LOVE COVERS ALL By C.V.L.Awmpuii (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: LOVE COVERS ALL By C.V.L.Awmpuii (Completed)

Unread post by Ngaia » April 3rd, 2022, 3:09 pm

LOVE COVERS ALL
By CVL Awmpuii


Chapter - 42


Ka nupui thusawi chu ngunthluk zetin ka lo ngaithla a, "Committee tura i chhuah hnu lawkah khan ania, chawhmeh ka lo chhuan lum laiin a rawn kal a. Tha deuhvin ka lo be ve mai a, a rawn lang tehnawlh kha mak ka ti ang reng lutuk a, deckchi tê hi a rawn khai tel bawk a 'Eng nge i lo tih dawn a, i lo leng mai mai nge?' ti a thu khawchang ka zawt kha a lo lakawi a. Huat tur a awm ka hriat loh nen 'Ka vahpa inah ka rawn kal a nimai, i lo buai vena tur a awm lo' min ti let zek a. Chuan ka chhan let hma hauhin kan nufa chanchin duhthawh zetin a sawi bawng bawng a. Kan tun hma nun min rawn phawrh chhuah sak kha ka la na em em pawh a nilo. Mahse thil nilo a sawi tel kha ka rilru a na ve lutuk a. Ka nu chu mahni taksa zuar thin ang te'n min sawi khum bawng bawng a, a hma daih tawh atangin khatiang lam khan min tawngkhum fo a, ka lo chhanglet ve a. Tichuan kan nupa inkar te chenin a rawn sawi a kan inneih tak avanga an lak atanga i hran thu te, ka fuihpawrh ang che te'n a sawi vel a. 'Ka pasal a ni tawh a, a ni lo zawngin ka fuih ngai lo. Kan inneih tâk avanga a lo hlat ta che u anih chuan ka tihpalh, keichuan inrem taka awm ka duh' ka ti fiah ve ta fak a. Ka thusawi engkim kha a lakawi zel a, tawngkam chapo leh amah deuhsawh angah min ngai tlat a. Dawhkan a ka phone dah kha ban mai ka tum a, rawn phone mai che kha ka rilruk a, kan buai zual zel dawn khan ka hria a. Mahse ka rilru hre lawk ang hrim khan min lo chet khalh a, ka phone chu kan inchuh buaina lamah dawhkana a chawhmeh min rawn suah kha a banin a rawn vai tla a, ka banrek a rawn buak phah ta alawm. Khatiang teh nuaih kan nih tak vang khan chhuata deckchi tla chu chharin a chhuak zui nghal daih a. Ka banrek chu a na ta ngut ngut a, reife chu ka din ngaiin ka ding tawp alawm" a ti ta zung zung a. A sawi hnem bawk a a thaw chhuak deuh hak mai.




Engtin emaw tak a ti dawn tih chu hre lawk tho mahila chutiang em ema ka nupui laka a lo che chu ka lawm lo a ni tawp mai. Eng rilru nge a put thin aw ka ti hial. Heti em em a hmeichhe rilru chhia leh kawi hi ka la hrelo a tin a ni.




A banrek durh chu ka tuaisak ta hauh hauh a "Nizanah khan min hrilh nghal vek tur che ania, thil kan chingfel hma nimai tur. Thil zep theih lutuk hi that lohna lai tam tak a awm ania. Nakinah chuan engkim min hrilh zel tawh ang che" ka ti dap dap a, a lo bu deuh nghat nghat mai.




"Ka rin loh vang che a ni miah lo ania aw, ka rin lutuk vang che hian i lakah thil ka zep thin zawk ka tih tawh kha. Ka hrilh nghal duh loh chhan che pawh nutei chungah khan i thinrim vak ka hlau a, chhungkaw buai nuaih te a hlauhawm a. Keimah vang ngat phei chuan buaina a awm ka duhlo" a lo ti ve charh charh a.




A dinhmun tur chu ka hrethiam ve ruak tawh. A mizia en hian pasalte bula zualko zat zat duh tur ang chi kha a ni miau lova. Mahse amah tina thei zawng leh hmusit zawnga an tawngkhumna te chu min hrilh zel turin ka duh. Pasal ka nihna anga ka tihtur hlenchhuah theih loh chu ka duhlo.




"Engpawh nise i chungah tupawh mawilo taka an khawsa a nih chuan min hrilh zel tawh ang che aw. Zualko nihna pawh a ni lo ania, ka nupui i ni a, ka chhungte laka vui vaina i neih pawhin ka hre zel tur a ni. Chuan, nangmah vangin chhungkua kan buaina tur a awm lo, i thiam lohna a awm miah lo ania. Ka thusawi chu i hrethiam tiraw?" ka tih chuan a rawn bu nghat nghat a, nui suk chungin a chalah ka fawp ta zeuh a, a lo nui ve ta var var mai.




Nupa inkar leh chhungkaw inkar chu thil inzulzui deuh tak a ni a. Fate nupa inkarah chuan an lo inrawlh ve pawh a thiang lutuk, chhungte inrawlh chu thil sual pawh a nilo. Mahse thil awm leh mawi tawk a awm ve ka ti tlat. Remna siam lo zawng lehnghal a an lo inrawlh ve dawn anih chuan lo inrawlh lo law law sela thil dik tak a ni zawk ang chu.




Tlai lama inbual chu a hritlan ka hlauh thin avangin chawhma lamah ka inbual tir a, a dul a la lian lutuk lo bawk a amahin a la inbual ve thei mai zel.



Thil awmdan chu ka nu ka han hrilh ve luam a, midang hek kual hi ka duh ngailo, thil mawi ni pawhin ka hrelo. Mahse he thil hi chu a dan a dang tlat a. Keimah zawkin nutei kha ka va be leh anih chuan insum zo lovin buaina ka tih punlun zawk ka hlau a ni ber. Ka nu bulah chuan nutei lo zilh deuh hlek turin ka chah a, a rawn lungawi lo ve ngang mai. Ka nupui thlavang hauh hi a pe na ve ang reng a, zilh a ngaihnaah a zilh hreh lo bawk. Ka beisei phak bakin an inngaina viau tawh bawk.




Nutei chu ka nu chuan a lo zilh ngei aniang buaina a rawn siam zui tawh lova, kan intlawhpawh tawh vak lo bawk. Thil tha ber a ni chu ka ti miah lo nain ka nupui a hmu mawh ngawih ngawih lutuk hian ka thin a khei ve laklawh tlat a ni.




Zuali erawh chuan tlawh ve zeuh zeuh turin min tur fo zawk a "Chhungkaw inhmuh thiam loh reng a thalo. A rawn lungawi loh chhan pawh kha a âwm ve tho, kan inneih hnu hian i tlawh khat ve bawk em a, a vui vai ve anih kha" a han ti ngial thin a. Hetia han biak that duh loh pawh hi a Pathian thu viau lo tih ka hria
mahse ka tui lo laklawh a ni ber mai. Amah lah hian zah a hre map bawk si lova ka inthiam chawp veleh mai zel.




Midang nen chuan kan inbe tha reng tho a, Pa Zaia pawhin rawn len luh nawlh a chîng a. Pa fel ngang a ni a, amah a that tehlul nen ka nutei ang hmeichhia a tawng hi ka lo khawngaih zawk hial. Rema te nupa pawh an lo leng ve zeuh zeuh thin a, Arini leh Zuali chu an inkawm thei viau zel. An mizia hi inanna lai an nei deuh reuh a, mi pawi sawi an hlau dun em em a, an inkawm thei phian pawh chu a âwm hliah hliah. Gracy ve thung chu a ngai reng a nimai, kan inah pawh a hma ang bawkin a la leng halh reng a. Thil mak deuh mai chu Zuali hi a be chhe ngailo, a hriat nuam lo tur thil a sawi ngai ta miah lo bawk a, a zia a thlak hlek a nimai thei. An inkawm ta hluak tihna erawh a ni chuang lo.




Zan mut hmunah chuan mak ka tih deuh em avangin Gracy nen an chungchang chu ka zawt ta a. "A chungah ka sual duh lo lui ve tlat sia a sual reng thei bik lo aniang" a lo ti mai a. Ka lo buk deuh nghut nghut lai chuan ka âwm zawn atangin a rawn dak chho hau mai a "Thil pakhat vang a ni leh thei tho bawk a..." a rawn ti leh niah niah a. Ka hrethiam hauh lo.




"Eng maw?" ka lo tih chuan "Ricky hi..." a rawn ti zawi zep a, sawi zawm lovin a ngawi deuh dat a. "A ngaizawng..." a rawn ti zawi leh sep a. Ka mak ti lutuk chu ka meng phawk nasa mai.



"I thianpa Ricky-a maw?" ka tih chuan a lo bu nghat nghat a "Hmanniah Ricky an min hrilh thawi deuh fua a, ka zawt chiang a, a sawi tha duh tawh miah lo a" a rawn ti leh niah niah a. "A va mak ve" ka lo ti ringawt, ka beisei loh lam thil daih ani.




"I thianpa chu a ngaihzawn vang aniang a biak chhiat ngam loh che tiraw?" ka ti zawi leh ruih a, rawn inbengkang deuh pah hian min rawn melh leh ha a "A nimai thei a ni...aa...mahse Ricky hian a bengkhawn vak chuang lo aniang" a rawn ti leh niah niah a.




Sawi zawm tura ka lo mitmei chuan a rawn sawi zawm leh a "Ka chungah Gracy-i a that leh that loh min zawt a, buaina kan neih loh thuin ka lo chhang a. 'Ka hrilh tha bawk a, a zawm ta chu a tihzia e, mahse ka duh let ve dawn chuanglo' a tia. A thusawi awmzia ka hriatthiam chiah loh avang chuan ka zawt tha leh a. Gracy in a ngaihzawn thu leh a ten thu min hrilh thuak a, a bak a sawi tha duhlo" a lo ti charh charh a.




A thusawi awmzia chu ka man thiam ruak mai e. Hei vang hi a lo ni deuh a ni mahna Gracy pawh a pangngai em em. Ricky an a ten pawh chu ka dem hran chuang lo. A thiannu laka a lo khawsak thin danah khan a lawmlo ve te pawh a ni mahna.




December thla kan chuangkai chho a, kan naute pawh thla 5 a tling ve ta, ka nupui dul pawh a lian tha ve viau tawh a. Check up turin Lunglei lamah thla tin kan kal ziah a,naute pawh a hrisel tha viau. A dul len danah mipa anih kan ring a, Matei chuan hmeichhia anih a ring thung.




Vawiin lamah kan chhungte pawh Krismas hmang turin an rawn kal tawh dawn a, kan phur nupa ve viau mai. Ka nupui nen kan inneih hnua an lo kal vawikhatna tur ania, kan lo inbuatsaih nasa ve khawp mai.




Tlai dar 4 velah chuan an rawn thleng ta a, Zuali dul an han hmu chu ka nu leh Matei an khek deuh chul mai, ka pa pawh a nui vur vur a. Video call in kan inbe fo a, a taka an hmuh takah chuan an lawm lutuk chu an insum theilo a ni ber mai.



Zanriah kan eikham chuan Mateiin hmun sengfel leh thlengsil a ti vek a, Zualin tihpui a tum pawhin "Kan awm rei dawn silo kan awm chhung chu ka âwl ang che" a ti ve tlat a, a hnial lui thei ta lo.



Kan chhungkaw bila thil nuam em em pakhat chu that leh thatin kan inlawm tawn thin a, hei tak hi nunhona kawngah chuan thil pawimawh tak a ni. Tha leh tha inlawm tawnnaah thil chhia a chhuak theilo hrim hrim.



Chutihrual chuan mi kawi leh mi kawi chu an inbat buai nge nge thin. Mi kawi leh mi ngil inbat erawh a dan a dang leh deuh. Mi kan chungah kawi viau mah se keimahni kan ngil tlat chuan a inbahbuai tak tak theih loh.




Zanah kan mut hmain chhung inkhawm kan hmang a, ka pain hun a hmang a. Kan fa lo piang tur pawh Pathian hnenah a hlan a, hrisel leh dam taka a lo pianchhuah theih nan a dil a. Pathianin kan dilna chu min tih hlawhtlin sak ngeiin ka ring bawk.



Chutia ka chhungte'n Krismas an rawn hmang dawn tih thenawm khawveng ten an hriat chuan an lo lawm ve khawp mai a. Inleng pawh kan nei ve zut a, ka pa hi thenrual kawm thiam tak ani ka tih tawh kha, tupawh lo lenglut se a lo kawm thiam em em vek zel mai a, nuam an ti thei viau.




Urlawk zan chu kan inkhawm vek a, ban veleh ka pizawn in lamah kan chhungin kan phei a, Nu Rinkimi te chhungkua pawh an lo tel ve a kan ri deuh laih laih mai. Sawmtluangi leh Matein arsa kan tur kan lei ve te chu an buaipui a, keini chu sitting room lamah meilum ai pahin kan lo titi mawlh mawlh hlawm a. Nu Rinkimi leh ka nuin sawi tur an hre bawk a, kan lo ngaithla a ni deuh ber mai.




Kan naute neih hun turte chu sawiin an titi malh malh a, an phur hlawm ngang mai.




Ka nu chuan "Zualtein nau a neih dawn hunah chuan kan lo zin leh ang" a ti malh malh a, Nu Rinkimi pawh chuan a lo pawmpui khawp mai. Nau kan ken tirh atanga a tum lawk sa tawh kha a ni hrim hrim a, kan neih dawn thlaah chuan helamah an rawn zin leh dawn tihna anih chu.




Kan haw meuh chuan dar 12 a lo ri thuak tawh mai. Zuali hian a nu a ngaihtuah em em reng a, ka hriat turin sawi lang kher lo mah se a nu in lama ka lenphei pui châng hian a lawm thin tih ka hria. A thisen zawmpui neihchhun a ni tawh a, theihtawpa ngaihtuah pui chu ka tihtur a ni.




In kan thlen veleh in mangtha in room lamah kan lut nghal vek a. Ka nupui khum lawn tur chu ka pui vat a, nui var var chungin min lo chelh ve vat. Ka mut that tir hnu chuan ka lehkhabu dahna bawm lam ka pan vat a. Naktuk Krismas chawhma inkhawmah thu ka sawi dawn a, reilote tal ka in ennawn veleh ang chu.



Ka Bible chhiar chhung chuan ka nupui chuan min lo menpui ve tlat a "Lo muhil la ka rawn mu vat ang" ka tih pawh chuan a mut chhuah loh thu leh min lo nghah tur thu a sawi ve tlat a, tihluih theih pawh a nilo.




Ka duh ang thalin ka in ennawn hnu chuan ka tho ta vut a, ka nupuiin ham bai bai chunga a kuta min lo ban chu ka va pan vat "Ka zun a chhuak" a rawn ti zawi sap a. Engmah sawi buai lovin ka kaitho a, bathroom lam ka panpui ta vat.



Kan muthilh hma chuan a dul puar ve lah tawh chu ka chul sak hauh hauh a, hahdam hmel zet hian a lo thawchhuak siai siai thung a. A khat tawkin a dul chu ka fawp leh vang vang thin. Kan fa lo pianchhuah hun tur hi ka nghakhlel takzet a ni.




"Ka duat, muhil la" ka nupui kuah tha sauh sauh pah chuan ka ti a "Ka mut a chhuak thei miah lo zanin chu" a lo ti vat a. A mitmeng fiah deuh kak chuan a thusawi chu a nemnghet ka ti mai, a mut a chhuah hmel loh kher mai.



Ka lam a rawn hawi deuh ha chu a hmuiah chuan ka zuk fawp zauh a, a lo nui ri hak mai. Pangchang zet hian ka âwm chu a rawn ngheng tha salh salh a, a dul puarin a dal deuh chu a phun niah niah a "Ka pum hi a lian chak tiraw?" naupang chhia zet hian a rawn ti hliai a, ka lo nui hawk "Kan fa tur lian deuh a awm alawm" ka lo ti zawi ruih a. Inbengkangin a dul chu a han chûl hauh hauh a "I pa hian han pai ve che sela tiraw, kei ai a lian tho sia a zo zawk ang che mawle" a ti sap sap a, ka lo nui chhuak hawk hawk tawh. Ani pawh chuan a thusawi atthlak zet chu a ngaihtuah chiang veleh hnuhnawh aniang a rawn nui chhuak ve hak hak a.




Dim zetin ka âwmah chuan ka kuah bei leh a "Kan naute hian mut a mamawh viau ang" ka tih chuan a rawn dak chho leh heu mai a "A nu ka mut a chhuak rih silo a, a mamawh vak lo aniang" a rawn ti a, a samah ka lo chûl thuak a. Chutah ka âwm a rawn bei leh pah chuan "Nangmah kha muhil rawh i chau awm si" a rawn ti ve ngial a. Ka nupui harh kir ker chuan ka mut pawh a tichhuak chiah lo.




A mutchhuah hma chu zanlai laiah ka chhaih nui kar kar reng a. Tun hnu hian a lai duh tawh bik miah lova, min chhaih let dan hi a hre zek a, min tilai zawk dawn dawn thin.



Pathian zarah Krismas chu tluang takin kan hmang zo ta a, keipawhin ka mawhphurhna neih ang ang te pawh Pathian kaihhruainain tha takin ka hlen chhuak ve niin ka hria.



Kan chhungte pawh kum thar hmain an haw ta a, an lo awm chhung khan kan ri ve deuh laih laih a, an han awm lo leh thut tur chu a khawhar thlak ve khawp mai. Ka nu ber chuan min kalsan a hreh khawp mai a, mahse nau kan nei vat dawn tho a, an lo phei leh dawn tho a tiin kan inhnem a. An haw thei ta hram.




Kum a han thar chho a, Rema te pawhin fanu duhawm deuh mai an nei ta !



Vawiin ah an in lamah leng phei ve turin kan intintuah a. Ka nupuiin nau enna tur nausen kawr a leisak bawk a, an lawm ve viauin ka ring.



Kan va thlen chuan nau en an lo awm ve nawk a. Pa Zaian min lo chiauau vat a, Nutei chu ka hmu mai lo.



Room lamah kan inzui phei ta a, an nupain min hmuh chuan min lo hui vat. Naute hmel ka hmu chiah chu sawifiah thiam si loh hian 'Pa' nih ka châkna a zual a. Ka fa lo piang tur chu ka thlahlel zual ka tilo theilo.



Rema'n a fa a pawm vel ka hmuh te chuan ka fa ka pawm ve theih hun tur ka ngaihtuah a, ka lo phur nghal surh maiin ka hria.



Ka nupui chuan a han pawm ve a, a dul puarin dal deuh mah se nau pawm vel chu a thiam dawn viauin ka hria.



Pathian zarah kan dam chho ve zel a. Nau pawh tluang takin kan pai chho ve zel a. Thla sarih hmel kan hmuh chuan a thil eiduh zawng a inthlak a, Mizo chawhmeh deuh deuh a eichak tlat thin a. Dawlrêp leh rawtuai rêp bai te, antam um te, thil dangdai deuh deuh a eichak tlat thin a. Ka theihtawpa duat ka duh miau avangin a eichak zawng a sawi apiang chu ka lakkhawm sak zung zung zel a. Tui ti taka a thil eilai hmuh chu a manhla bik riau thin.




Kan nau neih dawn thla chuan ka chhungte chu an rawn phei leh ta ngei a. Ka nupuiin inchhung sek rek a khawih an remti tawh lova nau neih dawn thla anih avangin amah pawh a indim zual em em a. Sawi leh sawi hnu ka fimkhur pui em avang hian theihtawpin a fimkhur ve thin.




Thil buaithlak deuh pakhat chu tun thla hian Kohhran Hmeichhe Inkhawmpui a awm dawn a. Kan bial chhunga kan khaw hlat berah inkhawmpui chu an nghat a, speaker ah min lo ruat tlat mai a. Ni thum vel châm a ngai dawn, ka nupui nau neih kar a lo ni lehzel nen ka rilru chu mahni tawkah a buai em em mai a. Han phat ngawt dawnin rawngbawlna thil a ni bawk si a, tihngaihna tak pawh ka hrelo.




Ka chhungte bula ka sawi chuan ka nu chuan phat mai pawh pawi a tih loh thu a sawi a. Ka pa chuan "Pathian râwn chung zelin thuthlukna i siam dawn nia" tih zawng a sawi.



Mut hmunah ka nupui chu ka han râwn ve a, ani chuan ka lo rinlawk ruk ang ngeiin kal ngei turin min ti.



"Doctor khan a la hla deuh ang a ti tho a, chuloah ka nu leh pa te, Matei te pawh an awm tho a, ka ngaihtuah awm loh vang. Pasalte awm loh laia nau nei pawh an tam alawm. I rawngbawlna kha a pawimawh, kohhran rawngbawlna ngawr ngawr a ni lova Pathian rawngbawlna ania" a ti dap dap a.




A thusawi chu ka pawm pui tho rualin ka ngaihtuahna ril ber chuan a ngaihtuah lo theilo a ni.




Pathian ka râwn vek hnuah chuan Kohhran Hmeichhe Inkhawmpuina hun hmanpui turin rilru ka siam fel ta a. Ka chhanna dawn dan a ni tlat a tin a ni.



Ka chhungte bulah chuan ka sawi ta a, ka pa chu a bu nghut nghut a, ka nupui pawhin min pawmpui thlap. Ka nu ber chuan Zuali a ngaihtuah em avangin a phal vak lova, Pathian râwn chunga ka chhanna dawn a nih miau si avangin min hnial ngam chiah bawk silo. Mahse a hnu deuhah chuan "Keini kan awm tho a, thlamuang deuhvin i kal dawn nia" a ti thei ta hram.




Kar lovah Inkhawmpui hun chu a lo thleng ta a. Zanah ka nupui chuan ka thawmhnaw ken tur chu min siam sak malh malh a. Ka ngaihtuah ru riau mai a, ka rilru a nuam thei mawlh lo.




"Ka awm loh laiin i lo vei thut chuan rilru a buai khawp ang" ka tichhuak hulh a. Ka thawmhnaw a thlep mawlh mawlh lai chu a rawn hawi vat a, a lo nui mai a. Ka va pan hnai a, a dul zawnah chuan ka va thingthi a a thiltih lai chu a lo dah ve vat.




A dulah chuan kut ka nghat vang vang a "I pa ka lo haw leh hunah inhmu ang aw" ka ti ta ngawt a, a rawn che dat mai. Ka nui chhuak hawk a, a chet leh hun chu ka ngaichâng ran a, a che duh tawh thak lo.



"A luhlul dawn anih hi" ka nupui chuan a lo ti hlak a, ka lo nui ve ta tawp.



Zanah chuan uluk deuhvin kan fa lo piang tur tan ka tawngtai leh a. Fa nei tawh chuan ka awmdan hi an hriatthiam ka ring. A lo pianchhuah hun a hnai telh telh a, a paitu ni miah lo mah ila ka zam ve lutuk tlat.




Zing dar 10 ah inkhawmpui kal tur chuan kan chhuak ta a. Ka car in Nu Rinkimi nen kan kal a, kawnglakah chuan a titi mawlh mawlh a, ka ngaihtuahna kal ding lutuk tur pawh a zia deuh e.



Kan thlen veleh ka nupui chu ka be ta vat a. Rorel inkhawm kan neih nghal dawn avangin rei pawh kan inbe hman lo.



Upa min te inah ka thleng a, chhungkaw puitling the thaw an ni a, min lo lawm thiam khawp mai. Zanriah te kan eikham hnu chuan inkhawm turin ka insiam nghal a, thupui hmangin thu ka sawi nghal dawn a. A bul tanna tur a ni bawk nen a huphurh awm ve viau mai.




In atanga ka chhuak tur chiah chu ka phone a rawn ri a, ka nu atangin a ni, ka pick up nghal vat a. Ka nupui nau vei thu a rawn sawi ta mai !


___________*___________*__________*_________

(In ning mah mah tawh em? Lo ning lo hram ula aw, chapter 2/3 vel bak a awm tawhlo ania. Deputy Commissioner kan dah thei rih dawn lo ta sa sa ka tia ka hmanhmawh duh lo anih hi)






LOVE COVERS ALL
By CVL Awmpuii


Chapter - 43


Ka phone chu hûm tha sauh sauhin in atang chuan ka chhuak nghal vut a, ka motor dahna bulah chuan ka va ding ren rawn a, chanchin chiang zawk chu ka zawt ta vat a.




"Zanriah kan ei tur kha a pum a rawn na a, in inbiak zawh hnu chiah kha a ni nghe nghe. Hmanhmawh deuhin kan che ta rum rum a, thenawmte taxi a lo remchang hlauh a Lunglei Hospital kan panpui ta nghal a. Doctor in a han en khan 'Nau a la hla rih' a ti bawk sia, mahse min admit ta tho a, damdawiinah chuan kan awm mek. Pakhat chauh awmpui an phal sia keiman ka awmpui a, i pa leh Matei te chu an haw leh ta anih kha, naktuk lamah an lo kal veleh ang" a rawn ti ta zung zung a. Ka rilru hrehawm lutuk chu ka lo thaw chhuak hawk.




"Tunah na a la ti viau em?" ka ti chhuak hulh a, ka kut lehlamin ka hmai ka tuai puat bawk. Nu hovin nau vei hrehawm zia an sawi ka hre fo a, an thusawi ka ngaihnep vang ni lovin ka lo ngaithla liam ve mai zel thin. Mahse ka nupui nau vei thu ka hriat meuh chuan ka lo hrethiam ve ruak maiin ka hria.




Ka nu chuan "Damdawiin kan luh tirh khan na a la ti ngat ngat khawp mai a, mahse a hnuah khan a reh te deuh a, tunah lawk khan a muhil chiah, a chau viau aniang. A na a rawn awm leh hunah a rawn harh leh tho ang" a rawn ti leh zung zung a. Ka rilru chu a buai takzet tawh.



"Ka lo haw mai dawn a mawnle?" ka tih chuan min lo hnial vat a "Ngaihtuah lutuk suh Bawiha, keini kan awm a, kan buaipui thei lutuk ang. I ko va rawngbawlna tla kha tha takin han hlen chhuak phawt mai la. Chulo rengah lo haw ta pawh ni la tih theih a awm chuang lova" a rawn ti leh zung zung a.




Inkhawm dar a rawn rik tawh avangin inkhawm ban huna ka biak leh tur thu hrilhin kan inbiakna chu ka titawp ta a. Ka rilruin ka tawngtai ta tawp.



Ka thlen in lamah chuan ka va lut leh a, chutia ka va let leh chu theihnghilh ka neih leh neih loh min lo zawt vat a. Engmah pehhel buai lovin ka nupui nau vei thu te chu ka han sawi luam a. Chutah an nu ber chuan "I haw phei nghal rum rum mai dawn em ni? I ngaihtuah awm sia" a lo ti ve halh a, ka lu ka lo thing vat.




"Helai hmuna ka mawhphurhna awm ang ang ka hlen chhuah hunah ka haw ang. Chu chu ka nupui duh dan pawh ania, ka rawn kal hma khan kan sawi dun vek tawh a, ka rawngbawlna tih thuan awp a duh lo" ka lo ti ve luam a. Ka nupui duhdan tak tak pawh a ni, ka rilru tak chuan ngaihtuah viau mah ila Pathianin engkim min rel fel sak ka ring tlat.




Thusawi tura ka dinchhuah chuan thu hmaah ka nupui nau vei chungchang vel te chu ka sawi a, Kohhran mipuite min tawngtaipui turin ka ngen ta tawp a. Tawngtaina thiltih theihzia a taka hria a, hmu a tem tu ka ni a, tun hunah pawh hian hna a rawn thawh ngei ka beisei.



Inkhawm kan ban hnu chuan Bial chhung Kohhran Hmeichhe Hruaitute chuan chanchin chiang zawk min lo zawt sap sap a, an fel hlawm ngei mai. Min han thlamuan ve liam liam hlawm a, an zinga pakhat chuan "Pasal te meuh an awm loh chuan a hrehawm ve duh viau thin a, nau in nei hnai tih chu lo hre hlawm ila hun ruat te pawh kan sawn mai tur ania aw" a ti vang vang a, a inthlahrun hmel viau mai.




"Ka rawn kal hi kan nupa duhdan ania lawm inthlahrunna tur a awm miah lo ania. Pathian hnenah min dilpui hlawm ang a, naute pawh tluang deuhvin kan nei thei ang chu" ka lo ti ve charh charh a.




"Pathian rawngbawltu nupa in nihna in hrechiang hle mai, a rah chu kan lo seng dawn anih hi" an ti ta vang vang hlawm a. Kan nupa min ngaihdan chu thil hriat hrehawm zawk zawk a ni hauh lo. Rawngbawltu hming pu ni si a kan rawngbawl saka te'n keimahniah engmah an hmuh loh hi ka thil hlauh ber a ni.




Motor-a ka luh hnu chuan ka nu chu ka be leh a, a ring ral thak thak. An buai viau anih ka ring ta, ka nupui pum nat dan tur mawlh chu ka ngaihtuah a, ka rilru a hah leh takzet tawh.



Ka nu ka biak tlang theih tak si loh vah chuan ka pa number ka dial ta tawp a, rei a ring lo a lo pick up vat "Ka pa, eng nge Zuali dinhmun?" ka ti nghal thawr a. A lo thaw chhuak hawlh a, a thusawi tur chu ka lo ngaichang ran thung.




"Zanin lamah chuan a la neih theih hmel loh an tia, nichin lawk khan i nu nen kan inbia a, a pum a na leh tawh a, an buai rih ang" a rawn ti dam thluam a. Ka nupui ka lainat lutuk chu ka thin a rim tun tawh.



"Bawiha, ngaihtuah lutuk suh aw, i rilru i lo tihah viau ange. Nau vei dan pangngai tak ania, a vawikhatna ania a harsat ve deuh dawn aniang. I û Mafaka pawh kha i nuin a vei rei ania" min thlamuan tum tak chuan a rawn ti leh charh charh a. Mahse ka awm chu a nawm phah chuang der lo.



Ka pa nen kan inbiak zawh hnu chuan in lamah pawh haw ta lo chuan Biakinah ka let leh a. Kan inkhawm banna kha a rei veleh deuh tawh a, tumah an awm tawhlo.




Pathian hnenah ka nupui leh ka fa lo piang tur tan ka dil a. "Kei a pasal ber a kiangah ka awm thei rih si lova nangin a na tawrh te chhawk zangkhai sak la, na tuar lutuk lovin kan fa chu lo pianchhuah tir hram teh" tiin ka dil tawp. A mawlmang pawh ka ti ang reng viau, mahse han chham kur nguai tur ka hre miau lo ani.




Ka thlen ina ka haw hnu chuan chanchin min lo zawt chiang leh vat a, ka pa thu min hrilh te chu ka han hrilh chhawng ve luam a. An nu ber pawh chuan ka hmel atangin ka awmdan chu a hrethiam aniang min lo tawng thlamuan ve vat a. Tunah tak hi chuan eng tawngkam mahin min thlamuan zo lo. Tawngtaina chauh lo chuan.




An pa ber chuan "Sangzual, zan a tlai tawh si a, naktukah programme i nei full bawk si, han mu hahdam hlawm phawt ila chanchin an rawn hrilh veleh zel tho ang che. Kan intawngtaipui tawn dawn nia" a ti charh charh a.




Room lam kan pan sap sap ta hlawm a, an nu ber chuan "I muthilh theih loh chuan min lo kaitho hreh lo la aw tihdan kan ngaihtuah dawn nia" a rawn ti ve ngial a. Ka awmdan chuan an rilru ka ti nuam lo viauin ka hre ta, min ngaihtuah hmel hlawm ngang mai a. Ka inthlahrung hnuhnawh viau mai.



"Mu thei mai ang, Pathian zarah an tha ang" ka ti ve ta thlup a, an ngaih a that hmel ta deuh e.



An mikhual room ah chuan ka mu a, ka mu tih lemah khumah ka thu a ni zawk mah. Ka mut a chhuak thei der lo. Ka nu min lo biak hun ka châng ran a, an lo buai takin tih thil thu ah ka va be hmasa duh rih tawhlo.



Chutia inngaihtuah buai ngut ngut ai chuan tiin naktuka ka thusawi tur inbuatsaih sa te chu ka ennawn thuak thuak a, ka rilru a Pathian thu dang lo lut te pawh ka ziah belh ta teuh mai. A khat tawkin ka phone ka en leh sek thin bawk.




Zanlai dar 1 velah chuan a rawn ri ta a , awihawm loh khawpa rangin ka lo pick up vat a "Aw nu" ka ti nghal tawng a. Ka lak ran dan atangin ka muhil miah lo tih a hriat mai ka ring.



"Zan tir lamah khan kan inbuaipui deuh a, i phone call pawh ka lo la hman lo anih kha. Pathianin rem a tih chuan khawvar hun velah kan neih theih mai ka ring" a rawn ti vat a.



"Tunah na a la ti em?" ka tichhuak hulh a, chutah ka nu chuan "Umm...a vial ngawih ngawih mai a, a lainat awm tak tak. Tih vak ngaihna a awm rih si lova a pum ka chul sak hian a ziaawm deuh a" a rawn ti sap a. Ka lo thaw chhuak hawk.




Ka nu bulah chuan Zuali bengbula phone dah turin ka ti a, a ri deuh sat sat a, ka nupui thaw chhuak ham ham ri ka hre ta. Ka rilru hrehawm zia chu tuman min hriatthiam pui ka ring lo.



"Ka duat..." ka âw a duatna, hmangaihna leh ngaihsakna lang chhuak thei ang zawng zawng chuan ka ti sup a. "Tuar fan fan rawh aw, ka lo haw tep tawh ania. Kei leh kan naute tan lo bei fan fan la, ka rawn haw veleh ka duat ang che u. Ka hmangaih che u ania aw" ka ti dam thlup a, "Umm..." a rawn tih ri chu ka hria. A na tawrh zawng zawng chu theih nise ka tawrh sak tur ania aw...




"Pathian hnenah kan dil ziah a, engkim kan hmuh thin kha" ka ti nghet leh charh a, a thaw chhuak ham ham ri bak ka hre ta lo.




Ka nu nen chuan reilote kan inbe leh a, "A zai mai theih loh em ni?" ka ti ta thlawt, ka lainat em a tin ani.



Chutah ka nu chuan "Doctor khan khawvar lamah chuan a nei thei mai tawh ang a tia, neih pangngaiin nei thei se an duh a" a rawn ti vat a. Ka lo thaw chhuak hawk.




Zan khua chuan ka mu ta miah lo a tih theih ang. Ka thusawi tur ka inbuatsaih karah chuan khum bulah thingthiin ka va tawngtai leh tawp zel a, thu mawlmang deuh ka va chham thin a, mahse Pathian chuan ka duh a hria tih ka hai lo.




April ni 7 zing dar 5:30 - ah chuan 'Pa' ka ni ta, fapa kg 3 leh gram 600 a rit ka nei ta, ka hlim zia chu ka sawifiah thiam lo zawk. Chunglam hawiin ka nui chhuak ta hawk hawk a, ka â ruai maiin ka hria.




Matei chuan "Û, in inang lutuk, i tetlai thlalak chiah chiah a nimai" phur zet hian a rawn ti lang lang a. Ka hlim lutuk vangin ka kâ ka chîp theilo, ka nui chhuak hawk hawk mai sin.



Ka nu leh pa nen kan inbe leh a, ka nupui erawh a nau vei chau nen a muhil rih a ni awm e. Amah hrim hrim chu a that thu min hrilh a, rilru pawh a nuam ta huai mai. Tluang taka kan fa a hring chu ka chhuang takzet. Hmeichhe lo ropui zia chu ka hmufiah nawn awn awn mai ni.




Kan inbiak zawh chuan Matei chuan ka fapa thlalak chu min rawn thawn ta nghal a, ka han hmu chiah chu maw, ka thinlung hi a khawih che dawt dawt mai sin. A hmeltha tih piah lam a ni, a pa mitah chuan a tha lawt lak, midang pawhin hmeltha an tih vek ka ring.




Ka phone screen a ka fapa hmel lo lang chu ka chûl hauh hauh a, a nî sawi ang tak takin min chhun lutuk tlat. A hnar, a mit, a hmui....keimah vek a nimai.



Pathian hnenah lawmthu ka sawi a, ka fapa hming sak tur ka dawng tel nghal bawk. Keimah ngeiin a hming chu ka sa dawn anih hmel.



Ka thlen in te chu ka han hriattir ve a, min lawmpui ngang mai. Thlalak te nen lam chuan ka hmuh a, ka fapa hmelthat zia thu mawlh an sawi. An fanu tlum ber chuan "Naute piang hlim si, a van hmeltha em em" a ti leh hliai thin a. A thiante hmuh ve atan ka fapa thlalak chu a inthawn nghe nghe. Chuti taka min lawmpui ve chu ka lawm takzet.



Tukthuan kan ei hmain Nu Rinkimi a rawn lang nawlh mai a. Nizan lamah khan kan inhmu ta miah lo kha ania, vengchhung a lo zau ve bawk nen kan thlen hnu khan kal dun e tilo chuan kan inhmu zui ta miah lova, tun hi kan thlen atanga kan vawikhat inhmuh lehna a ni.




Nu Rinkimi chu Nu Rinkimi a ni tawp mai, tu mitmei mah veng lovin min rawn fiam nghal thawr thawr a, ka lai lek lek alawm mawle.



"Kan Pro Pastor hian a nupui a chhai lai hian maw, a nupui hian 'Patling fa pahnih nei tawh anih duh hmel' a ti a. An inneih hnu khan a hre reng a, a hmanhmawh ta lutuk a, an inneih cham thlen hma hmain fa a neihpui nghal hmak hi" a rawn ti vel ham ham a. Ka thlenin te pawh an nui dar dar mai. An han titi chho zel a, Nu Rinkimin uang thuang zet zeta a thil sawite chu an nuihpui nasa mai. Keichuan ka phone wallpaper a ka hman tak ka fapa thlalak mawlh chu ka lo melh vawng vawng thung. Ka lo nui vur vur thin lehnghal a.



Khaw chhung Kohhran WhatsApp Group-ah chuan ka fapa thlalak chu an rawn post a 'Kan Pro Pastor Sangzuala te pawhin tukin khan fapa duhawm tak an nei e' tiin. Kan family group ah te, kan branch KTP group ah te, Group hrang hrang ka awmnaah te chuan lawmpuina thu min rawn hlan sap sap hlawm a. Mite that zia chu hriattirin ka awm nawn leh ta. Lawmthu te ka han sawi ve luam a, tawngtaina lama min hre ve reng turin ka chah zel bawk.




Ka inkhawm kal tur pawh chu phur takin ka chhuak ta a, tunah tak hi chuan eng thil mahin min tithinrim zovin ka ringlo.



Ka thusawi dawn chuan Kohhran mipuite chu ka nupuiin tluang taka nau a neih tak vanga Pathian hnena lawmthu min sawipui turin ka sawm ve luam a.



Pathian hnenah kan dil a, min pe a, lawmthu sawi let leh chu kan tih makmawh a ni.



Chawhma inkhawm ban refreshment kan ei lai chuan Biakin sir hmun reh deuh laiah ka va petek a, ka nu number ka dial nghal a, ka nupui biak ka duh tawh takzet a ni.



Ka nu ni lovin amah ngei mai chuan a lo pick up ta a, "Aw, U Sangzual" a rawn ti zâng vah a, a âw atang chuan a pangngai tawh niin ka hria.



"Ka duat, i tha tawh em?" ka tih chuan a that tawh thu a lo sawi vat a "Kan fapa hi nangmah chiah chiah" a rawn tih chuan ka lo nui hawk. Min hretu apiang ten ka fapa chuan min chhun thu an sawi vek alawm. A taka ka kut ngeia pawm hun ka nghakhlel takzet bawk.



"Ka fa a ni miau alawm" ka tih chuan a rawn nui ri hak hak a, a na tuar rum ri ai ngawt kha chuan hriat nuam tak a ni.



"Ka hmangaih che, ka chhuang takzet bawk che. Ka lo haw vat ang a, ka duat ang che" ka ti nghet leh charh a, a nui ri mawlh mai hian ka kawchhung a fan raih thin.



Rei inbe hman kan nih loh avangin kan inbiakna chu kan titawp ta vat a. A âw ka hre leh ta chu ka awm a nuam ta khawp mai.



Mipui ka va pawh leh chuan min lo chibai leh sap sap hlawm a, ka fapa neih thu chu Bial chhungah a thang a ni ber mai. Kohhran Hmeichhe Inkhawmpui a ni miau a, nuho titi duhzia a lang ania nge. A tha lam a ni tho a, ka pawi tih loh zawng tak a ni.




Chawhnu inkhawmah Thupui hmangin thu ka sawi leh a, 'Pathian rawngbawlna kawnga nû mawhphurhna' tih chu kan thupui a ni a. Thupui pawimawh tak a ni. Pathian rawngbawlna kawngah hian nû mawhphurhna hi a sâng khawp mai. A huam chin pawh a thui viau.




A tlangpuiin nû ho chu innghak tu an ni a, chhungkaw than dan mawi leh mawi lohte hi nû in a zir leh zir lovah a innghat thui khawp mai. Pasal zah kawngah te, fate enkawl kawngah te, inthenawm khawvenna te chenin nû mawhphurhna hi a sâng fal nalh a tih theih ang.




Hmeichhia te hi an chhel a, an ropui a, an chhuanawm takzet. Mahse chu chhelna , ropuina leh chhuanawmna te chuan ken tel a nei a, chu chu nu tam takin an hmuh hmaih fo. Mawhphurhna sâng tak a keng tel tlat a ni.




Nu mawhphurhna hlen thatna chhungkaw hlim lo an awm lo a tih theih hial ang.



Pâ mawhphurhna sâng tak phen a nu ropui tak a din tlat chuan pa berin a tihtur hlen loh chu a duh bik hauh lovang, mipa dik tak a nih phawt chuan.



Mipa te rilru leh thinlung dek buai zar thei khawpa thiltihtheihna nei chu hmeichhia te tho an ni tlat ! Kan nupui te'n kan thu awih sela, hriat loh karin nupuite thu zawk hi kan lo zawm ve nge nge thin. Ngaihtuah chian poh leh a dik zia a chiang zual ting mai ni.




Chawhnu Inkhawm ban chuan ka thlen in lam ka pan ta vat a, ka rilruin vei ruk rauh rauh a nei.




Zan lam inkhawmah hun hmangtu ka ni tawh dawn lova ka rilru chuan ka hre ve rauh rauh a. Mahni thu a haw kha mawi ka ti chiah bawk si lo, ka awmdan chu a lai vel vek maiin ka hria.



Mahse vanneih thlak deuhvin ka ti dawn nge, zanriah ei hmain Kohhran Hmeichhe Hruaitute ho chu an rawn kal a, "Pu Sangzual, haw i duh chuan inthlahrunna tur a awm miah lo ania aw. I nupuiin nau a nei hnai tih kan lo hre lawk lova a zia lo tak tak. I haw nghal rum rum te kan ring ania mahse hei i mawhphurhna i rawn hlen chhuak ta dap mai a. Kan hlawkpui takzet ania. Min telpui ve zel la chu kan duhthusam a nia, mahse i haw duh chuan inthlahrung miah lovin i haw thei ania aw, ka lawm tawk lutuk tlat" an rawn ti duah a.




A tirah chuan han pawm mai kha nuam lo ka ti ve deuh a, thu khawchang ka han sawi ve luam a. An felin min hrethiam hlawm em a, haw tur chuan ka rilru ka siam fel ta a. Ka hlim ru veng veng mai.




Zanriah pawh ei ta lo chuan ka insiam nghal zung zung a. Chutih lai tak chuan Nu Rinkimi phone call ka dawng a, haw ve nghal a duh thu a rawn sawi teh tlat a. Ka rilru ang a pu ve tho anih ka ring.




Tlai dar 5 ah chuan kan inpeih fel ta a, ka thlen in te chuan min ui der ve khawp mai. An pa ber chuan "Inkhawmpui nikhua leh ilo velah pawh kan in chu i inah rawn ngai tawp la, i rawn thleng zel turah kan ngai hmak mai ania" a ti charh charh a, a thlamuan thlak viau e.




Nu Rinkimi chu rei vak lovah a rawn thleng a, kan pahnih bawk chuan kan haw ta a. Kawnglakah te chuan min fiam min fiam a, kan inmelh leh run run thin. Chutia ka melh te hlei hlei chuan a nuih a za zual a,lu thing nghutin ka nui veleh ta tawp zel.




Khua chu a hlat loh avangin kan thleng vat a, Nu Rinkimi bulah chuan "Keichu Lungleiah tlang mai ka tum a, engtin nge i awm ve dawn?" ka tih chuan min han nuih leh rih, "I tuah thei bawk sia maw" nui hawk hawk chung chuan a rawn ti a, a nghal thiam thin asin.




Rum zeta ka melh takah chuan "Zosangzual, Lungleiah chuan tlang phawt mai teh ang, i mak ren run emai" a ti ta tawp a, a la nui char char tho. Engmah sawi buai tawh lovin Lunglei kawng lamah chuan kan tlang ta a.




Kan va thlen chuan nau neihna ward min lo kawhhmuh vat a, zan dar 8 thleng luh phal a lo la ni hlauh a, kan va thleng hma hram chu kan vannei tak tak ani.




Ka nupui awmna cabin kan thlen chuan kik buai lovin ka lut nghal thawr a, Nu Rinkimin min lo zui ve vat.



Min han hmu thut chu an phawk hlawm ngei mai, ka nu, ka pa, Matei leh Sawmtluangi an lo awm a. Ka nupui chuan khumah ka fapa ni ngei tur chu hnute tui a lo pe a, ka nuin a lo pui bawk. An pahnih chuan min rawn hmu ve chiah lo.




"Bawiha chu ! Engmah i rawn sawi lawk lova " ka pa chuan a rawn ti hluai a, ka nu leh ka nupui pawh an rawn hawi vat a, ka va lang thut chuan a thawng ve pawh a ni mai thei.



Nu Rinkimi chuan "Zan lamah programme a nei tawh lova kan rawn haw phei ta ngawt anih hi" pangngai tak chuan a lo ti vat a.




Engmah sawi lovin ka nupui mutna lam chu ka va pan vut a, a hamhaih hmel bo thakin min lo nuih var var a. Ka nuin a dinna min lo kian vat a "In inang lutuk" a lo ti vat a, midang ho chu an lo nui ri hak hak hlawm mai.



"I tha em?" ka nupui biang tawh zeuh pah chuan ka ti sup a, "Tha lutuk tlat" a lo ti vat.




Chutah ka fapa hnute tui hne dek dek chu ka bih ta a, ka naute hmuh tawh zawng zawng ah a duhawmin a hmeltha ber âwm e. A thlalak ai chuan a takah a la chiang lehzual lehnghal.



"I fapa chu eng nge ang i tih?" ka nupui chuan a lo ti sa sa a, ka melh chho vat. Midang chu awm lo se a mitmeng de sar sar vang chuan ka fawp ngei ang.



"Ka chhuang lutuk che" ka ti zawi sup a, min lo nuih var var mai.



Ka fapa ka han pawm chu ka lungawi hliah hliah hi a ni tawp mai. Ka nupui neih ni kha khawvela ka hlim ni ber a ni a, a dawtah chuan tun hun hi a ni ngei ang.



Kan chhungte chuan min chhun thu bawk an sawi leh a, lung hi a awi em asin.



Ka nuin riahpui a tum kha ania kei ka awm takah chuan ka riahpui tur thu ka sawi a, ka ti deuh bur bawk nen tuman hnial enah min en ta lo.




Ka pain ka car chu a khalh haw ta a, Nu Rinkimi te nufa pawh an haw ve nghal. Ka nu bulah ka thawmhnaw hawn ho chu lo la chhuak mai turin ka chah a, a lo tihfel vek tur thu a sawi.




Kan chhungte an haw takah chuan kan chhungkaw bil te chauh chuan kan awm ta a. Ka fapa chu ka thlir ning thei mawlh lo a ni.



A nuin hnute tui a pek lai te chuan hmuhnawm ti zet hian ka thlir reng a, a hmui che ve dek dek te chu duhawm tih ringawt hian a sawifiah zo lo.




Kan fapa a muthilh takah chuan ka nupui hmai bulah chuan kun hniamin ka fawp ta vang vang a, nui var var chungin min lo chhang let ve vat.



"Fapa duhawm lutuk min pek vangin ka lawm e, ka hmangaih che" kan chal insi reng chung chuan ka ti nghet charh a, "Fapa duhawm lutuk min pek vangin ka lawm e, ka hmangaih che" ka tih ang chiah chuan a rawn ti ve vat a.




Ka inlakhran hnu chuan ka fapa muhil hmel chu ka thlir leh vawng vawng a. Chutah ka nupui chuan "I fapa chu i tawngtai sak dawn lo em ni?" a rawn tih chuan ka hrechhuak chiah. Ka la tawngtai sak miah lo tak alawm.



Ka kut lehlamin ka nupui kut ka chelh a, ka kut lehlam chu ka fapa lu te tak te chungah chuan dim zetin ka nghat a. Pathian hnenah fapa duhawm lutuk min pek avangin lawmthu ka sawi a, A kutah ka fapa chu ka nghat nghal bawk. Ka nupui pawh dam taka a awm tir avangin lawmthu ka hrilh a. Kan chhungkua chuan Pathian kutah kan inkawl tir ta a.




Damdawiin atang chuan ni li hnuah kan chhuak ta a, kan chhuah ni chuan nau rawn en an thahnem ngang mai.




Kan inchhungah chuan kan khat deuh mup hi a nimai. Chuti taka kan fapa neih min lawmpui chu kan phu loh rual rualin hlu ka ti takzet.



A pian hma hauh atangin a mamawh engkim a nei nghal vek a. Kawr leh pheikhawk tih velte phei chu kan chhungte'n an rawn in lei siak hi a ni ber mai. Chuvangin mamawh belh pawh kan nei manglo. Nau rawn en apiangin an rawn ken belh ve zel bawk a, hei lo liama Pathian malsawmna hi a awm lovang.




Ka fapa hmingah chuan keimah ngeiin Pathian atanga ka dawn ang chuan 'Vanlalhriatpuia' tih ka sa ta a. Pathian hriatpuina thlapin a lo piang chhuak miau a. A lo upat a, a lo puitlin hnu thleng pawhin Pathian mi hriat ni ngei sela, Pathian hriatpuina thlapin engkim ti zel sela tih chu ka duhthusam ani.




Ka nutei pawh a rawn kal ve ngei a, naute a rawn en chuan a ner nang nang a, eng tak chu ngaihtuah leh tawh ang maw ka lo tih rilruk lai mek chuan "Sangzuala fapa pawh a ang lo" a rawn ti fak a. Inleng dang an la awm ve bawk nen an phawk nghal hra hlawm mai.




_________*__________*__________*__________


(Nau neih lai ngawr ngawr zanin chu😅. A hunlai a ni bawk a, lo ni deuh ngawr ngawr mai rawh se aw. Ka han chelh khawtlai ngial a, ka tum aiin a chapter hi a thui daih tawh ania aw, chapter hnih bak a awm theih ka ring tawhlo.)


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:10 pm

LOVE COVERS ALL
By CVL Awmpuii


Chapter - 44


"I fapa pawh a ang lo" ka lam rawn hawi pah chuan a ti leh kher a. Chhan hrep ka lo tum lai tak chuan ka nupui chuan "Midang zawng zawngin a pa a chhun thu an sawi vek asin" a lo ti dam thlap a. A hmel chu ka en a, engmah danglamna ka hmu lo.



Chutah ka nutei chuan "An en chiang lo anih chu an inang lo lulai emai" a ti deuh hlak a. A tawng ring ang reng bawk si a, kan inleng dangte chuan an melh hrek hrek a. Ka nupui lam ka hawi chuan awm nuam chiah lo hmel hi a pu tawh.



Ka nu a rawn inrawlh ta vat a "Saii, room ah min rawn zui teh" dam thlap, thupe âw zet si hian a ti fiah ta fak a. Ka nutei chu ka lo chhanglet duh ta bik lo, ka nuin han zilh deuh hrep teh se. A nau a ni a, keiai chuan tihdan a thiam zawk ang. A thuhrimah keiin ka lo tih chiam kha midang mithmuhah phei chuan a mawi fahran lo.



Ka nu leh nutei te an room lama an inzui luh hnu chuan Matein titi dang a vawrh ta vat a, midang ho pawh chu an awmdan pangngaiin an awm veleh vat a.




Ka pizawn leh Nu Rinkimi te chhungkua an rawn thlen takah phei chuan kan ri deuh laih laih a. Nichin a thil thleng kha chu kan ngaihtuah zui hmel vak hlawm tawhlo.



Ka pizawn chuan ka rinai daihin nau khawih a thiam, a pawm dan velte chu ka thlamuan pui zawng tak a ni.



"Sangzuala chiah chiah ani tak tak anih hi" nui var var pah chuan a lo ti ve vat a, ka lo nui suk. Patling pui si ka sawi thiam dan ber chuan ka intithei em em mai ni.



Inleng thenkhat chu an haw tawh a, chhungkhat laina kan la awm ve nuk a. Ka pa chuan ka pizawn leh Nu Rinkimi te chhungkua chu chawei nghal law law turin a sawm a. Ka nutei pawh kha ka nu nen room atanga an rawn inzui chhuah khan a haw tlang nghal daih a. Ka nu bulah engtin nge a tih ka zawh chuan min hrilh tha duh lo. A chingfel ah ngaiin ka zawt lui duh ta bik lo.




Ka nu chuan "Zualte, Masâii thusawi kha chu engah mah ngai duh suh aw, ka hau tawh a, khatiang lam hawi khan a tawngkhum tawh lovang che" ka nupui bulah chuan a ti dam thlap a. Zuali pawh chuan nui lui deuh var var chung hian "A pawilo engah mah ka ngailo, a ho lutuk" a lo ti vat a. A awm chu a nawm hmel fahran loh kher mai.




Chutah Nu Rinkimi chuan "Kan lo kal hmain thil thleng a awm em ni?" a lo ti vat a. Ka nu chuan thu kalphung te chu a lo hrilh ve luam a, chutah Nu Rinkimi chuan "Dik tak chuan maw Machhan, i nau saw chu a khamawm thin khawp mai. Hman atang tawhin Zuali te nufa chungchangah hian a inrawlh peih hrim hrim a. Ka ngaihdan a ni vak tawhlo, ka thuai hreh miah lo ania" a lo ti duah a. Ani hi zawng a duh loh zawngah hi chu sawi piap piap mai chi a ni a. Mahse a dinna hi a dik ve tlat thin.




Sitting room lamah midangho chu an inzui chhuak ta hlawm a. Keichu ka nupui leh ka fapa mutna bulah chuan ka zu bawk thla ve ta vat a.



Ka nupui mitmeng chu ka hai mawlh lo, nuam lo ti hmel a pu. Kan fapa hnute hne dek dek lam chu a melh daih a, "Ka duat" ka tih tak supah chuan min lo melh vat a, a rawn nui lui deuh seih bawk.



A biang chu ka chûl thuak a, "Ka nutei thusawi kha engah mah ngai suh aw, nakinah keiman ka lo hau dawn nia" ka ti nghet charh a, kan fapa lam melh leh daih pah chuan "Umm..." tih zawngin min chhang.




Ka lamah kuaih her ka tum a, a lo tang ve tung a. A hawina lamah chuan ka va insawn ta a, a mittui luang ka hmu chawpchilh nghal.




Ka tho ta hluai a, "Ka duat leh !" ka ti hluai a, kan fapa chuan hnute a hne zo tawh a, a muthilh lai tak ani.




A mutna lam chu ka va pan hnai ta vat a, a mittui a lo tuai nghal vat. A bulah chuan ka va lawnkai vat a, ka lama ka kuaih her chuan a tang tung tawh bik lo. Ka âwmah chuan hmai a rawn phum vat a, nghet zetin ka lo kuah thung.



"Tinge khatiang vanga i mittui hlu lutuk te i lo tih tlak mai le" ka ti chhuak hulh a, nutei ka huatna chu pui tak a ni.



"A chungah ka sual pawh ka hre si lova min huat em em chhan hi ka hrethiam theilo" insut deuh hraih pah chuan a rawn ti khur dar dar a. A samah ka lo fawp deuh tawk "I theihtawpin that i chhuah tawh a, thatnain a hneh theih loh mihring chu mi pangngai lo a ni tihna a nimai. A thusawi engmah ngai pawimawh duh suh aw, i bulah ka ding zel dawn ania" ka lo ti nghet charh a.



A hmai chu a rawn nawr leh vak a, a khur deuh dar dar mai. A awmdan chuan min ti hrehawm takzet.



"Misual awm tha duh lo vang mai maia ka nupui a tah ka phal miah lo ania, bâng tawh rawh le" ka ti dam thluam a, a hnung chu ka beng thuk thuk a. Rei tawk fang chutia kan awm hnu chuan a inlahrang ta a.




"I bulah chuan ho tê ah pawh ka tah a chhuak zel a" a rawn ti sep a, a sam hnawk deuh niai chu ka lo tuai mam sak vat a "A ho emaw ho lo emaw ka bulah chauh tap zel ang che, ka thlem reng peih che ania" nui suk pah chuan ka lo ti a, a rawn nui ve ta var var a.




Pathian kaihhruaina kan chang a, kan fapa pawh A zarah a hrisel tha em em a. Zanlaiah hian han sual deuh hlek tum a nei thin a, a bakah chuan a fel khawp mai.




Kan chhungte pawh helama awm reng thei an ni lova, kan fapain kar hnih a tlin chuan min haw san ta a. Ka nu mawlh mai chuan a tupa hawsan chu a hreh ngang mai a. "Zualtei te nufa hian min zui phei sela nangmahin lo awm mai la" a ti hial reng a. Thil tih chi pawh va ni suh. Ka nupui leh ka fapa tel lovin engtin nge maw awm bik se min tih ni. Lungthlu zan lo chuan an haw phei ta phawt chu ania, phone call kan dawng zing malh malh hle. Chu erawh thil lawmawm tak a ni.




Kan fapa pawhin thla li a lo tling ta a, a lianin a chum biang reuh a. Mi zawng zawng lawm a hlawh a tih theih hial ang.




Ka pizawn leh Nu Rinkimi te nufa an rawn leng phei deuh reng a, kan fapa chuan duat a hlawhin lawm a hlawh takzet. Thenawm khawvengte pawh an rawn lenglut awl lova, kan ri ve deuh laih laih thin.




Zan khat chu Rema rawn lenglut chuan a nu leh Gracy te chunga a lungawi lohna a rawn sawi luam a. A thinrim hmel ngang mai.



"Hmanni ah Arini rulh turin thuamhnaw an lo la ba teuh a, dawr neitunu khan Arini a lo hrilh a, chutiang engmah a hre si lova inthlahrung deuhvin min hrilh ta tawp a. School atanga a hlawh lo chu pawisa lak luhna a nei lova, chupawh ka nu kutah a chhunglut vek zel a, tul pawh ka ti kher lo nain ama duhdan ani a, ka zahsak a. Chuvangin keiin ka hlawh chu ama kutah ka kawltir thung a, chung chuan rulh tir an lo tum ani mai thei. Kei min hrilh se chu ka pawm zam thei mai ang a, mahse a hminga an lo ba kher kha a tha nat thlak ka ti ve lutuk a. Ka pa pawhin a zilh hrep kha. Indanah ka vau nghal thuai bawk a, a awmdan hi sim phah hram se ka ti khawp mai" a ti duah a.





Ka nutei mize mak sak lutuk hi chu engtikah mah ka hrethiam dawn lo anih hi. Rema pawh chu han sawipui vak ngaihna ka hre chuang lo nain Arini buaipui nasa turin ka chah ve luam a.




"Arini pawh hi Zuali ang deuh ania, mi inthlahrung chi ania, nutei hrawn a harsa ve dawn bawk nen buaina neuh neuh hrilh loh che a ngah ang. I dawm thiam hle a ngai dawn ania" ka lo ti ve charh charh a. A pawm hmel khawp mai.




A haw hnu chuan room lamah ka lut ta vat a. Ka nupui chuan kan fapa a lo ti mu a, ka va luh rual rual chuan a hmui zawnah a kutdahin bengchheng lo turin min lo mitmei a. Thil buaithlak deuh pakhat chu Bawihpuia hi a harh vang ang reng lutuk a, thawm ri hlekah a harh nghal zel a. a muthilh lai hi chuan thawm kan dim viau zel.



Dim zetin ka va pan hnai a, ka fapa muhil thaw sak sak chu hmuhnawm tak a ni. "A mutna a rei tawh em?" ka ti zawi sup a. A muthilh deuh chiah thuin min lo chhang vat a.



Ka nupui bulah chuan ka va inthawlh nghal zat a, a kawngah kuahin ka inbeng kang a, ka fapa hmel chu ka thlir ning thei mawlh lo.



"In inan zia hi" ka nupui chuan a lo ti sap a, a nghawngah fawpin ka thaw chhuak suai suai a, "Ka fapa ni miau hek" ka lo tih chuan nuih chhuah hlau zetin a nui dir ta tlak tlak a.



A nghawngah chuan ka hmai phumin ka kuah nghet nghal salh a, "Ka fapa rim i nam" ka tih chuan ka samah a rawn tham salh a "Mu tha tawh rawh" a rawn ti zawi sap a, a âw ah chuan nuihzatna ka hre thei.




"Ka fapa in min chhun thu in sawi fo sia, fanu nangmah chhun tur tak kan neih leh vat a ngai a ni" ka tih chuan ka sam chu a rawn tham na zual sauh a, a kut lehlamin ka hnungah a rawn beng dat bawk.




"A ni lo em ni?" nuihza insum zeta ka tih chuan ka beisei loh zetin ka bengbul chu a hmuiin a rawn nul thuak a, "Phir aw..." a rawn ti sa sa a.




A mitmeng en tum chuan ka inlahrang hlek a, mitmeng lerh zetin min lo melh anih chu ! A melh na vang chuan ka zam dawn lek lek nia mawle.




Chutia ka en reng lai chuan a hmai zawnah min pawt hnai deuh salh a "Ka pasal hian phîr a duh lo em ni?" a rawn ti leh sa sa a, a mitmeng mawlh mai chu ! Ka lai leh leh mai, min ti zâm chhiava a ni.



Ka awmdan a hmuh chuan a rawn nui ri ta hak a, "I lai vel a nimaw..." a rawn tih chuan ka melh chhuk ta run run a, ner deuh nang nang pah chuan "Pasal zak zum deuh ka lo nei anih hi" a ti leh kher a. Engmah sawi buai lovin a hmui ka zuk khar chilh nghal hmiah.



Chutia kan infawh deuh ngawng ngawng lai chuan kan fapa a rawn te chhuak that a, kan inla hrang nghawl hlawk.



Ka nupui chuan Bawihpuia chu a buaipui ta vat a, kei erawh ka awmdan thunun tumin ka bawkkhup a, thawk ka la zui nghal hawk bawk. Ka fapa rawn te chhuah hun chu a hunlo takzet.




Ka nupui chuan "A diaper ah a zun a lo khat tawh lutuk anih hi" tih leh lukham bula diaper ban chu a rual a. A thlak lai chuan ka fapa kut vai lap lap chu ka lo chelh vat a, "Bawihpui...a va hunlo ve" ka ti fan ruih a, ka nupui chu a lo nui hak hak mai.




Zantin ka fapa lu chungah kut nghatin ka tawngtai fo a, ka nupui nen pawh thingthiin Pathian kan au awl lova, A malsawmna chhiar sen lohvin min vûr bawk rêng a ni.



Vawiin Pathianni chawhnu inkhawmah hian kan fapa chuan Baptisma a chang ve tawh dawn a. A nuin a thlak lai vel chuan ka lo chhaih a, aw rawl chhuah meuhin a nui ruah ruah mai. A âw hi a lian em em reuh a, nuih a duh em em bawk a. A chang chuan a nui nasa lutuk hi a nu mang a ti ang thin, a thaw tha hlei thei thin lova. Amaherawhchu Pathian zarah nuih nasat lutuk vangin pawi lian tham kan la tawk hauh lo.




Kan chhungkua in Biakin lam pan chuan kan kal a, ka motor khalh laite chuan ka fapa chuan chhaih phut zet hian a ban te taktein min rawn ban thin a, ka lo chhaih leh zeuh thin a, a nui chhuak nghal hawk hawk zel.




Ka nupui chuan "Apa in motor a khalh rih a, tihbuai awih loh" a lo ti vat a, a chhaih emaw tiin a nui tak ang hawk hawk a, anu nen pawh kan nuih ta tawp.



Kohhran Secretary in "Vanlalhriatpuia, a pa Pro Pastor Zosangzuala, a nu Hmangaihzuali" tih a rawn puan chhuah chuan maicham hmaah kan va ding ta vat a. Nausen hming dang pathum a lam leh a, Rema te fanu Abigail pawh a tel ve.




Pastor in "He in fa Vanlalhriatpuia hi a lo than len a, a lo puitlin thlengin Pathian hriatna kawnga kaihhruai leh A thu zirtir in intiam tlat em?" a tih chuan "Aw tiam tlat e" tiin kan lo chhang a. Thu tawi fel tak tiam mah ni ila kan fapa nunkawng pum pui kaihruaitu tur thutiam a ni !




Chham mai mai chi a ni lova dân ang maia chham chi a nilo. Kohhran mipui hmaah mai ni lovin Pathian hmaa thutiam kan ni a, kan hlen chhuak ngei tur a ni bawk.




Lalpan fanau rochan hlu tak min pek te hi Ama hnena hruai thlen vek hi keini nu leh pa te tih makmawh a ni. Vanrama kan chhawm theih awmchhun chu kan fanau rochante hi an ni tlat !




Inkhawm chhung zawng chuan Bawihpuia chu a tlei em em mai a. A nuin pawm lovin keiman ka pawm a, a muhil miah lo nain bengchheng vawikhat pawh a siam lo, a pa hian ka chhuang reuh em asin.




October thlaa Synod Inkhawmpui lo thleng turah chuan Pastor atan Ordained ka ni dawn ta ! Pathianin min hruai tak meuh meuh a, hei leh chen hi Amah vang liau liauvin mualpho lovin ka rawngbawlna ka hlen thei a. Chu chang ni lovin ka kawppui tur nupui tha tak min pe a. Nupa dangten fa awt ngawih ngawih chunga an neih theih loh laiin kan inneihna kum khat pawh a tlin hmain fapa duhawm tak pek ka ni bawk a.




He leia malsawmna ka dawn zawng zawng te pawh ka chhiar sen loh laiin vanah lawmman ropui tak ka tan a la buatsaih fan a ! Kan Pathian hi hmangaih Pathian a lo ni takzet tih ka nunah hian fiahin a awm mawlh mawlh mai ni.




Inkhawmpui chu Mission Vengthlang ah nghah a ni a, kan lawina Kohhran a lo ni lehzel nen kan tan pawh a remchang takzet.



Kan chhungkua chuan Aizawl lam panin kan chhuak ta a, Bawihpuia chu a muhil hlauh a, a tihzia phian mai.



Kawng chanve vel kan thlen hnu chuan a rawn harh ta a, "Ka fapa duat, i mutui em?" ka lo ti hluai a, a hawikual ruai hnuah anu awmah chuan a bei leh thak a, hnute a dap nghal vat. A nuin hnute a pek takah chuan tuihal hmel zet hian a hne ta dek dek a.




"I riltam em?" ka nupui lam hawi chuan ka ti vat a "Tam lo e, ka la puar ang reng" a lo ti ve vat a. Chawei kham atanga chhuak kan nia, chhun a la ni chiah lo bawk a, keipawh ka la puar viau.



Bawihpuia chu a rawn harh chiang ta a, Aizawl khawchhung kan luh hma chuan ka pawm a ngen ta tlat a, a tap ta rawng rawng mai, anu in"Bawihpui apa khan motor a khalh a, a pawm theilo che" a tih pawh chuan ka lam hawiin a ban a rawn phar tlat a, mittui luang zawih zawihin min rawn ban bawk si.




Kawngsir rem laiah chuan motor chu ka tiding ta tawp a, ka fapa min lo ban tawk tawktu chu ka pawm ta vat a "Ka duatpui, bang tawh rawh le" tih leh a hnunga chûl chu ka rual a, a bang nghal hmak. Pangchang zet hian ka awmah a bei kak a, a nu chuan "A phakar reuh zia kha" a lo ri hlak a, ka lo nui mai a.




A hnu deuhah chuan ka han chhaih a, tunah chuan a nui leh hawk hawk tawh. Ka malchungah dintirin a zakah chuan ka chelh a, awmze nei lo hian a rak ve nawk nawk a. A nu lo nui chu a nuih chhan hre map lovin a rawn nuih veleh a, a awmdan chu a lawmawm a ni tawp mai.




Darkar chanve dawn chutia kan inpawm hnu chuan a nu chuan a la hrang thei ta hram a, an in chhaih nui zui uar uar a, motor khalh pah chuan ka lo nui ve hawk hawk mai.



Kan in kan thlen chuan ka nu chu a ri hlut a, Matei leh ka pa chu room atangin an rawn chhuak vat a. Ka nu chuan Bawihpuia chu a lahrang nghal vat a, a lo duh ve mai bawk a.




"Ka duatpui, hmuh lo karin i lo va lian tawh ve" a ti hluai a, Matei chuan a lo chhaih zui ve vat a, Bawihpuia pawh a nui nghal ruah ruah mai.



Ka pa chuan "In lo tluang em?" a lo ti vat a, kan tluan thuin ka lo chhang vat a. Chutah ka nu chuan "Bawiha han intifai nghal daih rawh u, tihian Bawihpuia hi chu kan lo awm rih ang, a tlai em hi" a lo ti zung zung a. Kan lo hnial bik lo.




Intifai tur chuan room lamah kan inzui chho ta nghal a. Zuali chuan kan thawmhnaw ho chu khumah lachhuakin a thlep fel nghal zung zung a. Keiin ka kawr leh kekawr hlipin towel ka lo ban vat thung.




"Thawmhnaw ho hi ka lo remfel chhungin lo inbual la, i zawhah ka lo inbual ve mai ang" a rawn ti nghal zung zung a. Mahse ka lo hnial vat "Inbual rual ila kan zo hma a nimai" ka lo ti mai a. Khum a thu reng chung chuan a chal a rawn ti chuar tap ringawt a.




Ka pan hnai ta vat a "Ka nupui hian min hnial dawn em ni?" tiin mitmeng tawrhhlelhawm zet hian ka melh a, thinrim mitmeng lam erawhin ka melh hauh lo.



Ka ti deuh tlat bawk nen chutia ka nghah tlat takah chuan min hnial lui ta bik lo. Bathroom chhunga kan luh dawn erawh chuan min vau lawk nasa mai a. Mahse minute 20 vel a liam meuh chuan thleng tur ang chu a thleng leh vek tho.




Vengchhung ah kan awm tih thenawm khawveng ten an hriat chuan an lo lengkhawm tak tak hlawm a. Ka nupuiin a lo chiauau vat thin a, tu mai pawh chu kan inah an leng halh mai.



Bawihpuia pawh an rawn lawm thin viau mai a, ani lah naute nui duh ngang a ni a, chhuna a nuih nasat lutuk avangin zan lamah chuan a mutui thei viau.




Zuali nî, ka nî a ni ve tawh mai ang chu , ka ni Lansiami te pawh an rawng lang ve vat a. Bawihpuia chu a nuin bual a lo tum lai tak ani a. Chutia nî Lansiami a lo kal takah chuan Bawihpuia chu a bual ta a. Nau khawih a thiam khawp mai.




Synod Inkhawmpui ah chuan Pastor atan nemngheh ka ni ta a, Pro Pastor Zosangzuala kha Rev. Zosangzuala ka ni ta ! Ka chungah mawhphurhna tam tak a tlak belh tih ka hria a, mahse Pathian nen engkim kan paltlang chuan tha takin ka hlen chhuak ngei ang tih ka ring thlap a ni.



Min ordained zan chuan ka nupui nen Biakinah Pathian hnenah kan inhlan thar leh a, kan kawng hruaitu atana kan thlan hian min hruai zel dawn tih kan hrechiang dun takzet a, Amah belh chu kan tih makmawh a ni.




Aizawl kan cham chhung zawng chuan Bawihpuia chu kan chang mang lova, ka nuin a chang deuh chawt a. Thenawm khawvengten an lo lawm ve bawk nen zan mut hun tih loh chu kan chang mang lo a tih theih ang.




Kum a lo thar leh meuh chuan Bial vawn turte chu Synod lamin an rawn siam fel ta a. Pastor ka nihna anga ka Bial vawn tur hmasa ber chu Lengpui khua a ni. Aizawl khaw bul lawka thingtlang khaw pakhat ani a, mi vengva chin deuh tan chuan hriat loh chi a nilo, Mizoram in Airport kan neih awmchhun awmna khua a ni tlat.




January thla Pathianni tawp berah chuan Veledictory sermon ka sawi ta a. Lunglei khawpui bula thingtlang khaw pakhat hi ka tan chuan a va hlu em! Ka nupui nen kan intawnna khua leh Pathian inpuanna tam tak ka hmuhna khua kha a ni miau a. Ka nuna ka hriat reng tawh tur thil tam tak thlenna hmun a ni tlat !




Kohhran mipuite chuan min lo ui der thiam ve ngang hlawm mai a. Inkhawm banah chuan min lo chibai sap sap a, min ui zia thute chu an han sawi ve luam a, ka tan chuan an hlu takzet.




Kan kal hma zan chuan chhungkhat laina leh thenrual thate an lo lengkhawm nak nak hlawm a. Bawihpuia pawh naupang thenkhatin an pawm hrang daih a, a tlai ve em em zel mai ni.




Ka pizawn leh ka nupuite chu choka lamah an inkawm a, nakinah chuan an inhmu leh thei mai mai dawn si lova zanin na na na chu âm takin hun hmang dun sela tih chu ka duhthusam a ni.




Inleng te an haw kim meuh chuan zan dar 11 a lo pel der tawh. Keini pawh kan mu ve ta nghal a, Bawihpuia chu dar 8 velah khan naupang hovin an lo ti muhil daih tawh a, a tihzia phian mai.



Ka nupui min hnungchhawn zawnga mu chu a kawngah ka va kuah nghet salh a, nichin atang khan a ngawi char char a. A chhan chu hrilh kher ngai lovin ka hre ve tlat. A nu a kalsan daih tur hi hrehawm a ti viau dawn tih ka hriatpui ve thlap.




"Ka duat..." ka tih rual chuan "U Sangzual..." a lo ti ve chiah a, ka lamah ka kuai her a, a rawn insiamrem ve vat a, hnai zetah kan inmelh ta a "Ka nu hi ka ngai dawn e..." a rawn ti tham chhal a, ka awmah ka lo kuahbet vat.



"Kan la zin leh fo dawn alawm, Pathian zarah kan dam ang a in la inhmu zel dawn" hnem tum tak chuan ka lo ti ve ngial a.



Chumi zan chuan a nu chungchang velte chu kan sawi luam a, a mittui a rawn tla leh thin a, ka lainat tak tak ani.




Kan muthilh dawn hnaih chuan "Pathian kutah engkim kan kawltir vek thin kha, engmah lungkham neih loh tur, kan la inhmukhawm leh vat dawn" ka lo ti charh charh a, a pawm thiam ta viau mai.




Kan kal dawn tukah chuan kan beisei phak bakin thlah tu kan ngah. Engmah kan nih loh vei nen chuti taka mi an ngaihlu ve chu ka lawm takzet !



Ka nutei te chhungkua pawh an lo kal ve a, nutei chuan buaina a siam tawhlo hram a. Ricky-a pawh a lo kal ve a, ka nupui chu zawi tete hian a bia a, a fuih ve ngei niin ka hria.



Nu Rinkimi chuan thu tha tinreng min fah a, kan tan hian nû nih a tling asin ! Tun hun kan thlen theih nan hian a pawimawh lutuk tlat. A hnuk te pawh a ulh ve hialin ka hria. Sawmtluangi leh Zuali te pawh thu tha an infah ve luam a.




Ka pizawn leh ka nupui inkuah vang vang hnu chuan kan tum ram lam chu kan pan ta a.



Truck in kan hnungah kan bungraw phurin min lo zui a, kei leh ka nupui leh ka fapate chu ka car in kan kal thung. Bawihpuia chu Motor a chuang sual deuh a, a tap a tap mai a, a manganthlak tak tak ani. Mahse Aizawl khawchhung kan luh takah chuan a muhil ta hlauh a, a tihzia phian mai.




Lengpui kan thlen thleng chuan a muhil tluan ta zak a.



Zan dar 8 velah chuan Lengpui Pastor Quarter chu kan thleng ta a, min thlahtu an thahnem tluk zetin min lo hmuaktu te chu an thahnem !



Kohhran Hruaitute leh Thalai hovin min lo dawngsawng a, an felin an polite em em a. Kan bungrua te chu kan chet ve ngai hauh lovin an thiar nghal zung zung a. An zuan a zangin mi an lo dawngsawng tha takzet !



_________*_________*________*_________



(Naktukah hian ka zirlaia ka mamawh vel buaipui turin bazar ka ngai a, ka lo dah hman dawn lo aw. Next ah chuan A HMAWR KAN BAWK tawh dawn a. Zanin chu uina thute pawh a lo sawi lawk theih e😅.)


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:10 pm

LOVE COVERS ALL
By CVL Awmpuii


Last Chapter



Lengpui kan awm atanga thla khat chhung vel zet chu kan in lamah chaw kan ei lo a tih theih ang. Chawei a min sawmtu an indawt chho zut mai a. Upa ho inah chaw kan ei kim vek tawh a, Kohhran mipui atangin min duhsak a min sawmtute an kat ve nuk bawk a. Keini ve tehlul min lo ngaihlu thiam lutuk chu kan tan pawh lo hnar chi a ni lo. Min sawmna apiangah kan ei chhuak ve zel tawp mai ni.




Vawiin hi Pastor quarter, tuna kan in ni ta a chaw kan ei hmasak ber tur a ni a. Chawhmeh siam tur chu Pathian leh min duhsaktute zarah kan tlachham lo khawp mai. Thlai leh ilo an thar ang angte min rawn pe âwl lova. An khaw nun zia chu ka fak lo theilo. Midang duhsakna lantir an thiam takzet.




Ka nupuiin eirawng a bawl avangin kan fapa chu ka lo awm a, walker-ah a chuan lai chuan ka lo chhaih nui uar uar a, a nu eirawng bawl lai pawh a lo nui ri ve leh hak hak thin.



A hnu deuhah chuan ka pawm a rawn ngen ta a, min lo ban chuan rang zetin ka lo chelh vat a, walker atanga ka pawm chhuah rual chuan a nui leh ruah ruah tawh.




"Ka fapa duatpui..." ka tih chuan a pa hian ka hmangaih hle tih a hre ve a ni mahna ka darah chuan min lo kuahbet ve tai a, a mitmeng fiah zet chuan min rawn melh chho deuh kiau bawk. Chhaih leh a beisei tih hriat zet hian a rawn nui heu mai a. Ka han chhaih leh takah chuan awmze nei lo hian a rak ve nawk nawk a, a nui nasa hle bawk.



Nui hak hak chungin a nu chu sitting room lamah a rawn phei ve a, "Khawi , hnute ka lo pe lawk ang, a nui nasa sia a tui a hal tawh ang" tih leh kan lama kut phar a rawn rual a. Bawihpuia chuan a lo ban ve vat bawk.



Thutthlengah chuan thu thlain hnute chu an inpe ta a, Bawihpuia pawh a tui a lo hal hle tawh aniang a hne nghal dek dek mai.




A chal thlan deuh hliam chu a nu chuan a chhem sak hauh hauh a. Bawihpuia hian thlan a ngah ang reng a, ka nu chuan 'I tetlai ang mai a ni, nangpawh i nuih nasat lutuk hian i thlan a tla vak zel' a ti thin. A hmel chu sawi loh thil dang tam takah pawh min chhunna tam tak a nei anih chu.




An nufa hnute inpekna bulah chuan ka zuk thu thla ve a. Ka nupui chuan "Eirawng ka bawl zo tawh a, Bawihpuia hian hnute hne zo sela chaw kan ei thei a nimai" a lo ti zung zung a. A fapa sam chu a chûl sak thuak bawk. Kei chuan thil tam tak ka lo ngaihtuah leh hman tawh.




Hmeichhe âwm nêm kan tihte hi a tul hunah chuan an lo chhel thei khawp mai. A dawrawm zawk leh der dep zawk angin lang mah se keini mipa tha chak leh tharum ngah zawkte hian tluk lohna kan ngah takzet.




Nulat tlangvalna kawngah lah nise dai pelh leh dai sual inang rengah pawh a hmeichhia zawkin mualpho chan an chang fo a. An pahnih tihsual rah chu an seng zawk châng a awm fo bawk. 'Nuthlawi' tih thumal ri leh 'Pathlawi' tih thu mal ri hi a tawp 'thlawi' tih inang reng mah se kan hmuhdan a inpersan hle thung a.




Kei chuan mahni rila rah ngei laka mawhphurhna pawh la ngam lo mipa ai chuan mualpho pawh huama a thil tihsual rah seng ngamtu hmeichhe huaisen chu ka ngaisang zawk fan ang.




Hmeichhia chu dawih zawk angin lang thin mah se a hmangaih em em tan chuan a la awm ngai miah lohna chhungkuaa lawi lut ngam khawpin a huaisen a. A chhungkaw thar chu mi tha vak lo an nih phei chuan thil eng emaw hlekah 'mo sual' nih a hlawh leh daih ang lawi a. Hrethiam ve hauh lotu a pasal lah chu a lakah a lo lungawi lo ve nghal ngawt bawk a. An dinhmun khirh zia hi zir tham a tling hial a ni.




Chutihrual chuan hmeichhe tha tam tak karah hmeichhe rapthlak zet zet an kat ve nuk bawk a. Chutiang tawngtu mipa chu khawvela mi vanduai ber pawl an ni hial ang. Mahse keichu mipa vannei ti a sawi theih zinga vannei ber ka ni hialin ka ring. Pathian kaltlangin hmeichhe tha tawp khawk ka tawng miau a.




Chutia thil tam tak ka lo ngaihtuah lai chuan ka nupui chuan mitko mim rawn sân khum ak a. An nufa hnute tui inpe lai melh vung vung pahin ka ngaihtuahna ka lo kawm char char tih ka hriat zawm zat.




Ka lu ka thing vut a, dar chhin akin Bawihpuia lam chu a hawi thla veleh mai bawk.



"I chau em?" ka tih chuan "Chauh na tur a awm hlei nem" a lo ti var a, mahse a chau thin viau in ka ring. Pastor nih chuan inleng kan nei deuh zut reng a, thingpui lum ngai nen kan fapa buaipui a lo ngai ve lehzel bawk nen a phar buai thei viau mai.




"Ka nupui ni reng rawh" ka lo ti sup a, min rawn melh chho deuh ha, ka lo nuih suk takah chuan a rawn ner deuh nang a "Kan inla ril leh tan dawn a nimaw" a rawn tih chuan ka nui chhuak ta hawk hawk.



Bawihpuia hnute hne zo chu a muhil ta nghal a, thutthleng a kan muttir hnu chuan zanriah kan ei ve ta chauh a. Inkhawm zan a ni lo a, tihtur dang ka nei em em lo bawk nen a hmanhmawh thlak vak loh.



Kan eikham hnu chuan ka nupui hmun sengfel vel chu ka lo pui vat a, "Lo va thu rawh" min ti leh thin a, mahse ka duh bik der lo. Ka hman nikhua hi chuan chawei hmun sengfel hi ka pui ve ziah a, tul a tilo thin khawp mai. Mahse ka tilui tlat zel a, min hnial hlei thei ngailo.



Apron ka ban rual rual chuan min rawn chhuh vat a, "A mak thin e, ka ti thei ka tih thin kha, lo va thu hahdam rawh" a ti hlak hlak a, apron chu a hreng zui nghal zat a. A chet zawm nghal mawlh mawlh chu ding chungin lawm vak lo hian ka lo melh run run a.



Dawhkan a hruk mawlh mawlh lai chuan a rawn hawi deuh ha a, ka lawm vak lo tih ka mitmeng atang chuan a hrethiam aniang "U Sangzual..." a rawn ti hap a, engmah sawi lovin ka melh ngur a, "Bawihpuia lo va awmpui zawk rawh ka ti thei alawm" a rawn ti leh hap a. Rum nghutin a lamah chuan ka phei vut a, "Phelh rawh" a apron hak lai melh pah chuan ka ti nghut a, a thaw chhuak deuh halh a. A hnu deuhah chuan a rawn phelh ta a, ka lo ban vat "Keipawhin ka ti ve thei ka tih kha, rawngbawlna vangin inchhung ka luah lum hman tawk lo tih ka hria a, ka puih theihna che apiangah chuan puih che ka duh. Ka hmangaih che tih i hriat kha" ka ti charh charh a, apron chu ka hreng nghal vat bawk.




"Ka tithei asin le..." a rawn ti hram a, "Keipawhin ka thei alawm, ka duat duh che ka tih thin kha" tih leh a bianga tawh zeuh ka rual a, ka nui ri deuh suk bawk.




"Ka duat ve duh tho che sia" nur deuh nang pah hian a rawn ti halh a, a bengbulah kun hniamin ka zuk phun sup a, ka hnungah a rawn chum ri nghal kawrh mai.




"I sual thei e..." a rawn ti hlar a, ka lo nui mai a "Zanah min duat dawn nia" mit siai sak pah chuan ka ti leh hram a. Rum zeta min melhin "Thleng kha silfai hle la a nimai" a rawn ti vak a, ka chhan hma hauhin Bawihpuia mutna lam min pansan ta daih a. Kei ka lo nui chhuak hawk hawk tawh thung.




Zanah U Mafakan min lo bia a, a thianpa Sawmdawnga te Chennai an kal tur thu leh kan in a min rawn tlawh kawi tur thute chu a rawn sawi luam a.




"Hna thil vangin an chhungkua in an kal dawn a, an flyte a hma ang reng sia an in lama tukthuan an ei chuan an tlai dawn si a. Zingkarah an lo kal ang a, tukthuan in lo buatsaih sak nghal mai dawn nia" a rawn ti zung zung a. U Sawmdawnga te leh U Mafaka te hi High School an kal ho thin a. An inkawmngeih ve hle thin a, khang hunlai khan U Sawmdawnga pawh hi a rawn lenglut ve fo a. Mipa nelawm zawk zawk ni lo mah se misual tak niin ka hrelo. A hmel hi a rum ve hrim hrim a, hmeichhe tan chuan a hlauhawm tham ve ang.




U Mafaka vek chuan "I number ka lo pe a, a rawn be ve hrim hrim ang che. Tukthuan lo bawl kep chu in tan a harsa em lovang chu maw..." a rawn ti leh a "Harsa lo e, lo kal ngei ngei rawh se" ka lo ti ve vat.




U Mafaka nen kan inbiak hnu reiloteah U Sawmdawnga chuan min lo call zui nghal zat a, an sumdawnna chungchang leh Chennai an kal chhan turte chu min rawn hrilh ve luam a.




"Tum dangah chuan tukthuan ei sain kan kal mai a, mahse tun tum chu hma kan ngai sia. I û Mafaka khan Lengpui lama in awm thu min lo hrilh a, mi hrang in ni lo bawk a, kan rawn tibuai ta tawp mai che..." a rawn ti zung zung a. A inthlahrung ve viauvin ka hria.




"Min tihbuaina tur a awm miah lo ania, min lo tlawh chuan kan lawm zawk hle ang" ka lo ti ve vat a. Harsatna hranpa a awm lo bawk a kan inbe rem thei ta a. Naktuk zing dar 6 ah an lo chhuak ang a, dar 7 velah chuan an lo thleng hman mai ang ka ring.




Ka nupui chu ka hrilh ve ta vat a, a lo phur ngang mai "Hma deuhah tho ila lo inhmakhua lawk ila a that dawn chu" a lo ti hliai a, ka lo bu ve nghut nghut.



Bawihpuia muthilh hnu chuan thu ho tete sawiin kan titi leh a. Heihi kan zantin dan ani, inkuah rial chunga inkawm melh melh hi kan nuam tih zawng ania. Rawngbawlna vangin chhun lamah leh zan tir lamah ka hman ngai vak lova, tun ang hun hi inhawng taka kan titi theih vena hun a ni thin a. Kan nupa nun pawh a ngheh phah sawt thin in ka hria.




A hnu deuhah chuan a bengbulah ka zuk phun chhuak leh sup a, min rawn nuih rah rah mai. "Thleng silah ka awl che sia ka phu ve viauin ka hria" ka tih chuan a ner nasa ngang mai "Sil rawh pawh ka tilo a, i thuin i sil a" sawifuh inti zet hian a rawn ti a. A nghawngah hmai phuma ka lo nui chhuak hawk chu "Shiiit..." a rawn ti zawi sap a, Bawihpuia a muhil tak e.




A hmuiah fawpin ka chul kual nghal dan dan a, a danglam hneh veleh viau tawh, a rawn thaw chhuak deuh hak hak thin chu zawi ruih hian ka nuih rik pui suk a "Min duat dawn kha..." ka tih chuan mitmeng phelh phanga min melhin a nui ve ta tawp.



Ka fawp zui leh mial mial a, chhanna pawh ka dawng tha viau. Ka fiam châk deuh thut a, ka inlahrang dat, mitmeng da va riaiin min rawn melh nghal a. A thaw chhuak deuh ham ham bawk, chutia chet ka lak zawm mai tak si lovah chuan min rawn pawt tawk tawk a, a mitmeng atang chuan a duh ka hai mawlh lo. Mahse ka intipau khauh lui ve tlat a.




A dawhtheihnain a tlin ta vak lo aniang min pawthnaiin min rawn fawp hmasa ta zawk a, nui lum hawk chungin koham zet chuan ka lo fawp let nghal tawn tawn a. Kan duhthawh dun kher mai.




Thawh hma ngai viau si kha tlai deuhah kan muhil a, mahse zingah chuan thawh kan hai bik chuang lo.



Kan beisei ai hmain U Sawmdawnga te pawh chu an lo thleng a. Ka nupuiin a lo chiauau vat "In lo tluang em?" a lo ti var a, U Sawmdawnga nupui Puipuii chuan an tluan thuin a lo chhang vat a. An nupa hi kum 10 vel zetin an inthlau a, a nupui hi keiai kum 4 velin a naupang. An kum a inthlau viau e tilo chuan nupa kawp chawi rem tak leh inhmeh tak an ni.




An fate pathum mai bakah mipa pakhat, hmel fai vung mahse inchei duhdah zet hi an rawn hruai tel a, ka sawi thiam dan ber chuan a nghal hmel hle, a enga mah hmain tlangval a nih ka'n ring ngawt pek a.




Sitting room lamah chuan kan inzui phei a, inhmelhriattir na kan han nei zung zung a. An mipa, tlangval lo hruai kha an nau a lo nia, a hming chu Remruata a ni, a hawiher reng reng chu a thawven hmel viau.




An fanu upa ber chu Goldie a ni a, kum 6 lek mah nise a fin hmel kher mai. A nau chiah Brandon chu kum 5 a ni a, U Sawmdawnga nen an inang viau. An naupang ber chu mipa tho a ni a, la tê ve ang reng, kum 2 chiah a la ni a, a pang ber tih takah a pangchan hmel viau, a pa a inpawm tir deuh kak mai.




Ka nupui leh ka fapa chu ka han hmelhriat tir ve zung zung a. Puipuii chuan "Nupui i nei hmeltha hle mai" a lo ti var a, ka lo nui mai a. Ka nupui hi chu a hmêltha alawm, chutihrual chuan a hmelthatna phena a rilru thatna hi ka la duh zawk.



U Sawmdawnga nen kan lo inkawm lai chuan hmeichhe pahnihte chuan eirawng an lo bawl dun a. U Sawmdawnga sawi dan hmangah Puipuii chuan eirawng bawlpui hmana rawn kal a ti deuh tlat a ni awm e, nupui tha tak a nih ngei ka ring.





Bawihpuia chu walker ah kan chuan tir a, Goldie in a chhaih nghal deuh chawt a, thawm a chhuah leh nasa tawh mai.



Remruata chuan Reuben-a, U Sawmdawnga te fa naupang ber kha a pawm nawlh a "Juda Iskariot, pawnah va infiam ang aw" a ti lung lung a, choka lam atangin Puipuii a rawn teu nghal hlar mai "Lalremruat vawi eng zat nge khati khan ko tawh suh ka tih che" a rawn ti hlar a, Remruata lah chuan ngai pawimawh lo zet hian Reuben-a chu a chhuahpui nghal daih a.




U Sawmdawnga erawh a lo nui ruh ruh thung a "A û Puipuii chhaih buai hi a nuam tih zawng ania" a lo ti sup a, ka nui ve ta tawp. Mipa thawveng tak chu a ni phawt ang. Mahse misual anih chu ka ring lo.




Tukthuan an peih hnu chuan chawei turin choka lamah kan inzui phei ta hlawm a, Bawihpuia pawh a walker nen ka nawr phei ve vat.



Goldie te reuh khan a naute kut a silfai sak vek a, "Chawei dawn chuan fai deuha kut sil tur aw" tiin a naute pahnih chu mi ina awmdan mawi a hrilh pah malh malh bawk a. Naupangtê si mak reuh tak a ni.




Ka nupui pawh chuan "Kum 5 chiah a la ni sia, a va fing fel reuh ve" a lo ti hliai a, a pa chuan chhuan hmel deuhvin a fate inbuapui lai chu a lo en a. Chutah Puipuii chuan "Keini paw'n mak kan ti ve fo mai, a naute hi a duat thiam ang reng a" a lo ti vw vat a.




Lalremruata pek chuan "Ka zirtir tha a..." a lo ti sam mai a, chawei dawhkan kil chuan a thu thla nghal zat bawk. Midangho chuan kan awih lo tlang aniang kan lo nui tawp.



Tukthuan kan ei lai chuan kan chhungkaw chanchin ve ve sawiin kan titi a, sawi nuam kan ti tlang hle ni tur a ni. Chaw ei e ti lo chuan titi a kal tluang viau mai.




U Sawmdawnga chuan "Keichu a duh loh chungin ka nei lui a, ka tihlungawi loh deuh chuan haw sanah min vau zel a, a buaithlak duh asin aw, Sangzual" a rawn ti hluai a, an nuin rum zeta a melh na chu chaw bar mawlh mawlh pahin a nuih ruh ruh a. An nupa mak ve deuh na chu ka û sawi dan kalhmangah an nu leh pate sawi remna vangin an innei a, tunah chuan an inhmangaih viau tawh ani awm e.




Puipuii chuan "Zualte, nang chu i vannei hle mai pasal zaidam deuh neih ve hi ka châk ania" a rawn ti ve kher a. U Sawmdawnga chuan an nu thusawi dan vel chu huatah a la lem lo aniang a nuih a zat hmel viau mai.



Ka nupui chuan an nupa inchhaih kual dan vel chu a lo man thiam ve a ni chek ang chu "Pathian hian kan kawppui turte hi a duan thiam asin, mize inpersan deuh pawh A thuruat dan a nih miau chuan nupa kawpchawi rem tak kan ni thei zel a. Pathian them thiamna leh remruat thiam zia lanna ka ti mai" a lo ti ve ngial a. Chutia ka nupuiin thu tak zeta thu a rawn sawi takah chuan an pawm dun hmel ve viau mai.




Chawei kham chuan eihmun an tifel nghal zung zung a. Reilotê kan thut khawmuan leh hnuah Airport lam chu kan pan ta a.



U Sawmdawnga te chhungkua chu an car lo ken in an kal a. Keinin kan motor in kan zui ve thung, Goldie - in Bawihpuia pawm a chak tlat a, chuvangin kan bulah a chuang ve a. Seat hnungah ka nupui te nen an chuang a, Bawihpuia chu a pawm ve tai a, a chhaih pah reng bawk a, an nui ri avang chuan keipawh ka nui ka nui ve mai.




"Goldie" ka tih tak supah chuan ka lam a lo hawi vat a, front mirror atang chuan ka lo melh zauh. "Bawihpuia kha i duat bawk sia kan bulah lo awm ve daih mai la" ka ti fiam a, inngaihtuah ni awm tak hian a ngawi ve deuh vang vang a, ka nupui chuan nuihza insum zet hian a lo en a.




Chutah Goldie chuan Bawihpuia a pawmlai chu ka nupui malchungah a dah ta daih a "Ka naute'n û an nei tawh lo ang asin" a rawn ti hap reuh a. Ka nupui nen chuan kan nui chhuak ta hawk hawk a. A inti û ve hle ni tur a ni. Naupangtê ni chung si a a naute ngaihtuah nachang a hria chu ka chhuang ru viau mai.




"Bawihpuia chu i pawm duh vak tawhlo a nimaw..." ka lo tih chuan a lu a lo thing vat a "Ka pawm duh tho a, mahse ka duat vangin in inah min awmpui daih in duh sia...ka naute bulah ka awm duh bawk sia" rilru buai hmel zet hian a rawn ti ve nang nang reuh a. A ngaihtuahna ka lo tibuai ve reuh hle anih dawn hi.




Ka nupuiin "Bawihpuia hian û a nei ve bawk si lova a û lo ni ve tho mai la, i naute pawh i duat tho ang a" a lo tih takah chuan rang zet hian a bu nghat nghat a, Bawihpuia chu a ban leh ta vat a, a pawmbet lehnghal tai reuh a. Bawihpuia pawh chuan thawm a chhuah leh nasa viau tawh.




Airport kan thlen takah chuan a pa te awmna lamah kan va phei ve ta vat a. Hun tam a awm tawh loh avangin kan han inmangtha zui luam a. An kal chu a ni nghal mai.




Remruata khan an motor chu Aizawl lamah a khalh haw leh a. Keini pawh in lam panin kan inkhalh phei veleh ta nghal a.



Pathianin kaihhruaina kan chang a, kan fapa pawhin kum khat hmel a hmu ve teuh tawh hle a. Naktip mai hi a piancham pha phak a ni tawh a, a pi leh pu te'n pui deuh a lawmsak an tum nasa mai si a, keini kan haw chho hman dawn silo a, anmahni zawk an rawn kal dawn a. Helama thenrual thate nen chawhlui kan kilho ve ang chu.




Ka nu leh pa te duhdan tak takah phei chuan khilama ruai nena pui deuha tih rup mai kha an duh a. Mahse keini nupa chuan kum khat hmel a hmu hrim hrim tur pawh kha malsawmna tam tak a ni tawh tih kan hria a, lawm pui viau kan rilruk lem lo.




Zanah ka pizawn te'n ka nupui phone atangin min lo video call a. A ni pawh hian a tupa hi a atchilh thaw thang a ni a, a fanu neihchhun fapa neihchhun kha a ni ve miau rih a, thil awm lo pawh a ni hran lo.




Nu Rinkimi ho chuan Bawihpuia chu an rawn chhaih nasa mai a, ralkhat atangin ni mah se an rawn tih than dan ania, Bawihpuia pawh hian a hre viau tawh. Tunah pawh awmze nei lovin a rak ve nawk nawk a. A kut te chu a han vai ve lap lap a, ka pizawn te pawh chu an rawn nui nasa mai.




Rei fe an inlawm hnuah chuan ka pizawn chuan "Bawihte, in pa ka lo be lawk ang" a rawn ti ta a, ka nupui chuan a phone chu min lo pe vat a, ka lo ban ve nghal vat.



Bawihpuia a la rak bengchhen em avangin thlang lam veranda-ah ka kalchhuak a, "Aw hello" ka tih takah chuan Bawihpuia piancham lo thleng tur chungchang te chu a rawn sawi ve nghal luam a "Motor chuan hi ka zo vak tawh lova, lo kal chu duh viau mah ila ka rawn telpui ve lo mai ang che u. I nu leh pa te ka ring deuh tawp ta mai anih kha i hrethiam ang chu tiraw" a rawn ti nghal zung zung a. A âw atang chuan a inthlahrung ve viau in ka hria.




"A pawi miah lo ania, lo tel ve thei la chu duhthusam a ni na meuh mai a. Mahse hriselna ngaih pawimawh hi a tha ania. Pathian zarah kan dam ang a, han hlei kang deuh sela hun remchangah kan lo zin veleh vat dawn tho a" ka han ti ve luam a. A hriselna chungchang te chu ka zawt tel nghal luam a, a dam that lai tak anih hmel e. Ka nupui nû a nihna laiah ngaihtuah a, hmangaih ve chu ka tih makmawh a ni tlat.




Bawihpuia piancham lo thlen hma tukah chuan ka nu leh pa leh Matei te an rawn chhuk thla a. Aizawl leh Lengpui chu inhnaih viau mah ila an buai ve tho avangin han inkalpawh zung zung hi a theih bik loh va, tun hi helama kan awm hnu a an vawikhat lo kalna a ni.




Ka nu leh Matei chuan Bawihpuia a nuin a pawmlai chu an ban nghal zat a "A va lian tawh ve" Matei chuan a ti hluai a, "Ei a duh reuh a" ka nupui pawh chuan a lo ti ve vat. A ni reng lah tak bawk a, thil hrisel a ei theih ang tur kan pek apiang hi chu duh loh pawh a nei manglo.




Ka nu chuan a pawm zui nghal daih a, video call vela an inhmuh zin em avangin Bawihpuia pawh chuan a lo duh ve mai bawk a. An inchhaih nui nghal uar uar a, kan thawm a ring leh viau tawh.




Chutia ka chhungte an lo thlen takah chuan inleng kan nei ve nghal zut a, an lo lawm thiam ve em em mai a, kan tan pawh a nuam takzet.




Nilai zan inkhawmah chuan ka chhungte chu an han dintir a, Kohhran secretary in lawm thu a han sawi ve luam a. Chutia ka chhungte an lawm thiam em em mai chu a hlu takzet.




Bawihpuia piancham ah chuan zanriah min kilpui turin thenawm khawveng te leh kan hmelhriat hnai vai te chu kan sawm ve nual a. Kan ri ve deuh laih laih mai a. Lawmpuina thilpek te an rawn keng nual hlawm lehnghal a, a tul teh teuh loh asin mawle.




Pathian kaihhruaina changa kum kan tling thei hi a lawmawm tawk viau chuan ka hria.



Bawihpuia chu a nuin room lamah a thlak a, ka pain rawn lenglut ho a lo chiauau lai chu remchangah lain room lamah chuan ka va lut ve a.



An nufa chuan inthlak pahin an lo inchhaih nui nasa mai a. Nui chungin khum lama Bawihpuia mû, a nuin lotion a chulh mek chu ka va pan ve vut a.



"Ka duatpui..." ka va tih chuan a pa aw chu a lo hai lo nasa mai, a rawn hawi ve vut a, a kut rawn phar chhuakin a rak ve nghal nawk nawk a.



Ka nupui chuan "A che nasa lutuk a, duh ang pawhin lotion ka hnawih theilo, a chak bawk si" a lo ti halh a. A lotion ken lai chu ka lo ban vat a "Lo insiam rawh ka lo buaipui ang" ka tih tak thluamah chuan min lo hnial bik lo.



A fapa mu nui ruah ruah melh pah chuan "A pa thu lo awih rawh aw" a ti sap a, hrethiam ve ni awm tak hian a rak nawk nawk a. Kan han nui leh rih.




A nu insiam chhung chuan lotion chu ka lo hnawih zung zung a, ka be pah mawlh mawlh bawk a, hrethiam ve ni awm tak hian a ngawi kar a, ka nupui chuan a kawrfual thlak pah chuan "A phakar zia kha" a lo ti hlak a, ka lo nui mai a.




Lotion ka hnawih zawh takah chuan ka pawm kang nawlh a "Apa thu kha a awih alawm tiraw" ka tih chuan a nui hek hek mai.




Kan fapa piancham phaphak lawmna chu tluang takin kan nei zo thei ta a. Ka pa in Pathian hnena lawmthu sawi tawngtaina a nei thlap bawk a. Kan fapa nun kawng hruaitu atana kan duh ber chu Pathian a ni miau a, a tette atanga Pathian hriatpuina thlapa ke pen zirtir chu kan tih makmawh a ni.




Chhun lamah a tal chau bawk a, zanah chuan a mu hma ang reng hle a. A luchungah kut nghatin ka tawngtai sak a, hei chu kan zantin dan a ni a. Ka tawngtai sak laia lo harh chang a neih pawhin ngaiah a nei ve tawh aniang a chesawn ngai miah lo.




Inlengte an tin hnuah chuan kan intifel nghal zung zung a. Kan intihfai zawha kan hman ve meuh chuan zan dar 11 a lo ri thuak tawh.



Bible chhiar a sermon ka ziah lai chuan ka nupui chu ka bula chair ah chuan a rawn thu thla a, "Zanin chu ka nu te an awm tho bawk a Biakinah va kal ila" a rawn ti zawi sap a. A thil rawn rawt chhuah chu ka lo hnial lo kher mai. Bawihpuia a awm tawh avang hian Biakinah kan tawngtai reng hman tawh lova, thla khatah vawinga vel tal hi chu Bawihpuia hruai pawhin kan va tawngtai thin a. Mahse kan nupa chauha kal chu kan nei mang ngai tawhlo.



Ka pa te bula kan sawi chuan an lo pawm khawp mai "Va kal ru, Bawihpuia chu kan lo veng mai ang" an lo ti nghal zung zung a.




Keini pawh kan inzui chhuak ve nghal mai bawk a. Kan Biakin hi kan quarter bul lawk, chil chhak phak maiah a awm a. Kan tan kal harsa a ni hran lo.




Pathian hnenah min hruaina zawng zawng avangin lawmthu kan sawi a. Kan nun kawng min hruai zel turin kan ngen tel bawk.




Ka pizawn tan hriselna tha tak kan dil a, ka nupui mitmeng atang chuan a nu a ngaihzia hai theih a nilo.



Biakin atanga kan chhuah hnu chuan engmah sawi lovin min kuah nghal thlawp a, nghet zetin ka lo kuah let ve vat. Zan a rei tawh avangin vei vak an awm tawh lova. Kan awmna lai chu a thim deuh bawk nen midang pawh awm mah se min rawn enchiang fe anih loh chuan min hmu kher lovang.




"Ka duat..." ka ti sup a, ka âw a hmangaihna tam tak lang chhuak hi chu a hre fo tawh ang, hriat nawn tir ka duh fo bawk.



"Ka nu ka ngai lutuk..." a rawn ti tham chhal a, ka lo kuah nghet sauh thung. A nu hi a ngai hle tih ka hre thin a, mahse vawikhat mah a la sawi chhuak ngailo. Ka rilru tih hrehawm a hlauh vang tih ka hria a, keipawhin ka haider sak fo. Chutianga a lo sawi chhuak ta chu a ngai zual hle ni tur a ni.




"Ka duat..." ka ti hulh a, engmah tih theih ka nek rih lo chu hrehawm ka ti takzet. Theih ni sela tunah hian a nu bulah chuan ka hruai nghal ang mawle. A hlim vang ni lova a mittui tlak hi ka phal ngailo.




"Engtin nge kan tih ang aw...karleh hun remchangah kan zin mai dawn em ni..." duat zeta tih pah chuan a sam chu ka fawp tawk a, a rawn zuau zual sauh emaw tih turin a rawn tap chhuak zui hlap hlap a.




Ka tihngaihna hre bawk si lo chu nghet zeta kuahin ka lo fawp leh tawk thin.



Chutianga rei tawk fang a tah hnu chuan a inlahrang dat a "Ka ngai...ka ngai lutuk a..." a rawn ti deuh tiau a, a mittui luang pherh deuh niai chu ka lo hruk hul sak thuak a "Ka hria e...ka hria e...kan zin vat dawn nia" ka lo ti dam thluam a.




A insiam that hnu chuan in lamah kan inzui haw ta a, a mitmeng bui deuh lak vang chu ani mahna ka nu chuan a lo en duh hle a.



"Nu, pa ka mu tlang nghal mai dawn sin" nui lui var var pah chuan a ti a, ka pa chuan ngaihtuah hmel zet hian a melh run run a,mahse engmah zawt buai lovin "Va mu rawh i chau ang" a lo ti dam thlup a.



Room-a a luh hnu chuan ka nu chuan zawi si, fiah zet hian "I hau em ni?" a rawn ti nghal tawng a, ka lo rum nghut. "Tap hrep hmel a pu alawm" ka pa pawh chuan a lo ti ve hluai a. A nu chungchang vang anih thute chu ka hrilh ve luam a, ka nu leh pa chuan an lo hrethiam khawp mai.




Ka pa chuan "In inneih hma pawhin a nû a hmangaih zia chu keini aiin i hriatthiam pui zawk daih ang a. A nû vanga mualphona a tawh zawng zawng te pawh kan hre ve vek a. A nû ber chu a tha ta cheng a, in inneih zui leh nghal daih si a, nufa inhmangaih tak an nihna laiah a ngaih vanga a tap pawh chu a âwm viau mai. I dawm thiam hle a ngai dawn ania. I rawngbawlna kawngah heti khawp hian a thlawp tha che a, hmangaih ngawih ngawih hi a phu ania" a ti ta duah a. Ka pawm zawng tak a ni.




Min hmangaih vangin a nû a hmangaih ngawih ngawih kha a kalsan ve ania. Duat let a hmangaih taka enkawl chu ka tih makmawh a ni.




Mu tura ka va luh ve hnu chuan pangngai zetin min lo nuih var var a, ka lo nuih ve suk a. Ka kawrhlipin a bulah chuan ka zuk inthawlh ve nghal a. A kawngah kuah nghet deuh salhin a chalah ka fawp vang vang a. Kan fapa muhil chu ka thlir leh tê tê a, a mutui viau mai.




Ngawi dun rauh rauh chungin kan inkuah deuh chial a. A hnu deuhah chuan "Ka duat" ka ti sup a, ka thusawi a ngaithla tih lantir nan ka awm chu a rawn tauh dat a.



"Karleh lamah chuan i nu bulah kan zin dawn nia" ka ti leh sup a. Chutah a rawn insiam tha deuh sat sat a, a tho kang deuh uaih a, inbengkang pahin min rawn melh chhuk ran a "U Sangzual, nichina ka tah avang khan ka tihpalh aw...ka lo insum hman lova. I rilru ka tihrehawm viau ang" a rawn ti hliai a. Ka awmah ka pawt bei leh dat , a sama fawh tawk pah chuan "Ka bulah chuan pangchang em em zel la ka duh ka thin kha, ka duat em em zel ang che. I nû i ngai lutuk tih ka lo hrethiam lo erawh pawi ka ti viau" ka ti chhuak hulh a, nichina a tah lai kha ka ngaihtuah let a, ka inthiamlo takzet.




A lu a rawn thing deuh nak nak a "I thiam loh a nilo, ka lo tahkhum chiam che kha ka thiamlo zawk. I rilru a hrehawm viau ang. Zin kher pawh a ngai rih miah lo ania, nichin kha chuan ka rilru a rawn no thut vang mai mai" a lo ti zung zung a.




Zin pui chu ka la tum ruh fan fan a, ka sawi leh chuan min lo hnial veleh tlat tawh "Pathian zarah kan dam ang a, hun remchang a la awm mai ang. Tun thla chu Kohhran a in buai lai tak ania, i rawngbawlna tikhai lak zawnga khawsak ka duh miah lo ania" a rawn ti ve tlat a. A ni lah tak bawk a, Kohhranin hmachhawp chi hrang hrang a nei a, kan buai lai chu a ni.




"Kan zin thei tho alawm" ka lo ti ve ngial a, mahse thudang daih a rawn sawi ta a "Min duat tho a, i fapa nen hian min duat em em reng la kan duhtawk rih viau" nuihzat hmel deuha a rawn tih chuan ka lo nui ve tawp. Chutihrual chuan ka duatna a hrethiam lutuk chu ka lo lawm viau. Duat ani tih leh hmangaih a ni tih hi inhrechiang hle sela ka duh.




Kan chhungte haw chhoh tak hnuah chuan kan chhungkaw bil chuan kan awm leh ta rak rak a. Bawihpuian min tihlim bawk a kan lung chu a leng em em hran lo. Thenawm naupang ten an rawn leng ve reng bawk a, an rawn awm thin a, ka nupui pawhin inchhung sek rek khawihna hun thawl a ngah phah a, a tihzia viau mai.





Ka rawngbawlna kawngah pawh hmasawnna tam tak kan hmu a, Kohhran mipuite min fak derna te chuan chakna tam tak min pe ve thin. Pathian rawngbawl kan nihna zawnah Kohhran rawngbawlna a tel lo theilo a. Pastor ber inhmuam up tun kha thil nih dan tur a ni kher lova, inpawh tlang taka kan awm theih nan mi nelawm tak nih ka tum ve reng a. Tu tan pawha buaina leh harsatna thlen ngam ka ni vein ka hria. Ka nupui lah nise midang biang biak a thiam a, a nelawm em em a, thalai atanga kum upa lam te thlengin a kawm nel thiam vek a, fak a hlawh thin ve viau. A pasal hian ka chhuang hle bawk.



A pangpar khawi te hi nu ho hmuhnawm tih a tling thin a, a pot siam pawh a sem chhuak nasa narawh. A nuam tih ber a ni a, a hunawlah a la siam ve reng thin a. A thuziah thin 'Love Covers All' tih kha chu ka chanah a tla a, ka kutziak a duh thin avangin ka ziahpui ve ta fo mai.




EPILOGUE




Inkhawm kan bân rual chuan ka nupui dul puar ve lah leh ka fapa te min lo nghahna Biakin sira cooler an hunna lam chu ka pan vut a. KTP hla zir tur innghak khawm tih loh chu an haw vek tawh.



Ka fapa tui in khalh khalh chu "Ka duatpui..." tiin ka va au a, a rawn hawi vat a, mahse rum zetin min melh. A ngaihna hrelo zeta ka nupui lam ka hawi chuan nuihza insum zet hian min lo melh a.



Ka va pan hnai vut a, Bawihpuia chu pawm mai ka tum a, a petek dawrh a, quarter lamah a tlan zui nghal khut khut. "I tlu ange" a nuin a tih zuina pawh chu a ngaithla zawm tawhlo. Kum 3 a ni ve tawh a, a kum rualpui dangte aiin a fing ka tilo theilo, a tawng pawh a fiah deuh kak a, lam thiam loh a nei mang lo. Tlemin enkawl a harsa ve hret tawh a, thil duhdan bik te te hi a nei ve reuh a, a inti tlangval em em bawk. Mahse keini a nu leh pate bulah chuan naute nuih duh tak ang kha a la ni reng.




In a tlan thlen takah chuan ka thaw huai mai, a tlu lo hlauh e. Ka nupui lam chu ka hawi vat a, min lo nuih var var a.



"Tinge khatia a awm a?" ka tih chuan "Amah i zawt dawn nia" a lo ti vat. A kuta ka va chelh rual chuan a hawikual vat a, Thalai hla zir tur ho Biakin chhungah an lut tawh tih a hriat rual chuan thaw huai hmel a pu. Nupa ni mah ila mi mit tikham tur ang zawnga awm hluak hi a duhdan a ni ngailo.



Inkai rialin kan in lam chu kan pan a, "I kawng a kham em?" ka tih chuan a lu a lo thing vat a "A vawikhatna a ni tawh lo bawk awmdan ka thiam viau mai" a lo ti mai a. Nau kan keng leh tawh a, thla 5 a ni veleh tawh. A rai hmasak ang lo takin raino luak chhuak ang kha a nei vak lova. A thil ei a tui em em reng zel a ka lawm ru viau. Thei thur leh vur a eichak reng zel a, thei thur ei chu thil hrisel a nih avangin ka pawiti vak lova, mahse vur ei reng erawh remtih loh chang ka nei. Ka lei khawl hnem chuan a ei hnem a nimai a, phal loh chin ka neih avang hian a chang chuan a titau bar bar zel. Mahse naupangchhia a ni lova a tana tha ber tur ka duh vang ani tih a hria a, kan intilungawi chawp veleh mai thin.




In kan thlen takah chuan room ah kan inzui lut nghal a. Bawihpuia chu khumah a lo inlukhup hlun a, a nu chuan "Khawnge Bawihpuia hi?" a han ti der vel a, a chechang duh bik thak lo, nuihza insum zetin a nu nen chuan kan inmelh a.




"Ice cream ei san ang aw" ka tih takah chuan rang zetin rizai chu a rawn tlawh hlim a. A nu nen chuan kan nui chhuak ta hawk hawk.




Inthlak miah lovin khumah chuan a lo mu a, anu in ban mai a tum chuan "Lo Inthlak rawh ka lo buaipui ang" ka ti sup a. A dul a len tawh avang hian chet a harsat dueh thin a, Bawihpuia naupang hrisel harh lutuk chi a lo ni bawk nen a khawih tam vak ka remti lo.




A inthlak zui ve nghal mai bawk a, keichuan Bawihpuia chu pawm tho mai ka tum a, mahse ka ban a lo vai per nawk mai. Ka lakah lungawi lohna a nwi tih hriat zet hian rum deuhin min melh a, a nu inthlak lai lam chu ka melh vut a, min lo nuih tawp.




Bawihpuia chu ban luih mai ka tum a, a inlukhup leh nghal hmak. "Ka duatpui..." ka ti sup a, a chesawn duh eih lo.



Chutah ka pheikhawk chu tlawh thlain khumah chuan ka lawnkai ta a, a puansin chawp chuan ka pawm kang nawlh a, a lo tal ve nasa mai.



Ka pawm ngheh tak tlatah chuan a muhil der nghal hmak anih chu ! Ka auh lawm lawm pawh chuan a rawn meng duh thak lo. A awmdan chuan ka nuih a tiza ru viau mai.



"I pa lakah hian lungawi lohna i neih chuan min han hrilh teh le" ka ti dam ta thluam a, chutah a rawn mengchhuak nghal kiau a, lungawilo tih hriat zet hian "Thu i sawi rei em anih kha" a rawn ti pawr nghal hlur a. Min melh rum zia lah chu !



A nu a rawn nui chhuak ta hawk hawk a, "Thuthmunah a phun a phun a, chhuah ka phal si lova, a ning tawh bawk sia a lungawilo anih kha" a rawn ti zung zung a.



Ka thusawi rei vangin ka fapa a titau ang tih rin ngaihna pawh ka lo hrelo. Kan chhangchhe ve viau tawh niin a lang.



Inkhawm kan kal hma khan "Apa...tawi deuh sawi rawh aw" a tih ve ngei tak kha mawle. Naupang na na na chu thusawi rei kha an lo ning a nimai thei, mahse darkar chanve vel bak ka sawi lova, rei pawh ka ti hran chuanglo asin mawle. Naupang tan chuan a lo ninawm tham a nimai thei a ni.




"Ka sawi rei loh em kha" ka fapa melh chhuk run pah chuan ka ti sup a, "I sawi rei lutuk" min lo tilet erh anih chu. Rum zetin min melh a, a thinrim hmel viau mai.



A nuin a lo khap ta vat a "I pa tawngkam vinin be suh" a lo ti fiah fak. Heichu ka nupui tih ziah dan a ni. Ka duat lutuk vang hian min vin let chin zeuh chang a nei thin a, a nuin a lo khap tawh hi chuan a tilui ngam tawh bik ngailo. Tunah pawh ka awmah hmai a phum nghal kak a, a tap zui nghal dawn tih ka hria. Ka ngaihtuah lai mek chuan a rawn tap chhuak ta reng a.




"Shiii... tlangval an tap ngailo, duatpui" ka lo ti sup a, ka âw ka dam zet vang chuan a rawn tap chhuak uar zual sauh a, a nu chu kawng dawm pahin a lo thaw chhuak nghal halh, khum lam a rawn pan zui a.




A rawn lawnkai ve hnu chuan Bawihpuia lu chu a rawn tuai zauh a, aw ka dam deuh zawk hian "Apa vin vak loh tur ka tih thin kha" a rawn ti dam thlap a. Bawihpuia chu ka lo pawm tha sauh a, a rawn hawi chhuak a, mittui tla hliam chung hian min rawn melh a, ka lo tuai hul sak vat.




Pangchang zet hian min ngheng tha salh salh a, a nu chuan thu tha a lo fah zui mawlh mawlh a "Apa khan Pathian thu a sawi a, phone-ah thil chi hrang hrang rei tawk i en pawhin i nin ngai miah loh kha, 30 minutes vel chauh a sawi a, chuti chung chuan i thinrim khum vak a. Pathian thu sawi chu nin loh tur, chuti lo chu Setana pawl i ni mai ang. Pathian chuan pa te vin vak vak a phal lo ania" a lo ti dam thlap a. Bawihpuia chu a ngawi reng tawh thung.




Kan inthlem lungawi takah chuan a thawmhnaw chu ka thlak sak zung zung a. Naupang rilru thianghlim tih takah kan inchhaih nui leh nasa tawh mai.



Mut hmunah chuan a nuin Bible commix book a chhiar sak a, Mosia chanchinte, Josefa chanchin te, Nova chanchin te chu a hriatthiam dan tur angin a hrilhfiah melh melh a. Zawhna khirh khan zet zet min zawt leh tawh "Mosia te khan tinge tuipui sen kher an kân, a pawl te ni zawk se" tihte chu a zawhna siam duhdan ania. A nu nen kan innuih kan innuih thin, tun hunah hian la hrethiam vek lo mahsela nakin zela a nunkawng hruaitu tur a ni a. Theihtawpin Pathian hriatna kawngah kan kaihruai ve chuan ka hria.




Fate enkawl hi a lo harsa hle anih hi ka ti ta. Sawi mai mai chi ni lovin a taka tawn buaka hriatthiam chi niin ka hria. Kan lo duatin kan lo hmangaih a, hauh phal loh te pawh hi a âwm ka ti ve viau mai. Mahse a thatna tur chuan ka hau hreh hauh lo. A lungawi loh vanga min han vîn ve chiam chang nei thin mah se a nuin a zir bawk a, a lo khap vat zel a, a tilui ngam ngailo.




Thil pawimawh tak pakhat chu a nu hian min zah em em a, ka fapa pawh hian a chhawm tel ka tilo theilo. Nu te pawimawhna a lang chhuak thin ka ti mai. 'Ti suh' ti a thu ka pek tawh chuan a tilui ngam ngai lova. Ka duat viau chung hian naupang te la ni mah se min zah ve hle chuan ka hria. In hlauh tir erawh ka duh hauh lo thung.




Vawiinah kan zin dawn a, kan zinna hmun tur chu khawi dang mah ni lovin ka pizawn te khuaah a ni. Lengpui a kan awm hnu atanga kan vawithum zinna tur chauh a ni a, tum khat chu zin satliah kan ni a, a vawihnihna chu ka nutei boral vang ani ! Tun tumah pawh ka nutei vang thovin kan zin leh dawn, a lungphunna hun hmanpui turin a ni tawh thung ang.




Ka nutei thihna hian ama tan malsawmna tam tak a kengtel tlat.



Khami ni a Pa Zaia thusawi kha ka theihnghilh theilo, ropui ka tiin ka hnuk a tiulh fo thin.




"Pathian hnenah ka dil a, pekin ka awm a ni" tiin bul a tan tete a, a thusawi tur kha kan lo ngaichâng ran hlawm a. Kan rin loh lam daih thil a rawn sawi ta anih kha!



"Ka nupui hian Pathian hmel a hmuh theih nan zantin ka dil fo a. Ka hmangaih em em a, vanram kawngkhar a lut zo lo mai ang tih kha ka hlauhpui thin. Khawvela kan mi hmangaih takte tel lo chuan vanram pawh khi a nawm zawh loh ka ring thin a. Kei ka luh laia chatuan hremhmun a pan bik tur kha ka ngaingam lo thin a. He khaw mite chuan a khawsak zia leh awmdan zawng zawng in hriat kha, nu fel tak leh rilru tha zawk zawk a ni hran lova. Midangte tana harsatna leh buaina thlen kha a hnapui ber anih kha. Zan tam Pathian hnenah a tan ka dil thin a. Min chhanna chu kum chanve hnuah ka hmu ta a, ka duhdan diak diakin min chhang lo mah se a tana tha tur ani tih ka hailo. Ni e, chhul cancer a ni tih a inhriat chhuah atang khan a nun thlak danglamin a lo awm a tih theih ang. A tirah chuan a in awih duh lova sual a chhuah lui zel a. Mahse thla khat a liam meuh kha chuan Pathian hnenah tuihalna tak tak a rawn hmu chho tan ta a. Thlahnih a liam leh meuh chuan a natna vang khan lawmthu a sawi thei ta asin. Pathian hnenah khan 'I lam a hnaih theih nan engpawh ti la ka pawm dam ang' ka ti thin a. Natna hi Pathian min pek a ni ka ti kher lo, mahse mihring siam that nan khawdur a ngai a, chutiang chu kan chungah a lo thleng a ni ve mai. Dam tha vara a awm lai ai khan natna khuma a mut hnu khan a hlim thu min hrilh thin asin. Tunah chuan chatuana nunna nei turin a lei taksa a thlah a nimai. Ka duhthusam thin ang ngei mai khan vanram kawngkhar ah min lo hmuak ta thung dawn anih hi. Pathian hnena lawmthu sawi mai hi kan tihtur ani" tiin a nupui ruang chungah khan Pathian that zia a sawi anih kha !



Khami ni a kalte kha mittui tla lo kan awm lo, keipawh hnuk ulh teuhin a thusawi kha ka ngaithla a, ka nupui phei chu a tap nghe nghe.



Speaker pakhat thusawi ka hrechhuak zawk a "Kan hmangaih tak ten Pathian an hriat loh va, sual kawng an zawh chuan A hmel an lo hmuh ve theih nan natna pawh dilsak mai tur. Accident tihbai awm taka an thih a, chatuan hremhmun a an kal ai chuan natna tihbaiawm tak Pathian hnena inlam letna hun an neih theih zawkna turin dil sak ila. Chatuan nunna an neih theih nan chuan chu tluka hlu a awm chuanglo" a ti anih kha ! Pa Zaia tawngtaina nen pawh chuan a inan duh hmel viau.




Kan hmangaih tak ten Pathian hmel an hmuh theih nan chuan lei hrehawmna an lo tawrh pawh phal sak tur a lo ni tih a tilang chiang takzet.




Aizawl atangin ka nu leh pa, Matei leh U Hlimi te chhungkua pawh an rawn kal ve dawn a. U Mafaka te chhungkua pawh an awmna khua atangin an kal ve dawn a. Chhungkaw inhmuhkhawmna ang reng a ni mai ang chu.





Khua kan va thlen chuan Nu Rinkimi te in kawtah min lo hmuak deuh laih a. Kan awm laia naupang te pawh kha tleirawl an lo ni tawh a, mi an lo la hre ve ngang mai. Bawihpuia chuan zawhna mak sak zet zet a nu a zawt nghal a, tha takin a fapa chu a lo chhang ve zel bawk.




"I kawng a na em?" ka nupui lam hawi chuan ka ti sup a, a lu a lo thing vat. Nau pai laia zin veivak ka remti vak lo nain loh theih loh thil a ni ve a. Tluang takin kan thleng ta phawt chu ania.




Ka pizawn leh ka nupui chu an han inkuah vang vang a, Bawihpuia chu Sawmtluangin a lo pawm nghal vat. Video call in an inbiak zin mai bakah a hmaa kan zin tum pawh khan a tlangnel nghal mai a. Naupang fel ve tak chu a ni.




Nu Rinkimi chu Nu Rinkimi a ni ka tih thin kha, ka nupui dul puar lah a hmuh chuan a uang leh viau tawh mai "Patling fa pahnih nei i van ni teuh tawh tak em!" a ti thluk duai a, kan tun hma nun hrethiam chin chu an lo nui dar dar a, keini nupa pawh inmelhin kan nui ve ta tawp.




Ka pizawn inah kan innghat a, ka nu te ho chu Nutei te in lamah chuan an innghat a, U Hlimi te chhungkua chu Nu Rinkimi te inah an innghat thung. Midang pawh an lo inhawng em em a, U Mafaka te pawh Nutei te thenawmah an innghat a. Kan chungah mi zawng zawng chu an lo tha hlawm ngang mai.




Bawihpuia chu naupangho chuan an lawm ngang mai a, kan thlen tirh atang khan an la hrang nghal daih a, motor chuan chauh pawh a nei velo aniang ka ti mai, a bo nghal daih.



Ka pizawn chuan "In chau awm sia intifai ula in duh leh mu nghal daih ru" a lo ti vat a. Keichu ka chau vak lo nain ka nupui chu ka ngaihtuah viau, a chau viauin ka ring.



Kan nupain kan inbual rual a, ka nupui che tha hlei theilo chu ka pui a, Bawihpuia a pai lai pawh khan ka bual fo a, a zak tit tet duh tawh bik lo. Nupa kan ni a, zahna tur a awm lo reng bawk a.



Kan inbual kan inthlak zawh chuan Bawihpuia chu Nu Rinkimin a rawn pawm lut a, "Zualte, mutsan daih rawh u, Bawihpuia hi chu kan lo buaipui mai ang" a rawn ti zung zung a. Ka nupui chuan "A harh teh mai nia aw" a lo ti hliai a. Ka pizawn a lo nui hawk hawk "Naupang harh kan kawl khat alawm, a lawmawm viau zawk ang. Sangzual, va muthilh pui rawh a naupai a rit ve tawh bawk chau lutuk ang, Bawihpuia chu ka riahpui mai ang" a lo ti zung zung a.




"A tihbuai che u chuan min lo ko mai dawn nia" ka ti ve ta sup a, Nu Rinkimi ngaihdan a lo nilo nasa mai "Engah nge maw min tihbuai ang le...over viau lo mai teh, mihrang ang maia han tawng, va mu vat vat mai teh u" a lo ti hluk hluk a. Ka nui ta tawp.



"Bawihpui, kan mutsan dawn che ania aw..." ka tih chuan ka fapa chu a lo bu nghat nghat a "Api bulah ka riak dawn" a lo ti ve vat. Naupang te si hi a tawngkam a felfai thlap thin reuh a, mi a tibuai lo ve chiang a ni.



Ka nupui mu tur chu ka pui vat a, a room ni thinah khan kan mu a, a te em em lo a, a lian lutuk bawk lova kan nupa chuan kan leng tawk viau.




A dulpuar lah chul sak hauh hauh pah chuan a muthlih hun ka ngaichâng a, a chau ve hle ni tur ani a muhil nghal vat mai. Keipawh ka muhil zui ve nghal mai a.




A tukah chuan Nutei te in lamah kan chhungin kan va phei a, ka pizawn leh Nu Rinkimi te chhungkua pawh tiamin kan va phei a.



Arinin min lo chiauau vat a, fanu an neih hnu khan fapa an nei leh a, kum khat a ni veleh der tawh. An unau chhang a zing bawk a, an chhangchhe ve viau mai.




Bawihpuia chu a pi Thapuii bulah a tap deuh chawt a, a pi Machhani erawh mikhual chiauau in a buai viau mai a. A tupa pawh a ngaihtuah tha hman rih lo.




Ricky-a pawh a lo lang ve a, ani pawh hi a pa khan kan insawn hnu lawk khan a boralsan a. Kan telpui ve hman ta lo kha ania, mahse kan zin hmasak berin kan va ral ve a, anu pawh a lo lawm thiam ve viau mai.




Ka nupui a hmuh chuan a rawn nui vur vur a, "Chhangchhe pa leh chhangchhe nu nih chiah in hmabak" a rawn ti a, ka nupui chuan "Nupui nei ve tawh rawh" a lo ti hlak a, a lo nuih liam san mai a. Mak deuh chu Ricky-a hian ngaihzawng a neih awm pawh ka hrelo, Gracy lah kha a hnawl fithla thak a, heti hian a that that hian a tha ve tawp mai a. Kan Sawmtluangi ang deuh hi a nimaiin ka hria. Sawmtluangi pawh a hma ang chiahin ngaihzawng lam a la hawi thei meuh lo. Nu Rinkimi phei chu a lakah a beidawng tawh a ni awm e.




Lungphunna programme chu tluang takin kan zo a. Pa Zaia chuan ruai kilpui theuh turin a kalte zawng zawng chu min sawm a. A hmel a lo tar ve deuh hlek tawh a, a khawhar ve hle in ka ring. Kawppuite sûn chu dar lehlam sahthlak ang an tih kha.




Gracy leh Matei te chu kan thutna lamah an rawn phei a, Gracy chuan min lo nuih var var a, ka lo nuihlet ve suk.



"I dam tha em?" ka tih chuan a lo bu nghat nghat a, ka khawngaih viau mai. Tihian a nuin a awm loh san der chu a ni tawh mai si a. Mahse Arinin a dawm thiam em em a, a nu chan a chang a, an inngeih viau tih Nu Rinkimi atangin ka hria a, thla chu a muang deuh.




Ruai kil tura kan inbuatsaih lai chuan kan nupain Sawmtluangin min rawn ko a, "In fapa saw rawn en lawk teh u" nui dir tlak tlak pah hian a rawn ti a. Pawn lamah chuan kan zui ve vat a.




Bawihpuia chu fatu ho kiangah a lo awm a, no lianpuiah antlak tui an lo hawp tir hi a lo nia. An bulah thuin a lo in ri khawlh khawlh a, an lawm viau aniang an nuih hawk hawk a, a nu nen pawh chuan insum hman lo lekin kan nui chhuak ta hawk hawk.




An sirah ka nu leh ka pizawn te an lo ding ve bawk a, ka nuin "A pa tetlai a chhun anih kha, antlak tui a hawp ri khulh khulh zel" a tih ri chu kan va hre thei.



Sawmtluangi chuan "A no thum inna a ni tawh, tisawn a dil belh zel a" nui hawk hawk chung chuan a lo ti a, ka fapa hi chu a dangdai thin mange.



A nu nen kan lo thlir reng min rawn hmuh takah chuan a no dahin kan lamah a rawn tlan phei vat a, "Apa..." a rawn ti lang lang a, ka lo pawm kang nghal nawlh, a hmui chu a huh hliam a, a la irhfiak awk awk lehnghal a.



Ka pizawn chuan "Antlak puarin a puar dawn nih kha" nui hak hak chung chuan a rawn ti a, ka nuin "I tetlai ang mai" a lo ti ve vat bawk.




Ka nupui chuan kan fapa hmui huh deuh hliam chu a lo hrukfai sak zung zung a. Ruai kil tur chuan kan inzui phei ta a. Ka pizawn sawi ang tak takin Bawihpuia chu antlak puarin a puar aniang chaw a ei hlei theilo. "Bawihpui, ei luih tum la" a nuin a tih pawh chuan "Ka puar tawh" a lo ti ve tlat a. Tih luih theih pawh a nilo.





Zanah chuan kan nupain kan spot ah kan va kal a, kum 3 hnua kan vawikhat kal leh na chiah a ni. Kan zin hmasak tum hnih khan kalna hun kan nei lova. Tun tum chu Bawihpuia a tlei bawk nen kan kalna tur chu kan chhungte kan hrilh a, min lo hrethiam khawp mai.




Nu Rinkimi a uang leh pek viau a, mei nei zet hian "Nau pai lai anih kha aw" a ti kher a, kan chhuah dawn thlengin min fiam zui a. Kan chhungte ho pawh an nui dar dar hlawm mai.



Ka nupui min ngheng deuh chiala thu chu a samah ka fawp vang vang a, a dul puar lah chu ka chul sak hauh hauh bawk.



"Ka hmangaih che" ka tih chuan hahdam hmel zet hian a rawn nui chhuak hak hak a "Keipawn ka hmangaih che" a rawn ti ve sap a.




"Pathian hi a tha tiraw" a rawn ti halh a, zantin he thu hi a sawi nawn fo thin. Pathian thatzia hi kan sawi bang theilo a ni ber mai.




"A thu zawma ke pen zel hi kan tih makmawh a ni" ka lo ti ve sup a.



A hnu deuhah chuan "Thil hrethiam rual i nih hnuin eng thil nge i hlauh ber" a rawn ti teh daih a, han chhan mai dan tur ka hrelo. Ka nunkawng fimkhur taka ka hman chhoh vang nge han hlauh em em hi ka nei hran lova. Pathianah pianthar na ka chan hma vang pawh a nimai thei.




Ka inngaihtuah vung vung lai chuan a rawn tawng leh a "Ka hlauh ber i hre duh em?" a rawn tih chuan "Sawi la" ka lo ti vat.



Chutah a rawn thaw chhuak deuh halh a "Bible chhiar chhuak hman lovin ka thi ang tih ka hlau ber thin" a rawn ti hap a, ka ngaihtuah loh lam daih ani.



"Sawichiang la" ka lo ti sup a. Min rawn ngheng tha salh salh pah chuan "Kan dam chhung ni te hi min Siamtu Pathian Thu pawh chhiar chhuak lova hman liam mai atan chuan a uiawm lutuk. A thu vawikhat pawh chhiar chhuak lova Amah tawh kha ka hlau ber thin" a rawn ti sap sap a. Ka lo ngaihtuah pha ngai miah lo. Mahse a sawi takah chuan dik ka ti viau mai.




Pathian Thu vawikhat pawh chhiar chhuak lova Pathian tawh chu hlauh awm reng pawh a lo ni. Min Siamtu khi a zahawm a, kan tana tangkai leh hnem hnanna awmlo kan chhiar peih viau lai hian A thu ber chhiar pawh kan tum lo anih chuan tun atanga bul tan a tha khawp ang.




"Ti zawng chuan ka lo ngaihtuah ngai miah lova" ka ti sup a, hahdam zet hian a rawn thaw chhuak ham ham a "Kum naupang zawk atanga tar thleng hian Pathian Thu chhiar kawngah harh thar vek ila ka ti khawp mai" a rawn ti leh sap a. A thahnemngaihna chu thahnemngaihna kawng tha tak a ni. Chutiang tur chuan harh thar ta vek ila kan ram hi a nuam awm mange. A thu kan hriat tam na na na chuan nun pui chin kan nei awm si a.




Bible-a a mi ngaihsan deuh deuh te chu a rawn sawi tel luam a. Sedraka te, Mesaka te, Abednago te chanchin a sawi chuan ka ngaihtuahna a lo tithui leh viau tawh.




Ka nun nen ka lo hmehbel hmanhmawh a, anni thian pathum khan lal Nebukanezara chibai an buk ve duh lova, Pathian chauh lo chu chibai an buk loh tur thu an sawi riap mai anih kha !



Meipuia thlaka an vau hnu pawh khan "He meipui atang hian min chhan chhuak dawn lo mah se Lalpa kan Pathian chauh chu chibai kan buk ang" tiin an tang tlat anih kha !



Meipuiah chuan an thlak ta reng a, Pathian lam an tan avangin meipui kha an pumpelh bik reng reng lo, mahse kha meipui sat na lak ata kha Pathian in a chhanhim ta zawk anih kha!



An nuna chiang ta em em ka tih chu Pathian hian harsatna leh buaina kan tawh te hi a phal a, min pehhel tir kher lo, mahse A tana kan inhuam phawt chuan kan tluk hlen hi a lo phal reng reng lo.




Ka nunah pawh hian chu thil chu chiang takin ka hmuin ka hria. Harsatna ka tawh chhung zawng khan Amah ka au tang tang a, chak lo tak chung pawha ka biak thinnaah khan A chakzia a rawn tilang ta anih kha ! Kan Pathian hi a ropui asin !




Ka nupuiin "U Sangzual..." ti a ka hmai a rawn tuai thuak takah chuan ka melh chhuk nghal vut a, ka ngaihtuahna ka lo kawm san mial mial tih ka hre zawm zat.



"I va inngaihtuah nasa..." a rawn tih deuh nang nang chuan a biangah fawp zauhin ka lo nui mai a.



Kan fa lo piang tur chungchang te chu kan sawi a "Hmeichhia i awt ve tawh em?" a rawn tih chuan "Ka thisen, ka rila rah a ni dawn a, hmeichhia emaw mipa a ni leh emaw a tha vek" ka lo ti sup a.



"I awt ve tawh hrim hrim em?" a rawn ti leh ha a, mihring mihrinna a ngaihtuah chuan amah chhun deuh tur fanu chu ka awt ve tho mai.




Ka lo bu nghut a "Nangmah ang deuh nise" ka tih chuan a rawn nui hak hak a. Ka ngaihtuahna a vir deuh zawk a, ka fiam chak tlat pek "Mipa anih leh tak leh hmeichhia tur a hranpain kan siam leh mai ang a" ka lo ti zawi ruih a. Ka âw thum deuh bul bul ah chuan nuihzatna a lang tel bawk.




A dul ka chulna kut chu a rawn sik vawt a, "Sawi duah kher mai" a rawn ti hlak. Ka lo nui chhuak hawk hawk a "Ka sawi chu ka ti ngei ngei thin tih i hriat kha" ka lo ti leh a.




A lo duai duh bik der tawh lo, "Fiah chiah ila a nimai lawm" cho zet hian min rawn melh chho deuh ha a. "Tunah pawh ka cho che" a rawn ti leh kher a, mitmeng lerh zet hian min rawn melh a. Rum nghutin ka fawp zui nghal hmiah. A mitmeng khan min turn on mah mah ani.




Nui lum hak chungin min lo chhanglet ve vat a, ka chet dan thlakin dam zet hian ka fawp ta a, ka tih ang zel chuan min lo chhanglet ve a. Ka fawh hmasak ber tum leh tun tum chu inpersan tawh tak ani.



Chutia rei ngial kan infawh hnu chuan a inlahrang ta a, "Ka turn on mah mah che" sawifuh inti zet hian a rawn ti chhuak hak a, ka awmdan min control hneh lutuk chu a inhrechiang ve ngang mai. Min nuih rah rah a.



"Helai hmunah hian ka nupui i nihzia ka tilang hreh hauh lo ania" ka ti deuh khawl a, ka ti ril phurna avanga rawn intham za chuai chu tawrhhlelhawm tak a ni. Ka rilruin ka nupui, ka ta tih a hre ve kar si a.



A rawn nui chhuak hak hak a "Haw tawh mai teh ang" tih leh thawh a rual a, ka lo pui vat. "Haw vat kan ngai ani" ka lo ti ve churh a, a nuih a za viau tawh.




Ka nupui leh ka fapa muhil thaw deuh sak sak te chu hmuhnawm ti zet hian ka thlir reng a. Rei ngial chutia ka thlir hnu chuan kan bultanna Biakin ngei maiah khan ka va kal leh a.




Pathian hnenah lawmthu ka sawi mawlh mawlh a. A hmangaihna vanga ka nupui nen pumkhat kan lo nih tak avangte chuan lawmthu ka sawi a. Fapa duhawm tak min pek avangtein lawmthu ka sawi a, fanau rochan duhawm tak tak min pek belh zel turin ka dil bawk.




Khawvelah hian Pathian lakah hlimna tur kan zawng anih chuan kan hmu ang, chutiang bawk chuan vui vaina tur kan zawng anih pawhin kan hmu tho ang. Kan zawn ang zel hi kan hmu zel mai a lo ni a, a hmu thiam te tan chuan engkim hi Pathian malsawmna a lo ni.





Pathian lakah vui vai chang nei fo mah ila A malsawmna tam tak kan dawnte hi theihnghilh phah lo ila. Pa leh fa inkarah chuan vui vaina a awm ve fo a, hmangaihna tam tak a ken tel hi theihnghilh lo ila vui vaina sual a ni hran lo ang.




Kan nupa inhmangaihna chu Pathian hmangaihna a intan anih avangin engkim kha Chung lamin min rel fel sak a. A hnena kan intuk luh ve hram hram na khan tun dinhmun hi min hruai thleng a ni ka ti lo theilo.




Chung lam chet hun nghak chung zelin kan tih tur hi lo ti ve zel ila. Kan dil ang a, engti kawng zawng emaw tal chuan kan hmu zel ang.




Zinkawng ngaihnawm ka hnutchhiah dan chu tuarna leh hrehawmna zawng zawngte, hlimna leh hmangaihna zawng zawng te nen khan ka duhthusam vek an ni. He ka zinkawng hi ka keu let chang apiangin Pathian hmangaihna vangin ka mittui a tla nawn fo ang !




A TAWP TA



_________*________*________*__________




Last Chapter hi chapter thum daih lawih anih hi aw, ka tum loh deuh thil tul ni si ka zep tel teuh ta mai a, mak ka inti teh ania...hihi


A tawpna a ni si a, thu tam tak min hnutchhiah ve chuan ka lawm viau ang.


🧚🧚🧚🧚🧚🧚🧚🧚🧚


CHHIAR HRAM ULA 👇

Han sawi tan mai dan tur ka van hrelo em ! Ka rilruah thu tam deuh a rawn indawt zut zut a, sawi chhuah ngaihna pawh ka hrelo hial zawk !



He thawnthu ka rawn ziah dawn khan ka rilru a buai khawp mai. Ka thawnthu hmasa nen khan a plot a inpersan nasa mai si a, zan tam tak ka ngaihtuah hnuah huaisen takin ka rawn post chhuak ta tawp a. Ka duh reng vang pawh a ni em em lo, keimahah hian tur tu a awm thin a. Ka rawn ziak chhuak lo phal lo a ni ber mai.



Min tuipui ve chiah em ka hrelo nain keichuan ka ziah tirh atang khan nuam ti deuhin ka rawn ziak nghal a. Keimah kha ka chêng veng veng zel ani ber mai. Ka chawei laite khan 'Zaninah engtin nge ka awm tir ang aw' tiin ka ngaihtuah ta thin a. Ka vei deuh ngut ngut a ni ber mai.



He thawnthu hi a hming chuan a ziaktu ka ni ngei mai a, mahse maw...Pathian hi a rawn che thin a. Chuvangin ka kutchhuak pawh ka ti ngam chiah lo, in lo hriat ve tho ka ring, a thawnthu a hlawkna in chhar comment lama in rawn sawite hian 'Ka lawm e' tih ka hreh thin a, 'A van lawmawm em aw' ka rawn ti ta thin anih kha. 'Ka ziah' ti a sawi hi ka hreh tlat pek anih chu ! Pathian telna thawnthu ka tilo theilo.



Tunlai thangthar tam tak, a bikin keimahni ang rual duhzawng chi thawnthu a ni vakin ka hrelo a, mahse huaisen chhuahin ka rawn ziak thlu ve ta tawp a. A chhiar chhun chhun te chuan Pathian ah hlawkna tam tak in chhar dawn tih hi ka hrechiang lutuk tlat. A chhan chu Pathianin min dinpui tih hi ka hrechiang lutuk a maw, ka dil a, ka dil ang zat aia liam min pe char char thin.



Zan tam ka lo suangtuah thin 'Kan zawh hunah chuan kan va hlawk dawn em!' ti a ka lo ngaihtuah thin zan kha kan thleng ta. Keichu ka lawm asin, he thawnthu ka ziah lai khan zo thei lovin ka thi daih ang tih te kha ka hlau thin a. Pathian hnenah mawlmang deuhin 'Ka zawh hma chu min thih tir suh aw' tiin ka tawngtai tawp thin. Hei tun hun hi min hruai thleng ta chu ania, ka hlim a ni tawp mai.



Ka sawi chhuak thiam chiah lova heti hian a hmawr ka'n bawk ange 'LOVE COVERS ALL' a tir atanga a tawp thlenga min lo chhiar sak avangin ka lawm a. He thawnthu ka ngaih tur tluk zet hian nangni pawh ka ngai dawn che u. Ka reh rei vang vang dawn si a, min lo theihnghilh hman te hi ka hlau ania. Min lo hre ve reng ru aw.



In zavai chungah ka lawm a, Pathianin malsawm vek che u rawh se tih hi ka tawngtaina aw🙏🏻


🧚🧚🧚🧚🧚🧚🧚🧚🧚🧚
*** KAN WEBSITE A FAKNA LAM THIL MILEM LANG THIN I LO HMEH ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni a. Whatsapp group pawh siam a ni e. Complete tawh ho zawng zawng leh story kallai kan dah vek avangin avangin in lo join theuh dawn nia..
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)