THE CAVE MAN. BY Duata Khualchhâwn (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: THE CAVE MAN. BY Duata Khualchhâwn (Completed)

Unread post by Ngaia » July 10th, 2022, 4:29 pm

THE CAVE MAN.

✍️ Duata Khualchhâwn.

BUNG 19-NA.

Zîng ni chhuak chuan Mumbai khawpui zalenna chu a lawmpui hle a niang tih turin a chhun de sawr sawr a, tûk dang aiin ni chhuak pawh a mawi zual em maw ni; mi ṭhenkhat bathlâr aṭanga zîng ni chhuak êng fân raih han thlîr veng veng pawh an awm nual. Khawlaia mipui veivâkte hmêl pawh hmuh a nuam a, khawi emaw laia mi ṭhenkhat nui var var paha lo tîtî laih laihte thlîr chuan, an thinlunga hlauhna zawng zawngte kha an zalen rual khân a kiang ve ta tih hai rual a ni lo. Kawtthlêr ṭhenkhata In leh dâwr bangah Sâwmfela thlalâk lianpui puia târin, "Dam reng ang che zalenna Pasalṭha huaisen" tihte leh an ngaih sânna thu mawi tak tak an ziak bawk a, hetih laia Sâwmfela hre lo hi an awm lo vang ti ila a fiah ber âwm e. Nula chhe lo tak tak an phone lockscreen leh wallpaper-a Sâwmfela thlalâk hmang tate kha an bialpate nên pawh an inchuti khati hial ngei ang. A phawk zual deuhte'n, "He detective hian min nei duh em tiin min zâwt ta se, ka inngaihtuah buaiin ka ring lo," an ti nui har har bawk. Nî a sâng zêla tûkṭhuan ei kham hnu-ah Sâwmfela leh Manis-a pawh an insiam sap sap a, Chawhma dâr 11-a award hlanna hun hman hmaa Mumbai Police-te nên han tîtî lawk an duh bawk nên, zîng dâr 10 a nih meuh chuan an inpeih fel dêr tawh. Police Station lam pan chuan an inkhalh chhuak nghâl a, footpath aṭanga lo hmutu nula tawih tak takte chuan Sâwmfela chu lo kâwkin an khêk ruai ruai mai a ni. Sâwmfela lahin nui sânga a han bye bye phei chu an thidang lo chauh hi a ni hawt e. Police Station parking area-a car an dah fel an chhuk chiah tihah piah deuha nula leh tlangvâl rual lo hmutute chuan, police station campus-ah rawn lût rawk rawka khêk chûl chungin an rawn pan sap sap a, an ngaih sânzia te, fing an tih thu leh huaisen an tihzia te chu hrilh zui mawlh mawlhin a autograph an dîl sap sap zui. Sâwmfela ruahmanna kha inspector Mahesh Sharma ngei khân media-hovin an kawmnaah a sawi miau alâwm le! Autograph pe mawlh mawlh paha lâwm thute a hrilh ve hnu-ah Police station chu an pan ding leh ta a. Sâwmfela chuan Sunglass vuahin Kamis vâr a ha a, necktie dum a awrh bawk, coat dum suit nên induang zarin a smart shoe dum tle karte nên chuan a va inhmeh leh tak! Police Station an luh leh hnu chuan amah ngai sângtute vâng khân rei an tîtî hman loh phah nghe nghe! Tichuan, award hlanna hmun tur Mumbai Police Training Ground zau ṭha tak lam panin an tlân chhuak leh ta a ni.

Chawhma dâr 11 a ri ṭêp tihah Police Training Ground chu an thleng a, India President leh Prime Minister bâkah sawrkâr mi pawimawh chinte ṭhutna platform-ah Sâwmfela leh Manis-a pawh an ṭhu ve nghâl. Mumbai police tam êm êm maite leh sawrkâr mi pawimawh chinte chu ground zau ṭha hem hawm takah chuan an ṭhu ṭhup mai. Hun an ṭan nghâl a, PM te, Police officer-te'n thu chah tawi an sawi hnu-ah, President-in award hlanna a neih dâwnah thu a sawi ve bawk a, award-te a hlan hnu chuan Sâwmfela'n lâwm thu sawina leh thu chah tawi a sawi ve bawk. He an thil tuma hlawhtlinna an chan hi an zavaia thawh hona vâng liau liau a nih thu te, ram hruaitute leh Police-te fakna thu thlum tak takte a sawi leh dap dap hnu-ah award hlanna hun chu an hmang zo ve leh ta. India ram hruaitute leh Police officer rualte platform aṭanga an rawn chhuk chiah tihah inspector Mahesh Sharma chu command pein lo au lauh lauh a, Mumbai police ṭhahnem takte chuan Sâwmfela chu zahna chibai(salute) an lo pe ṭhap. Tichuan, Police headquarter lam panin an tlân zui leh ta a. Sâwmfela hâw châk tawh lutuk chuan a tûk lawka chawhma dâr 11-a chhuak tur flight ticket a buaipui nghâl a, ram hruaitute leh Mumbai Police-te paw'n an hre thiam khawp mai. Police-te'n Airport thleng thlah an tum thu an hrilh chuan, "In hun hlu tak khawh ral nân chuan a ho mah mah, thu pawimawh tak sawi ho tur in neih kha! Manis-a hian min thlah se a tâwk reng mai. Ka lungawi lutuk tho a nia," nui sângin Sâwmfela chuan a ti a, Police-te paw'n an rem ti ve mai bawk. Mahse, airport-a tlang nghâl lova Police station rawn pan hmasa turin an chah ve leh ta a nih kha. Nî a her liam a, zân hun nuam tak a lo ni ve leh ta. Thil pawimawh dang tih tur a nei lêm lo bawk a, a tûk maia hâw tur a ni tawh bawk nên Quarter-ah Sâwmfela leh Manis-a chu an awm hahdam leh veng veng tawh. An hlawhtlin lawm nân champagne, caviar leh vodka bottle khat ṭheuh dawhkânah an inchhawp a, rûi lutuka in erawh an duh hauh lo. Khawi ber hi nge tui ti ni âwm takin an han tem kual vêl a, an duh ber chu an thli karh karh mai a ni. An lu a kai ṭan tawh tih an ṭawngkam aṭang leh mitmengah chuan a hriat tawh viau. Chutah Manis-a chuan, "Sir, nang nêna zu kan in dun hnuhnung ber tur a ni ve ta reng mai. Eng tikah nge kan in dun leh tâk ang aw?" a'n ti deuh vawng vawng a, a lung a lêng sa hle tih hai rual a ni lo. "Manis, Pathian zârah dam takin lo awm zêl la, kan la intawng leh êm êm ang. Nang ang ṭhian ṭha tak ka lo hmêlhriat che hi ka lâwm tak zet." Sâwmfela'n a tih chuan, "Sir, kha chu ka sawi tur a ni. Kei pawh ka lâwm, Mumbai-ah hian i tân hmun a awm reng dâwn a nia, theihnghilh ngai suh ang che." tak deuh hian a lo ti ve a, Sâwmfela pawh nui sângin a bu nghat nghat bawk. Rei lo tê an tîtî leh hnu chuan zân dâr 9 a ri dâwn hnai ta. "Manis, ka rûi lutuk dâwn, ka mutsan ang che." tih leh din a rual a, dik tak chuan Manis-a mitmenga khawharna leh amah a thlâkhlelhna kha an zân hun hnuhnung berah hian hmuh hrehawm a ti tlat a ni. In chunga a room lam pan chuan a chho zui a, Manis-a erawhin a la birh tlut tlut thung. Sâwmfela'n a room a luh hnu chuan a t-shirt chu phelhin jogger pant nên chuan a mu nghâl a, Emmy ngaihtuah rauh rauh pahin a maimitchhîng veng veng mai. A lu kai tâwk chiahin a lo khiat ve bawk nên rei lo têah a muhîl zui a, Mumbai boruak chu a ngeih nge ni a vunte chu nung sârhin, amah a hmêlchhe lêm lo bawka room light hnuaiah phei chuan a hmêlṭha zual hle.

Chutih lai chuan a ngaihtuah zui tawh lêm loh, hriat reng pawh a duh tawh loh Anita Sharma-i, nula hleitling leh pian nalh êm êm; a kimtlâng mawina mite sawi nin theih loh ngei mai chu an Quarter-ah phei a rawn khai lût dân dân mai le! Manis-a hnênah Sâwmfela a hmuh duh thu a zâwt a, a inthuam dân chu a inhmeh leh hle a niang Manis-a paw'n en deuh kâwkin, chhân nachâng a hre mai lo. Anita-i'n, "Manis," nui sânga a lo tih leh chuan a harh chhuak zawk a, a hawi â hû mai. Rei lo têah nui ve sun sun chungin Sâwmfela a room-a a awm thu chu a hrilh zui. Chuta Anita-i'n lâwm thu a hrilh hnu-a Sâwmfela room a pan chho chu Manis-a paw'n a zu no keng reng chung chuan a thlîr zui ve vawng vawng bawk. A sam dum tle kar chu thlah hnâpin, a taksa thlâwp zata tight kawrfual dum a malte chung deuh khuh pha tâwk vêl a ha a, chumi chunga coat vâr ang deuh, a kâwng fêk rât khuh pha tâwk a hâk hnuaia a mawngtam khal ṭha zet chu a ke pên zâwngte chuan a fâwn hlerh hlerh bawk, tenawm khawpa khal ni si lo; mipate mit la tâwk tur chiaha khal nalh hi a ni. Bag sen a dâr ding lama a bahte nên chuan thlangsâppui lanu ngaihtuah buai hman a ni âwm lo ve. A Mizo hming tur sa dâwn ta se Duhaisâmi emaw, Lêngtinkhûmi tih an sak ngei ka ring. A kawrfual nghâwng zau deuh ti mawi tura a nau coconut rah mûm ṭha ang reng tak, a bra-in a khuh phâk loh china lang phîr taih mai, inngeih âwm fahrana insi chêtte nên chuan thu sâwm pêkte zînga "Awt suh." tih ringawt pawh hi a tam mah mah zâwk hial ta ve ang. Pian inkhai thli zaih mai, chêr ni si lo ria chum bat an tih ang hi a ni mai âwm mang e! A malpui innâwk pial ralh ralhin Sâwmfela room chu a pan zêl a, a thlen ruala kawngkhâr a nam hlek chu a inhawng deuh, Sâwmfela khân a room kawngkhâr a lo kalh lo hi a ni.

Room chhungah chuan dîm têin a pên lût a, a boot dum nalh zet chu hlîpin kawngkhâr chu a herh lock nghâl hmak. Piah deuha Sâwmfela lo mu zangthal thaw sêk sêk chu a pan zêl a, a thleng ta maw tihah Sâwmfela chu en vang vangin eng nge a ngaihtuah tih erawh hriat theih a ni lo. Mahse, a en dânah Sâwmfela hi a haw hauh lo tih chu a chiang viau a, a taksa nalh zet leh a hmêlte chu a en tawn leh zauh ṭhîn. A boot khai phei chu chhuata dahin a bag chu dîm têin dawhkân chungah chuan a dah leh a, Sâwmfela mutna sîr âwl laiah chuan tih harh hlau tak chungin a ṭhu hniam riai riai zui. Nui sânga Sâwmfela chu en leh vang vangin a kûn hniam a, Sâwmfela hmûi nalh a tih êm êmah ngei chuan a fâwp ta vawng vawng mai. He Mumbai nula hmêlṭha Anita Sharma-i hian Sâwmfela hi a hmangaih tak zet a ni. Chutia a fawh hnu rei vak lovah Sâwmfela chu a rawn meng diar diar a, duh thawh ang reng taka amah fâwptu chu enin a meng chiang ta hle. Chu veleh Anita-i dârah namin a ṭhu chhuak nghâl a, "Anita, nang maw!" mak tih hmêl zeta a tih chuan, "Kan inhmu khât ta sia ka ngai lutuk che a, Em Es," a mitmu dum tle kar, bial ṭha kelh kawlha Sâwmfela chu en kiauin a ti nui sâng a, a pa a sûnna avâng khân tlêm chuan a tla ve deuh tih a hmuh thiam theih bawk. Chuti chung chuan a mawina leh duhawmnate erawh a kiam ve hauh lo va, a mawiin a duhawm êm êm reng tho chu a nih hi maw! Sâwmfela lah a lo meng cool deuh ruih bawk a, a hawi her leh ṭawng dânah chuan a harh fîm lo tih Anita-i paw'n a hre thiam reng mai. Sâwmfela sawi tur hre lo leh a pa thil sual tih a man hnu-a khai hlum zui a nih avâng khân Anita-i hian a haw viau turah a lo ngai kha a ni a, a rin leh ngaih ang a lo ni si lo; a mak ti deuh chuan khawngaih hmêl takin a en ngawi reng ringawt. Chutah Anita-i chuan, "Mak min va ti âwm ve Em Es...keimah Anita Sharma ngei kha ka ni e. Ka pa i man avâng khân ka haw viau turah che min lo ngai a ni maithei. Ni e, a tîr kha chuan ka rilru put hmang pawh ka hre thiam lo va, ka pa vânga ka zah êm êm rualin i hnaa i rinawmzia ka hriat hian ka ngai sâng lutuk zâwk che asin. Tûnah chuan i hlawhtling ta a, nang hian zalenna min pe a ni. Chuan, i hlawhtlinnaah ka lawmpui bawk che Em Es..." a mittui tling piau chunga a'n ti dap dap mai zawng, a khawngaihna chuan Sâwmfela meuh pawh a rilru a thlâktîr lek lek hial! Sâwmfela chuan Anita-i kut chu vuanin, "Anita, i rilru ka ti na hle tih ka hria; mahse, ka duh vâng rêng a ni bîk lo tih min hriatsak rawh aw. Pawi ka ti tak zet, i pa ni lovin mi dang ni zâwk se ka ti, tûn thleng pawh hian," tiin Anita-i mitah tak a en kar a, Anita-i paw'n mit la sawn hauh lovin a lo en ve reng bawk.

Chutia an inen reng lai chuan Anita-i chu kûnin a kut Sâwmfela'n a vawn tâk chu a en zauh a, chu veleh Sâwmfela paw'n meiling a vuan tel ta emaw tih tur hian a thlah rang hle. Chutah, "Awh! Tihpalh lutuk, ka tihpalh Anita," ti-a a hawi sawnin a lu thak lopui chu a hiat nuah nuah a, Anita-i a va en leh chiah a inrin hmain a lo fâwp thut. Rei an infawh hmain Sâwmfela chuan nam sawn pah hian, "Anita, eng nge thil awmzia? Ngati nge hetianga i awm?" a ti a, "Ka ngaidam vek tawh che Em Es...hmangaihtu chuan a hmangaih chu a fâwp thiang dâwn lo'm ni!" Anita-i'n a lo tih chuan Sâwmfela sawi tur hre lo chuan en karin, "Anita," a ti leh ringawt. "Ka hmangaih lutuk che asin Em Es," tiin fawh leh a tum chu Sâwmfela'n lo dang pah hian, "Anita, i rûi em ni? Hetiang hmeichhia hi i nih loh kha!" tiin a ding zui zat. Anita-i chuan, "Ni e, i sawi dik. Mipa dangte lakah hetiang hian ka la luangliam ngai Lo Em Es...mahse, nang hi chu mipa danglam tak i ni, ka zahzumna kulh bang ti chhiaa ka zah theih lohna kai tho thei khawp i ni hi!" tih leh din a rual a, Sâwmfela chuan mak tih hmêl zeta lo en pah hian, "Anita, ka hrilh tawh che kha, hmeichhe dang hmangaih ka nei a ni, hetiang hian ka phatsan thei lo vang." ti-a a ṭawng zawm mawlh mawlh lai chuan, "Kha i rinawmna tak kga alâwm ka duh êm êm chhan che chu! I hmûi kha chîptîr i ngai a nih kha." tih leh a kawrchung chu phelh a rual a, a kawrfual dum lah chu vest ang hian a bânbûl a lo ni. Sâwmfela'n hre thiam hrâm tura a lo chah ve mawlh mawlh lai chuan a nghâwngah va kuah thutin Sâwmfela chu a fâwp leh. Sâwmfela chuan nam nat tum mah se a nghâwngah a kuah nghet tawh si; nam na turin Sâwmfela lu kai ve bawk si chuan thahrui a nei ta lo. Chuta chin chu inhaw lo tih hriat takin an inkeih ta tâwn tâwn mai a, rei lo têah an inkâra ri kham dah sawn turin an thawmhnawte chu an hnawksak ta tih hriat zetin an hlîp zui sawk sawk. Tichuan, Sâwmfela khum dûp nuam takah chuan an âwn ta riai riai a; Chemtâtrâwta thawnthu Sâwmfela hian a hrilh mai mai hmêl loh khawp mai le! Chu zân boruak nuam tak chu an pahnih tâna zân hlu tak, an dam chhunga hriat reng tlâk a ni dâwn ta a nih hi!

September ni 4 tûk a lo inher chhuak ve leh ta. Zîng dâr 6 vêlah Sâwmfela chu a harh a, a taksa dektu hmeichhe pangti lum ther ther chu enin a kut vei lam chuan a mit a'n hup a, nizân lama Anita-i nêna hun rangkachak an hman dun dânte kha a ngaihtuah lêt leh a, pawi a tiin Emmy lakah pawh a inthlahrung ta kher mai. "Emmy ka tihpalh tak zet, min ngaidam mawlh ang che," a ti rilru vawng vawng mai a ni. A lo rûi ve deuh bawk si a, Anita-i lahin a lo zir bawk nên mipa hrisêl pângngai thisen a ti lum tlat tawha Sâwmfela tân pawh han insûm reng kha a har khawp ang. A âwm ding lam bawha lo kuahtu Anita-i muhîl thaw sêk sêk chu a han en leh vang vang a, dik tak chuan hmêlṭha a tiin duhawm pawh a ti tak zet. Mahse, Emmy laka a inthiam lohna a len êm avângin rei erawh a en duh lo. Anita-i pangti lum ther therte chu mipate tân chuan tui taka muthilh siai siai-na tur hi a ni a, khatiang din hmuna han hnar thei tur mipa hi an vâng viau bawk ang, an awm lo zâwk hial âwm e. Sâwmfela thawh chhuah tuma a chêt rual chuan Anita-i chu lo harh ve nghâlin, Sâwmfela chu meng chiang mang lova enin a nui sêih a, "Em Es...a la hma, mu rih ang." tiin a lo kuah nghet sauh sauh. Sâwmfela erawh a ngawi reng a, In chung a en vang vang ringawt. Anita-i lah chuan a thawhsan a hlau deuh nge che sekin a kuah uluk sauh sauh mai si; chutia rei vak lo an mut dûn leh hnu chuan, "Anita, tho tawh ang. Nang pawh va hâw tawh rawh." tih leh thawh a tum chiah Anita-i chuan, "Min nei mai rawh Em Es, i nupui nih ka duh, nang nêna chhungkaw din hi ka châk tak zet." tiin a kut vei lamin a lu chu a dawm kâng a, Sâwmfela âwm chu a kut ding lamin a chûl heuh heuh bawk. "Ka thei lo ka tih tawh kha Anita, eng pawh ni se, nizân thil avâng khân ka tihpalh tak zet, pawi ka ti lutuk." Anita-i en chunga Sâwmfela'n a tih chuan Anita-i a lo nui var var. "Eng nge nuihzatthlâk awm a? Kha thil kha ka tum a ni miah lo, ka ti tak tak," Sâwmfela chuan a'n ti leh a. "Hei tak hi alâwm ka duh êm êm chhan che chu?" tih leh Sâwmfela hmûia fawh zeuh a rual zui. "Anita, a tâwk e, va inbual fai la, i hâw nghâl mai dâwn nia," Sâwmfela'n a tih chuan nui ver verin Anita-i chu a tho ve mai a, mi dang vênthâwn tur an awm lo bawka a ti nge saruakin bathroom lam chu a pan ta theuh theuh mai. Bathroom hnaiha Sâwmfela towel sen chu lain a bathroom-ah chuan a lût nghâl a, rei vak lo a inbual hnu chuan towel sen chu a hnute khuha vengin a rawn chhuak leh. Towel tlâng chuan a malpui a khuh pha tâwk chiah chiah a, a sam hnawm chapte nên chuan a mawi chiang a ni he vai nula hi! Sâwmfela'n a lo en zauh chu nuih sêihin a thawmhnaw chhuata tla darh nuaih chu a ha zui mawlh mawlh bawk. Sâwmfela pawh towel chu vengin bathroom a pan ve nghâl a, Anita-i chuan a hmûi hnuai lam pet pahin a lo nuih ver ver. Sâwmfela lah chu kum 25 chhung a lo khâwl tawh, nungên ram pilrila a theipalingkawh rah phîr leh a hnûnpui ber, tumahina an la lawh loh khatia Anita-i'n a han lo ta khân, a tui hnâng thianghlim thau pâi a sâwr chhuahsak zui nên a kal hê deuh hâ hian a inhria a; bathroom chhungah pawh chuan a ding sâi ngar ngarte'n a inhre hial mai. Chumi hnu rei lo têah a inbual zui ve nghâl a nih kha.

Nî a sâng zêla tûkṭhuan ei kham hnu-ah Sâwmfela pawh, a hlawhtlinna chan ropui tak nên Mizorama hâw turin a inpeih ve leh ta. A thawmhnawte chu pack zung zungin car-ah Manis-a nên an load leh nghâl a, biak erawh an inbe tam lo hle. Mumbai Police headquarter lam panin an tlân chhuak nghâl a, motor chi hrang hrangte leh mipui veivâkte chu hmuhnawm tak an ni. Mipuite hmêl hmuh a nuam a, an zalên ta tih hriat takin an thlamuang hliah hliah tih a chiang hle. Rei lo têah Police headquarter chu an thleng a, Mumbai Police-te paw'n an lo lâwm thiam khawp mai. Sâwmfela fakna ṭawngkam nên Police-te chuan an lo chibai laih laih a, duhsakna inhlân tawnin an nui sâng bawk. Sâwmfela chuan piah deuha inspector Mahesh Sharma lo ding ngawi reng chu enin, "Inspector, thawh hona ṭha tak kan nei thei kha a lâwmawm hle mai." ti nui sânga pan pheiin a va chibai a. Inspector Mahesh Sharma chuan, "Detective, nangmah ka hmuh tirh chea ka hmuh dân che leh ka ngaih dân che thu dik tak hrilh che ka duh a, i huat loh hrâm ka beisei," a tih chuan Sâwmfela a lo bu nghat nghat. Rawn sawi zawmin, "Ka hmuh tirh che khân nangmahah rinna ka nghat ngam rêng rêng lo va, i ruahmanna leh i duh leh mamawh zâwng i sawite kha ka ngaihtuahin, kha kan buaina lak ata min chhuah zalen theih kha ka ring hauh lo bawk. Keimah ang bawka vawi tam hlawhchham ve turah ka lo ngai hmak che a; mahse, tûnah chuan i thluak ka phâk lohzia ka hre chiang ta kher mai. Chawimawina ka lo dawn ve tâkte nên khân i lakah hian ka tê chem chem chu a nih hi! Him takin i ram chu thleng mawlh la, min han hre ve reng dâwn nia. Chuan, ka chapona avânga nihna ka pêk theih loh che leh ka koh theih lohna che hi tûnah chuan a phû ber i ni tih ka hria a; chuvâng chuan zah tak chung chein, "Sir," tiin ka'n ko teh ang che." tih leh inkhêng khawng vaha Salute pêk a rual zat. Chu veleh Police dangte chuan salute an lo pe sap sap a, officer-te pawh an bâng chuang lo. Sâwmfela chuan nui sânga en kual hlawmin, "Nangni hi in awm chhung chu Mumbai hi a zalên reng tawh ang. In inpêkna, in huaisenna leh kan thawh hona zâr vek a ni e. Lo dam ṭha reng ang che u." tiin salute chu a pe ve bawk a, Mumbai Airport lam pan turin Manis-a nên Police headquarter chu an chhuahsan leh ta a. Airport chu a hla lutuk lo bawka hmanhmawh lutuk ngaiah an ruat lo nge; car-a tlân pahin Manis-a nên chuan tîtî pahin an nui dûn leh var var ṭhîn a, putu leh ṭhian ngaihawm tak zawng an ni dâwn chiang a ni. Sâwmfela chuan Mumbai khawpui vêl chu a thlîr kual vang vang hnu-ah, "Manis, Mumbai-ah hian eng nge pawimawh bera i hriat?" tiin a zâwt a, Manis-a chu ngawi deuh vang vangin, "Kan hun tawngte leh kan ram din hmun thlîr hian "Dân" a pawimawh ber ang. Chu dân keng kawh tur chuan Police-te an ni leh ang a," a lo ti a, "Sir, nangin eng nge pawimawh bera i hriat?" tiin a zâwt lêt ve leh. Sâwmfela chuan, "Manis, i sawi tâkte pawh kha a dik tho mai. Mahse, dân aia pawimawh chu nunna a ni. Chhungkua te, ṭhiante leh kan hmangaih te, dân aia pawimawh hi tam tak a awm. Mumbai-ah chauh ni lo, hring nunah hian ka tihna. I nuna mi pawimawh leh i tâna hlu te, chu'ng mite chu dân nên hian khaikhin ngai suh ang che." a tih chuan Manis-a paw'n dik a ti hle tih hriat takin a lo bu nghat nghat mai.

Chutianga tîtî pah chuan airport chu an pan zêl a, Airport panna kawng pêng pawh an hlat tawh lo, Manis-a chu a nuin a rawn call a, motor dang veivâkte pawh an tlêm lai tak a ni. Chutih lai chuan an rin loh leh beisei loh thil an tawng ta thut mai le! Vawi leh khatah an car hnung lam chu silaiin an rawn kâp zawt zawt a, anni pawh chu an phu chiang hle. Manis-a'n vei lama car steering a herh thut rualin a phone chu a la thlauh zui. "Manis, khawpui hi tlân chhuahsan vat rawh," Sâwmfela'n a lo ti vîn ṭhat. Ding leh veia car tlân kawi zawr zawr chungin Airport panna kawng aṭang chuan Thane panna kawngpui lamah chak takin an tlân nghâl a, mi sualho lah chuan an car hnung dârthlalang vêl chu an rawn kâp keh chuai chuai mai. An car seat hi bullet proof-a tuam a nih avângin Sâwmfela leh Manis-a pawh hi an la him hrâm hrâm a ni. Hnung lam Sâwmfela'n a hawi chuan car dum pahnih leh jeep sen pakhatin an rawn ûm tih a hre nghâl. Mi sualho lah chuan fing thiam takin Mumbai khawpui lûn laiah chuan silai an hmet puak duh lo va, thukru hmakin an ûm par par ringawt. Police-te'n kawng laka a invênna atân ti-a car seat hnung hnuaia silai leh chemtê, grenade 5 an dahsakte chu hmanhmawh taka lâk a ngai tih hriain car seat lock-na chu a hmet zeuh a, silai magazine leh grenade paina tur kawr pahnih chu a la hmasa phawt. Tûnah chuan kawngpui pângngai zawh lovin one way an tlân mêk tawh bawka two wheeler-te nên pawh an insu teuh thei hle. Ke li nei motor tê deuhte paw'n rem leh rem lovin kawng an lo kian hman ṭâwk ṭâwk hi a ni mai a, mak ti takin driver-te paw'n an rawn en lêt vawng vawng ṭhîn. Chutianga thui fe an tlân hnu chuan Mumbai khawpui pawh an chhuahsan dâwn hnai ta. Sâwmfela chuan râlthuam paina kawr chu a ha sawk sawk a, Manis-a paw'n car steering vêng pahin a ha ve mawlh mawlh. Chanchin inspector Mahesh Sharma hrilh tumin phone a phawrh nghâl a, contact no zawnga a thai chhoh mêk laiin mi sualhovin an rawn kâp leh ta tlat. Chu veleh ding lamah Manis-a'n car steering chu a herh thut a, vei lama an âwn rualin car tukverhah Sâwmfela paw'n a phone chu a la thlauh ve leh nghâl. Mi sualho lahin an rawn chîl zui hmak mai si; he detective hi a hmangaih hnêna kîr leh tawh ngai lo turin fam khua a lawi lo vang tih a sawi theih ta tlat loh.

Tûnah chuan Mumbai khawpui daifêma mi retheiho chênna hmun pawh an tlân pêl ta. Chuta chin phei chu mi sualte chuan an rawn kâp zing ta sawt mai. Car chu tlân zikzak zuai zuaiin hlat pawh an inhlat lutuk lo. Mumbai khawpui chu an hlat tial tial a, chawhma dâr 11 a ri ṭêp tawh a, chawhma a nih vâng nge motor dang lah an vâng phian leh nghâl. Sâwmfela chuan car tukverhah dâkin rifle chuan a'n kâp lêt ve a, mi sualte lah chu tlân kawi ve zuai zuaiin anni lah chuti bawk, a kâp fuh thei bîk tlat lo. Manis-a lahin, "Sir, fîmkhur rawh." a lo ti deuh reng bawk a, a hmaa mi sualho camp awmna lam kha panin an tlân par par ringawt mai a ni. Mi sualho camp thlen hma ramngaw chhung vêl chu Sâwmfela chuan a melh tawn zak zak a, pênna remchâng a hmu mai si lo; Manis-a chu chak taka tlân zêl turin a hrilh sauh sauh. Chutianga speed sâng taka tlân an nih vâng chuan Mumbai khawpui pawh an hlat tawh hle. Hetiang reng chuan motor dang an tawh hunah mi sualte silai mu dawng thei an ni tih Sâwmfela chuan hre karin Manis-a hnênah, "He'ng ngaw chhunga pênna remchâng i hmuh veleh tlân zui vat ang che. Mi dangte'n an tuar thei tlat." a'n ti a, Manis-a pawh a lo bu nghat. Mi sualte lah chuan kawng ngîla an rawn hmuh phâk tawh chuan an rawn kâp nghâl zêl si a; an car side glass pawh an kâp chhe vek tawh. Thui deuh tak an tlân leh hnu chuan kawng sîr vei lam ngaw chhung chu a lo zâwl ta deuh, thing lian leh sâng tak tak buk ṭha bawk site inkârah Manis-a chuan a tlânpui ta a, ngaw pilril lamah tlân zêlin an car pawh chu a âwn bawi bawi tawh mai. Mumbai khawpui hnaih zâwngin vei lamah an tlân kual leh char char a, an hma lawk chu lo âwih deuh tawhin thing dingte chu an lo bit ta bawk nên, car chu ti dingin an chhuk vat. An râlthuam neih chhun nêna an tlân leh chiah hmu hman tâwk chiahin mi sualho pawh chu an rawn thleng a ni mai e. Rawn tlir zawt zawt nghâlin an râk ruai ruai bawk a, anni pawh chu ding vatin motor aṭanga chhuk leh ûm zui an rual leh zat. Car pahnih leh Jeep pakhatah chuan an inhnawh tâwt deuh tih hriat takin mi 20 lai an ni a; mi pahnih lek tân chuan mâwl taka hmachhawn ngawt chi an ni tlat lo. An vawi khat tihna a ni lo tih hriat zeta insem darh pahin Sâwmfela-te chu an ûm zui par par a, an hmuh rual rualin an kâp leh zawt zawt ṭhîn bawk. Silai mu chuan Sâwmfela leh Manis-a chu thâwi thuak thuakin an tlânna lama thingte chu a verh pawr chuk mai a, anni pahnih tân lah kah lêt a la rem ve tlat lo. Chutianga thui mawi tâwk an tlânchhiat hnu chuan, thing lianpui pui dinna leh inphenna tur lung lian deuh awmna hmun an thleng ta a, chu lai hmunah chuan ṭan hmun an siam ve hmiah. An hnu lam chu uluk takin an en kar a, ram awm dânin a zir lo bawka hual an rem ta lo bawk nên, mi sual lam pawh a huho deuhin an rawn hnai ve zêl e. Fîmkhur takin chung lam leh hnuai lam hmun tin chu an rawn en kual zak zak a, an rawn hnaih leh deuh chiah tihah Sâwmfela leh Manis-a silai chu puak ve zawt zawtin, mi sual lam hma hruaitu pali an kâp thlu hman tihah mi dangte chu bawk nghâlin an inau tuarh taurh a, Sâwmfela-te lamah chuan silai an rawn hmet puak ve leh zawt zawt nghâl.

Sâwmfela leh Manis-a chuan silai mu an ngah lêm loh avângin an kâp zui duh ta lo va, fîmkhur takin an tawlh hnung par par, mi sual lamin an tam hneh si-a an awmna ngaia awm reng kha an tân a him lo tih an hre chiang êm a ni. Thui mawi tâwk an tawlh lêt leh hnu chuan mual pharh ṭha deuh, thing lian tak tak ding thelh han hmun an thleng a, hmun khat aṭanga kâp tawh lovin, mi sual lamte an insem darh ṭan tiha kâp thei turin chhak leh thlangah ṭan hmun an siam hrang ta a, rei pawh an la châng lo vang tihah mi sualte pawh chu an rawn lang ve leh mai bawk. An hotupa chuan hmun hrana hrana kal darh turin zaizirin a hrilh nghâl a, an che vêl chu Sâwmfela leh Manis-a chuan an lo en kar thung. Chu veleh Sâwmfela chuan Manis-a chu enin, a rawn hawi ve chiah tihah lu a bu nghat a, chhak lamah Manis-a chu a tawlh chho hriau hriau zui. Mi sualte pawh an rawn hnai leh ta maw tihah Sâwmfela chuan a thlang bera rawn veh phei ṭhâm ṭhâmtu chu a rifle chuan a kâp let tawp a, a awmna chu sawn nghâlin mi dangte chu a châng zui leh zât. Pakhatin hnim buk keu dân dâna a awmna hmasa lam tin paha a hnaih leh mêk chu a'n kâp leh zawt zawt a, a rifle mu a zo ta chiah. Chu veleh mi sual lam aṭang paw'n an rawn kâp ve zawt zawt bawk. Tûnah chuan chemtê, pistol leh magazine pai lai pahnih bâkah grenade pathum chiah a nei ta. A rifle chu paihin Pistol magazine awm sa chu a hûm leh nghâl a, Manis-a hnaih lamah a kal pah zêl. Chutih laiin, Manis-a awmna lama silai a puah zawt zawt ruala mihring na tuar ṭê rî pawh kha a hre reng a, Manis-a aw a ni lo tih hre nghâl maiin a nui sak! Thui lo tê tawlh hnung paha Manis-a lam a pan leh lai chuan Manis-a pawh fîmkhur tak leh hmanhmawh deuh tak hian a rawn phei ve mêk hi a ni. An inhmu chiah an tawlh hnung leh par par a, an piah hla vak lova mi sualte lah chuan an lo hmu hman leh si; rawn tlir nghâl zawt zawtin anni pahnih pawh chu thing phênah an ding vat. Mi sual lam chuan hmanhmawh ang reng tak leh fîmkhur takin an rawn hnaih phei hriau hriau a; dama he ngaw chhung chhuahtîr leh hi an tum lo tih a chiang khawp mai. Chutia thing phêna an din reng lai chuan an rin aiin mi sual pathumte chuan an chhak lam aṭangin an rawn hnaih hman tlat. An kal leh tur chiah Manis-a lam Sâwmfela hawi chuan an chhak deuha mi pathum, thing phên paha Manis-a rawn tintute chu a hmuh ruala dawk chhuak zawkin, "Manis bawk rawh." tih ṭhawt leh bawh thlûk a rual a, an pahniha lum sawn nghâlin an bul hnaia hnim leh thing vêl chu mi sual pathumte silai mu chuan an rawn tlir zawt zawt nghâl. Chu veleh a inphenna thing bul aṭang chuan grenade pakhat chu lain a pin chu pawh dawk a rual a, mi sual pathum rawn veh leh mêktute lamah Sâwmfela chuan a vawm phei zui. Mi sual pathumte insaseng tum an râk ṭhawt rualin grenade chu a puak dur a, mi sual pathumte zînga pahnih chu vawrh nawlhin thingah an intauh chawrh, pakhat zuang sawn hman deuh lah grenade puak chuan hnâwl hmanin lu ruh keh rawp khawp hian lungah a intauh bur bawk a, Manis-a'n silai mu a sêng thlâwn tlat, a rifle magazine pahnihna a kâp zo ve leh chiah bawk.

Chu veleh hmanhmawh takin an tlânchhe leh rih a, an mi ûmte an sawngnawi lo bawka grenade an pai bawk nên mi sual lamte paw'n an rawn hnaih ngam tawh meuh lo. Thui fe an tlânchhiat hnu chuan hmun sâng deuh lai an thleng a, "Manis, hetah hian châwl lawk ang," tiin Sâwmfela chu thing bul nghêngin a ṭhu deuh hnawk, a nâk nêm ding lam chu a dawm vawng vawng zui. Manis-a'n a lo hmuh chuan pan hnai nghâlin, "Sir, i inhliam a ni maw? Kha thisen a chhuak nasa lutuk," tih leh a hliam enkawlsak a tum chu a lo dang vat a, Sâwmfela chuan nui sakin, "Manis, hliam buaipui hman kan ni lo. Thil pakhat chauh min tihsak leh ta che," Manis-a mita en kar chung hian a'n ti a, "Eng nge ti tura min duh sir? Ka tih theih zâwng a nih chuan ka tihsak mawlh ang che." Manis-a paw'n a lo ti ve vat. Chutah Sâwmfela chuan Manis-a mit taka en reng chung hian, "Kan awmna hmun hi hla deuh takah hêl la, car kan dahna lam kha i pan vang vang dâwn nia, i thlen veleh hmanhmawh takin he ramhnuai hi tlân chhuahsan vat la, inspector Mahesh Sharma hnênah chanchin va hrilh ta che. An rawn tlân ve mêk tawhin ka ring." a hliam na tawrh insûm tih hriat tak hian a'n ti a, Manis-a chuan hnuk ulh deuh chung hian, "Sir, kha'ng hun leh nî kan hman liam tâkte-ah khân i thu hi ka hnial ngai lo tih i hriat kha; mahse, tûn ṭum chu min ngaidam mai ta che, khawiah mah ka kalsan dâwn lo che. Hetiang din hmunah hian ka kalsan thei lo che a ni." a lo ti ve tlat.

Sâwmfela chu a nui sak a, "Ka hria alâwm Manis, ka tâna i rinawmzia leh i inpêknate hi! Mahse, tûn ṭum chauh ka bodyguard i nih tâwp nân ka thu hi i zawm leh ka duh a ni." a lo tih chuan, "Ṭhian kan ni i tih kha!" Manis-a'n a lo ti vat. "Ni e, ṭhian chu kan ni alâwm," nui sakin Sâwmfela'n a lo ti leh, "A nih chuan ṭhian chu an thi dûn tur a ni dâwn lo'm ni," Sâwmfela kut vuan chunga nui sâng hian Manis-a chuan a lo ti ve leh a, "En teh Manis, silai mu pawh i hmang zo ṭêp a nih kha. Mâwl taka kan pahniha thih kher a ṭûl lo a nia, i chhungkua tân nang tal i dam chhuah a ngai a ni. Kei chuan chhungkua ka nei ve tawh lo asin, Manis. Inhnial nân hun kan khawh ral hnem ta, a tâwp nân ka hrilh ang che khân va lêt vang vang la, keiin he'ng mite hi ka lo ti buai ang. I hmuh leh neih angte hi hmuha neih ve ka châk khawp mai Manis. Mahse, tûnah chuan thu tam sawi hun a ni lo, ka thih i duh loh chuan ka thu hi zâwm ngei ang che. Ka nunna hi i kutah a innghat a nia, tûnah kal nghâl rawh." Sâwmfela'n a tih chuan mittui parawl ṭeuh hian Manis-a chuan, "Sir, i hmangaih tân khân dam taka i kîr leh tur thu i tiam kha!" a lo ti ve leh a, Sâwmfela chuan an awmna thlang lam ramngaw hring dup chu thlîr vang vang pahin, "Ani chuan ka hmangaih chu a ram leh hnam tân a nun a hlân ta a ni tiin ka chanchin hi a sawi ṭhîn ang. Kal tawh rawh le, i kal loh chuan keimah ngei hian ka that ang che. Tûnah kal nghâl tawh." ti vîn ṭhatin pistol chuan a tin a, a nam zui nawk nawk. "Ka thih i duh loh chuan kal vat rawh." ti leh ṭhatin pistol chuan a la tin reng. Hreh zetin Manis-a chu a ding a, mittui luang zawih zawihin Sâwmfela chu a la en reng. Sâwmfela'n, "Kal vat rawh." a lo tih leh ṭhat rual chuan hreh zetin a inher a, a mittui hru zauhin a kal zui ve mai bawk. Sâwmfela lan theihna hmun hla deuh tak a thlen rual chuan a hawi lêt leh a, mittui luang zawih zawihin police leh sipaite'n zahna chibai an inbûk dân dik taka inkhêng khawng vah chung hian Sâwmfela chu Salute a pe a, Sâwmfela paw'n a ṭhutna hmun aṭang chuan salute a lo pe lêt ve bawk. Chu veleh Manis-a chu hmanhmawh takin an car dahna lam pan chuan a kal zui par par a. Manis-a liamna lam chu rei lo tê thlîr zui vang vangin, "Manis, ka ruang tal hi rawn hlâwm ang che. Ṭhian ṭha tak i ni," a ti sap a, Emmy pawh hre chhuak zawk a, mah se, rei chutianga ngaihtuah zui hman a ni tlat lo. Mi sualho rawn kalna lam turah chuan a pistol leh magazine la hman loh pahnih, grenade Manis-a pai lai a chhuhsakte nên pali a paite bâkah, chemtê a paite nên chuan ṭan hmun a siam zui leh sauh sauh mai.

Hetih laiin, khatia Mumbai khawpui chhunga mi sualte silai kâp leh car pakhat an ûm lai lo hmutu mi ṭhenkhatte khân, a rang thei ang berin police station an call nghâl a, chanchin an hrilh hnu-ah inspector Mahesh Sharma leh police dang 20 vêl gypsy pahnih leh car pathumin an rawn tlân chhuak ve nghâl bawk. Mahse, an hmanhmawh luatah traffic ti jam palhin an tâng reng tawh zâwk a, chu'ng mi sualte ûm lai chu Sâwmfela leh Manis-a kha an nih an ring nghet hmiah bawk a, an hlauhthâwn luat vânga an speed chak deuh khân motor dang veivâk an ti khawlo palh tlat. Siren ri ral ral nên han tlân mah se, motor a tam bawk nên kawng kian mumal hman lo an awm miau si; kawng dang aṭanga tlân zui ngaihna awm hauh lovin an tâng zui a ni dêr. Motor dangte lah an tâwt ang reng si a le! Tih theih dang nei ta lo chu awm hmunah an lo inseh ruh ve ṭawlh ṭawlh ringawt mai a ni. Ramhnuai lamah ve thung chuan, a râlthuam paina kawr chu phelh sawk sawkin Sâwmfela chuan a t-shirt dark Grey bântlâwn hâk lai chu a hlîp vat a, a nâk nêm ding lam an kahna aṭanga thisen chhuak tih zia nân nghet takin a t-shirt bân chuan a ṭâwn nghâl a. A inpeih leh hnu chuan a piah hla vak lova mi sual rawn hnai mêkte chu en vang vangin, "Dam in ning tawh bawka rawn hnai mawlh teh u Zâwngchhe-ho. Damin he ngaw hi in chhuahsan hauh lo vang." Mizo ṭawng ngei hian a lo ti chheu chheu mai. Mi sual lam chu mi 9 lai an la ni tih pawh a hre thei mai bawk. Tûna an awmna lai hi hnim tlêmna lai niin thing lian ve tak tak erawh an ding thelh han a, he ramhnuaia hruai luh hi Cave Man hian a tum rilrûk kha a ni. He'ng mi sualho hian an mi ûm lai hi tu nge tih hre chiang hawt lovin an pâwng ngam ve êm êm a; khawpui chhung aia ramhnuaia khawsa ṭhang, pasalṭha thisen kai leh thluak ṭha chungchuang, a thinrim poh leha ngaihtuahna fîm telh telh ṭhîn a nihna hi rei lo têah an hre tawh ngei ang le. Chutia mi sual 9-te'n Sâwmfela an hnaih leh mêk lai chuan nî pawh a her deuh tawh a, an mi pêl lai chuan engkim ruahmanna fel tak nên a lo châng lêt khiau tawh zâwk tih rêng an hre si lo.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:29 pm

THE CAVE MAN.

✍️ Duata Khualchhâwn.

BUNG 20-NA.

Mi sual pakuate chuan inhmu phâk tâwka insem darhin Sâwmfela chu an hnaih phei hriau hriau a, an mit leh beng pawh an lên uluk kher mai. Chutianga fîmkhur taka thui vak lo an hnaih phei leh hnu chuan, chhak lama mi pathum inhnaih deuhte zînga pakhat chuan ram hrui a pal a, engah mah ngai lovin a pal sawn deuh sawk. A ṭhiante pahnihin an rawn en zawk hnu-a hma lam an pan ṭan leh chiah grenade pahnih a puak rual ta dur mai le! Anni pathum pawh chu râk ruai ruaiin an lêng lawp a, an tlâkna hmunah chuan an thi nghâl tih hriat takin an che zui tawh lo. Chutia chhak lama bomb puak dur leh an ṭhiante râk rî kha an hriat veleh mi dang parukte chu an fîmkhur zual sauh a, an mi veh lai hi mi namai a ni lo tih pawh an hre chiang telh telh tawh. Sâwmfela awmna hmun tur ni-a an hriat an thlen hnu chuan zaizira hual tumin an inhrilh a, lei lam an bih uluk deuh chu hnah vêla thisen far phei zai zai an hmu ta. An mi ûm lai hi an hliam ve ngei tawh tih hrilh nawn an ngai lo chiang hle. Chawhnu lam a nih tawh avângin ngaw chhung chu a thim deuh ruih tawh a, chu lai thing thelh hmun erawh chu hmun dang ai chuan a êng deuh. Fîmkhur taka thisen far chu chhui pahin an kal zêl a, hmun sâng lam pana thisen far an hmuh rual chuan chu lai hmun hual tur chuan an insem darh zui zat. Chutia mi sualte'n a awmna hlui an hual hriau hriau lai chu an piah lawka thing phên aṭangin Sâwmfela chuan a lo thlîr reng a, a nâk nêm ding lam dawm pah chuan thlang lam hnaih deuhah a veh lêt ve leh. Mi sualte'n thing bula thisen tam deuh an hmuh hnu chuan an mi veh lai hi a lo inthiarfihlîm hman tawh tih an hre nghâl a, an thin a va rim mai mai tak! Chu lai hmuna hnuhma vêl chu bih zung zungin a kalna lam hriat tumin thisen far chu an zawng zui leh zat, hawi kual vat vata thui vak lo an kal hnu chuan khât deuh pharha thisen far an hmu zui leh. Thisen far a khât deuh dânah chuan an mi ûm lai hian a thisen chhuak tih tâwp a tum ve hle tih an hre thiam nghâl mai. Chhak lam pana thisen far an hmuh leh chuan an ṭhian thi tate pal puah tur khân grenade kam tura a kalna a ni tih an ngaihtuah thiam bawk. Ram awm dân leh thisen far dân vêl uluk taka an en kual hnu chuan, an mi veh lai hi ram pilril lamah a kal tih an hre thiam ta. Ni e, Manis-a lêt lehna hnu kha an hmuh loh nân a thisen hmangin Sâwmfela hian ram pilril lama hruai a tum tlat a ni. Mi sual lamte hian mi pahnih ûmin an la ûm char char a, Sâwmfela'n thing bân chen vêl a sah hmangin Manis-a hnu ni âwm takin hnim ṭo vêlte chu a vaw pial deuh han bawk nên, tûnah pawh hian mi pahnih hnu chhui angah an la inngai reng bawk.

Chutia hnu chhuia an insem darh leh ṭan tihah an thlang lam aṭang chuan pistol vawi thum a rawn puak dur dur a, thlang lam hnaih bera kal chu ṭê ṭhatin a vir nawk zui. Chu veleh mi dang pangate chu bawk nghâlin pistol rawn puahna lam chu an rawn kâp ve leh zawt zawt mai. Thlang lama mihring tlânchhe thâwm an hriat rualin an ûm ve leh nghâl a, an thlang ruam zâwl deuh lai thing pakhat phêna Sâwmfela biru chiah chu an kâp zui leh zawt zawt, a inphenna thing chu an kâp pawr fur mai a ni. Mi sual lamte chuan an mi ûm lai chu pakhat chauh a ni tih hre nghâlin, khawiah nge pakhat zâwk kha a awm tâk ang, an lo kâp hlum reng tawh em ni ang tihte an ngaihtuah nasa mai a, mahse, an mi hmuha kha an duh ber zâwka kha a ni tih an hre bawk nên, chumi ruam pan thla pah chuan an in-signal zauh zauh mai a ni. Sâwmfela paw'n hnim buk leh thing phên pah zêlin a awmna chu a sawn leh tawh a, thing pakhat phên aṭanga mi sual rawn hnai zêlte zînga pakhat thing phen tuma che chhuak chiah chu kâp let leh tawpin, a chhaka mi a kah erawh thing phênah a biru ve hman tlat. Anni lahin an rawn tlir zawt zawt a, pahnihte chuan pistol an hûm ve tawh thung. Sâwmfela'n a magazine thlâk tuma magazine pakhat a thun leh tur chu a hmanhmawh luatah a thlauh palh a, a thlang ruam langsâr laiah a tleng thla zui lehnghâl. "Mai mai chuan!" ti supin a magazine pathumna leh a zawhna chu a thun leh vat. A awmna hmun chu a sawn loh chuan an rawn hual dâwn tih a hre thiam reng mai si; silai mu ren a ngai tawh bawk nên a grenade pakhat chu a phawrh a, mi sualte a bih leh vang vang hnu-ah a piah hla vak lo thing bul phêna pakhat ṭhu fel chiah lamah grenade chu a vawm nghâl, rei lo têah puak durin chu pa chu thlang lam âwihah chuan râk ṭhawtin a lêng thla vawn vawn a, a lum thla zui nawk nawk. Chu veleh hnim phên pahin Sâwmfela chu a bawkvâk phei zêl a, a nâk nêm hliam vâng chuan ṭhen ve sak sakin, thisen a hloh hnem ta bawk nên a mitmeng dâvâ riai mai chuan a chau deuh tawh tih an ti chiang ber âwm e. Tûna a hliampui tawrh nên hi chuan mi pathumte chu an la tam deuh hrat a ni. Chu'ng mi sual pathumte lah chu an fîmkhur sâwt tih hriat zetin, amah an hmuh chian hman loh chuan an rawn kâp duh tawh hauh lo va, Sâwmfela tân lah inthlahdah ngawt chi a ni dêr si lo. A hliam tuamna leh a kekawr bawp ding lam phei chu thisen a kai nasa tawh hle a, a thinrimna, luhlulna leh tawrhchhêlnate chuan an la chêttîr ve hrâm hrâm a ni ber.

Heti reng chuan rei lo têah a chau chhe mai dâwn tih a hre reng bawk si, a rang thei ang bera mi sual pathumte chu thah vata a hliam chu uluk zâwka enkawl a ngai tih pawh a hre chiang hle. Chutia chêt thawh dân tur a ngaihtuah lai chuan ruahmanna thar a ngaihtuah chhuak ta hlauh. Grenade pakhat a la neih chu lain a râlthuam paina kawr chu a hlîp a, hawi zak zakin a hliam tuamna t-shirt thisenin a chiah huh hlup tawh chu a hmet sâwr a, thui vak lo a vah phei hnu-ah mihring aia sâng deuh lei pâwng bul a thlen rualin a râlthuam paina thisen kai nuaih chu a hnutchhiah zui zat. Chutia a thisen chhuak a sâwr hnu chuan tlêmin thisen farte chu an zia deuh e, chumi lei pâwng bula thing lian zet tâwi deuh zung thlâr sûngah chuan a vâk phei nghâl a, chu lei pâwng chung thing phên pah chuan mi sual pathumte chu a châng lêt ta hmiah mai. Rei vak lo a chân hnu chuan a piah lawka hnim rawn che phei dat dat a hmuh rual chuan a nui sak! Rawn hnai zêlin pakhat chuan thisen tam deuha far a hmuh rual chuan a ṭhiante chu zâwi deuh hian a'n ko sap a, chu pa ding leh vei aṭang chuan chu pa awmna chu mi pahnihte pawh chuan an pan vat. Chutah fîmkhur takin thisen far chu an rawn chhui zui lehnghâl a, thui vak lo an chhui hnu chuan Sâwmfela lo chânna hmun chu an hnaih tawh hle. Hmun dang hawi leh zak zak chunga an rawn hnaih phei leh chuan lei pâwng bula a râlthuam paina kawr a dah chu an rawn hmu ta chiah e. Chu veleh fîmkhur lehzualin an rawn hnaih phei leh hriau hriau zui. Leia Police-te râlthuam paina thisen kai nuaih chu pakhat chuan a kutin a han thai let a, a bul lawka a ṭhiante pahnih chu enin lu a bu nghat. Chu lai vêla hnuhma bih tuma an che chhuak leh dâwn chiah tihah an beisei loh deuhin grenade pakhat lei pâwng chung lam aṭang chuan a rawn tla a, lei a thlen rualin a puak ta dur mai. Grenade an hmuh ruala insaseng an tum chu an tlai deuh ta a ni e. Hlam hnih dâwn lêng lawpin an ṭê ṭhawt a, an tlâkna hmunah thui lo tê lum zuiin che chhuak thei an awm ta lo. Rei lo tê a nghah leh hnu-ah Sâwmfela chu a tawmna aṭang chuan a chhuk a, an thi chiang ngei em tih hriat nân a thinrim bawk si chuan, tîm hauh lovin an hrawkah chemtê chuan a vit zui thawih thawh mai. Pakhat chu a la thi chiang lo tih hriat taka rawn meng kâwkin a tâl khûr dar dar a, a zal zui ve leh. Chumi hnu-ah Sâwmfela chau tawh lutuk chu a nâk nêm ding lam leh a khûp vei lam dawmin a kûn ngawih ngawih a, a awmna hmun vêl chu a en kual ruai ruai bawk. Pakhatin phone a lo ah chu lain, time set a en chuan tlâi dâr 3:30 a lo ri ṭêp tawh a, battery lah chu a low ang reng si; "Charge ve tur che alâwm le, hmêlphak," ti supin a ding lama hmun sâng deuh pan chu a rual leh ta a ni. Chutia a phei leh chu a lu pawh a hai deuh chiai chiai tawh a, a hliama ramhmul damdawi a bel hnan chuan thi chhuak tur chu an ti zia viau bawk. Hmun sâng deuha thing ding ṭhup hmunah chuan a lâwn chho zui a, ngaw chhung thim deuh ruih hnuaiah chuan a tlu leh nawk ṭhîn. Chumi tlâng pâwng deuh chung zâwl a hnaih ta tih chuan tlêmin a lo êng deuh a, chu chuan phûrna pein a lâwn ṭauh ṭauh mai a ni.

Hah leh chau taka thaw hlâwi hlâwiin tlâng chung zâwl chu a lâwn thleng ta e. A thlang lam chu khâm sâng tak hi a lo ni a, thlî thaw heuh heuhte chuan chhêm dâi sawng sawngin a hawi kual ruai ruai bawk. Chu tlâng pâwng deuh aṭang chuan a thlang lama tuipui(Arabean Sea) lo cham pût mai a hmuh chuan a lo hla vak tawh lo hi a ni. Tlai ni tla turin tuipui a chhun tlêt ser ser te, lenkâwl sen no chêk maite leh ramngaw hring dup maite chu a thlîr kual veng veng a, damin he ngawpui hi chhuahsan a inring tawh hauh lo. Thing bul pakhat nghênga ṭhuin khuarêl mawi takte chu a thlîr kual leh veng veng phawt a, a din hmunin a zir bawk nên Emmy laka a inthiam lohnate chuan a hnuk no an kai tho ni ngei tur a ni, Sâwmfela chu a mittui a rawn luang ngiai ngiai mai. "Emmy, ka tihpalh, ka tihpalh tak zet, ka hmangaih lutuk che tih hi min hriatsak mawlh ang che." ti mawlh mawlhin a mittui chu a hru zauh a, a phone ken lai a en chuan a rin loh deuhin signal a lo awm hlauh. Phone chu Nokia(keypad) niin, a unlock hnu chuan Emmy number chu dial-in a call nghâl a, Emmy hian a ngaihdam mai a ring hauh lo, mahse, a thih hma ngeia ngaihdam dîl erawh a tum sa vâng zâwka call a ni. Emmy'n a lo pick hnu chuan, "Emmy...keimah," a ti sap. "Awi! Sâwmfel, tu phone nge i hman a? Khaw nge i phone? Airport ka thlen hunah ka lo call ang che i tia min lo call leh si lo va," lungawi lo lek lek hian Emmy'n a lo ti a, Sâwmfela chuan nui sakin, "Ni e, ka buai deuh a, ka tihpalh a ni. Phone ka thlauh chhia a," a tih chuan a aw chu Emmy chuan a lo ngaithla uluk hle tih hriat zetin, "Sâwmfel, nâ i nei em ni? I inhliam alaw?" tiin a lo zâwt vat. Sâwmfela chu a nui leh sak, "Min kâp fuh ve khanglânga maw le! Mahse, a na lo ve, ka ṭha aw. Emmy uluk deuhin lo ngaithla la, rei kan inbe thei dâwn lo a nia," a tih chuan, "Ti nge? Engati nge kan inbiak rei theih loh ang?" hre thiam lo takin Emmy'n a lo ti leh vat.

Emmy...i ngaithla em? Lo ngaithla rawh aw.

Hnuk ulh aw tih hriat tak hian Emmy chuan, "Umm...ka ngaithla e." a lo ti a.

Emmy...nang ka lo tawng che kha ka lâwm khawp mai. Hmangaihna hmêlhriat tura ka lo tawng che hi ka vânnei ka ti. (Dam dapa tiin Sâwmfela chuan a kâ aṭangin thisen a chhak chhuak ṭhat a, mittui luang ngiai ngiai chunga a awmna hmun mawi êm êmte chu thlîr kualin a nui sâng bawk.)

Sâwmfel, khatiangin sawi suh. Ti nge min kalsan tum anga i ṭawng chhuah tâk mai. Khawiah nge i awm? Ka rawn hruai ang che.(Emmy pawh a mittui a parawl pûr tawh.)

Ka awmna hmun hi a mawi khawp mai Emmy, hmun mawi leh nuam takah ka awm a ni. Awm ve la ka ti tak zet. (A aw aṭang chuan Sâwmfela pawh chu ṭah a insûm hle tih a hriat.)

(Emmy chuan inhnît hlaihin a mittui a hru zauh a.) I awmna hmun min hrilh rawh Sâwmfel, ka rawn hruai ang che, ka rawn kal ang. Khawiah nge i awm? (A inhnît zui hlawp hlawp bawk.)

I laka ka thil tih dik loh man ka hmu a nih hi! Emmy, ka tihpalh tak zet. Min ngaidam hrâm rawh aw khawngaih takin...

Eng...eng nge i sawi awmzia? Ka lakah thil tih sual i nei hlei nêm Sâwmfel. Khatiang khân sawi suh khawngaih takin,

I tân ka thianghlim tawh lo a ni Emmy...ka lo rûi ve deuh a, ka room-ah min rawn luh chilh a, kha vai nula lepchiah lakah khân ka insûm zo ta ngang lo a ni. Ka tihpalh, ka tihpalh tak zet. (Sâwmfela pawh insûm tak chung hian a ṭap hak hak a.)

Ka hria alâwm Sâwmfel, kha nu-ina a duhzia che leh i laka a awm dân zawng zawngte kha! Manis-a khân engkim min hrilh vek alâwm, ka tâna i rinawmzia pawh min hrilh asin. Mahse, tûnah chuan a nih tur ang a ni zo tawh a, khatiang lam kha chu sawi tawh suh. Rawn hâw phawt rawh khawngaihin...(Emmy chu rilru na bawk, a mipa hmangaih pialrâl kawng zawh mêk vânga lungchhe bawk siin a awm a, a ṭap zui hlap hlap mai.)

Mak ka tiin awih harsa ka ti hle mai Emmy. Pawi ka ti lutuk,

Sawi tawh suh Sâwmfel, rawn hâw rawh. (Emmy chu a ṭap nasa tawh hle.)

Ka rawn hâw dâwn alâwm Emmy. Mahse, hetiang ni lo hian i thinlungah khân aw, vawi duai lo ka rawn hâw nawn fo ang. Pasal ṭha tak lo nei la, lo duat hle ang che aw.

Ka duh looo...mi dang neih ka duh looo...khawngaihin rawn hâw rawh Sâwmfel, khawngaih takin...(A ṭap thâwmah a nu leh pa, an awmpui nulate'n an rawn pan a.)

Ka hmangaih che Emmy, ka hmangaih lutuk che. Off tawh rawh le.

Aih, off lo vang. Off suh Sâwmfel, khawngaih takin off suh. Dah rih suuhhh...(Lungchhe vânkaiin Emmy chu a ṭap hawm hawm a, a nu chuan rawn kuah vatin thil awmzia a lo zâwt mawlh mawlh. Tlâi dâr 4 pawh a ri dâwn hnai ta.)

Emmy chuan a nu kuah chung leh ṭap hawm hawm chungin, "Nuuu..Sâwmfela, Sâwmfela kha..." tiin a sawi zawm thei lo. A nu chuan, "Sâwmfela chu engtin nge a awm a? Bawihi...maw...engtin nge a awm Sâwmfela chu?" a lo ti leh mawlh mawlh. "A thi dâwn, mi sualin an kâp hliama a thi dâwn?" Emmy chuan ṭap hawm hawm chunga a lo ti chiah a nu leh pate pawh chu an inmelh kâwk mai. An awmpui nulate lah Emmy an khawngaih bawk si, Sâwmfela an khawngaih bawk si chu awm hmunah an lo ṭap ve hlaih hlaih a, "Chanchin thar thlîr vat a ngai a nih chu," Pu Zothansanga chuan tiin Emmy chu an hnêm leh laih laih bawk.

Hetih laiin, Manis-a leh Police-te paw'n Sâwmfela chu ramhnuaiah an lo zawng reng tawh zâwk a, an mi thah tâk ruangte pawh an hmu nual bawk. Tûnah phei chuan khua a tlâi tawh avângin ngaw chhung phei chu a thim deuh mup mai a, chhûna rawn chhuak tawh an nih avângin torch light an pai si lo; an phone flashlight nên an chhui mawp mawp ringawt a, Manis-a'n a kalsan tâkna hmun kha thleng tawhin hnu vêl an lo bih zui leh mêk hi a ni. Mi sual panga vêl an la dam lai khân Police-te Mumbai khawpui rawn chhuahsan mêk leh Manis-a tlân lêt kha khawpui pâwn hla vak lovah an intâwk a, chanchin Manis-a'n hrilh zung zungin Sâwmfela an ûmna ram lam pan chuan an lêt leh nghâl vang vang, rin aiin Sâwmfela leh Manis-a khân Mumbai khawpui chu an lo tlân hlatsan zêk a, thui tak an tlân hnu-ah Manis-a pênna zâwn kha an thleng ve leh mai bawk. An thah bâng mi sual la damte an awm tâkah tiin fîmkhur takin an chhui phei ta a, duh ang paw'n an chhui chak thei ta lo a nih hi! Phone flashlight chuan thui an chhun thei si lo va, mahse, hnu thup lêm loh a nih avângin an la chhui ve thei zêl. Chutia thui vak lo an chhui leh hnu chuan ruam thlang lam pana mi pakhat hnu aia tam tih hriat tak, hnim pe sun leh leia ke hniakte chu an hmu fuh leh ta hlauh. Hnu chu zui nghâlin thlang lam chu an pan ve leh nghâl a, khua pawh a thim chiang tawh hle. Ruam zâwl deuh laia hnu an hmuhte an chhui leh hnu chuan thisen tam deuha far phei zai zai chu inspector Mahesh Sharma chuan khawihin a'n nuai neuh neuh a, "Thisen a khang hman tawh dânah hian dârkâr hnih vêlin kan tlai a nih hi! Detective chu dama kan hmuh leh ka va ring tawh chiah lo êm!" a tih chuan Manis-a phei chu a meng deuh kâwk a. Beidawn nân hrim hrim pawh ti-a an chhui ṭan leh deuh chiah tihah, mak tak maiin favâng boruak inmung chho ṭan mêk tawh si chu ruah a rawn sûr seng seng a, mite tâna a hun leh nun thâp tak taka mi inpe zo êm êm India sawrkâr duh lai, Detective Malsâwmfela'n pialrâl lamtluang a zawhsan tur chu vân pawh khian a ṭahpui ve hial a ni mahna le! Ruah chu a sûr tam lêm lo bawk nên, inspector Mahesh Sharma leh a hote paw'n an tih theih hnuhnung ber chu hlah an tum lo tih hriat tâk hian hnu chu an la chhui fan a, piah deuh lawka mi pathum ruang chu an hmu zui leh. Hnuhma vêl chu an bih leh nghâl zung zung hnu chuan ruam zâwl lehlam pana mi pakhat hniak chu an hmu ve leh mai bawk. Chu ngei chu Sâwmfela hnu a nih ring nghet hmiahin an chhui zui leh nghâl par par a, thui vak lo an chhui hnu-ah tlâng chung lam pana mihring hnu chho zai zai chu an hmu leh nghâl. Hnu chu uluk deuha an bih chian nâk chuan, chhuk zâwnga mi pakhat hnu an piah mual lam pan tlang an hmu leh zat. Tlâng zâwl a lâwn hnu-ah a rawn chhuk leh a nih dâwn hi tiin hnu rawn chhuk zâwk chu an chhui zawm leh ta a, thui lo têah mual chu a lo âwih ṭan ta bawk. Ruahin a nan fai mêk thisen tlêm an hmuh hnu phei chuan an hmanhmawh tawh kher mai.

Hnu chu thui vak lo an chhui thlâk hnu chuan luite tui luang ri kerh kerh an hre ta a, Sâwmfela chu hliampui tuar a ni bawk nên a tuihâl hian chu luitê chu a pan a nih an ring thiam nghâl bawk. Ko paha an chhui thlâk leh hnu chuan luite kama mihring hnuhma chu an hmu ta mai rêng a, mahse, an beisei angin Sâwmfela a'n hmu mai tlat lo. Luite kam lung khawkrawk laia Sâwmfela t-shirt ngei ṭet deuh hrup an han hmu chu an meng hnual ta ruih mai. Inspector Mahesh Sharma chuan, "Kan tlâi deuh a ni, a pawi hle mai. He lai hmuna ramsa chêngte hian a ruang min lo lâk khalh a nih dâwn hi!" tih leh Manis-a rawn kal hnai ve mêk en chu a rual a, a hmuh dân leh ngaih dân chu a hrilh ve leh bawk. Manis-a chuan phâwk zeta inspector Sharma ken lai Sâwmfela t-shirt ṭet hrup chu en vawng vawngin a mittui a luang nghâl ngiai ngiai a, muangchânga pan hnaiin Sâwmfela t-shirt chu a la a, ṭhingṭhi hnawkin, "A ni thei lo, Sir. Hetiang ringawt hi chuan i bo hlen thei lo vang. Ka rawn kîr leh ang ka tih kha, ngati nge min lo nghah loh?" tiin râwl chhuah tak meuh meuh hian a ṭap hawm hawm a, Police-te paw'n hnem ngaihna an hre bîk tlat lo, ṭhenkhat chuan mittui nên Manis-a chu an thlîr tlawk tlawk ringawt mai a ni. Hnuhma han bih chiang leh turin ruah sûr tam deuh tawh chuan a far reh vek tawh dâwn si; chu'ng lai hmun lah chu luite kam lung khawkrawk hmun ber kher a lo ni bawk nên, mihring hnu han chhui theihna chi a ni lo hrim hrim a, chu lai luite kama Sâwmfela t-shirt bâk chu eng hnuhma mah hmuh an nei si lo. Manis-a ṭap rî leh ruah sûr rî te, luite tui luang rîte bâk thâwm hriat tur dang rêng rêng a awm lo. Chu lai hmuna minute 10 vêl an awm vang vang hnu chuan lunghnûr zetin an kîr leh ta a ni. Thui deuh tak an lêt leh hnu chuan Manis-a chu a ngawi reng a, mi dangte paw'n hre thiam takin an be zui lêm lo. Sâwmfela nêna kha'ng hun leh nî an hman dun tâkte kha a mitthlaah an rawn lang chuai chuai a, a bodyguard mai ni si, a laka mi narân leh a ṭhian ang maia Sâwmfela awm dân te, a nui hmêlte leh nizân lawka an zu in dun laite kha a hmu chiang hle. Buaina an tawh ṭan aṭanga Sâwmfela'n hliam na tak tuar chunga a la be nui sâng theite kha a ngaihtuah thlen leh meuh chuan a mittui chu dan zawh rual a ni lo. "Manis, i hmuh ang leh neih angte hi hmuha neih ve ka châk khawp mai," a tih kha eng nge ni ang tihte a ngaihtuah zui a, tûna a din hmun thleng tura a ram leh a hmangaih thla khat êm pawh an awm dun hmaa a rawn kalsan thu te, Anita-i vânga a hmangaih laka a inthlahrunzia-te a ngaihtuah phei chuan, Sâwmfela a lainat lutuk chu hmûi pet ngar ngarin a mittui a hru deuh reng tawh mai a ni. A thinlung kil khatah erawh Sâwmfela kha a thih hi a la ring thei hauh lo va, eng tik nî-ah emaw chuan a rawn kîr leh ngei a beisei tlat lawi si.

Chutih laiin, Emmy pawh a room-ah a ṭap bâng thei meuh lo. Chanchin tharah thu chiang an hriat loh thu leh, detective chu a thi ngei tih finfiahna eng mah Police-te hnên aṭanga an la hriat loh thu an puang a, mi sualte'n Mumbai khawpui aṭanga an ûm kha Sâwmfela leh Manis-a car ngei tih erawh report an dawng kha a ni. A nu leh pate chuan Sâwmfela a thi ngei tih an la hriat loh thu chuan Emmy chu an han hnêm ṭhîn, ani lahin ṭah bâkin engtin mah a chhâng lêt thei dêr si lo; a chhan chu Sâwmfela hnên aṭang ngeia a hliam tawrh thu leh, a mangṭhana ṭawngkam dêngkhâwng tak kha a hre miau si a ni. Rei vak lovah Puia-te pawh an rawn thleng a, an ṭhiannu a hmangaih dâirial changa ngaih tawh sûna ṭap hlawp hlawp chu an thiam ang tâwkin an han hnêm ve a, Christy, Muani leh Zuali-te phei chuan an ṭahpui hi a ni ber mai, Emmy khumah chuan ṭhuin an mittui an hru reng ringawt mai a ni. Zân dâr 10 vêl a ni a, Manis-a pawh an Inah ngui nghiaia inkhalh hâwin a mittui a hru leh zauh ṭhîn. Mumbai khawpui mawi takte chu thlîr kualin engkim mai chuan Sâwmfela an hriat chhuahtîr a, "Sir, nang anga ṭhian ṭha ṭhian dang rêng rêng hi an awm lo. Ka nun chhan nân hliam na tak i tawrh phah a, chu chuan ka lak aṭang chauh ni lo, i hmangaih lak ata kumkhuain a dah bo ang che maw! A ni thei lo, rawn kîr leh mawlh teh." ti sep sepin a mittui chu a hru sêng lo a ni ber. Chutianga thui fe a tlân hnu chuan an In chu a thleng ve ta e. Doorbell chu hmet ri ral ralin rei lo têah a farnu chuan a lo hawng a, "Ka u," a lo ti sap. Manis-a chuan chhâng lêm lovin a lût tlang a, a nu leh pate mut tuma tho chhuak mêkte'n an lo hmuh chuan, "Bawiha, dama kan hmu leh chu kan va lâwm êm! Detective chu in hmu ta em?" a nu chuan a lo ti vat. Ngawi rengin Manis-a chuan lu a thing ringawt a, an fapa dama an hmuh leh avânga a nu leh pa, a farnute hmêla hlimna leh lâwmnate chu a hmu thiam reng thung. Sâwmfela chanchin ngaihvena Mumbai Police-te chêt chhuah thu kha chanchin tharah an hre ve tlat a ni. A chhungte'n hmêl hlim sârha an lo kuah chung chungte chu a en deuh vang vang a, thil hriat chhuah a nei ta. "Manis, i hmuh ṭhin leh neih angte hi hmuha neih ve ka châk khawp mai," a nâk nêm dawm chung leh nui sânga Sâwmfela'n a tih kha chiang êm êm hian a hre chhuak a, chhungkua a la nei bîk hi Sâwmfela sawi awmzia tak kha a ni tih a hriat thiam leh hnu phei chuan a ṭap chhuak hawk. A nu leh pa, a farnute chuan hre thiam lo tak hian a ṭah chhante zâwtin an lo hnêm laih laih a, a pa chuan, "Ka fapa, engati nge i ṭah tâk mai, eng nge a chhan min hrilh teh," a lo ti nghâl a, ṭah insûm tak hian Manis-a chuan, "Ka pa, Sir chu keimah vânga hetiang din hmun thleng hi a ni asin. Police-te nên a kawr chiah hmuh kan nei, ka lakah detective a nihna angin a awm ngai lo va, ka ṭhian ṭha tak leh mi narân ang maiin a awm ṭhîn." tiin mi sual pathumte'n an kah dâwn ṭêpa Sâwmfela'n a bawh thlûk thu leh amah zâwk chu an kah fuh thu te, a hmeichhe hmangaih nêna an chanchin te, chu a hmangaih tâna dam taka kîr leh chiah a duh thu a sawi leh meuh chuan, a nu leh a farnu phei chuan mittui an lo hru sap sap a, a pa paw'n a fapa din hmun chu hre thiam takin a mittui a hru ve zauh bawk. Inti pachang hrâm hrâm tura an fuih leh hnu chuan mut zai an rêl ve ta a ni.

A tûk khua a lo vâr a, tûkṭhuan ei kham a nih leh meuh chuan chanchin thara Sâwmfela thih thu chuan Mumbai khawpui mai ni lo, India ram pum a fan chhuak ta. Mittui leh ṭahna, lungngaihnate chuan ram pum chu a luah khat leh ta ti ila a fiah ber âwm e. An sal tânna lak ata zalenna dâr khawsak a, lungngaihna chhûm dum chhah ṭha êm êm vai kiansaktu, nula tlangvâl pitar putarte ṭap râwl leh mittui chuan India sawrkâr duh lai, Mizo tlangvâl huaisen Detective Malsâwmfela an uizia a ti chiang a; an nghahhlelh khawvâr mawitu ni êng duhawm an hmu ṭan chiah tiha chu ni êng hnuaia pangpâr mawi êm êm; mite ngaih sân leh ngaih hlut, a ram leh hnam puite hmangaihnaa khat thinlung neitu Sâwmfela'n mawi takin pâr a chhuang ṭan mêk tihah chu pangpâr chu thliaha a awm ta mai si chuan India ram pum chu a vêl a ni ber. Zalenna ni êng hnuaia mite hlim hmêl kha lungngai hmêlin a thlak zo va, mit khap kâr lekah an nui hmêl kha ṭap hmêlin a rawn thlâk leh ta si. Heti a nih mêk lai hian, Mizoram lamah pawh Sâwmfela chanchin an lo hre vek tawh a; India ram puma Police-te, sawrkâr hotute'n Live Telecast ngatin Sâwmfela sûnna hun an hmang bawk. President leh Prime Minister bâkah Police officer-te'n Sâwmfela thlahna thuchah hnuhnung an sawi a, an ngaih hlutzia entîr nân President-in, a tûk leh(Ninganî) chu India ram puma zirna in leh office zawng zawng khâra chawlh a puang ta hmiah mai. Tichuan, sûnna hun an hman zawhah Mizoram Police Department-te paw'n Live ngatin Sâwmfela sûnna leh an thurûk zawng zawng, Zâwlkhawpui chhan chhuah a nihna kawnga tlangvâl huaisen hmêl leh hming an thup tâk kha, tûna an sûn tâk Detective Malsâwmfela hi a nih thu te, ram pâwn lama a hnam puite a chhan chhuahnaa nun chân ta a ni tihte an puan leh meuh chuan Zoram mipuite a ṭhâwng hle a, mittui nên an ui thu leh an khawngaih thu an sawi sap sap zui. A bîk takin Aizâwl mipuite phei chuan an tuar lehzual a, social media hrang hrangah Mizo ṭawng thu leh hla mawi, lung kuai tak taka an thlahna thu post pawh an awm nual rêng a ni. Sâwmfela thlalâk Mizoram Police-te'n an post-te chu an lo download a, screenshot bawkin caption-ah,
"A ram leh hnam chhan nâna lâifei chawiin, a zâm lo dorâl hrâng kârah.
Kan ram kan hnam zalenna turin, dâwntuai mi hrâng vâl a fam ta." tihte leh thu mawi tak takin an uina thu an ziak a, Zoram mipuite mittui pawh a luang nasa kher mai.

He chanchin dêngkhâwng tak vâng hian Emmy chu biak hleih theih a ni lo va, a chângin a khawnga buaipui ngaiin a awm fo. Chu chuan a nu leh pate, a ṭhiante leh ṭhenawm hnaite hnuk a vit a, mittui nên Emmy tui taka muhîl ang maia a awmte chu an en tlawk tlawk ringawt mai a ni. Sawi tawh angin Emmy hi hmangaihna kawngah hian a mikhual hle a; mipa ngaihsak lo mi a nih avângin hmangaihna lipuiah mipa dangte a la chênpui ngai lo. Mahse, tûn ṭumah erawh a vawi khatna atân, a hmangaih hmasa ber ni bawk Sâwmfela'n hetiang din hmun a lo thlen tâkah chuan a tuar na hle rêng a; a hriatna lam thlengin a khawloh phah mai ang tih hlauhawm khawpin amahah nghawng a nei lian êm êm a nih hi! Ni e, hmangaihna avânga vawi tam bum lo ni tawh te, hliam na tak lo tuar tawhte hi chu an fing tawh a, tawrh dân tâwk nat dân tâwk an thiam tawh ti ila a dik lo hran lo ang chu maw! Mite nun chhiat phahna leh tliah hnâwpna khawp turah pawh hian na tak chunga dam dân an thiam a, an nelin an lo chhel tawh ṭhîn. Hmawlhtê chu awlsam takin kan elh tliak thei, mahse, a bung tinte chu kan belhbawm zêl chuan awlsam taka elh tliah mai mai theih a ni tawh lo. Chutiang deuh chuan hmangaihna avânga hliam na tak tuar tawhte hi chu an lo khawng tawhin an fei êm êm ṭhîn rêng a ni. He nula khawngaihthlâk, hmêlṭha leh duhawm, Zâwlkhawpui Katy Perry an tih Emmy Lalruatfeli erawh khitiang mi khi a ni ve lo va, a mipa hmangaih hmasak ber Sâwmfela hi a zawng zawngin a duh a, a hmangaih a, a thîk thu pawh a chhe hle bawk. Khatia Anita-i laka Sâwmfela insûm zo lo a che sual tih a hriat hnu pawh khân rilru na tak chungin a hnêna rawn kîr leh phawt turin a la chah lawm lawm a nih kha. Hliam na tak tuar chunga Sâwmfela'n thu dik tak a hrilh ngam kha huaisen a ti a, a lo ngai sângin Sâwmfela'n dâwt a hrilh ngai lohzia hre tharin a tâna a rinawmzia a hre chiang êm êm zâwk a, khami zân a chêt sual chhan pawh kha amah Sâwmfela zir loh vâng a ni lo vang tih hi a ring hmiah bawk. A hmangaih khatiang din hmun hlauhawma a din lai khân a thinrim phal mawlh lo va, a tih tauhsan phal mawlh lo, a duh ber chu dam taka Sâwmfela hmuh leh chiah kha a ni. Khawvêla hmeichhe vânnei ber chu, mipa rin tlâk tak thlazâr hnuaia awmte hi an ni an ti ṭhîn a, chutiang bawkin khawvêla mipa vânnei ber pawh, hmeichhe rinawm hmangaihnaa khat thinlung neitute hi an ni ti ila a fiah ber âwm e.

Tichuan, nî a liam ve zêla zirtâwpnî a lo inher chhuak ve leh ta. Emmy chu zânah a muhîl mang lo va, chaw a ei ṭha duh hek lo; a ṭâm hnêm tak tak chauhin a ei ve a, a na hle tih chu a mit meng leh hmêlah pawh hmuh theihin a lang ṭan tawh. Ngawi renga ṭhuin mittui nên tukverh lam a hawi reng ṭhîn a, a chângin varanda-ahte chuan a va ṭhu leh veng veng ṭhîn. Zirtâwpnî tûkṭhuan ei kham a nih chuan pângngai takin a inbual fai leh vang a, a tîr kha chuan bathroom-ahte chuan inbual tura lût siin inbual lo hian a en ngei enin a lo ṭhu leh veng veng ṭhîn bawk. A nu leh pa, an awmpui nula pahnihte leh Puia-te ṭhianho chuan an hman chângin an kan reng ṭhîn a, Emmy chu an vêng deuh chawt a ni ber. Chutia Emmy inbual fai chu inchei hliau hliauvin a inthuam nalh leh kher mai. A room aṭang chuan a chhuak a, sitting room a pan thlâk lai chuan, "Bawihi eng nge i tih dâwn? I school dâwn em ni?" a nu chuan mak ti deuh tak hian a lo ti a, Sâwmfela chanchin an hriat aṭanga an hmuh ngai loh Emmy chuan hmêl hlim sârh hian, "Aih, Sâwmfela ka hmuak dâwn, a lo thleng ṭêp tawh ang." tiin a phûr hmêl viau leh nghâl. A nu leh pate chuan an fanu awm dân chu a dik lo tih hre thiam maiin an mittui tla tur erawh an dang hrâm hrâm a, "Bawihtê, Sâwmfela chuan Emmy khân inah min lo nghâk rawh se a tia lâwm, i chhuah daihte chuan inhmu lovin in insûlpêl daih dâwn asin." a nu chuan a lo ti vat a, "Mahse, ka hmu châk tawh alâwm, keimah ngeiin hmuah ka duh," Emmy chuan a la ti tlat. An awmpui nulate phei chuan mittui an lo hru zeuh zeuh tawh. Chu veleh Pu Zothansanga a lo inrawlh ve a, "Bawihtê, Sâwmfela'n Ina min lo hmuah loh chuan ka rawn hâw dâwn lo a ti a nia, khawiah mah lo chhuak suh se ka rawn thleng ṭêp a ti, lo kal rawh i room-ah nghâk ang aw. A nih loh chuan Sâwmfela a rawn hâw duh lo palh ang, lo kal rawh le." nui sânga tiin Emmy dârah a vuan a, Emmy chuan phûr zeta nui ver ver hian, "Tak tak em Pa, ka hmu châk tawh eee...ka ngai tawh lutuk, a nih chuan ka room-ah ka nghâk dâwn aw," tih leh phûr zeta a room pan chu a rual leh a, a nu leh pate paw'n mittui hru zauhin an zui chho ve bawk. Chutiang chuan hun a liam zêla chhûnlai a nih pawhin Sâwmfela hmêl rêng rêng a rawn lang thei si lo; Emmy chuan rawn hâw har a ti tawh hle tih hriat zetin, "Nu, Sâwmfela chu a lo hâw har tawh eee...min ngai ve lo ami le? Keima'n ka va hmuak mai ang." a ti leh chu a nu chuan chhân har a ti kher mai. "A lo thleng ṭêp tawh ang bawihtê, i hmanhmawh lutuk a nih kha," tiin Emmy hnung chu a chûl heuh heuh a, a fanu awm dân chuan a rilru a ti na tak zet. Engtianga rei nge an fanu hi dâwt hmanga an khap beh reng theih ang tih chu ngaihtuah tham tak a ni. A duh ber Sâwmfela lah a reh vung vung tawh mai si.

Nî a her liam a, zanriah ei kham hnu chuan Emmy chu a pângngai leh tawh tih hriat zetin a ṭap leh hlap hlap tawh a, mu leh mal rêng nei lovin hun a hmang ral ve tawp a ni ber. A ṭhiante chuan varanda-ah hruai chhuakin an ṭhutpui ṭhap a, a hmaa nula fiam nuam leh ṭawng duh ve tak, fiamthu duh êm êm ṭhîn Emmy kha hmuh tur a awm ta lo. An biaknate chu a chhân loh châng a tamin an biak loh lahin biak nachâng rêng rêng hre lovin a en ngai a lo en leh tlawk tlawk ṭhîn. Puia chuan Reuben-a leh Kima chu kheuh zauhin piah deuhah an va ding a, sawi mai tur erawh an hre lo tlâng hle. Vâna thla zahve leh arsi de sep septe chu an thlîr kual a, Aizâwl khawpui mawi takte chu an thlîr kual leh laiin Puia chuan, "Ka sawi kha a dikzia tûnah chuan a chiang ta kher mai. Ani graduate-na leh kan graduat-na hi chu tehkhin rual a ni lo ka tih kha," a mittui hru zauhin a'n ti sap a. "Ni e, a dik khawp mai. Mi ṭhenkhatte chu hun rei tak kan bul hnaia awm tur leh, an kal bo ruala theihnghilh ni mai turin an rawn lang a, ṭhenkhat ve thung erawh chu hun rei lo tê kan kianga awm a, hriat reng ni tawh tura min kal bosan ṭhîn hi an awm an tih kha; chu'ng mi ṭhenkhat hriat reng tawh turte zînga mi chu Sâwmfela kha a ni." Kima'n a lo ti ve leh. Reuben-a chuan mittui tling piauva Aizâwl khawpui êng tuarhte chu la thlîr reng chung chuan, "Hnehna kan chang ta tih hi hrilh ka châk ṭhîn. Amah avânga kan hlawhtlinna chan thu hi!" a lo ti ve leh a, hmûi pet ngar ngarin an mittui erawh a luang ngiai ngiai mai. Chutih lai chuan naktûkah an picnic-na hmunah khân kal leh a duh thu Emmy chuan a lo sawi sap a, Puia-te pawh an phei vat. Hun remchâng danga kal an sawi lahin Emmy chuan mittui nên khawngaih a lo dîl mai pawh ni lo, a ngen hian a lo ngên lawm lawm a, chutiang na nâ nâ chu tiin an rem ti ve ta ringawt mai a ni. Chumi hmunah chuan a hmuh duh leh a beisei tak Emmy hian hmu thei tak ang maw!

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:30 pm

THE CAVE MAN.

✍️ Duata Khualchhâwn.

BUNG 21-NA.(Last Chapter)

Inrinnî a lo inher chhuak a, tûkṭhuan ei kham dâr 9:30 pelhah Puia-te pawh an rawn kim leh ṭhap tawh. Emmy'n an picnic-na hmun fan a duh thu kha a nu leh pate an hrilh tawh a, an fanu chu dan mi a ni dâwn lo tih hre thiamin an lo rem ti ve ta mai kha a ni. Christy chuan Emmy chu a room aṭangin a han hruai chhuak a, an ṭhiannu hliam tawrh na êm êm mai, dam lai lu sûna hun hrehawm tak tuar mêk Emmy hmêl chu hmuh hrehawm an va ti êm! Pu Zothansanga-te nupa paw'n nui sângin han be ve mah se, an mit meng leh hmêla natna inthup chu hmuh hmaih rual a ni lo. Pâwnah zui chhuakin Puia Car seat hnungah Emmy leh Christy chu an ṭhu dûn a, "PA zo, nu sâng, lo ngaihtuah suh u, kan rawn hâwnpui leh vat dâwn nia," Christy chuan tiin rei lo têah an picnic-na hmun pan tur chuan an inkhalh chhuak ta a ni. Kawngpui an thlen thlâk thlengin Pu Zothansanga-te nupa paw'n an thlîr zui vang vang a, "A pi leh pute kan nih angin Sâwmfela kha kan lo dang mai lova aw. Bawihtê, i nu leh pate hi min ngaidam mawlh ang che," ti sapin Pu Zothansanga paw'n mittui a hru zauh bawk. Hmanhmawh lutuk lova tlân zêlin Aizâwl chu an chhuahsan dâwn hnai ta. Motor leh mipui veivâk pawh an tam leh tawh hle. Traffic Jam-ah an tâng khawmuang lo bawka Aizâwl chu an chhuahsan ve ta e. Chhim lam kawng chu an zawh chhunzawm par par nghâl a, favâng boruak zâm vêlte chuan boruak an ti nuamin khua a thiang hle bawk a; han hawi khawthawn vêl pawh a nuam kher mai. A khât tâwkin Puia leh Christy chuan Emmy chu an be leh zauh ṭhîn a, a rûl tâwkin Emmy paw'n a chhâng ve zêl bawk. Sâwmfela-te In hlui an tlân pelh ata tawh Emmy chu a inhnît leh feih feih tawh a, a tân chuan nimin lawka thil thleng ang maiin engkim a chiang êm êm mai si. Inti pachang hrâm hrâm tura Puia leh Christy-te'n fuih pahin an tlân zêl a, an tum ram a hla lêm lo bawk nên chawhma dâr 10:30 pelh hlekah an picnic-na hmun kawng pêng kha an thleng ve leh mai bawk. Kawng pêng thla pawh chu rin ai takin a la fai phian a, anni pawh an tlân thla zui ve leh nghâl.

Motor luh theih chin an thlen hnu chuan chhuk sap sapin Emmy chu an hnêm pah bawk a, lui mawng lam pan chuan an chhuk leh ta a ni. Emmy pawh a mittui hru leh zauh ṭhînin a chhuk ve zêl a, buaipui ngai khawpin a la awm bîk hauh lo. Chawhma dâr 11 a pêl hlek tihah Sâwmfela riah ṭhinna Pûk zâwn kha an thleng ta a, chuta chin chu Emmy a inhnît hlap hlap tawh. Pûk lam pan chuan chho leh nghâlin biak pawh an inbe tam lo hle. Pûk bul an han thlen chuan hnim leh hrui zâm vêlin Pûk chu an lo bawh lûk tawh a, pûk kawt vêlah pawh thing tê deuh leh hnim an ṭo far bawk. Pûk kawngka zâwna ramhrui lo inzam nuaihte chu a chemte paiin Kima chuan a han sât veng deuh a, inhnît hlaih hlaih paha Emmy an hruai lût chu engkim a lo chul ṭhiap tawh hi a ni. Ramsate'n an luah tawh tih hriat takin pûk kawt leh pûk chhung lamah chuan ramsa hniak leh êk vêlte pawh an hmu nual bawk. Chuta Emmy'n pûk chhung a han thlîr kual vêl chu Sâwmfela nâk nêm hliama damdawi a hnawihsak laite kha a mitthlaah an rawn lang chuai chuai a, a insûm hman ta lo. Rawn ṭap chhuak hawkin, "Sâwmfel," a'n ti vawng vawng a, a ṭhiante paw'n mittui hru sap sapin pûk chhung vêl leh Emmy ṭap hawm hawm chu ngawi rengin an thlîr chhâwk sek ringawt. Lungchhe êm êma Emmy'n, "Sâwmfel, min ngaihtuah ve miah lo em ni? Min ngai ve miah lo em ni? Kei chuan ka la rawn zawng zêl che asin." a'n ti lawm lawm chu mipa pathumte pawh an pachang thei tawh lo, an ṭap ve hlap hlap mai. Mittui hru sap sapin Emmy chu an han hnêm leh rih a, rei vak lo pûk chhunga an awm hnu chuan hmun danga Sâwmfela sûlhnute chhui leh turin an chhuak zui leh ta a ni. Pûk chunga Sâwmfela phênglâwng tumna hmun erawh kawng a phui nasat tawh êm avângin an lâwn ta lo va, lui mawng lam panin an chhuk thla leh ta zâwk a. Thui lo tê an chhuk hnu chuan an riahna hmun kha an thleng ve leh ta e. Hlim taka tui an chênna lî pawh kha a ngai ngaiin a lo hring duk ruih a, an din hmunin a zir lo bawk nên tui han chêng thei an ni tlat lo. Chu lai hmun vêl chu thlîr kualin an hawi ruai ruai a, full moon lâwma Sâwmfela hova an zâi lai te, a nui hmêlte leh an hun hman tâk zawng zawngte kha chiang takin an hmu nawn awn awn bawk. Daihlima an ṭhut chawlh vang vang hnu chuan Emmy leh Sâwmfela sangha kahna lui mawng lam panin an chhuk zui leh ta a ni.

Lui mawng lam an zawh thlâk leh hnu phei chuan Emmy a ṭap bâng thei tawh lo. A hmasa ber atân a ṭhiante kalsana Sâwmfela nên an inzui hmasakna ber kha a ni tlat a ni, a bâk kha chu a ṭhiante awm loh lai zêl a nih kha. Chutia lui mawng lam pana an chhuk lai chuan kha full moon zâna Sâwmfela nên an inzui thlâk lai te, an tîtî dân leh Sâwmfela aw ngeite kha chiang êm êm hian a hre chhuak leh a, a mittui hrûkna avângin a mit pawh a sen râm tawh. Ding lama lui luang kâwi luite pakhatin a rawn finna kha an thleng leh chiah Emmy chu ṭap chungin a ṭhu hnawk mai. A ṭah nasat luatah a aw pawh chhâng zo tawhin a ṭap chhuak ṭha thei tawh meuh lo va, Sâwmfela'n chawnga tui thâlsaka a in-tîr laite kha a tân chuan a la chiang tâwk viau a ni. Rei mawi tâwk chu lai hmuna an ṭhut hnu chuan Emmy ṭap pawh a zia ve deuh ta, ngawi rengin Sâwmfela sangha kahna luite chu a thlîr veng veng a, a khât tâwkin mittui a hru leh zauh ṭhîn. Sâwmfela vaimîm hmun pawh kha kawng a pin tawh avânga kal ta lo an ni. Tûnah chuan chu ramhnuaia an sûlhnu hnuhnung ber, Sâwmfela ngawi dawhna hmun chauh fan tur an nei ta. Emmy chu ngawi renga dingin luitê chu a zawh chho nghâl a, a ṭhiante paw'n ngawi rengin an zui ve mai bawk. Muangchânga chho zêlin Sâwmfela ngawi dawhna hmun pawh kha an thleng ve leh ta e. Sâwmfela'n bâwmrâng dawha sangha a mannate kha lo mawih tawhin a lo chhe nuaih tawh a, tui khuah nâna lung a rem ṭhenkhat, fûr tui lianin a len bo ve tâk loh lung lian deuh ṭhenkhatte pawh an la awm ṭhap mai. Chu'ngte chu Emmy chuan ṭap chhuak hlei thei lo chuan a thlîr kual hlawm a, engkim mai chuan Sâwmfela an hriat chhuahtîr tawh si; aw chhâng thâm chhal hian, "Sâwmfel, ka rawn kal leh tawh hi khawiah nge i awm? I thlarau talin ka mit hmuhah hian rawn inlâr teh. Vawi khat chauh tal hmuh leh che ka duh, khawngaih takin rawn inlâr rawh." ti lawm lawmin lung pakhat chu a bawh a, a chûl vêl ruai ruai bawk. Chu zet chu hmuh hrehawm an ti hle tih hriat takin Reuben-a chuan, "Ṭhianpa, Emmy'n a koh lawm lawm che hi i chhâng dâwn lo em ni? I ṭhiante hi min hre chang ve tawh lo a ni maw?" ṭap hlawk hlawk chung hian a lo ti ve leh a, tumah insûm thei an awm tawh lo. Sâwmfela thla chu ko mawlh mawlhin an ṭap zui hlawp hlawp bawk. Inhnêm leh chuang tur awm lova an ṭah hlawp hlawp hnu chuan insûm takin Puia chuan, "Eng pawh ni se, tûn ṭum atân chuan kan hâw rih phawt mai dâwn em ni? Ni dangahte pawh kan kal leh zâwk dâwn nia," a'n ti a, Emmy chuan ṭap chung hian, "Aih, Sâwmfela tel lo chuan ka hâw duh tawh lo. Sâwmfela ka nghâk dâwn, Sâwmfela nên hâw ka duh," a lo ti thâm chhal mai zawng, sawi leh tur hre lovin a ṭhiante chuan mittui nên Emmy chu an thlîr ringawt tawh.

Heti a nih mêk lai hian, Manis-a'n a ngen nasat êm avângin Mumbai Police ṭhenkhatte pawh a vawi thumna leh a tâwpna ber atân tiin Sâwmfela ruang, ramsate ei bâng tal hmuh beiseiin an lo zawng ve leh mêk tawh hi a ni. An zawn bâkah a zau thei ang bera insem darhin an lo buai ve leh hle. Chu ramngaw lah chu a chhahin a lo zau nek mai si a, ram leh hnam pasalṭha ropui chu a ruang emaw, a ruhro tal emaw pawh hmu lova han thâm raltîr mai kha an inthiam thei ngang bîk lo a ni. A hliam leh thisen farte an hmuh khân thui kal thei turah an ngai bawk si lo va, beidawng ru tak chungin an pâwng zawn mup mup a ni ber. Thim dâwn thleng pawha beiseina ti sâng deuh tur an hmuh zawh tâk lohah chuan, "Manis, kan theihtâwp kan chhuah tawh a, tûnah chuan detective hi a thi ngei a ni tih pawm ve tawh mai rawh. A thawmhnaw kan hmuhna thlang deuhah khân a chemte pai ngei pawh kan hmuh tawh kha; mihringin a ruang kha la se chuan khatiang chemte ṭha leh nalh tak kha an inlâk daih ang chu! Ramsa hnute pawh a tam êm kha. Ani chuan huaisen tak leh ropui takin a ram leh hnam tân a nun a hlân ta a ni e," inspector Mahesh Sharma'n a tih dap dap hnu chuan Manis-a paw'n dik a tiin engtin mah a chhâng lêt lo. Chumi hnu rei lo têah lunghnûr zetin an motor dahna lam an pan zui ta a ni. Hun a ral a, nî a liam a, thawhṭannî a lo ni ve leh ta reng mai. Emmy pawh tlêm chuan a pângngai ṭan tawh viau. Mahse, nî dang ang lo takin a ṭawng tlêm êm êm a; a nu leh pate bâkah an awmpui nulate paw'n an be tam lo hle. A nui hmêl mawi tak kha hmuh tur a awm tawh lo va, a mit meng leh hmêlah chuan natna, lungngaihna leh khawharnate bâk hmuh tur a awm hauh lo. Tûkṭhuan ei kham a nih chuan school kal turin a insiam mawlh mawlh a, a inpeih hnu chuan, "Nu, school ka kal ve tawh ang e," tih chiah sawiin a chhuak zui zat. A car-ah chuan lûtin a inkhalh chhuak nghâl a, a nu leh pate'n fîmkhur tura an chahte chu hre âwm pawhin a awm lo. School lam pana a inkhalh phei lai chuan mittui a hru leh zauh ṭhîn a, a tân chuan Zâwlkhawpui zau tak chu hmun reh leh khawhar, thlalêr zau tak ang mai a chang zo ta. Fam hnu ngaia ṭah leh mittui tlâk reng hi a sâwt lêm lo tih hre rengin, hun âwl neih tam loh a tân chuan ṭha zâwkin a hria a; chuvâng chuan hetia a thinlung khawhar hnemhnânna tur hian school-a naupangte kianga hun hman hi a tum ta kha a ni.

School a thlen hnu-a car aṭanga a chhuak chiah Primary zirlai tharte leh pâwl sâng zâwk lo kai ve ta naupang duhawm tak takte chuan, "Good morning miss," ti nui ver verin chibai an lo bûk laih laih a, Emmy paw'n nui sânga chhâng lêt vein rei erawh a nui lo thung. Middle chin chung lamte chuan an Miss Emmy chu hre thiam takin an lo khawngaih ve êm êm a; Emmy vânga school kal nuam ti êm êmtute paw'n tûnah chuan hrehawm an ti tawh kher mai. An Miss hmêlṭha leh nui mawi an tih êm êm; Miss Katy Perry ti-a an sawi hial ṭhin a hmangaih a chân tâk avânga a nui hmêl, a hlim hmêl an hmu ngai ta lo hian zirlaite-ah pawh nghawng a nei nasa hle. Tichuan, class-te an kal ṭan a, Emmy luhna class rêng rêng bengchheng leh ninhlei ngam an awm lo. Tûn hmaa period khat zawh dâwn hnaiha classroom interaction hun nuam tak ang kha an hmang thei tawh lo va, a hun tawngin a zir lo bawk nên chu chuan Emmy class chu a ti hrehawm deuh tih zirlaite awm dânah chuan a hriat theih. Nî a sâng zêla lunch break hun a ni ve leh ta. Emmy chu office-ah pawh awm duh lovin Sâwmfela ṭhutna ṭhînah khân a ṭhu a, zirtîrtu dangte paw'n an khawngaih thu an sawi sap sap rêng a ni. Miss Hmingtei chu Emmy hnêmtu ber a la ni zêl a, Emmy pawh hian a zahin a nêl hle bawk. Chutia Emmy a en ngai ena a ṭhu ngawi reng chu naupangte chuan hnaih ngam chiah lovin an lo melh hrek hrek a, primary zirlai ṭhenkhat han inûm kâwi zawr zawrte pawh rei an infiam peih tawh lo. Chutih lai chuan Sâwmfela pawm hmasak ber pâwl khat zirlai ni ṭhîn, hmeichhe naupang hmêlṭha tak Lalrinsangi(Sangsangi) pâwl thum ni ve ta chu Emmy ṭhutna bulah chuan inthlahrung tak hian a va phei chhet chhet a, Emmy ṭhutna chung dona ban chu vuanin Emmy chu a en kiau bawk. Chu chu Emmy'n a lo hmuh chuan nui sâng hian a'n ko va, inthlahrun hmêl taka a kut zungpui seh tatin a pan ve beuh beuh. Emmy chuan nui sânga pawmin eng eng emaw a zâwt neuh neuh a, fel fai takin a chhâng ve zêl. Chutah Sangsangi chuan, "Miss, hotupa kha sikul a lo kal thei tawh dâwn lo ti raw? Ka ngai eee," a lo ti reuh chuan Emmy chu a vêl teuh kher mai. Ani naupang la mâwlmang ta na nâ nâ chuan an Miss Emmy din hmun chu ngaihtuah pha ve mawlh hek lo le; a rilru-a thu awm chu tlang takin a sawi chhuak hmiah mai a ni. Chutah, "Miss, i nui ngai tawh si lova kan sikul pawh hi nuam ka ti tawh lo. Ih maw...hotupa khân maw, sikula min hmuh tawh loh hunah chuan vânramah min hmu leh ang a ti asin. Mahse maw, vânramah chuan min hriat ka ring tawh lo eee...ih...ka lian tawh dâwn sia, min hre tawh lo ang." a lo ti leh phei chu Emmy a inhnît hlaih a, lehlam hawiin mittui a hru zauh. Amaha danglamna awm chu he'ng naupangtê-te pawh hian famkim lo takin an lo hre thiam ve deuh chu a nih dâwn hi tihte a ngaihtuah zui a, mittui tling piauva nui sâng hian, "Sangsang, vânramah chuan hotupa pawh khân a la hre êm êm ang che. Kei pawh min la hre reng dâwn alâwm. Saw, i ṭhiante paw'n chaw an ei tawh sia va ei ve phawt rawh aw." a tih chuan thu âwih takin Sangsangi chuan a tiffin la turin an classroom lam a pan ve mai bawk.

Chutih lai chuan Miss Hmingtei kha Emmy ṭhutna lam panin thingpui leh chow tui hmêl tak a rawn keng bawk a, "Emmy, i ril a ṭâm ang hei ei tur ka rawn ken che," nui sâng hian a ti a, Emmy paw'n a mittui hru zauha nui sângin, "Awi! Min rawn ko mai lo a nih kha Miss Hmingtê... mahse, ka lâwm lutuk e." a lo ti ve bawk. Emmy bulah chuan ṭhu ve nghâlin an han tîtî dûn sep sep a, Emmy mit meng leh nui hmêla natna inthup chu miss Hmingtei chuan hmuh hrehawm a ti ve hle tih a en dânah chuan a hriat mai. Miss Hmingtei chuan, "Emmy, ka tawrhpui chein pawi ka tihpui tak zet che. I na tuar hmêl pângngai ai khân i nui hmêl hmuh hi hrehawm ka ti zâwk daih. Mitthi kaih thawh theihna khawpa thil tih theihna chungnung nei ila chuan, i tân liau liau hian Sâwmfela kha ka kai tho leh ang maw le!" a ti ve vawng vawng mai a ni. Lunch break hun a zawh hnu chuan chawhnu class an han kal leh a, an bân hnu-ah Emmy pawh khawhar takin a inkhalh hâw ve leh ta a nih kha. In a thlen hnu chuan a inbual fai leh phawt a, vest sen nalh zet leh kekawr bûl dum hain a room varanda-ah a va ṭhu chhuak a, rei pawh a ṭhut hmain Christy a rawn lang hlawl. "Bestie, i ṭha zêl em? School kan bâng chiah ka rawn tlang phei nghâl a," nui sâng hian a lo ti a, "Aw, ka ngaihtuahawm loh e Bestie, lo ṭhu ve rawh. Khaw nge in pa chu?" nui sâng hian Emmy chuan a ti ve bawk. "Ani zawng a buai thei lutuka a hâw tlang nghâl a nih kha. Lalbuaia a ni ringawt," Christy'n a tih chuan an nui dûn sak a, Emmy chuan, "Hei hi han en ve teh," tiin a phone chu a thai neuh neuh zui. "Hetih lai hunte kha ka ngai ṭhîn khawp mai Bestie," tih zawm lehin Sâwmfela nên zîngkâra uitê an inchuh lai, an awmpui nulate'n video-a an lo lâk Sâwmfela kal hnu lawka an thawn tâk chu a entîr a, amah runluihna tura Sâwmfela'n uite vâr a lei tirh, Emmy hming saa a koh lauh lauh hnu-a Emmy thinrimin vuak hlum tuma an inchuh lai kha a ni. Christy pawh chuan uluk zeta enin, "Awi! Sâwmfela chu a va ngaihawm êm aw," tiin a mittui a parawl râm a, video-a Sâwmfela nui hmêl te, uitê pawm chunga Emmy a dang vêlte chu hmuhnawm ti viau mah se, rei vak lo an en hnu chuan an mittui hru dûn zauhin an inhnît hlaih hlaih mai. An en zawh hnu chuan Emmy chu kuahin Christy chuan, "Hmeichhe tuarchhel leh ropui tak ni tura i tawn liau liau a ni Bestie, chhel takin aw." khawngaih hmêl taka Emmy en chung chuan a ti a. Emmy paw'n mittui hru zauha nui sakin tlâi ni liam tur sen no nghelh thlîr pah chuan, "Kha a khawvêl khawhar tak, ramhnuai pûkah khân hring nun hi la hmang ve ni zâwk ta se, vawiin thleng pawh hian a la awm ve tur hi a nia. A hahdam ve deuh nân leh ka ṭanpui ve theihna awm chhun ni-a hriain, ka bodyguard hna thawk tur khân ka pa ka sâwmtîr a, he a thihnaah pawh hian kei ngei pawh hi ka inhnamhnawih ve asin." mittui luang ngiai ngaia a'n ti chuai raih mai zawng, lehlam hawia mittui hru zauhin Christy chuan, "Khatiangin inthiam lo duh rêng rêng suh Bestie. Nang chuan i ṭanpui ringawt a, a thihna tur erawh hi chu a duh thlanna a ni. A ram leh hnam hian an thlang miau si a!" tiin a lo hnêm ve leh. Chumi hnu rei lo têah inenkawl ṭha tura chah zuiin Christy chu a hâw ve leh ta a.

Hetiang hian khawhar takin Emmy chuan hun leh nîte a hmang ral ve zêl a, a thinlunga reh tawh ngai lo tur Sâwmfela hming leh sakruang mawi tak te, a nui hmêl leh an sûlhnu avângte hian mipa dang chu a ngaihsak chhunzawm lo kher mai. Amah chauha a awm chângte hian Sâwmfela uite vâr duat taka a enkawl ṭhin, duhawm zet kha pawmin Sâwmfela biak tak hian a be leh sep sep ṭhîn. Sâwmfela khân a rawn call leh la ring fanin a hlatah a phone chu a dah ngai lo va, a hmangaih ram hnuaia a ruang takngial pawh hmuh tur awm lo leh, ropui taka vûi liam phû êm êm heti maia a thâm ral tur hian a rilru an ti na zual tak zet a ni. A thâwmthangva rêng rêng hriat tur a awm zui tawh lote chuan a run êm êm a; ngawi rengin mittui a hru leh zauh ṭhîn. Nilainî a lo inher chhuak a, Sâwmfela thih cham hmasa ber a ni. Emmy chuan Sâwmfela thlalâk a print chu a room dawhkânah dahin a en vang vang a, "Nang chuan min ngai ve tawh lo ti raw Sâwmfel. Tûnah chuan ka tel lovin hlim takin i awm thei tawh a. Ni e, vânramah chuan i nu leh pate kiangah i hlim dâwn tih ka hria; ka lawmpui êm êm rual chein i nu leh pate chu ka thîk khawp mai. Vawi khat chauh tal hmuh leh che hi ka châk asin le!" tiin a inhnît feih feih a, a mittui hru zauhin Sâwmfela thlalâk chu a fâwp zeuh bawk. Tichuan, tûkṭhuan an ei kham hnu-ah school kal turin a inkhalh chhuak ve leh ta a ni. Chawhma class-te an zawh hnu chuan chawhnu lamah naupangte sports item hrang hrangin infiamna an neihpui a, an zawh hnu-ah hâw nghâlin Sâwmfela chu a ngai zual tak zet. A thih cham hmasa ber(chawlhkâr khatna) lo thlengah hian a ngaih a zual êm a ni.

Thlang lenkâwlah tûrnî a her liam a, zân inkhâwm bân hnu rei lo têah a ṭhiante pawh an rawn chuangkai leh sap sap tawh. Emmy chu an ngaihsak hle tih hriat takin an be bawrh bawrh nghâl a, a bulah chuan ṭhut hmun rem ve nghâlin an tîtî zui laih laih bawk. Sâwmfela chungchâng chu sawi chhuah tawh loh ṭha zâwkin an hria a; an hna chungchâng te, an chêt chhiatnate sawiin an nui leh var var ṭhîn. Emmy paw'n nui ver verin a ṭhiante chu a tîtî-pui thei ve tawh a, chu ringawt pawh chu a ṭhiante lâwm tâwk a va tling teh lul êm! Ni e, lungngaihna zakhua a lo thlen a, malna leh khawharnate'n min thlûr bing ngawt ngawt châng hian, ṭhenrual ṭhate min hnemna awka tam tak aiin ṭhian thate'n ngawi renga kan dâr an rawn vawn ringawt te, kan kianga ṭhut hmun an rem ringawt pawh hian min hnêm ber a, kan lo dam ber ṭhîn a nih hi! Ṭhian ṭhate kut leh an kiangah hian damna hi a lo awm ve reng a, chu chu Emmy pawh hian a hre chiang ta kher mai. Chutia an tîtî hnu rei vak lovah Emmy chuan zai ho a duh thu a sawi zui a, a room-a guitar a awm thu Puia chu a hrilh zui zat. Puia'n guitar a va lâk hnu chuan an ṭhianho theme song leh sâp hla dang te, Mizo hla chi hrang hrangte sain hun an hmang a, an thinlung khawhar hmun ruak luahtu erawh a inang tlâng viau ngei ang. Zân dâr 11 a ri dâwn hnai tihah a ṭhiante chuan an hâwnsan ta a, kawngka thleng a thlah hnu-ah Emmy erawh varanda-ah ṭhu zui lehin a phone chu a en leh vang vang ṭhîn. Pu Zothansanga-te nupa pawh an fanu nun danglam ta lutuk vâng te, tûn hmaa an In chhung hlimna thlentu ber Emmy ngawichawi ta lutuk leh, a thup tâk natna na tak avângte chuan tîtî dûnin Sâwmfela chungchângte an sawi chhuak leh a, Sâwmfela ang fapa neih ve an châk thute bâkah Emmy chauh fa nei mah se, an duh tâwk êm êm thute an sawi leh sep sep ṭhîn.

Chutia an tîtî malh malh lai chuan doorbell a lo ri tleng tleng a, an awmpui nulate an mut tawh avângin Pi Sangi'n a va hawng chu phâwk zet hian, "Sâwma, nang maw?" a ti sap. Nui sângin Sâwmfela chuan ṭawng ring lo turin a lo zaizir nghâl a, pi Sângi chuan a kâi lût vat. A nupui ṭawng hriaa Pu Zothansanga rawn phei ve mêkin Sâwmfela a hmu ve chiah chu hmuh thiang lo hmu ang maiin a meng bial kâwk mai. Bengchheng lo tura Sâwmfela'n a lo zaizir tâkah chuan hre thiam maiin, "I la dam chu ka va lâwm êm Sâwma. Bawihi paw'n a lo nghâk reng che asin. Han chho rawh, a room varanda-ah a awm ang." nui sâng hian a lo ti zâwi sap. Inthlahrung ru tak chungin Sâwmfela chu Emmy room lam pan chuan a chho zui a, a bag khai lai pawh chu a dah zui bawk. Emmy room varanda panna kawngkaah chuan dingin Emmy khawhar taka lo ṭhu reng leh, Aizâwl khawpui mawi êm êm a lo thlîr doh doh lai chu a en reng zui. Chutia a din hnu rei lo têah Emmy uite vâr pawm chuan lo bauh thar tharin a rawn tlân phei nghâl a, chuta Emmy rawn hawi lêtin Sâwmfela lo ding reng a'n hmu chiah mai chu meng bial kâwka ding chhuak riai riaiin, "Saw Sâwmfel, nangmah kha i ni em? Sâwmfela kha i ni ti raw? Ka ni lo ti miah suh aw. Nangmah ngei kha i ni ti raw? Sâwmfela kha i ni em?" mittui luang ngiai ngiai chunga pan hnaiin a ti zawt zawt nghâl a, khawngaih hmêl taka en ngawih ngawih chung a, "Keimah ngei kha ka ni e," Sâwmfela'n a lo ti chiah ṭap chhuak hawkin Emmy chu a tlân phei nghâl a, a kuah zui thlawp. Lungchhe êm êma ṭap hawm hawm chungin, "Ngati nge dâwt min hrilh? Ngati nge thi tur anga i insawi, mawhhh...mi sual pa. Eng vângin nge dâwt min hrilh Sâwmfel." ti lawm lawmin a ṭap zui hlawp hlawp. Sâwmfela chuan kuah chunga a sam chûlsak heuh heuh pahin, "Ka tihpalh a ni Emmy. Ka tihpalh tak zet, min ngaidam rawh." tiin a mittui a hru ve zauh bawk. Sâwmfela âwmah a hmai chu phûmin Emmy chu a la ṭap hawm hawm a, "Mi sual pa, i va rawn lêt har ve, min ngai ve miah lo em ni? Min hmangaih ve lo em ni? Min ngaihsak ve miah na nge? Mawwhhh..." tiin Sâwmfela âwm chu a chûm zui awk awk mai.

Nghet takin an inkuah vawng vawng a, an awm dân chu khawngaih thla la deuh mah se, an mittui luangte chu lâwmna sawi fiah zawh rual loh vânga luang a ni bawk a, hmuh an hrehawm lêm loh. Emmy chuan la inhnît hlaih hlaih pahin Sâwmfela chu a han en a, "I sam sei takte kha! I hmêl leh i awte erawh ka hmangaih Sâwmfela hmêl leh aw ngei kha an ni bawk si, min tih der lo ti raw Sâwmfel. Nangmah kha i ni tak tak ti raw?" mittui tling piau-a la en kar chung chuan a'n ti leh a, nui sângin Sâwmfela chuan, "Tih der lo che Emmy, keimah Sâwmfela ngei kha ka ni alâwm. Ka ngai tawh tak zet che asin." tiin Emmy chalah a fâwp zeuh a, dik tak chuan Emmy lakah hian a la inthlahrung êm êm tho. Emmy paw'n nui ver verin a'n kuah leh vang vang a, chutah, "Ka nu leh pate, lo kal rawh Sâwmfel." tih leh In hnuai lama kaih thlâk a rual zui. An fanu lâwm avânga ṭap ṭhâwm an hriat ruala Pi Sângi lo ṭap ve pawh a lo inhru ve mawlh mawlh a, Emmy chuan phûr zet leh hmêl hlim sârh hian, "Nu, pa, hei Sâwmfela a lo hâw, a lo kîr leh," a'n ti nui ver ver chu mittui hru zauha nui sângin a nu leh pate bâkah, an awmpui nula Sâwmfela leh Pi Sângi-te nupa inbiak thâwma rawn tho chhuak ve nghâlte chuan an lo nuih ve var var bawk. Emmy lah chuan an awmpui nulate bula Sâwmfela chu kai pheiin, "Remi, hei Sâwmfela a lo kîr leh," tiin a melh tawn ralh hnu chuan Sâwmfela chu enin a kuah leh vawng vawng. Khatianga a nu leh pate, an awmpui nulate hriata a hâw thu hrilh paha a kaih laite khân Sâwmfela chuan khawngaih hmêl takin Emmy chu a en vawng vawng ringawt a nih kha. Chuta chin chu Emmy hmêl hmuh a va nuam ta êm! Pu Zothansanga'n, "Bawihtê, Sâwmfela kha a chau lutuk ang. Hetah hian lo ṭhutpui teh le." a tih chuan phûr zetin Emmy chuan a kai phei leh a, ṭhutthlengseiah chuan a ṭhutpui nghâl bawk. Sâwmfela bân chu a kut hniha vuanin hnai takah a en nui sâng mai a ni.

Pu Zothansanga chuan thi tawha an ngaih hmin hmak tawh, engtia la dam nge a nih tihte a zâwt a, Sâwmfela paw'n zêp ṭhen nei hauh lovin a hrilh ve bawk. Khatia kah hliam a niha tlâng chung aṭanga Emmy a biak hnu khân, a vei lam khâm hnuai mual rêk lai ni âwm tak hi a hmu a, thisen a hloh hnem deuh tawh avânga a tuihâl lutuk khân harsa ti tak chungin a pan ta a, a rin ang ngeiin luitê kha a lo awm chiah bawk. A pain a hrilh ṭhin, "Mi tu pawh hliampui tuar i buaipui hun a la awm maithei a, nangmah pawh inbuaipui i ngaih hun a la awm thei bawk. Hliampui tuar rêng rêng vawi khatah tui i tulh ṭeuh tur a ni lo, an nunna atân a pawi thei tih hi hre reng ang che." a tih kha hre chhuakin luite tui chu a kut ding lama ṭhûmin tlêm a in a, mahse, a chauh tawh êm avângin rei lo têah a khaw hmuh a chiang lo zui bawk. A lu hai chiai chiaiin nikhaw hre lovin a ṭhutna hmunah chuan a let zui a. A harh leh meuh chuan tuipui(Arabean Sea) kama bûk chhungah a lo awm reng tawh. A bula vai tlangvâl pahnihte'n English-a an lo be thei pawh kha mak a ti viau kha a ni. Bûka a awm chhante a zawh chuan, khatia chhak lam ramhnuaia silai leh bomb puak thâwm kha zâwi takin an lo hre pha a, an ram din hmun ngaihtuahin mi sualte leh Police-te inkâp thâwm a nih an lo ring ve deuh tho hi a ni. Thâwm a reh deuh hnu khân Police inhliam ṭhenkhat an awm ringin luitê chu an zawh chho ta a, a ṭûl huna hman mai theih turin sa sahna chem leh talhtum nên an pahnih chuan an chho ve tawp a, thui vak lo an chhoh hnu-ah Sâwmfela lo let reng kha hmu nghâlin, an ngaih chân vang vang hnu-ah an va hnaih ta a, a hmêl an hmuh rual khân Mumbai khawpui chhan chhuaktu detective huaisen kha a ni tih hre nghâlin, ramhmul damdawi nên a hliamte an buaipui leh sawk sawk hnu-ah an zâwn thla ta a nih kha. Kha'ng mi sual 20-te pawh kha Khaim-a naute niin, Sâwmfela'n an hmunpui Police-te leh reserve battalion-te'n an beih thut khân ram chinchâng hre bel zâwk na nâ nâ chu an lo pût ru hman tlat. Khatia Sâwmfela leh Boris-a insual lai te, Khaim-a pistol mu lema a kah laite kha thinrim takin an bihrûkna hmun aṭangin an lo thlîr ve reng a, an pawisa leh râlthuam bâkah, an hmeichhe mante an hruai chhuah laite kha inseh ruh ṭawlh ṭawlh hian an lo thlîr reng hi a ni. Anni mi 20 tân lek chuan Police-te leh reserve battalion-te chu an tam si, an duh ber leh huat ber Sâwmfela hi an target hmiah a, "Damin Mumbai hi a chhuahsan tur a ni lo," an hotupa khân ti sapin an tawlh hlatsan zui ta kha a ni.

Ni 3 hnu-ah a hliam vânga a khawsikte leh a taksa hah lutukte pawh zia deuh tawhin a dam deuh tawh a, amah enkawltute chu pafa thum Sangha mana ei zawng an lo ni. A upa zâwk ni âwm tak chuan Mumbai University aṭanga graduate an nih thu te, sawrkâr hna an hmuh theih loh thu te, ti hian a pa-hova sangha mana ei zawng ta an nih thute a hrilh a, an khawsak chu a nuam bîk lêm lo vang tih Sâwmfela paw'n a hre thiam ve mai bawk. Ni 5-na a lo inher chhuak a, an pa ber chu an sangha man phur hâw ṭhîntu car upa ve lam tawhah rawn chuangin, a fapate pahnih leh Sâwmfela pawh chu car-ah chuan an chuang hâw ve nghâl a, thim dâwn ṭêpah Mumbai bazâr sangha zawrhna hmun an thleng ve leh mai bawk. Chuta ṭang chuan taxi-in Sâwmfela'n a ngên tlat bawk nên Mumbai Police Headquarter lam panin an tlân zui leh ta a, zân dâr 6:30 vêlah an thleng zui leh. Chuta Mumbai Police-te'n Sâwmfela an han hmu thut mai chu ding ngîl nghâl zawkin, duli tiat tiat hian an en kâwk kâwk a, an lo lâwm thiam hle a nih kha. Inspector Mahesh Sharma'n Manis-a a call vat a, ani pawh rei vak lovah a rawn thleng ve leh nghâl. Sâwmfela a hmu leh chu Manis-a pawh ṭap chhuak hawkin, "Sir, i la dam chu ka va lâwm teh rêng êm! I thih kha ka ring lo rêng a ni." tiin a kuah chung chung bawk. Tichuan quarter-ah khân zan khat riakin a tûk chawhma flight-ah Kolkata a pan nghâl a, Police-te kha Mizoram a thlen huna a la dam thu hi puang chauh tura chahin Manis-a leh inspector Mahesh Sharma-te contact no a la a, a chawimawina dawn leh pawisa fai eng emaw zât Manis-a'n a lo kawl ṭhatsak kiaute nên Kolkata thleng Manis-a paw'n a zui ve nghe nghe! Ram leh hnam Pasalṭha ngenna zahawm tak chu ngai pawimawhin, India ram pumin thi tawha an ngaih leh a sûn fel vek tawh Detective Malsâwmfela la dam thu hi an lo puang duh lo kha a ni.

Hemi a chanchin a dam chhuah dân chanchin a sawi zawh hnu hian, a nunna chhantu unaute kha inspector Mahesh Sharma hnênah an chanchin hrilhin, Mumbai Police an nih thuai tur thu-a inspector Sharma'n a thlah tâk thu a sawi leh a, Pu Zothansanga-te nupa, an awmpui nulate leh Emmy ngei pawh chuan ngaihnawm an ti hle tih a hriat. Chumi hnu chuan mu turin an tho zui sap sap a, thil buaithlâk pakhat a awm leh ta. Emmy chuan a bula Sâwmfela chu mu tura duh tlat chu a ni. A nu leh pate bâkah Sâwmfela ngei pawhin a kalsan tawh dâwn loh thu han sawi ve mah se, "Aih, ka ngai che alâwm, ka hriat loh hlânah i lo kal bo leh daih palh ang," a ti tlat a, a hnu deuhah Sâwmfela chuan, "Ka pi, ka pu, eng nge in ngaih dân?" a ti ta ringawt. Pu Zothansanga-te nupa paw'n an fanu chu hre thiam tak leh Sâwmfela chu an ring ngam tih hriat takin an rem ti ve tawp mai a nih kha. A tûk zîng chanchin tharah Detective Malsâwmfela a la dam thu chu Chanchin tharah an puang ta chuai chuai mai. Zoram mipuite mai ni lo, India ram pumpui a hretu apiangte chu lâwma kut bêng dur durin an kûk ruai ruai a, tûnah hian Mizoram-a a awm hahdam thu Mumbai chanchin thara an han hre leh phei chu mipuite an nui var var tawh mai a ni. Mizoram Police Department hotute pawh Pu Zothansanga Inah an rawn lang rang hle. A tûk leh zirtâwpnî-a Sâwmfela chawimawina hun hman a nih tur thu an ti tlu hmiah nghâl a, CM leh sawrkâr hotu lawk chinte pawh an rawn inlan chhâwk sek bawk. Chu'ng mite avânga Sâwmfela kianga a awm ṭha thei lo chu Emmy a titau bâr thung a, thinrim tak tak erawh a ni hauh lo.

Zirtâwpnî-a Sâwmfela chawimawina hun an hman zawh hnu chuan zân hun a lo ni ve leh ta. A ngai tê bawkin Emmy leh Sâwmfela chu varanda-ah an ṭhu dûn leh tawh a, Sâwmfela mal chungah Emmy chu ṭhu zuiin a nghâwngah a kuah zui leh. Chutah, "Sâwmfel, ti nge i la thih loh thu kha an va puang har ve? Chuan, ti nge thi tur anga min mangṭha vêl a, pasal ṭha tak lo nei la chuti khati-te i ti vêl a," rum ang reng taka Sâwmfela mit taka en chung hian a'n ti a. Sâwmfela chuan nui sukin, "Ih...englo...ka thi dâwn emaw ka tia, mahse, ka thi leh lo a nih hi! Bâkah surprise che ka duh ve hrim hrim a," a'n ti chu Emmy'n a va melh rum mai mai tak! "Hmm" ti sapin Sâwmfela dârah chuan a seh zui a, Sâwmfela pawh a râk nasa. Emmy bawk chuan, "En teh Sâwmfel, ka lakah hian i inthlahrung hle tih ka hria asin. Hei hi hria la ka duh, pasalin a nupui uire inchhîr tak taka ngaihdam dîl lehtu a ngaidam leh thei a, kei paw'n ka ngaidam vek tawh che asin." tak deuh leh mittui parawl râma a tih chuan Sâwmfela paw'n lo en ve karin, "Ka lâwm e Emmy...ka lâwm tak zet." lehlam hawia mittui hru zauh hian a lo ti ve a, a rawn hawi leh chiah a hmûiah Emmy'n a lo fâwp zat. Rei lo têah Emmy chuan a hmûi chu dah sawnin, "Min chhâng lêt ve rawh zei lo pa," ti nui sakin a han fâwp leh. "Hmm...i rilru i pe tâwk lo," tiin a vawi thum nân a fâwp leh a, tenawm loh tâwk chiah hian an inchhâng lêt bawk. Chumi hnu chuan an room ve ve an pan ta a ni.

Chutiang chuan hlim takin hun leh nîte an hmang ral zêl a, Emmy leh Sâwmfela inneih hun tur pawh an ti fel ta. An ṭhiante khân inneih tuma ruahmanna an nei ṭan tihah, tiang khân Sâwmfela chanchin kha an hre zui leh si a, hetia Sâwmfela a rawn kîr leh tâkah chuan an pahnih hian innei hmasa phawt rawh se an ti ta kha a ni. Inrinnî a lo inher chhuak a, kim taka an nulât tlangvâl hun nuam leh zalên, ngaihnawm leh ngaihawm chang tur thlah nân an picnic-na hmun lan theihna kawngpuiah khân, an kawppuite ṭheuh kuah chungin favâng khaw thiang tak hnuaia tlâi ni liam tur ngaihnobei zet chu an thlîr vang vang hlawm a. Chutah Sâwmfela chuan, "Kan vânglai chanchin hi mite'n rei tak rawn hril mawlh teh se," nui sânga a tih sap hnu-ah Pathian leh a kohhran-hote hriatpuina ngeia Emmy nên, "TIAM TLAT E" an tih hun tur nghâkhlel takin an hâw leh ta a ni.

A TÂWP TA.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)