LOVE COVERS ALL By C.V.L.Awmpuii (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

LOVE COVERS ALL By C.V.L.Awmpuii (Completed)

Unread post by Ngaia » April 3rd, 2022, 2:58 pm

epk87ze0.jpg
epk87ze0.jpg (21.89 KiB) Viewed 35940 times
#CHRISTIAN_LOVE_STORY

#Pastor_Zosangzuala & #Hmangaihzuali

#PROLOGUE

Biakin kawng lam pan chuan ka tlân zel a. Ka motor khalh lai te chuan thil awm thei chi hrang hrang ka ngaihtuah, mahse ka ngaihtuah tak erawh chu mi pakhat chungchang chiah a ni thung. Khanu mawlh kha !

Zan dang ang chu nise ke in ka kal ngei ang a. Tin, zan dar 10:00 - a kal lo hian dar 11:00 rik dawn lamah ka kal ngei ang. Mahse zanin hian thil belhchian chak ka nei miau a, a pawttu hi a na em atin a ni.

Kawngah chuan ka tawh tak thutin tih thil thu ah ka hawikual leh thuak thin. Ka motor headlight in a chhun phak chinte c kahu chiang zet zet hian ka melh thin a, mahse ka mi hmuh duh taka chu ka la hmu chuang lo.

Zan danga ka biakin pan turin a kawng kal lai ka lo hmuh tawhna thin, biakin kawngkawi lai ka thlen chuan kawngsir rem laiah chuan motor chu ka tiding thi duk a. Ka chhuak nghal vut bawk.

Ka dinna atang chuan kan biakin chu a lang thei, mahse theihai kung lianpui ding ruah vang chuan a lang chiang thei lo.

Car hmaa ding rûn chung chuan khanu chanchin mi thenkhatin an sawi dan kha ka ngaihtuah a.
"A nu ang bak a ni lovang, sunhlu kungah thei dang a rah ngailo"
"Shillong a zuk awmlai pawh khan a lo che hiar viau mai thei asin, lehkha a zir tak tak pawh ka ring love. Khuaa a rawn haw hnu hian Kohhran lah hi a rawn bêl zek a, a nungchang tawp zet hliah khuh nan Kohhran hi a kâwrah a hmang pawh a ni thei tho mai"
"A nu chu hmêlah chiah a chhûn, a nungchangah erawh a tha filawr lak. Hetiang dinhmuna ding chunga Kohhran a bêl hram hram te hi a chhuanawm reuh ania"
"KTP active member thenkhat ai pawh hian a nungchangah hian Pathian hmel a lang chiang zawk".

Thenkhatin a chungchangah ngaihdan tenawm zet zet an nei a. Thenkhat erawh chuan an fak viau lawi a. Ka awmna khua hi thingtlang khua a ni a, khaw lian tak a nilo bawk nen thu thang vel reng reng hi a darh chak viau.

A chungchang ka ngaihtuah lai chuan kha a mitmeng pawi sawi lo zette kha ka mitthlaah a rawn inlar zut zut a. Engtin emaw ni riau hian ka awm lehnghal a.

Rei ngial ka nghah hnu chuan a lo lang thei mai lo. Zaninah hian a kal ziah thinna kha hriatchhuah ka duh viau asin mawle.

Zan dar 11 a rawn rik meuh chuan nghah khawmuan ka tum tawh lo. Ka lo tih thin dan ang bawkin biakin lamah chuan tawngtai turin ka kal a, motor chu ka tinung tawhlo law law, ke in ka kal.

Biakin gate ka hawng a, ka lut chiah chu biakin kawngkhar a rawn ri khep. Ka mi hmuh avang chuan ka phawk hle ringawt.

__________________

"Lalpa, nu tha tak min pek avangin lawmthu ka hrilh che. Pa nei lo tan pa i nihzia i rawn lantir thin avang pawhin lawmthu ka hrilh che a, khawngaih takin ka tan Pa tha tak ni zel ang che aw. Nangmah hrelo thei lovin min siam la. Harsatna tam tak karah pawh ka la ring fan ang che"



LOVE COVERS ALL
By C.V.L.Awmpuii

February ni 7 a dah tur ka tih kha ni 1 ah ka rawn surprise che u🤩


Chapter - 1




"I lo puitling ta khup alawm le. Tawngkam pawh i lo thiam tawh khawp mai"
"I sawi nung lutuk"
"Zanin kan inkhawm chu ka mamawh tak ka chhar nimaiin ka hria"
"I thusawi kan ngaithla khat tawh awm sia aw..."
Kan inkhawm bang biakin atanga ka chhuah rual chuan Kohhran mipuiten min lo chibai sap sap a. Zanina ka thusawi tha an tih thu leh nung an tih thu te chu an sawi mawlh mawlh a. "Pathianin hna a lo thawk chu a lawmawm e" ka lo ti ve sup.




"Sangzual..." ka thiante min kohna lam chu ka va hawi vat a. Biakin gate pawn lamah chuan an lo dingkhawm laih laih a, tlangval thenkhat chuan zial an lo zu khu deuh luih luih a, nula te nen titiin an nui ri leh laih thin. An kut chuan min rawn hui a, ka bu nghut tak na a nutling thenkhatin min la biak khawmuan avangin ka la pawh mai hman lo.




"I awmna tur kha Lunglei piah em ni khah?" kan Kohhran Hmeichhe hruaitu Nu Ramin a rawn tih chuan ka awmna hmun tur, Lunglei piaha Thingtlang Khaw pakhat chu ka hrilh ve vat a. "Nang zawng khawi hmunah pawh awm la i ngaihtuah awm loh vang. Helamah kan lo tawngtaipui ve reng dawn che ania" a ti leh dap dap a. Rei vak lo kan titi leh hnu chuan ka thiante chu ka va pawh ve ta vat.




"I lo kal har lutuk a Nunui a lo phun a lo phun tawh" Valpuia chuan uang zet hian a lo ti a. "Lalvalpui i hneawm aw" a ban puam a ri nghal tawk, midang erawh an lo nui dar dar thung. Valpuia leh Nunui te hi chu helama ka awm nikhua pawhin KTP thiltih, hnatlan nikhua leh khawi ilo kal vela infiam peih fal bik kha an ni thin hrim hrim a, an lo la sim lo anih dawn hi, ngaiah kan nei tlang tawh.



Heihi ania K.T.P nawm vena pakhat chu - kan han infiam bawrh bawrh a, kan in chhaih kual a, tuman kan haw tak tak ngai lo. A huang chhunga tal tam poh leh KTP nawmna hi kan tem nasa ting a nimai.



Tawi khawmuang tawh lovin kan in lam kan pan a, kalkawngah pawh chuan an han infiam bawrh bawrh a, keipawh ka lo nui ve suk suk mai.



Kan in kan thlen chuan Kohhran Upa thenkhat pawh an lo awm nuk a, ka pa hovin an lo inkawm anih hmel e. "Lo leng rawh u" ka nu chuan ka thiante ho chu a lo chiau au vat a. Inchhungah chuan kan inzui lut nghal huk. "Ka han inthlak lawk ange lo thu ru" tih leh inchung lam pan ka rual a.




Room light chu ka on a, ka bag khai lai chu khumah dahin ka kamisz hak lai chu ka phelh nghal mual mual a. Naktuk maiah hian Pro Pastor-a ka awmna tur hmun lam ka pan tawh dawn a. Zaninah hian inthlahna ni pah fawmin thiante nen eng eng emaw kan ti ho ve ang chu.




Ka inthlak zawh hnu chuan ka bag chhunga ka phone dah chu lachhuakin ka on nghal a, missed call pali lai a lo awm, chu pawh mi pakhat lak atang vekin. Tunge tih ka hriat chian em avangin ka ner nghal sawk, ka call back lem hlei lova, ka kekawr ipteah thun lutin inhnuai lamah ka chhuk nghal daih.




Ka thiante chu an lo ri laih laih a, a thenin phone an khawih bawk. Ka chhang chiahin thingpui a lo lum a, ka nu chuan eitur eng emaw a siam deuh rak rakin ka hria.



Ka pate thutna lamah chuan ka va thu phei ve a. Zanin ka thusawi chungchang bawk an lo sawi leh tawh. Dik tak chuan karleh lam hi ka hun tura an ruat lawk chu ania. Mahse rin ai hmain ka kal a ngai dawn ta si a, Upa Saia nen kan hun an thlak thleng ta ringawt a ni.



"Mahni a zuk awm deuh ruk ruk chu i huphurh viau lo maw?" Upa Ngura chuan a rawn ti a. Ka huphurh lem loh thuin ka lo chhang ve vat. "I rawngbawlna tha taka thlawp tu tur che han tawng hman la tha tur" Upa Saia chuan nui ruh ruh chung hian a rawn ti a, ka lo kiai ve suk.




"Nangni zawng in fate ngaihtuah awm an awm tawh love. Mafaka lah hna tha tak neiin chhungkua a din tawh a, a nupui a fel si. Mahlimi lah aman hna a neih bakah pasal tha tak a nei bawk a. Sangzuala heti hi a ni leh a. Matei lah a ngaihtuah awm loh nasa mai si, tun atang rengin a fel ania. Fate enkawl dan tur Pathian thu a awmte hi in zawm tha tih a hriat ngawt mai" Upa Biaka chuan ka pa bulah chuan a ti charh charh a.




"A mai mai thin a, engkim hi Pathian malsawmna vek ania. Keini nu leh pate chuan Pathian kutah kan dah tawp a, anin a lo chingfel mai anih hi" ka pa chuan a lo ti nghet charh a. Ka nuin thingpui min rawn pek zui takah chuan thu dang kan sawi kai ta daih. BD ka zirlai chanchin velte min zawt luam a, tha takin ka lo chhang ve zel bawk.



Thingpui kan inzawh chuan rei thu khawmuang tawh lovin Upa ho chuan haw an rawt thuai a, "Kha, i thiante ho kha thu tha lo fah teuh rawh aw" Upa Ngura chuan a rawn ti a, "In thianpa hi tihdan kawng dap pui ru aw. Pro Pastor a ni rup tawh mai dawn sia, Pastor-a an ordane (nemngheh) hma ngeiin a nak ruh bo zawnpui ang che u" uang deuh tak hian Upa Saia chuan a rawn ti veleh a, an lo nui dar dar a, hmai a uang lo ve duh khawp mai.




"In zawnpui chi pawh va ni suh. A tawn tak tak hunah chuan chet a la ve vat turah kan ngai" Hma-a chuan a rawn ti veleh a, nui dar dar chungin upate ho nen chuan kan inmangtha.




Ka thiante ho chuan min fiam zawm laih laih a, sawi tur a mang pawh ka hre lo. "Arini ka va hmu velo ve" kan titi laih laih lai chuan ka nu chuan a rawn ti a. "A pi kha damdawiin ah a awm leh tawh a, a riahpui dawn a, zanin pawh a rawn inkhawm lo" Nunui chuan a lo ti vat a.



Arini te chhungkaw chanchin chu an sawi zawm nghal mawlh mawlh a. Fel an tih zia hahipin an sawi leh tawh. A awm lo hranlo. Arini chu vengkhat nula chhuanvawr kan tih ang kha ania. Kan vengah chuan sawi hat a tling ve a, a la hmeltha tel veleh zel nen.




"In thiannu Arini hi chu fanu atan ka ît mawle" awmze nei zet hian ka nu chuan a rawn ti hluai a. Midang ho chu an lo 'eee' dual mai. "Mipa chêt hun tak ania" Nunui chuan min melh pahin a rawn ti ngat a, ka lo nui mai thung. Ka nu hian min sawi hmawrhmuh nasa thin, mahse ngaihzawng enah ka en ngailo. Engtin emaw deuh chuan be ta ila Arini pawh hian min hnial ka ringlo. Mipa ka nihna angin min melh dan atangin ka hre ve kar. Hmelthain fel viau mah se min hîp lo a ni ber e.




"Nu Machhan, lungngai mah ta che, thingtlang lamah a zuk awm mah anga mo hmel in hmu vat mai ang" Hma-a chuan a rawn ti hluai a. "Mo neih chu kan la hlat hmel emai Au Hma" ka nauvin a rawn tih tak khauh ah chuan an nui leh huk huk hlawm mai.



Ka nu chow siam chu kan eikhawm laih laih a, thalai awmkhawm tih takah kan thawm pawh a tha laih laih khawp mai. Zan dar 11 rik dâwnah min tin san a, naktuk lamah min rawn thlah liam tur thu sawiin kan inthlah ve hlawm kha.




Ka chhungte an mu vek tawh a keipawh tawi khawmuang tawh lovin kawngka ka kalh tha a, tui bottle lain ka room lam ka pan chho ve nghal.



Ka mut fel hnu chuan ka phone chu ka phawrh a, missed call a lo awm leh hman tawh ! Side table-a dah mai ka tum chu a rawn eng leh pap a, pick up loh ka tum zet nangin a rawn call ngun tawh lutuk a ka pick up ve ta nge nge.




Phone chu ka bengbulah nawrin engmah sawi lovin ka ngaithla a, "Sangzual..." ka ngawih deuh reng vang chuan a rawn ti chhuak sep a, a âw chuan kum 4 liam ta ang chiah khan ngaihno a la bei reng. "Sangzual..." a rawn ti nawn leh sep a, a âw chu a tîm deuh dai mai. "Pawimawh a awm em?" ka rilru ang lo takin ka âw chu a dam zek. A ngawi deuh vang vang a, "Ka ngai che" a rawn ti chhuak sep. Tum dang ang kha chu nise inngaihtuah buai lek lovin ka va pan leh ruak ruak mai thei ani ! Mahse ka inthunun thei tawh tlat. Keimahah danglam tlemte la awm mah se inhneh tir ka tum lo.




"Sangzual, ih...i...i lo haw tawh tih ka hria a...chuan, bul tan tha leh ang" engmah ka sawi loh avang chuan bah nak hian a rawn ti a, ka lo thaw chhuak hawk "Sangzual... khawngaih takin..." ngenngawl zet hian a rawn ti leh a. "Numam, hmalam pan rawh" ka lo ti nghet charh thung, ka rilru tak takin ka sawi.



"Engkimah ka thiamlo tih ka hria, mahse i bulah lo chuan ka hlim lo..." a insut faih faih a, a tap tih ka hria. "Kum 4...kum 4 hmalam khan khatiang khan ngaihtuah la chu hetiang hun kan thleng lovang" ka âw chu a nghet cherh chawrh hle, a ngawi reng a "Chelh beh che ka tum a, mahse ka chelh beh zawh loh khawpin i awm a. I duhthlanna ka zah sak ta che a, inchhir lo turin ka chah bawk che kha. Chuvangin tuna i ngaihzawng lakah khan rinawm takin awm la. Hetiang zawng hi chuan min rawn be tawh suh. Hlim taka i awm theih nan tawngtaina lamah ka lo hre reng dawn che ania" ka ti leh charh charh a, a rawn thaw chhuak hliai a, phone chu a titawp zui nghal daih bawk.




Ka mut fel leh hnu chuan thil chi hrang hrang ka ngaihtuah a. Kum 4 liam ta kha ka ngaihtuah tel lo thei lo. Numami chu ngaihzawng neih tak taka ka ngaihzawng hmasa ber a ni. Kan veng thenawm lawk ah an awm a. College kan kal atanga inzui ve tan kan nia. Ka duh em em a, ka hmangaih ve hle pawhin ka hre thin. Kum 3 tal tap ang chu kan inngaizawng ve hman. Ka nupui tur ang hialin ka suangtuah thin a. Mahse BD zir tura ka kal dawn khan chu ka suangtuahna chu a chhe ta vek. BD zir ka tum tih a hriat rual khan zir lo turin min tur ta sek a. Mak pawh ka ti viau, a chhan chu amah hi nula fel tak a ani a, kan college ah pawh E.U ah kan inhmang dun nasa.





A tirah chuan ka rilru a tibuai khawp mai. Mahse Pathian rawngbawl kha ka thlang tlat si. Ka kal hma thla hnih vel la awmah chuan kan inhmu thiam thei ta mang tlat lova. Thla khat la awm velah inthen a duh thu a rawn sawi a, ngaihzawng a neih thu min rawn hriattir bawk. A thanat thlak ka ti kher asin !




"Pastor tha tak i rawn ni dawn nia. I rawn haw hunah chuan pasal ka lo nei tawh ang" chelh beh ka tum khan hetiang hian deuhsawh zetin min rawn ti anih kha ! Chuti na na na chu tiin chelh lui lovin a duhthlanna kha ka zahsak ta anih kha.



A tirah chuan hrehawm ka ti kher asin ! Mahse ka tawngtai tam phah a, Pathian ka belh hnem phah a. Khami khan chakna min pe a. Chak lo tak chunga ka beih hram hramnaah khan Pathianin a chakna rinchhanin kal dan min zirtir a, tun hun hi ka thleng thei chauh ani.




Hun kal tawh chu ngaihtuah duh tawh lovin ka lu ka thing nghut a. Naktuk lama rawngbawlna ka tan hmasak berna tur hmun chu ka ngaihtuah ta daih. Ka tum tak zir chhuak a, rahbi thar ka kai tur chuan min tilawm takzet ani.



Zosangzuala ka ni a, kum 32 ka ni ve der tawh. Mi tawng tam zawk zawk ka ni lo naa nelawm loh lutuk tih tur ang chi kha chu ka nilo in ka hria. Kan unau hi pali kan ni a. Kan upa ber U Mafaka hi a hnathawhna avangin khaw dangah a nupui leh a fapa te pahnih nen an awm a, Bank Manager a ni a, an khawsak a harsa lem lo. Min chhangtu chiah U Hlimi pawh hi pasal neiin a pasalte veng Zarkawtah an awm mek a, fapa kum 4 mi an nei tawh. Ka chhang chiah Matei erawh tar lam fa kan tih ang kha ani a, tunah hian pawl 11 a zir ve mek.



Tunah hian Mission Vengthlangah ka nu leh pa leh Matei te nen chuan kan chengho mek a. Ka pa hi professor pension a ni a, kan lawina Kohhran, Mission Vengthlang Presbyterian Kohhranah hian Upa a ni ve mek bawk. Ka nu chu khawpui nu dang ang bawkin Pangpar hi a atchilh em em a a nimai.





Chhungkaw eizawnna lamah chuan tawngkam mawilo ni lo se kan harsa lutuk lo. Ka pa pension hlawh bakah kan in bulah hian inchhawng pahnih kan sa a, in atan leh dawr atan an luah ve mek.



Hetiang dinhmun kan thlen theihna chu Pathian leh leia kan Pathian kan nu leh pa te vang chauh ani ka ti lo theilo. Tette atangin awmdan tha leh mawi engkim min zirtir a, tawngtaina nen min enkawl tlat a, hetiang dinhmun kan thleng thei hi an zar vek a ni. A bul ber erawh engkim chunga thuneitu, kan nu leh pate tawngtaina chhangtu, malsawmna tinrenga min vur tu Pathian chauh ani.



Zingah chuan ka harh hma ang reng, sana ka en chuan dar 6 pawh a lo la ri lo. Ka inphihfai hnu chuan inhnuai lamah ka chhuk thla a, ka thil zuk hmuh avang chuan ka nui suk.



"I va tho hma awm ve" Matei lehkha lo zir melh melh chu ka zuk ti a. Min rawn hmuh chuan a nui var var, "Test tur kan nei a" a rawn ti a. Thingpui a duh ve em tih ka zawh chuan a duh ve thu a lo sawi vat. Ka nau a ni na vang vanga fakna tur hi ka hre hnem ve ania. Lehkha zir hi a atchilh em em a, school a luh tirh atangin a la topper char char. Unau zinga a tlum ber anih chu thuhran nise tar lam fa a ni a, han pangchang ve viau thin mah se a tul hunah chuan a puitling viau.




"Eng subject nge in test dawn" a ep chiaha thutthlak pah chuan thingpui chu ka pe a, a lo ban vat "English ania, ka thiam sa tho ania mahse ennawn leh loh chuan ka awm thiam lo" a lo ti nang nang a, ka lo nuih suk. "Min thlah ve hman dawn silo va" ka lo tih chuan ngaihtuah ve ni awm tak hian a ngawi vang vang a. "Nakinah kan exam zawh hunah ka lo kal ve dawn aw" a rawn tih chuan ka lo bu nghut nghut.



Ka nu leh pa an rawn tho chhuak a. Matei pawhin a zirlai chu a dahtha sawk sawk a, ka nu eirawngbawl a pui ve nghal vat.



Chaw kan eikham chuan upa ho an lo lut khawm leh tak tak a. Ka bungrua vel ka en fel tur thu sawiin inchung lamah ka chhoh san a, ka nu leh Matei in min lo zui ve vat.



"Rawn zui thlak ve phawt che ka duh tehreng nen Matei te test lai a lo ni bawk sia aw..." ka nu chuan a ti vang vang a. "Ka intifel thei alawm" ka lo ti mai a. "A rang lamin lo zin ve vat kan tum ang" ka nu chuan a rawn ti leh a. "Nakinah muang marin in rawn kal dawn nia, ka zuk inbengbel phawt ang a. Kohhran mi te an fel a, Upa te leh Kohhran Hruaitu thenkhatte nen pawh kan inbe luam tawh a ngaihtuahna tur ka awm lo ania" ka lo ti duah a. "Chuloah ka nutei te an awm tho a, ngaihtuah ka ngailo ania" ka tih leh takah chuan tlem chuan a hmel hmuh pawh a nuam ta deuh. Ka nu leh pate hi fate ngaihtuah pe na chi an ni ve hrim hrim a. No hluakin min enkawl lo mah se puitling takin min duat thiam ka ti mai.



"Taka i nutei zin lai anih dawn kha aw. I thlen tukah chuan khuaah pawh an awm veleh tawh ang , inhmuh a khat sia i tlawh vat dawn nia" a tih leh chuan ka tlawh vat tur thuin ka lo chhang ve mai a.



Inhnuai lama bungrua vel kan zuk inchawi thlak chuan ka thiante ho pawh an lo ri huk huk tawh. Chutia kan inthiar thla min lo hmuh chuan min lo pui sap sap hlawm a. Rei lote chhungin kan in load zo vat mai.



"Arini chu i lo kal ve thei a, a va lawmawm ve" ka nu chuan a lo ti vat a. Arini lam chu ka lo en ve vat, min lo nuih sang a ka lo nuih ve suk. "Kan veng tlangval chhuanvawr te chu kan lo thlah lo phal nang" nui var var chung chuan a rawn ti a. "I pi chu eng nge a an a?" ka lo ti ve vat a. A nuin a lo awmpui thu a sawi chuan ka lo tawngtaipui ve tur thu ka lo hrilh ve luam.




Dar 10:00 a rik meuh chuan chhuak mai thei turin kan inpeih tawh. Tawngtaia Pathian hnena kan inhlan hnu chuan nu ho leh upa ho chuan min chibai liam liam a. Ka thiante pawhin min fuih ve nasa khawp mai.



Ka bungrua vel chu car hnunglamah chuan a khat tha viau. Mahni chauh ka ni bawk a motor dang hmang lovin ka car in ka kal dawn. BD ka zir zawh hlim hlawt a ka pa min lak thar sak a ni a. A tirah chuan ka hnial deuh nangin i rawngbawlna lamah i la tangkai pui dawn a ti tung bawk si a, ka hnial lui ta bik lo. Ka pa chuan Bolero a nei sa tho a, helamah an lo hmang tangkai ve thung ang. Ka bike pawh garrage ah a lo awm ve deuh tlawk tlawk tawh mai ang chu.




Ka tlanchhuah dawn chuan kut an lo vai sap sap a, "Tluang deuhvin kal la, i thlen veleh min rawn biak theihnghilh lo la aw Bawiha" ka nu chuan a rawn ti a. Ka biak vat tur thu ka lo hrilh nghal vat.




Ka tlan chhuah dawn tak tak chuan inthlahrun hmel deuh hian Arini chuan min lo kut a lo vai a, ka lo vai let ve mai bawk a.



Muangchangin ka tum ram lam chu ka pan a. Aizawl khawchhung ka tlanpel ta chu a reh ve ruih mai. Ka papuian min kalpui a tum viau a, mahse a BP sang luhai lai a lo ni a, chuvanga min kalpui ta lo chu a ni.





Dar 2 pelh hretah chuan Lunglei ka thleng a. College kan kallaia ka thianpa hi Lunglei Hospital ah Doctor in a thawk a. Lunglei bulah ka awm dawn tih a hriat khan a thawhna Hospital-a tlawh kawi turin min chah uluk viau a, ka tlawh kawi ve ta pauh aniang chu.



"Aw, i lo thleng tawh em ni?" phone call a lak rual chuan a rawn ti zangkhai vuh a. "Umm... hospital kawtah ka ding tawh" ka tih chuan a rawn chhuah tur thu min hrilh vat.



Car chu ka park tha vat a. Ka phone chu banin ka nu ka call a, rei a ring lo, Lunglei ka thlen tawh thu ka hrilh chuan fimkhur tur leh hmanhmawh lutuk lo turin min chah zui mawlh mawlh a, min ngaihtuah lutuk thin ka tih tawh kha.



"Nu, i kal thei ang tiraw" ka piah lawkah chuan hmeichhe aw zawi sep hi ka hria a. An lam ka va hawi nak chuan Taxi atangin nu pakhat hi a rawn kuah chhuak a. "Nu, i harh em?" a ti leh. A nu chu a zawi hmel hle a, a kuah hneh tha thum lo chu a ni e. A sam sei hniang chuan a hmai a hliah a, a hmel ka hmu theilo "Taxi fare?" taxi chhung atanga mipa âw in a rawn tih chuan thei leh thei lo hian a purse chu a hawng a, a nu chu a kuah deuh tai bawk. Taxi fare an inpek fel hnu chuan taxi chuan a tlansan leh mai a. An chezia chu ngawi rengin ka lo en reng ringawt.




"Nu, damdawiin kan thleng ania" a nu chu a kuah tha sauh sauh a, chiang zetin a hmel chu ka va hmu thei tawh, a mangan hmel angreng viau bawk. Va pan phei mai ka tum chu nurse hovin an lo hmu a, an lo buaipui vat takah chuan ka ding leh rih.



"I lo thleng tluang maw?" ka sir lam chu ka hawi vat a, Sawman ban min lo vai zauh. A lam ka pan phei ve vat a. "Tluang a nimai e" ka lo ti ve sup. Eng eng emawni min zawh luam hnu chuan Hospital ah chuan kan inzui lut a. Ka hnung lam ka hawi hram pek a mahse nichin ami te nufa kha ka hmu leh tawh lo, an inbuaipui fel ta ania nge.




Sawma cabin-ah chuan kan inzui lut a, a hnathawhna chanchin vel a sawi mawlh mawlh a, ka lo zawm ve zeuh zeuh.



"Kha heihi kan nu in 'I thianpa chu pe ve rawh' a ti a" paper bag pakhat hi a rawn lachhuak a. "Engthil nge a?" ka lo tih chuan "Mawza anih kha 'A rawn tlawh kawi dawn che chuan thilpek lo pe ve rawh' a ti tung bawk sia" nui vur vur chung hian a rawn ti a. "A ngailo asin mawle" ka ti nuah nuah a. "I rawngbawlna kawnga kan tawiawmna ve che a nimai" nui suk chunga a rawn tih chuan ka la ve ta hram. "In fate an dam tha maw?" ti a ka zawh chuan "Dam tha mah mah a, a upa zawk hi chu a zia viau a, a nau hi a harh uchuak lutuk a" nui huk huk chung chuan a ti a, ka lo nui ve huk.




Rei awm hman ka nih loh avangin kan inthlah liam leh vat a. Hun remchangah chaw ei ngei tur chuan min sawm hram kha.



Lunglei atangin ka awmna hmun tur chu a hla tawh lem lova, Dar 5 velah chuan khawchhung ah ka inkhalh lut ve ta hram e.



Pastor quarter ah chuan Pastor hovin min lo hmuak laih laih hi a lo nia. Ka chhuk chiah chu min lo chibai sap sap a, harsatna ka tawh leh tawhloh te min lo zawt luam a, ka tluan viau thuin ka lo chhang ve vat.




Kohhran Committee in chawhlui min lo buatsaih sak a, pastor hovin kan kil dawn anih hmel e.



An zavai mai chuan min lo dawngsawng tha em em vek a. Rawngbawlna kawngah pawh kan thawkho tha dawn viauin a hriat e. 'Pu Sangzual' min ti erawh laih a awl viau mai. Tlangval a pumpa 'Pu' tih hming han put nghal ngawt mai chu. Amaherawhchu kan nihna nen a lo hmehbel loh hleih theih si lova ka hrethiam mai zel tho e.




Pro Pastor quarter a awm lem lova , in luah tur min lo buaipui sak vek a. Chaw kan eikham fel hnu chuan chumi lamah chuan kan han inkhalh phei leh a. Biakin atangin a lo hla phian mai.



"Biakin bulah in luah tur pangngai kan hmu mai lova a zialo tak tak" ka zai ngai deuh tak hian Upa Thanga chuan a ti a. "Khatiang lamah chuan harsatna ka nei lo ania, kalna tur a thui leh exer a nimai lawm. Chuloah hei lirthei ka lo keng tho a" ka lo tih takah chuan thaw huai hmel an pu.



Ka inluah tur chu ka duhtawk angreng viau. Mahse mi pakhat chenna atan chuan a zau deuh a ni. Concrete pangngai tak a ni a, a chhawng a ni lem lo, room pahnih a awm a. A zau mah mah deuh chu a ni.



Min intihfel pui turin thalai ho an lo pungkhawm nak nak a. Min rawn chibai sap sap a, min rawn inhmelhriattir zung zung. Pastor leh upa te pawhin min la uap ve reng.




Nula thenkhat chuan thingpui an lum nak nak a. Ka bungbel tur velte pawh an remfel sap sap hlawm mai. Mipa hovin thutthleng velte chu an han rem fel a. An che zung zung a, kan intifel fai hma dawn viau e.




Puih ve ka tum hlawm tak nain min zah der ve tlat a, ka chet an lo phal tlat lo. Upa ho leh KTP Hruaitute nen kan lo titi a ni ber e.



"Taka Masâii te nen sawn in inchhung tak tiraw?" Upa Para chuan a rawn ti hluai a.
"Aw, ka nutei ania, ka nu nau" ka lo tih chuan a bu nghut nghut a. "An zin pawh naktukah lo haw an tumin ka hria" Ziran a rawn tih veleh chuan naktuka an lo haw tur thu chu ka hriat thu ka lo sawi ve vat a. "I chhungkhat laina te an lo awm ve hlauh chu a tihzia khawp mai. I khua a har ruk ruk bik lo turah ngai ang" an rawn tih leh chuan ka lo nui ve suk suk.




Chutia kan titi deuh laih laih lai chuan kawngka lam ka va melh a, ka mi hmuh avang chuan ka phawk deuh hman hle. Vawiina ka hmuh nu kha a ni chiang lutuk. A sam sei hniang dan atang ringawt pawh sawn ka hailo, a hmai chu a no deuh chek a, hmelchhia ti a sawitur chu a ni mawlh lo. Nula pakhat nen an rawn inzui lut a.



"Sawmtluang, i lo kal ve hman maw" ka bula thuin a tih chuan ka hawisawn vat. "Aw, hei Zuali pawh ka lo hruai" Sawmtluangi a tih nu chuan a ti vat a. A hming chu Zuali tihna a nimaw.



Ka ngaihbel nge ka hrelo, Zuali an hmuh chiah chuan thingpui lum nulate chu an phun deuh sar sar hian ka hre pek anih chu.



"Hei, kan pro pastor tur chu anih hi han chibai ve ula" Ziran a tih leh takah chuan Sawmtluangi chuan nui var var chung hian min rawn chibai a. A hnung ami pawh chuan lo zui vein kimki deuh tak hian min rawn chibai, a kut chu a no hrep lehnghal.



"In lo va tifel nasa tawh awm ve" Sawmtluangi chuan a ti leh zung zung a. "Saw, i naute ho saw va buaipui rawh" nui huk huk chung chuan upa ho chuan an lo ti veleh a, a ner deuh nang nang. Nula senior lampang a nih dawn hi tiin ka ngaihruat thiam ruak ruak.



"Zuali lo kal rawh va phei ve ang" a ti leh zung zung a, a hnung ami chuan nui var var chungin a zui ve vat.



Zuali chuan hmunphiah chu a hum vang a, an phiat mawlh mawlh a. Kei lah ta pek chuan eng ka hria nimaw ka lo en leh vung vung thin.



Kawngka lamah chuan thawm a rawn ri leh deuh laih a, "In lo va thahnem tawh ve" hmeichhe pakhat hian a rawn ti hluai a. "I va rawn kal har ve" tlangval ho chuan an lo fiam nak nak. "Nula hi chu kan buai alawm" nui hak hak chung chuan a ti a. Tlangval ho pawh chuan an nuih tawp.



"Mafel, helamah lo phei ve rawh" Sawmtluangi chuan a lo ti zung zung a. I he lovin Mafeli a tih nu pawh chuan a va pan ve mai bawk a.



Ka phone phawrh mai ka tum chu ka lo ak miah lo. Car ah ka theihnghilh tih ka hre zawm zat a. Ka thutpuite chu hrilhin ka va chhuak a, a thim deuh avangin ka ban fu mai thei lo. Car chu hawngin ka lut ta tawp a, ka ban fu ta hram.



Inchhunga luh leh mai ka tum chu veranda thlang lam hawia nula pahnih titi ka hriat avang chuan ka ding leh rih.


"Aaa... Hmangaihzuali hi chu a zaklo reuh ka ti. Nungchang that hmel deuh hian a awm a, a nu vang pawh hian zaka inkiltawih ngawih ngawih tur ania"
"Ni chiah e, Shillong ah pawh khan lehkha a zuk zir hi ka ringlo reng reng"
"A zuk tal hiar viau mai thei asin. A hmel a lo chhe si lova mipa a tilawm thiam phian ang"
"An ni ang hian alawm maw KTP hming tibal" pakhat zawk hawina lam chu ka hawi ve vat a, Zuali chungchang chu a ni an sawi ni.




Ngaithla zawm duh lovin inchhungah chuan ka lut ta daih, eng ka hria ni maw hmeichhia ka vawikhat hmuhna mai maiin min tihbuai viau ni.



"I va hmu maw?" Zira chuan a lo ti vat a. "Hmu e" thutthlak pah chuan ka ti sup. "Zuali hi chu a fel mawle aw...Pathiana rinna a nghat ngam lutuk te hi a chhuanawm" an rawn tih chuan ka lo bengkhawm leh hle tawh.
"A dinhmunah hian mi tam tak chu ding se an beidawng hle tawh ang"
"Aizawl lamah a nî te pawhin awm turin an rawn be fo a, a nu vang hian a lo hnial tlat zel an tia sin, an thenawmnu sawi ania"
"Nakinah chuan Pathianin hna a la thawk em em ang" ngawi rengin an titi chu ka lo ngaithla ve a. Ka mitmeng erawh choka lama hmunphiat mek chungah a fu kar thung.



Mi pakhat chanchin ringawt pawh ka hriat dan chu inang lo fia fia tak a ni.


____*____*_____*_____*_____


(In beisei a phalo viau em?😅)

In khua / veng Pro Pastor/ Pastor te kha eng nge an an le??🙊🙊🙈🙉



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 2:58 pm

Chapter - 2



Dar 9 a rik dawn chuan kan inrem fel thuak tawh. Thingpui te in hovin kan titi laih laih a. Thalaiho awm khawm chu an thawm pawh a tha khawp mai.



"Kha...tlangval thalai i la ni bawk a. KTP ho rawngbawlna lamah pawh inthlahrung miah lovin inrawlh chikim viau la kan duh ania. Nangin i ho theih chuan an phui sui ve sawt ang chu" upa Thanga chuan a ti a. "Ni e, karleh lam atangin hla zir kan tan dawn a. Chutah pawh chuan min rawn ho nghal tak la a tha ang. Thingtlang lamah hi chuan indaih loh a na ve riau a" Zira pawh chuan a rawn ti ve dap dap a ka lo bu nghut nghut.



Sawmtluangi chuan kan thingpui in no vel chu a rawn sengkhawm zung zung a. "Khawnge Zuali kha?" ka bula thu chuan a lo ti a. "A nu kha vawiin lamah a buai leh deuh a, a ngaihtuah ve sia a haw ta anih kha" a lo ti mai a. Ka hawikual chuan a lo awm tawh miah lo tih ka hrechhuak chiah.




"E...chu a va zialo ve"
"Nia, vawiin lamah pawh damdawiin ah an kal a. Drip vel an lo khai sak a, a zia ta phian sia an rawn haw leh nghal a. An ina ka zuk sawm pawh khan a nu chu a lo tha phian tawh" a ti leh zung zung a, silhmun lam a pan zui nghal. Mak tak maiin hriatchian chakna ka nei tlat pek anih chu!



Kan intihfel zawh hnu chuan tawngtaina te hmangin min thlah liam a. Ka mut hma chuan ka chhungte ka bia a. Anni pawhin min rawn fuih nasa khawp mai.


Ka mut fel hnu chuan WhatsApp ah ka lut a. Group chi hrang hrangah min lo add nghal. Helai tualchhung Kohhran group ah te, KTP group velah leh Kohhran Committee group tih ang reng velah te a ni.



KTP group-ah chuan ka lut a. An ri deuh laih laih a, zanin lama an chet tlatna thlalak vel an rawn post. Ka lo enkual ve thuak thuak a, ka mit la deuhtu ka hmu chawt mai. Sawmtluangi leh Zuali hmunphiat lai a ni a, nui chungin an inen a, Zuali nui hmel mawlh mai chuan ka mit zu la tlat pek a mawle.




Kawrfual a khup khuh deuh hnak hi a ha a, a nghawngah silver thi sîn te a awrh a, a sam chu a sei hniang a, a hnawkpui hauh si lo. Make up engmah a inbel lo tih a hmel atang chuan a hriat theih. Nu lian ti-a sawi tur ni em em lo mah se tê chhe zawk zawk chu a nilo, 5.4 vel chu anih ka ring. A hmêl mawlh mai chu, a tha reuh thlawt ani. A hmeichhia ngawih ngawih ka ti mai. Ka lu chu ka thing deuh nghut. Eng nge maw ka lo en chîk viau ni?!




*Kan Pro Pastor Pu Zosangzuala ka lo add e. Kan lo welcome em em che aw* KTP leader Zira chuan a rawn ti a, midang ho pawh chuan min lo 'welcome' sap sap a, lawmthu ka sawi ve luam. Ka tla tlum ve dawn khawpin a hriat e.



Zingah chuan ka nu chawhmeh min kentir ho chu Fridge atangin ka lachhuak a. A lo pack hnem phian lehnghal. Mahni chauha awm nih bawk si chuan eirawng inbawl chawp a ngai dawn. Kan tleirawl chhuah tirhin ka nu leh pa te hian engkim min tihtir a. Mipa leh hmeichhe hna bik an bithliah ngai lem lova chuvangin eirawngbawl pawh ka thiam ve viau, ka huphurh lem lo. Ka nu leh pate hian an fate chhawr tlak lohva kan chhuah hi an hlau ber a tih theih ang.




Bathroom atanga ka chhuah chuan ka phone a lo ri ral ral a, pastor a lo ni. Chaw ei turin min rawn sawm a, ka hnial deuh nain 'Mahni chauhvin i awm a, nimin lamah i lo thleng chauh si. Tukin chu rawn ei mai rawh, kan nu pawhin a bawl kep vek tawh che ania' a rawn ti deuh tung a, eirawng ka la bawl chuang lo bawka ka hnial lui ta bik lo, dar 8:30 vela ka va thlen hman chuan a tawk viau a tih kha maw.




Ka inthlak a, T shirt dum dak zarh leh jogger pants pangngai tak ka ha a, sneakers ka bun leh tawp. A la hma tho bawk a, thenawm khawvengte ina dah luh pahin pastor te in lam chu ka va pan ang.





Thingtlang khua a ni tak na a, Model Village ni pha chin an ni a. Census hnuhnung berah chuan in sangkhat vel ding tawh anga chhut a ni. Kohhran hrang hrang a ding ve thluah a. Baptist, UPC, Seventh Day leh IKK te an awm. Presbyterian Kohhran bik hi pahnih a ding tawh a. Vengthar lam hi bial neitu an ni a, Dawrkawn vêng pawh an indanna in kum 10 hmel a hmu tawh. Chhim lam tih takah Baptist Kohhran chu an thahnem ber.




Mi inah chuan ka lut chhuak zut a, min lo lawm thiam hlawm ngang mai. Kan Kohhran ni lem lote pawhin min lo chibai ve sap sap a. Kawng laka ka tawhte pawh chuan min lo be ve leh nawlh thin. Thingpui pawh ka lem ngun malh malh e.



An khaw dawhthlêng a rem em em a, a thengthaw nuam viau bawk.



"E...kan pro pastor chu khawnge i kal dawn a?" dawr pakhat atang hian hmeichhe aw hian min rawn au a, ka va hawi nak chuan Sawmtluangi kha a lo ni. Ka va pan hnai ve vat a, "Pastor quarter lama kal pahin thenawm khawveng te ka tlawh kual e ka tia" ka lo ti ve sup a. "Hawh, kan inah sawn rawn lut ve reng reng rawh ka chhungte pawhin an hmu ve duh ang che" dawr bul maia an in ding chu min mitmei a, ka zui ve mai bawk.




A chhungte chu an lo phul deuh hlut a. "Kan pro pastor chu a palian lutuk an ti mai a, i lo lian tak em anih hi" nui hawk hawk pah chuan Sawmtluangi nu chuan a lo ti hluai a, an nui deuh dar dar. "Thingpui in rawh aw" an monu in a rawn tih ve chuan ka lo hnial vat, ka lem hnem malh malh tawh emai.




An pa ber nen chuan kan titi ve luam a, Kohhranah pavalai pawl hruaitu a lo ni a, a nelawm hmel viau bawk e.



"Nu Rinkim, alu ka van lei duh ve..." an kawngka bul atang chuan hmeichhe âw hian a rawn ti a. Sitting room lama thu ka nih avangin tunge ka hmu theilo. "E ...taka dâwr ka rawn kalsan daih alawm" Sawmtluangi chu a tho vat a. "Zualte, lo awm rawh i û Sawmtluangi a lo kal dawn" Pi Rinkimi chuan kawngka lam hawi pah chuan a ti vat a, a hming lam rik chuan ka beng a lo verh leh viau tawh.



"Kan in bula dawr lo awm saw kan dawr ve ania. Mamawh i neih chuan lo lam pawp pawp rawh aw, kan inhlat lem lo bawk a" Pi Rinkimi chuan chokaa behlawi then pah chuan a rawn ti zung zung a ka lo bu ve nghut nghut.



Rei vak lovah pawn lam atangin thawm a rawn awm leh a. "Nû, Zualtei chu behlawi hnah chu hawn tir nghal mai la" Sawmtluangi chuan a rawn ti lang lang a. "E , a remchang nghal tak ang lo pengkawi sela" a behlawi then lai chu dahin a tho a, fridge ah chuan behlawi tel khat hi a rawn la chhuak a, dawhkanah dahin a thiltih lai chu a tihzawm leh mawlh mawlh a. Pu Rinmawia titi pawh chu ka ngaihtuah tawh lo reng reng.



Sawmtluangi leh Zuali chu an rawn inzui lut a. "Kha hei heta hi ka dah aw" Pi Rinkimi chuan dawhkana a behlawi tel dah chhuah sa chu a lo kawhhmuh vat. "A va tam awm" a ti hluai a. "Zuk ei teuh mai rawh u" Sawmtluangi chuan nui hak hak pah chuan a lo ti a. "Kan va lawm thin tak" a ti sep a, behlawi chu a la ve mai a.




"Zualte, i nu chu eng nge a an tawh a" ka bula thuin a lo tih chuan kan lam a rawn hawi ve ta chiah. Chiang zet hian ka lo melh a, min bengkhawn ve awm pawhin a lang lo "A tha rih viau e" a ti mai a. "A tihzia hlauh chu, harsatna in neih chuan min rawn pawt buai hreh su aw" Pu Rinmawia chuan a ti leh dap dap a, "Nei tawhlo turah ngai ang, min buaipui nasa tawk tawh alawm" a rawn tilet ve hliai a. "Kan tih ve theih tawk ania lawm, kawmthlang lawkah in awm bawk a, engmah inthlahrunna tur a awm lo ania" ka bula mi chuan a lo ti leh a, pakhatnu pawh a bu ve nghat nghat. An inbiak dan atang chuan thenawm hnai vai inpawh tak an nih hmel.





"Nizana i lo kalpui kha em ni?" Zuali chhuah hnu chuan Sawmtluangi bulah chuan ka ti a. "Aw, anih kha. A nu a dam sam meuh lova" a lo ti tha ve mai a.




"Zû hi chu thalo deuh mai asin, a fanu vang tal pawh hian sim a hun tawh mawle..." Sawmtluangi chuan a nu tawnglai chu mitmeiin a lo khap vat. Eng tak chu ni ang maw...Pu Rinmawia chuan titi dang a rawn vawrh daih a, kan sawi zui tawh lo.



"Ka va phei phawt ange" ka ding hluai a. Tawngkain min han chelh ve ngial a, hmun danga chawei turte ka la nih avangin min chelh lui ta bik lo. "Nidangah chawhlui te pawh min la rawn kilpui ve ang chu" pa ber chuan a ti leh dap dap a, an kawngka thleng min zui chhuak.




Sawmtluangi te in atanga ka chhuah meuh chuan dar 8:30 a lo ri tep tawh. Tawi khawmuang tawh lovin pastor te in lam chu ka pan a. Ka va thlen chuan an lo ri deuh chul mai. Fanu pahnih leh fapa pakhat an nei a. An chhang a zing a, harh rual lek an la ni vek bawk nen an chhangchhe ve hle.




"Thenawmte inah ka kal kual pah a, ka rawn tlai ta deuh" thupha ka chawi ve luam a. "Tlai hlei nem, chawei hma chu ril a tam leh hma mai mai" an nu chuan a lo ti ve sawk sawk a.



Ka thlen hnu rei vak lovah chaw kan ei nghal. Vawksa leh bawngsa min lo hmehpui a, bai leh antlak a siam deuh nual bawk. "Sa i ei vak nange" Pastor in a rawn tih chuan han chhan mai dan tur ka hrelo. Sa hi ei lo tawp chu ka nilo a, mahse ka ngaina chiam lo, ei lo tawp pawhin ka awm thei. "Ei ve tho e. Mahse chutiangin ka ngaina chiam lova" ka lo ti mai a. "Aww chuti tih hriat a alu vel lo siam tel tur ania a va zialo tak" an nu chuan inthlahrung deuh tak hian a lo ti nang nang a. "Hei chawhmeh dang a tam alawm ka eitui lutuk ania" ka lo ti ve vat.




BD kan zirlaia kan lecturer pakhat chuan 'Mi hrang hrang in chawei ah min sawm thut thut thei a. Rawngbawlna kawngah chuan chawhmeh ei duh loh neihte hi a buaithlak ania. Min duhsaktute tih hnual a hlauhawm' tiin a sawi thin. Chuvang chuan keipawh ka insiam rem ve nasa a, Mizo chawhmeh ang zawng zawng hi chu ka ei ve thei mai zel.




Tukthuan kan eizawh hnu chuan Pastor chuan helai Kohhran inrelbawl dan velte chu min hrilh luam a.



"Kum khat tha zen zawn chu kan lo awm ve tawh a. I rin ai daihin nuam i ti ang. Khawpui lama awm ai chuan nuam ka ti zawk mah tawh ania. Kohhran mipuite an inpawh a, rawngbawlna kawngah lah mi an hrethiam em em a, rawngbawl pui an nuam ania" a ti dap dap a. Ka lo bu nghut nghut.



Upa pali leh tual upa pahnih an nei a. Kohhran member danzawh kim 600 vel an awm a, naupang lam pawh an thahnem ve viau. Dawrkawn veng lam chanchin pawh min hrilh ve luam a. Vengthar lam hi bial neitu an nih miau avangin Vengthar lam chu kan lawina tur a tih theih ang chu.



"An nulate pawh belhchian an dawl fu ania" a thusawi tawp lamah chuan uang deuh tak hian a rawn ti a, ka lo nui hawk. "Ngaihzawng i nei sa lo turah ka ngai ngawt a" a rawn ti leh a, za lo zetin ka lo nui leh tawp. An nu rawn phei veleh chuan ka tlangval chang chawiin nupui neih lam ngawt min sawipui a, ka nui ka nui ve mai. An nelawm nupa viau e.



Motor ka ken loh avangin Pastor chuan a motor in min thlah haw a. Inti puithu khup ang chi kha anih loh hmel a, min kaihruai hneh viau dawnin a hriat e.



Nizan lama ka thuamhnaw la remthat loh ho chu wardrobe ah chuan ka remkhawm mawlh mawlh a. Ka phone a rawn ri a, caller ID ka en chuan Nutei a lo ni.



"Hello"
"Au Sangzual" Nutei te fa naupang ber Gracy chu a rawn khek raih mai. Ka lo nui hawk, ka nutei fate ro rovah pawh Gracy hi chuan min ngaina fal bik a. Ka nu leh pate pawhin an duat, kan inah pawh a rawn zin ngun malh malh viau. Matei aiin kum 5 in a upa a, mahse an inkawm thei viau tho, fa tlum ber ni ta fam chu a pangchan vang te pawh ania nge.



"Kan lo haw tawh ania" a rawn ti lang lang lang a. Vawiin hi an rawn haw ni tura an sawi kha a ni tak e. "In lo thleng tawh ami?" ka tih chuan an thlen chiah thu a rawn sawi a. Nakina ka len vat tur thu ka hrilh chuan a phur ngang mai.



Dar 10:30 hian Kohhran Committee a awm dawn a, chumi pah chuan ka pengkawi mai aniang chu.



Kamisz pawl tak deuh ngak chu ka inbel a, necktie dum plain ka awrh a, smartpants hain smart shoe ka nawh tlet sar chu ka bun leh a. Matei chuan min hmu se 'I tawrhhlelhawm hmel' min ti leh chiam tawh ang. Ka ngaihtuahna avang chuan ka nui huk. Hetia smart deuh thlupa ka inchei hian i lang pa, i tawrhhlelhawm, i chhelo a ti deuh mawlh mawlh thin a, ka nuihpui mai zel.




Zirna vangin in lamah ka awm tam lova, ka graduate zo chiah a BD zirin phaiah ka awm leh deuh vang vang bawk si a. Chhungte bulah ka tal tam hman viau lo, mahse chhungkaw hlutna erawh ka hrechiang viau thung.




Car chu ka lachhuak a, ka tlanchhuah hma chuan Gracy chu ama phone ah ka be leh rih, an inkawta lo ding turin ka chah, an in awmna ka la hre miau lova. Tunlaiah mahni buai buaiin kan buai tawh a, chhiatni thatni ah lo chuan kar hla chhungte nen pawh a intlawh pawh mai mai hman tawh loh. Chutiang chiah chuan keipawh ka nutei pasal neihna khua mah ni se tun hi ka vawikhat kalna ani a. Ka nu leh pa chu vawihnih thum vel an zin ve tawh. Hetah ka awm dawn tih ka nutein a hriat khan a phur ngang mai a, keipawh an lo awm ve hlauh tur chu ka thlamuanpui viau.




Kawngkai laia Gracy lo ding ka va hmuh chuan car chu ka tiding a. Min hmu chiah chu a khek chul mai, naupangchhia ni nghal loh chuan.


Inchhunga kan inzui luh chuan Nutei pasal Pa Zaia chuan min lo be nghal bawrh bawrh a. "Mâsai, Sangzuala a lo kal tawh ania" room lam hawi chuan Nutei chu a au zui a.




Ka nutei chu a rawn chhuak vat a, a rawn phul ve hlut mai. Kawmthlang lama Rema leng chu an ko haw a, kan han inhmu tlang thei chu nuam kan ti ve hlawm khawp mai. Ka nutei te hian fa pathum an nei a, a upa ber hmeichhia hian Lungleiah pasal a nei tawh a. Rema leh Gracy an la awm. Kei aiin an naupang vek a, inhmu tam lo mah ila min û chei ve viau.





Rei tawi khawmuang hman ka nih loh avangin ka chhuahsan leh vat a. Zanriah ei turin min chah hram a, KTP inkhawm zan a ni bawk a eirawng inbawl chawp ai chuan tiin ka hnial ta lo.




Kohhran Committee chu rinai takin kan bang hma a. Thingpuite kan inzawh hnu chuan ka inluah lamah ka let leh a. Ka inthlak fel zung zung a, khumah thua ka phone ka phawrh chuan message ka lo dawng nual.




*Kan pro pastor chhuanvawr chu a induh nghal hle mai a* Arini atangin a ni. Pangngai tak chuan ka chhang a, a rawn online nghal. Ka message chu a seen rang ngang mai. Thu hotete a rawn sawi a, ka lo nuihpui ve zel mai. Pangngai tak takin ka chhang let a, ka Nutei te ina chawei tur ka nih avangin chhuah leh vat ka ngai si a, kan inbiakna titawp hmasa tu ah ka tang.




Ka nutei te in lamah ka inkhalh chhuak leh a. Ka va thlen chuan an lo awm kim thap. Nutein eirawng a bawl a, Reman a pui bawk a, Gracy erawhin min ngheng deuh chawt. Ka nu te a han video call leh rih a, "Hetah kan lo char bet tawh dawn" Gracy chuan a ti lang lang a, ka nu leh Matei chu an nui nasa mai.



Zan lam inkhawm ngai kan nih avangin chaw chu kan ei har lo. Kan eikham hnu chuan rei thu khawmuang tawh lovin ka haw a, Gracy in inkhawm tur chuan min lo sawm kawi rawh a ti bawk.



KTP OB te nen chuan Upa ho thutna dawhsan lamah kan thu a. Kan zai lai chuan Biakin kawngka lama rawn lut mek chuan ka mit a lo la leh hman tawh. Kawr bantlawn a nghawng V smart zet a ha a, puan plain grey colour a bih bawk, hand bag a keng a, a sam sei hniang chu a thlah mawl tawp a, Sawmtluangi nen tlar li naah chuan an rawn thu dun.



Chairman in ka hming a rawn lam a, min dintir te chuan ka va mitmei deuh a, a hmelah engmah danglamna ka hmu lo. Eng a! Eng danglamna nge hmuh ka inbeisei ngawt ni? Hmelhriat loh hnen atang lehnghalin.



Inkhawm ban chuan Food Friday a rem tur hla zir turin an inruahman a. 'Tumah haw lovin zir tlang law law mai ang u aw' Hruaitu thenkhat ho chu an au laih laih. Mipa thenkhatin zial an pak khu hlat hlat a, nula thenkhatin an phone an hmet malh malh bawk. A then an titi laih laih bawk a. 'La haw bik suh aw' Zira chuan min tih deuh tlat avangin haw ka tum bik lo.



Zunin atang chuan Sawmtluangi leh Zuali chu an rawn inzui chhuak a, an nui ri deuh hak hak. Eng emaw sawi hian an phun sar sar a, kan awmna a inhlat avangin an tawngri ka hre theilo.




Biakin chhungah chuan kan lut leh thap tawh a. Zir tak tak hmain Zira chuan tawngtai turin min sawm a. Ka tawngtai zawh chuan Conductor in a kaihruai a. "Kan thiam sa deuh tho ani bawk a track nen sa nghal chhin ang u aw. Kan pro pastor hian min lo ngaithla sela, kan zai zawhah fak selna min lo neihsak dawn nia" zangkhai zet hian a ti a, ka lo bu ve nghut nghut.




Zaipawl member an thahnem vak loh nen an âw a rual tha a, rinai takin an thei. Tlar hmasa ber dawttua zai ve al al nu chuan ka mit a la leh tlat pek tawh. Eng nge maw ka hriat ni.




He khuaa ka awm atangin karkhat a liam ve der tawh. Khaw miten min duhsak ve em em a. Ka tlangnel ve viau tawh mai.



Ka lo tum lawk tawh angin vawiin chu Lunglei lamah ka kal ang. Hun remchang ka neih veleh Orphanage Home tlawh ka tum a, vawiin ni hi ka awl tum tak a lo ni bawk nen a remchang hlein ka hria. An hotunu pawh ka hrilh lawk vek tawh.




Ka nu leh pate hian kan tetlaiin Orphanage Home ah min kalpui nasa thin a. Kumtin kan tlawh thin. Thilpekte semin hun kan hmang thin a, a hunlai khan hrethiam chiah lo mah ila tun hnu hian ka ngaihlu a. Nu leh pa neih hlut zia ka hrechiang a. A nei ve lote hi ka lainat tak meuh meuh. Chuvangin ka tih theih sang ber tiin ka puitlin hnu pawh hian ka tlawh fo a, BD kan zir lai pawh khan ka awmna hnaivai a Orphanage Home ka tlawh mai thin.




Naupangho chu tualah an lo infiam a, baloon te an beng a, a then an inûm a. An hlim nui ri chuan ka kawchhung a fan hialin ka hria.



"Ehe...Pu Sangzual i lo thlenna a rei tawh em?" hmeichhe naupang tlu khut ka kaihthawh lai chuan Home hotunu nuvalai tak chuan a rawn ti a. Ka thlen deuh chiah thuin ka lo chhang.



Inchhung lamah chuan kan inzui lut a, tlangval pahnihin ka thil ken ho chu min lo khai luh pui bawk.



"Ka rawn hmuhtirh che khan ka hrelo tep che alawm" nui chungin a rawn ti a, ka lo nui ve suk. An naupangte chanchin chu min hrilh malh malh a, uluk zetin ka lo ngaithla.



Pawn lama kan inzui chhuah chuan naupang ri nak nak karah chuan tap deuh faih faih thawm hi ka hria a.



"Tap tawh suh le, i na kha vanah a kai daih tawh ania" thingkung buk laih hnuaiah chuan hmeichhe pakhat hian naupang pakhat a lo thlem mawlh mawlh a, a kut leh kawr chu a ben fai sak mawlh mawlh bawk. Min hnungchhawn zawnga awm anih avangin hmeichhia chu ka hmu theilo, mahse a pian zia leh a âw atang chuan ka hriat hnu ang ka ti.



"Zuali tê saw a fel teh ania...thla thum danah a lo kal thin a, chu aia rawn kal zin deuh chang pawh a nei. A hmel lah hi a tha reuh sia, a nu leh pate an fakawm ngawt mai hetiang fanu fel an nei thei hi" ka bul ami chuan a rawn ti a, thingbuk hnuaia hmeichhe hmel chu ka va hmu ta chiah bawk. Mak ka ti kher asin ! Amah kha a ni.




Kawrfual plain hmuhnuam zet hi a inbel a, a sam chu a bawk tawm a, sandals a bun bawk. Hmeichhe naupang chu a pawmkang nawlh a, nichina tap deuh fap fap kha a nui leh hak hak tawh.



Kan lam a rawn hawi chuan min hmu thut chu mak a ti ve hle tih a hmelah chuan ka hmu thei.


An lam pan chuan kan va kal a. Ngawi rengin min lo en tawp. "Au Zualin a pawm che elaw?" ka bul ami chuan naupang chu a chhawn chhaih vat a. Zuali chuan a mit lasawnin a naupang pawmlai chu a nuih var var a.



"Ka hmu thut che a" ka tih chuan a rawn hawi vat a. Za lo zet hian a nui a, "Nia" a ti hul hak ringawt.



"In inhria elaw" Home hotunu in a rawn tih chuan Zuali chuan an khaw Pro Pastor ka nih thuin a lo chhang vat a. "Anih tak chu mawle...nidangah chuan rawn inthurual tawh ula a remchang dawn nih chu" Home hotunu chuan a ti leh zung zung a, pakhatnu chu a nui tawi tak tak ringawt.



Hotunu chuan "Tikhan lo awm ru aw" tiin min kalsan a. Zuali chuan naupang chu a chhaih nui iar iar a, an hmuhnawm dun zek lehnghal.


An bulah chuan ka zuk thu thla ve a, min ngaihsak awm ang pawhin a awm chuang lo. Naupang chu a pawmna atang chuan a tal pit ta daih a, a thiante awmna lamah a tlanphei ter ter.



"I kal thin ami?" naupang infiam a thlir lai chuan ka lo ti sup.
Ka lam a rawn hawi a,
"A chang changin"
"Engin nge i kal thin a?"
"Sumo-in"
"Engtikah nge i haw dawn?"
"Nakin deuhvah"
A tawi tha thei teu teu khawp mai. Hmalam a melh deuh vang vang chu ka en reng a, min rawn melh leh zauh thin. Ka hawisawn duh bawk si lo chu chiang zetin min rawn en ta a, ka nui suk a, a khi ve sak, a lai deuh bawkin ka hria.




"I nu chu a dam tawh em?" mak tih hmel deuh tak hian min rawn melh a "A damlo khan ka hria a" ka tih takah chuan a dam that tawh thuin min lo chhang ve mai a.



"Lo dam zel rawh se tawngtaina lamah ka lo hre ve reng dawn nia" ka tih chuan "Ka lawm e" a rawn ti sep.



Sawi tur kan hrelo dun ve ngang ania nge kan ngawi dun leh rauh rauh a. Ka hriat loh laiin ka lo thlir leh reng thin.



Gate bulah chuan car pakhat a rawn ding thi duk a, ka thutpuinu chu a tho nghal tharh. Car atang chuan mi pakhat hi a rawn chhuak a, a palian ve pangngai, mahse kei ai chuan a lianin ka ringlo. Jeans kekawr leh kawr a ha a, a chalah band aid a inbel kalh bawk. A ban a rawn vai zauh a, Zuali chuan a lo vai let vat.



Gate lam pan chuan a kal a, hrechhuak thut ni awm tak hian a rawn hawi let a, lai zetin a ban a rawn vai a, nui suk chungin ka lo vai let zauh.



Eng ang hmeichhia chiah nge maw a nih reuh le? Ka ngaihtuahna ah chuan thil khawlo zet a rawn lut. Mi tam tak sawi ang hian a lo tal hiar ru zek emawni. Mahse chutianga ngaih tur em chuan a mizia nen inmilin ka hre hlawl silo.



Engvanga a chungchang ngaihven em em nge ka nih pawh hi ka inhrethiam tawh lo.



Ka phone rawn ri ral ral chuan ka ngaihtuahna atangin min hruai chhuak chiang kher mai.



"Aw, nu"
"Û keimah" Matei chuan a rawn ti zang vah a. "Exam kan zo tawh a, lo zin ka châk a. U Gracy te pawh ka hmu châk a. Chuloah vawikhat mah ka la rawn zin ve si lova lo zin ve ka duh" ka chhân hma chuan a rawn tih zawm leh zung zung a.
"Ka pa te i hrilh tawh em?"
"Aw, a hma pawhin ka dil tawh kha. An phal chu ka ring tho a, nangman min sawitel sak la" a rawn tih leh chuan ka lo biak tur thu chu ka hrilh a, a phur ngang mai. Mahni chauhva awm deuh ruk ruk ai chuan an exam chawlh chhungte chu lo awm ve rih se a nuam zawkin ka ring.




In lama ka haw hnu chuan eirawng ka inbawl a, chawhmeh vak siam pawh ka tumlo. Chi hnih chi thum vel a awm chuan ka duhtawk viau.



Chaw ka eikham thleng ka sil zo chiah tihah chuan pawn lamah hmeichhe âng thâwn ka hria a. Thenawmte chhungkaw inkhak thawm emaw tiin a tirah chuan ka bengkhawm chiam lova, mahse an thâwm a ring tial tial a, rûk rûk chungchang vel an sawi deuhva ka hriat avang chuan ka tho chhuak ve ta vut.



Pawn lamah chuan an lo dingkhawm laih laih a, street light a eng tawk lo nen tunge an nih pawh ka va hmu thei hlawm lo.



"Nu Fak, i hresual aniang" zawi raih hian hmeichhe pakhat hian a ti a. "I nu tan chu tum hlek lo mai rawh. A zah pawh i zak lawm ni?" pakhatnu chu a vîn tha thak thak khawp mai. "Chutiang zawngin ka sawilo. Ka nu hian rûk a ru ngailo" nghet charh hian pakhat zawk chuan a ti veleh a. "Mi hnial lo mai rawh aw. I zak chai nange, nangpawh hi i nû siar i nû siar. Lepchiah taka nun hi sim nufa teh u" a tawng hlawk ka lo ti khawp mai.



An lo awmkhawm laih laihna lam chu ka va pan hnai a, nu pakhat hi leiah a lo thu hnawk niai a, zu rim a nam deuh huam bawk. Hmeichhe pakhat hian a lo chelh bet a. Pakhatnu lah chuan a lo la ânkhum hlawk hlawk mai bawk si.



"Eng thil nge a?" dam dapa ka va tih chuan an lo hawi vat hlawm a. Midangho chuan thil awmzia min lo hrilh vat. "Pi Faki hian Zuali nu hi a pawisa rû ah a puh a" an rawn tih chuan leia lo thu hnawk niai te lam chu ka hawi vat a. Zuali chuan min lo melh ve chiah bawk !


______*______*______*_______*______

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 2:59 pm

Chapter 3


"Ka puh satliah hlei nem, amah bak la tur an awm lo" Pi Faki chuan a rawn ti leh hlawk hlawk a, midangho chuan bengdaih tum tak hian a hnungah an lo beng thuk thuk a. Zuali chuan anu tlusawp deuh nuai chu a buaipui a, midangho lah chuan pui ta nge tilo chuan an en deuh tawp hlawm.



"In mak nufa emai, in hnawksak sa tawh nen thil ruk kher hi chu chîng suh. Nutling pui zurui buai reng rengin i khawsa a, fanu pangngai neih ngaihna pawh awmlo" a ti leh hlawih hlawih a. "Zualte, i nu kha haw pui phawt rawh, khua var sela harhfimin sawi rawh u" patling pakhat chuan a ti dap dap a. An chezia chu ka lo en ve reng.




"Nu...i kal thei em? Kan haw dawn nia" a nu chu kaihthawh a tum a, tlangval pahnihin an lo buaipui ve vat. "Engtin nge ka pawisa a ruk kha ni ang a" pi Faki chuan a ti viak leh thawt, nu nasa tak chu a ni ve ang ka ring.




"Engzat nge?" fiah tha kelh kawlh hian Zuali chuan a ti a, a melh kalh bawk. "Cheng 2000 lai asin" a ti chang deuh rât a. "Ka nu hi ka haw pui phawt ang a, ka rawn pe ang che" a ti nghet charh. Mahse pakhatnu ngaihdan a lo ni leh awzawng lo mai. "A neih pawh in nei dawn mi? A zu ruih nan a hman ral vek tawh kha" a ti chiam a, a nasat thlak ka lo ti khawp mai.




"Lo nghak rawh" pi Faki lam hawi pah chuan ka ti sup a, Zuali chuan mak ti deuh tak hian min rawn melh, midang pawh chu an rawn hawi hu hlawm. Ka in lam chu ka pan vut a, room-ah chuan lutin drawer-a ka pawisa dah chu ka va lachhuak a. Ka pain ka kal dawn khan mamawh ka neih takin tih thil thu-ah pawisa thahnem ve tawk tak min ken tir alawm.



Ka va let leh lai chuan thawm dang a lo awm leh tawh. "Faki i tawngkam kha fimkhur rawh. An nufa hian i duh duha i nam nul tur an nilo" Nu Rinkimi chu engtik laiin nge maw a lo awm ve hman ni. "Ruk ruk hmang laka tawngkam fimkhur a ngaih chhan ka hrelo e. Hnawksak nufa ropui si" pakhat nu lah chuan a ti leh hmarh hmarh a. "A ru tih i chiang ngawt lo, hmuh pawh i hmu lo. Thil hrechiang hawt lovin mi ankhum chiam chiam hi sim rawh..." nu Rinkimi pawh chu a thinrim ve viau tawh anih hmel. Sawmtluangi chuan a nu chu a lo bengdai vat a, engmah a sawi zawm tawh bik lo.




"Kha cheng 2000 chu" Pi Faki hmaah chuan ka va lek a, an lo hawi phawk deuh hra hlawm. "Mahse..." a meng buai deuh nak a, "La rawh" ka tih nghet churh takah chuan nuam a ti chiah lo aniang a la ve ta hram, inthlahrung hmel a pu ve deuhvin ka hre ta. Kan chezia chu Zuali chuan min lo en ve reng.



"Kha, an inpe fel tawh bawk a i tin ang u. A zia lo thin emai. Faki nangpawh haw tawh rawh" patling pakhatin a rawn tih takah chuan an kalsawn ve mai hlawm a.



Sawmtluangi te chuan Zuali te nufa chu an buaipui vat a. Nu Rinkimi lungawi lo chu a la phun malh malh mai. An buaipui nu lah chu a chatthla emawni a zawi deuh nghiai a, a la rum tiah tiah zui.



"Ka va thlah ang che u" ka lo ti sup, hetiang chuan in an inthlen zo lovang. Zuali chuan min hnial deuh na a Nu Rinkimin 'a awlsam zawk ang' a tih tak tlatah chuan engmah a sawi buai tawhlo.



Ka car ah chuan ka dah lut a, Zuali hmel mawlh mai chu hmuh hrehawm ka lo ti, a inthlahrun hmel em em a, rilru na ngawih ngawih hmel a pu bawk.



Kawngah chuan Nu Rinkimi chu a phun mawlh mawlh a, "Faki hi chu nu nasa ngang a ni ve hrim hrim a. Zualte, a thusawi kha engah mah ngai suh aw. I nu hi kan ring tawk ania, ruk chu a ru dawn lo nasa lutuk. Naktukah kan sawi tha leh ang a, Faki pawh chu ka va be leh hrim hrim dawn" a ti deuh hmarh hmarh a. Front mirror atang chuan Zuali chu ka va melh zeuh zeuh a, a thu kun deuh lap mai.




Nu Rinkimi te in thlang lawkah an in chu a lo awm a. An inah chuan keiman ka kuah lût a. Zualin kawngka a lo hawng sawk sawk a, room-ah kan mut thattir nghal.



An sitting room-a kan inzui chhuah leh hnu chuan Nu Rinkimi leh Sawmtluangi chuan an tawng thlamuan mawlh mawlh a, Zuali hrehawm ti hmel mawlh mai chuan ka thawk a lo ti ipik em em mai ni.



An inchhung chu a felfai tharh reuh a, plants fai zet zet a inhung deuh thliah a, pot cheimawi emawni, chutiang deuh chu choka lamah a inrem deuh dal bawk.



"Keini chu kan haw chho phawt ang, thlai vel enfel ka la ngai a. Harsatna i neih chuan rawn sawi hreh suh aw" Nu Rinkimi chu a tho hluai a. "Sangzual, a la hma bawka la lenpui ve rih rawh aw" ti leh zung zungin an nufa chuan an inzui a, Zualin kawngka bul thleng a va thlah.



A rawn let leh hnu chuan ka ep chiahah a rawn thu a, ka lo melh vung vung. "Ih...ka pu..." a rawn ti chhuak hap. Pu maw ! A pu rual chu ka ni lo tawp ang. Ka lo en ngur takah chuan inthiam leh chiah lo hmel hi a pu a.
"Ih...Pu Sangzual"
"U Sangzual ti rawh" ka lo ti sup, tlangval hnah khat in pu reng zawng ka duh bik hlei nem.
"Imm...u Sangzual" sawi zawm lovin a thaw hak a, a thusawi tur ngaichângin ka lo melh reng. "Pawisa kha naktukah ka pe mai ang che aw" a rawn ti hap a, a inthlahrun hmel hle bawk.



"I remchân hun hunah a nimai" ka lo ti sup. Dik tak chuan min pe let turin ka phût kher lo, mahse a rilru nawm nana sawi ka ni. Heti khawp hian a inthlahrung tawh a, 'a ngai kher lo' ka lo tih chuan a inthlahrung zual dawn tih ka hria.



"Naktukah chuan ka pe ang che...chuan ka lawm lutuk ania aw" a rawn ti vat a, ka lo bu nghut. Chîk zetin a awm dan chu ka en vung vung a, hriat chian châkna ka nei tlat hi ka inhrethiam lo. 'Eng nge' ti ang hrimin a mit a rawn kân ak a, nui sukin ka lu ka lo thing mai, mahse ka la en reng mai.



"Thingpui in rawh aw" nuam a ti ta chiah lo aniang a tho ta tharh a, ka chhân hma hauhvin an gas awmna lam chu a pan daih. A chezia avang chuan lu thing nghutin ka lo nui suk.



An sitting room leh choka chu a inzawm a, in lian tak a ni lêm lo na a engkim mai chu a awmna tur dik taka awm ni awm fahranin a felfai thlip thlep khawp mai.


Rei vak lovah thingpui chawi chung chuan a rawn phei a. Min rawn pek chuan ka lo ban ve vat.



"He khuaah hian in awmna a rei tawh em?" thingpui chu ka lem khulh a. "Têtte atangin" a rawn ti sep, ka zawhna hi duhaiin a chhâng tawi thin. "I nu nen chauh em ni in khawsak?" a ti leh a, 'aw' tih chiahin min chhang.



"Engtikah nge i haw dawn?" kan ngawih dun vang vang hnu chuan a rawn ti mauh mai, ka nui chhuak huk lo chauh. Mahni inleng te chutiang zawhna han zawh mai chu aw... "Haw tawh turin min va duh hmel ve" nuihza insum deuh hian ka ti a. "Aa... chutiang lam pawh a nilo" a inthlahrung leh deuh aniang, a âw a riat nawi hle.



"Tak taka ka va haw tawh ange" ka tho vut a, a rawn tho ve vat. "Lo la leng ve rih la..." leh reuh si chuan a, "Aa...haw rawh ka ti chuang lo ania aw..." a rawn ti bah leh niai a, tawngkam a thiam lo ve hle anih dawn hi ka ti mai.




An kawngka thleng min zui chhuak a, lawmthu min hrilhin pawisa pawh min pek vat tur thu a sawi ve melh melh kha. Ka car khalh laite chuan lawm lohin ka nui ka nui mai. A awmdan lai lutuk khan ka nuih a ti za tlat pek alawm.




Ka inluah ka thlen a, sana ka en chuan rinaiin a lo la hma ang reng dar 8 chauh. Ka Bible leh notebook chu ka lachhuak a, ka insawrbing tak tak hmain ka chhungte ka han be leh phawt.



"Hei i nau hian rawn zin chu a tum deuh tung mai bawk sia" ka pa chuan a rawn ti dam thluam a, 'Ka hrilh tawh a phal vek tawh' matei lo tawngri lang lang chu ka hre thei. "Aw, in remtih chuan lo zin rawh se" ka lo tih chuan "Chhuahna tur neuh neuh i nei ve reng awm sia, amah chauh a in lo nghak tur chuan ka ngaih a ngam chiah lova" a rawn ti dam leh thluam a. A ngaihdan chu âwm ka ti ve tho mai. Tunah pawh inah ka awm hman mang lo, committee leh neuh neuh thil velah chhuah ve reng ka ngai bawk sia. Mahse Gracy te pawh an awm tho a ti-a ka sawi takah chuan a remti ve mai chuan ka hria. Matei chu naktip-a lo kal turin kan inbe fel ta anih kha.




Tun Pathianni lo awm turah hian hun ka chang ve dawn a. Ka vawikhat thusawina tur a ni a, ka huphurh ve angreng khawp mai. Bible chu keuvin ka theih tawk chuan ka inbuatsaih ve a, Pathian ka râwn nasa bawk a, keimah chauhvin maichamah ka ding dawn lo tih ka hrechiang.




Dar 11 rik dawn chuan ka Bible leh notebook vel chu ka dahtha sawk sawk a. Biakin lam pan turin ka chhuak nghal vut. Zan hmasaa ka lo tih tawh angin tawngtai turin ka kal leh dawn.



Ringtute'n a huhova rawng kan bawl chuan rawngbawlna in hma a sawn chak em em a. Mahni ngawta beih ai chuan kawngro pawh a su thin. Mahse chutiang huho rawngbawlna chak tur chuan mimal hi kan pawimawh. Kan chakna hnâr ber Pathian kuta kan tluk luh hnem loh chuan sualkawnga tang mek te khai chhuak turin chakna kan nei dawn lo. Huho rawngbawlna chak tur chuan mimal tin kan intih chak phawt a ngai. Chuvangin fianrial nun hi ngaih pawimawh a tha khawp mai.




Zan a rei tawh bawk a, kawtthler chu a reh deuh duk tawh. In thenkhat chu a la êng ve thliah thliah tho. Thil hmanhmawh thlak a ni lem lo bawk a motor-a kal aiin kê a kal nuam ka ti zawk.



Biakin kawngkawi ka thlen chuan hmeichhe pakhat hi ka va hmu, tun ang zantlai tawhah lehnghal eng thil nge maw a tih le? Ka kal lohna kawng sir lamah chuan a kal a, a hmalam chauh a enin hmun dang a hawichhuak miah lo. Kawng thim laiah chuan ngawi renga dingin ka lo en a. Ka zawn a rawn thleng chiah chu mak ka ti hle ringawt.



A kal liam hnu chuan ka che chhuak ve ta chiah. Tun ang hunah khawiah nge maw a kal le? Dar 11 rik dawn tawhah lehnghal. Ka ngaihtuahna lah chuan a puh chhe hle tawh. Mi thenkhatin a chanchin an sawi ang khan a lo khawsa thin em mawni dawn le...



Biakin chhung ka luh thleng chuan ka ngaihtuahna ah hmeichhe pakhat ringawt chu a awm. Ngaihtuah loh duh sateh mah ila a theih loh, ka inthunun thei lo. Ka tawngtai laite chuan amah ngawt ka ngaihtuah a, ka ti hlei thei tlat lo. Pathian hnenah ka buai ruk na chu ka hrilh ta ringawt. Mahse mak tak maiin rilru leh tih takzetin ka tawngtai thei ta thlap mai.




In ka thlen leh meuh chuan sana in dar 12 a lo kawk va va tawh. Ka inphihfai hnu chuan khumah ka inthawlh nghal a. Ka phone chu bihin WhatsApp ah ka lût a.



KTP group-ah chuan ka lut a, naktukah hnatlâng an lo ko a. Engmah tihtur ka neilo bawk a Pathian zara dam chuan ka kal ve ang chu.



Ka ngaihtuahna vir zawk rual chuan KTP group participants ho chu ka en nghal, Group-ah hian a awm ve ngei ngei ang. Phone number ho chu ka en thla zel a, an DP pawh ka check thla zel, mahse ka mi zawn hmel reng reng chu ka hmu lo, a dp hmuh theih lohvin a dah pawh a nimai thei.



Number pakhat Dp ah chuan Sawmtluangi hmel ka hmu a, amah a nih ngei pawh ka ring. A number chu ka save a, a lo la online hlauh.


*Sawmtluang, i thiannu number min lo pe teh, keimah Sangzuala* ka inthunun hman lo, ka send nghal a. A seen hun chu ka nghak ran, rei a rial lo min lo chhang vat.


*Tu ka thiannu ber maw?*
*Zuali* teh tawp a.
*Eeeehh🤭* Sawmtluangi hian mak tak maiin min fiam bawrh bawrh ngam a, kan inrual tawk viau bawk. Kum naupang zawk zawk a nih tawh loh vang pawh ania nge han laih vel ang kha a nei ngailo.
*Vatin...a nu chanchin kha ka zawt zui duh a* a âwih ngût ange maw.
Number chu min rawn thawn a *Kha...Zuali hi chu ka chhuang ania* a rawn ti ngei a, lawmthu ka hrilh ringawt.



A phone number min lo thawn chu ka save nghal a, KTP group ah pawh a lo awm ve reng anih hi. Biak ka va tum em em pawh a ni chuang lo a number chu ka duh ve tawp a nimai.



Ka mufel dawn chiah tihah ka phone a rawn ri a, caller ID ka hmuh chuan ka phun hluk, ka hrilh chiang viau tawh asin mawle. Vawithum vawili a rawn ti ngat ngat a, ka pick up ta hram.



"Sangzual..." a rawn tap chhuak nghal hlawp hlawp mai. Chutiang teh thut a a rawn awm avang chuan ka ngaih a titha lo nghal, "Eng nge ni?" ka ti deuh hluai a. "Ih...Jo...Jona an kut min thlak..." a rawn ti bah nawk a. Jona-a chu a bialpa keiaia a thlan tak kha ani. Chutianga kut a thlak chu mak ka ti ang reng viau. A duh ve hle khan ka hre si a.



Lungleiah hna thil vangin an zin dun a. Jona te Hotel-ah an thleng a, room hranah pawh thleng lem lovin room khatah an thleng dun a. Zan tira an chhungte tlawh tura a kal chhuah lawk hlanin hmeichhe pakhat a lo tawmpui a, a phawk thute chu bah deuh nuai hian a rawn sawi a, a la tap deuh hlawp hlawp bawk. Jona nen chuan an inhau ta chiam a, kut a thlak hrep hnuah zan la laa a hawsan daih thu chu a rawn sawi.




"Pawisa ken lawk sa ka nei tawhlo, ATM card ka lo keng bawk si lova. An Hotel-ah pawh hian ka awm duh tawhlo" Numami chuan a rawn ti leh mawlh mawlh a. "I chhungte hrilh rawh" ka lo ti sup, a chungchangah hian inham buai ka tum tawh lo. "I hriat kha...Jona nen kan chungchang an hriat chuan an lungawi lo zual dawn lutuk" a rawn ti zuai raih. Ni e, a chhungte hian Jona hi an pawmpui theilo. Kei min kalsan phah a ni tih an hriat phei kha chuan an fanu an hau chiam anih kha.



"Eng nge ti se min tih?" ka ti nghet churh, buaina lian tham a tawh hian ka la buai ve fo hi hreawm ka ti, mahse ka inthunun thei tawh ka tih kha. "Ih...Lunglei bulah khan i awm tiraw?" a ngawih vang vang hnu chuan a rawn ti chhuak sep a. A sawi tum chu ka man thiam mai e. Mahse helai hmuna hruai chu ka tumlo hul hual, thil mawi pawh va ni suh.




"I ngaihtuah ang kha chu ngaihtuah pawh ngaihtuah buai suh" ka ti nghet charh a, ka âw chu a chang lam mah mah ani. "Mahse... Sangzual engtin nge ka awm ang? Khawngaih takin min lo hruai hram mai rawh" pangchang zet hian a rawn ti leh a, ka lo thaw chhuak hawk. Ka ngaihzawng hlui a nihna a bo lova, ka la hmangaih vang ni miah lovin harsatna a tawh chuan hreawm ka lo ti ve tlat thin. Mahse helai hmuna hruai chu ka tum bau lo.




"Khawi hotel nge?" ka tih chuan phur zet hian a awmna hotel chu a rawn sawi a. "Lungleia ka thianpa ka'n bia ange" ka tih chuan "Mahse..." a rawn ti hluai a, "I ngaihtuah ang khan ka awm dawn lo. I kawng zawh tur i thlang fel tawh a, lo inhambuai ve ka tum tawhlo ka tih tawh kha. Tunah chuan i buaina a liantham em a ka mihringpui i nihna angin ka puiah che ngai rawh" ka lo ti nghet charh a, a ngawi ta reng.




Zanlai ni tawh mah se tih theih dang awm ta lo chu Sawma chu ka bia a. Damdawiina a duty a lo haw dawn chiah hi a lo nia, a tihchi tak tak ani. Thil awmzia te chu ka hrilh thuak thuak a, mipa tha ngang a ni a, a lo hrethiam khawp mai. An lo va intifel ve tawh mai ang chu. A va hruai hunah min lo be leh turin ka chah thlap.




Dar 2 dawnah min lo call leh a, "Sangzual, hruai a duh leh lo anih chu, 'hetah ka riak leh si mai ang' a ti tung a" a rawn tih chuan ka thin a van rim mai mai tak. Sawma bulah chuan thupha ka chawi ta tawp, min hrethiam thin a a tihzia khawp mai.



Thinrim teuhin khumah chuan ka mu a. A tih kual mai mai theihah min lo la ngai emawni, min chawk buai hneh khawp mai. Ka thatna hmang tangkaia min namnul mai mai a tum anih chuan a tisual khawp ang.



Zan lam ka mu tha lo bawk si nen zingah chuan ka tho tlai ang reng. Mahse mahni chauhva awm ka ni a, thiltih a harsa lo bawk a, a pawi lem lo e.



Chaw te ka eikham fel hnu chuan hnatlâng turin ka insiam ve a, dar 10 ah chhuah khawm tur an tih kha. Ziran a lo sawi lawk tawh angin min rawn sâwm a. Ka in atanga kan inzui chhuah chuan dar 9 leh a chanve a ri tawh.




Ka bankhur laih vel turte chu a sawi luam a, Upa Thanga te in sak lai bankhur kan lai dawn anih hmel. Hetianga hnatlâng ve tur hian min phut em em hran pawh a nilo. Mahse keimah zawk hian ka remchang anih phawt chuan Kohhran chêtchânnaah hian tel ve zel ka tum. Pro Pastor nih tak vanga inlak fekfawn vak kha ka tum lo, rawngbawlna kawngah chuan mahni awmna hmun azira insiam rem thiam zel hi a tha.



Kan va thlen chuan an lo awm nual tawh a, ka telpui ve thei chu an lo lawm khawp mai. Upa Thanga pawh chuan min lo be nghal mawlh mawlh a.



Sawmtluangi ka hmuh chuan min pakhat hmu tel turah ka inngai nghal ngawt pek a, mitmengin ka zawng nghal ringawt anih chu, a zialo tak tak ani.


"A hman lova a lo kal velo" deuh teh thawr a, ka bulah a rawn ding a. Midang chuan min rawn ngaihven lem lo, Zira pawh kha a kalsawn daih tawh. "Tu maw?" a sawi hrelo awm taka ka tih chuan a nui vur vur pek a.



"School-ah kan monu ai a kal, naute thar kan nei a" a nau nupui khan naute a lo nei tawh anih dawn chu. "Anih chu" ka ti ringawt a, min chhaih laih tum awm taka min melh deuh vel chu a.




Hnatlang chuan mi 20 vel kan chhuak a, Gracy pawh a lo kal ve a, Matei a rawn zin dawn tih ka hrilh chuan a phur ngang mai.



An bula awm a nuam hlawm em em a, an innel hlawm bawk a, an infiam bawrh bawrh, keipawh ka nui ka nui ve mai. A hminga pro pastor lo ni ve ta fam chu ka chet hlekin min chhawk deuh zut a, mi an zahder thiam lutuk chu ka inthlahrung lek lek hial mai.



Chhunah chuan thingpui leh chhang vel nula ho chuan an rawn sem a. Gracy ka bulah a tal deuh chawt a, tunah pawh a thiante nen ka bulah thingpui an in. An titi hotete chu ka lo ngaithla a, mahse mi chanchin an sawi peih mah mah ani.



"Hman zan khan a nuin mi pawisa a ruk kha" pakhat chuan a rawn ti hlak a, tu chanchin nge an sawi ka hre nghal. "Amah pawh hian engtin emawni deuh sum a la lut aniang, thianghlim lo deuhvin" ka bula thu ber Gracy chuan a lo ti a, a tawngkam chu ka lo duh lo khawp mai. Ka nauten hetia mi chanchin an sawi hi ka duhlo.



"An in pawh saw maw, a nu zu zawrhna veka an sak an ti. Chuan a inzuar thin tih vel thawm pawh a awm"
"Shillong-ah te khan a awm char char thei ania engtin nge sum an neih theih ngawt ang chutiang nilo se"
"Chuan, tunah hian maw...U Ricky nen an sawi zawm deuh kha...a hmeichhe mi ropui sia, an lo che hrep tawh mai thei asin"
"Chuloah zu a in nasa sia, damdawi a khawih tel pawh an tih kha U Ricky chuan... Hmangaihzuali pawh hi a inhnamhnawih ve mai thei asin"
"U Ricky pa khan kawm tawh lo turin a ti asin...mi sawi ka hria"
"Henu hi chu a hlauhawm ru zek ang"



An sawi chho zel a, a tawpah phei chuan Zuali chu inzuar ang hial deuhthawin an chhuah tawh. Ka ngaihtuahna a lo tithui khawp mai. Nizana ka hmuh te kha ka ngaihtuah chhuak a, an thusawi hi a dik anih vaih chuan...



Chuan, Ricky chu tunge ni ta ang? Orphanage Home ka kal tum ami kha ka hrechhuak zawk. Amah kha a ni thei mai angem tiin ka lo ngaihtuah ve rauh rauh mai.



Hruaituten an rawn koh takah chuan an tho sap sap a. Thudang an sawi leh daih tawh.



Kan thawk chhuak tha ve pangngai bawk a dar 2 a rik chuan ban khur chu kan lai zo der mai. Zira nen bawk kan inzui haw leh.



Zanriah ka eikham fel hnu chuan ka chhungten min rawn bia a. Naktukah Matei a lo kal tawh dawn a, chah duh ka neih leh neih lohte min lo zawt luam a. Kan inbiak zawh hnu chuan Bible leh notebook lachhuakin ka thusawi tur ka inbuatsaih leh mawlh mawlh a. Dar 11 rik dawnah ka inkhung fel a. Tawngtai turin Biakinah ka kal leh ang.



Biakin kawngkawi ka thlen chuan ka ngaihtuahna tibuai em emtu kha ka tawk leh ta. Nizan ang bawk khan hmalam enin a kal tawp a, min hmu miah lo thin emawni. Mahse a âwm ve tho, thim chinah zel ka kal thin miau si a.



Kawrfual deuh hnak a ha ziah a, a inhmeh thei hrep lehnghal. Hmeichhia hi a ni bik hliah hliah emaw tih tur a ni. A kalliam thleng chuan ka enzui leh ta reng. A chungchang thu dukdak lo tak tak an sawi thin kha chu dik lo hram se ka ti a. Mahse ka ngai khawlo lo theilo. Tun ang zarei tawhah tinge a chhuah ziah. Ka la hrechhuak khawp ang...



A ngaitê bawkin Pathian hnenah chuan ka thlen leh a, ka thawveng deuh huai thin hi mak ka ti lek lek. Eng emaw hriattir hian ka awm thin a, mahse ka hmufiah thiam thin lo.



Matei chu tlaiah a lo thleng a. Gracy in a lo hmuak ve bawk a, an inhmu chiah chu an phul deuh hlut mai. An indah fel nghal zung zung a. Nutein chaweiah min sawm a, an che reng reng chu an phur deuh sarh mai. An intihfel zawh hnu chuan Nutei te in lam kan pan nghal.



Motor hnungah thuin an titi malh malh a, Gracy chu a tawng deuh zat zat a, nula ve uaih tawh si hi a naupangchhia ru tlat zel. An rawn nui chhuak leh hak hak thin chuan min tihlim ve takzet.



Ka Nutei pawh a lo lawm thiam ngang mai. Kan unau hi a theihtawpin min duat ve a. Ka nu leh pa ten a fate an ngaihsak ang chiah hian kan unau pawh a theihna kawng kawngah chuan min ngaihsak ve thin.



"Mate, châm ve reng rawh aw" chawei lai chuan Nutei chuan a ti a. "Nia, kan châwl rei dawn a, ka û phal dan azir a nimai" nui hak hak chung chuan Matei chuan a ti ve a. "Au Sangzualan a duhloh hunah che pawh hetah i lo awm daih anga " uang zetin Gracy chuan a rawn ti a. Kan lo nui dar dar hlawm.




Matei chu Gracy in riak turin a sawm tlat pek a, hnial theih pawh a ni leh tawhlo. Matei chuan ka thu a ngaichâng deuh ran a, a riak ve chak tho tih ka hria, mahse phallo ila chu min hnial buai dawn lo tih ka hre bawk. Mi hrang ina riak tur a ni lo bawk a. An lo inhmu khat ve bawk nen tiin ka phal ta mai anih kha



In ka thlen hnu chuan ka intifai thuak thuak a. Ka rilruin vei rauh rauh a nei tlat. Zanin chu thil pakhat hriat chhuah ngei ka tum.



Biakin kawng lam pan chuan ka tlân zel a. Ka motor khalh lai te chuan thil awm thei chi hrang hrang ka ngaihtuah, mahse ka ngaihtuah tak erawh chu mi pakhat chungchang chauh a ni thung. Khanu mawlh kha !



Zan dang ang chu nise ke in ka kal ngei ang a. Tin, zan dar 10:00 - a kal lo hian dar 11:00 rik dawn lamah ka kal ngei ang. Mahse zanin hian thil belhchian chak ka nei miau a, a pawttu hi a na em atin a ni.



Kawngah chuan ka tawh tak thutin tih thil thu ah ka hawikual leh thuak thin. Ka motor headlight in a chhun phak chinte chu chiang zet zet hian ka melh thin a, mahse ka mi hmuh duh taka chu ka la hmu chuang lo.



Zan danga ka biakin pan turin a kawng kal lai ka lo hmuh tawhna thin, biakin kawngkawi lai ka thlen chuan kawngsir rem laiah chuan motor chu ka tiding thi duk a. Ka chhuak nghal vut bawk.




Ka dinna atang chuan kan biakin chu a lang thei, mahse theihai kung lianpui ding ruah vang chuan a lang chiang thei lo.



Car hmaa ding rûn chung chuan khanu chanchin mi thenkhatin an sawi dan kha ka ngaihtuah a.
"A nu ang bak a ni lovang, sunhlu kungah thei dang a rah ngailo"
"Shillong a zuk awmlai pawh khan a lo che hiar viau mai thei asin, lehkha a zir tak tak pawh ka ring love. Khuaa a rawn haw hnu hian Kohhran lah hi a rawn bêl zek a, a nungchang tawp zet hliah khuh nan Kohhran hi a kâwrah a hmang pawh a ni thei tho mai"
"A nu chu hmêlah chiah a chhûn, a nungchangah erawh a tha filawr lak. Hetiang dinhmuna ding chunga Kohhran a bêl hram hram te hi a chhuanawm reuh ania"
"KTP active member thenkhat ai pawh hian a nungchangah hian Pathian hmel a lang chiang zawk".

Thenkhatin a chungchangah ngaihdan tenawm zet zet an nei a. Thenkhat erawh chuan an fak viau lawi a. Ka awmna khua hi thingtlang khua a ni a, khaw lian tak a nilo bawk nen thu thang vel reng reng hi a darh chak viau.


A chungchang ka ngaihtuah lai chuan kha a mitmeng pawi sawi lo zette kha ka mitthlaah a rawn inlar zut zut a. Engtin emaw ni riau hian ka awm lehnghal a.



Rei ngial ka nghah hnu chuan a lo lang thei mai lo. Zaninah hian a kal ziah thinna kha hriatchhuah ka duh viau asin mawle.


Zan dar 11 a rawn rik meuh chuan nghah khawmuan ka tum tawh lo. Ka lo tih thin dan ang bawkin biakin lamah chuan tawngtai turin ka kal a, motor chu ka tinung tawhlo law law, ke in ka kal.


Biakin gate ka hawng a, ka lut chiah chu biakin kawngka a rawn ri khep a. Ka mi hmuh avang chuan ka phawk hle ringawt.



____*____*____*____*____


(Hma hi a har ve thin lutuk a... in lo chhiar ve avangin ka lawm thin ❤️)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:03 pm

LOVE COVERS ALL
By CVL.Awmpuii



Chapter 4



A âwmdan engkim hian min thawng dawt dawt reng mai nih hi !


Biakin kawngkhar chu a khar leh khep a, a lo hawi chhuak min rawn hmu ve chiah chu a phu chiang kher mai. Chîk zetin ka lo en a, biakin chhak street light eng riai chuan a mitmeng chu a chhun eng sar a, tap tih hriat zetin a meng sen râm mai.



A insiam tha vat a, "Ih...i...i lo awm thut a" bah nak hian a rawn ti a, a mit chu a tuai nghal thuak bawk. Ka kekawr ipte zenin chîk zetin ka lo en reng, a rawn nui lui seih a "Ka haw dawn a ..." a rawn ti leh tawp a, a sam a tuai nghal thuak.



Kal mai a tum chu a banah ka lo chelh ding vut, a ngaihna hrelo zetin min rawn chhoh en ha a, tê chhe zawk zawk a ni miah lo mahse ka palian em a, ka dar chen vel bak a nilo.



Chîk zeta ka en chu 'Eng nge' ti ang hrimin a mit a rawn kân ak a, ka chelhna kut chu a rawn vawn hnan bawk.


"Lut leh ang" biakin lam mitmei chuan ka ti sup, a meng buai deuh nak a, "A...va lut rawh" a kut ka vawnna chu phelh a tum a, a aia nghetin ka hmer salh. Ngawi rengin ka kut chu dawhsawn a tum ngat ngat a, ka thlah duh bik silo a tawpah chuan a ngaihdan a ni ta vak lo aniang "Eng nge i hriat a?" a rawn ti chang fak, min melh ve khai khai reuh anih chu. Hetiang mitmenga a meng hi ka vawikhat hmuhna, a lawmawm tei vet lehnghal.



Ka kut chu a rawn sik vak a, ka lo phun hluk, a kuttin a hriam lem lova a na hran lo. "I la inbunruak zo lo" tih hluk pah chuan biakin kawngka lam chu ka pan pui nghal a, a tal buai lo hlauh.


Ngawi rengin keyboard an hunna hnungah chuan kan thudun rauh rauh a, hnuai lam melhin a thaw chhuak leh hak thin. Light kan tihên loh avangin a hmel ka hmu chiang thei lova, mahse a awmdan chu rilru kaptu lian tak nei ang mai ani.




"I duh leh tap rawh" a thu kun ngal chu ka lo tichhuak sup, a lo hawi chhuak a "Insum lo khan inbunruak vek ta che" ka ti leh a. Engmah sawi lovin a lu a thing nar nar a, a hmui a petsawi zeuh bawk, a insum nasa hle tih ka hre thei.



"Sawtah sawn ka lo va thu ang aw" tlar hnung lam chu ka melh a, ka thochhuak nghal. Ka lo awm ve reng khan a insum tlata ka hriat vang a ni.



Hnunglam atang chuan ka thlir reng a, rei vak lovah chuan a rawn khur deuh dar dar, a tap ta nain ka hria. Chutianga a awm takah chuan hrehawm ka lo ti ve em em ringawt. A chezia engkim ka chîk em em thin te, belhchian ka châk tlatte hi ka inhrethiam tawh lo. Ka hnaiha a awm hian ka zâm vang ni miah lovin ka kawchhungah hian che a awm thin tih chu ka hai tawh mawlh lo.




Ka rilruin Pathian ka auh pui a.
'A kawng zawh mekah harsatna tam tak tawkin, lungngaihna tam tak tawk mah se beidawn tir lo la. Nangmah rinchhana kê a pen zel theih nan pui la. A buaina, harsatna leh manganna te i lak sak dawn lo a nih pawhin huaisen taka a hmachhawn theih nan huaisenna leh chakna pe ang che'.




He hmeichhia hian a hringnunah eng nge a tawn a, eng nge a hmachhawn mek tih ka hriatpui lo. Mahse hun khirh tak a hmachhawn meka ka ngaihna chuan ka thinlung a fan a, amah lainatna leh khawngaihna in ka khat a ni ber mai.



Rei tawk fang a khur deuh ngawt ngawt hnu chuan a rawn tho chhuak a, ka lo ding ve nghal hluai.


"Ka lawm e" Biakin atanga kan chhuah hnu chuan a rawn ti chhuak sep a, ka lo bu nghut. "Kan haw thei tawh em" ka lo tih chuan a bu nghat a, in lam panin kan inzui nghal.



March thla chawhnu lam a ni tawh nangin boruak a la lum em em lova, a nuam tawk viau. Kawtthler a reh deuh ruih tawh a, street light êng chu khât pheuh pheuh bakin a awm lo , a thim deuh khap mai.



"I nu a tha zel em?" ngawi renga kan kal dun lai chuan ka ti sup a "Imm...a tha tawh lutuk" a ti ve mai a. Nichin ai ngawt kha chuan a hmel hmuh pawh a nuam ta deuh e. "Ee...taka pawisa kha" a rawn ti deuh hliai a, a lam ka hawi vat "Tunah ka pe mai ang che aw ka buai lutuk a, ka lo mangnghilh daih a, a zialo tak tak" a ti leh zung zung a, keipawn ka lo hre tawh miah lo.



"A ngai kher lo ania" ka tih chuan "Ka pe ang che, mahse tunah ka ak mai lova kan in bulah min lo nghak lawk ang a" a rawn tih tak duahah chuan ka hnial tawh bik lo.



"Biakinah khan i kal ziah ami?" an in kan thlen hma hret chuan ka zawt a, "Ni deuh mai" min chhâng tawh dawn lo emaw ka tih hnu chuan a rawn ti chhuak sep "I hlau lo ami?" ka tih chuan a rawn nui ri hak mai, a nui ri chu hriat nuam ka ti. A ding deuh dat a, ka ding veleh rih "Hlauh tur a awm em ni?" nui deuh var var hian a rawn ti a, a hmeltha kher asin, ka lu thing nghutin ka kiai ve suk.




"Hmeichhia chu fimkhum tur, tawhsual tawk palh thei in nia. Zanlaiah phei chuan tul lovah chhuah mai mai loh tur. Misual pawh in tawk thut thei, mipa hi kan sual ania" kan kal leh hnu chuan thutak zeuh zawk hian ka ti nghet charh charh a. "Zanah Biakinah kal leh i duh pawhin hma deuh zawkah kal tum tawh rawh aw" pa in a fa thu tha a hrilh te pawh kan ang rum rum alawm le. Ka thusawi pawh chu engtin mah min chhang let tawh lem hlei lova.




"Tikhan lo awm rawh aw" an in step bul kan thlen chuan a ti chhuak sep a, an in lam a pan nghal. Kawrfual hi a hak tur bika siam ni awm a mawi a ni, a inhmeh bik ngawih ngawih.


Rei vak lovah a rawn let leh vat a, a kutah pawisa a rawn hûm bawk. "Kha aw, ka lawm lutuk ania" min rawn pek pah chuan a ti a, a rilru nawm nan chuan ka lak sak ta poh aniang chu. "Kal tawh rawh le, ka lo enliam ang che" dam thluam hian ka ti a, chumi rual deuh thaw chuan Bike ri vut vut thawm a rawn awm a, rei vak lovah Zuali nen kan lo dindunna piah deuhah chuan a rawn ding thi duk a, a tlan chak bawk a, a din rual chuan a ri thawt thei.



"Ricky..." ka bul ami chuan a lo ti hluai. Orphanage Home atanga rawn hruaitupa kha a ni, Gracy te thianhovin a ngaihzawng ang deuha an sawi kha. Kan lam panin a rawn pen phei pawk pawk a. "Inbe lawk ang" a rawn ti chhum hmuk a, ka awm ve chu hre âwm pawhin a lang lo. Zuali te in lamah chuan a chhuk thla nghal vut a, "A va buaithlak tak" ka bul ami chuan an in lam pana kal thla vut pa thlir chung chuan a ti chhuak hluai a.




Zuali ngawt chu ka lo melh ngur tawh. Ka lam a rawn hawi leh a, a meng buai deuh nak "A...ka haw tawh mai ang aw" a rawn ti bah nak a, ka lo melh ngur reng ringawt, a hmel landan chu ka hrethiam lo, a mitmeng buai deuh nak erawh ka hmuh hmaih lo. Ka rilrua thil lo awm thut avang chuan inher vutin ka kalsan nghal nal nal, ka hawilet hlek lo bawk.



Khumah chuan ka ban khamin ka mu meng kar a, ka thaw chhuak leh hawk thin, ka inlet tawn sek a. Mi te sawi ang mai mai hian a lo khawsa thin em mawnile. Kan hnatlân tuma Gracy te thianho thusawi kha ka ngaihtuah let roh roh a, khatiang hmeichhia kha a lo nih vaih zawngin...ka inseh ruh nghal tawlh tawlh thei.



Ka muhil thei ngang lo chu ka room thlang lam veranda-ah ka va chhuak a, boruak ka va hîp lut kawk ringawt. Hetiang hian ka rilru a la buai ngai lo. Ka bing mup mup a ni tawp mai. Tunah hian khapa nen khan eng nge an tih ang? Tun ang zanrei tawh ah lehnghal. Thil thalo ngawt ka rilruah a awm a. Hmeichhe pakhat mai maiin engtin nge hetiang em em a min chingleh theih mai le?!



Khuma ka va mut leh chuan zing lam dar 2 a lo ri thuak tawh. Ka rilru ka siam fel a, naktukah a chungchang zawng zawng ka hrechhuak ang, zawh tur tha deuh ka hria alawm.


Tukthuan ei hmain Matei ka va lam a, Nutein an ina ei leh mai tura min lo tih chuan ka lo hnial vat, eirawng ka bawl lawk sa vek tawh.



"Û, vawiinah khua hi min fanpui la, U Gracy te nen" chawei laia Matein a rawn tih chuan ka en vat a.
"Vawiin chu thil pawimawh tih lawk tur ka nei a. Pathian zara dam chuan naktuk velah kan ti mai dawn mi?"
"Aw...a pawilo i hman hun hunah a nimai" a rawn ti ve vat.



Matei a rawn awm chu a tihzia phian a, eihmun sengfel leh thleng sil vel pawh min âwl vek a, a hahdam thlak ve huai mai.



Ka chhuah dawn chuan Matei chu Gracy leng tura sawm turin ka hrilh a, lo len a tum sa hrim hrim thu min hrilh chuan ka thaw deuh huai. Nula ve uai tawh mah se mahni chauha awm tura kalsan chu ka hreh vang a ni pakhat.



Nu Rinkimi te inkawtah chuan ka car chu ka tiding a, an dawr a lo nghah avangin an inchhunga lut ta lo chuan an dawr lam ka pan nghal daih.



"Teh hlawl che chuan" a dawra ka va luh chuan a lo ti hluai a. Nu Rinkimi te hi ka Nutei te tih lohah chuan ka pawh ve riau a. Amah hi mi tawngduh deuh mai ania, mi pawi a sawi lem chuang lo. Midang a vin hlak hlak ri te hi chu ka hre ve thin, zaidam lem lo mah se misual a ni lo tih ka hria.



"Tunge in nghak a?" ka tih chuan an monu, nautê leh Sawmtluangi te an awm thu a sawi a, an pa chuktuah huanah a kal a, a fapa Sawmsanga chu school-ah a kal thu a sawi. He khuaah chuan khawsak pangngai ve pawl tak an ni a, an fapa neihchhun hi helai khaw High School zirtirtu a ni a, an monu pawh Primary School zirtirtu a ni.



"Dawr thil mamawh i nei nge?" ti a min zawh chuan ka nui mai a. Chair âwlah chuan ka thu tê tê a.
"Nei lo e, thil ka lo zawt dawn che"
"Eng lam nge?" a kuhva thellai dah pah chuan a rawn ti a.
"In kawmthlang te chungchang" pehhel buai lovin ka ti tawp. Chutianga ka sawi takah chuan chianh fahranin min rawn en a.



"A eng ber nge i hriat duh a?" a ti dam dap a, dawrtu a neih avangin a tho leh rih.
"Sawi la" a rawn thutthlak leh hnu chuan a rawn ti a.
"Hriat duh ka ngah" ka lo ti sup.
"An chungchang min zawt hmasa bertu i ni bawk a, engpawh min zawt rawh ka hriat zawngte a nih phawt chuan ka hrilh ang che" a ti dap dap a.



"A bul tangin ka hre vek duh" ka tih chuan a thaw deuh hak a.
"Aa...Zualtei hi chu maw a nun hi a khawngaihthlak a ni tawp mai" ngaihtuah ni âwm tak hian a ngawi deuh dat a.




"Sawmtluangi kum 5 vel anih lai kha ania, Sawmsanga pawh kum 3 a ni tawh, kan khuaah hian an rawn pêm a, Zualtei an pai lai hi a ni nghe nghe. Kan kawmthlang lawka awm an nih avang khan kan inpawh nghal em em a. Zualtei pa , Puia kha PWD ah a thawk a, helama kawng an siam lai anih vang ania an rawn pêm. Pa fel deuh mai hi ania maw, kan fate pawh an inah an zuk tal tam ve viau thin. Thapuii pawh hi chung hunlai chuan hetiang hian a la awm miah lo. Mahse Puia boral hnu khan a kehchhe vek a ni ber mai. Zualtei pian hma thla khat vel la awmah khan an kawng siamna lamah a chesual a, khamah a tla a, a ruang pawh kha hmuh tlâk a ni vak lo" a thaw deuh hak a, a hnuk a ulh deuhvin ka hria.




"A chêtsual thu an rawn hrilh lai kha Thapuii lo len lai tak ania. A ni naupai lai a lo ni bawk nen khatiang thu thin thawng lutuk a hriat vang khan nikhaw hrelo in a awm a, keinin kan lo buaipui vat a. Lunglei Damdawiin-ah kan hruai vat a, a dinhmun kha a lo tha lo lutuk a, nau chhiat thei dinhmunah a lo ding reng a. Doctor te'n zai chhuah a ngaih thu an sawi a, Zualtei hi thla kim lovin a piang ta tihna anih chu. Khatiang dinhmuna a din tak avang khan an pa ruang pawh chu a kil thei ta lo a. Thla thum tal tawp ang kha chu mi â ang maiin a khawsa a tih theih ang. Zualtei pawh hi a ngaihsak hlei thei lova, kan lâk sak tawp châng a tam mai. An nupa khan maw, nupa satliah ang hi an ni lo a, an inhmangaih ngawih ngawih tih kha a hriat theih. Zualtei lo piang tur an nghahhlelh ziate kha an sawi chamchi thin..." a hmui a pet deuh fan fan a, a thusawi mal tin chuan min lo thawng ve em em mai ni.




"Thla nga vel a liam hnu khan tlemin a pangngai ve ta deuh a, fanu pawh a ngaihsak thei ta deuh bawk a. Zualtei chu a lo thanglian ve zel a, sumah an harsa tial tial a, an pa chetsual chungchangah khan sawrkarah zângndawmna kan claim pui ve bawk tak na a engmah awmzia a awm thei meuh lova, kan theihtawp chhuaha kan beih ngial pawh khan engmah an dawng ta lo. Zualtei school kal rual a lo nih khan a mangang tan tih kan hria, keini lah kan khawsak harsat lai a lo ni ve bawk nen theihtawpin pui ve mah ila eng teh ual a ni silo. Primary school thleng kha chu a inhlawhna vel atangin a kaltir ve thei ta hram a. Middle school kha Lunglei lamah a kaltir ta daih a. Khawia pawisa in nge kaltir a tum ti a kan ngaihtuah laia kan hriat leh hmasak ber chu a zu zawrh thu ani. Khami thu kan hriat khan kan pa a zuk leng lut vat a, mahse a thusawi kha eng teh ualah a lo ngai bawk silo. Tichuan kan enliam ta tawp a, mahse Zualtei lo haw chang chuan eng zu mah a kawl ngailo, a nu zu zawrh thu chu Zualtei pawhin a hre fuh kher lo. Zualtein Higher a pass ve takah khan khuaa a awm ve chak tawh thu a sawi a, mahse a nuin Shillong lamah a zirna a chhunzawm tir leh ta daih a, naupang thuawih ngang a nia a nu chu a hnial buai lo. Chuta tang chuan Thapuii chu a bawraw chho a ni ta ber , a fanu a lo haw zen zen thei tawh bawk lo nen zalen deuhvin zu kha a zuar ta a, amah pawhin a in veleh ta zel a, an inah chuan chitin chi tang an awmkhawm hi a ni ringawt. Zualtei BA zir zo rawn haw khan a nu khawsak dan zawng zawng a hrechhuak ta vek a. Kal tura a tih leh pawh khan a duh ta lova, a nu zu zawrh a titawp vek a. Hei tunah chuan kum khat lai a awm veleh tawh chu ania" a ti leh dap dap a.




Eng thawnthu emaw tak chu a neih ka ring a. Mahse ka beisei phak bak vek, min thawng dawt dawt a ni tawp mai.



"Engtin nge ei an zawn a?" ka lo tih chuan a ner nak a. "Sangzual...mi hian Zualtei hi thil thalo deuh ti turah an ngai tlat thin anih chu" a rawn ti a, a âw atang chuan Zuali thlavang a hauh nghal zia pawh ka hre thei. "A kut them thiamna hi a hmang tangkai a, kut them thiam deuh mai hi ani reuh a. A pangpar pot chei vel khu i hmu tawh em, tunlai nuho khawsa thei deuh chuan an atchilh em hi. Khung khu a Lunglei lamah thawnin a hralh thin a, an ngam huai thei ang reng sia, pawisa chu a la lut ve nual ang" a hma khan a thil cheimawi neuh neuh chu ka hmu tawh tak alawm.




"Hmun dangah chhungte an nei lo em ni?" ka lo tih chuan "Taka thil mak deuh chu maw , Puia boral khan khual khua vel atangin an chhungte awm ang tumah an lo kal lo. Mahse tun hnu hian Zualtei chu a nî in a lo be thin. Sawmtluangi sawi danin a nî te chu Aizawlah an awm a, Zualtei hi an bula awm turin an rawn sawm thin a, MA kal zawm tur pawhin an thlêm reng, mahse a nu a kalsan hi a duh tlat lova" a rawn ti leh zung zung a.




Ka hriat duh ho chu ka hrekim thawkhat viau chuan ka hria. "Tinge a chanchin chu i hriat duh hrim hrim a?" engmah ka zawh tak lovah chuan a rawn ti a, han chhan mai dan tur ka hre lo. Ka tihngaihna hrelo chu ka nuih suk ringawt a, a fanu ang maia mitmeng chimawmin min rawn en chu le.



"Tak taka Zualtei hi chu ka fanu pakhat zawk ang ania, ka chhuang teh mai nia. A pasal tur pawh ka duh ang thlap ka than sak ang" deuh kher chuan a. A kuhva thel lai chu a thel zawm leh mawlh mawlh a, "Mi ho lah hian a nun chhungril hre hawt si lovin an lo sawi peih em em a. A tawrh ang zawng zawng hi tuar ve sela chu Pathian bel tur pawh an awm nang. Hrechiang turin an kawm chiang tawp silo a" a ti leh hlak hlak a. A titi a kal tluang bawk a, Zuali chanchin ngawt chu a sawi a, ka tan ngaihthlak nuam lo a lo nilo bawk nen uluk fahranin ka lo ngaihthlak sak zel mai.



"A kawm chiang ve ber tu Ricky-a lah hi hetiang ringawt mai hi ani sia aw, Sawmtluangi chu a laizawn angin lo ngai ta ila..." a mipa hming rawn lam chuan ka beng a lo verh leh viau tawh. "Tunge Ricky-a chu?" ka lo ti hmanhmawh, Nu Rinkimi chuan min rawn melh vat a, ka mitmeng chu chhiar a tum emawni "Zuali zawt ve tawh mai rawh" a va chimawm mai mai tak e aw, nutling pui si.



In lam pana ka inkhalh lai te chuan ka ngaihtuahna a kal ding leh viau tawh.



Miin eng hun nge an lo paltlang a, an lo hmachhawn tawh tih kan hriatpui loh chuan ngaihdan lo siam ve vak vak hi kan tih loh tawp tur a ni. An nun chhungril hre hawt si lova tehfung khauh tak taka teh turin mi tha famkim kan ni bik lo.



In ka thlen chuan Gracy pawh a lo awm a, noodles an lo ei mek. "Lo ei ve la" Gracy in a rawn tih chuan ka lu ka lo thing mai a, "Noodles a ei ngai vak lova" Matein a lo ti, ka ngaina tehchiam lo alawm.



Gracy haw hnu chuan Matein eirawng a bawl a, tihpui ka tum paw'n a phal tlat lo, 'Ka awm ve lai chuan ka lo duat ang che' a ti tung reuh a, tleirawl tê ni chunga hetianga min ngaihsak nachang a hria hi ka lawm khawp mai. Unau inhmangaih lo, inngaihsak tawn nachang pawh hre miah lo an awm tawh a, mahse keini unau chu Pathian zarah chutiang chu kan ni ve lo.



Chutia Matein ka puih a duh tak tlat si lohah chuan Bible leh notebook ka phawrh chhuak leh a, ka inchhiar zau leh ta poh aniang chu.



"U...bialnu hi i nei miah lo ami?" Matei lamah chuan ka inher vat a, a zawhna chuan ka nuih a tiza hle. Hetiang lampang hi min la zawt ngai miah lo. Room hrana mut a hreh deuh avangin ka room-ah kan mu a, khum khata mut a duh bik si lova ka room lehlama khum âwl chu ka room ah kan sawn phei a, ka khum bul chetah kan hung a, chutah chuan a mu.



"Tinge chutiang te min zawh thut a?" nuihza deuh taka ka tih chuan a nui ve sak a "Nupui nei tawh la ka ti e..." a rawn tih chuan ka nui chhuak huk. "Ka ti tak tak alawm, kum 3 a ral hunah chuan an ordane che anga, chumi hma chuan nupui nei rawh" a lo ti zung zung a, a ngaihtuahna a lo seng ve hle anih dawn hi.



"Tunge ka neih ang?" ka puan zin that pah chuan ka ti sup a, a ngawi deuh vang vang, a ngaihtuah ve emawni "Duh deuhte i nei lo ami?" a rawn ti a, "Hei...vei ve deuh angte kha i nei lo ami?" a rawn ti nawn leh, âtthlak lutukin ka mithla ah hmeichhe pakhat a rawn lang nghal. Ka lu ka thing deuh nghut a.




"U Arini kha fel i ti ve lo ami?" a rawn ti leh a, ka ngaihtuahna atangin ka harhchhuak zawk. "A hmanhmawh thlak hlei nem nupui neihte chu" ka lo ti sup a. Eng eng emawni a sawi leh neuh neuh, mahse hriat pawh ka hre mumal tawh lo. Ka mitthla a hmeichhe pakhat awm ringawt chu ka ngaihtuah tawh. Ka awmdan hi ka hrethiam ta hauh lo mai.




Kohhran Committee in Ruihhlo Ngaite Pual Camping buatsaih a rawt a, kan lo pawm tlang khawp mai a karleh lama neih nghal theih turin kan pass nghal.



A hmun tur atan Sunday School Hall chu kan hmang dawn a. Camping hma ni thum la awmah chuan a hmunhma vel tifel turin KTP hnatlang an ko deuh rum rum a, zaninah kan hnatlang dawn.



Gracy in Matei chu a sâwm ve a. Keipawhin mahni chauha ina a lo awm ai chuan lo kal ve se a that zawk ka ring. Ziran min rawn sawm kawi a.


Kan in atanga kan chhuah chuan zan dar 7 a ri tep tawh. Ka motor ka keng a, kawng lakah chuan Camping-a lut tur awm ang chu a sawi mawlh mawlh a, ka lo bu ve nghut nghut. Matei pawh a hre tawh a, a be tlangnel thiam viau mai.



Kan va thlen chuan Gracy pawh a thiante nen pawnah an lo awm a, Matei chu an rawn ko hrang nghal a, an titi nghal mawlh mawlh.


An inkawm thei bawka tiin Zira nen chuan Hall chhungah kan inzui lut a. Tlangval thenkhatin bang vel chu an lo thiat zung zung a, nula hovin hmun an lo phiat bawk.



"Zualte, min lo zâwnpui lawk mai" kan dinna sir lam chu ka hawi vat. Ni li ngawt ka hmuh tak lohah chuan ka hmu veleh ta hram alawm. A sam sei hniang kha a lo tan tawi deuh a, tawi lutuk chu a nilo, a zakhnuai chu a la vaw zan. A kawr hak chu sawi buai ngaiin ka hrelo, kawrfual bawk a ha leh tawh, hmeichhia a ni bik ngawih ngawih ka tih thin kha. Kekawr leh kawr a hak lai vawikhat mah ka la hmu lo hi a mak. A sam a tan tawi deuh vang nge tlemin a lang thau ve deuh.



Thutthleng sei chu a zâwn pui ve vat a, ka lo enzui reng. "Saw lamah sawn va phei ve ang hmiang" ka bula ding Ziran a rawn tih chuan ka hawisawn ve chiah. A kawhna lam chu kan va pan nghal a. An bang lak thlak tur chu kan lo zawnpui ve vat.



Hall chhung lama tihtur tul ang ang kan tih hnu chuan thutthleng ah thuin an titi laih laih a, nula phawk deuh pakhat hi a awm a, tlangval ho chuan an fiam an fiam a, ani lah chu a lo uang thei zel mai sia, a titi ngaihthlak a nuam viauin ka ring.




Chutianga an uang dar dar lai chuan pawnlamah hmeichhe ho te chel chul ri kan hre ta mai. Rang zetin kan va tlanchhuak a, ka thil va hmuh avang chuan ka ding chawt.



Zuali leh Gracy te an lo insual anih chu !



Tlangval ho chuan thelh tumin an va pawt a, mahse inthlah mai mai an tum hmel loh khawp mai. Gracy chuan a hneh lo lampang hret a ni. Hmeichhe lo awm vete lah chuan thelh pawh an tum lo, hlauhthawn hmel deuhvin an chiau chul ringawt a. Sawmtluangi chauhvin thelh a lo tum ve.



"Duhtawk rawh u" ka vin thawt a, hmeichhe dang chu an lo phu dawrh mai. Gracy chuan a thlah mai a, mahse Zuali zawk chuan a samah a la pawt ngar ngar.



"Zuali thlah rawh" ka tih viak thawt takah chuan a thlah sawk a, Gracy chu a pai khat mai, a thiante chuan an lo kaitho vat a "I nihna ka sawi vang mai khan i la na viau ami?" Gracy chuan cho deuh hian a melh a, "Min hriat nawn tir avangin ka lawm e" fiah fak hian Zuali chuan a ti a, inherin Biakin step lam a pan nghal nal nal. "Zuali..." Sawmtluangi koh zui lawm lawmna pawh chu hre awmin a lang lo.



"Mate, tikhan lo awm lawk rawh aw" Matein Gracy sam a lo chul mam sak thuak thuak lai chuan ka ti sup a. Rang zetin Biakin step lam chu ka pan ve nghal. Min enzui deuh he haw hlawm tih chu ka hre reng.



Ka pen pawk pawk a, ka va hmuh chuan a lo la thleng thui lutuk lo, a kal deuh hlawk hlawk a, ka va nangching vat. A kutah chelhin ka pawt ding dawrh a, "Min khawih suh" hlar mai a, vin tha tek tek khawp mai. A mittui hnawm chapah chuan a sam thur deuh chu a bet a, a hmai a sen vek bawk. Ka lo inring lo bawk nen min nem kat ve nawk a, a tap tih ka hria. A kal lehnghal hlawk hlawk chu ka va chelh leh a, engmah sawi tawh lovin ka kut chu min thin thlak sak a tum ngar ngar a, ka chelh nghet sauh thung.



"Min thlah teh..." aw lawi rat hian a rawn ti a, a kut ka chelhna chu phelh a la tum ve ngat ngat bawk. A eng ber nge ka hrelo, ka kawchhung hi a che alawm. A awmdan chu ka tawrh theih phak bak ani ta.



Ka pawt thut a, ka âwmah ka kuah bet nghal hmiah, a tal nghal aih a, mahse ka kuah ngheh leh salh takah chuan a rawn tap baw nghal hawk.



Ka kawrhma thamin chhuak zet hian a tap rawng rawng a, ka âwmah ka kuah bo vek a tih theih ang. Nghet zeta kuahin a samah chuan ka chul a. Naupang tap rawng rawng ang mai hian run zetin a tap hawm hawm a. A tap ri chuan ka thinlung chhungril ber a fan hial thei. Ka thinlunga âw chuan 'Amah hi a ni' tiin min rawn hrilh mawlh mawlh maiin ka hria. Pha thei ka nilo, henu hi ka duh ani ka duh.



Hmangaihzuali hi ka duh chiang ani !


______*______*______*______*______


(Naktuk Pathianni...kan chawlh thin kha aw... Pathian zara dam chuan Monday-ah kan inhmu leh theuh dawn nia ❤️)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:03 pm

LOVE COVERS ALL
By CVL. Awmpuii


Chapter - 5


Ka hmuh loh chhung zawng zawng khan ka rilru thunun tum reng rengin hun ka hmang a. Ngaihtuah loh tuma mit ka chhin apiangin a mitmeng fiah zet leh pawi sawi lo zet kha ka mitthlaah a lo lang zel a, mutmu pawh ka tuah tha thei mang lo anih kha. Ni li chhung zawng khan pehhel tum chung siin ka zawng ru reng thin ang lawi a.



Hmangaihzuali hi ka hriatna a la rei miah lo, kan inhmuh atangin thla khat pum hlûm chauh a la liam, hmelhriat pangngai ang pawhin kan awm chuang lo. Mahse chu ti chung chuan ka thinlung a luah hneh tlat si anih hi maw...



"Bâng tawh rawh le..." a hnung chu ka chûl hauh hauh a, a la insut feih feih. Inlahrang hlekin a sam hnawk deuh niai chu ka chûl mâm thuak thuak a, a kuta chelh sakin Biakin lam panpui ka tum chu a tang deuh tlat, a ngaihna hrelo zeta ka en chuan "Ka let duh tawh lo" a rawn ti zawi sep a, mittui tling deuh pamin min melh kiau bawk. Anni ho bulah khan let pui ka tum tawh reng reng lo "I let ka phal tawh hlei nem...lo kal phawt la" tiin a kut chu ka hmer nghet deuh salh a, ngawi rengin min zui veleh mai bawk.




Biakin gate chhaka ka car dahna bulah chuan ka din pui a, a kut ka la chelh sak reng. Ka phone phawrhin Matei number ka dial nghal a, ka bul ami chuan engmah sawi lovin ka tihtur a lo ngaichâng ve reng.



"Û..." a rawn ti hluai a, "Mate, midang rual khan lo haw mai ta che" ka bul ami chu ka en a, min lo en ve chiah bawk.
"Khawnge in awm a?"
"Hei thil pawimawh tih lawk tur ka nei a..."
"Hmeichhia kha a tha em?" khauh mai a, ka nau hian thil a man chak ang reng tih ka sawi tawh em?
"Umm...chumi chu ka tifel lawk dawn a" ka tih chuan a ngawi deuh vang vang a.
"Midang ruala haw chu i hreh em?" ka tih leh chuan "Aih, hreh love...hei kan haw dawn chiah" a rawn ti leh zung zung a. Matei ka biak zawh hnu chuan Zira number ka dial leh nghal a, "Lo nghak lawk rawh aw" ka bula mi chu ka ti sup a, engmah sawi lovin a bu ve nghat.



Zira bulah chuan ka nau chu lo ngaihtuah ve mai turin ka chah a min lo hrethiam khawp mai. Gracy chanchin ka zawh chuan a pangngai leh vek tawh thu a sawi. "Hei kan haw tawh dawn , a zialo tak tak ani zanin boruak chu..." a rawn ti zawi ve ruih a "Tum dangah a thleng ngai miah lo asin mawle... Hruaitute tan pawh mualpho thlak kan ti khawp mai i awm lai a lo ni ve lehzel bawk nen pawi kan ti tak tak a ni ,min lo hrethiam hrâm dawn nia" tiin thupha a rawn chawi leh zung zung a. "In thiam loh a awm hlei nem, thalai rual awm khawm kan nia lo inbakkaih ve deuh chu thil theih a nia lawm inthlahrunna tur a awm lo ania" ka lo ti ve deuh duah a.



Khatiang buaina thleng kha KTP tan chuan a mualpho thlak ve viauin ka ring. Kohhran huang chhung thil vek a ni bawk nen naktuk lamah khaw mite sawi duh ber a la ni dawn tih ka hria. Thingtlang khua ka hmuhsitna leh ka enhniamna lam ni lo se thingtlang ah chuan eng emaw thleng hlek se a darh chak em em a, sawisep kai pawh a awl viau, a zawng zawngah erawh chuan ka tilo.




Zira nen kan inbiak zawh hnu chuan ka bul ami chu ka en leh a, a lo kun deuh ngal mai. Ka car chu hawngin luhtir mai ka tum a, mahse a tang leh deuh tlat tawh "Lut la" ka tih chuan "Khawnge kan kal dawn?" ka lam rawn hawiin a ti deuh ha a, a mittui a hul hak tawh a, mahse a mit sen deuh râm leh a hnar sen deuh tar atang chuan a tah nasat zia a la hriat theih tho.



Mit a rawn kân deuh âk chuan ka nui suk a, "Lut phawt la" ka tih chuan chîk zetin min melh deuh vang vang a, ngaihthat hmel zan loh chuan a lut ve ta tho.



Car chu tinungin kan in lo lamah chuan ka tlan chhuah pui a, ka lam a rawn hawi vat "Khawnge kan kal dawn?" a rawn ti hap a, a mangang hmêl ka hmuh chuan ka fiam chak tlat pek "Hmun hla deuh ah" nui duh miah lo chuan ka ti sup a, a meng buai nak mai "Khawi hmun hla deuhah?" a rawn ti leh vat, a lam ka va hawi zawk a, ka nuih suk ringawt, a ngaih a that loh hmel khawp mai.



"Enteh ka pu..."
"U Sangzual ti rawh" ka lo ti nghut, a thaw deuh halh a, a ngawi leh vang vang ang lawi a. A hnu rei vak lovah chuan "U Sangzual, min thlah hâw zawk la" a rawn ti zawi sep a, a kûn leh deuh ngal tawh a, a âw pawh a zuai deuh raih mai, a awmdan chu dik zan lova ka hriat avangin kawngkawi rem laiah chuan ka dinpui leh rih.




An insualna ah khan na a lo nei zawk emawni le "Na i nei ami?" ka ti sup a, a lu a lo thing mai a, ka fiam vang kha em mawni dawn le "Khawiah mah kan kal dawn hlei nem, ngaih tha deuhvin awm rawh tlan thawven pui che ka tum mai ania" ka ti leh zung zung a, a rawn thaw chhuak deuh halh a "Chutiang pawh a nilo..." a rawn ti zuai raih, a hreawm ti hmêl chu ka hmuh hmaih lo.




"A zialo e..." a rawn ti zawi leh sep a, an insualna chungchang kha a ngaihtuah niin ka hre ta. "Enga tinge in lo insual reng reng a?" ka tih chuan a lu a thing nak nak a, "Ka sawi peih lo" a ti leh hmak ang lawi a. Zawh buai pawh ka tum tawh chuang lo. Mahse a thiam loh a nih bik ka ring lo.



'Haw ka duh zawk' a tih deuh tlat avangin in lam panin kan tlan leh a. A thu ngawi kar a, car tukverhah chuan a dak veuh veuh ringawt. A inngaihtuah mûk hmel em a biak buai pawh ka tum bik lo


An in zâwn kan thlen chuan ka ding dat a, "Ka lawm lutuk aw" ka lam hawiin a rawn ti sep a, ka lo bu nghut.



In ka thlen chuan Matei ka hmu mai lo, a muhil tawh anih ka ring. Room-ah ka lut a, khumah muin phone a lo khawih. Ka thawm a hriat chuan a rawn hawi vat a, ka lo nuih suk "I lo la mu nange?" ka tih chuan a rawn thu chhuak hluai a "Ka lo nghak che a" a ti ve mai a. Ka wardrobe chu hawngin ka kawr hak tur ka lachhuak a.




"Û, tunge hmeichhia kha?" ka kawr ka hlih lai chuan a rawn ti a, "Tu maw?" towel ban pah chuan ka ti sup, a sawi tum ka hre reng. "I hriat reng kha" a rawn ti ta reng a "Zuali anih kha" ka lo ti tha ve mai a, bathroom luh mai ka tum chu "A khawngaih thlak ka ti" a rawn ti deuh halh. A lam chu ka hawi vut a, an intihbuai chhan kha Matei hian a hre tak ang, Gracy te bulah khan a awm ve tak alawm.




"An insual chhan kha i hria em?" ka ti deuh tawl a, a rawn thu tha sauh sauh a. Hmeichhe thu hla a lo inrawlh buai ve chu ka duh lo viau nain an insual chhan kha hriat ngei ka duh.



"Hmeichhia khan kut a rawn thawh hmasa a" a rawn tih chuan mak ka ti ang reng hle. Zualin a tih hmasak ka ring hauh lo ania "Mahse ka ngaihdan chuan U Gracy kha a thiamlo ka ti" a rawn ti zawi leh sep a.
"Sawi chiang la" a bulah chuan ka va kal hnai a.
"Ih maw...U Gracy te thianho khan tawngkam mawilo deuh deuhvin a tawngkhum a. 'Camp-ah chuan i nu nen lo lût ve ula a tha ang, zu in pawh a sim phah mai thei asin' te kha an ti vel a, mahse hmeichhia kha a ngawi reng a. A hnuah U Gracy khan 'Taka zu ngawl vei ringawt a ni lo tak e, a taksa hmangin sum a lalut thin tiraw, nang pawh amah ang bawk' a ti a, hmeichhia kha a rawn hawi ta vat a, mahse U Gracy bawk chuan 'In taksa zawrh chungchang ka lo sawi chu dawnsawn a harsa viau ami' ti leh kher a, aaa...a tawngkam kha a chhe lutuk, ka sawi chhawng thiamnlo, chuan hmeichhia khan a tuar ta ngang lo aniang a rawn nem pawp a, an insual nghal chu a nimai" a ti siam siam a, ka lo inseh ruh tawlh tawlh thei.



Gracy tawngkam hman duh dan chu mak ka ti khawp mai. Hetiang ang mizia a pu tih pawh ka lo hre ngai hauh lova naupang chhia ang maiin ka ngai thin si a.



"U Gracy chet dan chu a mak tiraw..." Matei pawh chuan a rawn ti ve ta rêng a. "A zialo khawp mai" ka lo ti ve sup a. "Hmeichhia kha i zui daih sia U Gracy kha a thinrim rapthlak. Khanu kha i enge anih reng reng a" a rawn tih leh chuan ka lo nui mai a, "Mu tawh rawh, ka'n intifai lawk ange" tiin ka kalsan ta daih, min nuih zui karh karh leh ta nghal a.



Naktukah Gracy chu biak ngei ka ngai ang. Khatiang tawngkam mawilo lutuk a hmang kha ka duhlo. Tu chungah pawh nise ka nau ten mi rilru tina zawng leh mi deuhsawh zawnga tawngkam an chhak chhuah hi ka duhlo bur.




Misual tak tak leh khawtlanga awm tha duhlo kan tihte pawh hian kan hriatpui hauh lohvin an hun kaltawhah natna thûk tak an lo tâwk reng thei. Sual leh bawraw tak taka an nun an hman chhan chhui chhuah tum hauh lova tehfung khauh zet zeta kan lo teh thin hi sim a hun tawh takzet ani.




Ka mut hmaa ka tawngtainaah chuan a tan khan Pathian ka au a, chakna leh huaisenna a neih theih nan ka dil. A fate dilna tih hlawhtlin sak thintu chuan min tih hlawhtlin sak ngei pawh ka ring.



Ka mutfel hnu chuan ka phone ka phawrh a, Sawmtluangi message a lo tlar dul.
*Zuali kha a tha em?*
*Enteh, Gracy kha sawisel ka duhlo viau na chu ama thiam loh kha aniang*
*Zualin tumah a tibuai ngai lo*
Zuali thlavang a rawn hauhna chu a lo awm nual a, a tawngkam atang chuan Gracy a dem zia pawh a hriat theih.
*Zuali chu ka rawn thlah tawh, Gracy chu ka lo be dawn* tih zawng ka va thawn let.



Zuali number ah chuan ka lût a, a lo online hlauh, a message tur chu ka type a, ka delete leh a, ka type leh a, a va han leloh thlak tak, hmeichhia ang maia ka awm chu le.


*I mu tawh em?* mipa ka nia lawm le tiin ka va thawn ta hram a, minute 15 ka ngaihchân hnu pawh chuan a la seen duh thak lo, a online reng sia, reuh chuan a. Mahse nuam ka ti sawt ang lawi a, a awmdan chuan min hîp zual sauh nimaiin ka hria.



Zing ka thawh chuan Matei a lo tho tawh a, chaw chhuan tur a lo siam mek. Ka tho chhuak min hmuh chuan min lo nuih var var a, "Thingpui aw?" a rawn tih chuan ka lo bu ve nghut. Tualchhung Chanchin Bu dawhkana lo awm chu ka ban vat a, thutthlengah thuin ka chhiar a.



Ka thingpui in lai chuan pastor a rawn leng lut hlawl a, damlo kan paha a rawn pen kawi thu a sawi chuan a damlo kan chanchinte chu ka lo zawt ve luam a, "Tawngthu chheloah zanin a daih pawh a rinawm vak loh..." a ri fan deuh ruih a. Matein thingpui a lo pe vat a, "I nau hi a that reuh kirh kerh hi" a tih chuan Matei chu a lo nui hak hak a, "Ka lawm e ka ti mai ang" a lo ti ve vat. Matei hi thau ti a sawi tur nilo mah se a khal deuh talh a, a biang puar ve deuh lek lek hian a tilang cute thin.



"Nizan lam KTP hnatlang boruak a tha vak lo a ni awm a?" sitting room-a kan inzui phei hnu chuan a ti sup a, han sawi ve mai dan tur ka hrelo, "Nia a zialo tak tak ani" ka lo ti ve sup a. "Ka damlo kanna atangin ka rawn hria a, Kohhran huang chhung thil vek a ni si a, Kohhran dang hmaizah pawh a na ve duh dawn viau mai" a rawn ti leh charh charh a, a rilru tur chu ka hriatthiam pui ve khawp mai. Kohhran hmel hemna hi Pathian hmel hemna ang mai a ni si a.



Pastor haw hnu rei vak lovah chuan tukthuan kan ei a. Matei bulah chuan Gracy te ina kal ka tum thu leh a lo kal ve duh em tih ka zawt a "Aaa...ngawi rawh U Gracy bulah ka awm duh rih lo ka lo kal ve lo mai ang" a ti mauh mai. Nizan thil thleng vang kha niin ka hria.



Matei hi chu mi zaidam leh nunnem deuh mai hi ania, a naupan ngaihtuahin a tawngkam a fel fai a, mite pawi sawi a hlau em em thin bawk. Khatianga Gracy in midang a tawngkhum avang khan a ngaina ta vak lo pawh a nimai thei.




Ka nutei te in ka va thlen chuan Pa Zaia pawnah a lo awm a, an motor a lo sil mek. Ka kal min hmuh chuan a rawn ding vat a, "Chaw in ei tawh em?" ka ti sup a, "Aw ...ei tawh e, inchhung lamah lo va lut rawh, i nutei leh Gracy pawh an awm kha" a motor silna dahfel pah chuan a ti zung zung a.



Inchhung ka va luh chuan Nutei chuan hriauin eng emawni hi a lo thui a, ka hawikual a, Gracy ka hmu mai lo.



"Khawnge Gracy?" ka va tih chuan Nutei chu a lo hawi vat a, min melh deuh vang vang chuan mit ka lo kan ak "Hetah rawn thu phawt teh" a rawn ti fiah fak a, enge maw a hriat ni "Lawk, Gracy chu...?" ka ti leh rih, "Room-ah a awm" a ti tha veleh mai a, Gracy room lam ka pan vut chu "Nakinah ka be duh che ania" a rawn tih leh chuan ka lo bu ve ta nghut.



Room ka va lut "Gracy" ka va ti chiah chu lukham chhah zet hi ka hmaiah a rawn ri nghal dawp, ka lo rum nghut a, khum lam atang chuan thip zet hian min rawn melh.



Lukham chu chharin Gracy awmna lam chu ka va pan a "Eng nge i rawn tih dawn?" a lo ti bak hlar a "Inbe lawk ang" a dawhkan bula chair chu pawtchhuak in a khum bulah chuan ka thu a, lukham chu a khumah a dah thla nghal.



"Ka be peih lo che" khumah chuan muin a inlukhup hmak, ka thaw chhuak hluai a "Titeh Gracy naupangchhia ang maiin awm suh" a rizai chu ka pawt a , a lo pawt ve tang bawk si ka pawtsawn thei lo.



"Lalnunhlu" ka tih fiah fak takah chuan a rawn thu chhuak hluai a, thip fe hian min rawn melh. "Tinge midang tawngkam mawi lo tak taka i tawngkhum a?" dam deuh dap chuan ka ti a, a ner nghal nak "Tunge ka tawngkhum a?" ngeiawm zet hian a rawn ti a, "I hriat kha" ka lo ti nghut. "A nihna ka sawi ve mai anih kha" ngaihsam zet hian a rawn ti a, a tawng duh dan mai mai chu...



"Hetianga awm hi i inhmeh lo ania Gracy. Ka nau ten tawngkam mawilo an hman ka duh lo, midang rilru tina zawng phei chuan tawngchhuah miah loh tur. Nakinah Zuali kha ngaihdam dil ang che" dam deuh thluam a ka tih chuan "A teuhlo" a rawn ti vak, a awmdan mai mai chuh !



"Nizanah te khan min tan ta che i nau zawk ka nia khanu kha i umzui a " a rawn ti leh hlak hlak a, rum zetin min la melh. "Tan leh tan loh lam a nilo. I tawngkam kha a mawi lova tuna chinah chuan sim tawh ang che" khauh zet chuan ka ti a, "Chhuak tawh rawh" tiin khumah chuan a mu a, a inlukhup lehnghal hmak. "Ka sawi kha hre reng ang che. Tu lakah pawh i tawngkam fimkhur tawh ang che" ka ti nghet leh churh a, hria ang pawhin a awm duh tawhlo.




Gracy room atanga ka chhuah chuan Nutei chuan TV a lo hrufai a, min rawn hmuh chuan "Lo thu lawk teh" a rawn ti a, hnial lovin ka thu ve mai bawk a.



A kut a va sil hnu chuan a rawn let leh a, "Nizanah tinge i nau thlavang i lo hauh loh va" mauh mai a, a rawn sawi chhuah dan atang chuan a fanu chu a thiam zawkah a ngai a ni ngei ang.



"Gracy thiam loh anih kha" ka lo ti deuh tawl a, mak ti deuh taka min melh chuan "Nizanah Zuali kha tawngkam mawilo tak takin a lo tawngkhum a, Zuali thinin a tuar lova an insual ta anih kha" tiin thudik tak chu ka hrilh a. A thu rawn sawi chhuah leh duh dan chu ka lo beisei lawk loh lutuk anih vangin sawi veleh mai tur pawh ka hrelo.




"An chhungkaw nihna a sawi mai alawm. Hmangaihzualin kut a lo thlak hmasak vang anih kha an insual, mahni nihna chu eng nge a huat viau" a rawn ti hlak hlak a. Nutei thu lak duh dan chuan min ti hamhaih ang reng hle. An nufa hi ka lo hrechiang tawk ve viau emaw ka tia.



"Nang paw'n hnaih vak suh ang che an nufa saw an hlauhawm ania" a rawn tih zawm leh zat a, sawi zui vak ngaiin ka hre tawhlo, an thil thlir dan chu a chiang viau e.



Ka haw hma chuan Nu Rinkimi te dawrah ka pengkawi a, aman dawr a lo nghak a, a tupa upa zawk a lo pawm a, Sawmtluangin purun var vel a lo pack mek bawk. Min rawn hmuh rual rual chuan Nu Rinkimi chuan "Nizanah engtin nge Zuali in lo tih a?" a rawn ti hlak a, a âw atang chuan Zuali thlavang a hauh nghal hlur tih a hriat theih. An dawr chhungah chuan ka va lut tê tê a, "Engtin maw i nau Gracy chuan a lo tih a?" a rawn ti leh hlur a. "Nu, khawi maw i ân tui tak tak hmain sarang kha min lo pe phawt teh" Sawmtluangin nui rah rah chunga a rawn tih chuan ka lo nui huk, a nu titi laklawh tawh chu pawh chah a harsa ve em ani.




Sarâng ban pah chuan a tupa chu a nu bula lo va awm turin a tir a. A zawhna ngai bawk min rawn zawh leh takah chuan "A zialo tak tak ani Gracy pawh ka hauh tawh kha" ka lo ti ta vat a. Mahse a ner nasa ngang mai "I nau saw a chaltlai hrim hrim, Zuali kher lo pawh midang tawngkhum fek fek a chîng lutuk" a ti nghat nghat a , "Nu a mak" Sawmtluangi chuan a lo khap vat a. Mahse Nu Rinkimi tawng kaltlung laklawh tawh chu a khap theih loh ka tih tawh kha "Ania lawm, i nutei zia saw a chhun fuh lutuk a. I pa Zaia leh Rema saw chu an fel, Lungleia pasal nei ta pawh kha a fel tho, mahse Mâsâii leh Gracy hi chu an hahthlak. Tawngkam mei nei deuh deuha tawng hi an chîng tlat thin, an thenawm khawveng te pawh sawn an hre fur alawm" a ti leh hlak hlak a.




Ka nutei ka lo hriat thin ang letling thawk a ni. Mi fel leh mi hriatthiamna ngah tak angin ka lo hmu mai a, mahse inhrechiang turin kan inhmu tam lo ve em bawk ani.



Nu Rinkimi hi chu ri phawng phawng thin mah se a rilru a chhelo tih ka hria. Zuali te nufa tana a thiltih zozai atang pawh hian a hriat theih. Mi zawng zawng deuh thaw in an hmuhsit rawn chung hian an thlavang a hauh thei tlat. Tin, mi tupawhin an ngamin an nel em em a, a vin chiam thinte pawhin an nuih liam mai zel.




"Zuali chu inah a awm em?" ka tih chuan "Dar engzat nge?" Sawmtluangi chu a zawt a, "Dar 11" a lo tih chuan "A la awm ang, chawhnu lamah naupang exam naah a duty dawn a, a chhuak tep tawh ang" a rawn tih chuan zawhna ka lo nei leh hman tawh "Sawmsanga ten nau an nei leh ta sia, an nu bulah hna zawm tawh lo mai turin a ti a, an fate chhang a lo zing bawk nen Nana-i pawhin a hnial ta bik lo anih kha. Chuan, ai kala Zuali a tir kha a ban tak hnuin a nghetin an la nghal daih a, a tihzia tak tak ani" ka rilru hria ni awm tak chuan a rawn ti leh zung zung a.





An dawr atanga ka chhuah dawn chuan chimawm chhuahin an nufa in min chhaih hram pek kha. Ka pha buai duh lo, dawt ni miau hek lo le.



Zuali te veranda ah chuan pangpar pot chei mawi chi hrang hrang hi a lo tlar dul a, ka kal hmasak kha zân a nih avangin ka lo enchiang miah lova. Nu Rinkimin a kut them thiam zia min hrilh kha a lo dik anih hi mipa mah ni ila mawi ka ti ve reng mai.



An inchhung va lut ta mai lo chuan a thil chei ho chu ka enkual a, a tlânga hawrawp sîn tea thil inziak chuan ka mit a la kher mai, *Love Covers All* tih hi mawi fahranin a lo inziak a, enchian loh chuan a hmuh theih mang loh "Love Covers All" ka phun sup a, mak tak maiin ka rilruah Bible châng pakhat a rawn lût zawk mai.



Johana 3:16 "Pathianin khawvel a hmangaih em em a; chutichuan a fapa mal neih chhun a pe a, amah chu tupawh a ring apiang an boral lohva, chatuana nunna an neih zawk nan" a chhan ka hrelo ka rilruah chuan a rawn inthum rawn tluk tluk anih chu !




"Tunge?" ka hnunglam atanga hmeichhe âw in a rawn tih chuan ka inher vut a, Zuali nu chu an kawngkhar bulah a lo ding reng, hman zana kan buaipui vak tum khan ka lo enchiang miah lova Zuali nen an lo inang kher mai. Nu lian pangngai ve tak a ni a, a kum a upa ve deuh tawh tih chu a hriat theih.



"Tunge i nih a?" ka lo en deuh vung vung lai chuan a rawn ti leh sep a, hman zana zu rui buai vak kha chu a ang tawh miah lo. "Zuali a awm em?" ka ti sup a, "A insiam a" a lo ti tha ve mai bawk. "Sangzuala ka nia" ka tih chuan a meng buai deuh nak a, mahse a insiam tha vat "Pro Pastor maw?" a rawn tih chuan ka lo bu nghut a, tim deuh dai hmel hi a pu nghal, a inthlahrun hmel viau bawk, "I dam em?" ka tih chuan a bu nghat a, "Ah...i...inchhungah hian lo lut la" a ti bah deuh nak, an tawngdan ah pawh an inchhun nufa viau e.




Inchhungah chuan ka zui lut a, thutna min kawhhmuh lamah chuan ka va thu a, "Bawihte...hei mi an lo kal" min rawn melh zawk a, a hawisawn leh vat, ka hming lam a hreh anih ka ring.



Gas bulah chuan a va ri rak rak a, chawhmeh a chhuang lum dawn aniang. A chezia chu ka lo thlir reng a, Nu Rinkimin a chungchang thu min hrilhte kha ka hrechhuak lo thei lo, Mizo upaten 'Kawppuite chân chu dar lehlam sah thlak ang a ni' an tih hi ka lo hre ve tawh thin, a takah la tawng ve lo mah ila a hrehawm dawn hian ka hre lutuk a. A ni phei chu a pasal thih dan a runthlak bawk si, hetianga a awm ta mai hi dem ai mah chuan amah khawngaihna in ka khat. Tin, tuna a awmdan thlir hi chuan misual tak anih ka ring hran lo.




An room kawngkhar chu a rawn ri khep a, Zualin an sitting room-a ka lo thu rûn min rawn hmuh chuan a meng phawk kher mai. Kawrfual vut buak rawng hmakilh nei, a khup chen vela fual hi a ha a, a lang smartin a inhmeh kher mai. Sandals a bun leh tawp a, a ke no deuh chêk chu a lang chiang kher mai.




"Eng nge i lo tih dawn a?" a rawn ti hap a, min rawn pan ve vat, ka ep chiahah a rawn thu a. "Thingpui ka lo siam ang che aw" a nuin a rawn tih chuan "A ngai lo mai, ka puar rih emai" ka lo ti ve vat a, chutia ka chhan takah chuan room lamah a lut ta daih.



Ka hmaa thu chu ka en run run a, min melh ve kar bawk, a hawisawn duh thak lo lehnghal. A mit a rawn kan âk a "Nula inah ka lo lêng" ka tih tak supah chuan a meng buai deuh nak a, lai miah lovin min melh deuh khai khai a, a tho chhuak ta tharh "School kal ka ngai a, ka kalsan mai dawn che asin" a sana en pah chuan a ti sap a. Inlêng te kalsan daih han tum mai chu aw...



"I phone?" a hmaah chuan ka kut ka phar chhuak a, a ngaihna hrelo zetin min melh a "Ka lo hmang lawk" ka tih takah chuan a bag chu a zen rak rak a, a phone chu rawn phawrhin ngaihtha zân lo hian ka kutah chuan min rawn hmehbel a.




A lockscreen ka swipe chhoh chuan password a lo dah lem lo, wallpaper ah a nu nen an thlalak a hmang a, an inang kher mai. WhatsApp ah chuan ka lut a, ka chezia chu ngawi rengin min lo en ve reng. Number hlang a lo tlar thla dual, mahse tu message mah a hawng lo. A number save pangngai atanga message a dawn chu khat pheuh pheuh tak ani, a bak chu group a ni leh tawp mai.



"Eng nge tih i tum a?" a rawn ti fiah fak a, ngawi rengin number hlang ho chu ka delete mual mual a, mipa dangin an biak chu ka remti teuhlo mai. Ka number chauh chu ka save *U Sangzuala🌍* tiin.



A phone ka pek let leh rual chuan a lo ban vat a, a bag ah a thun lut lehnghal "Anih chuan ka kal tawh mai dawn asin" a rawn ti a, "Kal ila" ka tih chuan min melh ang he haw a, ka lo nui suk. A lu thing deuh nakin "Nu ka kal ania aw" room lam hawi chuan a ti lauh a, min rawn en leh a, a kal nghal daih chu ka zui ve vat.



Ka phone chu phawrhin a number chu ka dial a , ka hmaa kalnu chu a ding dat a, a bag zen rak rakin phone chu a lachhuak a, a bih zeuh hnu chuan a rawn lehhawi vat, min rawn melh leh ang he haw a. "A dik e, ka biak che chuan min chhang tawh ang che" ka phone ah that pah chuan ka ti sup a, a bulah chuan ka va ding ve nghal a.



"Tinge globe hi i dah kher?" a rawn ti fiah fak a "Ngaihtuah peihte tan" ka tih chuan nghal min tih hmel fe hian min melh a. "I tlai dawn kal vat ang" ka tih takah chuan chak zetin min kalsan nghal nal nal, ka nui chhuak nghal hawk thung.



Step ka han thlen chuan Nu Rinkimi te dawr a lo kalpel chiah, Nu Rinkimi te nufa chu an lo nui hawk hawk a.



An dawr kawta ka va din chuan min lo nuih dun khar khar a, eng an hria chu nimaw.



"Eng nge in nuih?" ka tih nghut chuan an nuih a za zual sauh emaw tih mai tur ani an nui chhuak leh hawk hawk a. "Eng nge i zuk tih a?" pangngai zawk hian Nu Rinkimi chuan a rawn ti a, Sawmtluangi chu kun chungin a la nui khur ngat ngat. "Ka zuk kal" ka ti nghut.



"Zualtei kha kan lo fiam a, 'Patling fa pahnih vel nei tawh a ang' a tih che kha" nuihza insum zet hian a rawn ti anih chu! An nufa nui khur dawt dawt chu ka melh run run a, ka kalsan ta daih.




Hmangaihzual leh ! Patling fa pahnih nei tawh maw ka an a? A teuhlo mai...


Car chhunga ka luh leh hnu chuan uluk zet hian ka inen a, ka upat hmel viau a mawnle? Kum 30 ral chu ka ni ve tawh tho a, mahse patling fa pahnih nei tawh hmel chu ka pu pawhin ka hrelo.



______*______*_______*_______


(Zan dang aiin a thui ❤️)

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 3rd, 2022, 3:03 pm

LOVE COVERS ALL
By CVL. Awmpuii



Chapter - 6



In lam pana ka tlân lai te chuan front mirror atang chuan ka hmel chu ka en leh zeuh thin a, patling fa pahnih nei tawh hmel chu ka pu tak tak a mawnle ? Ngaihtuahna a tibuai map thei, hmabak a la ko khawp e.



In ka thlen chuan Matein darthlalang a lo nawt fai malh malh a, nachang te hi a hre thin ania.



Room-ah lûtin darthlalang pangngaiah chuan ka va inen leh ngat a, ka sam te chu ka tuai thul. A eng ber hian nge patling hmel chu mi puttir le? Min hretute apiangin ka palianin ka hmeltha an ti thin a, min lo ngaizawng ve thintute pawh an awm nawk tih ka hria. Patling fa pahnih nei tawh tur ang em chuan ka upat hmel pawhin ka hrelo. Ka awmdan mai mai chu tleirawl ngaihzawng nei ang mai...



"Mate, lû i mêt thiam em?" Matei TV screen hrufai mawlh mawlh bulah chuan ka va ti thawr a, a lo hawi vat "Lu meh i duh ami?" a rawn tih chuan ka lo bu nghut a. "Apa pawh ka meh sah thin alawm heihi ka hru zo ang a kan mêt dawn nia" a rawn tih takah chuan ka lo bu leh nghut.



"I lû a la buk em em si lova tikhan i inhmeh tho asin" ka thingpui lum lai chuan a rawn ti leh a, a lam ka va hawi chuan min melh lem lovin a thiltih lai chu a tih zawm mial mial a. Ka lû ka meh chuan tlêmin ka lang pangngai ve thei deuh ang chu ka lo tih mek lai a, ka mêt leh lo zawk dawn em mawni?



"Mate, patling fa pahnih nei tawh hmel ka pu em?" ka tih chuan phawk zetin a rawn hawi a, ka lo melh ve run bawk "Put pawh ka hre nang...tinge a?" a rawn tih tak varah chuan han chhan mai dan tur ka hre pek lo.



"Ka hre chuang lo, ka lo lang patling viau em tih ka hre duh mai mai" nui suk chung chuan ka ti a, a rawn nui ve ta hak hak. A TV hruk faina puan chu rawn keng pheiin silhmun lam a pan a "I palian a, i naupang chhe zawk zawk tawh lo bawk a tlem chuan i lang patling ve deuh tho. Mahse patling han tihah fa pahnih nei tawh hmel pu ang kha chu ka tilo ania. I nihnain a lo zir ve bawk nen i lang patling ve deuh mai ania" a puan kenlai chu a sawp nawk nawk a, dawhkan bula dingin a thusawi chu uluk zetin ka lo ngaithla "Nang chu hmel leh pian en reng reng pawha hmeichhe tan innghahna tlâk tur tih hriat ngawih ngawih ang chi kha" a rawn tih leh takah chuan ka lo thaw huai thei.




Ka ngaihthat nan tal tiin ka lu chu ka meh tir ta tho, tlêm te chauh kan paih a, mahse ka lang danglam ve ta deuh chuan ka hria.



Tlaiah Zira a rawn kal a, naktip maia camping neih tur inbuatsaihna vel kan sawi luam a. Kohhran Committee in KTP ho kutah a dah deuh bawk nen an buai ve malh malh dawn viau mai.



Thalaite hi Kohhran kutke pawimawh berte zing ami kan ni a. Khawi Kohhranah pawh Thalai rawngbawlna a nun chuan Kohhran nung kan lo ni mai thin. Chuvangin phak tawk leh theih tawka kan inhmanna hian Kohhran hmel a ti mawi a, Kohhran hmel mawina in Pathian hmel a lo ti mawi mai thin a ni.




Revival Speaker kan sawm hranpa dawn lem lova, pastor leh Kohhran Upate nen hun kan inhman chhawk dawn. Hetiang hunah chuan mikhual chahin rawngbawlna an kalpui thin tlangpui ania. Kohhran Hruaitute inpekna ropui ka ti khawp mai.



Zaninah KTP hnatlang an ko leh a, tihtur pawimawh em em ka nei lo bawk a kal veleh ngei chu ka tum. Matei ka hrilh chuan a lo kal ve duh tawh bau lo. Amah chauhva kalsan ka hreh si a, thulh mai ka tum a, mahse min tur deuh sek avangin ka va hnatlang leh ta poh aniang chu.



Zira nen bawk kan inzui chhuak leh a, a la hma bawk nen titi pahin kêin kan kal a, boruak a nuam phian mai. Zira hi tlangval sa tha ve pangngai tak a ni a, an khuaah chuan pasal atana iai awm loh pawl tak chu a ni ve ang. Tin, amah hi pa dam thluam kan tih ang chi ve tho kha ani a. A ngaihzawn awm ve awm tehlul nen ngaihzawng a neih awm la hre miah lo.



Sawmtluangi te inkawt kan thlen chuan ka ding deuh chut a, a titi lai a tawp ve chut bawk. "Sawmtluangi sâwm kawi teh ang" zahzelah chuan ka ti ve ringawt a, ani pawhin a lo pawm ve mai.



An inchhung kan va luh chuan thlêng a lo sil mek a. Min rawn hmuh chuan min lo chiauau vat "In va hma ve" a lo ti hluai a, "Kan lo sawm kawi che anih hi" ka lo ti ve mai a.



An sitting room lamah chuan kan va thu phei a "Chaw in va ei tlai awm ve" Zira chuan a ti sup a, "Ka feh ka haw tlai deuh a" Pa Rinmawia chuan a lo ti ve vat. Sawmsanga chuan naupang test paper emawni hi a check mawlh mawlh a, a bulah annu in naute hnute tui a lo hrai mek bawk. Nu Rinkimi leh Sawmsanga te fapa û zawk ka hmu mai lo. Pa Rinmawia leh Zira chu an titi mawlh mawlh a, ka lo zawm ve zeuh zeuh.



"Lawk aw, ka hman tep ania" Sawmtluangi thleng sil zo chu an room lamah a va lut nghal a. Chutih lai chuan Nu Rinkimi te pawh an rawn haw a "Kha...ani Zualin waiwai a lo pe a" a tupa pawm chung chuan a rawn ti lut a. "'Ka lawm e' i ti em?" Sawmsanga chuan a fapa chu a lo ban vat a, a bu ve nghat nghat.



"In lo lêng mai mai ami?" an pa bulah chuan a thu thla nghal a "Sawmtluangi hnatlang turin kan lo sâwm" Zira chuan a lo ti vat. Nu Rinkimi chu a titi nghal bawrh bawrh a. Nizan hnatlang boruak velte chu a rawn sawi chhuak a, Zuali thlavang a hauh sak leh nasa mai. "A zialo tak tak ani zaninah chuan kan lo veng uluk tawh dawn nia" Zira pawh chuan a lo ti dam ve thlup a.



"Kan patling fa pahnih nei tawh chu a va ngawi thei ve" Nu Rinkimi chuan a rawn ti hluai a, midangho chuan a ngaihna an hrelo kher mai. Nu Rinkimi chu ka melh deuh run run a, chutah rawn tawng lehin "Zira kan pro pastor hi patling fa pahnih nei tawh a ang i ti ve em?" nui rah rah chunga a rawn tih leh takah chuan an nui ho ta dar dar. Kei erawh sawi ve mai tur hrelo in ka lo ngawi tawp. Duhaiin Nu Rinkimi hi a chimawm dawn riau mai...




Sawmtluangi inpeih hnu chuan chhuah mai kan han tum a, Nu Rinkimi thu rawn sawi leh avang chuan ka lam an lo hawi thap "I lu te i mêt vel elaw?" a rawn ti hluai a, "I va tang ve" a rawn ti lehpek "I kal teh ang u" ka ti ta nghut, an la nui tha hlawm tak ang deuh deuh a.



"Tikha chuan i tlangval tawh aw" an in atanga kan chhuah hnu chuan kawngka bul atangin a la rawn tih leh hram pek kha.



"I thiannu kan sawm dawnlo ami?" Sawmtluangi bulah chuan ka ti sup a "Naupang test paper check tur a nei a, a hman lovang" a lo ti tha ve mai a. Nizan lam boruak ka ngaihtuah let a, a lo kal duh ka ring vak lo hrim hrim. Zira chuan a phone a hmet mual mual a, kan thusawi chu a lo ngaihtuah ve vak hmel loh.



Hnatlanna hmun kan va thlen chuan an lo che leh sang sang hlawm tawh a. Gracy te thianho pawh an lo nui leh dar dar tawh, nizan lam thil thleng kha chu a enghelh vak tawh hmel loh khawp mai.



Tihtur awm ang ang chu kan tifel zung zung a, kan hnatlan hmasakin kan khawih hnem hman bawk a, zanin chu tihfel tur pawh a awm vak tawh lo.


Dar 8:30 velah kan bâng a, kan khawih fel thawkhat viau tawh e.


In ka thlen chuan Zuali chu phone ka tum ut ut a, mahse a buai ka rin deuh avangin ka call buai lo ta law law. Biakinah ka hmuh leh ngei ka ring ve tlat.


Bible leh notebook lachhuakin sermon tur ka ziak leh a. Matei chu a mu leh der tawh. Tawngtaina nena han beih tak tak hi chuan kan thu ni hauh lovin Pathianin kan rilruah hna a lo thawk a, thu nung a lo lut ve zel mai.



Dar 10 rik dawn chuan in atangin ka chhuak vut a. Zanin chu car in kal leh phawt mai ang. Zuali kal hma va nang hman ka duh, zana amah chauha chhuak tur chuan ka ngaihtuah tawh tlat.


Sawmtluangi te inzawn ka thlen chuan ka mi hmuh duh chu ka mitmei deuh a, mahse a kal tawh anih ka ring a reh duk mai.



Biakin gate chhakah chuan ka car ka hung leh a, Biakin lam chu ka pan thla vut. Ka hlim teh surh lehnghal a...


Thâwm dîm thei ang berin ka va lût a, tlar hmalamah chuan a lo thu ngei e. Zâwi têtê in a phun ri sep sep a, ka va kal hnai a "Lalpa, nu tha tak min pek avangin lawmthu ka hrilh che. Pa nei lo tan pa i nihzia i rawn lantir thin avang pawhin lawmthu ka hrilh che a, khawngaih takin ka tan Pa tha tak ni zel ang che aw. Nangmah hrelo thei lovin min siam la. Harsatna tam tak karah pawh ka la ring fan ang che" a tawngtaina chuan min lo fan hneh kher asin.



A bulah, amah si lo tawk vel chiah chuan ka va thu a, a tawngtai zawh hun ka lo nghak a ni ber. Ka thinlung khawih che zawng hlira a khawsa tlat thin hi mak ka ti hial mai, a tih luih bik chu a ni awm tawp silo.



A rawn meng chhuakin min rawn hmuh chuan a phu nasa kher mai. Ka lo nuih suk a "Zanah mahnia chhuah tawh loh tur ka ti emaw ka tia" ka lo ti sup, mak ti hmel deuh hian min la melh kal a, a lu ka tuai tak zauhah chuan hmalam a en vat.



Ka va thut hnaih chuan a lo tawlh phei hrat a, chimawm chhuahin ka va thuthnaih zel a, a lo tawlh phei ve zel, naupang chhia te pawh kan ang alawm le. Tawlhna tur a awm tak si lovah chuan ka lam a rawn hawi thut a, ka lo kûn hnai bawk nen kan hmai a insi thuak. Chiang kel kawl hian kan inen a , a meng phawk hra a, harhchhuak thut niawm tak hian a tho hluai a.



"Min lo zui ru ami?" a rawn ti fiah fak a, ka lo nui huk. Min melh ve khai khai a , zaidam viau mah se a tih loh lamah chuan tilo ve tak anih dawn hi. "Lo thu teh" a zawhna chhang lo chuan ka ti sup a, min melh deuh ngar ngar, rawn thut mai a tum hmel si lova a banah chuan pawtin ka bulah chuan ka pawt thu hmak.



"Inbe lawk ang" ka ti sup a, chîk zetin min melh a, a bân chu ka thlah veleh nghal mai a, ani pawhin thawh chhuah a tum tawh bik lo.


"Patling fa pahnih nei tawh hmel ka pu em ni?" lungawi vak lo chuan ka ti khur khur a, a lei chhuah tetin a then deuh chak chak, a duhawm hrep lehnghal "I ang ka ti ringawt anih kha" a rawn ti hliai a, a hmel landan chu a duhawm ani tawp mai.


"Naute hnute hne lai i ang" ka lo tih chuan ka beisei loh zetin a rawn nui chhuak hak hak a, a nui ri vang chuan ka lo nui ve tawp.


"Gracy kha ka hau tawh aw, i lo hrethiam hram hram dawn nia" thutak deuhva ka tih takah chuan a rawn thaw chhuak deuh hak a "Kut ka thlak hmasa a, ka thiam loh anih kha" a rawn ti let mauh mai. A thiamlo zawkin thiamthu a'n sawi nasat zat zat nen chutianga a inpawm thlap vang chuan min ti dang lek lek dawn alawm le.



"A tibuai tawh miah lo ang che" ka ti leh sup a, hmalam a melh deuh vang vang a "Duh reng vanga piang ni lo mah ila ka nu fa a ka lo piang kher hi ka lawm" a rawn ti chhuak sep a. A thusawi chu tâwi hle mah se thu tam tak a pai niin ka hria.



"Zanin i lo hnatlâng ve dawn emaw ka tia" a rilru kal ding lutuk tur lakpen nan chuan ka ti ta daih. "Naupang test paper ka check a...chuloah...a...ka phur tehchiam lova" a ti deuh nang nang a, a phur loh chhan tur chu zawh buai ngai lovin ka hrethiam mai.



"Miss nih chu a nuam em?" uang deuh tak chuan ka ti a, thutak zet hian a bu deuh nghat nghat reuh a "Keichu naupang bula awm hi nuam ka tia, zirtirtu nih phei chu hmân atanga ka châk tawh ania Pathianin hun tha min pe hlauh a, ka nih châk ka ni thei ta hlauh a" a ti siam siam a, naupang chungchang te chu a sawi siam siam a, zanin chu rinai takin a tawng duh phian mai.




Biakin atanga kan chhuah meuh chuan Dar 11 a lo pel tawh. Kan pahnihin rilruin kan tawngtai dun leh phawt a, a lo tlai duai hman anih hi.



Zuali chuan rilru thianghlim takin min bia tih ka hria, thian ang em chuan min be lo mah se a hmelhriat pangngai tak ang chuan min be vein ka hria. A rilru thianghlim zia ka hriat belh zelna te chuan ka duhna a tipung sawt a, min hip tial tial a ni ber.




Tur ut ut ka duhlo, ka hmanhmawh duhlo bawk, a dinhmun zir chian phawt a ka rilru chu hriattir ka tum.



Matei a haw leh tawh a, mahni chauha han awm leh ruk ruk takah chuan khua a har ve riau thei. Tawngtam lem lo mah se khatia a lo awm ve khan a nuam a, min âwl hneh phian bawk si.



Vawiin lamah campers an rawn lut tawh dawn a, kan lo inbuatsaih lawk dan chuan mi 50 aia tam rawn lut turin kan beisei a, bial chhung huapah sawmna kan sem bakah khawtual mi a duh apiang te tan luh theih kan ti bawk. A duh apiang tan tih lemah ' Ruihhlo ngaite pual' tih chu a ni tho.



Hall atangin Information Mike kan set a, thalai hruaituten camping chungchang an puang dur dur a, pastor leh upa te ho bulah thuin Pathian thu hmangin kan lo inkawm ve mek bawk. Campers te pawh an rawn indahlut ve zel a, kan ri deuh laih laih mai.



Tukverh bulah chuan dakin thlang lama thingpui lo semtu chu ka zuk thlir leh vauh vauh thin. A thawmhnaw inbel apiang hi inhmeh loh pawh a nei lo chu anih hi.



"Sangzual" Pastor in a rawn tih chuan a lam ka hawi vat a "Zanin chu bul tan mai la" a rawn tih chuan ka huphurh ang reng khawp mai. "Upa zawk te in awm alawm" ka tih ve ngial paw'n 'I chungah tla mai rawh se aw' an rawn tih tak tlat avangin ka hnial lui thei ta bik lo.



Tlai dar 3 thleng chuan mi 60 vel daih kan inziak tling ta mai, a hlawk thlak dawn khawpin a hriat e.



Inah hawin eirawng ka inbawl chawp sawk sawk a, campers te tana chawhlui an buatsaih kha ei ve nghal mai turin min ti ve ngial a, mahse ka lo hnial thung. Remchân chu a remchâng zawk na meuh mai, mahse chutianga midang tihbuai chu ka duh bik lo. Lo ei ve ta ngawt ila ka zai ngai reng renga an awm ang a, khatiang kha ka duhlo.



Ka insiam zawh hnu chuan ka phone ka check thuak a. KTP group-ah zanin thalai duty tur an rawn dah a, ka hming zuk hmuh avang chuan ka nui suk. Ka phur leh viau tawh...



A number chu ka dial nghal vat a, rei vak lo hnuah chuan a rawn pick up a.
"Hello" a rawn ti sep a, a aw ri ka hriat chuan ka'n nui suk ringawt pek a.
"Zanin i duty dawn tiraw?"
"Imm..."
"Min lo nghak rawh aw" ka'n ti tawl pek a, "Tinge?" a rawn ti khauh "Aww...i globe rualin i kal ang" ka tih chuan a hawihai hmel tur ka mitthla thei ruak mai "U Sawmtluangi nen kan kal dawn" tih leh phone dah a rual daih. Heti hi chuan hma kan sawn dawnlo tawp mai. Engtin emaw tak chuan ka tih a ngai ani. Pathian rawngbawltu mah ni ila mipa ka ni ve tho.




Hall ka va thlen chuan an lo ri laih laih a. A then hi chu mahni duhthu a rawn lut pawh an nilo, an chhungte nawr luihna avanga a hminga rawn lût ve mai mai an ni. Thenkhat, an nun siamthat duh tak tak avanga rawn lut pawh an awm tho.



Ruihhlo ngai camping buaithlak ve deuhna pakhat chu an chiri tlat thin hi ania. Buaipui thiam an harsa thin.


Sawmtluangi leh Zuali pawh chu ka va hmu ve mai a, mi pakhat chiri an lo buaipui a, kan chhangchhe dawn khawp mai. Mahse heng mi zawng zawngte hi Pathian hmangaihte vek an ni a. Keini hi an saltanna atanga chhan chhuak tura a rawngbawl turte chu kan ni.


Zan dar 8 dâwnah Sermon chu kan tan thei ta hrâm. Zu lo kenglut ru an awm pek a, rui lungpuam deuh deuhte an awm a, zawhna an ngah phian bawk si. Tawngkam mawilo nilo se 'Zu in mi hi chu Pathian thu-ah an khirh, an hre phian lehnghal bawk si' an tih thin kha a takin ka tawng mek. Ka thiam ang tawk chuan tihtak zetin ka'n hrilh ve bawk a, an thluakah a lut ngut ange maw.




Zan dar 11 velah chuan kan duhtawk thei ta hrâm. Pawna ka va chhuah chuan Zuali ka hmu tawhlo, hmeichhia hrim hrim an lo awm tawhlo. Pastor leh Upate pawh an lo la awm a, tlangval thenkhatte nen.



Zanin boruak kan han sawiho luam a, naktuk vel atang chuan pangngai takin hun kan hmang thei tawh turah ngai ang. Tlangval hovin an riah chilh dawn a, a ngaihthat thlak viau e.



In lam pana ka tlân Sawmtluangi te inzawn ka thleng tep tihah Bike pakhat chak zeta tlan nen kan inpel fua a. An in kawt ka thlen chuan an in panna step-a Zuali kal liam chiah chu ka hmu hman. Nichin ami kha Ricky-a tihna em ni? Ka ngaihtuahna avang chuan ka sa phat thei.



Car chu tidingin ka chhuk vut a, Zuali te in lam pan chuan ka kal nghal pawk pawk, ka insehruh teuh thei.



Ka zuk thlen thlak chuan an kawngka a lo kalh hman, an kawngka bula dingin ka phone chu ka phawrh a , a number ka dial nghal, rei a ring lo a lo pick up vat "Rawn chhuak teh" engmah a sawi ve hma hauh chuan ka ti deuh tawl a, a ngawi deuh vang vang chu ngai thei lovin "In kawngka bulah ka awm rawn chhuak teh" ka ti leh nghut, ka tawngkam bul ta lutuk te chu ka nih dan pawh a ni ngailo. "Eng nge i rawn tih?" mak ti âw ka hre tel thei "Biak che ka duh rawn chhuak teh" tiin kan inbiakna chu ka titawp nghal.




Ngawi rengin an kawngka bulah chuan ka ding a, a rawn chhuak har ka'n ti mai mai khawp a. In sir deuhva kalsawnin Phone leh mai ka tum lai chuan an kawngka a rawn ri khep a, ka inher nghal vut. Shawl lian deuh tak hian a inkhuh deuh hlûn a, mak ti deuh takin min melh kiau, a duhawm hrep lehnghal.



"Eng nge i rawn tih?" a rawn ti chhuak hap a, ka va pan hnai nghal vut a "Khapa kha tunge?" ka ti nghal hlur, pehhel dan dang hre miau hek lo le.



A ngaihna hriat loh hmel zet hian min melh a "Bialpa i nei em?" ka'n ti leh deuh tawl a, a hawihai nasa tawh mai. Ka lo insehruh tawlh tawlh tawh "Eng nge i hriat a?" a rawn ti fan raih. Inbengdaih tum tak chuan thawk ka la nghal hawk, ka awmdan chu ngawi rengin min lo en ve reng. Heti em ema ka thik thu a chhiat pawh ka hrelo. Mahse mipa dang hmu tura ka ngaihna khan ka thisen a tilum vek thei.



"Tunge nichina mipa kha" insum tum tak chuan pangngai deuh zawk hian ka ti leh a, chik fahranin min lo melh "Ricky i tihna ami?" a sawi ta chênga ka thinrim zual sauh nimaiin ka hria. "I eng nge a nih?" ka ti khauh leh fur a, ka awmdan chuan a thawng tih ka hria, a phawk deuh hra mai. "Sawi teh" ka ti leh hluk, zanrei tawh lam ani bawk nen a tawng rin ngam bawk si loh.



"Eng atan nge i tih?" min zawg let khauh a ka duhdan a nilo kher mai. "I eng nge anih sawi mai rawh" ka ti leh hluk, ka melh run run a, a ngawih deuh vang vang hnu chuan "Sual hi ka hua...misualte ka hmangaih thung. Ruihhlo hi ka hua a, ruihhlo ngaite ka hmangaih" a rawn ti fiah fak. Min chhân dân avang chuan sawi leh mai tur pawh ka hre tawhlo.



"Hmangaih tihah khan tisa thil taka va inhmangaihna lam kha ka sawi lo ania" a rawn tih zawm leh zat a, ka zawhna tak chhâng lo mah se chhanna chu ka hmu chiang viauin ka hria.


"Ka awmdan hi i hrethiam em?" ka lo tih chuan hriatchian tum awm ang fahranin min melh a "Misual deuh te pawh i ang" a rawn ti hlak, hmabak a la ko ka tih kha maw...mahse mipa ka nia lawm, a hriatthiam loh zawng zawng chu ka zirtir mai ang.



"Ka duh che anih hi" ka tih tak tawlah chuan a meng phar nasa mai.


______*________*________*________


(A ngaihnawm thlawt lo...tlai si tawi si zanin chu ka beih ngial paw'n rilruah a lut hlei thei lova a ngaihnawm hlawl lo min lo hrethiam hram mai teh u)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)