LOVE COVERS ALL By C.V.L.Awmpuii (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: LOVE COVERS ALL By C.V.L.Awmpuii (Completed)

Unread post by Ngaia » April 3rd, 2022, 3:08 pm

LOVE COVERS ALL
By CVL Awmpuii


Chapter - 37


Ka mut hmain Zuali chu ka call ta a. Rei fe a ring hnuah a lo pick up a "Eng nge i tih a?" ka tih chuan naupang paper a check thu a rawn sawi nghal zung zung a. Kar hmasa atang khan school an tan leh tawh a, an buai zual lai tak a ni.



"Eng nge i tih zawk a?" a rawn ti ve vat a, ka mut chiah tur thu ka lo hrilh ve vat a. Thu ho mai mai sawiin kan titi a, a nui ri leh hak hak thin. A nui ri hriat tluka nuam tih hi ka nei awm lo e.



A hnu deuhah chuan ka chhungte awm lai ngeia kan ina chawei turin ka sawm ta a "A van zahthlak awm" a rawn ti deuh hliai a. Mahse "Zahna tur a awm lo, kan kokim lai a ni bawk a pangngai taka inhmelhriat tirna hun a nimai" ka lo ti deuh duah a. Min hnial lui ta bik em em lova mahse a zah hmel viau mai.



"Naktuk zanah ka rawn kal ang a, kan sawi dawn nia" ka tih takah chuan a lo pawm ve mai bawk a.



Zingah tukthuan eikham hnuin nutei te in lamah chuan kan va phei veleh a. Inleng thenkhat pawh an lo nei ve nual mai.



Arini chuan eirawng a bawl a, Rema'n a lo pui bawk. Nutei leh Pa Zaia te chuan inleng an lo kawm a, Gracy erawh ka hmu miah lo.



Ka rinai daihin Nutei pawh a pangngai a, inleng kawm velah pawh tawngkam hriat nuam lo leh mei nei a chhak chhuak lo.



Tlai dar 3 velah Aizawl atanga mikhual lo kalkhawm te chu an haw ta a. Arini chhungte leh ka thiante ho pawh an haw ve nghal a. Zan lamah chuan khaw tual mi tih loh chu leng tur vak an awm tawhin ka ringlo. Ka chhungte erawh naktip thleng an châm dawn a. Chumi chhung chuan Zuali pawh chawei a sawm hman ngei ka tum.




Zanah chuan an in lam panin ka inkhalh phei ta nghal a. Tumah venthawn vak an ngai tawhlo ber hian min ti zalen ve deuh. A hma kha chuan midang hriat hlau reng rengin hun kan hmang a, tunah chuan a mawi tawkin kan inkawp ve thei tawh a. Rilru pawh a thawveng ve deuh hlek tawh.



Ka va thlen chuan pot a lo chei mek a, a nu chu sitting room thutthleng ah a lo mu a. An zai atangin thla khat leh a chanve a liam tawh a, a tha chak viau. A thil tih that loh zawng zawng a sim vek tawh vang nge a hmel hmuh a nuam thei hle a. A hrisel hmel viau tawh. Pathian malsawmna vek ani ka tilo theilo.



Nu Thapuii chuan min lo be nghal bawrh bawrh a, nimin inneihna chungchang velte chu min zawt a, tha takin ka lo chhang ve vat zel.




A hnu deuhah chuan "Zuali hi hruai chhuah lawk ka va duh ve, i remtih chuan" ka ti ta a. Zuali chu a lo hawi vat, a mit a rawn kan ak a, ka lo nuih mai a. Chutah Nu Thapuii chuan " Va kal rawh u, keichu ka lo mu dawn nia" a rawn ti ta a.




Zuali chuan a ngaihtuah viau mai a, mahse Nu Thapuii chuan ngaihtuah awm anih loh thu a lo sawi ve tlat bawk.



Dar 8:30 velah chuan kan inzui chhuak ta a, a nu pawh room lamah mu turin a lut phei ve nghal a.



"Khawiah nge kan kal dawn?" ka motor khalh lai chuan a rawn ti deuh ha a, a lam ka hawi vat "Kan spot ah" ka lo ti sup a. "I sawi lawk si lova" a ti hap a, ka lo nui mai a.



Khaw tawntirh kan thlen chuan kawngsir rem laiah motor chu ka hûng ta dat a. Ka chhuah rualin a lo chhuak ve nghal vat a. A lamah pheiin a kutah ka va kai a, min lo nuih nghal var var, a hmeltha thin ania.



Inngheng rialin kan thu dun ta a, ka hmaah ka kap kalak a, a sam rim nû chek chu ka hîp leh vang vang thin.



"Naktuk tlaiah chuan zanriah min lo eipui a ngai ania" ka ti ta a, chu velah ka lam a rawn hawi vat a "Ka chhungte la awm laia inhmelhriattir na pangngai tak neih vat kha a tha" ka lo ti leh a.



A hmui a pet sawi zeuh a "A zah thlak awm bawk sia. Mahse i rawtna chu a tha tho bawk sia" a rawn ti hap a. "Zah zum lutuk chu a tha ngai lo ania. Ka chhungte lakah ngat phei chuan zahna tur a awm lo. Ka nupui i la ni vat dawn a, kan chhungkaw zing ami i la ni vat dawn tihna anih chu. Chuvang chuan tun atanga pangngai taka in inhriat kha a tha alawm" ka ti ta duah a. A ngawi deuh vang vang a, ka thusawi chu a pawm hmel ve ta khawpin ka hria.



A tawng siam siam lai chuan a nghawng ka lo nul kual dan dan a, a za ti chu a rawn nui chhuak leh hak hak thin.



A hnu deuhah chuan "Heta kan kal hnuhnun ber tum khan min kuah turin ka ngen che a, i duhlo vel a" a rawn tichhuak hlawl a, a âw ah chuan titau âw a lang tel bawk.



Kan kal hnuhnun ber tum kha ka ngaihtuah let a, a hunlai kha chuan kan tawp hlenna turah ka ngai hmiah anih kha. Pathian vang liau liauin tun hun hi kan thleng leh lawi a, a awihawm loh hial zawk.



A bekah chuan fawpin "Ka kuah che chuan ka kaltir theih loh mai che kha ka hlau a, tawp hlen kha i thlang sia" ka lo ti chhuak hulh a. Khang hunlai khan a rilru a lo hrehawm viau in ka ring. A tawp nan amah kuah turin min ngen a, a duh vanga tawp thlang kha a ni bik silo. Kei lah chuan thlahlel ve lo ang maiin kuah duh lovin haw ka rawt ta zawk kha ania.




"I sual ve hrim hrim..." a rawn ti leh bar bar a, ka lo nui chhuak ta hawk hawk. A zakah chuan chawiin ka lamah ka pawthnai zual sauh a "Tun atang chuan i dil chhuah ngai miah lovin ka kuah char char tawh ang che. I duh lo chung pawh ka kuah lui tlat tawh ang che" fiamthu ti tak deuh hian ka ti a. Lungawi zet hian a rawn nui chhuak ta hak hak a.




A hnu deuhah chuan "Pathian hi a tha tiraw" a rawn ti zawi sep a, a nghawngah ka lo fawp zeuh a "Lawmthu sawi sen loh kan ba" ka lo ti ve sup.



Ka kuahna kut chu a rawn hmer nghet salh a "Ka nuna i lo lan ve hma kha chuan tu mipa mah ka hnaih ngai miah lova, hetiang hian ngaihzawng ka nei ve ang tih rin ngaihna pawh ka hre ngailo. Mahse Pathian hnenah khan ka tana A ruat ngei mipa ka tawn ve theih nan ka dil thin" a rawn ti malh malh a. A thusawi chu a dik ngeiin ka ring, ka hriat theih chinah tu mipa mah a hnaih ngailo. Duh tu a neih loh vang anih erawh ka ring hauhlo. Ka number save tum a a phone ka chhuh tum pawh khan number hlang atangin be tu a ngah viau anih kha.




"Pathianin i tana a ruat ngei ka lo nih chu" ka tih chuan ka lam a rawn hawi vat a "I va confi ve" a rawn ti hluai a, ka nui leh ta.



"Ka ni lo em ni?" sawifuh inti zet hian ka lo ti a, a ner deuh nang nang a, mahse a hnu deuhah chuan "Pathianin ka tawngtaina a chhan zawng zawng zinga chhanna ropui ber leh hlu ber i ni hial ang" thutak deuh hian a rawn ti ta a. Mahse a lai leh deuh nge a hawisan vat a, min rawn ngheng deuh dat.



Pathian chhanna ropui ber leh hlu ber angin min lo ngai hial anih chu ! Engtin nge ka hmangaih loh theih tehlul ang ni.



"Ka hmangaih che" ka ti nghet ta charh a, a rawn nui che dat a "Min hmangaih reng ang che" a rawn ti ve sap a. "Nitinin ka hmangaih zual deuh deuh ang che" ka lo ti leh a, ka âwm rawn ngheng dar dar pah chuan "Keipaw'n ka hmangaih deuh deuh ang che" a rawn ti ve ta a.



Ka lam a rawn hawi rual rual chuan a khabe ah dawmin ka lo fawp nghal siah a. Ka nghawngah kuahin min lo chhang let ve vat a. Chumi rual rual chuan ka inlahrang nghal dat a, a ngaihna hrelo zeta min lo melh chu a kawngah chawiin ka malah ka hlang a, a rawn te that mai.




Tawng a tum lai tak chuan ka fawp leh nghal mawlh mawlh a, kan duhthawh dun ngang mai.



Kawrfual a ha thin si a, hetia ka pawm hian a mal a lang thui lek lek zel a, mipa nih miau chuan hmuh loh tum viau paw'n a harsa thin.



Kan infawh mawlh mawlh lai chuan kan awmdan thlak thlengin phulah chuan ka muttir ta a, a sirah inbeng kangin ka inlahrang hlek a, a rawn thaw chhuak nghal ham ham a. Ka nghawngah min lo kuah tawk tawk bawk. Keimah ang chiahin a danglam ve tih a awmdan atang chuan ka hailo.




A beksam huiin ka fawp leh ta mawlh mawlh a, duhthawh zet hian min lo chhang let ve tan tan mai. A awmah ka tham nghal ruai a, ani pawhin ka hnungzang chu a hmer na ngang mai. Mahse tunah chuan na lam ngaihtuah theih pawh a nilo.




A kawrfual hma kilh phelh tuma ka inlakhran hlek lai chuan "Thi...thil thalo...ka...kan ti palh ange" a rawn ti bah nak a, rilru buai hmel zet hian mitmeng phelh phang in min rawn melh a, a hmuiah ka zuk fawp zauh "Min ring em?" ka ti lawi rut a, "Ka inrin aia nasain" a rawn ti chhuak hak a. A hmuiah ka zuk fawp leh zeuh a "A tha, eng thil thalo mah ka tihpui dawn lo che aw. Biakin dar ri hriat theih ngeiin pasal ka neihtir dawn che" ka ti nghet charh a. A kawr hma kilh ka phelh lai chuan "Hei chu thil pawi aia pawi lo hret" uang thuang deuh hian ka ti chhuak leh sup a, a rawn nui ri ve hak mai.



A kawrkilh ka phelh hnu chuan a dul thep zai chu ka fawp kual dan dan a, ka samah thamin a lo thaw chhuak ve halh halh a.



A brazier phelh ka tum leh lai chuan ka kut a rawn man a "He...hei chu...ka duh rihlo" a rawn ti bah nak a, a duh loh chin chu ka tilui duh biklo. A hmui zawnah insawnin ka han fawp ta vang vang a, ani pawhin min lo chhang let ve vat.



A hmui hnuai ka peh lai chuan ka nui lum hak a, ani pawh chutiang thovin. A dul nem laia ka tham tawk rual chuan a rawn te chhuak that, ka lo nui chhuak hawk hawk thung.



A bulah chuan muthlain ka âwmah ka kuahbet ta hlun a, kan thaw chhuak dun nghal ham ham mai.



"A va harsa thin ve..." ka tih chuan ka awmah a hmaiin a rawn nawr vak a. A lai leh viau tawh ani ngei ang. "Nupui zak zum deuh ka nei dawn si a, hmabak a va ko ve" mei nei zet hian ka ti a. Ani a lo duai bik der lo , ka awm rawn chum dat pah chuan "Nupui nawhchizuar i nei emaw i la inti dawn" a rawn ti ve ngei a. Ka lo nui chhuak hawk hawk chu a lai leh bawk si, min rawn chum leh pawp thin.



A kawr a kilh that lai te chuan ka lo nuih leh ruh ruh thin a, a lai bawk si chu rum zet hian min rawn melh leh thin.



"Ka la hmu vek dawn sia" nghal zet hian ka lo ti a, "I sual..." a rawn ti vak. Sual min ti tak tak si lo hian a laih luatah sual nih ka hlawh ziah. Mahse ka pawi tih loh zawng tak ani.



In lam kan pan leh meuh chuan dar 10 a lo ri thuak tawh. Biakinah tawngtai turin kan peng leh zawk a. A malsawmna kan dawn zawng zawngte vang hian malsawmtu chu kan hre ve reng tur ani.



An in kan thlen chuan "Naktuk chu chawei tur ringawta lo kal ka duh miah lo ania aw. Eirawngbawl hman turin min lo hruai rawh, dar 2:30 ah school kan bang thin a. Dar 3 velah chuan ka hman mai ang" a ti zung zung a. I he lovin ka lo aw ve mai bawk.




Tukthuan kan ei lai chuan ka chhungte bulah Zualin zanriah min lo kilpui theih tur thute chu ka hrilh ve luam a. Ka nu leh pa te chu an phur khawp mai. U Mafaka te chhung leh U Hlimi te chhung an lo haw hman chu pawi an tih thu an sawi ve malh malh a. Nimin lamah khan an haw phei ve nghal daih a, pangngai takin han hmu hman se a that dawn tehlul nen. Mahse hun remchang a la awm veleh vat ka beisei.




Chhunah Nutei a rawn leng a, a engamah hmain ka nu bulah Arini a rawn sawisel nghal malh malh mai "Sangzuala in lo neihtir lo kha a a tha khawp mai. Mahse ka fapain a neih phah ta sia. Tukinah pawh no pahnih a tikeh tawh. Ectra ka chah ngat kha a la ni zui, sawtiang mo neih chu a hahthlak dawn mange" a rawn ti barh barh a.




Ka nu chuan a thusawi ho chu uluk zet zetin a lo ngaithla a, mahse a hnuah chuan "Inneih thar hlim an la nia, vawikhat mah a la awm ngai lohna chhungkua ah a rawn lawi lut a. Hetiang hi a duhthlanna a ni bik kher nang. A insiamrem theih hun lo ngaichâng hram hram zawk rawh. Mo thar hlim chuan han chetsual mai te hi awl deuh mai ania. No pahnih lek te chu a dang nei lo pawh in nilo a lak vung lutuk tur a nilo" a lo ti dam thlap a.




Mahse nutei chuan "Chutiang chauh pawh chu a nilo. A awmdan hrim hrim saw a diklo" a han ti ringawt a. Huat tur zawng, hmu hlei thei si lovah ka chan ber mai.



Chutah ka nu chuan "Sawiselna phet zawng lo la, hmeichhia ve tho i nih kha. Fanu, mo leh nu dinhmun lo chelh tawh i ni a, hrethiam zawk ta che" a ti ta khauh a. Sawi zawm lehin "I tu tur a la pai mek lehnghal duat hleuh hleuh zawk rawh. A thu hrimah Arini hi misual a ni hran miah lo ania, keipawhin ka hrin loh fa ang deuh reuha ka en ania tun thlengin a that lohna sawi tur ka la hre miah lo asin. Mo thenkhat hi chu an lawina in a zir loh avangin mo sual nih an hlawh fo. Chutiang chhungkua te chu in lo ni ange" a ti leh ta duah a. Nutei chu a ngawi ta kar mai.



A awm a nuam ta vak lo aniang lungawi vak lo chuan a haw ta a. Ka nu chuan "Masaii hi chu kan tetlai rengin a zia hi a mak ve a, hriatthiam hram hram hi a ngai thin" a ti ve ngial a. A thusawi chu a dik ka ring, ka nu te unauah a mizia ang nei hi an awm ka hrelo.




Tlai dar 3 a rik chuan ka nu bulah Zuali lam tura ka kal tur thu ka hrilh ta a, Matei a lo nui a lo nui mai. Ka phur teh hawrh lutuk chuan a nuih ka tiza pawh a ni mai thei.



An in ka va thlen chuan a lo inpeih diam tawh. Nu Thapuii bulah chuan "Zanriah eikhamah ka lo thlah leh vat dawn nia" ka han ti ve ngial a. "Lo hmanhmawh duh reng reng suh u" a lo ti ve vat. A hma kha chuan ani ang nu Zualin a nei hi ka rilru a lo na thin a, tunah chuan khatiang rilru let thawk kha ka pu tawh.




In kan thlen hma chuan vawinga vel a zam thu a sawi hman. Ka dem hran lo, a tan chuan a zamawm ve dawn em ani. Inchhung kan luh hma chuan thawk an la tete phawt a, a kutah ka lo chelh a "Thil hlauhawm a awm lo" ka lo ti ve sup a, a thlamuan ve hmel deuhvin ka hria.




Kan inzui luh hnu chuan ka pain pangngai takin a lo bia a, tha tak chuan a chhang ve zel a. Ka nu chu a hmaa phur hle si kha Zuali hmel a hmuh rual khan a ngawi ta daih a, a melh leh vang vang thin.




"Machhan, han chibai ve ta che" ka pain a tih chuan kan lam a rawn pan ve ta vat a. A rawn nui var var a, an han inchibai a. Zuali mawlh chu a zam hmel lutuk chu ka lainat zawk. Mahse pangngai taka awm tum tih hriat tak hian a inthunun nimaiin ka hria, ka chhuang ru viau mai.




Ka nu kalsawn leh dawn lai chuan "Eirawng ka lo bawlpui ang che" a ti chhuak hap a, a sen deuh tan tan mai. Ka nu chu a lo hawi let vat a, nui sâng chung hian "Lo kal rawh" a lo ti ve mai a. An chezia chu midang ho chuan kan lo nuih suk suk mai.




Choka lama an inzui phei hnu chuan ka pain zawi deuh sup hian "Nizan mut hmunah a biak dan tur a zir nasa ania" a rawn ti ta a, nuih loh theih pawh a nilo. Mahse chutiang taka ka nuin a lo ngai pawimawh ta chu ka lawm ru viau.



Vawiinah hian an inakr fel hlel awm deuh hlek te kha siam tha vek thei hram sela ka duh.



An eirawng bawl dun chu kan ngai pawimawh duhlo lui a, ka pa vek chuan "Ti sawn han inhrawn deuh sela an zia pawh a inmil phianin ka ring" a ti chuar chuar a. Ka pawm zawng tak ani.




Room lamah inbual tura ka luh hmain choka lam chu ka va ngaichâng deuh a. Zuali chuan tomato a lo chan a, ka nuin purun a lo chan thung a. Zawi tete hian ka nu chu a tawng a, Zualin uluk deuh hian a lo ngaihthlak sak thung. An thusawi chu va hre fuh ve chiah lo mah ila tha takin an inbia tih a hriat a ka lawm viau mai.




Ka inbual zawh hnu chuan Bible ka han chhiar leh a. Choka lam atanga nui hak hak thawm ka hriat chuan lawm lohin awm hmunah ka lo nui veleh suk suk thin. Engkim kal tluang ta purh mai hian min tihlim em ani.




Chunglam hawiin ka phun chhuak sup a "I thiltih hi rawn en teh, lawmthu hrilh ngaihna che pawh ka hre tawhlo" ka ti chhuak sup a. Pathian chuan min rawn nuih let ve hialin ka hria.




Zanriah ei hun hma hretin ka va chhuak veleh ta a. Choka lamah chuan ka phei zui zat. Ka nu, Matei leh Zuali te chu eng emawni sawiin an nui ho dar dar a. Ka pa pawh an bulah thuin a lo nui ve suk suk mai.



"In va hlim awm ve" ka va tih chuan ka lam an rawn hawi vat a. Zuali chuan min rawn nuih var var mai, a hmeltha thin chiang ani.



Matei chuan "Ka pa chetchhiatna kan lo sawi a" a rawn ti a, a nuih chu a zat hmel viau mai.



Ka nu chuan "Chawei kan peih tep ania, kan ei vat dawn nia" a rawn ti nghal zung zung a.



Rei vak lovah chaw pawh chu kan ei ta nghal a. Ka bul ami chuan a ei mang pawhin ka hrelo. A inthlahrung deuh a nimai thei. A beng bulah chuan "Ei thur thur rawh" ka zuk ti zawi sup a, a lo bu deuh nghat nghat. Mahse eng tham mah a ei ta chuang lo.




Ka pa chuan "Innei vat ula, fa nei vat ula" a han ti hluai a, Zuali chu a thu ngil nghal zawt. A hmai a sen deuh tan tan a, ka pa thusawi tlang lutuk avang chuan a lai ani mai thei.




Chutah Matei chuan "Ka pa chu an inneih hma hmain chutiang te i lo sawi a" nuihza insum deuh hian a rawn ti a. Ka pa chuan "Ka duhthusam ka sawi ve anih chu" a lo ti mai a.



Zanriah kan eikham hnu chuan reilote kan han thu khawmuang veleh rih a. A nu a ngaihtuah ve bawk nen ka thlah haw ta vat a.



An inah chuan ka han thu khawmuang veleh a. Room-a a inthlak chhungin Nu Thapuii chu ka lo be ta a.



Palai tirh vat ka duh thu velte chu ka hrilh ve luam a. Ani pawhin min lo hrethiam ve khawp mai. "Ama duhthlanna hi ka ngai pawimawh ber a. A hmangaih viau che tih hi ka hriatpui ve thlap bawk a. A tana mipa tha ber i nih zia pawh ka hai miah lo ania. Ka bula awm reng tura ka duh rual rualin a theih ngawt bik si lova. Palai lam kha chu in pahnihin han sawi dun phawt ula. A lo dawn sawn lam kha chu ka kut a ni leh mai a" a rawn ti ta a.




Ina ka haw leh hnu chuan ka pa te bulah palai tirh ka duh thu chu ka sawi ta a. Zuali nen pawh a hma khan kan sawi dun tawh tho bawk a. Kan rem tlang thei turah ka ngai mai.



Ka chhungte haw hnu karkhat naah palai chu kan tir ta a. Midangin an lo tih thin dan ang bawkin 'Chhungkua kan lo inrawn khawm ang a, in lo kal leh dawn nia' tiin an rawn inthlah a.



A hnu karkhatnaah kan tir nawn leh a, kan inneih hun turte chu an rawn ruat fel ta vek a. Ka hlim takzet tawh, kan inneih tak tak hunah phei chuan hei ai hian ka la hlim lehzual ang.




Zanah chuan min rawn bia a, a zah thu min rawn hrilh malh malh a "Room-ah ka awm daih a, min rawn ko chhuak vel a, ka zak rapthlak" a rawn ti nang nang a. Naupangchhia deuha tawng chang hi a ngah ve a, mahse keichuan lawmawm ka ti tlat thin.



"June ni 8 hi ni nghal mai se ka va ti ve" ka lo ti chhuak hluai a. "An hmanhmawh ka lo tia, thla khat chauh a awm tawh sia" a rawn ti hap a, ka lo rum nghut "Min neih vat i duh ve lo a nimaw" ka lo ti nghut a.



"Aa...chutiang lam pawh a nilo... inbuatsaihna hun a tlem em a" a rawn ti ve ngial a. A dik ve reng chu ka ti, mahse inbuatsaih a ngaih em em pawh ka ngaihtuah theilo. Ka nupui ni vat sela ka duh ber.



"Thla khat pawh rei ka lo tia, thla khat aia tam te chu a...Biakin dar ri i hre lo mai ang" ka lo tih chuan "I sual ve siah..." a rawn ti leh hlak tawh.



A hnu deuhah chuan thu ho mai mai sawiin kan titi a, ka thusawi ho tete pawh a lo nuihpui hak hak zel a. A nui riin min tihlim bawk a, nuam kan ti dun ngang mai.




________*________*________*_______


(Engvangin nge mo kan lawm loh bik ang ti'ru? A tak taka Pro Pastor te paw'n nupui an nei ve tho alawm 😆. Chuvang chuan suangtuahna ramah pawh an nei ve thiang alawm. Mo lawm turin kawr mawi tak takte lo thui tir ula, tisa lam mai ni lovin thalrau lam nen lo intuai thar ula. Pathianin rem a tih chuan nak zan lamah mo lawmnaah kal vek kan tum dawn nia.)


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:09 pm

LOVE COVERS ALL
By CVL Awmpuii


Chapter - 38


Inneih sawmna chu Biakin ah kan puanchhuah tir ta a. Mi thenkhat mak ti fe fe chu an tam khawp mai. Mahse min lawmpui tu thahnem tak kan nei bawk.



Inbuatsaihna a kal zung zung a. Ka nuna ka hlim lai ber ka tawng baw chho mek zel niin ka hria.



Zuali nen kan buaina ber pakhat chu a nu lo awmdan tur hi ani. A fanu hi a innghahna ve ngawih ngawih ani tawh a. Hnathawk vak vak turin kum upa lam a nih tawh mai bakah a hrisel tha bawk silo. Nu Rinkimi bulah chuan kan sawi ta tawp a. A ni chuan a lo ngai awlsam khawp mai.




"Kan dawr hi tihral ka lo rilruk a, awm awl ve deuh hlek tawh ka lo rilruk a. Mahse Thapuii chuan nghak thin sela a tha tak ang. Tuna kan thil zawrh ho zawng zawng pawh hi chhawm nghal vek sela. A duh leh a rilru nawm nan a man hu ang vel min pe ve ang a. Heti hian bul a tan mai dawn alawm. Ama eikhawp te chu a nghak chhuak zo dawn lutuk. Chuloah keini kan awm bawk a ngaihtuahna tur a awm lo. In pahnih chauh khan inngaihtuah tawh rawh u" a ti ta duah a. Sawi veleh chuan tur engmah kan hre lo. Lawmthu sawi mai loh chu ! Kan tan hian a hlu takzet ani.




Kan inneih hma karhnih la awmah Aizawl lamah kan han bazar a. Zuali nî te chhungkua pawh an lo fel khawp mai. Zuali chuan 'nî' tiin a ko mai a, a hming tak chu Lansiami a ni. Nu fel tak leh ngainat awm tak niin ka hria. Zuali tana an lo awm hi a vanneih thlak takzet. Kan inneih dawn hunah pawh an in atang hian a lo lawi lut ang.



Khaw lama kan let leh hmain kan in lamah zanriah kan ei ho leh a. A nî Lansiami te chhung leh Sawmtluangi pawh tiamin kan hlim tlang dar dar khawp mai.



Zanriah eikham a kan han thu khawmuang chu U Hlimi pasal nau Chawitei hian Zuali chu chîk deuh hian a melh leh thin a. A hnu deuhah chuan "Ka hriat hnu i ang e" a ti hluai a. "Shillong ah i awm thin em?" a tih zawm leh zat. Zuali chuan mak tih hmel fe hian a melh a, "Awm thin e" a lo ti hap.




Chutah Chawitei chuan "Ehee...anih chuan ka hriat hnu kha i ni chiang lutuk" a ti ta hluai a, a hmel a nung deuh sarh bawk. Zuali chuan "Engtin?" a lo ti deuh ha a.



"Kan thian hovin shillong kan zin tum khan Ward's Lake kan tlawh a, khami tum khan i lo kal ve tiraw" a han ti tete phawt a. Zuali chuan "Ward's Lake chu ka kal zing ve ang reng a..." a lo ti fan raih a. Chutah Chawitei chuan "Kan kal tum chuan maw...kawrfual maroon rawng i ha, ka pawisa cheng 2000 ngawt ka tibo a. Kha bak kha ka lo kengchhuak silo a, ka thiante lah khan min lo ring bawk sia. Kan thlenna hotela let lehna tur ber pawisa kha kan nei ta si lova. Nangmah hian min lo pui alawm, i pawisa kawl sa min pek kha" a rawn ti ta duah a.




Zuali chuan a ngaihtuah deuh vang vang a, keinin amah kan lo en thap thung. A hnu deuhah chuan "Pawisa tibo te kha nangmahni maw?" a rawn ti chhuak ta hap a. Chutah Chawitei chuan "Ni chiang e mawle...awi...a tukah khan pawisa kha rawn rulh leh che kan tum a, i phone number takngial pawh kan lo la silo a, a zialo tak tak. Mahse kan lawm teh mai nia aw. Lawmthu pawh kha kan hrilh mumal hman ta lo che a, tunah kan han inhmu leh hlawl a. Chutah U Sangzuala nupui tur lehnghalin. Aaa...Nu Machhan in van vannei tak" a ti leh ta bawrh bawrh a. Ka nu chuan a chhuan hmel viau tawh.




Kei tak pawh hian ka chhuang takzet. Chutia hmelhriat ngai pawh nilo a lo tanpui mai thei chu ka chhuang takzet ani, phut let engmah nei lo lehnghalin.



An haw hnuah pawh ka nu chuan "A hma daih khan lo hria ila tha tur" a ti vawng vawng mai.



Man hlanna hun chu khaw lamah kan hmang a, a pa te chhung lam pawh an rawn tel kim tha khawp mai. Ka la hriatthiam theih miah loh chu Nu Rinkimi khan 'A pa boral ni khan an chhungte tumah an lo kal lo' a ti bawk si a, tunah lem chhungkhat laina an lo nei fu si a. Mak ka ti ang reng viau mai.



Aizawl kan chhoh hmain thuam chhawm thenkhat te chu ka in luah lamah kan thiar phei a. Heta la awm tur kan nih tho avangin Aizawl lamah bungrua kan keng hnem lutuk dawn lo. Helaia ken thlak vek a ngai leh dawn tho a, hetia lo tih hian a remchang zawka kan hriat vang a ni. Aizawl lamah chuan mamawh zualpui ang chauh kha kan keng dawn. Kar khat vel cham turin kan inbuatsaih bawk.




June ni 7 ah chuan kan inneihna lam tur chu kan pan ta hlawm a. Khua a inhlat tham ve bawk nen lânga kal mai chi a ni si lova, mikhual riak tur pawh an thahnem dawn viau mai. Min lawmpuitu te, min ngaihlu tute vek an ni a, hetiang taka kan inneihna tur min ngaihhlut sak hi a lawmawm takzet.




Zanah chuan kan in video call a, "Naktuk zanah chuan hetah hian i lo mu ve tawh ang" tiin ka bula mutna chu ka beng thuk thuk a, lai zet hian a rawn nui ri deuh hak hak mai.



"Zanin chu mut lo kham hle rawh aw" mei nei zet hian ka ti leh a, a rawn meng kual nghal ralh a. Chutah le "I sawi kha kan hre vek ania" Nu Rinkimin a rawn ti ta mai, Sawmtluangi nui riin a zui nghal zat bawk. Camera chu a che nghal fua a, Nu Rinkimi hmel a rawn lang zui zat, Nu Thapuii leh Sawmtluangi pawh. Chutah Nu Rinkimi chuan nui dir tlawk tlawk chung hian "Tuah tawh awm ve" a rawn ti a, min tilai dawn dawn mai. An lo awm ve tih pawh ka hre miah lo.




"Zanin chu kan han riahpui phawt mai ange aw" a rawn ti leh a, ka lo melh deuh run run tawh. Chu te hlei hlei chuan a nuih a ti za niin ka hria.



A hnu deuhah chuan phone chu Zuali a pe leh ta a. A hmel a rawn tilang leh chiah chu a laih zia hai theih a nilo.



"Nu Rinkimi te hmuh phak lohah khan awm teh" ka ti hluk a, Nu Rinkimin nui uar uar paha min rawn fiam ri chu ka la hre hman hram.



A ri deuh sat sat a, veranda lamah a chhuak ta niin ka hria. "I thusawi a mak thei lutuk a" a rawn ti hap a, a thim deuh vangin q hmel chu ka hmu chiang theilo. "An awm ve tih ka hre hlei nem" ka lo ti mai a. Min fiamna vang khan lai ve viau mah ila tihlan kher ka tum lo.




Rei vak lo kan inbe leh a, ka tinui karh karh reng a, naktuk lawkah pumkhat kan ni mai tawh dawn tih ngaihtuahna chuan min tihlim takzet.



Kan inbiakna kan tihtawp dawn chuan "Ka luh hunah min lo fiam vak dawn anih kha" a rawn ti nang nang a. A awmdan tur chu ka hrethiam khawp mai, Nu Rinkimi khan sawi hreh vel kha a nei leh dawn pek silo, an in ti lai viau ang.




June ni 8 chawhnu dar 1 a rik meuh chuan Biakin Dar a rawn ri ral ral a, ka message tone a lo ri ve chiah bawk. Rang zet hian ka ban a, a message a lo awm *Biakin dar ri hriat theih ngeiin pasal min neihtir dawn ta tak tak e* tih a ni.




*Ka bialnu i nih chhunga a tawpna atan ka hmangaih che. Inneih inkhawm tawp hunah chuan ka nupui angin ka hmangaih nawn fo ang che* ka ti let ve nghal a.



Matei leh ka nu an rawn luh takah chuan ka phone chu ka dah ta a. Kan inzui chhuak ta nghal a.



Mo thianah Remsanga ka hmang dawn a, a nin a û Sawmtluangi a hmang dawn thung.



Kan lawina Kohhran Mission Vengthlang Biakinah kan innei dawn a. Kan va thlen chuan mipui pawh an lo khat mur mai. Ka nuna ni pawimawh berah mipui heti zat mai an lo pungkhawm chu ka lawm takzet.




Biakin hawnga inneih te hi mihring theihna a ni hauh lo, Pathian tanpuina leh malsawmna hnuaia awm vek a ni. Thianghlim taka kan innei thei tur chu ka rilruin Pathian hnenah lawmthu ka sawi mawlh mawlh mai sin.



A hnu deuhah chuan Sawmtluangi nen an rawn inzui lut ve ta a. A nî Lansiama fapa, a hma pawha ka hmuh tawh khan a rawn kai lut a. Kan zawn a rawn thlen chuan ka hmu thei ta. Khawvela ka mo hmuh tawh zawng zawng zing ah a la mawiin a la hmeltha ber.





A veil khim chuan a thianghlim zia a entir a, saw aia thianghlimna lantir zualtu saw awm ngat sela chuan ka neih zawng zawng hmang pawhin ka thuam mawi duh ngei ang. A mokawr puk deuh laih te chu a hak tur bik liau liaua duan ni awma mawi a ni.



Mak deuh mai chu ka zam chhin eih lo nia ! Ka phur em em tawh zawk. Ani erawh a zam hmel takzet, mahse min nuih lui deuh var var a, a inthunun nasat ve zia chu a hmelah a lang thei.



Kan Bialtu Pastor Rev Lalduhsanga'n inneih thutiam min chham tir a. Pathian hma leh Kohhran hmaah pum khat kan lo ni ta.



Kan pualin thuchah tawi a sawi bawk a, thuchah tawi mah nise kan damchhung nun khawih thei thil ani a sawi ni.



Kohhran zaipawl leh Bial Zaipawl an zai bawk a. Inneih programme chu tluang takin Pathian zarah kan zo a. Ka hlim hmel ka thup thei meuh lo, thupa hun pawh a nilo rêng a. Mi zawng zawng hian ka hlim tih hi hria se ka duh a ni.



Thla kan lak lai chuan a bengbulah kûn hniamin zawi tete hian ka fiam leh zuk thin a, a lai nasa thei ngei mai. Vawikhat phei chu ka hnungah min rawn chûm nghe nghe.



Ama lam atangin a nu, Nu Rinkimi te chhungkua leh a nî te chhungkua in min lakpui a. A zirtirtu hna thawhpui thenkhat te paw'n min lakpui ve bawk.



Kan inneihna min lawmpui tute chu kan beisei phak bak an ni. Keini ve tehlul heti tak maia min lo lawmpui hi ka lawm takzet. Tin, Pathian malsawmna liau liau ani ka tilo theilo.




Thla kan lak zawh hnuah chuan a nî te in lamah mo thuam thlak turin an phei leh a, Remsangan a zui a, keini lam chu kan inah kan phei ta thung.



An lo thlen dawn hnaih chuan an rawn zai ta dual dual a. Sawmtluangi nen chuan kawr lavendar rawng simple zet mawi fahran bawk si hi a rawn ha a, puanchei an rawn bih bawk.




Lawichalah a nî pasal Pu Khuma an hmang a. Lawi hla an sak zawh chuan lawichal chuan "Hei, kan fanu neihchhun in inah a rawn lawi lut dawn a ni a. A hmasain in fanu tak tak angin in lo pawm thei angem?" a han ti tete a. Ka nu leh pa te chuan "Pawm thei tehreng mai" an lo ti vat.



Pu Khuma chu a bu nghut nghut a, midang ho chuan kan lo ngaichâng ran hlawm a. Tichuan a thil phut chu a sawi ta a "Kan makpa tur hi Pathian thu zira Pro Pastor meuh ni ta i ni bawk a, Bible châng pawh a hre hle turah kan han ngai a. Kan fanu hi a lo lawi luh tak tak in duh anih chuan mo neitu hian an inkar sawifiahna tha ber nia a hriat Bible châng han sawi teh se" a rawn ti ta a. A thutak viau bawk, midangho pawh chu an ngawi dak hlawm a.



A tirah chuan ka nghilh ve deuh dup a, ka zam ve pawh a ni mai thei. Zuali lam ka en chuan ril fahran hian min lo melh ka ti mai, chu chuan min hneh hle bawk.



Kan inkar sawifiahna tha ber ni a ka hriat Bible chang chu ka sawi ta a "Johana Bung 3:16 hi kan inkar sawifiahna tha ber niin ka hria a" ka han ti tete phawt a, boruak chu a reh deuh duk a. Zuali nen chuan chiang zetin kan inmelh a, ka sawi zawm leh a "Pathianin khawvel a hmangaih em em a, chutichuan a fapa mal neihchhun a pe a. Amah chu tupawh a ring apiang an boral lohva chatuana nunna an neih zawk nan. He thu hian kan inkar zawng zawng a sawifiah vekin ka hria. Pathian hmangaihna in bul kan tan a, kan inkar hmangaihnain a zui a. Amah kan dah Lal ber chinah kan duh zawng zawng pekin kan awm ta si a" ka ti ta duah a. Ka duatin mittui tling pam a min lo melh chu ka nuih suk a, a rawn tah nuih deuh hak.



Mipuiho chuan kut an beng ta dar dar a. Chutah Pa Khuma chuan "A lawi thei ta e" a ti ta a. Inkai rialin kan inchhungah chuan kan lut dun ta a.



Mo lam atangin thusawi tawi nei turin Nu Thapuii, tuna ka pizawn ni ta chu a lo ding chhuak a. A fanu chu a han melh deuh vang vang phawt a "Ka fanu hi ka chhuang asin" a rawn ti chhuak hliai a, "Pa tellovin ka chawilian a, mahse ka chawi len pawh ka ti ngam chiah lo. Pathian min kaihruaina vek a ni. Ka nun danin a zir lo em em a, mahse ka fanu tan hian ringhlel chung chungin Pathian ka au ve thin. Ringhlel chunga ka auh ei zawh Pathian hi maw, Amah ring tak tak tu tan phei chuan a va han tha dawn tak em! A pangchan ve theihna awmchhun anu ber kha pangchan theihna tur ang pawhin ka khawsa ngailo a. A chhel ka ti viau thin. A...kan nufa chanchin hi sawi tur a tam lutuk. Thu tam sawi ka tum lova heti hian ka thusawi ka'n titawp ang e. Ka fanu hian a hring a hranin Pathian thu vawikhat pawh min hrilh ngailo, a nunah hian ka hmu chiang hle thung. A chang chuan ka fa hrin a nilo emaw ka ti hial thin. Mahse ka fanu a ni hi ka lawm viau lawi si. Tunah pasal tha tak a nei ta bawk a, ka thla a muang ta khawp mai" hnuk ulh teuh chung hian an nufa chanchin chu a sawi a.




Zuali chuan mittui tling deuh pam hian a nu thusawi lai chu a en a, a kut ka lo hmer vawng vawng thung. Mi thenkhat pawh chu insum zo lovin an mittui an hru fap fap a, kei ngei pawh min hneh takzet.




Kan lam atangin ka pa a dingchhuak veleh a. A tawp berah thu eng emaw sawi duh hrim hrim kan awm chuan tiin sawina hun an hawng a. Chutah Nu Rinkimi chu a rawn dingchhuak ta vat a "Ka dinchhuah loh chuan a kim dawnlo tlat, an inkar palai hi ka ni ve a" uang deuh tak hian a han ti a, midangho pawh an lo nui dar dar mai.




Chutah Nu Rinkimi chuan kan inkar thu chu a rawn sawi ta a "Ka fate ve ve ang an nia. An bul tan atanga a tawp thlenga hriatpuitu hi ka ni ve a. Thu tam ka sawi dawn lo ania. An inkara entawn tlak ka tih deuh pakhat ka rawn sawi zau lawk dawn. Tunlai kan thalai tam tak te hi in ngaihzawngte nen in intihthiam loh changin engtin nge in awm ve thin? A then chu in insawh tau nghawng nghawng emaw ania nga. A then chu zu leh ruihhloa tlan hial te pawh in awm mai thei. Mahse Sangzuala leh Zualtei te hi chuan tih dan tha deuh mai an nei a. An inhauh leh intih thiam loh changin Biakin hi tlan tauh nan an hmang thin. Chu chu tun hun an thlen theihna pawh hi ani ka tilo theilo. Pathian lakah an inkar thu engkim an thlen a, engkim tithei khan a lo chinfel sak mai ani" a han ti dap dap a. An lo ngaithla uluk hlawm kher mai. Chutiang taka min thuam mawi thiam chu ka lawm ve takzet.




Kan in lama hunserh pangngai tak kan hman zawh hnu chuan ruai kan theh ta a. Theihtawp chhuahin kan inbuatsaih ve bawk a, tupawh tlai leh puar takin haw se kan duh, tisa thil a ni emaw thlarau lamah pawh.




Zan lamah pawh inleng thenkhat kan la nei zawm zat a. Keini chu room lamah thuamhnaw kan remkhawm tawh thung. Zuali leh Sawmtluangi te chu an inhrilh ru deuh sar sar a, Zuali a ner leh nang nang thin.



A zualpui kan han inrem fel zawh meuh chuan dar 11 a lo ri thuak tawh. Inhnuai lamah chhuk thlain mikhual te chu kan mangtha ta a. Ka pizawn te haw dawn chuan an han inkuah vang vang phawt a. Naktuk lamah an haw phei vek nghal dawn a. Keini karkhat hnuah kan phei veleh ang.




Nu Rinkimi a nghal leh ta zauh "Nizanah a mu hnem aw" a rawn ti kher a, ka chhungte ho pawh an nui ta tawp. Zuali chu a lai lutuk a, ka hnungah a tham deuh vak a, keichu ka lai duhlo ve tlat.



Kan pahnih chuan ka room lamah kan inzui chho ta a. Ka chhungte ho pawh mu turin an intintuah ve ta nghal a.



Room kan luh rual rual chuan ka pawm deuh nawlh a, tlak hlau zetin ka nghawngah min lo kuah ve nghal vat.



Darthlalang hmaah chuan dintirin a hnung atangin ka kuah nghal hlun a "Ka hmangaih che" ti zawi supin a nghawngah ka fawp tawk a, a rawn thawchhuak deuh hak.




Chutih lai tak chuan kan room kawngka a rawn inkik ri ta kauh kauh a, ka phun deuh hluk, ani erawh a nui ri hak a. Kawngka inkik ngai pawimawh lo zet chuan a nghawng ah ka fawp kual dun dun a.



Mahse an rawn kik nawn ta fo a, "Va hawng phawt la" a ti zawi ta sep a. Lungawi vak lo chuan kan room kawngka chu ka pan ve mai bawk a.



Ka va hawn chuan Matei hi tim deuh daiin a lo ding a, "Û, nu Muanin a fapa pumna a rawn hruai a, i tawngtai an duh deuh tlat a, inhnuaiah an nghak che. Ka pain han ko phawt mai rawh a tia" a rawn ti nghal zung zung a. Zuali chu a lo phei ve ta vat a.




"A va zialo ve..." a lo ti ve ngial a. Chutah ka lam rawn hawi pahin chhuk mai turin min mitmei a. Chutia miin ka tawngtai sak an thalmuan pui dawn anih chuan kan tawngtai phawt mai aniang chu. "Ka lo chhuk dawn nia" ka tih takah chuan a kal ta vat a.




Zuali lam chu ka hawi vat a, a bathrobe a lo lachhuak mek "Ka zuk chhuk phawt mai ang aw" ka han ti a, " Umm...Zuk kal phawt la ka lo inbual ang" a lo ti nghal zung zung a. "Lo muhil miah suh ang che" ka ti khur khur a, nuihzat hmel deuh hian min melh a, ka melh tur deuh khui takah chuan "Aw...muhil lovang" a rawn ti ve ta nge nge a.



Inhnuai lamah chuan ka chhuk thla ta a, ka nu leh pa te'n an lo buaipui a. Nu Muanin min rawn hmuh veleh chuan "Rawn tihbuai che kan hreh viau a chu Bawihtea hian i tawngtai in a dam a rin tlat a" inthlahrun hmel zet hian a lo ti nghal zung zung a.




"Tibuai love, kan tawngtai dawn nia. Pathian zarah a dam ang" ka ti nghet ve ta charh a. Naupangtê lu chunga kut nghat chung chuan a damna turin ka tawngtai sak ta a, a tirah chuan a reh mai lo. Vawihnih kan tawngtai zawh hnu minute thum velah chuan dam ta.




Lawm zetin an haw ta a, Pathian hnena lawmthu sawi mawlh mawlh turin ka chah ve bawk.




Room lama ka chhoh leh meuh chuan dar 12 a lo ri tep tawh. Khumah chuan thu chungin Bible a lo chhiar a, puan a sin deuh hlan bawk.



Min hmuh rual rual chuan lai zet hian a rawn nui a, ka va pan nghal ruak. A tawlhhnung deuh nghal rawk rawk a, min hlau zawk emawni.



A hmai bulah chuan ka zuk kun hniam a "Ka inbual tawh a..." a lo ti ringawt a, ka lo nui mai a "I inbual ve dawn em?" a rawn ti leh hap, a awmdan lai lutuk chu a khawngaih thlak zawk.



A hmuiah fawp zauhin "Ka va inbual ve phawt ange" ka ti ta a, ka inlahrang chiah chu thaw huai hmel a pu. Bathroom bul ka thlen chuan ka hawi let leh vut a, a la phu dawrh zui "Lo muhil miah suh ang che" ka ti nghet charh a. Min chhanna pawh nghak zui tawh lovin bathroom lam chu ka pan ta nghal a.




Ka inbual lai chuan a awmdan lai lutuk te kha ka ngaihtuah let a, ka nui leh huk thin. Khati em ema han laih mai chuh hmabak a ko khawp e.



Bathroom atanga ka chhuah leh chuan lukham nghengin a lo muhil deuh bam a, vawiin lamah a chau ve hle ni tur ani. Mahse zanin hian nupa tuak tharte tih thin ang kha tih pui loh ka duh hauh lo thung.



Inthlak ta lem lo chuan ka va pan hnai a, a biang chu ka chul deuh hauh hauh a, "Ka duat..." a beng bulah chuan ka tizawi sup a, a la harh mailo.



Ka towel ven lai chuan ka inhruhul thuak a, chhuatah ka paih thla nghal tawp. Khumah chuan lawnkaiin a hmazawn atangin ka bih ngur a, "Ka duat..." ka tih leh takah chuan a rawn che talh talh a. A rawn meng chhuak ta, chutia hnai lutuka ka lo melh avang chuan a phu chiam a, ka lo nui chhuak hawk hawk.




Chutah ka âwm ruak kang chu a rawn hmu fuh ta a, chhuata towel ka paih thlak tawp pawh chu a melh zui zat. Min rawn melh leh a, chutah zet zawng rizai chu a ban rawk rawk a, a inlukhup nghal daih anih chu !



Rizai keu kau ka tum chu a pawt deuh tung a "U Sangzual..." a rawn tichhuak chûl a. Midangin kan thawm an hriat te pawh a hlauhawm zawk alawm mawle.



"I bengchhen chuan ka pa te ngaih a tha miah lovang" ka ti dut dut a, a ngawi ta dak mai. Rizai ka pawt kau tur pawh chu min dang ta bik lo.



Ka bawh nghal run a, a mitmeng fiah zet chuan min lo melh ve kiau, ka hmel landan atangin ka awmdan chu a hrethiam aniang a rawn thaw chhuak hak a.




Rizai chu ka hlim nghal pawp a, "Nupa kan ni tawh a, zahna tur a awm lo" ka ti khur hluk a, a chalah ka fawp nghal vang vang bawk. A hmai sa hat hat chu ka hre thei hial, a zam viau a mawnle. A lainat awm zawk.




"Min ring em?" ka tih chuan a rawn bu deuh nghat a, "Anih chuan zam duh miah suh" ka ti a, ka nuih suk a, a rawn nui ve ta tawp.



A mutkawr hak chu a darah ka hui liam a, ka fawp kual nghal dun dun a, a rawn thawchhuak leh hak thin.



A hmuiah ka fawp ta a, duhthawh tak leh ril zetin ka fawp a. Ka samah thamin min lo chhanglet ve vat. Inlahrang hlekin "Ka duat..." ka ti tham tuak a, a mitmeng phelh deuh phangte chu hmuhnawm tak ani.




A hma aia duhthawh zawk chuan ka fawp leh ta ngawng ngawng a, min lo chhanglet ve tan tan mai. A mutkawr pan thler chu ka pawt ri nghal thawt a, a thlerin ka hria, mahse chutiang ngaihtuah thei pawh ka ni tawhlo.




A tak ram kan fan dawn lai chuan dam deuhvin ka che ta a. A mittui rawn luangchhuak ngiai ngiai te chuan min fan takzet. Ka nupui thianghlim zet hian pasalin a pek theih ang hlimna zawng zawng pek a phu a ni.




Ka tan a hmasa ber a ni a, a tan a hmasa ber ka ni bawk. Chu tluka hlu chu nupa inkarah a awmin ka hre lo. Pathian pawh a lawm ngeiin ka ring. Nupa inkar chauh a thleng tura A duan kha kan nupain âm takin kan chên a, mihring mihrinna ngaihtuah chuan ka nupui hian a zei miah lo. Mahse ka duhthusam zawng zawng amahah a awm vek.




Ka hriatchian tak em em a chu maw, mipate hi Pathianin mipa dik takah min siam a. Experience lo neih teuh kha nupa nuna zeina a ni kherlo tih hi. Pathianin min siam chungnun bik zia ka hre thar awn awn mai.




Ka muhil tan dawn chiahah Alarm riin min tiharh a, Zuali mutna lama ri a ni. Ka âwmah beiin a la mutui hle a, alarm ri pawh chu a hrelo aniang. A phone chu ka va ban ta a, zing dar 5 ah a lo set chu niin !




Darkar khat vel awrh kan la mu chauh ania, tuna a thawh nghal chuan a chau dawn lutuk tlat. Alarm ka off hnu chuan nizan thil thleng ka ngaihtuah let a, lawm lohin ka nui leh vur vur thin.




Zing lam dar 3 velah kan inbual fai nawn leh a, kan pahniha tawngtai dunin kan mu ta chiah kha ania. A chau viauin ka ring. Keichu mipa tih takah ka chauh em em pawh ka hre hran lo.




Dar 6 rik hma hret chuan a rawn che ta talh talh a, ka lo kuah nghet deuh salh. Harhchhuak thut ni awm tak hian a tho chhuak nghal zawt a, mahse a rawn mu thla lehnghal dawt "Ka hah..." a rawn ti chhuak hlawl a, ka lo nui chhuak hawk.




Ka lamah ka pawt hnai nghal hrat a, a te chhuak that mai. "Tinge i hah a?" ka lo tih chuan ka awmah a hmai a rawn nawr vak, han chhaih kual vel hi ka thil nuam tih ber pawl a ni tlat tawh.




Ka kuahbeh hle hle lai chuan a rawn che chhuak leh thut a "Awi, dar engzat nge?" a rawn ti hap a, ka âwm zawn atangin min rawn melh chho kiau a "Dar 6" ka lo ti sup.



Inlahrangin a phone a ban nghal vat a "Alarm kha ka set reng sia" a rawn ti hap a, min rawn melh deuh ha bawk. A hnarah lo tuai zeuhin "Thawh hma vak a ngailo. I harh tawp si lova..." ka lo tih chuan a ner deuh nang nang a. "Kan mut dawn khan i off a ni chiang mai" a rawn ti hlak a, tho theilo nih chu a duhlo ve khawp mai.



________*_______*________*________


(Mahni in lumah inneih kan han chhim bik mai ania...inneih mai bakah a dangte pawh maw...😂 Kan nihlawh zia hi...Zanin chu inneih boruak tih loh chu a leng vak lova mahse a sei viau ania aw.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:09 pm

LOVE COVERS ALL
By CVL Awmpuii


Chapter - 39



Inhnuai kan chhuk thlak hma chuan a inthlak a. Keiin ka ban lehlam lukhamin a chezia chu khum atang chuan ka lo thlir reng thung.



A mutkawr pan thler, nizana ka pawh chhiat tak kha a rawn lekkang a, a ner nasa ngang mai. Ka lo nuih ruh ruh chu min rawn melh ram ram a "I thiltih hi" a rawn ti hlak. "Ka lei leh mai ang che" ka lo ti mai a, "Mutkawr i mamawh em em pawh ka ti chuang lo nain" ka tih zawm leh kher a. A lungawi lo zak deuh bawk si che kual vel chu hmuhnawm tak a ni.




A hnu deuhah chuan "Lo inthlak la, inhnuaiah chhuk ve tawh ang, dar 6 a pel tawh ania" darthlalang bula ding chung chuan a rawn ti a. "Lo kal phawt la" ka kut chuan ka hui zauh a, min melh deuh vang vang hnuah chuan min lo pan ve mai a.




Ka bul a rawn thlen rual rual chuan ka lo pawt deuh thut a, a khek deuh raih mai, kei ka lo nui chhuak hawk hawk thung.



Khumah chuan ka bawhbet leh rûn a, mitmeng fiah kakin min lo melh let ve kal a, "Kan chhuk tawh a ngai ania, mo thar tuka thawh hai ka duhlo" a rawn ti hap a, a tawng zawnga a thaw lum deuh hak chuan ka hmai a rawn tilum hak thei.




Kûn hniama fawh mai ka tum chu a lo thlesawn vat a "Chhuk tawh zawk ang" a rawn ti zawi sap a. Keia duhdan a lo ni der lo.




"Ka lam lo hawi phawt la" ka ti sup a, mahse "Chhuk tawh zawk ang" a lo ti ve tlat thung.



Thaw chhuak hawkin a nghawngah chuan ka hmaiin ka nawr vak a, a lo thaw chhuak ve hak mai. A nghawng ka fawh rual chuan a za ti chu a rawn nui ri hak a, ka samah thamin inlakhran a tum a, mahse ka delh bet hneh ngang mai a min hneh der lo.




"A za ania" a tawng tha hlei theilo, nui ri hak hak chung chuan a tal kual vel a, a nghawnga la fawp reng chung chuan ka lo nui ve tho.



A inrin loh lai tak chu remchangah lain ka inlahrang hlek a, a hmuiah ka zuk fawp nghal siah. Ka beisei loh deuhin nui var var chung chuan min lo chhanglet ve vat a. A aia duhthawh zawkin ka fawp zui nghal tawn tawn a.



A kawrfual ka hlim chho tur chu min lo dang vat a "A tlai....a tlai tawh emai" a rawn ti phelh phang a. Ka mitmenga tisa châkna thup eih lo chuan ka han melh chho a, ani pawh a lo meng phelh phang mai.



A kawrfual ka chelhna kut chu rawn chelh nghet sauhin "Kan tho tlai lutuk palh ang, chhuk tawh zawk ang" ngenngawl deuh hian a rawn ti leh a. Inneih tuka a thawh tlai chuan a mualphona tur ania, chutiang a tawh chu ka duh bik lo.




Ka hmaiin a âwmah chuan ka nawr vak a, inthunun tum takin thawk ka la hawk bawk. "A tirah khan min dang lo la chu kan zo hman ang mawle" ka tichhuak sup a, ka hnungah a rawn chûm nghal tawlh. Ka lo nui mai a.



"I hmeichhe mî ru zek lo maw?" a rawn ti uang a, ka lo nui hawk "Ka zei viau em ni?" ka tih chuan ka hnung a ri leh nghal dawt. Ka lo nui chhuak hawk hawk thung.



A hnu deuhah chuan inlahrang hlekin mitmeng thutak zet hian ka han melh a "A hmasa ber leh a tawp ber i ni ang" ka ti nghet ta charh a. Chawp leh chilhin a rawn tah nuih deuh hak mai.



Ka han inbengkang a, ka biangah min lo dawm ve vat, ka sawi ang chiah chuan "A hmasa ber leh a tawp ber i ni ang" a rawn ti lawi ve ta rât a. Lungchim zetin kan infawp ta vawng vawng a.



Inhnuai lama kan inzui thlak chuan tho an lo awm nual tawh a. Mikhual thenkhat la awm ho pawh an lo ri deuh laih laih mai. Kan chhungkhat laina thingtlang lama awmte chu hmun danga thleng lovin kan inah an rawn thleng khawm deuh vek a. Chu chu kan duh dan a ni bawk.



Zuali chu ka nuin a lo ko vat a, kan chhungte chu a han hmelhriat tir zung zung a. Nimin inneih boruakah inhmelhriattir na hun pangngai tak a awm bawk si lova chuvanga tuna hmelhriat tir chauh a ni.




Choka lamah an inzui phei ta a, keichu ka pa nen inleng kan lo dawngsawng thung.



U Dinpuii a rawn lenglut ve hlawl mai a. Ani hi kan Kohhran atanga Missionary kal chhuak ani a. Zinkawng ngaihnawm tak a nei, mahse zinkawng ngaihnawm tak nei tura a tawrhna te, a chânna te kha a namai lo khawp mai.




Tawngkam mawilo nilo se chhungkaw rethei tê atanga seilian a ni a. Unau pali an ni a, a upa ber a ni. Naupanhtê an nih laiin a pain a boralsan a, a nuin a tul pui ta a. Bazar ah chawhmeh te zuarin a tul tul a ti a, an eikhawp chu an hmu ve mai thin. Lo puitling chhovin ngaihzawng a han nei ve a. A ngaihzawngte chu an dinhmun let thawk an ni ve thung. Chhungte atangin dona tam tak an tawk a. Mahse a mipa khan a duh ve em thin a, an inthlah thei meuh lo.




Chutiang dona hrang hrang leh dinhmun khirh tak taka an din mek lai chuan Pathian kohna a dawng ta a, hnial thei niin a inhre si lo. A bialpa a hrilh chuan a lo pawm pui thei awzawng lo mai a. In ruk puiah hial a sawm nghal rum rum reng bawk a. Mahse ani duhdan a lo ni bik dêr silo.




A nu pawh khan a tirah chuan a duhthlanna kha a pawmpui thei ngang lova. An chhungkaw innghahna ve ber kha a ni tawh si a, chutia a fanu han awmhrang daih tur chu ni theiin a hre ngang lova. Mahse Pathian tih mi ngang a ni ve a, a tawpah chuan a pawm pui thei ta hram kha ania.




A bialpa nen pawh inthenna thu sawi em em lovin Pathian rawngbawl turin Missionary chuan a pen chhuak ta a. A kal karhnihna velah a bialpa chuan sâwn a thlak thu a hre ta a. A rilru a na ve viauin ka ring. Mahse a rawngbawlna thulh phah nana hmang duh lovin intihchak nan a hmang ta zawk a. Tichuan tun dinhmun hi a thleng thei ta a ni.



Tunah chuan a naute pawh an puitling vek tawh a, hna pangngai tak tak an nei tawh. Amah hi chu nula senior kum 50 vel zet a ni tawh a, mipa hi a ngaihsak ta miah lo bawk. Pathian tan a nun pumpui hlan chu a tum ber niin ka hria.




A nun atanga ka hriatchian tak em em chu Pathian vanga chân kan inhuamna ah hian kan duh ang zawng zawng pekin kan awm kher lova. Mahse kan hlimna tur leh kan tana tha tur zawk zelin ro min lo relsak thin tih hi a ni. Keichu Pathianin chân ngamna ruama engkim a pek takte zinga mi vannei ber ka ni hial ang.




Ka pa nen chuan a rawngbawlna chanchin te chu kan han zawt a. Harsa leh buaithlak a tih deuh deuhte chu a han sawi ve luam a.



"Thil buaithlak deuh chu maw, kan ram ber hi a dam si loh chuan khulaia Pathian rawng zuk bawl pawh a sawt mawh khawp mai. Ka tih awmzia tak chu, helaiah kan ramah hnam dang tam tak, khung lai ami te khu hnathawk ten an rawn awm ve thin si a. Helaia kan nun dan in a lo zir silo, an rawn haw thlak chang hian 'Kristian ram inti ve si' tih a ni zel a maw" a han ti ve ngial a.




A thusawi chuan ka ngaihtuahna a tithui khawp mai. Missionary tam tak kan tir chhuak a, an tan hian a harsa ve thin viauin ka ring. Helaia 'vai chhia' kan lo tihte hnenah khan Pathian rawng an zuk bawl a. Kan ram, Kristian ram ngeiah Kristian nundan dik tak kan lo hmuh leh si lo. An zuk haw hian hmeichhe tawngkam takin min rel nasa ve thei ngawtin ka ring thin.




Kan ram hi hnam dang ten min chiah piah nasa ve ta hle in a hriat a, kan ram chhunga awmhmun rawn khuar ve tawh tal te hi chu Pathian rinna kawnga ke pen dan kawng lo kawhhmuh hi keini ringtute'n kan tih makmawh a ni. Chutianga kawng kawhhmuh tur chuan kan nun danin a zir a ngai ve viau bawk ang.



Ka pa chuan "A ni ngawt mai tiraw. Kan rama sakhaw dang be thin lo lut te pianthar tir thei tur khawpa thahnem ringtu inti hi chu kan awm ve asin mawle. Ram hi a dam miau chuan rawngbawlna pawhin hma a sawn thei deuh ang" a lo ti ve chuar chuar a.




Chutah U Dinpuii chuan "Mahse han vui vai lo phawt mai ila. Ring thar pawh nitin kan la lut ve zel tho a, hma chu kan sawn ve khawp e. Pathian tan vek a ni a, kan phak tawk apiang hi a lo pawm mai zel" a lo ti ve vat a.




Inleng tin hnuah chuan ka pain chhung inkhawm a hmang a, Zuali hriat tur pawimawh te chu a sawi luam a "Kan fanu i ni tawh a, inthlahrunna tur pakhat mah a awm lo ania. I chawhmeh duh zawngte, i thil duhzawng te chu i nû bulah hian sawi bawrh bawrh la. Inchhung khura i duhkhawp loh thilte a lo awm anih pawhin sawi mai tur. I nu pawhin a fate ang chiahin hauh i ngaihna ah a hau zel ang che nga, huatah lak miah loh tur ania. Mo pahnih fel tak tak kan nei che u a, kan lawm teh ania. A hmingin kan mo ni mah ula kan fapate nupui in nihna angin kan fanute in ni nghal a. Hlimi pasal pawh chutiang bawkin kan fapa a ni ve bawk. Kan zavaiin chhungkua kan ni a, awmkhawm reng lo mah ila kan thinlung chu inpawh em em zel rawh se" a ti dap dap a. Chhung inkhawm a hman zawh chuan tukthuan kan ei ta a.




U Mafaka fapa Neithan-a khan Zuali chu a lo la hre ve kar a, "A nute" a ti reng reuh a, an in awm thei phian mai. Chawei naah pawh a bula thut kher a chuh tharh a, ka nu te ho pawh an nui an nui mai.




Tukthuan eikham veleh inleng kan neih zawm leh zat a. Ka thiante ho leh nu leh pa thenkhat te chu an rawn lut khawm leh nak nak a. Zuali chu an han fiam bawrh bawrh a, a lai em em zel mai ni.




Chawhnu lamah chuan a nî Lansiami te in lamah a nû te haw tur thlah turin kan phei ta a. Kan va thlen chuan Nu Rinkimi pawh a ngai tein a nghal leh tawh khawp mai. "Zualtei chu a dâng nghal vek alawm le" a han ti hluai a, a nui duh thak lo lehnghal, mahse a uang tih chu kan man thiam vekin ka ring.




Sawmtluangi chuan a nu chu a lo khap vat a "I tilai chhe thei lutuk, a khawngaihthlak" a lo ti vat. Nu Rinkimi chu a nui ta awr awr a. Zuali chu a lai em tak bawk a, ka kawr hnungah min tham deuh ngat ngat mai ni.



An haw dawn hnaih chuan ka chhungte pawh an lo phei ve a. Zuali leh a nu chu an han inkuah vang vang a. "Ka tana fanu fel tak i ni ang chiah khan i awmna apiangah fel nih hlawh zel rawh aw. Nupui fel tak leh fanu fel tak nih tum rawh aw" a nu chuan a ti zawi sap sap a.




Zuali chu a tah a chhuah hmel viau "Lo inenkawl tha rawh aw" a ti tham chhal a. Tun hnuah an la awmhrang ngai miah lova ka khawngaih reuh tak tak ani.



An tlân liam tur kan thlir lai chuan hnem tum tak hian "Karleh lamah kan phei veleh vat dawn alawm" ka lo ti ve sup sup a. Min rawn melh chho deuh hain a nui lui var var a, a mittui tling deuh pam chu hmuh hrehawm ka lo ti hmanhmawh.




"I nu te ngai hman miah lo turin ka duat ang che" ka tih takah chuan a rawn nui deuh hak hak mai.



In lama kan let leh hnu chuan nizan lama kan bungraw la chinfel hman loh te kha kan tifel zung zung a. Ka nu, Matei leh U Malawmin min pui bawk a. Hna a sawt phah a a tihzia khawp mai.




U Malawmi a tawngduh bawk a, kan nui ho dar dar reng a. Kan boruak pawh a zângkhai viau mai.



"Neithan-a hian a ngaina nghal ngawt che a, mak ka ti ang reng. Mi hi a nel zung zung miah silo a" U Malawmi chuan mak tih hmel deuh hian a ti a. "A hma khan Lungleiah kan inhmu tawh a, U Sangzuala nen kan kal tumin ania" a lo ti ve mai a.



U Malawmi chuan "Vawikhat chiah in la inhmu tho bawk sia, U Mafaka khan min hrilh a, a vawikhat hmuhna atangin a nel nghal mai che a" a ti leh hram a. Chutah Matei chuan "Naupang, Neithan-a te ang rual hian mifel leh fel lo hi hriat theihna riau an nei alawm. Naupangin an nel viau tawh chu misual an ni ngailo" a lo ti ve vat a. Anih ka ring, Zuali hi chu naupang têin an nel nghal zung zung mai a. Fel lo sela an nel ngawt theilo hrim hrim.



Zanriah ei turin Valpuia leh Remsanga an rawn insâwm chawp a. Kan inchhungah hian an leng deuh halh reng a, ka awm chang hi chuan chaw an rawn ei ve fo mai.



Chakai leh kaikuang an rawn intum thlap a, Valpuia chuan "Mo thar eirawngbawl kan eichak alawm le. Nu Machhan, Zuali siam tir rawh aw" a han ti lung lung a. Ka nu pawh a nui ta tawp.



Zuali pawh an be tlangnel thiam khawp mai a, an rawn leng chu a tha phian mai.




Valpuia pek chuan "Thlalak aiin a takah i hmeltha daih a" a han ti a, Remsanga a lo nui ruh ruh. Zuali chuan mak tih hmel fe hian a han melh a "Thlalak ah min hmu tawh maw?" a ti hap a. Chutah Valpuia chuan " Hmu dawn lawm ni, Sangzualan kum thar hmanga a rawn haw tum khan min hmuh alawm" a lo ti mai a. Min lo melh vat a, ka lo nui ta tawp.




"Ka lawm e ka ti mai ang" a han ti ve ngial a. Valpuia chuan "A rawngbawlna kawngah pawh i pui bawm tha thei viau turah kan lo ngai tawp mai ania. Nupa kawp chawi rem tak in ni dawn nia" thutak deuh hian a ti ta a. Zuali pawh chuan "Min tawngtai pui ve reng kan mamawh dawn nia" a lo ti ve vat.





Hmeichhe hovin eirawng an bawl lai chuan thlang lam bathlarah mipa ho chu kan lo inkawm a. Politics leh tunlai khawvel thiamna hrang hrangte sawiin kan han titi a. Kan ha hawlh zawng theuh a ni bawk a, sawi tur kan hre hlawm khawp mai. A changin Pathian Thu a kan vei zawngte kan han sawi leh a, thil hrehawm tak chu a ni mawlh lo.





Zanriah ei an peih hnu chuan kan ei ta vat a. Ka thiante chuan Zuali chawhmeh siam tui an tih thu mawlh chu an sawi a. Ka lo chhuang ri rauh rauh khawp mai. Nikhat lek nupa la ni mah ila ka lo nei lovang tih ka hlau viau tawh.




Zuali chuan kaikuang leh chakai chu a ei ve miah lova, ka nuin chakai pek a han tum chuan "Ka ei ngai chiah lo a" inthlahrun hmel deuh hian a ti a. Chutah ka nu chuan a chakai ken lai chu dahin "Aw haw...anih leh kaikuang tal hi ei teuh rawh" tiin kaikuang chu a suah sak a. Zuali pawh chuan a lo hnial ta bik lo. Chutia ka nuin a duhsak em em chu hmuhnawm ka lo ti ngang mai.




Zanriah eikham hnu rei vak lovah ka thiante chu an haw ta a, mak sak zet zetin min la fiam tak ang deuh deuh a. Mipa thianho an thian zinga nupui nei thar hlim an fiam ang thovin min fiam. Sawi chhuah vek chi pawh va ni suh.




Sitting room lama ka let leh chuan ka nu leh Zuali an lo awm ve miah lova. Ka pa chuan "Kan room lamah an kal lawk anih kha inkawm tur lawk rawh" a lo ti vat a. Thaw huai chungin sofa ah chuan ka thu thla ve ta mai bawk.





David leh Neithan-a te unau infiam tê vel chu ka nuihpui hawk hawk a. An ninhlei lutuk chu a nuin a hau leh thin "I puin TV a en hi vei kual reng suh u, in bengchheng lutuk" a ti leh thin a. Mahse ka pa chuan "An infiam bengchheng ri kha hriat a nuam alawm. Kan hre khat bawk a an awm ve chhung chu duhtawkin bengchheng rawh se" a lo ti vat a. U Malawmi pawh chuan a hauh zawm bik lo. An unau chuan an pu thusawi chu an hrethiam ve ngei ni tur ani an han bengchheng uar sauh a, U Mafaka pawh a nui hawk hawk mai.




Ka nu leh Zuali room atanga an rawn inzui chhuak chu ka lo melh vat a. Zuali hmel chu a pangngai khawp mai a, mahse ka nu chu tap hrep hmel a pu. Chutihrual chuan rilru na vanga tap ni lovin hlimna leh lawmna vanga tap hmel a pu, a nuih deuh var var danah a chiang lehzual.



Zuali chuan min rawn nuih var var a, ka bula a rawn thutthlak rual chuan "Eng nge in sawi a?" ka lo ti sup a, "Hmeichhe thu hla, mipa hriat ve chiloh" a rawn ti ru ser ser a, ka nui chhuak hawk lo chauh. An in nufa dawn viau e.




Ka pa chuan fiamthu titak deuh hian Zuali chu a rawn fiam a "I nu i vel tap a nimaw, tap hmel a pu tlat" a lo ti uang a. Zuali tihngaihna hrelo hawihai hmel chu an han nuih hlawm leh rih. A hnuah chuan a fiam tih a hrethiam aniang thaw huai hmel a pu.



Ka nu chuan "I ti thlabar hman alawm" a lo ti hlak a, ka pa chu a lo nui mai a.



A hnu deuhah chuan ka nu bulah a rilru thlak thut chhan kha ka zawt ta a, engdangin min chhang lo "Pathian hmangaihna vang ani" tih chauh a sawi. Chu thu chu tawi hle mah se kan nunah nghawng thui tak a nei tlat. Hrefiah thiam vek lo mah ila Zuali nen kan inpumkhatna atana thil pawimawh lutuk ani tlat a ni.




Zan dar 10 velah chuan mahni room lam theuh kan pan ta a. Kan mut dawn chuan khum bula thingthiin Pathian hnenah kan inhlan leh thlap a. Engkimah kan inlungrual em em zel a, a bik takin Pathian Thu lamah hian kan inlungrual zual. Thil dang zawng zawng aia pawimawh ber Pathian Thu bera kan inlungrual miau chuan a dang zawng chu a fel vek a nimai.




Zanlaiah chuan thil ri deuh sat sat hian min tiharh a, ka âwmah ka kuahbet reng emaw ka tih kha a lo awm miah lova. Chiang zawka ka harh hnu chuan khumah a lo thu a, a kawrfual hak a phelh a, brazier leh panty nen chauh a lo awm. Ka hriat sual loh chuan a inhiat vakin ka hria. A thim deuh naa kan room veranda light êng deuh riai vangin ka hmu thei.




Ngaihtha lo zet hian ka tho chhuak a, table lamb chu ka on nghal vat a "Ka duat..." ka tih chuan a rawn hawi vat. "U Sangzual..." a rawn ti tiau a, rang zetin a thutna lamah chuan ka tawlh a. Ka va ban vat, a taksa ka hmuh chian nak chuan a âwm hi a lo sen vual vek a. Hlauhthawnna in min rawn nangching nghal.




"Ka duat leh, i tha miah lo" ngaihtuahna a khat hian ka tichhuak nghal hluai a. Mittui tling pamin min lo ban a, khum atanga chhuk thlain chhuatah chuan amah hmachhawn zawngin ka thingthi nghal a.




"Ih...lui lam sa ka hua a...ka ei chuan ka âwm a vual a, ka thak vak zel a...tlaiah khan kaikuang kha ka ei sia..." a rawn ti zung zung a. Zanriah eilai kha ka ngaihtuah let a, ka nuin a suah sak kha mawle. A ei hreh danah te khan lo hrethiam tur ka nia sin ! A inthlahrun vang mai maiah ka lo ngai a. Mahni inthiam lohna in ka khat nghal vek thei.




"Damdawiinah kal ang aw" tih leh thawh ka rual a, mahse ka kutah min lo ban vat a. "Min tawngtai phawt zawk mai rawh" a rawn ti tham chhal a, a âwm sen vual tun chu hmuh hrehawm ka van ti tak !




A lu chunga kut nghatin ka tawngtai sak ta a, mihrang tawngtai sak chuan chham tur a rawn awm zung zung mai a. Mahse ka nupui meuhin hrehawm a tawh meuh chuan ka phili vek a ni ber mai. Chham tur ber pawh ka hrelo.



Mahse Pathian hnenah rilru leh tih takzetin ka dil a, chhanin kan awm nghal ngeiin ka ring.



Ka tawngtai zawh chuan khumah ka mut that tir a, a zia deuh thu a sawi. Hmanhmawh zetin vual leh thak damdawi inhnuai lama kan dah chu ka zuk lak sak vat a. Hriselna hi ka nu ngaih pawimawh zawng tak ania, first aid leh damdawi hi chu kan kawl chikim phian.



Ka let leh lai chuan rizai hlimin a âwm chu a lo tuai a, ka pan phei vat. "Damdawi hi ei la, kan tawngtai leh ang a a dam mai ang" ka ti ta a. Thuawih deuh hian damdawi chu a lo ban vat a. Kan tui inchhawp sa chu ka lo pe tel vat bawk.



Kan tawngtai leh hnu chuan a zia ta deuh aniang a awm pawh a nawm hmel ta deuh e. A bulah ka va inthawlh ta vat a, ka kuah ta hle hle a.



A âwm vual chu a la sen deuh tul a, ka tuai sak ta hauh hauh a, hahdam hmel zet hian min ngheng ta a. Hmun dangah vual dang a nei miah lo thung.



"I thil ei theih zawng leh huat zawng pawh ka lo hre miah lova min ngaidam rawh aw" inthiam lo zet hian ka tichhuak sup a, a samah ka fawp vang vang bawk.



"I thiam loh a ni lo, ka lo sawi mai lo zawk a. Mahse ka nu khan min duhsak vang ani tih ka hre bawk sia ka hnial hreh a" a lo ti ve vat a. "Umm...i inthlahrung mah mah zel a, i taksa in a tawrhna tur khawp chuan inthlahrung tawh suh aw. Min tihlauthawng hman lutuk alawm" ka ti dam leh thlup a. A rawn bu ve deuh nghat nghat mai.



"Lui lam sa ka ei chuan maw zanlaiah ka vual vak zel a, a thak vak zel bawk a. Mahse a tukah chuan a reh veleh mai zel. A hrehawm chhung hian a hrehawm viau thung a. Naktukah chuan ka tha vek mai ang" a lo ti ve sap sap a.




Kan mut hmain a thil eiduh zawng leh huat zawngte chu ka zawt ta vek a. A pasalin engmah ka lo hriatpui ve lo chu ka inthiamlo takzet ani. A rawng duh berte chenin ka zawt a. Thil liantham atanga a te ber thleng kan duhzawng leh ngainat loh zawng kan inhrilh ta vek a. Hetianga ho deuha kan ngaih pawh hi nupa nunah chuan a lo tangkai vek anih hi ka ti ta .



__________*_________*__________*_________


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:09 pm

LOVE COVERS ALL
By CVL Awmpuii


Chapter - 40



Tukthuan kan eilai chuan ka chhungte bulah nizana kan buai dan velte chu ka hrilh a. Ka rin lawk ang ngeiin ka nu chu a inthiamlo khawp mai.



"I ei duh loh danah khan ka lo hrethiam lo anih chu mawle" a ti hap a. Mahse Zuali chuan "Min duhsak vang ani tih ka hria alawm, ka lo sawi mai lova ka thiam loh zawk a ni" a lo ti ve vat a.



Ka pa chuan "Nizan lama ka sawi tawh ang khan chhungkua kan ni tawh a. Engmah sawi hreh neih loh tur. Mihring reng reng kan thil duh zawng leh ngainat zawngte a inang lova, eitur huat zawng neih pawh thil awm thei ania, kan duh reng vang a nilo. Chên honaah chuan inhriatchian tluk a awm lova. Thil hotê atanga lian tham ber thlengin inhrilh hreh miah loh tur. Kan inhriatchian poh leh chen hona kawngah hma kan sawn thei ang" a ti charh charh a.




U Mafaka pawh chuan "Zualte ngawih theih lutuk hi a tha miah lo ania aw. Kha, tlema tlemah i chungah thil pawi a thleng lo chauh alawm, tun hnuah chuan engmah sawi hreh tawh suh aw" a lo ti ve vat a. Zuali pawh a bu ve nghat nghat mai.



Tukthuan kan eikham hnu chuan ka nuin Zuali âwm vuala damdawi hnawih tur min pe a "Hemi damdawi hi lui lam sa ei vanga vualah hnawih a tha an tia, inbual vat sela, in hnawih dawn nia" a lo ti zung zung a. A damdawi hnawih tur min pek chu ka lo ban ve vat.



Matein hmun a tifel a, U Malawmin thleng a sil thung a. Zuali chu an âwl ta hlauh, nuam a ti vak lo tih ka hria. Mahse kan chhungten an ti miau si a, a hnial hlei ta ngang lo a ni ber mai.



Ka pa chuan "I awm vual chu damdawi han hnawih vat zawk rawh u, a hrehawm dawn emai" a lo ti zung zung a. Keini pawh hnial buai lovin inchung lamah kan chho ta a.



A inbual lai chuan khumah thuin Bible ka lo chhiar a, a rei phian lehnghal a.



Bathroom atanga a rawn chhuah rual chuan ka lo tho uaih a, "I inthlak hmain hnawih nghal ang" tih leh side table ka damdawi dah chu ban ka rual nghal a.



Bathroom kawngka bula ding reng chung chuan "I chhuk daih tawh ka ring a, keimahin ka hnawih thei alawm" a lo ti hap. Mahse ka lo hnial ve tlat thung "I hnungzâng pawh hnawih tel a ngai awm sia, nangmah chuan i hnawih kim loh a hlauhawm" ka lo ti ve tlat a.



Engmah sawi buai tawh lovin ka lam chu a lo pan ve mai bawk a. Khumah chuan ka pawt thu a, a bathrobe hak lai chu ka phelh sak nghal bawk.



Bra leh panty nen chauh a awm a, rilru kawi ka pu miah lo nain a zah hmel ngang mai, a biang a sen tek tawh.



A âwm lai tak hi a vual nasa zual lai a nih avangin a brazier chu ka phelh tir a, ka phelh sak a ni zawk mah. Min hnungchhawn zawngin a inher vat a "Ka hnunglam kha hnawih la, hmalam chu ka hnawih thei mai ang" a rawn ti zawi sap a, ka hmelah pawh min en tha ngam tawhlo. Ka nuih a za viau nain ka nuih chuan a zak zual dawn sia ka insum hram hram.




Thuawih deuhin a hnungzâng chu ka hnawih sak ta a, nizan ang em em kha chuan a vual tawh lo. Mahse a la sen deuh tul tho mai. A taksa nêm han mai han deh chu thil hrehawm zawk zawk a ni miah lo.



A âwm pawh chu ka hnawih sak nghal vek ta law law a, a la tang tung leh ta nghal a. Nuihza insum deuhvin kan zo ta hram.



A inthlak zawh hnu chuan inhnuai lamah kan inzui thla leh a. Ka nu chuan chanchin min lo zawt vat a. Zuali pawh chuan "A tha dawn aniang, a zia sawt mai" a lo ti ve vat a. Ka nu chu thaw huai hmel a pu.




Kar khat dawn kan innei ve ta reng mai ! Ka nu nen pawh nufa dik tak ang chiah an ni. Engkimah an inlungrual a, an intilawm tawn thiam ti mai teh ang. An titi lai ka hmuhfuh apiang hian ka nuin Zuali a melh leh ngawih ngawih thin hi ka hmu fo mai a, a ngaihtuahna tur awm ang ka hre ngailo. Mahse hmangaihna mitmeng dik takin a en thin niin ka hria. Zuali pawhin a nêl em em a, ka rinaiin a tlangnel hma bawk. A lawmawm viau mai.




U Mafaka te pawh hmanni khan an awmna lamah an let tawh a. Kan awm ho chhung khan Zuali pawh a tlangnel ve hman viau a, U Malawmi nen pawh an inbe thei khawp mai.




Khaw lama kan phei hmain kan nupa chuan kan bazar a. Mamawh em em kan nei hran chuanglo nain chhuah dunna hun remchang ka chuh ve deuh a, nakinah chuan kan thei mai mai tawh awm si lova.




Inkhawmnaa a puanbih tur pahnih ka leisak a, kawr ka leisak bawk. Mamawh lo inti viau mah se pasal ka nihna anga ka thil lei hmasa ber a ni a, min hnial lui bik lo. A ni pawhin a pawisa khawl sain sana leh smart shoe min lei sak a, ka thil neihte zinga ka roh ber turte an ni ngei ang.




Pawisa chungchang hi kan inneih tirh khan kan sawi dun tawh a. Ka nupui a nihna angin ka hlawh lak apiangin pawisa kawltu ani tawh dawn a. A hna kha a bansan a ngai bawk dawn. Ka rawngbawlna nen ka kawppuiin hna a thawh kha a rem lova, Synod inkaihhruaina dân pakhat ani. Pastor leh Pro Pastor nupuite tan hna dang thawh a rem lova. Hei vang tak hian ania kawppui kan thlan uluk a tul em em, kan rawngbawlna kawnga tha taka min tawiawm tu thlan thiam hi a pawimawh. Ka nupui hi chu Pathian min pek liau liau ania, ka thlang sual lo tih hi a ni telin ka hre chhawm zel mai ni.




Ka nu leh pa leh Matei te thil tur pawh kan leisak nghal a, ama rawt chhuah bawk hi ania, nachang a hre thin ngawt mai.



Kan haw hmain dawrah kan châwl a, kan thil eitur chah kan nghah mek lai chuan ka hmelhriat ka hmu nawlh mai a. Rev Sanghminga niin ka hria, BD ka zir lai khan tum hnih ngawt kan inhmu a, pastor senior pawl tak a ni ve tawh. Ani pawhin min rawn hmu ve vat a, a hmelhriat ka ang a ti ve tho aniang min melh vung vung a, ka kuta ka hui zauh takah chuan kan lam panin a rawn phei vut a.




A rawn thlen rual rual chuan "Sangzuala ni rengin, ka hmuh hnu i ang ka ti reng a" a rawn ti nghal bawrh bawrh a. Kan han inchibai nghal lawp lawp a. Zuali lam a hawi chiah chu a phul hlut a ni ber chutiang chiah chuan Zuali pawh a phawk ngang mai "Ehe...pa Sanghminga chu" a ti hliai a, "Zualte..." Rev Sanghminga pawh chuan a ti nghal hluai a. An lo inhre sa emawni dawn ni.



Chutah ka lam a rawn hawi a, "Nupui i neih thu ka lo hria a, Zualtei hi em ni?" a rawn ti he haw a, 'aw' ka lo pawh vat.



Kan bulah chuan a rawn thu thla ve ta nghal a, Zuali nen an inhriat dan te chu a han sawi a. Zualin a lo belh ve zeuh zeuh bawk. "Shillong ah reilote chhung chu rawngbawlna vangin ka zuk awm a, zirna avanga thalai awm kha an lo thahnem ve khawp mai. Pathianni inkhawmah pawh an rawn tel ve thin a, chuta tang vela inhre chho chu alawm kan nih. Sangzual, nupui i nei tha hle mai" a ti nghal zung zung a, a hmel landan atang chuan Zuali chu a chhuan hmel takzet.




Chutah Zuali chuan "I awm chhung reilote pawh kha thalaiten kan hlawkpui teh asin" a lo ti ve vat a.



Washroom lama Zuali a kal chhung chuan Pa Sanghminga chuan nihlawh min tih thu mawlh chu a sawi ta reng a. Shillong Mizo thalaite zinga Zuali danglam bik zia te, a nunmawi zet te, tanpui ngai apiang a puih thin thute, Pathian a tih zia te leh an fak theih zia te chu min han hrilh zung zung a. A vawi tam tak nan ka nupui ani chu vannei ka inti leh ta.



An khaw miten 'Shillong a awm lai pawh khan a zuk tal hiar viau ang' an lo tihte kha chu maw...thu diklo zinga chhiar tel chi pawh niin ka hre ta lo, thil awm thei ngailo tur ani.



Mi chanchin a chhe zawnga kan sawi duh anih pawhin thudik tal hi ni ve sela a zia deuh ang. Dik lo bak saka mi chanchin mawilo taka sawi khan kan nun a nawm phah chuangin ka ringlo.




In lam pana kan haw tur car a kan lut chiah chu ka lamah ka pawt hnai a, a ngaihna hrelo fe hian mit a rawn kan ak. Glass ka up vek avangin pawn lam atangin tuman min rawn hmu thei lovang.




A biangah khuapin "Ka hmangaih che" ka ti sup a, a rawn nui ri hak mai. "Ka hre nawn fo duh ang" nui var var chung hian a rawn ti a. "Ka hmangaih che" ka tih leh chuan amah zawk chuan ka hmuiah a rawn fawp ta zeuh a "Keipawn ka hmangaih che" a lo ti ve sap a.




A hma aia pawt hnai leh hratin a tawng leh tur chiah chu a hmui ka khar chilh nghal hmiah. A tirah chuan a hamhaih deuh nain min lo chhanglet ve vat a, ka nghawngah a rawn kuah let ve tai bawk.



Rei ngial kan infawh hnu chuan a inlahrang ta a, "Hun lo lutuk" a ti khur dat a, ka lo nui lum hawk. A chal leh ka chal la nawr si reng chung chuan a hmui huh hliam chu ka fawp leh zauh a, "Haw vat kan ngai, inah ka duat ang che" ka ti zawi sup a, a nui ri leh hak hak tawh.




In kan thlen meuh chuan tlai dar 3 a lo ri thuak tawh. Kan chhungte thil kan hawnsak te chu kan han pe a, an lawm thiam ngang mai. Matei chuan kan Tshirt lei sak chu a han inteh chhin vel a "Ka van duh tak ka lawm e aw" a ti leh hliai thin. A lungawi lutuk chuan min tilawm takzet.




Kar khat tha zen zawn kan châm hnu chuan ka rawngbawlna lamah let a lo hun leh ta a. Kan phei dawn ni chuan Kohhran Hruaitu leh ka thian thenkhatte'n min rawn thlah a. Min ngai der ve tak tak tute an ni a, kan tan chuan an hlu takzet. Min thlah tura lo kal ten an sawi uar ber chu ka nupui hmêlthat thu leh fel an tih thu a ni. Thingpui sem a a che kual velte chu midang titi ngaithla pahin ka lo melh leh vawng vawng thin. Pasal vanneih tak ka ni !




Tukthuan eikham hnu rei vak lovah chuan kan chhuak ta a. Ka chhungte chuan Krismas hman an lo tum thuin min thlah a, Matei chuan min zui phei chak ngang mai. Amaherawhchu class an kal tan tawh a, zirna ngai pawimawh chi a lo ni bawk nen a rawn phei ve ta lo. Lo phei ve thei sela chu Zuali tan pawh a nuam ve viau tur ania.




Nu Rinkimi te inah zanriah kan ei dawn bawk a, eirawng bawl a ngai dawn lo bawk nen kan tlan chak vak lo. Mahni chauha khawhar taka helai hmun ka tlan lai te kha ka ngaihtuah let a, tuna ka dinhmun nen chuan inang lo tak a ni. Ka bula ka nupui awm ve hian a tidanglam vek, a titi siam siam a, chu tluka hriat nuam chu ka hrelo. Ka chhungte fel a tih thute, kan veng mite hrim hrim pawh fel a tih thute chu a sawi siam siam a. A thusawi ho tete pawh uluk takin ka lo ngaihthlak sak thin a, ka ngaihsak a ni tih hi hria sela ka duh.




Khua kan thlen chuan Nu Rinkimi te inah min hmuak tu an lo awm ve nawk mai a. Kan hamhaih lek lek hial, min lo lawm thiam hlawm ngang mai a, Zuali pawh chutiang bawkin. Pumkhat angin kan let tawh a, a hmaa an hmuhsit em em thin leh an diriam em em thin kha ka nupui a ni tawh a. Mi thar ang mai niin kan inhre hial.




Ka hriatchhuah taka chu Zuali hi mi zawng zawngin an lo hmusitin an lo en hniam kherlo tih hi a ni. Chu chuan mi zawng zawng hian kan chanchin chhe lai ringawt an lo sawi bik lo tih a tichiang takzet.



Hringnunah chuan kan phu loh fakna kan dawn châng leh kan beisei phak miah loh selna kan dawng zel dawn ! A chhan chu engdang a ni lo, hringnun a ni miau a !



Zuali te nufa an han inhmu chu an inkuah vang vang a, an nufa inkuah hi a ril bik ka ti, engtin emaw ni deuh hian ka kawchhungah min tham thin. Thil hmuh hrehawm zawk zawk chu a ni mawlh lo.



Eirawng an lo bawl peih dim diam tawh a, kan thleng tlai ang reng bawk nen inleng te tin darh hnu chuan zanriah chu kan ei ta nghal a.




Ka pizawn bulah chuan a dawr nghah chungchang velte chu ka zawt ve luam a, tha takin min lo chhang "Thil hrehawm a ni lova a nuam lutuk ania, i nu Rinkimin min pui nasa bawk a thil kan tifel zung zung mai" a ti malh malh a, ka bula thu Zuali chu a lo thaw deuh huaiin ka hria. A nu hi a ngaihtuah ngawih ngawih tih ka hria a, keipawhin ka theihtawp chhuaha ngaihtuah ve ka duh. A fanu ka hmangaih a, a nu pawh ka hmangaih tur a ni.




Kan in luah lama kan let leh meuh chuan zan dar 10 a lo ri tep tawh. Khatia tukthuan kan eikham hnu khan inleng an rawn awm veleh nawk a. Keini nupa ve tehlul min lo ngaihlu a, kan tan chuan lawm loh chi pawh va ni suh. Keini pawh kan zinkawng a thui ve tehlul nen hah hmel pawh kan pu vak lo. Kan phur dun viau vang pawh a ni mai thei.




Bungrua vel a dahfel chhung chuan lo inbual hmasa mai turin min ti a, ka lo hnial bik lo. Ka inbual zawh hnu chuan a lo in remfel thuak tawh a, bathrobe lain bathroom lam a pan ve nghal vat.



A inbual chhung chuan kan chhungte phone in chanchin ka lo hrilh a, kan thlen hlim bak kha kan la inbe lova. Chinchang kimchang kan hrilh vat loh chuan min lo ngaihtuah a hlauhawm tlat.



Bathroom atanga a rawn chhuah a, room a rawn luh leh lai chuan ka chhungte nen pawh kan lo inbe zo chiah a.



A sam huh deuh hniang a hruk mawlh mawlh lai chuan "I lu te i su a, i damlo ang asin" ka lo ti vat a, "A ro har vak chuang lova dam lo biklo turah ngai ang" a lo ti ve vat.



Boxer chauh ha chung chuan ka va pan hnai a, darthlalang atang chuan min lo nuih deuh var var a, a hmeltha teh vawt lehnghal.



A beng bulah chuan kun hniamin ka phun deuh sup a, lai zet hian ka âwmah a rawn chum nghal talh.



"Ka sawi dik lo em ni?" ka tih chuan "I sual..." a lo ti leh vak tawh. Ka chhaih laih apiang hian sual nih ka hlawh ziah.



Nui hawk hawk chungin a inrin loh lai chuan ka pawmkang nawlh a, a rak deuh that. Tlak hlau zetin ka nghawngah min lo kuahbet ve tai a, a hmuiah ka zuk fawp zauh a, a nui hak hak mai.



Khumah chuan ka nghat thla a, a bathrobe hak lai chu ka pawt phelh nghal a, a bengbulah chuan "Lawithat zan nawnna" ka ti leh kher a, a lai ngang mai.



Min chêt pui dan a la thiam vak lova, mahse ka tana chet awlsam turin a lo insiam rem ve thei zel a, tha takin min lo dawngsawng thin bawk. Chu chu ka lawm tawk a tling em em a, ka nupuiah hian ka lungawi a ni tawp mai.



Kan muthilh tak tak hmain kan tawngtai dun leh thlap a, kan rawngbawlna hmun tur tluang taka min hruai thlen leh avangin Pathian hnenah lawmthu kan sawi a, tunah chuan kan dîl aiin lawmthu kan sawi hi a tam tawh zawk hial ta ve ang. Lawmthu sawi sen loh hi kan ba miau alawm.




Zingah Pastor ten chawei a min sawm avangin eirawng kan bawl lova. Dar 6:30 velah Pastor quarter lamah kan phei ta nghal a. Ka nupui hian eirawngbawl hmana kal a duh miau a, kan kal hma viauin ka hria.



Kan va thlen chuan min lo lawm thiam ngang mai. Kan inneihna an lo tel ve theih loh avangin thupha te an han chawi luam a. An lo tel ve theih loh chhan pawh an fapa naupang ber dam loh lai tak a lo nia, mahse tunah chuan a dam tha viau tawh.



Pastor nupui leh Zualin eirawng an bawl lai chuan pastor nen kan lo inkawm a. An fate an bengchheng hle bawk.



"I hlim tawh em?" min han ti hluai a, ka nui lo theilo, ani pawhin ka hmel atangin a hrethiam tih ka hre vek.



"Ringtute'n kraws kawng kan zawh dan hi ringtu theuh theuh ni chung hian a inang lo thin khawp mai tiraw?" a rawn tih chuan "Kraws kawng kan zawh dan hi a awlsam viau anih chuan keimahni lam inenfiah kan ngai takzet tawh tihna nimaiin ka hria" ka lo ti ve vat a.




"I man thiam ta alawm" a lo ti sup. Chutah sawi zawm lehin "Kraws kawng awlsam loh zia chu Bible ah chiang tak takin kan hmu a, vanram luh harsat zia pawh Chanchin Tha bu ah kan hmuh kha 'Kawngka zîm ah chuan lut rawh u, boralna kawngka chu a zau va, a kawng pawh a nuam a, chumi lama kalte chu tam tak an ni. Nunna kawngka erawh chu a zîm a, a kawng pawh a chêp a, a hmutute pawh tlêm tê an ni' tih anih kha. Kan ringtu nun kawng hi a awlsam lutuk anih chuan kan dai pelhe hle tawh tihna a nimai. Chutihrual chuan Pathian nihna hmu chiang tak tak tute chuan kawng hrehawm pawh zawh mah se Pathianah lawmna an hmu tlat thin. Van lawmna kim kan neih theih nan kan lei lawmna te hi Pathianin min thiah sak fo va. Kan bul hnaia kan hmangaih tak awmte pawh Amah chauh kan thlan theih nan min laksak fo ania. Mahse kan tana tha tur zelin a rel thin chu anih hi" a ti ta duah a. Nitin hian A thu nun zia ka hmu chiang tawlh tawlh zel mai anih hi. Chutiang zelin Pathian ka hriatchian chakna a zual telh telh bawk.



'Hriatchian leh zual che ka va duh em' tih hla nung zet phuahtu rilru kha ka dâwn pha thei hialin ka hria. Mihring reng reng chu kan hriatchian duh tak takte bulah chuan kan awm hnem a, kan chhui chiang a, hrechiang tawk intih ni kan nei thei ngai chuanglo. Chu tak chuan kan mi hriatchian chakte hnaih deuh deuh turin min tur ta thin a ni.



Tuna ka tihtur chu Pathian ka hriatchian leh zualna atana Amah hnaih deuh deuh hi a ni ta ber mai.



Chawei an peih takah chuan kan phei ve ta vat a. Chawhmeh an lo siam hnem ngang mai, ei pawh ka eitui viau. Pastor nupui leh Zuali chu kum inthlau viau e tilo chuan an inkawm thei phian a, a hmain an lo inhre sa bawk nen kan mikhual vak lo.



Kan haw dawn chuan Pastor chuan ka hriat tham lek hian "Nangmah hmangaih tak tak tu che chuan i thlarau nun thlengin a hmangaih ang che" a rawn ti zawi sup a, ka bengah chuan a ri ring ngang mai. Ka ngaihtuahna a tithui viau bawk.



Kan haw kawng thleng chuan ka ngaihtuah zui rauh rauh a. Hmangaihna dik takin ka nupui hian min hmangaih ka tilo theilo. Ka rawngbawlna ka thuan awp phah hlauvin min hmangaih em em chungin tawp a thlang a. A tirah khan hrehawmin tuar viau mah ila Pathian hmel chiang zawka ka hmuhna hmanraw pawimawh tak a lo nih tak kha. Ka thlarau nun thlenga min hmangaihtu ka nei hi mi vannei ber ka ni ! Tin, ka hmangaihna hi a dik ve takzetin ka hre ta bawk, a thlarau nun thlenga hmangaihtu niin ka inhre ve tlat.




Nitin kan inhmangaihna chuan zual lam a pan zel a tih theih ang. Nupa kawp chawi rem tak leh inngeih tak kan ni ka tilo theilo. Han inhauh buai leh thu inhmuh loh pawh vawikhat mah kan la nei miah lova. Kan chungah Pathian a tha hle tih kan hrechiang dun em em a, chetziain kan hmangaihna kan lantir ve zel bawk.



Bial fannaah vawikhat kan kal dun tawh a. Pastor te chhungkua nen a ni a, hun nuam tak kan hmang bawk. Kan Bial chhung mite pawhin ka nupui chu an fak ve hle tih ka hria. A hmelthat chu thuhran a chetzia ah hian ringtu nun dik tak a lang thin miau a. An hai bik lo ani mahna.



Tuk khat chu thawh a hai ve teh tlat a, tuk dangah chuan a tho hma thei viau a, ka thawh khalh thei mang ngai lo anih kha. A muhil lai rei fe ka thlir hnuah ka tho chhuak a. Eirawng lo bawl peih vek ila chawei hunah tho chauh mah se a pawi lo.




Eirawng ka va bawl zawh hnu pawh chuan a rawn tho chhuak ta miah lova, room chhung ka va luh chuan khumah a lo thu chhuak ve chiah a. A hmel chu a dâng deuh bal a, damlo hmel a pu. Hmanhmawh zetin ka va pan a, "I tha em?" ka tih chuan a lo bu nghat. Mahse a hmel landan atang chuan dam thalo hmel a pu tlat.




Ngaih tha lo deuhin a pangah chuan ka va dek ta a, a khua a sik, mahse sa vût chu a nilo, khawsik ser ser ang kha niin ka hria.



"I khua a sik" ka tichhuak sup a, kalsawn vutin drawer lam ka pan nghal a, nachhawkna keng chung chuan a lam ka pan leh nghal vut. Ka chezia chu min lo en reng a, tui bottle kan inchhawp sa chu no ah ka thli chhuak a "Damdawi hi ei la, a zia deuh ang" tih leh dandawi pek chu ka rual nghal a. Mahse min lo hnial ve vat "Ka period dawn aniang, ka tai a na deuh bawk sia. Ka period dawn hian khawsik tenau ka nei ziah a, mahse a rei ngai lo" a lo ti zung zung a. Ka hrethiam ve vak lo. Mahse Matei pawh a period dawn khan a tai a na thinin ka hria.




Ngaihtha zan lo chuan dandawi chu ka dah let leh a, khuma thu chung chuan a kut ka hûm deuh vang vang a "Engtin nge kan tih ang?" ka tih chuan nuihzat hmel deuh hian min lo en, "A hrehawm em?" ka ti leh dut dut a. A rawn nui ta hak hak "Tih dan vak a awm hlei nem, ni nga vel bak ka period ngai chuang lova, ka tha vat mai ang" a lo ti var a. Thla khat kan innei pum tawh a, vawikhat mah kan inneih hnuah a la period lova ka lo dawngsawng thiam vak lo a ni ber.




"Engtin tak nge i tai chu a nat thin?" ka tih leh chuan "Keimah bikah chuan nihnih nithum vel hi a nâ thin a, hmeichhia kan inang vek lova period-a engtin mah awm velo pawh an awm tho" a lo ti zung zung a.



Rilru buai hmel zet hian "A va buaithlak awm ve" ka ti hulh a, hmeichhia hi an lo ropui anih hi, neuh neuh an ngah tehlul nen an lo tuar thei zel mai a.



"Buaithlak lo e, hunbi kima thî kan nei thei te hi Pathian malsawmna ania. Thî nei tha theilo tam tak an awm laia mumal taka kan la nei thei anih chuan Pathian hnena lawmthu sawi mawlh mawlh tur kan ni. Mi pangngai kan nih vang ania, tâi na te chu ka tuar thei lutuk. Thi neih vanga tai na te chu vui vaina tur a ni lo" a lo ti duah a. A thil thlir dan ang hian hmeichhe dang zawng zawng hian thlir thiam thin sela nun nuamin an hmang ngei ang.




Kohhran Committee kan neih dawn avangin tukthuan kan eikham chuan rilru nuam zan lovin ka chhuahsan ta a, ngaihtuah awm a nih loh thu min hrilh cham chi bawk. Tunlai chaw a ei tha hlei thei vak lo a, tunah hetiang a ni leh a ngaih chu a tha thei mawlh lo.




Biakin lam pan tlang lovin ka pizawn dawr nghak bulah chuan ka pengkawi ta hram a, Nu Rinkimi pawh a lo awm. Zuali chanchin te chu ka hrilh ve luam a "Tukinah a khua a sik deuh a, a period dawn vang anih a ring a. Ka ngaihtuah riau a, committee kan nei dawn bawk sia lo va leng phei ta mai chu" ka ti ta tawp a. Amah chauha awm tur chuan ka ngaihtuah mah mah tlat ani.




Chutah ka pizawn chuan "A period dawn hian a tai a na ziah hrim hrim a. Lo ngaihtuah duh suh, ka lo va leng dawn nia" a ti zung zung a. Nu Rinkimi pawh chuan "Dawr hi kan khar mai ang a, in committee chhung chu kan lo va leng mai ang. I ngaihtuah thei bawk sia i la che buai ngawt ang" a lo ti zung zung a. A thusawi tawp lam chu a uang leh viau tawh.




Kan inbiak fel hnu chuan Biakin lam ka pan ta a. Kohhran Committee chu rinai daihin kan bang har a. Thurel tur a thahnem phian a, in lamah min pawttu awm mah se ka rilru chu ka pe ve thei viau mai. Awmna hmun azir zela tihtak zeta thiltih hi mi puitling zia ka ti ve tlat.




Kan ban meuh chuan tlai dar 3 a lo ri thuak tawh. Pastor in thingpui in kawi tura min sawmna pawh chu 'Kan nu a nuamsam lova' tiin ka hnial a, min lo hrethiam khawp mai.



In ka va thlen chuan an lo hlim phian a, ka va haw min hmuh chuan hmel nung sarhin min lo melh hlawm a. A ngaihna ka hrelo hial zawk.



"I zia deuh em?" ngaihtuah zet chuan ka ti a, a lo bu nghat nghat. Ka haw takah chuan a nu te pawh chuan haw an rawt ta vat a, an chhuah dawnte chuan an phun deuh ser ser a. Room lam ka panlai tak anih avangin an thusawi pawh chu ka hre lem hlei lova.




Ka inthlak laiin ka nupui chu a lo lut a. Min rawn nuih var var a, ka lo nuih ve suk "I dam tawh maw?" ka tih chuan a lo bu nghat nghat a. Ka kamisz nghawng kilh chu min rawn phelh sak vat a, ka lo dawh hle hle thung.



"I chau em?" a tih chuan "Chauhna tur a awm hlei nem" ka lo ti mai a, a kawngah ka lo hmer salh bawk.



Ka kamisz a phelh zawh chuan balbawmah a dah nghal a. Towel ka lo ban ve vat, drawer ah thil a va hai rak rak a. Bathroom lam pan mai ka tum chu min rawn ko a, ka va hawilet leh rih.



"U Sangzual..." a rawn ti zawi sap a, a hmel nung deuh sarh atang chuan thu lawmawm min hrilh tur a ang ka ti, a hnungah eng emawni hi a thukru deuh tat bawk a.



Mitko san ak chungin a lam ka va pan vut a, rang zetin a kuta a thilken chu min lo hmuh a.



Pregnancy test kit a ni, rin sen pahnih a lo inrin zui. Keimah hi ka ngawng deuh chhû nghal maiin ka hria! Engtin nge ka awm pawh ka hrelo, ka nghilh deuh dup mai. Hei erawh ka chiang viau lawmnain ka khat.



__________*__________*________*_________

(Kan veranda thli thaw heuh heuh karah ka type a, ka feel hle ani...hihi)

Naute hming inphuah siak ve tawh ang u hmiang.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:09 pm

LOVE COVERS ALL
By CVL Awmpuii


Chapter - 41


Ka kuta test kit en reng chung chuan ka ding khawng luah a, ka â ruai maiin ka hria. Ka tha a zâw vek a, ka hmuh tirh atang khan ka thaw chhuak tawh pawhin ka hrelo hial.



Ka nupui ka hming lama a rawn phun chhuah sep takah chuan ka harh chhuak ta chiah. Engmah sawi lovin test kit keng reng chung chuan a biangah ka va khuap rûn a. A mitmeng de sar sar te, hlim nui sanga min lo melhna te chuan ka kawchhung hi a khawih che dawt dawt mai.



A chal leh ka chal innawr sik tir chung chuan ka han kiai suk a, a lo nui ve var var mai.



Ka mipat pui dangte hi hetiang dinhmunah hian engtin nge an awm ve thin ang ka hrelo. Keichu awm ngaihna ka hrelo, ka hlim lutuk tih ka hria a, mahse ka lan chhuah tir thiam lo a ni ber.



"I hlim em?" a rawn ti zawi sap a, tawngkaa chhang lovin a hmui ah chuan ka fawp ta vawng vawng a. Ka hlim zia sawifiah thei tawngkam a awm miau lo ani !



Ka nghawngah a ban rawn suihzawmin min lo chhang let ve vat a. Hmangaih a ni tih inhria sela, a pasal hlimna min thlen nasat zia hi inhria sela ka duh. Ka ngaihtuahna zawng zawng hriatthiam tir tum ni awm fahrana rilin ka fawp a. Ani pawhin chutiang chiah chuan min lo chhanglet ve zel bawk.




Rei fê kan infawh hnu chuan khum lamah ka kai phei a, ka thutthlak tir hnuah chhuatah chuan thuhniamin a dul zawnah chuan ka beng ka dawh ta vang vang a. Engmah sawi lovin ka samah chuan min lo tham ve salh a, a dul zawn atanga ka han hawi chhoh chuan min lo nuih var var mai.




Rei ngial a dul zawna hmai ka phum hnu chuan "Va inbual tawh la" a ti sap a, ka lu ka lo thing chu a nui ri deuh hak hak mai. "Reilotê chiah" ka ti sup a, a dul zawnah chuan ka beng ka dawh leh vang vang a, naute lungphu ngaihthlak ka tum a ni ber mai.




Ka ngaihtuah chhuah taka chu maw...pa leh fa inthlun zawmna lo chak tur zia hi a ni. Chu chuan Pathian leh mihringte inkar min ngaihtuah thlen tir lo theilo. Nû pum chhunga kan awm hma daih tawhin Pathian chuan khawvela piang chhuak turin min lo duan lawk tawh a. Kan pianchhuah ruala kan tah chhuah khan Pa thinlung a lo lawm em em dawn tih hi ka hmu chiang viauin ka hria.




Ka fa lo piang tur chu la hmu lo mahila a nû pum chhunga a awm lai mek pawh hian inthlun zawmna thuk tak kan nei nghal ka tilo theilo.



Inbual ta lem lo chuan kan chhungte ka phone kual ta zung zung a. Family group-ah test kit thlalak nen thlap ka post bawk. A hma khan ka lawm lutuk vangin ka â deuh ruai a, ka che chhuak hlei theilo anih kha. Tunah chuan ka che vut vut a, ka thian hnaivai te ka phone kual a, keimah reng reng chu ka phur a ni tawp mai. Ka nupui pawhin khuma thu chungin min nuih min nuih ringawt tawp.



Ka pa phone lovin ka nu zawk ka call a, chanchin ka han hrilh chu a khek deuh raih mai. Nau pai lai tana thil tha a rawn sawi zung zung a, keiin ka lo chhinchhiah ve zel bawk. Ka nupui biak a duh thu a rawn sawi chuan phone chu ka pe ta vat a.




An inbiak chhung chuan ka nupui chuan hmui phunin inbual phawt turin min lo ti a, towel vengin ka la awm reng a, chutia a rawn tih takah chuan ka lo hnial ta bik lo.




Ka inbual zo bathroom atanga ka chhuah chuan room ah a lo awm tawh lova, hmanhmawh zeta inthlakin sitting room lamah chuan ka phei ve ta nghal a.



Pot a lo chei zawm leh melh melh tawh a. Hna a kal tawhlo bawk nen inah awm mai mai ai chuan tiin pot a chei thin kha a chhunzawm ta zel a. Kan in pawh plants a hung nasa bawk a a landan a danglam hneh khawp mai, a tha zawngin ania ka tih.




Ka va chhuak min hmuh chuan min lo nuih var var a "Ka nu nen chuan in inbe thei maw" tih leh a lam pan ka rual a, a lo bu nghat nghat a "Min rawn ngaihtuah nghal lutuk a, a lawmawm rual rualin a inthlahrun awm" a lo ti ve vat a. A bula thutthlak pah chuan "A ngaihtuah tur che alawm" ka lo ti mai a.



Ei châk a neih leh neih loh ka zawt a, engmah eichak a neih loh thuin min chhang. Zawhna chi hrang hrang ka zawt zawm zat a, min chhan ngaihna a hrelo chu nihlawh intih hmel zet hian a nui ta tawp. Keipawh ka nui veleh tho, ka la pangngai thei meuh lo ani ber mai.




Tlaiah eirawng ka bawlpui a , a chesual ang tih mawlh ka hlau a, ka vengthawng nghal em em ringawt mai a, ani pawhin min hrethiam khawp mai. A che reng reng chu a fimkhur ve viau.




A dul la thep zai chu ka lo melh leh vung vung thin a, ka nui chhuak leh tawp zel.



Zanah an inah lamah ka len phei pui a, Nu Rinkimi te chhungkua pawh an lo chhuk thla ve. Nau kan keng tan tih an hre vek bawk a, kan ri ve laih laih mai.



Nu Rinkimi mawlh mai hi a uang leh viau tawh "I hmanhmawh vut vut thin ka ti reng a" nui tlawrh tlawrh chung chuan a rawn ti a. Midangho pawh an lo nui dar dar mai. Kei lah ka lo duai duh bik der lo "Patling fa pahnih nei tawh ka ni vat dawn" ka tih chuan a hmaa Zualin min ngaihdan kha an hrechhuak hlawm aniang a hma aia uarin an han nui leh a. Ka nupui pawh lai viau e tilo chuan a nui ve ta tawp.




Kan inngaihzawn hma thil vel an han sawi kai a, ka chetdan mawlmang tak tak te nen an rawn sawi chhuak a. Keipawh ka nui ka nui ve mai.



Kan haw meuh chuan zan a lo tlai ang reng ve tawh viau. Khum bulah thingthiin kan tawngtai dun leh a, hei chu kan zantin tihdan than a ni. Nilai thawhtan apiangin Biakinah kan tawngtai thin bawk.



Zanin chu a dulah kut nghatin ka tawngtai a, kan fa lo piang tur chu Pathian kutah ka hlan a. Dam leh hrisel taka a lo pianchhuah nan te, a nûin harsatna em em tawk lova tluang taka a pai theih nan te ka dil a. Pathian hnenah kan hlan miau a, Anin min lo chinfel sak mai dawn a ni.



Khumah chuan lukham nghengin ka thu mu deuh titih a, ka hmaah ka kap kalak a, min ngheng deuh chial chungin a mu tihna anih chu.




Bible ka chhiar sak a, a ri ngatin ka chhiar. Kan fa lo piang tur hian a nu pum chhung atanga a awm lai rengin Pathian Thu hi hre hnem ber sela ka duh. A kawng hruaitu tur a ni miau a, a kawng hruaitu ber a hriatchian miau chuan a talbuai ngai lovang.



Ka duh ang thala ka chhiar hnu chuan side table ah dahin ka nupui dul la thep zai chu ka chûl nghal a. A mutkawr hi a hma suih awm chi, pawh phelh mai theih ania, chu chu ka pawt phelh a, ka duh ang thalin a dul chu ka khawih thei.



Ka kut rawn vawn hnah pah chuan "Pathian hi a tha tiraw" a rawn ti fân raih a, "Lawmthu sawi mawlh mawlh kan ba" ka lo ti ve sup.



"I nupui ka ni hi ka lawm" a rawn ti leh sap a, ka lo nui ri suk. Ka nupui anih vanga a lawm chu ka lawm zawk daih.



"I pasal ka ni hi ka lawm" ka lo ti ve sup a, a rawn nui ri hak hak mai.



Rai no chu a haw zek mai a, chaw a ei tha hlei thei meuh lova, hmuh theih khawpin a taksa a tla chak a, ka lainat reuh tak tak ani. Chutihrual chuan rai no thinchhiat tih ang reng vel kha a nei ve miah lova, pangngai takin a awm, a hma aiin a pangchang deuh tih mai loh chu. Mahse chu pawh chu ka duhdan tak ani, theihtawpa duat a phu ngawih ngawih.




Inchhung chetah ka theih chen chenah ka âwl a, a uak deuh reng avangin eirawng bawl leh ilo vel tih pawh ka remti manglo. Mahse amah zawk hian min hnial tlat thin a, kan pahnih in kan ti dun zel a ni zawk mah.



Ka chhungte pawhin an rawn ngaihtuah khawp mai a, Krismas lo hman phei hial pawh an tum. Ka nu phei chuan hmanni khan Washing Machine min rawn thawn rup mai a, kan tan thiltih a awlsam zawk anga tiin keipawhin ka lo pawm khawp mai. Ka nupui erawh a inthlahrung hle a, mahse a chêt vak ka remti lo hrim hrim a, rai a haw veleh zel bawk nen min hnial duh ta bik lo kha ania.




Ber thla kan chuangkai chho a, ka nupui nau pai pawhin thla thum a tling ve der tawh. A thil ei pawh a tui chho tan viau a, a naupai hmaa a ei ai tam daih ei chang pawh a ngah thin. Kei ka lawmah a lo tla a, a ei theih tur ang zawng zawng chu kawl loh pawh kan nei mang lo.




A dul pawh a puar ve deuh ak tawh a, ka nupui tluka rai inhmeh hi ka hrelo. A vun a nung deuh sarh a, tlemin a thau veleh deuh tawh bawk a. Chu chuan a tilang duhawm zual hle bawk.




Ka theihtawpin ka duat tih a hria a, ani pawhin a theihtawpin min duat let thin, chu chuan kan pahnih inkar hmangaihna a tipung deuh deuh bawk.




Zantin kan fa lo piang tur chu a nu dul zawna kut nghatin ka tawngtai sak ziah a. A rawn chet hmasak ber pawh ka tawngtai sak laiin a ni nghe nghe. Kha zan khan ka muhil ta miahlo anih kha. A rawn chet leh hun kha ka châng char char a, mahse zankhuain a rawn che leh tawh chuang miah lo.



Tum li check up neiin Lunglei lamah kan kal tawh a, kan naute pawh Pathian zarah a hrisel tha tih kan doctor in min hrilh a. A lawmawm viau mai. Kan beisei lawk anga kan awm theite anih chuan nakum April thla velah kan nei ve thei ang.




Zaninah Kohhran Committee kan nei dawn a, ka ngaihtuah viau mai a mahse ngaihtuah awm a nih loh thu min hrilh ve malh malh a. "I nu inah lo awm mai che nangmah chauha i lo awm chuan a tihchi loh vang" ka tih lahin "Kan leng phei ngun alawm, zankhat lek te chu ka lo awm thei ang in rei chuang nang" tiin min hnial ve tlat a.




Ngaihngam zan lo chuan committee tur chuan ka chhuahsan ta a, eng em a lo ti bik lo turah ngai ang.



Committee chu rinaiin kan rei ta phian mai a, kan zawh meuh chuan dar 9 a lo pel tawh. Khawiah mah kal kawi lovin ka inkhalh haw ta nghal a. Reilote kalsan pawh ka hreh em em tawh a, ngaihtuah a na thin si a, Kohhran thilah lo chuan chhuah pawh ka chhuak ngailo reng ani.



In ka va thlen chuan thutthleng ah puansin chungin a lo muhil a, chutia hahdam zeta a lo awm chu ka thaw huai mai.



A lam ka pan vat a, a muhil hmel chu ka thlir vang vang a, a tha thlawt a ni. Tihharh ka hreh avangin khum lama pawm sawn mai ka tum a, mahse a banrek ka tawk fuh chiah chu ka phu zawk mai. Ani pawh a rawn harh chawpchilh nghal a, a ban ka lo en vung vung min hmuh chuan rizai hnuaiah a thukru nghal vat. Hlauthawng hmel a pu bawk.



"I lo haw na a rei tawh em?" pangngai deuh chuan a rawn ti a, mahse ka chhang thei der lo, a ban a thuhruk mawlh chu ka melh a.



A mitah chiang fahranin ka melh a, a meng buai deuh nak mai. Ka kut phar chhuakin "I kut kha" ka ti nghut a, mahse rawn lak chhuah a tum hmel loh khawp mai.



"I kut min pe rawh" ka tih leh nghut takah chuan tim dai hian a rawn phawrh chhuak a. Ka lo ban vat a, ka enchiang zui nghal zat.



A banrek chu tuiso a tihbuakna ni awm tak hian kutphah tiat velin a lo durh a, a nat hmel viau mai.



"Engtia i tih nge?" a mita melh chung chuan ka ti dam thlup a. A hmui petsawi zeuhin "Tuiso in ka intihbuak palh a" a lo ti mai a. Mahse a mitmeng atang hian dawt a sawi tih ka hailo. Kan inneihna a rei ve tawh a, ka nupui mitmeng chhiar thiam lo tur khawpa pasal laktlak loh ka nilo. A thuhrimah amaha a intihpalh nise a thuhruk kher chhan tur ka hrelo.



"Dawt i sawi" ka tih chuan a meng buai deuh nak a, mahse "Ka ti tak tak alawm" tiin a tang ve tlat a. Ka melh vung vung a, dawt a sawi loh zia min hriattir tum ni awm fahranin min lo melh ve kiau bawk.



"Min ngaihtuah lutuk ka hlau a, ka lo thukru anih kha" a tih leh tak tlatah chuan rin loh theih pawh a nilo.



Kan mut hmain damdawi ka hnawih sak a, a dim viau loh chuan tun ai hian a la na ang. Damdawi ka hnawih sak lai chuan fimkhur turin ka chah mawlh mawlh a, "Tui chhuan so chu engatan nge i tih reng reng a?" ti a ka zawh chuan "Ka hrawk a za a, in ka tum a" a lo ti vat. Nidangah chuan tui chhuan so sa dah ziah tawh tur ani ka ti rilru ta neuh neuh a. Engtin emaw intipalh hlek se ka chebuai hman viau zel a, keipawh hi insiam that ka ngai nasa.




Zingah a nu dawrah kan nupain mamawh kan va lam a, a fanu kut a hmuh chuan ngaihtha fahran lovin min lo zawt vat a. A intihpalh dante chu kan lo sawi ve vat a. A damdawi hnawih tur lei kan tum nghal hrim hrim a. Mahse damdawi dawrah a ni thung ang.




Damdawi dawr chu ka nutei te in chhak maiah a awm a, chuta lei chu kan rilruk a. A nu bula a lo awm rih duh ka rin avangin "Damdawi chu ka va lei ang a, hetah i lo awm dawn nia" ka ti ta a, min lo hnial bik lo.



Damdawi dawr lam pan chuan ka inkhalh chhuak ta a, nizan lamah khan thianpa Sawma ka be tawh a, damdawi hnawih atana thate min hrilh nual a. Chungho chu ka lei dawn ani.



Ka va thlen chuan Arini a lo awm ve tehmial a, ani pawh a dul a lian ve tawh hle a, Rema khan nakum kum tir lamah an neih ve theih tur thu min hrilh.



Ka dandawi mamawh ho dawr nghaktuin min lakkhawm sak lai chuan kan lo inbe ve luam a.



"Naktuk ka nu te lo kal tur chu i chhungte thil chah duh i nei ve em?" a lo ti var a, "Mamawh kan neih em em pawh ka hre rih lo" ka lo ti vat a, a bu deuh nghat nghat a. "An lo kal dawn tih hre lawk ila chu mamawh lo inngaihtuah lawk ila a tha tur ania" ka tih zawm leh zat a.




Chutah mak tih hmel tak hian min rawn melh a "Nizanah ka nu khan a lo sawi lo ami?" a rawn ti hap a, "Engmaw? Nu Sangkimin maw?" ka lo ti he haw a, mahse a lu a lo thing vat "I nutei ka tihna mawle" a lo ti hap a. Nizanah a rawn kallai awm reng reng ka hre bawk si lova a ngaihna ka hrelo hle ringawt.




Arini bawk chuan "Nizanah khan 'Sangzuala te inah ka va lengphei zuai teh ang' a ti a, ka nu te lo kal tur thu leh mamawh in neih leh loh thu lo zawt tur che u in ka chah ve nghal a" a rawn ti leh zung zung a. A ngaihna ka hrelo zual telh telh mai.




Kan mamawh min zawh leh zawh loh chu sawi loh a lo kal tih takngial pawh ka hrelo ania. "Kan committee lai khan aniang a..." ka ti sup a, ka ngaihtuahna a rawn vir nghal zawk. Ka nupuiin amah chauhin in a nghak a, ka nutei lo kal thu pawh min hrilh miah lova. Chuan, a kut durh kha !



Ka ngaihtuahna hrelo fe hian Arini chuan "Aniang" a lo ti ve mai a. Dawr nghaktunuin ka damdawi chah ho min lakkhawm fel sak hnu chuan pawisa pein ka kal nghal vut a.



Ka motor lam pan mai lovin Nutei te in lam chu pan thlak ka rual nghal a. Zawh fiah ka duh tlat, Zuali kut durh ngawt chhan te, zan danga tui chhuan so kher in ngailo in nizan ber khera 'in ka tum a' a tih tlat kher chhan te. Chu chu min hrilh ngei alawm mahse ka awih miah anih kha.




Ka zuk thlen chuan Nutei chu an sofa ah thu chungin phone a lo hmet mawlh mawlh a. Midang chu ka hmu mai lo. Ka va lut thawm a hriat chuan a rawn hawi vat a.



"Sangzuala teh nawlh chu" pangngai deuh hian a rawn ti a. Keia insum hman lo chuan "Nizanah kan inah i rawn kal em?" ka ti nghal tawng a, ka âw chu a chang lam hret a ni. A meng buai deuh nak a, mahse a reilo a insiam tha leh vat.




"Aw , rawn kal e mahse i awm si lova ka haw leh nghal a " a lo ti zâng vah a, ka beisei aiin a âw a pangngai.



Chutia kawngka bula ka ding reng chu inchhunga lut turin min sawm a, mahse amah en ngur chung chuan ka la ding khawng luah a. Eng emaw hriat ka inbeisei a ni ber.



"Engti turin nge nizanah chuan i rawn kal?" ka ti leh khauh a. A ngaihdan a ni ta vak lo aniang awka vin deuh hian "Hmangaihzuali chu i bulah a lo zualko nghal a nimaw?" a ti vin hlak a. Ka tawng leh hma chuan min tawngkhah lehnghal a "I nupui neih hnu hian i inlahrang tlat a, a hruai khawlo zo tawh che anih saw. Nizana ka rawn ankhumna mai mai te kha chu a nêp lutuk. A chhungte i ngaihven hurh hurh a, keini i chhungte tak tak zawk pawh min hlamchhiah zo tawh chu anih hi. Tawngkam tihel deuh deuhvin min lo tawngkhum khanglang a, ka baibing rawn suah tum che u tuisain kan inchai buaina lamah a buak ta anih kha" a ti zui hlawih hlawih a, pawisak a neih loh hmel kher mai. Ka thin a sa nghal phat thei.




"Ka nupui anih saw i hria em?" ka ti chang bawl a, ka âw ki san vak lo mahila ka thinrim zia chu a hai bikin ka ring lo.



Mahse min tham lo fe hian a nui ri hak a, "Hria e hria e...a fa pai lai te saw i fa anih pawh ka ringlo e" thil tenawm zet sawi ang mai hian a ner nang a, a âw chuan min tihel hle bawk. Chuti khawpa ka nupui a ngai khawlo chu ka alh chhuak pup nimaiin ka hria. Heti em ema ka thinrim hi ka la hrelo.




"A chungchang saw vawikhat pawh lo sawi ve tawh suh ang che" ka ti that a, ka âw ki a sang viau tawh. Pa Zaia chuan kan thawm a lo hria aniang room atangin a rawn chhuak ta vat a. Thinrim inhum ruh tunga Nutei nen kan lo inhmatawn min rawn hmuh chuan "Engtia zia nge ni Sangzual" a lo ti dam thlup a, chhang thei dinhmunah pawh ka dinglo.




"Heihi hre rawh ka nupui chungchang a tha lam emaw a chhe lam pawhnise i lo sawi leh anih chuan ka nutei i ni tih ka theihnghilh ang" thupe aw zet hian ka ti leh a. Min lo melh thip ve ngang mai "Mahni nupuite thlavang i hauh nghal hlur mai nia, i nutei ka nih hi hre rawh" a rawn ti chang ve fak a. A vawikhatna atan hmeichhe kutthlak ka chak, chu pawh ka nutei lehnghal !




Inthunun tumin ka insehruh tun a, Pa Zaia bawk chuan Nutei chu a lo khap a "Eng buaina nge i siam leh tak a?" a lo ti khauh a. Chutah Nutei chuan insawithiam tum tak hian "Nizanah a nupuiin tawngkam mawi lo deuhin min lo ankhum a, ka zilh deuh hlak a a thlavang a rawn hauh anih hi" a ti nghat nghat a. Khawiah mah khan ka nupuiin a lakah tawngkam mawilo a hmang dawn lo, chu chu a pasal ka nih avangin ka hrechiang tawk.




"Nupuite dik lohnaa zilh a, an diknaa an thlavang hauh chu pasalte tih tur ani. Chu thil chu ka rawn ti mai ani" ka ti fiah fak a. Sawi zawm lehin "I thiltih te kha ka rawn sawi hma hauhin nangmah vekin i rawn insawikhalh zung zung a. Phat buai chu tum lo mai rawh. Vawikhat pawh ka nupui tana natna i thlen leh chuan ka sawi tawh ang khan ka nutei i ni tih ka theihnghilh ang" ka ti fiah leh fak a. In her vutin ka motor awmna lam ka pan nghal a, Arini leb Rema rawn inzui hawin min kohna pawh chu ka chhanglo. Ka la awm khawmuang zel anih chuan ka tih atana thil mawilo ka ti palh mai ang !





Ka pizawn dawr ka va thlen leh chuan Sawmtluangi pawh a lo awm ve a, naute chungchang sawiin an lo nuiho dar dar a. Ka nupui chu ka khawngaih rual rualin a chungah ka lawm lo takzet. Thil nihna dik tak min hrilh mai loh avang khan min ring tawk lo niin ka hria a. Chu chuang ka lung a tiawi lo.




In lam pana kan inkhalh haw lai chuan ka tawng lova, hmalam ka melh ngur a, ka awmdan chu a hrethiam aniang tim deuh dai hian "U Sangzual, i lung ka tiawi lo em ni?" a rawn ti ta reng a. Chhang mai lovin ka ngawi vung vung a, a hnu deuhah chuan "Ka lung i tiawi lo" ka ti ta nghut a, a mitmeng chua tim nghal chawih mai. In kan thlen hma chu tumah kan tawng leh tawhlo.




In kan thlen hnu chuan a kut durh lo lamah chuan ka kai nghal chawt a, room lam ka panpui a, ngawi rengin min lo zui ve nghal dat dat a.



Khumah chuan ka nam thu a, mitmeng mangan hmel takin min melh kiau a, ka nupui tih mangan chu ka thil tum pawh a nilo mahse ka hun tawnin a zir lo em ani.




Ngawi rengin kawng dawm chung chuan ka melh chhuk run a. Chutianga rei ngial kan awm hnu chuan a ngaih a tha ta vak lo aniang "U Sangzual..." a rawn ti hap a, ka awmdan chuan a tithlabar deuh hlek a nimai thei a âw a khur deuh titih.



"I kut durh chhan dik tak kha min hrilh rawh" ka ti ta a, ka rinaiin ka âw a dam, mahse thupe âw a pawh lek lek. Chutianga ka tih takah chuan a meng buai deuh nak a.



"Tinge dawt min hrilh?" ka ti leh khauh a, "U Sangzual..." a rawn ti leh hap a, a kutin min lo ban a, thuhniamin a kut chu ka lo chelh vat. A dul puar ve ak tawh chungah chuan ka kut lehlam chu ka nghat a "I tana pasal tha tak ka nilo em ni?" ka ti ta a, a lu a lo thing vat "Chutiang a nilo" a lo ti vat a.




"Anih chuan tinge dawt min hrilh?" ka ti leh nghut a. A rawn thaw chhuak deuh hak a, nizana nutei nen an intihbuai dan chu min hrilh ta vek a.



_________*_________*__________*________


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:09 pm

LOVE COVERS ALL
By CVL Awmpuii


Chapter - 41


Ka kuta test kit en reng chung chuan ka ding khawng luah a, ka â ruai maiin ka hria. Ka tha a zâw vek a, ka hmuh tirh atang khan ka thaw chhuak tawh pawhin ka hrelo hial.



Ka nupui ka hming lama a rawn phun chhuah sep takah chuan ka harh chhuak ta chiah. Engmah sawi lovin test kit keng reng chung chuan a biangah ka va khuap rûn a. A mitmeng de sar sar te, hlim nui sanga min lo melhna te chuan ka kawchhung hi a khawih che dawt dawt mai.



A chal leh ka chal innawr sik tir chung chuan ka han kiai suk a, a lo nui ve var var mai.



Ka mipat pui dangte hi hetiang dinhmunah hian engtin nge an awm ve thin ang ka hrelo. Keichu awm ngaihna ka hrelo, ka hlim lutuk tih ka hria a, mahse ka lan chhuah tir thiam lo a ni ber.



"I hlim em?" a rawn ti zawi sap a, tawngkaa chhang lovin a hmui ah chuan ka fawp ta vawng vawng a. Ka hlim zia sawifiah thei tawngkam a awm miau lo ani !



Ka nghawngah a ban rawn suihzawmin min lo chhang let ve vat a. Hmangaih a ni tih inhria sela, a pasal hlimna min thlen nasat zia hi inhria sela ka duh. Ka ngaihtuahna zawng zawng hriatthiam tir tum ni awm fahrana rilin ka fawp a. Ani pawhin chutiang chiah chuan min lo chhanglet ve zel bawk.




Rei fê kan infawh hnu chuan khum lamah ka kai phei a, ka thutthlak tir hnuah chhuatah chuan thuhniamin a dul zawnah chuan ka beng ka dawh ta vang vang a. Engmah sawi lovin ka samah chuan min lo tham ve salh a, a dul zawn atanga ka han hawi chhoh chuan min lo nuih var var mai.




Rei ngial a dul zawna hmai ka phum hnu chuan "Va inbual tawh la" a ti sap a, ka lu ka lo thing chu a nui ri deuh hak hak mai. "Reilotê chiah" ka ti sup a, a dul zawnah chuan ka beng ka dawh leh vang vang a, naute lungphu ngaihthlak ka tum a ni ber mai.




Ka ngaihtuah chhuah taka chu maw...pa leh fa inthlun zawmna lo chak tur zia hi a ni. Chu chuan Pathian leh mihringte inkar min ngaihtuah thlen tir lo theilo. Nû pum chhunga kan awm hma daih tawhin Pathian chuan khawvela piang chhuak turin min lo duan lawk tawh a. Kan pianchhuah ruala kan tah chhuah khan Pa thinlung a lo lawm em em dawn tih hi ka hmu chiang viauin ka hria.




Ka fa lo piang tur chu la hmu lo mahila a nû pum chhunga a awm lai mek pawh hian inthlun zawmna thuk tak kan nei nghal ka tilo theilo.



Inbual ta lem lo chuan kan chhungte ka phone kual ta zung zung a. Family group-ah test kit thlalak nen thlap ka post bawk. A hma khan ka lawm lutuk vangin ka â deuh ruai a, ka che chhuak hlei theilo anih kha. Tunah chuan ka che vut vut a, ka thian hnaivai te ka phone kual a, keimah reng reng chu ka phur a ni tawp mai. Ka nupui pawhin khuma thu chungin min nuih min nuih ringawt tawp.



Ka pa phone lovin ka nu zawk ka call a, chanchin ka han hrilh chu a khek deuh raih mai. Nau pai lai tana thil tha a rawn sawi zung zung a, keiin ka lo chhinchhiah ve zel bawk. Ka nupui biak a duh thu a rawn sawi chuan phone chu ka pe ta vat a.




An inbiak chhung chuan ka nupui chuan hmui phunin inbual phawt turin min lo ti a, towel vengin ka la awm reng a, chutia a rawn tih takah chuan ka lo hnial ta bik lo.




Ka inbual zo bathroom atanga ka chhuah chuan room ah a lo awm tawh lova, hmanhmawh zeta inthlakin sitting room lamah chuan ka phei ve ta nghal a.



Pot a lo chei zawm leh melh melh tawh a. Hna a kal tawhlo bawk nen inah awm mai mai ai chuan tiin pot a chei thin kha a chhunzawm ta zel a. Kan in pawh plants a hung nasa bawk a a landan a danglam hneh khawp mai, a tha zawngin ania ka tih.




Ka va chhuak min hmuh chuan min lo nuih var var a "Ka nu nen chuan in inbe thei maw" tih leh a lam pan ka rual a, a lo bu nghat nghat a "Min rawn ngaihtuah nghal lutuk a, a lawmawm rual rualin a inthlahrun awm" a lo ti ve vat a. A bula thutthlak pah chuan "A ngaihtuah tur che alawm" ka lo ti mai a.



Ei châk a neih leh neih loh ka zawt a, engmah eichak a neih loh thuin min chhang. Zawhna chi hrang hrang ka zawt zawm zat a, min chhan ngaihna a hrelo chu nihlawh intih hmel zet hian a nui ta tawp. Keipawh ka nui veleh tho, ka la pangngai thei meuh lo ani ber mai.




Tlaiah eirawng ka bawlpui a , a chesual ang tih mawlh ka hlau a, ka vengthawng nghal em em ringawt mai a, ani pawhin min hrethiam khawp mai. A che reng reng chu a fimkhur ve viau.




A dul la thep zai chu ka lo melh leh vung vung thin a, ka nui chhuak leh tawp zel.



Zanah an inah lamah ka len phei pui a, Nu Rinkimi te chhungkua pawh an lo chhuk thla ve. Nau kan keng tan tih an hre vek bawk a, kan ri ve laih laih mai.



Nu Rinkimi mawlh mai hi a uang leh viau tawh "I hmanhmawh vut vut thin ka ti reng a" nui tlawrh tlawrh chung chuan a rawn ti a. Midangho pawh an lo nui dar dar mai. Kei lah ka lo duai duh bik der lo "Patling fa pahnih nei tawh ka ni vat dawn" ka tih chuan a hmaa Zualin min ngaihdan kha an hrechhuak hlawm aniang a hma aia uarin an han nui leh a. Ka nupui pawh lai viau e tilo chuan a nui ve ta tawp.




Kan inngaihzawn hma thil vel an han sawi kai a, ka chetdan mawlmang tak tak te nen an rawn sawi chhuak a. Keipawh ka nui ka nui ve mai.



Kan haw meuh chuan zan a lo tlai ang reng ve tawh viau. Khum bulah thingthiin kan tawngtai dun leh a, hei chu kan zantin tihdan than a ni. Nilai thawhtan apiangin Biakinah kan tawngtai thin bawk.



Zanin chu a dulah kut nghatin ka tawngtai a, kan fa lo piang tur chu Pathian kutah ka hlan a. Dam leh hrisel taka a lo pianchhuah nan te, a nûin harsatna em em tawk lova tluang taka a pai theih nan te ka dil a. Pathian hnenah kan hlan miau a, Anin min lo chinfel sak mai dawn a ni.



Khumah chuan lukham nghengin ka thu mu deuh titih a, ka hmaah ka kap kalak a, min ngheng deuh chial chungin a mu tihna anih chu.




Bible ka chhiar sak a, a ri ngatin ka chhiar. Kan fa lo piang tur hian a nu pum chhung atanga a awm lai rengin Pathian Thu hi hre hnem ber sela ka duh. A kawng hruaitu tur a ni miau a, a kawng hruaitu ber a hriatchian miau chuan a talbuai ngai lovang.



Ka duh ang thala ka chhiar hnu chuan side table ah dahin ka nupui dul la thep zai chu ka chûl nghal a. A mutkawr hi a hma suih awm chi, pawh phelh mai theih ania, chu chu ka pawt phelh a, ka duh ang thalin a dul chu ka khawih thei.



Ka kut rawn vawn hnah pah chuan "Pathian hi a tha tiraw" a rawn ti fân raih a, "Lawmthu sawi mawlh mawlh kan ba" ka lo ti ve sup.



"I nupui ka ni hi ka lawm" a rawn ti leh sap a, ka lo nui ri suk. Ka nupui anih vanga a lawm chu ka lawm zawk daih.



"I pasal ka ni hi ka lawm" ka lo ti ve sup a, a rawn nui ri hak hak mai.



Rai no chu a haw zek mai a, chaw a ei tha hlei thei meuh lova, hmuh theih khawpin a taksa a tla chak a, ka lainat reuh tak tak ani. Chutihrual chuan rai no thinchhiat tih ang reng vel kha a nei ve miah lova, pangngai takin a awm, a hma aiin a pangchang deuh tih mai loh chu. Mahse chu pawh chu ka duhdan tak ani, theihtawpa duat a phu ngawih ngawih.




Inchhung chetah ka theih chen chenah ka âwl a, a uak deuh reng avangin eirawng bawl leh ilo vel tih pawh ka remti manglo. Mahse amah zawk hian min hnial tlat thin a, kan pahnih in kan ti dun zel a ni zawk mah.



Ka chhungte pawhin an rawn ngaihtuah khawp mai a, Krismas lo hman phei hial pawh an tum. Ka nu phei chuan hmanni khan Washing Machine min rawn thawn rup mai a, kan tan thiltih a awlsam zawk anga tiin keipawhin ka lo pawm khawp mai. Ka nupui erawh a inthlahrung hle a, mahse a chêt vak ka remti lo hrim hrim a, rai a haw veleh zel bawk nen min hnial duh ta bik lo kha ania.




Ber thla kan chuangkai chho a, ka nupui nau pai pawhin thla thum a tling ve der tawh. A thil ei pawh a tui chho tan viau a, a naupai hmaa a ei ai tam daih ei chang pawh a ngah thin. Kei ka lawmah a lo tla a, a ei theih tur ang zawng zawng chu kawl loh pawh kan nei mang lo.




A dul pawh a puar ve deuh ak tawh a, ka nupui tluka rai inhmeh hi ka hrelo. A vun a nung deuh sarh a, tlemin a thau veleh deuh tawh bawk a. Chu chuan a tilang duhawm zual hle bawk.




Ka theihtawpin ka duat tih a hria a, ani pawhin a theihtawpin min duat let thin, chu chuan kan pahnih inkar hmangaihna a tipung deuh deuh bawk.




Zantin kan fa lo piang tur chu a nu dul zawna kut nghatin ka tawngtai sak ziah a. A rawn chet hmasak ber pawh ka tawngtai sak laiin a ni nghe nghe. Kha zan khan ka muhil ta miahlo anih kha. A rawn chet leh hun kha ka châng char char a, mahse zankhuain a rawn che leh tawh chuang miah lo.



Tum li check up neiin Lunglei lamah kan kal tawh a, kan naute pawh Pathian zarah a hrisel tha tih kan doctor in min hrilh a. A lawmawm viau mai. Kan beisei lawk anga kan awm theite anih chuan nakum April thla velah kan nei ve thei ang.




Zaninah Kohhran Committee kan nei dawn a, ka ngaihtuah viau mai a mahse ngaihtuah awm a nih loh thu min hrilh ve malh malh a. "I nu inah lo awm mai che nangmah chauha i lo awm chuan a tihchi loh vang" ka tih lahin "Kan leng phei ngun alawm, zankhat lek te chu ka lo awm thei ang in rei chuang nang" tiin min hnial ve tlat a.




Ngaihngam zan lo chuan committee tur chuan ka chhuahsan ta a, eng em a lo ti bik lo turah ngai ang.



Committee chu rinaiin kan rei ta phian mai a, kan zawh meuh chuan dar 9 a lo pel tawh. Khawiah mah kal kawi lovin ka inkhalh haw ta nghal a. Reilote kalsan pawh ka hreh em em tawh a, ngaihtuah a na thin si a, Kohhran thilah lo chuan chhuah pawh ka chhuak ngailo reng ani.



In ka va thlen chuan thutthleng ah puansin chungin a lo muhil a, chutia hahdam zeta a lo awm chu ka thaw huai mai.



A lam ka pan vat a, a muhil hmel chu ka thlir vang vang a, a tha thlawt a ni. Tihharh ka hreh avangin khum lama pawm sawn mai ka tum a, mahse a banrek ka tawk fuh chiah chu ka phu zawk mai. Ani pawh a rawn harh chawpchilh nghal a, a ban ka lo en vung vung min hmuh chuan rizai hnuaiah a thukru nghal vat. Hlauthawng hmel a pu bawk.



"I lo haw na a rei tawh em?" pangngai deuh chuan a rawn ti a, mahse ka chhang thei der lo, a ban a thuhruk mawlh chu ka melh a.



A mitah chiang fahranin ka melh a, a meng buai deuh nak mai. Ka kut phar chhuakin "I kut kha" ka ti nghut a, mahse rawn lak chhuah a tum hmel loh khawp mai.



"I kut min pe rawh" ka tih leh nghut takah chuan tim dai hian a rawn phawrh chhuak a. Ka lo ban vat a, ka enchiang zui nghal zat.



A banrek chu tuiso a tihbuakna ni awm tak hian kutphah tiat velin a lo durh a, a nat hmel viau mai.



"Engtia i tih nge?" a mita melh chung chuan ka ti dam thlup a. A hmui petsawi zeuhin "Tuiso in ka intihbuak palh a" a lo ti mai a. Mahse a mitmeng atang hian dawt a sawi tih ka hailo. Kan inneihna a rei ve tawh a, ka nupui mitmeng chhiar thiam lo tur khawpa pasal laktlak loh ka nilo. A thuhrimah amaha a intihpalh nise a thuhruk kher chhan tur ka hrelo.



"Dawt i sawi" ka tih chuan a meng buai deuh nak a, mahse "Ka ti tak tak alawm" tiin a tang ve tlat a. Ka melh vung vung a, dawt a sawi loh zia min hriattir tum ni awm fahranin min lo melh ve kiau bawk.



"Min ngaihtuah lutuk ka hlau a, ka lo thukru anih kha" a tih leh tak tlatah chuan rin loh theih pawh a nilo.



Kan mut hmain damdawi ka hnawih sak a, a dim viau loh chuan tun ai hian a la na ang. Damdawi ka hnawih sak lai chuan fimkhur turin ka chah mawlh mawlh a, "Tui chhuan so chu engatan nge i tih reng reng a?" ti a ka zawh chuan "Ka hrawk a za a, in ka tum a" a lo ti vat. Nidangah chuan tui chhuan so sa dah ziah tawh tur ani ka ti rilru ta neuh neuh a. Engtin emaw intipalh hlek se ka chebuai hman viau zel a, keipawh hi insiam that ka ngai nasa.




Zingah a nu dawrah kan nupain mamawh kan va lam a, a fanu kut a hmuh chuan ngaihtha fahran lovin min lo zawt vat a. A intihpalh dante chu kan lo sawi ve vat a. A damdawi hnawih tur lei kan tum nghal hrim hrim a. Mahse damdawi dawrah a ni thung ang.




Damdawi dawr chu ka nutei te in chhak maiah a awm a, chuta lei chu kan rilruk a. A nu bula a lo awm rih duh ka rin avangin "Damdawi chu ka va lei ang a, hetah i lo awm dawn nia" ka ti ta a, min lo hnial bik lo.



Damdawi dawr lam pan chuan ka inkhalh chhuak ta a, nizan lamah khan thianpa Sawma ka be tawh a, damdawi hnawih atana thate min hrilh nual a. Chungho chu ka lei dawn ani.



Ka va thlen chuan Arini a lo awm ve tehmial a, ani pawh a dul a lian ve tawh hle a, Rema khan nakum kum tir lamah an neih ve theih tur thu min hrilh.



Ka dandawi mamawh ho dawr nghaktuin min lakkhawm sak lai chuan kan lo inbe ve luam a.



"Naktuk ka nu te lo kal tur chu i chhungte thil chah duh i nei ve em?" a lo ti var a, "Mamawh kan neih em em pawh ka hre rih lo" ka lo ti vat a, a bu deuh nghat nghat a. "An lo kal dawn tih hre lawk ila chu mamawh lo inngaihtuah lawk ila a tha tur ania" ka tih zawm leh zat a.




Chutah mak tih hmel tak hian min rawn melh a "Nizanah ka nu khan a lo sawi lo ami?" a rawn ti hap a, "Engmaw? Nu Sangkimin maw?" ka lo ti he haw a, mahse a lu a lo thing vat "I nutei ka tihna mawle" a lo ti hap a. Nizanah a rawn kallai awm reng reng ka hre bawk si lova a ngaihna ka hrelo hle ringawt.




Arini bawk chuan "Nizanah khan 'Sangzuala te inah ka va lengphei zuai teh ang' a ti a, ka nu te lo kal tur thu leh mamawh in neih leh loh thu lo zawt tur che u in ka chah ve nghal a" a rawn ti leh zung zung a. A ngaihna ka hrelo zual telh telh mai.




Kan mamawh min zawh leh zawh loh chu sawi loh a lo kal tih takngial pawh ka hrelo ania. "Kan committee lai khan aniang a..." ka ti sup a, ka ngaihtuahna a rawn vir nghal zawk. Ka nupuiin amah chauhin in a nghak a, ka nutei lo kal thu pawh min hrilh miah lova. Chuan, a kut durh kha !



Ka ngaihtuahna hrelo fe hian Arini chuan "Aniang" a lo ti ve mai a. Dawr nghaktunuin ka damdawi chah ho min lakkhawm fel sak hnu chuan pawisa pein ka kal nghal vut a.



Ka motor lam pan mai lovin Nutei te in lam chu pan thlak ka rual nghal a. Zawh fiah ka duh tlat, Zuali kut durh ngawt chhan te, zan danga tui chhuan so kher in ngailo in nizan ber khera 'in ka tum a' a tih tlat kher chhan te. Chu chu min hrilh ngei alawm mahse ka awih miah anih kha.




Ka zuk thlen chuan Nutei chu an sofa ah thu chungin phone a lo hmet mawlh mawlh a. Midang chu ka hmu mai lo. Ka va lut thawm a hriat chuan a rawn hawi vat a.



"Sangzuala teh nawlh chu" pangngai deuh hian a rawn ti a. Keia insum hman lo chuan "Nizanah kan inah i rawn kal em?" ka ti nghal tawng a, ka âw chu a chang lam hret a ni. A meng buai deuh nak a, mahse a reilo a insiam tha leh vat.




"Aw , rawn kal e mahse i awm si lova ka haw leh nghal a " a lo ti zâng vah a, ka beisei aiin a âw a pangngai.



Chutia kawngka bula ka ding reng chu inchhunga lut turin min sawm a, mahse amah en ngur chung chuan ka la ding khawng luah a. Eng emaw hriat ka inbeisei a ni ber.



"Engti turin nge nizanah chuan i rawn kal?" ka ti leh khauh a. A ngaihdan a ni ta vak lo aniang awka vin deuh hian "Hmangaihzuali chu i bulah a lo zualko nghal a nimaw?" a ti vin hlak a. Ka tawng leh hma chuan min tawngkhah lehnghal a "I nupui neih hnu hian i inlahrang tlat a, a hruai khawlo zo tawh che anih saw. Nizana ka rawn ankhumna mai mai te kha chu a nêp lutuk. A chhungte i ngaihven hurh hurh a, keini i chhungte tak tak zawk pawh min hlamchhiah zo tawh chu anih hi. Tawngkam tihel deuh deuhvin min lo tawngkhum khanglang a, ka baibing rawn suah tum che u tuisain kan inchai buaina lamah a buak ta anih kha" a ti zui hlawih hlawih a, pawisak a neih loh hmel kher mai. Ka thin a sa nghal phat thei.




"Ka nupui anih saw i hria em?" ka ti chang bawl a, ka âw ki san vak lo mahila ka thinrim zia chu a hai bikin ka ring lo.



Mahse min tham lo fe hian a nui ri hak a, "Hria e hria e...a fa pai lai te saw i fa anih pawh ka ringlo e" thil tenawm zet sawi ang mai hian a ner nang a, a âw chuan min tihel hle bawk. Chuti khawpa ka nupui a ngai khawlo chu ka alh chhuak pup nimaiin ka hria. Heti em ema ka thinrim hi ka la hrelo.




"A chungchang saw vawikhat pawh lo sawi ve tawh suh ang che" ka ti that a, ka âw ki a sang viau tawh. Pa Zaia chuan kan thawm a lo hria aniang room atangin a rawn chhuak ta vat a. Thinrim inhum ruh tunga Nutei nen kan lo inhmatawn min rawn hmuh chuan "Engtia zia nge ni Sangzual" a lo ti dam thlup a, chhang thei dinhmunah pawh ka dinglo.




"Heihi hre rawh ka nupui chungchang a tha lam emaw a chhe lam pawhnise i lo sawi leh anih chuan ka nutei i ni tih ka theihnghilh ang" thupe aw zet hian ka ti leh a. Min lo melh thip ve ngang mai "Mahni nupuite thlavang i hauh nghal hlur mai nia, i nutei ka nih hi hre rawh" a rawn ti chang ve fak a. A vawikhatna atan hmeichhe kutthlak ka chak, chu pawh ka nutei lehnghal !




Inthunun tumin ka insehruh tun a, Pa Zaia bawk chuan Nutei chu a lo khap a "Eng buaina nge i siam leh tak a?" a lo ti khauh a. Chutah Nutei chuan insawithiam tum tak hian "Nizanah a nupuiin tawngkam mawi lo deuhin min lo ankhum a, ka zilh deuh hlak a a thlavang a rawn hauh anih hi" a ti nghat nghat a. Khawiah mah khan ka nupuiin a lakah tawngkam mawilo a hmang dawn lo, chu chu a pasal ka nih avangin ka hrechiang tawk.




"Nupuite dik lohnaa zilh a, an diknaa an thlavang hauh chu pasalte tih tur ani. Chu thil chu ka rawn ti mai ani" ka ti fiah fak a. Sawi zawm lehin "I thiltih te kha ka rawn sawi hma hauhin nangmah vekin i rawn insawikhalh zung zung a. Phat buai chu tum lo mai rawh. Vawikhat pawh ka nupui tana natna i thlen leh chuan ka sawi tawh ang khan ka nutei i ni tih ka theihnghilh ang" ka ti fiah leh fak a. In her vutin ka motor awmna lam ka pan nghal a, Arini leb Rema rawn inzui hawin min kohna pawh chu ka chhanglo. Ka la awm khawmuang zel anih chuan ka tih atana thil mawilo ka ti palh mai ang !





Ka pizawn dawr ka va thlen leh chuan Sawmtluangi pawh a lo awm ve a, naute chungchang sawiin an lo nuiho dar dar a. Ka nupui chu ka khawngaih rual rualin a chungah ka lawm lo takzet. Thil nihna dik tak min hrilh mai loh avang khan min ring tawk lo niin ka hria a. Chu chuang ka lung a tiawi lo.




In lam pana kan inkhalh haw lai chuan ka tawng lova, hmalam ka melh ngur a, ka awmdan chu a hrethiam aniang tim deuh dai hian "U Sangzual, i lung ka tiawi lo em ni?" a rawn ti ta reng a. Chhang mai lovin ka ngawi vung vung a, a hnu deuhah chuan "Ka lung i tiawi lo" ka ti ta nghut a, a mitmeng chua tim nghal chawih mai. In kan thlen hma chu tumah kan tawng leh tawhlo.




In kan thlen hnu chuan a kut durh lo lamah chuan ka kai nghal chawt a, room lam ka panpui a, ngawi rengin min lo zui ve nghal dat dat a.



Khumah chuan ka nam thu a, mitmeng mangan hmel takin min melh kiau a, ka nupui tih mangan chu ka thil tum pawh a nilo mahse ka hun tawnin a zir lo em ani.




Ngawi rengin kawng dawm chung chuan ka melh chhuk run a. Chutianga rei ngial kan awm hnu chuan a ngaih a tha ta vak lo aniang "U Sangzual..." a rawn ti hap a, ka awmdan chuan a tithlabar deuh hlek a nimai thei a âw a khur deuh titih.



"I kut durh chhan dik tak kha min hrilh rawh" ka ti ta a, ka rinaiin ka âw a dam, mahse thupe âw a pawh lek lek. Chutianga ka tih takah chuan a meng buai deuh nak a.



"Tinge dawt min hrilh?" ka ti leh khauh a, "U Sangzual..." a rawn ti leh hap a, a kutin min lo ban a, thuhniamin a kut chu ka lo chelh vat. A dul puar ve ak tawh chungah chuan ka kut lehlam chu ka nghat a "I tana pasal tha tak ka nilo em ni?" ka ti ta a, a lu a lo thing vat "Chutiang a nilo" a lo ti vat a.




"Anih chuan tinge dawt min hrilh?" ka ti leh nghut a. A rawn thaw chhuak deuh hak a, nizana nutei nen an intihbuai dan chu min hrilh ta vek a.



_________*_________*__________*________


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)