Muansanga *Habibi* By May Renthlei (Completed)

[Ngaia]

Muansanga * Habibi *
Chapter -7
May Renthlei
Min rawn phone leh a. Ka la ta nge nge.
"Kawngkhar rawn hawng rawh." Pa takin a rawn ti a. Kan kawngkhar a rawn ri zui.

Kawngkhar rik rualin ka ṭhuṭna aṭang a ka thawh tum hmanhmawh lutuk chu ka la inchhuih tlu zuar zui. A va han chet ṭhin theih ngai ve le. Ka sam pawr nei nuai leh ka patling kawr hak lian hlei hluai tenen a lo hmachhawn chu ka zuam meuh lo. Inthlakna hun lah awm der tawh si lo.

"Lo lut rawh." Û Kiman a tih mek lai chuan ka lo awm lai ṭuṭ. Ka inhrethiam bik lo. Ni dangah tiangin ka awm ngai si lo va. Kanin hmuh loh na rei tak vang nge ka dik thei meuh lo.

"Muansang lo ṭhu rawh." Nuihmel hmuhin ka lo ti a.

Ni dang zawng aiin ka hmu hmelṭha. A hair style thar zawng zawng tenen chuan a lang pa mah mah. Ti tla buk laih tawh lo in chunglamah felfai leh awm ze nei takin a ti chho vah a. Thawchham hial khawp a en tlawk tlawk tham a ni. Tiang khawp a ṭha hian ti nge min duh tlat thei zawk le? Tihpalh awl a ni.

"Nobawih i ṭhianpa chu khawilam mi nge? Ka va hre ngai lo ve." Ú Kiman a lo ti a.

"Muansanga anih hi. Pu Sangkima fapa." Ka lo ti sap a.

"A ni tak e. Ka hai che alawm mawle. Ka hre lutuk leh si che. I Û Hruaisanga nen pawh kanin hmu fo alawm. In in a chaw ka rawn ei hian i lo awm lo fuh ve ṭhin em a ni. Kan khawlama zin chu eng nge a an?" A ti suah suah a.

Muansanga pawn ṭha takin a lo chhang ve a. Minutes 15 chhungvel chu an ṭawng ka lo ngaithla ve. Muansanga nen chuan kanin melh ruk na lamah kan mit a intawng leh ralh ṭhin. Ka chhunglam hi a rawn pawng chhuak lo chauh zel. A thawkna viau ṭhin.

"A pa ka mut a chhuak tawh. Min mutpui rawh." Bawihtean meng hnuai lap tawhin a rawn ti no hliai a.

"Ti khan lo inkawm mai ru. Keini chu kan mut a hun leh tawh tlat. Nobawih thingpui te kha lum sak la." Bawihtea pawm pah a tho ṭuih ṭuihin a ti a.

"Thingpui a in ngai lo."

"Lum nghal rawh." Muansangan a lo tinghal zat a. Kanin melh rum hmasak phawt hnu chuan thingpui lum turin ka tho ta nge nge a. Ka muangchang lui ngang mai. A lo ngai thei lo leh ngawt ang chu. A kut tih chet dan aṭangin ka hrethiam vek tawh.

"A va ninawm tak aw." A phone ri chhen ning fe chuan a ti hluk a.

"Phone chhan duh loh kha sim tawh teh. A pawimawh thei." Thingpui pek pah chuan kati a.

"A pawimawh lo." Ti chung siin ka lo melh dan avang chuan phur fahran lo in a la ve ta hram a. Min hnial hrehna thinglung a lo la pu mial e.

"Eng nge?" An ti nghal tawng a. A be tu nih chu a peihawm chiam lo khawp mai.

"In ah ka awm lo. Zanin a tan chuan ka rawn zawm thei lo ang che u." A tih zawh chuan lehlam ṭawng ngaithla in a ngawi vang vang a.

"In hriat ve kher a ngai lo." Ti leh hlukin phone a off zui hmak a.

"Kha tiangin mi an be ngai em ni?" Ka lo tinghal a. A nungchang lo ngeiawm leh tawh lutuk chuan minti lawm lo. A paih ṭan tawh asin maw le. Kanin hmuh loh kar hlekin a ze ṭha lo bawk kha a lo nei leh ta chu ania.

"Ka ṭhiante an nih kha."

"I ṭhiante pawh ni se."

"Habibti." A rawn ti hap a.
"Ti khan awm lo teh." A awmdan mawlh chu. Thawk a ti buai pha dawn.

"Ti khan awm lo zawk teh Lalmuansang."

"Min ngai anih kha. Min ngaih chuan ka hmingpumin min ko ṭhin." Chimawm lutukin a lo la ti zui a.

"Awi awm lo." Meng kual ralhin kati a.

"A ni alawm. Min ngai." A nuihmel rawn lang chuan a ti ṭha zual.

"Min ngai zawk anih kha."

"Ngai e."

"Hmmp." Ka dang der mai. Zanin reng reng pawh hian a rawn hmelṭha teh vut lutuk a, minti buai zo. A lang pa ngawih ngawih. Mipa dik tak landan tur sawifiah dawn ta ila entir nan a mah hi kawk tawp ila a fiah ber hial ang.

Kan thingpui ve ve ngawi rengin kan in dun a. Ka bul hnaih deuh hlekah arawn ṭhu a. Ka lu ah kut nghakin ka samah a chul thla a. A eng ti emaw nawm riau.

"I sam i tan ani maw?" A ti khauh a. A hmawr tlem ka paih hlek ania.

"Tlem ka tan."

"Hmeiche sam tawi ka duh lo tih i hriat kha."

"Tan tawi nghal tur anih chu."

"Han tan tawi vaih teh. Ka kek ang che." Min tih chuan za takin ka nui a. Kha ṭawngkam hman kha a inhmeh ve lo kati dawn nge a inhmeh reuh lutuk kati zawk dawn.

"Ka kek ve thei tho che alawm." Ka kut a sam lamah ka phar phei nghal a. A rawn uluk ṭha bawk a ka khawih chu phal lo tak a ni. Nidangah lem ka ṭhamsak nasat theih nen.

"Aizawla i rawn chhuk dawn techuan min hrilh lawk awm che." A tih chuan ka nui sek ringawt. A induh lutuk a, hrilh chi pawh va ni suh.

"Eng nge i lo an? I lo fel em?" Melh kalh paha ka tih chuan hnuailam a melh daih.

"Ka ṭhaṭ leh ṭhaṭ loh pawh ka hre lo. Ka fel lo bawk." A ṭhen pah sak a.

"Ti nge?"

"Eng mah hi ka feel thei lo. A ruak vek." A ti cool ruih a. A awmdan chuan min khawih che dawt. Hlim tak a nun hmang tura ka duh hi a nunhluiin a kalsan hlei thei lo chu a ni.

"Habibti."

"Umm."

"A hma ka zawh tawh che kha."

"Ka hria. Eng tik lai pawh a i tana awm reng nih ka duh a, i natna chhawk sak che a hlimna pe tu che pawh nih ka duh. Mahse tun a tan chuan."

"Tun a tan chuan ṭhian leh bawk maw?" A ti pawr chhak a. A ding zui nghut bawk.

"Min ngaithla phawt la."

"Aih."

"Muansang."

"Ruatsanga vang ani ti raw? Kei chu i ṭhian a tan chauh min duh. Kei chuan chu chauh chu ka duh tawk ve lo."

"I ngai dik lo anih kha." He pa dawhthei lo lutuk leh duh tawh chu duh bur, neih nghal duh tawp ani hi chu a buaithlak ve ṭhin.

"Ka cousin chu ni lo se chu ka that duh hial ang." Kha lutuk leh thinrimna a khatin arawn ti chhuak chang hrawk a.

"Muansang i ngaih ang."

"I inpeih hunah kanin be ṭha leh dawn nia." Dawhthei lo lutuk leh thinrim takin phone a la chhuak nawk a, a hmet zui mawlh mawlh a. A awmdan hrep chuan minti chiai.

A nundan ṭha lo leh nungchang mak sak tak tak te hi hnehpui ka duh. Ka duh let ve tih a hriat hunah a ṭhaṭ phah sauh ang nge min namnul phah dawn ka hre lo. Chu vangin tun atan chuan 'YES' ti a chhan mai ka thei rih lo.

Ka ṭhiante a ṭangin ka lo hre tawh a. A bialpa, a lo duh ve lak lawh tawh. An inngaih zawn tak aṭang phei chuan sual tak mai kha. A ṭhalam zawng a nun hman phei chu khawilam. Ka ṭhiannu lah lo inham tang lak lawh bawk nen. Kha tiang kha tawn ve ka duh lo.

"Khaw nge in awm? Ka rawn zawm ve ang che u." Ka awm ve tawh lo ang hmaka ngaiin a phone aṭang in kei chu min ngai pawimawh lo takin midang min biaksan a.

"Min rawn lam rawh. Ka location ka rawn thawn tawh che." A biak pa hnenah chuan a ti leh a.

"Zan a rei tawh dawn. Haw tlang rawh. I chhungten an ngaihtuah ang che." Phone a dah rual chuan ka lo ti ve thung a.

"Ka ngai pawimawh lo."

"Keiman ka ngai pawimawh alawm. Tiang hian awm lo la." Ngen aw tak chuan kati a. A awmdan a danglam phah eih lo. A hmelhriat ngai loh ang lekin min ngai mek. A awmdan ngeiawm leh nelawm lo tak chuan min ti na. A inthlak nghal vek.

"Zan in hian eng nge ka tih dawn i hre chak em? Nula." Min nuihsawh rawngkai taka a rawn tih chuan lu ka lo thing nak a. Ka hmel a lang buai niaiin ka ring.

"Zanin hian eng pawh tawk ila min rawn ngaihven hlek suh ang che." A tih chiah phei chuan minti hlauthawng zual.

"Eng mah ti suh. Khawngaihin."

"Thu tlukna ka siam tawh." Luhlul taka ti rum hrakin ka hmai a rawn nul thuak a. Thinrimna lutuk kara kei min hmangaihna leh a ta nitura min duh zia chu arawn lang zawk. A bo lehnghal mai pawh a.

"Tu pawhin an lo bia che anih chuan min hmu lo. Chu ti chuan lo chhang ang che." Inherin a kal chhuak vung fua a.

"Lalmuansang." Ka auh zui pawh chu hre lo ang hmakin min kalsan a. Rilru hi a va han ti hah thei tak em.

Ruah sur tur inṭham tih hriat reng rengin khawpui a rawn ri zui dur dur a. Kawl a rawn phet rual techuan thil ṭha lo thleng tur ang maiin ka thauah a rawn man a. Hlauhthawnna nasa takin min rawn man.

"Awmawm." Rawn ti ri ah chuan ka harh zawk a.

"Bs." Ti chungin Muansanga kawngkhar chhuahna la inhawng huau ah chuan ka pen chhuak zui a.

"He ta hi ka awm." Kanin kawta ka va din chuan a rawn ti a. Kawngpuia Bsa lo ding vang chu ka han hmu a. Kawngpui thleng tur hian step tlem kanin aṭang hi chuan zawh a ngai.

"Lo chho lawk." Hmanhmawh hmel tawkin arawn ti a.

"Û Kim kawngpuiah ka chhuak chho lawk dawn." Kawngkhar khar pah chuan kati a. Ka chho zui venghal.

"Muansanga tekhan eng nge tih an tum?"

"Muansanga a lo kal lo em ni?" A rual ṭhawṭin zawhna kanin zawt dun a. Hei ha. A va hahthlak tak.

"Ka hmuh thu che ka hrilh rualin zan in a tih tum ho zawng zawng pawh a ṭhulh vekah kan lo ngai a. Mahse tun mai khan min lo bia a, .

"Lawk lawk. Eng maw a ṭhulh emaw in lo tih?" Kut hmang tel meuhin a ṭawng ka lo pawt chat a.

"Bike intlan siakah tel a tum."

"Eng a?" Ka insum hman lo.

"Ti lo turin kan nawrh nasa lutuk. A hre lo der tlat a lawm. Muansanga accident thlenna hmunah chiah lehnghal khan neih pui an tum." A tih leh chiah phei chuan ka hlauhthawng lutuk a thawk pawh a harsa vek thei. Ka duh ang pawhin ka ṭawng chhuak mai thei lo. Ka â mup.

"Tun. Tunah khaw nge a awm?" Ka ṭawng bahlah nawk nawk a.

"Ka phone a chhang duh lo. An intlansiak na hmun tur a pan mek anih ka ring." A tih leh chiah phei chuan ka ka ka hup chawt. Pawi kati lutuk a.

"Eng tin nge kan tih tak ang? Kan dan ngei angai." Ka ti ṭiau a.

"A dik alawm. Bike ah hian lo chuang ve phawt mai rawh." Rilru hah vehmel tak a a tih chuan ka bu liam nawk nawk a. Ka bike chuang tur te chu ka che buai vel vek.

"I chhungte hrilh lawk rawh. An lo ngaihtuah ang che." A tih chuan ka hre chhuak veleh chiah.

Û Kima phone ka tum te chu ka phone pawh ka hmet ṭha hlei thei lo. Thin a ti rim hlur. Hmanhmawh nen.

"Bs Vawin hi Friday ti raw?" Û Kima message thawn tur type mawlh mawlhin kati a. Ka call a nih chuan ka duh ai rei kanin biak ka hlau. Min ngaihtuah na lamah kal te a phal lo palh ang.

"Aw ni e." A tih chuan ka zia deuh. Naktuk Û Kima a office dawn lo hlauh e.

"I inring em?"

"Aw ring e." Ka tih zawh rualin chak lutukin kan phit chhuak a. Nidang chu nise ka hlau lutuk a nga chhuk ka ngen chul ang. Tunah erawh a aia hlauh dang ka nei a. Tlan chak pawh ka pawisa lo.

"Kan thleng ṭep. Hlauhthawng suh aw." Thli thaw vuk vuk leh chhum dum chhah tup karah chuan a rawn ti a. Khaw thim chhah mup leh ruah sur tur inṭham kara hun duhawm lo tak tawn chu a hrehawm dan a thuah hnih. A thaw ip pik thlak.

"Khaw awmdan hian ka awm a ti nuam lo zual." A hrehawm cherh churh em avang chuan kati lang lang a. Chhum a rawn zing phui chuk ṭan lehnghal a. Ka rilru ang maiin.

"A dik alawm. Ruah hi a rawn tla ṭep ang. Zanin zet chu.." Sawi zawm lem tawh chuang lo in a lo ti ve tlak tlak a.

"Kan thleng dawn." A tih rual chuan kan piah lawk a car leh bike chi hrang hrang chhum zing muai kar a lo eng phut hlawm chu ka va hmu a.

Chu zan reh ruih mai, thim chhah mup kar a thli thaw vuk vuk techuan min ṭhan er er. A boruak chu a nuam hlawl lo. Hlauhawm lamah a kal.

"Khaw nge Muansanga ber chu a awm ang?" Bike a ṭanga kan chhuk rual chuan ka hawi kual nghal ruai a. Ka hmu mai bawk si lo. Ka â mai dawnin ka hria. Hmuh vat vat ka duh tak zet.

"Muansang." Bsa pawhin a hming a ko chungin a zawng kual ve a.

Intlansiak an ṭan dawn tawh a vangin keini velah chu tuman min ngaihsak der tawh si lo. A intlansiak tur a telam ah chiah rilru an pe a. An thawm lah a ṭha ham ham hle tawh si a.

"Ka hmu e. Lo kal rawh." Tih leh Bsa chuan ka kuta kaiin kan hma a awm ho te pawh chu min sut pui tawp tawp a.

"An ṭan tak ngial dawn. Muansang khawngaihin ti suh." Ka ti rilru mawlh mawlh a. Bike tlan mai inpeih a ding ṭhup ho in a an chhun rawn, nula sexy em em mai pawh chu tlan chhuah tir mai inpeih at in a ding zei vah tawh a.

"Muansang." Ka hmuh rualin ring takin ka au a.
"Muansang. Bike a ṭang khan lo chhuk rawh." Ka theihtawp chhuah a ka au tak ngial pawhin thawm dang nen a hre thei tawh lo. A helmet vuah chhah hmel tak kara a mit meng nalh tak lo lang thip ram leh nelawmna reng nei lo ah chuan thinrimna leh pawisak reng a nei lo tih ka hmu thiam.

A thawmhnaw dum suit hak nalh tak te chu inhmehin lang pa hliah hliah mahse ka tan chuan hmuh a nuam chuang lo.

"Nula i kal thei lo." Tiin min lo la dang zui a. Bsa zawkin chu pa chu a nam tlu tawp a. Hmanhmawh theih tawpin ka tlan phei nghal a.

"5, 4 , 3." Tiin an rawn au rual ṭan a. Ka rilru a chiai. Muansanga ka ngaituah lutukna lamah chuan khawvel te chu a rawn vir muai muai maiin ka hria. Engkim chu a phe zo vek. Chu ti chung chuan Muansanga ka la pan lui ṭang ṭang.

"Ti lo hram rawh. Khawngaihin." Ka ngen tak meuh. Min rawn hmu vetawh der si lo. Nge ni a min hre lo der tlat zawk.

"Ni lo, ni lo.. A ni thei lo." An tlan chhuak hman. Muansanga dinna ka thleng chiah a sin. Ka mittui a rawn tla nghal zawih.

"Ding rawh Muansang." Mi â ang maia um zui chiamin kati a. Zan thim nen inpal in ka tlu zui hnawk a. Chu zan thim leh hun hrehawm tak karah chuan lungchhe takin Muansanga hming lam chungin ka ṭap ta ringawt a. Ka hlauhthawng em a ni. A chungah thil ṭha lo a thleng palh mai ang tih te ka hlau a, chan lah ka duh hek lo. A nat ka phal lo va. Mahse ka dang thei si lo. Ka awm chhung hi a na, a na lutuk.. Min hnawh tup tup.

"Eng em a thleng lo ang." Bsa an ka dar a vuanin a rawn ti a.

"Ni lo Bs. Muansanga khan a ṭhianpa ang a thih ve mai a chak thu min hrilh asin. Dam hi a thlahlelh ve lo." Rilru na leh hlauhthawng bawk si chuan ka lo ti hlat hlat a. A rilru put hmang hre ran chung chuan ngaihtuah loh a har em a ni.

Muansanga te tlan liam ka thlir vawng vawng lai chuan kawl a rawn phe zuai zuai a. Mi â ang maiin ka tluk dan dan chuan ka ṭhu tlawk tlawk lai chuan ruah lah chu a rawn sur ta buan buan a. Hun tawn mek nen chuan a hrehawm zual.

"Kal ang. I huh vek dawn asin." Bsa an dimte a min pawt tho in a ti a. Kei chu ka ni ruai mai.

Ruah sur vangin midang ho tepawh chu an tlan darh hlawm a. Rei lo te ah chulai hmun chu a reh nghal duk. Hmun khawhar tak ang maiin. Chu tih lai tak chuan kan awmna lam panin car a rawn tlan a.

"Lo lut ru." Car khalh chungin Ramdinan a rawn ti a.

"Awmawm lut rawh. Bike in ka rawn zui ang che u." Bsa an car kawngkhar min hawnsakin ka lut duh loh ang tih hlauh hmel takin a ti sawk sawk a.

"An tlanna lamah kan um zui dawn nia." Ramdinan car chhung a ka ṭhuṭ luh rual chuan a lo ti thuai a.

"In hriat lawk te chuan ti nge in dan loh? Eng emaw lo thleng palh ta se." Thanthani chuan ṭap ṭiau chungin a lo ti hlak hlak a. Ramdina nen an lo kal dun chu niin. Muansanga chu kan ngaihtuah em em vek mai chu a ni. A ni lahin a hrethiam der si lo.

"Kan dang nasa lutuk. Awmawmi Aizawlah a awm tih a hriat rual khan a ṭhulh vekin kan hria a. Mahse kan ngaih a ṭhaṭ chiah loh vangin zanriah ei kham veleh an in lamah kan va ngaihven a. Zanriah an in lama ei lo in a ṭhiante ho nen an ei khawm dawn thu a chhungte a lo hrilh a. Kan ei khawm der bawk si lo. Keini lo ṭhiandang aneih ka hre si lo. Tun hi kan thleng ta a ni." Pawi ti takin a a ti a.

Keimah vangin intlansiak tur a ṭhulh niin a ṭhiante ho in an hria a. Kei erawh chuan keimah vanga telah ka ngai thung si. Ka inthiam lo ngawih ngawih. Ka hrehawm zual.

"A tel tur thu in hre har em ni?" Thanthani bawk chuan a ti leh a.

"Zan dar8 bawr vel thleng kha chuan tel a tum tih thawm a awm lo. Ngaihsanga te ho thin pawh a rim a lawm. A ṭhulh leh niin kan hre vek a. An rawn chotuah nasa lutuk. An ṭawng êl nasa lutuk vel kha a tuar thei lo in a rilru a thlak leh thut pawh ani mai thei. Tlinpuian, Muansanga bike intlansiak na ah tel a tum tih thu min rawn hrilh meuh techuan kan lo tlai hman tawh lutuk." A tih vang vang lai chuan pawn ruah sur bur bur lam hawiin thil thleng ta tekha ka ngaihtuah let leh vek.

Ka chhandan vanga a rilru let butin tiang thil hi a tih phah tih ka chiang lutuk. A pawi a ni.

"Ka û chunga thleng tawh ang kha Muansanga chungah hian a thleng veleh anih chuan ka tuar thei tawh lo ang." Thanpuiin a rawn tih chuan ka hit mup thei. A sawi hriat ringawt pawn minti hrehawm.

"Chu tiang zawngin thil an ngaihtuah ngai lo." Ramdinan a tih mek laiin kan car chuanna chu a ding dawt a. Hmalamah kan bu lâwp hlawm..

"Eng nge ni?" Kan ti he haw hlawm a.

"Eng nge thil awm zia?" Kan hma chiah a bike leh car lo ding mek a chuang te chu Ramdinin a va bia a.

"Bike accident an awm." Tih ri chu ka bengah hian bomb puak dur ang maiin a ri ring. Min deng nghing dawt. Thin hi a phu rang nghal zawih zawih.

[Ngaia]

Muansanga * Habibi*
Chapter -8
May Renthlei
"Bike accident an awm." Tih ri chu ka bengah hian bomb puak dur ang maiin a ri ring. Min deng nghing dawt. Thin hi a phu rang nghal zawih zawih.

"Accident chu tu nge tih in hre thei em?" Ramdina bawk chuan a ti leh a. Min rawn chhang mai hlawm lo.

Thanthani lam ka va hawi a mit chhingin a lo inkuah khawm tat. A taksa a khur dar dar tih lah hai rual ani lo. Hlauhna nasa takin a tuam mek.. Ka lainat leh chhawng. An thil tawn tawh nen a hrehawm dawn em asin.

"Lo kal ve lo turin ka hrilh che kha." Thanthani awmdan a hmuhin Ramdina chuan a rawn ti a. A kut a rawn vawnsak thuai a.

"Tun ang zanah chiah khan he lai hmunah hian Û Muansanga kha." A tih mek laiin.

"Bike Accident number chu MZ-01**** ani e. A bike a chhe hneh viau ani awm e. A mah an zawng mek."

"Muansanga bike number kha." Ramdinan a rawn ti nghal a. Kan phu zawk zawk. A van hrehawm duh tak.

"Ni lo." Ramdina leh Thanthanin an ti rual dun ṭhawt a. Thanpuii a ṭap zawm nghal. Bike number an sawi kha tu bike nge tih an hrechhuak chiah ani tih hai rual ani lo.

"Muansanga chu an zawng hmu chiah e." Ruah sur leh boruak chhah mup kar a chu thu rapthlak tak hriat zawng mangchhia mai nise ka va ti tak em.

Car kawngkhar chu ka hawng rawk rawk a. Hmanhmawh bak lenga bike tlan liamna hmun lama tlan ruai ka duh laiin ka tha a rawn zawi vek. Ka mittui dan rual lohin a rawn tla a, ruah sur nen a inpawlh sawp nguai nguai.

"Muansanga thi suh aw. Min kalsan miah suh." Ti rilru mawlh mawlh chungin ka pan nawk nawk a.

Muansanga nikhawhre lo va awm, thi in a bual hnuang mai Bs an lungche taka a lo pawm kan hmu chiah mai chu maw awm ngaihna hi ka hre lo. Ka khawng vek. Ka â mai dawnin ka hria. Ka hmu sual chu ani si lo.

"Damdawi in ah kal pui vat angai." An ti ri te chu ka hre vuai vuai. Ka khawvel chu a bing mum mum.

"Ṭhianpa harh rawh." Ramdinan aw rawl chhuah meuhin an ti a. Keini ho chu kan nawi tlang vek. Kan che pangngai thei hlawm lo. Midangho chu an lo fel hlauh a. An buaipui zung zung.

"Ramdin, Thanthani kha ngaihtuah rawh. Muansanga chu Awmawmi nen kan lo chuan pui ang." A puitling deuh ber Bsa chuan a rawn ti ve thei ta hram a.


"Muansang mi â pa. Min kalsan suh aw." Car a kan chuanlai techuan kati mawlh mawlh a. Engmah hrelo va a awm bâl mai chu kan mit tui nen hlauhthawng thin phu dup dupin ka thlir a.

"In ti chak la. Min kalsan miah suh. Kan mamawh che. Kan vai mai hian kan mamawh che." A hmai leh a chhehvel te chu kut khur dar darin ka khawih kual vel thul.

"Harh hram la chuan awm i ti nuam deuh tur. I hliam tawrh hi a na viau anih ka ring." Te chu midang hriat loh tur si chuan kan ti vel thul.

Damdawi in kan thlen chuan zing lam dar1 a ri thuak tawh. An lo buaipui nghal zung zung a. Ka hmuh phak lo va an kalpui tur te chu theih nise kuah beh tlat mai ka duh.

"Khaw nge ka fapa chu a awm? Eng nge a an?" Muansanga chhungte hlauthawng phelenga rawn lang hmuh techuan a hrehawmin a inthlahrunawm duh tak zet.

Bsa an chanchin a lo hrilh thuak thuak a. Kei chu ṭawng tur hi ka awm lo hrim hrim. Muansanga thisen ka kawr leh a chhehvela kai hnuang techuan thil thleng chu a tak ngei anih zia a ti chiang nasa mai si. Muansanga chhungte mangang leh an fapa ngaihtuah lutuk awm ngaihna rawn hre bik mang lo te chu ka dem lo. An ngaihtuah zia ka hria lawm.

"Nangmahni zawk in ṭha em? Awmawm." Rilru hrehawm ṭeuh a Pa Sangkiman ka dara vuan chunga a rawn tih chuan ka lo bu nghat a.

"Thanthan eng nge thil awm zia hi? Nu Sangpui, Muansanga chu eng tin maw a awm?" Rawn ti lut ve ruai tu nu chu tu nge tih ka hre lo. A pasal niawm tak leh hmeiche pakhatin an rawn zui ve bawk.


"Nu." Thanthanin ṭap aw ṭiaua a rawn tih chuan tu te nge an nih ka hre thei ta chiah.

"Ka û chunga thleng ang kha a thlen leh ka duh tawh lo." A nu kuahin a ṭap zui hlawp hlawp a. Tumah chu insum thei an awm lo. An ṭap vek. Mipa ho pawhin ti pa chang zo lo in an mittui an hru veleh fup ṭhin.

An hun tawn hrehawm tur zia chu ka hriatthiam pui. Muansanga hmingpui an lo chan tawh a, kha tiang din hmun hrehawm leh rapthlak tak mai ang kha an tawng nawn leh ania. Hriatthiam a har duh ngawt ang.

"I û chunga thleng ang kha a thleng ve dawn tawh hleinem. A ṭha leh vat dawn alawm. I ṭawngṭai mawlh mawlh ang u khai." Pu Sangkiman a lo ti thlup thlup a.

"In huh nasa si, in thawmhnaw tekha thlak angai anih kha. Ti kha chuan in damlo ve mai ang. Min hawsan phawt rawh u khai. In ṭhianpa in ngaihtuah lutuk tih chu kan hria. Mahse tih theih vak kan nei lo. Awm hmun ṭheuh a lo ngaihven bak." Pu Sangkima bawk chuan keini ho chu min melh kualin a ti a.

"Ni e, haw phawt ula. Chawl hahdam rawh u. In ṭhianpa chuan eng em a lo ti nang." Nu Sangpuiin a lo chhunzawm ve bawk a.

Keini ho chu kan awmdan turah kan buaitlang map hlawm. Kalsan kan hreh rualin kan thawmhnaw huh hniang hnuang nen hi chuan awm reng chu a ṭha ber si lo. A nihna takah chuan a vawt tak zet. Thisen nen, chirh te ka kai nen nuan bawk si.

"Awmawm ka thlah ang che. Ti kha chuan i damlo mai ang." Û Hruaisangan ka kuta chelh zuiin a rawn ti a. Muansanga kal san chu hreh hle mah ila tih theih dang a awm rih chuang lo.

"Hahdam hmasa phawt ula in lo lang leh vat dawn nia. In fel lutuk, kan lawm e." Muansanga nu leh pate lah chuan an ti dam thluam a. Nu leh pa ṭha tak a nei a ni. Hriat chhuah tur hi a va ngah tak em. Kan hmangaih zia te leh kan thlakhlelh a, kan ngaihtuah tlan zia te hi a hriat chhuah hunah chuan dam thlakhlelh na tepawh a nei ve tawh mahna.

Keini ho zawng chu damdawi in a ṭangin kanin zui chhuak dam dam a. Thanthani nu leh pa leh Muansanga nu leh pa te erawh an la awm thung.

"Bs, Ramdin in khalh thei a ngem? Theih dawn loh chuan keiman ka thlah ang che u. Thanthani chu Û Hriatin a hruai haw thei a." Û Hruaisanga chuan parking kan thlenin a ti a.

"Min ngaihtuah suh. Kanin lamah zanin chu kan riak dun ang." Ramdinan a lo ti a.

"A nih chuan le. Hahdam tum hram ula. Awmawm kal ang le." Min rawn melh zuiin a ti a.

"Umm." Car chhung a lut zuiin kati a. Car chhung chu a lo lum nuam bik ngei mai.

"Hei hi sin rawh. Vawt i ti anih kha." Car chhunga a showl lum nuam tak lo dah lawk sa chu min sintir zui mawlh mawlhin a ti a. Ka lo hnial lem lo.

"I û Kima ka be tawh aw. I kal ve tih ka hriat rual khan."

"A tih zia hlauh chu." In tuam khawr tatin ka lo ti a. Sawifiah vak ka ngai dawn lo chu ka lawm. Ka sawi zawngin ka ṭap vak palh ang.

"Aizawl i rawn thleng thla ve chiah a tiang thil a thleng hi pawi kati lutuk."

"Keimah lam chu ngai pawimawh duh suh. Ral khat aṭangin he tiang thil thleng hi dawngsawng ni ta ila a hrehawm duh zual zawkin ka ring."

"A ni tho mai. Remchang hmasa berah kanin lo tlawh ve ngei ngei rawh aw. Muansanga room hmuh tir che ka chak."

"Eng vangin?"

"I la hre mai ang." Nui pahin min lo tih san mai a.

"Ka hre chak. A ṭhaṭ chhuah leh thuai ka beisei." Ka mittui a rawn hnai leh kuarh tawh, sawi zawng pawhin.

"A ṭha leh thuai ang. Nangmah vang tal pawhin." A tih chuan ka ṭah nuih ti tih.

"Eng mah hi a hrethiam lo nge ka hrethiam lo zawk pawh ka hre lo. A rawn ṭhaṭ chhuah leh hun chu ka zilh nasa ngawt ang. A samah ka kek bawk ang." Te chu kanti vel thul.

"Ni e. I hau hrep bawk dawn nia. Min tih mangan ngun em avang hian a rawn ṭhaṭ chuah leh hun chu sawisak zâl deuh raih chu angai ang. A chak lo vang." Û Hruaikiman a tih chuan chu tianga Muansanga tih chu phal lo tih hriat lutukin lungngai lawk sa fe in ka melh phei nur nang a..

"Chu tiangin ti lo la." Ka ti zawi raih a.

"Nang pawn hauh hrep a. Keh nawk nawk hial tepawh i duh kha."

"Mahse." Ka ti niah niah a. Ka ti na phal tak tak teuh lo. Ka duat tawh ngawt ang.

"Aw le, aw le. Ka fiamthu anih kha. Kha tiang hmel nûr lutuk kha pu teh suh." Nuihmel pu chungin a rawn ti a.

"Fiam i nuam dawn tlat." Min la ti zui. Ka nuih a zat rualin ka ngei ang reng.

"I sual lutuk."

"A dik alawm. Hahdam la, tui deuh a mut i tum dawn nia." Kan in bul kan thlen zui a vangin a ti a.

"Aw le. Thil thleng a awm chuan min lo be vat dawn nia."

"Lutuk." A ṭawng zawh rualin car kawngkhar ka khar ri khap a.

Kan kawngkhar bula ka din thlap hnuah chiah a tlan chhuak ri ka hria. Û Kiman min lo ngaihtuah nasa in chhung ka lut chiah chu. Ka ti phawklek khaw lo vek. Ka landan vel vang tepawh ani tel ang.

"Ti khan mu hahdam vang vang phawt la naktuk khawvar veleh keiman damdawi in ah ka hruai dawn che nia. Rilru ṭul lo ah tih hah vak vak loh tur. Thil dang ngaihtuah kual vak lo in mutthilh hram i tum dawn nia." Minti mawlh mawlh a. Ka bu liam vel mai mai. A sawi ho erawh a dik khawp mai.

Mutthilh chu kan tum teh a, a har a ni. Muansanga chiahin ka rilru a luah khat mup mup. Damdawi in a va kal lehnghal mai te chu ka duh ut ut a. Khawvar ka nghakhelh ngawih ngawih. A la thim ṭha mep mep hle mai si.

"A va ṭha lo em." Zomuansanga accident tawh thu an theh darh chuai chuai ka hmuh chuan kati hap a.

Milar leh chhungkaw hlun fapa anih bakah, a mah a lo lar in tunlai hmeiche ho ah a tla na ani bawk a, a accident tawh thu lo chu hmuh tur a awm mang lo. Ṭhenkhat erawhin an dem hle a, comment chhe tak tak leh chhiar hrehawm a tam khawp mai. Phone ka hmet thim ta tawp a.

A chhungril nun ṭha leh khawngaihthlak tak rawn hmu pha ve lo tan chuan mihausa fapa duat sual leh awm ngaihna hre lo tih pawh chu awmna chin a awm tho rualin, lo hrechiang tu tan chuan lo nat pui vawng vawng a awl. He tianga nun a hmanchhan hi a awm miau a.

"I va tho hma ve." U Kima lo tho ve in mit nuai chat chatin a rawn ti a.

"I mu thei meuh lo ani maw?"

"Mu thei vak lo."

"A awm tho e. Ka intifai ang a damdawi in lamah chuan kan kal dawn nia. Bawihtea pawh a harh tawh." Bathroom a lut zuiin a ti a.

Kei chu ka inpeih thlap tawh. Tih theih chu nei lo hle mah ila a bul hnaia ka awm chuan ka ngaih a ṭha deuh mahna.

Û Kima leh Bawihtea inpeih hnu chuan damdawi in lam kan pan ta vang vang a. Bsa leh Ramdina luh theihn chin kan thlen chuan an lo awm reng tawh. Min lo nuih hram hram a. Ka lainat dun reuh.

"In lo va kal hma ve. Ngaihtuah awm kan ni hleinem. Bawihtea pawh a lo kal ve ani maw?" Pa Sangkima chuan a lungngaihna te dah ṭhain min lo ti hram hram a.

"Eng nge in lo an? Nizan lam kan lo lang thei mang si lo va." Û Kiman a lo chhang thuai a.

"Zinglam dar4 vel kha chuan kan dinhmun kha a hniam ang reng khawp a." A tih chuan hlauhthawnna in mi rawn ti danglam nghal mup.

"Mahse tunah chuan a zia awm tawh e. Ngaihtuahawm ani tawh lo. A harh chhuah hun tur erawh hriat a har rih khawp mai." An ti hap hap a.

"A rawn harh thuai turah ngai ang. Tlangval chak tak anih kha. Hmabak hlen tur a la ngah hle si a." U Kima chuan min melh pah kherin a ti a. Min ti lai. An lo hre leh vek tawh anih dawn hi. Thuruk hi a awm thei tak tak lo.

Darkar 1 dawn an awm hnuah Bawihtean hawn a ngen tak reng a vangin Û Kima techuan min hawnsan a. Min kalsan chu a hreh hle tih ka hrethiam. A naupang ber tih takah min ngaihtuah leh lutuk ṭhin hlawm a. Ka puitlin vetawh tehreng nen hian.

"Zu inhnawh puar hlawm ula. I nu nena kan ei tur erawh min lo ken chhohsak ta mai ula. Chhuah ka va huphurh ve." Pa Sangkiman a ti chuar chuar a. Muansanga nu ṭhu ngui bam mai leh mit bui lak chu ka va melh a, a ṭawngṭai bang thei lo. Pathian pawhin a chhan ngei ka beisei.

"Kal ang u. In ril a ṭam tawh ang." Û Hruaisangan thawh nghal vut pahin a rawn ti a. Ka kal peih loh hlauin min tung tho zui ve bawk.

"In va ding nasa hlawm ve. Khaw nge kal in tum a?" Thanthani rawn thleng ve chiah chuan a rawn ti a.

"In hnawh puar kan tum a. Lo kal venghal mai ta che." Bsa an a lo ti vat a.

"Ka lo kal ve lo mai ang. Ka ril a ṭam lo e mai. In lo kim leh vek tawh bawk sia in zahawm e mai." A lang bûi châk leh Muansanga vang a a lungngai hmel te chuan a ti lang ṭha mah zawkin ka lo hmu.

"Kan thleng ve deuh chiah hlawm alawm. Hrehawm ti duh suh." Ramdinan a lo ti thuai a.

"Ni e." Bsa nen kan lo thlawp dun vat a. In hnawh puar turin kan kal zui a.

"Hnek chak ka va ngah tak. Ka thin an ti rim hlawm lutuk." Bsa chuan a phone hmet thim rap rap in a ti a.

"Kei pawh. Group a ṭang ka left nghal. Ka insum zo dawnin ka hre lo va." Ramdinan a lo ti ve bawk a.
An ṭhian tu tu te emaw nena an group siam te pawh ani mah na.

"In bengdai rawh u. Buaina dang siam loh hram in tum dawn nia. Mi techuan eng pawh an lo sawi thei alawm. Kei mahni ho hi kan pawimawh zawk. Sawisel turin ka naua hi a khawsa ve bawk alawm." Û Hruaisanga lah chuan puitling takin a lo ti dam thlap a. Kei mahni ho zawk chuan hriatthiam har kan ti zawk.

Ni lengin damdawi in lamah hun kan hmang a, Muansanga chanchin ṭha lam leh chhelam hriat tur a awm lo. A ngai reng. Kan hawsan hun ani mai tawh si a. Lo harh chhuak tawh tal se ṭha tur. Bsa an min thlah a. In chhung ka pen luh rual chiah chiahin Ruatsangan min lo call. A hun chat chat khawp mai.

"Hello."

"Eng nge kan dam lo chu a an?"

"Ka hrethiam lo. Vawin lam chuan hma chu a sawn vak lo."

"Tlema tlemah i nuthlawi lo chauh alawm le." A rawn tih chuan ka nuih a za deuh, ngei bawk siin ka awm.

"Nuthlawi na chhan tur ka nei lo." Ka tih chuan a nui hawk hawk a.

"Kan ngaihtuah lutuk che u. Kan ngui ruai hlawm mai."

"Min lo ngaihtuah suh u." Te chu kati mawi hnai ve a.

"Ka pa nen naktukah Aizawl kan lo chhuk ve dawn. Lo chhuk loh tawp chu awm a nuam thei lo e mai."

"Ka van lawm i lo chhuk tur chu." Ka ti tak tak. Ruatsanga a lo awm ve chuan ka tan pawh a nuam thei deuh dawn a. Fel hlawm hle mahse a hma daih a ṭanga ka lo hriat leh nelsa an awm lo lutuk a, a ruk tak chuan a hrehawm kati.

"Ka rawn ti hrehawm zual dawn che nia. Hahdam deuh khan awm tum la, i lo muhil thei lo vel a nge. Tui deuh tekhan mu la."

"Aw le, Kid."

"Hmpp. Ka ni rih mai ang. A nih phawt le." Kanin biakna chu kanti tawp a.

Ka chhungte ho in min rawn be veleh chiah hlawm a. Min biak kim vek a vangin kanin be rei ngang mai. Ka khua an ti har lo deuh.

Nizan lama ka mut loh vang leh rilru hrehawm tak a awm reng bawk kanih vang tepawh aniang, rei vak lo chu ka chhing ve sak a. Mahse thin thi diaiin ka mu thei chuang lo.

Phone ka hmet eng a, zinglam dar4 a lo ri tawh a. Ka ring kan ak ak in tukverh lam chu ka va melh a. Khua a lo la eng chiah lo. Eng thuai thuai se ka va ti ṭhin tak.

"Muansanga a harh tawh." Tih thu Û Hruaisanga hnen a ṭanga kan dawng chiah chu ka mu lai ka ṭhu tho zawk.

Ka harh chiang kawk kawk khawp mai. Lawm vangin biangah mittui a luang ta zawk a. Pathian hnenah lawmthu sawiin ka ṭawngṭai nghal mawlh mawlh.

Muansanga harh thu chu Û Hruisanga hnen aṭangin minutes 15 liam ta khan ka dawng a, call let nghal ruai chu chak hle mah ila midang biaka a hrilh kual te angaih ka rin vangin ka be ta lo va. Message erawh ka thawn let.

Bsa leh Ramdina pawh an mu thei tawh bik lo aniang kanin be kual hlawm a. Kan lawm tlang a ni.

"Dar6 velah ka rawn lam ang che." Bsan min ti a. Ka lo hnial lo nasa. Kal turin eng tik lai pawn ka inpeih.

Kan naute thar neih lam pawh ka lo theihngilh ṭhelh hman alawm le. A ṭha lam zel an ni a, an rawn chhuak ve thei ṭep tawh ang. Va hmuh tum ila a ṭha ang, Muansanga tlawh leh pahin.

"I hmel hmuh pawh a nuam ta deuh e." Min lam tura Bsa rawn thleng chuan ka hmel a hmuh rualin a ti a.

"Nang pawh." Nuihmel a put sang avang chuan kati let ve a.

"A dik alawm. Kal ang le."

"Aw le." Bike ah chuan ka lawn kai nghal a. Muansanga awmna a kan luh dawn chuan ka zam ru tak zet. Hmuh ka chak rualin ka huphurh tel tho bawk si. Ka pangngai thei meuh lo.

"Nu, eng nge in lo an tawh?" Muansanga nu hnenah chuan Bsa an a ti a.

"Kan ṭha khawp e. Ring vak lo chuan a rawn ṭawng ve a. Kan lawm khawp mai. Doctor pawhin ngaihtuah awm ani tawh lo a tia. Lungngaihna tur a awm tawh lo ve. Muang changin a ṭha chho ve zel tawhin kan ring." A lo ti siam siam a.

"Awmawm in ti lawmawm lutuk a nia. In ṭhianpa in rawn ngaihtuah a." Ka kuta vuan chungin a ti dam diaia.

"Eng mah tih kan nei hleinem." Lai ang reng takin ka lo ti a.

"Nei tehreng mai. Ngaihtuah tak tak tu ṭhian kan fapa in a nei cheu hi a vanneih khawp mai. A biak leh theih ṭep tawhin ka ring. A chau deuh a, doctor in hahdam turin a duh rih bawk nen. Lo ṭhu hahdam phawt mai rawh u. Thla in ti muang, Hruaisanga pawh a rawn thleng ṭep ang. Ei tur a rawn kengin ka ring."

"Ka nu nang pawh in lamah te va hahdam ve la. I chauh hmel lutuk tawh ania." Bsa an a lo ti ve bawk a.

"Ni e. A lo harh tawh bawka va haw ve lawk te chu a pawi lo vang. Pa ber rawn thleng se kan haw rual ang chu." Thaw hiai hiaiin a ti a. Muansanga nu anih vang nge phei chu ka hre lo, nu ngainatawm tak niin ka hmu. Nu sual tak chu anih ka ring lem lo.

"Damlo in hmuh cheu a duh a. Lo lut ula." Nurse fel hmel takin a rawn ti a. Ka thin phu a lo rang nghal sauh.

"Va lut teh ang u." Kan tih mek laiin Ramdina a rawn thleng ve a. A lo thleng fuh lutuk chu kan lo nuih ṭha.

"Ka fapa duat sual chu eng nge i an tawh le?" A nu in Muansanga pan phei pah a a tih chuan nuihmel a lo hmuh ve hram a. Tlangval lian lutuk pahnih bula ding kanih vangin kei chu min la rawn hmu thleng ve lo.

"I ṭhiante ho nen kan nia. An ngaihtuah lutuk che a zan pawh an mu ṭha thei bik lo. Thla an ti muang ania." A nu in a tih leh tak dap dap ah chuan mit meng vai riai leh chauh hmel takin mi rawn melh kual a. Keimah min hmuh chiah chuan a tawp chat a. Min melh vang vang hnuah mit a chhing zui daih. A awmdan chu ka hrethiam chiah lo. Min hmu chu a lawm lo em ni dawn le aw? Tih te ka ngaihtuah. Ka awm a nuam chiah lo.

"Kan mi â pa chu tikhan damlo reng la enkawl i nuam zawk ang." Ramdina lah chuan a lo ti a.

"Dik chiah. Thu a awih zawk bawk ang." Bsa an a lo tuihnih zui a.

Chau chung chungin kut tum a rawn hmuh dun a. Kan nui sang hlawm. Eng tin tin emaw an fiam zui a, Muansanga chu damṭha nise a pawr leh viau tawh ang. A pawr thei rih lo mai pawh a. Chet chu sawi loh ṭawng pawh a ṭawng ṭha thei rih lo ania.

"Min hrethiam lawk rawh u." Û Kima hnen aṭang a call ka dawn vang chuan kati a.

Ka chhuak turin Muansanga ka va melh chu hrethiam lo hmel takin min lo melh a. Khawngaih thla a la bil bel tak zet.

[Ngaia]

Muansang * Habibi *
Chapter -9
May Renthlei
Ka chhuak turin Muansanga ka va melh chu hrethiam lo hmel takin min lo melh a. Khawngaih thla a la bil bel tak zet.

"Aw. HELLO." Kawngkhar ka khar rual chuan kati a.

"Nobawih vawin lamah damdawi in aṭangin kan naute leh a nu an rawn chhuak thei dawn hlauh a. Damdawi in lam panin taxi hire in ka rawn kal mek, i û Remi te damdawi in awmna lamah rawn kal kawi ve lawk ta che. I tan a buaithlak loh chuan." A rawn ti a.

"Buaithlak lo ve. An lo chhuak leh thut thei tur chu a va lawmawm ve. Tun kar awm an la ngai rih dawn emaw tih laiin."

"Nia, a lawmawm khawp mai. Lo hmanhmawh duh vak lo la aw. Muansanga chu eng nge a an tawh reng reng?"

"A ṭha deuh tawh e. A la chak vak lo va."

"A nih tak chu. Muangchangin i rawn kal dawn nia."

"Aw le." Kanin biakna ka ti tawp a. Û Hruaisanga leh pa Sangkima bawr ang reng takin an rawn thleng ve chiah thung.
Min hmu chu nidang ang bawkin min lawm thiam leh hle a.. A zahthlak lek lek zawk, ka chungah hian an ṭha lutuk a.

"Muansanga chu ka rawn kan leh vat zawk dawn nia. Ka va hmu tawh kher lo mai ang. Min lo hrilh sak mai ru." Û Remi te damdawi in aṭang a an chhuah dawn thu ka hrilh zawh chuan kati a.

"Aw le. Kan ngaihtuahawm tawh hleinem. Hun remchang a awm veleh naute kan la rawn lawm ve dawn nia." Pa Sangkim chuan nelawm takin a ti suah suah a..

"Lutuk. In rawn la lawm ngei ngei dawn nia. A nih phawt u." Tiin ka kalsan a.

Û Remi te damdawi in awm na ka va thlen a, kan naute thar kan hmu chiah chu ka hmangaih nghal ngawih ngawih. Taxi kan chuanlai techuan keiman ka pawm a, ka en ning thei lo. A awmdan a lo hreawm palh ang tih hlau reng rengin ka pawm dim a. Ngaihtuah tak hi kani ringawt. Kan naute ah hian ka luangliam leh nasa dawn a ni.

"Muansanga chu eng nge an an tawh? A chhungte dang hi chu ka hmu fo va, hmun danga awm bo reng anih vang hian ani tak hi chu ka hmuh loh na a rei tawh lutuk a, a tleirawl chhuah tirh te hmel bak kha ka hre tawh lo." In kan thlen hnuin U Remi chuan a ti barh barh a.

"A ṭha deuh tawh. Ngaihtuahawm ani tawh lo." Kan naute muhil lai hmel la thlir reng chung chuan kati a.

"A accident lai vel khan ka damdawi in awm pui ho khan a chanchin lo sawi tur reng an hre lo. Nurse ho pawn an bang chuang lo, an la naupan hmel hlawm bawk a. A ṭha lar ve em ani Muansanga hi chu. A û te dangho pawh an ṭhaṭ tlan tho rualin ani hi chuan boruak eng emaw hi a siam leh hat ṭhin." Nui rah rahin a ti a. Ka lo khi ve suk.

Muansanga mi zia ka hria a, a sawi dik lutuk. A unau dangte ang lo takin buaina chawh chhuah hi a thiam tlat a. Ṭha hlur ringawt mai. A puitling sawt viau emaw tih laiin a lo che chhe leh palh bawk nen.

Hun rei tak a ta chaw kan han ei khawm leh thei chu kan bengcheng vekhawp mai. Sawi tur kan nghah tlang bawk a. Naute thar rawn lawm tum leh chawei khawm rawt an kat nuk bawk a, rel tur kan ngah khawp mai.
******* *** May Renthlei ************
Kar a liam a, Muansanga pawh a ṭha chho vetawh khawp mai. Naute thar lawm a min rawn tlawh an tam a, chawei khawm neuh neuh kan nei bawk nen kan buai vethei khawp mai. Naute awm ngai nen.

"Lo lut ru." Kawngkhar kik ri ka hriat a vang chuan hawi pawh hawi chhuak lem chuang lo in ka ti a.

"Lalrinawm i va buai awm ve." Ruatsangan a rawn ti lut lung lung a. He pa ngaihawm zia hi. Hmuh ringawt pawh chu a nuam.

"Buai a reh ṭep. Ka insu zo chiah." Ka lo ti a..

"Ruatsanga chu Aizawl lamah i la awm ani maw? I va lo leng duh lo ve." Û Remin a lo ti thuai a.

"Kan buai ve deuh a. Naktuk lamah ka pa nen chuan hawn mai kan tum tawh."

"In va tum hma ve. La awm rih ula." Ka kut hru hul mawlh mawlhin kati a.

"In lamah hna kan ngah tawh lutuk. Duh ai kan cham rei tawh zawk. Kan rualin i haw ve hman awm si lo va."

"Haw thei rih lo. Kan la mamawh lutuk." Û Remin min lo chhan khalh vat a. Ka haw hi chu an ui vethlawt. Ka chawk zangkhai ve lutuk a.

"Chhawr fe vek rawh u. Naute tekha a mah hlir hi awm tir ula. Mahse vawin a tan chuan ka lo hawh lawk ang. A hman a ngem? Û Rem." A tih chuan ka lo melh vak a. Chhuah ka peih lo. Muansanga hmu tur a kal tawp te anih loh chuan.

"Nang i ni bawk a hman mai rawh se. Eng nge tih pui i tum hrim hrim a?"

"Muansanga tlawh pahin eng emaw min lei pui se ka tia."

"Muansanga tlawh pah anih chuan a zia e. Min lo nghak rawh. Ka thawmhnaw hak lai ho hi ka insuk na lamah kati huh nasa lutuk a inthlak te ka ngai."

"Hmanhmawh duh suh."

"Hmanhmawh rawh pawh ti la ka hmanhmawh chuang lo vang." Min chhan leh hma in bed room lamah ka tlan luh san nghal.

"Damdawi in ah kal hmasa i la, hawn pahin bazar lamah chuan kual ila a zia zawkin i ring em?" Bike khalh chung chuan a rawn ti a.

"I tih dan dan ani mai."

"A nih chuan Muansanga va hmu hmasa ang."

"Aw le."

Damdawi in kawtah Muansanga chhungte ho haw tur nen kanin leh pel a. Awmpui a nei rih lo emaw, Bsa leh Ramdina chauh an lo awm tepawh ani mai thei.

"Ka ril a ṭam." Kati leh rih a. Zing chaw ei loh a rawn lang.

"Thil ei hmasa phawt ila ani mai alawm." A lo ti awlsam et a.

"A ngai lo. Nakin lamah ani mai. Kal kual ka peih rih lo." Ka lo ti leh lawi a.

"Tuna rilṭam ti tawh a. Muansanga awmna lamah lo han chho hmasa la ei tur ka rawn ken sak vethung ang che." Kal nghal rualin a ti a.

"A ngai lo." Ka ti leh tak na in a kal lui ta tho tho.

"Hmpp" Ka ti zui ringawt.

Muangchangin Muansanga awmna lamah ka lo han chho a. Bsa emaw Ramdina velin an lo awmpui turah ka ngai tawp.

Muansanga awm na room bul ka thlen chuan thaw ka la hmasa halh a. Ka zam leh tlat ṭhin. Muanchangin kawngkhar chu ka nam hawng a.

"Eng nge i lo an......" Ka sawi tur pawh sawi zo lo in ka thil hmuh avang chuan ka tawp chat. Keimah zawk chuan awmdan tur ka haih chham vek.

Thanthani chu Muansanga taksa a ṭang chuan zahna nei miah lo in a awm sawn a. Chu tianga ka va hmu chu lawm hmel takin a nui sawng lehnghal a.

"Ka ka.. Tihpalh. Kawngkhar ka rawn kik lo va." Ka ti bah nak a. Ka awmdan chu a lai lak lawh hrehawm vel vek. Ruatsanga kha lo nghak ila ṭha tur.

"Inthiam lohna tur a awm hleinem. Lo ṭhu ve rawh." In ti neitu takin Thanthani chuan min lo ti teh sawrh a. Muansanga hmel erawh eng mah thleng lo ang hmiahin a pangngai charh.

Ka va hmuh dan teh ur kha chu a dik lo. An in kiss lai ka va phawk ni berin ka hria. Ka chhunglam hi a su dalh dalh. Ka awmdan chu a nuam lo. Sawi thiam chiah si loh in. An ni pahnih hi Muansanga damloh den chhen hian an lo in eng emaw ta viau tepawh ania nge. Thanthanin a kuta a chelh tlat danah tehian eng emaw chu alo awm ru reng tawh pawh ani thei. Ka tlai ta em ni ang? Ka chan mai tur a nga ka inchan chiah chuan ka na ru rauh rauh.

"Ruatsanga nen in lo kal dun dawn emaw tia? Khaw nge a mah chu?" Thanthani lah chuan thawveng takin a ti a. Eng tin nge maw kan kal dun tih te chu a lo hriat hrep ni.

"Ei tur a lei kawi lawk. A rawn lut ve ṭep ang." Ka ti sap a..

"In inhmeh thlawt. Ruatsanga zawk hian a duh hmel che ropui sia. A nuam ngawt ang." A la ti tak deuh deuh.

Muansanga hmel ka en vat a. Tukverh lam min hawisan daihin a inseh ruh ṭang a.. A hmel a thim dur khup.

"Ruatsanga nen te chuan."

"Ka lo thleng e. Muansang eng nge i lo an tawh?" Kan boruak hre lo lekin Ruatsangan a rawn ti lut bawrh bawrh a.

"Ka ṭha." A lo ti hmuk a.

"Ti nge i lo din reng a? Ṭhu la heng ho hi ei rawh. I rilṭam kha." Ṭhuṭna ruak a min ṭhuṭtir pah chuan a ti a. Muansanga lo rum ri hak chu hriat loh a har. Nge maw a lo thinrim ve viau ni. A mah zawkin Thanthani... Nââhh. Ka ngaihtuah zawm peih lo zawk.

"Ka ei. Ka ei dawn." Nui chungin ka lo ti tak na chu ka rilṭam na tekhan min thlawh bosan vek tawh.

"In va induat bik ve a." Thanthanin nui har harin a lo ti a.

"Ka duat phal loh zawk anih hi." Ruatsanga ṭawngthei lutukin a lo tih chuan ka lo nui huk.

"Ei ve rawh u." A tih zawm a.

"Higher kan kal laia i crush min hrilh ṭhin kha a tak ngeiah ka hmu vethei ta hi a mak zawk e."

"Uhuhhh.." A rawn khuh der chiam a.
"Kha te chu a." A ti nung nung a. Keiin Ruatsanga ka lo melh rum. A hawi buai tawp. Muansanga a veng thawng tel bawk nen.

"Heng ho hi chu ka ei peih lo." Tih leh Ruatsanga thil lei ho chu Muansanga chuan hnawl a lo rual ve thung.

"I ei duh zawng ka lo hre lo va. A leh pekah chuan."

"Habibti ei ho ang kha ka ei duh zawng." A rawn tih chuan ka thil ei lai tawp chawtin ka va melh a. In la pawisawi lo, ngeiawm chi in min lo melh let ve a. Ka thil ei ka hak bawrh bawrh lo chauh.

"Habibti a." Ruatsanga leh Thanthanin an ti rual ṭhawṭ a.

"Fiamthu a kan in ko dan mai mai." Kut vai meuhin ka sawifiah nghal a. An hriatthiam loh dun hmel bakah Thanthani phei chu a lawm lo.

"Ka ei ve duh. Lo ṭhu hnai rawh." Muansanga lah chuan in la damlo deuhin a ti a.

"Min hrethiam lawk ru. Ka pa in min lo be tlat." Muansanga bula ka ṭhuṭ phei dawn laiin Ruatsanga chuan a ti a. A pa be turin a inthiarfihlim zui a.

"Min khehsak rawh. Ka kut a nat hi." A kut an tuam bar lek kang zauhin a lo ti a..

"Ei lo mai rawh." Ti chungin ka khehsak ta tho a. Tum deuh bar a ka thil khehsak pek pah a ka hawi chhuak chu a ṭha mah mah ang tih tur khawp a mawiin min lo nuih a. Ka khawvel leh ka lungphu a chawlh phah zuaiin ka hria.

"La ta che." A ei tur ka kensak ti che nakin ka ti a.

"Ka kut a na ka tih tawh kha." A thle zui bak a. He pa chet duh dan ṭhin hi chu aw.

"Thanthan, Muansanga hi ei tur lo barh.."

"Aa. A mak." A rawn inrawlh rang nasa.

"Keimahin ka ei thei." Ti tau aw tak chuan a ti a. A hmuh lohin ka nui sek.

"Khaw nge ka phone hi?" A mutna bul vel en kualin a ti a.

"Ta hi a awm." A lukham hnuaia tlem rawn lawr a phone chu la kanga pek mai ka tum laiin.

"Ka password i hriat kha, khawngaihin Û Hruaisanga min lo biak sak. Chah duh ka nei a, loudspeaker ah i dah mai dawn nia. Ka kut hi ka thil ei na lamah a bal bawk nen."

"Chuan eng tin?" Ka tih lai mekin a kut chu ka hrukfai turin min pe a.

"Nang tak hi chu." Kati hlak a. Nuam a lo tih hmel hle thung.

"I duhawm." Hmui phunin min ti a. Ka lo insiam chhe thung.

"Kan va pangchang thiam awm ve a." Ruatsanga phone hmang zo rawn lut chuan nui chungin a rawn ti a.

"A nih hi." Ka lo ti a. Muansanga chuan kan pahnih a kan thlalak, hlim taka kan nuih dunna wallpaper ah a lo hmang tawh a. A nuam duh viau.

Û Hruaisanga erawh in phone a chhang thei der lo.
"A buai rih aniang, nakinah kan be ṭha leh dawn nia." Muansangan a lo tih chuan bu nghatin ka ti tawp a.

"Ruatsang naktuk chuan em ni hawn in tum tak?" Thanthani pawh a rawn ṭawng veleh e. Ka rinai a ngawi rei thei.

"Aw ni e. Muansanga ber a ṭha chho tawh bawk a."

"Awmawmi lung a leng duh awm e. Hawsan rih bik lo la." A ti no hlai a. Ti nge maw min hmehbel ṭalh a tum ni?

"Lo lungleng mai mai rawh se. A lo haw hunah ka lo duat dawn alawm." Ruatsanga lah chuan thu tak pai leh tawh miah lo in a lo ti a. Muansanga hmel a lang dang leh vek tawh.

"Muansang, Awmawmi nen hian tih tur kan la nei sia kan kalsan tawh mai dawn che asin. Thanthani a awm tho bawk nen." Ruatsangan a ti dek dek a. Muansanga hmel mawlh chu.

"Eng tih tur?" A aw ri pawh a no lo ṭha khawp mai.

"Eng eng emaw. Awmawmi hi in lamah a buai rih bawk nen, thlah leh vat a ngai dawn sia."

"Nia, Remchang hmasa berah ka lo kal leh vat ang." Ka lo ti ve thuai a. Muansanga hmel a la dik thei chuang lo.

Ruatsanga chu a thik nge ni a, kan kalsan mai tur chu a lungawi lo zawk pawh ka hre lo.

"Lo ṭha zel la."

"Umm" a ti nghut a.

"Kal ang le Awmawm." Ruatsangan min kaih thawh pah a a tih lai techuan a rawn hawi chhuak eih lo. Phone min bih san ngur. Biak leh inthlahrunawm khawp in.

"A nih phawt u." Kawngkhar aṭang chuan kati a.

"Hun nuam deuh va hmang ru." Thanthani zawkin min lo chhang a. Muansanga chu awm lo ang vel ani rih e.

"I awm a va nawmloh hmel ve. Muansanga vang kha anih ka ring." Min su datin Ruatsangan a ti a.

"A lungawi loh hmel em a."

"Ngai pawimawh suh." A ti sam et a.

"A damlo bawk sia."

"Min thik anih kha."

"Naa. Awiawm loh e. Thikna chhan tur che a nei em ni?"

"Nei anih ka ring. Mipa ve tho ka nih hi, Muansanga awmdan kha chu ka hrethiam lutuk." Nuichungin a ti a. Nui thei reng ringawt mai.

"A lo nih vel tak chu. Kan tih tur chu ti vat phawt mai teh ang."

"Aw le boss." Chak tawkin min kal pui nghal hlawk hlawk a. He pa ṭhin hi chu. Min ti hah lutuk.

Darkar 1 vel ka bazaar pui hnuah min thlah lehnghal a. In ka thleng phone kan en chu Muansanga call leh message tam tawk a lo awm ṭeuh. Ka en chu ka nuih a zat rualin, a lawmawm ka ti a chet dan chu. Nuih ver ver loh a har.

"Dawng ṭha awm bik ṭhin ve aw. Lawmloh tehian kan nui thei ṭhin ania." Û Remin min lo chhaih nghal vat a.

"Chu tiang lam pawh ani lo." Ka ti tak na chu a nuih kati za zual mai mai.

"Phone la vat ta che." Muansanga call ka chhan rual rualin chu thu chu ka hre hmasa ber..

"Ka lak vat hi." Ka lo ti thung a. A thaw ri hrawk.

"In ah i awm tawh em?"

"Ka thleng deuh chiah."


"Chu ti chen chen nula an chhuak bo ngai em ni?"

"A chuti chen chen lo. Kan rei lo lutuk aw."

"Ti nge Ruatsanga.." Tih a sawi zawng ka hria. A sawi bak dang chu ka hre thei lo.

"Ruatsanga chu eng tin?"

"Eng mah." Lo ti hlur leh bawk si.

"I damṭha tawh anih kha. I thin a ṭha leh tawh e mai. Lo kan pawh i ngai tawh lo. Ka rawn kal tawh pawh ka ring chiah lo."
Ka ti zo chiah chu a khuh nghal chiam a.

"Doctor koh ka ngaiin ka hria. Ka nuam lo zual leh tlat tawh." Damlo chau aw ngawih ngawihin an ti nghal a. Ka nui ru lo thei lo.

"A nih chuan in be tawh lo mai ang. Hahdam rawh." Ka lo ti zaih a. A hmel awmdan tur hmuh a chakawm thlawt.

"Habibti." A ti thluk raih a.

"Yep. Habibi." A nui ri hriat nuam takin a zui.

"Zanah ka lo be leh dawn che nia."

"Tehreng mai." Kanin biakna chu kan ti tawp a.

"Miss you habibti." Tih message a rawn thleng zui a. Ka hlim ru veng veng.
### NI 4 HNU AHH ###
Kan naute thar duhawm tak maiin zanlam ṭah a vei a, kan mu tlem ṭhin khawp mai. Chhunlamah pawh ka chhuak lawk hman lo. Muansanga erawh rilru ah a awm reng mai. A chanchin ṭha lam hlir ka hriat avangin ka ngaih erawh a ṭha deuh.

"Nobawih i phone a ri." Bathroom a ka awm lai chu Û Remin min rawn ko lang lang a.

"Ka rawn kal." Ka inbual zawh chiah avang chuan ka lo ti a.

"Hello Bs." Ka ti nghal thawrh a.

"In vengah ka awm mek. Muansanga tlawh i hman em? I hman chuan ka rawn lam ang che."

"Aw hman e. Mahse ka inbual zo chiah a, minutes 10 hnu velah ka hman ang."

"I hman hunah min lo call la, ka rawn kal nghal ang. In inbul lawkah ka leng mek." A tih lai chuan hmeiche ṭawng lang lang ri ka hria a. Nula a rim chiang mai.

"Aw le. Ka rawn hrilh ang che." Phone dahin ka ti a.

Û Remi, Muansanga tlawh ka tum thu chu ka hrilh nghal mawlh mawlh a. Ka kal khat deuh avangin a lo phal khawp mai.

"Kal nghal i la." Kan in bul kawngpui ka han thlen veleh Bsa chuan min lo nghak vang tawhin a lo ti a.

"Tehreng mai." Nuisangin a bike ah chuan ka lawn zui a.

Damdawi in kan thlen chuan Muansanga nu leh Û Hruaisangan Muansanga chu an lo awm pui a. An lo ṭawng tui nasa.

"Eng thil maw kan tel lo in in lo rel a?" Bsan an thil sawi kan hriat thawi a vang chuan a ti lut a.

Muansanga nen kei chu awm ze nei lutukin kanin nuih sak. Min hmuh ruala min lo melh dan leh a hlim hmel chuan awm hi a ti nuam veng veng.

"Nangni in ni maw. In va fel ve. Lo ṭhu ru. In tel lo chuan engmah an rel thluk theih loh hi." Muansanga nu chuan nelawm takin min lo ti sawk sawk a.

"Naktuk hian damdawi in kan chhuahsan thei tawh dawn a. Kan awm rei ta ngar ngar bawk a.." Hahdam hmel tawh takin a ti a.

"A va lawmawm ve." Bsa nen chuan kan lo ti thuai a. Ka thinlung takin ka lawm. Kan lungngaih hman zia kha. Tunah damin damdawi in a chhuahsan thei der dawn ania. A lawmawm tak zet zet.

"Naktuk tlailam chu kanin lamah a lawmna chawhlui kan kil ho ang chu. In lo kal vek dawn nia aw Awmawm." Ka hming a lam tel ngat a.

"Nia." Kal tum tak tak lo tih hriat tak ang hian ka nuih pahin ka in hria.

"Lo kal ngei ngei rawh aw. Ka rawn lam ang che. Naua lah motor la khalh chi ani dawn si lo va." Û Hruaisanga lah chuan lo ti bawk.

"Kei pawn ka lo lam kawi thei alawm. A lo kal na tur anih phawt chuan. A tel lo chuan tu emaw nuihmel kan hmu nang. Keipui huai te chu nep te ani leh dawn asin." Nui ruh ruhin Bsa lah chuan a lo ti ve bawk a.
Muansanga nen awmdan kan thiamloh viau laiin midang erawh an lo nui thung.

"Lo kal ngei ngei rawh aw. A nih loh chuan ka kek ang che." Whatsapp aṭangin Muansanga lah chuan a rawn ti a. A type mawlh mawlh lai kha ka hmu reng a ni.

"Ka lo kal thei lo vang. I chhungte bulah hian min phatsak rawh." Tih ka thawn chuan min melh rum nasa.

"Khawngaihin." Hmui phunin ka ngen ru sap a. Phone a dah hmak.

"In in lamah ka nau a tlangnel sia, Awmawm naktuk tlai chu kanin i rawn hmuh ve ngei ngei angai."

"A dik chiah." Û Hruaisanga thu sawi chu a nu in a lo pui vat a.

"Ka lo tum dawn nia." Lung si zan lo in kati ve ta nge nge a.

A tuk tlailam thleng chuan ka awm a la nuam thei lo. Bsa lah min lam turin a rawn thleng ṭep tawh lehnghal a. Mi zak zum tak nih hi chu mahni kan inti hrehawm tam mai mai a nih hi.

"Nobawih lo haw tlai lo la aw. Tui deuh khan i va ei dawn nia." Tiin ka û te nupa chuan min thlah thlap a.

"I va phur loh hmel ve. I in la ni mai tur a kal tur si." Bsa lah chuan min la chhaih zui a.

"I sawi awiawm loh thei lutuk." A bana hnek sak pahin kati a.

Muansanga te in leh a chhehvel vel chu a remin hawi vel pawh a nuam khawp mai. Mizoramah kan awm ta lo emaw tih mai tur a ni. A mawi vel vek.

"In lo thleng ve tawh a. Awmawm i ṭha maw?" Ramdina chuan zangkhai vahin min lo bia a. A bula inti neitu taka ding Thanthani erawh min hmuh rual chuan ngeiawm takin a nui thung.

"Ka ṭha lutuk. In thlenna a rei tawh em?"

"Rei vak lo kei tak chu. Thanthani erawh a rei tawh ang tiraw?" Thanthani lam hawiin a ti a.

"Nu Sangpuiin(Muansanga nu) kan buai deuh dawn sia min rawn pui ve rawh a rawn tia. Kan hnial ngam nang. Monu interview neih ve tepawh angai alawm." Nui har harin a ti a. Ramdina leh Bsa chuan min lo vengthawng lehnghal tawp tawh. An ngaihṭhat nan nuihmel ka pu sang..

"In chhungah lut ang u." Tih leh Bsa chuan min nam luh a rual a.

Muansanga te in chu "WOWWW" hi ani ringawt. A bon lutuk. Khawilai pawh chuan mit a ti tlai vel vek. Hotel ropui tak tepawh a ang lek lek a lawm. A pawnlam landan aṭang ringawt pawh khan a ropui viau kha ka ring hrim hrim kha ania. Ka ring sual lo ve..

"Habibti." Rawn ti ri chu thawm awm nuai nuai karah pawh chuan ka hre nalh thei.
Chu lama ka hawi rual chuan ka lam pana Muansanga rawn pen hlawk hlawk chu chiang takin ka va hmu. A thawmhnaw dum simple tak ni si te chu a hmel leh vun rawng zawng zawng tenen chuan a inrem thlap a. A langsarh leh nalh tawh bik. A engkim hi a ṭha vel vek.

"Ka rawn lam thei lo che a ka tihpalh." Kan bul a rawn thlen chuan a ti a. A ṭawnglai zawng chuan Bs-an ka dar a khawihna ringawt chu melh ding ngur. Bsa lahin a runluih ta emaw tih turin dah sawn a tum phah der si lo.

"Hmuh tur che ka nei." Tih leh Bsa kut benthlak pah a min pawh sawn a rual a. A hmu thei thlawt tawh lo ania nge.

"In lo kal a vangin ka lawm e." Ka dar leh lam ve ve a vuana min kal pui chung chuan a ṭhiante ho chu a be liam puat a.

"Muansang hun serh hman a hun ṭep tawh ania." Thanthanin a rawn tih ngial pawh chuan a hre lo der hmiah.

"Khaw nge min kal pui i tum a?"

"I hre mai ang." Khi sukin min lo ti mai a.

"Hmm."

"Ka thlah haw ang che. Bsa rualin haw tawh miah suh." A ti ngut a.

"Motor i la khalh theih loh kha. Bsa rualin ka haw thei." Ka lo ti lah a.

"A ṭul tawh lo. Ka thlah ang che ka tih chuan ka thlah dawn che tihna ani mai." Luhlul leh mahni thu duh takin a ti a.

"Kan thleng e." Kawngkhar hawn pah chuan a ti a. Lut mai lo va ka din avang chuan ka kutah vuanin min kai lut a..

"I room ani tiraw?" Ka ti thei nghal. A room chei duh dan leh a rawng hman zawng zawngah techuan Muansanga hmel a ti lang ngawih ngawih. A hai theih loh. A simple leh hle na chu, a nalh loh phah chuang der si lo. Mit a la hle tho si. A thianghlimin, a felfai dik thlap.

"Hawng rawh." Min tih lam chu muang changin ka hawng a. A chhunglamah thawmhnaw chi hrang hrang, a dum leh var hlang deuh thaw awmna chu min hawn tir a.

"He laia ka thil bel leh dah ho hi en zawk rawh. Thawmhnaw ho kha ni lo in." Dim te a min kuai her in a ti a.

Ka thil hmuh vang chuan ka mengphar ak. Kan thlalak tam tham tak a lo bel khat vek. Tiang thil hi a ti ang tih rinngaihna pawh ka hre teuh lo nasa.

"Eng tin nge?" Nui pah deuh, hrilhhai fe bawk si chuan ka ti a.

"Ka thinglung leh ka khawvel. He khawvela cham ka la chak chhan a nih hi." Ka thlalak, hlim taka ka nui lai. A ma min lak ngei duh taka en chunga khawihin a ti a. Ka rilru a dek zar mai.

"Chhungte ti mangang leh ti hrehawm tu mai, mi dangte hlimna laksak a chhungkaw ti kehdarh tu mai nia inngai. Hringnun tlahniam tawh tak, khu ta awm a. He khawvel leh engkim haw em em ṭhin hmangaih thar leh theih a siam tu. Beiseina pe a, mi zawng zawngin min haw vek tawh emaw tih laia, mi dangte min ngaihdan leh hmangaih zia hriatchhuah thar leh tir tu anih avangin kei chuan ka hmangaih lo thei lo." Chu thu a sawi zawh chuan a mah en thei turin min kuai her hret a.

"Habibti.." Zam tih hriat lutukin chil a lem khalh a. Mipa ah pawh in ti pa em em mai kha a zam chhe ta der chu ania. Kei pawh ka lo ṭang ve ṭung. Ka hahdam lo.

"Ka ngaihdan che chu i hre chiang. Chuan nang pawh hian ṭhian ang chauh chuan min en bik lo tih ka hre tawh." A tih chuan ka lungphu hi a pawk chhuak dawnin ka hria. Inthup zawh hi a lo har aniang.

Chu tih laia a landan pawisawi lo leh ṭha lutuk techuan ka lungphu hi an ti buai vek.

"Habibti." Zam lutukin mit a chhing sawk a.

"Vawi khat chiah ka zawt leh ang che."
Ka chiang, tun ṭumah hi chuan "YES" tiin ka chhang tawh ngei ngei dawn .

[Ngaia]

Muansanga * Habibi *
Chapter -10
May Renthlei

"Habibti." Zam lutukin mit a chhing sawk a.

"Vawi khat chiah ka zawt leh ang che."
Ka chiang, tun ṭumah hi chuan "YES" tiin ka chhang tawh ngei ngei dawn .

"Muansang." Tih leh kawngkhar rawn chum dawt dawt ri in a zui.

Rang lutukin Muansanga taksa si deuhthaw a ka ding chu ka awm hla nghal dawrh.

"Hun lo lutuk." Muansanga chuan sam tuai thur nawkin a ti nghut a.

"Va hawng rawh." Biang sa hat hatin ka lo ti a.

Peih lo leh hreh hmel fe in kawngkhar hawng tur chuan a kal a. A pian nalh tak ringawt pawh chu en zui tham a ni. Ft6 a han tling pha tawk vel chiahin ka ring. Chu mai piah lamah chuan a taksa inphut nalh lutuk leh taksa hriselna ngai pawimawh mi anih na hian a ti lang hot zual.

Kei ve hi chu ft5 leh tlem a zawng kani deuh tawp mai. Ka pian lam ai chuan hmelah chhuan tur ka nei ṭha zawk. Ka vun a nalh hle bawk. Mizo mipa pian duh zawng, khalh mawi tawk an tih ang kha chu ka ni ve.

"Habibti min nghak tawh anih chu." Ka lam pana rawn pen let lehin a ti a.

"A va zia lo ve."

"A pawi lo. Eng ah mah ngai suh." Ka sam min chul ṭhat pahin a ti a.

"Kal ang le." Ka kut a rawn vuan a. Rang lutukin lak let ka tum a. A harsa ṭang mai. Kanin chak hleih ve em bawk a ni.

"Mi hmuh a inkaih vel ka duh miah lo ania."

"Ka hria lawm." Ti chungin min thlah phah chuang der si lo.

Rilru nuam lo takin ka zui a. Mahse mi dang lo awm khawmna kan thlen dawn chuan min din pui datin arawn hawi thla a. Duh tih hriat lutuka min nuihin ka kut a vawnna chu a thlah ve ta mai bawk a. Ka awm a nuam huai.

"He lamah." Ramdinan min lo hui zauh zauh a.

Mawi lo khawp ni si lo in Muansanga chuan min care em em a. Ka rinai daihin nuam pawh kati. Thil pawh ka ei tui. Hlim hmel bak a lan ka ring lo. Ka engkimah hian.

"Muansang ka be lawk duh che." Kan zanriah ei kham boruak thianghlim dawng a kan awm khawm laiin Thanthani chuan a rawn ti a..

"Ti hian sawi mai la." Muansanga lah chuan a lo ti deuh hmuk a.

"I duh chiah a maw?" Thanthani chuan a ti he haw a. A dik chiah lo in ka hria.

"Umm." Muansanga lah chuan keimah min nuih pah sukin a lo chhang leh mai a. A tih loh zawngah hi chuan a chimawm ve ania.

"A ṭha a lawm." In her vutin a kal zui a. Mahse a lai tak, mi dang ho pawhin an hmuh theih tur lamah ngatah ani a va din.

"Thanthan in be lawk phawt teh ang." Ramdina chuan Thanthani kianga kalin a va ti a. Thanthani erawh in Ramdina kut a lo vaithla sawk. An mahni ah chuan mit a fu nghal ṭhap. Thanthani hi anu leh pa te nen ngata rawn kal an ni.

"Thanthani saw a dik leh tawh lo." Bsa ṭawng ri sup chu ka hre pha tlat. 'Dik leh tawh lo' awm zia chu eng nge ni ta ang le?


"Muansang. Kha lai Muansanga, kawr dum ha kha. Ka u ṭhianpa leh ka u in min kalsan hnua ka innghahna neih chhun. Engkima ka u ai awha ka ngaih i ni a. Nangmah avangin ka u ka ngaihna na nasa tak te ka tuar thei ṭhin. U Muansanga min kalsan aṭang leh ka natna vang tehian nang chu ka tan awm reng ni lo la chuan tun thleng hian ka la dam ve kher lo vang." Chu thu chu hnuk ulh ṭeuhin a sawi a. Tu pawh mai chuan Thanthani lam chu kan melh vek. A thu sawi ngaithlain.

"I laka ka rilru put hmang dik tak pawh i hai bik ka ring lo. I lo dam khawchhuak leh pawh hi ka thinlung takin ka lawm." Muangchangin kan lam panin a rawn pen a. Kan lo en ringawt.

"Zan in aṭang hian ka û ai awh ang chauh ni lo in, ka bialpa i ni thei angem? Ka engkim i ni asin." Tih leh Muansanga chu nghet lutuka kuah nghal thlawp a rual a. Kut beng riin a zui hluah hluah laiin keini, Muansanga nena kanin kar hre chin ho chu kan ding khawng lah vek. Thil thleng chuan min ṭhawng hlawm mah mah. Chu tiang em em a thlen thut chu tuman kan ring lawk teuh lo.

"Khawngaihin ka sawmna che hi pawm rawh." Muansanga awm a bei chialin Thanthani lah chuan a ngen no nghalh a.

Lo awm dan tur van zia leh chu huna ka lo awm chu pawi kati ngawih ngawih. Muansanga nen kanin melh fuh chat a. Ka awmdan chu a hriatthiam nghal mai ka ring. Chu vang ani mahna Thanthani a nam sawn nghal lawp.

"Thanthan duh tawk teh." A ti nghal ṭhaṭ a. Pakhat erawh a ṭap ti tih nghal.

"Kei chuan ka unau nu angin ka ngai che. Chu bak chu ka thei lo." A chhanna chu a ring hran lo bawk a, a kiang vela ding ho bak chuan kan hre theiin ka ring lo.

"Thanthan kal teh ang. Tunah ni rih lo, hun dangah kan la sawi ṭha leh dawn nia." Ramdina chuan Thanthani hruai hran tumin a lo thlem ve mek bawk a.

"He nu vang hi ani tiraw? A ni em?" Huatna a khata mi melh alh pawp pawpin Thanthani lah chuan hmun leh hmunah min ṭawngkhum sak sak a. Bo daih theih ni se ṭha tur.

"Duh tawk rawh." Muansanga aw chu a ring hran lo na in, Thanthani awmdan chuan a ti lungawi lo hle tih erawh a hai theih chuang lo..

"Eng vangin nge kan nunah i rawn lan ve?" Tih leh mi rawn khawih a rual a. Tu mah chu kanin ring hman lo.

"Ka hlimna awm chhun anih hi. Kal bo rawh." Ka kawra ṭham bet tlatin min tih khum tuar tuar a.. Hrilhhai lutukin ka lo dawh tawp.

"Thlah nghal rawh." Muansanga thinrim lutuk aw ri chu rapawm lamah a kal.

Thanthani min vawn beh tlatna kut chu lak sawn sak tumin a vawn thuah a. Phih thluk tawp mai duh hmel a put rualin hmeichhia anih piah lamah, a ṭhianpa nau kha ani ve miau mai si a. A insum lui hram hram tih a lang reng.

"A tawk Thanthan." Bsa leh Ramdinan Thanthani lak sawn tumin an rawn inrawlh a. An nu leh pate lam pawh an rawn lang ve nghal. Mahse Thanthani thinrim lak lawh chu a â vek tawh. A nu but a, chu ti maia bengdaih theih ani lo.

"He nu hi ka hua. Ka that dawn." Min la ti lui ṭawng ṭawng a.

"A tawk." Muansanga au ṭhaṭ rualin Thanthani chu a leng lawp a, Bsa leh Ramdinan lo chelh hman lo ni phei se chu a tlu tawp thei hial ang.

"Eng tin nge? Eng tin nge tiang hian min tih theih?" Ṭap hlawp hlawp chungin Thanthani chuan a chhuahchhal a.

"Û Muansanga vang tal pawh khan ka tan i awm reng ka lo ring ṭhin asin." A tih leh rual chiah chuan Muansanga hmelah chuan mahni inthiam loh na leh hrehawm tihna a rawn lang chhuak nghal hlawp hlawp.

"Bawihi a tawk. Kal ang." Thanthani nu niawm takin ṭap hmel pu ṭeuhin a rawn ti a.

"Nu." Tih zawng a sawi hman. A thaw a rawn hah a. A tal buai zui nghal. A bul vela mi ho chu an chiai buai tak zet. Keimah pawh tiamin.

"Ka car kha lo ti nung rawh u. Damdawi in ah kal pui nghal a ngai. A hma ang kha a thlen leh hma in." Thanthani pa in a tih chuan natna a lo nei sa reng em maw ni aw? Tih ka rilru ah a rawn lang nghal.

"Muan... Muansang. Khawngaihin ka kiangah awm rawh." Thei leh thei lo in Thanthani lah chuan a lo ti ṭawk ṭawk a.
Muansanga rilru buai nuai hmel chu ka khawngaih zawk.

"Khawngaihin Muansang. Keini chuan tih theih kan nei lo." Thanthani nu in ṭap aw ṭeuhin a rawn ngen ve bawk a.

Muansanga erawh in ka ngaihdan hre duhin min rawn melh ve thung. Khawngaih thla la zet in. Min ngaihtuah tel ve tho bawk si. A rilru buai phir nuai hmel chu a lainatawm zawk.

"Kal rawh." Ka ti sap a.

"Habibti."

"Kei chu ka ṭha." Ka nuih lui sak a. Hui zup papin, thaw a la ri hrawk. A duh danin thil a thleng lo tih hriat takin a hmel a lang ngainatawm lo leh bal tawh.

"Ka tihpalh." Ka lu ah min tuai sak thuak hnuin Thanthani chu a pan ta nge nge a. A hreh hmel mawlh chu.

Thanthani lahin a lo ban ṭawk ṭawk a. An pahniha awm dun ka hmuh chiah leh Thanthanin duh leh thlahlelh taka a lo kuah ka hmuh rual chuan ka mittui a rawn tla ṭep. Ka mipa duh em em in hmeichhe dang a buaipui chu hmuh nuam ka ti lo, mi dang ang a en liam satliah tawp a har. Ka chhunglam hi eng tin emaw a lo awm. Damlo pawh nise ka thik lo thei chuang lo. Mihring, nun famkim lo tak nei kha ka ni miau a. Thanthanin Muansanga laka a rilru put hmang kan hre vek bawk nen.

An tlan liam thleng chuan ka thlir vawng vawng. Pawna awm kan nih vangin thli vawt tak chuan min rawn chhem a. Engkim chu a reh ta duk in ka hria.

"Awmawm i ṭha em?"
Min rawn ti tu chu muangchang leh ngui riaiin ka melh a. Û Hruaisangan ngainatawm takin min lo nuih a.

"Ṭha e."

"Ka ring chiah lo. Hahdam deuh phawt la keiman ka thlah haw dawn che nia."

"Tunah min thlah haw thei a ngem"

"Tunah tut tut maw?"

"A theih chuan."

"Aw le. Min lo nghak lawk rawh."
Car la chhuak tur a kal zuiin a ti a. Bsa an min rawn phone a. Lak pawh ka la peih lo. Min kalsan rual ṭhup a. Ka lang lawp mai alawm. Ka rilru an ti na.

"Kal ang le." Û Hruaisanga chuan ka bul mai a car ti dingin a rawn ti a. Ka chuang lut ve nghal.

"A ṭhawng ngawt ang che. Pawi kati lutuk." Kan tlan chhuah hnu chuan a ti a.

"Lo inthiam lo duh mah ta che. Mahse thil thleng kha chuan min ṭhawng. Thanthani khan eng emaw harsatna a lo nei sa reng em ni?" Tim ru takin ka zawt a.

"Aw. A hrilselna hi a ṭha vak lo. Muansangan a boral san hnu phei kha chuan depression a nei nasa lutuk. Ka nau chauh hian a buai a chhuah chang hian a pui thei ṭhin. Chu ta ṭang chuan a rilru put hmang a lo inthlak ṭan anih ka ring. Ka nau hi chuan farnu ang bakin a en lo. Ka chiang. Mahse Thanthani hi chu a kalsan hlat thei tak tak rih lo chu a ni."

"A inthiam lo ve bawk sia. Chu vang ringawt pawh chuan a buaipui lo thei lo tih ka hrethiam alawm." Ka lo ti ve thuai a.

Mahse a inthiam loh na hi remchangah Thanthani hian a la ve deuhin ka hria. Chu erawh ka sawi lang tel duh lo.

"I fel lutuk e. Thil hrethiam thei deuh te hi an ṭha ber ania." Fiamthu pah deuh chuan a ti a..

"A dik ang." Nui sak ṭungin ka lo ti ve a.

Kan in thlahfel, in chhung ka luh rual chuan ka zawi vek. Ka eng tih tha mah hi a tho lo. Phone silent mai duh tawk lo in DND ah ka dah a. Air pod vuahin zai ka ngaithla a. Mut erawh a chhuak thei mai lo. Tho leh in Naute mu duh lo Û Remi kan awih chhawk leh lawp lawp bawk a. Rilru erawh a kim zan lo.

Zinglam dar 7:00 vela data on a phone ka check chuan Thanthani nizan lam damdawi in a an riahpui thu leh vawin lama an chhuah leh theihnghal dawn thu vel ka hmu.

"A damṭha lehnghal thei chu a lawmawm e." Mahni leh mahni inbia in kati a.

Muansanga call leh message a awm nual bawk. A message kan bih chian chuan darkar tin message min rawn thawn tih ka hre chiah. Zinglam dar6 thlengin. Chu mi awm zia chu a tlaivar ṭhak tih na.


Zingdar5:20am vel a a thlalak min rawn thawn kan en chian chuan kan in a lang tel tlat. Kanin bul kawngpui vel a ṭanga lak ani tih chu a chiang reng. Kan in bulah zankhuain a awm tih na anih loh hram ka beisei. Kei tui tak a ka lo mutthilh chiah chiah lai khan.

"I tho ve tawh a?" Tih min rawn thawn chu tum loh lutukin ka seen nghal kulh.

"Pawi lutuk." Phone hmet thim leh rihin kati a.

"Nizan kha eng nge a awm zia? I tlaivar em ni?" Ka type mawlh mawlh zawh hnu chuan ka thawn a.

"Aw."

"Eng vangin?"

"Chhan vak a awm lo."

"Damdawi in ah i riak em ni?"

"Riak lo."

"Han tlaivar tawp mai chu. Muhil rawh. Muttui."

"Kanin hmu thei a ngem?"

"Aih. Ka buai lutuk."

"Ka hrethiam e." Lungngai hmel a rawn dah tel a.

Ka chhang let tawh lo. Ka buai viau pawh ani lo, chhuanlam mai a ni. chawhnu lamah erawh kan naute damdawi leh chawhmeh vel leia chhuah ka ngai dawn. Û Remi a la chhuak thei si lo va.

"Lalrinawm. Lalrinawm." Ka ei hman hma hma a min ko mawlh mawlh tu chu tu nge ka hai lo. A hmel hmu lo pawh ni ila ka hre tho tho.

Ka chuan na taxi a tlan liam fel hnu chuan kawng kanin min lo ko chiamtu Felpuii lamah chuan ka tlan phei a.

"Mi tamna zingah min ko vak vak zel suh." Na tawk a va kuah kun dawrh pah chuan ka ti a.

"Ka ngai che a lawm. I va cher ve. I rilru a hah a mi?" Over vel taka ka taksa en lawr dan danin a ti a.

"Hah lo ve. Lei tur ka ngah si min bazar pui vat vat rawh." Kal pui zui nghal in kati a. Û Remi a la chhuak thei chiah lo va, bazar tu berah min hmang rih.

"Aw le. Mahse zawh tur leh hrilh tur che ka ngah lutuk. Thu thang mak tak tak lah a tam si. Mahse thu thang naran vel mai mai chuan minti buai pawh ani chuang lo va. Ka ngaihtuah ber zawk che."

"I ti lawmawm e. Keimah hian ka buai tawk lutuk a, mi ngaihdan leh thu thang vel phei chu ka hriat loh bakah ka ngaihsak lo. Awm zia a awm lo." Hei chu ka nih ve dan reng ania. Mi thil tih leh nundan ngaihven hawr leh thil sawi neuh neuh vel peih lo ka nia.

Chhungte tak tak, mahni pianpui te ngei bulah erawh ka in bunruak ve nasa thei hle thung. Ka ṭhiante ka ring tawk zo lo tih na pawh ani lo chuang lo. A tawp khawk a kan kianga ding ṭhin te hi ka hrechiang em a ni.

"Kan kal kual nasa tawh bawk a ka ril a ṭam. Eng emaw ei lawk ila hawn hma in." Rilṭam hmel tawk a pum dawmin a ti a.

"In ah ei zawk ila, hawn vat ka duh zawk." Ka lo ti thung a.

"Thil kan ei dun khat tawh zia hi ngaihtuah teh. Kal chak deuhna ka nei. Kawngpui bul mai ania, in veng lam kawngah lehnghal. I hawn pahna remchang lutuk ania. Chu vangin eng emaw tal chu ei dun lawk ang." Min nawr nak nakin a ti a.

"Aw le." Ka ti ve ta hram.

"I van fel tak." Min ti nghal chiam a.

"I hriat kha." Ka tih lah chuan min ei lo takin a hmui a ti kawh phat leh lawi a.

"Muansanga chu a ṭha zel em?" Kan dawhkan tur kila kan ṭhuṭ fel hnu chuan a ti a.

"Aw ṭha e. A ṭha mah mah tawh." Ka ti deuh kher a.

"I va ṭawng hriam ve. A ṭha tawh chu lawm lo zawk tepawh i ang dawn alawm."

"Chu tia mi?" Ka ṭawng pah a thikna leh eng emaw hrechhuak ka nih vang zawka ṭawng hriam ka nih ka in ring.

Minutes 4 vel kan nghah hnuah kan ei tur chah a rawn thleng a. Kan ei ṭan dawn chiah tih ah thawm a rawn awm hak a. Kan bula thil ei ve dang awm nual ho chu an phawk lek hlawm hle a. Kei erawh ka thil ei tur lam chiah ka lo ngaihtuah.

"Muansanga ani tak tak. A chhiat loh zia saw."

"A van hmelṭha tak. A pa si." Tih te chu a ri ta nawk nawk a. Chu lai hmuna awm ho chu an pangngai thei lo. Muansanga hming lamin an che buai vek hlawm.

"Muansanga maw?" Tih pahin Felpuii pawh chu a hawi kual venghal ruai a. Mi dang ho mit fuk ṭhup na lam chhuiin ka hawi phei ve a.

Muansanga ei tur order mek niawm tak chu ka va hmu ve a. Ka khawvel hi a ding dawt. A mah chauh chu ka va hmu langsar nalh. Eng thil dang mah an awm ve ta lo emaw tih turin. Mi pangngai hmu satliah ang ngawt chu ka ni lo. Keimah ah hian a mah ka hmuh ringawt pawh hian danglam a awm ṭhin.

"Thanthani nen maw?" Felpuiin mi rawn melh pahin a ti a. A hnung deuh ah a rawn lang ve a. Ka hnual nghal ruih. Muansanga a ṭang a hla ta riaua inhriat na ka nei.

"Car a lo awm turin kati che sia." Muansanga chuan Thanthanin a lo zui lut ve chu a lo ti niin ka hria. A hmui phun a ṭang chuan. A ṭawng ri tak chu ka hre pha chiah lo na in.

Tu pawh mai chu thil han ei na chang hria pawh kan awm lo. Muansanga te ringawt chu an lo ngaihven hlawm a. An â vek lo chauh. Mit tla dawn dawnin an lo thlir tlawk tlawk a. Mi te hian he ti khawp hian ani maw Muansanga hi an lo duh rawn a, mi mit a lo lak.

"An inhmeh e. An inkawp na a rei tawh ka tih khan i awih lo vel a. I hrethiam tawh mai em?" Kan dawhkan kilna bula ṭhu hmeichhe pakhat lah chuan a kianga mi bulah chuan a lo ti ve mek bawk a.

"Inhmeh chu khawilam. A tih dan ching cheng te saw ka ngei. Mi dang mit hmuhah a in ti ta tu vel anih saw." Felpuii lah chuan a lo ti hluk hluk a.

Thanthani chu a in la cute kual vel em bawk a. Muansanga mi hmuh a han zui kual vel chu nuam tih hmel tak zet. Midang ho lah chuan an inkawp tak tak a ngaiin eng emaw an lo sawi ru sep sep hlawm bawk nen.


"Ka ta ani thei ngai dawn lo anih hi. Kan kar a hla tawh e mai. Kan khuaah te kha chuan kanin hnaih em em ṭhin kha ania. Tunah chuan kanin karah hian awm a tam tawh lutuk a. Ka hriatreng tawh tur mipa mai chauh pawh a la ni mah na" Thanthani leh Muansanga ka hmuh dun rual chuan chu thu chu ka rilru ah a rawn lut zing ruai.

"I ṭha em Awmawm? Thil ei pui tur khan lo sawm lui ṭalh lo che ila ṭha tur." Inthiam lo takin a ti a..

"A ho lutuk." Ka nui lui hram.

En duh tawh lo in ka thil ei lai chu ei zawm ka tum a, mahse a harsa lam hret a ni. Ka thil ei chak na a bo zo.

"Muansang khawngaih takin thla kan lo lak pui thei che a ngem? Hmelṭha kan ti lutuk che a." Ti an awm ta tlat, kan bul mai aṭang lehnghal chuan. Min hmu lo in an chhuak fel thei dawn emaw tih nak laiin. A va zia lo tak..

"Kal bo vat se ka ti asin mawle." Ka ti hlak a.

Ka hawi chhuak nawn leh Muansanga rawn hawi phei chu kan in melh chiang ta khawp mai. Ka thin a phut ran sawt laiin ka hmelah erawh an ni ka hmu chu ngai pawimawh lo leh inringtawk lah hmel ka lo hmuh thung.

[Ngaia]

Muansanga * Habibi *
Chapter-11
May Renthlei

Ka hawi chhuak nawn leh Muansanga rawn hawi phei chu kan in melh chiang ta khawp mai. Ka thin a phut ran sawt laiin ka hmelah erawh an ni ka hmu chu ngai pawimawh lo leh inringtawk lah hmel ka lo hmuh thung.

A ni erawh tum lo lutuka min hmu chu mak ti hmel a pu a. Ka lam pan a rawn pen dawn a tum lai chuan Thanthanin Muansanga taksa si chet khawp chuan a lo kuah bet a.

"Ka lu a hai leh riau tawh, in thlen vat a hahdam ka duh." Chauh hmel fe a meng diar in a lo chelh vat a..

Ka hma a ei tur inchhawp ka hmuh hmasak ber chu banin ka ei nghal pawp pawp. Ka melh peih tawh lo.

Eng kim tih tawp ka duh ka nat zual tak tak hma hian. A laka beiseina ka la neih zawng zawng te nen hian. Ka bialpa lah ani hek lo. A laka thikthu ti chhe ngam tur kani hleinem. Mahse.. Ti nge mahse hi a awm tlat si. Ka lo duh mah mah tawh anih ka ring.

"Ka la hmu kham lo a sin le." An ti nang nang ri ah chuan min be lo in an kal liam ta tih ka hre thei. Muansanga chanchin bak sawi tur an hre hlawm lo. A hre lo bik nih hlau niawm takin sawi tur lah chu an lo hre hlawm na rawh.

"Kan kal ve dawn em ni?" Felpuiin a rawn ti a.

"Aw le." Phur aw takin ka lo ti a. A awm nawmloh dan tur a awm ka duh lo. Ka rilru put hmang tih lan kher lah ngai kati hek lo.

"Awmawm mipa dang an tam e mai. Nang te chu i luck bawk si, i kal na hmun a piangah duh tu che i tawng ziah lehnghal. Muansanga kha chu theihngilh daih rawh. A phu lo che." Min ti ringawt a. Ka lo nui hak hak.

"In pa nen khan lo ṭha zel ula anih mai chu. Zanah ka lo bia ang che." In bye bye zui lauh lauhin mahni in lam kawng ve ve ah kan kal zui a.

Ka hnungchhawn rualin ka nuihmel a reh a. Natna thuk tak ka hmelah a rawn lan nghal thung ka ring.

Luck chu a ṭhaṭ na lai chen tepawh a awm ang. Mahni tawkah min duh der tu pawh ka tawng hnem ve. Ṭhianho zingah pawh ka luck fal nalh zel. Mahse maw, min duhtu tam tak te ai chuan kan duh pakhat lek hian minti hlim zawk a sin. Duh tu neih ṭun laia kan duh ber te nena awm dun theih loh emaw, duh berte neih theih si loh chuan a hlimawm viau chuang lo. Duh tu tam tak neih aiin ka duh tak mipa neih a, min lo duh let ve bawk hi a nuam ber. A tawk viau bawk ka tan chuan.

"I lung a leng em ni? I va dak nasa ve." Tukverhah nuate paw chunga ka dak vauh vauh chu Û Remin mi rawn ti a.

"Leng lo ve. Mahse kar thar lam chu haw ve mai ka duh tawh. Pawi in tih loh chuan."

"I Û Kima khan kar khat vel chu chawlh ka la thei ang a tia, a tih fel theih chuan khi lamah naute thar hmuh an lo chak ve bawk nen kan vaiin kan haw chho thei ang chu."

"Tak tak maw?" Phur aw lutukin kati kang vah a...

"Aw ni e. I bazar lai khan ka pa nen kanin bia a, car rawn tirh thlak a ngai em? A rawn tia."

"Rawn tirh thlak kher a ngai em ni?"

"Ka hre bik lo. Kan la in be ṭha leh ang chu. A ngai chu kati chiah lo kei pawh."

"Nia. Hawna tur dang a tam alawm." Kan naute muhil sek sek chala zu fawp pah zauhin kati a.

Hawn vat vat ka chak tawh. Nu leh pa bul tluka awm chakna ka nei rih lo ve. Ka dam huai huaiin ka in ring. Muansanga hlat thei ang bera awm pawh ka duh. Ka theihngilh thei tawh kher lo anih pawhin a laka ka rilru put hmang tal ka ti danglam thei mah na.

"Nobawih i phone a ri nawn leh tawh ania. Muansanga a niin ka hria."

"Phone te chu ri theia siam a lawm. Ri mai mai rawh se." Ka lo ti awlsam et a.
Muansanga tih erawh a ri ring dur dur duh khawp mai.

Û Kima office bang a rawn haw hnu rei vak lo ah zanriah kan ei a. Thlengvel seng zawh hnuah ka movie duh leh en chak ngawih ngawih tawh chu kul muk em em in ka en nghal char char.


Karleh rinni ah chiah kan khuaah lah chuan kan haw thei dawn a. Aizawlah kar khat dawn cham ka la ngai tih na anih chu. Ka peih tawh lo tak zet. Ka ning tawh.

"A va ninawm tak." Movies en laia call dawn hi chuan thin a rim hlur zel.

Muansanga a lo nia. Ka la ang nge la lo vang tih ka ngaihtuah zawk hnuin lak ka thlang a.

"Eng nge ni?" Ka ti nghal tlawng a.

"Whatsapp ah ka lo bia che a, min chhang thei si lo va ka rawn call tawp che." Aw ki hniam reih ruihin a rawn ti a.

"Ka lo hre lo va." Duh dah takin ka ti liam puat a.

"A nih ka ring. In veng aṭang hian thla eng hi a mawi bik riauin ka hria." A tih chuan ka meng phar ak...

"I hre sual anih chu. Mu tawh ta che, hahdam i mamawh kha." Ka ti daih a. Kan vengah a awm tih lam chu ka ngaihven duh lo, hmu turin ka inringtawk rih bawk hek lo.

"Vei nei run chunga mutthilh chu a harsa. A hma ang khan min pui leh thei a ngem? Rilru hahna leh hrehawmna min lak kiansak thiam em kha." Min ngenna aw ril tak ri tel chu hai der a harsa.

"Min mamawh tawh lo lutuk. Mi chak tak, mi dang harsatna sut kian pui thei i nih kha." Awm ze nei takin kati a.

"Habibti kha chu."

"Insawifiah kher a ngai lo. In inhmeh lutuk." Ka ti liam puat a. Chhunglam erawh in pawm harsa a ti hle thung si.

"Lalrinawm."

"Eng nge Lalmuansang?" Kati let pawr hlar a.

"Kha tiang zawng khan ngai miah suh." A ring hran lo, mahse a lungawi lo hle tih a erawh a hriat tho.

"Ka ngaih danah thu i nei em ni? Sawi tur dang i neih tawh loh chuan ka dah dawn ania."

"Ka hmu duh che."

"Ka mut a chhuak tawh. Muttui."

"Lalrinawm ka rawn ṭham chhuak dawn che nge ni a ka call dawn mek hi la in zankhua in ka party dawn?" Ngeiawm rawng kai lek lekin a rawn ti chhek chhek a..

"Mahni nun ti chhe zawng a nun hmang lui tlat duh khawp a mi hnuaihnung leh in control thei lo em ni i nih a? Ṭawngṭai tam rawh." Kei lah chuan ka lo ti a.

"Minutes 5 hun i nei. I rawn chhuak lo anih chuan..." Phone a off zui hmak a.

"Mipa in an duh hun huna an koh chhuah theih mihringah min ngai em mawni chu aw." Lungawi lo tak a phone hmet vak in kati a. Ka chhuak awm lo e mai. A duh leh a mah rawn lut rawh se.

"A mak bawk." Ka phone rawn rik leh chuan ka lo ti hmanhmawh a. Mahse Û Hruaisanga zawk a lo ni.

"Hello Û Hruaisang."


"Ka rawn ti buai che em?" Hawihhawm takin a rawn ti hmasa a..

"Ti buai lo ve. Eng nge ni?"

"Muansanga a room ah a awm reng emaw kan tih laiin a lo chhuak daih a, hmu tur che in a rawn kal mial em kan rawn ti." Nuam ti chiah lo leh inthlahrung aw takin a rawn ti a.

"Muansang mi luhlul, harsa pa." Ti a au chiam mai ka nap.

"Kal chiah lo. Mahse kanin be zo chiah. Ngaihtuah duh suh u." Ka tih mek laiin a nu lo ṭawng ri ka hria a.

"Tlaiah lawk tekhan a khua a sik a sin mawle. Khawiah tak chuan awm ang maw? Thil ṭha lo a ti em lo vang chu maw." A nu mangang aw ri ka hriat chuan a rilru awm ang tur dawn puiin Muansanga hruai haw sak duh na ka nei leh phah.

"A lo biak leh hlauh che chuan khawngaihin chanchin min rawn hrilh thei a ngem? Kan awm a nuam thei hlawm lo va. Kan rawn ti buai tawp che anih hi.. Phone a chhang thei si lo va."

"Min rawn ti buai hleinem. Muansanga chu lo ngaihtuah suh u. Biak ka lo tum ve ang."

"Aw le. Kan lawm lutuk e."

Kanin biakna chu kan ti tawp zui a. Banga sana in tar ka en chuan zan dar10 a lo ri vel chiah a. Khawlai pawh a reh duk ṭan tawhin ka ring. Ka û te ho phei chu an mu vek tawh.

"Rules bawhchhe leh phawt mai ang." Ti chungin Muansanga hmuh tumin kawngkhar a ṭang chuan ka pen chhuak ta ṭham ṭham a. Ka phun ru nasa. Ngaihdan ka lo siam kual ve chiam tawh bawk nen.

Minutes 5 min pe a. Mahse minutes 20 dawn a ral tawh thung. A lo awm tawh kher lo mai thei. Kan buaina ral liana hi.

"A kal tawh tak tak anih dawn hi." Kawngpui vela han hawi kual ruaiin kati a. Lo la awm se ṭha tur ania. A chhungten an ngaihtuah ropui mai si a.

"Khaw nge maw i awm le? Muansang." Beidawng tak chuan kati hap a. Ka phone la chhuakin ka phone ta ringawt a. Mahse ka bul maiah phone ri ka hre tlat. Hmanhmawh lutukin phone rik na lamah chuan ka hawi let thuai a.

"Muansang." A lo ding reng ka hmuh chuan ka thawveng huai. A chhungte chauh ni lo in keipawh hian ka ngaihtuah a ni. A mah ka hmuh a ka awmdan chuan a ti chiang.

A phone ri mek a rawn lek kang va va ah chuan ' HABIBTI ' tih a lang kalh a. A hmel pa takah chuan nuihmel a lang tel bawk. Hlim hmel satliah ni lo, thlamuanna leh ngaihṭhaṭ ngawih ngawihna nuihmel ang kha.

"Buaina ral lian pa. Minti mangang thei lutuk." Vin khar kharin ka ti a.

"I rawn lan ka ring reng a." A nuihmel ṭha takah chuan chau hmel erawh a lang tel.

"Lo lang lo ta i la."

"Rilru chawh nun nan zankhuain mi ka insual pui ang." Insual leh intih buai vel pawsa lo leh ngai ho takin a ti ṭhen sak a. A lang pa viau na chu ka hua.

"Mi â pa." Ka ti sup a.

"Ka hria." Ip te zan ap in mi rawn pan hnai riak riak a. Keiin mittui tling pamin ka lo melh thung.

"He tia tih hi ka chak tawh lutuk." Kun hniamin ka darah lu a rawn nghat zawi hniang a. A thaw zui sak sak bawk. Eng tin mah ka lo dang lo.

"Habibti ka ngai che." Harsa tih hmel takin a rawn ṭawng chhuak leh a. Kei chu hmun hla taka awm ang maiin min bia niin ka hria.

"I ṭha em? I sa lutuk." Awm sawn nghal hretin ka melh chho kiau a.

A mit sen ram leh chau hmel chu ka han hmu vat a. Ka kut lian lo techuan a chal chu dingdi hlip ak in ka han khawih a. A lo sa vur. Muansanga erawh a chal ka khawihsak chu nuam tih hmel takin a lo dawh a. Ka la sawn tur te chu a ui hmel hle bawk.

"I khua a sik a nih hi. Haw vat la a ṭhaṭ ka ring. I chhungten an ngaihtuah lutuk bawk che."

Kalsan lehnghal tumin ka hnungchhawn zui nghal a. Rang lutukin ka hnunglam a ṭangin mi rawn kuah a. Ka taksa a rawn sik rual chuan a taksa khur dar dar chu ka hrethei nghal. A khawsik vangin vawt a ti ani ngei ang.

"Muansang."

"Eng tiang chiah a nasa in nge i bul a hun hman ka chak tih hi i hrethiam lo a ni." Lungrun tak leh thlahlelh em em a min kuah chung chuan a ti a.

"Damdawi ei i ngai, hahdam vat i mamawh bawk. Car i rawn keng em?"

"Keng lo. Ka rawn chhuak ru."

"Naupangchhia lutuk." Min kuahna aṭang chuan ka awm sawn a. Min la vuan zui ṭawk ṭawk. Thlahlelh lutukin.

A hmel hmu tur a ka han hawi chhoh chuan tawrhhlelhawm leh thawk ti buai rak thei khawp a mawi leh duhna a khat in min lo melh chhuk riai a. Ka zam zo vek.

"Ka chau Habibti." In la babe zet a a tih chuan a lang duhawm ru hle si.

"Min lo zui phawt mai teh." Kan in lam pana inher khawng lahin kan ti a. Lawm leh phur em em chuan mi rawn zui a. Ka nui chhuak ṭep.

Kan in chhunga ka pen luh rualin damdawi bawm ka pan nghal chat a. Ka hai rak rak hnu in a ei tur a tan ṭha ber tur na chhawkna ka la chhuak a.

"Hei ei rawh." Damdawi leh tui pek pah in ka ti a. Thuawih tak chuan a ei ve mai a.

"Ti khan lo ṭhu la rizai ka rawn lak sak ang che. Intih lum i mamawh." Ka room lama lutin rizai lum nuam tak mai tur chu ka pawm chhuak ṭan a.

"Mu hahdam rawh. Rizai hi ka lo sin tir ang che." Ka tih chuan a bu nghat a.
Ka chevel chu ngun leh uluk em em in min lo en a. Ka che khawrh ru zo.

"A pawi lo vang maw? I û te nupa ngaihdan ani lo viau a ngem?" Mit meng ngui raih leh chau tih hriat takin a rawn ti a.

"An ni lam chu vengthawng duh suh, an hrethiam lutuk ang che." A chal la sa ṭha tak deh sakin kati a.

"Va mu ve tawh rawh Habibti." Ti chung siin ka kut chu rem leh rem lo in a rawn vuan a. Kalsan a hlauh hmel hle thung.

"Muhil phawt la." Ka tih chuan bu nghatin a chhing zui a.

A hahdam vat theih nan a lu ka chulsak heuh heuh a. Thlamuang takin mit a chhing a, a thaw ri sak sak bawk. Chiang leh zualin a hmel chu kan en a. A ṭha thlawt. A mit khur thuk lam pang, a hmel landan ti pa tu, fiah ṭha kelh kawlh tak leh zam ram ram na khawp a mi melh nâ thiam hnuai chiah a, a hnar ngul sang vah, a hmel pian hmang rem tur chiah a invuah fuh nalh. A hmui lam ka melh thlak leh chuan chil ka lem ri dak. A hmui chhah tap, hmeiche hmui ang maia sen tak ṭha chuan fawh a ti chakawm a. A sexy tak zet.

A taksa lah tunlai hmeicheho in mipa pian chu chutiang chu ni se nalh ka ti, ti a an lo suangtuah ṭhin ang neitu kha ani bawk a. A pian vanneih zia hi hria a hlim ngawih ngawih tur a nia.

"A muhil der ani maw?" U Remi mu tawh lo tho leh chuan a rawn ti sa sa a.

"A nih hi. A riah mai a ngai ang. U Hruaisanga pawh ka hrilh tawh." A ruk a Muansanga muhil thla ka lak ruk sak ka thawn tawh avang chuan ka lo ti a.

"A ṭhaṭ chu. Tui deuhin mu rawh se. Khawngaih thla a la reuh e mai." A rawn ti ve a. Ka lo nui sen sen.

Ka khum lamah pawh mu lo in Muansanga mut na bul chiah sofa ah chuan ka mu ve tawp a. Ka rawl deuh ṭhum mai thei a ni. Ka room lam a mutsan daih dawnin ka awm a ti nuam chiah bawk si lo.

"Hun lo lutuk." Muansanga phone a rawk rik rual rual chuan a harh hlau takin ka hmet thim thuai a. A ri a reh a, phone erawh a la vibrate cher cher.

"Tun ang zan rei tawhah tu nge maw lo call." Ti chungin lo call mek tu chu ka en a.. Thanthani leh bawk a lo ni a. Ka la peih lo. Ka en tawp.

"Ka muhil thei lo. Ka ngai che. Khawngaih takin call chhang rawh." A rik tawp rualin whatsapp lamah a rawn ti zui a.

"Ka mamawh che. Ka thi thei mai dawnin ka hria. U Muansanga vang tal pawhin khawngaih takin ka kiangah awm reng rawh." A vawi hnih nan arawn ti leh a. Muansanga chu ka kai tho ang nge tho lo ang tih ngaihtuahin ka rilru a insual buai. Lo harh kher kher lo ila ṭha tur.

Thil tam tak ngaihtuah zuiin ka mu mengkar a. Thanthani din hmunah kanin chan a. Ka khawngaih ve tho bawk.. Chu tih rualin Muansanga ka lo duh ve laklawh leh tawh bawk si. Kan ching chi vet nuai ani ber e. Mut hmunah ka thaw leh pap ṭhin. Eng tin tin emaw chuan ka lo muhil ve mai bawk a.

"Habibti, Habibti harh rawh." Ti ri chu ka mu mang hriat ruai ruai a. Kut dam thlap in ka biang leh a chhehvel ah a rawn nul niak niak a. Peih lo fe in ka harh chhuak ṭial ṭial a.

"Mamawh i nei em ni? Habibi." Mut chhuak aw phak chap in kati a. A damlo tih ngaihtuah chhuak thut in rang takin ka inti harh zui a. Ka ngaihtuah nghal em em tawp. Ka muhil ṭan vel chauh anih ka ring. A hma zawng khan ka harh reng sia. Tun a takah ka lo muhil leh si.

"Mamawh chu nei lo ve. I muthhilh lai khan i duhawm lutuk." Ka biang a khawih chungin a rawn ti a. Lai takin ka nui sek.

"I muhil thei tawh lo em ni? Eng nge i an tawh?" Mit nuai chat chatin kati a.

"Ka ṭha vek tawh." Ka sam hnawk nuai chu a rawn chul mam pah a. A changtunu leh changtupa han induat vel tepawh kan ang rum rum. Nuam pawh ka ti. Romantic film leh love story chhiar ṭhin tih takah thil hi ka ngaihbelh in, ka suangtuah leh chiam ṭhin.

"Dar eng zat nge?" Banga kan sana in tar en pah chuan kati a.

"Zing dar4 a ri chauh sia a la hma lutuk. Muhil leh ang. Zing chaw i ei nghal dawn nia." Rizai hnuaia inthawlh lehnghal ka tum chu min lo dang vat a.

"Ka sawi tur hi ngun deuhin lo ngaithla la. Ka kal a ngai. Mu thei kani tawh lo." Ka dar leh lam ve ve a vuan chung chuan dam dep dawpin min melh a.

"Eng vangin?" Hrihhai takin kati a.

"Thanthani chungchang ania." Inthlahrung tak a a tih chuan hmuh theihin ka hmel a ngui ruihin ka ring.

"Pawi ka ti. Mahse ka kal angai. Nizan zankhuain an lo buai tawh ani awm a. A nu min lo call ah ka harh thei chiah a. A hma zawngin kan lo hre lo va. Message pawh a awm nual mai. A dinhmun a ṭha vak lo anih hmel."

"Eng tiang a ṭha lo in?"

"Intihhlum a tum." A thaw zui hawk. Kei erawh sawi tur min ti haihchham.

"Muhil leh rawh. I hriat loh hlan a kalsan daih ka hreh che a vangin ka kai tho ta tawp che a nih kha. Pawi kati lutuk. Chuan khawngaihin min hrethiam ang che. Thanthani hi ka thlahthlam thei tawp bik si lo va. A chung changah hian mawhphurhna lian tak ka nei a ni." Hrethiam tur a min duh em em chuan an ti kauh kauh a.

"Kal tawh rawh. An lo nghakhlelh tawh ang che." Ka nui lui thei hram.

"Kan ṭha em?" Mit ko san ak in a ti hmasa leh phawt a.

"Umm."

"Aw le. Ka kalsan phawt ang che." Ka chalah a tau ri zui bap a. Kal tumin a ding zui a.

"Muansang." Ka ko ri ah chuan a ke pen lai tawp chat in a rawn hawi let leh a.

"Eng nge ni? Sweetheart."

"Eng lo." Hmui ka pet zui zauh a.
A phone a rawn ri nawn leh hman. An mamawh nasa tawh viau aniang.

"Kal phawt rawh. Eng mah ani lo." Ka ti leh ta zawk a.

"Tak zet."

"Aw. Kal vat vat rawh." Kal vat tura zaizir a hrilh pahin kati a. Chu tia min kalsan tawp chu a hreh tih a lang reng.

"A nih le." Mawi taka nuihmel min hmuh hnuin inher in a kal chhuak ta nghal a. A reh duk mai.

[Ngaia]

Muansanga * Habibi *
Chapter -12
May Renthlei

"A nih le." Mawi taka nuihmel min hmuh hnuin inher in a kal chhuak ta nghal a. A reh duk mai.

Chu mi zan a ṭang chuan ni 2 a liam a. Muansanga nen kanin hmu lo bawk. Thanthani ig story lamah erawh an pahnih a thlalak hmuh tur a awm nuk thung. A man a lak pui tawp, Muansanga erawh in camera lam pawh a en ngai lo. Thanthani chu Damlo tak tak pawh ang ka ti lo. Nge ni a a ṭha chak viau zawk ni dawn.

"Tu nge mawni dawn ni?" Number lawng tawp aṭang call ka dawn a vang chuan ka ti rilru a. Ka la ta tho.

"Awmawmi ani em aw?" Nu tling aw tawh tak hian a rawn ti a.

"Aw ni e. Tu nge aw?"

"Thanthani nu, Hlupuii ka ni e." A rawn tih chuan mak kati hle a. Min lo biak chhan tur awm ang rilru in a dap kual nghal.

"A nih tak chu." Ka ti zuih ral tap.

"Ka lo be tawp mai che ania mak pawh i ti ngawt ang. Mahse nute tan chuan fate nâ lai hmel hmuh tluka hrehawm a awm lo a tin ni. Mawi leh mawi lo pawh ka thlu thei tawh lo. Min hrethiam dawn nia. Ka sawi tum chu i hriatthiam mai ka ring Awmawm."

"Ka hrethiam alawm." Harsa ti fe chuan kati a. Nu tling em em biak ngaia awm chu a hrehawmin, a zahthlak ang reng hle zawk.

"Hmaichhana biak zawk che chu duh hle mah ila a remchang thei mang si lo va. Ti hian ka rawn be ta mai che anih hi. I hriat ang in fapa chan tawh kan ni a, tunah kan fanu nun chan leh mai thei din hmunah kan ding leh ania. Nu leh pa tan chuan a lu haithlakin a hrehawm ve em a ni. Kan fanu lah hian Muansanga bak ngaihtuah leh dam nan a hmang bawk si lo. Khawngaih takin Awmawm, rei lo te chhung a tan tal pawh kan fate nun aṭang hian i lo inthiarfihlim thei angem?" Min ti mai chu ka khawvel hi bomb chak takin a rawn hal alh dur ang mai hi a ni. A hrilhhai thlak a. Lo dawnsawn thiam a har mah mah bawk.

"Kan fanu â tak mai hi a û ang a chan ve kan hlau tawh em a ni. Khawngaih takin min hrethiam rawh Awmawm." Ngen ngawl taka min ti tu aw chu dam ṭha hle mahse na takin min tai thung si. Hriat a nuam chuang der lo.

"Ka hrethiam e." Phone rang takin ka off zui a.

Ka awm dawm ngawih ngawihin ka ṭhu zawi thla hnawk. Mi â ang maiin ngaihtuahna mu mal pawh ka pu lawk thei lo.

"Kan fate nun aṭang hian i lo inthiarfihlim thei a ngem?" Tih mawlh mai kha a rawn ri nawm tluk tluk a.

"Hah.." Mi â ang maiin kan nui lui hawk a. Mahse ka nui rei lo teh asin. A chhunglam aṭang hian natna in mi rawn hnawh chhuak tup tup.

"Ka hua che." Muansanga hming ka phone screen a rawn eng va va ka hmuh rual chuan phone chu khum mawng lamah ka vawmthla zui tawp a.

Muansanga call leh message ka chhang lo ṭan a. Ka contact list aṭangin Muansanga leh Thanthani thlalak tharlam an status a an hman ka la hmu hram hram ṭhin zui.

Engmah hre tak tak lo hian ṭhen khat lah in, 'In hmeh chuti kha ti.' An la ti tel ṭhin zui a. Va reh nawk nawk mai hi ka duh ṭhin.

Thanthani lar khel lah hian Muansanga thlalak eng emaw hi a lo tarlang peih ve bawk si. Muansanga ngaihdan anih pawh ka ring chiah ṭhin lo. Kei ang bawk a private life neih duh, social midea lama intarlan peih lo a lo ni ve bawk nen.

"Rinni nitawh se aw. Kan khua a haw ka chak tawh." Sofa a ṭhu chung chuan kati ngawih ngawih a. Û Kima leh Û Remi an lo khi ṭhu a.

"A ni ṭep tawh alawm. Vawin tuesday ani tawh ania. Kan haw thei ṭep tawh alawm." Û Kiman naute pawm chungin a lo ti thuai a.

"Naa. Ka ning tawh." Sofa a mu thla tawpin ka tal nak a.

"Nin chhan chu thil dang daih ani lo maw? Tu emaw nen in inkar a ṭha lo chiang lutuk." U Remin min fiam zaih thung.

"Chu tiang pawh ani lo. Ka haw chak vetawp tawh." Ka lo ti nang nang a.

"Ka phone lah hi ri reng." Thil nin kal tluan lai lo ni bawk nen kati zawm zat a.

"Mi luck phone tih na anih kha." An lo ti a.

"Û Hruaisanga anih hi." Ka ṭhuṭna thawhsanin ka room lamah ka lut a.

"Hello Û Hruaisang."

"Keimah zawk." Rawn ti thum dat tu aw chu tu nge tih ka hai lo nasa.

"I phone chu a chhe em si lo? Nge ni a ka phone line bik hi a chhe zawk?" Chimawm tak in a rawn ti a. Ka ngawi rauh rauh. Chhuanlam siam dan tur pawh ka hre lo.

"Eng nge a chhan?"

"Sawi tur dang i neih loh chuan ka dah dawn. Naute awm ka ngai." Ka tih chuan ngaihdan ni lo taka a thaw ri hawk chu ka hre thei.

"Thursday hi ka birthday ania. Kan huan lamah ṭhiante ho nen zan riak a lawm kan tum a. I lo kal vethei angem?"

"Thei lo vang."

"Eng vangin? Ka birthday ka tih chu. Ka birthday." Ka ngaih pawimawh hope takin a sawi nawn a.

"Nuam deuhin in hmang dawn nia."

"I lo kal ve dawn. Ka chhungten i chhungte an rawn be dawn. I lo kal ve lo anih chuan..."

"Ka lo kal ve lo anih chuan eng tin?"

"Nuam kati lo vang Habibti." Ngen aw takin a rawn ti a.

"A nih phawt." Phone ka off a. Ka ngaihtuahna buai nghal pap. Ṭhian ho va riahchhuah, picnic leh party tih velah ka tel ve ngai lo. Mahse tun ṭum chu ka mipa hmangaih pian cham ani dawn a. Chu pawh nise ka hnaih thei tawh si lo.

Muansanga nen kanin biak aṭang a darkar2 hnu velah chuan, "Boruak thawveng hip lawk ka mamawh." Ka purse phawrh rawk rawka room aṭang a tlan chhuah pahin ka ti a.

"In chungah zai ngaihthlak pah in ka ṭhu nghal dawn bawk ania. Ka rei deuh ang." Kawngkhar ka khar ri in a zui.

Dawr lamah ka han kal hmasa a. Ṭhut pah a ei tur ka duh avangin.

"Awmawm i va vang ve. Ka hmuh khat zia che hi." Bsa a lo lang leh ta hlawl e..

"Chu tia mi. Kan veng nula i rawn rim leh tawh ani maw. Ti nge i hmai chu?" A hmai duk deuh chur a awm vang chuan kati a.

"Bike ah ka tlu a."

"Awiawm loh lutuk hmela. Ngam loh val ka tawnga ti ve mai te che." A lu a ben lawlh pahin mipa khat hian ngamtlak takin a rawn ti thung a.

"Lo ngawi mai mai teh." A lo ti ve hluk a. An nui mai mai tho.

"Muansanga biak a va har leh tawh ve. In ṭha maw? A nuihmel hmuh tur a awm leh tawh lo." Mi dang hriat hlauh hmel takin a rawn ti sur sur a..

"Kan ṭha lutuk." Ka lo ti duh lek a. A ṭhiante ho in a mood chhia an lo tuar ve zel chu pawi kati hle a ni.

"Ka kal phawt mai ang."

"Lawk Awmawm." Min chelha a tih mek laiin dawr bul kawnah chuan car leh bike pahnih a rawn ding a. Midang an awm nual sa tawh bawk. Eng nge maw an awm zia le? Tih tum ṭha lo tak an nei leh tawh te hi ani lo maw.

"In lo thleng vetawh a. Zan in chu a va nuam dawn em." A lo thleng hmasa tawh ho chuan lo thleng thar ho chu lo lawmin an ri hlut a.

"Khaw nge Big Boss Muansanga ber chu a awm a?" An tih mek laiin car dum tliang hlarh aṭangin Muansanga ngei chu a rawn chhuak a.

Mafia pawl hruaitu niawm tak a ni. A inchei dan leh a che vel pa tak te reng reng chu. Dawr chhunglama awm hmeiche ho an lo ri hlut a. A zial â leh vek tawh hlawm aniang chu.

A ngheng ngalh ngalh hle tih a hriat a, a hmel a hlim lo in a lang nelawm lo hle bawk. Ka lo thlir dan mit aṭang chuan a induh tawk lutuk chuan a hma daiha lo hrelawk tawh chu ni lo ila, a lakah chuan a chapo hmel tiin ka luangliam duh miah pawhin ka in ring lo. Mahse chung a chet zia techuan hmeichia a hip phah thung daih.

"Awmawm a seh lo vang che. Biru teh suh." Bsa lah chuan a hnung aṭang a ka lo bih dek dek ngam chauh avang chuan a rawn ti leh ṭhin.

"Che lo khan awm mai mai rawh. Ka haw dawn." Ngawi reng a tlan haw nal nal ka tum lai takin.

"Awmawm i lo awm ve law. Ngaihawm nu." Ramdinan mi rawn ti ta. Ka va han thinrim ber. Muansangan min la hmu fuh lo asin maw le. Ka posi laih heih heih zia chu teh. Ka nuihzatthlak thlawt.


"Ahh nia." Muangchang a hawi let hna hna in ka va ti hâi a. Pawi ta ber chu Muansanga mit keimahah a rawn bur nghal chat chu a ni. Choak lian takin a thil ei tur fiah taka melh chunga, chhuah tum hauh lo va a birh thla vang vang tur nen hian ka intehkhin ber. Tlan chhiat ngaihna awm tawh lo khawp a min hual chep ta ang chiah vel hi ani ka din hmun chu.

An ni ho mawi leh nalh taka an induan khup laiin kei erawh pyjama lian leh thawl hek hawk nen ka awm thung a. Mafia pawl hlauhawm tak kara teddy bear che thei, lo awm palh ve ang vel ka ni. Confi a har. Ka kawrban hmawr lian lutuk chu ka ti che nak nak ringawt.

"Tu nge ni a? A va hmelṭha reuh ve."

"Lo ngaihven ve suh u." Muansanga aw ngaihno bei lo lutukin a lo ti nghal khur khur a. Mi rawn pan ding nalh a. Kei ka tawlh hnung hret hret thung.

"Ka. Ka haw tawh angai." Ka ti nawk nawk a. Theih tawk a rang a tlan hawn tum a ka inher chiah chu ka kawrah ṭhamin a lamah min kuai her let nawk.

"Muansang." Min kal tir tura duh lutukin ka han melh chho nghal kiau a.

"In bia ang."

"Aih. Min thlah teh." Ka tal nak a. Awm zia a awm lo.

"Min zui rawh." Hneh sawh lutuk a min kai nghal dawr dawrin a ti a.

"Muansang hun kan nei tam tawh lo ania." Tiin a ṭhian ṭhenkhat ho in an lo biak pawh chu ngai pawimawh lo in min kal pui hmawk hmawk a.

"Hawn ka ngai ka tih chu." Ka la ti ve ṭang ṭang thung.

"Lut rawh." Tih leh a car chhunga min dah luh a rual a. Na lutukin kawngkhar a khar zui bur bawk. Min ti phu lutuk.

"Khawiah nge min hruai i tum? Khawiah mah kal sawn thei ka ni lo ania.." Ka lo ti ve ṭawk ṭawk a. A landan nelawm lo leh rum lutuk techuan minti awm nuam lo chem chem.

Eng tin mah pawha min chhang lo in car chu chak lutukin a khalh chhuak a. Hlauthawng takin ka va melh phei dai a. A ni lah chu biak inthlahrunawm khawpin a a inkhar khip hmak thung.

"Eng hi nge maw i hriat ṭhin le? Mak sak leh atthlak tak hian che ṭhin suh." Theihtawp chhuaha lungawi loh na lantir chuan kan ti a. A awmdan a la thlak phah eih lo.

"Car hi ti ding rawh. Ka chhuk duh. Ti ding rawh ka tih chu." Ka sawi zo hman ṭawk, kawngpui zau ṭha lai leh reh hek hawkah chuan a ti ding zui tuar a. Hmalamah ka intauh chawrh lo chauh. Ka hlauhthawn zia chu. Ka awm ka dawm zui vawng vawng.

"He tianga awm ka ngaih ziah chhan dik tak chu kan hre ve ve ani lawm ni?" Thinrim takin a rawn ti ṭhawṭ a.

"Hre lo. He tianga i awm hian nuam i ti reng reng em ni?" Ka lo ti ve thung.


"Hahh." Zat vang ni hauh lo in an nui lui sawk a. Hlauhawm lamah a kal.

Ka rinloh lutukin ka lama rawn kun hniam thutin ka hmuiah tak duhthawh lutukin a rawn fawp ******** a. Theihtawp a talin namsawn ka tum tak na chu awmzia a awm lo nasa. Ka biang a vawn lohna lam kutin ka tukhum lamah ka hawisawn theih loh nan a vawn beh tlat bakah, ka sam karah a kut rawlh chho in a ṭham pah nawk nawk bawk.

"Duh tawk rawh Muansang." A awma nem ṭang ṭangin ka lo ti a.

"Eng tianga rei nge hai der luih ṭalh i tum dawn?" Steering a chum zui pawp a. Kei nasa lutukin ka lo phu thung.

"Tiang hian awm ṭhin suh."

"Awm lo thei lo in nang hian min siam thung alawm. Ṭha tak leh pangngai taka nun hman ve ka tum pawh hian ka nun control zo lo thei khawpin nang hian min siam ṭhin. Chu chu i hria em?" A mah si lo chauh a min pawt hnai dawrh in a ti a.

"I nundan ṭha lo laiah eng tianga rei nge midang puh i tum?" Ka tih rualin a chalin ka chal a rawn si rap a. A thaw zui hawk hawk bawk.

"I hrethiam lo anih kha. Eng tiang chiaha nasa in nge ka nunah hian thil i tih theih." A ti ril hruih a. A thawlum ham ham leh a lungphu ri dawt dawt te thleng chuan ka hre vek thei. Chu zanthim reh ruihah chuan.

"Habibti nangmah nena lei rem rual rah ve ka duh. Engkim, ka nun hmasalama ṭha lo zawng zawng chu hnunglamah dahin ka hawisan vek thei ang. Ka tiam a che. Chu mi tur chuan ka mamawh che. Ka kianga awm a, ka engkim ni turin." Min nawr na na chuan a ti a. Insum leh tawrh a harh mah mah.

'Aw' ti a chhan chu ka duh lutuk alawm. Mahse eng tin nge ka duhdan vang maia midang nun chan tir a, nun chhe vek tur chu ka thlir theih chuan ang. A va harsa tak em. Eng tin nge ka tih tak ang?

"Kei ang bawk hian min duh ve ani tiraw? Habibti." Beiseina a khat aw ka chhuak chuan an ti a.

"I laka ka feeling neih ang hi tuma lakah ka la nei ngai lo. I danglam bik. Chu tiang chiah chuan i lakah hian mi danglam bik kani ve tho tiraw?" Zam vanga chil lem ri zui dakin a ti a.

"A dik em?" A hmel en thei tur a min kuai dak zuiin a ti a. A mit meng mawi taka min duhna lutuk lo lang chhuak leh beiseina eng, alh hlep hlep chu ka han hmu thei.

"Aih." Ka hmuh lai reng chuan a hmela beiseina alh hlep hlep kha a mit riai riai a.

"Dawt. Dawt anih chu." Hrilhhai bawk si chuan a ti hawp a. A mita natna rawn lang chhuak riai riai chuan min ti na ve vawng vawng.

"Kei chuan ṭhian leh unaupa ang bakin ka en lo che." Harsa ti lutuk leh thawchham lo chauhin chu thu chu ka sawi.

"Habibti ti nge tiang hian i awm? Ti nge ka hmeichhia leh ka ta chauh chu i nih ve theih mai loh?" A ṭawng tir lam chu zawi hle mahse a tawp lam erawh thinrim lutuka au thawmin a zui.

"Ṭhian ang chauh chuan min en bik lo. Ka hria a ni." Inbengdaih tuma hmalam en ngur chuan a ti ro huk a.

"Duk tawk rawh." Vin vak ka tum a, ka thei lo..Ka aw chu a thâm chhuak chhalh.


"Ka laka i beiseina neih tekha dah bo tawh rawh." Tih paha a lam ka va melh chuan hmalam a lo la melh ngur a. Mahse a hmai mam nalh taka ngawi renga a mittui tla lai chu chiang lutukin ka va hmu.

Ka hmuh hlau takin a kut pa tak chuan a tuai bo vat tak na in ka hmu hman tawh tho tho. Ka bing mam mamin ka hria. Mahse thu tlukna ka siam tawh.. Chu ti maia sut leh thei kani tawh lo.

Kan boruak chu a rit in. Kan reh zui dun tlawk tlawk.. Muansanga mawlh mai chu. Ka phu lo, tih nat lah a phu bawk hek lo. Mipa ah pawh in ti pa lutuk, na neih pawha ngawi reng a thup bo mai duh khawp a lunglian leh luhlul mittui tla khawpa a awm anih chuan ka ti na vetawk tih na.


"A nih chuan eng tin pawn lo awm ni ila min thlir liam mai mai tawh ang che." Nelawm lo taka rawn ṭawng chhuakin car a ti nung zui hlat hlat a. Eng tin mah ka chhang lo.

"Ka tihpalh." Kan tlan chhuak hnu chuan kati a.

"Sh*t.. Sawi lo zawk rawh. Awm zia a awm lo." A lo ti kha hluk a. Nuam ti lo lutukin sir zawng chuan ka melh dek dek a. Muansanga ka en lai tak chuan kan hma takah car a rawn ding dawt a. Hmalama ka intauh tur chu a kutin rang takin min lo dang ni lo phei se chu ka na phian mai thei a ni.

"Hmel ho mai mai chu." Tiin a phun hluk a. Ka lo bo ngang mai.

Kan kalna tur dal chiah a car rawn hung te lam ka va melh lai chuan an chuanna car aṭang chuan an lo chhuak mek tih ka va hmu thei. An hnung maiah chuan bike pakhat a ding ve bawk.

An vaiin panga an ni a. Tenawm leh sual hmel takin min rawn nuih sawng hlawm a. Muansanga chu an hria tih hai rual loh in cho takin F**k min rawn hmuh va va.

"Chhuak miah suh." Muansanga chhuah tum chu rang lutukin a kutah hlauthawng takin ka va vuan nghal a.

"Eng tin pawn awmin, eng pawh ti ila i lo buai ve na tur a awm lo." Ka vawnna kut min paihthlak sak lawpin a ti a. A hrilhhai thlak rualin ka phu tawk chiah bawk si. Ka laka a thinrim leh rilru natna hrik thlak dan tur a mamawh lai tak a lo ni bawk nen, pawisak a nei lo khawp ang. A thinrim thisen so bulh bulh luan chhuah tirna tur a mamawh hun lai tak a ni.

"Car a ṭang hian rawn chhuak miah suh ang che." Thupek khauh tak min pe a.

"Ni lo, Muansang khawngaihin." Ka ngen zui ṭawk ṭawk a. Hria ang pawhin a lang lo, engah mah angai lo ti ila a dik ang.

A va han luhlul tak em. Min sawmna kha lo pawm ni ilang chuan ka duhdana awm a hnial dawn der si lo. He pa rilru kal khat lutuk hi chu aw. Hlauh leh pawisak nei tawh ṭhin bawk si lo.

"Muansang car kawngkhar hi hawng rawh." Chum dat datin ka au zui a. Ka chhuah theih loh nan min kalh khum tlat bawk si.

An tih tur saw dan ka duh. Ka rilru hria a car chhunga min kalh khum ani ngei awm bawk ang.

Zamna chhete pawh nei lo leh inringtawk em em in min lo nangching tu te ho chu a va pan chhek chhek a. Kei lah tih theih nei lo in awm hmunah ka lo ṭang em em ringawt. A nat a, a hliam tuarlai hmel hmuh leh ka duh tawh lo.

"Khaw nge ka phone?" Hre chhuakin ka hmet eng zui mawlh mawlh a. Ka kut a khur bawk si hmanhmawh nak laiin, a va hrehawm duh tak.

"Bs, Muansangan buaina a tawk. Location ka rawn thawnah che khan lo kal vat ru." Ka ti nghal mawlh mawlh a.

"Hmel ho chu. An va che fair lo ve. Kan lo kal nghal." Thinrim leh pawr lutukin arawn ti a. A ṭhiante ho a hrilh nghal ani mahna, an thinrim hmel hlawm ngang mai. An thawm aṭang chuan.

"Muansang mi â pa." Car chhung aṭang chuan hlauhthawng bawk si chuan kati a. Car aṭang a chhuah tumin ka sawi che dat dat a. A in hawng thei der bawk si lo.

Ruatsanga sawidan takin khawi hmunah pawh duh tu leh hawtu a hung ther fer fur tak tak anih dawn hi.

Ṭawngkamin a daih ta lo aniang chu mipa khat sual hmel ngawih ngawih pa chuan Muansang chu a hnek ta mai. Hmui ka lo hup chawt a.

An insual ṭan chu ani reng mai. An intam hneh nasa mai si a. Muansanga chu an sawisa hlum mai ang tih ka lo hlau. Ka lo ṭawngṭai thul. A van hrehawm tak em. Thil en hrehawm leh rapthlak tak a ni. En lo ngawt dawn ila Muansanga ka ngaihtuahin ka en lo thei bawk si lo. Mangchhia ang mai a ni. Min ti â zo dawn. Kei ang, in hau thawm ringawt pawh hre ngai lo chhungkua aṭang a seilian tan phei chuan.

"Muansang mi â pa insawisak tir reng mah ta che." Ka lo ti thul. Ka rindan ang khan a che lo. A dawh zawkah a ṭang lui tlat.

"Auhh.." Driver seat lam darthlalang an rawn tih keh chhuai avang chuan hlauhthawng lutukin ka lo au ṭhaṭ a.

"Hei eng thil duhawm nge ka hmuh hi? Hmeiche naupang kan hmuh tak mai. Mi tawrawt car ah lehnghal." Rapawm taka khi huiin min kaih chhuah a tum ta mai.

"Thlah nghal rawh. A ni khan tel ve na a nei lo." Muansanga hah leh thinrim aw inpawlh nawk nawkin a rawn ti khur khur a.

"Thlah duh lo ta ila?" Min kai chhuak zui lawpin a ti a. Muansanga a rawn dawk venghal zawk a. Chu pa chu a tlu nghal nawk thung. Mahse midang ho in Muansanga chu an rawn khawih zawm venghal a.. A duh angin a che zui thei tawh bik lo. Hliam a tuar nasa tawh bawk si. Ka khawngaih lutuk.

"He tiang hmeichhe innocent lutuk ang hi i duh zawng anih rin harsa kati hle mai, nang ang mi sual hian. Eng ang pawhin nun lo hmang dik lo pawh ni ila hmeiche fel vek hi kan lo thlang ṭheuh tho anih dawn hi." Muansanga hnek na tuai pah nuk nukin a ti khi ṭhaw a.

"A ṭhiante ho an rawn thleng ania." An ṭhian zinga pakhat chu a au lang lang a.

"Ka duh angin ka la che hman lo asin mawle." Tih ṭhawt pahin Muansanga an chelh bet lai chu a va hnek ṭhuai a. Midangan lo thlen tak avangin an khawihzawm ta lo hlauh.

"Muansang i ṭha em?" Bs an a rawn ti a. Muansanga erawh chuan Bsa chhanna pawh ngaihsak lo in hliam nei tih hriat taka ṭhen suk sukin a tlukna a ṭang chuan arawn ding chhuak a. Mi rawn pan ding ngur a. Mittui tling pam leh chiai takin ka lo melh phi riai a.

"Car ah lut nghal rawh." Ka kuta vuanin car lam min pan pui nghal hmawk hmawk a. Min dah luh nghal nawk nawk bawk. A tih ang ang chuan ka awm tawp. Hnial turin tha pawh ka nei lo.

Ka tawng tih pawh ka rin ngai loh tawngin mit ngeiin thisen chhuak ka hmu ania. Ka thauah hian min man. Ka chiai buai vek. Min ti zawi nghulh.

"Hmu lo tawp tur i nia sin." Seatbelt min hren tir mawlh mawlh chung chuan a ti a.

Kan tlanna dala an car hung chu dim lo lutukin a su leng lawp a, min dal tawh lo chiang khawp mai. Siam erawh an ngaih phah nual ang. Muansanga car pawh tiamin. Chu lai hmun aṭang chuan kan tlan chhuak ta nal nal a.

"I ṭha em?" Ngaihtuah lutuk chuan ka va ti a. A hliam aṭang a thi chhuak tih tawp tuma ka va khawihsak tur chu duh lo in a lo hawisawn hmak a.

"Damdawi in ah kal ang. I hliam nasa lutuk." Hlauhthawng aw tak chuan ka ti tham chhalh a.

"Ka thlah haw dawn che." Na neilo ang hmaka langin mi lo chhang ram hmuk a.

"Aih. Damdawi in ah kal ang. Enkawlna dawn vat i ngai. A na viau em?" Ṭap aw lek lekin ka lo ti thung a. Ka khawih a duh bawk si lo. Sual lutuk mai.

"Min ngaihtuah suh. Ka engmah ni lo hian min ngaihtuah ka duh lo. Ṭhian angah min lo ngai pawh ni la ṭhian angah ka ngai ve lo che. I ṭhian nih pawh ka duh ve lo."

"I hliam chiah ngaihtuah rih rawh. Ka thu sawi chu ngaithla bawk la."

"Ngaihthlak na chhan tur che ka nei lo. A chiang em? Engkim theihngilh ang che. A bik takin zanin thil thleng hi." Thinrim taka min vin hrawkin a ti a.

"Mi sual pa." Ka mittui a raw baw thla ve ta zawih.. Tih tlak loh tum a ka thuhruk ve char char ngei chu. Chiai a a mah vanga ka hlauhthawn nasat tehreng nen min la vin zawk zui ania, ka la na ve thlawt.

"Min thlamuan theih loh tal pawn min vin lo tal ta che. I duh ang ngei chuan ka ngaihtuah tawh bawk lo ang che." Rilru na taka pawnlam hawisan nghal hmak in ka ti a. Ka bianga mittui rawn luang thla te chu thli thaw vawt tak chuan arawn chhem hit nghal vawr vawr.

Kanin chhak kawngpui kan thlen a, car a din suk dalh thleng chuan kanin be tawh lo ve ve.

"Ka tihpalh. Hlauhthawng taka ka awm tir che avangin." Car a ṭang a ka chhuah dawn chuan a ti ve ta hram a.

"I hliam."

"Ngaihtuah suh." A ngai ang bawkin min ti leh a.

"Ka hmu leh duh tawh lo che." Car kawngkhar khar zui burin kati a. Ka ngaihtuah lutuk leh ka thin a ti rim lutuk tih ngaihna hre lo in chu thu chu sawi tawp ka ni.

In lam panin vai thla ruaiin ka chhuk thla zui a. Car tlan thawm engmah ka la hre lo. In chhung ka luh thleng pawh chuan.

Bathroom ah ka lut tlang a, ka ṭap zui hlawp hlawp. Ka la hlauhthawng reng a, ka ngaihtuah em em laia ka khawih tak ngial pawh a duh lo tekhan min ti na bawk.