LOVE COVERS ALL By C.V.L.Awmpuii (Completed)

[Ngaia]

LOVE COVERS ALL
By CVL Awmpuii



Chapter - 25



December thla kan chuangkai chho a, khua pawh a vawt tawh viau mai. Kristmas programme Kohhran secretary in a set fel tawh a. Keipawh hun ka neih ve dawn avangin helamah ka hman a ngai dawn a, kum thar erawh kan khuaah ka hmang ve thung ang.



Helama Krismas ka hmang thei tur chu ka lawm viau mai, hun thawl tam zawk kan neih theih phah ang a. Rilruin lo ruahman lawk roh roh pawh a nei ve ran a, tisa leh thlarau tak paw'n hun hlimawm tak kan hmang chho thei turah ngai ang.



Presbytery Inkhawmpui atang khan Nutei te nen kan la inbe tha hlei thei meuh lova. Pa Zaia leh Rema te nen chuan tha takin kan inbe tho a. Mahse Nutei leh Gracy ber hi an buaithlak a, a pawi pawh ka ti em em chuang hlei lova.




Zuali nen pawh pangngai takin kan la inzui a. Kan inkar thu chu mi thenkhat hi chuan rin dan an neih thiam ve tawh ka ring. Presbytery atang bawk khan ania, ka awmdan atang khan an hriatthiam ve deuh chu ka ring, tlang takin tumahin min zawt ngam lo mai mai niin ka hria. Kei chuan pawi pawh ka ti em em tawhlo, zalen deuh huaia inhriatna te hi ka nei hial zawk.




Vawiin chu tih tur em em ka neih loh avangin in ka tifel a. Mahni a awm miau chuan mahniin engkim tih a ngai a, mipa tihtur leh hmeichhe tih tur pawh a thliar hran theih meuh loh chu a ni.



Chhuat ka nawh laiin Pastor a rawn lenglut hlawl a, ka thiltih lai dahfelin ka lo dawngsawng vat a.



"Khatiang lama puitu tur che kha i mamawh tawh mawle" nui vur vur chungin a rawn ti lut a, ka lo nui ve mai a.



"I lo leng lut mai mai nge?" ka tih chuan "In thenawm dam lo saw ka lo kan a, a lo zia tawh khawp mai. A remchang em a ka tia ka lo lut kawi anih hi" a ti zung zung a, thutthleng ah chuan a thu thla a.



Ka thenawmah hian nutling pakhat dam lo a awm a, chumi chu a rawn kan anih hmel. Keipawhin tukin zing lamah khan an chanchin ka va zawt a, a tha rih viau chuan ka hria.



Choka lamah pheiin ka chhuat nawhna te chu bathroom ah ka dahfel zung zung a. Ka va chhuah leh hnuah thingpui ka lum sak nghal a.



"Naupang ho an dam em?" a thutna epa thutthlak pah chuan ka ti a "Pathian zarah an dam tha viau thin e" nui huk huk chung chuan a ti a. An fate hi an harh viau ka tih tawh kha.



"Eng nge in chanchin ni zel?" a ti sup a, a thutak viau bawk. Zuali nen kan chungchang min zawhna a ni tih ka hria a, ka lo chhang ve ta vat a "Keini chu kan tha viau a, mahse ka chhungte hi an buaithlak. A bikin ka nu, a pawm mai thei thlawt lo hi mak ka ti" ka lo ti hulh a.



Bu deuh nghut nghut chung hian "In ngaihtuah awm lo turah ka ngai a. Heng zawng zawng te hi in tan fiahna vekah ngai ula. In inhmangaihna tipung tu tur anih mai piah lamah Pathian thiltihtheihna rawn lanchhuah zelna tur niin ka hria" a ti dap dap a, kan hmakhua a ngaih ve zia chu a hmelah ka hmu thei hialin ka hria.



"A tir atangin chhanna ngai char char ka la dawng" ka lo ti sup a, hrethiam vak lova min lo melh chuan "Inpeih a a chakna rinchhana inthuam tha turin min ti" rilru buai hmel tak hian ka lo ti leh a.



Chutah zangkhai zet hian "A chakna chu rinchhan ta reng che, ngaihtuah buai tur a awm loh chu. Pathian mahin inpeih tur leh a chakna rinchhana inthuam tha turin a ti che a. A thu-ah chuan innghat tawp rawh. Mahse mihring lam hian tih tur kan nei ve a, chu kan tihtur chu Amaha kan innghah tak tak ngamnaah tihnghehin a lo awm thin" a ti zung zung a.



A thusawi chu dik lo pakhat mah a awm lo. Mahse ka ngaihtuah chian hian buaina hlirin min hmuak niin ka hria a, chu chuan min ti ipik takzet. Hmalam hun chu a êng zawnga thlir harsa ka ti a, kawng êng tak zawh ka duh tho bawk si.



"Ka nu rilru hi hneh sak dan tur hi ka hre mai lo ani" ka hmai tuai deuh puat pah chuan ka ti a.



"In tana tha tur zawkin Pathianin a rilru a tihkhauh sak rih pawh a ni thei ania. Isreal fate Aigupta sala an tan lai pawh khan Pharo rilru tihsakin a awm a, khatah tak khan Pathian thiltihtheihna ropui zia a rawn lang anih kha. Chutiang deuh chuan ngai la, tun hun in paltlang zawh hunah chuan Pathian thiltihtheihna a rawn lang ang a, a tawpah hlimna a lo awm mai ang" a ti dap dap a. A thusawi ang chu ni hram se ka ti...




Zanah Bible ka chhiar leh a, Pastor thusawite kha ka ngaihtuah roh roh a. A thil thlir dan chu tha ka ti a, pawm hram pawh ka duh. Mahse a tawng baw tu nih chuan thil reng reng hi a harsa deuh talh vek zel a. Ka ngaihtuah tam bik vang nge phei chu ka hrelo.



Naktuk December ni 4 hi a piancham phaphak ani a, a kum 25 na tur a ni. Ka thilpek tur pawh ka lei fel vek tawh. Naktuk chu hun chhinchhiah tlak tak hmanpui ka tum.



Zanah ka mut hmain ka call a, rei a ring lo a lo pick up vat a.



"I buai em?" ka ti nghal tawng a, "Ka mu dawn chiah" a rawn ti zang vah a. A ri deuh sat sat a, khumah a mu nghal anih ka ring.



"Vawiin i chau em?" ka tih chuan "Chau lo ve, vawiin chu period âwl ka nei nual a. Nang i chau em? " a rawn ti ve vat a.



"Chau ve deuh, In ka ti fel a, chhuat te ka nawt a, ka insu vel" ka ti thum dut dut a, a rawn nui ri hak hak mai.



"Suk tur chu rawn len pahin i lo keng mai lo anih kha" a rawn ti a. "Rawn ken reng ngai tawh lovin ka bulah lo awm tawh mai la" thutak zet hian ka lo ti a.



"Min chhawr i tum nasat hmel emai" nui hak hak chungin a rawn ti a, "Ka duat viau ang che" ka lo ti vat a, a nui ri leh hak hak tawh.



Kan inbiak tawp dawn lamah chuan "Naktuk zan chu hunawl lo insiam rawh ka tih kha aw" ka ti a, "I ti tak tak ami?" a rawn ti hap a.



"Ti tak tak e" ka lo ti mai a "U Sangzual, thilpek tih vel ka duhlo ka tih tawh kha aw. Chuloah piancham lawm vak kha ka duh miah lo ania. Pathian malsawmnain kan thleng thei a, a lawmawm viau" thutak deuh hian a rawn ti a.



A piancham thla kan thlen tirh atang khan kan sawi dun nasa viau a, keichuan lawm sak ngei ka duh a. A niin min lo hnial thung a. A ngaihdan tur chu ka hrethiam ve tho, mahse ka tih theih ang ang chu tihsak ve ngei kha ka duh miau ani.



"Ka duat, min hnial lo la" ka ti sup a, a rawn thaw chhuak deuh hak "Tiang vela insen tir vak che hi ka duhlo tak tak. Ka lo hrilh kher kher che ani" a rawn ti hliai a.



Ka ti deuh tung bawk si a, a tawpah chuan a pawm ve ta hram.



Zanlai dar 12 ah Piancham Chibai bukna message ka va thawn a. Ka awmdan hi ka nuih a za lek lek, tleirawl tir te ngaihzawng nei ka inchan lo theilo.


*Happy Birthday ka duat . Ka dam chhung chu dam ve la, i dam chhung dam ka tum ve bawk ang. Ka awm lohna ah chuan awm lo la, ka awmna ah chuan awm ve zel ang che. I tan Pathian hnenah ka tawngtai reng ania. Ka hmangaih che* tih hi ka va thawn a, a data a off tawh aniang, one tick chauh, zingah chuan a hmu ngei ang.




A bulah chuan thil ho tete pawhin hlimna min thlen a, hahdamna tam tak ka hmu thin. Ka nuna a lo lan hmaa hun ka lo hman thin dante kha ka ngaihtuah let fo a, mi hlim lo ti a sawi tur chu ka ni miah lo, mahse a ni ka tawn hnua hlimna ka tawn buak zozai te hi khang hun khan a hen zo lo.




Zing tawngtai inkhawmah Arini a lo kal ve tehnawlh a, kan ban hnu chuan min be deuh siam siam a, tal hran theih pawh a nilo.



"Krismas helamah i hmang ang tiraw?" a rawn ti a, in lam panin kan kal mek bawk. "Hun ka nei a, hman chu a ngaih hmel" ka lo ti tha ve mai a.



"Kum thar chu i rawn haw ve thei ang chu tiraw" a ti lehzel a, ka lo 'aw' ve mai a.



"Valpuia leh Nunui te nen kan hmang ho ve thei ang a, a tha viau ang" phur zet hian a rawn ti a. Lo chhan mai dan tur pawh ka hrelo.



Nutei te inkawt kan thlen chuan "I lo lenglut ve duh bawk silo" a ti deuh nang nang a, ka inthlahrun deuh avangin "Kohhran thilah buaina neuh neuh hi kan ngah ve a" ka lo ti ve luam a.



"Ni ve tho mai, mahse nakinah lo leng lut ve rawh aw" a ti zung zung a, ka lo 'aw' ve mai bawk a.



Eirawng ka bawl laiin room lama ka phone dah a rawn ri a, caller ID ka en chuan rang zetin ka pick up a "I inla ril vel e..." a rawn ti fan raih a, ka lo nui huk "Ka ril alawm" ka tih chuan a rawn nui ri hak hak mai, hriat hi a nuam thin.



Zan hun mawlh chu uluk deuhvin ka chah leh a, thil tih laklawh lai nei ve ve kan ni bawk a rei kan inbe lo.



Chhunah kan thenawm damlo chu ka va kan veleh a. Inleng dang pawh an lo nei nual a. Nimin lamah khan a that ve tawh tehlul nen vawiin lam chu a chau viau mai. Damdawiin atangin hmanni lawkah an lo chhuak a, kalpui leh an tum a, a duh tawh bawk silo a chhungte tan chuan rilru a hah ve duh viau ang.



"Sangzuala hi chu i bengvar thin ngawt mai" pa ber chuan a lo ti a, "Kan tih ve tur alawm" ka lo ti mai a.



"Tawng huat thu suh ah kan pro pastor hmasa kha chu hetianga damlo tlawh kual hi a ti ve ngai miah lova. Kohhran mi lo nih chuan phutna lai chen a lo awm ve thei silo a. Nang zawng i fel kan ti khawp mai" a ti leh zung zung a.




Fakna dawn hi a lawmawm a, mahse hmaichhanah chuan dawnsawn thiam harsa ka ti fo mai.



Zanah chuan phur deuh surhin ka insiam a, khua a vawt tawh a, ka inthuam lum tha khawp mai. Ka bouquet pek tur leh chocolate lian zet chu ka ban vut a, ka inkhalh chhuak ta nghal a.



Ka va thlen chuan Nu Rinkimi te inkawtah a lo ding tawh a. Inchei vak lova inthuam lum tha turin ka chah a, a inthuam lum hmel viau mai.



Car chhung kan luh rual chuan ka thilpek tur motor seat hnunga ka dah chu ka pe ta vat a. "Happy Birthday ka duat" ka ti sup a, a hmaah pangpar leh chocolate chu ka lek va a, hriatthiam hmel loh deuh hian min en ha a "La rawh, i lo pian man anih kha" ka tih chuan "Hetiang a ngailo ka ti sia" a rawn ti hap a "A thlawn in i dawng dawn hlei nem" mit siai zeuha ka tih chuan a ner nasa ngang mai.



Tha deuh chuan ka thilpek chu a la ve ta mai bawk a.



"Khawiah nge kan kal dawn?" a tih chuan "Kan spot ah" ka lo ti mai a. Khaw tawn tirh ah khan kan kal fo a, hahdam nan kan hmang thin. 'Kan spot' ka tih chuan a hrethiam ve mai aniang chu min zawt zui lem lo.




Kan va thlen chuan boruak a lo vawt zual kher mai. Thla bial zan a ni bawk a, thla pawh a eng deuh ut a, hmeichhe ho tawngkam takin 'a romantic'.



Inngheng rialin kan thu dun leh a, school chanchin velte chu min hrilh siam siam a. A hnathawhah hian a tui ve em em a, sawi nuam a ti thin a, keiin a thusawi apiang chu ngaihthlak nuam ka lo ti zel si a. Ho te pawh nise uluk deuhvin ka lo ngaihthlak sak thin.



Rei ngial kan thutdun hnu chuan thutak deuhvin "Pathian zara dam chuan kum thar lamah innei tawh mai ila" ka ti deuh tawl a. A hamhaih deuh aniang a ngawi deuh vang vang a.



"Kum tharah ka haw hunah ka chhungte ka bia ang a, inneih tawh mai ila" ka ti leh a, a rawn thaw chhuak deuh hak a "Ka nu hi..." rilru buai hmel zet hian a rawn ti zawi sep a.



Min neih a duhlo em em bikin ka hrelo, a nu ber chu a rilru buaina niin ka hria. Âwm pawh ka tih pui viau, a neihchhun liau liau kha a ni ve tawh a.



"Ka ti tut tut miah lo che ania. Mahse ka haw hunah ka chhungte chu ka be hrim hrim ang a, an rilru hmin ngei ka tum ang a. Nangin i nu lo be ve bawk la, in nufa inpeih hun hunah kan innei ang" ka ti nghet charh a. Ka nu remtih lohna chu ka dahtha hmiah mai. Ka haw huna tihfel vek chu ka thil tum a ni. Engti kawng pawhin ka hmin khawp ang.




"Ka nei em em ang che" a rawn ti ve ta nge nge a, a hmuiah ka lo fawp zauh a "Min neih ngei a ngai ang, chuti lo chu ka ru bo ang che" uang zet hian ka lo ti a, a rawn nui ri hak hak mai.



A nu chiah inah a awm avangin a ngaihtuah deuh bawk nen dar 9 velah kan haw ta a. Hun hlimawm tak chu kan hmang ngei e.




Krismas vuak vet a ni chho a, Kohhran thilah ka buai em em a. KTP hla zir naah telpui ve zel an ngai thin si a, indaih loh a na ve duh khawp mai. Mahse heng hi helai hmuna ka awm chhan ber a ni a, hrehawm tihna ka la nei ngailo.




School pawh an khar hlawm tawh a. Arini pawh hmanniah khan a haw tawh a, ka thawk a veng huai lehnghal a. Ka nuin min rawn biak apiangin a chanchin min zawt tel ve zel a, a hneawm duh ve em ani.




Nutei te nen kan inkar pawh a pangngai chho viau a. Vawikhat mah ka bulah Zuali chungchang a sawi tawh ngailo a, chu pawh chu thil lawmawm tak ani.



Gracy pawh naute an nihna laiah biak chhiat reng thu a awm lova. Chuloah amah hian min tihlungawi a tum ve em a, kan inkar pawh a tha leh tawh viau.




Vawiinah pawh chawei ah min sawm a, hnial theih hi an ni thin si lo. Pa Zaia pawhin min tih deuh tung avangin ka hnial ta lo chu ania.




Ka va thlen chuan an kawtah Reman an motor a lo sil a, ka va awmpui veleh rih a.



"Tunlai hnaah i buai em?" ka ti ve luam a "Buai vak loh lai tak, kar hmasa lamah khan vawk damlo an awm nual a, ka buai chho viau dawn emaw ka tia, mahse vawikhat ka chiu a, an dam veleh mai hlawm a" a lo ti zung zung a.



An pawn thutthleng ah chuan thut hmun ka rem sauh sauh a, "U Sangzual" a motor sil mawlh mawlh lai chawl meuh chuan a rawn ti hluai a.



"Eng nge ni?" ka lo ti vat a. A ngawih deuh vung vung hnuah "A ngai leh lo mai" a ti leh ang lawi a.


Vei nei run hmel a put avangin "Han sawi la" ka lo ti dam thluam a, mahse "A ngai leh lo" a ti deuh tlat a,ka zawt lui tawh lem lo.



Chawei laiin Gracy in a pa bulah Jeans chah a dil a, a pa chhanna chu a ngaichâng deuh ran a. Chutah a pa chuan "Hmanni lawkah i nu nen in lei emaw ka tia" a lo ti dam thlup a. Geacy chuan "Lei tho e, mahse khatiang lo deuh kha internet ah ka hmu a ka duh alawm" a lo ti vat a.




A pa chuan "I ni in a dawrah inhlawh turin a sawm che kha, inhlawh la, i chah dawn nia" a lo ti mai a. Gracy chu a lungawi loh hmel kher mai "Chutiang ka peih hlei nem, min chah sak mai la pawisa neilo pawh i nilo" a ti hlak hlak a. "Nang pawh dawr nghak theilo rual i nilo a, i mamawh ang chu thawk chhuak thei rual i ni tawh" a pa chuan a lo ti dam leh thlup a.




A lungawi lo chu a kham nghal hmak a, room-ah a lut zui daih.



Chu veleh nutei chuan "Han chah sak mai la aw..." a lo ti a. Pa Zaia chuan chhan pawh a chhang zui duh lem hlei lova.



Heihi Nutei buaithlak na em em chu ania a. Fate chu duat tur a ni meuh mai, mahse a âwm tawk a awm ve. Gracy hetia a awm chhan pawh hi amah vang ani deuh berin ka hre tawh.



Urlawk zan chu inkhawm leh zai khawm kan ban hnuin Sawmtluangi te inah ar kan kang ho ve ngei a. Kang ho tih tham pawh kan awm chuang lo. Kei, Zuali te nufa leh Sawmtluangi te chhungkua chu kan ni deuh mai. Mahse kan ri ve deuh laih laih a, a nuam viau mai.




Nu Rinkimi chuan "Krismas zawhah haw chhoh nghal mai i tum em ni?" a rawn ti a "Ni deuh mai, 27 velah ka haw ang Pathian zara dam chuan" ka lo ti vat a.



"Kan lung a va leng awm ve" awmze nei deuh hian a rawn ti a, ka bul ami chu a lo lai leh viau tawh.



"A lo lerh chuan in lo vaw dawn nia" ka ti uang a, an nuih a za ngang mai. "I sual" a rawn ti zawi hlak a, ka lo nuih mai a.



Sitting room atangin Nu Thapuii chu choka lamah a rawn phei a "Bawihte, ka mut a chhuak riau mai a, ka haw san mai ang che aw" a rawn ti a. "Thil pawh kan la ei loh hi" Nu Rinkimi chuan a lo ti hluai a.



"Ka puar rih hrim hrim a, mut a chhuak riau zawk a, ka tello in lo ei mai ru" a ti luam a. A inmangtha a, a haw zui nghal chu a nimai. A ni telin that lam a pan ve deuh deuhvin ka hria a, ka lo lawm ve viau mai.



Zan dar 12 vel thleng kan mengho ve a, a chang leh kan zai a, a chang leh Nu Rinkimi fiamthu kan nuih pui a. Urlawk zan ka hman tawhah chuan a la nuam ber mai awm e.



Krismas ni ah chuan thu ka sawi ta a, thupui thlan sa sawi zau a ni deuh mai thin a. Hetiang thupui awmsa sawi hi a harsa thin viau a mahse Pathian zarah kan tlingtla veleh thei ta hram chu ania.



Zanah inkhawm leh zaikhawmin hun kan hmang a. Kohhran mipuiten hun pui an ngai pawimawh hle tih a hriat, inkhawm leh zaikhawm kan thahnem danah. Thil pakhat min tilawm em em tu chu zaikhawmah hian Thalai rual an thahnem thei em em a. Kohhran puitling an nih zia lanna a ni ka ti lo theilo.



Zuali nen pawh hmun fal vela hmang buai lovin Kohhran huang chhungah zel kan hmang ve a. Pathian pawh a lawm ve viauin ka ring.



________*_______*________*________


(Rilruah a lut bawk si lo, ka hmanhmawh bawk si, a phelh sawlh nuaih mai. A ngaihnawm loh viau ang.)


Show post links
Top

[Ngaia]

LOVE COVERS ALL
By CVL Awmpuii



Chapter - 26


Krismas ni kha Pathianni anih avangin ruai kan theh lova, vawiinah kan theh dawn. Zaikhawm programme a awm a, keipawh chumi lamah chuan ka tuan veleh ang.




Zing dar 10 velah zaikhawm thlen in lam pan chuan ka chhuak ta a. Khawpuiah chuan Krismas thlen in awm tawh lem lovin Kohhran Hall ah kan zaikhawm mai thin a. Mahse thingtlang hmun thenkhat ah chuan hman atanga an lo kalpui thin dan angin an la kalpui a. Hetah pawh Upa Thanga te in chu zaikhawm in atan kan hmang a. Anmahni an inhawng bawk a, a nuam viau zel.




Kohhran Pavalai Pawl thenkhat leh Kohhran Hmeichhe thenkhat ho chu fatu ah an ruat a, KTP lamin zaikhawm te tan thingpui an lum bawk a. Zuali pawh thingpui lum turin an ruat ve a, Sawmtluangi nen an inzui deuh chawt mai.




Ka va thlen chuan an lo zai tan tawh a, Upa Thangan min lo hui vat a, a thutna bulah chuan ka va thu thla ve nghal a. Chhun lam a ni nain ka beisei aiin zaikhawm kan thahnem a, an lo zai hlim viau mai.



Kan zai tui chho telh telh a, mihring an lo kal belh ve zel bawk a. Nu ho lam rui thenkhat chu naupang te nawi hovin an lo nuih pek a, an lam mak sak em lah tak bawk a, naupang engmah hrethiam lo tan chuan an nuih a za viau pawh chu a âwm ve viau mai.




Thalaiin thingpui an rawn sem chuan Zuali ka va hmu nghal chat a, kan thutna lên lam chu a rawn sem a, ka lo en reng a, min la hmu fuh ve chiah lo.



Kan hmazawn a rawn sem lai chuan min rawn hmu ve ta chiah a, ka lo nuih suk a, a lei a rawn chhuah zeuh, ka lo nui hawk lo chauh.



Ka hmazawna tray rawn lek pah chuan "A tui viau ang" a rawn ti zeuh a, a nui var var bawk. "A tui loh chuan ka vua ang che" ka lo ti uang a, a nui tet tet mai.



Tlai dar 3 ah ruai kan theh ta a, mipui zinga theh ve mai ka tum a. Mahse Kohhran Hruaitute hovin min rawn hui vat a, ka va pan ve mai bawk a. Kohhran Hall lamah kan inzui phei a. Pastor leh Kohhran puipate nen ruai chu kan theh ho a, ka ei ve teuh mai.



Chaw eikham, kut ka sil zawh hnu chuan Hall kawtah dingin Zuali chu ka zawng ru deuh a, ka hmuh mai loh avangin ka call ta a, a pick up dawn lo emaw ka tih hnuah a rawn pick up ta hram a.



"Hello" a rawn ti zâng vah a, "Ruai theh i haw tawh em ni?" ka lo ti vat a. A ri deuh rak rak a, "Ka theh ve ta lo mai, ka nu in a theh ve duh silo a, mahse chaw chu kan ei hma ve ang" a rawn ti zung zung a. Eirawng a bawl vel mek anih ka ring.



"Kan leng ve dawn em?" ka lo tih chuan a rawn nui ri deuh hak a, keipawh ka nui ve tho. "Khawiah nge kan len ang a?" a rawn tih chuan rang zet hian "Kan spot ah" ka lo ti vat a.



Krismas ruaitheh tlaia len hi kan tleirawl lai khan kan chîng ve nasa thin a, tun hnu hian ka leng tawh ngai meuh lova. Vawiin chu chhuah khaw thawn ve ka duh tlat, naktukah ka haw tawh dawn bawk si a, kan hun neihchhun chhun te hi âm taka hman ka duh. Thil sual pawh a ni chuang lova Kohhran programme nang hman tawk velin kan haw leh mai ang a.




A ngawih deuh vang vang hnuah chuan "Umm...chaw kan han ei ve phawt ang a" a rawn ti ta a. Dar 5 vela chhuak hman thei tur ang chuan kan inbe rem ta phawt chu ania.



In lam pana ka kal laiin Nutein min lo ko peng a, an inchnung ka va luh chuan dawhkanah chhangban ah sa hi a lo dah tlar tiarh a , "Lo ei rawh , kan den ve anih hi" a ti zung zung a. Ka lo hnial vat thung "Ruai kan theh zo chiah sia, ka puar rih emai" ka lo ti vat a.



Midang ka hmuh mai loh avangin an awmna ka zawt hlawm a.



"I pa Zaia leh Rema chu inhnuai lamah current en fel lawk tur a awm a, an ruai theh zo kha an chhuk thla nghal a. Gracy te chu a thiante nen an leng" a ti zung zung a, chhangban chu a ei pah mawlh mawlh bawk, a puar ve lo emawni.



Ka nu khan a lo zilh tha aniang ka ti mai, buaina an siam zui lova tha takin kan han inbe chho lehzel phawt chu ania.



In ka thlen veleh ka inbual fai nghal a, nilenga coat suit han hak mai chu thawk a ipik ve lek lek thin.



Cotton Kekawr dum dak zat leh TShirt ka ha a, a chungah jacket ka ha tel bawk. Sneakers ka bun leh tawp a, a tawk viau mai.



Nu Rinkimi te inah ka peng kawi a, an nupa chauhin an lo awm a. Sawmtluangi chu ruai theh na hmun hma vel tifelin a la buai a, Sawmsanga te chu an nu te in lamah an leng phei niin a sawi. Rei awm pawh ka tum lo ania mahse a tawngtui laklawh a, ka chhuak leh mai hreh tawh bawk si ka thu ve ta reng a. Message in Zuali chu Nu Rinkimi te ina ka nghah tawh thu ka hrilh ta ngawt a.





Nu Rinkimi chuan thingpui min rawn pek pah hian "I chhungte rilru chi i hmin thei em?" thutak deuh hian a rawn ti a, Zuali nen kan chungchang a sawina ani tih ka hria.




Thingpui lo dawt khawlh pah chuan "Ka haw hunah hmaichhanah ka sawipui leh ang" ka lo ti sup a, a bu deuh nghat nghat a. "Mite anga han inruk mai a rem ve si lova in dinhmun hi a buaithlak emai" a ti deuh hlak hlak a.



Chutah thil hrechhuak thut ni awm tak hian "Kan higher zirtirtu thar kha i ngaihzawng hlui em ni?" a rawn ti hluai a. Tu a sawina nge ka lo hrethiam chiah lova, mahse Arini a sawina a ni tih ka hre chawpchilh leh nghal.



"Ni lo e" ka lo ti tawi tak a, ka chhanna chu a duhkhawp loh hmel kher mai. Keipawh chuan ka sawi zawm veleh mai a "Veng khat kan nia, kan inkawm ve zeuh thin" ka lo ti tha veleh mai a.



"A duh hmel riau che, a en thin dan che atang khan ka hre thei" a rawn ti khauh a, Nu Rinkimi thil man chak lutuk hi chu a tha lam nge a chhe lam tih pawh ka ngaihtuah thiam lo.



"A ho emai" ngaihsam zet hian ka lo ti a, sawi zui ka peihlo tih a hrethiam aniang min sawi zui pui tawh bik lem lo. Thudang sawiin kan titi ta daih a, Pa Rinmawia paw'n min lo zawm ve zauh zauh thin.



Dar 5 rik hma hretin Zuali chu a rawn lang ve ta a. Over coat ha in boot a rawn bun a, a hmeichhia leh bik ngawih ngawih mai ni.



Kan kal dawn chuan Nu Rinkimin "Pangngai takin rawn haw leh ang che u" thutak zet hian a ti a, ka lo nui mai a. Engtin vak nge maw haw leh se min tih ni.



"Fimkhur ula rei suh ang che u" a ti leh a, a thutak em avangin ka lo 'aw' ve vat a. Min ngaihtuah thin lutuk hi kan tan chuan lawmawm tak ani.



Zuali chuan "Ka nu khu min lo ngaihven sak deuh mai aw Nu Rinkim" a ti deuh hliai a, "Lo ngaihtuah suh, ka zuk leng ange" a lo ti vat a.




Keini pawh chu kan inzui chhuak ve ta nghal a. Kawngah chuan thu ho tete sawiin kan nui dun leh hak hak thin a. Kan hlim dun viau e.




Khaw pawn kan thlen chuan kan spot ah khan mi an lo awm tlat mai a, zu an in lehnghal. Va fin chi an nih chiah loh avangin let leh mai a rawt a. Mahse kan kal chhuak ve ta sa sa tiin ka tlan tlang pui a "Hmun dang a awm mai ang" ka ti a, a ni pawhin min hnial bik lo.



Minute 5 vel kan tlan leh hnu chuan thingzar lian deuh hnuaia thutthleng te fel ren rawn lo awm hi kan va hmu ta a. Kawngsir rem laiah car chu tidingin ka chhuak ta a, a lo chhuak ve vat.




Inkai rialin thutthleng awmna lam chu kan va pan ta a, hnim a awm deuh avangin kawngpui atang chuan a rawn en chik fe anih loh chuan tuman min rawn hmu mai lovang. Engtin nge keipawh khan ka va hmuh mai theih ka hrethiam tawh bik lo.



Khua chu a romantic tawk vel lekin a thim thet thet tawh a. Lung a tileng nghal ruih maiin ka hria.



"Ka lo let leh hunah chuan ka nupui tur i ni tawh ang" ka ti zawi sup a, nghet zetin a darah ka kuah bawk.



Rilru hah hmel deuh hian a rawn thaw chhuak hak a "U Sangzual, kan hmanhmawh mah mahin ka hria" a rawn ti sep a. Kei chuan hmanhmawh pawh ka inti lem lo. Mahse amah hrethiam taka ke ka pen pui zel a ngai tih ka hria. A nu dinhmun sawh ngheh a la ngai a. Tunah rui buai buk buk lo mah se pianthar na tak tak a la nei chiah lo niin ka hria. Chu tak chu Zuali rilru hahna pawh hi anih ka ring.




"Ka nawr tut tut lo che ka tih tawh kha, i inpeih hun ka nghak thei che. Mahse i pasal tur ka nih hi hre reng ang che" ka ti nghet charh a. Lungawi hmel deuh hian a bu ta nghat nghat a "Engkim a fel vek hunah ka nei em em ang che" tiin ka biang chu a kut te taktein a rawn dawm ve ngial a, ka lo nuih suk.




Nakumah bak kan inhmu thei tawh rih dawn lo tih kan hrechiang a, kan hun tawite neih chhun chu kan âm dun ve ngang mai. A chang leh kan infawp a, thu ho tete sawiin kan nui dun leh thin a. A âwm ka tham deuh tawk chang chuan lai zet hian min melh leh ram ram thin, ka lo nui mai zel a.



Inkhawm dar rik hma minute 30 vel la awmah kan haw ta a, a bulah chuan hun te hi a kal chak bik ka ti thin. Reilote emaw ka tih pawh hian darkar a lo kal duai hman thin.




Khua kan luh dawn hnaih chuan kawngkamah Gracy ang deuh hi ka va hmu hlawl mai a, hmeichhe pali leh mipa pathum an ni. Ka rin sual loh chuan an ruih hmel em em bawk. Motor headlight in a chhun avangin ka va hmu thei vek.



"Saw saw Gracy a ni em?" Zuali bulah chuan ka ti sup a, ka tlan muang deuh a, an lo awm khawmna lam chu ka mitmei zui zat bawk.



A va hawi phei chuan "A niin ka hria, a thian kawm thinte pawh ka hmu" a lo ti vat a. Eng khaw sawi set set lovin kwngsir rem laiah chuan motor chu ka tiding ta nghal a.



Zuali chuan ka lam a lo hawi vat a "Tikhan lo chhuk miah suh aw, ka va kal lawk ange" ka ti ta sup a, ngaihthat hmel zan loh chuan a lo bu ve mai a.



Tinge maw hetiang lai hmunah te a lo awm ve reng reng le, zu rui lehnghalin.



An awmna hmun chu ka va thleng chawpchilh nghal a "Gracy" ka va tih chuan ka lam a rawn hawi a, a hamhaih viau aniang a meng phar nghal awn awn mai.



"Hetah eng nge i tih" ka ti vawt raih a, a thiante ho pawh chu an hmel a pha nghal dai mai.



"Au Sangzual" a rawn ti chhuak hap a, a mitmeng chu a phelh deuh phang bawk. Ruih a nei tih hai rual a nilo, zu rim a nam nghal huam lehnghal.



Ka melh reng lai chuan lei lam bihin a ding zum zat a, hmeichhe dang lo awm ve hote pawh chu an ngawi reng. Mipa ho erawh mipa tih takah eng teh ualah min ngaih hmel vak loh.



"Min rawn zui rawh" ka ti nghet churh a, min rawn melh zawk a, a ip nghal chawih tih ka hria.



Ka kal nghal mai chu ngawi renga min en zui avangin "Min rawn zui rawh" ka ti leh churh a, ka mitmeng atang chuan hnial zui chi ah min ngai lo aniang a rawn che chhuak nghal a. A thiante pawh chuan chelh zui chi ah an ruat lo aniang tumah rawn tawng chhuak an awm lo.



Ngawi rengin min zui a, ka car seat hnung chu ka hawn sak a, "Au Sangzual" ngenngawl deuh hian a rawn ti a "Lut rawh" ka lo ti sup. Ngawi rengin a thu lut a, kan chezia chu Zualin min lo en ve reng bawk.



Motor a ka chuan ve hnu chuan kan tlanchhuak zui nghal a. Front mirror atangin ka va melh leh zauh thin a, a thu kun ngal a. Ka kut, steering ka vawn lohna lam Zualin a rawn chelh a, 'Inbengdai rawh' ti ang hrimin min melh a, ka lo bu nghut.



Nutei te inkawt kan thlen chuan Gracy chu ka va melh zauh a "Gracy..." ka ti dam thlup a, rawn hawi chhuak lovin a la kun ngal a. "Min ti lawm lo khawp mai" ka tih chuan a rawn hawi chhuak ta a "Ka nu leh pa bulah sawi lo la ka tisual tawh miah lovang" a rawn ti bah niai a. Sawi lo tura min duh zia chu a mitmeng atangin hai theih a nilo, mahse sawi ngei chu a ngai ani.



Zuali bulah chuan min lo nghak leh lawk tura hrilhin motor atang chuan ka chhuak a. Gracy nen chuan an inah kan inzui lut ta a. Nutein chokaah behlawi a lo thian a, chutia kan va inzui lut hlawl min hmuh chuan a phawk ang reng.



"Room-ah lo va lut rawh" Gracy bulah chuan ka ti sup a, ngawi rengin a room lam a pan nghal.



Nutei chuan "Engtin nge in rawn inzui luh hlawl a" a ti a, chhang lovin chair ah chuan ka thu thla nghal a.


Pa Zaia leh Rema te inkhawm kal tur chu room atangin an rawn chhuak ve chiah a.



"Khaw tawntirhah ka rawn hmu a, a thiante nen zu an in ania" pehhel buai lo chuan ka ti nghut a. Pa Zaia te pafa chuan ka thusawi chu an rawn bengkhawn kher mai.



"Zu a?" Pa Zaia chuan a rawn ti hluai a, ka lo bu nghut a. Chutah nutei chuan ka beisei loh lutukin "A thiante kha kawm tawhlo turin ka ti mawlh mawlh si a, thian sual a kawm a, an hruai khawlo zo anih chu. Ngawi tak rawh se a thiante chu ka la hau ang" thinrim zet hian a rawn ti chhuak hlawk hlawk a. A fanu thiante dem zawnga a rawn tawngchhuak hmasa chuan min ti hamhaih lek lek.



"A thiante chuan an tulh lui lo tawp ang. A duhthuin a lo in ve anih chu" Rema chuan a rawn ti nghut a, Pa Zaia chu a ngawi reng a, thil ngaihtuah muk deuh hmel hi a pu.



Chutah Nutei chuan "A duh thu chuan a in dawn lo reng reng. A thianten an tilui bak a nilo ang" a la ti hram a. A harh chhuak thei miah lo mai hi mak ka ti. Gracy a hauh vak kha ka lo hlauh pui zawk ania, tunah ka beisei loh lutukin a rawn tawng chhuak a, sawi ve mai tur pawh min ti hrelo hial zawk.




Pa Zaia chuan "Inkhawm turin ka chhuak phawt ang a. Saii i fanu saw lo chhuah tir suh ang che" a ti nghet ta charh a. Nutei chuan "Amah hauh vak te kha i tum ange" a ti hlak a. Chutah Pa Zaia chuan "Ka thusawi chu lo hre mai rawh" ti nghutin a chhuak zui nghal a, Reman a zui ve vat.



An chhungkua a chinfel chi niin ka ngai a, keipawh ka chhuak zui ta nghal a . Nutei chu a fanu thlavang hauh zawng hlirin a la tawng. Khati khawp khan Zuali te nufa an hmusit a, an diriam a, an nihna bak bakin an puh a. Mahse anmahni pawh an lo bang chai silo. Gracy tak pawh chu a awmdan hi a sim vat a ngai ani.



Motor a ka va let leh chuan ngaihtuah hmel deuh hian min lo melh a, ka nui lui suk a "Inkhawm tan hma minute 20 a la awm e, kan inkhawm hman ang" ka ti zâng vah a, tlem chuan a awm a nawm hmel deuhvin ka hria.



An in kan thleng tep tihah "I nutei chu a lo thinrim viau em, a hau na lutuk ang tih ka lo hlauhpui lutuk a" a rawn ti a. A lo rindan leh nutei awmdan chu inpersan tak a ni.



"A thlavang a lo hauh zawk" ka ti hluk a. Mak a tih hmel ve tho, mahse "A fanu ani ve miau sia hauh vak a hreh aniang" a rawn ti sep a. Thil engkim a thlir thiam thin hi ka fak lo theilo. Mize duhawm tak hi chu a nei chiang alawm.



Gracy in min ti khawtlai bawk nen dar an nawn dawn tepah Biakinah chuan ka va lut a, nuam lo duh ve tak ani. Ka tawngtai zawh chuan thalai thutna len ka en nghal a, Zuali pawh a lo thu fel der tawh.




Inkhawm banah zaikhawm programme a awm leh a. Keipawh haw lovin Upa Thanga te inah ka tlang nghal a. Kan tan tak tak hmain kan titi luam a, nu ho hian Pathian thu hi an tuipui thei khawp a. An titi ka lo ngaithla a ni deuh mai.



Zuali pawh Sawmtluangi nen thingpui lum pawlah an tang a. An rawn sem lai chuan ka lo melh leh vung vung thin a, a zialo tak tak ani.



Zaikhawm chu dar 11 velah kan bang a, thalai thingpui lum ho pawh an lo haw vek tawh a. Ka phone ka phawrh chuan Zuali message a lo awm a *Ka mut a chhuak lutuk a, ka haw san tawp che. Naktuk zingah ka hman chuan ka lo thlah ve ang che* tih hi a lo awm a, dar 10 vel daih tawha min lo thawn ania. Tunah chuan a muhil daih tawh ang.



*I hman loh paw'n hun insiam la, min thlah ngei ka phut ania, ka duatnu* tih ka va thawn let a, one tick chauh, a mu tawh tak tak anih ka ring.



Ka mut hmunah chuan thil tam tak ka ngaihtuah a. Gracy chu ka ngaihtuahna ah a awm ve rauh rauh bawk. Aizawl a rawn awm lai, college a kal thin lai khan hetiang hian a awm ngai pawh ka hre miah lo ania. Han inchen chilh tak tak tâkah chuan a ze dik tak a lo lang zawk nge pawh ka hrethiam tawhlo.




Tin, nutei mawlh mai hi, mak ka ti a ni. Mahni fate thlavang hauh chu nu leh pa te tih tur a nihna lai chen a awm ve na meuh mai. Mahse a pawng ataka fate tan hlur hi thil ni theiin niin ka hrelo. Khatiang zu in chungchangah ngat phei kha chuan a duhlo chung a thiante khan an nawr lui dawn lo tih ka hrechiang.




Zuali te nufa ka ngaihtuah leh a, ka zep lo, Nutei te ai pawh hian an ngaihsanawm zawkin ka hre ta. Nu Thapuii chu zu a in hi a nimai a, a fanu a hauh leh a tan lam thu hi vawikhat mah ka la hre ngai lo. Zuali pawh hmeichhe awm nem mah nise a nu diknaah chuan huaisen takin a dinchhuah pui mai a. A dik lohnaah ngawih a chuh mai a. A tan a tawngtai awl lo bawk a, chutiang chu ringtute tih tur dik tak niin ka hria.




Zan lam ka mu tha lo lutuk a, zingah chuan mit kham thumin ka tho a, sana ka en chuan dar 7 a lo ri va tawh.



Dar 10 a chhuak tur ka nih avangin hmanhmawh em em a ngailo bawk a, muangchangin ka che a. Ka chhungte leh thiante nen hun hman ho ka chak tawh rualin helama min pawttu nu hian min pawt hneh zawk mahin ka hria. Hmeichhe ho hi an lo theu neu miah lo. Mipa thinlung sak leh luhlul deuh pawh tinem thei tu chu hmeichhia an ni tlat.




Eirawng ka bawl hmain ka phone ka bih zuai a, a message a lo awm kiau a, zing dar 6 velah daih tawh khan, a tho hma thin ania.



*Ka lo thlah em em ang che, min ngai si pro pastor* a rawn ti a, mahniin ka nui chhuak hawk hawk mai.



Chaw ka eikham fel hnu chuan room-ah insiam turin ka lut a. Kawngka kik thawm ka hriat chuan ka va chhuak vat a, ka beisei loh zetin amah a lo nia.



Ka room kawngkhar nghenga dingin ka inkuangkuah nghal hlun a, chal ti chuar tapin mitko ka san uk a, ka nui duh miah lo lehnghal. Han chhaih kual ka chak ve hrim hrim tlat.



Lai zetin kawngka bulah chuan a ding reng a, a kawrfual hmawr a tham tat bawk "Thlah tur chein ka lo kal lawk a..." a ti nawi niai a, a lai thar em em reng mai zel hi a lawmawm thin.



"Nakinah ka hman dawn silo a, ka hman laiin ka lo kal lawk" a âw pawh a pangngai ta deuh a, lai lo anga lan a tum ve nasa ngang mai.



Keichu ngawi rengin ka din ngaiin ka la ding tlat a, nui duh miah lovin ka la melh char char a. A lawm vak tawhlo nge ni "I sual emai ka haw lehnghal daih dawn" tih leh inher a rual nghal a, nui chhuak hawk hawk chungin ka va pan ta vut a.



A kutah va manin inchhungah ka kai lut nghal a, tha deuh chuan min zui veleh mai bawk a. Thutthleng a ka thut tir hnu chuan kawngka ka va kalh nghal a.



A bula ka va let leh lai chuan "I chimawm si" a lo ti hlak a, ka lo nui mai a. Ka ina rawn kal duhna thinlung a rawn pu hrim hrim pawh hi lawm tak ka ni. A hma khan ka sawm ziah a, "Midangin min hmu ang" tiin min hnial tlat zel kha ania.



"I insiam zo tawh em ni?" a rawn ti leh a, "La zo lo deuh, min lo insiam pui la" ka tih chuan a lu a lo thing vat a "I room-ah ka lut duh lo e a" a rawn ti a. Ka lo nui chhuak leh huk, a inveng mah mah thin ani.



"Ka hlauhawm loh e..." ka tih chuan "Chutiang pawh a nilo e a" a ti ve tlat a. Mahse a mitmeng atang hian ka hrethiam vek sia.



"Tak taka tihian thlah tur chein ka lo kal zuai. Nakinah ka hman dawn silo a, pot khawih tur ka ngah lutuk a. Chuloah nakinah chuan midang an awm ve dawn sia ka thlah thei dawn si lo che a" a rawn ti duah a.



"Goodbye kiss min pek i chak anih kha" ka lo ti hmanhmawh a, a lei min rawn chhuah zauh a, ka nui a, a rawn nui veleh tho.



A thutna hmaah chuan ka va thingthi rûn a, a kut chu nghet zetin ka chelh sak a.


"Ka ngai viau ang che" thutak zet hian ka ti ta sup a, a kut chu lakangin ka fawp nghal tawk a. A rawn thaw chhuak deuh hak a "Keipawh..." a rawn ti zawi sep a.



"Ka hmangaih che" a mitmeng fiah kaka melh pah chuan ka ti leh a, tah chhuak insum hmel hi a rawn pu ta mai a.



Chutah a kut chu lasawnin ka ngawngah min rawn kuah nghal tai a "Ka lawm e aw" a rawn ti tiau a, nghet zeta kuah letin a hnungah ka lo chul a.



"I tah chuan ka haw lo mai tur ania" ka lo ti uang a, a rawn tah nui hak mai. "Ka tap hlei nem" a ti ve tak nain ka ngawnga a mittui luang chu ka hriat hmaih lo kher mai.



Haw loh mai te ka duh rum rum mai. A rilru tê hi no thut chang a nei a, Nu Rinkimi khan min hrilh tawh pangchanna tur a nei ve lova a pangchang viau anih pawhin dawm thiam turin min chah anih kha. A pangchan poh leh keiin duat nuam ka lo ti bawk a. Ka bulah hi chuan pangchang em em sela ka duh.



A mittui tla chu ka hlimpui lam ni miah lovin min ngai ve takzet dawn tih ka hriat phah a, ka hlim ru veng veng thung.



'Awm rei hman ka ni lo' a tih deuh tlat avangin a tap ka thlem hnuah min hawsan a. A tawp nan ti awm ang fahranin duhthawh zet chuan ka fawh kha. Hlim hmel pu chungin kan inthlah ta phawt chu ania.



Haw lo turin min ngen sela chuan haw loh mai pawh ka pawiti lo ania. Mahse min tur tu zawkah a tang ve tlat si a, hnial theih pawh a nilo.




Ka haw tur chu Pastor leh Upa thenkhat hovin min rawn thlah a. Nutei pawhin chhangban min hawn tir nual a. Nu Rinkimi paw'n thlai thar neuh neuh min hawn tir. A lawmawm khawp mai.



Aizawl lam pana motor ka khalh laite chuan Zuali awmdan kha ka ngaihtuah let rauh rauh a. A mittui tla khan ka ngaih a titha thei hlek lo. Mahse Pathian zarah eng em a thleng lo turah ngai phawt ang.



________*_______*_______*_______

(Naktuk Pathianni chawlh...in inkhawmnaah U Sangzuala lo zawng ru aw...hihi...)


Show post links
Top

[Ngaia]

LOVE COVERS ALL
BY CVL Awmpuii


Chapter - 27


Ka pain fimkhur turin min chah nasa bawk a, ka hmanhmawh duh vak lo. Ka tlan tluang viau a, mahni chauha zinkawng thui tak zawh chu khawhar thlak ve duh tak a ni.



Dar 4 pelh hretah Aizawl khawchhung chu ka lût chiah a. Chutia khawpui chhung meuh han thlen takah chuan Traffic pawh a lo jam nasa leh viau tawh. Chu chu remchâng ah lain Zuali ka phone a.



"Aizawl khawchhung ka lut chiah, traffic a jam nasa lutuk a..." ka ti nghal zung zung a. "Kawnglakah harsatna i tawk lo maw?" a rawn tih chuan "Lung a leng viau e tih loh chu harsatna a awm lo" ka nui ri suk a.



"In inchhung i thleng ang a, nuam i ti vat mai ang" a rawn ti ve ngial a, min hnem dan a hre bik vak lo aniang. Kan ngawih dun rauh rauh hnuah chuan "Ka ngai nghal che" ka ti chhuak hawlh a, a rawn thaw ri ve deuh hak mai. Min rawn chhan mai loh avang chuan lawm lo âw ka lek lek hian "Min ngai ve miah nange" ka lo ti khur khur a. Chutah zawi sep hian "Ka ngai che alawm" a rawn ti a.



Sawi tur vak kan hrelo, mahse phone dahtu nih chu kan hreh ve ve. Ngawi rengin kan thaw lak ri kan inngaihthlak sak tawn hi a ni hawt mai. Mahse kan rilru chu kan inhriat tawn sak viauvin ka hria. Mahni in pawh la thlen hma hawtin ka ngai nghal em em mai ania.



"Eirawng i bawl em ni?" ka han ti veleh ngial a "Aw, chawhmeh siam tur a vâng tawp a, a ngai reng hi chu a hneawm sia" zangkhai zet hian a rawn ti ve vat a.



Traffic Police in tlân tura signal min rawn pek tak zauhah chuan in ka thlen veleh a ka biak leh tur thu hrilhin kan inbiakna chu kan ti tawp ta a.




In ka va thlen chuan ka beisei loh zetin U Hlimi te chhungkua an lo awm ve a. Min han hmu chu an phul ve hlut a. An fapa Pekpeka chuan "Apute" tiin min lo ban vat a, ka lo pawmkang nghal nawlh. Kum 4 a ni ve tawh a, a lo rit ve viau tawh.




Matein ka luggage leh bag vel chu a lo ban nghal vat a. Ka nu chuan "Tinge i rawn thlen chin tal pawh min rawn hrilh loh" a lo ti hlak a, kawnglakah khan ka be miah lo lah tak bawk a.



"Hei ka lo thleng tluang alawm" ka lo ti mai a, engmah a sawi zui tawh lem lo.



Ka chawhmeh hawn leh chhangban hawn velte chu kan chawei dawhkanah an han phawrh chhuak a. "Nutei leh Nu Rinkimin min rawn thawn haw ve anih kha" ka lo tih chuan ka nu chu a lawm ve viau mai.



Ka pa chuan "An va fel thin ve aw, phone kaltlangin lawmthu han hrilh ve tur anih chu" a lo ti ve luam a.



Sitting room lamah kan inzui phei a, U Hlimi pasal U MP-a chuan ka rawngbawlna chanchin velte chu min zawt ve luam a. Keipawhin a hnathawhna chungchang vel chu ka lo zawt ve vat a. A ni hi Aizawl College ah Professor a ni a, a hnathawh that avang hian mi hriat pawh a hlawh ve viau. Mi fel tak leh Pathian tih mi tak a ni a, hetiang makpa kan nei thei hi kan vanneih takzet. Chutihrual chuan U Hlimi pawh hi ka û mah nise ka fak ve lo theilo. High school zirtirtu a ni a, a nulat lai pawh khan kan vengah chuan mi hriat hlawh tak a ni a, a tha zawngin ania. Innei tur dik tak an innei a tih theih mai ang chu.



Ka haw dawn vangin ka pa te'n zanriah ei turin an lo sawm hi a lo nia. Rei rial lovin zanriah pawh chu kan ei ta vat a. Kawnglakah engmah ka lo ei lo bawk nen ka ei hnem viau mai.



Zanriah kan eikham hnu chuan thutkhawmna lamah kan inkawm hlawm a. Pekpeka chu ka kapkarah thuin ka phone a khel nghal mial mial a. Kan inhmuh khat ve tawh nen min lo la nel viau chu a lawmawm lamah ka ngai.



"Nutei te an dam tha maw?" U Hlimi chuan a rawn ti a, an dam that thuin ka lo chhang vat a. "Gracy hmuh leh a chakawm tawh, a ni tê hi chu mi hi a be seuh seuh reng a, nel loh theih loh" a rawn ti leh zung zung a. Gracy awmdan dik tak chu hria se mak a ti ve viau ang. Sawi kher ngaiin ka ruat lem lova ka sawi duh bik lo.



Ka pa chuan "Mama te pawh kum thar chu helamah rawn hman an tum anih hmel a, chhungkaw inhmukhawmna hun tha tak pawh a ni dawn a. Pathian malsawmna kan dawng a, a lawmawm khawp mai" a ti charh charh a. Ka nu pawh chuan "MP nangni pawh kumhlui thlah ni te chu helamah zanriah rawn ei veleh ula tiraw?" tiin U MP-a chu a râwn ve a, "Kei chuan ka hnial hlei nem, Hlimi tih dan dan a nimai a duh phawt chuan kan rawn ei phei ve dawn nia" a lo ti vat a. An nupa hi chu an inzah tawn thiam thin ania.




Dar 8 velah chuan Pekpeka mutchhuakin haw a ngen reng avangin an haw ta a. Kum hlui thlah nî a chaw rawn ei phei tur chuan an inbiak fel tak kha.



Keipawh thu khawmuang tawh lovin ka nu leh pa te chu ka mangtha a, room lam ka pan chho nghal zat.



Ka bungrua vel chu Matei khan a lo rem fel vek tawh a, a nachang te hi a hre thin ania.



Zuali biak nghal ka tum zet a ka inbual fai hmasa ta zawk a. Vawiin lam ka tlan chau ve bawk nen ka han inbual fai chiah chu ka hahdam huai huai mai.



Khumah ka lawnkai fel hnuin Zuali chu ka be ta a, rei a ring lo a lo pick up vat a.



"Inah ka awm tak tak tawh e" ka lo ti sup a, "I chau em?" a rawn ti nghal var a "Chau lo e, eng nge i tih a?" ka lo ti let vat, a thawm atang chuan kawnga kal laklawh lai a ang ka ti "Inah i awm lo em ni?" min rawn chhan hma chuan ka lo ti leh hmanhmawh a. "Biakin atangin ka haw mek" a rawn tih chuan ka phone chu la thlain ka en nghal vat a, dar 9, "Tinge tun ang hunah nangmahin i lo chhuah leh a ?" lawm vak lo chuan ka ti a, a rawn nui ri hak a "A la tlai loh em hi, ka kal hma tho alawm. In pawh ka thleng tep tawh" min tlawn deuh titih hian a rawn ti zung zung a. Zan tlai tak phei chu a la nilo, mahse ka ngaihtuah loh phah chuang hauh lo.



"Ka thu i va awih lo" ka lo ti hluk a, "In ka thleng chiah e" a rawn ti daih a. Ka ngawih deuh vung vung vang chuan "I thinrim ami?" a rawn ti hap a, a âw a inthlahrunna ri avang chuan ka khawngaih leh deuh tlat pek a "Tlêm têin thinrim, ka tello chuan zanah chhuak tawh lo la ka duh" dam deuh zawk hian ka ti ta a.



"Biakin kal ringawt te chu...a hma pawhin ka kal ziah tho a" a rawn ti nang nang a. A sawi dik tho nain keimah ka awm ve tak hnu hian amaha a kal turte chu ka ngaihtuah tlat pek a, tawhsual a tawh ka hlau a ni ber ang chu.




"Ka awm loh chhung chuan inah khan lo tawngtai hram hram rawh" ka tih chuan "Biakin leh in chu a inang hlei nem. Inah fianrial hun chu a hman ve theih nameuh mai, mahse Biakin a kan kal kher te khan Pathian tana inpekna a ni hrim hrim a. A tân thâ kan sen ve theihna ania. Kan tana A tihte ngaihtuah chuan Biakin pana kan lo tawngtai ve hram hram te hi chu a nêp lutuk zawk" a rawn ti duah a. Min ti dang lel mai alawm le.



"Anih chuan zing lamah kal mai rawh" ka ti leh hrâm a, "Zingah chuan vei vak an lo awm tawh thin sia, khua a eng ut tawh bawk si kan langsar dawn emai" a rawn ti ve leh tlat a, hnial zui ngaihna pawh ka hre tawhlo.



"Ka ngaihtuah che tih hi i hria em?" ka ti ta tawp a, chutah rawn nui ri hakin "Hria e, mahse min ngaihtuah lutuk suh, Pathianin min lo veng dawn alawm" a rawn ti mai a. Ka bulah chuan awm se eng emaw ka ti leh duh ngei ang.



"Ka lo video call dawn che ania" ka tih chuan "Phone ah ka lang chhe thei lutuk" a rawn ti a, ka lo nui nghal hawk "Ania lawm, ka lang chhe thei tak tak" thutak zet hian a rawn ti leh a, lawmawm thin hian a.



"I lan chhiat lai ber paw'n ka duati i ni tho alawm" nui ri suk chung chuan ka lo ti a, a ngawi ta daih, a lai leh viau tawh anih ka ring.



Video call chu ka tih deuh tlat avangin lungthlu zan lo chuan a duh ve ta hram a. Ka call nghal zat a, a lo pick up chuan a lukham ni âwm tak hi a rawn lang nghal a, a hmel a hliah daih emawni.



"Ka duat..." ka tih chuan camera chu a che deuh sat sat a. Ka ban pakhat lukhamin ka kut lehlamin phone chu ka chelh a, a che deuh set set chu ka lo ngaichâng ran bawk.



Chutah a hmel chu a rawn tilang ta a, a hmel tih lemah rizaiin a hnar chin hnuai lam zawng chu a khuh vek a, a mitmeng mawi fahran chiah ka hmu thei.



"I hmel ka hmu duh ania" ka tih chuan "Ka hmelchhe thei tak tak alawm" a rawn ti vat a, a thutak phian lehnghal a.



"Hmelchhe lovang ka hmu duh che ania" ka tih leh tak tlatah chuan rizai chu a hawng ta a, a hmel ka hmu thei ta. Ka lo nui suk a, a lei a rawn chhuah zeuh. 'Ka hmelchhia' chu a rawn ti ve tak nain a hmeltha fahran.



"I hmelthat em kha" ka lo tih chuan a lâi leh viau tawh. "A vawt i ti em?" pangngai tak chuan ka ti leh a "Vawt ve tho e, mahse ka mu lum nuam a" a rawn ti ve vat a.



Ka khum leh room chhungte chu ka hmuh kual vel a "Nakina 'kan' room tur anih hi" nui suk suk chung chuan ka ti a, a rawn nui ri hak hak mai.



"I khum kha a lian si i mut lum zawh pawh ka ringlo" thutak deuh hian a rawn ti a "I lo mut ve hunah chuan kan mu lum tho ang" ka lo ti mai a, ka ngaihtuahna avang chuan ka nui zui suk suk a. "Min fiam peih lutuk" a rawn ti hlak, a lai hmel hi a hmuhnawm thin ania.



Darkar khat vel zet kan inbia a, sawi tur em em hrelo in kan innuih leh tawp thin. Zan khat pawh kan tling tlak hma hauhin kan inngai nghal em em mai chu ani sia.



Zingah dar 7 velah ka harh a, ka tho hma lem lo nimin lam vang khan ka chau ve deuh a nimai thei.



Ka zuk thawh chhuah chuan Pa Biaka, kan Kohhran Upa hi a lo awm teh mial a, ka pa nen an lo inkawm mek a. Thutkhawmna lam chu ka pan ve nghal a, min rawn hmuh chuan min han chibai ve vat a "I pa hian i rawn haw tawh thu phone in min rawn hrilh a, zing zingah ka rawn kal nghal anih hi" a lo ti zangkhai vah a.




Ka nuin thingpui min rawn pe vat a, Pa Biaka chuan ka awmna chanchin te chu min han zawt ve luam a, tha takin ka lo chhang ve zel mai bawk a.



"Châmliana te fanu pawh kha lecturer in a lo awm ve tak tiraw" a rawn ti hluai a, Pa Châmliana chu Arini pa a ni. "Aw awm ve e" ka lo ti mai a. Chutah Pa Biakia chuan "An khua chu an vannei hle mai a, kan vêng tlangval chhuanvawr leh nula chhuanvawr an chang nalh mai che u ania" nui huk huk chung chuan a ti a, za lo zetin ka lo nui ve mai a.



"Kumthar nî chawhnu Inkhawm lo awm turah hian hun ka chang dawn a, i rawn haw remchang bawk a, ka hun chu hmang daih ta che. Kohhran Committee pawh kan inlungrual tlangin ka ring" a rawn tih chuan ka lo hnial vat a "In hun ruat sa ang kha ni zawk rawh se. Chutianga lo tih su kuk ka duh miah lo ania. Kohhran mite mamawh tak pawh kei ai chuan i puang chhuak thei zawk ang" ka lo ti ve duah a.



Chutah Pa Biaka chuan "Ngawi teh, ka hun chu chang tak tak zawk rawh. Keini chu Pathian zarah Kohhran huang chhungah na na na chuan thusawina hun kan ngah ve viau a. Nang chu hmun danga awm zel turte i ni a, kan chan theih lai che hian sawi deuh mawlh mawlh la a tha zawk ang" a rawn ti leh churh churh a. Han hnial zui ngaihna vak pawh ka hrelo, mahse a hun lo thleng tur han chan daih mai chu ka hreh ve viau.



A haw dawnah chuan Upa dangho a lo biak tur thute chu a sawi tak ang deuh deuh a. Ka pa bulah chuan "Sangzuala chuan chang ngei sela ka duh ania aw, midang pawh ka lo bia ang a , nang chuan i remti sa ah ka ngai ange" a ti deuh tung a, ka pa pawh chuan hnial zui chi ah a ngai tawh lo aniang "I ti deuh tlat bawk si a, nimai rawh se" a ti ta a.



Duhsak takin a hun min pek a duh ve miau si a, hnial luih tung chi ah ka ngai ta bik lova. Ka pa pawhin "Thusawi tur chuan inbuatsaih mai rawh aw" a ti ta tawp a. Chutiang ani ta sa sa Pathian rawn chungin theihtawp chhuahin kan inbuatsaih ve ta poh aniang chu.



Chaw kan ei lai chuan ka pain "Mama te pawh naktuk lamah chuan an rawn kal thei tawh turah ngai ila, chhungkua kan phui sui dawn viau e" a ti charh charh a. Ka nu chuan "A room pawh kan lo tihfel deuh hlek a ngai a, bed sheet thar te pawh phah a ngai tawh tak ang" a lo ti ve zung zung a, an phur hmel viau mai. Keipawh ka bâng chuang lo, chhungkua awm khawm dial dial te hi thil nuam tak a ni.




Ka nu sawi ang ngeiin chhun lamah chuan Matei nen U Mafaka te room chu an tifel ta a. Keichu ka pa nen motor kan lo sil thung a, kan buai tlang hlawm viau mai.



Tlai lamah chuan ka thiante an rawn lang teh nawlh a, Valpuia, Remsanga leh Nunui te an lo kal a, Arini pawh a rawn tel ve.



Thutkhawmna lamah kan inzui phei a, Valpuia chuan "I lo haw thu ringawt i rawn sawi a, chawei a min sawm nachang pawh i hre lova" fiamthu ti tak deuh hian a rawn ti a, ka lo nui mai a.



Nunui chuan "Nu Machhani a fing hlauh a, amah zawkin min rawn sawm hlawm a" a lo ti ve hlak hlak a, ka lo hamhaih ang reng. Ka nu chuan engmah min hrilh lawk si lova, mahse nuam lo an tih ka hlauh avangin hrelo ang chuan ka awm duh ta lo law law. A lo sawm vek tawh tho bawk a, a tha vek zel mai e.



Ka nu inbual zo chu an room atangin a rawn chhuak ve vat a, ka thiante a rawn hmuh chuan a rawn chiauau vat a "In rawn kal hma lutuk duh anih kha, ka bawl sa in ei thei vek tho alawm. Mahse tihian inkawm hona hun in neih tam phah ang a, a tha zawk anih hi" a rawn ti zung zung a.



Arini chuan "Eirawng kan bawl pui ve dawn che alawm, rawn ei tawp te chu a chi nang" a lo ti ve vat a. Ka nu mit a tling leh teh ang chu.



Dar 3 vel a rik chuan eirawng chu kan bawl ho ta a, zan lam inkhawm a awm lo bawk nen kan hmanhmawh vak lo.



Ka nu chuan dawl rêp hi a rawn la chhuak a "Dawl rêp hi ka bai fuh hlei thei lova bai thiam in awm em?" a ti a, Arini chuan "Ka thiam em em pawh ka hrelo nain ka chhungte chuan ka bai chu an ei tui ve viau zel a. Ka lo bai dawn mi" a lo ti ve vat a. Ka nu chuan phur zet hian "A tihzia hlauh chu, i thiam dawn tih ka hria alawm. Nangman bai mai rawh aw, a tui viau ang" a ti nghal zung zung a.



Arinin gas lam a pan lai chuan ka nu chu ka bulah a rawn thu a, "Thiam loh pawh hi a nei lo emawni, a ni tluka i tana tha tur hi chu an awm lo mawle" a rawn ti zawi sep sep a. "A ni tluka tha ang hi ka duhlo" ka lo ti mai a, a rum deuh nghat chu ka ngai pawimawh duh bik lo.



Vawksa, Arsa, Antlak leh Bai vel chu kan siam ve nual a. Salad pawh tam tawk tak kan siam bawk. Kan ri ve deuh laih laih a, thil hrehawm zawk zawk chu a ni bik lo. Mahse ka rilru chuan hmeichhe pakhat a ngai rauh rauh lo theilo.



Tlai dar 5:30 velah chuan chawei kan peih der a. Ka pain hunserh a hman zawhah chaw chu kan ei ta nghal a. Ka nu in Arini nen min hmehbel phet a tum leh thin a, midangin hrethiam ve vak lo mah se ka hriatthiam tur tawk vel lek hian min hmehbel a. Chaw chu ka tum ang pawhin ka ei hnem lo.




Chaw eihmun vel chu hmeichhe hovin an tifel a, keini kawmchar lamah kan lo awm thung a. Ka pa chu thutkhawmna lamah lehkhabu a chhiar nghal daih.




Kan in hmun hi Aizawl khawchhung lûn lai taka awm mah ni se compound nei tha pawl tak chu kan ni ve a. Kan kawmchar lamah hian balcony zau tha tawk tak a awm a, thianho inkawm hlim nan pawh chuan hmun nuam tak a ni ve tlat.




Valpuia leh Remsanga te chuan zial an zu khu nghal hlat hlat a. Valpuia chuan ka bula rawn thutthlak pah hian "Engtikah nge Arini nen hian in tih ve huk dawn" awlsam zet hian a rawn ti a. Ka lo chet hluk a, "Inngaizawng pawh ni hawt lo chuan" ka tih chuan a phawk viau mai "In inngaizawng lo em ni?" a rawn ti hluai a. Engtin nge maw kan inngaihzawn te a lo rin reng reng ni. Mahse âwm ka ti veleh tho mai, engtin mah awm dun lo mah ila vengchhung mite dem rawn kha kan ni ve a. Phatna thu ka sawi buai peih ngai silo a, ka nu lah khan min hmehbel deuh chawt bawk nen kan inkungkaih anga a lo ngai pawh chu a demawm em em bik hran lo.



"Kan inngaizawng hlei nem" tha deuh chuan ka lo ti veleh mai a. "A mitmengah sawn i hrethiam lo em ni? A melh dan thin che hi" Remsanga chuan a lo ti ve vat a.



"Hrethiam lo rual ka ni bik hlei nem, mahse ka ngaizawng ngailo. Tunah chuan ngaihzawng ka nei tawh hrim hrim" nui suk chunga ka tih chuan a hma zawng ai khan an rawn phawk lehzual a "Tunge?" Valpuia chuan a lo ti vat a.



"Ka awmna khua ami" ka lo ti mai a, an hriat ve hi a rem lohna a awmin ka hrelo. Ka thiante an ni a, hmeichhia angin engkim inhrilh diak diak velo mah ila hetiang sawi hunlai te pawh hi a awm ve bawk ang chu.



Valpuia chu a rawn chet hluk a "I va ngawi thei ve" a ti hluk a, ka lo nui mai a. Chutah Remsanga chuan "A thlalak i nei em?" nui ruh ruh chung chuan a rawn ti a.



Ka kekawr iptea ka phone dah chu ka lachhuak vat a. Lunglei kan kal tuma ka motor-a a muthlih lai thla ka lo lak sak kha ka hmuh ta a. "Hmeltha ve" Valpuia chuan nui vur vur chung hian a rawn ti a, ka lo nui mai a. Zuali chu an fak ve kher mai. Thik thu pek chhiatna chi ah pawh ngai lovin a lawmawm lamah ngai phawt mai ang.




Arini leh Nunui te an lo kal takah chuan thudang kan sawi ta daih a.
Kum hlui thlah zan vela Ar kan ve an rawt chuk chuk a, thu an titlu nghal zung zung mai bawk a. Kan inah bawk hun hman kan tum leh anih hmel e.




An haw dawn chuan ka nuin Arini leh Nunui chu motor-a thlah turin min ti a. A tih chhan ka hrechiang sia ka phur fahran lo. Valpuia chuan a lo hrethiam aniang "Keiman ka thlah kawi ve ve mai ang" a lo ti sam mai a. Ka nu tan han hnial zui vak chi kha a ni tawh si lova tha deuh chuan inzui chhuak ta a. Veranda thleng chu ka va zui chhuah ve tak kha.



Ka nu leh pa heater lo âi na bulah chuan ka va thu thla ve a. Chutah ka nu chuan "Thlah mai tur che alawm, an ngai pawimawh che a, an rawn kal ve a" a lo ti nghal tawng a. "Valpuian a thlah theih kha" ka lo ti mai a, a lawm lo hmel chu ka haider leh hmiah.



Kum thar boruak hi han hmang zo ila Zuali nen kan chungchang chu sawi that pui ka tum ruh hle a. Eng pawh hmachhawn thei turin ka rilru ka siam tha sauh sauh a. Pathian hnenah ka thlen nasa bawk a, mahse chhanna danglam tak engmah ka la dawng lo.




Zanah chuan kan in video call leh a, a hmel a dik tlat loh avang chuan a dam that leh that loh ka zawt nghal vat a, a dam that thuin min chhang tho bawk si.



"Harsatna i nei em ni?" ka ti a, "Nei lo" a ti tlat bawk si. Mahse a hmel chu a dik mawlh lo alawm.



"Ka duat..." rilru hrehawm zet hian ka ti hawlh a, a mittui a tling deuh pam a, rang zetin a hmel a hliah vat a. A awmdan chuan min tihrehawm takzet.



"Buaina i neih chuan min hrilh rawh, i tan chuan engkim ka ti zel ang ka tih tawh kha" ka ti nghet charh a, ka thaw chhuak leh hawk bawk.



A ngawih reng avang chuan "Ka duat..." ka ti leh a, chutah aw tial ruai hian "Ka ngai tawh che" a rawn ti tiau a, hrehawn ti zet hian ka thaw chhuak nghal hawk. Theih ni ngat sela chu tunah hian a bula kal nghal ruak ruak mai ka duh.



"Naktukah ka lo phei ang" ka ti nghet ta charh a, a hmel hliahna chu lasawnin a lu a rawn thing nghal nawk nawk a "Aih, a ngailo...ka tah a rawn chhuak thut a...ka...ka ngaihtuah awm miah lo...ka ngai lutuk che a" a rawn ti bah niai a, a mittui chu a hru nghal sawk sawk bawk.





"Ka lo phei ang, ka ngai che a, min ngai bawk a. Chuvang chuan i bulah ka rawn awm vat ang" ka lo ti leh charh charh a.



"Ka tap tawh miah lovang, i rilru ka tibuai zo anih kha...a zialo hle mai" a rawn ti zawi sep a.



"Ka bula i tah loh te'n tu bulah nge i tah ang a. Ka rilru hi tibuai zel turin ka duh bawk che" ka lo ti nghet charh a, a rawn tah nuih deuh hak a "Ka lawm e aw..." a rawn ti zawi sep a, "I lawm tak tak chuan ka bulah awm zel la, min tibuai zel ang che" ka lo ti sup a.




Naktuka phei tut tut chu ka duh nghal rum rum tawh mai a. Mahse min hnial veleh tlat a "Ka rilru a no thut mai mai. Kum tharah bak lo let suh" a ti ve tlat a.



Kan inbiak tawp dawn lam chu a zangkhai deuh huai avangin a thusawi pawh chu ka lo pawm veleh mai a. Mahse a rawn tap kher khan ka awm chu a tinuam zan lo ani.



Ka pa sawi lawk ang ngeiin zan dar 7 velah chuan U Mafaka te chu an rawn thleng ta a. A nupui hi U Malawmi a ni a, nu tawite ania, mahse a thinchhe miah lo. A fel ve viau mai a. Ka nu leh pa te mit pawh a tlung thin khawp mai.



An fate pahnih David leh Neithan te chu motor an chuang sual a, an rui deuh a, an rawn ngui haw bar a. Room lamah an muttir nghal daih a, an khawngaihthlak reuh tak tak ani.



An luggage vel te chu Matei nen kan lo dahtha vat a. U Malawmi chu a che nghal zung zung a, a fel ka tih tawh kha.



Ka nu leh pa chu kawrlum phiar an rawn hawn a, Matei pawh bag nalh zet an rawn hawn bawk a. Keichu jacket min rawn hawn thung a. Kan lawm tlang hlawm viau mai.



An rawn haw kawngah an in ei puar tawh a. An intifai nghal zung zung a, chumi zawh lamah chuan reilote thutkhawmnaah kan han inkawm khawm leh rih a.




Dar 9 a rik dawn chuan ka pain "In zinkawng a thui sia, in rawn chau haw viau ang. Va mu tawh rawh u, i nu nen pawh kan mu tawh ange khua a vawt bawk sia mut lum vat kha a tha mai" a ti zung zung a.



Kan heater âi lai chu Matein a tifel zung zung a. Chumi hnuah chuan mahni room lam kan pan ta hlawm a.


Bible chhiar a ka tawngtai zawh vek hnu chuan Zuali ka phone a, a ring ral thak thak a. A tawpah phei chuan switch off a in ti ta a. Zing lamah khan vawithum ngawt biak ka tum tawh a, a ring ral thak thak tawh bawk a. A buai anih ka rin vangin nilengin ka be buai lova tunah a ngai te bawkin a ni leh a.



Ka han phone leh ngial a, switch off tih ringawt a ni zel a. Zing atanga biak theih loh a a awm tawp mai chu ka ngaih a thalo viau tawh.



*Ka message i hmuh veleh min rawn be rawh* tih hi ka va thawn a, a phone a switch off daih bawk nen one tick chauh ani.



Engtik laiin nge ka lo muthilh hman ka hrelo zing ka harh rual rual chuan ka phone ka ban a, ka la meng tha hlei thei lo, ka phak deuh chual a.



Ka message kha a ngai ngaiin a lo la awm a, ka phone leh a, mahse 'switch off' tih ringawt chu ka chhanna dawn awmchhun ani.



_______*_______*________*_________


Show post links
Top

[Ngaia]

LOVE COVERS ALL
By CVL Awmpuii


Chapter - 28



Khum atang chuan ka tho chhuak nghal zawt a. A number chu ka dial leh a, a ngai tê bawkin 'Switch off' a la inti tlat.



Chutia rilru buai zeta ka lo awm lai chuan U Mafaka fate thawm ka hria a, ka room kawngka rawn kikin "A pate, mi an lo lêng a, a pi ten 'Lo tho chhuak rawh' an ti" David chuan a rawn ti lang lang a. "A pate..." Nathan an a rawn tih veleh takah chuan "Ka lo tho" ka ti ve ta vat a.



Rilru nuam zân lo chuan washroom lamah ka lût a, ka hmai ka va phih a, ka ngaihtuahna chu a buai tak zet a ni. Tinge ka call a lak theih loh ? A tirah kha chuan a ring ve ngei a, mahse a hnua 'switch off' a inti leh daih kha hriatthiam har ka ti.



Chutah thil hrechhuak thutin washroom atang chuan ka chhuak nghal a, ka hmai pawh hru hul ta lo chuan ka phone chu ka ban leh nghal zat a. Sawmtluangi number ka dial ta a, ka ngaichang deuh ran a, mahse a ring ral thak. Ka tihnawn leh pawh chuan a ring ral leh thak thak a. Thawk ipik zetin ka phone chu khumah ka theh thla ta tawp.




Room-a awm reng theih ni ta lo chu inhnuai lamah ka zuk chhuk thla ve ta phawt a. Pa Biaka leh kan Kohhran Chairman Pa Ngura te an lo awm a.



Ka zuk pawh ve ta vat a. Pa Biaka chuan "Ka hun chu i chang tak tak dawn nia, i lo inbuatsaih dawn nia. Kan sawiho vek tawh a, i chanvo a dah chu kan remti tlang ania" a rawn ti zung zung a. Ka rilru a buai bawk nen lo chhâwn vak ngaihna pawh ka hrelo.



An titi te chu ka lo ngaithla ve reng a, zawhna min zawh chângin ka lo chhâng ve zel mai a. Thudangin ka titi pui hlei thei tlat lo. Ka rilru a nuam lo em ani.



An haw hnu chuan ka pain "I awm a va nawm loh hmel ve" min ti ta reng a, chik zetin min melh bawk. "Nuam e... room-ah ka han chho lawk ange" ka ti zawi sup a. Min chhanna pawh nghak hman lovin inchung lamah chuan ka chho nghal pawk pawk a.



Khuma ka phone chu ka ban leh a, kan han en chuan Sawmtluangi missed call a lo awm kiau a, vawihnih min lo call hman.



Rang zetin ka call back a, a lo pick up ve ta hram e.


Min rawn chhan hma hauh chuan "Biak tlang in va har ve" ka lo ti nghal hluai a, ka âw a nem lem lo.



"Nga ti teh hluk nge?" a rawn ti hliai a, a hamhaih ve deuh a nimai thei. Chutah dam deuh zawk hian "Zuali ka be tlang theilo" ka ti nghal tawl a, sawi zawm lehin "Buaina a tawk em? An inah zuk kal la, ka lo be lawk teh ang" ka ti leh sup a.




Chutah Sawmtluangi chuan mak tih hmel fe hian"An chanchin i hre miah nange?" a rawn ti hluai a. "Engmah ka hrelo" ka lo ti nghal vat. A thusawi tur chu ka lo ngaichâng ran a.




"Nimin vartian khan a nu a chau thut a, Lunglei damdawiin kan pan pui nghal rum rum alawm" a rawn ti ta mai a. Ka rilru a buai ve nghal phat mai.




"Tunah an la awm em?" ka tih chuan "Aw, awm e. Mahse a nu pawh chu a zia tawh lutuk. Nimin tuk chu ka lainat tak tak ani. An buai hun kha zing dar 4 vel chauh a la ni sia, khua a la eng bawk silo. Mangang deuhvin min rawn kaitho a, a inthlahrung bawk sia. Hmanhmawh deuhvin motor kan be ta chuk chuk a. Ka nuin a kalpui a, mahse nimin tlaiah vek khan a lo haw leh nghal. Zuali kha a inthlahrung tlat a, ka nu pawh chuan a lo hawsan tawp alawm" a rawn ti zung zung a.




Ka lo thaw chhuak hawlh a. A mangan tur zia ka ngaihtuah a, hrehawm ka lo ti ve lo thei lo. Mahse tinge engmah chanchin min rawn hrilh ve miah loh tih chu ka zawhna a ni.




"Tinge engmah min rawn hrilh loh va" ka ti ta rêng a. Sawmtluangi chuan "Zualin a rawn hrilh vek turah che ka lo ngai mai sin" a lo ti vat a. Ka lungawi ta vak lo. Engkim min hrilh vek turin ka ti ziah thin a, chutiang thil ka laka a zep chu ka lawm lo khawp mai.




"Amah pawh ka be tlang thei reng reng hlei nem. Ka phone a, a tirah chuan a ring, mahse a hnuah a switch off hmak alawm" ka ti hluk hluk a. Ka thin a rim ru tun mai.



Sawmtluangi chuan thil hrechhuak thut ni awm tak hian "Awi...ka van mawl tak, a phone a ken theihnghilh thu min hrilh tak alawm. A hmanhmawh leh mangang lutuk khan a lo mangnghilh daih a. Vawiinah sumo-a thawn turin min chah tak alawm. Battery a low vek a, charge tur pawhin min chah tak e" a rawn ti zung zung a. Ka phone tirha ring reng si kha a battery a lo low sa vangin a thi daih anih ka ring thiam ta ruak ruak mai. Tlêm chuan ka awm chu a nuam ve ta deuh e.



"In inbiak hunah i call tlang theih loh vang khan i lo thinrim khum vel ange a rilru a mangang tawk viau ania" a rawn ti leh kha kha a. Chu zawng ka tih loh tawp tur a ni. A tirah chuan ka mangang a, ka thinrim tun bawk, mahse tunah chuan amah hnem a thlamuan chu ka tih makmawh a ni.



Zuali nû phone number chu min pe ta hlauh a, chuta tang chuan be pawp mai turin min ti a. Ka hahdam ta deuh e.



Sawmtluangi nen kan inbiak zawh chuan Nu Thapuii phone number chu ka dial ta nghal a, rei vak lovah Zuali âw hian "Hello" a rawn ti zawi sep a.




A âw ka hre leh ta chu ka hahdam huai huai maiin ka hria. "Hello" ka ngawih reng vang chuan a rawn ti leh a.




"Ka duat..." ka ti ta sup a, a reh nghal dûk a. "Ka duat...keimah" ka lo tih leh tak supah chuan "U Sangzual" a rawn ti hap a, a ngawi leh daih ang lawi a.



"Sawmtluangin i nu chanchin min lo hrilh a, ka be tlang thei silo che a, min timangang alawm" ka ti dam thlup a. "Ka phone ka theihnghilh daih a, ka mangang lutuk a" a rawn ti halh a, a inthiamlo ve deuh ni tur ani. "Umm, ka hria alawm Sawmtluangin min hrilh vek tawh ania. I nu chu tunah eng nge a an tawh?" ka lo ti zâng deuh vah a, ka ngaihtuah takzet.




"A tha tawh lutuk, drip an khai leh a. Tukinah pawh a rawn harh pangngai tawh a, a muhil leh chiah" a lo ti ve vat a.



Amah chauha a nu a buaipui tur ka ngaihtuah chuan ka khawngaih lo theilo.



"I bulah ka awm thei silo a aw..." hrehawm ti zet hian ka ti hulh a. "Ka ngaihtuah awm miah lo ania. A tirah khan ka mangang deuh a, mahse ka pangngai tawh lutuk" a rawn ti zung zung a. Ka rilru tihbuai a hlau leh viau tawh tih ka hai mawlh lo.




"Tunah chuan chhel deuhvin lo awm phawt la, ka lo phei veleh duat chi tinrengin ka duat ang che" thutak zet hian ka ti a, a rawn nui ri nghal hak hak a. "Ka chhel tawk alawm, ka tawngtai hi chuan ka hahdam huai zel" a rawn ti reuh a. A rinna hian engtik niah emaw chuan hmalam hun eng tak a la rawn herchhuah pui ngei ang.




A nu muthlih lai a ni bawk a, rei tâwk fang chu kan inbia a. Ka phone number thiam tura ka tih chuan a nuih a za viau mai. Mahse a lo chhinchhiah thlap tawh tur thu chu min hrilh ve tak kha. Eng emaw thil thleng thut theiah pawh phone number chhinchhiah chu a la tangkai dawn tlat. Keipawhin a number hi ka chhinchhiah thlap alawm.




Tukthuan ei a hun tawh avangin kham lo zetin kan inbiakna chu kan titawp a. Chanchin min rawn hriattir ve zel turin ka chah uluk viau a, keipawhin a phone a kawl hma chu a nu phone atanga ka biak zel tur thu ka hrilh bawk.




Inhnuaia ka chhuk thlak hnu chuan David leh Neithan an lo in ûm kual nasa mai a, Matein a lo infiam pui a, an lo ri ve chel chul mai.



Ka nu leh U Malawmin eirawng an bawl a. Ka nu chuan David te unau ri chel chul chu "In pa a la mu ania, thawm dim deuh rawh u, a chau awm si" tiin a lo khap leh thin a. Naupang harh rual an ni bawk a, ka nu thusawi chu an bengkhawn tehchiam lo.




U Mafaka chu rei vak lovah a rawn tho chhuak ve ta a "An bengchheng thei asin aw, an bula awm dawn chuan hrisel that te hi a ngai ania" nui huk huk chung chuan a rawn ti a. A fate thawm bengchheng chu a ngaimawh hmel vak lo.




Tukthuan chu dar 9 pelh hretah kan ei a, tih tur tul em em kan nei hlawm lo bawk a tuk dang aiin kan muang lui ve deuh hrim hrim ani.



Chaw kan ei lai chuan ka nu chuan U Malawmi bulah "Naupang ho i bazar pui ve dawn em?" tiin a zawt a. U Malawmi chuan "Mamawh em em an nei chuang lova, a ngaih pawh ka hrelo" a lo ti tha ve mai a. Kan chhungkua hi chu tul leh mamawh lovah kan insengso vak ngai lo hrim hrim a. Uikawm leh khirh vang pawh niin ka hrelo, kan tih than dan ania. Kan intodelh ve viau bawk.




Tukthuan kan ei kham hnu chuan ka nu leh U Malawmin an tifel a. Matein naupangho a lo buaipui vat bawk. Keini chu kan pafain thutkhawmna lamah kan inzui phei a.



Ka pa chuan eng eng emawni kan unau chuan min zawt a, pangngai takin kan lo chhang ve zel mai bawk a.



Ka nu leh U Malawmi te rawn thut phei ve hnu chuan ka nupui neih hun tur velte sawiin an titi a, U Malawmi chu a phur ngang mai.



"I u Mafaka te Lunglei an lo kal tum a i hruai nu nen khan in la inzui em?" a rawn ti hluai a. U Mafakan a lo hrilh ve ngei anih ka ring. Kan la inzui thu chu ka lo hrilh ve mai a. Ka nu chuan mak tih hmel fe hian "Tu maw in sawi?" a rawn ti he haw a.



U Mafaka chuan "Zualtei kha" a lo ti vat a. Ka nu chuan thip fe hian min rawn melh a "In la inzui a maw?!" a rawn ti kha fak a, "Zui e, sawipui che u pawh ka tum alawm" ka lo ti sam et a. U Malawmi chuan kan boruak chu a hrethiam ve vak lo niin a lang, a meng buai emai.




Ka nu chuan "Malawm, Sangzuala hian a zuk awmna khuaa zu in thin fanu a ngaizawng ania" a rawn ti hlak a, ka pain a lo khap vat. Keipawh chuan rum deuhvin ka va melh a.



U Mafaka chuan "Ka nu, i sawi ang kha chu anih hmel loh, a fel hmel em kha. Chuloah Sangzuala nen pawh an inhmeh khawp alawm" a lo ti ve vat a.



Chutah ka nu chuan "Amah a sual pawh ka va tilo, mahse khawtlanga sawisep kai an nia. An inzui thawm te hi an khawtlangin hre ta se i nau mualphona vek tur anih hi. A nihna nen phei chuan a inrem lo lutuk " a ti hluk hluk a. U Malawmi chuan min rawn melh pah hian "Chutiangte chu a tha dawn a mawnle" a rawn ti hap a.




U Mafaka chuan "Khawtlang sawisep tih te chu a. An nihna tak anih loh phawt a hnu, chuloah amah a fel a , Pathian tih mi a nih chuan a tawk reng alawm" a lo ti mai a. Ka nu ngaihdan a nih loh hmel kher mai.




"Nupui ka neih vat in duh chuan Zuali ka neih vat hi remti ula, mo hmel in hmu vat a nimai" ka lo ti dam thlup a.



Ka nu chuan "Arini pawh a awm ve reng a" a rawn ti hram a. Ka lo chet hluk "Sawi ve ziah lo teh, beiseina thlawn lo siam sak tawhlo bawk rawh. A lakah eng rilru mah ka pulo" chiang tawk tak chuan ka ti a.




Ka pa a lo inrawlh ta vat a "In hmanhmawh tut tut anih kha. Sangzual inngaihtuah tha leh deuh la ka duh. Chuan, Machhan nangpawn tur tut tut tawh lo la. Nupui neih nan khua a la tlai hlei nem" a ti dam thlup a.




'Inngaihtuah tha leh la ka duh' a rawn ti kher chu ka lawm vak lo. "Zuali bak neih ka tumlo. In pawm theih hma chu nupui ka nei bik lo ang" ka ti ta reng bawk a. Ka nu chuan rum zetin min melh a, midangho chuan engmah an sawi zui tawhlo.




Zanah Zuali nen kan inbe leh a, a phone a lo hmang thei tawh. Kum thar ni a an chhuah theih tawh tur thute chu a rawn sawi a. Damdawiin lamah Krismas leh Kum thar vuakvet an han hmang tawp mai ania, ka lainat takzet.




"I chau em?" ka tih chuan "Chau lo e, kan mu tha thei lutuk" a lo ti mai a, a âw pawh a zang viau.



Kum thar ni chawhnu inkhawma hun ka chan tur thute chu ka hrilh ve luam a "Ka lo tawngtai pui reng dawn che ania" a rawn ti ve vat a. Ka tan hian a hlu thin ania.




'Inbuatsaih char char rawh' a tih deuh tlat avangin rei pawh kan inbe lo. Ka nu hian hrechiang ngat sela a ni tluka ka rawngbawlna kawnga min thlawp tha tur hi a hre kher bik lovang.




Kum hlui thlah zanah chuan chhungkaw kimin kan inkhawm a. Ka pain thu a sawi a, ka pa mah nise ka lo chhuang ve takzet. "Kumin kum kalta chhung zawng zawng kha Pathian duhdanin hun kan lo hmang lo anih pawhin zanin na na na hi chu Pathian duhdanin i hmang hram hram ang u" tiin a thusawi a titawp a. Kohhran mipuite pawhin an hlawkpui ve viauin ka ring.




Valpuia leh Remsanga te nen kan inzui deuh chawt a. Buaithlak deuh chu Nunui leh Arini te hi an kawm ve tlat bawk si a. Hmeichhe zia deuh taka kawm duh loh neih chu thil tih chi a ni bawk si lova kan inzui ve hlawm zel chu ania.



Zaikhawmnaah dar 9 leh a chanve vel thleng kan va tel veleh a. Valpuia chuan kan ina ar kan ve a rawt tlat pek a. A hmain kan lo sawilawk ve deuh tawh bawk nen hnial luih tung chi pawh an nilo.



Kan in lamah chuan kan inzui lut veleh ta phawt chu ania. Ka nu a lo phul hlut a, mak deuhvin Nu Sangkimi leh Pa Châmliana te pawh an lo awm ve a. Arini chuan a hre lawk aniang mak ti hmel pawh a pulo.




Ka nu chuan "Ar pum lei sa kan nei a, chumi chu kan siam dawn nia" a lo ti zung zung a. Arini a bel deuh chawt a, an titi dun sar sar a, nufa ni zawk awm tak pawh an ni.




U Mafaka te chhung chu naupangin zaikhawm an ngen tlat a, zaikhawmna lamah zanlai inkhawm thleng an awm dawn anih hmel, Matei pawhin a zui vein ka hria.




Ka pa leh Arini nu leh pa te chu thutkhawmna lamah an titi a. Keini chu ka nu hovin choka lamah kan ar kan tur kan buaipui a. Valpuia leh Nunui pawh a ngai te bawkin uang thuang zetin an infiam leh tawh a, kan lo nuihpui ve dar dar zel.




Chutia an buai vel lai chuan thlang lam balcony ah ka zuk thu chhuak a, ka phone phawrhin Zuali ka call a, a lo pick up vat a.



"Hello" a rawn ti zawi sep a, ka ngawi deuh vang vang a, tunah tak hian phat rual lohvin ka ngai thlawt ani.



"U Sangzual..." a rawn tih leh takah chuan "Ka ngai che" ka lo ti hulh a. A reh deuh vang vang a, "Ka ngai lutuk che ka duat" ka ti leh sup a. A rawn thaw ri deuh hak a "Keipawh..." a rawn ti zawi sep a.




Ka lo duhkhawp der lo, "Min ngaih tak tak chuan sawi ve la" ka ti a. Chutah rang zet hian "Ka ngai che..." a rawn ti halh a. Khaw hmun lo inngaizawng dangte hian engtin nge maw an lo tawrh theih le ka ti hial mai !




"Eng nge i tih a?" ka tih chuan "Ka nu a muhil tawh a, a bulah ka awm" a rawn ti a. Damdawiin hmun reh deuhah khan an nufa tein an awm ve reng awm sia. Tunah tak hian a bula awm ka châk takzet.



"Eng nge i tih ve a" a rawn tih zawm leh zat a "Inah ka awm a, kan kawmchar thutthleng ah thuin ka duati ka be mek che" ka tih chuan a rawn nui ri leh hak hak tawh.



"I lo phei hunah tuna min duat theih loh ai zawng zawng min duat ang che" pangchang zet hian a rawn ti a. Chu zawng min dil lo mah se ka duatna zawng zawng hi chu a tan vek ani.



"I peih loh thleng thlengin ka duat ang che" thutak deuh hian ka ti a, a nui hak hak a. Hetianga a nui ri hi hriat reng ka duh.



Inchhung ka luh leh hnu chuan an thilsiam chu an lo peih viau tawh a. Valpuia lah chuan "I lung a leng a nimaw" a rawn ti hluai a, ka lo nui mai a.



Thutkhawmna lamah eitur ho chu kan keng phei a. Arini nu leh pate pawh an lo la awm bawk a. Kan siam kep ve nghal vek.



Ka nu chuan "Engtikah nge Arini hi a phei dawn" tiin a nu leh pate chu a zawt a. Pa Châmliana chuan "Ni 5 vel hi kan tinzawn deuh a, zirlai kha ni 7 ah an tan dawn a" a lo ti vat a.



Chutah ka nu chuan "Sangzuala pawh phei a ngai dawn tho a, phei rual se a tha ang" ngaihsam zet hian a rawn ti a. Ka va melh hrawk a, a lo haider hmiah.



Nu Sangkimi chuan "A va remchang dawn tak ve, motor hman tur kan lo buai lutuk a. Kan driver in ni 7 thleng chawlh a la sia" a rawn ti ta zung zung a.



Min rawn melhin "Sangzual, i rual chuan kal se pawi i ti em?" a rawn ti leh a. Ka chhan hma hauhin ka nu chuan " A pawi chhan tur a awm lo, a remchang alawm. Kal rual rawh se" tiin min lo chhan khalh zung zung a. Ka lawm lo khawp mai.




Arini chuan inthlahrung deuh hian "Sumo vel pawhin ka kal thei reng alawm" a rawn ti a. Ka pa a rawn tawng ve ta thung a "Sumo chuan Lungleia chhuk i ngai tho tho dawn a, Sumo dang chân buai leh i ngai ang a, a buaithlak mai mai. Sangzuala rual chuan a remchang mai alawm" a lo ti ve ta vat a.




Tichuan kan pahniha phei dun turin thuthlukna an siam hlawm ta ngawt a. Ka lawm lo kher mai. Lo hnial luih tung kha thil nuam a ni bawk silo.




Zanlai inkhawm dar rik dawn hnaihah chuan Biakin lam kan pan ve ta hlawm a. Ka engtih mah a phur tawh lo. Mahse thinrim tuna kum hlui thlah chu ka duh bik si lova pangngai taka awm ka tum ve hram hram ani.




Kan ban veleh Zuali chu message in Kumthar Chibai bukna ka va thawn a, ani chu a muhil leh der tawh anih hmel.



Zingah chuan min rawn wish letna ka hmu ve nghal zat a. Ka thusawi tur atan duhsakna min rawn hlan ve bawk a. Ka inringtawk leh ta sawt e.




Chawhma Inkhawmah kan Bial vawngtu Pastor in thu a sawi a. A sawi nungin a sawi tha khawp mai. Ka hun tur pawh huphurhawm ve duh tak ani.




Inkhawm ban veleh in lamah kan chhungin kan haw leh dial a. Chhun thingpui vel kan inzawh fel hnu chuan David leh Neithan te chu an phi cheng mai a. "A patean thu a sawi dawn bawk si kawr dang kan ha duh" an ti deuh kher a, U Malawmi chuan a han thlak leh lawp lawp a. Mi chu an tihlim viau mai.



Chawhnu Inkhawm kal tura ka chhuah leh hma chuan Zuali nen kan inbe leh zuai a. Duhsakna min hlan mawlh mawlh a, min huphurh pui tho siin min fuih thiam khawp mai.



Thupui thlan sa hmang chuan thu ka sawi ta a. Ka inbuatsaihna note-a ka ziah pawh chu ka en manglo. Rilruah a rawn lang deuh zawt zawt a, Pathianin min awmpui hle ka tilo theilo.




Inkhawm ban te chuan min han chibai veleh sap sap hlawm a, rilru chu a hahdam ve huai mai.



Zana kan inbiak chuan an inah an haw tawh thu min rawn hrilh a. Ka lo thaw huai mai. Damdawiina awm reng kha chu midang awm ve dawn tho mah se a khawhar thlak dawn emai.



"I nu chu a tha vek tawh hrim hrim em?" ka tih chuan "Umm...Pathian zarah tha vek tawh e" a rawn ti ve vat a.




Arini chungchang kha hrilh tur a ni em ka hrethiam chiah lova. Mahse kan phei rual dawn si chuan hrilh loh tawp chu thain ka hre silo. Pangngai tak chuan ka hrilh ta a.



Chutah ka beisei loh deuh hian "Lo phei rual rawh u. A tan pawh insen a ngailo ang a, a remchang tak alawm" a rawn ti sam et mai a. Chutia engtin mah ngai miah lova a awm chu mak ka ti viau.




A thik miah lo chu ka thin a ur ru zawk hial dawn dawn mai a "Kan rawn phei rual chu i remti tak tak maw" ka ti leh hram a.



"Rem tih loh chhan tur a awm hlei nem. A tan pawisa save ani mai a, nangma tan pawh kawngkalah i khawhar lutuk lo anga " a rawn ti leh mai a.




Lawm vak lo chuan "I thik miah nange" ka ti khur khur a, a rawn nui ri hak hak a, ka lo phun hluk "I thik lo tak tak em ni?" ka ti leh nghut a. Chutah thutak deuh hian "Ka ring tawk che ka tih kha" a rawn ti mai a. Ka lo beisei loh lam daih a ni leh ta.



Min ring em em tu rinna hi tihchhiat sak ka duh reng reng lo. Engtikah mah ka tichhe ngai lo bawk ang.




Chutia amah berin 'Lo phei rual ru' a tih tak si ah chuan ka lo pawm veleh mai a. Phallo deuh tlat se ka ti ru viau ania, chutiang anih chuan Arini chu ka phei rualpui miah lovang.



Pathian zarah kan dam a, Zuali nen pawh nitin kan inbia a, a nu pawh insawiselna nei tawh lovin a dam tha vek tawh a. Tuna kan hmabak ni ta chu a bula awm vat a, duat taka enkawl a ni deuh tawp mai.



Ka phei ni tur a lo thlen chuan phur zetin zing ka tho a, ka tho hma viau mai. Zuali chu Morning wish ka thawn nghal zat a. Ka inphihfai hnuah inhnuai lamah ka chhuk thla a. David-a te an lo rak leh chel chul tawh. U Mafaka te hi chu kar khat vel an la cham ang.



Tukthuan ei laiin ka nu chuan "Dar 11 velah chhuak ula, khawthim thet thetah khawchhung in lut ang a, a nuam zawk ang. Dar 10 vela in chhuah chuan office kal tur ho chhuak the nen in innang ching ang a, traffic jam in a tikhawtlai ang che u" a ti zung zung a. Keipawh chu chu ka ngaihdan ania, phur viau mah ila hmanhmawh vak theih pawh a nilo.



Room-a insiam tura ka luh leh hnu chuan phone ka en vat a, ka message kha a ngai ngaiin a lo la awm a. Ngaih that lohna pawh nei lem lovin ka insiam nghal mai a.



Kan chhuah tak tak hma chuan inleng kan nei veleh zut a. Keini ang tehlul min lo ngaihlu thiam ve thin a, a lawmawm tak tak ani.



Arini pawh a nu leh pa te'n kan in thleng an rawn thlah thlap a. A inthlahrun hmel ang reng sia ka khawngaih ve deuh hlek a, tawngkam hnih khat chuan ka be ve luam a.



Dar 11 velah chuan kan chhuak ta a, kan chhuah hma khan Zuali chu vawithum vel biak ka tum tawh a. Switch off a inti zel a, ngaihthat lohna em em ka nei hran lo. Buaina tawk nise ka number a hre tawh a, a buai ve rih hrim hrim ah ka lo ngai mai a.




Kan zinkawng a thui dawn ang reng sia, kan inbe lum lam vak lo nen hla ka play ta a.



Lunglei kan thlen chuan a ril tam leh tam loh ka zawt mawi hnai ve a, a tam loh thuin min lo chhang mai a. Mahse a inthlahrung deuh niin ka hria a, restaurant pakhatah chuan ka luhpui ta a. Riltam lo inti si kha ka thil chah sak ho a ei zo leh vek ang lawi a.




Motor-a kan let leh hnu chuan "I rualin ka lo phei ta tho sia i lungawilo viau em?" a rawn ti hliai a, ka va melh vut a. "Lungawi lo lo e" ka lo ti mai a.



"I bialnu laka inthlahrun a na duh hle mai" a han ti ve ngial a "Min ring tawk alawm" ka lo ti leh mai a. Engmah a sawi zui tawh lem lo.



Khua kan thlen chuan dar 6 a lo ri thuak tawh a. Arini chu a inluahah ka drop nghal a, lawmthu min hrilh ve luam a, lawm ve tak tak hmel a pu.




Keipawh chu phur deuhvin ka inluah lam panin ka inkhalh ta a. Zuali te ina kal tlang nghal mai ka tum deuh rum rum a. Mahse heti chuan ka hmu thei rihlo, inrihfai phawt te ka duh.




In ka thlen veleh ka bungrua vel chu ka la lut nghal zung zung a, remfel ta lem lo chuan ka inbual nghal a, a vawt tha kher mai.



An ina ka phei dawn chuan ka call leh a, mahse switch off a la inti tlat. Ka ngaih a tha thei zan tawhlo.



Hmanhmawh deuhvin an in lamah chuan ka inkhalh phei ta a, sana ka en chuan dar 7 leh a chanve chiah a la ni.



Ka va thlen chuan ka beisei loh deuhin an veranda ah a lo awm a. An in awmna bulah hian in dang a awm ve vak lo ka tih tawh kha. Chuvang chuan a zuk thim deuh bik a, an veranda light on loh phei chuan mi a hmuh theih deuh chang chang.



Pot vel a lo remfel mawlh mawlh lai chuan ka zuk ko ta a. A rawn hawi mai lo.



A hnung lawkah zuk dingin "Ka duat..." ka tih tak supah chuan a rawn hawi vat a. Kan inhmuh loh chhung kha kar khat vel ang chauh mah nise ka hmuh leh takah chuan ka ngaih zia ka hrechhuak leh uar uar mai.



"Tinge i biak tlang theih loh leh pek a" ka lo tih chuan ka beisei loh deuh hian "U Sangzual, tawp tawh ang" a rawn ti dam ta thlap mai.




_________*_________*_________*_________


(Thui tha vawng vawng)


Show post links
Top

[Ngaia]

LOVE COVERS ALL
By CVL Awmpuii


Chapter - 29


Inhmatawnin kan ding dun rân a, a mitmeng fiah zet chuan min melh kalh bawk.



A thusawi chu ka hresual anih ringin "Eng maw i sawi?" ka ti zawi sup a. "Tâwp tawh ang" a rawn ti leh sep. Ka hriat sual a nilo tih ka chiang ta. A mitmeng ah engmah a lang lova, a awmdan chuan min ti hamhaih takzet.



"Engvangin?" ka ti ta khauh a, a ngawih deuh ren rawn hnuah "Kan inkar hi tawp se ka duh" tih chu ka chhanna dawn a ni.



A darah hmerin ka thaw chhuak hawlh a "Chhan tha tawk tak min pe rawh" ka ti a, ka âw chu zawi hle mah se a nghet tha charh charh viau.



"Tawp ka duh a, chu zawng chu a nimai" a rawn ti dam thlap a, chutia a sawi awlsam lutuk te chuan min ti na thlawt a ni.



"Ka duat..." a biangah chuan ka dawm a "Harsatna i neih chuan min hrilh rawh. Buaina i nei em? Engpawh sawi rawh ka ngaithla ang a, chinfel dan kan ngaihtuah dawn nia" dam ruih hian ka ti mawlh mawlh a.



A dar ka chelhna kut chu a rawn dah thla a, a tawlh hnung hret a "Engkim hi tâwp se ka duh, ka hah, ka chau takzet" a rawn ti zawi raih a. A mitmengah chuan amah bansan turin min ngen ni berin ka hria.



"Arini nen kan rawn phei dun vang a ni em?" ka tih chuan anih loh thuin min chhang. Ka nutei ten tawngkam dengkhawng zetin an lo tawngkhum leh anih ringin ka zawt ngial a, a nih loh thu a sawi zel bawk si. Ka rilru chu a buai takzet tawh ani.



A hmai chu ka kutin ka va khuap leh rûn a, "I tân theihtawp chhuahin ka bei tih i hria em, ka bei mek anih hi" zawldawh tak chuan ka ti leh a. "Duhtawk tawh ang" tih zawng a rawn sawi.



Ka ngaihdan a nilo lek lek ta a "Kan duhtawk chhan tur chhuanlam tha tawk tak sawi rawh" ka ti nghut a. A rawn thaw chhuak halh a, a thusawi tur chu ka lo ngaichang ran a "Ka hah a ni tawp mai" a rawn ti ringawt. Hriatthiam ka duh a, mahse tawp san chu ka duhlo. Ka duhlo hul hual.



"U Sangzual..." a rawn tih leh halh rual chuan a hmui ka khar chilh nghal hmiah. A ding khawng nghal lah a, min hnial lova min chhang let chuang lo. Chu chu remchangah lain thuk zetin ka fawp ngawng ngawng a, a dawh mawl tawp, a chesawn eih lo.



Ka hmuh loh chhung zawng khan amah ngai em em in ka hmuh hun tur ka suangtuah thin a, mahse kan inhmu ta chêng a, ka lo ngaihtuah ve dan leh tuna thil kal dan hi chu a inpersan lutuk tlat.



A hmui nem thep chu ka fawh tirh ang chiah khan fawh a la nuam reng. Ka thlahlel em asin.




Rei ngial ka fawh hnu chuan ka inlahrang hlek a. A hmel ka en chuan a mitchhingin a mittui a rawn luang chhuak ngiai ngiai a. "Ka duat..." a biang la khuap reng chung chuan ka ti zawi sup a. A mit a la chhing tlat, "Ka duat...kan tawp theilo ania" ka ti dam thlup a, a mittui rawn luangchhuak ngiai ngiai chu dim zetin ka lo tuai fai sak a.




Hetia a awm thut hian chhan tha tawk tak a neih ka ring tlat ani. Nimin thlengin tha takin kan la inbia a, kan inkarah harsatna engmah a awm lo. Mahse tukin atang chiah khan a danglam ta anih kha.



"Kan tawp theilo, i tan engkim ka ti zel ang ka tih thin kha. I harsatna zawng zawng min hrilh vek rawh" ka ti leh mawlh mawlh a. A rawn mengchhuak a, ka kut chu rawn chelh hnanin a thusawi ngai "Tawp ang" tih zawng a rawn sawi leh.



A biang ka khuapna atang chuan a inlahrang nghal a, va ban leh mai ka tum rual chuan a tawlhhnung leh hrat a "Ka duhthlanna min zah sak thin kha. Tunah pawh min zah sak leh la ka duh. Ka hah a, ka chau takzet. Chuvang chuan tawp ka duh" a rawn ti dam thlap a.



"Ka nawr tut tut viau che em ni?" ka ti ta thlawt a. Engtin mah min chhang lovin a nghawnga thi chu a rawn la thla a, ka kut chu rawn lain a rawn hmehbel a "Tawp ka duh chu zawng chu" a mit chu a sen deuh râm a. A awmdan hian ka thawk a ti ipik hluah hluah.



Ngawi rengin ka thi pêk tawh sa min pek let leh chu ka hûm rûn a. Ka bulah hahdam se ka duh a, mahse a hahdam lo anih si chuan ka thlah mai tur a ni dawn lawm ni. Chu zawng thil harsa tak a ni ang.




Kan ngawih dun rauh rauh hnu chuan "I duhthlanna ah i chiang maw?" ka ti dam thlup a, "Aw" tih zawngin min chhang.



"I tan theihtawp chhuah zel ka la duh a, keimahah hahdamna hmu la ka duh thin. Pathian hnenah pawh kan pahnih tan ka dil awl lova, min chhan ka la ring fan. Tun atan chuan i duhthlanna chu ka zah sak ang che. Mahse kan tawp dawn lo, reilote chhung kan chawl ang" ka ti ta duah a.



Mitmeng buai deuh nak hian min rawn melh a "Tawp ka duh" a rawn ti deuh tawl a. Mahse "Kan chawl rih ni zawk rawh se" ka lo ti tlat thung.



A thi, ka kuta a rawn hmehbel tawh chu a kut lain ka pe leh ta thung a, ka chezia chu hamhaih deuhvin min lo en reng ringawt.



"Ka thilpek che engmah min pe let ngai suh ang che. Reilote chhung atan chauha tawp tur kan ni tih hria la, i inpeih hunah a hma aia tha zawkin bul kan tan tha leh ang" tiin min chhan letna pawh ngaihtuah zui tawh lo chuan ka kalsawn nghal vut a.



An in step ah chuan ka pen chho nghal pawk pawk a. Kei chuan reilote chhung chawlh pawh hi ka duh hauh lo. Ka ngaiin ka thlahlel em em a, mahse amah ber a hah a, a chau anih si chuan zah sak ve hram hram ka duh.



Ka in lam pawh pan ta lo chuan Biakin lam ka pan tlang nghal a. Tunah chuan Pathian biak ka mamawh ber niin ka hria.



Biakin chhung reh dukah chuan keimahin ka thu ngawi reng a. Ka rilruah zawhna tam tak a awm a, chhanna pakhat mah ka neilo thung.



Pathian ka au awl lo, mahse kan inzui tantirh atanga tun thlengin chhanna ngai tho ka la dawng fo hi hahthlak ka ti. Pathian chu dem ngam lova, mahse ka chhungril tak chuan dem loh harsa ka ti.



Amah hmuh chak em em kha kan inhmu thei ta cheng a ka beisei loh lam daihin thil a rawn thleng a. Pawm thiam chu a harsa alawm mahse tun atan chuan ka pawm thiam rih mai a tul bawk si.



Min rawn sawi deuh dat dat tu an awm avang chuan ka harh deuh hlawl a, chetsawn ka tum rualin ka ban rawn mu deuh chum chum chu ka hre chawpchilh nghal a.



Peih mang lo zeta ka hawichhuah chuan Biakin chhungah ka lo la awm reng chu niin, khua a lo eng deuh riai tawh bawk !



"Sangzual" pastor in a rawn ti hluai a, min lo sawi harh tu kha amah anih dawn hi. Biakinah chuan thutthleng hma bawhin ka lo muhil reng hi a lo nia, engtin nge maw ka harh miah loh zawk le?



"Dar engzat nge a" ka ti sup a, sana ka bun ve reng tih hrechhuak in ka en nghal vut a, mahse pastor chuan "Dar 5 a pel hret" a lo ti vat a.



Ka bulah chuan a rawn thu thla nghal a "Dar 4 vel ah ka harh a, muthilh leh mai ka tum a, ka muhil thei tawh bawk si lo. Meng reng chunga mut reng kha ka ning sia, Biakina kal hi ka rilruk a, ka beisei loh deuhvin i lo awm hlawl a" a rawn ti zung zung a.




"Nizanah ka kal a, ka lo muhil daih alawm mawle" ka lo ti ve sup a. Ngawi reng hian min en deuh ren rawn a "Harsatna i nei em?" a rawn ti khauh a. A thil hriatna chak lutuk hi Pathian hnena a thil dawn zinga special ber te zing ami pakhat a ni ngei ang.




Ka hmai chu ka tuai deuh puat a, "Ka rilru a buai khawp mai" ka ti deuh tawl a. Chutah Pastor chuan " Ringtute hian piangthar kan nih tawh hnuah pawh nguina tw, chak tâwk lohna te, khawrona leh mal ngawih ngawiha inhriatna hi kan nei ve fo mai a. A chang chuan beidawn avanga thil țha lo pui pui suangtuah kual a awl a. Khawvelah hian beisei tur dang awm lo emaw tih tur khawp hiala beidawnna hian min chîm țhin. Hetiang hunah tak hian Pathian hi kan hnenah a awm reng tih hriat a pawimawh ania. Chuti lova a hel zawnga kan kar chuan thil a kal fu hlei thei thin lo. Hei nang chuan Biakin lam i la pan fan a, tun hun hian nakin atana hun duhawm zawk a la rawn herchhuah pui ngei ang" a rawn ti ta duah a.




Hman atang tawhin Pathian zarah mite fuih kaltu leh kawng dik kawhhmuh tu zawk ka ni reng thin a. Tun atan fuih kaltu ka mamawh ve takzet tih ka hrechhuak awn awn mai.



Fuihtu a nih reng theih bik loh a, fuih ngai kan nih hun pawh a lo thleng ve thei takzet anih hi !



Pastor chuan thu tha tinrengin min fuih a, ka buaina tak ka hrilh hauh lo, mahse ka mamawh ang zawng vekin thu tha min hrilh thung. Ka hriat chian leh ta em em chu Kohhran rawngbawltu tak takte hi chu Pathian hriak thih dik tak an lo ni ngei tih hi a ni.




Zing tawngtai inkhawm tur chu Biakin kawt vela an rawn kalkhawm takah chuan pawn lamah kan va chhuak veleh rih a. Kan va inzui chhuak hlawl chu mak an ti ve deuh tih an hmelah a lang a, Pastor chuan "Thil pawimawh kan ti lawk a" a lo ti mai a, ngaihthat loh hmel pawh an pu zui chuanglo.



Inkhawmah chuan ka tel veleh law law a, nizan lama ka mut danin a zir lo bawk nen ka taksa leh mit velte chu a kham deuh thum mai.



Ka haw veleh eirawng pawh bawl ta lem lo chuan khumah ka bet nghal chawt a. Engmah ngaihtuah buai rih lova mut hahdam ka duh ber.



Ka phone ri ral ral ah chuan chiang mang hlei lo hian ka harh a, lukham bula ka phone dah chu ka ban nghal zat a, Nutei a lo ni.



Ka pick up rual rual chuan "I la mu em ni? I inkawtah ka awm ania kawng min lo hawn teh" a rawn ti nghal zung zung a.



Ka tho chhuak nghal ve mai bawk a, dar 8 leh a chanve a lo ri dawn tawh anih hi.



Kawngka ka va hawn rual chuan "I va tho har ve, ka û in ka thil tur a rawn thawn che em?" a lo ti hluai a.



Inchhung lamah chuan kan inzui lut nghal a. Dawhkana ka bag dah chu ka hai ruk ruk a, lehkha a infun ka nuin 'I nutei ta tur' ti a min thawn chu ka la chhuak a. Eng nge anih phei chu ka hre chuanglo.



Nutei chu ka pe ta a, a lo ban vat a "Thlai chi ania" a lo ti mai a. Chutah chîk zeta min rawn melh pah hian "I va mut that loh hmel ve" a rawn ti hluai a, ngaihsam deuh hian "Mu tha e" ka lo ti mai a.



"Anih chu i mit a sen deuh rum ania in enkawl tha rawh" chu a ti ve bawk a. Ka in atanga a chhuah dawn chuan ka ngaihtuahna a vir deuh zawk a, ka han au ding leh rih a, kawngka bul a thleng tawh chu a rawn hawi let vat a.



"Zuali bulah thil sawi i nei em?" ka tih chuan a ngaihna hriat loh hmel fe hian min rawn melh a "Eng thil maw?" a rawn ti let daih a.




Chik zetin ka melh a, a mitmengah danglamna engmah ka hmu lo "Engmah" ka lo ti leh mai a. Chutah nutei chuan "I bulah min hek ami a?" lawm vak lo hian a rawn ti a. "Hek lo" ka lo ti nghut a, a thil ngaihtuah duh dan thin hi a.



"Anih chu, ani vang mai mai khan ka lakah tawngkam mawilo hmang tawh hlek suh ang che. Gracy chungah pawh" a rawn ti hram a. A mak deuh teh hlawk hlawk thin mange. "A bulah tawngkam mawilo hmang tawhlo ula a nimai" ka lo ti ve hluk a. Phun hlak hlak chungin a chhuak ta a.



Tuna a awmdan atang kha chuan Zualin tawp a duh chhan kha anih ka ring lo. A hma zawng pawhin Nutei chuan a tawngkhum fo a, kan inkar tih tawp nan a hmang ngai chuang lo anih kha. Tunah pawh lo tawngkhum ta se tawp duhna rilru put nan chuan a hman ka ring lo. Thil dang a awm ka ring tlat. Nge ni a, tawp a lo duh hrim hrim zawk? Rilru a buai leh ta khawp mai.



Tukthuan chu dar 10 velah ka ei a, ei tih lemah ei pawh ka ei mumal lo, ei loh aiah tak tak ka ei. Nimin khan zanriah ka ei ta miah kha ania, mahse ka ril a tam tlat lo ani.



Nu Rinkimi te dawrah mamawh lamkhawm turin ka kal a. Zuali chungchang sawipui ka duh pah bawk.



Ka va thlen chuan a lo phul deuh hlut a, nimin lamah ka phei tih a lo hre miah lo bawk nen min han hau leh rih a "I lo phei dawn te chuan rawn sawi lawk ta che, chaw i lo ei nghal tur ania" a ti hluk hluk a. Min duhsak vang zawk ani tih ka hria a ka lo nui mai a.



Chair lo inhungah chuan ka thu thla a, ka mamawh tur ang ho chu kei ai ai pawhin a hre tawh zawk. Ka sawi ngai miah lovin min lakkhawm sak nghal zung zung a.



A rawn thutthlak ve hnu chuan khun khan deuhva titi pui ka duh thu ka sawi ta a. Chutah inhawng zet hian "Han sawi la" a lo ti vat a.



"Zuali chungchang" ka lo tih zawi sup chuan sawi zawm rawh ti ang hrimin a mit a rawn kan ak a.



"Nizanah kan inthen" ka tih takah chuan a rawn meng phawk khawp mai. "Eng vangin?" mak ti zet hian a rawn ti hluai a. Nichina thawven hmel deuh kha chu a ang tawh mawlh lo.



"Aman tawp a duh a, mahse kan chawl rih ni rawh se ka ti ve tlat a" ka ti chhuak hawlh a. "A va mak ve" a rawn ti deuh nak a, ka lo nui lui suk a.



"Tawp a duh chhan tur awm ang ka ngaihtuah ngial pawh hian ka hrethiam theilo. 'Ka hah tawh' a ti ringawt a, mahse chu chu chhan tha tawk takah ka pawm theilo" ka lo ti deuh duah a. Nizan lam hun kha ka ngaihtuah let rauh rauh a, ka thawk a ipik leh vek thei hial mai.



"Tawp mai tur chuan ka ringlo che u asin le" a rawn ti ve hliai a, a hrilhai ve hle ni tur ani.



"Bansan a, tawp hlen ka tum hlei nem. Kan chawl lawk ka tih tawh kha, a inpeih hunah nupuiah ka nei dawn" ka lo ti nghet charh a. Chu chu ka rilru dik tak ani, amah lo chu nupuia neih ka tum lo.



"I bula a awm khan a hlim ve takzet tih ka hria asin. Tunah hian chhan tha tawk tak a nei ngei ang. Zualtei chu ka lo be dawn nia" a rawn ti ve ta vat a. Lo be mawlh teh se, a rilru chu thlak thei hram se ka ti hle bawk.




Nu Rinkimi dawr atanga ka haw hnu chuan Bible leh notebook nen ka inchhawp chhuak leh a. Tunah rih chuan hetiang pawh hi harsa ka ti, mahse kan chak loh lai tak hi Pathian kan mamawh zual hunlai a ni tlat bawk si a ni.



Tlaiah ka nuin min rawn bia a, thil danglam teh vak a awm lo. A thusawi chu ka lo umm e kual vel mai mai tawp. Matei te pre board exam tur leh U Mafaka te chhungkaw chungchang velte a rawn sawi a. Mak tak maiin Arini hming a rawn lam tello tehmial.



Zanriah chu tlemin ka ei hnem veleh deuh a. Nimin leh tukin lamah ka ei mumal lo bawk a tam lem lo mah se taksain a mamawh miau si a, nghei chi a ni tlat lo. Chuloah patling lo taka thil tuar chu ka duhlo. Hmalam hun chu beiseina nena thlir hram hram ka duh a ni.



Zanah chuan Zuali te inkawtah ka va ding reng a, va luh ka duh a, mahse nawr tut tut ka hlau ve tho bawk si. Dik tak chuan ka ngai thlawt ani. Ka thlakhlelh ang hian min thlahlel ve miah lo ni ten ka ngai hial mai.



Dar 9 vel bawrah chuan an kawngka chu a rawn ri ta khep a. Pot pahnih chawiin amah ngei chu a rawn pen chhuak a, an veranda ah chuan a hung tha malh malh a.



A rawn inher leh chiah chu min rawn hmu ta a. A meng buai nak mai. An in step bula ka lo ding run min hmu thut chuan a ti hamhaih ve a nimai thei.



Ngawi rengin min rawn melh vang vang a, thlahlel em em a ka lo melh letna hi hrethiam se ka ti.



"Ka duat..." ka tih zawih tak supah chuan "Eng nge i lo tih?" a rawn ti chhuak deuh hap a. A zawhna chhang lo chuan "Ka duat..." ka ti leh a, hriatthiam har fe hian min rawn melh a "Ka ngai viau che asin" van lam hawi chuan ka ti chhuak hulh a. Amah hmu reng chung sia ka khawih thiang ta miah lo te chuan ka thawk lak a ti ipik tun thei.



"Hetah awm reng suh, va haw rawh" a rawn ti bah deuh nak a "Ka ngai che" tih zawngin ka lo chhang.



Ngaihtuahna buai hmel zet hian a rawn thaw chhuak ve halh a "U Sangzual, a harsa zawngin awm suh..." a ti chhuak deuh halh a, a mitmenga min ngaihtuahna rawn langchhuak chu ka hmuh hmaih lo.



Va pan hnai mai ka tum a, mahse kawngka lam a pan nghal rawk rawk a, ka ding nghal chawt.



"Va haw rawh, ka mu dawn" tih zawng a rawn sawi a, kawngka inkalh ri khepin a zui a. Light a off thim nghal vek bawk.



Ka awmdan hi tlawm thlak ka ti, mahse chân ka duh lo. A rilru a thlak ka la ring fan a, beiseina neih hram hram ka duh bawk.



Biakinah ngawi rengin ka va thu a, Pathian hian kan tawngka chhuak mai bakah kan ngawih tlatna te hi min hriatthiam sak vekin ka ring thin.



'Ka auhna che hi i hria anih chuan chhanna min pe rawh" ka ti tawp a, sawi tur dang reng reng ka hrelo. Heti tak maia Pathian auh hrehawm ka tih lai hi ka la tawng ngailo. Ka mamawh lai ber a ni lawi si a,harsa ka ti asin.




Inrinni tukah Nu Rinkimi a rawn lang hlawl a, eirawng ka lo bawl lai ani bawk.



Ka thiltih lai chu dahin sitting room lamah kan inzui phei a. Beiseina sang tak nen a thusawi tur chu ka lo ngaichang ran a, "Hun thawl chu pe rih la thain ka hria" tih zawng a rawn sawi. Hun thawl chu ka pe rihin ka hre reng bawk si. Ka duhkhawp lem lo khawp mai.



Chutah rawn sawi zawm lehin "Zualteii chu ka bia a, engmah a sawi tha duh lo. I bula a sawi chin tawp a duh tawp thu tho kha min hrilh. Mihring inthunun thei lutuk hi ania a ngaihtuah tur awm ang pawh ka hrethiam lo. Mahse tunah chuan hun thawl a mamawh rih berin ka hria. I dinhmun leh a dinhmun hi ngaihtuah ve la, hah hluah hluah na tham chu a tling ve takzet asin" a ti ta duah a.




Ka hmai ka lo tuai puat a "Ka ngaihtuah lo pawh a ni bik lo, mahse tâwp chu ka duhlo. Hun thawl ka pek tur chu engtia rei nge ni ang?" beidawng zet hian ka ti a. Nu Rinkimi pawh chuan min lainat hmel ve kher mai.




"Ka thu chu nise tunah hian hlim deuhvin in awm dun ang. Mahse ka tih theih piah lam thil ania. Nawr chung chung kha thil tha niin ka hrelo a. Chuvang chuan 'Hun' in mamawh tawn ve ve niin ka hria" a rawn ti ve luam a.




Keichuan ka mamawh pawhin ka hre hran lo, engtik lai pawhin a tan ka inpeih reng zel zawk asin mawle.




Zan inkhawmah chuan a hmel pawh ka hmu ve reng a, ka hmuh sual nge ka hrelo, tlem chuan a cher belh ve deuhvin ka hria.



Kan inkar hla ta duai anga ka ngaihtuah chuan ka kawchhung hi a rum vawng vawng thei hial mai.



Inkhawm ban chuan hmuh zui tur awm miah lovin a awm zui a. Keipawh tawi khawmuang lovin ka haw ta a. Miin min lo biakna te pawh chu ka chhang mumal pawhin ka hrelo.



Zan dar 11 velah chuan khumah ka inlet kual sek a. Ka muhil thei thlawt lo chu Biakin lam pan ka rilruah a lang ta ngut ngut a. Ka tho chhuak ta tawp a, Biakin lam pan tur chuan ka inthuam lum nghal a.



Boruak a vawh deuh ruih vangin car in ka kal a, chhum zing mup mup te chuan ka lungngaihna min rawn tawmpui nimai hian ka hria.



Kawngkawi laiah chuan ka beisei loh lutukin Zuali kal lai ka va hmu a, ka motor headlight in a chhun en avangin amah a ni tih chiang takin ka hmu thei.



Rang lutukin motor chu ka tiding nghal dawt a, ani pawh a hamhaih ve deuh aniang a kal lai chu a ding chawt a.



Car atang chuan ka chhuak nghal vut a. A lam pana ka va phei lai chuan mak ti lutuk hian min lo en a, a ding khawng deuh lah bawk.



Vawitam hetiang hunah hian chhuak tawh lo turin ka ti fo. Tinge a chhuah leh thin ka hrethiam theilo.



"Tun ang hunah chhuak tawh suh ka tih kha" ka va ti deuh khawl a, ka dinchilh nghal ruak bawk.



"Ka thusawi hi awih a harsa viau em ni?" ka ti leh khawl a, zanlai anih vangin au rin chiamna chi a ni tawhlo.



A ngawih reng hnuah chuan "Ka haw dawn" a rawn ti ringawt a. "Chhuak tawhlo turin ka hrilh ngun viau che" ka lo ti leh nghut a.



Ka lak atang chuan a tawlhsawn hrat a, min kalsan a tum chu ka lo dinkhalh leh rih "Biakinah kal dun leh ang" ka tih chuan "Va kal rawh" min ti ringawt a. Inlakhran chu a la tum ngat ngat khawp mai.



"Min ngai ve lo em ni?" ngenngawl zet hian ka ti leh a. Kan indin hlat deuh tawh a, a hmeltha zet chu chiang takin ka hmu thei.



"Hmalam pan rawh, keini chu tihian tawp ang" a rawn ti dam thlap a. Ka lo rum nghut "Kan tawp dawn lo" ka lo ti hluk.



"U Sangzual, kan tawp hi a tha zawk alawm. Mipa innghahna tlak tak i ni a, kei aia tha i la tawng em em ang. Ka tan i beihna te hi duhtawk la, engkim tawpsan ang" a rawn ti leh a. Chutia min tawpsan a ngai awlsam lutuk chuan ka thin a tirim takzet. Ka rum chhuak nghal hawk a.



"Tawp chu i duhdan a ni meuh maw?" ka tih chuan "Theih ni se ka nuna i rawn lan ve hma hunah khan kir leh ka duh" a rawn ti anih chu !



Ka va pan hnai nghal vut a, a lo tawlh hnung lehnghal rawk rawk a. Ka nuna a lo lan ni khan keichu tihdanglam in ka awm a, hlimna tam tak min pe bawk. Mahse chutiang chuan min lo ngai ve hauh lo anih chu !



A nuna ka lan hma khan a lo hlim zawk anih dawn chu !



Chu chuan phat rual lohvin min tina, ka na takzet.



_________*________*________*________


Show post links
Top

[Ngaia]

LOVE COVERS ALL
By CVL Awmpuii


Chapter - 30



Ngawi rengin a kal liam lai chu ka thlir tlawk tlawk a, ka chesawn thei lo. A nuna ka lan ve hma hunah khan kir leh a duh anih chu !



Kan inhmangaihna kha a chak tawk niin ka ngai a, engmahin a tihchhiat theih loh ka ring thin. Mahse a ni chuan ka ngaih ang khan a lo ngai ve lo anih chu ! A tan theihtawp chhuah ka inhuam laia min hlat zawnga a khawsa tlat chuan min tina a, ka thin a rim bawk.



Motor-ah chuan lutin ka dawk chhuak nghal zawt a. Biakin lam pawh pan ta lo chuan khaw tawntirh a kan hun hman dunna thin lam chu ka pan a. Ka speed a hniam lem lo bawk.



Ka va thlen chuan ka chhuak nghal vut a. Kham chhawrdawhah chuan dingin ka au chhuak nghal thawt a. Sawi chhuah theih loh khawpin ka thinlung hi a rum vawng vawng.



Pathiana kan innghahna kha a tawk lo em ni?



"Nangmahah kan innghat reng thin asin ! I tana ka inpekna kha a tawk zo lo em ni? Ka tawngtaina kha i lo ngaithla ve thin em? Tinge chhanna ka dawn theih loh" thinlung rum vawng vawngin Pathian chu ka au a. Mahse a reh duk mai si...



A kawng zawh leh ka kawng zawh chu a inang hauh lo. Kan dinhmun pawh a inang lo. Mahse kan pahniha kawng inang kan zawh chuan Pathianin min pui ang a, zinkawng ngaihnawm tak kan hnutchhiah theih ka ring thin.




"Hei, ka beidawn tawp dawnah pawh auh tur dang ka hre chuang lo. Min chhang ngailo tih hre reng chungin ka la pan fan che ania" atthlak ti zet hian ka nui a, ka nuih zat vang a ni hauh silo.



Ka motor ke chu ka chhuih pawp a, ka au chhuak leh tuarh a. Ka thinlung tawt lutuk in mung chho vel hi a zia awm mahna !



"Dem che ka duh lo, mahse dem loh che harsa ka ti. I rawngbawl tura min kohna ka chhang che a, ka tan thil awlsam a ni bik lo. Mahse chuti chung chuan engkim chan huamin i lakah ka intulut a. I kohna ka chhang che, mahse enteh ka kohna che min chhan let ve dan hi" van lam hawi chuan ka phun chhuak a.



Ka hun kal tawh ka ngaihtuah let a. Mihring fel famkim ka nilo, mahse Pathian laka hel zawng lutukin ka khawsak lai awm reng reng ka hrelo. Ka theihtawpin a rawng ka bawl ve niin ka hre thin.



Ka tleirawl chhuah hlim hlawt atangin thil thalo lakah ka fimkhur em em reng zel a. Ka thian kawm thinte khan sual rawng bawl ve zeuh thin mah se Pathian vangin ka hnial tang tang thin.




Ka lo puitling chho a, a tan ka inserh hrang a. Ka ngaihzawng hmasa ber pawh kalsanin a thu zir turin ka inpe a. Khangte kha a hun lai chuan thil awlsam a ni bik lo. Ka paltlang zo a, tunah hmeichhe danglam tak min tawn tir a, a rilru lak sakin ka awm leh a. Ka hmangaih a, ka duh ang pawhin ka la duat hman lo asin.




"Ngawi reng lo khan ka demna vang tal che pawh hian min rawn chhang ta che" tiin Pathian chu a au leh a. Ka duh ang tak chhanna min pe lo mah se thawm rawn nei tal turin ka duh. Mahse a reh duk mai si !




Kan chak loh lai tak hi Pathian kan mamawh hunlai tak a ni tih ka hria. Mahse chu kan chak loh hunlai bera a ngawih tlat si chuan bei a dawng duh em asin.




"Nangmah lo chu innghahna tur dang ka neilo. I kutah ka innghat leh mawlh ang, mahse ngawi rei suh aw" tiin ka ngen leh mawlh mawlh a.



Dilna hlawhtlin tirtu a ni tak tak anih chuan min chhang mawlh teh se !



Zingah chuan mit kham thumin ka harh hlawl a, sana ka en chuan dar 8 a lo ri tep tawh. Lukhamah chuan ka lu nghatin ka maimitchhing leh vang vang phawt a. Tlem chuan ka harh chiang ta deuh e.



Washroom lam panin ka inphih fai thuak thuak a. Vawiin lamah Kumin atana a hmasa ber atan Kohhran Committee kan thukhawm dawn a. Nizan lamah ka mu tha lo bawk nen ka duh aia rei ka lo mu a, eirawng inbawl chawp te ka la ngaih hmel si a, ka hmanhmawh viau.




Chaw ka chhuan dawn lai tak chuan chawei dawhkana ka phone dah chu a rawn ri ral ral a. Hmanhmawh deuhvin cooker chu ka chhuang nghal zung zung a.



Ka phone chu ka va ban nghal zat a, Valpuia a lo ni.



Naktip lamah Remsanga nen helai hmun rawn kal an tum thu min rawn hrilh a, a rawn phur surh surh viau. "Eng nge in rawn tih dawn a?" ka lo tih chuan "Lungleiah khan kan dawr bungrua vel a lo thleng a. Rokhawlhna vangin an rawn deliver thei dawn lova, keiman ka rawn lam dawn. Remsanga pawh ka sawm a, a lo remchang ve bawk a. Kan rawn tlawh pah dawn che" a rawn ti nghal zung zung a.




Chutia thianten ka awmna hmun min rawn hmuhpui thei tur chu ka lo lawm ve viau mai. An rawn kal hun turte chu ka zawt chiang nghal zung zung a. Helai hmunah zanriah ei a, zan lama haw an duh thu a rawn sawi a. Ka lo pawm pui khawp mai.



Tukthuan ka ei zawh chuan tawi khawmuang tawh lovin Biakin lam ka pan nghal a, committee tan a hun tep tawh.




Ka va thlen chuan an lo kim thap tawh a, ka tlai em bik love.



KTP in fehchhuah programme dilna an rawn thehlut a. Khaw thenawm lawka thalai member puite tlawh rawtna a ni a. Kan han ngaihtuah ho chuan tha kan ti tlang viau in a hriat e. Kar thar hun remchangah bawhzui turin thu kan titlu ta a.




Krismas leh Kum thar puala sum kan sen ral zat te ngaihtuah ho a ni a. Kumin atana committee hmasa ber a lo ni bawk nen hun kan hmang rei phian mai.



Dar 3 velah committee kan zo a, ka haw lamah Nu Rinkimi te dawrah ka pengkawi a. Pangngai takin min lo bia a, min vengthawng takin a tawng ka ti mai. Zuali chungchang pawh kan sawi lo, a thlai thar chungchang vel a sawi a, ka lo zawm ve zeuh zeuh bawk.




A hnu rei vak lovah Zuali a rawn kal a, ka lo awm ve reng tih min rawn hmuh chuan a meng buai deuh nak a, mahse a insiam tha leh vat. Nu Rinkimi bulah chuan artui a lei duh thu a sawi a. Nu Rinkimi chuan min thup mawi thiam dun ngang mai. Zuali pawh pangngai deuhvin a lo bia a, kan inkarah eng thil mah a thleng lo ang vel ani.




Nu Rinkimin a artui lei tur a thlansak lai chuan chik deuhvin ka lo en ngar ngar a, a nghawngah thi hmuh tur a awm tawh lo. Chu ringawt pawh chuan a laka beiseina nei tawhlo turin min hriattir nawn awn awn maiin ka hria. Nizan lam a mu tha vak bik lo aniang a mit chu a bui deuh lak a, tap hrep hmel te pawh a puin ka hria.




"School i kal dawn nange?" ka lo ti zawi sup a, ka lam a lo hawi vat a "Naktuk atangin kan tan ang" a lo ti tha ve mai a. A âw ah thil danglam a awm lo.



Nu Rinkimin a artui lei tur a rawn pek takah chuan hmanhmawh deuhvin an in lam a pan nghal dawr dawr a, ka lo enzui vawng vawng reng ringawt.




Ka hriat chian tak em em a chu hmeichhe awm nem kan tihte hian mipa thinlung sak lutuk hi an ti zawp ral vek thei tih hi ani !




Nu Rinkimi chuan "Tunlai a nu hi a pangngai riau a, a lawmawm tak tak" a rawn ti chhuak hliai a. An in step-a a kal liam hnu chuan ka hawisawn ve ta chiah.



"A va lawmawm ve" tih zawng ka sawi, sawi zui vak ngaihna hre hek lo i.




"Engkim hi in tana tha tur vek a ni ang" a rawn ti leh halh a, za lo deuhvin ka lo then suk a "Min ngaih ve i ring em?" ka ti zawi sup a, ka zawhna atthlak lutuk avang chuan ka nui chhuak hawk. Min ngai ve ni sela min hnar reng dawn em ni?




Nu Rinkimi chuan "A ngai lo bik lovang che. A ngai ngawih ngawih zawk hial ang che chu. A duhthlanna vang hian mak tak maiin ka dem thei thlawt lo. Nang ka ngaihtuah loh vang che a ni miah lo ania. Ka fate ve ve ang in ni a, in tan chuan engpawh ka huam. In tana tha lo tur hi engmah ka duhlo bawk. Tun hun pawh hi in tana tha turah ngai rih la, pawm thiam zir rawh" a rawn ti ta duah a.




Nu Rinkimi hi kan tana nu nih tling tak chu a ni chiang a ni. A thusawi hi hnial buai theihna tur pakhat mah a awm ngailo. Nu pakhat chu a ni ve chiang khawp mai.




Valpuia te lo kal tur ni chuan in ka tifel a. Ka thawmhnaw suk tur ho ka lakchhuah lai chuan amah bawk a ni ka hriatchhuah leh ni! Kan inngaihzawn atang khan ka thuamhnaw hi keiman ka su mang ngai tawhlo. Ka len pahin ka keng a, a lo su mai thin anih kha. Ka suk peih loh vang pawh ni lovin aman min suk sak khan nuam tihna riau ka nei ve thin a. Mahse tunah chuan khang thil kha a danglam hret hret tawh.



Ngaihtuah buai duh lovin ka lu ka thing nghutin suk tur ho chu ka lakhawm nghal zung zung, a tam lem lova, chuloah a bal vak lo bawk nen suk harsa a ni lovang.




Chhuat te nawta ka insuk zawh fel meuh chuan chawhma hun a lo kal duai hman.



Ka ril a tam lem loh avangin chhun thil ei tur pawh ka siam ta lo law law a. Bible leh notebook ka inchhawp rup a, Bible chu rilrua lut zan lovin ka chhiar ve thei mai a, sermon ziah erawh ka hul hlauh thung. Eng thil mah ka rilruah a lut theilo.




Kohhran mite chauh changa an chakna ni turte, an mangan laia hnemtu ni turte, fuih kaltu an mamawh laia fuih kal tu ni turte, hetiang atana Pathian bel ruat kan ni. Mahse tunah tak chuan chutiang ti tur chuan chakna reng ka neilo. Chakna ka lakna tur Pathian ber a reh vawng vawng miau si a. Ka dik loh te pawh ani mahna. Mihring pangngai ve mai ka nih zia ka inhrechiang tulh tulh mai dawn anih hi.




Tlai dar 2 velah Valpuia chuan min rawn call leh a. Lunglei atanga an rawn phei chiah thu min rawn hrilh. Two Wheeler in an lo kal ve ve a, zinkawng a thui ve angreng nen an peih ka ti khawp mai. Mahse ride nuam ti tan chuan thil hrehawm zawk zawk a ni dawn lova nuam an ti zawk pawh a ni mahna.




Room-a Bible ka va dahfel hnu reiloteah an rawn thleng a. An rawn luh rual rual chuan Valpuia'n "Kawngah kan rawn hmu ania aw" a rawn ti deuh tawl a, Remsanga a lo nui ruh ruh.



A ngaihna hrelo zet hian "Tu maw?" ka lo ti sup a. Chutah Remsanga chuan "Ele i bialnu" a rawn ti sam et a. Zuali an sawina ani tih ka hre chhawm nghal mai, khawiah nge maw an lo hmuh ni.



Valpuia chuan "A takah a hmeltha zawk anih kha" a rawn ti a, ka lo rum nghut. Chutah Remsanga chuan nui ruh ruh chung hian "I in awmna kan rawn zawt vel" a rawn ti a, an pahnih chuan ka lo melh run run a. Kan inkar thu hmanni deuh lawkah an hria a, tunah hetiang dinhmunah hian kan ding lehnghal chu ania, han hrilh hriat mai dan tur pawh ka hrelo.




Fridge chu hawngin tui an in nghal khawlh khawlh a. Ka ep chiaha an rawn thutthlak rual chuan "Kan inthen tawh" ka lo ti tawi tup a. Mak an ti ve hle tih an hmelah a rawn lang chawpchilh nghal a. Remsanga chuan "Engvangin?" a lo ti khauh. Za lo zetin ka lo then suk a, an la dilchhut hmel viau tho mai.



Ka rilrua awm te leh ka buaina te sawi chhuak zawk zawk mi ka ni lo bawk nen chanchin mumal chu engmah ka hrilh lova. Ka tih dan than a ni tho bawk a an ni pawhin min hrethiam ve nghal mai.



Valpuia chuan a ngaihzawng te chanchin a sawi lung lung a. Mi pahnih pathum hi vawikhat ah a kawp deuh tun thin a, a che buai thei viau. A nula rimna a a chetchhiatna velte a sawi a, ka nui ka nui ve mai.



Eirawng kan bawl tak tak hma chuan Valpuian "Arini pawh a awm ve tak kha, sawm ve ila" a rawn ti hluai a, ka lo khap vat "A buaithlak mai mai, in duh leh a hranpain in va tlawh ve mai dawn nia" ka ti a. Valpuia chu a phun hluk hluk a, "Thian vek tho alawm kan nih le aw, a ho mai mai mange" a ti hluk hluk a. Remsanga chuan ka rilru tur a hrethiam leh viau mai.




Zan lama haw tur an la nih avangin chaw chu kan ei har lem lova, dar 4 leh a chanve velah kan ei a. Mahni chauh a ei leh thiante nena ei ho chu a danglam deuh e. Tun hnaia chaw ka ei hnem ber tum a la ni hial ang.




Kan eikham hnu chuan a remchan dan ang angin kan tifel a. Valpuia chuan "Kan lo kal remchan lai ani bawk a, kan lo awl ang che" a ti ve ngei a, ka hnial ta bik lo. Remsangan hmun a phiat a, ani'n thleng a sil thung a. Mipa hlang pawhin hmeichhe tih tur awm ang chi a kan ngaih te pawh hi a tul chuan a lo tih ve theih mai zel.




Arini in luaha kal an sawi chuan min sawm ve a, chu erawh ka lo hnial tawh bik lo. Ka motor keng lovin Remsangan a Bike-ah min phur phei a, haw lam chu kein ka haw ve tawh mai aniang chu.



Nutei te inah kan lut kawi zuai a, ka thiante chu ka hmelhriat tir ve zung zung a. An han inbe ve luam a, rei kan awm lo an inhnuaiah chuan kan chhuk thla nghal a.



Kawngka kan kik a, vawihnih kan kik na velah amah Arini ngei mai chuan a rawn hawng a. Keini thianho min hmu thut chu a hamhaih ve viau mai.



"Lalvalpuia te chu" a ti hluai a, Valpuia chuan "Kan lo tlawh ve zuai dawn che" a lo ti vat a. Inchhung lamah chuan kan inzui lut ta a.




Thutna tur min lo kawhhmuh nghal vat a. A luah luh hnu hian vawikhat chauh ka la leng ve a, chu pawh a nu awm lai kha ania. A rei veleh viau tawh, vengkhata awm thin e tilo chuan ka lut ngai mang lo tlat a tin ani.




Arini chuan kan epa rawn thutthlak ve pah chuan "Min ti hamhaih vek alawm le, in lo lang teh nawlh a" a lo ti hliai a. Remsanga chuan "Lungleiah kan kal a, a remchang bawk a kan rawn phei tlang a, Sangzuala inah zanriah pawh kan rawn ei alawm" a lo ti zung zung a.



Chutah Arini chuan "Min rawn hrilh lawk ve lo anih chu mawle, ka inah in lo ei tur ania. Nangni ai ngawt chuan ka chawhmeh siam a tui zawk ang" nui var var chung hian a rawn ti a.



Valpuia chuan uang zet hian "I inah lo kal tlang nghal ila chu Vallungleng thar lam an awm tih pawh kan hre nang" a lo ti huk huk a. A va han tul ber lo em aw...



Arini chuan mak tih hmel deuh hian min rawn melh a, mahse a hawi sawn lehnghal vat. Valpuia thusawi awmzia kha a man thiam ve maiin ka ring.



An titi karah chuan ka lo zawm ve zeuh zeuh a. Arini chuan thingpui lum a tum a, mahse kan lo hnial ta vat. Remsanga chuan thawh uaih pah hian "Kan kal tawh zawk ang, kan haw na tur a la thui si" a lo ti vat a. Kan tho chhuak ve nghal vat hlawm a.



An tlan liam thleng chuan Nutei te inkawt atangin kan lo thlir a.



"Valpuia thusawi kha..." ka sira ding Arini chuan a rawn ti hap a. A lam ka hawi vut a, min en let ve ngar a "A dik alawm" ka lo ti sup.



Sawi zui tur hre vak lo hian "A va zialo ve..." a ti fan raih a, engmah phei chu a sawi zawm lem hlei lova.



Chutah zangkhai zet hian "Ka va haw phei tawh ange" ka lo ti hluai a, "Muttui" te chu ka'n ti mawihnai ve a. "Muttui le" a rawn ti let ve sep a. Hawi let tawh lovin ka in lam chu ka pan ta nghal a.



Ka ngaihtuahna chu hmeichhe pakhat chauhin a luah khat leh rauh rauh tawh. An in panna step zawn ka thlen chuan ka ding chut a. Ka engmah ni tawh lo ang maia palzam mai mai hi harsa ka la ti fan a. Kan that leh hun tur ka ngaihtuah bâng lo bawk.



Chutia an step bula ka din reng lai chuan ama âw ngei mai hian ka hnung lam atangin "U Sangzual" a rawn ti sep a. Ka hawi let vut a, naupang lehkhabu ni awm tak hi a pawm deuh tun a. Principal te inah a kal leh tawh a nimai thei.



"Khawiah nge i kal a?" ka tih chuan "Principal te inah naupang lehkhabu ka lam lawk a" a rawn ti ta reng a. A âw chu a pangngai viau mai.




A kawrfual smart zet te, a sam sei deuh hniang leh a mitmeng fiah zet te hian a ti hmeichhia ngawih ngawih bik thin ka tih tawh kha. Engtik lai pawhin a hmêltha reng bik mai.



Chutia chik zeta ka lo en lai chuan "Kawng min lo kian lawk la" a rawn ti sep a. Ka lo ngaihtuah reng tih ka hriat rual chuan za lo deuh hian ka then suk a. A ngaihna hrelo zetin min rawn melh deuh ak a.




A mize dam raih vang chuan tun hun hi thil sawi fel hun niin ka hre ta a "Inbe lawk ila" ka ti sup a. Inngaihtuah ni awm tak hian min melh deuh vang vang a, ka beisei loh deuhvin 'aw' min pawh ta a.



"Heihi ka zuk dah lawk ang a, khatah khan min lo nghak rawh" a rawn ti zung zung a, ka lo bu nghut a, kawng ka kian a, a pen thla zui nghal a. Inbiak a duh tal pawh chu ka lawmna a tling viau tawh.




Rei vak lovah a rawn let leh a, kan boruak tang tha ru zet chu inhrilh tawn ngai lovin kan hre tawn ve vein ka hria.




Pan lam pawh nei em em lo chuan kawngpuiah kan kal dun a. Kan inkar hla ta dawrh anga ka hriatna te chuan min ti chau nghulh thei.



"Hetianga awm i duh chhan hi chiang takin min hrilh la, ka lo pawm thiam ve theihna tur tal pawhin" ka ti ta a, ka sira a kal ve reng chu ka melh a, a mitmeng chuan hmalam melh mah se ral hla tak thlir ang mai ani.



"Kan inneih theih i ring em ni?" a rawn ti a, a âw atang chuan kan inneih theih a rin loh zia a hriat theih.



"Ring e" ka lo tih chuan za lo deuh hian a rawn nui hak a.



"I chhungte'n min pawm thei ngai lovang. I awm loh chhung zawng zawng khan chung thil chu ka lo ngaihtuah asin" a rawn ti dam thlap a.


"Min ring em?" ka tih chuan "Ka ring lutuk che alawm" a rawn ti a. "Min ring tak tak anih chuan tawpsan lovang" ka ti dam thluam a, ka ngenngawl ang reng viau bawk.



"I chhungte'n min pawm dawn em ni?" a rawn ti leh nghat a. Han chhan mai dan tur ka hrelo, ka chhungte chu an la hel viau. Ka nu chu thuhranah lo dah ta ila ka pa pawhin a tawngkam atang kha chuan a duh chiam biklo tih ka hre ve kar a.




Ka chhan hma chuan "Min pawm dawn lo tih chu kan hre ve ve" inringtawk tak hian a rawn ti a. "Kan pahnihin kan paltlang dun dawn alawm" ka lo ti vat a.



A lu a thing deuh mat mat a "Beiseina neih laklawha beidawnna a lo thlen hian rilru a na duh viau zawk ania" a rawn ti nghat a.




Ka tihngaihna hre tawh silo chuan "Ka rawngbawlna hi ka chawlhsan ang a, tlanbo mai ang hmiang" ka ti ta thlawt a.



A kal lai chu a ding dat a, keipawh ka ding ve nghal chut. Chiang fahrana min rawn melhin "Kha thil kha alawm ka hlauh chu" a rawn ti khauh a.




Chutah rawn sawi zawm lehin "Ka hlauh ber chu kawng laklawhah kan ding dun ang a. Tun ai hian kan lo inhmangaih zual tawh si ang a. An phal lo chung awmdun dan kawng kan zawng ang a, Pathian pawi kan sawi mai ka hlau. Chuvang chuan tuna kan tawp san hi a tha zawk" a rawn ti duah a.



A ngaihtuahna chu ka ngaihtuah phak bak a ni. Mahse kan pahnih tan hian kawng eng tak a awm ka la ring fan a. Chu chu ka duhdan a ni bawk.



"Ka hmangaih zia che hi i hria tiraw" ka tih chuan "Ka hria alawm. Nakinah phei chuan tun ai hian kan la inhmangaih nasa zual zel dawn. I chhungte lak atang pawhin dona kan tawk nasa zual zel dawn. Chu chu i ruala paltlang ka hlau a nilo. Mahse an pawm theih chuan loh tur thil kar vak hian awmzia a awm dawn lo. Kan inhmangaih tantirh lai tak hian kan tawp a tha alawm" a rawn ti leh duah a.



A thusawiah hian vui vaina tur pakhat mah ka hrelo. Thudik tak tak vek a sawi, mahse ka pawm thei thlawt lo ani.



"Kan beih hma hauhin i beidawng a" ka lo ti nghut a. A hmui a pet deuh fan fan a "Chutiang pawh chuan ngai mai rawh. Ka tan pawh hian a harsa ve lutuk, mahse tuna kan tawp hi kan tana tha tur ve ve niin ka hre tlat ani" a rawn ti fan raih a.




Keimah inhuam viau mah ila a inhuam ve tlat si loh chuan engmah awmzia a awm dawn lo. Mi pakhat tan ka bei a, ka beih chhan ber hian a tan ka beih a duh si loh chuan tih theih dang ka nei lo.




An inah ka thlah leh thlap a. Chumi hnuah chuan haw lovin Biakin lam ka pan nghal a. A duhsakna min hlan te kha a rilru leh tihtak zeta min hlan a ni tih ka hria. Engtin nge nupui tha tak nei tura duhsakna min hlan theih. Amah neih tum tlat tu hi midang nei turin duhsakna min hlan anih chu !



Biakinah chuan ngawi rengin ka va thu a, "Min tawp tir dan hi a va hrilhhai thlak ve" harsa ti zet hian ka ti chhuak tuak a.



Hmeichhe dawr awm zet anga tah chhuah ve mai pawh ka châk hial mai. Mahse ka thinlung chhungril zawk hi a tap a, ka natna chu mittuiin hril lovin ka thinlung rum vawng vawng hian a hrilhfiah vekin ka ring.




_________*________*_________*__________


Show post links
Top