LOVE COVERS ALL By C.V.L.Awmpuii (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: LOVE COVERS ALL By C.V.L.Awmpuii (Completed)

Unread post by Ngaia » April 3rd, 2022, 3:07 pm

LOVE COVERS ALL
By CVL Awmpuii


Chapter - 31


Mi tupawhin a hmangaih tan chuan engkim tih a inhuam thin ang. Mahse chu a inhuamna zawng zawngte chu kha a hmangaih khan lo pawm duh leh si lo sela a tan eng nge sawt ang?



Kan inrin loh lai leh kan hriat loh karin hmangaih kan tawng hlawl a. Mi va hmangaih mai chu thil awlsam tak a ni thei, mahse hmangaihna a chên reng erawh thil harsa tak a lo ni ania nge.




Ka nun pawh chutiang chiah chu a ni, ka beisei loh lam atangin hmangaih ka tawng a. Nitinin a zual zel a, mahse kan tawpna chu hei chauh hi a ni !




Kum thar duhawm tak rawn inherchhuak tur kha nghakhlel takin ka lo thlir ve reng a. Ka tan êng leh beiseina thar duhawm tak a rawn inherchhuahpui ka ring thin. Mahse tuna ka dinhmun leh kha ka lo suangtuah kha chu inpersan tak ani.





He kum thar hian tisa leh thlarauah chauhna bak min pein ka hrelo. Mahse Pathian auh ka thulh thei silo. Amah dem tur tal pawhin Biakin ka la pan tang tang thin !




February thla kan chuangkai chho a, ka nun chu awmze nei lovin a kal ve mai mai niin ka hria. Kohhran huang chhunga tih tur pawimawh ka neih ang zawng zawng chu tha takin ka hlen chhuak ve mai zel a, mahse keimahah hian kim lo a awm tlat si.




Pathian hian kan tana tha tur zelin engkim a ruat thin. Kan kalna tur kawnga kan duh ngawih ngawih pawh kan tana tha lo anih chuan Amah zawkin min dan pin sak thin.



He thu hi ka tette atanga ka rindan thin a ni a, mahse pawm thiam harsa ka ti. Tuna ka dinhmun hi nakina ka thatna tur anih chhan tur ka hre thei hlawl lo a ni ber.



Ka ngaihtuahna vak kual nasa lutuk chu duh lovin lu ka thing nghut a. Tun hnaiah hian ka tih ngai loh dan takin thil ngaihtuah nasat ka chîng thar a, ka hun tawnin a zir viau pawh a ni mahna.



Ka Bible chhiar lai chu khupin dawhkana ka phone dah chu ka ban nghal zat a. Ka wallpaper-a hmeichhe hmeltha zet muhil lai thlalak chu ka en vang vang a. Ka ta ni lo turin ka la ngai thei meuh lo chu a ni.



Ka thutna atang chuan ka tho chhuak nghal vut a, zing dar 7 a lo ri der tawh. Chaw chhuan tur ka buatsaih a, chawhmeh siam vak pawh a ngailo, engmah ka eitui chuan lo bawk nen artui ka kang leh tawp mai aniang chu.



Tukthuan te ka ei fel zawh chuan room lamah ka insiam nghal a. Vawiin hi KTP in khaw thenawm a fehchhuah programme hun kan hman tur kha ani tawh a. Kohhran Committee in represent ah min han ruat ngawt mai a, ka tel ve leh ta poh aniang chu.




Biakin kawt ka va thlen chuan thalai an lo awm nual tawh a. Zahawm pangngai taka inthuam tur kan ti bawk a thu an awih tlang khawp mai. Inthuamna uchuak inbel tumah an awm lo. Zan lam programme hmang tlang tur kan nih avangin inkhawm thuamhnaw chu an keng tel tho hlawmin ka ring.




Arini leh Gracy in min rawn hmuh rual chuan min lo hui vat a, ka va pawh ve nghal mai bawk a.



"I motor i keng dawn lo tiraw?" Gracy in a tih chuan ka ken loh tur thuin ka lo chhang vat. Member kal tur in report kha mi 20 atanga 30 inkar vel an ni a. Bus pakhat an hire tawp a, chutah chuan an zingah ka kal ve ang.



An pahnih chuan an titi malh malh a, Gracy hian Arini hi a ngaina phian mai a. Arini pawhin nau ang deuh hian a en a, an inngaina tawn viau.



Zira a rawn thleng a, Arini chu a lo be vat a "I lo kal ve thei dawn a, a lawmawm" a ti ve luam a. Arini pawh chuan "Naupang school chawlh ni a ni hlauh a, ka remchang ve ta anih hi" a lo ti ve mai bawk.



Helai hmuna a rawn awm tirh atang khan a tlangnel ve nghal em em a, nula sual zawk zawk a lo ni lo bawk nen midang duhsak pawh a hlawh viau. Tunah phei chuan khaw chhung mi ang takin a khawsa ve thei tawh.



Sawmtluangi ka hmuh rual rual chuan midang zawn ka nei nghal ngawt pek a. Thla khat chu a liam ve tawh ania mahse ngaiah ka la nei thei der lo.




Zira chuan Sawmtluangi chu a lo au vat a "Zuali a lo kal ve dawn lo tiraw?" a tih chuan "Aw...a in report loh hrim hrim kha, tunlai hna thilah a buai deuh a" a lo ti ve mai bawk a. A chanchin engkim hi ka la bengkhawn lo theilo.



Bus-ah chuan kan han chuang a, Gracy-i chuan a hma seat handyman thutna bul chu a chuh tharh a "Bus chu ruih zeuh ka nei thin a, heta thut loh chuan ka ruih ka hlau tlat. Tlar hma lama thut hian ruih a har an tiin ka hria" a ti mai a.



Arini nen chuan tlar hnung lamah kan inzui phei a, seat hnih chauh a lo awl tawh a, kan pahnihin kan thut dun mai loh chuan tihngaihna a awm lo.



Ka thu thla ta a, a ding zum reng chu "Lo thu la" ka ti sup a, engmah sawi lovin a lo thu thla ve vat mai bawk a. A inthlahrun hmel viau mai.



Kan inpeih tlan hlawm takah chuan kan tlanchhuak ta a. A phawk deuh ho chu an zai nghal dual dual a, a hlimawm viau dawn e.



Arini chuan "Engtia rei kal nge ni ang le?" a rawn ti hliai a, "Darkar khat vel aniang" ka lo ti ve mai a.



Engmah sawi zawm tawh lovin kan thudun rauh rauh a. A hnuah chuan a earphone la chhuakin hla a ngaithla ta niin ka hria. Keipawh chuan mitchhing vang vang chungin thil ka ngaihtuah a. Midang zai ri leh au lung lung ri te chu ka hnaih maia awm mah nise ka hlat taka awm mi pakhat chiah kha ka ngaihtuah thung.



Chutia mit ka chhin deuh vang vang lai chuan min rawn sawi che deuh dat dat a, ka men chhuah chuan Arini chuan "Kha lamah khan ka lo thu mai teh ang a, ka awm dan a diklo tlat" a rawn ti zawi sep a, motor a chuang fu lo deuh pawh a nimai thei.




Ka bu nghut a, a thawh rual chuan ka tho chhuak ve nghal a, tukverh lamah chuan ka thuttir ta a.



A ham deuh bai bai a, "Ka pum hi a diklo tlat, ka luak te a chhuak" a rawn ti zuai raih a. Ka khawngaih ve deuh hlek a "Muhil daih la" ka lo tih chuan a lu a thing mat mat a "Ka mut pawh a chhuak chiah lo" a ti mai a.




Tihngaihna dang ka hriat loh avang chuan "Kan thleng tep tawh ania" ka ti ringawt a. Han ngaihtuah zui chiam dan tur pawh ka hrelo.




A hnu rei vak lovah chuan a muhil ta niin ka hria, a mit a chhing deuh vang vang a. Ka mut chhuak lo ti si kha a lo chhuak viau zawk anih dawn hi.



Minute 40 bawr vel kan tlan hnu chuan kan tum ram chu kan thleng ta a. Arini pawh a rawn harh chawpchilh ve nghal mai a, ham deuh bai bai chunga "Kan thleng tawh em ni" a rawn tih chuan ka lo bu nghut a.




Thalai Member ho chuan min lo hmuak ve a, kan va thleng chu an lo lawm thiam ve ngang mai. Eitur neuh neuh te min lo buatsaih sak a, an theihtawpin an lo inbuatsaih ve tih a hriat takzet.



An Pastor pawh a lo awm ve a, kan han in chibai a. An Kohhran inrelbawlna chungchang velte chu min hrilh ve luam a. Mi biang biak thiam tak leh nelawm tak anih ngei ka ring.



Kan thlen hnu rei vak lovah chuan hall chhung ah kan inzui lut ta hlawm a. Hetiang fehchhuah programme kan hman thin chhan ber hi chu khaw thenawm te nen Kohhranah inlungrual taka rawng kan bawl ho theih nan leh rawngbawlna in hma a sawn theih nan a ni deuh ber a. Member chanchin leh Kohhran dinhmun te chiang zawka inhriattirna hun kan hmang thin a ni.




Programme kan han tan a, an secretary in an Kohhran Thalai dinhmun velte chu a sawi zung zung a. Kan Kohhran atangin kan secretary a ding veleh a. Hun tawp dawnah eng emaw tal sawi ve turin Hruaitu chuan min sawm nawlh mai a. Ka va ding chhuak ve mai a, Kohhrana thalai kan pawimawhna velte chu ka sawi ve luam a, rei ka sawi lo minute 10 vel chiah ka sawi.




Zanriah tuihnai tak min lo buatsaih sak a. Ka nihna vangin min zah der thiam viau a, mahse kei chuan nuam ka ti vak lo. Mite zah kai leh rawn kai nih chu a lawmawm rual rualin nawm lohna lai chen a awm ve tlat thin.




Zan inkhawmah chuan kan tlawhna sum kan hlan ve a. An Bialtu Pastor in thu a sawi a, haw lehnghal tur kan la ni bawk nen a sawi rei hran lo.




Dar 8 velah chuan kan bang fel der a, reilote awm khawmuang lehin kan haw zui nghal a. Bus ah chuan seat ngaiah kan thu leh vek a, Arini nen bawk kan thu dun leh tihna anih chu.



Zan lam ka mu tha mang lova motor ka chuang chau veleh deuh bawk nen ka lo muhil daih a. Ka harh leh chuan ka darah min ngheng deuh chialin a lo muhil a, a mu tui ang reng sia ka tiharh duh bik lo. A chauh hmel bim bem riau lehnghal a.



Biakin kawt kan thlen chuan ka kaitho a, a meng phelh deuh phang mai "Kan thleng tawh a, inah i mu leh dawn nia" ka ti sup a. Engmah sawi lovin a bu ve mai bawk a.



In ka thlen meuh chuan dar 10 a lo ri tep tawh. Vawt viau mah se inbual lova mut ka duh si lova ka inbual fai leh phawt a. Ka harh deuh sawng sawngin ka hria.



Bible leh notebook ka inchhawp leh ran tawh a, chakna ka mamawh zia ka hria, mahse engmah hi ka rilruah a lut thei hlawl lo a no ber. Mihringin kan nun kan hman chhohna kawnga harsa lai ber ka tawng ve hialin ka inhria.



Ka mut hmain phone ka en veleh zawk a. KTP group-a ka luh chuan vawiin lama kan hlimthla velte chu an lo post a. Ka han en ve mual mual a. Thlalak pakhat chu Arini nen inngheng deuh riala kan muhil dun lai ani. Chu pawh Gracy rawn post a ni a. Ka ngaihtuahna ah Zuali a rawn lut a, a ngaihdan tur ka lo ngaihtuah hmanhmawh. Atthlak ti zet hian ka nui chhuak hawk a. A ni chuan hmalam a pan thei alawm engvangin nge hetiang thlalak a lo ngaih pawimawh tehlul ang?



A number ah chuan ka lut a, min la block bik em lova a DP chu ka la hmu ve thei a. A thlalak hmang lovin a Pot cheimawina a a ziah thin 'Love Cover All' tih kha a hmang a, a about-ah pawh chu tho chu a ni. Status chu a nei ngailo ang tluk a ni a, a status awmchhun pawh a pangpar velte an ni leh tawp mai.



Hningtawlh zawnga kal mihring nih ka duh lova, hmalam pan zel ka duh. Tunah harsa rih mah se engtik niah emaw chuan hmalam pana ka la kal leh theih ngei ka ring. Tunah hi chuan ka dinna ngaiah ka ding deuh tlawk tlawk a ni ber mai.




Nilaini tukah Ricky-a a rawn lang hlawl mai a. A pa chanchin te ka lo zawt ve luam a. Rilru hah hmel zet hian "Tunlai chu hma a sawn thei meuh lo" a ti sup a. Cancer ah pawh a stage sang ber a ni tawh a, mihring lamah chuan beisei a bo viau tawh. A rilru tur hi ka hrethiam ve viauin ka hria.



"Tun hnaiah chemo in khai leh em" ka tih chuan "Amah ber hian a duh tawh tlat lova. 'Ka chau vek zel' a ti tlat bawk sia. Vawihnih bak kha chu kan khai lo" a lo ti vat a. "Anih chu mawle, chemo khai hi that pui leh that pui lo an awm ve thin a. Ka hriat theih chinah chhiat pui an tam zawk tlat mai a. Khai loh pawh chu a thatna tur a ni zawk mai thei asin" hnem tum tak chuan ka lo ve luam a.




"Kal mai a duh tawh thu te a sawi a, thih thlamuanna a nei tawh ka ti mai" a lo ti zawi sup a. An pafa inkar a tha ve chauh si a, hun tam pawh hmang dun hman lova harsatna in a tlak buak zui chu ka khawngaih viau mai. Mahse a pa hi cancer a ni tih hrechhuak lo ta sela tun dinhmun hi an thleng kherin ka ring lo.




Theihtawpin ka lo hnem ve a, mahse amah ber chuan "Kal pawh nise ka dam. Amah a dam a, keipawh ka dam" a ti mai a, chutiang ngaihdan a nei thei chu ka lo lawm viau mai.




A haw dawn chuan Zuali nena kan chungchang min zawt ta zeuh a. "In inthen em ni?" a tih chuan 'aw' pawh mai harsa ka la ti fan. Mahse kan inthen miau si a "Ama duhdan ania lawm" ka ti a.




Chutah Ricky-a chuan "Tunlai a nguai ka ti reng a, Zuali hi zawng hriatthiam a harsa thin ania. Mahse in tawp hlen ka ring miah lo" a ti ve luam a. A rin dan hian thil thleng mawlh rawh se.



Karleh lama zanriah ei turin min sawm a. A hma pawh khan min sawm tawh a, ka la ei hman ta miah lo kha ania. Ka ei ngei tur thu hrilhin kan inthlah ta a.



Zanah chuan KTP Hruaitute ten an lo rel lawk tawh angin hnatlang nei turin kan chhuak khawm a, keipawh Zira nen kan inzui leh chawt tawh. Naktuk hi KTP Day a ni a, zaninah Biakin leh a chhehvelah flag tarin kan hnatlang dawn a. Member te pawh an phur tlang ve viau mai.




Tlangval thenkhatte nen thukhawm a kan lo titi lai mek chuan Sawmtluangi leh Zuali an rawn thleng a. Tunlai ka hmu khat em em a, ka hmuh chhunah pawh Biakinah a ni deuh tawp mai. Min pehhel ve thinin ka hria a, chuti taka min hmu duh lo bulah chuan inlan sek ka duh bik lo.



Ricky-a sawi ang tak tak khan a hmel chu a ngui riauvin ka hria a, ka hmu cher viau bawk. Mahse keimah vang anih ka ring bau lo, ka tellovin a awm thei alawm.



Chutia ka lo en reng lai chuan min rawn melh ve chiah a, mahse a hawi sawn lehnghal daih.



Zira chuan an tihtur a lo hrilh zung zung a. Keini pawh chu tho chhuakin hmeichhe hovin flag an lo siam tawh sa ho chu kan tar chhuak ta thliah thliah a. A thahnem ang reng si a, tih tham fe chu a ni ve.



Arini pawh a zuan a zang viau a, a rem hre bawk nen râwn takah an nei ve a. Kan vengah pawh Decoration Sub Committee member kha a ni ve a, pangpar khawi ah phei chuan a ni tluk a awm lo an tih ve hial kha ania. Ka nu nen an innel em em chhan pawh hi ani pakhatin ka hria.



Gracy te thianhovin thingpui in tur an rawn sem a, kan thu hahchawl ve ta vat a.



Ka beisei loh deuhvin Zira chuan Zuali nen kan chungchang min zawt thut a, ka hamhaih ang reng riau.



"In inngaizawng tiraw?" a rawn tih chuan han chhan mai dan tur ka hrelo. Mahse thudik takin ka chhang a, "Kan tawp tawh" tih zawngin ka lo chhang.



Chutah phawk deuh tak hian min rawn en a, "A va mak ve..." a ti hluai a, sawi belh tur a hre vak bik lo aniang. Ka lo nui lui suk a.



"Hmeichhe danglam tak ani" ka ti zawi sup a. Sawmtluangi nen titi paha thingpui no an chelh chu ka en pah vung vung bawk. A nui hmel te sawn a hma khan hlimna tam tak min pe a, mahse tunah chuan ka tel lova a hlim zawk ni a ka hriatna chuan min tina takzet.




"Zuali hi nula fel tak ania sin. An nufa laka ngaihdan teng hneng zet zet nei ho hi an pawng pawrh mai mai alawm. A thatna leh felna hmu hi kan thahnem zawkin ka ring. Misual a ni miau lova" a lo ti ve duah a. A ni pawh hian Zuali thatna chu a lo hmu thiam ve anih dawn hi. Mahse ka tan engmah a sawt tawh lo.




Beidawn ka duh lova mahse beiseina ka neih em em ka hre tlat lo ani.




Bân hmain an haw daih a ni mai thei, kan ban dawn chuan ka hmu leh tawhlo.



Zira, kei leh Arini te chu kan inzui haw a. Kawnglakah kan titi phei malh malh bawk a. Zira thusawi kan ngaithla a ni zawk mah.



Nutei te in kan thlen hma hretin Zira chuan "Hetah hian kan nu a leng a, ka lam haw nghal tur thu ka hrilh lawk tawh sia ka pen san mai ang che u aw" a ti a, 'aw' kan lo pawh ve vat a.



Zira a penkawi takah chuan Arini nen chuan kan inzui haw ta a. Sawi tur vak kan hrelo ve ve aniang kan ngawi reng a.



A in luah kan thlen hma hret chuan zawhna min zawt ta a "Zuali nen khan tinge in inthen a, i duh viauin ka hre sia" a rawn ti hliai a, min melh deuh ha bawk.



Ka ngawih reng vang chuan "Min chhan kher a ngai lo ania" inthlahrun hmel zet hian a rawn ti leh a. "Tawp a duh alawm" ka lo ti ve ta vat.




A ngaihna hrelo zet hian min melh a "Aman maw?" a rawn ti hap a, a âw ah chuan mak tihna a lang bawk. Ka lo bu nghut a, "A va zialo ve" a ti leh hliai a.



A in luah kan thlen takah chuan kan inmangtha ta a. Mahse thui pawh ka la pen hmain min rawn au ding leh a, ka va hawi phei chuan sawi duh nei hmel sawi chhuah hreh si hmel hi a pu a.



"Sawi la" ka lo tih sup takah chuan "I nuna ka luh ve min phal sak rawh" a rawn ti deuh tawl a, a ngaihna ka hrelo kher mai.




Chutah rawn sawi zawm lehin "Zuali ai chu ka awh zo kher lovang mahse i laka ka beidawn nan tal i nuna ka luh ve min phal sak rawh" a rawn ti leh a. A mitmeng chu mipa ka nihna angin ka hai hauh lo. Min duhna mitmeng mai bakah tumruhna ka hmu thei.



"Ka rilru chu i hriat kha" ka lo ti dam thlup a. Mahse a lu a lo thing nak a "Ka beidawn san nan tal che hun min pe ve rawh. Zuali i duh em em tih pawh ka hria, a pawilo, ka pawm zam thei vek. I duh reng chung pawha hun min pe ve thei anih chuan ka lawm ang" a rawn ti leh fan a.



Ka kâ a chhilh deuh tlat a, a tumruh hmel lutuk avang chuan han chhan mai dan tur ka hrelo. Chu chu a hrethiam aniang a rawn tawng leh vat a "Inngaihtuah i duh pawhin ka nghak thei reng che. I rilru tur pawh ka hrethiam lutuk, ka rilru tur hi min dawn pui ve hram la ka duh bawk. Min duh turin ka ti miah lo che. Mahse i nunah hmun ka chan ve theih nana ka beih min phal sak ve rawh" ngenngawl zet hian a rawn ti a. Ka ngaihtuahna a tibuai pha tlat.




In ka thlen hnu pawh chuan ka ngaihtuah rauh rauh a. Pathian hnenah ka thlen a, a reh, a reh duk ! A ngawih reng chhan hi ka hrethiam theilo.



Zuali laka ka rilru put hmang ang chiah hi Arinin ka laka a rilru put hmang a ni ve tho dawn tih ka hria. Ani phei chuan min duhna a rei tawh lutuk hial zawk anih kha!



Chuti taka ka laka rilru nghet putu chuan ngenngawl zetin ka nuna a lo luh ve theih nan a beih min dil a. Khatianga mipa ngen tur ang mizia kha a pu lo, mahse min duhna vangin a inphahhniam a. Chutiang lo hnawl tur chuan tunge ka nih ka hre ta bik lo.



Ka phone chu ka ban ta vat a, message ka va thawn ta a *Phal sak i ni e* tiin.



Hei hian eng kawngah nge min hruai dawn ka hrelo. Mahse ka zawh ve tawp mai ang.




_________*________*________*________


(Zan tam tihian ka ngaihtuah thin 'He thawnthu hi a tawp hunah chuan kan va hlawk tlang dawn em aw' tiin...chuvangin a bul min tanpui tawh a, a tawp min thlen pui ve hram turin ka sawm che u aw...a engamah hma khan lo ning lo hram ula🙈)


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:08 pm

LOVE COVERS ALL
By CVL Awmpuii


Chapter - 32


Khumah chuan ka mu meng reng a, chung lam hawiin ceiling chu ka melh vang vang a. Thil awm thei chi hrang hrang ka ngaihtuah a, ka ngaihtuahna vak vel chuan thawpikna bak engmah min thlen lo.



Chutih lai tak chuan lukham bula ka phone dah chu a rawn ri a, ka en chuan Arini a lo ni. Ka message kha a hmu tawh ngei anih ka ring.



"Hello" ka ti zawi sup a. "Sangzual..." a rawn ti hap a, a ngawi leh deuh vang vang a, a thusawi tur chu ka lo ngaichâng reng a.



"I message kha..." a rawn ti hliai a, "Ka lawm...ka lawm e aw" a rawn ti bah leh deuh nak. Ka message-ah khan lawmthu rawn sawi chhan tur a awmin ka hre hauh lo.



"Enga timaw?" a ngaihna hrelo zet chuan ka ti hulh a. A ngawih deuh vang vang hnu chuan "Ih...i...i nuna ka lo tel ve min phal sak avangin" a rawn ti bah deuh nak.



Chutiang zawng chuan ka sawi hauh si lo. Ka nuna a lo luh ve la phal sak na lam hawi zawngin ka chhang hauh lo. Ka chhanna kha a lo dawngsawng fu lo hle niin ka hre ta. A zialo hle mai.



"Arin" ka ti zawi ruih a, "Ka thusawi i dawng sawng fu lo niin ka hria" ka ti sup a. Ka inthiamlo ang reng viau mai.



"Maw?" a rawn ti hap a, phone-a sawi mai theih chi ni a ka hriat loh avang chuan "Naktuk hun remchangah ka hrilhfiah dawn che ania" ka ti ta a. A ni pawh chuan 'aw' min lo pawh ve mai bawk.



Zingah buhfai chhum tur ka sil laiin Nutei a rawn kal a, tiffin box hi a rawn keng tel a, "I plate lo la rawh, chawhmeh ka lo suah che" a rawn ti zung zung a. Ka buhfai sil lai chu dahin plate chu ka ban ve mai bawk a.



"Eng chawhmeh nge?" plate pek pah chuan ka ti a, "Baibing bai mawle, i nu khan i duh viauin a sawi a, ka lo suah che anih hi" a lo ti mai a. Plate-a a rawn bun chhuah lai chuan a rim a rawn nam cham cham a, ril a ti tam ve thei viau mai.



Ka chhin fel hnu chuan ka buhfai sil lai chu ka sil zawm leh a. Nutei chuan Fridge hawngin tui a in khalh khalh a.



Chair-a a thutthlak rual chuan "Hmangaihzuali nen chuan in tawp tawh maw...?" a rawn ti a, a âw atang chuan a hre sa vek tih a hriat theih.




Chaw ka chhuan rual chuan "Tunge ti a?" ka lo ti khauh a. Chutah Nutei chuan "Gracy in min hrilh alawm. Nizan in hnatlânnaah khan Sawmtluangi nen an titi a hria alawm" a lo ti awlsam then a.




Ka tawng veleh hma hauh chuan "Midangin an hriat hmain in tawp hman hlauh a, mualpho tak tak hmaa i bansan chu a tihzia khawp mai" a rawn ti leh zung zung a.



A thusawi duh dan chu ka ngaihdan a ni leh tawh bau lo. "Ka la tawp san ve hlei nem" ka lo ti nghut a, a ner nasa ngang mai.



Chair atanga thawh chhuah pah chuan "Zosangzuala chu thu tha hrilh i har emai, i thluak a suk sak mai mai che anih kha. I rawngbawlna hi ngaihtuah la, mualpho chi i nilo tih hre ta che. Hmeichhe pakhat vang mai mai lehnghalin, chutah pawh hmeichhe pangngai nilo lehnghal" a rawn ti duah a. A duhthawh bawrh bawrh leh viau tawh.



"Hmeichhe pangngai a ni rêng hlei nem, pangngai chunglam" ngeiawm zet hian ka lo ti vei nghut a. A mitmeng a thip leh ram ram tawh khawp mai.



"Hmeichhe dang pawh an tam tehlul nen hian i mak emai" a rawn ti nghek a. "Gracy kha buaipui mai teh, a awmdan te saw awmdan tha a nilo ania" ka lo ti hluk a. Ka nin zia chu a hriatthiam ve mai ka ring.



"A thian kawm te zir loh anih kha, tunah te chuan a pangngai leh vek tawh saw. Hmangaihzuali thla vang hauh nan i nau sawi chhe khanglang suh" thinrim deuh hian a rawn ti leh a, pawn lam pan a rual nghal a, ka chhang zui peih tawhlo. Nakinah la inhmuhchhuak ve hram teh se.




Tukthuan ka peih hnu chuan ka ei nghal zung zung a. KTP Day pualin Kohhran Hall-ah thisen kan pe dawn a. Lunglei Hospital atangin medical staff pathum vel an lo tirh kan beisei a. Keipawhin ka pek theih chuan pek ve ngei ka tum.



Thisen pek hi thil uiawm a ni lova, pe thei dinhmuna kan din phawt chuan pek ve zel hi a tha khawp mai. Tisa thil tak pawhin a tha, thisen kan pekchhuah hian thisen tharin a rawn thlak leh zel a, vun pawh a hma aiin a nung deuh surh thei an tia lawm.



Mahse a thlawn a thisen kan pek te hralh chhuah a ni thin hi chu dik tak chuan rilru a na thin. Mamawh te tan a thlawn in kan pe a, a thlawnin an dawng leh silo ! Mi harsa, rethei ve tete thisen tlachhama awm te pawhin an lei zel a ngai si. Mahse tun hnu hian man nei lova pek te pawh an nei ve nual tawh a, a lawmawm viau. Hei ai hian la tang deuh ila chu a thlawna kan pek te hi a thlawn veka sem chhuah hun pawh a la awm mahna.




Zing Dar 10 rik hma hretin ka in atang chuan ka chhuak a, ka hmanhmawh deuh hlek vangin motor in ka kal.



Nutei te in zawn ka thlen dawn chuan an inhnuai atangin Arini kal tur chiah hi ka va hmu a. Hun remchang tak niin ka hria a, a zawnah chuan ka va ding ta a.




Ka motor lam chu a lo hawi deuh ha a, tukverhah chuan dakin "Lo chuang rawh" ka ti sup a. Reilote chhung chu a meng buai deuh nak a, mahse a pangngai leh vat.




"Lo chuang rawh" ka ti leh sup takah engmah sawi lovin motor kawngkhar chu a rawn hawng a, a rawn chuang lut ve mai bawk a. A hmel nung deuh sarh vang chuan ka thusawi tur chu ka sawi chhuak hreh ang reng. Mahse thil hre fuh lova awm reng kha a tan thil tha niin ka hre silo.




"Tukin thawh ka hai a, ka tlai deuh alawm mawle" kan tlanchhuah rual chuan a rawn ti deuh hliai a. "A la tlai hlei nem" ka lo ti tha ve mai bawk a.



Rei deuh kan ngawih deuh vang vang hnu chuan "Arin" ka ti deuh hluai a, a lo phu uih lehnghal. Ka lam a rawn hawi vat a, ka melh ve zawk a.



"Nizana ka thusawi awmzia kha i hre fuh lova" ka ti dam deuh thlup a. A mitmeng chu a buai deuh nak mai "Eng ti zawngin?" a rawn ti chhuak hap a.



"Midang tana bei tur hian phalna inpek kher a ngaiin ka hrelo a..." ka chawl dat a, ka sawi leh tur ngaichangin min lo melh ran a. "Mahse nang chuan pangngai takin min dil a, ka lo phal sak mai che ani" ka tih zawm leh a.



A hmel atang chuan ka thusawi chu a la man chuang lo niin ka hria. " 'I nuna ka lo luh ve theih nan ka beih min phal sak rawh' tiin min dil anih kha. I beih ka phal sak mai che ani. Lo phal a, phal lo turin thuneihna ka neih ka hrelo, mahse min dil miau a, i beih chu ka lo remti mai ani" ka tih leh takah chuan a hriatthiam hmel ta deuh e.




"Ka theihtawpin ka bei ang" a rawn ti nghet ta charh a. Engtia han hrilhfiah chi nge ni ang aw. Theihtawp chhuah hnua beidawnna bak kan inpek leh si loh chuan a hun a khawhral mai mai a ni dawn si a.




"Ka hrilh tlang tawp ang che. Nangin ka nuna lut tura i beih tauh tauh lai khan kei chuan Zuali nei turin ka lo bei ve tauh tauh dawn a. Ka tan i beih laiin midang tan ka lo bei dawn anih chu. I beih ka phal sak chhan che chu i rilru tur ka dawn pui vang che ania. 'Ka rilru tur min dawn pui ve la' i tih kha ka ngaihtuah chiang a, kan mi duh takte tan chuan kan bei thiang ngei alawm. Mahse keichuan Zuali hi ka duh satliah a nilo a, ka hmangaih a, a ni lo chu hmangaih dang neih ka tum lo bawk" ka ti ta duah a.




A rilru na hmel chu ka hai bik lo, mahse nakin zel atan tlang taka thil sawi hi a tha ber tlatin ka hria a ni.



"A va beidawn thlak duh dawn ve" a rawn ti chhuak hap a, tawngchhuah harsa a tih hmel viau bawk.




"Chu tak chu ania ka sawi. I rilru nawm nana phal sak mai che ka ni. Hman atang tawhin i mitmeng atang hian engmah ka hai lo. Chutiang taka ka laka rilru nghet pu chu i ni tih ka hria. Nula fel pangngai tak i ni a, mahni hmasial ni miah lovin i hma hun hi sial thiam rawh. Ka lakah chuan beidawnna bak i hmu lovang, beidawng lovin Zuali tan ka bei dawn si a" ka lo ti leh duah a. Ka thusawi chu hrethiam se ka ti khawp mai.




A ngawih tak karah chuan engmah ka sawi zui tawh bik lo. A hrehawm ti hmel chu thil hmuh nuam a ni hauh lo, mahse nakina a hrehawm ai chuan pawi ka ti chiam lo.




A hnuah chuan pangngai deuh zawk hian "Zuali laka ka rilru put hmang ang hi ka lakah i pu ve dawn tih ka hria, mahse min hmangaih kher ka ringlo. Ngenngawl zeta ka nuna lo luh min dilna kha hnawl tur che ka niin ka inhre bik lo. Mahse ka nunah midang seng luh ka tum si lova. Ka thusawi hi i hriatthiam ka beisei tlat ania. Nakin zela i nat loh nana sawi ka nih hi" ka lo ti nghet leh charh a. A inpet ruh fan fan mai si a, a tah mai ka hlau bawk nen engmah ka sawi zui leh tawhlo.




Hall kawt kan thlen chuan car kawngkhar chu hawngin ngawi rengin a chhuak ta a, ka lo thaw chhuak hawlh. Tunah a tan hrehawm rih mah se a la pawm dam thiam ngei ang.




Car atang chuan ka chhuak ve ta vut a. Biakin gate lam ka zuk hawi chuan Zuali leh Sawmtluangin min lo hmu reng chu niin. Ka va hawi veleh an hawisawn nghal daih a. Arini chhuak lai pawh kha an lo hmu hmanin ka ring, an lo ngaih kawih loh hram ka beisei.



An lam pana ka kal thla vut tawh chu car chhungah ka phone ka theihnghilh tih ka hre chawpchilh a, car lamah chuan ka va let leh rih.



Ka phone ka lak hnu chuan ka va hmu leh mai tawhlo, an lo kalsawn hman daih anih hmel.



Lu thing nghutin Hall lam chu ka pan thla ta a, Lunglei Medical Staff te pawh an lo thleng tawh. Thianpa Sawman ka chungchang vel a lo hrilh ve aniang min lo hmelhriat en ve nghal hmak a.




"Doctor Sawma'n an pro pastor kha ka thianpa ania min lo biak dawn nia a ti tak asin" an lo ti ve luam a. Nizan lamah khan Sawma nen chuan kan inbia a, medical staff ho pawh hi aman tha a tih ho a rawn tir ani. An damdawiin ah chuan thawktu senior a ni ve tawh a, a thu pawh a lal ve viau tawh.




Thalai member ho pawh an lo kat ve nuk tawh a. HB leh check ngai dang zawng zawng te chu an han check zung zung a. A tlangpuiin hmeichhia in an pe theilo, HB ah an tla ziah.




Nula hovin thisen pek zawha ei tur rasgula leh chocolate te chu an rawn chhawp zung zung a. Sawmtluangi pawh ka hmu, mahse Zuali ka hmu veleh tlat lo.



An titi tui lai leh buai lai tak ani bawk a, a rukin ka petek ta zeuh a. Hall chhung atang chuan ka chhuak ta a, ka hawikual pawh chuan Zuali hmel reng reng ka hmu lo.




Mahse step-a ka chho tur chiah chu kun deuh ngal chung hian a rawn chhuk thla ve chiah a. A rawn hawi thla min hmuh rual rual chuan a meng awk a. Ka pen chho ta vut a, chutah hmanhmawh zet hian a let chho leh nghal rawk rawk anih chu !




Ka han ûm ta vat a, Biakin kawt ka thlen chuan ka hawi kual a, ka hmu leh tawh mai lo. Tinge maw a tlanchhiat vak kher ni?



Biakin chhung chu ka enkual ngat a, a awm chuang lo. Khawiah tak chuan kal hman ang maw?



Thlang lam atanga Ziran min rawn koh takah chuan ka zuk chhuk thla veleh ta vat a. Nakinah ka la hmu dawn tho sia aw ka rilru chuan ka ti rauh rauh mai.



Ka zuk chhuk thlak leh takah chuan Zira chuan "Kan in test ve tawh mai dawn mawnle ka tia, a remchang tawh bawk a" a lo ti vat a. Keipawh chuan ka lo zui ve ta vat a.




Ka HB leh BP a normal vek a, hrisel lohna ka nei hranpa em em lo bawk a ka pe ve thei mai dawn e.




Mutna awl a awm veleh chuan ka va mu ta a. An staff zinga nutling pakhat, min buaipui tu chuan min fiam deuh zuk zuk a "I hrisel that hmel sia, i palian bawka unit thum kan la mai dawn mi" a lo ti uang vel a, ka lo nui ve suk suk mai.




Thisen ka pek zawh hnu pawh chuan Zuali hmel reng reng ka hmu ta lo. Sawmtluangi hmun tifel lai chu ka zawt ta tawp a "Khawnge Zuali?" ka tih chuan min melh deuh vang vang a "I mak" tih zawng a sawi. Tawi tha teu teu khawp mai.



"Khawnge?" ka ti leh nghut a, "A haw tawh" a rawn ti tawi leh tak ringawt a. A hmunphiah chu lain a kalsawn zui nghal nal nal anih chu !



Zaninah ka hmu khawp ang !



Zanriah ka ei hma hretin ka nuin min rawn bia a, Matei te exam chungchang a rawn sawi a "An zirtirtu te khan an beisei sang ve sia, amah lah chuan 'Ka tum angin ka titha lo' a ti bawk si a, a rilru a buai ve khawp mai" a rawn ti a.



Hetiangah hian pressure inpek nasat lutuk a tha lo. Mahni thahnemngaihna a theihtawp kan chhuah kha a lawmawm tawk viau.



"Ka lo bia ange" ka tih chuan Matei chu phone a pe zui ta niin ka hria. "Aw, û" a rawn ti zang vah a.



An exam chungchang velte chu ka zawt a, ka nu sawi ang deuh tho khan min rawn chhang. "I theihtawp bak kan phut miah lo ania. In zirtirtu te chuan zirtirtu an nihna angin an beisei sang ve tur che ania. Mahse anni pawhin i theihtawp bak an phut bik lovang. Chuvangin rilru hah deuh khan lo awm suh. Chuloah i tichhe dawn lo hrim hrim" tiin ka lo hnem ve luam a.




A tih that theih em avang hian tlema a hnufual deuh chang hian tichhe ta duaiah a inngai thin a. Mahse beisei ai takin result tha a rawn nei ziah.




Zanah chuan ka chhuak ta ngei a, dar 9 vel chauh a la ni bawk a, a la mu dawn lo tih ka hria.




An in step atang chuan an in chu ka thlir vung vung a, light a la in on a a la mu lo tihna a ni.



Ka call a, a pick up duh thak lo. Vawi ruk lai ka call hnuah chuan a pick up ve ta hram a, a rawn tawng chhuah hma hauh chuan "In in bulah ka awm ka hmu duh che" ka ti nghal tawl a.




Chu veleh an in light chu a thim a "Ka mu tawh" a rawn ti. Ka awih a ring emawni.



"Light i off chiah anih kha" ka lo ti hluk a, a ri deuh rak rak a. "Ka muhil tawh dawn" a rawn ti nghat a, ka nui chhuak nghal hawk.



"Ti teh, lo chhuak teh. Khua a vawt sia ka ding reng peihlo ania" ka ti zawi ruih a. "Haw mai la, ka mu duh alawm" a rawn ti dam thlap a.



Ka lo thaw chhuak hawk, a hmel hmuh duh avangin ka pan a, hmu lova haw chu ka tum bau lo.



"I rawn chhuak dawn nge in kawngkhar tichhiain ka rawn lut dawn?" ka ti nghut a, ka aw atang chuan eng emaw tak tih ka hreh loh zia a hriatthiam ka ring.



"Pro Pastor in mi kawngkhar tihchhiat te i tum le?" a rawn ti hlak a. "I rawn chhuah chuan tichhe dawn nang" ka lo ti mai a. Tunah hian a ner nang nangin ka ring, ka ngaihtuahna avang chuan ka nui chhuak hawk a.




"Ka rawn chhuak dawn lo" a rawn ti vei nghat a. "Kawngkhar a chhe dawn nih chu" ka lo ti hluk, a rawn chhuah loh chuan ka tichhe duh tak tak ang.



"Pro Pastor i nih kha" a rawn ti ve hlak a. "Mipa ka ni tel bawk, a hmangaih tan engpawh tih huam ka nih hi" ka lo ti nghet charh a, ka thutak viau tawh.




Kan ngawih dun vang vang hnu chuan "U Sangzual, haw mai rawh" a rawn ti chhuak hap a.



"Ka duat, lo chhuak lawk la" ngenngawl zet hian ka lo ti ve thung a. A rawn thaw chhuak hak a. A tan ka inhuam thui zia a hrechiang bawk a, a rawn chhuah tur thu chu min hrilh ta a.




Ka lo nghah lai chuan van lam ka hawi vang vang a. Thawpik zet hian ka thaw chhuak leh hulh thin. "Kan tan eng ruahhmanna nge i neih le?" tiin ka phun chhuak sup a. Pathian reh ri tluka ring hi a awmin ka hrelo. Ka nuna Zuali reh ri ai pawhin a ring zawk tlat ani !




An kawngka a rik khep takah chuan ka zuk hawi thla vat a. Polar suit pink hi a rawn ha chhuak a, a inhmeh asin aw...



Rawn hawi zawkin step ah chuan a rawn pen chho a, ka lo nghak ve reng a.



Ka bul a rawn thlen rual rual chuan insum hman lek lovin ka lo kuah nghal hlun a, a bekah ka fâwp a "Ka va ngai che ve" ka ti chhuak hluai a, za lo zetin ka nui chhuak hawk. A taksa ka si chiah chu ka ngaih zia ka hre nawn awn awn mai.



"Min thlah la" a rawn tih chuan "Reilote" ka lo ti zawi sup a. A rim nu chek chu ka hip lut vang vang a. Ka ngai em asin...



Rei ngial ka kuah hnu chuan ka thlah ve ta hram a. Ka kutin a biangah chuan ka dawm a, min lo melh ve vang vang a, thil tam tak ngaihtuah hmel a pu.



"Ka ngai che" ka ti tham tuak a, ka hrawk hnawhtu a awm tlat. "Ka hmangaih che" ka ti leh a, hmui hnuai pet fan fanin min lo melh kiau a, a hmeltha asin.



A inlahrang ta dat a, a biang ka dawmna kut chu enin ka lu ka thing nghut a.



"I rilru engtikah nge i thlak dawn?" ka ti a, min chhang lo. "Engtikah nge bul kan tan leh dawn?" ka ti leh a. A ngawih rengna chuan a dinna ngaiah a la ding reng tih bak min hriattir lo.



"Min hmu tawh bawk a, va haw tawh rawh" a rawn ti tham chhal a. Thla eng deuh riai chuan a mitmeng a chhun tle sar sar a. "Tap la...i tah a chhuah chuan tap la...i tah ban hma chu ka kuah leh ang che" ka ti ril ruih a. A tap thlem a, kuah leh kha ka duh.




"Haw tawh rawh" tih zawng a rawn sawi. A âw chu nichina tham deuh chhal ang kha a ni tawh lova, ama tawkah a nghet tha cherh chawrh viau.




Ngawi rengin an in lam a pan chu mi a ang maiin ka thlir mawl tawp. Inchhunga a luh hnu thleng chuan ka thlir a, ka hmuh phak loh thleng chuan ka mitthla ah a cham vawng vawng.



Minute 5 vel ngawi renga ka din hnu chuan ka ngaihtuahna a vir zawk a. Hmanhmawh zetin ka car awmna lam ka pan a, pastor quarter lamah ka inkhalh chhuak nghal zawt.



Tinge Pathian rawngbawl hi ka lo thlan le ka ti hial tawh ! Ka kawng zawh zawng zawnga inchhir ka duh lohna berah ka inchhir mek !



Pastor quarter ka va thlen chuan zan rei tawh tak mah nise zah pawh ka dâwn theilo, an kawngka chu ka kik ta a.



Vawihnih chauh ka kik hman tihah pastor ngei mai chuan min lo hawn a, min hmu thut chu mak a tih hmel khawp mai.



"Sangzuala teh nawlh chu" a lo ti hluai a. "I mutui lai ka tiharh che em?" ka'n ti khaw mawi veleh rih a.



"Tiharh lo e, ka muhil thei lova Bible chhiarin i lo kal hun ka nghak" a rawn ti khauh mai a. Mak tih hmel taka ka lo en chuan "Mawlh tu ka nei alawm, rawn kal tur an awm tlata hriatna" a lo ti dam thlup a. Mak ka ti viau mai.




"Lo lut la kan inbe dawn nia" a tih takah chuan ka zui lut ve ta nghal a. A nupui fanau te chu an mu tawh aniang a reh deuh duk mai.



A Bible lo chhiarna lamah chuan kan inzui phei a, thutna min kawhhmuh ah chuan ka thu thla vut a.



"Eng nge ni ta le?" Ka ep chiaha thutthlak pah chuan zawldawh zet hian a rawn ti dam thlup .



"Chunglam khi ka auh nasat poh leh a reh zual nimaiin ka hria" ka lo ti chhuak hawk a.



Eng emaw ngaihtuah ni âwm tak hian a melh ngai a melh deuh vung vung a.



"Chhanna hmu theilo niin i inhria em ni?" a rawn ti dam thlup a. "A reh vek, eng chhanna mah ka dawng lo. A rei tawh emai" ka lo ti hul hawk a.



Chutah Pastor chuan "Abrahama, rinna pa kha kum 100 a tlin hnuin asin a nupui Sari lakah fapa pekin a awm. Pathian hnenah a dil a, mahse kum 100 chuang hnuah chhanna a hmu chauh. Chhanna a hmuh hma zawng khan Pathian Biak a thulh miah lo" a rawn ti ta a.




Chawp leh chilhin ka kha a rawn chhih tlat, sawi veleh mai tur pawh ka hrelo. A thusawi chu thui lem lo mah se ngaihtuahna a tithui pha tlat.



"Ngaihtuah chiang la, kum 100 leh thla khat chu inthlau deuh mai asin" nui suk chung chuan a rawn ti leh a. Ka rilru a dam nghal sawng sawng maiin ka hria. Tin, ka zak hle bawk. Thla khat, thla khat chauh alawm la liam. Kum em pawh a la ral lo.




"Pathianah hian chawlh tur, rei deuh mahsela beidawng lovin nghak fan fan rawh. Pathianin a fate duhzawng a tithlawn ngai lo. I thinlung duh zawng a hre vek a, a hun takah a lo thleng mai ang. Pathian hi a tlai ve ngai lo ania" a rawn ti leh duah a.



Pathian auh chhunzawm zel a, a hnathawh lo thleng tur nghah mai chu ka tih makmawh ani.



_________*_________*_________*_________


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:08 pm

LOVE COVERS ALL
By CVL Awmpuii


Chapter - 33


Ringtute kawngzawh zawng zawng hi a inang vek lova , mahse kan tum ram erawh thuhmun a ni.



A thenin kraws kawng tluang parh, buaina em em tawk lova a an zawh theih laiin thenkhat erawh chuan fiahna hautak tak tak an paltlang thung a. Mahse harsatna tawk lo rawngbawltu chu an awmin ka ring lo.



Kan harsatna tawh theuh te hi midang tan engmah nilo angin lang mah se a tawngtu tak tak tan chuan harsatna lian tak a ni thei a. Mi harsatna inhmuh tet sak chi a ni hauh lo.



Pastor te in atanga ka chhuah hnu chuan Biakin lamah ka chhuk thla nghal a. Ngawi rengin thutthleng ah chuan ka zuk thu a. Sawi tur reng reng ka hrelo, mahse zan danga ka sawi tur hriat loh ang kha chu a ni miah lo. Zaninah hi chuan Pathian lakah ka tlawm, ka tlawm takzet ani !




Ka lo chak tawk loh zia ka inhre chhuak a, Pathian a innghat inti si a ka lo innghah tawk loh zia te ka hrechhuak uar uar a. Chu chuan Pathian lakah min ti tlawm a, ka tan ruahhmanna fel fai tak a lo nei lawk diam tawhin ka ring hmak bawk. Chumi kawng zawh tur chuan Amah au chung zela Amah chu rina nghah mai chu ka tihtur a ni.




Thawhlehni tuk a ni a, ka insuk laiin Ricky an min rawn bia a, an ina zanriah ei turin min rawn sawm a, min sawmna a rei tawh bawk a, 'aw' ka lo pawh ve vat a. A pa chanchin ka zawh chuan a thatlai tak a nih hmel e. A lawmawm viau mai.




Tunlai ka pheikhai zâng vuh mai te hi Pathian vang a ni tih ka hai mawlh lo. Kha zan atang khan khawih tharin ka awm chiang a ni. Zuali nen kan inkarah hmasawnna em em la awm lo mah se ka rilru chhungril tak hi a hlim a. Amah ka va hmangaih ta lo tihna lam a ni hauh lo, mahse Pathianah hlim lehzualna ka hmu a ni ber mai.




Arini pawh kar thum zet chu a reh ta. Nutei te ina ka va kal châng hian a lo awm veleh zeuh thin a. Nuam tilo hmel ngawih ngawih hi a pu thin. Min duh ve takzet a, hnawl tu nih kha thil nuam tak ani bik lo. Mahse beiseina beidawnthlak inpek mai mai ai chuan tha ka la ti tho.




Ka nu erawh a la ngai reng a, Arini nen an inbiakna te a rawn sawi thul. Ka nutein Zuali nen kan inthen tih a lo hrilh a, ngeiawm khawpin a lawm. A thil duh ber kha a ni miau a, mahse a fapa hian a rilru hneh ngei ka la tum fan.



Ka pa pawhin a hriat ve tawh ka ring a, mahse engmah Zuali nen kan chungchang min la zawt lo hrim hrim. Ka nuin a lo sawipui dim diam tawh anih ka ring.




Chhunah chuan khawhar in lamah ka va kal veleh a. Nimin piahah khan mitthi kan nei a, pavalai tho thang tha tak ani a, stroke vangin a boral deuh thut a. An chhungkaw innghahna ber a ni ve si a, a lainatawm tak tak a ni.




Kohhran dangho chuan fiamthu titak deuh hian min lo fiam min lo fiam mai a. "Synod chu committee hi in nei reng mai a, committee Kohhran in nia. Pathian lo kal dawn pawh nise Committee phawt in ngai ang" nui dar dar chung chuan an lo ti a.




Keipawh chuan anmahni ang chiaha fiamthu titak deuh hian "Ekhai, theih nise Pathian lo kal hun tur chu hria ila, ropui taka lo hmuah dan tur ngaihtuah a, committee lo thutkhawm ania kan duh ni. Ropui taka lo hmuah dan tur rel mai kan nap ang chu" ka lo ti ve hluai a. An nui tak ang dar dar a, mahse an nuih chu a za vak tawh lo niin ka hria.




He leiah hian Kohhran hrang hrang ding mah se kan tum ram chu thuhmun vek a ni a. Inlungrual taka Pathian rawngbawl ho mai tur kan ni.




Tlai dar 4 rik hma hretah Ricky-a te in lam pan chuan ka chhuak ta a. Chawei hun chiah chiah a va kal chu thil mawi a ni lova, chuvanga kal hma deuh pawh chu ka ni.




Ka va thlen chuan ka beisei loh lutukin Zuali a lo awm ve ! Ani pawhin min beisei lawk bik lo aniang min hmuh rual rual chuan a phawk deuh hra a.



Ricky-a nu, Nu Rini chuan chutia ka lo ding khawng deuh luah chu min lo chiauau vat a "I lo thleng thei maw, lo lut rawh. Hei Bawiha thiannu Zualtei hi kan lo sawm tel ve a" a lo ti zung zung a. Nui lui sukin an inchhungah chuan ka lut ve ta vat a.




Zuali chuan eirawng a lo bawl pui mek hi a lo nia. An bulah chuan ka thu ve ta reng a, a tira phawk deuh hra kha min hmelhriat angin a awm duh leh tawh tlat lo.




"Pa Biaka chu eng nge a an a?" ka han ti mawi hnai veleh rih a. Nu Rini chuan "Tunlai chu a zia ve khawp mai. Room lamah a mu a, va kal tak rawh. I lo thleng tawh tih a hriat chuan a lawm ve viau ang" a lo ti nghal hluai a.




"Zualte, Antam kha chu keiman ka lo siam ang" a tih zawm leh zat a. Zuali Antam then sa chu a sil nghal zung zung bawk a. An chezia chu ka lo melh run run a, an inhre tha viau tawh anih hmel.



"Khawnge Ricky-a hi?" ka lo tih chuan "Dawrah ka tir lawk anih kha, a lo haw leh tep tawh ang" a lo ti vat a, "I Pa Biaka chu lo va kawm la" che zung zung pah chuan a ti leh a.




Keipawh chu an room lamah chuan ka phei ve ta vat a. Ka va luh chuan Pa Biaka chuan Bible a lo chhiar a, min rawn hmuh chuan a ri ve hluai a "I lo thleng hma hlauh chu a va lawmawm ve ka lo ngaichang reng che a" a ti ve hluai a. "Choka lamah ka va thu deuh char char tawh a" ka lo ti ve sup a.




An khum bula thutnaah chuan ka thu thla a "Bible te i chhiar peih a, i dam tha tih a hriat a, a lawmawm hle mai" ka ti ve leh luam a. A hmel a nung deuh sarh a, a dam lohna in a taksa ei chhe deuh mah se Pathian neitu ani tih a hriat ngawih ngawih.




A rawn tho kang deuh a "Tun hnua ka ngaihtuahna tithui ta em em chu kan chak loh lai ber hi Pathian Thu kan mamawh hunlai tak a lo nia. Chak lo chung chung pawha A thu a kan intuk luh hian tisa thil takin va chak sawt lo mah ila Thlarau ah chakna thar tam tak kan lo chawk lut hi a lo nia" a ti dap dap a. A thusawi dik zia leh nun pui tu anih zia chu a hmelah a lang hial mai.




A thinlungah a khat liam viau ani mahna Pathian Thu tha tak tak min hrilh a, a nuna thil thleng chho mek te chu min hrilh ve dap dap a. A lo ngaithla tu nih pawh chu a hahdam thlak takzet a ni.




A hnu deuhah chuan Zuali chungchang a rawn sawi ta a "Bawiha thiannu Zualtei saw a hma chuan ka hmuh dan a dik ngai miah lova. Ka fapa in a kawm te khan ka lo ngai thei ngai lova mahse tun hnu hian kan fapa tan a hlut zia ka hre thar tlat asin" a rawn ti hluai a.



"Mi thenkhat in an sawi ang hi a ni hlei nem, kan Kohhranah pawh kan rinrawl ber leh KTP active member alawm" tiin a thlavang chu ka lo hauh ve nghal vat a.



"Ka thlirna tlang kha a lo dik lova, ka thlirna tlang ka thlak chinah a thatna bak ka hmu ta lo. Kan fapa tan a hlu em em mai lehnghal a" a rawn ti veleh chuar chuar a, a aw atang chuan Zuali chu a ngaihsan hmel viau. Chu chuan min lo tilawm ve em em mai ani.




Chaw ei dawn ah chuan Pa Biaka chuan dawhkan kil a inhuam ve tlat a. A chhungte pawh an lawm viau.




Zuali nen chu ka melh leh vung vung thin a, mahse a lakah chuan hmelhriat ngai loh ang mai ka ni. Ricky-a nen chuan pangngai takin kan inbia a, a mitmeng atangin Zuali a sawm ve chhan ka hrethiam deuhin ka hria. Ka rinlawk ang ngeiin chaw kan ei hma hret chuan "I lo kal ve tur thu hrilh miah lovin ka sawm a, in tan hun tha anih ka ring a" a ti ve ngial a, a nui deuh suk suk bawk. A thianpa hian kan pahnih inkar hi a lo ngaihtuah ve takzet anih hi.




Ka lo nui ve suk a "Haw lamah chuan ka rualin haw sela" ka ti sup a, a pawm viau mai.



Chawei hma chuan Pa Biakan hunserh hmang turin min ti deuh tlat a, ka hmang ve mai bawk a.



Chawei lai chuan Pa Biaka leh Nu Rini titi kan ngaithla a ni hawt a, kan lo zawm ve zeuh zeuh tih mai loh chuan an pahnih titi a ni deuh ber mai.



A chawei lai chu ka melh leh thin a, eng tham mah a bar pawhin ka hrelo. Nu Rini chuan "Zualte i duhzawng a awm vak nange?" a ti ta reng a. Mahse "A tui hlawm lutuk, ka riltam lo hrim hrim a" a lo ti ve vat a, a nui deuh var var bawk.



Chawei khamah reilote kan han thu khawmuang veleh rih a. Dar 7 vel a rik hnu chuan Zuali chu a tho ta tharh a "Ricky, min thlah tawh mai la, ka nu amah chauhin a awm sia ka ngaihtuah riau mai" a ti hliai a.





Ricky-a nen chuan kan inmelh vat a, kan in man ngang mai "Ka haw ve duh tawh tho a, kan haw rual dawn nia" tiin ka tho kang zui ve nghal a.




Zuali chuan Ricky-a chu a va melh a, pakhatpa lah chuan a lo haider hmiah "A remchang tak alawm, in haw rual chuan a tha zawk ang" a lo ti vei sawng a. Zuali ngaihdan a nih loh hmel kher mai.




Pa Biakan "Haw hma in tum si a, nakinah lo leng leh ru aw. Zanriah te pawh min rawn kilpui leh ang chu. In haw na tur kawng a inang hlauh chu a tihzia angreng khawp mai" a lo tih tak zung zungah chuan min hnial thei a ni ta lo. Ka lo nui suk suk a, chutiang bawkin Ricky pawh.




Kan inmangtha fel hnu chuan kan chhuak ta a. Motor bul kan thlen veleh Zuali chuan "Ke in ka haw mai ang" a rawn ti a, ka lo rum nghut "Ka rualin i haw dawn" ka ti nghut a.




"Pen kawina tur ka nei a, ke in ka lo va haw zawk ang" a ti dam leh thlap a, a hma zawnga penkawina tur a nih thu sawi hlei lo kha tunah a neih thut tur thu a awm lo.




"Anih chuan kal rawh" ka ti nghut a, kal turin ka mitmei a, a hamhaih deuh nge ni min en haw a, mahse a kal ta nghal vat a, ka zui ve nghal vat bawk. Chutah ka zui tih a hriat rual chuan a rawn hawi let leh ang he haw a "Khawnge i kal dawn?" a rawn ti hap a. "I rualin ka rawn kal dawn" ka lo ti mai a.




Ka motor lam chu a melh zawk a "I motor sawn haw la, kein ka haw dawn" a rawn tih chuan "Ti sawn awm rih mai rawh se, naktukah ka va la mai ang. Zanin chu kein haw i duh miau sia kein kan haw ang" ka lo ti veleh tlat a.



Hahthlak tih hmel zet hian min melh a "U Sangzual..." a rawn ti hap a, "Eng nge ni?" ka lo ti vat. Sawi tur hre chuang si lo hian a riat nawi ta vel mai mai a.



Chutah ka va pan hnai a, a dara va kuah pah chuan "Kal tawh ang le" ka ti zang vah a, ka awmdan chuan a ti hamhaih hle ni tur ani a chesawn thei der lo, min rawn melh chho kiau ringawt a. Ka lo nuih suk a "Kal ang" ka tih leh takah chuan ka kuahna ban chu lak thlak a tum a, mahse ka kuah nghet ve tlat sia tihngaihna a hriat loh hmel kher mai.




A tawpah chuan "I motor-ah chuan haw zawk mai ang" a rawn ti ta a. Ka lo nui ta vur vur chu min melh rum ngang mai. A biangah ka piai zeuh a, ka ban a lo beng sawn nghal tharh a, ka nui chhuak ta hawk hawk.



Motor-a kan thut luh hnu pawh chuan a lungawi loh hmel ngang mai, kei erawh ka nui suk suk a, a awmdan hi a lawmawm thlawt.




Ka be char char a, min chhang duh thak lo luhlul ve ngil ngel tak a ni. "I nu a dam tha em?" ka tih chuan side glass lam a hawi hmak a, ka lo nui chhuak hawk.



"Min chhan loh chuan ka ru tlang nghal dawn che ania" thutak zet chuan ka ti ta a, a rawn hawi vat a, rinaiin chhaih buai a nuam phian mai.



"Ka nu chu a dam" tih zawng a sawi a, lehlam a hawi leh nghal hmak.



"Nang i dam tha em?" ka tih leh chuan a bu nghat a. "Chaw i ei tha lo i cher lutuk" ka tih chuan "Ka chawei tui lai tak" ngaihsam zet hian a rawn ti a.



"Thil min zawh ve duh te i nei em?" ka tih chuan min chhang leh duh tawhlo. "Keipawh ka dam a, ka chhungte pawh an dam tha a, ka chawei pawh a tui pangngai. Ka ngai thin lutuk che tih mai loh chu engkim a fel vek e" ka lo ti duah a.



"Ka zawt lo che" a rawn ti hlak , "I rilru in min zawt ka hre vek. Chuvangin ka chhang che anih kha" sawi fuh inti zet chuan ka ti a, kan ngawi zui ta vang vang.




An in zawna a chhuk dawn chuan a banah ka chelh leh rih a "Engtikah nge bul kan tan that leh dawn" tiin vawi tam tak ka lo zawh thin chu ka zawt nawn leh a.



Min melh deuh vang vang a, ka vawnna kut chu dahthlain "A harsa zawngin awm tawhlo hram rawh" tih zawng a sawi, a chhuak zui nghal a, ka umzui duh ta lo law law. Ka nawr tut tut chuan rah tha a chhuah ka ringlo.




Thla a vei leh a, ngaihtuahna a kal thui duh rauh rauh thin khawp mai. Min la hmangaih ve reng ang em tih ngaihtuah chang ka ngah thin. Ka chunga a innghat ngam miah lo hi hriatthiam a har. A innghah ngam miah lohna tur khawpa mipa lelo niin ka inhre bik silo.




Biakin velah kan inhmu fo a, hmun dangah chuan kan inhmu ngailo tawp a tih theih ang. Mahse zan tam tak an in bulah ka va ding thin a, zan chu ka tum tawi veleh mai thin.




Pathian ka auh tam phah a, chhanna dawng lo mah ila beiseina ka la nei fan a, ka beiseina hian eng emawni hmun tak chu min la hruai thlen ngei ka ring bawk.




Zirtawpni tukah chuan Nu Rinkimi dawrah ka va leng a. Tunlai Kohhran thila ka buai vanglai tak a ni bawk nen kan inhmu khat riau a, a titi ngaihthlak loh rei hi chuan lung a leng ve duh viau mai.




"Tunlai i lo kal khat lutuk a ka hai tep che alawm" a lo ti uang a, a nui deuh ham ham bawk.



"Kan buai thin lutuk a, ka lo tlawh khat phah che alawm" ka lo ti ve luam a.



A kuhva thel lai chu a thel pah zaih zaih a, a hnehsawh thin ania.



"In la inbe pangngai leh ta miah lo em ni?" thutak deuh hian a rawn ti a, Zuali chungchang a sawina a ni tih ka hria. Za lo zet hian ka lo then suk "Kei chuan biak ka tum thin alawm" ka lo ti tawi tak a.




A rawn thaw chhuak deuh hak a "Han sawipui tum lah hian a sawi tha duh mang ngai lova rilru in tibuai dun khawp mai" a ti hap a.



Nu Rinkimi bulah pawh a ngawi tlat anih si chuan min thlah hlen a tum tak tak angin ka ngai lo theilo. A inthunun thei lutuk hi rilru a tibuai map thei.



"Sawmtluangi hian a titipui ve tawh em?" ka lo ti sup a. A thian hnaivai ve deuh ber a ni a, a laizawnnu ang mai a ni bawk a. Sawmtluangi bulah tal chuan a inbunruah ka ring ve tlat ani.



"Kan Sawmtluangi te chu a..." a ti hlak a, chutah rawn sawi zawm lehin "Amah pawh hetiang mai hi ania engtin nge Zuali chu a titipui theih tehlul ang ni. Ngaihzawng chungchangah lehnghal. Sawi tlang tawp mai ang Sawmtluangi hi chu maw hetiang kawngah hian a zei hawi thlawt lo. Chuti nilo sela makpa te pawh kan nei ve tawh ang chu" a ti barh barh a. Sawmtluangi nungchang nen ka ngaihtuah a, anih duh hmel viau mai.




"Titipui tal lo tum ve sela ka ti mange" ka han tih chuan "A hma chuan a lo sawipui ve ngei aniang. Mahse 'An inthen thu bak min hrilh lo' tih zawng a sawi. Sawi leh sawi hnu Sawmtluangi hi chu mahni that thata tha tawp chi ania. Makpa hmel hmuh pawh kan inbeisei buai peih tawhlo" a ti leh ta duah a. A beidawn thlak duh mange.




Chutia kan lo titi lai chuan amah Zuali ngei mai chu Nu Rinkimi te dawrah chuan a rawn kal a, mahse amahin a lo kal lo. Mipa pakhat ka la hmuh ngai miah loh hi a rawn hruai tel. An in melh dan atang chuan a inhaw zawk zawk lo tih a hriatthiam theih vek bawk.




Chutia dawra ka lo thu ve min hmuh chuan a phu deuh uih a, mahse Nu Rinkimi bulah chuan a thil duh a sawi ta vat a. Kei chuan a lo kalpui mipa nen chuan ka lo entawn zak zak a. Mipa cher sang lampang a ni a, palian hluai tih tur ni lo mah se a sang tha phian. Kan inchen velin ka ring.



"Mate, cold drinks lam tel rawh aw" chupa chuan a rawn ti a. 'Mate' tiin a ko ! Ka hre sual miah lo. Zuali chu rum zet hian ka melh nghal khawl a, chu chu hriain a mitmeng a buai deuh nak mai. Nu Rinkimi bulah chuan cold drinks pawh chu a lam lehnghal a.



An in lam an pan hnu thleng chuan ka melh zui a. Ka thinrim lutuk chuan ka thawk a ti sak vek hial thei. Ka lungawilo a ni tawp mai.



Nu Rinkimi bulah chuan inthunun hman lo lek hian "Tunge khapa kha?" ka ti khur khur a. Mahse Nu Rinkimi chuan "Aizawla a nî rawn be thintu ka tih thin kha i hria em? Kha kha a fapa anih kha. Hmanni lawkah pawh a rawn kal tawh. Ka rin danin Zuali te nufa hi Aizawl hruai phei an rilruk niin ka hria. Sawmtluangi pawh khan a sawi deuh a 'Zuali pawhin a hnial vak tawhlo' a tia" a rawn ti zung zung a.



"Aizawlah maw?!" ka lo ti ang he haw a. Chutah Nu Rinkimi chuan "Umm...a hma kha chuan amah Zuali chauh kha hruai phei an tum thin a. Tunah chuan an nufaa hruai phei dan kawng an zawng deuh aniang. Mi in luah te paw'n an awm ve thei ang a" a ti leh zung zung a.




Thil awmdan chu a ni teh thut lutuk a ka nghilh deuh dup mai. A hma kha chuan a nî te bula awm kha ka duhpui lek lek a. Mahse tunah chuan thil a danglam tawh a. Kan awmna hmun a inan loh phei chuan kan inkar hla sa chu a hla lehzual sauh ang.




Zanah chuan ngawi rengin Biakinah ka va thu leh a. Ka thlakhlelh anga min thlahlel ve lo ni a ka hriatna chuan min tina nawn leh ta !




Chelh beh ka tum mek lai hian min kal bosan dan kawng ringawt a lo zawng char char niin ka hria. Chu chuan min tina takzet bawk.



Pathian ka au a, mahse A thawm hriat tur a awm lo.



Mak tak maiin a hma ang khan Pathian chu ka dem thei ta miah lova. A malsawm ka dawn zawng zawngte ka ngaihtuah let a, ka dil loh malsawmna tam tak min lo vur tawh a. Tun chauh chu ka dilna hlawhtlin tir lo mah se vui thei niin ka inhre lo.




A tana ka hrehawm tawrh ve te ka ngaihtuah a, bawk sawp khawpa hrehawm ka tawrh ka la hrelo. Chutiang hun chu tun hunah hian min paltlang tir dawn niin ka hre ta hial mai.



Mahse hlauhna ka nei ta miah lova, Pathianin min thlamuan ni berin ka hria. Kan tawpna chu engpawh nise Pathian remruat ah ka pawm thiam thlap ka ring ta.



Thuthlukna tawp ber siam turin vawikhat ka be leh ang a, chutah chuan tawp a la thlang fan anih chuan ka thlah zalen ang.



Ka hmangaih loh vang ni lovin ka hmangaih em vangin a duhthlanna ka zahsak ang a, ka kaltir ang.



Pathian tân ka chân ngam ve turah ka ngai ta hmiah.



________*_________*_________*_________


(Chapter kan nei tam tawh lova, next chapter ah chuan a ruh no no chhuakah kan ti ang a, an thawnthu tawp dan tur a hriat theih ruak tawh dawn aw)


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:08 pm

LOVE COVERS ALL
By CVL Awmpuii


Chapter - 34


Inrinni zan inkhawm ka kal hma hretin ka pa in min rawn bia a, Thawhtanni-ah Matei te result a chhuah tur thu te chu min rawn hrilh ve luam a. Rei kan inbe lo, ka dam tha tih a hria a, a dam tha tih ka hre bawk a, a tawk viau. Kan han inbiak ve pawh hian mipa ve ve ni ta fam chu sawi tur a lawi kan hre ngai mang lo.




Biakin ka va thlen chuan an lo zai tan tawh a, mahse mipui an la thahnem vak lo. Inkhawm an lo kal ve zel a, amah pawh ka hmu, Sawmtluangi nen tlar li naah an thu a, a kawr hak pawh a inhmeh leh viau mai.




Dar nawn hma hret chuan ka beisei loh lutukin Nu Rinkimi leh Nu Thapuii te rawn inzui lut ka hmu ! Nu Rinkimi inkhawm chu mak ka tilo, Zuali nu in a rawn zui ve mawlh chu ani !



Midang pawh chuan an lo melh deuh hrek hrek a, nuamlo a tih ka lo hlau hmanhmawh. Hetiangah hian Kohhran mi, inkhawm ngai vak lo leh mi thalo tak taka kan ngaih an lo inkhawm ve hian kan lo sawi sep sep zel si a, an tan hian a nuamlo ve duh ngawtin ka ring thin.



Inkhawm ban veleh hmanhmawh deuhin ka haw ta a, zaninah hian engkim chinfel vek ka duh ani. Pathianin ka chunga thleng tura a ruat apiang chu ka pawm thiam ngei ang.



Zuali te in lam pan chuan motor in ka kal a, zan a la rei lo bawk a vei vak pawh an la kat ve nuk mai.



Ka va thlen chuan an kawngka a lo inhawng a. Ka va dak lut a, dawhkanah pot a lo chei malh malh, a nu chu ka hmu mai lo.



Thawm ka siam takah chuan a rawn hawi zawk a, min beisei lawk lo hle ni tur a ni mak tih hmel tak hian a meng ak a.



"E...eng nge i lo tih dawn?" a ti hap a, chîk zetin ka melh vung vung a. A dinna ngaiah khan la ding tlat ta se tun hun hi pangngai taka ka hmuh tawpna tur a ni. Chu ka ngaihtuahna chuan ka thunun theih hauh loh chhungril natna nasa tak min pe a, a tana beih leh zel duh rum rum khawpin min siam tep ani.




'Eng nge' ti ang hrima mitko a rawn san leh ak takah chuan "Inbe lawk ang hmiang , chhuak lawk ang" ka ti ta a, chiang zetin kan in melh a, a mitmeng hi ka chhiar thiam thin lo, hmeichhe inthunun thei tak a ni.




"Tun chauh hi a ni tawh ang" ka ti zawi ruih a, mipa ka nihna angin tlawm thlak ka ti hle a, mahse hei lo chu kanwg dang a awm tawh si lo ani.



Ngawi renga min melh deuh vang vang hnuah chuan a rawn tho ta tharh a. "Nu Rinkimi te inah ka nu a awm a, kan hrilh lawk dawn nia" a ti ta sep a.



Kan inzui chhuak ta a, kawngka a lock lai chuan ka lo melh leh vawng vawng thin. Kan hmalam hun hi zanin a a rilruah a innghat thui dawn si a. A rilru thlak thei hram se ka ti a ni.



Chutia ka lo melh reng lai chuan "Kal ila" a rawn ti sep a, engmah sawi lovin kawng ka kian a, a kal rual chuan a hnungah ka lo zui ve nghal a.



Nu Rinkimi te ina a kal chhung chuan motor chhungah ka lo nghak a , rei a rial lo a lo let leh vat a. Seat hmaah chuan a rawn thu lut a. A chezia reng reng chu ka hmuh tawpna tur awm ang hrimin ka lo melh leh vung vung thin.




Kan spot ah khan ka hruai ta a. Kham chhawrdawhah chuan dingdunin ral lehlam hla tak chu kan melh dun vang vang a.



Ka tawng phawt loh chuan tawng chhuah a tum lo tih hriat zet hian a ngawi ngal a, a hmui a pet leh fan fan thin.



"I dinna ngaiah i la ding reng dawn em ni?" ka ti zawi ruih a, ka thusawi awmzia chu a hrethiam vekin ka ring. A rawn thaw chhuak deuh hak a.



Ka lo melh reng lai chuan ka lam a rawn hawi a, a mitmeng hriatthiam har zet chuan min melh deuh vang vang a.



"Ka duat..." ka tih leh tak supah chuan "Ka tihpalh" tih zawng a sawi, a âw a tham chhal a, ka hmuh sual nge ka hrelo a mittui a tling deuh pam bawk. "Tawp...tawp tak tak kha a tha" a rawn ti leh tiak a, a hrawk hnawhtu awm ang mai hian a rawn tawngchhuak bawk.



Ka lo rin lawk dan chu ni tho mah se chiang taka a sawi takah chuan ka na nawn leh awn awn mai.



Mahse a duhthlanna ka zah sak ang ka lo ti lawk tawh a. Ka tihlawhtling ngei bawk ang.



"I duh dan a ni takzet maw?" harsa zet hian ka tichhuak sup a. "Umm" tih zawngin min chhang.



Kan ngawi deuh vang vang a, ral lehlam bawk chu kan thlir leh a. Thli a thaw heuh heuh a, chhum a zing deuh chuk bawk a, kan lungngaihna chu min rawn tawmpui ve hialin ka hria.



"A tha e, i duh dan chu ka zah sak ang che. Keipawhin zanin atang hian ka tawpsan ve tawh ang che. I duhthlanna kawngah chuan hlimna tam tak chhar chhuak la. Ka hmangaih che ka tih tawh kha i hlim loh ka duh miah lo ania" ka ti ta duah a.




Min rawn melh vang vang a, chutah za lo fahran hian a rawn nui chhuak hak a "Ka hlimna bawk min duhpui leh a" a rawn ti tial ruai a. Chutah rawn sawi zawm lehin "Nupui tha tak nei rawh aw...ka hlim i duh ang chiah khan i hlim ka duh ve ania" a rawn ti leh hak a.



"Haw tawh ang" ka lo ti nghet charh a. Hetia a mittui ka hmuh reng chuan ka kaltir phal lo mai ang. A tan engkim tih ka huam dawn si a.



Ka inher chiah chu "U Sangzual..." a rawn ti tiak a, a lam ka hawi vut. Mittui tling pamin min melh a, a biang sen hlar leh a hnar sen tar te chuan tah a insum nasat zia an tilang chiang hle bawk.



Chutia ka lo melh reng lai chuan "Khawngaih takin a tawp nan min kuah leh rawh" a mittui a baw nghal zawih. Ka thaw chhuak hawk a, ka awmdan chu ka ni deuh nghulh mai. Ka kawchhung hi a titawt up up bawk.



"Khawngaih takin" a rawn ti tham leh chhal a, min ngenngawl takzet bawk. Ka va kuah anih chuan ka thlah leh phal tawhlo mai ang. "Haw tawh zawk ang" ka ti nghet ta charh zawk a. Ngaihtuah zui tawhlo chuan ka car lam ka pan a, rei vak lovah a rawn thu lut ve mai a.



Haw kawngtluanin kan inbe leh ta lo.



Ka chhungril tak chuan kaltir ka phal lo asin! Chelh ngheh tlat a beidawn san loh chu ka duh alawm. Mahse a tana thawpikna thlen tu mai nih ka hlau tawh a, ka thlah zalen hi a mamawh tawh zawk niin ka hre tlat ani.



'Pathianin kan tana thalo turin engmah a ruat ngai lo' tih chu ka inhnemna ber a ni ta.



Thawhtanni ah chuan Matei te result chu ka thuthmunah ka lo ngaichang ve ran a, chhun dar 12 ah a chhuak dawn a. Kan unau zinga HSSLC exam hnuhnung ber a ni tawh bawk a kan ngaihtuah tlang vekin ka hria. Family group ah te chuan an ri deuh laih laih reng a, Matei lah chu a zam ngang mai.




Dar 12 a lo rik chuan result chu a lo chhuak ta a. Ka lo en ve nghal vat a, a hming lo chuanna chu ka hmu nghal chat. Beisei phak bak ani !



Mizoram pum puiah Top 10 ah a lang ve tlat, chu pawh 3rd rank ah a la ni zui, ka nui chhuak ta hawk hawk a.



Family group ah chuan lawmpuina thu an rawn hlan nghal sap sap a, anmahni lam chu an reh nghal daih. An hamhaih ve viau ani mai thei.



Rei vak lovah ka phone a rawn ri nghal a, ka pa ani. Ka pick up rual rual chuan a rawn nui chhuak hawk hawk a, Matei result vang a ni tih ka hailo.




Aizawl lama haw turin min rawn nawr ta tut tut a "Lo phei thuai rawh. Naktuk lamah pass kan lawm dawn nia i nau hi a titha emai" a rawn ti hluai a, a aw atang chuan a lawmzia chu hai theih a nilo.




Kohhran programme pawimawh em em a awm rih lo bawk a tiin 'aw' ka lo pawh ve ta nghal vat a. Chhungkua a thil thleng zen zen lo ani a, lawm chu a phu ve ani.



Ka pa nen kan inbiak zawh chuan ka insiam ta vat a. Ka che reng reng chu ka hlim a ni tawp mai. Ka nau chu ka chhuang hle bawk, a thawhrim zia hriatpui tu ka ni ve miau a, a phu takzet ka tilo theilo.




Kawnga ka tlan lai te chuan ka lo nui leh vur vur thin a. Tun hnua ka hlim ber tum a la ni hial ang.



Aizawl chu dar 9 velah ka lut ta a, kan in ka va thlen chuan an lo ri luih luih a, ka nau lawmpui turin chhungkhat laina an lo pungkhawm a ni ngei ang.



Matein min hmuh rual rual chuan min rawn kuah ta vat a "Ka nau leh" ka lo ti hluai ringawt, a inlahrang a, a nui nghal var var a. "I titha lutuk" ka lo ti sup, a mitmeng nung deuh sarh atang chuan a hlim zia haider theih a nilo.



U Mafaka te chhungkua pawh an lo awm der tawh a, U Hlimi te pawh an lo awm ve. Thenawm khawveng, Matei thiante leh ka nu leh pa thiante pawh an lo kat ve nuk a. Min han hmuh chuan min lo chibai ve sap sap hlawm a, min lawm tura lo kal emaw ka ti dawn dawn mai alawm le.




Ka nu leh Matei te thianhovin eitur neuh neuh an siam a. Ka nu chuan "I room-ah han indah fel phawt la i lo chhuk leh dawn nia" a lo ti vat a, keipawh chuan hnial lovin ka room lamah chuan ka chho ta vat a.



Ka thil engkim chu a ngai ngaiin a la awm vek a. Thil pakhat ka hrechhuak zawk, tun huna hriatchhuah hi ka duh hauh lo asin.



Ka haw hnuhnun ber tum a Zuali nen kan in video call lai te, min ngaih thu a rawn sawi tum a a tah lai te kha !



Ka let leh hnu khan engkim a danglam ta vek kha ania.




Ka thil ngaihtuah chu duhlo zet hian lu ka thing nghut a. Ka thawmhnaw chu lachhuakin bathroom lam ka pan nghal vat bawk.



Inhnuaia ka chhuk thlak hnu chuan thil an lo ei tawh a, naupang rak chel chul ri nen kan bengchheng khawp mai. Mahse kan hlimna min rawn tawmpui tute an ni a, thil hriat nuam loh engmah a awmlo e.




Upa lo leng ve thenkhat ho chuan ka awmna chanchin min han zawt veleh hlawm a, tha tak chuan ka lo chhang ve hlawm a. Matei an fakna ri te chu hriat a nuam takzet. 'A zir nasa a, a fel bawk si a phu ve reng ani' tih chu an sawi tam ber a ni. A bul ber erawh Pathian a ni tih kan hrechiang vek awm e.




Dar 10 a rik chuan an tin darh ta hlawm a, U Hlimi te chhung pawh an haw ve nghal a. U Mafaka te chu an riak veleh ang.




Mahni khum tak taka han mut leh meuh chu a dan a dang riau. Ka chauh viau laiin ka muhil thei lehpek lova. Ka inlet tawn sek a, ka mitthlaah hmeichhe pakhat a rawn awm leh tan a. A hlim hmel te, a tap hmel te...ka ngai thin asin.



Zan tam ka ngaihtuah thin, engtin nge hun a hman ve zel ang? Kan inhmuh thinna chu Biakin a ni mai a. Min pehhel a tum reng zel a, chutia min pehhel tum reng chu keipawhin pehhel dan kawng ka zawng ve hram hram thin.




Ka hmangaihna hi a la kiam eih lova nitinin a zual zel mai zawng anih hi! Chutiang chiah chuan kan inkar pawh a hla zual zel a, ka ngaihna erawh a hma ai zawngin a nasa telh telh mai ni.




Zingah chuan Neithan-an min rawn kaitho a, nizan lam ka mu tha lo bawk nen thawh ka lo hai lehpek a, tihtur em em a awm chuang lova a zia phian e.



Dar 8:30 ah tukthuan kan ei a. U Malawmi hi chawhmeh siam thiam deuh mai ania, kan chawhmeh pawh tukin chu a tui viau mai.



Tukthuan eikhamah chuan ka pain U Mafaka nen an room-ah min ko lut a, ka nu pawh a lo tel ve.




Kan han luh khawm hnu chuan ka pa chuan "Inhmuhkhawm hunlai a ni bawk a, thu pawimawh sawi lawk ang" a ti a, an khumah chuan ka nu nen an thu thla a, keini an room-a couch inhungah chuan an thu thla thung a.




In sak chungchang vel a sawi nghal chuar chuar a "Pathian zara dam chuan in hna in pension hunah in leh lo din in la ngai dawn a. Tun atang hian buaipui tan ula ka duh khawp mai" a ti sup a. U Mafaka lam chu hawiin " Mama, in unau zinga upa ber i ni a, nupui fanau i nei tawh bawk a. Kan in an luah thlang deuh lawka ram âwl kan neih khu i chang dawn nia. I nu nen kan la dam ve lai hian in leh lo tha tak din ve turin kan duh che a, kan la puih theih lai che u ania. I duh hun hunah hma i rawn la dawn nia" a ti duah a.





Chutah kei min rawn melh lehin "Sangzual, nang chu in pui luah thei turah ka ngai che a. Pathian rawngbawl hna i thlang a, mahse i pension hun te pawh a lo la thleng ve ngei dawn a. Chumi hnuah chuan tuna kan inah hian i nupui fanaute nen in la cheng ve ang chu. Keini kan la dam anih te chuan kan chengho dial dial ang a" a rawn ti leh charh charh a.




U Mafaka nen chuan "I tih dan dan kha kan pawm vek" kan lo ti a. Ka pa chuan "Unau in inhmangaih tawn a, in nu leh pa te pawh kan lawm thin. In farnute hi chhiat that tawk thut thei an ni. Hlimi pawh tawngthu chheloah pasal thenin emaw sunin emaw a rawn haw thut thei. Chung hunah chuan hnawksak lo ti reng reng suh ang che u. Matei pawh chutiang tho chu. In farnuten harsatna an tawhin hmangaih takin lo tuam hlawm thin ang che u. Pathian zarah fanau rochan fel tak tak kan nei che u a, tuna ka sawi ang pawh kha a thleng kher lo ang. Thil awm thei ka sawi anih chu" a ti leh duah a.




Kan naupan têt atangin unau inhmangaih tawn turin min zirtir nasa a. Kan lo puitlin hnu thleng pawh hian chu thil chu kan than hnan ta zel anih hi.




A hnu deuhah chuan ka pa bawk chuan "Sangzual, i ngaihzawng kha i duh viau em ni?" a rawn ti chhuak hlawl a, ka nu nen kan inmelh nghal vat. Engmah a lo la hrilh miah lo chu mak ka ti ang reng viau.




"Kan tawp tawh" ka lo ti sup a, ka pa chu a hamhaih viau aniang "I duh viau khan ka hre sia" a rawn ti hluai a.



Ka lawm vak lo chuan "In duh angin thil a thleng a, in lawm viau lo em ni?" ka lo ti khauh a. Ka nu leh pa chu an ngawi reng.



Chutah U Mafaka chuan "Tinge in inthen teh thut a?" a rawn ti sup a. "Ama duhdan ania lawm" ka lo ti tawi tak. Zawh zui zel chi ka nilo tih a hrethiam ania nge engmah min zawt zui tawh lo.




A ngawih vung vung hnu chuan ka pa chuan "In inthen chhan chu engpawh nise in tana tha tura Pathian ruatah ngai la hmalam pan ang che" a ti nghet charh a, engtin mah ka chhang zui lo.




Chutah amah vek chuan "I nu lung a dum lo emai a, in inthen chu a tihzia lamah ngai mai ang. Lo nei lui ta la chhungkuaah innghir nghona a thlen mai a hlauhawm a, hetia in tawp pawh hi a tha lam a nimai thei ani" a rawn ti leh a.




Zuali an ngaihdan zawng zawng kha ka ngaihtuah let a, ka thinrim thar ta tlat a "Ka nu..." ka tih chuan ka nu chu a rawn hawi chhuak vat a.



"Mi harsatna hriatpui hauh lova an chunga ngaihdan siam ngailo tur khan min zirtir thin a. Min zirtirna chu zawmin ka hlen chhuak ve ngeiin ka hria" ka ti vei nghut a. Sawi zawm lehin "Mi harsa, ruihhlo bawiha tangte leh sualna in an nun a eichhiat mek hote hi awmhmuna lo khawngaih emaw huat ngawt chu a awl viau . Mahse an nun chhungril tak tak zuk luhchilh pui tu nih chu tuman kan duh leh miahlo. Kan mimal nun, chhungkua leh khawtlang thanna tur chu heng mi awm tha duhlo anga kan ngaihte nun chhungril luhpui a, an harsatna hmutu leh hrethiamtu mai ni lova an bula awm nih kha an tan a hlu ber" ka ti leh duah a.




Ka nu chu a ngawi reng, ka pa pawhin engmah a sawi lo. Zuali nen chuan tawp tawh tho mah ila an lo ngaihdanah khan ka la lungawi thei thlawt lo ani ber.




Ka pa te room atanga kan chhuah hnu chuan U Mafaka chu a nui ruh ruh reng a, nuihzatthlak engmah ka sawi si lova a lam hawi chuan "Eng nge?" ka ti nghut a. Chutah U Mafaka chuan "I ngaihzawng hlui thlavang hauh chu i pe na hle mai" a lo ti sup a. "U Malawmi thlavang hauh pawh i pe na ve tho ang chu" ka lo tih chuan "Ani chu ka nupui ani tawh alawm" sawi fuh inti zet hian a rawn ti a. Min nuih a, za lo zetin ka kiai ve suk ringawt.




Tlai lamah chhungkhat laina sawmin Matei pass lawmna ni pah fawmin chaw kan eikhawm a. Kan hlim tlang viau mai.



Keipawh naktuk lama phei lehnghal mai tur ka ni a, mahni in lama awm chhung chu nuam thei ang bera hman ve ka duh a. Ka unaute zingah chuan ka tap ve chawt a, ka cousin te chuan nupui nei turin min tur deuh sek hlawm reng a. Engtin mah phei chuan ka chhang zui hlawm lem lova.




Nilaini tukah chuan ka phei leh ta a, ka speed a chak ve deuh bawk a zing dar 9 vela kal kha chhun ni tlangsan lai takin ka thleng hman.



In ka thlen veleh ka inbual nghal a, eirawng ka bawl laiin ka rin loh lutukin Rema a rawn lang hlawl a.


"U Sangzual , biak lawk che ka duh" a ti tehmial a, a la thutak phian lehnghal a.



"Sitting room ah sawn lo va thu la, ka rawn phei ang" ka lo ti tha ve mai bawk a. A va thu phei a, keipawh chu ka chaw chhuan zawh chuan ka va phei ve nghal vat a.



"Han sawi la..." ka ti dam thlup a, a rilru kap tu lian tak nei ang mai hi ani. A ngawih deuh vang vang hnu chuan "Sawi tur em em pawh a awm chuanglo" a ti leh ang lawi a.



Zep nei tlata ka hriat avang chuan "Sawi rawh, min ring tawk la" ka lo ti dam leh thlup a. Chutah "Ngaihzawng i nei em?" a rawn ti teh daih a. Ka rin loh lam lutuk min zawh avang chuan ka chhang mai lo. "Zuali kha chu ka hre ve a, mahse ani lo ngaihzawng i nei em?" a rawn ti leh a.




Min va han zawt tlang teh tawl veleh, mahse "Nei lo e, Zuali bak chu" ka lo ti tha ve mai a. Chik fahran hian min melh a, chutah a tho ta thurh a "Ka va haw tawh ange" a ti hluai a. A awmdan deuh teh tawp chu a...




"I sawi duh tak chu sawi la" ka lo tih chuan "A ngai leh lo mai" a rawn ti awlsam et a. Engmah ka sawi leh hmain ka in atang chuan a chhuak zui nghal daih a, eng a hria chu nimaw.




Zan inkhawmah chuan ka tum loh tawpin mi pakhat ka zawng ru leh a, mahse mak tak maiin zanin chu ka hmu miah lo. Ka tawpsan tiin sawi mah ila a hmel zawn ruk hi ka sim thei meuh lo chu anih hi !




Inkhawm banah chuan Bible chhiarin notebook ah sermon ka ziak leh a. Thil engpawh lo thleng se Pathian rawng ka bawlna hi thulh thei ka nilo tih ka inhrechiang tulh tulh a, chu ka inhriatchianna chuan chhungril thlamuanna tam tak min pe thin.




Biakinah thuin ka va tawngtai leh a, thla tam tak liam taa ka tawngtai dan ang khan ni tawh lovin tawngtaina tharin ka tawngtai a.




"Thil engpawh chân dawn mah ila ka zui zel ang che" tih hi ka thupui ber a ni ta fo a. Pathian hi reh mah se ka tawngtaina hian keimahah nghawng tam tak a nei ni hian ka hre thin.




Ka phone riin min tiharh zawk a, sana ka en chuan zanlai dar 12 a lo pel thuak tawh. Ka phone chu meng phak chual hian ka ban a, ka han en nak chuan ka pa a lo ni a. Tun ang zanrei lutuk tawha min rawn biak chuan a pawimawh viau ani ngei ang. Thil thalo lam a nih loh hram ka beisei.




Ka pick up nghal vat a, "Hello" ka tih rual rual chuan "I mu tawh em?" ka pa chuan a rawn ti dam thlup a.



"Mu tawh e, mahse eng thil nge?" ka lo ti sup a. Chutah ka pa chu rawn thaw chhuak hawlhin "I nu hian a be duh che a, zanlai laiah hei a tap chiam mai a..." a rawn ti fan ruih a. Ka nu tap thu a rawn sawi chuan min tihlauthawng ang reng viau.




"Khawi ka lo bia ange" ka lo ti sup a, an ri deuh sat sat a. A hnu rei vak loah ka nu aw hian "Bawiha..." a rawn ti tham tiak a, ka ngaih a titha lo viau mai.



"Aw ka nu" ka lo ti dam thlup a. A reh deuh vang vang avang chuan "Ka tawng i hre thei em?" ka ti sup a. Chuveleh a rawn tap chhuak ta hawk mai "Nu i tha em?" ngaihtuah zet hian ka lo ti vat a.



"Min ngaidam rawh..." tap hlawp hlawp chung hian a rawn ti ta a. Chutiang thu a rawn sawi chuan min ti hamhaih viau mai.



"I tha em?" ka ti leh a, "Min ngaidam rawh aw..." a rawn ti leh ngawih ngawih a. A awmdan chuan min ti hamhaih mah mah ani.



Chutah le..."Zuali kha ka bia a...nangmah then turin" a rawn tih chuan ka nghing dawt mai !



"Kum thar hmang tura i rawn haw lai khan nangmah then turin vawi li ka bia a, a tirah chuan tha takin a then loh tur thu chein min chhang a, 'Ka tan a inhuam laiin ka tlansan theilo' tiin min chhang zel a. Mahse i haw dawn zanah khan ngenngawl zetin ka be ta a, ka vau chiam ai chuan ngenngawl zeta ka biakna kha a thawk tha zawk aniang a then tur thu chein min chhang ta anih kha. Bawiha...min ngaidam rawh aw" a rawn ti vawng vawng a.




A thusawi zawng zawng chuan min deng dawt dawt a ni ber mai. Sawi tur pakhat mah ka hrelo, ka tha a ti thum vek hialin ka hria.



Ka nu chu rawn tawng lehin "Tunah chuan ka hre tawh...ka pawm...ka pawm vek ang. Nupuia neih i duh chuan ka pawm vek. I tana a inpekna kha ka hrechiang tawh. Ka thiam loh vek ani, ka mit ka tidel lui tlat a. Ani tluka i tana tha tur an awm lo tih ka hmu chiang tawh" tap chung chuan a rawn ti leh zung zung a.




Ka nghilh dup mai ! Khang hun chhung zawng zawnga min lo pehhel thin te kha ka nu ngenna vang maw !



Ka lo tuar nasa hlein ka hria a, mahse ka tawrh let tam tak a lo tuar a. Kei chuan ka hmangaih vangin chelh ka inhuam a, mahse ani chu inhuam viau mah se ka nu ngenna vang liau liauin min pehhel dan kawng ngawt a lo zawng anih dawn chu !



"Bawiha i la awm em?" ka pa aw ka hriat rual chuan ka harh zawk a. "Awm e" ka ti thei hram.




Chutah ka pa chuan "Tunah chuan i tihtur i hria ang tiraw. I duh dan engkim kan pawm vek e" a rawn ti dam thlup a.



Thil reng reng chu a ni teh thut lutuk a ka hamhaih zo vek mai.



Ka tihtur chu ka hailo, Zuali biak ka ngai...


Harhchhuak thutin ka car chahbi ka la nghal a, zanlai pawh ka sawi theilo.



Engtik laiin an in kawt ka thlen hman pawh ka hrelo. Mahse ka va thlen chuan an in chu Tala in a lo inkalh a, hlauhthawnna in ka khat nghal. Nu Rinkimin Aizawla pem an tum rilruk thu min hrilh kha ka hrechhuak lo theilo.



Hmanhmawh zetin step ah chuan ka pen chho leh pawk pawk a. Nu Rinkimi te kawngkhar chu ka beng nghal dawt dawt a, zanlai pawh ka sawi thei tawhlo. Thil engkim hi a inthlak leh vek ka hlau ani ber.




Nu Rinkimi ngei mai chuan kawngka min rawn hawn ta a, a hmel phelh phang atang chuan a muhil tawh a rawn tho leh tih a chiang reng.



Min hmu thut chu a hamhaih hle a "Sangzual" a ti hluai a. Chutah Zuali te chanchin chu ka zawt ta vat a "Khawnge an awm?" ka ti khur hluk a. Ka âw a hlauhthawnna chu a hre ve ngeiin ka ring.



Chutah Nu Rinkimi chuan "A nu damdawiinah a awmpui alawm. Zu a nghei tawh a, mahse a zu in thin effect kha rawn lan zeuh zeuh a la ching a. Zaninah khan Lunglei damdawiin ah an kal a, an lo admit a. Sawmtluangin a kalpui a, ani pawh dar 10 vel khan a lo haw chauh" a ti zung zung a.




A nu chungchanga a mangan dan tur te chu ka ngaihtuah lo theilo.



Ka inher vut chu Nu Rinkimi chuan "Nga ti teh rum rum nge a?" a lo ti leh hluai a, a lam ka hawilet vut a "Ka kal dawn, kan rawn haw leh hunah chuan pum khat ni turin kan rawn haw ang" ka ti ta hluai a, ka ngaihtuahna avang chuan ka nui chhuak hawk hawk.



Nu Rinkimi chu a la hamhaih viau mai mahse hrilhfiahna hun ka nei tawhlo, Zuali bula kal vat ka ngai.



"Nakinah ka hrlhfiah ang che, duhsakna min han hlan teh" ka ti leh a, ani pawh chuan "Engpawh chu nise va kal phawt teh rawn inrem haw ula" a ti ve ta vat a.




Lunglei Hospital lam ka pan lai chuan ka thinlungah Pathian aw hi chiang lutukin a rawn ri dawt a "Engkim chan i inhuamna ah engkim pekin i awm dawn ta" tih hi.




Motor chu ka tiding nghal dawt a, Pathian aw ka ngaithla leh, thu ngai bawk kha a rawn ri leh a, a dang tam tak pawh. Pathian aw rei tak hriat loh hnua han hriat leh meuh chu a dan a dang asin. A vawikhat nan lawm avangin ka biangah mittui a rawn luang anih chu mawle !



Engkim chân ka huam chinah chiah khan Pa lung a lo awi anih chu !




________*________*________*_______


(Mo lawm lam hnaih ve tawh ila😁. In lawm em keichu ka lawm tawp ka duh ang takin ka tichhuak thei ta💖)


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:08 pm

LOVE COVERS ALL
By CVL Awmpuii


Chapter - 35


A makin a ropui asin ! Pathian rorelna vek a ni ka ti lo theilo.



A hnenah chakna ka dil a, chinfel tur harsatna min pe a. Nun chau ngawih ngawih a ka awm lai khan chau ve ngai lo anih zia min hriat nawn tir a. Ka beiseina zawng zawng a bo vek hnuah Amah chauh beiseina hnâr a nih zia min hriat nawn tir leh a. Engkim ka dil zawng zawng min pe lo, mahse ka mamawh zawng zawng min pe lawi si !



Tunah chuan ka hloh zawng zawng kha hlêp ah ka chhiar thei ta !



Car atang chuan ka chhuak vut a, boruak vawt vur mai chu ka hip lut nghal kawk a. "Lalpa... eng nge maw ka nih le !? I malsawmna tam tak dawng tur hian eng nge maw ka nih le !?" ka mittui tla chu ka dang zo lo, dan pawh ka duh hek lo. Pathian hmangaihna thuk zia chu ka thinlungah hian a rawn ri nawn tlut tlut a, ka â ruai maiin ka hria. Leiah chuan ka thingthi nghal hnawk a, van lam hawiin ka nui chhuak leh hawk thin.




'Engkim chân i huam naah engkim pekin i awm dawn ta' ka thinlungah hian a rawn in thum rawn tlut tlut a. Ka thahrui a zawi nghuai a, ka chau hauh si lo !



Chutia rei tawk fang ka thingthit hnu chuan ka tho chhuak ta a. Ka thinlungah hian Pathian Thu tam tak a rawn nung nawn tlut tlut mai ni.



Hmanhmawh zetin ka tum ram lam chu ka pan ta a. Rilru tawngtaina nen Pathian hnenah lawmthu ka sawi mawlh mawlh bawk.



Ka va thlen veleh car pawh park tha hman lovin Damdawiin chhungah chuan ka tlan lut nghal a. Nurse night duty panga an lo awm a, min lo chiauau vat a. Ka mi hmuh duh te chu nah nuai hian ka sawi a, "Pi Thapuii te ward min kawhhmuh thei angem? An nufaa hmuh ngei ngei ka ngai" ka tih chuan an lo remti hauh lo mai. "Zanah mi pakhat bakin riahpui kan phal s lova, emergency a nih lem loh hmel bawk nen naktuk lamah lo kal leh mai ta che" an ti tlat mai a. Ka dil luih ngial paw'n an remti tlat lo.




An dân palzut luih a, an phallo chung luh chu thil mawi a ni bik si lova pawnah chuan ka chhuak leh ta tawp a.



Ka car bula ka din vung vung lai chuan ka ngaihtuahna a rawn vir zawk, Sawma number chu ka dial ta nghal vat a. A la ring rei hrep lehnghal.



"Zanin i duty em?" a pick up rual rual chuan ka ti nghal tawl a. "Chhunah khan ka duty a, ka muhil min rawn tiharh chiah zawk" a rawn ti tha ve mai a. 'Hun' ka lo ngaihtuah tawh reng reng lo, dar 1 a ri thuak tawh a mi pangngai tan chuan mut loh a hun tawhlo.



"Eng nge ni a?" a rawn tih leh takah chuan ka biak chhan chu ka sawi nghal zung zung a. "In damdawiin ah ka awm mek a, dam lo riahpui tu zingah hmuh ngei ngei ngai ka nei a. Zaninah ngei ngei a ngai, duty ho ka dil a,an remti tlat silo, min lo biak sak teh" ka ti duah a, ka ngenngawl ang reng viau.



"Tunge i hmuh duh a?" a rawn tih chuan "Pi Thapuii ti mai rawh" ka lo ti vat a "Nakinah a chhan ka hrilhfiah ang che" ka tih zawm leh zat. Duty ho a lo biak tur thu a sawi hnu chuan kan inbiakna chu kan titawp ta a.



Car bulah chuan rilru phawk lek deuh hian ka vei tawn chhen a, Sawma min lo biak leh hun ka lo ngaichâng a ni deuh ber mai. Van lam hawi chuan lawm lutuk vangin ka nui chhuak leh hawk thin.



Rei vak lovah Sawma chuan min rawn be leh a "Va lut rawh ka lo hrilhfiah tawh kha, an cabin awmna an lo hrilh ang" a rawn ti nghal zung zung a, lawmthu ka hrilh mawlh mawlh hnuah phone chu ka ipteah ka ak tha ta a.




Damdawiin chhungah chuan ka pen lut leh vut a, nurse duty chuan an cabin awmna number min lo hrilh vat a "Ka hruai dawn che nge, nangmahin i va zawng hmu thei ang em" a tih chuan ka hmuh theih mai ka rin thuin ka chhang ta vat.




Cabin awmna lam chu ka pan ta nghal a, number chu ka en phei zel a, a tawp berah an lo awm hi a lo nia. Zanlai a ni tawh bawka a reh deuh duk bawk.



Engmah ngaihtuah buai tawh lovin cabin chu ka hawng nghal thawr a, ka va dah luh chuan Nu Thapuii chu khumah puansinin a lo mu bal a, drip an khai bawk. Ka hawi kual a, mahse Zuali hmel reng reng ka hmu lo.




Hrilhhai deuh chuan kawngkhar bulah ka ding ta reng a, tun ang hunah khawiah nge a awm ang tih chu ka zawhna a ni.




Ka ngaihtuahna a rawn vir zawk a, a awmna hmun tura rin chu pakhat chiah ka nei, min rawn hriattir tu an awm tlat alawm.



Nurse duty te bulah chuan ka va let leh a, ka kal deuh vut vut vang chuan min lo en duh hlawm ngang mai. Ka che deuh vut vut zel chu thuhran nise zanlai laiah an damdawiin ah ka va vei chhen mai chu ania a awm ve tho mai.




An zawn ka va thlen chuan "Khawiah nge Hospital Chapel hi a awm" ka ti nghal thawr a, ka awmdan chuan a ti hamhaih hlawm aniang min chhang mai lova.



Mahse a sir bera thu nutling pakhat chuan "Chhawng chung chiah, room kil berah khian a awm" a lo ti ta vat a. Lawmthu hrilh supin step awmna lam chu ka pan nghal a, min enzui hlawm reng tih pawh ka hria, mahse ka ngaihtuah buai hman tawhlo.




Hmanhmawh zetin ka pen pawk pawk a, room kil ber ka han thlen chuan ka chawl dat a. Ka rin lawk ang ngeiin a lo awm ! Min hnungchhawn zawngin thu mah se amah ngei a ni tih ka hailo. Ka lung hi a phu leh chiahin ka hria.



Ngawi rengin kawngkhar darthlalang atang chuan ka en a, a tawngtai niin ka hria. Va luhchilh rum rum chu duh viau mah ila thil tihchi ah ka ngai lova, pawn lama lo nghah chu ka thlang ta zawk.



Chapel luhna bula thutthleng an hunah chuan dim zetin ka thu thla ta a. Harsatna a tawh laia Pathian a bel tlat thinte, a beidawng duh ngai miah lo leh Pathian dem na thu vawikhat mah a la chhak chhuak ngai miah lo te hian ka hmangaihna a ti zual a, ka zah a, ka ngaisang hle bawk.



Thutthleng hnung nghenga mit ka chhin vang vang lai chuan kawngkhar chu a rawn ri ta khep a, ka meng zui nghal a. Ka hmuh duh ngei mai chu a rawn chhuak ta. Kawngkhar chu a khar tha leh khap a, min la hmu ve mai lo. Chutah a rawn inher rual chuan min rawn hmu ta chiah a. A meng zau kawk mai.




Ngawi rengin kan inmelh ta ran a, min melh dan atang chuan min beisei lawk lo lutuk tih ka hai mawlh lo. A biang chu a tla deuh dak a, thila ei tha lo tih a hriat ngawih ngawih, mahse a hmeltha tak chu a that ngai rengin a la tha.



Ka lo ding chhuak ruai ruai a, ani erawh a la ding khawng reng, ka lak atangin a mit a la lasawn eih lo bawk. A hamhaih hle ni tur ani.



Ka va pan hnai a, ani erawh a che chang thei der lo. A bul ka va thlen rual chuan engmah sawi lovin ka kuah nghal thlawp a, nghet leh duat takin, min lo dang lova min kuah let hek lo.



A awmdan tih ziaawm tum tak chuan a hnungah ka chûl ta hauh hauh a, a la harhchhuak miah lo niin ka hria, ka lo awm thut chuan a thawng viau emawni.



Ngaih tha vak lo chuan ka inlahrang dat a, kan mit a intawng nghal siah. Ka kutphah hlai hlup chuan a biang ka khuap nghal run a, ding khawng lah chungin min lo melh kiau bawk. Ngaih tha vak lova "Ka duat..." ka tih tak supah chuan a rawn baw nghal hawk a ni ber mai.



A hmai chuan ka âwmah a rawn nawr nghal vak a, a theihtawka nghetin min kuah nghal thlawp bawk, a tap chhuak nghal hawk a, chhuak zetin ani a tah ni ! Ka lo thaw chhuak nghal hawk.



Nghet zeta lo kuah letin a bekah chuan ka fawp vang vang a, a rim nu chêk pawh a la ngai reng. Zan reh lai a ni bawk a, a tap ri chuan kan awmna hmun chu a luahkhat hneh ngang mai, mahse chapel han awmna hi a fal deuh a, duty hovin kan thawm an hriat loh hram ka beisei.




A tah nasat lutuk vang nge ka hrelo, a tha a rawn zawi tan a, a ding nghet hlei thei tawh lo, boruak kham khawp lo tih hriat zet hian a rawn thaw chhuak kawk kawk bawk. Ka kuahna chu ka phelh thawl deuh a "A tawk e...a tawk e...bang tawh rawh le a tha vek ania" ka ti mawlh mawlh a. Inlakhran deuh ka tum chu nghet zetin min lo la kuah bet tlat, ka han kuah leh rih a.




Rei vak lovah chuan a rawn pangngai tan a. Thutthleng ah thutpui tuma ka inlakhran rual chuan a rawn zawi hnawk a , ka lo chelh vat. Rum nghutin ka pawm kang nghal nawlh a, ka nghawngah min lo kuah vat.




Thutthleng ah chuan ka thu thla a, min hmachhawn zawngin ka pawm ta hle hle a. Rei tak hahdamna hmu tawhlo ang mai hian a rawn thaw chhuak ta hle hle a, a hnungah ka lo chûl hauh hauh.



Chutia rei tawk fang kan awm hnu chuan "Inthen ka duhlo..." a rawn ti tiau a, ka lo thaw chhuak nghal hawk. "Ka...ka tan bei leh rawh...tawp ka duh lo... engkim ka inhuam ve tawh ang" a rawn ti tham leh chhal a, a chhipah ka lo fawp tawk.




Ka ngaihtuahna ah thil tam tak a rawn lut nghal a. Keiin ka inhuam em em lai khan a hnungtawlh zawkah tangin min chân a huam hial a. Tunah chân ka inhuamna zawnah ka tan a lo inhuam veleh chiah a. Chân a inhuamna zawnah tih huaisenin a lo awm a. Chân ka inhuamna zawnah ka duh ang pekin ka awm dawn ta chiah a. Kan mamawh tawk ang zelin Pathian hian ro min lo relsak anih chu !




"Engkim a tha vek tawh ang" ka ti nghet ta charh a. Inlahrang hlekin a kut te takte chuan ka biang a rawn khawih a, "Min ngaidam rawh aw..." a rawn ti tiau a, ka lo thaw chhuak nghal hawk.



"Ngaihdam dilna tur i nei lo. Engkim...ka nuin a lo biak thu che thlengin ka hre vek tawh" ka ti hul hawk a. Mak ti zet hian a rawn meng nghal kawk a, 'i ti tak tak em' ti ang hrima min melhna chu ka lo buk khum nghut.



A sam chul mam sak pah chuan "A tirah khan engkim min hrilh ni la tha tur ania. Kan pahnihin kan paltlang mai tur ania, min hmangaih reng chungin min pehhel dan kawng ngawt i lo zawng a" ka ti ta mawlh mawlh a, a rawn thaw chhuak deuh hak a.




"I nu khan thinrim in min rawn bia se, min rawn vau chu ni sela tawp ka thlang miah lovang. Mahse a ngenin min rawn ngen a, a fapa tana tha ber tur a duh thu a rawn sawi a. Nu in a fa tana a ngenna kha zahawm ka ti a, tawp ka thlang ta anih kha .Ka tan i rintlak zia ka hria a, i nu min lo biak thu kha hrilh ta che ila engpawh tih i hreh dawn si lova. Khatah tak khan Pathian pawi kan sawi palh ang tih ka hlau alawm" a rawn ti ve ta sap sap a.




A thusawi chu ka ngaihtuah chiang a, khami hunlai khan ka nuin a lo bia tih chu hria ila thinrim vang leh ka nu runluih duh vangin a duh loh zawngin ka khawsa ngei ang. Ka rawngbawlna hial chawlhsanin Zuali hi ka pan duh ngei ang.




Ka ti lehpek thin ang a tawk chauh zelin Pathian hian ro min lo relsak anih hi!




A hnu deuhah chuan "Anih leh tunah tinge i rilru i thlak thut a?" ka ti ta sup a. Nichin khan ka nuin a bia tih ka hriat thu a la hre miah lova, tawp a duh loh thu min hrilh leh lawi si anih tak kha maw...




A rawn thaw chhuak deuh hak a "Ka hmangaih che alawm" tih zawng a sawi. Hriat belh duh zeta ka lo melh chuan a rawn nui seih a "Kan tawp tak tak kha ka hlau thut a, ka ngai em em che bawk sia...i tana inhuam tawk ve lo angah ka inngai a..." a rawn ti a, a tah a chhuah hmel leh viau tawh.




Ka awma kuahbet hle hle chung chuan ka nuin min lo biakna te chu ka hrilh ve luam a, mak a ti ngang mai.



"I ngaidam hram dawn nia aw...a lo tawngkhum na che avang khan" inthuamlo ru zet chuan ka ti a, a lu a rawn thing nak nak a "Ngaihdamna tur a awm hlei nem, i tana tha ber tur ni a a hriat a ti ve maiah ka ngai" a lo ti dam thlap a. A thil thlir dan te hi ka duh thin, mi rilru dawn thiam tak hian a thlir thiam tlat thin.




"Thla li chhung khan min lo ngai ve reng reng em?" ka ti chhuak ta sup a, ka ngaih thin zia kha ka ngaihtuah let a. Tuna hetia kan awm leh thei ta mai hian ka thinlung a khawih che dawt dawt ani tawp mai.




"Ka ngai thei lutuk che a...mahse hlat che kha a ngai bawk sia" a rawn ti zuai raih a. Khang hun a lo paltlang thei kha hmeichhe chak tak a ni ka ti lo theilo.



"Min nei rawh aw" ka ti nghet ta charh a, ka kuahna atang chuan a inlahrang dat a, min rawn melh ta kiau a, hmangaihnaa khat mitmengin ka lo melh ve bawk.



"Min nei dawn em?" ka tih leh takah chuan mittui tling pam hian a bu ta nghat nghat a "Ka nei ang che..." a rawn ti chhuak tiak a. Chung lam hawiin ka nui ta hawk hawk a. Ka hlim lutuk hi awmngaihna ka hrelo a ni ber mai.




Hrilhhai hmel zeta min lo melh kiau lai chuan a bekah dawmin a hmui ka kharchilh nghal hmiah. Duhthawh zet hian ka fawp ta a, a tirah chuan a hamhaih deuh a, mahse min lo chhanglet ve ta vat. Chumi rual rual chuan a aia duhthawh lehzualin ka fawp ta ngawng ngawng a. Hetiang taka kan awmdun lohna hi a rei ta bawk a kan duhthawh dun ngang mai.




Thaw chham dawn khawpa kan infawh mial mial hnu chuan a inlahrang ta dat a, ka lo thaw chhuak hawk. Mitmeng dava riai hian min rawn melh a, ka lo nuih suk. A hmui huh hliam chu ka tuai sak a, ka nui leh suk thin. Lai zet hian a meng kalh ralh a, ka lo nui chhuak hawk hawk.




"I hmeltha lutuk" ka tih chuan ka awm a rawn tauh dat a, nghet zetin ka lo kuah khawm nghal hlun.



"Ka hmangaih che" ka ti leh sup a, ka awma hmai phum reng chung chuan a rawn nui che dat a "Keipawn ka hmangaih che" a rawn ti ta sep a.




Inhnuai lama kan chhuk thlak hma chuan duhthawh zetin ka fawp leh a, chhanna pawh ka dawng tha viau. A âwm ka tham deuh tawn tawn a, ka thisen a rawn lum nghal pup pup thei. Min turn on lutuk mah mah ani.




A harhfim zawkah a tang ziah thin a, kan kal thui tak tak hmain a inlahrang ta a. Kepawhin ka tilui tawh bik lo.




Inhnuai lama kan inzui thlak meuh chuan zing lam dar 3 a lo ri dawn tawh. Duty ho chuan min lo melh hrek hrek a, Zuali chuan nuam a ti chiah lo tih a awmdan atangin a hriat theih.




Ngaihdan mak sak pui pui an lo neih loh nan tiin ka han be veleh rih a "Chapel ah a lo awm a, ka mi zawn chu ka hmu tawh e" ka ti mawihnai ve ngial a, an hmel awmdan pawh a pangngai ve ta deuh e.



"A tihzia hlauh chu, Dr Sawma khan a rawn sawi a, zanin chu an cabin lamah i awm ve thei ang. Midang chu kan phal ngai miah lova kan hrethiam mai ang che" an lo ti ve vat a. Lawmthu hrilhin cabin lamah chuan kan inzui phei ta a.



Cabin chhunga kan luh hnu chuan a nu chanchin chu ka zawt nghal vat a. "Zai a ngai dawn a" a rawn ti hap a, ka lo melh nghal vat.



A nu khum bulah chuan a thu thla hnak a, ka zuk thu thla ve vat. "A englai nge zai ngai dawn a" ka lo tih chuan "A pum na ziah thin kha a ril phir vang a lo nia. Vawiin lam khan khawih nghal rum rum an tum a, mahse duh angin a taksa a fit tawk lova. Pathian zara dama, a taksa a fit bawk chuan naktip lamah zai an tum" a lo ti zung zung a.




A kut chu chelh sakin ka fawp zauh a "I rilru tihah duh miah lo la, Pathian a awm a, kei ka awm bawk a a tha vek mai ang" ka ti nghet charh a. Chutah min rawn nuih var var a "Ka hria alawm, ka rilru pawh ka tihah duhlo. Chuloah doctor khan kan zai hma pauh leh a dam hma a nimai a tia, zai vat vat se dam tawh se ka ti" zangkhai deuh hian a rawn ti a, ka lo nui suk a, a hmuia lo fawp zauhin "A dam leh vat ang" ka lo ti nghet charh.




Kan tlaivar dawn ngiala ka hriat vangin muhil turin ka ti a, a tirah chuan min hnial ve tlat. Mahse "Naktukah i nu buaipui leh i ngai dawn a ka awmlai hian muhil rawh" ka tih tak tlatah chuan min hnial ta bik lo.



Cabin chhunga couch an hun lamah chuan kan inzui phei a, min ngheng rialin a muhil ta a. Hahdam hmel zeta a muhil thaw ri sak sak te chu hriat nuam ka ti takzet.



Ka lo chhing ve sek a nimai thei ri rak rak thawmah chuan ka harh chhuak hlawl a. Couch ah chuan pangngai takin ka lo mu a, puan pan te ka lo sin bawk.



Zuali ka hmu chawpchilh nghal a, min hnungchhawn zawngin damdawi dahna drawer chu a hai rak rak a. Khum lam ka en a, a nu ka hmu miah lo.



Ka thawh chhuah rual chuan bathroom kawngkhar a rawn ri khep a, Nu Thapuii chu drip khai chungin a rawn chhuak a, Zualin a lo pui vat.



Nu Thapuii chuan min rawn hmu chawpchilh nghal a, min rawn nuih var var pah hian "I lo harh tawh a nimaw" a lo ti dam thlap a. Zuali chuan ka lam a lo hawi vat , a rawn nui ve seih a. "Ka harh chiah, ka lo mutui deuh ani" ka ti ve ngial a.



Khum lama an insawn phei tur chu ka va pui ve vat a. Kan inmut that fel tir hnu chuan Nu Thapuii chuan "Mut pawh i mu tha thei lovang a, a hrehawm awm sia" a rawn ti a, "Hrehawmna a awm hlei nem, ka mutui lutuk zawk" ka lo ti ve vat.



Zuali chuan "U Sangzual dandawi lam lawk ka ngai a, i la awm tho bawk a ka nu hi lo awmpui lawk mai che" a rawn tih chuan aw ka lo pawh ve mai bawk.



A chhuah hnu chuan Nu Thapuii nen chauh kan awm dun ta a. Eng ka hria nimaw ka zam thar deuh tlat pek anih chu !



"Sangzual" a rawn tih chuan "Mamawh i nei em?" ka lo ti vat a, lu thing pahin min nuih var var a, ka lo nui ve suk ringawt.



Chutah pangngai zawk hian "Bawihtein in chanchin min lo hrilh a" a rawn ti ta a. Engtin tak lo sawi ve ang maw ?



"Ka pi i rem tih chuan i fanu hi nupuia neih ka duh" ka ti nghal thawr a, han pehhel dan vak hre hek lo i. A hmalam en chuan thuk raih hian a meng a.



"A lo nula ve ta hle mai..." a rawn ti te te phawt a, a nui chhuak hak bawk. "Ka fanu a ni na vang vanga ka chhuang asin" a rawn ti sap a, a fanu a hmangaih zia chu a mitmengah a lang vek.



"Kan nufa chungchang hi sawi tur a tam khawp mai" a rawn ti leh hak a. Thil tam tak ngaihtuah hmel a pu. Tun hi pangngai taka kan vawikhat inbiak vena a ni a, a thusawi reng reng chu ka lo ngaithla uluk viau.



"Nupuia neih chu i duh tak tak a maw..." tiin chiang fahranin min rawn melh a, "Ka duh alawm, ka duh takzet " ka lo ti nghet ve charh.



Chutah thudang sawi buai tawh lovin "Ka fanu hlimna hi ka duh ber alawm. Pathian zarah dam takin damdawiin atangin kan chhuak turah ngai ila...palai hmel kan lo beisei dawn nia" a ti dam ta thlap a, ka lo thaw huai thei.




Kan inthen laia Zuali awmdan te chu min hrilh a "Zantin a tap thin, ka fanu kha ka lainat asin aw. In tawp chhan kha keimah vang a ni tih ka hai lo asin. I nuin a rawn biak thu ka hriat khan ka nun danin ka fanu nun a lo chawk buai vek tih ka inhrechhuak a. A pa boral hnua a vawikhat nan rilru leh tihtak zetin Pathian ka au asin. Khata tang khan thil thalo ka tih thinte sim turin thuthlukna ka siam fel ta ani. Hei tun thlengin ka la pangngai chho ve zel chu ania. Ka taksa erawh a lo chhe hman viau mai, zai hial ka ngai ta anih hi. Mahse Pathian lakah khian ka vui tawh ngailo, ka pasalin min boral san vang khan ka vui em em a. Midang pawhin pasal an sun ve tho alawm tiin inhnem ka tum thin, mahse thil engkim hi a tawngtu azir zel ania. Ka rinna a lo chak tawk lova ka tlusawp ta reng a. Mahse tunah chuan Pathian leh ka fanu vangin ka tho chhuak thei ta anih hi" a rawn ti ta duah a. A thusawi mal tin chu uluk takin ka lo ngaithla a.




Ka nu khan Zuali hi va be lo tase Nu Thapuii hi a inhmuhchhuak kher angem tih ka lo ngaihtuah leh hmanhmawh a. Tun dinhmun kan thlen theih nan hian engkim kha a lo pawimawh vek mai anih hi.




Ka hriatchhuah leh tak chu ka tawngtai chhanna ka hmu lo emaw ka lo tih chhung zawng zawng khan ka tawngtai chhanna kawng ka lo zawh mek zel a lo ni. Engkim kha A chhanna vek a lo ni anih chu !




Zuali lo luh tak hnuah chuan thudang kan sawi ta daih a.



An bula awm ve reng chu duh hle mah ila Kohhran thil pawimawh khawih ngai ka neih avangin dar 9 velah chuan haw ka tintuah ta a. 'La awm ve rawh' chu min ti sela awm reng pawh ka hnial hauh lovang. Mahse amah zawkin "Kan ngaihtuah awm loh va, heta awm ve reng kha i tan a mawilo. Phone a awm tho a, chanchin kan inhrilh thei alawm" a ti a, ka lo pawm ve mai bawk. Tha taka thil ei tura chahin ka hawsan ta a.



Haw kawngah chuan a khat tawkin ka be leh thin a, a vawili naah phei chuan a rawn nui ta tawp "Inkhalh thleng phawt la, i thlen veleh kan inbe leh dawn nia" nui hak hak chung chuan a rawn ti a. "Ka ngai che alawm" ka ti dut dut a, za zet hian a rawn nui a, a nui ri hriat tluka nuam hi ka hrelo.



Khua ka thlen hnu chuan chanchin ka hrilh ta vat a, doctor a round hunlai tak a lo nih avangin rei kan inbe lo.



Ka haw kawngah khan thil ka ei avangin ka ril a tam lem lova, eirawng pawh ka bawl buai duh ta lo law law. Nizan lamah ka meng rim tehlul nen ka chau eih lova, ka mut pawh a chhuak lo. Ka che reng reng chu ka hlim a ni tawp mai.




Kohhran lehkha pawimawh ho chu ka en fel thuak thuak a, an indaih lo ve thin si a tiin ka theih chen chenah an Kohhran Upa te hi ka pui ve thin a. Rawngbawlna vek a ni a, theihtawp chhuah hi ka tihtur a ni ka ti ve tlat. An lawm ve thei viau mai.



Zanriah eikhamah ka nuin min rawn be leh a. Inthlahrung reng renga a awm chu ka khawngaih takzet.



"Nu...ka tana tha ber tur anga i ngaihin ke i pen ve maiah ka ngai ania. Tunah engkim i hrethiam tawh bawk a inthlahrunna tur a awm lo, pangngai takin awm ang" ka ti ve ngial a. Chutia ka tih takah chuan a âw pawh a pangngai veleh viau mai.




Kan inbiak tawp lamah chuan Zuali be ve hrim hrim turin ka chah a, nakin zel atan tun huna engkim sawifel vek hi a tha.



Zan dar 9 velah Bible chhiara sermon ka ziah laiin Arini a rawn lang hlawl mai a. Ka hmu khat deuh bawk nen a cher deuh dak a, a dang deuh bam bawk. Dam lo hmel te pawh a pu alawm le.



"I lo lang teh nawlh a" ka lo tih chuan za lo deuh hian a rawn nui a. "Sangzual inbe lawk ang" a ti zawi sep a, a ngenngawl takzet bawk.




Ka Bible chu khupin Sitting room lamah chuan ka phei pui a, a ep chiah ah ka va thu thla a.



"Eng nge ni ta?" ka tih tak supah chuan a rawn thaw chhuak hak a. Thawk ipik hmel zet hian "Ka rai" a rawn ti deuh tawl mai anih chu !




Ka thuhriatin min thawn deuh vang chuan sawi mai tur ka hrelo. Chutah amah vek chuan "Ka rilru a hah lutuk" a rawn ti leh a.



"A va mak ve" ka ti thei hram, beidawn hmel zet hian a meng hnual rawih a. "Tunge a pa?" ka ti leh sup a, ka beisei loh lutukin "Rema" a rawn ti zawi raih, a âw chu zawi hle mah se ka hrechiang ngang mai.



"Engtin?" ka ti hluai a, mak ka ti em a ni. An inngaihzawn thu emaw pawh ka hre hauh silo.



Engkim chu min hrilh ta vek a. Khatia ka laka a beidawn hnu khan Rema lakah rilru a pe tan a, Rema chuan a lo awm tirh atang khan a lo ngaizawng daih tawh a. Ka lakah beiseina a neih avangin a lo hnawl a. Mahse khatia beisei bo deuha a awm hnu khan Rema a duh tan ta a, vawikhat an chetsual thu te nen lam chuan min hrilh ta vek a.




"Anih chuan amah i hrilh tawh em?" ka ti ta a. Chuti khawpa induh an nih te chuan buaina tur a awmin ka hrelo. Mahse a meng hnual nghal rawih a "Rema chuan a pawm lo em ni?" ka tih chuan a lu a thing nghal nawk nawk a. Chutah harsa tih hmel zet hian "Ka la hrilh lova...ka hrilh ngam lo. Ka tih awmzia chu nangmah ka la duh che emaw a ti tlat a" a rawn ti zuai raih a.




Hmannia Rema lo kal chhan te, ka ngaihzawng chungchang min rawn zawh chiam chhante nen khan ka tinzawn thiam ruai ruai mai.



"Rema chu ka lo biak sak dawn che em ni?" ka ti ta a "Ka hrethiam tawh bik lo" tih zawng a rawn sawi.



A rilru hah dan tur hi ka hriatthiam pui ve takzet. Nakinah vengchhung miten an la hria ang a, a nungchang zawng zawng nen mak chu an ti ve viau ang. Mahse keichuan thil sual an ti tih ka hre tho nain ka dem thei em em lo. Thildangah sualna leh that lohna a nei lova a chak lohna zawnah setana thlemna an do zo ngang lovah ka ngai ve hmiah.




A rilru hah thute, a chhungte hriattir a hreh thute chu min hrilh malh malh a. Mahse naute chu pai tlang ngei a tum ruh hle thu a sawi thung "Ka tihsual a ni a, a mawh chu phur ngam tur ka ni. Vawikhat dai sual vanga dai sual nawn leh ka duhlo" a ti nghet charh. Chutiang rilru a pu thei chu dai sual ro roah pawh a ngaihsan awm zual khawp mai.




Rema chu be ve hrim hrim turin ka ti a, mahse a hreh ngang tih a hmelah ka hailo. Chuti na na na chu tiin keiman ka biak sak ta nghal a.



Phone a lak rual rual chuan "Rema i buai em?" ka ti nghal tawl a, "Buai love eng nge ni?" a rawn tih chuan chhuanlam siamin kan ina lo kal lawk turin ka ti a, engmah min zawt buai em em lovin a lo kal nghal tur thu a rawn sawi a.




Kan inbiak zawh chuan min lo ngaichâng rengtu Arini chu ka va melh a "A lo kal dawn" ka ti sup. Thawpik hmel zet hian a rawn thaw chhuak hak a "A pawm loh chuan i nau anih vang mai khan tilui suh aw" a rawn ti dam thlap a, ka lo bu ve nghut.




Rei vak lovah Rema chu a rawn thleng a, Arini lo awm ve a hmuh chuan mak a tih hmel ngang mai. Kawngka bula a ding reng chu ka lo hui zauh a "Rawn kal rawh" ka lo ti nghut a. Engmah sawi buai lovin a rawn kal ve mai bawk.



Ka epah chuan inhlat deuhvin an thu dun a, "Rema" ka tih hluai chuan a rawn hawi chhuak zawk a. "Arini hian i fa a pai anih chu" ka tih chuan a meng nghal kawk. A beisei lawk lo ve hle ni tur a ni.



Chutah sawi zawm lehin "A hrilh ngam loh tur khawpin i lo awm a, ka lawm lo khawp mai. Kan inkarah engmah a awm lo tih lo hre bawk ang che. I dai sual rah seng ngam lo tur khawpa mipa dawihzepah ka ngailo che ania" ka ti charh charh a. A inthlahrun hmel hle a, Arini pawh a kun ngal mai.




"Tinge min hrilh loh" Arini lam hawi chuan a ti nghut a, a âw ah chuan lawm lo âw ka a lang thei.



Arini chuan chhan mai ngaihna a hriat loh avangin "A hrilh ngam loh tur khawpin i awm ka tih kha" ka lo ti nghut a.



Chutah Rema chu a thaw chhuak hawk a, Arini thu kun ngal chu a melh leh vung vung thin.



Kan reh dup hnu chuan "Engtia awm nge in duh?" ka ti ta a. Chutah Rema chuan "Min nei duh em?" a ti sup a, Arini chuan a melh vat. "Keichuan inneih ka pawiti lo" a ti leh a, "I tih dan dan a nimai" Arini chuan a ti zawi sep a. Chutah Rema chu a lo rum nghut "Khatia ti ringawt lo khan min neih i duh leh duh loh sawi rawh" a ti hluk a, a dawhtheih loh hmel viau bawk.



Chutah Arini chuan "Ka duh alawm" a rawn ti zawi ta sep a. Rema chu thaw huai hmel a pu "Tha deuhvin ka enkawl ang che u" a ti dam ta thlup a. Chutia awlsam taka an inbe rem thei chu ka lo lawmpui viau mai.




An haw hmain Rema chuan a fala min biak lawk a duh thu a sawi a, ka room lamah kan inzui lut a.



"Ka nu leh pa te min biak pui la ka duh aw. Naktukah Arini hi chu a haw dawn a, a haw veleh ka chhungte hrilh nghal ka duh a" a ti ta a, puih chu ka lo hreh hauh lo.




Chutah sawi zawm lehin "Ka nu ber hi a buaithlak dawn" a rawn tih chuan "Arini te chu a duh viau lawm ni?" ka lo ti he haw a. A lu a thing nghut a "Duh loh thu a awm lova mahse kan bul tan dan hian a zir si lova Arini ngawt a puh leh duh mai thei ani. A mizia chu i hriat kha" a rawn ti ta duah a.



A thusawi chu ka ngaihtuah chiang a, a ni thei awm teh tak e a ka ti ta. A fate hi engti kawng mahin a puh chhe duh ngai silo a. Arini zawk a mawh vek mai thei ani, tawngkam a duh tui lo ve bawk nen.



________*________*________*________


(Zaninah tih tur pawimawh ka neih avangin vawiin lamah theihtawpin ka type a, ka rawn hmain a thui tha hle bawk ❤️)


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:08 pm

LOVE COVERS ALL
By CVL Awmpuii


Chapter - 36


Rema te haw hnu chuan ka Bible leh notebook vel chu ka indahfel ve nghal zung zung a. Ka mut hmain Zuali nen ka inbe leh a. A nu chanchin velte chu ka zawt leh luam a.



"Vawiinah doctor in a lo check khan 'a taksa a fit tha tawh' a tia, naktuk lamah chuan an zai thei dawn anih hmel" a rawn ti a, a âw chu hriat a nuam viau mai.



"Keipawh ka rawn kal ang" ka tih chuan min lo hnial tlat thung. "Naktuk te chu Kohhran committee in neih kha, lo kal a ngai miah lo ania. U Sawmtluangi leh Nu Rinkimi te an lo kal leh dawn a, min ngaihtuah duh reng reng suh, tawngtai kha a ni tawp mai" a rawn ti zung zung a. Ka rawngbawlna min ngaih pawimawh sak em em thin hian ka tan Pathian ruat a nih zia a ti chiang lehzual thin.




"Ka lo kal lo tak tak ang maw, vawikhat committee thulh te chu a pawi em em vak awm si lova" ka han ti ngial a, ngaihtuah awm lutuk an nih loh thuin min rawn chhang leh tlat a, ka tilui ta bik lo.




A hnu deuhah chuan "I nuin min lo bia asin" a rawn ti ta hap a. Be tur khan ka chah tak alawm "Eng nge a rawn sawi a?" ka tih chuan a rawn thaw chhuak halh a.



"Ngaihdam te min rawn dil a, zialo ka ti tak tak ani" a rawn ti zawi sep a, "A tihtur alawm, i chunga a chet dan kha a diklo alawm" ka lo ti mai a. Mahse Zuali chuan "A inthiamlo lutuk kha nuam lo ka ti zawk hial asin. Keimah lamah phei chuan huatna engmah ka nei lo, ngaihdam dil pawh ka phut hauh lo ania. Tunah chuan engkim a tha vek tawh a ka lawm tawk viau ani. Nangpawh a chungah thinrim miah suh aw, a inthiamlo sa bawk si" a rawn ti malh malh a. Ka nu thlavang a rawn hauh deuh tung chuan engtin emawni tak hian min tilawm tho mai. Nakin zel atan inpui luah tur kan la ni dawn si a, an inngeih chhoh viau ka beisei.




"Engtin nge i lo chhan?" ka tih chuan a ngawi deuh vang vang a, a thusawi tur chu ka lo ngaichâng reng a. Chutah "Ka hre tawhlo, ka zâm lutuk a" a rawn ti chhuak hap a, ka lo nui chhuak hawk. A nu bula ka zâm ang chiah khan a lo zam ve a nimai thei ani.



"Tha deuh chuan ka chhangin ka hria" a rawn ti tha leh a. Kei lah ta pek chuan nghal zet hian " 'Ka nu' i lo ti em?" ka ti uang a. A ngawi daih, a lai leh viau tawh aniang. "I ti em?" nui ru chur chur chung chuan ka ti leh hram a. "I sual..." a rawn ti vak, kei ka lo nui chhuak hawk hawk thung. A lai hmel tur ka mitthla a, a hmeltha leh hrep ang chu !



Rei tawk fang kan inbiak hnu chuan kan dah ta a. Hun rei tak hnuah pangngai takin kan han awm leh thei a, ka lawm zia ka sawifiah thiam lo.



Ka tawngtainaah chuan a nu tan ka dilpui a, kan mamawh tawk ang zelin Chunglam khian min chhang leh dawn tih hi ka ring thlap a ni.



Zingah chuan Rema min ngenna angin an in lamah ka va phei ta a, phone kaltlangin kan inbe tawh a. Arini chu zingkarah Aizawl lam panin a haw tawh a, a chhungte a hrilh nghal dawn bawk. Ka lo huphurh pui ang reng khawp mai, a nu leh pa rilru chu a na viau ang le. An fanu neihchhun, an chhuan ve em em leh an rin em em in sâwn a han pai haw mai dawn chu a ni si a.




Nutei te in ka va thlen chuan an lo awm kim thap a. Pa Zaian an inkawtah hnâng a lo hlai a, Reman an motor a lo sil bawk. Nitein eirawng a bawl a, Gracy chu thutthlengah muin phone a hmet mawlh mawlh mai.



Reman min lo hmuh veleh chuan min lo pan vat a, a hmel atang chuan a zam ve hle ni tur ani. "Engmah ka la hrilh lova ka lo nghak phawt che a" a ti sup a, ka lo bu nghut.



Inchhungah kan inzui lut a, pangngai takin Nutei chuan min lo bia a, Rema nen chuan sitting room lamah kan thu phei nghal a.



Pa Zaia lo luh veleh a nu nen chuan a ko phei ta nghal a. A hmel a thu tak ang reng bawk nen an ngaih a that loh hmel kher mai. Mahse an rawn thu phei ve mai bawk a.



Rema chuan pehhel buai lovin "Arini a rai" a ti nghal tawl a. Nutei leh Pa Zaia chu an hamhaih hmel kher mai. Chutah Nutei zawk chuan "Sangzuala fa maw?" a rawn ti pek a, ka lo rum nghut, chutiang bawkin Rema pawh. Engtin nge maw ka fa a pai reng reng ang ni ?




Rema chuan "Ka fa" a lo ti tawi tak a. Reilotê chu a reh deuh duk a, an hamhaih tlâng viau aniang.



A hnuah Nutei chuan "In inngaihzawn lai ka va hrelo ve" a ti fiah fak a, "Thla khat leh a chanve vel chu a ni tawh ang" Rema chuan a lo ti vat. Pa Zaia erawh engmah sawi lovin a fapa chu a melh ngur a.



Nutei chuan "Engtin nge anih theih a?" a ti leh a, tuman kan chhang lo. Chutah amah vek chuan "Kan khawngaih a, kan inhnuai kan luah tir a, a lo khawlo ru zek anih chu mawle" a ti hlak hlak a. Rema rindan kha a dik vel fu anih hi.



"A thiam loh bik anih na a awm lo" Rema chuan a lo ti nghet charh a. Mahse Nutei ngaihdan a nilo nasa mai "Sangzuala a kherh thluk theih tak si lovah chuan i lakah a tuan anih hi. Sum a ûm phian ani lo maw, a khawlo zek mai a" a ti leh hlawih hlawih a, em em thin hian.



Ka lo inrawlh ve ta vat a "Sum ûm tur khawpin an dinhmuna chhe lo ania, khawsak pangngai tak an ni" ka lo ti nghet charh.



Chutah Pa Zaia chu a rawn tawng chhuak ve ta a "Engtia awm nge in duh?" Rema bulah chuan a ti ta sup a. Rem chhanna chu "Inneih kan duh" tih a ni.



Mahse Nutei ngaihdan bawk a lo ni leh tawhlo "Chutiang ngawtte chu, Biakin hawng lo lehnghal" a lo ti hlak a. Rema chu a phun hluk a "Kan tlin loh chu" a lo ti hluk.



Chutah Nutei chu a lo duai leh der lo mai "In inneih duh chuan Biakin hawngin ni rawh se, naute pawh chu titla ila tuman an hre chuang lovang. Pangngai deuhvin palai kan tir ang a, in innei mai..." a sawi zo hman lo Pa Zaia chuan "Ngawi hmak rawh" a lo ti vin thawt a "Kan tu tur anih chu mawle. I ngaihdan te hi a mak thei emai, i fapa hi tha takin zilh zawk ta che mawle" lawm lo zet hian a ti leh a.



Nutei chu a ngawi ta dak a, Pa Zaia hmel awm dan atang chuan chhan zui chi anih loh zia a hrethiam aniang. Ka lo rin lawk dan deuh chu ni tho mah se hetiang em em a mize mak anih hi ka ring ngailo. Mak tak ani.




Rema chuan "Kan pahnih tihsual a ni a, a mawh chu kan phur ang. Thil sual dang tih nawn a, hmingchhiat hlauh vang mai maia Pathian pawi sawi zui kan duh tawh lo" a lo ti ve thlap a.



Pa Zaia chu a bu nghut nghut a "Hetiang hi chu kan beisei lo asin mawle. Mahse inhauh vak a sawt tawh lova, palai kan tir ang a, a rang lamin inneihna chu kan buatsaih ang" a ti nghet ta charh a. Pa anih na angin a tihtur tak a ti niin ka hria.



Gracy a lo inrawlh ve khauh a "Tunlaiah sâwn man te pawh a inpek theih tawh reng a" a lo ti zauh. A pa in "Lo ngawi hmak rawh" a ti fiah nghal that a, a tawng zui ngam tawh lo.



Nu Rinkimin 'An inchhun nufa' a tih kha a lo sawi dik hle anih hi.



Ka haw hmain Pa Zaia nen chuan kan inbe leh a "Arini te nen khan in inhre tha thovin ka hria a, a nu leh pa te biak pawhna tur number min lo pe hrim hrim teh. Anmahni zawkin min rawn biak vat chu ka ring tho a" a ti chuar chuar a. Keipawh chuan Nu Sangkimi number chu ka lo pe ta vat a.



In ka thlen leh veleh chaw ka ei nghal zung zung a, Committee tan hun chu 10 a ni dawn a, mahse chhuah hma ka duh tlat. Lunglei lama Nu Rinkimi te kal hma va nan hman ka duh.



Dar 9 velah chuan ka chhuak ta reng a, Nu Rinkimi chuan inpeih sa thlap hian dawr a lo nghak a.



Min rawn hmuh rual rual chuan "Hman zan kha chu va tuah ve a" uang zet hian a lo ti a, a nui tak ang awr awr a. Ngai pawimawh duh lo chuan "Dar engzat ah nge in phei dawn?" ka ti ta a, "Sawmtluangi a la insiam a, dar 10 sumo ah kan chhuak ang" a lo ti tha ve mai a.




Ka lo bu nghut nghut a, chutah Nu Rinkimi pek chuan "I rawn ru haw dawn maw ka ti hman alawm" nghal zet hian a rawn ti leh a, ka lo rum nghut. A nuih lah chu a'n za em em mai pek a.



"Tak taka in tha tawhah ka ngai hmiah mai a a lawmawm" thutak zawk hian a rawn ti ta a. Kan buaina ber kha hrilh ve a pawi em em lova ka hriat vangin ka hrilh ta vek a, kan inrem leh dan zawng zawng nen. Nu Rinkimi chu a chet tlak tlak a.



"I nu pawh chu a va mak ve" a rawn ti hlak a, za lo zetin ka lo nui mai a. "Palai in rawn tirh hunah pawh kan lo phallo mai thei ani" a rawn tih zawm leh zat a, a hmel chu a thutak viau bawk.



"Aa...chutiang te chu a..." sawi zui tur hrelo in ka riat nawi ta mai mai a, an phal loh tak tak ka hlau hmanhmawh.



Chutah Nu Rinkimi chu a rawn nui leh tak ang awr awr a, min fiam tih ka hre leh chiah, a nghal thin asin.



Sawmtluangi inpeih at a a rawn kal ve takah chuan an dawr atang chuan ka chhuak ta a, lo ngaihtuah turin ka chah uluk viau mai. Nu Rinkimi chuan "Va committee mai mai teh, i rawn awm ve hma atang daih tawh pawh khan kan ngaihtuah reng" a ti hlak hlak a. Ka lo nui ta tawp, ka lo ngaihtuah mah mah thin a nimai thei, mahse ka pawi tih loh zawng tak ani.




Committee kan tan hmain pawnah ka be leh a, dar 12 ah an zai dawn a, an zai zawh veleh a min rawn hriattir vat turin ka chah uluk viau. Ka lo va kal ve mai lo te chu ka inchhir leh hnuhnawh dawn dawn mai. Mahse amah ber a thlamuang em em a, tlem chuan ngaih a tha deuh.



Committee member kan kim takah chuan kan tan ta a. Thu rel tur a tam ang reng a, kan rei phian mai. Kan ban meuh chuan tlai dar 3 a lo ri dawn tawh a.



Car chhunga ka luh fel hnua ka phone ka en chuan Arini nu hnen atangin missed call a lo awm a, an fanu chungchang an hre tawh a ni ngei ang.



Ka call let ta vat a, rei a ring lo "Sangzual" a rawn ti nghal hap a, "I nutei te chuan eng angin nge an ngaih" a rawn tih zawm leh zat, a âw chu a zuai deuh raih mai. A thusawi awmzia chu ka hrethiam mai a "Nakinah palai rawn tirh an rilruk a, nangmah nin in be tawh hrim hrim em?" ka lo ti ve vat a. Nutein a ngaihdan kha chu sawi tul ka ti lem lo, an rilru a na mai mai ang.



"La be lo, kan hre ve chiah a. Sawi tur a vâng khawp mai. I pa Châmliana phei chu a hrilhhai lutuk a, a la tawng leh lo hrim hrim. An unau ro ro ah Arini a chhuan bik zia chu i hriat kha" a rawn ti malh malh a. Pa Châmliana rilru tur chu ka dawn thiam ve khawp mai. Veng chhung ami zawng zawngin 'Arini hi chu a pa fanu hi a ni lutuk a' an tih hial kha a ni a. A rilru chu a na khawp ang.



"A nih tur ang chu a ni vek tawh a, in hau anih pawhin a âwm tawk chu in hriat ka beisei ania. Inhauh chiamin sawtna a nei tawh chuang lova. An induhtawn miau a, Rema pawh khan mawhphurhna zawng zawng lak a tum thu a sawi ania" ka lo ti ve dap dap a.



A rilru nat zia leh hrehawm a tih thute chu a rawn sawi luam a. Pa Zaia te be vat turin ka lo chah ve thung.



Kan inbiak zawh chuan Zuali ka phone ta nghal a, a ring ral thak. An la buai anih ringin ka call nawn ta lo law law, rilru erawh chuan a vei rauh rauh mai.



In ka thlen veleh ka inbual fai ta nghal a. Bathroom atanga ka chhuah rual chuan ka phone ri a lo tawp ve chiah, rang zetin khum lam chu ka va pan a. Ka rin ang ngeiin amah a lo ni.




Ka call back a, a lo pick up ta vat a "OT room kawtah kan awm char char a, ka phone cabin ah ka dah daih sia nichina min lo call pawh kha ka lo hrelo a" a rawn ti zung zung a. "Umm...keipawh ka inbual zo chiah, an zai zo tawh em ni?" ka lo ti ve vat a. An zai zawh tawh thu leh ngaihtuah awm an nih loh thu a rawn sawi chuan ka lo thaw ve huai mai.



An la buai deuh nak nak avangin chanchin kan inhrilh zawh hnu chuan kan inbiakna chu kan titawp ta a.


Eirawng ka bawl laiin ka pa in min rawn bia a, Zuali nen kan chungchang min rawn sawipui. Palai chungchang te a rawn sawi luam a. Mahse Zuali te dinhmun chu ka thiam tawkin ka lo sawi ve a.



"A sum pai ang zawngte paw'n puih ve a va tha ve" a rawn ti a, heihi keipawh ka lo ngaihtuah a, theihtawp a puih ve chu tha ka ti. "Nia, keiman ka lo buaipui dawn nia" ka lo ti ve vat a. Mahse ka pa chuan "Chutiang ngawt a ni thei lovang keiman ka lo be dawn nia. I nu khan a number a nei tho a, kan biak ve pawh kha thil mawi alawm" a rawn ti ve zung zung a. Chuti taka kan pahnih inkara an nêm ta chu ka lawm viau mai.




Ka pa chuan ka nu thlavang a rawn hauh vat a "A thiltih kha a dik ka ti miah lo, keipawn ka lo hre miah lova ka thiam chuang lo. Mahse i nu a nihna a bo lova a ngaihtuah zia che hria la, a chungah lungawi lo miah suh ang che aw" a rawn ti dam thlap a. Ka lo pawm ve thlap.




Zanah chuan Zuali nen kan inbe leh a, ka pa in a biak thute, sum leh pai lama puih a tum thute chu a rawn sawi ve sap sap a. Mahse a lo hnial thu a rawn sawi tel.



"Ka duat, theihtawp a puih che kan duh alawm. Inthlahrunna tur a awm lo asin, i nu dam hunah pumkhat kan ni tawh dawn tho a, inpuihtawn kha kan tihtur ania lawm" ka lo tih chuan "Ka inthlahrun vang a ni miah lo ania, ka nu inenkawlna man tur chu ka nei ve alawm. Tunah chuan kan la innei em lova kan intawngtaipui tawn hi tawk ka ti viau" a rawn ti dam thlap a. Hnial vak khan a rilru a sawh sawn duh lehpek awm si lova ka hnial zui ta lo law law. Mahse an lo haw hunah chuan puih ka duh tho, ka tihtur a ni ve thovin ka hria.




Arini chungchang chuan veng chhung a dengchhuak chak ngang mai. Valpuia leh Remsanga te pawhin mak an rawn ti khawp mai, mahse amah demna thu engmah an chhak chhuak lo. An khawngaih ve viau zawkin ka hria. Nunui pawhin min rawn be ve a, Rema te chhungkaw chanchin min rawn zawt a. A thiannu a ngaihtuah vang a ni tih ka hria a, tha takin ka lo hrilh ve mai bawk.



Kan chak lohna zawnah tak Setana hian min bei thin a. Ruihhlo leh zuk leh hmuam a insum thei te hi ruihhlo leh zuk leh hmuam hmangin a thlem kher ngailo, an thil duh tak hmangin ani a thlem thin ni. Rema leh Arini te pawh hmun falah an awm a, an chaklohna zawnah a thlem thlu ta a nimai. Chutihrual erawh chuan thlemna awmnaah chuan tlanchhuah na kawng a awm ngei ngei thin tih kan hriat a pawimawh.




Nau hial an pai ta si a, Pa Zaia te pawhin palai an tir ta vat a. Mahse engtin tin emaw Nutei lo tawngdan kha Pa Châmliana te'n an lo hria a, an tha a na ngang mai.



"Ka fanu ania, ka tunu tur a pai bawk a. Naute pakhat na na na chu a enkawlna tur kan nei ve bawk e, insawirem loh pawh ka pawiti tawp lo. Chutianga hmusittu leh duhlo tu lakah chuan engtin nge ngaihngam takin kan thlah theih ang" Pa Châmliana chuan a lo ti hmak a. Âwm ka tih pui hliah hliah. Nutei reng reng pawh khawchhung ah Arini dem zawngin a lo tawng chhuak hman anih ka ring.




Rema leh Arini bawk an khawngaihthlak. Rema chu a nu lakah a lungawi lo ngang mai a, Pa Zaia pawhin Nutei chu a khak deuh hrepin ka hria.



Ka puihna bawk min rawn dil leh a, pa Zaia chuan "I nu leh Arini nu kha an inkawm thin thovin ka hria a, i nu kaltlangin min han biak sak mai ta che. Kan tan pawh a mualpho thlak emai, i Nutei tawng tam vanga ka tu tih fahrah ka duh lo. An induhtawn loh vang pawh ni hlei lo" tiin ngenngawl zet hian min rawn ngen a. Ka tihtheih a awm anih phawt chuan ka inhuam bawk a, ka nu chu ka biak sak ta a.




Ka nu pawh a lungawi lo ve ngang mai, Nutei a khak tur thu leh Pa Châmliana te a lo biak tur thute chu a rawn sawi ta a. Ka nu hi chuan a laina hnaite a duat thiam a, chutih rual chuan zilh an ngaihnaah a zilh hreh ngailo.




Engtin tin emaw Arini nu leh pa te chu a hmin thei ta hram a. Nutei chuan engmah a sawi leh tawhlo. Rema chu a fapa anih na angin a nunah thuneihna a nei ve na meuh mai, mahse a tih dan hi a mah mah ve deuh hlek a ni. Fapa te'n mi fanu laka sâwn an thlak tawh chuan nei tura nawr zawk awm tak ania. A mizia hi a mak a ni tawp mai.




Palai an kal nawn leh dawn tukah chuan an in lamah ka va lang veleh a. Pa Zaian nutei a lo khak mek "Fate'n hum sual an dai a, pangngai taka zilh a hnekin midang zawk i puh a. I fapa i fuih khawlo tep zawk a, neih duhna thinlung a pu te hi lawm zawk ta che. Hmeichhia i nihna ang pawhin Arini hi ngaihtuah ve la. Gracy chungah thleng ve ta se i lungawi loh awm tehlul nen" a lo ti hluk hluk a, Nutei chu a ngawi reng.




Mak ve deuh mai chu Nutei hi han sualin tawngkam duh tui lo viau mah se Pa Zaian a khak tawh chuan a chhang tha ngam ngai lo.



Zuali te pawh in lama inenkawl turin an lo haw tawh a, an inah ka va lang ve zut a. Thenawm khawvengte mitmei kan veng vak tawh lova, chutihrualin khawlo takin kan khawsa tihna lam a ni chuang lo. Kan inngaizawng tih chu an hre ve nual tawhin ka ring. Nupuia neih vat ka duh dawn si a, midang mak tih lutuk loh nan a mawi tawka kan inkawp tih hriattir ve pawh chu ka pawiti lo.




An in ka va thlen chuan Nu Rinkimi te chhung an lo awm a, inleng dang an lo nei nual bawk. Ka va lut min hmuh chuan min lo nuih var var a, midang hmuh lohva mit ka va siai zeuh chuan a meng kalh nghal ralh. A lawmawm thin ania.



Inleng dangte chuan min lo be nghal bawrh bawrh a. An titi na ah chuan ka va thu thla ve a. Rema leh Arini te chanchin an lo sawi, thenawm khawveng te titi tui ber kha an ni ve rih a. A thalo zawngin an sawi em em lo bawk nen a tihzia viau.



Dar 10 rik dawnah chuan an tin ta hlawm a, Nu Rinkimi te pawh an haw chho ve nghal a. An chhuah hmain min la chhaih hram pek kha, a nghal thin ania.



Kan thingpui inna no a sil lai chuan chair ah ka lo thu a, Arini a lainat thu a rawn sawi teh tlat a. "A duh viau chein ka hre sia, ka khawngaih e. Mahse Rema pawh tlangval fel tak a ni tho a, an inhmeh tho mai" a ti siam siam a. Engmah sawi ve tur ka hre vak lo.




Chutah rawn sawi zawm lehin "A duh viau chung che khan engtin mah min tawngkhum ngai miah lova. I nu nen khan an innel tehlul nen ka rilru natna turin min be ngai miah lo asin. Nula sual chu a ni miah lo mawle" a rawn ti leh siam siam a.



Ka lo ngaihtuah daih chu Rema te an inneih hmasak a ngai dawn si a, kan inneih hun a hlat phah a ngai dawn.



"Keini aiin fa an nei hmasa dawn ania" ka lo tih chuan a rawn hawi vat a, "An neih hmasak loh te'n" a lo ti hap. "Kan lo pûk lawk ve mai lo ani" nui duh miah lo chuan ka ti a, a meng buai nak mai.




Kei lah ta pek chuan a rilru tihbuai ka chak thar ngang mai "Kan pûk lawk ve mai dawn mi...tunah pawh a theih reng a" tiin ka tho thut a, min rawn melh phawk nghal hra mai.



Ka va pan hnai a, chutah che chhuak thutin bucket a tui chu a suak chhuak a, min rawn tin nghal uaih "I lo kal hnaih vaih chuan tui hi ka theh dawn che" a rawn ti bah nak a. A hlauhthawn hmel lutuk chuan ka nuih a tiza ngang mai. Mahse ka nui duh lo lui tlat a.



A nu a mutna a rei tawh ang reng si a, zanreh lai tak a ni bawk nen a hlauhthawn hmel kher mai.



Ka va pan hnai zel a, ani pawh chuan min theh ta nge ti lo chuan khawng ata dingin min melh kiau a. A tui no chu laksakin a kawng fek ratah chuan ka chelh ta a, ka nuih ta suk. Min tlawn tum tak hian a rawn nui lui ve ngial a. Chu te hlei hlei chuan ka nuih a tiza zual.



"Pûk lawk chu..." ka tih chuan "U Sangzual" a rawn ti hap a, chiang zet hian kan inmelh a "Haw tawh rawh" a rawn ti leh deuh tawl a. Ka nui chhuak ta hawk. A ngaihna hrelo fe a min rawn melh chho kiau chu a hmuiah ka lo fawp zeuh a. "I duh loh chuan inneih vat kan ngai" ka ti ta a, thaw huai hmel hi a pu.




In lama ka haw meuh chuan dar 11 a lo ri thuak tawh. Biakinah kan va kal dun leh phawt vang ani pakhat. Pathian hnenah lawmthu sawi sen loh kan ba miau si a.




Rema te inneih ni chu a lo thleng ta a. Pûk lawk an ni bawk nen palai kal atanga thla khatna ah inkutsuih an rawt ta nghal kha ania. An neihin a tlin ve ve bawk a sum lamah chuan buaina a awm lo.



Ka chhungte pawh nimin piah lamah khan an rawn thleng a. Nutei te inah an thleng seng vek bik lova, ka cousin te ho pawh ka inah an thleng deuh fur hlawm. Tin, ka thiante, Valpuia leh Remsanga te pawh an lo kal ve a. Nunui chu Arinin a thianah a hman avangin paa a zawnte in lamah an thleng thung.



Biakin hawngin tlin lo mah se mikhual an thahnem a, an inneihna pawh a ropui viau mai.



Zanah chuan ka nuin "Nakinah Zuali chu kan awm lai hian chawei ah sawm la" a ti ta a, ka lo hnial lo khawp mai. Ka pa pawh chuan tha a lo ti viau a, palai tirh te chenin a sawi kai a "I naute an innei zo ta bawk a. A remchan dan angin palai pawh kal tir ve vat ila a tha ang. Mahse a inpeih hun lo ngaichâng la" a ti chuar chuar a. Ka pawm zawng tak ani.


________*_________*________*________

(10:30 a lo pel tawh sia, ka signal a chhe bawk nen nen palai tirh hman ka tum tehlul nen a la leng tlat lo...hihi)


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)