Love In Africa By Tluangi Sagy Pachuau

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: Love In Africa By Tluangi Sagy Pachuau

Unread post by Ngaia » September 11th, 2022, 2:44 pm

LOVE
IN
AFRICA

CHAPTER 13


BY Tluangi Sagy Pachuau



Reilo ah ka chhungte an rawn lang nghal zat a, ka pa chuan min ngaihtuah tih hriat tak hian "Bawihte engtin nge iawm, Hmingmuanan hetah i awm thu min lo hrilh a" A tih chuan ngawi reng in ka en tawp... Tawng chakna ka nei hlawllo a ni




Siamsiami chuan min hrethiam a ni ngei ang "Pa ngaihtuah awm a ni lo ang, ka lo awmpui ang, lo va chhuak rawh u hna in laklawh awm si" Ka u te leh ka pa nawr chhuah pah chuan a ti a




Ka hma ah chuan rawn ding in "le zawh kher che i phut nge min hrilh nghal dawn" Inkuang kuah at chung hian a ti a, thil thleng zawng zawng te chu a tir atang a vawiin ni thleng in ka hrilh ta vek. Rebecki chu a ngei in Hmingmuanpuia pawh chu a dem hle..




Min rawn kuah in "Har dawn viau mahse tuar hram hram rawh aw Manun i hriat kha ruah hi engtik lai pawh in a sur ngailo ban hun a nei leh thin, chutiang bawk in nang pawn i tuar chhuak thei em em ang" A ti a ka sam ah a chul hliau hliau...




"Siam ka pa ka lo la hrilh hman lo hi ka lawm takzet, ka lo la hrilh loh chhan pawh hi hetiang a thlen dawn vang hi a ni ngei ang" Tiin ka tap hlawp hlawp...




Pawn lam a thawm ri hluai kan hriat chuan Siamsiami chuan a va en vat "ehee Umama leh Prof. Hmingmuanpuia an insual" A tih chuan thawh chhuah mai ka tum a, ka kut ah chuan drip khai na hriau a lo la in vuah..




Phawi mai ka tum chuan Siamsiamin min lo dang vat "Manun ti suh a thalo a nia" A tih chuan ngaithla lo in ka pawt phawi sak a pawn lam ah chuan ka tlan chhuak nghal vat...




Mi ho chuan an lo hual thap a, thelh pawh an tumlo, thelh a hnek in thla te chu an lo la lak sak deuh deuh, mizo te kan la thin na em em leh than mawh bawk chu hei ngei hi a ni...




Mi thil tih that loh leh tih sual chang reng reng hian hun kan hmang a, hre ber nih tum leh hrelo bik nih hlauh hian social media ah an post a, thenkhat lah in an thil tih that miin an hrelo ang tih hlau in an in post thul, rilru pharisai hlawm lutuk...




"U a tawk duhtawk rawh sawisa tawh suh, i that thei takngial dawn asin U" Tiin a kawngah chuan ka va kuah bet a. A la tal fat fat nang in a in thlah dul tial tial a..




Chhuat a Hmingmuanpuia thu chu kaitho in a a coat hak chu ka ben fai sak thuak thuak a ka kut ah chuan lo man chawt in "engvang in nge i phawi" Ti nghut in ka mit ah chuan min en ngur a...




A hmai ah chuan pem a awm nuai a a thi deuh sung bawk, hmuh loh der hram ka tum bawk.
A sawi pawh ngaithla lo leh chhang lo chuan "kan tihpalh takzet a ni professor , ka u hian thil hriat sual palh a nei a ni ngei ang kan tihpalh takzet a ni" Tiin ka u chu kal pui mai ka tum a




"Naute" A rawn tih leh pawh chuan hawi let tawhlo in Umama chu a office ah ka kal pui a chair ah chuan thut tir in "Umam khatiang thil kha engvang a ti nge i nih" Ka tih chuan "rilru na a siam tu che kha ka awm tir mai mai theilo" A ti chang rut a, ka lo thaw ham ham




"Mahse U tharum hmang a thil engkim chin fel tum hi a tha vek kherlo" Ka tih chuan min en vung vung in "ka nau chu a lo va puitling sawt ve" A ti a lo nui hak in "mihring chu kan thil tawn leh kan chung a thleng a zir zel hian kan in siam rem thin alawm" Ka lo ti a, a bu nghut nghut...




A hnu chuan, engemaw ngaihtuah muk deuh nei ang hian a awm a, a ngawi deuh vang vang.... "Mate Mizoram hi chhuahsan in zir zawm leh i duh em" A tih chuan Umam chu ka en a "ti teh thut nge?" Chutia a rawn ti teh thut chuan min ti hrilh hai...




"A hma tang ka lo ngaihtuah tawh hrim hrim a i Uzela nen in kal mai anga, bakah tuna i chung a thil thleng nen phei chuan kal ngei ngei la ka duh a ni" A tih chuan min rawn ang in awm mahse "aih" Ti a chhan chi a ni lo tih ka chiang...




Bakah ni e, tunah ka chung a thil thleng nen chuan awm bo ngei ngei ka duh a ni, ka u hian tiang hian sawi lo mahse ka pa dil ka lo tum rilru hrim hrim...




Kar khat lai hospital ka kal loh hnu in kal kal bo tawh dawn si a tiin vawikhat tal hmu leh tur in ka va kal leh ta a....
Mahse a office chhung a hmeichhe nui ri ka hriat chuan lut duh ta lo in pawnah chuan ka ding reng a...




"Hlim tak in lo awm la i fa tan pa tha tak lo ni ang che aw, min theihnghilh hmin hmak tur chuan ka duh lo che a, khang kan hun hman tak hlimawm tak tak te kha chu lo la hre ve reng rawh aw... Ka kal ange, mangtha, mangtha vang vang aw Hmingmuanpui, ka rawn let leh hunah chuan heng ka natna te hi hlip thla in ka rawn let tawh ang" Tiin a office hlat zawng chuan ka kal ta a




Keichuan Hmingmuanpuia hi ka thinlung zawng zawng in ka hmangaih a, awlsam tak chuan ka theihnghilh thei in ka ring lo..... Mahse nakin lawk a mi pa ni tawh tur a ni a, ka theihnghilh chu a ngai miau si a....




Awle i lungdumtu nen chuan
Fanau maltluan chawi in va leng ta la
Keipawn chhai thar D zawng ve tur in
Tuan ve zai ka rel tang nge....



Duhthu leng sam mai maw ka chan tawk
Hlim te a kan len dun lai ni zawng te
Leh kan tuan na tlang leh mual zawng te
Vawng reng nang nge lairil ah



HMINGMUANPUIA POV*

Khang thil thlen atang khan kar 1 lak a liam leh tawh a Nautei ka hmu ngailo a... Hmathawk dang te thu sawi ka hriat dan chuan Mizoram a chhuahsan a nih hmel...




Na tak a a rilru ka siam hnu ah ka Nautei chuan ka hmel hmu duh tawhlo in hla tak ah min kalsan ta... Aw ka Naute, ka Naute rilru thianghlim vawikhat mah ngaihzawng pawh la nei ngailo khan na a va han ti dawn tak em, hnem thei tu ka ni ve tawh silo.... A mittui luang chu tu in nge hruk hul sak ta ang...




Ka chhung ten Rebecki a rai tih an hriat tawh miau avang in nupui a nei tur in min ti a, Nautei lo kha chu midang nupui a nei tur in ka lo la in ruahman chhin ngai eihlo asin, ka mumang ah takngial pawh ka mang pha ngailo




Nautei kal bo hnu khan Rebecki chuan ka office ah min rawn tlawh awl lo a, a zaklo hi ka va han ti mai mai tak, ka ngaihsak lo tih hre reng chung in ka office a rawn lut in a la rawn nui uar uar zel zui ah...




Hetiang hian a nih hi hmeichhe nasa tak te hi an lo awm thin ni, ka Nautei nen kha chuan inthlau tak an ni... Ka Naute, naute ka va han ngai tak che em ka hnen a rawn let leh tur a sawm tur che in dikna ka nei tawh silo...




Hlim tak in hun kan hmang anga, kan innei ve vat ang chu ti a duhthu lo sam laiin hriat loh lam atang a thli chhe rawn tleh chuan Ka hmangaih chu a len bo ta si....




Nikhat ka office a ka awm lai chuan Nautei U Sangtea chu a rawn lut a... "Hmingmuan i nupui tur hming kha Rebecki a ni tiraw?" A rawn tih chuan "aw ni e engtin nge i hriat a?" Ka lo tih chuan




"Ka lo rin dan chiah a ni" A ti ringawt a.... "Eng nge i sawi awmzia?" Ka tih chuan "Hmingmuan tuna Rebecki fa pai lai hi i fa a nilo" A tih chuan ka lo meng phawk vak...




"Maw engtin nge i hriat" A sawi awmzia hre chak in ka phi cheng tawh, "Matei khan a sawi kha ka hria a, thla 2 chauh a la ni a ni lawmni" A ti leh a ka lo bu nghauh nghauh.... Chutah a nui deuh huk a, a zat vang a nui erawh a nig hmel loh...




"Rebecki kha ka bialnu hlui a nia, thla 3 kal ta khan a rai thu sawiin ka fa a nih loh thu leh a fa paina chu a hmangaih zawk thu sawiin min rawn then alawm, nangni lah thlahnih kalta chauh khan in inhmu leh a ni si a" A tih chuan ka meng deuh kawk kawk tawh... "A nih chuan bum ka ni i tihna emni" Ka ti a, a bu ngauh nghauh....




"A nih chuan inneih na hi ka sut tir dawn" Ti a chhuah mai ka tum chu min lo dang vat "chutia ti mai thei i nilo a prove na i neih loh kha" A tih chuan "aw nangmah kha i ni mai alawm" Ka lo ti vat....




"Hetia ka sawi mai vang hian tuman an awi dawnlo, bakah a fa paina diktak pawh chu tunge a nih kan hre hleinem" A tih chuan ka beiseina an bo leh vek, chair ah chuan ka thu thla hnawk

Ka rilru a buai ta map mai, ka duhloh pui leh ka fa paitu pawh ni silo chu nupui a neih ka duh bik bawk silo


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 11th, 2022, 2:45 pm

LOVE
IN
AFRICA


CHAPTER 14


BY Tluangi Sagy Pachuau




Manuni POV*


Uzela nen Mumbai ah kan awm dun a, a lum em em leh Hmingmuanpuia ka ngai thei lutuk tih mai loh chu hrehawm tihna em em ka nei ngailo, mahse Hmingmuanpuia chu ka ngaih phak a ni ve tawh silo,




Khuanu ka zawt fo thin, "engatinge rem ve lo tur min tawn tir?" Tiin, mahse a chhanna ka dawng ngai reng reng silo, khuanu ruat kan nih ka lo ring thin a, mahse ka lo rinna leh a ni nen a ka suangtuahna neih zawng zawng te chu kha ni kha darkar ngei khan len bo in an awm si,




A chang chuan 'kei aia tuar nasa an tam alawm, ka tawrh chu an lakah chuan nep te alawm' tiin ka in hnem chawp thin, chutiang chuan sawi thin mah ila, ka in hnem zo tak tak silo a tawp ah mittui bawk a lo luang chhuak leh thin, tunah te hian engtin nge a awk ve ang





Min ngai ve tho angem? Nge ni a kha Rebecki nen khan hlim tak in an awm zawk ang, ni e an hlim viau ang chu tunah chuan naute pawh an nei tawh ngei anga, chhungkaw ti hlimtu tak pawh a ni maithei asin




"Mate chaw ei ang le" Uzelan a rawn tih chuan harh chhuak zawk in ka biang a mittui luang chu ka hru fai sawk sawk, chaw ei dawhkan chu ka va kil ve thuai a, "i lo ngaihtuah leh tawh a ni maw, ngaihtuah ngut ngut thin suh ka tih che kha kum hial a vai tawh hi" A tih chuan ka lo nui mai a




"Nangpawh nupui zawng ve tawh rawh, Utluangan nupui a neih khalh che a, Siamsiami pawh a rai kawh luah tawh kha, Utluanga faten i fa an velh an velh i duh ami" Ka tih chuan a rawn nui chhuak hawk hawk,,,, "kei te chu tlangval senoir tawk in story chhiar thin ami ang a zun ngah deuh nih ka tum alawm" A rawn tih chuan ka lo nui ve hak hak,,, tum ho ve sia





"U engtik ah chuan nge kan haw dawn?" Chawhmeh tui a hawp rik thlawrh thlawrh lai chuan ka zawt a
"Naktuk atan ticket ka la a" A tih chuan ti lang lo mah ila ka rilru chuan ka lawm hle, mahse Uzela erawh hi chuan haw ka huphurh hian a ring tlat a, tunah pawh hian "kan haw lo mai dawn ami" A ti a ti zel





Mahse a nih in a ni em em tawhlo, ka zirlai ka zir zo tawh a, kum 3 lai ka awm bo san tawh alawm, ka tuar thei tawh em em ang,,,, ti hian kan damdawiin ah doctor ang in ka lut nghal hmiah thei dawn a ni....





Lengpui airport ah chuan Umama chuan min lo nghak a, a bul a hmeichhe lo ding chu tunge a nih ka hre hauh lo, "Ihiauu mo thar hmel kan va hmuh hmel vee" Tiin umama chu ka va kuah thuk a, "Chibai rawh Irene-i a nih kha" A tih chuan ka kut chu ka phar chhuak a





"Chibai le Monuhuall" Ka tih chuan a lai chhe hlee, a biang a tai nghal tek thei, a la upat hmel vak bik loh, chuan a fel in a rilru a chhiat loh kan ring ve ringawt ah,,





In ah haw hmasa lo in damdawiin lamah tlang ka rawt a, kan thlen chuan thil tam tak danglam a awm tih ka hre thei, Hmingmuanpuian ka tap min thlem na fountain bulah te khan thutna thar siam in grass an lo phah a, hmun dang dang ah chutiang chu a awm in thingkung hmuh tur a awm nual bawk...a nuam dangdai takzet a ni





Intern kan nih lai a ka teammate te pawh ka hmu nual a, doctor pangngai an lo ni ve vek tawh a, a hun lai khan kan lo in nel hman hlawm bawk a, kan inhmu leh chu kan hlim tlamg ngei mai, an night dawn loh vang in dinner eikhawm an rawt nghal hmiah, ka pawn zawk tak a lo ni bawk,,,,





"Siamsiami lo hruai ve la" Biakzualan a tih chuan pakhat in "An pa i hlau lo em ni,,, kan biak hlek pawn a lo men tur hrang theih em kha aw" A tih chuan ka nuih a za hle, Utluanga chu a thikthu a lo chhe viau emawni dawn le





Kum 3 liam ta a umama leh Hmingmuanpuia insual kha na lo hriat ve vek avang in Hmingmuanpuia nen kan inthen tih an hrethiam mai a, tun hnu ah pawh a hming ka hriat a an lam rilo chu ka lawm hle, mahse a la thawk tih ka hria a, ka thawh chhunzawm dawn a nih chuan ka hmuh ka hmuh a la ngai dawn tih ka hria...chumi hmuchhawn tur pawh chuan ka in buatsaih nasa hle




Umama office lam ka pan lai chuan rin loh deuh in Hmingmuanpuia ka hmu thut a, bang phen ah chuan ka biru nghal vat, a cher lutuk leh a hmel dawldang vek te chuan chaw a ei thalo in mut mu a tuah thalo tih a hriat hle, engatinge sawtiang a a awm, mak ka ti hlee,,,,




Mahse a hnu chuan hna a thawh rim vang a ka ngai leh mai a, ngaih that lohna pawh ka nei em em lo, mahse s hmel ka hmuh chiah khan ka ngaihna a rawn thar leh a, a bul a va kal a va kuah vawng vawng kha min ti chak a ni, mahse mi pa a ni tawh si a, a rem teh teuh silo a ni...




Hetiang khawp a na a ka awm hnu pawh hian engatinge a hming hi ka la lam fan a, chang dang reng reng ka kan theih loh, heihi em ni hmangaihna dik tak chu?




Khawvel ah hian kan mi hmangaih te hi kan nei vek thei kherlo tih ka hre chhuak a, a nei theitu te hi chu khawvela mi vannei ber an ni ka ti ngei ang,,,



Rinawmlohna te hi awmlo se khawvel hi a va han nuam dawn tak em, nu leh pa inthen enkawl tu neilo a naupang vak rawlai an vang anga, in ngaizawng rinawmloh vang a inthen intihlum an van phah bawk anga a tha tur





Umama office ka luh chuan a bialnu pawh chu a lo awm ve a, nurse zu lo ni reng a, "Hospital Romance Einch,,, Hospital Romance" Ka tih luh chuan ka u chu a lo nui suk suk a, Irene erawh a lo lai chhe leh hlee tawh, a cute reuh phian lehnghal a, a inno hmel bawk si, engtin nge ka u te ang pa rorum te hi a duh theih zawk ni




In a kan haw inchhung ka lut chiah chu ka hnung a ri nghal awk "Lalnunpui i rawn haw te chuan in lam pan hmasak nachang hre ta che i chhah telh tulh lutuk, inah nghakhlel tawkk in ring fan iak ika in i lo haw hun thlir in pawn lam kan melh kan melh a, damdawiin ah i lo va tlang daih a" A sawi zo chu a thaw hlawi hlawi...





A thinchhe hlee mai aaa,,, ka lo nuih tlawn ringawt "nui the thaw suh, awi ka tawng nasa lutuk a ka hah" Tih pah in sofa ah chuan a thu thla a, Utluangan a lo buaipui vat, hmm,,,,, in la innei vel lutuk





"Tikhan lo induat ru aw ka roomah ka lo han chho ange" Ka tih chuan "Lalnunpuii nghal lutuk hi chu aww" A ti vang vang, nui suk suk chung in ka room ah chuan ka chho ta a...




"Mate" Umama chuan min lo zui chho ve chu ni in "eng nge ni a U" Ka tih chuan a thaw ham ham a "I room hi kan lo ti danglam a a nuam i ti em?" A tih chuan a sawi tum a sawi lo tih ka hre thei, dawt a sawi chang emaw a zam em em chang a a tih thin dan in a sam a tuai a tuai leh tawh vang a ni...





"Umm nuam e, U i sawi tum sawi la" Ka tih chuan a rawn thaw chhuak hawk "i lo hrethiam leh vek tawh a ni maw" Tiin a nui ro halh.... "Ih englo Hmingmuana kha" A rawn tih chuan ka lo dang vat "U Hmingmuanpuia chungchang sawi i tum a nih chuan sawi lo law law rawh, i hmuh ang hian hma lam ka pan mek a nih hi" Ka tih chuan "mahsee" A lo ti leh hram...





"Mahse a awmlo U khawngaih in, min sawi pui suh, i sawi dawn ai chuan chhuak zawk mai rawh" Tiin bathroom ah ka luh san ta daih, nupui a nei a, naute te nei in an hlim lutuk tih vel ka ngaithla peihlo,,, chu ai chuan hriat loh law law ka duh,,, damdawiin ah ka hmu a nih pawh in ka hrelo der hmak mai ang...





Bathroom atang a ka chhuah chuan ka khumah Siamsiami hi a lo thu a, "a nuam bawk maw Mumbai returnn" Tiin min lo nuih vur vur a "nuamlo nuamlo, a lum lutuk" Ka tih chuan min lo nuih hak hak,, "i thinchhiat ngai in i la thinchhe reng mai" Min ti ve khanglangg..... "Nang alawm le,, a hma aiin i thinchhia" Ka tih chuan a duhlo ngangg mai





"Manun Hmingmuanpuia kha" A tih chuan "nangpawh hi a chungchang sawi tum a lo kal ami i nih, chu ai chuan lo kal lo law law zawk rawh" Ka tih hlar chuan ka kut ah a lo chelh a





"Chutiang lam a nilo, hma i sawn zia ka hmuh che hian ka lawm pui che a ni" Tiin min nuih sen sen a,,, "enteh lo thu teh, ka pum hi a na riai riai reng mai, zanin phei chu chhun lam ai khan a nazual zawk" A tih chuan a dul chu ka tuai sak a....





"I neih hun a nih tawh vang aniang" Ka lo tih chuan a bu nghauh nghauh,,, ka kawr hak tur ka en vel lai chuan "khawiah nge i kal leh nghal dawn" A lo ti a Biakzuala ten dinner ei khawm an rawt thu chu ka hrilh a
"Hruai ve chu ka duh viau a chu i pum a na si a, nau nei thut thei dinhmun ah i ding tawh bawk nen ka hruai lo mai ang che" Ka tih chuan a lawm loh hmel hle




"Ka ning ahh! I u Tluanga lah hi thikthu chhe ropui si, hmanni in check up a kan kal pawh kan in hmu khawm a, lo melh sakei vakk a nih chu" A tih chuan ka lo nui ruh ruh




"A nih insiam rawh nuam deuh in in hmang dawn nia" Ti a a tho chiah chu a rawn au chhuak tuar "manun a hun,, naute a keu dawn" A ti chul mai, ka va hawi phei chuan khum tlang vuan in a lo ding huh zui a




A rang a rang in kan damdawiin lam ah kan tlan pui nghal a, nau neihna ward ah an nawr lut nghal, vawiin ah ringawt pawh hna thawh vang nilo in ka vawi 2 kal na a ni tawh,,





Hnung lam ka hawi chiah chu Hmingmuanpuia nen kan in hmachhawn siah, kalsawn na tur a awm tawhlo reng reng "I dam thin maw?" A aw chu a zuai ruih a, ka lo hriat thin Hmingmuanpuia kha a ni pawn ka hrelo, min melh ngur a hmun dang a hawi sawn tawhlo hrim hrim




"Dam alawm nang zawk?" Nuih suk chung a ka tih chuan tawng ka a min chhang lo in a lo bu nghauh ringawt,,, engemaw sawi leh a tum lai tak chuan "ka kal phawt ange" Tiin ka kalsan ta daih, hawi let lo mah ila ka hriatna thazam te hian min en zui tih ka hre thei


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 11th, 2022, 2:45 pm

LOVE
IN
AFRICA

CHAPTER 15

BY Tluangi Sagy Pachuau




Kan naute pawn karkhat hmel a hmu ve tawh a, mipa a ni nghe nghe, a hmingah ka pa in a ka pa in Vanlalngaihsaka a hming ah a sa a ni,,,





Kha zan a Hmingmuanpuia ka hmuh bak kha ka la hmu leh lo a, ka hmuh khan ka hmangaihna te kha an la kianglo in an la ngai reng tih ka in hrechhuak bawk,,,,, a hmel dawldang tak te khan ka rilru an ti na a, hlim tak a a awm tur a ka ngaih lai a, chutiang hmel pu a ka hmu chu ka rilru a na takzet





A hmelah khan min thlakhlelh na ka hmu in ka hria a, ka hmuh sual te a nih loh chuan, mahse ka ring ngam chiah silo





"In awm maw, ka lo leng Manuni a awm em?" Rawn ti tu aw avang chuan a ruk in sitting room atang chuan ka room ah chhoh ka tum a, mahse ka pa in min lo hmu hman chu ni in "matw hei inleng i nei, lo kal rawh" A tih chuan hnung lam hawi in ka in siam chhe vak, ka va han ning tak





Lalrinzuala hian ka haw tih a hriat atang khan zan tin a lo leng a, ka ning takzet a ni, a hmaichhan ah ngei ka duhlo tih chiang tak a ka hrilh chung pawn a la rawn leng a la rawn leng a, ka hrilh zan pawh khan a la nui hui mai mai zui a, a huihphai deuh hlek a nih ka ring





Ka pa bulah chuan peihlo deuh hian ka va thu ve a, a banah chuan ka sik vawtt vawt, a ni pawh hian ka duh loh zia a hria a, inleng lo hnar kha a mawilo a ti bawk si a, ka duhloh thu chiang tak in ka hrilh tih ka sawi phei kha chuan min hau hial a nih kha,,, eng nge,,, a ninawm ve em alawm





Kan duhlo tih an chiang reng tawh hnu pawh a min la bem reng peih hi chu lehlam kawng zawng tak chuan an tum a ruh hi kan ti em em khawp a, kei ni ila, ka bansan dawn chiang nen, hmaichhan ah min duhloh thu han sawi ngat phei se chu ka zak ngawt ang





A ti ti zat zat a, ka pa nen chuan an inkawm a ni ber, engmah sawi ve lo chuan TV chu en in channel chu ka hmet sawn ka hmet sawn a, Urinzuala chuan "Manun tikhan ti ti mah ta che, entur i hriat loh chuan off la kan titi hi min lo zawm ve mai rawh" Min hauh ve ringawt chuan ka eilo hle




Rinzuala tlangval senior, kan veng tlangval a zawng a senior ber lehnghal, a zaktheilo pawh hi a awm ve rengg a ni, thlasik a lo pal dai hnem tawh viau reng a, ka pa pawh hi "ka u" Zu han ti aa(uar mah mah em🤣🤣🤣)





Chutia kan lo thut lai chuan doorbell hi an rawn hmet a, ka va hawn a ka mi hmuh vang chuan ka ding khawng reng
A rawn khuh kharh tak ah chuan lut tur pawh ka sawm lo tih ka hre chhuak chiah "lo lut rawh" Tiin ka thutna ngai ah chuan ka thu phei leh a




"Ehe Hmingmuan i lo kal a ni maw" Ka pa chuan a lo chhawn vat a "Nia Sangtea hmu turin ka lo kal a, bakah naute ka lo en ang chu ka tia" Tiin nui sang chung hian a kut a naute thil a ken chu a khai kang zeuh a





"A ni maw, i va fel ve Mama chu a roomah a awm a, han kal mai ta che" A ti a "mate kha a thil lo ken kha lo laksak la i ti lawmawm hlee mai" Ka pa chuan a tih zawm leh nghal zat...




"Khawi ka lo la ang" Tiin a kut a a thil ken chu ka laksak a, mit la sawn hauh lo hian min lo en reng a, ka za mer mer in ka hria, Siamsiami te room a ka kal dawn lai chuan Rinzuala chu ka hre chhuak zawk,




"Urinzual naute i lo en ve duh em?" Nidangah pawh en tawh tho mahse Hmingmuanpuia awm vang a sawm ka ni pakhat, a ni Rinzuala lah chuan lo pawm nasa min zui nghal mai a, tuemaw mit a lungawilohna pawh chu ka hmuh hmaih lo..





Nge a lo lungawiloh ve vak ni, a bialnu pawh ka ni tawh hleilo, kan chhuah leh chuan Umama leh Hmingmuanpuia chu sitting room ah hian an lo thu dun a, hemi te pahnih hi engtik lai atang khan nge an lo in kawmngaih, umama pawh hian a haw ve viau khan ka hre si a




"Ka haw nghal mai ang Manun muttui ule" Tiin Urinzuala chu a chhuak a, Hmingmuanpuia a la awm miau avang in pawn thleng chuan ka thlah ve a, zan dang chu ni se ka thlah hauh lo ang





Ka luh leh chuan ka room ah ka tlang nghal daih a, min en zui tu an awm tih ka hre reng, ka hawi let duh thak lo,,,, 'Lalnunpui i ti tha lutuk e, i tuar chhuak thei em em ang' tiin ka in hrilh mawlh mawlh



HMINGMUANPUIA *POV*



Damdawiin chung zawlah chuan zial zu in ka thu reng a, van lam hawi chuan meizial khu chu ka pak chhuak ham ham, ka nautei chuan hma lam min pansan tawh a nih ngei dawn kha,




Ti hi chuan thlamuang tak in ka kal thei tawh ngei ang, nakin lawk ah chuan chhum chhah tak piah lam ram ah khian ka la cheng ngei dawn si a,,




Engatinge ka chungah tiang thil hi a thlen, mi tamtak in sual lam kawng zawh in ruihtheih thil an ti a, meizial nasa tak in an zu a, an hriselna ah engmah sawisel an nei ngailo




Engatinge kei, meizial takngial pawh zulo hian hetiang natna hi ka vei theih, a chang chuan nun fair loh zia hi Pathian bulah ka vui ve fo thin.... Zulo chung pawh a hetiang ka ni a nih chuan zu pawh ni ila a pawi loh hi, ti in meizial pawh ka zu ve ta kha a nia





"Ka naute, naute i hmuh phak loh leh khawih phak loh a ka awm hunah chuan hrehawm lo ti lutuk suh aw, i hmel ah khan min la hmangaih zia ka hmuh hmaih hauh lo a nia, mahse lo let leh tur erawh chuan ka duh chuanglo che, a chhan chu khawvel ah hian ka cham rei tawh dawn silo, reilo te chhung hlim a, na tak tuar tur a kalsan leh si che ai chuan tihian engmah hrelo law law la, lo let tawhlo law law ila i tawrh dan a nep deuh zawk mahna" Tiin ka phun chhuak sup sup





"Meizial hi taksa tan a thalo tih hrechiang ber tu te zing ami i ni ngei in ka ring" Rawn ti tu lam hawi chuan ka in her vat, Nautei ngei a ni, ka lo nui ro halh ringawt, a lam ka hawi leh chuan hma lam hi a thlir dauh dauh a, heng a hmeltha tak te he lei ramah chuan ka hmu thei tawh dawn silo





Ka kut a meizial ka lo cheh beh vu chu la thla in a peih thla a, a rap hrual nghal chawt chawt a a kal leh nghal nal nal, ka nui suk, min la ngaihsak ve reng tih hi chu ka hria alawm, eng ang pawn in thup tum mahse dawt hmang a nun hi a thiam ve thlawt lo





Ka ding chhuak chiah chu ka lu a rawn hai muai muai a, ka hmu phe vek tawh, ka khuh nghak khar kharh a, ka kut ka en chuan thisen ka khuh chuak tih ka hmu nghal "Hmingmuanpui" Ti a mangang tak a rawn tlan phei chu ka nuih suk a, ka awn riai riai a, a thim ta hmak



Manuni POV*


"Engthil maw i sawi, i fiamthu mai mai tiraw?" Beiseina nen ka u chu ka en reng, a thu sawi hi fiamthu mai mai ni se ka ti takzet, "U a dik loh zia min hrilh rawh" Ka u ban a vuan chung chuan ka ti leh,,,




A ngawih hmuk na hian a dik zia a ti lang chiang si, khum a Hmingmuanpuia mu chu ka va pan a "Hey Hmingmuanpui ka u sawi hi a dik loh zia sawi tur in rawn tho ta che, nang hian Chuap Cancer i vei theilo, min prank mai mai tiraw" Ka tih pawh chuan harh zai reng a rel silo




Ka mittui a tla zung zung a, nupui a nei ni a ka lo rin te kha, a fa nilo in midang fa a lo ni a, a tawrhna te hrethiam lo in keichuan ka lo hnaih duh thin silo, "Hmingmuanpui harh tehh,,, ka duat tawh ang che" Khawvel ah ka hmuh phak ah a awm ve tawh dawn lo tih ka ngaihtuahna chuan ka thin hnun hi a vit ngut ngut a ni ber





Ka lu a tuai tu an awm tih ka hriat rual chuan ka harh zawk, Hmingmuanpuia chuan nui sang chung hian min lo en a, ding chhuak in "Hmingmuanpui rawn harh vat ta che, min ti hlau alawm, Umama thil min hrilh kha a diklo tiraw, mawh a diklo tih sawi teh, nang hian khawi ah mah min kalsan dawnlo tiraw"




Ka tih chuan ka u ang bawk in a ngawi reng a, "a dik a ni maw" Ti sep in ka thu thla dawt a ka tap chhuak hawk hawk
"Engatinge engmah min hrilh loh, nupui i neih loh thu te min hrilh la, heng zawng zawng hi min hrilh la, tinge i hnen a ka lo let leh hi i duhlo em ni" Ka tap hlawp hlawp reng a




A nin ngawi reng in min lo en thung "engatinge engmah sawi i tum loh a, ka hua che" Tih pah in ka chhuak nal nal a, min ko thawm pawh chu ka hre reng, mahse din ka tum lo..




Damdawiin chung zawlah chuan ka chho ka au chiam chiam "engatinge engkim tuar huam in ka rawn haw a, heti zawng hian Hmingmuanpuia nen hian min intawn tir, hetiang lo deuh hian nupio te lo nei zawk se, ka tawrh dan a nep zawk ngei ang, engatinge a chungah tiang hi i thlen tir" Ka aw rawl tawp tawp chuan ka au a, ka mittui a luang tawp hleithei lo





"Naute" Ka hnung lam atang a min rawn kuah tu lam chu hawi in ka kuah let thawk "tinge hrisel tak in i lo awm loh, a theih loh min kalsan theilo ang" A awmah chuan ka tap hawm hawm
Ka hnung ah a lo chul hliau hliau




"Hetiang hian i awm dawn tih ka hriat vang alawm engmah ka hrilh duh loh che, bul lo tan tha leh ta ila, kalsan leh daih si che ila i tuar nasa dawn lutuk, chu ai chuan ka hrilh lo law law che a ni" A tih chuan a hmel en tur chuan ka dak chho a...





"Ka hriat loh a min kalsan i tum amaw, chutih hunah chuan inthiamlo reng reng in hun ka hmang dawn asin, tun atang chuan ka kalsan leh tawh ngailo ang che, ka hmangaih che tun atang chuan engkim min hrilh ve zel rawh, min hmangaih ve tak tak a nih chuan i pang khing ang ah min ngai la, i nat chuan ka na ve tih hre ta che" Ka ti a ka kuah leh nghak thak




"Keipawn ka hmangaih che Naute, ka hriattir loh che avang in ka tihpalh" Tiin ka chalah a hmui lum vung vumg chuan a fawp a


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 11th, 2022, 2:45 pm

LOVE
IN
AFRICA

CHAPTER 16

BY Tluangi Sagy Pachuau





"Naute ka ngai thei lutuk che a, nang lah khan min kal bo san daih si a, i kal hnu lawk khan i u puihna in ka fa a nilo tih kan hre chhuak a, rawn biak che ka tum a, mahse Cancer ka ve tih ka in hre chhuak leh ta si a, i tan phurrit nih ai chuan ka hrilh duh ta lo che a" A tih chuan ka khawngaih tak zet




"Keipawn ka ngai lutuk che, Rebecki nen a hlim tak a in awm tur kha ka hmu thei thlawt lo a ni, ka kal bo dawn khan rawn hmuh leh che ka tum a, , Rebecki nui ri kha ka hria a, ka rawn hmu ta lo che alawm" A awm zawn atang chuan ka ti sup sup




A hun lai a ka rilru nat zia kha ka ngaihtuah let in ka rilru a na thar leh riau pek a, min chhang tawhlo chuan a thaw ham ham




Kan chhuk thlak leh hnu chuan a office ah ka zui lut a "hma te hi thawk tawh mah ta che, in enkawl tha ve ta che" Ka ti hlak hlak, a ngaih sam lutuk hian min ti thinrim, a natna tih dam theih a ni lo te hian ka rilru a ti na, hrehawm a tih ka hlauh vang in ka ti lang lo mai mai a ni




Chhunah lah te khan meizial a lo la zu pawt pawt leh nghal a, a bulah chuan ka thu thla a, a ban a lo phar chuan kuah vat in a awm ah ka bei nghal chial, hetiang hun hi kan tawng leh tawh pawh kha ka ring lo a nia





A taksa ka dai rual hian a lo cher tak zia leh a natna in a ei chhiat ve tawh zia hi ka hre thin, a hriat loh tur chuan ka mittui chu ka hru leh zeuh thin, nghet deuh chuan ka kuah a, a ni pawh chuan min lo kuah ve vat




A tello hian engtin nge ka awm ang, mi pa a ni tur ngaihtuah ringawt pawh khan min ti na a ni a, khawvel ah ka hmuh theih ah a awm ve tawh dawn loh tih ngaihtuah phei chuan ka thawk a ti chham hial dawn in ka hria




"Africa ah khan kal leh ka chak ngawt mai, nang nen a bul kan tanna ah ngei khan" A rawn tih chhuah hlawl chuan a hmel en tur in ka dah chhuak a, a mit a lo chhing chial a, a kut min kuah loh na lam chuan a chal a dawm bawk





"Keipawh ka kal chak" Ka tih sap chuan a rawn meng chhuak riai riai a "kan pahnih in kan zin dawn em ni" A hmel ah pawh chuan a phur hle tih ka hre thei "a chi loh emmai a, thlawhna chuang chi a nilo" Chutia ka damlo chei ta viau chu a lung a awi vaklo nge ni tum vuau chung in a chhing leh ta daih





"Eng nge Hmingmuanpui tum vuau kher suh aw, i damlo reng alawm le" Keipawh chu ka thinrim ve lek lek tep, damlo a ni tih a in hre reng a, in enkawl a tum lo lutuk te hian ka thin an ti rim, han in enkawl ve deuh se, a nunna tlem tal pawn a pawt sei thei deuh ni mai tur




"Pathian in hun a tih ah chuan ka kal ve mai ang, hun a la tilo a nih chuan eng ang pawn lo cancer sawmsarih mah ila ka thi chuanglo ang" A lo ti nghut "a nih si chuan accident na tak tawk a lo kal thin te hi engvang a lo ti dam thin nge in nih" Ka tawngkam chu a vin lam deuh a ni





"Kan lo chhan him thei a nih chuan Pathian in hun a la tilo a ni mai, hun ti se chu a hmunah khan an boral nghal thei" A rawn ti leh, a sawi dik lo chuang bawk silo, ka thinrim lutuk chu thawh san mai ka tum a, ka kut ah min lo pawt in a awmah chuan ka bei dawt





"I thin tih rim tum a sawi ka ni lo, thil nih dan kalhmang ka sawi mai a nih kha Naute, thinrim suh, Africa ah chuan zin leh ang" Ngenngawl zet hian a lo ti a, ka lo chak ve tho bawk si nen "i in enkawl that dan a zir in le" Ka lo tu ve hmak




Hemi hmang hian tha tak a in enkawl tur in ka hmin thei mahna




In a ka haw hnu in Hmingmuanpuia nen kan chungchang engkim ka hrilh vek a, kum thum kal ta a thil thleng zawng zawng te nen, pawi a ti ve viau, Hmingmuanpuia hian cancer a vei tih ka pa pawh hian a lo hre reng bawk



Ka lak ah an lo zep vek chu ni in



Ka sawi ang ngeiin Hmingmuanpuia chu a in enkawl tha hle a, ka u hi a doctor a nia, tunah chuan kei hi a doctor ka ni tawh, ka u bulah a awmdan engkim ka zawt vek a, tunah chuan keimah ngeiin a, damdawi ei dan tur siam sak in a hun thlap thlap ah ka ei tir bawk thin....





A chhungte pawn chutia ka ti thin chu an lawm hle, an fapa luhlul zet in enkawl tha tur pawh a an tih hleih theih loh chu kei hian ka ti thei ta phian si a, ka chungah an lawm hle... A bialnu ka ni tih an hre lehzel phei chu lawm tak an ni





Amaherawh chu a natna kan hrechiang theuh a, lawm famkim chuan kan lawm tlang theilo, chauh thut a nei mai ang tih a hlauhawm bawk si





Thlakhat zen zawn chutia kan in enkawl hnu chuan a hma ai chuan hmuh a nuam ta deuh, meizial a lo zuk thin pawh kha ka sim tir hmak a, a natna nen phei chuan inhmeh lo tak a ni




"Africa ah chuan kal tawh ang" A tih nawn leh chuan ka lo hnial tawh bik lo
Tun hi kan kal hnuhnung ber pawh a ni maithei asin




Zawmna (last)


Africa ah chuan kan awm ta vang mai le, ka hlauhthawn ang ai in thlawhna pawh kan chuang thei phian,,,,




Hotel ah zankhat riak in hman a kan lo kal tawh na thin lam chu kan pan dun ta a, nasa tak nilo mahse thil tam tak ah chuan an hmasawnna hmuh tur a tam ve khawp mai, a nuam em em bawk.





Mipui ho in min lo hmuh chuan min lo la hre ve reng a ni mahna le min lo lawm ve khawp mai a, kan tan tak pawh hian a lawmawm. Hmingmuanpuia thianpa kha a lo la awm reng a, kan han inhmu chu kan hlim tlang em em khawp a, inhmun nei in a lo in bengbel daih tawh chu ni in




"Nupui nei lo a heta chen tar thak hi i tum ami" Hmingmuanpuian a tih chuan nui huah huah chung hian "Emily" A ti vak a, inchhung atang chuan sap hmeichhia hmeltha zet mai hi a raipuar tih hriat tak dul kawh luah chu a lo kal chhuak a




"Ehe nang hi, nupui i lo nei reng amaw, min hrilh ve miahlo lehnghal" Lungawiloh hmel tak hian Hmingmuanpuia chuan a ti a, mahse a lungawilo tak tak lo tih a hriat vang nge ni a thianpa chuan engah teh vak a ngailo, a lo nuih liam san mai mai




Hmingmuanpuia thianpa te inah chuan kan innghat ve tawp a, kan cham chen tur pawh kan hre chuanglo, kan awm peih tawh loh hunah kan haw ve leh tawp dawn a ni mai ang chu




Zanah chuan balcony ah kan thu dun a, ral lehlam khawpui eng ut chu kan thlir dun vang vang, a awm ah ka bei chial a, soul kan bat dun bawk, vawt tak chu a nilo a mahse Hmingmuanpuia hi inti lum se ka duh vang a ni




"Naute ka kalsan hunah che chuan lo tap miah suh aw, i mittui hruk sak tur che in ka kut ka lek kang thei tawh dawn silo a" A tih chuan ka in hum ruh vak "chutiang thu lawilo sawi sawi suh, khawiah mah i kal dawn lo, ka tah i duh loh chuan min kalsan lo la a ni mai" Ka lo ti hmiah...




Sawi zawm ka duh tawh loh avang in thil dang ka sawi pui ta daih, min kalsan dawn tih hi ngaihtuah pawh ka ngaihtuah duh lo, min kalsan dawnlo bawk, khawiah mah a ni hian min kalsan theilo





"Naktuk ah ramhnuai ah khan va kal ila" A tih chuan "khawi ramhnuai ah maw?" Ka lo ti vat "aw, i bo tum a ka rawn zawn hmuhna che kha mawle, tahkhan va kal ang aw" A tih chuan ka lo bu lauh lauh




A duh ang hi chu a chak that lai hian tih pui vek mai ka duh, hun harsa tak a tawh lai in a kiangah ka awm thei silo, ka hmangaihna neih zawng zawng hi a tan hlan vek ka duh, a phu reng bawk





Zing khua a lo var chuan a sawina hmunah chuan kal tur in ka insiam a, "thiana in va bo hloh ange aw" Hmingmuanpuia thianpa in a tih chuan "ka tan a hmun pawimawh tak hi kum tam tak kal tawhlo mah ila ka theihnghilh hoh lo ang, lo thlak danglam pawh nise a awmna hmun pawh ka hai lo ang" Tiin a lo chhang let a




"Engtiang chiah a pawimawh nge a nih a?"

"Ka nun a lunghlu hlu tak ka chhar na hmun a nih vang mawle" Tiin min lo nuih suk, ka lo nuih let ve sak




Chu hmun ngei mai lam pan chuan kan kal ta a, keiin a kawng pawh ka hriat chian tawh loh nen a ni chuan a lo la hre vek chu ni in, kum khati zat a liam tawh a a ni chuan a lo la hre vek a ni, chu pawh vawikhat chiah kan kal lehnghal




A hmun chu a la ngai reng ti ila, thingkung a tam sawt lo chu danglamna a awm tehchiam lo, khatih hun lai a thil thleng te kha mitthla ah an lo lang a, lung te a leng rum rum thei




Hmingmuanpuia chu a rawn nui chhuak deuh hawk "eng nge i nuih a?" Ka tih chuan "i nghal theih zia kha" Tiin a nuih chhunzawm leh, eng nge a ngaihtuah tih chu ka hrethiam ta mai




"Helai hmun hi ka theihnghilh ngai reng reng lo, 'ka hmangaih che Hmingmuanpui' ti khan min zui det det a, khatih lai a ka thinlung hlim zia kha i hre ve hoh lo ang, 'ka duh che min duh ve em?' I rawn tih te khan ka nuih a za bawk sia, ka lawm tho bawk si che a" Ti chuan a phun sup sup a




Kan hun liam ta sawi chuan kan ti ti dun ta char char a, thil hlimawm hlir kan sawi a, thu lungchhiat thlak sawi a in tih lunghnur kan tum lo ve ve, a tumah mah in a natna chungchang kan sawi chhuak lo a, kan in veng thawng tawh a ni deuh ber




"Bul kan tan na, helai hmun leh hun te kha ka theihnghilh leh tawh ngailo ang, nang ka tawn vang che hian Pathian hnenah lawmthu ka sawi mawlh mawlh fo ang" Tiin min rawn fawp ta vawng vawng a




Harehaii!!! A lo tawp fel leh ta,,,, Whatsapp lam in min vo nasa lutuk a Hmingmuanpuia pawh a thi ta lo, tihian thi silo natna dam chuang silo in tawp mai rawh se😅😅

A tir atang a a tawp thleng a min lo chhiar sak avang in ka lawm lutuk e🥰🥰❤


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)