RIP CHHUNG THURUK VAWNGTU BY Essy V Onyl (Completed)

Episode nei ho a hlawm a dahkhawmna
lyno v
Posts: 83
Joined: February 15th, 2022, 5:32 pm

RIP CHHUNG THURUK VAWNGTU BY Essy V Onyl (Completed)

Unread post by lyno v » August 29th, 2022, 9:34 pm

8i1yoh3m.jpg

PROLOGUE::

Thutkhawmna pindan chhuat laiah chuan thisen a luang kawi ngei nguai a.Chhuatah chuan hmeihchhe naupang kum sawm bawr vel tur hi alo mu hlawm reng bawk, a kawr te chu thisenin a bual khat vek tawh a. Shirley-i chuan a mal chungah mutin a kuta thisen kai hnuang chung chuan duat takin a sam a chul sak heuh heuh a, a kut ding lamah chemte thisen kai nuai chu a la hum ran bawk..




Chapter 1






“Ni lo, ni lo, ka â lo. Mi â ka ni lo, min thlah nghal rawh u, zawng hmelchhe ho,” tia vin tuar tuar chungin a tal chiam a, chutih lai chuan in chhung chu an luhpui fel der tawh. A vuantute lak atanga tal chhuah chu thil theih loh tluk a ni.




In chhungah chuan pa lian em em lo; hmel zahawm tak, hmai bial lam tarmit vuah hian a lo nghak reng a, chu pa chu khawiah emaw chuan hmuh tawhna a neiin a hria a, mahse, a hre chhuak mai thei lo. Ani chuan an lam arawn pan a, a darah lo vuanin, “Hahdam rawh, Shirley.” a ti a, chu veleh a hmaiah chuan chil chhah rualin, “Hmela, ramhuai i nih kha, min chhuah rawh, min chhuah nghal rawh.” a ti vin tuar tuar bawk.




Chu pa chuan rawmawl phawrhin a hmai chu a’n hru leh te te a, “A tawk e, in kal thei tawh ang,” tiin a chelh bet rengtute chu eng tin emaw a’n mitmei a, chu mite chu ngawi rengin an chhuak nghal.. An hmeihchhe lo hruai erawh chu a la rum nger nger thung.




“Hei, a tha e, a tha vek. Eng mah hlauh tur a awm lo, i hria em? Tu mahin an tina lo ang che,” tiin a dar chu na lo tein a’n hmet a, thutthlengah chuan thuttirin, “Min han en teh, Shirley. Min la hria em? Nang nen hian thian tha tak kan ni thin, tunah pawh a la danglam chuang lo,” a’n tih chuan Shirley chu lo hawi chhuakin a’n en chho a, tu nge a nih tih erawh a la hre lo.




Mahse, ani nen chuan eng eng emaw chu an sawi dun tawh ngei tih chu a la hre thei vuai vuai.




A thu sawi pawh ngaithla lem lo chuan, “Mi a ka ni lo, nang pawhin i hriat kha. Ka hriatna pawh a that vek thu i sawi a ni lo’m ni?” a ti bak hlar a. Chupa chuan Shirley en reng chung chuan a nui nghut..




chu veleh, “Chu thil chu ka hnena i sawi kha a ni lo em ni? Ka ring reng a ni, ka ât hi i ring a ni ti raw? Chu chu mi zawng zawng rindan a ni,” a hma aia aw ki hniam deuh zawka tiin hnuai lam melh chungin a kuttin chu a seh niap niap a.




Thutna dup nuam tak leh zau tha takah chuan amah chauh pawha leng lo emaw tih tur khawpa kil sirah chuan a thu tawm tat a.



Chu pa chuan a kut chu rawn vuanin, “Ni e, i hria a, kei pawhin ka hria, i â lo a ni tih hi. He lai hmuna i awm chhan hi eng nge nia i rin?” tiin a’n zawt a.





A ngawih tak reng avang chuan tukverh lam chu melhin, “Thla de khi i hmu thei em? A mawi ti raw?” dam thluam hian a’n ti leh a.Shirley chuan tukverh lam thlir zeuh pah chuan a lu bu nghatin a melh ngai chu a melh leh ran tawh.




Dawhkana theitui inhung pek pah chuan, “A nih leh i thawnthu mi hrilh i tum kha min hrilh duh tawh ang em?” tiin Shirley-i ke tiphu det det chu a en a, a’n hawi chhoh chuan an mit leh mit chu a intawng ta siah mai.




Chu ringawt pawh chu Shirley tan chuan buaina tham a tlin vei nen, a ke chhep rem hlei thei lo chuan Shirley-i chu tibuai zual hle a ni.




Chu pa chuan a be tawng zo dawn lo emaw a tih hnu chuan bah deuh niai hian, “Nang pawh hian mi dang ang thovin min ring dawn chuang lo. In awih emaw awih lo emaw thu dik ka sawi a ni. Mi â ka ni lo,” a ti leh a.




Ani chuan, “Nangmah chauh i ni reng reng lo. Mi tam tak thil tawn mak tak tak; mitthi tho leh te, thlahrang te leh UFO an hmuh chung chang te pawh ka ngaithla fo tawh thin alawm,” a ti hman chauh a, “A nih chuan, chung thu chu i ring em ni?” aw lawi lek lek hian Shirley-i chuan alo ti zui zat..




A zawhna chhan tumin a ka a ang zuau hman ang tih chuan Shirley-i chuan dawhkan lam chu melhin a meng bial kawk kawk mai, a taksa te chu vur ang maiin a var chhuak vek a,a hmel pawh a dang nghal lawp lawp,,, rum deuh nghar nghar chungin a theitui in lai chu dawhkan atang chuan a vai thla lawp a. A landan atang chuan inthlahrun hmel tak si pawisak nei teh chiam lo hi a ang ber awm e.




"tunah ni lo,,,aihh,,,,,ka ni lo" tia chiar nawk nawkin a lu dawmin mitchhing chung chuan hmalam leh hnunglamah a insawi dat dat a ..




Chu pa chuan a darah lo chelh vatin,,"a tha vek ania,,Shirley,,ka ring che alawm,," hahdam tak hian a ti a,,a dar chu a chulsak hauh hauh bawk...




Chu pa thu sawi leh amah chu rinna chhe te mah nei lo angin lan tum teh mah se la, a lakah chuan beisei a nei a ni tih chu pa chuan a hrethiam a, hriat chhuah ngei pawh a tum ruh hle a ni.




Rei vak lo hnuah chuan rawn pangai deuhin a mita en chung chuan, “Chung mite chu rilru buai, mi â in ti a ni lo em ni?” aw khur lek lek hian Shirley chuan a’n ti leh a.





A kut khur dar dar chu theihtawpa thup tumin a dawm a, chu pa chuan ngawi renga enin a che zia chu mak ti awm pawhin a lang lo. Khawngaihna leh lainatna mit menga en thintute ang pawhin a en chuang lo va. Mi dangte ang lo takin hlau ve lo mah se Shirley-i chuan a hlau ru tlat thung si a ni.




Tho chhuakin a dawhkan pawhdawh chu hawngin khawkher pathum hi ava la chhuak a,,a hmaah chuan va thu lehin “Hei hi i theih tawpa nain han hmet teh,” tih leh Shirley kuta hmehbel chu a rual a, “I thinrim chang leh i zam deuh apiangin tikhan i ti thin dawn nia,” tiin chek tlak tlak pahin a lu a thing nar nar bawk.





Ngaihsak lem lo tih hriat tak hian a faifuk hlerh hlerh reuh a, chu chu Shiley-i huat tawk a tling hle thung si. Khawkherh hmet rek rek chungin Shirley-i chuan, “Tunah hian rilru buai enkawl danin min enkawl mek a ni ti raw?” tiin za lo tih hriat tak hian a nui ker ker a.





Shirley-i ke bula no tla chu tho chhuak paha chharin, “Ni lo, kha khan i tha leh i tihrawl sawizawina kawngah a puih dawn che a ni. Chu te mai chu a ni e.” tiin tukverh lam chu a pan leh ta daih a.




Mi dang ngaihsakna leh lainatna hmel khan Shirley-i chu a tihthinrim vei thin nen, tuna taka namnul nia a inhriatna chuan a tithinrim viau chu a hrethiam lo hle a ni. Reilote hnuah chu pa chuan, “Arsi thlawk lenzia kha i lo hmu em?” lo a ti phut chu a phu chiang kher mai.




Shirley en pah chuan phur hmel deuha nuiin, “I lo hmu ti raw?” a ti nawn leh ngat a. Shirley-i chuan chu pa chu melh zawkin alo en reng tih ahriat vang chuan hmundang melh lehnghalin, “Ai, hmu lo,” tih chauhvin a chhang nghut.




“I hmu lo maw? tukverh lam kha i hawi ve rengin ka hre si a,” tiin pangpar vul lai chuai ta thut ang mai hian vawi leh khatah a hmel hlim tak kha lungngaihnain a thlak a, a awm dan chuan Shirley-i awm chu a tinuam mang der lo. A ngaih te lam a titha lo hial a, 'Mi â zawk chu kei ni lovin ani hi a ni,' a ti rilru neuh neuh a, a tim uai uai mai.





Thutthleng chu pawtin Shirley-i hma takah chuan hnaih setsawtah a thu leh ta nghal a, thla nei se la chuan thlawh chhuahsan daih Shirley-i chuan a duh tak zet a ni. “A nih chuan, arsi thlawk i hmuh loh avang ngawt khan kei hi mi â min ti dawn em ni?” tiin Shirley-i chu chu pa chuan a’n zawt a.





Shirley-i chuan hnuailam melh reng chungin a lu thingin a kun leh ngar bawk. “A nih leh i naupan laiin krismas putar hi a awm i ring ve thin em?” a ti leh a,




a ngaihna hre lo tak chung chuan, “Naupang zawng zawngte chuan an ring vek ang chu. Mahse, krismas putar chu a awm tak tak hleinem,” tiin Shirley-i chuan a chhang a, chu veleh, “Bingo,” tiin chu pa chu a nui a. Chutih lai chuan Shirley-i chuan a lung phawrhsak hial duh hmel a pu a ni.





Mahse, ani chuan, “Naupangin krismas putar chu a awm an ring a, dawhthlak pawh an dawh thin reng a ni. Naupang thenkhat chuan a takah krismas putar chu an hmu a, thilpek te pawh a pek thu te an sawi a. Nimahsela, a awm tak tak lo a ni tih hre vek mah ila naupangin krismas putar a awm tak tak thu a sawi avang chuan tumahin mi â an ti chuang lo a ni lawm ni? A chhan chu an thil hmuh kha an hmuh sual loh vang a ni mahna,” tiin Shirley-i chu a en kalh a, a thu sawi chu chhunzawmin, “Tikhan ka chhanna chu i hriat ka ring,” a tih chuan Shirley-i chu a buai ru hle tih a hmelah a lang thei.




A awm chu a’n chum dat dat a, a kut pahnih chuan a sam chu tham khawmin a lu a thing vak vak bawk, insehruh teuh chung chuan a kut dinglam a phar chhuak a, a jacket ipte chu zen a’n tum a, 'Ti suh, ti miah suh.' tih ang deuh te, 'Min kalsan rawh,' tih ang reng tea chiar deuh nawk nawkin amah leh amah chu a inbe mawlh mawlh bawk, tang tak tein a tang a ni ber.




A awm dan chu mi pangngai tan chuan hlauh lo chi ziazang a ni lo reng a ni. Chutiang hunah chuan inthunun a tum poh leh a kut leh ke te chu a thunun zo thin lo. Amaha nawrtu eng emaw awm chuan a tibuai thin ni berin a lang.





A hmaa thu chuan puih leh bawisawm tum hauh lovin a che zia chu uluk em em hian a thlir reng a ni tih Shirley-i chuan a hmu thei a. A tawp a tawpah chuan a khawkherh ah chu a phawrh chhuak thei ta hram.




A hmaiah thlan tui te chu an luang ngiai ngiai a,, “I ti tha e, i ti tha lutuk. I sual let thei ang tih ka hria a ni,” duat taka a lu chul heuh heuh chung chuan a bula thu chuan a ti a. A mit menga lainatna leh khawngaihna Shirley-i’n a hmuh chiah chuan lungchhe taka tah hawm hawm mai a chak a, a nu hre chhuakin a ngai em em bawk..




Shirley-i khawkherh hrual nawk nawk chu dimtein a kut nen a'n hmet bet a, a mita en chung chuan, “Ka puih theih nan che i thawnthu chu min hrilh i rem ti ang ti raw?” aw dam duai hian chu pa chuan a’n ti leh a. Chutah zet chuan Shirley-i pawhin a remti tih hriat nan a lu bu zeuhin a damdawi pek pawh chu thuawi taka eiin a thawnthu chu a hrilh tan ta a..




“Thian pakhat ka nei a, ani nen chuan mimal thil eng eng emaw kan sawi dun fo thin a, ngaihzawn ruk deuh ka neih te hian ka hrilh loh pawhin a hre thei thin kawp mai. A chang chuan ka ngei zawk hial thin, ka hmuh khat deuh chuan ka ngai hle thung si. Kan inkara thuruk awm lo khawpa kan inpawh hnu chuan ani pawhin a thuruk leh a chanchin engkim min hrilh vek a tih theih ang.




A tirah chuan a thu sawi chu rin pawh ka ring a, mak tihna em em pawh ka nei lo. Mahse, a hnu chuan thil awm ang lo leh mak tak tak ka hmu ta fo mai a. Vawi khat pawh kawng kan kân laiin, kawngpuiah thil eng emaw a thlauh chhara a kun lai chuan taxi lo tlan hian a su a, a su ngei a ni tih chiang takin ka hmu bawk. Ka hlau lutuk chu ka rak thawt, kawngsirah chuan ka thu sawp nawk nghe nghe asin.” Tiin a thu sawi ngaithlatu chuan a awih leh awih loh hriat tum ni awm takin a’n dak chhuak a, uluk takin a thu sawi a lo ngaihtlaksak tih a hmuh chuan a thu sawi chu a chhunzawm leh a.




“Taxi chu a piah deuhah dingin driver chuan, ‘I tha em?’ tiin kawngpuia ka thei khai tla darh nuai chu a chhar khawm mawlh mawlh bawk. Ka bul hnaia lo awmte chuan min buaipui laih laih pah chuan ka that leh that loh min zawt chhen hlawm a. Bah deuh niai hian, ‘Ka thiannu kha, sawtah, sawtah sawn a awm,' tiin ka kawk a, 'A tha em? A thi em ni? Taxi khan a su, a su, i, i...?' ka ti nawi nak a. Mak ti em emin an hawi kual vel ruai nghe nghe asin.




Chutih lai chuan ka thiani chu him pialin ka sirah a lo ding reng tawh a ni chu! Mi dang lo awm ve te pawh chuan ani ni lova kei chauh min buaipui liam liamna chhan chu ka hrethiamin ka inhria a, ‘Aw, tha e, ka tihpalh lutuk,’ ka ti ta ringawt." tiin Shirley chu a nui hak a,,




Chumi hnu chuan thil danglam,mak pui pui thleng zeuh zeuhin, ka thian kawm thin chu mi dangin an hmu ve lo a ni tih chu ka hrethiam tan ta a, vawi tam tak ka suangtuahna ata chu paih bo ka tum tawh a ni.” tiin a’n ngawi dat a, “Mahse, tuithawl pawpa tui chawi tum ang vel chauh a ni,” a ti chuai raih.




A thu sawi chu sawi zawm lehin, “Ani nena kan awm dun chan chuan ka bula mite chuan eng nge an sawi a, eng nge an tih ka hre ngai reng reng lo. Ka chhungte pawhin min hau fova, ‘Biakin mi chhanna chang hre rawh,’ min tih loh leh, ‘Biak hian i hriat reng pawhin i haider lui thin. Khatianga i awm chuan i â tak tak mai ang,’ te min ti fo thin a ni. Mahse, an mi biakna kha ka hre lo tak tak a, ka tan chuan chhan ngaihna leh chhuanlam tur kha a vang thin hle a ni.




A chang chuan ka zan mu te hi chunglam enin che lo chang lovin ka melh ngai ka lo melh leh vung vung thin bawk, a chhan pawh ka thiani khan mi kawm leh thin vang a ni mahna.




Ka bul amite tan khan a hrilhhaithlak hle a ni ngei ang, zan khat pawh ka nau hian, ' A u, a u, i harh em? I harh em? Eng nge i ngaihtuah,' tiin hlauhthawn hmel takin mi rawn sawi nawk nawk a, tha taka ka lo chhan avangin ngaihtha tak khan a awm ve leh mai a.




A hnua ka nauin a sawi chhuah tum chuan mi chhaih nan tak hmangin, ka chhungte’n a ruka ngaihzawng neiah mi ngai hlauh zawk kha hahdamthlak hlein ka hria.” tiin a nui deuh seih a.





“Hun rei tak chhung chu ka buai ru ve viau a; kim lohna ka nei em ni ang? Nge ni a, rilru buai an tih ang hi ka ni zawk le? tih te chu ka ngaihtuah ve fo thin. Ka thil tawn chu mi dang ka hrilh thei lo va, hrilh pawh ni ila tu nge awi chuag ang ni? Ka chhungte ngei pawh chuan min rinsak dawn lo tih ka beng tluk zet hian ka hre chiang hle bawk.




A nih loh vek pawhin khawilai pangpar huanah emaw ka awm zawk hial maithei a ni. Ka sawi dik em?” tiin Shirley-i chuan abula thu chu a’n zawt a. A lu chu a hai deuh chiai chiai hian a hria a, a mut a chhuak hle bawk.




A zawhna chu a chhanna pawh hre mumal lo chuan, “Kei hi ka a tak tak em ni, doctor?” chiang lo ruaia tiin a thu sawi chu a titawp a.






<<<<<>>>>>>>><<<<<>>>>>>><<<<<<<<>>>>>>>><<<<





Hmun pakhata kawng khar chu lo hawngin, “Lo lut rawh,” tiin hmeichhe pakhat hian a lo dawngsawng a, chu nu chuan, “Dr. Lalmalsawmi (Sawmi) ka ni a, phone-a lo betu che kha ka ni,” tiin a inhmelhriattir a, in chhungah chuan mipa pahnih an lo awm ve bawk a.



Dr Sawmi vek chuan, “Hei hi Commissioner Thankhuma a nih hi,” tiin a piah deuh ami chu, “Saw lai ami saw ukil Lalrammuana a nih saw,” tiin a lo hrilh thuai thuai a.



Chibai buk kual dan danin, “CIMH Behavioural Science-a psychiatrist Dr. John Lalrinsanga ka ni e,” tiin a lo theng thar ber chuan a inhmelhriattir a.
Chutia ukil leh commissioner te lam an awm chu Dr. John-a chuan thil pawimawh tak buaipui tur an nei ngei ang tih chu a ring thiam nghal a.



Dr. Sawmi chuan thil thlen dan hrilh thuak thuakin an case buaipui mek leh an zir chianna file chu a pe nghal a. Dr. John chuan lehkha chu a’n bih thuak thuak a, vawi hnih vawi thum dawn a’n keu nawn leh thin. Rawn hawi chhuakin, “He thil hi ka tih theih ka ring lo,” lunghnur zet hian a ti chhuak a.




Ka hauvin Dr. Sawmi leh Muana chuan an lo en a, commissioner chuan nui huah huah chungin, “He case hi i tuipui viau ka lo ring asin, Dr. John. He thilah hian i puihna kan mamawh a ni,” a’n ti thum deuh dup a. Sawmi leh Muana chu an inmelh a, commissioner chuan eng thu tak sawi leh ang maw tiin a thu sawi leh tur ngaichang chuan thin phu det detin an titi chu an lo ngaihthla a.



John-a chuan, “Ka pu, damlote puihtu mai ka ni a, kei ni lovin police emaw detective emaw he hnaah hi chuan an tha zawk ngei ang,” a ti a. Commissioner chuan, “Police leh detective-te chinfel theih ni se i puihna kan dil dawn em ni?” tiin an zawt let ta zawk a.



A chhan hma chuan Sawmi chu lo inrawlhin, “Doctor, he nu hi a dam lo mek a, a mamawh che a ni,” tiin a lo nawr ve zat bawk.



John-a chu a inngaihtuah nasa hle a, a tawp a tawpah chuan, “A case hi a danglam a ni tih kei ai mahin inhre chiang zawk ngei ang a, kan hlawhtling kher lo thei,” a rawn ti chhuak a,



commissioner chuan, “I specialist-na a ni tih kan hria a, chuvanga he hnaah hian min puih tura sawm che kan ni reng a ni tih hi i hria ang chu maw?” aw dam thlup maia a han tih leh chuan Dr. John-a chuan commissioner mit meng leh a thu sawi dan atang chuan, chu hna chu a duh emaw duh lo emaw a hnial theih a ni lo tih chu hrilh fiah leh chuan a ngai lo.



Sawmna phenah chuan thu pek a ri tel tih chu mi che zia leh awm dan atang ringawt pawha mi dang mize lo zir sil tawh tan chuan hai rual a ni lo reng a ni.


Commissioner chuan, “SBA-ah kan lo lawm a che, Dr. John,” a’n ti zawm zat a, John-a chuan sawi tur a van hle mai. Commissioner vek chuan, “He case hi nang leh i team-te’n in lo buaipui dawn nia, i hriat duh tul zawng zawng chu Dr. Sawmi leh ukil Muana hian an hrilh thei ang che,” tiin a ding hluai a,



John-a chuan, “Theih tawp kan lo chhuah ang, sir.” lung ni chiah lo hian a ti ta ringawt.



Commissioner chuan a hriat duh a hriat hnu chuan chu pindan chu a chhuahsan a, ukil Lalrammuana pawh chuan a zui chhuak ve nghal bawk.




An chhuah hnu chuan John-a chuan zawhna hmasa ber atan SBA chu eng nge a nih tih Sawmi chu a’n zawt phawt a. Sawmi chuan muang ban charhin, “SBA chu Secret Behavioural Analysis a ni. Ka sawifiah kher a ngai ang em?” nui ver ver hian a ti charh charh a.



John-a chuan, “Eng vanga thuruk ni nge a nih a?” tiin a’n zawt leh hram a, “I la danglam lo reng reng. Tunah chuan nangmah ngei kha i ni leh ta, senior,” Sawmi chuan fiamthu titak deuh hian a’n ti zeuh a.



John-a chuan ti tak fe hian, “Chhanna dik lo a ni. Hei vang hian alawm ka ngaihzawn theih miah loh che, Sawmi,” tia chek tlak tlak pahin a lu a thing nar nar a, “I damlote ang mai i ni tawh a nih hi,” a ti zawm zat.



“Chutiang a nih chuan, i enkawlna ka mamawh ngei dawn a nih chu,” tiin Sawmi chuan a’n chhang let ve leh ngat a. John-a chuan, “Kei pawh hi i bulah hi chuan ka â hui zel,” tiin a insum zo lo chu a nui chhuak hawk a, an pahnih chuan an nui dun leh kiah kiah.



“A nih chuan, kan â dun tak tak dawn em ni?” tiin Sawmi chuan an case buaipui tura thil tangkai tur te chu a la khawm a, chung thil a pek pah chuan, “I zawhna chhanna chu ka nei lo a ni. He case hi i zir chhian hnu-ah i hriatthiam mai ka ring.” tiin thu tak fe hian a en a,



“Chu thil chu kan zawn chhuah tur i tihna em ni?” Dr. John-a’n a tih chuan Sawmtei chuan a lu a lo bu nghauh nghauh ringawt.



A rin lawk ang ngeiin John-a chuan an thil buaipui tur chu a theuneu lo viau a ni tih chu a ring thiam nghal mai a. Eng tianga hmalak tur nge tih erawh hriatthiam har a ti hle thung.



Zan khuain an case khawih tawhna file chu a zir chiang a, zing lam dar ruk bawr velah pawh chuan eng emaw ngaihtuah ni awm takin a thutna ngheng chuan a dak ar ar a, a khat tawkin a thutna chu a tivir leh zeuh thin bawk. Tukthuan ei khamah chuan Sawmi hmu turin damdawi inah chuan a inkhalh chhuak nghal a.



Sawmi office-a a luh rual rual chuan eng khaw sawi set set lovin, “Eng pawh chu ni se, he nu hi hmuh phawt ka duh ang,” John-a chuan a’n ti chhuak phawng a.



Sawmi chu a thil ziah lai tawp chatin, “Eng tikah nge ni ang?” tiin a tarmit kar atang chuan a rawn melh chho kar bawk,,,



Dawhkanah a kut pahnih nghat chuan Sawmi chu a’n melh a, “A theih chuan tunah ka duh,” a ti thawp salh. Sawmi chuan rang zetin, “Tunah maw?” tiin a ner nak a. John-a chuan a lu bu zeuhin, eng dang mah a sawi lo.



“A ze ngai a chhuah leh dawn ta,” tia phun deuh nang nang chungin Sawmi chuan damlo hmu tur chuan a hruai ta a.






End of Chapter 1


(ziah sual/mistake a awm chuan in lo hrethiam hram hram dawn nia)


whatsapp group ah hian infor. ka dah thin a,a join duh tan👇🏻
https://chat.whatsapp.com/C9OTIm8XvfLHr9zYGrpOxN




(Comment👇🏻)

https://www.facebook.com/groups/9913546 ... 827124432/



Link:
BBcode:
HTML:
Hide post links
Show post links

lyno v
Posts: 83
Joined: February 15th, 2022, 5:32 pm

Unread post by lyno v » August 30th, 2022, 8:56 pm

RIP CHHUNG THURUK VAWNGTU



Chapter 2


(hun liam tawh chu rawn langin)


Chawhnu lam a ni tawh a, MZU sport a hnaih tawh avangin practice tur tlem te tih loh chu hmuh tur an awm tawh meuh lo. Hlutei chu library atangin lehkhabu pawm tun chungin a lo chhuak a, a kalna tur takah chuan mipa pakhat hi a pheihkhawk hrui suih tumin a lo buai em em mai a.



Hlutei chuan kal pelh mai a tum naa mahse chu pa kut dinglam chu a intuam luk tih a zuk hmuh chuan a lehkhabu ken lai chu leiah a’n ngat rawih a, ngawi rengin a pheikhawk hrui chu a suihsak mial mial, chu pa mak ti leh hrilhhai bawk si chu ngawi rengin Hlutei en pah chuan alo in dawh ve tawp mai a ni.



A suih zawhsak hnu chuan engmah sawi lo va kal leh mai tumin a inher a, “Ka lawm lutuk ania,” chu pain arawn tih chuan,,nuih seih ringawtin eng mah sawi lo chuan a kal leh ta zawk a, chu pa chuan Hlutei a lan theih chhung chu a thlir zui vawng vawng...



Kar khat a liam leh meuh chuan MZU sport pawh an tan tawh a. Hlutei te class pawh Tuikual indoor-ah valleyball khel en turin an kal ve a, hall chhung chu an khat mup mai, chhuatah te chuan kalna tur awm lo khawpin an thu khat hnur bawk.



An college leh an tumpuite chu an inhneh tawk viau a, khawi lam lam pawhin point an hmuh apiang chuan an au a, khuang nen an ri leh dur dur zel. A chang leh college slogan sawiin an au dual dual a, thawm pawh a tha hem hem khawp mai..



Inkhelh laklawh lai chuan Hlutei chu a thiannu Kimkimi leh a bialpa chuan thil lei turin an chhuahsan lawk a, chutih lai chuan mipa pahnih lo kalin, “Kan lo thu ve thei ang em?” tiin Hlutei chu an lo zawt a.



Pakhat zawk chu SU hruaitu a nih hmel a, pakhat zawk erawh chu sa tha nelh nawlh tak feet ruk hawlh thuak tur a ni. Chu pa chuan jersey a ha a, valley ball player zing ami a nih hmel.



Hlutei chuan phal loh ngawt chi niin a hre si lo, “A, ih, aw thu thei e,” a ti bah deuh nak.



Jersey ha zawk chuan, “I phal chiah lo a ni maw?” nui chung hian a ti a, Hlutei zak lutuk chu a hmai a sen tawn tawn a, a nui tawi tat mai. Chu pa chu a bulah thuin a thianpa chu a piahah a thu ve a.



Hlutei hnenah chuan, “Zuala ka nia, Hmanni pheikhawk hrui avanga ka lawmthu sawina a nih hi,” tiin thelret (chewing gum) pakhat hi a pe a.



Hlutei'n chiang taka chu pa hmel ahmuh rual chuan a taksaah current kal chuai ni ang mai hian a hria,chutiang chu a vawikhat tawnna a ni nghe nghe,,hmanni khan a hmel reng reng alo enchiang lo va,,hmel tha tak tia sawi tur ni lo mahse a hmel chu a pa hrak mai a,a khabe ruh invuah nghet tak mai te leh a mit meng fiah leh fim kak mai te chu tawrh hreawm tak tur a ni..



Hlutei lai lutuk chuan nui ver ver pahin, “I va’n ho tak,” tiin a kun a,,lai zet hian a hmui chhunglam chu a seh ngar ngar bawk,,a sam a benga a zeh zawng chuan a biangsum khuar dek chu alo lang zeuh a, a duhawm reuh asin aw.



Ngaihzawng la nei ngai lo leh zakzum chi a ni bawk nen,mipa han biak dan leh awm dan tur pawh chu a bo ve chiang kher mai,,,mahse a nungchang leh mizia chu mipate duh chi tak hi a ni thung a,,a ânka nem tak te chu a zuna uai tinatute zing ami niawm tak a mawi a ni..



Chutia han ngawih reng mai chu a hawihawm loh thlak deuh ni a hriain Hlutei chuan, “I khel ve dawn em ni?” tiin a’n zawt ve a,



“Dawn ta lo a nih hi, ka ban hi a la dam chiang si lo va,,ka pheikhawk hrui erawh min suihsak kha a nghet tha deuh aniang hei,,khami ni atang khan ala in phelh lo reng reng” Zuala chuan nui suk pahin a pheikhawk rawn lek kang zeuh chuan a ke lam chu a mitmei zeuh a.



Chu veleh Hlutei pawh chuan bih thla vein,,Zuala chu ava en leh zeuh a,alo en ve reng tih a hmuh chuan a thin rawn phu leh dut dutin a mit chu ala sawn rang kher mai,awm tha thuaiin,a kut tin sik neuh neuh pah chuan a hmui a pet leh ngar ngar tawh,,a sira thu pa chuan kiai suk hian Hlutei chu duhawm tih hmel zet hian a en leh vawng vawng..



Ralkhat atanga lo hmutu tan chuan hai rual lohvin a mitmengah chuan eng emaw tak a awm tih a hmuh theih ang..



'Vawikhat inhmuhnaa inhmangaihna' an tih thin chu awih lo viau mah se,tuna an awm dan leh rilru put dan atang hi chuan atak ngei a ni tih an pahnih chuan an hrechiang viau ta ve ang..



Thil eng eng emaw sawiin an titi dun thei viau mai,,Hlutei pawh nidang ang lo takin tawng tur chu a hre ve phian a,,a ni lah taka Zuala ang tlangval zei leh a bula mi te sawi duh zawng tur hriaa titi pui thiam bulah chuan Sahuai ni do meuh pawn a do zawh a rinawm loh...



Zuala chu indap ruk rukin,,“e he!!,, ka phone ka hmu zo miah lo mai" arawn ti hluai a,,"khawiah emaw i dahna i hre lo te a ni lo maw?" Hlutei chuan alo ti a..



"ka ak ngei khan ka hre sia,," la indap ruk ruk pah chuan Hlutei en zeuhvin rilru hah hmel tak hian a ti a,



Chutah inthlahrun hmel tak hian,,"Hlute,,pawi i tih loh chuan Khawngaihin mi lo call-sak mai teh a,” a’n ti chhuak phawng a,Hlutei pawh chuan phal tak hian alo remti ve nghal mai bawk...



A numbar chhuttirin phone chu a’n dial a, call chu a tlang a, chhangtu erawh an awm lo. “A ring a, mahse tu mahin an chhang lo,” tiin Hlutei chuan Zuala chu a’n melh zeuh a, a thianpa zawk chuan, “Nichin kan thutnaah khan a awm a ni ang,,kan va en chhin dawn em ni?” a lo ti var mai.



Zuala chu a mangan hmel hle mai leh nghal a, an thian dun chuan ding hluaiin, kal mai an tum a. Zuala chu kiai deuh suk pah hian Hlutei beng bulah chuan a’n kun hniam a, “Zanah ka lo bia ang che,” a ti sup, Hlutei chuan melh zawkin, “Eng tin maw?” a ti hu mai.



Zuala chuan eng mah hre lo ang maiin a phone ah chu rawn phawrh chhuakin Hlutei hmuh tur chuan a’n lek kang vel a,a thianpa nen chuan an kalsawn nghal zat..A phone a tibo lo tih a hriat chuan an fiam mai mai angah ngaiin Hlutei thinrim leh zak bawk si chu a ner nang nang mai.



Chumi zan atang chuan an in be tan a. Zuala chu senior a nih avangin Hlutei chuan a nel tehchiam lo naa college khata kal ta na na na chu han inhmuh ve zeuh zeuh takah chuan, Hlutei pawh chuan a ngaina ve telh telh bawk nen thla khat dawn an inbiak hnu chuan an inngaizawng ta nge nge a ni.




Nikhat chu Zuala chuan canteen bulah a lo nghak a, Kimkimi’n a hmuh rual rual chuan Hlutei chu a’n nghawk zeuhva, “Saw a nghak che a nia, va che khir leh viau suh ang che,” tiin a nui ver ver,



Hlutei chu ner nakin, “Chutiangin ka awm ngai lo ve a,” a tih chuan Kimkimi chu a nui thaw mai. A bul an thlen chuan Kimkim chuan, “In-date nuam u,” a’n ti leh hram a, Hlute thinrim leh lai lutuk chu a thiannu a melh vak ringawt..




Zuala chuan, “Khawiah emaw kal lawk ang hmiang,” a tih chuan Hlutei pawh chuan a hnial lem lo va. An college atanga hla vak lo, khawilai emawni hmun nuam tak maiah Zuala chuan a hruai a, chu lai hmunah chuan thinkung lian pui pui a ding fur mai leh nghal.



Mihring kalna leng tawk velin kawng chu a bel han a, a sir tawn tawnah chuan pangpar a vul chuk bawk. Tlem an phei leh hlek chuan thingkung buk laih a lo awm a, a bul vel chu phul hring dup mai chuan a hual vel a, thingkung bulah chuan thinga siam thutthleng sei vak lo hi a awm bawk.



Chulai hmun chu a reh raih a, sava hram leh leuh leuh thin tih lo chu thawm dang hriat tur a awm meuh lo. Khawpui zi hut hut leh bengchheng tak kara chutiang hmun a awm chu Hlutei chuan mak a ti hle a, nuam a tiin a hlim hle bawk.



Thil eng eng emaw sawiin thutnaah chuan an thu a, an hlim dun ve viau. Zuala chuan silver thi mawi zet mai hi Hlutei chu a’n awrhtir a, a sam a hui phei zawnga a nghawng var no tak Zuala’n a hmuh chuan insum zawh har a ti hle mai.



Zawi tein a ngawngah chuan a’n fawp zeuh a. Hlutei rawn inher chu a duhawm kher asin, a biang chu a tai tek a, a mitmeng de sar sar te, a hmui vam ham mai te chu tu mipa mah hian an hnar phal lo vang.



Zuala chuan dim tein a hmuiah chuan a’n fawp a, a hnar loh avang chuan a’n fawp nawn leh a, Hlutei pawh chuan rawn chhang letin duhthawh takin an in fawp zui a.



Zuala chuan, “Kan in-date-na hmasa ber chu nuam i ti em?" tiin a’n zawt a, Hlutei chuan, “Aw, nuam ka ti,” a ti sap. Zuala chuan Hlutei kut chu vuanin inngheng rialin an thu dun a, thlakhlelh dang eng mah nei lo hmel an pu a ni.





°°°°°°°°°°°°°°°°°°°°°°°°°°°°°°°°




Pindan kawngkhara nambar pakua (9) intar chu Sawmi chuan a hawng a, a chhungah chuan hmeichhe pakhat hi tukverh bula dingin ngawi rengin pawn lam chu alo thlir a, a kut leh ke te chu thirkhaidiata thlun a ni bawk.



Sawmi chuan, “A thawh harh deuh chang chuan saw tiang sawn ngawi rengin pawn lam a thlir thin. Biak a nawm hun lai tak a ni ang, i vannei hle mai,” tiin Dr. John-a chu a hrilh ru sap a.



Pindan chhungah chuan khum te fel thlip thlep, mut ngai loh ang maia mar tha leh rizai inthlep tha thlap hi a awm a, a bul chhuarah chuan felfai leh awmze nei takin lehkhabu a intiang thap bawk.



Tukverh bulah chuan dawkan leh thutphah pakhat awmin, dawhkan chungah chuan lehkhabu tlem leh pen a awm bawk a, a sir deuhah chuan tuium pali vel a inhung tlar diat bawk..



Samzai pakhat pawh hmuh tur awm lo khawpin chhuat lah chu a fai em em leh nghal, eng kim mai chu a nih dan tur leh a awmna hmun dik takah an awm vek niin a lang.



John-a chuan Sawmi en chungin, “A nih chuan, Shirley-i kan be dawn a ni maw?” a’n ti zauh a. Sawmi chuan, “A nih hmel,” tiin tukverh lam chu a pan a, “Good morning, Shirley. Nizan lam i mu thei em?” tiin a’n zawt a.



Shirley-i chu rawn inherin a nui seih a, chu chu Dr. John-a’n Shirley-i a hmuh hmasak berna a ni.



A mit chu a buang then a, a meng fiah kak bawk. A sam kir deuh chiat leh a hnarkawn invuah fuh em em mai te, a mawng bawr leh a awm bawr kawh deuh lah mai te chu hmuhnawm tham a tling a, a duhawmna tizual turin a nuih zawng chuan a biang sum chu a khuar deuh dek leh nghal.



John-a chuan, “Shirley, i tan chuan atna hi rukru nunrawng ber a va ni tehlul em!” tiin ama hriat tawk lekin a phun sep a.



Shirley-i chuan Sawmi en chung chuan, “Doctor, nang i ni maw?" tiin a hmui chu a’n pet zeuh a, “Nizan chu mumang nuam deuh mai ka nei a, ka mutui khawp mai,” a ti a.



Sawmi chuan, “A va lawmawm ve aw. I mumang chu hriat ve ka chak khawp mai, nakinah mi la hrilh ve ang che aw,” a tih chuan Shirley-i chu a khi deuh seih a.



“Eng pawh ni se, hmelhriattir tur che ka nei a. Hei hi doctor thiam deuh mai a nia, Dr. John-a anih hi. Ani hian i harsatna zawng zawngah a puih tawh dawn che a ni,” Sawmi chuan a’n ti zawm a.



John-a chuan chibai tumin a kut a phar zuai hman tihah Shirley-i chu a kun hmak a, “I kal bo dawn em ni?” zawi te hian a han ti a. Sawmi chuan, “Ai, teuh lo, kal bo dawn nang aw, doctor leh nangmah puih turin ka awm ve reng dawn alawm,” a tih chuan Shirley-i chu rawn hawi chhuakin John-a chu chibai a buk ve ta a. A lan dan chuan hmeichhe pangngai leh pawisawi lo tak hmel a pu a ni.



John-a chuan, “Shirley, kan inkawm lawk dawn em ni?” a ti a. Shirley-i chu thuawi takin a khumah chuan a thu ve mai a, a bula thuttlengah chuan John-a chu thuin thil eng eng emaw sawipuiin fiamthu te a’n sawi leh ang lawp lawp a, Shirley-i chu a nui leh ver ver thin.



Shirley-i chu a tlangnel deuha a hriat hnu chuan Dr. Sawmi chuan pindan atang a chhuahsan ta a.



Sawmi chhuah hnu chuan John-a chuan a recorder te reuh te chu dawhkanah chuan a’n dah te te a, “Shirley, eng nge i hming pum min hrilh thei ang em?” tiin a’n zawt a.



Shirley-i chuan, “Shirley-i,” tih chauhin a chhang thung. John-a chuan, “Shirley-i tih chauh em ni?” tiin a nuih deuh suk a. Shirley-i chu a zah avangin a hmai chu a sen nghal awp awp mai.



Hnuai lam bihin a kut tin sik neuh neuh pah chuan, “Ka hre chhuak thei tawh lo va,” a ti sap a. John-a chuan a zia a thlak mai ang tih chu a hlauh avangin thil dang dang a sawipui ta zawk a.



Boruak a zan deuh hnu chuan, “I hmel ang maiin hming i nei mawi hle mai,” John-a’n a’n tih chuan a nui ver ver a, a biang chu a tai tek reuh leh nghal, a lainatawm zawk hial a ni.



John-a vek chuan, “I chhungte chanchin, i nu leh pa emaw i unaute emaw an hming i la hre thei ang em?” tiin a’n zawt leh a, Shirley- chuan lu thin ner ner pahin, “Eng mah ka hre lo,” a ti a.



Thil kal dan chu a fuh dawn lo tawpin John-a chuan a hria a, eng thil nge sawipui tha ang tih ngaihtuahin a rilru a buai hle bawk.



Dawhkana lehkhabu leh pen a hmuh chuan, “Shirley, diary i ziak thin em ni?” tiin a’n zawt a, Shirley-i chuan, “Ai, ka ta a ni lo.” tih chauhin a chhang a, a zia lah chu a zawi sawt em em mai leh nghal.



John-a chuan rei a daih dawn lo tih chu a hrethiam a, “Lehkhabu hi le, i ta a ni vek em?” tiin a’n zawt leh a, Shirley-i chuan a lu a bu nghauh.



“Ka en chin thei ang em?” tiin John-a chuan lehkhabu chu a’n kawk a, Shirley-i chuan a remti tih hriat nan a mit chu a khap salh.



John-a chuan lehkhabu chu a’n keu thuak thuak hlawm a, a ziaktu a hran ang bawkin lehkhabu inang lo tak tak a ni hlawm.



Lehkhabu pakhat erawh chu phek 162 chu a in-underline thliah a, chu thil a hmuh chuan John-a chuan, “Shirley, phek 162-na chhinchhiah a nih chhan hi i hria em?” tiin a’n zawt leh a,



Shirley-i chu rawn hawi chhovin chiang fek fawk hian John-a chu a’n en a, “Code number a nih kha. Thil pakhat min zawn hmuhsak thei ang em?” tiin a zawt zawm zat bawk.



John-a chu Shirley-i hmaa thutnaah chuan a va thu a, “Eng thil pawh ni se ka zawng hmu ngei ngei ang tih ka tiam a che,” a ti ve rawi a. Shirley-i chuan, “Eng kim bul intanna a ni,” tiin John-a chu a en kalh.



John-a chuan Shirley-i awm dan leh che zia chu chik taka a en pawhin a rilru a fim ngei niin a hria a, mak a tiin a ngaihtuahna pawh a buai ru viau a ni.




Shirley-i chuan, “Ka thawnthu hrilh ta che ila, i ring ang em?” tiin a’n zawt leh a, John-a chu a bu nghauh a. Chutih lai chuan nurse pakhat lo lutin, “Doctor, damdawi pek a hun tawh a,” a rawn tih chuan Shirley-i chu a khum lu-ah chuan thuin vawt ti awm takin a khur beuh beuh a, a hlauhthawn hmel em em bawk.



John-a’n Shirley-i awm dan a hmuh rual rual chuan blanket a sintir vat a, “Shirley, i tha em?” tiin a pang chu a’n dek a, a tak chu sa em em a, a khawsik a sang hle hi a lo ni.



Shirley-i chuan eng emaw sawiin a phun nuah nuah a, a ha thialin a meng rang chiam bawk, a buai leh chu a ni ta der mai. John-a chuan nurse chu damdawi pe vat turin vin tuar a, nurse pahnih an lo tlan lut vat a, an hnungah chuan Dr. Sawmi a rawn zui lut bawk.



Shirley-i chu a tal vel vak vak a, ramsa ang maiin a hram chiam bawk. Nurse-ho chuan an chelh bet a, John-a chuan, “Shirley, hlauthawng suh, a tha vek ang, a tha e, a tha vek,” tiin a banah chuan in-jection chu a thun lut mawlh mawlh a, Shirley-i chu ngik faih faih chhungin a muhil zui ta a ni.





~~~~~~~~~~~~~~~~~~~~~~~~~~~~~~~~~~~~~




(hun kal tawh chu rawn lang lehin)



Tichuan, chu mi tlai vek chuan Zuala thian te inah an lut kawi a, chu chu an college atang chuan tuibur hmuam da kal pawh a ni lo vang. In chhung an luh chuan hmeichhe pakhat hian a lo chhawn a, thutkhawmna pindanah chuan mipa pahnih an lo awm bawk a, pakhat zawk chu Zuala thianpa SU kha a ni.



Zuala chuan a thiante chu a’n hmelhriattir a, in neitu nu ber chu Lawmi a ni a, Hlutei te nen semester khat an nih thu te chu a hrilh a, an SU Garry-a bialnu a ni.



Mipa pakhat lo awm ve chu Zuala thian tha ber Muana a ni a, ani chu Law zir chhuak hlim a ni ve thung.



Zualate thianho hi tette atanga inkawm a, sikul pawh lut ho an ni. Garry-a hi chu a nau deuh hrim hrim a, an aiin a pawl pawh a hniam deuh a. Thil eng emaw avangin Zuala hian college chu zo lovin a chawlhsan a, a bul atang a tan leh avangin Garry-a nen hian an inpawl rual ta a ni.



Muana’n Hlutei a hmuh rual rual chuan hmuh thiang lo hmu ta ang hrimin a mengphar nasa ngei mai. Hlutei chuan chibai pahin, “Hlutei, ka nia,” a tih chuan a thaw huai a.



A awm dan chu a thiante chuan mak tiin an lo thlir thap a ni tih Muana’n a hmuh chuan, “Hetianga hmeltha Zuala’n a hmu hi ka ring thei lo alawm,” a tih chuan an nui dar dar.



Chumi ni atang chuan Lawmi te in chu Zuala leh Hlutei chuan inhmuh nan tak an hmang a ni ber mai.
Lawmi nen tak phei chuan Hlutei chu an inkawmngeih viau nghe nghe a, eng kim a chhia a tha an inhrilh tawn a, Kimkimi ai pawhin a pawh zawk em maw tih tur a ni.

Kar tin deuh thawhin Lawmi te inah chuan an inhmu khawm thin a, an inkulhna hmun ber hi a ni ringawt mai. Lawmi chhungte an lo fel bawk nen Hlutei pawh a tlangnel em em a, Lawmi pa phei chuan, “Kan inah rawn insuan mai rawh,” a ti fiamthu fo thin a ni.



Hun te a liam ve zel a, Zuala te chhuah kum a ni a, Hlutei nen an inzuina pawh kum khat zen zawn chu an ve ta reng mai. Zuala valleyball player hriat hlawh ve tak, hmel leh pian chhe zawk zawk ni bawk si lo leh Hlutei zakzuk em em mai an inzui chu college-ah pawh hriat an hlawh hle nghe nghe a, inhmeh ti tawk an awm a, sawisel tawk lah bo lo.



A chang chuan buaina neuh neuh an nei ve fo thin a ni. IV semester an exam zawh rual rual chuan Hlutei chu an khaw lamah a haw nghal a, a phone a chhe bawk nen Zuala nen pawh chuan an inbe lo zui chu a ni ta der mai.



Class an tan leh hma deuh chuan Hlutei chu Aizawl lamah chuan a let a. A chhangtu chiah chu college a luh ve tawh dawn avangin in luah tur a zawng nghal chuk chuk a, a tawp a tawpah chuan Republic Vengthlangah a hmu ta hlauh mai.



Hostel atang chuan inla chhuakin a luah lut ve rawi a. A tukah chuan a phone chu siamtirin bungraw mamawh zualpui chu a lei nghal bawk a. A haw hnu chuan a nu leh pa chu chanchin hrilhin a nau pawh lo kal tir thuai turin a chah zui bawk.



A phone chu an en thuak thuak a, Zuala message pawh a lo tam tawh khawp mai, a message tawp ber a chhiar chuan a phu zawk. An chhiar nawn leh a, “Naktukah ka chhuk tawh dawn a nia. Ka be tlang thei lo che,” tih hi a ni a, Zuala chu a’n call nghal a, a tlang thei bawk si lo.



A tihngaihna hre lo chuan Lawmi chu a call ta ringawt a, chhanchin hrilh thuak thuakin Zuala chanchin te chu a’n zawt nghal bawk a. Lawmi chuan Delhi-ah zir zawm turin a kal tur thu leh an in atang a haw chiah thu a lo sawi chuan beidawng takin phone chu a titawp a, a khumah chuan a thu hnawk a, a tihngaihna hre lo chu a tap tih tih ta mai.




Chutih lai chuan a phone chu a lo ri a, tap tuau chung chuan a chhang a, “Enga tinge a? I tha em?” hlauthawng em emin Zuala chuan a rawn ti a.



Hlutei’n Zuala aw a hriat chuan a lawm bawk si chu sawi tur pawh hre lovin a tahnuih ta chiam mai, Zuala lah chu a ngaih a tha lo zual sawt mai si, “Khaw nge i awm? Tunah ka rawn kal nghal dawn.” tih leh a thianpa chabi ken lai chhuh a rual a.



Garry-a chuan khi deuh sung chungin a helmet chu a pe nghal a, Zuala chu a tlan liam nghal vung vung.



Zuala a thlen chuan Hlutei chu a zak leh hnuhnaw viau a. A inah chuan thutna mumal pawh a la neih loh avang chuan Hlutei khumah chuan thu dunin Hlutei chuan a phone chhiat thu te leh eng mah sawi lova a haw avanga a inthiam loh thu te chu a sawi ve niap niap a.



Zuala chuan kuah nget sauh pah chuan, “Ka thinlung tan hi chuan cyclone ang mai i ni. Mangang taka mi siam i thiam lutuk,” a tih chuan Hlutei chu a nui seih a, “I over em mai, u Zual,” tiin a awmah chuan na lo tein a’n chum det a,



Zuala chuan a kut chu lo manin a fawp zui nghal a, khumah chuan an tlu riai riai a, hmangaihna par chu an tlan dun ta a ni.



“Lungpui ang maia sak thinlung pawh hmangaihte bulah chuan tui ang maiin a nem thin,” an lo ti mathlawn lo va, chumi zan chuan Hlutei chu inveng ve viau mah se a hmangaih lakah chuan a thianghlimna chu a veng him zo chuang lo a ni.



Tlai khat Hlutei exam zo chu Lawmi te inah peng kawiin an ti ti luam a, a hawh chhoh meuh chuan a lo tlai tawh viau mai. An in thlen hma kawngpui awi deuh hleka a chhuk mek lai chuan hmeichhe pakhat hmanhmawh taka lo tlan hian a su chawrh a, a tlu thelh nghe nghe a ni.



A rawn sutu zawk chu kawngpuiah chuan a bawksawp nuai a, Hlutei chuan, “Ka tihpalh lutuk, i tha em?” tiin kaih thawh a’n tum a, chu nu chuan Hlutei a hmuh chuan a hma ai mahin a thlabar hmel zawk.



Hnuai lam a bih vat a, kawngpuiah chuan hmanhmawh taka bawkvak chhovin a tlan liam zui ta a, Hlutei chuan ngaihthat lohna em em pawh a nei chuang lo.




End of Chapter 2


(ziah sual/mistake a awm chuan in lo hrethiam hram hram dawn nia)

Link:
BBcode:
HTML:
Hide post links
Show post links

lyno v
Posts: 83
Joined: February 15th, 2022, 5:32 pm

Unread post by lyno v » August 31st, 2022, 9:43 pm

RIP CHHUNG THURUK VAWNGTU



Chapter 3







In chhung a’n luh chuan a pa lo awm reng chu a hmu a, a pa chu a ngai tawh bawk a ni ang a zi chung mai a, “I rawn kal dawn te chuan rawn sawi tur che hi nia,” tiin a pa chu a kuah chuk chuk a, a pain thei a lo hawsak te chu phawrhin an unau chuan an inchuh der vel a, an hlim dar dar viau mai.



Zanriah ei lai chuan apa chuan a zilh deuh hlak a, “Hmeichhia in ni a, tlai tak tak te haw loh tur, tunlaiah misual tak tak an tam tawh. Tin, ngaihzawng leh thiante pawh mi nazawng inah hruai lut hauh suh u, hmeihchhia mai in ni si a, an zuam hlauh dah ang che u,” a ti dap dap a.




Hlutei chu a inthiam lo hle a, a pa lakah chuan a zak ngawih ngawih a ni. A nau exam zo tawh haw chak tawh chuan a pa chu a nawr chhen bawk nen, a pa chuan a thil tih tur ang ang a tih fel hnu chuan Hlutei exam zawh pawh nghak ta lo chuan an hawsan ta a.



Hun a liam ve zel a, Zuala leh Hlutei pawh an inbe tlem tial tial a. Hlutei leh Kimkimi chu an exam zawh ni chuan bazar turin an chhuak a, adidas showroom an kal pelh dawn lai chuan Hlutei chuan Zuala hmu thanin a inhria a ni.



A thil hmuh chu ringhlel deuh si beisei deuh bawk si hian Hlutei chu inher vut a, phur deuhvin a’n let leh ngat a, showroom atang chuan hmeichhe pakhat nen hian Zuala chu an lo chhuak a, chu nu chuan a banah vuanin an hlim hmel em em mai leh nghal a, chu thil a hmuh chuan a mit sulh a, a khaw hmuh te chu a phe ruai mai.



A thiannu Kimkimi chu rawn let vein, “Eng mah sawi lovin tinge i let leh daih a?” tiin a vui nang nang a. Hlutei chuan a thiannu ban chu vuanin, “Ti rawh, kal ang. Hei hi ka thlauh alawm maw le,” tiin an thian duna chabi khaina inang an neih chu a hmuh a.



Hlutei chhuan an bazar chhung zawng pawh chuan Zuala leh a bula a hmeichhe hmuh ringawt chuan a rilru an luah a, tah hawm hawm mai te a chak a, an thil lei te pawh chu hriat mumal pawh a nei lo. Kimkimi ngaih tha lo chuan, “Eng thil nge thleng? I nuam lo em ni?” tiin a zawt chhen nghe nghe a ni.



An haw hnu pawh chuan Hlutei thaw ipik lutuk chu a inah pawh chuan a awm hle hle thei chuang lo. Lawmite ina riak turin a chhuk thla ta ringawt a. Hlutei chu a inngaihtuah lungpuam sa bawk nen Zuala nen an inkar thu Lawmi a hrilh chuan a mittui a luang nghal zawih zawih a.



Lawmi pawh chuan a lainat hle a, tih vak ngaihna lah a hre si lo, “Chutiang chuan Zuala’n i chungah a ti miah lo ang. Hmangaih la na tak mai a ni a, a vawn tawh chu a thlah mai mai ngai lo. A ngaihzawng hmasa khan a phatsan avangin a zirlai pawh a bahlah phah a, a phatsan che ka ring miah lo,” tiin a thiam ang ang chuan a’n hnem ve a. Hlutei chuan Lawmi thu sawi chu thu dik ni se a tiin rin a duh tak zet a ni.



Hlutei chuan an khaw lama haw phei chu tha berin a hria a, ni thum hnua haw turin ticket pawh a tifel ta a. Chumi tlai a haw tur chu an khuaa doctor awm thin Hruaia nen chuan an inhmuh fuh hlauh mai.



Hruaia quater luah chu Hlutei te kawmchhak maia awm a nih avangin an inpawh em em a, Hlutei tak phei hi chu a thawmhnaw sutu a nih thin avangin a duat ve em em a ni.



Hruaia chuan, “Ka treat ang che,” a tih tlat avangin High Five-ah an chawl ta a, an inhmuh leh Hruaia a lawm hlei hleiah a tang a. Hlutei te in luah hmuhsak ve hrim hrim a duh avang chuan an in thlengin a thlah zui nghe nghe a ni.



A tukah chuan Hlutei chuan Zuala message a dawng nawlh a, phur em emin a’n hawng nghalh a, a beisei ang erawh a ni lo. Zuala chuan an inkar a tawp tawh thu chu message-in a rawn hrilh a nih chu! A awm leh a hrawk bawr vel chu hnawhtu awm ang maiin a tawt up up a, a thu hnawk a, eng thil mah a ngaihtuah thei lo.



A kawngkhar kik thawm pawh chu a lo hre lo va, “Hlute, i tha em? Eng tin nge i awm?” tia a dara lo sawitu chu phe ruai hian a hmu a, chu veleh, “A’u Hruai,” tiin a awmah chuan bei thlawp a, a inhnit nghal hlawp hlawp mai.



Hruaia chuan eng mah hrethiam hek lo, “I nute’n an lo hau leh pek che em ni? Tah belh reuh lutuk,” tiin a kawngah chuan a’n beng thek thek a.



Hlutei chuan u ang tak tak a en avangin Hruaia hnenah chuan a ngaihzawng nena an chanchin zawng zawng chu a hrilh ta a, Hruai pawh chuan a lainat hmel hle a ni.



Hruaia chuan, “Rilru tih thawven nan ka in lamah kan kal lawk dawn em ni? I nute thil thawn tur pawh ka nei tak asin, chumi lak pah chu a ni mai,” tiin Hlutei chu a’n thlem kual vel a. Hlutei tan paw’n hnial vak ngaihna a awm si lo va, Hruaia te in lamah chuan an inphur chhuak ta a.



Hruaia te in an thlen chuan tu mah awm an awm lo nge a reh thiap mai a.Thutkhawmna zau nuam tawk tak bula pindan kawngkhar lo awm hmasa ber chu Hruaia chuan hawngin Hlutei chu a pawt lut dawr a, a fawp nghal ta mai.



Hlutei chuan a nam sawn thuai a, “Eng thil nge i tih hi,” a ti vin hlar. Hruaia chuan a pawm bet lawk a, bangah chuan nawr betin fawh an tum leh a, Hlutei chu tha tawpin a tang a, a au chiam mai a, a duh ang chuan a ti thei ta hauh lo mai. Hruaia thinrim chuan a hmaiah chuan a beng thuai a, muthilhna damdawi pein a pawngsual zui ta a ni.






~~~~~~~~~~~~~~~~~~~~~~~~~~~~~~~~~~~~~




A tukah chuan Shirley-i chu a dawhkan bula thuin a note bu-ah chuan thil a ziak mawlh mawlh a, zan thlengin a che sawn eih lo. Chutiang hunah chuan tihbuai a duh ngai lo va, a zia a zawiin a zak zum hle thin bawk. Midang a hmuh vaih chuan ‘Sahuai ni do’ an sawi ang mai hi a ni thin.



Dr. John-a chuan, “Saw saw a ze khat zawk chu em ni?” tiin Sawmi chu a’n zawt a, Sawmi chuan, “Aw, ni e,” a ti sap.



John-a leh Sawmi chuan Shirley-i chu chhuahsanin office-ah chuan an lut a, Sawmi chuan damdawi an mamawh chu lehkhapuana ziakin nurse chu a pe a. Chutih lai chuan John-a chu dawhkan bulah chuan a vei tawn sek a, a inngaihtuah muk hmel hle bawk.



A khat tawkin a hui leh pap pap thin a, a chang leh chair-a thu chung chuan a hmui bula kut suihin a bu leh nghauh nghauh thin bawk.



Sawmi ning lutuk chuan, “Eng thil nge i ngaihtuah a? Hna mi thawhtir thei lo.” a ti deuh hmuk a. John-a chuan, “Shirley-i hian Multiple Personality Disorder chu a neih i ring tak tak amaw?” a ti chhuak hlawl,!



Sawmi chuan ka hau-in a lo en a, a chil lem khawlhin, “Enga ti maw?” a’n ti haw a. John-a chuan a hma aia thu tak fe hian, “A tider nia hriatna ka nei. A nih loh vek pawhin eng emaw humhim a duh avangin emaw hlauh a neih avangin he tianga awm hi a nih i ring em? Thil zawn a neiin ka hria a ni,” a tih chuan Sawmi chu a hrilhhai hle a, a lu thak lo pui chu a’n hiat leh thin a, sawi tur alawi pawh a nei lo.



Sawmi a ngawih tak daih avang chuan John-a chuan a recorder te chu a ngaihthla leh vang vang a, a changin a hmet leh keuh a, a bul atang chuan a ti nawn leh thin.



Chutih lai chuan Sawmi chuan, “Ti tawp lawk teh,” a rawn ti chhuak a, pen leh lehkhapuan chu la sawk sawkin, “Han ti nawn leh teh,” a tih chuan John-a chuan ngawi rengin a thil record chu a play leh a.



Sawmi chuan lehkhapuana ziak thla mawlh mawlh pah chuan, “Pakhat, paruk, pahnih, pahnih, bial, a zawi lutuk ka hre thei lo, kha ai khan a tihrin theih loh em ni?” a ti leh a.


John-a chuan, “A pawimawh i ring em ni?” tiin a’n zawt a, Sawmi chuan melh zeuh pahin, “Maithei,” tih chauhin a chhang thung.



An ngaihthlak chian a, an han tihnawn an han tih nawn takah chuan nambar pahnih chu an hriat belh thei ta a, a dang erawh chiar deuh nawk nawk leh John-a au thawm vel bak chu hriat tur a awm lo.



Sawmi chuan, “Phone numbar a ni thei ang em?” tiin John-a chu a’n en ang he haw a. “Chutiang a nih chuan digit thum kan hmaih tihna a ni. Mobile number ni ta se, code number sawi awm tak a ni si a.” John-a’n a tih chuan, “A nih loh vek pawhin eng emaw chhinchhiahna a ni thei i tihna a ni maw?” Sawmi chuan a lo ti var a.



John-a chuan, “Shirley-i hian eng emaw hrilh min tum a ni. Chu thuruk chu kan zawn chhuah ngei a ngai,” tiin Sawmi chu a’n en a, Sawmi chuan a thu sawi awmzia chu a man rang kher mai, “A chanchin hriat belh ka lo tum ang,” a ti ve khauh a.



Chumi zanah chuan Shirley-i chu zan laiah a harh hlawl mai, a pindanah chuan tu emaw pen thawm chu a hria a, current a awm lo nge pindan chu a thim mup mai leh nghal a. Shirley-i chuan, “Doctor, nangmah i ni em?” tiin a khum atang chuan a thu chhuak them them a.




Chutih lai tak chuan pindan chhung ami chu a bulah a lo ding reng tawh chu niin vawi leh khatah a nghawngah chuan a rek a, Shirley-i chu tal vak vakin, Dr John-a’n a buai thut changa hmeh tur a hrilh chu a hre chhuak zawk a, a theihna zawng zawng sawm khawmin a khum lu a plug chu vawi thum a’n beng a, alarm chu a ri chuar chuar a, chu veleh Shirley-i beitu chu pindan atang chuan a tlan chhuah nghal vat bawk.



John-a chu Shirley-i pindan lam pan chuan a tlan phei nghal thuai a, nurse pakhat chu chhuat laiah a lo let reng a, John-a chuan a mar a’n det vat a, a lo thi fel der tawh.



Shirley-i pindan inhawng a hmuh rual rual chuan pindanah chuan a tlan lut a, eng pawh a lo awm ve chiah bawk. Shirley-i chu a lo mu hlawm tel a, a khur nasa hle bawk.




John-a chuan, “Shirley, i tha em? Harh teh, harh rawh,” tiin Shirley-i chu a pawm kang a, khumah chuan a mut a. Shirley-i chu a meng diar diar a, a la khur hlat hlat thung,a nghawng te chu a duk kual ruih mai. Sawmi leh police-ho pawh an lo thleng thuai a. Shirley-i pawh chu police venhimna hnuaiah a awm ta a ni.



John-a chuan Sawmi chu koh hrangin, “Shirley-i’n thuruk min hrilh a tum chungchang kha nang leh kei tih lohvin hria an awm tihna a ni. Tu nge i hrilh?” tiin a’n zawt a.



Sawmi chuan commissioner leh ukil Muanate’n a hriat thu a sawi chuan John-a chu a sa phat mai. “Naktukah Shirley-i awmna hi ka sawn dawn,” John-a chuan a ti ram hmak.



Sawmi chuan, “Chu chu a theih loh tih i hria, police hnuaia awm a ni tih i hriat kha,” a tih chuan John-a chuan, “Chuvang chuan i puihna ka mamawh reng a ni. Police emaw dan hre mi kan ni lo. Damlo puihtu kan nih kha, ‘Shirley-i hian kan puihna a mamawh’ chu thu chu ka hnena i sawi kha a ni,” a tih chuan Sawmi tan paw’n puih loh chi ziazang a ni lo.



An pahnih chuan ruahmanna siamin Shirley awmna chu sawn an tum ta a ni..



A tukah chuan John-a thianpa farm-a inah chuan Shirley-i chu a ruka sawn a ni ta a ni.


John-a chuan Sawmi hnenah chuan Shirley-i chanchin a hriat zawng zawng chu a bul atanga hrilh vek turin a ti a.




Sawmi chuan, “Ka hre tam bik vak lo. Kum hnih liam ta khan a nu leh pa leh a naute pahnih thattua puhin man a ni. Police-te sawi dan chuan an thenawm pa pu Lalringa chu tual thahna hmun theng hmasa ber a ni. Zing lam dar li leh dar nga bawr velah an thenawmte in atang chuan hmeiche na tuarrum ri leh tap thawm a hriat avangin a ngaih tha lo chuan a va ngaihven a.



An thenawmte in a thlen chuan chhung lamah a in kalh tlat a, tap thawm pawh chu a reh zui a, kal sawn leh mai a tum lai chuan an tukverh inhawng a hmuh takah chuan thil fel lo awma a rin avangin tukverh atang chuan in chhung chu a’n bih dek dek a, a thim deuh em avangin a hmu chiang thei lo na a thil dik lo chu a awm ngeiin a hria. Tichuan police punin Shirley-i te inah chuan zing dar ruk velah an lut ta chauh a ni.




Chuta an thil hmuh chu a rapthlak tak zet. Thutkhawmna pindan chhuat laiah chuan thisen a lo luang ngei nguai a. Hmeichhe naupang kum sawm bawr vel tur hi chuata chuan a a mu hlawm reng a, a kawr te chu thisein a bual khat vek tawh a ni.



Shirley-i chuan a mal chungah mutin a kuta thisen kai hnuang chuan a sam a lo chul heuh heuh a, a kut ding lamah chuan chemte thisen kai nuai chu a la hum ran bawk.




A pa chu an khumah hmuh a ni a, a hrawk hrui zai chah a ni. A nu ve thung chu an pindan kawngkhar bulah a bawk khup zawngin a lo mu a, a dulah vawi thum vih a ni bawk. A chhangtu chiah chu a khumah hmuh a ni ve thung a, a awma vih a ni. Police-te chuan Shirley-i pindanah chuan tranquilizer mum eng emaw zat an hmu bawk a, an han chhui chian chuan rilru buai enkawl lai a ni.



A report chu i chhiar tawh ang kha a ni mai. Tichuan, rilru buai avangin a chhungte chu a that ngei a nih an ring a, helai hmunah hian dah a ni,” tiin a’n hrilh a.



John-a chuan, “Mahse, kha report-ah kha chuan a hming kha Lalnunhlui tia ziah a nih mai bakah tuna taka a case ngaihven thar a nih leh nachhan hi eng nge ni? Tin, ukil Muana leh commissioner te, he case chung chang i hriat zawng zawng pawh ka hre duh bawk,” a’n ti leh hram a.




Sawmi chuan, “A hming tak chu Lalnunhlui a ni alawm. Amah hian Shirley-i niin a inhre tlat a. He lai hmuna ka hmuh hmasak ber ni kha ka la hre reng mai, a inthlahrung em em a, a hming takngial pawh a hre lo a ni. Biak pawhin mi a chhang ngai lo va, eng mah a sawi duh lo. Thla nga dawn kan enkawl hnu chuan Shirley-i a nih thu a sawi, chuta tang chuan a mize danglam thin chu ka hmu thiam ve chiah a ni.




Shirley-i a lo chhuah chang chuan titipui pawh a nuam viau a, thil eng eng emaw a sawi ve fo mai. A nelawm reuh phian asin,” tiin John-a chu a va melh a, a thu sawi chu chhun zawmin, “Mahse, thil mak deuh mai chu ukil Muana hi court lehkha nen lo kalin a ukil a nih thu a rawn sawi a, Shirley-i a hmuh theih nan hun siamsak turin min ti bawk.



Shirley-i’n ukil Muana a hmuh atang chuan a natna chu a zual emaw tih tur khawpin a zia a inthlak ngun a ni.



Shirley-i lo zawk Hlutei a lo chhuah chuan lehkhabu a lam chamchi a, a dawhkan bulah nileng zan khuain hun a hmang a, a damdawi pawhin hna a thawk mawh viau thin a ni.



Tin, a ze dang leh pakhat chu a thin chhiain a hlauhawm hle a, tharum a ngah em em mai leh nghal a, eng mah pawisak a nei lo,” a tih chuan John-a chuan a thu sawi lo pawt chatin, “A nih chuan lehkhabu zawng zawng kha inpe tihna em ni?” tiin a zawt a.




Sawmi chuan nui deuh sung pah chuan, “Ni lo ve, a ukil hian kartin a lo kensak ziah thin alawm,” a ti hman chauh a, “Lehkhabu ka en khan phek hmasa ber zelah khan Hz Sailo tih a inziak zel a, a chhungte pek a ni thei ang em?” tiin John-a chuan a’n zawt leh a,



Sawmi chuan, “Ka sawi lo ngaithla ve phawt la maw le, min tibuai zel a nih kha.” tiin an kiai deuh suk a, sawi zawm lehin, “Chu tak chu lawm mak chu Lalnunhlui chhungte leh ama chanchin pawh hriat tur eng mah a awm lo hi a ni. A chhungte ruang hlawm tur pawhin tu mah an lang lo tih an sawi ka hria. Bunghmunah a pi leh pu (pa nu leh pa) chu an cheng niin an sawi a, police-te an va kal chuan an thihna kum ruk dawn a liam tawh tih an va hre ta a, an laichin hla deuh tawh pakhat chuan an ruang chu a hlawm ta a ni awm e.



Zan khat chu Shirley-i (Lalnunhlui) chu a khuasik vak mai a, chutah chuan nat chhawknain ka jection a, a muthilh hnu chuan puan ka sin thattirna lamah a puma inzai na hnuhma awm chu ka zuk hmu a, ka’n en chian chuan inzaipui a tawk ngei tawh a nih hmel a ni.




Chu thu chu police lamah ka hriattir a, a medical record ka dil bawk a, mahse, chutiang inzai a tawhna eng mah hmuh tur a awm lo. Tichuan, Lalnunhlui chu medical examination neih thattir turin ka ti ta a. Chuta kan thil hriat chhuah chu a kal pakhat a kim lo tih hi a ni. Tichuan commissioner beng thlengin he thil hi kan kal chhohpui ta a ni ber mai.” a ti dap dap a.




John-a chuan tukverh lam chu thlir vang vangin a rilru a kal thui hmel kher mai...



Chutia a ngawih deuh tak vang vang hnu chuan Dr.Sawmi chu enin,,"Shirley chhungte chu kan zawn chhuah angai dawn a nih chu" a ti thawp salh a.Sawmi chuan phawk hra hian,"engtin nge kan.." a tih leh mek laiin,,"kan thei ang,,min puih theitu tur ka hria alawm" tih leh a thutna atanga thawh rualin room chu a chhuahsan nghal a.



Sawmi chuan zawhna ngah tak leh hrilhhai hmel tak hian a en liam zui vawng vawng..




Karhnih aliam leh hnu chuan Dr.Johna leh Police officer pakhat chu Sawmi te nen room pakhatah thil sawiin an awm ho va,,Dr.Sawmi chuan beidawn hmel zet hian,,"chuan,,kan innghahna chu engmah lo mai a ni tihna em ni" a ti hra a,



"thildang engmah kan hriatbelh thei lo a ni,,a pawi khawp mai" police officer in a tih chuan,Johna chuan thawk la halhin,,"a lawmawm lutuk e,,min puihna avangin" tiin police officer nen chuan an inthlah a..



Police officer a chhuah hnu chuan,,"heng thil hi a hriat i ring em?" Johna en pah chuan Sawmi chuan a ti a,,"kan la hria ang chu,," tiin John-a chuan a rilruah thil eng emaw awm tih hriat tak hian a chhang a...



Shirley room an luh chuan Shirley chu lehkhabu chhiarin a khumah a lo thu a,a hmel leh awm dan chu a pangai hle bawk,,a room a lo lut te pawh chu hre lovin a thil chhiarah chuan a rilru a pe hle tih a hriat..



Dr.John-a chuan a aw thian kharhin Shirley chuan arawn melh zawk a,,chutah inthiam loh hmel taka nui tawi tatin,,"ee,,doctor,,nangmahni e law" a ti zawi sap a,,Sawmi chuan,,"i lo tha em?vawiin lam te?" tihin nelawm tak hian a zawt a.



"mm...hei,,lehkhabu ka lo chhiar a" Shirley chuan pangai taka chhangin,,a bula ding doctor pahnih te chu a entawn chhen mai,,an hmelah chuan eng emaw a awm tih hrethiamin a rilru chu anuam lo rilru hle bawk..



Sawmi chu a bulah ava thu a,,an thusawi tur ngaichang tak hian Shirley chuan alo en ve ran bawk,,"enteh Shirley,,thil sawipui tur che kan nei a" tiin Dr.John-a chu ava melh leh zawk a,chutah sawi chhunzawm lehin,,"i chhungte awmna i hria em?" tihin a han zawt kual te te a..



Shirley chu ngawi vang vangin a hmelah chuan eng danglamna mah alang lo bawk,,,"Shirley" tia Dr.Sawmi'n a kut a va chelh sak chuan phu deuh zawk ang mai hian a che hrut a,,"aaihhh,,,,chhungte ka nei lo" tih chauhin a chhang..



John-a chuan uluk takin a che zia chu alo thlir ve reng bawk,,


Dr.Sawmi chuan awki nem tak hian,,"Shirley,,,he thu ka sawi ngai hi a pawi ka ti,,mahse i chhungte chu thla thum liam ta khan an thi tawh a ni" Shirley en reng chung chuan a ti ta a..



Shirley chuan mak ti hmel emaw hreawm ti hmel pawh a pu lo,,Sawmi chu mitkhap lek lo va enin a ngawi reng ringawt...


Dr.Sawmi'n,," i tha em?" a tih chuan Shirley chu ngawi renga tho chhuakin,,doctor te pahnih hnungchhawn zawng chuan a ding ta reng a,,Sawmi in John-a chu va mitmei zauhvin John-a chuan Shirley va kal hnaih pah hian,,"Shirley,,," tiin a dar ava chelh a.


Shirley chu zawi muanga rawn inherin chuta a hmel chu a hma lawka ngainatawm leh nelawm tak hmel kha a ni tawh lo,,a mit chu a sen vek a,a en ngai enin a ngur deuh chher chher bawk..


Dr.John-a chuan a awm dan chu lo hrethiam vatin,,"Shirley,,,i sual let thei a nia,,inhneh tir suh" tiin a dara chelh pah chuan alo fuih ve sauh sauh a,,mahse Shirley chuan a ngai pawimawh loh hmel kher mai,,John-a chu enin a nuih chiam ringawt..


Sawmi chu rawn inrawlh ve vatin,,"Shirley,,,hahdam takin aw,,,engkim a tha vek mai ang" pangai tak hian a lo ti ve a,,,chutah Shirley chu a nuih a za zual sauh emaw tih mai turin a nui leh ta vak vak mai..




End of chapter 3

Link:
BBcode:
HTML:
Hide post links
Show post links

lyno v
Posts: 83
Joined: February 15th, 2022, 5:32 pm

Unread post by lyno v » September 1st, 2022, 10:22 pm

Chapter 4







Mahse anni pahnih mitam tak leh mi chi hrang hrang lo enkawl tawh tan chuan Shirley awm dan chu hlauh ai mahin an khawngaih letling zawk a,,he a buaina leh natna ata hi chhanchhuah ngei pawh an tum ruh hle a ni..



"Shirley,,,,Shirley,,,,,,,engkim a tha vek,,,,a tawpah eng nge thleng dawn tuman an hre lo" tiin Shirley chuan tu nge a biak pawh hriat lohvin ring lutuk si lo hian a tawng nuah nuah a,,



"kei leh nang chiah kan ni,,tumahin an chhan thei dawn lo che" a tih leh mek lai chuan John-a chuan mutna damdawia chiu hi alo tum ve mek a,chu chu alo hmu fuh leh ta hlauh mai,,



thinrim mengsen ram a John-a chu melhin,,ava zuan thut a,,John-a alo inring hman si lo chu chhuatah an pahnih chuan an inbawhbet ta reng mai,,Shirley chu chiar pah nawk nawkin eng nge a sawi tih erawh hriat theih a ni lo..



Rang takin Sawmi chuan midang a au nghal thuai a,,mipa pahnih lo lutin Shirley chu an hnuk sawn vat a,,tha a ngahin a chak bawk nen an pahnih pawh chuan duh angin an chelh hneh lo a chha chu a ni..



Sawmi chuan chhuata la mu reng John-a chu va buaipui vatin vanneihthlak takin John-a chuan hliam engmah a nei lo hlauh ve,,a hmai vun thenkhat lai erawh Shirley-i'n a hamnaah a pilh ve deuh tih loh chu hliam em em a nei lo..



Shirley chu a khumah mut tirin mi pahnih chuan an chelhbet a,,anchhe tinreng lawhin a chang leh a chil a chhak bawk a,,a mita mittui tling kar leh mit sen ram chung chuan a nui leh ang chiam a,,a awm dan chu a mumal tawh lo tak zet a ni..



Sawmi chuan hmanhmawh takin a jection nghal a,,reiloteah Shirley pawh chu a zawi tial tial a,mitthi ang maiin a mu zawi leh ta der mai..



Room chhunga awm ho chu an thaw huai a,,"boruak ava sang duh pap pap ve" nui suk chung hian John-a chuan a ti a,Sawmi chuan nui khi thraw hian,,"a mipa zawk a hnuaiah i tang tun a" tihin alo fiam let ve zauh chu nui ring ngam si lo hian an nui tet tet ringawt...



An chhuah pah chuan dawhkan a lehkhabu pakhat chu John-a chuan a la a,,Sawmi chuan zawhna mitmeng taka enin,mahse John-a chuan engmah sawi lovin a nui khi suk ringawt,,,hahthlak tih hmel zet a thaw hakin kawngka chu an khara pawn lam atang an kalh leh thlap bawk...



A tuk chawhnu herah chuan Shirley chu a khumah thuin tukverh lam chu alo thlir dauh dauh a,,a lan danah chuan a pangai leh viau tawh tih a hriat...



Kawngka chu hawngin Shirley chu arawn hawi zawk a,,"i mu tha em?" John-a'n a tih chuan pangai taka chhangin,,"um,,mumang nuam deuh ka mang a" zangkhai tak hian alo ti a,,tukverh lam chu a thlir leh reng tawh..




John-a chu a hma zawna chair ah chuan thuin,,"eng nge i mumangah chuan i hmuh a,,a nuam hle aniang maw,,i hmelah alang vek alawm" nelawm tak hian a ti a,,Shirley chu tukverh lam la thlir reng chungin a kiai suk a,,a biangsum khuar kak mai chu a lang chiang kher mai..




nui ver ver chung hian,,"Dr.Sawmi te nen hian hmun nuam deuhah kan lo kal a,,unicorn te ka lo hmu asin" phur hmel zet hian a ti a,,John-a chuan Shirley chu en rengin a thusawi te chu a ngaihthlaksak a..



Shirley chu a tawng zawngin a nui leh thin a,a duhawm ngawt mai,,chutia a hlim hmel chu Dr.John-a chuan hmuhnawm ti tak hian a thlir reng a..Thil dang dangte sawiin an titi dun mial mial a..



Chutia biak anawm hunlai tak chu ni John-a chuan a chan ve reng ni..Nakin deuhah chuan a thusawi tum berah a lut tan dawn tih hriat tak hian a aw chu a'n thian kharh a..




John-a chuan, “Shirley, he lehkhabu hi i chhiar tawh em?” tiin lehkhabu kawm sen hi a rawn lek chhuak a, Shirley-i chuan a hmuh ngai loh thuin a chhang.




“I thil sawi zawng zawng kha he lehkhabu ami hi a ni. Chu chu nangma ziah a ni. Hlutei chungah khan eng thil nge thleng zel min han hrilh teh,” tiin Shirley-i chu a en reng a. Shirley-i chuan Dr John-a chuan a ti mai mai lo a ni tih chu a hria. Mahse, a la hlauthawng em a ni.




John-a chuan a aia awki hniam zawkin, “Shirley, tu nge i nih? Hlutei i ni em?” tia a zawh chuan Shirley-i mit atang mittui chu arawn luangthla ngiai ngiai a. Shirley-i chuan a hmai chu a’n khawih a, “Doctor, tui a lo luang a nia,” tiin John-a hnenah chuan a mittui chu a hmuh a.




John-a chuan Shirley-i chu kuahin, “Tap rawh, insum reng reng suh,” tiin a kawngah chuan a’n beng thek thek a, Shirley-i chu a tap chhuak hawm hawm mai.Chumi hnu chuan Shirley-i chu a pangngai leh zual a.




A tukah chuan John-a hnenah chuan eng kim sawi a inpeih thu a sawi chhuak ta a. John-a chuan a thu sawi zawng zawng chu a record zel a, eng kim mai chu hmaih nei hauh lova hriat chhuah a tum a ni.




Shirley-i chuan a thawnthu sawi chu sawi chhunzawm lehin, “Hruaia’n a duh tawk a ngah hnu chuan Hlutei chu a in luahah chuan a hruai haw a. A chunga thil thleng chu a sawi chhuak a nih vaih chuan thahah a vau nghal a ni. Chumi hnu chuan Hlutei chuan rilru pangngai a pu thei reng reng lo. A nu leh pa te bulah takngial pawh a zia a zawiin a hlauthawng em em reng a ni.



Tuk khat chu a pindan atang a rawn chhuah theih loh avangin a nu ngaih tha lo chuan a va ngaihven a, Hlutei chu a pindana ceiling fan-ah chuan a lo inkhai reng hi a lo ni. A nu’n a hmuh rual rual chuan a te chul a, a inkhaina puan chu a zai nghal sawk sawk a, chumi tum chuan damdawi in panpui vat niin a nunna an chhan hman ta hram ni.




Damdawi ina a awm lai chuan ni khat chu hmeichhe pakhat thi lek lek hi an rawn dah lut a, thawkna dawt hmanga thawk tir hram hram a ni a, kal thlak ngai a ni a, a chhungte zingah pe thei an awm loh avangin donor an hmuh loh chuan a thih hun nghah bak tih theih an nei lo a ni.




Chu nu an nawr luh lai chu Hlutei chuan a hmu ve a, mak a ti hle mai. A enkawltu doctor chu zuiin a office-ah chuan a va lut ve rawih a, doctor-in a lo hmuh chuan a meng phawk nasa ngei mai, “Eng tin nge nang, i mu reng a ni lo’m ni?” a tih bah nawk nawk.




Hlutei chuan, “Ka pu, amah ka ni lo. Hlutei ka ni,” tiin doctor chu a hrilh fiah a. Doctor chuan a file chu a’n keu nghal sawk sawk a, “Laizawn in ni em?” a ti nghal. Hlutei chuan unau an nih loh thu leh a vawi khat hmuhna a nih thu a sawi chuan doctor pawh chuan mak a tih ve hle mai.Chu chu Hlutei’n Shirley-i a hmuhna hmasa ber chu a ni,” tiin Shirley-i chuan a sawi a.



John-a chuan, “Eng thil nge thleng zel min han hrilh teh, Shirley” tiin Shirley-i chu an tur leh a, Shirley-i chuan a thil sawi chu Johna’n a ring tak tak a ni tih hriat chuan a lawm em em a.




Thawnthu chu a sawi leh ta a, “Hlutei chuan a kal chu Shirley-i chu a pe ta a. An harh chhuah hnu pawh chuan Shirley-i leh Hlutei chu an inngaina ta phian a, an pian leh hmel an inan em avangin nurse leh doctor a enkawltute chu sawi loh an nu leh pate ve ve pawhin an hre hrang lo hial a ni,” tiin John-a’n diary sen a lo ken chu a dil a,




a kawm tuamna chu tichhiain thlalak pakhat hi a phawrh a, John-a hnena pek pah chuan, “Hei hi Shirley-i leh Hlutei chu an nih hi,” tiin a nui seih a. John-a’n thlalak a’n en chuan hmeichhe pahnih hi inzaina kawr hain an inkuah rial a, atu zawk chu nge Shirley-i tih chu hriat har tak a ni.



Shirley-i chuan a thu sawi chu chhunzawm lehin, “Hlutei pawh chuan a nun pangngai chu hmang lehin college pawh chu a kal leh a. Mahse, tunhma ang kha chu a ni lo. Amah chauha awm te chu a la hlau reng a ni. Hlutei chu Hruaia chuan a video a lo siamsak leh zel hi a ni a, chumi chu vau nan hmangin a la tibuai chhunzawm zel bawk nen Hlutei chu nun nuamin a awm thei lo.



Nikhat chu a chunga thil thleng zawng zawng chu Shirley-i chu a hrilh ta a. Chumi hnu kar khat a liam hnu chuan Shirley-i chu Hlutei te inluahah chuan a kal a, Hlutei chu amah chauhin a lo awm a, a nau college kal chu a lo la haw lo va. Shirley-i chuan, “Finfiahna chu kan nei vek tawh, FIR kan theh lut dawn nia. Eng mah hlauh tur a awm tawh lovang,” tiin Hlutei kuta vuan chung chuan a ti a.



Chutih lai chuan kawngkhar chu tu emaw hian a chum ri bur bur mai, Shirley-i chuan Hlutei chu khum hnuaiah a nawr lut vat a, kawngkhar a'n hawn chuan Shirley-i chu hnunglamah pen hnih vel a tawlh hla dawr a , Hlutei hlau lutuk chu khumhnuai atang chuan ngawi rengin a khur ru der der, chet pawh a che ngam lo.




Shirley-i chu chhuatah chuan a bawkkhup zawngin a tlu thlawk a, chhuatah chuan thisen chu a dir nghal zur zur. Shirley-i chuan a lu thing ner nerin, “Shiii...one, six, two, two thousand sixteen book of the year,” hmui phun chuan a ti sep a. Chu pa chuan chhuata thisen kai chu hru faiin Shirley-i chu a hruai bo ta a ni.” a ti chuai raih a.



John-a chuan, “A nih chuan Hlutei i ni tihna em ni?” tiin a’n zawt leh a, Shirley-i chuan a lu bu zeuhvin, “A dik, Shirley-i ni lovin Hlutei ka ni. Ka dawi zep avangin Shirley-i chhungte leh ka chhungte khan an nun an chan phah a ni,” tiin a mittui chu a hru fep fep a.



John-a chuan, “Book of the year chu eng vanga sawi lang kher nge a nih i rin?” tihin a ngaihdan chu a zawt a. Hlutei chuan, “Chu chu finfiahna a dahna a nih ka ring,” a tih chuan John-a chuan a thil tih chu kawng dik a nih ngei a beisei a,finfiahna pawh chu hmuh ngei a tum ruh hle bawk.




John-a chuan a chhungte chunga thil thleng chu a’n zawt leh a, “Shirley-i thah a nih zan chuan ka pa phone in ka tap chiam a. A tukah chuan ka nau chu kan khaw lam panin ka hawpui nghal a, ka nau pawh chuan eng thil mah sawi lovin mi zui ve mai a. In kan thlen chuan ka nu leh pate chu thil thlen dan chu ka hrilh vek a, ka pa chu Aizawla kal nghalin FIR a thehlut ta a ni.





Ka pa chu Aizawl atang chuan rawn let lehin ni hnih hnuah a rualin Aizawlah chuan ka kalve tur thu min hrilh a, chumi zan chuan muthilhna damdawi ka ei avangin ka lo mutui deuh a ni ang zinglamah chuan tukverh ri rek leh ka nau te chuan mi tiharh a, current a awm lo nge pawn lam chu a thim mup a, ka nu te pindan kawngkhar chu a inhawng reng tih ka hmuh chuan ka pan ding nghal a, thutkhawmna pindan ka kal tlang dawn lai chuan ka keah hian tu emawin a rawn vuan a, ka te thawt nghe nghe.




Ka nau (kan naupang ber) Thapuii a lo ni a, thisen nen a lo let reng a, a dulah chuan chemte a la bur reng bawk. Ka nu leh pa chu ka koh lawm lawm a, chhanna reng a awm lo. Ka nau lu chu dawmin ka malah chuan ka nghat a, Thapuii chuan thei leh thei lovin, ‘A u a na lutuk ka pum a mi hi min phawisak teh,’ tiin min hrilh ru sep a, a dula chemte chu ka phawi a. Thapuii chu a nui seih a, a thaw hrawk hrawk a, a chatthla zui ta a ni,” chu zawng chu ka hriat chu a ni" a ti a.




A sawi zawh chuan a mittui chu a hru mial mial a,,John-a chuan Hlutei thu sawi zawng zawng chu a dik reng em tih fiah tumin amah ngei chuan thu dik chu a zawng ta a ni..




A tuk zing dar 10 velah chuan John-a chu a motor a rawn kalin Sawmi chu thutkhawmnaah a lo awm a,,"ti nge,,i va rawn let hma ve,kalkawngah min hrechhuak thut em ni?" tiin dawhkana file vel lo seng tha mawlh mawlh pah chuan a lo ti a.




John-a chu a hrilhhai ang reng viau mai,,hriatthiam loh hmel tak hian,,"eng nge i thusawi awmzia,,ka rawn thleng ve chiah alawm" a ti hu mai!




a thil seng fel lai chu tawp chatin John-a chu a en a,,"nichin lawkah Shirley hruai turin midang ilo tirh kha,," a tih chuan John-a hmelah chuan ngaihthat lohna alo lang nghal a,chu chu Sawmi pawh chuan alo hrethiam ve vat bawk..



"Lalpa leh!!!" Sawmi chuan a ti chhuak sap a,,engmah sawi angai tawh lo,,rang takin an pahnih chuan pawnah tlanchhuakin John-a motor ah chuan an inphur chhuak ve nghal a..



Kalkawnga an tlan pah chuan,,"engati nge ka rawn call che a i pick theih loh,,nangma rawn tirh emaw ka ti alawm" Sawmi chuan inthiam lo tak si rilru mangan hmel zet hian a ti chuar chuar a,




"bag chhungah ka phone ka dah a,seat hnungah ka dah daih alawm" John-a chuan a ti chhuak hawk,,tihngaihna hriat loh hmel tak hian Sawmi chuan a en a a chek tlak tlak ringawt,,an hmelah chuan an rilru a hah hle tih a hriat...




"tute nge an nih i rin?Khaw nge an kalpui ang?" Sawmi chuan arawn ti chhuak phawng a,,John-a chu a rilru a kal thui hle tih hriat takin a hmalam en run run chung chuan a ngawi vang vang a,,



nakin deuhah chuan,,"Hruaia,,kha Doctor tenawm zet Hruaia lo kha chu a ni lovang" a ti nghet charh..




"Mahse engtin,,,engtin nge hetah Shirley a awm tih an hriat,,ni lo,,,Hlutei zawk" tiin amah leh amah chu a inhnial bah nak a,,,thinrim ha sehchilh nawk hian,,"kha Commissioner kha apa alawm,,engtin nge a hriat lohvang,,ka hmuh hunah an pafa khan an na khawp ang" a ti ram leh hmak..




Sawmi chuan thil hriatchhuah nei ang maiin,,a thaw hak a,,"engtin nge rinhlehna chang ka lo hriat loh le,,,Shirley chungchang kha a ngaihven ka ti thin reng a,,,a mak alawm,,khatiang em em a angaihsak kha" tiin ngaihtuah zui niawm tak hian a ngawi leh vang vang a...




A motor chu ti ding thutin Sawmi chu a phu chiang kher mai,,John-a chuan Sawmi enin,,"chuan,,engkim i hrilh tihna em ni?" a tih chuan,,Sawmi hmelah chuan inthiam lohna alo lang nghal a,,John-a chu beidawn hmel tak hian a thaw hawk,,




"a pawi ka ti,,,hetiang a thleng dawn tih ka lo hre lo a ni,,min puih a duh thu leh Shirley himna tur zawk anih ka rin vang ania,,,ka lo mawl ngawt mai,,,keima vang vekin engkim a pawi zo dawn ta a nih hi" inthiam lo tak hian a ti a,,a mitah mittui a tling khat hnur bawk..




"i thiam loh a ni lo,,lo hrilh hma che ila a tha tur,,,a pawi tak tak hmain hun kan la nei ang" tiin a motor chu a start a,,an tlanchhuak leh nghal zat..




Hlutei chu motor atanga chhuakin in pakhatah hian an luhpui a,,amah hruaitute chuan engmah an sawi loh avang leh a zawhna te engmah an chhan loh avang chuan a ngaih chu a tha hleithei tawh lo..




In chhung an luh pawh chuan ngaihtha lo tak leh hlauhthawng tak hian a hawi kual hrek hrek a,,Dr.Sawmi emaw John-a hmel reng reng a hmuh tak lovah chuan a hlauhthawnna chu zual sauhvin a chhungril chu a khur ru der der mai...




"Khaw nge ka doctor te chu an awm?" beisei hmel tak hian a bula dingte chu a han zawt leh a,mahse a beiseina neihte chu an tham ral tial tial tih a hmel dang lawp lawp atang chuan a hriat..




Pindan kawngka pakhat chu lo inhawngin chuta tang chuan mi pakhat hi alo chhuak a,,Hlutei'n chu pa hmel a hmuh rual chuan a hnunglamah a kat nawk mai,,'a ni thei lo,,,ani hi' a rilrua ti mawlh mawlh pahin a pen hnung hret hret a..




A hmaa mipa ding chu en rengin a mit chu a khap hlek lo,,chu pa chu rawn tawngin,,"ilo tha maw,,,bawihi?" kiai suk hian a ti a,,Hlutei chu a hlauthawngin a mangan tawh tak zet...




Inher thutin tlanchhuah leh mai a han tum a mahse a tha a khur nasat avangin a che bah nuai mai,,chhuatah chuan a tlu sawp nawk lehnghal a,,chu veleh Dr.Hruaia chuan rawn thutchilhin Hlutei samah chuan lainatna leh dimna tel hauh lovin a phit dak awr mai..




"kha chen kha min bum ilo tum a,,min bum theih hi i ring em ni,,police min mantir i tum maw,?,," Hlutei bianga a hmui va nul thuak thuak pah hian a ti chang run a,,Hlutei hlau lutuk chu a mita mittui tling khat vekin a khur ru der der mai..



Chutah na zetin Hlutei sam a thamna chu a thlah vak a,,tho chhuakin a thuihhruaite chu kutzaizira hrilhin Hlutei chu an kai tho ve nghal a,,han tal a tang turin tha reng a nei tawh lo,,a hlauhna avang chuan a chakna zawng zawngte chu an bo vek tawh a ni,,



A mitthlaah a hun liam tawha a thil tawn te chu rawn langin a hlau hle a,,a khup khur dat dat chu thup tum eng ang mahse awmzia a nei lo hle,,a rilrua tawngtai bak lo chu tihtheih a nei tawh meuh lo...



"tha taka ka zawhna i chhan chuan i nunna ka zuahsak ang che" awki nem tak si,mahse zahngaihna a nei hauh dawn lo tih hriat tak hian Hruaia chuan arawn ti leh a,,Hlutei bulah lo kalin chiang takin a hmai bulah chatah chuan alo en a...




"min han hrilh teh,,khawiah nge evidence chu a awm?" a tih chuan Hlutei chuan rawn melh zawkin hnuailam chu a bih leh thuai a,,Hruaia hmel chuan a rapin a thlabar tawh hle tih a hmel dang bai atang chuan a hriat...




Hlutei'n a chhan mai loh avang chuan a thin rawn thawk leh thutin Hlutei lu chu na taka ama lam hawi tura kuai her lawpin,,thinrim tak hian,,"tha takin min hrilh dawn nge,,a hma aia rapthlak zawk kha ka thlentir leh dawn" thinrim insehchilh nawk hian a ti chuar a




"ka,,,ka,,,ka hre lo,,,engmah ka hre lo" a hlauh em avang chuan a tawng pawh a bah nuai mai,,"i hre lo a maw??Min hrilh dawn nge i doctor te pahnih kha ka that dawn?" ti leh hrawkin Hlutei chu a thutna atang chhuatah a paih thla hnawk mai..




Hlutei chuan a aw pawh a chhuah tha hleithei tawh lo,,a khabe chu sai hlawk hlawkin a kamsir atang chuan thi arawn luang ser ser a,,a hmai te chu a mittui leh thlantui avangin a huh hliam tawh bawk...




Chutah a sama rawn tham lehin,,"luhlul ila chhuah fo dawn em ni,,,tunah min hrilh rawh,,,dawhtheihna ka ngah vak lo tih i hriat kha" a tih leh chuan Hlutei chuan aw khur hlak hlak hian,,"leh,,,lehkhabuah,,,a awm" tih chauhvin a chhang...



"eng chu maw awm?" tiin a han zawt nawn leh a,,a sama a thamna pawh ala thlah chuang lo,,"evidence,,,,lehkhabuah a awm" bah niai hian a ti leh a...



Hruaia chu kiai sukin,,"i ti tha e,,,heta ka lo kir leh hma chu hahdam takin lo awm rawh,,,lawmtur kan nei a nia" tenawm zeta tiin Hlutei hmai chu a hmaiin a nul thuak thuak a,,



"ka lo let hunah kan chhunzawm ang" ti thawp salhin a kutzungpui chuan Hlutei hmui chu a nul a,,chutah na taka fawpin Hlutei chu a tal nasa kher mai..




Nui vur vurin a tho chhuak a,,a bula pakhat ding hnenah chuan "lo veng ang che,,he in hi a chhuahsan tur a ni lo,a chungah engpawh thleng se a mawh i phur ang,,chu chu i hria em,,?" a ti vin thak,,,




chu pa chuan,,"aw le,,ka hria e" tiin a chhang a,,an chhuah hma chuan Hlutei chu en leh zawkin,,"kan lo let thuai ang,,evidence nen" tia mit siai zukin an chhuak ta a..



Hlutei chuan a chan chhiat zia hriain eng nge tihber tur a hre lo,,a beiseina neihchhun doctor te pahnih khan an rawn zawng hmu angem? Zawng hmu lo ta se a thi dawn nge a dam dawn,,a chan tur chu a ngaihtuah ngam lo zawk hial a ni..




Chutih mek lai chuan Dr.John-a leh Sawmi pawh chu an lo buai ve khawp mai,,John-a thian police officer te nen thawk hovin Hlutei zawn hna chu an thawk a,,an awmna tur ni a an rinna apiangah chuan an zawng zela mahse an la hmu fuh thei tlat lo..




John-a chu a beidawng lek lek tawh,,"Hlutei chu engtia an tih nge i rin,,ala dam i ring em?" beiseina nei chau rau tih hriat tak hian Sawmi chuan a ti a,a hmelah chuan Hlutei chu dama a hmuh a beisei tawh lo tih pawh a chiang reng mai..



"awlsam taka an thah mai ka ring lo,,Hlutei khan eng emaw hriat a nei a,,chu chu an thah lohna chhan tur chu a ni,,,lungngai suh,,kan hmu em em ang", tiin Sawmi chu a tawng thlamuan a,,John-a chu a rilru a hahin a ngaihtuahna pawh a hmang nasa leh tih a hriat..




Hlutei chungah chuan eng nge thleng ang tih leh,,chung mite chuan eng nge an duh ber tur ni a arin chu a ngaihtuah rauh rauh va,,thil hrechhuak thutin a motor chu a ti ding a,,"eng ngati nge? Dik lo a awm em ni?" phawk tak hian Sawmi chuan alo ti ve vat..




A motor chu herin a tlan let leh nghal a,,"finfiahna kha,,,kha thil kha kan zawn hmuh angai" ti nghutin, a hmel tak ngul avang chuan eng zawhna mah zawt tawh lovin Sawmi chu a ngawi reng a,,a rilruah erawh zawhna tam tak a awm thung...



John-a chuan finfiahna chu anlo lakkhalh a hlau hle a,,lo hmu hmasa zawk ta se Hlutei nunna chu hlauhthawnawmah a awm dawn tih hriain a rilru a hah kher mai..



Finfiahna tello chuan engti zawng mahin hremna an hmu thei dawn lo va,,a lo thlawnin Shirley leh Hlutei chhungte khan an nunna an chan dawn tihna a ni a,,Hlutei tawrhna leh an thawhrimna zawng zawng pawh engmah lo mai a ni dawn tihna a ni..





End of chapter 4

Link:
BBcode:
HTML:
Hide post links
Show post links

lyno v
Posts: 83
Joined: February 15th, 2022, 5:32 pm

Unread post by lyno v » September 11th, 2022, 9:52 pm

Chapter 5





Shirley an dahna in bul an thlen chuan a kawtah motor pahnih hi alo ding a,,in atanga lanphak lohnaah dingin police officer chu a call nghal vat a,,chulai hmuna lo kal tur chuan a hrilh a ni..



"Heti hian kan lo nghak reng dawn tihna em ni?Finfiahna chu lo hmu ta se engtin nge kan tih ang?" rilru hah hmel tak hian Sawmi chuan a ti a..



John-a chuan a steering chu la chelhin in chu a thlir vang vang a,,,a chhang tawh dawn lo emaw a tih hnu chuan,,"an hmu lovang,,,hmu pawh ni se eng nge a nih tih an hre lovang", a tih chuan Sawmi chu a bangbo hman viau mai..



"anih chuan,,,i hria tihna mi?", tihin Sawmi chuan hriatchian chak tak hian a han zawt leh a,,John-a chuan rawn enin Sawmi chuan a chhanna ngaichang tak hian alo en ve kar bawk...


Chutah,,,"aih,,,hre lo" tih chauhvin a chhang ringawt..Sawmi chu thaw hakin,,"ti nge,,min ring vak tawh lo tihna em ni?" hnual aw tak hian a ti leh a,,



John-a chuan a hmalam chu en leh run run tawhin,,"tunah chuan keimah ngei pawh hi ka inring zo tawh lo" a tih chuan Sawmi hmelah chuan eng emaw hriat hleihtheih si loh hi a awm a,,chu chu John-a pawh chuan a mitsirin a lo hmu ve ran bawk..



Sawmi phone chu rawn riin a phone a en rual chuan a phone chu a khup vat a,,John-a chu va en leh zeuhvin,,a hmalam ala en reng tih a hmuh chuan,,"phone kan chhang lawk ang'e" tiin motor atang chuan a chhuak a..



Motor a arawn luh leh hnu rei vak lovah motor pahnih te pawh chu chulai hmun atang chuan an tlanchhuak ve nghal a,,an tlan liam hnuah John-a leh Sawmi chu in lamah an inkhalh ve nghal zat bawk...



In chhung an luh chuan an hma mi te khan zawn an nei tih hriat tak hian bungrua vel chu alo darh nuai a,,Sawmi'n a hmuh chuan a chek tlak tlak ringawt,,,



hmanhmawh takin Shirley room-ah John-a chu a lut nghal a,,room chhung pawh chu an lo chinglet hneh viau mai,,chhuata lehkhabu darh nuai zinga pakhat chu chharin a keu thuak thuak a,,Sawmi pawh chu room ah alo lut ve deuh chiah bawk..



"finfiahna chu ala awm em?" a lo ti nghal a,,John-a thil ken lai chu enin,,"kha kha em ni,,finfiahna chu" a tih leh chuan,,"ala awm anih hi", tiin Sawmi chu ava en a,,"hetah hian engkim chu a awm" John-a chuan a ti leh zat..



Sawmi chuan lehkhabu leh John-a chu enin a nui khi sak a,,"ka va lawm em,,tunah chuan a tawp kan thleng tep ta" a ti sap a,,John-a chu rawn tawng lehin,,"mahse heihi chu a chabi chauh a ni" a tih chuan,,Sawmi chuan hriatthiam loh hmel tak hian,,"kha kha finfiahna tak tak chu a ni lo i tihna maw?" a ti khauh mai..



a lu bu nghutin,,"umm,,,heihi chu finfiahna tak tak zawnhmuhna tur chauh a ni" a ti leh a,,"chuan,,,khawiah nge finfiahna chu a awm ang?Shirley nilo,,,Hlutei'n a hriat i ring em?" Sawmi chuan alo ti leh a...



John-a thusawi leh tur nghakhlel tak hian mitkhap lek lovin a en ran a,,chutah,,,"aiih,,,hre lovang,,hria chu ni se a sawi daih tawh ang,,,finfiahna awmna chu ka hre maithei a ni" tihin a chhang a..



Sawmi chuan a ka a ang zuau hman ang tihah John-a chu a kalsawn vut a,,lehkhabu keng chuan pawnah a chhuak nghal zat...



John-a'n a phone a dah fel vel chiah tihah Sawmi pawh chu in atang arawn chhuak ve chiah a,,"chuan,,tunah khawiah nge?" a tih chuan,,"an inah," tiin Sawmi chu a en a,,hrilhhai hmel tak hian a lo en haw ringawt...



"Shirley te inah kan kal ang" tia kiai sukin motor chhungah chuan a lut lehnghal a,,Sawmi chuan angaihna hriat loh hmel tak hian a en reng ringawt..




Darkar khat dawn an tlan hnu chuan Shirley te in chu an thleng a,,an in chu reitak luahtu awm tawh lo tih hriat tak hian pawn lamah te chuan hnim alo to nasa tawh a,,a fal ve deuh avangin han en reng reng pawh chuan chu in chu a hlui tawh hle a ni...



Tala a an kalhna chu chhu chhiain in chhungah chuan an lut a,,a chhung an luh chuan Sawmi chu a tim deuh ni hian a hmelah a hriat,,a ni lah taka Hlutei chhungte chunga thihna thleng ang tho khan chu inah pawh chuan thihna a thleng a,,mi pangai tan chuan han zam ve deuh chu a awm a ni...



John-a chuan room pakhat kawngkhar chu hawngin a chhung vel chu a bih thuak thuak a,,"heihi Shirley room anih i ring em?" a hnung ami en lem lo chuan a ti a,,mihring ke pen thawm niawm tak a hriat chuan hawilet vatin a thil hmuh avang chuan a meng deuh kawk mai..



Commissioner leh mipa pakhat chu lo ni rengin John-a chuan engtia heta lo awm ve nge an ni tih chu a hriatthiam loh hmel kher mai,,"min hmu chu mak i va tih hmel ve Doctor?" Commissioner chuan nui khi thaw pah hian lo ti a..


John-a chuan a hmel lan dan chu siamtha thuaiin pangai tak hian,,"hetah ka hmuh che u ka lo beisei lo em a ni" a ti a,,Sawmi chu va melh zeuhvin,,a hmel lan dan chu a pha dui ni mai hian a hria...



"ka mi chhawr hian a hna lo tur thleng thlengin thil a kalpui niin ka hria a,,chu chu ka lo enfiah a nih hi" la nui reng chung chuan a ti a,,John-a chuan a thusawi awmzia chu alo hrethiam chiang kher mai..



John-a chu nui khi sukin,,"ka hria alawm,,mahse nang ni lovin i fapa zawk kha a nia ka lo beisei chu" a tih chuan Sawmi chu a meng kawk kawk mai,,



Commissioner chu la nui huah huahin,,"ka rin aiin i lo fing daih mai,,,chuan khaw nge evidence chu a awm?" a ti nghal thawr a,,



John-a chu nui sun sunin,,"i hmanhmawh hle mai,,evidence chu hetah a awm lo,,,heihi chu ka game play mai mai a ni,,,tihpalh Sawmi" Sawmi va melh zeuh pah chuan a ti leh a,,,Sawmi chu a mengphar nasa tawh..



"ka hre vek alawm,,sum lama harsatna i neih vangin i clinic pawh i bansan a,rei vak lovah i hawn leh theihna chhan kha hepa hian sum tam tak a pe che ni lawm ni,,chuan Hlutei chanchin zawng zawng hepa hnenah hian report i va pe thin a,,Hlutei a ni tih inhriatchhuah velah hetiang hian in che ta a ni lawm ni,,,tlemin lo fimkhur deuh ni la a tha tur a nia,,phone a i biak leh i msg thawn lai te pawh kha ka hre lo emaw i tia mahse ka hre vek,,,chuan nangni in evidence in zawnga keipawn evidence tha tak ka neih theih nan hun ka insiam ve anih hi", tiin a sawi zawh rual chuan ngeiawm tak hian a nui khi leh suk a,,



Commissioner chu thinrimna avangin a hmai a sen tawn tawn mai,,Sawmi pawh a zah avangin inseh ruh teuhvin a kun tlawk tlawk ringawt,,thiamthu sawiin awmzia a nei dawn lo tih a hria pawh a ni mahna,chutia a ngawih chu atan a tha zawk a ni..



"a ropui hle mai,,mahse i thil plan chu a kal fuh tluantling dawn lo a nih hmel,," tiin Commissioner chuan a silai rawn lek chhuakin John-a chu a tin ta ur mai...




Lehlamah Ukil Muana chuan Johna hnen atanga a sms dawn chu bawh zuiin,Shirley an dahna inah chuan lehkhabu zawngin a lo buai ve mek bawk a,,a hmu mai si lo chu a beidawng lek lek tawh..



Shirley room ah chuan la tei vut vutin a thil zawn a hmu mai bawk si lo chu beidawng takin a tukhuma a kut suih chuan a han thaw kawk a,,chutah thil eng emaw tak hi a rap fuh ta hlauh mai..



Hnuailam en chuan a han kun hniam a,,chhuata an centre carpet chu hlipin a hnuaiah chuan thil thuhrukna niawm tak hi a hmu ta,,pawh hawn mai a han tuma mahse alo in kalh tlat,,rei ngial hawn tuma a beih hnu pawh chuan ala hawng thei mai lo..



Tihngaihna hre lo takin chhuat chu a rap chawrh chawrh a,mahse awmzia a nei lo...Thil hrechhuak thutin Shirley in hmana a thi pek a chabi ang deuh locket awm chu hrechhuakin a motor dahnaah chuan hmanhmawh takin ava let leh a..



A locker chu hawngin thi chu alo la awm ngei e,,in chhungah tlan lut lehin chhuata chabi rawlhna tur kua niawm takah chuan a rawlh lut a,,veilama a herh chuan a ri tlaka,,mak a ti hle tih a hmelah chuan alang...



Chhuata pindanteah chuan lehkhabu lo awmin,,2016 Book of The Year 'Aizawlah Aizawler' tih chu a hmu ta..La chhuakin phek no.162-na a han keu chuan,'Sociolinguistics -ah chuan tawng-ah hian Power leh Solidarity a awm thei', tih hi a lo inchhinchhiah a,a hrethiam lo hle.



Shirley chuan engvanga chulai te chu chhinchhiah nge a nih ang tih rinngaihna a hre lo chiang kher mai..Mahse a pawimawh hle ang tih erawh a hrethiam a,,lehkhabu keng chuan in atang a chhuak ta a ni..





Police officer Rema leh a ho te chuan khatia Dr.Hruaia te let leh kha zuiruin Hlutei chu an va chhan tawh a,,Hruaia leh midangte pawh an man nghal a ni...Hlutei chu hliam a neih avangin damdawi inah an hruai a,rei vak lovah Ukil Muana pawh a thleng ve nghal bawk..




Hlutei chu cabin pakhatah an dah a,pawnah Police pahnihin an veng thap bawk..Ukil Muana chu va lutin Hlutei chuan hriatthiam har tak hian a lo en a,,a khum bul ava thlen chuan,,Muana hmelah chuan hrehawm tihna leh natna tam tak a hmuh theih a ni,,mak ti takin Hlutei chuan a en reng ringawt..



Khum tlang chu vuanin kun chung chuan a inseh ruh nasa hle tih a bek rawn pawng atang chuan a hriat theih,,nakin deuhah chuan,,"ka nau Shirley kha ala dam emaw ka lo ti hman a" harsa tih hmel zet hian a ti a.




Hlutei'n chu thu a hriat chuan mak a ti nge a ngaihna hre lo zet hian reilote chhung chu a bula ding mipa chu a en tlawk tlawk,,Ukil Muana chu Shirley u a lo ni reng chu mak a ti hle a ni.



A lo hre lo pawh chu a awm lo hran lo,,Muana chu Mizoramah khatih lai khan a awm lo va,,a chhungte chanchin a hriat khan arawn let ve chauh a ni,tichuan a nau emaw tiin a Ukil-ah atang a,mahse a nau ni lovin a anpui Hlutei zawk a lo ni si...



A mit te chu a sen ram a,mittui a tling hnur bawk,,tap lo turin a insum nasa hle tih hai rual a ni lo,,"tihpalh,,," tih ri a hriat chuan hawichhuakin,,Hlutei chuan mittui tling piau hian a lo en ve reng a,,a hmelah chuan inthiamlohna leh hreawm tihna tam tak alang..



"keima vangin,,mi tam takin nunna an chan phah a,,khami ni khan Shirley ni lovin kei hi lo thi zawk ila heng zawng zawng hi a thleng lo tur,ka chhungte leh,,," a tih chuan sawi chhun zawm thei lovin a mittui chu a tla zawih zawih a,,




Muana pawh chu insum zo lovin Hlutei kuah chuan a mittui chu a dang zo ngang bik lo,,reitak a chhungrila a lo up beh tawh chu a puak keh hi a ni ber mai...Engmah sawi lovin an pahnih chuan an tap dun a.



An duhtawka an tah hnu chuan Muana chuan lehkhabu chu rawn phawrh chhuakin Hlutei chu a hmuh a,phek no.162-na chu chhiarin chu thil awmzia chu Hlutei'n a hriat leh hriat loh a zawh chuan a lo hrethiam nghal thuai a.



Damdawi ina an pangpar ngaihnat Kumtluang an phunna hmun a nih thu a sawi chuan chu lai hmunah chuan ukil Muana chu a kal nghal a. Hlutei sawi ang tak takin finfiahna video clip chu Shirley-i chuan a lo hnuchhiah reng a ni.




Dr.John-a chuan a hmaa silaia tintu chu enin a hmelah erawh zamna reng a awm lo,,"Min kap ta che,,lo thi ta pawh ni ila nang leh i fapa sualna chu hailanin a awm tho ang" a tih chuan,,



a silai a tin ûr ûrin,,"chutia nanga vo zam mai mai chi ka ni lo,,ka fapa leh ka chhungkaw hmingchhiat ai chuan nang mipakhat lek dah bo che hi ka pawi ti viau turah ngai suh,,kha chen ka lo beihna kha engmahlo maia a chan ka remti lovang" tiin a silai chu a kau a,,



a sira lo ding Dr.Sawmi chu a hlauthawng kher mai,,"ni lo,,ti suh" a hmuiphuna tiin,an hmaa ding John-a chu ava en leh a,,John-a chuan lo enin hahdam tak hian a lo nuih seih ringawt..



Silai a puak chiah tihah hmeihchhe au riin zawmin John-a chu a chhing sawk,,a mit a men leh rual chuan Sawmi chu a hmaah lo dingin a mit chu a sen ram a,a mittui chu a luangthla ngiai ngiai bawk



a ngaihna hre lo takin John-a chuan Sawmi chu a en tlawk tlawk,,"tihpalh" âw tham chhala tiin a tlu tur chuan John-a chuan a lo chelh vat a,,chutih lai chuan in chhungah Police pawh an lo lut ve chiah bawk..



Chhuata John-a leh Sawmi thichhawnga lo awm reng an hmuh chuan Commissioner chu a silai paih thla tura tiin an pahnih chuan an man nghal a,Commissioner chuan insawifiah tum eng ang mahse a thusawi chuan awmzia a nei lem lo..



"min lo puih vat teh u" tia auvin John-a chu a mangang hle a,Sawmi chu thei leh thei lo va lo tawngin,,"John,khawngaihin min ngaidam rawh,,,hetiang a ni dawn tih ka hre lo,," sawi chhun zawm thei lo chuan a ngawi leh a,,a hmai chu mittui nen thlan tui nen a huh hliam tawh,


"chutiang sawi suh,,hahdam rawh" John-a chuan a ti mawlh mawlh,,



Sawmi chu thaw deuh kawkin a chatthla nghal a,,John-a chuan a au lawm lawm a,mahse a chhang thei tawh lo,hreawm ti tak chuan a inseh ruh tawn tawn a,,



Sawmi chalah a chal chu nghatin,,"mi â nu,,ka hua che maw i tia mi?,ka ngaidam daih tawh che a lawm,,hetianga min kalsan tur hi chuan ka duh lo che" tiin rilru na tak chuan a kuah vawng vawng a...





Dr Hruaia an dawpna atang Shirley-i leh Hlutei chhungte thattu chu Burma lam, mi taksa peng sumdawnnaa a thurualpui a ni tih te chu an hre chhuak ta a. Hruaia chu commissioner fapa upa zawk a ni a, a pain a thil tihsual te chu a lo thai bosak zel hi a ni.



Tichuan, commissioner leh a fapa Dr Hruai chu man an ni ta a, Burma mi tualthattu Chunglai-a pawh Burma rama tlanchhiat a tum lai chu police-te’n an man ta a ni.



Damdawi inah John-a chu kalin,,cabin-a a luh chuan Hlutei chu a khumah a lo thu a,,John-a a hmuh rual chuan,,"e he,,doctor,," a lo ti var a..John-a chuan nui sang hian,,"i lo tha em?" a ti ve nghal zat..



.A khum bula thutnaah thuin an titi luam a,Dr.Sawmi chunga thilthleng chu pawi a tihzia leh ama thiam loh vek a nih thute chu sawiin a mittui chu a hru zeuh a,,John-a chuan a thiam ang tawka hnemin ama thiam loh a nih loh thute chu a hrilh ve bawk a.



Misual verhvek leh bum hmang lak ata midang nunna pawh a chhanhim zia te chu hrilhin,,ama tan hlawkna ni miah si lo va,kha chen mi â ang maia alo awm te leh hrehawm a lo tuarte chu huaisen a tiin a chhuang hle a,,a hmalam hunah pawh huaisen taka awm zel turin a fuih ve sauh sauh a ni..



John-a chuan Hlutei chu enin, “Hmeichhe huaisen tak i ni. Tun atang chuan zalen takin awm tawh ang che,” tiin a chhuahsan ta a.




Ukil Muana chuan Hlutei a tanna atang hruai chhuakin,tunah chuan engmah thiam lohna a nei lo tih finfiah a ni tawh bawk a,zalen takin a hun a hmang thei tawh dawn a ni..



Chhungte belh tur a neih loh bakah Hlutei chu Shirley thiantha tak a nih vangin Muana chuan a nau Shirley tana thil tha a tihsak angah ngaiin Hlutei chu a nau angin a enkawl chhunzawm a,,Hlutei chuan hnar ve mahse Shirley vang tala remti tura a tih vangin a hnial hneh bik ngang lo va,tichuan Muana nen chuan unau ang chiahin an khawsa dun ta a ni..




Ni khat chu Muana chuan Hlutei chu hmun pakhat hian a kalpui a, chu lai hmun chu Hlutei chuan a kal tawhna niin a hria a. Eng hmun nge a hre chhuak maithei lo.



Hla vak lo an kal hnu chuan Thingkung buk bulah hian mi pakhat hi a lo ding reng a, Muana chuan Hlutei hnenah, “Va kal rawh, a nghak rei tawh che a nia,” a ti a.



Hlutei chuan hrilhhai hmel zeta enin Muana chuan mit zaizirin a hmalama kal tur chuan a hrilh leh a,,a ngaihna hre lo tak chuan eng zawhna mah zawt tawh lovin a hmalamah chuan a kal ta zawk a..



A hma zawna ding chu va pan zelin tu nge ni ang tih erawh rinngaihna ala hrethiam lo hle,,a thlen dawn tepah chu pa chu rawn inherin Hlutei'n a hmel a hmuh chuan a pen lai chu tawp chatin a dinnaah chuan a ding ngawi reng..



Chu pa chu a lamah rawn pheiin abul a lo thlen chuan,, “Ka tihpalh a ni. Lo hre hma tur ka ni asin,” a tih chuan Hlutei biangah mittui a lo luangthla ngiai ngiai a,a hmaa ding chu enin tah insum zet hian a hmui a pet ngar ngar bawk,,




"engkim avang khan tihpalh,,min mamawh lai berin i bulah ka awm lo va,,mahse kha tih chhung khan second khat pawh ka theihnghilh ngai lo che sin,,i chanchin kha ka ngaihven reng thin,,,a chhan chu ka hmangaih che avangin,,vawikhat ka chan tawh che a chan nawn leh che ka duh tawh lo,,Hlute, bul min tan pui leh thei angem?" a tih chuan Hlutei chuan sawitur hre lovin hnuailama kun chung chuan a mittui a luang zawih zawih a..



Chu pa chuan va kuahin,,a sam chu a chulsak hauh hauh va,,"min ngaidam rawh,,i chungah engmah ka thlentir tawh lovang,,i bulah ka awm reng tawh ang" tiin a luah chuan a fawp zeuh a...



“Ka lehkhabu lo thawn zawng zawng che kha i hmu em?” tiin a’n zawt leh a,


mittui luang ngiai ngiai chung chuan Hlutei chu nui chhuak hakin, “(HZ) Hmangaihzuala maw? Eng tin nge ka hriat loh theih le,” tah nuih teuh hian a ti a.



Zuala chuan kiai sukin Hlutei mittui chu hruksakin a chalah chuan a fawp zeuh a,,a hnarah fawpthla lehin a hmuiah a fawp leh a,,chutah lungchim taka in fawpin an inkuah vawng vawng a ni...





:::::::::::::::::::::::::A TAWP TA:::::::::::::::::::::::::::


(readers te chungah lawmthu ka sawi e,,ziah sual/dik lo a awm chuan in mi hriatthiamna ka dil nghal e😅)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)