Suddenly in my heart BY Misse Prejudice (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: Suddenly in my heart BY Misse Prejudice (Completed)

Unread post by Ngaia » June 12th, 2022, 3:49 pm

Chapter-7
By Mrs. Prejudice





"Ka hmangaih che" tia ka beng bula a phun sup chuan hlimnaa khat mitmengin ka melh a, "Ka hmangaih che" a sawi chiah sawi vein zak chung chungin a hmuiah dim tein ka fawp de de a, duhthawh lutukin min lo chhang let.






"Ṭhakima kha hnaih tawh suh" a tih chuan mithmul ka kan ak a, "Ṭhakima ka hnaih ngai lo reng reng?" Ka tih chuan a nur nang reuh a, enge maw a hriat ni. "Nihliapa inzawn pawh a ngailo" a tih leh hmuk chuan ka hrethiam ta chiah, "Ruah a sur bawk sia a huh vek dawn sia ka khawngaih ve deuh a" nuih insum deuh hian ka ti a, mi a thik vawikhatna a ni hial ang.





"Nanglo pawh zawn tur an tam" a tih leh chuan chhang tawhlo in a awmah ka bei hle hle a, "Awle" ka ti sep. Ka chalah fawp vang vangin duat deuhin min kuah hle hle a, "KA HMANGAIH CHE" a ti chhuak sep.







Ka nu in min koh chuan ka ngaihtuahna aṭangin ka harh chhuak zawk a, kan nunhlui te ngaihtuah leta ka mittui a tlak chang pawh a tam ta.





"Mambawih" alo tih leh chuan ka mittui ka hru hul sawk sawk a, hnar ping ṭunin ka phei. Sitting rooma ka ṭhiante ho lo ṭhu thap ka hmuh chuan ka buai deuh a, mahse insiam ṭha thuaiin ka nuih lui hlawm.





"Kan ṭhianho a picnic kan tum a, kan lo sawm che." Siami'n alo ti var a, ka nui tawi tak ringawt. Ka phur tehchiam lo hle a ni. "Ka lo kal lo phawt mai ang, ka nuam sam chiahlo a" ka ti niah niah a, an ner nang hlawm mai.






"Tunlai hi kawm i har riau, schoolah lah ni se dawhkanah i bawk tlat zel a, i nui khat bawk si, i damlo viau elaw?" Nui chuan ati a, 'Damlo e, ka taksa mai ni lo, ka chhungril zawng zawng nen hian ka damlo takzet' tih chiam mai chu a ni ka chak. Ka pa chuan min thlek vang vang tih pawh ka mitsirin ka hmu.





"Ka chak lutuk, mahse ka nuam bawk si lova, remchang dangah ka lo kal mai ang" tiin chhuanlam ka siam a, phun nui nui chungin min chhuahsan hlawm.






An chhuah rual rual chuan ka room lam bawk ka pan leh nghal a, khumah muin earphone ka vuah leh nghal. Ka mizia a dang tih ka hria a, an sawi ang khan ka engtih mah hi a phur lo, ṭawngduh ve tak ni ṭhin kha ka ṭawng ngailo a, room chhung hi ka khawvel a ni ringawt tawh. Ka chhungte pawhin ka danglamna chu am hai bik lo, ka u pawhin, "Mate, i duh viau ami?" A ti thlawt a, ka u kuahin ka ṭap hrep anih kha.





"Hey"




"Ramdinsang"



Ka hnung lama aw rawl ring takin ka hmingpum ngata min koh chuan ka lehhawi a, Muana, Timothya ṭhianpa ka lam pana lo kal mek chu ka hmu nghal zat. Ka ṭhiante ho chu min lo va kalsan turin ka hrilh a, ka school bag chu nghet taka vuanin ka lo nghak.






"Ka en liam hram hram che a, mahse hlim taka i awm bik hi ka hmu peih tawhlo che." Alo ti nghal thawr a, a sawi awmzia chu engmah ka hrelo. "Ka ṭhianpa na tuara a awm laiin thu dengkhawng tak in hriattir a, khawnge i pasal hual pawh chu." A aw ah chuan min ngainep hle tih a hriat.






"Pasal hual a?" Inkawk va chung hian ka ti a, ka nui lui hak. "Nupui nei tur zawk chu amah a ni lawm ni? Khatiang zawng kha chuan min rawn hmusit miah suh." Tiin ka melh khai a, min enin a ner suk. "Hmeichhia te hi inlo inang vek anih hi" te chu ala ti zawk zamah lehnghal a.






"Natna khuma a mut reng lai pawhin a theihnghilh ngai miahlo che, kan inbiak chang pawhin i ṭhat leh ṭhat lo min zawt ziah a, midang ngaihtuah thei dinhmuna a din bikloh lai pawhin i chanchin min zawt a, lo ngaihven tur chein min chah ziah asin. I pa khan a makpa hual chu a chhuan khawp kha." A tawp lama Muana thusawi chuan min ti hamhaih kher mai.





"Ka pa maw?" ka ti lawi rat a, ka pa in Timothya bulah thil sawi a nei em mawni? "Muana engmah hi ka hrethiam lo ania, khawngaih takin min hrilh fiah teh, Timothy chu a damlo em ni?" Tiin ka banah ka vuat chawt a, mittui vangin ka hmu phe ruai bawk.





"Engmah i hrelo a maw?" Tiin a nui hawk a, a awih chiahlo anih hmel.





"Timothya'n nupui a neih dawn thu ka pa khan a sawi a, mahse ka awih lo, biak pawh theih loha rei tak a awm hnuah ka be thei hram a, mahse hmeichhe pakhatin min lo chhang a, Timothya muthilh thu min hrilh bawk, ka ngaih dan tur chu i hrethiam mai em? Keihi a tuartu zawk ka ni asin, phatsan niah ka inngai a, na ti chung chungin ka hlat asin. Kei hian eng pasal hual mah ka nei lo, Lalremtluanga zawk hi a ni lawm ni min phatsan tu chu?






Zantin amah ngaituahin ka ṭap muhil a, mahni inhau ru mawlh mawlh chungin a thlalak bawk ka ṭahkhum leh ṭhin. Ka tan chuan kawng engkimah a hmasa ber a ni a, ka rilru leh ka thinlung zawng zawng min laksak hnuah na taka min siamin min kalsan a, haw viau tur ka nih laiin ka haw thei bawk si lo, tinge tunah keimah min dem lehsi? I ṭhianpa anih avangin dik vek turah i ngai a, ka lo ngaihdan tur engmah i ngaihtuah miahlo bawk, ka natna te hi tinge tuman min hmuhsak loh."






A tir lamah chuan vin viau mah ila ka aw chu a zuihral vek a ni ber. Ka natna ka lo upbet ve ṭang ṭang tawh ka sawichhuak chu ka thawl huai a, ka mittui pawhin chhuah an chak leh tawk zek zek viau mai. A ngawi vung vung a, min lainat hmel a pu.





"A lung a cancer a, thlak a ngai a" a tih chuan ka melh rang kher mai, hlauhthawnna avangin ka khur der der a, ka mittui a luang thla pap bawk.




"A pu vanga Aizawl pan a ni hleinem, in check-up turin a kal a, mahse a zual thut avangin an admit a, tunah a dinhmun a ṭha vaklo, a lung thlak a duh bawk si lo a, kan mangang mek a ni."






"Chuan i pa kha a lo kal a, nangmah kalsan tur che leh pasal hual i neih thu a sawi a, chuvangin Timothya pawhin lo biak che a tum tawhlo anih kha. Chuvangin ania ka dem em em che, mahse thil thleng vel hi engmah i hrelo anih hmel."





Sawi leh tur pawh ka hre tawhlo, ka pa in chutiang thil a ti chuan min ti na takzet. Ka tan a duhlo tih chu ka hria a, mahse hetiang em em hian a kalthui ka lo ring miahlo a, ka rin phak bak thil a ni.





"Zirtawpah hian Aizawl kal ka tum a, min zui duh angem?" A tih chuan in ngaihtuah buai miah lovin aw ka pawh thuai a, tumahin min dang lovang.






In ka thlen rual rualin ka pa hming ka lam hmasa ber a, rooma a awm thu ka nuin a sawi chuan chumi lam chu mittui tling pam chungin ka pan nghal. Ka pa chu lehkha chhiarin alo ṭhu a, min hmuh rualin mak tih hmel deuhin min en.





"I ṭap em ni?" A tih chuan ka nui lui hak a, mahse ka biang chu a lum thla pap, nat lutuk vang hian alo ṭah ve theih tho anih hi. "Pa, tinge?" Tiin ka inhum khur der der a, hrilhhai hmel takin min en.






"Ka hmangaih asin, tinge ka chungah hetiang thil hi i tih?" Ka insut hraih a, ka mittui a sur zung zung bawk. Ka pa chuan a hrethiam a ni mahna a tarmit la thla in hahthlak min tih hmel zet hian min en.






"Min hnaih lo teh" min ban mai a tum rual chuan ti hlakin ka awmsawn a, a thaw hawk. "I tan a ṭha tura ka ngaih angin ka ti mai anih kha." A ti nghet charh a, ka insum thei tawhlo.





"I fanu mitmenga natna hi tinge i hmuh theih miahloh a, tinge ka hlimna tur min dodal sak tu i nih kher. Ka hmangaih kha na tuarin a awm a, kei lah chuan hrelo lekin amah ka lo hua a, ka mawl takzet. Naupang ka ni tawhlo, ka duh thlang thei ka ni ve tawh bawk. Zirtawpah Aizawlah ka chho dawn a, min dan tum miah suh." Tiin ka pa ka chhuah san a, ka nu leh ka u te chuan phawk hrain min lo en a, ngaihven zui lovin ka room ah ka lut a, ka kalh nghal hmak.





To be continue.....

Han comment ve ik teh u🤣


Ads minlo click sak leh hram ta che😘


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:49 pm

Chapter-8
By Mrs. Prejudice





Ka pa ka biak dan kha a mawilo tih ka hria a, mahse ka insum hman lo. Min hmangaih vangin khatiang thil kha a ti a ni maithei, mahse a hmangaihna hian a hmangaih chu a ti na miau bawk si.





*



Chawhnu lamah kan zirtirtute hovin programe dang an neih avangin chawnu kan chawl a, kan ban lai chuan ruah a tla cherh cherh.





"Minlo zawn ve teh" tih leh Ṭhakima chuan min kuah a rual a, ka zawn ṭha ve mai. "Kawn thleng a ni mai" a tih chuan ka bu nghut a, ka nihliap a tet deuh avangin inhnaih angreng takin kan kal nghe nghe.





"Khatah kal suh" tiin dinglam pan ka tum chu min pawt let nawk a, ka inrin hmain a awmah ka bei thlawp a, chumi rualin kan hma deuha hmeichhe ṭhenkhat kal te chu an rak ṭhat, an thawm aṭangin tu motor emaw in a per tih a hriat theih.






Inla hrang vatin lawmthu ka sawi a, kan veng panna a inan loh avangin kawn aṭangin kan inṭhen ṭhin a, ban kan invai lauh lauh. Ṭhakima hnungchhawn zawnga ka ding chiah chu Timothya thinrim hmel ka hmachhawn nghal a, ka lam pana thinrim hmel taka alo kal chu thinphu dep depin ka lo en reng.





Mahse min kal pel a, reilo te ah kut inthlak thawm ka hre zui nghal. Rang lutukin Timothya lamah ka tlanphei a, Ṭhakima chu leiah a mu zawi hnawk tawh. Midang anlo pungkhawm ve taka chuan kan ṭhelh thei hram a, mipui pung khawm karah chuan a banah vuanin ka kalpui dawr dawr.





Thui deuhhlek kan thlen hnu chuan ka kut chu a vai thla pawp a, a bula bang chu a tlawh chawrh chawrh. A awmdan chuan min tihlau takzet. A thinrim hmel ka la hmu ngailo a, a inhrosa vel chu mak ti zetin ka en bawk.






"Ramdinsang, khapa kha hnaih lo turin ka hrilh che a ni lawm ni" ti hrawkin ka dar tawn tawnah a vuan a, nghet zetin a hmer bawk. A hmer nat em avang chuan ka ner sak. A thinrim em em chhan hi ka hrelo, nihliap a kan inzawn ringawt kha engvanga haw viau nge maw anih le?





Mahse a awmdan thlakin min kuah thlawp a, ngaihdam min dil leh anih kha. "Khawngaih takin mipa dang hnaih tawh suh, ka that duh mai ang" a ti chhuak hrawih a, nghet takin min kuah bawk. "Lalṭhakima khan ka bialnu hmasa ber min chhuhsak a, a awmzia chu ka bialnu nen anlo inkawp ru reng tihna anih chu. Ka tan chuan a tlawm thlak takzet, khanu kha ka duh vanga ngaizawi ka ni lo, laklawh thilah ka ngaizawng a, minlo bum lehnghal a." Tiin za lo zetin a nui hak.






"Chuvang chuan Ṭhakima i hnaih chang hian ka hlauthawng ṭhin, min kalsan ang tih ka hlau bawk a, A ni kha i hnaih tawh lovang tiraw." A tih chuan ka ngawi vang vang a, ka bu ta nghat nghat.






Khami nia thil thleng ho te chu ka ngaihtuah let a, thinrim taka kal si lungrual deuha kan haw leh dan te kha ka ngaihtuah a, nakina ka mittui la ti tla tu tur anih ka ring ngai hauhlo.






Zirtawpni ah chuan Muana nen chuan Aizawl lam kan pan a, ka pa pawhin engmah a sawi buai tawhlo. Inthiamloh hmel taka min en chungin, "I hmakhua ka ngaih vang vek tih i hre dawn nia." A ti a, ka hrethiam tho mai. Tu pawhin mahni fate tan chuan a ṭha ber kan duh ṭheuh a, mahse ka pa kha chu a kalthui deuh a ni.






Tlailam ah Aizawl kan thleng a, damdawiin pan nghal rum rum duh mah ila ka pi te in lam min panpui a, naktuka kal law law kan tum ta zawk. Ka pi leh pute chuan ka kal deuh thut chu mak ti awm pawhin an awwlo, ka nu ten an lo hrilh tawh anih ka ring.





Zanah chuan Mami alo phei a, rei fe chu kan titi bawk. Timothya nen kan chungchang chu a vaiin ka hrilh a, mittui ka hru zeuh zeuh, ngaihnawm tih hmel deuhin alo ngaithla a, min khawngaih hmel deuhin min en bawk.





A tukah chuan chawhnu lamah damdawiin ka pan a, U Mama'n min thlah nghe nghe. Muana chuan damdawiin kawtah min lo nghak a, ka thlen rualin Timothya awmna lam kan pan nghal. Zamna leh phurna inpawlh nawkin ke ka pen phei zel a, a hmel hmuh mawlh chu ka chak tawh.






Timothya awmna kan thlen chuan lut mai lovin ka ding leh rih a, Muana chuan min hrethiam takin, "Va hmu hmasa la, meizial zukna tur ka va zawng teh ang." Tih leh min kalsan a rual a, keipawhin muangchangin kawngkhar ka hawng riai riai.






Min hnungchhawn zawnga tukverh lam hawia Timothya ṭhu chu chechang lovin ka en vang vang a, a taksa tla dawk chu hnung lam aṭang pawhin a hriat theih. A sam chu thla kawlh tih hriat takin lukhum a khum a, wheelchair ah a ṭhu bawk.





"Lalremtluang" ka tih chuan ka lam hawiin alo inher riai riai a, min hmu thut chu a meng awk mai. Kei erawh chuan a danglam ta lutuk chu ka en tlawk tlawk. Engmah sawi lovin min en reng a, a mitmengah chuan min thlakhlelhna ka hmu thei.





Va pan hnaiin a hmaah chuan ka ṭhingṭhi rawp a, a malchungah bawkin ka ṭap chhuak hawk. A pumah kuah betin ka insut hlawp hlawp a, a taksa tla chak lutuk leh a hma a ang tawhlo lutuk chuan ka rilru a ti na takzet. Ka tello in khang hun chhung zawng khan alo awm chu a ni si a.






Ka samah a chul a, a kut chu a khur ve der der mai. 'Ka kalsan tawh lovang che' ka ti rilru mawlh mawlh.






"Tinge ilo kal?" A tih chuan ngei lutukin ka melh a, min nuih suk chuan ka tum hmak. "Tinge ka lakah i zep a, i thaw hah ṭhin te kha cancer vang vek hi a ni tiraw? Tinge engmah i sawi loh, i bialnu ka nih hi?" Ka ti ṭiau.





"A chhan chu tuna i awm ang hian awm lo la ka duh avangin" tiin ka mittui a hru a, "Keimah vanga ṭap turin ka duhlo che" a ti leh sup. "I mawl lutuk" ka ti ta ringawt.






Damdawiin ah chuan ka awm deuh chawt a ni ber, a nau in a awmpui ṭhin a, ka call ṭuma lo chhang tu pawh kha a nih hmel. Ka riah chhawk ṭhin a, ka riah loh zanah pawh ka kal ziah tho. Hma a sawn thei meuh lo a, a taksa chu a chhe tial tial bawk. Nitin hiann a ral ni maiin ka hria, Bible chhiar sakin ka ṭawngtai sak fo a, tlai lamah ka chhuah thawven pui bawk ṭhin.







Ka chhungte pawhin min be fo a, Timothya chanchin pawh min zawt ve luam zel. Ka pi leh pu te pawhin an rawn kan ve tawh nghe nghe a, U Mama pawhin min rawn tlawh ve zeuh zeuh. Timothya chhungte an rawn lang awl lo a, kei nen pawh kan inpawh tawh hlawm viau. Riah chhawk min tum pawhin ka duh ngailo a, ka riah theih thu hrilhin ka hnial ṭang ṭang ṭhin. A chhan chu ka hun tam thei ang ber hi a bula hman ka duh vang a ni.





"Ka hmangaih che" a khum ka siamṭhat mawlh mawlh laia a tih chuan amah chu enin lu ka thing a, "Min hmangaih lo" ka tih chuan a rum nghut. "Mahni pawh in hmangaih theilo khan engtin nge min hmangaih theih ang" ngaihsam hmel tak chuan ka ti liampuat a, chal ati chuar nang mai.






"Ka inhmangaih reng alawm, mahse ka in hmangaih ai nasa in ka hmangaih che" a tih chuan lu ka thing a, mithmul a kan ak a, ka lo nui thung. "I inhmangaih anih chuan tinge dam i duh loh. Kan nun neihchhun uluk taka kan enkawl hi kan inhmangaih tihna chu a ni lo em ni? Mahse va in hmangaih chiam kha a kawk ber lo. I inhmangaih anih chuan i lung chu thlak rawh," tiin ka thlem a, hun rei tak chhung a rilru hmin kan tum tawh a, mahse kan la hlawhtling theilo, hetiang zawnga ka kar hian a duh phah ve maithei asin.





Ka lam lo panin hnung zawngin min kuah a, ka darah khabe a nghat bawk. "Ka damna tur a ni chuanglo" a ti zuai raih a, a aw ah chuan beidawnna ka hre thei. "I dam phah maithei asin, beisei la, nghak rawh. Beiseina hi minti chaklo a ni fo ania." Tiin a kut chu a vuan a, ka hum vang vang.





To be continue....


Ads minlo click sak ve ta che 😘


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:49 pm

Chapter-9
By Mrs. Prejudice





"Ka hringnunah ve hi chuan maw, beiseinain hmai min hup san a, beidawnna in hnehna an chang ṭhin. Ka beisei apiangin ka beidawnna a zual ṭhin a, beiseina hi ka mamawhlo." A tih chuan a hmel en thei turin ka insiam rem a, a mitah tak ka en chho ha bawk.






"Beiseina chuan kal zel chhan tur minpe ṭhin, i beisei ang thil alo thlen lohin i na a ni maithei, mahse beiseina tello tawpa hringnun hman ai chuan a thlanawm zawk daih." ka ti thung.






"Midang te angin mi hmangaih dan ka thiam ve lo a, i lawmna tur tih pawh ka thiam ve heklo. A vawikhat nan takmeuh ka nunah hmeichhia hmangaihna avangin ka la lut a, ka lungphu ti danglam thei awmchhun i ni bawk. I mitmeng hian min thlamuan ṭhin a, ral khat aṭanga ka thlir ṭhin lai che pawh kha nimin ang mai a la ni. Ka hrelo emaw i tih pawh kha ka hre vek asin. Keimah vangin i chhungten an hau ṭhin che tih pawh ka hre vek, mahse nang chuan min vuan lui zel a, bialpa chhuan tlakloh tak leh innghahna tlakloh tak ka ni tih ka inhria, mahse kalsan tur che hian huaisenna ka nei thlawt lo, a chhan chu ka hmangaih che avangin."






Ka mittui luang ngiai ngiai chu min tuai hul sak a, ka biangah dawmin lungchim zetin min en bawk.






"Keichu mi ṭha ka ni lo, ka chhungte ti hmingṭha zawngin ka awm ngailo a, ka pa tan fapa fel tak ka ni ngai heklo. A nihna vangin mi te zah a kai a, kei erawh chu a hming tichhe zawng hlirin ka khawsa ṭhin thung. Ka ṭhian kawmte apiang sual turah an ngai a, keimah ngei pawh hi. Vawihnih khat ka insual thawm an hriat avangin vengchhungah misual enin min en nghal a, nangpawh ka hnaihah i awm chuan chutiang chuan an ngai ve ang che, kei chu heti te mai hi ka ni tawh a, ka dam rei tawh kher lo ang, chuvangin i nat lutuk hma hian min kalsan rawh." A tih chuan ka kuah thlawp.






"Lalremtluang, kalsan tur chein min ti tawh suh." Ka ti ṭiau a, ka insut hraih. A vawikhat sawina a ni tawhlo, amah kalsan turin minti fo a, a inthiamloh vang a ni tih ka hria, a mitmengah hian min thlakhlelh zia ka hmu ṭhin a, mahse a lantir duh ngai miahlo thung.






"Ka chhungte thu awih lovin ka lo pan che a, ka zirlai zawng zawng pawh ka lo kalsan vek bawk a, heihi engvangah nge i ngaih a, min hmangaih thu i sawi ziah a, ka hmangaih che i ring ve ngai miahlo tihna ami? Ka hmangaih che ka tih khan ka ti mai mai hleinem, engkim huamin a sin ka lo pan che. Mi te min sawi dan turin ka rilru a luah zo tawhlo a, i ṭha em? Engtin nge i awm? Ka tello in na ilo tuar reng em ni? Tih ngaihtuah reng rengin ka awm asin, min kalsan tum mahla ka lo zui zel tho ang che, chuvangin kalsan tur chein min ti tawh suh."






Ka biangah mittui a luang zung zung a, lungawi hmel takin min en bawk. A mitah chuan natna, hlimna leh beiseina te a inpawlh nuk a, ka hmuiah chuan duat takin min fawp a, "Ka phulo miahlo che" a ti chhuak sup.





Kan pahnih khawvel chu a room chhungte chu a ni mai, mahse tudang mah kan ngai bik ngailo. Kan khawvel zimte ah chuan a awm turte kan awm kim a, keini zawng hi kan mamawh chu kan ni bawk a, khawvel pawnlam in min chimbuai lo a, kan inkar sawinghing thei khawpa chak an awm lo bawk.






Mahse nitin ka hmangaih chu a kal a ni si a, Chemo an khai avangin a chau thei hle a, ana a zual telh telh bawk nen. Ana a chhuah chang phei chuan nachhawkna sang ber pawhin a chhawk theilo a, a lung lah thlak chi a nih tawh loh thu doctorin a sawi bawk si a, lung hi a va zing tak.






A nat zual chang chuan ṭap chungin ka pa te hi ka va call leh ringawt zel a, phone aṭang chuan inpuih a har thei bawk si, ka chhungte pawh ka tibuai thei viau.






Nizan lamah a kaih avangin ICU ah an dah a, tlai lamah a zia deuh hnuin an la chhuak leh a, vawikhat pawh a hlatah ka awmlo, ka awmloh hlanin alo kal mai ang tih mawlh chu ka hlau a, ka inchhir leh na tur thil tih ka duh lo.





"A mawi zia khi" tiin vana thla leh arsi pe uar chu ka kawk a, hmuhnawm ti zetin Pathian thilsiam mawi zia ngaihtuah chungin ka thlir a, a niin kei min en thung a.






"Vana arsi te ai khian i mawi ka ti zawk" a tih chuan, "Hmmm" ka ti vak. "I awih chiah nange" nui vur vur chunga a tih chuan ka awihlo tih entirnan ka bu nghut nghut.






Ka pa a zin hlan a ni a, Zoi te inah riahkhawm kan tum a, Timothya nen inhmuh kan duh vanga riak khawm kan ni deuh mah. Ka ṭhiante chuan phur deuhin min chei kual vel a, ka hak tur pawh an thlang vek. Make-up erawh ka hnar thei hram.





Kan inhmuh ziahna ṭhin khawngah min lo nghak bawk a, inkuah rialin thla leh arsi kan en duh a, kan hma duh tur duhthusam tam tak neiin ka theihnghilh tawhloh tur zan hlimawm tak min hman pui a, khatih lai khan ka hmangaih hi alo na reng tawh awm si a.






Natna khuma ka hmangaih na tuar hmel chu ka en a, ka rilru ana ngawih ngawih. A khumah chuan bawkin a taksa chu ka kuah a, nakin lawkah chuan he taksa hian lumna a nei tawhlo anga, a lung phu dup dup pawh hi a reh tawh ang...mahse chu hun chu ka va huphurh tehlul em...!






Zan lamah chuan a zia deuh hlek a, zawi tete in a ṭawng peih a, ka be seuh seuh reng. "I chau tawh em?" Min thlek vang vang paha a tih chuan lu ka thing a, hlim hmel ka pu lai hram hram. "I dam huna kan awm dan tur te ka ngaihtuah ṭhin a, couple shirt te kan ha anga, kan bazar kual vel anga, i chak ve tho em? Dam vat vat la, thil tam tak tih tur kan nei ania."






Ka aw chu a lawi lek lek a, ka hnuk a ulh ṭun mai bawk. Mahse ka nui lui hram hram a, a hmaa ṭah loh hram ka tum a ni, mahse hlawhchham leh ta, khawngaih hmel takin min en zawk a, "Tiang lo deuh hi i phu asin le" a ti chhuak sup.






to be continue....


Comment theuh ang aw... hmeltha hlawm si..
Ads minlo click sak ve dawn nia😘


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:49 pm

Chapter-10
By Mrs. Prejudice





Tho kan a tum chuan ka lo pui thuai a, a sira pawhdawh chu banin bawm pakhat hi alo la chhuak a, ka kutah a hmehbel chawt a, hawng rawh ti niawm takin min melh bawk. Khumah ka mut tir leh tete hnuah bawm chu ka hawng a, a chhungah chuan Silver ṭhi, a locket a fairy ni awm tak lem awm hi a ni a, "A mawi lutuk" tiin nui sangin Timothya chu ka en.





"I ta tura ka lei ania, ka lo haw hunah pek che ka tum a, mahse ka lo haw thei ta mai si lo a" a ti sup sup a, a hmuh lai ngei chuan awrh in, "Ka inhmeh em?" Ka ti a, chau tih hriat zetin a nui bawk.






Kha kha pangai taka kan inbiak leh hnuhnawng ber a ni tawh, biak mumal theihin a awm tawhlo, ICU ah an dah a, a dinhmun chuan hniam lam a pan zel a ni ber.





Timothya cabin chhungah awmin mit ka chhing vang vang a. Ka chau tawh hle a, mumal taka ka mut lohna a rei tawh bawk nen ka lu te hi a rit bur tawh. Mahse haw tura min tih pawhin ka duhlo tlat. Natna khumah na tuarin ka hmangaih a awm mek a, hetiang mai mai te chu ka tuar thei tur a ni tawp. Mahse ka lo chhing sek tho aniang.






Ka kutah hian mipa naupang pakhatin min kai a, min pawt kal det det. Ka zui ve zel bawk a, thui deuh fe kan kal hnu chuan ka mipa naupang kaih chu ka en a, naupang alo ni tawh hauhlo. Tleirawl ngui tak leh beidawn hmel tak hi ka lo kai reng tawh.





Ka hmuh lai reng chuan chu tleirawl te chuan min kalsan a, zu leh ruihhlo chi hrang hrang a ti lai ngei ka hmu bawk a, a kalpel tu apiang ten a kawk zui bawk a.





Mahse chutianga a awm lai chuan hmeichhe pakhat lo kalin chupa chu a kai tho a, thla eng raih hnuaiah chuan mawi takin an lam dun chu ka lo thlir reng. Mahse mipa chuan hmeichhia chu a kalsan ta daih a, hmeichhia chuan au tuar tuar a, mahse amah hnungchhawnin a kal lui ta tho. A tawp nan ni awm takin chupa chu alo hawi a, alo hawi leh chuan Timothya hmel ka hmu, a hmaa hmeichhia chu na tih hmel takin a en ngawih ngawih a, a ral riai riai.





Hmeichhe ṭap thawmin min ti harh zawk a, hlauhthawnna in min luhchilh nghal. Ka mumang kha enge a awmzia ka hrethiam lo a, khatiang mumang kha ka neih ngai awm pawh ka hre heklo. Timothya chhungte ṭap rawih rawih ri chuan ka thauah min man a, ka pawh mai ngam lo. A chhan chu enge ka hmachhawn dawn ka hriat vang a ni.





"Min peihlo san ta maw?" Tiin ka phun sup a, ka tha a khur nghal der der tih ka hria. Timothya nau, Ruati chu roomah lo lutin minlo kuah chawt a, a ṭap chhuah hawm hawm bawk. Kei erawh chu ka hrawkah min hnawk tlat a, ka ṭap chhuak thei miahlo.





Timothya ruang chu an in lamah an phur phei a, a farnu te leh a chhungte hovin an au mawlh mawlh ri chu rilru chawmawlh zetin ka ngaithla reng ringawt. Tun hun hi kan la thleng dawn tih chu kan hriat kha, mahse a rang lutuk a, inrin lawkna hun takngial pawh ka neilo a tin ni.





U Mama pawh chanchin a hriat rualin alo kal thuai a, an inah pawh amah vekin min buaipui. Timothya chu ka en reng a, mitthi a ni tawh tih hi pawmthiam har ka ti. Ka ṭap lo a, mahse ka thinlung a rum vawng vawng thung. Nunna a nei tawhlo chung pawhin ala hmelṭha reng a, ka hmuh hmasak ber ni ang chiah khan.





Kan intawn dan leh kan hun hman dan te ka ngaihtuah kir a, a na a ni. Ka awmchu ka dawn vang vang a, kut khur der derin Timothya kut chu ka hum bawk. "Ka fapa" tiin a pa pawh chuan Timothya chu a kuah a, a mittui a tla zawih zawih.





"Bawiha, ka tupa duatte, ka van lainat tak che em, i vanglai hun pawh midang te anga hmang ve theilo natna khumah i hmang a, ka va han lainat che em, pa angchhungah i awm tawh bik awm sia tiraw." Tiin a pi chuan a hmai te chu a zut kual a, ka mittui pawh a luang ve ta alawm.






Khur der der chungin ka kut chu ka la kang a, ka fawp vawng vawng. A taksa lumna nei tawh miahlo te chuan min ti na, ka na lutuk hi sawifiah ngaihna ka hrelo. Ka chhungril a rum vawng vawng a, rawl tawpa ṭah vak vak ka chak.





Kuang an chhin dawn chuan ka puak darh ni ta berin ka hria, ṭap chhuak hawkin Timothya ka kuah bet tlat a, "Ka phal lo" tiin ka kuah tlat. Chulai hmuna awm ve te chuan an mittui an hru zeuh zeuh hlawm tih pawh ka hria. U Mama chuan min la hrang thei hram a, mahse ka tal vak vak tho. "Timothy, ka hmangaih che, min kalsan suh, mawh." Ka ti ṭawk ṭawk. .







Thlanah chuan ka kal ve an phal miau loh avangin ka kal ta lo a, Ruati nen an naupan lai album te kan en dun a, kan nui a, kan ṭap bawk. Mahse mak ka tih chu, ka mumanga ka naupang hmuh leh Timothya naupan lai chu an inang chiah chiah mai. Timothya nen hian inzawmna mak tak kan nei ah ka ngai hmiah bawk.






"Happy new year" ti sepin thlanah chuan pangpar ka dah a, granite lunga Timothya nui hmel chuang kulh chu ka chul heuh heuh. Min kalsan aṭangin kum 2 lai chu a liam leh ta reng mai. Mahse ka tan chuan nimin ang lawk kha ala ni reng.






Ka hman chang changin ka tlawh ṭhin a, BA final year ka kal tawh avangin Aizawlah ka awm a, ka hun neih apiangah thlanah ka kal ṭhin. A ṭhi min pek kha amah ah ngaiin ka be fo a, duhthlan a ngaih chang te, rilru hahna ka neih chang te, ka hlim leh lungngaihah pawh he ṭhi hi engkim ka hrilhna a ni. A chang chuan ka bulah hian Timothya a awm reng a, ka che vel min lo thlir reng ni te hian ka hre ṭhin.






Khawvelah hi chuan kan awmdun theilo pawh a ni maithei, mahse khawvel piahlamah min lo nghah ka ring tlat a, chu chu tun thlenga chak taka ka la awm theih na chhan a ni bawk. Ka hmangaih nen khan kan la inhmu leh dawn tih hi ka chiang a ni.




The End



(Min hau su😬🤣)


Ka story minlo chhiar sak tu te zawng zawng chungah thinlung takin lawmthu ka sawi e, story dawt lehah a ai ngaihnawm zawkin ka rawn ziak leh dawn a, minlo chhiar sak leh hram dawn nia.


(Last manah comment vek ang aw)


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)