HEY DADDY By Mami pachuau (Completed)

[Ngaia]

HEY DADDY CHAPTER - 7

Ziaktu : Mami pachuau




Kan veng thlanmual lam a kan tlan tih ka hriat rual chuan țhu mar deuh hlek in ka hawikual a "ngatinge heti lamah kan kal dawn a?" A ngaihna hrelo zet hian ka ti a, ka kut ka malchunga ka dah chu hûm khawm vakin Car khalh mek tu chu ka en bawk.



"Helai kawng hi a chhe deuh a lo invuan rawh" ka zawhna chhang lo in a ti daih.



Kawng chu a chhe tak aniang kan insawh deuh ta pawp pawp a kei pawh chuan Car kawngkhar a a vawnna awm chu nghet zet hian ka chelh ve bawk a a chhe lutuk kha kan insawhna lamah kan thlarau a chhuak hial ania ka rin ni.



Thlanmual luhna bulah chuan Car a ding a "enge hetah kan tih dawn?" Tiin ka zawhna ngai bawk ka zawt nawn leh, a seat belt hren chu a phelh mawlh mawlh tih hriat zet in a ri rak rak a "chhuak phawt ila" a rawn ti ve sup a.



Amah chu ka en a min lo en reng "sawi mai la, night dress nen ka la awm hi" ka kawr hak ka kut a kawh pah chuan ka ti a, a țhen suk.



"Dar 9, chhungkaw tam tak chaw ei hunlai a ni tuman an hmu lo ang che" a sana bun pâ zet melh vut pah chuan a ti sup. Kawngkhar hawnna chu ka vuan a.



"Ka chunga thil țhalo tih i tum vaih chuan ka that ang che" ka hlauhthawn laia ka țawngkam hman tur hriat țhin awmchhun chu hman leh pah chuan motor ațang chuan ka chhuak hmak.



A rawn chhuak ve tih hriat zetin Car kawngkhar a ri rak a, enge kan veng thlanmualah hian kan tih dawn tih rin ngaihna reng ka hrelo mahse ka sawi tawh ang khan ka chung a thil țhalo tih a tum chuan ka tih tur pawh ka sawi lawk theilo.



"I ding reng dawn nge" a aw ka hriat leh rual chuan ka sir lam chu ka hawi phei vat a, a kut pakhatin a kekawr iptê a zen a pakhat in a sam alo tuai chho pâwk!.



"Kan kalna tur min hrilh phawt rawh, bakah ka nu ten ka awmlo tih an hriat chuan min lo ngaihtuah lutuk palh ang" inkuangkuah chungin ka ti leh, harsa min tih hmel zet hian a thaw hawk! Min hrilh hma chu ka harsa leh zual ang.



"I kalna tur chu an hria, ka hrilh tawh birthday gift i duh a ni lawm ni?" Nin hmel zet hian a rawn ti hmuk! Thli thaw vûk vûk chuan ka sam a chhem lêng vek a a ni pawh a ni tho.



"Duh tho e mahse hetiang hmun fâl leh hlauhawm deuh a inhruai lam hi ka sawi khan a kâwk hleinem. Ka chungah thilsual tih i tum lo takzet maw? Ka ring thei che em?" A mita en kalh pah chuan ka ti a, a ruk chuan ka hlau ve reng mahse hlau anga lan erawh ka tum lo bur.



"Min ring thei ang, a tlai zel dawn zawhna ho lam zet in zawh chu bansan ila kal ang hmiang" dam zet hian a rawn ti leh ta zawk a, a hmel hahdam leh hmuh nuam zet chu ka la en ngar ngar, tunah tak hian 'iva țawng hnem ve em em' tih ka chak tawp.



Mahse a kal thla chu ka zui a, thlanmual mawnglamah chuan a kal a ka zui thla ve zel kan kal chhung a a vawikhat nan a ding ve ta hram a.



"Tinge?" A hnunga din pah chuan ka ti a, hah avangin ka thaw chhuak leh ham ham țhin bawk "kan thleng tawh" a tih sup rual chuan a en na lam chu ka en thla ve vat a ka u thlan hmaah tak kan lo ding reng, a thlan lung hmaah chuan pangpar ka dah kha alo la awm a a bulah chuan bawm a awm bawk.



Rang zetin Eddie-a chu ka en chho a "engtin..?" Ka ti sap, "engmah sawi a ngailo, i chhak ah khian ka lo awm ang rei awm hman kan ni lo tih hria la" a ti deuh hmuk a, lawm avanga thaw hak chungin ka u thlan ka en leh a amah chu ka en leh.



"Ka lawm e aw" ka ti sap a, bu nghut in "khu khu i mamawh ang" bawm chu a kâwk a, a inher a chhak lam chu a pan chho nghal bawk. Kei pawh chuan ka hmai chu tuai thuak thuak in ka sam chu ka vial tawm a ka u thlan lung hmaah chuan ka țhu thla a.



"U.. ka lo kal a, vawiin hi ka piancham a ni tih i hria tiraw? Van ațangin min lo lawm sak anga tiraw?" Nui deuh sêih chungin ka ti a, ka pangpar dah chu ka hûng țha a a hming inziahna te chu ka khawih ka khawih bawk.



"Ka ngaih che a zual sauh nizanah ka mumangah ka hmu bawk che a mahse nang chuan min ngai ve lo" ka ti leh sap a, a thlan lung bula bawm awm chu ka la a ka hawn ruala ka thil hmuh avang chuan rang zetin Eddie-a dinna lam chu ka hawi chho a.



Mi thlan chunga sir zawnga ding in thutak hmel zet hian phone alo hmang a, biak ka tum zet nângin be lo chuan ka u thlan lam chu ka en leh. He bawm chhungah hian ka pangpar dah ziah țhin leh ka u thlan ka tlawh chang a ka mamawh ang ho an lo awm kim vek!. Helai hmunah hian keimah chauh in ka kal țhin, chuan khipa khian engtin nge heng thil hi a hriat theih tih ka hrelo min țhawng lutuk chu che châng lo chuan ka țhu ngawi rên râwn a.



Ka nu leh ka pa tak ngial pawn helama ka chhoh changin ka u thlan ka tlawh țhin tih hre mahse enge ka dah a ka mamawh țhin an hrelo. Mahse khi mihring khian alo hria a, ka u in a hrilh a mi ti dawn ila ka u takngial pawn a hre silo.



Mak ti rilru zet chung chuan ka hawi chho leh, mahse nichina a awmdan ang khan alo la awm a phone alo la hmang reng bawk. Thaw ham ham in ka hawilet leh a "engtin nge i hriat theih?" Ka ti zâwi ta sep ringawt.



Ka u thlanah chuan pangpar dah pah chuan ka hriat tawk lek lek in ka phun sap sap a, bawm chhunga marker awm te leh book mark te chu ka la chhuak a, ka kal chang apianga ka tih țhin amah ka ngaih thu leh ka suangtuahna te chu book mark ah chuan sîn te te a ziak in pangpar karah te chuan ka bel khat vek a.



Ka zawh meuh chuan ka u chu mangțha in ka kal leh tur thu hrilh in muangchangin ka thawhsan a, hawichhuak miah lo in Eddie-a awmna lam chu ka pan chho nghal bawk.



A dinna ka thlen hma chuan a aw ri avang chuan ka hawichhuak a, phone lo la hmang reng chung chuan mit zîm sun hian min lo en reng alo ni a, ni sa tak chuan a vun chu chhun in thli thaw chuan a sam a chhem lêng sang sang a chutia min lo en ngur avang chuan lai zêtin ka kûn leh ta ringawt bawk.



"Kan lo chhuak dawn chiah" khauh ru zeta a ti sup ri ka hriat rual deuh thaw chuan a bul chu ka thleng chawpchilh nghal der a "umm.. kan reilo ang" a ti zui leh.



A bulah chuan ngawi rengin ka lo ding ve reng a ka u thlan chu ka melh thla vang vang "i zo tawh em ni?" A rawn ti a, amah pawh en lem lo chuan ka bu nghat a "i zawh chuan kan chho thei em?" A ti leh a țawngkâa lo chuan ka bu leh nghat, sawi tur ka haihchham tlat pek a nih chu.



Zialo țhin khawp mai.



Car hnung lamah țhu tawh lo in hmalamah amah zawk a luh hma hma in ka lo țhu lut ve tharh a tlanchhuah inpeih at in ka lo awm bawk. A rawn luh ve pawh chuan ka en lo a ka kut hûm tawm in hmalam ka melh ta ngar a mahse ka lo mitsir hman zel tho nia.



"Ka lawm e aw, khang zawng zawng kha engtin nge i hriat chu ka hrelo mahse ka lawm lutuk i gift min pek pawh a ropui takzet. Ka lawm nawn awn awn ni mai teh se" motor a tih nun rual chuan hmalam melh ngar chung hian ka ti a min chhang lo chuan a thaw ham ham ri ka hria a!.



"Engtin nge khang kha ka mamawh țhin tih i hriat theih?" A lam hawi zawnga țhut pah chuan ka ti a mahse mit khap miah lo hian min lo melh rûn mai "chu tal chu min hrilh la" amah melh let ve ngar pah chuan ka ti zâwi leh sap.



Min en ngur avang chuan amah pawh ka en țha ve ngamlo, a ngawi reng bawk si nen. Ka chhungte pawn an hriat loh a ni'n alo hriat bik nachhan hi ka hre chak a ka zawt lo ang ka ti tak nâ in ka thluak a chhuahsan thei tlat si lo.



Ka huaisenna zawng zawng sawm khawm a amah en ngar pah chuan ka zawt leh.



"Ka chhungten an hrelo, nangmah chiah in i hria, mahse engtin?" ka ti a, min en na a mit ala la sawn miah lo chutiang chiahin kei pawn "a țha e, min chhang suh ka lo zawt che kha ka inchhir takzet e" ti nek a hawisawn ka tum chu ka nghawngah rawn dawm in ka hawilet zawk a, ka beisei loh lutuk tak mai hian min rawn fawp ringawt!.



Muang leh dam zetin min fawp a ka hamhaih êm avang chuan chhan ve mai nachang ka hrelo, amah zawkin ka hmui nawr kau in ka ka chhungah a lei a rawn hâwl lut a ka hmui hnuailam ngenngawl zeta a rawn peh rual chuan ka insûm theih loh luatah ka chhang let ve a.



Rûm nghutin a lamah min pawt hnai zual sauh a, ka chhang let ve ta chu duhthawh zual sauh in kohâm zet hian min fawp ngawng ngawng a ka ngaihtuahna zawng zawng a ti nu bulh vek a ka ngaihtuahna ah hian min fawhna leh amah chiah hi a awm ngut ngut mai.



A kut lehlam chu chêt a ka mal a rawn khawih rual chuan a ban rêk ah chuan ka man bet zui chawt! Thâwk hîp let kâwkin kan infawhna ațang chuan ka awm hrang a ka chal a a chal a rawn nghah ruala a thâwk chhuah ham ham rual chuan kei pawh ka thaw ve ham ham.



"Engthil nge ka tih hi?" Maimichhing chungin ka ti zui tâwk!.



"Min en teh" a rawn tih rual chuan awm hran ka tum a mahse ka kawngah vuan zui chawt in a lamah chuan min pawt hnai leh zual sauh "tiang hian awm lo ang.. um? A diklo ania thil thleng kha chu a thleng tawh a a siam țhat theih tawh loh mahse.. kan awmdan hi a diklo takzet aw" maimichhing reng chung chuan ka ti a.



Rûm nghutin "meng teh" a rawn ti nghut. Ka lu ka thing nghek a a ni erawh a thaw zui hawm hawm "kan awmdan a diklo ka tih kha, awm hrang la ka meng ang chuan haw tawh ang ka ril a țam tawh" ka ti a, ka biang a sa hat hat a ka maimichhin tlat avangin amah engtin nge a awm ka hrelo.



"Meng lawk la" a rawn ti zâwi sup, min ngenna ka tih hlawhtlin theih loh avang chuan ka lu ka lo thing leh nghat "ka sawi kha..." ka ti chiah, ka hmuiah chuan a rawn fawp zui leh chawk a! Ka meng chiang fek fawk lutuk.



Nui ri suk in min fawhna a thlah a phâwk zeta ka meng chu min en in a hmai zâwnah chuan min pawt hnai a ka chil ka lem ri nghal khalh! Tunah hian khawvela ka mihring chhelo tih em em mitmeng ang chiah chiah a mitmeng sexy a pu, a hmui a liah hnawm chap rual chuan chil ka lem lehnghal khalh!.



Ka ngaihtuahna a nu ru bulh ta mai.



"Thu ka sawi ve tawh anga ngaithla la" min en reng chung chuan a rawn ti thâwp sup. Ka chhang lo.



Hetiang ngaihzawng te inkara thleng țhin lakah hian ka junior tawh lo, bialpa nei rual ka nih ve tawh angin Higher kan kal lai pawhin ka nei ve tawh nghe nghe mahse ka zirna keimah ngeiin ka ti bahlah zo vek ta zawk a.



Tuna min en dan leh a mitmeng ațanga lo lang chhuak hi hrethiam lo ka nilo, chuan kan pahnih in mipa leh hmeichhia kan ni a thil thleng hi sawifiah vak a tu mah mah dem ka tum lo a thleng ve thei a ni. Mahse.... kan pahnih inkar hi a sak rih ta țalh si.



"Tun ang khan awm tawh suh" a rawn ti sup, hrethiam lo zetin amah chu ka en chho a min lo en reng avang chuan rang zetin a hrâwk bâwk ka en lehnghal daih. A thaw hawk a.



"Ka biak chhun che a min chhan loh kha ching tawh suh tuna mi ang te kha" ti nghutin ka khabe ah chuan a rawn vuan a amah en turin min kuai dâk salh "a chiang em?" Min en reng chung chuan a rawn ti sup, ka la chhang lo.



He mihring hian engtin nge a awmdan a tih danglam zung zung theih bik? Kei chu thil thleng avang khan ka la pangngai lo a chumi belhchhah tur chuan tunah kan awm leh mek ka ngaihtuahna a fîm hleithei der lo!.



"Khatianga i awm leh chuan kha aia nasa kha ka ti leh ang" a rawn ti leh nghut, rilru tihfîm tum in ka lu ka thing nak nak "robot ang maia khawsa mihring ka biakna pawh vawitam chhang ngailo mihring biakna vawihnih khat lek ka chhan loh chu a pawina ka hre lo" ti sap in ka melh let ve ngar.



Mahse a mitmeng leh a hmui hnawm chap chuan ngaihtuahna a chawk buai nuai mai.



A rûm nghut a, a inrin hma chuan ka kawng a vawnna a kut chu pawh chhuah sak in Car kawngkhar hnaih ber ang zawng chuan ka țhu phei vat "haw tawh ang, chuan engmah sawi tum tawh suh min lo khawih tum tawh lo bawk la" hmalam melh ngar ngar pah chuan ka ti a ka rilru a pangngai hleithei meuh lo.



Mahse chutiang zawng zawng he mihring hma a ka tihlan vek kher a țullo bawk.



Thaw hawk in motor a ti nung leh a, kan dawk chhuak deuh zawk a ni ber. A hma ai zawng pawhin a khalh chak tawh zawk bawk mahse hlau anga lan chhin ka tum eih lo, a thinrimna hrîkthlak a tum ah ka ngai nghet hmiah! A duh duh a ti thei alawm.



Kan awmdan ngaihtuah let rauh rauh chungin ka țhu ve ngar ngar a thil thleng bawk ka mitthla zui a ka thaw leh vak țhin bawk. Rilru fîm reng reng ka pu theilo hi a âtthlak ka ti takzet a put tum in insawrbing mah ila ka thei derlo a hlat a ka awm vat a ngai a ni.



Inkawt kan thlen chuan a rang a rang in ka chhuk a hawilet miah lo in ka kal nghal nal nal. Inchhung ka lut țep tih a ka hawilet a ka chhuahna kawngkhar ka lo khar lo chu niin alo la inhawng huau a chutin khapa pawh kha alo chhuak ve deuh chiah bawk.



A khar ve mai ang ti rilru chung chuan inchhungah chuan ka lut a choka lama thawm a awm nak nak avang chuan ka pan phei vat a ka chhungte chuan chaw an lo ei mek.



"Mambawih lo țhu la ei ve nghal rawh, khawnge Eddie-a?" ka pa chuan alo ti thuai a "ka han inthlak phawt ang ka thlan vek a..." ka tih lai chuan hnunglam ah thawm ka hria a ka taksa an țang zui nghal ak!.



"E... kha Eddie rawn ei ve nghal rawh. Nu-i thleng han laksak rawh" ka pa chuan alo ti zung zung kei erawh ka chesawn ngam tawh lo.



"A ngailo e ka pu, i ti lawmawm lutuk a mahse let lehnghal ka ngai dawn a tihtur pawimawh ka nei a" ka nu a thawh uaih rual chuan hnunglam ațang aw chu a rawn chhuak a ka awmdan reng a dik thei tawh lo mai.



"Ei phawt la i kal dawn alawm" ka nu pawn alo ti ve vat, heiha huiha, lum ka tih belh takzet.



"A ni tho a chu nidangah kan la ti zawk dawn nia a hmanhmawh thlak ang reng lutuk a" ti sup ri te chuan min maimichhin tir sawk thei! Thil thleng mawlh maiin min la luhchilh tup tup a ngaihtuahna fîm put ava har țalh si em!.



Ka awmdan hi ka duh lo tlat.



"Aw... a nih chu a pawimawh hmel bawk si, nidangah rawn ei tal rawh aw. Mami pawn thleng va thlah rawh. Chuan Mate, enge i din reng țhu ta che" a rawn ti leh, ka pa awmdan chu ka melh ngat ngat a a danglam thlâwt a ni.



Ka u a thawh rual chuan ka țhu thla ve nghal a "Ed... ka kut kan sil lawk ang, ei phawt a kal tur che nia" ka u chuan a ti zung zung a ka nu pawn tiang chuan alo ti ve thuai a a nui ri suk ka hriat te chuan min țham za uaih zel thei mai.



"Pawnah ka lo nghak ang che" tiin a pensawn ri chu ka hre zawm zat a, hahdam ta huai ang mai hian ka thaw ta ham ham a ka țang țûn te pawh a reh ve nghal huai huai thei.



Bawnghnute ka in tur an lo chhawp chu ka in nghal khawlh khawlh a nidanga sawi tur hre țeuh țhin enge dik a enge diklo pawh thlu lova rilru a thil awm sawi chhuak phawng phawng țhin hmeichhia hian sawi tur ka haihchham tlat pek a nih chu!.



"Mambawih" ka pa aw ri ka hriat rual chuan ka la phu zawk zui, muangchangin ka hawichhuak vat a "I u thlanah i kal duh tih reng ngaihtuah nachang kan lo hrelo a mahse kha Eddie-a khan alo hre hlauh a a hruai che a hreawm kan ti khawp mai" a rawn ti a, a hmelah hreawm a tih zia a lang thei chutiang chiahin ka nu pawh.



"Hre turin in bulah pawh ka sawi hleinem hreawm ti su...a ho lutuk kei pawn ka lo hre leh tawh lo hrim hrim a" ka ti a, inthiamlo lo se ka duh hre turin ka hrilh bawk hek lo a hreawm an tihna chhan tur a awm lo bawk.



"Chaw ei khamah room ah inu ho hian inbe lawk ang aw" a tih chuan ka bu nghat nghat a, ka u pawh alo la lut leh lo.



Eddie-a khan ka chhungten an hriat thu a sawi a mahse tunah khan ka pa ten an hriat loh thu an sawi bawk si, thil thleng hi a mak takzet. Kha mihring khan ka mamawh ang zawng zawng pawh alo hre vek a he thilah hian chhanna țha tak ka duh ka duh takzet.



Ka puar hnu fê ah ka u a rawn lut ve chiah a chaw pawh ei chhunzawm tawh lo chuan chhuah nghal a ngaih thu sawiin biak hman loh khawp a rang a rangin a room lam a pan chho nghal nal nal.



"Ava mak rum rum țhin ve mawle aw.." ka nu chuan a ti a, kei erawh chuan ka en ringawt thung.



"Mambawih engtin nge i birthday chu lawm i duh deuh a han sawi la" ka pa chuan ka piah a rawn țhut thlak pah hian a rawn ti a ka phone chu ka dah a "lawm vak pawh ka lo ti lo a cake min tihsak tawh tho a pawisa a hek mai mai a bakah kan awm kim leh âwm tawp bawk silo" ka ti nang nang.



Ka nu a rawn lut ve a "aw.. sawi la kan tum mai dawn alawm i u pawh tih dan dan a awm mai dawn a" a rawn ti ve a, ka pa lah chuan alo pawmpui na ngang.



"In ti tak tak em min tihder leh in tum em?" An pahnih entawn zak zak pah chuan ka ti a.



"Kan tihder tawh ngai che mi?" Ka pa in a rawn tih chuan ka ner nâng "a nih chuan chhunah khawiah emaw chhuak ho ila ka u pawh kan bia anga thil te kan ei ho anga in duh duh naah ni mai zanah chuan kan țhianho in chhuah kan ti deuh a" ka tih chuan kei ai mahin an phur hmel zawk.



"Duhna lai deuh te i nei em?" Ka nu bawk a ni, a phone a phawrh chhuak a.



"Neilo, nangmahni pahnih in thlang rawh u in duhna hmun kha ka duh ve ni mai ka u lo chhuk se kan sawipui dawn nia" ka ti a, ka phone chu ka ban zawm a an ti ti chu ka zawm ve leh zeuh zeuh țhin bawk.



"Taka nu.. tunge present bawm lian deuh min petu khi in hria em?" Ka ti hâ, an nupa chuan an in en a.



"Chutiang bawm lian deuh dawn i nei em ni? I țhiante leh keini ho in kan pek bak che kha kan va hmu ve lo ve" ka nu in a rawn ti a, ka ngaihtuah let rauh rauh a.



"Captain Black Wolf a in ti a, ka teddy bear awh deuh ka sawi țhin ang kha alo dah a pangpar karah" ka tih chuan an meng buai nasa.



"Mate.. engmaw i sawi?" Ka u aw ka hriat rual chuan hnunglam ka hawi nghala "ah.. gift min petu nia ka tih, Captain Black Wolf a in tia bawm lian deuh maiah ania teddy bear alo awm a" ka ti a, ka u mitmeng erawh ka nu leh ka pa mitmeng nen a inang ve ta miah lo mai.


Show post links
Top

[Ngaia]

HEY DADDY CHAPTER - 8

Ziaktu : Mami pachuau



"I țha maw u?" Țhut kân deuh pah hian ka ti a, a hmel chu mak tihna ai mah in âwih lohna in a ni a khah zawk ni.



Muang ban chap hian min rawn en a "țha e.. ka gift pek che kha i hawng ve tawh em?" A rawn ti zui daih a, kan thusawi thlak a tum tih ka hre reng sia.



"Hawng nang... chu bawm lian deuh leh ka țhiante min pek țhenkhat chiah chu ka la hawng" ka ti a, a bu nghat a a inthup hleithei der lo chu a nih hi mawle.



"Bawihi khawia chhuah nge i tum? I nau in a piancham lawm nan chhuah ho a rawt a hei hunâwl insiam lawk mai ta che awmkhawm ve theih lai lai in" ka nu in a rawn ti a "hun ka nei alawm tuna mi hi chu meeting tenau chauh ania ka rei dawnlo" a ti a, a hman thu a sawi ve avang chuan ka thaw ham ham.



"I hman dawn loh thu i sawi dawn amaw ka tia lawm" ner nâng chungin ka ti a, a rawn nui hak hak a "ni e.. i hman chuan a țhat chu. Engtia kal nge i tum a F-a a awm silo a Eddie-a lah a haw tawh âwm si" a tih zawm zat.



"Ala hawlo, pawnah sawn min nghak a ka va kal zuai anga ka rawn haw leh hma dawn nia." Tih leh kal a ruala ka en zui reng ringawt. Ka nu leh ka pa in hunâwl a nei khat lutuk țhalo an tih zia an sawi chu ngaithla pah reng in kan țhianho chat-ah chuan ka pâwt ka pâwt a.



Ka birthday min rawn wish sap sap tu te chu ka chhang let ve zel bawk.



Nghakdaki message chu ka hawng a *hepa hian a star che a i number min dil a ka pe dawn em?* tiin thlalak nen ka rawn thawn a thlalak chu ka download vat.



"Tunge a?" Thlalak chiang zeta bih pah chuan ka ti a, ka hriat hnu a ang deuh reuh.



*Ka hre ngailo i mihring rawn thawn hi* tih leh sticker thawn tel ka rual a, a seen nghal pang a reilotêah min rawn call zawm zat.



"I hrelo tih sawi nawn leh teh Rodingpui" call ka lak rual rual chuan ka ti nghal hlak "ka hrelo ti ila aw... ka hriat hnu a ang deuh tho" ka ti a.



"Â chhah lian nu, Higher kan kal laia chhelo deuh basketball khel thiam deuh an star rawn luai luai țhin kan veng ami Dinpuia kha a nih hi engtin nge i hriat loh theih zawk a?" A rawn ti ta nghek mai. Ka phone chu ka en leh a thlalak chu ka zoom a.



"Ava danglam tawh si ve" ka ti ringawt bawk.



"Danglam tawh e... hmanni ațang khan i number min dil char char tawh a nangmah ka be hmasa duh che a i phalna la lo a lo pek tawp kha chu ka ti deuh a" a rawn ti ban chap.



"I duh leh pe rawh inbiak te pawh a khât alawm kan inkawm ve nasa si" ka tih chuan a rawn au nghek! Ka phu nasa...



"I ninawm vak vak țhin aw Nghakdak kan awmdun loh hi phone a nih hi" ka ti vak a, a rawn nui zui hak hak "ka lawm êm alawm, nihpui ngei ngei rawh aw bialpa i neih lohna a rei tawh si a chhelo bawk sia i vannei lellawl lutuk" hlim hmel zet hian a rawn ti a.



"Chutiang lam lo ngaihtuah teivet zel suh"



"Heiha... khawvel hi chu nuam kan ti tlang a ni, zaninah lo kal ve se.." a sawi zawh hma hma chuan "i mak" ka ti hlar. Awmdun ngat ila chuan min chûm leh nasa dawn lutuk henu hian.



"Aw enge kan la inkawm tho a number in in nei tawn lo a ni mai a bakah helamah in awm lo ve ve bawk sia" a rawn ti leh a, a țan leh tak tak dawn e.



"Duh leh lo kal ve se ni mai lawm inhmuh te pawh a khât a, Malsawmdawngkimi a lawm leh hle ang chu mawle ka dah dawn ka nu in min ko kan chhuak dawn a" tiin dawt ka sawi zaih a min chhanna pawh nghak lo chuan ka off nghal hmak.



Ava nuam hem hem țhin tak!.



Chhuak turin kan insiam a ka u pawh a sawi ang tak tak in alo haw hma a Eddie-a nilo F-a zawkin min thlah. F-a zawk ka hmu kha ka hamhaih luat ah Eddie-a awmna ka zawt teuh kher lehnghal.



Engvanga amah zawk beisei nge nih ka in hrethiam lo Car-a ka țhu te kha ka awm a nuam hleithei der lo lehnghal. Ka hriat duh leh ka vei hria ni âwm takin ka u lah chuan "pa Eddie-a kha hna thilah khu lamah a chhuk a ka chawlh hun chhung a tawp țep tawh bawk sia thil tihfel tur a la awm nuala F-a hi ka hruai ang chu" a rawn ti ta khauh a nih kha.



Ka ngaihtuahna kha a pawt vir zawk thei. Phai ah a chhuk thla tawh tih a sawi zo chiah a ka chhunglam kha engtin emaw a awm zui rawih rawih a nih kha. A awm lo tih thu hriat ringawt pawh in khatiang khan ka awm chu a ni si a kei hi ka diklo leh țan dawn tak tak.



Ka hriat loh hlan in ka tan Hotel-ah engkim ka u in min lo buatsaih sak a, meeting ka nei a tih te kha dâwt vek alo ni reng si ka chhungte hi chuan min țhawng reng mai dawn zawng a nih hi.



Zana chhuah lehnghal ka ngaih dawn avangin ka thawmhnaw hak ngai ha in Nghakdâki dawrah ka tlang a alo la buai em em mai lehnghal "Jane... tah khan bawm a awm amaw chuta thawmhnaw ka dah ho chu min lo phawrh chhuah sak" min hmuh rual chuan ala rawn ti zung zung zui leh ta nghal.



"Khawia bawm hi maw?" Chair-a ka bag nghah pah chuan ka ti chiam!.



"Kha, i ke bula mi kha hmanhmawh in" a rawn ti chûl a, ka ke lam chu bih thla in bawm chu ka pawm nawlh a a bulah chuan nghatin ka hawng a a chhunga thawmhnaw awm chu ka phawrh chhuah sak a.



"Tah hian lo khai zel teh aw felfai deuhin, vawiinah an lo en dawn a an la țeuh maithei a chuvang ania, heng ho hi ka lo en ngai miah lo siam țhat alo ngai vek a nih hi" a ti a, a sawi ang chuan uluk zet hian ka khai sak a amah pawh chuan min rawn pui ve bawk.



"Tu ten maw lo en dawn?" Thawmhnaw pek pah chuan ka ti a, hah avangin a thlan a tla phung tawh mai.



"Chu Dinpuia te chu ania naktukah a u te thingtlangah an zin dawn a tlem a zawng an keng chho duh dawn a"



"I hausa leh sawt dawn a nih chu.. min treat thei" ka tih rual chuan sam hnawk vek chung hian rum zetin min rawn melh a lum tih avangin a hmai te chu a sen vek tawh "kan ti lovang bungraw dang lak nan ka hmang dawn i rualin ka chhuk ve nga" a rawn ti a.



"Min treat tawp suh zaninah pawh lo kal ve suh ang che, mi uikawm țhian ka nei peih lo" ka sawi zawh rual chuan lei ka chhuah zeuh "henu nasat zia hi... mi ti vak suh aw Rodingpui" a rawn ti hlak.



"Tiang em em a i uikawm pawh hi ka ringlo asin" ti a ka kalsawn chu ka hnungzânga rawn ben dawt pah hian "nasa suh" a rawn ti nghek a nuih chhuah hak hak pah chuan ka inher a "tihtur dang ala awm em?" Ka ti a, a buai laia tianga tih hi a nuam ber.



"Awm e awm e, i chak dawnlo Dinpuia a rawn kal ve dawn a ka biak dawn khawp che" a rawn ti hlak hlak.



"Star ka nei min biak suh" ka ti a, a rawn hawi rang lutuk "tunge mihring nge?" A rawn ti nghek!



"I fel viau chuan nakinah ka hrilh ve ang che"



"Min hrilh lo vaih teh aw... chu mipa chu tu pawh nise ka hnenah a interview phawt tur a ni" a tawp lam chu zawi te te in ka lo sawipui a ka bag awmna lam chu ka pan phei bawk.



"An lo thleng a nih saw..." a tih ri ah chuan ka hawichhuak ve a dawr lam pan a hmeichhe pahnih leh mipa pakhat rawn kal phei chu ka lo en ve reng a a thlalak leh a takah danglamna a nei lem lo kan inhmuh lohna a rei tawh lutuk a amah a anglo ka la ti fan.



Dawr ah an rawn lut a tlangnel tawh tih hriat zet hian hmeichhe pahnih chu an ri zui har har a mipa erawh chuan min en ngur mai.



An mahni lo lawm nan tiin ka nuih lui sak a Nghakdâki ka lama a rawn kal chu ka en zui ta daih bawk. Inhmuh lohna a rei tawh lutuk a inkawm ve nasa viau mah ila han biak dan tur ka hre derlo.



"Dinpui hei, Jane-i kha i hre tho anga chuan Jane hei Dinpuia chu" Nghakdâki chuan ka bula rawn din pah chuan a ti zung zung a, Dinpuia chu a khi suk a "kan inhmu leh chu ka lawm e" tiin a kut chu a rawn phar chhuak a ka lo vuan ve vat.



"Kei pawh ka lawm, i danglam tawh i mean... Higher vela i hmel nen in danglam tawh plastic surgery ti ang vel i ni" ka tih chuan a nui suk ka kut nghet zeta a vawn chu ka pawt chhuak vat a "kei pawn ka hmuh hmasak berin ka tia lawm min chhip thlak țep a ni" a tih chuan kan vaiin kan nui a.



"Nangpawh i danglam tawh i kalna chu enge a an nuam i ti em?" a rawn ti ve sup, ka nui hak a "ummm a nuam a ni mai ang chu, khawi hmunah pawh hian tlangnel tum ve ila nuam kan ti a ni mai hreawm tihna hmun ka nei tak tak lo tih nangpawn i hriat kha" ka ti a, a rawn nui chhuak ta hawk hawk.



"Ila ngai reng a nih hi.. englo i number.." a sawi zawh hma chuan ka phone a rawn ri a dawhkana ka dah chu ka la vat number lawng ala ni zui ka hre țhaklo.



"Lawk aw kan chhang lawk ang" ka tih chuan a bu nghut a, tlem chuan ka kalsawn deuh a number chu en leh te te in a hring chu ka thai phei a ka benga ka nghah rual chuan "Hello" ka ti sap.



Lehlam ațang chuan thawm engmah a awm miah lo "Hello" ka ti leh min la chhang chuang lo "an rawn call sual amaw ni le nge vai zawk" ka ti nang nang.



Ka dah tur chu mipa aw thûm sup hian "dah suh" a rawn ti zâwi sup, phone chu ka bengah ka nghat chho leh a ka thin phu rang dawt dawt hi engvang nge? Zâm rukna nen a in chawhpawlh.



Eddia-a tih chu ka rilru ah a rawn lang hmasa ber ringawt.



"Tunge aw? Min chhang mai silo a" ți deuh dâk chung hian ka ti a, lehlam ațang chuan an rawn thaw ta ham ham "Miriam-i model lar deuh nau kha ini em?" Mizo țawng ngeiin hmeichhe aw hian a rawn ti lawi si.



"Nih chu ka nia mahse tunge aw ka van hrelo che" ka ti a, nichin khan mipa aw a ni sia tunah hmeichhia a ni leh daih sia.



"E... hei i u kan be tlang theilo a a bul hnai ah i awm mial em le?" A rawn ti a, ka thaw ta ham ham mahse ka ngaih a la țha fumfe chuang der lo.



"Ka awm lo a, englo ka pa number ka pe ang che aw a pawimawh hmel bawk si" ka tih chuan a neih thu leh kan awmdun a rin thu a rawn sawi a engmah ka sawi ve leh hma hma in ala dah daih zui.



Ngaihtuah zui rauh rauh chung chuan phone chu ka beng ațangin ka la thla a "mipa aw a ni ngei sia ka hriatsual amaw ni zawk le" ka ti zâwi sep. Ka dara khawih an awm tih ka hriat rual chuan phu nghekin ka inher vat, Dinpuia chuan a ngaihna hriat loh hmel zet hian min melh rûn bawk.



☆ EDDIE LALRUATSANGA POV ☆

"Tinge... i be ngam leh tawp silo chawp leh chilhin dawt min la sawi tir zui leh ta nghal" Aruati chuan phone min rawn pek pah chuan a rawn ti hlak.



Ka hmai chu tuai puat in ka thaw chhuak hawk a! "Hrelo se ka duh a hriat chuan a tan a pawi thei a aw ka hriat khan ka lawm a hriat loh in engkim tihsak ila a hlim hmel ka hmuh chuan ka duhtawk" ka sawi zo chiah, a rawn nui hak.



"I duhtawk lo chu nih kha, amah i thlakhlelh zia pawh mimawl tak pawn an hrethiam ang chu mawle Higher a kal lai ațang tawh in kil tin ațangin i venghim a a duhthusam hriat tum in i bei a a ngainat zawng leh a mamawh ang zawng zawng hriat tum in i bei a mipa avanga a țah lai pawn a kiangah i awm reng tih a hre tawp nang..." a rawn ti zui a.



"Duhtawk teh" ka ti nghut.



"Ka duhtawk lo ang, a thinlung hliam tu mipa pawh i duhtawkin i khawih a tun thlengin țîk pawh a rawn tih ngam tawh loh hi. A tan mihring inih anga i tih theih zawng zawng i tihsak a ila tihsak mek zel bawk a chuti chung chuan amah neih ila tum chuang lo a mipa dang nen i hmuh dun in i thîk leh tho si" a ti leh, ka hmai hup in ka thaw hawk!.



"I piang ve tih pawh a hriat hma in i theih ang tawkin i venhim i tum a, i thlahlel ngawih ngawih a nih chuan engatinge a thinlung neih sak i tum mai loh? A kianga awm reng chung siin a taksa them pawh i khawih sak theilo a nilo i khawih thiang lo zawk a ni lawm ni. Thinlung na leh ser reh thei tawh lo tur i insiam hma in bansan rawh Eddie chu chu ka ngen duh che i awmdan ka hmuh apiang hian hreawm ka ti ngawih ngawih zel"



"Duhtawk teh Aruat ka thih dawn thleng pawn ka venghim zel ang, ka kalsan dawn lo a ka bansan dawn bawk hek lo a kiangah awm theilo mah ila a hlimna ka siamsak chuan ka duhtawk" ka ti sup, a rawn nui lui leh hak a.



"Thih dawn thleng pawn ka venghim zel ang huh! Eddie khawvel a i awmchhungin hlimna neih chu i phu ve asin i phu ngawih ngawih. Kha hmeichhe tana i thiltih zawng zawng kha amah ka hriattir dawn. Higher a kal lai ațang tawh a i venhim dan leh a tana i thil tih zawng zawng teddy bear thleng khan ka hrilh vek dawn" ti a, a kal tur chu ka au zui hrâwih! A ding dat!.



"Duhtawk tawh rawh, a tana ka thiltih zawng zawng i hriattir a nih chuan a hlatah ka awm dawn. Miriam-i'n min rinhlelhna a neih hi ti tibelhchhah suh! Miriam-i'n a hria a nih chuan he hna hi bansan in L.A-ah ka kal nghal a ngai dawn. Kumkhua in ka hlat a ngai ang a vanneihthlak taka kan intawng leh thut a nih loh chuan ka hmu tawh ngai dawnlo ka chân dawn. Chuvang chuan hriattir suh hetia awm hi ka duh zawk. Ka kiangah awm lo mahse ral khat ațanga a hlimna ka siamsak chuan ka lawm tawk lutuk! Amah chân ai chuan ka la thlang zawk fo!" Ka thusawi lai reng chuan a mittui a lo far thla fap.



"Lo kal teh" tih leh keimah zawkin ka pan phei leh ta zawka nghet zetin ka kuah bet nghal hmiah! Ka unaunu ang chiah a nih avangin a mittui a tlak ka duhlo.



"Ka hria, min ngaihtuah tih ka hria ka sawi kha. Amah chân ai chuan hetianga awm hi ka duh zawk Miriami min rinhlelhna ti belhchhah suh aw nau-i" a chhip a fawh vang vang pah chuan ka ti sup.



"A hlim hmel ralkhat ațanga i hmuh a ilo nui ve ringawt țhin hian min tina țhin alawm. Phone ațang ten a nui hmel ringawt video i kawl te i en țhin a phone hmai i chûl riak riak hmuh te hi a hreawm alawm. Hlim i phu lutuk" a rawn ti țiau a, a țah avangin a sawi hleithei lo. Thaw ham ham in ka kuah nghet zual sauh.



A sawi tawh ang khan Jane Rodingpuii hi Higher a kal lai ațang tawh in ka theih ang tawkin ka venghim tawh. In ațanga a chhuah ațanga in a a luh leh thlengin a chanchin hriat loh ka nei ngailo. A duhthusam hriat tum in ka bei a mahse ka hre hleithei lo tuna ka rin hi a ni chiah em erawh ka hrelo. Hmeichhe inthup thei ve tak hian a chak lohna a lan chhuah tir erawh kei chiahin ka hmu in ka la hre thung.



Kha hunchhung zawng khan chhete in ka kalsan lo, hmeichhe chak hmel tak anga lang leh enge dik a enge diklo pawh ngaihtuah hmasa ngailo a țawng phawng phawng țhin hmeichhe chak lohna erawh kei chiah hian ka hria!.



A mittui luan tirtu mihring pawh nilo kha ka duhtawkin ka khawih a tunah pawh a kut a la chêt hleithei lo. A mamawh țhin ka hria a a mittui a tlak changa a mamawh ka hre bawk a beisei miah lo a dawn changa mak a tih fo chhan pawh a tan engkim tihsak ka duh vang a ni. Mahse amah ka duhna ka lanchhuah tir ve na erawh thuruk a nih a ngai thung si!.



Mahse amah hlat ai chuan a ruka tih pawh ka thlang zawk fo zel ang! Miriami'n min ringhlel a a teddy bear awh țhin em em ka present a hming inchhu kha ka hming a ni, a hria a min zawt chiang reng bawk mahse ka insawi thiang lo chuvanga Mumbai-a min tir thla hi a ni, a rawn chhuk hma awm tura tih ka ni bawk.



Headquaters lama a thu hriat te a hrilh a nih chuan kumkhua leh chatuanin ka hmu tawh ngai dawn lo chu thil chu ka thlentir theilo bawk.



Chutiang thlen tir ai chuan dawt hmang a nun a theihtawpa amah venhima a hlimna thlen sak ka thlang zawk fo!


Show post links
Top

[Ngaia]

HEY DADDY CHAPTER - 9

Ziaktu : Mami pachuau



Miriami min hrilh ang in Agency dang dang ka dawr a a khat tawkin enge ka tih a rawn ngaihven reng bawk. Mipa mahni tawka inti pâ ve tak hi ka nun hi control tu an awm a duh lo viau țhin mah ila ka sawisel thei hauh si lo.



Amah venghim tura tih ni mah ila a hna leh engkimah ka pui vek tho a mimal nun thlengin.



"Ramsang chanchin report tur a awm em?" Laptop a Miriami weekly Schedule tur chhut luh mawlh mawlh pah chuan phone ka hmang a.



"Tunah chuan a țhiannu dawrah khan an la awm dawrtu an nei ve nuala an la buai ve ang reng"



"Kha mihring kha ala awm em?" Ka ti leh nghut.



"An chhuahna a rei tawh mahsela an chhuah dawn khan Jane-i bulah chuan eng emaw chu a hrilh ni tur a ni ka awmna a hlat avangin an sawi ka hre theilo" a rawn tih chuan ka thaw ham ham "vawiina a hun hman dan tur engmah ka hrelo a ngaihven zual rawh aw" ka ti sup.



"Ve teh mial che chuan min hrilh lawk lo kha ka lo ti reng a" a rawn ti ve a.



"Ngaihven la ni mai biak theihin awm reng la, ka dah dawn ania thil țhalo thleng a awm chuan lo sawi vat la" tiin off turin ka hrilh bawk. Nidangah chuan a thil tihtur a zawng zawng hre țhin lo mah ila a chhungte leh amah a a awm a a sawi țhin avangin a hun hman dan tur țhenkhat ka hre țhin.



Mahse tun țumah chuan engmah hre hman lo in ka awm a alo intipalh ang tih ka hlau hle bawk.



Ka room chhunga eitur chawi chunga rawn lut chuan zanriah ei a hun tawh a ni tih min hriattir ve chauh a tunge a nih ka hriat avangin ka lo chhâwn lem lo "dawhkana hi ka dah ania a daih hma hian ei vat rawh" a tih chuan ka bu nghut.



"Ka nu in biak che a rawn tum a phone ila theilo a tinge?" Ka dawhkan hmaa rawn din pah in a rawn ti a ka phone chu ka ban zawk. Ka hmet êng a "missed call ava awm silo ve, pawilo keiman kan call lêt ang e" tiin ka nu number chu ka hmetchhuak a.



"Ka chhuak ania lo ei vat ang che" ka chhang lem lo.



Phone chu ka bengah ka nghat a ka hna avangin ka chhungte tan hun ka neilo, ka nau te Hostel awm pawh ka zin chhoh changin ka tlawh țhin a Saturday apiang hi chuan hûnawl erawh insiam ka tum ve fo țhin.



"E Bawiha" ka call an lak ruala aw ri ka hriat chuan nu thlazar hnuaia awm min chak tir zual sauh "min lo call em ni Aruati khan a sawi a missed call ka hmu leh bawk silo a" ka ti sup.



"Vawihnih vel chu kan rawn call hman ang che ka ring i buai a nih ka ring deuh a thil pawimawh han sawipui che kan duh deuh hlek mawle i buai loh chuan" a rawn ti a, a fapa laka a inthlahrung fo țhin mai hi bansan se ka duh.



"Ka buailo nu, sawi rawh ka ngaithla e" ka ti sup.



"Aw nia, i nau te hi board te han exam zo se hna kan thawhtir mai dawn mi ka ti deuh an hautak si a i pa heti mai hi a ni si a insên ala ngai nasa dawn si ka hlawh ve hi chuan engmah han tih theih a nei tak tak si lo" inthlahrun hmel zet hian a rawn ti a thaw ham ham in laptop chu khup in phone chu ka bengah ka nghat a.



"A țullo nu, an mahni tawkah zir chhuah tum in zirna sang zawk pan zel an duh ve a. An duhthusam ni thei tura an beihna kawng a puitu țha kan nih chuan a tawk lutuk! I fate hi i rin ang aiin an puitling ang nu, an mamawh zawng zawng chu ka rawn tum vek ang i rilru lo ti hah duh suh chuan ka pa enge a an?" Ka tih zawm a.



Ka tho chhuak a sofa lam chu ka pan phei a.



"Vawiinah hna kal suh ka ti mawlh mawlh a hei a kal lui a tlai lamah chuan 'chulai chu a nâ' a rawn tih leh tawh hi. I hlawh zawng zawng helamah i rawn thawn chho a chan nei mang lo a i awm kha a ngai ngam lo a" a rawn ti leh, ka pa țhin hi!.



"Ka hlawh zawng zawng ka rawn thawn hian pawi tihna ka neilo nu, engatinge ka pa nen hian in in thlahrun teivet țhin a! Ti tawh lo teh u, in fapa lakah hian inthlahrung suh u mamawh in neih chuan lo sawi ula ka nau te thlengin ka tih theih a nih chuan ka ti ang tih hreh engmah ka neilo" ka lungawi lo lutuk chuan thinrim ru țeuh in ka chhang let a.



"Ka hria alawm, keini avangin i nun pawh duh ang in i hmang ve theilo a i nun hremhmunah kan chantir a hreawm kan tih a reh theilo a nih hi"



"Hreawm tih a ngai reng reng lo nu, ka duhthu a he hna hi thlang ka ni nangmahni in tel ve lo chuvang chuan ka pa nen khan inthiamlo tawh reng reng suh u chu chu ka duh, in ti ang tiraw?" Ka ti leh a min chhang lo, rei fê a ngawih hnuah ka pa tuilum a hrûk a ngaih thu min hrilh in chaw ei țha turin min hrilh bawk a kan inbiakna kan titawp nghal bawk.



Ka duhthu a he hna hi thlang ka ni, inchhuanna lam a ni lo ka hlawh hi private company a thawk tam tak aia letin a tam zawk. A zat ve aia tam khi lamah ka thawn chho vek țhin a tlem la bang chu ka mamawh ang ang lei nan ka hmang a a dang erawh ka dah țha țhin thung. Damloh leh thil thleng palh thulh a inven nan tiin ka la dah țha ngar ngar bawk.



Dan ngai te in Laptop hmaah ka țhu leh tawh a Ramsanga hnen ațanga report ka dawng har tawh lutuk chu a khât tawkin ka phone ka melh leh chhen țhin, ka thil tih ah ka rilru pawh ka pe hleithei der lo.



Thaw hawk in ka țhutna nghenchhan chu ka ngheng dawt! Ka phone chu ban in ka hmêt êng a Gallery-ah Jane-i thlalak leh a video ka neih țhenkhat chu ka en bawk. Ka gallery ah hian ka chhungte thlalak leh video țhenkhat tih loh chu he hmeichhia Jane-i hian a luahkhat vek a dang engmah a awm lo.



Dawr chhunga hlim hmel taka a nui lai video chu ka play nawn reng a ka play laklawh lai te chuan pause in ka lo en leh vung vung țhin.



Theih se mipa dangin an tih angin amah ka ngaihven a ka duh tih hi mi zawng zawng hmaah pawh sawichhuah vek ka duh mahse ka duhna ka tihlan ve a thiang lo a thuruk a nih a ngai tlat si.



A chang chuan ka insûm zo lo teuh kher țhin.



A video ka en laia call rawn lut chu a rang a rang in ka chhang a "engvanga chanchin rawn sawi har em em inih?" Ka ti nghal nghut lehlam ațang chuan thawm ring zet a rawn chhuak bawk a.



"Ka hawisawn hlan in an lo kalbo hman a ka zawn hrep hnuah ka hmu chauh alawm, a landan chuan zui ru tu kan awm tih a ringhlel aniang hnunglam a hawi deuh chhen țhin a" a sawi zo chu ka sam ka tuai chho pâwk!.



"Engatinge i fimkhur loh em em theih a hriattir reng reng suh ka sawi chu i hrethiam em?" Ka au ti tih.



"I awm loh chuan kan tan a buaithlak lutuk, a harh si" a tih chuan ka nui leh lawi.



A sawi dik chiah, naupang ang maiin ala khawsa "tunah khawnge i awm?" Ka ti a, ka țhutna ațang chuan ka tho chhuak a tukverh lam chu ka pan phei a "a țhiante ho dinner ei naah ka awm ve luh ruk ala har em em mai lehnghal" a rawn tih zawm a.



A hmel ka hmu chak lutuk hi sawi ngaihna ka hrelo, darthlalang ah chuan kut nghat in ka kut chu ka hûm ruh nghek!.



"Tunah enge a tih? Engtin nge a awm?"



"Eng emaw a sawi mek thil a sawi pah in a phone a khât tawkin a en leh țhin bawk a chân a nei a ni maithei" a tih te chuan Mizoram lam a let lehnghal rum rum te min chawh hial thei.



"I sana emaw i glass vuah a camera ka dah hmang khan a chevel lo record la min lo thawn ang che, a chiang em? Chumi i tih zawh chuan i haw thei ang" ka ti a, a tih nghal tur thu sawiin call a ti tawp zui bawk.



A thil record a rawn thawn hun nghak chuan ka Laptop ka bih leh zeuh țhin a lehlam ah Laptop ah tho Miriami weekly Schedule ka chhu lut mawlh mawlh a ka chhu sual nasa thei kher lehnghal.



Ka phone rawn vibrate chu hun lo ti zet in ka en a Miriami call alo ni.



"Hello" call ka chhan rual chuan ka ti nghal a.



"Aw... ka call dik e" ka rin loh zawk aw a rawn rik chhuah avang chuan phone chu ka bengah ka nawr na zual sauh "Eddie-a ini chiang tiraw?" Nâwi zet hian a rawn ti leh a a nui zui hak hak.



He hmeichhia hi a rui ve reuh amaw ni.



"Ka ni alawm" ka ti sup, lehlam ami chu a irh fiak awk a a awmna zawh duh viau mah ila Miriami phone a hmang a nih chuan an awmdun ngei ka ring. Lawk! Mahse nichin lawk khan dinner an ei chuan tunah a rui maw?.



"Khawnge tunah khan i awm?" Min chhan hma hma chuan ka ti lehnghal a, a irhfiak zui leh awk!.



"Jane..." min chhan loh avang bawk chuan ka ti leh, ka hrelo tih in min chhang hlek suh se.



"Hotel-ah ka awm, ka birthday lawm pah ni fâwm in kan țhianho in chaw kan ei chhuak" tiin țha deuhin min chhang a, dik taka min chhan avang chuan ka thaw ham ham Mahse.



"Chuan i rui a!" Ka ti a, ka lung a awilo hle nghe nghe.



"Umm... ka țhian ten min in tir alawm. Hrim hrim in enge Mumbai-ah ilo chhuk daih a dinner eina turah pawh F-a mak deuh a khan min thlah phah nangmah i awm lo a" a rawn ti nui nui. A ruih laia a a sawi ni mahse ka lawm tho tho.



"Ka thlah che i duh tihna mi?" Nui suk chung hian ka ti a, a rawn thaw ham ham a a hnuah a irhfiak zui leh awk! Zu a in ngai miah lo a vawikhat ruihna a ni hial chuan buaina a tawh ka hlau in buaipui ka chak hle bawk.



"Duh ang chu, nang te hi... ka hriatna che ala rei loh nen ka ngaina nghal der che a a mak tawp chuan maw... ka u phone ka lo hman ruk sak a i number ka nei silo a, hehe khawvel hi chu a nuam e..." nui hek hek chungin a rawn ti ham ham kei pawh ka nui ve suk.



"Min ngai tihna a ni em?" Ka ti a, min chhanna ka nghah lai chuan a ni a ngawi vung vung.



"Jane.." ka ti leh sup.



"Ka ngai che maw? A ni dawn mi? Ka ngaih che pawh ka hrelo e a mahse i awm lo tih ka hriat khan ka helai tak hi a khawhar ru reuh tawp a a țhing tawp" a tawp lam chu a nui leh ti tih.



"Ka ngai lutuk thung che" ka tih chuan a reh leh vang vang, a irhfiak leh awk țhin bawk! "I ninawm... lo chho tawh rawh naktukah chhuah ka ngai dawn a thlah ka ngai dawn nangma thlah chiah ka duh" pangchang aw zet hian a rawn ti a, ka duat chakna a ti pung leh ta bawk.



"Min ngai em sawi phawt la" ka ti ta zawk..



"Na..." a rawn ti vak, ka nui hawk!.



"Sawi phawt la" ka ti leh sup.



"Ka hrethiam lo, ka ngai tho che chuan ka hria a mahse ka hrelo ka ngai..." a sawi zawh hma hma chuan "tunge ilo biak a i ruih nen nen" ti ri in a zawm a phat rual loh in Miriam-i a ni tih ka hre thei.



Hrep tak hian!.



"Eddie-a maw ilo biak? Eddie!" Vîn zet hian a rawn tih zawm a.



"I rawn call nge ka nau hian a rawn call che, nilo a ni rui hi chuan a rawn call tawp lovang che nangma mi rawn call zawk?" A rawn ti nawn leh.



"Ka rawn call che a i Schedule hi tihdanglam tur a awm avangin chuan i nau in alo chhang a nih kha" ka tih rual chuan a thaw ham ham.


Show post links
Top

[Ngaia]

HEY DADDY CHAPTER - 10

Ziaktu : Mami pachuau



"Eng lai nge tih danglam ngai awm a?" A rawn ti ta zawk a, Jane-i rui tih hriat zeta alo țawng bah ve nawk nawk chu ka hre deuh ruai ruai bawk a ka hun tawn a khirh viau e ti lo chuan ka nui leh suk țhin.



"Tunkarah rawn chhuk i tum bawk si nen meeting neih kha i hman hmel si loh a kar leh lamah kan sawn mai dawn mi?" Ka ti a, amah ka biak huna hrilh ka tum tho a nih avangin a remchang ang reng hlauh zawk.



"Ni e kha kha, ka lo ngaihtuah miah lo a sawn kha a pawilo zawk ang bakah thleng thla chiah mah la zanin hian lo chho leh lawk la ka duh" a thusawi avang chuan phone chu ka beng ah ka nawr na zual sauh.



"Thil thleng a awm em ni?" A hmaa ka tih țhin dan ang bawka țawngkam pangngai in ka ti leh, mahse ka phur lutuk thung.



"Awm chu a ni deuh a lo thleng phawt la ka hrilh dawn che nia, bakah hrem lo che in thu zawt fiah zawk che ila a țha ang. Sanjay-a te zaninah lo chhoh an tum a ka hrilh tawh a rawn zui chho ve mai rawh an awmna chu i hriat kha" a ti leh a, an mahni ka biak tur thu ka hrilh a.



Thaw hawk in phone chu ka off bawk. Muangchang lo in Sanjay-a te chu ka call nghala an in tihfel mek thu an lo sawi a kei pawh an hnen ka thlen vat tur thu hrilhin Aruati ka ko lut a ka mamawh ang zawng zawng lo pack turin ka hrilh bawk.



Zawhna min zawt char char a mahse ka chhanna erawh a ngai hlir "ka ngaih em em duat turin ka chho dawn" tih zawng, ka sawi zawng ringawt pawn ka phur zia a lang chhuak in ka ring, zaninah ka thleng hman lo a nih pawn a muhil lai thlir tur tal chuan ka thleng hman êm ang chu.



Mizoram kan thleng tawh, khua ala var lo a mahse bazar leh kawngsir vela țhu tur erawh chu an in pho chhuak sang sang tawh thung. In lamah pawh tlang lem lo in Jane-i te in lam ka pan nghal a tih tak êm ah chuan ka chhoh tur thu ka chhungte ka hrilh miah lo.



Jane-i room zawnah ka ding vâng a, a tih dan ngai te bawk in a tukverh tereuhtê chu boruak luh nan tiin alo hawng leh tawh a, a chhungte pawn khar turin an ti fo a mahse a duh tlat lo kha ania.



Ka tihdan ngai te bawk in theihai kungah chuan ka lawn leh a uaina tur ka siam ka phelh tawh chu vêt kual leh in thawm dîm thei ang berin ka uai phei a tukverh ah chuan ka ke hlang lut hmasa in ka in hnawh lut zâl zâl bawk.



A room chu alo thim leh vek tawh a, a thosilen zar phui loh kar ațanga a che sat sat chu ka en reng, thawm dîm zetin ka pan phei a thosilen chu ka keu hawng a amah ka hmuh rual chuan ka thaw chhuak hawk!.



Khu lama a awm lai leh helama a awm laia a mu lai thlir hi ka tih fo dan a ni a, a muhil hmel țhat zia pawh kei chiah hian ka la hmu in ka ring chutiang chiahin a tho hlim hmel pawh a sexy tel bawk, a night dress nena a awmdan hmuh phei chuan en nin a har ngawih ngawih.



Khum bul dawhkan tê a plastic desk light a dah chu ka hmet êng a a mah chu a chhun pha chiah chiah . A khumah chuan muangchangin ka țhu thla a a sam hnawk niai in a hmai a zar chu hui sawn sak in ka siam rem sak a a hmel fai vang chu en in ka thaw ham ham.



"Vanramah tal chuan ka ta ni ve rawh aw" a biang chûl heuh heuh pah chuan ka ti a, kunhniam in a chalah chuan ka fawh sak vang vang a amah lah chu wine rim ala nam chêk chêk zui lehnghal "i rui hmel ka hmuh chak ang bawk in ka buaipui chak bawk che" ti leh sup in a biangah chuan ka fawhsak leh a.



Awm hrang mai lo chuan hnai sêt sâwt ah chuan a hmel chu ka en reng a a biang chu ka chûl sak heuh heuh bawk. Thlanmuala ka hruai țum a a hmui fawh nuam zet a hriat hma hauh a fawh nuam zet a ni tih ka chian tawh ka tawh khan min hnar loh zia ka hre tawh mahse beiseina ka la insiam ngam chuang hauh lo.



He hmeichhe rilru hi a kum a kum zui tawh mah ila tun thlengin hriatthiam har ka la ti țhin lutuk takzet!. A inthup theih mai bakah thil reng reng pawh a insûm theih loh tawp khâwk ah lo chuan a lan chhuah tir ve mai mai ngai lo a, kha teddy bear ka present pawh kha a chhung ten a duh tih an hre miah lo!. Nilo! A u mipa tih loh kha chuan.



A class banah inhlawh in a thawh chhuah hmang a lei ve a tum țang țang a khami ka hriat khan eng khaw sawi set set lovin ka lei sak nghal tawp bawk. A thil duh pawh a tâwp khâwk a nih loh chuan mi a hriattir mai mai ngailo tih ka hria, ka hriat chuan tawk ka ti viau bawk.



Hnai zeta a hmel ka en lai chuan a che sat sat a a hâm bai bai bawk a a harh dawn amaw ka ti chu a biang ka dawmna ka kut chu kuah in a saisir zui leh hmak a thaw nghal siai siai a ka nui chhuak hawk!.



"Mangchhe reuh si khum ațanga i tlak tawp zan khan min tibuai viau a nih kha tiraw?" Ti sup in a biangah chuan ka fawp vang vang, a room pawn lam ațanga a nu au lung lung ka hriat takah chuan ka sana bun chu ka melh vut zing dar 5 a ri dawn thuak!.



"Ka tih leh ngei a ngai dawn a nih hmel" ti nghut in ka kut a kuah beh chu muangchangin ka la chhuak a ala harh miah lo lehnghal, a mu thei reuh zêk!



Light chu off sak zung zung in chhuar an siam phênah chuan ka tawlh lut zui nghal a ka rin lawk ang chiahin a nu chu room chhungah rawn lut in tukverh alo hawn chu a rawn khar sak hmak bawk. A room a thim a ka thawmhnaw hak a thim bawk nen min hmu lutuk thei hauh lo ang.



Eng emaw a tih sak zung zung a a chhuak tih ka hriat rual chuan kei pawh ka bihrukna ațang chuan ka chhuak phei ve nghal a a thosilen zar chu alo dah kian sak vek a puan pawh alo sin țhat tir ni tur a ni.



Mqhse, rei awm thei ka ni tawh lo khawvar chian hnua ka chhuak a nih chuan midang in min hmu dawn a chumi hma chuan ka chhuah ngei ngei a ngai.



Jane-i bawk chu ka pan phei leh a khatih hun chhung lek khan alo zangthal leh hman tawh a nih chu! Kun hniamin a bek ah ve ve chuan ka dawm sak a a chal ah fawh sak vang vang in a hnarah chuan fawp thla zelin a hmui zâwnah chuan ka chawl deuh dat!.



"Engtikah nge ka tawh leh theih ang ka hrelo a, i ruih lai chauh ni mahse nizana i thusawi khan min tih hlim zia i hrethiam pha lovang" ka ti sup, a chal ah chuan chal nghat in ka thaw ham ham a "chuan i duh ang ngeiin vawiinah chuan chuan ka thlah ang che keimah ngeiin" ti sup in a hmui fawh nuam zetah chuan ka fawp zui nghal vang vang a.



A rim nu chêk wine rim nena inpawlh chuan min zem chiai chiai a a hmui hnuai ka peh rual chuan seh sak zeuh in ka rûm chhuak hawk! Muhil mahse chintâwk neih a har țhin takzet!.



"Ka duh che" ti sup in a biangah chuan ka fawh sak leh a tho kâng riai riai in ka tawlh hnung dat a rei fê a muhil lai hmel chu thlir leh te te phawt in tukverh lam chu ka pan phei a midangin min hmuh hlau zetin ka chhuak zui bawk.



A mutthilh lai chauh a ka duh zia sawi ve bak tih theih ka nei meuh lo a a harhfîm lai ngeia sawi a a beng ngeiin hria se ka duh zia lah tuman min hriatthiam pui hauh lo.



Kan in lam ka pan phei a ka nu leh ka pa an lo tho tawh! Min hmu chu mak an ti ang reng viau a mahse ka hrilhfiah hnuah chuan inbual tura min hrilh in tlem a zawng tal mut tum leh turin min ti bawk.



Ka intleuh fai hnu chuan ka room lam ka pan a awm rei dawnlo mah ila matei te va tlawh hram ka duh mamawh an nei leh tawh ngei ang. School neitupa ka țhianpa a ni bawk a ka dil leh tlauh tlauh mai aniang chu.



☆ Jane Rodingpuii POV ☆

Lu na bur in ka tho chhuak a nizana an thil min in tir avang mai mai khan ka meng fiah lawk theilo lehnghal. Ka piancham a nih manah ka duh lo chung min han in luih tir ngei hlawm ah! Ka awmdan kha mumal pawn ka hre tawh lo.



Ka mit chu ka nuai nak nak a, ka room parda pawh ka nu in alo hlim chho leh vek tawh. Ka rim chu duh lo zetin khum ațang chuan ka chhuk a towel chu ban zawkin bathroom ah chuan ka lut tlang zui nghal daih bawk.



Nizan khan ka u ka ko ngei tih chu ka hria phone ah mi biak pawh ka nei a ni mahse a hnu leh engmah ka hrechhuak hleithei tawh der lo lehnghal. Pawilo, vawiinah tihtur ka neilo Nghakdâki dawrah ka kal anga ka zawt fiah mai ang.



Ka in tifai zung zung a kawrfual ka khup thleng vel chu ha in inhnuaiah ka tlan thla a dar 9 a pel daih tawh ka pa phei chu hna a kal tawh anga ka nu erawh ala awm maithei chuan ka u pawh.



Choka ah chuan ka lut a ka nu alo la awm "ngatinge min kaih thawh loh?" Ka tih chuan ka aw hria in a rawn hawi let a "i tho thei maw? I pa in kaih thawh che tum in a bei a a hlawhchham țhak ni tur a ni" a rawn ti a, fridge ațangin bawnghnute ka la chhuak a no ah chuan ka thli a.



"Wine min in tir khanglang a nih kha tunah te hian ka lu ala ni bûk mai" bawnghnute in khawlh pah chuan ka ti a "vawikhat mah i room tukverh khi hawng chungin mu tawh suh, theihai kung nen a inhnaih si mi an rawn lut thei reng kalh ziah tawh rawh" a rawn ti leh a, a zing tin tihdan ziah mahse ka kalh ngai chuang lo reng reng.



"Khawnge ka u? A chhuak tawh mi?" Ka ti daih.



"Chhuak lo, huan lamah Eddie-a nen an inbe lawk a nih kha" ka nu thusawi avang mai mai chuan ka bawnghnute in ka hâk ringawt! Ka khuh kharh kharh a ka hnungah chuan a rawn chûm zui dat dat a "fimkhur ve rawh" a rawn tih zawm zat.



Eddie-a alo chho maw mahse niminah a chhuk sia engtin nge alo chhoh lehnghal theih zawk?



"Nu.... niminah khu lamah a chhuk a ni lawm ni?" Ka ti hû.



"Nizanah i u in a ko chho leh alawm, i u rawn call na lamah i rui in a call ilo chhang pek a ni maw..." a tih chuan ka meng kâwk! "Enga!?" Ka ti nghek!.



Tu call maw ka lo chhan a!?



"A mak vak vak țhin emai i u te pawn chaw an la eilo nghak mai rawh ka kal a hun dawn chawhmeh ti lum ula in ei mai dawn nia" a apron awrh phelh a tum rual chuan a banah ka va vuan a "nu... nizanah chuan eng chiah maw thleng?" Tiin ka zawt a.



"I u lo zawt chiang mai rawh ka hrechiang bik lo ka tlai dawn bungrua alo thleng dawn a ka hmanhmawh" a ti zung zung a, a apron hak chu a bang a choka ațang ala chhuak daih zui.



Nizan khan biak ka nei ngei tih chu ka hria mahse kan hrechhuak zo lo tlat pek a! Ka nu sawi ang khan Eddie-a a nih vaih chuan ka chhe vek a ni mai hmuh pawh ka hmu ngam dawn ami.



Mai mai sala!.



Ka room lamah ka tlan chho a ka phone ka check ve ringawt mahse a number ka nei tawp si lo. Huan lam lan theihna lam tukverh chu ka pan a tlem hawng in huan lam chu ka en thla a ka nu sawi ang tak tak in Eddie-a leh ka u chu thutak tih hriat ngawih ngawih hian an lo in be mek a.



Rang zeta tukverh chu khar in ka ngheng a ka âwm chu dawm in ka thaw ham ham, ka lungphu a rang leh tawh nia. Mak sak tak maiin a awmlo tih ka hriat khan ka âwm chhung hi a khawhar ru reuh lutuk a a chhan kha ka hrethiam lo țep a mahse a hnuah ka fiah leh uar uar thung.



F-a'n dinner eina tur hmun a min thlah ringawt te kha ka ngai thiam lo ringawt a Eddie-a khan min thlah lo kha ka lungawi lo a ni mah zawk.



Tianga ka awm avang hian amah ka duh ti dawn ila ka duh pawn ka hre si lo mahse khatiang khan ka awm âwm tawp bik si lo a ka hrethiam lo ka awmdan hi! Nizanah ka lo be leh lek lek a nih phei chuan enge ka sawi ka hrechhuak thei bik si lo.



Ka âwmchhung a khawhar tih te kha ka hrilh reu reu ang e a chi viau loh ang.



Tukverh chu hawng in ka en thla leh de de a ka en reng lai chuan a rawn hawi chho ta thut mai, kan mit chu a intawng nghal siah a min enna a mit la sawn miah lo in a țawng reng a kei pawh chuan ka la sawn bik chuang lo.



He mihring hi ka duh ni ta berin ka hria, amah hi ka thlahlel ru in ka hre bawk!.


Show post links
Top

[Ngaia]

HEY DADDY CHAPTER - 11

Ziaktu : Mami pachuau



Zah zelah nuih tawi tak ringawt a tukverh chu ka khar țhêm țhêm a kalh sawk sawk in ka inher a khum lam ka pan phei nal nal. Ka rilru tih thawven tum in ka phone ka charge chu ka ban a whatsapp-ah te lut in ka țhiante message chu ka chhang a mahse tukverh lam bawk ka mit sir hman zel tho nia.



Khumah chuan mu thla dawt in ka thaw chhuak vak! Tiang hian awm lo teh ang, khu lama ka chhuk a hun țep tawh! Ka ngaihtuahna ațanga ka tih reh vat loh chuan khu lamah lehkha ka zir thei leh dawn lo tawp mai.



Ka sam tla hnawk niai chu la khawm mawlh mawlh in ka chhipah ka bawk tawm a inhnuai lamah chhuk thla in choka lamah ka lut phei a chawhmeh ala sat avang chuan ka ei tur ka in siam mawlh mawlh a an duh leh an inbiak zawh ah ei ve mai rawh se va tihbuai ka ngam teuh lo.



Online pah in chaw ka ei a Malsawmdawngkimi chhuah pui turin ka sawm a ala hman lo khanglang lehnghal, ka țhian dangte hi chu hna an thawk țhup tawh a an hman ka ring lo hlawm.



Ka chaw ei na ti fel sawk sawk in insiam turin ka chho a pangngai zeta inchei in ka bag siam țhat mawlh mawlh pah in inhnuaiah chuan ka chhuk leh a ka chhuak tur chu ka u te rawn lut tur nen kan intawk chat!.



"I chhuak dawn mi? Chaw i ei tawh em?" Ka u chuan a rawn ti nghal vat a, naktuk ah a chhuk tawh dawn a a intibuai lutuk hi ka ngei zo vek tawh.



"Umm.. ei tawh, chawhmeh kha ti lum ula ei va mai ru ka hmanhmawh ka kal dawn" ti a ka chhuak tur chu min au ding leh "engin nge i kal dawn?" A rawn ti leh a, ka inher leh.



"Taxi in ka kal ang chu ka lo ti" ka sawi zawh rual chuan ka țhen zui sak a, a phal leh dawnlo tih ka hre chiang khawp!.



"A ngailo, Eddie-a a awm remchang tho a ava thlah ang che, Eddie va thlah lawk la chaw i ei tawh em?" Ka u chuan a tih zawm leh, heiham... țul miah lo in lum ka ti leh ringawt tawh mai ka thin a phu rang bawk.



"Ei tawh e" Eddie-a chuan a ti sup a, a aw ka hriat rual chuan ka maimichhing sawk thei! Ka chhunglam hian a lo hre rang lutuk ringawt ka awmdan hi ka duh lo!.



"Ok... Jane va inthlah tir rawh taxi-a kal ai in chuan i rawn haw dawnah min rawn hrilh la ka rawn hruai tir leh ang che" a ti leh a, hnial in awmzia a nei dawnlo tih ka hriatchian êm avangin ka bu ta nghat a pawnah chuan ka chhuak zui nghal daih bawk.



Zêp loh chuan niminah pawh khan ama thlah kha ka duh a nizan thleng pawh khan ka la duh reng a a chhan ka hrelo takzet!. Tunah ka duh ang ngeiin min thlah dawn a mahse ka huphurh ka taksa an khur a ka thin lah a awm hle hle thei lo.



Ngaihzawng emaw duh ka nei ngai em em lo mahse ka neih tawh vek vek chuan ka inthunun thei ngai miah lo thung. Min duh ve tih ka hriat lek lek phei chuan va biak hmasak pawh pawi ka ti ngai miah lo, zah theih loh chhuah pawh pawi ka ti ngailo a chhan chu ka vei țhin êm a ni mahse mi pathum chiah an la awm, pakhat chu Sanga kha ania, pakhat leh chu nikum hmasa khan a boral tawh a, a pakhat leh chu he mihring hi a ni dawn tih ka hrechiang lutuk tlat!.



"Min lo zui la" ti sup ri ka hriat rual chuan ka thaw chhuak ham ham, ka awmdan tih pangngai luih tum hram hram in a dinna lam chu ka en phei a min lo en ngur a ka nuih lui a "min thlah lo mai la taxi-a kal ka duh zawk a" ka ti a.



Ka ti tak tak bawk, hetiang reng reng a motor khat a kan chuang dun a nih chuan awmdan tur ka thiam dawn lo chiang lutuk!.



Rûm nghutin ka ban rêk ah chuan a rawn vuan ve ringawt amah ka en kâwk rual chuan min kai sawn nghal a "i kâ chauhin hnial mah la i mitmeng khan a duh lo" kal pah reng chung chuan a rawn ti sup, hnial buai pawh ka tum lo ka ban rêk a vawnna en pah chuan in ka thaw ham ham a.



A sawi dik chat!. Ka kâ in a sawi mahse a dang hian an duh ve lo.



Garage chhungah kan lut țep tih ah chuan "Chuan..." ti sup in a ding dat, ka din ve dat rual chuan ka beisei loh lutuk in min rawn hnaih chilh a amah ka en chhoh rual chuan ka kawngah a kut rawn rawlh lut in ka chal a rawn si a ka âng phâm a ka kâ ah hian boruak an leng lo țep.



"I thil tih hi...!" Ka sawi zo hleithei lo kan in awm hnaih lutuk avang hian ka awmdan a pangngai miah lo "reilotê...." a aw zâwi lutuk avang chuan mit ka chhing sawk thei! A rik chhuah dan kha a sexy lutuk takzet!.



Ka sawi tawh em ka hrelo, inngaihzawnna thil velah hian ka junior hauh lo heng thil vel hi chu ka paltlang hnem ve tawh lutuk dan in awmzia a neilo tih ka hrechiang na ngang!.



"Awmsawn rawh..." maimichhing reng chung chuan ka ti chhuak sep, ka kawng a hmerna chu a ti na zual ting a ka thâwk ka hîp lêt kâwk thei mai ka taksa in a dawnsawn dan a dang hneh lutuk emai.



"A harsa lutuk... ka theiin ka ring lo tum chhin pawh ka duh bawk hek lo" mi â ang maiin a phun sup sup mai.



Tal hran ka tum rual chuan min chêtpui awk in garage chhungah chuan min nawr lut a bangah min nawr bet rawk in ka hmaah chuan a ding thim ta khup mai.



"Engthil nge maw i tih le, awmsawn teh" ka awmdan thup tum zet hian ka ti a, mahse a mitah tak pawh ka la en ngam chuang lo "ka mitah min en teh" a rawn ti sup, ka sam karah a kutțang a rawn rawlh lut a ka hmui hnuai ka pet ringawt.



"Khawngaihin Jane.." a rawn ti zâwi sup!.



"Engvangin? Engvangin nge i mitah chuan ka en ang? Awmsawn zawk rawh" kûn ngal in ka ti a, rûm nghut in ka sam a țhâmna chu a ti nghet zual sauh mai "ka mitah min en phawt teh Jane" a rawn ti leh.



"Khawngaihin" a rawn tih leh takah chuan thaw ham ham in ka dâk chhuak a amah ka en rual chuan kan mit a in tawng chat! A mitmeng chu ka hrethiam lo chutiang chiahin tuna kan awmdan thut hi ka hrethiam lo dan tumna ka nei bawk hek lo.



"Ka duh che" a tih sup rual chuan ka meng kâwk! A ni erawh a thutak lutuk "ka duh che Jane" a rawn ti nawn leh mak ka tih lutuk avang chuan amah chu ka melh ngawt ngawt a ni erawh a thaw ham ham.



"Mak tih hmel deuh khan min en lo teh" lungawi lo tih hriat ngawih ngawih hian a rawn ti nghut. He pa hian min duh thu min hrilh zo chiah a engtin nge pangngai taka ka awm theih a rin reng reng zawk?



"A mak alawm ngatinge min duh thut a?" Ka rilru a rawn lang hmasa ber ka sawi chhuak ringawt pek! Tur zet min hian rawn melh a ka thusawi kha a dawngsawng dik lo amaw ni.



"Ka duh thut lo che, ka duhna che a rei tawh mahse ka tihlan ve a rem lo mahse hun țha ka neih lai ka chuh a nih hi" rilru nat hmel zet hian a rawn ti a ka chal ah a chal rawn nghatin a thaw hrâwih! Nichina kan awm dan leh tuna kan awmdan hi a in perh san lutuk.



"I sawi awmzia ka hrethiam lo ka tlai ang kal tawh zawk ang" thu mak pui pui a sawi leh hma tiin țawng ka chuh vat a, ka thusawi chu min pawmpui ve lo tih hriat ngawih ngawih hian ka chal a rawn nawr na zual sauh.



A awmdan hian min ti hlauh rual rual in hetianga a chêt thut nachhan hi ka hrethiam lo takzet. Keimah zawk kha ka inthunun zo lo țep zawk a ni reng sia.



"Ka chhuk thlak khan engtin nge i awm?" A zawhna min zawh ka'n hriatchian mai mai zia chu! Nichina ka awmdan ah khan ka let nawk thei "kal tawh zawk ang" hrelo der luiin ka ti ngat, mahse ka hrechiang si.



"Min pehhel tum tlat lo teh khawngaihin, ka hun țha neih hi bawh pelh ka duh lo chuan ka zawhna che kha dik takin min chhansak rawh" a aw ri chhuak ațang chuan min ngen ngawih ngawih a ni mah zawk. A enge maw ka hun țha neih a tih ve ziah chu le!.



"Engtin nge ka awm vak anga engtin mah ka awm hleinem" ka sawi zo chiah ka inchhir lehnghal dâwt ka sawi chiang lutuk.



"Inthup hnehnu i harhfîm laia i kâ ngei ațanga hriat ka duh avang alawm ka zawh nawn leh che" a rawn ti nghut. Ka mitah tak min en tawh "hetiang hian ngatinge i rawn awm ve rikngawt a kal tawh ang" ka mangang țan ta lutuk chuan ka ti ringawt.



Ka inrin hma hauh in min rawn fawp a tal ka tum phat rual chuan ka banah vuanin a aia ngenngawl zawkin min fawp a ka hmui hnuai min peh sak lai chuan ka thaw chhuak hak! Dam zawkin min fawp leh a chhan let ve ka tum rual chuan min thlah daih.



"Hetianga ka awm chhan maw? Ka duh che vangin, ka duh che tih mipa dangin i hnena an sawi anga ka sawi ve chu a pawi viau em ni? Engatinge i rilru hi hriat a har em em a? A tâwpkhâwk a thlen hunah chauh em ni sawichhuah leh i tum?" A rawn ti ta tâwk mai! Amah chu ka melh ve ngat ngat a ka hmui ala sa ham ham mai.



A thil sawi awmzia hi ka hre deuh in ka hria, kei hi enge dik a enge dik lo pawh thlu lovin țawng ve phawng phawng mah ila enge ka duhzawng ni a enge ka mamawh ka sawi lang ngai hauh lo thil reng reng a tâwpkhâwk a thleng a nih loh chuan keimah a tih ka tum ngar ngar țhin.



"I mize hriatthiam har țhin lutuk hi amak ka ti, i rilru a i vei hi sawi chhuak țhin rawh! Midang hmuh a nâ anga lang duh hauh si lo midang hmuh ah chuan hmeichhe chak ang taka lan tum mahse tuma hmuh loh thim zingah a țah chang apianga a mittui hru fai ngailo tu a țah chang apianga a hmai hupna tura lukham zawng ziah țhin hmeichhe inthup hneh lutuk nih hi hreawm iti lo em ni? " ka la chhang lo amah chu ka melh ngawt ngawt a he mihring hian engtin nge ka khawsak dan ka hmaah dik lo pawh awm miah lo a a sawi theih?.



Ka țah changin ka hmai hupna tur in lukham ka mamawh țhin tih engtin nge a hriat a mi hmuh a chak taka lan ka tum tih te a hriat theih? Amak lutuk he pa hi, engtin nge ka chhungte tak ngial pawn ka țah changa ka mamawh an hriat loh he mihring hian engtin nge a hriat theih?.



"Ka țah changin lukham ka mamawh țhin tih engtin nge i hriat?" Ka aw chu a ri chhuak em pawh ka hrelo, he mihring hi ramhuai a ni hial lo maw... ka u thlan a ka kal changa ka mamawh țhin alo hriat rik ngawt chhan te kha engvang nge?



"Chhanna ka duh, chhanna min pe rawh!" Ka aw a ring hran hauh lo ang ka mangan changin ka aw hi a ri chhuak hleithei ngailo.



"Hahdam phawt teh, i aw a ri chhuak hleithei dawn lo thâwk la phawt la" a ti belh chhah turin a rawn ti leh zat nghet zeta min rawn kuah in ka tukhumah chuan a dawm a thaw chhuak turin min hrilh bawk.



A taksa chu ka rinchhan a ka țawng tawh lo hrim hrim min tih ang ang chuan ka awm mawl tawp "engtin nge ka chungchang hi i hriat em em theih a?" Ka ti thâm chêl a, a thâwk ham ham ruala ka nghawng rawn lum ve chu ka chhunglam hian alo hre rang leh lutuk.



Ka zawhna min chhang lo in min kuah reng ringawt ka chhungte pawh ka hriattir duh loh a hre vek a ka țah laia ka mamawh țhin nen lam a hre vek, ka u tih loh kha chuan ka țap lai an hmu ngai zen zen lo a an hrelo miau ang mahse he mihring thisen leh engah mah a inzawmna ka neih pui loh ka u avanga ka hmelhriat ve mai mai hian alo hriat ve theih zawk?



Ka mangan changa ka aw ri chhuak țha theilo thlengin a hre vek! Hetianga min hrechiang tu chu ka u chauh kha, ka u chauh kha ala ni. He mihring hi ka tan enge ala nih chiah dawn le a chhan ka hriat miah loh a min lo hrechiang lutuk hian amah min hlauh tir hial bawk.



Ka zawhna min chhan duh miau loh avang chuan be tawh lo in Car ah pawh chuan ka țhu ngawi reng a Nghakdâki dawr kan thlen pawn engmah sawi lo in ka chhuk hmak a ka hawilet tawh lo hrim hrim.



"Iva lo thleng har tak! Dinpuia a awm reng tawh a" a dawr chhung ka luh rual chuan pakhat lah chuan alo ti vei thawt thawt!.



"Enge alo tih ve dawn a?" Dawhkana ka bag nghah pah chuan ngaihsam zet hian ka ti a min rawn beng pawp! Mood fuh loh nâk alaiin aw.



"I rawn kal dawn leh dawn loh min zawt a i rawn kal dawn thu ka hrilh a a rawn kal ve a nih kha... lo be chhe ngawt suh ang che" a tih chuan lei ka chhuah zeuh ringawt.



Mood fuh tawh loh sa nen ka thluak chhuahsan lo tu tur ka hriatchian ang bawk in ka țhiante lo chu midang hmachhawn ka peih rih lo ka inhnial pui hrep duh mai ang.



Nghakdâki sawi ang in Dinpuia pawh a rawn lang vat reng a ka be chhe chuang lo mahse ka țawng dan vel ațang chuan thil ka sawi tam peih vak lo tih a hre ve tho ang.



"Jane.. inhnuaiah parcel a awm a min lo lak lawk ka hming alo inziak mai ang" Nghaki chuan a rawn ti a Dinpuia chuan min kalpui tur thu a rawn sawi vat a ka hnial hranpa lo Nghakdâki store room hi ka hlau miau a tin ni.



Step-ah chuan ka chhuk thla hmasa a "fimkhur la aw" Dinpuia'n a rawn tih chuan ka bu nghat a chhuat ka rap țep tih ah chuan ka rahna lai tak a ri țhawt zui a ka au țhat rual chuan ka tla nghal chu a ni mai.



Chhuata ka țhu sawp niai chu Dinpuia chuan min rawn buaipui vat "i țha em i khawilai nge na?" A rawn ti vat a țawng lo in ka ke rêk chu ka kâwk a a na lutuk chu ka mittui a tling pam thei.



"I ulh a nih hi... ava hunlo mai mai tak!" A ti zui hluk a, tihchêt a tum rual chuan a nat zel avangin a ban bulah chuan ka hmer tâwk a "enge thleng?" Nghaki chuan kan thawm hria in a rawn ti vat.



"Step hi alo mawih deuh tawh a a tla a a ke a ulh a" tiin Dinpuia chuan alo chhang ta vat.



"Avan zialo tak helai kawngkhar hi ka rawn hawng anga in lo chhuak mai dawn nia naktukah entir a ngai dawn nih kha" Nghaki chuan a ti ta zung zung kei erawh chu ka mittui ka bianga a luan thlak ka hlauh lutuk avang chuan ka vanvadâk ta ngar ngar.



"Ka pawm mai ang che aw pawi itih loh chuan" Dinpuia chuan min ngaichang zet hian a rawn ti a ka lo bu ve nghat. Ke ulh hi a hreawm teh hrep asin mawle.



Inchungah min pawm chho a damdawiin kal an ti tlat a mahse ka duh tlat lo ina haw ka duh zawk thu ka hrilh a ka u kan phone ta ringawt bawk a Eddie-a a rawn kal mek thu min hrilh bawk.



Ke na chung nena khapa hmachhawn kha duh lo viau mah ila tih theih dang ka nei tawp si lo a rawn thlen hma min țhutpui a ka ke ka tih chêt ngam loh miau avangin a ven hian min veng deuh tawp a ni ber.



Eddie-a a rawn thleng a dawr chhung a rawn luh rual chuan țullo lutuk in ka mittui a tling leh ringawt nia ka awmdan hi ka duh teh hrep lo!.



"Damdawiin kal a duh lo tlat alawm" Nghaki chuan alo ti nang nang a Eddie-a erawh a bu nghut. A mitah pawh ka en ngam tawp lo.



"Ka pawm leh mai ang che aw" ti a Dinpuia'n min rawn pawm leh a tum rual chuan "keiman ka lo pawm zawk dawn em ni ang?" Khauh zeta rawn ti tu avang chuan Dinpuia chu a ding ngil leh riai riai a.



"A pawilo Dinpui, ka lawm lutuk ania inhnuai ațang min buaipui tawh bawk sia ka rit ve si i kawng te ka ti na palh ang" Eddie-a hmel rum ûl mit sir zawk pah chuan ka ti a, eng khaw sawi set set lo chuan ka bag vel chu a la khawm a min pawm kang ta nawlh mai.



"Nghak ka lo be mai ang che aw pawi ka ti i step ka rap chim sia, chuan Dinpui ka lawm lutuk" ka tih chuan a bu nghut!. A hamhaih viau in ka ring takzet.



"Va fimkhur hle la ni ringawt zanah ka lo tlawh ang che" Nghakdâki chuan a rawn ti a, Eddie-a'n min pawm chhhuah tawh miau avangin a thusawi ka hre mumal thei tawh lo.



Car hnunglam kawngkhar chu hawng in dîm zet hian min dah lut a "ana em?" A rawn ti sup, lu ka thing ringawt a ka ke na lam dahna tur eng emaw ala rawn la chhuak ta deuh deuh lehnghal.



Ka ke chawi a tum rual chuan ka tîm deuh châwih chu hria in min rawn awm hnaih a ka chal ah chuan a rawn fawp vang vang mai "min ring rawh ana lo ang tih ka tiam a che" ka chal dek reng chung chuan a rawn phun sup ka thaw hak a.



A sawi ang tak tak in dîmte in a rawn chawi a ka lo țang țûng a ana zawk tih loh chu na dang a awm lo, thil dûp zetah chuan min nghah sak a "ka sawi kha, i taksa țang țûng kha thlah dul rawh" a rawn ti thâwp nghal sup bawk.



"Min hrechiang si ka hlau che" ka ti a, rûm nghutin a rawn kunhniam a a mitmeng chu a mak takzet.



"Min hlau suh aw a thleng nawn tawh lo ang" tiin a awm hrang a kawngkhar a khar rual chuan ka ruak leh ang huai reuh bawk si ka hringnun hi a hahthlak ru takzet.



"Engtia i tihnat nge?" In lam kan pan lai chuan a rawn ti a "ka rah tur step kha alo mawih deuh tawh a ka rap chiah kha a chim a ka tla thla" ka ti țha ve mai.



"Chuan khapa khan a pawm che a" a aw rik chhuah dan a ngeiawm tawk lek zui lehnghal.



"Min pawmchhuah mai loh in, ka u a awm em? Min hau nasa leh dawn si" ka tih chuan a awm loh thu in min chhang a ka thaw huai thei tak tak.



In kan thleng a min pawm chhuah a tum chu a țhulh leh "enge?" Ka ti hâ.



"Khapa kha i duh em?" A rawn ti tawl, a ngaihna hrelo zet hian ka melh a.



"Dinpuia kha maw?" Ka tih chuan a mit ko a sân ak a tun hun hi remchang lak ve hun a niin ka hria.



"Ka zawhna che dik taka min chhan dawn chuan ka hrilh ang che" ka ti let ta zawk.



"Min zawt thei ang" ka rin loh deuh a awlsam hian min chhang a ka hun ka ren duh lo law law mak ka ti tih chu in hre leh tho ang.



"Engtin nge ka țah changin lukham ka mamawh țhin tih i hriat?" Ka tih chuan ka mitah tak min rawn en a kei pawh chuan ka en ve ngar ngar a chhanna dik tak min pek ngei ka beisei bawk.


Show post links
Top

[Ngaia]

HEY DADDY CHAPTER - 12

Ziaktu : Mami pachuau



"Thil dang min zawt zawk theilo em ni?" Min en reng chung chuan a rawn ti a "aih, thildang zawh tur che ka hrelo khami kha chhanna dik tak min pek ngei ka beisei" ka ti ve leh ngat.



"I țah lai ka hmuh tawh avangin" min chhang dawn tawh lo amaw ka tih hnuah a rawn ti a "engtikah?" Ka lo ti nghal vat, min rawn awm hnaih a kei ka lo awm âwn ve zel mahse ka hmai bul chêt ah chuan a rawn awm tho.



"I u in helama chho lo tura a tih țum che a, i țah khan ka rawn let leh a ka en zui reng che avangin ka hria!" A rawn ti a, chil ka lem khalh min awm hnaih bawk si nen "khata lo kal ve kha tumah ka en lo a nangmah i tel maw?" Ka ti leh ringawt.



"Ka sawi ang chuan ka kal ve ngei a nih chu!" Min en reng chung chuan a rawn ti leh, ka hawisawn rang lutuk chu ka khabe ah dawm in amah en turin min kuai her leh a "a nih chu!" Ka ti ringawt, khami țum khan ka țap nasa lutuk ka hria kan Hostel-ah ka u lo kal in helama chho lo turin min rawn hrilh tlawng a nih kha khami țum a ka țap kha hepa hian alo hmu reng chu ania.



Ka zak leh hnu hnawh.



"Chhuak tawh ang" ka ti leh ringawt.



"Khapa i duh em?" A rawn ti nawn leh a, lu ka thing ringawt "i kâ ngeia i sawi ka hre duh" min rawn awm hnaih zual leh pah in a rawn ti a.



"Ka duh lo, ka țhian ania Higher vel kan kal laiin kan inkawm ve țhin" ka tih chuan hahdam hmel fê hian a thaw ta ham ham "a bul hnaiah khan awm tam suh aw" dam zet hian a rawn ti a ka ner nâng.



"Ka duh vanga awm tam pawh ka ni hleinem a hranpa in mi ka va hnaih thawt thawt ngailo" ka tih chuan ka chal ah a rawn fawp leh ringawt "ti ve ziah suh" ka tih chuan a nui nghawr dat a ka rin ai hepa hi alo nui duh daih mai ka hmuh tirh kha chuan nui ngailo mihring amaw kha ka tia.



Min pawm chhuak a min pawm dam ka ti mai min pawm laiin engmah nâ a awm lo min tur ut ut tih mai loh chu, kum khatah vawikhat tal ka ke hi ka ulh ngei ngei in ka hre mai




Inah chuan min luhpui a ka room panna step-a min chhoh pui lai te chuan "ka rit iti lo ami?" Inthlahrung zet hian ka ti a, ka rit a tih loh zia fiah nan min han pawm țha sauh kher a a duh chuan a chimawm thiam hi mawle.



Ka khumah min nghat a damdawi awmna vel min zawt a ka hrilh hnu chuan khum lam a rawn pan leh "ka hmet dawn ania" a rawn ti a, a â amaw tiin amah chu ka melh nghal nghek min la en miah lo zui lehnghal.



"Ka duh lo, ka nu te lo haw hun ka nghak mai ang an hmet thiam, an hmeh ka duh zawk" ka ti vat a, khumah chuan a rawn țhu thla a tawlh turin ka ke ka ti che ngam bawk si lo "hetiang lek hi chu ka buaipui ngun tawh ana lutuk lo ang" a ti dam thlup, min rawn en rual chuan ka lu ka thing nghek a.!.



"Tlem tal pawn min ring ve em em theilo em ni?" A țawng dan chu a beidawn hmel thlãwt!.



"Engtiang pawn ana lutuk dawnlo ti mah la a na lutuk țhin tho alawm mawle aw... ka hriatchian ve tawh vang tho in alawm ka sawi" ka ti ve chiam! A sam tuai chho pâwk in a thaw hawk "min en teh" a rawn ti a.



"Ka en reng che hi" ka ti ve nghat! A nui hawk mai.



"Ok.. a nih chuan ka mitah min lo en la i mit la sawn lo la" a rawn ti a, thaw ham ham in a mitah tak chuan ka en a a dam thlup a hahdam turin min hrilh zawk ni maiin ka hria "i ke i ulh hmasak ber țum kha ila hria em?" A tih chuan ka bu nghat.



"I u mipa khan a buaipui che a i țap vak vak a nih kha" a tih leh rual chuan ka bu leh nghat a "mahse engtin nge i hriat?" Ka ti let ta zawk, ka ke rawn na zawk avang chuan râk țhat in en thlak ka tum a mahse amah zawkin min kuai her in min rawn hnaih chilh lehnghal rûn.



"I mit la sawn suh ka tih kha" a rawn ti zâwi sup ka thaw ham ham a "i u in a hmeh che pawn a nat miah lo kha i u mipa ang khan min ngai la ana lutuk lo ang tih ka tiam ang che" a rawn ti a, ka chhang lo ka u anga kut dam kha ka la tawng lo a ka chhungte an nih loh chuan midang chu ka ring ngam dawn em ni?.



"Jane..." ka chhan loh avang chuan a rawn ti leh a mahse ka la chhang chuang lo.



"A vûn len hma in kan hmet anga damdawi kan hnawih anga kan tuam ang, a țha em? Tlem tal in ka chungah rinna nghat ve la" a rawn ti a, a mitmeng ațang chuan min ngen zia ka hmuhsak thei hial.



Heiham... ka thih phah lovang!.



Ka bûk nghat takah chuan thaw hawk in ka ke bulah a țhu hniam thla a ka taksa an țang ru țûn tho mahse tihlan erawh ka tum lo "a nat chuan ka ban hi i vuan thei ang" a tih chuan ka bu nghat a, ka ke chu muangchangin a chawikâng a khum khuhna ka lo țhâm tâwk a.



A hmet a a nat êm avang chuan ka mittui a hnâm sawk thei, a ban puam laiah chuan ka kut pahnih meuhin ka hmer ngawt ngawt a min dîm ru viau tih ka hria mahse ke ulh hi chu dîm viau pawn in hre mah ila a lo na lo tak tak thei pawn ka hrelo.



Damdawi a hnawih a a tuam zawh fel meuh chuan ka mittui a luang thla thei hial tawh "mu hahdam la aw" ti a a rawn hawichhuak chu mittui tling pam chungin ka lo melh let vê a, chhung lam ațanga rawn thaw ri hrâwihin min rawn hnaih chilh a.



"Ka tihpalh" a phun sup ruala ka biang a rawn dawmna ban rêk ah chuan ka lo vuan ve vat a ka beisei lawk hauh loh in ka mittui luang thla chu a rawn fawp a ka maimichhing tawp ringawt.



"Ka tihpalh" ka hmai bulah chuan a rawn phun leh sup a ka țah chhunzawm ka hlauh avanga ka hmui ka peh ngar ngar chu dam zet hian a rawn fawp a dan pawh ka tum buai peih lo, ti se ka duh zawk. A thiltih avanga ka rilru rawn no thar hi duhlo viau mah ila ka dang thei bik tawp si lo.



"Țap tawh lo la lukham a awm hnaivai lo ania" ti a ka hnar a a fawh zeuh rual chuan ka nui hak, a ni pawh a nui ve a. Tuna kan awmdan hi inngaizawng kan ang lutuk takzet!. Mahse chutiang chu a ni bawk si lo liam thei lo se ka tihna rilru chu puitling se ka ti ngawih ngawih bawk.



"Chanchin i u kan hrilh lawk ang, mu hahdam rawh aw" ka chal a rawn fawp vang vang in a ti leh, ka thaw țha ve ngam tawh lo. Ka awmdan hi zaktheilo pawh min ti maithei mahse dan a hnêkin tih belh zel se ka duh zawk a țawngkâ in ka dil ngam lo. Hetiang thilah chuan zah theih loh chhuah pawh ka pawi tilo ka tih tawh kha.



A awm hrang hlek a a hmel ka en rual chuan alo nui suk a dawr chhunga a rawn luh laia a hmel dur khap leh tuna a hmel hi chu lei leh van ang vel a ni.



"I lêt lehnghal dawn ami?" Lêt lo se ka duh luat ah ka zawt a a phone a phawrh chhuah pah chuan lu a thing nghut! "I nu te rawn haw hma chu ka awmpui che a ngai alawm i u duhdan a ni bawk a lo mu hahdam rawh" tiin a tho chhuak zui a ka room ațanga a chhuak lai chu ka en zui reng bawk.



Dam zeta a fawh ka hmui chu ka tawk dâ dâ a, ka ke a tuam chu ka en leh. Min duh tih a sawi kha a ti tak tak ang em le nge a sawi mai mai zawk niang? Ka hrethiam lo ka ring ang nge ring lo ang, zêp miah loh chuan kan inhriatna la reilo in inhmu khât mah ila kei hian ka duh tawh tih ka chiang.



Ka phone a rawn ri a, Nghaki chuan chanchin vel min rawn zawt a damdawi hnawih a kan tuam zawh tawh thu ka hrilh chuan Dinpuia pawn min ngaihtuah tih a sawi tel bawk a ka țhat thu hrilh turin ka ti let ve ta thung.



Ka ke kan tuam chu thla la in kan țhianho group-ah chuan ka thawn a *ka ke ka ulh tih te hi in hre leh tawp lo ang, min kan turin rawn thawk chhuak vek ang che u zaninah* tih chu ka thawn tel a an buai aniang minute 5 hnuah pawh tu vak mah in an la seen lo.



Eddie-a a rei tawh tih a ka lo ngaihtuah lai mek chuan eng emaw chawi chung hian a rawn lut a bawnghnute a ni tih ka hmuh rual chuan mak ti zet hian amah chu ka en a.



"I zu la mi?" Ka tih chuan a bu nghut "a ngai hleinem" ti a ka sawi lai chuan ka khum bula dawhkan ah chuan a rawn nghat a chair awm chu phawt chhuak in a țhu a.



"Ka la vek tawh sia i in ngei chu a ngai ang" a tih chuan bawnghnute chu ka en a "a ngailo asin le aw... damlo pawh ka nih loh hi" ka ti nang nang a.



"Damlo chiah in bawnghnute an in țhin ami?" Ngeiawm zeta min zawhna chu chhang lo in lei ka chhuah khum a a nui ri pawh ka hre tel "ka u in engtin nge a tih?" Ka ti daih.



"I nu te rawn haw hma in ka awmpui che anga an rawn haw hunah ka let leh ang chuan a hau dawn bawk che in ka hria" thutak zeta a rawn tih chuan ka ner nâng... "ka rin sa reng a ni 'i fimkhur lo țhin lutuk a de dei dei' a ti hmasa leh ang a" ti a ka sawi zo amah ka en chu nuih insûm tih hriat ngawih ngawih hian min lo en a.



"A tihdan ziah alawm" zah luatah kan ti ringawt ah!.



"Ka hria lawm" ti sup in a țhen zui sak a, a khabe tuai zeuh in a khi suk a nih chu. Ka thusawi kha a nuihzat tih a lang reng.



"Naktukah chuan in chhuk dawn ami?" Ka tih chuan chiang leh zual hian min rawn en ni maiin ka hria a bu nghut ringawt a kei pawh ka bu ve ringawt. Bawnghnute ban ka tum chu amah zawkin min ban khalh a min rawn pe a.



"Ka chhuk chuan thlah tur che leh hruai tur che an awm tawh dawnlo ania" tiin dawhkanah chuan a kiu a nghat a a khabe chu a tuai leh zeuh bawk "nia... taxi in ka kal tawh mai aniang chu" ka ti ve sap bawk a dik tak chuan ka huphurh ru ang reng mahse tih lan a rem țeuh si lo.



"Hreawm i ti dawn em?" A tih chuan ka bawnghnute in lai chu ka chawl dat! Hreawm ka ti dawn em tih zawhna min zawt a! Chuan ka chhanna chu aw tih a ni..



"Enge hreawm ka tih ngawt ang hreawm tihna chhan tur ka nei hleinem" ka sawi zo chiah a rûm nghal nghut mai, mahse hre lo ang hmak in ka bawnghnute in lai chu ka in zawm daih bawk.



A chhuk tih ka hriat ringawt pawn ka kawchhung lam kha a khawhar ru ngawih ngawih a nih kha rawn chho leh lo phei se chuan ka awmdan tur pawh kha ka hrethiam lo. Mahse tunah an chhuk dawn tak tak tawh a engtikah nge ka hmuh leh theih ang tih pawh hriat loh a ni lehnghal si.



"Ka u bulah i thawk reng dawn nge thildang i ti daih dawn? Ka u bula hnathawh a hreawm thei si a duh khirh si a vîn peih si i awm reng peih zawk ka ti..." amah en pah chuan ka ti leh, a hmel hmuh a nuam lo leh tawh.



"I huatthu ka sawilo tiraw?" A hmel hmuh a nawm loh tak êm avang chuan inthlahrung zet hian ka ti a, a hmai tuai puat in a thaw ta hawk a a khupah a kiu pahnih nghat in a kut chu hmalamah a suih zawm a chiang zet hian min rawn melh rûn a.



"Ka duh che ka tih kha ka fiamthu lo, khang zawng zawng haider lui khan thudangah pên tum țhin suh! Inthup tum eng ang mah la i theilo...." thutak zet hian a rawn ti a, ka thaw chhuak hak!.



"Enge sawi i tum?" Ka ti a, min en chian êm avang chuan ka chil ka lem ri nghal khalh bawk.



"I rilru hriat ka duh, min duh ve em tih hriat ka duh" a ti leh, chhan tum a ka kâ ka âng ziau chu hmu in min rawn hnaih chilh nghal a hnai sêt sâwt ah chuan kan in hmachhawn ta rân mai.



"Inthup reng suh Jane... i rilru hriat ka duh, min duh ve tih sawi hram teh!" A aw chu manganna te leh ngenna te nen a ri pawlh nuai ni maiin ka hria "i â mi?" Ka la ti țâng țâng.



"Teivet a! I rilru a thil awm ka hnena sawi chhuah chu thil harsa a ni em ni?" A au chhuak hrâwih a, a mita ka en chu a nat hmel ngawih ngawih. Engtin nge ka hrilhfiah ang, bialpa ka neih chuan chintâwk awm lo in ka vei ziah țhin a an mahni lo chu ngaihsak dang ka nei thei thlawt lo!.



Lehkha zir ah ka tlak hniam phah a ka chhungte rilru pawh ka ti hah ve nasa tawh. Tunah... tunah hepa hi ka duh tih ka sawi chuan chintâwk awm lo khawp in ka vei leh anga engdang mah ka ngaihtuah thei lo leh ang a a tuar tur chu keimah bawk.



"Ka..." ka ti sap, sawi lo in ka ngawi leh a thaw hawk in a tho chhuak a "a țha e, engkim kha theihnghilh vek rawh! Theihnghilh vek ang che i hria em?" A au tuarh a ka phu zawk thei.



Thei leh thei lo in no chu dawhkanah ka dah a amah ban ka tum chu thaw hawk chungin alo inher hman a ka kut chu ka la let leh riai riai.



A rawn hawi let a "mutthilh tum rawh pawn lamah ka awm reng dawn tho a mamawh i neih chuan min lo au dawn nia, chuan engkim kha theihnghilh vek ang che" a aia dam zawk hian a rawn ti a biak hma hma chuan ka room chu a chhuahsan nghal daih bawk.



Thaw ham ham in khum lu chu ka ngheng a nuamlo ka ti ve tho. Ni e... amah kha ka duh alawm mahse ngaihzawng nei thei ka ni tawh si lo tuna ka thil zir te hi lo zo tawh tal ila nilo, chintâwk awm lo khawp in vei țhin lo ila chuan ka sawi chhuak ve phawng phawng ang.



Ka chhungte pawn min hrilh țhin 'bialpa neih i thiamlo si mipa pawh melh ve tawh suh mahni i in pumpek hmak zel lehnghal' tiin. An sawi dik țhin êm avangin ka hnial buai duh ngai miah lo. Ka awmdan anga awm ve mihring chauh in an hriatthiam ka ring.



Ka nu te rawn haw thleng in room chhungah a rawn lut leh tawh lo a, a haw tawh em tih ka nu zawh chak viau mah ila ka zawt ngam leh tlat lo.



Ka u rawn haw pawn a rawn lang leh tawh lo a ka lo beisei ve ngawt chu ka duh lo ru takzet. Mahse ka u erawh a chhuak lehnghal thung



Zanah chuan ka țhiante an rawn kal khawm a Dinpuia pawh a rawn tel ve bawk. Ka nu leh ka pa awm loh avangin an rawn ri lut hlut a eitur te an rawn keng a ka nu leh ka pa an awm hi chuan Malsawmdawngkimi tih loh hi chu an ți dâk zel țhin.



"Ala na viau em?" Dinpuia chuan a rawn ti a, midang erawh chuan board an pen a an au chel chul mai "min tur ut ut tih loh chu a nat vak pawh awm lo, i rawn kal ve pawh ka ring lo a" nuih pah hian ka ti a, a ni pawh a nui ve suk.



"Ka ngaihtuah che alawm"



"Iti lawmawm lutuk a mahse ngaihtuah ka ngai hleinem hei ka țha lawm ka ke ka ulh mai chauh ania, vawiin kha ka tihpalh lutuk ania" ka ti ta zawk. Eddie-a lah khan a be chang mai sia.



"Engthilah chuan maw?" Hriat loh hmel zet hian a rawn ti a "aw... Eddie-a kha mawle" sawi tam lovin ka ngawi zui a a rawn nui hawk a.



"Khapa kha maw... a ho lutuk engah mah ka ngai hleinem min hnek chak hmel kha ka ti lutuk a, in kal hnu pawh khan Nghaki nen hian kan sawi alawm hreawm tihna tur a awm lo ania" tiin ka samah a rawn chûl zeuh a rum zet hian ka melh let thung. Aman hreawm ti lo mahse kei man hreawm ka ti tal thung alawm le.



"Nangni pahnih kha, in mawngkaw hriat tham leka phun lo khan rawn tel ve rawh u. Kan thusawi midangin an hre palh ang ti âwm ang zia zânga in han țawng chu le" Nghaki chuan ka bula rawn țhut thlak pah hian a rawn ti hlak hlak a.




"Ngaihdan i nei maksak thei emai Nghakdâk, thil hrilh tur che ka nei" tiin ka lamah ka pawt hnai a Dinpuia erawh Tlana ten an rawn koh avangin an games khelh naah a phei ve thung.



"Eng chungchang nge sawi vat teh!" Hriat chak tawh hmel zet hian a rawn ti a.



"Duh ka nei" ka tih rual chuan a khêk țhat a nih chu! Midang an rawn hawi vek "tih zawm ru henu hian min sik alawm" a ti awlsam thên, min rawn en a a mitmengah chuan a phur zia a lang thei hial.



"Tunge sawi vat teh.. Dinpuia saw mi?" Phur lutuk hian a rawn tih zawm.



"I â mi?" Ka ti ringawt, ner nâwng chung hian min rawn en a "ka â ziah lo, amah saw a ni em ka ti mai lawm ka â tihna ni lo" a ti vei pâng pâng.



"Dinpuia saw chu a ni lo, midang zawk" tiin ka la pehhêl ngar ngar, henu hi hrilh ila ani'n tihdan min ngaihtuahpui thei mahna.



"A nih chuan sawi ta vat reng la"



"I duh em em pa Eddie-a" ka ti a, min rawn en a ât hmel zet hian min rawn nuih a "ka duh tawh lo" a sawi zo chiah "maw!?" A rawn ti tuarh!.



A kâ chu a rang a rang in ka hup sak! A meng phâwk nasa bawk si, ka kut chu a rawn beng nawk nawk a "thawm dîm ve țhin rawh" ti hlak in ka thlah bawk.



"I duh ve dawn ka tih kha... mahse amah kher, ui i mak e Rodingpui Dinpuia saw a khawngaihthlak" Dinpuia lam en pah chuan a ti a "khawgaihthlak mahse ka duh vang pawh a ni bik hleinem aw..." ka ti zui a.



"Engtik ațang khan nge?" A rawn ti a.



"Ka hre bik lo amah pawn min duh tih min hrilh asin, tukin zingah khan min hrilh daih tawh a mahse ka âwih sak duh lo a. I hrem, tlaiah khan ka duh ve leh ve loh min zawt a mahse ka chhang duh lo bialpa neih ka thiam loh zia leh nei thei ka nih loh zia pawh nang pawn i hriat vek kha..." ka ti sap.



"A duh che tih a hrilh che maw...a van mak em em ka beisei lawk miah lo"



"Mahse tumah hrilh suh aw" ka ti hram.



"Mahse tinge in in duh tawn ve ve a nangpawn i duh ve tih i hrilh mai loh, thil a pawi thui bik tawp nang. Amak e... a duh che tih a hrilh che a mak ka ti lutuk hi sawi ngaihna pawh ka hre bar lo mahse ngatinge min hrilh vat loh!" Ka ban bula rawn ben pawp pah hian a rawn ti a a țan leh dawn e.



"Zingah kha chuan ka lo ngaih thutak sak vak lo a dawr ka lo thlen pawh khan ka mood a off êm kha mahse tlaiah khan a sawi leh a ka zirlai vel hi lo zo tawh tal ila chu zia tak ala awm a" ka ti zo chu ka thaw zui hak.



"Ni e... mahse ngawi rawh tihdan kan ngaihtuah dawn nia" tiin Malsawmdawngkimi a ko phei a Eddie-a hming sawi lang lo in thil a hrilh thuak thuak a thil tihdan tur vel an pahnih an han sawi ta tak tak chu nuih nen an fâwm a ka chanchin ațang an bialpa te chanchin ah zu pêng daih a!.



He mite pahnih bula awm hi chu luhai na tham a tling țhin.



Zingah chuan ka tih dan ang lo takin hma takah ka tho ve a ka u thlah hman ve ka duh hram vang a ni pakhat bawk, hmuh chak deuh ka nei tel bawk a.



Ka nu a rawn lut a "nu engtikah nge ka u te an chhuah dawn?" Ka lo ti vat, tukverh min hawnsak in ka thosilen zar vel chu a rawn hlip chho a "dar 12-ah kan chhuak dawn a ti mai khan ka hria ni, i kal ve duh mi?" A rawn ti a, ka nu nge nge.



"Duh e... engtikah nge ka hmuh leh ang pawh hriat loh" ka ti a, he thu ka sawichhan erawh chu midang daih an ni zawk reng sia.



"Pathian zarah kan dam anga chhungkua te chu kan inhmu khawm leh em em ang, i ke ipa Duha kan va hmeh tir anga Damdawiin kal a ngaih leh kan kal anga chuan i u chu kan zu thlah dawn nia i pa in a rawn pawm chhuak ang che" ti duah in min chhuah san bawk.



Ka pa in chaw ei dawnah min rawn pawm thla a ka u erawh zingah alo chhuak leh daih tawh. Heihi alawm a bula ka awm peih lohna ka free ve tawh dawn alawm a ti ve ziah a khawia free sawi lo law law zawk se țha zawk țhin tur.



Ka u thlah turin Car in airport lam kan pan a, office ațang Eddie-a zawk a rawn tir dawn amaw ka tia F-a zawk a rawn tir daih a tûm bur in Car ah ka țhut phah, zêp loh chuan ka hmu chak lutuk ringawt.



Airport kan thlen in ka u alo thleng tawh a min hmuh rualin min rawn be hmasa leh te te phawt "mate... an lo pawm chhuak ang che" ka u in a rawn tih chuan ka bu nghat, a bula ka awm hunah ka hau nasa dawn chiang alawm ka ngei tlat.



Ka țhutna lam kawngkhar an rawn hawn rual chuan innem khalh in ka lo insiam rem ve a rawn kûnhniam a Car chhunga rawn lut deuh reuh tu ka hmuh erawh chuan meng kâwk in ka thaw ta hak mai.



"Eddie" ka ti sap a, ka auhna hria a a rawn hawi chhuak chu kan mit a intawng chat a ngawi reng chuan kan in melh ta rân bawk.


Show post links
Top