THE CAVE MAN. BY Duata Khualchhâwn (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

THE CAVE MAN. BY Duata Khualchhâwn (Completed)

Unread post by Ngaia » July 10th, 2022, 4:23 pm

a3uexw8z.jpg

THE CAVE MAN.
(Action, romance, comedy, Investigation)

✍️ Duata Khualchhâwn.

BUNG 1-NA.

"Picnic spot nuam tak a nih dâwn hi!" Emmy chuan ti sapin lui kuang chu an zawh thla zêl a. An beka thlan fîm luang ngiai ngiaite chu ngai pawimawh lêm lovin hma lam pan chuan an kal zawm zêl. Lui kama thing lian leh sâng tak tak zâr du maite chuan ni sa lutuk tur chu an ti zia viau a; lui tui luang ri kerh kerh leh sava hrâm chiah chiah te, thingzâr chuana han inchhaih kawi zawr zawrte chuan an mit leh beng an ti tlai khawp mai. Ding meuhin Puia chuan a camera chu a hmet ri leh chak ṭhîn. Thui vak lo lui kuang an zawh thlâk leh hnu chuan lui kam hmun zâwl zau leh rem zet, tui lianin lei leh lung nâwi a hnâwl khâwm tih hriat fahran, hmun ṭhenkhata phûl hring cham dupte leh chu lai zâwna li zau ve deuh hring nghalh mai chu an han thlîr kual thuak thuak a. Lui kam lah a lo thawveng phian bawk nên, chu lai hmuna innghah mai chu ṭha an ti tlâng ta a ni. He lai hmun an thlen hian chawhnu dâr 1 vêl ni tawhin, ṭhianho picnic tur an ni bawka inak bâwr deuh mah se nuam an ti hle tih chu an hmêlah a hriat theih. Hmeichhe pali leh mipa pathum an ni a, an zînga hmeichhe pakhat Emmy-i hi mipa ngaihsak lo tak niin, tûn ṭum an picnic-na turah pawh hian lunglên hnêmtu tih mai mai atâna kawppui neih kha a peih ve tlat lo va; hun âwl hnawh khah nân a lehkhabu ngainat êm êm kengin a duh tâwk viau a ni. Hetih laiin a ṭhian hmeichhe pathumte erawh an bialpa ṭheuhte nên an ni thung. A hranpaa riah bûk sual ngai lovin a ṭhiante chuan an kawppuite nêna inṭâwm tur Tent(Puan In) an zâr a, Emmy erawh ama leng tâwk aia lian deuh Tent zârin a mut hran a ngai bîk dâwn a ni. Chutia Puan inte zâra an buai leh nak nak hnu chuan daihlimah ṭhu thlan dâiin an han hawi zau deuh a, an chhak hla vak lo lui kam lehlam hmun sâng deuha Pûk ni âwm tak hi an hmu fuh ta hlauh mai. Reuben-a chuan, "Khi laia Pûk khi kan han bêl chiang lawk dâwn em ni? A bul vêl a fai dânah khian luahtu an awm pawh a ni maithei asin." tiin a ṭhiante chu a melh kual hlawm a; ṭha an lo tih tlân tâkah chuan Pûk lam pan chuan an chho zui leh. Rei lo têah Pûk bul chu thlengin an han en kual vêl a, luahtu an awm tih hriat takin Pûk kawt leh a chhûng lam chu a lo bel han mai. Pûk chhûng an lût chu hmeithai in tia dâwna zau a lo ni a; mihring khawsakna tih hriat takin mutbu lo intêl fel thlap leh Guitar hlui lam tawh Pûk bang nghênga lo intung at te, bungbêl ung tak tak fel taka lo inrem thlap site bâkah, an ina an hmuh ngai loh Mizo thil chi hrang hrang awmte chu mak ti deuh takin an thlîr kual zung zung bawk. Duh tâwka an en kual hnu chuan pâwn lamah an chhuak leh ta a; Pûk kawt aṭang chuan an riah tumna lui kam vêl pawh a lang chiangin khaw hawina pawh a lo zau deuh bawk a, thlifîm thaw heuh heuh vângte chuan hahdam sawng sawngin an inhre hial a ni. Pûk kawta ṭhutna tur mau hmanga siamahte chuan hmeichhe-ho chu an han ṭhu hahdam a, eng eng emaw sawiin thla te an la leh ṭhîn.

Chutia an rîk dar dar lai chuan an lam pana mi pakhat rawn kal hi an hmu a, ngawi rengin an lo thlîr zui ṭhap. Chu pa pawh chuan rawn hmu ve nghâlin mak a tih hmêl viau leh nghâl. T-shirt hring tak deuh sipaiho hâk ṭhin ni âwm tak leh, Cargo kekawr dum hlui lam tawh hain sneaker dum hlui deuh a bun bawk a, a dâr ding lamah chem a hnung puak bawk, a sam lah chu a koki chenin a zuah a; an inhlat tawh lo bawk nên tlangvâl a ni tih chu an ring thiam ve mai. Pûk bul a rawn thlen chuan a buzâwl kawta hmeichhia leh mipa hmêlchhe lo tak mi pasarih lo awmte chu a melh kual den den hlawm a, chutah Reuben-a chuan, "Ṭhianpa, he Pûk hi i riahna em ni? Thlang aṭang khuan kan lo hmu-a kan rawn bêl chiang e kan tia," nui sâng hian a'n ti a, chu tlangvâl chuan, "Aw ni e, eng nge in lo tih a?" a aw chu a thûm lek lek, a nui lova a tûm hek lo. He tlangvâl hi Mizo tlangvâl hleitling leh pian nalh ve tâwk tak, khabe zum lam deuh niin, mitmu dum fiah ṭha kêk kâwk, hnâr ngûl sâng vah mai a ni a, a sam sei deuh te, a hmui hmul leh khabe hmul buk lutuk lote chuan a ti ṭawp deuh em aw tih tur ni mah se, eng emaw zâwng tak chuan a inhmeh hle. A mitmengah chuan mipa mahni inringtâwk tak a ni ang tih pawh a hriat theih bâkah, tlangvâl hmêlchhe lo tak a ni tih chu chîk lêm loh pawhin a chiang viau a ni. Puia chuan ṭhianho picnic tura kal an nih thu te, a riahna Pûk chu nawm hmêl a tih thute chu a'n hrilh ve a, chu tlangvâl chuan, "A nih chu." tih ringawta chhângin a kal pêl zui zat. Pûk kawt sîr deuha thing ro a dahte chu a chem hnung puak chuan a tan zui mial mial. A chem chu Mizo pa chempui ang ni lo, chemte hmâwr zum ṭha zet mai zung thum bawk vêla hlai hi a ni a, a fawng tâwp aṭanga teh chuan tawng chen vêla sei a ni. A enkawl uluk hle tih hriat zetin a tle var a, a hmangtuin a zir vâng nge ni a hriam hmêl hle bawk. Mi ṭawng tlêm tak a ni tih chu Reuben-a leh mi dangte pawh chuan an hre thiam nghâl mai a, ngawi rengin a thing tan lai chu an thlîr ringawt tawh. Chutih lai chuan, "Ṭhianpa, tu nge i hming? Engtin nge an koh che?" Emmy chuan a lo ti ve a, Emmy pawh en chuang lovin, "Malsâwmfela." tih ringawtin a lo chhâng leh. Chu veleh Emmy chuan amah leh a ṭhiante chu a hmêlhriattîr ve leh a, Sâwmfela chuan en kual thuak thuak hlawmin, "Aw le." tih bâk a sawi leh chuang hauh lo. Sâwmfela awm dân leh ṭawngkam vêlah chuan mi dang hi a mamawh hmêl loh hle hian an hria a; be tam tawh lovin an chhuk pah chuan naktûk an picnic-naa lo tel ve turin an sâwm ve ringawt ta a nih kha. An riahna tur hmun an thlen thlâk leh hnu chuan mipa pathum Reuben-a, Puia leh Kima-te chuan thing ro an fawm zui nghâl a; an nulate erawh tui chêngin an lo ri ve rak rak thung. Zanriah bâwl nân a la hma deuh bawka Puia-te pawh chu tui chêng turin an inbuatsaih zui ve leh. Chutia a changtupate an hman tâkah chuan Emmy chuan, "Ehem! Hetiang chuan ka dâwng reng bîk dâwn tlat, Cave Man-a kha ka han hruai ve dâwn maw ni?" nui var var hian a lo ti a. A ṭhian ṭha ber Christy-i chuan, "Ehh! I star chiang mai bestie. Han hruai ve tak teh. A nih loh chuan ka awhthîk(awhfîk leh awhsîk an ti bawk) reng dâwn che a nia," lo ti vein mi dangte pawh chuan an lo fiam zui laih laih bawk. An inkâr thu zêp ṭît ṭêt ngai lova inhre tlâng vek an ni bawka inzah êm êm vak hek lo; a ṭhianga tui chêng dûnte lah tui chên dân chi dang deuha han inkeih tâwn tâwn ṭhînin an hlim dar dar hle; an inei zo mai ang tih pawh hlauhawm tak a ni. Chutia a ṭhiante tui chêng duhdah lutuk chu Emmy chuan ner nâng nâng pah hian, "Awi! Chhe hlawm siah a!" ti sapin amah tê chuan a hleuh ve leh barh barh bawk a, an zînga fiamthu duh ber Puia lah chuan Emmy ṭawng kha a lo hre leh hman pek; nui sâng hian, "Katy...oh sorry Emmy...i châk ve a nih kha lo kal rawh. Hap hnih thum chu ka lo khiuriu ve ang che." a tih rual chuan an nui leh dar dar. Emmy chuan Katy tia koh chu a lâwm vak lo tih hriat zeta nui tûm suk chungin Puia chu a melh deuh râm râm a, chutah nui tûm deuh bâr chung hian, "Ngawi teh, innu mitmeng zek zawk kha ka ṭih êm mai. I inpêknaah ka lâwm e." lo ti lêt ve lehin he'ng ṭhianho picnic-te hian tu dang mah an ngai tawh lo chiang a ni.

Zanriah bâwl a lo hun tâkah chuan lui kam lam panin an chhuak zui sap sap a. Inhru hul zung zungin thawmhnawte an thlâk leh hnu chuan buhfai zan hnih tla khawp an pai chu zanriah tur Reuben-a chuan sil faiin Kima chuan chaw a chhûm a, Puia'n thing ro an fawmte chu a chemte paiin a lo tan ve bawk. Tichuan, chaw chhum vil paha tîtî hlawmin an picnic-na hmun chuan an lung a dum hle tih an hmêlah pawh a hriat viau a ni. He lui hi a hming hre lo mah se, Aizâwl chhim lam hla vak lova awm a ni a, Motor kawngpui aṭangin a hla lêm lo bawk. Lui kam thlenga motor a luh theih avângin anni pawh hi an inak bâwr hle rêng kha a ni. Motor luh tâwpna aṭanga km chanve pawh tling lo lui kuang an zawh thlâk hnu-a he lai hmun hi thleng an ni bawk. October thla tâwp lam a ni a, chhûn lamah nî sain khua lum deuh mah se, tlai lam leh zân boruak erawh thlasik hma hruai boruak vawt deuh vâng chuan a dâi nuam tâwk hle a; vawi khat Puia zin hâw lamin he lui kuang leh ram awm dân vêl hi hmuin, picnic nân a ṭha dâwn riauvin a hria a; a ṭhiante hi hrilh ve lehin ti hian hun âwl remchângah an kal ta a ni. Aizâwl pa hausa fate an ni bawk a; hetianga picnic hi chu hna khatah an dah hmiah ti ila a dik lo hran lo vang; Emmy phei chu Minister fanu neih chhun a ni leh nghâl. An vai hian Phaiah awmin an graduate hnu-ah chawlh hmanga Mizorama an rawn hâwn lai leh an kim lai chuhin hetianga picnic hi an ti tlu ve ta a nih kha. A ṭhiante hi mi hausa fa ni âwm rênga hleitling tak an nih laiin, Emmy erawh a ṭhiante lakah hi chuan tê fel at fit 5 leh inches 3-a sâng, chum deuh hi a ni a, a kimtlâng mawina chu kan hriat thiam theih dân tur chuan tuipui râl lanu ni ṭhîn, nuthai chang ve tawh zaithiam Katy Perry nên khân an inang hle. A an lohna ber chu a zaithiam lo lutuk hi a ni âwm e. A ṭhian hnai deuhte phei chuan Katy tiin an ko fiam ṭhîn rêng a; a duh loh ṭhin êm avângin a sâp hming Emmy tih hian an ko zing ta mah zâwk a, a runluih peih ber Puia hian Katy tia koh luih châng a nei leh zauh ṭhîn. Hetih lai hi Aizâwl khawpui chhûng râlmuan loh lai, hmeichhe rûk bo, pâwng sual, damdawi tawlh rûk leh tualthahte hluar lai tak niin, Zâwlkhawpui thim chhah lai tak a ni âwm e. Aizâwl mai ni lo Lunglei bâkah khawpui deuhte chu an râlkhêl hle a; chu chuan ni tin zan tin chanchin thar an luah ti ila kan sawi sual tam êm lo vang chu maw; a ram pum huapa Mizoram a thim chhah lai ber a ni âwm e.

Tûrnî her liamin zân hun duhawm a lo her chhuak a, a tûk leh zân chu thla bial zân a ni bawk nên thla pawh a êng chiang tawh kher mai. An riahna bul lui hnaih deuhah meipui chhep hluahin an kîl laih a; Emmy tih loh chu inkuah chiala ṭhu dûn hlawmin an inchuk leh zauh ṭhîn. A ṭhiante'n pai tura an tih Puia chuan a guitar chu a'n kuah rem sauh sauh a, an hla duh zâwngte thlangin an sa hlawm a, dî nei lo Emmy meuh pawh chu zân thla êng nuam lutuk leh an hun hman dânte avâng chuan a lung a lêng ve vawng vawng hial a ni. Chutah Puia chuan, "Tleirâwl laia kan sak ve dân," tiin Sâp hla hrang hrangte chu dik lo baksak tak hian a'n sa a; a guitar plucking erawh mawi viau mah se, a satuin dik lo baksaka sak dân a thiam bawka a hla thu chuan an nuih bâwm a hawng chiang kher mai. An nuihza zualpui a zia hnu chuan Kima chuan, "Dang a ro êm mai, dang hnâwn nân." tiin officer choice ngat chu dispo-ah a lo thli sen nguai nguai a; Emmy erawhin beer a in ve thung. An chanpualte an tlâk hnu chuan an tîtî leh rih a; Sâwmfela chungchâng zanriah bâr hmaa an sawi zauh tawhte kha sawi chhuak lehin, an lu a lo kai deuh tawh nên Reuben-a chuan, "Kawmchhak Cave man-a khi kan sâwm ve lo a ni. A mizia kha ka duh chi tak, pa ka ti tak zet." a tih chuan Puia'n, "Kei chu a induh tâwk hmêl ka ti. Ka pawi sawi se ka ti ngawt mai. Vawiina min chhân dânte kha ka lo ngei ru hman asin." a tih chuan hmeichhe pathumte paw'n an lo sawi zui ve laih laih bawk a. "E khai Buddy, khatin an ngaihtuah ngai lo. Mihring, rilru leh mize inang lo vek kan ni a; kan la hriat chian loh vâng mai mai a ni." Kima'n a lo ti ve leh. Reuben-a chuan, "He lai hmuna a awm chhan leh khi Pûka a khawsak chhan khi thurûk eng emaw tak chu a awm ngei ang. Nakinah kâwm nêl ila kan la zâwt dâwn nia." a tih hnu chuan a ṭhiante paw'n chhan ṭha tak a awm ngei chu an ring nghet bur mai a ni. Hei tak hi Emmy rilru kaptu leh hriat a châk êm êm a ni ve chiah bawk. Tin, Cave Man an tih Sâwmfela hi a mitmeng aṭang khân mi sual a nih a ring hauh lo va, a pian nalh tak maite leh a lan dânte kha ngaihtuah lêt lehin, a ṭawngkam bung nghut maite nên khân inhmeh a ti viau. Chutia a ngawih vang vang lai chuan, "Hei Katy...awh khaih Emmy...kan mu tawh dâwn asin. I la meng dâwn nge i mu ve nghâl dâwn?" Puia chuan a lo ti a, Emmy pawh a phu deuh zawk nghe nghe a ni. Zuali chuan nui ver ver pah hian, "Lalṭhian i ngaihtuah ka hria a nia aw." a lo ti zauha rang zetin Emmy chuan, "Sâwmfela maw? Ahh...ni leh lo, ka ngaihtuah bawk lo Zualêk." bah nuaih hian a lo ti a, a zak deuh chuan nui sakin Zuali leh Puia chu lei a'n chhuah khum ngawt a; an piah deuha Reuben-a leh Muani chuan an lo hre pha ve si, "Eheu! Eheu! Cave Man-a maw? Ka hrawkah hnawhtu a awm tlat ehem! ehem! Hahchhiau!" tiin Reuben-a chu a khuh zui leh kharh kharh bawk a. Emmy ngei lutuk chuan, "Mu mai mai teh u Ben-tik-tuk. Kei pawh ka mu dâwn." tiin lui hnaih bera a Tent chhûngah chuan a nui lût sâng zui a.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:23 pm

THE CAVE MAN.
✍️ Duata Khualchhâwn.
BUNG 2-NA.
Zân hun ralin khua a lo vâr a, zîngkâra sava hrâm noh nohte leh lui tui luang ri barh barhte chu an inchawih kher mai. Ni chhuak êng fân raih chuan inthlahrun hmêl takin tlâng ṭhenkhatte chu a chhun de sawr sawr emaw tih tur a ni a; ruam ṭhenkhatah lah a thlâr lût sûng bawk. Emmy-te riahna hi a ruam vak lo bawk a, ni êng thing hnah kâra rawn thlâr lût sûngte chu mawi dangdâi tak an ni. Chutih laiin Sâwmfela chuan thing a lo ek ri karh karh a, a eh zawh hnu chuan zîngkâr boruak hîp pahin Emmy-te riahna chu a rawn thlîr thla leh vang vang ṭhîn. A koki thlenga sam a zuah leh a pian chu a inrem phian leh nghâl. Fit 5 leh inches 10 a sâng, pian inkhai thli zaih mai, han en mai chuan ria lam deuh tih tur hi a ni a; a taksa erawh a inphut mawi tâwkin a tihrâwl pawh ṭha tak a ni. A six pack lang fiah takte leh a dâr hlai deuh thlâwp zata a bânbul lian lutuk lo, tê tih tur ni si lo, a kut bâwr thlenga thisen zâm inzam thla nukte bâkah, a kâwng fêk rât hnuaia a malpui lian ve tâwk takte chuan mipa pian thiam tak a nihzia an ti chiang a, hna a thawh nasat vâng nge a sek phiar deuh fat bawk; mipa pian dik tak chu a nei kim viau a ni.
Nî a lan chian deuh hnu chuan tûkṭhuan buatsaih turin Pûk chhûngah chuan a lût leh a, ngawi rengin a tih tur chu a tih zawm mial mial. Hetih laiin Emmy leh a ṭhian hmeichhe pathumte chu tho ve tawhin, luiah chuan an han inphih fai sawk sawk a; tûkṭhuan buatsaih turin mei an nun zui zat. Chutih lai chuan Puia a rawn tho chhuak ve a; luia inphih fai tuma kal pahin, "Nizân chu muhîl hlei thei lote kan awm em aw. Cave Man suangtuah paha inlet sek pawh kan awm ngei ang maw le!" nui sâng hian a'n ti a, Emmy a lo ner leh sak. "I chhe zet zawt a nih mai chu a Pui-hnap. Nangmah khân i vei a nih kha!" Emmy chuan ti bak hlarin an han nui leh rih. Mi dangte chuan lo fiam ve leh laih laihin an in-ûm leh zuai zuai ṭhîn. An thâwmah Reuben-a leh Kima pawh an rawn tho ve ta nge nge! Chutia a ṭhiante'n an fiam rawn fo mai chu tîti danga kâipui tum takin Emmy chuan, "Ti daih ila, hetia thu dêngkhâwng lam hriat tur a awm lo hi a hahdamthlâk ka ti. Kan Zâwlkhawpui chhûng zawng a râlmuang lo e." a tih chuan, "Ni ngawt mai. Hetia kan picnic-te hi min lo enthla anga min man ve daih ang tihte a nia ka hlauh ni." Muani'n a lo ti ve bawk a; chutia Emmy-te tîti kal lai ti buai tur hrim hrim chuan Puia chuan, "An ngam leh rawn kal se, kan lo that phiar anga ni mai lâwm," a lo ti ve leh chu Emmy run lutuk chuan, "Awi! A tlânchhe chak berah i ṭang ang." a lo tih zawm ve zat.
Chutianga infiam barh barh paha tîtî chung chuan tûkṭhuan chu an bâwl chhunzawm zêl a. An peih hnu-a an ei kham leh meuh chuan nî pawh a kâng ve ta deuh. Reuben-a chuan Kuhva hring hmawma Silk Cut zu pah hian, "Vawiin chu kan riahna thlang lam ram vêl khu kan vâk kual hlawm dâwn em ni? Naktûk(Inrinnî) chawhnu lama hâwn tum kan ni sia. Chaw hmeh atân Ramar leh ramsa tê deuh kah tur pawh kan hmu mial maithei asin. Miniature ka keng ve sia ram vahpui lohva hawn leh ringawt chu ka ti deuh," a'n ti a. "Ni e, a nuam viau tak ang. Ram chin hriat nân pawh a ṭha alâwm. Hetia awm chawt ringawt chu a ninawm duh êm mai, tih tur dang a awm chuang si lo va." Kima'n lo ti ve lehin, Reuben-a rawtna chu ṭha an ti tlâng tih an hmêl leh ṭawngkamah chuan a hriat hle. "Cave Man a tel ve loh vânga peih lote kan awm chuan Tent hi a nghah theih tho a nia," Puia bawk chuan lo ti leh kauhin an nui leh dar dar a, Emmy chuan rum zeta melhin, "Aw, ka kal peih lo, tah hian ka lo awm ang. In ram vah laia in inchuk leh tur vêl kha ka hmu peih lo." tiin a lehkhabu ken tâk chu a chhiar zui hmak a. "I hlau lo ang maw Emmy? Eng chen nge kan thang dâwn kan hre lo a nia." Reuben-a'n a lo tih pawhin Emmy luhlulna Puia khân a cho chhuak tlat tawh. Chu veleh Puia bawk chuan, "A..ka hre thiam mai. Kan kal hlânin Cave Man-a nên an inkâwm thei dâwn alâwm." a lo ti ve leh. Emmy paw'n nui sak chungin, "Awi! I va ninawm tak chimawm pa, kal vat teh u. Vâk hla lo ula; in bo palh ang e." a tih lehzêl tâkah chuan anni pawh chu an tho chhuak zui a, an inpeih hnu chuan, "Nih, bestie kan kal aw. Hlauhawm i hmuh chuan i lo au vak mai dâwn nia." Christy chuan ti ve lehin an kal zui ta a ni.
Hei tak hi Emmy danglam lehna chu a ni. A peih tawh loh chinah chuan a tih luih theih hlek loh va, thingtlâng nula tam tak pawhina an ngam loh hi ani khawpui nula, hna hrâm thawk ngai lo leh Minister fanu lehnghâl hian rampalailênga mahnia awm hi a ngam tlat a ni, a inhmeh lo pawh ti ila kan sawi sual tam âwm lo ve. Hetih laiin Aizâwl khawpui chhûng pawh mipui leh lîrthei tam ta na nâ nâ chu an khawsak phung thlîr chuan an râlmuan hmêl hle a; khaw êngah chuan an nun phung pawh a pângngai viau. A khât mawi tâwka Traffic police whistle ham rîk leh motor ri inpawlh nuaih te, footpath leh hmun tin hmun tanga a pui a nawia inzui duah duah te, Millennium Centre-a lût leh chhuak insûlpêl deuh reng te, Campus chhûnga nula leh tlangvâl, nutling patling han ṭhu khâwm luih maite chu hmuhnawm pakhat an tling ve rêng a; an lênna Zâwlkhawpui ti râlkhêltu Pâwng sual, hmeichhe rûk bo leh tualthahna thleng ṭhînte avânga an hlauhnate kha an hre chang tawh lo tih an hmêlah chuan a chiang khawp mai.
Khatia a ṭhiante'n an vah bosan tâkah khân Emmy chuan a lehkhabu chhiar lai chu khupin a'n hawi kual zung zung a, a rilru tak chuan nuam a ti chiah lo tih a hriat, a chângin Sâwmfela riahna Pûk lamte chu a thlîr leh vang vang ṭhîn. A smart phone chu lain an ṭhianho thlalâkte chu a en kual vêl ta mai mai a, signal a ṭha lêm lo bawka an video nuihzatthlâk deuhte chu nui ver vera enin, a thinlunga hlauh rûkna awm pawh chu a zia phian. Nî a sâng zêla dâr 12 a ri dâwn hnai ta. Thlate la leh ṭhînin a awmna hmun vêlte chu a'n la ve bawk a, lui kuang leh tui luang delh delh te, a kam vêla thing leh mau hring dupte chu mawi a tiin, sava hrâm noh nohte leh thingzâra an inchhaih ri ve rak rakte chu hmuhnawm ti takin a thlîr kual leh veng veng ṭhîn. Chutia thawveng leh nuam ti taka hun a hman lai chuan, hla vak lova rimawi sîn fân raiha tum ri raih raih a hre ta a; a hriat rual chuan ngawi deuh vang vangin a'n ngaithla chiang deuh a, mak tak maiin chu rimawi sîn nalh zet chuan a thinlung chu a hneh hle ni tur a ni, chu rimawi lo chhuahna nia a hriatna lam chu a thlîr ta veng veng mai.
Chu rimawi tumtu chu Sâwmfela kha a ni thei mai ang em tihte ngaihtuahin, mahni chauha awm ai chuan a thlamuanthlâk deuh a ti pawh a ni mahna; rimawi lo chhuahna lam pan chuan a kal zui zat. Sneaker dum nalh zet bunin T-shirt vâr nghâwng bial a ha a, kekawr bûl dum a malte khuh tâwk tight ṭha tak hain lukhum dum a tlâng parh deuh nêm thep mai a khumte leh a sam dum ṭha tak, a hnute thleng a thlahte nên chuan a va inhmeh teh lul êm! Amah lah taksa chum lam a ni bawka a khal mawi viau mai si; sâng lêm lo mah se nula pian nalh tak chu a ni ve chiang a ni. A hmêlṭhatna chu thu hran, a hnute mûm pâwng lah te, a khêl leh mawng bâwr khal ṭha tak invuah fuh lutukte chu mipate mit latu an ni rêng a; lum hluma hlawh ngam pawh an awm nuk bawk, an dam chhuah tâk mial beiseiin. Thlifîm thaw heuh heuhte chuan a sam chu chhêm lêng siau siauvin chibai an rawn bûk ve mawlh mawlh bawk a, ani pawhin rimawi lo chhuahna chu a hnaih tawh hle.
Pûk zâwn a thlen rualin chu rimawi chu Pûk chung lam aṭanga rawn chhuak a ni tih a hre thiam nghâl a, lui kân turin lung chungahte chuan tlûk palh hlau takin, zei lo taka lung va rap deuh ṭuih ṭuihin a kal beuh beuh a; a zei lo lutukte chu hmuhnawm leh duhawm tak hi a ni ringawt. Amah chu hruai turin mi rawn ko mai se chuan ka va phûr sûrh sûrh dâwn êm aw. Lui a kânna hi suar awmna lai niin a zau lo bawk a, lung rapa kân mai theih a nih avângin a kân ve thei mai bawk. Lui kam lehlam a kai chiah Pûk lam pan chuan a chho nghâl a, Pûk sîra mihring kalna hnu tih hriat tak bel han a hmuh chu a zawh chho leh zat. Kawng a chho lêm lo bawka rei lovah Pûk chung chu a thleng zui mai. Zawn kual ngai lovin a hmuh duh chu a piah deuh thingkûng lian ṭha tak, a hlim zau ṭha tak leh nawm hmêl zeta ṭhutna tur mau hmanga mawi taka siam chunga Sâwmfela lo ṭhu reng leh, a piah ram hla tak lam hawia mau te tak tê fit khat vêla sei a hmuia chuktuaha hâm hlerh hlerh a hmuh rual chuan, kha rimawi tumtu kha tu nge tih hrilh a ngai tawh lo chiang hle. Va pawh mai rih lovin tui taka Sâwmfela Phênglâwng tum lai chu a thlîr reng a, Sâwmfela mizia ngaihtuah chuan hetiang rimawi danglam tak mi thinlung hneh thei a tum thiam chu a inhmeh lo a ti deuh hlek a, a en rei deuh hnu chuan inhmeh tihna riau a nei ru tho bawk si. Sâwmfela lah chu a lo tui deuh ni tur a ni, Zâwlkhawpui mawitu dâwntuai ṭhalêngi'n a thlîr reng tih a hre hauh lo a nih hmêl. Mawi taka rimawi hrang hrang a tum hnu chuan, a Phênglâwng chu dahin a mittui hru zauh chu Emmy chuan a hnunglam aṭang chuan a hre thiam tlat. Chutah Emmy chuan a kut vawi thum bêng thek thekin, "Wow! A va mawi teh rêng êm ṭhianpa. I tum thiam hle mai." nui sâng hian a'n ti a, Sâwmfela pawh rawn hawi lêt rang tak a ni. "Ih...i lo kal alaw?" Sâwmfela chuan tiin a zak deuh nge a piah ram lam chu a thlîr zui leh daih. Emmy chuan, "Umm...i rimawi tum rî kha ka lo hria a; mawi ka ti lutuka ka rawn chho ve tawp, ka ti buai lo che maw? I tum thiam hle mai." nui sâng bawk hian tiin a rawn pan hnai zui a. "Ka lâwm e." Sâwmfela chuan tiin eng mah a sawi chhunzawm leh tawh lo.
"Ka lo ṭhu ve thei ang em? Thil zawh duh che ka nei a." Sâwmfela en chung chuan a'n ti leh a. Sâwmfela chuan, "Aw le, min zâwt ta che." tih pahin a tawlh hlek bawk. Sâwmfela bula ṭhut pah chuan, "I duh loh zâwng a nih chuan min ngaidam la, engati nge he lai Pûkah hian i khawsak tih ka hre châk deuh a," inthlahrung deuh tak hian Emmy chuan a'n ti a. Sâwmfela chu lo nui sakin, "Ni e, ka hmuh tirh che u khân in mitmenga zawhna kha ka hmu daih tawh alâwm. Ka nu nêna kan dam khawchhuah ve nân hetianga khawsak hi ka ngai a ni." a tih chuan Emmy chuan a hre thiam chiah lo tih a hriat, "Eng nge i sawi awmzia?" a lo ti vat. "Kum 15 ka nih laiin ka pain min boralsan a, kan lo-ah Savawm a lo chhuaka ka pa nên an inbei a, a vânduai zâwkah a ṭang ta a ni. Tichuan, ka nu nên hian harsa taka khawsa zêlin, kum 3 liam taah khân Aizâwlah hian kan rawn pêm a; ei leh bâr dap a awlsam deuh beiseiin. Mahse, Aizâwl khawpui chhûnga In luah tur kan hmuh loh avângin khawpui daifêma In ruak kan hmuh chhun chu kan luah ta a ni. Aizâwl khawpui mi tia inchhâl pawh ka ngam meuh lo. He lai hmun hi ram ruak(neitu awm lo) a ni tih ka hria a; kan VCP-te hnênah huan lo ram atân kan dil a, anni'n min khawngaihin min pe ta a; kan piah deuhah sawn Vaimîm leh anṭam huan siamin ti hian ka riah chilh ta a ni. A tawi thei ang berin ka hrilh che." a tih dap dap hnu chuan Emmy chuan a khawngaih rualin thil awmzia chu a hre thiam ruak mai. "A nih chuan, Vaimîm leh anṭam in tharte chu in hralh ṭhîn tihna." a lo tih chuan Sâwmfela chuan bu nghat nghat pahin, "Aw ni e, kan nghei lova chu zawng chu a ni mai." a tih hnu chuan Emmy paw'n a chanchin ṭhenkhatte chu a hrilh ve bawk a; rin ai tak chuan an inpawh phian.
Chutia an tîtî rei deuh hnu chuan chawhnu dâr 1:30 a lo pêl ve leh ta reng mai. Sâwmfela chuan, "Vaimîm hmun va tlawh leh ka tum deuh a, ei tlâk deuh pawh a la awm ang. Nakinah kan la inkâwm leh dâwn nia." tih leh thawh a rual a, Emmy chuan, "Aw le, takin! I phal chuan ka lo kal ve, ka ṭhiante an ram vâk daiha keimah chauhin ka awm a." a lo ti chu mak tih hmêl zet hian Sâwmfela chuan a lo en ka hau mai. "Engtin nge nangmah chauha i awm ngam zâwk a? Aw le, i peih phawt chuan le." tiin Vaimîm hmuna kal tur chuan an inzui thla ta a ni.
Hetih laiin Reuben-a te ram vâk pawh kha hâwn tumin an lo inbuatsaih ve mêk a, vahrit leh ramar pakhat ve ve kâpin hlawhtling an inti hle. Fiamthu nên ri barh barh ṭhînin Emmy chungchângte chu an sawi chhuak leh a, a chângin Sâwmfela nên chuan an hmeh bel titih thûl, an ram vahnaa a kal ve peih lo chu hlau ru tak chunga a awm zui tâk an rin thute nên an nui leh var var ṭhîn. Puia lah chuan tih ṭhaih a tum nasa mai si; Emmy leh Sâwmfela-te awm dân kha rawn hmu ngat se zawng, Emmy chu an fiam rawn leh laih laih ngei ang le. A hla lêm lo bawka Emmy leh Sâwmfela-te paw'n Vaimîm hmun chu an thleng ta. Emmy chuan nuam a tiin Vaimîm chu tam a'n ti khawp a! A chauh deuh avânga a biang tâi sen hlar mai leh a thlanfîm luang ngiai ngiaite nên chuan thlîr nuam tak tur a ni. Rei lo tê an ṭhut hahdam hnu chuan, "Tah hian min lo nghâk mai che, Vaimîm ei tlâk deuh hi ka'n zawng ang e." Sâwmfela chuan a ti a, "Aa...a hmun hi ka fang ve châk hrim hrim a, ka lo kal ve zâwk mai ang." Emmy'n a tih tâkah chuan an pahnihin an inzui leh ta a ni. Hetih laiin, Emmy-te ûm zuitute paw'n lui lam chu an rawn hnaih ve zêl a.
Chhunzawm leh tur.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:23 pm

THE CAVE MAN.

✍️ Duata Khualchhâwn.

BUNG 3-NA.

Tlâi dâr 2:30 a ri ṭêp tihah Reuben-a te ram vâk rawn hâw tate khân an riahna hmun chu an rawn thleng a, Emmy a awm lo chu ngaih ṭha vak lovin an hawi kual nghâl ruai ruai mai. An Tent leh thil dang an dahte lah a ngai ngaiin a awm vek si; amah Emmy ber chu khawiah nge maw a awm le? "Ani awm ning deuh hi a lo vâk chhuak ve ang a, he'ng rampalailêngah hian a invâk bo daihte a ni lo maw!" tiin an sawi zui sap sap bawk. Hmeichhiate phei chu an hnuk ulh titih nghâlin Emmy chu an han ko vak vak ṭhîn, chhâwntu rêng rêng an awm si lo; hmeichhe pathumte chu an mittui a parawl pûr tawh. Zawn tuma an inbuatsaih mêk laiin an chhak hla vak lo aṭang chuan Emmy leh Sâwmfela chu an rawn inzui thla hnak hnak a, "Ka lo kîr ee..vaimîm ka lo hawn ṭeuh che u. In lo thleng tawh a ni maw?" Emmy chuan nui var var hian a lo ti lauh lauh, "Ka rin tâwk vêl a ni," Puia chuan lo ti supin an han nui leh rih. Rei lovah Emmy leh Sâwmfela pawh chu an zuk thleng thla ve nghâl a. "I lo invâk bo daih a nih kan lo ring hman a, Katy." Puia'n a lo tih leh chuan Emmy paw'n huat hmêl pu lêm lo hian, "Nia, hei Sâwmfela nên hian kan lo inkâwm a, vaimîm pawh min pe ṭeuh mai." tiin Sâwmfela chu a'n melh zui ralh a, chu veleh Sâwmfela chuan a iptepui khat dâwna a ah vaimîm chu a rawn bun ta rûih mai. Anni pawh chu an lâwm tih hriat takin an lo phûl hlut nghâl a, Christy chuan, "Awi! A va'n tam êm êm ve bestie, kan ei sêng dâwn em ni?" a lo tih chuan, "Hei hi ka rawh tur, hei pawh hei pawh..." tiin an bialpate nên chuan an inchuh rawk rawk zui. Chutia an rîk hlut hnu chuan Sâwmfela chu lâwm thute an han hrilh ve leh a, an zînga zanriah ei ve tura an sâwmna erawh Sâwmfela chuan mawi taka hnarin, a riah bûk lam pan chuan a chhohsan leh ta a ni.

Tichuan, nî a her liam a, full moon zân tih hriat zetin zan tîr aṭangin thla a êng nghâl hle; lui kuang leh a kam vêla thing bukte chu a chhun paw pheu mai a ni. Ṭhianho intih hlimna hun nuam leh zalên hmangtute chuan meipui chhep hluahin vaimîm chu an rawh puak ṭak ṭak a, an tih ngai loh thil tih takah an va zei lo hlawm êm! Vaimîm rawhna mai mai tur mei chu an chhep na mah mah tih pawh an hre lo. A khât tâwkin vaimîm chu han let ve ṭhîn mah se, duh aia mei a nat avângin mei sâ vâng chuan let ṭha thei hlawm hek lo; ṭhenkhat lai chu chakai ṭawk atâna awhawm khawp hian a ût hmui rum rum a, ei tlâk alawi awm mang lovin an rawh khawlo zo chu a ni dêr. Pahnih vêl an rawh hnu chuan mei chheh alh dân tâwk chu an hre thiam ve zêl a, Emmy leh Sâwmfela chu inhmeh an tih thute sawiin an fiam leh laih laih ṭhîn bawk. Zanin full moon chu lâwm ang u aw tiin men rei pawh an tum nangiang mai, an tlaivâr hial mahna le! Chutia vaimîm rawha an tîtî barh barh lai chuan an chhak lui kam lehlama Sâwmfela rawn chhuk chu an hmu a, Reuben-a chuan, "Ṭhianpa eng nge i tih dâwn? I vaimîm min pêk pawh a tui khawp mai." tiin a'n au lauh lauh a. "Ka ngawi dawh en pahin sangha ka kap teh ang ka ti." Sâwmfela'n a lo tih chuan an hre thiam chiah lo tih chu an inen ka hau dânah a hriat. "Eng nge ngawi dawh chu? Sangha an kâp ngai a mi?" tiin an sawi zui sap sap a. "Keima'n ka lo zâwt chiang dâwn nia. Sâwmfel ka lo kal ve?" Emmy chuan a'n tih zawm leh zat, a ṭhiante chuan, "Eehhh!" tiin an lo nuih var var. "A bula awm nuam i ti ṭan riau," tihte leh demna awkâ hrang hrangin Emmy chu an fiam zui laih laih bawk a; an ṭawngkam rûl tâwka chhâng lêt ve zêlin Sâwmfela awmna lam pan chu a rual zat. "Ṭha tê tê khân zuk awm ula, him dam takin lo kîr leh ngei ang che." Puia'n a lo tih chuan Emmy pawh a ter leh at tawh. He mite pahnih tak hi chu(h)! An thlang deuha suar awm, lung rah rem deuhna lai aṭangin Sâwmfela chuan a rawn hruai a, "I chau lutuk ang a, hetiang hian ramah i kal ngai âwm si lo va." Emmy en chunga Sâwmfela'n a tih chuan, "Chau lo vang. Bâkah nuam ka ti ve a, hriat zau nân pawh ka duh alâwm. A hla em?" Emmy chuan nui sâng hian a'n ti zung zung a. A hlat loh thu Sâwmfela'n a hrilh hnu chuan lui mawng lam panin an inzui thla ta a ni.

Zân boruak vawt raih vâng chuan Hoodie(Jumper) dum pan deuh hi Emmy chuan hain, a hnuaiah T-shirt eng nalh zet a ha bawk a, track pant dum mar ṭha tak hain sneaker dum kha a bun leh bawk. Thla êng ṭha viau mah se, lui kuang na nâ nâ chu thim lai a lo tam deuha Sâwmfela'n Torch light on-in Emmy chuan a phone flash light a on ve bawk. Chutiang chuan an chhuk thla zêl a, Emmy-te riahna aṭang paw'n a hla ve deuh ta, ding lama lui luang kawi chu thleng thlain, a kam vêl chu thla êng chuan a chhun paw deuh vo mai a, lui kama uchang hrâm ri chuah chuahte chu Emmy chuan a zâwt pah zêl a, Sâwmfela paw'n ṭha takin a hrilh ve zêl bawk. Lui kam thing leh mau hmuna thâwm dang deuh a hriat chuan Emmy chu phu zawk ṭhînin, "Eng nge kha kha?" rang zetin a tih zawm zat a, hlauhawm a nih loh thu Sâwmfela chuan hrilhin an inzui thla ve zêl. An zawh lai lui chu luite pakhat hian lo finin an han châwl det a, luite tui thianghlim tak chu Sâwmfela chuan chawnga thâlin Emmy chu a intîr a, "Hemi luite chhak deuhah khian a nia ngawi chu ka dawh. Chhoh lamah kan en dâwn nia. Khu lai aṭang khuan Sangha chu ka kâp ṭan ang." a tih chuan Emmy chuan, Aw le, ngawi dawh chu eng nge?" tiin a lo zâwt vat. "Sangha man dân chi khat a nia, kan en hunah i hre mai ang." Sâwmfela'n tiin an kal zui leh ta a ni.

Sangha kah ṭanna tur hmun an thlen rual chuan, "Lui kamah hian lo kal la, keiin Sangha kah tur ka'n zawng ang e." Sâwmfela chuan tiin, lung chung aṭangin Torch light nên lui chu a chhun kual a, a en uluk hle. Sangha thal atâna mau tê deuh hlam khat aia sei hlek tur, a hmâwr kut zungte tia vêla thîr zum ṭha tak pathum a ṭâwn beh chu kah mai theih turin a keng rân a, chu mau aia lian hlek chhûngah mau tê chu thunin, rubber sen hlai chi chhai fân an tih chu mau bul lamah nghet takin a ṭâwn zawm leh a, a ngha thal bul lam aṭang chuan pawtin a kâp tawh mai dâwn a ni. Emmy chuan mak a tiin Sâwmfela che vêl chu hmuhnawm a ti viau mai. Thla a ên êm avângin Sâwmfela chuan hlawhtlin a inring chiah lo va, mahse, thui lo tê an chhoh hnu chuan sangha man tura mite kal tam lohna tih takah rin aiin sangha chu a lo tam phian; thla bial zân chu an lâwm ve ni hmiang! Sâwmfela'n ngha thal a kah apiang chuan a vawi khat kahnaah a ṭhelh ngai lo bawk a, Emmy pawh a lo lâwm thiam ṭhîn teh e. "Awi! A va lian êm êm; eng nge a hming? I va'n kâp thiam," tiin a lo zâwt ve hman ziah bawk. An chho zêl a, an lui zawh rawn fintu luitê kha an thleng ve leh ta. Sâwmfela lui aṭanga a rawn chhuak chiah Emmy chuan, "Khawi maw ka lo en?" ti nui sângin tabawnga sangha chu a bih zui zat a, "Awi! I va kâp tam êm êm; a tui hmêl hlawm si. Min pe ve dâwn em?" ti nui ver verin a hlim hle tih a hriat. Sâwmfela pawh lo nui ve sukin, "Kan insem dâwn nia. Hetah hian châwl lawk ang aw." tih leh lui kama ṭhut chu a rual a, Emmy pawh Sâwmfela hma lam sîr deuhah a ṭhu ve bawk. Sâwmfela chuan a lukhum chu la thlain meizial leh lighter chu phawrh a rual a, meizial pakhat chu ṭanin a pak khu luih luih zui. Chutah Emmy chuan," E heee! Meizial te i zu ṭhîn alaw? Hrisêlna atân a ṭha lo asin. I zu ngai lo emaw ka tia," tiin Sâwmfela chu a en vang vang a. "Ka zu tam lo, thosi vêl hnawh kian nân a ṭha êm a." a tih chuan Emmy paw'n hre thiam takin a sawi zui ta bîk lo. "Chuan, ramah hian i riak reng ringawt nge? Hâwn chângte i nei ve em? Eng tikah nge i hâwn ṭhin?" tiin a zâwt leh. Sâwmfela chuan, "Nilai leh inrinnî-ah ka hâw ṭhîn a, thawhṭan zîngah ka kal leh ṭhîn." tiin ṭha takin a chhâng ve zêl. "A nih chuan naktûk inrinnî a ni sia, kan rualin hâw ve ta che. Motor chân ngai lovin," Emmy chuan a lo ti leh a, "Thlai tlêm azâwng hawn ka ngai sia ka ti buai lutuk ang che u. Ti rawh, ka ngawi dawh chu han en ang hmiang," Sâwmfela chuan tih leh thawh a rual a. Din chhuah pahin Emmy chuan, "Ti buai lo ve, kan hâw rual dâwn nia." a tih chuan Sâwmfela erawhin a chhâng tawh lo.

Hetih laiin, Emmy ṭhiante chu an zâi rin dânah an lu a kai leh tawh hle tih a hriat kher mai. A kawp tê têa lâm pahin an lo nui leh uarh uarh ṭhîn bawk a, han indût leh ngâwng ngâwng ṭhînin nuam an va ti teh rêng êm! Tent aṭanga an kawppuite nên rawn chhuak leh ṭhînin eng tak chu ti ni maw! Hmeichhiate'n an rawn chhuah paha an sam an tuai ṭhat sek dânah an awm mai mai lo tih chu mi pângngai tân hriat thiam loh chi a ni hek lo. "Hmânlai hian mawww..." tia bul ṭan thawnthu an inhrilh lo tih a chiang reng mai. Chutih laiin, Emmy leh Sâwmfela inzui ta pawh khân Sâwmfela ngawi dawhna hmun chu an thleng ve leh ta. Emmy chuan mak ti takin a en kual nasa mai a, "Hei hi maw ngawi dawh chu? Tui khuah ni âwm zâwk tak!" ti sapin a mitmeng leh hmêlah chuan a hmuh ngai loh thil a ni tih chu a chiang hle. A ni lah tak a! Ani ang khawpuia piang leh seilian, retheih leh thingtlâng nun awmzia hre lo tân chuan mak tih loh rual a ni lo rêng a ni. Luite tui chu lungin a lo inkhuap a, tui luan chhuahna tur bîk chu tuidawn ang hian, ṭângphel vêla sei changel kâwrin a dawh zawm a, a hmâwra tui lo luan chhuahna zâwnah hnânga bâwm a tah chu a dah leh a, bâwm chhungah chuan tui chu a khawh luhtîr ta a ni. Sangha an tlâk ṭhat chuan an man hnem thei hle. Sâwmfela chuan bâwm chhung chu a torch light chuan chhunin a zuk bih a, sangha lian deuh leh tê deuhte chu an lo tla tam kher mai. Tabawnga a chhûn luh leh meuh chuan a tabawng lian ve tâwk tak pawh chu a khat hmuk tawh. Sangha kah chhunzawm ngai lova a rin aia an hlawhtling chu a hlim ru veng veng mai a ni. Tichuan, Emmy-te riahna hmun pan tlang tawh mai turin luite kama kawngṭum chu an zawh ta a; Emmy mak ti leh lâwm bawk si chu nui var varin, a hriat ngai loh thil thar a hriat belh ṭeuh thu te, hun remchânga kal leh ngei a duh thute sawiin, Sâwmfela chêt phung dik lutukte chu hmuhnawm a tihzia thute nên a tîtî siam siam tawh mai a ni.

An riahna hmun chu a hla tawh lêm lo bawk a, an han thlen chuan zân a la rei lo bawk nên a ṭhiante pawh an lo la zai ring kher mai. Chutah Emmy chuan, "Kan lo thleng eee...sangha kan lo hâwn ṭeuh, Sâwmfela hi sangha a man thei lutuk." ti nui var varin an ṭhiante chu an hnaih zêl a; an va thlen chuan anni paw'n an lo lâwm thiam khawp mai. Changel hnah hlai ṭha tak pali a sah chu Sâwmfela chuan leiah chuan a'n phah a, an sangha man a bun chhuak chiah mai chu, "E khai le(h)! In va man hnem tak ve, in thang rei loh nên engtin nge hetiang zozai hi in rawn hawn theih a?" Puia chuan tiin Sâwmfela chu a en ka hau mai. Sâwmfela'n sangha a sem mêk lai chuan sangha an man dân chu Emmy chuan intih theih hmêl tak hian a'n sawi zung zung a, nuam a ti hle tih a hmêl leh ṭawngkamah chuan a hriat theih bawk. Christy chuan, "Bestie, Pasalṭha hnung zui chu nuam i ti hle mai maw, in rawn hlawhtling hâw bawk a," lo ti vein mi dangte pawh chuan an lo be ṭha khawp mai a, an kai deuh bawk nên an va polite êm! Kima chuan rûi awkâ tih hriat tak hian, "Ṭhianpa, hah damdawi ṭha deuh ka lo khilai ve ang che chu? Hei sangha lah min pe tam bawk sia," tiin Sâwmfela chu a kuah vêl chung chung a. Sâwmfela chuan lo hre thiam ve maiin, "Aa...a ngai lo mai, ka lâwm e. Ka chhohsan nghâl mai ang che u. In ei sên loh chu tah hian in rêp mai dâwn nia." tiin sangha rêpna tur pher a tah sa chu a pe a, hei pawh hi Emmy khân mak ti taka a en leh vang vang ṭhin kha a ni. A sangha man ang ang sem tum sa kha a ni bawk a, rêp dân turte a hrilh leh hnu chuan a chhohsan leh ta a ni. Anni paw'n au zui lauh lauhin lâwm thute an han hrilh hnuhnawh leh a, sanghate an rêp fel hnu chuan full moon lâwm turin an inbuatsaih zui leh zat. A ṭhiante chuan Emmy chu an fiam ṭan leh laih laih tawh. Mei an chheh chu kîl laihin Reuben-a chuan guitar chu a'n perh ve a, "Dî tawng lo vâl kan rûi" tih hla mipate'n an han sa kher chu an duh laii-te'n an va melh rum mai mai tak!Chutia hla chi hrang hrang saa full moon an lawm lai chuan zân pawh tlâi ve zêlin dâr 11 a ri dâwn hnai ta. Vênthâwn tur an awm lo bawka an hmeichhiate pawh kekawr bûl leh vest(tâwnzau) hain an inthuam duhdah viau mai a, Emmy paw'n kekawr bûl sen ṭial a malte chung khuh pha ṭâwk leh, vest dum pan deuh tak hain lukhum dum kha a khum leh bawk a, a taksa a mawi bawka inhmeh tak a ni. A vest hma lam tlâng rual chiaha a nau rahtlan tê chhe lo tak phîr taih maite chuan a ti duhawm zual a, mipate tân chuan îtawm tak tur a ni rêng a ni. Sangha rêpna tur a hranin mei an chhêm leh kha a ni a, tûna an mei ai lai hi chu an chhep alh na hle.

Sâp hla leh Mizo hla chi hrang hrang saa hun an hman lai chuan an rin loh leh beisei loh lutuk thil an tawng ta tlat. Vawi leh khatah, "Tumah kha che tawh suh u." tih thu pêk an dawng ta mai, aw lo chhuahna lam chu phâwk zet hian an hawi rual ṭhawt a, lui hnâr leh lui mawng lam aṭang chuan mipa pistol keng pahnih leh chemte hûm mi pathum an rawn chhuak zui sap sap mai le! Engtin tak awm zêl ang maw?

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:24 pm

THE CAVE MAN.

✍️ Duata Khualchhâwn.

BUNG 4-NA.

Hmeichhiate chuan an hlau hle tih hriat takin mipate bulah an insawn hnai rawk rawk nghâl a, chutah Puia chuan, "Tute nge in nih a? Kan lak aṭang hian eng nge in duh?" a ti ram ve hmak, chu'ng mite zînga pakhat chuan, "Tute nge kan nih a pawimawh lo. Min ti hah hrep lehnghâla in châk lo khawp ang." tiin hmeichhe-ho chu a melh kual den den a. A ṭawng tlêma a pai deuh dânah Mizo a ni lo tih chu an hre thiam mai. Chu pa bawk chuan hmeichhe-ho chu ît hmêl taka melh vung vungin, "In hmêlṭha hle mai." a tih hnu-ah, "Mipate kha phuar rawh u." tiin a hote chu thu a pe leh a. Chutia an bialpate an phuar tur chu phal hlawm bîk hek lo; "Khawngaihin min kalsan rawh u. In pawi eng nge kan sawi," ṭah aw ṭuau-a tiin an bialpate chu an lo kuah ve ṭâwk ṭâwk a. Dîm lo baksak taka mi pathumte chuan rawn phit dawtin mipate tân lah chêt thawh ngamna chi a ni si lo; pistol kaw hmâwr an hmachhawn reng si. Reuben-a, Puia leh Kima-te an hnung khirh ṭhap hnu chuan chu'ng mite chuan vai ṭawngin eng eng emaw an sawi zui barh barh a, Reuben-a, Puia leh Kima-te thinrim lutuk chu an inseh ruh nasa kher mai. Chu'ng mite lah chuan thâwm bengchheng chhuah lo turin an vau zui nghâl a, thu an awih loh chuan thah an hreh loh thute nên an hrilh dap dap zui. A tîr aṭangin Emmy chu a la ngawi reng a, an thil tawn chuan a ṭhâwng na deuh nge lei lam chu a en vawng vawng ringawt. A beiseina neih chhun chu Sâwmfela chauh a ni a, mahse, a lo muhîl hman tawh ang em? Amah chauh chuan he'ng mi pangate lak aṭang hian a chhan chhuah theih chu a ring chiah si lo; chu'ng mite'n an rawn en dân aṭang lahin anni hmeichhe-ho chu an ît hle tih a hre thiam ve reng bawk si, a ngaihtuahna a kal thui viau a ni.

Chutia a rilru a lo kawm melh melh lai chuan an hotupa ni âwm tak, pa tê chhe lo tak hian Emmy-te ṭhian li chu a rawn pan hnai a, an samte chu khawihin a'n chûlsak vêl a, chu veleh Kima chuan vîn zet hian, "Hei Zâwngchhe pa, anni kha khawih hlek suh." tih leh thawh chhuah a tum chu pakhatin a chemte fawngin a bekah a lo chhutsak bur. Christy chu râk ṭhawtin a ṭap zui hlawp hlawp a, chu'ng mite lah chuan an bialpate hnaih chu an phal dêr si lo, chutia Christy lo ṭê ṭhat chu an hotupa chuan melh zui zatin, "I bialpa a ni maw? Tûn aṭang chuan kei chauh hi i bialpa ka ni tawh tih hria ang che." a lo tih chuan Christy thinrim ve tawh insûm zo lo chuan, "Nang vai chhe lu bâwk kha eng tikah mah ka bialpa i ni ngai lo vang." lo ti bak hlarin, chu pa chuan a bêng hawi sawk zui. Reuben-a leh Puia thinrim chuan chu pa chu an rawn vau zui ve leh a, tih theih erawh an nei tlêm hle. Chutia a ṭhian ṭha ber kut thlâk a ni chu Emmy insûm rei tawh lutuk thinrim in-up nasa bawk si chuan, "Eng vângin nge ka ṭhiannu kha i ben rîkngawt a? Hmêlchhe pa, hremhmunah kal rawh." a lo ti ve hlaih hlaih a, chu pa chuan rawn en pah hian, "Minister fanu, nang chu him dam taka hruai che kan duh, i man pawh a to viau dâwn a nia." a lo ti zauh chu he'ng mite hi hmeichhe ru bo ṭhînte zînga mi an ni tih an hre thiam nghâl mai. Chu pa chuan a ṭawng chheh sual palh chu pawi tih loh hmêl takin a awm zui ta mai mai a. Emmy chuan, "Khawiah mah min hruai lo vang. Nangni hi hmeichhe ru bo ṭhîntute kha in ni maw? Tualthah chungchângahte pawh khân in inhnamhnawih ngei ang. Zâwng hmêlchhe-ho." tiin a melh rum ve khai khai hlawm hle. "Minister fanu, duh tâwk rawh." chu pa chuan a lo ti vîn ṭhawt a. Mahse, Emmy nute thin thawk laklawh tawh chuan a la ân khum phiar phiar tho. Chu'ng mite chuan engah mah ngai lovin hmun khat laiah kal khâwmin an inbe leh sar sar a. Chutih lai pawh chuan Emmy hlau deuh leh thinrim bawk si chuan ṭawngkam a la duh tui lo hle; a ṭhiante pawh chuan huaisen an ti letling tawh zâwk hial a, a chungah thil ṭha lo a thlen phah erawh chu an hlauhthâwnpui viau a ni.

Rei lovah an hotupa chu rawn phei lehin, "Nang hi i ṭawng tam riau mai, minister fanu ni mah la tûnah chuan kan nula i ni tih i inhre lo em ni? Tho teh," tiin Emmy phih thawh lawp chu a rual a, a beka pistol-a tin pah chuan, "Nang hian ka duh min tihsak dâwn." tih leh lui hlat bera Kima leh Christy-te Puan In lam pana hruai luih chu a rual ta mai. A ṭhiante chuan chu vaipa thil tum chu hre thiam takin an lo au zui tuarh tuarh a, hmeichhe-ho phei chu an ṭap pûr tawh. Hetia rawn man ringawt-tute hian lukhum khumin mask an vuah tlat bawk sia an hmêl an hre thei hauh lo leh nghâl. Emmy pawh chu han ṭang ve ṭhîn mah se, pistol-a tin reng a nih avângin a kal lo ngam si lo, mittui tla zawih zawihin Sâwmfela chu a rilruin a ko mawlh mawlh ringawt mai a ni. A beiseina neih chhun Sâwmfela lah a lo mu tui deuh nge a reh vung vung mai si. Tent hla ber an thlen chuan chu pa chuan Emmy chu a nam lût nghâl a, thing bukin thla êng a hliah ṭhen deuh avângin a thim deuh bîk bawk. Emmy chuan, "Zâwngchhe pa min khawih suh. Ka duh lo, min thlah rawh hmêlchhe pa." tiin a theihtâwp tak meuh meuhin a tâl vak vak a, chu pa pawh chuan a duh angin a khawih thei mai bîk tlat lo. A chângin kut inthlâk thâwm chu a ri leh ṭhat ṭhîn a, Emmy aw ngei maiin ṭap chung a, "Ka duh lo, min khawih suh. Khawngaihin..." a ti lawm lawm chuan a ṭhian te, a bîk takin mipate thin a khei zual kher mai, mipa pathum te, Kima, Puia leh Reuben-a te tih theih nei si lo chu an mittui a parawl ve hial! Chu pa lah chu a mipatna chuan riah rûn remna a mamawh tawh hle tih hriat takin 90 degree a kâwk vah tawh mai a, Emmy kekawr pawh thlâksak tuma chêt a thawh leh lai takin bân tha chak zet hian a nghâwngah a rawn kuah ta chat mai le! Kâ âng nghâl zuau zuau-in a nghâwnga rêktu bân chu phih thlâk a tum a, a rêktu chuan a reh ngheh êm avângin a phit thla thei mai lo. Chutia a leng uai uai lai chuan amah rêktu chuan a ding lamah a'n herh vak a, ruh tliak ri rakin a zawm nghâl. Emmy pawh lo ṭê ṭhatin a thinlung erawh lâwmnain a khat a, rawn chhan chhuaktu chu tu nge tih a hre chiang hle bawk.

Sâwmfela chuan Tent kawngka aṭang chuan mi palite chu a bih vang vang a, an rawn ngaihven lêm lo niin a lang. Chu veleh a mi thah pa ruang chu fîmkhur takin a hnûk chhuak zui, lui mawng lam hawiin Tent hma lam chu an lo zâr hlauh a, thla êng lah thing bukin a hliah bawk nen an vânneihna a kal tluang rih tlat. Sâwmfela chuan Emmy chu kaiin lui hlat lamah a kalpui a, hmun him laiah chuan ṭhuttîrin, "I nâ em? Hlau tawh suh aw." a'n ti sap a. Emmy chuan, "Na lo e, i rawn lan hi ka ring rêng a ni. Ka lâwm tak zet aw. Ka ṭhiante kha." hnuk ulh ṭeuh hian a'n tih zawm zat a. "Aw le, fîmkhur taka kan chêt loh chuan min that vek ang. Lâwm thu sawi kha a ngai lo a nia, i hnaih phei ang hmiang." tiin Sâwmfela chuan hma a hruai zawm leh. Fîmkhur taka kal zêlin, lung lian vak lo phênah tawmin an ṭhiante chu an thlîr reng a, hlam thum vêl lekin an inhlat âwm e. Chu'ng mite pawh chuan an hotupa chu rei an ti deuh nge, Emmy a hruai luhna Tent lam chu an hawi leh zuk zuk ṭhîn. Lui tui luang ri barh barhte chuan an hotupa leh Sâwmfela thâwm kha an lo hliah khuh hlauh a, an hotupa chu lungawi taka a rawn kîr leh hun an nghâk tawp tawh hi a ni. Sâwmfela chuan amah maia chêt a thawh chuan mi pali lai an la ni bawk nên a che sual ve thei tih hriain, mei bula Puia-te phuar chunga ṭhingṭhi ṭhap chu chhan chhuah hmasak ber an ngai tih a hre chiang hle. Hlam hnih vêlah anmahni vêngtu pahnih chemte keng an awm reng bawk si a, chu'ng mite rilru lâk pênna tur thil eng emaw tak tih a ngai tih chu hrilh a ngai hauh lo. A bula lung kuttum tia vêl mâm ṭha zet chu chharin Emmy-te riahna thlang lam chu a'n vawm a, lei nêm laiah a tla tih hriat takin a ri dup, chu'ng mite pawh chu an va phu chiang mai mai tak! Thâwm awmna lam chu hawi ṭhapin an tho chhuak sap sap a, Puia-te vêngtu pahnih erawh thui an kal duh ta tlat lo, an piah hlam li vêlah chuan va dingin an ṭhian pahnihte chu an be zui mawlh mawlh. Chutih lai tak chuan Sâwmfela chuan fîmkhur taka lung phên pah zêlin Puia-te chu a hnaih phei zêl a, anni paw'n Sâwmfela a ni tih an hre mai. An kut phuarnate chu zai chahsak zung zungin, "Min lo ngai châng dâwn nia," a tih sap hnu-ah a tawmna lam panin a vah pheisan leh, vêngtute an inbiak lai chuan thing ro an fawm sa pathum chu Reuben-a chuan a la dân dân a, phuar hlâwm ang taka an kut hnung suih chungin an la ṭhingṭhi ṭhap. Chu'ng mite pawh chuan eng mah an hmuh lêm loh avângin an rawn chho ve leh mai bawk a, mahse, an hotupa erawh rei an ti deuh tawh tih an hmêlah chuan a hriat hle. Pistol pai pakhat la dam chuan an hotupa chu tih thinrim hlauh hmêl tak hian a han ko ṭhîn, chhângtu an awm si lo; a ngaih ṭha tawh chiah lo chuan Tent chu va hnaih pheiin a ko pah zêl a, Tent si chêta beng a dawh pawhin mihring thâwm hriat tur rêng rêng a awm si lo. Chuta Tent chhung lam a'n bih ta chuan tumah rêng rêng a hmu ta hauh lo mai le! An hotupa a awm loh thu a hote chu a hrilh nghâl a, râk nawk nawk chungin a hote lama hmanhmawh taka phei a tum chu, a ding lam sîr aṭanga Sâwmfela rawn chhuak thut chu a chemte ken lai chuan a lo vai pawp a, a vai lêt leh tur erawh a bânrêkah Sâwmfela chuan lo manin, a thlukvûma tlang thawih khawpin a chem zum khân a lo vit pâwk mai. A pistol a phawrh hman loh avângin a chemtê ken lai zâwk chu a hmang lo thei lo va, chu chuan Sâwmfela nêm vei lam chu a chemte hmâwr lam chuan a tâi kak ve hman tlat. Chumi a hote'n an hmu Sâwmfela lam an rawn hawi lai tak chuan, "Zâwngchhe-ho." Puia'n rawn ti ṭhawtin anni pathum rawn hawi lêt leh chiah bekah tak thing ro bânrêk tia vêl, chang ṭha taka Puia-te ṭhian thumina an han hlap siah mai zawng chu'ng mite chu an vir nawk a, an tlu tawh chu vaw zui zawt zawtin an hnek chawrh chawrh bawk.

Chutia thisen chhuak khawpa an inbei ta chu hmeichhe-hovin an râp lutuk chu inhup zui chung chungin an ṭê ṭhat ṭhat a. An bitum ṭheuhte an thah hnu chuan an hmangaihte nên inkuah vawng vawngin, hmeichhe hnuk no tih takah an lo inhnît zui feih feih bawk, an thiam ang tâwka hnêm ve malh malhin, Emmy pawh him dam takin a rawn chhuak ve bawk nên an lâwmna chu sawi fiah rual a ni âwm lo ve. Chutah Sâwmfela lam chu hawiin lâwm thu an hrilh zui leh mawlh mawlh a, an thah tâk ruangte chu an mask vuahte hlihsaka an thlate an lâksak leh hnu-ah, an riahna aṭanga hla deuhah an zâwn sawn leh ta a ni. An taksaa thisen kaite chu luiah chuan an va sil fai sawk sawk a, Sâwmfela chhoh leh mai tum chu Puia chuan ko dingin, "Ṭhianpa, i chungah hian kan lâwm tak zet. Lâwm thu sawi sên loh kan ba a ni. Kan tâna i thil tih zawng zawngte hi eng tikah mah kan theihghilh tawh lo vang." Sâwmfela bula din pah chuan a'n ti dap dap a; Emmy paw'n mittui tling piauvin Sâwmfela chu a lo en ve vawng vawng bawk. "Lâwm thu sawi a ngai hlei nêm, ka tih tur nia ka hriat ka ti mai chauh a ni. Mangṭha muttui phawt ule." tiin Sâwmfela chuan a chhohsan leh ta a; tui taka mut chu a har viau ang le. Sâwmfela chhoh hnu chuan kha'ng mite chanchin kha an han sawi zui leh nak nak a, engtin nge he laiah hian an awm tih an hriat theih tih hi zawhna an chhân theih loh chu a ni. Emmy chu Minister fanu a ni tih an hria erawh ngaih dân an nei thiam mai.

Zân pawh a rei ta, zîng lam dâr 1 a ri ṭêp tawh tihah Sâwmfela chuan a hliama hnawih tur ramhmul damdawi a lâkte chu a nêm hliama hnawih turin a lo buatsaih ve mêk a. Chutih lai chuan, "Sâwmfel, khawi keima'n damdawi hi ka lo hnawih ang." tiin Emmy chu Pûkah chuan a lo lût ve chiah bawk. Sâwmfela chuan mak ti deuh taka enin, "Engtin nge ka inhliam tih i hriat? Ka ṭha alâwm, min ngaihtuah suh." Emmy chu rei en lovin a damdawi chu a buaipui leh mial mial. Emmy chuan, "Ram kal tur kan ni sia, inhliam palh theih a nia tiin damdawi ka pai alâwm, kha i hliam kha a na dâwn êm mai. Khawi ka lo hnawih ang." a tih pawh chuan, "Aa...a ngai lo e, hei hi ka hnawih anga a dam vat mai ang." Sâwmfela chuan a la ti tlat. Khatih laia a din hmun chhiatzia te, a nun tih chhiatsak a nih teuhziate leh a lâwmnate chuan a thinlung hnuk no an kai tho ni ngei tur a ni; Emmy chu Sâwmfela hmaah chuan dingin a inhnît ta feih feih a. Chu veleh Sâwmfela chuan a ngaihna hre lo zeta Emmy chu en phâwk hrâ chung hian, "Hei, ngati nge i ṭah ringawt? I ṭahna turin engtin mah ka tih loh che kha? Hei, ṭap suh. Ṭap ka thlêm thiam lo a nia aw," tiin Emmy hmaah chuan a ding ve ta ringawt a. Emmy pawh Sâwmfela ṭawngkam vâng chuan ṭah nuih suk suk pahin Sâwmfela chu a kuah thlawp, heih raw! "Ka lâwm e aw." Emmy chuan ti sapin a lungchhe zual chu a zia ta deuh. Chutia a rin loh lutuka Emmy'n a lo kuah thut chu Sâwmfela awm dân chu a va laklawh mai mai tak! Kuah lêt ngam chiah si lo, din tlâwn zuar ringawt chu dikin a hre bawk si lo pawsi chu hmutu awm se an nuih a za viau ngei ang. Emmy bânbulah dawmin, "Aw, i lâwm tih ka hria; kei pawh ka lâwm tih ka hria, a lâwmawm." te a ti duah a, a hnu deuhah, "Ka thisen kha i kai ang e aw." a'n ti leh chu Emmy nuihza bawk si chu a nui khûr char char tawh mai a ni.

Emmy chuan Sâwmfela a kuahna chu thlahin, "Khawi le! Damdawi hi ka lo hnawih tawh ang. A nih loh chuan ka ṭap vak a ni mai." tiin mittui tling piau-a nui sâng hian Sâwmfela chu a melh zui ralh a. Sâwmfela tân lah tih ngaihna awm tawh hek lo; "Aw le, i ṭah ai chuan hnawih mai rawh." tiin a ṭhu zui leh. Emmy chuan lapua-ah damdawi chu leihin, "A thîp deuh dâwn a nia." tiin Sâwmfela nêm zungchal bawk aia thui mah a vun kau hakah chuan a nem bet nghâl a, Sâwmfela erawh nâ ti hmêl pu hauh lovin a awm dân a ngai reng thung. An bula candle alh hlep hlep chuan an awm dân chu a ti romantic phian mai. Creep bandage-a a tuamsak leh lai chuan an ṭhiante thâwm chu an hre zui ve leh. Anni pawh chu rawn lang nghâlin Puia chuan, "E khai aw. I inhliam nâ em ṭhianpa? A zia lo hle mai. Keimahni vângin hliam i tawrh phah a, i nunna atân pawha hlauhawmah i din phah a nia." inthlahrung deuh tak hian a lo ti nghâl a, mi dangte pawh chuan pawi an tih thu an lo sawi ve sap sap bawk. Sâwmfela chuan a nat loh thu te, inthlahrunna tur a awm loh thute lo sawi vein, an tîtî leh laih laih hnu chuan," Ṭhianpa, ka inthlahrung viau na'ngin zanin chu mut a chhuak thei si lo va, i peih chuan kan riahna hmunah khuan min lo telpui ve ta che. I mut duh tawh chuan kan ti lui chuang lo che a," tiin Christy chuan zei takin a'n sâwm a, mi dangte'n an lo sâwm zui ve bawk nên Sâwmfela pawh chuan "aw" a pawh ve ta nge nge a ni. An hun tawngin zir ngat se chuan Emmy chu an fiam leh bawrh bawrh tawh ngei ang le. Tichuan, an vaiin Emmy-te riahna hmun pan chuan an chhuk thla leh ta a.

An zuk thlen thlâk chuan zîng lam dâr 1:30 a lo ri ve leh ta reng mai. Mei chhep ṭha lehin an han ṭhu sap sap a, "Rilru tih thâwl nân zanin chu kan hero hian zai han hruai teh se aw." Reuben-a chuan tiin Sâwmfela chu guitar a pe zui zat; Sâwmfela chuan, "Kei aiin in perh thiam zâwk ang. Ka perh thei sawlh sawlh chauh a ni." tiin han ṭang ve viau mah se, an hnawn tâk tlatah chuan guitar chu a la ve ta nge nge e. A nihna takah chuan, khatia an mihring puite nunna an han la ta mai kha an rilru erawh a nuam thei chiah lo va, an ngaihtuah thui deuh chuan an rilru a hah zual ting a ni mai si; hmeichhe hriat laia sawi chhuah lah an hun tawngin a zir lo bawk nên tih chi-ah an ngai si lo; an chhung ril ipik lutuk tih thawven nân hetianga Reuben-a hian ti kha a ni rêng a ni. An mi thah tâkte kha hnam dang akâra mi sual leh hnawksak êm êm an ni chu tlêmin an inthiam ve deuh mai pawh a! An demawm hauh loh, mahni mihring pui ngei nunna lâk hi chu a mi ṭhâm dân a dang khawp ang le. Chutah Sâwmfela chuan guitar chu kuah rem sauh sauhin, chu zân thla êng tlêma dul deuh tawh nêna inchawih êm êm mai hian a'n fingering mai ale; thiam an tiin mawi an ti hle tih an en ka hau dânah chuan a hriat theih mai. Chutia a finger style mawi turu zet a duh tâwk hnu chuan an beisei loh lutukin Sâwmfela chuan, "Sâp hla ka duh deuh ka'n sa ang e, in thiam zâwng a ni ang em maw?“ tiin a aw lian leh thâm deuh nêna inhmeh êm êm; Kenny Rogers leh Dolly Parton-i hla "Can't make old friends" tih kha hmêl hlim sârh hian a rawn la ta.

What will I do when you're gone?
Who's gonna tell me the truth?
Who's gonna finish the stories I start
Way you always do.

When Somebody knocks at the door,
Someone new walks in.
I will smile and shake their hands;
But you can't make old friends.

Anni ṭhianho pawh chuan mawi an va ti teh rêng êm! "He hla hi ka duh lutuk," Kima'n lo ti zauhin nui sâng hian an lo sakpui ve nghâl mai. Ni e, he hla hi vawi tam Kima hian ṭhianhova an awm châng hian a play fo va; a ṭhiante pawh hian duh thar ta riauvin thiam pawh an thiam tawh viau a ni. Inkuah dialin an sak chhunzawm zêl a, a thunawn an sak hnu chuan hmeichhe-ho chuan a dawt leh châng chu an sa ve thung.

How will I sing when you're gone?
Cause it won't sound the same.
Who'll join in on those harmony parts
When I call your name?

Hemi châng an sak lai hian Emmy leh Christy chu mittui fîm tling piauvin an inen nui sâng a, mi dangte pawh an bâng bîk lo. An thil tawn leh an hla sakte nên chuan inchawih riauvin an inhria a; an va zai tui teh rêng êm! Hla tâwp lam, "I'll be there just waiting for you. tih lai te, "And you and me, will be young again" tih leh, "Me and you, will be together again. Cause you can't make old friends." tihte an sak thlen meuh chuan, hmeichhe hnuk no deuhte phei chuan nui sângin mittui an hru leh zauh ṭhîn. An sak zawh hnu chuan kut bêng dar darin, "A va nuam êm! Khatianga tui khân ka la zai ngai lo. Hla i thlang thiam hle mai ṭhianpa." Puia'n a ti hial rêng a ni. Thla lah a hniam ṭan tawh bawka a ngui deuh lûp tawh. Reuben-a chuan, "Guitar khawih vêl pawh i turu hle mai, en ang ngawt hi i ni dâwn lo tlat. Chutih rualin, kan mi thah tâkte khân rilru erawh an la luah hneh deuh a ni." a lo ti ve a, Sâwmfela chuan, "Ngaihtuah vak duh suh. An thil sual tih man an hmu a nih kha!" a lo ti hmak. Chu veleh anni ṭhianho pawh chu an han inhnêm tawn leh laih laih hlawm a.

Zân a rei tial tiala zîng lam dâr 2:30 a nih meuh chuan an mut a chhuak ve ta deuh nge an hâm bâi bâi tawh. Chu chu Sâwmfela chuan hre thiam takin, "Eee..in mut a chhuak tawh a nih kha, mu tawh rawh u. Kei pawh ka chho ang e." a'n ti a. Anni chuan an mut a chhuah loh thute leh tlaivârpui law law turin an lo sâwm zui sap sap. Christy chuan, "Kei chu ka mu hreh tawh e. An thlate a hrâng ang tih ka hlau." a lo ti chu hmeichhe dangte pawh an phâwk hrâ tawh, "Bestie, i lo sawi chhuah leh kher? Mahni chauhin ka la mu zui." Emmy chuan hlau tih hriat tak hian a lo ti a. Anni mai an ni lo, an bialpate lah ramhuai/thlahrâng lam hlau mi an lo ni bawk nên, chu lai hmuna han riah leh chu an hreh tawh hle tih an hmêlah chuan a hriat reng mai. Chutih lai taka mau ro an tuah pakhat a lo puak thut mai chu(h)! Karei karei! Thla nei se chuan chhim leh hmâr chhak leh thlangah an thlâwk kawkalh nawk nawk ngei ang le. A hnu deuhah an Tent-te chu sawn leh tê têin an inhnaih tawh hlawm hle mai. An awm dân vêl chu Sâwmfela chuan lo nuih sukin, "Mu hahdam rawh u, ka lo vêng ang che u." tiin mei bulah chuan a ṭhu zui ve leh. Puia chuan, "Ṭhianpa i chau lutuk ang a," tiin tlâwmngaih han tum ve viau mah se, "Chau lo e...mu hahdam rawh u." Sâwmfela'n a lo tih leh tâkah chuan an nulate mut a chhuak tawh nên, nuam lo ti ru tak chungin Tent-ah chuan an luhsan ta a nih kha. Chhûn lamah vâk hah deuh mah se, an thil tawn leh Christy thu sawi khân a la ṭhawng na deuh nge ni, muhîl thei mai lovin an inlet sek a; a rei deuh chinah chuan an muhîl ve thei hrâm; Emmy Tent hnaih deuhah Sâwmfela a ṭhu bawka Emmy pawh rei lovah a muhîl zui ve ta a nih kha.

Zân thim thu neihna ti tâwp turin khua a lo vâr a, Emmy-te an thawh ve meuh chuan zîng dâr 9 a ri dâwn hnai tawh. Tûkṭhuante an peih fel hnu-a an ei kham leh meuh chuan nî pawh a sâng tawh hle. Sâwmfela sangha pêk an hmeh chu tui an tih thute sawia tîtî pahin an han ṭhu châwl leh vang vang a. Dâr 11 a ri dâwn hnai tawh tihah a tâwp nân tiin tuiah chuan an han chêng leh rih. Nizân lawka an thil tawnte kha an theihnghilh leh ta mai em ni aw tih turin an hlim leh viau tawh. Rei lovah Emmy chu chhuakin a inhru hul zung zung a, a thawmhnawte a thlâk leh hnu chuan Puia Camera kha kengin a ṭhiante tui chêng lai chu nui sâng hian a khât tâwkin thla a lo lâksak leh ṭhîn. Sâwmfela Pûk lamte chu han thlîr leh vang vang ṭhînin eng nge a ngaihtuah tih erawh a hriat mai theih loh thung. An duh tâwka tui an chên leh hnu chuan a ṭhiante pawh chu an rawn chhuak zui sap sap a. Ni danga an tui chên dân leh tûna an tui chên dân chu a dang viau âwm e. Inhru hul zung zunga an inthlâk lai chuan Sâwmfela pawh a thlai hawn tur tlêm nên Pûk a rawn thleng ve leh chiah. Puia chuan a au zui lauh lauh a, an ruala hâw ve tura a sâwm leh hnu chuan a ṭhiante hriat turin, "Mihring hi a lo va inan loh theih ve le...hrehawm tawrh châng chu nei ve tho mah ila, keini chu nuamsa takin zirna rûn aṭangin kan graduate-a; ani graduate-na erawh khi chu tehkhin rual a ni lo, mi danglam tak chu a niin ka hria." a tih charh charh hnu chuan mi dangte paw'n dik an ti tih hriat takin an thlîr zui ve vawng vawng mai a ni. Tin, an mi thah tâkte hmanrua, Pistol leh chemtê-te kha Reuben-a'n a lo dah ṭha hmak a, chu'ngte chu hawna thil awmzia Police hnêna thlen ṭha bera an hriat vâng a ni. An inpeih fel thlap hnu chuan lui hnâr lam pan chuan an inzui chho leh ta a. Motor dang nghah leh ai chuan tiin a remchâng bawk nên, Sâwmfela pawh lo inpeih ve tawhin a ṭhian tharte rual chuan a hâw ve dâwn ta. Anni ang mi hausa fate motora a thlaite nêna han chuan hnawk nuaih erawh a hreh hle tih a hmêlah chuan a hriat hle.

Nî pawh a sa leh viau, tîtî pahin an chho zêl a, an motor dahna an thleng chu an thaw deuh huai mai. An rilru kaptu pakhat chu, kha'ng mite khân an motor-te hi an lo tih chhiatsak mai an hlau ru deuh a nih kha. An motor him piala lo awm te, an motor chhak deuha Bolero dum lo ding ve-te chu an en zui vawng vawng a, kha'ng mi sualte rawn ûm zuina ngei kha a ni tih hrilh an ngai tawh lo. Police-te kutah dahin chu Bolero chu an tlân chhohsan ta a ni. Ni e, khatia Picnic tura Aizâwl an chhuahsan lai khân Bolero aṭang hian an lo enthla reng a, Emmy-te Car hmu pha tâwk zêla rawn ûm nghâlin, Aizâwl an chhuahsan aṭanga rei lovah Emmy-te vânneihna tur a ni ang chu! A engine lamah chiang lo awmin, thui pawh an ûm hmain a phit deuh dawt dawta a thi ta hmak mai. An siam ṭhat theih lawk loh avângin minute 30 vêl hun an khawh ral hman tlat. An siam ṭhat hnu-ah an ûm zui leh nghâl a, an ûm lai Car pahnih chu an hmu thei ta mai lo, an pênna an hre bawk si lo kha chak taka tlân tlang zêlin Emmy-te lui panna pêng kha an tlân pêl daih a. Emmy-te speed ngaihtuah chuan ûm pha turah an inngai tawh. Mahse, kawng laka an hmuh tâk si lohvah chuan Chhim lam khaw hnih khaw thum vêlah zan khatna kha tlaivâr titihin an lo zawng hrep tawh hi a ni. He'ng lai an thlen hman an ring lo bawk nên, hlawhchham vânga rilru hnual takin an lêt leh ta ringawt a, zân dâr 10:00 vêla Aizâwl an thleng ṭêp tihah lui kama Emmy-te mei chhêm kha lo hmu fuhin an rawn chhuk chilh ta kha a ni. An rin ang ngeiin an ti sual lo hle; mahse, thla êng hliahtu thing buk hnuaia Pûk awm kha hre ve hek lo; khatia an mi man mipate deusawha hmeichhia-te an han chhaih kual vêl thâwm kha Sâwmfela muhîl ṭan mêkin a lo hre hman hlauh a, chu chu an chêt sualpui ta a nih kha.

Tichuan, tlâi dâr 3 vêlah Emmy-te hâw chuan Aizâwl chu an thleng ta a, khawpui chhung an luh hma deuh, in a la khât deuhna hmun an thlen chuan, "Kha laiah khân ka lo chhuk ang e. Chuan, hei anṭam hi têl khat ṭheuhin in insem ve dâwn nia." tiin an din hnu chuan a chhuk nghâl a, car hnunga a vaimîm ip dahte a lâk leh hnu chuan, "Hei, vaimîm pawh hi in lo insem dâwn nia." tih leh kawngpui thlang hla vak lova Concrete upa ve lam tawh chu pan a rual a, an lâwm thu sawite pawh a hre mumal hman âwm lo ve. Chu veleh Puia chuan car start pahin, "Ehem! Lunglêng fe fe tur chu kan awm dâwn a ni." nui sâng hian a'n ti a, a seat hnunga ṭhu Emmy chuan nui sak chung hian, "Ni e, hei a ṭhutna a ruak ta sia ngaih a na nghâl riau." Puia fiamna haw tawh lo ni âwm taka a lo ti chu Puia chuan a va run tak! "Hmm..A'n haw phal tawh lo ngeia(h)!" ti hlukin Aizâwl khawpui chhûng lam pan chuan an tlân zui leh ta a ni. Sâwmfela chu ṭawng tlêm deuh mah se a bula awm nawmzia leh thlamuanthlâk si-zia te, a aw dam thluam mai leh a mitmeng fiah kâk mai te, kha'ng mi sualho laka a chêt dân aṭangte khân mi huaisen tak a ni ang tihte chu Emmy chuan a ngaihtuah zui neuh neuh a. A nêm hliam pawh hre âwm lo taka a chêt phung pângngai reng te, damdawi a hnawihsak lai pawha nâ ti hmêl a put hauh loh dânahte khân mi tuarchhel tak a ni ang tih pawh a ring thiam mai. Chutih laiin, a ṭah laia a thlêm thiam lo lutuk leh a zei lo lutukte kha a ngaihtuah a, a nuihte a za thar leh rih. Khatia a ṭapin a tih manganzia-te, a ṭawng khum dânte kha a ngaihtuah leh phei chuan a nuihza lutuk a hmûi a pet leh ngar ngar ṭhîn. Zêp rual lohvin Emmy hian a ngaina tawh hle tih pawh a chiang ta viau mai le!

(Hun leh nîte an ral zêl ang a, Sâwmfela'n Cave Man tih hming pu-a a pianna leh seilenna Mizoram mipuite mai ni lo, India ram state hrang hrangte hmeichhe rûk bo leh pâwng sual, tualthah leh damdawi tawlh rûkte leh dân lova che ṭhînte tukzala zalenna dâr a khawsak dân ropui leh ngaihnawm chu kan la hre chho zêl dâwn chauh a ni.)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:24 pm

THE CAVE MAN.

✍️ Duata Khualchhâwn.

BUNG 5-NA.

Thawhṭannî a lo inher chhuak a, Aizâwl khawpui pawh mipui leh motor an insûlpêl leh zut zut tawh. Mipui mimir nun phung thlîr chuan chhûn lamah chuan an nun phung pawh a pângngai viau a; hmun ṭhenkhata hardware dâwrte pawh a ri leh tleng tleng ṭhîn. Nî dang ang bawkin MC pawh mipui an lûn leh tawh hle mai. Mahni hna ṭûl leh tih tur hrang hrang neia che sang sangte chuan khawpui chhûng chu an ti hmuhnawm a, ṭhianhova han lêng khawthawng mai mai te, an voh dî-te nêna coffee leh thil dang ei leh ina restaurant mawitute lah sawi hmaih chi an ni lo vang. Hetianga mi tinte an phusak suau suau lai hian Emmy-te ṭhianho erawh Police Station-ah an ṭhu ṭhap a, an picnic-naa an thil tawn zawng zawng te, an mi thah tâkte thlalâk leh hmanrua vêl keng chuan thil awmzia an lo hrilh ve mêk bawk. Police OC-in anmahni chhan chhuaktu chanchin an sawi Sâwmfela chu hun rem châng hmasa bera rawn hruai tel ve tura a hrilh hnu-ah an hâw ve leh ta a ni. Kha'ng mi sual pangate an thah hnu kha chuan ni khata ruang pakhat tal emaw, hmeichhe pâwng sual leh rûk bo tih vêl kha reh deuh turah an ngai a, nilainî a lo inher chhuah thleng paw'n chanchin dêngkhâwng hriat tur chu a awm rih lo phawt. Emmy-te ṭhianho pawh nilainî tûkṭhuan ei kham dâr 10 vêlah Sâwmfela-te In luah lam panin an tlân phei leh ta a; an va thlena Sâwmfela-te In luah an zawh leh hnu chuan an pan tlang leh zat. Sâwmfela khân Emmy hnênah nilainî leh inrinnî-a a hâwn ṭhin thu a hrilh a nih kha. Chutih laiin, Sâwmfela nu Pi Mawizuali pawh inah awmin, a thlai kawl sate a zuar zo tawh bawk nên Sitting room-ah chanchinbu a lo chhiar mai mai a, kawngka kik thâwm a hriat rual chuan lût turin a hrilh zui zat. Emmy-te pawh chu an lût zui ve nghâl a. Chutia a hmêlhriat loh nula leh tlangvâl hmêlchhe lo tak, mi pasarih lai rawn lût chu Pi Mawizuali chuan mak tih hmêl deuh tak hian a lo en vang vang mai. Emmy chuan nui sâng hian, "Ka pi, Sâwmfela nu i ni em? Keini hi," tiin an hmingte chu a'n hrilh nghâl zung zung a, Pi Mawizuali paw'n, "Aw a ni maw? Lo ṭhu rawh u. Ka fapa chu engtin nge in hriat a?" mak a la tih hmêl hle. A demawm hauh loh, tûna an in rawn raptute hi a hriat ngai loh mai bâkah, an incheinate a en chuan chhungkaw hausa tak aṭanga lo seilian an ni ang tih a hre thiam reng mai si. An ṭhu fel ta tihah Puia chuan Sâwmfela an hriat dânte chu hrilh hmasa phawtin, "Ka pi, lo hlauthâwng lo la." tiin an thil tawn leh Sâwmfela'n a chhan chhuah tâk dân zawng zawngte kha kim taka a hrilh leh dap dap hnu chuan, Sâwmfela chu Police Station-a hruai tura rawn kal an nih thute chu a sawi tlang ta vek a. Pi Mawizuali chuan, "A nih chuan Mâma chu Jail-ah a tang dâwn tihna em ni? A va'n pawi êm aw." a lo ti vawng vawng chu an khawngaih kher mai. "Ee..tang dâwn lo ve ka pi. Thu zawh fiah atân an duh mai a ni. Kan rawn hruai kîr leh dâwn alâwm," Reuben-a'n a lo tih tâkah chuan tlêmin a zia deuh. Kima chuan, "Fapa huaisen tak i nei a ni, ka pi. Mi dangte tân a inpe zo bawk si, mahse hlauhthâwn tur a awm miah lo a nia," a lo ti ve leh a, tîti dangahte kaiin an nui leh var var ṭhîn.

Chutia an tîtî malh malh lai chuan Sâwmfela pawh mâkchhiat a tâwk ta emaw tih turin a rawn inphur lût bâwr leh tawh hle. Nilainî hi chuan a thlai hawnte a tam thei ang ber an hralh theih nân a hâw hma ṭhîn a ni. A nu chuan lo be sawk sawkin an ri zui nghâl laih laih a. Emmy-te chu mak tih hmêl deuh tak hian Sâwmfela chuan a en leh vang vang ṭhîn. Inhre sa an ni tawh bawka anni paw'n tlâng nêl takin an lo be bawrh bawrh a, Sâwmfela erawh a zak deuh tih a awm dânah chuan a hriat viau a ni. "Mâma, inbual fai nghâl mai la, hei i ṭhiante hian thil pawimawh deuh hrilh tur che an nei a nia." Pi Mawizuali chuan a ti a. Sâwmfela chuan Puia-te chu enin, "Aw le, ka rei lo vang." tih leh Towel nên bathroom-ah chuan a lût zui zat. Pi Mawizuali'n Puia-te thingpui siamsak a tum chu ṭawngkam mawi takin an lo hnar a, rei lo tê an tîtî leh hnu chuan Sâwmfela inbual zo pawh a rawn chhuak ve leh. A hmui hmul vêl kha a lo ziat fai vang a, a hmêlchhe lêm lo bawka a khabe hmul tlêm a zuahte chu a inhmeh viau. Room-ah lût tlangin rei vak lovah a thawmhnaw neih ṭhat ve deuh T-shirt dum pan lam a bân tlâwn, a nghâwng bial zau deuh leh Cargo kekawr hring tak deuh hain, Timberland eng a bun bawk a, a sam chu a chhîpvir zâwnah ṭâwn lehin a tukkhumah a kûl raih bawk. Chutianga inchei chu a lo inhmeh khawp mai a, room aṭanga a rawn chhuah rual chuan, "Ka hman e." a lo tih zawm zat chu Kima-te ṭhianho chuan mak an ti letling zâwk hial! An thu hrilh tur hre lâwk ni âwm taka a awm mai chu an hrilhhai lek lek zâwk a ni. Chutia an mi nghah ber a hman tâkah chuan anni pawh chu ding ve sap sapin an rawn kal chhan tlângpuite chu Puia'n a hrilh pah bawk a, a nu Pi Mawizuali pawh ngaih ṭha taka lo awm tura an hrilh leh hnu-ah an chhuak zui ta a ni. Sâwmfela inchei dân chuan hmeichhiate mit chu a lo la deuh nge; Emmy chu zâwi tê hian an fiam zui leh laih laih tawh, Puia rawn hawi lêtin Emmy a lo kiai khum sak chu a va melh rum leh êm aw. An motor dahna an thlen chhoh hnu chuan Police Station lam panin an tlân zui leh ta a ni. Reuben-a khân an vêng aṭanga Police Station hnai ber Khatla Police Station-ah an thil tawnte kha a lo report a ni.

Traffic Jam vângin an tang leh ṭhîn nên, Khatla Police Station an va thlen chuan chhûn dâr 12 a ni tawh. Kima-te chu lût hmasain Sâwmfela chu a hnung berah a lût ve a. Kima chuan, "Sir, kan rawn hruai e." a tih chuan Police Station-a awm Police dangte pawh an lo hawi nghâl ṭhap. Police OC chuan Sâwmfela chu chîk taka enin, "Tlangvâl hetah hian lo ṭhu teh le." tiin a dawhkân hmaa ṭhu tur chuan a hrilh zui a, Sâwmfela pawh ngawi rengin a ṭhu ve mai bawk. Chutah OC chuan Emmy-te picnic-naa an thil tawn leh a chêt dânte chu a zâwt zui leh. Sâwmfela chuan hmeichhe ṭê ṭhat a hriat ruala Pûk aṭanga chhuah tâk dân te, mei bula mipa pathumte ṭhingṭhi ṭhap a hmuh ruala thil fel hlel deuh a thleng nia a hriat thu te, chuta ṭanga thil awmzia hriat chian tuma a chhuk zui thute leh, hun rem châng nghâka kha'ng an mi thahte ṭawngkam leh engkim ngaithlaa a thlîr ve reng thute bâkah, thil thlen dân chu kimchang takin a'n sawi dap dap a, a aw-ah hlauhthâwnna hriat tur a awm lo va, a mitmengah lah Jail tân phah dâwn pawh ni se hlauhna hmuh tur a awm hauh lo. A sawi zawh hnu chuan, "Aw le, mahse, tualthah hi dân bawh chhiatna a ni a, Jail tân theihna a ni tih i hria ang chu maw!" OC chuan chîk zeta en pah hian a lo ti a. Sâwmfela chuan, "Aw hria e. Mahse, ka thah mai loh chuan min that dâwn sia, ka nun hum him nân ka that ta a nih kha." a lo ti ve leh hmak. OC chuan, "That kher lova nung dama man hrâm hrâm hi a ṭha ngai asin." a'n ti leh a. Sâwmfela ning deuh tawh chuan a awki ngai dam dap hian, "Khatiang din hmunah kha chuan nang paw'n nung dama i man theih ka ring lo." a lo ti chu OC chuan, "Chu Police tlaw tak i ni min tihna a ni maw?" a lo ti tawi ta hmak mai le!

Chutia OC-in a tih tâkah chuan Emmy-te chuan Sâwmfela chu a insawi âwk mai ang tih an hlauhthâwnpui tak zet. Sâwmfela chuan nui sakin, "Ni lo ve Sir. Kha kha ka sawi tum a ni lo." a tih zawh rual chiahin, "A nih chuan eng nge i sawi tum chu ni a?" OC chuan a lo ti zui leh. Sâwmfela chuan, "Nih leh zawhna ka zâwt thei che ang em Sir?“ tiin OC chu a mitmu dum fîm ralh chuan a en kar a, OC-in zâwt tura a tih hnu chuan, "Rûkruin i wallet an rûksak che a, i va chhuh lêt leh khân rûkru i ni ve ta tihna em ni?" OC chuan, "Ni lo." a lo ti vat. Chutah Sâwmfela chuan, "A nih leh, tualthah hmangin thah che tumin a bei che a, mahse i that ta zâwk a. Chuvâng chuan dân bawh chhe ṭhîn tualthah hmang i ni ve ta tihna pawh a ni lo vang ti raw?" a tih leh chuan OC pawh a lo bu leh nghat nghat. "A nih chuan kei chuan dân ka bawh chhe ta tihna a ni ang maw?" Sâwmfela'n a tih leh chuan OC chuan a lo en kar ringawt. Chutah Sâwmfela chu dingin, "Aw le, mahse, khawngaihin thil pakhat chauh min tihsak ta che, Sir. Kei hi lock up-ah chuan min khung la, anni erawh hi chu kaltîr rawh. Thil ti sual leh thil sual ti hi a hrang daih a nia." tih leh a kut hûma a bân pahnih chu OC hnaiha lek kân a rual a. Emmy-te ṭhianho chuan thinphu dêp dêpin an lo thlîr reng ringawt. Chutah OC chu muang chânga rawn ding vein, "Kan hotute nên kan lo sawi tawh a, engkim kan ti fel vek tawh. Kha'ng mite kha hun eng emaw chen kan zawn tawhte an ni a, nangin kan hna chu min chin felsak ta a ni, anni pathum nên hian," tiin Puia, Kima leh Reuben-a te chu a melh zawk a, Sâwmfela chu en lehin, "Nang hi a sûlsutu ber i ni tih ka hria. Mizoram Police Department ai awhin i chungah lâwm thu ka sawi e, in thawhhonaah pawh, i huaisen hle mai. In kal thei tawh e." tih leh zahna chibai(salute) pêk a rual a. Sâwmfela mak ti letling zâwk chu a han hawi kual vêl a, Police dangte paw'n salute an lo pe sap sap mai. OC chu en lehin, "Ka lâwm e." ti sapin a inher a, Police Station kawngka lam pan chu a rual zat. Puia-te paw'n Police-te chu lâwm thu hrilh ve sap sapin an chhuak zui ve leh ta a ni.

Police Station kawt an rah rual chuan, "Ṭhianpa, OC i chhân dân vêl leh zawhna i zawh dânte kha a ṭha hle mai. I fing thawkhat hle ang tih pawh ka hre thiam mai." Puia chuan a'n ti a, "Amah kha Police Officer dikna duh mi a nih vâng a nih kha." Puia chu ena nui sâng hian Sâwmfela chuan ti lêt vein mi dangte pawh chu a en kual leh tê tê a, "Ka him nân nangmahni hian in lo sawi fel vek tawh tih ka hria, in chungah ka lâwm tak zet a ni." dam dapa a tih leh hnu chuan anni-ho chuan mak an ti ṭhîn teh e. "Lâwm thu kha chu keimahni sawi tur ni âwm zâwk tak a ni." Reuben-a'n lo ti ve lehin an sawi zui leh sap sap a. Chutah Sâwmfela chuan, "Thil dang tih tur ka neia min lo hâwnsan mai ta che u. Pênna tur ka ngah êm mai, ka kal nghâl mai ang e." tih leh motor kawngpui lam pana chhuk a rual a, Kima-te chuan ngaih sân hmêl tak hian an thlîr zui vawng vawng bawk. "Kan mâkpa tur chu...aa...kan tih sual loh hmêl e." Puia'n lo ti leh zauhin nui sâng hian Emmy chu an melh zui ṭhap a. Emmy chuan, "Awi! Mi nghal, kal mai mai teh. Ka ril a ṭâm tawh a nia," ti nui ve sângin an nui leh var vâr tawh. An incheinate chuan an sakruang a chawi vul bawk a, mi hausa fate ni âwm rêngin an silhfên lah a nalhin an inhmeh bawk si; an awmna hmun apianga nula leh tlangvâl awm ve-te mit an la viau pawh chu a âwm lo hran lo. Hetih laiin Sâwmfela kal ta pawh khân Kawngpui footpath chu a zawh chhunzawm zêl a. Mi tam ta na nâ nâ chu a duh ang paw'n a kal chak thei lo chu a ni. Hmeichhia a tawhte lah chuan an en duh viau leh nghâl a, nuvalaite pawh an bâng bîk hauh lo. Ṭhenkhat rawn nêk fet deuhte lah chuan an hnute pêr bâwih bâwihin an lo nêk salh zêl bawk a, chu'ngte erawh a thengthawngah a thawk lo nge ni hawi lêt map lovin a kal tlang hmiah hmiah mai. Tlangvâl hleitling ve tâwk tak, fit 5 leh inches 10-a sâng a ni bawk a, a pian lah chu Mizo tlangvâlte zîngah chuan a nalh pâwl tak a ni bawk ang. A sam ṭâwn leh a inchei dânte chu a inhmehin hmeichhiate pa tih zâwng tak hi a ni hrim hrim a, "Pa-a" tia koh châk fe fe pawh a hmeichhe kal pelhte zîngah pawh an awm nuk tih hriatna chu, an ṭhiante eng emaw hrilh sap sapa nui sângin, a hnung lam aṭang pawha an rawn melh zui leh hrâm hrâm ṭhîn chuan a ti chiang viau âwm e. (Keini ve khawpuia zin nîkhuate hian kan hmeichhe tawhte'n hma lam aṭang paw'n min en peih lo a nia.😒😏)

In lamah ve thung chuan, Pi Mawizuali chuan rilru nuam zân lovin Sâwmfela anṭam rawn hawnte chu a lo têl fel thlap tawh a, a fapa rawn thlen hmaa lo chhuahsan erawh a tum hauh lo thung. Tlâi lam dâr 2 a ri ṭêp tawh tihah pawh Sâwmfela chu a la rawn thleng si lo. Chutih laiin ṭhenawm hnaivaite anṭam lei tur an rawn lût deuh reng chuan tlêmin a rilru hahnate chu an hnêm deuh a, a khât tâwka an rawn leisak deuh reng tâkah chuan anṭam pawh têl zahve dâwn chu a hralh dêr tawh. Hna hahthlâk thawh ngai lovin Sâwmfela hian a âwl hneh bawk a, amah hi nuvalai tak ang mai hian a vun pawh hi nung sârh rêngin, nu tê lam hmêlchhe lêm lo tak a ni bawk. City Bus an khat thei si, Taxi ruak rawn tlân hman mai tur a hmu bawk si lo, Sâwmfela chuan Taxi Stand lam a pan ta a, Taxi pakhatah chuan lûtin Zârkawt an pan zui ta a ni. Vânneihthlâk takin Traffic Jam-ah an tang khawmuang lo bawka an thleng hma viau. Mahse, Zârkawtah chuan Traffic Jam-ah motor chu an lo tang khat mup mai a, horn ri chuah chuah kârah Traffic Police chuan whistle hâmin a lo vai lauh lauh bawk. Hun an khawh ral tam dâwna hriain chu laiah chuan Sâwmfela chu a chhuk ta a; MC lam pana kal a rual zat. MC kawta han thlen chuan mite pawh an lo ṭhu leh ṭeuh tawh a, ngawi rengin a phei ve zêl. A hma hlam 5 vêla hmeichhe pahnih hleitling ve tâwk takte an ṭhutna aṭanga tho chhuak a, MC kawngkapui pantute tâwk zâwnga mipa pathum tê chhe lo tak rawn phei ve-te chu a en vang vang a, an hawi her vêlah chuan an chapo hmêl hle mai, an thawmhnaw en chuan chhungkaw khawsa thei tak chu an ni ve ang tih pawh a hriat hle bawk.

Chu'ng mite'n nula pahnihte chu an kal pelh rualin, an zînga pakhat chuan hmeichhe pakhat mawng khal ṭha ang reng tak chu a'n bêng keuh a, chu nula pawh chu a rawn hawi lêt rang hle. Thinrim zet hian, "Hei, eng vângin nge ka mawng i lo ben ringawt a? I va zak lo ve, Police ka hrilh dâwn a nia aw. Zak thei lo lutuk mai." tih pahin chu pa hmaiah chuan a bêng lêt ve sawk. "I khal nalh êma han kal pelh mai i har deuh a ni. Ka'n fiam mai mai che a nih kha, hmeichhia tê tê mi han ben ve khanglân chu le." tih leh ben lêt ve a tum chiah a bânrêkah tu emaw hian a lo man chat mai le! Chu pa han hawi lêt chuan tlangvâl hmêlchhe lêm lo tak, zaidam hmêl zet leh a mitmeng thîp raih si hian a bânrêka chelh chung a, "Ṭhianpa, khatiangin hmeichhia kut an thlâk ngai lo ve." lo ti zâwi saptu hmêl a hmuh rual chuan a va lâwm lo tak! Chu veleh a ṭhiante pahnih chuan Sâwmfela chu rawn hnaih nghâlin pakhat chuan, "Kan duh leh kan bêng ang a, nang hi inti pa ve deuh alaw? I va huaisen âwm ve," tiin an rawn nam deuh sawk. Mi dang lo awm ve-te chuan an lo thlîr ṭhap tawh. "Khatiang kha hmeichhe fiam dân tur a ni lo." tia Sâwmfela chuan ṭawngkama chin fel mai a tum a, mahse, hmeichhe ben tumtu chuan rawn pan hnai ve lehin, "Ani hi i bialnu em ni? Ka nula chhaih dânah chuan eng nge harsatna i neih a? Buaina hi i zawng ve hrim hrim nge?" tham loh hmêl zet hian a lo ti ve leh. Sâwmfela chuan, "Zawng lo ve, ani kha ka hre ngai lo bawk. Mahse, in chêt dân kha a dik lo ka ti mai a ni." Sâwmfela'n a lo tih leh chuan, "I bialnu a nih si loh chuan engah nge i lo buai ve," tih leh ṭawngkam chaltlai tak taka ṭawng khumin chu pa chuan a nam sawk sawk a, a hnung pên li/ nga vêl a nam phei hnu chuan Sâwmfela dawhtheihnain a tlin ta lo. A kuttum chu vai chhuak zawkin chu pa bek chu a ri chawrh a, vir nawkin a tlu bawk khup ta nawk mai. Chu veleh mi pahnihte chuan rawn hnaih ve nghâlin a ding lama mi chuan, "Zâwngchhe pa..." tih leh rawn hnek a rual zat. Sâwmfela chu lo kûn zauhin a vei lama miin hnek tuma a rawn hnaih ve leh chiah dulah a'n tlawh vak a, a thal ve leh nghâl. A ding lama miin a rawn tlawh chu a ke-ah lo mansakin, a tlawh thlûk pa rawn tho leh chiah bawh rawkin a theh vir nawk zui. An lu intauh chawrha an tlûk zui avângin an luhai deuh chu an tho thei ta mai lo. Chutih laiin a hnek thlûk hmasak bera kha bek dawm vawng vawng chung leh lu thing deuh nawk nawk hian a rawn ṭhu chhuak ve leh a. Sâwmfela chuan hnaih phei vatin, "I ṭhiante nên hian hâw rawh u." ti bûl hmukin MC Security-te an rawn thleng chawp chilh bawk nên, thinrim ru ṭeuha an kal sawn dâwn tihah Security mipa palian tak hian a la hau hrep zui. An rawn chhuah rual khân thil awmzia kha nula khân a lo hrilh vek tawh hi a ni. Sâwmfela chu rum taka melhin an kal sawn ta hnu hnu a. Nula chuan lâwm thute a hrilh ve leh hnu-ah Sâwmfela pawh chu a kal zui ve leh ta a ni. Mi dang lo awm ve-te, a bîk takin nulate chuan an va en duh hlawm êm!

Sâwmfela'n In a thlen chuan tlâi dâr 4 pawh a hnai tawh hle. A nu chuan, "E mâma i rawn thleng tawh maw? I tang zui ta a nih ka ringa ka lo mangang hman asin." tiin a fapa chu a en vang vang a. "Traffic Jam-ah kan tang rei deuh a, anṭamte hi i pho chhuak ta lo a ni maw?" Sâwmfela'n a tih chuan, "Aw, i rawn lêt har sia, ṭhenawm hnai deuhte lei bâk kha chu tuiah chiah ila, naktûk lamah ka ṭhutpui mai dâwn nia." a nuin a lo tih leh chuan thil awmzia Sâwmfela pawh chuan a hre thiam ve mai bawk. A inbual fai leh hnu rei vak lovah zanriah an ei zui ta a ni. Hetih laiin, Sâwmfela sual rawntute pawh kha Car chhûngah ṭhuin an thinrim a la reh lo tih an ṭawng dânah a hriat viau. A hnek thlûk pa chuan, "Kha pa kha tu nge maw a nih le? A kut thlâk a na phian lehnghâl a, a hmain ka hmuh ngai pawh ka hre lo." a tih chuan, "Kei paw'n ka hmu ngai lo. Insual lah kha a thiam phian mai a, khawi martial arts school-ah emaw instructor a ni ngei ngei ang." pakhatin a lo ti ve leh. Pakhat leh chuan, "Pathumina pakhat kan hneh lo leh kan mualpho lutuk kha ka lung a awi thei lo. Kan la intawng leh mawlh ang. Duh leh martial artist thuah sawmsarih pawh ni ang hmiang. A la hre khawp ang." a lo ti ve bâi bâi a, an chêt zâwnga an ṭhen leh sak sak dânah an na thawkhat hle tih a hriat mai. Tichuan, phun zui nuah nuahin an inkhalh hâw ve leh ta a nih kha.

Hun leh tui lianin tumah a nghâk lo an tih angin dan rual lohvin hun leh nîte an her liam zêl a. Zirtâwpnî a lo ni ve leh ta reng mai. Pi Mawizuali pawh thlai zawrh tur a nei ta rih lo bawka in chhung vêl ti faiin a buai ve leh hle. Chhûn dâr 12 vêl a nih chuan hmeichhe aw hian, "Kha ka pi i awm maw? I va buai âwm ve." a lo tih rual chuan Pi Mawizuali pawh chu hawi vatin, Emmy leh mipa pakhat rawn lût mêk chu ena nui sâng hian, "Buai lo ve, Emmy kha i ni em? Lo ṭhu rawh u." tiin a lo chhâwn ve vat a. Sitting room-a ṭhutthlengsei cushion sen nalh taka an ṭhut fel hnu chuan, "Pawimawh a awm leh em ni? I rawn lêng khât bawk sia, i ṭhianpa hi ka va hre lo êm!" Pi Mawizuali chuan tiin a hmêl hmuh pawh a nuam khawp mai. Emmy chuan, "U Hruaia a nih hi. Pawimawh chu awm hran lo ve, Sâwmfela chung châng hi zawh che ka duh deuh a." nui sâng hian a lo ti a. Pi Mawizuali chuan, "A ni maw! Eng nge ka fapa chung châng min zawh duh tak chu ni a?" mak tih hmêl deuh taka Emmy en pah chuan a'n ti leh a. "Eng lo...a mizia leh chêt phung ka ngaihtuah hian, hei YouTube-a Pasalṭha thawnthu kan ngaihthlâk ṭhin ang khân, amahah hian Pasalṭha zia a inphûm tlatin ka hria a; zak thei lo pawh min ti maithei a, in chhungkaw chanchin vêl a nih mai chu." nui var var hian Emmy chuan a lo ti ve leh. Pi Mawizuali chuan, "E khai! Zak thei lo tihna tur che a awm loh chu. Ni e, ka pasal hi Zokima a ni a, kan khaw hluiah kha chuan mite'n Pasalṭha an han ti ve chu a nia, mâma pian hma hian kan khaw pa pakhat feh hâw Savawmin a lo bei thut mai a, chu chu a hnunga kan pa rawn hâw ve chuan lo hmu hlauhvin, silai a ken loh nî tak a lo ni bawk nên an inbei ta a, a vânnei zâwkah a ṭang a, chempuiin a sât hlum ta a ni. Mizo paah chuan a tê chhe bîk hauh lo, fit 5 leh inchi 8 a sâng a ni ve a, mâma hian pumruaah chuan a khûm chiang khawp mai. Sakei pawh pakhat chu a kâp a, chumi lo ramsa dang pawh a kâp thei viau. Tûnah chuan ramsate an lo tlêm tawha humhalh an ngai ta zâwk si a, a hnu deuhah Forest department lamin an lo hria a, a silai chu mansakin amah pawh rei vak lo Jail-ah a tang nghe nghe! Tûnah erawh a silai chu hmuh tur a awm tawh lo, engtin nge an tih lah kan hre zui ta lo a ni. Vawi khat kan lova a kal pawh vaimîm hmunah Savawm nên an intawng leh pek a, an inbeih hnu rei lovah kan pa chu lei nâl rapin Savawm hmaah a va bawk ta a, a lo seh hlum ta a ni. A hnu-a a ruang latute'n an inbeihna hnuhma an hmuh dân aṭanga an rin dân a nih chu. Chutih lai chuan mâma hi kum 15 vêl a ni." tia a'n sawi dap dap chu Emmy leh Hruaia chuan ngaihnawm ti takin an lo ngaithla a.

Pi Mawizuali chuan sawi zawm lehin, "Tichuan, hun a liam ve zel a, vawi khat chu Burma sipai râltlân hi kan mikhual ta a, eng nge a tlân bo chhan erawh ka hre lo. Han be turin an ṭawng kan thiam si lo va, ani lah khân Mizo ṭawng a thiam bawk si lova a ngaihna a awm thlâwt lo a ni." tiin a nui leh rih. "Mak deuh mai chu kha sipai khân kan chêt phung a hmuha a insiam rem thiam tlat ṭhîn kha a ni. A hnu deuhah chuan zaizir nên engtin tin emaw kan khawsaho thei ve zêl. Mâma lah hi sikul kal aia ram kal nuam ti mi a lo ni bawk nên a lâwm ta phian a, an ram kalnaah insual dânte a lo zirtîr ṭhîn a ni âwm e." a tih lai chuan Emmy'n lo pawt chatin, "A nih chuan, Burma sipai chuan Martial arts a thiam tihna a ni maw?" a lo ti vat a, Pi Mawizuali chuan, "Aw, ka sawi thiam lo a nih kha. Thla khat chhung vêl a châm hnu-ah a hâw ve leh ta a ni. Tin, Mâma-te pafa hi an luhlul êm êm a; a pain sikul kal tura a tih paw'n kal ṭha peih hek lo. Pawl 10 chu engtin tin emaw a kal ve hman. Mahse, ram vah ngawt a rilru luahtu a ni bawk nên, "Fail tura Exam ka peih lo." tiin a chawlhsan zui a, a pa nên pawh kan ṭhat en tawp mai a ni. A tih tauh châng hian a pain, "Pênglêngpûnga i nih hi." a ti ṭhîna a haw thei khawp mai." a tih lai chuan a nui leh var var. "Tichuan, a pa thih hnu-ah ti hian Aizâwl-ah hian kan rawn pêm ta a ni. Mahni pasalte lu nghahna hmun han kalsan chu ka hreh viau a; kan din hmunin a zir loh êm avângin ti hian loh theih lohvin kan rawn kalsan ta a nih hi. A bâk chu in hmuh ang hi kan ni mai e." tia a sawi zawh hnu chuan, "A runthlâk deuh na'ngin a ngaihnawm hle mai a, Sâwmfela chu hmuh ve ka châk hle mai." Hruaia chuan a lo ti ve a, an tîtî pawh a tluang ta phian mai. Pi Mawizuali chuan, "Mahse, he'ng YouTube-a Pasalṭha thawnthu kan ngaihthlâka Pasalṭha ropui tak takte ang hi chu a ni lo a nia," a lo ti nui leh var var bawk. Chutah Emmy chuan, "Pasalṭha thisen kai a nih kha ka ring deuh rêng a ni, Pasalṭha nihna amahah khân awm tlatin ka hre rêng a." a lo ti ve leh sap bawk. Tîti dangahte kaiin, Sâwmfela leh Police OC inbiak dânte kha Emmy chuan a hrilh ve leh a, Sâwmfela chu fing a tihziate sawia a fak leh dap dap hnu rei lovah an hâw ve leh ta a nih kha. An hâwn kawngah Emmy chuan Sâwmfela chanchin Pi Mawizuali'n a sawi tâkte kha ngaihtuah lêt lehin, Pênglêngpûnga tia koh a duh lo lutuk tur hmêl vêlte chu a suangtuah phei chuan, a mizia nên inhmeh a ti deuh nge Car tukverh lam hawiin a nui leh var var ṭhîn.

Tûnah chuan November thla an chuang kai tawh bawka khua pawh a vawt ṭan ta. Hetia Zâwlkhawpui râlmuan viau lai leh buainate'n an kiansan ve ta ni-a an ngaih lai hian, ni khat chu vêng pakhat In a din khât deuhna lai one way sir lawkah hmeichhe ruang an chhar leh ta tlat. A nghâwng chu hruia rehna hnuhma tih hriat tak hian a lo duk kual ruih a, Police lamte pawh an hna tlin takin an thleng rang khawp mai. Hetiang thil thleng hi a nasat tawh êm avângin Police-te tân pawh chhui zui sên a ni lo va, hma lâk chak pawh har tak tur a ni. Chuta kârah mipuite aṭanga Police demna au chhuahpui tâwk lah an bâng lo, Police-te lu pawh a hai map tawh mai a ni. An thil ṭha tihte leh an hna rinawm taka an thawh ṭhinte chu hre chang tawh lovin, ṭawngkam na tak tak nên an perh zui fak fak mai a, mipui mangang au thâwm chhuahtute leh Police lam pawh dem ngawt theih an ni lo ve ve ang. Ram changkâng zâwka Police-te nên khaikhin chi an ni lo va, hnu chhuina hmanrua leh thil dang hrim hrimah pawh Mizoram hian kan phâk lo hle tih chu kan hre tlâng vek âwm e. Chutiang a nih laia hna ṭha taka an thawhte ngaihtuah chuan an fakawm zâwk viau a ni. Zîng dâr 8 vêl a ni a, ruang entu mipui lo bial luihte chu hnawt kiangin Police-te chuan an han bêl chiang ve a, mipa awm ṭha duh lo thil tih mai mai a ni lo tih an hre chiang viau mai. Chu nu thawmhnaw ṭet deuh hrup te, kekawr takngial pawh ha lova ruang hmu hmasate'n puana a ke lam an lo khuhte bâkah, a hmai duk cher churte aṭang chuan Pâwng sual hnu-a thah a nih chu an ring thiam nghâl bawk. Ruang hmu hmasatute eng eng emaw an zawh leh hnu chuan, Postmortem turin damdawi in lamah an phurhtîr ta a, amah hretu an awm chuan Police hnêna hrilh vat tura mipuite an chah leh hnu-ah an ṭînsan ve leh ringawt ta a nih kha.

Nî a liam ve zêl a, vêng laili leh hmun sâng deuh laia Concrete building lian zet chhûngah Emmy nu leh pate paw'n an lênna Zâwlkhawpui hun tawng hrehawm zet avâng chuan an fanu chu an ngaihtuah hle tih hriat takin, an fanu tâna himna tur an sawi ve nasa khawp mai a, Emmy chu tîtî-puiin fimkhur tur paw'n an chah nasa hle. Picnic-naa an thil tawn avângte khân a nu leh pate chuan Emmy chu an veh zui reng an ring nghet hmiah bawk a, zan lama an In vêng tur tlangvâl fel deuh rawih maite an rilrûk rum rum tawh. Chutih laiin, an mi rawihte a fuh loh chuan an fanu chu a him dâwn chuang lo tih pawh an hre chiang viau bawk si, Emmy'n anmahni chhan chhuaktu a hrilh tâk Sâwmfela chung châng an zâwt leh ṭhînte chuan, an fanu tâna himna an ngaih pawimawhzia a ti chiang viau a ni. A hnu deuhah Emmy pa chuan Sâwmfela chu hun rem châng hmasa bera hmuh ve a duh thu a sawi ta nge nge a nih kha. Zân a lo ni a, huana an thlaite a lo rêm tawh nên Sâwmfela pawh inah awmin lehkhabu a lo chhiar a. Pi Mawizuali chuan, "Mâma, kan hun tawng hian min ti ṭi tawh riau mai, a theih hrâm chuan inah hian awm tam deuh tawh teh. Nang pawh fîmkhur hle la a ṭha ang. Kan thlaite lah a rêm tawh si a, engtin nge maw pawisa hi kan tuak tâk ang aw?" a tih chuan Sâwmfela chuan inhlawhna tur a hmuh mai a rin thute nên a nu chu hnêmin fîmkhur turin a chah lêt ve leh bawk. Chutia an tîtî lai chuan a nu phone a lo ri ral ral a, a nuin a pick hnu-a an inbiak dân aṭangin Reuben-a a ni tih Sâwmfela chuan a hre mai. Engtin nge a nu no hi a neih theih le tihte a ngaihtuah lai chuan Reuben-a'n a biak duh thu a nu chuan a lo hrilh a. Reuben-a chuan naktûk hi a birthday a nih thu leh rawn tel ngei turin a lo sâwm ve a ni. A kal ve tur thu a hrilh hnu chuan phone chu a dah a, a nu chu en lehin, "Engtin nge Reuben-a khân i no hi a neih theih le?" Sâwmfela chuan a'n ti a. A nu chuan a thlai zawrhnaa Reuben-a nên an inhmuh thu leh anṭam pawh a leisak thu bâkah, amah Sâwmfela biakna atân pawh a no chu a dil thu a hrilh ta a, Sâwmfela chu bu nghat nghatin, "A nih chu, ka chau êm mai, ka mu hma ang e." tih leh bedroom-a luh chu a rual a. A tûk zân Reuben-a birthday lawmnaa a kal hunah a tum loh deuhin a va ri leh rep rep ang tih erawh a hlauhawm viau a ni.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:25 pm

THE CAVE MAN. 6
✍️ Duata Khualchhâwn.
BUNG 6-NA.
A tûk khua a lo vâr a, tûkṭhuan ei hun a nih chuan Sâwmfela-te nufa pawh chaw ei pahin an lo tîtî ve mêk bawk. Pi Mawizuali chuan, "Mâma, Emmy hian i chanchin hi a ngaihven riau mai a, a ṭawngkam vêlah khân hmeichhe fel tak chu a ni ngei ang. Amaherawhchu, hnîm hnai lutuk lo la ka ti hle mai, an hausak hmêl si a, nakinah i rilru a ti na mai mai ang tih ka hlau a ni." a tih charh charh hnu chuan, "Minister fanu a nih kha. Ṭhian ang bâkin kan inen hlei nêm ka nu, engtin nge kei hian a lakah ṭhian nihna bâk ka beisei ngam ang le. Ka beisei vâng pawh ni lovin an fel êm a; ti hian an ṭhianah min pawm ve zâwk a nih hi." dam dap hian Sâwmfela chuan a ti ve leh a. "Tu minister ber nge?" a nu chuan phâwk deuh tak hian a lo ti vat. "Pu Zothansanga." Sâwmfela'n a tih leh chuan, "A nih chu maw le! A pa hming a sawi si lo va, keiin zawh nachâng ka lo hre bîk si lo, chu kan Minister ṭha êm êm mai fanu a lo ni reng a nih chu le! Chuti a nih phei chuan fîmkhur hle teh. Inṭhian ṭhatna aṭang hian hmangaihna hi a piang thei a, i inring hman dâwn miah lo a nia. Nang hmeithai fapa ve mai hi chu Minister mâkpa meuh ni tur chuan a nu leh pate paw'n an duh hauh lo ang che. Nang teh lul ṭhiana an pawm ve che a nih chuan a lâwmawm a nih chu." tak zâwka a tih leh dap dap hnu chuan Sâwmfela pawh bu nghat nghatin a kham zui nghâl a, ha a nawh fai leh hnu chuan a room-ah lûtin a inthlâk leh zung zung. Khua a vawt deuh tawh bawk a, T-shirt Grey colour chungah Jumper dum a hma pum leh Cotton Jeans dum hain Timberland eng kha a bun leh bawk. Room aṭanga chhuah pah chuan, "Ka nu, vawiin chu inhlawhna tur ka'n zawng ang e. Hei dâr 9 a pêl tawh sia ka chhuak hma anga ka lo hâw hma leh zâwk dâwn nia, ka rei deuh paw'n min lo ngaihtuah lutuk lo la." tih leh kawngka pan a rual a, a nu paw'n fîmkhur tura chah vein a chhuak zui ta a ni.
Motor kawngpui a chhuah chhoh hnu chuan kawng sîra mipa naupang pali ball lo pêtte chuan lo en deuh hâ hâin, "E heee! U Sâwmfela chu i va'n pa êm êm! Khawiah nge i kal dâwn?" mipa naupang pakhat chuan a lo ti nui sen sen a. "Nupui tur ka zawng dâwn a nih hi. Ka lo hâwn hunah inkhêl ang u aw." Sâwmfela chuan ti nui sângin a kal zawm leh. "Eehhh! U Sâwmfela chu bialnu i nei chiang," pakhat chuan lo ti nui leh ver verin, chocolate-te, Wai Wai leh an thil duh zâwngte an chah zui laih laih bawk. Sâwmfela paw'n nui sânga a hawnsak tur thu a hrilh leh hnu chuan, Taxi hman mai tur a awm lo bawka a thui thei ang ber kea kal tumin Aizâwl khawpui chhung lam pan chuan a kal leh par par mai a ni. Hetih laiin, Emmy-te ṭhianho pawh Reuben-a birthday present tur zawng paha chhuah an lo tum ve mêk a. Emmy-te Inah ṭhu ṭhapin a inpeih hun an lo nghâk mêk hi a ni. Minister In tih takah Emmy-te In chhung lam pawh a pui ham ham kher mai. An ceiling-te leh In bangte chu a vâr thianghlim sar a, an chhuatte lah Tribal ke phah hlai nazawng tâna rah huphurhawm tak tur hi a ni. An doormat-ah pawh, "Rap suh, a bâl ang." tih ziak pawh ni se an demawm hauh lo ang le! Han en reng reng pawha thil man tlâwm a ni lo tih hriat ngawih ngawih Sofa mawi tak te, dârthlalang dawhkân fai êm êm mai leh In chhung cheina thilte chu thingtlâng pa tân chuan hmuhnawm tham tak tur hi an ni a, an Ceiling light-te lah chu a hranpa ngata Foreign aṭanga an chah a ni ang a tih tur hi a ni bawk, a sawi uar thiam deuhte chuan America President chênna White House ai paw'n an sawi ropui thiam zâwk ngei ang.
Christy chu tîtî pahin Facebook-ah a'n lût a. A thai chhoh neuh neuh lai chuan, "E heee! Hei Sâwmfela kha a nih hi. MC kawta an insual lai video an lo up." a tih chuan mi dangte paw'n, "A ni maw? Ka'n en ve ang e." tiin Facebook-ah chuan an lût zui ve nghâl a. Muani leh Zuali-te erawhin Christy phone-a mi chu an en ve thung. "Awi! Mi pathum chu a va hnehsawh ve, a va'n che rang rêng rêng; an khawih fuh ve hman lo a nih hi!" Muani chuan a ti nui sâng a, Zuali paw'n, "A va'n hnek na âwm êm êm; a hnek hmasak ber pa hi a tho thei tawh lo, a lo va'n pui rem rem ve," a lo ti ve leh. Reuben-a, Kima leh Puia-te paw'n hmuhnawm an ti hle tih hriat takin an en ngawi kar bawk. Chutah Puia chuan, "Kan ṭhiana hi zuam sual a awl dâwn hle mai. A kut thlâk pawh a na thawkhat hle a nih hi. Hei, a hnek hmasak ber pa hi a vawi khat hnekah kulcho dêr." tiin a nui sûng bawk a, Emmy chu ko zui zatin, "Katy hmanhmawh teh hei, thil ṭha tâwk mai entîr tur che ka nei a nia," a'n ti lâwng lâwng mai chu, an awmnain a zir bawka a ring ṭha ang reng viau. Emmy pawh rei lovah In chung aṭang chuan a rawn chhuk ve a, "Lo kal teh hei, Cave Man-a kha MC kawtah pawh a lo la pui miah miah khawp mai." tiin Puia chuan a hui lauh lauh bawk a. Chuta Emmy'n Sâwmfela-te insual a hmu ve chu ka âng deuh huau hian, "Awi le(h)! Engtin nge mi pathumte hi a hneh theih zâwk le!" a lo ti ve sap. Chutih lai tak chuan Emmy pa meeting tura insiam zo pawh a nupui nên an rawn chhuk ve chiah a, nupa hmêl sâr veh vawh tak an ni bawka an inhmeh viau. "Pa Zo, hei lo en ve teh, i hmuh châk êm êm Sâwmfela Cave Man kan tih chu." Kima chuan tih leh han entîr chu a rual a, anni nupa pawh chuan hmuhnawm an ti tih chu an hmêlah a hriat hle. Pi Sângi chuan, "He pa hi maw nangmahni rawn chhantu che u chu?" a tih chuan a nih thu an lo hrilh sap sap. Pu Zothana paw'n chîk taka en chung hian, "Kha a pian pawh a dik hmêl khawp alâwm, Mizo tlangvâl insual ka hmuhah chuan insual a la thiam ber a ni." ti nui ve sângin, an chhuahnaa fîmkhur turin a hrilh zui hlawm a, Pi Sângi paw'n a lo chah uluk ve kher mai. Tichuan, anni ṭhianho pawh chu an chhuak zui ta a ni. Pi Mawizuali'n Sâwmfela chung châng a sawi a, Burma sipai râltlânin insual dân a zirtîr thu kha Emmy hian a zêp tlat a, a chhan chu a ṭhian te, a bîk takin Puia hian a fiam leh reng dâwn tih a hre sa bawk nên, hetia ngawihpui rih hi ṭha a ti ta kha a ni.
Tûnah chuan chawhma dâr 11 a ri dâwn hnai ta. Sâwmfela pawh a chânga Taxi hmangin Aizâwl khawpui chu inhlawhna rem châng zawngin a lo fang kual ve mêk a. Vêng pakhat In lo din khupna hmun an tlân leh lai chuan, an thlang lam hla vak lova Concrete sak mêk tih hriat taka hna thawkte a hmuh rualin driver chu rem châng laia ding turin a'n hrilh a, a chhuk hnu-a Taxi fare a pêk fel leh hnu chuan a tum ram lam pan chuan a chhuk zui leh ta a ni. A hmaa step-ah chuan pêng thlain a chhuk zêl a. A zuk thlen hnu-a a thlîr leh vang vang hnu-ah, pa pakhat hna thawkte lo thlîr ve rengtu a hmuh rual chuan chu In neitu tur chu a nih a ring ta tlat. T-shirt dum nghawng thleh fel at leh Smart Pant a ha a, sneaker dum a bun te, lukhum sen hma parh kûm deuh a khumte leh a dul kiar luahte chuan a ti Contractor hliah hliah mai. Chu pa bul a va thlen chuan hlawhfa a la duh leh duh loh te, inhlawhna zawnga rawn kal a nih thute Sâwmfela chuan hrilhin inhlawh chu a dîl ve ta a, chu pa chuan chîk zeta rawn en pah hian, "Min lo dîl har deuh a nih chu aw, tlangvâl. Anni bâkah hian a chhuat leh a beam chhûn huna rawih tur mi dang ka lo la sa vek tawh sia, a pawi hle mai a..." a lo tih tâkah chuan Sâwmfela chuan, "A nih chu, a pawi lo ve, ka lâwm lutuk tho." ti nui sânga inherin a chho zui leh ta a ni. One way a han chhuah leh hnu chuan a chhukna footpath chu zawh chho zui lehin main road pan chu a rual leh nghâl a, hmun thuma hlawhfa an duh khawp an lo nei zêl chuan a ti beidawng ve lek lek tawh. A khât tâwka a mi tawhte lah chuan an en duh hlawm hle mai a, hmeichhe-ho phei chuan ding meuha thlîr zui vawng vawngin, "Kha pa kha a ni chiang MC kawta an sual rawn kha! A va'n pa tak; ka duh eee..." hmeichhe pathum zînga pakhat chuan a ti nui ver ver zui. Pakhat chuan, "Aw, a ni chiang lutuk, ka hre sual lo. Khawi maw en ṭha leh teh ang u." tih leh an bul varanda-a ṭhut chu an rual a. Sâwmfela-te insual Video chu an zawn hmuh leh hnu-a an uluk zeta an en hnu chuan, "Hei, a ni chiang lutuk, a mitmengte leh a thinrim hmêlte hi awi! Ka duh lutuk, va zawng leh ang u, hmuh leh ka châk eee, a no-te kan dîl dâwn nia. Tih tur pawimawh êm êm kan neih lêm loh kha." pakhat chuan tiin a ṭhiante chu a tur sek bawk. A ṭhiante pahnih paw'n an lo hmu châk ve tho a ni mahna, Sâwmfela kalna lamah chuan phûr zetin a lêt ve leh ta a.
Hetih laiin, Reuben-a te pawh Restaurant changkâng takah an lo châwl ve mêk hi a ni. Emmy leh mi dangte chu dawhkân hran kîlin an ṭhu khâwm laih a, Reuben-a leh Muani erawh customer dangte ṭhut tlêm deuhna laiah inhma chhawnin an ṭhu ve thung. Muani chuan Reuben-a kut chu vuanin, "Ka pa ka hmangaihna aia ka hmangaihna che hi a tlêm bîkin ka ring lo Reuben, ngaih ngam taka ka chawlhna leh ka pangchanna ber i ni a. Khuanu'n nang min tawntîr che avâng hian ka lâwm tak zet. Ka hmangaih lutuk che. Chuan, i pian cham ka lawmpui bawk che." hlim tih hriat taka Reuben-a mita en kar chunga a tih chuan, "Ka lâwm e duh tak. Nang ka tawn vâng che pawh hian ka lâwm tak zet. Kei paw'n ka hmangaih lutuk che." nui sâng hian a'n ti ve a, chu restaurant chhung chu hmangaihna zâizâm vêl chuan a va ti mawi zual teh lul êm! Chutia romantic taka an inen nuih sâng lai chuan, "In sawi zo tawh eeemmm? Rûn hmun lên dun lam kha chu nakinah nakinah. Kal vat teh ang u hei, customer dangte kan dîp dâwn tlat. Valentine's day pawh a ni lo, Reuben-a birthday a nih hi!" Puia chuan a lo ti lauh lauh mai. He pa tak hi chu(h)! Reuben-a leh Muani pawh nui sakin an ding nghâl a, inkai riala kal dûnin Puia-te ṭhutna chu an pan ding ta a ni. Anni pawh lo ding nui sângin restaurant aṭanga chhuah pah chuan, "Ṭhut nilên tum ang maia ka chuti ka khati che tih sap sap reng kha in ning ve lo em maw ni! Restaurant-a thawh ve hi dîl in tum emaw ka lo ti hman a," tiin Puia chu a phun zui nuah nuah a, a dâr leh hnung vêlah Muani chuan chûm pahin, "Awi! Chimawm Paaa... I birthday a thleng ve leh dâwn alâwm i hre khawp ang." tiin a inseh ruh nasa teh e.
Chhûn dâr 12 pelhna pawh a rei ve deuh ta. Khawi lam nge a pan leh tâk ang tih ngaihtuahin Sâwmfela chu mi In piah deuh kawng sîrah chuan a ding ngawi vang vang a. A rem châng bawk nên meizial pawh a pak khu leh tawh hle. Hnâr khu chhuah pahin Motor veivâk vêlte chu a thlîr leh veng veng ṭhîn. Chutih lai chuan hmeichhe pahnih hmêlchhe lêm lo takte scooty sen nalh zeta inphur hian a awmna chu an rawn pan a, Sâwmfela paw'n mak ti deuh tak hian a lo thlîr ve reng bawk. A bul an rawn thlen chuan ding chatin, scooty khalhtu zâwk chuan a helmet sen tle kar chu hlîpin Sâwmfela chu a rawn en nui sâng a, a scooty chu park fel leh tê têin a ṭhiannu nên chuan an rawn pan zui leh. Sâwmfela lo ding ngawi reng chu nui sâng hian, "Sâwmfela kha i ni ti raw? Min la hria em?" a lo ti nghâl a. "Aw hria e." Sâwmfela chuan a lo ti ve bawk. Ni e, he nula hi MC kawta Sâwmfela'n mi pathum awm ṭha duh lote laka a chhan tâk kha a ni. Nula chuan, "Min la hre ve chu ka lâwm hle mai. Hmanni khân kan inbe ṭha hman ta si lo va, Angela Remruatkimi ka nia, Angel tih emaw i duh dânin min ko mai dâwn nia. Ka ṭhiannu hi Lalruatfeli a nia, Feli tiin kan ko ṭhîn a," a tih hnu chuan an han inchibai a, Feli chuan, "Ka hmu leh che chu ka lâwm hle mai. Sâwmfela maw i nih?" a lo ti nui ve var var bawk. Sâwmfela chuan, "Aw ni e, mahse, engtin nge ka hming in hriat a?" mak tih hmêl tak hian a'n ti lêt ve thuai a. Angela-i chuan, "Aa...hriat dân a awm ve zêl mai," ti nui leh ver verin, "He laiah hian eng nge i tih a?" a tih zawm leh. "Aa...thil pawimawh deuh tih tur ka nei a, ka châwl lawk a nih hi." Sâwmfela chuan a lo ti ve leh a, "Tu emaw nghah i nei te a ni lo maw?" Angela-i chuan a lo ti nui leh hak hak. Sâwmfela pawh nui ve sukin, "Nei lo ve, eng nge in tih zâwk a?" a tih chuan hna pawimawh vânga chhuak an nih thu leh an hâw leh lam a nih thu Angela-i chuan a sawi leh zung zung. An awmna vêngte an inhrilh leh hnu chuan an tlânsan leh ta a ni. Sâwmfela chuan thlîr zui vang vangin an bula awm a nuam dâwn hle hian a hria a; nula fel tak an nih pawh a ring nghet hmiah mai. Tin, Angela-i kha hmeichhe hleitling ve tâwk tak hmai bial lam a ni a, a incheina a inhmeh thei bawk a, a sam rawng eng leh dum inpawlhte leh a biang chum bat te, a hmui chhah lutuk lo sen hlar maite chuan an ti hmêlṭha hle bawk. A ṭhiannu Feli erawh khabe zum lek lek, hmui pan deuh hi a ni a, ani pawh hi nula hmêlchhe lo tak a ni.
Chawhnu dâr 1 pawh a pêl ve leh ta dêr mai. Sâwmfela rilṭâm deuh tawh chuan inhnawh puarna tur zawngin a kal zui leh a, thui pawh a kal hma chuan a ding lam thingpui dâwr aṭanga ei tur an siam rimte chuan a hnâr an rawn verh ta sawr sawr mai. Tûna a din hmunah hi chuan, "Mihring hi chhang chauhvin an nung lo," ti thei kha a ni tawh lo tih hriat zetin thingpui dâwrah chuan a lût zui hmak. Restaurant changkângah chauh lo pawh a inei puar theih tho tih hi a hre chiang ve êm a ni.Mi dang lo châwl ve-te chuan an lo melh leh zeuh zeuh ṭhîn a, a hmuh ruala an hawi sawn leh daih lawi site chu mak a ti ru viau. Sawhchiar leh thingpui a order-te an rawn chhawp chu sawhchiara chi leh hmarchate pawlha a chawh kual thuak thuak hnu chuan ngawi rengin a ei zui zat. Chutia ngawi renga sawhchiar a hâwp mawlh mawlh lai chuan mipa pathum amah aia naupang deuh tur lo ṭhu hmasate chuan an rawn pan a, Sâwmfela erawhin ngawi rengin sawhchiar chu a la hâwp zui mial mial. A ṭhutna an rawn thlen rualin pakhat chuan, "Ṭhianpa, nangmah hi i ni ti raw?" a lo ti nghâl a, a sawhchiar hâwp lai chu châwlin chu pa chu a en vang vang hnu-ah, "Tu chu maw?" ti supin sawhchiar chu a hâwp zui leh. "MC kawta an sual rawn pa kha? Aw i ni chiang lutuk. Insual i va thiam ve, i lâr tawh viau ang." a lo ti leh chu Sâwmfela a rawn hawi ka hau mai. "Khatah khân in awm ve em ni?" tiin a zâwt leh a, "Awm lo ve, fb-ah an lo up a, in insual lai video kha." a lo ti leh phei chu Sâwmfela'n mak a ti tawh hle. Video chu an han entîr leh tê tê a, like/react pawh 5.7 a lo tling dêr tawh hi a ni. Chutah Sâwmfela chuan, "E khai aw. Video-a an lâk lai pawh ka lo hre hlei nêm, up lo zâwk sela ka duh asin le!" a'n ti nuah nuah a, sawhchiar bawk chu a hâwp zawm leh. Chu'ng mi pathumte lah chuan an ngai sâng tih hriat tak hian an fak leh laih laih ṭhîn bawk. A inpeih hnu chuan ding hluaiin, "A up-tu kha in hriat chuan delete vat turin min lo hrilhsak dâwn nia." tih leh kal a rual a, a ei mante a pêk fel hnu chuan a chhuak zui leh ta a ni.
Nî a hniam a zêl a, chawhnu dâr 2 a pêl fel tihah Police lamin damdawi tawlh ru ṭhînte chung châng report pawimawh lutuk an dawng ta tlat mai le! Aizâwl khawpui pâwn hmâr lama tlâng lian ve tâwk tak bul ṭhut, hmun biru ang reng taka tu tih hriat loh mi 10 vêl fîmkhur taka motor aṭanga an chhuk lai leh, chumi tlâng lam pana an inzui lai chu hmutu an lo awm ni ngei tur a ni. Aizâwl Police Station tinte chu phone-in an inhrilh kual nghâl zung zung a, dârkâr chanve vêl a liam leh meuh chuan chu lama kal tur Police-te pawh an kim ṭhap tawh. A ṭûl huna hman mai theih turin silai nên chu tlâng lam pan chuan Police motor-te chu an inzui nghâl dul dul a; Siren ri tleng tleng nêna tlân an ni bawka lîrthei dangte paw'n kawng an lo kian sap sap. Tichuan, harsatna dang tâwk lovin Aizâwl hmâr lam tlâng chu an pan ta zar zar mai a ni. Aizâwl an chhuahsan veleh Siren chu off-in Motor chhung hma lamah chuan an dah lût leh zaih a, inring ru takin an tlân chhunzawm zêl. Chu'ng mi rinhlelhawm-te an hmuhna ni-a an sawi hmun an hnaih ta tihah Police-te chu an ding ta a, hmanhmawh tak leh inring taka an hma lam pan chu an rual leh zat. Thui vak lo kea an phei leh par par hnu chuan kawng kawi pang phênin an hma hruaitu chuan a'n bih dêk dêk a, motor ding pawh a hmu ta hauh lo mai. Thing ding ṭhupte leh Japan-hlo buk leh ram hrui buk deuh thliin a chhêm rîk ser serte bâkah, thing zâra sava chiar nak nakte bâk thawm bengchheng hriat tur a awm hauh lo bawk. Chu lai hmun ngei chu report an dawn kha a ni bawk si, fîmkhur tak leh inring takin an hnaih phei zêl. Chu lai hmun an thlen rual chuan an han hawi kual leh zung a, rinhlelhawm tur thil danglam hmuh an nei mai lo, ngaw chhung tih takah tlâi lam a ni tawh nên thing buk hnuaiah chuan a thim deuh ruih bawk si a, an kiang vêlah thil danglam deuh awm pawh ni se, langsâr tak a nih si loh chuan hmuh pawh har tak tur a ni.
Chutia sûlhnu danglam zawng paha an hawi kual hnu chuan an vei lam hmun zâwl laia thingtuai ding ni âwm tak, nghet vak lova lo inphun leh ram hrui eng eng emaw-in an bawh deuh luih hi Police pakhat thinrim chuan, "Mai mai a!" tih leh tlawh a'n rual a, a rin loh deuhin chu thing chu a âwn riai riaia a tlu ta tup mai. Chumi thing tlu chu mak ti taka a en zui chuan motor luhna hnu ni âwm tak ram ril lam pan chu a hmu fuh ta hlauh mai le! Mak an tih leh êm êm chu motor ke hnu hmuh tur a awm si lo chu a ni. "He lamah hian lo kal khâwm teh u." ti zui zatin Police dangte pawh chu an rawn phei zui sap sap a, chu lai hmun vêl chu an bih uluk ta kher mai. Thing tlu-in a kawhna lam chu panin an han lût phei deuh a, thui pawh an zawh hmain motor ke hnu chu chiang takin an hmu ta. Chu veleh fîmkhur lehzualin Police 30 rualte chuan an zawh chhunzawm leh sap sap. Mit leh beng chhi karin an kal zêl a, thui vak lo an kal leh hnu chuan thing pawh a lo ding khât deuh ta. Tlêma a ên deuh hnu phei chuan an hmu chiang thei tawh bawka an fîmkhur zual tawh hle. Châwl lova an zawh chhunzawm leh hnu chuan an hma lam hla vak lova mipa ṭawng thâwm an hre zui leh phei chu inring pân pân tawh tak an ni. Thâwm dîm taka insem darh nghâlin an hnaih phei zêl bawk a, hual beh an tum tih an chêt dân aṭang chuan a hriat viau. Chutia fîmkhur taka an hual ṭan mêk tihah an mi zawnte chu an indâwr fel tawh nge ni, an motor-a luh tuma an che chhuak chiah an va hmu hman a, chu veleh Police pakhat chuan Pistol-a tin chung a, "Che tawh suh u." ti ṭhawta a pên chhuak tur chu an mi ûm zuite lam aṭang chuan Pistol a rawn puak zui chu a ni dêr. Chu Police chu lo bawk hman hlauh lo se chuan a thi chiang viau ang le. Chutia silai a puah tâkah leh an mi ûmte tlânchhiat tuma motor-a an luh zui rawk rawk tâkah chuan fîmkhur theih ni tawh hek lo. An motor vêl chu Police lam chuan an rawn kâp zui ṭhuai ṭhuai a, anni paw'n an motor chu ti nung vatin an tlân chhuak zui zat. An hma lamah chuan kawng rek chawpin motor luhna tur an lo siam leh chu niin. Chu lam pana an tlân chu Police lam chuan an kâp zui ṭhuai ṭhuai bawk a, tum mumal tak an neih hman loh avângin a tîra an kah hlum chu mi 3 chiah an ni. An kah hliam tâk mi 2-te chu manin, dîm lo baksak tak hian an motor dahna lam chu an panpui ta a; an tum anga an che thei ta lo erawh an hmêl a uang lêm lo hle tih a hriat viau thung.
Ni e, he'ng mite hi mi a nilêng ni bîk hek lo. An hmunpui hi mite'n an hriat mai loh nân khatiang khân an pênna kawngah thing phêk dawhin, chumi chu an motor chuan an zawh ta zai zai a, leiah motor ke hnuhma hmuh tur a awm ngai lo ṭhîn kha a ni. An pênna laiah pawh chuan thing pângngai ding angin thingtuai pali/nga vêl an phun chawp zêl a, lei vûngte chu thing hnah rovin an chhilh leh vek ṭhîn. Tichuan, thing ding pângngai ang taka an cheibâwl hnu-ah an en fel leh thlap a, ramhnuaia thing dingte nên danglamna an hmuh loh hnu-ah an kalsan ve leh chauh ṭhîn a; chuvâng chuan he lai hmun tlân pêltute paw'n an hmu thiam ṭhîn lo rêng a ni. Hetia an che lai hi mite'n an hmuh loh nân chhim leh hmâr lam kawng kawi laiah duty an indah leh thlap a, chu'ng duty-te pawh chuan châwl khawmuang mai mai angin lem an chang ṭhîn bawk. An fin ve êm avâng hian mi tam tak chuan rinhlelh nachâng hre lovin an en liam mai mai zêl a, duty an inchhâwk ve zêl bawk nên a hmutute pawh dem ngawt theih an ni lo vang. Tûnah chuan tlâi dâr 5 ni tawhin khua pawh a thim chu a ni dêr. Thlasik boruak vawt raih vâng chuan an mi mante leh Police-te pawh an khûr dar dar mai. An motor-te an rawn chhawp hnaih leh hnu chuan an mi man vai pahnihte chu Gypsy hnungah nam lût rawk rawkin Aizâwl lam pan chuan an tlân zui leh ta a ni.
Zân a lo nih chuan a ngai tê bawkin Aizâwl khawpui chu a mawi leh tawh kher mai. In tin aṭanga light de tuarhte chuan Zâwlkhawpui ni âwm rêng hian hmun ruam deuhte leh sâng deuh laite chu an khah mup a, hawina lam apianga motor light de chuah chuahte leh ri inpawlh nuaihte chuan khawpui chhung reh lutuk tur chu an ti ziain an hmuhnawm kher mai. Thlasik boruak vawt raih chuan khawpui chu fan chhuakin, thli thaw heuh heuhte chuan ṭhian ṭha nih an va tlin teh lul êm! Vân a thiangin thla pawh a de seki raih a, arsi pawh a mawi tâwkin an êng far bawk. Khawlaia mi veivâkte pawh a lum thei ang bera inthuam chhah tupin an tum ram an pan sang sang a, khawi emaw lai aṭanga "ngaih lai mi u" te nêna thlîr kual mai mai pawh nuam tak tur a ni. November ni 22 thawhleh zân a ni a, Reuben-a birthday lawmnaa sâwm bîkte pawh Reuben-a te Inah an chuang kai ṭak ṭak tawh. Reuben-a te In kawt leh kawng sîr Parking area pawh motor chi hrang hrang, ke hnih nei chenin a khat mup a, nula leh tlangvâl chhe lo tak tak sâwm bîkte chu a kawp tê têa inkaiin, an hmêlah chuan German râl do tur an ni lo tih a va hriat êm! Hmun thim deuh lai hmang thiama lo indote an awm a nih chuan keini thu ni hek lo le! An duh tâwkin lo indo sawk sawk ang hmiang. Zân dâr 8 a ri dâwn hnai tawh tihah Pi Mawizuali chuan, "Mâma, Reuben-a birthday lawmnaah chuan i kal dâwn lo em ni? Dâr 8 a ri dâwn hnai tawh a nia," a'n ti a. Sâwmfela TV en tui laklawh chuan a nu pawh en chuang lovin, "Vawiin ka vahna lamah ka chau deuh sia ka kal lo mai ang. Bâkah Present pêk tur pawh ka nei si lova a nuam lo." a lo ti sam êt. Chutih lai tak chuan an rin loh lutukin Kima a rawn lût hlawl. "Present neih kher a ngai hlei nêm ka ṭhian, insiam vat rawh. Reuben-a'n i kal loh chuan a Birthday party pawh cancel a tum a nia. Rawn hruai tur chein ka rawn kal a nih hi." a lo ti lût bawrh bawrh nghâl a, kawrchung lum a rawn hâkte leh a inthuam dân hrim hrim chu a inhmeh viau. Pi Mawizuali paw'n nui sâng hian Kima chu a lo be bawrh bawrh nghâl a, an innêl tawh hle tih an inbiak dânah chuan a hriat theih. Chutia amah hruai tur meuha Kima a rawn lan lehzêl tâkah chuan Sâwmfela pawh ṭang buai tawh lovin, "Nih, ka insiam ang e." tih leh room-a luh a rual a, a hâk lai Jumper dum chungah leather Jacket dum tle var hain a inkâp rim tui ve bawk a, Cargo kekawr hring tak deuh kha ha lehin Timberland bawk kha a bun leh, sunday dress tih loh incheina thawmhnaw a nei tam ve tlat lo a ni. Amahin a zir bawka a inthuam dân chu a inhmeh tak zet, a sam pawh a ṭâwn kûl leh ngât bawk. A inpeih hnu chuan room aṭang chuan chhuak nghâlin, "Ka inpeih e." a tih rual chuan Kima paw'n a lo en uluk ang reng hle. Chutah, "I inhmeh kha le! I pa khep khep hle mai." ti nui var varin Pi Mawizuali chu, "A nih ka pi mangṭha mut tui mai aw." Kima chuan a'n ti a, Pi Mawizuali paw'n a fapa chu en thlithlai deuh tur leh fîmkhur tura a chah zui ve leh hnu-ah an chhuak zui ta a ni.
Kawngpui an thlen chhoh hnu chuan Car-ah lût nghâlin Reuben-a te In lam pan chuan an tlân zui nghâl a, motor tâwt deuh vânga han ding leh zauh ṭhînin rei erawh an tang lo thung. Thui fe an tlân hnu chuan Reuben-a te vêng pawh an thleng ve leh ta. Reuben-a te In an pan ding lai chuan, "Ngaih loh lamah ngai lo la, hei, a seat hnunga hi i Present pêk tur chu a awm aw. Inthlahrung lo la, birthday boy leh a ṭhiante hi i lakah pawh mi hrang ni lovin i ṭhiante vek kan ni. Chuvâng chuan tlâng nêl takin i awm dâwn nia." Kima chuan a'n ti dap dap a, Sâwmfela chuan, "Aw le, ka lâwm e." lo ti vein a Present pêk tur lehzêl Kima'n a lo leisak diam chu a zak ru ang reng viau thung. Kâr lovah Reuben-a te In chu an thleng a ni dêr, birthday lawmpuina hla an lo play dup dup a, a chângin Sâp hla an play bawk.
Kima'n a motor dahna ngaia a dah fel leh hnu chuan an kal zui leh zat a, an hmaa concrete building lian ṭha ve tâwk tak êng luah mai te, campus vêl thil chi hrang hranga chei mawi êm êm leh mi dang lo awm ve-te chu hmuhnawm tham an ni. Mi dangte lah chuan an lo en duh viau bawk nên Sâwmfela chu a zak hle tih a awm dânah chuan a hriat theih. A bîk takin nula tawih tak takte chuan an mitmeng aṭang chuan an haw lo tih a hriat reng mai si, zak viau e ti lo chuan a hawi her leh chêt phungah erawh Sâwmfela chu la confi tak a ni. In chhung an han lût chu pâwna mite aia tam mah nula leh tlangvâl an lo ding ngîr khup a, an no ken lai en chuan tu pa emaw buh ṭawih tui mai mai a ni lo tih pawh a chiang e. Kima lo betu nulate lah chuan Sâwmfela chu en leh vang vang ṭhînin mit an la sawn hlei thei meuh lo. Ani Sâwmfela lahin vawi khat a melh bâk a en nawn duh dêr si lo va, chu'ng nulate chuan "Hmuh theih loh hrui hrual" hmanga han phuar beh pawh an châk viau ngei ang le.
Chutia Kima leh Sâwmfela rawn lût a hmuh rual rualin Reuben-a chuan a rawn pan hnai vat a, hla an play ring bawk nên ring deuh tak hian, "In rawn thleng thei mawww? Han hahdam deuh ula kan ṭan nghâl mai dâwwnnn niaaa," nui sânga ti lâwng lâwngin Sâwmfela chu a kuah chung chung bawk. Emmy leh a ṭhiante pawh rawn phei ve nghâlin Sâwmfela chu an rawn be ve lâwng lâwng zui a, an ṭhianho chu an kim leh dêr tawh. Chuta Emmy leh Sâwmfela inmelh dân erawh ngaihtuah zui peihte tân chauha hriat thiam chi a ni âwm e. Emmy chuan han en mai pawha secondhand a thin mai mai a ni lo tih hriat zet kawrchung lum fual deuh tak, dum tle sep sep hain kekawr dum tight ṭha tak a ha bawk a, sahmul pheikhawk eng dal lam a châwnpuar khuh pha tâwk bunin lukhum lum sen nalh zet a khumte chu a va inhmeh mai mai e aw! Kei takngial pawh Evi thei rah ei châk rilru kha min puttîr rum rum thei alâwm le! Het sa-la! Tichuan, eng eng emaw an sawi leh hnu-ah, birthday lawmna hun ṭan turin Reuben-a chuan dawh sân chei mawi lam chu a pan ta a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)