Suddenly in my heart BY Misse Prejudice (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Suddenly in my heart BY Misse Prejudice (Completed)

Unread post by Ngaia » June 12th, 2022, 3:48 pm

37qdpjhd.jpg

Chapter-1
By Mrs. Prejudice






Sava chiar nak nak thawmah chuan ka meng chhuak diar diar a, ka phone hmet engin dar zat ka en a, dar 6:00 chiah ala ri. Ka phone hmet thimin ka inlet thaka ka mit ka chhing zui leh nghal.





"Mate" ka nuin ka tih chuan ka hrelo der.



"Bawihi"



"Mambawih"



"Dini"



"Dinsang"




"Tunah 1,2" ka tih rilruk lai mekin, "Ramdinsang" a rawn tih chuan ka nui hak. Min koh duat rei kha ka ring lo reng a.





Peihlo zetin ka tho chhuak a, dar zat ka en chuan 8:30am alo pel fel tawh. Bathroom ah lutin ka inphih fai a, khum ka thlehfel leh te te hnuah ka phei ta chauh.






Ka nu chu ka u nen eng eng emaw an lo sawi a, an thusawi ngaihven lem lo chuan fridge hawngin tui ka in khawlh khawlh.





"Zingkarah tui in ziah suh" ti hlakin ka nu chuan tui lum minlo pe a, ka ner nang. "In ngei ngei ang che" ka ner hmel a hmuh chuan a ti hram.






"I inpack fel tawh maw, naktuk zingkarah kan chhuak dawn ania, i buai leh rum rum ange" ka nu bawkin a tih chuan, "Ka van peihlo tak" dawhkana bawh pahin zawi zetin ka ti a. Thingtlangah ka pa hna vangin min sawn dawn a, peihlo tak te in ka peihlo. Thingtlang hi ka ngainat loh bakah ka ṭhiante an awm ve dawn bawk si lo.





"Nu, apa hi dil ila, keichu Aizawlah hian ka lo awm anga, api te inah pawh a awm theih tho sia." Ka ti nang nang a, ka u lah chuan min lo nuih char char. "A theih loh" ati bur mai si.






"Naa...Mama pawh a awm dawn tho sia ka awm ve duh tho alawm, min duatlo bik lutuk, in fa lak ka nih te hi ka ring rum rum." Ka ti tan tan a, ka u chu alo nui chhuak hak.





"I ho set sut. Mama te chu a zirlai a laklawh a, awmbo thei a ni hleinem, 12 hi ṭha deuhin pass la, Aizawl awm te chu ila ngai dawn chauh." A tih chuan ka tum bur tawh. Kar leh aṭangin class kan ṭan dawn chauh a, kan laklawh lai ni se ka van ti tak.






"Mama chu han kaitho rawh chaw ei dawn ang u" a tih chuan ka kal tau nghawng nghawng.





Ramdinsangi ka ni a, kum 18 niin class 11 ka zo chiah a, 12 tur chiah ka nih chu. Ka pa hi lunglam doctor a ni a, mi taima tak leh mi dik a ni a, mi pawhin an zah thei viau.





Kei hi unau pathum zinga naupang ber ka ni a, kan upa ber hi hmeichhia a ni a, Lalrinsangi niin kei aiin kum sawm laiin a upa a, kan milai Lalrintluanga niin university a kal mek thung. Kan unau hi kan kum a inthlau hlawm ang reng a, mahse duat ka hlawh phah viau.





Kan upa bei hi lung lam ṭhalo a ni a, amah vanga thingtlanga awm tum kan ni bawk. Khawpui boruak ai chuan thingtlang boruak hi a hriselna atan a ṭha zawka an ngaih avangin ka pain thingtlanga transfer a dil a, ka u hriselna ngaihtuah pui ve tho mah ila thingtlanga awm chu ka phurlo takzet.






"Uii, kal lo mai la" tih pahin Mami chu ka khumah a bawk thlawp a, zawi zetin ka mu thla ve nghal. "Ka thu chu ni se ka kallo chiang viau ang." Uar zetin ka lo ti ve bawk. Khumah chuan inkuah rialin ka mu a, kan titi sep sep. Naktukah kan kal tawh dawn avangin vawiin chu nilengin alo leng dawn a , a riak nghal dawn bawk, kan awmhrang tawh mai tur hi ka ngai lawk zawk.






Kei hi rualpawl vak lo chi ka ni ve a, ṭhian siam phei hi chu ka thiam lo hrim hrim, an mahniin an zir viau te anih loh phei chuan ṭhian thar hi ka siam khat khawp.






Ṭhian ṭha tak tak chu nei ve ṭhin mah ila kawm tak taka kawm leh engkim ka hrilh ngamna chu Mami chiah hi a ni a, tet te aṭanga inkawm tawh kan nih avangin ka ring viau bawk.





Nileng chuan min insiam pui a, kan buai dun ngar ngar viau. A star hmaa a chetchhiatna vel sawiin kan nui leh uar uar ṭhin.





Hmeichhe lerh tak ka ni lo a, bialpa pawh ka la nei ngailo, star deuh te hi chu nei ṭhin mah ila tihtak zeta star phei chu ka neih awm pawh ka hrelo. Mipa ah hian ka buailo khawp a, ka vanneih ve na pakhatah ka ngai mai.





Hun a liam zung zung a, kan chhuak dawn ta der mai, Mami nen chuan kan inkuah rial a, "ṭhian dang i kawm anih pawhin min induh khum vel vaih chuan ka rawn kal chilh che anga ka rawn sawisa ang che." Tiin min vau kha kha , nuih hi a ti za ṭhin.





Ban vai lauh lauh chungin kan inthlah liam a, inbe reng turin kan inchah mawlh mawlh. U Mama kal ve lo tur chu kan melhrum leh ṭhin a, ani lah chuan lei min lo la chhuahkhum zui a, ka ngei tak tak a ni.





Kawngtluan chuan ka muhil a tihtheih ang, ka chhungte chu an titi barh barh hlawm a, Kei erawh chu ka muthlu kawng tluan a ni ringawt.





Khawchhung kan luh chuan tlai lam dar 3pm a pel tawh a, quarter kan luah dawn anih hmel. Kan in tur kawtah chuan ka pa thawhpui tur te ni awm tak chu an lo awm nual a, ka pa chuan a be nghal bawrh bawrh.





Kar hmasa khan ava kal zuai tawh avangin an lo inhre nel viau hman anih ka ring. Ka pa hi chu kei anglo takin rual pawl thiam tak a ni a, ṭhian pawh a siam zung zung zel. Ka chhun lo hi a pawi a ni.





Kan in tur chu a zau phian a, ka rinai daihin a thingtlang lo bawk. Thingtlang khaw ṭhing deuh tur angin ka lo ngaihruat a, mahse ka rin ang em em chu a ni lo, mahse thingtlang hming pu tawk vela thingtlang chu a ni tho mai.


Room zau ber dawt chu thlangin ka inrem nghal char char a, a zualpui ka rem zawh chuan ka inbual nghal. Ka chau ve deuh aniang ka lu te hi ana bur a, mut daih ka chak.





"Mate, thingpui fe va lei lawk ta che." Room aṭanga ka chhuah rual rualin ka nuin alo ti nghal a, ninawm hian. "Dawr awmna pawh ka hre lo" ka ti hmuk. "Saw lai maia saw a awm saw, in aṭang pawh hian a hmuh phak." A ti lehzel a, kal tho chu ka ngaih hmel. A tirah pawh khan dawr chu ka hmu daih tawh, ka kal peihlo vangin hmu lo angin ka awm mai mai.





Dawr ah chuan ka kal hnak hnak a, mi ho lah chuan min en hrek hrek maiin ka hre lehnghal, ka hrelo awm hmiah hmiah. Mami nen kan in text paha, min ngaih thu a sawi nasa mai, keipawhin ka ngai nghal.




Phone en paha ka kal lai chuan eng emaw hi ka rap a, ke vawr suau in ka tlu anih kha!! Ka zak lutuk chu ka che mai ngam lo. Ka sir deuha hmeichhe pathum lo awm te chu an nui chiam a, ka thinrim bawk si, zak bawk si chu ka ṭah a chhuak hlur thei.





"Ana em, ana ngawt ang" tih pahin nui vak te zinga pakhat kha alo kal a, a kut chu lo chelh vatin min kaitho a, a hmel aṭang pawhin a nuih ala za hle tih a hriat.





"Ngatan mah ngai suh, thal awmchhun i ni lo ania" an zinga mi tho in rawn ti lehin an nui hak hak. "Ka va hmu ngailo che ve" pakhat chuan a ti a, lo awm thar ka nih thu leh ka pa hming ka sawi chuan an phul hlut.





"Uii, kan inah chaw inlo ei dawn tih te kha i hria em" min kaitho tunu khan a ti a, lu ka thing ringawt.





"E, chuan....Nui ka nia, heihi zoi, chuan heihi Siami tiin an hming chu min hrilh hlawm a, keipawhin ka hming ka sawi ve bawk.





"Ramdinsang, hmanhmawh ta che, kan nghak che ania." Ka nu a rawn au lawng lawng takah chuan ka hrechhuak zawk. "Kan inhmu leh dawn nia" ti sawk sawkin thingpui fe chu ka lei a, hmanhmawh deuhin in lam ka pan hmawk hmawk.





Zanriah chu Nui te inah khan kan ei a, ṭhian ka siam chu a ni ta der mai. Kan school luhna tur alo inang lehzel bawk nen a tihzia ang reng.





Ni a kal bek bek a, school pawh naktuk maiah kan kal tawh dawn. Ka peihlo viau rualin ka chak ve deuh tho.





Earphone vuahin he khuaa ka hmun nuam tih berah chuan ka kal leh a, ramhnuai deuh reuh a ni a, hetiang hmun reh hi ka ngainat avangin ka kal fo. Mipui tamna hmun ai chuan reh deuh ṭhapna hi nuam ka tih zawng ania, hetiang hmun hi chu ka hre thei lutuk.





Mipa rum ri ang deuh ka hriat vang chuan ka earphone chu ka la thla a, chiang zawkin ka beng ka chi. A reh vang vang avang chuan ka hresual emaw tiin kal leh mai ka tum a, mahse rum ri bawk ka hriat leh avang chuan thawm ka hriatna lam chu hmanhmawh deuhin ka pan a, ka hresual lo ngei e.







To be continue.....




Ads leh comment te kha minlo to tihsak leh turin ka ngen a che u😙



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:48 pm

Chapter-2
By Mrs. Prejudice





Mipa pakhat hi a leiah ṭhingṭhi hnawkin lei a nem a, a kun tlawk tlawk mai. A beka a thisen zam pawng ṭawlh ṭawlh leh a tlan fim chhuakah te chuan na a tuar tih hai rual a ni lo. Hreh chung chungin puihtheihna ka neih tak mialin tiin a lam ka pan a, ka thawm a hriat rual chuan amah zawk chu a rawn hawi chhuak a.





Chutah che phutin kan hnaih bera thing pakhatah chuan min rek bet ta mai. A thil tihin min ṭhawng lutuk chu chet mai nachang pawh ka hrelo. Mahse min rehna a nat tak em avang chuan a ban chu ka beng vak vak a, min thlah a tum hmel loh khawp mai.





A mitmeng a sen rum a, a â vek bawk. Min rehna na bawk si leh a thlah thei bawk silo chu tih ngaihna ka hre lo takzet.





Chutah harhfim thut ang mai hian a tha a thlah thut a, leiah ka ṭhu zawi hnawk a, ka khuh nghal bawrh bawrh. Ka hrawk na lutuk chu mittui tla phungin ka khuh a, ka thaw kawk kawk bawk.





Rum zeta chupa ka va melh chuan thingkung nghengin a thaw halh halh a, a thaw a hah tih ka hre thei nghal. Ka u hi a thaw a hah ṭhin avangin thaw hah ho awmdan chu ka hre ve deuh.





A lam pana ka kal hnaih chuan rum zet hian minlo melh a, zawk zamah hian a, ka kalsan daih zawk dawn mawni. A banah ka va khawih chuan minlo alo vai per lawp anih chu, ka pai nawk lehnghal.





Ka ngei lutuk chu ka kalsan lo chauh a ni. Mahse lo thi palh ta se, helai ramhnuaiah hi chuan tumahin an hmuh ka ring si lo, ka ṭanpui loh vanga a thih palh chuan minlo hrankhum palh ka hlau.





A bulah chuan kal leh ngatin a hmaah ka ṭhu thla a, min lo melh khui te chu ka hmulo der hmiah. A hmaa ṭhu reng chung chuan ka thaw chhuak suai suai a, muangchanga boruak hip lehin ka thaw chhuak leh suai suai, kut zaizir nen meuh chutiang chuan ka ti a, mitmeiin ti ve turin ka ti bawk.





Ka u buai zual lai chuan tiang hian ka pa in a ti ṭhin a, a chang chuan a reh daih zel. Chupa pawh chu a thawk a pangai telh telh a, chuta a rawn hawi chhuak nen chuan kan mit a intawng chat mai.





A mitmeng chu a mawi lutuk tlat. A mitmu dum fiah kak chuan min melh ve reng a, keimahah hian ka sawifiah thiam si loh che dawt a awm. Hnuailam bih lehin a hmui a seh zeuh a, a nui suk. A lai deuhin ka hria.





"Ka lawm e" ril ruih hian a ti a, a aw te chu a pa tawp. Chhan nachang pawh hrelo chuan ka melh reng ringawt.





"Tho tawh la" a tih leh chuan hrechhuak thutin ka tho nghal thuai a, ka khawr deuh
ṭut chu ka inhrethiam lo.






Ṭawng tuma ka ang zuau chu mipa ṭawng lawng lawng ri hi ka hre thut a, ka hawi phawk nghal hru mai. Mipa nui huah huah ri ka hre zui bawk a, an thawm aṭang chuan an ṭhahnem thawkhat tih a hriat.





"Kal tawh rawh" ka bula miin a tih chuan, "Maw?" Ka ti deuh hu a, ka at hmel ngawt ang. "Kal vat rawh" an thawm alo hnaih zel takah chuan a ti vin hluk. Min tur sek bawk nen hmanhmawh deuhin ka kal a, a awmdan te thut chu mak ka ti, khami te kha a hlau te anih ka ring rum rum. Engpawh chu ni se, ka buaina a ni lo.






"Iva rei ve, vawiin tlai chu" in ka luh rualin dam zetin ka pa in alo ti a, "Nia" ka ti zawi sep ringawt. Tlaitin ka walk ziah a, heihi anni pawhin ngaiah an nei tawh.





Ka inbual leh tete hnuah ka nu eirawng ka bawl pui a, a lo bawl zo deuh tawh avangin eng phei chu ka ti vaklo.




"I u va koh la, chaw ei ang u" ka nuin a tih avangin ka u room lamah ka phei a, kaihthawh ka tum chuan alo sa vur mai. Kan sawi deuh a, a harh theih mai si loh avangin ka pa chu ka koh vat a, alo lut rang khawp mai.





Ka u khawsik chu alo sang viau a, a tlun deuh bawk nen ka pa chuan damdawiin lama kal a rawt a, motor a lak chhuah chhungin ka nu nen ka u tih harh kan lo tum ve mek bawk. Ka pa chuan pawm nawlhin motor lam a panpui a, seat hnung lamah ka ṭhu lut vat a, ka malchungah dim tein alo mut bawk. Ka nu erawh chu a hmaah a chuang thung. Hetianga kan awm vawikhatna a nih loh avangin kan chiai lutuk tawhlo.





Damdawiin kan thlen chuan ka pa chuan a endik zung zung a, nachhawkna sang chiin a chiu nghal bawk. Ka nu nen chuan inbe lem lovin kan ṭhu ve reng a, ka u hrisel lo bik lutuk hi ka khawngaih ṭhin. A chang hi chuan a tuar ai te hi tuar sak daih ka chak ṭhin a, chu erawh thil thleng ngailo tur a ni thung si.





"Kan tei harh lawk" tiin ka nu chu a tho chhuak a, kei erawh chu ka ṭhutna ngaiah ṭhu in ka ṭhiante message ka reply zeuh zeuh a, mi che vel chu ka thlir pah bawk.





Bang nghenga kawngka lam ka thlir dauh dauh lai chuan tlaia ka mipa hmuh kha ka hmu hlawl mai. Damdawiin luh chiah hian ding lam leh vei lamah a inṭhen a, ding lam hi hmeichhe awmna a ni deuh bik a, vei lamah hian mipa an awm thung.





Chupa chu vei lam room aṭangin alo chhuak a, hawi chhuak lemlo in hmalam a pan mawp mawp. A jacket siamṭha paha a lo hawi zawk chuan min melh zawk a, a hawisawn tawh hnuah min rawn en ṭha leh ngat a, minla hre ve chiang mai. Ka lampana lo kal a tum chu mi pakhat hian alo kuah a, an chhuak daih. Ka lo ui ru veng veng anih chu.





Ka u khawsik a reh hnu chuan inlamah kan haw a, kan ni rum rum bawk nen chaw pawh kanla ei lo. Mahse chaw ei chakna pawh ka nei tawhlo. Mut hmunah thleng pawh chuan khapa khan ka ngaihtuahna a luah reng a, a hming lah chu ka zawt der lo lehnghal a, kan inhmuh leh hunah zawh ka tum ruh viau.





Vawiin hi kan school ṭanni alo ni ta der mai. Ka rinai daihin school chu a nuam dawnin ka hria. Kan class pawh kan tam lutuk hranlo, 29 kan ni a, a tawk vel chiah mai. Kan class ah chuan ka upa ber a, kum 18 dang an awm lo, ka upa fal bik chu nuamlo tihna em em pawh ka nei hran chuanglo.





Khapa kha ka hmu ngai ta meuh lo a, mahse ka zan mutnaah erawh a hmel suangtuah chungin duhthu ka sam nasa thei viau mai. A mitmeng mawlh kha ka theihnghilh thei lo a, hetiang em ema mipa min hip tu hi ka tawn ka inring ngailo. Mahse duh viau mah ila tihlan loh hram hram ka duh ṭhin, ka zak tlat zel.






Class chu a nuam viau e, lehkha zir tih loh chu. Ka classmate te an felin min nel nghal em em a, Nu-i te ho nen kan class inang ah kan awm a, kan inzui deuh chawt.






"Enteh u, saw saw tunge in hria em?" Khapa khan school bula dawrah ka hmu thut a, ka hmuh rualin ka ṭhiante ka zawt nghal, an lo hre viau lehnghal.





"Uii, Timothya anih saw" Zoi chuan a ti hluai a, "Sual viau lo se chu ka star ngei ngei ang, a pa ve thlawt" a ti zui zat. "A sual em ni?" Ka lo ti he haw a, an bu nghat nghat hlawm mai, sual chu a inhmeh lo ka ti riau pek.





"Aizawl khua an nia, a nu leh pa an inṭhen tawh a, chuan ruihhlo ati nasa lutuka a pa mangangin thingtlangah alo dah tawp an ti, a pi leh pu te bulah. Mahse, a fel sawt pawhin ka hrelo, kan khuaah pawh a hming hrelo an awm lo ang, mahse a chhe zawngin ania." Zoi chuan atih zawm zat a, ka rilru chu a hnual nghal rawih rawih.





To be continue....


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:48 pm

Chapter-3
By Mrs. Prejudice









Chutia kan lo dinkhawm lai chuan Timothy chu kan lam alo hawi a, a chungchang kan sawi tih hre hek lo, ngainat awm deuh hian a rawn nui suk a, ka ṭhiante pawh chuan an hmuhhmaih lo nasa.





"Inlo hmu em, alo nui mawle" Siami khan a ti sup a, "In inhre sa ami?" Nui'n a tih chuan ka bu nghat. "Hre sa lutuk lo." Ka ti sep.





In ka thlen chuan ka inbual a, kan ban tlai avangin ka walk ta lo mai. Ka nu ka pui ve nghal char char a, chaw pawh kan ei hma viau.





Roomah awmin khumah ka bawk a, phone ka khawih mai mai lai chuan Zoi a rawn lang hlawl a, phawk deuhin ka lo en. "Tehhlawl che chuan" tih pahin ka tho thuai a, a nui vur vur mai.






"Ka birthday ania, a hmingin kan lawm ve mai mai dawn a ka lo sawm che" a tih chuan, "Ka chhungte khan an phal dawn mawni?" ka tih niah niah a, "Amah khan a peih leh peihlo va zawt la an ti" alo ti then a, phur deuhin ka insiam nghal.






Mut kawr nena ka awm avangin ka inthlak zuai zuai a, kan inzui chhuak nghal. Nui leh Siami pawh kan sawm a, kan class ami te pawh a sawm nual mai.





"Sangpuia kan sawm theihnghilh daih" Zoi chuan a rawn ti phawng a, Nui nen kan va sawm leh rih. An in awmna lah chu a hla reuh phian lehnghal a.






"Lsa te pawh hian lo sawm chhoh nghal tur ania, tlaw hlawm siah" hah vanga thaw halh halh chung hian a ti hlak hlak a, ka lo nui mai thung.





"Chu enge" mipa rum ri kan hriat avang chuan kan ding chawt a, kan kalna tur kawng lam aṭanga lo chhuak chu aniin ka hria. "Va enchiang ang" ti leh kal a rual a, kei erawh chu ka ṭang deuh ṭung thung.






"Uii..." kan thil hmuh vang chuan Nui chuan a ti hluai a, nghet tawkin min kuah. Tlangval pathum hian mipa pakhat hi anlo khawih rawn a, an sawisak pa lah chu chechang tur pawh a awm tawhlo. Chu aia mak ka tih chu, an sir ah chuan bike nghengin Timothya khan hmuhnawm tih hmel deuhin alo thlir anih chu.





"Va dang teh ang" an tihlum thei takngial dawna ka hriat avang chuan ka ti a, kal mai ka tum chu Nui chuan min vuan tlat. "Kal lo ang, Timothya te ṭhianho an nih saw, min sawisa ve palh ang" tiin min pawh let a tum ve ṭang ṭang bawk.





"Hmeichhia chu min tina duh bik nang" tih leh kal ka rual a, Nui chu rilru hah hmel deuhin alo ding a, "Lo kal rawh" alo ti sek bawk. Mahse ka kal lui tho.





An bul ka thlen ruala "Tawp rawh u" ka tih chuan an vai chuan min en ṭhap a, Timothya'n ka hmel a hmuh chuan a mitmeng a danglam zawk a, mahse a reilo. "Tunge i nih a? Hmeichhia te te si" tih paha an zinga pakhatin min lo pan a tum chu, "Muana" Timothy chuan a ti thum sup a, chupa pawh chu a ding chat.





Timothy chuan ka lam alo pan a, Nui awmna lam ka va hawi chuan hlauhhmel deuhin min lo en a, a dang vek thei alawm le.





"Engmaw i sawi?" Ka hmai zawna rawn kun hniam runin Timothy chuan a ti sup a, min awm hnaih lutuk chu ka thaw ṭha theilo vel, thinphu dep depin ka en reng a, chhan nachang pawh ka hrelo.





"Hey, nang kha" tih pahin tiang nen Nui a rawn tlan a, ka bula mi chu ding ngilin hahthlak tih hmel deuh hian a thaw hawk. Kan bul alo thlen rualin ka hmaah a rawn ding a, vuak inpeih atin a tin run bawk.





"Ka hlau miahlo cheu ania, min kalsan vek ru misual ho" A aw a hlauhna ri tel chu ka hre thei a, midang ho pawh chuan an hre ve a ni mahna an nui huk mai.





"Ka....ti tak tak ania" ban charh hian a ti leh a, chutih lai tak chuan Sangpuia kan awmna lama hmanhmawh deuha lo tlan ka hmu a, Nui chu ka kheuh zeuh. A hmu ve a ni mahna ring zet hian, "Lalsangpui lo tlan rawh" a ti vak a, Sangpuia a hmuh vang a ni mahna Nui chu a inla huai ṭha leh vel.






"Enge ni a?" Nem vaklo hian Sangpuia chuan a ti a, "Kal teh ang u" ti hluaiin Timothya chuan bike lam a pan nal nal a, a ṭhiante ho pawh chuan an zui ve mai. Timothya che zia chu ngun deuhin ka lo en reng a, bike ah chuan lawnin a sam a tuai thuak a, helmet a khum hma chuan mawi lutukin min nuih suk a, a tlan chhuak nghal.






"In ṭha maw?" An tlanchhuah rual chuan Sangpui chuan a ti a, ka bu nghat nghat. An sawisak pa kha an kalsan daih lehnghal a, Nui te nen chuan kan pathumin kan bawihsawm a, an in kan hre bawk si lo nen vengchhung pa ṭhenkhat chu kan pun tawp a, an buaipui theih tur thu an sawi hnuah kan kalsan ve chauh.






Zoi te in kan pan leh lai chuan Nui chuan a hlauh zia leh Timothya te a ngei zia a sawi char char a, Sangpuia chuan alo ngaithla ṭha hle hle. Khatia ka va kal hnaih lai khan Sangpuia lo call in lo chho vat turin alo hrilhchuniin





Kei erawh chuan Timothya ringawt kha ka ngaihtuah a, sual deuh tur angin ka ngaihtuah thei miahlo. A mitmeng mawi lutuk leh a nui hmel mawlh kha, ka thlir nin theih pawh ka ringlo.




Ka haw hnu thleng pawhin ka mitthlaah amah ngawt alang a, a chezia engkim mai chu screen a chiang deuha a lang ang hian ka mitthlaah hian chiang deuhin a lang ka ti mai, hepa hi ka duh chiang lutuk!!!





Zanah ka muhil lawklo bawk nen a tuk zing chu thawh ka hai chiang ngei mai. Ka ṭhiante pawh min kalsan turin ka hrilh tawp kha ania. Zingkarah emergency a awm avangin ka pa lah chu a chhuak daih bawk si a, hmanhmawh deuhin ke in ka kal hlawk hlawk.





Hmanhmawh deuha ka kal hlawk hlawk lai chuan bike hian chak zetin min rawn tlanpel a, mahse ka hma deuh lawkah chuan a ding ri hrawk mai. Chutah lehhawi meuh hian ka lam a lo hawi a, ban a rawn vai zeuh a.





Ka hnungah mi an awm emaw tiin hnunglam te chu ka thlek ngial a, ka hmu bawk silo chu ka inkawk ha a, bike lam chu ka pan hnai zel bawk.





To be continue....


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:48 pm

Chapter-4
By Mrs. Prejudice





"Ka lo thlah ang che" a tih chuan, "Timothy" ka lo ti hluai a, a bu nghat. "A tlai tawh ania lo chuang la" dam zeta tiin min melh run a, chuan mai chu ka hreh deuh tlat lehnghal a.





"Zak duh suh" tih pahin seat hnunglam chu min mitmei zeuh a, a tlai ve tawh bawk nen rilru bet lo deuhin ka chuang a, mahse ka inchhir rang khawp mai. A tlan chak lutuk chu a hnungah ka pawm bet ṭai a, Tlan muang tura hrilh chu sawi loh
men pawh ka meng ngamlo hrim hrim.





"Chhuk tawh la" nui suka a tih chuan ka harhchhuak zawk a, ka hlauh luatah kan thleng tih pawh ka lo hrelo chu niin. "I bike khalhah ka chuang tawh miahlo ang." ka chhuk rual chuan ka ti kha kha a, a nui suk ringawt. Lawmthu pawh sawi lovin ka kalsan daih.





Ka ṭhiante bul ka thlen chuan mak an tih hmel hlawm khawp mai, "Engtin nge alo thlah daih theih che a?"



"In inhre sa em ni?"


"A fel em?"


"In inkarah eng emaw a awm ami?" Tih vel chu min zawt nghal char char a, chhan dan tur pawh ka hrelo e a....





"I bula a awm hian a nui reng zel" Siami'n a tih chuat ka awih vaklo, "Chu chiah, a nui hmel ka hmu khat asin aw...!" tiin Nui chuan alo tuihnih a, ka bula a awm avanga nuih duh ta sawt anih phei chu ka ring hran lo.






Class chu a ngaiin kan ṭan mawp mawp a, a boring em em a ni ringawt. Kan english teacher hi ka ning hluah hluah, no deuh deuhin a ṭawng hlawi hlawi ringawt a, assignment min pe leh vak zel a, hei tunah min pek leh ṭawk tawh hi.





Miss chhuah rual rual chuan kan class a ka ngei ber mai Lalṭhakima chu ka lam a lo hawi leh tawh. Kan hma chiahah a ṭhu a, thei ila chuan ka insawn daih ang.





A insual hrat lutuk leh midang hmuhsit a ching hi ka ngei chhan ania, kum 2 a fail tawh a ni awm a, kei tih lohah chuan a upa ber bawk. A inlak senior mai bakah a mah ai chaklo zawkte diriam a, tibuai a ching a, ka huat zawng tak.





Kei hi chu school ka luh tlai hrim hrim bakah chhungkaw lam harsatna avangin kum khat ka beihnawn phah a, ka upa fal ta anih hi.





"Tinge i tum hmuk zel a?" Min en reng chunga a tih chuan dar ka kan ak a, melh pawh ka melh lemlo. "I chhelo ka ti" a ti leh khawl a, ka melh zawk.





"Inva infah thlum awm ve a" fiamthu titak deuh hian Ruata hian a rawn ti a, "A ril chho ṭan mek" tiin Ṭhakima'n alo chhan chuan an nui zui huah huah a, ka lo ner nawng.





Zanah chuan chaw eikham aṭangin assignment ka ti nghal char char a, kan neih tam mai bakah hun heh chi hlir anih avangin ka zawh meuh chuan dar12 alo pel fel diam tawh.





Ka phone chu ka en leh zuai zuai a, phone number hriatloh aṭang hian, [Ka number hi lo save rawh, keimah...i boss] tih hi a lo awm a, a dp ka en chuan Ṭhakima lek chu lo niim, engtin nge maw ka number alo neih reng reng ni.





Ka phone en zo ka hawichhuah chu tukverh aṭanga minlo thlir reng tu vang chuan ka ṭe chhuak ṭhawt lo chauh a ni. Timothy chuan ka room tukverh tlang bawhin minlo en kur anih chu!! Ka hmu thut bawk nen ka ṭe chhuak lo chauh a ni. Tukverh ka kalh lo tih ka hre ve chiah bawk.





"Hetah enge i tih?" Phawk deuh tak si, ṭawng ring ngam silo hian ka ti sa sa a, a ruih hmel em em mai lehnghal a! Ka beisei loh lutuk anih avanga ka hamhaih lutuk chuan ka thlir reng ringawt.






"Kal san vat rawh, tinge ilo kal reng reng" ti sawk sawkin a awmah ka nam a, ka kut a lo vuan chat , pawh sawn ka tum rualin a vuan nghet sawt lehnghal a, ka chhungten an hriat ka hlauh vang nge ka kut a vawn vanga ka thinphu chu rang em em anih ka hrelo, hlauhthawnna vang zawk anih ngei ka ring.





"Tinge, ka bula awm i peihlo ve tho em ni?" Ngeiawm deuha nui chung hian a ti a, a aw ah chuan natna thuk tak a inphum ni maiin ka hria. "Ka dem lo che, tumahin ka bula awm nuam an ti hleinem" tiin a nui a, mahse a nui hmel chuan a mit pawh a thleng lo.






Chhang lovin ka en reng ringawt a, ka khawngaih tlat pek anih chu! "Ih...a tlai tawh sia, va haw la, ka mu rawh" engvanga ka ṭawng nem ta viau nge ka nih ka hre hauh lo, mahse ka bula mi hi a na ang tih ka hlau a, ka ṭawngkamin a tina ang tih ka hlau anih chu!!





"Tiang khan min en suh" ka ti hmuk a, ka kut pawh ka thlah hmak.




"Engtin?"



"Khawngaih hmel tak khan min en suh, i khawngaihna ka mamawh lo" ti leh hmukin a kalsan daih a, ka en zui vawng vawng ringawt. A pawi sawi ka nei em mawni ka ti hial.





"Heyy" ka samah a rawn pawt zeuh a, hnunglam ka hawi chuan Timothya ka hnungah alo awm reng chu niin.





Min nuih vur vur a, ka ṭhiante hovin a nui khat an tih kha chu an hmuh khat vangah ka ngai, a nui hmel hi ka hmu ngun lutuk tlat, chuan....a mawi Ka ti hle bawk.





Tawi tein ka nuih let ve a, engvak pawh sawi chuang lovin ka rual chuan a kal ve char char a, school gate kan thlen chuan "Ni hman nuam le" ti supin a let leh nal nal.





Chutiang chuan karhnih ngawt chu min thlah tawh a, thutam sawi ngailo mahse a awmdan chuan ka hriatloh laiin min lo ngainat tir hman hle tih ka hria. School lam pawh a ngai angin a kal a, Ṭhakima a chimawm thei hle bawk. Mahse misual tak erawh a ni hranlo, kei nen pawh a hma ai ngawt chuan kan in pawh ve tawh a, phone-a min rawn text zeuh zeuh hi a ching bawk a, ka lo chhang ṭha ve mai zel.






Nizan lamah Timothya te an insual tih ka ṭhiante hnen aṭangin ka hria a, a chhan pawh kan inngaizawng angah an ngaih avangin, a tir kha chuan ka nih loh thu sawi nasa ve viau mah ila tunah chuan ka sawi buai peih tawhlo, an ngaihdan a danglam loh bakah Timothya laka ka rilru put dan hi a danglam tih ka hria a, ka bialpa anga an ngaih hian a hma ang khan ka haw thei tawhlo.





Timothya te insual puite chu damdawiina hruai ngaia an awm thu te ka hria a, ka lo hlauthawng viau mai. Ngaih ti ṭhalo zual turin tukin chu min thlah turin alo kal miahlo a, ka nghak deuh ren rawn a, mahse alo lan theih loh avangin lunghnur ru deuh chungin ka kal hnak hnak a, ka rilru ah chuan Timothya chiah a awm.





A inhliam ve angem? A thaw hah te kha a chhuak leh angem? Tunah hian enge a tih mek ang? A ṭha angem le? Tiin ka ngaihtuahna a vak thui viau a, ka bialpa pawh nilo chutianga ka ngaihtuah em em chu mak ka inti. Timothya hi ka ngaizawng ni ber tawhin ka hria, mahse chutiang rilru put chu ka duh miahlo thung a.





Nileng chuan ka nguai a, eng tih mah ka phur lo. Ka ṭhiante chuan min fiam zuk zuk a, lo hnial emaw tur pawhin ka tha hi a zawi vek. Rilru bet lo deuhin nileng hun ka hmang a, ka mood a control hneh lutuk te chu a mak zawk.





Zanah chuan rilru bet lo deuhin lehkha ka zir a, ka chhiar zawh chiah pawh ka theihnghilh leh nghal, chutiang vel chuan rilru ka pe lo.





Ka lehkha zir laia ka tukverh ri rakah chuan rang lutukin ka hawi phei a, Timothya hmel ka hmu zui nghal.





Rang lutukin tukverh lam chu ka pan a, Timothya chu ka thlek kual thuak thuak, kan in hi chhawng khat chauh a ni a, ka room awmna lai hi a sang lo a, awlsam takin a luhchhuah mai theih bawk. Pawnlama Timothya ding chu room chhung aṭang chuan chiang takin ka hmu thei bawk.





Ka hmai ah band aid a bel thluah a, a duk chur bawk, chu chuan minti lungawi lo ve em em bawk a. "Tinge tukin ah min thlah turin i lo kal loh" vui aw deuh hian ka ti a, a nui suk chu a hmai a na deuh a ni mahna a ner zui sak.







To be continue....




Tawi thei tek tawk mange.... word 5000 chu tling ve zel tho ania🤣


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:48 pm

Chapter-5
By Mrs. Prejudice







"Ka sil lutuka thawh ka ngai a" inthlahrun hmel deuh hian a ti a, "Ka lo nghal char char che a, ka tlai phah ania aw, kan sir ten min vaw lehnghal" tiin dawt ka hrilh a, a mengrum nghal ul mai.





"Tu in maw vua che? Khawi laiah maw?" A ti khur khur a, a rui bawk si nen thawm a dim lo lutuk chu ka khap leh rih. " Ka hnungah hian min vua, a vual vek alawm" ka ti leh a, ka nuih mai loh nan ka insum nasa viau.






"Hmel ho chu!" A ti hluk a, tukverh tlang chu a chum pawp. "Engtin emaw ti turin min duh em? Ka va hnek dawn ami?" A tih chuan insum hman lovin ka nui hak a, a phun hluk. "Nghal lutuk" a ti maiin ka hria.





"I cho dawn mi?" Tia fiamthu titak deuha ka tih chuan, "I tan chuan 'The rock-a' pawh ka cho" tiin a nui suk a, "Awihawm loh" ti hlakin ka nui hak. A tira ka mood off kha chu chhem bo ang diak a ni tawh.





Timothya chu ka ngaina tial tial a, thuin sawi lo mah ila kan chezia in engkim a lantir thung. Inngaizawng ang chu kan ni a, ka bialpa hmasa ber anih avangin ka zei vaklo. Ka ṭhiante chuan min duh pui loh thu an sawi ṭhin a, mahse an sawi anga sual hi a ni lo tih an hriat loh vangah ka ngai, ka hriat ang hi an hriat ve kher loh avangin Timothya ṭhat lohna an sawi pawhin thinrim phah nan ka hmang ngai lemlo.






Mami pawh ka hrih thlap a, kei ai pawhin a lawm zawk, "I lengtar ang tih hi ka hlau em a, lawm lo thei ka nilo" a rawn ti ngei.





Tukin chu zingkar aṭangin ruah a tla cherh cherh reng a, thlir a tel deuh bawk nen a vawg vur a, nimin lam boruak nen chuan a inang lo viau mai. Peihlo deuhin school kal turin ka insiam a, a vawt ka tih em avangin high-neck ka hak thuah ta tawp.





Ruah a han deuh lai tak chuan ka kal vat a, ka kal chak bawk a ka kal sawt viau mai, mahse school thlen hma deuh lawkah chuan a rawn baw leh hawk a, kei mi haihawt lutuk hian nihliap ka ken theihnghilh chu niin. Tun ang ruah sur karah nihliap ka ken theihnghilh chu ania, ava buaithlak tak em!!





Mi inkawtah chuan ka ding ta ringawt a, ka ṭhiante lah chu an kal daih tawh anga, ina va let leh tur pawhin a ngaihna a awm bawk si lova, ka tang ta reng ringawt.





"Dee" ka hnung lam aṭanga rawn ti sup chu ka en vat a, Timothya nihliap nen ka hnungah alo ding a, mawi ka tih deuh ang khan min nuih bawk. Alo kal hun fuh lutuk chu ka nui ver ver, ka mamawh hunah hian alo lang chat zet.






"Ka va thlah ang che" tih leh ka vawn theih tura a ban lo dah a rual a, ka lo vuan vat. Inkuah deuh rialin ruahsur bur bur karah chuan school lam kan pan a, ka bengah chuan ruah leh thlipui ri chu a ring zo tawhlo. Ka beng zawna lungphu ri dup dup chu ka hriat awmchhun leh ka ngaihtuahna luahtu a ni.






School kan thlen chuan nihliap chu min pe a, kal mai a tum chu a banah ka vuan vat. "La zawk rawh, keichu schoolah ka awm daih dawn a, ka mamawh tawh lovang" tiin pek ka tum a, ka lu ah chul zeuhin a hawi kual thuak. "Saw lai deuhah sawn ka ṭhiante an awm a, a dang an nei. Ban hunah a sur palh thei a" a tih chuan kuah nawk nawk mai ka duh. Min ngaihtuah hmel vel lutuk chuan minti hlim veng veng thei. Hmeichhe hlimna chu ho te a ni an tih kha maw....





Rilru hlim veng vengin classroom lam ka pan a, ka ṭhiante ho chuan ka mood fuh lutuk chu mak an tih hmel tawp. Ruahsur nasat avangin class duh angin kan la mumal theilo a, kan school hi a bang chu cement ni mahse a chung rangva a ni a, a bengchheng duh phian.





Mumal lo deuhin class chu kan kal tluan ve a, ruah lah chu a sur ṭha duh em em mai lehnghal a, ka dawhkanah bawkin ka nui ka nui mai, Timothya khan engtin nge a ngaih ve ang le? Nuam a ti ve tho angem? Ka awmdan ang hian a awm ve angem? Tih angreng chu ka ngaihtuah a, tunah tak hi chuan dandelions hmuna awm ang vel ka ni.





Banah chuan Timothya nihliap nen ngei chuan ka haw leh a, nihliap te chu ka be mawlh mawlh a, a hre awm tawp si lova tiin keimah leh keimah ka innuih leh rih, ka van zaktheilo tak....





Ni leh thla a liam zel a, Timothya nen pawh pangai takin ka inzui bawk. Inngaizawng ta na nâ na chu hre tawk an lo awm a, ka chhungte pawhin an hre harlo. Mahse, ka chhungte chuan ṭhen turin min ti tlat!





Mi sawi thawm aṭangin tlangval awm ṭha duhlo leh insual hrat angin an lo hre ve bawk nen ka pa phei chuan min vo ti tih a, "Khatiang tlangval kha chu hlat rang hle ang che, an sawi dan aṭang rengin tlangval ṭha a ni lo a, i hlat vat lo anih chuan Aizawlah thawn chhoh che pawi ka ti dawn miahlo ania," a ti khur khur a, a hmaa Aizawl thlahlel viau si khan min thawn chho ang tih mawlh chu ka hlau tawh a, mihring rilru danglam theih zia hi chu aw...!




Ka nu erawh chuan, "Tunlaiah chuan an hmelṭha tih vang ringawt a ngaihzawn loh tur, hmel hi chu a pawimawh lo ania, tunah fel viau mahse hma hun a hriat loh a, mi fel tak lo lakah hi chuan in hambuai loh law law tur" tiin zaidam takin min hrilh a, mahse ka zak chem chem tho.







Ka bialpa vawikhat neih ve na a ni a, hetiang lamah kher hi chuan hauh leh zilh ngaiin ka awm ngailo ania, nuam ka ti lo takzet. Mahse, Timothya hi ṭhen tumna ka neilo, a chhan chu ka duh tawh lutuk tlat.





Kan inzui aṭangin weed zuk a bansan hmak a, zu pawh in tawhlo hram hram a tum ṭhin a, a harsa ang tih ka ring a, chuvangin ka nawr ngailo. Mahse sim se ka duhzia kawng hrang hrangin ka lantir ṭhin. Ka hriat laiin vawihnih khat chiah ala rui a, rui chunga minlo biak chang pawhin a harhfim hnuah inthlahrung deuhin ngaihdam min dil leh ziah.






Miin sual an tih hi keichuan ka ti thei tlatlo, ka bulah chuan a theih ang tawpa ṭhat a chhuah a, ṭawngka vina min biak ngailoh mai bakah englai pawhin min zah thiam a, a mizia ṭha lam chiah ka la hmuh vang a ni mahna keichuan a sualna sawi tur ka hre ve tlatlo.







"Naktukah i hman angem?" A ti thum dut a, ka bu nghat, min hmu theilo tih ka hriat rualin ka nui hak. "Enge?" A ti thum leh dut. "Hman ka ring,tinge?" Ka tih chuan aw a thian kharh.





"Ka ngai che" zawi sup hian a rawn ti a, ka chhungril a fan rawih rawih mai. Ni thum lai chu mumal takin kan inhmu tawhlo a, lehkha zir tur kan ngah vang a ni pakhat. Kan ina lo len a tum lahin ka chhungte ka hlauh vangin chhuanlam fahrah te te siamin ka hnar zel a, ka inthlahrung ru ve takzet.






Tlaia min lo nghah tur thu a sawi hnuah kan inbiakna kan ti tawp a, lehkha zir leh zuai zuaiin ka mu nghal.





To be continue....


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:48 pm

Chapter-6
By Mrs. Prejudice





A tuk tlaiah chuan Nui te ina kal tur anga insawiin ka chhuak a, minlo nghahna lam panin ka kal. Kan inhmuh hmasak berna hmunah khan ka kal a, alo awm leh vang tawh.





Thawm dim deuhin ka kal ṭhem ṭhem a, a bul ka thlen dawn chuan ban phar hluaia, "Bara" ka tih lai takin alo hawi thut a, "Khaih" ka ti zawi sep. Ka awmdan avang chuan a nui suk a, min rawn pan hnaiin min kuah hle hle.






A rim pa hrak mai chu ka lo hip lut vang vang a, nghet takin ka kuah bawk. "Naktukah ka zin dawn a" a tih chuan ka melh cho vat a, a ni pawhin minlo melh chhuk run mai. "Enge i tih dawn?" ka ti sep a, ka lung a leng lawk.





"Ka pu a ṭha vaklo a, ka hming a lam reng bawk nen hmu turin ka kal dawn" a tih chuan a rei angem tih daih ka lo ngaihtuah. "Min ngai dawn em?" Fiamthu deuha a tih chuan lu ka bu nghat nghat a, a hmui a pet sawi duh lek.





"Kha chu ka pawm lo, sawi kher a ngai" a tih chuan ka ner sak a, a tum hmuk lehnghal. "Ngai dawn e, keimah tea ka lo ṭah kerh kerh i duh loh chuan lo haw leh vat rawh" zak ru deuhin ka ti ve ngei, mawi zetin a nui a, "I ṭah ka phal reng renglo, i ṭah hmaa lo haw angai anih chu" tiin min fawp zeuh a, leiah chuan ṭhuin kan inkuah hle hle.






Ka ngaihbel nge ni a cher riauin ka hria a, a mitkhur pawh a thur zual deuh bawk. A dang deuh bawk a, a damlo anih ringin a pang chu ka dek a, alo lum thur thur mai. "I khua a sik anih hi" ti hluaiin ka pawt kun a, ka biang leh a biang ka insik tir a a lum veng veng mai.





"Ka pangtilum anih hi" amah lah chuan ati sam et a, pangtilum leh khawsik te chu ka hre hrang ve lutuk.






"Haw ang, damdawi te ei la, mu rawh. I zin dawn phei chuan motor i chuang nuamlo ang" ka aw ah chuan ka ngaihtuah zia a lan theih ka ring. Min hnial lo ve tehkhiah a, muangchangin ke in kan kal dun a, damdawi ei turin ka chah mawlh mawlh.





A khat tawkin a thin bawr vel chu dawmin a ding leh rih ṭhin a, a thawk chu a pangai chiahlo deuhin ka hria. "I nuamlo viau em ni? Engtin nge i awm?" Tia ka panhnaih lai chuan a thlanfim bawl ṭek ṭek chu ka hmu a, ka hlauthawng takzet.





"Kal vat vat ang aw, damdawi ei vat i ngai" tiin ka kai a, hmanhmawh deuh zawkin ka kalpui. An in kan thleng ṭep tihah chuan a ṭhingṭhi hnawk a, leiah a kut nemin a insehruh ngawt ngawt a, ka hmuh hmasak ber nia a lo awm dan ang chiah khan.





A awmdan chuan minti chiai vek a, ka hriatloh karin ka mittui alo tla fel leh der tawh. Kan awmna a lun bawk a midang ho chu an lo kal khawm thuai a, tlangval ho chuan an in thleng an kuah a, na a ti lutuk chu a ṭhen leh chawk chawk ṭhin a, a awmdan tehthut mak ka ti lutuk leh chiai bawk si chu an bulah ka lo vei sek ringawt.






An in kan thlen chuan a pa chuan alo buaipui thuai a, eng damdawi emaw hian a chiu bawk a, a chhawk a ni mahna Timothya chu a muhil siai siai mai, chu chuan ka thaw alo ti veng huai bawk a.






Rei vaklo ka awm leh hnu chuan ka haw san rih a, sawtiang te chuan naktukah pawh a zin thei dawn em mawni. Ka rilru a kap run a, zan mutnaah pawh ka letkual sek ringawt. A message emaw phone call emaw beisei ru ranin ka awm a, mahse a tuk zing thleng chuan chutiang engmah ala awm lo.





Tlaiah chuan minlo be hram a, Aizawlah chuan a kal ta tho anih hmel. Amah ngaihtuah lo turin min chah ve luam a, mahse ka ngaihtuah loh phah chuanglo.






Ka pa pawh a tuk lawkah zan hnih lek cham turin Aizawl ah a kal ve a, zui ve mai chu ka duh rum rum a ni. Ka ngai tawh lutuk a, a pangtilum te kha kuah tura kal ve ka chak.






Mahse ka pa lo haw leh chuan thu dengkhawng tak a rawn hawn a, chu chu Timothya nupui neih tur thu a ni.!!






Mahse ka awih miahlo thung, ama ka aṭang ngeia ka hria anih loh chuan awih ka tumlo bur. Mahse ka be tlang theilo chu ka buaina a ni, ka call apiangin switch off a inti zel a, ka pa sawi kha dik em mawni tiin ka ngaihtuah ṭhin a, mahse a sawi ka hriat hma chu ka awihlo ang.





Karhnih hnuah ka be tlang thei ta hram a, mahse....lo call lo zawk ila ṭha tur ania. Phone ring ral ral chu thinphu dup dupin ka ngaithla a, mahse min chhang tu chu Timothya a ni hauh lo.





"Hello?" Hmeichhe aw tliang nalh zet hian min lo chhang a, rilru na lutukin phone chu ka hmer ngawt ngawt. "Timothya ka be thei angem?" Ka ti lawi rat a, ka ṭah chhuah mai lo nan ka inpetruh ngar ngar bawk.






"A muhil rih a, tunge aw?" A tih chuan phone chu hmet tawpin ka ṭap chhuak hawk a, bum ka ni tihna em ni? Ka pa khan a sawi dik a maw? Engtin nge hetiang hian ka chungah a tih theih zawk?






A hma kha chuan beiseina chhete kha ka la nei a, mahse tunah chuan eng beiseina mah ka nei tawh lo, Timothya chuan nupui a nei dawn a, kei chuan a ngaihtuahna peng pawh ka luah tawh hauhlo tih a hriat theih. Mahse, ka la ring phal chuanglo. Amah ngei biaka engvanga ka chunga hetiang thil hi tinge anih tih zawh ka duh a, mahse ka chapona erawh chuan a duh hauhlo thung.






Timothya nen khan rei tak kan inzui lo a ni thei, mahse kan inzawmna kha a thuk a, kum tam tak inzui tawh te nena kan inhmangaih loh bikna ka hre lo.








[Pawnah ka awm ania] a message ka chhiar zawh rualin ka nui hak a, a lo kal tak tak pawh ka ring lo ania. Ka call thuai a, ka room tukverh ka hawn rualin kan in gate pawna Timothya, thing kung nghenga lo ding ka hmu nghal a, ban avai zeuh.






"Ilo kal tak tam elaw?" Nuihza aw deuha ka tih chuan, "Ilo kal loh chuan ka titau dawn iti tlat anih kha" a ti bul bul a, van cute tak...






"Reilo te bak ka chhuak theilo ania aw" ka tih chuan a bu nghut a, thawm dim deuhin ka room tukverh aṭangin ka chhuak zal zal. Gate thleng chu dim thei ang berin ka kal a, ka chhuah rualin Timothya chuan ka kut alo chelh vat a, nui vur vurin ka lo vuan let vat.






Kan pahnih a kan kal ziahna lamah inkai rialin kan kal a, zan rei tak ala ni lo a, boruak nawm hunlai tak. Inkai riala kan kal lai chuan mipa pakhat hi kan lam pana lo kal kan hmu thut a, rang tawkin kan kalna lamah kan tlan let leh a, mi motor phenah chuan kan biru leh rih.






"Tinge kan tlanchhiat a?" A tih chuan, "Ka hrelo" ka ti sep a, kan han nui dun leh rih.






Thla eng raih hnuaia duh berte kuah aia thlamuanthlak thil hi a awm angem le ka ti hial a ni. Thil tamtak min hrilh a, an chhungkua boruak te pawh. A pa in a nu a uiresan avanga inṭhen an ni awm a, tun thleng hian a pa nen an boruak ala ṭhat theihloh thu leh amah runluih nana ruihhlo ti ṭhin anih thu a sawi a, ka khawngaih hle mai. Mi ṭha tak a ni tih leh chhan neilo a sual kawng zawh anih loh kha ka ring ṭhin reng a ni.






To be continue....


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)