KDB BY Apuii Tlau (Completed)
Posted: May 1st, 2022, 9:44 pm
Chhiar ula, chuan feedback min pek sak leh vek bawk dawn nia....
KDB - CHAPTER :- 1
AGNES LALDUHSAKI (POV)
"Dar engzah velah nge rawn chhuah in tum?" lehlam atanga ka nu in a rawn tih lang lang chuan "Hre lo, Au Mapuia hian chaw ei khamah a tia, dar 10 chho vel bawr ah niang" tiin ka rindan vel chu ka sawi a, ka nu pawn alo pawm hle. Rei zet kan inbiak hnu ah fimkhur tur leh kan chhuah dawna be leh tur a min chah mawlh mawlh hnu in phone kan dah thei ta hram a. Kan sitting room ve deuh zau lo te a kan țhut phah ah chuan ka țhu thla nghal duai a.
"I in pack fel tawh ami?" U Mapuia'n bathroom atanga rawn chhuah paha a tih chuan "Umm" ka lo ti thuai a. "Theihnghilh leh lei hmaih palh vel i nei nge nei lo ngaihtuah la aw, kal leh hun ala hla mai thei sia" ti ve leh sup in room lamah inthlak turin alut phei a. Kei erawh vawiin nileng kan che hah buai bawk nen ka mu hle hle rih.
Ka phone rawn ri chu peih lo zet in ka ban leh a. Ka țhiannu Hmangaihkimi
"Aw"
"Teh tawp a, min va biak peih lo hmel Eki" a rawn ti nghal hlar a. Ka nui sak ringawt. A thinchhe ve mai sia.Ka best ve ber ania, mahse kan inhmu khat khawp mai, kan school luhna a inang lo bawk nen, mahse țhianțha tet te atanga kawm tawh hi zawng thinlungin a pawh a kan inthlah thei tak tak chuang lo.
"Peih teh nang!" nui chunga ka lo tih chuan a chek tlak tlak a. A ner nasa leh dawn tih lah hriat reng. Chumi vang te pawh chu niang ka nui ka nui mai.
"Ngawi mai teh! ka tum ka țhulh san leh zawk dawn che emaw ni" a rawn ti leh kha kha a. Engtak tum ve leh ni maw. A rilru lian chi hi ani ve a, an inchhungah pawh a duh apiang chu ti thei tluk ani, a luhlul em a achang hi chuan. Mahse aman sual phahnan a hmang hran chuang lo erawh a lawmawm lam ani. Sual leh vaih phei se chuan a nasa ngawt ang tih theih ani mai thei. Mahse ka tan erawh ka best ani tho tho.
" Sawi la duatpui" țhu chhuak pah chuan nui chungin ka ti a. Ka tui lumna lam ah chuan phei in alo so chiah bawk nen ka off nghal zat bawk.
"Min tlawn vel suh, mahse ka sawi hram ang, kum 1 chu han inhrawn ve leh ila?" a tir lam pawr viau mahse a tawp lam erawh a nui pah deuh a. Kei erawh a sawi awm zia hre lo zet in ka lo hawi hil leh viau tawh.
"Engti hrawn maw, Eki" ka tih leh chuan a rawn pawr leh viau mai.Thinchhe ve hlir hler sia, kan awmdun chuan kan in hau reng a , kan inhlat hian kan inngeih ve deuh mahse kan inngai ve leh em em thung lawi a. Khua a kan haw chang phei chuan kan inkawp chawt zel. Kei min hmu chuan Hmangaihkimi hmuh inring se an ti sual ngai lo chutiang bawk i ani lamah pawh.
"I thluak lo ve thei sia! Ka rawn let ve lo tawp dawn emaw ni!" a rawn tih kha kha chuan ka ngaihtuah thui ve deuh a, hriat chhuah zawk ka nei.
"I ti tak tak em?!!!" duh aiin ka aw ring. Ka thunun hman lek lo miau a, mahse a thusawi khan min țhawng em ani! A dik anih ngat phei chuan ka mood chhe lutuk pawh a zia deuh ang
"Mi zawt nawn tawh suh! Ka nawrh nasat zia chu, nangmah vang hri hre khan, mahse i tel ve dawn tih ka sawi lo ania...." a rawn ti leh lar lar a. Kei erawh ka khek chul tawh. A sawi ang tak tak in a nawrh nasat viau pawh ka ring. Ka hlim lutuk chu tih tur ber pawh hre lo in ka phusa kual ve ta niin ka hria.
"Ka duatpui, ka duat zia che hi......Thil min rawn hawn lo nà teh! Silver bengbeh ka duh nia" a rawn ti leh nghal zat zat a. Ka hnial lo nasa mai.
"I va han fel tak! Ka bulah awm la chu...." ka tih vang vang lai chuan "Tenawm suh, Lalduhsak!" a rawn ti leh hlar a. Kan inbiakna kan ti tawp hnu te pawh chuan ka nui țha reng tho.
"Enge ni vur vur" Au Mapuia'n room atanga rawn chhuak in a rawn ti ta chiah reng a. Ka hma a thil lo thleng tur ka huphurhna zawng zawng te chu Hmangaihkimi vang chuan a reh fel vek ti tih thei hial.
"Akimtei alo haw ve dawn....ka sawi awmzia chu higher kan kal ho thei dawn tihna" phur zet hian ka lo ti lar lar a. Tum bak bak a ka thil phal lai a awm lo ang tih tur ang vel in ka mood a fuh.
"Ka nu te leh Nutei te chhungkaw tan chuan in ring renga awm leh angai dawn ava ang ve!" a rawn tih chuan ngei zet hian ka lo melh nghek a. Choka a tui rawn fill pah chuan ala nui vur vur zui.
"Christmas hmanga in rawn haw dun ringawt țhin pawh an huphurh ania" a rawn tih leh chuan ka bula thil awm hmasa ber chu chuh vat in ka tin nghal uai a, alo indang ve zat bawk. Ka mood a tih chhiat vek hma hian inbual san daih ang.
Agnes Lalduhsaki ka ni a, a țhenin Dus min tia a țhen in AG min ti bawk, Ka rualpui te aiin ka class ahniam hret a, a chhan pawh ka naupan laia ka hriselna țhat loh vang ani ber. Akimtei erawh 18 tho ni mahse keimah vang bawk in class 2 a beinawn, ka tan hian hlu ve deuh mai ania. Class - V ațangin Holy Faith Lunglei ah kal in, Class - ix ka nih in kei Aizawl lamah ka kal ta thung a, Au Mapuia vang deuh hian. Akimtei erawh tun thlengin ala kal thung. Tunah class - xii kan ni dawn a, kan khaw lamah kan awm tam lo bawk nen ka nu leh pa in tunkum chu saw lama zir ve turin min duh deuh a, a chhan pawh hmun dangah kan awmsan deuh reng a, tunkum bak kan khawlamah zirna hun a awm tawh dawn silo, xii zawh chuan college ani maia hmun dangah awm tho angai dawn a, an bulah tun kum lam chu min thlahlel ve deuh bawk nen ka awm mai a țul kha ania, mahse Akimtei awm tel ve thei tur erawh ka lawm. Țhian kawm ngheh vak ka nei silo, țhian chu ka nei del dul ve tho nang hian kawm deuh bik alo awm zel hi tiang deuh hi ani mai.Ka nu leh pa ten Akimtei nen kan awmdun tur hria se Au Mapuia sawi ang tak tak in an phur ve teh chiam erawh ka ring lo. Kan sual lo a mahse kawng engkim a țha zawng emaw a chhe zawngah pawh kan inthurual theih zel avang hian min veng hneh bik țhin silo a, kan ti buai ve rap rap țhin mahse nasa deuh a ni bik lo.
Ka nu leh pa hi zep loh chuan la valai tak ani ve a, kum 45 - 50 inkar an la ni ve ve. Ka pa hian kan khua ah Hardware dawr lian ve pangngai tak anei a,chumai nilo eng eng emaw inchhungkhur bungrua vel pawh kan kawl nual tho, kan khua mai bakah kan khaw chheh vel ho bungraw rawn lakna ber anih avangin kan phui sui viau bawk.
Ka nu erawh Health worker ani. Unau 3 chiah kan ni a, kei leh Rohluzual(U Mapuia) leh kan upa ber Roluahpuia (Apuia) te kan ni tawp a, Apuia hi class Xii a pass hnu ah zir zawm tawh lo in ka pa dawr lamah hian a pui tawp a, keini a naute erawh kan la zir zawm ta thung. U Mapuia hi graduate niin chumi zawhah eng exam emaw pek tum in coaching a kal tawp a, a hau tak ve phian bawk. Kei pawh class xi ka nih kha DCA certificate ka nei tawh, ka pa in a rem lai atia kan khaw mi te tho Aizawl lama computer zirna hawngte hnenah kan unau in min kal tir tawp kha nia.Mahse alo țha zawk daih.
★
Zing chaw kan ei khamah motor ah kan in thiar lut fel a. Rin aiin bungrua ka ngah zek bawk. Nimin lamah kan khawmi tho ka cousin te rawn zin phei in ka pa motor KUV 100 chu an rawn khalh phei a, sumo a phei ngai lo tur chu a zia viau mai. Au Mapuia hian Scooty secondhand chu anei ve tho nangin long run tur atan chuan kan peih dun chiah bik lo bawk nen kan inluahna te garage ah kan dah ve daih a, amah hi a phei leh vat dawn tho avangin angaihtuah awm loh tur ah kan ngai ve mai.
"Akimtei chu engtik nge rawn chhoh ve atum, Lunglei lamah ala awm ve ani lawm ni?" kan tlan chhuah hnu lawkah Au Mapuia'n a ti a.Nia kan mak ve ma deuh chu school kan chawlh chang pawn kan haw ve zen ngai lo, abik takin kan tum rual te nih loh chuan Christmass bawrah chauh kan haw țhin.
"Vawiinah an zu lam ve dawn tho in ka hria!" ka tih chuan a nui suk suk a. "Ka nu te tan chuan a lungngaihthlak leh dawn ve!" awmze nei zet a min rawn melh zeuh paha atih chuan ngei zet hian ka lo melh let. "Ti ve ziah suh, chutiang kan ni bik lo" ka lo ti hlar a. min sawi dan hi kan sual hmel ka ti, kan sual tawp silo.
"Sual lo e, mahse naughty" a tih leh sup chuan ka lo ter leh at tawh. "I thinchhe ve reuh sia....tun kum christmas te ngaihtuah kir ve ta che, zanlaiah scooty in la chhuak ru a khawpawnah in lo han kal thul, zaikhawm tura chhuak petrol pump ah te inlo zu kal leh daih a, a changlah in ka picnic e intia, khawi khawi ramah emaw inlo vak chhuak ve ringawt zel bawk si, en loh kar hlekin eng emaw ropui deuh inlo ti hman ziah a, thlakhat chhung lek pawh in inhmang thiam thei bik" a rawn tih chuan ka nui tawi tak tawh. A sawi a sawi chhuah a ral ah chuan tlem chuan kan chimawm ve deuh anih hmel.
Sawi pui duh tawh lo in ka ngawi ngal a. Akimtei nen kan in text zauh zauh a, ani pawh an bazar phawt dawn anih hmel. Motot dinna remchangah chuan Au Mapuia chu din tir in bengbeh zawrhna chu kan melh kual ngial a. Kan tlan pelh tawh lam chhak zet kawi ah chuan ka han hmu, ka va chho peih lo tak.
Mahse peih loh pawh sawi thei ka ni bawk silo, ka han kal leh vang vang a, silver bengbeh kual lian lem lo tak chu la in ka tan tlem a cheina awm ve deuh chu ka la tel ve bawk.
Motor ka thlen thlak leh a ka thil lei ka hmuh chuan Au Mapuia chuan ho a tih hmel viau lehnghal. Kan tlan ta vang vang a, chaw ei sa a kal kan ni bawk a kan motor ala fit țha bawk nen chuan pawh a nuam phian. Kan inlama kan khawsak tlem em avang hian kan motor a han chuan ve te hi khat deuh ania.
Thenzawl ah thingpui kan in phei a, khua kan hlat tawh vak lo bawk nen kan tlan leh chu kan hmanhmawh tawh teh chiam lo. Dar 1 a pel awrh chauh ani bawk a. Kan naupan lai thil ho zet zet ka ngaihtuah phei a, mahni chuan ka nui ka nui mai. In marble kan uar ve lai phei kha chuan Akimtei hi a thiam ve thei bawk sia kei erawh tlaw.....Keini aia nau te an khelh pui ngei a, a man apiang a perh chhuah kha keiin ka lo chhar nghauh nghauh a, in rubber miss tih vel erawh kha chu kan peih dun leh miah lo thung. Kan inkhualte lem apiang in keini aia nau ho kan kawm ziah a, a chhan pawh lalnu anih duh vang leh tirh kual vel ah...kei erawh Lal fanu lem ka chang ziah a, kawiàm(Kawlthei) hnah kha pawisa lemah kan han hmang ngei a, kawiàm hnah kan lo nasa thei lutuk kha a kawlh vek lo chauh a, api te kha an thinrim thei ania aw....
School ban apiang in ruah sur tlaiah tui hawk kan dai haw ngei ngei ziah a, ruah sur loh lah in kawngpui ah kan ke in lung kan rap hrual chho a, kawng kha a rang nuai zel mai bakah kan pheikhawk chhuat te kha a va ral duh tak, a chang lah in kaw pangngai a haw duh lo in tlang lam atang ten kan han haw kual vel a, a hlat hlat nen khan kan va han peih tak.
Kar lohah khaw chhung kan lo lut fel der alo nia. Ka sanna ka bih zeuh a. Tlailam dar 3 leh a chanve bawr alo ni der tawh.Kawnah chuan kan dawr kawt ah motor chu a ti ding deuh dat a.Tukverh a ka dah chhuah vat chuan ka pa kan lampana dawr atanga lo chhuak ka va hmu zat bawk. Dawr sir thlanglamah chuan dawr a thawk te ni awm tak in pick up ah tile an lo thiar lut mawlh mawlh bawk.
"In chau em?" motor bula rawn din pah chuan a rawn ti thum dut a. Ka lo nuih var var ringawt.
"Chau em em lo e, in va buai hmel ve?" Au Mapuia chuan alo ti vat a.
"Nia, tlai ah cement alo thleng leh dawn bawk sia, rod lam nen.....Apuia pawh khaw țhenawmah bungraw dahin a kal daih a" a ti dam leh dap a. Pa țawng tam lem lo, dam thlup hi ani rauh a, abul ah hi chuan ka pangchang thei viau bawk.
"I chau awm, kan rual in lo haw ve daih la" ka tih chuan anui hawk hawk a. "I nu in alo nghahhleh em che u kha, han chho tlang nghal mai rawh u....keini chu kan la buai emai" tiin ka sam a rawn tuai zeuh a. Kan inlam panin kan chhoh san lehnghal. Kawn ațangin chhim lam zawh chho in hla vak lo ah,kawng hnuai lamah peng a awm zauh a, chu chu kan inkawng, kan in pawh alo lang nghal ruai mai. A hma kan kalsan hnuah rawng kan hnawih țha an tih kha alo ni tak tak a, Dark brown lampang leh cream white deuh reuh niin ka hria kan tual lam pawh cement in motor kalna lai tur bik an lo zut vek a, adangah lei ala ni ve tawp mai.
Au Mapuia chuan horn an pe thla mawlh mawlh a, chimawm ve siah. Tuala kan din rual chiah in kawngka pui a rawn inhawnga ka nu a rawn chhuak nghal hlawl mai, nui var var in min rawn pan vat a, rang zet in motor atangin kan lo chhuak nghal vat bawk.
"Intluang em? In chau viau lo maw?" tiin min rawn pan thuai a, nui var var in ka lo kuah nghal chial thung. "Chau lem lo, dawrah ka pa kan ranw tlawh chho a an lo la buai viau zui" U a zawk chuan alo ti vat a. Kan bungrua a hnunglam ami chu kan la thla nghal mawlh mawlh bawk.
"Nia, bungrua ho tum aiin an lo thleng hma a, tlailam phei chu kudam lamah nangmah emaw in han kalpui ve peih la, i pa hi a chau ve thei lutuk a Sintext alo thleng dawn ati bawk nen" ka nu chuan lo ti zui mawlh mawlh in inchhunglamah ka thawmhnaw ho chu kan dah lut a, kan in bul vel hi thing kung leh huan thlanglamah a awm dul bawk nen anuam ka ti.
Inchhunglam pawh rawng an lo hnawih thar vek bawk nen alang thar vuk mai.
"Keipawh dawrah ka lo zu pui ve ang" ka tih chuan min nuih tawi tak duh chauh.Țum khat dawr bungrua chhe te in ka lo ti buai palh tawh a, khata țang khan ka nu hian khawih aphal tawh vak lo.
"In inbual duh em? nge thingpui kan in hmasa dawn" A tih leh chuan "Kan inbual tawh, kei chu ka peih tawh lo" ka lo ti vat a.Choka lamah inzui pheiin thingpui a siam rak rak a, stool ah țhu at in ka phone ka phawrh nghal zat a. Akimtei text lo awm ran chu ka hawng nghal zat bawk.Tlawng an lo thlen tawh thu alo sawi a, darkar chanve lai aliam tawh chuti nih chuan an lo thleng har tawh miah lo ang.
Thingpui sà țha ver vawr leh waiwai leh chana,hmarcha purunsen leh eng eng emaw nen a bawl bowl te ah fiante nen min rawn pek tel chuan ka lo țhen țha a, ka sam rawn tuai leh thuak pahin ka nu pawh a nui sak a, U a erawh cake a chhawp thung.
Kan school hlui lam leh ka țhiante chungchang vel ka sawi zui barh barh a, ka nu pawn helama addmision vawiin a last date anih tawh avangin an lo tih fel vek tawh thu alo sawi ve bawk. Akimtei chungchang erawh ka la sawi duh lo, surprise ve ani mai.
Thingpui ina choka kan țhut ho țhap lai chuan *Ka duatpui!!!* a rawn ti ta lang lang mai le! Ka nu in phawk zet in min rawn melh a, kei in tlawn nuih deuh a nui pahin ka tlan chhuak ve nghal.
Kan kawmchhak kawngpui ah chuan an motor alo ding ran a, amah alo chhuak mek bawk. Nutei kan lam site a țhu pawh kawngka ka lang chiah chu alo phawk ve nasa mai.
"Min hawsan ru, tan ka awm rih dawn" an motor bul ka thlen chhauh lai chuan Akimtei chuan alo ti lang lang a. Nutei in hahthlak tih hmel zet in alo melh khai khai bawk. Ka nu te pawh ka bul an raen thleng chho ve vat a.
"Ag(azee), i lo haw ve lawk em ni?" nutei min rawn melh paha dam zet a atih chuan nuih rah rah pahin ka nu ka melh a, a kawng dawm meuh in alo thaw hlial thung.
"Hetah XII zawh tir kan tum a, kan chah haw a vawiinah an rawn thleng ve chiah anih hi" ka nu chuan kan pahnih a min melh dun pah chuan ati hlak hlak a. Nutei chuan rang zet in min rawn melh dun zat a, keini pahnih lah kan lo inkuah leh hlun tawh.
"Kan HMANGAIHKIMI helama rawn kal a ngenna chhan anih dawn chiah chu!! " a rawn ti ve hlak a. Ka nu nen an han sawi dun hrep a, addmission lah an lo la ve ve tawh sia, kan school luhna hlui atang lahin kan lo in drop out ve tawh bawk nen min dan duh si dang thei silo hmel chu an lainat awm țep.
"In fate kan nih hi, sual viau teh suh u....min tluk lo lutuk!" Akimtei'n a tih hlak hnuah kan inlam panin min kuah thla nawk nawk a, ka nu te erawh tih ngaihna hre lo in an nui lui ringawt vel tawh ka ring. Hmeichhia ah chuan a der dep e an tih mai awm em chu ni bik lo mahila ka nalh lem lo, 'A hmelțha mahse a it awm loh!' tia sawi zui ka ni ziah a, kan nui mai mai zel. Nalh loh khawp a cher erawh ka ni bik miah lo, ka induh khawp ve tho. Akimteii erawh a squad peih bawk a, a chaw lak a țha bawk nen a nalh zaih zaih hle thung. A kawlh a, tupawh a kawm thei mahse a mil lo tawh te erawh ti ve bawih bawih ngam khawp a dawihzep lo ani, a rilru sual loh zia erawh a kawm tam apiangin an hria ang.
"Awiii, ka hahdam sawng sawng mai!" kan inchhung a luh rual rual chuan ti chiam in sofa ah a mu thla nghal zawl zawl a.Tet te atanga heta khawsa ve deuh thaw ani bawk a ka unaunu tluk zet ani.
"Chaw ei ve nghal rawh aw, Kim" ka nu chuan a rawn ti lut nghal lang lang a. An bula min ven theih laia awmdun hi chuan an phal lo hran miah lo, min ngaina tawn a nu leh pa pahnih kan nei tih hial khawp vel an ni. Mahse an hlauh ber zawk chu an tello a kan lo hawi pir ve zeuh zeuh hi ani mai. Țum khat sawi leh lawk ila meizial kan lo zu ru ve ngei a, an hre leh sia, beng min han suk tir mai a, Akimteii te inah vawi 50 kan su a, kan inah 50 tho kan sim chiang asin, kan la tet tet nen khan engtia na chang hria nge maw kan lo nih ni.
Zanah chawei kham hnu fe ah ka zu thlah ve leh a, kan in hi inhlat tia sawi tur ni miah lo ani a, kan inthlang kawi hnihna kawng chhak lamah in lianpui nikum hmasa lawkah an sa. An inhmun hlui erawh bangla veng lamah daih ani.
"Engtik nge school țan kha" an sitting room ah thei ei a tv kan en dun ran lai chuan a ti leh a. Ka mal chungah a lu nghat in chhuat ah ka thu a ani erawh amu leh zawl zawl tawh.
"Kar leh Thursday ani in ka hria.." ka lo tih ve niah niah chuan min ngaihsak leh tawh ang pawn a awm lo."Uni form pawh ka la nei lo, naktukah zu inteh ila" ka tih leh chuan tv lam ngawt amelh a, a chalah ka beng thlarh erawh a rawn pawr leh viau mai.Kei lahin ka bia a hriat loh thu ka lo sawi ve ngat bawk. A hnuah kan sawi dun a alo phur ve leh viau lawi sia.
"Hmangaihkim, nula ini ve tawh chhuat ah te mu zawl zawl suh! mi te reu reu an rawn leng ang tih a hlauh awm, kar huau huau bawk suh" Nutei room atanga rawn chhuah paha a rawn tih hlak hlak chuan tum burin a thu țha ve mai a.Patea erawh ngawi rengin kan piah deuh sofa ah a rawn țhu ve. Ani hi zawng ngawi renga fiamthu thawh țhin ka ti mai zel, a nel thiam tan chuan pa țha leh fiamthu duh deuh ania, hrawn vak lo tan erawh pa țawng mawh lam te pawh a ni ve ang.
★ Next Day
"Khawi lai thleng vel nge i duh tawh, khup khuh an ti tlangpui a" Kan form țhui tir tupa in a tih chuan "kum khat chauh alawm ka hak dawn, khup chung hlek kha" awlsam zet hian alo ti leh pek. Nia keipawh khup khuh em em chu ka duh bik lo.
"School in țan hunah chuan in rawn ti fual duh ngei dawn ania, khup khuh deuh hi ti mai ru" ala ti hram a. "Tinge pu, khup khuh kher an tia mi?" ka lo ti he haw thung.
"In zirtirtu te hian an rawn sawi lawk tlangpui a, uni form chu khup khuh hram hram tur hmeichhe tan, mipa pawh an rap thei te anih em loh chuan fual lua a awm lo an tia lawm" alo ti sam et a. An va strict hmel reuh. Akimteii pawn min rawn melh ve zauh zauh mai.
"Khum chen chiah chiah tho kha kan duh chuti" ala ti hram a. Keipawh cher nen fual deuh ka duh bik teuh lo, pitar ka ang awm si.
"Pu Zai" rawn ti sup ri ah chuan rang zetin kawngka lam kan melh vut hlawm. Kawngka ah chuan tlangval sang zet kawngka chung chen dawn khawp hi alo ding a, a hmel a tak ngal mai, a nel awm loh tih a hriat nghal ngawih ngawih bawk.
"E, Pu Daniel lo kal rawh, lawk aw mami" tiin min tehna chu a dahthla sawk sawk a. Chupa pui lah chuan min la melh run run zui. A meng rum lutuk chu kan rel emaw tih mai tur vel ani.
Pu Zaia chuan coat a rawn phawrh hlawl a, a grey lehnghal. Chupa pawh chu rawn lut in a va ban ve vat a, a ha chhin nghal mawlh mawlh bawk. A coat hak zawh darthla langa a in en ve chu amah ai mah chuan nalh ka lo ti hial ta ve ang. A inhmeh ngawih ngawih.
"Dik lo lai ala awm em?" Pu Zaia chuan vir kual vut vut pahin a ti leh a, inhmeh ati ve nge a nui sang mai. "A țha viau e, engzah tur nge" tiin a hlip nghal mawlh mawlh a, pu zaia pawh chuan polythene rawn la in an khung dun leh mawlh mawlh mai.
"250/- ani mai, siam țhat tur a tam lem lo bawk a" tiin pawisa an inpe zui mawlh mawlh a, a chhuah dawn thleng chuan min melh leh tawh eih lo. Induh tawk ve ngal ngal awm hi ka tia.
"Kan khua ah ka hriat ngai pawh ka hre lo e a" Akimteii'n a rawn ti ta chiah reng a. Keipawn ka lo ngaihtuah ve mek, khapa ang kha ka la hmu ngai miah lo tak tak bawk.
"Aw, khawpui lamah in tal rei ve alawm, tak tak a kan khua a soil J.E thar anih kha, nikum december thla khan a rawn join a, mahse a rawn inbenbel(bengbel) tak erawh febuary lam daih kha ania" Pu Zaia chuan a rawn ti ve mai a. Min teh zawh hnu ah muang changin kan haw chho leh a, Hmangaihkimi lah chuan ice cream lei ala ngen tlat zui, pawisa neih loh ve ve nen.
"Khapa kha a chhe miah lo, ka hual nghal!" Akimteii a ice cream liah hliau hliau paha a rawn tih chuan ka melh nghek. J.E meuh te chu kan kum nen pawh a in thlau dawn lu lai lutuk, awm lo thei.
"Min melh vak suh! I tan alawm ka hual" ala ti tak deuh deuh a. Kei erawh ka lo nur nang nang ang. Ngaihzawng à deub pakhat chiah ka la nei, kei ai mahin Akimteii'n a hlimpui zawk a mawl buang buang lutuk kha ka țhen tawp a, thla 2 chhung min la tih buai chiam hnu ah a reh ve ta chauh kha nia.
"Thu lawi lo zet zet hi sawi suh! I nu sawi ang tak tak in i kim lo deuh ani lo maw...." nui chunga tih leh tlan ka rual a. Ka hming pum a ring zet a min rawn koh hrawk rual in lung chhar in min rawn um ve nghal a. A va naupang chhiat theih tak.
In țhuai nawk nawk chunga kan ina kan luh leh chuan kan sitting room a lo țhu te kan hmuh chuan kan ding dun chat.
"Enge in rawn tih dawn?" kei aiin Akimteii chuan alo ti hmasa leh thawr a. Nia, heta an rawn lang thut hi amak ve bawk em ani, kum 3 zet kan inhmu tawh lo hial ta ve ang.
"Hmangaihkim Misualnu.....kan lo haw ve!" tih hlar pahin Feli a rawn ding a, Ateii pawh a rawn tho chhuak ve nghal zat a. An nui dun sang mai sia. A hnu a thu chiang an han sawi erawh kan ri zui hlut mai. Ateii leh Feli te nen hian childhood friend chu kan ni ve tho nangin lehkha zirin an chhuak bo hma bik a, an lo haw khat bawk, inbe ve zeuh zeuh mahila kan inpawh dan erawh tlemin a pawn lang tawh a, mahse hei helamah rawn kal ve an tum takah chuan kan nasa lehkhawp ang.
◆SUNDAY
Sunday anih tawh a chawhnu lam len ngei ngei tur a ruat ang tawp chi kha kan nia, Baptist nih bawk nen chawhnu lam len hi chu a inrem bik.Chhungte'n motor hman phal bik hek lo ke in kan kal țhawng țhawng a, kawnah dawrlian inhawngah ei tur lei khawl țeuh in tlang lamah kan inzui chho leh ral ral a, ho deuh deuh sawi tur an hre tam si kan țhen reng ani mai.
Khawthlirna awmna thlanga tanky thar an siam mek tui an la dah loh an peih vek tawh si chungah kan țhu dal a. Kan piah lawka far kungin alo ti hlim ve bawk nen khuan alang chiang mai si, a boruak nen a nuam thlawt.Sunday ani bawk nen motor thawm bengchheng hriat tur avanga a khat tawk a, biak in dar ri leh, a hnu deuh a khuang ri leh dum du. hriat tur a awm deuh nual tih mai loh chu leng ve dang te thawm nen bak hriat tur avang hle.
"Higher zawhah college kal ho tawh ang u aw" Feli'n a rawn tih chuan "Nia, in te kan luah ho anga" phur hmel zet in Ateiin alo thlawp nghal zat a. "Sawi chu awlsam, ka nu hmel mitthla rawh u" Akimtei'n a rawn ti ve thung. Kan nui ri hak mai. Kan nu leh pa te hian kan rilru puitlin loh zia keini ai daih in an hria a, min hau min hau pawh hi a awm lo hran miah lo.
"Tih dan a awm ve leh mai zel alawm" Feli'n alo ti ve leh a. Nia, anu cheng man ber ani miau a a duh chuan kawng a dap hneh leh dawn lutuk tih lah kan hre vek sia.
"Ehe, khu in khu an luah elaw?" Tia Ateii'n a kawh na lam chu kan hawi nghal țhap a. Kan meng deuh awk hlawm ang. Kan awmna thlang thlang chiah a tlang mual ve deuh tho a in mal din ani a, abul vel ala awl viau nangin a pang velah thingpui kung a awm nual bawk. Kan khua ah chuan inding hmasa pawl ani a, a rei tawh ang aiin an thing hman a țha nge ala rawp in ala chhe lo hle a, a nei tu ten an ti hnum țha peih bawk a a la țha fu in ka hria. Mahse a neitute kha an pem daih sia, tunge maw luah ni.
"A chhung ka hmu chak reuh, a hlui tawh sia hmanlai insaka sak ani dawn sia, adangdai reuh fu ang" Ka lo ti ve vat a. An ni pawn an lo ti ve tliar tliar tho. Inlam en a kan ti ti melh melh lai chuan kawngka pui a rawn inhawng a, tlangval sang zet kekawr bul chauh ha in a rawn chhuak ta mai!
"E he!" Kan awi rual țhawț laiin Akimtei'n alo ti leh bik chuang a. Kan melh țhap bawk.
"Khu khu, Dus-i tan ka hual anih khu, Pu Daniel-a" phur zet hian ala rawn ti tak deuh deuh. Khapa bawk kha maw lo ni. Rum zet a ka va melh lai chuan kan țhiante pahnih lah chuan hriat chak hmel zet in an lo zawt nghal zat zat a, vawikhat chauh kan la inhmu a engvanga sawi zui reng nge maw anih reuh ni.
"Pu te i tia, tlangval ala niang ala chhiat hmel miah lo, a hmel pawh ral atang mah nise a chhe miah lo tih ka hrethiam" Feli'n min ko min rawn san khum zeuh zeuh pah a a rawn tih chuan chuan nà zet in adarah ka beng dawt a, "Ringawt a che u, vawikhat bak kan la inhmu lo Hmangaihkimi hian a * zawk anih kha!" ka lo ti hlar a. An ni ho erawh chuan 'anilo ang, nangmah niang' tia melh ang tak hian nuih rah rah in min melh a. Ngeiawm hlawm lutuk mai.
*************************************
★Notes :- He story hi maw ka duh ber ber te thlan khawm a ka thai kualna ani dawn a, a thupui *KDB* pawh hi țhenkhat tan chuan in rin loh lam daih aniang. Feedback țha tak tak min lo pe leh ula, inzirna tur tam tak te pawh a awm leh nual mai thei a, order tawp tawp a inhrilh lo in hriatnuam deuh hlek turin in hrilh tawn thei bawk ila, in feedback chhiar te hi anuam ve a Țang tlang leh dual dual ang u aw....