lo siam sak thin, ka nau te nen hian kan kar a hla ang reng a; ka nau chiah hi class8 a zir ve mek a, kan te ber chuan class6 a kal tan ve chiah bawk. Hnathawk tura la rin ngam an la nih chiah loh avangin ka nu nen chuan kan hah thei hle reng thin bawk a







Ka inthlak zawhah chaw eiturin ka chhuak phei a, ka nau chuan inti thei fahranin, "A û artui ka kan sak che a, a tui viau ang" a ti a, nuih sen sen pahin, "Ka ril a tam leh sawt a nih chu" ka pum tuai paha ka tih chuan a nui vei hak hak a, rawngbawlah la rintlak tak tak lo mahse tlem a zawng chu thiam an nei ve tawh a, an thil siam thiam thar hi a intih theih pui viau thin reng a ni








"Eheee...noi avan tui em em, tuin nge zirtir che a" chaw ei paha ka tih chuan, "A pa in min zirtir a, i duh phawt chuan zantin ka kan sak ang che" inti thei fe chuan a ti leh a, chhang lovin lu ka lo buk khum nghat nghat thung. Ka eina chu keiman ka seng fel thung a, ka tihfai zawh hnuah ka chauh deuh em avangin an bulah pawh rei thu peih lovin room ah ka luhsan a







Mut hmunah te chuan eng eng emaw ka ngaihtuah a, a chang chuan nun hi fair lo tih chang ka ngah thin duh lo viau mah ila kan nun a thunei berin min ruatsak a nih miau chuan duh lo chung chung pawha pawm a ngai leh thin; nitin haw tlai ziah ka ni bik lova, laklawh vanga haw hma thei lo leh tul bik an awm hian an haw hun hi nghah a ngai thin a, tuna ka thawhna office phei hi chuan faina an ngaih pawimawh em avangin zingah leh tlaiah tihfai ziah angai








Bal awm lo mah se chu chu rules a ni tlat, department hrang hrang han phiah fai zawh meuh hi chuan a lo tlai leh duai tawh thin; ka thawhpui ve tho chu nau a neih dawn avangin chawlh a la a, keimaha tih vek tur atan chuan a tam mah mah ve bawk em a ni, office canteen ah hian thian tha tak tak pahnih ka nei a, kan inkawmngeih bakah ka chungah an fel em em bawk







"Mamte tho tawh rawh i tlai tep a nia" ka room kawngkhar rawn sawi nawk nawk pahin ka nu chuan a ti a, ka harh chiang nghal ngang mai; ka lukham bula ka phone dah chu la in sana chu ka en a, ka tlai tawh tak tak a lo ni. Hmanhmawh lutuk a thochhuak nghalin ka intifai zung zung a, tukthuan pawh ei hman tawh lovin in atang chuan ka chhuak ta nghal a








Hmanhmawh tawh nen taxi hman tur a lo awm mai lo bawk nen a tlanin ka tlan a ni hrim, office ka thlen chuan vanneih thlak takin thleng an lo la tam vak lova; chawlh pawh la hman lovin ka hna chu ka tan nghal a, ka zawh ve meuu chuan ka hah a la reh fel lo tih ka hre ve chiah bawk. Nizan zantir lamah khan khatiang ang em em a hah tur khan tlan lo ila chu vawiin ah pawh hian office ka thleng hma viau ang mawle








Khalai kawng helna chu a awm teh meuh mai mahse kawng thui zawk a nih avang leh mahni chauha ke a haw tur tan phei chuan kal ngamna chi a ni lo leh zual a, in thlen hma duh chuan shortcut lam kan pan lo thei lo thin bawk nen hrehawm leh huphurh tih chang chu ka ngah thin khawp mai







Ka pum a rawn ri tak reng avangin thil eitur chuan canteen lam chu ka pan a, ka luh rual rualin Ahmingi chuan, "Nizan chu i haw thei maw" tiin min lo zawt nghal var a, haw ka hreh thin zia leh drug addict an tam theih zia te, min tihbuai thin thu te ka lo hrilh tawh avangin min ngaihtuah em em reng bawk a, "A hma ang tho kha a ni mai" dawhkana bawh thlawp pah chuan ka ti zuai raih a







"Ka thlah ang che ka ti mawlh mawlh a, i duh lo a nih kha" min ngei hmel zeta a tih chuan ka lo nuih tlawn ringawt a, min thlah se tih chu ka duh alawm mahse haw lamah engnge a tawn ang? A ni phei chu an veng a hla leh chhawng a, min thlah hmasak a a haw leh a nih chuan in a thleng har dawn lutuk. Keimah ang thoin chhungkaw enkawltu ve tho a ni a, a haw hnua rawngbawl chawp leh tur a la ni nghe nghe zui








Chuvang chuan ka inthlah tir lo mai zawk a ni, "Engnge i ei dawn? Tukthuan i rawn ei hman lo leh pek tawh a mi" thawk hluai pah chuan a ti leh a, lu ka lo buk khum nghat nghat thung, "A buaithlak e, scooty te hi khalh thiam tum teh khatiang reng reng a hun i hman chuan i dam rei lo mai ang" a ti ta thlawt a, a thilsawi avang chuan kei erawh chu ka nuih a za hle thung








"Ka dam dawn alawm, ka chhungte kalsan thei pawh ka nib loh hi" fiamthu ti tak si a ka tih chuan hahthlak tih hmel zetin min en ta tawp a, "Engnge i ei dawn, tui deuhin ka lo siam ang che" rei vak lo kan ngawih hnuah chuan a ti a, ka ei duh ka hrilh hnuah Tluangzeli chu ko in ka ei tur ho siam tur chuan a ti a







"Tui deuhin ka siam ang che i ti maw tia" ka tih chuan, "Tluangzeli siam chu ka siam tluk a nimai" nuih huah huah pahin a ti a, keipawh ka nui ve ta ringawt a. Eitur an rawn dah hnuah ka hmaah chuan an pahnih a rawn thu dunin an titi nghal suam suam a, thil ei pahin an thusawi chu ka lo ngaithla ve zel a; office canteen hi Ahmingi te ta a ni a, Tluangzeli hi chu hnathawk a an chhawr chu ni tho mah se Ahmingi thiannu ve tho a ni







An thil siam a tui mai bakah a thianghlim em em a, office a thawk te kher lo pawhin rawn chawlh ve nan tak an hmang thin bawk; "Inrinni chu chhuak ho i la, bazarah va tei harh ve ang u" Tluangzeli'n a tih chuan, "Ka chak tawh rapthlak, nang hi i hman lo leh pek bik ang e aw" Ahmingi chuan a rawn tih zawm leh nghal zat a






"Hman ang, ka nu leh nau te inah an awm dawn alawm bakah intih harh ka mamawh ve hrim hrim a" ka tih chuan an phur tawh nasa mai. Kei chu ka thil ei zawhah rei pawh awm lovin ka kalsan leh nghal a, office ka thlen tlai deuh avangin pu te ho bik room chiah ka la tihfai hman avangin a dang zawng chu ka la tih a ngai a, hna hahthlak tak ni lo mahse mahni chauh a building pum deuh thaw tifai tur chuan a chauh thlak ve theih thin viau reng a ni






Haw chak thin viau mah ila haw kawng vang erawhin haw ka peih loh phah fo thin, dar nga(5) a rik tawh hnuah pawh pu ber chu a la haw ve ta lova; khaw thim hmaa in thlen hman ka duh teh lul nen amah vangin ka buai leh phah hrep dawn a nih hmel, amah chu a muang em em mai leh nghal a, hmanhmawh tumna a nei lo a maw tih mai tur a ni







Kuhva ei tuam tuam pahin phone te chu a la hmang ang ta deuh deuh a, ka nghak a nih chuan ka tlai leh vek dawn a ka hriat avangin department dang ho room chu ka phiat ta zawk a; ka zawh hnuah pawh a lo la haw ve ta chuang lova, sana ka en deuh sek tawh a, dar ruk(6) a ri vel chiah a ni. Haw thei reng chu ni mah ila a haw hma haw chu ka hreh ve tum hrang tawh bawk si a, Ahmingi nen chuan phone ah message in kan inbia a







Min lo nghak ve bawk mah se a ni pawhin min haw san tawh, a room pawn lama nghah pahin ka ning tawh lutuk chu ka ke ka ti che thul; hmanhmawh rawh va tih chi ni bawk si lo chu, ka ning tawh ngei mai. A tawp a tawpah chuan a rawn chhuak ve thei ta hram a, "I la awm a nimaw" min nuih sang paha a tih chuan nuih a za tawh lo viau mai







"Aw" nuih let ve sang paha ka tih chuan, "Min lo nghak duh kher a nih kha mawle, i haw mai lo a nih chu aw" a ti a, ka ngei lutuk chu biak pawh ka be tha peih tawh lo. Ka thawh tirh khan hriat loh vangin ka haw hma a min hau hrep tawh a nih kha, a awm tlai apianga ka nghah lah hian chutiang chuan a sawi ve ziah a mahse ka haw hma ngam phah chuang lo







"A nih chuan ka kal ang e, tluang deuhin i haw dawn nia" dam taka a tih avang chuan lo tum khum reng thu awm hek lo le, tha deuh chuan ka chhang ve mai a; a kal liam hnuah a room ah chuan lutin ka tifai a, a tawp thei mai bawk si a, kuhva panhnaha chinai la awm te hi chhuata a paih loh leh dawhkanah hmuh tur a awm ve ziah leh nghal







A nupui tan pawh a hrehawm duh ngawtin ka ring, hetianga mipa che tawp leh lutuk hi chu kei ka ngainat zawng a ni ve hauh lo leh nghal; ka tihfai zawha pu ber room ka chhuah rualin security guard chuan pu ber room chu kalh a lo tum ve chiah bawk a, "I va haw tlai ve, ti em em nge" min hmu chu mak a ti ve ngei mai







"A haw tlai leh pek tawh a" ner deuh nang a ka tih chuan a nui hawk hawk a, "Pu ber hi chu i ngaina lo ve chiang a ni" a tih chuan ka bu nghat nghat a, ka pawmpui chiang viau mai, "Amah vangin ka haw tlai ziah alawm" ka tih deuh hlak hlak chuan ka bula mi chu a nui leh a, "Ka lo thlah ang che han ti dawn ila duty ka ngai sia, ka thlah thei bawk si lo che a" inthlahrun hmel lutukin a ti a







"Awi a ngai reng reng lo, keimah pawhin ka haw thei alawm" nuih sang paha ka tih leh takah chuan pu ber room kawngkhar kalh pah chuan lu min buk khum a, "Ka kal a nia" ka tih leh takah chuan lo hawiin, "Awle tluang deuhin aw" tiin min thlah ve bawk a. A tir kha chuan kan inbe ngai lo tih theih tluk a ni mahse pu ber vanga ka haw tlai tak fo avangin tunah chuan kan inbe ta fo mai







Kan awmna lah hi a falin a mawng ang reng bawk si a, taxi driver ho lah hian kal an hreh tlang hlawm ni ngei tur a ni; taxi han phar fuh ve chang pawh hian ka kalna tur ka sawi zawh rualin chhuanlam siamin min tlansan daih leh nghal thin a, an ngeiawm thin tak tak a ni. Ke in ka haw leh ta hnak hnak a, mi te ang a college kala lehkha zir te ka chak ve thin







Ka rualpui te nalh nalh taka an inchei laiin kei erawh chuan nalh taka inchei chu sawi loh mahni pawh kan inchei hnum hman meuh lo a ni a, vanduai intih chang pawh ka ngah thin reng a ni; mahse chumi vang ringawt a hnual chu ka tum lova, mahni infuih nan ka hman phah zawk thin. Ka peih loh ber lai hmun ka thlen dawn chuan ka peih lo ngei mai, rilru in ka tawngtai phei nghal mawlh mawlh bawk a







Thui pawh ka kal hma hauhin nizan a mi bawk te khan min lo au leh a, hawi let duh hauh lovin hma lam pan chuan ka pen phei nghal pawk pawk a; ka tha khur tan pawh chu tihreh ka tum nasa viau mai, "Nula lo ding teh, nizan ang kha chuan i tlanchhe thei tawh hauh lovang" hnung lam atanga an rawn tih leh lek phei chuan hlauhna hlirin min man leh nghal tawh a tih theih ber ang chu







"Ding rawh" vin thawt a an rawn tih leh takah chuan min rawn nan chin hman ka hlauh avangin tlan ka rual a, an thawm atang chuan min rawn um ve nghal tih ka hria; hnung lam ka hawi let ngam lova ka theih ang a chak chuan ka tlan ve pah reng bawk, khawi lai atangin nge a lo chhuah tih pawh ka hriat loh laiin nizana min chhan tu bawk kha a lo lamg leh hlawl a







Ka kut a vuanin min tlanpui a, mahni ngawt a tlan ai chuan a zia ve ta deuh e; helai kawng hi ka kal ngun ve tawh viau nen ka lo la hrechiang lo viau a ni ngei ang, veilamah chuan min pen phei puiin hnim buk sang tak tak leh thingkung ding thap karah chuan min biruk pui a, ka kuta a vawnna la thlah chuang hauh lo chuan a kut leh lam tang chuan a hmui chu tawkin thawm chhuah lo turin min signal nghal a






Drug addict hovin kan zawn an rawn thlen chuan tihngaihna an hriat loh hmel khawp mai, an hawi kual vut vut a, "Ka hmuh leh hunah a chak lo viau ang" helai hmun ka kal apianga min lo be thin tu ber chuan a ti a, "Khanu kher kha tihbuai angai a mi bro" pakhatin a tih chuan a rum nghut a, "A ni lo kha midang pawisa ruk sak theih tur awm ang i hria mi" a ti chhum bung nghut a







Pakhat erawh chuan a chhang tawh lo, chulai hmunah chuan rei fe an awm hnuah, "Let teh ang u, khanu vang mai mai a hun khawhral kha ka peih lo" a tih leh takah chuan an lo kalna lamah bawk chuan an let leh a, an kal liam hnu thleng pawhin ka bula mi chuan ka kut chu a la thlah ta chuang lova, min lo la vuan reng a ni tih pawh ka lo hrechang tawh hleinem mawle







Kut zaizira la awm tura min tih hnuah min vawnna chu thlahin khami te kha a va thlithlai leh zet hnuah ka bulah bawk chuan rawn let lehin, "A kal theih tawh" thum dutin a ti a, ka thaw huai mai. "Ka lawm e" ti sapin ka ding chhuak nghal a, kal mai tum a ka inher mek laiin, "Khawilaiah nge in awm?" Tiin min zawt leh a







Kan awmna ka hrilh hnuah, "Ka lo thlah ang che" a tih chuan a ngaihna hriat loh hmel lutukin ka en hau ringawt a, khami te kha an awm tawh loh chuan thlah kher pawh ka ngaih tawh loh thu ka hrilh chung pawhin hmeichhia mahni chauha haw nan chuan a tlai tawh lutuk thu sawiin min thlah chu a tum ruh hmel viau mai







Ka hnial hneh tak ngang loh avangin min thlah chu ka rem ti ve ta nge nge a, "Ka lawm e" ka tih leh chuan min lo enin a nui suk a, chu bak chu kan in be leh tawh lo. Chulai kawng reh lutuk leh thim lutuk kan kal pelh hnu chuan tlemin kawng chu a hmuh ve theih tawh deuh a, street light bul kan thlen chuan min thlahtupa hmel en tuma ka hawi chho chu ka phu deuh zuk leh nghal







Khalai hmunah kha chuan a thim lutuk a, a hmel pawh ka hmu fiah thei lo a nih kha mahse tlem a a eng deuh lai kan thlena a hmel kan hmuh chuan a hmel chu tha vut ti a sawi tur ni lo mah se a fresh em em a, hmuh a nuam tak zet mahse a rui tih erawh hai theih rual a ni lo thung






Tattoo lah chu a taksa khawi lai hmunah chuan hmuh tur a awm a, chu chuan min ti rap deuh lek lekin ka hria; min biak tawh loh mai bakah vawikhat te mah min en leh tawh lo bawk, kan in thlen hma kawi kan thlen chuan ka ding dawt a, mak ti fe a min lo en mek laiin nuih sang pah chuan, "Helai thleng hi ni mai rawh se, ka lawm lutuk a nia" ka ti a






A kal mai dawn a maw ka tih laiin kal ta mai lo chuan a ding ve reng a, "Thim hnuah kha lai hmunah khan kalpui tur i nei lo a nih chuan kal tawh suh ang che, hmeichhia mahni chauha kal nan chuan a hlauhawm" thum dut leh chhum bung lutuk a a tih chuan ka nuichhuak hak a, tunge a ni tih pawh ka hriat ngai loh leh a hming tak ngial pawh ka la hriat lovin chutiang thu chu min hrilh a nia!







"Nia mawle mahse a haw loh theih thin si lova" ka tih chuan a bu ve nghut a, "Kalpui neiin haw tawh ang che" a tih leh chuan lu ka thin khum nawk a, "Ka ngaihtuah awm loh, tun thlengin engmah ka la tawh bik loh hi" tha taka ka chhang ve thei zel mai chu mak ka ti ang reng viau mai







Mi ka vawikhat hmuhna leh ka hriat ngai loh, ka thiante ni bawk si lova ka biak ve theih ber chu a ni ngei ang, "Him loh chin i la nei ang" a ti leh nghut a, deuh teh tlat chuan, engnge maw a hriat a chutia a tih deuh tlatna chhan pawh chu ka hre lo, "Engpawh chu nise min chhanhim a ka lawm lutuk, a leh pekah chuan min puih a ngai tawh lovang keimahin ka ti ve thei tawh mai ang" ka tih chuan hahthlak tih hmel zeta min enin a thawchhuak hawk a







"Ka kal phawt ang e" ti lehin hawi let leh tawh map lo chuan kan in lam panin ka pen phei nghal pawk pawk a, ka thinphu rang ta viau chu a chhan awm ang tur ka hrethiam hauh lo leh nghal; in a ka luh rualin ka nu chuan ka haw tlaina chhan te chu min zawt a, kan pu haw har vanga ka haw tlai thu ka hrilh chuan a lo awih ve mai bawk a






Dawt mu hlum sawi tawp ka ni lova, kan pu kha haw har lo se la chuan khatiang buaina kha ka tawk hauh lovang; zanriahte ka eikham hnuah chauh ka intifai ve a, ka nu leh pa leh ka nau te tv lo en mek chu reilote thutpui ve in mu turin room lamah ka phei san leh nghal a, nichin maia min chhantu thusawi kha ka ngaihtuah let a, a thusawi kha dik lo lai reng a awm lo







Ka him reng thei dawn lo tih hre mah ila, ka haw na kawng a nih miau si avangin ka haw lo thei bawk si lova; mahse engtianga rei nge khami te lak atang khan ka him ang tih ka hre lo, ka theih chhung chu kha lam atanga ka haw tho chu a ngai dawn chu a la nih hmel viau mai







[Zanin atan chuan ti zawng kha ni rih leh phawt se, ka story te min lo chhiarsak thin avangin ka lawm a chuan ads click, like leh comment kha min lo tihsak leh hram dawn nia🤗]



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 16th, 2022, 1:14 pm

CHAPTER-2





Inrinni nih vangin hnathawk tura kal pawh a ngai lova, kan thian hova kan lo ruat lawk sa tawh ang ngeiin bazara tei harh chu kan tum viau mai; a hma zan atangin ka thiante pahnih chuan an chak tawh zia leh an phur thu chu kan thian ho group ah chuan ha hipin an sawi a, a tira chhuah ka peih loh ang hu in an pahnih awm dan chuan min ti chak leh zo vek ni berin ka hria







Ka nu leh pa te pawhin chhuah chu min lo rem tih sak ve hlauh a, ka lawm kher mai; kan buai theih thin em avangin thian hova chhuahna hun pawh ka nei ngai mang lova, ka pa hi a taksa a chak loh tel thin avangin a chang phei chuan buaipui a ngai nasa hle thin a, ka nu chauh chuan a zo bik si lo nen chutah ka nau te lah chu la rin ngam tak tak an ni bawk si lova






Chhungkaw pa ber chan ka chang hi a ni ringawt, ka insiam mawlh mawlh laiin ka nu chu room ah a lo lut a, "Pawisa te i nei em" ti a min zawh chuan lo nuih sang pahin, "Aw nei ve bawk e" ka lo ti a, lu buk nghat pahin, "Kha hei tlem ka lo pai ve ang che, thiante rualin i chhuak ve ngai lova i chhuah ve niah chuan pai ve rawh, thil te in va ei teuh dawn nia" ka nu chuan a ti leh a







Ka chhuah khat zia a hria a, ka pa chetsual hnuah phei chuan ka chhuak tawh ngai lo tluk a tih theih hial ang; tun tum ka chhuak tur pawh hi ka nu chuan min lo phur pui ve viau a, pawisa min pek pawh chu a tum viau mai. Mahse ka hman tur tawk chu ka nei ve a, ka nu leh zel lo tih hek chu ka duh bik hauh lo mai, "Ngai lo nu, pawisa te chu ka kawl ve alawm" ka tih chuan lu thin mat mat pahin, "I chhuak khat sia, i chhuah ve chhunah tam viau lo mah se tlem tal pai ve che ka duh alawm" a ti leh a






Hnial eng ang mah ila min pe lui dawn tho tih ka hriat avangin ka hnial lui duh ta bik lo, chhuak ngai lo tih takah ka han inchei tur chu kawr tha chhuah pui nana tlak pakhat te mah ka lo nei hauh lo chu niin; ka inhai ve tak ngial pawhin ka nei miah lo a nih chu! Insiam ta mai lo chuan room atanga chhuakin sitting room tv en paha lo thu ka nau te bulah chuan ka thu phei ve nghal a







Kal leh loh mai chu ka duh tawh, ka phur na zawng zawngte kha a reh nghal vek niin ka hria a; hak tur ka nei loh vanga mood chhe ta vek chu ka ni bik chiah lo, keimah ang rual tam tak chu college te kalin nalh tak takin an inchei a, class banah thiante nen leng kawi leh in hun nuam tak tak an hmang thin







Chak lo bik chu ka ni miah lo, ka chak ve lutuk mahse kan chhungkaw khawsak danin a zir miau loh avangin chutiang mi hausa fate awm dana kan awm theih lohna chin te pawh a awm ve a; hrehawm han tih thut thut chang chu han nei ve thin bawk mah ila ka vui ngai bik lo, mahse tunah zet zawng chhuahna tur tak ngial a hak tur ka nei lo chu mak ka tiin ka lungawi thei thlawtlo a ni







"Aw i insiam nghal a maw tia" ka nu lo phei chuan mak tih hmel fe a min en pahin a ti a, "Nia ka peih leh chiah lo deuh a" hak tur ka neih loh vanga chhuah thulh leh ka ni tih ka sawi duh bik lo, a chhan chu ka nu hrehawm ti hmel tur hmuh kha ka duh bik lo a ni; "I chhuah khat em kha maw, va chhuak harh ve rawh kartluanin hna i thawk a, i mamawh ve alawm" ka nu in a tih pawh chuan ka lo nuih liam san ta ringawt a







"Hetah lo kal teh" chutia rei tawk fang tv en a kan thut ngawih reng hnuah ka nu chuan a ti a, thuawih takin an room lam pan chuan ka zui ve mai bawk a, "Hak turah i buai a mi?" Ka nu in a tih chuan ka ti lang bawk si lova engtin nge a lo hriat pawh ka hre lo, mak ti fe in ka en hau ringawt a, "Ni love, ka ngaihtuah chiang a ka peih leh lo mawle" peh hel thei ang ber chuan ka ti a





"I nu hi dawt i hrilh theih i ring a mi? Ka fate in ni a thla kaw chhung ka pumah pai che u in ka enkawl seilen in nih hi, hrechiang lo viau turah min ngai suh bawihi" ka nu chuan ka malchunga ka kut dah chu rawn hum vang vang pahin a ti a, sawi ve tur reng pawh ka hre lo; "I nau te bulah khan ka sawi duh lo a ni a, hman niah school ah jeans an lo zuar a ka lo leisak che a; i nau te hmuh laia ka pe che a nih chuan an ngen veleh emaw te kha a niang a chuvang chuan ka lo dahtha a" ka nu in a tih chuan phawk zetin ka en leh ha ringawt a








"A ngai lo asin nu, keima tan chuan in seng duh suh" ka inthiam loh thar leh em avang chuan ka ti ta ringawt a, min rawn nuih sen sen pahin, "Ka lo theihnghilh hman alawm mawle, nichin i awm dan ka hmuh khan ka hrechhuak leh a" tih pahin a thutna atanga tho chhuakin an almera chu hawngin jeans min lo leisak la hawn miah lo ni awm fahrana a tuamna nen a lo la awm thlap chu min pe a







"Kal rawh le, i duh dan ang tak khan va inchei la i thiante nen hun nuam tak in va hmang dawn nia" min nuih sang pahin a ti leh a, ka lawm lutuk chu ka thutna atanga tho chhuakin ka nu chu ka kuah nghal chung chung a, "Nu ka lawm lutuk aw" ka ti nghal chul bawk a, a ni erawhin ka hnungah chuan dim te a lo ben thak thak pahin a nui hak hak thung







Phur lutukin ka roomah chuan ka tlan phei a, jeans chu kan ha vel chhin a engtin nge ka nu hian ka tawk chiah chiah pawh chu a hriat theih zawk ni; ka inhmeh lutuk tak zet. Jeans chu ha in hman ni a ka lei ve kawr ban tlawn chhawchhi buh rawng a vara tial chu ka ha a, ka pheikhawk ka roh ve em em leh ka neihchhun var chu ka bun bawk







Room atanga ka chhuah leh in ka nau te chuan mit la lek lovin min lo en reng a, "A û khawnge i kal dawn" Nonoi chuan a lo ti nghal var a, "Tikhan inchei ziah rawh i inhmeh lutuk" kut zungpui tih pir va pahin Tetei chuan a lo ti ve bawk a, nuih hak hak pahin, "Ka chhuak lawk dawn a, ka awm loh laiin a nu thu lo awih ula tirh theihin lo awm ang che u aw" tha taka ka hrilh chuan lu an lo bu ve nghat nghat mai







Ka chhuah hnuah ka thiante nen a inhmuh khawmna tur hmun kan sawina lam pan chuan ka kal ta nghal a, ka hmanhmawh peih lutuk lova bakah hnathawk tura chhuak ka nih loh avangin ka kal chak viau lo bawk; eng emaw chen ka kal hnuah inhmuh khawmna tur hmun kan sawina lai chu ka thleng a, an ni pawh an lo chhuah ve deuh chiah avangin ka nghah deuh rih a ngaih hmel viau mai







Rei pawh ka thut hmain an ni pahnih pawh an lo thleng a, an awmna chin hi chu a hriat theih thin khawp mai; an ri nghal chel chul a, kawnga kal ho lah chuan mak tih hmel fein keini thian ho chu min lo en leh hrek hrek thin hlawm a, "In thawm kha dim deuh teh u min lo en nasa lutuk" ka ti ta thlawt a







Bazar lam pana kan kal lai te chuan an titi ring dun si a, an thusawi ngaithla chungin an hnungah chuan ngawi rengin ka kal ve zel a; hmun hrang hranga kan kal kual hrep hnuah an hah ve deuh tawh a ni ngei ang, thingpui dawra chawlh an rawt ve ta nge nge a, ka pawmpui viau mai. Ka riltam tawh zia chu sawi ve na hun pawh ka nei lo, an pahnih titi ah pawh tawng an inchan mang loh laiin ka riltam thu te chu ka sawi ve hman lo hrim hrim






Eitur chah kan nghah laiin, "Zual sawpa saw i hria mi, a rawn en deuh tlat che in ka hria" tih pahin a lu leh mit kan zauh zauh chung chuan a hawina lam chu hawi ve turin min ti a, tu tak ni ang maw ti a ka hawi phei chu khapa kha a ni tlatin ka hria; a va thut hlat deuh avangin amah a ni em tih chian tum a ka en leh chu amah ngei kha a ni! Rang lutukin ka hawi let nghal vat a, ka thiante pawh chu amah en tawh lo turin ka hrilh cham chi bawk







"Tunge i hriat ngai a mi? A chhiat loh hmel ropui mai si a" Ahmingi'n a tih chuan, "Khalai kawnga ka kal khan drug addict ho lakah vawihnih vel chu min chhan ve tawh a, a bak chu inhriatna hranpa kan nei lo" tiin ka lo chhang vat a, lu buk nghat pahin, "A va fel ve" a ti veleh mai a, mahse Tluangzeli erawh chuan a zia a chhuah leh tan dawn a nih hmel viau mai








En tawh lo tura ka tih pawhin a la en ta reng a, eltha a tih thu leh chhelo a tih thute chu sawiin kan lam a lo la hawi reng thu te chu a sawi tak ang deuh deuh leh nghal a; khapa khan a lo ngai kawi ang a a chungchang chu ka thiante ka hrilh a maw a ti ang tihte chu ka hlau khawp mai, "Saw saw a tho a nia" Tluangzeli chuan a ti a, a kawk pah bawk







Ahmingi pawh chuan a lo khap ve nghal vat a, "Zual kan lam a lo panin ka hria" a tih chuan ka thu ngil nghal awt a, ka chil lem khawlh pahin ka kut chu ka hum ruh nghal nghek ringawt a; mawl thei e kan Tluangzeli hi chu min ti zak leh hrep ang tih ka hlau khawp mai, min mitmei pah chuan a lo thlen tawh thu a sawi a engvanga lo zam ve vak nge ka nih pawh ka hre lo








"Kan inhmu leh ta maw" aw thum dutin a tih chuan chil ka lem khalh a, hreh zeta a lam hawi pah chuan nuih luih sakin, "A nih hi" ka then khum nghal sak bawk, hmur tipawrh zuaihin lu a bu nghut a; "Haw har lo la" a tih leh chuan ka thiante pahnih chu an khuh rual that a, rum lutukin an pahnih chuan ka en nghal tawng a






"Ka haw hma leh hma loh tur thu sawi turin tunge i nih" ngeiawm zeta ka tih chuan chupa chu a nui deuh suk a, "Tumah ni love, khang mite ho kha i tawn loh nan a sawi mai chauh ka ni" a tih leh chuan ka chhang tawh lo, "Nuam takin hun i hmang dawn nia" ka sam chu a tuar thur nghal vek a, a tuaina hnu chu dawm vang vang pahin a kal liam thleng chuan ka hauin ka en ta ringawt a







"Awi a van pa em em" Tluangzeli chuan a ti hluai a, "I bialpa a ni chiang. Ngawi teh, Lalhluzual bialpa i nei tih hi i zep a ni lo maw" te chu a la ti tak ang deuh deuh leh nghal a, "A teuh lo mai, ka sawi tawh kha khalai kawngah khan drug addict ho lakah vawihnih min chhanhim tawh" uar fe a ka tih chuan awih loh hmel fe a min en pahin a chek tlak a, a va han hahthlak thin tak!







"I chiang chiah maw" te chu min la tiet erh leh nghal a, tunge chian ngai zawk chu a hriat zawk viau in ka hria, kan thil chah a lo thlen hnuah chuan kan ei nghal a, ka hriat ngai pawh a ni si lova chutih rualin a ni pawhin min hrechuang bik miah lovang mahse chuti chung chuan ka lakah that a chhuah reng chu a ni sia mahse a ni pawh kha an zinga mi a ni ve thei tho







Ka pawisa min laksak theih nan that lo chhuah der thin pawh a ni mai thei a, tunge hria ang? Chuvang chuan ka fimkhur zual deuh chu a ngai dawn hle in ka hria a, ka ngaihtuah thui poh leh ka hlauthawng tulh tulh ni berin ka hria; mahse a awmdan atang kha chuan tider hmel a pu pawhin ka hre bawk si lo, ka rilru te chu a buai nuai nimai hian ka hria







"Khapa thusawi kha helh viau suh, a sawi dik a nia khang drug addict te laka him i duh chuan hma taka hawn hram hram tum thin rawh; tihpalh thil thu vang pawhin khang mi te vang khan i nunna pawh i chan thut thei tih a hriat miah lo a nia" thingpui dawr atanga kan chhuah hnuah Ahmingi chuan a ti a, keipawhin dik tihna lai chin ka nei ka tih tawh kha mahse khapa pawh kha a rinhlelhawm viau angem tih ka hre chuang bawk si lova







"Khapa pawh kha an zinga mi a ni ve mai thei asin" chiang ngam bik chuang lova ka tih chuan Ahmingi chu a nuichhuak hak a, Tluangzeli nen phawk fe a kan lo en reng laiin, "Rinhlelhawm ta se chu haw hma tur khan a hrilh che i ring reng reng a maw ni le, chubakah a chhan thu che i sawi tawh bawk a; an zinga mi chu nise khang mite ho lak atanga chhan lo che khan i pawisa kha an laksak tawh zawk ang che" a ti leh ta duah a







"Engmah a hriat loh, ka chungah a lo tha der reng pawh a ni thei a" ka ti leh hram chu hahthlak tih hmel zeta min enin Ahmingi chu a thaw hak a, "Kei chu khawi zawk nge dik a tan zawk tur lam pawh ka hre lo, in sawi kha dik tih ve ve na lai chin ka nei a kei chu" Tluangzeli bawkin a rawn a ti veleh a, "Chiang chuang love mahse haw har reng pawh thil tha a ni chuang lo" Ahmingi chuan a ti leh a








Bakah ka haw har kher dawn tihna pawh a ni lova, hnathawh ni a nih loh chuan haw har vakna chhan tur kha a awm lo reng a ni; "Engpawh chu nise khawi hmunah nge kan leh ang, mahse kal hla vak tawh lo teh ang u ka ke hi a na kham vek tawh" Tluangzeli chuan a tih zawm leh nghal zat a, boruak rit deh tup pawh chu a zia ta hawkin ka hre nghe nghe








"Mc velah va tei kual ve mai mai ila, kan chhuak ho khat a chhuah ho ve chhunah hi chuan nuam thei ang bera hman hi a tha" Ahmingi chuan a ti dap dap a, Tluangzeli chuan thudang a rawn pakaiin an pahnih bawk chuan an titi dun leh nghal malh malh a; kei ve thung erawh chuan ka dan ngai te ang bawkin an titi chu ngawi renga zui chungin ka lo ngaithla ve zel a







"Nuam lo i ti em, kan kal dun reng sia" Tluangzeli chu rawn hawiin inthiam loh heml zet chuan a ti a, "Ka lo ngaithla ve zel a in titi kha chuvang chuan a hrehawm loh a nia" nuih sang pahin ka lo ti let ve nghal vat bawk. Eng emaw chen kan kal kual leh hrep hnuah kan haw ve thei ta hram a, "Thawhtanah kan inhmu leh dawn nia" kut vai lauh lauh pahin Ahmingi chuan a ti a, keipawhin ka lo vei let ve bawk








Khua a la en avang leh chulai kawngah chuan mi veivak an awm ve deuh nawk avang chuan khang drug addict te ho khan awm an hreh a ni ngei ang, ka kal lai pawh chuan hmuh tur reng reng zu han awm lova! Him tak chuan in ka thleng ve thei ta pawh chu ka lawm lutuk vangin ka nui vur vur reng theiin ka hria







Ka nu chuan vawiin hun kan hman dan te chu min zawt a, nuam ka tih leh tih lohte pawh chu min zawt a tha deuhin ka lo chhang ve zel a; ka hawi kual hrut hrut reng a ka pa ka hmuh mai loh avangin ka nu bulah chuan ka pa awmna ka zawt a, "A nuamsam lo deuha a nerve na a chhuak leh a a mu fel deuh chiah a nih kha" a tih chuan lu ka buk khum nghat a







"Ka va kal ang e a bulah chuan" ka tih chuan kal turin ka nu chuan min lo ti ve bawk a, an room ka luh chuan khuma a saisir zawnga lo mu bam mai ka pa ka hmuh chuan ka lungchhe hnut chu ka in hnit nghal hrawih a; hriselna ngai pawimawh thin em em leh zinga a hman loh chang pawh a tlaia exer la ziah thin kha tunah chuan engmah pawh ti hleithei tawh lovin a awm ta der mai chu a ni sia







"Pa ka lo haw a" a muhil tih chu hre tho mah ila ka sawi ve hrim hrim, "Ehh...i lo va haw hma ve, vawiin i kalna te chu a nuam em" ka lama rawn in letin nui sang pahin min chhang a, ka nu khan a mufel deuh chiah a ti maw ka tia a lo la muhil lo a nih dawn hi. "Aw vawiin chu ka hmang nuam khawp mai" nuih let ve sang pah chuan ka ti a







Ka bag ah lai chu kawr khaina ah chuan bangin ka pheikhawk phelh sawk sawk pahin ka pa bulah chuan ka inthawlh ve nghal a, "A va mak bawrh bawrh thin tak" ka chet deuh sek avangin ka pa chuan nuih hawk hawk pahin a ti a






"Pa...?"




"Immm...engnge nita bawihte?" Ceiling lam chu kan melh pah dun reng a, chhang leh ta chuang lo chuan ka ngawi vung vung a; min en zawkin, "I sawi tur i theihnghilh leh tawh a mi?" A nui zui hawk a, ka pa in hetianga aw dam thluama min biak emaw inthlahrun hmel taka a awm te hian hrehawm ka ti thin, ka ngai zual a a bula awm reng ka chak phah thin








Mi pa te angin chakin hnathawk thei tawh kher lo mah se, ka tan chuan khawvela ka pa neihchhun leh ka hmangaih ber a ni a; harsat leh hrehawm pawh sawi lovin kum kha leh chen kha min lo enkawl ve tawh bawk, tunah harsatna a tawk a amah dem mai lovin rethei taka awm tur pawh ni ila tunah chuan ka pa hi ka theih tawp chhuahin ka enkawl ve ngei ang







"Engtikah emaw chuan ka hlawhtling ve ngei ang a, nuamsa takin ka la siam ve ngei ang che" ka tichhuak sap a, min chhan mainloh avangin a muhil ta emaw tiin in bengkan pahin ka pa chu ka en nghal vat a; mutthilh chu sawi loh ceiling lam chu a lo en reng a, "College i kal thei lo hi hrehawm i ti em" a tih chuan min en lo tih hre reng mah ila lunka thing mat mat a







"Teuhlo mai, hnathawh hi nuam ka ti tihian ka chawm thei zawk che u a" ka tih chuan a nuichhuak huk a, "I lo puitling ta hle mai" a aw chu nidang aiin a dul mah mah emaw ni le aw te ka ti hial a ni. Ka tho thut chu mak ti fein min lo en a, "Mu rawh pa, keipawh ka va intifai ang e" tih pahin ka nuih sang a, an room atanga ka chhuah hnuah ka room lam panin ka kal leh nghal a







Ka inthlak zawh hnuah ka nu chu eirawngbawl pui turin room ah chuan rei pawh awm lovin ka chhuak leh nghal a, Nonoi leh Tetei te ka hmuh mai loh avangin ka nu bulah chuan an awmna ka zawt a; thenawmte ina an len thu a sawi chuan, "An lo pui ve che em" tiin ka zawt nghal vat a, an puih chu ring chiah lo mah ila ka nu chuan a fate hi min tan thei thin khawp a tunah pawh a chhe zawngin a sawi leh chuang hauh lovang








"Pui ve e, tih tur awm loh hnuah chauh alawm ka len tir" a lo ti nghal vat a, ka rin dan reng a ni. Zanriah eikhamah kan unauin ka pa ke chu kan pet a, tv kan en pah bawk, "Û sawlai kawng reh deuh kha i hria em?" a tih chuan khawilai ber nge a sawi hre lo chuan ka ngawi deuh vang vang a, "Aw....kawngkhar saw mawle" Nonoi'n a tih chuan ka hrechhuak leh chiah







"Hria e tinge?" tiin ka lo zawt vat a, "Drug addict an tam thei lutuk zan velah an tia, ka la hmu ve miah lo na chu i hmu ve tawh em?" tiin min zawt a, "La hmu love, hrim hrimin chu chu ngatan nge i tih?" tiin ka lonzawt let vat a. Ka hmuh thin thu ka sawi a nih hlauh chuan ka nu ang mi dilchhut leh hrechiang chak hian a duh a hriat kim hma chuan min zawt leh tlut tlut ang a, min tibuai thin tih an hre leh zel a nih chuan hna ka kal min phalsak tawh lo mai ang tih ka hlau bawk a ni








"I lo haw tlai thei sia, sawta tang bakin i lo haw ngai si lova i hmuh ve takin ka zawt zawt mai che" a tih chuan ka chhang tawh lem lova, ka nu chuan min zawh leh in ring tak chunga mit mei zeuh zeuh pahin ka ngaichang a tih theih ber ang chu, "I lo hmu ve hlauh a nih chuan fimkhur la, an hlauhawm a nia tiang ho hi" ka rin dan ang rengin ka nu chuan a rawn ti ta chiah a









Ka hna nen engmah a sawizawm loh avang chuan ka lawm viau bawk, ka zawhah Tetei chuan ka pa ke chu a hmet veleh a; kei erawh chuan room ah ka phei san thung. Privacy duh chi ni mah ila, kan unau in room pakhat chu kan intawm a, ka khum piah lawkah Noi leh Tetei te khum chu a awm a, an mu dun nghe nghe bawk








Hlawh ka la la lova chutiang bawkin ka nu pawhin a la la bik lo, ka nau te fee pek hun a pelh tawh thu ka nu khan tlaiah a sawi thuak tawh bawk si chu ka rilru a hmanhmawh ru ang reng viau mai a; tun thla chu ka pa in entirna manah leh chhungkaw thil eng engah emaw pawisa kan hmang nasa viau a, ka nau te school thilah nen pawisa pawh chu kan indaih lo viau reng a







Chuvanga tun thla pawh chu pe lo kan ni a, thla tharah hlawh kan la ang a ka nau te fee kan pek a; thildang dang electric bill, tui bill tih ang reng vela kan pek leh chuan pawisa pawh chu kan indaih lo leh ngei dawn tih ka hria, chutiang vel neuh neuh ngaihtuah chung chuan khumah ka mu meng kur reng a, ka nau te lo mut fel hnuah pawh ka la mutthilh ve theih loh avangin ka in let ka in let a






A chang leh ka thawchhuak leh hluai thin bawk, thla hmasa atang khan kan sum chheh fel sa chu a buai vel tawh a; tlemte pawh ni mah se a hma a kan indaih thin tehlul nen kan indaih thei ta reng reng lo mai chuan rilru a tihhah mai bakah ngaihtuahna tr chu a ti tawi tup ni mai hian ka hria, sawi tawh angin ka nau te school ah ka nu a thawk a a hlawh atanga a chanve an cut sak avangin ka nau te fee kan la pek loh pawh chu min hrethiam hram hram a ni tih ka hre mai bawk







Ka ngaihtuahna ka hman nasat poh leh ka buai tulh tulh mai bakah ka thawkte pawh chu a ipik tupin ka hria, ka ning ta deuh chu thuchhuak hluaiin thawk ka la sek sek a; "Lalpa min pui hram teh khawngaihin" ka rilru chuan ka ti chhen bawk. Ka pa hetianga a awm hma kha chuan hausa ti a sawi tur chu ni lo mah ila tiang em em hian kan chebuai ngai lo







Mahse tunah chuan engkim hi a inthlak hlawk tawh a, hman a kan nundan ang khan kan nung thei tawh lo tih chu ka hria; mahse pawisa dehchhuahna tur leh a hman dan tur hre lawk sa thlap tan chuan rilru sen loh a har khawp a, chu chuan nun nuam taka min siam theih loh chang pawh a ngah thin hle reng a ni







Ceiling lam hawi chuan eng eng emaw ka ngaihtuah reng a, mutchhuah aimah chuan ka harh ta tulh tulh emaw tih mai turin ka awm tawh zawk hial a ni. Ka harh leh chuan khua a lo eng uar tawh a, nizan khan engtik laiin nge ka lo mutthilh pawh ka hre lo; ka hriat hnuhnun ber kha chuan eng eng emaw te la ngaihtuahin ka in let kual sek a nih kha







Ka inleh kualna lamah khan ka lo muhil tlang daih ni ngei tur a ni, sunday a ni bawk a ka nau te pahnih pawh chu inkhawm turin an lo insiam mek a; inkhawm tura insiam leh tur chuan ka tlai leh ting tang tawh bawk si nen tun tum chu ka inkhawm lo mai angai dawn a nih hmel, tukthuante kan eikhama ka nau te inkhawm tura an chhuahfel hnuah ka nu nen chuan kan titi mai mai a







"Engtin nge ni dawn, thlatharah hlawh la pawh ni ila ka nau te fee mai bakah eng eng emaw pawimawh thila kan hmang leh nual a nih chuan chan a lawi kan nei leh dawn miah lo a nia" ka nu bulah chuan ka ti a, "Tih dan kawng a awm mai ang, principal te ka hrilh tawh a an ni pawhin min hriatthiam rih khawp kha maw le" ka rilru nawm nana sawi a ni tih ka hria







Nawm chu nawm ve phah deuh mah se a zawng zawng erawh chuan a ni lo, sum thawk chhuaktu nih hrehawm zia leh hahthlak zia chu ka hre chho ve zel ni pawhin ka hre tel nghe nghe bawk. "Mahse i pa hriatah chhuah chi pawh a ni lo a nia, hrehawm a ti leh mai ang" ka nu in a tih chuan ka pawmpui khawp mai, kan duh vanga ka pa laka zep ni lovin ka pa in hrehawm a tih kan hlauh vang zawka sawi lo kan ni zawk mah









"I rilru kha lo tihah vak duh suh, keiman kanlo ngaihtuah mai ang. Nang chu thlamuang takin lo awm la, hna tha takin thawk la a nimai" ka nu in a tih chuan lu buk khum ve nghat mah ila rilru a nuam famkim thei lo a ni zawk mah, zan mut hnu thleng pawhin ngaihtuahna ka hmang reng a, hriatchhuah zawk neiin a tukah chuan hnathawk tura kal chu ka chak tawh khawp mai







Office ka thlen chuan ka tih tur ang ang te chu ti nghal sawk sawkin ka zawh veleh Ahmingi te awmna lamah chuan ka kal nghal vat a, a ni hian sum hmuhna tur dang a hriat leh ka ring tlat a ni; hmelhriat a ngah mai bakah inhlawhna tur tha deuh deuh a hriat thu a sawi ve reng thin bawk a, chuvang chuan amah chu biak mai a tha in ka hria a ni








"Vawiin chu nidang aiin i rawn lang hma" canteen ka luh rualin a lo ti nghal var a, "Hming inhlawhna tur tha deuh i hriat kha a la thawh theih angem?" Ka tih chuan min en reng chung chuan a ngawi deuh vang vang a, "Theih te chu theih reng e mahse i thawhna tur chi pawh a ni lo" a tih chuan a chhan ka zawt nghal vat a







"I thawh tur atan chuan ka duhpui lo che bakah ka phallo" tih zawngin min chhang a, mamawh tawh lai laia chutianga min chhan avang chuan ka lungawi lo dawn lek lek na chu a chhan ka la zawt ta fan a, "Hrelo law law rawh ka sawi leh sawi loh hi a in ang reng nangpawhin i duh chuang lovang" a ti leh a, ka zawh nawn leh pawh chuan min chhang duh tawh thak lo leh nghal








"I thawh tawh vangin a that thu i sawi a ni lawm ni, ka mamawh lutuk a ka nau te fee hi pek a ngai tawh bawk nen inchhep a buai lutuk a sumah kan indaih thei thlawt lova" ka tih chuan a thil tih lai chu dahin min en a, thawk a la sek bawk, "Zual, kei chu loh theih lohna vanga ti ka nia nang leh zel hnuhluh che ka duh lo" a tih chuan hriatthiam loh hmel fe in ka en ha ringawt a







"Han sawi hrim hrim teh, ka rilru a awm tir reng ai chuan ka duh lohna tur chhan pawh chu ka hriat ve hrim hrim a tha" ka la ti ta fan a, hre law law i la thawh tur dang pawh ka zawng thei mai ang, "Sawi ta ila min kawm duh tawh loh phah angem?" a ti leh a, a thilsawi chu hrethiam chiah lo mah ila engah nge maw ka kawm duh tawh loh phah ngawt ang le







"Sawi la, thian kan nia ka kawm duh tawh loh phah rik ngawtna chhan tur che a awm hleinem" ka tih chuan thutnaah chuan thu thlain dawhkanah chuan a kiu pahnih chu nghatin a hmai a hup vang vang a, chu a lo inhlawhna thin a sawi hun chu nghak in keipawh chu ngawi rengin a bulah chuan ka thu ve ta reng a







[Ti thleng hi ni leh phawt se, ads click, like leh comment kha min lo tih sak leh hram ula chuan min lo chhiar sak thin avangin ka lawm thin lutuk bawk a nia🤗]

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 16th, 2022, 1:14 pm

CHAPTER-3





Ahmingi thil min hrilh chuan min thawng dawt ni berin ka hria, a sawi laia a hrehawm ti hmel mawlhte khan ka khawngaihna a ti zual a puih chak viau mah ila inpui thei tur chuang kan awm bawk si lo; pawisa mamawh vanga ka thianghlimna han hralh em chu ka duh bik si lo mahse tulna in min nang thlu ngang bawk si chu ka rilru a buai khawp mai







"Ti ve turin ka duh lo che, keimah ang a rilru hrehawm ru reng renga awm tur chuan ka phal lo che" Ahmingi'n a tih chuan amah pawh ka chhang lova, en pawh ka en hek lo; keimahin ka ngaihtuahna chu ka kawm a, pawisa kan indaih lutuk vanga kan chhungkaw buai zia leh ka pa hrehawm ti leh inthiam lo hmel hmuh reng chu ka tan chuan a hrehawm tawh lutuk a tin ni







"Chu chu engtin nge in tih thin, a hmunah in kal nge an lo bia che u" hriat chian hrim hrim ka duh avangin ka ti leh a, "Zual ti ve miah suh ka tih che kha aw" a tih pawh chuan a thusawi chu hre lo ang hmak a awmin ka zawt lui ve zel a, tih ngaihna a hre tawh bik lo a ni ngei ang a tawpah chuan min hrilh veleh ta tho a






"A that chu" tih zawnga ka chhan chuan phawk zeta min lo en pahin, "I tu dawn tak tak a mi?" Tiin min zawt a, "Ka hre lo, tunah chuan ka rilru hi a buai lutuk engtin nge ka awm dawn pawh ka hrelo. Ngaihtuah tur a tam si, ka chauin ka hah tawh tak zet" ka beidawng lutuk chuan ka sawi duh ngai loh leh inhneh tir ka duh ngai loh chu sawi chhuakin chu thil chuan min ti beidawng tak zet a ni






"Ka hriatthiam pui lutuk che, mahse keini ai thlawt chuan in zia zawk alawm; i nu nen hna in la thawk dun tal a" Ahmingi'n a tih leh chuan ka thawchhuak hak a, "Chawm tur kan ngah zia hi i hria em, ka nu nen chauh a kan hlawh ve hi chu a bei tham lutuk mah mah" ka tichhuak leh hrawih a







Nilengin rilru buai takin ka awm a, engmah pawh chu tih ka peih lo ni berin ka hria bakah tha a tho thei tlat lo; chhun chawlhah pawh ka thiante chuan min be tawng hlei thei meuh lova, Tluangzeli chuan ka nuamsam lo a maw a ti a mahse Ahmingi erawh chuan chutianga ka awm chhan chu a hre chiang hle thung a, min rawn enin thawk a la leh hak thin a







Nidang ang bawkin pu ber chu a haw tlai leh ber tawh a, a haw hnua a room ka phiah lai te pawh chuan ka muangchang viau mai; ka zawh hnuah kan in lam pana ka haw pawh chu ka kal chak lo viau a, kawng khawhar leh hlauhawm pawh chu ka hlau zo tawh lo a ni ber






Tunah tak chuan chulai hmun baka nuam tih chu ka nei kher lovang, a thim a a reh tha bawk a rilru pawh ka hman theih phah zawkin ka hria; ka ngaihtuah thui poh leh mahni in khawngaihna ka ngah tulh tulh a, chu chuan ka rilru no kai chhuakin ka tah a chhuak tut tut bawk a, mahse khawlaia han tah em chu ka duh bik si lo







Ka mittui tlak zeta lo hnam tiam tiam chu ka khap let sak sak a, thawk ka la sek sek bawk. Ka hnungah chuan tu emaw hian min zui tlat ang a hriatna ka nei a, nidang chu nise ka hlau leh tawh viau ang; mahse tun tum zet zawng ka hlau lo mai pawh ni lovin ka ngaihven peih thlawtlo







Tlem chuan ka kal chak sawt tih ka hria chuti chung chuan hnung lam ka hawi let duh chuang lova, ka hnunga kal pawh chu tunge a ni tih ka hre lo bawk; mahse min rawn hnaih chilh chuang miah lova, ka pawisa lak emaw min khawih tur pawhin a rawn kal hnai chuang lo. A kal dan ri chu a dam thlup ni mai hian ka hria, ka hnungah zel kalin ka kal chak leh tlemin a pen ri chu a ring ve deuh a, ka kal muan leh chuti tho







Chulai hmun ka kal pel tep tihah chuan hlauhna mak tak maiin min man thut a, ka tha chu rawn khurin ka thlan nghal tiam tiam bawk a; chil ka lem khalh a, tlanchhiat in ring zet chuan ka awm dan chu ka siam rem a, engtin emaw min rawn tih tum pawh nise min khawih hmaa tlanchhe nghal thei tur ang ber chuan ka awm a tih theih ber ang chu







Chulai hmun ka pelh thleng pawh chuan engtin mah min rawn ti miah lova, min lo zui tawh lo a ni ngei ang a pen thawm pawh ka hre tawh miah lo bawk; ka kal dan chu thlak phah chuang lovin kan in lam pan chuan ka pen phei hlawk hlawk a, mahse mak ka ti thar leh thut chu kan in luh dawnah chuan ka ding leh rih a, drug addict te khan min tibuai miah lo







Ni lo khalai hmunah khan an awm awm ka hmu miah lo bawk chu inher vutin ka hnung lam chu ka en ringawt a, awmzia phei zawng a awm hauh lo; mahse khang mi te khan khalai hmun kha an chhuahsan ngai si lova, zantin min lo chang tur ngawr ngawrin khalai hmunah khan an lo awm thin a nih kha mahse zaninah chuan an awm miah loh chu sawi loh an thawm ri va hriat tur pakhat mah a awm lo bawk







A ngaihna hriat loh hmel zeta inher let lehin inchhung ka luh rualin ka nu chuan min ko peng nghal pang a, "Inthiam lo viau mah ila mate inhlawhna tur dang hi i zawn belh mai dawn em maw ni le" ka nu in inthlahrun hmel fe chuan a lo ti a, chhang lovin ka hma zawn melh ding ngar pah chuan thawk ka la hak a, "Kan in daih lo viau a mi" ka tih chuan lu min buk khum nghat a







"I pa hi in entir leh a ngai tawh dawn a, a damdawi man a to zia pawh i hriat kha" a tih leh chuan tih lan loh hram tum mah ila ka rilru hah leh tawt ut ut vang chuan ka thawchhuak leh hrawih thin a, "Engpawh nise kan sawi tha leh dawn nia, ka va inthlak lawk ang aw" ka tih chuan, "Aw ni dawn tak, va inthlak phawt rawh" tiin min nuih pah sang a, mahse a nui hmel phen a rilru hahna leh hrehawm tihna te, inthiam lohna te chu ka hmuh hmaih chuang bawk si lo






Ka nu berin chutianga a rawn tih takah chuan loh theih lovin inhlawhna tur dang chu ka zawn a ngaih hmel hle leh nghal a, Ahmingi sawi kha ka ti mai dawn em maw ni le tiin ka ngaihtuah tut tut a; pawisa tam tham tak ka hmuh rualin ka thianghlimna ka chan tawh thung dawn tih ka hriat rualin ka ngam leh chiah bawk si lo







Ahmingi chu ka bia a, mahse min duhpui loh thu bakin min chhang lova; ka nu bula ka phei hnuah hnathawh tur dang chu engtia zawn chi nge a nih ang tihte chu kan sawi dun a, rilru a hah duh thin khawp mai. Zanriah eikham hnu thleng pawhin ka ti ve mai dawn em maw ni le aw ti chuan ka ngaihtuah a, chan leh chuan tur pawh ka nei lova a nih si chuan tinge ka tih ve mai lovang?







A chang hi chuan tawngtai pawh hian awmzia a nei lo ni te hian ka ngai thin, kan duh a kan mamawh a a hnenah kan thlen a chhanna kan hmu leh ngai chuang bawk si lo; keini ang tan chuan beidawn a awl em em a, nitin hei hi thawk lo ta ila engnge kan ei ang tih ngaihtuah reng rengin hun kan hmang a, peih lo viau thin mah ila kan thawh a ngai ve thin bawk si








Mi rethei leh hausa inkar hlat zia chu bang chhah pui leh lei khi chat lian tak kan inkara awm ang vel a ni, a nei ten an nei tun tun a, an mamawh loh an awh zawngte pawh ho te in an nei thei a; mahse keininang tan chuan a ni ve lo, an neih ang nei ve tur chuan hah thi kula kan thawh a ngai a, damloh pawh hi thil uihawm tak a tling tawh thin







Tih nek nek chhungin thla a lo thar a, hlawh ka lak hun a thlen chuan ka huphurh ru ang reng hle a; mi tam tak chuan an hlawhte hi mahni in an pum bilh a, an duh zawng lei nan te an hmang thin. Mahse kei erawh chuan ka thei ve lo, ka hlawh te chu chan a lawi ka nei ve ngai lova, a zatve ai tam daih chu chhungkuaah submit a ngai thin







Pu berin a room a lut turin min ko lut a, phur lo zeta ka luh chuan thu turin min ti a, thuawih takin ka thu ve mai bawk a, "Tunlai chu i hah viauin ka hria a, ka haw hun te nghakin keimah vangin tlai takah i haw a ngaih phah thin sia tun tum i hlawh chu ka pek belh ang che" min nuih sang paha a tih chuan phawk zetin ka en ha ringawt a







"Sir i ti tak tak a mi?" Mak ka tih lutuk vang leh ka lawm lutuk vangin ka zawt leh a, lu buk nghut pahin, "I duty i hlenna hi kei chuan ka ngaisang che a, chuvang chuan i hlawh hi pek belh i phu a ni" a tih leh chuan au nghal vak vak a, pu ber chu va kuah chung chung mai chu ka duh rum rum a mahse ka ti ta em bik lo, zanin pawh a awm tlai leh dawn a mahse haw hma tura min tih avangin ka haw hma thei ve hlauh dawn bawk








In thlen hlan chu ka nghakhlel tawh hle a, ka hlawh mai bakah min pek belhna lah chu a tam em em mai leh nghal a; ka rilru a lo hah ve hman tawh tehreng nen chutianga ka phu loh thil ka tawn avang chuan haw lam erawh ka nui ta ver ver dawn a nih hmel. Midang an haw fel hnuah phur zetin ka hna chu ka tan a, hmun ka phiah laite chuan ka zai pah rat rat bawk








Pu berin haw hma turin min ti bawk a, a room chu a tuk lama tihfai turin ka haw san a; ka bag te chu nidang ai mahin ka ak nuam a, ka khawih pah reng bawk. A chhan chu a chhungah kan chhungkaw tana thil pawimawh lutuk tur ka hawn tel tlat si vang a ni, kawng khawhara ka kal laite chuan hlauh pawh a lang thei lo a tih theih ber ang chu







Khua a la thim chiang lo bawk a nidang ang aiin ka hlau vak lo bawk mahse khami zana ka buai vak zan hnu atang khan khang addict ho te kha ka hmuh leh tawh awm pawh ka hre lo, engvang nge tih phei zawng hre lo mah ila ka tan chuan a lawmawm lutuk ringawt; a chhan pawh zantin min lo chang ziah a, ka pawisa lak ngei ngei an tum thin an duh ang a min tih theih ngai loh avangin min chang ziah thin kha a ni reng a








Kawnga ka kal lai chuan khawi atang nge tih hriat si loh hian min zuitu leh min enthla rengtu awm ang mai hian hriatna ka nei a, ka hawi kual lahin ka hmu ngai chuang bawk si lo; hlauh a hnekin engtin emaw thlamuan ruk riauna ka nei leh nghal a, ka awmdan chu ka hrethiam chiah lo. Min zuiru emaw min enthlatu awm ang a hriatna kan neih chuan tupawh hian hlau lo kan awm ka ring lo








Mahse ka hlau lo, hlauh a hnekin him zawk tlat ang a hriatna ka nei thung. In a ka luh rualin ka nu chu ka au nghal chul a, harsatna ka nei a maw tiin hmanhmawh bak lengin an room atang chuan a lo chhuak a, "Engnge i chungah thil tha lo a thleng a mi?" Min dap kual pah chuan a ti nghal zung zung a, lo nuih ver ver pahin lu ka thin khum zawk chu mak tih hmel lutukin min lo en a








"Nidangah khatiang khan min au si lova, engnge thleng ta" la ngaih that loh hmel zeta a tih chuan, "Nu vawiinah hlawh kan la a, chuan pu berin min pek belh bawk a" hlim lutukin ka nu chu ka hrilh pah nghal mawlh mawlh a, "Chuan ka nau te fee chu kan pe tla nghal thei bawk ang a, kan in siamrem veleh thei deuh tawh ang" phur zeta ka tih chuan ka nu pawh chuan min nuih ve ver ver a








Ka kut a vawn pahin, "Pathianin ka tawngtaina a chhang a nih chu, a van lawmawm tak em" ka kut a vawnna chu ben thak thak pahin a ti a, ka lo buk ve nghat nghat mai. Kan harsat zia leh pawisa kan mawmawh zia chu ka pa hrilh kan duh lova, mahse hlawh ka lak bakah pu berin min pek belh thu chu ka hrilh thung a, a ni pawh a lawm ve tih a hmel atang chuan a hriat theih khawp mai








"Mi fate angin nun nuam takin ka siam thei lo che u a, lehkha zir zawm i chak zia pawh ka hria mahse keimah vangin hna i thawh a ngaih phah si a ka fanu i lakah hian ka van inthiam lo tak" ka pa chuan inthiam loh hmel zetin a ti a, rang lutuka kuah nghalin, "Pa chutiang an sawi ngai lo, hnathawh hi nuam ka ti a, chhungkaw tana tlem tal ka lo thawk chhuak thei hi ka lawm zawk asin" tiin ka pa chu ka hrilh a








Inthiam lo reng a hun a hmang tur hi ka duh lo, a sawi ang ngei chuan lehkha zir zawm leh te pawh chu ka chak alawm; hnathawh reng chu nuam ka ti reng bik lo mahse ka pa tan chuan nuam ti ang a ka awm a ngai thung. Ka pa a ni a, khawvelah amah lo chu pa dang ka nei leh tawh dawn lo chuvang chuan ka hmangaihna zawng zawng hi lanchhuah tir ve ka duh mai zawk a ni







Office canteen ah ka tih dan ngai thoin ka tih tur ka tih fel zawh hnu chuan ka awm leh reng tawh a, thiante ho nen chuan eng eng emaw te sawiin kan titi ve pah reng bawk a; "Teh saw saw hman ni a mi kha a ni em?" Min lo kheuh zeuh pahin Tluangzeli chuan a ti a, "Tu chu maw" a thilsawi chu ka hriatthiam loh em avangin ka zawt let ve bawk a








"Kan chhuah ho ni a lo en rengtu che kha mawle" a tih chuan khapa kha a ni tih ka hre thei nghal mai a, "Chu chu tinge?" Tiin ka zawt leh kher a, "I lo thlen hmu reiloteah hian ka hmu ve thei ziah a, saw sawlaiah sawn nilengin a thu thin alawm" tih leh pahin a thutna lai zawn chu ka kawk pah nghal va a, a kawhna lam ka hawi phei chuan khapa kha a lo thu lur leh nghal a








"Khatin kawk vak vak thin suh, a hriat theih lutuk" tiin ka hawi let rual chuan ka khap nghal vat a, "I in inhria mi, sawtah sawn nilengin a lo nghak thin che in ka hria; nimin i haw hma ni pawh khan i liam hnuah a rawn zui veleh nghal che a" ka thilsawi chu ngaih pawimawh loh hmel zetin a sawi zawm leh nghal zat a, kan inhre ngai lo chu sawi loh a hming pawh ka hre lo a nia min zui haw phei chu ka ring lo nasa a ni








"Hre ngai lo" tawi taka ka chhan avang chuan awih loh hmel fe a min en pahin a chek tlak a, "Mahse tinge a lo nghah thin che" a tih chuan a hriat loh ang tluk zetin ka hre lo tih hi a hrethiam lo a ni ngei ang, "Ka hre nang, midang nghah pawh a nei zawk mai thei a" dar chhin ak pahin ka ti leh a







"A ni lo, i lo thlen hnu lawkah a lo thleng a, i haw hnuah a zui haw veleh che tih hi ka chiang lutuk tlat" hriat chian hmel fe a a tih leh chuan ner nang pahin amah chu ka en a, "I hmuh ang zawng zawng kha a ni kher lo thei a nia" Ahmingi chuan a rawn ti veleh a, "Mit ka nei a, a del lo bawka chuvang chuan ka mit hi ka ring tawk" in rintawk hmel zetin a ti leh a








Kan thianho ro roah pawh Tluangzeli hi a naupang bik a, a rilru a thain a fel mai bakah mi lang tlang tak a ni bawk a; a ngaihdan lo deuh leh a duh loh deuh thil a awm chuan peh hel kual lovin a sawi pawp thin, engmah hi a care ve tawh thin bawk si lova Ahmingi nen zawk hian a zah ai kan lo zak thin a tih theih ber ang chu








"Hming lo en rawh min awih loh chuan Zuali haw hnuah a hriat leh mai ang" te chu a la ti tak ang deuh deuh a, kan hahthlak tlang thin teh e! Kan pu chuan awm rei tura min ti a nih loh chuan haw hma ziah tawh tura min hrilh avangin hnial ka tum lo nasa mai, tih tur neih tawh em em bawk si lova mahni chauha a lo haw nghah reng kha chu a ninawm ve thin bawk em a ni







Thlasik lai phei chuan a hit bawk si nen kil khatah kan lo thu khur tlawk tlawk zel a, chutia ka haw hma thei tawh tur leh ka nghah a ngai tawh lo tur chu ka tan chuan malsawmna chhiarsen loh hi a ni tawp mai; tlaiah ka haw hma in ka thiante chu ka tlawh kawi leh zuai a, an ni chu la intihfel mai bakah eng eng emaw tih tur an la neih nual avangin an la haw ve thei rih lova








Ka haw hma ta lutuk pawh chu ka awm thiam lo zawk dawn dawnin ka hria, "A nih chuan ka haw san ang che u aw, ke a la haw turte ka ni sia" eng emaw chen ka thut leh hnuah ka thutna atanga thochhuakin ka thiante chu ka hrilh a, "Aw nia haw rawh, keini chu nghah ve kher kan ngai lo" min nuih sang pahin Ahmingi chuan a ti a, lu buk khum nghat paha chhuahsan mai ka tum chu Tluangzeli bawk chuan, "Nghaktu liana pawh saw a tho ve ta tiam tiam mai" nuih kur kur pah chuan a ti a








A infiamna chi pawh ka ti chiah lo, min chhanhimtu leh ka chunga that chhuahtu ni mah se rui ve tho a nih avangin ka duh lo viau mai; bakah ruihtheih thil ti ho hi ka ngaisang teh chiam lo bawk, "Laltluangzel over viau thin suh aw" nuih paha ka tih chuan a ni pawh chu a nui ve a, min fiam dan chu duh lo viau mah ila thinrim thei ka ni chuang bawk si lova, a chhan pawh a rilru tet thlak lutuk dawn tlat a ni








"Kan hmuh loh chinah khan va che na dun viau lo ula a tha vek mai ang" a ti leh hram a, hahthlak tih hmel zeta enin thawk ka la hak thung, "Aaa...engpawh nise ka kal a nia" Ahmingi zawk chu enin ka ti a, lu buk paha min nuih pah chuan, "Fimkhur la aw" a ti a, ka thiante pahnih hi chuan min duat bakah an phak ang tawkin min ngaihtuah ve hle thin a







An ni chu in thenawm mai an nih bakah an haw rual thei a, kei chu veng hran daiha ka awm avang leh mahni a haw tur ka nih thin vangin thiantha tih takah min ngaihtuah zia chu an ti lang ve thin khawp mai; Tluangzeli thusawi chu la hre rengin ka kal pah chuan min lo zuitu an awm em tih hriat tumin ka beng chu ka chhing reng a, hnung lam chu ka hawi pah zeuh zeuh bawk








Eng emaw chen ka kal hnuah min zuitu an awm tak si lohah chuan Tluangzeli thusawi chu a nih loh zia naktukah ka nem nghet ngei bawk ang, kawng khawhar ka thlen chuan nidang ang bawkin tumah an lo awm lo leh tawh a; ka hahdam huaiin ka hria khang mi addict te khan engnge an tih tak zel ang tihte chu ka ngaihtuah neuh neuh a, nikhat thil thua han bo dak dial chu a mak ve bawk em a tin ni







Mahse pawi lo zawk awm lo reng se ka ti, a chhan pawh an awm chuan min tihbuai reng bakah ka duh ai tam hun ka hman phah ziah thin bawk a; ka pel tep tihah chuan an lo awmna thinah vawiin chu ka hmu leh ta tlat mai mahse hre lo derin mahni inhumruh teuh chung chuan ka kal ve zel a, helai kawng awm hi chu tute tan pawh hian hlawkna a nih rualin kan in hman tangkai hleih dan chu a dang thin teh e






An zawn ka thlen dawn chuan ka zam deuh hlek a, ka huphurh thar leh deuh nghe nghe bawk mahse heng mite hian engnge an hriat ni min tibuai lo ve teh mial a; mak ka ti lutuk chu chiang zetin an mahni lam chu ka hawi nghe nghe bawk. Ka pel tep tihah an zinga pakhat min tihbuai lai pawha min be ziahtu ti mai teh ang chupa chu a rawn tawng a







A thilsawi vang erawh chuan ka ding chawt thung, "Maw engnge i sawi kha" keimah min bia pawh a ang lo a thiante hrilh ang chuan awm mah se a thusawi dan kal hmangah chuan hre ve se min tih zia a lang chiang viauin ka hria, "Ka be lo che i duh chuan i kalnleh thei tawh ang" ngeiawm zetin a ti a, mahse ka ngai pawimawh hman si se lo a thusawi kha hriatnawn leh duh tlat a ni







"Han sawi leh teh tun lawk a i sawi zawh tak chiah kha" ka ti leh a, chupa chuan min ei loh hmel zeta min enin a ner nghal sawk a, min biak peih loh hmel em em mai leh nghal; mahse nichin lawka a thilsawi kha ka hriat leh hma chu helai hmun hi ka chhuahsan dawn lo hi a ni tawp mai, "Khapa kha awm lo se la chuan tunah pawh hian him takin i awm tawh kher lovang" a ti a








"Tunge khapa i tih chu" vin deuh lek leka ka tih chuan an vaiin phawk hrain min lo en hlawm a, "Nangmah duhtu pa vang chauh che in tunah hian i la him tih hria ang che" a ti nawn leh a, an mahni ka kalsan hnu thleng pawh chuan mak tihna hlirin ka khat a; khapa an tih lah kha an ni pawhin a hming an hre lo a ni ngei ang, a hming an lam rik awm pawh ka hre lo







Mahse tinge min duh ngawt ang? Vawihnih tha ang zen zawn bak kan la inhmu lova, tihpalh thil thuin a min chhan ve ve tawh a; chumi vang ngawt a induh nghal chi pawh a niin ka hre lo, bakah ka hre ngai lova khawia awm nge tih leh tunge a hmung tih te, engnge a tih thin a eng hna nge a thawh tih tak ngial pawh ka hre lo







A ni pawhin min hriat ka ring bik lova, kha zan min chhan bak kha vawikhat restaurant ah kan inhmu a nih kha chumi vang ringawt chuan min duh ka ring bik lo; mihring induhna chu vawi leh khata awm nghal tawp thei niin ka hre lova, inkawm chhoa kan nihna engkim kan in hriatsak hnuah zawi zawiin induhna chu a lo piang thin nimaiin ka hria







Bakah ngaihzawng ka la nei ngai lova, nei pawh ni ila ka ngaihzawng hmasa ber atan rui chu ka duh bik hauh lo; a hrim hrimin ngaihzawng ngaihsak hman pawh ka niin ka hre lo, chhungkua kan buai em em a chhungkaw tan hna ka thawh a ngai a keiin ka thawh loh chuan eitur a lawi kan nei lo nghal a ni mai dawn a, chuvang chuan rim taka thawh ka ngai








Mi te angin nun zalen tak leh ngaihzawngte nei a heheu taka nun hmang ve thei ka nih loh zia chu kei tluk a hrechiang an awm lovang, in ka thlen hnu thleng pawhin khang addict te thusawi khan ka rilru a la luah ta reng a; chumai bakah Tluangzeli thusawite chu ka hrechhuak leh zel bawk nen chuan ka awmte pawh a nuam lo zawk dawn dawn mai







Min tibuai a zeng pawh a ni lova, chutah lah min be ngai chuang bawk lo chuvang chuan lo va tih chiam lah thil tih chi ni nghal ngawt lo chuan; mahse ka awm chu a tinuam tawh lo hrim hrim a, min duhtu ka hriat vawikhatna a nih chu thuhran addict ve tho in min duh thu hriat chu a lawmawm dan a famkim chiah lo ve bawk em a ni








Zanriah eilai te pawha ka ngawihchawi em avangin ka pa chuan a chhan min zawt a, "I hnathawhna lamah eng emaw tawn i nei a mi i va tawng duh love" chaw hlui kil lai hian chhungkua a kan awm ho theih laite a nih thin avangin titi nan leh eng eng emaw thu pawimawh sawi nan hun kan hmang thin a, chuvang pawh chu a ni ang ka pa chuan min zawt ve ngei a








Engmah a nih loh thu te sawiin chaw chu ka bar zawm mial mial a, ka nau te pahnih erawh chuan an titi lai an thlah phah chuang lova; an duhzawngte sawiin an nih chak tih ang reng velte chu a ni an sawi ni, ngawi renga bar pahin an thusawi chu ka ngaithla ve reng bawk a. Chaw eikhama kan eina hnu ka tihfai zawhah ka pain an bula tv en ve tura min sawm ve tlat avangin ka thu kawi leh rih a








Savdhan India leh eng eng emaw tawng lehlin vel te chu kan en a, ka chhungte ho hi chuan tv hi an ngaina ve hrim hrim a; entur hmuhnawm a awm chu tv hmaah hian an thu reng peih ang tih tur vel hi an ni ve tlat a, mahse an ni lo ang takin kei chuan ka ngaina ve lem lo a ho ka tih mai bakah duh hunah a puase ve theih si lova tv ai chuan youtube ah hian thil ka en nasa daih zawk reng a ni







Dar kaw(9) chho ah chuan ka peih tawh ngang loh avangin mu turin room ah chuan ka phei san a, ka rin ang rengin ka nau te chuan room tukverh chu an lo la khar lova; tlaiah hi chuan khar ngei ngei tawh thin tur hi a nia, thosi hlo chhit loh phei chuan muttui laia kan hmai bula lo vi hi an ching thin si a, ka nau te tirh leh thil ti tura hrilh hi chu ek lung hrilh ang vel hi an ni








Ti ta nge pawh hi an tih phah chuang lova, zanah thosi in a rawn tibuai a nih chuan an mahni thiam loh a ni tawh mai; tukverh ka kalh dawn lai tak chuan khawi lai emaw atanga min entu awm ang tlatna hriatna kha ka nei leh tawh a, ka mitthlaah khapa kha a lo lang nghal zawk nghe nghe a, duh lo lutuka lu thin nawk nawk pahin tukverh chu ka kalh tha nghal sawk sawk a







Engvanga min entu awm ang tlat a hriatna nei nge ka nih pawh ka hrethiam lo, bakah khapa hmel lo lang nghal pawh kha ka duh lo hrim hrim; lu thin nawn leh nawk nawk pah chuan ka lu chu ka beng a, he ka lu bur te reuhte atanga paih chhuah ka duh. Khapa ka hriatchhuahna ringawt pawh kha ka duh tawh lo hrim hrim bawk, ka mut hnuah pawh ceiling lam hawiin ka lo ngaihtuah leh vung vung thin a







Eng ka hria chu nimaw a mak teh chhen lutuk mai, ka nau te pawh an lo mu phei ve tawh a muhil nghal mai lovin khumah chuan an titi dun reng a; Noi chu vawilehkhatah hlauh nei tih hriat lutukin a te nghal that a, rang lutukin ka mutna atang chuan ka thuchhuak nghal zawt a, "Engnge thleng" tiin ka zawt nghal vat bawk







"Chukchu a hmu leh tawh a ni ang" nui hak hak pahin Tetei chuan a ti a, chutiang chukchu hmuh vang mai mai a zanreia a au vak avang chuan ka thinte pawh a tirim mai dawn alawm mawle, hauh tum a ka an mek laiin, "Chukchu a ni lo" a ti nghal tiau a, a tap nghal par par bawk, "A nih chuan tinge i au vak" ka ti leh a, ka vin zawk lek lek leh nghal







"Ramhuai ka hmu alawm" a tih leh chuan awih lo lutuk vangin ka nuichhuak nghal hak a, ramhuai awm ngawt lo chu a chukchu hmu ka hauh hlauh vanga a chhuanlam siam a ni chiang lutuk; "Lalremmawi dawt phuahchawp hlek suh" ka ti leh khar khar a, lu thin nawk nawk pahin, "A û dawt ka sawi lo, sawlaiah sawn palian pui mai a lo ding a inchhung a lo bih alawm" a tih leh a







"I ti tak tak a mi" ka tih leh chuan lu a bu nghat nghat a, dawt a sawi em tih chian tuma a hmel ka en chuan dawt sawi hmel a pu bawk si lo; ka ngaih tha ta zan lo chuan en chu ka tum ta nge nge a, tukverh lamah chuan pheiin ka hawng nghal rawk rawk a, ka hawi kual tak ngial pawhin tumah hmuh ka nei lo








"A kal tawh a nih dawn kha" kalh that leh paha ka tih mek laiin, "Engnge thleng a" ka nu chuan a rawn ti a, Tetei'n a lo va hrilh hman a ni ngei ang. Zanreiah Noi hi chu au leh vak hi a ching thin a, a chhan pawh chukchu a hmuh vang a ni tlangpui; chuvang pawh chu a ni ngei ang ka nu leh paten an lo ngaihsak lawk nghal bik loh, "Engmah a ni lo Noi hian hmuhsual a neih vang mai mai alawm" ka ti a








Ka nu pawh chuan a ngai thu tak bik chiah lo a ni ngei ang, Noi hi chu ngaiah kan nei ve tawh deuh reng reng bawk a; ka nu an room lama a phei leh hnuah ka nau te chu mu turin ka ti a, an mutthilh hma chu an bulah chuan awm ve rengin an mutthilh hun chu ka nghak a, an mu fel ta maw tihah ka mutna lamah chuan phei ve nghalin ka mu ve leh nghal zat bawk a







[I lo chhiar thin avangin ka lawm a chuan ads click, like leh comment kha lo ti leh hram hram ula ka lawm leh zual ngawt ang🤗]

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 16th, 2022, 1:14 pm

CHAPTER-4






Ka fel loh zia ka hria, mahse tuna ka nundanah hian sawiselna ka nei lo; tumah mawh puh tur ka ni lo na chungin hetianga ka awm chhan chu ka pa leh a nupui vang a ni ka ti lo thei lo, ka pa khan ka nu kha kalsan lo se la chuan hetiang hian ka awm bik hauh lovang. Ka pa bula ka awm hnuah chauh ka nundan pawh hi thlak ka ni







Hmeichhe pakhat duh deuh mai ka nei a, mahse ka hnaih ngam lo ni; a chhan pawh keimah vangin an chhungkua ka tih chhiat phah a, kha zanah khan rui lutuk lo ila chuan khatiang thil rapthlak tak kha ka ti hauh lovang, ni lo ka tum vang renga ti ni lovin ka inthunun zawh tawh loh vang zawk a ni mah







Ka hmeichhe duh chu ka ta a siam ka duh a, mahse ka thei bawk si lo; hnaih ka duh a ka awmdan vangin ka hnaih ngam chuang bawk si lo. Hmeichhe kawl hrawng ve tak niin ka hria, hmeichhe dang tam tak chu nise khalai hmunah khan mahni chauhin an kal ngam tawh kher lovang; mahse chutiang chu a ni ve lo, a hlau tih kei ngei pawh hian hrilh chawp ngai lovin ka hria







Mahse chuti chung chuan khalai kawngah kher khan a haw lui thin, a luhlul tak zet bawk; mifel leh tha chu ka in ti hauh lo mahse ka hmeichhe duh kha venhim ka duh avangin khalai hmunah khan ka lo chang thin a, khang mite khan an tibuai reng thin tih leh a pawisa laksak an tum tih ka hriat atang phei kha chuan a kalna hmun apiangah ka zui reng thin







Keimah vangin a pa in hliam na tak a tawrh phah a, keimah vang bawkin mite tih ang ti thei lovin a chhungkaw chawm nan naupangte in hnathawh a ngaih phah bawk a; chuvang pawha hnaih ngam lo pawh chu ka ni, mahse atana ka tih ve theih chhun chu a himna tur ngaihtuah sak hi a ni a, a him nan leh nun nuam taka a awm theih nan a nih dawn phawt chuan engpawh ka ti mai ang







Tunge ka nih a hre lova, ka hming tak ngial pawh a hriat loh laiin kei chuan a nihna, a hming leh a chhungkaw chanchin chu ka duh ai tam ka hre viau thung; nitin hmuh ka duh bakah venhim reng ka duh a, hlimna tam tak neih hi a phu ve in ka hria. Mahse ka en ang hian min en ve lo tih ka hria a, a chhan pawh drug addict a min ngaih tlat vang a ni







Khang mite khan an tihbuai reng avangin haw a hreh phah thin tih a awmdan atangin ka hre thei a, an tihbuai tawh loh nan chung mite chu hmuh puiah ka sawm a; pawisa an mamawh a nih phawt chuan ka pek theih thu in ka hrilh a, mahse ka rin aiin dawr an har phian leh nghal a, Zualtei pawisa kher an duh thu an zinga thu ve hmel berin a sawi chuan thinrim vangin ka sawisa lo chauh a ni







Engvanga a ni pawisa chu duh kher nge a ni tih a ka zawh chuan an zinga thu hmel ber chuan Zualtei chu a duh vang a ni tih a sawi leh zel a, insum nasa viau lo ila chuan khalai hmunah khan a nunna a chan fel der tawh ang; engtin tin emaw ka thlem kual ka thlem kual hnu chuan ka in rem siampuina chu an pawm ve thei ta hram a mahse ka hek phah hrep dawn a nih hmel








Damdawiah pawh a to ber chi an tih avangin an pawisa mamawh zat pawh chu a sang tha hle a, ka pek theih tur thu leh ka pe a nih chuan Zualtei chu tibuai tawh lo turin ka ti bawk a; an ni pawhin rem ti mah se ka la ring ngam ta chuang lo fo mai, heng mite ho hi chu rin vak loh tur an ni reng bawk a, a chhan pawh an in sawi ang a an awm leh thin loh vang pawh a ni pakhat








Pawisa chu ka pe ta ziah a, mahse min zuam phah ang tih erawh ka hlauh avangin an mi dil ang diak diak chuan ka awm duh bik lo; rui ve fo mah ila an ni ang em em hi chuan regu takin ka ti lo thung a, Zualtei hian min hlau deuh tlat ang a hriatna ka neih avangin a hmuh turin ka awm khat hle a ka in lan tha duh lo a tih theih zawk mah ang chu








Mahse nizan kha chuan ka tisual ve hle in ka hria, ka pa leh a nupui phiangsen vangin in a awm ka peih lova ni lo ka hmu peih lo a ni zawk mah; harhfim a awm ka peih leh tak loh avangin ruih ka thlang ta zawk kha a ni a, ka rui ta cheng a Zualtei hmuh ka chakna chuan ka insum theihna chu min thiah sak chiang hle a ni








A mut tawh chu ring mah ila ka hmuh chak em avangin an in lam pan chuan thei leh thei lovin ka inkhalh chhuak a, ka rin ang ngeiin mut chu an lo mu tawh ngei a; let leh mai tum a ka inher chu tawng thawm ka hriat leh tak si avangin ka let leh a, tawng thawm ka hriatna lamah chuan ka kal a, an room ni awm tak chu a lo la en avangin a la mu lo turah ka ngai a








Tukverh an kalh tlat avangin duh ang pawhin a chhung chu ka hmu thei lova, ka awmdan chu siam remin ka ding sang deuh bawk a, amah ni awm tak ka hmuh chuan ka nui suk a, mahse light in min en khalh avangin en chiang tumin ka pan hnai leh hret a ka kut pahnih a ka biang sir khuh pah chuan ka zuk bih a







Nichina ka hmuh hmuh leh tuma ka en kual lai takin tu emaw a rawn te tak thutah chuan ka awmna atanga in la hrang nghal vatin tukverh hnuaiah chuan min hmuh theih loh tur ang berin ka biru nghal a, amah a maw ka tih kha a ni lo tih ka hre ve chiah bawk








An tawng ri chu ka hre reng a, ka che sawn ngam tawh der lo rem lo zet chuan ka ding ta reng a; Zualtei chuan tukverh chu hawngin a hawi kual nghal ruai a, khar leh nghal vatin tumah a hmuh loh thu leh a nau chu a hmuh sual a nih thu a hrilh pah nghal bawk a, rei fe chutianga ka awm hnuah an thawm a reh tak avangin keipawh chu ka awmna atang chuan ka chhuak veleh thei ta chauh a








Min hmu ang tih ka hlauh em avangin thawk pawh ka la tha ngam lo kha a ni a, ka awmna hmun atanga ka chhuak chiah chu ka thaw huai theiin ka hria; ka rui ve viau emaw ka ti a mahse tunah chuan ka harhfim leh vek tawhin ka hre bawk. Ka motor awmna lam pan chuan ka kal nghal a, ding leh deuh datin tukverh lam ka en leh zet hnuah motor ah chuan ka chuang ta nghal a







In a haw ka peih loh avangin hotel a riak turin hotel lam chu ka pan ta zawk a, ka pa nupui hi ka hua em tih ka hre lo; ka chungah a tha em em reng zel a, min ngaihsakin min duat thiam ve viau mah se ka pa vang ringawt pawh hian ka be peih lo a ni ber. Ka pa khan ka nu kha kalsan lo se la chu an chungah ka sual bikin ka ring lo, mal takin a kalsan a ka nu khan khawhar takin hun a hmang thin tih te kha a hre ve miah lo a maw ni








Ka haw peih loh apianga riah nan a ka hman thin hotel kawt ka thlen chuan chhuak vatin ka room lam pan chuan ka kal tlang nghal a, helai hmunah hian ka awm deuh reng avangin a thawkte pawhin min hrechiang ve tawh em em a; room chahbi pawh keiman ka kawl mai bakah ka awm loh lai pawhin ka room chu tumah an luah tir ngai lo bawk a







Room a ka luh rualin khumah chuan ka let thla nghal tawp a, ceiling lam melh pah chuan thawk ka la ham ham a; eng emaw chen chutiang a ka awm hnuah chuan peih lo zeta thochhuakin ka intihfai leh zet hnuah muhil thei dawn a ka in hriat ngang loh avangin cupboard a ka zu dahkhawm zinga pakhat chu la chhuakin glass ah chuan ka thli chhuak a







Muang changa in pahin ka hun kal tawhte chu ka ngaihtuah let a, mal ngawih ngawih ang a inhriatna ka neih chu ka duh lo kher mai; ka nui ro nghal hawk a, ka no ken lai chu ka hum ruh nghal vak bawk. Ka pa chu ka haw zual nghal em em a, "Tenawm lutuk mai" ner nawk paha ti hrawkin no ken lai chu la kangin ka tlak nghal pap bawk







Ka in tam awm ka hre lo na chu ka thutna atanga ka thawhchhuah meuh chuan ka rui hle tih ka hre thei a, ka pai nghal khut khut bawk; ring takin ka nui vak a, ka nuih zat vang a ni hauh lo thung. Thei leh thei lovin khum chu ka thleng ve thei ta hram a, let thla nghal tawpin mit ka chhing nghal vang vang a, engkim mai chu a vir muai muai ni maiin ka hria







Ruihtheih thil ti ngai lo ka ni a, mahse tunah chuan a ngawl ka vei tawh a ni ber; chuti chung chuan zu ka in hleithei lova, tlem ka in pawhin ka rui vak thin. Luak chhuakin min rawn pump a thochhuak turin chakna ka nei tawh lo thung, ka zawi vek a tha ka hmang thei lo bawk








A reh mai ringin ka la chhing ta reng a, a hma aiin engkim mai chu a vir nasa a maw tih mai tur a ni; mahse harhfim taka awm ai chuan nuam ka la ti zawk fan a, a chhan pawh ka ruih chuan engmah ka ngaihtuah thei lova, ka ruih avanga keimah atanga awm nawm lohna, luakchhuak lo chhuak bak ka ngaihtuah theih loh vangte pawh a ni







Ka thawchhuak leh hawk thin a, ka nui ro leh hawk thin bawk; chutiang chuan engtia rei nge ka awm ka hre lo ka harh leh chuan khua a lo eng uar tawh a, khum atanga la thochhuak peih lovin ka la mu ta reng a, ka lu na er er leh ka pum ri rawih rawih chuan min ti zawi zual tak zet. Ka riltam zia ka hria mahse ka taksa thununtu chuan thochhuak peih lovin min siam tlat a tin ni









Ka muhil nawn leh a ni ngei ang ka harh leh chuan ka awm nawm lohna leh luakchhuak te chu an awm tawh lova, ka harh chiang viau tawh bawkin ka hria; khum bul dawhkana ka phone dah chu zawi zeta la in sana chu ka en a, ka thuchhuak nghal chiang kher mai. Hmanhmawh taka ka mutna atanga thochhuak nghalin bathroom lam ka pan ta nghal a, ka chhuah leh hnuah ka thawmhnaw te chu inbel zung zungin hotel atang chuan ka chhuak ta nghal a








Engtin nge ka theihnghilh theih zawk? Tunah chuan Zualtei chu office ah a awm tawh ngei ang a, canteen ah pawh a awm tawh mai thei zawk; chawhma chhung ka mu thei chu ka tih vak ngai loh avangin nizan ka thil in vang kha a ni tih ka hre thei nghal mai a, office lam pan chuan ka inkhalh chhuak ta nghal a, engmah la ei lo ka nih avangin ka pum lah chu a ri deuh sek leh nghal









__________________________________________________









"Vawiin chu a lo kal dawn lo a niang a" Tluangzeli chuan pawn lam thlir pah cbuan a ti vang vang a, henu hi chu hrilh hrilh mah ila a sawi loh phah dawn chuan loh avangin ka khap peih tawh lo zawk, "Tu chanchin nge i lo sawi leh hman tak" nuih hak hak pahin Ahmingi chuan a zawt a








"Lalchheloa kha mawle" a tih chuan ka lo nuichhuak hak a, chhelo a timaw? A khawi laiah khan chhe lo a tih kei chuan ka hre ve hauh lo, "I thil buaipui kha a ho emai hetah kan bulah hian lo thu ve tawh rawh, titi ang u" a duh tlat lova, buaithlak thin khawp mai







"Saw saw a lo kal a van nuam chiang tak" pawn lam kawk pah chuan a ti nghal chul a, chutianga a phutsak nuaih avangin Ahmingi nen pawn lam chu kan en ve ta ringawt a; motor te a nei a nimaw ka vawikhat hmuhna a ni chiang mai, "A chhiat loh zia saw" a ti leh nghal chul a, Ahmingi nen chuan in enin kan nui dun ta ringawt a







"Awi a lo phei a nia, a mak e" a ti leh zel a, chutianga Tluangzeli'n a tih takah chuan a chhan sawi tur pawh hriat loh hian ka thin chu a phu nghal dawt dawt ringawt a, thlawk chhuak tur ang mai phu rang a ni; ka awm chu ka dawm bet ta ringawt a, hepa hian min hnaih apiangin ka thin a phu vak zel leh nghal a chhan sawi tur awm ang lah chu ka hre der bawk si lo







"Engnge eitur in neih?" A awmna lam hawi duh lovin leh lam hawi chuan ka thu tlat a, "Kan nei tui thei teh mai a nia, i duh sawi la kan nei vek ang" phur zetin Tluangzeli chuan a ti a, a lo biak dan vel chuan ka nuih a ti za ang reng khawp mai. Kan bulah chutiang ang a nem leh no taka a tawng ngai awm ka hre si lova, mihring hi chu kan awmdan leh kan tawn a zirin kan lo inthlak danglam thei tih ka hrethiam ve chiah bawk








"In neih zinga tui ber chu min tih sak mai rawh" a ti thum dut a, a bul lek lek a maw tih tur hi a ni a mahse thinrim vang a ni lo tih a hriat a chutih rualin a aw pawh chu a dam thlup bawk; phur zetin Tluangzeli chu a kal ta nghal a, Ahmingi pawh chuan a zui phei ve nghal a, kal ve lo se ka tih teh reng nen. Min rawn bia ang tih chu ka hlau khawp mai, ka kut tin chu ka sik neuh neuh a ka thaw tha ngam lo bawk








Ka tukhum leh hnungzang zat mer mer danah chuan min lo en tih ka hre thei a, ka thin phut ran ang hu in amah chu ka hlau ru deuh tlat leh nghal; rei pawh rial lovin Tluangzeli chu a rawn phei leh vat a, "Tui deuhin i ei dawn nia" ti a duhsakna a hlan leh zet hnuah ka bulah chuan thu in amah en thei tur ang chuan a thu rem nghal sauh sauh bawk a







Mit la lek lovin ka hma mi lah chuan a en leh nghal a, a khawilai saw nge tha a tih pawh ka hre ve lo; Tluangzeli awmdan chuan ka nuih a tiza, ti khanglang ve teh ang school ka laia star ka neih ve thin lai te chu min ti hrechhuak a, ka lung a tileng khawp mai; khang lai kha chuan ka nun kha a la nawm mai bakah ka duh dan ang takin hun ka hmang thin







Engnge kan ei ang a, engtin nge pawisa ka thawh chhuah zel ang tih ngaihtuah a la ngaih loh hun lai kha a ni a; mi hausa tak chu ni lo mah ila khang lai kha chuan ka duh ang zawng kha chu ka nei ve zel thei thin tlat a ni, chupa chuan a ei zawhah a eina man pe in canteen chu rei pawh awm lovin a chhuahsan leh ta nghal a







A chhuak chiah chu Tluangzeli chuan, "Awi a van pa chiang tak" a biang pahnih dawm meuh chuan a ti a, ka lo nuih hak hak thung. Tunah chuan star chu sawi loh ngaihzawng pawh ka ngaihtuah hman lova, ka pa thachhang dawltu ka nih avang leh kan chhungkua chu ka kuta an awm ve tlat avangin heheu takin ka nun ka hmang ve thei lo bawk







Office ban a hun tawh dawn avangin ka thiante chu ka kalsan a, vawiin chu pu berin haw lova amah chu nghak tura min tih avangin ka haw hma thei dawn lova; a haw tlai dawn chuang lova a room chu tifai ve nghal tura min duh vang pawh a ni mai thei, mahse ka hnial hran lo a chhan chu ka hlawh min pek belh kha a tha hnem ve bawk em vang a ni







Midang haw hnuah ka theih ang ang chuan ka phiat nghal a, midang ho awmna ka tihfai zawhah ka thiante chu hmuh lawk tha a ka hriat avangin an awmna lam pan chuan ka kal hmasa leh te te a, an bula ka thlen chuan, "Vawiin chu ka haw hma thei dawn lova" ka ti a, "Pu berin a phal leh tawh nange" Ahmingi pawh chuan a lo ti ve vat a







"Awi a duh duh hunah hian hepa hi a inti thu a maw tih mai tur a ni" Tluangzeli pawh chuan a lo ti ve nang nang a, ka lo nuih liam san mai mai thung, "A rei dawn chuang lova, a room phiat nghal turin min duh a niang" tha tak chuan ka ti a, lu lo buk dun nghat nghat pahin, "Keini pawh hei hi kan tifel ang a kan haw thei a nimai, nangpawh i haw kawngah fimkhur la aw" Ahmingu zawk chuan a ti a







Chhunzawmna....















Rei pawh nghak lovin pu ber pawh a haw ve nghal mai a, ka tih tur ang chu hmanhmawh zetin ka ti nghal sawk sawk a; ka zawh veleh awm khawmuang tawh lovin ka haw nghal a, Tluangzeli'n a sawi tawh angin ka vel chu ka mit sir pah zeuh zeuh reng a







A hrim hrimin a lungawi thlak chiah lo bawk a chutia min zui haw ziah pawh chu ka duh lo lutuk a ni, drug addict leh nghal tihian awm reng se nakinah eng thil tha lo nge ka tawh ang tih pawh hriat loh; min zui leh a nih chuan hauh chu ka tum rilru viau mai a, chhungrilah thinrimin han in hrosa ve teuh thin mah ila ka rilru a nawm loh hma thin avang hian tumah tawngkam chhia emaw vin hi ka duh ngai lo







Mahse tun tum chu ka tum chiang a ni, hetiang reng reng chuan tha pawh ka ti lo ka nun chu a ti chep zawkin ka hria a; hahdam takin hun pawh ka hmang thei lo. Tunge min zuitu awm tih kan hriat a nun thlamuang tak leh nuam taka hmang thei awm reng ang a ni







Eng emaw chen ka kal hnuah min zuitu chu an awmin ka hre lova, Tluangzeli sawi vang kha nge maw ni ka ngaihtuah chhunzawm zawk pawh ka hrethiam lo; keimah leh keimah chuan ka nuih te chu a ti za viau a, mahse a awm ang lo ka ti hle bawk. Mahni chuan ka khi leh sak thin a, chutianga ka lo ngaihtuah pawh chu thing ka in ti ang reng viau mai






Kawng khawhar ka kal lai chuan hnung lamah ri rek rek ka hria a, ka hawi lahin hmuh ka nei lem lo; khua a duaiin nidang zawng aiin chulai hmun chu a reh ta emaw tih mai tur a ni a; tlem chuan hlauhna in min man ve bawk, mahse ka kal ngaiin ka kal reng a ka hlauhna lo awm tan mek chu tih reh ka tum viau bawk







Mipa aw thian ri ka hre leh zeuh thin a chu chuan min ti hlau leh zual niin ka hria a, ka hawi leh zuk thin bawk; ka kal dan chu thlakin a hma ai chuan ka kal rang ta zawk a, tlan chiah si lovin ka kal chak tulh tulh bawk, a tawp nan ti a hnung lam ka hawi leh chuan ka hmuh duh ka ti dawn nge ka lo rinhlelh chu ka hmu ta chiah







Ka thaw huai theiin ka hria, ka lo hah ve hman em em a hlauh ai mah chuan ka nuih a zat zawk bakah ka thinrim lek lek bawk; a chhan pawh hlauh hlawpin min siam lo chauh zawk a, dingin ka hnunga mipa chu min lo zui rengtu chu ka melh nghal kiau a







"Tinge min lo zui" ka ti nghal tawng bawk, min chhang lova ka awmna atanga hlam hnih vel lekah dingin a kekawr ipte chu a kut pahnih a zen bawk; "Min lo zui tawh suh" ka ti leh tawl a, mahse min la chhang ta chuang lo, hahthlak tih hmel zeta enin thawk ka la kawk ringawt a







A lan danah chuan kan inbe tawng zo dawn lo a nih hmel viau mai, "Min lo zui tawh suh" sawi tur ka hriat tawh loh avangin ka ti nawn leh ringawt a, min en vang vang hnuah dar chhin uk pahin a nui zui suk bawk; a awmdan ngeng zet avang chuan ka ngei viau mai, a tawng duh bawk si lo chu tih ngaihna hre lo zeta inherin ka kal chhunzawm leh ta ringawt a







Ka thusawi chu ngatan mah a ngai lo tih hriat zetin min zui chhunzawm leh tho, min lo zui ve ringawt chuan ka pawi a sawi hran pawh a ni lo mahse min zui lo se ka ti ber; a chhan pawh thlamuang tak a ka awm theih loh vang a ni ber, ngawi rengin ka hnungah chuan min lo zui ve zel a ka kal dan te chu a tibuai vek tawh ni berin ka hria







"A mak e, min zui tawh suh ka tih che kha" ding thutin a lamah chuan ka inher nghal thut a, a phut awm ka hre lo mahse a mitmengah chuan chutianga ka awm thut avang chuan a phawk ve chiang khawp mai, "Buaina ka siam lo che" a ti bul hmuk a, ni e buaina chu min siam hauh lo mahse min zui avang khan thlamuang takin min haw tir thei lo zawk a ni








"Mahse ka duh hleinem" ka ti leh ringawt a, a lo nui duh lek chauh leh nghal. "Engnge ka lak atang hian duh i neih, pawisa a mi?" Ka ti leh ta tawp a, min zui chhan ka hre bawk si lo, a hmel atang chuan a hausak hmel viau a ka pawisa duh vanga min zui a nih chiah chu ring lo mah ila ka zawt ta tho, min chhang lovin lu min thin khum ringawt a






Hahthlak ka tih chi zawng tak a ni, biak tawng hleihtheih bawk si lo chutah lah min chhan dan lah chu ka duh khawp lo em em mai leh nghal a; "A nih chuan engnge duh i neih?" Ka ti leh hram a, a ngawi rei lutuk a min chhang tawh dawn lo a maw ka tih hnuah a aw chu a rawn thian ta kharh kharh a






A duh a sawi hun nghak chuan ka lo en ve reng bawk, khang mite kha chu nise ka hlau leh hman viau tawh ngei ang mahse a ni hi chu a danglam tlat; a chhan sawi tur em em pawh hre lovin hlauhna ka nei miah lova, khang mite ho ai kha chuan nelawm loh zawk fe mah se hlauhna tur ka hmu lo zawk a tih theih ber ang chu







"Ka duh ka sawi chuan min pe thei dawn a mi?" A rawn ti ve ta hram a, ka pek theih leh theih loh tur chu hre thei lo mah ila min zui reng ai chuan a dub pek chu ka duh zawk ngei ang; "Aww...sawi la, engnge i duh chu?" Tlemin ka tawngka chhuak chu a bam deuh charh a, a sawi nghal dawn a maw tih laiin a ni lah chu a ngawi chhunzawm leh daih bawk si!








"Sawi la" a hma ai deuh chuan ka pawr leh ta zawk a, "Min pe thei lovang" ti supin ka nui leh suk bawk, engnge hepa hi a awmzia pawh ka hrethiam tawh neih nuaih lo; min zui chhan a sawi duh loh mai bakah a duh pawh chu a sawi leh duh chuang bawk si lo, "Ka pe thei dawn lo che tih i hriat chuan mjn zui tawh suh" ka ti leh tawl a







"Kha kha chu ka thu thu" ngeiawm zeta tiin a lu a hiat pah nauh nauh bawk, a va han ngeiawm thin mai mai tak; ka thinin a tuar dawn ngang a ka hriat loh avangin thawk lak khum hluai pahin ka inher leh nghal vut a, ka kal nghal nal nal bawk. Min lo zui leh zui loh pawh ka ngaihtuah buai peih tawh lo nachungin ka thusawi engah mah ngai lo tih hriat lutuk a min la zui tho avang chuan ka inhum ruh nghek ringawt leh nghal







"Tunlai chu i lo haw hma thei riau mai, in pu in haw hma a phal a mi?" Inchhung ka luh rual rualin ka nu chuan min lo zawt nghal a, lu buk khum nghauh pahin, "Aw, tunlai chu hnathawh tur a nei vak lo a niang" ka ti tha ve mai a, "Va intifai rawh, thingpui kan lo siam ang e i nau te pawh koh haw an ngai leh tep tawh ang" a lo ti nghal zat zat a







"Khawnge?" Ti a ka zawh chuan, "Birthday naah an kal a, an leng tlang nghal a ni ang" tha tak chuan a ti ve mai a, ka nau te chu ka dem hran lo thian kawm ho rual an la nih mai bakah thiante ina len chak lai hun a la ni a mahse ka awm lo a nih chuan ka nu a buai thei em em a, ka nu lah hian ka nau te hi a tan thei ropui mai leh nghal







Birthday naah chuan kal rawh se pawi ka ti lo, ka awm loh chhung reiloteah hi chuan ka nu lo pui ve thin se ka ti; an la naupan bakah an rilru pawh a la puitling lova puih te chu pui ve thin bawk mah se ka nu hian a duat lutuk a, len an chakin a len tir zel a, an tih theih tur ang pawh a lo tih sak vek thin avang hian ka thin an ti rim thin







"Puih i ngai lo a mi?" Bul zeta ka tih chuan, "Tih tur em em pawh a awm hleinem" nui sangin a ti leh a, nu dang tam tak chu nise an phun leh viau tawh chuan ka ring a ni; mahse ka nu chu a ni ve lo, phunna tur hi a hre lo zawk a maw tih theih mai tur hi a ni a, "Ka pa a tha em?" Ka ti leh a, lu min buk khum pahin, "Vawiin chu kan tha" a ti leh a







Chhang tawh lem lovin room lam ka pan ta nghal a, ka inthlak zawhah ka nu pui turin ka chhuak phei leh nghal a; ka pa pawh an room atanga lo chhuakin thingpui kan in tlang a, "Pa ka nu hi hrilh teh, ka nau te hi a duat thei lutuk. Tihian amahin engkim a ti vek zel a, a hah phah vak zel a, ka nau te hian eng emaw chenah puihna chang hre ve rawh se" ka pa bulah chuan ka ti nghal hlak hlak a







"Ka sawi ve bawk alawm, a tih duh loh chuan a tuar zel ang a nimai" nuih suk pahin awlsam zet chuan a lo ti than a, ka awih teh hrep love a; "Ka nau te hi in tan thei bik lutuk" tum bur chuan ka ti leh a, chhungkaw enkawltu leh chhungkaw pa ber chan chang mah ila nu leh pa te bulah hi chuan a lo puitlin tak tak theih dawn loh a nih hi







Pangchan leh rilru no a neih loh theih lova, tha hnem ka lo ngai thin lutuk leh ka nu leh pa te ka ngaihtuah luatah an mahni ai fe chuan ka lo hah zawk thinin ka hria; ka ti tawh lovang ka tih pawh hian tha hnem ngaih luatah ka lo ti leh vak thin a, han sawi ila an ni ho lah chuan an lo ngai thutak lo thei ropui thin bawk nen tul lohah ka chil per ka seng thlawn hi a ni ringawt







"Buaithlak" ka ti leh hluai chu ka nu leh pa te chuan min nuih ringawt a, "I rilru tur chu kan hriatthiam pui che lawm, i nau te pawh min pui lo bik an ni lova school an lo bana homework te an tih zawh tawh hi chuan an tih tur kan hrilhte an tih zawh vek hnuah chauh alawm ka len tir thin. An ni chu naupang mai an la ni a, tha tak tak a la chhawr chi an ni lova, an nun kan hren sak leh lutuk chuan nuam an ti bik nang" ka nu chuan dam thluamin a ti a







"A nih chuan hna banah ka leng kawi ve ziah tawh ang" ka tih leh chuan nuih hak hak pahin ka nu chuan, "Len te chu i leng thei reng alawm, i duh duh ti turin zalenna i nei mahse i duty hre hmasa phawt la i tih zawhah i leng duh a nih chuan i leng dawn nia" a ti leh chuan keimah zawk chu ka inthlahrung daihin ka hria







A thusawiah chuan engmah dik loh lai a awm lova, ka nu hi mi fair tak leh dikna ngaina mi a nih avang hian a zahawm ka ti thin; ho lam mai maiah min hau ngai lova, a thinrim khat viau bawk, thu tha min hrilh reng mah se a nazawngin a sawi ngai bik lova a sawi tawh chhunah erawh chuan hnial ngam chi a ni ngai lo







Ka pa nen pawh hian an rilru a in ang em em a, nupa inhmeh tak zawng chu an ni ve chiang alawm; duh chuan an pu ten an thlem lai khan eiru ve thei reng a ni a, hausa takin mi te angin duh duh pawh kan nei thei ang mahse ei ruk ai chuan kan khawsak ve theih naw naw a, eitur kan nghei phah loh phawt chuan chu chu a duh zawk







Thingpui kan in zawhah ka nuin ka nau te chu an lenna atanga ko haw tura min tih avangin peih lo zet chung chuan ka nau te ko haw turin ka chhuak a, an lenna ina ka luh ruala ka thil hmuh avang chuan phawk lutuk vangin leiah ka tlu lo chauh a ni; engnge helai hmunah hian a tih ve? Ka nau thiannu nu te nen hian inhriatna an nei zawk a maw ni, tum loh deuh deuhin ka hmu reng mai







[Dawhthei takin min lo chhiar ve zel ula, chuan ads click, like leh comment kha min tih sak leh hram ula min lo chhiar sak thin avangin ka lawm lutuk a nia]

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 16th, 2022, 1:14 pm

CHAPTER-5





"Nang maw!??" Mak ka tih em avang chuan ka ti a, midang ho pawhin min lo en ve thup nghe nghe, "Aw keimah" nui sukin a ti a, mahse engnge ka hriat tehreng ni pawh ka hre lo tun tum a nui hmel chu a pa ka ti tak zet. Ni lo, ni lo chutiangte engtia ngaihtuah thei nge maw ka nih le







"A û Hlimhlimi, putea hi i hre ve mi" Tetei chuan a ti a, ka nau te ko tura kal ka ni tih ka inhre veleh chiah bawk, ka nau en chung chuan rang fahranin lu ka thing nawk nawk a; leh lam atang chuan nui hawk ri ka hre zui zawm nghal zat bawk, "Ka lo ko haw tawh dawn che u a" nuih sak pahin ka ti a







Rawn kal ta nghal mai lovin an thian thum chuan an inbe khawmuang leh rih thin a, ning tawh viau mah ila haw tura lo tur ve chhen lah mi inah leh nghal a mawi bawk si lo; chutah lah nise ka sira ding ve reng mipa in mit la lek lova min en reng avang chuan ka awmdan chu ka sawithiam lo, a buai nuai tawh a, ka ding mai mai thei tawh lo a ni ber







A chang leh ka ke ka per a, a chang leh ka kut te chu hma lama ka suih loh leh hnung lamah ka ti tawn chhen bawk a; chungte chu a lawmah a tla a ni chek a niang chu a nui leh hawk ri chu ka hre thin a, va melhrum hrep a "Min en tawh suh" tih te chu chak viau mah ila melh chu sawi loh a lam pawh ka hawi ngam der lo chu a nia buaithlak hian!







Eng emaw chen an inbiak hnuah, "Lo leng leh ru aw" Hlimhlimi chuan a ti ve thei ta hram a, ka nu te pahnih pawhin lu buk khum nghat nghat pahin an len leh tur thu hrilhin kan in lam pan chuan kan haw ve thei ta hram a; pawn kan chhuak chiah chu ka thaw huai theiin ka hria, engtin ka awm vak hre lo mah ila inchhunga ka awm lai khan ka lo tang nasa viau tih pawn kan chhuahin ka hre ve chiah







Ka nau te pahnih chu kan tawng dun malh malh a, "Û Hlimhlimi putea kha i hre ve a mi?" Noi chuan min rawn zawt leh kher a, lu thin khum nar nar pahin, "Hre love" tih ringawtin ka chhang a, an awih hmel viau loh a ni ngei ang, "Mahse hriat hmel deuh khan i awm bawk sia" zawhna ngah tih hriat zet chuan a ti leh a







"Ka hmelhriat a ni a maw ka tia" za lo lutuk a nuih hak pah chuan ka ti a, "Kan len apiangin alo awm ve thin a, a fel thei lutuk Hlimhlimi te ho nen thil min lei thin a" Tetei chuan a rawn tih zawm ve nghal zat bawk a, engvanga khapa chanchin kha sawi nge maw an nih le? Ka ngaihthlak peih loh lam zawng tak a ni leh nghal, "ûNono tunge a hming kha?" Tetei chuan a la ti tak deuh deuh leh nghal a







"Pa Samuela" a tih chuan ka nuichhuak hak a, ka nau te pahnih chuan mak ti lutuk leh hrilhhai hmel zet chuan min lo en dun nghal zat bawk, tlangval ve pui "Pa" ti a ka nau ten an koh chu ka nuih a tiza viau leh nghal; "Tinge i nuih?" ka nau bawk chuan a ti leh a, "Thil ka ngaihtuah a" tiin ka chhang daih thung







In kan thlen rualin ka nu chuan chaw ei a peih tawh thu sawiin ka nau te chu chaw ei siam turin a lo tir nghal a, thuawih takin an ni pawh chaw ei siam turin choka lam an pan nghal a; kei erawh ka awl hlauh thung. Thuthlengah chuan thatchhe zeta thut thlak pahin tih tur awm loh em avangin phone chu ka khawih pah mawlh mawlh a







Kan kawngkhar chu tu emaw in a rawn kik avangin ka nu chuan hawng turin min ti a, ka thutna atanga tho chhuak talh talhin kawngkhar lam chu hmanhmawh lo zetin ka pan phei a; eng thil nge ni leh ta ngai? "Nang leh bawk maw!???" phawk lutuka ka en mek laiin, "Enga tinge khatah i din reng, tunge lo kal a?" ka nu chuan min rawn pan phei pahin a ti a







Chupa lah chu a nui suk duh lek chauh leh nghal, ka nu a lo thlen takah chuan min en tawh lovin ka nu chu a en ta zawk a, "Nonoi te unau khan hei hi an theihnghilh a" rawmawl hlai zet chu rawn phawrh chhuakin ka nu chu a pe nghal a, hetiangte hi ka nau te hian an neih ngai pawh ka hre lo







"Chu an lo tir vang vang che nimaw, a va zia thin ve" ka nu chuan nuih sang pahin inthlahrun hmel zet chuan a ti a, "Inthlahrunna tur a awm lo, hei chaw eikham walk pahin a remchang em a" tha takin ka nu chu a chhang veleh mai bawk a, an in atanga kan haw na kha a la rei loh teh lul nen engtin nge chaw chu a lo eikham leh hman bik pek!







"Lo thu lut ve la" ka nuin a tih chuan lu thin nawk nawk pahin, "Ka kal leh zawk ang e" a ti a, kal vat vat se ka tihna hi a rei tawh lutuk a maw, chutia lo lut lova a kal tur thu a sawi pawh chu ka lawm hle ringawt a ni; ka eng pawi a sawi awm hre lo mah ila min lo zui haw thin avang hrim hrim pawh khan amah hi ka ning ka ti dawn nge ka ti thei lo ve tawp







A kal liam chiah tihah Tetei chuan chaw a ei theih tawh thu a rawn sawi a, keipawh choka lamah ka phei nghal a, "Nangni pahnih hi in lennaah thil theihnghilh ringawt thin su" kut sil mawlh malwh pahin ka ti a, "Engnge kan theihnghilh?" Noi chuan bangbo hmel zetin a lo ti let ha leh nghal







"Rawmawl in theihnghilh a, Hlimhlimi putea khan a lo dah alawm" ka tih chuan, "Chutiang kan keng lo hrim hrim" uar fein Noi bawk chuan a ti leh a; "Nia dik chiah" Tetei pawh chuan a û thusawi pawmpui zet chuan a lo ti veleh a, an ta a nih si loh chuan tinge an theihnghilh thu sawi a a rawn dah si ni! Ka buaina tur chu awm hauh lo mah se a mak ve thlawt alawm






Chaw ei laiin ka nu chuan a rawn sawi veleh a, ka nau te chuan an ta a nih loh thu chu uar fein an lo sawi dun bawk; "Ni lo se a rawn dah lovang, chet fel tur ka tih thin kha mi ina kan len pawhin kan haw hmain theihnghilh kan nei em tih kan in check hmasa phawt thin tur a ni; rawmawl mai mai mah nise an rawn dah vang vang a, mi kan tih buai phah a nih kha" ka nu chu a inthiam lo tih ka hrethiam thei mai a







Nu inthlahrung hma chi a lo ni vei bawk nen ka nu sermon leh na tur kan siam sak hi a ni ringawt, chaw eikhamah kei chu room ah ka lut tlang a; ka nau te pawh chuan min lo zui lut ve nghal zat bawk, "A û kan ta a ni lo tak tak a nia, dawt kan sawi miah lo. Rawmawl pawh kan chhuah dawnah kan keng lo hrim hrim" Tetei chuan a ti nghal zat zat a






Ka lo nuih liam san mai mai thung, "Engpawh chu nise khatianga tih ngai khan awm tawh miah loh tur aw" tha taka ka hrilh chuan lu min buk khum dun nghat nghat a, engdang pawh sawi lem lovin room atang chuan an inzui chhuak leh nghal a, thilsual titu a puh hi an duh ngai lova; an tihsualah a nih loh phei chuan an tang nasa ve thin lutuk leh an intan dun thin lutuk hian ka nuih a tiza zawk thin







Vawiin hi sawrkar chawlh a nih avangin hna kal a ngai lova, mut pawh ka mu rei reng bawk a; vawiin chu ka tih hman loh te tiin chhung sekrek khawihin hun hman ka tum viau a, ka veina a rei tawh bawk a ka duh ang thana tihfai chu ka tum ruh ve hle thung. Ka phone a rawn rik ral ral avang chuan phak chuapa mengin phone call lo kal chu ka chhang a







"Zual, ka nu damdawi inah kan kalpui a" hlauhthawn hmel tih hriat zetin Ahmingi chuan a rawn ti a, "Engthil nge thleng?" Ka harh deuh zawtin ka hria, "Nizanah khan a thaw a rawn hah a, a pum a na bawk a, damdawi te ka pe a a zia veleh mai a mahse tukinah khan a rawn awm leh a" a aw pawh chu a tham tiak a, a hlauhthawn mai bakah a la buai tih a hriat theih viau mai







"Khawi damdawi inah nge in awm?" Tiin ka zawt a, min hrilh hnuah ka kal tur thu ka hrilh leh zet hnuah kan inbiakna chu ka ti tawp a; Ahmingi hi a nu nen chauh an awm dun a, a pa pawh a hre lo a nih hmel. Ti hian a theih ang angin a nu hi a enkawl thin a, a nu lah nu hrisel lo tak a lo ni vei bawk nen a hah thin zia hi ka hriatpui ve a chuvang chuan damdawi ina kal chu ka tum bawk







Tih tur ka lo in ruahman lawk nasat teh reng tih loh bawkah ka tlak leh dawn a nih hmel viau mai, Tluangzeli chu ka call nghal a, a ni pawhin Ahmingi te chanchin a lo hriat tawh thu leh min lo biak a tum mek thu chu a sawi ve bawk a; kal rual tura kan in tih hnuah phone chu dahin intifai turin bathroom ka pan ta nghal a, Tluangzeli hi chu kan thian ho zingah pawh awm thei ber an ni a






Mahse lehkha a zir peih tawh loh avangin Ahmingi nen intiam rualin tihian thingpui dawr an hawng ve a, a capital zawng zawng tumin Ahmingi kutah dawr hi a dah thung; a chhan pawh an chhungkaw khawsak dan a hriat vang a ni ve pakhat a, an inhralh chhuah atangin a chanve ai tlem hret chu a hlawh ve thin bawk







Chaw ka eikhamah ka insiam sa tawh avangin damdawi in kal tur chuan ka chhuak a, ka nu pawhin awmpui a phal bawk a; vawiin chu nilengin hun kan hmang leh dawn a nih hmel viau mai. Innghahna tur hmun kan sawia ka thlen chuan Tluangzeli pawh nidang lo ang takin a lo awm ve ran tawh a, tawi khawmuang lovin damdawi in lam chu kan pan dun ta nghal a






Kal lamah chuan Ahmingi leh a nu a khawngaih thu te chu a sawi a, dam leh se a tih thu te nen lam chuan a sawi a; keipawhin ka pawmpui khawp mai, nufa chauha awm an nih avang hian an inngai dun em em a, a hranin thil an ti mang ngai lova Ahmingi hian a nu hi a ngaihtuah em em a, a thiam dan ang angin a enkawl bawk






A nu leh zelin a kalsan a nih chuan a mal dawn viau leh nghal a, a pa lah a hre bawk si lo nen ka khawngaih em em a; a nu lah a hrisel lo bawk nen eng emaw thil ho teah hian a dam lo leh vak thin a, a nu damdawi man leh an in entirnaah hian pawisa an seng hnem tawh em em bawk a, tuna an dawr siamah ringawt hi chuan pawisa an indaih loh avangin khangtiang thil pawh kha ti a ni reng bawk a







Mi tam tak chuan an virgin tawh loh avang ringawtin tenawmah ngaiin an duh lova, misual thenkhat phei chuan hmuhsit nan an hmang thin; engvanga chutianga awm chu nge an nih an ngaihtuah ve tawh thin si lova, tam tak chuan an duh vang ni hauh lovin thlan tur dang an hriat tawh loh vanga ti an ni a







Khawsak dan leh awmdanin zir se chuan an tih a ngai kher bik nang, KS tam tak pawh hi KS an nih avangin kan hmu khawlo nghal ringawt thin a; engvanga ti nge an ni tih kan hriat loh vang a ni chawk, thenkhat chu rethei ve tak tak inhlawh dawn se an hlawh khan an chhungkua an chawm zo thin si lova chutah lah an hlawh a chhiat phei chuan rilru a hah ve duh thin hle







Chuvang chuan mi hi an lan dan ang ngawt a teh hi a tha ber lova, an lan dan a kan teh fo a nih chuan tumah hi fel famkim kan awm dawn lo; rawngbawl mi a pawn lam lan dana zahawm leh fel em em ngaihsan tlak viau ni si kha a chhungkuaah chuan misual tak, thinchhe tak leh nupui fanau te sawisak ching mi, inchhung awm ti hrehawm khawpa a awm leh si a nih chuan ngaihsan tlak a ni lova






Kan lan dan ang ngawt hian mihring te hi kan awm vek kher lova, mi chanchin chhe lai kan hria a ni pawhin midang hrilh ve zel kha a tha ka ti ber lo bawk; a chhan chu midang kan va hrilh khan keimahniah hlawkna pakhat mah a awm lova, ngawi renga mahni mawng hlim ang kan ni, chuvang chuan mi kan hrechiang fe te a nih chuan an lan dan ang ngawt a teh hi tha ka ti lova chu chu ka ngaihdan pawh a ni bawk







Damdawi in kawt kan thlenin luh dawnah Ahmingi chuan min lo hmuak a, Tluangzeli nen a min hmu dun chu hahdam huai hmel a pu in ka hria; "Tunah engnge a an?" A bul kan thlen rual chuan ka zawt nghal a, min chhang mai lovin thawk a la ham ham a, "Engvak chu a ang lova, mahse zing lam ai kha chuan a zia tawh lutuk" min rawn biak lai ai kha chuan tlemin a aw pawh a zia vet ta deuh







"Khawnge a awm a?" Tiin ka zawt leh a, ICU a awm thu min hrilh hnuah chumi lam pan chuan kan inzui leh a, Tluangzeli pawh nidang lo ang takin vawiin chu engnge maw a hriat teh reng ni; a tawng mang lo ve teh tlat a, a nui leh sak thin tih loh chu eng emaw kan sawi a min rawn chhang leh thin tih a ni mai a, a tawng tam lo ve khawp mai







Nu Ziri chu ICU a awm tlat vangin tih tur em em phei chu a awm hauh lo leh nghal a, tawng rin an phal lo bawk nen a ninawm tepin ka hria; a tu a te mah chu tawng peih kan awm lo a maw tih mai turin thu ho reng siin kan ngawi deuh thuap a, tawng hmasa bertu nih pawh a inthlahrun thlak lek lekin ka hria







Ka mawng a kham tawh em avang leh ka nin deuh tak hlek avangin zun ina ka kal tur thu sawiin ka thutna atang chuan ka ding a, ka thiante chu zunin a ka kal tur thu hrilhin ka kal leh ta nghal a; helai damdawi inah hian ka vawikhat kalna a nih avangin zun in awmna lah chu ka hre lo leh nghal a, zawh tur an awm mai bawk si lo nen ka duhna lamah chuan ka kal mawl tawp a







Engtin tin emaw ka kal kual ka kal kual hnuah zunin awmna chu ka thleng ve thei ta hram a, a chhuah tawh em avangin hmanhmawh zetin ka lut nghal a; toilet ah chuan lut tlangin ka zung chiah chu ka thawl nghal huaiin ka hria, zun insum hrehawm zia chu tute pawhin an hriatthiam ve ka ring







Ka phing puar teuh tawh pawh chu a thep suai suaiin ka hria, ka zung zo ka chhuak mai tur chu mipa tawng ka hriat avangin chhuak leh ta lo chuan ka awmnaah chuan ka awm ta leh rih a; engnge an sawi chu hre lo mah ila engvanga mipa lo lut ve nge an ni tih erawh ka hrethiam lo chiang kher mai







An chhuak ta maw tihah chuan ka chhuak ve ta nghal a, toilet pawh ka chhuah fel san hma hauhin mipa dang ho chu an rawn lut leh a; a lo lut apiang lah chuan mak tih hmel zeta min en hnuah nuihzat hmel tih hriat lutukin an nui leh tut tut thin a, chutianga an awm chhan lah chu ka hriat loh mai bakah ka bangbo viau leh nghal pek a






Keia lah pawh chu chhuak ta mai lovin ka dinna ngaiah chuan inthlahrung zetin ka lo ding ve reng a, ka lam panin mi pakhat hi a lo kal a; nuihza insum tih hriat zetin min en pah bawk, "Thiannu hetah engnge tih i tum a" ti a min zawh chuan, "Ih... Ka zung a" zawi deuh taka ka chhan chuan chupa chu a nui hawk a, a ngaihna hriat loh hmel zetin ka lo en ha thung







"Helai hi chu hmeichhe zunna tur a ni hleinem, pawnah khan a in tar vek kha i hmu lo ni maw" a tih chuan zah lutuk vangin ka sa nghal pap papin ka hria, chupa pawh chu ka en tha ngam tawh lova hnuai lam ka bih nghal ngur bawk; "I zung dawn chauh nge i zo tawh?" Tiin min zawt leh a, helai hmunah hian ka la awm reng tih ka hrechuak leh chiah bawk








"Zung zo tawh" ka tih rual deuh thaw chuan hmanhmawh zetin ka chhuak nghal a, ka kal hmain toilet hmaa an thil tar chu ka en leh hram pek a; mipa zunin tih sign a lo awm va ka hmuh chuan zah lutuk vangin ka khu nghal chem chem ni mai hian ka hria, "Damlo i kan ve a mi?" Chupa bawk chuan a rawn ti leh a







Engtik laiin nge ka bul a lo thlen leh hman pawh ka hre lo, "Aaa....aw, a ni deuh mai" bah zet a ka tih chuan lu a bu ve nghut a, "Keipawh dam lo ka kan ve tho a" a nelawmin ka hmelhriat la ni lohah chuan biak a nuamin a fel hmel ka ti tak zet a, thui pawh kan kal hmain, "Helaiah hian ka pensan ang che, chuan i zun hmain sign kha en hmasa thin tawh la aw" nuih hawk hawk pah chuan a ti leh kher a







Sawi chhuak kher tawh lo mah se pawi ka tih loh teh reng nen a sawichhuak leh kher chuan ka zahna a tizual leh ni berin ka hria, a kal hnuah keipawh ka thiante awmna lam pan chuan ka kal veleh nghal a; an bul ka thlen rual rualin ka rei thu leh khawiah nge ka kal kawi tih te chu min zawt a, ka chet chhiat zia leh ka thil tawn velte ka hrilh chuan an pahnih chuan ICU bula awm kan ni tih theihnghilh thak khawpin min nuih a






A hunlai khan zak viau mah ila ka thiante mood erawh ka siam tha hle thung niin ka hria, ka zei loh vang nge pawh ka hre lo ka awmna hmun apiangah leh ka thil tihna apiangah hian ka che chhe thei em em a; ka tluk loh leh eng emaw ka tih chhiat tal loh chuan ni hi ka hmang zo thei lo ni berin ka hria, ka tum vang ni hauh lo mah se kar khatah vawikhat tal chu che chhe ngei ngei ang ka ni







Duty lo kal chuan ka thiante pahnih nui ring lutuk chu a rawn khap a, nui ring ngam bawk si lo insum nasa lutuk chu hmui hup meuhin ka thil tawn avang chuan min nuih a; an insum nasa lutuk chu an nui vawih leh that thin a, thinrim ai mahin an awmdan chuan ka nuih a tiza veleh chhawng a, a tirah tawng tur tumah kan awm loh vei nen kan awmdan chu a zia tawh phianin ka hria







Nileng zankhuaa in awmpui theih ni hawt si lo chu tlai thim tepah chuan kan haw san a, in lama buai ve ve kan ni bawk a; kan haw lo thei lo bawk si chu kan haw dawnah Ahmingi chuan a hreh ve hle tih a hmel atangin a hriat theih a, mahse nui hmel a pu thung, "Nilengin min awmpui a, in buai dawn tehreng nen ka lawm lutuk a nia" tiin lawmthu te chu a sawi leh luam a







"Thian alawm kan nih chutiangah inthlahrunna tur a awm lo, min mamawhna i nei a nih phawt chuan min rawn be hreh lo la" ka lo ti ve a, "Ni e, engtik lai pawhin pui tur che in kan awm a nia" tiin Tluangzeli chuan a rawn tui hnih ve bawk. Eng eng emaw kan sawi leh teuh hnuah kan haw san ta a, veng in ang lo na na na chu haw hran leh tho kan ngaih avangin Tluangzeli nen pawh chuan kal dun rei lovin kan inthen hrang leh ta nghal a







Haw kawngah lah chuan chhuna ka thil tawn ka ngaihtuah chhuah apiang chuan ka zak lutuk chu mahni leh mahni kan inbeng leh nawk nawk thin a, awmzia erawh a awm thui viau lo khawp mai; khapa kha a fel ka ti khawp mai, tunge a nih ka hriat loh ang bawkin a ni pawhin tunge ka ni tih a hre bik lova nga mahse chuti chung chuan a hmelhriat tha ang maiin min be thei a nih kha








Horn pe tuar hi ka hriat avang chuan ka kal lai chu ka ding chawt a, ka phu nasa bawk nen motorin min su dawn a maw tiin kal chhunzawm ngam tawh lo chuan la ding reng chungin mit ka chhing ta ringawt a, "Lo chuang rawh ka lo thlah ang che" mipa aw thum dutin a rawn tih takah chuan tunge tih hriat tumin ka mengchhuak leh nghal vat thung








Mahse ka hmel hmuh avang chuan ka ner nghal sawk a, "A ngai lo mai" mawi lo taka chhan chu ka duh bik chiah loh avangin a mawi hnai thei tur ang ber chuan ka ti a, motor chhunga mi chuan min en reng chungin a mit ko min san khum ralh duh thung, ngaihsak tawh map lovin ka kal nghal nal nal a, engtik laiin nge ka bul a lo thlen tih leh motor atang khan engtin nge a chhuah hman pawh ka hre lo








A chhan chu thawm ka hre lo tlat a ni, "Ka thlah ang che" a tinawn leh sup a, "A ngai lo ka tih chu" bak hlarin ka lo ti thung mahse ka thilsawi ve te chu enga tan mah a ngai lo tih hriat zetin ka kut chu ka inrin hma hauha rawn chelhin a motor awmna lam chu min pan pui nghal a, motor kawngkhar chu hawngin, "Lut rawh" bul zetin a ti a







Teh tawp thin hian, duh lo hle mah ila min din chilh tlat avangin han kalsawn na tur eih pawh a awm loh avangin tui lo zet chung chuan ka lut ve ta nge nge; ka thu awrh tihah chuan kawngkhar chu dim zeta kharin motor chu kal hualin a thutna turah chuan a rawn thu ve nghal zat bawk, rum fe a ka lo melh laiin a ni erawh chuan min nuih thung







Kan in lam pana min tlan pui laite chuan ka tum bar reng a, tawng pawh ka tawng peih lo; amah pawhin ka awmdan avang chuan min biak a inthlahrung ve deuh a ni ngei ang, min rawn melh leh zuk thin tih loh chu min be bik lova, pawi ka ti lo nasa viau bawk. A chhan pawh ka duh vanga heta thu a chuang ka ni lova, chuvang chuan ka awmdan ang ang a a pawm ve angai tihna a nimai







Kan in kawt kan thlen chuan motor chu a ti ding a, chhuk nghal mai ka tum chu, "Hmeichhia mahni chauha chhuah a tha lo" tih zawng chu a sawi a, min bia nge ka hriat tura sawi ve hrim hrim tih pawh ka hrethiam lo; za lo zeta nuih hak pah chuan, "Chutiang thu min hrilh tur chuan tunge i nih?" Ka tawngkam chu a na mah maha ka hriat bakah a mawi lo viauin ka hria







Mahse tianga a ti reng pawh hi ka duh chuang lo, "Tumah chu ka ni lo mahse ka sawi mai chauh a nia" min vin hrep dawn a maw ka tih laiin aw dam thluam chuan a ti a, ka inthlahrung let zawkin ka hria mahse tih lan kher erawh ka tum lo nasa viau mai; "Lut tawh rawh" a ti leh sup a, a bialnu a maw min ti riau riau a maw ni le hepa pui hian







"Pa Samuel, min thlah avang hian ka lawm viau na chu nidangah chuan min thlah tawh lo la ka duh zawk ang" mawi lo zet chuan ka ti leh a, a ni erawh za tih hriat lutukin a nui hawk hawk thung. A ngaihna hriat loh hmel zeta ka en laiin, "Ka hming hi i hriat dan chu a va lawmawm chiah love" a ti a, a nui hmel hmeltha lutuk chu ka lo en leh vang vang tawh thung








"Kan tha em aw" ang phiau a ka lo en avang chuan mit ko san ak pahin a ti a, vawiin zet zawng ka che chhe reng mai dawn a nih hi; "Ka tha" vin lek leka ka tih chuan a hmel chu a thu tak leh viau tawh thung a, lu min buk khum nghat pahin, "Muttui le" a ti sup a, a aw chhuak chu a rilin a dam ruih bawk. Ngawi teh, ka rilru hi a khawlo dawn tlatin ka hria, lu thin nawk nawk pahin ka lu chu ka beng a








"Buaina a awm mi?" A tih chuan, "Awm lo mangtha" tih leh chhuah chu ka rual nghal a, hepa bula ka awm apiang hian a chhan sawi tur hre si lo hian ka awmdan chu a danglam mai bakah ka lo tang ru teuh zel a; chumai bakah ka thil tih ngai hauh lo tawngkam te chu ka thlah dah viau bawk, engvang nge tih phei zawng hre lo mah ila amah pawhin chutianga tawngkhum chu a phu ve reng a ni ngei ang








Hawi let tawh map lovin in lam pan chuan ka kal nghal nal nal a, inchhung ka luh rual rualin thawk ka la nghal ham ham bawk; ngaihzawng tumah la neilo mah ila khapa bula ka awm ang khan mipa dang bulah ka awm ngai lo, tinge amah a nih vanga khatianga awm ziah nge kha maw ka nih le, hahthlak thin lutuk hian!







Ka nu chuan kan kalna chanchinte chu min zawt a, nuZiri nat dan leh a dinhmunte, ICU a a awm thu te leh ka khawngaih zia te chu ka hrilh ve nghal mawlh mawlh a ka nu leh pa te chuan uluk zeta lo ngaithlain ka thusawi lai kar lakah chuan lu an lo bu dun nghauh nghauh a, "A zia lo thin emai, Ahmingi pawh chu ka va khawngaih ve mawle. Zan mut dawnah i pa nen kan lo tawngtai pui ve dawn nia" ka nu chuan a ti a








Thildang kan sawi leh teuh hnuah inthlak turin an room chu chhuahsanin ka room lam chu ka pan nghal a, ka nau te pawh vawiin chu an lengchhuak lo ve teh mial a ni ang room ah chuan youtube ah thil enin khumah chuan an lo bawk dun a; bia pawh ni ila min chhang tha leh dun dawn chuang lo tih ka hriat avangin an pahnih chuan ka be ta lo law law a







Chaw eia min lo la nghah avangin ka inthlak zawhah ka nau te tir lovin keimah chuan chaw ei chu ka siam a, nilengin ka chhuahsan bawk si a ka inthlahrung ve deuh a tin ni; zanriah eikhamah chuan ka chhungte bulah chuan thu phei ve in an thil en lai chu ka en pui ve a, mahse kei chu tv hi ka lawm lo ve hrim hrim nge pawh ka hrelo







Ka en ve peih vak lova, ka en ve peih chhun chu naupangchhia deuh deuh hi a ni thung; kan en duh a rual lo tlang bawk nen min en pui ve peih ngai loh avang hian ka en tha vak peih lova, chu ai chuan phone a awm a, en chak ka neih chu youtube lamah a full a a awm chuan ka en mai thin, tih lohah hi chuan ka en ve khat khawp mai







Rei pawh thu lovin mu turin room ah ka luh san leh nghal vat a, ka hah zia an hria a chuvang chuan an bula thu turin min tilui bik lo; hna chawlh ni a ina han awm tum ve pawh hian emergency thil hi a awm ve thei ziah leh nghal a, hahdam taka awm ve te pawh chu ka duh ve thin a mahse a theih meuh loh a tih theih ber ang chu







Mut hmunah chuan nichin maia ka thil tawn chu ka ngaihtuah let a, ka duh chu ka ti lo mahse a bula ka awm apianga ka danglam vek thinna chhan chu ngaihtuah chhuah ka tum leh ka hre lo tial tial a maw tih mai tur hi a ni; engvanga ka chunga tha em em nge a nih ka hre lova, chutih rual chiah chuan engvanga ka himna duh viau chu nge a nih ka hre chuan lo bawk







Ka lak atang duh a neih thu a sawi tak kha mawle, zanin khan tinge ka lo zawh loh le ka pek theih chi a nih chuan pe ila ka hmuh tur hian awm tawh lo se tih chu ka duh a; min zui rengtu an awm tih ka hriat chuan thlamuang takin hun ka hman theih loh mai bakah keimah chu zalen lo ta riau angin ka in hriat phah bawk, eng chu nge a duh chiah ka hre lova a sawi danah kha chuan ka pek theih loh tur thu a sawi a nih kha








Min zui buai reng tawh loh nan chuthil chu pek mai ka duh a, eng ang a to pawh nise pek ngei ka tum ang; mahse a sawi si lova ka pe thei lo mek chu a nih si! Eng ang fa ko a to nge a ni tih leh chu thil chu engnge a ni tih hriat ka chak tulh tulh a, chu thil chuan nasa takin ka rilru a kam viau bawk, remchang hmasa berah chuthil ka lak atanga a duh chu ka la zawt chhuak ngei ngei bawk ang







[Ka story te in lo chhiar thin avangin ka lawm a, min lo chhiar sak zel ula chuan ads click, like leh comment kha min tih sak leh hram hram dawn nia🤗]

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 16th, 2022, 1:14 pm

CHAPTER-6






Ka tawngkam kha a na mah mah a maw ni le aw tih te chu ka ngaihtuah leh hnuhnawh a, khatia ka tih atang khan kar hnih dawn chu a liam tawh tun thlengin a hmel hmuh tur a awm leh tawh lova; min lo zui tawh ngai hek lo. Chutianga a awm ta chu mak ka ti zawk khawp a, ka awm thiam lo leh zawk dawn a maw tih mai tur a ni







"Tinge chhelo deuhpa kha a lo kal tawh ngai lova, in inhau a mi?" Tluangzeli lah chuan kan in ngaizawng a maw ti tlat pek a, a buaithlak zawk thin a ni; "Chutiang leh zel ka hre bik nang" ka tih chuan hmui min tih pawrh khum tarh pah chuan awih loh hmel zetin min en a, leh ringawt thin hian! Chhan zel tlaka ka hriat loh avangin thildang a sawi pawh chuan ka chhang tawh lem lo







"Nu Ziri chu engnge a an tak zel a" damdawi in atanga an chhuahna a la rei lova, khami ni a kan kal bak kha kalna hun a awm leh tawh meuh loh avangin ka kal nawn leh tawh bawk si lo chu ka inthlahrung ve hle a; "Kan tha zel a nimai, ka nu hi chu tihian a awm leh thut thut thin a han invenna hman pawh hi a ni thin lo" nuih deuh sak pahin Ahmingi chuan a ti a








Lu lo buk khum nghat pahin, "A that hlauh chu, lo dam zel rawh se. Kan buai lutuk a tlawh lehna hun che u pawh ka nei leh thei tawh bawk si lova" thupha deuh reuh chawi pah chuan ka tih zawm nghal zat a, lu thin nawk pahin, "Awi in buai zia ka hria lawm, ka phut kher hleinem mahse ka lawm lutuk a nia hetia in ngaihtuah ve zia ka hriat ringawt pawh hian" Ahmingi chuan a ti leh a







"Aw haw nang chu" rawn ti thum duttu lam chu kan thian thum chuan kan hawi phei rual nghal that a, phawk zetin ka lo en ve nghal bawk, "Aw nang chu" ka then khum nghal sak bawk, helaiah hian hmuh ka lo in beisei miah lova; eng ti tiha rawn lang hlawl nge maw a nih chu le? A hmel ka hmuh lah chuan khami ni a ka thil tawn kha ka hrechhuak a, ka zak thar leh chem chem ni mai hian ka hria








"Hetah engnge i tih ve" min nuih sang pah chuan min zawt leh a, "I hmuh ang hi nimai" tih zawngin ka lo chhang thung. Ka chhan dan chu a mawi lo mah mah em aw tihte chu ka ngaihtuah leh a mahse ka sawi zo vek tawh a, awmzia a awm tawh lo; "Nang zawk?" Ti a ka zawh leh chuan, "Ka pa lehkha pawimawh theihnghilh ka rawn dah lawk mawle" tha deuh chuan min lo chhang ve mai bawk a








Tunge a pa ti a a sawi phei chu ka hre chuang lo na in fapa fel tak a ni ngei ang, "Mahse hetah i awm bawk sia" ka ti leh zel chu a nui hawk a, "Ka hmuh hnu ang ka tih vang che in ka rawn kal hmasa" awlsam et chuan min lo chhang a, lu ka lo buk khum ringawt thung, "A nih chuan ka kal ang e" a ti leh a, chhan let phei chu ka chhang let leh tawh chuang lo bakah chhan letna hun awm lovin a kal nghal bawk nen








"Zualte, pu berin a ko che a" security guard chuan ka bul a lo thlen rualin a ti a, "In inhmeh ve ngawt mai, pu ber nen hi chuan" Tluangzeli chuan a lo ti ve nghal zat bawk, kei erawh chuan ka nuih liam san mai a, ka thiante pahnih bulah chuan ka han kal lawk tur thu hrilhin ka let leh vat tur thu ka hrilh hnuah pu ber room lam pan chuan hmanhmawh lutukin ka kal nghal a







Lut tura ka dil hnua ka luh chuan ka pen lai chu tawp chatin ka hmaa mipa thu chu ka en reng a, a ni pawh chu a lo hawi ve chiah bawk, "Aw nang bawk maw" min nuih sang pah chuan a ti leh a, pu ber lah chuan a ngaihna hriat loh hmel zetin chupa nen chuan min entawn dun sek ringawt a, "In inhria elo bawiha" a tih chuan amah aiin keimah zawk chuan mak ka ti zawk daih ang







"Hria han ti ila, damdawi inah khan kan inhmu tawh a" rang fahranin a chhan hma chuan ka lo chhan khalh chu ka hma mipa thu chuan min rawn en zawk pahin a nui nghal hawk a, pu ber erawh chu nui ve lem lovin lu a lo bu nghauh nghauh thung. "Ka pa chu a nih hi" a tih leh lek phei chuan mak ka ti tawh lutuk ringawt







"E aw, a nih chu" bah deuh naka tih pahin ka then khum nghal vak ringawt a, sawi tur ka hre bawk si lo ka din dan lah chu a laklawh bawk nen chuan pu ber room pawh chu nuam ka ti tawh lo tan viau leh nghal a; "Zualte ka kohna chhan che chu, vawiin pawh kha min lo nghah kher a ngai lovang; i duh chuan i haw hma leh dawn nia" ka awmdan chu hrethiam ni awm takin pu ber chuan a rawn ti nghal a








"Awle" tih zawngin ka chhang thung, ka kut chu hma lama suihin zah lutuk vang leh sawi tur ka hriat loh em avang chuan ka tin te chu ka sik pah neuh neuh bawk a; "Lo thu ve la" chupa in a tih chuan rang lutukin lu ka thin khum nghal nawk nawk a, "Sir thildang ala awm em?" Pu ber zawk chu enin ka zawt nghal a, a awm loh thu a min chhan avang chuan ka chhuahsan leh nghal vat bawk







Tunlai chu thil mak deuh deuh hi ka tawng reng mai ni te hian ka hria, canteen lam pana ka kal mek laiin tu emaw hian ka darah chuan a rawn kuah thut a; ka lo inring bik si lo nen hma lamah ka bu dawr nghe nghe. "I kal daih a" min hrechiang awm fahranin nichina mi bawk khan a ti a, a nui sang bawk. Min hrechiang ngawt bawk si lo chu hrechiang awm fahranin a awm hmiah hmiah thei chu a chhuanawm ka ti zawk mah







"Teh ngawt che chuan" ka aw chu a bul mah mah mai thei a ni, a bu nghut a, "Tun atang chuan ka thian i ni tawh" a ti leh zel a, a zak thei lo ka ti zawk dawn nge pawh ka hre tawh lo. "Huh...ka duh ngawt a mi" ngeiawm zeta ka tih chuan, "Duh lo pawh ni la, ka thian i ni tawh" a ti leh zel a







Chhan ngaihna dang ka hriat tawh loh avang chuan ngawi rengin ka kal ta ringawt a, ka dara a kuah reng avang chuan nuam ka ti chiah lova bakah midangte ho lah chuan min hmu ngai lo ni awm fahranin min en hrek hrek bawk nen min kuahna chu ka dah thlak sak nghal vat a; "Min lo zui tawh suh" zawi deuh tak si vin lek lek a ka tih chuan a nui hawk a







Ka kalna apianga min zui reng avang chuan nuam ka ti lo hle a, a hmain Sam kha a ni tawh bawk tunah lah hepa hi a ni leh a; min zui pawh chu nuam an ti hlawm viau a maw ni dawn le! "Nangpa kha min zui tawh suh ka tih che chu" midangin min en nasa bawk nen nuam ka tih tawh loh em avang chuan ka ti leh a, "Nangpa a!??" A nui leh hawk a







"Aw i hming ka hre si lova, nangpa kha ka tih mai loh che in" ka tih chuan a buk nghut a, "Ka hming chu Lalrozama a nia, i duh duh danin min ko thei" a ti a, a inring tawk lutuk leh ka be tha duh lo chung pawha min a nui reng thei chu mak ka ti viau mai. Canteen thlen hma chiah chuan a thu thiam thut a, "Min lo nghak lawk, ka pheikhawk hrui kan suih lawk" a tih chu remchangah la in canteen lam pan chuan hmanhmawh lutukin ka kalsan a








Ka lut chiah chu ka thaw nghal huai theiin ka hria, ka thiante pahnih chuan mak tih hmel zetin min lo en dun ha a, "Tinge, pu ber chuan a lo hau che mi?" Ka awmdan teh tawp avang chuan an ngaih a tha chiah lo a ni ngei ang min lo zawt nghal a, lu thin khum nawk nawk paha chhan mai ka tum chu, "I lo kal daih a" Zama chuan rawn luh pahin a ti a







Ka thiante pahnih hriatthiam loh hmel lutuk a min lo en chu ka hmuh hmaih bik hauh lo, zawhna mitmengin min en dun nghal a; han chhan dan tur pawh ka hrelo, ka ngawi reng a, "I haw hma dawn tiraw, haw rual ila" ka bula ding lah chuan a ti leh zel a, hahthlak tih hmel zeta enin ka thaw kawk ringawt a








Ka nunah hian mipa ka la lut lova, hetianga min hnaih an tum pawh hian kei chuan nuam ka ti chiah lo a ni bakah ka duh dan ang pawhin min awm tir thei lo ka ti mai; "Aaa...keimahin ka haw thei alawm" min be tha reng peih chu lo biak chhiat reng thu awm hek lo le, tha tak chuan ka ti ve mai a, lu buk nghut pahin, "Ka lo nghak dawn che nia, tih tur ka nei chuang lo" a ti tak tal a







Ka thiante bulah pawh awm mah ila nuam ka ti thei chuang lova, Zama chuan pawna meizial a zuk tur thu min hrilhin a chhuak nghal a; a chhuak chiah chu, "Awi khapa kha tunge ni leh ta" Tluangzeli zawhna ngah lutuk tih hriat reng chuan a ti nghal zat a, "Damdawi in a mi kha" thawk lak huai pah chuan ka ti a








"In lo inkawm reng thin tihna mi?" Ahmingi chuan a ti leh a, lu thin nawk pahin, "Kawm nang, kha min hmelhriat biak hmiah hmiah" ka tih chuan ka thiante pahnih chu an nui ta hak hak a, kei erawh chuan nuihna tur ka hre ve hauh lo thung. "A hmain khapa kha ni tawh bawk, tunah lah..." Sawi zawm lovin thawk ka la leh kawk ringawt a







"Mahse tha deuhin bia la, i ngaizawng kher dawn tihna a ni lova kawm che a duh chuan nangpawhin kawm tum ve la" Ahmingi chuan a ti a, Tluangzeli nen kan inkawm hma daih hian Ahmingi nen chuan kan lo inkawm tawh a; kan thil tawn lo in ang zel bawk nen kan inpawh zual mai bakah kan in hrechiang dun em em a, engkim kan inhrilh tawn bawk a








"Ka hria lawm, mahse mipa hi ka kawm ngai si lova hetianga an rawn tih hian rilru nawm lohna ka nei thin a" chuai deuh raih chuan ka ti a, chupawh chu Ahmingi chuan a hre bawk, "A hun ve tawh lawm, kawm ringawtte chu a thiang a nangpawhin tum ve la ka tihpui che" a tih leh takah chuan lu ka buk khum ringawt a







Kan thian ho ah chuan a upat ber bakah kei nen tak phei chuan kum ruk(6) velin kan inthlau a, thian ang mai bakah nau ang maia min en avang hian min duhsakin min ngaihtuah em em a; chutiang chiahin keipawhin a thusawi chu ka awih ve hram hram zel bawk, office ban a hun tan a keipawh ka tih tur tih tum chuan ka inbuatsaih ve a, min lo nghah ka rin tak tak loh tehreng nen pawna ka chhuah chuan Zama chu a lo la awm ve reng a







Min hmuh ruala a thutna atanga lo dingchhuakin min nuih nghal sang a, "I hman tawh a mi" ti a min zawh chuan lu thin khum pahin, "Ka la haw ve thei chiah lova, min lo nghah chu i tum tak tak a mi?" Ka tih zawm nghal zat a, "Ka nghak ang che ka tih kha, kan haw rual dawn nia" a tih chuan, Ahmingi sawi ang ngei chuan tha takin ka bia a ka rei loh tur thu hrilhin chutianga a inhuam a nih chuan min lo nghak turin ka ti ve ta nge nge a







Midang haw fel hnuah chuan ka tih tur chu ka ti vat vat a, a fai tha em tih pawh ka hre chiah lo; a chhan pawh min nghaktu an awm ve reng a, muangchanga lo chet kha chu a nuam chiah lo bawk a ni, pu berin haw hma tura min tih avangin ka tih tur ang ka tih zawh hnuah ka chhuak ta nghal vat a






Khua pawh a lo thim chhalh tawh a, Zama bul ka thlen chuan min lo nuih sang pahin, "In in awmna ka hre si lova min hrilh pah zel mai dawn nia aw" a tih hnuah chuan bike ah a chuang nghal a, "Lo chuang rawh le" tih pahin a hnung seat chu beng nghal thak thak a, chuang ve ta nghal mai lovin bike seat chu ka en reng ringawt a







Bike a ka chuan tawh chu sawi loh hetiang seat sang lutukah hian engtin nge ka chuan theih ang, "Tinge?" Ka din reng avang chuan min rawn en pahin a ti a, "Hei hi" tih pahin a seat chu ka kawk a, "Chuan" a lo ti ve vat bawk. "A sang lutuk a ka chuang kai thei dawn a mi" ka tih chuan a nui ta hawk hawk a, ka chuan theih tur chuan a rawn ti awn deuh a, "Tikhan i thei tawh angem?" Tiin min zawt a







Lu te chu buk khum ve nghat mah ila, ka chuang zei lo viau mai; a rah chhan chu ka ke pakhata rah pahin Zama dar chu ka vuan pah bawk a, ka tham a ni zawk mah. Amah lah chu ka vawnna lamah ka tih ang ang a lo awmin a awn nasa viau leh nghal a, ka thu fel awrh tihah, "Bike chuan la zirtir i ngai dawn a nih kha" nuih hawk hawk pahin a ti a, ka va han ngei mai mai tak







Tlanna tur lam ka hrilh hnuah chumi lamah chuan kan tlanchhuak ta nghal a, la chuang ngai lo tih takah a seat sang bawk si nen chuan bike chuan chu nuam ka ti viau lo khawp mai; kan tlan pah chuan a titi pah mawlh mawlh a, a tlan chak ang reng bawk sia tawng a hriat hleihtheih loh chu thuhran ka hlauh avang chuan a kawr hmawrte chu ka tham khawr vek tawhin ka hria






Kawng khawhar kan tlan luh rual chuan kawngsira Sam lo ding chu ka hmu a, chiang takin amah pawhin min lo en ve bawk; mahni a haw ziah chutia mipa bike a ka chuang ta mai chu hriatthiam loh hmel zeta min enin min en dan chu a rum mah mahin ka hria, kan tlan chak em avangin ka hmu rei lo mai pawh a mahse ka hmuh chhun ringawtah pawh khan a hmel chu rum tha tak a ni





Chhunzawmna...













Zanriah eikham hnuah room ah ka lut tlang nghal a, message tone a rik rualin ka phone chu ka en nghal vat a; ka thianten eng emaw an rawn sawi dawn a maw tih laiin number hlang atang message ka dawng tlat mai, en loh ka tum deuh uk chu thil pawimawh te a nih takin tih thuah message chu ka hawng ve ta nge nge a








"Tunge khapa kha??.." A va lawmawm teh chiam lo ve ka message dawn teh hrep chu, a rawn tihdan atang chuan tunge ka hre thei lova; chupawh chu nise a thil min rawn thawn teh tawp dan chuan nungchang mawi a nei lo tih a tilang chiang viau in ka hria, [Tunge aw...?] Tiin ka va thawn let ve ta hram a








[Tunge ka nih a pawimawh lo, tunge tlaia phurtu che kha] a tih takah chuan hriatchhuah ka nei nghal zawk a, ngawi teh hepa hian khawi atangin nge ka number a neih theih? Mak ka ti lutuk chuan ka phone chu ka en tlawk tlawk ringawt a, chhan pawh ka tum tawh chuang lovin phone chu ka dah a, ka mut dan siam remin ka mu ta ringawt a








Mut erawh a chhuak teh chiam lo khawp mai, nikhat thil thuah ka nun thlak danglamtu pahnih an awm ka ti dawn nge pawh ka hre lo; vawikhat in hriat kha a pawi lo asin mahse min la tihbuai chhunzawm ta zel chu a ni sia, ka rilru a te emaw tha lo emaw in ti mai thei mahse a ni bik lo, mipa leh hmeichhe inkarah chuan induhna a lo piang thin a, a tu emaw ber ka hnaih hian nakinah ka duh mai ang a








Ka hnaah hian rilru ka pe thei lovang tih ka hlauh vang zawk a ni a, chhungkaw enkawltu ka pa thachhang dawltu leh chhungkuaa pawimawh ber nih chuan hetiang thil hi ka ti ve thei lova, ka rilru la peng thei tur thil chu ka hnawl thiam ve a ngai ni pawhin ka hre bawk







Mahse tunah pawh he mite pahnih hian ka rilru chu an tibuai hneh tawk tawh chu a nia, Ahmingi sawi ang khan zawm ngei pawh ka tum a; thian nih chauhte chu a pawi hleinem, ka thian nih an duh ve te nih chuan ka kawm ve tur a ni bawkin ka hria. Zama nen chuan thian pawh lo ni ta ila, Sam ve thung hi engtin nge ni ang thian angin ka kawm ve thei kher angem ka hre tlat lo a ni







Zinga ka harh chuan khua a lo eng uar tawh a, vawiin chu hna ka kal peih lo ngei mai kei leh kei lo ang takin; keimah chu ka nuam lo riau in ka hria a, mahse mutpui nan khawp a na erawh a ni chuang bawk si lo, ka ni deuh er erin ka hria a chuvang chuan thawh pawh ka tho nuam lo viau mai







Office ka thlen a ka tih tur ka tih lai te chuan nidang angin ka phur lo tlat a, a chhan han sawi fak tur lah ka hre lo. Ka pum leh ka tai bawr te chu a na deuh er er bawk nen, zan lama ka thil ei fuh loh vanga ka puh ngawt pek a; mahse awm han ti nuam lo tur khawpa han ei lah ka neih awm ka hre chuang der bawk si lo







Ka thiante bula ka awm hnu pawh chuan ka zuai ngiai reng chu an lo hrethiam a ni ve chek a niang chu, a chhan min zawt reng bawk a; keipawhin a chhan sawi tur ka hriat loh thu ka hrilh chuan, "Tunlai chu i luck lutuk a, i zo lo a nih dawn kha" Tluangzeli chuan a lo ti leh hmanhmawh pek a,chutiang a nih awm pawh ka hre chuang lo







Ka dik theih ngang loh avangin haw mai chu ka rilruk a, pu ber room ah chuan inthlahrung deuha luh ka dil hnuah ka awm a nawm chiah loh thute chu hrilhin haw hma chu a rem tih leh tih loh te ka zawt tel a; chutianga awm nuam lo na na na haw phal loh thu sawi chi ni hawt lo chu min haw tir chu a rem ti a







Ka thiante bula ka kal leh hnuah ka haw san mai tur thu ka hrilh chuan min la ui der ve viau mah se in a chawl hahdam tur chuan min ti a, reilote kan inbiak hnuah ka haw san a; kawnga ka kal laite chuan ka dik lo tan viau tawh ni ber hian ka hria, ka period dawn a niang han ti dawn ila thla tirah ka period thin sia, a nih em chu ka ring chiah bawk si lo







Tu emaw hian ka kawngah chuan a kawrlum hi a rawn vet a, ka phu chiang khawp mai; ka hnungah chuan tunge awm tih hriat tumin rang fahranin ka hawi let nghal vat a, Sam chu ka hnungah a lo ding reng tawh chu niin, "Nang maw!??" mak ka tih em avang chuan ka aw ki pawh chu thinrim vang ni hauh lovin ka san nghal em em ringawt a







A jacket a ka kawng a khuhna chu lak thlak nghal ka tum a, mahse ka kut a rawn vuan nghal chat thung. "Khatianga haw kha i hreh lo a mi?" a thilsawi dan chu ka man lo ngei mai, engnge haw chu ka hreh ngawt ang? "Engnge i sawi awmzia chu" tiin ka zawt let ha a, min mit sir paha ka hnung lam en tura min tih chuan ner khum nang pahin ka hnung lam chu ka en a







Ka kekawrah chuan thisen a lo kai luai hi a lo ni! "Mahse engtin nge a nih theih?" keimah leh keimah chu ka inbia a ni ringawt, a chhan pawh thla tirah khan ka period tawh si a, tunah engtin nge a awm leh theih dan chu ka hrethiam lo ngei mai, "Ka thlah ang che" tih leh pahin ka kut chu chelh nghalin a motor awmna lamah chuan min hruai phei nghal a







"I hmu maw" ka zah em avang chuan ka ti leh ringawt a min chhang lovin lu min buk khum nghut thung, "Tinge i sawi loh?" Ka ti leh tawl ringawt a, motor a kan chuan luh hnuah tlanchhuak nghal ta mai lo chuan keimah chu min enin, "Sawi kher a ngai lo" bul zetin a ti a, a aw bul leh lutuk chuan chhan pawh min ti thlahrung zo vek niin ka hria







Hma lama hawi let leh nghalin motor chu a ti nung nghal vut vut a, kan chhuak nghal mai bawk; chuang duh lo viau mah ila ka awmdan leh ka thil tawn mek hian a zir miau loh avangin inthlahtir mai loh chu tih theih dang ka nei bawk si lo; eng emaw chen ngawi reng a a tlan hnuah, "Nimina mi kha tunge?" A rawn ti chhuak hlawl a







"I hriat ve a tulna a awm lo" ti a ka lo chhanna chu a duh vak lo a ni ngei ang, min zawt nawn leh kher a; hahthlak tih hmel zeta thawk lak hak pahin ka thian a nih thu chu ka sawi a, "Thian a...!??" Tih pahin za lo zet chuan a nui nghal hawk a, a awmdan chuan min ti hrilhhai let ling zawk dawn alawm mawle, "Aw chutah chuan buaina i nei a mi?" Ngeiawm zet chuan ka ti let ve kher a







Lu thin nawk pahin, "Thian mipa nei suh" a ti leh tawl a, ringawt thin hian ka thian neih leh neih loh tur thuah hian sawi theih a nei reng reng hleinem. A engmah ka nih loh rualin ka chunga thunei tur pawhin engmah a ni chuang lo, "Ka thu thu" ka tih chuan min rawn melh nghal kawk ringawt a, a hmel rorum ta lutuk chuan min ti hlau ve deuhin ka hria








"Nei suh" a ti nawn leh kher a, ka chhang tawh lo. Chubak chu in kan thlen thlengin kan inbe leh tawh lova, motor atanga ka chhuah dawnah a jacket chu pe letin ngawi rengin ka chhuak a; hawi let tawh map lovin inchhung lam ka pan nghal a, a motor ri ka hriat mai loh avangin inchhung ka luh hnuah tukverh bulah chuan kalin parda phen atang chuan ka en leh kher a







Mahse a lo awm tawh lo, "I lo va haw hma ve? Tinge i kekawr mawng chu" ka nu in a rawn tih avang chuan parda chu kharin ka nu lam chu ka hawi nghal vat a, "Thla tirah khan ka period tawh sia, ka period nawn leh a" tiin ka nu chu ka hrilh a, lu buk nghauh pahin, "Va inthlak vat la, a val vek ang e i kekawr kha" a tih avang chuan room lamah ka luhsan ta vat a








Ka chhuah leh hnuah ka nu chuan thingpui ka duh leh duh loh te min zawt a, ka duh thu chu hrilhin a bulah chuan ka phei nghal vat a, "Khawnge midang hi an awm vek a, nangpawh vawiin chu i va haw hma ve" tiin ka nu chu ka zawt nghal a, "I pa chu room ah a awm a, i nau te chu an lengin ka hria" ka nu chuan min nuih sang pahin a ti a







"Tinge i va haw hma ve" ka ti nawn leh sap a, "Exam chawlh alawm" tha taka min chhan chuan ka hre ve chiah, ka nau te chu nimin atang exam chawlh kar hnih an nei dawn tak e. Rawngbawl nan a a la hma em avang leh ka tai chu a nat deuh er er avangin ka mut lawk tur thu chu ka nu ka hrilh hnuah room lamah chuan ka pheisan a







Period la na chi ka ni lo bawk nen chutianga ka tai a nat ve deuh avang chuan awm a ti nuam lo kher mai, engtin pawhin awm ila a nuam lo vel vek ni ber hian ka hria; khumah chuan ka inlet tawn sek a, ka na tulh tulh a maw tih mai turin a awm a, a tawpah chuan ka nu chu ka ko phei ta nge nge a ka tai te min zut sak hnuah tuilum te chu min siam sakin tuilum ipah chuan a dah a








Min deh sak pahin, "I period loh huna i period vangin a na a nih dawn kha" a ti a, a nih ka ring. Hetiang hian ka la awm ngai lova, a rawn na ta chu a nuam lo duh ngei mai, eng emaw chen min zut sak hnuah min chhuahsan a, keipawh tuilum ipa ka deh avangin a tir ang ngawt ai kha chuan a na pawh chu a reh ve ta deuh bawk nen mutthilh chu ka tum a







Ka phone ri ral ral chuan min tiharh chiang khawp mai, peih lo zeta ka phone chu banin en chiang hlei chuan call lo kal mek chu ka chhang a, "I lo haw daih a" mipa aw in a rawn tih chuan tunge tih ka hre mai lova, "Tunge aw" aw tham chhal a ka tih chuan leh lama mi chu a nui hawk hawk a, "Zama" a tih chuan ka meng nghal kawk theiin ka hria







A ni leh zelin engtin nge ka number a neih theih? "Engtin..." Ka tih lai mekin leh lama mi chuan, "I thiannu ka dil" ka sawi tum hre nghal ni awm chuan a rawn ti nghal a, "I lungawi lo viau lo ang chu maw" a rawn tih leh chuan, "Ka lungawi lo" tih ngawt chi ni hek lo chu, a pawi loh thuin ka chhang a







Ka haw hma chhante min zawh chuan tha takin ka chhang ve zel a, dam vat vat tur chuan min ti ve luam a; keipawhin lawmthu te ka hrilh ve luam hnuah kan inbiakna chu a dah hmasatuah ka tang a, rawngbawl a hun tawh avangin peih lo zeta thochhuakin ka nu ei rawngbawl pui tur chuan ka chhuak phei ta nghal a






[Zanin chu a nawi viau mai thei a mahse min lo chhiar sak zel ula, ads click, like leh comment kha min lo tih sak leh theuh dawn nia🤗]

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)