Tuia min theh ṭhawt chuan ka harh kawk a, ka awmna eng lutuk vang chuan mit a vai chum chum thei hial a ni. Chet ka tum rualin ka kut chu phuar beh a ni tih ka hre chawpchilh nghal a, chiang zawka ka men theih takah chuan chaira phuar beh ka ni tih ka hre thuai bawk.
Mo kawr pawh a ngai ngaiin ka la ha a, kei hi rukbo ka ni tihna em ni?!!
Ka hmaa ding ka en chuan Rinkimi alo ni a, hlauhthawnna in min luhchilh nghal. Nui hmel rapthlak zet nena min enin min lo pan hnai a, ka ṭim sung sung thei. Emilyi leh Zualtei chunga a thiltih ka ngaihtuah let phei chuan min that ngei dawnin ka hre lehnghal a, a thlamuanthlak loh kher mai.
"Jailah i awm sia?" ka ti zawi sep a, ka aw chu a khur lek lek bawk. Ka hmaah chuan chair pakhat rawn hungin tah chuan a ṭhu a, a bawp khawkherhin a kuahkuah bawk a, chair hnung chu hahdam hmel zetin a ngheng ar ar.
Kawr sen tide ṭha zet mai hain pencil hill sang ṭha tak a bun bawk a, nail polis sen nen. Pawisak neihloh hmel zetin a awm a, min melh reng bawk.
"Nia, Jailah te chuan awm e, mahse kha an tang vengtu hurherh zet khan min beisei a, remchangah lain ka lo chhuah theih phah anih hi, zei ve deuh se chu a nunna kha ka la kher lo maithei a ni." Ngaihsam hmel zet hian a ti zat zat a, "I that a maw?!" Tiin phawk lutukin ka lo zawt thung.
"That e" nui sakin a ti a, rapthlak ti lutukin ka melh reng ringawt. "Tinge hetiang hian min tih? I lakah hian eng fa ko nge ka tihsual? I eng pawi nge ka sawi?" A ti vin ve ta vak a, a ṭhutna aṭangin a ding chhuak riai riai.
"Nang hian i hrelo a maw? Nang hian ka ta tur min laksak vek tih i hria em, kei hi Joseca nei tur zawk ka ni asin, saw chhungkuaa lawi lut tur diktak saw. Kha kawr kha ha tur ka ni bawk asin, min laksak vek" thinrim zetin a ti tuar tuar.
"Engtin nge i ta ni miahlo chu ka laksak theih ang che?" Ka ti hap a, mahse chu chuan a ti thinrim zual sauh tih hriat takin a mitmeng a rum zual sawt.
"Joseca ka neih theih nana ka beih nasat zia hi i hria em, ka duh loh thil tamtak ka tih phah a, ka nih ngai miah loh misual tak ka nih phah asin. Zualtei kha engtin nge a rilru ka hmin i hre duh em? I duh ngeiin ka ring. 'Kan chhungkua chuan mo atan kan awt lutuk che, mahse i unaunu nen an inngaizawng miau a, tih ngaihna a awmlo' chu chu zualtei ka chhimbudawi na ṭawngkam anih chu. A unaunu a hmangaih ve em em pawh khatiang thu lek vang khan a phatsan nghal a, ka tan kawng a awlsam sawt.
Emilyi kha chu hnawksak vakah ka ngai lo, Joseca khan a duh hlawl lo tih ka hriat vangin dahṭhat ka tum lemlo. Mahse kan kawng a tih awlsam dawn vangin ka that a, Zualtei mawh ka phur tir bawk a, ni hnih thum hnuah a chhuah leh nghal tur thu sawiin dawt ka sawi bawk a, a awih leh nghal hmiah. Ka thusawi dawt tih a hriatchhuah khan engkim thudik a sawi dawn thu min rawn hrilh a, a thih phah ta anih kha."
A aw ah chuan inchhirna emaw, nuam tih lohna pakhat mah a lang chhuak lo a, sawi nuam a tih hmel viau zawk a ni. A awmdan chu psychopath chiah chiah.
"Nang hi chu a tawp atan ka khek bik che alawm." Min nuih saka tiin a chhuak a, rawn lut leh vatin chemte leh silai a rawn keng ta mai!!!
"Chemte hmanga thih nge silai hmanga thih i duh?" A thil ken lek kual vel chunga a tih chuan rapthlak ti lutukin ka melh reng.
"E chuan, i pi kha, i dawm hlum ta si lo a, ka lo dawm hlum sak mai che anih kha." A tih chuan, "Ka pi" ka ti sep. "Aw, i pi kha mawle. Ventilator Zualtei'n a phawi laia a taksa zawi riai riai te kha han feel ve la ṭha tur."
"Hmeli" ka ti tuar a, ka pi pawh kha henu ruahmanna vek hi maw ni a, Zualtei'n ka pi chunga khatiang rilru a put chhan pawh kha Rinkimi vang vek hi a ni tih ka chiang. Ka pi thih ni pawh khan ka hmu dun tak anih kha.
"Chemte hi chuan i thi har zawk ang, ana deuh hlek zawk maithei bawk. Silai hi thlang mai ang aw, ka khawngaih ang che." Tih pahin chemte chu chhuatah a paih ri bawl a, silai chu a load mawlh mawlh.
Ka thi ngei dawnin ka hre tawh. Ka rilru ah ka fanu alo lang zawk a, ka tawt nghal ṭun mai. Kum em pawh ala tling lo a, ka tello in engtin nge a awm ang. Joseca'n ka tello in engtin nge a enkawl theih ang. Ka fanu vang pawhin dam ka ngai takzet tih ka inhria a, mahse tun dinhmunah hi chuan enge maw tih theih ka neih chuan le, che theilo in min phuar mek a, beilet tur pawhin tih ngaihna a awmlo.
Silai chu a ri khap a, min nuih sawngin ka lam alo pan.
"Khawi hian nge ni ang, ka Joseca i lo duh ve na thinlungah hian em ni?" Ka thin zawnah silai chu a nghat a, ka pum zawnah sawn thla in, "Nge ni a, a fa i pai saknaah zawk hian?" A nui ar ar a, inhumruh ṭeuhin a awmdan vel chu ka lo thlir.
"Ka Joseca ilo ngaihtuah ṭhinna ilu bur ah zawk hian a ṭha ang" tih pahin ka bekah silai chuan min tin a, ka taksa chu a mur chhuak vek.
Chutia min tin lai chuan kawngkhar a rawk ri bur a, ring taka Joseca'n ka hming a lam ri ka hre zawm zat. Ka lawm lutuk chu ka ṭap chhuak hawk a, ka thla a muang nghal ngawih ngawih.
"Hrep taka!" Tih hlakin Rinkimi chuan chhuata chemte chu a chhar a, ka kut a phuarna hrui chu a zai chat hmawk hmawk. Chutih laiin kawngkhar chu ala ri ve char char bawk a.
Hrui a phelh zawh chuan min pawt tho lawpin ka lu ah silai chuan min tin nghal run a, bang kil lam min pan pui bawk. Kawngkhar chu an tichhe har lo, kawngkhar chhiat ruala Joseca lo lut ka hmuh chuan ka lo nuih lui hram hram.
Joseca hnungah chuan Zothana leh Johna an lo lang ve nghal zat a, an vai chuan coat an la ha ṭhap. Police pawh an lo lang harlo.
"Min rawn pai hnai miah suh u, ka kap hreh dawn hauh lo ania." Rinkimi chuan silaia ka bek nawr na zual sauhin a ti a, mipa ho chu an hmel a rum ul mai.
"Lo kal hnai suh." Tih leh kan lam pana Zothana lo kal chu tin a rual a, a ding dat, mahse alo pen lui leh ta tho.
Chutah ka rin loh lutukin Rinkimi chuan Zothana chu a kap anih chu!! Vawikhat mai pawh ni lo vawihnih lehnghal!!
Rak tuarin Zothana lama phei ka tum a, mahse Rinkimi chuan min pawt bet tlat. Johna chuan Zothana chu a buaipui nghal thuai a, a tih tak tak an ring biklo a ni mahna an che suau maiin ka hria.
Khawi lam aṭangin nge pawh ka hrelo, silai a puak dur a, Rinkimi chu a zawi hnawk. Min vawnna a thlah rualin Zothana lamah ka phei nghal. Engtin nge an awm zui ka ngaihven tawhlo.
"Zo....Zothan. Zothansang! Engtin mah awm suh aw, Zothan khawngaih takin engtin mah awm suh" ka ti mawlh mawlh a, ka insut nghal hlawp hlawp. Zothana lu chu ka malchungah ka nghat a, a hliam vel chu Johna chuan alo hup ve ṭang ṭang. Mahse thisen chu a chhuak reng tho.
Chutih lai chuan police chuan Rinkimi chu an lo hruai ve mek bawk a, a banah an kap a nih hmel. Ṭawngkam chhe pui pui chhak chhuakin a rak tuar tuar a, mahse chu chu ka ngaihven tawhlo.
"Ambulance an lo kal mek" Joseca'n a tih lai te chuan ka buai vek a, Zothana chalah chuan a khat tawkin ka fawp mawlh mawlh. A rawn khuh kharh kharh a, a ka aṭanga thisen lo chhuak ka hmuh phei chuan ka ṭap chhuak hawk. Ka hlauthawng takzet tawh. A kut ka hum chu nghet takin alo hum let a, harsa tih hmel zetin min melh bawk.
"Min hmu tiraw? I ṭha dawn ania, i bulah ka awm reng ania, khawngaih takin tuar hram hram rawh aw, Zothan khawngaih takin" a chal leh ka chal insik tirin ka ngen a ni ber tawh. Min kalsan theilo ang, a tello chuan engtin nge ka awm ang.
"Zosangpuia" harsa tih hmel zetin a ti chhuak hrawih a, nghet leh zualin ka kut a vuan bawk. "Kan intiamna kha ila hria em? Keichuan fapa ka nei dawnlo a, i fapa hmingah i hmang thei tihna anih chu." Harsa tih hmel zetin a nui suk a, a sawi zawh ruala a taksa zawi riai riai chu phallo in ka kuah a, ka ṭap chhuak hawk.
"Zothansang, hey....misualpa, pitar ka nih thlengin min tihbuai dawn kha, tunge min tibuai ta ang, ka phallo, Zothansang." Johna pawh chu harsa tih hmel zetin a thaw chhuak hrawih a, "Ṭhianpa" a ti sehchilh nawk mai. Zothansanga ka chan, kei hian Zothansanga ka chan, Ti nge Zothana kher?!
Ka mo kawr var sarah chuan Zothana thisen a kai nuai a, ka mittui vangin ka make-up zawng zawng pawh a rang nuai tawhin ka ring, mahse chu chu ka ngai pawimawh lo. Darkar thlemte liam ta kha chuan biakin chhungah min kai lutin khawvela mo hmelṭha ber ka nih thu min hrilh anih kha, mahse tunah chuan ka koh pawhin min chhang duh tawhlo.
Ambulance an lo thlen lai chuan Joseca awmah beiin ka insut hlawp hlawp a, nghet taka min kuahin min chul heuh heuh a, ka ṭah nasat lutuk avangin ka zawi vek a, kal pawh ka kal ṭha theilo.
Nutei te hovin an hriat hunah engtin nge an awm ang, an va tuar dawn tak em! Ka thiamloh vek a ni.
Chianglo ruaiin Joseca'n car-a min pawm lai vel chu ka hre ruai ruai a, abak engmah ka hre tawhlo.
"Zothan" ka hmaa min hnungchhawn zawnga ding chu ka kohna avang chuan ka lam alo hawi a, nuisangin min en. Coat suit var, a taksa rem zaih mai a ha a, rose var a keng bawk. Ka lam panin alo kal a, mitkhap leh lovin ka lo en.
"Zothan, haw ang aw, inah haw daih ang" min chhang lovin a rose ken chu min pe a, "kal tawh ang le." ka lak rualin a ti sup a, hahdam hmel taka nuiin ka hmaah chuan a ral riai riai.
"Zothan!" Khumah ka ṭhu chhuak hlawl a, ka mit lo hnawm chap chu ka hru zeuh. Ka awmna ka en kual chuan Zothana roomah ka awm tih ka hre chawpchilh nghal. Ka kawr pawh anlo thlak vek tawh a, ka mumang ka rilruah alo lan rualin ka mittui a hnam nghal ṭiam ṭiam.
"Zosangpuia" tiin ka phun chhuak sep. Kan tleirawl lai khan fapa nei hmasa zawk zawkin Zosangpuia tia a hming phuah kha kan intiam a, a chhan chu kan pahnih hming inpawlh anih vang a ni a, mawi kan ti ve em em anih kha. Kei chuan khang zawng zawng kha ka hrechhuak tawh ngailo, ani erawh chuan alo la hre reng a, fapa ka nei anih chuan Zosangpuia a ni ngei ang.
Joseca'n inhnuaiah min chhuk pui a, Nutei leh u Mami ten minlo hmu chu min ṭah rawih rawih a, Nutei chuan a fapa chu a kuah ngawi ngawih. "Ka duat te, ka enchimloh, tu pawi mah sawi ngailo ka fapa duat hi, tinge hetianga hmuah ngaia inlo siam mai le, ka thinrim emai. Bawihte." Nutei chu a khawng ti tih avangin an mut tir lui tawp a, inhnem thei chuang bik kan awm lo.
Kan beisei lawk loh lutuk thil anih vang a ni mahna a chhungte leh ṭhiante chuan kan tuar thiamlo a, kan rilru ana ngawih ngawih. Tukin zingah kha chuan hlim takin kan la nui ho a, kan hma hun hi kan lo ve hrelo tak em.!
Zothana an phum dawn lai chuan ka na lutuk hi min vilh ngawt ngawt a, ka awm ṭhamin ka ṭap chhuak hawk. Rawl chhuah meuhin ka ṭap a, a kuang chu ka kuah ngawih ngawih. Vawikhat chiah hawn leh ka dil tlat avangin min hawn sak a, ka che vel chu min en ṭhap hlawm a ni ber.
Zothana chal leh ka chal chu ka insik tira a biang tawn tawnah ka dawm bawk. Ka hmu leh tawh ngai dawnlo tih ka hriat avangin thlah mai chu harsa ka ti. Chutianga ka tih lai chu Nutei chu a ṭap chhuak hawk. Ka mittui a sur zung zung a, he hmel hi ka hmu leh tawh ngai dawnlo tih ka hria, mahse, ava na em!
"Ka hmangaih che, Zothan ka hmangaih che. Min kalsan lo tura ka ngen chung che pawhin i kal lui a, i sual hle mai. Zothan, i tello chuan engtin ka awm ang, pen khat pawhin i tello chuan a har lutuk. Lo tho leh mai la, reilo te tal pawh. Ka ngai lutuk che, Zothan...mawh" chulai hmuna awm ve te chu mittui tla lo reng an awm lo.
Kuang chhin leh an tum lai chuan phallo in ka kuah bet tlat a, Joseca'n min pawm beh lai te chuan ka au tuar tuar. "Min thlah rawh, Zothana saw phum an tum ania, Zothan, Zothan. Saw, Zothana sawn a hlau lutuk ania." Ka ti tuar tuar.
"Bawiha, Puipuii pawhin awm ngaihna a hriat loh hi" Nutei chuan mittui luang zawih zawihin a ti a, ka taksa zawi riai riai chu ka hriat hnuhnun ber a ni.
Zothana thih aṭangin thla khat a liam tawh a, kei erawh chuan ngai ka la awh thei meuhlo. A rei telh telh a, ka ngai telh telh ni maiin ka hria. Engkim hi kan sulhnu vek a ni a, ka thil tih apiangah amah hriatchhuah na tur a awm zel bawk.
A hma ang em em ni tawhlo mah ila ka nun a nguaiin engmah tih chakna ka nei lo a, ka fanu pawh ka pawm ngai meuhlo. Joseca chhungten min hrethiam em em a, min ngaihsak em em bawk.
Pawm thiam ka duh a, Zothana thihna avanga ka tawrhna leh ka awmdan te hi reh tawh se ka ti, nunphung pangai zawh a, thil thar tih pawh ka duh lutuk. Mahse Zothana tello a ke pen chu a har takzet.
Kum khat lai a liam a, ka ṭhianpa thihna avang ka lungngai a, ka na hle tih pawh ka hria, mahse hun leh ni a danglam ang hian mihring rilru pawh a danglam ve hret hret a, ka tuarthiam chho ṭan viau. Keimah chauh na ka ni bik lo a, a chhungte pawh an na tih ka hria, an fa duhawm em em an chan a, an na ang tih pawh a rinawm. Mahse anni chuan puitling takin an hmachhawn a, ka awmdan kha mi puitlinglo zia tih ka lo hre ngailo a, tunah chuan ka hre tawh a, ka tih tur chu ka nunphung ngaia letleh a niin ka hria.
Hmalam pan ka tum vang erawh chuan Zothana ka theihnghilh tihna a ni lo a, ka theihnghilh tawh ngaiin ka ring lo. Ka hero a ni a, a ni reng bawk ang. Amah hre reng chunga hringnun hman ka zir dawn mai chauh a ni.
Thlanah chuan ka pangpar ken chu thlanah chuan dahin in lamah ka let a, ka mal lo riaua inhriatna ka nei bawk a, Zothana chuan hmangaih tak leh ngaihtuah takin min thlir reng ni maiin ka hria.
"Mama" min hmuh ruala ka fanu lo tlan terh terh chu alo thlen rualin ka pawm kang nghal nawlh a, ka nghawngah chuan min kuah bet ṭung a, a hah vangin a thaw halh halh bawk.
"Dada, roomah mu" inchung kawk paha a tih chuan inchung lamah ka chhohpui a, tun ang huna a mu chu mak ka ti viau. Rosalyni hian Anu, Apa tih aia Mama, Dada a ti ṭhin a, Joseca'n an len hnuah an koh dik mai zel atih avangin kan sawisel ta lo. Kum khat a ni ve tawh a, a duhawm vanglai tak a ni bawk nen veng chhungah pawh 'nau hmelṭha' tih ngatin an sawi ṭhin.
Rooma kan luh lai chuan khumah ka pasal chu bawkkhup zawngin alo mu a, a thawk sak sak danah a muhil a ni maithei. Ka fanu chu enin ka hmui zawnah ka kut zungchal ka dah a, ka tih ang chiah chuan alo ti ve, ava duhawm chiang tak.
Khumah chuan ka fanu chu ka mut a, keipawh saisir zawngin ka mu thla ve a, ka pasal chu ka melh vang vang. A hnaah a buai em avangin mut mu pawh a tuah ṭha ngailo, zanah rei tak tak thleng file pawimawh a khawih a, zing lama a mu hman chauh zel.
A dark circle a lang kulh a, a khabe hmul leh hmui hmul a ṭi siar siar bawk. Mahse chu chuan a hmelṭhatna a hliah chuanglo, ka mitah chuan a ṭha ber tho tho.
Zothana vanga mumal lo tak taka ka awm chang te, rilru naa a indawmkun reng lai pawh khan min hnem a, ka bulah awmin min fuih bawk a, englai pawhin ka kut a chelh a, a ruala pen min phalsak ṭhin. Ka pasal hi ka pasal a ni lo ang tih ka hlau takzet.
"Lal apa, ka hmangaih che" zawi te in ka ti sup a, "Keipawhin ka hmangaih che." La maimitchhing reng chung chuan a ti sup. Ka tiharh em mawni.
"Ka tiharh che elaw?" Inthlahrung taka ka tih chuan alo nui mai a, a mut tlem ṭhin tehreng nen a mu tui lai ka ti harh chu ka inthiamlo ang reng. "Mu leh rawh, inhnuai lamah kan va chhuk ange" tih paha Bawihtei pawm ka tum chuan min rawn hnaihin ka kawngah a kuah thak a, "Ti hian awm ang." A ti sup.
Kan vai chuan kan mu ta vek a, keiin ka fanu ka kuah a, ka pasalin min kuah bawk. Tunah tak hi chuan Anne Marie-in, "We are all we need" a tih kha ka hrechhuak rauh rauh mai.
*Time skip*
"Anu, Tetea hi hau teh, ka barbie ke a chep bung ania." Rosalyni chuan a ti lang lang a, a sawi zawh rual a Zosangpuia, Tetea tia kan koh ṭhin chhuak nghal daih chu ka hmu reng.
"Ang ang" tih pahin ka fapa te ber, thla riat mi chu chaw ka barh leh a, a ei zawh chuan ka sil fai a, walker ah ka chuan tir nghal.
"Nu, enteh" ka fanu Rosalyni chu a barbie nen lungawi lo tih hriat zetin ka bulah alo kal a, a barbie ka en chuan a ke a lo inchen lo chu niin. "Nizanah pawh ala inchen vek" a ti leh bai bai.
"Zosangpui" ka tih chuan kawngkharah a rawn dak dek dek a, ka hmu tih a hriat rualin a pil leh zuk. "Lo kal teh" ka tih chuan hreh deuhin alo kal hna hna. "Heihi i tih a ni em?" Zaidam taka tiin barbie chu ka lek kang a, lu a bu nghat nghat.
Rosalyni chuan a hau chak tih ka hre reng, mahse mitmeia ka khap vangin engmah a sawilo. "Nga tinge?" Ka tih chuan, "Ka chem hriam leh hriam loh ka test a." A ti sep a, a u chu a thawh hak mai. "Tinge chem te i khawih a, i inti na palh anga sin. Dahṭhat daih chi anih chu." Ka tih chuan hmui a ti pawrh nasa mai.
"Ngati ṭhep ṭhup nge." Joseca hna bangin a rawn tih chuan Rosalyni chu apa bulah a zualko nghal zat zat. "My boy, hmeichhe thil khawih chu a pa lo e." Joseca chuan a ti a, "A thar kan lei mai dawn nia" tiin a fanu samah a chul a, walkera a fapa awm chu a pawm nghal zat.
Kan inneih aṭangin kum sawm lai a ni ve ta reng mai. Rosalyni pawh kum sawm a ni ve tawh a, a chhang chiah Tetea erawh chu kum ruk a ni thung a, a te ber hi sawi tawh ang khan thla riat a ni bawk. A te ber hi mipa tho niin, Melvin Lalhmangaihkima a ni a, ka chhungte lam phuah a ni thung.
Zothana duh ang ngeiin Tetea alo pian hian hming dang pawh ngaihtuah lovin Zosangpuia kan ti nghal a, kan chhungte chuan sawiselna pakhat mah an nei lo. Nikhat lek pawh Zothana ka theihnghilh ngai lo a, ka ngai em em bawk. Mahse chak phah nana hman ka tum tlat a, harsatna ka tawh chang pawhin, "Zothana'n a thlir reng che, chak taka i awm angai." Tiin keimah leh keimah ka in fuih, chu chuan nasa takin min pui bawk.
Tetea hi thla riat a piang anih avangin a tet lai khan a hrisel lo em em a, tun hnuah erawh chuan a zia deuh. Mahse, hritlang a kai hmain a la na em em zel a, ho tea kan ngaih pawh hi khum beta nat pui chang te a nei ṭhin. Natna sawi tur a neih loh avangin in enkawl uluk zawng chu kan tih theih a ni. Midang erawh sawiselna tur an awmlo a, an hrisel ṭha dun viau.
Rosalyni hi class 5 a ni ve tawh a, zirna lamah hian a ti thei phian a, an class ah pawh a thiam thei ber a ni ṭhin. Zosangpuia erawh chu class 1 chauh ala ni a, ti chung hian a zir peihlo em em mai a ni.
Rosalyni hi chuan thu a awihin vawikhat sawi chu a zawm nghal thlap zel a, a nau erawh hi chu a luhlul ngang thung. A tih tawhloh lamah chuan tu mahin kan nawrlui theilo. Unau ṭheuh ṭheuh, enkawl dan innang vek bawk si hi alo inan loh theih khawp mai.
"Anu, tlaiah Patea'n ka lo hruai ang che ati." Rosalyn chuan a sam ka khuih delh delh lai chuan a ti a, ka lam lo hawiin min nuih tlawn ver ver. Patea a tih hi Johna a ni a, Rosalyni hero a ni ber mai. Chuan, Johna hi Lydiai nen an inneih a, an inngaizawng tih kan hriat tirh kha chuan mak ti lo reng kan awmlo. Kum 2 an innei tawh a, an fa pakhatna tur Lydiai'n a pai mek bawk.
Tetea hi chu a pute Ruatkima naute ania, kan thu a awih loh pawhin a putea hi chuan eng tin tin emaw hian a sawi pui kual a, a putea thu chu a awih ziah.
"Homework i tih ṭhat chuan i kal dawn nia." Ka tih chuan "Yess" tih pahin a ban a phar hluai a, nui hakin a sam ka khuih chhunzawm leh nghal.
"Coconut" hnung lam aṭanga min kuahin ka ngawngah a fawp zeuh a, darthlalang aṭangin a awmdan chu nui ruh ruhin ka lo en. Rosalyn leh Tetea te room hranah an mu tawh a, Melvina a mu tawh bawk a, awmze nei deuha min melh chuan ka nuih sak. Ka pasal nuam taka siam chu ka thiam zawng tak alawm.
"Anu lo kal chak la." Tia ka fate tlan chu Joseca chuan fimkhur tura chah chungin a um a, keiin Melvin pawmin muang changin an hnungah ka zui bawk.
Vawiin ah kan chhungkuain kan picnic a, keimahni huan ah a ni a, riahna tur a awm avangin zan khat riaka kal kan tum a, naupangin nuam an ti khawp mai.
Tetea tlan chu a tlu bawk thlawp mai a, Joseca chu tlan thuaiin Tetea chu a kaitho nghal. "Ka ṭap miahlo" a kut thi ser ser en chung chuan Tetea chuan a ti sup a, "I van man ve a, kut thi pawha ṭah loh te chu, i va han fel tak" tiin Joseca hian a fak chhunzawm a, an sirah chuan Rosalyni a ding ve bawk.
An bula kal mai lo chuan ka pasal leh la fate chu ka en vang vang a, ka fapa te ber chu melh leh zeuhin, "HABIB ALBI" ka ti chhuak sep.
Tun huna chen reng hi ka chak takzet. Kan hma hunah harsatna kan tawh leh ka hlau a ni. Mahse, eng ang harsatna pawh tawk ila, ka hmangaih te ka kianga an awm chhung chuan ka tuar thei tih ka chiang. Ka damchhan te anni miau.
A tawp ta...
Ka story a tir atanga a tawp thlenga min chhiar sak tute chungah lawmthu ka sawi mawlh mawlh e.... story ka lo dah leh zel turah ngai ila minlo chhiar sak zel dawn nia
Last chapter nih manah comment loh awihloh....
*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***
Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/