AMANTE(Hmangaihtu) By: Irene H muankimi (Completed)

[Ngaia]

Chapter 1



MESAK POV



Zankhua tlaiin run in sumtual ka fang thin a
Hawi velin chung siar leh chhawrthla eng no riai
Thlirin awmkhua a har zual thin, i ngai hian maw
Lung min len e I kim tlangmawina zawng khan e


Awmkhua a har nangngai reng hian
Chhun ni leh zan khua ka lo hmang thin
Tlei reng a har i tello chuan eng dang reng hi aw ... ka dawn thei lo
Luai thlipui nul a tul leh thin



"Tho teh tlangvala pumpa kha tia mut zawi reng tur pawh a ni lo" ka hla ngaihthlak min off sakin,ka pa chu ka khumah a rawn thu a. "Saw, Thara'n Blanket khawn puiah a rawn sawm che saw. Tho la va khawn pui ve rawh" ti a,min ben thuk thuk hnuah ka room atang a chhuaka, thawhaka in per tho in keipawn ka pa chu ka zui chhuak ve nghal.




"Kha i nuamsam vak na nge?" Sitting room ka chhuah phei rual rualin Thara chuan thingpui no dawm pahin min lo zawt nghal vata,ka zak ve det. Tun ang zanriah ei kham awr hi tlangval dam tha tana mutna hun ala ni lo reng bawk nen.




"Nuam e,kha ka pa khan Blanket khawn te a rawn sawi a" nui chunga tiin an bulah chuan ka thu thla a,ka nau Grace-i'n thingpui hang ka duh ve leh duh ve loh choka lam atanga min rawn zawhna chu 'duhlo' tiin ka chhang nghal zat bawk.




"Ni e,hmani committee na a kan lo rel tawh angin naktuk lama kan suk tur Blanket khawn khawm kan ngaia i theih chuan lo tel ve la ka ti maw le" a thingpui chu a dawt leh khawlh a.




"Anih chu.. ti khan thingpui kha lo in la ka'n va insiam ve a nge" ka thutna atanga tho in,ka room lam ka pan leh rih.




Ka hming chu Mesak Lalrambuatsaiha niin tunah hian ka kum 30 na ka hmang mek a ni. Ka pa hi Pastor a ni a. Tuna kan awmna khuaah hian tun thla tir lam khan kan insawn a ni.




"I pa in i chanchin te min lo hrilha pawi ka tih pui khawp mai che" min hnem tum taka a rawn tih chuan ka lo then suk. Ka chhungte hian kha accident avanga ka tawrh zia hria in min lainat lutuk hian ka chanchin hi an mi ngamtlang te hnenah an lo sawi leh chiam thin.




"Ka lawm e,ka pa chuan min lo phawrh mualpho leh hle lo maw?" Nui chungin ti mahila ka ngaihtuahna ah erawh kha hmeichhia thisen in a bualkhah vek chung pawha min hmangaih thu la sawi tang tangtu kha awmin ka in hum ruh sauh.




"Eng pawh ni se,chutiang taka tlangvalin I tuar a nih chuan I hmangaih hle a ni ngei ang. Ka hnem thiamlo hle ang che tih chu ka hria a,mah se thian kawm turte i mahmawh chuan ka awm reng a nia". Ka dara a rawn kuah chuan ka ngaihtuahna kal bing lutuk tur pawh a ti zia deuh.




Titi mawlh mawlhin kawng sira gate lianpui chhungah chuan kan luta Thara sawi danah mi sawm tur tah chuan kan nei a ni awm e.




"Kan nghak lawk mai dawn em ni? An zo har pawhin ka ringlo" tiin bathlar sira thutna an dahah chuan a thu a. Keiin chu kawngkhar dum tliang nalh zeta ' CHHUNG INKHAWM KAN HMANG MEK' tih intar chu ka en a.




Hetianga inlian leh ropui nei an nih chuan an chhungkaw ei zawnna a tha hle a ni phawt a nga. Kohhran lama in hmang tak chhungkua an nih phei chuan Kohhran tan chuan an va tangkai dawn teh reng em. Mahse,hetiang milian ho hian an ei rukna te thup nan Kohhran leh khawtlangah sum tam tak thawhin in phen nan an hmang thin a.Pathian zarah an ni hi chu chutiang ang mi chu an nih loh hram ka beisei.




In herin Thara thutna bulah thu turin ka in siam rem a. Chu tih lai mek chuan kawngka chu a rawn in hawng riai riai a,thu leh ta mai lo chuan kawngka lam chu ka en reng a. Mahse,beisei loh tak maiin hmeichhe pakhat hi thawm dim hmel zetin ke lawng hian a rawn pen chhuak them them a. A pheikhawk bun tur ni awm tak chu a kutah a keng bawk. Kawngka a khar fel leh rual chiahin khi suk hian a pheikhawk chu a bun leh te te a.




"In zo tawh em ni?" Keini thian dun kha min lo hmu lo nge Thara a han tawng chhuah chuan chu nu chu phu chiamin mawng sawh dawt hian a tlu a.Phawk em em in kan lam a rawn hawi bawk,a hmel chu a nuih zatthlak lek lek mai.Kha tiang em em a han phut chiam ka ti rilru a,nui lo turin ka in sum ve hle a ni.




A hmel lah chu a tha ka ti dawn nge...ni e, hmeichhe hmeltha tak chu a ni alawm. Mahse, ka hmeichhe duh chi a ni lo. Ha....engvangin nge chu thil chu ka lo ngaihtuah ve ngawt le!




"Aw! Ka..ka tihpalh tihphut che kha ka tum a ni lo ania. Inkhawm in zawh tawh chuan reilo te rawn len luh zawk kan duh mai a nia." Ka thianpa chuan inthiam loh taka tiin a ban chu chunu puih tum chuan a phar chhuaka mahse, kan thiani chuan ngeng zetin ka thianpa kut chu chelh duh lovin a rawn tho chhuaka a che zia chu ka ngaihtheih loh em avang in ka lo then suk.




"Father in 'Aw Lalpa' a ti mek" thamlo zeta kan thian dun min en hnuah ner nawngin an gate lamah a kal a. Gate bulah chuan Bike pakhat hi rawn dingin tah chuan ti thang tih hriat zeta awlsam hian a lawn kai a. An tlan chhuah leh meuh chuan a phitin an phit chhuak a ni deuh ber an bike ri thum vung vung pawh kan hre lo thuai.




Tunlai thalai ho in lirthei an ngam leh mah mah lutuk hi chu tha ka ti lo khawp mai. College
a ka thawh lai pawh khan ka students te zingah bike accident a thi pahnih lai an awm a,chuvang chuan thalai ho hian chak tak taka lirthei khalh hi bansan thei se chu ka duh khawp mai.




"Kuri a nih kha" gate lam ka en rengna mit chu sawnin Thara chu hrethiamlo zet hian ka en, " an fanu upa ber dawttu hi a nia,a eng vang teh reng nge ni a chhungte anglo takin ani kha chu a nungchang a buaithlak deuha" ti sep sepin a hmelah chuan pawi tihna ka hmu thei bawk.




Chutia a tu a ve ve pawh sawi tur hrelo a kan lo ding ngawih reng lai chuan kan hnunglama kawngkhar bawk chu a rawn in hawng leha hmeichhe dang pakhat hi rawn chhuakin keini chutia an kawngka zawna lo ding reng min hmu thut chu a meng deuh kawka mah se a rei lo.




"E? U Thara te chu in lo thleng der tawh elaw? Lo lut ru,in lo awmna a rei tawh em?" Nelawm taka nuiin kawngkhara an thil tar chu la thla in an inchhungah chuan kan in zui lut a.




"Ti khan ka pa te bulah sawn lo va thu ula,ka han in siam lawk a nga kan kal dawn a nia" ti zung zungin inchung lamah min chho sana Sitting room lam kan va lut phei chu rin loh takin kan Kohhran upa pa Chhuanga ka zuk hmu a.




Ani pawn min hmuh rual rualin " kha Thara leh Mesaka chu lo thu ru,lo thu ru. Hei zanin chu ka office ban tlai avangin inkhawm kan tlai deuha,Puitei in rawn sawm dawn em ni?" Alo ti zung zung a.




"A nih hi,nangni zawng intaima a keini chhung ve saw chu Chawlhni ah bak chhung inkhawmna kan hmang ngai meuh lo" Thara'n a han tih chuan ka ngaihtuaha chhungkaw engzat chiah hian in nge nitin chhung inkhawmna hi hmang zat zat thin ang le. Ka pa sawi dan kha chuan ka pu hian zingkarah khawvar hma in chhungkaw kimin an in kai tho a an hmang thin tih a sawi a. Kha tih lai khan chutiang anga hmaa inkhawm neih chu a peih awm lohin tullo ka lo ti viau thin a. Mahse,tun hnu a ka han ngaihtuah hian ka pu kha ka ngaisanglo thei lo.




Chhungkaw tam tak chu hnathawh avangin kan hun hman dan a in anglo nuaia,chhungkima kan awm theih hun Sunday ah chauh inkhawmna kan hmanga,ka pu kha chuan awm kim lai ber chuhin zing hma takah inkhawm a neih pui thin a. Chumi a avang pawh chu a ni mahna ka pa lam te ah zing thawh harsa an awm lova keini ngei pawh zingah chuan min kai tho hma thei khawp mai.




"Ni e,kan han ti ve hram hram chu a nia. Kha Mesak nang eng tikin nge i rawn let a?"




"Nizan lam khan ka rawn thleng a. Hei in in tih ka lo hre lova,in in lo nei nuam hle mai" ka lo ti ve vat. Kan insawn avangin kan awmna hlui lamah thil buaipui tur tlem a awma chu mi buaipui chuan ka let leh kha a ni a. Kan Kohhran mi leh sa pawh chutiangin ka la hre ve vak lem lo.




"Ka hman kan kal dawn em ni?" Thingpui pa Chhuanga nupuiin a rawn chhawp laiin Puitei bawk kha rawn lang lehin kan bulah chuan a rawn ding a."E! Thingpui in lo in dawn chiah e law? In phawt Ula kan kal dawn a nia" a ti leh,ka rin sual loh chuan hmeichhe tawng duh ve tak a ni ngei ang.




"Ni e, hmanhmawh suh u ala hma hi" nu berin alo ti ve vat bawk.




"Puite i u kha han sawm ve la, Kohhran lamah hian nau zawk ni mahla zui tam che se la a tha"




"Au Kuri maw?"



Pafa inbiakna avang chuan ka thingpui in lai chu hakin ka khuh ta chiam. Thara'n ka hnungah a rawn benga kan in en chuan kan thil ngaihtuah a in ang tih ka hria.




"Aw,a sa tih ka lo sawi lo a ni. Ava zia lo ve" nu berin alo tih chul chuan a pawi loh thu ka lo sawia,thingpui sat lam chu thu hran kha hmeichhia Kuri ko tura Puitei a kal mawlh chu a ni ka lo hlauh. A eng chu ka hria ni maw?





"A...pa a ni chu a nawmsam loh kha zanin chu lo kal ve lo mai rawh se" Puitei'n a tih chuan pa ber hmelah chuan lawm vak lohna ka hmu thei. Rei awmlo in thingpui kan in zawh veleh KTP member te nen in pakhatah kan in hmu khawma tah chuan kan kal dan tur rel ho in,in pakhata in zui dul dul lovin,pa hnih thum te te in kan in thena,kei leh Thara chu kan kal dun a.




Veng hmawr lam kan chan avangin chu lam chu panin in pakhat Thlanmual thlen hma kawng chhak fal deuh taka awm,kawngpui atanga chhohna pawh bawngtuthlawh hmanga siam chawp tih hriat tak. Fur laia a nal tur ven nana a tlang Mau hmanga kham zei zeiah chuan kan chho a.




"In awm em?" Kawngka kik paha ka thianpa in a tih chuan chhunglam atang nula aw tliang nalh tak hian min lo chhawn a.




Inchhung kan luh rual rualin "E, U Thara te chu lo leng thu ru" kha nula aw nalh tak bawk khan lo ti lehin a thutna atanga in sawnin a nu bulah a thu pheia,keini thian dun pawh nula thutna hnu ah chuan kan thu ve bawk.





"Kha pi Kap i ke chu eng nge a an tak zel a?" Chutia Thara'n a tih lai chuan nu ber ke chu ka lo en vata,an lo tuam var luk mai.




"A....hei a tha tawh khawp mai. Kha i thianpa chu khawilam mi nge ni a,ka hmuh ngai awm ka va hre lo ve?"





"Aw,a... nia...hei ani hi kan Pastor thar fapa Mesak-a a nih hi. Chuan, Mesak anni hi pi Kapi leh a fanu Vansangkimi" meng deuh kawkin kha hming 'Vansangkimi' tih kha ka bengah hian a mi khual hauhlo. Ka lungphu ri in thum rawn tluk tluk karah chuan hmeichhe nui ka hria a. Ni e, kum 2 lai liam tawh mahse kha hmeichhia ka Vansangkimi kha ka la nghilh thei tlat lo.




Ka thianpa in min rawn nghawk paha ' vung vung a che' a rawn tih sup chuan harhchhuakin ka han khuh kharh kharh a.



Thara nen naktuk lam hnatlan dan tur chungchang vel sawia Blanket an in pek laite chuan ka lo en reng a. Ka Vansangkimi nen khan in anna chu neilo mah se, amahah chuan ka Vansangkimi kha ka hmu a. A kianga awm chu a nuamin a hahdam thlak tak zet a ni.



KURI POV



"In va lo thleng har ve" Bike atanga ka chhuk rual rualin Veronica-i a rawn phun nghal.




"I ninawm kha keng teh" tia, kan intur lak ka pek chuan a nui leh nghal vur vura,he nu zet hi chu!




"Lo phei ru,tu emaw pawh a awm ve ania. Mahse, a mood a fuh vak hmel loh" awmze nei taka a mit min siai zeuhin a kala,a hnungah Joel-a nen kan zui ve nghal.




"In in hau em ni?" Kan hmaa mipa thu a hmuh rual rualin ka beng bulah a rawn phun ser ser. Lalrinchhana chu an mei chheh sirah thu in ngainat awm loh zet hian kan lam alo hawia a hmel rum lutuk avang chuan keipawn chil ka lem khalh. Chutah a thutna thawhchhuah sanin kan lamah a rawn kala Joel-a a in thiar fihlim rang hle.




Vawi tamtak Joel-a hi zui tawh lo turin min ti a. A chhan pawh Joel-a hian min hnarlo tih a hriat vang a ni. Mahse, ka thinrim chang leh Lalrinchhana tih thinrim ka duh apiangin Joel-a hi ka kawp chawta chu chuan ka tum pawh a ti hlawhtling thin hle.




"Min rawn zui rawh'" tiin min kal pela,nui sukin ka zui ve vat. A ke pen a zau bik em avangin a Bike bulah min lo nghak a. "Eng vangin nge ka message leh phone call I chhan loh" a bul ka thlen rual rualin alo ti nghal.




Mahse,ka nghal chhuahin engmah ka sawi duh lo. Nimin piahah zanriah ei chhuah pui min tiama mahse, a thutiam bawhpelhin ka u te nufa nen zanriah an ei chhuaka chumi avang chuan a phone call leh message engmah ka chhang duh lova. A thik tur ngeiin Joel-a ka kawp bawk.




"Kha pa kha zui tawhlo turin ka hrilh che a ni lawm ni?" Dawhtheilo tih hriat takin na zet hian ka khabe ah a rawn hmer a.




"A...a na a nia" ka khabe a hmerna kut chu ka vawn hnana, ani pawn rang zeta min thlahin a bike ke chu a pet chawrh. Khang hun reilo te chhunga ka ngaihthah der avang khan heti em em hian a thinrim a maw!




"Lal...Lalrinchhan" hlau thawng taka ka tih da da lai chuan rang zet hian min rawn kuaha "ka ngai che" a rawn tih sup chuan ka nui suk. Mahse, ani erawh a thawk lak dan atang eng emaw vei a nei tih ka hria.




"Thil thleng a awm em ni?" Nghet zet hian ka kuah let a.



"Eng vangin nge nang nilo a, Ramthansangi a ni" thawk ipik hmel zeta a tih takah chuan ka kuahna chu thlahin a hmel ka hmuh theih nan ka din hlat deuh a.



"Ka u nen in in hau leh em ni?"


"Hau lo e"


"Dawt" ka lo ti vat. Hau lo ti mah se,thil thleng a awm tih ka hria. " Ti nge mahni leh mahni i in hrem reng. Saw in ah sawn hreawm ti taka i awm kher a ngai em ni? Ka u saw then la,kan pahnihin hmun hla takah mi tuman min then hran leh tawh ngai lohna tur hmunah kal daih ang" ka rilru mangan na avang chuan ka ti ta tawp.Mahse ani chuan min chhanglo in thawk a la ham ham a.




"Ti nge min chhan loh" ka tih leh takah chuan a hmui liak zeuhin "ka thei lo" a ti zawi sup a,ka mittui a hnam sawk thei.




" Engvangin? Min hmangaih a ni lawm ni? Min hmangaih a nih chuan engvangin nge i hmangaih miah loh bula awm chu i thlan tlat?" Hahtlak min tih hmel zet hian ka dar tawn tawna rawn dawmin a nui suk a.




"Ka hmangaih che alawm. Mahse, Isaac-a hi ka kalsan thei lo,ka fapa a ni a nang ka hmangaih ang tho hian ka hmangaih a ni. Chuvang chuan ka thil tih sual avanga ani fahrah a siam chu ka theilo a ni" ka thu hriat chuan min thawn em avangin engtia awm tur nge pawh ka hre lo. Kei hi a thil tih sual maw ka lo nih a,ka nuih a zat rualin ka biangah mittui a rawn luang a.




"Lalrinchhan, i tih sual maw ka lo nih a. Chuvang chu em ni ka naute te kha min thah tir?"



"Kuri"



"Nang..nang hian ka u fa chu fahraha siam i thei lova mah...mah se ka puma naute khawvel eng hmuh ve chak em em te chu lainatna nei miahlo in min tih tlak tir thin a." Rilru na zetin ka bianga mittui lo luangte chu ka tuai a,mahse a hul thei silo.





Ni e, Lalrinchhana nen hian ka tleirawl chhuah atang kan inkawp tan a. Chutih lai chuan pawl sawmpakhat zirlai ka ni. Ka u leh a thiante chuan kan in ah chaw ei khawm an nei a, ka u leh Lalrinchhana pawn chutih lai chuan eng in zawmna mah an la nei lo. Rinchhana hi ka vawikhat hmuhna atang ka duh nghal em em a,tleirawl zakzumlo chi ka nih avangin ka duhna pawh chu thup buailo in ka bem a. Chung zawng zawng chu ka thian tha ber Lalruatpui leh Vansangkimi ten min hriat pui vek a ni.




Vanneih thlak takin Rinchhana chuan ka duhna chu lo pawmin kan in ngaizawnga ka hlim lutuk kha ka chhungte pawn a chhan hre silo in min lo hlim pui ve hial a ni. Mahse Rinchhana nen kan in kar chu amah Rinchhana hian mi hriata sawi chhuah a phal lo va. A chhan ka zawh chuan ' naupang mai chauh ila ni a,kei College kal. I chhung ten kan in kar hi an hriat chuan tlangval leh naupang inngaizawng tiin kan in kar hi an pawm dawn lova. Chuvang chuan 12 i zawh hunah mi dang chu kan la hriat tir dawn a nia' tiin min chhang a. Kha tih hun lai khan amah ka duhna khan ka mit a tih del vang nge a thu sawi apiang a kawi a ngilin ka zawma ani pawn min duatin rin hlelh tur leh han thik tur amah ah chuan ka hmu ngai lo.




Chutiang taka hmeichhia leh mipa in haw lo leh a ruka inkawp kan nih avang chuan hun rem chang kan ngahin kan che sual ta a. Mahse Lalrinchhana ka lo hmangaih hman em avangin alaka ka thianghlimna ka hlauh pawh chu pawi tihna ka nei lo. Ti chuan vawikhat tih sualin vawihnih a hring an lo tih angin hun fal kan neih phawt chuan Rinchhana tih lawm chu ka tih turah ngaiin ka lo hnar ngai lo.




Ani pawn min sit phah lova. Nupuia min neih ngei tur thu a sawi thin. Mahse, chutianga hlim taka kan awm lai chuan ka ruaklo tih ka in hria a. Rinchhana chu hlauhthawnna leh hlim ru tak chung si in ka chanchin ka hrilha ani chuan lawm hle mah se nau chu ti tla rih phawt tura min hrilhin dam dawi ei tur min pe a. Ani chuan nupui nei tura a dinhmunin ala zirlo thu hmangin nau vawihnih min tih tlak tir a ni.




Class 12 ka zawhin ka pa in Delhi Medical college ah min luh tira,Rinchhana min lo tiam 12 ka zawh huna kan in kar sawi chhuah chu dawt mai a ni. Mahse, ka hmangaih em avang leh amah ka rin em avangin hun tha dang ka pe leh a. Mahse ka awm dan atang ka u in Rinchhana nen kan in kar a hre chhuak a. Thil dang engmah sawi lovin " i zirlai ah in sawr bing la,thil dang ngaihtuah suh" a ti a. Mahse,kei chuan Delhi a ka awm chhungin ka u hnenah Rinchhana chu min lo ngaihven sak turin ka ngen thung. Hostel ah ka awm dawn avangin phone eng tik lai pawn ka kawl thei dawn lova ka duh hun hunah ka be thei tawh dawn silo a ni.




Lalrinchhana avangin zan tira ka mood fuh ka lo tih ve em em te pawh an bo zo a,chuvang chuan kan thiante zingah pawh rei awm lovin Joel-a ka in thlah haw tir thuai a.




Kan in kan thlen chuan 12:30 am a pel tawh a, nidang anglo takin kan in chu alo la eng uar a. Eng thil nge maw thleng ni! In chhung ka luh chuan sitting room a Bawihpuia tih loh ka chhungte ka u te nufa nena lo thu ngawi thap chu ka hmu a.




"Ramneihsang" ka chhungte va pawh lova kailawn ka pan tur chu ka pa aw vin lutuk avang chuan ka ding nghal chawt. Mahse, ka lulul chhuahin kailawnah chuan ka pen lui leh ta tho a, rei erawh a ni lo. Ka hnunglam atang ka samah ka pa chuan rawn thamin chhuatah chuan min phih thlu a.




"Lulul ka chhuah e te i han tih" tiin thinrim zet hian min en a.



"Mami pa"



"Nang kha lo tawng suh,i fa te chungah hian nem thin lutuk suh ka tih fo che kha. Hei tunah eng nge thleng ta,a unaunu pasal a chuhpui mek a nih hi" ka pa in ka nu lo tawng ve tur chu lo pawt chatin thinrim zet hian a ang buan buana hei vang hi a ni ngei ang ka u te nufa pawh kan in ah an lo awmna chhan.

.......


( Le chhiartu duhawm tak tak te ka thawnthu min lo chhiar sak leh avangin in chungah ka lawm a.Tin,kan thawnthu hi Chapter hmasa ber a nih angin comment lamah thawnthu a I ngaidan rawn sawi ve la. In thurawn tha tak tak atang te in, thawnthu leh ka kal dan phunga siam that ngai te siam that ka lo tum dawn a nia.)


Show post links
Top

[Ngaia]

Chapter 2




"Awi kei zawng a pawi ka ti em mai" ti a,ka nu lungngai taka tap chu Puitei'n lo kuahin ani pawh a in hrut ve tho.




"Mipa dang an tam teh lul nen mahni u te pasal kher lo khuaikhem hi i zak lawm ni Lalneihsang. A mihring pangngai tih chi loh em mai" ka pa thusawi avang chuan za lo zet hian ka nui hak a.




Lu hai deuh chiai chiaia tho chhuakin ka u te nufa kan lam hawia lo ding reng te bulah chuan pheiin " in pa alo haw tlai apiangin he tah kei min rawn chhuahchhal thin dawn em ni?"



"Kuri"


"Vanramneihsang" ka u aw zawi tak ruala ka pa aw rawn ring zet avang chuan ka pa lam ka hawi a.




"I hria em pa? Mipa tam tak an awm laia mahni nau te kawppui laksaktu chan tur chu hei hi a ni." Ti charh charhin ka u chu ka en a,a mita hlauhna chuan mak tak maiin min ti hlim tlat.




"Nau te kawppui a! Eng thil nge i sawi awmzia?" Ka pa chuan a rawn ti ta renga,ka u chu a meng buai tawh tak zet.




"Ka hre nang,in duh chuan ka u hi zawt Ula eng thil nge a tih chu" ngaihsam hmel zeta tiin ka chhungte chu ka en kuala an vai mai chuan ka u chu thil hriat chian chakna mit mengin an en thapa ka u erawh a meng khup lap tawh.




Inchung lamah chho in ka u in eng thu nge ka nu leh pa bulah a sawi dawn ka ngaihven lo. Mahse,kha ka natna ang chiah kha tuar ve se ka duh a ni. Lalrinchhana sawi kha a dik a nih chuan kha zan khan Birthday lawmin ani chu a rui hle a. Ka u erawh ka hriat theih tirh ata vawikhat pawh kuva la ei lo, hmeichhe fel leh zaidam ka ngaihsan em em thin a ni.




Chutiang khawpa ka mi ngaihsan leh lo zah em em thin chuan ka mipa hmangaih a ni tih hre reng chungin alo chet sual puia,chuvang pakhat chu a ni Lalrinchhana kal tir ka harsat em em. A duh vang ni miahlo in ka u chu nupuiah a neih a ngai a, ani chuan min la hmangaih thu sawiin hun pe leh turin min ngena,ka u chu fa a hrin vel leha a then tur thu min tiam a ni.




Mahse, a thu tiam chu hlen lovin kan in kar pawh a chhiat phaha,mah se hmangaihtu chuan a hmangaih ngenna chu rei a hawisan thei silo a ni. Ka chunga a thil tih te avangin haw hle mah ila ka hmangaih em avangin a diklo tih hre reng chungin kan in kar chu ka ti tawp phal lova. A tir atang rengin kan in kar chu a ruk a ni sa ti a in hnem in reilo te mah ni se kha ka mipa hmangaihin min hmangaihna kha dawn ka la thlalel em em tlat a ni.

.......


Meng manglo hian ka phone ri reng chu ka dap kuala mah se ka dap fuh theih tak thlawt lohah chuan ning zetin ka thu chhuaka,ka phone chu chhuatah alo eng va va,ka dap fuh mailo pawh kha a awmlo hran lo ve.




Rang zeta chharin "Ruatuih" ka ti tuara,ani, lah lo duai biklo, ' Kur uih' alo ti ve thuai a. Kan in ngam leh mah mah chu a ni.




"I chhia,ti nge zing zingah te min rawn biak. Ka mutui lai min ti harh a lawn."




"Chawhnu 1:00 pm hi ka Kurkurtei tan chauha zing a ni" a rawn tih let chuan ka hmui ka ti pawrh duh lek chauh. Ka tan chuan ka zan mu, khum atanga ka than harh hun hun chu zing a ni mai.




"I ninawm kualkim lutuk,i sawi duh chu sawi vat rawh"




"Vawiin ah ka lo let dawna min lo hmuah chuan thil tha deuh ka lo hawn ang che"



"Vawiin ah maw,i nu chu a dam tha tawh em ni?"



"Um,tih vak theih ka nei Chuang lova ka lo haw dawn" he pa zet hi chu.




Ruatpuia hi Kum 13 a nih in a nu leh pa te an in thena,a chhan pawh a nu dam lohna leh a pa ngaihzawng neih vang a ni a. A pa hian a nupui a hnawhchhuah hnu kum 1 na ah nupui thar neiin Ruatpuia hi a nu bula awm a phal lova. A u hmeichhia erawh a nu bulah awmin tunah hian an khaw lamah an awm a. Tun tum pawh a nu dinhmun a that vak loh vangin a nu te khua ah chuan karkhat cham turin a va zin ve a ni.




Kan inbiakna kan tih tawp hnuah ka phone chu ka check a, Lalrinchhana call leh message a tam ngang mai. Sangkimi call pawh lo awmin ka call back nghal a, a vawihnih ring na ah ala la chauh zui.




"I van buai awm ve, eng nge i tih a?"



"Buai ve tho KTP hnatlanna ah ka kala,ti nge call i lak theih loh. Rawn biak che ka tum nasa lutuk."




"Nia,ka tho ve chiah a" ka nui ringawt,a ngaihdan tur ka hre Chiang em a ni.



"Nang lah hi Ruatpuia ang mai,kha ani pawh vawiinah alo haw dawn kha"



"Um,chuvang chu ania ka lo call che iva hmuak dawn lo em ni? Hei min rawn bia a min lo hmuak a ti"



"A tha alawm,i rawn hnatlanglo ta sa sa va hmuak rawh mahse rui lo ula" tiin a buai em avangin phone chu kan ti tawp a.



Sangkimi leh Ruatpuia hi High school kan kal atanga inngai zawng an ni.Ruatpuia nen hian tette atanga inkawm School khata kal ho char char kan ni a. High school kan luh khan Sangkimi hi kan tawnga a tir chuan Ruatpuia hi a nungchang vel avangin Sangkimi hian a hlau deuh thin a. Mahse a hnu ah erawh in be tlangnel chho in an in ngaizawng chho a,in hnial rengin an in hmangaih ve em em tho.




Mahse,ka thiante pahnih in kawp hi Sangkimi u U Hruaikima hian a phallo hle a,chuvang chuan buaina pawh kan tawk ve rap rap tawh. U Hruaikima hi inhlawhin veng dangah a awm thina chumi chu nilo phei se chuan Ruatpuia hian engtik lai pawn sawisak a tawkin ka ring.




Ruatpuia nen kan han in hmu chu Sangkimi thil sawi kha kan hre chang tawh lo reng reng. An in pawh thleng lovin kan thiannu Dingtei Birthday party ah kan tlang nghal daih.



"Ka Sangkimi te inah va leng ang u" karoke lama kal kan sawi laiin Ruatpuia chuan Sangkimi te in a kal ringawt a lo au chhuah pui a.




"Ai,a chi loh i ruih em kha" lo tiin a darah ka beng deuh chawr.



"Ni e,kha hmeichhe in la Chris lutuk hming kha rawn sawi suh" ka thusawi thlawp zetin Dingtei'n alo ti a. Mahse,ka thiannu a sawi dan kha ka duh zawng a ni hauh lo.



"Dingte.."



Ka ti hman tawk, Ruatpuia chuan ka kuta rawn chelhin inchhung atang min chhuah pui daih a. Ka thil tih tum a hria pawh a ni mah na le. A tha chak zawkin min chelh tlat avangin duhlo hle mahila atawpah chuan Vansangkimi te kawmthlangah kan ding ta ran mai.




Haw ka rawt mawlh mawlh laiin ka thianpa rui tawh chuan ring zet zetin "Vansangkim" a ti chiam chiam a. Zan a rei tawhin mi pawh an mu rem vek tawha midang a ti harh a nih chuan kan chan tur chu a nuam vaklo ang.




"Hei, mawl a. U Hruaikima a awm chuan i chaklo ang aw. Bengchheng tawh suh" tiin a ka hup sak ka tuma alo la duh lo zui. Chutah hlauh ang ngei ngeiin Sangkimi te in chu a rawn eng ta pup mai. U Hruaikima hi Sunday hmang tura rawn haw a chin a vangin tunah pawh hian a awm ka ringa tlanchhiat vat kan ngai.





"Kha, Awnchhezawr nangma thiam loh vek. U Hruaikima alo chhuak hrim hrim" thinrim taka tiin ka thianpa lu ah chuan ka beng a.A banah vuanin kal pui ka tum bawk mah se Sangkimi aw kan hriat takah chuan an in lam chu kan hawi leh rih.




"Lalruatpui" vin zeta rawn tiin an step te tak fur laia nal em em thinah chuan a rawn pen thla hlawk hlawk.




"A lo chhuak ta, ka hmangaih lo kal teh" ka thianpa che zia ka ei loh em avangin a hnungah ka lo chum ri leh dawp a.




"Lalneihsang,nangpawh rui suh u ka ti a ni lawm ni.Chutah rui chungin in rawn la kal zui.Ka nu leh ka u in ti harh alawm" a tih leh phei chuan hlau thawng tawh tak ka ni.An in lam ka en dak dak lai chuan " alo chhuak lovang" a rawn ti leh thata,ka phut chiang em avangin awm dawmin ka thawh hle hle.



"He pa hi alawm kal lovang ka tih pawn rawn kal a ti tala" in sawi fihlim tum zeta ka tih laiin ka bul ami chuan a bialnu kuah alo tuma ani lahin a lo nam hla zel a.



"Khawi teh i rimchhe si" a ning ta ngang a niang, Ruatpuia chu a nam deuh pawp.



"Hla te khua atang nangmah ngai em em in ka lo haw a,ngaihman i awm lo si"



"Nangpawh ngaihman I awm biklo. I rui renga,hetianga i awm reng dawn a nih chuan kan inthen mai a ngai ang" lungawilo zeta tiin kal mai a han tuma ka lo man bet vat.



"Vansangkim, bialpa ngaihman awmlo niin rui reng mah ila nang nena in then hi ka duh lo a ni" thu tak zeta rawn tiin Sangkimi chu Lalruatpuia 'n a rawn kuah ve a,keiin ka thlah vat.Chutia ka thiante pahnih ka thlir reng lai chuan ka mitthla ah Lalrinchhana a rawn langa,vawiin hian a call leh message pakhat mah ka la chhang lo.




"I ninawm" tia Sangkimi'n a kuah let chuan ka lung rawn chhe thutin "min kuah ve ru" ka ti a,ka thiante pahnih chu ka va kuah ve leh a. Mahse, kan Lalruatpuia bawkin "kan ngaizawng tel ve lo che" tiin min nam sawn phet a tuma ava han sual tak.




Sangkimi'n an ina luh ti mahse u Hruaikima kan hlauh em avangin motor kawngpui sirah vaipa thuta thu in Sangkimi min zilhna thu chu uluk takin kan ngaithla a. Kan muthlu deuha a hriat leh min rawn chum leh tawk a,kan meng phi chial mai.





"Kuri pawh vawiin lamah i nau Puitei thu min hrilh atang i pa ten i chanchin an hre chhuak vek tawh a ni awm a,chuvang chuan bansan tak tak tawh rawh. Nula i la ni a..."




"Fa hrin loh vanga thlawi lo mai mai zawk" khik suk paha ka lo tih khalh chuan nget zet hian ka kut a rawn hum a. Ka thiante pahnih hian a tirah nau ka ti tla tawh tih an hre lova kha tia ka u leh Lalrinchhana te an inneih avanga ka tal buai lai khan ka sawi chhuaka an hre ve chauh a ni.




"Nizanah Lalrinchhana nen chuan kan in bia a,ani chuan kei hi a tih sual a nih thu min hrilh a" zan hmasa lama ka thil tawn ngaihtuah chhuakin ka tap chhuak leh ta nghe nghe. Tah hi ka duhlo mah se ka thiante bulah hi chuan ka in sum zo lo leh thin.




"Kan hmela chu..ka thiannu a tih tah man hi ka la pe dawn khawp. Kuri lungngai suh i thianpa ka awm alawm,kan Zawng hura chu kan la sawisa hrep dawn a nia"




Chutianga Ruatpuia in hrosa vel chu in khawihpha veka thu kan ni bawka a ri nghal chawrh.




"Sawisak,sawisak tih a ngailo i nep ropui si. Kha ai chuan a thil sual tih man hi Pathianin ala rul let dawn tih hria ula,in nundan hi bansan rawh u. Naktuk pawh rawn inkhawm tawh ngei ngei ang che u" a ti leh dap dapa kan thiannu zet hi zawng a ropui a ni e.




Thil eng eng emaw sawia kan nuih dar dar laiin an tukverh atang u Hruaikima chuan Sangkimi a rawn ko a. Keini thian dun pawh zan a rei tawh thu min hrilhin haw turin min ti a,hnial ngam tumah awm ta lo chu Sangkimi mangtha in kan thian dun chuan kan in lam panin kan haw leh hnak hnak a.




"Ti nge U Hruaikima hian min huat em em mai le?"



"Aw,Sangkimi nen in in ngaihzawn vang a ni mai alawm." Ka tih chu hrethiamlo zet hian a meng a, " En la,Sangkimi te chu hmeichhe fel eltiang Pathian pawh lo kal se a chhanhim hmasak ber tur a ni a.Mahse, nang chu meidila a thawn hmasak ber ber tur te zing a mi i ni thung.Tu unaupa in nge chutiang mi nena an farnu te inkawp phal reng reng ang ni" kut phar meuha ka hrilhfiah takah chuan a hrethiam a ni chek ang chu a bu ve ta nghut nghut mai.




"Anih chuan meidil ka tlak loh a ngai a nih chu" a rawn ti leh..hahthlak hian.



"Ni reng e, Sangkimi nupuia neih i duh takzet chuan i nundan hi simin piangthar ta che"



"Ka pianthar daih te chuan kawm tur I nei nang" ding thuta a rawn tih chuan ka ngaihtuaha a sawi dik ve reng. Sangkimi chu ka ruih laiin ka kawm tha ngam lova. Kan thian dang te lah kha ka kawm tha peih bawk silo.



"Anih piangthar rih lo mai rawh" ka han ti leh tawp a.



"Aw le,kan pahniha kan piangthar rual dawn te a nih loh chuan ka piangthar duh bik lo. Kan pianthar hma a meidil kan lo kal hman a nih leh Sangkimi a awm alawm. Kan tui in tur a rukin min lo pe thin a nga,a hreawm bik lutuk nang" thawveng zeta tiin 'Sawi sawi mah se ka nghei dawn chuanglo' tih chu a sa nghal al al a.




Meidil a tla tui an pe ru thin em ni? Engtin nge an in pek ruk ang le? A..ka ngaihtuah peih tawh biklo.
...........


"U tho teh inkhawm ang" nizan ka room ka lock theihnghilh avangin a rawn lut thei a,khuma mit chhing chunga ka mu khawng tlat chu min tun thawh a tum ngar ngar.




"Iva han hahthlak tak. Niminah pawh U Sangkimi'n hnatlanna a i rawn kal loh avangin zawhna min zawt hrep tawha vawiin chu inkhawm ve ngei ngei tawh rawh" thaw halh halhin min thlah ta nghe nghe.




"Member tha tak ka ni a zeng pawh nilo,eng nge alo buai ve em em zel"




"Ve a,nangmah a nih kha a thlavang hauh ber ber thin."



"Ka hauh lovin ka thiannu alawm" ka lo ti leh vat chu min ei loh hmel zet hian a hmel a siam chhia a.



"I ho, tho la vawiin chu rawn inkhawm ve tawh rawh" puan chhuata tla chu khumah a rawn theh chhoh rual chiahin ka let tap a.




"U.." a ti tuara,a u zawk ni mah ila ka nau hi ka tluklo tak zet tih ka hria.



"I u sual tak hi Biakin lawi lut turin ka tling ve lo" uang zeta ka tih chuan ka nau thawm chu a reh daiha alam ka hawi chuan mittui tling deuh pam hian min lo en.




"Puite, nga ti nge! Ka ti fuh che em ni?" Hlauthawng zeta tiin a biangah ka va dawm sak.




"Ai,u...i suallo,i sual miahlo" tiin a mit atang mittui a rawn luang chhuak a.




"Ti nge tiang hian i awm,tap suh le" hrethiamlo zetin a bianga mittui rawn luang chu ka hruk hul sak a.




"Ka u Thani sawi kha dawt ti raw? Nang leh u Chhana te hi..." Ngawi leh datin ka mitah tak min en a,kei erawh sawi tur hre lovin ka ngawi ta reng, " u, khatiang kha i ti lo! Ni e, u Thani khan a hre sual a ni" ti mawlh mawlhin a bianga mittui te chu a hru hul a.




"Thu dik a nia lawm" ka tih sup chuan mak ti zeta min en in "u" a ti tham tuak a. " U Ramthani sawi ang khan kei leh Lalrinchhana hi kan in kawp alawm" in ti pachang taka ka thil sawi chu duh lovin a lu a thing mat mata,rang takin ka room atang a tlan chhuak zui a.Puitei leh Lalrinchhana inngainat zia ka hria,chutiang chiahin kei nen pawh Puitei hi kan in ngaina a,zan ka chhuah ruk chang pawha kawngka min hawn sak tu ber a ni a. Tuna a awmdan hi Kum 3 liam ta a ka awmdan nen khan a in ang hle bawk in ka ring.




Ka message tone ri avangin ka phone chu ka en a, " nimin khan ka lo theihnghilh daiha inkhawm banah ka pe mai ang che. Mahse,kan inah ilo kal a ngai ang" tih Lalruatpuia message hi alo ni a. A eng thil tak chu ni ang maw?




Ka phone chu en kualin Lalrinchhana call leh message ka chhan let loh te chu ka en reng a. Engvang nge ka ta nilo tur chu ka lo tawn kher che le? Ka at vang nge mi te angin nupui i neih hnuah pawh itan ka la rinawm reng a nih chuan ka hnena ilo let ve leh ka bei sei a. Mahse,khang chu thawnthuah chauh a thleng thei pawh a ni mahna tunah eng tin nge ka tih tak ang che?




Lalrinchhana ka hmuh tir atanga kan hun hman dun tawh te ngaih tuahin ka lo muhil leh hman a ni ngei ang Lalruatpuia au ri lang lang riin min ti harha,ka khuma ka thut chhuah rualin Sangkimi nen ka room ah an rawn lut ve chiah.




"Awi! Alo la mu ka ti" hahthlak min tih hmel zet hian a han ti hluai a,ka khumah chuan rawn thu in a han let tap a."Eng i ti pawh a ni chuanglo a rawn in khawm ve hle hle tur che alawm" ala ti talh.




"Mut aia inkhawm a thlante chuan Neihlungkhaki a ni nang" rang zetin Lalruatpuia chu lukhamin ka vawm. A duh duh danin ka hming hi a sawisa a ka ning lek lek thin. Ka hming sei lutuk hi KG-1 leh 2 velah ka thiam theih loh em avangin ka pa in V. Ramneihsangin min tih saka,ka la duh khawp lovin V.R. Neihsangi tiin ka lo thlak leha ta tang chuan ka hming hi a duh duh dana min phuah sak a Chiang a,a ngeiawm thei tak tak a ni.




"Insiam vat rawh kan in lamah phei ang,ka thawmhnaw hi ka ning tawh lutuk" a tih leh chuan "i chawh" lo tiin Sangkimi nen kan nui dun kar kar.




"Nang i inthlak hmasa dawn nge ti khan ilo kal tlang dawn?"




"Kei chu ka lo kal ve dawn hleinem,nimin lama kan blanket suk kha kan sem chhuak leh dawn a"



"A ro hman vek em ni?" Ka lo ti vat,nimina suk tuna han sem chhuah leh nghal mai an tum chu mak ka ti deuh a ni.




"Ro e,kan suk zawh khan kan spin nghal vek a,zan lamah in in chungah leh U Thara leh midang ni kangna deuha awm te inah kan pho a,a ro vek tawh alawm" alo ti sam et a.




"Na..kan thian ho pawn hun kan hmang khat e,chungte chu midang pawn an lo ti thei awm em mai. Lo kal ve rawh" ka la ti hram.




"Ni reng e, eng nge Lalruatpuia te inah chuan tih tur awma a ho leh awm ropui si. In va rui leh vel mai mai te kha a nia nga. Chu ai chuan kan blanket semna ah chuan lo kal ve ru" tia Sangkimi'n min sawm laiin a hnunglam atang pakhatin a sawmna chu hnar turin min lo signal char char.




Chutih lai tak chuan inhnuai lam atang Sangkimi an rawn ko a,ka room a tang a chhuak hlauh.Insiam vat vat tura min tiin Ruatpuia pawn a zui chhuak nghal a.



Insiam zawha ka room ka chhuahsan chuan inhnuai lam thawm tha zet ka hre nghal. Tu tu nge lo leng ni? Kai lawn lam ka pan phei chuan tha chak zet hian ka banah rawn vuanin inhnuai lam atanga min hmuh theih lohna tur bang phenah min pawt phei nawk nawk a.




"Lalrinchhan eng nge i hriata min thlah rawh" tawng rin hlau bawk si,thinrim zet in ka ti a.




"Ka chungah ila lungawilo reng em ni?"



"Lalrinchhan.."



"En teh, ka dinhmun hi i hriatthiam a ngai a ni"



"Eng chu maw ka hriatthiam ang. I hria em Lalrinchhan hei hi ka ning tawh lutuk ka mipa hmangaih em em nena kan in kar chu thuruk niin tuma hnenah ka sawi chhuak thei lova. Kei chuan zalen taka kan pahniha len chhuah dun te ka duh a,mite hnena ka makpa ang nilo a ka bialpa ka mipa hmangaih anga hmelhriat tir ve che pawh ka duh asin"



"Kuri"



"Ai,min khawih suh" tawlh hnung datin " Kan inkar ngaihtuah nan hian nikhat hun ka pe ang che"



"Maw! Eng nge i sawi awmzia"



"Khatianga i tih sual mai ka nih thu i sawi atang kha chuan kan in kar hi eng chiah nge a nih ka hre tawh lo. Chuvang chuan duh thlan tur ka pe ang che 'ka u nge kei' duh i thlan fel hunah min rawn be leh dawn a nia"




Ka sawi tur sawi zo a ka kal tur chuan kan piaha mipa inchung chhuahna kawngka a lo ding chu va hmu in ka ding data mahse, ngaihpawimawh duh lovin kailawn lam chu ka pan leh.




Inhnuaiah chuan Blanket thlepin KTP member te chu an lo ri nak naka,ka thiante pahnih erawh ka hmu mai lo. Pawn lamah chhuakin ka va hawi kuala chutih lai tak chuan kan gate a an rawn lut tur chiah hi ka han hmu a ka pan vat.




"Khawnge in lo kal daiha ka zawng che u alawm."



"Hei in kawmchhak te inchung a mi kan han seng alawm" blanket pawm tun chungin Sangkimi zawkin alo ti a,Ruatpuia pek chuan a blanket pawm pakhat chu pawm ve turin min lo ngiat tlat.




"U Mesak" ring zeta Sangkimi a au chuan a hawina lam kan in lam chu ka zuk hawia, bathlarah nichin maia inchunga ka hmuh kha phone bia in alo ding leh reng chu niin. Sangkimi auhna avang chuan a phone chu a kekawr ipte a thunin kan lam panin a rawn pen chho pawk pawk a.





Mipa hmel fai tak leh smart tak. Rorum tih ni tur si lova a mitmeng rum tak chuan a chetzia pa tak chu a thlawp zaih a. Mizo mipa ah chuan palian tak niin a kum erawh a naupang zawk zawk tawh lo tih a mit tlang chuar deuh atang chuan a hriat theih.



"Kha Sangkim iva keng tam ve ka lo ken pui ang che" kan bul alo thlen rual rualin a ti nghal a.




"Ka va lawm em" tih pahin Lalruatpuia chuan a Blanket ken pahnih chu chupa hnenah chuan a pe a.



"A..aw..a hei ka thiante pahnih hi kalna tur an neia" tun maia Ruatpuia awmdan mawilo zet avanga inthiamlo tih hriat tak hian a ti ban deuh chap.



"Aw.. a nih chu,khawi lo la rawh" ti nghal zung zungin ka blanket ken lai pawh chu min rawn lak sakin kan in lam pan chuan a kal thla leh vuk vuk a.




"Kal rawh u,kei pawh ka zuk lut thla vat a nge" tia Sangkimi kal mai tum chu...




"Khapa kha ka rin zawng pawh a ni lo. Vansangkim a fel i tih avang ringawt khan ilo be nel leh luam a nge" Lalruatpuia'n alo tih avangin mak ti zet hian kan lam a rawn hawi a.



"Lalruatpui" ka lo ti sup, Ruatpuia hian Sangkimi a hauh nat zia ka hria mah se,tun ang hian a hmel ala thutak ngai lo.



"Ka sawi chu i hria em Vansangkim" nelawmna tel hauh lo in a ti leh a,ngawi rengin ka lo ding tawp tawh.



"Ringawta che kan Pastor fapa a nih kha!"



"Pastor fapa pawh ni se a en dan che kha ka duh lo" alo ti bul leh hmuka,kha pa khan eng tin chiah nge Sangkimi kha alo en bik le.



"Chutia i rin loh viau te chuan kan bulah lo awm ve reng la ti nia" Sangkimi aw pawh a no ta fahran lo.



"In ninawm, Lalruatpui i thikthu hi pe chhe viau zel suh kal ang" boruak thlak tum zeta tiin Ruatpuia chu ka kal pui ta daih a. Kan pastor in fapa a neih awm ka hre silo a,pastor thar kan nei em ni le?


Show post links
Top

[Ngaia]

Chapter 3



Ruatpuia te in kan va thlen chuan a nu hrawn Biakkimi leh a thian hmelchhe tak tak te lo awmin thawm an lo nei lian phian a.Ruatpuia nu a awm lai nena teh khin chuan he in pawh hi zahawm tawh lo tak a ni.



In chung lamah chho in a room ah kan luta,mak tak maiin Ruatpuia hi pawn lamah a khawsa ho viau e tih lohah chuan amah hrim hrim hi a che fel faia a room te pawh ka room aiin a fel fai daih zel.




A in thlak chhungin a khumah mu ar arin inchung lama a thlalak tar ho chu ka en Kuala,ka thianpa a ni na vang vangin a style hi a dang thei ania. A room bangah eng thil mah a tar lova mah se a room chungah erawh thil tam tak a in tar thung.




"Kha kha eng thil nge?" Hriau leh eng ilo Damdawi hi a rawn lek lang a.



"I hmuh reng hi"



"Chuan heihi maw min lo hawn i tih chu!" Mak ti zetin Damdawi leh amah chu ka en tawn zak zak.



"Um,mahse ka ti lui lo che" ti mawlh mawlhin in vih a tum ta mai.



"Hei, Lalruatpui Damdawi kher hi chu a tih chi dawn em ni? A ngawl vei a awlin a na si a".



"Ka sawi kha ti ve turin ka ti lui lo che,mahse kei chu he ka nun hreawm lutuk ata hi zalen ka duha chu thil min pe thei tu chu he thil chauh hi a ni" tiin a in vita, a bulah tih theih nei lovin a thisen zam damdawin a fan lai chu ka lo thlir ngawt ngawt.



"Kuri"


"Aw" rang zetin ka lo ti.



"Dawt ka hrilh che a nih kha"


"Maw!"


"Ka nu a tha ka tih kha dawt vek a nih kha. Ani chuan kei hi min hre tawh lo" ka thianpa hmel chu ka en a,hnem a ngai tih ka hria mahse,ka thu hriat te leh hmuh te avangin ka chi ai em a,eng thil nge tih hmasak ber tur pawh ka hre lo.



"Ka nu hmangaihna kha dawn ka la duh asin. Engvangin nge kha tih lai khan ka nu bulah ka pa phallo chung pawn ka lo kal mai loh le. Tunah chuan neih engmah ka nei tawh lo" a mittui khap per sawkin a hmai chu a tuai pawk a.



"Sangkimi i nei alawm. Chuan..keipawh" ka rilru a lo lang hmasa ber chu ka sawi ta tawpa alo nui ri hak.



"Vansangkimi,kha hmeichhe fel lutuk kha kei hian ka phu takzet em? Nilo,ani kha chu ka tan a tha mah mah a ni. Keimah ang nilo amah hmangaihtu mipa tha tak a phu a ni"



"Lal..Lalruatpui"



"Nang chuan min phatsan lo ang tih ka hria,ka naupan tet atanga ka kianga awm reng thin i ni si a"



Ka thianpa kut chu lo chelh sakin ka nui suka,ka tih tur pawh Chiang takin ka hria,ka thianpa engtik lai pawha ka tana awm thin hi phatsan ka tum lo.



Kan naupan hun lai hlimawm tak takte sawiin kan nui dun hak haka, kan Damdawi chuan Ruatpuia sawi ang tak takin ka nun hreawm tak ata zalenna min pe a, ka thaw a veng sawta hun rei tak hnu a,ka hahdam ber tum a ni.




"Hello...khawiah nge...aw ka lo kal" ti mawlh mawlhin a phone dahin a pheikhawk a bun sawk sawk a.



"Khawnge I kal dawn ka lo kal ve duh"



"Joel-a te, veng thenawm ho nen an in ti buaia" a tih chuan rang zetin kan in zui chhuaka,bike a kal kan ni bawk nen Joel-a te an lo in tih buaina hmun pawh kan thleng phei vata an lo la buai nasa khawp mai.



Joel-a te ho hi chu veng leh veng in huat mai bakah a mimalin hengho nen hian in huatna an nei a,an in tawn fuh apiangjn buaina chhuak lovin an in kal pel ngai lo.



Ruatpuia pawh bike a hun fel rual rualin an insual pikna hmunah chuan ava tlan luta mahse,reilo te ah inkhawm bang pa ho rawn kalin insual chu an rawn thelh a. Chung pa ho hnungah chuan Sangkimi leh kha Pastor fapa rawn in zui kha ka va hmu a,Ruatpuia ka en chuan ani pawn a hmu ve tih ka hria.



Chung pa ho in min zilh malh malh lai chuan Sangkimi te lam panin a kala an hmaah tak chuan va ding runin Sangkimi pawn chutia Ruatpuia a hmu thut chu a meng ve kawk thei. Chutah rawn hawi kualin an piah deuha Kohhran upa ho nena kan lo ding chu a rawn hmu ve ta a.




Pa Zawma kan kawmthlang pa chuan thil thlen dan chu Sangkimi te hnenah chuan a hrilh veka,Sangkimi chu a lungawi loh hmel takzet. Kei leh Ruatpuia chu a hran deuh hleka min din puiin thil thlen dan chu min zawt tha leh a,mahse Lalruatpuia chuan..




"Engvang nge hepa nen hian ka hmuh dun che u" ngeng zet hian alo ti let thung.



"Ruih in nei ti dawn ila eng rim mah in nam bawk si lo. Anih si chuan engvanga hetianga buaina siam nge in nih" lulul leh lulul na nana chu an zawhna chhanna an in pe lo tawn teh e. Kei leh Pastor fapa chu an sirah ngawi rengin kan lo dinga sawi ve tur reng ka hre lo.




Chutah kan ngawih vang vang lai chuan " Damdawi an rui niin ka hria" kan pastor fapa ber chuan a rawn ti ta mai. Phawk zetin alam ka hawia, " an mit meng a tang khan a Chiang reng alawm" a tih zawm leh meuh chuan ka mit ka lo hup vat.



"Dam...Damdawi maw! Lalruatpui" rilru na tih hriat taka ka thiannu in a mipa hmangaih em em ka thiantha ber ni bawk a enna mit meng chu ka en a,rei erawh ka en ngam lo.



"A ni lo" lo ti vatin ka bula mipa ding chu rum zet hian ka en a,ani lah chuan sawi dik in ti zetin min lo en ve ran.



Chutah Sangkimi chuan Ruatpuia kun tlat chu din hnaih deuhin"Eng tik atang khan nge?" A han ti ringawt a. Mahse,ka thianpa chuan chhanna a pe thei lo. Rilru na zeta keini ho min tlansan chu ka en reng a.




"Mawla va um zui ta che" Ruatpuia dara ka chum chuan peih loh hmel zet hian a kal ve leh maia,eng a hria chu ni maw! Nidangah te chuan Sangkimi'n a then loh nan chhuanlam fahrah te te siamin a mawh min phur tir leh vek awm si a.




Thinrim lutukin ka bula mipa ding hnenah chuan " tu nge i nih? Engvangin nge kan thian ho inkarah i rawn in rawlh" ka ti chiam a. Ani hian Damdawi chungchang kha rawn sawi lang lo se chuan Sangkimi khan engmah a hrelo mai tur.




"Kuri buaina siam belh kan duh lo ania,lo kal rawh in in thleng ka va thlah ang che" dam dapa rawn ti tu chu kan kawmthlang pa pa Zawma a ni.




"Nanga thlah pawh ka ngailo" tih khuma ka thiante pahnih liam takna lama kal ve mai ka tum chu kha Pastor fapa khan ka bana lo chelhin min lo dang a.




"Pa Zawm lo ngaihtuah suh keiman an in thleng him dam takin ka va thlah a nge" tiin min chelhna atanga tal chhuah ka tum lai chuan pa Zawma chu a bia a.




"Aw le,hei committee ngai kan la ni bawk sia kan kalsan phawt mai ang che u" lo ti ve in chung pa ho pawh chu an kal liam ve leh ta a. Khang mipa insual ho pawh kha an lo awm leh tawh miahlo.




"Min thlah rawh" tih leh na zeta ka ban pawh ka ruala ani pawn min lo thlah ve mai. Ka kut a vawn lai khan tha a seng vak pawn ka hre si lova a han thlah chiah chu a sa hat hat thei.




"Hmeichhe zan chhuah ruk ching, Damdawi tih hmang leh mahni makpa ngaizawng bawk."




"Na.. nang"



"Kal rawh,khang pa ho hnena ka lo in tiam angin in in thleng chu ka va thlah ang che" tun maia min deusawh dan kha hre lo ang hmak hian a rawn ti leh!



"Ka duh duh danin ka nung a nga,ka duh duh chu ka ngaizawng bawk ang tah chuan nang hian lo sawi ve tur pakhat mah i nei lo" ka tih chiam laiin min thamlo zetin ani alo khi suka ka ava han haw mai mai tak.




"Hmela leh" tia han khawih mai ka tum chu ka banah lo vuanin a lamah min pawt sawk a.A awmah ka va beilo chauh a ni.




"Nang ang hmeichhe tawp lutuk nunah hian ka buai peihin i ring em ni?" Rawn kun deuh hian a ti thawp supa ka lo tal leh aih aih thin chu ngaihnep hmel zeta min en chhuk run in, " hrin man awmlo lutuk" a ti leh sup.




Tak zet hian he Pastor fapa hian min ti thinrim tawh takzet. A tawngkam reng atang pastor fapa pawh a nih ka ring nek lo ve. Nge ni a, Veronica-i te ho sawi ang tak takin heng Pathian rawng bawltu in ti keini ang min hmusit em em thin tu te hi lem chang mai zawk. A nih pawh a ni mahna ka u nun zia reng atang a Chiang alawm le.




Min tih luih tlat avangin kan in lam pan chuan ka kal ta nghe nghe. A thu anga awma haw chu tumlo viau mah ila kha tia thupe aw taka min biak leh min melh run avang khan hnial buai tawh lovin ka kal ve mai a,keipawn mak ka in ti zawk lek lek.




Ka awmdan mak tak ngaihtuah chung zela kal ka nih avangin ding leh thinin ka hnung lama muang changa min zui tu chu rum zet hian ka han en leh ren rawna engmah sawilo in ka kal leh rih thin ka va han ning mai mai tak. Kan gate a ka luh chuan ani chu alo lut ve lova kan gate bulah chuan dingin kan in a ka lut tur chu min en renga keipawn kawngka ka hawn hma chuan alam chu ka en vang vanga ka luh san ta chauh.




Inchhungah chuan ka chhungte an lo kim veka U Ramthani te pawh an chhungin an lo awm a. Lalrinchhana pawh makpa tha ber awmin alo awm ve bawk. Chuan a duh chu a thlang fel ni ah ka ngai. Ka chhungte chu va pawh duh lovin inchung lamah ka chho a,in tifaiin ka khum ka luah lum nghal vat.




Zan dang anglo taka ka haw hma em avangin ka awm thiamlo hle a. In hnuailamah lah ka awm ve tih pawh hrelo in an hlim em em a. Tum loh deuhin kha Pastor fapa kha ka ngaihtuah chhuak thut. Duhlo zetin ka sam ka han tuai chiama mah se ava han sawt lo si em.




Rinchhana nen ka han khaikhina pawnlam lan dan mai atang pawn Rinchhana chu a dah nil hneh lutuk. Awi,thil ni lo lo ka ngaihtuah dawn, ahma in tiang hian Lalrinchhana nilo mipa dang ka la ngaihtuah ngailo. Mipa min duh der tu leh chhelo tak tak te pawh awm thin mah se Lalrinchhana ka duh hnen em avangin chung ho chuan ka ngaihtuahna peng khat pawh an luah ngai lo.




Mahse,tunah eng nge thleng ta hi mipa ka vawikhat hmuhna a ka thuruk hre vek tu leh mawilo taka min tawng khum tu ngei kha tunah hian ka ngaihtuah mek chu a ni a. Ngawi teh heihi Lalruatpuia Damdawi min pek hnathawh kha a ni thei mai a ngem?Ni e,a ni ngei ang.




Chuan he kan Pastor fapa hian ka thiannu Sangkimi lakah hian eng thil chiah nge a duh. Ani hian ka thiante pahnih in kara tlak zeh a tum alo nih vai chuan ka ngawi mai mai hauh lo ang. Rang zeta ka phone phawrhin Ruatpuia ka phone a mah se a chang thei lo. Chutiang chiahin Sangkimi pawn an ni pahnih hi an va in sawi fel thei em ang chu maw?




Message hnutchhiah ve ve in ka muthilh san a. Zing ka thawh leh meuh chuan Sangkimi message lo awmin chhun lamah a thawhna Restaurant a in hmuh a duh thu hi alo ni a. Ruatpuia erawh in ka message pawh online reng siin a en lo va. He pa hi a zinna ah khan eng thil chiah nge ava tawna ti em em a a rawn danglam tak.




Mak tak maiin zan ka mut hma vang nge ka thangharh hma hle a,inhnuai lama ka chhuk pawn ka chhungte tumah an la tho lova chutah Bawihpuia choka ah chuan tui la turin a rawn lut hlawl a,kei min hmu chu a Phu deuh zawk zui.




"Au Kuri chu ilo haw chiah em ni?" Mak ti zet hian a han ti a,lu ka lo thing mat mat. Ani hi 12 exam turin a in buatsaih meka a hun tam zawk hi a room ah in khungin lehkha a zir thin a ni.




"I thawhna a rei tawh em? I zir laiah eng nge i an?" Ka coffee lem khalha ka tih chuan hah hmel zet hian dawhkanah a tui bottle a nghat a.




"Chemistry ah buaina tlem ka neia,i peih chuan min lo en pui" in thlahrung zeta min en in ka chhanna a nghak a.




"Aw le,lo kal rawh puih i ngaih chuan min hrilh hreh reng reng suh" tiin kan in zui chho a. Ani nen hian kan in be tam lova. Delhi lama ka awm avang leh ka nun dan avang hian ani mipa zakzum leh tawngtam lo tak hian min pawh tha duh lova. In khata cheng dun e ti lo in kan in hmu khat thei khawp mai.




Ka naupan lai reng atang lehkha ka thiam theiin lehkha zir hi ka nuam tih ber a ni thin. Ka pa phei chuan min chhuangin kan unau ah min duat berin ka hre hial thin bawk. Mahse, Lalrinchhana ka tawn atang ka pa nen kan in kar chuan hlat lam panin tunah phei chuan a fa te zinga a huat ber ka ni ta hial a ni.



"Duh duh hunah lehkha min zir pui turin ka ko thei ang che maw?" A thiam loh te ka en zawh pui hnuah lawm tih hriat tak hian a han nui a.




"Tehreng mai,Puitei pawh ka pui nasa thei lutuk alawm" tia a vawikhat nan tak meuha Bawiha nen in nel taka kan titi lai chuan Puitei a rawn luta,chutia keini pahnih min hmuh chu mak a ti ve deuh tih a hmelhah chuan ka hre thei.




"Au Kuri teh daih chu! He tah eng nge i tih a?"



"U puite hei au Kuri'n Nizana ka thiam loh kha min chhan sak a" lawm takin a lehkhabu chu a u bulah a hmuh tir vat.



"Awi, he thil hi a buaipuina a rei tawh lutuk ilo en pui hlauh chu a tih zia hle mai. Zan lamah hian leng chhuak tawh lovin Bawiha lehkha zir pui thin tawh la a tha ang" pakhat lah chuan alo la ti zek zui.




Chumi tuk chuan hun rei tak hnuah chhungkaw kimin tukthuan kan ei ho a,ka chhungte bula chaw ka ei lohna chin pawh hi ka hre tawh lo. Zingah ka thawh hma in an chhuak veka,tlai lamah lah pawn lamah zanriah ka ei leh thin a. He in ah hian riak tur bakin ka haw ngailo ti ila a dik ber ang.




"Nizan lamah i u te nupa nen kan in bia a" aw thian kharh kharha ka pa in a rawn tih chuan kan boruak chu a rit sawt khawp mai.




"Anni nupa chuan inthen an tum lova, Chhantea pawn a tihsual pawmin i u bulah ngaihdam a dil tawha nang pawn thil hlui te chu theihnghilhin i zirna zawm leh turin ka duh che a ni" ka pa chu ka en a,a chaw ei lai chauh ngaihsak mai awm hian a awm a. Ka nu chuan ngawi rengin min lo en thung.




Ka u te an inneih lai khan kan exam mai tur tlansanin Mizoramah ka haw chho a,mahse ka let tawh lo a ni. Chumi avang chuan ka pa hi ka chungah a lawm lo hle a,kan in hauin a hnu leh zela ka nun dan te avang phei chuan thinrimin hmai sen min hmuh ta fo a. A hma a pafa in ngaih tak thin kha pafa in hal takah kan lo chhuak ta a ni.




Chaw ei kham lamah chuan Sangkimi hnathawhna hmun lamah kal tur chuan ka in siama,a hmun ka va thlen chuan a ngaite in alo vir buai leh char char tawh.




Min hmuh veleh an boss hnenah chawlh dilin dawr chhunga dawhkan pakhat chu kan kil dun a. Midangin kan tawng an hriat loh nan a tawng zawng chuan a rawn awm hnai zel.




"Lalruatpuia chungah hian ka hriat ve loh thil thleng a awm em ni?"



"Ti nge?"



"Nizan khan inthen a duh thu min hrilh a" ka lo meng kawk thei, " a nu dinhmun dik tak hi i hria em? A zin rawn haw hi ka lakah eng emaw thup a nei tlat hian ka hria?" Rilru buai hmel zeta dawhkan chung khawih neuh neuh pahin nizan lama Ruatpuia nen an in biak dan vel chu min hrilh malh malh a.




Lalruatpuia chuan ka hnena a sawi a nu dinhmun diktak te leh a rilru hahna te kha engmah a hrilh lo. Chu aiah chuan Sangkimi chu a hnen atang kal tir a duh zawk a ni. Eng nge a chhan ka hre lova,mah se ka thianpa hi a beidawng ta takzetah ka ngai a ni. A hma kha chuan miten eng ang pawn lo sawi se Sangkimi then a sawi ngailo.




"Ka lo be dawn nia" ti ringawtin Sangkimi chu ka hnem theih mial beiseiin a kut chu ka va vawn sak a.




Sangkimi thawhna chhuahsanin kawng ka kana chumi rual chiaha ka phone lo ri chu Lalruatpuia a nih ringin en manglo hian ka chhanga mahse, Lalrinchhana zawk lo niin...



"Biak che ka duh in hmu ang"



"Nang nen hian in hmuh na chhan tur engmah kan nei tawh lo"



"Kuri"



"Ka pa in engkim min hrilh vek tawh" ti deuh hmakin call ka off a. Ti nge thil engkim mai hi a buai em em vek mai le. Lalrinchhan a tawp thlengin....khawlai em a mittui tih tlak ka duh loh avangin chhunglam melhin ka hmui ka pet fan fan.




Chu tah rilru ti buai tur ting tangin kha Pastor fapa leh Sangkimi dawr chhunga nui dun leh innel hmel taka an titi vel chu ka va hmu leh a. He mi te pahnih in karah hian eng thil chiah nge awm, Sangkimi mipa nazawng nel ngailo leh mize zawi em em khan eng tin nge ni reilo te chhunga a hmelhriat chu heti khawpa a nel nghal thei mai.




Ruatpuia rinhlelna te kha alo dik zawk em ni? Chuan hei vang hian em ni Sangkimi chu then alo tum? Ni e, a dik ngei ang ka thianpa hian a hmangaih ber hmeichhia chu amah ang rui reng thin nen nilo mipa tha tak nen inkawp se a duh a nih kha. Hei a duhthusam ang ngeiin pastor fapa a hmu a, a duhthusam ti puitling turin kal tir a tum ta a nih hi.




Rang zetin ka thianpa te in lamah chak thei ang berin ka tlan a. An kawngka pawh kik buai lovin an in chhungah tlan lutin ka thianpa room ah chuan ka tlan chho a,ani chu chhuatah thu in Sangkimi nena an thlalak te chu ngawi reng hian alo en a. A bulah syringe a let ngat bawk.




"Kha pastor fapa vang kha a ni em?" Tiin a bulah chuan ka zuk thu a,rang zeta a phone chu hmet thimin ka lam alo hawi a, " mawla i hmangaih a nih te chuan hetianga ti lo hian chelh tlat tur i ni asin" ka tih leh chuan nuiin na zet hian min kuah bet.




"Khawi teh" tiin ka tal chhuaka, "a dang ala awm em" tihpahin syringe ruak chu ka leng kang.



"I chiang maw?"



Lu bu nghutin,"Kei pawh Lalrinchhana nen kan in kar a tawp fel tawh. Ka pa in ka zirna zawm leh tura min kal tir a tum a" ti siam siamin ka ban chu a Chiu turin ka dawh pah.



Zana ka haw chu ka pa in ka zirna zawm leh chung chang min lo sawi pui a,kei chuan ka lo duhlo nasa. A tawpah phei chuan aw ka vinin kan in hau leh a. In atang thinrim zetin ka chhuak.




Dawrah lutin eitur ka lei teuha,ka chhuah dawnin kha pastor fapa kha ka hmu leh. Min kal pelh mai a tum chu ka lo be vat.



"Nang hian ka thiannu kha i ngai zawng em ni?" Ka ti deuh tawla,a hawi a lek lek mai, " Sangkimi ania ka sawi" ka lo ti leh.



"Thil hriat sual nei i ang hle mai" ti maiin min kal pela,eng thil mah sawi belh tawh lovin keipawh dawr chhung atang chuan ka chhuak ve nghal.




Dawr thlanglam inte ah chuan thli thaw dawngin ka thu a,ka eitur lei pawh tuilo zet hian ka ei pah. Zanin chu kha Damdawi khan min chhawk reilo hle mai. Tunah te hian Lalrinchhana ka ngai lutuk,zan dang te chu nise duat taka min kuahin ka vawiin hun hman dan te min zawt leh ngei awm si a.




Chutia ka in ngaihtuah lunghnur lai chuan ka bul maia mipa rawn thu chu ka mit sir zeuh. Kha pastor fapa bawk kha a ni."Helai chu a view a that phian hi" ti ham hamin a drinks lei chu a in pah a.



Kan veng hi veng sang lam niin Biakin hnaih a ni a. Pastor Quarter pawh kan in piah kawi chhak lawka awm a ni. Chuan tuna kan awmna phei hi chu kan veng chhunga ka hmun ngainat ber a ni,a hmun a theng thaw nuamin zanah phei chuan khawpui eng phe uar a thlir thei a,ka kal fo thin.




"Ka puk a nih hi" bul deuh hmuka ka tih chuan a nui ri hak.



"I duh leh awi suh,ka puk anihna a bo chuanglo" ka ti leh hram.




"I puk a ni lo ka tih loh kha" tiin mawi em em mai hian min rawn en a,rang zetin ka lo hawi san. " Damdawi kha i khawihna a rei tawh em?" Ka rin loh lutuka zawhna min rawn zawh avang chuan alam ka hawi leh.



"Professor ka nia, college ah naupang mize in anglo tak tak ka enkawl thin. Chung zinga ka naupang pakhat chu class ah Damdawi OD in a boral a" thil thui tak ngaihtuah ni awm tak hian hma lam chu a thlir vang vang.




"Lungngai suh kei chu OD in ka thi dawn lo reng reng" ngaihtuah lem lova ka thil sawi chu ka sawi zawh rual rualin ka in chhir nghal.




"Ni e, thih miah suh ang che" chu a thusawi nghet charh avang chuan chu mipa a hma lam thui tak thlir reng tu chu ka en reng a.



"I zirlai thi ta chu i tan eng nge a nih?"



"Chu chu itan a pawimawh em ni?" Ka lam a rawn hawi ve leh ta.



"I hmelah khan natna thuk tak ka hmu thei,chuvang chuan..."



"Amah nilo zawk"


"Maw!"



"Ka nupui hual ania,he khawvela ka hmeichhe hmangaih awm chhun a ni" thawp supa a rawn tih leh chuan sawi tur mai hrelo in ka lu chu muang changin ka bu a, " kum hnih liam ta khan accident in min boral san a" a tih zawm leh meuh erawh chuan awmdan tur pawh ka hre tawh lo.




"A pawi hle mai" mawi hawiah ka ti thei tawk.




"Ha..a mak hle mai" rawn ti lehin a nui deuh hak a,a eng chu nge maw mak! Pawi ka tih thu ka sawi vang kha maw? Chutah min rawn en in, " ka hmeichhe ngainat loh em em bulah ka sawi duh ngai loh ka sawi ta mai chu a nia" atthlak tih hmel zeta a nui chu ngei zetin..




"Keipawn ka ngaina biklo che" tih khum deuh hmukin lehlam ka hawi sana, a nui ri ka hriat chuan ka melh zawka ka nui ve leh ta tho a. Zanin ka awm dan chu a ho in a naupang chhia ka ti tak zet.




Chutah za zeta kan nuih dun lai chuan Chiang em em a in melh fuhin kan nui tawp riai riaia,ka awm dan chu a lai thar deuh tuta,ka khuh der ta khak khak.




"Ka han haw chho a nge,nang pawh haw vat ang che. Hmeichhia zanah an chhuak an chhuak ngai lo a nia" tiin min kalsana za lo zeta then sukin thawk ka la ham ham.


Show post links
Top

[Ngaia]

Chapter 4



MESAK POV




" U nizan kha ivan lo let har em em? "
Dawhkana thingpui in tur min pek paha Grace-i'n a rawn tih chuan nizan lam kha ka ngaihtuah let.





Kha tia haw tura ka kal kha dawr neitunu lo in khar chiah nen kan in be kawi leh a, " kha i thiannu nen chuan in in be thei vak na nge?" Tia min lo zawh avangin ka hnunglam chu ka zuk en leh.





"Nia,nang zawk iva in khar hma ve"





"Zanin chu kan naute a damlo nen hawng rei lo mai ang". A tih mek laiin kha hmeichhia bawk kha ka zuk en leh a.





"Ti khuan a thil lei ho khu a ei zawh hunah a haw ve leh mai ang" alo ti chuan nui sukin.





"Chu alo kal ngun viau elaw?"





"Ngun ve tho mai,i ngaihtuah deuh em ni?" A zawhna avang chuan ka nui mai a."Anih ka kalsan phawt mai ang che" tiin min kalsan a,keipawh kal ve nghal mai ka tuma eng nge ka hriat ni,ka kal thei tlatlo.





Hla play in a piah lam ram hla tak chu a thlir reng a. A kal fo thin tih leh an in atanga hnai tak a ni tih hre reng chung pawn amah chauha han kalsan chu ka ngam tlat lo.





Ti chuan a haw hma chu a chhak thim chin atang chuan ka nghak ta reng a. Ka rin ai ala thu rei zek zui. Dawr nghak tunu khan a thil ei zawh a ti a,zanin chu a boruakin a zir nge a thil ei tur a ei zawh hnuah pawh ala thu renga ka tum ai rei ka men phah.

...



"Vung vunga che, i thingpui kha a dai hman vek ang" ka nau aw bawkin ka ngaihtuahna ata min ti harh leh a. Zan ka men rei vang nge ka ni deuh bura ka tho harh lo tak zet.





Grace-i sawi ang tak takin thingpui chu alo daih vek tawh avangin vawikhatah ka in zo nghal vek a.




"Ngaihzawng i nei em ni?" Tia min rawn zawh chuan nuiin tui dehna lamah ka no ka keng phei a." I hmel kha i nei Chiang mai" min dawp chhuah tum takin min rawn din hnaiha,nizan lama ka awm dan hria se chuan hetiangin zawhna min zawt tawp awm si lo.






"Thingpui lum pawh ilo thiam tawh hle mai" ti maiin choka chu ka chhuahsana,ka ham leh bai bai thin.





"Thara'n an a thawhna school ah pol.sc teacher ai kal a zawn saka,chu mi ngaih ven chuan vawiin chu ka va chhuak teh ang" ka thil sawi avang chuan ka pa chaw bar tum chuan ngun fe hian min rawn en a.





"Ai kal maw? Chu ai te chuan i hna ngaiah let leh la a tha zawk lo em ni?" Ka nu zawkin alo ti vata, ka rin lawk tho a nih avangin ka pa min chhan hun chu ka nghak ran.





"Vuana pawn min rawn be renga,i nu sawi ang khan hna thawh leh te i tum a nih rau rau chuan Aizawl lamah i hna ngai zawm leh turin kal zawk ang che" dam dap,mahse thu pe aw tak siin a rawn ti ve a.





Mahse,kei chuan ka thu thlukna sut leh ka tum lo. Kha college ah khan let lehin Vansangkimi nen kan sulhnu chhui kir reng renga hun hman ka duh lo. Kan khaw lama haw lova hetia ka pa ka zui chhan pawh pangngai taka ka nun ka hman theih ka in rin zawk vang a ni a. Chuvang chuan let leh ka tum lo bur.





"Engkim tih fel sa vek a ni tawha,Aizawl-ah chuan ka let dawn lo"





"He tia i awm chhan hi kha hmeichhia vang kha a ni em?" Ka kut chu na zeta hum ruhin ka pa chu ka en. "Mipa i ni a, hmeichhe pakhat vang mai maia nun hlauh thak tur i ni lo" ka pa ka chhang let hma chiahin ka nu alo tawng hman.






"Ni e Bawiha, hetia awm ve tawh lo ngaia i hmakhua i ti chhia ka hmuh hian ka lai a dam thei thawtlo,i pa thusawi kha ngun takin ngaihtuah rawh" a rawn ti ve dap dapa,engmah sawi zui tawh lovin chaw ei dawhkan chu ka thawh chhuah san a.






Ka chhungte rem tilo chung chu Thara call in hna chu ka thawh theih tur thu ka va hrilh a. Chaw chhun ei hunah in hmu a,thil tih fel kan tum a ni.






Rei a chawlh theih dawn loh avangin an school thlanga in hmu turin 11:00 am velah in atang ka chhuak a. Kan in hmuhna tur dawr ka va thlen chuan rin aiin mi an lo tam phian. Thara thawhna school hi kan veng chhung nilo in veng thenawm a ni.






Ka piah deuhah chuan thalai rual khat chu an ri leh hak thin a. Tleirawl lai min ti hre chhuak ve hial thei.






Thara chu a thawhpui hmeichhe raipuar leh mipa pakhat nen an rawn kal a. Raipuar chu a ai ka kalsak tur a nih ka ring ve hmiah.




"Min lo nghahna a rei tawh em?"




"Rei love ka thleng ve deuh chiah a ni e" lo tiin thil ei pahin ka hna kal hun turte kan sawi a. Kar leh Monday atang class chu ka kal ve tan dawn a ni.





Ka hma mipa thu ve chu a tawng mawh hle a,kan piaha thalai ri leh hak thin lam chu a melh leh run run thin. Kei lah chuan amah chu hmuh tawhna nei tlatin ka in hria a,mahse ka hre chhuak mai thei lo.






"Lo han chho ru ka rawn chho ve vat ang" khapa khan tiin keini ho dawr atanga kan chhuak tur chu min zui ve lovin dawr kil lamah chuan a phei a,ka va en let chuan tu nge a nih ka hre ta chiah.






Thara'n min lo auh avangin ka chhuak zui ve nghal a. Ka ngaihtuahna erawh dawr chhunga ka mi hmuh te ah daih khan a awm. Zunin lamah in zui pheiin mei zu in reilo te kan ding leh lawka,chuta ka let tur chu ka thil hmuh avangin ka ding nghal chawt.






"Lalrinchhan min thlah rawh" tiin mipa lak atang chuan tal chhuah a tuma,an lam chu pan vatin a mipa zawk chu a hnunglam atang ka pawt hrang dawr.





"I tha em?" A dar tawn tawna dawmin ka kun hnaih deuh.





"Hmela leh.." tia kut rawn phe fuah a vang chuan ka biang chu ri no chawkin ka bula hmeichhia chu a te that. Kut thlawn tawrh ka duh loh avang leh thinrimna ka neih avangin rang zeta ka kut ka lek chu a hmeichhia zawkin lo din hliah pah in..





"Khawngaihin" mit meng fiah zeta min en in a ti sup. Chuvang chuan thinrim lungawilo zet hian ka kut chu ka dah thla riai riai.





"I duhlo chung khawih luih tum tu che chu ila tan tho ang maw!" za lo zet hian ka nui hak. Engvangin nge ka lo va inrawlh reng reng ni.





"Mawla leh ani hi ka hmeichhia ka duh duha ka mutpui theih a nih hi. Lo inrawlh tum buai duh suh" pawr zeta titu chu na lua awm lova khawih ka va chak teh reng em. Eng tin nge hetiang nungchang nei hi naupang te zirtirtu a nih theih zawk.






"Lo kal rawh" ti a,kaih mai a tum chu a hmeichhia zawk chuan a duh ta tlat lo. Kun deuh ngar hian a ban chu a lo thukru a.





"Kal rawh, Chuan heihi ilo hre reng dawn ania kei hi i duh duha i tih kual theih hmeichhia kha ka ni tawh lo" hnuk ulh lek leka tiin hawi pawh a hawi chhuak duh lo.






"Tunah chuan ka kal phawt a nga,mah se Lalneihsang ka hnenah tho i rawn let leh dawn tih hi hre rawh,i virginity laksak tu che ka nih avangin nang hian min kalsan thei ngai lovang" chaldelh taka ti deuh charh charhin chhaklama stepah chuan hawi kual vut vut chungin pen chho a.





"Khatiang mipa vang khan i nun i ti chhia chu ania." Nem lem lo taka ka tih chuan mittui tling pam leh tah chhuah a hlauh em avanga hmui sai dar dara min en in..





"Ka ..ka hua che" harsa tih hmel zeta rawn tawng chhuakin a mit atanga mittui rawn luang chhuak chu a tuai pawka,in herin min kalsan.




Ha...min hua a maw? Kha mipa laktlakloh zet kha nilo in kei hi min hua a maw? Lalbuatsaih engvangin nge khatiang hmeichhia avang khan ilo buai ve chiam ni! I a tawh a nih hi. Mahni leh mahni in bia in ka kam sir thi ser ser chu ka tawk zeuha a thip phian mai.

.........


KURI POV



"Kha heihi zu la a zia vek mai ang" a weed zuk lai min pek chuan ka lo ban vat.





Kha pa kha ka hua,ka haw tak zet. Hun reilo te chauh ka la hria in kan in hmu a,kan in hmuh apiang lah hian ka chanchin mi tam zawkin an hriat loh a hre ziaha, engvangin nge amah kher kha a nih?






Amah kher a ni pawh chu engvanga thinrim em em nge ka nih, ani khan ka chanchin hi a chhe lai chauh nilo a tha lai te hre ve se ka tih vang zawk em ni? Lalneihsang i khawsa zia chu a mak sawt hle mai.






Za lo zeta nuiin ka mei zuk chu na zeta fawpin a khu ka hip lut vang vanga,ka zia huaiin ka hria.


(zawmna)




Ka dan ngaitein Lalruatpuia ngaihven turin ka kal leh a,ani ve lah hi in ti pa tawka a bialnu then a tuma amah ber ber a ni leh sia hreawm ti tu. A room ah a tawm renga, Sangkimi nen an thlalak a en theih chuan a lungawi tawk em em.




"I ngaih em kha chhang ve hle hle ta che" a room ka luh rualin a phone ri ka hria a,lo call tu pawh tu dang nilo in Sangkimi a ni.




"Ti hian a tha zawk" a tih rual chiahin phone chu ka hmet tawpa, " ti nge?" A rawn ti leh deuh hluai.




"I chhang duh bawk silo a ka ning alawm" ka tih khum hmak. Chhang duh miahlo in a ring erawh off a phal Chuang der lo khawngaihna nei lo lutuk mai.




"Kha pastor fapa nen khan eng inzawmna mah an nei lo" a khuma let tapin kha pastor fapa kha ka mitthla,ti nge alo lan hun hi a fuh loh em em thin mai le.





"An nei ka tih loh kha,keiai chuan ani khan Sangkimi a enkawl tha thei zawk ang ka ti mai alawm" ka nur khum nang, kha pastor fapa kha a thik vang mai mai.





"Sangkimi i ti khawngaihthlak lutuk,min rawn biak te hian sawi tur ka hre silo. Va bia la,in ngaih leh ru"




Min chhang tawh dawnlo emaw ka tih hnuah zawi fiah zet hian "Ka hrelo,a chang chuan a tan hian phurrit mai ni hian ka in hre thin" rilru hah tih hriat zeta thaw hakin a ding deuh uai.




"Ila nei em?" Ka tih chuan rang zeta lu bu in a thawmhnaw bawm lam a pan nghal. Ti nge maw thil tha lo lo te hi thil nuam ber ber a niha,zun an neih tlat zel ni.




"Keiin Lalrinchhana chan ka hlauh em avangin ka u pasal a ni chung pawn ka thlah phal lova,nang lah chuan Sangkimi then tumin i room ah ilo in khung bawk. Ava han in an loh theih ngai ve" ban pharin khumah chuan ka let kual chiam.



"Hmangaihtu te hian hmangaih let ve kan phu lo em ni?"



"Maw?" Ka che chu ka tawp hmak.



"Ka nu khan ka pa hi a hmangaih takzet asin. Mahse ka pa a hmangaih vanga a chan chu uire sanna chauh a ni" thawp supa a thil sawi chu ka ngaihtuah chianga ka tah a chhuak.Engvangin nge hmangaihtu te hian kan mi hmangaihte hi kan neih ve mai theih loh.




"Ka pa fapa ka nih avangin amah ang maia awm ka hlau a ni. Sangkimi hi mahni hmasial takin kawp zawm zel ta ila a rei hnuah ka pa ang mai hian thununna ngaithei lovin Sangkimi tih nat ka hlau.."




"I ngaihtuah thui lutuk a nih kha"



"Nangpawh i tum ai hma in Lalrinchhana'n i u nupuiah a nei a ni lawm ni"



"Lalruatpui" ka ti that.



"Eng nge sawi dik loh ka nei em ni? Mipa zawng zawng chu hetiang vek hi kan nih" au deuh tuara a rawn tih avangin ka phu dawr a,hamhaih zeta ka en reng laiin." Hmei...hmeichhia ka chetsual pui" muang fan raiha tiin khumah a thu hnawk a.




"Lalruatpui tunah khan eng thil nge i sawi zawh chiah kha?" A bulah thuin a darah ka nam deuh sawk.




"Ka tum pawh a ni biklo,kha tia ka nu in Alzheimer avanga min hre tawhlo tih ka hriat khan ka rilru na lutukin zu ka in chiama.." beidawng zeta a tih meuh chuan ka va han thinrim tak.




"Ti..ti nge a tirah min hrilh loh?" Ka ti leh a tir khan a nu in a hriat tawh loh thu leh a pa a huat thu te,a unaunu nen an inkar that loh thu te min hrilha he thu hi engvanga zep nge a nih. Sangkimi kha tia then a tum ringawt pawh kha mak ka tiin a chhanah kha pastor fapa kha ka puh saka mah se,he thil vang zawk hi alo ni reng si.




Sawi sawi mahila eng thil mah ka siam tha thei tawh bawk silo. Rilru buai leh mangang zetin kan in lam ka pan a,Sangkimi bulah eng thil nge ka sawi tak ang.




"Aaa..."



"Au Suh" tiin ka hmui a hupna a thlah rual rualin "Lalrinchhan" ka ti that.




"Vawiin ami kha tu nge? Eng in zawmna nge in neih?" Tia min zawh chuan za lo zeta lo nuih khum hakin




"Ti nge nanglo mipa dang ka kawp chu i hlau leh viau si elaw?"



"Min tih thinrim tum hauh Suh"



"Lalrinchhan khawnge I in rintawkna te an awm tak,vawiin mai kha chuan i ta ka nih zia chapo takin i au chhuah pui ngam a ni lawm ni? Nang hian i tello a ka awm theih loh thu min sawi khuma tiraw mahse, lo en rawh i tello a ka awm theih zia hi ka hmuh tir ang che" ti charh charha kal mai ka tum chu kan compound hungkualna bangah min nam bet in.




"Ka..ka tihpalh vawiin khan ka thinrim em a,sawi awm leh awm loh pawh ka lo ngaihtuah lova..."




"Nilo,i sawi tur dik tak i sawi zawk a ni. Khang kum chhung zawng khan min hmangaih ve miahlo tu avangin ka nun ka lo ti chhe tawha, ka siam that theih a ni tawhlo tih ka hria mahse ka tih chhiat belh tawh ngai lovang" ka dar a vawnna kut chu phih thla in..




"Ka u leh ka pa ten hetah ilo kal tih an hriat chuan eng nge thleng dawn i hriat kha,chuvang chuan ngawi reng khan let la min rawn ti buai leh tawh suh ang che" ka kal hma chuan a tawp nan ka mipa lo hmangaih em em thinin mak tihna,inchhirna leh beidawnna mit menga min en na chu ka melh ve renga, chu thlemna ngaia ka luh nawn leh lohna tur erawh chuan nasa taka in sumin ka kalsan ta a.




Na lo anga lan ka tum pauh leh ka chhunglam a na ting si. Thil dang zawng ai kei min thlang chu nise,ka la hmangaih reng tih ka hrilh tur a ni a. Mahse,ani chuan min thlang ngai dawn silo.




Bawiha lehkha ka zir pui e ka tia ka ngaihtuahna ah erawh a lut lo khawp mai. Nichin maia Lalrinchhana ka tawngkhum dan zawng zawngte ka ngaihtuahin pawi tihna leh tih lohna in zat reng..ni leh lo,pawi tih lohna buk chu a rit zawk ngei alawm.




Mahse,ni e 'mahse' hi a awm leh thin.
Ka awm dan erawh thinlung taka hmangaih nei ve te chauhin an hrethiam in ka ring.Mi pa a nihna lam kha a pawimawhlo amah chu ka mipa hmangaih a nih miau avangin engtik lai pawn akianga awm ka duha mah se a mi min tawngkhumna te zawng zawng ngaihtuah erawh chuan kalsan hi ka tan a tha ber tih ka hre bawk si.




"Vanramneihsang.... Lalneihsang khawnge I awm?" Inhnuai lama hmeichhe rawn au tuar tuar chu a hmel hmulo mah ila tu nge a nih ka hrechiang tak zet.




"Ka zuk kal lawk a nge, ti khan lo zir rawh" tih leh Bawihpuia room chhuahsan ka rual a.




"Thante eng nge ni ta bawrh bawrh"



"Khawnge kan mihur nu kha a awm" ti ang renga ka u tawng Kara ka nu lo tawng ri leh thin ngaithla chung chuan inhnuai lamah ka chhuka ka u in min hmuh rual ruala min rawn pan in ka biang a ri nghal sawk.




Ka kawr awmah thamin, " khawnge Chhana" a ti deuh tuar a .





"Ramthansang eng thil nge i tih kha?" Ka pa aw vin thak mai avang chuan ka pa chu ka en,a thinrim hmel takzet.




"Pa.."



"Engvanga khatia i nau kutthlak ringawt nge i nih?" Ka u tawng tur lo pawt chatin a ti leh that.




"A ..ani hian Chhana.." tiin a phone chu a hmet mawlh mawlha,ka pa va en tirin, " pa Chhana hi ka hmangaih a ni,khawngaihin Kuri hi Delhi lamah let tir leh rawh" tap pura a tih chuan ka lo meng ve kawk.




"He thil hi eng nge a awmzia? Lalrinchhana saw engvanga hmu leh nge i nih" tiin vawiin lama Restaurant a kan thlalak leh zan tir lama kan gate bula kan ding dun lai thlalak te chu ka pa in min hmuh tir.




"Nang hian mi min zui ruk tir em ni?" Thinrim zeta tiin ka u ka pan tur chu kan in karah ka pa a rawn tla zep hman.




"Zui ru emaw zui ru lo emaw engvanga i u pasal chu la thlah lo nge i nih?" A ti thum chhaka,ka hmui sai dar dar chu sehin ka hawi sang vah a.




"Khatiang mipa rinawm loh lutuk kha eng atan mah ka ti lo. Khang thla kha tu lak nge ka hrelo a mahse,i pasal nen kan in karah engmah a awm tawh lo. In nupa hian ka hua in ka hmu hne ngawih ngawih che u" ka u en rana tiin ka in her.




"Dawt,dawt vek khawnge Lalrinchhana...i room ah I thukru em ni?" A sawi zo hman tawk ka u chu ka pa benna avangin a thle nghal sawk. Ka pa hi misual a ni lo,mah se a kut a ram em avangin kan naupan laia thil kan tih sual te hian ka pa vuak kan tuar fo. A hnuah a in thiam loh hian ngaihdam te min dilin min tlawn lungawi leh mai zel a. A thinrim hian insum hman lova kutthlak a awlsam a chuvang chuan ka nu pawn ka pa tih thinrim a duh ngai lo.




"Engtin nge khatiang khan i nau i tih theih. Chhana chu i pasal a nihna angin veng uluk ta che,a nupuiin i zirlo a nih chuan hmeichhe dang dang lakah a uire san ang che. He tah i nau dawta rawn puh hi bansan la i in chhungkhur saw a keh darh loh nan tan va la rawh" a tih khum chiam. Tunah khan ka pa chu ka lam tangin ka tan ka u chu a zilhhau a ni. Chu chu engtiangin nge ka tan a hlut min hriatthiam pui kherin ka ring lo.




Ka u chhuah hnu chuan ka pa nen a falin kan in bia a.




"I u awmdan kha en la, Lalrinchhana chu hmu leh tawh ngai Suh ang che. Ka fa te ve ve in ni a,mipa pakhat avanga in unau inkar leh kan pafa in kar tih chhiat ka duh lo. Tunah te hian Isaac-a chu awmlo se i u te nupa pawh ka in then tir ngei ang. I u in i chunga a thil tih kha a dik ka tilo mah se siam that theih a ni tawh Chuang lova ngaidama hmalam pan turin ka duh che"




"Pa"



"I zirna pawh Delhi lam khera zawm i duh tawh lo a nih pawhin ka ti lui lovang che,he tah i duh chuan Mizoramah pawh i zawm thei ang,chu erawh i duh thlanna ni se. Hmana ka fanu Vanramneihsangi kha ka duh let leh a ni. Chhana te ang mai mai tan chuan ka fanu kha chu a sang mah mah" khik suk paha ka pa thusawi avang chuan tah nuih hawkin ka pa chu ka kuaha a ni pawn duat zeta min lo kuahin ka hnungah a beng thak thak.




Ka sawi tawh angin ka pa nena kan inkar a chhiatna hi a rei tawha,tun ataka chutiang anga dam a min fuih thei hi ka lawm a,khang hun chhung zawnga ka pa thusawi ka lo ngaihthah thin kha ka in chhirin tunah erawh Lalrinchhana kalsan tura chakna min pe hmasa ber tu a ni.


Show post links
Top

[Ngaia]

Chapter 5




"U tho teh" ka room kawngkhar in chum ri bur bur avang chuan harhin kawngka ka va hawng.




Puitei chuan mittui tling puauin "u..u Ruat..u Ruatpuia nu a thi" bah deuh nuaia a tih chuan za lo zeta nui sukin ka nau chu ka en. A thusawi kha ka hre sualin ka hre silo.




Zawi muanga ka khum lam panin ka khumah chuan ka thu a, thil engkim mai chu a reh thum hian ka hria,ka nau kawngka a ding chu en in ka nui leh ringawt thin. Nu Buangtei(Ruatpuia nu) ka hmuh hnuhnun ber hun lai te ka ngaihtuah let. Nu hmeltha tak niin a fel em em a, Ruatpuia nen khan danglamna awm miahlo in min duat thin.



Kha tih hun lai kha chuan ka pa leh pa Zorema pawh hi thian tha tak an la ni. Zanah pawh kan inah riak lovin Ruatpuia te inah ka riak fo a. Chung hunah chuan nu Buangtei chuan zan kan muthilh a mang tha tak kan neih nan thawnthu min hrilh thin.




Chutah harh chhuak thut ang mai hian Ruatpuia te in lamah ka tlan chhuak a. An in ka va thlen meuh chuan Lalruatpuia chu alo tal buai tawh tak zet. An inchhung bungrua chu hmun tinah a darh a, thenawm khawveng ten a pa chu kut a thlak mai loh nan an lo dawm bet. Chuti chung pawn a pa chu a lo thi neu nuau tawh.




"Kuri" ngawi renga a bul ka va thlen chuan nghet zetin min lo kuah. Tunah chuan keipawh ka tap ve thei ta. Kan thian dun chuan chhuak em em hian kan tap a. Nu Buangtei kha hmeichhe harvang tak a ni ngailo,engtik lai pawn na sawi tur nei reng a nih avangin a hun tam zawk in lamah a hmanga,a pasalin ngaihzawng a nei tih pawh hre reng mah se a fa te avang leh pa Zorema a hmangaih em avangin a tuar hram hram a. A tawpah erawh thlan a ni ta Chuang silo.




Ruatpuia chu ka thlem fe hnuah a nu te khua a kal turin ka insiam pui thei ta a. Ka pa a rawn kal tel ve dawn avangin ka bungrua erawh Puitei'n min siam saka ka pa chuan Ruatpuia te in ah min rawn lamin kan pathum chuan kan kal chhuak nghal.




Kawng tluanin ka pa tih loh ka tawng lo a tih theih awm e. Ka pa chuan kan thian dun chuan inzilhna ni pah fawmin hnemna thu min hrilha,a bikin Ruatpuia chu a hnem kawng tluan.




An in luh hma a ka nu Buangtei thlalak ka hmuh te chuan an in ka len apianga min lo nuih ver ver tu leh,chhang min ur sak tu kha ka mitthla a,hetianga min thih san thut hi ka awi thei lovin tunah pawh hian kawngka ah lo chhuaka min rawn nuih leh ka la beisei fan a ni.




Kan lut thuk zela tap ri nen ka pa banah vuanin Ruatpuia chu a hnungah kan zui zel. U Christy-i pawh kum tamtak hnuah ka hmu leh ta. Ani hi pa Zorema'n a kianga awm ve tura a duh loh avangin a nu bulah a awm a, chuvang pakhat chu a ni anau Ruatpuia hi a ngaih loh. A nau apa in a duh laia ani a kianga awm ve tura a duh loh avangin duh loh bikah in ngaiin a nau chu a haw em em a ni.




"Nu..nu" thingthi rawpin nu Buangtei ruang vun dang bel leh Cher tak chu kuahin a hmai te chu a chul kual sak." Nu,ka lo kal ania. Nu i fapa Ruatpuia ka lo kal" tiin a nu chal leh a chal chu a in sik tir vang vang. A mittui te chu a nu hmaiah rawn luangin chu thil hmu tu apiang mittui chu a far lo thei lo.




"Nu i vawt em mai ka lo kuah lum ang che aw" tih leh a nu kianga inthawlh a ruala, a nu chu kuahin " i chauh lutuka thawnthu min hrilh hma in i muhil daih alawm. Mahse,a pawilo tun tum chu khang i thawnthu min hrilh te kha ka la vawng nge vawnglo en nan ka hrilh ve thung ang che" ka insum theilo chu ka pa in min kuah betin ka pa awmah chuan nasa takin ka tap chhuak hawm hawm.




Reilo teah kuang rawn chawi lutin nu Buangtei chu kuanga zalh an tum ta mai. Ka thianpa in phallo a a nu a pawm beh tlat chu thlah tir thei an awm bawk si lo. U Christy-i chuan thiam takin han thlem ve mah se ka thiana chuan a nu chu chutiang maia kal tir a phal lo.





Kum 10 chhung a nu a hmu lovin a nu hmangaihna dawn a chak em em thin. Mahse,a nu a hmuh ve meuh chuan a nu chuan a fapa a ni tih pawh alo hre tawh si lo. Rilru na taka a rawn haw san hnu lawkah a boral thu a hre zawm leh zat bawk nen ka thiana tan chuan a na mah mah a ni.




"Kuri i thianpa saw va buaipui rawh" ka pa in min tih chuan huhphurh zetin Ruatpuia chu ka pan hnai.




"Ruatpui.."




"Kuri hengho hian ka nu min laksak leh an tum ania,han hrilh teh ka nu hi ka ngaiin a kianga awm ka duh a,hruai lo turin min ngen sak rawh" alo ti chul mai.




"Lalruatpui in ti harh rawh" tap pura a dar dawm sakin, " nu..nu Buangtei..ka tih i..i nu a boral tawh"




"Ai,a chauh em a a muhil a nih hi. Nakinah alo harhin ka fapa min la rawn ti dawn." Tiin a tang tlata mahse chelh reng theih ni heklo u Christy-i pasal leh mi thenkhatin Ruatpuia chu chelhin kuangah chuan an zalh ta. A tal buai chhunzawm mai an hlauh avangin room ah Ruatpuia chu an khunga,thlalakna ah pawh an telh lo.




"Kuri ka nu kha lak tir Suh,khatiang bawma an khunga lei hnuaia an phum chuan alo harh hunah thawchhamin a thi thei mai ang. Khawngaihin Kuri" tiin min ngena mah se tih theih ka nei si lo.




Tlai lamah Sangkimi,Thara leh kha Pastor fapa kha ka hmu hlawl. Sangkimi chuan lungchhe zeta min kuahin a tap a. Keini kan kal khan khua ala var Chiang lova. Sangkimi lam reng reng ka lo ngaihtuah chang tawh lo nen a rawn lang thut pawh chuan min thawng ve deuh chu a ni.



"Ruatpuia chu damdawiin an Chiu muhil a, engin nge in lo kal. Thil kha a nih deuh thut nen rawn hrilh na chang che pawh ka hre lo" tiin a kianga mipa chu ka melh zawk.




"Nia, Puitei'n min rawn hrilha mahse, in rual kha chhuan ka chhuak ve hman lo a. Hei Thara motor lo rem hlauhin Mesaka leh a nau te thian dun in min rawn zui ve bawk a." Alo ti ve mai bawk.



Ruatpuia alo harh leh chuan zanriah eikham a ni tawh,Sangkimi a hmuh chuan lawm loh hmel zet hian kei min rawn en a,ka lo hre lo der hmiah.




"Engvangin nge ilo kal" a ti bul deuh hmuk a.


"Lalruatpui"


"Haw rawh"


"Ka duhlo,nangpawh hetiang hian awm Suh" tiin a bulah ava kal hnai a.



"Lalneihsang i thiannu hi haw pui rawh" a rawn tih chuan ka thu lai chu ka kang awk.



"In bia ula sawi fel rawh u" Sangkimi ka lainat em avangin ka lo ti ve.



"Engmah sawi tur a awmlo,kan in then tawh" alo ti leh hmuk a.Tih ngaihna tak pawh ka hre tawh lo.



"Ngaihzawng dang ka nei" Sangkimi nen ngawi renga kan din laiin amah chuan a rawn ti leh a.Phawk zetin ka va en.



"Ka awilo, Lalruatpui khawngaihin tiang hian awm suh" ngenngawl zeta tiin a kutah ava chelh mahse, ka thianpa chuan a kut chu lo thing thla in.



"Ani chuan ka fa pawh a pai mai thei"



"Lalruatpui" ka lo ti thata Sangkimi erawh chhuatah a thu sawp deuh hnawk.



"I u thu kha awiin kei ang mipa laktlak loh lutuk avang hian in ti buai duh tawh suh" ti deuh hmakin room atang chuan a chhuak a. Sangkimi bulah chuan eng thu nge sawi tur pawh ka hre lo.




"Kuri, Lalruatpuia khan dawt a sawi ti raw?" Beiseina mit menga min en chuan hnuailam ka melh daih. "A nu avangin a rilru ala buai a ni ngei ngei ang,khatiang khan Lalruatpuia'n a ti hauhlo ang" min bia ni pawhin ka hre tawh lo.



"A pawi ka ti Sangkim" ka tih sup chuan dan rualloh in a mittui a luang nghal zung zung."Keipawn ka hriatna ala reilo" ka ti zawi leh sup.



Sangkimi chu a tap muhil a. Lalruatpuia kha khawnge a kal zui tak ka hre lo,room ah pawh a rawn let leh tawh silo nen khawiah tak chuan va kal ang maw.




Sangkimi a mu nghet ta ni a,ka rin hnuah room chu ka chhuahsan a,inchhung leh tual velah pawh chuan hmuh tur a awm lo.




"I thianpa kha em ni I zawn?" thim chin atanga rawn chhuakin a meizial zuk chu a sir kawrah a vawm lut.




" Sangkimi nen eng in zawmna mah in neih loh thu i sawiin ka hre sia engvanga he lai thleng thleng rawn zui nge i nih?" A zawhna pawh chhanglo chuan ka lo ti daih.



"Ti nge ka lo kal ve chu a pawi viau em ni?"



"Nang hi"



"Mesak...Mesak Lalrambuatsaiha, tun atang chuan Mesak tiin min ko thei ang kha tia in mawl biak fo mai kha a dik thei lo" a rawn ti teh daiha,



"Ma..maw"



"Ka hming ka sawi a nih chu" then suka tiin a rawn kun hniama,kei ka hnung lamah ka lo awn vak.



"A ho,ka duh duh danin ka ko ang che" a din ngil rual ruala tiin Ruatpuia awmna lam ka zawt nghal zat.



"Nichin khan saw lamah sawn hmeichhe pakhat nen an kal" tiin khawngpui reh ruih chu a kawk. Inchhung lamah leng khawm zai ri reng mah se,hmun dang chu a reh ruk mai.



Ka sana ka en 10:00pm a ri tawh a, hmeichhia a tel ve avang hrim hrim chuan Lalruatpuia chu zawn ka duh si,mahse Engvang teh reng nge ka tiril hi khurin in atanga hla taka kal chu ka hlau deuh tlat.



"I hlau em ni?" Ka bul amiin a tih chuan rang zetin 'ai' ka lo ti. A khi leh suk ka hmuh chuan ngei zetin Ruatpuia kalna lam ni a,a sawiah chuan ka kala mah se ka kal hla tulh tulha ka pen a sak tawlh tawlh.



"Kal rawh ka lo zawn pui ang che" street light in a chhun phak loh china ka din lai chuan ka bulah a rawn ding hlawl,Phu deuh zawkin ka awm ka dawm a thawm engmah ka hre silo engtin nge ka bul a lo thlen theih.




" Min ti Phu alawm" tia ka vin chiam chuan inthiam loh hmel zeta min en in, "tihpalh" a ti deuh sup.




Tichuan kan pahnih chuan Lalruatpuia chu kan zawng duna he khua hi kan vawikhat kalna ve ve a niin khawilama zawn tur nge pawh chu kan hre chuanglo,kawngpuiah kalin thawm danglam deuh ka hriat apiangin ka bula kal chu ka hnaih hrut hrut zela a tawpah phei chuan ka kut a vuan ta ringawt.




"Ti nge ilo kal ve kher a" ngawi renga kal chu ka nin em avangin ka ti ta tawp.




"Veng tur che in" uang zeta a rawn tih chuan kan nui dun hak hak a.



"Pastor fapa ve si ti nge mei te i zuk a" ka ti leh. A ni reng bawka nichin a meizial a paih ka hmuh khan mak ka ti lutuk.




"Ti nge pastor fapa chuan mei kan zu ve thei lo em ni?"



"Chutiang lam pawh a ni lo,a..i hria a nga .."



"Vansangkimi a boral hnu atang ka zu tan a,ka sim theilo a nih hi" tiin kan piah deuha in chu a thlek a,chu inah chuan mi an tam hmel khawp mai thawm an nei ring em mai.



"I hmangaih viau a ni maw?"



"Tah sawn i thianpa chu kan va en chhin dawn em ni?" Ka zawhna a chhang dawn emaw ka tih laiin chu in lamah chuan min kal pui daih.



An in bul kan thlen atang zu rim kan hre nghala,kawngka kan hawn chuan min lo en deuh thap. Pa tling pui pui hmel bumro leh ruih hmel tak tak te lak atanga min ven tum ni awm takin an ni lak atang chuan min din hliah a.




"Lo lut ru, eng nge in duh" nu pakhat la valai tak hian alo ti deuh lang lang. Chunu lam ka va en chuan Lalruatpuia chu hmeichhe pakhat nen kil khatah hian an lo thu dun a. Rang zetin an lam chu ka pan nghal.




"Lalruatpui hetah eng nge i tih haw ang" ka tih chuan rawn hawi chhuakin min nuih var var.



"Kuri lo thu rawh,a nuam teh mai a nia i duh chuan Damdawi pawh kha an ngah mai" alo ti ham ham.




"Kal ang" tiin a thutna atang ka pawt tho chu zawi zet hian min rawn kuah a rit bawk si.




"Lalruatpui in ti harh ta che i rit si" ka ti zo hman tawk Mesaka'n( Tun atang chuan Mesaka kan ti char char tawh ang,Aman Mesak tia koh a duh bawk a) zo zet hian a rawn pawt san.




"Kal rawh i hnungah ka rawn kal pui ang" tiin a kuah dinga rang zetin kawngka lam ka pan. Mahse, thil hriat chhuah neiin ka hawi leta Ruatpuia lo thutpuinu khan keini chu min lo en reng.



"Ka thianpa hian bialnu nghet a neia lo ti buai tawh suh ang che" a bulah kalin ka va ti.



"Tu nge i nih?"



"Ka thianpa kianga ka hmu leh che a nih chuan ka that ang che" tiin ka kalsan. Amah kha a ni tih prove na chu neilo mah ila amah a ni tih ka Chiang.




"Vansangkim ka tihpalh" tiin kawngah te chuan a au vak vak a.




"Iva han hahthlak tak" tiin a hnungah ka chum leh pawp a,ani lah chuan na tih a hnekin ala au ring sauh sauh zui.



"Hei Lalruatpui in kan thleng dawn in ti harh rawh" ka tih chuan kawngah chuan dingin a nu te in chu a en reng.



"Ala awm em?" A tih chuan thinrim zetin a room a Sangkimi muthilh thu ka hrilh. An in chhungah chuan ruilo ang maiin a lut a, a hnungah Mesaka nen a tluk hlau zetin kan zui.




A khuma Sangkimi muhil chu chhuatah thu in a en reng a,a hmaiah te a khawih da da a,keini chu rei awm duh lovin pawn lamah kan chhuak leh thung.




"Ka lawm e min puih a vangin" a hmel pawh en lemlo chuan hmun dang ka hawi daih.




"Min hua khan ka hre sia ti nge lawm thu te min hrilh" a rawn tih chuan kan in hmuh hnuhnun bera ka thil sawi kha a sawi tih ka hria.




"Kha chu.."



"I makpa nen chuan eng nge in chanchin ni ta zel" tiin ka tawng chu min lo pawt chat. Engvangin nge a bula ka awm hian hahdam bik riau a ka in hriat thin le.




Thaw ham hamin, " Kan inthena mah se a har khawp mai" tia nui sukin, "anih nang i nupui hualin a boral san che khan engtiang chiaha hreawm nge? Kei chu kan in kar ti tawp mahila ka la hmu thei tal a" ka tih chuan a ni pawh a nui ve suk.




"Hreawm tih hian a sawifiah kher awm lo ve. Engpawh chu nise thihna te chu mihring kan nih chhung chuan a awm reng dawna a dam zawnga kan lak thiam hram hram a ngai a nih ber mai hi" a ti kual ve duah.




"Lalrinchhana nen hian ka tleirawl chhuah atang kan in kawpa, Delhi a lehkha ka zir laiin ka u nen chesualin ka u chuan fa alo pai ta si a" a hun lai thil thleng ngaihtuahin za lo zetin ka nui ro hak.




"Eng nge a awmzia?" Mak tih hmel zeta min en chuan thawk ka la leh hak.




"Ka u khan ka bialpa a ni tih hre reng chungin Lalrinchhana rui kha remchangah alo hmanga, chuvang chu a ni hetianga ka nun. Ka u Pathian thu awi mi leh a nungchang pawh selna tur reng reng awmlo in khatianga a tih avang khan ka hua a,a pasal a ni tih hre rengin Lalrinchhana chu ka thlah duh lova mahse, a tawpah chuan a tlawm zawkah ka tang ta a nih hi" ka bianga mittui lo luang chu ka tuai hul vat.




"A tlawm zawka tan hi kan Pathian duh dan a ni fo reng a ni. A remruat hi a maka mihringte tan chuan hriatthiam ve phak a ni lo. Nangpawh beidawng lo la,he i thil tih avanga i u te chhungkaw boruak tha leh tur te ngaihtuah chungin hmalam pan la. Nakinah nangmah hmangaih tu diktak ila tawng leh ngei ngei ang tih ka ring tlat" hmel nung sara a sawi chuan ka ringhlello mahse, ka thei ve kher a ngem ka hre lo a ni.




"Nang chu Pastor fapa i ni a,chutianga sawi leh ngaih chu a awl viauin ka ring" ka ti leh hram.




"Pastor fapa ka nih avang hian thil engkim hi a awlsam biklo asin. Mihring ve tho ka ni a,ka nuna harsatna liantham ka tawn chang te hian Pathian hnenah ka vui ve fo. Mipa dang te ang bawkin tisa chakna leh thil tha lo tih ve chhin duhna ka nei ve tho a,mah se min chhandamtu kan Lalpa Isua tawrhna ka chian em avangin chung chu nasa taka insum chungin ka hawisan mai chauh zawk a ni" a ti leh.




"Ti nge chung thu zawng zawng chu min hrilh" amah en ran chuan ka ti a,ani erawh chuan kawngpui lam a en reng. In hmelhriat tha leh chhungkhat hnai vai kan ni lova engvanga ka hma khua lo ngai ve em em nge a nih.




"A chhan chu kha ka zirlai naupang Damdawi OD a thi ta kha min hriat chhuah tir vang a ni" a tih chuan ka hnim rawih a,eng thu nge sawi tura ka lo beisei reng reng ni.



"Chuvang chauh chu maw?"




"A..kan KTP thil tum avang te pawh hi a ni tho" a tih leh chuan ka awm chhungah hian na a awm tih ka hria, " chuvang chuan i harsatna chin fel nan Damdawi leh zu hmang tawh lovin chung hunah chuan tawngtaiin Bible chhiar hram hram tum la, puih i ngaih chuan min rawn be thin dawn ania" nelawm zeta nuiin ka luah a rawn tuai a,ka beisei loh lutuk lam hlir a sawi vang nge sawi ve tur reng ka hre tawh lo.
......


Hun a kala kan thian ho boruak erawh chuan hma a sawn mawh khawp mai. Sangkimi leh Ruatpuia an in thena, an kianga ka awmin a tu a ve ve pawn an chanchin sawi an duh lo va. An awmdanah an inthenna chu an tuar ve ve tih a lang reng bawk si.





Chutah tum ve viau mah ila ka thisenin kha Damdawi kha alo hriat tawh avangin ka in vit ta fo a. Lalruatpuia phei chu a hma zawng aia nasa in Damdawi a khawiha harhfima a awmlai hmuh tur a awm tawh ngai lo.




"Vawiin chu Biakin a hmuh che ka lo in beisei dawn a nia" tih Mesaka message ka en chuan ka hlim na leh huphurhna a in zat velin ka hria.




Sangkimi hnen atang ka number alo nei a. Kha zana min tiam ang khan zantin ka Bible chang chhiar tur min hrilhin zingah pathianthu min rawn thawn leh thin. Chutianga min puih hreh lo ta na nana chu ka lo be ve zel a. Mahse, Damdawi ka la ti tih erawh engmah ka hrilh lo.




"Puite lo kal teh" ti a au vakin ka inkhawm thawmhnaw ka dahna bik chu ka thlek kual.




"Eng nge,ka kawr hak tur ka thlak leh si avangin nawh ka ngai a nia" a rawn ti lut bawrh bawrh.




"Khawi zawk hi nge ha ila nalh ang,eng puan nge ka bih ang" tiin kawr pahnih hi ka khai lang.




"Kha kha i kum 21 birthday a,ka nu thui sak che kha a ni em?" Ka kut dinglama ka khai kawr hring dal chu a rawn kawk.




"Aw, enteh thawmhnaw hlui hlir a nih hi eng nge ka hak ang" beidawng zeta tiin ka khumah ka thu hnawk. Ka inkhawm lohna a rei tawh avangin inkhawm thawmhnaw lam reng reng ka ngaihtuah tawh ngai lova. Sawng ka thawmhnaw ah te sawn mit han la deuh bik engmah ka nei lo.




"Lungngai mah ta che,thawmhnaw te chu ka ngah alawm,kar hmasa a ka thui thar tir kha ka la ha lova i ha dawn a nia" a rawn tih chuan ka thaw huai thei.




Chutianga ka insiam lai chuan ka thisenin mamawh dang a nei tih ka hria,mahse biakinah Mesaka ka hmu ngei a nga ani chuan ka mitmeng atang ka ruih leh ruih loh a hre thei si a. Ka in ngaihtuah buai laiin Puitei'n min lo ko ve chhen bawk si ka Damdawi dahna ka drawer chu melh loh pawh tum ila ka thei lo chu a ni.




"I van rei em em,kal vat ang ka pa te pawh an kal vek tawh" inhnuaia ka thlen thlak rual rualin alo ti nghal.




Biakin kan va thlen chuan keimahah mi mit chu fu tlatin ka hria a,eng emaw an in hrilh ruk leh an nuih te chuan ka lo in ngaih bela,ka hawi chhuak ngam ta reng reng lo. Ka tih tlat avangin ka nau chuan a hnunglamah min thut puia,chuti chung pawn ka hawi chhuak ngam Chuang lo.




Ban tawngtaina kan sawi zawh rual ruala chhuah ka tum chu Puitei'n min lo pawt thu in tlar hmasa lam ami chu chhuah hmasak tur alo ni. Hawi kual tha ngam silo in,kan kiang vel a mi te chu ka melh kuala chutah ka hlauh ang ngei ngeiin Mesak-a kan lam pana rawn kal mek chu ka va hmu ta.




"Kha Kuri chu i rawn inkhawm thei a" a rawn tih chuan ka nauin alo chhang vat. Kei erawh ka hawi chhuak ngam tawh lo. Ka hawi chhuak a, ka mit a hmuh rual rualin ka rui tih a hre dawn si.



(A tawi pathum belhkhawm a ni pha chuan ka hria Ads min click sak ru aw)


Show post links
Top

[Ngaia]

Chapter 6




"Ti nge i nuam sam lo em ni?" Ngawi renga ka kun reng avanga min rawn din hnaih deuha a tih lai chuan chiai tak hi ka ni tawh.





"Kha Mesak eng nge in tih a? Vawiin chu kan in lamah rawn leng phei ula" Vanlalruati kan school luhna a kan senior chiah ni thin hian a rawn tih avangin Mesaka pawh chuan min din hlat hret in.





"Eng ti lo ve,lo va phei ula hei Kuri te ho nen hian kan rawn phei ang" tha tak chuan alo chhang.





"E! Kuri i rawn in khawm ve elaw? Iva ti tha ve rawn inkhawm ziah tum rawh aw" nui har hara tiin kan bul hnaiah a rawn kal." Mahse,kha i nuamsam vaklo em ni?" Ani pawn a rawn ti ve leh chiah.





"A...aw bathroom ah ka va kal lawk a nge" ti phutin anni ho chu rang zet hian ka tlan san, hmeichhe bathroom ka thlen chuan ka thaw huai thei. Ti nge maw Damdawinka la thlah loh thu ka lo hrilh tlang mai lo. Ni lo se chuan hetiang hian ka buai awm si lo.





Reitawk fang bathroom a ka in khung hnuah pawh ka la chhuak ngam nghal mai lo. Ani kha lo la awm ta se engtin nge ka tih ang,mahse chutiang bathroom ah ka tawm reng thei bawk si lo.





Chutah ka awm rei tawka ka in hriat hnuah bathroom kawngka chu hawng de de in ka va dak chhuak mah se, ka Phu Chiang lutuk chu ka tlu thelh a ni. Mesak-a chu kawngka zawnah lo dingin chutia ka va dak chhuak chu min lo en kur hi alo ni.





"I zo tawh em?" Nelawm loh zeta tiin min melh run a. Inthla hrung takin pawn lamah chuan ka pen chhuan them them.





"Eng..loh a nia" ban deuh chapa in sawi fiah ka tum chu ka banah rawn pawtin a awmah min kuah beta,thil thleng chu mak tih luat avanga hamhaihi Mesaka awmah chuan meng kur chungin ka bei reng.





"A pawilo,a pawi reng renglo" tiin ka luah zawi muang hian a chula,ka lung phu Phu rang lutuk te chu ka control theih piahlam a ni.





"Hrilh che chu ka tum renga mahse, ka ngam thlawtlo a ni. Vawiin pawh khan tih loh chu ka duh lutuk mah se ka in thunun thei lo a ni" a awma ka lu nawrin hnuailam ka biha ka mittui a rawn far fap.





"Chutiang maiin Damdawi a sim theih loh tih ka hria alawm. Mahse, tun hnuah chuan chutianga i in thunun thei dawn lova i in hriat hunah chuan min rawn be thin dawn a nia" a tih chuan tal hrangin a hmel chu ka en.





"Chutiang chuan ka rawn be thei ang che maw" ka tih rual rualin nui chungin ka sam ka hmai zar tu chu ka bengah min zeh sakin eng tik hunah pawh ka biak theih tur thu min hrilh.





"I tha ti raw" ka dar dawma ka mit taka min en chuan lu ka buk khum nghut. "Anih chuan kal ang Sangkimi leh Thara ten min nghak reng a nia" tiin a kekawr ipte zenin a kala a hnungah nui var varin ka zui.





He pa hi ka duh,ka duh takzet a ni. Lalrinchhana nilo mipa dang ka duh leh thei hi mak ka in tiin a tir chuan ka awilo viau a. Mahse,ka laka a rilru put hmang hi eng chiah nge a nih ve ka hre thei hauh lo. Kan inbiakna te hian induhna lam a hawi lova. Chuti chung chuan min duh ve ni a hriatna ka nei thin.





"In va rei ve,kha Ruati khan an ina thingpui in turin min sawm nasa mai si a" a bul kan thlenphei hma hmain Lalsiamthara'n alo ti nghal.





"Khawnge Sangkimi?" Sangkimi ka hmuh ve loh avangin ka ti vat. Nichin khan Mesak-a'n Sangkimi a awm ve thu a sawi reng si a.





"Tih tur ka nei atia,a haw ta a nih kha keini tal chu in phatsan lohah kan ti ang chu" ti ham hamin kal a siam a.




"Kal ila" min nghak tih hriat takin min en leh reng tawh.





"Maw keimah maw ka lo kal ve kher a ngai em ni?" Ka hreh lutuk chuan ka lo ti vat.




"Tih tur i nei em ni?" A ti a.


"Nei chuanglo e..mah se.."




"Anih chuan lo kal ve la" ka chhanna nghakin min en reng,ka va han ning tak engvanga hnar mai theilo nge maw ka nih le. Huphurh ru tak sawi chhuak ngam silo hian ka zui a.





"Lo lut ru kha a rem remah khan va thu mai ru" Vanlalruati te in kan va thlen chuan Ruati nu chuan alo ti nghal sawk sawk. Vanlalruati leh a thiante chu an sitting room lamah an lo ri nak nak hlawma ka rin aiin mi an lo tam zek.





KTP thil tum leh hma an sawn dan tur vel eng eng emaw an sawi. An thil sawi ho chu ka sawi pui ve theih chi a nih ve vak loh avangin ka thu ngawi kara,ka hmuh dan chuan chu hmuna awm ve tur chu ka ni pawhin ka in hre lo,inchhung kan luh phat atang khan ka kal puite pahnih chauhin biak an hlawha kei erawh tuman min biak an tum lo.Biak tumlo mai pawh nilo in ka awm ve tih an hre lo zawk hialin ka hria.





A tawpah phei chuan bathroom a kal chhuanlamin pawn lamah ka chhuak ta daih. Thiante bulah ri phurh phurh chi ka nih avangin khatiang hmuna awm kha ka la zo ve chiahlo pawh a ni mah na pawn ka chhuak chu ka veng hawk thei.





"Mesak-a hian nang ang hmeichhia hi a ngaihven tak tak che in i in ring em ni?" Rang zetin ka hnunglam ka hawi a, Vanlalruati alo ding reng.



"Eng nge i sawi awmzia?"



"Ka sawi chu nang ang hian Mesak-a te ang mipa hi in phu lo ka tih na ania. Hetia nangni ang Pathian thu lama kaih hruai hi tun tum kan KTP thil tum a ni a. Chuvang chu ania hetia a buaipui em em che"



"Maw.."




"Ha..a zah pawh hi i zaklo ngawt mai,engtin nge mahni u pasal te i ngaihzawn thei" nui lui tih hriat tak hian a nui a.




"Ka chungchang sawi tur hian tu nge i nih?"




"Hei hi hre rawh i awmlohna tawp turah i awm a ni. Nangni ang ho hi chuan kawng sira ruih kawih vel mai mai leh mi pasal kawp kual kha in in hmeh ber. Nangmah vang hian Mesak-a'n mi sawisep a kai tih te hi i hria em? I tih hmingchhiat tak tak hma hian kian san rawh" ti charh charhin inchhung lamah a lut a.





Kei erawh inchhunga luh leh tumna ka nei tawh lo. Inchhunga Mesak-a nui ve hak hak chu pawn atang chuan ka va en. Keimah vanga mite sel a nih chu ka phal dawn em ni. Nilo, ka phal hauhlo. Midang tumah hrilh lovin chu hmun chu ka chhuahsan ta daih.





"Kuri" ka bula bike rawn ding chu tu dang nilo in Lalrinchhana alo ni.




"He tilamah eng nge i rawn tih?" Kalsan tur ka ni tih ka in hria mahse, nichin maia Vanlalruati tawngkam avang khan ka thei tlatlo.





"Kan thian ho in Dawnga te huanah chaw eikhawm kan nei dawna lo kal ve ta che"




"Tiang hian maw?" Ka inthuam dan en in ka ti chiam.




"A pawi vak em ni?" Thle baka a tih chuan thaw hakin a bike hnungah chuan ka Chuang ve leh ta nghe nghe. A kawngah chuan nghet zeta kuahin a hnungah ka bei a. Chutianga Lalrinchhana nen bike a kan in phur leh ta mai pawh chu mak ka ti. Mahse, ka chapo na hian min thunun hneh em a ni.





"I tha em?" A rawn tih chuan harh zawkin ka hawi kuala kan lo thleng der tawh chu niin.




"Hei ava nuam ve" bike atanga chhukin ka puan bih ka siam tha nghal mawlh mawlh.





"Puan bih pawh i in hmeh kha" tia min lo fiam chuan nui sukin, " ka ning teh a nia" ka ti ve maia alo nui hak hak.



"A hmun fan kual i duh em?"



"Duh tho mahse.." tiin thing hmanga in an sak lam chu ka en.





"Ngaihtuah suh" tih paha ka kut rawn vawnin, "helamah hian thei huan a awm a ni" a ti a,min kal pui nghal.





Kan kalna lamah chuan dil te te lo awmin Sangha an lo khawia hmuh an nuam tak zet.





"Khapa nen khan in la in zui reng em ni?" Sangha ka thlir rengna mit atang chuan amah chu hriatthiam loh hmel zetin ka en.





"School ah kan thawk tlanga pastor fapa a ni tih ka lo hre bawk a" a tih chuan tu a sawina nge ka Chiang khawp mai.Ani hian Mesak-a nen kan inngaizawngah a ngai a. Chu thil chu Mesak-a ka hrilhin Lalrinchhana'n ka lakah beiseina a neih tawh loh nan a that zawk thu min hrilh kha a ni a. Chuvang chuan Lalrinchhana bulah hian Mesak-a chu ka bialpa thar angin ka sawi a ni.





"Nangni ka u nen chuan in inkar boruak eng nge a an tak zel?" Mesak-a chungchang ka sawi duh loh avangin ka lo ti let daih.




"A pangngai a ni mai,mahse a harsa khawp mai" a kekawr ipte zenin thawk a la hak a.





"Beidawng mah ta che..." ka ti zuai ruiha Mesaka'n min fuihna thu zawng zawngte kha hre chhuakin han sawi chhuah ve chu duh viau mah ila,Vallalruati thil sawi kha ka hriat chhuah thar leh avangin ka sawi zawm leh duh ta lo.





"Kuri" a rawn tih sup chuan a mitah tak ka han en,ani pawn eng emaw sawi duh nei tih hriat tak hian min en reng a.





"Inchhungah va lut tawh ila" ka awmdan diklo tan hriaa kal ka tum chu ka kutah min lo chelh.





"Chance vawikhat chauh min pe leh theilo em ni? Tunah hian hna sang zawk buaipuiin hun ka hmang meka,chumi hun thleng chu min lo nghak la i kiangah ka rawn kal ang" ka rin loh lam daih a rawn sawi avang chuan che changlo in ka ding reng.

..........



Zana ka haw chuan ka chhungte an lo reh thiap tawh. Thawm dim zetin ka room ka thleng chho thei hram. Ka khumah chuan vawiin lama ka ken ka bag alo let ngata,vawiin khan Bathroom a kal tur anga ka in sawi avangin ken chhuah na chang ka hre lo va.





Ka phone chu en in missed call leh whatsapp message lo awm nualin message te chu ka check nghal. Chutih lai mek chuan Mesak-a phone call a rawn lut a. Ka chhang dawn nge dawnlo tia ka in ngaihtuah laiin alo ri tawp hman.





Mahse, a whatsapp message rawn lut nghal vatin ' vawiin kha ti nge engmah sawi lova i kal daih' tih hi a ni a. Chu te mai pawh chhang let turin hun ka va mamawh hnem teh reng em.





' ka chunga i thil tihte avangin ka lawm lutuk. Mahse, kei chuan ka nun pangngai hi ka kalsan theih ka in ringlo chuvang chuan beidawng tawh zawk mai rawh' tih ka type lai chuan ka biang a lum nghal pap.





Message chu kut khur dar dara thawnin ani lah chuan lo seen nghalin a rawn call nghal a. Chu erawh chhang duh lovin ka hmet tawp. Tunah rih chuan ka be duh rih lo a ni. Ka lakah rilru dang a put loh laiin keiin a ni lo zawngin ka lo ngai a. Ka be ngam ngang lo.





Khumah mu in Vawiin lama ka thil tawn te ka ngaihtuah let. Lalrinchhana'n vawikhat chauh amah ring leh tura min tihna te Mesak-a'n duat zeta min kuah lai te kha ka ngaihtuaha rilru hah luatah ka thaw leh hak thin.





Zanlam ka mut that loh avangin zingah chuan lu na burin ka harha,ka mit te lah chu ala thip em em zui.Chu ti chung chuan Puitei phi chengin ka room ah a rawn lut.





"Niminah khawiah nge i kal,u Mesak-a'n a ngaihtuah lutuk che a,azawng nasa che alawm. I phone i keng bawk silo ti nge engmah sawi lova i kal daih a" a tih phuar phuar .





"Mesak-a'n min zawng maw?" Ka tih deuh hu chuan ka darah min beng chawrh.




"Mi a nu, taka u Mesaka nen hian eng in zawmna nge in neih,in in ngaizawng em ni?"





"Awiawm loh e" ti vak mah ila, ka awm chhungah hian danglam a awm tih ka hria.





"Tak tak maw! Mahse, nimin khan mi sawi ka hria a" a ti leh ang niap niap a. Engtiang chiahin nge mite chuan an lo sawi. Vanlalruati pawh khan a sawi tawh bawka keimah vang hian alo hmingchhe tak tak em ni ang.





"Pui, mite chuan engtiang chiahin nge an sawi?"





"Â chutiang ngaihtuah suh,u Mesak-a chu makpa atan ka duh asin le" tiin fiamthu a thawh chhunzawm daih a. Engmah a zawh chhuah theih loh, a pawilo chhun lamah Sangkimi va tlawh pahin ka zawt chiang mai ang.





Tukthuan kan ei lai chuan ka pa zilhna ka dawng leh a,tun tum erawh ka chhang let lo.





Sangkimi te dawr ka va thlen chuan min lo melh rum ngang mai.Lasi chahin a awl hun tur ka lo nghak a, Customer an tlem deuh hnuah kan in be thei hram.





"Ti nge nimin kha? Khawnge I kal?" Lungawilo zet hian a ti bul hmuk.





"Rinchhana nen an thian ho a chaw an ei khawmna ah kan kal" ka sawi zo hman tawk ka ri nghal awk.





"Mawli kha leh chen kha amah hmu lo in i awm thei tawha engvanga chutianga awm leh nge i nih" a ti zat zat.





"Chulam chu nakinah,thil zawt tur che in ka lo kal"



"Eng maw?"





"Keimah vangin Mesak-a'n a mawilo zawnga sawi a kai em ni?" Ka tih chiah chuan a hmel lan dan in thlakin a hawi chhuak tha ngam manglo. Ka lo rin dan kha a dik a ni maw.





"Engah mah ngai duh suh,mite chuan dawt pawh nise mi chanchin sawi an peih zia i hriat kha" ti mai mah se ka rilru a nuam theilo.





"Sangkim beidawng tawh mai rawh u,keini ang tana in hming chhe fo hi a tha lo" ti supin Sangkimi chu ka nuih luih a,ani erawh chuan ka thusawi chu alo pawmlo khawp mai.





"Mite chuan lo sawi mai mai ang hmiang,ka beidawn san dawn lo che u" a ti deuh hmak.





"Lalruatpuia pawh maw?" Nui pat pata ka tih chuan min han melh rum tha leh a. " Tak takin inthen hlen in tum tak tak em ni? Sangkim mahni hmasialah pawh min puh mahla a pawi ka ti lo mah se vawikhat dang leh hun i pe theilo em ni?" Tiin ka tah awh ta tawp.





"Ka hrelo, mahse hmeichhe dang a mutpui tih ka hriatna hian min ti na ve em a ni" a tih chuan a dik ka tiin ka khawngaih bawk si. Mahse, amah chauh hi he khawvela ka thianpa hlimna thlen thei tu a ni tih ka hre bawk si a ni.




(Zanin atan chuan kha zawng kha ni leh phawt mai rawh se aw)


Show post links
Top