BINGBI_PAR #By #Irene_H_muankimi

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: BINGBI_PAR #By #Irene_H_muankimi

Unread post by Ngaia » July 3rd, 2022, 1:52 pm

BINGBI PAR
Chapter 13





"Kum tamtak amah hrelo a ka awm laiin ani chuan keimah avangin natna a tuara, amah ka hmuh hnuah pawh mi anglo tiin tawngkam na tak takin ka tawng khum thin. Chuan tunah a tan ka thinlung ka hawngin ani chu tunge a nih ka hre ve chauha ka kalsan leh a ngai ang maw? Engtin nge ka tana mi pawimawh ber hi ka theihnghilh theih ang"




"Hei vang hi alawm a harsa ang ka tih kha. Ti hian han ngaihtuah te dawi chu sut lovin Nguri hi a khawvel diktak niloa a boral chuan amah chauh a ni khawvel ata bo hlen tur chu. Mahse, dawi hi kan sut a nih chuan tupawh, in awmna hmun theuhah in natna te hre tawh lovin hlim takin in nun in hmang vek a nga,i hmangaih nen chuan in hre tawh dawn lo mah ula nangmahni nunah khan in la hlim thei tho alawm" tia min tawng thlamuanna chu dik ti viau mahila Nguri khumkhuaa ka hretawhlo tur leh ka chan hlen tur chu thihna nen a danglamna ka hrelo a ni.





"Nguri chu a dam leh ngei ang tih i Chiang a maw?"




"A dam leh mai nilo in khawvelah hian piannawn leh theihna hun tha a nei tel thei bawk dawn a ni."




"Engtia piannawn leh na?"




"Tun ang hian mahse, engtik hunah nge tih leh eng kumah nge tih chu ka hre lo" a tih dam dap a. Ni e,ka hmangaih chu ka hriat rengna ata nawhreh lo niin ani pawn min hre tawh dawnlo mahse,hlim taka a nun hman tir chu hmangtu in a hmangaih tana a tih theih tha ber a ni.





"Dawi chu engtianga sut tur nge" a tawp atawpah chuan ka ti thei ta.





"Thla bial zan lo thleng leh hmasa berah Nguri taksa chu kha hmun Buannelah ngei khan kan hruai a ngai dawn a ni. Tah chuan ka lasi unau ten dawi sut turin an lo pui ang che" tiin tih tur tul leh ngaite min hrilh a.





"Anih thla bial lo thlen hma in Nguri chungah hian thil eng emaw lo thleng ta se?"




"Chu chu keini lasi te tih theih phakbak a ni tawh" a tih chuan ka beiseina tlemte te kha khawnge an thlawh bo tak ka hre lo. Doctor te pawn a dam khawchhuah an beisei loh thu chiang takin an sawi tawha,chuthil chu awi duhlo viau mahila ka hlauthawnna hian min kian san thei silo.





Thlabial leh hmasak ber chu Pawltlak Thla a ni tawh dawna,chumi hma chu ti hian tih theih neilo in ka lo nghak ngawt ngawt mai dawn tihna em ni? Engtin nge chuthil chu ka tih theih ang?
~~~~~~~


Hunin tumah a nghak ngailo angin hun pawh chuan darkar leh ni te chu a liam pui zela,kei erawh nitin mai hian hlauhtawnna nen ka hun second tin mai chu ka hmang rala,Nguri chuan hmasawnna a nei lova,thisen lah chu a pe tu an tam pauh leh a mamawh tam emaw tih mai turin a duh ang khawp thisen a neilo fova. Ka hmelhriat pawh ni lemlo hnena thisen ka dil hi a tamin ka chhiar sek ta lo.




Ka nu,Papuia leh Doctor te pawn Nguri chu hreawm tuar tir reng lova kal tir tawh mai turin vawitam thurun min pe a,kei erawh chuan beiseina kut tin ther tiah pawh tluklo khawpa te ka neih hi tih mih duh lovin Pawltlak Thla a thla bial hun chu ka nghak fan fan a ni.





"Thiana, enghi nge i ngaihtuahna ah hian awm chu ka hrelo mahse, hei chu i hriatthiam a ngai a ni. Nguri hi i kal tir a hun tawh ani pawn chu chu a duh zawk ang"





"Dik chu a dik viaua mahse, Thiana beiseina pakhat lek pawh i nei a nih chuan chu i beiseina chu derthawng tak pawh ni se beiseina a nih chhung chu beidawnna hian engtikah mah a hneh thei ngailo ang che" ka tih chuan Papuia pawn ka inpeih hun nghah chu thlangin hetiang lam thu hi min sawipui leh tawh ngailo.




Tichuan kan ruahman anga Nguri Damdawiin atanga lak chhuah hun chu alo thleng ta a. Ka thil tum ka sawi chuan a hria apiangin á min tih hmel tak hian min en veka; mahse, chuthil avang chuan ka thil tum hi thulh ka tum reng renglo.




Danny-a bia in kawng laka min lo chang turin ka chah sa vek a. Papuia chuan a tawp thlenga ka lam a tan tur thu a sawi tawh avangin ka thil tih dan chu mak ti viau mah se, engmah sawi lovin min zui ve zel a.




Tichuan Papuia leh Danny-a nen chuan Buannel chu Zokhawthar atang thlabial ni chuan kan pan ta a. He kan thil tih turah hian kei lo chu Nguri bulah hian mihring dang awm phal a nih loh avangin khua a thim hma in ka thiante pahnih chuan khaw lamah min let san leh ta a ni.





"Ni reilo te chuah hun kan nei tih lo hria ni ila chuan ka hmuh tirh atang che khan hmangaihna ka hnen atanga ila dawn loh zawng zawng kha ka pe vek tur che a ni a. Hau in vin che pawh ka vin chiam chiam ngai lovang che. Mah se maw Nguri, ka hriatna atanga nawhreh pawh lo ni mahla ka thinlung erawh hi chuan amah neitu hi eng tikah mah a theihnghilh ve ngailo ang.





Ka hma a ilo in lan leh hun tur chu engtia rei pawh nghah ngai dawn mahse, Nguri ka lo nghak reng dawn che a ni. Nangpawn i thinlung chhungril berah khan min theihnghilh dawn biklo tih hi ka ring tlata kan in hmuh leh hma chu in nghak tang tang ang aw" tiin he khawvela ka hmeichhe hmangaih ber hnenah chuan thu chahin ka tiama tun tuma ka thutiam erawh hlen ngei ka tum bawk a ni.





Ti chuan thla chu lo chhuakin a en dan lah chu a han eng Chiang em em mai khawpa,khawvar lai nen khan a danglamna a en danah chuan ka hre hauhlo. Hriatloh karin ka bul velah chuan thil eng emaw fiahlo riaia hmuh theih, ziarang danglam leh mak tak tak nei rawn langin a thente chu fiah tak taka rawn lang zui ta pawh an awm.




Mihring tih dawna an ke hmuh tur awm silo leh an hmel sawifiah ngaihna awm lova tha te chuan mit an la in,an hmelthatna avang chuan thil dang reng reng chu an thing thuap mai a ni. Nguri taksa chungah chuan eng thil nge an tih chiah chu ka sawi theilo. A ka ah kha Bingbi par leh eng tui ril emaw hi dahin,a bengah te chuan eng thu emaw hi an hrilh a.




Chubak chu keipawn chiangkuangin ka hre biklo,zial atin ka awma ka thil hmuhte chu rawng chi hrang hrang ni ta mai te hian ka hria a,a hnu deuhah phei chuan a thim ta daih.
~~~~~~~~
~~~~~~~~


"Bawiha...hei tho teh haw a hun ania" ka pa in a rawn tih chuan muangchang hian ka menga ka pa leh pa Khuma chuan min lo nuih hawk hawk a.




"Engah nge maw i nu pangpar tur lak tum ilo va mutthluk ngawt ni? Hei ruah a tlak hma hian i haw thuai ang u" ka pa chuan a ti zung zunga keipawh chu tho in,ka bula bag chu ka ak nghal.




"Pa Damdawi chu in hmu tam em?" Ka pa te chu an hnungah hmanhmawh zet hian ka zuia an pen a zauin kei naupang tan chuan an vawikhat pen chu ka tan pen hnih a ni.




"Kan duh anga tam chu nilo mahse,a tawk viau e" a ti maia vawiin hian ka nu phallo chung hnim Damdawi la turin Buannelah kan kala, ka nu thlem nan Bingbi par ka hawn ang ka tia mahse,ka hawn miahlo ka van mawl tak.




Hetianga Bingbi par kher hawn ka tumna chhan ber pawh tunah hian ka nu in pi Rotluangi ziah 'Bingbi par' tih bu chu a chhiar thin vak a ni. Keipawh ka muthmunah min chhiar rik sak ve tawha ka nu chuan he thawnthua a changtu ang hi nupuiah han nei la a nuam awm a ti fiam fo mai.




Pa Khuma te inah zan kan riaka a tuk tukthuan ei khamah Zokhawthar lam panin kan haw leh. Ka nu chu alo la lungawilo renga a titau thlem nan ka pa nen rawng kan bawl duna chhungkaw tlemte mah ni ila kan hlimin tudang kan ngai biklo.




Hun lo kal zelin tunah chuan mipa puitling leh mahni in enkawl thei ka ni ve tawha, ka hna avangin keimahin Aizawl lamah in ka luah thla a, ka nu leh pa erawh Zokhawthara kan in ah ka u fanu Mali ho in an awm a ni.




Office lama ka hna ka zawh veleh State Library lam panin ka in khalh chhuaka, heihi Zirtawp apianga ka tih thin dan a ni. Boruak hahdam thlak taka hun ka hman theih nan. Library a ka kal hian lehkha ka chhiar reng bik chhuang lova a hmun reh leh a boruak saw a ni ka kal chhan ber chu.




Library ka kal apiang hian thutna bik ka nei thin a,tunah pawh chulam chu ka pan nghal. Vawiin chu midang tumah ka luhna room ah chuan an lo awm ve lova a reh tha khawp mai.




Mahse,a chung sanga ka chho ka thutna thina hmeichhe thu ka hmuh chuan rum nghutin ka dinna atang chuan chunu chu ka en a, ka thawm a hria nge min rawn melh zawka a lehkhabu chhiar bawk chu a bih leh.





Chu a che zia in a min run em avangin a bulah chuan va kal hnaiin, dawhkan chu ka kut tangin ka kik karh karha rum zet hian min rawn en chho ha a,a hmel lah chu ala tha hrem zui. Mahse, hmeichhe lehkha chhiar peih chu an boring tlang pui.





" Eng nge i duh" kalsan mai lova a kianga ka din ve reng avang chuan zawi fiak that hian a rawn ti a.




"I thutna" ka tih chuan a meng zau deuh kawk.





"Eng nge maw i hriat le?" Ti deuh nung nunga thawnthubu chhiar leh a tum chuan lehkhabu chu a ban phak lohah ka lo lek kan sak. "Hmela nang.." rawn dingin a kut tang chu min hmuha a tawng ring a in ti leh deuh nge hawi kualin a ngawi leh riha,





A lehkhabu chhiar lai chu kan piah dawhkanah chuan ka theh phei saka,a thinrim avanga a hmai sen hlar chuan a ti lawmawm phian,ka thil ngaihtuah avang chuan ka nui suk a.





"Mi a i nih hi" min tih khum chu a lehkhabu ka thehna lamah chuan a kala kei a thutna hnuah chuan ka thu thla ve nghal. Chutianga thu chung chuan ka piaha hmeichhe thu chu uluk zet hian ka en a, engvanga khatianga ti kher kha nge maw ka nih le?




Ani pawh chu a thil chhiar a rilru ah a lut biklo tih hriat takin thaw halh hian tum zetin min rawn melh leh thina, lawm si loh hian ka awm hmunah chuan ka nui leh tet tet thin. Thil eng emaw tih ka chak tlat ka neih avangin ka phone ka kekawr ipte a ka ah chu phawrhin ka hma ami chu thla ka laka a vawihnihna ka hmet leh tur chiah chu Chiang em em hian ka phone camera chu a rawn melha chuti lak tak chu keiin ka lo click.




Lungawi loh hmel zeta rawn ding chhuakin ka kiangah chuan a rawn kala, ka hmaah chuan nichina ka tihdan kha a zir emaw tih mai turin ngawi renga min en chungin a kut mawi zet chu a rawn dawh a. Keiin ka mithmul ka lo kan khum ak.





"Enteh..."




"Raymond" ka lo tih khalh zeuh chu a ner deuh sawk a.




"A tha e, Raymond an phalna la hmasa lova mi thla lak sak hi lungin tan theihna a ni tih i hria em?" Min ti a nih chu, nui sukin ka ka ding chhuaka dan vahin min la melh ve ran tho.





"Tu nge i thla ka la ti,ka thlalakna zawnah ilo thu a,kei chuan library chhung chauhhi a ni thla ka lak chu" tiin ka kalsawna, ka nuih za chu ka in sum nasa hle bawk.





Nidang aiin library chu ka chhuahsan hma a, pawn ka chhuah chhoh rual chiahin ruah tam em em mai hi a rawn baw nghal hawka kal lam khan a dur chhah ka ti reng a ni.




Library bathlarah chuan ka kekawr ipte zenin ka ding ren rawna, chutih laiin kha hmeichhia pawh kha a rawn thleng chho ve chiah. Pawna ka lo ding min hmuh chuan lawmloh hmel zetin min hlat deuh tak hian a dinga,phone ah tu emaw a be pah bawk.





"Aw,ka lo kala....ai nihliap ka nei alawm" tih vel a ni a sawi. Ti chuan ruah tam tak karah chuan nihliam amah khuh kim thei tawk tawk khumin a kal chhuak a nih chu. Eng nge ka hriat ka hre lo,keipawh chu ka car ah rang zeta tlan lutin chunu chu ka umzui vat a.




Tawite chauh ala kal tih chuan ruah a tam em avangin a huh deuh hman vek. A zawnah chuan va dingin glass down in lut turin ka sawma,ani pawn min hnial biklo. A rawn thu lut ve mai a.




"Khawnge i kal dawn?" Ka tih chuan min en vung vungin " Aizawl Hospital ah" a ti ta chauha,keipawh ka tlan chhuak nghal.




Car khalh pah chuan ka sira thu chu ka va melh leh zawk thina, a bag chu a huh nge a phawrh mawlh mawlha a lehkhabu rawn phawrh pakhat chu 'Bingbi Par' bu kha a ni.




"Kha lehkhabu kha hmeichhe ho hian in atchilh viauin ka hria?" Nui suk chunga ka tih chuan min rawn en vuta,a lehkhabu ken chungchang ka sawi tih a hriat theih nan a lehkhabu ken chu ka melh zawk.





"I chhiar ve thin em ni?" A rawn tih ha chuan ka lu thin pahin ka nu in a chhiar thin thu leh a atchilh thin zia chu ka sawi a.




"Keipawn vawi engzat nge ka chhiar chhuah tawh pawh ka hre lo" pangngai tak hian a rawn ti a.




"Eng nge i duh chhan?" Ka tih chuan a hmui hnuailam sehin a ngaihtuah vang vanga, chutah ti hian min chhang a.




"A changtunu Nguri leh a changtupa Ralkapthanga in hmangaihna kha" tiin,a ngaihnawm tih chhan mawlmang lutuk avang chuan ka nui chhuak thawta, "ti nge?" Alo ti vat.





"A changtu te an in hmangaih avang ringawta ngaihnawm han tih chu!" Tiin ka nuih zawm leh.




(Awi naktuk zanah last chapter dah tawh ang u aw. Vawiin chu ka nu in thlai khawih tur a rawn hawn hnem lutuka thui deuh ziaha zawh chu duh viau mah ila naktuk zanah a tawp kharna kan nei dawn ania)


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 3rd, 2022, 1:52 pm

BINGBI PAR
Chapter 14(Last Chapter)



NGURSAIPUII P.O.V




"A nuih zatthlakna pakhatmah ka hre ve lo" ti deuh hmakin ka kut ka kuangkuah hmak. Ka thil sawiah khan tuna a nuihna ang teh chiam chiama nuihna chhan tur engmah a awmlo.




"Tu nge i hming?" Kan thil sawi nena inmilh lo deuha a rawn tih chuan 'Nguri' ka lo ti nghuta awilo hmel deuha min en deuh reng lai chuan "Ngursaipuii" ka ti leh deuh kher.




"A mak hle mai" thu tak deuha tiin hmalam a melh ngur a.




"A makna pawh ka hre love" ka lo ti leh nghut. Keipawh hi eng vanga ka hmingte kha hrilh nge mawh ka nih le? Library atang khan mi pangngai zanlo a nih zia te chu hrechiang tawh viau tur ka ni asin.




"I ngaisang hle a ni maw? A hming ang te i in phuah ania. Chuvang lek chu a ni ngei ang ngaihnawm i tih em em." A rawn tih chuan rum zet hian ka lo melh. He lehkhabu chhuah hma daih hian ka hmingte chu ka pu daih tawh.




"Chutiang vang pawh a ni bawklo, changtupa in a changtunu a hmangaih avangin a nun a chana mahse, changtunu ber khan a theihnghilh daih bawk si a,a rilrunat thlak iti ve lo em ni? A ziaktunu hi la dam se chuan engvanga a tawpna kha siam hlimawm deuhlo nge a nih tih hi ka zawt chak" tiin ka chhiar apianga a tawpa ka tah thinna chu ka sawi a.




"Ti khan a tha tawk viau lo em ni? A changtunu khan a pa in a mipa hmangaih pa a that tihte,a thiannu ngeiin a phiarru tihte kha a changtupa ber a sun laiin hre tel ta se a tuarna viau dawn asin. Mahse,chutianga tilo a a nun hreawmna zawng zawng theihnghilh veka nun bul a thara a tan kha a tha daih zawk alawm." A ngaihtuahna leh ka ngaihtuahna chu in anglo tak a ni.





"Tha ringawtlo,engtin nge Nguri berin a nunhluite theihnghilha pasal a neih chuan pialral thlenga Ralkapthanga nena awmdun an intiamna kha a hlawhtlin theih ang" ban phar meuhin ka ti hliai a.




"Atawk e atawk e, thawnthubu tamtakte hi chu kan duhdan ang diak diaka a tawp lohna hian alawm ti hlu thin." A tih chuan dik ka ti leh viau sia.




Mahse,he 'BINGBI PAR' bu ah kher kher hi chuan keimaha nghawng a neih dan hi thawnthu dang nen a in ang lo em a ni. Khatia Ngurpuii an khawtlangval awmtha duhlo pahnihin a taksa an it avanga an ruk bo lai te khan Ngurpuii khan mi a ang maiin Ralkapthanga emaw tiin a zui a nih kha,ani chuan a thutiam angin a rawn hruai turah a ngai a.




Pasaltha Do-a kha awmlo phei se chuan kha hmunah khan Nguri dinhmun chu a tha lo hle ang, Ralkapthanga'n Nguri venghim turin a ti tih chu hre mahila khatia Nguri'n khang mipa te nena an in chai buaina lama a lu a sawha a hriatna a hlauh hnu khan thudik a hrilh hre duh lova. Chu aiah a nupui a nih thu a hrilh a nih kha.




Chawngi pa upa Luaia'n an lal Lalsaivunga a lalna ata paih thla a, amah leh amah lala a in siam khan a rukin a tlanchhiat puia, ti chuan khaw dangah nupa tuak thar angin an khawsa ta a ni. Chutiang thil thleng vel an khaw thenawm khawhnihin an lo hriat chuan an rawn run thut maia zahngaihna nei lek lovin hmeichhia leh naupang,kum upa te thlengin sala an hruai mi tlemte tih loh chu Chungverh khaw mi reng reng chu an that chimit vek a ni.




Ti chuan Do-a leh Nguri pawn khawdangah nupa anga nun bul tanin an hlim dun hle a, a tawpah a changtupa ber nilo nena changtunu hlim taka an cheng dun ta daih khan ka thin a tirimin ka lung hi a ti awi theilo a ni.




Chutiang vel ka ngaihtuah lai chuan Aizawl Hospital chu kan thleng der mai, ruah pawh a hmi a tla fep fep chauh tawh a ni. " Ka lawm e" engmah sawi loh ai tiin ka chhuk dawn chuan lawmthu ka sawi e ka ti a.Mahse, a lu a thle buk duh chauh a nih chu.





Hmanhmawh deuha tlan chhuakin Casualty lamah ka kala,ka pa chu a a eitur insum loh thin em avang hian BP sang te hi a nei thut thut thin a,han hau in a ei turah khuahkhirh tum viau thin mah ila a rukin a taksa tana tha lo hi a lo ei leh thin a. Chu chu tuna kan buaina pawh hi a ni.




Ward pangngaiah min daha, zanin kan riak a nga naktuk lamah chuan kan chhuak leh thei maiin kan in ring. Ka nu chu haw tiriin keimah ka awm tlanga, tlaiah Papuia rawn kalin ka thawmhnaw hakthlak tur ka nu in a rawn thawn avangin Chanmari lama a kal tur chu a rawn kawi zawk a.




Papuia te chhung kua nen hian thian tha tak kan niin Mission vengab Building in hnaih deuh takin kan khawsa a . " In ha lum ang che kha i in sut i in sut leh tawh kha" a tih lai pawh chuan ka in sut leh thin. Vawiin a ruah Sur avang kha a niang.




Zanah chuan ka pa in thian thar a chhara, Zokhawthar lam ami. Ti chuan a thian hlui a sawi ve ziah thin Roliana chungchang an sawi chhuak a. Chu a thian thar pa lah chuan ka pa thianpa chu alo hrechiang nasa mai si a biakpawhna tur number te an in pe hial.




Ti chuan a hma ang tho in ka pa chu ei leh in uluk tur tih vel,ahma a Doctor ten an hrilh bawk hrilh tha leh in a tukah kan in lamah kan haw leha ka pa chuan a thianpa chu phone hmanga be pawpin in hmuh an rel a.
~~~~~~



"Vawiin kha interview i neih hun tur em ni?" Ka pa in a tih chuan ka lu ka bu nghut.




"Tha deuh khan va ti la,tlin loh pawn hnual nghal ngawt loh tur ania" a tih chuan rang deuhin.




"Interview hmachhawn hma hauha tlak te i sawi ka pa kei hi i fanu Ngursaipuii Sailo ka nih hi" ka han ti a,ka nu nen min nuih tawp.




Ti chuan interview turin Zonuam lamah taxi in ka kal a. CT Paper ania tuna ka interview na tur hi. Tunlaia mizo Sumdawng zingah chuan an ni tluka hmasawn chak hi an awm lo.




Interview na tur hmun ka thlen chuan rin aiin mi an lo tama,ka huphurh zual sauh. Interview neih zawh dawn tawh lamah mipa pakhat ngo veng mai hi hmanhmawh zeta rawn tlan lutin a thaw nghal ham ham.



"Ka tlai dawn ta emaw ka tia" a tih chuan interview ve tho tur a nih ka lo ring ngawta, ka bulah chuan rawn dingin a ke a khawng ri keuh keuha keiin chu chu ka lo ngaithei silo.




"Thianpa i ke kha i khawng ri renglo thei a ngem?" Ka lo tih hluk chuan mak tih hmel zet hian min en vung vunga.




"Rinsanga ka nia,mah se i hmelthat manah RS tia min ko ka phal sak ang che". zam miahlo hian a ti a nih chu, keimah zawk chu ka zak lek lek engtin nge mi tamna ah khatiang khan a sawi ngam zawk.




"Ngursaipuii" tia ka hming an rawn lam chuan interview na room lamah ka luh san a.




"Nang" kan ti nghal thawra,a chhan pawh ka hma a lo thu te zinga pakhat chu nimina ka hmuh pa kha a ni, Library ami kha. A bul chiahah Papuia a thu bawk a,ani hi chuan endiktu zinga a tel ve tur thu kha min hrilh lawk avangin ka hre sa a,mahse he pa hi engtin nge hetah hian a thut ve theih !




Raymond-a chuan a khik suk danah min la hria ni chuan ka hria a, mahse ka chianglo ka awmdan lai lutuk vang pawh kha ani mai thei. Polite lo min tih thu sawiin chhuak leh turin min ti nghala, Papuia'n hmui phunin min lo la hau tel zui.




Keipawh chu chhuak tura min ti tupa in min en run avang leh a thutpui ten an lo khap si loh avangin thinrim leh zak tak chungin ka chhuaka, ka chhuak leh hma lutuk chu midang ho pawn mak min ti hlawm viau.




"An hnawl che a ni maw." RSA chuan thawveng zet hian a rawn ti a,tunah tak hi chuan min hnaih vaklo se ka duh,a tawngtheih hmel ropui si a, ka thinrimna a belhchhah mai mai.





Amah kal pela ka kal chu min rawn la umzui tawk tawka, "i ninawm i interview ve dawn a ni lawm ni? Engah nge min zui zel?" Ka tih hluk hluk chuan thawhveng zet hian ala hawi vah vah thei.





"Ka peihlo ka nu in ka duhlo chung min rawn kal luih tira, Online shopping i ti ve ngai em?" thil inmilh loh deuh a sawi avang chuan ka nui chhuak hawk.




""Ti nge?"




"Dawr ka neia,i duh chuan ilo thawk ve thei ang" a ti sam et a,hepa hi a nuizatthlak tak zet.




"Vawiin ah kan in hmu ve chauh a ni a, engtin nge ka rin theih ang che?" Ka ti chu ' rintlak ka nih vangin' a ti leh maia mipakhat chu a ni ve Chiang alawm.




Ti chuan tum loh deuhin a dawr a tih Zarkawtah chuan kan kala, dawr chu alo nei ve tak tak. A nu in alo nghaka interview chungchang a sawi chuan a tlin loh thu in a chhang maia, a nu chuan a hau zui hlak hlak.




"Nu ani hi Nguri ania dawr nghaktu thar tur" tiin a nu hnenah chuan min in hmelhriat tira keipawn ka nih loh thu ka sawi biklo. Chhun thil te kan ei zawhah ka nu in min rawn call in ka pa thianpa Roliana te chhungkua in chaw an rawn ei tur thu a rawn sawi avangin ka haw hma a,in ka thleng chu thut chawlhna hun pawh ka nei lo.




Tlailam 3:30 pm ah Papuia rawn haw chuan vawiin a ka chet dan avang chuan min rawn hau nasa mai. Ka nu bulah ka chet dan vel a sawia ka nu pawn min hau tho.





"Inninawm hna te chu ka nei daih tawh" ka tih chuan zawhna mit mengin min en ve ve. " Thawmhnaw dawr ania, Zarkawtah naktuk atang ka thawk dawn" ti deuh hmakin ka room lamah inbual turin ka kal a.




Ka pa thiante chu 5:00pm dawnah an rawn thlenga, pa hmeltha leh nu hmeltha tak rawn kalte chu ka nu nen kan lo chibai vata mahse,an hnunga rawn kal ka hmuh chuan ka ding khawng leh ta reng mai.




Engvangin nge hepa hi ka hmuh fuh theih em em mai le? Ani pawn chu hmuna min hmu thut chu mak a ti ve tih min hmuh tira a men danah khan ka hria mahse,mipa mahni in thunun thei tak a ni a, a hmel chu a danglam leh thuai.




Kan nu leh pa te chuan nuam an tih hmel viau a, sawi tur pawh an ngah khawp mai. Kei leh Raymond-a erawh kan chhungte'n min bia a nih loh chuan kan thu ngawi renga,zanriah kan ei khamah sitting room lamah an in kawm khawma kei erawh choka ah thingpui lum pahin phone ka khawia, ka thiante nen Group ah thu ho mai mai sawiin kan in hnial a.





"A hmuhnawm viau a ni maw?" Mipa aw thum tak ka hriat rualin ka phone atang ka mit ka la sawn a. Choka luh dawnah bang nghen hian alo ding kawi deuh,a kut a kuangkuah kher bawk nen a nel awm loh belh chhah.




"I thingpui chhuan a so" amah ka en reng laia a rawn tih chuan rang zetin ka hawi leta alo khu vut vut tawh alawm. Thingpui chu ka siam nghal sawk sawka, in tura ka va sem hnuah an kiangah chuan ka thu ve ta renga,mahse puitling titi na karah chuan nuam ka ti lo thuai zel. Sawi tur a vang thei lutuk a.




Thingpui no ka seng choka lama ka phei chu khapa Raymond-a bawk khan min zui phei leh a. No ka sil lai pawn choka ah chuan a awm ve renga, ngawi renga chutia awm chu dika ka hriat chiah loh avangin "ka pa thianpa fapa ilo ni reng a" ka han ti ri ngawt a.




"Nia"



Ha...'nia' tih chauh maw? Engvangin nge ka lo biak hmasak kher kher ni mahse, " mamawh i nei em ni?" Ka ti leh ta zawk a.




"Neilo" kan va han in chhang tawi thin tak." Ngaihzawng i nei em?" Ka tawng tawh miahlo ang ka rilru a ka tih mawlh mawlh laiin a rawn ti a,a lam ka hawi chuan min lo la melh Chiang em em zui.



"Ti nge?" A mita ka en Chiang lutuk chu ka tha zu han khur thei a.



"Ka hreduh" a ti leh deuh tawpa, ka in hum ruh viau tawh. Tun hnaia ka mipa tawn thar ho hi mi pangngai an awmlo reng reng.



"Nei" ti hmukin no chu ka tleuh zo.



"Neilo tihna a nih chu" alo tih zeuh peka phawk deuh hian ka en. Nei tih chu engtin nge neilo tihna a nih theih ang. Chutia ka en reng lai chuan min rawn pan hnaiin min si chet hian a rawn ding a.




"E..engthil nge i tih?" Tia awmsan ka tum chu ka kawngah kuahin a lamah min hnuk hnai sauh.




"Nanghi tu nge i nih?" Chik em em a min en in chu thu chu min zawt a nih chu.



" I hre reng alawm,i pa thiannu fanu emaw vawiin a interview na room atanga i hnawhchhuah" ka ti deuh khera, vawiin a ka zah ziah kha hria se chuan hetiangin a awm hauhlo ang.




"I ni lo" a ti leh supa,a awmdan chuan ka ngaih a ti tha chiah tawh lo. Diktak chuan ka hlau deuhin ka in hria." Tu nge a nih ka hriat loh mahse,a awm ve a ni tih ka hriat si" a tih sup chuan a ngaihna ka hrelo takzet.




"Raymond" sitting room lam atanga a nu au ri avang chuan ka ding hlat vata Raymond-a nu pawh chu a rawn lang chawpchilh nghal. "Kan haw tawh dawn em ni Bawiha? " A rawn ti a. Ka bul ami lah chuan min la melh reng bawk si.




A nu pawh chuan keini pahnih chu min entawn deuh zak zaka, "in la in be laklawh em ni?" A tawpa tawpah chuan a ti ta hram a.




"Haw ang" pakhat lah chuan a ti leh ang tho bawk sia,hepa mizia hi chu ka hriatthiam theih chi a niin ka hre lo.




"Anih Nguri mangtha aw,nidangah chaw eiin in la rawn leng ve dawn ania. " Tiin a fapa chu a zuia ka nu leh ka pa in pawn thleng an va thlah laiin kei chu kawngka bulah ka ding a. Ka nu te rawn let leh inchhung an rawn thlen hmain sofa ah ka lo thu leh hman.




"Roliana chu kha fapa a nei fel hle mai. Nguri pasal atan i duh a ngem?" Ka pa in a tih chuan ka lo teuh nghal hlara ani lah chuan min la nuih huah huah zui.




"Nakinah Roliana kha ka la sawi pui ang" ala ti tak deuh deuha ka room lamah ka kalsan daih.




Ka pa sawi vang nge maw Raymond-a chu ka ngaihtuah zawm reng a, " Tu nge a nih ka hriat loh mahse, a awm ve a ni tih ka hriat si" chu thil chu vawitam ka ngaihtuah nawna, mak ka ti tulh tulh.




Chhan leh vang sawi tur awm si lova lunglen veng vengna te, tu emaw ka kiangah chuan kimlo an awm nia ka hriat thinna te. Ngaihzawng ka neih dawn apianga keimaha inthiam lohna awm thin te chu kha thu nen khan a in milh ka ti ta viau. 'Tu nge a nih ka hriat si loh mahse,a awm ve ngei a ni tih ka hriat si' chu thil chu keipawh hian ka nei alawm.
~~~~~~~~~~
~~~~~~~~~~


RAYMOND P.O.V.




Ka phone screen a hmeichhe thla chu ka en renga, amah ah hian eng thil danglam nge awm bika heti em ema ka vei ni? Chhan awm lova tu emaw ka kianga awm tur tu emaw awm ve lo tlata ka hriatna chu he hmeichhia ka tawn atang hian a reh ta hmak a. Tu pawh chu nise ani hi ka hmeichhia ah ka siam dawn hi a ni tawp.




A profile atanga ka lak a number ah chuan ka call a,zan a rei tawh bawk nen a chhan pawh ka ring em em lo kha ania mahse, min chhang.




"Iva meng rei ve?" Ka tih chu "tu nge i nih?" Tiin min chhang let.




"Tuna i mi ngaihtuah mek kha".



"Raymond" a tih zawh rual chiahin phone a hmet tawp a. Ka thil sawi kha ka ti fiam mai mai a ni a; mahse, min rawn hriat nghal chat theih danah min ngaihtuah tih ka hria. Zanin chu ka mutui dawn khawp e.




Zingah chuan nizan kan haw lama a sawi ngai bawk ka pa chuan a rawn sawi leh a. " Bawiha kei chu Nguri kha monu atan ka awt viau ania. Nang lah nupui nei rual i ni tawh bawk si vawiin chu thianpa Saia kha ka titi pui leh tur a ni " a ti leha ka hniallo, ka pawmpui thu pawh ka sawi hek lo.




Ka pa chuan alo be tak taka, anni lam pawn chhungkua a insiam chu an lo hniallo viau mai a. Mahse, an fa te erawh hmani bak kha kan in hmu in kan la in be leh miahlo.




Ka pa chuan Kartawpah chaw ei turin a sawma, ka nu a in buatsaih nasa khawp mai. Ti chuan reilo te chhungin kar tawp chu a rawn thleng leh mai a. Zanin hian keimaha thil danglam awm hi ka zawng chhuak ngei ang.




Zanriah ei hma darkar khat dawn la awmah an rawn thlenga tun tum chu ka lo tum lawk sa a nih avangin kan nu leh pa bulah chuan chhuanlam siamin Nguri chu ka room lamah ka chhoh pui a.




Ka room kan luh rual rual chuan kawngkharah ka nam bet nghala a hlauh hmel viau, "che suh" tiin a kalsawn tur chu ka banin ka lo dang vat.




A hmui sen vam ham mai chu en in chil ka lem khala, rei ka nghaklo kun hniamin a hmuiah chuan zawi muangin ka fawpa,ka sawi kha he nu hi ka tan a mikhual hauhlo. Ka fawhna min lo hnar loh a vang chuan ka fawh dan thlakin ka duhthaw sawt hle a,a hmui a chet rual chiahin a biangah dawmin ka lei ka chet a.




Kan in thlah meuh chuan a thaw halh halha,a meng phi chiai bawk. A hmui senno chak tun maia kan thil tih avanga hnawm leh pawrh deuh tar chu ka kut zungpuiin ka khawih a.




"Tu nge i nih?" A mita mak a tihna langchhuak ang chiahin keipawh hian mak ka ti ve tho a ni.




"Ka hre lo" ka tih sup chuan a duh ang chhanna a hmu lo nge sir lam chu a hawi hnual rawih a. A banah kaiin khumah ka thua ka mal chungah ani chu ka lam hawiin ka thut tir.




"Nang pawhin kan pahnih inkara thil danglam awm hi i hre ve a ni tiraw?" Ka tih chuan lu a thing nar nara mahse, a hria tih ka hria.




"Ka ngaihtuah ngial pawn ka tan hian tu nge i nih ka hre lova. Chutianga ngaihtuah tur pawn nangnen hian kan in tawng chauh bawk si. Engmah ka ngaihtuah chhuak theilo pawh chu a awm viau. Mahse, Nguri heta awm ka thinlung hian a hria che a ni." Ka tih chuan uluk zet hian min en a.




"Min duh tihna em ni?" A rawn tih heu chuan ka nui suk a.




"I thinlung khan eng nge a sawi?" Tiin ka zawt leta,



"Ka hrethiamlo mahse, Nizana i sawi Tu nge a nih i hriat si loh mahse,a awm ve ngei a ni tih i hriat si ang kha kei pawn ka nei ve thin." A han ti ringawt a.



"Ka ti suallo a nih chu, tun atang chuan engtikah mah kan in then hrang leh tawh ngailo ang,kumkhua in kan awm dun reng tawh ang." Tiin ka kham ngai loh tur a hmuiah chuan ka fawp a. Tunah chuan famkimlo ni a ka in hriatna zawng zawngte kha an bo ta.




A TAWP TA



(Ka thawnthu lem em em mai😂 a tir atanga a tawp thleng min lo chhiar sak avangin in vaia chungah ka lawm lutuk e. Ka mizo tawng ziah dan dik tawklo tam takah ngaihdam ka dil che u a,min duh saka ka tih sual min hrilhtu zawng zawng leh comment zantin min hnutchhiah saktu te chungah khan a bik takin ka lawm em em bawk.)


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)