TRAITOR BY Emiry B. Vanchhawng (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: TRAITOR BY Emiry B. Vanchhawng (Completed)

Unread post by Ngaia » January 30th, 2022, 12:45 pm

TRAITOR
CHAPTER 55

(LAST CHAPTER)

☆☆☆☆☆☆☆

(A tawpa notes chu tawi lem vaklo mah se inlo chhiar ve țheuh dawn nia,ka lawm e💃)



NÛPUII POV:


"I inchhîr lovang maw?" Amah ka buaipui mawlh mawlh lai chuan ati sup a. Ka thiltih lai chu chawl dat in ka melh zeuh a,mahse,ka melh rei duhlo. Hmu theilo mah se ka awmdan hi a hrechiang thei lutuk a,a inthlahrun ka hlau thin.
"Engah chuan maw?" Tih pahin ka thiltih chu ka chhunzawm leh a.
"Ilo kîr tawh a,ka dinhmun vangin hrehawm tih chang pawh i nei ang. Mahse,chumi vang chuan haw leh mai tur emaw,min ensan tawp turin ka ti dawnlo che ania" atih chuan ka nui ver ver a. A rilru hi ka duhdan chiah a ni,amah vanga min khawngaih anih pawhin ka beidawn san mai tur a nilo.




"Kalsan hlen duh che ni ila,ka rawn lêt tawh lovang" tih pahin khumah chuan ka nghat riai riai a.
"Ka lawm e" tih sup pahin min lo kuah vat a,kuah let ve in
"A rei rawh dawn hleinem,karleh mai anih tawh kha" ka tih chuan a thaw suai suai a.




Karleh hian US lamah kan thlâwk dawn a,tah chuan Doctor pakhat in mit petu tur min lo hmuhsak diam tawh a,keimahni chauh min lo nghak tawh. Kan hlawhtlin chuan a hmu leh thei anga,kan hlawhtling lo palh hlauh anih chuan tihngaihna dang a vang tawh hle ang..




Karkhat vel zet kan awm ve tawh vangin Gordon pawh a țha chak ve hle a,a ke pawh a rap ngam tawh a,mahse,ala hmuh theih hrihloh vang hian engkima puih erawh ala ngai thung.



Ka fanu pawh apa nen an inpawh nghal em em a,atir kha chuan tlemin a tîm deuh thin a. Mahse,tunah chuan ka hrilh ngun a,an pahnih in hun an hmang dun tam tawk tawh bawk nen,a lehkha zir tur ve chhun pawh kalsan in apa nen anlo inkawm leh daih zel.




Ka nu Muanêngtheii pawh a țha tluang ve zel a,ahma anga han sual khe-rek leh min khak phêt tumna ang kha a nei tawhlo. Kan bula awmte hi inthlahrung deuh ang hian a awm thin a. Sitting room a han țhutkhawm te hian eng emaw chhuanlam siamin a pindan lamah a kal daih zel. Kallo tura hrilh a,chelh ka tum lahin Lalmawizuala hrek hruk hian ka kal dawn tih a hria maw ni,min lo dang ziah lehnghal a.




Ka pa thlân kan tlawh țum pawhin a zak deuh nge,a nawmloh thu a sawi a,lokal ve loh mai a tum a. Mahse,ka fanu fing kir ker lutuk mai hian hrilh chawp ngai hauhlovin api chu a sawm seuh seuh a,an pindan lama an va awm dun rên rawn hnuah chuan ka nu pawh a rawn kal ve ta nge nge.



Chuta chinah chuan Bawihtei chuan api chu a ngaina lehzual a,kan bula awmlova pindan lam a pan daih te hian ava zui lût vat a,api nen chuan eng eng emaw an va ti dûn thin.
Fiamthu titak deuhin ka nu chuan midang bulah
"Anu leh pa te an fing bawk a,an fanu pawh in a chhûn hneh khawp mai" ati thin.



Mahse,ka nu hian buai chang a neih zauh zauh a,buai han ti ila chuti teh lua phei chu a ni lo. Kan awmbo hlan khan bâwk awm vangin a chhûl anlo paih a ni awm a. Chu chuan ati haihawt in ati thinchhe deuh thin. Gordon sawidan phei chuan nulate hi a hau nasa thei hle a,ama thil dah rengte hi a hre leh lova,nula tu emaw zawk zawk a hauh phah thin alo ni.




Chumi vang vel chu anih ka ring nulate pawh hian an hlauh hmel em em. Ka nu awm ve lai chuan engmah pawh an sawi țha ngam lova,an ngawi kar zel.




"Bawihte,lo mu tawh la,mut a hun tawh a" ka zu tih chuan a rawng chu a bag ah a khung nghal sat sat a.
"Api mangțha aw,ka mu tawh dawn" tih pahin api chu a nuih sen sen a. Ka nu pawh chuan a bianga lo chuk zeuh pahin
"Naute chu mut hma tur ania,zingah kan inkawm leh dawn nia aw" tiin a mangțha ve nghal a.




"Nûnû,apa hi a mit a del reng dawn ami?" Step a kan chhoh pah chuan ati a.
"Dawn love,an zai anga,chumi zawhah chuan a rawn hmu leh dawn alawm" tih pahin ka melh thla a
"Anih chuan ka hmel pawh a hmu tawh dawn maw?" Lawm hmel deuha atih chuan nuih pahin ka bu nghat a.
"Chuvangin,apa bulah khatiang kha sawiloh tur aw. Apa kha ala damlova,duat tur ania" ka tih lai chuan kawngkhar a pawt hawng a.




"Apa,i mu tawh ami?" Tih pahin a rawng bag chu chair ah a dah a,apa bulah ava inthawlh ve nghal.
"Ka arsitê chu ilo chho tawh maw?" Tih pahin apa chuan alo kuah vat a.
"Ummm. Api nen lem kan ziak a,api khu a khua a har thei lutuk a,țhian pawh a nei ve lova,keimah chauhin ka kawm thin a" ati nang nang reuh a.
"Api chu a sual a,tuma'n an kawm duhlo aniang" Lalmawizuala'n atih chuan
"Gordon" ka lo ti vat a.




"Tinge a sual?" Tih pahin Bawihtei chuan min melh leh hâ a.
"Apa khan ati mai mai anih kha,hawh mu tawh ang aw" tih pahin light te chu ka tithim sawk sawk a..
"Naupang bula sawi tur hre rawh" tih sep pahin Gordon chu ka va sik zeuh a. Alo nui mai mai duh chauh.




Kei chuan ka chunga thil lo tisual tawh tute sualna kha ka hre reng tawh lova,ka theihnghilh hmin țhak e ka tihna pawh a ni bawklo. Mahse,hun a kal a,mihring pawhin hmalam kan pan zel ang hian,tumahin kan nunhlui țhalote in hriatsak reng kan duh biklo. Kei ngei pawhin a țhalo ho te kha chu theihghilh vek theih ka duh,mahse,ka thei lova,chumi ringawt pawh chuan min delh rih chang a nei. Chuvangin,ka nu pawh ka damchhung chuan ka nu ala ni reng dawn a,keini pawhin tihsual kan nei ve vek tho. Chuvang chuan in ngaihdam tawn hi thil țha ber a ni. Chu chu Gordon bula ka sawi thin pawh a ni bawk.




Zingah chuan ka tho vat a,inhnuai lamah chhuk turin ka insiam nghal bawk. Khum lam ka va melh leh chuan ka nui hak a,ka phone phawrhin an pafa thla chu ka la a,an mut duh dan inang lutuk te,Gordon-an a fanu nghet zeta a kuah hlûn te hi ka en ning thei lova,ka ning ngai bawk hek lovang.




Chawei kan peih hma țep chuan Bawihtei alo chhuk a.
"Nûnû,apa khian 'Biangno' ati vak vak mai" atih chuan ka melh zawk a.
"Inhnuaiah ka awm tih i sawilo ami?" Ka tih chuan
"Ka hrelova" ati sep a.
"Bawnghnute kha lo in la,ka han chho lawk ang" tih pahin ka fawp zeuh a.
"Kal vat vat rawh,a tho duh tawh aniang" ati vei khanglâng a,nulate chuan a țawng duh dan chu anlo lawm leh hle bawk.




"Biangno" tih leh thil rirawp ka hre zui a,hmanhmawh lutuk a khum lam ka pan chuan
"Awiiii,i țha em?" Tih vak pahin ka pan nghal rawk rawk a.
"Khawnge i awm?" Tih pahin chhuat bul vel chu alo dap ruai a.
"Hetah hetah" tih pahin ka tawk vat a,a awmdan chuan lung ati chhe lek lek mai.




"Tinge ilo thawh ringawt a,i tlûk phah kha?" Ka tih țiau chuan nghet zetin min lo kuah nghal chat a,ka sam a chul nghal thuak thuak bawk.
"I bo leh tawh emaw ka tia" atih chuan a hnungah ka beng thlawrh a.
"Min tihlau alawm" ka tih vak chuan alo nui hawk a.
"Engmah ti tawh suh,ka harh apianga ilo awmlo anih chuan i bo leh emaw tiin ka buai vek thin. Chuvangin,englai pawhin ka sîk reng theihin awm rawh" ati sup sup a..



"Ka tihpalh,Bawihtei eitur hi ka siam țhang lutuk a,siamsak zui ka lo tum zel maw le" ka tih leh chuan min thlah a,min hmu thei ang maiin uluk fe chuan min melh a,ka biang chu rawn khuap in a chûl pah bawk.
"I mittui atla ami?" Atih teh daih chuan ka biang chu ka tawk vat a,alo tla deuh em maw ni,a tla hmanlo emaw ka tia.




"Tla lo" tih pahin a kut chu ka hûm hnan a.
"Keimah vangin i mittui kha vawikhat pawh tla tawh suh se,i hria em?" Tih pahin ka biang chu a khuap na sauh a,tihnat tum erawh a nilo.
"Ka țap lo,ka țap tawh dawnlo. Misual vanga țah ka tum tawh reng renglo" ka tih chuan a ha lang țhatin a nui a.
"Ni e,misual vanga țah loh tur" ati ve sup bawk.





"Leee,tho ila. I fanu sikul a thlahte pawh angai ania" tih pahin ka tho nghal vat a,ka kut chelh chungin ani pawh a rawn tho chhuak ve nghal.
Bathroom ah lût in a hmai te chu ka phih pui a
"Hmulo mah ila ka la thiam ve ania" tiin ka puih a duh lawk lova,mahse,ka pui lui ta tho. Engtin tin emaw alo chetsual ka hlau a,bathroom phei chu a nâl ve bawk nen,a tluk sual mai te hi ka hlau thin.



"Bawihtei chu ka thlah thei si lova,a vui thin em?" Tih pahin a hmalam a hawi vung vung a
"Vui love,hrehawm iti ami?" Tih pahin a hnunglam atang chuan a dârah ka kuah a,ka kut chu chelhin
"Hrehawm ti deuh e" ati sup a. Ni e,ka hria,a fanu a pawh theih lutuk loh chhan pawh hrehawm atih thin vang a ni. Naupang chuan an pate lak atangin thil phût tam tak an nei a,inpêk chi leh intihsak chi te anni hlawm. Bawihtei sikul kal a hruai theilo te hi hrehawm a ti tih ka hria a. A fanu thil siam leh ziah te,a nui hmel leh a mulai a hmu theilo te hlei hlei hian amah a tihrehawm lehzual.




"Hrehawm ti miah suh,i fanu hi i hrechiang tawklo a ni. Naupang mah nise a fing em em a,a tuarchhel hle bawk. Tunah pawh a phût hauhlo che ania,bakah kan rawn lêtna ala rei lova" ka tih chuan engmah a sawi tawh lova,thawk ham ham pahin hmalam chu a hawi ngul bawk.
"Hrehawm tih phah nan i hmang dawn anih chuan keipawhin ka hruai tawh miahlo ang" ka tih chuan
"Ni love,ka sawi mai mai anih kha. Anu hian midang zawng zawng aiin i enkawl țha dawn tih ka hria alawm" ati ta a,ka awm ati nuam ta deuh.





Chhunah chuan ni a sat tawh em vangin inhnuai lamah kan chhuk a,mahse,kan beiseiloh deuh mikhual kan nei tlat.
"Kha... i țha maw Gordon" Rinnungi pa in atih chuan midang chu kan ngâwi țhap a. Lalmawizuala lah chuan chhan pawh a tum hmelloh.
"Kan țha tawh lutuk" ka lo ti vat a.
"A zia hlauh chu,keini pawh kan pangngai a nimai" atih chuan Lalrinnungi chuan keini pahnih chu min rawn melh a.




"Inlo thleng thei alaw,Rini,eng nge kha i an a?" Tih pahin ka nu chu an pindan lam atangin alo chhuak a,a hnungah USarah-in alo zui ve bawk. An rilru takin pawh theilo mah se,an accident vang vel pawhin an haw hlen chuanglo.
"Aw,ka țha tawh e" Lalrinnungi chuan alo ti țha ve mai bawk a.




Gordon chu sofa lamah chuan ka kuah phei a,kan chevel chu Lalrinnungi chuan mittla lêklovin min lo en bawk. Ka va hawi thut a,mit ko ka san âk chuan harhchhuak zawk ang mai hian a inthing deuh a,min nuih ver ver pahin a lu a thing nar nar ringawt.




Lalrinnungi pawh hi Wheelchair ah ala țhu char char a,an accident hnu atang khan a ke hian nâ a hre lova,a kal thei lova,vawikhat pawh lei a tawk leh tawhlo. Ka ngaihtuah hian ka khawngaih angreng viau a,mahse,Khawngaihin awmzia a nei tawhlo,engkim anih tur ang a ni vek tawh. A chhungte pawh hian an tuithlar zawm thei tawh lova. Tihian,Gordon-an a accident pui vangin vui vâina pawh an nei chuanglo.




Puitlingho chuan eng eng emaw an sawi a,Gordon chu ka bul chêtah țhu in ka kut a hûm tlat a,a thaw a sak țalh bawk. A landan chuan Lalrinnungi te lokal hi a lawm vaklo anih hmel.




"Nû-i,inbe lawk ila" tih pahin USarah chuan min signal zeuh a,ka nu te pindan lamah a phei nghal bawk.
"Ka va kal lawk aw" Gordon bula ka tih chuan
"Ngailo" alo ti deuh hluk a.
"Aaa,USarah-i alawm" ka tih chuan ka kut a chelhna chu a thlah ve ta a.



"Eng nge ni ta?" Tih pahin a bula ka țhut chuan
"Rini saw ila hua em?" A'n ti phawng a.
"Haw lo,mahse,ka ngainat phah chuanglo" ka ti sep a.
"A țhat hloh chu,Gordon ve hi chuan e" tih pahin a chek tlak tlak a,a sawi leh tur ka lo châng ran bawk.
"A ti thei tawh țhaklo,i kal hnu khan an chhungkua in vawitam anlo kal a,kum 4 chhung tehmeuh anih chu" tih pahin min melh a.





"Chuti chung chuan inpa hian vawikhat pawh a be duh lova,biak chu sawiloh an bulah 'țîk' pawh a tilo. An rawn lan tawh hi chuan a ngawi hmak a,a chhuak nal nal zel" ati a.
"Anih chu,anih Lalrinnungi saw eng nge a an?" Ka tih chuan a thaw hak a.
"Sual hi chu a pawi a ni. A sual man a têl anih ber saw. Inchhîr reng rengin hringnun a hmang ral anga,tisawn a kê a hmang thei tawh bawk si lo. Vawikhat Inpa rawn hmuh a tum lui a,Wheelchair a țhu chu nilo se Inpa hian alo ching phar hrep ang chu. Ka hlauh hman zia chu a" tih pahin a ngaihtuah vang vang a.





"Nia,sual hi chu a pawi asin. Min tihbuai kha chu ka la hrethiam thei. Mahse,kan naute min thahsak kher kher kha chu ka damchhung hian ka theihghilh thei tawh lovang" ka tih chuan ka dârah alo beng thek thek a..
"Lungngai suh,sual tur pawh a awm tawhloh saw. Hman kum phei kha chuan a thi lo chauh alawm" atih chuan mak ti takin ka en vat a.




"Eeee,i awmloh hlan a ni tak,ila hre ve lo ang maw?" Atih chuan
"Eng chu?" Ka lo ti vat a.
"Vawikhat kha ngen tak meuhin min ngen a. Lalmawizuala hnena ngaihdam dil a duh bawk si,pakhat lahin a hmu duh dêr si lo. Inpa office ah ava kal chilh a,ka hruai nghe nghe. Tah khan kan thlen veleh ka chhuak lehnghal a. Mahse,inpa hian engtin chiah nge alo țawngkhum ka hrelo. A haw khan inah intihhlum alo tum a,damdawi alo bâr vak mai a,a kê chu hmang thei se khanchhukah alo inkhai hman daih ang chu" tih pahin a mal chu a beng thek thek a.




"Ava mak ve,a zialo hle mai" ka sawitur hrelo chuan ka'n ti ngawt a,sawi tur a vang em a ni.
"Nia. Mahse,Inpa hian na takin alo țawngkhum anih ka ring a. Mahse,țha ka ti zawk,a chhan pawh" tih pahin min rawn melh zeuh a.
"In kal hnu khan nau ka pâi a,Gordon kutah hian engkim a tla ta vek a,a rilru hah leh hnathawh tur tam nen,chutah,alo hrisel bik vak bawk silo. Ka nu lah,a chhûl bawk kan paih a,atir lam khan vil deuh chawt angai a,chupawh Gordon tho hian ati. Chutah,a buaina chhan ber nangni in rawn lêt bawk si lo. Nangmahni chanchin ngaihven reng rengin hun a hmang a,a nun kha a buai ve thei asin. Lalrinnungi lah kha a rawn lawr sek a,khatia Gordon-an alo hau kha ka lawm a,a rilru tawt a tithawl angah ka ngai mai. Lalrinnungi intihhlum alo tum kha țha ka tihna lam ni lovin" atih chuan ka zak chem chem hian ka hria.





"A pawi hle a ni. Mahse,hun kha kan mamawh ve ve sia" ka tih chuan alo nui a.
"Pawi reng renglo,in zirlai ve ve in zir alawm. Tunah chuan,puitlin mai bakah puitlingho aia puitlin lehzual in zir thiam ve ve tawh a" atih chuan ka lo bu nghat nghat a.




Kan va chhuah phei chuan thingpui vel anlo in a,ka pasal ve chu Robot ang maiin alo țhu khawng luah a,a khap fuk fuk ringawt.
"I ril a țam tawh em?" Ka va tih ser ser chuan ka kut alo chelh leh nghal vat a. Hetia atih hian a thla a muang tih ka hria a,ka dang duh lemlo.
'Kum 4 chhung khan ka mumangah ka hmu ziah che u a,zingah chuan ka bulah mu in,in nufa in ka lo kuah thin che u. Mahse,ka harh chian chuan inlo bo leh daih zel a. Chuvangin,ka mumang a ni tawhlo tih fiah nan ka chelh tlat duh che' tiin a sawi anih kha.





"Țam em em lo,i ei duh tawh em?" Tiin min zawt let khauh a,zawhna zawh lah hian mi hi a zawt let daih zel.
"Țam em em bik chuang love" tih pahin ka nuih hak a,ani pawh alo nui ve hawk tho.
"An eikham ah kan ei ve mai dawn nia aw" ka tih chuan
"Tunah va ei ila" tih pahin a tho nghal titih mai a.
"A pawilo ami,an hmuh laia" tiin ka ngawi dat a.




A chhan pawh a zah ka hlauh vang a ni. Engkim ka puih angai a,a chang phei chuan kan inbarh tawp thin. Lalrinnungi te chhungkaw hmuh laia inbarh ngai vel kha a tlawmngaih ka hlau deuh bawk atin ni.




"Min zahpui dawnlo tih ka chiang a,kei ka zak bawk silo. Chuti,kan ei thei tihna anih chu" tih pahin min pawt tho lawp a,inkuah run chungin choka lamah chuan kan inchhawm phei ve a.




Gordon chu ka dinglamah a țhu a. A veilamah USarah a țhu bawk. A hmuh theihloh tirh leh a kê a nat lai vel khan USarah hian engkimah alo buapui vek a,chhangchhe nu ani tih pawh hriatloh khawpin a nuțapa tan U nih alo tlin hle a ni. Heng vel vang hi ania fa U ah chuan hmeichhia ka duh ka tih thin.




Thil kan ei chhung chuan Lalrinnungi te chhungkua chuan kei leh Gordon in buaipui vel chu min melh zeuh zeuh a,ka nu leh USarah chuan ngaiah an nei tawh a,min en lêmlo. Mahse,kan mikhualte mawlh mai hian,patling țhan kin uaih tawh,6ft dawna sang țhu thluang zuar eitur ka barh ta mai chu hmuhnawm anti deuh nge mit an lasawn thei meuhlo.





Min en tih ka hriat vangin Gordon chu ka han duat lehzual a,a tihtheih reng te pawh ka tihsak lui tlat a. Chu chu ka pasal pawh hian lo hrethiam in alo inla pangchang deuh ngei bawk,kan va indaih em. A hmui berh te chu ka hruk sak sauh sauh a,
"Helai pawh hi" tih pahin a kamsîr vel te chu alo khawih a.




Kan awmdan naupangchhia lutuk chu USarah-in alo man thiam nasa mai.
"Nû-i hi kan mo alo ni lovang tih kan hlau teh asin,tihian naute pahnih a enkawl thei ania" fiamthu tak chuan alo ti a,Lalrinnungi te ho pawh chu an nui dar dar a,tunah chuan a nui hmel pawh a tak ve ta deuh e,a hmaa vervêkna a khat nui hmel kha chu a pu tawh bik em lo.





"Bawihtei hruai turin ka kal dawn ania aw" ka tih chuan alo tho deuh uaih a.
"Tho suh,ka kal a ni nghal mai" ka tih pawh chuan a țhuchhuak hram.
"Lokal lawk teh" atih chuan ka en reng a.
"Lokal lawk la,rawn pan tur che in i awmna ber pawh ka hmulo ania" atih chuan ka pan vat a.
"I hmaa hi ka ding e" ka tih chuan ka pum zawn atangin min lo melh chho a,min en chiang thei lutuk hi a chang chuan min hmu thei emaw ka ti hial thin,a chang leh ka mitmeng chhiar tum ang mai hian chîk angreng deuha min melh a chîng bawk.





"A hma vak tawhlo ania aw,i fanu kan ngamlo ang e" nuih hak paha ka tih chuan ka kawr chu a rawn pawt kau a,ka kawngah rawn kuah phei pahin a lu chu ka kawr chhungah chuan a phûm daih a,ka dul a rawn liah zeuh chuan ka lo phu zawk thei.
"Ka lawm e aw" tih pahin ka dul chu a fawp vang vang a,a nui pah deuh tih ka hre bawk.
"I lawm lêt fê in ka lawm ania,lawmthu min hrilh tawh suh. Kan fanu tan chhungkaw inngahna tlak kan nih pawh hi thil hlu tak anih hi" ka tih chuan
"Ni e" alo ti sup a.




"Bawihtei hi chu a tlei bawk nen ka zawng ruai lova,chuvang chuan ka hmangaihlo tihna a nilo. Ka hmangaih lutuk,ka thinlung zawng zawngin ka hmangaih. Mahse,chu aia let tam takin anu hi ka thlahlel in ka ngai zawk che" ati sup sup a.
"Keipawh ka nia lawm. Bawihtei chu englai pawha ka hmuh ani a,ka hmangaih lutuk bawk. Mahse,apa kum 4 chuang zet ka thlakhlelhna kha ala reh biklo ania" tih sep pahin ka kawr chhanah a sam chu ka tawk a. Ka dul alo thawk khum ham ham bawk,a thaw sa bawk nen ka țim sung sung thei nia.





"Kal tawh rawh le,ka Arsitê kha alo hawi hâi lutuk ang" tih pahin ka dul chu a fawp tawk a.
"Ka lo haw leh vat ang,eng nge ka lo hawn ang che" ka tih chuan phun hluk pahin ka kâwng chu a țham salh a.
"Eng nge,ania lawm. Bawihtei pawhin lapaw chini a rawn hawn che kha" ka tih chuan a nui hawk hawk a.




Hmanni kan fanu sikul bang ka va hruai chuan an sikul kawtah lapaw chini anlo khai tuar a,atira duh tawp silo khan haw dawn a ruaiah a ngen leh tlat pek a. A senno chu 4 vel kan lei a.
"Iva duh hnem ve?" Kan haw paha ka tih chuan
"Kan ta vek tur alawm" ati mai a. Api leh a U te a pe ve dawn anih ka lo ring mai a,ka zawt lemlo.



Ina kan thlen chuan api chu a sem ve ta ngei a. Keipawh a eitur siamin choka ah ka tlang nghal daih. Mahse,a hnuah a uniform nen bawk a rawn chhuk leuh leuh a.
"Nûnû,apa khi ka pe ve a,lawmthu sawina chang pawh a hrelo. A tum char char a,a ei duhlo aniang" tih pahin a lapaw chini chu nula te a rawn pe ta daih a. Nulate lah chu an nuih alo za em em bawk.




"Ipa hi heihi i pe ve maw?" Nuihza deuha Bawihtei an zawh chuan pakhat lah chuan uar fahrana lu thin pahin
"Aw,anu in kan vaia eiturin min lei ka tia" atih chuan
"Bawihte leh" ka lo ti vat a. Keimah be pawh ka nui ta ringawt.
"Ipa chu ava lawm dawn em,a duhber mai Lapaw chini ilo hawn a" tih pahin nulate chu an nui an nui a.




Gordon eitur pe tura ka chhoh pah pawh chuan ka nui reng a. A fanu lah hian a hrethiam si lo. Ani lahin tlawmngaia lo ei a tum dawn der si lova.




"Lapaw chini chu i duhlo ami,i duh ber thin emaw ka tia?" Ka han tih chuan alo tum hmuk tak tak a.
"Gordon" tih paha ka va tawh chuan
"Naupangchhia ka nihloh hi,ka naupan lai zawng zawng pawhin ka duhlo" alo ti deuh hluk a. Ka nuih vak vak takah chuan ani pawh a nui ve leh mai a. Chutah,Bawihtei chu a lapaw chini nen ngei mai chuan khumah a rawn lawn a.





"Apa,a u te'n lapaw chini i duh ber anti. Min khêk vangin i duhlo mai mai anti ania,kha" tih pahin a rawn pe leh a,Gordon chuan hreh hmel deuhin alo la a,a fanu in duhsak taka a pek alo ni bawk nen hnar a duh chiahlo aniang.
"Bawihte,ka duh vaklo asin" atih ban chap chuan Bawihtei chuan apa lapaw chini ken chu la lawkin a lian fe mai hian a piai thla a,chutah,apa engmah hmu ve hleilo chu ava barh thut a. Gordon lah chuan keimah emaw alo ti. Inpawt râk tuarh tuarh pahin an inbarh luih tak kha.





Vawiin hi Inrinni ani a,Thawhțanni mai khi US kan kalna tur a ni tawh. Naktuk Pathianni a ni a,inkhawm an duh dawn vangin vawiin lamah kan chhungte ho rawn len an tum a,zanriah pawh an ei nghal hlawm ang.



Ka ngaihbel nge tun nihnih thum chhung vel hian Gordon hi a nawmloh hmel thei riau a,a nui te hi a tilui a ang ka ti thin. Bawihtei nen an infiam te hian a chau thei em em a,zanah chuan biak tur pawh awmlovin a mu nghal mai zel.
"I nuamlo ami?" Tia ka zawh lahin
"Ka huphurh deuh anih ka ring" ati mai zel a,ka thiam ang tawkin ka fuih a,ka hnem pah bawk thin.




Ka nu te ho chu anlo thleng a,Ka nu Muanêngtheii pawhin alo be țha herh hawrh khawp mai. Ka nu te lam pawhin țha takin an bia a,engmah buaina a awm tawhlo. Chawhnu lamah Remsanga te chhung leh Lalrema te anlo thleng a. An hnu deuh lawkah Zonunmawia leh Nuni an rawn inzui lût ve bawk. Chutia,nula senior leh tlangval senior rawn inzui lût ta chu ka pa te lai lai chuan anlo dem rawn a. An han țang ve nasa khawp a.
Nuni lah chu a tawpah chuan zam tawh heklo.
"Ka bêm a,min duhlo alawm" ati hmak mai a. Zonunmawia zawk chu a zak zawkah alo țang,engmah sawi lovin naute pawm tur a dap deuh ruai a,naupangho lah an infiam tui nasa mai si. Zualtei naute pawm lai te chu ava chhuh ang leh ang lawk a.




An dem an dem a,an insawi rem theih mai ka ring.
"Mawh,Zonunmawi,min dem rawn tawh tho hi. Ni ve tawh mai ila" Nuni'n atih chuan Gordon pawh chu alo nui hawk a. Midang phei chu an nui nasa tawh lutuk a,an hmel pawh a sen vek tawh.
"I zaktheilo ka ti" Zonunmawia'n atih chuan Nuni lah zam heklo.
"Zaklo deuh hi inneih hnu chuan an țha duh itih kha" ala ti tak deuh deuh.





Chutah,Zonunmawia chu a ding hluai a.
"Ka phur haw tawhlo tawp ang che" tih pahin Verandah lam a pan nul nul a.
"A thinrim ngawt ang e" Puitling in anlo tih chuan
"Thinrim teuhlo,a mawl lutuk" tih pahin Nuni'n chuan a en liam ringawt a.
"A zeiloh zia chu maw,leng tar tur chi. An inah ka va kal a,amah chiah a awm ve reng a,pindan ah min inkhung san char char anih chu. A chhiatloh loh nen ala single chhan pawh anih ka ring" tih pahin Nuni chu a han inzâp deuh hap hap a.




"Anih chu,ngaihzawng chhelo deuh a neih ka lo rin nen" anlo tih chuan Nuni chuan ner nawng pah hian
"A khawia ngaihzawng chhelo mah a nei lovang e. In ngaihzawnna lam sawipui pawhin India danpui lamah min kaipui daih zel" atih chuan kan zavaiin kan nui fai vek a. Kan Zonunmawia chu chuti khawp chuan nimaw alo zeiloh le,eng emaw tak kan tih chu ala ngai dawn anih hi.





Zanriah kan ei dawn chuan ka pa chuan țawngtaina te neiin Gordon pawh duhsakna an hlan liam liam a. Chhungkhat leh țhanrual țhate nen hlim takin chaw hlui kan kîl hova. An haw dawnin Sawmtei lah ta pek chuan
"I hmuh leh theih meuh chuan ball in dawlh leh mai ang a" ala ti lung lung zui.
"Kal mai mai teh u,duh leh ball double pawh a dawlh ang" Gordon chuan alo ti hluk a. Sawmtei chu a nui nasa mai.
"Bawihte,Bye aw. Nau i nei vat ang" an chhuah pahin ala tih hram kha.





Khumah chuan mu turin kan insiam a,Gordon ka va en chuan alo muhil leh daih tawh,tun lawkah khan a mu chauh sia. Ani hi damlohna a nei em maw ni dawn le.
Va pan hnaiin a chal chu ka dek a,a dai thlur bawk si. A chau ve hrim hrim anih ka ring deuh a,light te chu tithim in ka mu zui ve mai a,a mutui hle emaw tih laiin min lo kuah nghal vat a.





"I nuam chiah maw?" Tih paha ka melh chhoh chuan min kuah ngheh sauh pahin
"Nuam e,ka chau deuh mai a ni" alo ti sup a. Kan mut hnu fe ah pawh ala inlet ala inlet a,
"I mu theilo ami?" Ka tih chuan
"Theilo,thawnthu sawi teh" ati teh daih a.
"Eng nge ka sawi ang a?" Ka tih chuan
"In awmna hmuna in khawsak dan te leh Bawihtei țhenlen dan te" atih chuan ka aw ka thian sauh sauh a. Tichuan,kan thlen tirh atanga kan lêt dawn thleng chuan ka hrilh fai vek a. Hun hrehawm leh harsa kan tawh lai te,khawvawt tak hnuaia amah ka ngaih țhin thu ka sawi te chuan a thaw a sak țalh a.





Ka sawi zawh meuh chuan ka sam chul hliau hliau pahin
"Ka thiamloh vek a ni" ati ringawt a,thawh zawk pahin
"I thiamloh vek a nilo ka tih kha,sawi tawh suh" ka ti hlar a.
"Ka sual alawm. Ka tihsual vangin ka fanu țhanglian lai hmel pawh ka hmu ve lova,mahni fanu te hmel awmdan pawh hrelo khawpa awm chu a hrehawm em asin,mihring dam ve reng tan chuan thil rapthlak tak a ni" ati sup a. Mu lehin amah chu nghet takin ka kuah a,
"Engkim kan țhatna tura ruat vek anih hi" ka tih chuan
"Ka hmuh theih hunah in hmel ka hmu ngam ang em ka hrelo" atih chuan ka en vat a.





"Engvangin nge i hmuh ngamloh ang. I hmuh chak ber tur alawm kan nih" ka ti vak a,a awmdan hian ka thin a tirim a,chu ai mah chuan ka ngaih a tițhalo lehzual zawk,vawiin a awmdan te kha.
"Chak e,chak tak ka ni. Ka hmu ve chak asin" tih pahin ka biang a rawn tawk a.
"Hlim taka i nui hmel te,i chhungte leh țhiante bula i hlim hmel tluka hmuh chak ka neilo. Vawiin pawh khan i nui ri khan ka kawchhung thlengin a fan chhuak vek asin,ka hmu ve chak lutuk. Mahse" tih pahin ka bekah a kut a rawlh lut a.
"Chak ngawi ngawih pawh tithei lovin ka awm anih hi" atih chuan a âw ah beidawnna ri ka hre thei.




"Nilo,naktuk maiah kan kal tawh dawn alawm. I dam leh vat dawn,min hmu leh dawn alawm" tih pahin a âwm zawnah hmai ka phum daih a,ka țah mai ka hlau a ni.
"Mipa ka nia,mipa ka nih anga tawh che a,duat che a,hmangaih taka enkawl che ka duh. Mahse,ka theilo. Ka theihloh zawng zawng chu nangin min kêp vek anih si hi" tih pahin a thaw hrawk a.




"A thlawn in ka ti hleinem. I hria em,ka thiltih sak zawng zawng vang che hian i rawn hmuh leh theih a,min rulhlêt leh ngei angai ania. I mit vang hian i beidawng theilo aw. Mahse,Mit del kumkhua pawh nila pawi ka tilo. Ka tih ngâite ka ti zel anga,hei aia duat i ngai anih pawh hei ai hian ka duat mai ang che. Chuvangin,beidawng mai suh aw. An khawih hunah che pawh duhtawk mai suh,inâ te i beih lêt a,i rawn harh leh angai ania" ka ti a,ka sawi zawng te chuan ka țang lutuk chu ka hah vek thei.




"Ka phuloh zia che ka u in a sawi thin lai khan ka âwih ngailova. Mahse,tunah chuan ka phulo ngawih ngawih che tih ka hrechhuak nawn awn awn mai" tih pahin a nui hak a..
"Phuloh a awmlo,hmangaihnaa kan indawm tawn chuan engmah phulo a awmlo" hrethiam se ti takin ka ti mawlh mawlh a.
"Ni e. Ka hmangaih che,mittui le" tih pahin ka bekah a rawn fawp tak a
A awmdan te chuan ngaih a tițhalo rum rum mai,a chhan pawh mut dawna min hmangaih thu min hrilh hi ka duhlo tawp thin a. Ka nu te vang a ni pah bawk. 'Mut dawna in hmangaih thu in hrilh thut thut chuan kan tho ho loh a hlauhawm,tihțhan a nihloh chuan tih phut phutloh tur' tiin an sawi thin.




Zingah chuan inhnuai lamah ka chhuk a,kan Visa leh Passport an rawn dah chu ka dahfel nghal vek bawk. Myanmar ram buai hian keini thlengin min tibuai a,engmah a tih zung zung theihloh. Kan Visa pawh vawihnih lai anlo ennawn leh a,a chhan pawh refugee danlo anga lût an tam thin vang a ni.




Bawihtei chu Sarah te bulah a mu ve mai a,naktuk maia kan kalsan tawh dawn vangin a ni pakhat bawk. Gordon pawh chawei hnaih tawha alo la chhuk mai loh vangin kaitho tur chuan ka han chhova. Pindan ka luh chuan khum alo ruak huai a,makti deuhin Bathroom lam ka pan vat a,eng emaw a ri rek rek a.
"Gordon,i awm ami?" Tih paha hawn mai ka tum chuan alo inkalh ve tlat lehnghal.




"Ka lo chhuak" atih sup chuan ka thaw huai a.
"Nangmahin i kal ziah a" alo chhuah veleh chuan ka ti nghal thawr a,nuih suk pahin
"Min thlir zankhua thin sia,i chau palh ang" ati mai a. Kan bathroom hi chu a bel hneh a,hruai kherloh pawhin a kal ve thei mai zel.




Chhunah chuan USarah te chhung chuan anpa te in lamah thawmhnaw lak lawk an tum a,Bawihtei leh ka nu pawh an hruai ve a,kan nupa in in kan lo nghak thung.



Kan țhut mai mai lai chuan Gordon hian a lu a khawih leh thin a,ka va en chang hian a bek zawn hi alo kawm deuh ngar ngar bawk.
"I lu ana ami?" Tih pahin ka va khawih a.
"A nuamlo deuh alawm maw le" ati mai a.
"Mu ila,i zia deuh lo maw. Damdawi ei a chi tawh si lova" ka tih chuan min hnial lovin min zui chho ve mai a. Khumah chhan kan mu a,a ban lukham chungin kei ka mu a,ani'n min kuah run bawk.




Thawm awm nak nak vanga ka harh chuan Gordon chu alo la thaw suk suk a. Inhnuai lam thawm ah Bawihtei te anlo haw tawh anih ka ring deuh a,ka chhuk chuan anlo ni reng a. Eitur anlo insiam mek alo ni.



Pindan lama ka chhoh leh chuan Gordon chu alo la mu tui hle a. A inbual zawha a hak tur te dah chhuakin a suitcase ka enfel leh bawk. A rûm deuh țuah țuah ri ka hriat chuan ka hawi phei vat a,alo inlet sek a. Va pan vatin ka sawi a.
"Gordon,harh teh. Nâ inei ami?" Ka tih pawh chuan ala harh mai lo.
"Gordon" tih vak paha ka sawi leh chuan a rawn tho hlawt a.




"I lu ana leh ami?" Tih pahin a lu chu ka han khawih a,a bek chu alo phu uih uih mai.
"Ka hrelo" ati sup a,a meng â ruai maiin ka hria.
"Doctor kan phone leh dawn" ka sawi zo hmanlo..
"Thisen" tih pahin a hnar chu ka hup bet vat a. Amah pawh chuan a hnar chu tawkin a hup vat bawk.





Hlauthawng takin Lapaw awmna lam chu ka pan a,a hnar ka hruk dawn te chuan ka thâ a khur lek lek a,ka kut chu lo chelh in
"Hlau suh,ka damdawi ei vang anih hi" atih chuan ka taksa khûr chu thunun tum takin ka thaw ham ham a.
"Iti tak tak maw,min ti hlauthawng ania" ka tih chuan ka kut chu hûm in lapua chu a dahthla a.
"Ti tak tak e,ka damdawi ei vang alawm. I hlauhthawn chuan naktuka kan thlen hunah Doctor kan zawt thei ang" atih chuan ka thawveng ta deuh a.




A sawi ang tak takin a lu chu ana leh tawh lova,a hnar pawh a thî tawh bawklo. Zingkara chhuak tur kan nih vangin hma takah kan mu a,kan fanu inla nula lutuk chu kan bulah mu duh lovin A U Nonoi bulah a mu tlat pek a,a lunglen kan hlau bawk nen kan tilui ta lo.




♧UNITED STATES OF AMERICA♧


Nilenga kan thlawh hnu chuan Washington chu kan thleng ve ta hram a. Chutah pawh zan dar 11 velah chauh kan thleng. Darkar 15 chuang kan thlawk a,chawlh zeuh zeuh chhung nen chuan chawhrualin darkar 17 dawn thlawk ang kan ni.




Hotel vela thleng lovin Damdawiin ah kan awm nghal a,awm hma leh tihhma a ni mai a,kha kha kan duh zawk pawh a ni..
Gordon pawh kan han thlen takah chuan huphurh ang pawhin a awm lova,a ziaawm phian..



An khawih hma zanah chuan Mizoram lam nen kan in Video call a,anni lamah chuan zing dar 9 vel a ni hem mai. Darkar khat dawn kan inbia a,naupangho chuan toys te min lo chah bawk. Bawihtei ber chuan engmah min chah ve lova,a duh kan zawh pawhin engmah a duhloh thu leh kan haw vat a duh thu chauh a sawi.



Operation anti dawn a,Gordon pawh hnimhlum in a hneh tawh ngang aniang,a meng chiai chiai tawh a. Thei leh theilo hian
"Ka harh hunah hmuh hmasak ber chu ka duh ania" ala ti țawk țawk a,theih chu nise va luhchilh ve mai te hi ania ka duh.




Tuna mit donate tu hi kumtir lam khan a boral tawh a,a boral hmain a mit donate na tur chu alo sign fel vek tawh alo ni. A thi dawn tih a inhria nge chu ka hre lova. Mahse,kan tan chuan pawisa ai pawin a hlu a,a hlu lutuk hi ka sawifiah thiamlo zawk.



Darkar hnih dawn tluang taka an zai hnu chuan an rawn nawr chhuak a,room pangngaia awm lovin awmna tur bika antih lamah chuan kan insawn phei a,Nurse ho chuan engkimah min pui a,ka buai tur ang em pawhin ka buailoh phah hloh.




Alo harh hun nghah nan Mizoram lam te ka bia a,ka pa te pawhin chanchin min rawn zawt ve reng bawk.





Zanah chuan alo harh deuh a,Doctor te kan hrilh hnu chuan anlo kal vat a. Gordon rawn che deuh chuan
"Biangno" tih pahin a mutna bul vel chu a dap kual a.
"Tah ka awm,i mit anla tuam anih kha" tih pahin ka pan vat a. Mit lam Doctor pawh ni ve lemlo,heta Mizo Doctor awm ve pakhat chuan min fiam zuk pahin
"Va duat hlak rawh,a thlahlel hle che anih kha" tih pahin min nuih sun sun a.





"Naktukah a mit tuamna chu kan phelh dawn nia" tiin an check thuak thuak a,a țhat vek bawk vangin a tuamna an phelh hun chauh kan nghak tawh. Zanah pawh a bulah mu turin min ti tlat a.
"A zahthlak alawm,anlo kal thut chuan" ka tih pawhin
"Zahthlak loh,a hrehawm ang" ati țung mai bawk si. A thinrim ka hlau deuh bawk nen a khumah chuan kan mudun leh ta ringawt.




A tukah chuan Doctor pahnih leh mizo Doctor kha anlo kal a,Nurse 2 in anlo zui bawk. Gordon mit tuamna an phelh dawn pawh chhan ka kut nghet takin a chelh a,kan zam ve ve a ni,a hlawhtlin vek ka beisei.



"A zo e,i meng thei tawh e" tih pahin Nurse chuan min nuih ver ver a,Gordon chuan ka kut a hum nghet zual sauh bawk..
"Min hmu thei em?" A rawn men veleh a ka tih chuan min melh vung vung a,
"Gordon,i hmu thei em. Hei Doctor leh Nurse ho te hi" ka tih pawh chuan ala ngawi reng a. Ka kut a hum nghet em em ringawt.





"Doctor,ala hmu theilo aniang. Engtin nge kan tih ang?" Tih pahin an dinna lam chu ka va melh a,anni pawh chuan min lo melh kur ringawt a.




"Gordon,engtin nge ni ang. Min hmulo maw. Heihi engzat nge i hre thei em?" Tih pahin ka kut zungțang te chu a hmaah ka tiche kual vel a,
"Hmu thei tur chu ini maw le,heihi engzat?" Ka sawi zo hman lo min pawt thut a,ka lo au țhawt bawk.
"I hmu thei ami?" Ka tih chuan
"Ka'n test ang e" tih pahin min fawp thut a,min țhawng lutuk chuan chêt maina chang pawh ka hrelo. A rawn uar tawlh tawlh tihah chuan kut anlo bêng tliar tliar a,chutah harh zawkin Gordon chu ka nem sawn vat a. Ka sik hlak bawk.




"I test fuh thei maw?" Doctor in English a alo tih chuan kan nui hak a,ka zak bawk,lawm bawk si chu ka sen țan țan in ania ka rin.
"Test fuh e" tih pahin Gordon chuan min rawn ban leh a.
"Zahthlak lutuk" tih pahin ka nuih ringawt a.





Chutah,Doctor te awmna lam chu va melh leh in
"Sir,ka lawm lutuk ania. Awmlo la chuan kan hlawhtling kher lovang" atih chuan mizo pa chu ka en vat a.
"A țha vek e,a lawmawm khawp mai. Kha kha innu chu ami?" Tiin Doctor chuan min rawn melh a,ala nui reng tho.
"Anih hi,fanu kum 5 mi kan nei tawh bawk a" tih pahin Gordon chuan min kuah a,a sawi dan vel chu min chhuan hmel hle bawk.



"In inhria ami?" Tiin ka zawt vat a.
"Specialist kan zirlai a kan zirtirtu alawm" ati mai a. Chuvang alo nih chiah dawn chu min lo ngaihsak em em..



Mut hma chuan kan țawngțai duh a,thinlung leh tihtak zetin lawmthu kan sawi mawlh mawlh a. Kei phei chu ka mittui te a tla hial a,Gordon chuan engmah sawi lovin min hnem a,ka mittui tla te chu a hru hul reng bawk.



Kan haw hma in kan chhungte leh țhiante thil hawn tur kan lei kual a,a mit a fiah tawh bawk nen kan leng ziai ziai reng mai. Sunday kan châm tho vangin lawnthu sawi kan duh bawk nen biakin ah kan inkhawm ve a,mizo lo awm pawh an awm ve nual. Mahse,kan be hlawm lêmlo,an intithei mai mai,hehhe.




Nilaini chuan kan thlawk chhuak leh a,khawiah mah chawl kawi lovin kan thlawk a,US lam nilaini a kan chhuak chu India Ningani ah kan thleng chauh a.




Airport kan thlen chuan kan chhungte hovin min lo hmuak țhap a,mittui lo titla tawk pawh an awm.
"Khawi ber hi nge i fanu le?" Tiin naupangho chu an dinkhawm tir a.
"Eng nge maw ka hriatloh ang le?" Tiin Gordon chuan chil a lem khawlh a.
"Chuti khawi ber hi nge i fanu?" Antih chuan Bawihtei chu mit ka siai zeuh a,ani pawh chuan alo hrethiam mai.




"Ka fanu ber maw?" Tih pahin Gordon chuan naupangho chu a melh kual a.
"Aisi êng ber hi" tih pahin Bawihtei kûn ngal chu a pawm lawp a,Bawihtei lawm lutuk chu a khêk chul a,midang pawh anlo nui dar dar mai.




Kan haw kawng tluan chuan an inpawm chawt a,Gordon chuan a fanu lak atangin a mit a lasawn lo hrim hrim a,a fanu chu a en ngawih ngawi reng mai.



Zanah pawh kan chhungkua tê in kan mu a,chutah pawh chuan min hre changlo lek lek. A fanu muhil lai te chu a thlir ngawih ngawih a. Phone in thla ala sek bawk.
"Amak,mu tawh rawh" ka tih pawhin
"Kum 4 chhung ka hmuhloh ai kha ka en char char dawn" ati mauh mai a.




Zinga ka harh pawh chuan an pafa in alo awm leh tawhlo. Inhnuai lam ka chhuk chuan kawtah anlo infiam a. Bawihtei duh ang ngeiin apa chuan alo koki chhuan lawp lawp bawk. An in awm tuk pum a,chhunah pawh hahdam ngai ala nih vangin a fanu nen an in awm nileng mai thin.




Engkim an tidun a,an awmdun reng bawk. Ka nei dawn tirha ka suangtuahna ka kalsan tak ang zawng zawng kha ka nei let leh nimai hian ka hria. Bawihtei chu kan inkhawm pui a,apa in a pawm a,an hnungah bag khai chungin ka zui bawk. Bazarah kan chhuak hova an pafa in an in koki chhuan a,keiin an hnungah hlim takin ka zui bawk. Kan chhungkua in kan mu a,kan chhungkua bawkin zing kan tho ho leh a,eitur kan siam hova,mite angin chhungkaw awh-awm lutuk ni kherlo mah ila kan chhungkua hian tu chhungkua mah kan awt bik hrihlo.




Kum a vei leh meuh chuan ka mal chungah kan fapa thla 5 mi a mu a,kan fanu zawk erawh apa ngheng pahin phone a khawih bawk.



Gordon pawhin englai pawhin a thutiam a hlen a. Amah vangin vawikhat pawh ka mittui ka titla tawh lova,hlimna mittui chauhlo chu mittui luanna chhan tur ka nei tawhlo. Naute ka pai chhung zawngin
"Ahmaa ka tihloh ai" tiin engkimah min buaipui a,ka peihloh thleng thlengin Doctor pawh min hmuhpui thin.




Eitur țha leh Damdawi phei chu luakchhuak hluiin ka ei thin ti ila ka sawi uar mah mah ang em ka hrelo. Mahse,a ni miau bawk si. Kan fapa alo piang a,a hmingah pawh
'Rohlupuia' tih ngatin a sa a,a hming khan engkim a sawifiah nghal em asin.



Heihi a ni,kan hmangaihna thawnthu. Mi tamtak ti lungngai a,tihlimtu. Mi tamtak ngei nih kan hlawhna leh mi tamzawk khawngaih nih kan hlawhna ni bawk. Hmelhriatloh nihna atanga kan țan,Central jail atanga Bawngkawn PS thlenga kan thlenpui rap rap. Induhna atanga hmangaihna,hmangaihna atanga huatna. Huatna atanga huat lehzualna. Huatna in huaisenna min pek atanga hlimna ka zawnna kawng,ka hlimna in dawhzepna a hrin chhuah rah. Dawihzepna avanga mi pahnih te in hmangaih tak duh anga inpawh hleithei tawhlo te thawnthu. Mahse,khuanu ruat nih tlat vanga insuih zawm leh. An inzawm leh meuh chuan ahma aia nghet leh mawi zawk,rah duhawm zawk leh peng tam zawk chhuah ta hmangaihna thawnthu sei tak chu.


Kan thawnthu ka ngaihtuah let apiangin Gordon-an ka bula a sawi thin
'Khuanu remruat chu țhen hrang țalh pawh tum la,a nghet charh mai ang' tih leh
'Kan in hmangaihna nen hi chuan tlang pawh sawn tum ila kan nep chuanglo ang' alo tih thin hi ka hrechhuak thin a. Tlang sawn theihna hiala michak leh thiltithei chu ni mah suh ila,tlang sawn thei hial khawpa thlipui chak leh rapthlak pawhin kan inkar hi chu a tinghing tawh bik lovang.



Vawiin hi February Ni 1,2021 ni chiah a ni a. Khua a chen deuh vangin inah kan awm țhap a. Tv ah chanchin thar kan ngaithla pah bawk.
Myanmar ram buai vel an puang a,ka fapa hnute ka pek vangin News lam chu ka ngaihsak hman lutuk lo.




"Nûnû,khi khi en teh" Bawihtei chuan alo ti leh thin a. Ka laklawh em vangin ka ngaihsak lawk hmanlova.....
"Nûnû,khi khi. Au Rammuana" atih chuan ka hawi zawk a. Gordon chuan min lo en ngur bawk,thikthu chhe liana hian alo thik leh tawh a ni ngei ang.



"Bawihte,ila hria ami?" Tih pahin TV a Zorammuana lang chu ka thlir a,sipai thuam famkim nen a inbel țhup hi chuan a famkim ngawih ngawih.
"Aw,a fel em alawm. Sakawrah min chuanpui kha" atih chuan a hre rei reuh ka ti khawp a.



"Chu chu tunge?" Lalmawizuala chuan alo ti khur khur a.
"Ka bialpa hlui maw le" ka tih chuan a awih chiah si lo,a meng no lo teh e.
"Bawihte,khi khi tunge a?" Tiin a fanu chu a zawt a.




"Apa,khi khi Au Rammuana ania,Khita kan awmlai khan kan inkawm thin a. A fel lutuk,Nûnû nen pawh an inkawm ngeih lutuk a. Sakawr chungah te min chuanpui thin,ka hmu leh chak e" tih pahin Bawihtei chuan apa chu a melh kar a.
"Lo nih vel tak chu" tih sup pahin Lalmawizuala chuan min rawn melh run run a,ka lo en țha duh miahlo.




"Sawi ve tur i nei em?" Tih pahin a ke chuan min rawn tlawh a. Ka la en duh chuanglo.
"Zorama țhiannu" a rawn tih kher chuan ka nui hak hak a.
"Lucifer Lalmawisual,khi te chu naupang anih khi,en ta che" ka ti vak a. Chil kem khawlh pahin min melh kur a.




"Naktuk atangin Sakawr khalh zirna ah kan kal ve ang" tih pahin a tho hluai a. Bawihtei chuan lawm takin apa alo kuah vat a,he nau kan fin phakar reuh zia hi chu,apa nawrtu leh fuihpawrh tu ber pawh a ni. Tunah te hian Bawihtei'n Zorammuana nen kan chanchin kha dawt hrilh ta se,i hê lovin a awih leh nghal vek mai ang. An inchhun pafa ania aw.




"Bawipui,i u leh ipa chu an sual emai tiraw?" Tih pahin ka fapa chu ka lawm a,engmah hre ve heklo. Hnute pet chung min melh kuau ringawt.



"Sakawt khalh kan zir anga,Zoramchhana nge,Rammuana nge Muanlova nge,tunge,chumi țhiannu chuan a zir ve lovang. Hawh,Baiwhte" tih pahin an pafa chuan an inpawm chho nul nul a. An awmdan naupangchhia lutuk chu ka lo en mawl tawp ringawt. Vawikhat pawh la hmuhloh han thik mai chu.




Mahse,TV ah pawh khan Zorammuana chu a rawn lang țha ve em anih kha. Kan mizo nulate'n anlo hmuh fuh chuan anlo 'Duhpa' leh nasa hlawm ang chu.



Pindan kawngkhar haen paha Bawihpuia ka pawm chuan kan mi phakari te pafa chu anlo che sawt sawt a,min hmu chiah chu inmelhin puan chuan an inkhuh hmak nia. Hahhh,hemi te hi,pakhat lah kum 50 ral kai tawh,pakhat lah hmeichhe naupang kum 8 mi chauh.



A țha vek e,heihi alawm CHHUNGKUA ti CHHUNGKUA tu chu,CHHUNGKUA tia sawitur ka la neih ve chhung chuan ka vanneih zia hria in ka dawn chin malsawmna ah ka lawm zel ang.


*****A TAWP TA*****


A HMASA IN KA STORY INLO CHHIAR A,MIN LO HLUTPUI VANGIN LAWMTHU KA SAWI MAWLH MAWLH A. STORY 2 CHIAH KA ZIAH NA ALA NI,MAHSE😅 HE STORY ZET VANGA MIDANG RILRU KA TIHBUAI ZIA CHU TEH😂😂😂 MAHSE,IN RILRU BUAI VE EIHLO KHA CHU A DIK BAWK SI LO🤭.... AAAAA,KA SAWIFIAH THIAMLO,IN HRE ZAWK ANG😉


A BIKIN LIKES LEH COMMENTS LO PE THINTU TE PHEI KHA CHU, PIAI NAWK² CHE U HI KA DUH MAI THIN🤭. NAKINAH,ZORAM PUM HUAP MILAR LA NI VE MAH SUH ILA,SA-UM BAI TAL KA LA RAWN SUAH VE ANG CHE U😂. FEL SI,THINCHHE SI,PHUNCHIAR LEH TIHTAM HO🤭😂😂🤣🤣🤣🤣



(IN TELLOVA KA HAN ROPUILOH ZIA MAI CHU MAW,NUIHZATTHLAK ZAWK HIAN. FB AH HIAN KA HMELHRIAT/MIN HRETU,2 CHIAH AN AWM A. PAKHAT KA U,PAKHAT KA ȚHIANNU TE ANNI. KA ȚHIANNU CHUAN A CHHIARLO HRIH VE TAWP A,NAKINAH ALA CHHIAR ANG😉 PAKHATI VE THUNG CHUAN 'I ZIAH ANIH VANG HRIM² PAWHIN KA CHHIAR PEIHLO😁' TI TAWP MAI NI MAW😂😂😂😂. AN SUAL ZIA CHU TEH. MAHSE,NANGNI CHUAN ZAN REI THLENG THLENG PAWHIN MIN LO NGHAK ȚANG ȚANG ZEL A,KA BULA MU THLURH THLURH THIN TE ANGLO TAKIN😅😅😅😅 CHUVANG CHUAN KA LAWM EM EM E TIH HI LO HRE TAWP MAI TEH U)



HE STORY KA ZIAH CHHAN PAKHAT,A CHHAN HMASA ZAWK CHU 'OLIVIA RODRIGO' HLA 'TRAITOR' KA NGAITHLAK ATANGIN A NI A,HE HLA KA VEI LAI PHEI CHUAN NITIN ZANTIN KA NGAITHLA CHAR² A,MIDANG HIAN ANLO HNE HIAL ZAWK😂😂😂


KA NGAIHTUAH HIAN TIANG HI A TAKAH TAWNG TA ILA ANA DAWN EM A. MAHSE,KA LA TAWNG VE LO CHU ANIH HI😂😂😂. CHUAN,KEIMA CHANA KA INDAH TA A,KA SUANGTUAHNA TE CHU KA RAWN CHHAWPCHHUAK VE RAWIH A,NANGNI'N MIN LO HLUT SAK A,INLO THINRIM PUI A,INLO HLIMPUI HI KA THINLUNG TAKIN KA LAWM TAKZET.


CHANGTUNU VANGA MIN NGEI LEK LEK TE PAWH IN AWM ANG. MAHSE,KA ZIAH CHHAN PAKHAT LEH CHU 'HMEICHHIA TE LUHLULNA' HI A NI VE LEH TLAT.
'CHANGTUNU A ZIAK SUAL EMAI,AMAH HI A SUAL ANIANG' 'A CHUTI KHATI' PAWH INLO TI MAI THEI A. MAHSE,STORY KA CHHIAR A KA HUAT LEH KA PAWM THEIHLOH TAWP PAKHAT CHU,HREMNA TEL LOVA INNGAIHDAM PAWP PAWP HI A NI(WRITERS DANG KA SAWISELNA AH MIN LO NGAIHSAK LO ULA) .


STORY KAN CHHIAR A,CHANGTUPA EMAW/MISUAL TE HOVIN THEIHTAWP IN CHANGTUNU AN HMUSIT/TIDUHDAH A,CHANGTUPA TE PHEI CHUAN AN PHATSAN HIAL THIN. CHANGTUPA TE INCHHÎR NGAWIH NGAWIH A AN AWM HMUH CHAK LEH CHANGTUNU TE LO THINRIM PUI VANGA THINRIM ȚUN,CHAW EI PAWH TUILO VEK KHAWPA KAN LO AWM VE LAIA. NGAIHDAM DILNA ȚAWNGKAM HNIHKHAT LEH NUNNA LAKA AN VAU VANGA,ANLO NGAIDAM LEH ZUNG ZUNG TE HI CHUAN E🥴 KA LO NA ZAWK ZAWK THIN.


CHHETÊ TIHSUAL VANGA INHAUH ZEL TUR TIHNA PAWH A NI LOVA,CHUTIH RUAL CHUAN HMEICHHE LUHLUL TAK CHIN TAWH IN 'KA RILRU A LÊT CHUAN I INCHHÎR ANG' ANTIH LAWM LAWM PAWHA AN HAN RUNLUIH THIN TE HI CHU E,KEI HMEICHHIA A ZAWNGA MIPA CHAPO TITHEI ȚHAKLO HIAN KA TEI THEI TLATLO😂😂😂


HMEICHHIA CHU ÂWM NÊM ZAWK LEH HMEICHHIA ZAWK KAN NIH ANGIN MIPA TE PAWH KAN ZAHTHIAM IN KAN NGAIHSAK THIAM TUR A NI A. MAHSE,KAN IN RAH BEH TIR RENG TUR TIHNA A NI CHUANGLO. FATE VANGA TUAR TAM TAK HIAN AN NIHNA HLOH THAK KHAWPIN AN FATE TAN HREHAWM AN TUAR A,A ȚHA CHU CHU NI E. MAHSE,TAWRHNA HIAN CHINTAWK A NEI A. HMANGAIHNA PAWH HIAN DAWHTHEIH CHIN A NEI BAWK.


KAN LAL ISUA MEUH PAWH A THINRIM KAN TAWNG BUAK CHUAN A HMAA A DUHSAK BIK EMAW KAN LO TIH THIN. MI SUAL LEH HLEMHLE TAK TAK TE PAWH A RAWN SUAT PHUK PHUK ZEL HI.


MAHSE,HEIHI(STORY) CHU KAN SIAMCHAWP KHAWVEL A NI TLAT A,HUN ȚHA KA RAWN SIAMSAK LEH THEI HRAM A NI. MAHSE,KEINI IN HETIANG HUN ȚHA, GORDON LALMAWIZUALA ANG HIAN HMANGAIHNA KAN DAWNG NAWN TAWH DAWNLO,KAN TAWPNA CHU KAN KHAWVEL TAWPNA A NI TAWP MAI.


KAN STORY NEN INMIL CHIAHLO MAH SE KA RAWN SAWI VE DUAH ANIH CHU😃 KEI AIIN IN UPA VEK ANGA,HRIAT PAWH IN NGAH ZAWK ANG. MAHSE,KA RAWN SAWI VE HRIM HRIM ANIH CHU AUH.



HRINGNUN HI INCHHÎR RENG RENGA HMAN RAL ATAN CHUAN A TAWI LUTUK RINGAWT. CHUVANGIN,VAWIKHAT INCHHÎRNA THIL ITIH KHA A TAWK. SIM RAWH😂😂😂


KAN VAWIINNI ZEL HI KAN HUN ȚHA NEIH LEH A NI..EVERYDAY IS A 2ND CHANCE.


A TAWP ZAN ANIH ANGIN INLO COMMENTS VEK THEIH CHUAN KA LAWM KHAWP ANG,HEI,BOOK REVIEW AN NEIH ANG DEUH HIAN MAW😂IN NGAIHDAN LO SAWI VE HRIM HRIM TEH U'N. KEIMAH AH HMASAWNNA ALO AWM VE BAWK NAN TE,IN THUSAWI KA HRE VE DUH HRIM HRIM A,KA SAWI ȚEUH A. INLO NGAWIH ȚHUP CHUAN A ZAHTHLAK🤣🤣🤣


A TAWP NAN TAK2 KA LAWM EM EM E
THANKYOU 💜
GRACIOUS 💜
KHAMSAHAMNIDA 💜
ARIGATO💜
MERCI 💜
XIÈ XIÈ💜


KA STORY LEHZEL TURAH PAWH INLO TEL ZEL A,MIN LO SUPPORT ZEL TURIN KA SAWM A CHE U. LALPA'N MALSAWM BIK RIAU CHE U RAWH SE,VULCHÛK'S HO😘😘😘


KA HMANGAIH TLAWRH CHE U

*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)