THUTIAM By Tom Tom Putara (Completed)

[Ngaia]

#Prologue
"Lalfakzuala..." tih pahin a bula ṭhu, a ngaihzawng ni ngei a ka hriat chu a melh zui rulh a. "Ka nau anih hi... Ruthi Lalmuanpuii" a rawn tizui leh a. "Nang?" tih pahin a bân a rawn phar chhuak vah a.
"Lalhlimpuii....Hlimi" ka ti sap a. "Rawn ṭhu ve rawh" tih pahin a bu deuh nghat nghat a. A bula ṭhutna awlah chuan ka ṭhu zui nghal a. A nau erawhin vawikhatmah min be lova, a nui sen sen ringawt a.

Ka rîla rah, ka fanu hmel hmuh leh hlan chu ka nghakhlel takzet. Nurse pahnih chuan Naute chu an rawn pawm phei a, puan var thianghlim takin an rawn tuam phei hlân hlân a. Ka bula an rawn mut chiah chu ka kuah vat a.
"Ka hmangaih....ka fanu..." ka sawi zawm thei tawh lo. Ka biangah chuan mittui a rawn luang ngiai ngiai a. Ṭah hawm hawm ka châk a, theihtawpin ka insûm thung. "Enteh Duat...i fanu hian pa a mamawh asin. Khawiahnge i awm?" ka rilru chuan ka au zui lawm lawm a.

"U Ruat...ka chanchin, ka nihna zawng zawng i hriat hnu ah pawh min la pawm thei a maw? Mipa ah hian rinna nghah leh har ka ti... Mahse....nang chu hnaih loh i har em a ni"

Bathlar thlang lamah chuan ka chhuak a, Thla êng en a ding chu ka hmu nghal vat bawk a. Muangchangin ka pan chhat chhat a, ka thinrimna erawhin min belhchhah zual sauh a. A bul ka thleng dawn tihin muangchangin a rawn hawi a. A hmel da bai chu ka hmuh hmaih lo. Mahse...ka chhungril natna chuan min tuam hneh zawk fe si a.
A hma chiahah chuan ka ding chat a, ka kut, thinrimna in a tuam chhuah avanga khûr der der chu ka khapbet zo lo. A biangah chuan ka bêng ṭhuai a. A thle deuh sawk nghe nghe. Ben nawn ka tum chiah chu ka kutah a lo man chat a, hnehsawh zetin min pawthnai a, nghet zetin min pawmbet zui salh a. "Engvangin i kalbo? I fanu khan vawikhat chiah hmuh ve che a phu asin" ka ti chhuak hawk a, chum taih taih pah chuan ka ṭap hawm hawm a.


THUTIAM
Chap~1



By : Tom Tom Putara






Ka ṭhu tûm deuh bâr a, pindan lamah ka nu in rilru phili tak chungin ka pa a buaipui tih hrereng mahila ka lungawi lohna lantir chu ṭhulh ka tum chuang lo. Ka ngaihtuahna kil khatah erawh ka khawsak dan chu a diklo tih chu ka hre ve rân tho. Mahse, thil thleng tur te, ka ṭhiante min nuihzatna tur te ka ngaihtuah kual nasa mai si a. Engvang mahin kan zin tur chu ṭhulh theih niin ka hre bik hlawl lo.







Ka nu chu pawr phangin pindan aṭang chuan a rawn chhuak a. Ka pa erawh harsa ti takin a khuh hrawih hrawih thung. Ka nu rawn chhuak chuan min rawn melh zauh a, a mitmeng chu a ṭi deuh hrâ ni mai hian ka hria a. An fanu duh ang an pe thei lova, an fanu tih châk zâwng an pe thei lo bawk a. Ka lakah chuan a inthlahrung viau te pawh a ni mahna le, inthlahrung mawlh teh se.








Kei lahin lungawi lohna mitmeng thuplo zetin ka lo melh râm râm a. Tunah tak hi chuan hmelṭha min ti ziah tute ho khan min hmu se 'Ramhuai pai' ah min chhuah daih zawk mai thei.







"Mami...i pa saw lo awmpui lawk ta che. Nachhawkna damdawi kan lo kawl tawh miah lo mai a, ka zuk en lawk ange" tih pahin pindan chhungah chuan a lut zui leh nghal a.








Rang takin ka zui lut a, Khum a lo mu, ka pa hah taka lo thaw deuh kâwk kâwk chu dîmlo zetin ka melh nghal ngheng bawk a. Ka nu chuan pawisa chu a phawrh sat sat a, "Pawisa neilo in intih tehreng nen....?" ka lo ti ram hmak a.








Ka nu chuan min melh leh zauh a, "Mami...i pa hian a mamawh em a ni. Tunah pawh loh theih lohin Pathian Ram tura ka dah kan pawtphawi leh anih hi" tih pahin a kalna tur dâl taka ka ding chu min hêl nghal vat a. Ka pa erawhin min melh tlawk tlawk thung. A khuh zui leh bawrh bawrh a, a mutna Khum mawng lamah chuan ka la ding reng a. "Khuh der vak vak pawh kha a ngailo..." ti rilru chungin ka pa chu ka melh râm râm reng a. Ka thinrim tâwt lutuk chuan ka rilru a pawt khawlo zo tih pawh ka inhai miah bik lo.







Min melh rulh a. "Bawihi...i nu hi chhâwk zângkhai ve teh khai... In lamah tal hi chuan âwl ve tum teh..." a rawn ti teh daih a.







Lungawilo zetin ka pa chu ka melh kâwk a, "Ka chhâwk ngun teh alawm maw le...hei bak bak" ka ti ram hmak a.







"Engmah ka thawk thei tawh lova. Kan chhungkaw mamawh hrang hrang bakah i mamawh tinreng dapin a thawh theih loh bâk bâk a thawk ṭhin a. I nu hi a hah teh ania" a ti zo chu a khuh zui leh bawrh bawrh a, a in sêp kâng dâwrh dâwrh a.







Ka ter deuh at a, thinrim in seh ruh ṭêuh chung chuan, "Engnge ka mamawh anih bik na? In fanu ka nia, ka mamawh chu in ngaihtuah ve ang chu... Min châwm zolo tur si engatinge min neih?" ka tih tâwn tâwn lai chuan ka nu chu hmanhmawh zetin a rawn thaw lut huam huam a. Min rawn kal pel a, Khum bula Tui ûm chu banin ka pa chu a ṭhuttir a, damdawi chu a pe zui nghal a.








"Kei ai fe in pawisa in hmang nasa zawk? Duh leh mamawh ka sawi khât tehreng nen..." ka ti leh chiah chu ka nu chu a rawn hawi phei a, "A tawk... Lalhlimpui, ngawi hmak rawh" a rawn ti fiak ṭhat a.








Ka hriat theih tirh ata ka nu in ka hming pum a min koh vawikhatna niin ka hria. Ka thinrim lutuk chu ka puakkeh lo chauh a ni. "Ka ngawi ang..." tih pahin ka chhuak zui nghal a, pindan kawngkhar chu na takin ka khâr zui ṭhuai a. "A ngailo...tikhan awm tir hrih rawh" ka pa in a tih chu ka hre hman tho. Ka nu chuan min rawn umzui a tum anga, ka pa in a dang ni mai hian ka hre ber. Min rawn um zui pawh ni rawh se, engmah ka hlau tawh lo. Ka thinrim a kaltluang hrih em a ni








Tukverh bulah chuan ka ṭhu a, ka phone chhe zet tawh chu ka hmet kual mawlh mawlh a. "Ninawm...a tâng leh chut chut tawh. Khawih ve dawn ila 'Hang' nghal zel ringawt" tih mawlh mawlh pahin ka phone chu ka hmet sawk sawk a.








Ka ṭhiannu Dofky-i message a lo awm khiau a. "Ṭhiannu...engnge i chanchin ni ta? I thei ve dawn ta em? Enteh...a nuam dawn lutuk. Sir khan a sawi a...kan free hmel viau dawn anih hmel..." a rawn la ti zui. Kal ve châkna in ka khat zual tulh tulh bawk.








Class 12 zirlai mi 18 min thlangchhuak a, Aizawl lamah Cultural Dance show-tura thlan kan ni a. Chutah chuan kei pawh min thlang ve hlauh mai a. Kal ve ngei ka duh si, ka nu hnena ka sawi hun darkar aṭang khan kan In chhungah hmel hlimin kan inbe zui ta miah lo bawk.







Kan chhungkaw chanchin sawi tel zuaih ila a ṭhat ka ring. Ka nu leh pa hian kum 10 chhung fa an nei thei lova. Beiseina an neih chauh viau hnu, tlai khawhnu ah kei hi min nei ve hlauh mai a. Upat lam fa tih takah min duat in an phâk tawk tawkah an tih theih ang apiang min tihsak a ni ber a. Ka pa phei hi chuan min duat zual a. Keh thei dawmin min dawm a ni ber mah zawk.







Saitual khaw chhuak kan ni a, ka pa hi Police Driver a ni ṭhin a. Ka nu erawh eng hna mah a nei hran lo. Ka pa hi Lunglei lamah an sawn a, kan in bêngbel zui ta a ni. Lunglei Chanmari vengah kan khawsa zui ta nghal a. Kei pawh hi Lunglei an awm hnu a piang chauh ka ni nghe nghe.








Nikum hmasa kumtir lam khan Lawngtlai bulah accident-in an vanneih a siamin an boral lo hlauh a. Chumi hnu lawk aṭang chuan ka pa hi a hriselna a pan chho em em a. Eng hna mah a thawh theih tak loh avangin Medical Pension- in a chhuak a. Tunah phei chuan a thawhah hian nitin a belh ni mai hian a lang a. Khum hi a khawvel a ni ve ta!!







Kum 17 na ka hmang mek a, ka nu leh pa hi an hmelchhe lem lo bawk a. Mipa mit la ber pawl ka ni dêr tawh a. Ka pian a ṭha a, ka dâwng zuah a, ka hmelṭhatna hi chu kei ngei pawhin ka inhai hauh lo. Hmeichhe luhlul ve tak, mahni induh tawk ve tak ka nih pawh ka ṭhiante ngei pawhin min zilh fo na a ni. Ngaihzawng hi vawi hnih vel chu ka nei ve tawh a, ngaihzawng pawh ka la thutak vak hran lo. Chubakah, râlkhat in ngaihzawn ang chauh kha a la ni.







Ka nu chu a rawn chhuak a, tukverh lam chu ka hawi thuai a. Ka bulah rawn ṭhu in dam dap hian, "Mami...naupang chhia i ni tawh lova. Kan dinhmun hi hria la ka duh takzet a ni. Tin, i pa hian nitin min kalsan hret hret ni hian ka hria..." a rawn ti chuai raih a.







Engmah sawi lovin pawnlam chu ka la en reng a. Ka nu thusawi chu ka hre lo a ni lova, ka naupan lai aṭanga ka ṭhan hnan tawh 'tihtauh' hmanga engkim nawrchhuah chu ka la tum fan.






"Bawihi nu..rawn kal teh.." harsa ti taka rawn au lam chu a pan zui leh a. Ka nu chu ka enzui reng a, ka thinlung chhungril berah erawh ka inthiam thei chuang bik lo.






"Mami.... Mami....rawn kal teh" ka nu chuan min rawn ko a, ngawi rengin ka lut zui ve nghal a. Ka nu chuan, "Rawn ṭhu lawk teh.." tih pahin min lo hûi vat a. Ka pa chu a theih ang angin a lo ṭhu rem ve mek bawk a.







"Engzat vel nge i mamawh ang? Rs 5000 a tawk ang tiraw?" tih pahin ka nu chuan min melh dul raih a. Ner deuh sak pahin, "Em em a...ka kal lo mai ang" ka ti leh deuh hmak a.







Ka nu leh pa chu an ngawi reng a, ka pa chuan min rawn melh zuk pahin, "Bawihi, kal ve ngei la kan duh thlu ngang mai bawk si a. I pa Rinpuia te pawisa kan pûk mai aniang chu..." a rawn ti sup a. Ka pa meuhin kal tura min duh thu a sawi chu ka lawm viau mai.







"Anih Mami...kan neih sa in a daih ngang dawn si lova. I pa Rinpuia te pawisa ka va en lawk ange. Kal tur chuan i rilru i lo siam dawn nia" nui lui sak chunga ka nu in a rawn tih zui takah chuan hlim ru zetin ka chhuahsan zui ta nghal a.







Hmanhmawh zetin kan In chu ka chhuahsan zui ta nghal a. Ṭhiannu Dofky-i te In chu phûr zetin ka pan zui nghal a. "Ṭhiannu...pârchheng....i awm em?" thawveng zetin ka ti lut nghal bawrh bawrh a. Ṭhiannu Dofky-i chuan nui var var chungin min lo chhâwn a. "Hlimthawveng...rawn leng rawh" alo ti ve vat bawk a.







"Awiii...ka rawn kal nghal. Ka kal ve thei dawn anih chu..." nui sâng chungin ka ti leh nghal vat a.






"Yessss...ka rilru a lo hah hman zia chu...ka lawm eee" tih pahin min rawn pawm deuh chung chung a. "Kal loh ka lo tum ve deuh ngawt asin" tih pahin ka lama ṭang reng anih zia chu a lo phuhchhuak zui leh zat a.








Engmah dang kan sawi thei lo...chhungte hmuh phak lova hun hman kan châk ve tlat. Whatsapp -a kan ṭhianho group lamah nise kan active-nghal viau bawk a. Kan pahniha kan thlalak dun te chu kan phochhuak leh rih ṭhin. Kan hlimna chuan Van a tawng ni mai hian ka hria.








Zan lamah pawh engmah dang ka ngaihtuah thei tawh lo. Ka thawmhnaw bawm ka hawng a, 'Hei hi kal kawngah ha ila, hei hi sawtah ha ila...khawi nen nge a inrem ang?' tih vel ngaihtuahin ka thawmhnaw chu ka chhepkual kawi sek a.








Ka room kawngkhar chu a rawn inhawng ri ṭât a. Rang takin ka lehhawi vat a, ka nu chu hmel hlim tak pu chungin a rawn lut a. "Mami...i insiam ṭan der em ni? Va fimkhur viau ang che aw? Thil hote ah kumkhaw hmingchhiat theih a nia. Hmeichhia ngat phei chu mipa nen kan dinhmun a inthlau em em a. Mipa te tana insawitheihna nih tum loh a ṭha ania" rawn tih nghal mawlh mawlh pahin ka Khum ah chuan a rawn ṭhu zui a.








"I hmingchhiatna a lo thlen a, nuihzat em em tu che chu i bul lawka i ṭhiante tho kha an ni leh thei ania...chuvangin fimkhur em em ang che" a rawn tih zui leh lai chuan ka lo melh ralh a. Ner deuh nâng nâng pah chuan, "Dofky-i kher saw chuan min nuihzat hauh lovang" ka ti deuh hmak a.








"Mami....i nu hian thil tam tak ka lo tawng ve tawh ania..." tih pahin a tho zui a. "I pa in a hmu duh che ania" tih pahin min chhuahsan zui nghal a.







Ka ter deuh at a, "Ka va han hne tak, buai nak a lai a" tih nang nang pahin ka thawmhnaw ken tur chu ka thehkhawm zui nawk nawk a.







Ka pa chuan uluk takin min lo en khiau a. Nidang zawng aiin a thâwk te chu a hah niin ka hria. Ka pa hi a vanglai chanchin a ṭhianpa sawi ka hre ve zuaih tawh a. Tlangval hmelṭha leh to tak, mi ṭawng tlem leh luhlul zet a ni awm e. Ka nu erawh hmeichhe rilru nem tak, a tih loh chinah erawh hmeichhe luhlul leh tuarchhel tak a ni tih an ṭhiante sawi ka hre tawh bawk.






"Bawihi...lo ṭhu hnai teh" a lo ti sup a. Rang takin ka pa mutna bulah chuan ka ṭhu phei nghal a.






"Bawihi...hei min hmuh ang mai hi ka ni tawh a. Engpawh thleng se, i nu thusawi hi lo ngai pawimawh em em ang che aw? I tana ṭha tur chauh a ngaihtuah tih hria la, a thusawi zawm hram hram i tum ṭhin dawn nia" min fuih nghal mawlh mawlh a.







"Awle pa.." ka ti hlak a. Ka nu rawn lut chu ka lo melh vat a. "Mami...i insiam zo tawh em ni?" a rawn ti nghal zat a. "Insiam zo lo...insiam vak dan pawh ka hre lo" ka lo ti vat a. "Tirawh...ka insiam pui dawn che em ni? Zan a rei mai dawn ania. Thawh hma i ngai dawn a?" ka nu chuan min melh ngar a, a hmel nelawm zet pawh ka hmuh hmaih hauh lo.







"A ngailo mai...ka va insiam ange...ka insiam zo har lovang" tih pahin ka tho a. Ka pa chuan eng emaw sawi duh te a la neih takin tiin ka melh ralh a. A lo bûk deuh nghat nghat takah chuan ka chhuak zui ta nghal a.







Ka insiam zui leh mawlh mawlh a. Ni 5 kan châm dawn a, chumi chhunga ka thawmhnaw hak tur thlangkual rêng rêng chuan ka buai a. Ka duh ai tam mah ka inkhung tawhin ka hria. Ka Khum bul lawkah chuan ka Bag puar zet chu ka dah a. Lungawi ru zetin Khumah chuan ka lawnkai nghal a.







Ka phone ka hmetzui mawlh mawlh a. "Lalṭhian mawngpawr...i mu tawh em?" Dofky-i message ka thawn nghal a. A hmu rang kher mai... "Hlim kebâl...zawrkawi nu...ka la meng kar" a rawn ti vat a.







Ka inlet thak thak a, ka nui hak hak bawk a. "Sawm nghawngseia a kal ve dawn sia..hnawk min ti leh awm..."tih ka thawn rual chuan a thinrim leh tur zia te chu ka mitthla ah ka hmu nghal a, ka bawkkhup a, ka nui nghawr dat dat a.






"I chhe lutuk....ka pe ang che" a rawn ti nghal vat reng a.






Nuih hak hak pahin, "Aihhh....ka phulo...chubakah min duh lovang. I tan bak a rem ve leh lovang" tih ka thawn rual chuan ka phone chu ka dah a, ka nuihza chu ka insum hlei thei meuh lo.







Pindan lehlamah erawh ka nu leh pa chu an ṭawng ser ser reng a. Ka chungchang an sawi ngei pawh ka ring bawk a. Ka awmdan chu ka ngaihtuah neuh neuh a, a dik bik lo tih chu ka hria. Mahse, kal ve ngei ka duh bawk si. Thinrim titau a ka nawr loh chuan min kaltir dawn lo tih pawh ka hrechiang viau bawk.







Ka phone a rawn ri a, rang takin ka la nghal vat a. "Mawng er....i phûr tawh em? Kal vat vat ka châk tawh teh ania" Dofky thawvengi bawk a ni. "A ninawm....ka kal leh lo mai thei" ka tih rual chuan a rawn khêk ring viau bawk a. "Em em a che...zanlai a ni dawn tawh..thimhlim nuih uarh uarh hun pawh a ni tawh lo" ka ti deuh êrh a, engahmah a ngai dawn chuang lo tih pawh ka hre tho bawk.







"Anih...i sual si...ka mutsan dawn che" a rawn tih rual rual chuan, "Mu rawh...mu rawh...phi cheng suh. Kalkawngah pawh mit tikhamin awm miah suh ang che u" ka lo ti deuh kher a. A rawn nuihza viau dawn lo tih pawh ka hria. Sawma hian vawi tam tak min sawi tir tawh a, a ṭhiannu ber ka nihna ah min hrih tir tam ber ang. Mahse, kan Dofky-i hian a duhlo ve em em mai bawk si.







"In ṭhudun dawn nia...inhnaih takin ṭhu ang che u" lungawilo tih hriat zet hian a rawn ti bal bal a. Ka nuih a za viau a, fiamzui leh pawh ka chak viau a. Mahse, mut a hun ve tawh deuh nen mutsan mai a ṭha ka ti ta zawk a. "Mangṭha le...alarm kha theihnghilh suh" ka ti leh hram a. Kan in mangṭha zui ta nghal a.







Ka puansin chu ka tawmkhawm a, ka kapcheh a, lungawi zetin ka mu ta siai siai a. Aizawl kan thlen huna Bazar kal ka chak ber tawh mai. Ka thawmhnaw lei tum te chu ka mitthla lawk bawk a, nui var var chung chuan ka mu ṭha sat sat a.







Alarm rik rualin ka harh ni ber hian ka hria. Hmanhmawh zetin ka tho nghal a. Ka chhuak phei zui a, ka hmai ka phih sat sat lai chuan ka nu pawh a rawn tho chhuak a, a rawn la hâm bâi bâi a. Thingpui a chhuan rik khat khat lai chuan hmanhmawh zetin ka room lamah chuan ka lut zui leh nghal a. Ka incheina dawhkan hma ah chuan ka ṭhu zui nghal chat a. Hmanhmawh zetin ka insiam zui mawlh mawlh a.







Ka insiam zova, phone rawn ri chu rang takin ka ban vat a. "Ummm...ṭhiannu, ka hman ṭep...i hman tawh em?" tih mawlh mawlh pahin ka Bag chu ka khai chhuak zui nghal a. Ka nu chuan thingpui chu a lo chawk ri rak rak a, "A ṭhat chu...ka rawn phei har lovang" tih zui pahin ka phone chu ka dahzui nghal a.







"Mami...thingpui leh chhang hi ei rawh. Pum ruaka Motor chuan chu a ṭha lo, ruih a awl ania" tih pahin min lo siamsak sawk sawk a. Dawhkan bulah chuan ka ding a, "Muangchangin ei rawh, a la hma alawm. I tlaichhe lovang" ka nu chuan a lo ti tak na a, ka ṭhu hle hle thei tawh lo.







Ka nu chu pindan lamah Thingpui no chawi chuan a lut zui leh nghal a, rei vaklo hnu ah chuan a rawn chhuak a. "Mami...i kal hma in i pa saw va thlah ve la aw? Kha pawisa chu..fimkhur deuhin va hmang ang che" tih pahin min rawn pe nghal a. Ka melh ralh a, nuih sak pahin ka ak ṭha nghal sat sat a.








Thingpui ka in zova, ka pa hmu tur chuan ka kal zui leh nghal a. Ka nu pawhin min rawn zui nghal vat bawk a. Ka pa chuan thingpui a lo in mek a, ka lut chu min lo melh rulh a, nui vur vur chung chuan, "I va tho hma ve? I phûr lutuk mah mah a ni...kan ngaih che nen min kalsan i phûr riau mai. Ka titau nasa viau mai thei a ni" a lo ti vat a. Ka pa bulah chuan ka kal hnai vat a, rang takin ka kut a lo chelh vat bawk a.








"Bawihi....va fimkhur em em ang che aw? In rawn haw theih ve leh a rang lamin rawn haw bawk la aw? Ka ngai dawn teh che ania" a ti chu a khuh zui bawrh bawrh a.








"Awle...awle...lo dam ṭha ang che" tih pahin ka inher a, "Tluang deuhin in kal dawn nia" ka pa in a rawn tihzui pawh chu ka hre vuaih chauh a, hmanhmawh zetin ka chhuak a. Kan In kawt thleng ka nu in min rawn thlah a, kan in vai liam ta!!







In nghahkhawmna tur hmun an tih ah chuan an lo awm deuh vek tawh a. Kan Class ami Mazuali nen chiah min lo nghak tawh a. Dofky-i chuan ka Bag khai chu a lo phihthla thuai a. Sumo ding hmasa zawk chu min panpui nghal a. Driver chuan, "Khawi..lo hlang nghal ang u" tih pahin a lo ban vat a. Ka Bag pawh kan hlang fel ta....







Mazuali pawh thaw deuh hlâi hlâi chungin a rawn thleng a. Sir Zirpuia chuan, "E khai Mazuali meuh a rawn thleng tawh bawk a. I han inrem chhin teh ang u. Motor hi kan hire a ni lova, ticket cut-mai kan ni ve tho a. Motor pakhatah hian kan chuang full anga, motor hmasa zawkah sawn passenger dang rawn chuang ve tur an awm a...." a rawn ti nghal mawlh mawlh a.







Kan inrem nghal sang sang a, Dofky-i nen chuan Driver hnung chiah ah kan chuang a. Kan tlarah pathum kan chuang a, a hnung ber tlarah pathum bawk. A hma ah erawh an chuang full- thung.







Kan hnunga Motor chuan horn-a rawn hmet ri ṭhat ṭhat a. Kan driver chu a rawn ṭhu lut a, kan tlanchhuak ta nge nge e.






Driver hriat hlau ru zetin, "Midang rawn chuang tawh lo se. A peihawm loh e..." ka ti sa sa a. Dofky-i lah chu engamah hma in a lo ner nâng nâng a. "Ṭawng pai, uih hmuk chi kha a rawn nih phei chuan...." a rawn ti ve sa sa phei chu kan nui dun nghal char char a.






Thui pawh kan la tlan hma in Driver chuan, "Lawk aw.. Aizawl haw tur la ve lawk ang aw?" a rawn ti a, kawngsirah chuan a ding rem zui nghal a. Horn a hmet ri nghal ṭhat ṭhat a.







Ka phone bih chuan kan kûn ngar a, "Hei hi alawm ka awh chu...." tih pahin ka phone a thawmhnaw nalh ka tih, ka lo dahṭhat ve rân chu kan enkual dan dan a, ṭhiani chuan, "Khawi maw leh lawk....nalh tih deuh ka nei" tih pahin ka phone chu a rawn hmet tak nawk nawk a. "Hei hi a nalh ka tih chi..." tih pahin ka phone chu a pawt deuh ṭung nghe nghe a.







Driver chuan, "A hnungah khian pakhat kha ṭhu ula...khatilai ah khan pakhat ṭhu mai rawh u" a ti lâng lâng a. Dofky-i chuan min rawn nghawk salh salh a, vawi thum min nghawkna ah chuan, "Engnge?" tih pahin rum takin ka melh nghal vat a.







A mit chuan min en ve lova, awmze nei zetin min zâi ralh thung a. Ṭhiannu Dofky-i hawina lam chu ka en ve ta vat a. Kan ṭhutna sir lehlama kan ṭhianpa ṭhu chu a hnung seat-ah a insawn chho a. A hmaa kan ṭhianpa ṭhutna ah chuan hmelhriat loh rawlthar leh hmeichhe tleirawl pakhat chu an lo ṭhu vâng a.







Ka en reng lai chuan a rawn hawi phei a, kan mit a intawng chiah chu ka hik deuh mup in ka hria. A va han hmelṭha chiang tak em... Mahse, tlangval hmelṭha tak ni mah se a nikhua vakin ka ringlo. A T-shirt bân bûl hnuaia a bân lang chin chu Tattoo hlir ni mai hian ka hria. Kan driver chu a rawn ṭhu lut a, kan tlanzui ve leh nghal a.







Ka bula hmeichhe tleirawl ṭhu chu a be sar sar reng a. An thusawi ngaihven hlur chu ka hreh deuh a. Mahse, ka hre chak riau bawk. Ka bul chiaha hmeichhe tleirawl ṭhu lah chu a nui sen sen reng a, a khât tawkin a va kûn hnai leh a, a nui leh sen sen ṭhin bawk a.







Dofky-i chuan min rawn nghawk leh salh a, rum zetin ka melh leh ngheng a. "Ka ta tur anih kha aw? Aizawl thlen hma in min hmangaih khawp ang" a rawn ti nui vur vur a. "Kal mai teh a...'lerh suh' ka tih vek tawh che kha...ka kâwm lo tawp che a ni mai" tih pahin ka ner khum sak a. Ani lah hi kan inkawmna a rei tawh bawk a, ka mizia, ka rilru tur awm ang thlengin a lo teh thiam zung zung ti ila ka sawi sual kher lovang. "Tu che hmasa sa ti ila ani mai" tih pahin pawnlam a hawi a, a nui vur vur a.







Lunglei kan chhuahsan deuh hlawt tihin ka bula ṭhu chuan tukverh bula ṭhu, a hming pawh kan hriat hma hauh a kan inchuh der chu a va kuai sawk sawk a. Ani lah chuan hrethiam zetin a lo inṭhut thleng pui thuai a.







A bialnu nge ni zawk ni? A theih ang ang chuan a buaipui nghal sawk sawk a. "Tui kan lei theihnghilh daih anih hi...ava pawi ve aw?" a ti niah niah chu ka hre pha a, rang takin ka Bag pawm chu ka hâi nghal rak rak a. "Kha...." tih pahin Tui Bottle-thar chu ka pe nghal vat a.







A rawn hawi a, min nuih sak pahin, "Kan lawm lutuk e...nakinah ka pe leh mai ang che" a rawn ti vat a. "A ngailo...a ho lutuk. Hmang rawh u" ka lo ti vat a.







"Thil phal sia..." Dofky-i rawn ṭawng kher chu ka la run viau a. Ka nghawk ri deuh awk a. Ani lah a nui phuh deuh ṭhat a, nuam lo tih hmel zetin, "Kan tihpalh lutuk aw? Kan lo lei theihnghilh chiang lutuk a..." a rawn ti leh deuh luam a.







Nui var var chungin, "Aihh...a ho lutuk...chutiang lam pawh a nilo...thil dang daih ania kan nuih ni" ka lo pha mar zung zung a. A lo bu deuh nghat a, a nui sak hmel chuan a hunlai rêng pawhin ka mitthla ram a chhuahsan miah lo nia.







Ka phone chu a rawn ri a, rang takin ka la vat a. "Mami...in chhuak tawh em ni?" a rawn ti vat a. A aw ah chuan hlauthawng aw ri a tel tlatin ka hria. "Aw...kan chhuak fel tawh e. Engnge ni ta?" ka ti vat a.







Ka nu chu a ngawi deuh dat a, "Aw...hello...nu..." ka ti leh vat a. "Aw...engmah ni love. I pa in in chhuah tawh leh tawh loh a hre duh a.." a rawn ti ve leh vat a. "Anih chu...kan thlen chin ka rawn sawi zel dawn nia" ka tih hnu chuan kan inbiakna kan titawp zui ta a.







Ka melh phei ralh a, ka bula ṭhu rimtui chem chem chu ka hre sa tho na a, ka hriatbelhin ka hria... Hmalam en in a lo ṭhu ngawi ngal a. A piah ami, a bialnu ni ngeia ka ngaih rûk nen chuan an kut an insuih chial a, ka rinhlelhna pawh a dik dawn viau in ka hria.







"In nu chu a muhil thei maw?" ka ti sap a, ka nui lui sak bawk a. Min rawn melh zuk a, hmalam en chuan a nui var var a. "Muhil rawh se..." a lo ti ringawt a.







"In zin tur nge in haw tur zawk?" ka tih lai chuan Dofky-i chuan a beng a lo dawh ru ve khiau tih ka hria. Driver hmaa puanchhia chu zuk lâk lawk a, a beng chu hnawhsak nawk nawk ka chak..ani lo ngaihthlak ve a ngai ker kur lo. Kei pawhin ka chang dawn lova, kan pahnih phei chuan kan changlo zual dawn a, a rawn in kar kâi ve ka phal teuh lo mai.







"Kan haw dawn a...ka nutei te tlawhin kan rawn kal lawk maw le" a rawn ti dam dap a. "Nangni?" tih pahin min rawn melh nawn pah leh zauh a. Nui sâng chungin Dofky-i chuan, "Kan zin dawn..." a lo ti vat a.







Ka ke chu muangchangin ka chêt ṭalh ṭalh a, Dofky-i ke chungah chuan ka nghat riai riai a. Insiamṭhat chhuanlam in ka rap hrual lui zui ngheng a. "A naaa..." tih pahin min nem sawk a, ka rah chhan chu a hrethiam chiang viau bawk ang. Ani lo chhân ve a ngai mai mai lo.







Ka bula ṭhu chuan min lo hmu ru reng zawk nge ni? A nui deuh tat tat a, ka va ngei reuh tak. Dofky-i lah chuan, "Tu zei zei a ni tawh mai" ka hriat phak tawk lek leh ka huat tawk tling zetin a lo ti leh kher a. 'Ka nghawk ri awk ang' ka ti deuh na a, ka bula ṭhu chuan a lo hriatthiam leh ka hlau deuh nen ka ngawi ta zawk a.







Kan ṭhiante Sumo chuanna chu an lo kîl bial laih a, kan chuanna Sumo pawh an hnung lawkah chuan a ding zui ve chat bawk a. Kan Sir- pawh a Bike-in a rawn thleng zui ve nghal mai bawk a.







Kan chhuk sap sap a, kan ṭhiante chu an lo nui var var a. "In kalsan awih loh aw?" an lo ti sap sap a. Ka zun a chhuak ru tawh bawk a, chhuk pahin inthiarna remchang chu ka melh nghal ruai a.







Ka inthiar zo ka phei leh chu ka bula ṭhu leh a bialnu ni awm tak te chu an lo ṭhu hrang deuh a. Midang zawng chuan Motor chhia an lo hual ṭiai hlawm a. Ṭhiannu Dofky-i pawh engmah hre lo tur mah nise a hnaih ber pawlah ṭangin a lo bih leh kût kût tawh.







Ka hawi phei chu ka bula ṭhu tê khan min lo nuih suk a, "Rawn ṭhu phei ve daih rawh. Engmah i siam thiam ve chuang lovang" a rawn ti zauh a. Nuih var var pahin ka pan phei zui ve nghal mai bawk a.







"In va inngaih hmel ve aw? Ka rawn tibuai ang che u tih chu ka hlau viau ania" tih pahin ka nui rah rah a.






Nuih hak pahin, "Lalfakzuala....nang?" a lo ti daih a. Ka chhân hma in, "Ka nau hi Ruthi Lalmuanpuii" a ti zui leh a. Ka chhânna nghakin a mitmeng fiah kâk chuan min melh kar a, a nau erawhin nui rah rah chungin Motor chhe bâwr laih ho lam chu a en daih thung a.







"Lalhlimpuii....Hlimi" ka ti sap a. "Rawn ṭhu ve rawh" tih pahin a bu deuh nghat nghat a. A bula ṭhutna awlah chuan ka ṭhu zui nghal a. A nau erawhin vawikhatmah min be lova, a nui sen sen ringawt a.







Dofky-i chu a rawn hawi hû hû a, a rawn ner deuh nûng bawk a. Kan awmna lam pan chuan a rawn chho zui nghal a. "Kal rawh...rawn chhoh ve kher a ngai lo" ti rilru chung chuan ka lo melh râm râm a, ka mitmeng nelawm fahran lo chu a hmu tho ang. A ngai pawimawh leh chuang miahlo bawk ang.







"Eng ti tur nge in nih?" tih pahin min thlêk zauh a. "Aaaa...kan va lâm dawn anih hi" tih pahin ka nui sêih a. "En a va chakawm ve.." tih pahin a hmawlh ken chuan Lei a vaw kerh kerh a.






"I bo daih ka tia....helamah ṭan i lo han la a ni maw?" thawveng zetin a rawn nui nghal hawr hawr a.






"Rawn ṭhu ve rawh" nui sak chunga ka bula ṭhu in a lo sâwm chu a pawm chiang hle aniang...a rawn ṭhu zui nghal vat a.






"U Te...ka lo zuk inthiar lawk ange" tih pahin a nau chu a tho zui nghal a.






"Rawn chhuk rawh u le" kan ṭhianpa Tluanga min rawn hûi lauh lauh lam en pahin kan tho rual nghal dial a. Kan inzui chhuk thla zui nghal a.






Kan chuanna ah ṭheuh chuan kan inrem zui leh nghal sang sang a. Kan driver pawh a thlan phung mai. "Kal ang aw?" tih pahin kan chuan kim leh kim loh a rawn enkual zung zung a. Kan lawn kim hnu chuan kan chhuak zui ta nghal a....






(to be continue........)


Show post links
Top

[Ngaia]

THUTIAM
Chap~2



By : Tom Tom Putara






Aizawl thlen hma in vawi thum ngawt Sumo chhe lutuk avangin kan ding a, siam harsa tak ni silo, min pawt khawtlai tawk vel siin a ṭâwng a ni ber e.







Kan thleng hnai ve tawh e, ṭhiannu Dofky-i erawh motor a chuang fuh vak lova. A khât tawkin a ei loh pui pui a bun chhuak phei bâk bâk bawk a. Kan hnung lama kan ṭhiante ho pawh an muthlu deuh fur hlawm a. Kei erawh rilru kâwmin ka meng kar reng a, zan lam mut ṭhat loh a lang a, ka mut erawh a chhuak ve ṭep mai.







"Khawiah nge in innghah dawn? In thleng darh dawn nge, hmun khatah in thleng dawn?" rawn tih sa sa pahin a rawn hawi phei zauh zauh a.






"Hmun khatah kan thlen khawm ka ring" ka ti sap a.






"Kan inhmu leh ang chu..." zâwi sap in rawn ti mah se a thusawi chu ka hrechiang em em tho. Nuih sak pahin, "Nia..." ka ti ringawt a.






"Kha...i number min lo pe teh a" tih pahin a phone chu min rawn pe zui a. Ka melh ralh a, nui sen sen chungin ka phone number chu ka chhu lût zui mawlh mawlh a. "I duh dan danin min lo Save-mai dawn nia" tih pahin ka pe lêt a. Ka mitsir chuan ka melh zui ralh a, 'Duati' tiin a Save nia...ka thaw deuh halh a. Ka nui sak a, Dofky-i chu ka melh zui ralh a. Chilthli tla lek lekin a lo la mu âng phuau.







Rackshack- lian vak lo a pawm chu a siamṭha sat sat a. "Ka number min dil ve ka ring a?" min nuih suk pahin a rawn ti zui a. "Min rawn biak hunah ka lo Save mai ang..." tih pahin ka nui sen sen a.






"A ngailo...min lo ngai pawimawh lo riau palh ang" fiamthu tih tak zeta a tih takah chuan ka phone chu ka pe a. A number chu a chhu lut zui mawlh mawlh a. Min pek pahin, "I duh duh danin min lo chhinchhiah mai dawn nia" a rawn tizui leh a.






Nuih sak pahin, "Awle....tehreng mai. Midangin engtinnge an chhinchhiah hlawm che ka hre lova. 'DUATA' ni mai rawh" ka ti ve ngat a.






"Hmmm....deuh kher chuan....." tih pahin ka kut chu a rawn vuan a. Rang takin ka lo chelh ve ringawt bawk a. A bag- pawm hnuaiah chuan midang hmuh hlau zetin kan kut chu a insual niap niap a. A khât tawkin kan inmelh leh ralh a, kan nui leh ringawt bawk a.







Aizawl kan thleng ta...ka la kham lo, ka la chuang kham lo. Zankhuaa tlan leh ngar ngar ngai pawh nise ka la zuam viau in ka ring. "Khalai remchangah khan kan lo chhuk ange" a tih rual chuan ruak deuh nghal huaiin ka inhria a. Ka thin a phu det det a, a kut chu ka la chelh fan a. Ka thlah phal lo ni ber hian ka hria.







"Anih...kan chhuk a hun sia" a rawn tih sap lai chuan a nau pawh a lo nui var var a, min rawn melh tawn ralh ralh a. Dofky-i pawh phak chuapin a rawn ṭhu rem ve sut sut tawh bawk a. "Anih ule" tih pahin awmze nei zeta min hmer salh chu ka lo hmer lêt ve salh bawk a. Kan inthlah ta....ka kut thlan hliam pawh chu ka hru hul phal mawlh lo.







An unau chuan an chhuk a, kan kalsan ta.. Kan tlan leh chiah chu kan hnunga ṭhu ho an rawn phûr ta chiah e. "Tu emaw khawhar an awm mai thei..." tih pahin awmze nei zet zetin min rawn fiam nghal sap sap a. "In ninawm....engmah a awm lo" ka ti tak na a, min fiam an chawlh phah chuang lo. Min fiam reng se ka duh zawk mahin ka hre bawk.







"Engnge thil thleng a awm em ni?" rum zeta min melh pahin ṭhiani pawh in min rawn zawt nghal sek sek a. "Kan innei dawn...i muthilh hlanin kan sawifel vek tawh" ka ti nghat a, min nghawk sawk pahin, "Awii....awiii....awiii....i ngaihtuahna mumang vakvai anih chu..." a ti nghal ngheng a. Kan pahnih chuan za takin kan nui zui awr awr a.







Kan innghahna hmun tur kan thleng a. Kan riahna hmun tur lamah kan indahfel nghal zung zung a. Hmeichhe riahna leh mipa riahna lam a awmhrang thlap bawk a. Dofky-i pawh a ze ngai te te in a thawveng leh helh helh tawh hle. Motor ruiin a luak hrep tih a hriat leh tawh miah loh nia...







Chaw kan eikham a, kan inbual fai ser sawr a, kan inthlak zawhin Aizawl khawpui êng ut lan theihna laiah chuan kan ṭhu a. "Mawngi...vawiin khan ka muthilh hlanin eng thil chiah nge i tih a?" tih pahin min melh rûn a.







Nuih hak hak pahin, "Mut i duh man anih kha....ka chhuhsak che" ka lo ti vat a. Ka hnung chu a ri zui nghal dawp. Mahse, ka lo er lâwk deuh hman avangin a zia deuh chuan ka hria... "A na....ninawm thei lutuk..." tih pahin ka nghawk ve sawk a.







Ka phone chu a rawn ri a, kei ai mahin ka bul ami chuan a bih rang mahin ka hria. 'DUATA'






"Hello..." tih sap pahin ka tho chhuak nghal a, ka hawi let pah ralh a, ka melh zawk chhung pawhin ṭhiani lo ner nâng nâng chu ka hmu hman tho.





"Engnge in tih a? Chaw te in ei tawh em?" a rawn ti nghal sawk sawk a.



"Aw....ei tawh e. Nang zawk?" ka phûr hle tih chu kei chauh nilo ka biak mek leh ka hnunga ṭhu chuan an hrechiang ve viau bawk ang.



"Ei ve tawh e...inhmu ila?" a ngawi nghal hmuk a.



"Tunah maw?" ka thin a phu deuh dut dut bawk a.



"Aw" tih zawngin min chhâng a.



"Aaa...ihhh...a tihchi nâng..." ka ti bah deuh nak a.



"I thu thu le" a rawn ti leh hmuk ringawt a.



Ka ngawi deuh dat a, hmuh leh chu ka châk ngawih ngawih a. Mahse, engangin nge min ngaih ang tih te ka ngaihtuah tel ve deuh bawk si. "I thinrim em ni?" ka ti thla deuh ngawt a.



"Thinrim love...thinrim nachhan tur a awm hlei nem..." a rawn ti ve leh vat a. Sawi tur vak ka hre tawh chiah lo nen ka ngawi zui reng a. "Ka hmu leh châk lutuk che a..." a rawn tizui leh a.




"Mahse...." ka ti sap a, ka ngawi zui daih. Ka rilru ah chuan, 'Engtinnge kan inhmuh ang? I rawn thlen hunah min rawn hrilh la?' ka ti mawlh mawlh thung a. Ka hnung lawka ṭhu chuan ka ṭawngkam chhuak apiang a ngaihven hle tih chu ka hrechiang em em bawk.




"Engnge? I sawizawm dawn a maw ka tia. I ngawi leh daih bawk sia" nuih hak pahin a rawn tih zawm leh a. "In awmna lai rawn sawi la, ka rawn kal ang" a rawn tih zawm leh phei chu ka za ru cheng ni mai hian ka inhria.




"Ka rawn hrilh dawn che nia" hlauthawng ru deuh chung chuan ka ti thla ve ngawt bawk a.




"Ka insiam lawk ange. I message ka lo ngaichang mai ang. Ka rawn thleng har lovang" a tih hnu chuan kan inbiakna kan titâwp a. Message chuan kan awmna lai chu ka hrilh zui nghal zat bawk a. Keimah tak hi chuan hmuh thawt thawt ka duh lova, ka hlauthawng ru viau bawk. Mahse, chhûngril lam aṭangin min nawr na viau bawk si. Ka duhthlanna chu ka duhthlanna a ni tawh lo ni ber hian ka hria..






"Engnge a? Tunge 'Duata' chu?" ṭhiani chuan min rawn dinchilh zui nghal a. Ngawi rengin ka ṭhiannu chu ka pawm chawt a, ka zuang deuh tar tar bawk a. "Khawi maw? Engnge i hriat a?" tih pahin tâlchhuah a tum a, ka kuah nghet tulh tulh thung a.






"Khawi maw....khawi maw...kal teh" tih pahin min nem ṭang ṭang a. Nui har har chungin ka thlah ta a. "Kan inhmu lawk dawn?" tih pahin a ngei tur tâwkin ka siai zauh a.






"Tu nen chuan maw?" min rinhlelhna mitmeng leh rin zâwn a nei tho tih chu ka hmuthiam ve vek. Ka nui lui nghek a, "I muthilh san, i ngaihsak loh deuh kha" ka ti chu a tûm der bâr a. "Min lo biak dawn nia... 'Ani ai hian ka zei ang a ti' lo ti ang che" a rawn ti deuh kher a, kan nui dun har har a.






Darkar chanve a liam a, a la reh vung vung mai si. Ka phone chuan bih a hlawh ngun viau a, ka bih zin ang aiin lawmna tur erawh ka hmu chuang der silo. "Hre rawh...mipa rintlâk loh tak i nih zawngin i châk lovang" ka ti mawlh mawlh a. Eng kawngro mah su lo tur tih hre chungin ka vo lawk a ni ber e.







Ka phone hûm lai chu a rawn ri a, rang takin ka thlêk vat a. "Aw hello..." ka tih rualin, "Ka rawn thleng...rawn chhuak rawh" a rawn tizui a. "Awle...ka lokal" ka ti nghal vat a.






"Ṭhiannu...ka han kal lawk aw? Ka rei lovang...min lo thup deuh mai rawh" tih pahin ka kalzui nghal a. Ka ṭhiannu thusawi pawh ka bengkhawn tawh hek lo. Kan riahna hmun aṭanga ka chuang chhuak chiah tihin ka phone a rawn ri leh a. Ka en hma hauhin, "A mak thawt thawt....ka rawn kal" tih nang nang pahin ka nui sen sen a. Mahse, min nghak mektu a ni lo. Ka nu in min biak a tum tih ka bih rualin ka hre nghal. Ka ding dat a, "Aw...nu" ka ti zui zat a.





"Mami...rawn biak che kan tum reng a. In la buai kan hlau deuh maw le...in thleng tluang em?" a rawn ti nghal zung zung a.




Ka chhân hma in midang min rawn biak tum an awm tih ka hre nghal a. Ka bih nghal thuai bawk a, 'DUATA'.




"Aw...kan thleng tluang e. Nu....kan la buai deuh...ka rawn be dawn che u nia" ka ti zung zung a. Ka hmanhmawh ru takzet tawh bawk. "Awle...kan lo ngaichang reng ang che" a rawn tih lai chuan, "An la buai deuh em ni? Ka va be châk tawh em...." ka pa in harsat hmel zeta a lo tih ṭawk ṭawk pawh chu ka hre bawk a.






Phone ka hmet tawp a, hmanhmawh zetin ka chho zui leh nghal a. Ka hawi kual a, ka zawng rei love. Car nalh zet bulah ka 'Duata' ngei mai chuan min lo thlir reng a. Ka pan phei zui nghal a, a lo nui suk a.






Ka bânah a lo chelh a, "Nula man to nghah chhung chu a rei hle mai" a lo ti fiamthu vat a. Min tih tlangnel a tum ang ngeiin eng emaw ti riau hian ka nêl ru viau bawk.






Car -chhungah min luhpui nghal a. Kan ṭhutluh ruala a rimtui chêk ka hriat chuan min ti nui sak a. "Hmun dangah ka kal hman lo ania. Tunah pawh ka rei hman lo" ka tih rual chuan ka kutah a rawn chelh a. "Hei hi ka la hmer kham lo em a ni" tih pahin ka kut chu a rawn hmer zui nghal salh a. Nui var var chungin ka thlêk zauh a, "I hne zui leh vat si ange" ka ti ve khauh a.






Ka lamah a rawn tawlh phei hret a, ka sam chu a rawn chûl zui a. "Nang anga hmeichhe nalh leh mawi, duhawmna tinrengin a bawm hi ka hne thei ngai lovang tih ka inhrechiang viau asin" a rawn ti sar sar a. Muangchangin min kuai hê a, ka mitah tak a en kal a, keipawhin chiang zetin a mitmeng fim fiah kâk chu ka en reng bawk a.






Ka laka a rilru puthmang chhiar tum mahila a duhawmna, hmelṭhatna leh a mitmeng fiah kâk, tawrh har zet chuan min tibuai vek ni mai hian ka hria. Ka en reng lai chuan a mit a lasawn a, ka hmui phu ru der der chu a melh khiau tih pawh ka hai lo. Min pawh hnaih rualin min rawn hnaih zui salh bawk a. Ka mit chu ka chhîng phu der der a, ka hmui nêm thep, mipa ti zauthau tawk tur leka kau phiau chu a rawn fawp ta!!






Kan duhthawh dun bawk a, kan thaw deuh hlap hlap a. Kan inthlah rual chuan ka hmui chu ka pet zui hlak a. Min nuih sak a, a ṭhu ṭha zui a. "Min duh em?" tih pahin chiang zetin min en kar reng a.






"Ka awmdanah ila hrethiamlo em ni? Nge, khang kha infiamna tawk lekah i ngai zawk?" ka ti deuh nghat a. Ka hmui chu ka tuai zui zauh bawk a.





"Nang anga hmeichhe hmelṭha lutuk hian min duh tak tak ka rin loh vang ania" tih pahin ka kut chu a la kâng a, a fawp zui vawng vawng a.






"Keini ang lo pawh i hmu ṭeuh ang chu...min hrechiang anga, min thlauhthla leh tho si lovang maw?" tih pahin rinhlelhna thlipui min nuai mek tu chu ka thupzo ngang lo.






Ka hmui chu a rawn hup a, a thlah rualin min hnaih leh nghal zat a. "Ka fawp kham thei dawn lo che anih hi..." tih pahin min rawn fawp zui leh a. Ka lo pawm nghet nghal salh bawk a. Tlemin a insiamrem a, ka ṭhutna sir chu a rawn zen rak rak a, a rawn tho zui deuh a, muangchangin min nemthlu ta riai riai a. Car seat a tihâwn zawh rualin ka chung ah a rawn bawk zui a ni deuh ber a. Kan la infawp mawlh mawlh reng bawk a.






Ka inhrethiam chiah lo... Ka vawikhat hmuhna aṭang khan ka duh ngawih ngawih a, ka hnaih ah awm reng se ka ti rilru vawng vawng bawk. Ka chan loh tur leh chan phâk hauh lo tur anga ka in ngaihtuah pawhin ka na vawng vawng a ni ber.






Mahse, "Sihhnip min ti awm..." tih sap erawh ka ṭhulh chuang lo thung. Min nuih sak a, "Chutiang zâwngin ka ngai lo che. Intawng tur tak kan intawng ah ka ngai" a rawn ti chu ka kuah nghet zual sauh a.






Ka phone a rawn ri a, rang takin ka dap nghal rak rak a. "Aw ṭhiannu...." ka ti nghal vat a. "Rawn chhuk vat rawh. Sir a thinrim lek lek tawh ania" a rawn ti nghal zung zung a. Ṭawng leh ka tum lai tak chuan nuih var var pahin ka hmui a rawn chhilh leh hmak a. "Hummm....hmm...." tih pahin ka nemkiang a, nui lui sak chungin, "Ka rawn chhuk nghal" tih pahin thawh nghal ka tum a.





"Engnge i va hmanhmawh ve?" tih pahin min la dang rân a. "Hey...khawnge in awm a? Rawn chhuk vat rawh" ka ṭhiannu chuan ka bula rawn ṭawng ri chu a hrechiang viau ang tih pawh ka ring.






Phone chu ka dah a, "Khawi maw tho teh. Ka ṭhiannu ania, kan Sir a thinrim tawh viau anih chu..." tih pahin ka nem zui dat a, muangchangin a tho zui a. A ṭhutna ngaiah chuan a ṭhu ṭha zui chawrh a, a ngawi zui ngal a.






"I lungawilo deuh em ni?" insiamṭhat mawlh mawlh pahin ka ti sap a. Mahse, engmah dang ka rilru ah a awm tawh lo. Ka mualpho hmaa chhuk vat ka ngai tih pawh ka hria. "Anih..ka chhuk aw?" tih pahin ka tho zui nghal a.






Ka chhuak tur chiah chu ka bânah a rawn chelh a, min rawn hnaih zui leh nghal a. "Kan inhmu leh thei angem? Hun lo insiam la tiraw?" tih pahin ka biangah a rawn fawp zauh a.






"Ka lo tum dawn nia" tih pahin ka nui lui sak a. Ka hmanhmawh ru tawh takzet bawk. "Ka kal aw..." tih pahin ka chhuak zui a. Rang takin a rawn chhuak zui ve nghal a, "Anih leh phawt, muttui le" ka tih rual chuan ka melh ralh a. "Anih leh phawt le Duati" a rawn ti chu ka nuih sêih a, ka kalsan zui ta nghal a.






"I va rei em em ve? Dawr kal angin ka sawi che ania" Dofky-i chuan a lungawi lohna lantir zetin min lo pawt sawk a. Kan mutna tur lamah chuan kan lut zui nghal a. A ṭhenin phone an lo hmang a, a ṭhen in game an lo khel mawlh mawlh bawk a. Min lo ngaihven em em lo chu ka vannei letling phian in ka hria.






Mutna ka siam zui ve mawlh mawlh a, ka bula mutna siamsa ah chuan Dofky-i ngei chuan mu chungin min lo melh rum ûl thung. "Khatiang em em a rei kalbo chi a nilo tih hre ve ta che" min ngaihtuah tih hriat zetin a lo la âng hmarh hmarh reng a.






Mut zui thlawp pahin, "A duhawm zia kha..." ka ti sap a. "Amah ah khan ka suangtuah ṭhin mipa nihna zawng zawng a kim in ka hria" ka ti zui leh chu ka ri zui dawp a, ka bân puam ṭalh ṭalh chu ka tuai zui vat vat a. Kut min thlaktu ngei mai chuan, "Engang mihring nge anih pawh hriat loh...i ṭahpui hluam hluam tur pawh a ni mai thei asin" min rawn la ti zui mawlh mawlh bawk a.






Phone chu ka hmet mawlh mawlh a, "Aw hello nu...kan mu fel chiah e" ka ti nghal vat a.



"Anih chu...in buai tawh lo em ni?" a rawn ti nghal zung zung a.



"Aw....buai tawh love" ka tih lai chuan ṭhiani chuan min lo ner khum nâwng a, ka melh zui hrep ve tho.




"I pa a lo muhil hman tawh a, nachhawkna te kan inpe leh bawk a. A be châk che a, a ngai lutuk che asin Mami... Vawiin lam chu kan fel lutuk lo" a rawn ti leh mawlh mawlh a. Ka ngawi rân a, "Naktukah rawn biak che kan tum dawn nia...mu hahdam tawh rawh khai...in chau ang" a rawn ti zui leh mawlh mawlh a. Ka nu aw chu a pangngai zân lo tih chu ka hria a. Mahse, ka inthiam loh rûkna chuan engmah min zawhchian tir ngam bawk silo.




"Awle...nu..." ka ti ringawt a. "Tui deuhin mu rawh u. Midang tana hnawksaka awm kha hlau em em la aw? Ka ngaihtuah mang tak che e aw..." a rawn ti leh vawng vawng a.




"Nu...ka ngaihtuahawm loh ania, ka hre ve vek alawm" ka ti tak na a, min ngaihtuah loh phah dawn lo tih pawh ka hrechiang viau bawk.




"Anih leh aw Mami...muttui ule" ka nu aw ah chuan ṭah hawm hawm châk aw râwl tel tlat a hriatna ka nei bawk. Kan in mangṭha ta nge nge a.






Ka nu nena kan inbiak lai khan message ka dawng mawlh mawlh tih pawh ka hria. Rang takin ka hawng zui a...


'Ka thleng chiah aw Duat...'


'Ka ngai che...ka ngai reuh che'


'Min ngai ve em? Inhmuh leh ka chak takzet'


'Min chhâng duh bawk silo...mangṭha le'






Rang takin ka phone chu ka dawm rem zui sauh a. Hmanhmawh zetin ka hmet nghal zung zung bawk a.






Ka nghak zui vang vang a, a reh zui vang vang mai bawk si. Dofky-i lah fiamthu ho deuh deuh, zâwi tê in a ngaithla a, a nui kur kur reng a. A thawveng bik lutuk chu nghawk irh awk ka chak deuh tak tak. Mahni lo maha Duata chân leh mai ka hlauh tehreng nen...






Ka ennawn leh ṭhin, a la Online reng mai bawk si. Ka message thawn a en thei bawk si lo. Call-mai ka duh rum rum tawh a, ka en leh ṭhin. A reh hian a reh tlawk tlawk a. 'Ka nu te nen kan inbe lawk anih kha...i duh duh chu be zawk rawh' ka thawn rual chuan ka phone chu ka dah deuh sawk a. Ṭhiani chu a rawn hawi rang kher mai. Min rawn nuih luih suk pahin, "In inṭhen leh nghal em ni?" a rawn ti hluk a.






Puan chu ka pawt chho sawk sawk a, "Kal rawh...inṭhen lo...inṭhen lo" tih pahin ka in khuh pil nghal hmak a. "Tunge i biak a? Ka message pakhat pawh i chhâng duhlo a maw?" tih rilruk pahin ka inseh ruh ṭung a ni ber e.






A khât tawkin ka phone chu ka bih leh ṭhin a. Engmah thil thar thleng a awm lo. A ngai rengin a la reh tlawk tlawk a. Ka mit a thîp ṭhûm tawh bawk a. Ka thinrim, ka lungawilo takzet. Mahse, biak hmasak erawh ka tum bik chuang lo.






"A ṭha, i duh duh be rawh. Mi sual pa..." keima hriat tawk chuan ka phun mawlh mawlh a. Ka mutchhuak in min hnehthlu ngang a nia nge, ka lo chhîng leh zauh ṭhin. Ka ṭhiante pawh an muhil vek hlawm tawhin ka hria. Meng leh meng lo inkâr velin ka phone chu ka bih leh ṭang ṭang a. A ngai tê in a lo la 'hring' vâ reng a. Ka message pakhat tê mah chuan en a la hlawh chuang lo.





Lungawilo zetin ka phone chu Lukham hnuaiah ka thawlh lut a, muthilh tum chuan ka mu ṭha zui sat sat a.






(to be continue.....)


Show post links
Top

[Ngaia]

THUTIAM
Chap~3


By : Tom Tom Putara





Zing ka harh pawhin engmah dang ka rilru ah a awm lo. Rang takin phone chu ka bih leh nghal vat a. Engmah chhânna ka la dawng chuang lova. A lo hring tawh em bik love, chhânna ka dawng miah lova, ka message a en hek lo. Lungawilo ru zetin mutna chu ka thlep tau sawk sawk a.






Ṭhiani pawh a rawn zi ṭalh ṭalh a, hâm bâi bâi chungin min rawn melh rulh a. "Engnge? Tho rawh..." ka lo ti vîn hlar a. Nuih tut tut pahin, "In bengdai rawh, hriatchian loh mipa vanga ṭhian ṭha te chunga thinrimna zawn ngawt a ṭha lo ania" a rawn ti nuah nuah a.






Nui lui sak chungin, "Tho teh, tho teh...i chhe lutuk. Va inphihfai vat rawh, Sawmnghawngseia a rawn kal ṭep ang" ka ti fiamthu zui zat a.






"Ka ning....sawi tawh suh" tih ngheng pahin a in khuhpil leh nghal a, a ke a leng vak vak bawk a. Ṭhiani hi chuan min tihlim ṭhin teh mange.






Kan Sir- rawn lut chu kan lo melh ṭhap hlawm a. Min rawn thurchhuah nalh ka rin nen engmah a sawi lova, ka lawm hle bawk. "Vawiin lamah Bazar duh in awm leh Bazar-theih turah ngai ila. Mahse, tlai dar thum hma in helai hmun hi thlen vek tur a ni ang" a rawn ti chu ka va han lawm tak...






Chaw kan eikham a, kan insiam zui mawlh mawlh a. Ka phone rawn ri chu ka melh vat a, 'Duata' bawk a ni. Ka chhâng dawn nge ka induh khum dawn tih hrethiam lo zetin ka ding ngawi reng a.






"Aw...engnge?" bak hlarin bul ka han ṭan nghal phawt mai a. "I buai deuh em ni?" min rawn tidam dap pawh chu ka bengkhawn ṭha duh vak lova.



"Engnge min rawn biak?" ka ti leh deuh hmak a.



"Rawn biak che i duhlo viau a ni maw?" a rawn tih ṭawngkam chu a nêm ta lêm lo hle bawk.



"Zankhua in biak i nei alawm. I duh leh va be ve leh mai la..." ka tih rual chuan, "Engnga!!?" a rawn ti deuh ṭhat a.



Engmah ka sawi zawm lo, ka ngawi reng a. "Nizanah ka lo muhil daih alawm... Zingah ka harh chiah...ka ṭhianpa nen kan inbia a. Kan inbiak lai ka muthilh san anih kha...nangin min rawn biak tum hek lo che" a rawn ti nghal mawlh mawlh a.




A rawn in sawifiahna ṭawngkam derdêp lutuk chu ka ringzo chuang lo na a, insawifiah tur erawhin ka phût ru viau tho si. "Anih chu..." ka lo ti bûl deuh hmak a.




"I awih lo viau a ni maw? Ka ṭhianpa nena kan inbiakna ka rawn thawn dawn che nia" a rawn tih pawh chuan a laka ka pangchanna, thîkna chuan min la kherh hneh viau zawk tho a.




"Anih..ka dah aw? Ka ṭhiante'n min nghak reng tawh a...." tih pahin a rawn chhânna pawh nghâk chhuak lo chuan ka dah zui nghal hmak bawk a.






Dofky-i leh Masangi te chuan min lo nuih var var a. An bul ka thlen rual rualin ṭhiannu Dofky-i ngei chuan, "Bialpa nei reilo ber of the Year" a lo ti deuh kher a. Ka ner khum sak a, "I hmelchhia...." ka ti hlak a, kan pathum chuan kan nui zui har har a.






Ka phone chu a rawn ri ṭang a, kal pahin ka phawrh zui nghal a. Dofky-i leh Masangi erawh thawveng zetin an nui zui awr awr a. Ka ke pên muang zui zat chuan ka message dawn ka ngaihven zia a pholang chiang viau ang.






A ṭhianpa nena an inbiakna chu a rawn dah lut rûih a. An inbiak hun darkar thlengin chhiar pah chuan ka chhût lêt neuh neuh a. A sawi kha a dik zawk deuh tlatin a lang ta!! A lo mutsan pawh chu a ni mai thei bawk e. Mahse, biak pawh hmasak erawh ka tum phah bik chuang lo. Zankhua in min ti mangang tawh a, keimah vangin lo mangang ve hrih rawh se. A duh leh amah zawkin min rawn be rawh se.






Taxi kan phar a, Bazar lam pan chuan kan chhuak phei nghal a. Ka ṭhiante pahnih chu an ri phei chûl a. Kei erawh engmah dangin ka ngaihtuahna an luah thei lo. A khât tawkin ka phone chu ka melh sek a. Message-a rawn thawn lova, min rawn be hek lo. A online-lova, a reh hian a reh tlawk tlawk a ni ber mai.






Ka phone a rawn ri chu ka en rang kher mai. "Aw....nu" ka ti ram hmak a. A ninawm, rilru ah an awm hrih thlawt lo.



"In buai em ni? I pa in a be châk che a" a rawn ti hnual raih a. A inthlahrung ru dai ni mai hian ka hria.



"Ummm...nakinah ka rawn be dawn nia. Bazar kan kal mek a, kan la buai lutuk. A bengchheng bawk sia" ka ti nghal mawlh mawlh a. Ṭhiani te pahnih lo ri hlut nen ka beng ka dawh uluk hle bawk.



"Awle...rawn be ngei ngei rawh aw Mami?" a rawn tih leh hnu chuan, "Awle...ka rawn bia ang" ka ti leh nghal sawk sawk a, kan inbiakna chu kan titawp zui a.






Kan duhzawng ṭheuh, kan lungawina ṭheuh lei kan ni hlawm bawk a. Kan hlim tlang viau mai. Kan Bazar zawhin kan inhnawhpuar a, Dofky-i leh Masangi bula awm chu rilru hrisel angai hle tih ka hrechiang. An hlimna ṭawmpui pha ber ṭhin ka nih pawh ka hai lo. Mahse, tun ṭum erawh ka rilru zahve vela kâwm ka ni bawk a. An thawveng lutuk chuan ka thin an tirim lek lek zawk in ka hria.






Dar 3 a ri ṭep tawh a, hmanhmawh zetin kan thlenna hmun lam pan chuan kan haw zui leh nghal a. Ka phone chu a khât tâwkin ka thlêk sek a. Engmah chanchin danglam a awm lova, hlim taka nuih ver verna tur thil lah a awm hek lo.







Kan ṭhian dangte pawh an lo thleng khawm ṭak ṭak tawh a. Kan thil lei kan inhmuh a, kan ri deuh laih laih hlawm a. Ka phone rawn ri chu ka thlêk vat a, ka nu bawk a ni. Ka hmet thim hmak a, lo ri ral mai mai mah se pawi tihna ka nei hrih hek lo.






Dofky-i chuan min rawn hûi lauh lauh a. Hmanhmawh zetin ka pan phei zui nghal a. A phone chu a rawn lek kâng vâ a, "An be duh che" a lo ti vat a.






A ngaihna hrelo zetin ka ban zui nghal mai bawk a, ka thlêk thuak a. Dofky-i number hriat loh aṭangin a ni.



"Aw...hello..."



"Mami...in buai viau em ni? I phone i la thei lova. I ṭhiannu number ka va dil ringawt alawm" ka nu aw khûr dar dar chu ka hre nghal a.




"Ka lo hrelo reng reng....kan thlenna a la rei lova. Kan thil lei vel kan lo in ensak hlawm a" ka ti niah niah a. Dofky-i chuan mak ti hmel lek lek hian min melh kar reng a.




"I duhzawng i hmu em?" min rawn ti tak na a, a aw ka chhuak ah chuan min phûr puina ri ka hre miah lo thung.




"Aw, hmu e...a nalh hlawm lutuk" ka ti ve vat a. "Nu...engnge ka pa a an a?" ka tihzawm zat a. Ka nu min chhân hma in, "Ka lo be ve dawn em ni?" ka ti zui leh zat a.




"Tunah tak chuan a muhil a...nakinah a harh ve leh kan rawn be dawn che nia" a rawn ti leh a. Ka nu chuan thu sawi duh tam tak a nei niin ka hre ber..nidanga min biak ang a ni lo. A aw a zângkhai vah lo in ka hria.




"Awle nu...nakinah min rawn hrilh la. Hunthawl deuh zawkah kan inbe dawn nia" ka tih hnu chuan kan dah zui nghal a.






Phone ka pêk lêt lai pawhin Ṭhiani chuan min lo melh khiau reng a. "Kha le..." ka tih rual chuan a lo ban vat a, kalsawn ka tum chiah chu, "Ṭhiannu...." alo ti sap a. Ka ding dat a, ka lehhawi leh nghal vat a. Ngun fahranin a mitmeng aṭanga thuchhuak leh thuruk infûn chu ka chhiar a ni ber e. Engmah erawh ka hrethiam chuang lo.






Min rawn pan a, ka bul sêtah a rawn ding a. "Ṭhiannu...i hriatchian loh leh eng ang mi nge anih pawh i hriat loh avangin i nu leh pa kalsan suh" a rawn ti thâwp sat a.






Lungawilo zetin ka melh râm râm a. "Ka kalsan em ni? Engtiklaiin nge ka kalsan a?" ka ti ram deuh hmak a.





Nuih hak pahin, "I kalsan ka ti hlei nem... 'Kalsan suh' ka ti mai che alawm" a rawn ti zui ve leh a. Ka lo nui lui sak a, "Mahse...ka chîk neuh neuh che a. I kalsan ṭan der ania" awmze nei zet chuan a mit ko a sân âk a.






"Hmm...phei ang. A ninawm, ka sawi duhtawk e" nuih var var pahin ka ti zui hlak a, kan inzui phei ta nghal a.






Chaw kan eikham a, kan ri zui laih laih a. A chuh chak pawl tih takah a hmasa lamah ka inbual thei hlauh e. Dofky-i rawn inbual zo chu hmai hnawih mawlh mawlh pahin ka lo thlêk zauh a. "A nuam sawr sawr em? Ka hahdam huai in ka hria..." ka lo ti vat a.






"Nuam tak a ni, nuam tak...." rawn tih sawk sawk pahin ka bulah chuan a rawn ṭhu a. Midang hriat hlau takin, "Engnge in chanchin ni ta zel? Engmah zêp buai tum suh aw?" a rawn ti zui sap a.






"Awii...a hun lo lutuk. Nakinah ka hrilh vek ang che" tih pahin ka hawikual pah ralh ralh a.





"Min hrilh tho chu ka ring alawm" a sam hrûk mawlh mawlh pah chuan a rawn ti leh vat a, a nui zui har har a. Nia, engkim hrilh vek ka tum sa hrim hrim a. Hrilhna hun ka la neilo em mai zawk a ni.






Zan boruak a rawn thleng a, thil thleng thar dang erawh a awm hrih lo thung. Ṭhiante ho thawveng lutuk te chu ka hne ru ngawih ngawih tawh. Ka phone ka bih leh sek tawh a, ka nu leh pa min rawn biak hun ka ngaichang ru khiau bawk. Mahse, an rawn biak laiin rawn biak a tum ang tih ka hlau tel viau bawk.






Ka nghahhlelh rûk chu a rawn ri ta chiah e. Hmanhmawh zetin ka la nghal vat a. "Hello" tih pahin chulai room bengchheng zet chu ka kalsan zui nghal a.



"Aw....Mami..ila buai em? I pa hian a be châk tawh lutuk che a" ka nu in a rawn tih lai pawh chuan ka pa phûr aw ri ka hre thei nia.



"Buai love..min rawn be lawk si lova, ka lo nghak reng che u alawm. In la buai anih ka ring a..." ka tih lai lai chuan, "Khawi maw Bawihi chu keimah ngei hian ka lo bia ange" a rawn ti mawlh mawlh a. ""Aw....Bawihi...in buai tawh lo maw?" ka pa chu a khuh nghal bawrh bawrh a.




"Ka pa....i ṭha em? I nuam deuh em?" ka ti nghal zung zung a.



"Ka ṭha...Bawihi..ka ṭh...." a khuh leh bawrh bawrh chu ngaihthlak a nuam tehchiam lo viau bawk.



"Ka pa...hahdam phawt la...nakinah kan inbia anga" ka ti hnual raih a.



"Mami...keimah nen inbe mai ang" ka nu chu a kalsawn tih pawh ka hre thei a, ka pa la khuh bawrh bawrh ri erawh ka la hre viai viai thei bawk.



"Nu...ka pa kha a ṭha lo viau em ni?" ka ti nghal sawk sawk a, ka hlauthawng ru thar takzet bawk.



"Engtikahnge in rawn haw ang?" ka nu chuan a rawn ti teh daih a, ka nu chuan haw thuai turin min duh tih pawh ka hrethiam nghal vek bawk.



"Naktuk aṭangin hun kan hmang ṭan tawh dawn a, rawn haw vat ka chak tawh..." ka tih mawlh mawlh lai chuan min rawn biak tum an awm tih ka hre nghal a. 'Duata' ngei a ni tih pawh ka hrechiang viau mai.



"Nu...nakinah ka rawn be leh ang che u. Ka pa kha a hahdam deuh hunah min rawn hrilh rawh aw?" ka ti sawk sawk a.



"Awle...ni e, rawn biak reng pawh a inthlahrunawm viau mai. In buai bakah ṭhiante kâra phone lo hman bîk reng kha a nawm lohna chen te pawh a awm ang" a rawn ti dam thliam a.



"Nia....Nu, nakinah kan inbe leh dawn nia" ka tih hnu chuan kan dah a. 'Duata' min rawn biak leh hun nghak chuan Aizawl khawpui êng ut chu ka thlir reng a.






Min rawn be lova, ka nghak ngar ngar reng a. Darkar khat a liam a, darkar hnih a liam leh a, darkar thum a liam....ṭhiante pawhin mutna an siam leh sap sap tawh a, ka thinrim hlur tawh. Min rawn biak a tum laia phone ka lo hman avang ngawta thinrim anih chuan a tawk a ni mai. Ka be hmasa awm bik lo em mai. Min hriatthiamna a neih ve angai, chhungte nei ka ni a, hmeichhe tla hlang ka ni lova. Ka chhungte nen pawh kan inbe ve bawk ang chu!!






Mutna ka siam tau sawk sawk a, ṭhiannu Dofky-i chuan nui rah rah chungin min lo thlêk zuk zuk a. "Nui suh...ka nawr nawk ang che" tih ram hmak pahin ka melh zui ngheng a.






"Ok...ka nui tawh miah lovang" tih paha lehlam min hawisan hmak chu ka la na viau bawk. Ka mutna ka siam zova, rang takin ka ṭhiani bulah chuan ka inthawlh a, ka kuah zui nghal a. "Khawi maw kal teh...va mu tau vel mai mai rawh" a lo ti deuh hmak a, min nghawk deuh salh bawk a.






"A ninawm..." tih pahin ka kuah nghet salh a, "Khawi maw rawn hawi teh...titau kher lo la....Sawmnghawngsei" ka tih zui leh takah chuan a rawn hawi nghal vut a. Min melh râm râm pah chuan, "Kha hming kha ka beng hriatah i sawi leh anih chuan vawikhat mah ka nui hmel i hmu tawh lovang" a rawn ti nghal vat a, a nuihza insûm chu ka nuih a za kher bawk a, ka insûm thei ngang lo. Kan pahnih chuan za zetin kan nui zui nghal awr awr a. Kan ṭhiante pawh a ngaihna hrelo zetin an rawn nui ṭhaw hlawm a.






"Engnge ni reng reng a i va lungawi loh hmel ve?" tih pahin thutak zetin min melh kar a.






Ka insiamṭha sat sat a, "Ka ṭhian...ka hrethiam lo...kan inkâr hi ka hrethiam lo" tih pahin a ngaihdan diktak hriat in beisei zetin ka melh kar a.






"I ring nghal bur em ni?" ngun zetin min en kar bawk a.






"Ummm" ka ti nghat a. Ni e, amahah rinna ka nghat nghal ngam tho nia. Ka rin anga a awm lo anih zawngin ka na viau ang tih pawh ka inhmu thiam nghal vek bawk.






"I hriatchian loh, i vawikhat hmuhna, engang mipa nge a nih pawh i hriat loh hnenah i rinna zawng zawng i dah vek a maw?" min tih mawlh mawlh lai chuan message ka dawng ri tlang a. Ka lukham bula let bal chu ka ban nghal vat a. Ka 'Duata' ngei a ni tih ka hriat rual chuan, "Ka mu dawn..." tih pahin ka tho nghal a. Nui ver ver chungin ka mutna lam chu ka pan phei nghal a.






Ka mawnga rawn tlawh pahin, "Mu rawh...mu rawh...min mamawh hunah pawh rawn phei tawh miah suh" min ti zui ngheng a. Ka lehhawi a, "Bye...." nui sâng chungin ka ti ve kher bawk a.






"Engnge i tih?" tih zawng a rawn thawn na a, min tinui ver ver tho nia.



"Engmah...nang?" ka thawn zawh rualin ka inkhuh ṭha nghal sat sat a.



"Engmah ka ti lo...biak i har em mai a.."



"Engnge biak ka har na?"



"Biak dawn apiangin i busy- char char zel alawm"



"Awwww....ka nu te nen kan inbia anih kha..."



"In inbiak zawh pawhin min rawn biak i tum chuang lova..."



"Nang pawh..min rawn biak i tum nawn chuang lova...."



Ka nghak zui deuh reng a, engmah a rawn sawi zui lova. "Heyyy....engnge i tih a?" tih chu ka thawn zui leh ta nge nge a. A en lova, a reh zui leh vang vang a. Ka call-ta nge nge a, phone a hmang!!






Vawi thum ka tihna ah pawh a la hmang tho va, ka thinrim ru leh takzet tawh bawk. Lungawilo zetin ka lukham hnuaiah ka dah a, ka nghak deuh vang vang a. A reh tâk reng avang chuan ka phone chu ka ban leh da da a. IG- ah ka lut a, a hmaa ka en ṭhin pawh ka entui lova. Youtube- lamah ka lut leh a, engmah en tur ka hre chuang lo. "I duh duh danin min tihkual tum miah suh ang che" ti rilru chung chuan ka phone chu ka dah tau deuh hmak a.






Ṭhiannu Dofky-i mutna lam hawi chuan ka inlet dê dê a, ani lah chu eng thil nge a buaipui tehreng ni? Midang hriat hlau si, za tak siin a lo nui khûr dur dur a. A thil buaipui chu hriat ve a, nuihpui ve vak vak ka châk a. Mahse, ka pawh ngam hrihlo. Min lo ti nek dawn tih ka hrechiang viau bawk.






"Lalfakzual...hre rawh...ka be hmasa lo khawp ang che" keima hriat tawk lekin ka phun sap a. Ka puansin chu ka siamṭha sat sat a, muhilh ngei tum chuan ka in let thak a, ka ngaihtuahna vakvel tlansan tum chuan ka chhîng zui ta vang vang a.






(to be continue.......)


Show post links
Top

[Ngaia]

THUTIAM
Chap~4




By : Tom Tom Putara





Nilengin kan buai a, phone lam pawh ngaihsak hmanin kan awm meuh lo. Ka rilru ah erawh amah ngei khan hmun a luah reng lawi si. Mahse, biak hmasak ka tum lova, ngaihsak anga lan pawh ka duh hek lo. Ka ṭhiante hriatthiam tura khawsak ka duh lova, ka awmdanah min rinhlelhna an neih pawh ka hlauh ber a ni.







Tlai a kan intihfel meuh chuan kan chau hnawk hi a ni hlawm ber a. Kan mu ngiai hlawm a, mahni phone ṭheuh kan buaipui a ni ber. Engkim siam sa ei kan ni hlawm bawk a, tih tur kan nei hlawm lo. Kan hman em em hi a ni ber a, Dofky-i phei chu a hman zual hle.







Ka nu biak tumin ka ngaithla vang vang a. Chhânna ka dawng lova, ka rilru a nuam lo zual sauh bawk a. Ka nghah vang vang hnu chuan ka phone chu a rawn ri a. "Aw...nu
..in buai em ni?" ka ti nghal thuai a.



"Dawr ah ka kal lawk a....ka thleng chho a, i pa in phone- a rîk thu a lo sawi a, ka rawn be nghal che" a rawn ti nghal sawk sawk a. Ka nu bawk chuan, "Mami...engnge vawiin lam in hun hman te a nuam em?" a rawn tihzawm zat a.



"Aw...nuam lutuk. State dang aṭanga rawn kal ho pawh an hmuhnawm lutuk. In en ve atan ka duh sia, video in ka rawn la ṭeuh mai. Mahse, ka phone hi a chhe lutuk a" ka ti let mawlh mawlh a.



"Awi...kan va en ve chak tawh tak em..." a rawn ti nghal zung zung a.



"Nu...ka pa engnge a an?" tih pahin pawnlamah ka chhuak zui nghal a.



"A ṭha ti ila a fel vak lo. A changin a fel viau a, a fel viau emaw tih laiin kan han buai leh nawk nawk bawk a" a rawn tih lai chuan thaw deuh halh chungin ka lo ngaithla kar reng a.



Ka nu bawk chuan, "Mami...rawn haw tawh ula ka ti mange. I pa pawh hi a dam sawt sawtin ania ka rin ni. A ngai em mai che" a rawn tih zawm leh zat a.



"Nia, kei pawhin ka ngai tawh che u" ka ti sap a, kan ngawi dun zui vang vang a. "Anih Mami...eng eng emaw tih tur neuh neuh ka nei a, nakinah kan inbe leh dawn nia" a rawn tih hnu chuan kan inbiakna kan titawp zui ta nghal a.







Dofky-i chuan min rawn au a, ka bul a rawn thleng zui chawpchilh mai bawk a. "Tirawh...dâwr ah han kal lawk ang. Sir- ka dil vek tawh" thawveng zetin a rawn ti nghal phar phar a.






"Ummm...kal ila....ka peih zawng tak" tih pahin ka zui nghal chu a ni mai bawk a. Kan pahnih chuan kan inzui chho nghal hlawk hlawk a. "In inbia em?" tih pahin min melh rulh a.






"Be nang....engatinge?" tih pahin ka phone chu ka bih thuak a. Engmah thil danglam hmuh ka nei lo. "Engnge min zawh teh daih?" ka tinawn leh a. Engtinmah min chhân chuan loh avang chuan ka ner khum sak a.






Dawr kan thleng a, ṭhiani chuan a phone chu a hmet mawlh mawlh a. "Aw...hello..khawiahnge i awm a?" a ti nghal mawlh mawlh a. "E....a ṭhat hlauh chu" a tih hnu chuan phone chu a dah zui a. Pawisa a pe a, ngawi rengin kan chhuak zui leh nghal daih bawk a.







"Ding lawk ang" tih pahin a phone a phawrh a. Ngawi rengin ka lo en reng ringawt a. Mi hmuh tur a nei ngei ni chuan ka hre bawk a. "Dar 7- alo ri ve ṭep alawm" ati leh ringawt bawk a.






Rei kan la ding hman lo tihin kan bul lawkah Car-a rawn ding a, chu Car- chu ka hrechiang nghal viau mai. A khalhtu chu a rawn chhuak a, mak ti takin ka en reng a. Ṭhiannu Dofky-i chuan zâwi sap hian, "I phone ka hmansak che khan a number ka la ru anih kha" a rawn ti vat a. "Chhe e...." tih pahin ka ner khum sak a.







"Nangmahin engmah ti kaw thei heklo che" tih pahin min nghawk salh a. "Lo in chibai ve ila...Dofky" tih pahin a lo ban zui vat a. "Ka lawm e" ka rilru chuan ka lo ti ru vat bawk a. An inchibai lai chuan min rawn melh ralh a, engmah phei chu a sawi lova. A nui sak hmel erawh ka en ning thei lo hi a ni tawp.







"Ka lo zuk chhuk ange...hmundangah erawh kal lo ula" tih pahin ṭhiani chuan min melh tawn ralh ralh a, nui var var chung chuan min kalsan zui ta nghal a.







"I ṭha em?" tih pahin min rawn din hnaih zual sauh a. Ka lo bu nghat ringawt a, "I induh thiam si" a rawn tizui leh zat a.






"Engnge ka induh na?" tih pahin ka melh kar a. "Lokal rawh" tih pahin ka kutah a rawn chelh a, Car lam pan chuan min kai zui nghal a. Ngawi rengin ka zui ve nghal mai bawk a.







A Car-hnungah chuan kan ṭhu lut zui nghal a. Kan awmna lai hi hmun lûn luih luih lai a ni lo kher bawk a. Eng emaw zawng tak chuan a vanneih thlak viau bawk. Kan ṭhu lut chiah tihin min rawn kuah a, "Induh thiam te..." a ti sap a.







"Ka induhlo...i lakah hian ka induh hlei thei lo anih ber hi" ka ti sap a. Engmah dang kan sawi zui tawh lo. Kan inpawm nghet salh a, min thlahdul a, ka khabe ah a rawn vuan a. "Ka lal fanu hmelṭha...i duhawmna hian min bual â tawh anih hi..." tih pahin min rawn fawp zui ta vawng vawng a.







Kan duhthawh dun bawk a, kei pawhin ka thiam ang tawkin ka fawp let mawlh mawlh a. Kan inthlah chu kan thawdun halh halh a, ka hnute mûm khal âl chu a rawn vuan a. Engtinmah dan buai ka tum hran lo. Duhthawh zeta min fawh leh pahin ka hnute chu a ṭham zui nawk nawk a. Ka kawrchhan ringawtah chuan a kham khawp a hmulo thuai a, ka kawr chu a keu a. Ka hnute chu dâltu awm miah lovin a hmet a, a hmûr te chu a hmet hrual zui niap niap a.








Ka hmulthi ding ru seng seng chuan ka zauthau ruk zia chu min hrilh hre chiang hle bawk. Muangchangin Car hnung seat-ah chuan min bawhthlu riai riai a. Ka chungah chuan a rawn bawk phêk thlar a. Ka kawr chu a hlim chho zui a. Ka hnute chu duhthawh zetin a hrâwm nawk nawk a. A tawlh hniam zui a. Ka hnute chu a fawp zui mawlh mawlh a. Ka hnute hmûr a seh ner ner chu ka thaw halh a, ka kut pahnihin a sam chu ka ṭham a, ka tuai kual zui thuak thuak reng a.








A hma aiin a duhthawh a, ka kap lama min dotu chu ka hrethiam a, ka hai miah lo bawk. Ka hnute a fawh kual pahin a kut dinglam chuan ka mawng bawr a chul kual thuak thuak reng bawk a. A kap lamin min nawr leh salh ṭhin chuan min ti zauthau takzet bawk.







Ka er leh tân tân ṭhin a, ka malpui pahnih inkara a tlazep chuan min ti zauthau takzet. "Zual..." ka ti thâm chhalh a, engtinmah min chhâng lo na a. A chêt dan erawhin kawng engkimin chhânna min pe thung si.







"Duhtawk ang" tih pahin ka nem a. Ani erawhin tawp a tum lova, a hma ai mahin min sawp nasa mah zawkin ka hria. A kut dinglam chu a rawn che kual a, ka kap a rawn dap chu ka lo man chat a. Ani in theihtawpin min dap zui a tum a. Keiin ka tha tawpin ka dang bawk a.







"Khawngaihin....a tawk..." tih pahin ka nem zui ṭang ṭang a. "Ummmm....awle" tih hmak pahin a tho zui hmak a. Ka tho zui ve nghal a, ka insiam ṭha zui sat sat a. Ngawi rengin a ṭhu a, "I thinrim em ni?" tih pahin ka melh zauh a.






Engtinmah min chhang lova, a ngawi reng a. "Mawhh....i thinrim tiraw?" ka ti leh sap a. Bengngawng biak ang velin a la ngawi reng a. "Ka chhuk ange..." tih pahin ka chhuak zui nghal a. Rang takin a rawn chhuak ve nghal a. Ka kalna turah tak chuan dingin min melh kar a. "Khawngaihin la kal suh" a ti thâwp sat a.







"Ka zawhna pawh i chhân duh loh kha... biak tlak pawh nilo chu eng atan nge i tih?" tih pahin ka melh kal a.






"Min hrethiam rawh...ka tihpalh a ni" tih pahin min rawn kuah a tum a. Hawi kual zak zak pahin, "A hun tawh hrih lo. Khawlai anih hi" tih pahin ka lo dang nghal chat a.






"A ho lutuk...mi zawng zawngin min hmu rawh se" tih pahin min rawn din hnaih zual sauh a.






"A hun lo em mai...kal teh" tih pahin ka nem deuh na a, nghet takin min rawn kuah leh nghal a.






"Ka kal phawt ang aw? Kan inbe dawn nia" tih pahin ka kuah lai chu thlahlel tak chung siin ka thlah riai riai a. Min pawt hnai leh nghal vat a, ka chalah chuan a rawn fawp zeuh a. "Midang be tawh suh ang che" tih pahin a nui lui sak a.






A âwmah chuan ka chûm taih a, "Misual...i sual lutuk. Nangmah lo mipa dang biak ka neilo" ka ti hlak a.






"Ka va lawm..." tih pahin ka biangah a piai hlak a. "Kan inbe dawn nia...." a tih lai chuan lungawina mitmeng thlahdah zetin ka lo melh de ser a. "Anih phawt le.." ka tih hnu chuan ka kal a, ka kut chu a la vuan reng a, min thlah reih reih thung a. Ka lehhawi a, nuih sak pahin, "Haw nghal ang che...ka lo nghak ang che" ka ti sap a. Ka kalsan ta nge nge a.







Dofky-i ka hmuh rual rual chuan, "Ka ṭhian...engtin chiah nge i tih?" ka ti nghal sawk sawk a. A mutna bulah chuan ka inthawlh zui ve nghal a. "Khawi maw i phone rawn la teh" tih pahin pawhthlak sak ka tum a. Rang takin a lo thukru nghal hmak bawk a. Midang tih phâwklêk hlau zet siin kan nui dun ar ar a.






"Sir an rawn kal tawh em?" ka ti zui sa sa a. "Kal tawh e..." rang taka min chhân avangin ka hlauhthawn a zual sawt bawk a. "Engtinnge a tih?" ka ti nghal vat a.






"A hmu silo che a, keimah min zawt" tih pahin min melh zui ngheng a. "Chuan...?" ka lo ti vat a, ka ngaihtuahna a vak kual nghal zut zut bawk a.






"Ka dam ṭha lova, ka damdawi tur a lei lawk ka ti che" tih pahin a kiai sak a. Ka thaw deuh huai a, "Ka ṭhian...lal fel em em nu...ka lawm e" ka ti zung zung a.






Ka phone rawn ri ṭang ṭang chu ka bih vat a, ka nu ngei a ni e. "Aw..nu" ka ti vat a.



"Mami....Mami..." engmah dang sawilo chuan a rawn ṭap nghal hawm hawm a. Engmah chanchin chiangkuang hrelo mahila ka ṭap ve nghal chu a ni zui mai bawk a. "Nu....engnge? Sawi teh..." ka ti thei hram a.




Kan mutna room-a mu ve dang zawng zawng pawh an mutna aṭangin an rawn thochhuak vek tih pawh ka hria. Dofky-i chuan ka hnungah a rawn chûl nghal hliau hliau a.




"Mami..i pa hi..." a rawn ṭap zui leh hawm hawm a. Engmah dang ka sawi thei tawh bik lo. Ka pa chu a boral ni maiin ka hre ber a. Ka phone ken lai chu ka chelh khûr dar dar a. Rang takin Dofky-i chuan ka phone kenlai chu a rawn phihthla a, kan ṭhiante pawh an rawn kal hnai ṭak ṭak hlawm a.




"Nu Mawi...engnge ni ta? Dofky-ka nia" ka ṭhiannu chuan aw zângkhai vah in ka nu chu a hmachhawn nghal a. Ka nu rawn chhânna erawh ka hre tawh lova. Dofky-i ṭawngkamah erawh lawmna tur ka bengin a hre hauh si lo. "Aw...anih chu Nu Mawi...eng em inti lo turah ngai phawt ila. Kan Sir- pawh ka lo hrilh ange" ṭhiannu Dofky-i chu ka melh ralh a. Ka mittui kâr aṭangin ka tana mi ṭangkai, ka hmaa ding ngam reng ṭhin chu ka melh zui tlawk tlawk a.







Phone chu a dah a, min rawn melh ralh a. "Ka ṭhian...i pa a ṭha vak lova. Damdawiin lamah an tlanchho anih chu... Tunah tak chuan ngaihtuahawm lutuk a ni love. I aw a hriat khan i nu kha a rilru a no deuh bawk anih kha.." rawn tih nghal zung zung pahin min rawn kuah a, ka hnungah a bêng thak thak a.







Ka insût deuh hlap hlap reng a. Ka ṭhiante chuan an thiam ang tawkin min hnem laih laih reng bawk a. A ṭhenin kan hotute hrilh mai a, haw mai rawt pawl an awm bawk a. Ngaihdan ṭha tak tak, min ngaihtuah takzet tih hriat taka an han thawhkhawm ve liam liam mai chuan hnuk an tiulh zual zawk mah e.







Mahse, thutlukna felfai tak erawh kan siam thei hlawm meuh chuang lo. Ka phone rawn ri chu hlauhthawnna nen kan melh rual nghal ṭhap hlawm a. 'DUATA' a inti kuau ta mai si. Zah vanga khûk ral chem chem châkna in ka khat nghal bawk.






Ṭhiante ho chu an thûm deuh hak rêng a. Ka phone ri ṭang ṭang reng chu ngaihsak châk engang mahila ka awmdan a laklawh vel vek tawh. Mahse, a thinrim leh hle dawn tih ka hrechiang bawk si. "Min lo hrethiam lawk" tih pahin ka phone chu ka ban a, ka tho zui nghal a. Pawn lamah chuan ka chhuak zui nghal vat bawk a.






"Aw hello..." tih pahin ka inhru fai sat sat a.



"I va la har em em? I buai em ni?"



"Nia...ka nu in min rawn bia a, ka pa a ṭha vak lova"



"Anih chu maw le...i be leh duh em?"



"Aih...a ngai hrihlo. Kan inbe zo chauh alawm..." ka ti vat a. "I thleng tawh em?" ka ti zui zat a.



"Ka thleng fel a, ka rawn be nghal che"



"Anih chu..." ka ti ringawt a.



"I rilru a hah hmel sia....nakinah hun thawl deuh hlekah kan inbe zawk dawn em ni?" a rawn tidam thluam a.



"Nia...min lo hrethiam lawk mai rawh" ka ti ve vat a. Ka rilru diktak pawh a ni hrih tlat. Amah kha ka ning a, ka hne vang lam pawh a nilo. Tun boruak rit lutuk ah chuan inbiak hrih loh a ṭhat zawk ka rin vang a ni.







Kan riahna mut pindan ka luh rual chuan ka ṭhiante chuan an muthmun aṭangin min lo melh rual ṭhap a. An rilru a awm tur awm ang chu ka ngaihtuah kual nghal zung zung bawk.







Dofky-i chuan min rawn ṭhutpui vat a, rang takin ka hnungah a rawn chûl heuh heuh a.
"Ṭhiannu....lungngai reng reng suh. I pa chu engtinmah a awm miah lovang. Kan ṭawngṭai anga, Pathianin min chhâng em em ang" a rawn ti sar sar a. Ka ṭhiannu chu ka kuah thlawp a, ṭap lo turin ka inpet ruh ṭang ṭang bawk a.






"Zanin kan ngaichang anga, a ṭul chuan naktukah kan phei dawn nia" a rawn ti leh phei chu ṭah hawm hawm ka châk takzet.






Ka phone rawn ri chuan min tiphu zawk a, hlauthawnna nen ka melh nghal vat bawk a. Ka nu ngei a ni tih ka hriat rualin ka thinphu a su ri nghal dup dup bawk a. Ka awmdan chu ka ṭhiani chuan a hailo nasa mai. Rang takin ka kuta phone ri êng ṭang ṭang chu a rawn phihthla nghal vat a.






"Aw hello Nu Mawi..." a ti ngal vat a. "Awm e...ka lo chhâng zâwk anih hi..." a tihzui danah chuan ka nu chuan ka awmna chin a ngaihven nghal hle tih pawh ka hrethiam.




"E...aw...ava lawmawm ve aw...a ṭhat nasat chu..." Dofky-i chuan nui sen sen chungin min rawn melh a. Mahse, ka beng ngeiin a hriat loh miau avangin hlauhthawnna in ka khat tho si. Ṭhiani chuan min rawn melh ralh ralh pahin, "Anih chu... Ni e, naktuk zingah a hma lamin rawn phei pui ka tum dawn nia" a rawn tihzawm phei chu a hmaa hmel hlim taka min melh lai kha ka mitthla aṭangin an darh nghal vek nia.




"Awle...anih ule" Ṭhiannu Dofky-i ṭawng mawlh mawlh chu rilru mumal lo zetin ka en reng a. Phone-min pek pahin, "I pa chu a ṭha tawh lutuk. Tunah phei chuan thil te a ei peih anih chu" a rawn ti sap a. Thil ei leh mai thei a ṭha anih ka ring miah lova, ka ṭhiani chuan min thlamuan mai niin ka hria.







Min melh kal a, a hmela hlim nui sâng ṭhin kha ka ennawn ngial pawhin ka hmu zo tawh lo. "Ṭhiannu....i pa chuan a ngai em em che a. A lam reng che a, naktuk zingah haw phei mai a ṭha in ka hria a..." a rawn ti dul raih a.







Engtinmah ka chhâng lova, sawi mai tur lah ka hre hek lo. Ṭhiani lah chuan, "Lo awm lawk rawh. Sir-ka va hmu lawk ange" tih pahin a tho a, a chhuak zui nghal bawk a.







Kan thâwm leh boruak engkim hretu kan ṭhiante pawh an rawn dingkhâwm leh laih tawh a. "Lo va mu rawh u...kan ngaihtuahawm loh ania" ka lo ti vat hlawm a, ka pa chanchin chu ka hrilh nghal mawlh mawlh a. Mahse, tumah chuan min kal hlatsan hlawm chuang lo.







Sir Zirpuia leh Dofky-i rawn inzui lut chu kan lo melh deuh ṭhap a. Sir Zirpuia chuan min rawn melh ding ngar bawk a, a hmelah chuan min lainatna hmel ka hmu tel nghal a.






"Hlimi...a pawi ka ti hle mai. Engmah tih theih kan nei hrih bawk si lova. Engpawh nise, Pathian hnenah kan hlan anga. Ani in kawng min kawhhmuh zel ang" tih mawlh mawlh pahin ka bul lawkah chuan a rawn ṭhu zui nghal a.







Ka phone chu a rawn ri ṭang a, rang takin ka melh nghal vat a. 'Duata' message ka dawng tih ka hriat rual chuan ka hmet thim zui leh nghal a.







Sir Zirpuia bawk chuan, "Engpawh nise, zan a rei mai dawn a. Mu phawt ila, engpawh thleng se chanchin min rawn hrilh leh vat dawn nia. Naktuk zingah i pa chanchin a zirin i haw phei dan tur kan ngaihtuah dawn nia" a rawn tihzawm mawlh mawlh a.







Rang takin ka harsatna tawh laia ka bula awm reng ṭhin, ka ṭhiani ngei chuan, "Sir, haw phei ngai anih chuan keima'n ka zui phei ange" a rawn ti vat a.







Sir Zirpuia chuan min thlek tawn zak zak a.
"Engpawh nise...i mu phawt ang u. Hlimi pa chanchin erawh ngaichang tlâng reng hlawm ila..." tih pahin a tho ṭuah ṭuah a.







Ṭhiante pawhin an mutna lam an pan leh sang sang a. Keimahni vanga boruak uap churh an pal hlawm chu ka inthlahrung viau bawk.







Ka mutna ah rilru bet lo deuh chuan ka mu zui ve a. Dofky-i pawh a thawveng lo tih hriat zetin a mu meng ngawi kur a. A khât tawkin min rawn melh leh zuk ṭhin bawk a. Ka phone chu ka hmet hawng a, ka message dawn chu ka en nghal thuai a.







"Engnge in chanchin duat? Min rawn hrilh ve zel la aw?" tih min rawn thawn ka hmuh chuan ka thaw deuh huai a. Min ngaihtuah ve hle anih pawh ka ring viau bawk. "Nia...kan buai ta nek nek a, ka rawn chhâng hman lawk lo che a...sorry lutuk aw?" tih thu ka thawn rual chuan ka mu ṭha sat sat a.







A hmu rang kher mai, a thu rawn thawn tur a chhu mek tih ka hmuh rual chuan nghakhlel zetin ka nghak ngar reng a.





"Engnge i pa chanchin?"


"A zia ve deuh e"


"Ava lawmawm ve aw...rilru ah in awm reng a?"


"Tak tak maw? Ka va lawm tak...min lo ngaihtuah ve a..."


"Nang lo ngaihtuah ka nei hlei nem..."


"Ka lawm e"



"In buai ka ring sia..ka rawn Call- hreh deuh bawk che sia..."



"Anih chu..." a hmuh rual rualin, "Naktukah haw phei ka tum a..." tih chu ka thawn zui leh nghal a.



"Eng hunah?"



"Ka hrelo...ka pa chanchin ka ngaichang reng bawk a...zing Sumo ah pawh a ni thut mai thei"



"Anih chu...ka hruai i duh em?"




Ka phu deuh dawrhin ka hria. A message hnuhnung ber chu ka ennawn leh ṭhin. Ka chhungrilah chuan hlim rûkna in min tuam mep mep ni mai hian ka hria.



"I duh vak nange? I thu thu le" tih a rawn thawn nawn hialna tur khawpin chu a thu rawn sawi chuan min ti hawihai rei a ni ber e.



"Aaaa...ka tibuai lutuk ang che"



"Min tihbuai loh alawm ka hlauh..."



"Ka hrethiamlo e a"



"Rawn sawichiang vat la aw?"



"Min ti lâi..." ka ti ta ringawt a. Ni e, min ngaihsakna a lantirna ringawt pawh ka hlimpui em em ringawt tawh a. A tak ngei anih phei chuan ka hlimna a zual viau ang le?



"Anih ka thlah phei che chu i duh em?"


"I ti tak tak em ni?"


"Aw"





"Ṭhiannu....ṭhiannu..." ka ti nghal vat a. Dofky-i chuan hlauhthawnna mitmeng nen min rawn melh nghal vat bawk a. "Ka va'n lawm...." ka tihlai pawhin ṭhiani chuan a mitmeng chuan thil awmzia min lo zawt char char bawk a.



"Dar 6 velah ka rawn phei ang. Min lo nghak ang che. Ka insiam nghal ange..ka dah aw?" a rawn ti leh nghal zung zung a.



"Aw...awle....awle" tih pahin phone chu ka dah a. Rang takin Dofky-i chu ka bawhphei zui nghal ruak a. "Ṭhiannu...min thlah phei dawn" ka ti nghal a.






Mak ti hmel a la pu mah zawkin ka hria. "Amah khan maw?" a la ti he haw a. "Aw...amah Lalfakzuala khan..." ka ti zui ve ngat a. "Ṭhiannu...ka lawmpui che" min ti sap pawh chu a thinlung zawng zawngin a sawi ang tih pawh ka hria. Ka nu message rawn thleng chu ka bih nghal vat a.







"Mami...naktukah chuan rawn haw phei mai ta che. I pa hi a ṭha lutuk lova" Ka nu message ka chhiarzo chu ka nghilh duk in ka hria. Ka hlimna tem zuai te kha an bo nghal duak a. Ka ṭhutna ah chuan ka ṭhu ngawi reng a. Message rawn ri leh ṭang pawh chu ka ngaihven lawk lo.








Dofky-i chuan ka awmdanah thil diklo a awm tih pawh a hrechiang viau a, min rawn hnaih zui vat a, min chûl heuh heuh a.






"Mami...i pa hian a lam reng che ania" tih message ka chhiarzo chu a hma aiin ka hrehawm tawh zawk. Ka bîng chûk chûk a, ka taksa te chu âwn ruai ruai hian ka hria.







Ka kal dawna min ngaihzia te, kan harsatna hmulo der tlata ka biak ṭhat peih loh lai te chu ka mitthla ah a rawn in tlar zut zut a. Ka pa in min biak a châk em em laia ka hêl ṭang ṭang dan te ka ngaihtuah let phei chuan ka inhaw thar ngawih ngawih bawk.







"Ka nu...naktuk zingah ka rawn haw ang. Ka pa chuan min lo nghak ṭang ṭang rawh se. Thil hrilh tur ka ngah lutuk" tih thu ka chhut mawlh mawlh lai pawhin ka biangah mittui a rawn luang ngiai ngiai a.



"Mami...muthilh tum rawh. Hei, i pa pawh a mutui hrih viau e"



"Ka nu, tak tak em ni? Ka pa chu a mutui tak tak maw?"



"Aw, rawn ngaihtuah hah reng reng suh. A mutui hrih khawp mai"



"A ṭhat chu..keipawh muthilh ka tum ange"



"Awle..kan lo thlir reng ang che. Mami...muttui aw?"



"Awle nu.." ka thawn zawh rual chuan ka phone chu ka hmet thim zui hmak a.







"Ṭhiannu...ka va mu dawn ange. Thawh ka hai palh ang" tih pahin ka tho zui nghal a. Dofky-i erawh thil ngaihtuah thui hmel takin a bu deuh nghat nghat ringawt a.







"Pa....min ngaidam rawh...ka tihpalh takzet a ni. Min ngaih tehreng nen a tiraw?" tih rilru mawlh mawlh pah chuan ka mu ṭha sat sat a. Ka mitthla ah kan kal dawn lai te, ka pa in thlahlel taka ka kut a chelh vawng vawng lai te chu a rawn lang zut zut a.





(to be continue.......)


Show post links
Top

[Ngaia]

THUTIAM
Chap~5



By : Tom Tom Putara





Zing dar 7 a ri ṭep, a rawn la thleng silo. Sir Zirpuia leh ṭhiannu Dofky-i nen kan lo ding rân tawh a. Ka phone ka phawrh a, rei fê a rîk hnu pawhin a la thei chuang lo. A reh hian a reh tlawk tlawk mai si.







Sir Zirpuia chuan, "I unaupa chu Call-a la thei nange? A va rawn muang ve maw le aw?" a rawn ti sup a. Ṭhiani nen chuan kan inmelh leh ralh ringawt ṭhin a. Ka dinna chu ṭum deuh dat dat châk khawpin ka in sehruh rilru tawh bawk.








"Nia...a la thei miahlo" tih lêt sap pahin ka phone chu ka beng bulah ka chuktuah leh nghal rân a. Engmah chhânna ka la dawng chuang lo.








"Engvangin nge min bum a? Min tih zah zia hi..." ti rilru neuh neuh chung chuan ka insehruh fan fan tawh a ni ber e.







Kan lam pana Car- rawn tlan phei pakhat chuan ka mit a la rang kher mai a. A rawn tlan hnai zel a, a chhunga chuang pawh ka hmuchiang thei ta viau e. Ka thaw deuh huai in ka inhria.








A rawn chhuk a, nui sak chungin kan pathum chuan min melhkual hrak a. "Petrol ka rawn la kual a, duh aiin ka rawn tlai" tih pahin min rawn pan hnai a. A mitmeng fim fiah kâka min rawn melh rân pahin, "Kan kal nghal mai dawn em ni?" a rawn tizui zat a.








Rang takin Dofky-i chuan, "Nia...kal rawh u. In tlai lutuk ange" a rawn ti nghal vat a. Sir Zirpuia erawh a lo bu nghat thung a. Rinhlelhna mitmeng thlahdah zetin min melhtawn ralh ralh bawk.








"Anih...kal ang hmiang" tih pahin ka Bag chu a khai zui nghal a. Motor lam pan chuan min kalsan zui ta nghal a. "Anih..kan kal ange" tih sap pahin ka zui nghal a.







Ka ṭhu lut fel a, "Anih Sir, kan kal aw?" tih pahin ka nui lui var var a. Sir Zirpuia chuan min melh ngar reng a. Ka bula ṭhu, tlangval tuai tir, lian ṭha thelhthawlh leh mitmeng fiah fel kâk chu ka unaupa anih a ring hlawl lo ni berin ka hria. "Kal rawh u, chanchin kan inhrilh zel dawn nia. I pa pawh lo dam thuai rawh se" a rawn ti zui ve ta tho a.







Car- a tinung a, a tawlhchhuak zui nghal a. Ka ṭhiannu leh Sir Zirpuia chuan min vai lauh lauh a. Ka thaw deuh huaiin ka hre nghe nghe. Engtin tak ka ṭhiannu chuan zawhna dawng hnem ang maw? Sir Zirpuia khan a zawt chîk leh hle dawn tih ka hrechiang viau bawk.







"Engnge i ngaihtuah vung vung a?" a rawn ti hluk a.






"Engmah ngaihtuah love...ka thin ila tirim?" tih pahin ka melh râm râm a.






A ngaihna hrelo zetin min melh ralh a, a nui deuh sak bawk a. "Engnge thinrimna tur thil awm a?" a ti deuh hâ a.







"Engnge Call-i lak duh miah lova?" ka tih rual rual chuan a in dap nghal that that a. "Khaiiii....ka phone ka theihnghilh chiang mai" tih pahin a chek tlak tlak a. A sana bun chu a bih zauh bawk a. "Let leh lawk mai ang aw? Ava ho e aw...hmanhmawh tawh nen..." a ti zui niah niah a.







Engmah sawilo chuan ka ngawi reng a, let kan ngai a ni tih pawh ka hrechiang ve tho bawk a. Side glass ah hnunglam a thlêk zak zak a, a inherkual zui pawp a. Kan kal tawhna lamah chuan kan let zui leh vang vang a.








Engmah kan sawi lova, ngawi rengin kan tlan mawp mawp hi a ni ber. An In bul ni ngeiah chuan a ding chat a. "Khu ti lai khu kan In chu ania. I lo lut ve duh em? In kan sa a, kan la zo lo deuh a. Hemi hnuaiah hian kan awm hrih a..." tih mawlh mawlh pahin kan dinna bul lawka In lianpui hnuailam chu a kâwk va a.








Ka lu ka thing ringawt a, ani pawh chu ngawi rengin a chhuk zui a. Hmanhmawh deuhin a rawn tlân lêt hlawk hlawk a. Car chhungah a rawn ṭhu lut nghal a, a phone chu a en pah reng bawk a. Nuih sak pahin, "Rawn phone i va tum nasa ve aw? Ka tihpalh a ni..min lo hrethiam dawn nia aw? A zialo hle mai" a ti mawlh mawlh a. Motor a tihnun pah chuan min melh ralh a, ka chhânna a phût tih pawh ka hrethiam. Ka bu deuh nghat nghat a.






Ka phone a rawn ri a, rang takin ka dap nghal that that a. "Aw...nu" ka ti nghal vat a. "Mami...in rawn phei ta em?" zâwi tê, fiah kâk si in a rawn ti nghal vat a. Ka chhân hma in ka nu bawk chuan, "Mami...kan ṭha vak lo ania" a rawn tihzawm leh zat a.






"Nu, kan rawn phei.... Tunah ka pa chu engnge a an?" hlauthawng ru zetin ka ti nghal mawlh mawlh a. Ka nu chu a insût ri hraih tih chu ka hria. Mahse, a aw a thian kharh a, "Mami...rawn thleng thuai ula ka ti mange" a rawn tihzawm leh a.






"Nu...kan rawn hmanhmawh dawn nia.." ka ti ringawt a. Engmah sawi zawm tur ka hre tawh lo. Phone chu kan dah a, "Engnge chanchin?" rang taka min lo zawhna pawh chu ka chhâng nghal mai thei lo. Pâwnlam hawi chuan ka ṭhu ngawi reng a.






"I pa chu a ṭha lo zual em ni?" a rawn tihzawm takah chuan ka ṭhu ṭha sat sat a. Kan hmalam en ngar chung chuan, "Aw....ka nu ania. Ka pa ṭhat loh thu a rawn sawi..." ka ti zâwi sap a. "Anih chu...a zia lo mange" tih pahin a tlan chak zual sauh bawk a.







Kawngah kan chawl khawmuang lutuk lem lo bawk a, kan tlân sâwt viau bawk. Chaw pawh kan ei lova, thingpui kan in zawk tih loh chu kan tlan par par a ni ber e.







Lunglei kan thleng hnai tawh tihah ka phone a rawn ri leh a, hlauhthawnna in ka khat a ni ber. Ka chhungril a khûr hlawk hlawk a, ka tha a ṭhum zo ni mai hian ka hria. "Khawi...keima'n ka lo chhâng ange" tih pahin a kut a rawn lekchhuak nghal a. Keipawhin ngawi rengin ka pe ve mai bawk a.






"Aw...hello..." tih pahin a tlan chak ngai reng chuan a tlan par par reng a. An thusawi hre châk leh hlauthawng zetin ka en khiau reng bawk a. "E..a ṭhianpa Fakzuala ka ni e" a tih mawlh mawlh pah chuan min rawn melh a, a nui lui sak bawk a. "Anih chu maw le...kan rawn thleng har lovang" a ti leh mawlh mawlh a. Phone chu a dah a, min rawn pe zui nghal zat a.







Engmah a sawi lova...a ngawi ngal a. Ka en reng tih pawh a hrechiang viau ang. Mahse, an inbiakna chungchang chu pakhatmah a a sawichhuak lova. A hmelah erawh thil tam tak ka hmu thungin ka hria. Ngawi rengin a hma aia chakin a khalh mawp mawp a.







Ka phone a rawn ri leh a, ka la chiah tihin Signal a bo zui nghal hmak a. Hlauhthawnna in min nang a ni ber e. Thui vaklo kan tlan leh hnu chuan ka phone rawn ri leh chu kan ngaihven ru dun hle tih pawh ka hria.







"Aw...Nu..." ka tih rualin ṭap hawm hawm in min rawn chhâng zui nghal a. "Mami...pa i nei tawh lo.... Mami....i pa in a nghak thleng zo lo che" ka nu ṭap ri hawm hawm chu ka ngaithla kar reng a. Engmah sawi tur ka hrelo, ka biangah mittui a luang zawih zawih a. "Ka nu...." tih chiah ka sawi thei. "Mami...i pa hian a ngai lutuk che asin. A lo nghak ngar ngar che asin" a rawn tih zawm leh a, ka ṭap chhuak ta hawk a. "Pa...ka phal lo... Pa...min ngaidam rawh aw?"







"Din khawmuan lawk i duh em?" ka bula tlangval ṭhu chu a hawihai takzet tih pawh ka hria. Ka lu ka thing ringawt a. "Mami....duhtawk phawt ang" a rawn tih rual chuan ka phone chu ka dahthla riai riai a. "Zuala...ka pa chu a kal tawh" ka ti sap a. A lo bu nghat tih erawh ka hria a, engtinmah min sawi zui pui lova, ṭawngkam khat mah a chhâk chhuak hek lo.







Lunglei khawpui kan tlan lut a, engkim chu a chul ruih ni mai hian ka hria a. Ka mit in a hmuh apiang mai chuan, 'Nangmah ngai em em tu...i pa in a kalsan tawh che' min lo ti vek ni mai hian ka hria.







"I chhungte ka lo be lawk dawn em ni? I nu nilo kha han ti lawk teh. Ka lo be lawk ange" Zuala chuan fiah zâwi sap hian a rawn ti a. Rang takin ka phone chu ka hmet mawlh mawlh a. Ka enkual ngial pawhin va biak mai tur ka hre mai lo. "Lawk aw.." ka ti ringawt a. Ka hnâr a ping deuh bûr ni mai hian ka hre bawk a. Ka hnâr ṭawng deuh tih pawh ka hai bik hek lo.







Pa Rinpuia number zawnah chuan ka ding chat a, ka hmet zui ta nghal a. "Kha aw.. Pa Rinpuia" tih pahin ka phone chu ka pe phei zui nghal a.







"Aw hello.... Pa Rinpui..." a ti nghal sap a. "Hlimi ṭhianpa Fakzuala ka ni e" a ti zui zat a. "Aw...aw...aw.." tih pahin a bu nghat nghat a. "E....a ṭhat nasat chu..." tih pahin min rawn melh zawk a. "Awle...anih aw?" tih pahin phone chu min rawn pe zui leh a. A aw a thian kharh a, "In lamah kan chhuk thei anih chu...an chhuk chiah..." tih pahin min rawn melh leh zawk a.






Ka va han huphurh tak em... Ka pa, hlim taka min lo chhâwn ṭhin tu ngei khan ngawi rengin min lo hmuak dawn chu a ni si a. Min ngai em em rengtu khan min ngaih thu a sawi leh tawh ngai lovang maw? Min ngaih em em laia ka kalsan ngei khan min ngai tak chungin Khawvel a chhuahsan maw? "Ka pa...ka pa...min lo nghak thleng ta che" ti rilru mawlh mawlh chungin Khum-chunga ka pa min lo hmuah dan tur chuan ka mitthla ram a luah vawng vawng a. Ka biangah mittui a sûr zung zung a.






Kan In awmna a hriat miau loh avangin ka hrilh phei zel bawk a. Kan thleng dawn ta, ka chhungril a khûr hlawk hlawk a. Ka thin a phu rawn tluk tluk bawk a.







Motor aṭanga ka chhuk tur chu ka kutah a rawn chelh a. "Puitling takin awm rawh aw? I bulah ka awm reng dawn a, ka kalsan dawn hauh lo che ania" a ti sap a, a kut chu ka hmer vawng vawng a. "Kal rawh le...i nu in a lo nghakhlel tawh takzet che ania, i thlamuan a mamawh" a rawn ti zui leh a.







Kan In bul vela pungkhawm ho chuan min lo en deuh ṭhap tih pawh ka hria. Pa Rinpuia chuan rang takin min rawn pan a, Zuala rawn chhuak mek chu chibai a lo bûk mawlh mawlh a. Muangchangin ka chhuk a, ka ke pên a sak em em bawk a. In sût hlap hlap chungin kan In, thihna in thla a zâr mekna chu kan pan thla hnak hnak a.







Min lo ṭah hawm hawm hlawm a, In chhûng ka rap lut chu ka insûm thei tawh lo. "Ka pa....ka pa...." tih pahin Khum chunga pa khawngaihthlak lo mu bal chu ka pan ding nghal a. Ka nu chu a lo ding vat a, rang takin min lo kuah vat a. "Mami pa... Mami a rawn thleng tawh. I ngaih em em i fanu a rawn thleng tawh ania..." tih pahin a kûn hniam a, ka pa chu a bawh a, a biangah chuan a chûl hliau hliau a.






"Ka pa...ka pa...min lo nghak ta che" tih pahin ka kuah thlawp a. "Ka pa...min ngaidam rawh aw? Ka pa...ka pa...a pawi ka ti lutuk...." tih pahin a biang vawt thler chu ka chûl ve nghal heuh heuh a.






"Hlimi pa.... Hlimi pa...i fanu a rawn thlen tawh hi..." ka bula rawn ṭap hawm hawm chu kan chhungkaw tana awm reng, kan mangan leh lungngaih pawha min kalsan ngailo, Pa Rinpuia nupui, Nu Mangheti a ni tih pawh ka hai lo.






"Ka pa...ka pa..." ka ti mawlh mawlh reng a. Mahse, chhânna reng reng ka tawng tawh silo. "Bawihi...ka ngai thei lutuk che a, lokal teh..ka bulah hian rawn ṭhu teh" a tih lai te chu ka bengah a rawn ri nawn awn awn bawk a. "Pa....min ngai a ni lawm ni? Ka lo thlen tawh hi..." ka ti leh mawlh mawlh a. Ka nu leh Nu Mangheti ṭap ri hawm hawm ri bâk chhânna ka dawng silo.







Ṭhutna kan rem fel deuh chiah tihin Pa Rinpuia leh Zuala rawn inzui lut chu ka hmu nghal a, ka lo melh ralh bawk a. Pa Rinpuia chuan ka pa bul a rawn hruai thleng a. "Hetah hian i duh leh ṭhu ve rih la..." a tih lai chuan muangchangin ka pa chu a rawn pan hnai a, ka pa chalah chuan a khawih zeuh a.







Rang takin ka lo insiam rem sat sat a, "Rawn ṭhu ve la...?" ka lo ti sap a. Ka nu chuan a lo thlêk vang vang a, min rawn melh leh ralh a. "Mami...hei hi em ni i ṭhianpa chu?" a rawn ti sap a. Ka lo bûk nghat hnu chuan, "Ka lawm lutuk aw? Ka fanu min rawn thlah thlen sak avangin ka lawm takzet" tih pahin a kut a lek chhuak nghal vat a. Zuala chuan a lo chelh vat bawk a, "Kan theihtawp chuan kan rawn hmanhmawh ve asin maw le...a pawi ka ti khawp mai" inthiam loh hmel takin a lo ti lêt vat a.







Ka nu chuan, "Rawn ṭhu ve rawh...." a lo tih zawm daih thung a. Inthlahrung deuh chungin a rawn ṭhu zui ve mai bawk a. Pa Rinpuia chuan, "I hahchawlh duh tak leh kan In lamah pawh a hahchawlh theih dawn tho ania" Zuala beng bulah chuan a rawn ti sa sa a. Zuala chu a lo bu deuh nghat nghat a, Pa Rinpuia chu a kal chhuak zui ta nghal a.







Kan Inchhung chuan PA a mamawh zia chu ka hrechiang nghal em em bawk a. Damlo, mutna Khum a mu mai chauh mah nise ka pa khan Inchhung a lo uap em em tih pawh kan boruak tawn mek chuan min hrilhfiah chiang hle bawk. Ka nu lakah pawh ka inthlahrung ru ngawih ngawih a, ka awmdan khan min ti zak ngawih ngawih bawk. Mahse, inchhîr a sâwt tawh silo.







Ka chhungrilah lungchhiatna, hrehawmna leh tâwt up up na in bu khuar thûk viau mah se ṭah hawm hawm châkna ka nei hlei thei miah lova. Ka hul hak ni mai hian ka inhre bawk a. Ka bula ṭhu chuan engtin emaw riau hian min khar tlat ni maiin ka hre ta deuh ber. Ka nu te ho erawh an ṭap râwih râwih reng a. Ka mittui sûr zung zung erawh ka thup sêng bik lo.







Zuala tan chuan a hrehawm em em dawn tih pawh ka hai hek lo. Ka mittui ka hru hul a, "Zual...i duh leh lo va chawl hahdam daih la...i chau awm sia" ka ti sa sa a. A thaw deuh halh a, "Ka zun te a chhuak deuh a. Ka lo va ṭhu chhuak ange aw?" a rawn ti vat a. Ka lo bu deuh nghat a, min chhuahsan zui ta nghal a.







Engkim mai chu ka pa kan thlahna, a puala hun kan hman hnuhnung a chang chho zel chu a ni si a. Ka ṭhiante ho pawhin min rawn ngaihven hlawm hle a, School-lama kan zirtirtu leh ṭhiante hmel pawh an rawn lang ṭak ṭak a. Aizawl lama ka kalsan tak ka ṭhiante pawhin tawrhpuina min rawn thawn chamchi hlawm bawk a. Hun harsa takah ṭhiante tawrhpuina ka dawng mawlh mawlh a. Ka tan hian an va hlu hlawm tehreng em..






Ka pa tana hunserh a zova, engkim chu a tawpna a ni vek chuan min ti hrehawm zual hle bawk. Ka pa tana uluk taka an siam, Kuang rawn zawnluh anih aṭang phei chuan min ngai a, min thlahlel em em tu ka pa chu kan hmu rei thei tawh dawn lo tih pawh ka hria.






Ka pa chuan kumkhuaa a mut hlenna tur hmun chu a luah ta!! Ka nu chuan kûn in a chûl heuh heuh a..."Ka va ngai dawn che em... kan nufa maiin engtinnge kan awm ang? Engtikahmah kan in kalsan lovang kan tih kha....ka va ngai dawn che em..." ka nu chuan a ṭah râwih râwih a.






"Ka pa....min ngaidam rawh aw? Ka tihpalh lutuk...ka pa...khawngaih takin min ngaidam rawh... Ka pa...vawikhat chiah min ngaihdam thu hria ila..." ka ti ve mawlh mawlh a.






Kumkhuaa hmuh tawh ngai loh turin an khâr ta! Ka nu chuan min kuah a, a ṭap râwih râwih reng a. Ka ṭah a chhuak lova, ka chhungril erawh a na ngawih ngawih. Ka indem in ka inhaw ngawih ngawih a. Ka inten ngawih ngawih bawk. "Ka pa...i fanu, i ngaih em em hi min ngaidam rawh. Ka pa...ka tihpalh takzet...." ka ti rilru mawlh mawlh reng a.







"Hlimi pa...min kalsan suh. Min chhuahsan suh. I tel lo te chuan kan In hi a ruak lutuk dawn asin" ka nu chuan min kuah reng chungin ka pa an chhuahpui mek chu a au lawm lawm a.







Min hmangaih em em a min thlahlel em em tu ka pa zâlna tur Thlan khur chu ka en ngawih ngawih a. "Ka pa...helai hmunah hian min awmsan tawh ang maw? Helai hmunah hian min riahbosan tawh ang maw? Ka pa....kan va ngai dawn che em..." ka ti rilru mawlh mawlh a. Ka bianga mittui luang ngiai ngiai chu ka dang zo lo.







Ka pa chu an thlak thla ta riai riai a, ka nu chuan min rawn kuah a, "Mami...i pa a kal tak tak ta... Mami pa...kan va ngai dawn che em..." a ti tlawk tlawk a. "Ka pa...pa...pa... min ngaidam rawh aw? Ka pa...vawikhat chiah min chhâng rawh" ka tih ri chu ka bul hnai lawka awm te bâkin an hre lovang. Mahse, ka thinlung chhûngril ah erawh a ring em em thung si.







Min hmangaih em em tu, min ngai a min thlahlel ngawih ngawihtu ka pa chu kumkhuaa hmu leh tawh ngailo turin kan thlahliam ta! Ka hawi let a, "Ka pa...mangṭha aw? Ka ngai dawn lutuk che" ka ti sap a. Ka nu chu a la inhru thla fap fap reng a.







Zuala chu ka rilru ah rawn lang zawk a, ka hawikual deuh na a, ka hmu bawk silo. A pu te In lamah chawl hahdam turin a kal anih ka ring rilru ta ringawt a.






In lamah erawh kan khawhar hlau in ṭhenawm khaw vêng te an rawn lut âwl lova. An rawn lên chhan ang takin kan khawhar tur an hnem takzet bawk. Zuala hmel ka hmulo erawh ka khawhar ru viau thung.







"Mami...i ṭhianpa hmel kha ka zawng deuh a. Ka hmu mai lova, lawmthu hrilh mumal na hun pawh a awm lova.." hawikual ralh ralh chunga ka nu min rawn biakna thu chuan ka 'Duata' chu min zawn zauh tir zual sauh a.







Ka phone chu ka phawrh a, Whatsapp ah ka lut vat a. Message a rawn lut zut zut a, ka pa boral min tawrhpuina thumawi leh hlu tak tak hlir a ni mai e. 'Duata message' lo awm ve vâng chu ka hawng zui nghal thuai a.






"Ka pu te In lamah ka phei lawk aw? Ka rawn phei leh thuai ang" tih alo dah vâng a. Nuih sak pah chuan, "I duh leh awm hahchawl rawh" tih zawng chu ka thawn let ve leh nghal a.







Dofky-i pawhin a rawn call-ve chiah e. "Aw hello....ṭhiannu" ka ti nghal vat a. A rûk tak chuan ka lungchhe viau a. Mahse, zângkhai taka biak erawh ka tum fan thung.


"Ṭhiannu...a pawi ka ti"


"Nia...tih theih kan ni silo anih hi"


"I bula awm a, hnem che ka châk ber...ṭhiannu....a pawi ka ti lutuk" a rawn ti leh mawlh mawlh a. Kei ai mahin a rawn lungchhia tih pawh ka hailo. Mahse, ka insûm tluk zetin a insûm nasa ve hle tho in ka hria.


"Ṭhiannu...engnge vawiin lam in an?" boruak dang vawrhluh tum chuan thudangah ka pakai pui nghal zat a.



"Mumal pawhin ka hrelo...khalam bak ka rilru ah a awm lo" a rawn ti leh ṭâlh tho a.



"In rawn haw veleh kan pahnihin kan ṭap vak vak dawn nia" tih pahin ka tho a, mi awm lohna lam deuh pan chuan ka kal zui nghal a.



"Ṭhiannu....a pawi ka ti takzet a ni. I nu pawh ka lainat lutuk" a rawn tih leh zel takah chuan ka insûm hlei thei tawh lo. Chhâng lêt turin ka hnuk a no ru tlat tawh. Ka hmui a phu der der a, ka pa damlo, chau zet chunga min thlakhlelh zia lantir hram hram tu chu ka mitthla ah a rawn inlâr zut zut a, ka ṭap hawm hawm châk ta ber mai.



Mahse, bul rawn ṭantu ka ṭhiannu Dofky-i ngei chuan a mizia a rawn phawrh zui leh zat a. "Ṭhiannu....lungngai suh. Ka pa boral laiin i awmbo ve daih dawn nia" a rawn ti zui leh zat a, a nui deuh hak hak bawk a.



Mittui tla pûr, nuihza deuh bawk si chuan, "Ummm...ka awmbo chiang khawp ang. Nangmahin ka kalsan ve ang che" ka ti ve leh chu kan nui dun ta hak hak a.







"Mami... Mami..." ka nu min rawn pan phei chu ka lo en vat a. Ka mittui ka hru hul nghal mawlh mawlh bawk a. "I ṭhianpa a rawn thleng ania" a rawn tih pahin chiang zetin min en a. Lainatna mitmeng min hnutchhiah nghal vat bawk.






"Aw...ka lokal nghal ang" ka tih rualin ka nu chu a lêt leh vat a. "Ṭhiannu...duhtawk phawt ang. Ka 'Duata' a rawn thleng" ka ti zui zat a. "Aw le...lo duat viau rawh. I tan a inpêk zawh em kha..." a rawn ti zung zung a.







Kan inbiakna kan tihtawp rualin hmanhmawh zetin ka phei zui leh a. Min lainattu nu leh pa leh kum upa lam ho chu an lu ṭhu deuh ṭhap tawh a. Ka nu bul lawka ṭhu chu ka melh ralh a, ani erawhin a phone a hmet mawlh mawlh thung a.







"I rawn phei leh duh kher a? In lamah awm hahdam daih tur che ania" tih mawlh mawlh pahin a bulah chuan ṭhuthmun ka rem zui ve nghal vat a.






Min lo en a, a nui suk ringawt a. "Chaw te in ei thei maw?" tih zauh pahin min melh nawn leh ralh a.






"Aw...ṭhenawmte hian min kêp vek a. Kan ei ṭeuh mai. Nang i puar maw?" ka ti ve vat a.







"Ka puar khawp mai" tih pahin a phone chu a ak ṭha sat sat a.







"Nu...Fakzuala anih hi. Zuala tiin ko mai rawh u" tih pahin ka nu te chu ka melh ralh ralh a. Ka nu leh a bula ṭhu, kan ṭhenawm nu ho chuan min en deuh ṭhap a. Zuala pawh chuan an mit a la tlâng hle tih pawh ka hmuh hmaih lo.







Rang takin ka nu chuan, "Hei Mami hi a rawn tlanpui vang vang a. Kan nufa hian kan lawm teh mai ania" a bula ṭhu Nu Masangi te ho chu a hrilh hre zung zung a.







Ka nu bawk chuan, "Zuala, kan lawm takzet ania. Vawiin khan han inchibai mai loh kha chu hun kha a awm ta lo lutuk a. I lo in chibai nawn teh ang" a lo ti leh vat a. Ka nu ṭhiante pawhin, "I va han fel ve aw...amah maiin rawn haw sela a khawhar dawn tehreng nen..." an lo ti ve sap sap a, an chibai dan dan hlawm bawk a.







"Duh angin kan rawn thleng hma thei lova, a pawi ka ti khawp mai" a tih lai chuan chiang zetin kan lo melh ṭhap hlawm a. A zak ru viau ang tih pawh ka hrethiam nghal mai.







Nu leh pa an ṭil hret hret a, nula leh tlangval an rawn inzui lut sap sap hlawm a. Kan khawharna hnem turin an inpeih viau hlawm tih pawh ka hria, an chungah ka lawm em em bawk a. Nula lam erawh ka bul lawka ṭhu chuan an mit a la hneh hle tih pawh ka hai lo.







In lêng nula leh tlangval an ṭin a. Zuala pawhin a pu te In lam panin min hawsan ve leh tawh a. Kan nufa in kan huphurh rûk em em ka pa tel lova kan zan mut hun hmasa ber chu kan thleng ta!! Kan khawhar hlau a tlangval rawn riak te pawhin chu zan khawhar inṭanna chu an dang zo lo a ni ber e.






Zanlai dar 12 a pel a, thawm a reh tlawk tlawk a. Ka mutna ah chuan ka mu meng kar reng a. Thâwm dîm taka ṭap ri hlap hlap chuan ka beng a verh nghal zar a. Ka beng a luh nghal zak a.







"Mami pa....ka va ngai che em...i fanu pawh i kuah hman lo ania...i kal hma hret a ni" ka nu aw chu a ring lo na a, ka beng ri hriatna in a hriat zingah a ring ber a ni hial thung ang. Ka in nem kâng a, ka ngaithla chiang leh zual a..







"Mami pa....i tel lovin engtinnge kan nufa ngawtin kan awm ang? Mami pa...min lainat ve lo em ni" a ti râih râih te chu ka hrechiang em em mai si. Ka biangah mittui a rawn luang ngiai ngiai a, "Ka pa...min han en teh. Ka nu hi hnem ngaihna ka hre silo. Ka pa....ka pa...kan ngai lutuk che. Ka pa...min ngaidam hram rawh aw?" ka rilru chuan ka ti mawlh mawlh a. In chhûng thim riai hnuaih chuan ka hawikual a, ka pa mutna chu ka en a, ka nu ngei chuan a hmaa a kuah ang thovin ka pa mutna ruak hiai chu a kuah a, a insût hlap hlap reng a.







Thâwm dîm zetin ka pan phei chhat chhat a. Ka nu mutna bulah chuan ka ding khawng reng a, ka nu lu chu dawm a, ka nu chu pawm vawng vawng ka châk takzet. Mahse, ka chhûngrila ka inthiam lohna chuan min hmet khawng tlat si. Ka nu chuan a bul lawkah, a hnung maiah ka ding tih a hre dêr silo.







"Mami pa.... Mami pa....ka ngai lutuk che. I tel lovin engtia awm turin nge min ngaih a?Ka va ngai tak che em..." tih vawng vawng pahin ka pa mutna ruak hiai chu a chûl heuh heuh a.







Mittui luang zawih zawih chungin ka kut chuan ka ban de de a. Ka khûr hlak hlak tih pawh ka in hrechiang viau bawk. "Ka nu..." ka tichhuak thei hram a.







Rang takin ka nu chu a rawn hawi let vat a, a rawn ṭhuchhuak nghal vat bawk a. "Mami...ka lo tiharh che a ni maw?" a hmela khawharna leh inthlahrunna chuan ka mittui a ko chhuak chiang viau bawk.







"Ka nu...." tih sap pahin ka pawm nghal vawng vawng a. Insût hlap hlapin nghet zetin kan inpawm vawng vawng a. "Nu....ka pa khan min ngaidam thei angem le?" ka ti thâm chhal a, ka hnar a ping vek ni mai hian ka hria. Ṭah hawm hawm ka châk a, ka nu pawhin a châk ve tho ka ring. Mahse, kan khawhar hlau a min riahpuitu tlangval ho mu hnâr sêk sêk chu tihharh kan hlau em em bawk si.







"Mami...tlangvalho kan tiharh palh ang. Va mu leh tawh rawh" tih sap pahin min kuahna chu a thlah nghal a.






"Nu...nangpawh mu rawh aw? Mut hahdam i mamawh ania" ka ti sa sa a.






"Mami...min ngaihtuah suh. Ka ṭha lutuk ania, va mu tawh rawh. Keipawh ka mu tawh ange" a tih lai chuan a hmel chu ngun takin ka en a. A muhil thei hian ka ring bawk silo.






"Nu...i.bulah ka lo mu ve ange" ka ti vat a. Ka nu hmel chu a inthlâk nghal vekin ka hria. "Mami...lokal rawh" tih pahin ka kutah chuan a chelh a. Ka pa mutna ṭhin lamah chuan a mu nghal vat a. Keipawh rang takin ka lawn zui nghal a. Ka mu fel chiah tihin ka nu chuan min rawn pawm a, duat takin min chûl zui heuh heuh a.







Muthilh ka tum viau a, thildang ka ngaihtuah viau pawhin ka harh tulh tulhin ka hria. Duat taka min pawmtu pawh chu a muhil biklo tih ka hrechiang viau bawk. Ka nu leh pa chunga ka khawsak dan tenawm lutuk chuan min nuai hlup hlup a. Ka pa in ka aw a hriatchak em em laia ka ngaihsak ṭhat duhlohna khan min dêng nawn awn awn a. Ka damchhungin ka inthiam thei tawh ngai lovang.







"Ka pa....vawikhat chiah kuah che a, ka ngaihzia che hrilh theih che ka va châk tak em...ka pa.... Van aṭang khan min rawn ngaidam hram rawh aw?" ka ti rilru mawlh mawlh a. Min kuah rengtu chu ka tihharh ka hlau a, ka chhungrila ṭahchhuak em em a min rawn hnawhtu avang chuan insûm takin ka taksa chu a che leh dawt dawt ṭhin a. Thâwm dîm takin ka insût leh hraih ṭhin bawk a.







Mutchhuak in min zem chiai chiai a, ka nu chu a muhil niin ka hria. Ka nu bân chu ka chelh a, ka muthlu leh diar diar ṭhin kârah pawh ka pa min koh lawm lawmna aw ri chuan min timeng leh zawk ṭhin bawk a. Muthilh ka mamawh tih hrereng chung chuan ka chhîng lui ta ngar ngar a.







Thawm ri hrang hrangin min tiharh zawk a, rang takin ka inlet vat a. Ka nu chu a lo mu tawh miah lo. Ka in nuai chat chat a, ka lukham hnuai a phone chu ka ban vat a. Dar 7 a lo ri ṭep mai. Kan Inchhungah chuan ṭhenawm nu leh pa te an lo ṭhu far hlawm tawh a. Rang takin ka tho zui vat a, zing dar 4 thleng kha chuan ka muhil lo tih ka hria. Ka nu phei chu a meng tlang anih ka ring hial bawk.







Ka in phihfai a, kan Inleng ho chuan ka mut theih leh theih loh te min lo zawt luam bawk a. Ka hmai ka hrûk laiin ka phone chu a rawn ri a. Rang takin ka ban nghal vat a, nui sak chung chuan, "Aw...hello" ka ti vat a.



"Aw....hello....Morning" a rawn ti zângkhâi vah a. "In mu thei em? I mutui em?" a rawn ti nghal mawlh mawlh a.



"Aw...mu thei e. Nang i mutui maw?" ka ti nghal vat a.



"Ka mutui khawp mai" a rawn ti vat a. "Vawiin chawhnu lamah ka haw phei leh mai dawn amawn le ka ti deuh a" a rawn tih zawm vat a. Engtin emaw hian min nghawr dat in ka hria.



"Chuti thut thut te chu..." ka ti ringawt a.



"Nia...la châmpui che u pawh ka duh viau a. Mahse, In lamah kan buai ve bawk sia" a rawn ti zâwi sap a.



"Ni ve tho mai. In sa lai in ni bawk sia...hna chu in ngah khawp ang" ka ti tak na a, ka hriatthiam viau rualin ka thinlung erawhin a pawm miah lo thung.



"Kan inhmu thei angem? Khawilaiah emaw ka lênharhpui ang che. A pawi viau angem?" a rawn ti dam dap a.



"A pawina chu ka hre miah lova. Mahse...lêngchhuak tura insiam a mawi dawn lo em aaa...ka nu ngaihdan pawh anih ka ringlo" ka ti bah nak a.



"Zan lamah inhmuh tum mai ila..." a rawn tih zawm leh a.



"Vawiin i rawn leng phei dawn lo em ni?" ka ti ve leh vat a. Ni e, min khawngaih a, min lainattu tam tak awm mah se ka 'Duata' hmel ka hmuh loh chuan ka khawhar a zual tlat bawk si.



"Rawn phei ka lo tum dawn nia..."






Ka nui var var a, kan inhmu leh thei tur chu ka lawm viau bawk. Zana inhmuh a duh chuan kan inhmuh ngei pawh ka ring. A tum ang thut thuta a awm loh nan chelh ngei pawh ka tum. Mahse, naktuk lamah chuan a haw phei ngei ka ring tawh viau bawk. Keia lo dan reng theih lah a ni bawk silo.






(to be continue........)


Show post links
Top

[Ngaia]

THUTIAM
Chap~6



By : Tom Tom Putara






Nilengin kan inhmu a, kan in awm chawt a ni ber a. Ka nu pawhin inkâwm satliah kan nilo tih a hrethiam ngei bawkin ka hria. Midang mitmei vên ngai chuan min tikhawr dun viau thung a. Zuala pawhin inthlahrunna chen a nei viau tih pawh ka hai lo. Chuti chung pawhin min ngaihsak thiam em em tho.






Tlai lamah zanriah ei turin chelh tum viau mahila a ṭang tlang ta ṭalh tho a. Zan lama inhmuh ngei tum chuan kan in vai liam leh ta hrih phawt chu ania.






Kan nufa tana khawhar zualna hun min thlenpui turin Zan hun a rawn thleng a. An dân ngai tê in nu leh pa, kum upa lam thlengin an thiam leh theih ang tawkin min hnem an rawn tum vek a. Kan nufa tana hun huphurhawm ber chu min chhâwk nameuh mai.






Ka phone a rawn ri a, rang takin ka melh vat a. Ka bula ṭhu ka nu pawh chuan alo melh ve vat. 'Duata' tia ka dah chu tunge anih pawh a hrechiang viau ang. "Ka chhâng lawk ange" tih pahin ka tho zui nghal a.






Pawnah ka chhuak zui a, mi awm lohna lai ka pan a. "Aw...Zual..." ka ti nghal sap a.



"Hei...in inchhak kual, JK Store bulah khan ka awm ania...rawn chho la..." a rawn ti deuh nghal thâwr a.



"Awii...a inthlahrunawm e..." inthiamlo ṭi ru dai chung chuan ka chhâng vat a.



"A pawi chuang lo...i tihdan dan a ni mai" a rawn tih hnu phei chuan ka thin a phu deuh dat dat a.



"Hmuh ka duhlo che a ni lova, ka ngailo che pawh a nilo. A hun hrih lo em a ni" ka ti khûr deuh dar dar a.



"A dik alawm....ka rawn chhukthla lo mai ang.." a rawn ti zângkhâi vah chuan min ti hlauthawng zual zawk si.



"I thinrim ngawt ang tiraw?" ka ti ta ringawt a.



"Engvang ngawtin maw? Thinrim nachhan tur a awm hlei nem..." a rawn tih pawh chuan hlauhthawnna in ka khat a ni ber e.



"Engtiknge haw chu i tum?" min chhânna erawh hriat ka huphurh viau bawk si.



"Naktukah ka phei ang. Chanchin kan inhrilh zel anga tiraw? I nu kha duat viau ang che. Min lo biak bawk anga" a rawn tihlai chuan ka kut chu ka hûm ruh ngar ngar a.



"I haw hma in kan inhmu tawh dawn lo maw?" ka ti thâm chhalh a.



"Ka rawn thleng thla lo mai ang" a rawn ti leh ringawt bawk si.



"Anih...i tih ṭalh chuan le... Tluang deuhin i haw phei dawn nia. Engkimah khan ka lawm em em ania" ka ti ve ta mawlh mawlh a. Hmuh a, a bula hun hman a, kan pahnih chauh a awm a, pangchang taka a ṭâng belh chu ka châk nameuh mai. Mahse, tuna ka dinhmun ah chuan a theih tlat si loh. Chubakah, mi min hmuhdan tur te ka ngaihtuah ve angai tho bawk si.



"Engmah lawmthu sawi a ngailo. Ka buaipui thei che kha ka lawm lutuk zawk ania. Ka buaipui i duh ringawt pawh ka lawm takzet" a rawn tihzawm leh zat a. "Anih...duhtawk phawt ang aw? Inleng in ngah awm sia...nakinah kan inbe leh dawn nia" a rawn tihzawm leh a.



"Rawn chhuk thleng ve mai la...naktuk i haw dawn phei chuan?" ka ti leh ṭâlh a.



"A nuamlo ve alawm...min hrethiam dawn nia. Hmuh che erawh ka la khamlo takzet" a rawn ti ve leh vat a. "Anih phawt aw?" a rawn tih zawm leh a.



"Anih leh phawt le" ka ti ve leh vat a. Kan inbe tawp ta hram e.






Inchhung lamah ka lut zui nghal a. Ka nu bula ṭhutna awlah chuan ka ṭhu zui leh nghal a. Ka nu chuan min lo melh ralh ralh a. Ka hmel awmdanah chuan eng emaw diklo a awm tih chu a hre leh vek tawh ang, min hrechiang em a ni.






Zan mut hun thleng thuai se, ka 'Duata' chu biak leh hram ka duh a. Ka ngaihzia leh thlakhlelh zia hrechiang sela chuan a la châm ngei ka ring bawk si.






Kan mu a, ka nu bulah bawk chuan muthmun ka rem a. Ka nu chuan thil tam tak ngaihtuah a nei tih hriat takin a ngawi kar reng a. "Mami...engnge thleng a?" a rawn ti sap a. "Mami...kan pahnih chauh kan ni tawh a. Kan ṭandun zel loh phei chuan mi hmuhsit bak kan hmalam hunah hian tawn tur kan nei lo. Mahse, kan ṭandun tlat chuan tumahin min hmusit ngai lovang" a rawn ti zui leh sa sa a.







"Mami...ngaihzawng nei rual i ni tawh chu a ni ve mai a. Neih phal lo engang mahila in khapbeh reng theih a ni dawn lova. Mahse, i nu hi i ṭhian ṭha ber aiin min ringzo ang che"a rawn tihzawm leh a.






Ka thaw deuh halh a, "Naktukah haw a tum a..." ka ti sap a. Ka nu lamah chuan ka saisir a, chiang takin ka nu chu ka melh kar a.






"Anih chu maw le..zanin te khan rawn leng sela ṭha tur anih chu maw le aw..." ka nu hmelah chuan fiamthu leh ka rilru damna tura min ṭawng thlamuanna hmel ka hmu lo. A rilru tak tak a sawichhuak niin ka hria.






"Nia...a hreh a, nuam a ti chiah lo deuh a" ka ti vat a.






"Mami...lungngai suh. Zirlai mai inla ni a, kumkhuaa i kawppui tur anih chuan hun ṭha in la nei dawn chauh alawm" ka nu chuan min fuih pahin min hnêm a ni ber mah e. "Muhil tawh rawh...a tlai tawh ania" a tih zui takah chuan engmah sawi zuilo chuan ka inlet thak a, ka nu hnaih chuan ka tawlhphei zui hrat bawk a. Rang takin ka nu chuan min lo kuah nghal vat bawk a.






Ka phone chu ka phawrh de de a, Message- ka dawn ngei in ring chuan ka lut vat a. Ka ṭhiante'n min ngaihsak zia an lantirna bak engmah ka dawng lo. Min rawn biak tawh ka rin tehreng nen engmah a Message- hmuh tur a awm lo.






Ka nghak deuh vang vang a, a reh tlawk tlawk mai si. Ka phone chu ka hmet hawng a, ka chhu zui ta mawlh mawlh a. "I mu tawh em?"



Rei vaklo ka nghah hnu chuan min rawn chhâng ta ngei e.



"Mu tawh e...nangni zawk?"



"Kan mufel chiah e...engnge ilo tih a?"



"Movie ka lo en mai mai...ka lo nghak deuh che a"



"Tak tak maw? Ka va lawm leh si"



"Aw...tak tak e..."



"Min lo biak ka ring a, i message-alo awm tawh ka ring a. Ka hawn phûr nen engmah a lo awm si lova" hlim ru tak si chuan ka nui ver ver a.



"Ka rawn be ngamlo che alawm. Ka rawn tihbuai che ka hlau aaa...."



"Hmmm..."



"Engnge? A ni miau alawm"



"Min tibuai reng la ka lo lawm viau zawk mai thei asin" ka thawn rual chuan ka nui leh deuh sak a



"Anih chuan ka rawn tibuai reng tawh ang che. Mahse, ilo ning viau si ange?"



"Kan hre mai ang chu..."



"E taka, naktuk kha ka ṭhulh leh si"



"Tak tak maw? I ti tak tak em?" ka phûrzia chu rawn hmu sela chuan haw a ṭhulh thu chu vawi li vawi nga tal min hrilh nawn sek ka ring hial zawk.



"Ka Ni hi rawn phei ve a duh sia. Naktukah a la hman lova. A tuk lehah kan phei dawn anih hmel..." ka dawn rualin ka chhiar nghal vat vat a. Ka nui sâng bawk a, ka hlim takzet. Inhmuhna hun kan nei leh mai thei asin.



"Ka va lawm tak..."



"Tak tak maw? Ka haw lo tur chu i lawm tak tak maw?"



"Aw...ka lawm lutuk. Kan inhmuh leh hman dawn chu.." ka chhâng phûr kher mai.



"Zan lamah chuan ka phût ngamlo che a. Naktuk chhûnah lengchhuak lawk ila...ka ṭhianpa te In ah kan lêng anga. A chhungte an awm dawn lova"



Ka nui sêih a, ka phone chu ka fawp zeuh a. "Kan tum dawn nia.." tih thu ka thawn rual chuan inhmuhpui ngei ka tum nghet nghal charh bawk.



"Awle...i mu duh tawh em?"



"Duh pawh ka hrelo... Nangmah zawk kha i mut a chhuak tawh ang"



"Chhuak hran lova, in hah ṭhin bawk sia. Chawlh hahdam kha a ṭha alawm"



"Ni ve tho...anih kan duhtawk dawn em ni?"



"Awle...muttui phawt le. Ka ngai lutuk che" chu thu chu ka hlimpui ber a ni nghal phawt chu ania.



"Keipawhin ka ngai lutuk che. Muttui phawt le" ka thawn rual rualin ka message pawh chu ka thîk lek lek ni berin ka hria. Ani zawngin a bul a thleng dawn bik si a.



Lungawi takin ka mu ṭha sat sat a, thlahlel taka min kuahtu, ka nu pawh a chau takzet ania nge...a mu hnâr sêk sêk tawh a. Zuala nena kan inhmuh hun tur mitthla pah chuan ka mu ta siai siai a.






Ka nu tho thawmah chuan ka harh vat a. Rang taka ka phone chu ban nghalin, "Tho ve tawh rawh...a tlai tawh. Morning...." tih ka thawn zawh rual chuan ka tho chhuak zui nghal a.





Ka nu hnenah chuan engkim hrilh a ṭha ka tih rualin lo phal lo ta se pal luih a nuam dawnin ka hre bawk silo. Engmah hrilh lova mahni duhdan ang anga khawsak ngawt chi niin ka hre bawk silo.






Ka huaisenna zawng zawng ka sawmkhawm ve tak meuh a ni ber e. "Nu...i buai viau em?" ka tih rual chuan ka thawmhnaw chu ka thlep ṭha mawlh mawlh a. "Engnge ni a?" a rawn tihlai pawh chuan ka hawichhuak chuang lo. Ka thil tihlai ti pah reng chung chuan, "Lokal lawk teh..." ka ti sap a.






"Engnge ni Mami?" tih pahin ka bulah chuan a rawn ṭhu nghal vat a. Muangchangin ka nu chu ka en a, "Nu....a haw leh lova" ka ti nghal deuh ngawt a.






Ka nu chu a lo nui vur vur zui, min ti zâm zual sauh bawk a. "A la haw hman nganglo anih dawn chu.." awmze nei zeta nuih paha a rawn tih leh takah chuan tlem chuan ka ngampa ve ta deuh e.






"Nu...'zan lamah chuan lenchhuah a fuhlo' a ti bawk sia. 'Vawiinah lengchhuak lawk ila' a tia. Rem i ti em?" ka sawichhuak zo lo lek lek, a tawp lam chu a zuih viau mai. Mahse, ka thaw deuh huai thung.






"Mami...a hun chu ka ti miah lova. Mahse, i pa pawh kha la dam sela a kal tir tho che ka ring" a rawn ti hnual raih a. Aizawl kal ka dil lai a ka tihtauh khum te chu ka hrechhuak nghal uarh uarh bawk a. Keimahah hreawm tihna in ka khat nghal a, ka inthlahrung in ka zak ru ngawih ngawih bawk.





"Nia...ka hria alawm" ka ti ringawt a.





"In lengchhuak anih pawhin rawn haw tlai lo la aw? Ka khua a har teh ania. Chubakah, kan khawhar hlau takin mi an rawn leng a. Chulai kara lo lênbo daih te chu a nalh dawn miah lo ania" a rawn tizui dap dap a. Ṭawngkam vin a hmang lova, thupe aw tak a hmang hek lo. Mahse, a thusawi erawhin min chhun ngâih zel tho si.






"Ka hria alawm Nu..." ka ti leh ringawt a. Ka nu kalsawn hnu chuan ka thawmhnaw thleh lai chu ka tihzawm leh char char a. Ka rilru ah erawh inthiam lohna lian tak ka nei reng tho.






Ka lo nghahna lai chu a rawn thleng ta. Car chhungah chuan ka lut zui nghal a. Min lo nuih sak pahin, "I nalh hle mai" alo ti vat a.






"Ka lawm e" ka ti sap a. A ṭhianpa te In awmna lam pan chuan kan tlan zui a. A khât tawkin ka rilru tih zângkhai nan fiamthu a thawh leh zauh ṭhin bawk.






A ṭhianpa te In kawtah chuan kan ding a. A phone a phawrh a, a bengah a chuktuah zui nghal a.






"Aw...kan rawn thleng ania" a ti nghal vat a. "E...a ṭhat chu. Aw le...aw le..." a ti zui leh mawlh mawlh a. "Lokal rawh le...helai hi ania" tih pahin kan dinna bula In lian vaklo chu a kawk nghal zauh a.







Kan lut chiah tihin a ṭhianpa chuan min lo chibai vat a. Nui sâng chungin, "I hmelṭha hle mai....ṭhianpa nge nge Lunglei ah hian a lo tla na ber anih hi" a lo ti zung zung a. "A hmelṭha ṭha a rawn thing mai che u anih hi maw?" tih pahin a kalsawn zui nghal a.







"Ngawi mai mai teh a..in lâk luck-vak zel kha sim teh. I luck-zia min sawichhuah tir kher tum suh" Zuala chuan a lo ti ve vat bawk a. Kan vai chuan kan nui dar dar a, ka chhungrilah erawh a ṭhianpa thusawi chuan zawhna min siam nghal zung zung bawk.






"Lokal rawh u" Zuala ṭhianpa min hûina lam chu kan pan zui nghal a. An In hnuai lamah chuan min chhukpui zui nghal a. A room chu a lian lo na a, a hmel en aiin a che fel vei phian lawi a.






"Khawi chahbi chu....ka va kal lawk ange" tih pahin Zuala bulah chuan a ding kawisawi zui nghal a. Zuala'n chahbi a pek rual rual chuan a chhuak zui nghal a.






"Lokal rawh..." tih pahin ka kutah a rawn chelh a, Khum lian vaklo ah chuan min pawtṭhu zui nghal a. Min melh a, a nui deuh sak a.






"I haw tak tak dawn amaw ka tia...ka hlauhthawn hman zia chu a" tih pahin pangchang zetin ka chûm taih a, min rawn hnaih zual nghal sauh a.






"Ka chhuanlam anih kha.." a rawn ti chu a ngaihna hrelo zetin ka nui ringawt a. "Ka ti tak tak alawm. Ka chhuanlam mai mai anih kha. Nang hmu leh lova ka haw theih i ring reng reng em ni?" a rawn tih rual chuan ka kut chu a la a, a khal zui niap niap a.






"Ka lawm lutuk...i ti tak tak anih chuan..." tih pahin ka nui sak a.






Min melh zauh a, a tho zui nghal a. Room kawngkhar chu a va kalh zui nghal a. A rawn lêt thuai a. Ka bula rawn ṭhut pah chuan min rawn kuah zui nghal a. "Nang hmu leh lova ka haw theih i rin man ah..." tih pahin ka hmui ah a rawn fawp nghal a.






Ka namsawn a, a ngaihna hrelo zetin min melh kal a. "Lawk" tih pahin ka in siam ṭha sat sat a. "Min bum man ah" tih pahin a ngaihna hrelo zeta min melh kar chu ka fawp thut a.







Kan inpawm a, duhthawh zetin kan in fawp mawlh mawlh reng a. Muangchangin Khumah chuan min nem âwn riai riai a. Min tih ang ang chuan ka awm a ni ber mai e. Ka chungah a rawn bawk zui a, ngun zetin min en tih chu ka hria a. Mahse, ka meng ngam lo. Ka mit ka chhîng phu der der a, min fawh hun nghakin ka hmui pawh duhawm tawk chiahin a kau tih pawh a hmuhhmaih ka ring hek lo.






"Hlimi...i va han duhawm chiang tak.." tih sawi bâkin hun a khawhral phal biklo te pawh aniang. Min rawn fawp zui leh a. Ka hmui a fawh pahin ka hnute, mum han chu a rawn hrâwm zui nawk nawk a. Ka dang lova, dan tumna pawh ka nei hek lo.







A hmui a lasawn a, ka nghawng leh ka beng velah a rawn fawp kual dan dan a. A za ka tih deuh rualin nuam ka ti ru viau lawi si. Nghet zetin ka pawm a, thlah leh tawh ngai reng reng lo tura pawm beh reng ka duh ni berin ka hria.







Ka kawr a hlim a, ka hnute chu a khawih zui leh a. A tawlhhniam hret a, ka hnute chu a fawp zui leh nghal a. Ka hnute hmûr a seh ner ner lai chuan ka ke ka tawm deuh châih châih a. A tukham sam chu ka ṭhâm deuh tâwn tâwn tawh a ni ber.






A kut chuan min chûl kual ruai a, ka malpui leh mawng bâwr a rawn hrâwm nawk nawk lai chuan ka taksa chu a danglam takzet tih ka hria a. Mahse, ka kap bâwr a rawn khawih thlen meuh chuan ka phu deuh zawk a. Rang takin a kut chu ka man chat a, "Duhtawk ang...a tawk..." ka ti thâm chhal a.






Ka thusawi chu engahmah a ngailo tih hriat zetin a hma aia nasa mahin ka hnute chu a fawp bawrh bawrh a. Ka malpui pahnih inkârah a rawn tlazep zui a. Ka malpui chu a ṭhâm leh deuh hlak hlak ṭhin bawk a. Ka nam ṭang ṭang a, "Khawi...tho teh. Duhtawk ang" ka ti khûr hlak hlak a.






"Aw...kan duhtawk ang" tih hmak pahin a tho zui nghal a. Ka mutna bulah chuan a ṭhu tûm deuh bâr a. Rang takin ka tho zui ve nghal a, ka sam thur bam chu ka huih mam zui nghal thuak thuak a. "I thinrim em ni?" tih sap pahin a bul sêtah chuan ka ṭhu zui nghal a.







"Thinrim love" tih hluk pahin a phone a phawrh zui nghal a. A hmetkual zui mawlh mawlh a. Ka en ve reng a, eng thil pawimawh mah hmehchhuah tur a hrelo tih pawh ka hmuhhmaih miah lo bawk.






"Phei ang, insiam ka duh" a ti leh nghut a. A lungawi lo tih chu ka hai miah lo bawk. A ding zui nghal a, a phone chu a tuai zui nghal thuak thuak a. "Khawnge maw a kal le?" a ti zui nuah nuah a.






"Zual....i thinrim tiraw?" tih pahin ka dingchhuak zui ve nghal a. A bulah chuan ka kal hnai zui nghal a. A benga phone chuktuah chungin a kalsawn zui nghal a. Tukverh bulah chuan a ding a, a ngawi ngal bawk a.






"Phone la thei bawk silo" tih niah niah pahin tukverh aṭang chuan pawnlam boruak chu a thlir vang vang a. Ka hnaih leh sauh a, a hnunglam aṭang chuan ka pawm a, a hnungah chuan lungawi zetin ka bei zui hle hle a.






"Zual...thinrim suh aw? Khawngaih takin..." ka ti zuai raih a. Engtinmah min chhâng lova, kei erawhin lungawi takin ka la kuah hle hle thung.






"Diktak chuan maw?" a ti nghut a, a ngawi zui leh daih a. "Aw.." ka ti sap a. Muanchangin a hma lamah ka insawn a, ngun zetin ka en chho kal a. Min en lova, a en ngai chu a la en ngar reng a.






"Sawi la..." fiah kâk chuan ka ti ve ta nghat a. Engtinmah min chhân a la tum lo tih ka hriatthiam rual chuan ka luhlulna a paw chhuak ve ta tlat! "Min chhâng suh. Min chhâng miah suh" tih pahin ka kalsawn zui a. "Ka kal ania" tih pahin kawngka lam pan chuan ka phei zui nghal a.






Kawngka ka hawng tur chiah chu min rawn chelh vat a, a lam hawiin min kuai herzui nghal sawk a. Ka mitah tak a en kal a, rang takin ka mit ka lasawn a. "Khatianga in tih kha ka duh bik lo. A mipa zawk thlem ngai reng..." sawi zawm ka tum viau na a, ngawih a ṭhat zawk ringin ka ngawi zui a. Min pawmna chu talpît ka tum zui nghal a.






A hma aia nghet mahin min chelh a, a rawn kûn hniam a, ka hmui chu a rawn chhilh zui nghal zat a. Engtinmah ka chhâng let lova, ka hmui a fawhna chu laksawn ka tum a, nghet zetin min chhilh a. Kawngka lamah chuan min nawr phei a, min nawrbeh rualin min fawp zui bawrh bawrh a.






A hmui a lasawn a, "I duh chuan min kalsan thei tawh e. I thu ni rawh se" tih nghat pahin a tawlhhnung hrat a.






Mipa dang ang chu nise a hmai ah chuan ka bêng thlawrh anga, ka chhuahsan tawh ngeiin ka ring. Mahse, khawiahnge ka induh tâwk ve na te kha an awm zawh tak ka hrelo. Ka kalsawn lova, kalsan tumna pawh ka nei hek lo.







Ka kuah thlawp a, "Zual...ka hmagaih che" ka ti thâwp sat a. Min pawm kâng nawlh a, Khum lamah bawk chuan min pawm phei a, Khumah chuan dîm zetin min mut a. Ka taksa khûr der der chu a hrethiam ngeiin ka ring bawk.







"Zual...thil pakhat" ka ti thâm chhal a. Ka mit aṭanga mittui luang ngiai ngiai chu ka hru nghal vat a. Ka meng zui diar diar a, ngun takin min lo chhuk melh kal a. "Zual...." ka ti thei hram. Engmah ka sawi thei tawh lo, ka insût hlap hlap a.







Duat takin min chûl heuh heuh a, "Hlim...engmah rilru natna tur a awm lo" a rawn ti chu ka phu zawkin ka hria. Ka en vat a, min lo nuih sak a. "Eng maw i sawi?" ka ti nghal vat a.







"Hmun hranah kan awm dawn a, engnge kan chungah thleng dawn kan hre lâwk lo. I taksa pum hi neih ka duh a, ka ta ni la ka ti mai chauh a ni. Mahse...." a ngawi zui daih a.






A biangah chuan ka chûl a, "Sawi zawm rawh..." ka ti sap a. "I rilru tihnat ka duhlo" a ti leh ringawt a. Nghet takin ka pawm a, ka hmui ah a rawn fawp nghal vat bawk a. Duhthawh zetin kan infawp a, a hma ang bawkin ka hnute a khâl leh nghal a. Ka kawr a hlip a, ani pawhin a hlip zui a. Engtinmah kan awmzui dawna ka hriat loh avangin pawi tihna ka nei hran lo. "Zual....a bak chu insûm ang aw?" ka ti hman hram, min rawn fawp zui leh nghal a.







Ka awmdan a danglam nasa tih ka hriat rualin kei aia nasa in a danglam tih pawh ka hai hek lo. Ka mal a chûl a, muangchangin ka kekawr kilhna a phelh niap niap a. "Zual..." ka tih pawhin awmzia a nei lo. A tawlh hniam a, ka hnute pahnih suasam chungin a kut a hlei zual sauh bawk a. Ka thaw halh halh a. A sam leh a remchang lai laiah ka ṭham tâwn tâwn a.






Ka phone rawn ri chuan ka ngaihtuahna nu but chu a rawn ṭhiat a, rang takin ka ban a. Mahse, min lo ban khalh chat a. Ka nu in min rawn biak a tum tih pawh ka hria. Rang takin a hmet hlum a, "Nakinah..." a rawn ti zui a.







Min rawn bawh zui leh nghal a. "Hlim...min hrethiam mai rawh. Ka thei ngang lo a ni. Ka ta i nih chuan ngaihngam takin ka awm thei dawn a..." a rawn ti khûr dar dar a.






"Zual....itan chauh ka rinawm reng dawn alawm" ka tih pahin ka nuih lui sak a. Mahse, ka laka a rilru puthmang chu a thlak thei silo. Ka kekawr a phelh tur chu ka dang tak na a, ka dang na theilo ni berin ka inhria. Ka danglam nasat zia chu ka hai hek lo.







Engmah kan inbel tawh lova, ka mit pawh ka meng ngam tawh hek lo. Muangchangin a duhthusam thlen na tur chuan hma ala zui nghal a. Ka hmuiah a rawn fawp a, ka chhâng lo.






"A na....a na...." tih ṭhat ṭhat pahin ka nem ngar ngar a. "Shhh...shh....hahdam rawh" tih pahin a chawl dat a. A duhthusam thlen nana hma a lak zui leh rual chuan, "A na..." tih pahin inher ka tum a, "Shhhh....a reh mai ang...hahdam rawh" tih pahin a duhthusam ram chu min thlenpui ta!!







Ka sirah a rawn mu a, min rawn kuah a, a thaw deuh halh halh a. Kei erawh che tur ka awm lo. Ka taksa pum chu a na chhuak vekin ka hria a, ka taksa ruak hiai thupbo tur pawhin thahrui reng ka nei lo.







"Ka hmangaih che...ka tan hian i va han hlu tak" tih pahin min rawn chûl heuh heuh a. Ka mit aṭangin mittui a rawn luang chhuak ngiai ngiai a. "Ka hmangaih che" tih pahin thlahlel takin min rawn kuah leh a, ka mittui luang chu a hru hul nghal a.







"Zual....min hmusit ngawt ang tiraw?" ka ti sap a. Ka ṭahchhuak chu ka khabe a inkhâwng sâi der der a.






"Engvangin nge ka hmuhsit ngawt ang che? Ka tan hian i hlu lutuk" tih pahin min rawn mut hnaih sauh a. Ka kuah a, ka pawm vawng vawng a. "Zual...min kalsan thei tawh lovang. I ta ka ni tawh a, kumkhuaa i ta nih ka duh" ka ti mawlh mawlh a.






"Zual...an rawn haw thut ang. In ha ang" tih pahin ka tho zui a. Ani erawh a la mu reng a, min en vung vung a. "In ha rawh" tih pahin a thawmhnaw chuan ka vawm zui a. Nuih suk pahin a rawn tho zui a, ka hnunglam aṭang chuan min rawn pawm a, ka nghawng a rawn fawh zeuh pah chuan, "Ka hmangaih che" a rawn ti thâwp sat a. "Keipawhin ka hmangaih che" tih pahin ka pawm leh vawng vawng a.






Kan in ha fel awrh tihin room kawngka chu a rawn ri dat dat a. "Ṭhianpa...a rawn luh theih em?" rawn titu chu a ṭhianpa aw ngei kha a ni. Ka thaw deuh huai a, rang takin Khum a thi kai chu puan chuan ka vawm khuh ta ringawt a. Bed sheet- sen a phah avangin a hmuh a har hlauh zawk a. Zuala chuan room kawngka hawnsak tumin a pan zui nghal a, keipawhin kan khawsakna chuar hnawk niaih chu ka pawtmar nghal zung zung a, hmanhmawh zetin tukverh bulah chuan ka ding phei zui nghal a.







A rawn ri lut bawrh bawrh a, min rawn nuih suk a. Min hmu nikhualo nghal ngawta hriatna keimahah a awm et et bawk. Pawnlam chu ka en reng a, an ṭhiandun chuan an infiam bawrh bawrh a. A ṭhianpa in ka hming a zawh sû sû lai pawh ka hria. Kei pawhin a hming ka hre bik miah lo tih pawh ka hrechhuak zawk bawk.






"Bawihi..." Zuala rawn tih rual chuan ka hawi vat a. "Hei hi Mapuia anih hi" a rawn tih rual chuan ka lo bu deuh nghat a. Min melh vung vung avangin nuamlo ka ti riau bawk.






"Khawi...lo inchibai ṭha leh ang" Mapuia chuan min rawn pan a, nui sâng chungin min rawn chibai a. "Hlimi maw?" tih pahin ka kut chu a hmer salh a. Ka lo nui sak a, ka lo bu zui nghat bawk a.






"Ṭhianpa, kan va phei ange" Zuala'n a tih lai chuan ka phone a rawn ri ve leh chiah a. Ka en vat a, ka nu bawk a ni. Hlauthawng ru zetin, "Hello" ka ti zâwi sap a.




"Mami...rawn haw ava hun tawh ve?" a rawn ti chang fak a. Engmah dang a sawi lova, a hmaa min biak a tum thu leh ka chhân loh thu pawh a sawi ri miah hek lo. Mahse, kan pahnih chauha kan awm hunah a sawi ngei anga, a chhan min zawh ngei pawh ka ring.




"Aw...nu, kan rawn haw dawn chiah" ka ti nghal zat a. Zuala leh a ṭhianpa chu an inzui chhuak nghal a, rang takin phone chelh reng chung chuan ka zui ve nghal vat bawk a. "Anih phawt aw Nu...kan rawn phei dawn chiah" tih zui pahin Car chhungah chuan ka ṭhu lut ve nghal a.



"Anih ṭhianpa, nakinah kan inbe dawn nia" a tih hnu chuan kan tlanchhuak zui ta nghal a.



"Naktukah eng hunah nge i chhuah ang?" tih sap pahin ka melh ralh a.



"Ka hrelo le...zing a chhuah chu ka duh a. Mahse, ka tho hma thei ṭhin lo" tih pahin min nuih pah suk a.



"Zual...rawn phei leh vat rawh aw?" ka ti hnual raih a. Ka sawi liam puat lo, ka rilru chhungril ber aṭangin a ni ka sawm ni.



"Nang hmu lovin hun rei tak ka va awm theih i ring em ni?" a ti nghut a. Min rawn melh zawk pah chuan, "Ka ta i nih tawh kha aw? Mipa dang biak ka phal dawn miahlo ania" a rawn tihzawm leh a.



A nâkah chuan ka va piai zauh a, a phu deuh zawk nghe nghe. "Mipa nih vangin lerh va tum miah suh ang che" ka ti ve hlak a.



Kan In bul thlen hma kawngkawi ah chuan a ding a, kawngsir remlaiah chuan a tawlh phei zui nghal a. "Ka rawn chhuk thleng lo mai ang. In tam thei em mai" a ti vut a.



"A ngailo...chhuk ang. Ka nu pawhin 'a haw hmaa hmuh leh ka duh' a ti a ti maw le" tih pahin a ngaihdan hriat tumin ka melh ngar a.



A bu nghat nghat a, "Anih...chhuk ila.." tih pahin a tlan thla zui leh ta a.





(to be continue........)


Show post links
Top