THUTIAM By Tom Tom Putara (Completed)

[Ngaia]

THUTIAM
Chap~7



By : Tom Tom Putara







Ka nu chuan Zanriah ei ve nghal turin a sawm nasa viau na a, a ṭang tlang ta tho a. Ka nu pawhin a be chhe hran lo viau chuan ka hria. A rûk tak chuan ka lawm ru viau bawk.





"Anih..ka phei ange aw?" tih pahin min nuih sak a. "Zanah i rawn leng dawn lo em ni? Inleng kan ngah lutuk tawh kher nang" beisei sâng zetin ka ti let sap a.





"Nia, kan inhrilh dawn nia" tih pahin ka biangah a rawn piai zauh a. "Ka phei phawt ange" tih pahin a Car-lam chu a pan zui nghal a.





A tlanliam thleng in ka thlir vawng vawng a. Ka ruak huaiin ka hria, ka ngai nghal ngawih ngawih bawk. Keimahah chuan thuneihna nei nghal ta riau a hriatna ka neih rualin, ka lakah mawhphurhna a nei lian hle in ka hre tel bawk.






In ka luh rualin ka phone charge lai rawn ri chu ka en vat a. Ṭhiannu Dofky-i ngei a ni e. "Hello...ka ṭhian" ka ti nghal vat a.



"Aw...ṭhiannu....kan rawn haw mek" aw zângkhai vahin a rawn ti nghal sawk sawk a.



"Ka va lawm tak, rawn thleng vat rawh. Ka ngai tawh lutuk che" ka ti ve vat bawk a.



"Min lo hmuak ang che. Thil ṭha deuh ka lo hawn che ania" a rawn ti leh phei chu ka phûr takzet.



"Rawn thleng vat vat la anih mai chu a" ka tih hnu chuan kan inbiakna kan titawp zui ta nghal a.






Ka nu chu a ṭul ṭulah ka pui nghal zung zung a. Kan lên laia a phone ka chhân loh chungchang engmah a sawi ri miahlo chu ka lawm ru viau a. Mahse, sawichhuah hun a neih ngei chu ka ring. Chutianga ngawi liam mai mai tur a ni lo.






Chaw ei kan peih fel a, ka nu rilṭam lah a tei zung zung tawh. Ka phone rawn ri chu ka en vat a, "Aw ṭhiani" aw zângkhai vaha ka tihrual rual chuan, "Lo phei rawh...kan rawn thleng fel chiah" a rawn ti nghal sawk sawk a. "Aw....ka rawn kal nghal..." ka ti nghal vat a. Phone ka dah zui nghal a, "Nu..Dofky-i te In ah ka va kal lawk...an rawn haw a" tih pahin ka kal zui nghal a.






"Mami....va rei suh aw? Ril a ṭam ania" ka nu chuan min rawn au zui lawm lawm a. Engtinmah ka chhâng zui tawh lo, hmanhmawh zetin ka tlan phei hlawk hlawk a.





Ṭhutthlengah thatchhe zetin alo ṭhu zawi nguai a. A bulah a bungrua a let phing pheng bawk a. Min hmu chu a rawn zuangtho nghal a, kan inpawm chûk chûk a.





"Engnge min rawn hawn?" tih pahin kan ke bula a bungraw dahkhawm chu ka melh nghal vat a.





"Keimah hi a ni mai" tih pahin a ṭhu zui nghal a. A bag chu hawngin a hai nghal sawk sawk a. "Kha...T-shirt nalh deuh ka rawn hawn che" tih pahin min rawn pe nghal a.





"Awiii...hmelṭha chiang" tih pahin ka piai zui nawk nawk a. Kan va hlimdun tehreng em..a chhungte pawhin keini pahnih inkâwm hi chu ngaiah an nei tawh a. Kan rik hlut pawhin min enliam ve mai mai tawh.






Kan ṭhudun a, kan titi nghal bawrh bawrh a. Dofky nu, Nu Rempuii chuan, "Hlimi...engnge i nu a an zel? Zan te a mu thei em? Ka rawn leng phei ang ka ti ṭhin a. Ka nuamsam thei meuh lova" a rawn ti mawlh mawlh a.





Kan ṭhiandun inhmu tawh hi chuan engkim kan theihnghilh ṭhin. Nu Rempuii'n ka nu chanchin min zawh rual chuan a rilṭam tawh zia ka hrechhuak nghal zawk a. "Aw...a fel lutuk. A khua erawh a har takzet tih chu a thup thei meuh love" tih pahin ka tho zui nghal a.






"Ṭhiannu...zanah te chuan min rawn tlawh dawn lo em ni?" tih pahin kan la inchelh rân reng a.





"Awii....ka rawn phei loh i ring reng reng em ni?" a tih zawh rual rual chuan ka kai zui nghal a. "Min rawn thlah rawh, ka haw phei dawn. Chaw ei a hun" ka lo ti zui zat a. Kan inzui chhuak nghal a, zana lên ngei a intiam thlap hnu chuan ka haw phei zui ta nghal a.






Zan boruak chu a nuam ser sawr viau a. Kan khawhar hnem a min rawn lênpui pawh an la awm ve deuh ṭiai a. Kan khawhar an hnem takzet a, engtikah emaw chuan an la ṭil ṭiak ngei awm si a. Ka nu phei chuan hrehawm a va tizual dawn tehreng em...






Ṭhiani pawh a dan pangngai in a rawn lut thawveng halh halh viau a. Mahse, nidanga a rawn rîk luh phawr phawr ang erawh a ni bik love.






Ka nu te ho inkawm khawmna kalsanin kan inzui hrang nghal a. Bathlar thlanglam kan chuh zui nghal zat a. Ṭhutna kan remfel chiah tihin, "Engtinnge a awm? A haw phei leh tawh nge? Kan inbe zui miah lova" a rawn ti sa sa a. Tu chanchin nge a rawn sawi chu ka hrechiang hle bawk.






"Vawiin pawh kan lêng nileng alawm... Naktukah phei a tum a...zanin pawh a rawn kal chu ka beisei" nui sak chungin ka chhâng vat a.





"Awiii....nuam inlo ti vel sia.." tih pahin awmze nei zetin a meng tâl tap a.





"Awi, kan chhungkaw boruak tawn nen a in mil lo viau a, nuam tih vak ngaihna a awm lo. Mahse, ani hi awm lo phei sela chuan ka khawhar zual ngawt ang" ka lo ti nghal mawlh mawlh a.






Ka phone rawn ri chu ka thlek vat a, ka 'Duata' hming ka hmuh rual chuan ṭhiannu Dofky-i hmazawnah chuan inti thei zetin ka lek kual zui nghal a.






"Be mai mai teh....tun ang reng kha i nih loh chuan i ṭahkhum tur ka ni leh dawn tho sia" tih pahin min nuih lui sak a.





Za lo zeta nuih luih sâng pah chuan, "Aw hello....ilo thleng tawh em ni?" ka ti nghal zat a. Ka chhungrila hlim veng veng na awm erawh tumahin min hriatpui hrih silo.



"Ka rawn thleng phei chiah e...ka rawn lut hreh deuh a...an tam ang reng sia" a rawn ti tlang nghal râwih a.



"A ho e....thlang lamah kan ṭhu daih alawm. Dofky-i nen kan awm" ka ti nghal thuai a.



"An rawn haw tawh a ni maw?" aw zangkhai vahin a rawn tizui leh a.



"Aw...rawn haw tawh. Rawn lut rawh..a ho lutuk" ka tih ngial pawhin a ṭang ngar mai si a. "Anih..kan rawn chhuak ang" tih pahin phone chu ka dah a.





"Tirawh ṭhiani, va chhuak lawk mai ang. A rawn lut ngam ngang si lova" ka tizui nghal zat a.





"A va han MAN lo rem rem ve aw..." min tih thinrim tum zetin a nui lui ngheng bawk a. A ṭhutna aṭang chuan a rawn tho nghal a, thutak deuh zawk chuan, "Rawn lut ngamlo rual a ni tawh lo. A hrim hrimin a tihdan ang angin awm suh. A rawn lut anga, ṭha takin in lusûn khawhar a rawn hnêm turah ka ngai" a rawn tihzawm mawlh mawlh a.





"Lokal mai mai teh.." tih pahin ka pawt zui hlawk a. Kan inzui chhuak ta nghal a.





"Nu...dawr ah kan kal dawn ania.." engmah sawi lova chhuah mawl tawp aiah ka hrilh hre ve hram a, ka nu chhânna pawh ngaichang em em lo chuan kan chhuak pah zui vat a. "Rei lo ula aw?" ka Nu min lo chhânna chu kan bengkhawn zui lem hran lova. Ka 'Duata' tan chuan hun ka pe tam thei tawh dawn lo tih ka hria...naktuk maiah a haw tawh dawn tih pawh ka hria. Chuvangin, hmuh ngei ka duh bawk.






Min lo nuih var var a, Dofky-i nen chuan an in chibai nghal sawk sawk bawk a. "Vawiinah maw in rawn haw?" a lo ti nghal vat a.





"Aw" a lo ti nghal thuai a. "A hrim hrimin engnge kan rawn haw ve chauh a, phei i tum nghal a?" a tih zawm nghal sawk sawk a.





"I ṭhiannu hian 'Haw phei tawh rawh, min dîp' a ti reng bawk sia...la châm deuh ka châk tehreng nen" tih pahin min melh zauh a. A nui duh miahlo chuan min ti thinrim lek lek bawk.





Dofky-i lahin rum taka min melh fiam pahin, "I zeilo thei ṭhin ngawt mai. Zui haw te tum zawk ta che?" min rawn tifiam zui hlak a.





"In ninawm..." ka tih rual chuan kan vai nuih hak hlawm a. Zuala bulah chuan ka tawlhhnai zui vat bawk a.





"Lengchhuak lawk ila..in peih em?" tih pahin kan ṭhiandun chuan min thlek tawn zauh zauh a.





"Aaaa.....kei chu ka rawn kal ve lo mai ang. Motor ka rawn rui nileng ṭhak a. Min hrethiam mai teh u" ṭhiannu berin a tih tak tlat ah chuan kan hnial lui ta bik lova. "Mahse....rei lovang aw?" ka ti sap thung.





Dofky-i kal rual chuan Car chhungah kan lut zui a, kan tlanchhuak zui nghal a. Min rawn thlêk zeuh pah chuan, "I hlim loh hmel e.." a rawn ti deuh hmuk a.






"Ka hlim loh pawh ka hre nang...min ngaihdan mai mai anih chu..." ka ti deuh hluai a. Ka rilru chhungril erawh a hmanhmawh ru viau lawi a. Kan haw har vaih chuan ka nu rilru hrehawm tur zia te ka ngaihtuah neuh neuh reng a.






Kawngsir, phûl cham dap ah chuan a ding ta riai riai a. Kan hma zawn phei ah chuan Lunglei khawpui chu a êng chiai a. Min kalpuina hmun chu a thawveng nuam a, thlifim a thaw heuh heuh reng a. 'Engtinnge chulai hmun nuam zet chu alo va hmuhchhuah hman bik? Eee....taka, a ṭhianpa khan Lunglei nula hmelṭha a thur nalh nalh thu a sawi tak e'. Engamah hma chuan a hun kal tawh chu ka thîk nghal em em bawk a.





"Hetah hian ṭhu ang hmiang" tih pahin min pawt ṭhu nghal a. Cigarette-a phawrh a, a ṭankai zui a. Kan hmalam khawpui êng thlir vang vang chung chuan a sî zui hlarh hlarh a.





"Enteh....sawlai hmunah sawn ka hmangaih, ka engkim neitu chu a lêng si a.." a ti zâwi sup a.





"I hmangaih chu engatinge i hruai loh? Kei min hruai daih si?" ka ti ram hmak a.






Ka en reng mipa chuan vawikhat pawh min melh lova. A thil fawh lai chu a hmuiah a chuktuah sek thung a. "Mawh? Engatinge kei min hruaichhuah si? Chumi thu min hrilh tur chuan maw? A hma pawhin min hrilh thei lo em ni?" ka ti zui mawlh mawlh a.






Engtinmah min chhâng lova, ka thusawi hria awm ang pawhin a lang hek lo. Ka thin in a diar ta bik lo. Thui tak haw kawng anih hre chung pawhin haw nal nal duhna rilru lian zet chuan min nawr tho zawt a. "I hmangaih chu va hruai rawh" tih pahin kal nghal ka tum a.






Rang takin a rawn tho a, ka kutah a rawn chelh vat a. Min pawt lêt zui dawrh a, ka hmui ah a rawn fawp zui chat a. Lungawilo zetin ka nem sawn a, "Khawi maw...kal teh. I duh duha min khawih tum miah suh ang che" ka ti vîn nghal ṭhat a.






Engahmah ngailo tih hriat zetin min rawn pawt leh hrâwk a. Nghet zeta min pawm beh thlawp pahin, "Saw khawpui saw i khawsakna hmun a nilo em ni?" a ti chang fak a.





"I bulah ka awm reng a, sawlai hmuna i hmangaih a awm thu i sawi daih anih kha..." mittui parawl kiang chuan ka ti khûr der der a.





"Nangmah ka sawina che alawm...i tel lova ka khawsak huna ka sawi dan tur anih kha.." tih pahin ka sam chu a chûl heuh heuh a.





"I fiamthu lo tiraw?" rinhlelhna mitmeng thup lo zetin a mitah tak chuan ka en kal a.






A mitmeng fîm fiah kâk chuan min en reng a. "Nang hi alawm ka hmangaih chu..." a tih lai chu ka en zo hram a ni ber a. A bak chu ka mit huaisenna hian a tlin thlawt tawh lo.






Ka mit ka chhîng a, ka hmui phu ru der der chu a rawn fawp zui chat a. Duhthawh zetin kan infawp zui mawlh mawlh a. Muangchangin min nawr hnung hret hret a. Car-bang kan tawh rual chuan duhthawh zetin min fawp uar sauh a.






Ka nghawng leh beng fawh pahin ka hnute a hrâwm nghal nawk nawk a. Keipawhin mûr ru seng sengin a lu chu ka tuai thuak thuak a. A rawn thaw lum leh hem hem ṭhin chuan min ti danglam chak viau bawk.






Ka pawnfen chhanah ka mawng a sâwk leh tâwn tâwn ṭhin a. Rei a nghak lo, ka rin ang chiah a ni. A kut hlei zet chu a thlahdah zui rang hle bawk. Ka pawnfên hnuaiah a rawn zen chho a. Ka rilru fîm min hloh tir tum zetin ka kap lam a rawn dap zui chat bawk a.




Ka kut chuan dang turin chakna a nei lo a nilo a, a dang phal lo zawk niin ka hria. Mahse, hmeichhe sihhnip nih ka hlauhna erawhin min nawr na ngang si a. A kut chu ka chelh a, thâwk hak pah chuan, "Zual....duhtawk....ang" ka ti ban fân raih a.






Ani lahin engmah dang a ngaihtuah tawh lo. A thil tum ṭhulh tir turin ka hmalakna in awmzia a nei lova. Awmze nei tura hmalak ka duh tak tak biklo te pawh a ni mahna..






Min fawp leh mawlh mawlh a, muangchangin a duhthusam ram chu kan pan zui zel a, min kuaiher zui lawp a. Ka hnute ṭham nawk nawk pahin ka nghawng leh beng velah a rawn fawp lum zui thar thar a.






A duhthusam ramri kan kân ta! "A na..." ka ti zâwi fiah fak a. "Shhh....a na rei tawh lovang" tih pahin a hna a chhunzawm zui zat a.





"Duhtawk teh...motor rawn kal a awm in ka hria..." ka ti thâm chhal a. Car hnung kawngkhar chu a hawng zui thuai a. Min nawr lut zui a, chulai hmun reh takah chuan a vawihnihna atan ka taksa chu ka hlan leh ta!






A thaw halh halh a, ka hmui ah a rawn fawp leh zauh ṭhin a. Nghet zetin ka pawm a, kan thlan dun hliam bawk a. "Zual...haw lo mai la?" ka ti chuai raih a.





"Ka duat....ka rawn kal leh thuai dawn alawm. Tunah chuan ka haw phawt angai alawm" a tih rual chuan phal lo zetin tih theih dang awm hek lo, ka kuah nghet zual sauh a.





"A lum i ti ve em?" a rawn tih rual chuan kan intawhna apiang thlan huh hliam chu ka hrechiang thar viau bawk a. "Lum ti e...tirawh, sawlaiah sawn i va ṭhu zawk teh ang" ka ti nghal vat a.






Kan in ha fel a, a tira kan ṭhutna ah chuan kan ṭhu zui nghal a. Ka phone Sana ka bih zauh a, Dar 10 a lo pel leh ta der mai. Ka rilru chhungril hmanhmawh viau mah se ka bul ami ka thlakhlelhna chuan a hup bet vek hrih si.






In thlahlel zetin kan in ngheng rial a. Ka kuah chial a, ani lahin duat takin min kuah bawk a. A kut chu ka khâl niap niap a, "Zual...thu min tiam rawh" tih pahin ka melh chho ralh a.





Khawpui êng pe at chu a thlir vang vang a. "Thutiam" tih pahin a bu nghat nghat a. A ngawi zui ta daih a, ka thlêk hâ reng a. Engmah dang a sawi zawm chuang hek lo. "Ni e, thu min tiam rawh" ka ti nawn leh ngat a.






Min rawn en a, ka khabe ah a rawn vuan a. Muangchangin min kuai dâk dê dê a, ka hmui ah chuan a rawn fawp ta vawng vawng a. Kan inthlah a, ka pawm nghet salh a, "Mawh...min tiam thei lo em ni?" ka tih rual chuan a hawisawn a.






"Hlim... Thla leh Arsi eng khi i hmu tiraw?" a ti thâwp sat a. Van boruak thiang kâk chu ka thlir chho ve vat a. "Aw..hmu e" ka ti nghal vat a.





"Khawi hmunah pawh awm ila... Khing Thla leh Arsi te an ên chhung chuan ka phatsan ngai lovang che" tih mawlh mawlh pahin min kuah nghet salh a.





Ka thinlung zawng zawng in ka lawm a, ka hlim takzet. Ka lung a chhe tel mah bawk a, "Zual...ka hmangaih che" ka ti sap a. Kan infawp leh ta vawng vawng a.





"Zual...i bula awm la thlahlel viau mahila kan phei phawt dawn em ni?" hmel ṭi deuh dâk chuan ka melh pah ralh a. Min en a, min thlêk vang vang a. "Hlim...ka ngai dawn hle mai che" a ti nghat a.






Ka kuah thlawp a, ka pawm vawng vawng a. "Zual...haw lo mai rawh" ka ṭah te a chhuak a, ka in sûm nasa hle. "Rawn kal leh vat rawh aw? Ka ngai dawn che e..." ka ti thâm chhal a.





"Ka duat..ka rawn zin leh thuai ang" a ti ringawt pawh chu ka thlamuanpui hliah hliah a. Ka mittui rawn luang ngiai ngiai chuan ka la thlakhlelh zia min hrilhpui tih a hrethiam em ang chu maw?






Min en reng a, ka mittui luang ngiai ngiai chu a hmuh hmaih hauh lo. "Ka duat...i mittui hi ka hru dawn lo. Ka tana rawn luangchhuak ania...i taksa a fan theih chin chin fang rawh se" a rawn tizui sap a.






"Ka hmangaih che" a rawn tihzui leh hnu chuan in thlahlel zetin kan inpawm vawng vawng a. Car lam pan chuan kan inkai phei a, kan phei pah chuan ka mawng bawr chu a ṭham phei leh zauh ṭhin a. Ka haw hran lova, nuam lo erawh ka ti ru viau.






Car kawngkhar ka pawt chiah chu ka kutah a man chat a, a lam hawi chuan min pawt her zui a. Min rawn fawp zui nghal bawrh bawrh a. Kei pawhin a tuk maia ka hmuh loh zui tur, ka ngaih em em chu ka fawp let mawlh mawlh a.





A duhthawh ang bawkin ka duhthawh a, min hrâwm nawk nawk hi a ni ber a. Ka hnute a khal a, min fawp kual sek bawk a. Ka hnute a fawp leh a, a hma ang ngawt ka ni tawh lo. Min ti zau thau takzet tih ka inhria, mak pawh ka inti viau bawk.





A rem lai laiah ka ṭhâm chân chân a, ka thaw deuh halh bawk a. Ka mal leh mawng bawr vel a chul lai phei chuan ka thaw leh hawk ṭhin. Mahse, kan hun hman mek chu ka ngaihtuah a, ka nu mangan tawh dan tur te ka ngaihtuah thleng zung zung a.




"Zual...duhtawk ang, kan tlai lutuk ang" ka ti thâm chhalh a. Min nuih sak a, "Awle..i thu vek alawm" a ti ban chalh a.





"Zual...i thinrim lo tiraw?" tih pahin ka man bet chial a. A hmel chu ngun zetin ka en reng bawk a.





"Thinrim lah love....tirawh phei ang" tih pahin Car kawngkhar chu min hawnsak zui a. Ka ṭhu lut zui a, ani pawh a rawn lut zui ve leh nghal a. Cigarette-a ṭan a, a sî zui vang vang a. Chulai hmun, kan hun hman tawpna ni hrih tur chu kan chhuahsan ta!





"Zual....i rawn zin phei leh vat ang tiraw?" tih pahin ka thlêk zauh a. A lo bu nghat nghat ringawt a, kan hmalam chu a en ngar a, duhthawh zetin a Cigarette-peh chu a sî zui leh vang vang a.






Ka phone chu ka bih a, ka nu in min rawn biak a tum nasa hle tih ka zuk hmu nghal thuai a. Zan dar 12 a lo ri ṭep tawh bawk. Mahse, engpawhin min tise ka lungawi em em tho ang. Ka hmangaih tana hun ka pêk theih zan hun hnuhnung a ni hrih tlat.






Kan hmalam hun tur te, kan inkarah eng thil pawh thleng se rinawm taka awm intiam mawlh mawlh chungin kan tlan zel a. Ka 'Duata' ka kalsan hun a thleng dawn ta tak tak e.






Kawngsir zau laiah chuan muangchângin a ding riai riai a. A ngawi ngal a, ka insiam ṭha mawlh mawlh a. "Anih Zual...tluang deuhin i kal dawn nia aw? Ka ngai ngawt ang che" tih pahin a kut chu ka vuan chat a.






A ngawi reng a, vawikhat pawh min melh chhin hek lo. "Zual...ka kal ange... Mangṭha hrih phawt mai aw?" ka tih leh rual chuan chhuah tumin ka in siamrem zui a.






Zual chuan min man chat a, ka ṭhu ṭha zui thuai a. Min en kal a, a hmel hlimlo ru zet chu ka hmuh hmaih hauh lo. "Hlim..." a ngawi zui leh daih a.





"Ummm" tih pahin ka en kal a. Min rawn hnaih a, min pawthnai zui leh a, ka hmui ngei chu a rawn fawp zui leh ta nge nge a. Kan hun hnuhnung a ni tih hrechiang dun zetin kan infawp mawlh mawlh a.





"Hlim...min zui mai la?" tih pahin ngun zetin ka mitah chuan a en kal a.





"Zual...ka châk lutuk. Kumkhuaa i bula awm ka chak lutuk. Mahse, tunah chuan a la rem hrih silo. Rinawm takin ka lo nghak reng ang che" ka ti fân raih a.





"Ni e...min hrethiam rawh. Ka la thlahlel em che a ni" a ti sap a. Ka pawm nghal thlawp a, ka kuah vawng vawng a. "Zual...ti suh. Kal suh.." ka ti chuai raih a.






Zankhua in inpawm mahila kan inthlakhlelhna a reh dawn chuang lo tih hretu kan ni ve ve si. Hun kan chelh thei silo, ka kal a hun ta.






"Zual...ka kalsan phawt ang che" ka ti leh sap a. Nuih suk pahin ka biangah a rawn piai zauh a, "Anih...lo dam ṭha ang che" a rawn ti zauh a. Ka chhuahsan ta...






Min en reng a, min thlir reng a. Ka kalsan ta.. Ka hawi let lai chuan a in her mek a, min rawn vai lauh lauh a. Kei pawhin ka vai ve reng bawk a. A tlan liam a..ka ruak nghal huaiin ka hria.






Dim zetin ka lut a, kawngka ka kalh zui nghal a. Muangchangin ka pên phei chhat chhat a, mut pindan ka pênlut chiah chu Tukverh bula ṭhu, pawnlam hawi a lo ṭhu ngawi reng ka hmu chu ka ding chawt a. Ngawi rengin ka en reng a.





"Ka nu...ilo la meng a ni maw?" ka aw khûr ru der der chu a hriat ngei pawh ka ring.





Muangchangin a rawn hawi a, a mit aṭang chuan mittui a luang hnem tawh tih hriat takin a bui sen ṭiak a. Min en reng a, ka dinna ngaiah chuan ka ding ngawi reng a. Muangchangin min rawn pan chhat chhat a.






"Mami...ka in nghahna, ka hmachhuan awmchhun i nih hi.. Engatinge hetiang mai maia i awm?" a rawn ti fiah fak a. Ka kutah a chelh a, Khum lamah chuan min kai phei a. Khumah chuan kan ṭhudun a, ngawi rengin min zilhna chu ka ngaithla char char a ni ber e.






"Mami...vawiina i tihdan te kha chîn tam loh atan a ṭha. Eng anga i duh leh i thlakhlelh pawh nise ani ai chuan ka pawimawhin ka nihna a sâng hrih zawk tih hrereng ang che. Eng emaw vanga thlahthlam a phatsan mai thei che aia i dinhmun chhe ber pawha i lama ṭang tlat tur hi ka pawimawh zawk tih hria ang che" a ti mawlh mawlh a. A sawi tum pawh ka hai hek lo. Min rawn biak a tum laia ka chhân loh chungchang a rawn sawi tih pawh ka hrethiam nghal bawk.






"Mami....zânah hmunfal leh khawi hmunah emaw a mipa kawmfâl a ṭha lo ania. Inchhûng khur ngeia in rîm hi a him ber tih hre fovang che" a rawn tih zui leh pawh chu ka hrethiam chiang hle bawk.





Ka ngawi reng a, engtinmah ka chhâng lo. Thiamna ka neilo chiang bawk a. Mahse, nidang ang chu nise hnial hrâmna chu ka hre leh tho chuan ka ring. Tun dinhmunah chuan ka nu khawhar mangang em em chu hnial buai ka tum hran hek lo.






"Engpawh nise Mami...i mu dawn ang. A tlai tawh ania" a tih zui leh hnu chuan mu turin kan insiam zui ta sat sat a.





Ka nu lam hawi lovin ka inlet thak a, ka phone chu ka phawrh de de a. Ka inkhuh zui nghal thuai a.






"I mu ve tawh em?" ka message thawn rual chuan ka phone chu ka pawm zui thak a. A rawn chhân tawh leh tawh loh erawh ka bih ngun zui viau thung a. Mahse, min chhânna erawh ka dawng har viau thung.






Ka lo muthlu leh lap ṭhin a, ka harh zawk a. Ka phone chu ka bih leh a. Min chhânna a lo awm ta vâng e. "Aw..ka mu fel chiah e" tih chu ka chhiarliam puat a. Ka lo muthlu zui leh nghal a. Ka meng leh kâwk a, "Zual...mu ang, ka meng thei thlawt lo" tih chu ka chhu zo thei hram e.





"Awle...tui deuhin mu rawh. Muttui em em le" a rawn tih rual chuan, "Muttui le" ka ti nghal vat a. Ka phone chu lukham hnuaiah ka thawlh lut zui nghal a. Muthilh nghal tum chuan ka insin ṭha sat sat a.





(to be continue.......)


Show post links
Top

[Ngaia]

THUTIAM
Chap~8



By : Tom Tom Putara






Nitin zantin inbe mahila ka khawharna erawhin kiam a hnêkin zual lam a pan tulh tulh bawk si. Khawharna chu ka ṭhian a ni a, kan inkawp chawt hi a ni ber a. Ṭhiannu Dofky-i nen pawh kan inkawm tam lo sawt viau a. Ṭhian thar a lo nei ve bawk nen, kei lah vahchhuah aiin mahni a awm a, ka hmangaih leh ngaih em em Zuala hlimthla kawm melh melh nuam ka ti zawk si.






"Ṭhiannu, engnge i tih?" tih pahin tukverh lam hawi chuan ka phone chu ka chelh ngar a.



"Eng em em ti love...i va reh em em ve? I dam zawk em?" ka ngaihbel nge ṭhiannu Dofky-i aw zângkhai vah erawh ka hre tlat lo.



"Ka dam ṭha e. In ah i awm em?" ka ti nghal sawk sawk a.



"Tunah chuan awm lo, Sawmtei nen kan chhuak lawk a. Kan ṭhianpa Rinmawia te In ah khan chaw kan ei nghal mai thei" a rawn ti nghal zung zung a.



"Tunge Rinmawia?" ka ti nghal vat a. Ka chhungrilah chuan thîkna in ka khat nghal. Ka khawharna leh lunglenna te chu ka ṭhiani chuan min hrethiam takin min hnem turah ka ngai a. Mahse, ka tel lovin ṭhian dang kawmin a hlim hle tih ka hriat chuan ka na ru nghal ngawih ngawih si.


"Awww...i hrelo maw? Jenny-i u kha...." aw zângkhai vaha a rawn tih hnu phei chuan ka tawt up up in ka hria.



"E, nih chu....anih nuam deuhin hun hmang rawh u" ka ti ban chat a.



"Ṭhiannu, ka rawn haw veleh ka rawn lêng phei dawn nia" a rawn tih lai te chuan an thawm a na viau a. An ri deuh laih laih a, tel ve châkna ka neilo na a, an thawveng lutuk bik erawh ka haw ru ngawih ngawih thung.



"Awle.." ka ti liam leh puat a, kan inbiakna chu a rawn titawp zui nghal hmak a. Ka phone chu ka dah chawrh a. Tukverh lam hawi chuan ka ṭhu ngawi reng a. Zuala lah a reh tlawk tlawk mai si.






Ka nu rawn haw chu rang takin ka va chhâwn vat a. Chawhmeh zuarin a kal kual nasa ṭhin si a, a hah hle dawn tih pawh ka hria. "Nu, thingpui i duh em?" ka lo ti vat a.






"Aw, a awm te chuan...." tih pahin a chawhmeh hralh bâng chu a remfel mawlh mawlh a. Thingpui chu ka siam sak zui nghal mawlh mawlh a.






Ka phone ri ral ral chu ka bengkhawn nghal viau bawk a. "Nu, hei aw?" tih pahin Dawhkan ah chuan thingpui chu ka hûng zui nghal a. Hmanhmawh takin ka phone awmna lam chu ka pan zui nghal vat bawk a.





"Aw hello..." tih pahin ka mut pindan lamah ka lut zui nghal a.



"I buai em ni?" Zuala chuan phak chalh hian a rawn ti ban charh a.



"Buai em em love..ka nu a rawn haw chiah a. Thingpui ka siamsak lawk maw le" ka ti nghal vat a. "Engnge i tih a?" ka ti zui zat a.



"Ka la mu a.."



"I nuamsamlo em ni?"



"Ka nuhah aniang..." a rawn nui hul hak a.



"I va over tak..."tih pahin ka nui hak a.



"Tak taka, nuam e. Ka mu vel mai mai"



"A hrim hrimin min va ngailo em em?" ka nu in a hriat phâk ka hlauh avang chuan ka ṭawng zâwi hle bawk a.



"Ka ngai che alawm, ka ngai lutuk che" a rawn ti ve vat a.



"Engtikahnge i rawn kal leh ang?" ka tih sap lai chuan, "Mami...ka inbual lawk dawn ania" tih pahin ka nu chu a rawn dâk zuai a. "Awle..." ka lo ti vat a, "Mawh...engtiknge i rawn zin leh ang?" ka tinawn leh a.



"Ka hrelo le...kan buai ve lutuk a. Kan In sak zawh lamah daih a ngaih ka ring" a rawn ti ban chat a.



"Engtiknge in zawh ang? A la rei awm e" ka hnual rawih tih pawh ka ṭawng ri chhuak ah chuan a hrechiang viau ang.



"Ka hrelo le...a rei lutuk lo turah ngai ang" a rawn tih chu thu hriat nuam lam mah nise ka thlamuanpui pha chuang der silo. "Ka dah phawt ang aw? Ka tho chhuak ve ange" a rawn tih zawm leh a.



"Awle...zanah min rawn be rawh aw?" pangchang zetin ka ti lêt vat a.



"Yes....ka rawn be dawn che nia. Anih phawt aw?" a rawn ti leh zung zung a.



"Anih leh le..." ka tih rual chuan a dah zui hmak a. Ka ngaih leh ka thlakhlelh ang in min ngaiin min thlahlel lo ni berin ka hre ṭhin. Kan inbe khât a, kan inbiak chhunah lah min kalpah deuh mai mai nia hriatna ka nei bawk.






Lungawilo ru zet chung chuan ka chhuak phei a. Ka nu a hah hle tih hrereng chungin theihtawpa awl tum chuan ka che nghal sawk sawk a. Ka nu inbual zo chu a rawn lut a, pindan lamah a inthlak a. Inthlak paha khawhar taka a zâi rât rât chu ngaihthlak hrehawm viau mah se min hnem viau in ka hre lawi si.







Zan lamah inleng kan nei vak tawh lova. Ka nu rawn kawm tum kan ṭhenawm lawka awm Nu Champuii erawh a rawn lang leh hram e. Thingpui te ka lum sak a, an pahnih chuan an inkawm a, an hlimdun ve em em a. An hmel hmuh a nuam viau mai. Ka nu khawhar hmel hmuh hi a hrehawm ka ti ṭhin.






Inchhung hnawk niaih mai chu ka tifai nghal sawk sawk a. Kawngka lamah thawm a lo awm a, Zuala rawn lang tura ngaihna lian tak ka nei a, ka thin a phu nghal dut dut. Kawngka kik thawm chuan ka lungphu a rawn chhu rang zual sauh bawk a.






Ka nu in lut tura sawmna a pek rual chuan ka ṭhian, ka engkim, ka ngaih rûk em em chu a rawn lang nghal zat a. "Chaw in ei tawh maw?" tih pahin a rawn ri lut nghal thar thar a.







"Ei tawh e, rawn leng rawh" ka nu in a lo chhânna pawh chu a bengkhawn zui em em hran lo. Hmanhmawh zetin ka awmna lam pan chuan a rawn phei zui nghal a. A dan ngai te in kan Sitting room kil khata Darthlalang hmaah chuan a ding a, a inthlek kual zui leh nghal a. A hmui te pawh a tipawrh leh kual nasa tawh mai.







Hmunphiah pahin ka ṭhiani chu ka melh leh ralh ṭhin a. Darthlalang hmaah chuan a la in thehkual nasa mai a. "Chaw chu in eikhawm ta nge?" tih pahin ka hmunphiah ken chuan a rem lai lai chu ka hâwl kual nawk nawk a.







"Report ka pe dawn nia, han tizo phawt la.."tih pahin ṭhutna ah chuan a ṭhu zui a. Nui var var chungin a phone-a hmet nghal mawlh mawlh a.






A bula ṭhut pah chuan, "Leee...ka in ring ta viau e. I lo ngaithla dawn ang hmiang" ka ti nghal vat a.






"Awii...enteh, kan ni daih" tih pahin min rawn tuai thuak a. A hmelah chuan hlimna zawng zawng ka hmu ni mai hian ka hria.






"Tu nen chuan maw? Sawmnghawngseia nen maw?" ka ti nghal vat a. A lungawilo viau dawn a, a dik min hrilh nghal dawn tih pawh ka hrechiang viau bawk.






Ka rin ang ngeiin min rawn chûm nghal dawp bawk a. "Awiiiiii....teuhlo lutuk. Rinmawia nen...." a rawn ti nghal chat bawk a. A hmel hlim lutuk chuan a lungawina a pholang chiang hle bawk.






"A ni maw? Ka va lawmpui che" ka ti nghal vat a, ka thinlung takin ka lawmpui em em bawk. Ka ṭhiannu hlim hmel chu hmuh a nuam takzet.






Kan pahnih chuan kan ri bawrh bawrh reng a. Ka nu te ṭhiandun erawhin min ngaihven lem lo. Keini pahnih awmdun hi chu ngaiah an nei deuh zel hlawm tawh a, kan bengchheng ṭhang dun bawk a. Min hre ṭhang hi chuan min enliam vel mai mai tawh ni ber hian ka hria.






"Tirawh...thlanglam bathlar ah ṭhu ang" tih pahin ka tho zui a. Ani pawhin rang takin min zui nghal a.






Ṭhutna kan remfel chiah tihin phone rawn ri chu rang takin a ngaihven nghal a, min melh paha nuih sâng pahin, "A rawn call..." a ti sap a. A tho zui nghal a, kan ṭhutna piah deuhah chuan a va ding zui a. An inbe zui nghal mawlh mawlh a.






Ka phone chu ka bih thuai a, a reh hian a reh tlawk tlawk bik si. Eng message mah a awm lova, min rawn biak a tum miahlo tih ka hre bawk. Ka luhlulna in biak tum biklo mah se ka ngaihna leh ka thlakhlelhna erawhin biak a châk zek zek thung lawi si.






Ka insûm thei ngang tawh lo, "Engnge i tih? I va reh ve?" message ka va thawn ta hram a. A chhânna ka nghak ta ngar ngar a, ani erawh a reh vung vung lawi si.






An inbe zova, ka bula rawn ṭhut pahin, "Naktuk lenchhuah puiah min rawn sawm a.." a rawn ti nghal sat sat a.






"A nuam ngawt ang" nui lui sak chungin ka lo ti nghat a. Ka awmdanah chuan thup tum viau mahila min hrechiang em em tu chuan a rawn hmuthiam nghal em em si.






Ka bula rawn ṭhut pahin ka kut a chelh a, "Ka ṭhian...engatinge ka lakah zêp i neih a? In inkarah engnge thleng?" tih pahin min thlêk hâ a.






Ka ngawi reng a, ka ngaihtuahna hmun hla taka a awm ang bawkin ka mit pawhin hmun hla tak a melh ngar bawk a. Ka ṭhiani chuan min en tlawk tlawk tih pawh ka hria.






"Ṭhiannu...." tih pahin min rawn kuah a. "Ka ṭhian....engnge i chungah thleng?" a rawn tizui leh a. Min rawn sâwi zui a, ka ngaihtuahna aṭang chuan ka harhchhuak zawk niin ka hria. Ka ṭhu ṭha nghal at a, ka phone chu ka bih leh a. Engmah chhânna ka la dawng lo.







"Ṭhiannu, ka hrethiam tawh bik lo. A châng leh min rawn ngaihven em em a. A châng leh a reh leh vang vang a. A khawsa zia hi ka hrethiam tawh bik lo" ka ti hnual raih a.






Kan pahnih chuan kan ngawi reng a, engmah sawi zawm tur ka hriat loh ang bawkin ka ṭhiani pawhin min hnem mai ngaihna a hre bik lo niin ka hria.






Ka phone a rawn ri ta! Phûr ru tak,
hlauthawng ru tak leh hnual lâwk ru takin ka en a. Ka ṭhiani pawhin a lo bih ve vat a, "Aw...hello" ka ti nghal vat a.



"I lo buai em? Tunlai chu kan In sa kan buai lutuk a..." a rawn tinêm duai a.



A hmaa ka lo lungawi lohna te, ka lo thinrim rûk ngawih ngawihna te chu a reh nghal duakin ka hria. "Anih chu....i chau em?" ka ti nghal thuai a.



"Chau love...ka hah lo lutuk. I lo damṭha em?"



"Ka dam chuan ka hria..."



"Engatinge? I damsam vak lo em ni?"



"Ka dam ṭha...ka ngai che a..." ka inthlahrung thar ve leh deuh, ka bula ṭhu chu ka melh ralh a. Mahse, nui vur vur chungin a phone a lo hmet mawlh mawlh a. Ka thaw deuh huai nghe nghe.



"Keipawhin ka ngai lutuk che alawm"



"Tak tak?" a aia chiang deuh zawka min chhân ka beisei nghal em em bawk a.



"Tak tak anih i ring lo em ni? Ka ngai lutuk che. Ka ngai takzet che alawm" a rawn ti dam dap chu ka thaw deuh huai a, ka lungawina chu min rawn hmuhpui ve sela chuan min pawm leh vawng vawng awm si a.



"Zual...ka lawm lutuk. Ka hlauthawng ṭhin..."



"Eng thilah chuan maw i hlauhthawn?"



"I reh vang vang hian hlauhthawnna in ka khat ṭhin?"



A rawn nui hul hak a, "Hlauthawng tawh suh aw ka duat? Ka ngai reng zel che ania. Mahse, ka buai ve thei lutuk a, duh angin ka ngaihsak hman ṭhin lo che a. Min lo hrethiam dawn nia" a rawn ti mawlh mawlh a.



"Nizanah Fb-ah ka rawn mention-che kha...min la chhâng miahlo" thildang sawipui ka duh zawk ta tlat a.



"Anih chu...ka lo en dawn nia. Ka khawih hman thlawt lo alawm. Eng thil nge ni reng reng a?"



Ka nui hak hak a, "En la i hre mai ang" ka ti zui ve leh vat a.



"Anih Duati...ka intifai ve ange aw? Ka ril a ṭam ve deuh tawh bawk a" inthlahrun hmel zetin a rawn ti zâwi sup a.



"Awle...awle...intifai rawh..i chau ngawt ang. Mahse, reilo la aw? Ka lo ngai leh hman ngawt ang che" ka ti ve leh vat a.



"Awle...ka rawn be leh vat dawn che nia" a rawn tih hnu chuan kan dah ta hrih a. Ka dah rual chuan ka phone chu ka pawm zui vawng vawng a.






"Va nuam leh awm si ve aw?" ka ṭhiani chuan min rawn nghêng salh a.





"Awiii....kha kha alawm ka hriatthiam ṭhin loh ni. A reh leh vang vang emaw a ni ngei anga" ka nui lai pawh ka tâwp zui nghal chiang hle bawk.






"Ngawi teh ṭhiannu, eng emaw dang vak a ni lovang. A buai ve aniang..." min hnemna thu chu a tak ngei nise ka ti ngawih ngawih bawk.






Kan ngaihdan, kan suangtuahna chu kan chhuangso bawrh bawrh a ni ber a. A chang leh kan nui a, a chang leh ka ngaihtuahna tibuai map tur te kan ngaihtuah thleng dun bawk a. Zawlkhawpui tlangval ringawt erawh kan tuipui bik chuang lo. Ka ṭhiani lungdumtu pawh kan tleipui tel viau bawk.







"Ṭhiannu...ka va haw phei dawn ange, duh aiin ka awmrei tawh..." a rawn ti chu chelh hrih duh viau mahila Sana ka bih rual chuan chelh reng chi niin ka hre ta bik lova. Kan inzui chhuak a, kan in mangṭha ta nge nge e.






Ka nu chuan min lo melh ralh a, "Mami, rawn ṭhu ve lawk teh" a lo ti vat a. Ka nu bulah chuan ka ṭhu a, englam tak min hrilh leh dawn ni maw?






"Mami...i pa a awm tawh lova. Hmeichhia mai kan ni a, zahawm taka kan khawsak angai dawn ania. I nu lah heti mai hi ka ni a, nangpawh pa lova khawsa tawh tur i ni dawn a. I nun uluk hle ang che aw?" a ti mawlh mawlh a. Ka lo bu deuh nghat nghat a.






"Mami..ka engkim i ni a, ka innghahna i ni bawk a. I tel lovin engmah ka ni dawn lo tih hi hrereng bawk ang che aw?" a rawn tizui leh a. Kei, heti ve mai laka ka nu lo in nghahzia ka hriat chuan ka insit thar ngawih ngawih bawk a. Engmah phei chu ka sawichhuak hran lo.







"Tirawh, i mu dawn ang hmiang" a rawn tih zawm takah chuan ka tho zui ve nghal a. "Ka insil lawk ange" ka ti zui ve sap a. Ka nu erawhin mut pindan lam a pan nghal thung a.






Ka nu bula riah chu duh ru viau mahila mahni a mut duhna pawh ka nei lian ve viau bawk si. Ka nu pawhin khawharin min thlahlel viau mah se min hrethiam ve em em tho.







Ka mu fel chiah tihin ka phone chu a rawn ri ṭang a. Rang takin ka bih vat a, "Mu tawh em?" tih ka hmuh rual chuan ka nui sêih a.



"Ka mu fel chiah...nang?"



"Ka mu hman ve chiah e."



"Ummm...i hahdam siai siai mai ang"



"I va mengrei reng reng ve? In leng i nei ṭha deuh aniang"



"Nia...."



"Ok" tih zawngin a rawn chhâng chu ka nuih a za ta lo riau bawk. A rawn ngai thutak viau ang tih ka hlau thar em em bawk a.



"Dofky rawn lêng char char alawm. Kan rêl char char che a..."



"Anih chu....a dam maw? Min lo biak dawn nia"



"Chhas thar a nei a...."



"Woww...ka hman hunah ka lo fiam ange"



"Rawn Call-zâwk la...ka type-hne"






A reh deuh vang vang a, ka phone chu a rawn nghawr dar dar a. Ka la thuai a, "Umm.." ka ti nghal vat a.



"I thu mai siaa..." a rawn nui hak hak a.



"Engnge? Ka ngai che alawm...i aw hriat ngei ka châk alawm" ka ti mawlh mawlh a.



"Ka ngai lutuk che Duati...."



"Keipawhin ka ngai lutuk che...engtikahnge i rawn zin leh ang?" chu zawhna chu ka va han zawt ngun tawh tak...



"Ka hrelo le...hun hi ka nei hrihlo lutuk a"



"Rawn kal leh vat la...? Ka ngai tawh che e...."



"Keipawhin hmuh leh vat che ka châk tawh lutuk...ka ngai lutuk che" a rawn ti dam dap a.



"Zual...naktukah rawn phei leh mai la...?" a sawitu ngei pawhin thil thleng lo tur anih zia chu ka hailo. Mahse, ka ngaihna leh thlakhlelhna erawh chuan a tak ram thleng ngei se ka ti ngawih ngawih bawk si.



"Duati....keipawhin rawn kal ka châk lutuk alawm"



"I châk tak tak lo, min ngai thlawt lo"



"A mak eeee.....ka ngai lutuk che. Duh dan angin a awm zung zung theih loh anih hi"



"I duh chuan i thei" a laka ka pangchanna chuan thinrim derna tur ngawt min ngaihtuahtir lui tlat a.



"Theih nise i bula awm char char ka châk alawm"



"I duh chuan i thei...i duhlo lui mai alawm"



"Huiham...sawi tur ka hre tawh lo"



"Anih tak chu a" min thlêmna phût ru takin ka nghâk zui khiau bawk a.



"Thinrimna tur i zawng reng a..."



"Thudik ni miau hek..min ngai tak tak lo"



"Ka ngai che alawm Duati..."



"Sawi ringawt chu a har hlei nem...a taka tih hi a har ṭhin"



"A mak eee...thinrimna zawng reng lo la...ka ngai ber che ka tih kha..."



"Anih...ka lo beisei ang che"



"Nia....han tum phawt ila..." a rawn tih takah chuan ka nui var var a. A rawn kal ngei pawh ka ring bawk. "Engpawh nise Duati...kan mu tawh dawn em ni? Ka chau ve deuh aniang, ka mut a chhuak dawn tlat" a rawn tih zawm takah chuan kan inbe tâwp thei ta hram a.







Ka puansin chu ka pawt khâwm a, ka sin peihlo na a, ka kuah khawm a. "Zual...ka ngai tawh lutuk che a. Min kalsan tawh miah suh aw?" tih mawlh mawlh pahin ka puan kuah khâwm chu ka pawm vawng vawng a.








(to be continue.........)


Show post links
Top

[Ngaia]

THUTIAM
Chap~9



By : Tom Tom Putara




Ka beiseina neih zawng zawng a kiang a, nitin kan inbe khât tulh tulh a. Kan inhmuh hnuhnun ber pawh thla hnih liam a lo ni ve ta der mai.






Hmeichhe pangngai te ang lo takin thla bi hlawh ka la lo leh ta pang a. Ka inrinhlelhna chu a dik ngei pawh ka ring ta viau bawk. Finfiah ngei ka duhna leh ka hlauhthawnna pawh a inchen viau bawk.






Nitin class-kan kal a, a hmaa School-nuam ka tihna zawng zawng kha a bo zova. Ṭhiante nena nuih thler duai duai pawh ka peih tawh lova. Ka ṭhiani lahin nitin a dan pangngai tê in thawveng takin hun a hmang a. A bialpa thar nen an inzui chawt a ni ber a, nuam a ti lutuk chu ka lawmpui ru em em thung.






Kan School- thlang a Thingkung lian ve tak hnuaiah chuan ṭhutna a awm a, chulai hmun aṭang chuan Tlâng a langkual ruih a, chulai hmunah ngei chuan hun ka hmang tam ber a. Keimah chauha awm duh viau mahila min rawn ṭhutpui an awm fova. Mahse, tumah ka kâwm peih lova. Min kawm an rawn tum sek pawh ka peih hek lo. Mahni mai a hun hman a, ka ngaihtuahna khawvelah chuan midang dîpbuaitu awm lova hun hman ka châk ber bawk.






Ka awmdan leh khawsak dan avanga min en hrek hrek leh min kâwm zui peihlo an nih deuh vek laiin mi pakhat, min kalsan duh miah lo a awm thung a, Henry Lalliansanga.






A tirah chuan ngeiin hnawk ti ru viau ṭhin mahila School-kan kal apiangin chulai hmunah chuan kan ṭhudun ṭhin a. Kan innel ve tulh tulh a. Ka harsatna te min zawt fo ṭhin.





"Ṭhiani....ka chhuk dawn asin" tih pahin Dofky-i chu ka melh ralh a.





"Chhuk daih bik zel lo la? Kan inkawm ho vek thei alawm" a lo ti vat tak na a, ka duhthlanna erawh min sawhsawn sak dawn lo tih chu ka inher zui danah chuan a hrethiam ve tho ang.





"Anih....nakin deuhah kan rawn chhuk ang" a rawn tizui chat a. Muangchangin ka ṭhutna ṭhin lam pan chuan ka pên thla chhat chhat a.






Ka ṭhufel deuh awrh tihin ka hnunglam aṭang chuan, "Min thlen khalh a ni maw?" rawn ti an awm a, tunge anih hrechiang viau mahila ka hawilet nghal thuai a, ka lo nuih sak a.





"Rawn ṭhu ve rawh" ka tih rualin Henry-a chu a rawn ṭhu ve nghal thuai a.





"Canteen-ah han chawl ve ila? Ka hausak lai tak ania" nui hak hak chungin a rawn ti nghal a.





"Aaaa....i duh leh han chawl la...ka ril a ṭam lo lutuk a" tih pahin ka melh ralh a.





"Keipawh" a lo ti vat a. Henry-a bawk chuan, "I chawlh duh ka ring maw le..." a rawn tidam leh duai a.




"Engmah ka châk lo tak tak...i duh chuan han chawl rawh" ka tinawn leh a.





"Tidaih ila Hlimi...engnge i rilru kap tu ber? Ka hriat ve chi thil a ni em?" a rawn tizui daih a.





Ka ngawi reng a, kan hmalam hmun hla taka tlâng lang paw ruih lam chu ka thlir vang vang a. Min rawn zawh nawn pawh chu ka hrereng na a, chhânna ka la pe chuang lo. Ka hrilh kher nachhan tur a awm lo bawk in ka hria.






"Ka nawrlui hran lo che ania. Min hrilh duh a, ka bulah i in bun ruak duh anih chuan khawiahmah ka sawichhuak dawn lo ania" a rawn ti leh mawlh mawlh a.






Engtinmah ka la chhâng lova, tupawh ring nghal mai chi ka nih avangin a laka ka rinna paih pawh ka ni chuang hek lo. Mahse, ka chanchin, ka hrehawmna zawng zawng bunruahna hmun tur a ni lova ka hriat avangin ngawih ka la chuh reng thung.






"Hlimi...i rilru ah hian thil vei lian tak i nei tiraw?" tih pahin min thlêk hâ a. Ka bu nghat a, ka mit erawhin hmun hla tak, hmun reh tak lam chu a la en ngar reng thung






"Ṭanpui theihna che ka nei em chu ka hre miah lova. Mahse, ka tlanchhiatsan miah lovang che" a rawn tih lai chuan ka thlêk vat a.





"Ni e...." ka ti hman chiah tihin Dofky-i aw ngei chuan, "Ummm...kan va man chiang em... 'Nitin maiin helai hmunah hian mi pahnih an ṭhu ziah' an tia. Kan hmu fo na a, a tak ramah chuan boruak an lo nei zual anih hi" a rawn ti fiamthu nghal mawlh mawlh a.






Henry-a nen chuan kan hawilet rual ṭhawt a, Dofky-i leh a bialpa chu an rawn nui ṭhaw a. Keini pahnih pawh chu kan in en zauh a, kan nui ringawt bawk a.






"Rawn ṭhu ve rawh u" tih pahin ka tawlhsawn rem sawk sawk a. An ni pawh sawm nawn an ngai lo. An rawn ṭhu ve nghal thuai a.





"Enteh ṭhiannu, Zari chanchin kha i hre tawh em?" tih pahin min rawn melh pah ralh a.






Henry-a leh Rinmawia chu an inbe nghal bawrh bawrh a. Inkhelh chungchang an sawi nghal mawlh mawlh a. Dofky-i chu ka thlêk hâ a, "Hre nang...." ka ti thuai a.





"Awii....enteh, a rai anti" zâwi sap hian a rawn ti a.





"Tak tak maw? A van mak em em..." ka ṭhiannu chu ka melh tawh lo. Ka thin a phu deuh dut dut a, ka hmazawn hla taka hmun reh tak lam bawk chu ka thlir leh nghal vang vang a.






Dofky-i lah chuan a ze ngai chhuahin, "Mak pawh ka lo ti vak hlei nem...An inzui nasa em mai" a rawn ti ngheng a. Ka ṭhiani chuan a rilru diktak a rawn sawi ang tih pawh ka hria. A mizia diktak a ni tlat!





"Ka hmu khât ka ti rêng a ni" ka ti ve leh sap a.





"A la naupang sia...a la inchhir ngawt ang" ṭhiani chuan a ti leh mawlh mawlh a. Engtinmah ka sawi zawm tawh lo. Ka ṭhiani hnenah chuan engkim ka sawi anga, School-bân pahin Zun test-na tur ka leitir ang ka ti deuh ania. Mahse, tuna a rilru ang tho hi ka lakah a put ka ring bawk si.






Dar rawn ri chuan min kaitho rual siau a, muangchangin School-lam pan chuan kan chho zui ta nghal a.





Ka rilru ah 'Zari a râi' tih ngawt chu a awm a. Ka in rinhlelh angin thil thleng se engangin nge min ngaih hlawm ang? Ka ṭhiannu, engkim ka hrilhna ngei ṭhin leh ka harsat mangan ber pawha ka lama ṭang ṭhin pawh chuan min hmusit ru viau lo maw? Zirlai chuan ka rilru a luah lova, ka ngaihtuahna a buai mup mup a ni ber e.






Muangchangin kan ṭhiandun chuan kan inzui haw hnak hnak a. Damdawi dawr awmna kan thleng phei ṭep tawh. Ka rilru a insual buai hle a, ka dinhmun diktak hriat duhna in min nawr beh viau laiin ka hlauhthawnna in min lo pawt buai ve sek bawk a. Mahse, ka ṭhiani lo chu rin ngam ka nei chuang bawk silo.





"Ṭhiannu...." ka ding dat a. Ani pawhin min rawn melh vat bawk a. "Ka ṭhian...." ka tizui leh a. Kan hma lawk kawngsir a Damdawi dawr lam chu ka melh ngar reng a.





Dofky-i chuan ka hawina lam chu a melh ve vat a. Rang taka min rawn en pahin, "Engnge ni ta ka ṭhian?" a rawn ti hê haw a.





"Ka zun test-ka duh" ka sawizawh rual chuan ka thaw hawk a. Hnuailam chu ka bih zui ngar a. Ka ṭhiani chuan min rawn din hnaih vat a, "Ka ṭhian...." a rawn ti ringawt a.





Muangchangin ka hawi chhuak a, "Ka ṭhian...nang chauhin i hria ania...ka nu pawhin hre hrih lo se ka duh a" ka ti ban chat a.





A bu deuh nghat nghat a, min en tlawk tlawk a. "Engmah thleng lo hram se..." tih sap pahin Damdawi dawr lam pan chuan a kal zui nghal a. "Ngawi rawh.." ka ti chhuak thei hram a. Mahse, a kal ngaiin a kal zui zel tho a. Hmanhmawh takin ka kal zui ve nghal sawk sawk a.






Dawr aṭanga hmuh phâk lohna hmun turah chuan ka ding khûr der der a. Ka ṭhiannu in min rawn pan phei lai pawh chu ka hmu reng na a, ka hmufiah miahlo thung. Ka lu a rawn hai deuh muai muai a, ka tiril a khûr ru der der a. Hlauhthawnna in min ṭhâm ar ar reng a.






"Lokal rawh le..." tih pahin ka bânah a rawn kai a. Ngawi rengin ka zui nghal ve mai bawk a. Ka ṭhiani pawh chuan engmah a sawi lova, ngawi rengin kan inzui phei hnak hnak a. Dofky-i te In chu kan lut ta!!






Tumah an lo awm lova, a Bag-aṭang chuan a rawn phawrh a. "Kha le ṭhiannu....engkim chiang taka hriat a ṭha ber.." a rawn ti ta... Ka ban de de a, ka hûm zui vang vang a. Ka ṭhiani chuan min en reng a, ka melh zauh lai chuan an Bathroom-lam chu a lo kawk vah a.





Muangchangin ka pan a, ka thin a phu dut dut bawk a. Kawngkhar ka kalh zui a, ngawi rengin ka ṭhu vang vang a. Ka tih tur chu tha khûr ru der der chungin ka ti ta... Ka nghak deuh vang vang a, ka in rinhlelh leh hlauhthawn ang ngeiin hmun hnihah a inthai sen kalh mai. Ka ding khûr der der a, muangchangin ka chhuak zui chhat chhat a.






Ka ṭhiani chuan min lo en khiau reng tih pawh ka hai lo. Hlim hmel hmuh luih ka duh a, ka thei silo. "Ṭhiannu...." a lo ti chiah chu ka kuah thlawp a. Lungchhe em em in ka insût hlawp hlawp a. Ka hnungah a chûl heuh heuh a. "Ka ṭhian...bâng rawh le. Engmah a sawt tawh lo" a rawn ti leh ngat phei chu ka lung a chhe zual sauh bawk a.






Ṭhutna lam chu min pan pui a, ka ṭhu kun chal a. Tun ṭum zet chu ka ṭhiani pawhin min hnem vak ngaihna a hre biklo a ni chêk ang chu, min chûl heuh heuh reng ringawt a. Ka thil hûm chu a rawn ban a, ngun zetin a en vang vang a. A thaw deuh halh a, ka va ennawn leh ngial pawhin pahnih a inrîn chu a fiah ngai rengin a lo la fiah reng tho si.






"Ṭhiannu....ka nu hrilh ka huphurh takzet" ka ti thâm chhalh a. Ni e, a in nghahna, a engkim, hmalam huna a beiseina neihchhun chu thawk leh khatah a tawp vek dawn a ni si a. Engtin tak ngai ang maw?






Min en vang vang a, a mitmengah chuan min lainatna leh khawngaihna a inlâr tawn reng a. Mahse, engmah a tidanglam thei bik lo tih chu ka hriatchian ang bawkin a in hrechiang ve tho bawk si.





Pawnlamah thawm a rawn awm a, rang takin ka mit chu ka tuaifai sawk sawk a. Dofky nau Sentei chu thawveng zetin a rawn ri lut nghal bawrh bawrh a. Nidang ang chu nise kan lo phûl pui ve leh luam ang chu!





"Ṭhiannu...ka va haw phei ange" tih pahin ka tho sak ṭalh a. Ka ke chuan chakna a nei tam lovin a zawi nghuai ni mai hian ka hria.





"Ka ṭhian...engpawh nise i rilru ti paukhauh la. I ṭhiannu hian i lam ka ṭang reng tih i hre dawn nia. Tunah rih chuan midangin hre tam vaklo se a ṭha zawk ang. I nu erawh hrilh ran a ṭha ka ti" tih mawlh mawlh pahin ka bânah a rawn chelh vat a. Kan inzui chhuak nghal a.






"Awle...ka lawm lutuk ania" ka tih lai chuan rang takin, "Ṭhiannu...ka lo hrilh zawk mai dawn em ni?" a rawn ti vat a. Ka ngawi reng a, kan In lam chu ka thlir vang vang a.






"Ṭhiannu, ka tana i inhuamna ah ka lawm lutuk ania. Mahse...." ka ngawi zui dat a. Min en reng a, ka sawizawmna hriat ngei tum chuan min ngaichang zui ta reng a. "Keimah ngeiin ka hrilh ange...a lawm zawk ang" ka ti zui sap a.





Ṭhiani chu alo bu deuh nghat nghat a, ka kutah a la chelh reng bawk a. "Ka phei phawt ange. Chanchin kan inhrilh zel dawn nia" ka tih leh hnu chuan kan in kalsan ta.






Ka nu chu a lo buai hle mai a, tlai lama a chawhmeh zuar kual tur siamin a lo inchhep hnawk niaih a. Ka lut chiah chu ka in ngaihbel nge, min lo enduh viau in ka hria. "Mami...i rawn bâng tawh maw? Vawiin chu rin aiin i va rawn tlai ve?" tih mawlh mawlh pahin a thil tih lai chu a buaipui pah reng bawk a. "Thingpui a awm ang, min lo tih kêp ve nghe nghe teh" a rawn tihzawm leh vat a.






Dawhkan ah chuan ka Bag-chu ka dah deuh chawrh a. Thingpui chu ka siamzui nghal mawlh mawlh a. Thingpui ka pêk lai chuan min lo melh vut a, "Mami...tunlai hi i nuamsam lo deuh nge, i hlim lo riau a ka hriat?" a lo ti nghut a.





Dawhkan bula ṭhutthleng chu ka pawt rem zui vat a. "Ka damṭha e...." ka ti ringawt a. Engmah dang min zawhzui loh avang chuan ka lawm hle bawk.





"I pa Rinpuia te lah chuan pawisa an mamawh thu an rawn sawi sek tawh mai si a. Engtinnge maw kan tih dawn ni? I pa chu awm se tihdan dan a hre leh mai ang maw le aw.." chawhmeh zawrh tur remfel paha ka nu thusawi chuan min dêng dawt a. Engkim chu keima thiam loh anih pawh ka hria.






"Mami...eirawngbawl hi lo chhunzawm la..ka han zuar kual zung zung ange" tih pahin Thingpui chu a lem zui khawlh khawlh a. "Awle" ka ti ringawt a. Engmah dang sawizui tur lah ka hre hek lo.






Ka nu chhuah hnu chuan pindan lamah ka lut zui nghal a. Ka inthlak zui nghal mawlh mawlh a. Ka dinhmun diktak chiang takin ka hre tawh a. Vawiin hi ka School-kal tâwpna tur anih pawh ka ring nghet bur bawk.





Ka Bag-panga ka thil dahṭhat chu ka phawrh a. Khumah chuan ka ṭhu zui hnawk a. "Zual...i fa ka pai asin" ka ti chuai raih a. Rang takin ka phone chu ka ban nghal a. Engkim hrilh hriat vat a ṭhan zawk ka rin avang chuan biak pawh tum chuan ka phone chu ka chelh rân a. Mahse, chhânna reng reng ka dawng silo.





"Zual....hetiang vel hi i ni si a tiraw? Kei hi min han enteh.. Ka hmalam hun zawng zawng a chhe vek asin" tih mawlh mawlh pahin eirawngbawl tur chuan ka chhuak zui ta nghal a.





Ka nu a rawn haw thlen meuh chuan khua a thim chhulh tawh a. A hah hle tih pawh zawh hranpa ngai lovin a hmelah chuan a langchiang hle bawk. "Ka nu...inbualfai la, chaw kan ei dawn nia. Keichu zanah ka inbual mai ang" ka lo ti sawk sawk a. A chawhmeh hralh bâng tlem chu ka lo dahfel sak zui nghal sawk sawk a.





Ka nu inbual chhung zawng pawhin ka ngaihtuahna a buai mup mup reng a. Engtinnge ka hrilh ang? Engtinnge bul ka ṭan ang? Keima tihsual a ni a, keimah ngeiin ka hrilh tur a ni tih chu ka thutlukna a la ni ve fan lawi si.





"A va nuam sawr sawr ve le.." rawn tih pahin a lu a rawn hru pah mawlh mawlh bawk a. Inthlak turin a mut pindan lamah a lut zui nghal a. Chu hun chu hun remchang anih pawh ka hria. Mahse, nidang anga lut mai turin chakna ka nei tam lo hle thung.






Ka pindan lamah hmanhmawh zetin ka lut a, ka lukham hnuaia ka thildah chu ka la nghal vat a. Ka nu hmu tur chuan ka chhuak zui leh nghal vat bawk a. Mahse, ka nu awmna hmun lut tur erawh chuan ka ke pên a dul sâwt hle thung.





"Nu....." tih pahin ka huaisenna zawng zawng sawmkhawmin ka lut ta nge nge a. A lo inthlak mawlh mawlh a. Rang takin min lo en a, "Engnge ni Mami?" a lo ti thuai a. Hlim hmel min lo hmuh na a, ka harsatna leh buaina, ka mangan rûkna, ka hrehawmna zawng zawng chu ka mitmeng ṭi ru dêkah chuan chhiar chhuah a tum ni mai hian ka hria.





"Nu....thil hrilh tur che.... ka nei a..." ka ti ban chap a. A lu tuamna Towel-siamṭhat mawlh mawlh pahin min rawn hnaih nghal thuai a. Ka kutah a rawn chelh a, Khumah lamah chuan min pawt phei zui a. Khum a min ṭhutpui pah chuan chiang zetin min en kal a.





"Eng thil nge ni ta Mami? Ka lo ngaithla ange" a rawn ti dam duam a. Min lo ngaihsak em em na chuan min ti zâm zual sauh thung ang lawi a.




"Nu..."



"Aw Mami....engthil nge ni?"




Muangchangin ka kuta ka thil hûm chu ka lekchhuak a. Ka nu chuan a lo melh kar reng a. "Nu...." ka ti chhuak thei hram.. Ka kut khûr der der leh ka aw chhuak ṭha thei lo kâra ka khabe inkhâwng der der chuan ka dinhmun a tichiang viau awm e.





Ka nu chuan a en tlawk tlawk a. A ngawi reng a, min rawn melh zui leh tlawk tlawk a. "Mami...ka mumang chu a ni silo" a rawn ti chhuak hawk a.





"Ka nu...ka tihpalh" tih pahin ka kuah thlawp a. Ka nu erawhin min kuah lêt lova, a ṭhut ngai chuan a ṭhu ngawi reng a. A fanu chuan ka tina takzet tih chu ka hrechiang hle bawk.





"Mami....chaw i ei phawt teh ang" tih pahin a tho zui a, ka lungchhe zual takzet bawk. Ka hrilh huphurh ber ka hrilh hre thei tawh erawh ka thaw deuh huai thung a. Ka tihsual rah tuar thei tura ka rilru ka lo siamfel ve viau emaw ka tih kha ka lo inpeih lo viau tih chu ka nu min lo hmachhawn danah chuan ka hre nghal mai bawk.






Tlai dang ang a nilo, chaw lem a sak kan tidun viau ania nge. Ngawi rengin kan ei a, kan kham hma dun viau mai. Ka nu chu tukverh bulah dingin pawnlam boruak inthlak danglam mek chu a thlir vang vang a. Chaw eina ka sengfel a, ka tifai mawlh mawlh bawk a.




"Ṭhiani, chaw in ei tawh maw?" tih pahin Dofky-i chu a rawn lut zui nghal a.




"Rawn leng rawh, lo ṭhu rawh" ka lo ti nghal thuai a. Ka chezui nghal sawk sawk bawk a. Ka nu leh ṭhiani chu an inkawm nghal bawrh bawrh a. Kan School-chanchin te chu a zawt mawlh mawlh a.





"Ṭhiani, lo awm rawh aw? Ka inbual ve lawk ange. Ka rei lovang" tih pahin ka pindan lamah ka lut zui nghal a. Ka phone-chu ka bih zuai a. Message-a lo awm vâng e.





"Bawih...i lo ṭha em? Ka hman veleh ka rawn bia ang che. Ka la buai lutuk a.." ka hmangaih, ka ngaih em em Message- a lo awm khiau mai.





"Ka ṭha e. Ka inbual lawk ange" tih chu ka thawn ve nghal thuai bawk a. Hmanhmawh takin ka chhuak zui leh nghal a. "Ṭhian..lo awm rawh aw? Ka rei lovang" tih pahin Bathroom-lam chu ka pan zui ta nghal a.





Ka inbual chhung zawng pawhin engmah dangin ka rilru a luah lo. Ka pum chu ka tuai leh zauh ṭhin a. Ka pum chhunga naute rawn ṭhanglian mek chuan hlimna aiin rilru hahna min siam mek hrih chu a ni ber e.





"Zual....enteh, i hmangaih hian thlamuantu, duattu a mamawh ngawih ngawih asin" tih pahin ka ding ngawi reng a. "Zual...min rawn hruai mai rawh. I bula awm hlan ka nghakhlel takzet" ka tih rilruk lai chuan ka nu in ka ngaihtuahna a rawn luah ve nghal thuai a. Engtinnge ka awm lovin a khawsak ang? Engtinnge ka duatna tel lovin a nun a hman ang?






Ka inbual zova, ka chhuak chu ka nu hmel ka hmu lova. Ka ṭhiannu chu amahin alo ṭhu a. Phone a lo hmet mawlh mawlh a. "Khawiahnge ka nu kha?" ka ti nghal thuai a. "Dawr ah a kal lawk" lo tih thuai pahin min rawn zui nghal thuai a. Ka pindan lamah chuan kan inzui lut nghal a.




"I hrilh tawh em?" tih pahin ka Khumah chuan a mu nghal thlawp a.




"Aw" ka ti ringawt a.




"Engtinnge a tih? A thinrim viau em?"




"A rilru a na hle....a bak a awm hrih lo" ka ti ringawt a.



"A na viau ang"




"Engnge thleng zui zel dawn erawh ka hre tawh lo" ka ti leh ringawt a. Ka ṭhiannu mutna bulah chuan ka ṭhu a, ka hmai chu ka hnawih zui mawlh mawlh a.





"Mami... Mami..." ka nu chuan min rawn ko nghal mawlh mawlh a. Kan ṭhiandun chuan kan chhuak zui nghal a. "Mami...i pa Rinpuia damdawi In an tlanpui anih awm chu.." a lo ti nghal thuai a.





"Engatinge?" ka ti nghal thuai a. Ka rilru ah thildang a rawn lut nghal vat bawk a. An pawisa kan bat mawlh kha!! Tunah damdawi In ah an lut anih chuan pawisa an mamawh ngei anga, min rawn dil ngei pawh ka ring sa nghal bawk a.





"A chaw eikham a tlu ringawt a ni awm e" a lo ti thuai a. "Ka han ngaihven ve lawk dawn nge ni?" a rawn tihzawm nghal thuai bawk a.





"Ka hrelo le...tunah tut tut chuan a ṭul dawn em ni? Chanchin te han ngaichang deuh la?" ka lo ti ve thuai a. Ka ngaihtuahna a insual nasa hle bawk. Kan chhiat tawh chungchangah pawh an chhungkua in min ngaihsak dan te, min buaipui nasat dan te ka ngaihtuah chuan a rang a ranga han tlan chhoh ve nghal a ṭha tih pawh ka hria. Mahse, ka nu chuan pawisa hûmchhuah tur pawh a neilo anga, an lo beisei ru viau angem? Engkim maiah hian hlauhthawnna in ka khat ni ber hian ka hria.






"Engpawh nise an In lamah ka va lang phei lawk ange. Ka rei lovang" tih pahin a pindan lamah a lut zui nghal a. Rang takin a rawn chhuak zui leh nghal a. "Dofky, i ṭhiannu kha lo awmpui lawk rawh aw? Ka va phei ve lawk ange, ka rei lovang" a rawn ti nghal mawlh mawlh a.





"Awle...ka lo awmpui ange" Dofky-i'n a tihlai chuan, "Nu, rei lo la aw?" ka lo ti ve thuai a.





"Rei lovang... An chanchin hrereng chunga lo ṭhut ngawih reng ringawt zawng ka ti deuh maw le" tih pahin a chhuak zui nghal a.




"Ṭhiannu, ka rilru a hah" ka ti nghal thâwr a. Ani lah chu a phone a hmet nuap nuap a, a nui ang vur vur bawk a. "I thawveng bik mai sia" lungawilo ru zeti ka ti zui hlak a.





"Ka hria alawm ṭhiannu... Sawipui che i duh ka ringlo deuh mai zawk ania" tih pahin a phone chu a dahṭha nghal sawk sawk a.





Tukverh bulah chuan kan ṭhu sawn a, tukverh aṭanga thlifim thaw heuh heuh chuan ka suangtuahna tuipui a rawn chhem leh heuh heuh ṭhin. Mahse, suangtuahna awmze nei turin ka hun hman mek chuan a lo chiah buai ve reng bawk a.






Ṭhiani phone chu a rawn ri riai riai a. Rang takin a la nghal vat a. "Aw...hello" tih pahin min rawn nuih sak a. "Tunah maw? E...awle...awle.." a ti nghal mawlh mawlh a. "Aw...ka lokal nghal ang" a tih hnu chuan a dahzui leh nghal a.






"Ṭhiannu, min lo hrethiam mai rawh aw? A rawn leng dawn a, kan In bulah min nghak reng tawh sia" inthiamlo hmel zetin a rawn ti nghal thuai a.





"Aw le...hrethiam tehreng mai. Hun nuam deuhin va hmang rawh u" nui sâng chungin ka lo chhâwn vat a. Ani pawh rang takin a tho a, kan inzui chhuak ta nghal a.





"Anih aw ṭhiannu...ka rawn leng leh vat ang" a ti ve leh thuai a. Thlahlel takin a kutah chuan ka chelh vawng vawng a. Mahse, dan buai reng chi a nilo tih erawh ka hrechiang viau si. "Aw le ṭhiannu, hun nuam deuh va hmang rawh u" ka lo ti ve ta thuai a. Min kalsan ta nge nge a. Kan in mangṭha hnu chuan ka thlir liam ta vawng vawng a.





Ka pindan lamah ka lut zui nghal a. Ka phone chu ka en a, a reh hian a reh vawng vawng mai si. Message tal a awm ringin ka hawng a. Henry-a message a lo awm a. Bung nghutin ka chhâng a, min rawn biak zui loh pawh ka beisei viau a. "Muttui aw...zing thawh nuam le" a rawn la ti hram a. Ṭha takin ka chhâng ve ta tho a.





Ka phone chu ka hmet kual sek a. Ka chhungrila min tur tu avang chuan biak tum chuan ka ngaithla ta vang vang a. "Aw hello" a rawn ti phak chuap a.



"I mu tawh tihna em ni?" ka ti nghal thuai a.



"Ka chau deuh aniang...ka lo muhil daih alawm" a rawn ti nuah nuah a.



"Aw" a ti ang tih hlau ru zetin, "Anih...muhil leh mai la...?" ka ti deuh nghat a.



"I aw ka hria a, ka mutchhuak a reh nghal vek" nui hak chungin a rawn ti vat a.



"Engnge in In sak chu in an tawh a?" ka hrilh duh leh hrilh tum takah erawh ka la lut ngam bik chiah chuang lo.



"A hautak reuh khawp mai. Tunlai chu ka u pawh a hah aniang. A mu hma thei khawp mai" a rawn ti leh mawlh mawlh a.



"U Mipa i nei tihna em ni?" an chhungkua a chêng zât ka la zawt miahlo tih ka hrechhuak nghal bawk. A nu leh pa leh a nau Hmeichhia kha ni mai turah ka ngai a.



"Aw nei e" a rawn ti vat a. "I la mu lo nge?" a rawn tihzawm zat a.



Ka harhchhuak deuh hawk in ka hria. "E taka, Pa Rinpuia kha i hria em? Ka pa borala kan phei ṭuma min lo dawngsawngtu kha?" ka ti nghal zung zung a.


"Aw, hria e..pa fel tak a ni"


"Zanin an chaw eikham khan a tlu ringawt
a. Damdawiin lamah an tlanchho nghal a"



"Khai aw....ava pawi ve aw? Eng êm a tilo turah ngai phawt ila..."



"An In lamah ka nu pawh a tlanphei nghal a, ala rawn haw lo deuh..."


"Anih chu maw le aw...ava zialo em..."



"Nia...." ka ti ringawt a.



"Vawiin lam Class- i kal ang chu maw?"



"Aw, kal e..."



"A nuam bawk em?"



"A nawmna pawh ka hre lem lo. Mahse...."



"Engnge 'mahse'?" a rawn tirang kher mai.



"An ngaihawm hlawm viau ang" tih pahin ka thaw deuh halh a.



"Engnge i sawi awmzia?" a rawn ti nghal thuai bawk a.



Ka ngawi deuh vang vang a, "Ka kal tawh dawn lova?" ka ti zâwi sap a.



"School- maw?" a rawn ti deuh hluai a.



"Aw" ka ti bung nghat a.



"Engatinge a? Engvangin?" mak a tiin ka thilsawi chuan a ṭhâwng takzet tih pawh ka hria.



"Pasal neih ka duh tawh a...ka luhkhung dawn..." ka tilui ve leh ngat a.



A rawn nui hul hak a, "Fimthu reng lo teh. I fiamthu nge thutak tih ka hre miahlo ania" a rawn ti nuah nuah a.



"Ka fiamthu lo...ka rawn phei dawn...ka thei tawh lo"



"Keimah avanga i hmalam hun a chhiat ka duh miahlo ania"



"A chhe vek tawh alawm" ka ti ve leh nghat a.



"Hlimi..." a rawn ti chang fawk a.



"Engnge? Ka thusawi i awihlo em ni?" ka thil hrilh tur taka ka luh hma in a rilru diktak hriat erawh ka tum fan thung.




"Keimah avangin i hmalam hun i tihchhiat ka duhlo. Khawngaihin khatiang ang zawng chuan rilru pu suh" a rawn ti leh vat a, a tlânchhe deuh riaua hriatna ka nei nghe nghe. Engkim ka hlauhthawn vang te pawh a ni mai thei bawk. Zuala hian min phatsan ka ring lova, hmangaih taka min kuah ka ring zawk bawk.





"Zual...engkim a chhe tawh alawm. Nangmahah lo chuan beisei tur engmah ka nei tawh lo asin" ka ti chuai raih a.



"Hlim...chutiang ang zawngin ngai mah ta che. A hrim hrimin kan la naupang lutuk" a rawn ti bûl deuh hmuk a.



"Kan khawsak danah kan naupang chuang si hlei nem..." ka ti ve leh deuh kher a.



Zuala chu a ngawi reng a, a Meizial zûk sî vang vang ri bâk chu a reh zui tlawk tlawk a.



"Zual...." ka tih pawh chuan a la ngawi reng a. "Zual...thil hrilh tur che ka nei ania" ka tih rual chuan ka hnuk a ulh ru viau bawk a.



"Ummm...sawi la?" a rawn ti nghut a.



"Zual...ka hmalam hun engkim a chhia..."



"Sawi chiang la?"



"Ka rai"



Kan ngawi dun vang vang a, ka ṭah a chhuak a. Mahse, ka insûm ṭang ṭang thung a. Ka ṭah chhuah ka hlauh em avangin ka hmui chu ka hup ṭang ṭang bawk a.



"I rai a maw?" a rawn tih rual chuan ka lo bu nghat ringawt a. "Aw" tih ṭawngkam tawite mai pawh chu ka tan sawichhuah a harsa em em bawk si. "Hlimi...tak tak em ni?" a rawn tihnawn lehna pawh chu ṭawngka in ka la chhâng thei chuang lo. Ka bu deuh nghat nghat a.



Kan ngawih deuh vang vang hnu chuan ka mittui parawl kiang chu ka hrufai sawk sawk a. "Zual...thlalak ka lo thawn ang che" ka tih rual chuan Whatsapp lamah ka lut zui thuai a. Ka in test-na, chiang taka in rîn kalh thlalak chu ka thawn zui ta nghal a. Ani pawhin a lo en thuai bawk.



"Zual....ka rai...i fa ka pai" ka ti zui leh nghal a. Engtinmah min chhâng lova, a reh tlawk tlawk a.



"Zual..."


"Ummm..."


"Engtinnge kan tih dawn?"


"Tunah mai chuan ka hrelo..."


"Engnga? Eng maw i sawi?" ka lungawilo hle tih pawh ka aw ki ah chuan a hrethiam ngei ang.





Kawngka lamah thawm a rawn awm a, "Mami...." rawn ti ri chu ka lo chhâng thuai a. "Hetah ka awm" ka tih rual chuan ka pindana ah chuan a rawn lut zui nghal a. "Ka va rei ta nek a. I ṭhiannu haw na a rei tawh em?" a rawn ti sawk sawk a.





Rang takin ka phone chu ka hmet hlum nghal a. "A haw phei deuh chiah.." ka lo ti thuai a.




Ka Khumah chuan a rawn ṭhu a, min en kal bawk a. "Mami...a pawi hle mai. Engmah siamṭhat theih a ni tawh bawk silo" min en reng pah chuan a ti tlawk tlawk a.





"Ka nu....ka tihpalh a ni. Min ngaidam rawh" ka tichhuak hawk a.





"Mami...i hmalam hun zawng zawng a chhe ta vek tihna a ni lova. Mahse, rilru in a lo beisei leh hmachhawp erawh thawklehkhatah a tawp thut mai chu a ni si a" a ti leh vawng vawng a.





Ka nu bawk chuan, "Mami....heti mai hi kan ni a. Mi min hmuhsit rûkna kan belhchhah dawn anih hi..." a ti ban chalh a.





Ka kûn chal a, "Ka nu....keima thiam loh vek a ni" ka ti chuai raih a.





"Mami....hei erawh hria la ka duh thung. Engtiklai pawhin, ka thâwk theih chhung chu i lamah ka ṭang tlat dawn a. Ka phatsan ngai lovang che. Thil sual lian tak i ti tawh a, tih belhchhah miah suh ang che" a rawn ti leh dap dap a.





Engtinmah ka chhâng lova, ka inthlahrung ngawih ngawih bawk a. Min hau in min zilh hrep se ka tan awm a nawm zawk ka ring hial bawk. Ka nu chuan min en tlawk tlawk a.





"Mami, nangni ang rual hian Nau titla in thil sual leh tenawm rapthlak tak an ti ṭhin. I hnen aṭang chuan hriatbelh ka duh tawh lo. I tihsual man chu i hmu in i tâwn ngam tur a ni" a rawn ti zui leh a.





"Ka nu...." ka ti ringawt a, thil tam tak sawi tur nei mahila ṭawngchhuak turin ka hmui hian chakna a nei mawlh silo.





"Mami....mu tawh rawh. Naktuk lamah kan sawi ṭha leh dawn nia" ka nu beidawng mitmeng chu hmuh nawn duh lovin ka kûn zui leh nghal vat a. "Muttui le..." tih pahin ka biangah a rawn piai zeuh a, min chhuahsan zui ta nghal a.





Rang takin ka phone ka la vat a, "Zual...tihpalh lutuk. Ka nu a rawn lut thut a" tih chu ka thawn nghal a. Ka nu chuan kawngka a kalh ri rak rak a, a pindan lamah a lut zui nghal a. Mu chungin ka nu thawm chu ka ngaithla zui khiau reng bawk a.





Ka mu meng kar reng a, thawm a reh tlawk tlawk a. Sitting room-banga kan Sana târ kal ri tlek tlek pawh a rin viau danah thawm a reh thawkhat tih ka hrethiam mai. Zuala chuan ka message- thawn chu a en lova. A reh zui nghal tlawk tlawk a.





Biak nawn leh chu ka duh a, zawhna tam tak ka la nei. Mahse, be hmasatu nih reng chu ka la na ru ve viau bawk si. Ka in let thak thak a, a khât tawkin ka pum chu ka chûl a. "Ka rai chu a ni si a maw?" ka inti leh ringawt ṭhin. Ka tihsual ni mah se ka thil tihsualin ka nihna thar min pek chu ka pawm thei lo ni berin ka hria.





Sana ka en a, zing dar 2-a lo pel duai tawh. Ka nu thawm ka hria a, a ṭawng mawlh mawlh tih pawh ka hria. A sawi hriat theih tum chuan ka in bengkâng nghal thuai a. Bang lamah chuan ka beng ka dawh zui nghal thuai bawk a.




"Mami pa...i tello chuan i fanu hi ka enkawl puitling thei lovang ka tih mawlh mawlh kha... Hei, i awmna aṭang khan min han en teh...kan dinhmun hian chhiatlam a pan zel anih hi..." a ti mawlh mawlh chu ka ngaithla kar reng a. Ka mittui a luang ngiai ngiai a. Ka hriat hlau taka ka nu ṭap ri feih feih chu kuah vawng vawng ka va châk tak em...





"Ka nu..min ngaidam hram rawh...ka tihpalh takzet a ni." keima hriat tawk lek chuan ka ti mawlh mawlh a. Ka dâk a, "Ka pa...min ngaidam nawn fo ṭhin rawh aw? Ka pa...nang chuan rilru na tak chung pawhin min hnem thei ang tiraw?" ka tizui mawlh mawlh a.





Khum lu kil lamah chuan ka ṭhu a, ka puansin tur chu ka pawt chho a, ka sin ṭha mawlh mawlh a. Ka nu ṭap ri feih feih reng chu ka ngaithla kar reng a..







(to be continue........)


Show post links
Top

[Ngaia]

THUTIAM
Chap~10



By : Tom Tom Putara





"Mami...tho tawh la, chaw i ei dawn ang" ka nu in min rawn koh thawmah chuan ka harh zawk a. Sana ka en thuai a, dar 8 a lo ri ṭep tawh a. Zan lamah ka mengrei bawk nen ka lo mutui hle mai. Ka nu chu a mu mang bik lovang tih pawh ka ring.






Ka tho zui nghal a, ka phone chu ka bih thuai a. Zuala thawm erawh a reh vang vang reng si. Eng emaw vangin a buai hrih anih ka rinna aiin min kalsan a hrehlo hle tih ka rinna a lian zawk telh telh bawk.






"Nu, Pa Rinpuia chu engnge a an zel?" tih pahin chaw chu ka ei zui niap niap a.






"Nizan lam chu an mu thei anih hmel e. A natna tak an la hmuchhuak thei lova" tih pahin min melh ralh a. "Nizan i mu thei em?" min rawn tizui leh a.






"Umm.." ka ti ringawt a. Ka mu ṭha vaklo tih chu a hrethiam ve tho chuan ka hria. Kei pawhin a mu ṭhalo hle tih chu a hmelah chuan ka hai bik hek lo.






"Mami...engpawh nise, kan hmalam hun atan kan inpuahchah a ngai nasa dawn anih hi. Engkim a nih ang a ni vek tawh a, huaisen takin hmachhawn ang che. Zirna lam thlengin a nghawng hrih dawn che a. Mahse, theihtawpin inbuatsaih reng tho ang che" ka nu chuan rilru na takin chûng thu ṭha tak tak chu min hlui tih pawh ka hriat hmaih bik lo.






"Kan theihtawp kan chhuah anga. Nangpawhin i hun kal tawha i tihsual kha in siamṭhat nan i hmang dawn nia" a rawn tizui leh a. Min thawhsan zui nghal a, keipawh ka bâng chuang lo. Engmah kan ei thei thlawt lo a ni ber e.






Ka nu chu a dan pangngai tê in chawhmeh zawrh chhawn tur buaipui turin a chhuak zui leh nghal a. Ka theih ang angin Inchhung tifaiin ka phe buai zui ve nghal char char a. Ka ṭhiante hun hmandan tur te ka chhût neuh neuh a, ka khua a har ru nghal em em chu a ni si a.






Ka nu chu chawhnu lamah a rawn haw hman leh chauh dawn tih ka hria. Ka intifel thawkhat ta bawk a, kawngka ka kalh ṭha sawk sawk a. Pindan lamah ka lut zui nghal a, Khumah chuan ka mu nghal thlawp a. Ka phone chu ka bih leh thuai a, a hma ang thovin Zuala chu a reh hian a reh tlawk tlawk a ni ber e.






Zan lamah ka mu chhe bawk nen mutchhuakin min rawn zem chiai chiai a. Ka phone chu ka bul lawkah ka dah a, a rawn rik thut pawha rang taka ka hriat theih nan ka indah hnaih hle.






Tlâng thengthaw nuam zetah hian ka ṭhu a. Thlifim thaw heuh heuh inchhêmtir in thâwk ka la vang vang a. "A nu..." tih pahin ka piah aṭang chuan hmeichhe naupang duhawm zet chuan min rawn pan a, a rawn tlanphei ter ter a. A hnungah chuan Zuala ngei mai chuan nui var var chungin a rawn ûm phei hlawk hlawk bawk a.






"Bawihte...ka duat" tih pahin ka lo pawm vat a. "Ka hmangaih ber tê...." tih leh pahin ka fawp mawlh mawlh a. Zuala chu a rawn kal hnai zel a, "Zual....enteh Bawihtei hmelṭhat zia hi..." ka lo ti thuai a. Mahse, engtinmah min chhâng lo. Ngawi rengin a rawn kal a, Bawihtei chu a pawm nawlh a. Hmanhmawh takin ka ṭhutna piah tlang pial thla vut lamah chuan a kalpui nghal a.






Hlauhthawnna in min rawn man nghal a, hmanhmawh takin ka tho nghal vat a. "Zuala...ding rawh...kal tawh suh" ka ti tuarh tuarh a. A hma aia chakin ka um leh hlawk hlawk a. Ka ding chawt a, "Bawihte.... Zuala...." ka ti tuarh a. A hnuai khâm sâng takah chuan an liam zui nghal a.






Ka harh zawk a, ka thaw hlawp hlawp a. Ka thlan in min lo bual huh hlup hman a. Ka thaw deuh hawk a. Ka mumang, mangchhia chuan ka mitthla ram a la luah ngut ngut reng a.






"Engnge a awmzia ni ang le? Ka ngaihtuahna kal diklo ṭhin hian ka mumang lam thlengin min nghawng tawh anih hi.." tih mawlh mawlh pahin ka thaw deuh hawk a.





"Mami.... Mami..." tih paha kawngka kik dat dat chuan ka ngaihtuahna kal ding ngut ngut a rawn vaw mit hlauh a. Hmanhmawh zetin ka thochhuak zui nghal thuai a. Ka nu chu a rawn inphur bawr hle mai a. Rang takin a thil phurh chu ka lo hlânthlak sak a. Thingpui ka siamsak zui nghal thuai thuai a. Ka nu erawh chhuatah a ṭhu a, hah pawh sawi lovin a che zui mawlh mawlh a.







"Nu, vawiin tlai chu ka rawn zui ang che" tih pahin ka thiam ang ang chuan a thil tihlai chu ka tihpui nghal zung zung a.






"Eirawng lo bawl zawk la? Haw huna inbawl chawp nen chuan kan tlai lutuk ang" tih pahin a thlai hnah zawrh tur chu Em ah a rem zui mawlh mawlh a.






"Ka lokal ve ang, ka thiam ve angai alawm. Nakin lawka ka hmabak tur tho a ni" ka ti chu ka nu chuan ngun zetin min en kar a. Engmah phei chu a sawi hran ta lem lo.







Kan nufa chuan kan inzui chhuak a, ngun takin kan kalna chu ka chhinchhiah kar reng a. Mi khawngaihna kan dawng nasa a, ka nu hian dawrtu pawh a ngah ve phian mai. Hmun kilkhawr leh hmun remlo zet zet thlengin min suartluan pui a. Kan vanneih a siam in kan nufa phurh chu kan hralhzo ve mai bawk e.







In kan thleng chu ka ṭhu hnawk a, ka nu erawh a che leh nghal zung zung a. Ka nu lo hah ṭhin zia leh ka tana a lo inpekna thukzia ka ngaihtuah chian phei chuan ka inthlahrung thar ngawih ngawih bawk.






Zan boruak a rawn in her thleng a. School-kal zawm thei ka nih tawh loh avangin tih tur ṭul ka nei lo hle bawk a. Ka nu chu Pa Rinpuia te Damdawi In aṭanga an rawn chhuah avangin kan tura kal a tum a, a insiam mawlh mawlh a. Keimaha awm chu ka hnial hran lem lo hle bawk.







"Mami...ka kal ania aw?" tih pahin a chhuak zui nghal a. Rang takin ka phone ka la vat a, Zuala message-a awm takin ka en thuai a. Engmah a awm lo chu ka na ru vawng vawng bawk.






Tukverh bulah chuan ka ṭhu a, thlifim thaw heuh heuh chuan ka khawhar an belhchhah zual ting bawk. Ka ṭhiani biak ka duh viau na a, ka tan hun a nei tam bik vak tawh lo tih ka hrethiam ve rân bawk si.






Ka phone rawn ri chu ka bih thuai a. Ka beisei ngam loh, ka ngaih em em si hnen aṭangin a ni.



"Aw....Zual" phûr zet leh pangchang ru zetin ka ti nghal thuai a.



"Chaw in ei tawh em?"



"Aw, ei tawh e. Nang?"



"Kan hnathawk bânna a la reilo. Inbual pawh ka la inbual lo"



"I hah ṭhin mange aw..."



"Hah em em hran love...ka ti ṭhang ve leh deuh tawh a"



"Nia, tih ṭhan a lo awm dawn anih hi..." ka nui hul hak a.



"Chaw te ka ei anga, ka intifai anga, kan inbe leh dawn nia aw?" a rawn tih rual rual chuan, "Rei suh aw? Ka ngai tawh che ania" ka lo ti nghal thuai a.



"Awle...rei lovang" a rawn tih hnu chuan kan inbiakna chu kan titawp a. Ka phone erawh ka la ngaithla vang vang reng a. Eng emaw tak rawn sawizawm leh tura hriatna ka nei tlat bawk.






Kawngka rawn kik chu ka lo chhâwn thuai a. "Lo lut rawh" ka tih rualin Henry-a a rawn lang nawlh mai. Mak ti takin ka en reng a, "Lo leng rawh, teh nawlh che chuan?" ka lo ti hâ a.






A rawn nui vur vur a, kan In awmna a rawn hre thei mai chu a ngaihna ka hrelo hman viau na a. "Dofky-i ka rawn zawt a..." tih pahin ka bulah chuan a rawn ṭhu zui nghal a.





"Anih chu...i va fel em em..." nui var var chungin ka lo ti thuai a.





"Kan ṭhutna ṭhinah khan ka rawn kal a, i awm si lova. I ṭhiannu ka zawt ringawt alawm" tih pahin a nui leh suk a.






"Nia....ka rawn kal tawh dawn lova" ka ti nghal tawl a. Mak tih hmel takin min en reng a, "Ka bân angai a..." ka tizui leh a. Ka thusawi avang chuan a hawihai hle tih pawh ka hria.






"Engatinge?" tih pahin min la en reng a. "Ka hriat ve chi a ni em?" a rawn tizui leh a.





"Aaaa...a tam lutuk" ka ti ringawt a. Ani pawhin min zawt zui hran ta bik lem lo.






Kan School-chanchin te, thildang dang kan sawi luam a. Henry-a hi a fel hle tih pawh ka hai bik hauh lo. Mahse, ka chanchin chhe lai ber erawh ka hrilh duh bik hrih lem lova.






"Thingpui in ang aw?" tih pahin a thilsawi tui lai chu ka lo pawtchat zeuh a. "A pawi miah nang..i lum peih te chuan..." tih pahin a nui suk a. A thusawi ngaiah bawk chuan a chhunzawm leh thuai a.






Ka phone ri ṭang chu ka ban thuai a, "Ka hman ṭep aw Duati...." tih message-ka hmuh rual chuan engtin emaw tak hian ka hmanhmawh riau bawk a. Ka awmdan erawh ka thup hram hram thung.





"I nu nen chauh tiraw in awm?" tih pahin thingpui chu a lem zui zauh a. "Aw.." tih pahin ka bu nghat a.





"Chuan i nu? A mu tawh nge?" tih pahin min melh rulh a.





"Mu love....ka pa Rinpuia damlo a va tlawh ve lawk a. A rawn haw ṭep ang" ka lo ti thuai a.





"I chawlh chhan tur ka hrelo na a, harsatna i neih chuan min hrilh hreh suh aw? Ṭanpui theihna che ka nei anih chuan ka tlanchhe dawn miah lo ania" a ti mawlh mawlh a.





Ka nui lui sak a, "Min ngaihsakna ah ka lawm lutuk ania" ka ti sap a.





"Thingpui ka in zo chauh na a, ka haw phei dawn ange. Chanchin kan inhrilh zel dawn nia" tih pahin a tho zui nghal a.





"I va hmanhmawh tut tut ve maw le...lên duhna ila nei a ni ngei ange" tih pahin ka tho zui ve nghal a.





"Chutiang lam pawh a nilo..." tih pahin a nui vur vur a. Kawngka bul thleng chuan ka thlah a, "Anih leh phawt le. I hmanhmawh bawk sia, remchangah i rawn leng leh ang chu" tih pahin ka nuih sak a.






"Ni e, remchang hmasa berah ka rawn leng leh dawn nia. Hei, in In ka hre tawh alawm" a lo ti ve thuai bawk a. "Anih ka phei ange" a rawn tihzawm leh lai chuan ṭhutthleng a ka phone chu a rawn ri ral ral a.






"Anih leh phawt le" ka tih rualin
hmanhmawh zetin ka phone ri mek chu ka pan zui thuai a.



"Hello.."



"I buai deuh em ni? I va chhâng har ve?"



"Buai hran love, thil ka lo tifel lawk a"



"I buai tawh lo tak tak maw?"



"Aw, buai tawh love" tih pahin kawngkhar chu ka khârfel nghal a. Ka nu a rawn haw har ka rin loh avangin Kawngka chu ka kalh buai buangbâr peih lo. Ka mut pindan lam pan pahin, "Chaw chu i ei tawh em?" ka ti nghal mawlh mawlh a.



"Aw, ei tawh e" a lo ti thuai a. Khumah chuan ka lawnkai zui nghal a.



"Hlim...i thu min hrilh kha fiamthu a nilo tiraw?"




"Khatiang ang te fiamthu thawh nana hman chi a ni reng reng em ni?" ka ti niah niah a, ka lungawilo ru viau bawk.




"Tak tak?" a la rawn ti hram a.




"Aw, tak tak ni e. Ka rai....i fa ka pai" ka ti ve ta deuh ngat a.



Zuala chu a ngawi zui ta reng a. Keipawhin sawizawm tur ka hre bik chuang lo. Kan ngawi zui deuh vang vang a.




"Engtia awm nge i tum?" a rawn ti leh ngat phei chu ka ni deuh nghulh in ka hria. Mahse, engkim fiahfel taka hrilh a, hriat ka châk takzet a, ka tan a pawimawh em em tih pawh ka hai hek lo.




"Engtin vak nge awm ila min tih a?" ka ti chu chhânna ka dawng lo, a ngawi kur reng a. "Engtinmah awm ngaihna dang a awm chuang lo. Ka hmalam hun zawng zawng a chhe vek a, nangmahah ka innghat tawp anih hi..." ka tizui ve leh nghat a.



"Hlim...i lungawilo viau angem?"



"Eng thil ah chuan?"



"I thinrim viau angem?"



"Ka hre nang...han sawi la? Thinrimna tur lam erawh ka hrechak hran lo viau mai"



"Hlim....."



"Ummm...sawi rawh"



"Ti tla mai la....?" a sawi zawh rual chuan ka ni deuh nghulh mai. Engmah sawi tur ka hrelo, ka mittui a rawn luang nghal zawih zawih a. Ka ṭah a chhuak em em a. Mahse, ka insûm ṭang ṭang thung.




"Zual...engmaw i sawi?" hrereng chungin hriatnawn châkna nei miahlo chung si chuan ka zawt nawn leh ngat a.




"I hmalam hun a chhiat vek ai chuan ti tla mai la ka ti..." a la rawn ti nawn leh anih chu!!




"Zual..." ka sawizawm thei lo, ka insût hlap hlap a.




"Ka sawi awmzia..." a rawn tihlai chuan, "Ngawi rawh....a tawk...engmah ka hriatbelh duh tawh lo" ka lo ti thuai a.




"Zual...ka tih tlak avangin ka hmalam hun a inhawng leh ang maw? Kumkhuaa inthiam thei tawh ngailo tura min siam duh khawpin maw ka lakah i rilru a lo chhiat a?" ka insût zui hlawp hlawp a. Engmah a sawi lova, a ngawi reng a. Ka ṭap ri a ngaithla reng tih erawh ka hrechiang em em thung.




"I fa, i fa ngei hi ti tla turin min duh a maw?" ka ti zui ve ta ngat a. "Mawh? Min chhâng rawh?" ka tihzui hnu pawh chuan a ngawi reng a, engmah a rawn sawi zawm hek lo.




"Ka dah phawt ange, mut hahchawlh lawk ka duh" a rawn ti phei chu ka rilru na lutuk hi ṭah hawm hawm mai ka chak ber a, ka insûm ṭang ṭang thung.




"Zual...ka rin ang ilo ni lo hle mai" ka tichhuak thei hram a. "Khing thu rapthlak tak hmanga min hliam nawn a, min tih hrehawm ngawih ngawih lai khian i mu hahdam duh a maw?"




"Aw...i ngaihdan dan ni rawh se. Mut hahchawlh ka duh" a rawn ti nawn leh ngat anih chu!!




"A ṭha e...a ṭha e...mu rawh" ka ti ngheng a. Engmah dang rawn sawilo chuan a hmet tawp nghal hmak bawk a.






Ka phone chu ka thehthla ṭhuai a. "Mi tenawm pa....ka haw lutuk che" tih tuarh pah chuan ka puansin leh lukham, Khum a thil awm ka ban phâk apiang chu ka thehdarh nghal ṭhuai ṭhuai a. "I mak ka ti..khatiang mipa kha maw i lo nih?" ka ti mawlh mawlh bawk a.






Kawngka rawn inhawng thawm pawh chu ka hrelo a nilo, ka insum theihna in a tlin ngang lo zawk a ni. "Nang ang mipa tenawm hi asin tawn ka hlauh em em..." ka tih mawlh mawlh lai chuan ka nu chu a rawn lut a.






A ding chawt a, min en reng tih pawh ka hria. Ka ṭhu kun chal a, ka insût hlap hlap a. Ka nu chuan ka thil paihdarh chu a rawn vawmkhawm zung zung a. Ka bulah a rawn ṭhu a, min rawn kuah pahin, "Mami...engnge thil awmzia ni a?" aw dam diai hian a rawn ti a.






"Nu..." tih pahin ka kuah thlawp a, nghet zetin ka kuah a, ka ṭap nghal hawm hawm a. Ka hnungah a chûl hliau hliau a, "Awle...a tawk e. Engnge ni thil awmzia?" a ti mawlh mawlh a.






A hma aia nghetin ka kuah salh a, "Nu...ti tla turin min ti..." ka tichhuak thei hram a. Ka nu chu a ngawi reng a, min pawm nghet ve salh a.






Reife kan inkuah a, kan ngawih dun vang vang hnu chuan ka lungchhe zualpui pawh a reh ta deuh e. Ka nu chuan min la chelh reng a, ka Lu ah chuan a chûl hliau hliau a.






"Ka phal reng reng hlei nem... Pathian remruat vek anih hi. Kan pahnih chauha kan awm tur leh kan khawhar tur zia hria in Pathian in kan khawhar hnemtu tur atan a rawn dah anih hi...." a ti thâm chhalh a. A lungchhia in a rilru a na hle tih chu a ṭawng ri chhuak ah chuan ka hai miah lo.







"Mami...keimah ngeiin ka lo bia ange. Han ti ṭha leh teh..." ka nu chuan a rawn ti leh thuai a. A fiamthu mai mai lo tih chu ka melh zawk chhung pawh khan ka hmuthiam nghal bawk.






Ka phone chu ka ban thuai a, keimah ngei pawhin engkim zawhchian leh ka duh avangin ka ngaithla zui vang vang a. A ri ral ṭhak a, a lo muhil tak tak anih takin, ka ti ṭha zui leh vat a. A lo 'Reject' hmak nia.






Ka ti ṭha leh a, kan beidawnna belhchhah turin 'Switch Off' a lo ti leh a. Ka nu chuan a lo ngaichang reng bawk a. Mahse, thil awmdan erawh a hai hauh lovang le. Ka ṭhu tûm bâr a.






Ka nu chuan min kuah a, duat takin min chûl heuh heuh a. "Ka fanu...ka ring tawk che ania. Thil sual lian tak i ti tawh a, a aia rapthlak tizui tur khawp chuan ka ring lo che ania" a rawn ti dam dap a.






"I bulah, i kiangah ka awm tlat dawn alawm. Engpawh thleng se ka phatsan ve dawn lo che tih hria la...i harsatna, i buaina engkim min hrilh ve zel dawn nia aw?" rawn tihzui pahin ka mittui luang ngiai ngiai chu a rawn hrufai zui a. "Ka fanu....ka ring tawk che ania. Nangmah i in rintawkna kha hloh ngai suh ang che" a rawn tih leh hnu chuan ka lo nui sak a.






"Ka lawm e....ka lawm takzet. Nu, ka hmangaih che" tih pahin ka kuah leh thlawp a. Kan inpawm zui vawng vawng a.






"I mu dawn ang hmiang, nangpawh muthilh tum la aw? Taksa chak ṭha i mamawh rualin nangmah chauh i nih tawh loh kha..." tih pahin hmel ngainatawm zetin min nuih sâng a, min chhuahsan zui ta nghal a.






Sana ka en a, dar 11 a lo ri ṭep mai. Zuala chu biak tum chuan ka ngaithla zui leh a. A la biak theih chuang loh...ka ner sak a. Ka phone chu ka dah a, mutna chu ka siamfel zui nghal mawlh mawlh a.






Ka mu a, ka mut a chhuak thei der bawk silo. Ka mu meng kar reng a. Ka phone chu ka phawrh a, Zuala hnena ka sawi duh chu ka chhu lut zui nghal mawlh mawlh a.







"Zual....hetiang maia min bum a, min kalsan mai tur hian ka ring miahlo che asin. Ka mipa rin i nih avangin ka thianghlimna zawng zawng pawh ka hlan che a. Mahse...khang ka tih theih sang ber pawh khan i lakah awmzia a nei silo"





"Zing boruak a rawn herchhuak a, i tho ve tawh angem, zan lamah i mutui angem tih ngaihtuahna in bul ka ṭan a. Nilengin nang lo chuan ka ngaihtuahna an luah tak tak thei ngai hek lo. Zan boruak a rawn her thleng a, ka ngaihna che leh ka thlakhlelhna che a zual ting mai bawk si. I tel lova zan hun hmanral harsa ka tihzia te hi vawikhat lek pawh min ngaihtuahsak ve ngai ang che maw?"






"Zual...i tel lova hun hmang tawh turin min kalsan i tum em ni? A harsa ka ti viau ang. Mahse, i thei anih chuan keipawhin ka thei em em ang"





"Ka hmangaih....muttui le" tiin ka thlah leh hram a.






Ka nu thawm ah chuan ka harh chiang zual sauh a, ka in nem kâng a. Khum ah chuan ka ṭhu a, pindan lehlama ka nu thâwm chu ka ngaithla chiang zual sauh a.






"Mami pa...nitin hian he In chhungkhur hian a mamawhna che a langchiang tulh tulh anih hi. Min han enteh...ka chau takzet tawh a ni. Keimah mai chuan ka tlin lo lek lek ṭhin. Mahse....ka ti thei ang. Nangpawhin min chah ngun ber kha a ni miau a. Ka ti thei ngei tur a ni" a ti mawlh mawlh chu ka ngaithla kar a. A insût leh hlap hlap ṭhin bawk a.






"Ka pa...min ngaidam rawh aw? I fanu hian harsatna tam tak ka thlen anih hi...khawngaih takin i awmna hmun aṭang khan min ngaihdam thu rawn sawi la ka ti takzet. Ka pa....i fanu hian i ngaihdamna ka mamawh takzet asin" tih mawlh mawlh pahin ka mu ṭha zui sat sat a.







(to be continue...........)


Show post links
Top

[Ngaia]

THUTIAM
Chap~11



By : Tom Tom Putara






Ka beidawnna in nitin min belhchhah tulh tulh a. Ka ṭahna mittui pawhin hul Ni a nei meuh lo a ni ber e. Ka inpumpekna leh ka innghahna in min rehsan satliah a nilo. Amah biak pawh theihna awm ang chi zawng zawng a bo vek a. Hmalak ngaihna lah ka hre tawh hek lova. Beiseina pakhat ka la hum ve hram chauh a ni.






Ka ṭhiannu ber lah kan inhmu khat em em tawh a. Keimah mai in ka hun ka hmangral a ni ber tawh. Nitin zantin, engtiklai pawhin 'Zuala...ka ngai lutuk che' ti reng ṭhin mahila chûng chuan awmzia a neih phah chuang lova. Ka duhthusam thlen turin hmasawnna kawng min kawhhmuh thei hek lo.






Ka insiam mawlh mawlh a, ka rilru a awm reng leh ka beiseina chhe te chu bawhzui ngei tumin ṭan ka khawh lui ve zel a. Zuala biak pawh ngaihna ka hre tawh lova, a ṭhianpa hnen ka thlen chauh mai chu beiseina ka kuahbeh awmchhun a ni ta!!






"Ka nu, i lo hah lutuk ange aw? Ka rei lovang, ka va chhuak lawk ange" tih mawlh mawlh pahin ka pindan aṭang chuan ka chhuak zui nghal a.






"Rawn tlai lutuk lo la aw?" tih pahin kawngka bul aṭang chuan min thlirliam a. Ka nu hian kawng engkimah min ngaihtuah em em reng a. A phâk tâwk a ṭha eitur tuihnai tinreng min ngaihtuahsak a. A ei phâk loh ṭha ṭha thlengin min hlui ṭhin.






Auto Rickshaw-rawn tlan chu ka lo phar thuai a. Ka kal duhna ka hrilh a, a lo remchan hlauh avangin ka ṭhu lut zui nghal a. Beiseina nei chau ru zet leh hmasawnna hmuh in beisei ru tho chung si chuan ka rilru ka kâwm phei mawlh mawlh reng a.






"Ka pu, khalai remchangah khan ka lo chhuk ange" ka tih rualin min dinpui nghal a. Pawisa ka pe fel a, min kirsan zui nghal a. Ka ding a, ka hawi vang vang a. Ka mitthla ah Zuala nena kan len hunlai te chu a rawn lang thar uarh uarh a. Ka lung a leng thar vawng vawng mai.






Muangchangin Zuala ṭhianpa te In lam chu ka pan chhat chhat a, ka thin a phu deuh dut dut bawk a. Ka lêt leh lamah beiseina thar neiin nge ka lêt anga, beidawnna thuah hnihin tih te thlengin ka ngaihtuahna a kalding ngut ngut bawk.






Kawngka lo inkhâr khap chu ka kik dat dat a. Inchhung chhûngril tak aṭanga hmeichhe aw in, "Lo lut rawh..." a tih ka hriat rual chuan ka lut zui nghal a. Ka ding a, ka melhkual ralh ralh a. Pindan lam aṭang chuan hmeichhe tleirawl hi a rawn chhuak a, min rawn thlêk deuh hâ a. "Engnge ni?" a rawn ti nghal vat a.





"Aaaa...ih.... Mapuia a awm em?" ka ti sap a. Ngun zeta min entu chu ka melh ve leh ralh a. "Aw, awm e. Lo ṭhu rawh, ka zuk ko ange" tih pahin a hmaa kan chhukna ah khan a lut pil thla zui nghal a.






Rei vaklo ah chuan an pahnihin an rawn inzui chho a. Mapuia'n min rawn hmu chu a mengphawk viau in ka hria. Ka lo nuih sak a, ka bula rawn din pahin, "I rawn leng a ni maw? I va fel ve?" tih pahin a kut a rawn phar dâ a. Kan ding a, kan inchibai zui nghal a. Ka bula rawn ṭhut pahin, "I dam maw?" a rawn tizui leh vat a.






"Ka dam chuan ka hria..." ka ti deuh nghat a. Ka awmdanah chuan ka ṭhat loh zia a hrethiam tho chuan ka ring.





"Ka room lama chhuk i duh em?" tih pahin chiang zetin min melh kar a.





"A ngai hran love" ka lo ti vat a. "Mapui....i ṭhianpa chungchangah biak che ka duh a. Ka rawn kal tawp mai. I phone number ka lo nei si lova" ka ti zui nghal thuai a.





Mapuia chu a ṭhu ngil a, a thaw deuh halh a. "I hriat duh ang hrilh tur che ka neih pawh ka va ring lo em...." a lo ti thuai a.





Mapuia chu ka en kal a, min en ṭha ngam vaklo ni mahin ka hria. Chu chuan keimahah phûrna nasa tak min siamsak thung a. "Mapui....ka zawhna che hi dik takin min chhâng ang che" ka ti hmasa leh te te a. A ngawi reng a, engmah phei chu a sawibuai hran lo. "I ṭhianpa nen engtiknge in inbiak hnuhnun ber?" ka ti chang fak a.





A ngawi vang vang a, a hawikual rulh rulh a. Min rawn melh zuk pah chuan, "Kar hnih chuang a ni tawh mai thei. Kan inbe khât khawp mai. Lunglei a rawn phei anih loh hi chuan kan inbe vak ngai lo" a rawn ti hniam ruih a.





"Anih...kan pahnih inkâra thil thleng hi a hrilh che em?"





"Engtia in inkâr thil?"





Ka thaw halh a, zêp buai ting ka tum duh tawh bik hek lo. "Ka rai thu hi a hrilh che em?" ka ti ta khawl a.





Mak tih hmel zetin min en a, a âng deuh zuau a, a ngawi zui leh vung vung a. "I rai a maw?" a rawn ti zui nghut a.





"A hrilh miahlo che em ni? Dawt sawi miah lovin?" ka fiamthu lova, thudik tak zel hriat ka duh tih chu ka hmelah chuan a hai miah lovang.




"Aw, engmah ka hrelo"





Chulam chu sawi zui pui reng ka tum bik lem lo. "Anih, tunah khan i be thei em?" thudangah ka pakai san zui nghal thuai a.





"Ka hrelo le...ka tichhin ange" tih pahin a tho vut a. A room-lamah chuan a chhuk zui nghal a. A rawn chho leh thuai a, a phone chu a hmet nuap nuap a. A ngaithla zui vang vang a. Min rawn melh zuk pah chuan, "A tlang thei lo... A switch off..." a rawn ti bûl hmuk a.






Ka thaw deuh halh a, "Nia..." tih zawngin ka lo chhâng a. Ka en ngai chu ka en reng a, ka ngaihtuahna erawhin kil tin a dap zung zung thung.





"Hlimi, a number dang emaw biak pawh dan dang ka hre bik miah lo mai" a rawn tih lai pawh chuan ka ngaihtuahna ringawt ka lo kâwm mawlh mawlh reng a.





"Ka rin ang a lo nilo hle mai" ka ti chuai raih a. Mapuia erawhin engtinmah a rawn sawi zawm lo. "Thingpui in ang aw?" a rawn tidaih thung a.





"Aih...a ngailo. Ka rei hman lo, ka haw phei leh zâwk ange" tih pahin ka phone chu ka phawrh nghal a. "Mapui, i number min lo pe teh. Eng emaw rawn zawh thut che ka duh takin..." ka ti zui a.





A number min pek pahin, "Ni e, keipawhin biak pawh ka lo tum dawn nia. Chanchin kan inhrilh zel anga" a ti mawlh mawlh a. Ka lo bu nghat ringawt a, "Eng emaw vang mai mai te pawh a ni mai thei asin" min rawn ṭawng thlamuan zuina erawh ka pawm hran lem lo.






"Anih Mapui, ka phei ange" tih pahin ka tho nghal a. Ani pawhin min chelh khawmuang lui bik lem lova. Kan inzui chhuak ta nghal a. "Chanchin kan inhrilh zel dawn nia aw?" ti chung chuan kan inthlah zui ta nghal a.






In ka thleng chu Khumah ka ṭhu hnawk a, ka beidawnna chu in hneh tir tum lo viau mahila tun dinhmunah erawh chuan beidawnna in min bûk kâng mah chu a ni si.






Ka nu chu thil zawrh tur la in a chhuak tih ka hrethiam mai a. A rawn haw hunah a hah leh em em dawn tih hrethiam chungin ka che zui nghal sawk sawk a. Hahdam taka dah ka tum rân a, theih phei sela chuan keimahin engkim tih vek ka duh tawh zawk a. Mahse, zir ngai ka la ngah em em bawk si.






Zan boruak inher thleng tur hi ka huphurh ngawih ngawih ṭhin. Chhun lamah chuan eng eng emaw tiin ka buai ve nek nek a. Ni a herliam mai ṭhin. Zanah hian a reh tlawk tlawk a, ka khawhar a zual ṭhin.






Ka phone a rawn ri ral ral a, phûrna ka nei lem lo. Muangchangin ka pan chhat chhat a. "Aw hello ṭhiannu" ka ti ban chat a.



"Ka rawn phei ang ka tia... In ah i awm angem?"



"Khawiahnge kal se min tih reng reng a?" za lo zetin ka nui lui hak a.



"Ka rawn phei hman ṭep... Thil hrilh tur che ka ngah tawh lutuk" a rawn ti zung zung a.



"Rawn phei rawh" ka ti bung nghat a. A hma angin ka ṭhiani hmel hmuh pawh ka châk em em hran lo.





Pindan lamah ka thawmhnaw suk ka thlep fel a, ṭhiani rawn lut thawveng zet leh ka nu inbe bawrh bawrh chu ka ngaithla kar a. "A mu leh tawh ami Zawiliani chu?" tih pahin a rawn lut zui nghal a. "Awii..buai thei sia" tih pahin ka thawmhnaw thlehna bulah chuan a rawn ṭhu nghal a.





"Vawiin Class i kal em?" tih pahin ka thiltih lai chu ka ti mawlh mawlh reng a.





"Kan inṭhen..." tih pahin za takin a nui zui hawr hawr a.





Ka melh ralh a, ka nui phuh deuh ṭhat a. "I va han thawveng bik tak..." ka ti zui vat a.





"A ho e...midang an tam em mai" tih pahin a thusawi lai chu a sawiliam puat tih hriat zetin phone a hmet zui mawlh mawlh a.





Ka thawmhnaw chu ka khung fel a, Khumah chuan ka lawnkai zui ve nghal a. "In inṭhen tak tak maw?" thutak deuh zawk chuan ka zawt ṭha leh ngat a.





"Inṭhen tak tak e..." nuih awr awr pah chuan a lo ti sam êt a.





"I ngaiho mai bawk sia" tih pahin ka melh tlawk tlawk a. Min ngaihsak em em hran chuang lova, phone chu a hmet zui leh mawlh mawlh a.





"E taka, engtinnge in chanchin ni zel?" tih pahin min melh zuk a. "Enteh, a chhelo i ti em?" tih pahin a phone a thlalak chu min entir zui zat a.





"Min zawt pawlawh em mai a" lungawi chiahlo a nuih lui sak chung chuan ka ti thuai a. Ka khawharna leh rilru tawtna ka hrîktlâkna tur ber lah heti mai hi a ni si a. Lungawilo zetin ka phone chu ka hmet zui ve mawlh mawlh a. "Tirawh...chhuak ang. A lum em mai" tih pahin ka tho zui nghal a. Ani pawhin phone kheuh nuap nuap chungin min rawn zui ve nghal a.






"Mami, thingpui han lum ta che. I pa Tluangtea nen hian kan lo in ange. In duh ve leh in lum kêp ula" ka nu chuan alo ti nghal zat a.





Pa Tluangtea chu ka melh deuh kâwk a, min lo en lo hlauh chu a vannei hle in ka hre bawk. Ka nu erawhin ka khawsa zia chu a lo hmuh hmaih miahlo thung. Ka pa ṭhian ṭha tak kha a ni ṭhin a. A nupui hian an fate pathum nen a boralsan tawh a. Hmanni deuh aṭang khan a rawn leng ngun riau a. Ka nu lah mi kâwm siam siam chi a lo ni bawk nen, ka ngei ru viau tawh a. Ka nu hi rawn hnimhnaih a tum viau chuan ka lungawilo viau ta ve ang.






"Ṭhiannu, thingpui chu ka tihkep dawn che em?" tih pahin ka rizui nghal rak rak a. "A ngai kher hlei nem..." a rawn tihrual chuan, "In ve ang, keipawhin ka in dawn alawm" ka lo ti nghal thuai a.





"Hlimi, kei a hâng in ka duh zawk ania aw?" a rawn tih rualin Pa Tluangtea lam chu ka hawi nghal hmak a. Min lo thlir vung vung chu ka duhlo nghal viau bawk. "Aw" ka ti deuh hmak a, ka nu chuan min rawn melh nghal hrâwk bawk a. Engah teh ual ka ngai hran bik chuang hek lo.






Thingpui chu ka siam sawk sawk a, ka nu leh Pa Tluangtea chu en pawh en ṭha mang lovin ka pe deuh puat a. Kan ṭhiandun chanpual tur chu ka keng phei zui a. "Kha le..." tih pahin ka pe zui nghal a. "Tirawh....ṭhutna sawn ang" tih pahin thlanglam bathlar lam chu ka pan zui nghal a. Ani pawhin min rawn zui nghal thuai bawk a.





Thingpui lem khalh pah chuan, "Ka beidawng takzet" ka ti hnual raih a.





Min melh ralh a, ka hawina lam hmun hla tak chu a thlir zui ve daih a. "Engtinnge a tih?" a rawn ti nghut a.





"Ti tla rawh a ti" ka tih rual chuan rang takin a rawn hawi a. A hmelah chuan thinrimna hmel pawh ka hmuh hmaih hek lo. "Engnga? Eng maw i sawi? Chuti chuan maw a tih a?" a rawn tizui ngheng a





"Ṭhiannu....biak pawh ka be pawp thei tawh lo" ka tih lai chuan min en ngawih ngawih a. "Mipa tenawm lutuk" a lo ti hluk a.





"Aizawl va kal ka duh...hmuh ka duh..hmaichhanah ngei" thil tam tak ngaihtuah pah chung chuan ka ti zui mawlh mawlh a.





"Ka ṭhian....chutiang rilru chu ila pu a maw? I laka chutiang rilru a pu tih i hriat hnu pawhin hmuh i la duh a maw?" mak tih hmel zetin min melh khûi khûi a.





"Ka hria alawm. Mahse, hmaichhan ngeiah hmuh ka duh takzet" ka tilui leh ṭalh a.




"Biak pawh i biak theih tawh loh chu?"




"An In ka hria alawm"




"Mahse....ka chan nise ka ti miah lovang"




"Ka hria alawm" ka ti ringawt a. Engmah sawilo chuan kan ngawi dun reng a. Thingpui chu kan lem zui dun khalh khalh a.





"Anih zawhna pakhat ka zawt ang che aw?" tih pahin ngun zetin min en kal a. "Aw" ka ti lo ti thuai a.





"Hmu thei ta miah lo la, be thei tawh miah lo bawk la? Engtiang chiahin nge a lakah rilru i put ang?"





Ka ngawi vang vang a, chutiang lamin ngaihtuahna ka la sêng miah lo tih pawh ka hria. 'Engtikah emaw kan inhmu anga, duat takin ka pum a chûl heuh heuh anga. Hmangaih takin min enkawl ngei ang' tih hi hi ka ngaihtuahna leh duhthusam a la ni fan reng.





"Mawh?" a rawn tihnawn leh takah chuan ka melh ralh a. Ani pawhin ka chhânna nghakhlel takin a lo thlir reng tih pawh ka hai hek lo.






"Ka hrelo....ka la ngaihtuah thleng chhin ngai lo" ka ti vawt raih a. "Anih, ka zawt ve ang che aw?" ka ti zui nghal zat bawk a. "Min zawh tum lam chu ka hresa deuhin ka hria" tih pahin a nui hak hak a.






"Nia...i hre mai thei" tih pahin ka ṭhu ṭha zui a. "Enteh ṭhiannu, Van boruak zau tak khi ka thlir zantin a. Mit ka chhîng vang vang a. Nui var var chungin ka lam a rawn pan a, ka biangah a rawn fawp a. 'I dam em, i ṭha em, in enkawl ṭha rawh aw?' min rawn ti ṭhin. Mahse...." ka chawl a, ka thaw deuh hak a.





"Chuan....?" hriatzawm châk hmel takin min lo thlêk hâ a.





"Mahse....ka mit ka meng a. Ka suangtuahna leh ka mitthla thawnthu chuan min kalsan nghal a. Van boruak zau takah khian min nuih chungin a ral leh ṭhin...." ka ti zui mawlh mawlh a. "Ka ngai takzet a ni" ka ti zui leh a.





"Ka va khawngaih tak che em..." tih pahin min rawn kuah a. "Ka ṭhian....lungngai miah suh. Engkim a fel leh vek mai ang" rawn tihzawm mah se beiseina ka neihsân phah chuang lo.





"Engnge in inṭhen chhan chu?" tih pahin ka melh ralh a. Ani erawh ka khawharna tuipuiah a lo in vai buai tlaikhawhnu ni mai hian a lang. A ṭhu ngawi reng a, hmun hla tak a thlir vang vang a. "Engtikah emaw chuan nangmah vangin a rawn kir leh mai thei asin" a lo la ti fan a.





Beiseina ka neih lem loh avang chauha sawizawm pui duhlo ka ni lo. Ka hnen aṭang hian hmun hla takah awm sela. Min tina nawn turin rawn kir tawh lo se ka ti ber tawh. Zuala lakah hian ka beidawng takzet tawh.





"Mawh? Engnge in inṭhen chhan ber? Sawmnghawngseia a rawn inrawlh nge?" nuih hak paha ka ti nawn leh chu a rawn meng hrâw a, min nghawk sawk a. "Teuh nang...ani vang chu ni lul suh se" a rawn ti nghal ṭhat a, kan nui dun leh rih bawk a.





"Tak takin ka hre lo...zaninah pawh kan ni ṭha leh thut mai thei a" nui rah rah chung chuan a rawn ti teh daih a. Nuih hul hak pahin, "In va la holam tak..." ka ti nghat a.






"Awi....ṭhiannu, kei hi....ka phei angai" a rawn ti teh deuh thut a. A tho zui nghal a, "Tih tur pawimawh lutuk ka nei" a ti zui mawlh mawlh a.





"A va mak teh thut tak.." tih pahin ka zui ve nghal a. Pawn thleng ka thlah a, ka en reng a. A nun chu awh rûkna ka ngah hle bawk. Engkim a palzam thei mai ṭhin kha ka ngei rûkna ṭhin ania. Mahse, ka awt ru ta viau mai.






Hmun ka phiat kual nghal zung zung a. Ka nu pawhin thil a lo dahfel zung zung bawk a. "Naktuk zingah ka thawh hma peih chuan i pa Rinpuia te pawisa tlem a zawng ka va pe ange. An damlo nen an mamawh viau ngei anga..." a ti mawlh mawlh bawk a.






"Mami, rawn ṭhu ve teh. Thil i sawidun teh ang" tih pahin min lo en khiau a. Ṭhut pahin, "Pa Tluangtea chungchang em ni?" ka ti deuh nghat a.






"A ni tel tho bawk ang chu..." a lo ti ve kher chu ka sa deuh phat a. "Engnga?" tih pahin lungawilo zetin ka melh râm râm a.






"Hmeichhia hian kan zahawmna hi kan vawn thiam leh thiam loh ah a innghat thui hle tih hrereng ṭhin ang che. Ni e, i pa Tluangtea pawh hian min be chhe lo hle tih ka hria. Ka be chhe hran bik lova, atan zuamawm erawhin ka awm ngai hauh lo ania" a rawn tizui dap dap a.






"Zanin ang te khan awmdan leh khawsa zia ah lantir loh tur....a mawi lo takzet. Engang mi pawh nise, keini In rawn chuangkai ve duh an awm phawt chuan ṭha takin biak vek tur a ni ngai. Mahse, mi pangngai awmdan baka min zuam emaw min zahpah lo tak an nih chuan a tawp thlengin kan zahawmna kan vawng nung tur a ni" a rawn ti leh mawlh mawlh a.







Ka ngawi kar a, engmah sawi zawm tur ka neilo. "I zahawmna leh zahawm lohna chu nangmah ah hian a innghat thui em em tih hrereng ṭhin ang che. Pathian zarah kan dam anga, fa ṭha tak i nei anga. Chung hunah chuan mipa tam takin an zuam nghal em em 'Nuthlawi dinhmun' chanvo i chelh dawn a. Chumi hunah tak chuan tuna ka thu hrilh che hi a pawimawh leh zual dawn ania"





"Nu, thildang daih..." ka ngawi zui dat a. "Zuala hi va hmuh ka duh..." ka lo ti daih a.





A ngawi reng a, a thaw deuh halh a. "Engpawh nise, tunah thut thut chuan a ṭul ber em ka hrelo. Engpawh nise, ngun takin kan ngaihtuah dun zel dawn nia" fiah fel fek fawk chuan a rawn ti zui a.






"I mu dawn ang...a lo tlai leh duai tawh mai" tih pahin ka nu chu a tho zui a. Keipawh ka tho zui thuai a. Ka nu chu a ding chat a, "Mami...thil reng reng naupang chhia takin ti vut vut lo la. Ngun takin ngaihtuah la, a ṭha ngei nia i hriat ang chauhin thutlukna siam ṭhin ang che" a rawn ti leh a, ka lo bu nghat a.






Khum ah chuan ka ṭhu vang vang a, ka phone chu ka en a. A ngai rengin a reh hian a reh tlawk tlawk a. Tukverh chu ka hawng a, tukverh bulah chuan ka ding a.






Van boruak thiang kâk mai chu ka thlir vang vang a. Thla mang lai a ni a, Arsi de sep sep bakin Van mawina an tem hek lo. Kei lo hi nun khawhar ngawih ngawiha Van boruak reh ruih mai hlutna tem mek hi an awm ve angem?






"Zual....tunah hian engnge i tih ve ang le? Ka ngai lutuk che asin. I dam ṭha em? Ka tel lo hian i hlim tiraw? Kei chuan ka ngai takzet che asin" ka biangah mittui a rawn luang ngiai ngiai a.





"Zual...i fa ka pai mek nen hian min kalsan ang maw? Eng harsatna nge i neih? Engkim min hrilh la, engang harsatna pawh nise kan pahnihin kan hmachhawn mai dawn alawm. Nilo, kan pathum in..." tih pahin ka pum chu ka dawm vang vang a.






"Zual....tui deuhin mu rawh aw? Ka mutsan ang che. Ka taksa hian hahchawlh a, chak ṭhat a mamawh si a. Muttui aw..." tih pahin tukverh chu ka khar a, ka Khum lam chu ka pan zui nghal a. Ka hmangaih, ka ngaih em em mitthla reng chung chuan ka mu ṭha sat sat a






(to be continue........)


Show post links
Top

[Ngaia]

THUTIAM
Chap~12


By : Tom Tom Putara






Ka phone ri in min tiharh zawk a. Zi mar ṭalh ṭalh chungin ka lukham sira phone chu ka thlêk pah zauh a. Ka number hriat loh a ni.





"Aw hello...." ka ti phak chap a.




"I dam maw?" chu aw ngei chu alawm hriat tuma nitin ka phone ka hmeh sek chhan chu!!




Ka ṭhu chhuak vat a, "Nangmah maw?" ringhlel lek lek chung chuan ka zawt let hlauh thung a.




"Aw, keimah" a rawn ti nghut a.




"Zual....tinge? Engvangin nge i reh vang vang? Tunah khawiah nge i awm?" zawhna zawh sên lohin ka khat a ni ber e. "I rawn phei em ni?" beiseina chau zet chungin ka zawt tel lui hram a.




"Ka damṭha e. Delhi ah ka zirna chhunzawm turin ka chhuk leh ta thut sia..." a rawn ti bah nak a.




"Chupawh nise min rawn hrilh hman lo em ni?" pangchang zetin ka la tilui ve leh hram tho a.




"Engtinnge i tih tak?" ka hriatthiam nghal leh hriatnawn ka duhloh zawhna pawisawi zet chu ka ngaithla tluan lo ṭep mahin ka hria.




Ka ṭap lek lek a, ka insûm ṭang ṭang thung. "Kha thu bawk kha maw?" ka tichhuak thei hram a.




"Inbiak rei ka hman lo ania...ka ngenna che kha i ti hlawhtling ta em tih ka hre duh lawk a?" awki danglam hauh lovin chu thu chuan min rawn chhu nawn sak anih chu!!




"Ka thei lo....tualthah ka thei lo" ṭah zui hawm hawm ka châk ngawih ngawih bawk.




"Mi tihloh dan pawh a ni hlei nem..." a rawn tizui leh chiah chu ka nghing dawt in ka hria.




"A tawk....a tawk....a tawk tawh. Sawi tawh suh" ka tizui ta tuarh a. "Hlauthawng suh ang che. A pa i ni tih pawh ka hrilh ngai lovang. Kei hi a nu ka ni a, a pa pawh ka ni bawk. Vawikhatmah i chanchin hi a bulah pawh ka sawi ngai lovang" ka tizui hmawk hmawk a.




"Khati zawng khan ngaikawi zel lo la?" a rawn tih rual rual chuan, "Zuala...ka ngaikawi a ni lova. Thudik tak zawk anih chu" ka ti chang fak a. "Tun bak hi kan inbiak ka rin tawh loh avangin ngun takin ka thusawi min lo ngaihthlak sak ang che" ka ti zui leh vat a. "Aw, han sawi ta che" zâm miah lo leh in thiam lohna neilo aw ki hairual lohin min rawn tizui ve nghal hmak bawk.




"Mipa diktak, min hmangaihtu ka tawng che ah ka ngai a. I hriat kha....ka thil neih hlu ber, ka thianghlimna zawng zawng pawh ka hlan che a. Tun huna nangmah hi lo hmu tel pha ila chuan nang tawn ai chuan ka hêl ngar ngar ang che.




Eng dinhmunah pawh ding ila, engang harsatna pawh tawk ila, ka kiangah i din tlat ka lo ri vei nen....ka rin ang i nilo chiang hle mai...




Min rawn ngaihtuah suh ang che. I thil min tih tir tum erawh ka ti thei lo. Ka pai puitling anga, eng anga harsa pawh nise ka hmachhawn pui ang. Nang hi a pa i ni tih a rawn hre ngai lovang. Chu chu i duh zawk pawh ka ring..." ka ti ta mawlh mawlh a. A ngawi kur reng a, sawi tur ka ngah takzet. Mahse, sawi hmasak tur ber erawh ka thliar hrang thiam lo thung.





"Mi fate anga nuamsa in ka dah thei kher lovang. Mahse, keimah aṭanga hmangaihna a dawn theih erawh ka hlan vek thung ang. Zuala...." ka ngawi dat a, ka thaw halh a. "I duh ang ngei chuan min kalsan rawh. Chhuanlam dang ka ngaithla duh hek lo. Nang ka tawng che hi ka lawm takzet, zirlai tam tak min zirchhuah tir avangin..." ka ti zui leh mawlh mawlh a.





A aw a thian kharh a, "Engkim i ngaikawi anih kha.... Tun dinhmunah chuan nei thei che ka la ni lova. Nang pawhin hmalam hunah beisei tur tam tak i nei a... Tunah chuan ti tla..." a tih lai chuan, "A tawk...sawi tawh suh. I chhuanlam chhe te avanga thil rapthlak tak tih ka duh lo" ka ti tuarh a. Ka mittui a luang zawih zawih bawk a. Ka ṭawngchhuah zawngin ka khûr hlak hlak bawk a.





"Anih.....a tawk anih chu! Engmah sawipui theih loh...anih aw?" a rawn ti bûl hmak a. "Aw le" tih hmak pahin kan inbiakna chu kan titawp ta!!






Ka ṭap chhuak hawm hawm a, "Mi tenawm pa...tenawm pa.." ka ti tuarh tuarh a. Rang takin ka nu a rawn tlan lut hlawk hlawk a. "Ka fanu..." tih pahin min rawn kuah thlawp a. "Nu...kha mihring kha..." a bâk ka sawizawm thei tawh lo. Lungchhe zetin ka inhnît hlawp hlawp a.






Ka hnungah a chûl heuh heuh a. "A tawk e....a tawk e....engkim ka hria alawm... a tawk tawh e..." a ti mawlh mawlh a.






Muangchangin min kuai dâk a, ka mittui chu a hrufai sawk sawk a. "Ka fanu huaisen... i sawi engkim ka hria alawm. Ka chhuang lutuk che. I nu ka awm a, i pa in Van aṭangin a lo en reng bawk che a. Tunah te hian chhuang takin a en reng che ka ring. Harsatna tam tak hmachhawn huamin thil ṭha zawk i thlang miau si a" a ti mawlh mawlh a.






Ka nu chu ka kuah hle hle a, "Ka pa kha ka ngai lutuk..." tih pahin ka insût zui leh hlap hlap a. Nghet zetin min kuah a, ka Lu a chûl heuh heuh a. "Ka fanu duat....lungngai miah suh ang che. I nu hian engkim ka hmachhawnpui dawn che alawm" a ti dam diai a. "Tirawh le...in dawmkun hman kan nih loh kha...chaw ei dawn ang" nui sâng chungin a rawn tizui a. "Nu...ka lawm e" tih pahin ka nui lui sak a, ka nu chhuah hnu chuan ka mutna chu ka thlepfel zui mawlh mawlh a.






Ka nu hnathawh tur chu ka hrechiang a, hah takin a rawn haw leh ngei dawn tih pawh ka hai hek lo. Nakin lawkah chuan ka pum ami hi a rawn ṭhanglian anga. Chung hunah chuan duh ang angin ka pui thei tawh dawn lo tih ka hrechiang em em bawk a. Tuna ka puih theih lai hian theihtawp chhuah chu ka tum ruh sauh sauh bawk a.






"Kal chhuahna tur i nei em ni?" tih pahin ka insiam mawlh mawlh lai chu min rawn melh zuk a. Ka lo nui ringawt a, a hrethiam ve mai bawk ni hmiang, ngawi rengin a insiam zui ve nghal mawlh mawlh a.






Kan nufa chuan kan inzuichhuak a. Chawhmeh a lakna ṭhin kan thlen chuan chawhmeh zuar chhâwng, nu nasa ve tak tak, chuhhelh tak tak pawh ka hmu nual mai. Ka nu erawhin muangchangin a lak duh chu a dah hrang ve mawlh mawlh tho a. Ka nu lak sa rawn chuhpui lek lek ho erawh lo melh hrep zel chu ka hna tih ka hai bik lo. Ka tih ve chi a ni dawn lovin ka hria. Ka insualpui duh tak tak mai ang.






Kan hralh zawh theih tawk tur anga a ngaih chu la felin pawisa a pe nghal mawlh mawlh a. A bul lawkah chuan an motor- hmantir ngei tumin mipa pali velin an lo pawt sek sek reng bawk a. Pakhat chu melh ding bikin, "Henghi ania kan bungrua chu...pahnih kan chuan tel angai bawk" a tih rual chuan hmanhmawh zetin chu pa chuan a Auto Rickshaw-lam chu a pan thuai a.






Kan khat ṭân ṭân hle mai a, ka nu leh a khalhtupa chu an vawikhat in dâwrna a nilo tih hriat zetin an infiam bawrh bawrh reng a.






Kan kalna lam tur, kan chhak la hla ve deuha Hmeichhe tleirawl, Taxi chhunga lut fel chiah chuan ka mit a la kher mai a. "Ruthi.." ka ti sap a. Keima hriat tawk lekin ka phun ni maia ka hriat nen, "Mami....i ṭhiante hmuh i nei em ni?" Ka nu chuan a lo ti vat a. "Ka hai" ka ti ringawt a.






Taxi a chuang tawh chung pawh a kuta chelh vang vangtu kha a ni min tiphu nasa zawk tu ber zawk chu! An lo dinna lai kan thleng chho a, ka hawi phei thuai a. "Ka pu ding lawk" ka ti nghal thuai a. A ngaihna hrelo zetin ka nu chuan min en reng bawk a. A dingfel chiah chu ka chhuk thuai a, hmanhmawh takin ka tlan phei nghal hlawk hlawk a.






Ka umpha har lo e, a hnunglam aṭang chuan a banah ka va chelh nghal thuai a. "Zuala...." ka ti nghal vat a. A rawn hawi a, a ngaihna hrelo zetin min en a, a nui suk a. "Ṭhiannu, min hai a ni lo maw?" a rawn ti nghut a.






"Ka tihpalh....ka tihpalh...ka tihpalh lutuk" tih pahin ka thaw hlâi hlâi a. Ka zak bawk si, ka sen deuh ṭân ṭân a. "A ho lutuk" a tih pawh chu ka hre mumal meuh lo ni berin ka in hria.






Ka inher a, muangchangin ka lêt a, hmanhmawh taka ka nu rawn kal phei pawh chu ka hmu phe ruai tawh. Ka bana rawn chelh tu avang chuan ka ding chat a. Muangchangin ka lehhawi a, tun maia ka hai chian em em tho kha a ni.






"Ṭanpui theihna che ka nei em?" tih pahin chiang zetin min en kal a. "Ruata ka nia.." tih pahin a nui sâng a. Ka nu pawh a rawn thleng chawpchilh ve nghal a. "Aih...engmah a nilo e. Ka tihpalh lutuk" ka ti ringawt a.






"Kan lo hai palh che anih hmel e" tih pahin ka nu chuan a rawn tuihnih nghal vat a. "Lokal rawh le Mami...min nghak reng ania" tih pahin min lo ban thuai a.






"Tihpalh anih kha..." ka tihzui leh hnu chuan kan nufa chuan kan inzui phei nghal a. Ka lehhawi leh zauh a, min lo la en reng. Kan tlanzui leh ta nghal a.






Ralkhat aṭang khan an in ang em a ni. A hnaia ka hmuh pawh a hnunglam aṭang chiah a ni zui a. Zuala pianhmang vel nen an in ang leh em em bawk nen ka haipalh pawh kha ka demawm hran lo chuan ka hria. Keimaha ni tlata ka hriatna leh ka beiseina vang khan amah ngei niin ka hre lutuk pawh a ni mahna le!






Motor chhunga chuang lut, a kuta a chelh vang vang kha a nau Ruthi-i ngei kha niin ka hre tlat bawk khan engkim a ti awihawm kual vek bawk a ni. Kan chuanna khalhtu chuan min lo enduh hle kha ka dem em em bik chuang love. Nula ve uaih tawhin tlangval um duan duan tak mai kha atan chuan mak tih a tling ngei chuan ka ring. Engtin tak min ngai zui ang maw?






Tlai dang angin engmah ka tih a tui theilo. Chawhmeh zawrh kual lam pawh ka rilru ah a awm lova. Ka nu chhuah hnu chuan Inchhung sekrek khawihin ka buai kual char char a. Ka tlangval hmuh khan ka mitthla ah hmun a rawn chan rualin Zuala ngei khan ka thinlungah khawharna min rawn siam thar leh vawng vawng si. "Zual...kalsan ve theih che hi ka chak takzet asin" ka ti rilru vawng vawng a.






Ka nu a rawn haw thlen meuh chuan a tlai leh ruih tawh a. A inbual chhungin chaw ei ka lo siam mawlh mawlh a.






"Mami...lo ei mawlh mawlh rawh. I ril a ṭam tawh ngawt ang" tih pahin pindan lamah a lut zui nghal a. Ka nu phone rawn ri chu ka hnaih zawk avangin ka pan thuai a, 'Tluangtea Venglai' a lo ti kalh mai. "Nu, an be duh che" tih ram hmak pahin chaw ei dawhkan lamah ka kirsan nghal hmak a. "Aw, ka lokal nghal..." a rawn tizui lâng lâng a.






"Aw...Tluangte..." tih pahin pindan lamah a lut zui nghal hmak a. An thusawi kalhmang hriat tum zetin ka nu ṭawng chu ka ngaithla kar a. "Kan ṭhulh leh angaih hmel mange..." a tih lai te chuan ka lo tawt nghal up up a. "Nia, ka rindan ang deuh kha a lo ni leh sia. A pawilo lamah ngai mai ang" a ti mawlh mawlh te chu ka ngaithla kar reng a.




"Awle...eng emaw boruak thar a awm tak leh kan inhrilh ṭha leh dawn nia...




"Awle....awle....anih leh le" a tih hnu chuan a rawn chhuak phei a. Chaw pawh ka lo la ei chuang lo. Ka nu hmel chu ka lo en khiau a, nui var var chunga a rawn phei ka hmuh phei chuan ka thinrim lutuk hi ka puakkeh lo chauh ni ber hian ka hria.






Ka hmazawnah a rawn ṭhu a, a ṭawngṭai zui nghal a. Kei erawh chuan lungawina nei miahlo hmelpu rengin ka lo en tlawk tlawk a. Thikna in ka khat a ni ber zawk awm e.






"Mami...ei ta che" tih pahin min melh zuk a. Ka rilru awmdan tur chu a hai hauhlo tih hriat zetin, "Hetia awm mawl tawp chu a diklo ka tih bakah kan zahawmna humhim ve nan pawh Palai tirh ve hrim hrim ka rilruk a. Zuala te chhungkaw hnenah an fa kan pai thu hrilhhriat ve ngei hi a ṭha ka ti viau a. I pa Tluangtea kha ka hrilh a, a lo in huam thui viau mai a. Mahse, in chanchin ka hriatbelh zel a. Tunah chuan ka ngaihdan ka thlak chiang hle bawk. Min duh lova, a fa ah pawh a ngailo ang hialah ka ngai hmiah a. Palai kan kal hi a ṭulna ka hre lo" a phone dawn chungchang chu a rawn sawi a ni ber zawk.






"Ni e, a tawk....a chanchin hi tawp tawh rawh se" tih hmak pahin chaw ka bâr zui mawlh mawlh a. Ka nu pawh chuan min pawmpui viau mai. Ngawi rengin mahni rilru ve ve kâwmin chaw kan eizui mawlh mawlh a.






Dofky-i hmel ka hmu thut chu ka lawm ngei mai. Phone ka lo tum rilruk mek lai tak a ni bawk a. "Awii kan inhmuh khât zia hi" tih pahin ka pum lam a en uluk viau tih pawh ka hria.






"I induh em alawm" tih pahin Inchhung ka tifel zung zung a. "Lo awm rawh, thil hrilh tur che ka nei ania" ka tizui zat a.





Kawngka rawn kik dat dat chu ka chhâwn nghal vat a, ka rin rilruk ang ngeiin Pa Tluangtea bawk a ni.






Ka pindan lamah kan lut zui nghal a, "Enteh ṭhiannu, i chhungte'n chhuah an phal angem? Sawtah min kalpui lawk la ka ti maw le" ka ti nghal vat a. "Khawiah?" tih pahin ka Khumah chuan a mu zui nghal a.






"Kan kal anga i hre mai ang" ka ti ringawt a, ka thawmhnaw ka thlak zui nghal a. "An phal ang tiraw?" tihzui pahin ka melh rân a.






"Phal...phal...phal..." tih pahin a rawn tho a. "Kal ang" a tizui nghal zat a. Kan inzui chhuak chu a ni nghal der mai bawk a.






"Nu, ka va leng lawk aw? Ka rei lovang" tih pahin ka tawi khawmuang det a. "Rei lo la aw? I awm loh chuan a khawharthlak ṭhin" nui sâng a min melh pahin a lo ti vat a. Dofky-i nen chuan kan inzui chhuak ta nghal a.






"Ṭhiannu, kha pa kha a rawn leng ngun ve in ka hria? I nu bialpa a ni lo maw?" a rawn ti chu ka chûm awk a. "Sawi pawh sawi suh, ka ning ania" ka tizui nghal mawlh mawlh a.






Dofky-i nu leh pa chuan ka chungchang engmah an la hrelo a ni chêk ang. Rinhlelh leh mahni in ngaihbel tur ang pawhin min fiam miah lo, a mak ka ti zawk. Ka rinlawk ang ngeiin phal takin min chhuahtir a, ka ṭhiannu Scooty chuan kan tlanchhuak zui ta nghal a.






Kan kalna lam tur ka hrilh zel a, kan tlan zel a. Lunglei khawpui kan hnungchhawn thui tawh hle tih ah, "Ṭhiannu....khawiah nge kan kal dawn?" a rawn ti hâ a. "Kal zel phawt rawh, kan thleng ṭep" ka ti ringawt a.






"Khatah khan le..." ka tih rual chuan a ding a, a hawi ta vang vang a. Kan dinglam sir a hawi phei chu a râk ta chûl mai. "Awii... Lalpa leh!! Engtinnge helai hmun hi i hriat a? Awiiii....a nuam tawp" a ti chûl a. Zuala nena inthlahlel taka kan inpawm vawng vawng na hmun lam pan chuan a tlan phei thuai a. "Awiii...a nawmzia hi...ṭhiannu...lokal ve rawh" a rawn ti chûl a.






Muangchangin ka kal phei chhat chhat a, Thla bial zan alo ni kher nen, kan awmna hmun pawh chu a reh êng deuh phût a. Hlim taka a bân phar vel chu en reng chungin ka ṭhu a, Lunglei khawpui chu ka thlir zui vang vang a.






Ka bula rawn ṭhut pahin, "Engtinnge helai hmun nuam zet hi i hriat bik a? A va nuam chiang tak.." a rawn ti mawlh mawlh a.




"Zuala'n min hruai alawm"




"Engnga? Helai hmunah hian maw in kal?
Engtinnge a hriat theih a?"





"A ngaihzawngte a hruai ṭhin aniang chu!!" ka ti deuh hmak a, ka chhungrilah ka na nghal vawng vawng lawi si.




"Lungleiah hian ngaihzawng a nei tawh em ni?"




"A ṭhianpa in a fiam zauh ka hria alawm, 'Lunglei nula hmelṭha ṭha i thlang bik a....' a tia. Kei lo hi helai hmunah hian ngaihzawng a nei tawh chiang tih ka hria" ka ti hnual raih a.





"Anih chu" tih pahin a indap rak rak a. Cigarette-bawm leh Lighter- a rawn phawrh a. Nuih hak hak pahin, "Ka zu châk lutuk tawh" a rawn tizui vat a.






"Engatinge khatiang te i tih a? A ṭhalo asin" ka lo ti thuai a. Ka thusawi ngai pawimawhlo zetin a ṭankai zui a, "I duh ve em?" a la rawn tizui tak deuh deuh a. Ka lu ka thin khum na na a, tui tih hmel zetin a sî zui hlarh hlarh a.






"I ngai tiraw?" tih pahin a meizuk chu a si leh vang vang a. "Nge, thildang vang zawk in?" chulai hmun ka hruai nachhan chu hriat a duh tih pawh ka hai lo.






"Engkim a tawp tawh" tih pahin ka ngheng a, a koki ah chuan ka lu nghatin ka thle phei a, kan hmalam râl a khawpui êng at chu kan thlirdun vang vang a.





"Hnem ngaihna che ka hrelo. Mahse, ka hrechiang che a. Engpawh hmachhawn turin ka ring ngam tawk bawk che" ka ṭhiannu min fuihna ṭawngkam avang chuan chakna thar neihbelh ila ka ti takzet bawk.






A phone ri ngaihven chuan a che nghal sat sat a, keipawh rang takin ka ṭhu ṭha nghal vat a. "Ka be lawk aw?" tih pahin a tho zui nghal a.






Ka phone ka phawrh a, zai ngaihthlak tum chuan ka hmet zui mawlh mawlh a. Ka play a, ka khûp ka tawm a, ka khabe nghatin ka thlir ngai bawk chu ka thlir leh vang vang a.


'I tiamthu hretu Chhawrthlapui,
A êng riai e piallei mawiin,
Chhai thar bel in i liam ta maw?
Luaithli nul a min tiam zawng te kha aw?
Dawnkir leh raw Derthiam mi u'





Van boruak zau tak chu zan dang ang thovin a reh tlawk tlawk a. Thlifem thaw heuh heuh te lahin min hnemna biahthu aiin khawharna bawk min fah mawlh mawlh a. Ka hawina lam apiang chu a chul riap a, ka mitah mawina reng an pholang silo.






"Zual...min enteh... Nangmah ngai takin helai hmunah hian ka ṭhu mek anih hi... Min kuahin min hnem dawn lo em ni? Min hmangaih thu i sawi leh dawn lo em ni? Vawikhat chiah i kiangah hun reilo te hmang leh thei ila ka hlim tur....



Tunah chuan min hlat ang bawkin ka thlah reih reih che chu a ni si a. Helai hmunah hian nang thlah turin ka kal anih hi..hun reilo te i neih ah hian min rawn hnaih dawn lo em ni? Ka kal i phal lutuk ang tiraw? Ka kal anga, ka rawn kir tawh dawn lo asin.



Zual...engtikahmah kan intawng leh tawh lovang. Enteh, 'Thutiam' i neih laia min thlir renga min hriatpuitu Thla leh Arsi te khi chuan ka khawhar hlau in min la awmpui reng asin.." keima hriat tawk chuan ka ti mawlh mawlh a.






"Rawn len a tum a, kan lo chhuak daih sia. Min lo la nghak ṭalh anih chu!!" thawveng zetin a rawn ti nghal mawlh mawlh a. Rang takin ka mittui ka hrufai sawk sawk a. Nui sâng chungin, "I zei lutuk hi a tuar theilo anih ber hi maw?" ka lo ti sap a.





Min en a, min ennawn leh a. Rang takin ka bulah a rawn ṭhu vat a, min rawn kuah pahin, "Ka ṭhian..i ṭap em ni? Ṭap reng reng suh....khatiang mipa nep lutuk khan a phulo che" a rawn ti nghal mawlh mawlh a.






Ka lo kuah let vat a, ka insum ṭang ṭang na khan englaiin nge min chhuahsan ka hrelo. Ka ṭap chhuak hawk a, "Ṭhiannu....ka ngai lutuk" ka ti tluan thei hram a. "Ṭap rawh..in ṭap thawl hawk rawh" tih pahin min chul heuh heuh a. "Mahse....i mittui far khat pawh hi a phulo asin" a rawn tizui leh a.






Ka insiam ṭha nghal vat a, ka inhru hul nghal sawk sawk a. "Tirawh i haw ang, a lo nghah reng che chu" ka ti thâm chhalh a. "Aih...a pawimawh hrih lo. I duh chen chen kan awm ang" a lo ti deuh hmak a. Phone ka bih zauh a, "Hei a tlai tawh hrim hrim alawm. Ka nu in min lo ngaihtuah tawh ang" ka ti ve leh vat a. Ka rilru chhungril chuan chulai hmun chu a la thlahlel ngawih ngawih thung a. Mahse, ka ṭhiannu chuan nghakhlel taka thlirtu a nei tih ka hria a, chelhbeh reng ka tum bik lo.






Ka tho zui nghal a, "Kal rawh, haw ang" ka ti leh vat a. Ani pawh rang takin a rawn tho a, kal pah chuan, "I duhtawk tak tak maw? Keimah lam chu engmah vengthawng duh suh" ka rilru tur hrethiam zetin a la rawn ti ṭalh a. Ka tan hian a va han hlu ṭhin tak em..






Dofky-i chu a ṭawng phei mawlh mawlh a. Muangchangin ka kal a, ka ding zui dat a. Ka lehhawi a, kumtluanga rinawm reng tura 'Thutiam' kan neihna hmun chu ka thlir vang vang a. "Zual...anih keipawh ka kal ange. Mangṭha vawng vawng le" ka ti zâwi sap a. Ka ṭhiannu min nghahna lam pan chuan ka kal zui ve ta nghal a.






(to be continue.......)


Show post links
Top