THE CAVE MAN. BY Duata Khualchhâwn (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: THE CAVE MAN. BY Duata Khualchhâwn (Completed)

Unread post by Ngaia » July 10th, 2022, 4:25 pm

THE CAVE MAN. 7

✍️ Duata Khualchhâwn.

BUNG 7-NA.

Reuben-a'n dawh sân a lâwn rual chuan mic chu la zui zatin, "Hello! Ladies and gentlemen." a'n ti thûm ham ham a, mi dangte pawh chu an tîtî lai tâwpin an rawn hawi nghâl ṭhap. Chu veleh Reuben-a chuan, "Zanina ka pian cham min lawmpui tura rawn kal zawng zawng te, in zavaia chungah ka lâwm tak zet a ni. Zanin hian hun nuam leh hlimawm tak hmang ṭheuh turin duhsakna ka hlân che u a; tumah lungawi lova in hâwn ka rem ti hek lo. Nangni hmêlhriat tura he khawvêla ka lo piang ve hi vânnei ka inti a, nu leh pa ṭha tak Pathianin min pêk avâng pawh hian ka lâwm êm êm bawk a ni. He hun hlu tak hi ka ta chauh ni lovin i ta a ni ve tho tih hria la, zalên tak leh a nuam thei ang berin aw ni ang." uar taka a'n tih dup dup rual chuan kûk ruai ruaiin kut an lo bêng dur dur a, thâwm a reh deuh ta tihah, "Khai le! Tûnah hian ka birthday party hun chu a inṭan e." a tih rual chiaha kut lo bêng leh dur durin kûk ruai ruai tâwk pawh an awm nuk bawk. Chu veleh DJ chuan Birthday lawmna nêna inhmeh êm êm sâp hla hot deuh si hi a rawn play ta a, chu music mil chuan nula leh tlangvâl ṭhenkhatte chu an lâm zui hah hah mai a ni. Reuben-a te In hi tûna an party-na tih loh chhâwng hnih lai neia sak a ni a, Ground floor hi chu hetianga party hun hmanna tur atân hian Reuben-a'n a pa a ruahmantîr kha a ni. Keini thingtlâng khaw kêl til Community Hall mai mai chu a chhungah a dah theih ang chu maw le! An party-na hmun chu a zau ṭha hem hawm bawka nuam an va ti teh rêng êm! Ṭhenkhat boruak ngamna tui tlân tura dawhkân mawi rawn pante pawh an awm nual. Juice leh wine bâkah drinks lam chi rêng rêng pawh an hnianghnâr teh e. Thlasik boruak vawt raih vâng chuan inkhâr phui viau mah se, hmun thum vêla remote control hmang AC vuah thlap a ni bawka boruak chu a hrehawm lo khawp ang. Pâwn lam aṭang chuan an music play thâwm pawh bengchheng tham a ni lo, tumah vênthâwn tur an awm lo bawka nuam an va ti ham ham ve le! Nula leh tlangvâl lâmte lah an kawrlumte phelhin an lu a lo kai deuh tawh bawk nên, "Sîrtiang sâwnin pên hnih thum, pên hnih thum. Hmatiang sâwnin ding lamah, vei lamah. I phei chheh mawi rem zêlin Pak-chheih-khah." ti ni âwm hrimin nulate phei chu an intheh ing-euh auh auh bawk a, nula ṭhenkhat mawng bâwr Shakira zette chu an va hmuhnawm chungchuang tak! Hmun khat laia lo tîtî barh barh te, kil khata sâp inchibai anga lo inchibai ngâwng ngâwngte lah sawi hmaih phal chi an ni nâng le.

Chutia hun nuam leh hlimawm tak an hman lai chuan, Sâwmfela erawh a zak deuh chu kil khatah a tûk lawka khai hlum tur ang mai hian a lo ṭhu ngui deuh bûr a. Hetiang party-naah hian a vawi khat kalna a ni bawk nên awm dân a thiam chiah lo pawh a ni mahna le! Mi chezia vêl chu ngawi rengin a lo thlîr kual mai mai a, Reuben-a te In chu ropui a ti deuh nge a hawi kual leh vung vung ṭhîn. A hamhaih zo chuan a present ken chu eng tika pêk tur nge ni ang le tihte ngaihtuah kualin ama tâwkah a lo buai ve êm êm mai a ni. Chutih lai chuan Reuben-a te ṭhianho chuan an rawn pan hnai a, Reuben-a chuan, "Ṭhianpa, i va inthlahrun hmêl ve, tumah zah tur an awm lo a nia, pawimawhah ka nu leh pate an chhuak lawka an rawn thlen veleh Cake kan ei dâwn nia aw. Saw, in turte saw i duh zâwng i lam ve tawp dâwn nia. Zanin na nâ nâ chu nuam takin le." a lo tih chuan Puia leh Kima-te bâkah Emmy-te paw'n an lo tuihnih ve sap sap. Sâwmfela chuan, "Eee...nuam ka ti lutuk, min ngaihtuah suh u. Hei, an hmuhnawm khawp mai." a lo ti nui ve sâng a, an awmna hmun chu a bengchheng deuh nên an piah deuha mi tlêm deuh awmna sitting room lamah an kalpui ta a ni. A in duh zâwngte zâwtin an be bawrh bawrh renga Sâwmfela paw'n nuam a ti ve hle tih a hmêlah chuan a hriat theih. Puia leh Zuali bâkah Emmy leh Muani-te chuan drinks an va la a, an rawn thlen leh rual rualin, "Khawi nge! Han khiat khawlh khawlh ila ni mai lâwm," Puia chuan tiin Sâwmfela chu juice bottle hring tê fel at hi a pe ve a, ani paw'n ngawi rengin a lo la ve mai bawk. Reuben-a erawh present petu an awm leh ṭhîn nên a indaih lo lam chu a ni. An bottle ken lai chu a khât tâwka dût leh zauh ṭhînin an lu ruh pawh a ring sâwt hle; Emmy paw'n beer chu a in ve leh zauh ṭhîn. A chângin an han Selfie a, a chânga nui leh var varin Emmy leh Sâwmfela-te chu an han dem fiam leh a, anni pahnih pawh zak tih hriat taka inmelh zuiin an nui dûn leh sak ṭhîn bawk.

Sâwmfela chuan a juice in chu tui a ti deuh nge a dût zing ve ta khawp mai. Chutih lai chuan Reuben-a a rawn phei leh a, "Ka nu leh pate an rawn thleng tawh e." a tih rual chuan anni ṭhianho pawh chuan hre thiam takin an phei ve nghâl a. Reuben-a chu dawh sânah lâwn lehin mic chuan, "Min lo hre thiam lawk, khawngaihin..." a tih leh dum dum rual chuan music an off a, lâmte leh tîtî laite paw'n an rawn en leh ṭhap tawh. "Tûnah hian ka nu leh pate an rawn lût dâwn a, khawngaihin kut min lo benpui dâwn nia." a tih zawh rual chiahin a nu leh pate pawh nui sângin an rawn lût nghâl a, kut an lo bêng dur dur. Dawh sâna an va din ve hnu chuan, "Cake zai ang aw." Reuben-a'n a ti zui leh zat. Chumi rual chuan room pakhat aṭangin Chef thawmhnaw vâr famkima inthuam, nula leh tlangvâl cake siam tura rawih tih hriat takte chuan hmêl hlim sârh hian an rawn nawr phei a, dawh sân hmaah an rawn hûng chat bawk. Cake chu chhâwng 5 nei mawi taka chei a ni a, inneih cake pawh a ang zaw mah âwm e! "Happy birthday to you" tih kha sa rual dual dualin Reuben-a chuan cake chu a zai ta a, a nu leh pa barh hmasa berin a hnu-ah Muani, chuan a ṭhian ṭha bîkte chu a barh ve leh. Chutah Reuben-a chuan mi dangte dinna hnung lam chu thlîr nui var varin, "Ṭhianpa, lo kal rawh le." a tih rualin hnung lam an rawn hawi ṭhap. Ani Sâwmfela lah Juice in tuma bottle lek kangin a lo dâk vah mai a, khatia Reuben-a'n a rawn koh ruala mi dang lo hawi ṭhapte chu a pawsi laklawh deuh tak chung chuan a lo melh kual ralh ralh zui. Juice bottle chu la thlain amah lo thlîr ṭhaptute chu a melh kual leh tê tê hnu-ah a bul lawka dawhkânah chuan a'n dah ri karh a, a cheziaah chuan a harhfîm tawh bîk chiah lo tih a hriat. Chutah muang chânga pheiin dawh sân a hnaih deuh ta tihah lâwn turin Reuben-a chuan a hrilh zui leh. A lâwn fel hnu-ah Cake chu a barh ve ta a, mi dangte chuan kut an lo bêng leh dar dar. "Tu nge saw pa saw? MC kawta an sual rawn pa kha a ang ka ti." lo ti sep sep tâwk pawh an awm nual bawk. Chumi hnu-ah Sâwmfela chu Reuben-a chuan kuahin, "Ka ṭhianpa hi Malsâwmfela a ni a, kan picnic-na aṭanga intawng kan ni. Ani hi mi sual pangate lak aṭanga min chhan chhuaktu kha a nih hi. MC kawta mi pathumte hneh loh kha amah bawk hi a ni e." chhuang thiam taka a tih dap dap hnu chuan ṭawng mur mur leh kut bêng rite chu a inpawlh nuk nghâl. Thâwm a reh deuh hnu-ah Reuben-a pa chuan, "Eee...nang hi maw ka fate chhan chhuaktu tlangvâl huaisen chu? Khawi nge; ka'n chibai nghe nghe teh ang che." Pu Rinzuala chuan ti nui sângin a chibai a, a nu Pi Helen-i paw'n fakna ṭawngkam nên a lo chibai ve leh bawk. Anni nupa pawh hi zahawm tak an ni. Sâwmfela erawh mi dangin an lo thlîr ṭhup bawk sia a zak deuh tih a awm dânah chuan a hriat theih.

Chutih lai chuan Reuben-a chuan DJ chu a'n signal zauh a, chu veleh, "Zai leh lâmin party hun ṭan leh ang aw." uar taka DJ chuan tiin sâp hla bawk a rawn play ri leh ta dum dum mai. Reuben-a nu leh pate erawh In chung lamah an chho zui nghâl a, anni ṭhalaite ve thung chu an la hir-ha tlauh tlauh thung. Sâwmfela chuan a present chu va la leh rihin Reuben-a chu a pan leh vat a, "I pian cham ka lawmpui tak zet che. Hei, i ta tur, kha nei daih rawh." ti nui sângin a juice in bâng a dah ṭhatna lam pan chuan a kal leh zat. Tûnah chuan zân dâr 11 a pêl ta reng mai. Sâwmfela chuan a nu a hre chang tawh hauh lo va, chu birthday party chuan a uap hneh deuh pawh a ni maithei le! Dawhkân bula chair-ah ṭhuin nula leh tlangvâl lâm hah hahte en kual pah hian juice chu a lo in ve leh zauh ṭhîn bawk. Chutih lai chuan nula pathum nalh zette hian an rawn pan a, Sâwmfela erawh dawhkân lam hawia ṭhu tawhin juice bottle chu a hûm rân a, nulate pawh chu a hmu ve hauh lo. A bul an va thlen chuan, "Hi! Sâwmfela maw i nih kha?" nula pakhat chuan a'n ti nui sâng a, nula pathumte chu en kual thuakin, "Aw ni e..." tih leh hawi sawn a rual leh nghâl. Nulate chuan an hmingte hrilh vein a bula chair ruakah chuan an ṭhu zui ve sap sap bawk. Sâwmfela chuan rawn be hmasa bertu chu melh zawkin a juice bottle chu a lek kang a, nula no mawi tak chu va tauh ri tlengin, "Cheers!" a'n ti nui sâng a, nula pahnihte nên pawh an han Cheers leh hnu chuan tîtî pahin an nuiho leh var var ṭhîn. Chutia nula pathumte'n Sâwmfela bula ṭhut hmun an rem chu piah deuha Emmy ṭhu ve chuan a khât tâwkin a lo thlîr leh vang vang ṭhîn a, eng nge a ngaihtuah tih erawh hriat mai theih a ni tlat lo. Nula nui leh var var ṭhînte chu en ve rengin drinks chu a in leh zauh ṭhîn bawk. Zân a lo rei ta bawk nên DJ chuan a hla play chu off thutin, lâm tual mawitute leh mi ṭhenkhatte'n a ngaihna hre lo zeta an thlîr ṭhap lai chuan Sâp hla cool nalh êm êm mai hi a rawn play leh ta, mi dangte pawh chuan nui var varin an voh dî-te nên inhma tawna dingin romantic dance chuan an inthên ta delh delh a.

Chu veleh Emmy chu tho tharhin Sâwmfela ṭhutna lam pan chu a rual a, a va thlen chuan, "Sâwmfel, lâm ila, min lâmpui duh em?" a va ti tawl mai. Nula pathumte pawh chuan mak tih hmêl deuh tak hian an lo en deuh hâ hâ a, Sâwmfela lah a tha za tâwk lekin a lo hai ve tawh bawk nên Emmy chu en vang vangin, "Teh rêng mai." a lo ti nui ve sâng bawk. Kha'ng nula pathumte khân Emmy nute duhawm leh chimawm ze dik tak an kai tho pawh a ni mahna le! Lâm tual lamah Emmy chuan kai pheiin mi dangte bulah chuan an inhma chhawn ve ta rân mai a, Sâwmfela chuan, "Engtin nge ka awm dâwn? Ka lâm thiam hlei nêm." a lo ti nui sûng chu Emmy chuan, "Ka chêt dân azir zêlin i ti dâwn nia," a lo ti nui sâng a, mi dangte lâm dân chu Sâwmfela chuan a en kual leh zung zung. Chutia Emmy leh Sâwmfela inhaw lo tih hriat taka lâm tuala an han inthên ve delh delh lai chu Puia'n a lo hmu leh. "Wow! En ve mah teh u, an inhmeh asin." a tih rual chuan a ṭhiante pawh chuan a thlîrna lam chu an rawn hawi ve nghâl a, mi dangte pawh chuan hmêl hlim sârha thlîr vein thlate an lo lâksak leh ṭhîn. Sâwmfela khabe hnuaiah Emmy chu a dâk deuh vah a, Sâwmfela paw'n chhuk bih rûnin an nui dûn sâng bawk. An insân hleih lutukte chu engtin emaw tak hian an inhmeh zâwk viau mai. Sâwmfela zei lo lutuk erawh thingtum nem âwn hi a ang ber âwm e! Chutia hun nuam leh zalên tak an hman hnu zanlai pelh hlek hnu-ah programme chu an hmang zo ta a, a Car-in Reuben-a ngeiin Sâwmfela chu an In thleng a va thlah leh ta a ni.

Hun leh nîte a liam zêl a, november thla chu an hmang zo ve leh ta reng mai. Sâwmfela pawh cement work inhlawhna a hmuhah chuan thawk ve zêlin, an hmabâk en chuan December thla laihawl vêla an zawh fel mai a rinawm tawh. A thawhpuite lah chuan an insual lai video aṭang khân an lo hre tawh bawka an inpawh tlâng ang reng viau bawk. December ni 7 a ni a, a inhlawhna bula mitthi an awm avângin hna an chawlh rih a ngai bawk nên, chawhma dâr 11 vêlah a account-a pawisa deposit turin Sâwmfela chu Bank-ah a kal a, Aizâwl khawpui pawh lîrthei leh mipui an lûn leh hle. Pawisa a deposit hnu-a a hman leh meuh chuan chawhnu dâr 1 a ri dâwn hnai tawh. Tih tur dang a nei tawh lêm lo bawk a, a inhnawh puar tawh bawk nên MC campus-ah ṭhu hahdamin mite chezia chu a thlîr kual vêl mai mai a, T-shirt dum chungah leather Jacket kha hain a ngainat êm êm Cargo kekawr dum a lei thar ngei a hâkte leh a Timberland-te nên chuan a inhmeh leh kher mai. A bul hnaia awm apiangte'n an rawn melh leh zuk zuk ṭhîn chu a ning ru tawh tak zet. Chutih lai chuan mi pakhat hian a sîr lam aṭangin, "Sâwmfela i ni ti raw? I inhlawhna pa kha ka pu a nia, hna chung chângah biak lawk che a duha rawn hruai tur chein min ti a," tiin amah ang rual vêl tur tlangvâl chum lam deuh hian nui sângin a lo bia a. "Khawiah nge a awm?" a tih rualin chu tlangvâl chuan, "In hna thawhna thlanga building hlui fâl deuhah khân, khami building kha ṭhiah a duh nge ni?" a lo tih leh chuan chu tlangvâl car lam pan chuan an inzui ta a ni. Chu building hlui awmna lam pan chuan an tlân ta par par a, rei vak lo an tlân hnu chuan building hlui hmun fâl deuha lo ding chu an thleng ve leh ta. Car aṭang chuan chhukin Concrete building hlui chu an pan zui leh nghâl a, Sâwmfela chu lût hmasain a han hawi vêl ruai ruaia tumah a hmu si lo, a luh thûk leh deuh hnu pawha tumah a hmuh tâk si lohvah chuan thil awmzia zawh tumin a hawi lêt a, rawn hruaitu tlangvâl pawh kha a hmu ta hauh lo mai le!

A ngaihna hre lo zeta kawngka lam a hawi kual leh ruai ruai hnu chuan a hnung lama mihring pên thâwm chu hriain a hawi lêt vat. Chutah le, mi pakhat Baseball stick keng, Jumper dum lukhum khum chunga a sîr zâwnga lo ding hi a hmu ta a, baseball stick a ken chu vawi thum chhuata a tauh rîk kauh kauh rualin kawngka lamah mi pathum hmêl nêlawm lêm loh lian ve tâwk tak hi an rawn chhuak ve leh. Chumi rual deuhthaw chuan a ding leh vei lam room ruak aṭangin mi pahnih ve ve rawn chhuak lehin an rawn en rum ang reng viau. A mitmeng leh hmêla hlauhna hmuh tur awm hauh lo hian chu'ng mite chu Sâwmfela chuan a melh kual den den hlawm a, a hma lam a hawi leh chuan mi pathum an lo ni leh dêr tawh bawk. Ṭawngkam ṭhaa dâwr buai chi an ni dâwn lo tih Sâwmfela chuan a hre chiang bawk a, ngawi rengin a hmaa mi pathum dingte chu a en kar mai. Chutah rawn lang hmasa ber khân a Jumper lukhum chu pawt thlain a mask vuah chu a hlîp bawk a, "Min la hria ang chu maw?" a lo tih rual chuan chu pa hmêl chu a lo la hre nameuh mai, Sâwmfela chu a lo nui sak! Chu pa bawk chuan, "Min tih mualpho man kha ka rûl ve dâwn che. I chêt fuhna kha Fb-ah an lo up lehnghâla mite nuihzat kan ni tawh. Nangin hming ṭhat i hlawh laiin keini'n hming chhiat. Thuchah hnuhnung sawi duhte i nei em?" a rawn ti rum ta hmak mai le! Sâwmfela chuan a sam chu nghet zâwkin a han ṭâwn ṭha leh tê tê a, vei lama nui sâwi bâi chung hian, "Ṭan ilaaa..." tih leh inseh ruh ṭeuha a hmaa mite lama tlân thut chu a rual a, a hnunga mite lama inher thutin pakhat dulah a tlawh nghâl chawrh a, a vei lama mi kuttum bum nân kûn chungin a'n vir zawk a, mi pahnih a ruala rawn che chhuakte chu a ding lama mi zâwk chu tlawh lehin, a vei lama mi rawn hnek chu kûn paha bumin a dulah a hneksak chawrh. Chu pa thaw kâwka kûn lai chu a khûpin a hmaiah a do zui leh siah. Chumi ruala mi pakhat kuttum rawn thlâwk chu a bum hman ta bîk lo, a biang ki chu ri lawlhin ani pawh a kat ve nawk nawk. Mi pali dangte chuan rawn bawh rawnin an ri chawrh chawrh zui a, tu kuttum mah a thlâwnin a dawng bîk lo thung. Pakhatin a kaizaa a rawn tlawh tâk chawrhah chuan ṭhingṭhi hnawkin a bân pahnih chuan a hmaia pêt tumtu ke chu a lo dang leh hman hrâm. Mahse, chumi rual chiaha a bek vei lam ri lawlh vâng chuan a sîr lamah a bawk rawp a, chuta an han chhir rawn tak tak chu Sâwmfela tân pawh invên sên a ni tawh tlat lo.

A zal deuh rak hnu chuan an han kiansân a, ânchhe tin rêng nên pakhat chuan a han chhir leh zawt a, Sâwmfela pawh thaw hawkin a vial ve ngawl ngawl mai. Mi pakhat chauh tân chuan mi pasarihte chu an tam deuh mah mah a ni e. He lai hmuna hruaitu tlangvâl khân a samah rawn ṭhâmin, "Bum pawh i lo nawm hi le! Ka ṭhiante ti mualphotu hi ka dim vakna tur che ka hre lo." tiin a nam bu lâwp zui a, chutah Sâwmfela chu ṭhen sak sak chunga muang chânga zangthalin a rawn la nui hak hak mai. A sam ṭâwnna an phelhsak bawk nên a hmaia thisen leh a sam chu a inchiahpiah nuaih a, pakhat chuan a kawr âwmah rawn ṭhâmin dîm lo zet hian a pawt tho rawk rawk zui. Chu veleh Sâwmfela chuan rawn pawt thotu chu hnek thal tawpin pakhat rawn che ve leh chiah chu a'n tlawh thal leh ṭhuai a. Mi dangte chuan ṭê ṭhatin an rawn khawih rawn ve leh mai si. Sâwmfela pawh a invêng sêng lo tih hriat zetin chhim leh hmâr chung leh hnuai hawi tawn sawk sawkin a tlu zangthal zui leh ta a, chu chu pakhatin va chhir zui a tum chu a ke-ah lo mansakin a phit thlu a, bawh zuiin a rem lai laiah a hnek leh ta chawrh chawrh zui. Chutah pakhat chuan a bekah lo tlawh chawrhin Sâwmfela chu a sîr tlûk ve leh nawk a, a tho thei ta mai lo. Hetiang khawpa an sawp rawn hrep hnu pawha a la che thei viau chu chu'ng mite pawh chuan Sâwmfela chu mak an ti letling tawh zâwk hial a ni. Chutia Sâwmfela bawk zawi reng leh che ṭuah ṭuah chu baseball stick kengtu leh mi pahnihte chuan an rawn pan hnai a, Sâwmfela che vêl kha hmuhnawm pawh an ti ru viau. An hotupa ber baseball stick kengtu chuan Sâwmfela chu a chhîp sâma ṭhâm dâk lâwpin, "Khai le! I lak aṭang hian ngaihdam dîlna chiah ka phût, ngaihdam min dîl la i thi lo vang." tiin Sâwmfela rum zeta en pah hian a'n ti a, ani Sâwmfela paw'n rum zeta rawn en lêt pah hian, "Theihnghilh rawh." a lo ti bûl hmuk. Chu pa chuan thinrim zet hian, "Zâwngchhe pa, engtin maw i tih a?" tiin a kêk na zual sauh. Sâwmfela chuan a kaa thisen chhâk chhuak ṭhat pah hian, "I beng a ngawng em ni a? Theihnghilh rawh ka ti." a lo ti leh chu, "Zâwng hmêlchhe paaa..." tih tuarh leh a baseball stick hûmna lam hmâwra a beka chhut chawrh chu a rual a, Sâwmfela khaw hmuh a thim ta mup mai le. Tichuan, mask-te an vuah leh thlap hnu-ah an motor dahna lam panin an chhuahsan ta a ni.

Tlâi dâr 3 a pelh hnu chuan Pi Mawizuali paw'n a fapa chu rawn thleng har a ti deuh tawh nge; pâwn aṭangin an chhak kawngpui lam chu a thlîr leh vang vang ṭhîn a, rei vak lovah lût lehin a eirawngbâwl lai pawhin a rilru a nuam thei lo. Tlâi Dâr 4 pelh hnu pawha Sâwmfela hmêl rêng rêng a rawn lang thei lo chu Pi Mawizuali chuan tawh sual a tâwk a nih a ring ta ber. A rawn hâw har loh tur thu Sâwmfela khân a hrilh bawk si a, rin aia a thang rei leh si chu a ngaih ṭhatthlâk loh bawk êm a ni. Hetiang din hmunah hi chuan nu hmangaihna thinlung hi hlauhthâwnna hian a mawlh tlat tawh ṭhîn a; dem ngawt theih a ni lo vang. Reuben-a call-a Sâwmfela a hmuh leh hmuh loh zawh a tum rilrûk lai chuan Reuben-a a rawn lang hlawl. A hmuh rualin Pi Mawizuali chuan, "E Bena, lo call che ka tum mêk a," a hmêla thup nei tih hriat tak hian a'n ti nui sâng a. Reuben-a chuan khawngaih hmêl taka en vawng vawngin, "A chhan ka hria e nu mawi. Civil Hospital-ah Sâwmfela a awm a, rawn hruai tur chein ka rawn kal a ni." a tih chuan phâwk zet hian, "Chu, Mâma chu tawh sual a tâwk nge? A va'n pawi êm aw." tiin a mittui chu a'n hru zauh a. "Chanchin ka hriat ang ang chu kawngah ka hrilh dâwn che nia, kal phawt ang hmiang, inthuam lum la." Reuben-a chuan dam dap hian a'n ti leh a. Pi Mawizuali pawh inhnît feih feihin kawrlum phiar a hâk chungah puan lum a bât leh a, a inpeih chu a ni dêr. Reuben-a nên chuan chhuak zui nghâlin kawngpui pan chuan an chho zêl a. An han chhuah chhoh rual chuan Car-ah lût lehin Civil Hospital lam pan chuan an tlân zui leh ta a ni. Reuben-a chuan chanchin a hriat ang ang chu hrilh pah zêlin an tlân zêl a, an tang khawmuang leh ṭhîn bawk nên Civil Hospital chu zân dâr 6:30 vêlah an thleng ve ta e. Sâwmfela awmna ward lam panin an inzui chho leh nghâl a, an han thlen chuan Emmy-te ṭhianho pawh an lo ṭhu ṭhap tawh. Pi Mawizuali'n a fapa eng mah hre lova natna khuma lo mu reng leh, a hmêl hmai vûng duk cher chur te, a lu leh bânrêk ding lam an lo tuamsak bûrte chu mittui tling piauva thlîr ngawih ngawihin, "Mâma, a va'n pawi êm aw. Engati nge hetianga i chunga chêt thawh duh hi an awm tâk mai le? Mi pawi i sawi hmasak ka hre ngai lo asin." hnuk ulh ṭeuha a'n ti hliam hliam mai zawng, Emmy, Muani, Zuali leh Christy-te paw'n mittui an lo hru ve sap sap a, mipa pathumte pawh an mittui a hnâm ve hial mai. Anni chuan hun thâwl pêk a ngai tih hre thiamin, rei lo têa an kîr leh tur thute an hrilh hnu-ah an chhuahsan rih ta a ni.

Khatia Concrete building hlui aṭanga mi 10 lai mask vuah chung leh hawi deuh zak zak chunga an chhuak lai kha, chu building hlui piah deuh hleka pa pakhat tukverha rawn dâk chuan a lo hmu fuh hlauh a; an hawi her leh thawmhnaw paw hruahte bâkah, pakhat baseball stick kengte leh mask an vuah thlapte chuan thil dik lo eng emaw tak an ti ni ngeia hriain, minute 10 hnu-ah building hlui lam pan chuan a chhuak zui ta a ni. Chuta building hlui chhuata mipa pakhat nîkhaw hre lova lo bawk reng a hmuh rual chuan pan hnai vatin a mar a'n dap a, a la thi lo tih a hriat ruala tlân chhuak vatin mi dang a va pun ta a, an rawn thlen hnu-a a hmai thisena khat vek chu puanchhe fai deuha an han hru fai chu ṭhenkhat chuan a hmêl chu an lo hre tlat, "MC kawta an sual rawn pa kha a nih hi! Insual a thiam nên ti nge le?" ti sap sap pawh an awm nual mai. Tin, chu pa mi punte zîngah chuan a hmaa Reuben-a birthday lawmnaa kal ve tlangvâl pakhat a lo awm hlauh chu niin. Chu chuan Reuben-a chu Call nghâlin chanchin a hrilh zui a, chumi hnu-ah mi pathumin zâwnin pa pakhat Car-ah chuan an chuang ve nghâl a, damdawi in hnai ber Civil Hospital-ah hian an phur ta a nih kha. Hetih lai hian, Aizâwl khawpui pâwn hla vak lova Car vâr nalh zet chhûnga mi palite tîtî chuan Zoram hmasâwnna lam hawi chu an sawi lo kher mai. Pakhat chu Mizo pa ngei a ni tih a hriat hle bawk. Chu pa chuan, "Thla hmasa lawkah kan sumdâwnna ti khawlhkham zâwngin Police-te'n kan hmunpui an rawn luh chilh a, kan nau panga lai kan chân a nih kha. Kha lai hmun kha chu tûn atân chuan pan chi a ni rih tlat lo. Tin, kan hma lawkah hunpui Christmas kan hmang dâwn a, a bîk takin ṭhalaite zalen hun lai ber a ni bawk. A tam zâwk hi chu kan dâwi hlo hian a phuar nghet tawha an mamawh reng tawh dâwn tih chu kan hre thiam tlâng vek a. Chuti a nih rual chuan fîmkhur taka kan chêt erawh a ngai, tumahin min man chhuak tur a ni lo. Ṭan la thar leh ula, a tam thei ang ber rawn lâk luh in tum dâwn nia, hlawh chung chângah kha chuan buai suh u; a tlêm chhe lo vang. Ka sawi chu in hre chiang em?" a'n ti dap dap a, mi pathumte chuan lu an lo bu nghat nghat a. An zînga pakhat chuan, "Chu bâkah chuan maw Sir, kan Minister fanu vehtute kha thah an ni tih kan hriat kha. Police lamin a thattu hmêl an târ lang duh si lova hriat chu a har deuh dâwn a ni. Kei chuan phuba lâk ngei ka duh." pai deuh taka a lo tih dânah Mizo a ni lo tih chu a chiang viau e. Mi dangte pawh chuan thinrim hmêl tak hian an lo sawi zui ve sap sap bawk. "Ni e, khami chung châng kha chu hun rem châng kan la tawng mawlh ang. Tûnah rih chuan ka hrilh tâk che u kha ngaihtuah hmasa phawt rawh u aw. Phuba chu kan la mawlh ang, in kal thei tawh e." tih leh pawisa têl chhah deuh tak an pathuma pêk chu a rual a, anni pathum pawh Car aṭang chuan chhuak zuiin Bolero dum thar ṭha ver vawr takah an lût zui a, an tum ram lam pan chuan an tlân zui ta a ni.

Mizoram Police-te khân khatia Sâwmfela leh a ṭhiante'n mi sual panga an tih hlum thu kha mipuite thlamuan nân tiin chanchin tharah an puantîr a, an mi thahte thlalâk an târ lang bawk. Chutih laiin a thattute erawh vên himna ṭha tak an pe reng thei dâwn lo va, an nunna atâna pawi thei a ni tih hriain an hmêl an târ lang tel ve ta lo kha a ni. Mizoram Police-te'n fing taka an hna thawhsaktute hmêl an târ lang tel duh lo hi kha'ng mi palite tân pawha phuba lâk ngaihna awm ta lo kha a ni ta chiah bawk. Chutih rualin, social media chak tak kârah hian an thup reng thei ang em tih chu ngaihtuah tham tak a ni. Police OC khân Reuben-a te hnênah an ṭhianpa Sâwmfela chu hetiang lama fîmkhurpui tur hian a lo chah diam a, a thlalâk post-tute pawh khatianga an chêt thawh dân lam hawia Caption siam lo tur te leh, comment lamah pawh fîmkhur hle turin a lo hrilh lâwk diam hi a ni. Zalên leh nuam taka hun leh nî an hman liam ve mêk lai hian lehlamah mahni ram leh hnam phatsan a, mite siam ṭhat sa pawh ti chhe duh ṭhîn mihring an lo awm ṭhîn hian ram hmasâwnna an dang a, an dîp a, mahni dinchhuahna tur a nih phawt chuan mi dangte nghei leh chhiat pawh pawi ti lo, langsâr si lova ram leh hnam hmêlma hlauhawm êm êm an dam rei ve phian si hi a buaithlâk ber chu a ni. Thing ngêt ang hian a chhung lam aṭangin an ei chhe mêk zêl chu a ni si a; kher chhuaha tih hlum vat an nih loh chuan pâwn lama him pial siin Zoram hian dâwl zawh loh hun a la nei ve ngei ang le.

Zân dâr 9 a ri ve leh ta. Sâwmfela pawh rawn meng diar diarin a awmna hmun chu a'n melh kual a. Chu veleh a harh hun nghâka chhum lo chat lova lo vil rengtu a nu chuan, "E mâma i lo harh ta maw? Min ti hlauthâwng hman lutuk a," ti nui sângin a mittui chu lehlam hawiin a hru leh zauh a. Puia-te paw'n nui sânga lo be ve bawrh bawrh nghâlin an lo en ve ṭhap bawk. Sâwmfela chuan a mitmenga hlim tih hriat tak hian a en kual hlawm a. A vei lama Emmy'n mit la sawn eih lova a lo en nui sâng chu en vang vangin Sâwmfela chu a nui deuh sak! Chutah a nu chu en lehin, "Nu, hâw ka duh." tih leh thawh chhuah a tum ta mai. Chu veleh a ṭhiante chuan an hâw theih ṭêp thute hrilhin an lo khap zui laih laih a. Reuben-a chuan, "Ṭhianpa, tûnah chuan la che vak rih suh. Hahdam rih rawh. Kan hâw thei ṭêp e." a lo tih chuan mi dangte paw'n an lo khap zui ve leh. Mahse, Sâwmfela erawh ṭhen sak sak chunga rawn ṭhu chhuakin, "Ka ṭha alâwm ṭhiante u. Inah ka inenkawl zui mai ang." tih leh khum aṭanga chhuk a tum leh. Kima chu Doctor leh nurse-te ko turin a kal zui vat a, a hnu rei lovah Doctor leh nurse pahnihte nên hmanhmawh takin an rawn phei hlawk hlawk a.

An rawn thlen rual chuan, "Tlangvâl, engti zia nge?" Doctor pa chuan a lo ti nghâl a, "Hâwn ka duh." Doctor melh zawk pahin Sâwmfela chuan a lo ti bûl hmuk. "Tûnah chuan i hâw thei rih lo alâwm, treatment-te kan zawh hunah dam varin i chhuak leh zâwk dâwn nia." tih leh doctor chuan mu hahdam turin a hrilh zui a, "Aa..ka awm peih tawh lo, ka hâw dâwn." Sâwmfela chuan ti bûl leh hmukin a bân vei lama drib an khainate chu a pawt thla ta mai, rang zetin nurse pakhat chuan a lo herh tâwp zui vat a. Mu hahdam tura doctor leh nurse-te'n an tih leh ngial pawhin mi luhlul Sâwmfela zia a chhuak laklawh tawh tlat. A hliam tawrh leh a awm rei lohzia-te ngaihtuahin mi pângngai tân chuan ṭhut chhuah ringawt pawh har tak tur a ni. Chutih rualin, pasalṭha thisen kai a nihna chu a hriat ṭan ta viau. Sâwmfela erawh ṭhen sak saka ding chhuakin kawngka lam pan a rual ta chhet chhet mai a, mak ti taka an thlîr ṭhap lai chuan a rawn hawi lêt leh, "Ka Jacket-te kha khaw nge?" tiin doctor leh nurse-te chu a melh zui hâ a; "Ṭhianpa, keima'n ka dah ṭhatsak che." Reuben-a'n a lo ti vat. Sâwmfela chu bu nghatin a kal zui leh. Puia-te chuan doctor leh nurse-te chu hre thiam ngawt mai tura lo ngensakin lâwm thute an han hrilh leh hnu chuan Sâwmfela chu an zui ve ta a ni. Kima chuan doctor hnênah an inenkawlna sênso zawng zawng chu an ṭhianhovin an pêksak tur thute a hrilh ve leh a, doctor leh nurse-te tân pawh tih ngaihna awm hek lo le; mak tih hmêl takin an thlîr zui vawng vawng ringawt. Pi Mawizuali paw'n a fapa chu a hre chiang bawk a, tih luih vêl kha a sâwt dâwn lo tih hriain a ngawi reng ringawt a nih kha. Sâwmfela kal bâi suih suih chu Puia leh Reuben-a'n kuah an tum lahin a duh si lo, step-ah chuan a tlûk palh hlau takin an vêng tawp mai a, Sâwmfela pawh a ke vei lam bâi deuh suih suihin a chhuk ve zêl bawk. A rilru chuan, "Ka dam leh dâwn alâwm." tiin a inseh ruh ṭalh ṭalh a.

Chhunzawm leh tur



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:25 pm

THE CAVE MAN.

✍️ Duata Khualchhâwn.

BUNG 8-NA.

Sâwmfela leh Puia-te ṭhianho Civil Hospital aṭanga chhuakte chu hmanhmawh lêm lova kal zêlin, rei vak lovah damdawi in kawt chu an thleng ve leh ta a. Reuben-a Car-ah Sâwmfela leh Pi Mawizuali, Muani-te chu lût nghâlin an tlân chhuak zui a, Puia leh Kima Car-ah mi dangte chu an chuang ve bawk. Vân pawh a thiangin thlasik kawng a paw phei pût a, arsi tam lutuk lote zînga siruki-te unau chuan mit an la deuh ngei ang. Motor chi hrang hrang ri inpawlh nuaiha insûlpêl zut zutte chuan khua an ti har lo bawk a, motor kawng sîra dâwr ṭhenkhat light de sep septe nên chuan hmuhnawm tak an ni. Kawng lakah an tang khawmuang tawh lo bawk nên, zân dar 10:30 a pêl âwrh tihah Sâwmfela-te In chu an thleng ve leh ta e. In chhung an rah leh meuh chuan dâr 11 a ri dâwn hnai tawh. Ṭhutthlengseiah Sâwmfela chu ṭhuin a ṭhiante pawh chu an ṭhu ve sap sap a. Reuben-a chuan, "Ka ṭhian, i chunga hetianga chêt thawhtute hi report ngei ka duh, an hmêl i chhinchhiah em?" a bula Sâwmfela chu en pah chuan a'n ti a, a aw-ah chuan a thinrim ve hle tih a hriat. Mi dangte pawh chuan report ngei chu ṭha an tih thu an lo sawi ve laih laih bawk a, chutah Sâwmfela chuan, "Eee...report lo ve, ruahmanna dang ka nei a ni." a lo ti hmak mai. "Eng ruahmanna maw?" a nu chuan a lo ti vat a. "Nakinah i la hre mai ang ka nu," Sâwmfela'n a lo ti leh. A ṭhiante erawhin a ruahmanna âwm ang chu an hre thiam mai tih an mitmeng leh hmêlah a hriat theih mai e. "Eng pawh ni se, kha i hliam a na bawk si-a mu hahdam la a ṭha ang. Hei dâr 11 a pêl dêr tawh a nia," Puia'n lo ti ve lehin anni pawh hâw tumin an ding nghâl sang sang a. Kima chuan, "Hei, i damdawi tur aw. Indîm deuh la, mahnia thil tih ngawtte kha i lo tum ang e." nui sânga a lo tih ve leh hnu chuan kawngka lam an pan zui sap sap. Pi Mawizuali chuan, "Ngawi lawk teh u, kha damdawi man hi," tih leh a bag dum hlui lam tawh chu keu a rual a, "Aih, a ngai lo nu mawi. Kan ṭhianpa tâna thil kan tihsak ve theih chhun a nih hi, damdawi in awmna man pawh kan pe fel vek tawh." Kima'n nui sânga a lo tih chuan Pi Mawizuali leh Sâwmfela an meng deuh kâwk mai. "Awi aw! In va ti lâwmawm êm! Chutih rualin a zahthlâk zâwk alâwm le!" Pi Mawizuali chuan a'n ti khawmawi ve a, anni chuan eng mah zahna tur leh inthlahrunna tur a awm loh thu an sawi sap sap bawk. Chutah Emmy chuan Sâwmfela chu nui sânga en pah hian, "Lo dam vat rawh aw. I nu thu hi awih hle ang che." a tih rual chuan anni pawh chu an chhuak zui leh ta a ni.

Tichuan, ni tlêm a liam leha December ni 10 chawlhnî a lo inher chhuak a, tûkṭhuan ei khamah Pi Mawizuali chu inkhâwm tura insiam chet chetin a inpeih hnu chuan, "Mâma ka han inkhâwm ve lawk ang e aw. Kan ṭhenawm pa Upa Sangzêla thu sawi hun a nia, nang pawh a rawn kan fo che kha. Sande sikul chu ka kal lo mai ang." tih leh damdawi a ei leh ei lohte a fapa chu a zâwt zui a, a ei tawh thu Sâwmfela'n a hrilh hnu chuan a chhuak zui ta a ni. A nu a awm tâk lohvah chuan an In chhung chu ruak huai hian Sâwmfela chuan a hria a; amah vânga a nu hian a tawrh ve mai pawh a hlau ru tak zet. Thlang lam tukverh hnaihah chuan ṭhuin a han hawi chhuak a, a hmuh theih china tlâng hring dup mai leh Vân thiang kûk maite chu hmuhnawm tih hmêl tak hian a thlîr veng veng a, eng nge a ngaihtuah tih erawh hriat theih a ni lo thung. Chutia duh tâwka a thlîr hnu-ah tukverh bula dârthlalang fit khat vêla sei, hmai lang kim tâwk chiaha hlai chu lain a han inen ta alâwm maw le! A mit vei lam a vûn nasat luat vânga a siai duk ruih te, fawh a hlâwk âwm mang e tih tur a hmûi chhah deuh tupte bâkah, a hmêl hmai duk deuh chur te, a lu leh a kut ding lam an tuamsak bûrte chu a en kual hlawm a, inseh ruh ṭalh ṭalhin ṭhutthlengseiah chuan a mu zui leh, ngaihdam tih vêl kha chu a ngaihtuah buai lo khawp ang le! Chutiang chuan khawhar takin chawlhnî chu a hmang liam ve zêl a, chawhnu lam a nih chuan a nu pawh a rawn thleng ve leh ta. Ṭhutthlengseia a fapa tui taka lo muhîl thaw sêk sêk chu Pi Mawizuali chuan a en deuh vang vang a, a rilru erawh a kal thui hle. Hetiang a nih chuan a fapa hian mite kutah nunna a la chân mai ang tihte leh eng eng emaw ngaihtuah kualin a pasal a ngaihnate chu a rawn thar leh uai uai bawk. A inthlâk fel hnu thingpui lum tuma a kal leh lai takin, "E nu mawi i awm maw? Sâwmfela chu eng nge a an zêl? Hei, ka nu leh pate." Emmy'n a lo ti nui sâng a, a dam ṭhat ve zêl thu hrilh pah chuan Emmy nu leh pa hmêl sâr veh vawh, zahawm êm êm maite chu a melh deuh hâ hâ zui. Emmy pa chuan, "Pi Mawii maw? Min hre hrim hrim em?" tih leh chibai tuma kut rawn phar chhuah chu a rual a. Pi Mawizuali paw'n nui sâng hian, "E khai! Kan minister ṭha leh felte chu engtin nge ka hriat loh theih ang che le? I nupui maw?" tih leh Emmy nu chu en a rual a, an inchibai lauh lauh hnu chuan, "Lo ṭhu rawh u. Keini Inahte in rawn lêng ve duh chu ka lâwm rualin ka zak rum rum mai a!" Pi Mawizuali chuan a'n ti nui var var a, Emmy pawh a nu leh pate nên sitting room-ah chuan an ṭhu zui zat. Khatia an inbiak lai khân Sâwmfela pawh lo harh tawhin a lo ṭhu fel ve leh dêr tawh hi a ni. Pu Zothansanga chuan Sâwmfela chu en pah hian, "Sâwmfela maw i nih kha? I chanchin hi chu ka hriatna a rei tawh a, hun rem châng ka neih theih loh êm avângin ka rawn kal thei lawk lo a ni. Eng nge i an zêl le?" a'n ti zung zung a, a zia chhoh zêl thu hrilhin Sâwmfela chu a zak deuh tih a hriat. Chutah Pi Sângi chuan, "Sâwma, ka fanute i chhan chhuah dân kha kan lo hria a; kan lâwm tak zet a ni. A bîk takin kan fanu zahawmna leh kan chhungkaw zahawmna chhe tur i chhan him a, lâwm thu sawi sên loh kan ba a ni." lo ti ve lehin Sâwmfela chuan lâwm thu sawi a ngaih loh thutein a lo chhâng ve leh. Inpawh tlâng takin an tîtî zêl a, hetianga hliam a tawrh chhante an zawh chuan mi ṭhenkhatte nên an insual thu kha a hrilh tlang ve mai bawk. Pu Zothansanga chuan, "An tam hneh deuh che tih a hriat reng mai. MC kawta mi pathumte nên in insual video ka hmuh khân chuti maia sawp theih i ni lo tih ka hre chiang." a lo tih chuan, "Kha kha ka ṭhiannuin min entîr ve a, mahse sawi chhuaha hauhin kawngro a su tawh bawk si lova ka ngawihpui ta mai a ni." Pi Mawizuali chuan a lo ti ve a, eng eng emaw sawia an tîtî leh hnu-ah Pi Mawizuali chu chêng 5000 an hnawn luih fe hnu-ah pein an hâwnsan ve leh ta a nih kha.

Hun leh nî a liam zêla December ni 20 an thleng ve leh ta reng mai. Christmas a hnai tawh bawka Mizoram khawpui ber tih takah Aizâwl khawpui chhung hmun ṭhenkhat laite pawh an chei mawi ṭan dêr tawh. Motor ṭhenkhatte pawh sarâng tle mawi zette leh thil dang dangin an chei thluah bawk a, an tlân phe hlep hlep mai a ni. Taxi an rimin City Bus pawh an full deuh pap pap tawh mai a, accident pawh ni se a na ber pawh a hnap a tawlh ringawt ang tih tur khawp hian an tâwt thei mai mai asin aw. Chawhma dâr 11 vêl a ni a, mi tin maite chu Bazâr hran hranah an innêk luih luih a, thawmhnaw leh thil dang zuartute tân pawh boruak ipik tak tur a ni. Sâwmfela pawh duh thâla a chêt ṭhat theih tâkah chuan mipui phu mur mur kârah Bazârpui a lo fang ve mêk bawk a, thawmhnaw ni lo, a thil duh tak lei ngei tumin a lo buai ve viau mai. A sam chu ṭâwn tawh lovin a thlah vek a, a chal chung aṭangin a tukkhum lamah a nam pial bawk. A incheina pângngai Jumper dum chungah leather Jacket kha ha lehin, cargo kekawr dum a hâk leh Timberland bawk a bunte chuan an va ti pa teh rêng êm! Rawn melh leh zeuh zeuhtu mipate leh nula nalh tak takte chu a kal pêl zêl a, hmun khat laia thei tui chi hrang hrang an zawrhte en kual paha a din lai chuan a vei lam Bazâr phei aṭang a, "Khaaa, lo man rawh uuu; rûkru a nih khaaa." tia lo au lauh lauh thâwm a hriat rual rualin a hawi ve vat. Chuta a hawi lêt chuan tlangvâl kum 20 vêl tur Jeans kekawr leh Jumper dum ha, mask vuah bawk hmeichhe bag tih hriat tak keng chunga rawn tlânchhe mêk leh, chu tlangvâlin amah hnaih deuhtute a chemte ken kut phah bawk chen vêl nêna a rawn vai kiang phei zêl a hmuh rual chuan a rawn hnaih ve ta kher mai. A bul a rawn hnaih ta maw tihah Sâwmfela chuan a hmaa frooty bottle tê chu laa inher thut a rual a, frooty chu in tum ang taka a bân lek kânah chuan chu rûkru pain amah ûmtute ena a hnung lam hawi zawk, hma lam a rawn hawi leh chiah hnâr kâwnah a nghawk ta siah mai le! A rawn tlân muang lo bawka chutia a hnâr kâwn a tauh chawrh chu a tauh na deuh a ni ang; thal ṭhuaiin a lu hai deuh chu a tho zui thei mai lo. Sâwmfela chuan mak tih hmêl deuh tak hian a mitmeng hmang chuan lem a'n chang zui zat a, rawn ûmtu mipa pahnihte lahin rûkru pa tlu lai hnâr leh hmûi bâwr dawma lo thawh chhuah tum leh mêk chu an rawn nangching zui mai si; anni chuan dîm lo baksak taka hnekin an han chhir zawt zawt nghâl a, mi dangte chuan ngawi rengin an lo thlîr ṭhap zui. An hnaih bera ding Sâwmfela lahin ṭhelh a tum dêr si lo, "In duh tâwk khân han nawp teh u," ti ni âwm takin a lo en ve reng ringawt mai si. An rîk deuh chawrh chawrh hnu chuan pakhat zâwk chuan, "Ṭhianpa, i zârah kan man thei hlauha kan lâwm lutuk e." a lo ti a, "Kei pawh le." Sâwmfela chuan ti nui sângin, frooty mante a pêk leh hnu-ah kal paha frooty bottle chhîn chu herh hawngin a in zui zat. Mi dang lo thlîr ṭhaptute chu vawi khat tê pawh melh chhin eih lovin hma lam pan chuan a kal zui miah miah mai a ni. Hmeichhe ṭhenkhat Sâwmfela en vang vang paha inhrilh ru leh sap sap ṭhînte chuan eng tak sawi ang maw!

Nî a her zêla chhûn dâr 12 a pêl leh dêr tawh. A thil zawn tak a hmu mai thei lo chu Sâwmfela pawh a thinrim ru ṭeuh tawh mai a, a la kal lohna lam chu beidawn nân hrim hrim a ti nge a pan zui leh. A kalna apianga mi ṭhenkhat rawn en leh vung vung ṭhîntute chu eng khaw sawi set set lova chum thal tawp hi a châk tawh zâwk a; chu êm êm zawng tiin a insûm thei hrâm. Chu bâkah a pawi sawitu ni lote tih buai ringawt chu Cave Man Malsâwmfela zia kha a ni tlat lo a ni. Chutia a vâk vêl chuan hmun pakhata chemtê leh chempui, tuboh leh perek bâkah hmanraw dang dang an zawrhna hi a pawh ta hlawl mai. Chu'ngte chu en kual den denin a zuartunu lah chuan leitîr ngei tumin a lo be siam siam a, chu'ng hmanruate aia changkâng deuh, ken leh chelek nuam deuh turte zawnga a en kual leh chuan, dâwr hma lam sîra Police leh Security-te hman ṭhin pakhat, a fawng dum fit chanve vêla sei, a lock-na hmeh ruala thîr kut zungṭang tia vêl rawn chhuak nghâl thei chi kha ni ngeia a hriat lo inkhai khâwm laih chu a hmu fuh ta. A zuartunu hnêna en chian a duh thu a hrilh rualin chu nu pawh chuan a rawn pe nghâl a, a en dânah Sâwmfela chu mak a ti deuh tih pawh a hriat viau. Sâwmfela chuan a thil ken chu en vang vangin a lock-na chu a'n hmet zauh a, a rin ang ngeiin a duh thu sâm tak tiang ngei chu a ni e. Chuta chin chu a hmêl pawh a hlim tawh hle. A man zâtte zâwtin chu nu chuan a lo hrilh vat a, don buai lova a pêk fel hnu chuan "Ui puar koh" ang mai hian Bazâr chhuahna lam kawng zawhin a kal nal nal tawh mai a ni.

Hun bi vawngtu tûrni'n bahlah hlek lova chhûn leh zân hun chu a her chhuahpuiin a liampui leh ṭhîn bawk a, tûnah chuan December ni 23 a lo ni ve leh ta reng mai. Aizâwl khawpui hun tawng ngaihtuahin Mizoram Police lamte pawh Bazâr leh hmun hrangah duty an indah belh sauh sauh a, a hma aiin an duty ngawrh sauh bawk. Ram leh hnam, khaw mipuite him nân thlasik khaw vawt pawh pawisa zo lovin theih tâwp an chhuah a, demna leh sêlnate'n an mawhphurhna pawimawh leh ṭûl êm êm lakah an dang chat thei chuang lo; chuvâng chuan Mizoram Police-te zahna chibai bûk che u hi in va phû hliah hliah tak êm! Zân dâr 10 vêl a ni a, Emmy pawh a nu leh pate nên sitting room-ah heater aiin an lo tîtî ve mêk bawk. Pu Zothansanga chuan, "Bawihi, Phaia awm tawh lovin i pu Rama-te school-ah chuan thawk ve mai ta che. Kan Zâwlkhawpui chu sawi loh ram pâwn chanchin ka hriat hian, kan hmuh phâk lohva i awm bo hi i tân a him lo tlat, a thlamuanthlâk loh êm mai. I pu Rama paw'n Bawihtei chuan kum thar aṭangin min lo pui ve se, amaherawhchu zirtîrtu dangte anga hlawh pângngai pêk erawh a phût lo turah ka ngai a, a pocket money tur erawh kan lo tumsak ve dâwn nia a tih che kha. I pi leh pute lah hian an duat si che a." a'n ti dap dap a, chu veleh Pi Sângi paw'n, "Ni e, i pa sawi ang khân hmun danga awm bo leh chu i tân a hlauhawm êm mai, hetah hian Sawrkâr hnate pawh i zawng ve pah ang a; chu bâkah kha i ṭhianpa Sâwmfela pawh a fel hmêl khawp kha a!" nui var var paha a tih chuan Emmy pawh nui ve sakin, "Leh ringawt a! Khatiangin min dem titih ngawt suh aw. Ni e, in tih tlat chuan ka pute chu ka pui anga ni mai lâwm." a lo ti ve a, ngaihzâwng leh pasal tur pawh zawng thiam turte leh, mi sualte laka fîmkhur êm êm reng tura an chah leh dap dap hnu chuan, "Nu, pa, vawiin kan chhuahna ka chau deuha ka mu dâwn, ka mut a chhuak tawh lutuk." Emmy chuan tiin a room lam pana chhoh a rual nghâl a, han en mai pawha mut a nuam dâwn tih hriat reng reng a laikhum thleh nêmah chuan a mui zui zat. Vawt a tih deuh avângin lukhum lum sen a khum leh hoodie dum nalh zet a hâk te, kekawr lum chhah deuh a hâkte nên chuan a mu tawp mai. A mut a chhuak viau-a a hriat laiin a han mu ta chêng a; a muhîl thei mai si lo, ding leh vei hawiin a inleh chhâwk sek a, amah nula lian a ni lêm lo bawka thlangraah pawh a leng ang a tih tur hian a mu kawm ngal mai a ni. Ka pangti lum silha a bula mut ka va châk êm aw! A mut hmunah chuan eng eng emaw ngaihtuah kualin a hun liam tate kha a ngaihtuah lêt leh a, hriat chhuah thut nei ni âwm tak hian rang zeta a phone ban chu a rual zat. An picnic-na hmuna an thlalâkte chu enin a nui sâng bawk a, a rûka Sâwmfela thla a lâksakte chu a en leh vang vang ṭhîn. Sâwmfela sangha kâp laite kha thla a lo lâksak ṭeuh mai a, a camera flash de zuai zuai ṭhînte kha Sâwmfela khân a ngaihsak lo mai mai kha a ni. Thlalâk dangte chu en leh ṭhîn mah se, Sâwmfela thlalâk erawh a en uluk thei bîk hle. A nâk nêm hliama damdawi a hnawihsak laia Sâwmfela taksa nalh zette kha ngaihtuah chhuak lehin, a ṭah laia Sâwmfela awm dân leh ṭawngkam vêlte khân an ti nui leh var var ṭhîn bawk. A ngaihtuah thui deuh hnu chuan zah hmêl taka nui ver verin a puan sin lai chuan a han inkhuh leh vêl a, hetianga a awm dân lâi thar leh vêl hi hmuhnawm chu a tling ve chiang alâwm. Hetih laia Emmy duhawmzia hi sawi fiah thiam chi pawh a ni lo; aw, tih nat hlau tak si-a pen taih ka châk mang e! Chutia thlalâk vêl a en hnu rei vak lovah a muhîl zui ve ta a nih kha.

A tûk zîng ni chhuak chuan Christmas ur lâwk nî chu ni dang zawng aiin a duhsak nge; Zâwlkhawpui chu a rawn chhun de sawr sawr a, tûk danga ni chhuak aiin a mawi zual em aw tih tur hi a ni. Chhung tinte pawh mahni In ṭheuhah tûkṭhuante buatsaihin an ri rak rak a, ṭhenawmte cooker phit rî leh an chaw hmeh rimte chuan an bul hnaia mi ṭhenkhat tei chhuakte hnâr leh beng a verh sawr sawr bawk a, lîrthei tlân ri leh vut vut ṭhînte lahin khawpui chhung chu reh hmanin an siam hek lo. Zîngkâr thlasik boruak vawt vîn têk vâng chuan a hmaa mipui veivâk ang êm kha chu pha rih lo mah se, mipui leh lîrthei veivâkte chu hmuhnawm tham tak an la ni tho mai. Nî a sâng zêla tûkṭhuan ei hun a ni ve leh ta. Sâwmfela-te nufa pawh tûkṭhuan an ei kham tawh tih hriat takin, pi Mawizuali chuan chaw ei thlêng vêl chu a sil ri rak rak a, chutah a fapa pawh en chuang lovin, "Mâma, vawiin chu va bazâr ve la, i account-ah pawh pawisa i khâwl tam ve tawh kha; i daih loh deuh i rin leh ka account-a mi pawh i la chhuak mai dâwn nia." a'n ti a. Sâwmfela chuan, "Thawmhnaw thar tih vêl ka awt hlei nêm ka nu. Mahse, intei harh hrim hrim chu ka duh, incheina tur T-shirt emaw chu ka lei ve dâwn maw ni ka tia," a tih chuan, "Ni e, T-shirt chauh lo pawh kekawr leh pheikhawkte pawh inlei ve la, thawmhnaw i neih tlêm êm kha! Takin, phone-te hi i duh zâwk lo em ni?" a lo ti ve leh a, "Phone chu nakinah le. Nih, ka insiam dâwn asin." tih leh room-a luh chu a rual zat. A hâk khât deuh zâwk Cargo kekawr hring tak deuh chu hain Jumper dum chungah leather Jacket bawk a ha leh. A pheikhawk pahnih neih ve chhun adidas(sneaker) khawk deuh nuk tawh leh Timberland-te chu eng zâwk hi nge ka bun ang ti ni âwm takin a en dûn vang vang a, a hnu deuhah chuan a thil tih tum nên pawh a inhmeh zâwk a ti deuh nge; Timberland chu a bun leh ta a ni. Almira dârthlalanga a inen leh vang vang hnu-ah a sam chu hrâwm khâwm nawk nawkin a chhîpvir zâwnah a ṭâwn leh bawk a, a sam hmâwr lam chu a tukkhumah a kûl leh ngâih mai. A hmai serte leh la duk deuh ruihte nên chuan pa tak hi a ni ringawt. Room aṭanga chhuah pah chuan a khum bul bangrela a dah, tiang a lei thar ngei kha la lehin a Jacket iptê-ah a ak zui hmak bawk. Zîng dâr 9:30 vêl a ni a, a nu thlêng sil zo ṭhu fel ve deuh chiah chu enin, "Ka kal nghâl mai aw ka nu." tiin kawngka lam chu a pan zui zat a, a nu paw'n fîmkhur hle tura chah ve lehin a chhuak zui ta a ni.

Dangtu leh dâltu awm lo chu nî pawh a sâng zêl a, chawhma dâr 11 vêl a nih meuh chuan Sâwmfela pawh hmuhnawm thlîr tur a tam deuh a ti nge; MC campus-ah a ṭhu leh vâng tawh. A hma aiin MC pawh mipui an lûn leh ta kher mai. Kawngpuia lîrthei ri chuah chuah chunga insûlpêl zut zut te, mi tam êm êm mai a pui a nâwia inzui duah duahte lah mit ti tlai tham an ni a; MC-a lût leh chhuak ringawt pawh chhiar vek peih chi an ni hauh lo. Chu'ng mipui zi huai huai kârah Sâwmfela chu "mi dum zînga a nei tê ber ang" maia ṭhu ngawi karin, mipui veivâk sup supte chu a thlîr kual vel mai mai a, MC campus-a ṭhute ringawt pawh chu an tam bawka Atom bomb thlâk dup châkawm tham an ni. Rei vak lo a ṭhut hnu chuan T-shirt pakhat tal lei ve tumin MC-ah chuan a lût ve ta a; duh thu sâmin mihring pawh an tam narawh e. Leilâwn chhuk chho nguai nguaia mihring chuangte chu a thlîr leh veng veng hnu-ah, chu leilâwna chuan ngai lo zâwnga T-shirt en kual chu ṭha a ti ta a niang, a vei lam Ground floor-ah chuan a phei zui zat, a duh zâwng tak hmu ang maw! Chutia a phei hnu chuan MC Security nula leh tlangvâl hmêlchhe lêm lo tak, kawngkapui hnaiha duty-te chuan an lo thlîr zui vang vang a, an uniform dum suit leh lukhum dumte chu an inhmeh viau mai. Nula chuan tlangvâl beng bula va hawi hnai pah hian, "Kha pa kha kan hnung deuha mi pathumin an sual rawn pa kha a niin ka hria. Saw lai lawka an sual rawn kha." nui sâng hian a'n ti a, tlangvâl chuan, "Umm..a nih kha. I lo hmu tawih deuh a ni maw?" a'n ti nui ve sâng a; nula bawk chuan, "Ka duh tawp, pa ka ti eee...a sam sei leh a dress khân an ti pa zual bawk." tiin a nui var var. "A nih chuan bawh zui vat rawh, i tlâi palh ang e." nui pah hian tlangvâl chuan a lo ti ve leh a, nula zak deuh chuan nui sakin a bânah a'n sik nawk a; rei tîtî lovin mipui veivâkte chu an thlîr zui leh ta a ni. Chutih laiin Sâwmfela pawh thawmhnaw zawrhna vêl chu a lo fang kual ve mêk a, a ding lama phei lehin a hawi ve zak zak mai. Thui lo tê a phei leh hnu chuan T-shirt nalh tak tak lo inkhai thluahna hi a hmu ta a; mipui kâra inzep phei nawk nawkin a pan zui zat. A thlen rual chuan T-shirt-te chu a en kual zung zung a, dâwr chhunga T-shirt pakhat an khai chuan a mit a la ta zar mai le! T-shirt dum bân tlâwn, a nghâwng bial lai taka kamis hma lam anga kak thla, a kuaa keptê ni lo, hrui hrual dumin chumi kak lai chu a thil tawn hi a ni a, chu ngei chu kâwkin a man zât a zawt zui bawk. MC tih takah rin aiin a to phian. A zuartu nula pawh a inthuam dân leh a hmêl chu mawi lo a ni hauh lo. Ha chhin tura a tih tâkah chuan Sâwmfela chuan a Jumper leh Jacket chu hlîpin a ha chhin ta a; dâwr chhûnga dârthlalang sei deuh hmaah chuan dingin a inen dik vêl a, chutia a inen lai chuan, "Awi! I inhmeh lutuk ringawt. I hâk tur liau liauva an siam a ni ngei ang. I taksain a zir bawk sia," nula chuan a lo ti nui sâng mai. Sâwmfela pawh chuan nui sâng a, "Ka inhmeh vak em maw ni le?" a lo tih chuan nula bawk chuan, "Umm...i inhmeh lutuk. Min dâwr la, ka la inhralh ve miah lo a nia," tiin a lo nui hak hak bawk a, Sâwmfela chuan, "Aw le, ti hian ka ha nghâl mai ang." tih leh pawisa phawrha pêk chu a rual a, T-shirt a ha chhuak lo bawk nên, tih tur pawimawh tak a nei bawk sia ken buai vêl kha buaithlâk a ti deuh ni ngei tur a ni. Nula chuan lâwm thute a hrilh mawlh mawlhin, "Takin a! Ṭhianpa, nangmah hi i ni em mi pathumin an sual rawn kha? I niin ka hre tlat." a lo ti leh. Sâwmfela chuan nui suka hawi lêt pah hian, "Ni lo e," tiin a kal zui leh nghâl a, nula chuan thlîr zui deuh vang vangin a nui sâng bawk. Eng nge a ngaihtuah tih erawh kei paw'n ka hre bîk tlat lo. "Ni tin min rawn dâwr mai teh la aw, Vâlmawi." tih kaihhnawih lam chu a nih ka ring.

Sâwmfela kal ta chu inhnawh puar turin Ground floor restaurant-ah chuan a ṭhu leh tawh a, mi dang châwlte pawh an awm ve nual bawk. MC bang hnaih deuha dawhkân ruakah chuan bang lam hawiin a ṭhu a, chow mein leh thingpui nên chuan ngawi rengin a bûr ngar ngar mai. Hetia bang lam a hawi chhan hi eng dang ni lovin, mi dang lo châwl ve-te'n an rawn en leh zuk zuk kha a hmuh peih tawh loh vâng a ni. A inpeih hnu chuan a ei mante pein a kal zui leh a, MC aṭanga a chhuak tur chu nula leh tlangvâl duty-te pawh khân an lo en deuh vang vang a, nula chuan nui sakin a duty-pui tlangvâl chu a va sik nasa mai mai tak! Chutia MC a chhuahsan hnu chuan Sâwmfela chuan thawveng huai hian a inhria a; chawhnu dâr 1 a pêl tawh bawk nên a tum ram lam panin a kal leh ta a ni. A kal pah chuan a beer lei chu hawngin a in pah bawk a, taxi ruaka lût zuiin a thil tum rûk chu tih hlawhtlin ngei a tum tih hriat tak hian, chu lam pan chuan an tlân chhuak ta zâl zâl a. Hetia a tum ram lam pana Sâwmfela a kal mêk lai hian, Aizâwl Police ṭhenkhatte leh Vairêngte Police ṭang kawp chuan dân lova damdawi rawn phurh luh tumte nên ramhnuaiah an lo inkâp ṭhuai ṭhuai tawh hi a ni. A tam zâwk leh mahni ram leh hnam, khaw mipuite tâna huaisen taka nawrtu Mizoram Police-te chuan an ûm zui zêl a, mi sual lam pawh mi 10 lai chu an kâp hlum dêr tawh. Chutih laiin Mizoram Police lam erawh vânneihthlâk taka nunna êm chân lo, mi 8-te chuan hliam na tak an tuar ve bawk a, a khawi lam ve ve pawh an him kim tawh tlat lo. Chu'ng mi sualte chuan an nunna humhim turin an motor leh damdawi an phurhte chu an tlânchhiatsan tawp mai a ni. Au lâwng lâwnga an ṭhiante fuih sauh sauh kâra silai puak leh ṭhuai ṭhuai ṭhîn te, na tuar han ṭê leh ṭhawt ṭhawt thâwmte chuan chu lai ngaw chhûng chu an luah khat nuaih tawh. Thing phên paha inkâp leh ṭhuai ṭhuai ṭhînin an thing inphennate pawh silai mu chuan a verh pawr chek chuk mai a, chu ngaw chhûnga sava chi hrang hrangte pawh chiar noh noha thlâwk darh fur furin hmun him lam an pan zui nal nal bawk. Mi sual lam hi mi 7 vêl an la dam ve bawk a, rin aia silai kah an thiam ve phian avângin Mizoram Police lam tân pawh tawngpawng zuam ngawt chi an ni tlat lo a ni. Chutih laiin nî a hniam zêl a, ngaw chhung phei chu a thim deuh ruih tawh. Tûnah chuan chawhnu dâr 2 a ri ve leh ta reng mai.

Khatia Sâwmfela kal ta khân sawisak rawn a nihna ngei Concrete building hlui chu thleng tawhin a han hawi kual vêl a, kal zui leh a tum lai takin a hnung lam aṭang a, "Kha zawn nei i va ang ve, anni kha hmuh i beisei em ni?" pa phanchang lam tawh hian a lo tih rual chuan a hawi lêt rang kher mai. Chu pa chu en vang vangin, "I hria em ni?" Sâwmfela chuan a'n ti lêt vat a, chu pa lian lêm lo, tê chhe lutuk lo chuan, "An hmêl chu hre lo e...mahse zirtâwp tlâiah hian an rawn kal ber ṭhîn a, vawiin tlâi pawh hian an rawn kal leh ka ring." Building hlui lam en pah hian a lo ti leh. "A ṭhat chu." Sâwmfela chuan lo ti sapin a piah deuha hnim leh pangpâr buk lam pan chu a rual zat. Chu pa bawk chuan, "Fîmkhur rawh aw tlangvâl," lo ti ve lehin a kalsan zui ta a nih kha. Ni e, he pa hi Sâwmfela thichhâwnga awm va hmu hmasa bertu kha a ni a, a In tukverh aṭanga building lam a rawn hawiin Sâwmfela a hmuh rual khân a thil tum âwm ang chu hre thiam maiin a rawn pan vat kha a ni. Chutia Sâwmfela a bihrûk hnu rei vak lovah motor ri cher cher chu a hre zui nghâl a, Concrete building hlui lam chu a en uluk ta kher mai. Minute 1 vêl lekah mi 10 vêl mask vuah chunga Building hlui lam pan chu a hmu ta mai rêng a; ngawi renga thlîr zui vang vangin a inseh ruh ṭalh ṭalh bawk. Chu'ng mite an lût fel ta tihah a tawmna aṭang chuan chhuakin, building kawngka sîr bang zâwnah a kal zui zat. Tlâi dâr 2:30 vêl a ni tawh bawk a, nî pawh a hniam deuh tawh avângin Concrete building hlui phei chu ni êngin a chhun pha tawh lo. Kawngka bul Sâwmfela'n a thlen rual chuan thâwm ngaithla hmasain a bih zui leh zat a, Building chhung lam pawh a thim deuh ruih mai. Chu'ng mite lah chuan zalen hmêl tak hian dispo-ah a mawi chi an lo thli sen ngiai ngiai a, tîtî barh barh zuiin an nui leh dar dar ṭhîn. An awmna hi building kawngka hlat lam room bang tlabal nuaih a nih avângin Sâwmfela pawh hian a hmu thei kha a ni. Chu Concrete building chu hlui deuh tawh mah se, a kawngkhâr erawh rin aiin a la ṭha a, an luh ruala an khâr loh dânah him tâwk viau-ah an inngai a ni ngei ang. An dispo ṭheuhte dawma an cheers hnu chuan an in zui khawlh khawlh a, chu veleh Sâwmfela chu ngawi rengin a lût ve ta a, kawngkhâr chu khârin a kalh ri rak zui. Sâwmfela kawngka khâr leh kalh rî an hriat rualin anni pawh chu an rawn hawi rang teh e. Kawngka zâwn bang hnaiha chhuak zui sap sapin pakhat chuan, "Tu nge i nih a?" a lo tih rualin Sâwmfela chu muang chângin a hawi lêt a, mask dum lei, a luh dâwna a vuah tâk chu hlîpin, "Min la hre hlawm ang chu maw?" a mitmenga nêlawmna hmuh tur awm lo hian a ti thâwp sap.

Anni-ho pawh chuan Sâwmfela hmêl an hmuh ruala meng rum nghâl râm chung hian, "Nang leh bawk maw ni a, dam hi i ning deuh tawh a ni maw?" tih te, "Nâ leh hrehawm tawrh leh i la kham lo a ni maw?" tihte leh deusawhna ṭawngkam hrang hrang nên an rawn pan zui ta ṭhâm ṭhâm mai le! Chutah Sâwmfela chuan, "Nuam ka tih zâwng tak!" vei nuih sak chunga tih leh pan a rual ve nghâl. Chu veleh pahnih chu râk ṭhawta rawn tlân pheiin a vei lama mi kuttum chu kûn zauha bum leh, a tiang lei thar a hûm rûk khiau chu hmeh dawk zawk a rual a, chu pa dula hlap pawpin a nâka tlawh a rual leh zat. Chumi rual chiaha pakhatin a rawn tlawh chu bum nâna vir zawkin a hnungah a hlapsak leh chawrh bawk. Mi dang rawn hual tumtute chu hnaih phei leh vatin, a ding lama mi pahnihte chu a hnaih chilh thut a, pakhatin a rawn hnek chu a bân vei lama indang pahin a khûpah a hlapsak zui leh chawrh. Rang zeta insiam rem pahin pakhat zâwk rawn che chhuak ve leh chu a tlawh thal ṭhuai a, mi palite chu rang taka hnaih leh nghâlin a che hmasa apiang chu ṭê ṭhawt ṭhawtin an indawm vawng vawng mai a ni. Mi pariatte chu vial ngawl ngawlin an indawm ṭhen vawng vawng a. A tlawh thlûk pa rawn tho leh chu a pan hnai leh, chu pa chuan hlauh hmêl zet hian a rawn hnek ve leh a, Sâwmfela chuan kûn zauhin chu pa dula hnek chawrh leh chung zâwnga a kiu tih ngîl at chu a rual a, chu pa a dul a hneksak ruala thaw kâwka rawn kûn chiah hnârah a kiu chuan a nghawk chawrh zui. Mi pahnih an hotupa ber leh a hmaa amah bumtu ngei maite lo insiam rem ve mêk chu ena nui sakin a pan leh nghâl a, amah bumtu zâwk chuan a ding lam aṭanga rawn tlawh paha hnek tumin a rawn che chhuak chiah, a ke lek chhuak tur tlawh lêtsak paha vir zawkin chu pa kuttum chu a kut vei lama bêng per pahin a hnungzângah a hlap leh ta siah mai. Chu pa pawh chu ṭê ṭhawta bawk titih nghâlin a eu ngâwng ngâwng zui. An hotupa erawh a che chhuak mai ngam lo nge phâwk deuh tak hian Sâwmfela chu a lo en ka hau mai a, chu chu Sâwmfela chuan melh zawkin, mi dang a khawih thlûk hmasakte rawn tho chhuak hmasa apiangte chu pan leha tlawh thal ṭhuai ṭhuaiin a tiang chuan a hlap thlep leh nawk nawk bawk a, tumah ding thei awm tawh lova an indawm vial ngawl ngawl chu a thlîr kual leh hnu-ah, a tiang chu zei fahrana a kut zungchal hmanga theh virin, a tiang hmawr lam chu a malpui ding lama sawhin a nawr lût leh zat. A Jacket iptê-a a ah leh hnu chuan an hotupa lam chu panin, "I hun a inṭan e, hmêlphak!" ti hmukin a hnaih phei nghâl. Chu veleh an hotupa chuan hmanrua a keng tawh lo bawka a ti nge; hnek thal tawp tumin a kuttum a rawn vai fua mai. Sâwmfela chu lo eu zawkin a ke ding lam chuan a thin zâwnah a pêt siah bawk. Chu pa na ti thaw hawka indawm kûn lai chu a hnaih phei leh nghâl a. Rûn dâlah ti ni âwm taka chu pain a rawn tlawh chu a sîr zâwnga inher paha lo bumin a ke rêkah a bânin a lo chep bet a, Sâwmfela chuan a ke vei lama chu pa inrah khalhna ke vei lam chu pêt ṭhuai leh a ṭhialpâwna ben pawp a'n rual mai chu(h)! Naupangchhia ang maia chu pa chu vir nawkin a tla thûm awk zui.

Sâwmfela thinrim laklawh tawh chuan chu pa luhai inthing nawk nawka rawn dâk chhuak leh chiah hmûi chilh rawkin a hnek zui leh chawrh. Chu pa lah chu khatia a tlâkna lamah khân a hnâr a lo tauh thî bawk si a, chhuata thisen per ṭhatin a zal zui ta a ni. Mi dangte chu a en kual leh nghâl a, anni erawh chêt thawh tum tawh lova an lo la indawm ṭhen sak sak a hmuh chuan a inthlah dul ve ta a; a kut thlâk a na bawka tiang a hmang bawk nên tumah han bei zui leh ngam an awm tlat lo a ni. Hmai thî sûngin an rawn thlîr reng ringawt a nih kha. Chutah Sâwmfela chuan, "Hei hi a tâwpna atâna in la duh lo a nih chuan...eng tik lai pawhin ka inpeih reng tih in hre dâwn nia. Ka chunga in chêt ang êm kha chuan ka che ve lo vang. Kha nî-a in chêt dân kha hmutu che u an awm reng tih in hre lo a ni ang maw? He lai hmunah hian in awm ṭhîn tih ka hriat theih dânah hian ringhlel buai duh suh u." aw nêlawm loh zet hian a'n ti dap dap a, anni erawh an ngawi reng ringawt. Chu veleh Sâwmfela chuan a sam ṭâwn chu phelhin, he'ng mite zu bottle bula beer pakhat chu a la a, phone pakhat chu la lehin tu phone nge tihte a zawh leh hnu chuan a lock-te a hawntîr hnu-ah, a nu no chu dial-in a hâw mêk thu a hrilh hmasa phawt a, chumi hnu-ah phone chu dah lehin ngawi rengin a kal zui leh, anniho chu vawi khat tê pawh a en lêt tawh lo. Building kawngkhâr a kalh chu hawngin a chhuak zui nghâl a, a sam chu a tukkhum lama tuai thuakin beer chu a hawng zui zat, vânvadâk vaha in pahin Taxi stand lam pan chuan a chho zui leh ta a ni. Chutia Taxi stand lam pana footpath a zawh chhoh lai chuan vai pakhat smart deuh mai hian a rawn pan hnai a, lehkha pawimawh leh thil dang eng eng emaw keng bâwr lûk chung hian sâp ṭawngin a lo be ta zawt zawt mai. A châng leh a thil ken laite chu kâwkin eng Company emaw ber chu join turin a lo sâwm ve a ni ngei ang. Sâwmfela pawh chu a lo bu ve nghat nghat bawk a, a duh aia a sawi rei phian avângin a ning deuh tawh chuan a kut lekin a lo khap vat. Chuta vaipa ṭawng tâwp rual chuan melh zawkin, "Sâp ṭawng ka thiam lo," ti nui sûngin a beer in pah chuan a kalsan zui leh ta a ni. Chu vaipa chuan mak tih hmêl taka thlîr zui vang vangin, "Awmjiaa am looo..." ti ni âwm takin lu a thing nar nar ringawt a nih kha. Nula ṭhenkhat bazâr paha lêng kual vêl rawn hâw mêkte chuan an en zui leh vang vang ṭhîn bawk a, taxi rawn tlânte leh khawi lai In emaw aṭanga Christmas hla Boney M-ho zai leh Mizo hla an play dup dupte chuan Sâwmfela beng erawh an luh lo teh e. He tlangvâl theihna leh nihna dik tak hi Zoram mipuite hian an la hre chho zêl dâwn chauh a ni si.

Chhunzawm leh tur

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:26 pm

THE CAVE MAN. 9
✍️ Duata Khualchhâwn.
BUNG 9-NA.
Christmas nî a lo inher chhuak a, chhûng tinte pawh an theih tâwpa In leh a bul vêl chei mawiin, an fanu an fapate thawmhnaw thar leh silai lem te, barbie leh toys chi hrang hrang nên an hlim dar dar hlawm kher mai. Kohhran tin an hlim a, ruai ṭheh mup mupin Biak In leh a chhehvêlahte chuan an phu mur mur bawk. Nula leh tlangvâl an tum ram lam pana Car leh Bike-a inphur kawi zawr zawrte lah chhiar fe tham an ni a; mi ṭhenkhatte In hrang hrang aṭanga Christmas hla sâp hla leh Mizo hla play dup dup te, hmun tin maia mipui tam fe inkal pêl zut zutte leh, motor chi hrang hrang tlân ri leh vung vung ṭhînte chuan Zâwlkhawpui chhûng chu an luah hneh hle. Hlim leh zalên takin Christmas chu an hmang zo va, Mizoram Police Department lamte pawh mutmu tuah ṭha hman lovin an buai hat hat teh e. Anni inpêkna leh thawh rimna vâng liau liau hian hunpui pawh buaina tâwk lovin an hmang thei a, mipui mimirte hriat loh buaina eng emaw tak thlengte chu a awm ve tho mahna le! Khawpui a zauvin mi chêng an tam bawk si a, Police-te tân pawha vil leh vên vek sên ni hek lo le! Khawi emaw laiah chuan ram tâna mi hnawksakte pawh an lo inphûm ru leh khiau tawh maithei a ni. Sâwmfela paw'n Christmas leh kum thar inkârah OPPO chêng 9000 chuang hlek a lei ve ta a nih kha. An inhriat tirh ata a tâna ṭhian ṭha nih tlin êm êm Puia-te ṭhianho lahin an thlahthlam ngai lo bawk a, a duh lo chung anni hian thawmhnaw thar Kamis bodyfit sen, a dung leh vâng zâwnga rawng dumin a ṭial nalh zet leh Smart pant dum mawi tak bâkah, sneaker nalh êm êmte leisakin, a nu Pi Mawizuali pawh thawmhnaw thar mawi leh ṭha tak tak an nu leh pate'n Sâwmfela chunga lâwm thu sawina ni pah fâwmin an leisak bawk. He'ng zawng zawngte hi anmahni pawisaa lei tur ni se an lei vek sêng lo tih an hre chiang bawk a, Sâwmfela-te nufa pawh an va lâwm teh rêng êm! Hun leh nî a ral zêla Kum thar pawh an hmang zo ve leh ta. Tûk khat Pi Mawizuali thlêng sil lai chu a âwm vei lam nâ dawmin chhuatah a tlu nawk mai a, Sâwmfela TV en chu rang zeta rawn hawiin a nu awm dân dik lo a hmuh rual ruala meng kâwk chung hian, "Ka nu," tih ṭhawt leh tlân phei a rual zat. A nu chu dawm pahin, "Ka nu, engati nge? I eng lai nge nâ? Mawwhhh...i eng nge nâ ka nu?" tiin a be mawlh mawlh zui. Chutah pi Mawizuali chuan a âwm vei lam chu dawma ṭhen sak sak pah hian, "Mâma," tih chauh a sawi thei, a mittui parawl fîm ralhte chuan a na thawkhat hle tih an ti chiang viau a ni. Sâwmfela chuan hetiang ringawt chu a dik dâwn lo tih hriain a nu chu ṭhutthlengsei lamah chawi pheiin a muttîr a, a cotton jeans hain a sneaker thar ngei kha a bun sawk sawk a, a T-shirt lei thar kha ha lehin a inpeih hnu-ah a nu chu puain kawngpui lam panin a chhohpui hlawk hlawk nghâl a.
Chutia Sâwmfela'n hmanhmawh taka a nu paw chunga a chhohpui hlawk hlawk chu lo hmutute paw'n an rawn pan zui sap sap. Kawngpui an chhuah chhoh rual chuan mi ṭhenkhatte chuan chanchin an lo zâwt zung zung a, Sâwmfela'n a hriat ang ang a hrilh hnu chuan piah deuha car sen chu pa pakhat hian a rawn khalh phei vat. Car-ah chuan a nu chu an dah lût a, Sâwmfela paw'n chuanpui ve nghâlin sênso a zia deuh beiseina nên Civil Hospital bawk an panpui leh ta a ni. Kawng lakah rei tâng lovin an tlân zêl a, a nu mitchhîng reng chu Sâwmfela chuan a be pah reng bawk. Tûkṭhuan ei kham dâr 10:30 vêlah damdawi in chu an thleng ve leh ta. Car khalhtupa chu chhuak vatin chanchin a va hrilh a, rang zetin nurse duty-te pawh stretcher nên an rawn thleng ve leh. Sâwmfela nu chu dîm têa nghatin ICU lam panin an nawr phei nghâl a. An nawr thlen hnu chuan nurse pakhat chuan Sâwmfela chu pâwna lo nghâk turin a hrilh a, ani pawh thu awih taka ICU kawngka bulah chuan dingin a awm dânah erawh a rilru a hah hle tih a hriat. Ṭhutthlêngah chuan muangchânga ṭhuin damdawi in chhuat chu a melh tlawk tlawk ringawt a, thil tam tak ngaihtuahin a nu nêna an hun hman tâk te, hlim taka a nu nui hmêlte leh kha'ng kum tam an lo hman dun tawhte kha nimin lawka thil thleng ang maiin a mitthlaah an rawn lang chuai chuai mai a ni. Tûkṭhuan an bâr laite leh tûna a nu din hmunte a ngaihtuah kai leh meuh chuan, mi sehhel leh luhlul Malsâwmfela meuh pawh a biangah mittui a rawn luang thla ngiai ngiai mai. A kut pahniha a chal dawmin a ṭhu kun tlawk tlawk a, a mittui farte chu chhuatah a tling piau bawk; a hlauhthâwn luat vânga a lung phu ri dup dupte chu a tân a ring tâwk viau a ni. A châng leh ding hluaiin a mittui chu a'n hru zauh a, rilru hah takin a tei kual chhên a, a chângin ICU kawngkhârte chu a melh leh vang vang ṭhîn. Chutia rilru hah taka a din hnu rei vak lovah Doctor(mipa) leh nurse 3-te an rawn chhuak a, chanchin a lo zâwt vat. Doctor chuan a room-a zui lût tura a hrilh tâkah chuan a zui ta a; an luh fel hnu chuan, "Tlangvâl, i nu chungchâng hi tlang takin ka hrilh dâwn che a; i rilru erawh siam rem thiam turin ka ngên hmasa che a ni." a tih chuan Sâwmfela chu a lo bu nghat nghat. Chu veleh doctor chuan a tarmit chu dah leh tê têin, "Chanchin sawi nuam a ni hauh lo. I nu hi a chuap vei lam a cancer a, tûnah hian a ṭai darh nasa tawh bawk si-a rei a dam chu a beiseiawm loh khawp mai. Chutih rualin theih tâwp kan chhuah ang a, kan theih chen chen chu a nunna hi pawh seisak kan tum dâwn a ni. Beidawng lo la, kan chunga thil thleng hi kan pawm thiam a ṭûl chângte a awm ve ṭhîn a nia, rei lo têah i nu chu i hmu thei ang." a tih dap dap hnu chuan Sâwmfela chu ngawi rênga dingin a chhuak zui ta a ni.
A ni lah tak a! Vawi tam Pi Mawizuali hian a âwm rawn na leh ngawih ngawih ṭhîn kha sawi chhuak duh lovin a lo tuar reh ve leh mai ṭhîn a, Sâwmfela sawisak rawn a nih hma aṭang daih tawh khân inrinhlelhna nei tawhin, a fapa hian a hriat a duh loh avângin a rûkin a lo tuar tlawk tlawk ṭhîn kha a ni. Tûnah chuan zêp rual lohvin chu a natna chuan a hneh tial tial a, tûn din hmun thleng hi a ni chiah bawk. Nu-te hi an tuar a lo va chhel thei êm; he a natna hi a lakah a nuin a zêp tih Sâwmfela hian hria se engtin tak ngai ang maw? Hetih laiin mipuite erawh thlamuang taka lêngin an tum ram an pan sang sang a, lîrthei veivâk tam takte nên chuan hmuhnawm an nih ṭhin vei nên, chu'ngte chuan Sâwmfela mit leh rilru an la thei tawh lo va, chu Zâwlkhawpui chu a tâna hmun hrehawm leh rilru hahna hmun mai a chang zo ta. ICU-ah chuan lûtin natna khuma a nu ventilator nêna lo muhil thaw sêk sêk chu a pan hnai a, doctor thu sawite kha hre chhuak nawn awn awnin a mittui a tling piau bawk. Khum bula ṭhutnaah chuan ṭhuin a nu kut chu a dawm vang vang a, tih theih dang nei ta lo chu a ngaihtuahna a kal thui khawp mai. Chutia ngawi renga a nu a en tlawk tlawk lai chuan Reuben-a a rawn lût ve a, Sâwmfela dârah chuan ngawi rengin a va vawnsak ringawt, ani paw'n hnem vak ngaihna a hre bîk tlat lo a ni. Sâwmfela chuan a mittui hru zauhin a han hawi lêt a, khawngaih hmêl taka Reuben-a'n a lo en reng chu, "E...i lo kal a ni maw Reuben." a tih rual chuan, "Kan zavaiin kan rawn kal, ti teh, pâwnah chhuak lawk ang hmiang." Reuben-a'n a lo tih tâkah chuan an inzui chhuak ta a; an ṭhian dangte paw'n hmêl hlim chu pu ve bawk mah se, an mitmengah erawh Sâwmfela chu an tawrhpui hle tih a hmuh theih. Engtin nge damdawi in-a an awm thu hi an hriat tih Sâwmfela chuan a zâwt hlawm a, Puia chuan, "February thla tîr lam hian Bangalore-ah kan kal leh dâwn tawh sia, chumi hma chuan farewell programme-te siam ve ila kan tia, a hun leh nî vêl hrilh tur chein kan rawn kala in ṭhenawmte'n in chanchin hi min hrilh ta a ni. A pawi ka ti hle mai ka ṭhian. Tih theih kan nei bîk si lo va," hrehawm tih hmêl taka a tih chuan, "Thil tam tak min tihsak tawh alâwm, inthlahrung rêng rêng suh u. Ka harsat mangan apiangin ka bulah in awm ṭhîna ka lâwm tak zet." Sâwmfela chuan a ti ve leh a, "Kan nunna min chhan himsak kha ngaihtuah chuan eng tham mah tih kan nei lo, eng tikah mah kan rûl sêng lo ang che." Kima'n lo ti ve lehin mi dangte pawh chuan an lo tuihnih sap sap bawk. "Kan thawhhona vâng liau liau a ni, nangni anga ṭhian ṭha hi ka tawng leh tawh ngai lo vang." nui sâng hian a'n ti a, a chhung lamah erawh hnawhtu a awm tih a aw aṭang chuan a hriat theih thung. Tichuan, a nu chu a dam ṭhat leh ngei an rin thute sawiin an hnêm zui sap sap a, chumi nî chu nilêngin damdawi inah chuan an awmpui ve ta a nih kha.
Zân a lo ni a, vân a thiangin thla de tîr seki reihte leh arsî eng farte paw'n vân an mawi leh ṭhap tawh. Aizâwl khawpui thlang lam ramhnuaia mi hausa thlâm tih hriat reng reng; concrete chhûngah chuan mi 10 vêl hi khunkhân takin an lo tîtî ve mêk a, pakhat chuan, "Sir, tûn atân chuan damdawi hmanga chêt thawh ngam a ni rih lo ka ti deuh. Police lam an duty ngawrh bawk si a, nikumah pawh Vairêngte piah ramhnuaiah kan mite leh Mizoram Police-te an inkah nghe nghe kha! An kah hlum bâk kha mi 3 an man a, khata ṭang phei kha chuan an fîmkhur sâwt tawh khawp mai. Engtia hma lâk leh chi nge ni ang?" a'n ti dap dap a, Mizo tlangvâl ngei tih pawh a hriat viau. Chutah an hotupa pa tawi lam dul kiar zet polar haa puan lum bât bawk chuan, "Ni e, a dik khawp mai. Tûn atân chuan pawisa tam tham deuh hmuhna tur chu pakhat chauh kan nei rih. Chumi kan tih hlawhtlin theih chuan kawng dang chu a kaw ve leh mai turah ngai ila, hlawh kha chu in thawh ṭhat dân azir a ni mai." a lo tih chuan, "A nih chuan chu kawng khat chu eng nge ni?" Mizo tlangvâl bawk chuan a lo ti vat. An hotupa chuan a naute chu en kual den denin, "Nikuma in ṭhian pangate hlawhchhamna leh nun an chân phahna kha han ngaihtuah teh u." a lo ti ve leh. Anni-ho chuan rei pawh ngaihtuah lovin, "Minister fanu," ṭhenkhat chuan an lo ti sap. "Ni chiah e, chu bâk kawng dang a awm rih lo. Phaia awm ṭhîn a ni a, tûnah hian an kal leh ṭêp tawhin ka ring. Tin, tûnlai tak hi khawpui a râlmuan lai a ni a, Police lam pawh khaw chhungah chuan an inthlahdah deuh lai a ni bawk. Ram pâwn lam pawh vên himna an uluk tawh êm êm a; a kal leh hma ngeiin keini'n rûk chhuah kan tum dâwn a ni. Chuan, kan hmunpui berah khân kan hruai ang a, chuta ṭang chuan tlanna sum chu kan ngiat tawh mai dâwn a ni. In hre chiang em?" a tih leh hnu chuan an lo bu nghat nghat a, Rei lo têah Aizâwl lam panin an tlân chhuak zui ta a ni. Heti a nih mêk lai hian Sâwmfela pawh a nu mutna khum bulah ngawi rengin a ṭhu a, ventilator kiu chût chût bâk thâwm bengchheng a awm hauh lo. A ṭhiante an awm rih lo bawk nên a nu kut chu vuanin a'n melh vang vang a. Chutah, "Ka nu, i dam ṭhat lai leh i hrisêl lai kha'ng hun zawng zawnga ka hmangaih thu ka hrilh loh che avâng khân min ngaidam rawh aw." tiin a mittui a luang zawih zawih a, an nufaa hun an hman liam tâkte kha ngaihtuah lêt lehin, "Ka nu, fahrah ni turin hetiang ringawt hi chuan min kalsan thei lo vang. Mahse, ka pa nên hlim taka in intawng leh tur erawh ka lawmpui che a; ka thîk khawp mai che. Tûnah rih chuan ka la mamawh che asin." tiin bengchhen hlau tak hian a ṭap zui hak hak a, mi sehhel takte pawh hi nute thih hlauhawma an awm meuh chuan an pachang thei bîk lo chu a nih hi maw! Chutianga a nu kut vuana a mittui a hru leh zauh ṭhîn chu ICU kawngka dârthlalang aṭangin Emmy'n mittui tling piauvin a lo thlîr ve reng tawh hi a ni. Puia-te erawh ṭhutthlêngah ṭhuin chanchin an lo ngaihven ve bawk a; zân dâr 9 pawh a hnai leh tawh kher mai.
Rei lo têah a nu check up tura Doctor leh nurse-te an lo luh tâkah chuan Sâwmfela pawh a chhuak zui nghâl a, pâwna a ṭhiante lo ṭhu reng a hmuh rual chuan hlim lui tih hriat tak hian a'n be nui sâng a, anni paw'n awka zâng vaha lo chhâng vein ei tur an leisakte chu an pe bawk a, an mitmeng leh hmêlah erawh Sâwmfela an khawngaihzia pawh hmuh theihin a chiang hle. Doctor leh nurse-te rawn chhuah hnu chuan chanchinte an han zâwt a, an rilru hah lutuk tur tih zia nân Doctor chuan a ṭhat deuh thu hrilhin an kal zui leh. An kal hnu chuan anni ṭhianho pawh eng eng emaw sawiin an tîtî leh rih a, Sâwmfela kha kawrlum pawh ha lova chhuak a nih avâng khân Emmy chuan kawrlum fual dum nalh zet a leisak chu pein, "Kha hei hi ha rawh, khua a la vawt si-a i hritlâng palh ang." tiin a kuta hmeh bel a rual zat. Sâwmfela chuan, "A thar a ni maw? Thawmhnaw thar min leisak ṭeuh tawh kha, hei chu ka la thei lo vang." inthlahrung tak hian a'n ti a, an hnawn luih tâk tlat avâng leh Emmy'n hâktîr ṭâlh a tum zui bawk nên ani paw'n ṭang buai lovin lâwm takin a ha zui ta a ni. Emmy chuan hoodie pâwl(blue) nalh zet hain muffler dum a bât bawk a, kekawr dum chhah lam a hâkte leh Versace nalh zet a bunte bâkah, a sam a koki chung deuh thleng a tan te, a tukkhum sam aia a bek sam sei deuha a tan âwnte chu a inhmeh kher mai. Amah nula hmêlchhia a ni lo bawk a, Katy perry chiah chiah kha a ni hawt e!
Zân pawh a rei ve leh ta, Puia-te ṭhianho pawh an la awm ṭhap a, Sâwmfela erawh a nu bulah ṭhu leh tawhin a nu eng mah hre lova muhîl reng chu a melh leh vang vang ṭhîn. A nu kut chu a chala siin a ṭhu kun nghiai mai a, chutia a ṭhut kun reng lai chuan a nu chu rawn thaw kâwk kâwkin a âwm a rawn sêp dâwrh dâwrh mai. Chu veleh, "Ka nu," ti ṭhawtin a ko zui mawlh mawlh nghâl a, a thâwmah a ṭhiante pawh an rawn tlân lût vat. Thil awmzia an hriat rual chuan Doctor leh nurse-te ko turin Puia chu a chhuak leh nghâl a, rei vak lovah Doctor leh nurse-te pawh an rawn thleng e. Sâwmfela ṭap deuh pûr chu a ṭhiante chuan an kuah chhuak a, a nu lah a thaw a zâwi tial tial tawh mai si. Doctor leh nurse-te'n a nu an buaipui vêl chu ICU kawngkhâr dârthlalang aṭangin Sâwmfela chuan hlauthâwng tak hian a thlîr reng a, a ṭhiante paw'n han hnem leh ngaihna an hre tawh tlat lo. Chutia Doctor leh nurse-te'n a nu an bâwihsâwm mawlh mawlh lai chuan ventilator chu "tût" tiin ngîl tak hian a khamphei ta vah mai. Chutah zet chuan tih theih an nei ta lo. Doctor chuan lu thing nar nar chungin Sâwmfela nu chu puanin a khuh ta a; chu'ng thil hmu ve rengtu Sâwmfela chu muangchânga lûtin a mittui a luang zawih zawih bawk. A nu mutna khum bul a va thlen chuan an khuhna puan chu a han keu a, meng leh tawh ngai lo tura a nu maimitchhîng chu en tlawk tlawkin, "Ka nuuu," tih leh kuah thlawp a rual a, râwl tâwp chhuahin a ṭap ta hawm hawm mai. A ṭhiante paw'n mittui an hru âwl lo va, Emmy phei chu rawmawlin a inhup khûr ngar ngar mai a ni. Rei lo te hnu-ah a nu ruang chu nawr chhuakin ambulance-ah an dah lût a, an khaw hluia a pa thlân kianga zalh ngei turin an tlânchhuak zui ta a ni.
Hun a liam zêl a, tûnah chuan Sâwmfela nu thih aṭang paw'n chawlhkâr khat a liam ve leh ta. January thla pawh an hmang zo chu a ni mai e. A ṭhiante'n hun âwl an neih apiangin an lêng fo ṭhîn bawk a, Sâwmfela pawh khawhar lutuk lovin an In luahah chuan a khawsak chhunzawm ve zêl. An In luah chhunga a nu sûlhnute a thlîr kual chet chet châng chuan a mittui pawh a tla leh fo ṭhîn. Ni khat chu amah chauha Ina a awm laiin Emmy pa Pu Zothansanga a rawn lût hlawl mai a, Sâwmfela paw'n ṭha taka lo biain an tîtî zui ta a ni. Emmy pa chuan, "Sâwma, i nu i chân ta hi ka tawrhpui tak zet che a; ka nu ka chân ve tho avângin i nat dân tur chu ka hre thiam e. Thil dang tihsak theih che chu ka nei hauh lo. Mahse, kan hun tawng thlîr hian tûnlai phei chu hei, ni khatah ruang pathum laite an hmu ṭan leh dêr tawh a, hmeichhia deuh zêl an ni leh nghâl. Chuvâng chuan i tâna hna hahthlâk lêm loh ṭha tak pêk che ka duh a, nang lo chu rin ngam leh rin tlâk ka nei lo bawk. Amaherawhchu, hun tawngin a zir loh chuan i nunna atân pawh a pawi thei ve thung tih erawh ka'n sawi tlang law law a ni. Bawihi hi a pute school-ah thawkin ni tin deuhthaw a chhuah a ngai ṭhîn si a; a himna tur ka ngaihtuah a, nang hian vên him hna min thawhsak ta che. Tûna thutlûkna i siam thei lo a nih pawhin ka ngai châng thei che a nia, mahse, a hma lamin ni thei se a lâwmawm viau ang." a'n ti dap dap a, a biak pawhna tur contact no a pe pah bawk. Chutiang a nih tâkah chuan Sâwmfela pawh a inngaihtuah nasa kher mai. Chanchin thar a thlîr chânga Aizâwl khawpui chhunga thil thlengte leh, ram pâwna Mizo nula ṭhenkhat pâwng suala thah an nih thute kha a hriain a hmu ve vek si a; a bîk takin ram pâwna Mizo nula ngei râwng taka thah an ni tih a hmuh khân a thinrim ru ṭeuh ṭhîn a nih kha. Chutah a thutlûkna chu a hrilh tur thute sawia rei lo tê an tîtî leh hnu-ah Emmy pa pawh chu a chhuak ve leh ta a ni. Nî her liamin zân a lo ni a, thlasik lai a la ni bawk nên khua a thim hma bawk a, zân dâr 6:30 vêlah Sâwmfela pawh Ina tawm reng chu ninawm a ti deuh nge; tei chhuak turin a insiam mawlh mawlh mai. A sam chu ṭâwnin a T-shirt dum ban tlâwn pakhat, Police station a kal dâwna a hâk tâk kha a ha a, a chunga Emmy'n kawrlum lukhum awm a leisak ngei a dum fual kha hain Cargo kekawr dum a hâkte bâkah, sneaker dum a lei thar a bunte chu a inhmeh leh hle. A insiam zawh hnu chuan kawngkhâr kalhin kawngpui lam panin a chho zui zat.
Kawngpui a han thlen chuan vâna thla de tîr seki leh arsite chu a thlîr kual leh veng veng a, eng tak chu ngaihtuah ang maw? Rei lo te hnu-ah Taxi hman tur zawng pahin Aizâwl khawpui chhung lam pan chuan a kal zui leh ta a ni. Thui pawh a kal hmain a hma lawka dâwr bungrua leh a neitute rawn dah fel Taxi lêt leh tur a hmu ta hlauh. Chutah chuan chuang ve nghâlin an tlân zui leh nghâl a, chutia an tlân lai chuan Reuben-a'n rawn call-in a lên chhuah thute a hrilh hnu-ah phone chu a dah leh mai bawk. Aizâwl khawpui chhung an lût thûk zêl a, motor leh mihring veivâk pawh an lo tam leh tawh hle. A kal khât deuhna lam pana kal turin driver chu a hrilh a, an tlân zui leh par par. An hmaa dâwr lian ve tâwk tak bulah chuan a chhuk ta a; fare a pêk fel hnu chuan dâwrah lût zui nghâlin beer leh sikret a lei hnu-ah kein a hma lam footpath-ah chuan a kal zui leh ta a ni. Chutih lai chuan, han en reng reng pawha office lian ṭha tak tih hriat zet hmu pha tâwk vêl kawng sîr thim deuh laia ding, Bolero dum chhungah mi 5-te chuan mi chân an nei tih hriat tak hian chu office lam chu an thlîr ṭhap a, an hmêl aṭang chuan vai an ni tih a hriat mai. Zân dâr 8 a pêl âwrh tihah pa pakhat kawrlum uk leh Smart pant ha, pa sâng lam dul kiar deuh, smart shoe tle ṭha ver vawr bun hi office aṭang chuan a rawn chhuak a, chu veleh Bolero dum chu a lam panin a rawn tlân zui bawk. Khua a vawh deuh vâng nge mi veivâk an tam lêm lo va, an reh lai tak a ni leh nghâl. Chu pain office piah deuha a car vâr lam a pan lai chuan Bolero dum chu a bul a rawn tlân thleng hman ta tlat. Chu pa hnaih deuhah chuan ding chatin mi pathum mask vuah hi rang zetin Bolero aṭang chuan an rawn chhuak a, chu pa a car-a luh tum mêk chu va man thutin Bolero lamah chuan an pawt phei rawk rawk zui. Pakhatin a kâ a hup tlat avângin a au chhuak thei si lo, theih tâwp tak meuh meuhin ṭan khawh ve mah se anni pathum chuan an hnûk hneh ang reng viau tho mai. Piah deuha hmeichhia leh mipa tleirâwl rual lo ṭhu khâwmte chuan, "Khaaa mi sualin man an tum a niaaa," an lo ti leh phei chu chu'ng mite chu an hmanhmawh zual sauh.
Sâwmfela rawn phei ve mêkin a rawn hmuh rual chuan, "Hei," tih ṭhawt leh tlân phei a rual nghâl a, an mi man pa an nawr lût mêk tihah mi sual pahnih Bolero-a luh tumte chu va nangching hmanin an kawr hnunga ṭhâm leh phih lêt a rual zat. Chu'ng mi pahnihte lah chuan an mi man pa kha nawr lût ṭha hman hek lo; a chhûnga chuangte'n an rawn pawt tur chiah kha a mantute tlu tur chuan an man ngheh luatah an lo pawt lêt hlek. Chu veleh bolero-a chuang pakhat chuan chemte tawi deuh hian an mi man pa nâk nêm ding lamah a rawn vit hman ta tho mai. Chu pa ṭê ṭhata a nâk nêm dawm chunga kawnga sîr tlûk lai chu Sâwmfela'n a lo hmu leh, mi pahnih a phih thlûkte chu vawi hnih khat ve ve bâk a khawih hman âwm lo ve. An thâwm hriaa mi dang an rawn pun khâwm tâkah chuan mi sualte chu hmanhmawh takin an tlânchhe ta a ni. Sâwmfela chuan, "Taxi ko rawh u." a tih rual deuhthawin rawn pung khâwmte zînga tlangvâl pakhat chu piah deuha a taxi nên a rawn inkhalh phei leh vat. Taxi-ah chuan hlângin an awmna aṭanga Hospital hnai ber, Greenwood hospital panin an tlânpui ta nghâl a, Sâwmfela chuan chu pa thisen chhuak chu dawmpuiin, "Ka pu, i harh em?" tiin a be pah mawlh mawlh bawk. Rei vak lo an tlân hnu chuan Greenwood hospital chu an thleng ta e. Taxi driver leh Sâwmfela chuan hmanhmawh takin an zâwn chhuak a, piah deuha dam lo kantu lo ṭhu chhuakte'n an hmuh rualin an rawn zâwnpui ve vat. Nurse duty-te pawhin an hmuh rualin stretcher nên an rawn thleng ve leh tawh a, chu pa chu nawrin an liam zui ta a ni.
He officer hi Aizâwl pa challang tak hausa bawk si a ni a, nurse-te paw'n an lo hre chiang bawka a chhungte an call vat. Zân dâr 9 a pelh hnu rei vak lovah a nupui leh fanu pawh Greenwood Hospital-ah chuan an rawn thleng ve chiah a, nurse duty-te'n a awmna room an hrilh hnu chuan hmanhmawh taka kal nghâlin, ṭhutthlêngah ṭhuin chanchin an ngaihven zui zat. An ṭhut aṭanga rei vak lovah Doctor leh nurse-te an rawn chhuak a, chanchin an zawh chuan hlauhthâwn tur a awm loh thute hrilhin an kal zui leh. Chutia an pa mutna khum bula mittui parawl râma an ṭhut lai chuan a fanu nula hmêlchhe lo tak, hleitling ve tâwk tak chu harh chhuak thutin nurse duty-te awmna lamah a kal nghâl a, a pa chu tuin nge rawn hruai tih a zawh hnu chuan nurse pakhat chuan, "A hming dik tak a sawi duh lo va, ani pawh la awm rih turin kan hrilh kha; ka'n ko ang e." tih leh Sâwmfela zawng chuan Damdawi In bul vêl chu a en kual zung zung a, piah deuha Damdawi In hnung chhawna ding Sâwmfela chu, "Ṭhianpa, lo kal teh le." a tih rualin Sâwmfela pawh a rawn hawi vat a, a rawn phei zui ve leh. Chuta nulain a pa Damdawi Ina hruaitu tlangvâl a hmuh rual chuan meng deuh kâwkin, "Sâwmfel, nangmah maw?" a lo ti sap. He nula hi Angela Remruatkimi kha a ni. Sâwmfela paw'n mak tih hmêl deuh tak hian, "Kha kha i pa a lo ni maw Angel? Eng nge tûnah a din hmun le?" a tih chuan nurse-te chuan a ngaihtuahawm loh thu lo hrilh vatin, "In inhria a ni maw? Engtin nge in lo inhriat a?" tiin nurse pakhat chuan a lo zâwt ve leh a, Angel-i chuan MC kawta Sâwmfela chêt dânte nên khân sawi vekin nurse-te paw'n Sâwmfela chu an en dân a dang ta deuh, an hmuh tawh hnu ang kha an ti rêng bawk a. Chutah Sâwmfela chuan, "Ka kal phawt ang e Angel. I pa chu a dam ṭhat leh vat ka beisei," tih leh kal a rual a, Angel-i chuan thui lo tê zui vein, "Ka lâwm tak zet aw Sâwmfel. Ka pa nunna i chhan him a ni. Kan chhungkaw zahawmna zawng zawng nên," ti sapin Sâwmfela chu a mitmu dum bial ṭha kelh kawlh, mittuiin a pawlh fîm ralh chuan a'n en vang vang a, Sâwmfela chuan, "Lâwm thu sawi a ngai lo a nia, kei pawh ka lâwm, nih mangṭha mut tui." nui sânga tiin Taxi stand lam panin a kal zui ta a; Angel-i chuan thlîr zui vang vangin a nui sâng bawk, Sâwmfela liam hnu chuan Damdawi In lam panin a kal ve leh ta a nih kha. Ni hnih a liam leh hnu zan khat chu Sâwmfela lêng hâw lam chuan, kawng sîra mipui lo bial luih maite a hmuh rualin a pan zui vat a, mipui kâra inzep phei nghâlin chuta a thil hmuh chuan a ti thinrim kher mai. Putar kum 70 vêl tur chem hnuhma tih hriat êm êm; a hrawk kau hawka lo let reng chu inseh ruh ṭalh ṭalh hian a thlîr a, putar lakah pawh chêt an thawh zui duh ta mai chu Sâwmfela pawh a inhûm ruh ngat ngat, rei erawh awm lovin a hâw zui leh. In a thlen hnu chuan Emmy pa chu call-in, "Ka pu, ka hna thar zawm tur chuan ka inpeih tawh e." tiin rei lo tê an inbiak hnu-ah phone chu a dah leh a, a nu thlalâk banga a târ chu a en leh vang vang hnu-ah bedroom-ah a lût zui ta a ni.
Tichuan, ni a liam zêla February thla zahve an chuang kai ve leh ta. Minister fanu an man thei mai lo leh hun remchâng an nei thei hlek lo chu mi sual lamte pawh an thinrim tawh tak zet. An thinrim hrîkthlâk nân a remchâng apiang manin an that a, ṭhenkhat phei chu an sawisa nasa thei hle. Chu achhapah an target ber Minister fanu lah bodyguard a lo nei hman bawk si; an hmuh theih chin aṭanga thlîrin an inseh ruh ṭawlh ṭawlh a, hun remchâng an nei hlauh a nih chuan bawh pelh an tum lo khawp ang le. Khatia an thinrim chêt thawhna râwng takte avâng khân Police lam pawh an buai khawp mai a, ram pâwn aṭanga damdawi rawn phurh luh tumte pawh vên an hautak tawh nâka laiin, Aizâwl khawpui chhung ngeia tualthahna leh a khât mawi tâwka hmeichhe bo leh ṭhînte chhui zui nên phei chuan buai tak an ni ringawt. Vêng hrang hranga an fanu ruang lo ṭahpui hawm hawm te, mipuite fîmkhur tura vêng tin au rinna hmanga au dup dup ṭhîn te bâkah, lungngaihna thim chhah êm êm mai chuan Aizâwl khawpui chu an luah khat a, City Bus pawh ṭum dang ang lo takin an thâwl tawh hle. Taxi service-te pawh duh thu sâm passenger an neih theih tâk lohvah chuan an hlâwk tawh lo ti ila kan sawi sual âwm lo ve. Mipui an tawmim duak a, hna ṭûl vânga chhuakte tih loh mipui zalên taka insûlpêl zut zut ṭhînte pawh an tlêm sâwt ta viau. Chutiang chuan hrehawm takin hun leh nî an hmang liam ve zêl a, March thla an thleng leh dâwn ta reng mai. A ngai têin thawhṭannî a lo inher chhuak a, tûkṭhuan ei khamah Pu Zothansanga chuan Sâwmfela hnênah, "Sâwma, hei kan hun tawng hi kian a hnêkin a zual tulh tulh mai a, tûnah pawh hian enthlâk kan lo ni ve reng tawhin ka ring. Chuvâng chuan i mawhphurhna hi a sâng zual sauh dâwn a ni. Ka fanu chauh hi him turin ka duh lo va, nang pawh him reng la, in pahniha himna hi ka duh ber chu a ni. Eng lai pawha biak mai theih turin i phone kha i hlatah dah ngai suh ang che." a'n ti dap dap a,
Sâwmfela pawh lo bu nghat nghatin, "Aw le ka pu, theih tâwp ka chhuah ang." ti vein Kamis dum bân bûl, security-te uniform ang deuh leh kekawr dum an leisak a hâkte nên chuan a inpeih at tawh. Chutih lai chuan Emmy school tur insiam zo pawh a rawn chhuk ve mêk a, a inchei dân chu simple deuh mah se a inhmeh khawp mai. T-shirt pink leh kekawr dum tight ṭha tak hain Versace nalh zet hi a bun a, a sam tan lah a taksa chum deuhte nên chuan a inchawih bawk si; make up a uar lêm lo bawka a inhnawih mawi tâwk ṭhîn viau bawk. Emmy chuan nui sâng hian, "Sâwmfel ka hman e." tiin a nu leh pate'n fîmkhur tura an chah hnu-ah an chhuak zui ta a ni. Garage an thlen chuan remote te tak tê ni âwm tak hi Emmy chuan garage lam hawiin a'n hmet ri kauh a, an garage khârna chu chung lamah a tawlh chho riai riai zui. Car vâr nalh zet chhungah chuan lût nghâlin Emmy chuan a khalh chhuak nghâl a, Sâwmfela'n a la khalh thiam ṭha lo bawka Emmy hian a khalh mai ṭhîn a ni. Zîng dâr 9:30 a ni a, chutia Emmy leh Sâwmfela school lam pana an inkhalh chhuak chu kawngpui an thlen hnu rei lo têah tu tih hriat loh mi 5-te chuan Car dum, a hma lam glass tih loh dum hlang vek hian an ûm zui ve zêl a.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:26 pm

THE CAVE MAN.

✍️ Duata Khualchhâwn.

BUNG 10-NA.

Emmy leh Sâwmfela chu school lam panin an tlân zêl a, Emmy lah nula ṭawng duh ve tak a ni bawk nên, a pute school-a naupangho chanchin nuihzatthlâkte sawiin a tîtî nui var var mai a, hetia Sâwmfela a kianga a awm hi nuam a tiin a thla pawh a muang hle tih a hriat bawk. Rei vak lo an tlân hnu chuan kawngpui aṭangin one way-ah an pêng a, an hma lawka school building lian ṭha zet chu an thleng zui a ni mai e. School gate chhungah Emmy chuan car chu khalh lûtin a park fel a, Sâwmfela pawh office-a kal ve tura a hrilh leh hnu chuan an inzui leh. Naupangho lah chuan, "Good morning miss. I va'n chhe lo êm êm; eehhh i bialpa a ni maw?" rawn ti nui var varin Sâwmfela chu an melh leh ha ha ṭhîn. A pute school hi Primary aṭanga pawl 12 thleng awm a ni a, School hma lamah chuan lian takin "Brandon Memorial English School" tih a lo inziak kuau a, a pu fapa upa ber boral ta hriat reng nâna an din a lo ni. Middle chin hi hostel an siam bawk a, School campus-ah phei chuan Mizo ṭawng hman an phal lo bawk. Mahse, he'ng Primary zirlaite lakah hi chuan school rules and regulations hian awmzia a nei lo ṭhîn khawp mai. Zirtîrtute paw'n hriat thiam chin chu han nei ve bawk mah se, an In kawt khawsaka an khawsa leh ṭhîn erawh a buaithlâk lam chu a ni e. Chutia Emmy leh Sâwmfela office-a an luh rual chuan zirtîrtu dangte paw'n lo be bawrh bawrhin Sâwmfela chu an en duh ang reng viau. Emmy pu Principal ni bawk Pu Hriatrenga'n a lo hmuh rual chuan nui sâng hian, "E..in lo thleng tawh maw bawihi...i ṭhianpa kha Sâwmfela chu a ni em?" a'n ti zui zat a, a nih thu Emmy'n a hrilh hnu chuan Pu Hriatrenga chuan rawn pan hnaiin a chibai a. "I chanchin hi bawihtei hian min hrilh tawh a, hmuh che ka châk ṭhîn khawp mai. Hei, mipa rin tlâk tak chu i nih dâwn hi. Inthlahrung lo la, he school hi i ta a ni ve tho tih i hre reng dâwn nia, ti hian lo ṭhu hahdam rawh. Dâr a ri tawh sia class kan la lawk ang e aw." a tih dap dap chuan Sâwmfela pawh bu nghat nghatin, chutiang taka a lo welcome ṭha chu lâwm thute a'n hrilh ve a, chair ruakah chuan a ṭhu zui zat. Zirtîrtu dangte paw'n lo be ve sawk sawkin an chibai ve laih laih bawk a, ani pawh a tîra a huphurh ang kha ni lovin nuam a ti ru kher mai. Chutia class laa zirtîrtute an chhuah tâk diakah chuan chhak lam tukverh bulah Sâwmfela chu ṭhuin, lîrthei veivâkte leh mipui ṭhenkhat tei chhuakte chu a thlîr mai mai a, rei pawh a ṭhut hmain a han ngaihtuah vang vang a, zirtîrtute office-a lo ṭhut ve reng chu a inthlahrung leh deuh nge; tho vutin office aṭang chuan a chhuak zui leh. Gate hnaih deuha ṭhutthlêng thîra siamah chuan a va ṭhu a, chung neia an siam avângin a dâi nuam ang reng viau bawk.

Chutia ngawi renga Sâwmfela ṭhu laite chu car dum chhung aṭangin mi 5-te chuan an lo enthla kar a, an target ber man tur chuan a bodyguard hi dah ṭhat hmasak a ṭûl dâwn tih pawh an hre chiang viau a ni. Khaw êngah chuan tih vak ngaihna an hre bîk lêm lo bawk a, rei mawi tâwk an thlîr hnu chuan an tlânsan leh rih ta a nih kha. Chutih laiin Puia-te pawh, ram pâwn lam chanchin an hre ve reng bawk si-a Bangalore-a kal ta lovin inhlawhna an lo zawng ve tawp mai a, Puia leh Christy chu inkawp reng an ni bawk nên an vânneiha siamin sawrkâr high school-ah hna hmu vein an lo thawk ve reng tawh zâwk a, an ṭhian dangte Reuben-a, Kima, Muani leh Zuali-te pawh Bank-ah thawkin Aizâwl-ah an la awm kim ve hi a ni. An pate aṭang rênga mi lian dangte hriat sa kha an ni hrim hrim a, anni lah Bangalore University aṭanga graduate an ni bawk nên, an tân hna hmuh pawh hi a awlsam deuh a ni mahna le! Hun âwl an neih remchân theih tâk lohah chuan an ṭhianho pawh hi an inhmu khât ta viau rêng a ni. Hetia mahni hna ṭûl hrang hrangte thawka mi tin an phut suau suau lai hian, Mizoram Police Department lam pawh sawrkâr hotu lawk deuhte nên dân lova che ṭhînte chungchâng ngaihtuahin meeting an lo nei ve mêk bawk a, Emmy pa pawh a tel ve bawk. Engtianga hma lâk tur nge ni ang? Khawpui chhung hi kan dap leh mai dâwn nge tih te, khawpui pâwn lam en fiah pawh hi ṭha kan ti em tihte sawiin an lo buai ve hle. Case chin fel hman loh khawp an nei ṭeuh tawh si a, chumi ringawt chin fel tuma an buai chuan mi dangte'n an tuar leh thei bawk si, chin felsak loh chuan chhiatna tâwk chhungte hmai zah a nâ an ti tawh bawk si a, thu tih tlûk dân tak pawh hriat thiam har an ti khawp mai. A châng leh detective rawih maite an han sawi lang leh thûl, chutianga detective rawih ngawt chu tlâwmthlâk an tiin rawih tur lah an vâng phian lehnghâl a, engtin tak thu ti tlu ang maw?

Nî a sâng zêla lunch break hun tih hriat zetin dâr a ri ta tleng tleng mai. Naupangho pawh rawn tlân chhuak phak phakin School kawtah chuan an inûm kawi zawr zawr nghâl a, ni sa pawh chu an hre chang lo em maw ni tih tur hian an hlim dar dar hle. Chu'ng naupang rilru thianghlim leh duhawm tak takte che vêl chu nui sâng hian Sâwmfela paw'n a lo thlîr a, Emmy'n a rawn koh chuan naupangho infiam vêl thlîr a duh thuin a chhâng vat. Zirtîrtu dangte'n ni saa awm lo turin han au zui lauh lauh mah se, primary zirlaite beng chu a luh lo tih an khawsak dânah a hriat viau a ni. Chutia Sâwmfela'n naupangho chetla vêl a thlîr reng lai chuan naupangte paw'n an lo melh leh vang vang ṭhîn a; middle chin chung lam pawl 12 zirlai te, a bîk takin hmeichhiate chuan inhrilh ru sep sepin Sâwmfela chu an en duh khawp mai. Rei vak lovah primary zirlai ṭhenkhatte chu Sâwmfela ṭhutna bulah rawn pheiin, an va hnaih ngam chiah si lo chu an tawi deuh hruk hruk a, Sâwmfela'n a bula kal tura a hrilh chuan an va kal hnai ve mai bawk. Hmeichhe naupang pawl 1 zirlai duhawm deuh mai hi Sâwmfela chuan, "Mâmi, i hmêlṭha hle mai, tu nge i hming?" a'n ti nui sâng a, hmeichhe naupang chuan zah hmêl tak hian, "Lalrinsangi. Sangsang tiin min ko ṭhîn," a lo ti sap. Chu veleh mi dangte chuan an hming an lo sawi ve sap sap zui a, an uniform Kamis pâwl leh pawnfên dum bâkah necktie leh mawza dumte chu an inhmeh hle. Mipa naupangte pawh an kekawr dum chu a paw leh tawh viau. Sâwmfela chuan, "In va hmêlṭha hlawm êm; in fel bawk si, nih leh, tu nge in zirtîtute zîngah fel in tih ber?" a'n ti leh a, "Miss Emmy-i." an lo ti rual deuh ṭhap. Ṭhenkhatin, "Kei chu Sir James-a fel ka ti ber tih te," Kei chu Miss Hmingtei," tihte leh zirtîrtu dangte hming an sawi laih laih zui. Chutah an zînga pumraw ṭha ber, thau lam deuh hian a necktie hmâwr khawih niap niap pah hian, "Kei chu maw...Miss Emmy fel ka ti ber a maw...ih maw..." tia a ngawih lai chuan Sâwmfela'n, "Aw." a lo ti chiah chu mipa naupang duhawm buang mai chuan, "Ih maw...ka hre tawh lo." a lo ti chu Sâwmfela pawh a nui suk. Naupang rilru thianghlim tih takah an zirtîrtu fel leh sual an tih deuhte chu huatna tel hauh si lovin an sawi zui sap sap a, hmeichhe naupang pakhat chuan, "Miss Emmy chu fel ka ti bera maw...mahse a châng chuan a hlauhawm thei lutuk. Homework kan thiam lohin kan chalah a pen ṭhîn a," lo ti ve nauh nauhin Sâwmfela pawh a nui var var mai a ni. Tiffin an paite an ei zawh hnu rei vak lovah chawhnu class ṭanna dâr a lo ri leh a, naupangte pawh phûr takin an class lam panin an tlân leh dam dam zui. Chutih lai chuan Emmy pawh nui sângin thingpui leh chow dispo plate-a keng chungin a rawn phei ve mêk a, Sâwmfela bul a thlen chuan, "Kha le! I ril a ṭâm ang. Hostel cook-te'n an siam a nia, a tui teh mai a nia," tiin Sâwmfela chu a pe zui zat a, Sâwmfela'n a ril a ṭâm loh thu lo sawi ve bawk mah se Emmy chuan a bul ṭhutnaa dah pah chuan, "Nî a rei tawh sia eng mah i ei loh chuan rei lo têah i ril a ṭâm thuai ang. Nge...ka barh kher che i duh," a'n ti nui hak hak a, Sâwmfela pawh a lo nui suk. "I duh chuan intei harh la, dâr 3-ah kan bâng ṭhîna bân hmain i lo lêt leh ang a, hetia awm ringawt chu a ninawm ang." Emmy chuan a'n ti leh a. Sâwmfela chuan a ninawm loh thute a lo sawi ve leh hnu-ah, "Nih, class ka'n la ve leh ang e aw. I duh chuan i tei chhuak mai dâwn nia," ti nui sângin Office lamah a phei zui leh ta a ni.

Tichuan, nî a hniam zêl a, Sâwmfela dâwra cold drinks leia chhuak ta pawh kîr ve leh tawhin, tlâi dâr 3 a nih chuan dâr a ri leh ta tleng tleng a, naupangte lamtu nu leh pate paw'n Sâwmfela chu an en leh hrek hrek ṭhîn. Rei vak lovah Emmy pawh a rawn phei ve a, car chuan an inkhalh hâw leh ta a ni. Hâwn kawngah chuan naupangte chanchin Emmy chuan sawiin a nui leh var var ṭhîn a, chutia tîtî paha kawngpui thui vak lo an tlân hnu chuan Traffic Jam vângin motor an lo tang ṭeuh a, anni pawh chu ding ve nghâlin an hnungah pawh motor chi hrang hrang an intlar pût bawk. Emmy chuan, "A va'n ninawm tak! Inbual ka châk tawh asin le." tiin a phun zui nuah nuah a, traffic point ber pawh an hmu pha teuh si lo. School bân hun vêlah hi chuan an fate lama lîrthei khalh chhuak ṭhîn an awm ve nual avâng leh, taxi service an tam si a, chuta kârah two wheeler-te lah motor dangte inkârah an rawn tlân phei hret hret ṭhîn bawk si, City Bus ding luahte chuan a bîk takin an ti chêp zual bawk. An hun tawng duhawm lo zet avânga mamawh lama chhuakte an awm nual bawk a, chu'ngte vâng chuan Taxi pawh an tang hnem leh hle. Chutih laiin nî a hniam zêla khua a thim dâwn ruai chu a ni ta. Tawi tê tê chu han tlân leh hret ṭhîn mah se an tang leh nghâl zêl si. A nu leh pate'n an rawn call deuh reng tawh mai a, chanchin an hrilh hnu pawhin vawi thum lai an rawn call leh tawh. Emmy rilṭâm tawh bawk si chuan an vei lam kawng sîr restaurant-a inhnawh puar turin Sâwmfela chu a chhuahpui ta nge nge a; motor light pawh a êng thluah tawh bawk. Restaurant an va luh chuan mi dangte pawh an lo châwl ve nual a, dawhkân ruak pakhatah chuan inhma tawnin an ṭhu ve zat. An ei turte an order hnu rei lovah an rawn chhawp nghâl a, inbe tam tawh lovin anni pahnih paw'n an ei zui mial mial. An bul hnaia ṭhute an chhuak thâwl deuh ta tihah Emmy chuan, "Sâwmfel, ka pa ngenna che i tih hlawhtlinsak avâng hian ka lâwm tak zet. A hma kha chuan ka pa driver-in school thleng hi min thlahin min rawn lam leh ṭhîn a, kan hun tawng hrehawm tak hi ka nin tawhzia hi; kan zalên lo lutuk a," Sâwmfela en pah chuan a'n ti a. Sâwmfela chuan, "Ka nu leh pate ber an awm tawh si lo va, ka ngaihtuah vang vang hnu-ah thutlûkna hi ka siam chauh a ni. Ka nunah ṭhian angin in rawn lût a, tûnah chuan nang leh i chhungte vên him hi ka kovah a innghat tawh a, a bîk takin nang vên him che hi ka mawhphurhna bîk a ni. Ka nunnain tuar dâwn mah se, i himna tur a nih phawt chuan eng pawh ka inhuam e." hmêl hlim sârha a tih lai chuan Emmy'n khawngaih hmêl tak hian a lo en kar a, restaurant light hnuaia a mitmeng tle kar mai chu mipa tam tak tân pawha zâm rum rumna tham a ni ngei ang. Rei lo tê an inen hnu chuan Sâwmfela chuan a mit la sawnin, "Kal ang hmiang," tih leh din a rual a. Tichuan, restaurant aṭang chuan inzui chhuakin car-a an luh leh hnu rei vak lovah Traffic Jam pawh tâwp zuiin an tlân chhuak leh ta a ni.

Tûnah chuan khua pawh a thim chiang tawh hle. Chutia hmanhmawh lutuk lova an tlân zêl chuan tlêma In awm khâtna, kawng sîr tawna thing phunna hmun, kopang rawng vâra hnawih khah vek leh thu ziak lo intâr thluahna an tlân ṭan mêk tihah, car dum hian rawn tlân pêl fuain an hma lawkah chuan a ding ta thut mai le! Chu veleh mask vuah vek mi 5-te chu car dum aṭang chuan hmanhmawh deuh tak hian an rawn chhuak nghâl a, Sâwmfela chuan, motor glass hi khâr phui vek la, kawngkhâr hi lock vek ang che," tih leh car aṭanga chhuah a rual a, a sawi ang khân Emmy paw'n a ti nghâl vat. Sâwmfela chu Emmy car hmaah tak va dingin chu'ng mi 5 chemtê leh thîr tlâwn fit khat vêla sei, kut zungpui tia vêl hûmte rawn hnai zêl chu a en kiau a, Emmy hlauthâwng lutuk chuan che hauh lovin a thlîr ve reng ringawt. Zan tîr chauh a la ni bawk sia lîrthei veivâk an tlêm lai tak a ni bawk si, an awmna hmun lah chu In a awm khât bawk nên ṭanpuitu han koh mai tur an awm si lo. Chu'ng mite zînga pakhat chuan, "Minister fanu kha min pe la nang chu i him ang." Mizo ṭawng pai hauh lo hian a lo ti thûm nghâl dût mai. Chutah Sâwmfela chuan nui sakin, "I mumangah le!" tih leh chu'ng ho pan hnaih chu a rual a, a tiang lei a pai chu a hmet dawk zui zat. Anni paw'n an rawn veh nghâl chu a ni mai e. Pakhat chuan a thîr tlâwn ken chuan a rawn hêm pawp a, a ding lama mi pahnihte rawn che chhuak ve leh chiahte hlat lamah Sâwmfela chuan kûn paha vir zawkin, hem thlûk tawp tumtupa ngal chârah a'n hlap pawp maia(h); chu pa pawh chu ṭê ṭhawta zuang zawkin a ngal dawm pah chuan a ṭhu hnawk a, a ngal chu tuai vat vat bawk. Pahnih rawn bawh rawntute chemte leh thîr tlâwn rawn vai fua fua chu eu zawk zawk leh kûn chunga bum pahin chemte keng zâwk chu a tlawh thal ṭhuai a,
thîr tlâwn kengtu chêt tum leh chiah chhîpah a tiang chuan a chhuk hlap leh chawrh. Chumi rual chiaha mi pahnihte rawn che ve leh chiah hnaih thut pahin a tlawh thlûk pa rawn tho leh mêk chu a hlap vir leh nawk a. Mi pahnihte pawh chuan an rawn hnaih chilh chu a ni dêr. Pakhatin a chemtêa a rawn vai ṭhelh ruala a insiam rem leh chiah pakhat zâwk chuan Sâwmfela chu a âwmah a rawn tlawh ve hman ta tlat. Sâwmfela pawh chu a thal ṭhuai a, a ke pahnih chu leng vakin a khûp ding lam leiah a nghat a, a ke vei lam chuan a hma lama inrah khalh lehin a ṭhu leh nghâl zat. Pakhat zâwkin Emmy car lam a pan tâkah chuan Sâwmfela pawh a dawk phei nghâl zawk a, pakhatin a thîr tlâwna lu ruh keh rawp khawpa hem tuma a rawn vai chu a zak hnuaiah kûn zauh pah leh din chhuah paha vir zawkin, chu pa tukkhumah chuan a hlapsak leh chawrh a, bu lâwpin a bawkkhup zui nawk. Chemte kengin Emmy car kawngkhâr pawh hawn mai a tum chu a lo lock ve tlat si a; a hmanhmawh tawh si chu a va thinrim mai mai tak! Chutah Sâwmfela chuan, "He lamah aw." tih leh chu pa chu pan a rual a, chu pa pawh chuan thinrim tih hriat zeta rawn pan ve nghâlin an ri leh ta chawrh chawrh zui. Chu pa chem rawn vai bum nâna eu zawk zawkin a kûn leh zauh ṭhîn bawk a, a hnung tawlh pah zêl bawk. Chu pain a nghâwng zâwna chemtê a rawn vai leh chiah a bânrêkah a tianga a'n hlapsak chawrh mai zawng, ṭê ṭhawtin a chemtê chu a thlauh zui nghâl a, chumi rual deuhthaw-a a tiang vai lêtin chu pa bek ding lama a hlap rîk lawlh rual chuan let tawpin a ṭê zui tawh lo chiang hle. A khawih hmasakte zînga pahnih la che ṭha thei deuhte inkuah chung leh bâi suih suiha an motor lam pan mêkte chu a ûm zui leh vat, thui an kal hman lo. Chutih lai chuan Emmy Car hma lam leh hnung lamah Police Gypsy pathum an rawn thleng ve chiah bawk. Hmanhmawh taka rawn chhukin chu'ng mi sual 5-te chu dîm lo takin an hnung khirh nghâl rawk rawk a, an mask vuahte hlihsakin mi pali an lu leh beka Sâwmfela'n a hlapsakte phei chu an thisen a chhuak nasa hle bawk. Inspector chuan, "Motor-ah dah lût nghâl rawh u." a tih rualin an phit phei leh nghâl hlawk hlawk a, ṭhen sak sakin an bâi phei auh auh mai a ni.

Inspector chuan Sâwmfela chu enin, "Hliam i nei em ṭhianpa, Pu Zothansanga'n chanchin min rawn hrilha kan rawn tlâi deuh tho chu a nih hi a!" tiin a chibai zui a, Sâwmfela paw'n nui sâng hian, "Eee...a hun takah in rawn thleng a ni." a lo ti ve vat. Inspector chuan lâwm thute a hrilh ve leh laiin Emmy paw'n Sâwmfela chu a rawn pan vat a, "Sâwmfel, i ṭha em? I inhliam em? Ka lo hlauthâwng lutuk a," tiin a bânah a rawn vuan zui a. "Ka ṭha e, ka inhliam lo." nui sânga Sâwmfela'n a tih hnu chuan, "Kan kal leh nghâl mai ang e. I huaisen hle mai. Lo him reng tawh ula." Inspector chuan a lo ti ve leh. Tichuan, mi sualte car dum nên Sâwmfela-te chu an tlânsan zui leh ta a ni. Khatia Emmy hlauthâwng hamhaih kha harh chhuak thutin a pa a call nghâl a, an awmna hmunte a hrilh hnu-ah phone chu dah lehin hlauthâwng tak hian Sâwmfela-te insual lai kha a lo thlîr tawp a, pakhatin Sâwmfela a tlawh thal tawp lai phei kha chuan, "Awi! Ka duh thei lo," tiin a mittui a lo tla hman hial a nih kha. Rei vak lovah ti khân Police-te an rawn thleng zui ta kha a ni. Emmy leh Sâwmfela car-a lût leh tur chu an han hawi zau deuh a, motor ṭhenkhat pawh lo ding ṭhup tawhin mite pawh an lo tam tawh khawp mai. Police-te'n mi sualte kha rawn la hman lo ngat se chuan chîl hlum tham zet tur hi an ni âwm e. Tichuan, Emmy leh Sâwmfela pawh In lam panin an tlân zui ve leh nghâl a, In an thlen chuan Varanda-ah Pu Zothansanga-te nupa paw'n lo hmuakin, Car aṭanga Emmy rawn chhuk chiah a nu chuan, "Awi! Bawihi min va ti hlauthâwng tak êm!" tia rawn panin an inkuah vawng vawng zui, hmeichhe hnuk no tih takah an mittui a tla hial bawk. Emmy pa chuan Sâwmfela chu ngaih sân hmêl taka en pah hian, "Ka va thlang sual lo che êm Tlangvâl huaisen, a vawi hnihna atân ka fanu i chhan him leh ta," tia kuah thlawpin a hnungah a bêng thek thek bawk a, Emmy nu paw'n, "Sâwma, kan lâwm tak zet aw. Mipa rin tlâk tak i nihzia ka hriat belh leh e." tih leh rawn kuah a rual ve leh, Sâwmfela hrilhhai letling erawh sawi mai tur hre lovin a ding ngawi reng ringawt. Pu Zothansanga'n In chhung lama lût tura a tih rual chuan hlim takin an inzui lût leh ta a ni. Khatia Sâwmfela Minister fanu kaihza vêng tura a inpêk hnu khân, a mawhphurhna sân turzia hriain Self defense techniques and skills lam te leh martial artist-te movie a en nasa a, a tuina lam tak a lo ni bawk nên zîng tin a practice tlauh tlauh bawk. Chu bâkah Burma sipai râltlânin a thiam thil a thûlkhungte nên phei chuan, mi narân panga lekte tân pawh a ṭuan a rang bawk nên silai tih loh hmanraw dangte nên chuan tawhkhirh ve deuh tur kha a ni ve tlat tawh a ni. Hetia a practice a chin a tha pawh a za zek zek ṭhîn rêng a; chu hun tak chu kha'ng mi pangate khân an rawn nangching ti ila a dik ber âwm e.

Bahlah hauh lovin hun leh nîte an her liam zêl a, Aizâwl Police-te paw'n an mi mante nâ leh hrehawm tawrhtîr paha theih tâwpa an dâwp hnu-ah, an mi mante hnên aṭangin an thil tum leh tawm rûknate an hre thei ta bawk a, ILP nei lo leh a lem hmanga Mizorama Vai awm te, hnam dang Chakma leh Bru bâkah, rinhlelhawm deuhte dap chhuah hna thawkin an buai zui map map a, Sâwmfela pawh a pu Minister a nih mai bâkah Police ṭhenkhatte'n an hre chiang ve tawh bawk a, Police-te hma lâknaah pawh hian ama duh thlanna ngeia tel vein a ṭangkai hle. A chângin an han inkâp ṭhuai ṭhuai a, mi sual lamte inrin loh laia va bei thut an ni bawk nên, Khuanu'n a ṭanpui ve rêng em maw ni tih turin Police lam chu hliam tuar tih loh nunna chân an awm hauh lo va, anni paw'n mak an ti viau; damdawi pawh man hnem tak an ni. Tin, Aizâwl khawpui chauh ni lo Lunglei leh khawpui hmun hrang hranga awmte pawh, Mizoram Police-te ṭangrual chuan dap chhuak zêlin an man hnem kher mai. A tam zâwk chu an ram lamah an thawn thla hmiah hmiah bawk a, chutianga thla hnih dâwn an buai hnu chuan Aizâwl khawpui pawh a zalên ṭan leh tawh hle mai. Mipui mimirte nun a zalên a, an hmêl hmaiah pawh hmuh theihin a chiang viau a ni. Amaherawhchu, Aizâwl khawpuia kha'ng dân lova chêt thawhna hrang hranga a meizang hlaptu ber, Mizo pa ngei leh tlangvâl pakhat kha an la hre chhuak thei tlat lo hi an zalen famkim theih lohna tak an la ni dâwn thung. Chu bâkah an tawm rûkna dangte hre vek tawh mah se, an hmunpui ber an la hre chhuak thei tlat lo hi a la pawi thei viau bawk. A chhan chu an mi mante khân an nunna atân pawha thil pawi tur pawh tawrh huamin an thup ve tlat a, an pâwl thurûk engkim an hriat vek bîk loh thu leh thu pêk an hmuh anga che mai ṭhîn niin an insawi ve tlat bawk si, Police-te tân pawh awih loh ngawt chi a ni si lo. An Pu laka an rinawm êm êmna hi an entawn tlâkna tak pawh a ni ngei ang. Ram pâwn lama râwng taka chêt thawh ṭhînte nêna an inzawm vek thu erawh an hre thei thung a, a pawimawh ber he Zâwlkhawpui ṭahna leh lungngaihna thlentîrtu ber erawh anmahni ngeiin an chhui chhuah a ngai dâwn a ni. Tûn atân chuan ven khatin an veng ta phawt a, mipui veivâk leh lîrtheite pawh an tam leh tawh kher mai. Chutianga zalên taka an lên leh hnu chuan May thla tâwp lam an chuang kai ve leh ta. Emmy leh Sâwmfela pawh school an kal leh tawh a, naupangho paw'n Sâwmfela chu an nêl tawh hle tih hriat zetin school kawt an rap chiah mipa naupangte chuan, "Hotupa, eng tikah nge min zirtîr ve dâwn? I lo kal ve ziaha min zirtîr ve ngai si lo va," ti nui var varin an lo bawh nghâl nak nak, Sâwmfela paw'n nui sânga lo kuah hlawmin, "June thla aṭangin aw." a lo ti ve mai a, Emmy pawh a nui ver ver mai a ni. Tichuan, class-te an han kal leh a, Emmy pu lahin Sâwmfela leh Emmy hâwn kawnga buaina tawh chungchâng vêl kha a hre bawk nên, Sâwmfela chu a fak âwl lo a ni mai a, a mâkpa chei titih dêr. Chutih laiin an Miss Hmingte-i lah chuan Sâwmfela chu a haw lo tih hriat tak hian a mitmei deuh reng bawk a, hetiang lama mi hawi harh lo Sâwmfela lahin nuih suk ṭhînin hma lâk ngaihna rêng rêng a hre lo. Lunch break a nih chuan Sâwmfela pawh a ṭhutna ngaiah naupangho nên an ṭhu khâwm leh laih tawh a, chhangchhe pa ang maiin hmeichhe naupang Lalrinsangi, Sangsang ti-a an koh ṭhin kha pawmin mipa naupang pahnihte lah Sâwmfela si chêtin a bulah an ṭhu bawk a, mipa naupang pakhat harh fâl lah a koki chhuan deuh reng mai a ni. A châng leh mipa naupangte chuan a sam sei chu an lâwm deuh nge an phit dâk leh âwrh âwrh bawk a, Sâwmfela paw'n, "Aiah aiah, samah chuan phih awih loh," ti nui sângin ning hmêl erawh a pu hauh lo. Hei tak hi Sâwmfela danglam lehna chu a ni. A mizia ngaihtuahin naupang lâwm lo nambar one ni âwm tak hi naupang bula awm nuam a ti êm êm a; han chhawnchhaih vêl pawh nuam a tiin a peih viau bawk. Chutia naupangte nêna an che vêl chu Office varanda aṭangin Emmy leh Miss Hmingte-i paw'n an lo thlîr nui sâng a, hmuhnawm an tih hmêl hle. Emmy chu Miss Hmingte-i chuan a hrilh ru leh zauh ṭhîn. High school leh higher hmeichhiate paw'n inhrilh ru sap sapin an thlîr bâng lo a ni hawt e. He'ngte hi Sâwmfela lahin a hmu thiam dêr si lova aw.

Chutianga zalên taka mipui an phut suau suau lai chuan Police-te chuan mipuite chu la fîmkhur turin an chah ve reng bawk a, social media hrang hrang leh chanchinbu-ahte pawh Mizoram Police Department-te fakna thu mawi tak takte hmuh tur a tam hle bawk. Sâwmfela'n a ngen angin an hma lâknaa an hlawhtlinna bul ber Sâwmfela hming leh hmêl erawh Police-te chuan an la thup rih a, zalenna famkim nên Zâwlkhawpui chhan chhuah a nih hunah erawh Sâwmfela hi a lâr hat hat tawh viau ang le. Chutih lai chuan khawpui chhung hmun pakhat, motor kawng sîra car vâr nalh zet chhungah mi palite chu an lo tîtî sep sep a, an ṭawng zawih deuh dânah an thu sawi chu lo hre rutu an awm palh ang tih an hlau hle tih a hriat. Zân dâr 11 vêl a ni a, an zînga Mizo tlangvâl ngei chuan, "Sir, tûnah chuan tih theih kan nei tawh lo a va nih hmêl ve, Police-te lahin min hual chêp sâwt bawk si; mi rawih an nei a nihte ka ring deuh asin." a tih chuan mi dang pahnihte paw'n an rin thu an lo sawi ve sap sap bawk a, an hotupa chuan, "A ni maithei le. Minister fanu bodyguard pawh kha a ni thei. Chutih rualin, kawng khat chu kan la nei e," tiin a'n ngawi deuh vang vang a, a naute chuan hriat châk hmêl zet hian an en ṭhap. An hotupa bawk chuan, "Tûnlai hi mipui an zalên a, an inthlahdah lai tak a ni. Tin, kan hma June ni 24 hi ka ṭhianpa fanu birthday a ni a, an lâwm leh ngei dâwn. Kan Minister Zothansanga-te nên pawh an inhnaih khawp mai. Birthday lawmnaa tel turin an sâwm ngei ang a, kan target ber Minister fanu Emmy Lalruatfeli pawh Party-naah a tel ngei bawk ang. Chu chu kan innghahna leh beiseina neih chhun a ni. Hun remchâng in hmuh veleh che mai thei turin in inring reng dâwn nia. Tumahin kei hi min hre chhuak tur a ni lo bawk, min man rual rualin in sum hmuhna a tâwp nghâl dâwn tih hria ang che u. Target in kuta a awm rualin tlânpui nghâl ula, chanchin min rawn hrilh bawk ang. Chuan, ka hovin kan hmunpuiah khân kan hruai ang a, kan mi leh sa 20 vêl chu an la bihrûk ve kha. Ka tel chuan Vairêngte check gate chu kan pal tlang thei mai ang. In hre chiang em?" a tih dap dap hnu chuan, "Boss nge nge; i fing ṭhîn teh e." Mizo tlangvâl chuan a lo ti nui var var a, pawisa têl chhah ṭha tel tawl tak an lâk leh hnu chuan an chhuak zui ta a ni.

Tichuan, hun leh nîte an hmang liam zêl a, June ni 1 an thleng ve leh ta. An innêl tawh bawk nên Emmy chuan Sâwmfela chu Miss Hmingtei a dem ta fo mai a, nui har har pah hian, "Vâl luck, Miss Hmingte-i chu engtin nge ka hrilh dâwn? Ani paw'n a duh lutuk chea a sawi ngam lo mai mai a ni ka ti dâwn nge?" a tih chuan Sâwmfela'n a va melh rum thei tak! "Han hrilh vaih teh," ti hmukin a room-ah a luhsan daih ṭhîn a, chutianga fiam chu Emmy nuam tih zâwng tak a lo ni bawk nên an inûm leh zuai zuai ṭhîn. Tin, Sâwmfela an Ina a awm hnu rei vak lovah khân, a pain a hrilh angin Emmy hian zan lamah Sâwmfela hi Spoken English Class a neihpui ṭhîn a, Central sawrkâr lama khuallian neih nîkhuaa Minister fanu bodyguard meuh ni si; khuallian-te'n sâp ṭawnga an biaka a chhân lêt theih loh chuan an mualphopui ve thei tih hi Pu Zothansanga hian a hre thiam tlat a ni. Thla thum vêl chu pângngai takin an inzirtîr thei mai a, hetia Emmy'n Miss Hmingtei a dem fo tâkah chuan Sâwmfela pawh a tîra a phûr ang kha a ni ta hauh lo. A tui lo chung leh peih lo chung chung tih luih lah Emmy'n nuam a ti êm êm mai si; an inti thinrim lo chauh ṭhîn rêng a ni. Emmy lah hian ngeiawm zet a, "Heihamm! In lamah leh School-ah naupang English zirtîr ka ngaia a va hahthlâk tak!" a'n ti ṭhîn phei hi chu Sâwmfela a ner nasa ṭhîn khawp mai.

June ni 14 zân a ni a, thla zahve êng nghalhin arsi pawh an de sep sep a. Emmy room thlang lam varanda zau ṭha tak, thlang lam kil pahniha ban an dintîrah chuan street light ang deuh hi an vuah a, a êng ṭha hle bawk. Chutah chuan Emmy leh Sâwmfela pawh an zirlai zir chhunzawm lehin dawhkân te fel at nalh deuh mai bula chair-ah an ṭhu dûn leh tawh. Inbiak a râlah chuan Sâwmfela pawh a zia tawh viau a; tense hi a buaina a la ni. Emmy chu tho tharhin white board lian lutuk lo a leiah chuan English sentence pakhat a va ziak a, chu chu a tiang kut zungte tia vêl chuan kâwkin, "Hei hi eng tense nge le?" tih leh Sâwmfela en chu a rual a, Sâwmfela lah chuan Emmy mize ngeiawm zet hi a la pai dâi thei lo nge; "Ka sawi peih lo e a!" ti hlukin a hawi sawn hmak. Emmy pawh chu nui deuh hakin, "Hei, ṭha deuhin awm teh aw. Naupang thu âwih lo deuh chu ka zirtîr ṭha peih miah lo a nia," a lo ti leh kher. Chu veleh Sâwmfela chu ding hluaiin a room-a chhuk a tum ta mai. Emmy chuan, "Hei Sâwmfel, ka fiamthu a nih kha. Ṭha takin zir tawh ang. Aw, pângngai takin," tih leh Sâwmfela hmaa va din chu a rual a, Sâwmfela lahin, "Ka mut a chhuak tawh." a lo ti leh hluk. "Tûnah dâr 8 chiah a nia mut chhuah a la hun lo. I zir ṭhat duh loh chuan ka pa ka hrilh dâwn a nia," nui duh hauh lo hian Emmy'n a lo ti ve leh. Chutia a pa a hrilh tur thu a sawi tâkah chuan hreh taka ṭhu leh ṭuih ṭuih pahin Sâwmfela chuan, "A ngai lo, hrilh lo vang." Emmy melh râwm râwm chunga a tih chuan Emmy nuihza tawh lutuk chu a va insûm thei lo teuh ṭhîn êm! "A nih leh, hei hi eng tense nge le?" tiin ṭha tê tê chuan a'n zâwt leh a, Sâwmfela chuan nin hmêl zet hian, "Present perfect Indefinite Future Continuous tense." a ti duah mai. Emmy chuan inseh ruh ṭeuh hian, "Awi! Chutiang tense a awm ngai lo Sâwmfel." rum zeta melh pah hian a lo ti bak hlar zui.

"A nih leh, eng tense nge min hrilh la."

"I hre reng, i sawi ṭha duh lo a nih kha."

"Ka hre lo."

"I hria."

"Ka hria."

"I hre lo. Awh! Ka tih sual. Aw, i hria, i hre reng, sawi vat rawh." nui hak pah hian Emmy'n a lo ti vata a tûm leh nghâl. Sâwmfela pawh lo nui sukin a kûn khûr ngar ngar zui a. Emmy chuan, "Nui suh, sawi vat rawh." a lo ti vîn deuh ṭhat. Chutah Sâwmfela chu inti mi tak deuh hian a rawn dâk chhuak leh a, inti zirtîrtu taka Emmy'n a thu ziah kâwk vaha a lo melh no lo hle tih a hmuh rual chuan Sâwmfela a va nui chhuak leh teuh tak! Khua a lum deuh bawk nên Emmy chuan Vest pâwl nalh zet hain kekawr bûl sen chhîng vahin a ha bawk a; ke lâwnga ding teuin a mitmu dum tle ralhte nên chuan nalh ziai ziai tak a ni. Sâwmfela chuan chîk zeta English Sentence chu enin, "Future impossible tense a niang!" a lo ti leh chiah Emmy pawh a inhup khûr ngar ngar zui a, "Chimawm pa, luhlul lutuk mai. Ka zirtîr peih tawh lo che, mu rawh." tih leh a room-a luh chu a rual hmak. Sâwmfela pawh nui sakin a room lam pana a chhuk dâwn chiah tihah tukverha rawn dâk pahin Emmy chuan, "Hei hei hei, naktûkah MC-ah min bazârpui ang." tiin a pil zui leh zat. Sâwmfela chu ner leh sakin, "Bazâr bazâr ti reng ringawt mai. Eng hi nge maw lei tur i neih bîk ṭhin ni?" ti-a phun zui nuah nuahin a chhuk zui ve leh ta a nih kha.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:26 pm

THE CAVE MAN.

✍️ Duata Khualchhâwn.

BUNG 11-NA.

Tûk dang ang bawkin zîng ni chhuak chu a mawi leh kher mai. Zâwlkhawpui chungah intih thu neih hmêl fahrana êngin In tin deuhthaw leh motor chi hrang hrangte chu a chhun de sawr sawr a, a khât tâwka ruah a sûr zeuh zeuh ṭhin vâng ni maw; vân a thiangin han hawi vêl pawh a nuam hle. Mit leh beng ti tlai turin mipui leh lîrthei an insûlpêl leh zut zut bawk a, motor horn ri chuah chuahte leh Traffic Police whistle ham rîk ṭhat ṭhatte chuan Zâwlkhawpui chhung chu an luah hneh leh viau tawh. An hotu ber berte la man lo mah se, ram leh khawtlâng tâna mi hnawksakte dah bo an nih hnu khân, zalên takin kawtthlêr tinah mipui hmêl nung sârh pawh hmuh tur an awm zui ta reng a, Police-te'n mipuite la fîmkhur tura an ngennate kha an hre chang tawh lo em maw ni tih turin an hmêl hmai hmuh a nuam hle. Tûkṭhuan ei kham hnu chuan Emmy leh Sâwmfela MC-a bazâr tumte pawh an insiam mawlh mawlh a, Emmy insiam zo chu a room aṭang chuan chhuakin, Sâwmfela a inpeih tawh em tih zawh tumin a chhuk zui zat. Sâwmfela room hi In hnuai Sitting room bula awm a ni a, guest room atâna a pain room ruak zau tak pahnih a siamtîr-te zînga thlang lam hnaih zâwka awm a ni. Emmy chuan Sâwmfela room kawngkhâr tlêm lo inhawng deuh chu nam hawng pah hian, "Sâwmfel, i hman tawh em?" tih leh kawngka chhung lama din chu a rual a, a meng deuh kâwk mai. Sâwmfela inbual zo Towel sen venga dârthlalanga a lo inen lai tak niin, "Ka hman ṭêp," tih leh rawn hawi phei a rual ve nghâl a, thawmhnaw eng mah a la inbel si lo, a sam sei la huh deuh leh a hmâwr lam kir lek lek te, a bânbul tê chhe lo tak leh a âwm poh lah thlâwp zata a six pack val kalhte bâkah, a pian leh taksa nalh êm êm maite chu a ni, Emmy men phâwktîrtu chu. Hna a thawh laia a taksa phiar fuatte kha hetia hna hahthlâk a thawh loh a chin a lo chum ve deuh tawh hi a ni a, hmeichhiate ît tur mai ni lo, mipa tam takte pawhina an awh tur mipa pian nalh tak hi a ni. (Mipa ṭheuh ṭheuh a lo va intluk loh theih ve lehhh😤😒😏) Sâwmfela'n a chhân hnu rei lo te chhung chu Emmy chuan a la en ka hau mai. Chutah harh chhuak thutin bah nuaih hian, "Aw..ih.. ka duh..awh ka tih...aw le." ti nawk nawkin a inher vat a, chhuak zui nghâlin sitting room-ah chuan a nghâk ta a ni. Rei vak lovah Sâwmfela pawh chu room aṭanga rawn chhuak ve nghâlin, "Ka hman e pi ber," a lo ti ve ngat. "A ṭha e Bodyguard," ner sak pah hian Emmy paw'n a lo ti ve a, an awmpui nula pahnihte In chhung vêl lo ti fai mêkte chu thawmhnaw thar a leisak tur thute Emmy chuan hrilhin anni pahnih pawh chu an hlim khawp mai. In kawta a nu leh pate leh ṭhenawm hnaite tîtî paha lo ṭhu khâwm laihte chuan lo en dûn vang vangin, "Bawihi, va rei lutuk lo ula aw. Chuan, naktûk hian CM hnung zuiin New Delhi-ah kan kal dâwn a, chawlhkâr khat emaw a aia rei pawh kan châm maithei. I nu pawh a sumdâwnna thil vêl en pah turin a kal ve dâwn a nia," Emmy pa chuan a lo ti a, an rei loh tur thu Emmy'n a hrilh hnu-ah a nu chuan fîmkhur tura lo chah ve lehin Garage chu an pan ding leh. Sâwmfela paw'n Car a khalh thiam ve tawh bawk a, Emmy chu Poster-ah ṭangin MC lam pan turin an inkhalh chhuak zui ta a ni. Nî pawh a sa ṭan tawh viau, kawngpui an thlen thlâk hnu chuan motor inzui duah duahte ti buai si lovin an tlân zawm leh nghâl a, kawng sîra thei den lo zuar te, vûr zuarte leh ei chawp dâwr bul vêla mihring kal vêl ringawt pawh chu hmuhnawm an va tling êm! Chu'ngte chu tlân pêl zêlin Concrete lianpui puite chu an faiin hmuh an nuam hle bawk.

MC an thlen chuan a bul lawk parking area pawh two wheeler leh four wheeler an lo ding thluah mai a, an la tâwt lutuk lo thung. Sâwmfela'n a park fel hnu chuan chhukin MC kawngkapui lam panin an inzui phei nghâl a, mi ṭhenkhatte chuan an lo en duh hlawm khawp mai. Emmy chuan Kamis ang deuh bodyfit senduk leh kekawr dum tight ṭha tak hain a thun thlap a, Versace sen nalh zet a tlâng dum nêna inchawih êm êm a bun bawk, a sam tan kha a lo sei ve leh tawh nên a chhîpvir zâwn vêlah a ṭâwn kûl raih bawk a, a thuam vêl leh a sam ṭâwn dânte chu inhmeh lo titu chuan psychiatrist pan vat rawh se. A sam ṭâwn dân mawlh hi a ni Sâwmfela nên Car-a an inhnial leh hrepna kha; a hmain Sâwmfela hian hetiang hian a lo ṭâwn fo tawh kha a ni. Sâwmfela paw'n Emmy sam ṭâwn dân bawk chuan ṭâwnin, Emmy'n a lo ṭâwn ve avânga a sam ṭâwn ṭhin dân chu tih danglam a tum eih lo; a rilru chuan, "Duh leh hmeichhia zâwk hian ṭâwn danglam zâwk rawh se," a ti hmiah mai a ni. MC-a t-shirt dum a lei bântlâwn kha hain, a nghâwng kak thlaa hruihrual dum chu loose takin a suih bawk a, a âwm daidantu khuar lai lang kalhte nên chuan a sexy ang reng viau. Jogger pant dum a hâkte leh sneaker dum a puin a leisak ngei a bun bawk. An inhmeh bawka mi dangte mit chu an la teh e. Nula leh tlangvâl lo hmutute chuan Emmy chu Katy Perry ang hi an han ti khawp a; mipate chuan thlîr zui vawng vawngin, "Katy Perry a va'n ang eee...a va'n chhe lo tak! Khal bawk si," an ti zui sap sap. Sâwmfela lahin hmeichhe-ho mit chu a la zual ti ila kan uar lutuk lo ang chu maw! "Kha pa kha ka hmu tawh tlatin ka hria; insual thiam deuh kha a ni, aw a ni chiang lutuk. Hemi MC kawta mi pathumte nêna insual kha. A va'n pa tak! Kha nu kha a bialnu a niang a, ka va'n thîk, eeehhhh!" ti nui hak hakin an inbêng leh taih ṭhîn bawk a, anni pahnih lahin hawi sawn hlek lovin hma lam an pan ding nal nal mai a ni.

MC an luh hnu chuan Emmy'n leilâwn lam a panpui ṭan chiah tihah, "Emmy...awh Madam, leilâwnah khian chuang lo vang. Hmun dang aṭangin chho zâwk ang." Sâwmfela'n a lo ti vat. Emmy chuan mak tih hmêl deuh tak hian, "Nga ti nge? Khi, mi dangte pawh an chuan zêl khi," a tih rual chuan, "Duh leh mi dangte chu chuang rawh se. Ka chuang dâwn lo," Sâwmfela'n a lo ti bûl hmuk. Hetia Sâwmfela'n leilâwn chhuk chho-a chuan a hreh êm êm chhan hi eng dang a ni lo. Aizâwla an pêm hnu pawh khân ani hi chu khawpui chhung aiin ram lamah a khawsa tam zâwk a, MC hi a luh khât mai bâkah a luh ve châng pawhin he leilâwn chuang lo hian a hêl ṭauh ṭauh ṭhîn. Emmy-te Ina a awm hnu khân khawpui chhung buaina avânga an tawmim deuh lai leh, school-a Emmy a lo thawh ve tâk avâng khân hun âwl an neih vak loh bâkah an bazâr dûn ngai hauh lo va, an awmpui nulate leh Emmy pa Pu Zothansanga driver-te mamawh lamin an kal mai ṭhîn kha a ni. Hei vâng hian leilâwn tawlh nguai nguai hi Sâwmfela hian a nêl lo hle a; che sual dâwn tlata inhriain a chuang duh ngai lo rêng a ni. Chutiang thil vêl chu Emmy nute chimawm duhawmi hian a hre dêr si lo va, a hriat hunah engtin tak Sâwmfela lakah hian khawsa leh ang maw? Emmy chuan nui lek lek hian, "Ti nge i chuan duh loh? I chuang ngai lo a mi?" a tih lahin Sâwmfela sawi zak ve si chu ngawi rengin a hawi kual ta mai mai a, mipuite lahin chutia an ding dûn chu an lo en duh viau leh nghâl. Chutia Sâwmfela awm dân vêl chu Emmy dawh theihnain a tlin leh ta lo, "Hlauthâwng suh min chelh tlat dâwn nia, lo kal rawh." tiin Sâwmfela kuta vawn leh pawh thut a rual ta mai. Hetih laia Sâwmfela mangang thinrim zâm hmêl leh duh lo inpawlh hi chiang taka hmutu tân chuan nuihzatthlâk tak tur a ni. Mipa zâwk tha tâwpa ṭan ṭûng ṭûng chi a ni tawh si lo, mi dangte lahin nui ṭhaw hian an lo en leh hâ hâ ṭhîn bawk si, Sâwmfela lungphu a va ri rang dup dup dâwn tak! Emmy'n a kut vuana a pawh tâk tlatah chuan ani pawh chu hreh takin a kal ve ta chhet chhet a nih kha.

Leilâwn bul an va thlen chuan Emmy'n chuan dân turte a hrilh leh rih, a va buaithlâk tak! Rawn kal pêltu apiangte lah chuan nui sûnga rawn enin an chuan khalh zung zung bawk a, chu'ngte chu entawn turin Emmy chuan hrilhin a fuih sauh sauh bawk. A hnu deuhah chuan, "Le! ka tih rualin kan chuang ang aw," Emmy chuan tiin, "Le!" a ti zui nghâl a, leilâwn tawlh chho-ah chuan an chuang ve ta. Emmy'n a kut ding lama Sâwmfela kut vei lam a vawn chu a nghet thei ang berin Sâwmfela chuan a lo hmer ngat ngat a, a kut ding lamin Emmy bânbul ding lam chu a hmer tlut bawk. A ke chu dah kâk deuhin a mawng chu a ti poh deuh ûl bawk a, pitar-ho zun dân pawsi chiah chiah hi a ni mai e; a chuan dân a va ṭhing tak! An hnunga chuangte leh leilâwn chhuk lama chuangte paw'n Sâwmfela chu, "A zei lo ve hle mai. Ka chuan hmasak ber ṭum min ti hre chhuak," tiin an nuih ṭhaw mai a ni. 1st floor an thlen chuan Emmy'n, "Le!" a tih leh rualin chhuatah an pên rual nghâl a, Sâwmfela erawh inchhuih khutin a kat deuh nawk. Emmy pawh nui hakin lehlam a hawi a, a inhup khûr ngar ngar zui. Mi dang lo hmutute lah an lo keh hai bawk si; Sâwmfela zak lutuk chuan Emmy bânbulah piai hlakin, "I châk lo khawp ang." inseh ruh ṭeuh hian a'n ti a, Emmy erawh nuih a insûm hle. A ṭhiannu dâwr nghahna lam panin 2nd floor-ah an chho zui nghâl a, Emmy nuihza insûm chu Sâwmfela chuan, "Nui suh." ti hlukin a va melh rum thei tak! A ṭawngkamte lah chuan Emmy nuih an ti za zual ting mai si; Sâwmfela chuan a kêk lo chauh hi a ni mai e.

2nd floor an thlen leh chuan ding lamah an phei leh a, mi dangte pawh an lo tam leh viau tho mai. Thui lo tê an phei hnu-ah Emmy ṭhiannu Kimkimi dâwr chu an thleng ta e. Kimkimi'n a lo hmu chiah, "Awi! Lalṭhian i dam ṭha maw? Kan va inhmu khât êm êm; lo ṭhu teh u, hei, in pa em ni?" ti nui sângin Sâwmfela chu a en deuh vang vang a, "Ka ṭhianpa leh ka bodyguard tlangvâl huaisen a nih kha." chhuang thiam tak hian Emmy'n a lo ti ve vat. Kimkimi chuan, "A ni maw! Khawi maw, lo inchibai ila, Lalrinkimi ka nia, Kimkim tiin min ko dâwn nia," A kut rawn phar chhuak pah hian a'n ti leh a, khabe zum lam deuh biang chum bat, nula hmêlchhe lo tak, fel leh hawihhâwm tak a ni tih a hriat. Emmy ai chuan a sâng hlek bawk. Sâwmfela paw'n nui sângin, "Malsâwmfela ka ni e." tiin an inchibai zui a. Chutih laiin Sâwmfela buai lehna tur nge Emmy chimawm belh lehna tur ni teh rêng ni; Kimkimi ṭhianpa ti ila mipa dik tak ni chiah lo tuai kan tih ang hi a lo awm ve chu niin. "Awwiii Lal-emmyyy...mi induh...mi pawh i be ve duh lo mawww..." lo ti duai duaiin a'n hawi tau zui hmak a. Sâwmfela paw'n a lo en deuh kâwk mai. Emmy chuan, "Awwiii...Lal-Cici...i ṭhutna kha a piah deuh sia thawmhnaw zârin a hliah daih che a, ka hmu lo che alâwm, i dam ṭha maw?" a'n ti nui ver ver a, Cici-a chuan, "Hmm...melh pawh min melh duh lo a nih khaaa..." tiin a tûm leh hmak. A sam Emo deuhte leh a hmêlṭha vawr te, a ṭawngkam leh a aw-te bâkah a awm dân vêlte chu Sâwmfela ten zâwng tak a ni lehnghâl a. Cici-a awm lohna dâwr lehlam hawi zâwng chuan Sâwmfela chu a ṭhu nghâl hmak. Chutah Emmy lah chu Cici-a bulah va ṭhu pheiin, "Ka ṭhianpa saw chhe lo i ti em? Insual a thiam sia a pa teh mai a nia aw." Sâwmfela melh zauh chung leh nui duh hauh lo hian a'n ti a, Kimkimi chu a mit ko a sân khum zauh bawk. Cici-a lah chuan, "Ka hmuh hnu a ang ka ti...khawi, ṭhianpa lo inchibai ve ilaaa...i chhe lo siaaa," nui pâwt pâwt chunga no deuha tih leh rawn pan a la rual zui. Hetih laia Sâwmfela duh lo lutuk leh insûm hmêl kha. Ṭha takin Sâwmfela chuan a lo chibai ve mai, no fahrana a rawn chibai leh a kut a lo hmer salh chu rang zeta la lêt vatin Sâwmfela chuan, "Ti hian lo inkâwm rawh u, ka'n tei harh lawk ang e." Emmy leh Kimkimi en pah chuan a'n ti a, a chhuak zui zat. Chu veleh Cici-a chuan, "Awi a va'n pa reuh, ka duh tawp. A hairstyle, a dress leh a hmêl te, a aw leh a mitmengte kha awiii! Lal-emmyyy...min lo tihpui teh aw." ti nui var varin a han inhup vêl bawk a, Emmy leh Kimkimi pawh an nui var var mai a ni. Chuta Emmy'n Sâwmfela chanchin a hrilh leh hnu phei chuan Cici-a chu Sâwmfela zûnah a uai mai ni lo, a thênin a inthên duai duai hi a ni mai e; Kimkimi pawh chuan a ngai sâng hle tih a hmêlah chuan a hriat bawk.

Khatia Sâwmfela tei chhuak ta khân kalna tur dang hre chuang hek lo; 2nd floor pan chhohna step lamah khân a phei ta ringawt a, veng huaia inhriain thawmhnaw zawrh vêlte chu en kual pahin a phei zêl. Step lam hawia a kal leh chiah mipa pakhat hian a lo su lui deuh sawk a, Sâwmfela pawh chu hawi vatin chu pa en pah chuan, "Awh! Ka tihpalh." tih leh kal mai a tum chu, "Min hmu lo a mi? Hawi ta che." tih leh Sâwmfela rawn pan hnaih chu a rual ta mai. A hmêl aṭang chuan tlangvâl a ni tih chu a hriat viau. Sâwmfela nên chuan an inchen tâwk hle bawk. Chu pa bulah chuan tlangvâl tawi sa muk deuh hi racksack akin a lo ding ve reng bawk a; buai erawh a inpeih reng tih Sâwmfela a en dânah chuan a chiang hle. Hang lam deuh hi an ni a, an hmêl chu hmuh thuta phut zawkna tur a niang tih tura chhuanawm loh tak an ni. Sâwmfela chuan, "Ka hawi vângin min lo su rêng a nih kha, buaina siam hi ka duh lo a nia ṭhianpa." aw dam dap hian a'n ti leh a. Mi dangte paw'n an lo en ṭhap tawh.

Chu pa bawk chuan, "Tu nge buaina i siam peih ti...min vau ve khanglâng alaw," tih leh Sâwmfela âwma nam a rual zui. "Maw...min vau ve alaw," tiin a rawn nam her leh sawk. Security-te zunram thiara an kal bo lai tak a ni si. Chutah Sâwmfela chuan, "Vau lo e...ka hrilh mai mai che." dam dap hian a'n ti leh hrâm a. Chu pa bawk chuan, "Mai mai tih ka duh lo. I in la pa ve deuh a mi?" a lo ti leh. "In la pa lo e...mipate chu inlâk pa a ngai tawh hlei nêm. Min ti lui suh ṭhianpa. Min kalsan rawh u." Sâwmfela'n a tih leh pawh chuan ngai pawimawh lo tih hriat zeta nuihsawh chung hian, "Ve khanglâng che chuan a...min la vau ve ka ti." tih leh hnek a rual ta mai. A che vêl ngun taka lo entu Sâwmfela chu kûn zauhin chu pa dulah chuan a kuttum ding lamin a hnek chawrh a, chu pa thaw hawka kûn lai bek vei lamah a kuttum vei lamin a hnek leh siah. Chu pa chu vir nawkin MC chhuatah chuan a bawk zui thlawrh. Chumi rual deuhthaw-a pa tawi zâwkin, "Hei Zâwngaaa," tih leh Sâwmfela chu spear thal tawp tumin a racksack ak chung chuan kûn chungin a rawn tlân phei zawk a. Sâwmfela chu inher ve zawkin chu pa bek vei lama a khûp ding lama a'n do leh siah mai zawng, chu pa chu a ding lama thle dâk deuh âwrh chung hian a bawk zawi ve leh nawk zui. A kut thlâk a na bawka an tho thei mai lo. Chutih laiin a khawih hmasak zâwk rawn tho ve leh mêk chu va pan hnaiin a kawr âwmah ṭhâm leh phih din lâwp chu a rual a, "Min ti lui suh ka tih kha i hria em? Vawi thum bâk tumah warning ka pe ngai lo tih hi hre reng tawh ang che. Heta ṭang hian kal bo nghâl rawh u." tih leh nam kat nawk a rual a. Chu pa pawh chuan eng mah a sawi tawh lo, a ṭhianpa rawn che ve ṭuah ṭuah chu kai thovin zahna pumhlûm nên indawm ṭûn chungin an kal sawn ta hnu hnu a. Dâwr nghâktu leh customer-ho rawn thlîr ṭhaptute chu Sâwmfela chuan zak tih hriat takin en kual zak zak hlawm a, pa upa lam leh hmeichhia deuh vek an ni bawk si, ngawi rengin Kimkimi dâwr lam pan chuan a kal ve leh ta a nih kha. Sâwmfela entu nula-ho mitmeng de sawr sawrte kha aw.

Chutia Sâwmfela kal ta chuan piah deuha Emmy, Kimkimi leh Cici-a te lo ding ve reng a hmuh rual chuan, "I hman tawh em? I hman tawh chuan kan hâw tawh mai dâwn em ni?" nui hmêl lek leka tiin Emmy chu a en bawk a, "Aw, ka hman a ni mai. Kha mite kha an va zak lo ve, an tih dân che kha dawh theih chi a nih loh tawp kha, chawh lutuk, hmêlchhe dûn si." Emmy chuan ti hlaih hlaihin a lo thinrim ve hle tih a hriat, mi dangte chu an lo nui hak a, Sâwmfela pawh a nui ve suk bawk. Emmy thawmhnaw leite chu Sâwmfela chuan khaiin an kal dâwn tihah, "Nih, kan kal mai aw Lalṭhian, Cici...bye..." Emmy chuan ti nui sângin an kal zui nghâl a, Cici-a chuan Kimkimi chu sik nawk nawkin, "Awi! Sâwmfela kha ka va'n duh tak, man rem rem eee." hmûi hup paha tiin a nui leh pâwt pâwt mai. Sâwmfela khân hria se engtin tak awm leh ang maw? Chelh din rual lohvin hun leh nîte an her liam zêl a, ruah tui pawh a tla tam ṭan ta viau. Emmy nu leh pate pawh New Delhi-ah an kal tawh bawk. June ni 20 zân chu Vân athiangin thla zahve a êng no nghelh a, arsi de sep septe chuan hringmite tân hmuhnawm hlui lehin, Zâwlkhawpui In tin aṭanga êng de tuarh mai te, motor tlân ri vung vung leh horn ri chuah chuahte chu mit leh beng ti tlaitu an va tling chiang êm! Thli thaw heuh heuhte chuan boruak an vawng dâi a, chu zân khawharthlâk takah chuan mipa ve ve ṭhian ṭha takte pawh tîtî dûn sep sep sela a romantic viau tho ang tih tur hi a ni. Chutih lai chuan, a room thlang lam varanda-ah Sâwmfela chu combo leh guitar nên a ṭhu hnawk ang reng hle. Emmy-te In a awm hnu chawlhkâr khat vêl a liam ta tihah Emmy hian Sâwmfela khawhar inhnem nân guitar hi a leisak a, an picnic-naa guitar a thiamzia kha a la hre reng hi a ni. Anni chhungkua lah hi music lama bang bo ve tak tak an nih avângin Combo ṭha zet tih loh music instrument hrim hrim hi an ngaihsak lo hle. Chutia Sâwmfela ṭhu chhuak chuan combo-ah guitar chu fit-in, ring lutuk lo hian a'n thai ri tleng tleng chhin a, a phone-a a record guitar perh rîk pângngai music tempo chu combo-ah ring vak lova play lehin, music introduction a ngaih chân deuh hnu chuan GNR hla hit deuh, November Rain Slash-a guitar lead nalh leh turu zet kha Acoustic guitar chuan a'n lead ve tak tak a nih kha. Chu acoustic guitar lead nalh zet chuan a room-a Emmy lehkhabu chhiar lai beng chu a verh ta zar mai le! Emmy chuan nalh ti taka a ngaihthlâk deuh vang vang hnu-ah a lehkhabu chhiar lai chu a khuma dah leh a room varanda-a chhuah chu a rual nghâl a, varanda beam chunga a kut dahin chu rimawi hnehsawh taka lo tumtu Sâwmfela chu a thlîr thla ta veng veng mai. Sâwmfela lah chuan a guitar lead lai chu enin a tui tlut tlut hle tih a hriat. A kut zungṭang rang zeta guitar hrui hmet sual hauh lova a han ti che zet zet maite chu Emmy chuan thiam a tiin hmuhnawm a ti kher mai.

Chutia hmuhnawm leh ngaihnawm ti taka a thlîr hnu rei vak lovah Sâwmfela chuan a guitar khawih nalh turu zet chu a lo play zo dêr. Chutah thlang lam chu hawiin guitar chu a'n thai ri leh tleng tleng a, a nuin a dam laia a duh êm êm ṭhin Pathian hla pakhat, R. Lalramchhana'n mawi tak maia a sak "Khawpui mawi" tih kha mitchhîng chung hian tak deuhin a sa ta a; a thunawn

Angel vâr nêna lêng zain,
Lal fak zai kan rem hun chuan;
Chutah ka ṭah mittui zawng zawng
A hul ang khawpui mawiah chuan!

Tih a sa zo leh chiah chu a hnuk a ulh deuh tih hriat takin a tâwp zui a, kûn pahin a mittui a hru zauh bawk. Emmy chuan a kut pahniha a biang dawm tawnin varanda beam-ah chuan kiu nghat meuh hian a lo thlîr reng tawh hi a ni. Chutia Sâwmfela mittui hru zauh a hmuh rual chuan Emmy chu inher vatin Sâwmfela awmna pan chuan a chhuk nghâl a, a zuk thlen rual chuan, "Sâwmfel," tiin a ko zui zat. Rang zetin Sâwmfela pawh chu a rawn hawi ve nghâl a, hawi lêt lehin a mit chu a hru leh zauh. Chumi hnu chuan rawn hawi lehin, "I lo kal alaw, Emmy." a'n ti nui sak a, Emmy chuan chhâng lêm lovin a pan hnai zêl. Sâwmfela bul chair-a ṭhu pah chuan, "I nu i ngai ti raw?" Sâwmfela khawngaih hmêl taka en chung hian a'n ti a, Sâwmfela paw'n zêp buai lovin a nu leh pate a ngaih thu chu a hrilh ve mai bawk. A nui hmêla khawharna inthup erawh varanda light hnuaiah chuan Emmy'n a hmuh hmaih hauh lo. "Mi tuarchhel tak i ni Sâwmfel, i nu leh pate paw'n Vânram aṭang khian chhuang takin an lo thlîr reng ang che. Chuan, i guitar lead kha mawi ka ti lutuka ka lo thlîr reng che a; GNR-ho hla November Rain Slash-a guitar lead kha a ni ti raw?" hmêl hlim sârh hian a'n ti leh a, Sâwmfela paw'n a nih thu a lo hrilh ve leh.

Music zirna school-ah i kal tawh em ni?

Kal lo ve, mahse ka puin min zirtîr ṭhîn a, solfa a thiam bawk.

A nih chu, i awhawm bîk e Sâwmfel, guitar bâkah phênglâwng i tum thiam si, i zaithiam êm êm bawk sia, tu nge maw i chhun ber le?

I ti zahthlâk êm mai Emmy. Mi dangte paw'n an thiam lutuk alâwm. Ka nu kha kan khuaah chuan MHIP day lawmna programme-ah a zai ve ṭhîn a, chu zawng chu a ni mai. (Sâwmfela chu a nui sak bawk.)

Chhun tur i nei ṭha êm a nih chu, Pasalṭhat lamah lah i pa i chhûn bawk si, nang pasala neitu che hmeichhia chu khawvêla hmeichhe vânnei ber a ni ang.

Êm êm a che te-tak-tê...

Nih, zawhna ka zâwt ang che aw, Sâwmfel. (Sâwmfela a lo bûk nghauh hnu chuan)

Ih...kei hi kha'ng mi sualte khân min manin min tlân bopui ta se, min rawn zawng ang em? Min rawn chhan chhuak ang em?

Teh rêng mai. Kâwl kil tâwpah pawh tlân bopui che mah se, ka hmuh hma loh che leh ka chhan chhuah hma loh che chuan ka tâwpsan ngai lo vang. Tin, an man che pawh ka phal lo.

Ti nui sângin Sâwmfela chuan Emmy biangah chuan a'n piai zauh a, mahse, Emmy mitmeng takna, khawngaihna leh lâwmnaa tle kar a hmuh chuan a nui lai chu tâwpin Sâwmfela chuan a en deuh vang vang a, Emmy lahin mit la sawn hauh lovin a lo en ve reng bawk. Varanda light êng ṭha tak hnuaia a kawrfual(dark blue) khûp khuh pha tâwk a hâkin a khuh phâk loh china a châwn no mûm taih mai te, a kawrfual chu pangpâr lem hmun hran hrana awmin a ṭialte bâkah, a sam dum tle kar a koki hnuai deuh thleng a thlahte leh a mitmu dum bial ṭha tak tle ralh mai te, Katy Perry hmaifang pu mi a nihna leh a biang chum bat te, a hmûi chhah lutuk lo sen hlar maite nên chuan duhawm tak hi a ni mai. Chutia rei lo tê an inen deuh vang vang hnu chuan Sâwmfela chuan a mit chu la sawnin, "Ih...eng lo...guitar perh hi ka lo zirtîr ve dâwn che mi, i duh em?" Emmy en leh pah hian a'n ti nui sâng a, Emmy paw'n nui sângin, "Aw le, ka thiam ve châk alâwm," tiin guitar perh chu an inzirtîr leh ta zâwk a. Guitar perh an inzir dân vêl chu lo ngaihtuah ve tawh mai r'u aw.🤭🙆

Hun a liam leh deuh ta tihah Emmy chu a ze ngai bawk a chhuak leh a, Sâwmfela chu Miss Hmingtei a dem loh leh Cici-a kha a dem thûl; inûm kawi zawr zawrin sofa leh khumahte chuan Sâwmfela'n a keuh dup dup mai a, thinrim tak taka kut thlâk chi a ni si lo; Sâwmfela chuan a va melh rum thei tak! Zan lamah an ṭhiante Puia-te kha an rawn lêng zauh zauh ṭhîn bawk a, Emmy lah chuan Sâwmfela runluih chu nuam a ti êm êm mai si, nui har harin a room-ahte a tlân lût leh zuai zuai ṭhîn a nih kha. Chutia a duh loh zâwnga Emmy'n a fiam fo ṭhîn chu Sâwmfela chuan rulh lêt dân tur a ngaihtuah nasa mai a, tûk khat chu tih dân tur ṭha deuh a ngaihtuah chhuak ta a ni ngei ang, chuta chin chu Sâwmfela a nui vur vur tawh mai a ni. Tûkṭhuan ei hma deuhin Sâwmfela chu a chhuak nalh a, Car-in a tum ram lam a pan vang vang zui. Rei vak lovah rawn kîr lehin uite vâr duhawm zet hi a rawn hâwn ta a; awmpui nula pahnihte chuan, "Awi! A va'n duhawm reuh ve U Sâwmfel. A hmêlṭha reuh si, i lei em ni?" tiin uitê chu an chûl heuh heuh bawk. Sâwmfela chuan a lei thu a hrilh hnu-ah nula pakhat zâwk chuan, "Eng nge a hming?" a lo ti nui ve sâng a, Sâwmfela chuan nui ṭhaw chung hian, "Emmy a nih hi." a lo ti sam êt mai. Nula pahnihte pawh chuan rawn en deuh kâwk hian, "Ber kher a! U Emmy'n a hriat chuan a thinrim viau ang aw." pakhat chuan a lo ti vat. Pakhat zâwk chuan, "A ti lui peih che sia thungrulh dân i ngaihtuah chhuak ṭha hle mai." tiin an nui var var. Chutah Sâwmfela chuan uitê chu pawm pheiin a room varanda-ah Emmy hriat ngei turin a pawm chhuak leh a, chhuata daha kal sawn pah hian, "Emmy Emmy...tlek tlek tlek..." tih leh a kuta chhuat han tuk keuh keuh chu a rual zat. Emmy room varanda han hawi chho zauh zauh pahin a aia ringin a ko lauh lauh zêl a, a châng leh faifûkte'n a ko thûl; rei lo têah Emmy pawh chu varanda-ah chuan a rawn chhuak ta nge nge e! Amah a ko emaw ti-a mak ti deuh taka a rawn hawi thla chuan Sâwmfela hawi sawn zawk leh uite lam hawi a, "Emmy Emmy...tlek tlek tlek...lo kal teh, hei, hetah lo kal rawh. Emmy...tlek tlek..." a lo ti lauh lauh a hmuh rual chuan Emmy chuan a va melh rum mai mai tak! Inseh ruh ṭeuha melh râwm râwm pah hian vîn zetin, "Awi! Sâwmfel hmêlchhe pa, i uite lei mai mai kha ka hming maw i phuah ve kher, i va'n châk dâwn lo tak!" tih leh Sâwmfela awmna lama chhuk chu a rual zat. A thinrim ke pên chuan step-te chu a per keh vek ang tih pawh hlauhawm tak a ni.

A zuk thlen thlâk rual chuan, "Hmêlphak, i uitê kha ka vaw hlum dâwn. Nang pawh kha i châk lo viau ang." inseh ruh paha tih leh pan hlawk hlawk chu a rual leh zat. Emmy nute thin thawk râwl leh ân hla chu na hat hat tak a ni. An awmpui nulate lah chuan varanda kawngka aṭangin an lo nuih awr awr bawk a, Sâwmfela leh Emmy uite inchuh lai chu video-in an lo la zui. Emmy chuan Sâwmfela bânbulahte chuan a seh leh ṭhîn. A sam chu ṭâwn kûl leh raihin kekawr bûl dum a malpui khuh pha tâwka chhîng leh vest sen nalh zet a ha a, amah a chum taih bawk nên a nau lactogen mûm pâwng lahte nên chuan a mawi leh viau mai. Sâwmfela paw'n kekawr bûl dum leh Lakers Jersey bânbûl a ha bawk a, an inthuam dân pawh hi an inhmeh thei hle. Chutia rei mawi tâwk uitê an inchuh hnu chuan tûkṭhuan ei turin an inṭha ṭhen thei hrâm a nih kha. Chaw ei lai pawhin an awmpui nulate chu an nuih a la za deuh tih a hriat reng, Sâwmfela paw'n nuih insûm takin a ei ve bawk a, Emmy erawh "Duh loh râi ang" hlauh, a tûm bûr thung. Anni pahnih hi zawng an inngeih rei lo lulai ṭhîn êm a ni. Nî a sâng zêl a, Emmy leh Sâwmfela pawh inbe tam lovin school chu an la kal dûn ve leh mai. Emmy'n amaha kal a duh thu a sawi lahin Sâwmfela chuan, "Fîmkhur tluk a awm lo," lo ti maiin an inphur chhuak tau bûr mai a ni. School an thlen hnu chawhma class-te an zawh leh chuan Miss Hmingtei chuan Sâwmfela chu a nêl sâwt tih hriat zetin, naupangho bulah Sâwmfela si chêt chuan a rawn ṭhu ve ta mai. Chutah Emmy'n ngeiawm zeta a lo inhup nuih khum pâwt pâwt dânah eng emaw tak chu Miss Hmingtei hi a hrilh tih a chiang ta hle. Sâwmfela pawh a va inseh ruh leh nasa mai mai tak!
Chumi nî chu Sâwmfela pawh tuitang lo zetin a awm nilêng a, tlâi an bân ruala Emmy'n Miss Hmingtei thlah tura Sâwmfela a'n hrilh leh vêl phei chu Sâwmfela'n a va ngei teh rêng êm! Mahse, Sâwmfela chuan fing thiam tak a, "Ka mawhphurhna hi ka ngaih pawimawh loh chuan," Miss Hmingtei ena a'n ti nui sâng chu ani paw'n a lo hre thiam êm êm mai si, chu erawh Emmy run tâwk a tling ve leh êm êm bawk a, an va inei lo tawn ṭhîn tak!

Tichuan, nî a her liam a, June ni 23 ninga zân hun duhawm a lo ni ve leh ta reng mai. Kohhran programme a awm lo bawka zanriah ei kham hnu zân dâr 7 vêl a nih chuan, motor light de chuah chuaha tlân ri vung vungte leh In tin aṭanga êng de tuarh mai te, Vân mawitu si-ar kawp chawite chu an hmuhnawm leh tawh hle. Chutih laiin Sâwmfela pawh Tâwnzau dum leh kekawr bûl dum bawk kha a ha leh a, a uitê Emmy chu pawmin thlang lam varanda-ah a ṭhu leh vâng tawh. Drinks leh nep nawi ei turte nên chuan a inchhawp hnawk leh rûih mai. Emmy inbual zo inthlâk fel leh chiah chu Sâwmfela awmnaah chuan a rawn phei ve leh mêk a, kawrfual dum bânbûl a châwn khuh pha tâwk, a taksa thlâwp zata tight pan lam deuh a ha a, a hma lam nghâwng zau deuh tlâng rual chiaha a râl dona phaw phîr mûm lian tâwk tiu teu tak, insi chêta a bra-in a khuh bâk lang taihte nên chuan en vung vung a, "Confessor, thu min pe rawh." ti-a pawm thut pawh châkawm tak tur a ni, heih raw! Chu mai ni lovin, a kâwng fêk deuh hnuaia a hlei tâwk chiaha a mawng khal poh lahte chu pêt pawp hi an châkawm zâwk a; he nu inthuam duhdah ṭhîn lutuk leh a inhmeh êm êm zêl si hian alâwm ka rilru hi ti hah ṭhîn ni. Mipate tân chuan hetiang khawpa hmeichhe mawi leh nalh, pianṭo dik êm êmte aia thil siam mawi hi khawvêlah hian an awm âwm lo ve, an hleitlin leh hleitlin loh lam ni lovin, an hlim nui hmêl phei chu hmuhnawm a tling ṭhîn. "Nei ve lo chil pût a luang dem dem," tiin Sâwmfela hian min awhthîk lul suh se. Emmy'n Sâwmfela bul a va thlen rual chuan, "Sâwmfel, i uitê kha ka lo pawm ve teh ang." nui si lo tûm si lo hian a'n ti tawl a, Sâwmfela chuan rawn melh hâ chung hian, "Vuak hlum i tum kha." lo ti hlukin uitê chu a pawm uluk sauh sauh. Emmy chu nui sakin, "Nge...ka hming i phuahsak ve kher?" tiin a tûm leh nghâl zat. (Mihring hming erawh sa tih tur)

I pawm ve duh chuan ka pu Sai sâwm kâp ti rawh.

Hmm...ka ti âwm lo êm mai a! Ka pu pawh i ni lo.

I tih duh loh leh i pawm lo tawp anga ni mai lâwm.

Chimawm viau suh aw Sâwmfel. Ka pawm ve châk a nia.

A aw leh mitmeng pangchang leh titau deuh inpawlh chunga Sâwmfela a'n melh zui ralh mai zawng, Sâwmfela chuan en vang vangin a khawngaih leh deuh si a ni ngei ang.

Nih leh kha, pawm la..

Ti-a dingin uitê chu a lu chungah a keng ta vah mai. Emmy chuan melh râwm râwm paha ner sakin, "Awi! I sual thiamzia hi maw! Khawi..." tih leh uite ban chu a rual a, an insân hleih si; a ban pha mai si lo chu a zuang leh auh auh ṭhîn a, Sâwmfela lah lo nui hak haka dingdihlîpin a aia sângah uitê chu a keng vâ vâ bawk. Chutia Emmy'n uite lâk tum a, "Khawi..." ti paha a zuang leh auh auh ṭhîn chu Sâwmfela'n a lâwm hle ni tur a ni. An inhriat tirh ata Emmy'n a la hmuh ngai rêng rêng loh Sâwmfela za taka a nui ver ver mai chu Emmy paw'n hmuhnawm a ti tih hriat takin a lo en leh vang vang ṭhîn. Varanda light hnuaia Sâwmfela nui hmêl chu hmeichhe dangte tân pawh hmuhnawm tak tur a ni ngei ang. A ha vâr rual zet thianghlim sar maite chu Sâwmfela nui hmêl ti ṭhatu an ni tlat a ni. Nui var var pah hian Sâwmfela chuan, "La ta che, kha la rawh," tiin Emmy hmai bulahte chuan a'n keng hniam zuai zuai a, Emmy lahin uite chu ban zuaiin Sâwmfela nui hmêl ngawt chu a lo thlîr reng thung. Chutia uitê ban tum buai tawh lova Emmy'n a en reng ringawt tâkah chuan Sâwmfela pawh la nui var var paha Emmy chu rawn enin, mak ti taka Emmy en pah chuan, "Eng nge a?" a lo ti ka hau mai. Chutah Emmy chuan nui sâng hian, "Khatianga hlim taka i nui hmêl kha hmuh a nuam lutuk Sâwmfel. Nui fo turin hlim reng la ka duhsak che." a mitmenga tak deuh hian a lo ti a, Sâwmfela chu a ngawih deuh vang vang hnu-ah, "Ka lâwm e. Nang pawh hlim reng ang che. Kha, a duhawm reuh asin." nui sânga tih leh uite pêk chu a rual zat. Emmy paw'n nui sânga lo banin a pawm chiah tihah uitê chuan Emmy kut chu a lo liak hlep hlep. Emmy chuan nui ver ver hian, "Awi! Duhawm lutuk, hmêlṭha bawk si." tiin uite biangah chuan a chuk keuh. Ka biangah hian han chuk zâwk sela aw. Chutia Emmy'n hlim taka uitê a chhaih vêl chu Sâwmfela paw'n a en ning bîk hauh lo tih hriat zetin a lo thlîr ve veng veng bawk.

Chutih lai chuan Emmy chuan, "Sâwmfel, In chungah ṭhu ila, guitar kha keng bawk la," tih leh a ngaih la tâwk leka melh a'n rual mai zawng, mi luhlul Sâwmfela kha khaw nge a awm tâk le? "Aw le," tiin In chung lam panin an inzui chhoh hnak hnak khi! An thlen chhoh hnu chuan an han hawi kual a, Aizâwl khawpui mawi êm êm mai, In tin aṭanga êng de tuarh leh motor leh mi ṭhenkhat veivâk sang sangte chu an han thlîr kual leh veng veng phawt a, "A mawi asin." Emmy chuan a ti zâwi sap. An ṭhut fel leh hnu chuan, "Hla thlang la, eng hla nge kan sak ang. Sâp hla nge Mizo, zanin hi a romantic bawk sia," awmze nei deuh hian Emmy chuan a'n ti nui ver ver a, Sâwmfela chuan, "Ka va hre mai lo êm! Ka tawrh hi Lalpa'n a phal, vui thei ka ni lo tih kha sa mai ang hmiang." a'n ti nui ṭhaw mai chu Emmy chuan rum zeta melhin, "Awi! I va romantic lo tak!" ti hlakin a ṭhu tûm bâr zui. A hnu deuhah chuan Sâp hla leh Mizo hla nalh an tih zâwngte sain nuam an ti viau. Emmy erawh a zai ṭha duh vak lo, sawi tawh angin zâi lam hi chu a chem kal lohna lam tak a ni a, a aw hi mi dangte aw lakah hian a independent fâl êm a ni. Hla 4 vêl an sak hnu chuan Emmy zâi ve vâng nge ni dâwn ni; ruah a rawn sûr ṭan ta mai. Hmanhmawh takin an chhuk leh ta a; Sâwmfela pawh a room pan tlang nghâlin a mu dâwn chiah tihah Emmy'n a kawngkhâr a rawn hawng leh. "Kha i ui..." tih leh Sâwmfela pêk chu a rual a, chu veleh, "Sâwmfel, naktûk zân kha ka pa Kima fanu birthday party-naah kan kal dâwn kha aw. Ka chhe lo leh viau ang." a'n ti leh kher chu Sâwmfela'n a va ei lo tak! Chutia Sâwmfela ner hmêl a hmuh rual rual chuan, "Nang paw'n chhe lo min tih êm kha a! Mite tluk loh nih hi ka ning ṭhîn, awiiii!" tiin a nui har har zui, chutah, "Hei, hetiang hian ka lâm anga ka in-post vêl bawk ang a," tiin a han zir leh rih. Sâwmfela chuan, "Mu mai mai teh, ka mu duh tawh a nia," a lo tih hluk rualin, "Aw, nih mangṭha mut tui," chhuak paha kawngka khâr tum deuh hian a'n ti leh a, "Aw aw aw mut tui." Sâwmfela'n a lo ti leh chiah, "Byeee...muah muah," tiin Emmy chu a nui leh hak hak. Sâwmfela'n, "Kal teh a!" a lo ti leh hluk. Emmy pawh nui hak hak chungin a room lamah a chho zui ve ta a. Nula zâwiâwi a ni lêm lo bawka a lawmawm ṭhîn a ni he nu hi chu! Duhawm leh chimawm hi amah ti nêlawmtu an ni leh tlat bawk a, chutih rualin, naktûk zân birthday party-a an kalna turah hian a tâna thangvalh a va dai per mai ang tih erawh a hlauhawm viau mai.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » July 10th, 2022, 4:27 pm

THE CAVE MAN. 12

✍️ Duata Khualchhâwn.

BUNG 12-NA.

A tûk khua a lo vâr a, June ni 24 zirtâwpnî a ni. A ngai tê bawkin zîng ni chhuak chu a mawi leh hle a; Aizâwl khawpui pawh a reh lo leh tawh kher mai. Tute pawh an hmêl hmuh a nuam a, tûkchhuak fuh lo deuh an lo awm a nih chuan pâwnah an tei chhuak lo a ni ngei ang. Chutih laiin, Sâwmfela pawh a thiam thil practice-in a room sîr lama phûl hring cham dup pangpâr chi hrang hrangin a hual ṭhup hmunah chuan a lo tâl nasa leh tawh hle. Punching bag lian ṭha tel tawl tak rih hmêl zet khaiin a hnek a, a pêt a, zuang vir zawkin a back kick thûl; a châng leh boruak lâwng ringawt chu rang tak taka hnekin mihring sualpui ang tak tak hian a practice-a, chutianga a practice reng ṭhin vâng pawh chu a ni mahna; a tihrâwlte pawh a hma aiin an mawi a, an lian deuh bawk a, kekawr bûl dum hain ke lâwng nên chuan a che zek zek mai a ni. Emmy lah chuan hmuhnawm ti êm êm hian a room varanda aṭang chuan a lo thlîr nui sâng a, chutia a thlîr lai chuan Sâwmfela chu a ke ding lam theh vakin a invawrh a, a ding leh chat. Sâwmfela pawh chuan, "Yesss" tiin a kut pahnih hûma lek vah chung hian a lo ti zui. Chutia vawi tam tih a lo tum tawh leh a theih loh ṭhin invawrh a thei ta chu Sâwmfela pawh a hlim hle mai. Emmy chuan kut lo bêng thek thekin, "Wow! A mawi lutuk," a lo ti nui var var bawk. Sâwmfela hawi chhovin Emmy a hmuh rual chuan a mit ding lam siai zauhin a nui ve sâng bawk a, a room lam pana kal nghâlin a thlen hnu-ah inbual fai turin bathroom-ah a lût zui ta a ni.

Rei vak lovah tûkṭhuan an bâr a, an ei kham leh hnu-ah School kal turin Emmy nên an insiam zui leh. Sâwmfela chuan Kamis sen ama pawisa ngeia a lei, a dung leh vâng zâwnga rawng dumin a ṭial nalh zet leh cotton Jeans dum hain Sneaker rawng sen leh dum inpawlh nalh zet a bun bawk a, a Kamis bân chu a bânpuam thleng a thlep bawk. A sam sei lutuk tur a tan tawi deuh a thlahte chuan a koki an hawlh pha tâwk chiah a, a tukkhum lamah a nam pial bawk. Hetih laiin, Emmy pawh Kamis bodyfit vâr ṭial a hma chilh pum lova a hnuaia T-shirt eng nalh zet a hâk te leh Jeans kekawr pâwl tak deuh a hâk te bâkah, sneaker vâr a bunte nên chuan a nalh leh hle. A sam dum ṭha zet chu a chhîpah a ṭâwn kûl raih a, a chal sam tlêm a thlahte chu a inhmeh zual em aw tih tur hi a ni, make up pawh a uar tâwk leh kher mai. A mawng bâwr khal ṭha tak te, a khêl mûm kûng thlâwp zata a malpui chîp chaihte chuan mipate mit an va ti nghal lehzual dâwn êm! An inpeih hnu chuan chhuak nghâlin School lam pan chuan an inkhalh chhuak leh ta a. School an va thlen chuan naupangte paw'n Sâwmfela chu an lo bawh leh nak nak nghâl. "Hotupa i va'n pa êm êm; ih maw...MC-a in insual kha kan en asin." mipa naupang pakhatin a lo tih chuan Sâwmfela beng a verh ta zar mai. A han zâwt nawn leh a, "Ih maw...pakhat zâwk chu a tawi deuha maw...school bag ang deuh a ak bawk," A lo tih leh chuan Sâwmfela paw'n a hre thiam ta. Ni e, khatia Emmy nên MC an kal ṭuma mi pahnihte nên an insual lai kha video-a lo la an awm nual rêng a, chu chu social media hrang hrangah an lo up leh chuai chuai hi a ni. Ani Sâwmfela lah fb a lût khât si, Puia-te nên whatsapp-a an inbia tih lohah chuan phone a khawih tam bawk si lo. Chutiang bawkin Emmy pawh fb ai chuan IG a khawih nasa a, chu pawh rei lo tê bâk a lût ngai hek lo. Whatsapp-a a ṭhiante a biak bâk Sâwmfela runluih rêng rênga khawsa ṭhîn a nih avâng khân an lo hre hauh lo hi a ni. Chutah Emmy chuan, "Wow! I lâr leh tawh hle a nih chu bodyguard. Tûn aṭang chuan vengva deuha awm a ngai tawh a ni. Chuan, Miss Hmingtei leh Cici-a te paw'n an lo hmu ve ngei âwm sia," nui paha tih leh office lam pana tlân a rual zui. Sâwmfela pawh chek hlukin Emmy chu a melh zui râwm râwm a, Office luh pawh chu a huphurh ta kher mai. Chuta kârah office kawngka aṭangin Emmy'n a rawn ko zui leh lauh lauh mai si, he nu chimawmzia hi chu aw.

Chutiang a nih tâkah chuan zirtîrtu dangte paw'n nui var varin an rawn ko zui bawk nên, a kal lo thei ta si lo. Office chhung a luh rual chuan an insual video vâng khân an lo fiam deuh laih laih rêng a; Emmy pu Principal Pu Hriatrenga lahin, "A ṭha, khatiang kha mipa dik tak chêt dân tur a ni," a lo ti hmak. Hetih laia Emmy'n Sâwmfela leh Miss Hmingtei nui pâwt pâwt chunga a lo en chîkzia kha aw. Miss Hmingtei lah chuan, "Ka tân i rem ve tawh mai lo'm ni vâltinkhûm," tih melh taka melhin a duh zual tulh tulh tawh mai si, Sâwmfela rilru a hahin a awm dân a va lâi laklawh tak! Tichuan, class-te an han la a, short break-ah pawh school campus-ah Sâwmfela hmêl hmuh tur rêng rêng a awm ta lo. Emmy chuan hre thiam maiin a nuih a za ang reng viau. Chawhnu kal loh nî a ni bawk a, lunch break zawhah Emmy leh Sâwmfela pawh inseh ruh khum ṭeuh chungin an inphur hâw ve leh ta a nih kha. Nî a hniam zêla zân hun nuam tak a lo ni ve leh ta. Zanriah ei kham hnu dâr 7 a pêl tawh tihah Emmy chu a insiam sawk sawk a, dârthlalanga duh tâwka a inen hnu-ah a bag chu lain Sâwmfela room lama chhuk a rual leh. Kawngkhâr chu kikin, "Sâwmfel, i hman dâwn tawh em? Hei, dâr 7:30 a ri ṭêp a nia, dâr 8 a nih kha birthday programme ṭan hun kha," a'n ti lauh lauh a, "Ka kal peih lo eee Emmy." Sâwmfela'n a lo tih rual chuan kawngkhâr chu nam hawn leh luh a rual zat. "Insiam vat mai rawh. Sual thiam viau suh aw. Mi dangte chuan kalpui an nei leh vek dâwna ka dâwng leh bîk dâwn asin." tiin Sâwmfela chu a en kar a, "Nangmahin va kal mai rawh, ka kal lo mai ang." Sâwmfela'n a lo ti leh. Emmy chuan rum zeta melh pah hian, "Aw, kal tawp suh. Mi sualho kha ka inmantîr nghâl dâwn. Min man ta se i inchhîr lo ang maw?" a'n ti leh hlaih hlaih a, Sâwmfela a lo nui suk. Emmy chuan, "Nui suh, i peih lo leh thinrim hmêl kha Sabereka titau khuang kaih peih tawh lo hi i ang a!" a'n ti leh chiah chu Sâwmfela'n a rawn en ka hau mai. Chutah, "Sabereka khuangkaih tihte i hre ve alaw?" nui ṭhaw hian Sâwmfela chuan a lo ti a.

Hre teh rêng mai. I hriat loh thil tam tak ka hria Cave Man.

Cave Man tih chu eng nge a awmzia?

Hmm...i hre reng, insiam vat mai teh.

Nih, thil tam tak i hriat chuan Isua patea hming i hria em?

Hmm...Isua'n patea a nei a mi?

Nei e...nang paw'n i neih chuan engah nge a neih loh ang.

Ka awih lo êm mai a! Bible-ah Isua patea hming a awm pawh ka hre lo. Insiam rawh...mawwhhh...khawngaih takin.

Emmy pangchang aw leh hmêlte bâkah a hmanhmawh bawk si chu Sâwmfela chuan nui sûnga enin, "Nge maw mi hausa fate-ho hi birthday party hi in tih reng ni." ti-a phun nuah nuahin a tho chhuak a, Emmy chuan nui sêih hian, "Sitting room-ah Ka lo nghâk ang che mi fel paaa..." tih leh chhuah a rual chu Sâwmfela'n a va melh rum leh êm! Rei lo têah Sâwmfela chu a t-shirt dum bântlâwn, Emmy nên an chhuah dun ṭuma a hâk kha ha lehin Cargo kekawr dum a ha bawk a, a sam ṭâwn kûl leh raihin Timberland a bunte nên chuan a pa tak zet. Sâwmfela chu inpeih hma a ti deuh nge Emmy chuan a lo thlîr deuh hau mai a, kawr pâwl pâr ṭial, a bân hmâwr lam parh hniang hnuang a hâk chu a pawnfên dum tight deuh a khûp khuh pha tâwkah chuan a thun thlap bawk, pheikhawk dum sâng lutuk lo a bunte leh a sam thlah hnâpte nên chuan Katy Perry tleirâwl lai chiah chiah a ni mai e. Sâwmfela'n, "Ka hman e madam." a lo tih rual chuan, "A nih chuan kal ila bodyguard, cave man." nui hak hian Emmy chuan ti ve lehin an inzui chhuak ta a ni. Pu Kima-te In lam pan chuan an inkhalh chhuak nghâl a, lîrthei leh mihring veivâkte pawh an tam leh kher mai. An inhlat lutuk lo bawka an va thlen chuan mi dang lo kal hmasate pawh an lo awm ṭeuh tawh. Hemi zân hi khaw dur deuh vâng nge thla a êng ngui lûp a, arsi pawh an khât pharh bawk. An hmaa mi lian In tih hriat reng reng Concrete lian leh mawi êm êm mai, thianghlim sar mai chu an pan dûn ta a, an va thlen chuan In chhung lamah an lût zui leh zat. Pu Kima-te nupa leh an fanu Bawihbawihi chuan an hmuh ruala nui sânga rawn panin an inchibai laih laih a, an ṭawngkam a zângin an lo welcome ṭha hle. Puia-te ṭhianho pawh lo awm ve tawhin an han inhmu leh chu an va hlim dar dar êm! Sâp hla leh Mizo hla an play dup dup bawk a, mi dangte pawh an awm ṭhup mai a ni. Tichuan, birthday lawmna programme an ṭan ta a, cake-te an zai zawh leh hnu chuan party-in an chhunzawm leh nghâl. Pu Kima-te nupa erawh In chung lamah an chho ve thung. Chu'ng birthday party-a sâwm bîkte chuan lungkham nei hauh lovin Sâp hla an play chu an lâm rem hah hah a, light mawi tak êng nuam êm êm hnuaia hmun khat laia lo tîtî-te leh no mawi keng far mai te, nula tlangvâl nalh tak takte chu hmuhnawm an tling a, Sâwmfela pawh a mit leh beng a tlai leh hle.

Chutiang chuan hlim leh nuam ti takin hun an hmang zêl a, zanlai pelh hnu-ah pawh an la tui tlut tlut viau. Sâwmfela paw'n betu nula leh tlangvâl a khât tâwkin a nei zauh zauh bawk a, zu pângngai in lovin beer erawh a hûm ve leh rân tawh. Chu'ng mite zîngah chuan Angela Remruatkimi kha a lo tel ve a, Sâwmfela hnaih taka ṭhuin an tîtî sep sep a, an nui dûn leh var var ṭhîn. Tluang taka hun an hman lai chuan zîng lam dâr 2 pawh a pêl ta hial! Chutih laiin Emmy paw'n Juice leh beer ringawt chu a duh khawp tawh lo a ni chêk ang chu, a no sen tle ralh chu a lo dût ve khawlh khawlh bawk a, a bula nula pahnih rawn ṭhu vete chuan an no ken lai chu in leh zauh ṭhînin eng eng emaw sawiin an nui dûn leh har har bawk. Chutia rei vak lo an tîtî hnu chuan Emmy'n a dawh thei ta lo nge; vîn lek lek hian, "Hei, ka pa in sawi chhan alaw. Minister-te hian an eiru vek bîk lo aw. Zak thei lo lutuk," a lo ti hlak mai. An hla play a ring deuh nên a aw pawh chu an bul hnaih deuha awmte paw'n an hre pha tih hriat zetin an rawn thlîr deuh ṭhap a, chu'ng nula pahnihte chuan nuihsawh deuh tak hian, "I pa chungchâng kan sawi lo, kan sawi peih lo. Minister fanu wine leh gambling lam pawh hnehsawh tak i nih hmêl, i inchei dânte lah kha hmeichhe lepchiah tak i ni tih a hriat," tihte leh ṭawngkam mawi lo tak takin an ṭawngkhum a, Emmy thinrim chuan a bula zu bottle pathum dawhkâna an dahte chu vai thla ṭhuaiin, "Zâwngi engtin maw min tih, kei hi khatiang hmeichhiaah khân min ngai a maw?" ring zeta a ti leh chiah, a thâwmah an hla play chu off-in lâm laite leh piah deuha ṭhute pawh an rawn hawi nghâl ṭhup. Bawihbawihi leh Puia-te ṭhianho chu an rawn phei vat a, thil awmzia an zawh chuan rin aiin an boruak a sâng ta tlat. A ṭhiante chuan Emmy chu chelhin nula pahnihte thinrim chêt thawh tumte pawh chu an dang zui a, Sâwmfela pawh a rawn phei rang kher mai. "Emmy, a tâwk e, insûm hrâm rawh." dam dapa Sâwmfela'n a lo tih chuan Emmy thinrim laklawh tawh leh lu kai deuh tawh si chuan Sâwmfela'n a bân a rawn vawnna chu thing thla nawkin, "Tu nge ka chunga thu neihna pe che? Ka duh dân dânin ka awm ang. Ka bodyguard ve mai i nih kha." Emmy chuan a ti lêt ta hrep mai a, Sâwmfela mak ti leh a ngaihna hre lo chuan Emmy chu phâwk zet hian a en ka hau ringawt. Chutah Emmy chuan, "Maw...tu nge thu neihna pe che. Khatia min rawn tih ve ngawt." thinrim zet hian a rawn ti leh. A ṭhiante ngei pawh chuan Emmy chu mak an tiin an khap hlei thei meuh lo. Mi dangte lah chuan Sâwmfela chu an thlîr ṭhap a, ani lahin Emmy chu mak tih hmêl tak hian a en reng ringawt mai si, Emmy thinrim chu hawi tau hmakin dawhkâna a zu in bâng chu a in zui leh hmiah. Puia-te chuan Sâwmfela chu hre thiam hrâm turin an lo ngên sap sap a, Sâwmfela erawh a ngawi reng thung. Chutah Sâwmfela chuan zah hmêl tak hian mi dangte chu a melh kual hrek hrek a, a kekawr iptê chu zenin car chahbi chu a phawrh a, Emmy ṭhutna bul dawhkâna dah leh inher vuta chhuah a rual leh zat.

Puia leh Reuben-a, Kima-te chuan Sâwmfela chu ûm zui thuaiin ding turin an han au zui lauh lauh bawk a, thui lo têah va ûm phain Puia chuan, "Ṭhianpa, Emmy awm dân kha kan hre thiam bîk hauh lo, pawi ka ti tak zet. Khawngaihin hre thiam hrâm rawh. Mahse, khawia kal nge i tum rêng rêng? a'n ti a, Reuben-a leh Kima paw'n an lo ngên ngawl kher mai. Sâwmfela chuan nui sâng hian, "Ka hâw ang e. Ka awm rei thawkhat tawh bawk alâwm." tih leh kal a tum chu kuai ding lehin, "Kan hâw dâwn alâwm ṭhianpa. I tel lo chuan Emmy hi a ngaihtuahawm lutuk ang. I thinrimin i zak viau ang tih chu kan hria alâwm, a harhfîm hunah a inchhîr leh viau tho ang. Hre thiam hrâm hrâm rawh." Reuben-a'n a lo ti ve leh. Sâwmfela chuan, "Ni e, a sawi dik alâwm, kei chu a bodyguard ve mai ka ni. Ka nihna pêlin ka lo khap ve ringawta ka thiam loh a ni e, ka kal phawt ang e." nui sânga a tih leh pawh chuan kaltîr mai an la phal tlat lo. "Ṭhianpa, Emmy nên in hâw rual dâwn nia," Kima'n a lo tih chuan, "Ka hâw ang e ka tih khân kan Inah zâwk ka tihna, kan In luahah khân...mahse, mi dangin an lo luah tawh a nih tâk leh kan khaw hlui lamah ka hâw mai ang." ti-a a kal ṭan leh chiah,
"Hetiang ringawt chuan min kalsan thei lo vang ṭhianpa. Keini hi min kal bosan ang maw? En teh, he'ng zawng zawng nên hian min kal bosan ang maw?" Puia chuan tiin Aizâwl khawpui In êng tuarh mai mawi êm êm maite chu a kâwk kual bawk a, chutah Sâwmfela chuan, "Ni e, he'ng zawng zawng nên hian...ṭhian ṭha tak in ni. Ka kal phawt ang e, lo dam ṭha reng rawh u." nui sâng bawka tiin a kal zui leh nghâl a, Puia-te paw'n chelh ngaihna hre lovin pawi ti tak hian an thlîr reng ringawt.

Chu veleh rang takin Pu Kima-te In lam pan chuan an lêt leh nghâl a, mi dangte pawh an rawn chhuak phak phak tawh. Emmy zawnga an hawi kual deuh hnu chuan kawngpui lehlama Emmy car-a lût tur chu a bulah Bolero dum rawn tlân thutin an ding ri chîk deuh tuarh a, mi pahnih mask vuah rawn chhuakte chuan Emmy ka leh hnâr chu rawmawlin an hup a, Bolero chhungah chuan dah lût vatin an tlânpui ta nal nal mai. Puia-te chuan, "Hei," ti ṭhawta tlân phei chu rual mah se, Emmy erawh an chhan hman ta tlat lo. Mipa dang la awm vete paw'n, "E heee! Emmy an man a nia," tiin an thlîr zui vawng vawng a, Christy phei chuan, "Awi! Ka duh thei lo bestie," tiin a ṭhiante pahnih nên an ṭap zui hlawk hlawk zui. "Police Station call nghâl rawh u," Puia chuan ti ṭhatin Kima nên a car-ah an lûta an ûm zui ve nghâl bawk. Reuben-a erawh a car-a tlân chhuak ve nghâlin Sâwmfela a call nghâl a, Sâwmfela lahin a la thei mai lo. Reuben-a chuan, "Shit! La vat teh ṭhiana, a pawimawh a nia," ti vawng vawngin a thinrim hle. A pick tawh dâwn lo emaw tih hnu-ah Sâwmfela chuan a pick hrâm e.

Aw, ṭhianpa. Tûn maiah khân Emmy an man. Hei, ka rawn tlân meka khaw nge i awm?

Eng a? Emmy an man a?

Aw, Bolero dumin an phur nghâl. Khaw nge i awm?

Rawn tlân zêl rawh, kawngpui bulah ka lo chho ang.

Aw le.

Reuben-a chuan phone chu dahin a tlân chak sauh bawk. Chutih laiin Sâwmfela pawh a inngaihtuah nasa kher mai. Kha leh chen Emmy nêna hun an hman dun tâk te, Emmy nui hmêl leh engkim mai chu a ngaihtuah chhuak leh zut zut a, nichin lawka Emmy'n a ṭawng khum dânte nên lam a ngaihtuah chhuah leh phei chuan a thinrim lutuk chu a puak keh lo chauh hi a ni hawt e. Rei vak lo a nghah hnu chuan Reuben-a pawh a rawn thleng ve ta. Car-ah chuan lût vatin an mi ûmte kalna lam ni-a an hriatah chuan an tlân zui leh zat. Thui mawi tâwk an tlân hnu chuan Emmy-te In an thleng a, Sâwmfela chu hmanhmawh taka chhukin In lam pan chuan a tlân chho nghâl hlawk hlawk. A han thlen chuan kawngka an lo kalh chu kik dawt dawtin awmpui nulate chu a ko pah bawk a, rei lo têah nula pakhat zâwk chuan a rawn hawnsak. Lût zui vatin a room a pan tlang leh nghâl a, drawer-a a dah a tiang lei leh Chemtê tawng chen vêl kha lain a chhuak leh chiah, "U Sâwmfel, eng nge thil awmzia?" nula chuan mak tih hmêl tak hian a lo ti a. "Mi sualin Emmy an man," tih chauha chhângin Reuben-a lo nghahna lam pan chuan a tlân thla leh hlawk hlawk zui. Nula chuan, "Awi! Ka duh thei lo," ti-a ṭap zuiin a ṭhiannu muhîl chu kaih thawh leh Emmy chanchin hrilh chu a rual a, ṭap chungin an inkuah ringawt mai a ni.

Chak taka tlân zêlin Reuben-a chuan Kima Call turin Sâwmfela chu a hrilh nghâl a, Sâwmfela paw'n a call zui vat. Kima sawi dânah an mi ûmte chuan Vairêngte panna kawng an zawh tih chu an hre thei mai. Mahse, an inkâr kha a inthlauh deuh avângin an mi ûmte an ni chiah em tih Kima leh Puia pawh chuan an chiang ngam tlat lo. Emmy mantute kha Bolero duma chuangte an ni si a, tûna an ûm lai hi chu Car var a ni tlat. Chutiang zân ral tawh lama Car var chak taka tlân chu ringhlel ve tawpin an ûm zui zêl a, an mi ûm laite ngei an ni em tih erawh an chiang chiah lo, râlkhata hmu pha tâwk zêlin an ûm ve mawp mawp ringawt mai a ni. Khatia Bolero dum an bo tâkah khân an khawmuang leh hlek bawk si a, tûna Car vâr nên pawh hian an inthlau ta viau. Tûnah chuan Aizâwl khawpui pawh an tlân chhuak ta reng mai. An piah hla deuh taka Car vâr tlân ûm pah chuan chanchin an inhrilh pah zêl bawk a, an speed pawh sâng tak a ni. Sâwmfela thinrim leh hlauthâwng bawk si chu ngawi rengin a inseh ruh ṭawlh ṭawlh a, eng nge a ngaihtuah ber pawh hriat thiam a har khawp ang. Emmy chhan chhuah chu a tum ber ni mah se, a mantute chungah hian zahngaihna a tlachham viau maithei bawk. Hmân zâna Emmy'n, "Kha'ng mi sualte khân min man ta se, min rawn zawng ang em? Min rawn chhan chhuak ang em?" a tiha a thu tiamte kha hre chhuak uai uaiin a inhûm ruh ngat ngat mai a ni. Reubena-a nên pawh inbe tam lovin an tlân par par a, anni pahnih paw'n Aizâwl chu an chhuahsan ve ta e. Chawlh khawmuanna chi a ni lo bawka an tlân zui leh par par.

Chumi hnu rei vak lovah kâwl a lo êng a, savate pawh kawng sîra thing zâr hrang hrangah pakai zat zatin an chiar noh noh bawk. An tlân zêl lai chuan nî pawh a lo lang dêt dêt a, no nalh fahranin chhak tlâng chungah leilung a rawn bih leh dêk dêk tawh. Rei mawi tâwk an tlân hnu chuan zîng dâr 6 vêl a ni a, nî pawh a êng chiang ta deuh. An speed a sâng bawka Kima leh Puia-te paw'n Vairêngtê chu an râl thlîr thei ta, In lo ding far mai rângva In chung leh dârthlangte chu nî chhuak tîr chuan a chhun tle ser ser a, an hun tawngin zir ngat se chuan hmuhnawm tak tur an ni. Thui deuh tak an tlân leh hnu chuan Vairêngtê chu an thleng ve leh mai. Khaw hmâwr lehlam pan chuan an tlân leh char char a, a tâwp a tâwpah chuan Vairêngte Police check gate chu an thleng ve ta nge nge e. Police ṭhenkhatte pawh silai leh hmanraw dang nên an lo inphur chhuak ve mêk bawk a, Puia-te an hmuh rual chuan lo ti ding vatin eng nge an tih dâwn tihte an zawh chuan Puia'n chanchin a lo hrilh zung zung. Police Inspector chuan, "Keini paw'n kan hre ve deuh chiaha hei, kan ṭhian ṭhenkhatte chuan an ûm zui nghâl. Mahse, Bolero dum tiin report kan dawng a, nichin minute 10 vêl ral taa rawn thlengte kha chu Aizâwl pa hausa Pu Samson-a leh a naute phaia zin tur niin, car vâr-ah an chuang sia, mahse, motor an thlâkte pawh a ni thei tho." tih leh kaltîr chu a rual a, Inspector pawh chu Gypsy-ah lût thuaiin Puia-te chu an ûm ve leh ta a ni.

Hetih laiin, Reubena leh Sâwmfela-te paw'n Vairêngtê chu an hmu pha ve tawh a, an rawn hnaih sâwt ve tawh viau. An tlân chak bawka kawng sîra mau leh thing hnah ro tla te, nepnawi kâwr ruak an tlân pelh chin chu an lêng suau suau mai a ni. Chutih laiin, Vairêngte Police ûm hmasatute paw'n khua chu an hlat tawh hle. An hnungah Puia leh Kima bâkah Inspector-te chuan an rawn thlâwp ve zar zar bawk a, Pu Samson-a te liam hnu rei vak loah report an dawng kha a ni. Khatia Party-naa mite'n Aizâwl Police station an call apiangte kha an hun tawng a ziaawm lai leh an inthlahdah deuh lai tak a lo ni ve si-a; Emmy an manna tura a ai ve hrim hrim nge tih turin call la mai thei an awm tlat lo. Vawi tam an call kual leh hrep hnu-ah Police station pakhata duty chuan a pick thei hrâm a, report an hriat ruala an insingsak chhungin Police station dangte an hrilh kual leh zung zung, Aizâwl an chhuahsan hman an ring lo bawk nên Vairêngte Police lam hrilh vat nachâng hre lovin an buai buaiin an buai mawp mawp a, an inpeih fel hnu-a fîmkhur thilah ti-a Vairêngte Police lamte an hrilh leh meuh chuan an tlâi zo ta a ni e. Tûnah chuan Reubena leh Sâwmfela paw'n Vairêngte Police check gate chu an pêl ve leh ta. Duty-te hnên aṭangin an ṭhiante pawh an tlang ve nghâl tih an hre bawk nên, rei châwl lovin an tlân ve leh nghâl hi a ni.

Chutih laiin, Emmy erawh tui takin a la muhîl a, rawn harhin a awmna hmun vêlte hi thlîr kual ta se a bangbo khawp ang le! Mantute khân rawmawlah muthilhna dâwi hlo telhin a kâ leh hnâr an hupsak ta kha a ni a, ani a lu a lo kai ve deuh bawk nên a la mu tui siai siai hle. Zîng dâr 7:30 vêlah Emmy muhîl chu a rawn harh a, a lu na deuh bûr vânga ner sûngin a la che ṭha thei hek lo. Rei lo têah a lu nâ chu dawm a tum a, mahse, a kut a phar chhuak thei ta hauh lo mai. Che ṭiah ṭiaha a han harh chian deuh hnu chuan a awmna hmun vêl chu a thlîr kual ruai ruai a, mak tiin a meng bial ta kâwk kâwk mai le! Khawi lai hmun nge tih pawh a hriat loh ramhnuai thing ding thelh han mai leh a awmna mau râp Inte chu a melh kual nasa teh e. A han inen leh chu a kut leh ke chu phuar beh tlat a ni a, a ṭhutna lah chu thingphêk dawh mau-a do kân, hnâng bâkah ram hruite hmanga mau phel nêna phuar khâwm fit 12 vêla sei a ni bawk. Chutia mak ti taka a hawi kual lai chuan, "I lo harh ta maw Minister fanu, i mu tui hle mai." mipa aw thûm lam hian a lo ti a, Emmy pawh a hawi rang hle. Lo betu hmêl a hmuh rual chuan hlauhnain a man chawpchilh nghâl a, chu pa chu Mizo ni lovin Vai palian pui dum rên rûn hi niin, AK 47 a hûm rân bawk. Chu pa bula mi pathum pistol leh chemte pai lo dingte pawh chu Mizo an ni lo tih Emmy chuan hre thiam nghâlin a khûr ru der der zui. Chutah hlau aw khûr deuh hian, "Tute nge in nih a? Eng vânga min man ngawt nge in nih?" a ti vîn ve ṭhat. Chu veleh pâwn lam aṭang chuan mipa aw bawk hian, "Sum tam tak hmuh nân maw le!" tih leh rawn luh a rual zui zat. Chu pa hmêl Emmy'n a hmu chu mak tiin a meng phâwk zual kher mai.

Ni e, he pa ngei hi a ni, Police-te'n an chhui mêk leh an la man theih si loh, Zâwlkhawpui ṭahna leh lungngaihna thlen a, nunau leh patlingte pawh muanga lêntîr thei lotu, pawi khawihna hrang hranga an hotupa ber Pu Samson-a chu! Pa tawi lam dul kiar tarmit vuah leh hmai bial lek lek, mitmu bial ṭha tak leh hnâr bawng ṭha tak, hmûi pan deuh hi a ni a, kawrchung dum fual hnuaiah Kamis vâr hain smart pant dum leh sneaker pâwl a bunte chu a nalh viau bawk. Emmy chuan en ka hau chung hian, "Pu Samson, nang maw?" a lo ti sap. Pu Samson-a chuan pan hnai pahin, "Ni e, keimah. I pa nên khân Minister nih tumin kan inbei nasa a, mahse, a fin phakar luat vâng leh a sum leh pai hmangin a inlei tling ta zâwk a; kei hi min paih thla a ni. Chuta ṭang chuan i pa nên hian hmêlma kan lo ni ta a, tih chhiat dân tur zawngin hun rei tak ka lo enthla reng ṭhîn asin. Tûnah chuan chu ka duh thu sâm chu a hlawhtling dâwn ta a nih hi. Min ûm zuitute khân ram pâwna kan tlang ringin an zuk tlang thla ngei ang a, khu lam aṭanga kan ṭhiante rawn chho an hre dâwn dêr si lo. Chutianga an buai fe lai chuan nang chu hralh fel i ni daih tawh ang. I man pawh a to viau a nia," hmêl hlim taka a tih dap dap hnu chuan Emmy chu a thinrim kher mai. A hlauhna ai mah chuan a thinrimna chu a nasa tawh zâwk âwm e. Thu dik nge dâwt tih pawh a hriat loh hmanga a pa ti hming hliau zâwnga a ṭawng khum chuan a ti thinrim ber a ni. Chutah Emmy chuan, "Dawheh lutuk, i thil tih dân ngaihtuah hian sum vawrh nasa chu nangmah ngei hi i ni tih a chiang. Chuan, hei hi hre rawh, police-te chu i bum thei a ni maithei; mahse, mi pakhat bum theih loh tur i nei tih hi. Chu pa chuan maw, min zawn hmuh hma loh chu a beidawng ve dâwn lo. Tûnah pawh hian he lam hi a rawn pan mêk tih ka hria; ani lakah chuan nang leh i ho hmêlchhe uchuak tak takte hi eng mah in ni lo vang. A that vek dâwn che u." rum zeta Pu Samson-a melh râm râm pah chuan a'n ti a, mahse, a thu sawi chu amah ngei pawh hian a ring ngam chiah lo thung. Pu Samson-a chu a lo nui suk a, "Kha i bodyguard ve mai kha maw i la beisei ve chu ni a, a rawn thlen hun hun chu a tâwpna a ni dâwn zuk nia," A tih leh lai takin Emmy phone chu a lo ri ta tleng tleng a. Emmy ṭhutna bul lawka mau hmanga ṭhutna an siam chunga an dah Emmy phone chu an en nghâl ṭhap. Rawn call-tu chu tu nge tih Emmy chuan a hre chiang hle. Pu Samson-a chuan, "Hei, a rawn call e," tih leh pick a rual a, chu veleh Sâwmfela chuan, "Ani kha a sam zai khat pawh in dek a nih chuan thi saah lo inngai rawh u." a lo ti ram hmak. Pu Samson-a chuan, "Eee...lo ngaihtuah suh. Hei, ani pawh a him e." tih leh off a rual zat. Tichuan, bûk aṭanga chhuak pahin a hote chu fîmkhur turin a chah zui bawk.

"I bodyguard ve mai kha maw," Pu Samson-a'n a tihte kha Emmy chuan ngaihtuah zuiin, nizân party-naa thil thlengte kha a hre chhuak chuai chuai a, Sâwmfela a ṭawng khum dân te, a mak ti hmêl leh zak hmêlte bâkah a nui hmêlte kha a ngaihtuah chhuah leh meuh chuan a insûm zo ta lo. Emmy chu ṭap nghâl hlawp hlawpin a rilru chuan, "Sâwmfel, ka tihpalh tak zet a ni, khawngaihin min ngaidam rawh aw, khawngaih takin min ngaidam rawh. Ka tihpalh," ti vawng vawngin a ṭap khûr hlawk hlawk a, a mittui pawh a hru thei dêr si lo. Khatianga ṭawngkam nâ leh dêngkhâwng taka zahna tâwpkhâwka a dintîr hnu-ah pawh, mi tam tak hmaa a tih mualpho êm êm tlangvâl huaisen Sâwmfela chuan, hlauhawm leh chhantu ngai ngawih ngawiha a awm chu ama nun thâp tak meuh meuhin a la rawn ûm zui duh fan tih a ngaihtuah kai lehzêl hnu phei chuan Emmy inchhîrna hian bân a chen mai ni lovin, vân a tawng zâwk hial ang chu! "Sâwmfel, ka tihpalh lutuk aw. Min ngaidam hrâm rawh, ka tihpalh a ni," a rilru chuan a ti mawlh mawlh ringawt mai a ni.

Chutih laiin nî pawh a sâng tawh hle. Dârkâr tin, minute tin leh second tinin hun pawh a ral zêla zîng dâr 10 vêl a ni ve leh ta. Vairêngte Police-te chuan Lailapur Police-te hnên aṭangin chutiang Car vâr rinhlelhawm an luh loh thu an hre bawk nên, an mi ûm laite hi ramhnuai khawi laiah emaw an biru tih an ring thiam mai a, mahse, an bihrûkna tur âwm rin dân erawh an harsat viau thung. Kawng sîr remchâng laiah ding khâwm rûihin, kum liam taa motor suam hmangte chêt thawhna ṭhîn ni-a an hriatte chu an han sawi zui laih laih a, chu lai hmunte chu an luah an rin tawh loh thute leh an luah lehte a ni lo maw tihte sawiin an buai nak nak hle. Chutih laiin Sâwmfela erawh a ngawi reng a, Puia-te hmaa ûmtu Vairêngte Police-te khân an hmu hman tawh bawk si lo; chutia Police-te an rin thu sawia an rîk dar dar lai chuan Police Inspector chuan, "Ngawi lawk teh u, nikum lama damdawi tawlh rutute nên kan inkah khân, kan kah hlum bâng mi pathumte khân pan ding deuh an nei tlata ka hriat tâk chu ni, han ngaihtuah nawn ve teh u." a lo tih chuan Sâwmfela beng a verh ta zar mai le! Va pan vatin, "Sir, chu lai hmun chu khawiah nge? Min hruai thei ang em?" a va ti tawl mai. Police dangte pawh chuan an rawn en deuh ṭhap a, a mitmeng thinrimnaa khat sen râm mai leh a pianṭo dik zette chu an en kual leh hnu chuan, "Kan tlân pêl tawha kan lêt leh a ngai ang." Inspector chuan a lo ti ve leh. "A nih chuan eng nge kan la nghah? Lêt leh ila, that vek ang u hmiang," Sâwmfela'n a lo ti leh hmak. Tichuan, rei awm lovin mi sualho nên nikuma an inkahna mual lam pan chuan an lêt leh ta a.

Kawng sira thing leh mau ding hring dupte chuana sava inchhaih kawi zawr zawrte leh hrâm noh nohte chuan Police-te leh Sâwmfela mit leh beng chu an luh zo tawh lo va, chutih laiin nî pawh a sâng ve zêl bawk. Thui mawi tâwk an lêt leh hnu chuan an sawi hmun chu an thleng ta e. Motor aṭanga chhuk vatin chu lai hmun vêl chu an han en kual zung zung a, mihring hnu chu sawi loh motor ke hnu thar takngial pawh hmuh tur a awm dêr si lo. Sâwmfela chuan ram awm dân chu uluk zeta en kual pah hian, "Sir, khawi lai tak hi nge in inkahna hmun chu?" tiin Inspector chu a zâwt leh vat. Inspector chuan, "Hemi kawng sîr ding lam mual hi a ni a, mi pathum kan man te chu saw lai Khiang kûng lian deuh bulah sawn kan man a," a tih leh hnu chuan khawi lai aṭanga ûm nge an nih tihte Sâwmfela'n a zâwt leh. Inspector-in a hrilh leh hnu chuan Khiang kûng dinna leh a bul vêl ramngaw hring dupte chu Sâwmfela chuan a en kual vang vang a, motor kawng awm dânte nên chuan a entawn leh thûl. Chutia rei vak lo a en kual hnu chuan, "Sir, kan lêtna lamah khuan i tlân thla leh deuh teh ang u hmiang," Inspector en chung chuan Sâwmfela chuan a'n ti leh a, Inspector pawh chuan mak a ti deuh tih a hriat. An rawn lêtna lam bawka thui lo tê an tlân lêt leh hnu-ah Sâwmfela chuan a dintîr leh a, motor aṭanga chhuk vatin an piah deuh kawng sîr ding lam thing leh hnim bâkah mau ding farte chu a en uluk kher mai. Police-te pawh chuan a ngaihna hre lo zet hian an thlîr ṭhap ringawt tawh. Chutah Sâwmfela hawi kual chuan kawng sîr lo phut deuh dap hi hmuin a'n bih vang vang a, mihring kuthnu ni ngeiin a hre ta tlat. Hawi kual leh zak zakin a piah deuha thing leh leia hnah ro awm dânte chu chîk zeta a en leh vang vang hnu-ah hnah rote chu a thai darh chhin a, lei vûng thar deuh hi a hmu zui leh.

Chu veleh thingtuai ding pakhat chu a nam chhin ta a, a der hle tih a hre nghâl. A han nam na deuha thingtuai chu a âwn riai riaia a tlu ta tup mai. Hnah ro leh thingtuai tlûkna hmâwr aṭanga thui lo tê a luh leh hnu chuan, "Hetah hian an pêng a nih hi." a lo ti ta mai. Rang zeta Police-te phei ve chuan motor ke hnu ram ril lam pana lût chu an hmu zui ve mai bawk. In-au khâwmin chumi kawng chu an zawh ta a, Sâwmfela erawh dûk par par tak a ni tawh. Chutih lai chuan Aizâwl Police ṭhenkhatte pawh an rawn thleng ve chiah a, rei inbe tawh lovin Sâwmfela hnu hmuhna lamah chuan Vairêngte Police-te nên an kal ve leh ta a.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)