ERASED BY Krystal Vanchhawng (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: ERASED BY Krystal Vanchhawng (Completed)

Unread post by Ngaia » June 12th, 2022, 3:58 pm

ERASED


CHAPTER 19
☆☆☆☆☆☆


SHARONI POV:



Zinga ka harh chuan ruak riau hian ka inhre nghal ngawt a,a ngaihna hrelo taka ka thawh chhuah chuan Saia hmel reng ka hmu tawhlo..






A bungrua kan dahna pindan ka en chuan a suitcase pakhat mah alo awm tawh lova,amah pawh a awm heklo.






Zawi zeta choka lam ka phei chuan dawhkanah hian lehkha them alo awm ran a. Ka chhiar chuan ama lehkha alo ni

'I thawh hnuah chuan ka kal theih ka ring lova,i mutlaiin ka chhuak aw. Haw mah ila ka rawn kal reng dawn ania,i thawh veleh min lo bia la'
Tih hi alo ni.






Heti em em a min thlahlel hi dawithiam emaw ka inti hial,ka theihtawpa hlat ka tum chung pawhin min hnaih tang tang a,inkawp tur renga duan kan lo ni te pawh ania nge.





Dan ngaite bawkin hna kal tur chuan ka insiam leh a. Vawiin hian buaina ka nei hranpa lo anih chuan ka nu tlawh tura kal ka tum a,Lianzuala alo awm hnaihloh hram ka beisei.






Nilengin Saia chuan min be lova,a buai leh buailo zawta ka text chu ala enlo hrim hrim. Mi zai ni anih vangin an buai anih ka ring a,ka text zawm duh ta lo.





College ban chuan Taxi ka chang a,chutia ka lo din reng lai chuan ka hmaah Car alo ding thut a,a khalhtu ena ka kun chuan David-a lek alo ni.





"Khawnge i kal dawn?" Tia a rawn dah chuan
"Ka nu te in lamah,taxi ka chang a" ka ti mai a.
"Lo chuang rawh,ka lo thlah ang che" atih chuan ka hawikual thuak a,Zirtirtu leh zirlai thenkhat haw ve tur mit chu kan la viau.





Ka phone chu ka hmet eng leh a,Saia'n engmah ala rawn sawi siloh vang chuan kal mai ka rilruk ta a.






"Eng nge itih?" Thut luh paha ka tih chuan
"Damlo pakhat ka tlawh lawka" tih pahin a tlanchhuak nghal mai a.





Thut that pahin darthlalanga hnunglam ka en chuan Rosie te thian dun bawk in min lo enzui leh tawh. Gate bulah Vanthlahlua leh Saizami teho anlo ding khawm thap bawk.





Inbe lemlo chuan kan tlan zel a. Inpawh viau mah ila han sawi mai tur hi a vang thin. Ka natna vanga inbia kan nihloh chuan sawitur mai ka hre thinlo..






Ka nu te veng a thlen chuan kawnah chhuk ka tum nghal a..
"Tah khan aw" tia bag vel ka ah that chuan a ding deuh dawt a. Chhuk hmaa ka ve melh chuan hmalam alo melh deuh ngur a..





"Ka kal dawn sin,ilo chhuk ve duh em?" A mawia ka zawh chuan min la en chuanglo. Ka che deuh zawk chu hmu in ka banah a rawn man a,
"Enge?" A ngaihna hrelo zeta ka tih chuan
"I hlim em?" Ati ringawt a..





"Hlim e" ka tih sep chuan min thlah hlawk a. A awmdan chuan awm a tinuamlo lek lek.
"I hlim chuan a that chu" ati leh hawlh a.





"Ka kal dawn asin" tia chhuk mai ka tum chuan
"Ka lokal ve ang" tih pahin chhuk hmasa sa ah chuan a tang leh ang lawi a.




Ka nu te in lama kan inzui thlak lai chuan an in kawtah Saia lo ding ruau ka hmu ta thut a.





"Ehe" ka tih sep ri chu David-a chuan alo hria nge.
"Khu khu Saihmingpuia ami?" Alo ti vat a.
"Aw,anih khu. A buai emaw ka tia" ka tihlai chuan kan thleng zawm nghal mai a.






"Text i chhang thei si lova,i buai anih ka ring a" tih paha ka pan chuan David-a zawk chu alo melh ngur a. David-a pawh chuti tho,hemi te hian boruak thalo anlo nei tawh em maw ni.





"Heihi ka Doctor thin David-a ania" nuih luih sak paha ka tih chuan a bu nghut a,ka kutah chuan kai lawkin
"Lut ang" tih pah chuan min kai lut nghal pawp pawp a.






"I lokal alaw,hei Saia'n eitur min lo ken teuh a" ka nu in alo tih chuan ka hrechhuak ve leh chiah,engmah pawh ken nachang ka lo hre ve leh lo..





A dinhmun te ka zawt a,a that thu a sawi chuan ka awih fahran lo. Vanneihthlak takin Lianzuala hmel ka hmu lova,a zia viau. Mahse,kan mipa 2 te hi in bauh thut tur ang maiin an in melh leh run run thin a,inbe si lovin an hawisawn leh hmak bawk.






Choka lama ka phei chuan ka hnungah Saia alo kal ve a.
"David-a nen sawn in inhria ami?" Ka tih chuan min melh reng a,a kuangkuah thun bawk nen a hlauhawm lek lek.






"Tinge i kal dawn tih i sawiloh?" Atih chuan ka tui thlit lai ka tawp chat a.
"Ka rawn text che a,i hmu theilo alawm" tha taka ka tih chuan
"Saw pa saw tinge a rawn tel ve?" Ati leh a.






"Kan inhmu fuh a,tinge. In hmel makna in nei tawh ami?" Ka ti ta tawp a.
"Neilo,ka lo va phei ang" tih pahin a inher thut a,a chhuak leh nghal daih.






Choka atanga ka chhuak ve tur chiah chu David-a lokal nen kan intawk ve leh chiah a..
"Khawnge Saia chu?" Tih paha a hawi kual zuk zuk chuan
"A rawn chhuah kha,ka nu bulah aniang" ka ti mai a,a ner reng chu eng nge a chhan tih ka hre chak zek zek.






"Saia nen hian inhuatna innei ami,tinge in awmdana hi?" Tih paha ka melh kar chuan a hmui a tuai zawk a.
"Nei em emlo" awlsam hmel zeta atih chuan ka awih hlawllo.





"Sawi tha mai mai teh,a nuamlo ania" tia ka zawh deuh sek sek chuan
"Doctor kan zirlaiin ania,an junior kan nia. Ka hmeichhe khawp khan amah vang hian min then a" atih chuan ka lo meng deuh awk a.





"Tunge chu chu?" Hriat belh chak zeta ka tih chuan
"Aho lutuk,hnamdang ania. Saia hi a rawn zui haw nghe nghe" atih chuan ka danglam deuh zawk mai. Inzui haw duh tur khawpa an awm anih chuan.






"A vaiin sawi law law ta che" rawn titu vang chuan ka inher zawk a. Saia chu bang nghengin alo ding kawi ngul a,kuangkuah chungin David-a nen kan inbe lai min lo thlir reng chu niin..





"A vaiin sawi law law la,ka bialnu rilru tihah tawk leka i sawi chuan nakinah ka insawifiah angai dawn a" dam thlup,mahse,mar deuh puta tih pahin a rawn phei deuh chhulh chhulh a. David-a hmel ka en chuan Saia alo melh ve reng.





"Kha bak ka hrelo" atih hluk chuan Saia alo ner ve sawk a.
"I hriatloh chuan sawilo law law rawh" tih leh ka dara rawn kuah a rual a.
An pahnih inkar boruak hi a sang riau,a nuamlo..





"Aho lutuk,hawh,phei ang u" tia Saia ka sawi deuh chuan alo che hauhlo,a din ngaiin a ding nghet charh a,a hmaa David-a ding nen chuan an inmelh kur ringawt..





"Khasi nula nen i thianpa hi an inzui thin a,chu nu chuan min ngaizawng a,keimah vang ni lovin,a duh vangin a then. Mizorama min zui haw tih vel kha chu a dik veklo,min zui haw ngei. Mahse,hotel ah a thleng a,inah pawh a rawn chuang lut ngun viau. Chu erawh ka dan theih a nilo,ka duhloh vangin Lalrinawmi nen kan inzui phah bawk" atih charh charh lai chuan ka dar a vawnna chu ana sawt hle.






"Aw,aho lutuk ka tih kha. Kal ang" tih paha ka kuah let chuan a che ve lawih a,David-a ding reng kalpelh pah chuan
"Tikhan i hrechiang tawh ang chu" ala ti hram. Ava han nghal ve chiang tak.







"Inva naupangchhia tak,aho e" ka tih chuan
"Ho love,nakinah intihthiamloh palh te a awm thei. Khatiang thu puar pawleng lutuk vanga i thin tihrim ka duh hauh hleinem. Tikhan ani pawhin an inthen chhan a hrefiah anga,a tha mai" atih chuan ka bu nghat nghat a. David-a kha chuan Saia thiamlovah angai deuh anih hmel kha,tikha chuan a fiah deuh sawt tawh ang chu.






Khawthim hma deuh chuan ka zia a man deuh nge
"Ipa chu a chhuak" alo ti sup a. Ka nu muhil chuan alo hria ang tih hlau takin ka en a,mahse,a muhil tui hloh..






"I hmu hreh dawn tih ka hriat vangin ka tirbo anih kha" ati mai a. A sawidan vel chu a intihtheih hmel lutuk.
"Ka lawm e,ka kawng ilo sut kian zel vangin" ka tih chuan min lo ban a,ka thut hnaih chuan a awm nghenga min kuah betin a lungphu chu ka ngaithla kiau a.






"Lawmthu min hrilh nan ka sawilo,ka ta inia,ka tihtur a ni" a tawng rik apiang chuan a awm zawn a rawn nghawr dar dar a. Ka chhang lova,reilotê hnuah thawm a rawn awm a. Lianzuala chu inthlahrun hmel takin a rawn lut a. Ka thu ngil nghal zat..







"Haw tawh ang" tih paha ka thawh hluai chuan alo tho ve nghal a. Ka nu pawh a mutthilh ang angin kan hawsan dawn ta anih hi. Lianzuala awmlai chet vel kha ka peih teuhlo.







"Naktuk tukleh khi ka nu thihcham ania,i peih chuan i kal ve ka beisei" haw lama atih chuan ka hrechhuak ve leh zawk.
"Anih chu,ka lo tum dawn nia. Eng nge ka ken ang?" Tih paha ka melh chuan a hmel alo chang leh tawh hle.






Anu chanchin kan sawi apiang hian a hmel a chang rut zel a,eng nge a chhan ni ang aw????







"Saia?" Ka tih pawh chuan min la chhanglo
"USai" ka tih thak chuan alo hawi zawk a.
"Tunah khan engtin maw min koh?" Nuihzat hmel zeta atih chuan
"Usai" ka lo ti hak a.






"Iva chimawm reuh e,min u hauh suh" tih paha ka kut a rawn chelh chuan
"Tak takin,kum 50 i tling tawh em?" Ka tih chuan a nui chhuak hawk hawk a.
"Eng nge?" Tih paha a kut ka lo pawh sawk chuan
"Kum 50 hmel ka pu mi?" La nuih paha atih chuan
"Ka hrelo,khabe hmul i neih vang nge,i upat hmel em a" ka ti zawi sep a.






"Ka la tling hauhlo. Saizami pawh hian a sawi tei vet lehnghal. Ka hmel hi a putar hrim hrim aniang" atih chuan ka nui ve mai a. A ni deuh tak tak alawm,ka hmuh hmasak ber phei kha chuan nupui fanau a neih daih tawh ka ring a. Mahse,min endan leh min biakdan velah khan ka ring diklo tih ka hre chauh.





Vawiin hi Saia nu thihcham a ni a,Last period awm lovin ka haw hma a. Min rawn hruai hun ka nghak dawn anih hmel..




Thih cham te a ni ve sia tiin kawr dum te chu ka ha ve a. Ken tur engmah ka lei lova kut ruakin ka kal dawn ta anih hi. Amah ka zawh lahin engmah a ngaihloh thu alo sawi mai zel bawk sia.





An chhungkua ngawr ngawr chu hmuh ka hrehlo. Mahse,Thenawmpa nupui hluite nufa mawlh kha,an nasa ve si a,engtin emaw min lo tih leh mai ka hlau a ni.





Bazara min tihzah kha chuan a ngaihna ka hriatloh em vangin ka ngawi tawp a,an sawi awmzia kha ka man hlawlloh vang a ni pakhat. Tunah chuan thil diklo hul hual vangin min en hniam tih ka hre ta a,min chhuahchhal anih vaih zawngin ka ngawih mai mai theih ka ring silo. Saia chhungte hmuha kan intih hmingchhiat mai pawh ka hlau hlel love.






Dar 3 velah min rawn hruai a,anu thihcham anih vang em maw ni,a ngui hmel riau a. Hetia an awm hian tihngaihna vak ka hre thinlo,ka zeilohna nge,biak phul hlut dan hi ka hre ve thlawtlo a ni.






An in kan thlen chuan anlo awm deuh laih laih a,kum tamtak liam taa boral tawh si,a thihcham heti khawpa urhsuna an la hmang hi an fakawm ka ti hle. Saizami nu ka fak lehzual bawk.





Anu leh pate chuan min lo lawmthiam hle a,Saizami nu pawh ahma ang ngawt chu a ni tawh biklo. Tunah hrih chuan ani te nufa kha ka la hmu lova,lo kal ve lo mah se a pawi dawn miahlo asin maw le.





Rei tawk fang kan thut hnu chuan hunserh hman an rawt ta a. Chutah,inchung lam atangin ka mi hmuh hreh berte nufa chu an rawn chhuk ta zan zan mai.





Nui bawk bawk chungin an kal a,ka hmel an hmu chiah chu an nui tawp chiang teh e. Ka bula thu Saia lah inlengho bia in a buai reng bawk si,khimi te nufa khian min zuam sual ang tih mawlh a ni ka hlauh.





Saia nen kan hmaah tak chuan an rawn thu a,a bialpa nge,a unaupa nge mipa pakhat hi an bulah chuan a tel ve bawk.




Hunserh neih chhung chuan Saia'n ka kut a chelh tlat a,kan inakarah dah mah ila kan nufa mit chakte chuan an lo hmuh hmaihlo nasa. Ka kut laksawn ka tum lahin pakhat hian alo hum bet tung a,kan hmaa mite lah chuan thil tenawm tak en in ania min en tawh.






Thusawi zawh chuan tawngtaina kan hmang leh a,ka awmdan nuamlo lutuk vangin,eng nge kan chham a,eng nge an sawi pawh ka lo hre ve leh peklo..





Chawei an ti nghal mai a. An thawh sang sang hnu chuan tu emaw hian Saia chu a rawn ko hrang ta zuk a.
"Ka va kal lawk,tikhan lo thu la,lo che ve suh" tih pahin a tho nulh a.






A kalsawn fel ta maw tihah Thenawmpa nupui hlui ngei mai chu a rawn insawn phei ta tharh a. Thawh ve nghal mai ka tum chu
"La thu la" alo ti vat a,a meng te reng reng chu a meng si sap mai a,ruih a nei anih ka ring.






"Ka fanu te pafa chu i ning deuh tawh a nimaw?" Nuih hak paha atih chuan zu rim a nam hak mai..
"Ka fanu pawhin nangmah vangin min ngaina tawh lova,neih law law tur che lawm" ring deuh zawka atih chuan chhanglo turin ka insum nasa hle..





"Tlanchhiat tum hauh suh,i nundan thing lutuk te hi kan hrelo emaw ti suh. He chhungkuaa mo tur hian i tling hlawllo. Nuthlawi sawn pawm tawh lehnghal" atih chuan ka sa ta phat mai.






"I thusawi awihawmloh tak ngaithla hman ka nilo" tih leh din ka rual a,ani pawh a rawn ding ve nghal. Kan hmaa anu thu chuan khap miah lovin min lo melh reng a,midang chu anmahni buai buaiin an buai a,min ngaihsak teh vaklo.






"Ka nau Saia hi i bum kual mai mai atan kan phal hleinem. Phaiah i awm thin tiraw" tih pahin a nui hak a. Engtin nge Phaiah ka awm tihte alo hriat theih????






"Phaia i awmlaiin customer i ngah viau thin lo maw?" Atih chuan ka chhipa chum pawp ang mai hian ka hai nghal chhulh thei.





"Amak vaklo,mahni i inchawm zo pawh hi" tih paha a kal tur chu ka ke ah a rawn in pal lui kher a,țe that pahin chhuatah chuan a tlu sawp nghal hnawk a.





"Ana" midang hriat kher tur chuan ala ti vak zui..
"Awi,mate,ana em?" Tiin anu chu a rawn phei vat a. Midang awm ve zawng zawng mit chu keimahah a fu ta thup mai,ka tihtluk a ni aw zawng silo.





"Ka ke hi ana deuh,mahse,ana lutuk lo" tih pahin a tho a. Anu chuan min melh kuau pahin
"I tihluih tiraw?" Ati anih chu,za lo lutuk a nuih hak pahin ka enkual a,rinhlelh hmel zetin min lo melh hlawm bawk.





"Ka tih a nilo,amah a inpal anih kha" ning zeta ka tih chuan a meng pawng nghal zawrh zawrh thei.





"Dawt anih chu. Ka fanu pasal nen in inkawp thin tih kan hria a,tunah ka vahpa ilo bum thlu leh bawk,hmeichhe nasa tak chu ini. Mi pakhat ah lungawi ta che" tih paha min kawh sawk sawk chuan a kut vai lawp pahin
"Ka pi" ka ti thak a.





Midang ngawi thup chu a melh kual nghal hruk hruk a,a fanu pawh inla ke na fahran in alo ding ngil theilo vel.




Khawnge maw Saia pawh hi alo awm,mi zawng zawngin rinhlelhna mitmengin min melh a. Ka mamawh asin maw le.





"Naupang te si,zahna i tlachham reuh hle mai" ala tih talh chuan
"Ka diknaah chuan ka tang ngam" ka ti ve salh a. Saia chhungte lakah mark tha dawnlo mah ila,ka tih ni hauhlova min ankhum hi ka tuar mai bik lovang.





"Zak hle rawh. Kan fanu pasal nen in inzui pawh tih tawh nen" ring leng lawnga atih vak chuan ka insum theilo mai dawn.






"In fanu pasal nen kan inkawp lova,kan inkawp ngai heklo ang. An inthen chhan chu in hmuhsit lutuk vang leh,sawrkar hna a thawhloh vang anih kha" ring thaka ka tih ve chuan min ben a tum nge a kut a rawn phar zawk a.





A ban chu lo man chat in
"Duh duha kut thak hiahna ka nilo,Vawikhat kha a tawk viau" tih pahin ka thing thla lawp a,a tider nge a pai dawrh lehnghal.






"Enge thleng?" Tih paha Saia te pafa anlo lan chuan a pai dawrh chhan ka hre ta chiah.
"Malsawm eng buaina nge in neih?" Tia Saia pa in a zawh chuan thinrim hmel fe a min melh pahin
"Kan makpa hlui ngaihzawngnu sawn Matei alo ti tlu pek alawm" tiin min kawk sawk a.






"Thu nilo pui pui sawi suh u" tih pahin Saia chuan min hnaih nghal hrut.
"I tha em?" Tih pahin ka darah a vuan a. Ka buk zeuh chuan ka awmdan atangin ka tha vaklo tih a hria nge,ani te nufa lam chu ava melh nghal hrawk a.





"Ka ni,an inkawplo tih ka sawilo em ni. In makpa inah khan karkhat chuang ka awm a,an zia pawh ka hrechiang viau. Ramdinpuii nen hian chhete pawhin an inngaih melh lo" chang deuh taka Saia'n atih chuan an tit hmel ta dak a.






"Ni e,hriatchian loh chuan thil hi sawi mai mai tur a nilo. Helaiah hunserh te kan nei a,a zialo hle mai. Sharon,hrethiam rawh" tih pahin apa chuan min en a. Ani bawk chuan
"Ka u,tiang hmeichhia mo a han neih tum reng reng" ala ti talh.






Chutah,Saia nu chu lo inrawlh ve in
"U Malsawm,in inmelh rum lai atang tawh khan ka en reng che u ania,Mali kha amah leh amah ava inpal thlu anih kha,Bawiha thiannu thiamloh a awmlo" a rawn tih chuan Saia nu chu an han melh rum leh mai mai khawp a.






"Lo inrawlh ve suh,ka fate hi i vah tak tak annihloh vang hian i en hrang tih ka hria alawm. He ina mo diktak inihloh hi" ati chiah Saia leh apa chuan
"Ka ni"
"Lalmalsawm" anlo ti rual thawt a. Saia nu mitah chuan natna ka hmu chawpchilh nghal.






"In nufaa in rawn tel apiangin buaina a chhuak ziah,rawn tel tam tawhlo ula tha ang" thinrim hmel zeta apa in atih chuan ka lo inrawlh vat a.





"Ka pate,keimah zawk hi ka haw mai ang. Ka awm a nuamlo hrim hrim,zanriah pawn ka ei peih ka ringlova,Saia hi min thlah turin ka lo sawm mek zawk a" tih paha Saia ka sih zeuh chuan
"Nia ka pa,a nawmlohna a rei tawh a,thlah ka lo tum mek a" alo ti ve zat a.






Anu chuan min rawn panin
"Haw kher angailo asin" inthiamloh hmel zet chuan ati a.
"Aho lutuk,ka nu damlo tlawh ka ngai hrim hrim a,chaw ei kha chu ka tumlo sa" tiin hniak phawilo chuan kan daw ve leh ngawt a.





"A zailo hle mai. Chutia i nawmloh chuan inchung lamah pawh a chawlh hahdam theih ania" apa bawkin alo tih leh chuan Vanneihthlak takin Saia zawk chuan
"Nilo,ka thlah vat zawk ang" alo ti vat a.





Anmahni inthiamlo bawk,keia nuam ti chiah bik silo chu mumallo zetin kan inthlah liam a,thupha an chawi reng bawk. Ani te nufa kha an haw ve ta nge phei chu ka hrelo.





Haw tlang mailo chuan Hotel ah chaw ei kan rawt ta a.
"I dawt sawi khan i puar zo dawn si lova,hotel ah chaw ei mai ang" Saia'n atih chuan ka nui tawp a. Dawt ka sawi tih alo man nasa. Dawt sawilo ila kan haw thei dawn derlo tihna ni sia,ka nawmloh der kha angai tlat.





Hotal ah chuan thil kan ei a,2 chauh nisi a han chah hnem em em khawp lehnghal a. Ka puar tawh hnulamah pawh
"Ei teuh rawh" tih pahin min la suah belh zel bawk,dul hmul khat hmuarin ka ei in ka hria.






Kan eikham fel hnu chuan haw mai ka duh a.
"Bill ka va pe lawk ang e" atih chuan kawngkhar bula lo nghah mai tumin ka phei a.





"Sha Sha" tih ri ang deuh ka hriat chuan ka ding chawt a,ka beng chhe ri emaw tiin min kotu awmna ni awm tak lam chu ka melh a,Saia bak ka hmulo.




Ngaih tha zan lova ka pen leh tur chiah
"Baby Sha Sha" tih ri vang chuan hip beh ang mai hian ka ding chawt a,ka che leh tawhlo.




"Inih chiah hi,kan Sha Sha i ngei" tih paha ka hmaa lo ding chu Ramhuai melh hian ka melh a.
"Na nanghi?" Tih paha ka kawh chuan ka kut a khur nghal der der thei.




"Aw,keimah. Inhmuhlohna ava rei tawh ve. In ram chu a nuam hle mai" tih pahin ngeiawm fe chuan min melh a..




Ani alo lan chuan buaina a hnai. Engmah sawi lova kal mai ka tum chu ka banah alo man chawt a
"In kawm leh tawh ila" tih paha ka ban a zut chhoh chuan hlau lutuk in ka lo tlawh sawn dawrh a.





Saia dinna lam khawng ut a ka va hawi phei chuan buaina ka tawk anih a ring nge,hmanhmawh deuh hian a rawn phei pawk pawk a.





"Kal rawh,min kalsan rawh. Min hai aniang" tih paha Saia lam pan ka tum chu rapawm lek leka min nuih khumin
"Ka hai hauhlo che,Baby Sha Sha. Ouchh,nilo zawk,Stripper Sha Sha maw le" atih chuan ka mitthla thlengin lungngaihna chhumpui zing mup mup bak a lang tawhlo.





"Engmaw in sawi?" Tih paha Saia ka bula lo ding chuan nasa takin tiphu zui lehnghal.


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:58 pm

ERASED


CHAPTER 20
☆☆☆☆☆☆


SAIA POV:



Kan thil eina vel bill ka tihfel hmaa ka va hawi phei chuan tu emaw nen anlo inbia a,a hmelhriat satliah a hmu angah ngaiin ka ngaihsak teh vaklo.




Mahse,ka hawi phei leh chuan chupa chuan alo pawt deuh tih ka hmu ta mai a,hmanhmawh fe a phei pawk pawkin an dinna lam chu ka va pan a.





"Engmaw in sawi?" Tih paha Ramdinpuii ka pawh sawn chuan nasa lutuk in ala phu zui.
Hepa hian Baby leh ShaSha tih vel a sawi ngeiin ka hre tlat.






"Tunge inih?" Tia ka hmaa ding ka melh chuan zamlo hmel fahran hian ipte zen chungin Ramdinpuii chu a melh reng a,a mendan lah chu a pangngailo,a melh dan pawh a diklo.






"Eng buaina nge in neih?" Tia Ramdinpuii zawk ka zawh chuan khap hauh lovin kan hmaa ding Vaipa chu alo melh kuau a. A hlauthawng lutuk hmel zawng zawng nen chuan ka ngaih an titha hauhlo.






"Engmah a nilo,kal ang" tia kal mai a tum kan hmaa vaipa bawk chuan min rawn melh chhoh ha pahin
"Baby Shasha hi lo enkawl tha rawh" ver vek hmel zeta min melh pahin ati sup a. Chhan hun pawh awmlovin a kal nghal daih.





"Eng nge kha kha?" Tia Ramdinpuii ding khawng reng ka zawh chuan mitthi ang mai hian a hmel alo var pap a.
"I tha em,i awmdan a dik hauhlo?" Tia a biang ka tawh chuan alo phu zawk a.







"Ka tha,haw tawh ang" ati sep a. Khapa khan a nunhlui eng emaw hriat a nei anih ka ring tlat,a nunhlui duhawmlo tak,tuma hriat ve a duhloh pawh alo ni thei.






Haw kawngah pawh chuan hlauh nei ang maiin a hawikual hrek hrek reng a. A awmdan mak em vang chuan kawng lakah motor tiding in
"Khapa kha tunge?" Ka tih chuan a kut a sik neuh neuh ringawt a,min chhan tum hmel pawh a pu lo.






"Ramdinpui" ka tih thak chuan min en zawk a.
"Ka hrelo,ahhh,ka tih awmzia chu,khulama ka hmelhriat satliah anih kha" ati bah nawk a. A awmdan atang chuan hmelhriat satliah chu anih siloh kha maw. Engpawh nise,a natna thlentu tur anih loh hram beisei ang,amah lah hian a sawi duh awm der silo.






SHARONI POV:


Saia haw veleh sofa ah chuan milim ang maiin ka thu nghal chawrh a. Engtin nge alo inlan leh theih,ka nun atangin a bo hlen tawh dawn emaw ka tih hnuah,Anita pawh a boral tawh a. Mahse,ani khan Anita boral chhanah min puh anih kha.





Chu chu ka buaina ber a nilo,Bangalore a ka nundan zawng zawng hretu ani a,tu emaw bulah alo sawichhuak mai ang tih ka hlau em em a ni. Tunah dinhmun ka siam rem ve tan dawn chauha,buaina dang hmachhawn lehnghal tur chuan ka hlim reilo mah mah.






A number ka chhinchhiahna lehkhabu te chu ka hai chhuak leh a,ka lo hal ral hmanlo chu ka vannei takzet..






"Hello" ka tih chuan a enga mah hmain a rawn nui nghal vak vak a.
"Tinge i rawn inlan leh,Engvangin nge i bo hlen loh?" Tiin ka aukhum nghal hrep a,ka insum buai thei tawhlo. A hmel ka hmuh tirha ka hlauhthawn zia te kha.





"Min rawn phone ka ring reng a,i hlauthawng deuh ami?" Ngeiawm taka atih chuan a awmdan tur zawng zawng nen ka mitthlaah alo lang a,ka haw ngawih ngawih.





"Khawngaihin min tibuai tawh suh,ka nun ka hmang ve dawn chauha" beidawng taka ka tih chuan a reh vung vung a,ka mittui rawn tling ngawt chu duhlovin ka khap let vak vak ringawt.






"Thil pakhat chiah ka hre duh,Anita kha engvanga thi nge?" Atih chuan chu zawhna ka ning lutuk chu ka puak darh mai dawnin ka hria.
"Chu leh bawk chu maw,ka sawi ngun tawh viualo em ni?" Ka tih hap chuan
"Sawi mai rawh,Anita kha i tina leh em ni?" Atih teng chhuaih chuan ka mitthla ah Anita hmel alo lang a.






"Anita kha natna a neih vangin a boral,kei nen inzawmna kan neilo,i duh chuan damdawiin lehkha pawh ka hmuhtir thei che" ka ti ta thlawt a. Ka phone ah hian Anita Medical Record ala awm in ka hria a,chu chu en se a fiah mai ang.





"Naktukah inhmu teh ang" atih chuan ka tho zawk a.
"Aw,khawiah nge kan inhmuh ang?" Tia ka zawh chuan a thlenna Hotel a sawi a,a Hotel thlenna em em a va hmuh chilh chu ka hreh hle a. Mahse,a lohtheih tawh siloh.






Zanah pawh chuan ka mu manglo ang vel a ni,ka mut ve chhunah pawh eng emaw lo thleng tur ang mai hian ka hria a,ka nghar mut a ni ber.






Ka buai zan berkher in Saia alo leng bawk silo. Mahse,sawi buai thei ka nilo,anu thih cham a ni a,keimah vangin a chhuah angai mai pawh a,vawiin chu chhungkuaa awm ni a ni..





College ban hma deuhin min lo bia a,inhmuh a rawn rawt leh ta thut mai. Ka hmanloh thu leh chhuahna tur ka nei tih ka hrilh chuan engmah min zawt tawh lovin a dah ve leh mai a.





College ban veleh ka mi hmuhtur awmna lam Hotel chu ka pan a,ka luh hma chuan enthlak ni tlata ka inhriat vangin ka hnunglam chu ka en let zawk a. Mahse,Hotel a mikhual leh hnathawkho bak hmuh tur an awmlo.






A pindan ni ngei tur ka thlen chuan ka kik karh karh a,lo hawng thuaiin lut tur chuan min sawm a. Ka lakah sual viauin min tibuai peih hle mah se,a che mawilo dawnlo tih Anita-i ka hriatchian tluk zetin ka chiang ve tlat.






"I thil min hmuh tur chu?" Ka lut fel chaih tihah min zawt nghal a. Ka phone gallery chu hai let in Anita-i medical record leh a natna vel inziahna hrang hrangte chu ka hmuhtir a. Thil eng emaw ngaihtuah vung vung ang mai hian a awm reng a.






Chutah,rawn thawh leh hluai pahin
"Natna vang chu anih hi" atih hawlh chuan ka thaw huai thei. Ti hi chuan min tihbuai zawm tawhloh hram ka beisei..





"Mahse" tih paha min melh kuau chuan a sawi leh tur chu hlauthawng ru takin ka lo ngaichang kar a
"In inkarah tiang kha thlenglo se chuan ala thi bik hauhlo ang" thinrim hmel deuha atih chuan sawitur reng ka nei tawhlo. Ni e,intawnglo ni ila chuan ala awm ve maithei a ni.





"Tah kha chuan sawitur ka hrelo,ka thiamlo a ni" kun paha ka tih sep chuan a thu leh hnawk a.
"Ka ngaih sualna ah che khan ka thiam biklo. Mahse,Anita-i ka hmangaihzia kha hria la chuan min thiam thovang" atih chuan an fanu chanchin hrilh hun tak niin ka hre ta a.






"Ka hrethiam e. Anih,nupui i nei tawh em?" Tia ka zawh chuan a nui hawk a.
"Ka nupui hual ber boral hnu atang khan neih nawn ka tum tawhlo" atih chuan hrilh ngei ngei ka tum ruh tlat. Anita-i thuchah pawh ka vawng thei dawn ta lo anih hmel. Mahse,an fanu hi hetia awm ngawt turin ka duh bik silo.






"In fanu kha ala dam asin" ka tih chuan a tho zawk a.
"Engmaw,a thi inti ni lawm ni?" Atih thak chuan
"Anita-i nen in boruak chu i hriat kha,a thih dawn thleng pawhin sawichhuaklo turin min chah a. Mahse,i fanu hetiang ngawta a seilian tur chu ka duh biklo a ni,ilo lang ta sa sa" tiin a fanu awmna Home address velte chu ka hrilh a. Ka sawilai vel chuan a thlan a tla buah buah reng a,a intuai thuak thuak bawk.






"Engkim ka hrilh tawh che a,Khawngaihin min tibuai zawm tawh suh" tia ka ngen chuan ala pangngai chiahlo nge en pawh min en lo
"Ka sawi chu i hria em?" Ring deuh zawka ka tih leh chuan
"Aw le,a tha e. Ka fanu min neihtir leh vangin ka lawm e. Ka tibuai tawhlo ang che" atih chuan ka lawm lutuk ka tap dawn hial.





Ani tihloh hi chu ka nunhlui vanga min tibuai thei an awm tawhlo. Anih si chuan,tullovah ka buai angai tawh dawnlo tihna a ni. Thlamuang takin ka mu ve thei tawng ang.






A lawm lutuk chu misual tak ani tih a in theihnghilh nge,chawei ve nghal turte chuan min sawm a,ka pawmlo nasa. A fanu chanchin hrilhlo ni ila chuan kut min thlak duh hial ang tih vel kha a ni sia.







A pindana ka awm chhung zawng chu ka thaw a sak deuh talh reng a,a tawpa tawpah chuan ka kal theih thu a sawi ve ta a. Thaw huai paha ka chhuah chuan kawngkhar ka khar phui a,tha zawi fe a kawngkhar ka nghen chuan,ka sira lo ding run pa vang chuan ka au thawt a,ka thlawk dawrh lo chauh.







"Eng nge ilo tih?" Tih paha ka awm ka dawm chuan a din ngaiin ala ding reng a,bang nghengin eng emaw a ngaihtuah vung vung bawk..







"Khapa kha i eng nge anih tih ka lo ngaihtuah nasa hle thin a,ka hre theilo. Mi satliah mai mai angin i sawi a,ka awih mai. Mahse,ka sawmna che hnara a ruka i hmuh meuh chu mi satliah ani lo tawp ang" tih pahin a rawn inher ruai ruai a.







"Hetah,ka hmuh i hria ami?" Din ngil hlek paha ka tih chuan ngeiawm lek lek in alo nui suk a.
"Hria e,kha vaipa kha i hmu ni lawm ni. Nimin ka chhuah khan i kawngkhar bulah ka ding reng a,ka chhuah veleh hmanhmawh bak lenga i phone nghal te kha ka hrelo emaw ti suh,ka hre vek. In inhmuh tum pawh ka hria. Ramdinpui,dawt ka duhlo,i eng nge anih?" Khauh fara atih chuan chhan mai dan tur ka hre tawhlo.







"Kal phawt ila kan sawi dawn nia" hlauhloh hram tuma ka tih chuan
"Teuhlo,tunah hian sawi nghal rawh. Saw vaipa saw i eng nge anih. Ka laka i sawitheih miahloh chu eng nge?" Tih paha min hnaih hrut chuan ka lo tawlh sawn vat.






"Ka sawi ang ka tih chu,kal phawt ang,helai chu hotel anih hi" tia ka bag ka ah that chuan ka kutah alo man lawk a,min kalpui a tum chiah ka hlauh ang nge nge in pindan chhunga mi chu alo chhuak zui nghal.





"Eng buaina nge i neih?" Tih paha Saia a melh chuan Saia chuan ka ban a hmerna chu na tawh tak a ni.





"Eng buaina mah kan neilo,ka thianpa anih hi,kal rawh" tia kalkawng ka lo ken chuan
"Buaina i neilo tak tak maw?" Rinhlelh hmel deuh chuan ati leh a,ava han ninawm sek tak. Saihmingpuia lah hian a hnek bur mai ang tih hlauhawm khawpin a melh na tawh si.






"Aw,ka neilo. Kal tawh rawh. Keini pawh kal ang" tia Saia thinrim hmel tak ka melh chuan ka ban hmer pahin kan hmaa pa chu ala melh rum rut reng a.






"Buaina i neih chuan min hrilh dawn nia" tih pahin a kal zui nghal mai a. Min rinhlelh hmel takin ala rawn hawilet zuk zuk tho.





"Kal ang,motor ah kan sawi dawn nia" ka ban laksawn paha ka tih chuan alo thlah hnawk a. Engmah sawi tawh lovin ka hmaah chuan a kal nghal nul nul a.





Motor dahna ka thlen chuan alo thu fel vek tawh a,biak chu sawiloh,en pawh huphurhawm khawpin a awmdan chuan min ti hrehawm vek thei.





Thawm dim thei ang bera ka luh chuan a che hauhlova,steering hum pahin hmalam chauh a melh ngur mai..





A tawng miahloh vang chuan ngawi rengin ka thu ve reng a,parking hmun thim nen,a reh bawk si nen chuan a râpawm lek lek..






"Tunge sawi tawh rawh" hriat nuam deuh zawka atih chuan thut ngil pahin thawk ka la ham ham a. A zavaia sawi ka duh lova,duh pawh ni ila ala hun heklo. Kha chen a hre tawh a,engkim hre tur chu ani. Mahse,tun atan chuan ala theih rihloh.






"Amit-a ani a,sumdawng hausa tak ani bawk. Hnuchham ina naute ka biak thin Mary pa kha ani a,awmzia chu ka thian boral ta Anita-i kawppui tihna anih chu" tih pahin ka thaw halh a,ka awm zawn chu a rawn inhnawh puar ang maiin thawk a harsa.






"Kan inkarah eng emaw thu hriat dikloh tamtak a awm a,chumi tifel tur chuan alo kal anih kha. Ka hrilh vatloh che vangin ka tihpalh" tih sep paha ka melh zawk chuan milim ang maiin ala awm reng.






"Engvanga nangmah kher hmu che nge anih,i thiannu thi ta chuan hmelhriat dang a neilo ami?" Atih chuan a hmel ka en a,a sawi duhdan chuan ka thin a khei dawn riau. Mahse,ka thiamloh anih vangin ka hrethiam zel mai ang.






"Neilo,keimah leh amah chauh kha nimai. Nu leh pa pawh a nei tawhlo,a neihchhun chu keimah chauh" tih paha Anita-i hmel ka mitthla chuan ka nui hak a.
'A neihchhun' tih lai tak hian inthiamlohna liantak min la siam reng zawng anih hi.




"I thiannu chuan eng hna nge a thawh?" Atih chuan ka ngaihtuahna atanga harh zawkin mak ti zet chuan ka en a. Engvanga chu'ng zawhna te chu min zawt nge anih????






"Enga tan nge itih,a minal nun ania,kan sawi theih a awmlo" ka tih chuan a thin ka tirim nge,a rawn hawi zawk a.





"Khapa nen khan nupa nge annih inkawp satliah?" Tiin a ka reh chu a chip leh hmak a..
"Inkawp satliah" ka tih chuan a steering chu a chum chik thawt a. Mak ti lutuk in ka lo en dawrh.





"I thiannu chu eng hnathawk nge?" Thawk hawk paha atih chuan amah a nilo emaw ka ti hial. Tinge,midang buaina vang mai maia hetia ka chunga a chet tak mai.






"Tinge chu chu min zawh reng,a chungchang chu bak chu ka sawi theilo,a mimal nun a ni a,a boral tawh bawk. Kan buaina ah hian engmah inrawlhna a neilo" inbeng daih tum taka ka tih chuan khabe kual ti che rawlh khawpin a nui hawk a.







"Khawngaihtakin,an chungchang chu abak min zawt tawh suh. I duh chuan ka laka zawhna i neih min zawt mai rawh,hetia awm hi nuam ka ti miahlo ania" ka ti ta thlawt a. A hrehawm em a ni,ani ber hetia a chet chuan awmngaihna pawh ka hrelo mai dawn.






"I thiannu nen pawisa hmuh nan khapa kha in tilawm thin tihna anih chu" ati chiah chu kut hum ruh nghek chungin ka melh hrawk a.






"Chutiang chuan sawi hauh suh" ka tih chuan lehlam alo hawi hmak tawh.
"Eng nge ni vak chuang se itih,he laia ka hmuh hi nangmah inilo tihna ami?" Tih hrawk pahin a phone chu a rawn phawrh a,ka hmaa thalak a rawn tihlan ka enchian chuan ka hmusual emaw tiin ka en nawn leh a,mahse,ka hmusuallo.






Ka hrawk chu hnawh phui ang maiin a awm a,thawk lak vak ka tum pawh chu ka hlawhchham chiang hle.






"Engtin nge i neih?" Harsa fe a ka tih chuan
'Alo nih chiah hi' tih melhin min melh a.
"I pha lo maw?" Awihloh hmel zeta atih chuan
"Keimah ngei ka ni. Mahse,engtin,nilo,i hmuh ang ngawt kha a nilo. Amit-a" ka ti chiah
"A tawk" a ti hrawk a.






"Nilo,i hriat ngei angai" tih paha ka tawlh hma chuan
"Ka zawh lai che in i sawi duh hleinem" alo ti hmuk bawk si. Min zawh laiin khatiang a nei tih ka hre bik tawp silo. A hrim hrimah tunge khatiang thlalak hlui,a neitute phalna lova lo la reng reng,kum tamtak liam tawh ami lehnghal.






"Aw le,ka pha lo,thlalak ami kha keimah ngei ka ni. Mahse,Amit-a dinglamah khan Anita-i a ding ve tih chiang takin ka la hria" ka ti ta a. Thalak chu Bangalore a Bar a kan thawhlai ami a ni a,thawmhnaw pan leh chhing tak nen kan ding a. A laiah Amit-a a awm a,a veilamah kei,a dinglamah Anita-i a awm bawk,Amit-a hian a kawngah a chelh nghe nghe.




Chiang takin keimahni ngei tih a hriat a,mahse,he thla lak hi a awm tih kan hriatloh ang bawkin,kan duhthlannaa lak a ni hauhlo.





"Anita-i leh Amit-a inkawp tantirh lai anih kha" ka tih leh chuan
"Dawt sawi hauh suh,dawt hi ka hua. Tah hian 2 chiah in lan hi,khawnge i thiannu thi tawh chu a awm,a thlarau takngial pawh a awmloh hi. Anih si chuan min thawntu hian i chhuanlam tur hi hria in alo edit chawp ami" atih vak chuan phawk fe in,khap miahlo chuan ka lo melh reng a.






"Anih chu,khawimaw,tunge tiang thlalak edit thing lutuk hi lo thawn che" tih leh a inrinloh laiin a phone chu ka chhuh lawk a,min dan pawh a tum chuanglo.





Ka awih theilo,he nu nen hian anlo inbia a maw. Engtin nge anih theih.
"Rosie nen hian in inbia a maw,chutah,a thusawi i awih zawk a" ka tih chuan ngawi ngulin hmalam a melh reng a.






"Sawi teh,engtin nge Rosie daih daih hian alo thawn theih che. Nge,inlo inbe reng thin zawk? A tawngtheih lutuk vanga buai hrep tawh kan ni tih i theihghilh mai em ni" ka tih chuan a khabe ruh che rawlh rawlh khawpin thawk ala na em em ringawt.






"Aw le,engmah ka sawi theilo. Mahse,ka thusawi hi ring hram rawh. Ani nen khan kan inkawp ngailo,Anita-i kawppui ani zawk" beidawng aw taka ka tih chuan
"Engvanga khatia awm kha nge inih ve,mi hur ang maia khatiang thawmhnaw inbel te,mipa lem kual velte kha engvanga ti nge inih?" Atih chuan ala in bengdai hauhlo.






"Ka tih a tul alawm,thil tamtak i hriatloh a awm. Chu chu helai motor chhunga sawi mai theih a nilo,chuvangin,Khawngaihin kal ila,ka sawi theih chin chu ka sawi vek ang" ka ti ve ta thak a. Zaidam loh sa nen,ka dawh thei ta biklo.





Ni e,ani chu a dawh thei,rei tak min dawh tawh. Mahse,a theihloh chin a awm ve,midang mimal nundan ngat phei chu keia lo sawi theih a awmlo..





"Eng fakau nge i sawi theihloh?" A tihlai tak chuan a phone alo ri a,hmanhmawh zeta a off chuan screen a
'Miss Rosie Synod' tih chu ka hmu hman tho. In call hial turin anlo inpawh tawh anih dawn hi.






"Ani kha i ring zawk tiraw,eng thu fakau nge alo fah thin ang che le. Kha chen ilo hel tawh pawh min ringhlel ta ania" ka theihtawpa dama ka tih chuan rum em em mai hian min melh a,kan inhriat tirh atanga a men rum ber ala ni hial ang.






"Chu chu sawi rawh ka ti reng che alawm. Mi satliah iti a,a hnuah dawt sawiin i hmu ru leh a,ani chuan mi satliah en in a enloh che kha. I thuruk țawp ber pawh min hrilh theih laia,chu thil mai mai sawi chu a harsa ami?" Atih hrawk chuan
"Engmaw i sawi?" Awihlo fe chuan ka lo ti ha a.





"Aw,i thuruk tawp ber,i pahrawn nen in chanchin pawh i min hrilh theih laia,he vaipa chanchin mai mai i sawi theilo chu eng nge a chhan?" Ka hmai zawna atih vak chuan a vawihnih nan amah anilo emaw ka ti nawn leh,mahse,a ni si. Ka thinlung hi pawh sawm ang maiin a rawn na nghal em em a,tah chhuakin min tur nghal ut ut bawk.





"Tunah khan Saia engmaw i sawi,ka thuruk tawp ber Lianzuala chanchin maw?" Ka tih chuan tumloh lutuk in ka mittui a rawn luang pap a. A hmel ka en chuan alo hawi buai nak
"Nilo" atih sup chuan kawngkhar lock ka hawng rak a.






"Khawvela ka mi rin awmchhun,ka chanchin hre hnem ber ini a,mahse,khanu thusawi leh thlalak vang mai mai khan tikhan i sawi a maw. Ka thuruk ka lo hrilh che chu ka inchhîr hle mai" rilru na zeta ka tih sep chuan a hmai a tuak pawk a.





"Ka sawi tum a nilo,nilo,ngaithla teh. I thalak leh video" atih chuan ka hupin ka meng zau kawk a. Video ti a sawi em,ani hian chupawh chu alo nei a maw..






"Nunhlui tawp ber nei tawh leh hmeichhe tenawm ber ka nih thu ka sawi ngun a,chuti chung chuan min hnarlo anih kha. Mahse,tunah chuan ka nunhlui vangin min diriam leh si,tiang tur si chu tinge min chelh" tih pahin kawngkhar chu ka nem hawng rawp a.




"Nilo,Ramdinpui,kal suh" mangan hmel lutuka ka ban a rawn man chuan mit hnawng chapin ka lo melh a.




"Nilo,min hmusit hun ila neih chu ka ring hrim hrim. Mahse,Lianzuala chanchin kher kher kha chu i sawi ka ringlo. Ka tihpalh a ni e. Ka thiannu Anita-i te chanchin zawng zawng ka sawi theihloh vangin,mahse,heihi hre rawh,lo boral ila,ka chanchin duhawmlo tak takte miin an sawi nawn reng tur chu ka duh bik lovang. Ka duhloh thil chu midang lakah ka ti thei biklo a ni" tih pahin beidawn hmel zeta min melhtu kut chu ka thing thla a.





Car atang chuan chhuakin ka hmai ka tuai hul thuak thuak a. Hmanhmawh fe a kawngpui lam ka pan chuan kawngkhar inkhar dawp thawm ka hre zui a.




Hnunglam hawilo mah ila min umzui tih ka hre nghal. A aia chak lehzuala ka kallaia
"Ding rawh" atih vak ri vangin ka ding dawt a.





"Tah khan ding rawh,kal tawh suh" atih leh chuan zawi muangin ka hawilet a. Inchhîr hmel lutuka din pahin min en reng a.




"Ka tihpalh,a tha em. Khatiang thu kha sawi ka tumlo,ka duhlo bawk. Mahse,ka hrelo,ka sawilo angah ngai hram rawh,Khawngaihin kal suh" tih paha min rawn pan chuan a awmdan vang chuan ka na hle a. Mahse,nichina a thusawi khan min la tina fe zawk.





"Ni hrihlo,tunah chuan keimaha awm ka duh,min zui suh" kut vai paha ka tih chuan a kallai chu a tawp chawt a..





"I kal hlen lovang tih sawi rawh,i thinrim pawhin min kalsawn lovang tiraw?" Atih chuan lehlam hawiin ka mittui ka khap per sak a. A hlauthawng pawh hi a awm ve reng,Khawvela ka thil huat ber hmangin min tina si a.





"Tun atan chuan khawngaihin" a hriat tawk tura ka tih sep chuan
"Aw,kal rawh. Mahse,kal hlen suh,lo let leh ang che. Ka tihpalh takzet,ka sawi tum a nilo. Ka thinrim leh khapa ka thik luatah khan ka insum zo lo a ni. Aw,Khawngaihin" atih ngawih ngawih chuan ka tahchhuah vakloh nan ka inpet tang tang a.






"Ka hrelo,ummm,kal phawt ka duh" ka tih chuan a che leh hrut a.
"Tihnat che ka duh ngailo,chu chu min hriatsak rawh,kal hlen lo hram rawh" tih paha ka mit taka min melh chuan amah tak kha ani leh tawh tih ka hmu thei.





Tuna Saia hi chuan min tihnat a duh lova,min nawr ve vak vak ngailo. Mahse,nichina Saia kha chuan min tihnat mai pawh a pawisa lova,a insum theihloh thlengin a innawr anih kha.




Tunah chuan keimaha awm chauh a ni ka duh. Mahse,Rosie khan engtin nge ka thlalak alo neih theih,tinge Saia nen anlo inbiak thin?????


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:58 pm

ERASED


CHAPTER 21
☆☆☆☆☆☆


SHARONI POV:


Khua a thim thet thet tawh a,ruah a tla seng seng bawk. Tukverh bulah chuan dingin kawrlum ka ha hlun a,thingpui khu vat vat ken pahin ka hmalam tlang chu ka thlir vang vang a. Tlang bawh chhum zing paw chiaite chuan lungngaih a kai tho emaw tih mai turin ka hnuk an ti ulh lek lek a,saw tlang sawn min rawn chhiatkhum ang maiin ka thlir zawm rei thei ta lo.






Zanriah ei ka peih fel vek tawh a. Mahse,ei chakna hlawl ka nei silo. Ka Thenawmpa te pawh anlo haw tawh a,an pafa inchhaih thawm chu hlimna ka tem ve theih awmchhun a ni mai.






Ka ngaihtuahna ah hian eng dang a awm theilo. Miss Rosie chuan engtin nge ka thlalak alo neih daih theih,chutah,Saia ala thawn zui ania. Anni 2 hian nunhlui eng emaw anlo nei reng em ni,hmanni buaina kan neihlai khan chutiang engmah a lang silo.






Ka haw atangin min la rawn be lova,mahse,pawi ka tilo. A thusawi vang khan a inchhîr hle tih ka hmu a,hrethiam turin min duh takzet bawk. Mahse,tun maiah chuan ka theilo..






Zanah chuan tv hmaah ka thu ngal a,eng nge chhuak pawh ka hre chuanglo,tiang vel chuan ka ngaihsak lo.





Ka mut hma deuh chuan Thenawmpa te pafa anlo lut hlawl a. A nu chanchin vel ka zawh chuan an that thu a sawi mai a. Chutah
"In chaw eikhawmna ah buaina in tawk deuh ami,a zialo hle mai" atih sup chuan a bawp karah a fanu alo ninhlei ve reng bawk.






"Nia,Bawihtei nu chu kan ngamlo deuh a ni" nuih pahin ka ti mai a.
"Min hrethiam dawn nia,a zialo takzet" hrehawm tih hmel deuha atih leh chuan
"Aho lutuk,i thiamloh a awmlo" ka ti leh a. A inthiamloh hmel lutuk chu a khawngaihthlak zawk.






Saia nen kan chungchang min zawt ang tih hlau taka ka awmlaiin an haw ta hlauh a,amah Saia ber pawh chuan min la rawn be lo hrim hrim. Ala thinrim tluang zel a ni ang..






Mut dawn chuan han tawngtai ngial ka tum a. Mahse,ka theilo. Kut ka suih zawm chiah,thinrimna bakin min luah khatlo. Ka tum lui ta lo law law a,chhuaklo takin ka mu meng zui nghal kar.





College kal hmaa ka phone charge ka phawi chuan ka switch on chiah a,zana mutnaah hian hla ka ngaihthlak thin vangin a low a,alo thi daih thin..




Chhuah paha ka en chuan Saia missed call alo tam ngang mai. Zanlai pelh ah vek a ni a,ka hla ngaihthlak in min awi mu daih a,a call pakhat mah ka hrelo.




Call let ka tum zet a,ka hmet dawn chiah ka rilru thlakin ka dah leh ta zawk a..




College ka tlan luh chuan garage bulah Saizami alo vei thuak thuak a. Min hmu chiah chu hmanhmawh em em in a rawn phei nghal hlawk hlawk.





"U Sharon,awh ka tih,Miss" tih pahin ka hmaah a rawn ding zat a. Ka helmet phelh pahin
"Eng nge ni ta?" Ka ti halh a.






"Ka u nen in inthen ami,nge in inhau?" Atih chuan a sawi tur awm chu ka hre mai.
"Englai pawhin a that theih rengloh tih i hriat kha. Nang leh Scott-a pawh in inhau ve thin thovang chu. Hawh chho pah ang" ka tih chuan min zui ve mai a.







"A ni thova. Mahse,ka u hian a zia a thlak khat viau ania,nizanah alo haw lova,ka hriat theih tirh ata a riah chhuah vawikhat na ania,ka pa te pawhin mak anti lutuk" atih chuan a thusawi lai chu ka melh zawk a. A thutak hmel ropui lehnghal.





"A thiante bulah a riak ve aniang chu" ngaihsam hmel zeta ka tih chuan
"Nia,a thianpa inah a riak a. Mahse,zanah a thianpa chuan min lo call a,ka u chu a rui atia" atih sep chuan
"Engmaw?" Ka lo ti vak a.






"Amak iti ve tho tiraw,ka u ruih ka hriat vawikhatna a ni hial. In inhau anih ka ring a" atih chuan ka dinpui ta a,midang an tam tawh em vangin kan thusawi an hria ang tih ka hlau.







"Nia,nimin khan kan inhnial deuh a" ka tihlai takin Rosie leh a nau,zirtirtu a tling ve ta lo kha anlo inzui phei a,min hmu chiah chu eng emaw an inhrilh sep a,ngeiawm takin an rawn nui phei bawk..





"Hi,Saizam,i dam maw?" Tiin a nau zawk chuan alo bia a. Anni pawh anlo inhre tho anih hi.
"Aw dam e" Saizami chuan ati sep ringawt a,a be chak fahranlo tih a lang reng.






"Kal ila,an sawi ril hmel emai. Miss Sharoni chu i rilru ava hah hmel ve" Rosie chuan atih zawm zat a,a buaina min thlen vanga rilru hah ka nih thu ka aukhum vak zawk dawn maw ni. Ka thinrim an chawh chhuah tam hma in an kalsawn ta hlauh a.







"In miss nen khan in inhre sa ami?" Tia Saizami ka zawh chuan
"Aw,ka thiannu Awmawmi cousin kha ania" ati ta chiah a,amak lo hran love..
"I u nen hian an inpawh em?" Ka tih leh chuan mak atih hmel deuh nge
"Pawh em emlo,tinge?" Ati ha a.
"Engmah ni love,an inpawh hmel em a" tia kut ka vai thuak chuan
"Eee,ka hre leh. An inpawh lo tawp. Mahse,Miss Rosie hian ka u hi a star thin,school an kalho laiin,Awmawmi khan a sawi thin tak" atih chuan ka nui hak a.






Chutiang anlo nih teh nuaih vang anih chiah chu. Tunah chuan engmah hi a maklo hran tawhlo,alo awm vel vek e.




Haw kawngah chuan kawngsirah Saia Car ang deuh ka hmu fuh a,ka tlan laklawh em vangin ata a ni chiah em a hre theilo.





In ka thleng a,ka indah fel vel chiah tihah kawngkhar a rawn ri ta karh karh a. Ka ring suallo anih hmel.





Ka va hawn chuan amah ngei alo ni a,eng emaw a khai tun a,a hmel ka en chu ka phu deuh zawk thei. A sam a ro ruap a,a buk chhum bawk si. A kamiz hak lah a then a bilh a,a then a chhuak pur bawk.





"Ka lokal" tih leh luh a rual nghal mai a.
Ngawi rengin a hnungah ka zui phei a,min melh zawk pahin a thillei chu dawhkanah a dah a,a landan chuan chawhmeh leh Gulabjamun tih vel a ni..





"I eitur in ka lo lei" atih chuan ka melh zawk a,ani paw'n min en rei ngamlo tih hriat takin a hawi sawn lehnghal.





"Tiang hi ti tawh suh ka tih kha,helaia i awmlai kha chu thu hran ania" tih hap paha Sofa lam ka pan tura ka inher chu ka kuangkuah ang angin hnunglam atang chuan min kuah thut a. Ka chet lawih chuan a aia nghet fe hian min kuah zui leh..





"Ka tihpalh,ka sawiloh tur tawp ka sawi tih ka hria,thirim tawhlo hram rawh" ka dara khabe nghat chungin ati sup a.
"Min ngaihdam theihna anih chuan ka tihpalh tih thu vawi sang chuang pawh ka sawi mai ang. Mahse,i hnung min chhawn tawh lul suh" ka dul zawna a kut tihngheh sauh paha atih chuan
"Ka thinrim lo,ka lungawilo mai a ni" ka tih chuan a thaw deuh hawk a..







"Ipa nen in chanchin vawikhat pawh ka sawi leh tawh lovang,ka sawi leh anih chuan ka lei hi i tan dawn nia. Chuti khawp chuan ka intiam ngam,mahse,Khawngaihin" tih pahin min thlah a. A lam hawi tura min kawih her chuan a khawngaih thla la hmel lutuk chu chiang takin ka en a,nizan a hawloh chuan a sa patal na lamah a chau khawp ang.





"Nizanah i haw lo ami?" Ka tih chuan sirlam a hawi zawk a,a hnar tuai thuakin
"Ka thianpa inah ka riak" ati liam puat a,a zam chuan a hnar a tuai thin,tunah pawh a ni chiah.
"Tiang khan awm tawh suh,i chhungte mang iti ang ania" melh kar paha ka tih chuan
"Chuti thinrim tawhlo la,i thinrim chuan chhia leh tha hriat pawh a nuamlo" atih chuan a ruih thu a sawina ah ka ngai hmiah.







"Ruih pawh a thalo" tih hap paha a kut ka dahsawn chuan
"I chunga ka tihsual chiah kha thalo ka hria,bakah Beer chaih ka in" tib pahin sofa lam chu a pan ve nghal a.





Inhma tawnin kan thu fel chaih tihah a phone a ri zawm a,phun hluk pahin a dap ruk ruk a,a chezia chu ka en reng,ka ngaihbel nge,a che phelh phungin ka hria.






"Aw" atih tawp chuan lehlam tawng ri chu ka hre ve phak,hmeichhia hi a au in a au a,Saia chuan a ner nawk pahin a phone chu a dah hla deuh bawk.





"Anih chu,ka lokal nghal ang. Zai turin lo peih fel rawh u" tih pahin a tho hluai a. A phone a dah veleh
"Ka let angai,ICU a kan damlo a zual thut a,zanah ka lokal leh ang aw" tih paha min din hnaih hrut chuan ka lu ka lo bu zeuh a.






"Hman ngei ka lo tum ang,thil saw lo ei ngei ngei la" tih pahin ka bekah a fawp zeuh a,biak hman lohvin a chhuak zui nghal.






Ani chu inthiamlo mah se boruak danglamlo ang maiin a awm thiam a,keichu ka ni ve lo,ka sual vang nge,ka natna te hi ka hre reng zel,ka hre rei thei lutuk. Tunah Saia pawh ka haw lo,mahse,ka lungawi hlawllo. Ka mumangah pawh tiang tak khan min la tawngkhum ngailoh vang pawh a ni mah na. Hlauthawng chung chungin inzawmna ka siampui a,ka rin sualloh chuan ka hlauh apiang a indawtin alo thleng zut zut mai zawng anih hi.






A sawi ang chuan a awm lehlo tawp,zanah pawh alo lang lova,biak pawh min be heklo. Mahse,eng nge ka sawi theih,Doctor ani a,a hna ah an buai pawh a ni thei a,a hna chu a dah hmasa ber tur a ni. Keipawhin ka hna vangin ka chhungte ka ti lungnilo ngun tawh em mai.







Mahse,alo langlo anih pawhin,mut hmain min lo call emaw text tal ka lo beisei ve a,ka mu lawk theilo lehnghal. Nizan ang khan alo che buai hle ang tih ka hlauh vangin ka nghak deuh hlek a. Mahse,a tlei thei khawp aniang,zinga ka thawh pawh chuan a call emaw text takngial pawh a awmlo.






Naupang Semester tawplam a ni tawh a,Saizami leh Vanthlahlua te pawh an pass chuan an Graduate ve dawn ngei.





Ka chhuah hmain ka nu ka bia a,la kal thei chaihlo mah se a zia viau tawh anih hmel a. Lianzuala pawh haw viau mah ila tun dinhmunah chuan a tangkaina ka hmu lian zawk lo theilova,ka pawi a sawilohva ka nu a enkawl tha anih chuan ka huat ngawih ngawihna te pawh a zia ve mahna.







Chhun chawlh laiin Amit-a khan min lo call leh hlawl a,ka la duh lawk lova,amah ka hlauh vang pawh ni lovin,eng emaw hmanga min rawn blackmail leh mai ka hlau a ni.






Vawihnih a rawn tihnawn leh naah chuan pawnah chhuakin ka la ta a.
"Naute hi chuti maiin a lak theihloh,khatah khan ka lo kal a,i testify angai" atih chuan ava han buaithlak lehzel tak.
"Ka lokal thei si lova,ilo let leh mai dawn mi?" Ka tih chuan
"Ka lo let tawh a,tlaiah Ukil nen kan inhmu thei ang em?" Atih chuan ka ngaihtuah vang vang a,han aw nghal mai ka hreh deuh bawk si,ka venthawn ber Saia lah ala reh hmak bawk nen
"Aw,ka ti dawn nia" ka ti ta tawp a.





Mary kha keima dah anih vangin ka phalna tello chuan a lachhuak theilo tihna ania,ka phalna chiang taka an neih angai a,ka hriatpui ngei tih a chianloh chuan apa pawh ni mah se a lachhuak thei chuanglo.





College ban chuan kan inhmuhna tur lam panin ka chhuak nghal a,a hmun ka thlen chuan Ukil ni ngei tur nen anlo thu reng tawh a. A fanu chanchin anih vangin a hmanhmawh khu chuk ni berin ka hria.






Ukil chuan uluk takin thu min zawt a,Amit-a hi apa ani ngei em,ka hriatpuina thlap a ni em tih leh Anita-i chanchin tlem min zawt bawk. Ka thusawi zawng zawng a record hnu chuan lehkha ah min sign tir leh a,tichuan kan hna kan zo. Tikha chuan hepa hmel hi ka hmuh nawn tawhloh hram ka beisei.







"Ka thlah ang che" atih chuan scooty ka ken thu ka hrilh a. Kal mai ka tum chu
"Lawmthu sawina leh ngaihdam dilna inkawpin,eitur ka treat che chu rem ti rawh" atih chuan hnial turin ka ang zuai a.
"Tun bak kan inhmu tawhlo tak tak ang,ka fanu nen nunthar kan hmang anga,Mizoram hi kan rawn rap tawhlo maithei" atih chuan a hmel ka enchiang a,a thutak hmel ve riau. Mahse,ka la duh ta chuanglo.






"Ka nu damlo tlawh kawi ka ngai sia,ti rihlo mai ang" ka tih chuan a ngaihdan a nihloh hmel hle a,a ze tak a chhuah leh mai te pawh ka hlau e.
"Anih,pawnah sawn theitui va in kawi ila. Mahse,kal vat ka ngai ania" ka tih chuan a hmel pawh a zia leh ta deuh a. In hre ve emaw,hnamdang hian thilpek hnawl hi an haw hle,a bikin Vaiho hian,an duh thua thil min offer a,kan hnial fithla thak anih chuan an haw lutuk,in hmuhsitna ang hialah an ngai thin. Chu chu Bangalore ka awm chhunga ka zirchhuah ve pakhat a ni.





Restaurant kawta dawhkan te an dah ah chuan inhma tawnin kan thu ran a,kan intur lo thlen hma chu chhuanlamah ka phone ka bih sek a,ka hmaa mi lah chuan thu duai chungin mi melh vung vung reng mai.






Theitui alo thlen chuan thaw huai chungin ka ban vat a,ka chezia chu alo man nasa.
"Hmanhmawh suh. Ka tina dawnlo che. I lakah rilru chhia ka pu ngailo tih i hriat kha,tu emaw vang anih chauh loh chuan" atih chuan a dik reng. Anita-i chungchangah min ring chhe deuh tih a ni mai a,chu tihlohah chuan mintihnat tum emaw,ka laka han sual em em a nei ngailo,keimah hian ka pawh fahranlo tih mai ania.






Kan inzo a,ani chu bathroom ah a kal lawk a,haw tura ka tho,restaurant chhung atanga lo chhuakte avang chuan ka ding chawt a.
"Ahh,Miss Sharoni pawh" tiin Rosie chu ka bulah alo ding dat a,a sawi zo chiah a hnungah Saia'n a rawn zui ve nghal. Heihi maw buai,nileng zankhua in a reh a,henu nen hian anlo chhuak dun vel a.






"Tah hian kan chawl a" tih pahin Rosie chuan Saia a melh zeuh a,ani chuan min melh ngur tihloh engmah ala sawi ve lo. Enga mah hmain a thinrim hmel em em ringawt..





"Ka hmanhmawh a,ka kal mai ang" tih paha inher mai ka tum Saia thu rawn sawi vang chuan ka en nghal haw a.
"Khawnge i kalpui kha?" Mei nei zeta min melhin a hawi kual leh a. Alo hmu vek a nimaw,pawi love,tah hi chuan ka thiam ve chiang emai..






"Heta hi ka awm" tiin Amit-a a rawn ding zui nghal a. Kan boruak chu a tang tha leh tawh hle.
"Kal ila,Scooty dahna thleng ka thlah ang che" atih chuan Saia ka melh zawk a,alo ner nawk chu ka hmu hman.






"Ngawi teh,nanghi" tia Amit-a'n Rosie hmel a en chuan Rosie chu alo biru deuh titih a. Chutah,Saia chuan min melh zawkin engmah sawi tawhlo chuan a inher a,min hnungchhawn zawngin a kal nghal. A kal chiah tihah Saizami leh Awmawmi an rawn inzui chhuak leh bawk. Anni hian min lo phiar ru reng te hi a nilo maw,hetia anlo inhmuh khawm vek danah..






"Kal ila" ka tih chuan Saizami'n
"U Sharon" a rawn ti zuau a,ka chhang lova,melh pawh ka melh peihlo. Amit-a pawh nghak lovin Saia kalna lamah tho chuan ka phei a.







"Khanu kha ka hmuh hnu ava ang e" tih paha ka hnunga lokal in thu a sawi chuan eng emaw ka hrechhuak thut.
"Khanu khan Bar a kan thlalak hlui tawh tak a nei a,engtin nge a neih theih. Anita-i hmel a lang lova,nang leh kei chiah kan ni" ka tih chuan ding meuhin a han ngaihtuah a,chutah,a kut rawn tihrik thak pahin
"Ka hrechhuak e,in rawn thawh laia Mizo thawk ve pakhat kha" atih chuan keipawhin ka ngaihtuah let a,Mizo 3 vel chu an awm ve.






"Tu ber nge ka hre mai tawhlo,kha khan vawikhat party ah alo hruai tawh. Chumi zana thlalak chu a ni thei mai ang em?" Atih chuan keipawhin ka hrechhuak leh zawk. Zankhat,club din champha lawmnaah khan party an huaihawt a,Mizo tamtak pawh anlo lang anih kha. Miin min hmu ang tih hlau reng rengin ka biru a. Mahse,khami zana kan thlalak a ni silo,a dang engtin nge alo neih.






"Khami zan khan min hmu pawh nise,thlalak te kha chu a dang daih alawm" ka tih chuan
"I hre tawhlo mi,Bar rules kha,in thalak tamtak chu Bar ah khan pholan anih thin kha" atih chuan ka man ta uar uar mai. Bar a mi chetla lai vel thalak chu bangah an tar thin a,ka duh ve loh vangin keichu ka lang ngailo ang tluk a ni. Mahse,kan thla anlo la ru anga,ka awmloh hnuah anlo tar chhuak pawh a ni mah na.








Parking kan thlen chuan a Car lam a pan nghal mai a,ka scooty ka tinung a,Amit-a a tlanchhuak chiah tihah bang phen atangin tu emaw hian ka scooty atang chuan na lutuk in min pawt thla nawk a,au that paha min pawt tu ka en chuan Saia thinrim hmel nen kan in hmachhawn lehnghal.








"Eng buaina nge i neih a?" Tih paha ka din that chuan ka ban a puam tawlh tawlh thei.
"Hmuh ila bansan lova" thinrim taka atih chuan
"Nangpawh Rosie kha engvanga hmu nge inih,itan eng nge anih?" Ka ti let va fak a.






"Ka hmulo" atih hmak chuan ka awih thlawtlo,dawr atangin anlo chhuak dun reng alawm.
"Anih chu" tih hmak paha kalsawn ka tum chu a ngaiah bawk min man lawk a,a thim chinah chuan min pawt phei dawr dawr in
"Engvanga hmu nawn leh nge inih?" Chang banga atih leh chuan tihngaihna hrelo zetin a thinrim hmel chu ka en a,tiang thil sawikual reng tur hian chakna pawh ka nei tawhlo asin maw le.






"A fanu lak letna turah ka testify angai a,Ukil nen anlo kal. Tichuan a chiang tawh em?" Ka tih chuan min thlah hnawk a.
"Anih nang ve,zana ilo kal tur thu i sawi a,lo kalloh chu sawiloh,i chanchin call leh text takngial paw'n ilo sawi lova,tunah,Rosie nen inlo chhuak dun leh tho sia" dam dap,ngeiawm zeta ka tih chuan a thusawi ngai bawk
"Kan inhmu lo" ati leh hmuk a.






"Alo nih chu" tih hmak paha ka inher chuan
"Ding rawh" ati hrawk a,ka va han ding awm hleilo e.




"Ding rawh ka tih chu" tih pahin ka scooty atang bawk chuan min pawt thla leh a,mahse,ana lo.
"Enge,eng nge ila hriat duh cheu a,ka sawi vek tawh" beidawng taka ka tih chuan kut khur lek lekin ka biang a rawn khuap a,amah en thei tur chuan min kuai dak nghal bawk.





"Tun chauh,thudik chiah ka duh. Khapa nen khan eng inzawmna nge in neih?" Dam thlup chuan ati leh lawi a,a awmdan hi ka hrethiam hlawllo.





"Engkim ka sawi chuan min haw dawnlo ami,engkim ka sawi vangin Rosie nen in inhmulo angah ka ngai thei dawn ami?" Vin lek leka ka tih chuan min hnaih leh hrut a.





"Khanu nen khan kan inhmu lo,ka nu leh Saizami te nen kan chhuak a,Lalrinawmi nen an rawn lang ve anih kha,ka hmulo" atih chuan a mit takah ka en a,dawt sawi hmel a pu lo.






"Dawt i sawi,inu a awmlo" tih paha a kut dahthlak ka tum chuan min khuap na sauh
"Ka nu chu bathroom ah a kal,kan hnungah khan alo chhuak. Rosie te rawn lan takah chuan tiin ka rawn chhuahpui hmasa a,a chhan pawh,thlalak a neihdan hriat ka duh vang a ni" atih chuan ka nuih khum hak a.







Chuti khawp chuan maw ka nunhlui chu hriat alo chak a. A tha e,ka sawi ang,ka sawi khawp ang,hmeichhe tenawm ber ka nih hunlai,ka ka atanga chhuak leh tur pawha ka duhloh ber thu chu a hre duh ngawih ngawih sia lawm le.






"Chuti khawp chuan maw ilo hriat chak a?" Thinrim taka ka tih chuan
"Aw,ka hre duh. I engkim ka hre vek duh,eng anga chhe ber pawh nise" pangngai tak chuan alo ti a.






"I hria ang,i hre khawp ang. Min ten anih chuan ka thiamloh a ni lovang. Anita-i kha ka kawppui thin anih kha,ani nen khan reitak kan inngaizawng. I hre tawh em,mipa ka hlau a,ka hnathawh vangin ka hlauloh angai,Anita-i nen khan in kan inluah tawm a,zawi zawiin nun kehsawm tawh pahnih chu kan inpawh a,mipa haw reng renga nun hmang pahnih chuan kan chak leh chakloh thlengin kan inpe tawn a. Mipa nge hmeichhia kan nih tih pawh hrelo thakin kan nung thin. Chu chu em ni i hriat duh,a dang ila hre duh em?" Hrawk phiar tawng tawnga ka tih chuan a hawi a deuh chhulh a,ka thusawi chuan a thawng takzet tih a lang reng. Hei vang hi ania,a thawi pawha sawichhuah ka duh tawhlo.







"Lianzuala vangin mipa ka hlau a. Keimah inchawm nan Bar ah ka thawk,khatah lo kha chuan hna ka hmulo,Bar kha khulaia ka hna hmuh thianghlim ve ber a ni,a dang chu mahni inzawrh ngai vek a ni. Bar ah chuan mi hausa tak tak anlo kal a,anni chu lo kan taksa hmanga lo lem in kan chhaih kual a,sex hmanglo tawk chiah chiahin pawisa kan hlawhchhuak thin. Chu chu ka nundan a ni. Chutia ka awm apiang chuan ka haw veleh ka luak nghek thin a,Anita khan theihtawpin min buaipui thin. Tenawm viau mah ila zu ka in ngai lo,mahse,zankhat,ka rilru buai em vangin ka in ve a,chumi zan chuan Anita-i nen kan inkar chu alo zim sawt a,huat inang,duh inang ta na na na chu tenawm thei ang bera awm lek lek chang lah kan ngah. Mahse,i hria em,Christian ka ni ve tih kha,ka thinlung takin hrehawm ka ti thin a,depression zawng zawng nen,Anita-i erawh kha chuan kei chauh ngaihsaktu a hmuh vangin min lo duh tak tak a,ani chuan mipa ka ni emaw,hmeichhia ka ni emaw,engmah a pawisa lo,mipa a hlau miau a. Mahse,a hna vanga mipa mutpui chang a ngah,mipa in an chawh phur zawhloh miau vangin mipa nena mutdun chu engah mah angailo.







Chunglam hnathawh ka ti dawn nge,David-a nen kan intawng a,ani rilru lam Doctor alo ni nen,zankhat kan inkawm chuan hrehawm ka tih em vangin a then a zar chu ka hrilh a. Ani'n theihtawpin min pui a,treatment leh damdawi hrang hrang nen,hna dang pawh min zawnsak hial. Mahse,aAnita vang bawkin ka Peng theilo. Hmalam ka pan san mai chu a rilru ana hle a,tah tak chuan Amit-a kha kan nunah a rawn lang a,ani chuan Anita kha a duh nghal a. Mahse,Anita chuan sum hmuh nan bak a duhlo.








Zankhat an chesuala,tah chuan Mary kha a pai ta a. Mipa nen inkawp tawh mah se ka hlat ta kha a hrethiam thei thlawt lova,hna inang la thawk reng mah ila ka hlat miau vangin nuam ati ngailo. Zankhat kan inah chuan kan inhau vak nghe nghe,chutah chuan a ni,Lianzuala laka ka thianghlimna ka hloh hnua,mipa ka mutpui lehna hmasa ber chu. Mahse,tunge anih ka hrelo. Zing ka thawh chuan alo awm tawh lova,thlakhat a liam leh chuan ka ruaklo tih kan hrechhuak leh a,Anita pawh alo ni ve chiah.






Kan tawn tur ve rengah ngaiin pawm dan thiam kan zir a. Mahse,ka theilo,vawitam tihtlak tumin ka che thin a,mahse,ka chhiat theilo. That tura Doctor pan em kha chu ka hreh si a,hrehawm tak chuan ka pai tlang a,ka chhiat hloh takah tiin chaw te kha eiloh chang ka ngah. Mahse,chung Pathian khian a thihtir duh hauhlova,Anita-i khan kei aiin a nei hmasa a. Ka neih a hun ve ta tihah Amit-a khan alo hrechhuak a,an nufa in hruai a tum a,ani duhlo chuan kan inkawp thin thu leh,neih inang pawh ni mah ila kan inthen theihloh thu a sawi ta tawp anih kha. Amit-a kha sual viau mah se,hmeichhe duhlo chung tilui mi ani lova,Anita duhthlanna chu a zahsak a. Mahse,a hnuah alo lang leh a,tah chuan naute chu a thi a,keini pahnih pawh kan inkawp leh angin kan sawi ta a ni.








Tichuan,naute chu ka nei a. Mahse,i hria em,zawi zawia ka hmangaih ve tan ka naute chu thi sa in a rawn piang chhuak a,a hmelthat tehlul nen a vun te kha a duk vek a. A kuttang ala kimlo zui asin. Ka naute kan thlah liam hnu reilo te ah Anita chu a Positive tih kan hre leh a,natna dangin a tlakbuak tel vangin a daih reilo. A thih dawnin a naute chu ka kutah a dah a,ka thih thleng pawhin Amit-a laka zep turin min ti bawk.







Chu chu a ni i hriat duh em em chu. Ka nuna hremhmun rapthlak laiber chu i hre tawh a. I lawm tawh em,ka sawi duhlo asin,ka inten ngawih ngawih a,ka ka atanga chhuak leh tur pawh hian ka duh tawhlo,ka ngaihtuah zawng ringawt pawhin mahni inthah chakin ka tuihal thin. Chutiang sawitur chuan min nawrlui leh si a. I duhtawk thei tawh em?" Tia ka sawi zawh meuh chuan ka tawng chhungin ka mittui alo luang zawih zawih tih ka hre chiah a. Ka tawngna lamah ka hrawk a thip vek bawk.






"I duhtawk tawh em?" Ka tih leh sep chuan din khawng reng pahin hmalam a melh kuau a. Eng thu mah a chhak chhuaklo.






"Tunah chuan i hre tawh bawk a,Nangpawh,khawngaihin min tibuai tawh suh. Ahma kha chuan ka lungawilo satliah mai a,mahse,tunah chuan ka duhloh ber thil min sawichhuah tir leh vangin ka hua che,ka haw ngawih ngawih che tih hre rawh" tih pahin a awm chu ka chum vak a,ka tah zawina vangin ka chum na theilo.





Ka chum ang ang chuan alo awm tawp a,min dang lova,min melh eih heklo. Ka sawilaia a awm ang khan ala awm char char tho.





Tunah chuan ka nunhlui tawp takin a hrin chhuah,ka nun thim hunlai ber pawh a hre leh ta a. Min chelh chhan tur a hre tawhlo ang chu. Ka sawi anih chuan min iai anga,min ten ru dawn tih ka hria. Chan ka duh biklo,chuvanga zep ngar ngar pawh ka ni. Mahse,ka zep chhan berin min nawrluih miau chuan,eng nge ka tih theih.






Ka sir lam ka melh a,kan hnungah Car light alo eng pup a,Saia hmel ka en leh chuan Car lam chu lo melh kuau a.





"f**k you" tih ri ka hriat vang chuan hnunglam ka hawi nghal zawk a. Amit-a chu thinrim em em maia rawn pheiin ka hmaa Saia ding khawng reng hmaiah tak chuan a rawn hnek chawrh a.






"Amit" tia ka khek tuarh chuan Saia chu alo tawlh dawrh a.
"Engvanga nawrlui nge inih,an nun hrehawmzia pawh i hria ami?" Tiin a hnek nawn leh a,va pan hnaiin Amit-a kutah chuan ka man a.






"Hnek tawh suh,duhtawk rawh" ka tih chuan
"Ani hian i duhlo chung a sawitir che tiraw. Hre rawh,an nun theih nan an taksa zuarin pawisa an thawkchhuak thin asin. Hmeichhia anih hi,zahawmna ala nei ve,Vawikhat pawh nawrlui tawh suh" tih pahin Saia chu a kawk sawk sawk a. A awmah chuan nemin
"Duhtawk tawh rawh,engmah a hrelo a ni" tia Saia ka melh chuan keini pahnih chu min melh kur a,Amit-a kha lo dan pawh a tum chuanglo.





Amit-a ka pawh beh reng lai chuan Saia chu a dinna ah chuan a thingthi thut a,makti lutuka ka en chuan
"Min ngaidam rawh u" ati sup a. Amit-a chuan a kawr pawh sawk pahin
"Go to Hell" atih khum vak a,thinrim zet chuan a kal ta a.






"Tho rawh" ka tih chuan
"Nilo,ka tum reng vanga ti ka ni" mawl hmel zeta atih chuan a sawi awmzia ka hre hauhlo
"I sawi duhlo tih ka hria. Khapa khan eng emaw chen chu a sawi thuak tawh,mahse,i ka atanga thudik ka hriat duh vangin tikhan ka nawrlui ta che anih kha. Ka tih thinrim hmasak loh che chuan engmah i sawi duh ngailo" atih chuan mittui hruk zeuh pahin ka thaw hak a.






"Eng chen nge a sawi?" Tia ka melh thlak chuan hnuailam a bih ngur a.
"Bar ah in thawk a,in hnathawh thin a sawi. Abak a sawilo" ati mawl leh tawp a.






"A pawilo,tunah chuan i hre ta a. Kan inthlah zalen thei ta a nimai. Ngaihzawn tlak ka ni lova,nupui tlak phei chu ka nilo lehzual. Mipa hlau chunga mipa in an rai theih hmeichhia,a neih ang nei pawh kawp hrehlo mi tenawm,mahni fa paina pa pawh hrelo,naute pawi sawilo pawh tina hrehlo mi nunrawng ka nih hi. Keichu min ensan in hmalam pan rawh. I thatna te thatna bawka thungrul thei tu che hmeichhia tawng la,chhungkua din rawh u. I hmangaihna leh inpekna te kha ka tan chuan a sang lutuk,ka dawn phak a nilo. Chuvangin inthlah zalen ang,ummm" ka tih chuan ngawi rengin,che miahlo chuan min melh reng a.







Sawitur reng a hriatloh danah ka sawmna a pawm ta anih hmel. Tihngaihna hriatloh hmel zetin a sam chu a tham vak a.
"Ka duhsakna zawng zawng ka hlan che. Chuan,reilote atan pawh hmangaihna awmzia min tem tir vangin ka lawm e" ka tih leh chuan ka mittui alo baw zawih a,nuih hak paha ka hruk thuak chuan Saia chu ka hmu phe ruai.






A ngaihna hriatloh hmel zeta min melhtu mipa chu zawi muangin ka inher san a,a che uk a,mahse,ka nuih sak vang chuan a awm ngaiin a awm leh a.





Kei ang hmeichhe tenawm leh rapthlak hian a lumna ka chhim hneh ngai dawn lova,inthiamlo reng renga nun ka hmanpui dawn ai chuan tuna thlah fel mai hi ka duh zawk.





Thawnthu chhiar dawn pawha a tawp keu hmasa ber thin hian,a tawpna chiang sa thawnthu ah chuan role ka la nawn thei dawn em ni. A tawpber phek keu kherloh pawhin a tawpna chu a chiang nghal em em si a,a keutu nih pawh ka zah tawhna thawnthu ah chuan ani ang mi tha famkim lutuk hi tel turin ka sawm nawn thei lova,a duh thua changtupa nih a tum leh pawh ka phal tawh heklo. A chhan chu,a tawpna hlimawm ka nei ve tlat silova,tawpna hlimawm a neih theihna tur bu dang keu tura ka kalsan mailoh chuan a thawnthu a dik thei ngailo ang.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:59 pm

ERASED


CHAPTER 22
☆☆☆☆☆☆


SHARONI POV:



Mit phe ruaiin ka scooty chahbi chu ka hawlh nawk nawk a,ka tifuh mai theilo lehnghal,ka hawlh fuh hnu chuan engmah nghak khawmuang tawh lovin ka phit chhuak nghal a,garage ka chhuak chiah tihah Saia nu leh Saizami lo chhuk ka hmu a,hmanhmawh taka ka tlanchhuak chu mak anti deuh nge,min en haw a,mahse,melh pawh melh khawmuang lovin ka tlan liamsan nghal.







Ka hawilet tawh lova,chhete pawha ka hawikir leh anih chuan a beidawng hmel khan min tina lehzual dawn. A chunga ka thinrim vanga thutawp siam ka ni lova,atana tlinglo lehzual ka nih vang a ni zawk.







Ahma kha chuan ka zep thei mai a,duh luat vanga zahtheihlohna nen,a hriat ve hma kha chu theihnghilh derin,min iailoh chhung chu tiin hmalam ka pan pui thei. Mahse,tunah chuan a ni tawhlo,engmah zep nei lovin ka sawi fai ngiat a,a hriat tam poh leh mahni insitna a lian,hrelo tawp se,kan hun hmandun ten zawi zawiin kalliam pui se,a dik nimai tur. Mahse,ka thu vek a ni silo.






Engtin tin emaw in chu ka inkhalh thleng ve thei hram a. Kawmchhaka scooty ka dahthat lai chuan Scott-a hi alo chho thauh thauh a,ka tap tih a hriat ka hlauh vangin ka hnungchhawn a,min be lovin a kal mai dawn emaw ka tih laiin
"Iva vang ve" tih pah chuan min kal hual a,ka hmaah tak a rawn ding nghal.






"Nia,ka buai deuh a" tih paha kal mai ka tum chu
"I tap ami??" tih pahin min pawt ding chawt a.
"Tap nang,ka rawn khalh chak lutuk a,khua a chhe deuh sia" tih pahin ka hawichhuak ta nge nge a.







"Anih chu" tiin min thlah mai a,min zawh zuiloh hram ka beisei.
"Ka chhuk aw,tha deuhin zir la" tih paha ka ben thek chuan a bu nghut a,ka chhuk san ta a. Hawilet lo mah ila,min enzui tih chiang takin ka hre thei.






Inah ka lut a,chhunglama inkalh khumin sofa ah chuan ka bawk zawi hnawk a. Ka hun tawn hian min tihah,ka hlimna te an kiang zel a,min hmangaihtu awmchhun pawh min laksak leh a,ka nunah hian hlim ni a awm ve ngai dawnlo niin a lang.








Khawvel hi chu amak a ni,chungnung bera,engkim siamtu khian,thil tamtak hre turin min duang a,tamtak ka tih a phal silo. Ka tana thalo tur chu min hmelhriattir lo mai se,ka mit hmuhah pawh langlo se,ka natna tur reng chu engah nge ka hmaah alo chhawp chhuah ni. Min hmelhriat tir a,min temtir a,a, nawmna ka pawh te te a,lak bovin an awm leh si,eng ang rolrelna ni ngai. Nu leh pate pawhin fate natna tur leh an tana thalo tur chu an mit hmuhah pawh an dah lang duh lova,theihtawpin an thukru thin. Chutiang chu ni mai se,engah nge maw zalenna pumhlum nei si lova,zalenna min pek ve tingtang le?????






SAIA POV:


Rilru na tih hriat taka tlan chu ka enliam tawp a,dan nghal ka duh. Mahse,ka theilo,ka tihnat belh ang tih ka hlau a ni.





A nunhlui chu ka hre duh,nilo,hriat chakin ka tuihal a ni ber. Mahse,khatiang khawp kha a ni ang tih rin ngaihna ka neilo a ni. Kha vaipa alo lan atang phei kha chuan hlauhthawnna in ka khat a,kei,mipa,mipa ah pawh senior tawh tak,a hminga Doctor ve meuh hi Vaipa khan min ti hlauthawng anih chu.







Ramdinpuii thil sawi tha duhlo lutuk leh,zep nei anga a awm te. Tha tak anga lan a tumna phena hlauh a nei tlatte khan nasa takin min tibuai a,a buaina zawng zawng hriatsak a,ka theihna laia chinfel sak ka duh. Mahse,tunah chuan ka tibuai vek zawk anih hi.






Khapa kha ka hmu a,Bangalore ah Bar a an thawh thin thu a sawi a,Bar neitu kha anih ka ring tlat a,ka zawh lahin a sawi zawm duh silo. A hnuah,an thlalak dun ka dawng leh a,chumi hnuah video mak tak ka dawn zawm leh. Mahse,vanneihthlak takin video ami kha chu hmeichhe dang daih a ni.






Hmanni pawh khan ka thinrim lutuk ka insum theilo a,ka sawiloh tur tawp ka sawi anih kha,ka thinrimna khan min bual a hneh em a ni. Ka zui ru a,kha vaipa room a ava kalchilh ka hmuh khan ka thlalak dawn zawng zawng nen,thinrim loh a har ngawih ngawih.





Tunah pawh,a then azar chauh ka hria a,a zawng zawng hriat ka duh vangin ka nawr na deuh tih pawh ka hria. A thin ka tirim a,a sawichhuak ta vek reng a. Mahse,khati khawpa thalo kha a ni ang tih rin ngaihna reng ka hrelo. A inzawrh thin chu ka ring thova,chu chu a pahrawn in a pawngsual a,in atanga a chhuah thu ka hriattirh khan ka ring tawh,alo dik reng bawk a. A thiannu boral ta nen an inkawp ang tih rin ngaihna reng ka hrelo,kha zet kha chu a chheber ka dawn pawhin ka la ngaihtuah thlenglo. Chuvanga chet mai ngaihna hrelo pawh ka ni.








Ka pa bulah a chanchin tlem azawng ka sawi a,ani chuan a fapa ka nih angin min hrechiang a,eng anga nunhlui chhia pawh nei se,min do a tumlo,ka nu pawh chuti tho.







Chuvang chuan,ka thu hriatte khan min thawng viau mah se,engkim chawk buai vek mah ila,hmalam penin ka kal zel ang. Ramdinpuii lakah hian beidawn ka tumlo,ka beidawng theilo. Ka lakah rilru dang pu ngailo angin awm mah se,min ring a,a thuruk te min hrilh anih chuan,danglamna chhete tal chu ka nei ve tihna a ni.






Min lo nghak rawh,ka tihsualte siamtha in,i natna te chu ka tuam dam sak leh ang che,i chanchin i sawi vang khan ka hmusit lo che a,ka ngaihniam bawk heklo che.





SHARONI POV:


Khami ni atang khan nihnih lai a liam ve leh ta,Saia hmel ka hmu nawn tawh lova,a call emaw message pawh ka dawng bawk heklo. Ka ngailo ka tih chuan dawt ka sawi a ni anga,mahse,ngai thei dinhmunah ka ding tawhlo.





Zanah David-a alo lang leh a,ka nu te ina kan kal atang khan ani pawh a rawn lan lehna hmasa ber a ni. Saia nen an inhmuh thiamlohna pawh a bo ta nge,engmah a sawi tawhlo.





"Buaina i tawk em?" Chik zeta min melh pah chuan ati a,ani hi chuan min hrechiang ve thlawt,ka buai zuallai zawng zawnga hmu ve tu kha ani miau a..
"Aw" ka tih sep chuan thaw hawlhin a thu tha nghal a.
"Ani khan a tina che ami?" Thinrim hmel taka atih chuan
"Chutiang a nilo,i ngai sual laklawh mai mai anih kha,a suallo" ka tih chuan a lawm hmel em em chuangloh..






"Tinge hman ang chiaha i awm si,hmana i natna i beihlet laia i zia ang chiah kha i nei tih i hria em?" Atih chuan za lo takin ka nuih sak a..
"Saia khan engkim a hre tawh a?" Ka tih chuan a meng phawk nasa.






"Engtin nge a hriat theih?" Atih chuan ka chhang mai lo
"A nawr lui che tih sawi hauh suh" atih fak chuan
"Nilo,min nawrlo. Ka duh thu in ka sawi. Dawt sawi kual reng kha hrehawm ka tia,zep nei tawhlo turin ka sawi fai ta vek anih kha" ka tih chuan kei ai aiin alo hah hmel zawk.






"Chuan engtin,a kalsan phah che ami?" Atih leh chuan
"Ka hrelo,tawpna chu keima siam ania,min tawp san ve chiah em ka hrelo" ka tih hap chuan
"A kalsan lovang che,chutiang zia pu in ka hrelo" ati leh lawi a.





"A hriat atangin ala reh vang vang,engmah a sawi zawm tawhlo. Bakah,chiang tak khan ka sawi a,ka phulo em a ni" hnuailam bih paha ka tih chuan
"Tikhan sawi tawh suh ka tih kha. Hmangaihna tihlohah chuan phuloh a awm thei. Mahse,hmangaihna ah chuan a awm tak tak theilo" atih chuan ka nuih ringawt a,ni tak tak se tha tur,a tuartu tan a nawmlohzia hi an hre ve tak tak si lo.




A haw hnu chuan mu tura insiam nghal mai ka tum a,kawngka vel ka kalh fel a,kan thil inna te ka sil zawh chuan khuma ka phone dah alo ri ral ral a. Ka va en chuan ka nu alo ni,zan zanah eng tak chu ni ang maw.






"Aw" tih pahin ka kut ka hru hul mawlh mawlh a.
"Mate,ila mu lo maw,hei ava lawmawm ve" atih chuan eng emaw thil tha an tawng a ni ngei ang,a zan zana min hrilh a tum nghal chuk chuk danah.





"Aw,a ni maw,sawi la" tih pahin khumah chuan ka thu dat a.
"Ka fanu hian pasal i nei mai ang tih pawh ka lo ngaihtuah ngailova,naupang emaw kan tih lai che in midang mo ilo ni mai dawn sia,kha i inlengte pawh an haw fel chiah" atih chuan a tho â emaw,a damdawi ei a rui anih ka ring.






"Iva sawi mak" ka ti ringawt a,a natna vangin a haihawt a,thil nilo pui pui sawi a hrat thin vang a ni.
"Eng chu,zak mah ta che,zahna chhan tur a awm hleinem. Midang tihdan ang bawkin lokal nawn leh turin kan tih kha" atih chuan a fiamthu hauhlo.





"Tute maw kal nawn tura intih?" Tih paha ka thawh zawk chuan
"Aw,Saia palaite maw le" ati ta mai. Eng nge maw a sawi le.






"Saia palaite maw?" Ka tih ha chuan
"Ni e,a Patea leh apa pawh anlo tel a,Palai pakhat phei kha chu kan hmelhriat hlui alo ni lehnghal. I sawi lawk si lova,anlo lang thut sia,kan chebuai tep alawm" lawm hmel taka atih chuan a ngaihna reng ka hrelo. Anni hian min tihder an tum zawk anih te ka ring hial.






"Ka nu,engmah ka va hre ve lo ve" ka tih chuan
"Awi,mate,i zak anih kha,kan sawi fel vek tawh" Atih lai takin kawngkhar a ri a
"Tu emaw anlo kal a,ka lo be leh ang che" tih paha ka chhuah chuan
"Saia aniang chu,inbe rawh u" tiin a dah ta a,keipawhin amah anih ka ring chiah.






Thawk hak paha kawngkhar ka haw chuan amah alo ni ngei. A hmel chu a ti deuh duk a,a kun deuh chhul bawk. Mahse,a tawng chiah,a landan atanga ka lo teh chu ka tisual tih ka hre nghal.





"A landanah chuan i hre tawh a ang" tih pahin a rawn lut nghal a.
"Enge awmzia?" Tih pahin ka lut zui ve nghal.
"I hriat ang kha nimai" awlsam hmel fe a atih chuan ka ngaihdan a ni hauhlo.






"Tawpna kan siam tawh emaw tia,ka hriat miahlohvin palai ilo tir maw?" Awihlo lutuka ka tih chuan zamloh hmel zetin chair chu a pawt chhuak a,min hmachhawn zawngin a thu nghal zat.





"Tir e,zirtawpni ah an kal leh anga,tah chuan inneih hun an sawi ang" phar hluai paha atih chuan ka thin a tirim mai dawn.
"Ka duh ami,eng nge vawikhat pawh min rawn lova ilo chet,ka then tawh che" ka tih hmak chuan engah mah ngai hmel pawh a pu lo.






"Min then ringawt a,ka then ve hleinem che,hun ka pe mai che ni. Inthen tur chuan 2 angai" tih pahin a kuttang 2 chu min hmuh a,rang zeta a kut chu lo man pahin
"Innei tur pawhin 2 angai" ka ti that a.






A kut ka man ang ang chuan a lamah min pawt hnai dawrh a.
"2 chu kan ni reng alawm" min melh ngul pah chuan ati leh.
"Sawi ngaihna pawh ka hrelo" tih pahin ka ding ngil vat a,ka sam ka tuai thur vak ringawt.






"Sawi ngaihna hriat vak angailo,kan sawi vek dawn alawm" atih chuan min runluih deuh em maw ni.
"Nang hian min runluih nge?" Tia ka melh hrawk chuan
"Runluih phal chi rual ini lo" ati awlsam leh mai.






"Haw rawh,ka mu tawh dawn" ka tihngaihna hrelo chuan ka ti ta tawp a.
"Haw dawn e,palai kal leh hunah chuan i awm angai tawh ania" tih pahin a tho hluai a.





"Iti tak taklo tiraw,infiamna chi anihloh hi" tia ka inher chuan thutak fe in min lo melh reng a.
"Ka pian ahnu lama ka thutak ber a ni" tih pahin a kuangkuah leh nghal hlun.






"I fiamthu loh chuan tawp rawh" ka ti ram hmak a,a chezia hian min tilawm hlawllo.





"Ka titlang ang" ati ve hmak.
"Monu tellovin in innei dawn nia" ngeiawm zeta ka tih chuan min pan hnai hrut a,kei ka lo tawlh hnung vat.





"Min hlau ami?" Atih thawp sup chuan
"Hlau lo" tih pahin ka thu daih a.





"Ka nawrluih vang che in min ngaidam la,tunah pawh ka nawrluih leh dawn vang che in lo inring rawh" atih chuan awihlo lutuk in ka melh chhova,in rintawk hmel fe chuan alo ding luah..





"Eng nge,eng nge i duh. I hriatduh ka sawi vek tawh kha,min tibuai tawh suh" thinrim taka tiin ka tho hluai a,kan inhmachhawn ta ran mai.
"Nangmah ka duh che" tih pahin a aia hnaiah chuan a rawn ding a.





"A theihloh tih i hriat kha,in chhungkaw mo atan ka tlinglova,i nupui ni turin ka thianghlim tawk heklo" ban vai meuha ka tih chuan ka ban alo man chawt a.
"Kan chhungkaw mo ni tura tehna kan neih ka hre hauhlo" atih chuan ka ban chu ka pawt sawk a,ka pawh rualin a lamah min hnuk hnai ve sauh.






"Tinge,i hriatthiam theihloh,kan theilo. Miin tunge ka nih an hriat hunah in zavaiin in hmingchhe dawn. Bar a inzuar thin hmeichhia hi Doctor nupui ka ni tih an hriat chuan an nuihzat ang che a,i hnunglamah an sawi zui ang che. Nang chauh ini lo,i chhungte ngaihtuah ta che" ka ti ta thlawt a.






"I sawi zawh tawh chuan ka sawi ve ang. Lo ngaithla rawh,ka hrethiam,engkim ka hrethiam vek. Miin tunge inih an hriat hunah chuan ka nupui ini tih an hria ang,Bar a inzuar thin ka nupui ani tih an hriat huna ka hnunglama min sawizui anih pawhin eng nge pawi,ka hmaah nang i awm a. Ka chhungte an sawi chu eng nge pawi,chhungkua kan nia lawm,a tha lamah kan in lawm tawn anga,a chhe lamah kan infuih bawk ang chu. Chu lovah,tunge Bar ah i thawk tih hria se itih,khapa leh kei kan ni mai a,keiin ka sawichhuak dawn hauh silo,tunge sawi se itih???" atih ve duah chuan sawi tur hre lovin ka ngawi tawp tawh.







A sawi hi chu a dik vek. Mahse,keimah annihloh vangin engmah an hrelo.
"Kei hmeichhe tenawm tak vang mai mai hian i chhungte chuan mualpho an inhuam lo tawp ang" ka tih leh chuan
"Mualphona a thleng anih pawhin,anni chu an mualpho lo tawp ang. Mualpho tur chu kan 2 kan ni ang,nupa kan ni dawn tlat a" atih chuan ka beidawng zo,awmdan tur pawh min ti hrelo.






"Tiang zawng zawng ka tihsual hnuah pawh min la pawm thei ami. Engmah thlenglo ang maiin min en thei dawn ami,nula hnahkhat,changkang tak takin an hel sup sup lai che hian?" Tiin ka melh kar a. Chilh lem khawlin
"Aw" ati sup a.






"I theilo ang,a hun ala thlenloh vang mai mai a ni" tih pahin ka hnungchhawn a,sofa ah chuan ka thu leh nghal,tinge a luhlul em em mai le.






"Haw tawh rawh,i chhungte chu i hrilh mai dawn nia,a tul chuan keipaw'n ka rawn sawi ve mai ang" tih paha chhuat ka bih tlat chuan a thaw ri chauh ka hre tawh.





"Anih le,i duhdan anih chuan ka tilo theilo anih chu,ka chhungte chu ka lo hrilh dawn nia" atih chuan ka melh chho zawk a,ipte zen run chungin min lo melh thla ve reng.





"Ka tih ring suh" tih pahin ka hmaah chuan a rawn thu hniam thut a.
"Kha thu kha ka sawi ring suh,i dam chhung chuan ka sawi lovang. Ramdinpui,vawi engzat nge ka sawi,luhlul viau suh. Eng anga nun duhawmlo pawh nei la,ka duhloh phahloh che tih hi vawi engzat nge ka sawi dawn. Kan thusawi hi midangin lo hre ve se chuan an ning tawh ngawt ang. Nge,I theihnghilh reng dawn ai chuan i bangah hian kan tar dawn mi????" tih pahin ka mal chunga ka kut chu a rawn la a,a hum hnan nghal hmak.






"Ummm,tun chauh huaisen leh rawh,abak chu min rinchhan vek thei tawh ang" tih pahin ka kut chu a lakang a,a hmai nen chuan a tisi vang vang bawk.






"Ka hrelo" ka tih hap chuan ka mittui a tla lek lek
"Aw le,tihian ti ang. Tuna i chhanna ang zelin ka awm ang,i duhlo hulhual anih chuan i duhdan ang ngeiin ka rawn lang nawn tawhlo anga,i ngam anih chuan engkim keima'n ka ti vek ang. Aw leh aih chauhin min chhang rawh" ati ta.





"Ka hmangaih che em chu ka hrelo. Mahse,ka hnar biklo che tih chu i hria. Ka sawi leh pek thin ang,min tiam thei em. Ka hun kaltawh vanga min diriam nawn leh dawn ai chuan inkawploh law law ka duh a,ka hun kal tawha mipa i thik dawn ai chuan hmeichhia angin min enlo law law rawh. A pawimawh ber,ka chhan theihloh chhan che chu,in chhungkuaa mipa fa awmchhun ini. Mahse,min nei anih chuan chi i thlah theilo maithei,ka sawi awmzia chu i hria em,fa ka pai theih a rinawm tawhlo anih chu. Ka naute a thih khan Doctor in chiang takin a sawi a,ka lo chet tenawm tawhna vangte pawh a ni ang,fa ka pai theih a rinawm tawhloh thu a sawi a,fa pakhat pawh ka hrih sak theihloh che chuan a pawi dawnlo em ni????" Mittui tling veka ka en chuan Doctor thusawi lai ka ngaihtuah a,ka hun kaltawh vanga ka inchhîr ngawih ngawih lai awmchhun a ni hial ang.




Ka hlauthawng em a ni,mipa ngainat vakloh sa nen,mipa rinna hi ka tlachham ngawih ngawih. Bar a lokal thin tamzawk kha mipa anni a,nupui nei lai anni bawk. Chu te hlei hlei chuan mipa min ti ringlo lehzual.





"A pawilo,ka duh chhan che chu i nunhlui that leh thatloh lam ni lovin,fa i neih theih leh theihloh lam pawh a nilo. A chhan chu nangmah chauh ini,chu chu engma'n ati danglam theilo" atih chuan tah hak pahin ka kuah ta thlawt a.





"Ka lawm e" ka tih chuan min kuah let pahin alo nui mai a,min tihlauthawng a,chan hlau ngawih ngawihin min siam a,amah thlanglo theilovin min siam miau a,duhthlan tur dang ka neilo,chan ka duh bik teuh si lova.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:59 pm

ERASED

CHAPTER 23
☆☆☆☆☆☆


SHARONI POV:


Inneih ka pawm hnu chuan a lawm hle a,ani chang a nilo,a chhungte pawhin lawmthu min hrilh hial. Apa phei chuan
'A leng tar mai dawn maw kan ti tawh a'tiin a fiam a. Ka hriat miahlohvin Palai vawikhat an kal tawh a,a hnua an kal leh chuan ka hriatpuina ngei a ni ta.






Palai lokal zan chuan a mawiah ka nu te inah chuan ka phei a,riah chu ka tum chuanglo. Apa,a patea leh patling 2 hi anlo kal a,thil chiang sa anih tawh vangin minute tam an hmanglo. An sawi zawh chuan hmanlai thilte sawiin an titi hlut a,Palai zinga pakhat chu ka nu thianhlui alo ni ve chiah bawk nen,thingpui sen hang an lam zing hle.







Naktuk lamah inneih hun leh a tul dangte relin chhungkaw pahnih kan kalkhawm dawn a,zanin atan chuan an duhtawk rih a. An chhuak tur kawngkhar an thleng hman tawk tihah,Saia chu a rawn lut hlawl a.






Apa chuan nuih pahin
"Mopa tur pawh mawnga hawlh ang mai anih tawh hi" tiin a fiam a. An titi chhung khan pawnah a ding char char anih ka ring,nichin atang khan thawm ka hriat reng danah.






"Lo va haw mai rawh u,kinah ka lo haw ang" tiin apa te ho chu a kalpel thuak a,ka dinna lam chu lo pan vatin
"Eng nge chanchin?" Ati vat a,ka fiam hlak chak tlat.





"Anla sawi fello,anlo kal leh phawt angai anih chu" thutak fe a ka tih chuan a meng awk a.
"Tinge,engvangin,tunge chu chu rel?" Ati nghal vat a. Ka la nui duh chuanglo,ka nu chu a rukin alo nui alo nui a. Lianzuala erawh chuan inlengte kha ava thlah aniang.






"Ipa sawidan alawm,bakah,vawithum vawili te alawm an kal nawn thin,chutin an ti rum rum ngailo" dam dapa ka tih chuan kawng dawmin a thaw hawk a.
"Ka pa sawi maw?" Atih chuan ka bu nghat a,a kut chu vai vutin a hmai a tuai thuak a.






"Ka pa mai mai chu" tih leh a inher zawk a
"Tikhan lo awm rawh,ka rawn lam leh ang che" tih paha chhuah a tum chu ka nu in nuih vak chungin
"Saia,lokal teh,a fiam che anih kha" alo tih chuan a ding chawt a.





Ka nu bawkin
"Matei hian a fiam mai mai che anih kha,lokal rawh,thu rawh" la nuih reng paha atih chuan min melh thut a,a thinrim dawn emaw ka ti hman lek lek. Mahse,min rawn en a,a thinrim hlau taka ka lo nuih chuan chal tuai meuhin a nui ta ngawt a,hahdam huai hmel a pu.





"Tikhan lo inkawm ula,chumi hmain Saia pindanah min va hruai lawk ta che" ka nu'n atih chuan nuih suk pahin min melh a,a kut chuan min kawh a
"Tikhan lo ding ang che" lawm hmel zeta tih pahin ka nu chu ava pan a,an phei chiah Lianzuala a rawn lut ve leh chiah.






Min kalpel tur chu a ding leh zawk a,kuangkuah chunga ka lo ding reng chu min melhin
"Ka lawmpui hle mai che,pasal tha tak i hmu dawn a" atih chuan ka chhang lova,ka rilru lehlam chuan
'Ka lawm e' tih mai a duh a,mahse,a lehlam zawkin
'Ilo lawm ve vak angailo,nangmah vang chu nilo se kan innei daih tawh ang' tih khum hrep alo chak leh bawk si.






"Nia" tiin ka nuih luih hram a,buk nghut pah chuan pindan lam a pan ve mai a. Ka nu bula a awm a,in hmangaih hmel taka an han in duat vel hmuh hi chuan ka lawm ve thin. Ka huatna te pawh dahthat ka duh,mahse,a har ve thin a ni.






Verandah lamah chuan chhuak thla in ka hma lama eng pe tuar chu ka thlir a. Nichin mai pawh khan keimah ka la inzawt nawn,ka thutlukna siam hi a dik ang em. Ka tisual mai ang em tih hian ka rilru a tibuai. Saia lama rinna ka neih tlem vang a nilo,ka ring lutuk. Ka hlauhthawn chhan chu keimah hi ka ni a,an beisei ang ka phakloh mawlh hi ka hlau.






"Eng nge ilo ngaihtuah a" tih pahin ka kawngah chuan a rawn kuah thut a,a awm chu lo ngheng nghal dat in
"Kan hun tawn hi maw le,kan inneihna lam tur te" ka tih chuan ka lu chung zawnah a thaw ham ham a.






"I inchhîr ti sawi hauh suh" tih pahin ka nak chu a piai hlak a.
"Teuhlo,ka inchhîr lo. Mahse,i chhungte laka ka inthlahrung a" ka tih sep chuan rawn kun hniamin ka darah khabe a nghat a,ka biang si lek lekin rawn hnaiin
"Lungngai suh,ka chhungte chuan kei ai aiin hriattthiamna ang ngah ania. I inchhîr ngailo ang" atih chuan nuih pahin a sam chu ka lo chul a.





"Nichin khan min tihder a" tih pahin ka biangah chuan a rawn fawp tawk a,chet zawk pahin
"I chebuai kha hmuh a nuam alawm,i hlauthawng sia" ka tih chuan a lamah min pawt hnai zual sauhin a kut chu a tinghet lehzual a.





"Ka hlauthawng tak tak alawm. Ka nghak rei tawh a,i sawi anga ka pa in alo ti tak tak anih kha chuan va chhuahchhal nghal rum rum kha ka duh mai a,ka nghak thei tawhlo viau ania" atih chuan ka lo nui mai a. A ngahhleh ang zet hian keipawhin ka nghakhlel a,mahse,tihlan dan ka thiam ve lo.





Zan a rei tak tak hma chuan ka nu te mangtha in min thlah kawi leh a,reilotê alo thu a,12 a hnaih thuak vangin a haw leh mai.





A tuka college ka kal tur chu thlah ka ngaih leh ngaihloh min zawt a,scooty ka neih tho vang leh in lama an buai ve em vang chuan ka duhloh thu ka sawi a,min hniallo ve teh mial..





College ka thlen chuan Saizami pawh ka hmu nghal a,Vanthlahlua nen an inzui ka hmu khat viau a,an inthen leh zawk tawh em maw ni.





"In chanchin ka lo hria a" ati sa sa chuan
"Tumah hrilh suh aw,an sawi buai peih emai" ka tih chuan buk nghat nghat pahin a kal ta a. Vei reng neilo ang maia a kal ka en chuan awmze neilo takin ka nui a,nun pangngai tak nei ila chuan amah ang rual ka nih khan hlim takin ka nung ve tur ania,mahse,ka thatlai hun zawng zawng tawrhna in ka vui liam zo tawh si.







Ban dawna garage lam ka pan chuan Rosie bawk ka tawk leh a,a hmel pawh saw ka hmu reng peihlo. Kalpelh mai tuma ka hmuhlo der chu ka huat tur takin alo nui vei hak a.






"I thlalak mai mai chuan Saia thinlung a sawi nghing zo lo a nimaw?" Atih chuan ka melh nghal siah a.
"Ilo zem hneh hle anih dawn hi" atih leh chuan ngawi rengin ka phone ka phawrh a,Amit-a thalak min lo thawn ka hmuh chiah chu a meng phar nasa.






"I thalak ka neilo emaw ti suh,ka thehdarh i duhloh chuan ngawi rengin awm rawh" ka tih fak chuan rawn ban a tum ngawt a,zahna hi chu ava han hrelo ve tak..





"Min tibuai leh anih chuan hemi lo pawh hi ka tidarh ang" ka tih chuan a ding zum zat a,a ngawi ta ngal mai. Dawihzep lutuk.





Ka scooty chu lachhuakin ka tlansan ta daih a. Amit-a thil min lo thawn chu a tha dawn viau e. Bangalore lamah a chhuk leh tawh a,Bar a thlalak hlui alo hai nge. Rosie leh a thiante nuam chena an suk nghawng nghawng lai leh an video 1 min lo thawn a,sual chhuah kher ka tumlo. Mahse,min tibuai zui anih chuan a zirlaite'n an sawi zui ve nasa khawp ang.






Naupangho exam hun alo thleng a,hna lamah kan buai theuh vangin inneih lam chu kan la awn vak thei lo,exam zawh lamah kan buaipui dawn chauh a ang.





Exam zawh hian Saizami te phai lamah anu check up turin an kal dawn a,Lily te chawlh neih hun nghah angai ve bawk nen,Saia hmai zah viau mah ila upa lam ho tihdan a ni miau sia,kan la nghak leh hlek dawn chu anih hi.





Mahse,zawi zawi chuan mamawh vel kan inlei khawl ve tan a,a hun alo thlen meuh chuan a ni deuh thut dawn sia tiin eng eng emaw chu kan buaipui ve tan. Mizorama ka let leh hnu hian thian ka kawm tam lova,mo thiana han hman mai tur pawh ka hrelo,chumi chu hriain Saia chhungte chuan min lo buaipui sak vat a.





A patea fanu kei aia nau hret chuan a chak zawng tak alo ni hlauh a,thian atan ka hmang mai dawn anih hmel.





Ka hman chang chuan an in lamah pawh ka va lang ve zauh a,chaw erawh ka la eilo. Anu pawh kan inhmuh tan dan fuh chiahlo mah se inchhung khurah na na na chuan nu tha tak a ni tih ka hre ta a,tlem chuan ka nel ve deuh.





"I hria anga,Saia hringtu hi ka ni lova,chuvang ania ahmaa ka khirh deuh chhan pawh kha. Anu tak ka nilo tih an hre fur a,nupui lo nei fuhlo ta se,keimah min dem rawn daih duhtu tur kan chhungte zingah hian an tam a,nu sual ah te pawh ka chhuak daih thei. U Malsawmi te nufa khan vawitam i chanchin hi an sawi thin a,atir chuan ka awih vaklo. Mahse,an sawi zin hnuah,fa i nei tawh tihte kan lo hre lehzel a. I hre tho anga,Bangalore vela mizo hmeichhe awm,hnathawh leh zir mumal pawh neilo hohi chu kan en dan a dan deuh mai hi. Tiang kha ini ve ang tih ka hlau lutuk a,chuvanga zawhna ngah viau pawh kha ka ni. Hmanah keimah vangin a hmingchhe hle tawh a,tiang hun kha kan tawn leh mai ka hlau a. Min hrethiam dawn nia" atih chuan ka rilru zawng zawngin ka hrethiam.






Reilotê atan nu nihna ka chelh ve zawk a,ani phei chu hun reitak nu alo ni tawh,fate hmangaih natzia leh hrinloh fate enkawl harsat tur zia phei chu ka ngaihtuah thiamlo zawk. Chuvangin,alo che mak deuh pawh kha ka thiamlo hauhlo.





Saia pindana kan awmlai chuan a ruak deuh riau a.
"Sawlaiah sawn dawhkan dah ila,make up leh eng ilo vel dahna tur" tia ka kawh chuan khuma thut pahin min melh vung vung a.
"Sawi zel rawh,kan ti zel dawn nia" atih chuan ka lai lek lek.






"A dang vak pawh a ngailo,dawhkan chu a nimai,a var ni thei se" ka tih chuan min lo ban a,ka thut hnaih chuan khuma awn duai pahin ka kawngah alo kuah a.
"Kan siamtir khawp ang,ngai itih chu sawi zel la. I duh chuan khum pawh kan siamtir ang" atih chuan a hmel ka enthla a,mitmeng danglam zeta min lo melh chuan
"Chulam ka sawilo" ka ti vak a,rawn thawh pahin a nui hawk a.






"Ka uang anih kha. Tak taka,thalo itih lai chu sawi hreh suh,i damchhung chuan he pindan hi i pindan a ni ve tawh dawn a,i duh ang thlap a ni tur a ni. Pindan chunga tui chenna dah i duh pawhin kan lai khuar duk mai ang" atih chuan
"I over e a" tiin ka beng thlawp a,a awm ngaia awm reng pahin a nui mai mai duh chauh..






"Tak taka,naupangho chu exam zo vat vat se,ka nu pawh in check up zo thuai se,ka hmanhmawh tawh riau ania" ati leh a.
"Keipawh ka hmanhmawh alawm. Mahse,upa zawkte thusawi hi awih hrih mai angai a,kan tana tha tur zawk pawh aniang" ka tih chuan a ngawi vung vung a,a sawi buai leh tawh chuanglo.





Heihi ania amah ka duhna em em chu,ka zai a ngai thiam a. Ani ang hi a ni ka pasal duhthusam,ka thuhnuaia ka dah theih siloh,ka thu ngai pawimawh thintu hi ka lo suangtuah thin ngei chu a ni.





Kar lovah naupang an exam zova,Saia nu te pawh in check up tur chuan an chhuk thla vat a. Keini erawh inneih lam kan lo hawi ve tawh thung.





Saia chuan a unaupa ve tho thianah a hmang dawn a,keiin a farnu ka hmang dawn bawk. Kan 4 chuan mo thuam leh eng ilo vel enin nitin deuhthaw kan chhuak a. Kan duhtak kan la hmu theilo.




Chhawm tur puan thenkhat leh inneih sawmna card velte chu kan buaipui a,nileng lenga chhuah chang kan ngah.





Anu te chu anlo haw leh tawh a. Mahse,Saizami a rawn let tello
"A thiante anlo awm ve nual a,nithum vel a cham zawk dawn anih kha" anti mai a,mi hausa fanu tih takah,chawlh hman pawh an awlsam e. Lily pawh man hlan hma ni chiahah alo thleng ve hman dawn chauha,engmah min buaipui hman dawn tak taklo a ang.





Ka nu pawh a hlim hle a,lungchhe hma tih takah a mittui a tla leh thin a. Lianzuala pawh ka rin ai daihin a fel sawt a,ka pasal neihtur chu a phur phurah alo tang ve a,ka chhawm tur leh in lama buaipui chi engkim chu amah vekin a buaipui a,ka awl phah phian.






Naktuk mai hi man hlan hun a ni tawh a,vawiin hian college lama ka thawhpuite'n lawmna neih an duh vangin college ah ka chho lawk dawn a,a zawhah Saia te in ka tlawh leh ang.





Ka inbual a,ka insiam zawh chuan ka chhuak nghal mai a,a hmun ka thlen chuan ka phone ka theihghilh tih ka hre chiah. Ka phone ber tello chuan a dik thei dawn lovin ka hria a,let leh mai tuma scooty lam ka pan leh chu zirlai naupang thenkhat anlo kal tak tak a. Semester thenkhatho hi exam la zo ve lo leh,Club thiltih vanga kal te an awm nual.





Tha te te in min kalpel dawn emaw ka tihlaiin eng emaw sawi sep sep chung chuan min melh hrek hrek a,pasal ka neihtur thuthang vel anlo hria anga,mak anti deuh anih ka ring mai a,ka ngaihsak vak duh lemlo..





Mahse,College kawt ka thleng a,midang zawng zawng pawh chuan min lo en tho. Pasal ka neih dawn vanga chuti vaka min en chu ka hrethiamlo hle a. An phone an bih a,ka hmel an en leh a,thenkhat hmeleh chuan thinrimna leh tenna ka hmu thei.




Ka ngaih chu a tha tawh chiahlo. Hmanhmawh deuhin kan thiltihna tur lam ka pan hlawk hlawk a,kawngkhar ka nem hawng tur chiah a chhunga zirtirtu awmte thusawi vang chuan ka tawp chiang hle.




"Amak ka ti hle mai,Synod hnuaia zirtirtu ni ve meuh si,tiang te han tih thin"
"Keichu mak ka ti vaklo,a chanchin ka zawh khan Bangalore ah a awm thin atia,khulama awm thin ka hmelhriat ka zawh khan a sawi tha duh vaklo" tihte chu an sawi.





"Aaa,hriatsual a awm a nilo maw,Miss Sharoni berkher" tih ri ka hriat chiah chuan ka hawng rawp a,phung hmu ang maiin min en phawk hru hlawm mai.





Rosie chuan min en pahin
"Tunah ila chhuak a maw,inah tawm tur inia sin" atih chuan
"Eng nge thleng?" A ngaihna hrelo lutuk chuan ka ti ha a,min chhang lovin an inmelh hruk hruk ringawt.





"Miss,eng nge inlo sawi kha,eng nge tih dikloh ka neih?" Tih paha ka bula thu thin ka melh chuan Sir zawk chuan
"A,Miss Sharon,i phone kha han check chhin teh,eng emaw video a darh ni awm tak ania" atih chuan ka lungphu a in thum nghal dup dup a.






"Ka video maw?" Khur lek leka ka tih leh chuan an bu nghat a,rang lutuk in ka chhuak a,kalkawnga zirlai ka kalpelh hote chu ka su phei deuh nawk nawk a. A then chuan min lo su let nawk bawk.





"A zaklo hle mai,a pasal tur paw'n a duh tawhlo ang" tih te
"Tiang te chu zirtirtu pawh ni tawhlo se" tihte chuan min lo tawngkhum a. Engmah thu chiang ka la hriatloh vangin ka chi ai mai theilo,ka scooty chu tinung in ka ving chhuak nghal a..





Kan veng ka thlen chuan alo reh deuh thuap a,hmanhmawh lutuk in kawngkhar ka hawng a,ka phone theihnghilh chu ban lawkin kut khur der der chuan ka tieng a,ka hlauh tizual tur ringin Saia missed call 10 leh midang call alo tlar thla tuarh.





Ka tha a khurh nasat em vang chuan ka thu hnawk a,hlau chung chungin ka grp awmna ho chu ka en a,hetah chuan a awmlo. Fb lama mi an troll thinna group ka hriata ka lut chiah chu au thawt pahin ka phone ka thlauh nghak dawt






Engthil nge ka hmuh hi,saw saw,engtin nge,nilo tunge lo nei. Tha khur zawih zawih chung chuan ka chhar kang leh a,Anita nen kan awmdun lai leh,Bar a kan chetkual vellai chu chiang takin alo lang a,min hretu tan chuan hai rual ka nilo.






Hmun tinrengah chuan an post darh a,a then ka nihna lo risk tawk an awm a,a thenin naaa takin min ten thu an sawi bawk. Mizo hnam timualpho ang hialah te min chhuah.



Saia call alo kal leh chiah au vak pahin phone chu bangah ka vawm pawp a. Ka lungphu mai nilo,ka thluaka thisen zam che vel thleng chuan ka hre pha vekin ka hria.




Engtin nge anih theih,tinge ka nunhlui hian min la umzui reng. Tunah chuan beisei lehchuan tur ka neilo. Pasal nei mai tawh tur ka ni a,tiang anih chuan eng inneihna mah a awmlo tawp ang.





Hlau tak,tihngaihna hrelo,mittui tla thei si lova ka thut tawm renglai chuan chhuata ka phone chu alo eng leh a,ka en chuan ka nu alo ni. Hlau chung chungin ka ban a,ani pawhin alo hmu tawh ngei ang..





"Hello" khur der der paha ka tih chuan
"Mate,eng nge thleng hi?" A rawn ti ta chiah a,tah zet zawng,ka awmhmunah hian tek in min rawn deng ro vek mah se pawi tihna pawh ka nei tawhlo.





"Nuuu" ka ti tiau a,sawi tur reng ka hrelo,ka lei chu thlun beh ang hmak a ni.
"Nu tilo khan sawi vat teh" atih thak chuan
"A dik,keimah ka nih kha. Bangalore ah khan scholarship ringin ka nunglo,i fanu hi a inzuar thin,ka inzawrhna pawisa hmanga inchawm mai ka ni" ka tih vak chuan
"Engmaw i sawi a,Ramdinpui,tunah inah rawn kal nghal teh,engtin nge tiang chuan i awm theih zawk. Rawn thlawk chho nghal rawh" atih ve vak chuan






"Aih" tiin ka au tuarh a
"Iva rapthlak ve,tiang tur hian ka zirtir ngailo che. Inu hi entawn tlak ka awmlo,mahse,tiang kher kher chu i lak atangin ka lo beiseilo asin. Rawn chho nghal rawh" atih leh thak chuan
"Ka rawn chho duhlo,ka rawn chho lovang. In thiamloh vek anih hi in hrelo mi,tinge tiang khan in awm?" Ka tih chuan ka mittui a rawn luang zung zung a.





"Engmah sawi belh tawh suh,rawn chho phawt teh" insum deuha atih leh chuan ka insum thei tawhlo
"In thiamloh anih hi,ka harsatna min hriatthiam pui thin ni ula,tiang hian ka awm lovang,ka pasal tur chhungte pawhin engtin nge min ngaih anga?" Ka tih khum nghek a.
Anni dem hian sawtna a neilo tih ka hria,mahse,ka beidawng em a ni.





"Ramdinpui,tawng lo khan rawn chho ringawt rawh. Eng nge kan thiamloh a nihna,i zirna senso kan tumlo ngai em,tunge mahni thua chhuak thut kha,scholarship dawng anga insawiin,i inzuar thin a maw. I rawn let pawhin vawitam ka sawm che,i rawn haw duhlo anih kha. Ilo khatih vang anih kha min hlata i awm,rawn chho nghal rawh" atih hrawk chuan ka off hmak a.






Ka mittui chu hru hul sawk sawkin helmet ka ban a,kalna lam tur ber pawh hrelo chuan ka inkhalh chhuak ringawt a,ka chhuak fel chiah tihah ka hnunglam atanga Vanthahlua au ri ka hria a,min ko a ni ngei ang. Anni chhungkua pawh khuan mi tenawm hmuh bakin min hmu lovang.





Ka tlan zel ka tlan zel a,kawng lo awm apiangah chuan ka tlan pawp pawp a,ka mittui chu dan rual lohvin a sur reng a,ka hru buai peih tawhlo. A rei deuh hnu chuan Falkland ah ka chhuak hlawl a,World Bank Road lamah ka tlan anih hmel.





Mit phe ruai chung chuan Zemabawk lam panin ka tlan leh zel a. Khawi nge ka tum ram pawh ka hrelo,Zemabawk ka pelh pawh chuan ka ding theilo,tlan paha ka mittui hrulai lo hmutu te pawh chuan mi tenawm tak en in min en vek ni berin ka hria.






Ka tlan leh fe hnu chuan Tuirial lei ka thleng a,tah tak chuan ka scooty chu ka tiding a,leiah chuan ka ding vang vang a,ka hnuailam ka bih a,sang tha tak a ni,zuang thla ngat ila, ka vannei hle anihloh chuan ka damchhuak hauhlo ang.







Ka ngaihtuahna vang nge hnuailam chuan min hip ta riau a,ka melh ka melh a,ka phone lo ri chhen chu en lovin ka hmet thi vat a,ka mittui lo luang reng chu hruk pawh ka hru buai peih tawhlo.





A sir deuhah chuan dingin ka aw rawl tawp chuan ka au vak a,tinge,tiang ngawt hi ka nih bik. Ka hlim hi a rem velo ami,tinge hrem ka nih reng bik. Thenkhat uire leh thilsual tinreng tiin an leng a,an nun ala tluang tho. Tinge,ka uire lo,tu pawi mah ka sawilo,chuti chung chuan hremna ka tawh reng bik. Eng zo zai nge ka tawrh la ngai leh dawn. A tawk tawh em em lo em ni,ka nu takngial paw'n min hmusit ania,engtin nge nun ka hman ve tak ang. Mi zawng zawngin an kawh rawn ni chungin engtin nge khaw eng ka hmuh ngam ang..






Lei hnuailama tui luang ri hum hum chu ka en thla,a kam veleh thenkhat intihlimin anlo nui har har a,an nui ri te chu ka tan chuan lungngaihna dar ri ang mai a ni.






A ko tlang ah chuan ka ding a,ka ke ka pen dawn,Saia hmel ka mitthla ah alo lang a,a nupui ka ni mai tur a lawmzia te,min kalsan ngailoh tur thu a sawilai te,hmangaih taka min kuah lai te ka mitthla a,ka ke chu a khawng tlat.






Ka nu leh Lily ka ngaihtuah leh a,anni vanga tuar kha ka ni asin. Mahse,ka nu chuan min hrethiam ve lo,ani chuan fanu zahpuiawm tak angah chauh min ngai tawh.






"Ka tihpalh" tih sep pahin ka pan hma leh hret a,ka ke lehlam ka khai tur chiah ka mitchhing a,ka mitthlaah ka hmangaihte nui hmel alo lang leh a,ka bengah an nui ri,ka hming lama a tawng ri alo ri nawn awn awn a.







Au nghekin ka beng ka hup vak a,chhuatah chuan thu sawp hnawkin ka au chiam a,ka thawm hre pha chuan mi a emaw min ti ngei ang.





Ka benga thawm chi hrang hrang ri nuaih nuaih tihngaihna hrelova ka sam ka tham nghek lai chuan tu emaw hian ka kut chu alo chelh hnan a.




Dakchhuaka ka en chuan hmeichhe pakhat,te lam,ngo ving veng hi alo ni. Mittui kar atangin a nui hmel chu ka hmu phe ruai a. Ka kut chu chul hliau hliau pahin
"Thiannu,i beidawng mai em ni?" Dam zeta atih chuan thei leh theilovin ka inbeng kang a,ka banah chuan manin min lo pui vat.





"I kawppui nen in inti thiamlo nge,harsatna dang i nei chu ka hrelo. Mahse,i nunna la tur em chuan thinrimin thutlukna siam suh" atih chuan ka en reng a,ka mittui tla pawh a zia ve deuh.




Ka kut vawn reng pah chuan ngui hmel tak hian a kun chhal a.
"Khulaia mite khu ka chhungte anni,ka pasal,ka hmangaih em em leh ka fate 3" tih pahin lui lam chu a thlir thla a,ka hawithlak ve chuan mipa pakhat hian naupang pathum alo infiampui a,an hlim hmel em em bawk.





"Ka pasal nen khuan kum tam kan innei tawh,mahse,kan hlim reng biklo. I hrelo maithei a,Jail tang chhuak leh ani a,Pathlawi a ni bawk. Jail ah nurse niin ka duty thin a,chuta tanga intawng chu kan ni. Kan hmangaihna kawng chu i hringnun ai pawh khan a bumboh maithei a,a mam zawm maithei bawk. Mahse,heihi hre rawh,kan fanu upa ber pian hma khuan min uire san vangin kan inthen a,ka thinlung chu pawh sawm a,rah hrual nawk nawk ang a ni. Ka kehchhe vek a,ka fanu hial pawh ka pawh theih lawkloh phah. Mahse,kum tam alo vei a,a hmangaihna chuan ka huatna te a hneh zova,kan inkara inhmuh thiamlohna awm zawng zawng a fel hnu chuan kan inhruai leh a,chutah pawh chuan harsatna namenlo kan tawk tho,Keipawh nangmah ang tho hian ka tlanbo a,Kashmir ah kum 4 vel zet chu ka tlanchhia. Mahse,a theihloh,a bo rei theihloh,khawvelah pawh i bo hlen theihlo anih chuan,thlarau i nih hnu phei chuan i bo hlen theih ring suh. I taksa aiin i thlarau kha a nung rei dawn,i hmangaihte ngaihtuah la,chutah,i thlarau chantur. Khawvelah hlimna reng reng neilova hun i hman tawh phei chuan,engah nge i thlarau nun lehzel chu chatuana hrem i tum. In ngaihtuah chiang rawh,tunah hian i nunna ila anih chuan,tual i that tihna a ni dawn asin. Chutiang anih chuan,chhia leh tha i hriat theih chhung i thlarau chuan thi silo dam silovin na a tuar tawh ang" ati duah a.






"Chuvangin,hmalam pan tum rawh. I rilru dam hma chu biru la,a pawilo. Mahse,khawvel atanga bihruk chu tum tawh suh" la nuih sen sen pah chuan ati leh a. A phone alo ri a,ka kut chu thlahin a ipte a zen a,phone screen ah chuan
'Kan pa Gordon🤍' tih alo lang kiau a.





A pasalte awmna lam chu hawiin ban a vai zauh a
"Ka kal ang e,ka chhungte'n min ko tawh sia,ka sawi kha aw" tih pahin ka kut chu a tawk leh zeuh a.





"I hming min hrilh thei ang em?" Ka tih chuan a ding leh dat a.
"Khawngaihthangi,Khawngaihthangi ka ni e. Mahse,ka pasal duhtak chuan Biangno tiin min ko thin" tih pahin a nui hak a,a pasal a sawi ruala a hmela hlimna chu ka hmuh hmaih hauhlo.





"Ka lawm e" ka tih sep chuan ahma aiin a nui mawi lehzual
"Kei deuh ka lawm,kan la intawng leh te anih ngai chuan kan thawnthu te inhrilh tawn turin kan inkawm ngei dawn nia" tih pahin a inher a,a pasal fanaute awmna lam pan chuan a chhuk ta a.




Khawngaihthangi maw a hming kha,a hming a pu zo hle mai,ka damchhung in ka hre reng tawh ang. Thihna kotlang atanga ka thlarau nun sawi harhtu ani miau a.


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » June 12th, 2022, 3:59 pm

ERASED

CHAPTER 24
☆☆☆☆☆☆


SHARONI POV:


Inher in ka scooty chu ka hung tha a,zia deuh tawh mah ila haw ka la tum chuanglo. Tunah ka haw anih chuan zahna bak ka tawng dawn lova,chu ai chuan tihian helaiah ka awm hrih anga,boruak a zia deuh hun ka nghak mai ang.





Khawilam berah nge ka kal dawn pawh hrelo chuan ka hmalam chu ka pan ve mawp mawp a. Lei piah deuha fehbuk an siam bulah chuan dawr 3 vel hi alo awm a,fehbukah chuan va thut hahdam a,Zemabawk lama let leha,riahna tur zawn mai ka tum ta a.





Mahse,dawr nghaktu pitar lampang deuh tawh chuan ka awmdan chu alo hmu ru reng nge
"Mami,intih thawven tumin ami ilo kal?" Tiin min lo zawt a
"Aw,ni deuh tho" ka ti ringawt a.
"Thlenna turte i nei em,nge langin i tei mai mai?" Atih leh chuan ngaihdan tha zawk ka nei ta a.





"Zin tur ang deuh chu ka nia,mahse,Hotel emaw ka hmu mai si lova" ka tih leh chuan min rawn pan vat a.
"Kan in hi a hminga concrete a ni ve a,inhnuai luahtute an insuan chhuak chiah a,i duh chuan i riak thei ang,khum pawh a awm" ati ta hloh a.





An in lamah chuan scooty in kan inphur phei a,heng lai velah chuan in nei nuam pawl ber anni hial ang. Ka riahna tur pawh chu a tawk reuh hle.





A fate niawm tak anlo chhuk duah duah a
"Heihi kan mikhual ania,tah hian a riak hrih ang" tia a hrilh chuan an bu tliar tliar a. An kal hnu chuan
"Ka fate leh an thiante anni ve kha,lungngai lo la,i duh chen chen i awm thei ang" atih chuan ka lawm hle a,awm man pawh ka pawisa pai sa chuan ka pe lawk nghal a.






Tleirawl leh paho thenkhat an luh chhuah deuh reng vang chuan ka ngaih a ngam chaih lova,zep thu a chenglo,heng lai veng vel hi chu Zu zawrhna hmun a ni thin a,tunah pawh zuar anla awm fur ang. Ka thlenna te pawh hi chutianga eizawng anlo nia nga,an customer emaw tiin mi hian mak min lo ti viau mai ang tih chu ka hlau ru hle.






Ka thlen atangin ka phone ka on leh tawh lova,enlo mah ila Saia missed call a tam leh viau tawh in ka ring. A lakah pawh ka inthiamlo zo zai tawh,tiang boruak tehhrep a tawng reng hi ka thiamloh liau liau a ni.






An bathroom ah chuan ka inbual a,towel pawh a awm chuanglo,ka kawr chuan ka inhru hul vel mai mai a. Tlaiah pawh chuan rawng bawl tur a awm hranpa lova,bawl tur awm pawh nise ka ei thei dawn in ka hrelo. In neitute dawrah chuan cup noodles leh theitui te leiin ka ei ta vel mai mai a.







Zanah chuan tihtur a vang duh hle a,motor tlan thawm,naupang tual chaia infiam,inbihruk siaka au thawm te leh lui luang hum hum ri te chuan ka beng a luahkhat a,ka rilru erawh hmun dangah a awm daih si.





Nikir hun lai vel a ni a,khua pawh a chiang thei meuhlo,chhunah han lum viau mah se,zan lamah chuan a dur deuh kuih kuih a,sur mang silo hian a awm reng a. A rawn tlak vek vek chuan a tam tham khawp ang.






Mut hma chuan ka phone ka on a,ka on fel chiah tihah Saia call a rawn lut nghal,min lo chang char char anih ka ring.




A lakna ka hmet hman tawk
"Hello" a rawn ti nghal vat a,ngawi rengin ka beng bulah ka dah a,a thaw ri hawlh chu ka hre thei.






"Ka tawng i hre thei em,khawnge i awm?" Mangan hmel zeta atih chuan ka phone chu ka hum ruh hle a.
"Min ngaihtuah suh u" ka tih chuan a thaw huai mai.





"Khawnge i awm,tinge engmah sawi lova i kal daih,i awmna min hrilh rawh,ka rawn kal ang aw" atih chuan ka lung a tichhe lek lek a
"Ngailo,min zawng suh,min hmu chuanglo ang,ka awmna a hla lutuk" ka tih chuan a thaw leh hawlh a.





"Hla rawh se,a pawilo. Tinge ka tellova i kal,kal i duh chuan ka zui zel ang che ka tih kha" atih leh meuh chuan ka mittui ka khap per sak a.





"Khalam eng nge chanchin?" Aw lawi zeta ka tih chuan
"A tha,mahse,i awm lova,a thalo" ati hmuk a.
"Ka nu eng nge a an,min hau a?" Ka tih chuan a ngawi vung vung a.





"Ani pawh a tha,mi zawng zawng an tha vek,keimah chiah ka thalo,khawngaihin lo haw rawh" ngen ngawl zeta atih leh chuan
"Ka theilo alawm,i hriat kha" aw khur der der chuan ka ti hram a.





"Ka zawng ang,ka zawng chhuak khawp ang. Hremna pawh ana thei ang ber an hmu ang tih ka tiam che. Chuvangin,lo haw rawh ummm,tunah i awmna sawi la,ka lo hruai ang che" ati leh a.
"Ka tihpalh,keimah vangin in hmingchhiat phah a,i chhungte kha ngaihdam min lo diksak dawn nia" tih pahin ka thaw halh a.






"Ngaihdam i ngaihna pakhat mah a awmlo,ngaihdam ngai chu a theh darhtute kha anni. Chuvangin khatiang kha sawi leh tawh suh" ati hrawk a,ka chunga thinrim a ni lova,a aw ki pawh lo dawnsawn dan tawk ka thiam viau.






"Keimah vangin naktuk programme pawh kan thulh leh angai sia,ka tihpalh lutuk" ka tih chuan kan inneih dawn vanga a hlimzia te ka ngaihtuah a,man hlan hun a nghahhlelh zia te kha.





"Nangmah vang a ni tei vet lo,tihpalh tih thu kha sawi tawh suh,kan innei dawn,boruak a daih hunah kan la innei khawp ang,engma'n min thulh tir dawnlo" ati nghet charh a.





"Ka nu kha min lo ngaihtuah sak deuh rawh aw,chuan,khawngaihin,ka chungchang thu a thalo lampang a sawi anih pawhin,Lianzuala chanchin kha sawichhuak lo hram ang che" ka tih leh chuan nin hmel lutuk in a thaw hawk a.
"I sawilo ang tiraw?" Ka tih chuan min chhanglo
"Ka nu khan lung tha a nei a,heart attack a nei thei mai ang" ka tih leh chuan a thaw ri na lutuk chu ka lo hah ve vek thei.






"Aw le,ka sawi lovang. Kan buaipui fel tep tawh ania aw,lungngai lo la,eng thil thalo mah ngaihtuah suh ang che,i rilru a alo lan apiangin kei tal min rawn mitthla la,ka hmangaihna che hian a dan zawh ngei che ka beisei" atih chuan ka insut hrawih a.
"Umm,ka ti lovang,ka lo let vat ang,khawngaihin ka nu kha ilo enkawl dawn nia" tih pahin ka off ta nghal a.





A bak ka sawi thei tawhlo,kha aia tam kan sawi anih chuan tawp chin awm lovin ka tap thei mai ang. Tiang ka ni chung pawha min la hmangaih tlat vang hian keipaw'n ka thlah thei tawh lova,a sawi angin,tuia zuanthlak ka tumlai pawh khan a hmel ka ngaihtuah vangin ka zuang thla theilo anih kha.






SAIA POV:



A dah chiah chu ka phone ka vawm darh vek lo chauh. Engvanga la zep duh cheu nge anih. Ti khawp hian a tawrh phah a,ti chung chuan zep ala duh cheu ania. Zanin hian be tlang theilo ngat ila chu engkim ka sawi ang ka ti hman tawh a,mahse,tih tak meuha min ngentu ngenna chu ka tihlawhtlinglo ngam silo.





Tukin zing ka hna kaltur message ka dawng hnem hle a,a pawimawh vak ka rinloh vangin ka en hmanhmawh lemlo. Mahse,a hnua message pakhat ka en chuan thin ti thawng dawt theitu hlirin a zui a,eng nge tih hmasak ber tur pawh hre lovin ka vei kual sek a. Amah ka phone a,ala thei bawk silo.






A in lam pan tuma ka chhuak tur chu hmun danga kan chhungte hnen atangin call chhan senloh kan dawn zawm leh a,a awm viau,naktuk mai hi man hlan a ni tawh miau a.






Call tam zawk kan chhan hnu chuan kal ka tum leh a,amah pawh biak ka tum reng,mahse,ala theilo. Ka pa in ka chhuak tur chu min dang a
'Tunah chuan amah aiin a tihreh dan lam buaipui rawh,Police lam bia la,a darh zel tur hi dan tum zawk rawh' ati ta a. Keipawh chuan ni viauin ka hria a,amah ber ka phone tlang thei bawk silo nen chuan Police lam ka be ta zawk a..






Nilengin phone call chhang leh man hlan kan thulh thu sawiin kan buai a,video darh zel tur ven nan in leh Police station kan kar tawn chhen bawk..





Tlai lamah chuan pangngai takin ka thaw ve thei ta chauh a,a nu te in lamah ka kal a. Rin ang ngeiin anu chu alo thinrim nasa mai,a fanu chanchin chu a tha zawngin a sawi thei meuhlo.





A pasal kha ka hmu ve lova,hmu ngat ila chuan anu hriatlohva khawih mai ka duh rum rum a,a vannei hle,a awmlo chu.





Anu chu theihtawpin ka hnem a,a thinrim laklawh bawk nen beng daih hleihtheih pawh a nilo. Ka kal leh tur thu hrilhin ka hawsan leh ta a.




In ka thleng chiah Police Station lamin min ko leh a,hmanhmawh zeta ka kal chuan Ramdinpuii nunhlui vel min lo zawt luam a,Officer ka hmelhriat hnenah chuan sawi awm chin zawng ka sawi a. Bangalore Bar lama a thawhna te pawh an biak tur thu te chu min hrilh bawk.






Atir chuan Amit-a atih pa kha ka ringhlel rum rum,ka chhuitir hmasak ber pawh a ni. Mahse,alo ni teuh silo. Ani chu Ramdinpuii sawi ang takin a fanu nen anlo hlim viau a,kan buaina a hria chu alo buai fe zawk alo nia,tihngaihna tak pawh ka hre tawhlo.





Nilengin ka be tlang thei lova,be thei pawh ni ila a tawng tha duh dawnlo tih ka hria. Tunah phei chuan ina a awm ka ring tawhlo. Saizami hnenah a in luahna te fapa number kha ka dil a,ka phone chuan chawhma lamah a hmuh hnuhnun ber thu min hrilh a,a tawng danah chuan ani pawh a buai hmel ve hle.







Zanah chuan thutchilh meuhin call ka tum leh ta a. Vawithum vel ka tihna ah ala ve ta chauh chu anih hi.





Ka rin ang ngeiin alo kalbo daih a,zawnglo tur chuan min ti nghal. A aw atang pawhin a mangang a,a thlabar hle tih ka hre thei,chuvang tak chuan a awmnaa kal chilh a,hnem a,duat taka kuah ka duh. Mahse,ka thei silo. A duhloh chu sawiloh,in ka chhuahsan thei der silo.







Zan pawh chu ka mu lo ang vel a ni a,ka text a,a phone a On lo tih hriat takin Deliver pawh a in deliver theilo. A mu ang em,chaw a ei ang em,a tap zankhua mai ang em,chu zawhna ringawt chu ka rilru ah a awm a,zawnglo turin min ti na a,ka zawng tho dawn emaw ka ti rum rum a. Mahse,a hel tlat ka hlau bawk si.







Khua alo var a,khual khua atanga lo thleng turte chu lokal lehlo turin kan hrilh tawh a,mahse,helai hnai vela kan chhungte lokal tawk chu an awm tho. Ka nu leh pa ten an sawi that duh vakloh vangin an duh angin an rawn sawi chhe thei lova,kan mitmei veng zetin an ngaihdan a nihloh thu erawh anla sawi talh. Ni Malsawmi te nufa pawh a sawi uar uar ah an tang.






Chaw kan han ei kham a,nidang anga ni pangngai chu nise vawiin hian man kan hlan anga,dan anga ka nupui a ni mai tawh tur. Mahse le,kan hma hun kan hre silo. Nakinah,boruak a reh anga a inpeih hun hunah a bul atangin kan tan leh mai aniang chu.





Chawei kham chuan Police station lama kal leh turin ka insiam a,ka phone alo rik chuan rang zeta banin amah anih leh nihloh ka en a. Mahse,a nau zawk alo ni.






"U Sai,tunah lengpuiah ka awm a,min lo hruai hman ang em,ka nu te ka be thei si lova" atih chuan ka khawngaih reuh hle a,a tihbuai thin ber a U lah biak theih a ni der silo. Ka hruai tur thu sawiin ka chhuak nghal vat a. Kawng a tha tawh bawk a,ka thang reilo.





Suitcase 1 nen alo thu reng a,min hmuh chuan alo phei vat a.
"Ka u i be thei em?" Atih chuan a mit a sen deuh ram tih ka hmu chiah.
"Nizana ka biak bak ka be leh tawhlo,i be thei ami?" Tih pahin a suitcase chu ka khai phei nghal a.





"Ka be theilo,Vawikhat mah ka text a chhanglo bawk. Kei chu ka hlauthawng,tiang hi alo thleng ang tih ka hlauh vang ania,ka nu hnenah pawh zep lova sawi ka tum thin. Mahse,amah hian min vau reng a,ka sawi lui anih chuan a intihnat mai ka hlau bawk sia,ka u chu a luhlul bakah,a hun tawn alo khirh ve kher nen,a buaithlak emai" kal pah chuan ati ve niah niah a.





Kan tlan chhung zawng a tawng leh tawh lova, a phone chuan mi a call reng a,a U call a tum anih ka ring. A tlang thei hauhlo ang,a phone a On miau lova.





An in kan thlen chuan ka luhpui a,kan lut fel chiah,apa hmel a hmuh chuan a meng rum nasa,anu pawh a melh no fahran biklo. An inhauh buai mai ka hlauh vang chuan ka thu deuh ren rawn a,rei pawh ka thut hmain Police lamin min ko leh bawk nen,ngaihtha zanlo chuan ka chhuahsan ta a. Ani chu kan luhtirh atang khan pindanah ala tawm char char a,a thinrim hle tih a hriat.





Police station ka thlen chuan pen khatin hma kan sawn tih anlo sawi a,an thil hmuhchhuah min entir chuan thinrimna karah lawmna alo thleng ve dawn tan niin a lang.





SHARONI POV:


Nithum ngawt ka awm ve ta,a zana ka on tihloh chu phone ka On nawn leh tawh lova,On ngat ila chu missed call leh message hriat nuamlo zet zet ka hmu leh teuh ang.




Ka awmna te hian fanu tleirawl te an nei a,ani chuan min ngaina thiam em em a,alo leng ve reng a,khawhar a hnemin rilru pawh ala peng hneh viau.




Ka la awm deuh rih ka rin vang chuan an bazarah te min kalpui a,thawmhnaw leh towel vel te chu kan lei a,eitur te ka leisak a,a lawm tawk ve em em.





Kan haw leh chuan a nu te charger ka hmang a,ka phone low lek lek tawh chu charge pahin ka On zuai a. Lily message ka hmuh chuan ka na thar leh ni maiin ka hria..




'U,tinge ilo awmloh,ka lo haw a. Anu lah a biak tawng theih siloh,apa hmel pawh hi ka hmu peih tawhlo. Khawngaihin lo haw tawh rawh. U Saia pawh a phe buai nasa thei ania,a ngaihtuah reng che,a rilru a hah hmel lutuk,a cher vek tawhin ka hria. Lo haw tawh rawh,anu pawhin chaw pawh a ei theilo' tih te
'Ilo haw loh chuan ka sawichhuak mai ang,anu hian i thla a hau nasa ania,ka hre reng theilo' tihte alo ni.






Saia message pawh alo awm kalh a,mahse,Lily ang em chuan a rawn bei ngunlo thung.
'Ka sawi kha aw,eng thil thalo mah ti suh. Khawi hmunah pawh awm la,ilo let dawn tih ka hria,chuvang chuan ka hahdam. I awmna hmunah khan hlim deuhin awm la,helam buaina chu ka kutah dah rawh,ka chinfel veleh hruai tur che in ka lokal anga,ka nupui ini tawh ang' tih alo ni. An message ka chhiar zo chu ka mittui alo luang leh ngawt a.






Ka tleirawl awmpui te chuan min lo en reng a.
"A u,i tap ami?" Atih chuan ka nuih hak a
"Tap deuh e,tu te te emaw in min lo bia a,ka ngai reuh lutuk a" ka tih chuan a rawn thu hnai sauh sauh a.





"Ihmaw,i rawn kal ni khan nangmah ang deuh hmeichhe pakhat video hi a darh vak a" atih chuan ka meng phawk chiam a,anni lehzel chuan ni lul love.





"Chuan?" Tih paha ka hawisawn daih chuan
"Ini tih kan hria" ati sep a,mak ti zetin a hmel chu ka en a.
"In hria maw?" Ka tih chuan
"Umm,kei aiin anu khan a hre hmasa zawk. Mahse,i hria anga,apa hi helai kohhran upa hi ani a,anu pawh nu zahawm ve pangngai tak ani. Anu khan alo hmu che a,puih a chak tlat che a,chu chu an sawi vek alawm,zana chaw kan eiin. Hria anga awmlo tur leh duat tur che in min hrilh a,mahse,ka sawi ta tho" ati sep sep a.






"Inva fel ve,ka lawm lutuk aw,midang angin min hmusit ve lova" ka tih chuan min kuah that a
"Kan hria alawm,apa pawhin a sawi,tihsual kan nei thei vek a. Nangpawh i tihsual palh aniang,i duh vanga tianga awm ini lo,i sual dawnlo tih kan chiang" atih chuan lawm vanga mittui far kauh chungin ka lo kuah let thuai a.





Ni li ka awmnaah chuan pangngaiin ka phone ka on ve ngam ta a,net signal ka neihlai chuan Saia nen kan inbia a,a hmawr an bawk tep thu a sawi chuan ka hahdam ta deuh. A fel hnuah,min rawn hruai tura anlo kal hunah chauh ka let ang,keimah chuan huaisenna ka neilo.







Kan inbiak zawh hnu chuan naupangte nen khan lui kam vela kal kan tum a. Mahse,kan chhuah hma deuhin ruah baw hawk a rawn tla chiam a,inah chuan kan tawm hle hle ringawt.






Ruah sur chuan engtin emaw tak hian min ti lungngai ta riau a,ahma chuan Lianzuala'n min khawih chhiat ni kha khawchhiat ni anih vangin ruah a sur tawh phawt chuan ka hlau thin a,Țek tla leh kawlphe te khan in atanga mangang taka ka chhuah hun kha min ti hrechhuak thin.







Tunah ve thung chuan chhan hriat silohvin ka ka tah te chu a chhuak ut ut a,ka nu leh Lily,Saia ngei pawh ka ngaihtuah chhuak reng chuan ka ngaih a titha hauhlo. Ka nu nen phei chuan ka kal atangin vawikhat mah kan inbe leh tawh lova,a tha em turah ka ngai,Lily leh Saia an awm a,lo tha hram teh se,rilru tihhah na tlak pawh ka nihloh hi.







Ruah chu a han deuh a,chhum zing erawh ala chhah map map hle. A vawh deuh ver vang chuan thingpui lum ka tum a,thuk lam pana ka kallai chuan ka phone alo ri ral ral a,mak lutuk in ka phu chiam lehnghal. Ka la chiah chu vawileh khatah țek a rawn tla chuai a,ka phone chu chhuatah ka thlauh nghal bawl..







Hlau zetin chhuata ka phone tla ka melh chhuk chuan Lily phone call alo ni a,awm dawm pahin thaw huai huai chung chuan ka la kang a.







Ka beng zawna ka dah rual ruala an thu rawn sawi vang chuan ka khawng nghal awt thei
"Engmaw,sawi tha teh?" Ka tih sep chuan a sawi nawn leh a,awihlo lutuk in ka nuichhuak hak a
"Intih derna hun a nilo" ka tih hrawk chuan
"Ka tihder lo che,a damlai hmel i hmu duh anih chuan tunah lokal rawh" ati ta mai.






Tah zet zawng ka phone kenlai chawp chuan chhuatah ka thu hnawk a,ka thaw chu tawp tur ang maia awmin a sak talh a,ka thawk lak zawngte chuan ka awm chu a in sep deuh thaw thei.





Ka phone bawk chu alo ri leh a
'Ka nu' tih alo inziak kuau,au nghek pahin ka sam ka tham vak a.




Heihi dawt a ni,a thi dawnlo,a thi lovang,a accident satliah mai mai a ni. Tinge min lo pan,tumah hmuh ka duhloh thu ka sawilo em ni. Tinge ruahsur hnuaia a rawn kal. Ka hmangaihte chan lehzel tur hian eng nge tihsual ka la neih,ka thi ve nghal mai dawn em ni?????


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)