TRAITOR BY Emiry B. Vanchhawng (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

TRAITOR BY Emiry B. Vanchhawng (Completed)

Unread post by Ngaia » January 30th, 2022, 12:29 pm

ek5sacrb.jpg
TRAITOR
CHAPTER 1

☆☆☆☆☆☆☆

COMPLETE LIST A DAH HMAIN KA ENNAWN LEH ANG KA TIA. MAHSE,KA PEIH TAWHLO😂😂😂😂CHHIAR NUAMLO LEH DIKLO DEUH LAI ALO AWM ANIH CHUAN INLO HRETHIAM TAWP MAI DAWN NIA AUH☺☺


NÛPUII POV :

"Anû,i hming iva ziak tawh maw,kan head hi a khirh si a buaithlak" ka țhian kawm ve ber Nuni chuan a rawn ti phei hlak hlak a.
"Aw,ka ziak zo chiah. ICU lam ami kha vawiin hian an chhuak dawn tiraw?" Ka tih chuan
"Nichin mai khan an chhuak tawh,i buaipui anni bawk sia,a hrehawm ngawt ang. An khirh mai si a" tih pahin a bag vel chu a dah fel sawk sawk a.

Keihi Khawngaihthangi,kum 27 mi ka ni a. Ka chhungte chuan 'Nûpui' tiin min ko ber a,ka țhiante ve thung chuan 'Anû' emaw 'Angaih' min ti ve thung. 'Thangi' tih lai tê hi min ngeitu te chuan min koh nan an hmang thin. Pi Laltluangliani leh Pu Vanlalruata Zarkawt veng a chêng,fa pathum te zinga hmeichhe awmchhun ka ni a,tunah hian Civil Hospital ah intern tiin ka awm mek,ka zo ve țep tawh. Mahse,ka awm rei lovang,hmundang thawh duhna ka nei tlat.

Doctor ward fang chu kan zui ve zel a,damlo na zual vak kan nei lova,a zia viau. Vawiin hian kan Hospital hian a thlâwn a Thisen pekna an huaihawt dawn a,lo kal pawh an tam hle. Nuni pawh chuan pek ve a duh a,vawikhat mah ka la pe ve lova. Ka han test ve anga ka tlin hloh chuan pek ve chu ka duh a ni. Damdawiin ah ka han thawk rei telh telh a,damlo thisen mamawh ngawih ngawih ka hmuh hian thisen pek lo hlutzia ka hre thar a. Ka theih phawt chuan pek ve zel ka duh tawh.

Ka damlo enkawl bik vawiina ICU atanga lo chhuak te room ah chuan ka va lut a,an lo țhu ngâwi leh țhap tawh. Ngâwi reng chuan a drip te chu ka va khai tha a,a damdawi te chu ka enfel bawk a. Anni hi mi hausa lutuk an ni a,private damdawiin ah khum an chanloh vangin Civil rawn pan ta an ni. An nu ber hian a pawm theilo ka ti mai. Engkim hi a sawisel reng a,keipawh vawi thum vel chu min hau tawh.


Chawhnu lam chuan thisen pekna lamah kan va kal ve a,va in test hmasa lo chuan kan va pui leh a. Hmeichhia aiin mipa an tam zawk.
"Awi awi,ka buaipui pa chu a hmeltha lutuk,țha tak a ni" phûr deuh in Nuni chuan a rawn ti a.
"Chu a iva hmu tha hle alaw" ka lo tih chuan
"Teuh nang,mask a vuah daih alawm,mahse a mitmeng atang khan a hmeltha tih ka hrethei" tih pah chuan a han phar kual vel a.

"Helam hi lo buaipui lawk mai ta che" Nurse pakhat in alo tih chuan ka va kal vat a. Mipa pakhat sei zeh zuah deuh hi thisen pekna khumah chuan alo mu zuar a,ava sei țha thlerh thlawrh ve,a tukhum min chhawn avangin a hmel chu ka hmu thei lova,a bân lehlam chu a hmai hliah deuh titih hian a dah a. En leh ta lo chuan a hriau vel chu ka va phawi a,Unit 2 lai alo pe anih hi,a hrisel viau ani ang. A thisen bag vel ka buaipui lai chuan chiang fê hian min melh a,ka zak deuh bawk si chuan en pawh ka lo en ve ngam lo. Ka thil khawih te chu ka titla ang nawk nawk a.

Chupa chu alo nui hawk a,a aw chuan ka thinlai ril hi a fan ka ti mai,mahse a hmel ka la en ngam chuanglo. Tiang hi chu kan tawng ve fo mai,damlo chhelo deuh hlek lo kal hian,keini la naupang ve bawk nen kan lo lai ve nasa thei lutuk.
"Kha,khûr tawhlo la" tih pah chuan ka thil thlauh chu min lo pe a.
"Ka ka lawm e" tih bah deuh nawk nawk pah chuan hmanhmawh deuh hian ka kal daih a. Ka kal hma chuan min nuih tih ka hria,a nui ri kha ka theihghilh theih pawh ka ring tawhlo.

"Eng nge ka buaipui pa min lo chhuh daih" tih pahin Nuni chuan min rawn bêng thlawrh a,
"Chutia law,ka lo hre hleinem,a hmel pawh ka hmulo" ka tih chuan țha a tih thu chu a bul atang bawk chuan a han sawi leh a. Alo luangliam hman thlawt anih dawn hi. Lu thing nang nang pahin kan thisen va test tur chuan kan kal phei a.


GORDON POV:

Vawiin thisen pek ni anih vangin thisen pe tur chuan Civil Hospital lamah ka kal ve a. Mi anlo tam phian mai. Tuma'n Highland Hospital neitu fapa ka ni tih an hrelo,mahse ka lawm zawk. Mi an lo tlawn leh hûrh emaw te kha ania nga. Nurse pakhat harh hmel thit thet deuh hian ka thisen chu a la a,min en ngun ngei mai,va be ngat ila chu a lawm vangin a țap thei ang tih mai tur in min en duh.

Ka zawh hnu chuan Nurse dang pakhat hian min rawn buaipui a,a kut chu a dam thlap mai,hriau a phawi lai pawh ka hrelo,a mi khawih reng reng chu a ni thlap mai a,a kut hian malsawmna a ken tel hial a ni ka rin. A hmel en tura ka va hawiphei chu hnuailam hi alo bih ngar a. A hmel chu a țha hle mai,hmeichhe tê lam deuh a ni a,a hmel chu a zum lam mah mah. A khap zâwng chuan a mithmul chu alo che deuh laih zel a,a chhia tih phal chi ani lo tawp mai. Keihi eng nge maw ka lo ngaihtuah ni,in lamah ka nupui duhtak in min lo hmuak mek a,chutah nurse pahkhat ka lo hisâp zui.

A rawn hawichhuak chuan min hmu thut chu a phu deuh zuk a,min en ngamlo hrim hrim,eng nge maw ka hriat ni ka melh lui ngar ngar a. Ani lah a chebuai telh telh,a thisen bag te chu a thlauh phah ringawt. Pek paha ka biak chuan zak tih hriat deuh hian a phei ta chawn chawn a. A awmdan chuan ka nuih a tiza hle,ala nuapang chhia tih a hriat reng mai.

A hnuah thisen test na lamah chuan kan Hospital lehkha pawimawh lam turin ka va kal a. Ka hmaah chuan hmeichhe pahnih hi an ding a. An thisen an test tir dawn a ni ngei ang.

Ka han enchiang chu nichin nurse harh deuh leh kut dam deuh kha anlo ni a. Harh-i chuan a test a tling ngei a,a lawm hmel vur vur lutuk. Chutah pakhat zawk,kut dam deuh chuan ava test ve a,an han chhun chiah chu a phu uih a,ka awmhmun ah ka lo nui suk. Ani pawh a tling ve ni ngei tur a ni.

An va intlar ve a,a hmelțha zawk chuan a hlau tih hriat reng reng,a kut chuan a âwm hi a dawm leh vang vang zel a.
"Hawh,min hrechiang chuanglo,haw leh daih mai ang,ka hlau e" a țhiannu bulah chuan a ti nang nang a,a țhiannu lah chuan engah vak a ngaih hmelloh,lo bêng thlawrh pahin
"Awi i dawih emai,nurse ve si. Aho lutuk,thihna a nilo" alo tih san hmak.

Hmelțhai chu a ngawi reng a,an hun a thlen chuan khumah ava mu ve zân a,an han vit tur chu a hlau ngang aniang,a mutna puan phah chu a țham tawm vek a,ka khawngaih reuh hle,sawti khawpa hlau chuan tihloh mai tur ania. A țap țep tawhin ka hria,eng nge maw ka hriat ni engkhaw sawi set setlo chuan ka va pan hnai a,a kut nêm leh dam thlep ah chuan ka va chelh ringawt a. A mit a men loh vangin rang fahran hian a rawn hûm lêt ve nghal a,amah chiu tu emaw minti a ni ngei ang.

A bân a zawi deuh hnu chuan ka kut chu ka la sawn a,ani pawh chuan alo thlah ve mai a,tunge ka nih pawh a rawn en chuanglo. A têt nen a hmer na reuh zêk lehnghal a. Kal sawn pah chuan a kut ka vawnna chu ka en a,ka khi sak a,engtin mah min be lo mah se ka lo hlimpui ve em em ringawt. A țhiannu ka kalpêl tur chuan min lo hmu nge,mak tih hmel deuh chuan min lo en char char bawk.

An Doctor te hnen atang chuan lehkha pawimawh chu ka va la a,kan damdawiin ah ka dah zuai anga ka haw tlang nghal ang. Ka nupui pawhin min lo thlahlel tawh ang.

Keihi tunah hian Doctor ni thei reng ka ni tawh a,mahse ka la nilo chu anih hi. Kan damdawiin ah hian ka thawk nghal mai ang. Ka pu thi ta kha ka ngaina em em a,ka nu leh pa ai hian ka ngaina zâwk mah,ani khan Doctor ka nih hi a duh ber a ni a,awm ve tawhlo mah se ka tihlawhtling ngei ang. Damdawiin pawh hi ka pu in a ka pa a rochun a ni a,nakin lawkah chuan ka kutah a awm tawh ang.

Ina ka haw chuan ka nu chuan min lo be thuai a,ka tihtur ka tihfel thu te ka hrilh nghal bawk a. Ka nu pawh hi ka nu mah ni se a châng chuan tih theihloh chang ka nei,sum kan nei tih chu ka hria mah se a hleihluak hian a che țhin. Ka nupui hi a bazar pui reng mai a,ka nu phei chu inchei a uar si. Ka pa hian engtin nge a neih peih hi ka ti thin. Mahse,ka nu a nihna a bo chuang lo.

Kan pindana ka luh chuan ka nupui chu alo muhil a,ani pawh chu tlâi chawei hnaih tawh ah ngah nge maw alo mutthilh ni,a awmdan ah hian duhloh tamtak ka nei,mahse a hlimna ah ngaiin engmah ka sawisel lêmlo. Ka nu nen hian in nufa ngang hi an ni a,han khak ila anlo in chhan leh a. Hmeichhe ho buaithlak na a ni. In ngei deuh si hian anlo inţan leh țhâm zel a.

Ka inthlâk sawk sawk a,ka thâwmah pawh chuan ala harh chuanglo. Ka kut vawt tak chuan a nghâwng vel chu ka zu khawih kual a,alo rûm deuh țiah țiah a
"Ka mut ala chhuak ania" mutchhuah hmel deuh hian a rawn ti a. A hmuiah chuan zu fâwp zauh pahin
"Chawei a hun țep tawh a,lo tho tawh la" ka tih pawh chuan ala che châng peihlo.
A bulah chuan ka zu inthawlh ve a,a hnunglam atang chuan kuahin a âwmbâwr chu ka kut lâwng in ka zu tâwk a,a rawn harh chiang teh e.

Ka lam hawi chuan a rawn inlet thak a
"Misualpa" tih pah chuan ka dul vun ah chuan a rawn țhâm ve nghal zat a.
"I duh a ni maw" tih pah chuan a chungah chuan ka bawk run a,ani erawh chu nuih har har pah hian min lo dap kual vel a. Ka nupui ka duh em em chhan pakhat pawh a zei hlawrh hlawrh lutuk hi a ni.

Mitmeng awmze nei zeta min melh pah chuan ka âwm vel chu chûlkual vel a,a kutah chuan man chawt in ka fâwp a
"I cho chhuah liau liau" tih pah chuan a kawr chu ka hlîm tâwk a.

"Chawei hun tawh ah tinge pindanah in tawm bo reng,rawn chhuk r'u" kan pindan kawngka rawn chum pahin ka nu chu rawn au deuh titih a. Ava han hunlo tak em.
"I chawh" lo titu chu a biangah ka seh vak a,a thinrim hmel teh e. Peihlo zet chuan kan tho ta a. Ka nupui Mapuii hian ka nu hi ngei lai hi a nei tlat zel a
"I nu hian mi hi tihbuai nuam a ti ve hrim hrim" rêl duh chuang miah si lo hian a ti țhin a,ka sawi zui pui peih lêmlo. A thupui fûnlo emai.
A dika dikah chuan ka nu pawh hi mi tihbuai a hrât riau.

Kan nupa hian kan in hmangaih em ka hrelo,mahse hei bak chu a awm thei dawn em ni. Kan inthlahlel a,kan inngai em em a,kan in ngaihsak a,kan inhau ngai em em lova. Doctor zir a ka awmbo chhung pawhin rinawm takin kan awm ve ve a. Hei bak chu ka hre biklo. Hmangaihna an tih pawh hi hei bak hi anih ka ringlo,a chhan chu hetiang bak kan nunah ala tel ve tlat lova. Chutia thil ka ngaihtuah lai chuan vawiina Nurse hmelţha-i kha ka mitthla ah alo lang zawk.

Ani khan hmangaih te a nei ve ang em,a hmangaih chu a vannei ngawt ang. Ngah nge maw chutiang mai mai ka ngaihtuah leh tâk? Ka bulah ka nupui îtawm tak awm ve reng lai a,ka nupui chu ka va kiss zeuh a. Mahse,tlâia ka nupui khuma mu ka hmuh pawh khan khanu bawk kha anih kha ka lo ngaihtuah.
Ka vawikhat hmuh a ka ngaihtuah zui awmchhun a ni ngei ang,engmah diklo a awmlo, amah kha a danglam reuh em a ni tiin ka inthiam chawp mawlh mawlh a.

NÛPUII POV:

Zanriah kan kîl lai chuan ka nu leh pa te chuan ka u Ruatfela chu an zilh mawlh mawlh a,midang chu kan lo ngâwi kar.
"Hmeichhia i kawp anih pawhin pasal neilai kawp hauh suh ang che,mi sawi hi alo dik anih vaih chuan i nunkhua chu a nuamlo viau ang" ka pa in atih chuan ka lo mengphâwk hle. U Ruatfela hi kan chhungkaw black sheep ve a ni a,zilh reng ngai ang kha. Kan upa ber UPuia hi chu a țha thluam a,nupui a nei tawh a,a nupui pawh ka țhian țhaber Sawmtei ani nghe nghe.

U Puia leh kei hi chu min zilh vak ngai lova,thilsual kan va tih lua loh vang pawh a ni mah na,bakah kan nu leh pa te hi a thâwka phita fate hau reng ang kha anni lo bawk a. U Puia te hian fa pahnih an nei tawh a,class 12 kan pass hlim khan anlo inru ve rawk alawm. Ka țhian kawm ber ni si khan alo zêp char char a mak ka ti asin aw. Mahse,hei engmah buaina awmlo chuan kum 6 chuang chu an innei ve tawh. Fa pawh pahnih lai an nei tawh nghe nghe.

Zanah chuan Țanpuia alo lêng a,ani hi ka bialpa ve a ni thung. Kum 2 țha chu kan inzui ve tawh,sawițhat em em awmlo mah se a hminga inhual chu kan ni ve tawh mai. Amah hi Highland Hospital ah naupang lam Doctor ani a,a thawh vang a ni pahkhat a,saw mi damdawiin ah kher hna zawm ka tum tlat chhan pawh. Ka chhungte nen hian an inpawh em em a,hna țha tak nei alo ni bawk nen,an tan chuan a ngaihțhat thlak ve bawk em a ni.

Keini inkarah pawh hian hmangaihna an sawi fo hi a awm em ka hrelo,kan in hmel duh a,buaina kan nei lova. Hetiang bak a thlenloh vang te pawh hi aniang engmah buaina em em kan la neihloh. Mahse,a thawhna a hmeichhe Doctor pakhat sawn a duh deuh tih ka hre reng. A phone ka ensak a a rawn biak țhin na ka hmuh khan ka manthiam mai. Mahse amah berin enga tan mah a ngaihloh miau chuan buaina a awm hranlo.


Inneih lam hi min sawipui zeuh zeuh a,mahse aw ka la pawh thei meuhlo. Sawmtei ka zawh châng hian "I mi hmangaih tak i tawn tak tak hunah chuan maw,i thinlung kha a dek zar mai ang. Țanpuia hi i hmangaih leh hmangaih loh ka hrelo. Mahse,nghak la,itan a ruat anih chuan i thinlungah hna a rawn thawk mai ang" a ti țhin. Ka ngaihtuah hian chutiang em em awm pawhin ka hrelo. Ngaihzawng ka nei ngai lova,ani hi a ni deuh mai a,chumi vang pawh chuan ka la hrethiamlo anih hmel.

Zîng ka tho chu inhnuaiah hian inhau thâwm ka hria a,hmanhmawh deuh chuan ka chhuk thla a,ka rin ang ngeiin U Ruatfela chu anlo hau leh a,amah pawh chu a rûi deuh emaw ni.
"Tun thla ngeiah hian i awmbo ang,min tizak zo zai tawh lutuk" ka pa chuan alo ti a.
Eng buaina nge an neih leh tak ni. Keichu hmeichhe awmchhun ka nih vang pakhat hian buaina nazawng min hrilh ve vek kher lova,ka zawh loh chuan mi hrilh pawh an tum chuanglo.

"U,ngah nge tiang hian i awm reng mai le,midang rilru i tihah thei emai,i vahte pawhin an hlauh che saw" Ka u Ruatfela thle deuh bâwk bâwk chu a pindan lama hruai pahin ka zilh ve a.
"Mate,bawihte. I u hi ka sual em a ni. Nangchu tiang hian awm ve miah suh aw,ka angel hmelțha inih kha,fel leh rilru țha bawk si ka nau inih kha. I u hi chu ka vanduai em a ni" tih pah chuan a khumah a chatthla zui nghal hmak a.

Ava buaithlak țhin tak. Ka nu leh pa rilru a hah nasa thei mai si. Ka pa hi Education Directorate ah hian Executive Director ani ve a,Zarkawt veng kan lo ni bawk nen,mi hian thil hi sawi nuam an ti riau zel.

Damdawiin lam pan chuan ka Vespa scooty chu ka khalh chhuak ve leh ta a. Ka scooty hi Nurse ka zir zawh khan ka pa hian hna kal nan tiin min leisak a,ka duhtak ka thlang bawk.

Ka damlo enkawl bik te awmna lam chu ka va pan a,biak hi an châkawm loh thin teh e. Anlo țhu tûm leh hmuk tawh. An fapa hi ka khawih lai hian ţap ngat se chu min seh duh ang tih mai tur hian ka chêtsual hun an châng rân mai mi.

Kan buai ngaiin kan buai reng a. Ka hmaah hian hmeichhe pakhat hleitling zet,en mai pawh a mi vantlang chunglam tih hriat ngawih ngawih hi alo ding a. A tarmit chu la thla in
"Khawi lam nge Doctor Mahruaii țhutna?" A tih chuan țha deuhin ka lo hrilh a,min nuih sak pah hian a phei lawh lawh a.

"Kha kha Highland neitute monu kha ani tiraw?" Ka duty pui ten anlo tih chuan ka lo hre leh peklo
"Ka hre ve hauhlo" ka tih chuan Nuni chuan
"Ni chiang lutuk,tinge damdawiin an nei ve reng a helai te alo pan le?" Tih pah chuan midang chu a en kual a,an sawi zui leh sap sap a.
Ka sawipui ve lêmlo,hetia mi sawi zui hi ka peihloh bakah ka hriat mi ani ve lova a chungchang sawi tur ka hre ve bawk lo.

Kan hmeichhe lam Doctor,Mahruaii chuan phone hmangin file pakhat hi a rawn lam a,kei ka âwl ber takah chuan pe tur chuan ka va kal a. Thâwm nei em em lo chuan ka phei a,kawngkhar hawn ka tum chiah an thusawi vang chuan ka ding leh rih
"A hlauhawm asin,nangma tan pawh" kan Doctor a ni.
"Vawikhat kan paih tawh a,tih nawn chu a chi tawh lovang. Chuvang chuan naupai theihloh na tur țha deuh min pe mai rawh" pakhat chuan a ti a. An sawi laklawh hmel em vang chuan a sîr a țhutna ah chuan ka lo țhu hrih a.

Tu tak chu bia ang maw,an sawi dan ah chuan nau pai chungchang a ni ngei a. Nau pai a duhlo a nih hmel. Mahse,pindan atanga rawn chhuak ka hmuh chuan mak ka ti hle. Highland neitute monu an tih kha alo ni reng a. Min melh zawk pah chuan a kal nghal daih a.

Ava mak dawn ve,an damdawiin ah kal lova helai alo kal chhan pawh kha ka hrethiam ta uar uar mai. An sawidan chuan a mo na te sawn tu hmuh an châk tawh hle si a,mahse tunah a pai tur berin nau pai theihloh na a rawn dil leh lawi si. An sawi hmangah phei kha chuan vawikhat chu a titla tawh tih a chiang reng.

Doctor file ka va pek pawh chuan mak ka la tih hmel deuh aniang
"I tha maw?" Doctor chuan alo ti a.
"Aw tha e,aa tuna lokal kha Highland neitute monu kha ani em?" tîm deuha ka zawh chuan
"Aw,anih kha ka hmelhriat țha ania min lo tlawh kâwi mai mai" alo ti thên a.

An thusawi ka hrechiang mai si a,eng buaina tak nge an neih dawn ni. A hmeichhe khawloh vang anih ngat chuan a mo na te chhûng chu an khawngaihthlak hle mai.

●●●●●●●



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 30th, 2022, 12:29 pm

TRAITOR
CHAPTER 2

☆☆☆☆☆☆☆

GORDON POV:

Damdawiin lamah hna ka țan tawh a,mahse hna tak tak erawh chu ka la khawih chiah lo,Cardiologist ka ni a. Tunah chuan ka pa hnung ka la zui hrih,damdawiin inrêl bawl dan ka chian hnu ah chauh ka thawk tak tak ang. Tunah chuan Ka Pu duhthusam ka ti hlawhtling ta a,ka awm pawh a nuam deuh tawh.

Ka nupui Mapuii nen hian tunlai chu inhauh zeuh zeuh châng kan nei a,inhau ti mai ila amah hi a awmdan a mak em em a. Ka nu nen inhauh zeuh chang an nei bawk a,kei phei chuan ka hau hmasa ngailo hrim hrim a,ka nupui a ni a,alam ţang tur ka ni a,mahse ka nu nen an buaina ah chuan ka pa nen hian kan inrawlh ngailo.

Ani chuan kan inneih tirhtê atang khan fa neih a duh lova. Chhungte sawi rem chawp vanga innei kan ni a,mi hlei zawk zawk kan nilo ve ve nen,chutia inhmu reng leh pindan khata chêng reng na na na chu kan lo inpawh chho ta a,kei phei chuan ka hauh na em em a. Hmeichhe vawt leh mi hausa fanu duatsual anga ka lo ngaih kha ka hrechiang chiah chu alo ni hauhlo tih ka hre bawk a. Nitin mai khan thil thar min hmelhriat tir reng a.

Kan inneih tirh chuan ka nu leh pa,ka u Sarah nen pawh an inmil em em a. Mahse,a rei telh telh a inkhak fek fek an chîng tan a. Ka u Sarah phei chu pasal nei tawh anih vangin kan inchhung khur buaina a lo inrawlh vaklo turin ka khak nghe nghe.

Ka pu enkawl seilen ngang ka ni a. Mapuii pu leh ka pu kha țhian țha tak an ni thin. An duhthusam chu keini an tû te inneih tir kha a ni a,ka pu thu chu a kâwi a ngil a zâwm thin ka nih vangin ka lo pawm mai a. Mapuii pa hi Politician a ni bawk a,mi challang tak chhungkua an ni.

Kan inneih tirh khan fa neih nghal a duhloh thu leh in hriatchian phawt a duh thu a sawi a,fa awt viau mah ila ka lo pawm ve mai,inhmelhriat sa chu ni tho mah ila khatia nupa anga awm nghal mai kha kan harsat anih ka ring. Hun a mawmawh anih ka ring bawk a,kan innei rei anga a rilru pawh a sawh sawn mai ka ring a,tu hmeichhia mah fa neih duhlo ngawih ngawih an awm kha ka ringlo a ni.

Mahse,hei chen kan innei tawh a,ala rai hauh lo hi chu mak ka ti hle. Vawikhat chu ka nu hian bawlhhlawh a paihna lamah indanna damdawi kan pindanah alo chhar a,specialist zir tura ka awmbo hlan a ni nghe nghe. Phone atangin kan inhauh phah bawk a,mahse kan inbiak khan a rawn țap hliam hliam a ka chhungte'n hriat nuamlo deuh hrilh an nei anih ring in a tâwp ah chuan "fa neih kan la inpeih loh vangin a ei anih kha" ka ti ta tawp a.


Chumi hnu chuan kan sawichhuak leh tawh ngailo. Ka nu leh pa te hian tu hmuh an châk tawh em em a,ka u Sarah-i hian fanu a nei a,an hlimpui em em a,mahse inhrang chang annih tawh vangin an duh angin an awm thei lova. Keima fa ngei,mipa fa ngei hi hmuh an châk thu an sawi reng zel.

Nizan mut naah pawh țha deuhin
"Naute neih lam te hi hnaih ve tawh ila,indanna ei reng pawh a tha lo ania" kuah paha ka tih chuan a thin hi a rim nghal em em ringawt a. Tunlai phei chu kan boruak nawmloh lai alo ni nen
"Ka ngaihdan chu ka sawi vek tawh,i pawm thei lo anih chuan fa neihsak thei tu che nei mai rawh" ti hmak in a chhuak anih kha.

A hahthlak a ni,a hmeichhia zawk tihian a awm tlat zel a,midang hi an ni ve em ka hrelo. Ka nu nen an inkar rem sak ngai bawk. Keini kan lo ni bawk,a eng hi nge maw diklo ni.

Vawiin ah chuan ka patea fanu Delhi atanga rawn haw lam turin kan nupa chuan Lengpui lam kan pan a,kawngah pawh chuan a țawnglo,ngâwi rengin a phone hi a khalh niap niap a. Keimah bawk in ka va tlawn leh angai dawn anih hmel.

A phone chu ka la lawk a,ka ak hmak a. A rawn meng no lo teh e. Țawng a tum chiah a hmûi chu ka va hup a,a chêt hma chuan ka va pawm nawlh a,ka malchungah chuan ka hlâng a.
"Le lungawiloh na i neih chuan sawi la,khatia hmelțha deuha tûm bur lo khan" tih pah chuan ka fâwp zeuh a.

"I sual em alawm,kan thil sawifel vek tawh inlo thar thawh leh zel a" a hmui tih pawrh deuh tarh pah chuan ka âwmah a rawn bei thlap a,hetia kan awm lohna chin pawh ka hre tawhlo. Min en thei tur chuan ka kuai dâk a

"Ka nupui ini a,ka chhungte pawh i chhungte vek anni a,in inkar thu rem hi ka tan a nuam hranlo tih hi hria la,ka nu te'n i duhloh deuh thil an lo sawi anih pawhin ngawi mai mai la,chhânglêt miah suh. Tichuan englai pawhin i lam ka ţang reng thei ang,i hrethiam em?" A mit taka en pah chuan ka ti a. Naupang chhia zet hian a bu ve lap lap a.

Nutling pui si hi a che naupang thei riau.
"Fel lutuk,tiang kha ka nupui awmdan tur diktak a ni" tih pah chuan uar fahran mai hian a hmui pawrh tarh ah chuan ka fâwp bawrh bawrh a,ka zêplo ka nupui hi ka thlahlel thin a ni.

Kan inhauh châng phei hi chuan hrehawm ka ti thin. Ka thlahlelh tluk zetin ani pawh hian min thlahlel ve in ka hria.

Motor chhunga chuang e tilo chuan infawh pah chuan kan indap kual ruai a. Kei chu a harh hmasa zawkah ka ţang a,thâwk deuh ham ham pah chuan ka fâwp leh tâwk a. A țhutna ah chuan ava țhu leh thên a.

"Min hrem rei man anih kha i hria maw,zanin ah phuba ka la ang" tih paha a mal ka va țhâm chuan alo țe deuh țhat a.
"Nangmah anih kha,ka la hrem maithei che ni" tih pah chuan ka kap lam puar deuh ûl chu a rawn tawk zeuh a.
"Kan awmna hi kawngpui chu nilo se,motor chhung pawh sawi lovin ka kuai râk nasa tawh ang che" a beng bula va tih sur sur pah chuan a nghâwng vel chu ka nûl thuak thuak a.


"I hur emai,kal vat teh" tih pah chuan a biang chu a tawk kual vel a,a lai hma ve thei mai sia. Ka duhna pakhat a ni hei pawh hi. Engmah sawi tawh lo chuan Airport chu kan thleng a,kal lam ai ngawt chuan kan boruak pawh a nuam deuh. Ka bânah chuan min vuan leh chat tawh.

"Rinnungi chu helam ah a awm hlen tawh dawn a mi?" Motor dahna bula kan din lai chuan a ti a
"Aniang,a pa sawi hmangah kha chuan" ka tih chuan a ngâwi ve leh mai. Kan mi nghah hi ka nau a ni a,nau ti ila kei aiin kumkhat velin a nau deuh. Ka patea fanu anih vang hian nau angin ka en tawp a,kan seilian ho vek a. Ani pawhin min u chuang lo.

"Gordon,U Mapui" tih lâng lâng pah chuan Lalrinnungi chu alo chhuak a. Ka bul alo thlen veleh chuan min kuah nghal a,keipawh chuan ka lo kuah lêt ve a. Mahse,Rinnungi ka bul hnaiha a awm hi ka nupui hian a tithei vaklo nge ni,a mood țha zawng zawng pawh a țhalo zo leh vek tawh. Hetiang nula fel lutuk ni si,inhuatna an nei a ni maithei.

"Nangpawh u Mapui ilo dam maw" nui sâng pah chuan ka nupui chu a bia a,
"Aw dam" tih chauh in Mapuii chuan a chhâng a,Rinnungi chu a hrilhhai hmel hle.
"Țhat chu" dar sân ak pah chuan a ti a,motor lam a pan nghal daih,ala nui reng tho.

"Iva nawmloh hmel ve"ti a ka nupui ka zawh chuan
"Nuam e,kha i nau khan rei minlo ti ang" tih paha kal a tum chu ka pawt lêt a
"Tinge ani kha i millo ami,a fel em kha. I nau itia ka nau chu inau ani ve mai lo mi" thinrim chuang hauhlo a ka tih chuan
"Ni e,i nau chu ka nau chuvang chuan kan nau khan rei min lo ti palh ang" kut vai thuak pah chuan a kal nghal daih.

Kan boruak tha pawh a chhe leh zo ta vek e. Heng hmeichhe ho hian eng buaina tak nei hlawm maw.

Mapuii chu motor a lut ta mai lo chuan a pâwnah chuan tûm deuh hmak hian alo ding ngal a,a duhna ah chuan luhlul ve tak hi a ni,a sei len dan in a zir bawk em a ni.

"Tinge ni leh ta,inhauh ka peih tawhlo ania" ka va tih chuan
"Ka peih biklo,kha en la" a tih a ka en chuan Rinnungi chu a seat hmaah chuan alo țhu fel hmak tawh chu niin,ka nupui hian a seat midang in an chuh hian a duh hauhlo bawk. Buaina chinfel ngai leh bawk.

Rinnungi țhutna glass chu ka kik ri kauh kauh a,ka sawi tur hrelâwk ang mai chuan
"U Mapui,min hrethiam mai rawh. Gordon hi thil hrilh tur ka ngah bawk sia,vawiin chauh chu a hmaah hian ka lo țhu mai ang. I thinrim lo ang tiraw?" Mitmeng pawisawilo zet a ka nupui melh pah chuan a ti zet zet a. Ka nupui chuan keimah zâwk chu rum fê mai hian min melh a,a mitmeng ah chuan kan boruak ala ţha mai mai dawnlo tih ka manthiam mai. Hahthlak.

"Rim hauhlo,enjoy" a kut pahnih phar deuh hliai pah chuan a hnunglam seat ah chuan a țhu lut a,kawngka chu na fe mai hian a khâr țhuai bawk a. Lalrinnungi mi nghal lah chuan
"Ouchh,kawngkhar khan na hrethei se chu a țhen tlawk tlawk ang" alo ti hmanhmawh.

Ka nupui chu a âng zuau a,ka lo țawng khalh vat, "naupang ang maiin țawng thin suh" ka lo khak deuh chuan a țhu tûm vei bâr a. Chutia ka sawi zo chiah chu ka nupui chuan
"Naupang hahh" nuihzat hmel deuh mahse a zat vang ni hauh si lo chuan alo ti sep a.Hmeichhe thinrim titau in min hual kual vel anih ber hi.

Ngâwi reng chuan motor chu ka khalh mawp mawp a,Rinnungi chuan a awmna chungchang vel a sawi siam siam a,țhut pawh a țhungîl theilo. Ka lam a hawi loh leh Mapuii lam ava hawi a,a kut phar kual zawng zawng nen chuan nuih a tiza zawk. Phûr deuh in Mapuii chu ava hrilh ve thin,ka nupui lah chuan "E aw" bakin alo chhang si lo,keimah zawk hi ka lo awm thiamlo. A țhu tûm bur mai a,biak pawh a châkawmloh ngawt ang.

Pakhati lah chuan a sawi tui mai si,a châng leh a nui leh vak vak a,za vaklo chuan ka lo țhenpui ve suk suk tho,ka nupui țhu tûm bur chu front glass atang chuan ka va melh leh zeuh zeuh thin a. Eng nge a ngaihtuah hriat a har hle.

"U Mapui,Fela kha khulamah alo chhuk ve asin" Rinnungi'n atih chuan ka nupui thil in lai chuan a thil in a hâk bawrh bawrh a,
"Tinge fimkhur ta che" motor ti ding chuan rawmawl ka va pe vat a.

"Ka sawi ve mai mai anih kha,khatin ilo lâk thutak vak ka ring lova" Lalrinnungi chuan a ti leh a
"Chu chu tunge" ka nupui melh ngur paha ka lo tih hmuk chuan a ngâwi kar a,a thinrim hmel hle. A hming sawi ringawt pawh a a awmdan phung tibuai vek thei chu tunge ni ang.

"Kan hmelhriat hlui maw le,U Mapuii nau pakhat nen hian an inngaizâwng thin a" ngaihsam hmel deuh in Lalrinnungi bawk chuan alo ti a. Ka nupui erawh chuan engmah a sawi ve lo.

An sawi ang ngawt chu anih ka ring biklo,mahse ka zâwt buai peihlo,hmeichhe buaina bak a ni leh pek lovang.

Lalrinnungi chu an in thleng kan thlah a,pianpui unau a neihloh vang hian min ngai thei em em a,ka bulah pawh a tla tam bawk. A pa hi ka patea ti mai ila,inchhungkhat kan ni lova,ka pa leh a pa hi an inkâwm thin a. Ka têtte atangin a pa hi 'Pate' tiin ka ko mai a,ani pawhin ka nu leh pa te hi ka tih ang bawk chuan a ko ve mai.

An ina kan awm chhung chuan ka nupui chu a țawng tawh hauh lova, "kan haw tawh mai dawn mi?" Ka va tih chuan thaw huai hmel a pu.

Kan chhuah dawn chuan Lalrinnungi chuan ka nupui melh pah hian
"Gordon,in nu hi vêng țha hle rawh aw,a hmelțha si" ala ti ţalh a. A eng chu hria ni maw.
"Vêng țha ang" tih hluk pah chuan kan kal ve ta a.

NÛPUII POV:

Vawiin chu kan hna lam kan buai hle a,mawng pawh kan hûng hman meuhlo. Accident leh inhliam neuh neuh an awm nual a.

Ka damlo enkawl te pindan ah chuan ka va lut a, mipa naupang chu amah chauh chuan alo awm a,thil alo ei bawk.
"Bawiha khawnge i nu?" Ka va tih chuan
"Dawrah a kal lawk" a thil ei mawlh mawlh pah chuan alo ti a
"I damdawi hi ei a hun tawh a,lo ei lawk la" ka tih chuan
"Ka thil ei ala zo lo" alo ti deuh hlar a,a sual ve mai sia
"Anih i nu lo lêt hunah ka lo hrilh anga hetah hian ka dah ang,nakinah thil i ei zawhah lo ei mai rawh aw" dam deuha ka tih chuan
"Aw,anu pawh lo hrilh a ngai chuanglo. Ka lo hrilh mai ang. Ka ei zo țep" a ti mai a.

A luak danna damdawi chu ka dah a,ka chhuahsan ve leh mai a. A nu a awm si lo,ka lo pek luih chuan a țap leh ang tih ka hlau. Ahma pawhin phone ah game alo khêl a,a damdawi ei a ngai tawh si. Dah lawk a ei zawk tura ka tih chuan a țap ta vak mai a,a nu alo lan chuan min zilh erh mai a,a nuam duhlo lutuk.

Chuvang chuan ka tilui duh tawhlo. A damdawi ka dah tih chu a nu kha alo lêt hunah hrilh hrim hrim a ngai a ni. A nu lo lêt hun ka lo nghah lai chuan,Nuni chu hmanhmawh deuh hian a rawn tlân hlawk hlawk a
"Tinge?" Ka lo tih chuan
"Accident na deuh an awm a,VIP an nia. Lokal vat rawh" tih pahin min kalpui nghal hlawk hlawk a.

Accident chu kan Minister pakhat fapa hi alo ni a,heipawh bike accident a ni. A khalh chak vang anih ka ring. Alo na phian a,darkar 2 chhung meuh Doctor te chuan an zai a,an bulah an mamawh pe turin kan lo awm ve reng. A zai tu ni ve lo mah ila ka lo hah vek thei.

Kan zawh meuh chuan kan zavai mai chuan kan thaw huai hlawm a. Intifai tur chuan kan kal sap sap hlawm a. Nuni leh midang chuan kan zai pa chu a hmelțha an tih thu anlo sawi leh hman tawh. An hahthlak,chhelo lah hi an hrethei si. Tuna accident pawh saw a chanchin anlo hre leh vek hman tawh ang.

Kan duty na lam kan thlen phei chuan ka damlo enkawl naupang nu kha alo vei thuak thuak a. Ka hrechhuak zawk,a fapa damdawi kha ka lo theihghilh daih,engtin nge ni ang. A fapa khan alo hrilh ang em.

Kan va thleng min hmu chiah chu ka hmaiah tak min lo bêng hawi sawk a. Nuni leh midang awmho chu anlo au țhat bawk a. Mittui tling pam a ka hawichhuah chuan thinrim hmai sen țawn țawn hian min lo en a
"I hna i tlinloh vangin ka fapa in a tuar leh phah saw i hria em,hre rawh a dinhmun ngai a awh leh vat loh chuan i hna hi i chân ang" min kâwk sawk sawk pah chuan a ti phiar phiar a.

A fapa khan a damdawi a eilo a ni ngei ang. A hrilh tur thu kha a sawi a,mahse keipaw'n hrilh ve leh tho tur ka ni a,accident an awm vangin ka lo mangnghilh palh a ni.

Nuni chuan min kuah a kei chuan ka mittui tling țeuh chu ka hru hul a
"Ka pi ka tihpalh a ni,min ngaidam rawh" țah chhuak zet chuan ka ti a. Ni e,vawikhat mah tumah in kut min la thlâk ngailo a,midang awm ve na ah phei chuan kutthlâk chu sawiloh hauh ka ngaih pawhin min hau ngailo. Min benna ana bawk nen,ka zak bawk nen chuan hawi pawh ka hawichhuak ngam tawh lo.

"Ka ngaidam lovang che,nangmah vangin ka fapa a luak char char a,hremna tuar turin lo inring rawh. Nikhaw hrelova a awm leh anih ngat phei chuan i hna hi i chân hlen vang vang anga,he hna hi khawiah mah i thawk leh thei tawh lovang" tih pah chuan a kal nal nal a.

"Ava han nasa em em. Anû ana em,awi a nasa e"
"An hausak an chapo pui mai mai anih kha"
"Enga tan mah ti suh,khatiang kha chu kan tawng fo ania" tiin min hnêm sap sap hlawm a.

"A pawilo,ka thiamloh ania,ka tuar tur alawm" ka tih chuan Nuni chuan
"I thiamloh ni miah lovah ngaihdam i dil ania,keichu ni ila ka chhânglêt hrep ang. Awi ka thin alo rim lutuk,khatiang pasal te hnathawh chapo pui inla milian satliah. An fapa khirh sual zia chu an hria a, amah khan thil a ei tlat vang anih kha" thinrim deuha tih pah chuan min kuah sawn a.

"A pawilo,keipawh in lo hre leh tur ka nia" ka tih chuan
"Hre leh tur paw'n mi zai naah kan awm daih kha,i inphah hniam reng chuan an zuam tawlh tawlh mai ang che" ala thinrim hle ani ngei ang. "Pawilo" tih a nuih sen sen pah chuan a kut chu ka va chelh a.
"Nangnu hi chu,tupawhin an zuam reng dawn che nih hi" ala ti hrâm .

Kut min thlâk kha chu ka la pawm dam thei mai,mahse ka hna chungchanga min vau ber kha a ni. Ka hna hi ka chân ang tih ka hlau ber a,eng ang pawhin min hrem mah se ka pawm vek ang. Ka hna ka chân lohna tur anih phawt chuan.

Haw tur a ka scooty dahna lam ka pan chu ka hmalam en manglo hian ka kal a,hmeichhe naupang pahkhat hian min rawn su chawrh a,mawng sawh chuan a tlu niaih a
"Awi,Bawihte i tha em,ka tihpalh lutuk" tih pah chuan ka kâi tho nghal a. Vawiin hi eng nge awmzia ka che chhe reng mai. Naupang ka en chuan mi alo nuih ver ver a,a duhawm reuh lutuk,na pawh a tilo aniang.

"Nono" rawn tih ri ah chuan naupang nen chuan kan hawi phei a. A nu ni ngei tur hi kan lam pan chuan alo phei a.
"Ilo tlu leh ta alaw,tlân suh ka tih che kha. Ngaihdam i dil tawh em" a nu chuan a fanu en pah chuan a ti hlak hlak a.
"Nute hmelțha ka tihpalh" aw sîn rât te hian a ti a,,min ti lâi lek lek. Naupang in hmelțha tia min fak vangin ka lai deuh titih mai chu ania.

"A pawilo,keima'n kawng ka lo enlo alawm" tih pah chuan a biangah ka piai a,alo nui ver ver a. A nu chuan ngaihdam te min dil luam a. Nufa fel tak annih dawn kha,an hmel pawh a fai vang a,mi pangngai mai mai chu annih hmel loh.

Ka scooty ka lachhuak a,ka tlânpelh hnu chuan darthlalang atang chuan ka va en leh a. An bulah chuan mipa pakhat hi alo awm tawh a,hmeichhe naupang kha alo pawm kâng a,an inchhaih râk nasa mai. A pawmtu saw ka hmuh hnu a ang hle. Hmanni thisen pe tura lokal hmelțha deuh kha a ang. Ka tlân thui tawh vang chuan ka en zui thei lêmlo.

Zanah chuan Ţanpuia chu alo lêng a
"Ka nu leh pa te'n kan inneih hun tur min zâwt sek tawh ania" a tih chuan ka lo nui mai mai.
"I nui ringawt zel a,inneih i duhloh chuan sawi țha mai la" a thinrim nghal ngawt
"Ka sawi chian vek tawh kha,bakah fanu awmchhun ka ni a,ka nu leh pa te ka la enkawl ve duh ka tih kha" țha deuha ka tih chuan
"Sawmtei pawh a awm reng alawm. Min lo duh ve tak taklo anih hi" tih pah chuan a tho deuh hluai a.

Eng chu a hria ni maw,hetia a mipa zâwkin min nawr sek sek hi ka tithei lo. Thil ti tut tut mi ka nihloh vang pawh a ni maithei. Min nawr reng hian ka awm thiamlo. Bakah ani nei tak tak tur chuan in ngaaihtuah fê ka la ngai ang.

A farnu nula senior pahnih khirh leh khawvel mi em em te sawn min ngeih vaklo tih ka hria a. An nu ber pawh sawn a fapa hlimloh a hlauh vang chauhin min be țha tih ka hria,a fanu te nen an rilru chu a inang reng. Tiang khawsak sâng lutuk ho bulah sawn ka chên theih ka inring chiahlo a ni. Kan khawsak a in mil lo chai chai em mai.


GORDON POV :

Ka nupui nen kan inkar boruak țha ve deuh mah se a țha rei hleihthei meuh lo. Inah a awm tlêm em em a. Tihtur nei anga insawiin a chhuak reng a. Ka nu nen an inkhak reng bawk. Kan inchhung boruak pawh a ni hulh mai. Ka pa erawh chu mipa ngang ania,engmah ala sawi ve lêmlo.

Lalrinnungi hi a rawn lêng țhin a,ka nu nen hian an inkâwm ngeih hle a. A rawn lan tawh hi chuan ka nu a lêngchhuak lo ve deuh. Mahse,Rinnungi rawn lên apiang hian ka nupui zâwk hi a lêngchhuak ve leh daih zel a. Anni ho hian eng nge buaina an neih ka hre hrep lo ve.

A rawn lên apiang lah hian ka haw hun min lo nghak a,thil pawimawh deuh a sawi dawn emaw tih lahin
"I nupui hi vêng țha rawh ka tih kha aw,i rinloh lam deuhin thil alo thleng phut mai ang" tih vel mai mai hi a sawi a. Ka nu bulah pawh alo sawi a ni ngei ang. Ka nu lah hian ka nupui tana hriat nuamlo tur hian thil hi a sawi leh fek fek zel a.

Lalrinnungi pawh a rawn lêng anih pawhin țawng tam vaklo turin ka hrilh nghe nghe. A mipa ber hi hmeichhe buaina ah hian ka lo inrawlh a ngaih phah ziah. Ka nu in Mapuii a khak châng lah hian ka chungah a thinrim belhchhah leh ziah bawk si. Pindan khatah pawh kan riak lo. Pindan dangah ka mu daih thin.

Kan boruak hi ka hne a ni. Lalrinnungi hian
"I ngai thutak lo bawk a,kinah ila hre mai ang" tiin min chhuahchhal ziah lehnghal a. An thusawi ka hriat zawng zawng leh ka nupui awmdan ka en hian inmil riau lai hi alo awm leh thin bawk nen. Ngaihtuah ve deuh chu a ngai a ni. Hrechiang hle in an inchhâl a,tiang thu liamtham phuahchawp chi a ni si lo.

Ka u in an chhuahna hmun a lam turin min rawn bia a,ka va lam chuan an nufa leh hmeichhe pakhat samsei hniang mai hi anlo inbia a.
Ka hmuh hnu a ang hle a. Ka enchiang chu Nurse hmelțha leh kut dam deuh kha alo ni. An inbiak dan vel chu ka en a,naupang a biak dan chu a dam dap a. A nuih sen sen bawk a. A biangsum khuar kâk mai langa a nuih phei saw chuan a duhawm hliah hliah.

A chezia chuan lawm hauh lohvin min tinui thei. A kal sawn pawh chu ka thlîr reng a. Amah ang khan ka nupui hian naupang ngaina ve se. Chhungkaw duhawm tak kan din ni mai tur.

Ka u te nufa chu ka va pawh ve a
"Tunge inlo biak a?" Hrelo âwm deuh a ka va tih chuan
"Ka hriat ngai a nilo,mahse damdawiin kan kal vel hian ka hmu thin. Kan damdawiin a naupang Doctor Țanpuia nen sawn an inzui ka hmu thin" a tih chuan chhan awmlo hian ka motor khalh lai chu ka lo ţang țun a,steering te chu ka chelh nghet hle.

Mahse,ka bialnu emaw ka nupui emaw pawh nilo,ka vawihnih khat hmuh lek hmeichhia lakah chuan ka lo huamhauh ve ringawt chu a ni sia. Lalmawizual in ngaihtuah harh teh,tih pah chuan ka lu chu ka thing deuh nawk a.


"Pute tinge i lu ana mi?" Nonoi chuan ka lu thing chu alo hmu a ni ngei ang.
"Na lo lutuk,Putea hian a ngaihtuahna a ti fîm lawk anih kha" tih pah chuan ka va piai zeuh a.

"Ngâwi teh,nichin kan hmuh nu tê kha,Dr.Țanpuia nen khan an inzui kha ka hmu thin a. Mahse, Dr. Jenny naupang lam ami tho sawn hmanni khan ka bulah a bialpa angin a sawi a ni" ngaihtuah vang vang pah chuan a rawn ti hluai a. Keipawh chuan a thusawi chu mak ka ti hle. Alo ni anih ngat chuan a khawngaihthlak dawn hle mai.

Kawppui te kan laka an rinawmloh hian ana dawn em a. Mahse,tunah chuan midang ngaihtuah thei pawh ka nih loh hi. Kan nupa inkâr hi engtin nge ka siamțhat theih ang tih ngaihtuah ka mamawh zawk.

Chân ka hlauh em em vang pawh a niin ka hrelo,kha chen ka nupui a ni a,kan lo inhmêl duh ve a,heti ngawta a khawsa thin hi chu keipawh in mak ka tihna a rei tawh. A tir chuan a zia ve rêng emaw tiin ka enliam a,mahse zân rei tak tak chhuah ziah thu va awm suh.

"Tunlai chu inkawp te hi a lâr riau mai. Nangpawh fimkhur hle ang che,keichu innu saw ka mil lo laklawh tawh a. Tunlai a awmdan en phei saw chuan ka ringlo teh ania,mi hausa fanu duatsual tih takah" a fanu thil barh mawlh mawlh pah chuan a ti a.

Engtin mah ka chhâng lêmlo. An inah ka dah a,ka haw leh nghal. Bâwngkawn a ka pêng chho tur chiah chu ka nupui ang deuh hi mi pakhat nen bike a anlo inphur ka hmu a. Ka en zui dawn a anlo tlân liam hman tawh si.

Ani chu Sêrchhîp ah api leh pute bulah a kal daih tak kha maw le,keipawh hi ka rilru an tipêng zo.

Inah ka haw chuan ka nu alo țhu tûm deuh bâr a,ka lut min hmuh chuan alo hawi vat a
"Bawiha,innu hi Sêrchhip ah a kal tak tak em?" Alo tih chuan
"Kal ang chu,nimin piah khan ka thlah kha" ka lo ti mai a.

"Vawiin khan ka țhiante nen kan bazar naah Mapuii ang deuh mi pakhat nen lokal kan hmu a,a hnu ah bike in an inphur leh daih a" a tih chuan ka âwihloh hmel ati nge ni
"Keimah chauh ka nilo ania,ka țhiante pawhin an hmu ve" a tih zawm leh a.
"Ani lovang,in hmusual aniang" tih pah chuan inchungah ka chhoh san daih a.

Mahse,keipawh ka ngaihtuahna a kalthui hle mai. Bike a inphur ka hmuh kha ani mai ang em? Ka hmuhsual ka ring a,ka nu te pawhin anlo hmu lehzel si. Ka rilru a buai a ni.

Min lo phatsan tak tak anih chuan ka awm mai mai hauhlo ang.

Ka mut dawn chuan ka va bia a,țha tak chuan min lo chhâng a.
"Ka pi te i be ve duh em?" Atih phei chuan ka rinhlelhna te chu abo lehzual. A pu aw ni ngei tur ka hre bawk a. Pangngai tak chuan kan in mangțha ta a. Midang thusawi ngaithla a ka lo ringhlel ringawt te kha ka inthiamlo leh hnuhnawh.

Mahse ka mut hma chuan Lalrinnungi hian thlalak min lo thawn a,ka han en chu nichina ka ngaihtuahna leh ka nupui ka rinhlelh vanga ka lo inthiamlohna te kha thinrimna leh rinhlelhna hian a thlâk nghal vek.

Mapuii leh mi pakhat inkâi riala an kal lai a ni a,a hnu ami chu bike a an inphur lai a ni nghe nghe. Hei ngei hi anih hi vawiina ka nu te leh kei ngei pawhin ka hmuh kha.

Lalrinnungi chu ka va be nghal a,thil awmzia ka zawh chuan
"Kima nen kan lêngchhuak a,chuan ka hmu thut a. A zin kha inti bawk sia mak ka ti deuh a,Kima nen kan zui ru tawp. Chuan in pakhat ah hian an lût bawk a. A bul vela mite kan zawh chuan 'hetah hi chuan nupa an khawsa,an la awm reilo. Naupang tê anni' anlo ti zel a. U Mapuii thlalak te kan hmuh chuan amah anih thu anlo sawi lehzel a" a rawn ti a.

Kima chu a bialpa kumhlun ngang hi a ni a. Țuan leh mâng ata tawh anla inzui reng.

Ka nupui chuan min lo phatsan tak tak em ni ang. Nge ni khata inluah te kha a hmelhriat te pawh anni thei thova,buailoh na turah hian ka lo buai mai mai em ni. Hmelhriat te pawh a nei thei thova,a țhian te inluah ania nga,ava chuankai ngun vangin țhenawm vel te pawh chuan a hmel anlo chhinchhiah a ni thei tho bawk a. Chutiang mai mai ngaihtuah chuan zân chu ka tumtawi a.

Ka nupui hi ka ringhlel phallo nge,tianga awm tur hian ka duhlo zawk pawh ka hrelo.
"Thu chiang i hriat duh chuan 11 ah hemi address ah hian va kal mai rawh" tiin Lalrinnungi chuan address min lo thawn a.

A hla vak lêmlo. Zemabawk dâi mai saw niin ka hria. Ka va kal poh aniang chu tiin kal tur chuan ka inbuatsaih ta a. Ka va kal anga thil pawh a chiang deuh ang.

●●●●●●●

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 30th, 2022, 12:29 pm

TRAITOR
CHAPTER 3

☆☆☆☆☆☆☆

NÛPUII POV :

"Damdawiin lamah buaina te in tawk em?" Chawei lai a ka pa in dam dapa a tih chuan amah en turin ka hawichhuak vat,ka nu leh midang pawh chuan min lo melh țhap
"Aaa awm hran love" tih pah chuan Sawmtei chu ka va melh vak a
"Ka sawilo" hmui phun chuan alo ti sup a. Ka thaw huai thei. Khatiang thil ka chungah a thleng tih hria se chuan ka hna hi min bansan tir duh ang.

"Harsatna i neih chuan chhungkuaa kan awmlai te hian sawi ve bawrh bawrh la,chhungkaw nih tinuam tu a ni a. Nangchu mahni inah pawh i ți dêk a" fiamthu deuh chuan ka nu chuan alo ti bawk a.

"Chulam pawh a nilo,engmah buaina ka neilo alawm. Ka neih chuan ka hrilh em em ang che u" nuih lêt var var paha ka tih chuan anlo nui ve suk hlawm a. Kan naupang pahnih te erawh an chawei chauh an ngaihtuah.

"Ni e,dikchiah. Miin falâk emaw anlo ti leh mai ang che" U Puia chuan nui vur vur chunga alo tih chuan kan vai chuan kan nui ta vek a.

Kan naupan deuh lai,sikul kan kallai vel hian Zarkawt ah kan insawn chauh a,kan țhenawm leh sikul kan kalpui te hian ka zia a zawih vang leh kan chhungkaw chungchang ka sawi ngailoh em vang in kan chhungkaw falâk ka ni emaw min lo ti a. Ka chhungte hi anlo zâwt thin chu alo ni a.

A hnuah an fanu neihchhun leh an naupang ber ka ni tih an han hre leh chu min han tlawn leh hlawm em em khawp a. Mahse,kawm theih bîk tê hi ka nei a. Lalmalsawmi nen hian kan inkâwm chawt a,ka u nen anlo intawn phah ta bawk a.

Nurse ka zir dawn pawhin an phal lutuk lova
"I u te office ah pawh i theih tawk te chu a awm em em ang,i duh phawt chuan" an ti kha a ni a. Mahse,ka tih luih tlat vangin an rem ti chauh a. An fanu neihchhun in khatiang zahna ka tawk tih leh hmelhriatloh in kut min thlak tih hre phei se chuan an ngawi mai mai lovang.

U Ruatfela pawh hmun dangah a awm tawh a,thlamuang takin kan awm a,naupang pahnih pawh in an putea rui hmel hmuh tur a awm ta lo chu an hrethiam ve a ni ngei ang.

Tunah hian ka tihsual hremna ka hmachhawn dawn tih ka hria a,ka nghak mek a ni. Ka naupang enkawl nu khan kan hotute bulah min lo hêk a,thawk nghet ka nihloh vangin ka intern tihna an sawn mai dawn a ni. Pawilo e,thla thum țha chauh ka nei tawh tho alawm.

Thawhțanni alo thlen chuan phûr fahran lo hian ka hna lam chu ka pan a,ka chhungte lakah hlim hmel ka put reng a ngai thova,ka hlimlo tih an hriat chuan an rilru a hah ka hlau a ni.

Ka thleng chiah chu ka thawhpuite chuan min lo be liam liam hlawm a,min hnem an tum nasa. A chhan pawh ka hremna tawh tur hi a namai dawnlo a tin ni. Min hêktu te chhungkua hian thil an tithei em em a,an pa ber Politician alo ni nen,thudik hre ve kîlh kêlh lo mah se a nupui thusawi chu alo âwih vek mai bawk si. A fapa khan a damdawi vawikhat lek pawh a eiloh chuan a na a zual leh thin a,hmanni pawh khan chau hnêpin alo luak leh a ni.

Accident vangin kan buai tih kan pu te pawhin an hria,mahse an chunglam ho an ngam biklo a,Keipawh inthiam lohna ka nei tho bawk nen,ka pawm thiam mai aniang chu.

"Nurse Nûpuii kha alo kal lawk hman em" kan nurse senior ward superintendent in a rawn tih chuan ka lungphu a tâwp mai dawn. Engtin nge minlo tih ang le.

Hreh rilru deuh in a room ah chuan ka va lût a,naupang nu pawh kha alo awm bawk.

"Hei an thusawi hi a dik anih chuan thil pawi tak kan naupang damlo VIP lehnghal chungah ilo ti palh a ni âwm a. I tihsual te hi i pawm em?" Kan Ward SU chuan a mitmu lian kelh kawlha min melh kuau pah chuan a ti a.

"Aw, ka tihsual palh vang a ni e" kuttin sik niap niap paha ka tih chuan a tarmit chu la thla in thâwk a han la deuh halh phawt a.

"Chunglam atangin thupêk kan dawng tlat mai a,i pawm thiam aniang chu. Kan tihtheih a awm si lova,mahse i hna i thawh țhat chuan ilo lêt vat thei anga. Internship itih chhung pawh alo zo tawh anga hna i zawng thei nghal ang" a ti dap dap a. Naupang nu ngam leh ngam lova ka va melh chuan ka melh hma ka ngai rum rum mai. Laser chu nei se a rawn kâpchhuak pawp pawp tawh ang.

"Ka hrethiam e. Anih leh khawnge min sawn dawn min hrilh thei em?" ka tih chuan
"Misual pûkah" naupang nu chuan alo ti hlar a,chu chu eng nge ka va hrethiam lo
"A awmzia chu Central Jail lamah tihna anih chu" hnehtu inti hmel deuha min melh pah chuan dâk vah hian a rawn ti a.

Ka thal tawp lo chauh. Thingtlângah pawh,dai kil kârah pawh,hlate khuaah pawh ni se ka pawm thei vek. Mahse,Central Jail berkher chu ka theih ka ringlo a ni. Engtin nge ka tih tak ang. Ka ngaihtuah ringawt pawh hian ka thâu ah min man thei dawn hial.

"Central Jail lam khuan staff nurse an indaih lova,an mamawh thu anlo thlen lai tak alo ni a. Mahse,lungngai lo la,thubuai thlen tu te hian itan thil a awlsam na'n tiin i awmdan a zirin ilo lêt vat thei ang" kan Ward SU in atih chuan chhân pawh ka chhâng thei tawhlo.

Room atang chuan ka chhuak a,ka țap lo chauh tawh. Tinge hemi te chhungkua ber kher ka lo tawn. Central jail ber kher chu kei hmeichhia,hmeichhia pawha âwm nêm pawl hian engtin nge ka zu awmchilh theih ang.

Ka țhiante chuan chanchin min lo zâwt sap sap hlawm a,chhan pawh ka chhâng tha theilo. "Ka awmna an sawn" tih chauh ka sawi thei. Ka bag ka la a,ka haw nghal vang vang. Ka chhungte thusawi kha lo âwih mai ila,private te khan lo zir ni ila,hetia sawrkar kawih phar mai mai theihloh hian ka awm ni mai tur.

Thurûk zêp reng theih ni si lo chu,ka chhungte chuan nihnih ngawt ka hna ka kal tawhloh vangin min ringhlel deuh a,ka sawi țhat duhloh vangin U Puia'n Civil lam kan hotute alo va hmu chu niin. Ka pa te chuan engmah an la sawilo,mahse an thin a rim hmel hle.

"Khawiah maw an sawn che a?" Thinrim hmel deuha ka pa in a tih chuan ka chaw eilai ka tâwp chiang hle.
"Central jail lamah" melh pawh melh ngamlo chuan ka ti a. An vai chuan an thaw deuh halh a,an chaw eilai pawh an tâwp chiang hle.

"Le room an lo va kal lawk r'u le" Sawmtei chuan a fate pahnih chu alo ti thuai a.

"Tinge,ava mak daih daih ve. I insawn tih pawh kan hre ve hauhlo ania" ka nu chuan mak tih hmel deuh chuan min zawt a.

"Ka naupang enkawl kha vawikhat damdawi ka pe fuhlo deuh a,a natna a chhuak leh a. A chhungte lam an lungawi theilo deuh alawm" zêp reng theih ni heklo le,ka sawi ta tawp a.

"A bâk ala awm em?" Rinhlelh hmel deuha ka pa in a tih chuan "Awmlo" lu thin pah chuan ka lo ti vat a.

"Khawngaihthang,engtia rei nge i chhungte lakah hian zêp i tum a. I thawhpuite leh damlo zawng zawng pawhin kut a thlâk thu che an sawi vek a" thinrim taka U Puia'n a tih chuan ka hawi dâwrh thei. Ka hmingpuma min koh vawikhat na anih bakah engtin nge ka chunga thil thleng alo hriat theih.

"Engtin maw,kut thlâk a. A ni ami Mambawih" ka nu chuan a țhuhna atanga tho chuan ka bulah alo țhu vat a.
"A dik alawm" hnuailam bih ngar pah chuan ka lo ti a.

"Ka fanu ini lo em ni. Ngati nge hetia nangmah chauha i zêp tlat thin. Vawi tamtak i harsatna te kan hnena thlen tur in kan sawilo em ni? Tinge i inhmuam ûp tlat zel a" ka nu chuan beidawng deuha min ben thak pah chuan a ti a. Ka chhânglo a,ka ngâwi reng.

Ka hrilh anih ngat chuan ka pa in a hmelhriat te bia in min sawnna hi a sût thei ngei ang. Mahse,khatiang kha ka duhlo atin ni. Kan naupan deuh lai pawhin kan sikulah hmeichhe kâwlhrâwng deuh hlek ho hian mi tihbuai an chîng a,ka chhungte ka hrilh ngailo. Mahse,ka u te nen kan kalna a inan vangin anlo hria a,min tibuai tute chu an chhungte an ko a,hnawhchhuah ah hial zirtirtute chuan an vo a. Min tibuai tawh lêmlo,mahse 'pa te hna sân vanga him inih kha' tiin min la sawi țalh anih kha.

"I u te zia tur zawng zawng hi ila vek a. I luhlul em mai" ka nu chuan thâwk deuh hap pah hian a ti a. Mahse,ka luhlul lohzia hrechiang tute an ni. A tâwpkhâwk ah chauh ka mipa zia chu ka chhuah thin.

"Kal chu i hreh em. Ka lo be hlawm dawn em ni?" dam deuh zâwk a ka pa in alo tih chuan
"Hreh love,ka tihsual man ania bakah thla hnih leh tlêm bak ka nei tawh lova. Naktukah Highland Hospital lamah hna dilna ka va thehlût anga,tuna min hremna hian hna ka dilna engmah a dang buai thei chuang lova" ka tih chuan a bu nghut nghut a.

Mahse,ka hlau tho a ni. Zirtâwpni ah chauh ka haw thei anga,kârtluan in ka awmchilh a ngai dawn si. Hmanni deuh lawkah khan tlânchhuak an awm a,mahse an man leh vat a,chutah pawh chuan Jail ah buaina a tam anih kha. Tualthat vanga man an awm bawk nen.

"I pa chu biak tir mai rawh. A zialo emai,khutiang a hmeichhia zu awm te chu" ka nu in alo tih chuan
"Nu,min ngaihtuah lutuk anih kha. Midang pawh an awm ve dawn thova,bakah Medical room te chu Jail bulah tak a awmlo,building hranah daih alawm a awm" tiin ka lo hrilh a.

"Ni e,huaisen zirna a ni ve pah mai a. Mahse,buaina i neih in i chhungte hi min hrilh ziah tawh ang che" khauh deuh hleka ka pa in atih chuan "aw le,ka hrilh ziah tawh ang che u" tih pah chuan ka han nuih tlawn vel a.

"Kumtin kha thu kha i sawi ziah. Keizawng ka ngaih ala țha thei chuanglo" ka nu chuan min melh deuh râwm râwm pah hian a ti a. Ka nuih ver ver ringawt.

Peih fahranlo chung chuan Central Jail lam pana ka kal angai ta si a. U Puia chuan min thlah a,kan inbe lêmlo. Ani mipa ah pawh pâ tak mai a ni a,keilah țawng duah theihna boruak ka nei si lo. Vawikhat pawh ka nu te'n nilêngin inah kan pahnih in min kalkhum a,nilêngin inbe hauh lovin inhma tawn rengin kan țhu kuit țhak. Ka nu te lo haw chuan min hau nasa teh e. "Țawng hi in ui leh lutuk mai" an tih phah hial.

Kan thlen chuan ani pawh a lêt leh vat a,Highland lamah khan ka resume ka thehlut tawh a,min lo duh hlauh chuan thlahnih hnuah ka thawk ve tawh ang.

Țanpuia lah chu a reh vang vang mai si,min rawn be zeuh zeuh a,hmuh erawh kan inhmu ngailo. Ho tê a inhauh vanga inbiak duhlo tawp ang chi kha ka thiam ve lova,a tawp anih tawploh chuan min biak that chhung chu ka la be țha ve zel.

Nurse pakhat duty lai hi alo awm ve a,Tluangi a ni. Doctor mipa pakhat upa lam lek lek tawh hi a awm bawk a. Vanneihthlak takin Tluangi nen chuan intiamin kan hotute kan bia a,kan duh dan a zirin nitin kan in haw chhâwk thei dawn hlauh a. Karkhat ah vawi 3 vel kan haw thei dawn a nih chu.

Ka hlauh ang em em chuan engmah thleng a awm lova,han sual fâl,damdawi pêk leh pem khawih vela han nghal fâl ang chi kha an awmlo a,pakhat hi mitmeng nghal zik zek deuh a awm a. Amah tawp hian pâwlte ala nei zui. Min lo biak pawhin ka chhâng ţha duh ngai lova,hetiang ka ngainat zâwng a ni hauhlo. Mahse,a fel ve na pakhat chu biak duhloh a mi han tihluih țalh tum ang kha a ni lova,midangin mi han chhaih fiam an tum te hian min lo chhan ang deuh hian a awm ve thin. Chu erawh a zia ve reng anih ka ring.

Karkhat vel ka awm hnu chuan țhian țha tak kan ni ta zâwk a,damdawi ka pek leh medical room lama anlo hruai châng hian kan inbe ve zeuh zeuh thin a. A bialnu in pasal a neihsan a,chu chu duh lovin a bialnu pasal tur chu ava sawisa a,a bialnu va rûk chhuah a tum chu a bialnu chhûngte chuan anlo man a ni âwm e. Ani erawh a chhungte'n an bail chhuak vat ang.

Nikhat danah Tluangi nen chuan kan in haw chhâwk zeuh zeuh takah chuan ka chhungte pawh an rilru tlêm chuan a hahdam ve deuh ta.

Lalțanpuia pawh a rawn lang leh zeuh zeuh a
"Ka thawhna an chuan lo thawk ngei ngei la aw" a tih chuan ka lo nui vel mai mai thin. Ka sawi chiang ngam tlatlo a ni.
Amah a thawh vang pawh ni em em chuang lovin Highland Hospital hian min hîp tlat a,ka thawh châkna tak a ni bawk.

GORDON POV:

Lalrinnungi address min lo thawn lam pan chuan ka kal ta a,motor a ka tlân chhung pawh chuan ka rilru a buai hle. An sawi ang kha alo nih chuan engtin nge ka va hmachhawn ang,inhmangaih vanga innei kan nilo tih kan hre ve ve a,mahse hetia min rinawmloh san theihna dan hi a nei biklo. A tîra thinrim hauhlo kha ka in ngaihtuah thinrim chawp ka ti mai. Ka duhloh dan deuha ka va hmu anih ngat chuan ka pawt sawm vek duh ang.

Ka zahawmna a ti chhe vek anga,mipa nêp leh nupuite pawh tilawm theilo angah ka chhuak mai dawn. Traffic lo jam ve chhen te chuan ka thin an tirim vek,steering chu ka chûm pawp a,horn alo inhmet palh bawk nen,anlo hawi țhup. Pawi chai love,ka nupui hi alo uire anih ngat chuan saw ai sawn miin min la en nasa dawn.

In awmna chu ka va thleng a,ka chhuah hma chuan thâwk ka han la ham ham phawt a. Nilo deuha alo awm anih pawhin ka insûm tur a ni. Ti mawlh mawlh pah chuan ka chhuak a,mahse ka zâi erawh a dam thei meuhlo. Motor kawngka chu na tak hian ka khar ri dawp a.

In atang chuan mipa pakhat lukhum khum hi hmanhmawh deuh hian alo chhuak a,inbul vel chu en in a hawikual zuk zuk a. Kei erawh min hrelo nge,min en zawk a,hmanhmawh deuh hian a kal a. Lukhum a khum vangin a hmel ka hmu țha thei lova. Mahse, a biang dinglam ah khan ser lian tham tak a awm tih ka hmu hman. Insualna hnu hma pawh a ni maithei.

Kawngka chu ka va kik kauh kauh a,eng thâwm mah a awmlo. A reh tlawk tlawk a.
Na deuh zâwk chuan ka han kik leh a.
"I kal chauh amaw tia,min ngai hman ami. Keimah a i sulhnu pawh ka la tifai zo lo asin" nui har har paha rawn titu chu ka nupui ngei a ni. Mahse,amah nilovin hmeichhe dang pawh a ni maithei asin ti in ka la inhnêm fan a.

Ka kut ka hûm ruh țeuh a,alo hawn paha lo hnek dawp lo turin ka insûm hram hram a ni.

A rawn hawng chiah chu a phu nasa teh e. Keipawh ka phu ve tho. Ka nupui kum 4 chuang ka lo neih tawh chu towel pan te veng chung hian alo awm a,a hmel lah chu. Ka hamhaih chuan chêt lawk ngaihna pawh ka hrelo. Ani pawh chuan lian kelh kawlha meng hian min melh char char a.

Ka harhchhuak thut,a hrawk ah chuan ka rêk chawt a,inchhungah ka nawr lut a. A thaw deuh hrâwk hrâwk a. Ka la thlah chuang lo.

"Tu sulhnu maw la fai zo lo. Tu maw la duh leh?" Tih pah chuan țhutthleng ah chuan ka theh phei pawp a. Hmeichhe khutthlak hi ka duhlo. Mahse,i nupui ngei ka hmuh ang hian hmu ve la i insûm theih bik ka ringlo.

"Ka bialpa maw le" zak miahlo chuan a rawn ti a. Ka rehna pawh na atih tawh hmel loh.

"Han sawi leh teh,tu chu maw i bialpa chu" tih pah chuan a țhutna chu ka va pan hnai a.

"Aw,,,a chhungte hlauh vanga min kawptu ni ve lo. Ka bialpa,min hmangaihtu" tih pah chuan a nui uar uar a. A á deuh emaw ni zawk.

"I zak miahlo maw. I pi te bula kal tur angin ka thlah che a,tihian ka hnunglamah ilo awm leh a. Uire chu a nuam viau a mi. Kan in saw rawn rap nawn tawh reng reng suh" ka kut chuan ka kâwk sawk sawk a. Min thamlo hmel te chu, kut ka thlak nat mai ka hlau a ni.

"Saw inah sawn awm reng peih ila tihian ka awm nang. Ka lo lêt hauh lovang,lungngai suh. I hmeichhe khâwi ho nen nuam inlo tâwl ve dawn nia" zak map lova atih chuan ka nuih a tiza zawk. Keihian hmeichhia ka kawp a maw.

"Keihian tu maw ka kawp?" Tih pah chuan ka pan hnai nghal a.
"Aw inthup buai angai tawh lovang. Tihian kan inrul tawk chiah. Kha i z*** khan hmeichhe dang hawlh tur ilo zawng tawh dawn nia. E,zawn pawh i ngailo,i nei sa" a sawi zo hmanlo. A hmâiah tak chuan ka bêng țhuai a.
Zaklo lutuk,a uire vanga uire a mi puh ngawt.

"Dâwt ka sawilo tiraw. I duh chuan min bêng leh la,mahse heihi hre rawh. Tunge uire hmasa" a tih leh chuan a biang lehlamah chuan ka bêng leh țhuai a. Ka tum a ni em em biklo. Mahse,uire a min puhna hian ka ngêng a chhun tlat.

"Keihian mamawm em em turah che min ngai tiraw,nang lo hi ka hmu ve lutuk. Chuvang chuan ka ina i bungrua saw rawn la rang ang che. Ka tih mualpho hma che hian" tih paha ka inher chuan pâwnah Lalrinnungi hi alo ding reng a. Ka va hawi chiah chu min hlauh hmel deuhin a kal sawn nghal vat a.

Ni e,min hlau tur a ni,tiang hian vawikhat pawh ka la awm ngai miau hleinem. Saw nu saw thah ka châk zia saw,tunah hi chuan thinrimna nasa takin min bual â vek.

Ka va hawi lêt chu ka benna kha a ni ngei ang,a hnar atangin thisen alo chhuak a. A kut hian alo tuai tâwk tâwk a. Nidang ang chu ni se va panin ka va buaipui ngei ang. Mahse,tunah chuan a teuhlo,saw aia na sawn ania khawih ka la châk. Zahna neilo hmeichhia.

Thinrim tak chuan ka haw a,ka kut ka en chu thisen hi alo kai a,khanu thisen kha a ni ngei ang. Tenawm lutuk,hri țhalo a kai leh kailoh pawh a hriatloh.

Khati khawp khan ka duatin ka ngaihsak a,mit a tihkham ngawih ngawih na ah pawh a nat ka hlauh vangin ka hau ngai lova. Theihtawp in ka duat a,eng nge tihsak loh ka neih. Ka nu min huat khawpin a lam ka țang a. Mahse, tenawm hian.

Inchhung ka lut ka nu in min lo hmu chu alo țe deuh vak a. Ka kuta thisen chu a rawn hmu nghal chat.

"Engti zia nge Bawiha?" A tih deuh hluai chuan ka pa pawh a rawn lang vat a.
"Kha hmeichhia kha,a thawmhnaw awm zawng zawng khi paih chhuak vek rawh u" ti a kan nula te ka vin deuh tuarh chuan
"Lalmawizual,eng vanga khatia awmpui te rawn vin vak vak nge inih. Eng nge buaina i neih" ka pa in thinrim taka a tih chuan ka nui hawk a,mahse ka hmêl chu ala chang rût tho.

"In hre duh a maw. Kha mihring,'ka nupui' ti a ka lo chhâl ve khan min uire san tih in hria em" ka tih tuarh chuan ka nu chuan
"Awi karei" tih pahin min lo pan vat a.

"Min rawn khawih hlek suh nangpawh,i thiamloh a awm ve tho tih i hria em. Alo mo tirh in ilo hruai hir hâ zo a,a hnu ah a duhlo ber ber ah i țang leh a" tih paha ka nu ka va melh chuan a mitmeng a khup deuh zâl zâl a.

Ka nu hian a tir atang khan mo anih angin lo en ni se tiang hi kan thleng kher lovang. A hruai khawlo zo a,amah ber ber in a ngai thei leh si lo.

"I nupui uire naah i nu puh hauh suh. Chutianga iva man chiang anih te chuan a tâwp anih chu" tih hmuk pahin ka pa chuan a phone a phawrh a. Kha mihring nu leh pa te kha ava be dawn a ni ngei ang.

Ka nihna pawh miin an la hriatchian hma hauh in ka hmingchhe nghal dawn a,mipa ka nih anga ka chapona a tichhia a ni. Hmeichhe pakhat lek mamawh pawh pe zo lo. Hmeichhe lâwmna pawh siam thiamlo chhuahin asin miin min chhuah dawn.

Kha nu khan ka mamawh em em angin a sawi a tiraw. Ka hmangaih bik hauh hleinem,doctor ka zir chhung zawng zawng pawhin hnamdang leh ka hnampui hmeichhia ngei min thlêmtu pawh ka ngah ve. Mahse,rinawm taka min lo nghaktu nupui ka nei tiin ka insûm hram hram thin a.

Mahse,ani ve chai chuan kei Lalmawizuala,Highland Hospital neitu fapa neihchhun hi min rinawmloh san ngam a maw. A nunkhua chu a nuam hauhlo ang. Mipa ka nih anga ka chapo na hi a hnûk hniam a ni.

Inhnuai ka chhuk leh chuan kan mihringi bungrua chu anlo lachhuak vek tawh a. Kan awmpuite pahnih chuan min hlau deuh aniang,melh pawh min melh ngamlo.

Chaw kan ei a,ka ei pawh a tui hrep lo.
"Tikhan intih hmingchhiat kher pawh a ngailo. Ințha țhen tawp mai tur" ka pa in atih chuan
"Keichu ka haw emai,ka rinhlelhna a rei tawh reng a ni" ka nu in alo tih ve chuan ka va melh hrâwk a. A ngâwi hmak.

Ani pawh hian engmah sawi theih a neilo. An inang chiah,ka naupan laiin mipa dang lakah a uire ve tawh tho. Ka pa hian a khawngaih vangin a ngaidam leh mai pawh a. Mahse,a zia țhenkhat chu ala sim chuanglo.

Kan doorbell chu a ri ral ral a.
"Va hawng vat ta che u" ka nu chuan alo ti deuh hlar a.
"Gordon Lalmawizuala te in ani em?" Police 3 hi anlo ding țhap mai a.
"Aw ni e" aw khûr deuh hlek chuan ka nu chuan alo ti a.

"I nupui Lalhlimpuii kutthlak a,nikhua pawh hre lova i hnutchhiah vangin tunah hian man ini" a rawn tih chuan ka hawi buai hle.
"Keihian chuti chuan ka kalsan a maw. Vawihnih bak ka ben tawp loh kha" ka tih chuan ka sawi zo hman vek tawh.

"Tuna i thusawi khan a tichiang e,hriatpuitu ah i chhungte pawh kan hmang ang. Va man r'u" a tih chuan ka kut an rawn man chawt a.
"Hetianga min tih theihna dan hi in neilo. Thlawk bo r'u" tih paha ka lo vai pawp chuan police pakhat zawk bekah ka vai fuh a.

"Duty laia police officer kut i thlak vang pawhin i thubuai chu a zânglo hle ang" alo ti leh a.
"In ngam chuan ti ula" ka tih chuan
"Lalmawizual,ngâwi rawh" Ka pa chuan a rawn ti hrâwk a.

"Ka fapa chu in duh chuan hruai ula,mahse a dikna a in hrem anih chuan in hna in chân vek ang" ka pa chuan ati deuh khur khur a.

"E ka pu lungngai suh. In monu dinhmun en chuan kan țanna hi a dik kan ring e. In monu chu tunah ICU ah nikhaw hrelovin a awm mek a,a nu leh pa te ngeiin thubuai hi an thehlut a ni. Mita hmutu sawi dan chuan in fapa hi chawhnu lam deuh khan a kal ngei tih kan hre bawk" police pa in khauh deuh taka atih chuan sawi tur reng ka hrelo. Keichuan vawihnih a hmaiah ka bêng a,mahse engtin nge nikhaw hre lova a awm daih theih.

Loh theihloh in Bawngkawn Police Station lamah min phur thla ta a. Țhenawm khawveng te chuan mi an thlîr duh hle. Naktukah chuan Vanglaini phêk hmaah ka lang kulh ngei ang.

"Eng vanga i nupui kha sawisa nge inih" an OC chuan alo ti deuh khur khur a.
"Ka sawisa lo. Buaina kan nei a,kan inhnial a,ka zêplo. Vawihnih chu ka bêng ngei alawm. Mahse,nikhua hriatloh phah na chu a niin ka hrelo" melh lêt ve chat pah chuan ka ti a.

"Hmeichhia te dan in a humhalh nasat zia i hrelo em ni. Tunah i nupui chu ICU ah engmah hre lovin a awm a,engtin nge i insawifiah ang le. A lu ah chhutna ni ngei a awm a,a hrawkah rehna hnu hma a awm bawk a. A bân leh âwm velah duk a awm thluah bawk a. Chu chu engtin nge i sawifiah ang" a chair a țhu âwm duai pah chuan a ti a. Mei a pak khu luih luih bawk.

"Ka sawi vek tawh. Ka tih chin ka sawi a,in duh leh min hrem thei alawm" ka tih chuan thlalâk hi ka hmaah a rawn theh thla a,ka nupui,nilo a hlui zawk natna khuma amu lai a ni a. A hliam lai leh a in a an va hmuh dan vel a ni. Pakhat ah chuan kha in ami kha a ni a,thisen nen chhuatah chuan a awm nuaih a.

Ka rilru a buai a ni. Engtin nge anih theih. Tu emaw chuan min awhtir a tum a ni. Kha mihring kha amah leh amah a inti na anih ngawtloh chuan.

"Eng pawh chu ni se,bail theih ini lova. Tikhan lockup ah ilo riak ve mai dawn nia" nuih vur vur pah chuan a kal daih a.

Nuih na chi pawh ni hreplo chuan. Ka buai a ni. A nghâwngah khan engvanga rêk kher kher nge ka nih,ka kut thla an hmu si. Kha chiah kha finfiahna an neih awmchhun a ni.

Ni hnih zet chu he lockup rimchhe zet ah hian ka awm tawh. Mizoram chhungah na na na chuan ka lâr teh e. Mitin sawi ka ni,a âwm love. Highland neitu fapa ka ni miau a.

Ka chhungte'n theihtawp chhuaha min bail an tum pawhin an thei ngang lova. Min khingtu te hian thil an tithei em a ni. An fanu neihchhun,an duatsual ni bawk thi chhâwnga siamtu ah min ngai miau a. A uire thu phei chu sawi chi pawh a ni tawhlo.

A chhungte vawikhat min hmu turin anlo kal a,a U mipa khan kut mi thlâk ngawt lehnghal.
A farnu ka khawih vanga ka tuar tur ah ka ngai a,engmah ka sawilo anih kha.

An sual thiam khawp a,karhnih hnuah Court kan pan dawn a,chumi hma chu bail theih lohvin min dang chêp vek. "Kan fanu pawh alo harh hman mah na" tih chhuanlam a hmangin lockup ka awm rei theih dan ber an ngaihtuah. Politician chhungkaw hlun tih tak ah.

Ka thiamlohna awmlo ah chuan ka tuar mai mai lovang tih rilru pu in ka inti pachang hram hram a. Helai hmuna awm reng pawh hi hrehawm deuh a ni.

Mahse,ka khawih angin an sawi a,mita min hmutu an awm miau lo. Ka thiamna ah chuan ka tuar hauh lovang. Min dâwp apiangin vawihnih ka ben thu chu ka sawi a,mahse an awih hauhlo.

Court kal ni alo nih chuan police motor chuan min hruai a. Court kawt kan thleng chiah chu mipui anlo awm tam mai.
"Lalhlimpuii thih ngama khawihtu Gordon Lalmawizuala hi na taka hrem ni rawh se"
"Damchhung jail tân tir ni rawh se"
"A Doctor license hlih sak ni rawh se"
"Damlo enkawl tlâk ani lo"
tih ten anlo au rual a.

Hmeichhia an tam zawk. Keichu police in min vêng hneh a,min khawih pha lo hlauh. Chuti nilo se chuan min chîl hlum duh ang tih tur khawpin an thinrim..

Lo ngai reng rawh u,thudik chu alo lang mai ang,ka rilru a ti mawlh mawlh pah chuan Court ah kan lut a.

Ka chhungte pawh anlo țhu far a,an pawr phang bawk. Ka pa phei chu damdawiin nen buaipui a ngai a,kei ka luh ve hma hauhin ka ti hmingchhe nghal si. Ukil țha ber ber kan ruai a,engti kawng pawhin ka dikna ka pho chhuak tur a ni.

Lalhlimpuii lah chu ala harhchhuak thei si lo. Lo harh ni se chuan thil thlen dan engkim a sawi thei ni mai tur. Thudik a sawi ngam chuan a uire na pawh a chhungte lakah ka thuppui hreh hauhlo.

A chhungte țhutna lam ka va en chuan an meng ling hlawm teh e. Min thah mai duh hmel an pu,an fanu duat hi hetianga siamtu ka nilo tih an hre si lo.

Ka la zâm duh chuang hauhlo,a chhan chu ka dikloh na ka hre hauh lo a ni. A kaw tâwpah pawh ka la ţang ang.

Lehlam Ukil chuan mi puh na tur ngawt a zawng a,a thiam ang ang chuan thu chu a phuah kual a,a tuartu ber ala mu reng a. Chuta kara ama hrilh ang maia an rawn sawi vel chuan ka thin a tirim hle.

Ka Ukil chuan a han sawi ve leh a.
"Judge zahawm. Ka client hian a nupui chu ava hmu ngei a. A sawi angin inhauhna an nei ngei a,chuan vawihnih chu a hmaiah a bêng tih a pha bawklo. Mahse,khami hnu thil thlengah leh Victim lam in tawhsual a tawh chungchang ah chuan ka client hian inrawlhna a nei tawh lova. A in a chhuahsan pawhin a nupui chu ala țha vek a. Ala thinrim thei bawk,chutia ala thinrim ber chuan ka client hian nikhaw hrelo in a siamlo tih a chiang a. A nupui nen an buaina vanga vawihnih a bêng erawh dan hian hrem a duh anih chuan sawi theih kan neilo. Mahse, anni lamin sawisa hrep leh kalsan anga an chhuah hi chu min ngaihtuah sak turin leh lockup a karhnih ngawt bail theih miah lohva an dah vang pawhin kan thubuai hi thlei bik nei lova min ngaihtuah sak turin kan ngen a che" a ti a.

Judge chu alo bu nghauh nghauh a,keipawh chuan beiseina chhetê chu ka la nei ve. Mahse.......

"Finfiahna kan neih te hi rinthlak tak a awm lova,mit ngeia hmutu an awm a,in dikna ve ve in tilang theilo anih chuan Court hi kan titâwp anga,hun danga neih leh tura tih a ni ang. Chutah chuan sawi duh in nei em le?" Judge chuan nghet charh hian a ti a.

"Judge zahawm,mita hmutu ngei koh kan duh a,min phalsak thei ang em?" An tih chuan Judge chuan an theih thu alo sawi vat a.
"Tunah Gordon Lalmawizuala'n a nupui kut a thlâk lai mit ngeia hmutu Lalrinnungi khawngaih takin lo chhuak se" a tih chiah chuan ka beiseina neih te chu chawp leh chilhin a bo vek.

"Lalrinnung,Lalhlimpuii a pasal in kut a thlâk lai chu i mit ngei hian i hmu em?" Fing taka a zawh chuan,kan Lalrinnungi mi dâwih zep tak chuan dâwt a sawi dawn lo tih ka hria. Khami ni khan Lalhlimpuii kut ka thlâk lai chiah a hmu hman a,a bâk engmah a hmulo a ni.

"Ih ih,ka va kal khan" bah deuh nuaih a Lalrinnungi'n a tih chuan lehlam Ukil chuan thinrim tak hian
"Tunah hian thih leh dam inkar a ni a,ih ih,tikual lo khan zawhna chauh chhâng ang che. Court chhunga dâwt i sawi anih chuan nangpawh hrem ini ang" a ti a.

"Aw ka hmu ngei e" ka rin ang ngeiin a sawi ta. Tunah chuan ka tan talchhuah ngaihna a awm tawh lo.

"Gordon Lalmawizuala, i nupui nghâwnga finger print leh i finger print a inmil vang te. Mit ngeia i khawih lai hmutu an awm avang te. I nupui nikhaw hre lova siam a,i kalsan avang te. Police leh dan hmaa dawt i sawi avang te in dan chuan thiamloh a chantir che a. I nupui thu hretu ber alo la harhchhuah loh vangin dan chuan i lakah zahngaihna sang ber a lantir a,i nupui alo harh a,thu a tih chian hma zawng Court chuan IPC Section 214(B) hmangin tualthah tum thubuai leh hmeichhe chaklo zâwk nghaisa a ngai che in, kumkhat lungin tang tur leh a inenkawlna tura a zângna dawmna atan cheng nuaih 1 chawi tur a thubuai siamsak ini a" Judge in thu tawp a siam chuan ka chhe vek ni mai hian ka hria.

Engtin nge ka thiamna rengah pawh hrem ka nih theih. Finfiahna awm zawng zawng in ka lam a kawh vek takah chuan ka tan thiamthu sawi ngaihna a awm lova,ka nun a chhe vek a ni ber.Mahse,a thusawi leh tur chuan ka nun a tichhe lehzual tih min hrilh chiang zâwk

"Highland Hospital rochuntu tur i nihna chu dan hian a titawp theilo. Mahse,mi tamtak in i laka thubuai an siam vangin leh in damdawiin ngei pawhin a chhiat phah theih vang te. Damlo i enkawl tur ber ten i laka damna hmuh an inrinloh vang te. Doctor case awrh nei lai an mahni tidam tura an duh loh vang te. Mahni nupui ngei pawh thi chhâwnga siam a ensan tu chuan i damlo te lakah mawphurhna i hlen theilo tur anga ngaiin Doctor i nihna licence chu India dan puiin Indian Medical Council Act a neih anga laksak ini a,in damdawiin ah ngei pawh Doctor anga thawh tir phal ini dawnlo tih ka puang bawk e" a tih chuan ka chhungte chuan thâwm anlo chhuah hak a.

Keihi Doctor ka ni thei dawnlo a maw. Ka pu duhthusam hnu hnung ber ka tih hlawhtlin ve chu dâwta pun ka nih vangin he'ng mihring ho hian min laksak a maw. Ka che phut a,Lalhlimpuii chhungte thutna lam chu ka thleng phei nghal. A zuan hian ka zuangphei ka ti mai.

A u mipa mi deusawh taka min lo melh kawr tu âwmah chuan ka pawt lawp a,ka hnek țhuai a. Guard ho chuan min lo chelh bet vat a,hrem ka ni ta sa sa,hlauh tur ka nei tawh hleinem.

Ka chhungte chu engtin mah an che chânglo. An hmel a natna lang mawlh saw. An fapa an hnungzui tur chuan Jail bang ka zût dawn mai bakah ka pu thu min chah ka ti hlawhtlin thei si lo.

"Hre rawh u,politics in khelh vang mai mai khan dan hi in lamah a țang reng lovang. Ka dikna ka hâilan a in fanu uire kha alo harhchhuah hunah chuan ka tichhe vek ang che u" ka ti tuar tuar a. Ka aw-râwl tâwp in ka au bawk.

Ka nu leh pa te ai pawha min khawih tam tu,puitling ka nih theih na tura khauh tak,dimdâwih tak si a min chher tu ka pu duhthusam ka tih hlawhtlinloh hlauh vangin kha chen ka tuar a,mahni inlum pawh chhim pha lovin hnamdang karah hrehawm tuarin ka khawsa a. Anni politics khelh kual vang maia hetia ka Doctor nihna min hlihsak theihna dan hi a awmlo hrim hrim.

Jail tak tak tâng tur chuan min hruai chhuak ta a,ka nu leh U Sarah chu an mittui a tla tih ka hre mai. Mahse,ka hnêm theilova,ti tur dinhmun ah ka dinglo a ni.

Ka pa chu inthiamlo deuh hian ka va melh a,ka dára hmer deuh vang vang pah hian
"I dikna chuan lo lanchhuah hun ala nei em em ang. Chumi hma chu chhel takin" tih pah chuan a bu nghauh nghauh a.

Lalrinnungi chu ka lam pan hian a bialpa nen an rawn phei a,a țap deuh pur a
"Gordon ka tihpalh a ni. Ka hmuh chin chiah sawi turin min ti a,ka hmuh lai kha ilo khawih lai a ni bawk si. Mahse,khatianga ti tu kha i nilo tih ka ring tlat ania aw" mittui tla deuh phunga a tih chuan ka melh khui ringawt.

Ka beng bulah chuan rawn dingdihlîp âk âk in
"Ka sawi hi lo ngaihthla rawh. Thu a buai tam ka hlauh vangin tumah ka la hrilh lo a. Ka kal hnu khan ka ngaihtuah che a ka lo lêt leh a,mahse chutah chuan ilo awm tawhlo. Mahse,mipa lukhum khum pakhat nen hian in nu kha anlo inhnial nasa mai a. Chuan an thâwm atang chuan kut an inthlâk anih ka ring. An au ring deuh a,ka hriat chinah chuan a bialpa kha ani ngei ang. Finfiahna tur ka lo zawng char char dawn nia" a rawn tih ser ser chuan keipawh ka harh zawk thei.

Ni e,mi pakhat ka hmuh ve ngei kha,kha pa kha lêt in an inchai buai pawh a ni thei asin. Tichuan kut an inthlak anga. Mahse,tinge a bo nghal hmak,tinge min awhtir kher.

Lo ngai reng rawh,ka rin hi a dik anih ngat chuan mualphona leh zahna min thlen zawng zawng avang leh ka pu duhthusam min lakbo sak vang pawh hian ka la tichhe vek ang che.

I chhungkua thlengin ka tawrh ang hi in tawrh ve nan ka la rawn chhuak leh khawp ang.

Ni e,ka pa khan theihtawp alo chhuah anga,kumkhat ka tân hun ni mah se,ka va tâng tling âwm hleilo em. Min lo nghak la,ka la rawn zawng hmu khawp ang che. Hremhmun tenau tâwk turin ilo in puahchah ve dawn nia.

Ka mualphona zawng zawng leh diriamna ka tawn tur ni hauhlo min pek avang te hian i nunkhua chu a nuam hauh lovang.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 30th, 2022, 12:30 pm

TRAITOR
CHAPTER 4

☆☆☆☆☆☆☆

GORDON POV :

Central Jail lam pan tur chuan min hruaichhuak a,ka chhungte na hmel khan min ti hrehawm hle a ni. Lalrinnungi sawi ang tak tak kha alo ni anih ngat chuan ka țhu mai mai hauh lovang.

Court kawtah chuan mipui anlo pungkhawm țeuh a,thiamloh ka chan vanga chawh min tih hmel fe fe te pawh an awm. Engmah hrechiang hleilo hian mi anlo dem rawn luai luai ringawt a,a bikin hmeichhia hi anni.

Jail kan thleng chiah chu anlo dâk huang huang hlawm a,a chhungah min luhpui a,kan kalpelh cell apiang mai chuan an cell kawngkhar anlo khâwng ri vak vak a,heng ramsa ang maia che ho kianga min awm tirtu mihring chu tupawh ni rawh se,ramsa diktak ka la hmuhtir ang.

Mihring pui te chunga țhat leh lutuk pawh hian eng rahțha mah a chhuah chuanglo,kan laka an sual ngai renga an sual phei chuan engmah sawngsaw hlawtna a neilo. Chuvang chuan ka nun pawh ka her danglam tawh ang.

Ka cell tur kan thlen chuan min hruaitu chuan
"Tunah chuan tuman i hmingin an ko tawh lo ang che,țha deuhin le Cell Number 207" tih pahin min nam lut,a kutțang pahnih chu a lu zâwnah hian a vai thuak bawk a.

Ka cell chhungah chuan ngâwi rengin ka țhu a,tunah chuan ka zahna aiin ka thinrimna a tam zawk. Ka chhuah veleh kha mihring min tâl awh tirtu kha ka theihtawp in ka zawng khawp ang.

"Heihi i routine tur ania,naktuk atangin midang ho nen hna in thawk dawn nia" hmeichhe aw hian a rawn ti a,ka chhâng lova,ka hawichhuak bawk lo.
"A beng a chhêt a man le?" A tih deuh nang nang ri pawh ka hria.

"Ala rawn insawn tîr a,ala zakzum anih kha. Hrethiam rawh" ka piah chiah cell atanga a rawn tih chuan thinrim sa nen, 'insawn thar' 'zakzum' te mi tih. Ka cell bang leh a cell bang inzawmna chu ka chhir bur a. A aia ringin a rawn chhir ve leh a.

Cell danga awm ho chu anlo au dur dur a,nurse pakhat pawh chu hlau deuh hian a tlân phei chawn chawn a.

"I cho ve deuh tihna ami? Cho duh suh,i ngam lovang" pakhat chuan ka cell țhenawm chiah ami ngaihsân hmel fê chuan alo ti a. Ka țhen sak ringawt. An hlau ve deuh ni ngei tur a ni.

"Enteh u,a inla ngêng ve deuh anih hi"
"Nihnih thum vel han awm se,a zal rawih rawih mai ang" tih pah chuan an nui dar dar hlawm a. Chhân en ah pawh ka en lo,helai Central jail,chupawh fel vanga kal khawm nilo a kara lo inlak boss vel kha a ho ber.

"I ngam chuan zanriah eikham ah field ah lo kal la" an tih chuan an Boss emaw chu ala ngâwi reng a.
"A ngamlo aniang"
"Ka rin ang chiah"
"Nêp sazu emai" an tih pawh chuan ka la țawng lo. Ka in seh ruh ngawt ngawt ringawt.

Ka pa khan helai min hruai dawn khan min bail an phalloh theihna tur engmah tilo tur khan min chah uluk viau a,ka thinrim ber lai pawhin ka insûm tur a ni.

"A nêp tih chu a hriat reng alawm. Engtin nge an tih kha. A nupui in midang a kawp vangin alo va sawisa an ti mi,nêp lutuk. Hmeichhe pakhat lek avanga chutia han awm"
"A hmeichhe hmuhloh thlak emai"
"A khamloh thlak emai" an tih chuan ka insûm ve na te kha ka hloh ta vek e.

"Ngâwi r'u,ngâwi hmak r'u. I kâ kha i chîp hmaklo anih chuan i khabe ruh thlawn hlawk khawp in ka țhuai ang che" tih pah chuan ka cell bang chu ka bêng vak vak a.

An ngâwi țhup tawh,min chhângtu ber pawh chu ți deuh a meng chungin a kâ a chîp hmak. Khati daih tawh tur kha a ni.

"I duh chuan field ah ilo kal dawn nia" an Boss pa chuan ala ti țalh a. Chuti na na na chu tiin
"Hre rawh,i cho chhuah anih hi" tih pah chuan ka khum lam chu ka pan nghal a.

Cell dang ami te pawh an țhu sap sap hlawm a.

Chaw dawh alo hun a,an chhuak vek tawh. Mahse,ka thinrim ka la bengdâi theilo,midang lakah ka tilang ang tih ka hlau a ni.
"Rilțam a thih i tum anih loh chuan lo chhuak rawh. Min beih lêtna tur tha i neilo palh hlauh ang e" chapo zet a tih pahin an Boss-a chuan ka cell chu kekawr ipte zen chung hian a rawn kal pêl a.

Chuti fa kova min cho tu lakah chuan ka tlânchhiat chhan tur ka hrelo. Ka taksa zâ,tih reh na te pawh a ni mahna.

Chaw chu ka va dawh ve a,mithar ka nih vang chuan min lo en huang huang hlawm a. Ka chaw dawh țhutna a țhut ka tum chu an zia anlo chhuah leh ta.

Ka țhut tumna apiang mai ah chuan min lo țhut khalh zel a. Ka insawn leh kei aia chakin anlo thleng leh a. Ka thinrim so sang tawh lutuk chuan ka chaw thleng chu ka paih țhuai a,pakhat chuan min rawn khawih a tum a. Ka thleng chuan ka chhir zawt a. A țhu leh nghal hnawk.

Nichina min lo chhaih kual tu lam chu ka va pan a,a mitmenga hlauhna chu ka hmuh hmaih lo. Eng nge ka sawi,an cho chhuah ania lawm. Thaw hrâwk hrâwk chungin a hmai bul chêt ah chuan ka zu kûn a,a hlau lutuk a mit alo chhîng tawp,nêp lutuk.

Engmah sawi lo chuan a chaw thlêng chu ka la lawk a,amah chu pawt tho lawp in ka theh dawrh a. A țhutna ah chuan ngâwi renga țhu in a chaw chu ka eisak mial mial a.

"Hmuhnawm a awm lo,in chaw kha ei r'u" ka tih tuarh chuan an hawisawn vat a. Ka hnunglam za mer mer țhin chu a chhan ka hrelo. Tu emaw hian min lo en renga ka hriat vang chuan ka hawilêt thut a.

Nurse form ha pakhat hian inchhung ațang chuan min lo thlîr reng a,ka han hawi chiah chu rang fahran hian a hawisawn vat a. A kal nal nal bawk. Kha pawh kha eng nge buaina a neih.


Misual tharum thawh hrât angin min ngai a,mahni nupui pawmlai pawh sawisa hlum lo chauh ah min chhuah hlawm a ni law'm ni,ka en tir ang che u,misual awmdan diktak chu. Ka pa khan țha taka ka awm a,midang a biak thiam chuan min lâkchhuah vat tur thu kha a sawi a. Mahse,helai ah hian ka damchhung hun hmang ral țhak pawh ni ila eng nge pawi tawh chuang.

Ka chhuah hunah pawh mite kawh rawn,misual leh nupui sawisak vanga Doctor license an chhuhsak ka nihna kha ala bo dawn chuanglo. Chuvang chuan tunge ka nih tih theihghilh țhak khawpin helai hmunah hian nuam tawl ila tu pa pawi mah ka sawi tawh dawn hleinem.

Chawei kham chuan an sawina hmun chu ka va thleng a,an strict viau emaw tia kil khata zu no lo dawm tawk pawh an awm.

Field ka va thlen chuan anlo ding bial laih a,min hmu chiah chu rawn tleh phei nghal huk ang tum a,mahse an Boss-a khan alo au ding hlawm. An hlau ve hle mai maw.

"Ka chona che i pawm a ni phawt anga,ilo kal ngamna ringawt pawh hi i huaisen e" tih pah chuan min kal hual vel a. Ka vai thlûk pawp loh nan ka insûm hle a ni.

"Nupui te chauh khawih ngam chu mipa pawh ini dawn emaw ni,khawih tham pawh hi ilo nilo mai anga" tih pah chuan ka khabe ruh a rawn hmer salh a. A kut ka lo phih thla țhuai.

"Ummm, mi nêp tak chu inih dawn loh kha. Anih leh heihi" tih pah chuan ka bekah chuan a kut ri țhawt khawpin a rawn hnek pawp mai a. Ka hai chhalh thei.

"E,i tlawm mai dawn em ni. Nupui te chauh kawih ngam loh tur ania" a țhuih hruaite chuan min lo au khum a.

"I nupui pawh chuan Z*** pakhat a duhtawk lo a ni maithei asin. Kan hnen ah te lokal se,kan lo tilawm thiam lutuk ang" tih paha a țhiante lam hawi an nuih ham ham lai chuan ka thinrimna hian a vâwrtawp a thleng ta tih ka hria.

A hnungah chuan ka tlawh țhuai a,lei ah chuan a thal tawp a,a tlûkna lamah eng emaw a zu tauh lehghal.

"Hnunglam atangin maw kan tih dawn" tih pah chuan a rawn ding a,kan insual buai chu a ni nghal mai. A țhiante chuan min rawn bawh huk a, ri awmchhun chu kan inhnek leh au ri a ni hrih.

Tute nge pawh ka hriatloh chuan keia mal ţan ta chu min rawn pui a,mipa sâwm rual kan inphêk sual ta chiah chu midang ho anlo au dur dur a.

Pakhat chuan ka hnar hi a rawn hnek thi sawk a,ka hnek ve țhuai a,a thal tawp. Midang chu an chau deuh tawh ni awm tak a ni,an thal pheng phung hlawm a. An Boss-a chuan min rawn pan chhalh chhalh a. A hmai ah chuan pem thi a awm nual.

Keipawh ka hnar atangin thisen a chhuak a,ka kamsir a thi a,ka biang a pem nual bawk. Min rawn khawih leh a tum chiah chu ka tha la awm ve te chu sawm khawm in ka tlawh zawt a,chhuatah chuan a thal ve nghal duai.

Mu chung chuan ala nui thî sûng a,thinrim hmel pawh a pu lo.
"Engvanga insual ngam nge innih. Tunge bul țan" police leh guard 5 vel chu anlo thleng dêr.

Tumah mah chuan chhân kan tumloh vang chuan thinrim zet hian
"Nangni kha,tho ula in cell pan r'u. 207 leh 208 kha Medical room lam pan in va hruai phei nghal bawk rawh u. Buaina siam reng hlawm mai" tih pah chuan guard pahnih chuan min rawn hnungkhirh a,min nam phei dawt dawt bawk. 208-a lah chuan a lâk thutak hmel loh,chutia an nem dawt dawt lai te pawh chuan ala nui sen sûng thei.

Medical room bul kan thlen chuan min chelhna chu an thlah a
"In hliam te va khawih tir ula,hetah hian kan lo awm ang" pakhat chuan aw pawr chhak hian a ti a.

Medical room kan luh chuan Nurse uniform ha pahnih hi anlo awm a. Pakhat chu nichina lehkha min rawn petu kha a ni. Pakhat leh chuan min hnungchhawn tlat a,a pianzia chuan ka mit ala hle. A mawng a chhîng lah a,a sam a bâwk tawm bawk a. A bawp chu sei lua nilo mah se mipa duh chi tak a ni. Ka bula ding pa chuan min nghawk sawk a
"Melh vak suh,a duh chuanglo ang che" ngeiawm deuh hian a rawn ti a. Ka melh ngur ringawt,ani lah chu a nui suk duh lek chauh.

"Nurse duhtak hmelțha te u,a vawi nga na atan ka lo lang leh" tih pah chuan țhutna lam a pan nghal a. Misual tak pawh kha a ang tawhlo,tunah chuan mipa ler leh nghal tak a ang tawh zâwk.

Pakhat chu rawn hawi phei in
"Nang leh bawk maw. I hmel hian hil ni reng a neilo" tih pah a min rawn hmu ve thut chu mak ati deuh nge
"Ehe,nangpawh maw. Ava mak" tih nang nang pah chuan a țhiannu lam ava hawi a. Pakhati lah chu a rawn hawi ngamlo nge,min hnungchhawn zâwng chuan a ding ngar ngar a.

"208-a hi ka lo buaipui anga,mi thar hi țhiani lo en mai teh" tih paha lo kal a tum chu a thiannu chuan a kawrah alo pawt bet chat a.
"Min thlah rawh,an hmu vek che" a thiannu beng bulah chuan sehchilh nawk nawk hian a ti a. Ka hmulo emaw an ti a ni ngei ang.

Kan insual zawh chiah vang a ni ngei ang,ka lung hi a phu dup dup a,lung Doctor ka ni a hetiang anga lungphu hi a pangngailo tih ka hre chiang.

Nurse pakhat chuan 208-a chu a rawn buaipui nghal vat a,pakhati ve thung chuan a kut a sil tê tê a,ka lam a rawn pan tih ka hria,mahse kei erawh chu ka thinrimna ala reh fello bawk nen ka lung la phu dup dup chu zir chian ka tum ka ti mai. Inbengdaih tumin thâwk ka han la vang vang a. Mahse,a phut ngai chuan ala phu dup dup tho.

"I kut hliam kha ka lo en ang chû" tih ri ah chuan ka harh zawk a,en pawh en lêmlo chuan ka kut chu ka pe a. Mahse,ka kut a tawk chiah chu ka lung phu kha ahma ai mah hian a rawn phu rang leh zual,ka kut pem ah chuan damdawi chu a hnawih a,engmah na ka hrelo.

A hnawih pah chuan a chhêm heuh heuh a,ka thinrima vanga ka lung la phu rang anga ka ngaih chu bengdaih ka la tum mek.

Chutah ka hmai chu rawn tawk in ka kamsîr pem velah chuan damdawi a rawn hnawih a,a kut nêm takin min tawk chiah chu keimah ah hian ka hriatthiam si loh eng emaw darh deuh chuaih a awm,ka mit ka chhîng vang vang a.

Ka pem vel chu chhêm pahin damdawi a hnawih hliau hliau a. Tunah hian thil hriatchhuah ka nei.

Kha nurse kut dam leh hmelțha tak,ka vawikhat hmuh naa ka suangtuah zui kha,kha ngei kha ani tuna ka ngaihtuah chu. Ka hmaa Nurse ding chu en turin ka mit ka han men chuan kei lung lam Doctor meuh pawh hian mihring ngaihtuahna in kan lungphu a thunun theih zia a tak ngeiin ka finfiah ve ta a ni.

A vawihnih nan ka chungah engmah ti lovin ka lungphu a tirang leh tawh.

A mit takah chuan ka melh ngar a,ani erawh chu ka en veleh khan hnuailam a bih ta ngar a. A kut erawh ka hmaiah ala awm thung. Min en miahlo chuan ka pem chu a khawih a.

Engtik laiin nge ka kut ka lo lekchhuah hman ka hrelo. A khabe ah chuan ka zu vuan chawt a,ka tina deuh nge,ala phu uih zui. Ani hian midang ang bawkin ka nupui ka sawisak avanga tâng angah ngaiin min hlau a min en țha ngamlo anih ka ring.

A rawn hawichhuak ta nge nge a,kan mit chu a intawng chat. A mitmu fiah leh tle ralh mai a min han melh chiah chuan ka na te khan englaiin nge min lo kian san hman ka hrelo. He a mitmeng nalh tak leh a kut,tidamtu kut ang maia lumna ngah leh nêm ah hian damna leh hahchawlhna ka la hmelhriat ngai reng reng loh ka hmu a ni.

Chu thil chu a mit taka vawikhat ka en hian ka hmu nghal vek. Ka duh hmu tur chuan rei ka mamawh lo,ka vawikhat en na ah hian amaha țhatna awm zawng zawng chu ka hmu thei nghal vek a ni.

NÛPUII POV:

Zoram mipui zawng zawng tî tî,Highland Hospital neitu te fapa tunhnaia a nupui sawisa a puh vanga Jail a an rawn hruai chu ka lo en reng a. Mahse,ka hmu chiang theilo. Jail lut smart ber a ni hial ang. A inthuam dan en pawh hian mi pangngai tak chu ani maw le. A hmel chu a țhat hmel phian a,hmuh tawh na ka neiin ka hria.

208-a pawh a chhuak țep tawh a,a chhuah hnuah engtin nge a bialnu nen khan an va awmzui ang tih ka hre châk hle mai.

Zanin hi ka riah zan a ni a,Tluangi haw zan a ni ve thung.

"Awiha awiha,enteh...mak lutuk" a rawn ti lut hluai a. Ka lo melh hâ ringawt.
"Khatin mi melh kuau zel suh. Ka hmuh ang hmu ve la chu mak iti ngawt ang" tih pah chuan a phone chu a hmet kual a.
"Eng chu maw" damdawi dahțhat mawlh mawlh pah chuan ka lo ti a.

"Highland Hospital neitute fapa lo tâng thar pa kha maw,ka va hmu a. A mak lutuk,ani te chu ka hriat na a rei tawh. Ka cousin hi Doctor awm a,Gordon-a hi an senior ani thin a. A star thei lutuk" tih pah chuan a phone chu a thai kual a thai kual a.

"Khawnge a awm daih le?" a tih chuan a phone chu ka va bih ve a.
"Highland neitute fapa ani tih an hrelo chung pawhin an duh hlawm ania. Chhelo tak hi ani mai,awiiii ka sawifiah thiamlo zawk. A hma chuan vai fa emaw kan ti țhin. Aw heihi" tih pah chuan thlalak min rawn hmuh a.

A sawi pa thlalak ka hmu chiah chu ka phu zuk thei. Hepa hi chu hmana Civil lama thisen lo pe ve kha anih hi. Tinge damdawiin an neih reng laia Civil alo pan. A nupui chuan engtin nge a phatsan theih,hetiang khawpa mipa chhelo hi.

"Mahse maw,a rilru lamah hian buaina a nei deuh aniang an ti asin" a rawn tih ser ser chuan ka lo nui hawk. Ka âwihlo lutuk,a hmel chu sawiloh a hawiher ringawt en pawhin mi pangngai chu ani tih a hriat vek.

"Keipaw'n ka âwih chiah lova,mahse an sawi alawm. Lockup a awm chhung zawng pawhin a țawng ngailo an ti. Chuan a thinrim thut thut zel,hnaih vak a țhalo ang" a tih chuan ka la nui mai mai tho.

"Chuti,chaw an dawh dawn hnai a,ka va en thlî thlâi chhin hlawm ang e,lo la chhuak lo la" tih pah chuan chaw semna hall lam ka pan a.

Inchung ațang chuan tângho chaw dawh chu ka en reng a. Ka mi nghah kha alo la lang ve lo. Chaw dawh angai tih a hre ve lo aniang.

Mipa rual awm tih takah an ri le lu hlawm a,inhnek a in tuk pawp pawp pawh bâng lo.

Chutia an che vel ka lo en reng lai chuan ka mi nghah rûk ngei mai chu alo lût ve a,jail kawr inhmeh ber ala ni ngei ang,a hnungah 208-a chuan alo zui bawk. Anni saw an inhal loh ngei ka beisei.

207-a Gordon an ti emaw ni alo luh chuan an lo reh dûk hlawm a,an lo melh țhup bawk. Ani lah chuan engmah hrelo ang mai hian âwmpho vah hian a kal pel hlawm a.

A kal pelh ho chu an meng no fahran lo. Chaw ava dawh zo țhutna a pan tur chu kan misual rual awmkhawm chuan an sual anlo chhuah leh tawh.

A țhutna tur apiangah chuan anlo tlân khalh a,hmun dang a pan lam apiang chu anlo chhuh zel bawk. Ani chuan ka chîp hmak chung chuan misual ho che vel chu a en rûn a. A mitmeng ngawt pawh saw keichuan ka hlau sa tawh.

Thildang ka lo ngaihtuah lai tak chuan chupa chuan a chaw thleng chu chhuatah a paih țhuai mai a,ka la phu nghek zui. Midang ri ham ham pawh chu an reh nghal țhuap a. Chaw sem ho thleng chuan eng nge thleng tur kan nghak vek.

Chutah Gordon chuan amah chhaih kualtu lam chu muangchâng hian ava pan phei chhat chhat a,chupa chuan a hlauh hmel tawh lutuk.

A hmai bul chêt ah chuan a zu kûn hniam a,a au khum vak emaw a hnek țhuai kan lo rin laiin ngâwi rengin chupa chaw thleng ala eiloh chu ala lawk a,chupa chu a țhutna atanga pawt tho lawp in chhuatah a theh thlu tawp a. Mahse,a chêt dan chu a âwm ka ti. Midang ho khu an che over ve hret a ni.

Chutia a chawei lai mit tla lêk lova ka lo thlir lai chuan ka lam a rawn hawi thut a,rang fahran a hawi sawn pah hian ka kal nghal hlawk hlawk a. Lawk lawk,tinge ka tlânchhiat ve ringawt,thil ka tisual pawh a ni si lo. Ka biang lah chu ala sa hat hat zui,eng chu ka hria ni maw.

Medical room lam pan ta mai lo chuan ka hawi khawthawng vel mai mai a. Guard an awm vek vang hian kal kual pawh a hlauhawm vak loh.

Chutia ka kal kual vel lai chuan field lam atang hian thâwm a rawn awm hak a. Ka hawi thla chu anlo in phêk sual chu niin,an insual ka hmuh ringawt paw'n ka tha a khûr thei.

Tinge țhelh an tum miahloh. Ka hlau bawk si nen chuan rang taka kalin guard ka hnaih ber ho chu ka va hrilh vat a,chutah hamrîk hâm tuar tuar pahin police 2 vel nen chuan an zu pawt țhen ta hlawm a. A țhen chuan fiamthu ah an la emaw tih mai turin an la nui mai mai thei. An hmel ka en chuan thisen chhuaklo a ram pawh an awmlo. Engtin nge khuti chung khuan an la nuih theih. An tâng pawh hi a âwmlo ta hlawm love.

Chutah insual zingah chuan 208-a leh 207-a chu ka zu hmu ve hlawl a,anni phei chu an nat hmel leh zual. 208-a pawh chu thisen chhuak chung chuan a nui sûng a. 207-a ve thung chu thinrim tih hriat tak hian ala thaw hawlh hawlh a.

Ka hmachhawn tur ka hre nghal. Hmanhmawh takin Medical room lam ka pan a,Tluangi haw inpeih at a lo țhu chu ka va bawh rawp a.
"Tinge,eng nge misual i hmu mi?" Hlauthawn hmel deuha alo tih chuan
"Misual te chuan min hual vek hi,misual pûkah alawm kan awm" ka tih chuan thaw huai hmel a pu.

"Insual an awm leh a,i haw theih ka ringlo min rawn hrilh dan in. Chuvang chuan haw lo mai rawh,keimah chauh chuan ka buaipui thei lovang" engvanga thil ho tê a dâwt sawi ta ringawt nge ka nih pawh ka hrelo. Mahse,keimah chauha khapa lo hmachhawn kha ka zuamlo a ni. Mahse,ngâwi teh tinge ka lo huphurh ve ringawt,engmah boruak kan neihloh chu sawiloh hriat pawh min hre ve lo ania.

Mahse,ka zuamlo ve tawp,Tluangi paw'n riah a hreh em em chuang lova tihian awm ve mai ang.

Ka rin ang ngei chuan an pem buaipui tur in anlo hruaia,mahse 208-a leh 207-a chauh anni. Tluangi chuan "Pahnih chauh annih saw,ka va'n ngei tak che,kan naute piancham kan lâwm dawn sin le" ngei hmel deuha min melh pah chuan a ti a. Ka lo nuih tlawn ver ver ringawt,sawi tur ka nei miaulo a ni.

208-a chu a rawn ri lut ham ham a,alo luhpui pa ve erawh chu sakei huai an sawi ang mai a hlauhawm leh rum in a meng.

Tluangi chuan a zia a chhuah leh,207-a chu buaipui turin min ti hmiah. Ani hi a mak ve deuh na chu mithar hi a khawih duh ngai hauhlo.

Ka mi buaipui tur pa lah chu a ngâwi ngul mai a. A thaw ve lo emaw tih tur khawpin a chelo thei. A țhu khawng at a,a ngaihtuah mûk hmel hle. Ka va buaipui pawh chuan a mit chhîng vang vang chung hian a thaw leh ham ham thin tih loh chu engtin mah a che lo.

Ni e,eng nge ka lo beisei ve vak. Hriat pawh kan inhre ngailova. Chutah,amah hmachhawn hlauvin dâwt hial ka lo sawi ve ringawt a. Ava ho tak.

A kut pem a damdawi ka hnawih pawh chuan a mit ala chhîng tlat. A mithmul chu a sei seng a,a dum tak hle bawk. A sam tihdan leh a hmai tlang vel ka thlir chian chuan ka rilru ah thil pakhat chiah alo lang. Chu chu Lucifer a ni. A sam ințhen si lova darh ve deuh hlek si te. Amah ti Lucifer ber tu chu a hmaifang leh thinrim in bengdaih tum ni âwm taka a thaw ham ham te chu an ni.

A hma lawkah a hû-hâng zo chiahlo ka awm tih hre lêk lovin min thâwk khum ham ham a. Ka kut te chu a khûr dawn hial.

A hnar bul vel ka han tawk chiah chu a rawn meng thut a,chiang mangkhêng hian min melh a,keichuan hnuailam ka bih vat. Amah melh leh miahlo chuan a hmai chu ka hru a,chutah ka khabe ah min rawn kuai dâk âwrh a,ka phu zuk.

Ka țe chhuak țep a ni. Ka mit takah min melh a,min thunun tum ang mai hian a mi melhna chu a chiang. Tluangi leh 208-a inchhaih nui thâwmah chuan ka harh zawk a,ka khabe a chelhna chu lâksawn tumin ka thle sawn deuh a,a kut chu ala ve mai.

A mit chu ka lak atangin ala lasawn chuanglo. Chutia a hmûi pem a damdawi ka hnawih chiah chu ka kut alo vai sawn pawp a,ka sîr a drip khaina ban thîra siam kan hûn ah chuan ka vai fuh a,a ri deuh țhawk a. Ana lutuk ringawt,mahse a rûka tuar chi.

Ka kut chu ka hûm vang vang a,ka hmaa țhu khawng luah pa chu a rawn che deuh uih a,mahse 208-a'n "finkhur ta che,nurse anih hi" tih deuh hrâwk paha min lo pan chuan a che chu tâwp chat in a țhut ngai chuan a țhu leh a.

"Ana lo,tlêmin ka vai fuh ringawt" ka tih chuan,208-a bawk chuan
"Hmeichhe khawih țhang hi chuan an sim rei theilo" ngeiawm lek lek a alo tih chuan ka lo îp châwih thei.

A thinrim hlau taka Gordon lam ka va hawi chuan ngâwi ngul hian 208-a chu alo melh a. An insual leh mai ka hlau a ni. Chutah kan chêngkawla chu a rawn nui chhuak hak a,kan vai chuan amah en chuan kan hawi phâwk hra hlawm mai.

Tunah khan tuma'n eng nuihzatthak mah kan sawi si lova,ani lah chu ngeiawm takin a rawn nui chhuak bawk si.

"Ka sawi kha maw,tlemin a rilru hian chianlohna a nei" ka beng bulah chuan Tluangi chuan a rawn ti sar sar a. A sawi ring mai si,ka lo sik vak a. Gordon lam chu hawiin
"Hmmmm" tih khum țalh pah chuan a han kal pel a. Ava han naupangchhia tak em.

"I kamsîr kha ka la hnawih zo lova" tîm deuha ka va tih chuan,min chhân pawh a tum hmel loh.

"Pawilo i duh tawhloh chuan chhuak tawh mai r'u" dam deuha ka tih chuan 208-a chu a chhuak nghal a. Kan Lucifer-a chu a țhutna ngaiah ala țhu reng.

"Tikhan light off hnan tawp rawh" Tluangi'n pindan lehlam atanga alo tih chuan Lucifer-a chu alo rûm nghut a.

"Ka kalh tawh dawn ania" tih paha kawngkhar lam ka pan chu ka kutah min lo pawt dâwrh a. Mak ti bawk hlau deuh bawk si a ka en chuan
"Tunge i nih?" min ti anih chu,ka nuih hak a.
"Nurse" tih paha kal leh mai ka tum chu a aia na chuan ka kut chu a hmer leh a.

"Min thlah rawh,eng nge maw i hriat le" tih paha ka tâl vak chuan
"Ngâwi rawh" khauh tak hian a rawn ti a. Hepa hi ka hlau deuh riau mai.

"Khawi chhuak tawh rawh" ka tih chuan ka kut a man na lam,nichina min khawn fuh tirna chu lek kâng in a en vang vang a.
"Ana em?" A tih sup chuan amah chu ka en vat,min lo en ve chiah bawk. Chutah tak chuan keimah ah hian diklo a awm tih ka hre mai. Ka lungphu te hi a su dâwrh dâwrh hian ka hria. Ka kut a vawnna lah chu a sa ham ham bawk si.

"Na na tawh lo" bak deuh nak a ka tih chuan ka kut na lai chu a thâwk khum ham ham a,ala na deuh bawk si nen a sa deuh hat hat bawk.
"Tihian ala na em?" Tih pahin ka kut chu la in a hmai sa vur mai chu min tawh tir a,ka kut chu a hmaiah chuan tipharh in a nawr bet a,ka ban rêk zâwn ah chuan a thaw sa ham ham bawk.

A chêt dan chu mak ka tih em vang in ka en mâwl tawp a. Chutia ka kut in a hmai a sîk tir vang vang lai chuan ka kutphah chu a hmuiin a rawn nûl thuak thuak a.

"Eh engthil nge itih" tih pah a ka kut lâk sawn ka tum chuan ka kutphah chu a fâwp tâwk a,ka țek chhawk ni ber in ka hria. Hepa hian min chhaihkual a tum em ni.

"Mak ti viau suh,tiang kha chu ila tawng fo ang" ka kut dah thlâk pah chuan a ti sup a. Phâwk fahran hian ka lo melh reng ringawt. Ka kut chu chelh tawhlo mah se ka chêt tir theilo. Ka bân chu vawn si loh hian a âwm zâwnah chuan ka la phar deuh țai a.

"Chuan,mipa sual hlang hmaah khatiang uniform âwm zau tak kha ha tam vak suh,insûm theihna an nei tlêm hlawm teh ania" tih pah chuan ka kut chu a rawn ti thla a.

"207,iva rei ve" tih paha guard pakhat alo luh chuan min nem lawp a,ka kat nawk thei.

Nichina a chêt dan leh min melhna dam tak te kha chu thlenglo ang maiin a bo leh nghal vek. Rum ûl hian a meng leh nghal a,guard pa chu melh khui chung hian a chhuak a.

Kha kha eng nge? Eng ang zia nge maw a neih ni. Min fiam kual a tum anih chuan a ti fuhlo hle ang. Zaktheilo lutuk. Ka lung lah hi amah vang khan alo phu ve dup dup a. Ani lah chuan mi tihnat pawh hrelo in a che a,chutah mi hîp ber ni âwm ang zia zangin a che leh a. Midang anlo lang a,min nam kat leh dâwrh a.

An sawi kha alo dik anih dawn hi,a chiang fahran lo aniang. Hnaih vakloh a him ber ang. Khatiang mipa kha chu an hlauhawm. An zûna uai ana duh an ti lehnghal. Eng nge maw ka ngaihtuah le,kei hi a zûnah ka uai ang maw.

A teuhlo lutuk,a hmel leh pianzia chu sawisel bo a ni tih ka pha lo. Mahse, a zia a mak em mai.


Hlat a him ber ang,chu chu ka nat lohna tur a ni. A vawikhat min tawhna lekah pawh ka danglam anih chuan a țhatna khan min la zêmthlu mai ang tih pawh ka hlau hlel love. Ka kut a fawhna chu ka'n thlêk vang vang a. A sa hat hat thei. Ka kut leh a biang a intawh chiah khan power nei ang maiin min chârbet nghal.

Thil dang ngaihtuah ang,khatiang pathlawi,an hur duh an ti lehnghal. Bialpa ka neih reng kha maw le,ani chauh kha ngaihtuah ang. Mahse,nichina a chêt dan teh phut kha a mak em a ni.

Mutna ah pawh ka lo ngaihtuah leh țhin. Amah kha a nghet charh mai a,a ângchhunga tlûk luh chu a thlamuan thlak ngawt ang le. Khatiang mipa khan min hmangaih ve se la chuan ka chhuah phal hauhlo ang maw le. Tunah te hian eng nge a ngaihtuah ve ang,a nupui a ngaihtuah ve ang em le. Engtin nge a nupui chuan a phatsan theih,tih vel mai mai ngaihtuah chung chuan ka muhil ve ta a.

(An intawng ve ta 😊😊😊)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 30th, 2022, 12:30 pm

TRAITOR
CHAPTER 5

☆☆☆☆☆☆☆

NÛPUII POV:

Ka hun leh ni hman dan chu a ngai pût hi a ni mai. Jail lamah ka liam thla reng a. In nen ka kârtawn chhen bawk.

207-a pawh rilru tibuai tawk leka chêt a thiam a. An insual zawh khan vawithum vel an insual nawn leh tawh.

Medical room anlo kal apiang hian ka khawih lo chu a duh țhak lova. An tam chânga ka hman lawk loh pawhin midang ka khawih zawh alo nghak ngar ngar thin. Ngâwi rengin ka che lai min lo thlir tawp a,a mit hi ka lak atang a lasawn ngai lo tluk a ni. Ka buaipui mek ho chuan nuamlo an ti thei si,damdawi ka hnawih zawh hma hma te hian an kal daih zel.

A pem vel ka buaipui pawhin kan inbe ngai lova,min khawih a tum heklo. Amah ka buaipui lai pawhin min melh ngar ngar a. Kei hmeichhia a zawnga tleirawl laih pawh hrelo hian hepa min melhna vang hian ka lai a,ka nunphung ka hlauh țep țep thin.

Mahse,a cell lama ka va kal te,damdawi ka sem chângte hi chuan lungtum biak ang chiah hian bia pawh ni ila min chhâng lova. Melh pawh min lo melh ngai heklo. Ka auh lâng lâng pawhin milim ang maiin a țhu ngar zel.

Ina ka haw châng chuan tlemin ka thawveng ve deuh a,Jail boruak hrim hrim khan ip pikna a keng tel ka ti mai.

U Ruatfela pawh an thawn bo na lamah ala awm ve ngar ngar anih hmel. Ka nu leh pa te pawh an hlim hmel kan hmu tam ve ta.

Țanpuia hi alo lêng ziah a,vawikhat mah inneih lam a sawi chhuak tawh ngai lova. A hma zawng aiin min ngaihsak ka ti mai,a chêt ngailoh dan deuh a chêt te hi a chîng a. Min tih thinrim a hlau zek zek tawh. Engkimah ka zâi ngai deuhin a awm a,a khawngaihthlak letling zawk.

Ka hman châng chuan a thawhna lamah min hruai ve țhin a. A nuam in damdawiin boruak tur diktak a keng tel. Ka kal châng hian amah lo be țhin tu Jenny kha ka zawng deuh țhin a,mahse vawikhat chauh ka la hmu.

Bazar turin kan chhuak dun a,thil kan ei dun a. Mi a ngaihtuah thar em em hi eng nge a chhan ka hre lo. Thilpek min pek a tum ziah a,chu erawh ka duh ngai hauhlo thung.

Vawiin pawh ka chawlhni anih vangin Highland lamah ka va kal leh a. Gate ka lut tur chiah chu hmanni a hmeichhe naupang ka sut te kha ka hmu thut a,min lo la hria ani ngei ang. A nu nen chuan ka bulah an lo kal a.

"Hi,i dam maw?" Ka va tih chuan alo nui sen sen a,ava duhawm chiang tak.
"Hmanni khan kan hmanhmawh lutuk a. Sarah ka nia. Eng nge itih dawn?" Tih pah chuan a nu chuan a kut a rawn phar chhuak vat a.
"Aw,Khawngaihthangi ka nia. Angaih,Nû-i emaw Nûpuii,i duh dan dan in" tih pah chuan ka chibai lêt ve a.
"Helai velah hian kan hmu thin che,i thawk ami?" Sarah-i'n a tih chuan
"Ka țhianpa ka lo tlawh thin a" ka ti a

"Tu ber nge i țhianpa?" Mitmeng nghal deuh chuan min han melh a
"Naupang lam ania,Țanpuia" nuih ver ver paha ka tih chuan a nui lai a tâwp chiang hle. Tinge chu ka hre lo.

"A,anih chu lo kal ziah rawh. Heihi kan damdawiin ania" a tih chuan nui hmel a pu ve leh deuh.
"Alo ni maw,ka lo hrelo a" tih pah chuan kan lût a. Corridor ah hian Țanpuia leh Jenny inhawlo tih hriat tak hian an rawn phei a.
"An pahnih sawn an inkawm nasat hmel hle mai" ka bula ding Sarah chuan alo ti sep a.


Ka chhâng chuanglo. Anni pahnih chuan min la hmu ve lo.
"Jenny,kha inpa a mi?" Sarah chuan ngeiawm lek lek a alo tih lâng lâng chuan an rawn hawi phei a. Min rawn hmu chiah. An nui lai an tâwp hmak.

"Ilo kal tih i sawi lova,ka lo hruai tur che nia" Țanpuia chuan ka bul alo thlen chuan engmah thlenglo ang mai hian a rawn ti a. Țhian an ni a,an inkâwm ve mai mai aniang tiin ka lo thinrim duh chuanglo.

"Jenny heihi i bialpa i sawi kha ni lo mi?" Sarah chuan alo ti leh kher a. Jenny chu a hawi buai nak a,ka nuih alo za hle.
Lalțanpuia ve thung chuan Jenny chu alo melh rum hle.
"Ni lo e. Heihi chu ka thawhpui alawm" Sarah melh zek zek pah chuan a ti a.
"Hmanni mi i sawi nen khan an inang hle mai" Sarah chuan ala ti hrâm pek a. Jenny hawihâi hmel chu ka lo en reng ringawt. A dâwt sawi rah a seng a ni mai.

"Zai tur kan nei a,kan zawh veleh ka lo kal nghal ang. Min lo nghak la" Țanpuia'n a tih chuan Janny nen chuan an kal ta a.
"Hmeichhe zaklo ching cheng deuh hi ka ngei tlat" Sarah chuan ngei hmel deuha Jenny phei lai en pah chuan a ti a.

"Damdawiin hi i pasal te lam ta nge,nangmahni lam" inthlahrung deuh tak chuan ka záwt a,Gordon-a nen unau an nih leh nihloh ka hre châk a ni.

"Aw,ka pu te din a nia. Ka pa hian a enkawl zawm anih hi" a tih chuan Gordon-a nen unau anni tih ka chiang nghal mai.

"Aw anih chu,hmanni khan keipawh hna ka rawn dil asin" ka tih chuan min melh kâwk a.
"Eng ber kha nge? Nurse anih chuan keima buaipui hi alawm. Bawihte,office ah lo va kal rawh le" tih pah chuan țhutna lam min pan pui a.

"Aw,nurse lam ania" ka tih chuan
"Țha lutuk,vawiin hian a tling ho hrilh kan lo tum asin. I tel ve ngei ngei ang. Tunah khawnge i thawh?" Tih pah chuan a țhu a.

"Tunah chuan Central Jail lamah ka la awm" zak deuh tak a ka tih chuan,a meng phâwk leh hle.

"Awi,a ni maw. Ava țha ve. Gordon-a cell number 207 a awm kha i hria em?" Zak hmel deuha a tih chuan keimah ka lo inthlahrung zawk.

"Aw hmanni lawk khan alo lut alawm" nuih ver ver paha ka tih chuan tlema nguai hmel hi a pu deuh.

"Awi,a tân chhan ah hian sawi tur a tam lutuk a maw. Keini pawhin kan lo kan thin alawm. Mahse,amah hian min be rei duh vak ngailo a" a tih chuan a rilru tur ka hrethiam uar uar mai. A unaupa ve lah kha thinrim sa a piang an sawi ang velin a awm thin si a.

"Hawh,lehkha kan târ chhuak țep a. I en nghal dawn nia. Ilo tlinglo anih pawhin kan hnawhlut țalh dawn che nia" nuih vur vur pah chuan a tho a. Ka nuih alo za hle. Tlinglo han inhnawh luh țalh te chu.

Vanneihthlak takin an nurse lâk zingah chuan ka tel ve hlauh a,tun atanga thlakhat hnu ah he Hospital ah hian ka thawk ve thei tawh ang.

Țanpuia a rawn chhuah chuan ka lo hrilh vat a,ani paw'n min lawmpui hle. "Kan hnathawhna a inang tawh dawn sia" a ti deuh reng a. Eitur te min leisak a.

Ina ka haw chuan ka chhungte ka hrilh a,anni pawh an hlim hle. Jail a ka thawh chhung zo vat vat ila an hlim lehzual ang.

Hlim hle mah ila Central Jail lam bawk chu ka pan a ngai leh si. Ka huntawn a hlimawm a talângin kan Lucifer-a pawh ka lo theihghilh daih. Nihnih chawlh ka dil a,anlo phal ve mai a. Ani khan ka awmloh te alo hre ve ang em,a hre leh tawp lovang.

GORDON POV:

Thlakhat zet chu tân inah hian hun ka hmang ve ta. Englai pawhin hetianga ka chunga ti duh tur mihring hi ka ngaihtuah reng a,tumah ka tin zâwn thiamlo a ni.

Nurse hmelțhai ka hmuh ni khan mak ka ti hle a. Tumloh deuh hian kan intawng leh nawlh zel. Mahse,kha ka nupui vang phiangsen khan tu hmeichhia mah hi ka ring pumhlum leh thei tawh lovang.

A hming pawh Khawngaihthangi ani tih ka hria,a common lo viau. Amah pawh a common lo. Ka tawh leh a bulhnai a ka awm apiang hian a awmdan hi a thlak ziah a,keipawh ka bâng biklo. Eng nge a chhan ka hriat si loh hian ka danglam riau thin.

Ka cell piah chiah ami kha a chhuak tawh a. A chhuah hmaa a sawi dan kha chuan min insual pui kha a sual vang reng pawh a nilo.
"Kan tân chhan a inang em a,hmeichhia vang mai mai tih chi pawh a nilo. I rawn luh tirh khan i thinrimna pai zawng zawng nen i rawn kal a. I thinrimna kha engtin emaw tal i hrîkthlak loh chuan englai pawhin pawi khawih i châk reng mai ang. Chu chu ka tawn a ni a,helai ka thlen tirh khan ka thinrim hrîkthlakna lo nei ve ila chuan ka tân hun chhung reilo tê hi heti taka țhalo hian ka hman ka ringlo" tiin a sawi anih kha. Lehlam kawng zâwngah chuan a fel viau a,a ngaihtuah kim bawk. Ka thinrim hrîkthlakna turin min lo pui anih kha.

Kan nurse pawh chu ka ngaihsak lovang ka tih lai hian ka lo ngaihsak leh thin. Insual leh han buai châng kan neih a an duty na hmun kan va pan te hian mi zawng zawng chhuah hnu ah ka chhuak chauh thin.

Mipa sual ve tak tak an tam si a,engtin emaw anlo tih ka hlau a ni. Aman min khawih loh chu ka duh lova. Ka sawi tawh kha,a kut hian damna a keng tel. Hmanni khan engvanga khatianga che thut kha nge ka nih ka hrelo.

A kut in min tawh chiah khan hahdamna ka la neih ngai reng reng loh ka nei a. A kutphah dam thlap ka bianga ka nawr beh chiah te khan ka na te kha a dam sawng sawng ni mai hian ka hria.

Engvanga a kutphah a fâwp ngawt nge ka nih ka in hrelo. Khami vang khan nge ni min hlau deuh hian ka hria. Min buaipui pawhin min melh duh miah lova,ka tibuai duh bik lo. Tunah chuan phuba lak chauh a ni ka rilru ah hian lian chu.

Mahse,ka ngaihtuah reng thova. A kut dam tak khan min khawih leh se,ka na te hi a dam vek ni mai tur. Ka thinlung zâwn hi han tawk ni ngat phei se chuan ka rilru chhia pai zawng zawng te hi a tibo thei hial in ka ring.

U Sarah leh Lalrinnungi te hian min lo kan zeuh zeuh thin a. Mahse,ka hmu rei duh lêmlo. Hmeichhe ho phei chu eng emaw han sawi hlek ila an mittui a tla hma thei si.

Lalhlimpuii pawh ala harh ta chuang lova. Ani kha lo harh in thil awmdan han sawi ni se chuan ka hremna te pawh a nêp deuh mah na.

Ka U te lokal chuan kan nurse an rawn hmuh chuan
"Saw saw Ţanpuia țhiannu kha anih saw" tih pah chuan an va en a.
"Tunlai chu kan damdawiin lamah alo kal ngun riau. Țanpuia a rawn vêng thin aniang" ngaihsam hmel deuha Sarah-i'n a tih chuan a chhan hriat si loh hian ka thin a rim ringawt.

Tunlai hmuhloh zeuh zeuh châng ka nei ka ti reng a. A bialpa alo va pan thin vang anih chu. Hmeichhe ho tak hi chu.

Ka cell lama alo kal pawhin ka hrelo der hmak a. Ka be duh bawk lo. Ka phuba lâk dan tur ngawt a ni ka ngaihtuah duh chu. Mahse,a hnunglam atanga vên chu ka la țhulh chuanglo. A thiltih engkim ka chîk a,a nat palh ka hlau a ni ber. Hmanni a a kut ka tihpalh te khan va buaipui vat ka duh mah se khapa kha a bialpa ni âwm fahrana a rawn chêt vang khan ka tum ka țhulh leh a ni.

A hmel ka hmuh duh vang ringawt in min tibuai eih tu apiang chu ka insual pui hreh lova. Kan inhliam chuan loh theih lohvin an duty na kan pan thin. Chu chu a fâla ka hmuh theihna awmchhun a ni.

Vawiin pawh U Sarah te lokal chuan an hmuh thu an sawi leh a,chupawh kan damdawiin ah a ni. A hna dil a hmu tih ka hre lehnghal a. A nuam dawn e. Helai hmun atanga ka chhuah hunah chuan Doctor angin hna thawk theilo mah ila kan damdawiin ka enkawl thei dawn tho alawm.

Damdawiin neitu leh an nurse,hmmm,a nawmloh hmel fahran loh chu. Lo thlir reng rawh. Ka rilru hian a duh a hmu ngei ang. Engvanga nang hi buaipui reng che nge ka nih a,ka rilru pawh hrethiamlo khawpa min siam i thiam tih ka hriat hunah chuan kawng dik ni a ka hriat chu ka zawh ngei ang.

Duhlo eng ang pawh ni la,ka chhuah mai mai hauhlo ang che.

Hmangaihna tih vel hian ka nunah hmun ala luah ngai lova. Ani saw hmeichhia anga ka lo ngaihmelh a nih ngat chuan kei hian a vawikhat nan duh ka nei ve tih na a ni mai. Mahse,chumi hrechiang tur chuan hun a duh rei khawp ang. Hmeichhe chunga rinna nei tlachham takah ka chhuak ta si a.

NÛPUII POV:

Ka hna lamah chuan ka lêt leh a. Sarah chuan a sawi ang ngeiin a unaupa chu a rawn tlawh a,a rualin midang pawh anlo kal. Mahse,ka va pawh duh lêmlo. Tun hun tak hi ka nun hlim ber hun a ni ngei ang. Ka hna dil ka hmu a,ka kawppui nen kan inkâr a țha bawk a. Ka unaupa vanga chhungkaw buai kan nei ta lo bawk a.

Lucifer-a'n min tibuai lutuk ngai tawhlo bawk a. Mahse,ka che vel min enthla thin tih ka hria.
A rilru ah hian eng nge awm chiah ka hriatloh ang bawkin eng nge ka rilru ah hian awm chiah ka hre biklo.

Tluangi damdawi sem tur pawh hepa ka hmuh duh vanga va zui ringawt châng ka ngah mai. Ka â zo tawh a ni ngei ang. Mi hlauhawm a ni tih hi ka inhrilh ngun hle tur a ni.

Damdawi pe turin ka va kal a. Helaia lo kal ţhenkhat te hi an rilru lamah harsatna an neih mai loh nan kan Doctor te hian an enkawl uluk hle thin a. Damdawi chi hrang hrang an ei bawk. Hepa phei hi chu midang zawng zawng aiin damdawi a ei țha a,an nei zo bawk a,a damdawi man pawh a to bawk.

Va pawh ta mai lo chuan ka bih dêk dêk a. A dan ngai bawkin hmalam melh ngar ngar chungin alo țhu âwm leh duai tawh. A chil lem zâwnga a hrawk bâwk che thla ralh țhin sawn ka mit ala tlat țhin. Mipa taksa hian ka mit ala vak ngailo mah se Lucifer-a hrawk bâwk saw chuan ka mit ala thlawt a ni. A hrawk bâwk ringawt pawh in ka rilru a luah thei anih chuan a taksa pêng dang te chu engtin tak awm ang maw. A tihrâwl te saw a inphiar ve fat ang em. A âwm khauh hmel tak,pho vaha a kalpui thin ah sawn bei hle hle ila ava thlamuanthlak dawn em.

Hett hett,eng nge maw ka ngaihtuah vak vak le. Keihi ka â tak tak tawh a ni ngei ang. Ni e,saw pa saw a â lo,keimah hi anih hi rilru buai chu. A damdawi te hi ka han hmawm ve thawt mai dawn maw ni.

"I damdawi ei a hun e" ka va tih pawh chuan ngâwi rengin a melh ngai ala melh ngar ngar a.

"Cell no. 207 ka sawi chu i hria em?" Thinrim deuh taka ka tih chuan
"Thlâwkbo rawh" alo ti deuh hmuk a.

Hepa hi a â deuh an tih kha a dik leh si aniang. A rawn thlen tirh atangin a țawng vak lova,kei min bia anih loh chuan tumah a be ngailo. Chupawh tunlai phei chu min be ngailo. Jail tâng zawng zawngah a hnawk lo ber ang. A insual țhin tih loh ah chuan. Midang anga va che over emaw mi han tihbuai țalh tum ang kha a ni ve lova.

"Thla ka neilo" a sawi anga ringa ka lo tih lêt chuan cell danga awm ho chuan anlo hria ni ngei tur a ni an lo nui ham ham a.
"In thlâwk hla âwmlo emai,Lalhmelțha" an rawn tih chuan ka va melh rum hle.

"In kâ kha chîp hmak rawh u" kan Lucifer-a alo lêt leh e. Midang pawh chu an ngâwi ta hmak a. "Alo țan deuh emaw ni" pakhat in zâwi deuha atih ri pawh ka la hre reng.

"Khawi damdawi chu" tih pah in a cell kawngka lam chu a rawn pan a,ka lo pêk chuan ka kut ala hûm hnan țalh a,rum fê a min melh pah hian
"Nangpawh hi rawn vâk daw daw zel suh. Ilo kal hun lovah pawh i țhiannu i rawn zui ziah,i ler reuh emaw ni" a ti anih chu.

Ka va han chhu thlu tawp châk tak. Amah hmuh châkin ka kal ve em em a. Chutah ler ah min la puh hleuh zui. Ala hria ang.
"Nangni ang em em a râwp chu ka ni love,ka chhuak anga ka duh duh in ka hmu thei. Lo buai suh" thinrim deuh taka ka tih chuan ka kut chu a hmer na zual sawt a,
"Ka sawi chu zâwm mai rawh" seh chilh nawk chuan a ti a
"Ka lo hrereng dawn nia" ngeiawm taka tiin ka kut chu ka phih pawp a,alo thlah ve mai. Ana phian lehnghal.

Tiang hmeichhe dim nachâng pawh hrelo. Tunah khan ler deuha min chhuah vangin ka thin a rim hauhlo. Mahse,amah vanga kal ka nih pawh hrethiam lova nilo taka min sawi kha ka duhlo. Tun atang chuan min hmu mai mai tawh lovang.
.
.
Ka sawi ang ngei chuan cell awmna lamah ka kal khât pharh a,ka kal anih pawhin Lucifer-a awm lohna lamah chauh ka kal țhin. Tluangi haw ni chuan a haw hma in cell kal ngaihna zawng zawngah ka inpuih tir vek a. Khapa ve kha,ka duh deuh ang te khan ka inhria a. Ka duh tur hi a nilo hrim hrim. Sual lutuk.

Karkhat lai kan misualpa chu ka hmu tawhlo. A damdawi pawh Tluangi'n a pe zel a,a sawi dan chuan a damdawi pawh alo la duh lova,Tluangi chuan chhuatah a rawlh luh tawp thin thu a sawi.

Vawiin chu Tluangi damdawi pe ka zui rû a,engtin nge alo awm ka hmu châk a ni. Tluangi chu ka zui zêl a. Cell chhung atanga tuma'n min hmuh theihloh na laiah chuan ka ding a,ka va bih dêk dêk a.

Ka rin ang chiah,alo țhu rum leh ûl tawh.
"Kha Misualpa,sual lohna damdawi"tih pahin Tluangi chuan a cell chu a kik kauh kauh a.
"Khawnge pakhat kha a awm" alo ti chher mai.
"Tumah pakhat an awmlo,tunge i mi sawi pawh ka hrelo" tih pahin Tluangi chuan a damdawi chu a nawr lut a.
"A hming hria ila ka sawi ang chu" alo ti deuh hmuk.

Hepa hian ka hming pawh alo la hrelo a maw. Ka âwih theilo,buai vek khawpin ka rilru a luah a. Chutah ka hming pawh alo la hrelo chu a ni sia. Ava han beidawn thlak tak em.

Medical room lam pan chuan zawi zet chuan ka phei a. Tluangi chu a rawn lêt ve tawh a.
"Ka haw tawh mai ang aw,kan misuala chuan i chanchin aniang min lo zâwt a,ka sawi duhlo anih kha. Nangni hi boruak inlo nei a nilo maw?" A tih chuan ka lu ka lo thing vat a,mahse min hmulo tih hria in
"Teuh nang,a sual em a,kal apiangin min lo hau ve ziah a ka hmu peih tawhlo alawm. 'Ler' te min ti zêk lehnghal a" ka tih chuan alo nui kur kur a.

"Saw saw chu a sual ve em alawm. A tlâi tawh,min nghak si ka kal" tih pah chuan a chhuak a.

Keimah chauh chuan room ah chuan ka awm a,damdawi te chu ka rem fel vel mai mai a.

Kan Lucifer-a chu ava han sual tak,Lucifer-a diktak a ni. Ka hming pawh lo la hrelo. Ka be duh tawh miahlo ang.

Chutia ka rilru kâwm paha ka lo chêt vel mai mai lai chuan ka hnunglam atang hian tu emaw hian ka kâwngah an rawn man thut a,a kut leh lamin ka hmui a hup bawk. Ri chhuak si lo chuan ka au ve a. Chutah ka hnunglam ka hawi chu Lucifer-a lek lo niin.

"Mamawh inei a mi,eng nge i duh?" Ka ti a,min ti hlau hman lutuk.

Min pawt her sawk pah hian dawhkânah chuan min hlâng nawlh a,ka lo țe țhat chu duh lovin ka hmui a rawn hup leh vat.
"Nanghi i â deuh tak tak ami" amah tlawh deuh titih a ka tih chuan ka zâwnah a rawn ding a,a bân chuan ka kâwngah a rawn kuah nghal rûn a. Mak deuh deuh a chêt dan a thiam hi khawia a zir nge ni ang.

"Tu emaw chuan a țhiannu damdawi sem a zui ru a,bang phên ah a ding a" ati chiah chu ka lo meng phâwk nasa mai,hepa hian min lo hmu reng a maw.
"I daw emai,min hmu theilo" awi ka sawi zo vek tawh.

"Tikhan a chiang mai alawm. Tunge tlân ri thlek thlek ngai. Mi i enthlâk dawn chuan thâwm dîm tawh rawh" tih pah chuan ka hmai bul chêt ah a rawn kûn hniam a.

"Eng nge i duh,Khawi ka chhuk duh ania" tih paha chhuk ka tum chu a bân chuan min lo dang hneh hle.
"Ka hrelo. Tinge i bo vang vang" ka mit taka min melh pah chuan a ti a.

"Ler nih hlawh ka hlauh vangin ka awm mai mai" ka tih chuan alo nui hawk a.
"Eng nge" ner nâng a ka lo tih chuan ka hnar a rawn piai zeuh a.
"Khami ka sawi vang khan ilo kal duh tawhlo a maw" a tih chuan naupang fel ang maiin ka lo bu nghat nghat a.

Ala nui reng,a nui mâwi takzet. Tinge he nui hmel hi a put reng loh. A nupui kha a vannei ngawt mai,he nui hmel mawi lutuk hi a hmu nitin bik âwm sia.
"Eng nge ilo ngaihtuah leh hman?" a tih chuan ka harh zawk. Amah chu ka melh ta kiau a,ani pawh chuan min hnaih sauh sauh pah hian min melh ve ngar.

"Lokal tam lo tura ka tih chhan che chu sawlai mipa,hmeichhe râwp tak,ît hmel taka lo melh tu che saw rawn hmu tamlo la ka ti a ni. Kha i pian nalh tak kha ît hmel takin an suangtuah thin tih hre lêk lovin nanglah i kal lah lah bawk a" uang miah lova a sawi chuan ka dang chiang hle.

"Âwih awmloh emai,an nghal ve hrim hrim alawm" ka tih chuan mitmeng danglam zet hian min melh reng a.
"Bakah tinge chutiang te ilo ngaihtuah ve vak. I hmeichhia emaw i farnu pawh ka ni lova" eng vanga chu thu chu sawi ngawt nge ka nih ka hrelo. Mahse,min chhânna ka hre châk a ni.

"A chhan ka hre biklo. Ka la ngaihtuah mek a ni. Nang hian ka rilru hi min hrilhfiah thei zawk lo mi" tih pah chuan ka kut pakhat chu la in a âwm zâwnah chuan a nghat a,a lung phu dup dup chu ka hre thei. Keimah zâwk pawh hi ka diklo.

"Tikhan min hrilhfiah thei ang em?" Tih pah chuan a rawn kûn hniam telh telh a. Kei ka lo awm âwn ve telh telh bawk.
Lalpa,ka duh theilo hepa hi a rilru ah eng nge awm.

Ka mit takah chuan min melh a,keipawn ka lo en lêt ve kar. Tuna a mitmeng ang hi enloh phal chi ni hawtlo chuan,ka hmu leh ang em tih pawh hriatloh.

Chutia ka en reng lai chuan a chil lem deuh khawlh ri chu ka hria,a hrawk bâwk nalh ka tih em em ka mit la tak tu chu khawih turin engtik laiin nge he ka zâwng kut hi ka lo lekchhuah hman pawh ka hrelo.

Ka khawih ta,ka lo suangtuah fo he a hrawk bâwk nalh ka tih em em,a chil lem zâwng apianga lo che ve ralh thin hi ka kut ngeiin ka khawih ta. A sak țalh a,ka khawih zâwng chuan a chil alo lem kher bawk nen,a pial deuh ralh a
"A nalh" ka lo ti chhuak hman a,a nui ri chuan min tiharh zawk. Keihi eng nge maw ka tih le.

Ka kut chu rang zet hian ka la lêt a,mahse kei aiin a che rang zâwk. Ka kut chu alo man chawt a. "A nalh maw" a tih chuan engmah ka sawi thei tawhlo, ka zak lutuk.

"Umm" tih ringawt in ka chhâng a.
"Keichuan heihi nalh ka ti zâwk" tih pah chuan ka hmui ah chuan a rawn fâwp thut anih chu.

Ka țhu khawng awt a,chhân pawh ka chhâng lêt theilo. Țanpuia nen vawithum vel chu kan in fâwp ve tawh. Mahse,hepa min fawh dan hi a dang lutuk,naupangin khamlo taka nu hnute tui an hne dek dek ang hian ka tehkhin ber.

A kut a rawn chêt takah chuan ka harh zawk a,ka țhutna atang chuan ka zuang thla zawk thei.
"Engthil nge maw itih le" tih pah chuan ka hmui chu ka kut in ka tuai a.
"Khatin tuai suh" tih pah chuan ka kut alo man a.
"I zaklo hle mai" ka sawi tur hrelo chuan kan ti thâwr a. Alo nui hak ringawt.

"A tîr te chuan zak ve tho ve. Nangpawh in min dang chuanglo a ni law mi?" Ngeiawm lek lek a tih pah chuan ka hmui chu a kut zungpui chuan a rawn tuai leh kher a. Min ti â zo dawn.

"Che thei lovin min siam vang anih kha. Tikhan ti tawh reng reng suh. Bialpa nei lai ka nih hi" thinrim hmel taka ka tih chuan a hmel ah nuihzat na a lang tawh hauhlo. Lucifer-a dik tak kha ani leh tawh.

"Bialpa,hmmm.... Bialpa nei reng chunga mipa dangin an fawh lâwr theih te hi an awm châwk ania" mitmeng dur deuh khupa min melh pah chuan a ti a. Zaktheilo hi ka'n ti khawp a.

"Zak rawh" tih paha ka kut ka vai tur chiah chu alo man chawt a. A laka ka lo tlûk hma deuh vang maiin a duh duha tih theih ka ni lo.

"Zak e,mahse tunah chuan ka zak tawh lovang. Chuan kha i hmui kha seh tawh suh ang che" tih pah chuan ka kut chu a paih thla hnawk a. Tha lah chu a ngah mai si.

"Ka duh leh a liah pawh ka liak anga,i thu lo. Ramhuai nge maw Sakei inih zâwk ni" ka tih chuan
"A pahnih in. Ka bula awm te a zirin,a chângin Ramhuai ang maia râpthlak ka ni a. A chângin Sakei,mahse a bula awm te a zirin Sakei chu a zaidam in a thinchhe thin" tih pah chuan a inher a.

Kawngkhar a hawng tur chiah,min tihdan ka thinrim lutuk tuar zo lo chuan ka bula compact darthlalang chuan ka vawm pawp a. A hnungah a fuh a,rawn hawi lêt in a țhen suk a. Sawtiang hmel a pu țhin te hlei hlei sawn min țih zo.

Keiin thinrim deuhin ka lo melh a. Min fawh vang ngawt in hmeichhe ler takah min ngai a,chutah enga tan mah min ngailo ang maiin min hnungchhawn leh hmak a.

"Goodnight kiss i duh anih ngawt loh chuan i kut kha chêt hlek suh" mitmeng thim khup,mahse țhen deuh sak pah chuan a ti a.
"I mumang chhâwng sawmhnih naah pawh mang suh. Lucifer" ka lo tih deuh tuar chuan ka sawi sual tih hrilh nawn ka ngailo.

Ka bulah chuan a rawn thlâwk phei ka ti mai,min rawn man chawt a.
"Engtin maw min koh" a hmel nena inmil lo lutuk,dam dap a a rawn tih chuan amah chu ka en chho hâ a. Ka chhâng chuanglo.

"Sawi teh,engtin maw tunah khan min koh a" tih pah chuan min hnung khirh a. Min khawihna ringawt pawh hi report duh ila chu ka report thei tawh reng. Midang zahna pawh neilo.

"LUCIFER ka ti che" fiah kêk kâwk a ka tih chuan ka bân chu thlah in a nui suk a,hei ngei hi anih hi Lucifer diktak chu.

"A țha e,i tan chuan Lucifer-a chu ka ni mai ang. Lo en rawh engtin nge Lucifer-a chu a chêt thin" tih pah chuan ka biangah a rawn fâwp tâwk a. Auh hman loh hian a chhuak nghal.

Ka thinrim lutuk tih ngaihna hrelo chu ka vei kual ngat ngat a. Khapa lakah khan ka lo luangliam ve a,hahh,ka âwih theilo. Khatiang misual ramhuai anih kha. Min tihnat pawh a hreh lo.

Tikhan a cell ah engmah thlenglo ang maiin ava awm leh anga,keiin thinrim bawk thilthleng theihnghilh phallo bawk si in ka rilru ka lo thlau leh ang a.

Ava hahthlak tak. Helai hmun hi ka chhuahsan vat vat a ngai anih hi. Mahse,chhuahsan pawh ni ila an damdawiin ah tho ka thawk leh dawn si,contract pawh kum thum chhung ngawt kan ziak lenghal.

Tinge engmah ngaihtuah chiang hmasa lo hian thil ka lo tih. He misualpa hi alo la chhuak ve ngei anga,an damdawiin ah kan la inhmu fo dawn bawk nen.

Aw...thlakhat tal hi han liam thuai thuai teh se.

Jail tâng zawng zawng ah a hnawklo ber te kha ka lo ti vel a,tunah chuan ka tan a hnawk ber tawh anih hi.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 30th, 2022, 12:31 pm

TRAITOR
CHAPTER 6

☆☆☆☆☆☆☆

GORDON POV:

Ka rin ang chiah a ni,fawh man a awm hle mai. Nui suk chuan guard pakhat min hruaitu nen chuan ka cell lam kan pan a.

Sazu note ang mai hian a ți dêk a,han khawih chiah ila a țeu leh hlar tho sia. Chhaihkawlh a nawm phian kha. He tânin a ka luh tirh khan hlimna ka chhar thar ang tih ka ngaihtuah pha hauhlo. Mahse,he hmeichhia têreuh vang hian ka duhlo chung hnuhluh ka nihna ah ngei hian hlimna ka la tawn ngai reng reng loh ka tawn phah ta a ni.

Khapa a bialpa chungchang a rawn sawi vang khan ka thin a tirim hle,ka hnenah hian mipa dang chungchang a sawi tur a ni hauhlo. A bialpa phei kha chuan a kawp an ti emaw ni. Kan damdawiina thawk anni a,helai hmuh atanga chhuah vat vat hi ka ngai a ni.

Chutih rual chuan hetiang thil ka chunga titu hi ka la ngaihtuah âwl lova,ka hrechhuak anih ngat chuan an chhungkaw mualphona thleng pawhin ka thlen hreh ve hauhlo ang.


NÛPUII POV:

Kan Lucifer-a vang vek,Țanpuia pawh hmuh ka hreh phah vek. Alo lên pawhin ka be țha theilo,ka rilru ah hian thildang a awm reng a. Ka bulah ka bialpa awm ve reng laia mipa dang han ngaihtuah daih mai chu a zialo hle mai.

Ani pawh chu a lêng reilo.
"I thawhna lamah khan chhelo deuh a awm an ti nia" Sawmtei chuan ka pindana lo luh pah chuan a rawn ti a.
"Chutiang âwm pawh ka va hrelo ve" ka thil remțhat mawlh mawlh paha ka lo tih chuan ka khumah a țhu nghal thak a.

"Highland Hospital neitute fapa an tih kha. Gordon an ti maw ni,kha kha maw le. An sawi nasa nia" a tih chuan a bulah ka va țhu ve a.
"I ler emai a,ka u ka hrilh mai tur sin" ka tih chuan ala nui ang vak vak a. Henu hi chu sikul kan kal lai atang tawhin chhelo hi a hre thei riau lenghal.

"Chulam chiah pawh a nilo. Inlo in chû ê khâ vel ang tih ka hlau alawm" a tih chuan ka en dâwrh a,min lo enthla maw ni.
"Ti âwmlo emai" tih pah chuan ka va bêng thlawrh a.
"Âwmlo a awmlo ania,laina rate in ka hrilh che anih chu. Helamah hian tawnhriat ila nei mang si lova,ka ngaihtuah deuh che" thutak fahran chuan a ti a.

Min ngaihtuah ai khan ka lo talbuai hman tawh maithei a ni,ka rilru chuan ka ti a.
"Taka,Zothansanga case kha an tifel deuh tawh aniang. An khin pa kha an man an ti. Central jail lamah anlo hruaithla dawn ania. Lo fimkhur hle rawh" a tih chuan ka hrechhuak ve zawk mai. Kha kha anlo man ta a ni maw. A zialo hle mai. Mizoram anga thleng atan chuan.

"Mambawih,hei pension nan pawh kum hnih țha chauh ka nei ta a. Pasal neih lam te hi ngaihtuah ve deuh tawh la. Kan upa telh telh a,i pasal neihlai kan hmu hmanlo ang tih kan hlau ania" chawei laia ka pa in atih charh charh chuan ka va en vat a.

"Pa,chutiang te i sawi. Pathian zarah min la dampui reng dawn alawm. Pasal neih te chu hmanhmawh thlakloh emai" ka tih chuan alo nui ve leh mai a.
"Țanpuia nu nen hmanni khan bazarah kan inhmu a. In pahnih chungchang te hi a sawi nasa ve ania,nu sual tak chu anih hmel loh kha. Mo neih vat an châk thu te kha a sawi a" ka nu in atih chuan ka chawei lai chu ka hâk țep a ni.

A nu khan min thlahlel dawnlo tih hriat reng reng. Țanpuia'n sawi ve turin ati anih ka ring. Mahse,ka rilru ka la siam duh teuhlo. Pasal neih te chu chuti mai mai a tih chi a nilo.

Ka chhungte'n inneih lam an sawi pawhin engmah ka sawi ve lova. Naupang pahnih ka lo be daih thin. Anni pawh an beidawng ve ta ania nge. "Eng chu a hria ni maw. An inzui rei ve tawh nen" an ti tawp anih kha. Hmanhmawh loh nâk alaiin lehlamah Gordon-a ka rilru ah alo awm ve chhên bawk nen,tunah phei chuan ka rilru a phîr lehzual.

Jail lama ka chhuk leh hma in bazar lamah ka kal zawk a. Țanpuia nu ka la hmu zui.
"I dam maw?" Hawihhâwm chhuahin kan be ve a.
"Dam alawm,kha jail lamah ami ila awm" a sawi dan lah chu sawi thianglo sawi ang mai a ni,a ner deuh nâng a. Ka nu kha han awm ve se aw.

"Ni e" tih ringawt in ka chhâng a.
"Hawh,Bawiha te damdawiin lamah ka kal dawn a,inbiak pahin kal ila" a tih chuan kal ka lo tum ve tho nen ka zui ve mai a.

Damdawiin kan thlen chuan inhnuaia țhutna ah chuan kan țhu a.
"Inneih lam te hi ila tinzâwn lo em ni?" a ti a.
"Chutiang lam sawi pawh engmah a awm hleinem. Țanpuia nen pawh kan sawi vek tawh kha" ka tih chuan min melh no lo hle.

"Nangma'n i sawi vang chauha pawm aniang chu. I neih duh tak tak dawnloh chuan sawi chiang mai la. Kan mo nih châk an tam teh asin" chapo tak chuan a ti a,ka thin a rim ve hle.

"Sawi chian lehchuan tur pawh a awmlo. Chutia inti dawn anih chuan in mo nih châk ho leh i fapa chu ilo inneih tir thuai thuai dawn nia" tih pahin ka tho hmak a.
"I chaltlâi reuh hle mai" a tih sap pawh chu ka hre reng.

Chutih lai chuan Lalțanpuia chu kan lam pan hian alo kal hlauh a.
"Nu,inlo kalrual a ni maw?" Tih pah chuan min en daih a. Ka lo nuih sak ringawt. A nu hi a hlau dei dui tih ka hrechiang em.

"Anih kha,Inneih lam te kan lo sawi a. Mahse,a nei peih vaklo che anih hmel" ngeiawm taka atih chuan Lalțanpuia chu alo hawibuai zâwk hle.
"Eng nge awmzia" bo taka a tih chuan
"I nu kha zâwt mai rawh" tih pahin ka kalsan hmak. Min tihzah hi nuam a ti ve hrim hrim.

Ka kal hlawk hlawk a,tunah tak hian Lucifer-a ka ngai reuh. Hettt,ka va zak theilo ve,ka bialpa pawh nilo te ka ngai vel a.

Țanpuia chuan min rawn ûmzui a,ka bul alo thlen chuan thinrim hmel ka lo hmuh duh lêmlo.
"Ka tihpalh. Ka nu khan itan hriat nuamlo alo sawi anih chuan" inthlahrung deuh taka a rawn tih chuan ka melh vang vang a.

Ani hi chu a suallo maw le,a nu hi a kâwi sâwi ve em a ni.
"Engmah a nihloh kha. Ka hmanhmawh vangin ka kal ta daih a. Keimah zawk pawh ka thiamlo,khatiang țawngkam kha hmang tur ka nilo" ka tih chuan min rawn kuah thut a. Kan dinna hi a pûk deuha tumahin min hmu thei lêmlo.

"Ka chhungte hi itan pawh ngaia neih an har ang tih ka hria,mahse tuar hram hram rawh aw" a tih chuan,ka tawrh chhan tur pawh ka hriat si loh,ka innei ngei ngei dawn pawh nilo,ka rilru chuan ka lo ti hmanhmawh.

Peihlo deuh,phûr rilru pu tho si chuan Jail lam chu ka pan thla a. Eng nge awmzia ni,vawiin ka thiltih engkim ah khan ka rilru ah Lucifer-a ringawt a awm.

Medical room ka luh chuan vawiin nilênga ka rilru luahtu chu alo ding kur a,min tiphu zawk nghe nghe. Khawnge maw Tluangi pawh hi a awm.

"Iva phu nasa ve,lokal teh hetah hian,Thangi" min ti anih chu. Hmela mai mai chu Thangi te mi tih,min haw tute chauhin min koh dan asin.

"Eng nge,nâ i neihloh chuan ka lo kal lovang" tih paha kalpelh ka tum chu min lo ban hman țalh a. "Eng nge" ka tih hlar chuan mit zîm sun hian min lo melh a. Vawiin ka hun tawn nawm vakloh nen,'Thangi' te mi lo tih mai mai.

"Iva thinchhe ve,i bialpa nen in inhau ami?" A tih chuan ka kut a vawn chu lâksawn ka tum a.
"Alo ti lâwm vaklo che a ni maw. Keima'n ka lo tilâwm ang che" tih pah chuan a rawn kûn hniam ruai ruai a.
"Iva mak tak,vawikhat min fawh vang ngawt khan i duh duh in min tithei tihna a nilo ania" tih pah chuan ka nem dâwrh a.

"Iva sawi hnem hman e" a ti ringawt.
"Ka duh che in ka hria" a tih chuan ka kallai chu ka tâwp chawt. Ka thin hi ava phu nasa em em ve.

"I â tawh aniang" aw nghetlo taka ka tih chuan alo nui suk a.
"Ni e,ka â tawh ani ngei ang" tih pah chuan min rawn pan hnai a. Kei ka lo tawlh hnung ve zel bawk.

"In hmeichhe hmuh theih awmchhun ka nih vang hian rilru diklo pu hauh suh u" khauh deuh tak chuan ka ti a.
"I țhiannu pawh saw hmeichhia anih tho saw" alo ti sam êt a. Sawi tur pawh ka hrelo. Hepa hian min chhaihkual a tum ni maiin ka hria.

"Ka chhaihkual hauhlo che ania. Fiah i duh chuan min fiah rawh" a rawn tih chuan ka lo meng phâwk nasa,ka ngaihtuahna a zawhna tak alo chhâng a ni.

"Pasal hual neilai ka nih hi i hrelo ami?" Melh chho hâ paha ka tih chuan a hmel a chang nghal rût thei. Ka kawppui chungchang ka sawi apiangin tihian a awm ziah thin.

"Pasal hual maw. A țha e,ka sawilo angah ngai rawh" tih pah chuan a inher vut a,eng emaw sawi hluk pah chuan a chhuak nghal a.

Eng nge kha kha,a che maksak thei hle mai. A thusawi kha thutak khûka khûkpui chi pawh ni hauhlo chuan.

"Awi ilo lêt maw. Misualpa khan Warden in a hmu duh che atia ka va kal ve a,dâwt a sawi ani chiang" thâwk halh halh pah chuan Tluangi chuan a rawn ti a. Hepa hian a thusawi te kha a ti tak tak reuh emaw ni le. A sawi duh vangin Tluangi alo hnawtbo a ni thei ang em. Mahse,thutak ni se khatiang lo deuh khan sawi ve âwm ania.
.
.
.
Kan Lucifer-a pawh khami hnu khan a sual zual ka ti mai. A ze ngai chiah chiah a nei leh a,a sual ngaiin ala sual reng.

An damdawi pe tura ka va kal te hian min melh chu sawiloh,a damdawi pawh a lo la duh lova. Chhuatah ka dah tawp thin

Chu chu sawiloh,cell dang ami te'n min lo chhaih hian min chhan pawh a tum tawh lova,midangin nuihza siam nan min hman te hian an zinga mi ang mai hian alo nuihpui thin.

Chuchuan chhan awm hauhlo in ka rilru a tina hle a ni. An insual buai chang lah in kan awmna rawn pan ai chuan a pem pawh a tuar hil țhak thei. Vawikhat chu loh theihloh in anlo hruai thleng a,chutah pawh chuan ka khawih duhlo in Tluangi a pan a. Chu te hlei hlei chuan ka rilru a tina lehzual.

Ka bialpa emaw ka pasal pawh nilo laka rilru lo tina tur ka nilo tih ka hria. Mahse,eng nge a chhan ka hrelo. Hepa hian ka rilru a tibuai hneh em a ni. A fâl a min hmu tura lokal chu sawiloh melh eih pawh min melh ngai tawhlo.

Amah vangin zân pawh ka mu țha thei lova,ka thil ei thlengin a tui theilo. Keihian kan misualpa hi ka lo duh tak tak em maw ni le aw. Ka lo duh tak tak anih chuan hlimna aiin hlimlohna a tam zâwk ka ring tlat a. Ka hlauhthâwn vang nge ka hrelo.

Nupui hlui nei tawh chu an nunhlui vangin an buai châwk an ti thin. Mahse,keipawh engmah ka nih bikloh hi,bialpa nei lai reng ka la ni ve tho mai.

Damdawi leh an lehkha vel sem tur chuan cell lam chu ka pan leh a. Ka hnuk a ulh deuh titih ringawt. Ka va hmachhawn hreh a ni. Min tibuai reng a,rilru a awm veleh theh hmeh ang maiin a reh leh a.

A cell zâwn ka thlen dawn chuan thâwk ka la ham ham a. Engtin paw'n awm teh se,keipawh kawplai nei ka nih hi maw le,tiin inrintâwk hmel fahran chuan ka va kal a.

"207,kha i lehkha leh damdawi" ka va tih chuan a rawn hawi zawk a,a hawi sawn lehnghal vat.
"Chhuatah hian ka dah mai dawn mi,a baw thei ania?" Ka tih chuan rum fahran hian min rawn melh a,ka lo îp châwih thei.

"Kut i neih chuan rawn zen la dah rawh" a ti nih chu. A thinrim pawhin tiang em em a min huat hi chu ka ringlo asin.
"A țha e" tih pah chuan ka theih tâwka thûk chuan ka zen a. A mâm deuh laiah chuan ka hûn sak a.

A piah chiah 208 ah hian misual ka ti dawn nge nghal ka ti dawn ka hrelo,pa lian vaklo hi a awm a. Hei phei chu hmeichhe khuaikhem case a lo lût a ni. 208-a,chhuak ta nen khan an inmil lo hle a. An insual ngun viau bawk. Min chhaih a hrât a,a tir chuan ka hlau hle a. Mahse,208-a khan a vau a,an insual hnu khan min chhaih zui tawh ngailo.

Chupa pawh chu a lehkha ka va pe a.
"208,hei i lehkha" ka va ti a. Hei chu kan tih țhan dan anih vangin ka sawi mai mai a ni. Ngâwi renga pek chu a hawih hâwmloh thlak ve em a.

"Nangpawh hi i tawih maw le,i khal dan pawh a tâwk chiah" tih pah chuan ka kut a rawn zût thuak a. Tih ngaihna ka hre vak si lo,ka hlau deuh bawk si chuan
"Ka report mai ang che" aw khûr deuh hlek chuan ka ti a.

Gordon Lalmawizuala chu chhan beisei zet hian ka va melh a,min lo en lo hrim hrim. A lehkha kha alo bih ngur a,beiseina beidawn thlak mai a ni,hepa pawh hi.

"Report chu sawi teh suh. Kinah in room ah ka lo kal ang. Țhianpa report te chu kan duh bik nang tiraw?" Tih pah chuan Lalmawizuala cell bang chu ava bêng ri a.

Min lo chhanna thu chhâk chhuah chu sawiloh "Nurse mai mai anih kha" tih pahin alo nuihpui anih chu. Ka khawilai nge ka hrelo mahse na zawk chu a awm.

Ka thin ka tih chuan a ni si lo,ka âwm zâwn hi ana a ni. Min chhan duhlo anih pawhin engmah sawilo mai se. Tinge min tina tur khera min tihbuai. Sual leh lutuk.

"In zaklo dun hle mai" tih pah chuan ka kalsan a,anla nui dun hawk zui. Cell dangah chuan hmanhmawh leh rilru na zet hian ka va kal hmawk hmawk a. Saw Lucifer-a lam hawi zâwng sawn ka mit ka lên tawh tur a nilo.

Medical room ah chuan tha khûr titih hian ka va țhu lut hnawk a. Tluangi alo thleng ve chiah bawk. Engmah sawilo chuan haw turin ka insiam sawk sawk a. Ka thil ho ka khung dawn pawh chuan ka che fuh hlei theilo.

Min tihdan kha ana ka ti a ni. Nurse mai mai pawh ni ila,ka zahawmna min zah sak ve tur asin. Khatiang zia aneih vang anih kha a nupui pawhin a phatsan. Misual leh hmeichhe dim dâwih nachang pawh hrelo mipa anih kha.

Thinrim deuh chuan inah ka haw a,ka chhungte bulah chuan ka nawm vakloh thu sawiin ka mu nghal daih a. A tûka kal leh pawh a peih awmloh zo vek tawh.

Ka mu pawh chu ka muhil hlei theilo. Tunhnaia min en dan leh tihdan zawng zawng ka ngaihtuah hian min duh thu a sawi ka lo âwihlo kha ka lawm hliah hliah. Lo âwhin lo pawm ni ngat ila chuan hei ai hian ka na zawk daih ang.

A tuk ka kal tur chu ka u in min thlah a,ka tlân laklawh lai hian Lalțanpuia leh Jenny rawn inphur kan tâwk a. U Puia chuan a hmu ve lêmlo,hmu pawn ni se a ţan leh tho ang. Lalțanpuia pawh hi eng nge maw awmzia ni ka hre neih nuaih tawh love. A duh leh lo kawp teh se,amah ka duh em em pawh ka hrelo.

Mahse,min țhen duh anih pawhin mumal taka tih ka duh,a chhungte an nasa mai si. Nakinah buaina neih ka duhlo. Amah hi ka la hrilh ang.

Jail ka thlen chuan pâwn lam atang hian ka thlîr vang vang a,kâr 2 vel chauh ka nei ta. Ka zalên thei ţep e.

"Awi ilo va thleng har ve" Tluangi chuan hlauhthawn hmel deuh hian alo ti a.
"Ngah maw,a pangngai reng hi" tih pah chuan ka indah fel zung zung a.

"Awi kan misual rualho an insual leh pek alawm. Misualpa pawh a tel. Ilo thleng hman lovang tih ka hlau lutuk a,keimah chauhin ka buaipui ngam dawn si lo" a tih chuan ka lo hlauthawng ve ringawt. Lalmawizuala a tel ve maw. Tute nen nge an insual ang.

"Tunah khawnge an awm?" Ka hlauhthawnna thup tum tak chuan ka ti a.
"Warden hnenah an report a,a bulah counseling an nei aniang. An rawn kal țep ang. A âwm tho ka ti,an in tibuai ngun sia" a tih chuan ka lo thaw halh ringawt.

Hetia an in tihbuai reng hian an bail theihna an ti khawtlai ve zel tih an hre âwm reng si a.

Ka țhu mai mai thei tawhlo,ka lo vei sek a. Kawngkhar lam leh anlo phei na tur corridor chu ka lo melh sek bawk. Tluangi laka inthup ngai nen,ka țang lutuk hi ka hah zo vek.

Minute 10 vel ka lo vei sek hnu chuan anlo thleng țak țak a. 10 vel an ni. Engtin,hemi te ho hi misual pawl hruaitu emaw an inti a ni ngei ang.

Kan misuala chuan an rawn luh tirh a min melh zawk bak kha min melh leh tawhlo hrim hrim. A tihloh dan pawh a ni lova,eng nge ka lo buai ve vak. Tluangi țhutna lamah chuan a kal a,a nghak dawn a ni ngei ang.

Ka khawih a duhloh a hnu chu ka khawih ma lêk anga nimai lawm. Mahse,misual nghal deuh pa kha ka lamah hian min nghaktu ah a ţang ve,ka duh miahlo. Ka hlau deuh bawk si. Ani lah chuan ka khawih hun nghakhlel ni âwm takin alo awm zek zek tawh lehnghal.

Nikhaw hrelovin ka tlu der thut mai dawn em ni.Ka va buaipui peihlo si em. Loh theihloh chuan ka khawih a ngai ta a. Ka hmaa a rawn thut chuan a hmai pem vel chu ka lo en hmasa a,hetiang pem nei tur chuan inkhawih nasat ve hle a ngai ang chu.

Damdawi ka hnawih tur te chu ka khûr lek lek,ani lah chuan min melh ngar a. Ka âwmbâwr hi a en em ni,a țhutna hniam vangin loh theihlohvin ka kûn deuh a ngai si. Lucifer-a lah chuan ka chebuai hmu reng chungin min en mawl tawp a. Hetia midangin min tih hian hmuh nuam ati ani ngei ang.

'I taksa midangin ît hmel taka an melh kha ka duhlo' a tih te chu rilru ah alo thar uar uar a. Ka luak te hi a tichhuak. A thusawi zâ a 99 hi âwihloh tur ania,zâ a 1 hi rinhlelh tur anih tawh hi.

Misual nghala chuan mit tla lêk lovin amah ka buaipui lai chuam min thlîr reng a,ka taksa khûr te hi ka zâm vang a ni hauhlo. Ka hlau zawk a ni.
"Kha i kawrah khan thil a kai" tih pahin ka kawr hma rawn ban a tum chuan hlau lutuk hian
"A pawilo nakinah ka tifai mai ang. Ka zo i kal thei" tih pahin ka petek zawk a.

Engmah sawilo chuan a kal ve mai a. Lucifer-a erawh chuan kan chetla chu chîk zet hian min lo en reng bawk a. Saw pawh saw chhuak tawh tur a ni.

"Ka zo,kal tawh rawh. Midang pawh an kal tawh" tih pah chuan Tluangi chuan kut silna lam a pan a. A chhuak tlang mai dawn emaw ka tih laiin ka bul lamah chuan a rawn kal a.

"I chungah khatianga a chêt vang khan ka chhuah hauhlo ang" rawn tih te chu hnailo..

"I hlau anih chuan tilang mai rawh. Nge,khatianga an en che kha nuam iti ?" Ka beng rawn thâwk khum ham ham pah chuan mi rawn tihkhum anih chu.

A thusawi mak ka ti lutuk chuan rilru na deuh hian ka en hau ringawt a. Tunah tak hian mi luhlul leh mittui tla har ka nihna hi ka chhuang tak zet a ni. Chuti ni lo se chuan he mihring,puih ka mamawh laia beisei mitmeng deuha ka melh pawh hai dertu misual hmaah hian ka hmingchhe dêr ang.

"I kal theih chuan kal tawh rawh" thinrim hauhlo âwm tak chuan ka ti a. Ka rilru natna ka âw leh chezia ah a lang lo chu ka lâwm hle.

Ka hnungchhawn nghal daih vangin engtin nge a awm ka hre lova. Ka hawi lêt leh chuan alo awm tawhlo. Țhutthlengah chuan ka țhu hnawk a,kha mihring ka nuna ka lo dah pawimawh hman lutuk kha ka tihsual lian ber a ni.

Zanin pawh keima riah zan anih vangin ka huphurh hle. Rilru hah nen mahni chauha khawhar taka awm chu. Misual nghal deuh kha alo kal leh ang tih ka hlau.

Zanah chuan keimah chauhin ka awm rek rek a,phone ah chuan Sawmtei te ka be vel mai mai a. Naupang pahnih video te min lo thawn a,rin ai tak chuan ka rilru a zân phah deuh.

Mahse,kawngkhar rawn hawng ri ka hriat chuan ka va en chu kan misual nghala hi guard pahnih hian anlo hruai a. A hmel ka en ringawt pawh hian ka thâu ah min man thei hial.

"A pem hi nâ ati zual deuh a. Lo ensak mai ta che" Guard pakhat chuan a ti a.
"Lo kal la" ka tih chuan guard te chu an kal sawn veleh mai a.

"Tah hian lo țhu rawh" ka tih chuan țhut pah hian
"Vawiina nurse kawr kha i inhmeh daih zawk anih kha" a tih chuan râpthlak ti lutuk in ka melh dâwrh thei. A chhan chu tunah hian kawr nghawng chîp vek ka ha a. Nurse kawr kha chu tlemin a âwm a zau deuh a,kûn vak phei chuan âwmbâwr a lang lek lek thei.

A pem pawh hi nâ atih tak tak pawh ka ringlo. Ka hru deuh tâwk tâwk a. Damdawi pawh hnawih tur ai tam deih ka hnawih. Na chhâwkna te hi ruih hnâwp theihna ka eitir zawk dawn maw ni.
"Ka zo" tih paha thawh mai ka tum chu ka bânah hian alo man chawt a.

"Engthil nge itih min thlah rawh" ka hlauhna pawh ka thup thei tawhlo.
"Min hlau a ni maw. Min hlau suh,a chhan chu i lâwmna chauh ka siam sak dawn che lawm" a tih chuan a hmel chu a râpawm hle.

"Min thlah vat loh chuan ka au vak anga,pawna guard ho bulah sawn ka report ang che" khauh deuh zawk a ka tih chuan a nui vak vak a. Țih lutuk hian ka lo en reng ringawt.

Chutah ka kut chu a phih dâwrh a,
"Khapa nen khan in inkârah awm a awm tih ka hria alawm. A țan vang che in kut min thlak lehnghal a. Kut thlâwn ka ba ngailo." Tih pah chuan min hnûk hnai vak a. A sawi hi engmah a awmzia ka hrelo.

"Vawikhat fawh chiah che a ni mai. A bâk ka duh biklo,a hmun a remlo emai. Ka ît na che a rei tawh lutuk" tih pah chuan min fawh a tum ta mai. Ka hlau lutuk chu ka țe vak a. Guard ho kha ka au vak a,tumah anlo kal lo. Aw Lalpa,min pui rawh. Hepa fawh hi maw,teuhlo lutuk,hlawh nei pawhin ka ti lovang. A mipatna ah tak chuan ka pêt pawp a,ani lo ding rem tur chu ka duh aiin ka pêt na lo.

"Hmeichhia,kut min thlak amaw?" Tih pah chuan ka chhîp samah a rawn țham a,ka âwmbâwr chu rawn khawih pah a tum bawk. Ka theihtawp chuan ka țe tuar tuar a,Guard ho kha khawnge an kal.

Tu emaw tal lo kal teh u. Gordon-a pawh khawngaih takin lo lang teh.

Ka hnute chu a rawn țhâm pawp a ka au chhuak vak a. Chumi rual chuan kawngkhar a rawn inhawng țhuai a,thlabâr lutuk in Gordon thinrim taka lo pên lut pawp pawp chu ka lo en a. He misualpa hian alo luh tirh khan kawngka alo kalh hman anih hi.

"Ka sawi tawh a ni lawm ni. Ka hmeichhia khawihlo turin" tih pah in Gordon chuan a rawn phih dâwrh a,bangah chuan nawr betin a hnek țhuai a,chutah misualpa chu ala nui thî sûng thei. Khûr deuh titih hian chhuatah chuan ka lo țhu sawp niai a.

Gordon chuan "I cho chhuah" tih pah chuan a hnek ta mawlh mawlh mai. Ramsa ang mai hian a rûm vak vak a. Thinrim hrîkthlakna hmu remchâng a ang ka ti ber.

Tiang chuan a that thei takngial dawn. Guard 2 pawh hlauhthawn hmel fê hian an rawn tlân lut a. Gordon chu an rawn phih sawn vat a,Misualpa chu an buaipui nghal a. Gordon hian alo khawih na hman hle anih dawn hi.

"Khatiang misual,buaipui pawh a ngaihloh kha" tih pahin ava chhir leh ta zawt zawt mai a. Guard 2 lah chuan an hlau deuh nge,an lo țhelh chuanglo.

A hnunglam atanga va kuah pah hian
"Khawngaihin duh tâwk rawh a thi thei mai ang" ka va tih chuan a tâwp chat a. Vawikhat an chhir leh țalh a.

"I țha em. He ramhuai hian alo khawih hman che em. Ka ta hi alo tina hman em?" Ka bianga khuap pah chuan a ti mawlh mawlh a. A awmdan chu mak ka ti zâwk hle. Amah hi ani lo mi,hepa in min chhaih pawha lo uan pui tu kha.

Chutia min ngaihtuah ang deuha a han awm leh vel chuan ka țah a tichhuak thar leh thut a. Ka mittui chu a rawn baw ta zâwih a. Min khawih luih a tum lai zawng zawng pawhin ka mittui a tla lova. Tunah hepa min ngaihtuah na vang hian ka mittui a tla leh si a maw.

A âwmah chuan min kuah bet thlawp a.
"Chhuahpui vat ta che u. Hetah buaipui tir rawn tum hauh suh ang che u" Guard pahnih vîn hrâwk pah chuan a ti a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)