THUTIAM By Tom Tom Putara (Completed)

[Ngaia]

THUTIAM
Chap~13



By : Tom Tom Putara






Boruak hrang hrangin kan nufa chuan min nuai kual ve reng a. A chang leh kan pahnih chauh pawhin tudang mah ngai lovin kan hlim ve em em reng a. A chang leh mahni pindanah ve ve ah kan indawmkun tlawk tlawk chang a awm bawk a.






Mi pawisa ba em lovin kan khawsa ve thei zel a. Tumah han awh em em bik kan neilo chu kan vanneihna tak pawh a ni. Ka nu hian min chhuan thu leh ka nun inthlak nasat zia te, ka rilru puthmang danglam ta lutuk chu a lawmzia min hrilhfo ṭhin.






Ṭhiante zinga in la eng emaw bik riau khawpa hmelṭha tih inhre rân ṭhin, ṭhiante aia engkim a chungnun tum tlat. Nu leh pa thu ai pawha mahni fing ve tawk inti ve tlat, min zilhna thu aia mahni ngaihdan dah chungnung zawk tlat. Chhungkua, nu leh pa bul aia ṭhian satliah mai thu ngai pawimawh leh tlat lawi si ka nih ṭhinna te chuan min ti zakin min ti na thar zawk hlauh tawh a. Ka pa khan a mit ngeiin min hmu ve se ka ti ṭhin. Mahse, heng zawng zawng a thlen theih nan hian a nunna hial a hlan a ni si a.






School-lamah leh hmun hran a ka mualpho dan te, ka fa paina pa pawh puh tur ber hrelo ang hial a min sawina te chu ka ṭhian satliahte hnen aṭangin ka hre fova. Min hrilh an châk zawk hle tih pawh ka hai hek lo.







Dofky-i leh Henry-a erawhin hmeichhe huaisen tak ka nihzia te, ka tawrhchhelna leh ka tumruhna te, mi ngaisanawm ka nih thu te min barh mawlh mawlh fova. Miin min sawidan an hriat ang ka zawh ngial pawhin an hre ngai dêr lo thung. Ṭhiante u, in thusawi hi rinna pakhatmah ka neilo. Ka chanchin chhelai hi sawi duh ngat ni ula chuan nangni aia hrechiang in awm awm silo. Ka tana ṭhian hlu tak in nihna hi ka hrereng fovang.






"Mami...ka kal dawn ania aw?" ka nu min rawn koh rual chuan ka chhuak thuai a. "Rit deuhin la suh aw? I hah thei lutuk" tiin ka thlah ve ngial tak na a, theihtawpin ṭhahnem a ngai dawn tih chu ka hai chuang lo.






Inchhung sekrek khawihin ka theih ang ang chu ka ti ve nghal sawk sawk a. Ka pum rawn na leh riai riai ṭhin erawhin ka awm a tinuam chiah bik lo. Ka nau neih thla a nih tawh avangin ka zâm ru viau bawk a. Mahse, keimah ka infuih mawlh mawlh ṭhin. 'Mi pawhin an nei thei a, an tuarchhuak thei a. Kei aia derdep zawk leh chaklo zawk pawhin an theih chuan engvangin nge ka theih loh bik ang?' ka inti mawlh mawlh ṭhin.






Chawhnu lam phei chu ka nuamlo zual a. Khumah ka tluzâl a, ka awm a nuam thei ta reng reng lo. Ka pum rawn na thei lutuk chu nidang anga na a, reh mai a ni ta reng reng lo. Ka ṭhu a, a chang leh ka mu a, a saisir zawng te'n ka mu thul. Engtinmah ka awm a nuam thei chuang lo.






Haider tumin ka phone chu ka khawih kual ngial na a, haider theih leka na a ni tlat si lo. Ka kap lam rawn lum pup chu a ngaihna hrelo zetin ka zuk khawih vat a, ka hnîm zui deuh kher bawk a. "A va nikhua loh theih tak, engnge zun ka cheh ngawt a?" za lo zetin ka in nuih leh rih ṭhin. Hmanhmawh takin Bathroom-lam chu ka pan a, ka kal phei lamah a rawn lum leh pup a, ka nuih pawh a za tawh lo. Mi pawhin nau an pai ve fova, zun an cheh em em pawh ka ring love.






A hmaa na kha chu nep tak a ni, a rawn na zui leh ṭawlh ṭawlh a. Chutah zet chuan ka hlauthawng ve ta takzet mai. Ka nu chu ka be ta thuai a, "Nu....ka pum a na lutuk. Zun te ka cheh a..." ka tih rual chuan, "Awww...a ni maw? Ka rawn haw nghal" a rawn ti nghal sawk sawk a.






Ka nu chhuakvak rawn haw har ka tih ber ṭum a ni hial ang. Khum ah ka ṭhu a, Thosilen ban chu ka hmer leh ngar ngar ṭhin a. Pawnlama thawm rawn awm chu ka ngaihven rang kher mai. "Nu... Nu..." ka lo ti thuai a.





Hmanhmawh zetin a rawn tlan lut a, "Mami...ka fanu...nau i vei anih kha..." a rawn ti mai chu ka hlauthawng zual sauh a. Ka nu awm loh lai khan lo nei ta mai ila, engtinnge ka awm ang? Ngaihtuah pawh ka ngaihtuah zui thui ngam lo.






"Ka inthlak sawk sawk ange..lo tuar ṭang ṭang rawh aw?" tih pahin hmanhmawh zetin a chhuak a, a che nghal khawt khawt thawm chuan min ti hlauthawng zual telh telh bawk si. "Nu...ka nei hman ange" ka lo ti sek tawh a.





"Aw...hello... Mathan, khawiahnge i awm? I awm hla viau em? Kan va hmang duh che ve?" ka nu phone hmang ri chu ka ngaithla kar a, ka pum na lutuk tawh chuan min ti khûr hlak hlak a. Ka chal ah thlan a rawn bawl ṭiam ṭiam a.






"E...a ṭhat hlauh chu. Mami hi Damdawiin lamah kalpui vat angai. Rawn hmanhmawh rawh" tih pahin phone chu a dah a, a rawn kalzui nghal thuai a.






A hmaa ka lo insiam rûk ve deuh tawh avangin ka thil mamawh tur chu dahkhawm a harsa lem lo hlauh e. Ka hakthlâk tur chu a khung mawlh mawlh a. A hmel chu ka lo en kar a, ka ngaihbel vang nge a zâm riau a hriatna ka nei bawk. "Nu...a rawn thleng dawn tawh angem?" ka lo tisek a. "Thleng ṭep ang" tih pahin kan thil ken tur chu Sitting room lamah a khai chhuak zung zung a.






"Ṭhiannu...in awm em?" tih lâng lâng pahin Dofky-i chu a rawn ri lut thar thar a. "I ṭhiannu saw nau a vei anih saw...lo va awmpui rawh" ka nu chuan a lo ti vat a. Hmanhmawh zetin a rawn lut zui nghal a. "Awii...ṭhiannu..." tih pahin ka bulah a rawn ṭhu nghal a. "Engtinnge ka tih ang che?" tih pahin ka hnungah chuan a rawn chûl nghal teh ngawt a. "Engtin pawh..." tih nghut pah chuan ka kut chu ka hûm ruh ṭang ṭang a.






"Motor a rawn thleng e" ka nu in a rawn tih rual chuan, "Kal ang...kal vat ang" ka tichhuak hawk a. Ka tho zui nghal a, "Mami...kan rawn kuah ang che. Kha...hei hi ken tur..." tih mawlh mawlh pahin a ri sawk sawk a. Rang takin min rawn pan a, min rawn kuah nghal a. Dofky-i leh ka nu chuan min kuahchhuak ta!





Kalkawngah pawh chuan min fuih dun sauh sauh reng a. A khât tawkin ṭhiani chuan fiamthu a rawn thawh leh zauh ṭhin a. Ka nui na a, a za thlawt lo. A chhungte a be mawlh mawlh a, kan chanchin te chu a hrilh zung zung bawk a.






Damdawiin kan thleng a, an lo buai hle mai a. Ka nat ang aiin min lo ngaihsak em em lo zui leh nghal a. "Helam ah rawn kal rawh u" ti a Nurse pakhatin min hûi na lamah chuan kan kal zui ta nghal a. "Lokal rawh le....a inhawng ṭha tawh em tih en phawt ang" tih pahin min pawtpeng zui nghal a.






"A in hawng full ṭep tawh alawm. I nei har lovang. Nau i har em?" Nurse kum upa ve lam tawh, ka nu rual vel tur hmel deuh chuan min nuih sâng pahin zawhna min zawt mawlh mawlh a. "Ka pakhatna tur..." ka ti hmuk a, ka in hûm ruh nasa hle bawk. Ka rilru in, "Ka pakhatna leh a tawp berna tur..." ka tih rilruk lai chuan, "Hlauthawng miah suh aw? Ṭha takin i nei mai ang" a rawn ti dam leh dap a.






Ka nu leh Dofky-i chuan min buaipui sawk sawk a. Nau neihna a hak tur pawnfen te chu min haktir nghal sawk sawk a. "Ṭhiannu, min hawsan miah suh aw?" ka ti mawlh mawlh a. "E....lungngai suh. Hawsan love...naute hming ka phuah dawn" nui sâng chungin a lo ti vat a.






Khumah chuan ka mu a, ka rûm leh nghat ṭhin a. Mahse, tuarzuau leh hmeichhe nep nih ka tum ṭhak lo thung. Ka nu chu hmanhmawh deuhin a rawn lut a, eitur chi hrang hrang a rawn khailut a, "Ei chak i nei em?" tih pahin ka bulah chuan a rawn ṭhu nghal a.






"Engmah ka châk lo. Ka ngûm a na lutuk" tih pahin ka rûm hak a. "Nuai teh..a na lutuk" ka ti vîn hlar a. An nui hak a, ka thin a rim zual sauh a. Ka nuih a za deuh tho bawk si. "Nuai mai mai teh u" ka ti vîn zui ṭhat a.






"Khawi keima'n ka nuai pilh phung ange" tih pahin ṭhiani chuan min rawn hnaih nghal vat a. A thiam ang ang chuan min buaipui zui nghal a.






Zan dar 6- a pel hret tihin nau neihna ah min luhpui ta! Min fuih mawlh mawlh reng a, chu chuan chakna thar min pekbelh chiang hle bawk.





"Le...ṭang rawh le...ṭang rawh...a rawn chhuak ṭep ania" min fuih mawlh mawlh a. Ka theihtawpin ka sang ngar ngar a, ka thlan in min bual huh vek tawh bawk. "I ti thei ania, ṭang rawh" min ti mawlh mawlh reng a. Ka theihtawp ka chhuah tak meuh...naute ṭap ri ngâk ngâk ka hre ta! "Hmeichhia i nei e..." tih ri ka hriat rual chuan ka biangah lawmna mittui a rawn luang ngiai ngiai a. "Lalpa...ka lawm e" ka ti chhuak sap a. Ka bulah chuan an rawn hruai zawk a, "Kha...en rawh le...a hmelṭha em em leh nghal" an rawn tih rual chuan ka lo thlêk vat a. "Ka fanu..." tih pahin ka nui sak a.





Ka rîla rah, ka fanu hmel hmuh leh hlan chu ka nghakhlel takzet. Nurse pahnih chuan Naute chu an rawn pawm phei a, puan var thianghlim takin an rawn tuam phei hlân hlân a. Ka bula an rawn mut chiah chu ka kuah vat a.





"Ka hmangaih....ka fanu..." ka sawi zawm thei tawh lo. Ka biangah chuan mittui a rawn luang ngiai ngiai a. Ṭah hawm hawm ka châk a, theihtawpin ka insûm thung. "Enteh Duat...i fanu hian pa a mamawh dawn asin. Khawiahnge i awm?" ka rilru chuan ka au zui lawm lawm a.





Ka nu chuan a rawn hnaih nghal thuai a. "Awiii...ka tunu hmelṭhat dan hi... Lalpa in kan tana a ruat liau liau anih hi. 'Lalremruati' anih hi..." tih mawlh mawlh pahin a rawn kûn hnai a, a chalah chuan a rawn fawp zauh a.






Dofky-i chuan nui var var chungin ka kutah a rawn chelh a, "Ka ṭhian...i ti thei ta! Engkim tawp tawh rawh se. Tunah chuan hlimna hlirin hmuak che rawh se. I fanu nen nun thar in ṭan tawh ang" a rawn ti siam siam a. Ka nu pawh chuan mittui kâra nui hmel hmuhin ka ṭhiannu thusawi chu pawm tih hriat zetin a lo bu nghat nghat a. Ka ṭhiani bawk chuan, "A hming phuah ka tum nen min phuahkhalh ta sia. Sap hming ka phuah tel ve ṭalh dawn... 'Brenda'" a rawn ti zui nghal zat a.






Nui var var chungin ka fanu chu ka melh a, "Brenda Lalremruati" ka ti vat a. "Ka khawvel thar, ka hringnun thar, ka hmangaih...ka fanu..." ka tizui mawlh mawlh a.





Damdawiin aṭanga kan chhuah hnu pawhin ṭhiante leh ṭhenawm khawveng te an rawn lang khât tawk reng hlawm a. Kan phuloh in Bawihtei pawhin lawmpuina thilpek a dawng mawlh mawlh reng bawk a. Ka nu phei chuan, "Mami...mi tan kan ṭangkai loh nen mi hi an ṭha teh e tiraw?" hnukulh ṭeuhin a ti fo ṭhin.






Ṭhianpa Henry-a pawh a rawn leng ve deuh reng a, Nau a lawm bawk a, engmah hrethiam lo mah se a chhaih peih em em reng bawk a. A rawn len apiangin Bawihtei mamawh tur a rawn hûm tel ziah bawk a. "Henry...engmah rawn keng tawh suh. A mamawh te chu a ngah tawh lutuk alawm" ti fo mahila Bawihtei tana thil lei a ṭhulh phah chuang lo.






Dofky-i chu a rawn nui lut hawk hawk a, mak ka ti hran chuang lem lo. Ani hi zawng ka hrechiang em em tawh a, a chang leh âng bawrh bawrh chunga a rawn lih chang te pawh a awm ṭhin. "Engnge a?" lo tih erawh ka theihnghilh chuang lo.






"Ka nuihzat zia chu a..." tih pahin min rawn hnaih thuai a. "Bawihte...ilo dam em?" a rawn tizui leh daih a.





"I nutei a lokal ania..." tih pahin Bawihtei chu ka sawi ne ne a. A mutui em em mai bawk si. Tihharh tak tak chu ka hlau ru viau lawi bawk a.






"Ka rawn phei khan sawlai lawkah sawn Rpi te ṭhiandun ka hmu a. An rilru a hah mai sia..." nuih hak hak pahin a rawn nuih luh bâwk bâwk chhan chu a rawn thar thawh leh zat a. "Eng thil nge a?" ka lo ti vat a.






"Vawiinah Class an tlanbo a, Miss Machhuani khan a ringhlel deuh rêng a. Tunah khan an rawn chhuak phei chiah Miss Machhuani te nen an intawk leh sia. An in man chiang lutuk a...an indinchilh laiin ka rawn kal phei daih alawm" a ti zui mawlh mawlh a.





"Engnge an kal loh chhan?" nuih hak hak pahin ka lo zawt zui thuai a.





"Awww....Sawma leh Thanzuala an ni mai alawm" nui rah rah chungin a lo ti thuai a. "A lo nih vel tak chu a..." ka ti thuai a, "An in man chian hmel sia. A zahthlak ve khawp ang" ka tizui leh thuai a.






"Nia...an vawi thum tihna ania, Miss khan a enliam mai mai chu ka ring miah lo" a phone khawih mawlh mawlh pahin min lo chhâng liam puat a.





Thil hrang hrang kan sawi a, nuih hak hak pah chuan, "Kan thilsawi leh ngaihthlak duhzawng pawh a in ang tawh lo mai sia. Nu leh nula chu thilsawi duhzawng a in ang tawh lo hle mai" ka ti fiamthu hlak a.






Min chûm awk dawn tih ka hresa na a, ka inring hman leh chuang lo. Ka ri zui awk a, "I va han over tak... Nu ni ve theilo ah min ngai nge mawn le? Ṭan ka la deuh anga, ka sah huk anga... Nu ka ni chu a ni ve mai a.." a rawn ti nghal zawt zawt a. Kan nui dun nasa kher mai.





"Ṭhiannu...ka va haw phei dawn teh ang. Eng eng emaw tihzui tur neuh neuh ka nei a" tih pahin a tho zui nghal a.





"I fel lutuk e....i reh vung vung chuan ka khua a har thei lutuk a. Rawn leng leh vaf ang che" ka ti nghal zung zung a. Bawihtei hnute a hne laklawh nen Khum aṭang chuan ka vailiam zui a.






Zan lamah pawh buaipui a ngai vak lo, Bawihtei hian min tibuai lo viau mai. Mut a duh em em a, a ṭhang duh viau dawn aniang. A muhil lai chu ka en reng a, ka enning thei ṭhin lo. A zi ve ṭet ṭet ṭhin te hi ka piai nawk nawk chak ṭhin.






"Ka fanu duat...ka hmangaih che. I nu hian ka kalsan ve miah lovang che" ka ti mawlh mawlh a. Chu thu ka sawi chu ka ngaihtuahna a vak thui zui kher mai. Ni e, a fanu pawh duh lovin a kalsan kha a nia. Mipa tenawm tak khan he hmeichhe naupang, duhawmna tinreng a khat hi a kalsan a maw? "Bawihte....ka hmangaih che" tih nawn pahin ka fawp vawng vawng a.






Ka nu chu thawm dim zetin a rawn lut a, "Ka bawihte....ka tunu duat em em te...i va mutui thei tak...meng ve la...i pi nen inkawm phawt rawh u" a rawn ti sa sa a.





"Nu....Bawihtei hi a mu nasa thei e..a ṭha dawn a mawn le?" ka lo ti vat a. Bawihtei muhil sêk sêk chu ka melh reng a.





"Nau ṭhang ṭha tur anih hi..." tih pahin a tunu chu a fawp zauh a. "Tui deuhin mu sêk sêk rawh se" tih leh sap pahin a biangah a piai leh zeuh a.





"Tui deuhin mu rawh u aw? Bawihtei a mut ṭhat duhloh palh thut chuan min rawn kaitho mai dawn nia" tih pahin min chhuahsan zui ta nghal a.





Bawihtei chu ka en vang vang a, "Bawihte... ka khawvel thar tur i nih hi aw? Fel deuhin awm rawh aw? I nu hian ka hmangaih lutuk che ania" ka ti sar sar a. A kut tereuhte chu ka chelh a, a rawn che ve niap niap nia!





"Bawihte...." ka ngawi vang vang a. "I rawn len hunah zawhna tam tak min la pe ngei awm si a tiraw? Ih maw...i len hunah, thil i hriatthiam hunah chuan i hriatah sawi ka duh dawn silo..." ka chawl dat a, pawisawilo zeta muhil sêk sêk chu ka en reng a. "Bawihte...i nu hi min dem miah suh aw? I pa chuan i rawn pianchhuah a duh lova. Mahse...i nu hian ka mamawh bawk si che. I pa pawh dem chuang lo la aw? Eng emaw harsatna lian tak a nei a ni ngei ang" ka ti zui mawlh mawlh a.






"Aaaa...a nei lovang. I pa ni tlak a nilo zawk a ni. Kei ka awm a, i nu hian engtikahmah ka thlahthlam ngai lovang che. Ka chelh reng ṭhin ang che" ka tih mawlh mawlh lai chuan 'Pa lova selian tur' ka fanu chu ka en tlawk tlawk a. "Zual...i hming ka lam tawh ngai lovang ka ti asin. Mahse, kan nufa hian min han en teh... I fanu hi vawikhat chiah han hmu ve la chuan i thusawi zawng zawngah khan i inchhir ngei ang. Enteh... Zual...duhawmna tinrengin a bawm vek asin" ka tizui mawlh mawlh a.






"Bawihte....tui deuhin mu rawh aw?" tih leh pahin tihharh hlau zetin ka fawp zeuh a. Ka fanu kut tereuhte chelh reng chung chuan ka mu ṭha zui sat sat a.






(to be continue.......)


Show post links
Top

[Ngaia]

THUTIAM
Chap~14


By : Tom Tom Putara






Hun a kal zel a, kan khawvel tharah chuan lungngaihna leh khawharna tam tak awm mah se hlimna pawhin min chenchilh ve fo tho a. Bawihtei vang ringawt pawhin ka hun hman in awmzia a nei a, amah vangin ka hringnun in hun hlutna a tem ve fo ṭhin.






Ka mitah ani aia ṭha leh duhawm an awm bik chuang lova. A muthilh chhung lek pawhin ka khawhar ngawih ngawih ṭhin. A pi lahin kehthei dawmin a dawm a ni ber a. Khawi emaw kal hlek se 'Bawihtei ta tur...' tih nei lo leh kutruakin a rawn haw ngailo a ni ber. Kan theih tawk a sang lo na a, kan theih chinah chuan kan chhungkaw Lalnu a ni ber e.






Fa ka nei a, pa hlutna ka hrethiam tulh tulh a. Ka pa hmunruak zauh zia ka hmuchiang tulh tulh bawk a. Pa Tluangtea pawh a hma angin ka haw hlur tawh lo. Mahse, ka nu chuan a hmaa a biak ang bakin a biak ṭhat huam phei chu ka hre chuang hek lo.






Henry-a pawh a hma ai mahin a rawn leng zing a. School-lam chanchin ka zawt âwl lova, ka ngai ru ve veng veng ṭhin. Ka nu in kan chhungkaw mamawh tinreng, kil tinah a dap kual a. In ah min awmpui hman meuh lova. Bawihtei harh ve tawh bawk nen ka buai em em ṭhin a. Henry-a chu min lakchhawk tu ber a ni ṭhin a. Bawihtei pawhin a ngaina ve viau chuan ka hria. Mahse, kan inkarah inṭhian ṭhatna bak a awm hran lova. Ka ṭhian ṭha tak angin ka en a, ani pawhin chutiang bakin min en thûk bik chuanglo niin ka hria.






Dofky-i erawh kan inhmu khat hle thung a. Board Exam hmachhawn tur te a ni bawk a, ṭan a la nasa ve deuh ni turah ka ngai. Ka ngai ṭhin viau na a, biak buai ka hlauh avangin ka be ngai lo thung.






Kawngka kik dat dat ri ka hriat rualin Khum aṭang chuan ka thochhuak vat a. "Lo lut rawh" ka tichhuak lâng lâng a. Kan Class ami Madini ka hmu chu ka phu deuh zawk hial a. "E he....teh nawlh che chuan...lo leng rawh..." ka ti nghal sawk sawk a.






"Naute hmelṭha ka rawn en dawn..." tih pahin a hawikual zak zak a. "Lokal rawh...a muthilh lai tak..." tih pahin pindan lamah chuan ka hruailut zui nghal a.






"Awi ṭhiannu...a va hmelṭha em em.. Awii...ka duh e...a cute sia.." Bawihtei tihharh hlau zet chung chuan a ti deuh hlut a. "Awii....ka piai nawk nawk chak..." te a ti leh thul. Ka hmangaih, ka fanu in lawm a hlawh anih chuan chhungrilah hian ka hlim veng veng ṭhin.






"Madin...i zir nasa tawh em? I ti ṭha thei turah ka ngai ngawt a?" ka chhungrilah chuan School kal a, zirlai zir leh te chu ka chak ru ngawih ngawih bawk.





"Awii...teuh nang. Ka zir peihlo lutuk hi a buaithlak zawk..." nuih har har pahin a lo ti vat a. Min en a, thutak hmel zetin, "Enteh, Dofky-i nen in inti thiamlo deuh nge?" a rawn ti zui zat a.






A ngaihna hrelo zetin ka thlêk hâ a. "Chutiang engmah a awm pawh ka hre hlei nem... Zirna lamah a insawrbing deuh avangin hmuh chu kan inhmu khât khawp mai" ka lo ti vat a. Madini hmel chu ka en chiang hle a, a mitmengah chuan eng emaw zawhna dang a la nei ru ngei in ka hmu bawk a. "Anih chu...a ṭhat hlauh chu" a lo ti vat tak na a, ka ngaih erawh a ṭhalo ru viau thung a.






Zawhna eng emaw hmanga zawh chhuah duh ka nei ru ta riau bawk a. Madini hi ṭawng duh ve tak, lamṭang atana ṭha deuh ang chi kha anih avangin zawhna ka pek fuh chuan eng emaw hriatbelh ka duh rûk riau, engnge anih ka hriat mai bik loh chu ka zawhchhuah theih mai ka ring viau bawk.






Ka melh ralh a, "Hmanni deuh kha chuan kan thu a in hmu lo deuh a, Bawihtei pa chungchang velah hian a ni nghe nghe a. Mahse, chutianga thinrim reng na tur phei chu a awm miah lo" dâwt pawilo tur nia ka ngaih hmang chuan zawhna min pek awmzia tak chu hriatchhuah ngei ka tum rân a.






Ka en reng a, ka beisei ang ngeiin a hmel a danglam ta tlat! "Ka rin dan chiah a ni" a rawn ti ta nghat a. Ka thin a phu deuh dat dat a, hriatchian ka châk rualin ka ṭhiannu Dofky-i lakah chuan ka rilru a na nghal ngawih ngawih ringawt bawk a. "Chuan....?" ka lo ti thâwm sat a.






"Eng em em chu nilo e...a sawi dan vel che ah hian in inkawm ngai tawh lo anih ka ring ngawt a. In in haw viau anih ka ring deuh ngawt bawk a" a rawn ti ta siam siam a.






Engtinmah ka chhâng lo, ka en ngai ka en tlawk tlawk a. Ka ṭhiannu chuan engtin tak nge mi bulah min sawi ang ni? Ka bula ṭhu chu ka melh zawk a, "Engtin chiah nge min sawi ṭhin a? Thudik tawk lo te pawh a ni mai thei a. Nang hian a thusawi i hre tawh a, ka thusawi i hriat ve leh kher te pawh a ṭha mai thei asin" a hnen aṭanga engkim hriat theih in beisei zetin ka vehthlem zui zat a.






A thaw halh a, "A ṭhen chu midang kâ aṭang pawhin i lo hre nual tawh mai thei bawk a" a rawn tihlai chuan ka lo bu nghat nghat a. Engmah hrelo anga ka awm chuan sawichhuaktu nih bik a hlauh phah ang tih ka hlau ru bawk si.






"I fa pai chungchang pawh a sawi a, a pa puh tur ber i hriat loh thu te, i puh chhun lahin a hnial a, a kalsan thu che a sawi ṭhin a" a ti ta mawlh mawlh a. Ka thu hriat chuan ka rin phâk bâkin min dêng na bawk. Ka ṭhian ṭha bera ka ngaih chuan midang bulah chutiang ang chuan a lo sawi a maw?






"I nau pai tihtlak mai i tum thu te, a dan nasat thu che pawh a sawi ṭhin" a rawn tihzawm phei chu ka sa pup pup ni mai hian ka hria. Chutiang ang em em chuan ka lakah rilru a pu ang tih reng ka ring ngai lo. Henry-a reh vang vang pawh hian chhan a neih ka ring ta viau bawk a. Engtiang chiahin nge Henry-a bulah min sawi ang? Ka ngaithla zawm ngam tawh lo.





Thudangah ka pakai pui thuai a, chu thil a sawi chu ka tan thu thar a nih loh thu te, midang pawhin min hrilhfo thu in ka tlip zui hram a.





Sana a en zauh a, "Ka phei dawn ange. Remchangah ka rawn leng leh ang" a ti deuh hluai a. "Bawihtei lah chu a mutui sia. A induh em mai, ka pawm lo tawp ang" nuih sen sen pahin a thlek vang vang a. Kan inzui chhuak ta nghal a.






Ṭhutthlengah chuan ka ṭhu hnawk a, ka tawt up up bawk a. Engnge tih ber tur pawh ka hre mai chuang hek lo. "Ṭhiannu, ka thu hriat hi dawt mai nise ka va ti tak em... Mahse...." keima hriat tawk lek chuan ka phun chhuak sap a.






Bawihtei thawm ka hriat rual chuan hmanhmawh zetin ka tlan lut nghal a. "Ka fanu duat...i lo harh tawh maw? I mutui hle mai" tih nghal mawlh mawlh pahin Thosilen chu ka keu nghal sawt sawt a. "Bawihte...ka duat em em te...." tih pahin ka pawm tho zui nghal thuai a.






Pindan aṭanga kan chhuak chiah chu a pi pawh a rawn haw thleng ve chiah a. "Bawihte...i lo tho chiah em ni?" tih pahin a rawn hnaih thuai a. Bawihtei pawhin a thiam dan ang angin a lo nuih ve nia! "Bawihte...ka la bâl lutuk a, ka intifai sawk sawk anga ka awm ang che aw?" tih zui mawlh mawlh pahin a indahfel nghal sawk sawk a. "Bawihte...ka inbual lawk ange aw?" tih leh pahin a che zui nghal sawk sawk a. Bawihtei pawhin a pi hi chu a hre ve tawh em em a. A pi hmel a hmuh hi chuan a phûr ve sûrh sûrh ṭhin hle bawk.






A pi nen an in awm a, Inchhung sekrek khawihin ka buai zui nghal char char a. Keini nufa tan hmabak chhawp a tam lem lo. Zan mut kan bâk leh tawp hi a ni leh tawh mai a.





Zan dang anglo takin thli a thaw vûk vûk a. Khawpui a ri dur dur reng bawk a. Kawlphe leh zawr ṭhin te chu ka mutna aṭang chuan ka thlir reng a. Bawihtei chu a muhil tui leh tawh viau a. Ka thlek vang vang a, "Bawihte....tui deuhin mu rawh aw?" ka ti sap a. Ruah a rawn ri fuap fuap a, Bawihtei tih harh hlau zetin ka tho ṭhem ṭhem a.






Tukverh bulah chuan ka ding a, pawnlam boruak in lumlet mek chu ka thlir reng a. Kawlphe eng zuai zuai karah ruah tla sung sung chu ka hmuh hmaih lo. Ka ngaihtuahna kalding mup mup chu thunun tum viau mahila ka thei silo.






"Zual....khawiahnge i awm? I dam ṭha em? Enteh..i fanu nen kan awm a, kan khua a har ṭhin lutuk asin..." ruah rawn baw ri hawk ah chuan ka phu deuh zawk nghe nghe a. Bawihtei chu ka melh zawk a, a mutui sêk sêk viau mai.






"Zual...ruah a sur ve em? Ruah a sur hian ka khawhar a zual ṭhin asin. Bawihtei pawh hian i kuah a thlahlel ve ngawt ang. Ih maw...tunah chuan ṭhian pawh ka nei tawh lo. Nangmah vang hian ka engkim, ka hmalam hun, ka ṭhian leh ka nun engkim hi a chhe vek asin. Mahse...." ka mittui rawn luang ngiai ngiai chu ka hru zauh a. "Fanu hmelṭha tak min pek avang erawh chuan ka lawm lutuk ania. Mahse, nang chuan fa ah i pawm lova. I fa a ni ve ngai lovang" ka ti ta mawlh mawlh a.







Ṭek rawn tla ri ṭhuai chu ka phu kher mai. Bawihtei chu ka en vat a, ka rin ang ngeiin a tal sat sat a. "Mangṭha aw? Ka mutsan ang che" ka ti leh hram a. Tukverh parda chu ka siamṭha sawk sawk a. Hmanhmawh zetin Khumah chuan ka lawnkai zui nghal a.






Bawihtei ṭe ṭhet ṭhet chu ka kuah nghal thuai a. "Bawihte..á nu a lokal e...khaih..khaih...hau suh u...hau suh u.." tih pahin hnute ka barh zui nghal thuai a. Ka kuah chiah chu thlamuang takin a thaw ve siai siai a, ka chûl heuh heuh a. Ka hmangaih, ka fanu Lu chu dawmin ka ṭawngṭai ta mawlh mawlh a.






Thawm dim takin ka nu chu a rawn lut ṭhem ṭhem a. Thosilen chu a rawn keu de de a. "Bawihtei a mu thei em? A hlau lo maw? Ṭek a tla nasa bawk sia" a rawn ti sa sa a.





Ka lo nui sak a, "Nachin khan a phu ve zawk mai. A muttui tehreng nen ka ngei tak tak a ni" ka lo ti thuai a.





"Bawihte....tui deuhin mu rawh aw? Engmah hlauhawm a awm lo ania" tih pahin a biangah a rawn chûl thuak a. Min chhuahsan zui leh ta nghal a.





Zuala chu ngaihtuah zui loh ka tum viau na a, ngaihtuah loh theih loh khawpin ka rilru a rawn luah ut ut mai si. Kan inhmuh hmasak ber ni aṭanga tun hun kan thlen dan te chu ka ngaihtuah kir neuh neuh a. A chang leh ka nui leh sak ṭhin a. A chang leh ka lung a leng veng veng a. A tawpah erawh thinrimna bawkin hnu ka khâr leh ta tho chu a ni si a.






Mutchhuakin min rawn zem chiai chiai a. Ka phone chu ka bih zawk a, dar 1 a lo ri ṭep mai. Muthilh tum chuan ka insiam ṭha zui a. Bawihtei chu ka kuah a, a hnâr ri sêk sêk chu ruahsur chi cherh cherh karah chuan ka hriat hmaih chuang lo.






Chhûm a rawn zing chuai chuai a. Kan piah lawka Motor chhe ding, min dangtu chu ka melh kâwk a. "Kha aia sir deuhah te khan i chhe thei lo em ni? Hmanhmawh tawh tehreng nen.." ka rilru chuan ka va hau mawlh mawlh a.






"Á nu..chhuk ve ang. Ka zun a chhuak" Bawihtei chuan chhuk a tum zui nghal a. "Ngawi rawh lawk Bawihte..."tih pahin ka pheikhawk hrui chu ka suihṭha mawlh mawlh a.





"Khalaiah khan zung mai rawh" tih pahin ka din hliah zui nghal a. Kan hma lawka Sumo ding bula pa chêr chhe ve zet chuan min rawn melh leh rulh rulh ṭhin a. Bawihtei chu a en vung vung bawk a, ka lawm viau lo hle bawk.






"Bawihte...motor ah khian ṭhu lut leh daih ila...chhum a zîng nasa bawk si...a vawt em mai" tih pahin ka kai a. Engmah sawilo chuan a lo pawm ve viau bawk a. Passenger dang erawh mipa an ni hlawm bawk a. Meizuk pahin min dangtu, Truck lian zet ding ruau chu tih theih leh thiam nei chuanglo chuan an va kil tuau hlawm a. Kan nufa chuan kan ṭhu ngawi reng a. Bawihte chuan a tlin ta ngang lo aniange, a pheikhawk bun a phelh sawk sawk a. Ka malpui kham chuan a rawn mu rem sawt sawt a.






"Bawihte...vawt i ti em? Ka puan hi sin rawh aw?" tih pahin ka khuh nghal sat sat a. Ruah a sur tawh lo na a, khua a hnawm in a vawt vur mai a. Chhum lah kian a hnêkin a zîng phui tulh tulh ni maiin ka hria.






Ka ṭhu rem a, ka ṭhutna bul chu ka khârphui zui a. Muthilh tum deuh chuan ka awm rem zui sat sat a. Bawihtei sam chu ka chûl heuh heuh a. "Bawihte...muhil daih rawh" ka tihlai chuan ka hnunglam Sumo darthlang chu a rawn ri kerh kerh a. Rang takin ka hawi nghal vat a, Bawihtei zunlai a kan chhak aṭanga min lo en rengtu, pa chêr chhe zet kha a lo ni reng a.






Kan mit chu a intawng chiang hle mai. A nui lova, hmel hlim min hmuh hek lo. Chhang leh Frooty-bûr a ken chu a rawn lekchhuak vah a. Muangchangin Glass- chu ka herh hniam riai riai a. "Engnge ni?" ka ti chang fak a.






"I fanu kha a rilṭam takin ka ti maw le.. Kan la tân rei hmel sia.." a lo ti dam dap a. Bawihtei chu a rawn thochhuak thuai a, "Á nu...tunge?" tih pahin pawnlama ding chu a melh ngar a.





"Mami....hei hi ei rawh. Kan la rei hmel sia...i lo rilṭam palh ange" tih pahin a thilken pek tum chuan a kut a rawn dahlut nghal a.





"Engmah a ngailo asin. Nangmah khan ei zawk la? Keini chu kan pai tho alawm" ka lo ti tak na a, a dahlui ta tho a. "Ka pu...engtia rei nge nghah a la ngaih hmel le?" ka tizui zat a.






"JCB an kova, rei lutuk tawh lo turah ngai ang" tih pahin min en kar a. A mit leh ka mit chu a vawihnih nan a intawng leh ta sak a. Eng emaw ti riau hian ka awm a, he pa hi khawiah emaw chuan ka hmu tawh ngeiin ka hria. Mahse, ka hrechhuak zo tawh si lo.






"Á nu...á nu...." aw ki danglam zeta Bawihtei'n a rawn tih rual chuan ka thlek vat a. A mitmeng danglam lutuk chu ka hmu chiang viau bawk. Pawnlam chu a en a, a nui var var a. "Á pa..." tih pahin a kâwk nghal vâ a. Rang takin ka hawi nghal vat a, ka bul lawka ding, a hmaa pa chêr chhe ve zet kha a lo ni tawh miah lo. A lo ding ngawi reng a, min lo en reng a. Mak ka ti lutuk chu ka âng phuau ringawt a. Ka ṭawngchhuak lawk thei lo. "Zuala..." ka ti chhuak thei hram a.






Bawihtei chu a chhuk rawk rawk a, "Pa..." tih pahin a pan nghal a. Dan pawh ka tum hek lo, mak ti takin ka en tlawk tlawk a. Mahse, Zuala chu hmanhmawh takin a inher vut a, a chho zui nghal daih a. Ka fanu in a koh mawlh mawlh pawh chu hria ang pawhin a awm hek lo. Vawikhatmah a rawn hawi let lova, ding takin a chho a. Ka ṭhutna aṭang chuan ka thlir reng a. Ka mittui luang ngiai ngiai pawh chu ka dang zo hek lo.






Bawihtei lahin a pan chho zel a, a um pa lah chuan vawikhat te pawh a ngaihsak si lo. Rang takin ka chhuk a, Bawihtei chu ka um chho zui ve nghal a. Bawihtei chu a ding chawt a, hlau tih hriat takin a ṭe nghal tuarh a. Ka hawi chho chu keipawh ka ding nghal chawt mai. Kan hmaa kal chho, Zuala ni ngeia ka hriat kha Ruhro vek a lo ni tawh!!






Ka harh zawk a, ka ṭhu chhuak hlawl a. Ka thlan in min lo bual huh hlup a. Rang takin Bawihtei chu ka en vat a, a lo mutui viau thung a. "Ka mumang....ka mumang..." tih mawlh mawlh pahin ka thaw deuh hawk a, rang takin ka mu zui leh thuai a. Bawihtei chu ka kuah vat a, "Bawihte...i pa chuan mumang ramah pawh a duh chuang lo che a ni maw?" ka ti sap a.






Muthilh ka tum ngial pawhin ka mangchhia chuan ka mitthla ram a rawn luah ngut ngut reng a. Ka mumang mai mah nise awmze thui tak a lo nei zawk reng angem? Zuala hian eng emaw chhan ṭha tak vangin min hnaih ngamlo em ni ang? Tunah te hian natna khirh tak tawkin a fanu hi a lo suangtuah ve reng zawk lo maw? Pa chêr tak, a mitmeng ka hmuh khan mi tu emaw hriatchhuah theih si loh, ka hnaih ṭhin ni tlat in ka hria a. A hnu lawkah Zuala ngei kha a rawn inlar a, Bawihtei'n a umzui lai khan a kalsan a, a hnu lawkah Ruhro mai a ni leh si. Khang zawng zawng khan inzawmna thûk tak an nei ni mai hian ka hria.






Ruah sûr baw hawk a reh a, a la ri fuap fuap reng thung a. Ṭêk ri a reh a, kawlphe zuai zuai erawh a la ngai reng thung. Bawihtei chu ka khuh ṭha a, thâwm dîm zetin ka tho nghal ṭhem ṭhem a. Tukverh parda ka keu a, ka ding ngawi reng a. Pawnlam boruak chu ka thlir vang vang a.






"Zual....engtak nge i chungah thleng ka hre silo. Ka mumangah ṭha lo takin ka hmu che asin. Tunah hian khawiahnge i awm? I dam ṭha ang tiraw? Dam ṭha rawh aw? Hlim takin i hun hmang mawlh ang che?" ka bianga mittui luang ngiai ngiai chu ka dang zo lo. Ani vanga mittui tla lo turin ka intiam na a, zaninah ringawt pawh Vawi hnih lai ka bawhpelh der tawh si. Ni e, ka thinlung hian hlat a tum nasat apiangin a hnaih zual ni mai hian ka hre ṭhin....ka hmangaih Zuala ngei kha!!





(to be continue......)


Show post links
Top

[Ngaia]

THUTIAM
Chap~15




By : Tom Tom Putar






Chhungkaw thar min pe a, hlimna nasa tak kan Inchhungah a thlen a. A muthilh chhung reilo te pawh kan khua a har ngawih ngawih ṭhin. Bawihtei hi nuih a duh a, a nuih zawnga a biangsum lang kelh ṭhin te hi a hmuhnawm em em bawk. Ṭhenawm khawveng te lawm a hlawh a. Ka ngaih em avang hian ṭhenawm leka an pawm haw zawk pawhin ka umzui nghal thuai ṭhin.






Nidang ang erawh a nilo tlat thung. A ṭap belh em em a, a ṭe reng a. Thlan tla phunga ka awih pawhin a muhil ṭha duh reng reng lo. A muhil sek a, a harh leh nghal a ni deuh zel mai a. A khua a sik in ka hre bawk silo. A pi lah chawhmeh la in a kal a, a pi rawn haw hun chu ka nghakhlel takzet.






"Hmmm....hmm...khaih..khaih...bawihte... engnge i duh? I engnge na?" tih mawlh mawlh pahin ka kal kualpui lawp lawp a. Engmah a la sawi thei bawk silo. Min chhanna awmchhun chu ṭah a ni ngawt mai a. Ka mangang ru tawh takzet.






Phone ka ban thuai a, "Nu...i rawn haw dawn tawh em? Bawihtei hi a tlei duhlo reng reng" ka ti sawk sawk a. Ka nu in a rawn thlen ṭep thu a sawi chu ka thaw huai mai.






"Ka fanu duat....tete hne daih rawh aw?" tia ka barh ngial pawhin a tleipui chuang silo. Ka thaw a sa pap pap tawh a, a pi rawn haw nghakhlel takin kan In kawt aṭang chuan kan lo thlir reng a. A rawn kal hlawk hlawk ka hmuh rual chuan ka thaw huai mai.






"Bawihte...i lo nuamlo em ni?" a rawn ti nghal sawk sawk a. Inchhung lamah kan inzui lut a.






Ka nu chu a indahfel sawk sawk a, "Nakinah kan thliar fel mai dawn nia. Ka inbual nghal ange" tih zung zung pahin a che nghal sawk sawk a. A inbual reilo kher mai.






An pitu chuan an inpua a, a tlei duh chuang silo. "Mami...va mutpui chhin teh. Mut a chak a nilo maw?" a rawn ti ta ngawt a. Khum lamah chuan kan inzui lut a. Mut pahin hnute ka pe a, a ṭe rei lutuk love. Hnute hne chung chuan a muhil ta siai siai a.






Mahse, rei a nilo..a rawn phu dawrh a. A ṭe ṭhet ṭhet a. A thaw chu a hah hmel ta riau mai. "Nu...rawn kal vat rawh" ka ti nghal tuarh a. Ka nu chu hmanhmawh takin a rawn tlanlut nghal a. "Bawihte....ka fanu.." ka sawi nawk nawk a. A harh miahlo na a, a thaw erawh a hah deuh tlat in ka hria.






Ka nu chu a ding ngawi reng a, a en tlawk tlawk a. "Nu..." tih tuarh pahin ka sawi nawk a. "E...aw...bawihte..." tih pahin a rawn ṭhut hnaih thuai a. "Lo insiam rawh...damdawiin lamah kal ang" tih pahin a chhuak zui nghal a. "Hello....khawiah nge i awm? Rawn kal thuai teh" phone a hmang mawlh mawlh a.






Ka buai, ka chiai vek a. Engtia insiam tur nge pawh ka hrethiam lo. Ka fanu chu ka kalsan thui thei lo. Ka zuk sawi leh rih ṭhin. Ka nu chu a rawn lut zui thuai a. Thawmhnaw ken ṭul awm ang chu a rawn siam nghal mawlh mawlh a.






"Bawihte..ka fanu..." ka ṭap a ni ta ber e. Bawihtei lah a thaw hrâwk hrâwk a, ka en ngam tawh lo. "Nu...motor chu a va rawn thleng har ve?" ṭap ṭuau in ka ti zui a.






Motor a rawn thleng a, hmanhmawh takin kan chhuak nghal a. A pi in a pawm a, a harh tawh miahlo chuan min ti hrehawm zual a. Ka ṭap kawngtluan a ni ber e. A pi pawh a bâng chuang lo.






Damdawiin kan thleng a, Casualty ah kan lut nghal a. Min lo buaipui nghal sawk sawk a. Oxygen-an pe nghal chûk chûk a. Doctor chuan thil awmdan min zawt chîk viau bawk. "In naute hi a dinhmun a ṭha lo khawp mai" a rawn ti chiah chu ka ding khawng reng a. Bawihtei mu bêm chu ka thlir ngawih ngawih a.






Doctor-chuan uluk takin min vil reng a, tlai dar 4 vela kan lut kha tunah Zan dar 11 a ri tawh! Engmah hmasawnna hmuh tur a awm chuang lo. A ṭhalo tulh tulh ni mai hian ka hria a. A pi chuan a ṭhutchilh chawt a, kei chuan ka hnaih ngam tawh lo. Ka kal hlatsan thei chuang bawk silo.






A hma ang chiahin a rawn kaih leh a, Doctor leh Nurse te chuan an kil bial laih a. Kei chu ka awm hnai thei tawh lo, pawn bathlarah chuan ka ding a. Ka rilru in ka ṭawngṭai mawlh mawlh reng a. "Lalpa...khawngaih takin ka fanu hi tidam leh hram rawh. Lalpa...i kutah ka kawltir e" ka ti mawlh mawlh reng a. Engmah chham tur dang ka hre thui chuang bawk silo.







"Bawihte...ka phal lo... Bawihte....a pawi lutuk" ka nu ṭap ri râwih râwih chuan min ṭhâm vawt sung sung a. Mittui luang zawih zawih chungin ka pên lût chhat chhat a. Ka nu chuan ka fanu kut tereuhte chu a lo chelh ngar a. Doctor chuan a lo enkual zung zung a. Ka ding chawt a, ka en tlawk tlawk a.






"Ka pi...a rang em a ni. Kan chhan hman ngang lo a ni e" ka hma lawka Doctor thusawi chu ka hria, ka hria, ka hrechiang lutuk. Mahse, ka fanu a sawina anih erawh ka pawm miah lo thung.






"Bawihte...ka tunu duat te...a va pawi tak em..." ka nu ṭap ri chuan min ṭhâm nawn awn awn a. Ka kal hnai hret hret a, ka fanu bul chu ka thleng ta! Ka ṭhu hnawk a, Nurse chuan Bawihtei Oxygen hîp lai chu a phelh mawlh mawlh a. "A mamawh asin" ka ti thâm chhalh a. Ka fanu, mu ngawi reng chu ka en tlawk tlawk a.






"Mami....a natna kha a na em a ni. Thlamuang takin chawl rawh se" ka dâra rawn vawn pahin Doctor Malsawma chuan min rawn dinhnaih salh a. Ka en chho hâ a, "Ka pu....vawikhat chiah han ennawn leh hram teh" ka ti vawt raih a. Ka beiseina neih chhun tlêmte chu min tihsak ta chuang lo.






"Ka fanu....ka duat Bawihte....ka phal lo...ka phal lo..." tih mawlh mawlh pahin ka kuah vawng vawng a, ka ṭap chhuak ta hawm hawm a. Ka fanu biangah chuan ka fawp a, ka mittui far chuan a far fap fap a. "Bawihte....engtinnge i nu hi ka awm anga? Bawihte...ka fanu tereuhte..." ka tizui vawng vawng a.






Engkim min buaipui sak zung zung a. Ka nu leh Doctor Malsawma chu kilkhatah an ding dun a, an thusawi erawh hrelo mahila ka nu chuan inhru mawlh mawlh chungin Doctor thusawi a ngaithla ngun hle tih chu ka hria.






Damdawiin aṭanga kan chhuak chiah chu Henry-a chuan min lo kuah vat a, ka kuah thlawp a. "A awm tawh lo.... Bawihtei a awm tawh lo" ka ṭahkhum hawm hawm a. Henry-a chuan min kuah nghet salh a, "A pawi lutuk..." a lo tih ringawt pawh chuan min hnem takzet si.






"Bawihte....In kan thleng tawh dawn...tho rawh le" a pi chuan a tunu, a pawm lai chu a sawi nawk nawk a. "Bawihte...ka duhlai...tho rawh le" tih mawlh mawlh pahin Motor aṭang chuan a chhukpui a, Henry-a chuan min kuah a, kan inzui lut ta nghal a.






Bawihtei mu ngawi reng chu ka en thei tawh lo. Ka bawk thlawp a, ka kuah a, ka fawp vawng vawng a. "Bawihte...tho tawh rawh. I ril a ṭam tawh ang. Ka fanu duat...tho rawh le. I duh leh nuar la, i duh duh danin awm rawh...mawh...ka duat..." ka ti mawlh mawlh a. Mahse, a mu ngawi reng a, min chhâng tawh der silo






Kan chanchin hria apiang an rawn kal khawm a, min tawrhpui takzet tih pawh a langchiang hle. Dofky-i chu a rawn tlan lut hlawk hlawk a. Bawihtei chu a rawn kuah a, "A pawi lutuk...a pawi lutuk.." a rawn ti nghal mawlh mawlh a. "Ṭhiannu...min ngaidam rawh aw?" tih zui pahin min rawn kuah a, kan inpawm vawng vawng a. Engmah ka sawi thei lo, ka chhungril tawt up up chuan min dang bet tlat ni mai hian ka hria.






Zankhua in ka fanu chu ka au a, a pi lahin a sâwi a, a ko mawlh mawlh reng a. Mahse, min chhâng lova. A taksa dai diai bâk chu engmah chan kan nei lo. A bulah chuan ka mu a, hun reilo te chiah ka bulah a mu tawh dawn tih ka hriatchian em avangin thlahlel takin ka kuah vawng vawng a. A biangah ka chûl a, ka fawp ning thei lo.







Zing khua a rawn êng a, hnute a hnek hun tih hriat takin ka hnute a rawn ṭang leh ta âl âl a. Min menpuitu te pawh an thawm a reh raih mai. Khum mawng lamah ṭhiannu Dofky-i pawh a muthlu diar diar a. A pi pawh chhûn lamah a chau deuh ṭhin bawk nen, a lo ṭhu muhil sâk sâk a.






Thawm a reh ruih a, ka fanu hnute hne duh thawm lah hriat tur a awm lo. "Bawihte....Bawihte..." thâwmdîm takin ka au a. Min chhâng lova, hmelṭha takin a ngawi reng a. "Bawihte...tete i hne dawn lo em ni? I ril a ṭam tawh dawn em mai. Bawihte...min kalsan daih dawn anih pawhin in hne puar phawt la?" ka be mawlh mawlh a. Ka mittui far zung zung chu ka hru pah mawlh mawlh reng a. Dofky-i chuan min en reng a, a insût ri ve leh hrâih ṭhin bawk a.






"Duati...tho tawh ila? Eirawng te kan bawl leh anga..á pi bulah i lo mu leh hrih dawn em?" ka tizui leh mawlh mawlh a. "Ka fanu duatte...i va induh em em? Á nu in a koh mawlh mawlh che hi? Duati...thawh ila peih lo em ni?" tih pahin ka fanu biang vawt thler chu ka chûl heuh heuh a.






Mumang lamah pawh ka la suangtuah chhin ngai loh Bawihtei thlahna hunserh chu kan hmang zo chu a ni ta der mai si. Ka huphurh em em hun a thleng ta! Kuang mawi tak an siamsak chuan ka mitah mawina rêng a nei si lo. Bawihtei mutna bulah chuan an rawn hûng chu a ni ta mai si a.






"Bawihte...ka phal lo...min kalsan suh. Khawngaih takin lo meng leh rawh" ka ti mawlh mawlh a. Ka kuah a, ka fawp a. A biangah ka chûl a, "Duati... ka fanu.. bawihte..." ṭah rîk hawm hawm ka châk a, ka thei silo.






Ka nu chuan a rawn hnaih a, "Bawihte...niminah khan Bakilh mawi deuh ka rawn hawn che asin. I mawi dawn tehreng nen..." tih pahin a rawn phawrh a, a kilh tir mawlh mawlh a. "I va mawi tak em Bawihte.." tih zui pahin a kuah vawng vawng a.






Kuangah chuan an dah ta....ka phal thei lo. "Bawihte...khatah khan min awmsan daih ang maw? Duati....nangmahin i mu ngam dawn em ni? A thim dawn lutuk ania...lokal daih rawh" tih pahin ka kûn hniam a, ka fawp mawlh mawlh a.






Ka lu a rawn hai muai muai a, engmah ka hmufiah tawh lo. Ka inthing nawk nawk na a, a rawn thim mup tih chu ka hre riai ruai.






Ka harh leh chuan min lo ṭhut hual tiau a. Dofky-i chuan tui in min lo dep mawlh mawlh a. A ṭhen in ka kut leh ke te an lo hmet mawlh mawlh bawk a. Ka harhchian deuh hnu chuan Bawihtei thlalakpui tur chuan min hruaichhuak a, ka thinlung chhungril ber ah hian min vit ngawr ngawr ni berin ka hria.







Thlan lamah kal a, ka fanu chu thlahliam duh viau mahila keimah chu ka diklo hle tih an hriat ang bawkin keipawh ka inhria. "Bawihte....mangṭha aw? Ka ngai dawn lutuk che...ka hmangaih che ka fanu...." tih mawlh mawlh pahin ka thlir reng a. "Ka pa....Bawihtei a lokal ania, lo duat rawh aw?" ka tizui leh vawng vawng a. A hma ang bawkin ka lu a rawn hai chhulh a, engmah ka hrezui tawh lo.






Kan In chhung chu a ruak vek a, engkim mai hi a ṭhing ruap ni mai hian ka hria. Kan khawhar hlau taka min rawn lenpuitute chu ka hmu peih lova. Min hnem tum taka min rawn hnaih te phei chu melh pawh ka melh peih hek lo. Pathian thu hmanga min rawn ṭhutpui a, titi rawn vawrh te ngat phei chu an thusawi ka ngaithla chhin lo hrim hrim bawk.






Pathian hnenah ka ṭawngṭai a, ka ko lawm lawm a. Ka thinlung chhungril ber aṭangin ka au takzet bawk. Mahse, min chhâng chuang lova. Ka ṭawngṭaina kha chhângtu tur awm nise thinlung chhungril ber aṭanga ṭawngṭaina kha chhânin a awm ngei ang. Mahse, min chhâng silo.






Kan ṭhenawm lawka awm, Nu Tluangpuii chuan min rawn ṭhut hnaih a, A fapa boral dan te, a natna tawh dan te chu a rawn sawi mawlh mawlh a. Ka khawngaih lo a ni lo. Ka khawngaihin ka lainat lutuk. Mahse, min hnem mawlh silo. Ka awmdan ah a hrethiam ni fa hmiang, ka nu te ho ṭhutna lamah chuan min in sawnsan zui leh thuai a.






Dofky-i leh Henry-a chu an rawn inzui phei rawl rawl a. Dofky-i chu Khum ah chuan a rawn lawnkai zui ve nghal a, Henry-a erawh Khum bula ṭhutna ah chuan a ṭhu nghal thung a. Ka rilṭam leh ṭam loh te, mamawh ka neih leh neih loh te min zawt zung zung a. Ka ril a ṭam lova, engmah mamawh leh duh ka nei hek lo. Bawihtei chauh lo kha chu...






Bawihtei awmdan te, a chanchin te chu min zawt a, ka sawi mawlh mawlh a. Ka sawi kham thei lo. Ka ṭhiante pahnih chuan ngun takin min ngaihthlak sak a. A chang leh ṭap pûr in ka sawi a, ngun takin min en kar a. Min hnemna thu engmah an sawi lova, uluk taka min ngaihthlak sak erawh chuan min hnem em em zawk lawi si. Bawihtei chanchin lo chu ka ngaithla peih lova, a hmel mitthla reng chunga a chanchin sawi reng chu ka duh bawk.






Ṭhian ṭha te'n kan khawhar hlau takin min riahpui ṭhap a, Henry-a pawh a rawn riak ve a. Ka bulah Dofky-i pawh a riak tel ve bawk. Mahse, chung zawng zawng chuan ka khawharna leh lunglenna min hnem zo mawlh silo.






Khawpui ri dur dur chu ka ngaithla reng a. Rei a ni lo, ruah a rawn tla ta fuap fuap a. Ka mutna aṭang chuan thawm dim zetin ka tho chhuak a. Tukverh bulah chuan ka ding a, kawlphe zuai zuai kara ruah tla ṭan phoh phoh chu ka thlir reng a. A rawn sur ta nge nge e. Rang takin Bawihtei mutna chu ka en vat a, Dofky-i lo mu kawisawi zet bak ka hmu silo.






Tukverh aṭangin pawnlam chu ka thlir reng a. "Bawihte...i hlau em? A vawt i ti em? Ka duat...min tawk lovin i muthilh theih loh kha.." ka ti mawlh mawlh a. Ka biangah mittui a rawn luang zung zung bawk a.






Ka hawi kual a, an mutui hlawm viau in ka hria. Thawm dîm takin ka pên phei chhat chhat a, Nihliap ka ban a, ka thâwm an hriat ka hlauh em avang chuan zâwi thei ang berin Kawngka chu ka hawng a. Hmanhmawh takin Thlanmual lam pan chuan ka kal ta sawk sawk a.






Ka pa thlan bulah an phûm tih ka hriat sa avangin ka hmu har hran lo. Bawihtei thlan chungah chuan ka ṭhu hnawk a.. "Bawihte....Bawihte....á nu a lokal tawh e. Lo hlau miah suh aw?" tih mawlh mawlh pahin ka kut chuan Lei vûng tharlâm tak chu ka hâi zui nghal mawlh mawlh a.






Ruah lah chu a rawn baw zui hawk a, a tam kher mai. Nihliap chuan a theih ang angin Bawihtei nan thei tur nia ka hriat chu ka dang ṭang ṭang a. Ka au tuarh tuarh bawk a, ka thil hâi lai lah ka chawl chuang hek lo. "Bawihte....lo tuar ṭang ṭang rawh aw? Ka theihtawp ka chhuah ania" ka ti mawlh mawlh reng a.






Ka kuta rawn man chat tu chu ka en vat a. "Henry..." tih pahin ka kuah chawt a. "Min rawn tihpui dawn em ni?" tih pahin ka thlah a, a hma ang bawkin Lei chu ka hai zui leh nghal a. "A tawk...a tawk tawh e" tih pahin min rawn chelh a. Min rawn kuah zui leh nghal a, ka ṭap hlawp hlawp reng a. Min kuah pahin, "Min en teh...min en lawk teh" tih pahin ka biangah chuan a vuan a.






Ka en a, a light ken êng chuan a hmai a kah deuh avangin ka hmuchiang hle bawk. "I haw tawh ang. Bawihtei chu hmun nuam deuhah a awm tawh alawm. Min ngailo em mai, hawsan hrih ang...lokal rawh le" a ti mawlh mawlh a. "Ka duhlo...a rilṭam tawh dawn lutuk" ṭap ṭuau chungin ka ti vat a. Ṭhut ka tum leh chu nghet zetin min chelh a. A âwmah min pawm bet a, a pangti lum hem hem pawh chu kan awmna hmun vawt vurah chuan a chiang lehzual viau in ka hria.






"Hlimi...a tawk tawh e. Helai hmuna kan awm reng chuan In lama i nu mangang taka awm saw i khawngaihlo em ni?" a rawn tichiah chu ka meng deuh kâwk a. In ah ka awm lo tih an hria tih ka hriat rual chuan ka nu min ngaihtuah dan tur te ka suangtuah nghal zung zung a. Hmanhmawh takin kan inzui haw ta hlawk hlawk a. Kawngah chuan vawikhatmah min be lova, keipawhin vawikhatmah ka be hek lo.






Ṭhiante rawn riakho chu an lo tho vek a, min zawn tumin an lo insiam vel mek tih pawh an awmdanah chuan ka hai lo. Ka nu chuan min rawn pan hnai a, min rawn kuah a. "Mami..." tih bak a sawi thei lo. Kan pahnih chuan kan ṭap dun hawm hawm a.






Kan intihfel meuh chuan zing dar 2 a ri ṭep mai. Dofky-i leh ka nu chuan min mutpui a, ka nu chuan min kuah pahin ka rilru tihnat hlau tak chungin Bawihtei min kalsan chu ka pawm thiam theih dan tur berin min hrilh melh melh reng a.






Ka ngawi vang vang a, "Ka nu, Bawihtei kha eng natna nge an tih?" zâwi sap, fiah kâk si chuan ka ti a. Ka nu hnenah engkim an hrilh ka ring bawk.






Ka nu chu a thaw halh a, "Doctor kha chuan Lungpawp a ang atia. A piantirh aṭanga a neih tawh anih a ring bawk a..." a ti fân raih a. Ka ngawi reng a, ka ngaihtuahna a kal ding hle bawk. "A phu hma thei lutuk te, thawm na deuh a ngai thei lo lutuk te kha khatiang vang kha a lo ni dawn anih hi..." a rawn tih zawm leh a.






Ka ngaihtuah lêt vang vang a, a ni thei dawna hriatna ka nei ta chiang hle bawk. Engmah hlauhthawnna kan lo nei lo te kha a mak zawk. Kan ṭhenawmnu lah khan an fanu dawih thei lutuk te, thil hotete ah a phut zawk zawk ṭhin thu te kha a sawi ve ṭhin tho a. 'An lian deuh a, a reh ve mai' a tih ah khan kan lo innghat thui lutuk zawk nge ni?






Engkim maiah chuan ka indem fai vek a, hrehawm tihna in ka khat vek a ni ber. Ka fanu kha keimahni mawl vang leh ngaihven loh vanga boral ni maiin ka hre ber.






Ka hmangaih, ka fanu duat tel lova ka zan hmasa ber chu muthilhsan tum chuan ka chhîng vang vang a. Mahse, a har a ni. A mutna ṭhin chu ka tawk reng a. A kut tereuhte ka chelh reng ṭhin kha ka zawng a, ka dapkual a. Mahse, engmah a awm silo. Ka ngai takzet a ni.





(to be continue.........)


Show post links
Top

[Ngaia]

THUTIAM
Chap~16



By : Tom Tom Putara







Nitinin hun khawharthlak tak nen Zing Ni chhuak kan hmachhawn a. Nilengin Bawihtei nui hmel hmuh leh beiseiin Ni kan chhiar fân rei fova. Zantin mittui nen a hlimthla kan thlir fo ṭhin.






Pathianni apiangin Bawihtei thlanah hun ka hmang a. Pangpar chi hrang hrang ka phun a, ka pa thlan ah pawh pangpar ka phun kual ve diah tho.






Thlan khawhar chu ka tan chuan lunglen hnemna hmun a chang a. A nui ri leh a ṭap ri chu chulai hmunah chuan a chiang zual ṭhin. Ka ṭhutna hnuaiah chuan ka hmangaih chuan mutmu a tuah a, tui takin a mu siai siai tih hre mahila tihharh ka hlau tawh lova. A harh ngei theih nan aw râwl tawp tawpa ka auh vak vak ṭum lah a tam narawh e. Mahse, ngawi reng leh reh tlawk tlawk bakin min chhâng ve silo.






Pathianni dang ang bawkin mi Chawhnu Inkhawm rehlai chuhin hmanhmawh takin ka insiam mawlh mawlh a. Ka nu chuan ka kalna tur a hrechiang a, min zawt hran lem lo. "Mami...ka kal ania" tih pahin Inkhawm turin min chhuahsan a. Keipawh ka insiam zova, ka fanu in min lo ngahna lam pan chuan hmanhmawh takin ka kalzui ve nghal a.






"Bawihte...i khua a lo har tawh em? Ka rawn kal hma thei ṭhin lova. I ril a lo ṭam tawh em?" ka ti mawlh mawlh a. A Thlan chunga hnim ṭo te reuh te te chu ka pawtfai zui mawlh mawlh a.






"Bawihte....naktuk hi i Birthday ania. Kawr mawi tawk ka lei ang che aw? I nu Sangpuii hnenah Cake kan order bawk anga. Eng anga siam nge i duh ang? E....ka hria..pink a nalh ang..." ka be mawlh mawlh a, hnim chu ka pawtfai pah reng bawk a.






Ka ṭhu a, eitur ka ken chu ka hawng a. Ka ei mawlh mawlh a. A khât tawkin ka chhang ei chu ka pawt thla hlek a, Bawihtei Thlanah chuan ka thehthla leh zauh ṭhin a. Bawihtei rilṭam tur chu ka ngai ngam ngang lo.






Thlifim a thaw heuh heuh reng a, ka ṭhutna aṭanga hmun hla taka Tlang lang paw ruih chu ka thlir vang vang a. "Bawihte...ih maw..i pa Henry-a khan i thlalak nalh deuh deuhin a siam a. Frame-nalh deuhin a rawn siam thlap bawk a. Kan mutna bulah khan ka târ a, ka en reng ṭhin che asin. Chuan...i nute Dofky-i nen kha chuan kan inkawm ngai vak tawh lo. Kei chuan kawm ka duh lutuk a, min kawm peih lo aniang....a rawn leng khât lutuk a. I pi bak chu i pa Henry-a ani deuh mai ka kawm ṭhin..." keima hriat tawk lek chuan ka phun zui mawlh mawlh a.






Ka piah deuh aṭanga aw rawn thian deuh kharh chu ka hria a, rang takin ka en vat a. Nui sâng chungin Henry-a chuan min rawn pan phei a. "Ka rawn kal ve duh a...a pawi lo ang chu maw?" a rawn tidam dap a.






"Lokal rawh...pawi love...kawm tur ka lo duh lutuk a. Bawihtei kiangah nangmah chiah ṭhian ka neih thu ka lo sawi mek asin " ka lo ti vat a. "Chu...min lo rêl hrep a ni maw?" tih pahin ka bulah chuan a rawn ṭhu ve nghal a.






Eitur a rawn khâi bâwr laih bawk a, min melh zeuh pah chuan, "I duh duh hi ei rawh. Hmawmsawm hi ka ei ngailo lutuk a, i duhzawng a ni nge phei chu ka hre miah lo" a ti zui mawlh mawlh a.






Ka nui sak a, "Ka lo ei tawh tho na a, ka ei vek tho ang. A tui hmel hlawm em mai" ka lo ti vat a. Kan pahnih chuan kan nui hak hak a.






Bawihtei ka pâi lai te, ka neih lai leh a hnulam thlengin ka sawi thar leh mawlh mawlh a. Nidangah pawh chu thu chu ka hrilh fo ṭhin. A nin viau ka rin nen uluk takin min ngaihthlak sak vek zel a. A khât tawkin Bawihtei a pawm ve ṭhin lai te, a hmelṭhat zia te, a duhawmzia leh a ngaihzia te a lo sawi ve leh ṭhin bawk a. Henry-a bul anga Bawihtei chanchin sawichhuah rengna hi ka neihloh avangin a bula ka awm hi chuan ka thawl huai in ka hre ṭhin.






Ka kut chu a rawn chelh a, ngawi rengin ka lo vuan ve ngawt bawk a. A hmer leh salh ṭhin a, engmah phei chu a sawi hran lem lo. Ka ngheng a, a hma ang thovin ka fanu chanchin chu ka sawi mawlh mawlh reng a. Eitur a rawn ken chu kan ei pah reng a, ka tihdanin a thil ei apiang chu Bawihtei a pe ṭhen ve zel bawk a. Engmah ka sawilo na a, engkim a man thiam zel ni mai hian ka hria.






"Hlimi...." a ngawi zui leh daih a. A Cigarette-a phawrh a, a ṭankai a, kan thlang lam hawi chung chuan a sî zui vang vang a. A rawn sawizawm mai dawn emaw ka tih avangin ka lo thlêk sek a. "I ngawi leh daih bawk sia" tih pahin ka nui hak a.






Min en a, a nui suk a. "Min duh em?" tih pahin ka mitah tak chuan min en ta kal a. "Eng maw?" ka ti ban chat a. A thusawi chu ka hrelo a nilo, ka hrechiang em em thung. Min la en reng a, ka kûn ta daih a. Muangchangin min rawn kuai dâk a, "Min duh em ka ti..." a rawn ti zui leh a.






Ka hawisawn a, ka ngawi reng a. A awmdan leh chezia te, a ṭawngkam leh ka laka a khawsa zia ah chuan eng emaw tak a awm anih ring fo mahila he thu hi ka hnenah a sawi erawh ka ring pha ngailo thung!






"Min duh leh duhloh hriat ka duh a ni" a fiamthu lo tih hriat zetin a rawn ti fiah leh kâk a. Min en reng tih ka hai lo, en lêt ve turin ka huaisenna in a tlin lo thung.






Ka kut chuan Lei chu ka thâi let kual sek a. Ka chhânna a nghak reng tih ka hria. Mahse, ka hrawk chu a phui vek ni mai hian ka hria. Ka ṭawngchhuak thei mai hek lo, ka aw then kharh pahin ka melh ralh a, mitmeng fiah kâk in min lo en reng a. Ka hawisawn rang kher mai. "Henry...kei aia ṭha an tam lutuk" ka ti ta ringawt a.






Ka kut a rawn vuan a, a hmer leh salh a. "Ka tan an awm lo te pawh a ni mahna.." a ti leh ringawt a. Chhân mai dan tur ka vân ru viau bawk. "Duh tlâk ka ni em ni?" ka ti zâwi sap a. Ka zak ru viau bawk, keimah chu ka inhrechiang em em bawk si. Ka bul ami chu ka hrechiang ve thawkhat tawh chuan ka hre bawk a. Kei, nuthlawi, fa chân avanga indawmkun mek leh rualpawl zo tawh lo hian ka phu loh lutuk tih ka hai lo nasa mai bawk si.






"Ka duh che a, min duh ve leh ve loh ka zawt mek che" a rawn tih leh tak zelah phei chuan chhânna pek tur ka haihchham viau a, ka lawm ru em em lawi si.






"Henry....thudik tak ka sawi anga. I thutlukna erawh ka sawi phâk a ni lo thung" ka ti hmasa te te a. Min en kar a, a bu deuh nghat a. Ka thaw deuh halh a, "Tunah tak hi chuan chutiang zawngin ka en miahlo che. Ka tan ṭhian ṭha tak i ni. Ka hnâwl che a, ka duhlo che tihna erawh a nilo. Ka ngaina takzet che" ka tizui mawlh mawlh a. Ka thaw deuh huai nghe nghe.






"I thusawi awmzia ka hrethiam famkim chiah lo deuh" tih pahin min en reng a. "Mahse, lawmna tur tam tak ka nei chuan ka hria" a rawn tihzawm leh a.






"Ni e, tun dinhmunah chuan ka chhâng thei lo che ni rawh se. Ka dinhmun hre vek chunga tuna i rilru ang hi ila pu zui reng anih erawh chuan engkim a la danglam ve thei bawk" ka tihzui ve leh lai chuan a lo nui suk a. Ka kutah a rawn vuan a, a hmer leh nghal salh bawk a. "Ka dinhmun harsat zia chu min hriatpui ber tu i nih ka ring" ka ti chuai raih a.






Min rawn nghawk salh a, "Ka hria alawm...i inpeih hun ka lo nghak reng ang" a ti dam dap a. "Tirawh...kan haw tawh dawn em ni ang? Rin aiin a tlai tawh nek ania" tih zui daih pahin a Sana a bih zuk a. "Nia...ka duh ai hian ka awm rei ziah" ka lo ti ve thuai a. Kan tho rual nghal ṭhawt a, kan in en a, kan in nuih ringawt bawk a. Ka in bêngfai zui nghal thak thak a.






A kut a rawn phar chhuak a, ka lo chelh thuai a. "Bawihte....ka hawsan leh hrih ang che aw?" ti rilru niap niap chung chuan min kaitu chu ka zui ta nghal a.






Kan In bul kan thleng a, "I rawn lut pêng dawn lo em ni?" tih pahin ka chhuk nghal zat a. Min en reng a, a nui var var a. "I phal tak leh zanah ka rawn leng dawn nia" tih pahin min siai zeuh a. Nuih sak pahin ka chûm taih a, "Phal lutuk e..." ka lo ti sam êt a. "Anih...ka phei ange. Kan inbe dawn nia" tih pahin ka biangah a rawn piai leh zeuh a, "Awle...mi nghal pa..." tih pahin ka nui sêih a, hlim hmel pu zetin a tlan chhuak zui ta nghal a.






In ka lut chiah chu ka hmelhriat loh pa hmel fel tak, pa te lam deuh leh ka nu hi an lo nui hak hak a. "Mami..i lo haw tawh maw? Hetah rawn ṭhu ve teh" ka nu chuan a lo ti sawk sawk a. "I pa Biaka, i pa ṭhian hlui anih hi" a bul lawka ṭhu chu min hmelhriattir nghal zung zung a.






"E...khai....lo in chibai teh ang. I tetlai ti ila, kum 5 vel i nihlai kha ka hmuh hnuhnun ber che ania. I lo lian tawh hle mai. I hmel lah chu a ṭha em em mai bawk si a" tih pahin a ṭhutna aṭang chuan a lo tho chhuak vat a.







"Ka lawm e" zak ru deuh tak chuan ka ti thla ngawt a. Kan inchibai zawh chuan an ṭhutna hmachhawn zawng chuan ka ṭhu ve nghal zat a. "Thlan lamah i kal a ni maw? I nu in a lo sawi a..." tih pahin nui sâng chungin min en reng a.






"Nia..." ka ti ringawt a. Pa Biaka bawk chuan, "Thlanmual kal te chu sim daih rawh. An sual em mai, biak mawlh mawlh pawhin an ngawi reng zel a..." a rawn ti fiamthu zui a. Ka lo nui tawi tak thung a. Ka dinhmun a hrethiamlo hle niin ka ngai nghal hmak bawk.






"Mami....i pa Biaka hi a khawngaihthlak asin. A fate pathum ngawt a chân a. I pa nen pawh khan 'va râl ve tur a ni' kan ti fo ṭhin a. Mahse, eng eng emaw buaina kan nei chho zut a. I pa te accident chho nen, khata ṭang phei kha chuan khawiah mah kal chhuak thei kan ni ta si lova..." a lo ti zung zung a.






"Ni e, intlawh zung zung dawn pawhin lam a hla tham a. A harsa ve ṭhin bawk a ni. Ṭhianpa boral pawh kha ka hre thuai maw le. Nu ber lo hrisel loh zual lai a lo ni bawk nen...keini pawh kan duh hunah kan rawn kal theih chuan miah loh kha..." Pa Biaka chuan a lo tidam dap a.






"Nu...thingpui in lo in tawh em?" ka lo ti vat a. "Han lum rawh...thingpui te chu in tawh a awm hlei nem..." tlangnel takin Pa Biaka chuan a lo ti thuai a. Ka nu pawhin, "Ni e, tui deuh khan han lum rawh" alo ti zui ve vat a. Thingpui lum tur chuan ka thawhsan zui nghal a.






Ka nu leh Pa Biaka chu an inkâwm bawrh bawrh a. Sawi tur an ngah dun viau mai. A chang leh an nui leh bâwk bâwk ṭhin bawk a. Thingpui ka pek hnu chuan pindan lamah ka luhsan zui nghal a.






Khumah chuan ka ṭhu hnawk a, ka tho leh thuai a. Bawihtei thawmhnaw bawm chu ka hâi rawk rawk a. A thawmhnaw chu ka phawrh a, Khumah chuan ka dahkhawm a. Ka ṭah a chhuak, ka ṭap thei bawk silo. "Bawihte....min ngai ve miahlo em ni? Engatinge i reh vung vung a? Á pu in a lo duat che em? In inhre ve ang tiraw?" keima hriat tawk lek chuan ka phun mawlh mawlh a. A boral Nia a thawmhnaw hak ka thlep fel leh chiah chu dan rual lohin ka biangah mittui a rawn luang zawih zawih a. Ka pawm a, sûkfai pawh ka phal loh ngei kha a ni. Bawihtei rim a la nam chem chem nia.






"Bawihte...ka ngai lutuk che. I rimtui lutuk" ka tichhuak hawk a. Khumah chuan ka bawk a, ka ṭap ri an hriat ka hlau bawk si. Ka tâwt up up a ni ber e. Lukham hnuaia Bawihtei Sam ka ṭawnna ṭhin chu ka dap leh nghal a. A Sam tlêm a la awm avanga dahṭha leh roh em em ka ni bawk. Ka en tlawk tlawk a, "Bawihte....i tel lo hian i nu hian engmah chakna ka neilo anih hi... Ka ngai lutuk che. Vawikhat chiah pawm leh vawng vawng che ka chak takzet asin" ka tizui leh vawng vawng a.






Pa Biaka haw hnu chuan ka nu chu a rawn lut a, ka lo muhil lek lek hman a. Min rawn sawiharh a, chaw ei turin ka thochhuak zui ve nghal a.






Zan boruak mawlh hian ka khawharna a belhchhah ṭhin. Ka nu chu TV en in a la meng a, kei erawh Khumah ka mu tawh thung. Kawngka kik thawm chu ka nu in a chhâwn vat a, "Mami...rawn tho rawh. I ṭhianpa a rawn leng ania" a rawn tizui lâng lâng a. Henry-a anih ka ring bawk.






Ka tho chhuak a, min lo nuih suk a. A bulah chuan ṭhuhmun ka rem ve nghal a. Ka nu nen pawh an in kawmngeih tawh bawk a. An infiam bawrh bawrh bawk a. "E taka Hlimi, ka phone chhia ka siamṭhat tir a. Thlalak i duh deuh deuh tur a awm nual asin" a rawn ti chu ka ngaihven rang kher mai.






Phone chu min pe a, rang takin ka ban nghal a. Thlalak, Bawihtei thlalak ngei mai chu a lo awm nual mai. Henry-a hian a awm in a pawm ve nual hman a. Kan Ina a rawn len ṭumin thla a lo laksak nual anih hi. "Ka kuthlei thil tih anih kha" inthlahrun hmel zetin a rawn ti deuh sup a.






Nuih sak pahin, "I kut a lo hlei lovang tih ka hlau..min lo thawn vek rawh aw?" tih pahin phone chu ka pe let a. Ka nu lah chuan a lo ngaihven nasa mai. "Khawimaw....Bawihtei chu ka lo en ve teh ang" alo ti thuai a. Henry-a chuan a entir nghal zung zung a.






"Awiii....Bawihtei hmelṭhat zia hi...enteh u, hetah hian engnge a en ang le? A nuih a zat hmel bawk sia" tih mawlh mawlh pahin ka nu chuan phone chu a rawn lek phei va va a. A hmaa ka en hnu vek tawh ni mah se phûr takin ka en leh tho. "Ka seh nawk nawk châk...." nui sak chunga ka tihrual chuan Thlan ah, Lei hnuai thimah a awm tawh tih chu ka thinlungah a rawn ri nawn nghal awn awn lawi a.






Ka pindan lamah ka tlanlut a, Khumah chuan ka bawk thlawp a. "Bawihte...ka fanu...ka ngaih che hi a bâng dawn lo anih hi..." ka insût hlawp hlawp a. Rang takin ka nu chuan min rawn ûmzui a. "Mami...a hunlo em mai. In sûm rawh khai...i ṭhianpa a hawihai lutuk alawm" a rawn ti nghal mawlh mawlh a.






Ni dawn tak e...ka tho thuai a. Ka inhrufai mawlh mawlh a. Ka nu chhuah hnu lawk chuan ka chhuak phei zui ve nghal a. Henry-a chuan a phone a lo hmet mawlh mawlh a. A bula ṭhut pah chuan zâwi sapin, "Ka tihpalh lutuk aw?" ka ti nghal vat a.






"Lo inkawm rawh u. Bible chhiar te ka duh riau. Ka chhiar rei hlei thei tawh lo. Zan men te hi ka theilo sawt khawp a ni" tih mawlh mawlh pahin a pindan lamah chuan min luhsan zui ta nghal a.






Kan ngawidun vang vang a, "Thingpui in ang aw?" tiin bul ka han ṭan ta ringawt a. A lo bu nghat a, thingpui siam tur chuan ka thawhsan nghal a. Ka ding deuh dat a, "A thlum in nge a hâng in i duh?" tih pahin ka melh pah ralh a.






"A hâng te chu patling in chi alawm. Keini ang te chuan thlum ver vawr kan la ngaina zawk" nuih hak hak pahin a rawn ti fiamthu zui a. "I siamdan ang ang kha a ni mai e" rawn tizui mah se a thlum a âwn zawk tih ka hrethiam ve tho.





Thingpui ka pe a, a bulah chuan ka ṭhu zui nghal a. "Tidaih ila in unau engzatnge in nih? Ka la zawt ngai miah lo che in ka hria" ka ti nghal zat a.






Thingpui lem khalh pah chuan, "Pangnga kan nia, ka naupang ber a. Kan unau upa pathum hi hmeichhia an nia, pasal an nei vek tawh a. Ka u chiah mipa hian thla thar ah hian a nei ve ang" a rawn ti nghal zung zung a. Nui suk chungin, "Kei hian nakum kum tawp lama neih ka tum deuh bawk a" a rawn ti fiamthu zui zat a.






Nuih hak pahin, "Awii...i zaklo e..naupang ila nih kha.." ka lo ti fiamthu thuai a. A nui ve ringawt bawk a, "Min sawm ve ang che" ka tizui vat a.






Min rawn melh zuk a, "Nang ber i rawn kal loh te chuan dinpui tur ka nei si nang..." a rawn ti khauh a. "Awii...i over em mai a. Keini ang nuthlawi nilo dinpui tur an tam dawn lutuk" nui rah rah chungin ka lo ti thuai a.






"Nuthlawi title hi nalh ka ti thar viau asin" tih pahin min nuih suk a. Ka chûm taih a, "Sual suh aw?" ka lo ti vat a. Kan pahnih chuan kan nui dun hak hak a.






"E taka, karleh lam chu lêng khawthawng mai mai ila...kan ṭhianpa te In ah chaw kan ei nghal anga. Hetia in dawmkun reng chu a ṭha ka ti lo" tih pahin ka ngaihdan hriat tum zetin min en reng a.






"Aaaa....khawiahmah hian kal ka châk lo. Bawihtei hnaih ah, a thlanah hian ka tlei ber maiin ka hria" tih pahin ka melh ralh a.






"Lo thinrim lo la..." a ti zuk a. Engmah dang sawilo chuan a ngawi zui leh daih a. Ka melh zeuh rual chuan, "Englo...ih....engmah hi a danglam tawh dawn lova. I fanu hi theihnghih pawh tum la i thei chuang hek lovang. Mahse, hetia ṭhut kun reng a, a ṭhalo zawnga ngaihtuahna sên reng hi a fuh lo ka ti. In tichak leh hram rawh...harsatna tam tak i lo hmachhawn tawh a, i paltlang tawh a.." a rawn tizui mawlh mawlh a. Inthlahrung takin min hrilh tih chu a awmdanah chuan ka hrethiam chiang viau bawk.





Ka nui sak a, "Ni e, a dik alawm. Engpawh nise a hun te thleng phawt sela kan tum dawn nia" ka ti chu mak tih hmel zetin min en a, ngawi rengin a nui deuh suk bawk a. "Engnge min en reng? Ka zak ve thei tho ania" tih pahin ka nghawk salh a.






"I duhawm em a..." tih pahin ka biangah a rawn piai a, rawn piai nawn leh a tum chu ka lo indang a, a kut paihsawn pah chuan, "I kut a hlei riau" awki dîm vak lo chuan ka tizui zat a. Ka nu chuan a hriatphak ngei pawh ka ring. A ṭhu ṭha rang kher mai, ka inthiamlo hnuhnawh leh ang reng viau bawk.





"Thingpui in leh ang hmiang" ka sawi tur ber hre lo leh inthiam lo deuh bawk chuan ka tizui daih a. Mahse, a lu a lo thing ringawt a. Nuam lo ka tizual sauh bawk a. Mahse, engtia han tihzui dan vak erawh ka thiam chuang lo.






"Ka phei zâwk ange, rin aiin a lo tlai tawh.." a rawn tibung nghut a. "Hmm...i hmanhmawh teh thut bawk sia" tih pahin thawh tuma a insiamṭha sat sat lai chu ka en zeuh a. "Nge, lênkawina tur dang ila nei zawk nge?" nui sen sen chung chuan ka tizui leh a.






A tho zui nghal a, thawh pah chuan, "Nei hran love...a tlai tawh alawm" a ti leh ringawt a. Ngawi rengin ka tho a, ka zui nghal ve ta ringawt a. Kawngka bul thleng chuan ka thlah a, a awmdan leh khawsa zia chu ka hrethiam chiah lo na a, a lungawilo viau chuan ka hria. Mahse, han thinrim haw tauh bûr bûr nachhan tur ni chuan ka hrechiah bik chuang lo.






Kawngka ka kalh fel a, Inchhung hnawk ka hawl kual nghal zung zung a. Khumah chuan ka lawnkai a, ka hmangaih leh ngaih em em, ka bawihtei nena kan mutna Khum ruak hiai chu ka bêl leh ta!!






A khât tawkin phone ka melh leh zeuh ṭhin a. Nidangah chuan a rawn lên reng rengin In a thlen hunah a rawn sawi ngei ngei ṭhin. Zanin erawh a reh raih mai. Biak hmasak erawh ka tum bik miah lo thung. Sana ka en a, a haw tlang anih chuan In a thlen a hun fe tawh tih pawh ka hrechiang bawk.





Ka ngaihtuah lêt a, ka thiam loh a awm lem in ka hrelo. Kut hlei zâwnga infiam kher kha ka duhlo a ni ve mai. A tih ang khan awm zel ila chuan min zuam zui viau mai thei asin.





Mu chungin hla ka ngaithla a. Ka mit ka chhîng vang vang a. Chhungkim a hun kan hman hunlai te mitthla ah a rawn inlar thar zut zut a. Ka pa in, "Bawihi..." ti ngei maia min kohna ri te chu tun hun ang maiin ka bengah chuan a chiang hle bawk.






Aizawl kan kal tur ka insiam vel lai te, ka pa damlo chaklo tak chung ka kalsan lai te...min ngaih em em laia tun thlenga ka nun vaw chhetu ka tawn avanga ka pa min ngaihna aw rawl pawh ka bengkhawn ṭhat duhloh lai te chu mittui luang ngiai ngiai chung chuan ka suangtuah thar zel a.






Kan kal dawn zana ka nu thu min chah chuan ka ngaihtuahna a rawn luah thar hle bawk. Mahse, ka nu in min hrilh mawlh mawlh lai khan ka ṭhian ṭha ber nia ka chhâl Dofky-i khan hetiang ang rilru hi a pu ang tih ka ring pha hek lo.






Zuala bawkin hmun a rawn chang a. Kan intawn tirh aṭanga ka mipa duh leh hmangaih ngawih ngawih ni bik tur khan eng ang mipa chiah nge a nih? Ka thianghlimna zawng zawng min laksak a. Chumi ah chuan tawp mai sela chuan ka insit viau rualin ka tuar thei tho ngei ang. Mahse, ka hmangaih Bawihtei khan a thihni thlengin a pa hmel a hmu ve silo. Ka na thar leh ngawih ngawih ṭhin.






Bawihtei nena kan hun hmandan te, nileng maia kan buai dun ve ṭhin dan te chu ka mitthla ah a rawn lang thar zut zut a. Tunah chuan Lei hrehawm kalsanin Pa angchhungah hlim takin a lêng tawh si a. "Bawihte....i nu hi min ngai ve miah lo em ni? I awmna hmun kha a nuam viau em ni? Min hmuh loh hleka nuar fo ṭhin kha i va tlei em em ve?" tih mawlh mawlh erawh ka sim thei chuang lo chu anih hi maw...






Dofky-i bawk ka rilru ah a rawn lang thar a. Kan pahnih khan tumah dang ngai lovin kan hlimdun ṭhin asin. Kan rilru, duhzawng, ngainat leh huat thlengin a in ang em em a. Ka rilru natna chu a natna, a hlimna chu ka tan pawh lawmna a ni ṭhin. Mahse, tunah chuan engkim a danglam zo tawh a. Kan inhmu ngai tawh lova, phone ah takngial pawh kan inbe ngai tawh hek lo.






Sana ka en a, zing dar 2 a lo ri leh der tawh! Mut ka kham loh theihzia ka ngaihtuah chhuak zawk a, muthilh tum chuan ka insiamṭha zui sat sat a.





(to be continue..........)


Show post links
Top

[Ngaia]

THUTIAM
Chap~17




By : Tom Tom Putara







Bawihtei tel lovin kum thum lai hun kan hmang ve ta! Hmanni lawk, kar hmasa lawk emaw ka tih reng chhungin a thlan kal tlut tlut pawh ka lo sim ve viau tawh a. Upa in 'Mitthi ngaih chu khuareiin a hnem' an lo tih ṭhin kha ka pawm miah lova. Ka fanu chu ka ngaih bân theih ka ring ngai hek lo. Mahse, ka fanu chu ngai viau mahila a Thlan tlawh reng tur erawh chuan a hma ang em em chuan min pawt kal em em tawh lo tih erawh kei ngei pawhin ka in hrechiang in ka pawm viau bawk.






Ka nu leh Pa Tluangtea pawh an inhaw lo hle tih chu ka hai bik lo. Ka nu dinhmun te ka ngaihtuah a, a khawhar ṭhin zia te thlengin ka ngaihtuah kai a. Engang thutlukna pawh siam se ka hnial hran lo. Mahse, engmah a sawi ngai lova. Mit tikham zawngin a khawsa ngai hek lo.






Dâwr nghakin ka inhlawh ve lawp lawp reng a. Ka nu pawh Bazar hmunah ṭhutna te nei ve tawhin mi In a inzuar kual rengin hun a hmang tawh bik love. Ka zirna zawm turin min nawr reng mah se ka awmdan a lâi kual vek tawh ni ber hian ka hria.






Pindan aṭanga rawn chhuah pahin ka nu chuan, "Mami...thil sawidun lawk teh ang" a rawn ti nghal vat a. A aw ri pawh a zangkhai vah a, thu lawmawm lam ni turah ka ngai bawk. "Rawn ṭhu lawk teh.." tih pahin min ko zui leh nghal a.






A bula ṭhut pah chuan, "Eng thil nge sawidun ngai a? Pasal neih i ngen dawn nge ni?" ka ti fiamthu deuh hluai a. Ka nu chu a nuih a za kher mai. Kan nufa hian kan inpawh em em a. Engkim hi kan sawidun a ni ber. Henry-a pawh kha min lo duhpui hman viau a. Mahse, kan inpawh chho zui em em lova. Ka biak hmasak loh chuan min be ngai lova. A reh telh telh a, a hnu lawkah nupui a ru tih te ka hre chho ta zel a. Ka rilru taka ka lo kâwm hman lo kha ka lawm hnuhnawh viau bawk.






"Englo ania...i Pa Biaka nen kan inbia a. An nu damlai a an nu in Dâwr a lo tih ve tawh kha hunrei tak an chawlhsan a. Tunah sawn tha tharin an bei ṭha leh a. Thawmhnaw dawr changkang tak an bei chho a ni awm a. Amah lah hmun hran hranah thawmhnaw la in a zinchhuak reng bawk sia. An Dâwr nghak a, engkim buaipui turin a rin tawk thu che a rawn sawi nasa mai a. Engnge i ngaihdan ni le? Helaia mi Dâwr a thawh tho chuan sawlaiah a neitu ang tak takin i kutah engkim a awm thei dawn a..." ka rilru hriat tum taka min en reng chungin a rawn ti dap dap a.






Ka ngawi vang vang a, "Nu...tun dinhmunah chuan ka chhâng mai thei lo che. Zaninah ka lo in ngaihtuah ange" ka ti ta ringawt a.






"Ni e, i rilru in kil tin dap kual la. Thutlukna siam hmanhmawh lo la ka duh" a ti dam dap a. "Hei erawh vawng reng ang che. Hun kal tawh avangin in tichhe suh ang che. Engmah siamṭhat theih a ni tawh lo. I hmalam hunah hun ṭha in siam tum rân ang che" a rawn ti zui leh dap dap a.






"Ni e...kan hmalam hun atan kan inbuatsaih ve sauh sauh angai alawm" ka ti ve vat a. Ka nu chu inbual turin a tho zui nghal a. Kei pawh eirawngbawl ka zawh tawh avangin ṭhutthlengah chuan ka tluzâl nghal thuai a. Phone ka en a, Whatsapp message lo awm vâng chu ka hawng nghal thuai a. Ka number hriat ngai loh aṭangin, "Lalṭhian....i dam maw? Min hre ve tawh awm der si lova" tih a lo awm kalh a.






Rang takin ka enkual nghal zung zung a. A hming lah 'Steve' tih ringawt a ni bawk si. A thlalak ah lah Cartoon hmelchhe zet a hmang ringawt bawk. "Ka hre mai lo che. Han insawi la?" ka ti let thuai a.



"Awiiii...min theihnghilh hma sia"



"Hmm...ka hriat em em reng pawh i lo ni mai thei asin"



"Ih maw...Sawmtea..."



"Awiii....i va ngaihawm tak..ka rawn be dawn che" ka ti nghal thuai a. Biak tum chuan ka ngaithla zui thuai a.



"Aw...hello" a hmaa kan inkawm ṭhin lai ang thovin a rawn ti no duaih a.



"Awii.. Lalsawmte....i va ngaihawm tak.. Engtinnge ka number i neih?" ka ti nghal zung zung a.



"Ka zawng nasa lutuk che maw le a. Ka phone kha ka tibo ta daih sia. Number ka thlak zui daih bawk a. Engtinmah biak zui ngaihna che ka hre bawk silo. Fb-lamah engtinnge i indah ka hre bawk si lova..." a rawn ti nghal zung zung a. "Awii...i chanchin te ka lo hria a, ka tawrhpui lutuk che ania. I ngaihawm bawk si...remchang hmasa berah ka la rawn zin ang. Ka rawn râl ang che" a rawn tih zawm zung zung a.




"Awii...i van fel tak. Ni e, rawn zin leh rawh. Ka hmuchak tawp che. Engtin maw ka number chu i neih?" ka ti ve leh thuai a.




"Mapuii nen kan inhmu hlauh a. Dofky-i number a lo nei a. Chuan....i number ka dil leh a. Min rawn pe a, ka rawn be nghal che" tih pahin za takin a nui zui hawr hawr a. Sawmtea bawk chuan, "Awii...ka rawn zin leh chak zia hi... Lunglei kha chu a nuam ve thlawt alawm" a rawn ti zui leh zung zung a.




"Tunah khawiah nge i awm Sawmte?" ka tihrual rual chuan, "Tunah tak chuan ka E.." nuih hawr pahin a rawn ti nghal thuai a. A ri zui rawk rawk a, ka ngaithla kar reng a. "Ka E kham chiah...ka hman tawh e" a rawn ti zui leh vat a. Za fahrana a nui te chu amah Sawmtea chiah chiah kha a la ni reng. Lung a tileng thar reuh mange.



"Awii...ka ning thei chiang. A hma khan ilo hman miah nange?" nuih hak hak pahin ka ti ve leh kher bawk a.



"Hman em em nang...ka sang ri i hriat te ka hlau a, ka Ek rei phah alawm"



"Awiii...ka pum i ti na vek tawh...ka nui vak vak peih chiah bawk si lova, ka nuih a za ropui bawk si"



"Engnge? Nui vak vak rawh...a nuam ber alawm" thawveng tih hriat zet hian a rawn tizui ham ham a.



"Sawmte...khawiah maw in awm?" tih tak deuh zawkin ka zawt nawn leh a.



"Awiii...enteh, ka upa tawh lutuk a. Ka haihawt zo vek tawh. Min zawhna kha ka chhâng ṭha leh tho ang che ka tia...ka lo theihnghilh hman leh tawh" a rawn ti deuh duah a. "Tunah chuan kan khua ah, Kolasib ah ka awm hrih. Ka nu te chu Aizawl ah an awm, Chhinga Veng ah khan In kan nei ve tawh alawm. I rawn zin hunah rawn thleng ngei ngei ang che" a rawn tizui nghal deuh duah bawk a.



"Tehreng mai...ka rawn leng dawn chiang lutuk" ka tihlai chuan ka nu Inbual zo chu a rawn inhru chhuak mawlh mawlh a.



"Enteh ṭhiannu, ka buai lawk dawn? Remchang hmasa berah ka rawn be ve thung ang che. A pawi lo tiraw?" a rawn ti deuh duah a.



"Awiii....pawi lah love. I hman hunah kan in be leh dawn nia. I number pawh ka lo save-nghal thlap ange" ka ti nghal thuai a. Kan inbiakna chu kan titawp zui ta nghal a.






Sawmtea chu ka ngai thar reuh hle mai. Kan inkawm nasa ve tho na a, In lamah chuan kan inkawm em em hran lo. A pa hnathawhna anih avangin an rawn awm ve zawk a. Kan class- a in an avang leh kan haw na lam a in ang avangin kan inkawm ve fova. School banah erawh chuan ngei ngeiin kan haw ho ṭhin. Dofky-i leh Sawmtea nen khan kan haw kawng kha kan hmangho tam a. A chang erawhin Dofky-i chu haw rualpui theih loh hun kan nei fo ṭhin a. Chung hunah pawh chuan kan pahnih in kan bengchheng haw viau zel.





A mipa nihna dahṭhat chang a ngah viau kha a buaithlak ṭhin. Kan inkawm ṭha viau emaw tihlai khan min tih tauh khum haw fo bawk a. Mahse, a mizia ka hriatchian em avangin thinrimah ka la ngai hran lo. A chang leh inngeih uchuak takin kan inkai haw ang ral ral bawk a. Ka ngaihtuah let a, keimah chuan ka nui var var a.






Ka nu chuan chaw eichhung zawng pawhin ka hmalam hun tur min sawipui a. Mahse, ngaihtuahna fim tak hmang turin min duh viau lawi thung a. Ka thutlukna a zah thiam viau bawk. "Tunah mai chuan thu ka pawtchat zung zung ngam lo. Hmun hrana Bawihtei kalsan tur chuan ka theih ka ring hrih lo bawk a ni" ka ti mawlh mawlh a. Ka nu chuan engmah a sawi lova, min hnial lova, min fuih chuang hek lo. Ka rilru inpeih hun a nghak ni mai hian ka hre ber.





Zan boruak thiang kâk chu ka ṭhian neihchhun a ni a. Bathlar thlanglamah chuan ka ṭhu a. Inchhung lamah erawh ka nu chuan inleng a nei a, Pa Tluangtea nen chuan an inkâwm bawrh bawrh a.





Van boruak thiang kâk mai chu ka thlir a, Arsi de neuh neuh ah chuan ka fanu hmel rawn lang tlata hriat chang ka nei ṭhin. Mahse, ka ngaihtuahna mûk zet chu kalsan hram ka tum thung. Ka in ngaihtuah neuh neuh a, ka hmalam hun thui tak ka ngaihtuah a. Helaia tawm reng ringawt pawh a dik berin ka hre bik lova. Chona thar hmachhawn ngei chu a ṭha ka ti ve tho bawk.





"Mami... Mami...i Pa Biaka'n a be duh che" rawn tih lâng lâng pahin min rawn pan a, "Kha...inbe lawk rawh u" tih pahin a phone chu min rawn pe nghal a.





"Aw..hello"


"Hlimte...ila mu lo maw?"


"Aw...mu love...."


"I mut tawh ka ring deuh maw le...i buai lai a ni em?" Pa Biaka chuan a rawn ti mawlh mawlh a.



"Buai love, ka ṭhu mai mai...engnge ni ta?" a rawn sawi tur awm ang ring thiam ru chung chuan ka ti lêt a.



"Aaaa...englo ania. I nu in a hrilh tawh tho che chu ka ring tho a. Khalaiah i buai viau loh chuan min rawn pui dawn em mawn le? Kei lah zinkual ngai reng ka ni a, mi rintlak tak ka mamawh em mai a, i nu kha ka rawn be tawp anih kha" a rawn ti ta rêng a.



"Pa Biak...engmah ka ni dawn lo nasa lutuk. Dawr lampang phei chu ka mi sa em em hran lo ania" ka ti ve ta ngawt a.



Pa Biaka chu a rawn nui huk huk a, "Tumah thiam sa an awm bik hlei nem... I in zirthiam thuai mai ang" a rawn ti vat a. "Ka lo ring ang che aw?" a rawn tizui leh nghal a.



"Aaaa....Pa Biak, tunah mai chuan thutlukna ka siam rum rum ngam lo. Ka nu nen pawh kan lo sawidun ve leh hrim hrim ange" ka ti leh a.



"Ni e, in nufa in felfai takin lo sawidun rawh u khai... I rawn theih dawn chuan rawn phei nghal deuh rum rum la ka duh khawp mai. Thawmhnaw la in zinchhuah ka duh tawh viau mai a" a rawn tih lai pawh chuan ka rilru a insual nasa viau bawk.



"Ni e, naktuk lamah kan inhrilh ṭha leh dawn nia" ka tih hnu chuan kan inbiakna kan titawp zui a. Inchhung lamah ka lut zui nghal a, ka nu chu phone ka pe a. A mitmengah chuan zawhna tam tak ka hmu in ka hria. Mahse, Pa Tluangtea a awm ve reng avang chuan engmah phei chu a sawichhuak hran lo.






Muthmunah pawh chuan ka ngaihtuahna ka sêng zui viau bawk a. Helai hmunah hian awm reng ringawt ila hmasawnna ka nei kher angem? Ka nu, harsa taka min enkawl seiliantu chu ka nawmna ngaihtuahin ka kalsan ang maw? Nge, ka nu hian ka mitmei a lo veng ru viau anga, hnawk min lo ti ru viau zawk? Thil ni thei hrang hrang ngaihtuah chuan ka in let kual sek a.





Ka nu hnena zawhna tam tak nei leh thutlukna siam thuai theih in ring tak chung chuan ka mu ṭha sat sat a.





Zan lam ka mengrei bawk a, thawh ka hai chiang hle bawk. Tunlai tak hian a in sawisel deuh avangin ka nu pawh Bazar lamah a ṭhu tam lo hle. "Mami...tho ve tawh la...chaw ei a hun tawh viau ania" a rawn tih takah chuan phak zetin ka tho chhuak a.





Chaw ei laiin min zawh ngei ka ring sa a, "Mami...engnge nizan chu in thu leh hla?" a rawn ti chat rêng a. "Aaa...thu leh hla em em pawh kan nei hrih lo. Kan pahnih a kan sawidun phawt a ngaih thu te ka hrilh a" ka ti ban chat a.





"Anih leh Pa Biaka te hi engang chhungkua nge an nih?" ka tizui leh zat a.





"Ka hrethui viau lo na a, eng emaw zat chu ka hria a. Hmanni khan ka zawhbelh nual bawk a. An fate pathum boral hnu khan a nupui a boral ve leh a. A hnu khan nupui dang a nei leh a. A nupui hmasa nena an fate pahnih nen, tuna an fate pahnih nen an awm ni maiin ka hria...." tih mawlh mawlh pahin chawhmeh a suak kual dan dan a.






"A fa hmasate pahnih erawh phaiah lehkhazir in an awm bo a ni awm e. Anmahni hi khawsak harsa an nilo hrim hrim a. Pi leh pu aṭanga an inchhawm chhoh zel a ni awm e" a rawn tizui leh a. Engmah ka sawi lova, ngun takin ka lo ngaithla khiau thung.





"Engnge nangmah hian i rilru ni hrim hrim? Engahmah min vêngthawng lo la, i rilru in ṭha a tih kha zui chawt ngam ang che" tih pahin min melh ralh ralh a.





"Ni e, kalsan che hi ka hreh khawp mai a. Nangmah chauha i awm tur hi ka ngaingam lo a ni ber e. Mahse, ka va phei tawp pawh hi a lo fuh zawk viau mai thei a. Nakina kan nufa nawmna tur pawh a lo ni mai thei bawk" ka tihlai chuan ngun zetin min en reng tih pawh ka hria.






"Engpawh nise Mami...phei tur chuan i rilru lo siam phawt mai la... I lo rilruk lo leh ta deuh anih pawhin kan sawi ṭha leh dawn nia.. Ngun takin ngaihtuah ang che" tih pahin min kham san zui nghal a. "Vawiin chuan Bazar lam te pawh thlen phei ka duh maw le" tih zui pahin a kut a silfai zui mawlh mawlh a.





Ka nu chhuah hnu chuan ka ṭhu ngawi vang vang a. Ngun takin ka ngaihtuah a, ka nu leh Bawihtei te putu Thlân hmun khawhar zet vang chauhin helai hmun hian ka tan hlutna an nei ni chauh in ka hria.






Nilengin ka rilru a in sual buai a, rilru mumal put har ti viau mahila ka rilru chhungril chuan âwn lam chu a nei ru ṭan viau thung. Ka nu rawn haw chuan thudang a rawn hawpui em em chuang lo. "Mami...i Pa Biaka lah chuan vawihnih ngawt min rawn be leh tawh a. A rawn bia che em? I number ka pe a..." a rawn ti nghal zung zung a.





"Ngun takin ka ngaihtuah a, min awm bosan chu kei tak hian ka huphurh lutuk. Mahse, i Pa Biaka hi pa rilru tluang leh ṭha tak niin ka hria a. I hmalam hun zelah itan a ṭhat zawk ka ring ber bawk si" tih leh pahin ka rilru hriat tum takin a thusawi ngai chu a sawi nawn sek bawk a.





Ka phone rawn ri chu kan ngaihven dun hle bawk. "Aw hello..." tih pahin ka pindan lamah ka lut zui nghal a.



"Aw...Hlimte..i pa Biaka"


"Aw" ka ti ringawt a.



"Engnge i ngaihdan ni le? Ka hmanhmawh nasa tawh mai sia" a rawn tizui nghal zat a.



"Nia...rawn phei ka lo tum dawn nia" ka ti ta ringawt a. Ka rilru erawh a la hmin famkim chuang miah lo.



"A va lawmawm dawn ve aw...naktuk velah lo in puahchah la. A tuk leh lamah chuan rawn phei theih tum la ka va ti em... Dawr lamah ka buai riau mai a. Keimah hi zinchhuah ka duh bawk si" aw zângkhai vahin a rawn ti nghal zung zung a. Pa Biaka bawk chuan, "Nge, ka rawn hruai dawn che em ni?" a rawn tizui leh a.



"A ngai hran love...rawn phei ran chu ka lo tum dawn nia" ka ti ve leh ta tawp bawk a.



Kan inbiak zawhin ka nu hnenah engkim ka hrilh a. Ka nu chu a hlim viau in ka hria. "Mami...i hmalam hun hi thui tak ka ngaihtuah a. Kan nufa inchâwmna khawp chu kan thawkchhuak thei a, ka huphurh hek lo. Mahse, i indawmkun reng hi ka hmu thei tawh lo a ni. Hmalam i pan ve leh theih nan boruak thar i hmachhawn a ngai a ni. Nakinah i rilru a danglam chho anih tak leh i rawn phei leh mai ang chu" a rawn ti chiah chu ka harh uarh in ka hria.





Ni e, ka nu in ka pa pension-hlawh tlem a zawng a la hûi ve thei a. Tlem ka lo hlawh ve bakah ka nu in Chawhmeh a zawrhna vel nen chuan keini nufa inchâwmna khawp chu kan phâng bîk lo. Mahse, ka awmdan leh hun hmandan ah hian a rilru a na in hrehawm a lo ti takzet tih ka hrethiam thar ta uarh uarh a.






Zankhua in ka rilru chuan ngaihtuahna dang a pu thei lo thung a. Ka seilenna Inchhung chu ka la thlahlel ngawih ngawih a. Bawihtei nena kan mutna Khum kalsan chu ka hreh ngawih ngawih bawk.





Bawihtei thlalak chu ka en a, "Bawihte...ka kalsan daih dawn che asin. Aizawl ah ka awmsan daih dawn che a. Min ngai ve tho ang tiraw? Bawihte...ka ngai dawn lutuk che" ka ti mawlh mawlh a.






Mut hmunah pawh thlah ka phal lova, ngai leh thlahlel takin ka fanu thlalak chu ka kuah vawng vawng a. Ka hmangaih, ka fanu chu mumang ram lamah tal tawn leh in beisei chungin ka mu ṭha sat sat a.






Zing boruak thar chu ka tan chuan a chul raih fova. Mi tan Ni thar, beiseina thar nena an hmachhawn fo chu beidawn tharna nen kum thum chuang chu ka hmachhawn ta! Zing dang zawng aiin ka tan chuan a chul zual niin ka hria. Bawihtei hnaiha ka awm theih Ni hnuhnung ber chu hlim taka chibai bûk ka thei ngang lo a ni ber e.






Hmanhmawh lo takin ka insiam a, ka nu lahin ka mamawh tur hmaih hlau takin engkim a ngaihtuah kual ni berin ka hria. Min in siampui pahin fuihna thu ṭha tinreng min fah mawlh mawlh a. Ka ṭhut kunna hmun aṭang chuan min hlân chhuah chu a tum ber niin ka hre ta...






"Mami...i hun kal tawhah eng emaw chen chu i chêng lo thei dawn lova. Bawihtei pawh theihnghilh tum duh suh. I thei dawn chuang hek lo. Mahse, i nun tichak tu tur ni hlauh zawk rawh se....



Engkim hmachhawn thei turin in buatsaih la. Engkim hmachhawn tur erawh chuan in phal suh ang che. Harsatna tam tak kan palbuak te hi paltlang kher lovin a hêl theih tih hre nawn fovang che.



Mipa lakah zahawm takin i nun hmang la. Vawikhat lek pawh an zah lohna tur che thil i ti anih chuan kumkhua a daih fo ṭhin. Hmangaihtu diktak hre theilo khawpin thildang dah pawimawh hmasa lo la...i mit tidel tur khawpin hmangaihna âtpui hek suh ang che" tiin min fuih pah mawlh mawlh reng a.






"Ka lo hrereng ṭhin ang..." ka ti sap a. Ka nu thu min hrilh chu hriatreng a, vawn a, zawm ngei pawh ka tum chiang hle bawk.





Tlai boruakin min tuam a, Ni a nêm raih tawh tihah chuan, "Ka nu...Bawihtei ka va tlawh lawk ange. Ka rei lovang" tih pahin ka insiam zui mawlh mawlh a. Ka nu pawhin ka rilru tur awm ang a hrethiam hle tih chu a awmdanah chuan ka hai lo.





Bawihtei Thlan pawh ka tlawh khât ve ta deuh bawk a. A lo hnim ve deuh tawh a, ka theih ang ang chuan ka pawtfai zui nghal mawlh mawlh a. "Bawihte....á nu hi a buai ve thei lutuk a. Min lo ngai tawh awm mange" ka ti pah mawlh mawlh bawk a. Bawihtei Thlan ka tihfai zawhin ka pa Thlan pawh ka tifai zui nghal a.






Bawihtei Thlan bul ah chuan ka ṭhu a. 'Brenda Lalremruati' tih Kross-a inziak fiah tawh lo tak chu ka en reng a. "Bawihte....i hringnun khawvel a reilo lulai em a ni tiraw? Tunah te hian ka bulah awm nila chuan hlim takin hun kan hmangdun ngei awm si a...." keima hriat tawk chuan ka phun mawlh mawlh a.





"Bawihte....ih maw...hmun hla takah ka kalsan dawn che a. Ka ngai ngawt ang che. Khawi hmunah pawh awm ila i NU ka ni reng ṭhin ang. Ka fanu...." ka tizui mawlh mawlh a.






Dan rual lohin ka biangah mittui a rawn luang ngiai ngiai a. "Bawihte....á nu hian a ngai thei dawn lutuk che. Ka awm loh daih te chuan i khua a va har thei dawn tak... Bawihte...lokal ve daih la...kan pahnihin kan kal anga, hmun nuam deuh deuhah te kan kaldun anga..." ka tihlai chuan ka thlang lama Naute ṭap ri chuan min tiphu deuh zawk a.






Ka ding a, ka hawi deuh ruai a. Ka thlang, ka awmna aṭanga zuk hla ve deuhah chuan Nu pakhat hian Naute chu a lo thlem mek a. Ka en reng a, a pasal, Naute pa thlanah an nufa in an kal ngei a nih ka ring thiam zui thuai a.





Ka ṭhu hnawk a, Naute ṭap ri chu ka bengah a châm zui vawng vawng a. "Bawihte...khua a tlai mai dawn...ka hawsan tawh ang che aw? Ka ngai ngawt ang che..." tih pahin ka fanu Kross-hlui bêm tawh chu ka dawm khûr der der a. "Bawihte....mangṭha phawt le..." tih leh sap pahin chulai hmun khawhar zet chu ka kalsan ta a.






Ka kal pahin thlanglam chu ka hawi thla pah reng a. An ni nufa pawh chuan haw an tum mek tih ka hrethiam mai. Min rawn hmu ve lova, muangchangin ka kal liamsan zui ta nghal a.






Ka hmangaih, ka fanu awmna hmun khawhar chu engtikah tak tlawh leh thei ang i maw? Ngai leh thlahlel taka ka kalsan a ngai hrih si a... Ka ding dat a, Bawihtei zâlna hmun khawhar reh raih chu ka thlir vawng vawng a.







(to be continue.......)


Show post links
Top

[Ngaia]

THUTIAM
Chap~18



By : Tom Tom Putara







Lunglei khawpui, ka seilenna, ka hmangaih leh ngaih em em, ka fanu Brenda Lalremruati leh ka pa sakruang zâlna hmun chu kan chhuahsan ta! Ka bula ṭhu, kawng engkim a min buaipuitu leh min chelh rengtu ka nu meuh pawhin min hnem zo chuang lo. Midang hmuh lohin ka mittui ka hru zauh zauh reng a. "Bawihte....engtikah nge ka rawn tlawh leh ang che le? Mangṭha hrih phawt aw?" ka ti rilru vawng vawng a.






Kawngah harsatna dang kan nei hran lo bawk a, tluang takin Aizawl kan lut a. Kawngah kan chin rawn ngaichangin Pa Biaka chuan ka nu a rawn be deuh reng bawk a. In nghahna lai tur te an inhrilh mawlh mawlh bawk a. Ka nu lahin kan chuanna Driver chu a hrilhchhawng leh zel bawk a.






Pa Biaka te nen chuan kan inhmu ta nge nge e. Min lo lâwm thiam hle mai a, keini nufa pawh kan tlângnêl nghal hle bawk. An In lam panin min tlanpui nghal a. Aizawl khawpui, mipui zi hut hut chu tlân pahin ka thlir reng a. Ka rilru ah Bawihtei pa a rawn lang thut a. Hmuh thut in ring tak leh beisei chuang miah lovin ka mit erawhin a zawng ru tlat lawi si.






In kan lut a, an In chhung chu ka melhkual nghal zung zung a. An che fel thawkhat tih a hriat mai. An In a lian ṭha hek hawk viau a. Pa Biaka nupui ni ngei tur chuan min lo chibai nghal sawk sawk a. "In rawn chau em? Kawng a thui tham bawk si...in rawn rui em lo maw?" nui sâng chungin a lo ti zung zung a.






Kan thawmhnaw pawh ka Room- tur lamah chuan min dahtir nghal a. Ka mutna tur pindan chu a thawveng nuam helh hawlh viau a. Ka awmna tur niawm rêng a mawiin a zalên halh ni mai hian ka hria.






Sitting Room-lamah kan inzui phei leh a. Pa Biaka chuan, "Hlimte...hei hi i Nu Rinpuii anih hi. I duh leh kan hming telin min ko anga, i duh leh 'ka nu, ka pa' ti pawhin min ko thei tho ania" tih mawlh mawlh pahin an nu chu chhuan hmel zetin a en vung vung a.






Nu Rinpuii pawh in zângkhai vahin min lo hmachhawn a, a fel hmel ka ti viau bawk. Ka nu leh Pa Biaka chu an inkâwm bawrh bawrh a. Nu Rinpuii thingpui leh chhang min pek dawm pahin an titi kotlangah ka lo dâk kual vel hrih hi a ni ber e.






Bawihtei tel lova ka zan hun hman hmasak berna tur a ni a. Min kalsan hun chhût erawh chuan Kum 3- lai a lo liam ve ta reng mai. Mahse, Lunglei ah kha chuan kalbo angin ka ngai lova. Ka bula awm ve reng ang ah ngaiin ka pawm hmiah a. Tunah erawh hmun hla takah ka awmsan chu a ni ta si a.






Ka mutna bul tukverh chu ka hawng a, ka ding vang vang a. Aizawl khawpui êng pe ut mai chu ka thlir vang vang a. "Bawihte...kan awmna a inhlat hle mai. Ka ngai lutuk che asin. Ka theih ang a rangin ka rawn tlawh leh thuai ang che. Tunah chuan...." ka ngawi zui vung vung a. "I pa awmna ah ka awm mek a..." ka ti zui sap a.






Motor min sâwina ka chau ve deuh nen ka mutui hle mai. Ka harh veleh Sana ka en vat a, dar 7 a lo ri ṭep mai. Ka thochhuak thuai a, ka nu leh Pa Biaka chu an lo inkâwm bawrh bawrh a. An pahnih chuan min lo en rual ṭhawt a. "Hlimte...i mutui maw?" Pa Biaka chuan nui sûng chungin alo ti vat a. Bûk nghat pahin choka lama nula che sat sat chu ka en reng a.






Pa Biaka chuan a lo hrethiam aniang chu, "Zodin...rawn phei lawk teh" a ti nghal thuai a. Nula, la upat hmel vak bik lo tak chu a rawn nui phei var var a, a rawn phei pah chuan chiang takin min en reng a. "Engnge ni ka pu?" a rawn ti nghal thuai a.






Laa"Hei hi ania Hlimtei ka tihfo chu...han in chibai teh u" alo ti nghal thuai a. Min rawn en melh rulh pahin Pa Biaka bawk chuan, "Hlimte...hei hi Zodini anih hi..." a rawn tizui thuai a. "Ani hi kan nau ania, ani hian Inchhung lamah min rawn âwl hneh hlauh a" tia ka nu a hrilh mawlh mawlh lai chuan kan lo in chibai a. "Tirawh...thingpui in ang" tia Zodini min sawmna chu ka zâwm nghal a, Choka lamah chuan kan inzui phei nghal a.






Chaw eikhamah chuan Pa Biaka hovin ka nu te nen an Dâwr lamah chuan kan inzui chhuak nghal a. An Dâwr chu a lian ṭha helhhawlh viau a. Thawmhnaw pawh an kawl changkang viau mai. Kan thlen hnu rei vak lovah chuan Dâwr nghak tura a rawih nula pahnih an rawn thleng nghal bawk a.






Pa Biaka chuan min in hmelhriattir nghal zung zung a. "Hei hi Ruatfeli ania, chuan...hei hi Akimi anih hi..." a ti zung zung a. Ka hming chu a lo hrilhfo tawh tih a ṭawngkam leh min lo en mikhual loh danah chuan ka hrethiam mai. "Naktuk aṭangin ka ai a rawn awh tawh dawn nia. Vawiin zawng lo awm hahdam rawh se" Pa Biaka'n a rawn tihzui lai chuan an pahnih chuan min nuih var var a.






Ṭhuthmun aṭangin kil tin chu ka melhkual a, Pa Biaka chuan thil pawimawh tak a buaipui tih hriat takin a buai mawp mawp hle bawk a. Ka nu pawhin ka dâwr nghah tur chu a theih ang tâwkin a zirchiang nasa hle chuan ka hria.






"Pa Biak...ka rawn kal apiangin i awm thei reng reng lo mai" rawn ti lut phar phar tu chu kan lo enrual deuh ṭhap a. Mipa sa ṭha ve lam, hmelṭha tak leh Lu zo veh vawh chu kan enduh hlawm viau in ka hria. A landanah chuan Kum 30 aṭanga 40 inkâr chu a ni ve tawh dawn tih pawh a hriat viau bawk.






Tumah chu min en ve lova, dawhkan bula ṭhu, Pa Biaka chu a pan ding chat a. An inbe nghal mawlh mawlh a. "Naktuk zin ka tum deuh a, ka lo in ham buai vel mek..." Pa Biaka chuan a lo ti zung zung a.






Ka phone chu ka hmet mawlh mawlh a, a khât tawkin Pa Biaka bula ṭhu chu ka melh leh ralh ṭhin a. Pa Biaka chuan kan chanchin a sawi tih pawh ka hria. Ani pawh chuan min rawn en ngei pawh ka ring bawk. Ka phone chu ka bih ngar reng a, "Hlimte....lokal lawk teh" tih ri ka hriat rual chuan ka phu deuh zawk nghe nghe.






Ka tho a, an ṭhutna lam pan chuan ka phei zui nghal a. Ka rin ang a nilo zawk nge, min lo en kiau ka rin nen min lo en lo mai ni lovin min lo ngaihven lem lo tih chu a awmdanah ka hai lo. A phone a en a, a nui suk a. "Hei hi ania Lunglei lama ka fanu chu..." Pa Biaka'n a tih rual chuan a rawn hawichhuak zauh a, min rawn melh zuk a.






"Lo inchibai ila..." tih pahin a ṭhutna aṭang chuan a rawn ding chhuak a. Pa Biaka bawk chuan, "Ruata anih hi...i duh chuan i 'U' dawn nia" a lo ti leh zung zung a. Ngawi rengin kan in chibai a, ka mitah tak a en kal a. Kei erawh ka hawisawn thuai thung a.






Ka ṭhutna ngaiah ka let zui a, an ni pahnih erawh titi dang sawi in an ri zui leh hluai a. "A hrim hrimin zin te i tum ve leh ngawt tak...pawisa i nei reng reng em ni? I duh chuan i kal leh haw na ka lo tum sak ang che" nui huah huah chungin a ti a. Pa Biaka chuan nuih huk pahin, "Mai mai ṭhin a...nanga pûk chawp pawisa hman ai chuan a bâ in ka zin mai ang" a lo ti ve thuai a.






An infiam zui bawrh bawrh a, chapo hmel ka ti ngawih ngawih. Ka ngei ru nghal em em bawk a, mipa chapo ve tak niin ka hria. Pa Biaka chuan chhâng lêt hrep zel se ka lo ti thei viau bawk.






Pa Biaka chuan Dâwr a nghak zui nghal a. Keini nufa erawh Bazar lamah kan chhuk kawi duh bawk avangin kan chhuak ve ta nghal a. Kan kal dawn pawhin chu mipa chapo zet chu a la awm ve reng a, kan chhuah pahin rum zetin ka melh ngheng a. Min lo en miah lo leh nghal chuan ka thin a tirim zual viau bawk.






"Nu....engtia awm nge i rilruk deuh?" tih pahin a kutah chuan ka chelh a. Bazar chhung lam pan chuan kan inkâi thla hnak hnak a. "Naktukah ka phei ve leh nghal mai ang chu ka ti deuh... In kan kalh tawp mai si a, a ngaihtuahawm deuh alawm" a rawn tih lai chuan thildang daih ka lo ngaihtuah thung a. Ka nu haw tur chu ka huphurh nghal em em bawk a. Ka lung a lêng lâwk viau a. Ka bula awm reng chu ka ngai thar em em bawk.






Zanah pawh ka sâwm luih tlat avangin ka bulah a rawn riak a. Kan titi melh melh reng a. "Nu...Bawihtei thlan kha lo va tlawh ṭhin ang che aw? Hnim te khan a lo bawh palh ange. Awiii...la awm ve hrih la ka ti e..." kuah châih pahin ka ti mawlh mawlh a.






"Mami...kei pawhin ka ngai dawn khawp mai che. Mahse, theihtawp chhuah la ka duh a ni. I pa Biaka te chhung hian an ring em em che a. An rin ang ngeiin rintlak takin awm ang che. Sawlam chu rawn ngaihtuah duh reng reng suh. Ka hunawl apiangin ka lo va tlawh ṭhin ang" a ti mawlh mawlh a.






"Ka fuihna ṭhin che kha theihnghilh miah lo la...vawng reng ang che. Tin, buaina engpawh nei la, midang hrilh hmasa lovin i nu hi min rawn hrilh vat ṭhin ang che. Eng anga harsatna lian pawh nise i lama ṭang tluanparh tur awmchhun ka nih hi hrereng ang che" a ti zui mawlh mawlh a.






Ka ngai dawn bawk a, ka thlah phal meuh lo a ni ber e. Ka pawm chial a, ka thla a muang ru em em bawk. Zing thawh tlai kan hlauh avangin muthilh tumin kan ngawi zui ta vang vang a.






Ka nu thâwm ri sat sat ah chuan ka harh thuai a. Phak chapin ka tho zui ve nghal a. "Nu...thingpui ka va lum ange aw?" ka ti thuai a. "A ngailo...kan tlai palh ang. Duh leh Sumo Counter- bulah kan in mai dawn nia" tih pahin kawnga a hak tur thawmhnaw chu a inbel mawlh mawlh a.






Pa Biaka pawh a rawn tho chhuak zui a. Ka nu thlah chu inhuam viau mah se ka nu chuan "Taxi-in a awlsam zawk" a tih deuh tlat avang chuan a ngawihsan ta nge nge a. Kan inzui chhuak a, Counter-lam pan chuan kan chhuak zui ta nghal a.






Ka nu nen chuan kan inchelh reng a, "Mami...nitin kan inbe reng thei dawn alawm. I hna ah theihtawp chhuah la, rintlakin hnathawh tum ang che" a ti leh mawlh mawlh a. An chuanna motor-chu a nung ta vut vut a, kan inthlah a, an tlan zui ta... Kan in vai lauh lauh a, an lan theih chhung zawng ka thlir zui ta reng a.






Ka hna thawh ṭanna tur Ni anih avangin ka in siam mawlh mawlh a. Nu Rinpuii pawh Naupang School-hruai turin a buai ve hle bawk a. Pa Biaka lah zinchhuak tur anih avangin ama buai buai chuan a lo buai ve mawp mawp bawk a. Choka lamah Zodini pawh a buai ve viau bawk.






Dâwr ka thleng a, Sana ka en thuai a. Dar 9 a lo ri ṭep mai. Pa Biaka sawidan khan an buai deuh avangin Dar 9- velah Dawr an hawng hman chauh ṭhin a. Nidangah chuan Dar 8- ah an hawn hman ṭhin thu a sawi a. Naktuk lam aṭang chuan chumi tur ang chuan ruahmanna ka siam rilru bawk a. Theihtawp chhuah ka tum takzet.






Ka thlen hnu rei vak lovah Ruatfeli a rawn thleng zui ve a. Rei vak lo hnuah Akimi pawh a rawn thleng zui ve mai bawk e. A hma Ni a inhmu chauh mah ni ila kan innel nghal hlawm viau mai a. Kan inkâwm tâwk rual hlawm viau bawk a, a nuam dawn hle chuan ka hria.






Pa Biaka min hrilh ang takin Ruatfeli chuan kan thil zawrh man chu a lo bel nangiang mai a. Keipawhin theihtawpin hriatchian ka tum nasa bawk a. A zualpui chu ngawi rengin ka sawi kual chat chat thei thuai a. Engkim mai chu ka kut a nih vek avangin ka mawhphurhna sânzia ka hrechiang a. Ruatfeli leh Akimi pawhin ka thu an ngaichang thiam viau bawk.






Pa Biaka pawhin Airport a thlen thu te, Thlawhna chhung a luh tawh thu te thlengin min rawn hrilh ve thlap thlap zel a. Rin phak bâka kan inhralh ṭhat thu ka thawhpuite sawi ka hrilh ve te chu a lawm thiam hle bawkin ka hria.






Ka theih ang leh hriatthiam ang tur zelin Note-ah chuan kan inhralhna te chu ka ziak thla ve zung zung a. Pawisa lam thil anih avangin ka fimkhur hle bawk. "In awm maw?" rawn titu lam chu ka hawi thuai a. Nimina ka melh rum nghek pa bawk kha a ni.





Ka hna ngaihah chuan ka bûr zui chat a. Ruatfeli te pahnih chuan an lo be bawrh bawrh a, an innel hmel viau bawkin ka hria. "I va buai awm ve?" tih pahin ka ṭhutna hma ah chuan a rawn ding a.






En pawh en hran lem lo chuan, "Buai ve deuh..." ka ti ringawt a. A kalsawn zui leh mai tura ka rin laiin ka bula ṭhutna awlah chuan a rawn ṭhu zui tak deuh deuh a.





"Engnge i duh? I duhzawng te a awm em?" tih pahin ka thil ziahlai chu ka ziak mawlh mawlh reng a.





"A awm pawh ka hrelo..a changkang lo hlawm em mai" a rawn ti kher chu ka melh nghal vat a. Min lo en lova, a phone bawk a lo buaipui leh daih tawh.





"Anih chu..." ka ti deuh nghat a. "Pa Biaka chu a kal ta em ni?" a rawn tih pawh chu, "Aw" ka ti bung deuh nghat a.





A nui deuh huk a, "Pawisa min rawn dil ta si lova, a kal thei ta tho a ni maw?" a rawn ti chu ka chhâng lo. Thawh lawk a, ben nawk nawk ka châk ngawih ngawih. Mipa an ni emaw hmeichhia an ni emaw, kum upa lam pawh nise mi chapo bula awm hi ka thiam hlawl lo. Engang mi pawh lo ni ila min zahpah lo taka min ṭawngkhum ṭhin bulah ngat phei chuan ka hun khawhral ka ui ṭhin.






"Pa Biaka rawn haw hunah a rawn hawn nalh viau chuan ka rawn lei ang. Tuna in kawl ho ang hi chu ka neih hnu deuh vek ania" nui deuh hak hak chunga a rawn tinawn leh phei chu ka sa pup pup ni maiin ka hria. Ruatfeli leh Akimi chu ka va melh zawk a, an lo nui deuh ṭhaw leh nghal a. Ka thin a rim zual sauh bawk.






"Thil in ei tawh em?" tih pahin ka thil ziahlai chu a rawn bih pah dûk dûk a, rang takin ka dahsawn thuai a. "Ei lo" ka ti deuh hmuk a. He mihring hmaah hian ṭawngkam ṭha cheh vak ngaiin ka hre lova, zahthiam taka biak kual vel ṭulin ka hre bawk hek lo.






"Akim...nang va la lawk la...ril a ṭam tawh alawm" a tihlai chuan Akimi chu ka en vat a, ani lahin ka thu a nghak zawk ni mai hian ka hria. Ka mit chuan ka zâi ralh a, Akimi pawh chu a chhuak zui nghal a. "Ka duhzawng chu i hriat kha.." tia a au zui chu Akimi chuan a hre hman kher ange maw?






"Lunglei chu hman deuh, nikum hmasa khan ka rawn kal ve tawh alawm. Ka vawikhat kalna ania, zan hnih riakin kan rawn kal a..." a rawn ti su su a. "Anih chu..." ka lo ti ringawt a. "Hetia thlalak vela kan lo hmuh ang aiin a takah a ṭhing ka ti. Ka rin aiin a nuam lo. Aizawl hi a lo nuam ber mai anih hi..." a rawn tizui leh a. Engtinmah ka chhâng lova, ka phone chu ka en san daih a. Engmah chu ka rilru ah a awm thei chuang lo. Ka tâwt up up ni berin ka hria. Ka bula ṭhu chu ka haw ngawih ngawih a, ka ten a ni zawk mah ang chu!






Akimi chuan eitur a rawn chawi lut lâ lâ a. Kan hmazawnah a rawn dah kual den den a. Ka thinrim a talângin ka duhzawng ka lo chah theihnghilh daih pek a. Chow-min rawn lak chu ka ei peihlo viau na a, Akimi chuan nuamlo a tih ka hlauh vangin ka ei lui hram hram a ni ber e.






Thil eilai pawhin a khât tawkin Akimi te pahnih chu a fiam deuh sek reng a. Keimah tak erawh min fiam ve hran lem lo. Akimi te pahnih lah chuan an lawm phian a, a thusawi ngeiawm zet te chu an nuihpui ang bâwk bâwk a. Vawikhat pawh ka nui chhin love.






Ka ei lui thei ngang lo, a zahve pawh ka ei thei lo. Chow-hi englai mahin ka ei ngailo hrim hrim a. Mahse, ka duhzawng ka sawi loh avangin Akimi lakah chuan ka in thlahrung a, ka ei lui hram chauh a ni.






"I duhtawk der em ni? I va ei tlem ve?" tih pahin min melh zuk a. "Ka puar" ka ti ringawt a. Ani pawhin engmah min zawt zui lova, a thil eilai chu a ei zui leh mawlh mawlh a.






Ruatfeli chuan kan thil eina vel chu a rawn senghawi zung zung a. "Keima'n ka va dah ve tawh ange" a tihlai chuan, "Kha..kan eina man hi rawn pe nghal la... Ani hi chu a hausa bawk a, a thil eina man chu pe ve mai rawh se" ka lo ti deuh kher a.






A nui deuh suk a, "Kha....keima'n ka lo pe ange. Kan vaia ei man kha ka lo tum ang. In hlep a chhe ve sia, in hlep in ei zawh zel chuan in rawn hausa ve har lutuk ang" a rawn ti deuh kher a. Ka huat tur ngeia thilsawi nuam a ti viau ni berin ka hria.






Engmah dang sawi zui lovin kan ngawi ṭhap a, kan boruak chu a fuhlo vel vek ni mai hian ka hria. Min dâwrtu dang an rawn kal zui neuh neuh nen ka tho zui nghal daih a.






A ṭhutna ngaiah ala ṭhu reng a, min dâwrtu buaipuia hun kan hman rei tehreng nen, a lo la ṭhu ngat ngat anih chu! Mi hman ve tak niin ka hria.





"Lokal lawk teh" a rawn tih rual chuan kan pathum chuan kan enrual ṭhap a. Keimah min ko tih chu kan hre tlâng vek ang. Muangchangin ka pên phei chhat chhat a, "Engnge?" ka ti bûl deuh hmak a.





A nui suk a, "I phone number-min lo pe teh. Rawn kal kher ngai lovin bungraw thleng thar in neih leh neih loh te ka rawn zawt duh dawn che a..." a lo ti vat a.





Ka nui hul hak a, ka en nawn leh ṭhin a. Ngun takin min lo melh khiau a, "Pa Biaka number i neih reng kha...i lo zawt mai dawn nia" ka ti deuh tawl a. Ka pe phal lo tih chu mi pangngai anih chuan a hrethiam ve em ang chu maw?






A ding hluai a, "Anih chu...a pawilo ni mai rawh se" a ti deuh nghut a. A ṭhutna aṭanga rawn chhuah pahin, "Ka va phei ange, remchangah ka rawn leng leh dawn nia" a rawn tizui a. Engtinmah a chhân loh teh ngawt chu a mawi chiahin ka hre bawk si lova. "Awle..." ka ti ringawt a, engmah dang sawi zui lo chuan a chhuak zui ta nghal a.






Ka thaw hawk a, "Awiii...ka hahdam huai mai" tih pahin thâwk ka la zui leh sang sang a. Ruatfeli leh Akimi chuan min en a, an nui var var a. "A va ninawm ngat ngat tak...a rawn kal ziah em ni?" zawh bîk pawh neilo chuan ka tizui zat a.






Akimi te pahnih chu inthlahrung deuh chuan an nui dun hak hak a. Ka nuih a za lo nasa mai bawk si. An ṭhutna lamah chuan ka phei zui nghal a, "Engnge in nuih reng a?" ka ti nghal phawng a, an lakah ka thinrim lo tih an hriat nan ka nui sâng thung a.






Akimi chuan, "Khatia a lan ang kha a ni lo ania. A fiamkual châk che niin ka hria. Pa fel tak anih kha...a rawn kal fova, pa in ngaitlawm leh zaidam tak niin ka hria" a rawn ti teh daih a.






"A mizia tur awm ang chu ka hrethiam ve chuan ka hria....pa chapo tak a nih kha" ka ti hlak tho a. Zawhna dang ka pe zui lova, an ni pawhin engmah an sawi zui hek lo.






Khua a thim deuh thet thet tawh a, Note-ah chuan thil pawimawh, min rawn zawh kan neih loh te, kan inhralhna te chu ka ziak lut mawlh mawlh a. Sana bih zauh pahin, "Lo in tifel ula...haw dawn ang u" ka ti chu an phûr hle tih pawh ka melh zeuh chhung pawhin ka hrethiam hman. "Naktuk aṭang chuan Dar 8-ah inhawn hman tum tawh ila... Pa Biaka khan min beisei deuh a...a harsa lutuk lovang chu maw?" ka ti zui leh nghal a.






Akimi chuan, "A hma pawha kan hawn ṭhin dan tho alawm. Anmahni an indaih loh deuh avang khan kan hawng tlai ṭhin ta deuh mai ania....engmah harsatna a awm lo" a lo ti chu ka thaw huai mai.






"E...chahbi spare-hi tu zawk nge kawl dawn che u?" ka tih rual chuan an in hnawn nghal ve ve a. A tawpah chuan lo thawk rei tawh zawk Ruatfeli kutah kan inhlan fel thei ta nge nge a. "Eng emaw harsatna nei thei ka nia, rawn thlen har hret pawh awm thei ania" ka ti leh mawlh mawlh a. Chahbi spare-ka kawltir chhan chu ka hrilhfiah zui mawlh mawlh a.






Ka insiam a, ka tho chhuak tur chu ka luhai lutuk chu ka ṭhu leh hnawk a. Akimi chuan min lo hmu rang hlauh, a ṭe tuarh a. A rawn tlanphei zui nghal a. Ruatfeli pawhin min rawn hnaih zui ve nghal a. "Ka ṭha...ka ṭha..." ka lo ti tak na a, ka luhai chuan min tuam mup mup ni mai hian ka hria.






Ṭhutthleng sei ah chuan min muttir nghal a. Hlauthawng zetin min ko reng bawk a. "Ka ṭha...ka harh reng ania" ka ti chung chung chuan min ko mawlh mawlh reng tho.






Ka zia ta deuh a, ka ṭhu chhuak a. Ka Lu chu a la rit bûr tho. "Nizan ka mengrei nen, tukin zing ka tho hma leh bawk sia..ka zo lo deuh aniang" ka ti sawk sawk a. Buaipui ngaia ka awm chu ka inthiamlo hle bawk.






Dâwr aṭang chuan kan chhuak a, Taxi min pharsak a, kan in kalsan ta. Zan lam ka men rim leh ka thil ei ṭhalo lutuk chu ka mawhpuh ber mai. Motor-te chu ka rûi dawn ni mai hian ka inhria. Ka thaw leh deuh halh ṭhin a. In thlen vat a, mut hahchawlh chu ka châk ber a ni.






(to be continue........)


Show post links
Top