Professor_P aka Professor Poopypants BY Cck Lalchhuanawmi (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: Professor_P aka Professor Poopypants BY Cck Lalchhuanawmi (Completed)

Unread post by Ngaia » September 25th, 2022, 11:58 pm

Professor P
Chapter-7
Ziaktu: Cck Lalchhuanawmi

Professor nena kan inlaichinna hian engtik hun thleng nge a daih ang, damchhung tal a daih ve ang em?
Ni a liam a, kar a liam ve zel bawk a, dam chuan hun hi a lo ral chak ve thin khawp mai, nge ni a ka hlimna hian hun hi kalmuangin ka hre zawk le!
Professor-in tlar hnung lama ka thut a phal miau tawh loh avangin tlar hmasa berah chuan ka thu ta reng a.
Mahse, a nuam phian ka chhaih pah zeuh zeuh thin a, class boring tur pawh a ziaawm deuh.
College ah kan inngaihzawn thu tumah hriat a ni lo a, a ruka thiltih chu lanchhuah hun nei mah se, a hun dik takah chuan a lanchhuah ve mai ka ring.
Achang chuan lainat chin ka nei, mi inngaizawng ve te chu hriat lohsak an hlau zawk ni ngai a, kei chuan a rukin ka duh tlat thung a, a chhan han sawi mai tur ka hre hauh si lo, mahse min hnial bik chuang lo.
Ti hian lecture a pek hun lo thlen tawh hi chuan mut hi ni deuh tawp mai, amah berin mut a phal miau a, bengchheng a duh lo kha ni mai a.
Kei erawh mutsan ka phal teuh lo, lecture pawh ngaihtuah lo lekin amah ringawt ka lo ngaihtuah thin, achangin ka chhaih a, ka chhaih dan erawh mit siai zeuh kha ni leh mai, a che chhe teuh ve thin lutuk hi ka lawmah a tla tlat zel.
" Naktukah test kan nei ang", eng nge maw a sawi tak le!
Mu ho pawh an tho sang sang hlawm mai, mak tih hmel takin ka en ho a, ' i chawh' tih melh hian min lo melhin ka hria, ka thin a van rim tak.
" College tan ni atanga vawiina kan zir chin zawng hi a ni ang, test mai mai tia namnul rikngawt loh tur, punishment pawh a awm maithei a ni tichhe lutuk in awm phei chuan ", min lo la melh zui, min tihchhan chiang lutuk.
Ka va haw tak, test tur khawp thiam ka neih pawhin ka la hre lo a sin le, a chak lo ang.
" Test maw?"
" Kei chu ka mu char char zel sin"
" Zankhata han banai vek tur chule... "
Keipawh chu chu ka ngaihtuah, zankhata thiam vek theih a ni lo.
Faka ka lam panin a lo kal chhet chhet a, " Angaih, enteh maw", a sawi tum ka ngaihruat leh thei mai.
" I sawi leh vaih chuan ka hnek ang che"
"Awle awle, mahse fel over chi... "
" Thlawkbo rawh", tiin ka lo aukhum nghal thawt a, a kat dawr nghal thei.
Mahni lo maha rilru hah ve nak laiin.
Kan professor POOPYPANT pawh chuan eng nge maw a hriat le, tichhe tan punishment a awm maithei te kha ti lehnghal a.
Engtin nge ka tih ang aw... Ka hria e, vawiin tlai chu hnathawk loin chawlh dil tawp ila tha ang, chuan haw nghalin ka zir nghal char char ang a, ka pass thei tho ang.



" Hmai"
" Eng nge? ", ka vin nghek, ka ngei lutuk em mai.
" Lehkha i zir maw? "
"Zir", ka tibul hmuk a," Min lo ti buai suh, punishment hmuh ka duh miah lo a nia aw", ka tihzawm leh a, ka tah te hi a chhuak rum rum, call ka cut daih a.
Zan dangah pawh akhat tawkin lehkha ka zir leh zir loh hriat nan min lo call ziah, call hmangin ka lehkha zir min vil ka ti mai.
" I la zir em? ", ka tlin tawh lo.
" Ka mu", tap pur chungin ka chhang a, zankhata zir vek atan chuan a lulai deuh em a ni, ahma atanga lo inzir ve bek bek tur hi a nia keipawh hi.
" Ngati nge test i tih thut a? "
" Tah kher a tul ami? ",
" Ka haw lutuk che", phone ka dah leh hmak, sual reuh lutuk mai, naktuk khua var lo se ka va ti tak!

" Engtin nge ka tih ang? "Thiam ka nei lo", keimah chauh ka ni bik lo e.
"Okay, ready? ", kan test tak tak dawn!
Ka lam a lo hawi duh thak lo lehnghal.
Tumah chhang kan awm lo reng reng, thiam kan awm lo tlang vek hlawm bawk em a ni.
" Okay... Test kan nei leh lo ang", tak tak, ka va lawm tak! Ka va kuah nghal dawn a mile, insum...
"Yesss", tunge chutianga lo ti chu.
Kan professor ka en nghal vat a, a thinrim leha ka rin tehreng nen chutiangin a awm miah lo.
" Tu nge? ", a àw a fiak tha kel kawl, thinrim erawh a thinrim miah lo.
Faka inthlahrun hmel takin a dingchhuak riai riai a, a khawngaihthlak reuh lutuk.
" Han sawi tha leh teh"
"Yesss", zawi sapin a ti a.
"" A ai ringin"
"Yesss"
"A ai ringin"
"Yess"
"A ai ringin"
"Yesss", a kut a phar chhuak hliai pah bawk a.
A vawilhatna atan kan professor class ah nui ri hriat tur a awm ve ta e, amah tih loh chu kan nui vek, ngati nge a nui ve miah lo le?
" Bengchheng ka duh loh thu leh, in bengchhen loh ai chuan in mut daih pawh ka duh zawk tih ka sawi a, in apply tha ngat ngat bawk a tuna in awmdan kha han ngaihtuah leh teh u
In duh ang thalin bengchhengin fail pawh ni mah ula, kan hlawh erawh a ngai reng, a chhan chu kan duty tha taka kan thawh vang a ni.
Nangni pawhin duty in nei a, chu chu lehkha zir a ni, in duty tha taka in hlen ve hi kan duh ber a ni. In mut daih ai te khan lecture te kha han ngaithla daih ula, ka duhthusam kha apply loin in tan chakai han khawrh zeuh ula chuan tunah hian test pawh kan thulh a ngai miah lo ang".
A va han hmeltha tak! A sawi dik phian lehnghal a.
A tawpa tawpah chuan ka lam pawh a lo hawi ve ta lawm, nui sen senin ka lo melh let a, ka hlim lutuk ringawt. Test thulh vang kha chuan ni lo e.
* lawmman tha tak dawn ka phuin ka hria*
Phu chiang ele, a dawng chiang khawp ang.
* i phu lo, i phu lo*
A reaction dan ka van hre chak tak.
A sawi dik chiah, tun atang chuan kan professor pawh a inchhuan ve lawih theihna tur khawpin ka zirtha tawh chiang viau ang.
Tun atang chuan kan professor pawh a inchhuan lawih theihna tur khawpin ka zir tha tawh chiang viau ang.
Ka bialpa ni ve ta fam chu amahah thik tur leh han ngaihbel tur awm ang hi hmuh zeuh zeuh ka nei ve tan ta tlat.
A bikin Botany lam min zirtirtu, chhelo thei em em, hmaifang pawh dik thlap, miss Mizoram ni awm hiala mawi professor Madiki ah hian.
Kan professor pawh chhe zawk zawk a ni bik si lo, perfect hi ni ve reuh a, smiling face pu ngailo mah se, duhtu hi a ngah tho tho, zirlai te atang hian, kan class atang pawh hian duhtu a ngah thar tawh lutuk.
Chutiang kara kei min duh hi mak tihna ka nei fo, kan college ah hian en tlak lo ve ber hi ka ni ang chu mawle, ka hriselna a la derdep zui! ni lo e; min hmangaih alawm, Lukhum duma a nih lai atangin!
" Kan professor Puia lo thawk ve hi chu a nuam e"
" Amah avangin college pawh hi ka lo kal hram hram"
" B. Sc kan lo zir lo ang tih a hlauhawm zawk alawm le", an nui bawk bawk a, kei erawh arukin ka lo tang ve ul zel, hahthlak hian.
Aaa... a duh duhin lo duh kual vel teh se, tumahin an chang pha tawh chuang lo, keima ta chauh a ni tawh, 'ka bialpa a nih hi' tiin ka hrilh vek law law zawk mai dawn ami le, ahhh chi loh...
"Angaihi chu hmuh tha i hmu chiang, nui ver verna tur hmuh tha chu ka hmu ve duh nia", Lucy chuan a lo ti sep sep a, ka hrilh ve mai dawn mile.
" Engmah nilo", tiin nui ver ver chungin ka chhang a, awih loh hmel deuhin min lo melh a, ka lu ka lo thin khum leh.
" Yes, guys new announcement ", Faka a au lang lang a, eng new announcement tak chu ni maw?
" Tunah hian Lalhriati a single mek a, ka bem nghal dawn, belchhung sa a ni bawk", a va mak thin tak, thutak a nih lo rin ve tawh nak alaiin, Hriati te chu an inthen ni maw.
Classroom chhung hawhaw leh kut beng riin a zui nghal a, ka sawi tawh kha kan class ah rawn lutin min lo belchiang ula, science students an chut tih a dik lohzia in rawn hmu thei ang.
A hlimawm phian zawk, Hriati lam hawi kan rual thup nghal a, kan nui thaw hlawm lehnghal, chutah karah a nui ring fal pawh an lo awm zel tho.
Lo ehemm tliar tliar tawk lah bo lo, hritlang àwmna an nei rual thup hlawm aniang!
" Hriati ka bem che, Tu emawte angin hnawlna ànka ka duh miah lo bawk a nia aw", min rawn en zeuh a, min sawichhan chiang lutuk, kan hmela mai mai chu.
" I uang peih lutuk "
" Min duh ve tho kha" , a mit a tizim sulh a.
"A pui dawn e", tih leh, " I duh ve tho chuan yes ti ve mai la", audience atang beiseina a sang e.
" Yes ti ve mai thin la", an han sa leh kher a, a va buaithlak tak.
" Nang kha ka duh lo che... Kan professor Puia hi ka kherh thlu dawn", Hriati pek chuan a lo ti, " Awwwww", an ti dual a, " Faka a pawi miah lo", athenin an lo ti bawk.
A la nà teuh lo, fiamthu mai mai a nia. Maw! Hriati khan tumaw a kherh thluk dawn?
Ka va thinrim tak, tuna mi kha a fiamthu nge, ti tak tak lo se ka va ti tak. A fiamthu mai mai aniang, hahdam deuhin awm tum zawk ang.
Mahse ka thei lo, tumahin kherh thluk lam an la sawi ngailo sin le, ka mood off phah vek dawnin ka hria.
*Cafe ah kal rual ang, campus pawnah ka lo nghak ang che*
Yea, a va nuam tak, kan professor hnen atangin, ahhh nuam lutuk...
Mood on leh vek!
Bang thuai thuai ang u...

Ka hmu e, bolero dum a nei a chu chuan college a lo kal thin a, min thlah erawh chuan taxi ah a lo chuang ve mai zel.
Muangchangin ka pan phei a ka ke te hi an khurin ka hria, va tullo tak. Ka mi hmuh avangin ka ding dawt, professor Madiki 'n min thlen khalh!
A banah chelhin a nui sen sen a, eng eng emawni hi a sawi a, professor chu bu nghutin professor Madiki chu motor chhungah chuan a lut zawm a.
Ka phone a lo ri nghal, ka han en chuan professor a lo ni," Sorry, ka lo thlah haw zawk mai ang che ", ti supin call a cut nghal daih, engmah ka sawi hman lo.

Hnathawhnaah pawh rilru ka pe theilo, ka chesual reng mai, ngaihdam pawh ka dil hnem malh malh e.
An tihtur ringawt ka ngaihtuah, eng nge an tih ang a, engthil nge an tih ang, lo inenglo ang ta sela, ahhhh chutiang nilo ang, ka rilru buai.
* Sorry, ka lo thlah thei dawn lo che *
Tih zawng message a lo thawn leh, call pawhin min hrilh ve thei tho sia.
Min lo call hman lo tur khawpin engthil nge thleng ang le, professor Madiki nen hian an lo inkawp reng te hi ni lo maw le!? " Sorry, titau tawh lo la, please.. ", ka en reng a, a inthiamlo a ni tih a hmelah pawh a lang.
A call leh message pawh ka chhang duh lo a, a class ah pawh ka mu daih, nimin lama a awm dan vangin a ni ber, tihtauhna tur khawp a nih chu hrelo mah ila, ka titau duh tho tho.
" Professor Madiki nen eng nge in tih?"
" Damdawi inah ka thlah lawk alawm, a pa hi doctor a nia, tlawh kawi lawk a duh a"
" Chu pawh nise", ka thaw hrawk a," Min thlah hman tho chu", ka hnuk a ulh dawn tlat, tum loh deuhin ka tap ang tih ka hlau.
" Ahma pawhin thlah hman loh chan che ka neih tho kha", ka va ning tak, tun tum chu a dang alawm le.
Dining chair pawt chhuakin ka bulah a lo thu a, " Sorry lutuk titau tawh suh, Madiki ka thlah zawh khan in lamah buaina kan nei leh sia", chungte chu sawi ve tur a nia, eng buaina tak ni maw.
" Kan tha tawh em? ", ka lo bu zeuh a.
" Le, nui tawh rawh le", amah pawh nui duh mang silo hian nui turin min ti ziah.
" Awle professor, P...", ka lei ka seh zeuh, sawi kher a ngailo sin le.
"Good ", ti sapin mi rawn hnaih a, min fawh a tum lai takin cooker a rawn phit!
Ka nui chhuak hawk hawk a, " Va hun lo tak", ti hlakin a tho tuah tuah a, pum dawm meuhin ka lo nuih, a hun lo ve em bawk a ni.
Tihian min thlah zan hi chuan ei rawng min bawl sak ziah, a thiam em em mai lehnghal, ka ei teuh zel.
Fridge pawh a ruak huai tawh lo, chaw pawh duh hun huna chhum theih turin buhfai pawh a awm thlap tawh.
A thleng sil lai chu ka va kuah a, a palian ve reuh si a, a han che vel te hi hmuhnawm tham tak a ni.
A hnungah ka bei hle hle a, min awi ni awm ang hrimin a insawi dat dat a, chutah a kut vawt lutukin min lo vuan a ka phu chiang teh e!
" Hmai"
" Umm"
" Tunah hian ka hruai haw daih ang che, i duh ang em? ", eng nge maw a sawi le, hruai haw maw?
" Hmai? ", zawhna mitmeng deuh hian min melh a, chhan dan tur ka hre lo, ka hamhaih vek lawm.
" Awi chutiang te chu... te chu... ", sawi dan tur ka hre tawh lo, hruai haw chu ka duh tak tak em?
" Hmai? ", a ti leh, engtin nge ka tih tak ang.
" Chutiang a ho ", inchung lamah ka tlan chhoh San daih a, min lo umzui nghal tih ka hre thei.
Inhruai haw rikngawt, graduate ve phawt te ka duh a. Lawkin, inhruai haw ta ila chumi awmzia chu inneih tih nen a inang reng dawn, inneih puiah min sawm tihna mile?
" Hmai"
" Min tiphu lawm", ka lo ti hlak a, ka inthiamlo leh hnuhnawh.
" Thu teh", khumah min pawt thu a," Ka fiamthu nih kha, lehkha zir tha la, tha taka pass chhuah i tum zawk dawn nia", ka hre ve tho lawm, a lo fiamthu lek, inneih te chu a duh lo mile, ka ngaihtuahna tak hi chu.
"Awle", ti sapin za vak lo in ka nuih a, khumah chuan min tlukpui leh riai riai a.
" Lehkha zir ka ngai"
" I chhuanlam a ho "
" Reilote chiah ni mai", a tihzawm leh a , ka va ngei tak, lehkha tha taka zir turin min tizo chiah sia.
" Tunge tha taka lehkha zir tura min ti tu kha? ", a tawp chiang teh e.
Tho tuah tuah chungin kawngkhar lam a pan a," Pass chhuak vat ang che, inneih hunah chuan eng ang pawhin duh lo sateh mah la, awmzia awm chuang lo ang", a chhuak nghal vang vang.
Inneih hunah tih a sawi, a duh ve chiang, ka um thla nghal vat a, kawngka lo hawn a tum lai tak.
" Professor P", P tel kher ngailo sin le, nui sang chungin a ban ka va chelh a.
" Inneih maw? ", tiin ka zawt a, " Chutiang ka sawi lo re re", a va han sual tak a sawi reng sia.
" I sawi"
" Ka sawi lo", a la ti talh, pawi tawp lo, ka hrechiang tho lawm. " I pha thei lo ang, i sawi tih ka hrechiang lutuk", ka tum deuh hmuk a.
" Ka sawi lo", a va hahthlak tak, ka tum rei thei chuang lo a zak ve deuh ni chiang.
Nui saihin, " I.. ", ka ti chiah tihah, " Awle ka haw dawn, lehkha zir ang che ka lo call dawn che nia", tia min rawn fawh leh kal a rual nghal a, a sawi chiang alawm.


Vawiin chu ka nui tawp theilo, ka khi sung reng mai ni, ni dang zawng aiin ka hmu tha tlatin ka hre lehnghal.
A class hi nileng hian ni se ka va ti tak, tia thlir reng mai hi ka duh, ka thinlung zawng zawngin ka hlim, ka hmangaih kawisawi kual nuai vel vek mai.
Rawng dum hi a ngaina ve hrim hrim nih dawn hi, mahse a inhmeh lutuk tlat. Mit siai te hi ka zei tawh lutuk tlatin ka hria hahaaa.
Ka hmu sual chu a ni em lo maw! Aw Lalpa leh! Professor P saw a nui. A nui chiang lutuk. Ka lam hawiin a lo nui chiang lutuk!
Classroom atanga a chhuah dawn khan lo lehhawiin a nui chiang lutuk, ngati teh thut nge le?
"A ni chiang lutuk", dawhkan ka chum leh chawrh, va hahthlak tak.
Lucy lah chuan thophang tih hriat tak hian, " Eng maw? ", a lo ti, ka hrilh phal teuh lo, engmah a nih thuin ka chhang leh a.
" I awmdan hi a mak thei e", chik deuhin min la en vung vung zui.
" I ho", tiin ka hawisan daih a, nia mak deuh deuha awm chang lo nei pawh ni ila pawi ka ti lo, ka hlim em a ni.
A tawpa tawpah kan professor Poopypant pawh a nui ve ta lawm, nizan lama inneih tih vel kan sawi vang kha ni ve chiang mai.
Ka seat ah chuan ka thu leh vang vang a, ka hlim lutuk hi ka à zawk dawnin ka hria, a nui hmel kha ka ngaihtuah leh vang vang a, a va tha chiang tak!


*** HAN NGAIHTUAH VE TEH MAH KAN THINLUNG THLENG PAWHA KAN HLIMPUI THIN TE HI A LO HO VE DUH THIN KHAWP MAI ***


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 25th, 2022, 11:58 pm

Professor P
Chapter-8
Ziaktu: Cck Lalchhuanawmi

Kan professor nui hmel hmuh tluka hlu hi a awm thei dawn em ni?
Hlimna ka chhar hi engmaha thleng ka phal lo, nangni pawhin in phal ka ring lo. Professor Madiki han thik zeuh zeuh chang ka neiha kan inthlem leh zeuh thin tih loh chu intihthiam lohna a hranpain kan nei ngai lo.
Ka zirlaipui ten an lo star a, an star thu an sawi pawhin pawi ka ti lo, cafe a ka thawhpui Remi pawh khan a star ru ve chiang lawm, engahmah ka ngai lo vek.
Mahse kan professor Madiki kher kher hi chu en liam mai mai har ka ti thei tawh lutuk. Ahma pawhin an inbe lum lam thin tho a, keipawhin ka hmu fo, kan inngaihzawn tak hnu hian namnul mai mai chu ka ti thei tawh tlatlo thung.
Amah avangin ka tihtau khum ziah a, dawhthei takin min hrilh zawk thin a, kan inthlem lungawi leh nge nge zel.
Inngaihzawnna kawnga ka vawikhat kalna a ni a, ka hmangaih angin amah pawhin min hmangaih a, kan inkar hi tluang zel turin ka duh.


* ngatinge i tah *
Ka hre bik lo, nizana thil thleng ka la lawm lutuk vang zawkte pawh niang.
* nakinah ka hrilh dawn che nia *
Kan professor pawh ka hrilh chak tawh lutuk. Ka thlakhlel thin em em leh awh thin a thleng ta si a.
* ka thlah hman loh leh che vang kha a mi, sorry *
A va tha chiang tak, mahse min thlah hman loh vanga tap ka ni lo, ka mittui hru zeuh a hmuh avangin a inngaihbel a ni hrim hrim.
* campus pawnah ka lo nghak ang che, cafe ah kan kal rual tawh ang *
A lo thawn zawm lehnghal, a ngaih a thalo hle niang maw, keipawh hi inngaihtuah lungpuam lo tur a nia aw...
" Sawi tan rawh le", nangmah vang ka ti talh dawn mile, ka kut a lo chelh a, "Madiki chungchang leh em ni? ", tiin min zawt leh a.
Ka sawi dawn a ka thei mai lo, eng emaw hian min hnawh tun mai," A ni em?", ka lu ka thing nar nar a, kawng sirah motor a tiding a.
" Khawmaw i tarmit hi", tih leh lak thlak a rual nghal a, kei ka mittui a lo tling piau hman chu niin.
" Hmai eng nge ni ta, i hnathawhnaah buaina te i tawk ami? ", dam dup hian a ti a, va hahthlak tak, ka lu ka thing leh a," Ih... Ih...", ka ti chhuak tiau a.
Nizana cafe atang ka haw chu kan in lo eng phet hi ka hmu a, keimahin ka hawng hmasa ziah thin kha a ni si a, ka nu leh pate an haw hun a ni bawk si lo.
Mak ti takin inchhungah chuan ka lut a, chuta ka mi hmuh te chuan min thawng lutuk ringawt, ka nu leh pate chu sitting room ah an lo awm vang mai a.
Ka nuin min lo hmuh veleh chuan min lo chhawn vat a, ka pa pawhin min lo chhawn vat.
" Angaih i lo haw tawh maw, i ril te tam em, i pa nen chaw ei turin kan lo nghak che a", dam diai hian ka nuin a lo ti a, kei erawh ka ding khawng reng, mak ka ti em a ni.
Ka pa pawh a lo inrawlh ve vat a, " Ka fanu pawh hriat loh karin i lo nula uai tawh mai ka ti, titeh bawihte, han intifai la i nu nen chaw ei kan lo siam ang e", choka lam a pan nghal a.
Ka nu chuan, " Ni e, han chho tawh", min nawr kal det det pah a, choka lamah a phei ve nghal a, inchungah ka chho ve nghal mai bawk a.
Eng tak chu hria ni maw, hriat loh karin ka lo nula hman amaw huh, Angaih maw, bawihte maw, i pa nen, i nu nen maw, eng thil chiah nge thleng hi le.
Kan pathum chuan dawhkan kan kil bial thap mai, tunah hian lawmin ka zuang tawr tawr mai dawn em ni ang?
" Tunah chuan chhungkaw kimin chaw kil ho thin tawh ila, zing leh tlaiah pawh. Bawihte nangpawh zing lamah hnathawkin chhuak tawh lo la, i duh chuan tlai lam chu i thawk thei ang a
I nu nen pawh hnathawh kan àm lutuk tawh lo ang a, kan inhmu tam hmanlo ang bawkin kan inbe tam mang ngai si loa, chuvang chuan tun atang hian chin dan thar te hi i tan tawh ang u", ka pa chuan a ti dat dat a.
Ka nu pawhin, " Ni e", tiin a bu nghauh nghauh pah a. Kei erawh ka ngawi reng thung, awmdan tur ka thiam thaklo, mi thar ni maiin ka inhria, ka hnuk a ulh tun mai bawk.
" Tukin pawh kha ka nu chuan kal lo turin min tia, mahse vawiin chiah ka kal tur thu leh tlai lamah chauh ka thawh theih tawh tur thu hrilh pahin ni mai ka tia", min en reng a, ka mittui a hru zeuh zeuh pah bawk a.
Mahse, ka lai tlat, ka nu ka pa tia koh ka harsat tawh lutuk, thawklehkhata inkoh thut atan chuan.
" I hlim em? ", tiin min zawt a, " Ka hre lo", tiin ka lo chhang let a. Ka hre lo tak tak a ni, lawm chu ka lawm ngei, hlimna leh lawmna hi a inang a lo nih chuan ka hlim tihna a ni mai.
" Kei chuan hlim reng turin ka duh che", ka kut la kangin a fawp zeuh a," Ka hlim reng i duh chuan min thlah ngai suh ang che", a kiai suk a!!!
Mahse, ka ngaihtuah let hian an ngaihzawngte kha engtin nge an tih ang le, chhungkaw inngeih tak angin kan awm tan tawh dawn chu a nia, a der mai a nih loh hram ka beisei.
Chutah a phone chu a lo ri a 'big sis' tih hi a lo nia, loudspeaker ah a dah a, " Aw ka u", a ti chiah tihah mipa pakhat hian, "Puia hmanhmawh deuhin lo kal vat teh, I u Faki hian nau a vei ania damdawi inah hruai vat a ngai", a lo ti lang lang a.
" Aw ka lo kal nghal"
" Hmai min rawn zui ve duh em? ", ka lo bu nghat a," Invuan nghet rawh aw", tih leh chak deuha tlan a rual nghal, cafe ka hmu phe zuai bawk!
Zonuam lamah chuan a tlan zel a, mak ka ti lutuk ringawt veng inhnaih takah kan lo awm reng zawk a ang tlat, in lian ve tawk tak pakhat kawtah chuan ding chawtin a tlanchhuak nghal a, keipawh ka chhuak ve nghal.
U Faki chu a pasal ni ngei turin a lo pawm chhuak a, a samah a tham nawk nawk a, " Min dim ve deuh teh", a ti khut khut a, " Chutiang sawi suh", u Faki chuan a ti hlak a, an hmuhnawm reuh lutuk, an hnungah chuan naupang pahnih hian an lo zui ve bawk a.
Motor chhungah chuan an dah a, professor chu ka lam lo hawiin, " Hmai naupangte hi lo awmpui lawk mai ta che, ka lo let vat ang", a ti a, a lut nghal a.
U Faki pasal chuan, " Nang hi maw Hmai chu? ", min lo en nghal vat a.
U Faki pawh chuan thaw hluam hluam chung hian, " Hmai chu maw i nih? ", a lo ti ve bawk a, professor hian min sawi thin a ni chiang mai, " Aw ni e", tiin ka chhang a.
U Faki chuan a pasal samah a tham leh nawk nawk a, " Puia kal vat mai teh", a pasal chuan a lo ti a.
" Awle, Hmai lo awmpui lawk mai rawh aw", ka lo bu leh zeuh a.
" Professor P, smile... ", a nui duh thaklo, tunlai chho hi a awmdan hi a mak riau, rilru hahna eng emaw tak a nei a ni ngei ang.
Mahse ka han ngaihtuah takngial a ka hre thei mai bawk si lo, u Faki pawhin an fa pathumna tur leh a tu pathumna tur tunah a pawm leh mek a.
A tute pahnih lah an lawmawm em em mai lehnghal a, a u zawk hmeichhia a ni a, kum ruk ni tawhin school te a kai ve tawh a, a nau chiah erawh mipa a ni thung a, kum li mi niin school erawh an la kai tir ve lo.
U Faki pasal pawh mitha tak a ni a, tin a nu leh pate pawh. Vawikhat chiah ka la hmu vek, an naute thar tih loh leh professor te in hi.
Zonuamah an lo awm reng a, veng inhnaih tak kan lo ni reng. U Faki pasalte inah zawk khan nia kan kal, anni pawh khatianga awmthei ve thei tak an nih phei chuan professor te in hi ka hmu chak lehzual.
Mahse ka sawi ngam teuh lo, a hun ka nghak zawk mai ang e.
" Hmai", a tawngchhuak ve hram e.
" Aw sawi la", ka lo ti var, ka thin a phu dut dut mai.
" Naute i la hmu ve lo tiraw kha? "
" La hmu Nang, mipa a ni tih chiah min hrilh kha, chuan kan Inkawm tui lai hlawmin min hawpui daih bawk a nih kha", titau deuh titihin ka sawi niap niap a.
Min lo en zawkin a khi deuh sung a, "Ka nu leh pate khan kan inah rawn hruai tur che in min ti a, chuan ka tute pahnih pawh khan an ngai tawh khawp mai che", muang cher chawrh hian a ti khar khar a.
Ka khi deuh ver ver, ka lawm lutuk ringawt, ka zak ve deuh tho bawk, ahhhh a nuam lo e, engtikah nge kan kal leh ang aw.
" Keipawhin ka ngai ve khawp mai"
" Tak tak maw?", nui saih chungin lu ka lo buk khum a.
" Chutih chu ka hruai tawh lo tawp ang che", a va han sual thiam tak.
" Engvang ngawtin, ka ngai ve a ni mai a, bakah khami ni atang khan kan la inhmuh leh miah lo hi", ka ti niah niah a, engtin tak min chhang ang maw.
" Kei niloin ka tute i ngai daih a"
" Nui suh", a ti hlak a, a titau ve deuhte hi niang , a ni chiang mai.
A biangah va piai nawk nawk pah hian, "Ka professor duhawm em em lutuk mai hi ka ngai ber che , tunah pawh hian ka bulah awm mah la ka ngai ber tho che", ka nui hawk hawk pah a, a tawpa tawpah a nui ve leh ta nge nge e.
" Cafe ah chuan ka lo lut kawi tawh lo mai ang zanin pawh ka hman lo ang sorry", awle pawilo.
" Chuan naktuk kan lenchhuah dawn kha aw", ka hria lawm, kan invai liam ta e.


" Thlasik engtik laiin nge kan lo chuankai hman a", ka then deuh sulh a.
Hahthlak tih hmel deuh hian a thaw hrawk a, a ni ve lah tak a kan chuangkai tih pawh ka lo hre reng reng hleinem, hun hi a van lo kal chak tak!
" Thawmhnaw lumte pawhin i inthuam tan ve tawh hi maw", vawt ka ti satliah maiah ka lo inngai a.
Ka lengchhuak ngai si lo a nuam ka ti lutuk ringawt, ka kal duhna apiangah min hruai zel a, ka duh apiang min leisak tur thu a sawi bawk.
Duh ka ngah reuh lutuk, ka leitir teuh ang.
Kawngsira eitur an lo zawrhte a tui hlawm phian, secondhand ka han thinpui tak tak mai nih kha!
T-shirt pathum, polar kekawr pathum, sneaker pakhat ka inleitir a, a bak chu MC ah lei tur a ti tlat a, min kalpui nghal dawr dawr bawk.
Elevator atang second floor ah min chhohpui a, ka la chuang ve ngai si lo, ka ni nghulh mai, ka lu te hai dawnin ka hria.
Professor kut ka hmer ngawt ngawt ni ber, ka luak a chhuak dawn teinn ka hria.
Kan chhuak chiah chu inhaler min hip tir nghal veng veng, ka thaw huai mai bawk.
Pheikhawk lum, puan bih tur pahnih vel, bag te min leisak leh tho, a inthlahrunawm duh reuh tak tak a ni. " Zaninah Vellore ah kan kal dawn a", ka thil ei lai ka tawp chat, ka en nghal vat bawk a, plate-a eitur awm chu a chawk let a chawk let a.
Min lo enin, " Nakum daihah kan lo haw chho maithei a ni", chutiangte thleng thleng chu.
" Ngati nge a? ", min hnawhtu a awm leh tlat tawh.
" Inentir tura kal a ngai a, ka nu leh pate", eng nge maw a sawi tak le.
" An damtha maw tia"
" Nia", chuvang ni ngei ang, a rilru pawh hah ve tur tak a ni, ahma te pawha min hrilh ve tur alawm le aw, amahin a lo tuar ngawt ngawt mai a.
5d en ve ka chak tehlul nen a phal tlat lo, thawhah lo ang pawhin ka insawi thei tho sia. (5d en phalloh zingah khan thawhah neite kha an tel em kha aw ka chiang chiah tawhlo)
Kut inkai rialin kan han kal vel a, zahthlak reuh e, mahse nuam bawk si.
" Coffee kha lo nghak la, garage ah ka lo zu chhuk chhung ang e, ka inkhai bawr tawh em mai", kiai sup chungin a kal a, coffee kan ti deuh reng mai nih hi.
Garage-a ka thilhmuh lam pan chuan ka tlanphei thuai a, professor chuan khur der der hian tui a lo in khawlh khawlh a, damdawi hi a lo keng bawk a.
Phihthlak sakin ka kuah bet thlawp a, a taksa khur ru der derte pawh chu ka hre thei.
" Professor tiang kha chu ti tawh suh, keimah vang tal pawhin, khawngaihtakin ti tawh suh aw", ka àw pawh a khur hlawk hlawk, ka hlauthawng em a ni.
" Hmai", min kuah nghet lutuk a àw a khur telin ka hria, " Pakhat chiah, pakhat chiah ni mai", ka kuah nghet zual sauh.
" Ka remti lo...ka hmangaih che, professor... Upui", tap hlawp hlawp chung hian ka ti a, a kut khur hlawk hlawk chungin ka mittui min hruksak a, a chal velah te chuan thlan a bawl tiam tiam mai bawk.
" Hmai... Keipawhin... Ka hmangaih lutuk... Che... I bulah... Awm reng ka duh.. "
" Keipawhin ka duh, chuvang chuan i awm reng theihna tur chuan hetiang hi ti tawh miah suh ang che".


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 25th, 2022, 11:58 pm

Professor P
Chapter-9
Ziaktu: Cck Lalchhuanawmi

Kan professor hmel hmuh tur awmlo achin chu college pawh a ruak huaiin ka hria, professor aia lo kal lah hi a strict reuh lutuk a, a hrehawm lamah a kal zawk.
An tha zel erawh a lawmawm lutuk, mahse ka ngai vawng vawng mai, mobile phone te hi a awmlo ang tih a hlauhawm zawk lawm le, video call te phei phei a tangkai dan hi.
" Kan professor Puia kha a ngaihawm in ti ve em? "
" Ti e, tuna mi hi chu... a inla eng emaw vel lutuk a ka mil thai lo"
" Lo haw chho vat vat tawh se aw", keimah baka nghakhlel an awm dawn mi? A tha tho e, midang pawhin an nghakhlel ve hlawm tho a.
" Nakum daih niin ka hria chutah chauh chuan an lo haw chho dawn an tiin ka hria", thil lah hi an hre thei hlawm bawk sia aw.
" Urlawk zan hmanpui a chakawm sin le", ka va ngei hlawm tak, " Kum hlui thlah zan lam te pawh", an ti leh ta, eng nge maw an sawi niap niap hlawm le.
Chutiang fiamthua sawi chi pawh ni lo, rilru na tawk te kan awm thei tih hriat tur nia, ka va ngei hlawm tak.
" Chutiang ngaihtuah su, professor Madiki bakin a hmanpui thei teuh lo, nangni chuan in changpha lo hrim hrim ", Faka pawh chu, a la nui huah huah zui.
Eng nge maw an hriat hlawm le!
" Hemi te pahnih hi chu an inhmeh ve chiang alawm", an inngaizawng ni ang hrim a.
" Professor Madiki pa hi doctor a nia, kawng tam takah chuan a pui thei ve ngei ang", a nih chu.
" College pawh kan chawl tep tawh si a, chawlh hun chuan a chhuk thla ve daih lo ang maw? ", engvangin nge a chhuk thlak ngawt ang a.
" Tihhuk lamte an hnaih tawh hrim hrim ang ", a nuihzatthlak lem loh khawp mai.
Ka tuar thei tawh lo, sawirem an tum ringawt, classroom atang ka tlanchhuak a, lecture min pe tura kan class rawn pan mek professor chu tawkin ka damsam loh thu ka hrilh a, a chhanna pawh nghak loin ka tlan leh vang vang.
Kalna tur ber pawh ka hre chuanglo, professor nu leh pate damloh naah professor Madiki pain a pui ve ngei nih chuan kan professor te pahnih pawh an inhre tha em em ang a, inlaichinna te an lo nei ve tawh zawk hial ang em?


Ka mit a thip ur mai, ka lu lah na bur bawk si, ka hrawk vel pawh thip lutuk, nizana thlifim ka hip tam vang ni chiang mai.
Phone ka en chhin chu kan professor hnen atang call leh message a lo tling teuh mai, nizanah ka chhang duh lo a, silent -a ka dah daih, college-a an thil sawi khan ka ngaihtuahna a tikal thui em a ni.
Khum atang pawhin ka la tho peih lo, a vawt tawh bawk si bakah ka nuamsam chiah lo tawh bawk si nen.
Ka nu a lo lut a ka pang te a han dek a, damdawi min eitir nghalin rei vak loah ka pa pawh a lo lut ve nghal a.
Ka pangchang zual sawtin ka hria, lungchhiatnain min tuam lehnghal!
College kal pawh ka phur tawh lo, thil nilo pui pui ka hre leh ang tih ka hlau. Ka mit ka chhing diar diar a, muthilh vang vang ka duh hrih.
Ka tuihal chuan min tiharhin ka han meng deuh siar siar a, ka nu tawng ni ngeiin ka hria phone-ah tu emaw nen an inbe thawm ni tlatin ka hrie bawk.
Ka han thuchhuak a, ka nuin min lo hmuh chuan min lo pan vat nghal a.
" Angaih i harh tawh maw, engtin nge ni ang aw, office lam an buai lutuk a kal ngei ka ngai si a"
" Pawilo kal rawh ka tha mai ang", ka ti muang ban chawrh a.
" Awle ka lo haw hma ang, i pa pawh haw hma turin ka chah kha", ka lo bu zeuh a, nilengin min awmpui ve se ka ti ngawt mai.
" Takah, professor poopypant tih kha niin ka hria a lo call che a, i dam that loh thu ka hrilh kha aw, chuan college lam pawh ka hrilh kha", a chhuak nghal vang vang a.
A ngaite bawkin dam that loh niah pawh keimah chauhin ka ni leh ta, professor tal chu awm se aw...
Ka nuin a hrilh a nih chuan ka damthat loh thu a hre ngei ang a, min ngaihtuah ve viau ang em le? Ka chalah hian eng emaw awm tlatin ka hria, ka kut tihchet ka tum a ka thei derlo, a rit nulh mai.
Ka mit ka meng siar siar a, ka dang a ro hulh mai bawk ka tuihal takzet a ni.
Thaw ri sat sat hi ka hria a, muang changa ka ding lam ka han hawi chu, engtik laiin nge ka mittui a tlak hman ka hre lo reng reng, a luang ngiai ngiai a!
Professor hi a lo mu ve reng chu niin, ka kut rit nulh ka tih pawh kha a lo vuan zawk hi a lo ni a, ka chalah pawh chuan towel hnawng chap hi a lo awm zawk hi a lo ni.
Ka en reng a, a muttui hmel em em mai lehnghal. Ka hmuh lohna a rei tawh vang nge mawni ka hmu cher kàk mai, damdawite kha a nghei hlen ve ta ni ngei ang, bakah a rilru hahin ngaihtuahna a seng hnem dawn lutuk.
Min vawnna chu ka tiche dat dat a, koh ka tum a ka àw a chhuak tha hleithei tlatlo.
" Pro... Professor ", ka ti thàm chhalh a. A che eih lo, a muhil siai siai lai chu tihharh ka duh lo ta zawk a.
Ka chala towel chu la thlain, tihharh hlau tak leh muangchang hian ka tho a, a bulah chuan thuin a biang vel te chu ka chul heuh heuh a, ka mittui pawh ka dang theilo.
Rawn che tual taulin mak tih hmel deuh hian a rawn meng chhuak hliai a, " Hmai i tha maw, ngati nge i thawh a, mu leh rawh", tih leh ka chal rawn deh a rual nghal zat a.
" Ngati nge i va cher em em ve, chaw te i ei tha lo em ni? ", insut hlawp hlawp chung hian ka lo ti let a, ka àw pawh a chhuak thei tawk.
" Lo kal teh", ti sapin min kuah a ka lo kuah let ve vat.
" Ka ngai tawh lutuk che a", ka pangchang chak tlat, bakah ka ngai ve tawh em a ni.
" Keipawhin ka ngai lutuk che", nghet takin ka kuah leh sauh a, ka dam nghal sawng sawng bawkin ka inhria.
Ka tuihal thu ka hrilh chuan min mut thattirin tui bottle la tur in a tho chhuak a, a lo let leh chuan min intirin min muttir leh a, a kut pahniha innemkhalhin min en chhuk run a keiin ka en chho ha ve thung.
Achangin ka biangte a chul heuh heuh a, " Ka ngai lutuk che", a tih loh leh, " Hmai ka hmangaih che", a ti pah reng a, ka lo chhang let ve vat zel.
" Ngati nge i lo chhoh a? "
" I nu khan i damlo tih min hrilh a ka lo hlauthawng hman lutuk a, ka lo chho ta nih hi, i dam that veleh ka chhuk lehnghal ang"
" Aih chutiang a ngailo chhuk leh vat zawk rawh, ka tha tawh lutuk alawm"
" Tak tak maw? ", awih hmel vaklo hian a ti a, ka that tawh thu ka lo hrilh leh.
" Vawiin pawh hian chhuk thla leh nghal mai rawh", a nu leh pate kei min ngaihtuah vangin a lo chho san a ni a, zahthlak zawk.
Mahse, chhuk leh nghal tur in ka ti na a, la awm reng mah se pawi ka ti miah lo sin, a nu leh pate ka ngaihtuahpui erawh chuan chhuk leh nghal vat tur in ka duh thung si.
Ka thiam ang tawkin ka han hrilh ve a, a pawm ve ngei e, airport lam a be leh nghal vat a, zan dar ruka chhuak tur ah seat pakhat chiah chiah a lo awm a, a vannei phian.
" Ngati nge call leh message i chhan duh loh? ", tiin min zawt a, professor Madiki nena an sawi dante chu hrilhin,
" Ka thik lutuk a", ka tichhuak tiau.
" Va buaithlak tak", rawn kun hniamin min lo fawp zat a, inlasawn leh vatin, "Thik thu kan la nei pawh a tha e", ti leh sapin min fawp leh vang vang a.
Rawn inthawlh lut leh nghalin blanket chuan kan inkhuh hlun ta mai.
Min fawp leh zat a, keipawhin ka chhang ve vat, kan inchuktuah leh ran tawh, a kut pawh ka kawr chhungah duhthawh tak leh a duh ang zanin a tinghal a.
Dam thalo ka ni tih lam reng a ngaihtuah lo a ni chek ang chu, min dimlo mah mahin ka hria, thawmhnaw inbel ka nei pawhin ka hre tawh lo!
Ka nghawng leh àwm velah a hmui a tinghal leh tiam tiam a, ka hmui a rawn chuktuah zeuh zeuh, chutiangin a kutpawh a tinghal tha em em bawk.
Ka rilru a nu tan leh riai riai a, a taksa tang tun pawh chu ka hre thei, a kut ka chelh vat a, ka beng bulah thaw ri hluam hluam chung hian, " Ka tiam a che, engmah a thleng lo ang, min ring rawh", a ti a, a che lehnghal!
A dik, a tiam ang ngeiin engmah a thleng lo leh ngei ang, mahse pakhat zawk zawkin ràl ven erawh chu a ngai reng, chu chu keimah ngei ka ni.

*** After 3 months ***

" Ate, pua "
" Ka fapa hi a mutchhuak tawh maw", ka fapa Peka chu ka paw nghal zat a, tunah chuan Lunglei Venglaiah ka u Zualtei te bulah ka awm tawh a.
College pawh L. G. C -ah ka chhunzawm, kum a thar rual rualin k'u Zualtei te rualin ka phei nghal a.
Tin, ka nu leh pate pawh an inthen fel ta e, a dera nun kha chu an thei thlawt tawh lo nih kha.
Khang thla thum hma lama thil thlengte kha mangchhia mai nise ka ti thin. Tun thleng pawh hian theihnghilh chu harsa ka la ti, duh lo viau mah ila.
Bathlarah chuan ka fapa chu ka awi dat dat a, thla eng no nghelh chu ka thlir vang vang a, tuna ka rilrua lo lang hi lawm paih bo daih ka duh thin chu, mahse ka thei si lo.
Professor kha urlawk zan ka hmanpui ngei lawm professor Madiki'n a hmanpui lo, keimah nen ngei kan hmang, k'u Zualtei te nen, Faka khan a sawi diklo chiang alawm.
Mahse, 31 zan min hmanpui leh tiama Vellore lama a liam leh khan... Ka lo hre lo em a ni, lo chelh tlat zawk tur hi ka nia.
31 zanah nghakhlel takin ka thlirin ka nghak reng a, ka phone pawh kha lo en lo tur hi ka nia...
Ka thil hmuh leh hriat khan kan professor-in min kalsan ngei a ni tih an ti chiang si!
Urlawk zan kha ka tana chhinchhiah tlak tak niin, 31 zan erawh lungngaihna, kum hlui a nih ang ngeia nghilh vek tur ka nih laiin ka nghilh thei si lo.
Professor... nilo upui, i telloa kal ve bek bek hringnun hi lo thlir teh, a ruak huai a sin, a awngrawp zo ang tih tunah chuan a hlauhawm ta!
Ka ngai che, ka ngai lutuk che, ka hmangaih che a, ka hmangaih lutuk che, lo kir leh hram la tiraw, mahse i thei tawh si lo, kan inkar hi a hla tawh em a ni.
Ka la hmangaih reng chein ka la ngai vawng vawng thin che a, ka la thlahlel em em bawk che sin!
" Hmai, lo chuang rawh le", a ngai thin lo sin le, kawng hi chhoin hahthlak ve thin viau mah sela, ka tum ram chu ka thleng ve thin tho.
Bakah a zahthlak, mi sawi sep sep kan ni tan der tawh bawk si, a hrim hrimin 'Hmai' ti hian min ko ziah lehnghal, min ko tawh lo tura ka tih pawhin awmzia awm thin lo, hahthlak thin zawk hian.
" A ngailo, muangchangin kal pawh ni ila pawi ka ti lo, bakah bike-a chuan ka ngaina lo ka tih kha", zawi sap sap hian ka ti a.
Nghaka lah chuan, " Lo chuang thin mai mai teh, ka lo leng dawn vawiin chu", a lo ti hlak, va hahthlak thin tak, chuang leh phawt mai ang.
" Bethel store-ah kal phawt ang, eng emaw lei tur ka nei a", college atang chuan kan inphur chhuak leh ta a.
L. G. C. hi Thuamluaia mual thlangah awmin chhuk lamah a chhuk em em a, chho lamah a chho leh thung a, college vengah a awm a, kan awmna hi venglai a ni a, college veng nen a inhlat lutuk lo bawk nen kal lam leh haw lam insen a ngailo thung a, a tha phian zawk.
Kalkawng hi a thui tham ve em vang erawh hian thaw leh kàwk kàwkin inhaler kawng lakah te ka hip leh vang vang zel a.
Chuvangte pawh niang Nghaka hian kan in thleng min thlah loh leh, kawngpui thleng hi chu min phur thin a, hnial fithla chang nei thin tho mah ila, hnial thlak theih loh chang pawh ka nei tho.
College kan zawm rual a, zirlai thar ve ve tih takah kan inkawm zui chu a ni mai. Mahse, kawm dan chin tawk pawh hriat a ngai khawp, amah hi hmeichhe hoin an duh chi tak a lo ni bawk nen, buaina ka tawh te ka hlau rum rum zel.
Tunah pawh min melh sala hi chu an awm pheuh pheuh tawh tih pawh ka hria!

Kan dawr kal chu ka fapa Peka tan colour leh coloring book, lemziah sa chei tur ang chi a leisak chu niin, Peka lah chu a hlim em em mai lehnghal a.
Ka u Zualtei pawh chuan a ngaina nghal ve em em a, Nghaka pawh a tlangnel hle a vawikhawt lo lenna pawh ni mah se.
Kan chaw ei lai chuan, " Nghaka kha a van fel em em, lo thlah thintu che kha tiraw, a tawng duh ve reuh phian a, a nelawm tak tak a ni. Bakah a hmeltha bawk si", k'u Zualtei chuan min melh zeuh pah hian a ti siam siam a.
K'u Thaa pawh lo inrawlh ve vatin, " Tu maw Nghaka chu ka hre ve duh", min melh leh zeuhin a lo ti ve a.
" Chaw kha ei mai mai teh u", ka lo tihsan a, kei erawh chuan ka ei chhunzawm leh mial mial a.
K'u Zualtei bawk lo tawng chhuak lehin,"In thawnthu pawh a inan reuh kha, in kawppui te ve vein an kawp che u a, chuvang chuan khuanu hian a intawn tir che u ni hrim hrim", a ti leh siam siam a.
Ngaihtuah zui ni awm ang hrim hian kan ngawi leh thap a. Vawiinah khan k'u Zualtei hian a lo zawt leh pek a, Nghaka pawhin tha deuh in a lo hrilh ve mai bawk a.
Ka chungchang erawh k'u Zualtein a hrilh ve lo hlauh a ka lawm tak tak a ni.
Ku Thaa'n a àw a thian khar kharh a, " In inkawp thei phian ang a chuti chu", a ti bul hmuk a.
Ku Zualtei a lo nui sen sen, " Ngaizawng tih vel neih ka peih tawh lo", ka lo ti var a.
" Tunah chuan a duh ber bulah hlim takin a awm tawh ngei ang a, nangpawh hlim taka awm tum ve tawh rawh"
" Ka u ka hria lawm, mahse... theihnghilh hi har ka la ti em a ni"
" Hun pawh a liam tam tawk ve tawh lawm", ni e hun chu a liam tam tawk tawh pawh ni mahna le, a thusawi kha ka bengah hian a la cham reng a, chu chuan min tina thar leh vawng vawng thin.
" I lak atanga ka duh ka hmu tawh a, tikhan hmeichhe hlutna nei tawh lo i ni tawh", ka lak atang a duh ber a hmu tawh miau a, min kalsan mai bak chu tih theih a nei tawh bik chuang lo ni e.
Hmeichhe hlutna nei tawh loah min siam a, min hmusitin min nuihsawh zui!
Ku Thaa chuan boruak dang siam tum ni awm tak hian, " Inrinni khian Theiriat tlangah han leng vel mai mai ang u aw", a ti a, kan lo buk khum zeuh. Kan professor khan ka hmaihngaihna ai khan, hmeichhiate chapo ve theihna awmchhun 'thianghlimna' ber kha ka lak atang a lo beisei zawk kha a ni a.
Min hmangaih ve amaw ka lo tia, mahse ka HMANGAIHNA kha a lo hmang tangkai mai zawk hi a lo ni.
Tunah chuan professor Madiki nen tihhuk lam an hnaih zual sawt tawh ngei ang, a nih loh pawn an tihuk mai thei tawh bawk a ni.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 25th, 2022, 11:58 pm

Professor P
Chapter-10
Ziaktu: Cck Lalchhuanawmi

" Lalnghaklian, i chak dawnlo lutuk", ka um kual dat dat a, Peka a la pawm zui.
" A mak em mai, khawi ka tarmit", min la chhiahkhum ta ang lehnghal a.
An pahnih chuan umin kan nui bawk bawk pah a, Peka phei chu a nui pawh ni lo a khékin a khék, nuam a ti ve ngang a nia nge.
A tawpah ka man ta nge nge a, inkuah khawmin kan nui vak vak a, ka pum a na vek thei mawle.
Theiriat tlangah hian far thing a tam em em mai a, chhawkhlei par te a awm bawk a, tin tawngtaina in a awm bawk.
Pangpar chi hrang hrang awm belhin hei ai hian chei hnum ni lehzual sela, a nuam lehzual ngawtin ka ring.
Tawngtaina inah ka kal a, dil ber tur pawh ka hre lo. Professor tana dil leh ngawt bak tih theih em em ka nei chuang bawk si lo.
Tunah hian eng nge a tih ve mek ang le!
" Angaih"
" Hmai"
"Ate"
Min au lang lang a, min ngai thei teh e, an bulah chuan ka va kal a. Nghaka chuan min lo hmuh rualin, " Fianrial tawngtaina chu a thawk tha bawk ang chu maw", a lo ti muang ban chawrh a.
Ka u te an lo khi sung hahthlak thin. Tlai lam a nih tawh avangin kan inphur haw leh sang sang a, a thente chu haw lam la hnaih loh leh lo kal belh mek zawkte an la awm neuh neuh thung.
" Ngatinge Hmai tih hian min koh tlat zel a? "
" Lalhmangaih tia koh i duh zawk tihna mi", mi hnial kalh dan tur lah a hre thei bawk si.
Bethel store-ah min kawipui leh a, a nu dawr lo ni rengin!
Delhi lamah college a kal a, mahse helamah a lo zir zawm leh daih a, a bialnuin a kawp tih a hriat vang ringawtin, ka hriat tir chuan ho ka ti khawp a, mahse ka ngaihtuah hian tunah chuan ho ka ti tawh lo khawp mai.


Tunlai chho tea ka awmdan hi ka hrethiam biklo, ka ni nghulh maiin ka hria, ka pum te hi a inlet but but a ka uak leh thawt zel, luakchhuah ka nei mang bawk si lo.
Rim ngai theih lohte ka nei ta zeuh zeuh, ka ute erawh ka hrilh chuanglo, science zir ni ve ta na na na chuan eng emaw han rin dan tur ka hre tho a, mahse ka ngaingam chiah lo thin a ni.
Ku Zualtei chu ka pindanah lo lutin ka bulah a lo bawk ve a, " Angaih, vawiin ang em ema i nui kha ka hmuh lohna rei tawh dan hi", a lo ti siam siam a.
" Khatiang khan hlim takin awm reng tawh rawh, i cher chhe zo vek dawn, bakah i dam lohna te hi a zual phahin ka hria, Nghaka pawh kha a hlim ve takzetin ka hre bawk
In pahnih hian bum in nihna kha theihnghilhin hmalam pan zel rawh u, chubakah in kawppui tur a aia tha in hmuh theihna tur kawng te pawh a ni mai thei sin", a ti siam siam a.
Ka u hi chuan min thlamuan thin teh e. Ka tawng lo ang tih hi ka hlau thin ngawt mai, Pathianin min pek liau liau ka ti mai.
" Ka u, Nghaka chu ka duhsak lutuk keipawhin, mahse kei chu... I hriat ve vek kha"
" Ka naute ka hria lawm, mahse tihsual palh te chu kan nei vek a Tu pawhin, tluk phah nana hman kha a tha lo alawm.
Bakah i nihna ang anga nangmah hmangaihtu tur che Pathianin a pe em em ang che, kan professor ai pawha tha a pe mai thei che sin", nui saih chung hian a ti a.
" Ka hre lo le... ", ka ngaihtuah rauh rauh a, hlutna nei tawh lo dawm tur hian kan professor aiawh zo tur an awm thei dawn chuang em ni, an awm lo ang, amah ngei a nih a ngai.
Tunah pawh hian ka la beisei fan chu a ni si ale!
Kan Pathian hian ka nihna ang anga min hmangaih theitu tur chu min pe ang em le?

College hlui kha ka ngai thin khawp mai, ni e college hlui, hlui tih thamin ka chhuahsanna la rei lo hle mah sela, tunlai chho hi ka ngai thin khawp mai.
Cafe-a ka thawhna te, inbe lum lam thinlo viau mah ila ka thawhpui Remi te kha, Faka te leh Hriati te pawh.
A va nuihzatthlak tak, Lucy ama tawka ngawi chuah chuah, tho phang deuha zawhna min zawh lai te kha, Lucy pawh ka ngai ngawih ngawih thei nia!
College leh a vel te, thlamuang taka ka thut chawlhna hmun te kha, chuan chemistry lab te!
" Hmai i tha maw? ", ka phu nasa lutuk Nghaka thin hi chu aw.
" Min tiphu lawm, aw ka tha", ka lo ti hlak a.
" Fianrial tawngtai i neih lai ka tibuai palh ang che", ti sapin a thiante bulah a kal leh nghal daih a, pawilo mahnia awm hi nuam ka ti ber alawm.
Ka nu leh pate nen reilote chhungkuaa kan awm ve lai te kha! Ka va thlahlel leh tak em, kan run riang engtiang pawhin awmin luah lum tha lo viau thin mah ila, tha taka min dawng sawng thintu a ni bawk si.
Taxi driver pa Mawia pawh ka ngai thar, a va buaithlak tak. A bik takin kan professor kha, engtik lai pawhin ka ngai, ka ngai ngawih ngawih zel.
Lukhum duma anih lai atang ka chhui zel a, kan professor a nih a, lecture min pek laia ka awm dan danglam thin te, kan inngaihzawn hnua ka chhaih thin laia a che chhe teuh thin lutuk lai phei kha chu!
Kan lenchhuah dun lai te, ka dam tha lo tih a hriata a nu leh pa kalsana lo chho vang vangin min awmpui kha a ni a.
Khangte kha min hmangaih avangah ka lo ngai a, Tu emaw ka thik avanga ka tihtauh khum ve ringawt te kha, aw... ka lo va à thin tak em!
Hun hi koh kir leh theih se ka ti ngawt mai, zah pawh dawn lovin ka chelh ngei ngei ang!
Ka rilru te hi no thar a, ka lungchhe hmain ho te teah ka thinrim hma bawk si.
College atanga haw veleh ka awmdan hi ka u ka hrilh ngei ngei tawh ang, ka hlauhthawn ruk hi lo dik ta ang sela, ka lawm ang nge lawm lo ang tih pawh ka sawi thei lo.
" Lo leng leh la"
" Min sawm ve teh khiah a, ka lo leng hrim hrim", kan inzui lut a, ku Zualtein min lo hmuh rualin min lo chhawn nghal vat a, a la nui thaw ang zui.
Ka lu a lo hai thut a, bike-a ka chuanna ni turah ka ngai mai a, mahse ka pen leh tur chiah chu ka mit sulh a, ka hmu vai ruai nghal,
" Hmai"
" Angaih", tih thawm ka hre ruai ruai chauh tawh.
*** 24dec. Flashback ***
Ka u te Lawipu daiha an awm hi chu aw... kal leh vang vang a ngai dawn. Pa Mawia a awm hlauh a, taxi chan a ngai dawn lo a, a tihzia hlauh.
" Hello"
" Min lo ngai tawh em? ", ngai tawh lutuk.
" Ka bulah i awm thei dawn si lo a, ka ngai lo che ni mai rawh se", ka va sual reuh tak, ka ngai reng sia.
" Ka u te bulah ka kal leh dawn a, in atang ka la chhuak lo", ka tihzawm leh a, a ngawi reng thung, a la thutak nge mawni le.
Pawna ka chhuak chiah chu ka mi hmuh chuan min thawng ngei mai. Professor chu a bolero dum kha nghengin a lo ding reng chu niin!
Ka ring ngam chiahlo bawk si, muangchangin ka va pan phei a, "Nangmah i ni tak tak em? ", ka ti ho a.
Ka chalah min pen zeuhin, " Keimah tak tak ka ni lo, ka thla a nih hi", nuih insum deuh tak hian a ti a.
Ka harh chhuak zawk a, " Lalhlimpui i sual lutuk aw", ka beng dat dat pah a.
" Lalhlimpui a? "
" A nih leh professor poopypant", ka lei ka chhuah zeuh.
" Engmaw, engtin maw min koh a? "
" I hriat ve kher ngai lo", " Ka ngai lutuk che", ka va kuah a, minkuah let ve vat.
" Min ngai lo emaw ka tia", ka fiamthu mai mai ni sia.
" Aizawl fang ang aw... ", ka lo bu zeuh.
Ka bulah professor a awm ve vang nge mawni, kawn chei velte pawh kum dang zawng aiin ka hmu mawiin ka hria.

Ka bulah professor a awm vang nge mawni, kawn chei vel te pawh chu kum dang zawng aiin ka hmu mawi phian.
Motor chhungah eitur ei a phal bawk a, amah pawhin a lei teuh tho a, ka hmawm hmiah hmiah mai.
" I ei zawh theih chuan ei zo vek rawh, kan lei zel dawn nia", min lo en zeuh a, biang puar tun chungin ka lo nuih sen sen.
Achangin kut inkai rialin kan han vak kual leh rih thin a, Kulikawn phei vela kan vah laiin ka ute nen kan inhmu hlawl, kan Peka pawh a la harh tha viau.
Inhmelhriattirna te ka han nei ve a,"Kan professor chu a tawpah kan han hmuh ve hlawl che chu le", ku Thaa chuan chibai pah hian a ti a, ku Zualtei pawhin a lo chibai ve vat.
" A va cher reuh", ku Zualtei hi chu aw.
" Ka u ka hrilh tawh che kha", zawi sap hian ka ti let ve a. Restaurant-ah kan chawl ho a, titi siam siamin kan nui ho dar dar leh thin a, a nuam phian.
Kawn cheite pawh kan fang ho a, zan a rei ve tawh nia nge Peka pawh a ham bai bai tawh mai. Ka ute chuan min hawsan ta a, ka zui haw ve thei ta lo.
Kum dangah chuan ka ute bulah ka riak mai thin a, mahse tun kum chu a dang ve ta hlek, ka nu leh pate an awm tawh a.Tunah hian kan in lam panin kan tlan mek a ni.
" Hmai... a tak ram min thlenpui rawh"
A mitah chuan ka en kar a, a tihtak zia ka hmu thei. "A pawi lo, ka tilui lo che nia", a tihzawm leh a, mahse eng nge ka hriat tehreng ni ka duh a nih thuin ka lo chhang!
" Merry Christmas ", a ti zawi sap a, "Merry Christmas", ka lo ti let ve a.
Tuna ka thiltih hi a dik ber ang em tih erawh ka hre hauh lo mai, rah tha nge rah tha lo a chhuah ang tih nen lam ka hre lo.
*** End of flashback ***
" Chuti chu a nu hi a chauin a hriselna a pan si a, a inenkawl that hle a ngai ang", tih chu ka hre ruai ruai a. Ka mit chu meng siar siarin inchung var pup mai hi ka hmu a, damdawi inah ka awm a ni tih ka hre thei.
" Angaih, aw... ka naute i lo harh tawh maw", min kuah chuk chuk pah hian a ti a. " Ka u, eng nge thleng a? ", ka ti tham chhalh a. Ka u chuan, " Min hrilh tur alawm, nangmah tein i lo tuar a, kei pawh khan lo hre thiam thin tur che ka ni a sin le", tah àw tak hian a ti a.
" Doctor-in titla mai tur in min rawn a, i pai puitlin theih a ring lo a ni. Mahse risk kan lak mai tur thuin ka lo hrilh a", dam duai hian a tihzawm leh a. Ka hrethiam e, nau ka lo pai ngei a ni.
Ka dul chu ka han khawih a, naute a awm vang chu ni si a, a pa ve hi!
" Ka u... ", ka tichhuak tiau a, ka mittui a sur zung zung hi ni ber, dan theih pawh a ni lo. " Aw... Ka naute", ka u nen chuan kan inkuah a, kan tap dun tlawk tlawk a. Ka u chuan, " Lungngai reng reng suh aw, i u ka awm a engtin mah in awm ka phal ngai lo ang", ka hnung chul heuh heuh pah hian a ti a.
" Ka u... ka pai... ka pai puitling ngei ngei ang... "
" Ka hria e ka naute, ka ring che lawm i pai puitling ngei ngei ang, chuan hrisel takin i hring chhuak bawk ang a tiraw", ka lo bu zeuh a, mittui pawh tawp intai nei lovin a luang ngiai ngiai reng mai bawk.
" Mahse, a pa hi kan hrilh ve thain i hria em? ", chu kher chu, " Ka u, hrilh lo mai ang, atan chuan engmah a ni dawn chuang lo a, engtiangin nge a lo tawngchhuah leh ang tih kan hre si lo, kan na leh zawk mai mai palh ang, aw ka u", ngen ngawl tak hian ka ti a.
" Mahse Angaih, han hrilh ve phawt mai ila", aw ka u tak hi chu.
Ni thum lai a lo liam ve ta a, ka u hian professor hrilh turin a khat tawkin min hrilh chhen a, tunah chuan Nghaka pawhin ka chungchang a hre ve vek tawh a, han zep reng thei a ni bik si lo a.
A thiam ang tawkin min hnem ve reng a, chutih rual erawh chuan naute pa hrilh ve hrim hrim turin min ti reng pah bawk, ku Zualtei ang chiah.
Ngun taka ngaihtuah turin min ti a, khatianga professor-in min kalsan khaNghaka chuan eng emaw inthup awm tlatin zu hre pek a!
Zanin chu Nghaka pawh a lo leng ve teh mial a, ku Zualtei te, ku Thaa lam lamin an pathum chuan tang rualin professor call turin min ti tlat a, kei ka tang ve tlat thung.
" Ti teh, han call teh, i bulah kan awm reng dawn lawm, engtiang pawhin lo ti chein naute hi lo pawm duh lo pawh ni sela keini hi in bulah kan awm reng ang", ku Zualtei chuan a ti a, midang pawh chuan a dik thuin an lo sawi ve bawk a.
Khur der der chung hian professor number ka hmet a, ka phone hlui zawk a chhiat vangin phone thar ka hmang a, mahse professor number erawh ka hre reng thung.
" Tut tut", tiin a ri ral ral a, ka tiril a lo khur nasa mai, ' naute, i pain a lo pawm duh lo che nih chuan i tan ka awm reng dawn nia aw' ka rilru chuan ka ti neuh neuh a, ka mittui pawhin min huphurh pui a nia nge an lo luang ve ngiai ngiai a.
Chutah hmeichhe pakhat hian, " Hello", a lo ti tham chhalh a, a àw atang chuan a hah hle a nih tih a hriat theih, ka ngaihtuahna a kal ding ngang mai.
Pangngai taka tawngchhuah ka tum a, "Professor Puia ka be lawk thei ang em, Hma... Hmangaihi ka nia", ka tichhuak thei tawk. Chutah, " Hmai nangmah i ni em, i ni tiraw? ", a lo ti a. Mak ti tak chung hian ka nih thuin ka lo chhang a.
" Puia u Faki kha ka nia awi... Hmai kan zawng nasa lutuk che", a tap hawm hawm nghal a," Ka nu... Hmai ka hmu tawh", tia a au lang lang chu kan hre zui leh nghal.
Mak ka tihna a zual sauh, eng nga tan chuan nge min lo zawn ang?


*** A CHANG CHUAN KAN HMAA THUDIK AWM RENG PAWH HI KAN MIT KAN CHHIN TLAT AVANG HIAN KAN HMUH HMAIH FO THIN A NI MAI LOVANG
MAW? ***


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » September 25th, 2022, 11:58 pm

Professor P
Chapter-11 Last
Ziaktu: Cck Lalchhuanawmi

Mak ka tihna a zual sauh, eng nga tan chuan nge min zawn ang?
U Faki chuan, " Hmai a pawi em mai...", a lo tih zawm leh a, eng nge pawi chu ni ta ang? Zawhna hlir hian ka khat, kei chauh ka ni lo ka bula awmte pawh chuan, " Eng nge ni ta a? ", tiin an phun sep sep ve tho, loudspeaker-a ka dah avangin an hre ve vek thei a ni.
" U Fak eng nge ni ta, engthil nge thleng ta a? ", ka hmanhmawh takzet, boruak awmdan pawh hi a rit sawtin ka hria.
" Puia hi mawle... Hmai... Hrilh lo tur chein min ti tlat a... Mahse... ", tap hawm hawm chung hian a ti a. Ku Zualtein min vawnna chu ka hmer ngawt ngawt, hlauhthawnnain ka khat nghal, eng chu nge min hrilh lo tura atih.
" U Fak min hrilh rawh... Eng nge ni ta, professor... Upuia khawiah nge? ", ka ti chhuak thei tawk, tum lo viau pawh ni ila mittui hian a hnathawh hun tur hi a hre thei riau! " Hmai... ", tap tiau chung hian a ti leh a, ka tiril a khur tan a professor ringawt chu ka ngaihtuahnaah a awm.
Àw pakhat hian, " Fakte eng nge ni ta, min ko khan ka hria", a ti a, u Faki chuan, "Ka nu... Hmai ka hmu tawh", tap chung chuan a ti leh a, a nu nih dawn chu! " Maw, tak tak maw? ", tih leh, " Hmai", tia min lo koh a rual nghal, a tah zawm veleh nghal mai bawk si!
An awmdan chuan ka ngaih a ti tha lo takzet tawh, " Ka, ka, ka nu... U, u, u Fak... " ka ti bah nawk a, " Thil awmzia han sawi vat vat teh u", ka ti vin hlar a, hriat vat vat ka duh, engthil chiah nge thleng.


A zana zanin Aizawl lam kan pan nghal a, keiin ka duh tlat, naute hi ngaihtuah tho mah ila, a pa a pawimawh zawk si a.
Doctor khan vawiin zan pawh a beiseiawm tawh loh tur thu a sawi a, a ni thei lo ang kan thlen hma chu a lo harh tha viau tur hi a ni ringawt. Kan professor chu a lung a lo tha lo reng chu niin!
Vellore-ah a nu leh pa a kalpui anga ka lo ngai pawh kha amah zawk Delhi-ah a lo inenkawl lek zawk chu niin. Beisei boa an hriat tawh avangin Delhi atangin an lo haw tawh a, vawiin zan hian lo thleng chhoin Ebenezar hospital-ah an awm mek a ni.
Damdawi ti thin anga ka lo ngai pawh a lung lam that loh vanga lo ei thin zawk kha a ni a, keiin a ei lai vawikhat ka hmuh vang ringawt khan, aw... ngati nge maw ka lo àt em em mai le!
Amah pawh khan min hrilh ve tur a ni a sin, " Nghaka tlan chak rawh, kan thleng hman lo ang e", àw khur hlawk hlawk chung hian ka ti a, inhaler ka hip leh vang vang.
Nghaka pawh a lo kal ve a, ku Thaa nen motor an inkhalh chhawk a, ku Zualtei leh Peka te nen a hnungah kan thu a, ka fapa hi ka lainat viau naa vawiin zan la laa kal ka duh miau bawk si.
" Puia... Zanin chauh chu han tuar leh tang tang rawh aw... Hmai a lo kal mek a nia, i lam i lam thin kha a lo kal mek a nia aw...
Hmuh i chak thei thin em kha tiraw... A lo thleng tep tawh a nia aw... Ngaihdam dil i duh thu leh... I hmangaih takzet a ni tih pawh i hrilh thei tep tawh a nia aw...", ka nu chuan tap hawm hawm chung hian a ti a. Kei erawh thu kam khat lek sawi tur pawhin ka kha a chih tlat, ku Zualtei chuan kan thlen chin te chu hrilhin call a cut ta a. "Upui... Min lo nghak tang tang rawh aw rei a ni tawh hauh lo ang ka lo thleng tep... Min lo kalsan miah suh ang che...
Ngaihdam min dil i tum maw...ni lo e keimah zawk hian lawm ngaihdam dil tur zawk che chu... Ka lo à em a ni, keimah zawk hi min ngaidam mawlh mawlh zawk rawh aw... Min hmangaih tluk zetin keipawhin ka hmangaih che, min hmangaih thu min hrilh i chak tluk zetin keipawh hian hrilh thuai thuai che ka chak leh tawh a sin... min lo nghak ngei ngei ang che... ", ka rilru chuan ka ti mawlh mawlh a.
Ka ngaihtuahna a kal ding ngang mai, Nghaka khan thu inthup awm anga a lo ngai pawh kha ka hrethiam tanin ka hria, Khatiang ringawta min kalsan kha chu a diklo ve em bawk a ni, aduh vang reng kha a lo ni bik hauh dawn si lo.
Zing khawvar lamah thlengin damdawi in kan thlen rualin ka chhuk nghal thuai a, damdawi in chhung ka luh rual chiaha ka thu hriat avang chuan ka ding chawt.
" Puia, aw... Ka fapa...i nu hi min lo chhang ta che. Timaia i kal hi ka la phal lo kan la phal lo... ", tiin nu pakhat hi a tap khàwk rum rum mai a, ku Zualtei chuan min lo kuah nghal thuai.
Mittui tla tur pawh an awm tawh lo a nia nge, a ro hian a ro hulhin ka hria, tawng ka han tum a ka kha a inchih tlat bawk si.
" Lalhlimpui tho ta che, thawh a hun tawh...", a ni thei lo. "I nuin kaihthawh che ka tum hi... Ka fapa, Puia... Lalhlimpui han tho tawh teh, i nu hi a chau zo dawn a nia...", a ni thei lo ang!
* After three years ***
Ka nu nen chuan thlalak kan en kual dan dan a, upuia hi a tetlaiin a lo duhawm a nih hi, hei vang pawh hi ni mahna a fanu pawh a duhawm em em ni. Ka nu leh pa( professor Puia nu leh pate) pawh hian, " A pa tetlai a chhun a nih hi", an ti ziah.
" Lung thalo sa khan a lo piang a, a naupan hun chhung zawng damdawi inah a hmang a... A rualpuite tlankawi zar zar a hmuh te khan, ' ka nu tinge tlan phalsak ka nih ve loh, ka tlan ve duh', tap pur chung hian a ti thin a, ka hrilh a hai thin teh a sin aw... ", ka nu chuan inhnit faih faih chung hian a ti a.
Ka va kuah a, tih theih dang nei bik hek lo le a hnung chu ka chul heuh heuh ringawt mai a. " A duh angin a naupan lai hun a hmang thei si lo. Hmai i hria em, zan khat a lo haw chu a tap tlawk tlawk mai a, khatia patling pui han tah tak mai hmuh kha chu a hrehawm a sin...
' ka nu... Hmai bulah ka awm duh, damchhung hun hmanpui ka duh'... ", ka nu nen chuan kan inkuah a, kan tap dun tlawk tlawk mai a. Ka insum thei tawh bik lo, mittui sen hi a phu em a sin. Tap chungin kan sawi zel a, ka nu nen hi chuan kan sawi bang thin lo.
A tetlai chanchin, a hun hman dan zawng zawng a ni mai, keiin cafe atanga ka hriat dan te leh inhaler hip ka mamawh laiia remchang a lo la ve te leh, kan inngaihzawn dante kan inhrilh tawn a, Chemistry lab boruak vel kha chu ka hrilh lo, ka zak tlat!
Kan tap pah a kan nui bawk bawk pah bawk a, kan hriat hnu inhrilh ni thin tho mah ila a thar ang mai hian ka hre leh thin! Ka pa chu bawihtei pawm chungin pindanah a lo lut ve a, " Aw... I nu leh i pi tak hi chu, an lo tap leh ta", a lo ti a. Ka nu nen in enin kan tah nui hak ringawt.
" Api, bawihtei hi tlai nemah hian lenpui leh ang hmiang a ute bulah ", a ti a. Ka nu pawh chuan a zui chhuak ve ta a. U Faki te inah an lenpui leh dawn niang, a ute ho pawhin an duat a bawihtei pawhin nuam a ti ve thin khawp, kan vai mai hian kan duat ni ber.
Thlalak ka en zawm leh a, damdawi in khuma mu dàng bel mai hi ka professor duhtak, ka pasal ni bawk leh bawihtei pa ngawih ngawih a nih hi!
***********
Ka thu hriat chuan min thawng takzet, ka pen sawn thei lo ka ke hi char beh ang mai a ni. Chutah, " Hmai", tia min ko thawm hi ka hria a ka en chu taxi driver pa Mawia kha lo niin. Thil awmzia zawh ka tum a, ka kha a inchih tlat.
" I lo thleng tawh ni maw, helamah aw, a lo nghak char char che", ka thaw huaiin ka hria, min lo nghak char char nih chu!. A tawpah zawng ka pensawn ve thei ta, mittui pawh ka la nei a ni ngei ang, a luang leh ngiai ngiai tawh.
Cabin chhunga ka han lut chu khumah a lo mu dàng bel mai a, " Puia, Hmai a lo thleng tawh a nia", a beng bulah zawi sap sap hian an ti a. A lu an tikang deuh a, min chhuahsanin keimah chauh chuan min hnutchhiah ta a.
Va pan hnaiin a kut ka va vuan a, mahse a che miah lo, laksawn ka tum chu min lo vuan vatin a chul heuh heuh a. Ka tah chhuah loh nan ka hmui ka pet tan tan ringawt. Chutah lo meng chhuakin, " Hmai min ngaidam rawh", a ti muang ruih a.
A kut chu la kangin ka pum chu ka khawihtir a, " Kei, keimah chuan enkawl... Ka zuam lo... Chuvang... Chuang chuan min kalsan thei lo ang", tap hawm hawm chung chuan ka ti a. Ka mittui kar atanga ka va en chuan a lo chhing tlawk tlawk a, a mittui luang ngiai ngiai pawh chu ka hmu thei.
A lo menchhuah leha a thusawi chuan min tina lutuk ringawt, " Hmai... Dam ka la duh. In bula awm ka duh", naupangin a duh ber a ngen hi ang ka ti lutuk, engtin nge ka chhan ang. Tih theih engpawh ka neih chuan ka ti hreh miah dawn si lo!
Ka kuah thlawp ringawt a, ka tah khum chiam mai bawk. A theih ang anga min kuah let vein, " Hmai ka hmangaih che. Ka hmangaih... Lutuk che", a ti pah reng a.
" Min... Ngaidam rawh, hmeichhe hlu lutuk i nih hi aw... Ka tan hian i hlu lehzuala ni. Hmai... Ka hmangaih che... Ka tan hian i hlu lutuk a nia aw... ".
" Min kalsan turin ka duh lo che", ka àw a chhuak thei tawk tawk.
**********
" Professor ding rawh, kal suh... ", ka au vak vak a, a kal lui tho. Bawihtei pawhin, " Apa", tiin a au lawm lawm a, mahse a kal lui a, a liam dawn takngial. " Upui, upui, professor".
" Hmai, hmai harh teh", ka hmai a beng thek thek a, ka han meng a ka mumang lek a lo ni. Amah ka hmuh tak hnu phei chuan mumang mai a ni tih a tichiang.
" Kha i thlan vek nia, tun ang hun tlai tawhah mu thin lo turin ka tih che kha", min hru bawrh bawrh nghal a. " Min kalsan I tum a nih kha, ka au vak vak che a bawihtei pawhin a ko vak vak che", tap faih faih chung hian ka ti a.
Hahthlak tih hmel deuha thaw hrawk chung hian, " Mumang mai nih kha, bakah i mut hun hi fuh thin lo, tap tawh suh, ka kalsan dawn hleinem che u, in bulah ka awm reng dawn lawm", a nui sak a, chu chuan ka pangchan duhna a tizual sauh.
" Mahse...min kalsan i tum alawm", va hahthlak thin tak, a aia uar mah hian ka tap leh a, nutling pui ve tawh si hi, mahse ka pasal bulah lo hian pangchanna tur ka nei chuang hleinem mawle.
" Ohh come on... ", a lamah min pawt hnaiin min kuah bet a, " Tap tawh suh le, nangni ka rohlu te hi ka kalsan ngailo ang che u", dam diai hian a ti leh a.
A àwmah chuan ka bei hle hle a, tuna ka ngaihthlak mek lung phu ri hi hmana ka tana phu thin professor lung kha ni tawh loin, ka pasal, ka fanu pa ni bawk, kan tana a lung pawh phu tawh zawk Lalhlimpuia a ni.
An pafaa an infiam lai chu ka thlir doh doh a, an hmuhnawm lutuk. Patling pui si kha a fanu thu thuin a a awm a nia, naute ang tein a awm thul, achangin a bauh a, a changin a miau thul, va hahthlak tak.
A tlanpui zar zar a, " Tlan tawh suh u, in hah lutuk ang e", ka va ti a, min lo chhan dan tur ka hre sa, " A duhtawkin tlan rawh se", hei hi a chhanna a ni ziah, ka hriatthiampui thei khawp mai.
" Anu lo tel ve rawh", an bulah min pawt nghal zat a. Bawihtei pawh kum thum lai ni tawh a, a duhtawkin a kalin a tlan ve thei tawh a, achanga a tlu leh zeuh thin tih loh chu.
" Pa pawm, pa pawm", bawihtei chuan a kut phar meuhin min um a, a pa hian min pawm miau hek, " Bawihtei chu sual, anu pawm daih dawn", min tlan kawi pui leh a, bawihtein tap pur chungin min um tawh. Chu chu a pa lawmah a tla a, a uar sauh.
" A tawk a tawk", nui hak hak chung hian ka ti a, min chhuk tirin bawihtei chu a pawm a," Pa pawm, pa pawm", tiin ka umkawi veleh chhawng a, a nui khék nasa ngang tawh mai, a pi leh pute pawh an lo inrawlh ve a, kan chhungkua hian tudang kan ngai biklo a nia.

Innemkhalhin ka pum chu a chul heuh heuh a, kei erawh chuan a àwma ser chu ka lo en thung. Khami ni khan hriat ngai loh Lalhlimpuia hnen atangin ka Lalhlimpuia hnenah a lung a lo hlan a, kan lawm teh a sin aw!
" Hmai, nau i pai har leh awm em mai, damdawi kha ei tawh lo mai rawh", kum khat chuang lai chu ka ei tawh lo sin, " Bawihtei pawh hei ai hian hleikang deuh hlek phawt se", nui saihin ka ti a.
" Bawihtei i pai lai khan ka duh ang pawhin ka duat tha thei si lo che a", a va tha chiang tak. " Awle, a nih chuan ka theih chhung chu nau ka pai char char ang a, min duat char char ve bawk a ngai ang", tum deuh bar chung hian ka ti a.
Mi fawp zeuhin, " Good, ka duat char char ang che", mi rawn chuktuah lehnghal a. Kei erawh ka ngaihtuahna a kal thui leh deuh hlek, indanna damdawi ka ei lohna a rei ve tawh nen ka la ruak reng chu ni si a, keimahah hian dik lohna a awm a mile?
" I tha em? "
" Aw ka tha lawm", a nghawngah kut suiha kuaikunin a hmui ka chuktuah a, a hamhaih deuh nge ni atir chuan a chechang lo, a hnuah erawh a duhthawh leh hle thung.
" Upui i Rohlui a tap a nih chu", a tap ring bawk si, a pi leh puten an thlem thei leh lo ni chiang. Thawk kan la dun halh halh a, " Ka Rohlui hi a pi leh puten an bulah an la riah tir thei chiah loh nih hi", ka lo nuih sen sen.
Lalrohlui, a fanu hming ni miau hek, a sak ve liau liau!

Chawlhhmuna St. James School saw a pa, aw ka pa school din lo ni ve rengin, thil hi a lo hriat loh theih thin khawp mai. Tunah chuan upuia hian a enkawl tawh a, ka pa pawh hian a la pui ve thin tho.
Master zir zawm ka tum lahin, " Bachelor a tawk", min ti tlat a, hetia ina awm reng hi chu a ninawm, bawihtei pawh a pi leh pute bulah a tlei ve tawh a, cafe-a thawh ka tum leh lahin a phal leh bawk si lo. Nau te hi pai leh ta ila a tha zawk phian mai thei ni!
" Chutianga that lohna hranpa i neilo, a hma aiin hahdam tum la hrisel takin awm zel phawt rawh", doctor chuan dam diai hian a ti a, ka thaw huai mai, that lohna engmah ka neih loh thu min hrilh tawh bawk a, pai vat turah pawh inngai mai ang.
Damdawi in atang chuan bazar lam ka pan nghal a, pa Mawia ka inhruai tir a, kan intawn dan chanchin hi sawi nuam a ti thei em a sin, " Kha zan kha chu pheichham ka man hi ni ringawt, ka vanneih pui tak tak a ni", a sawi bang thin lo.
In luah man thla hnih lai an ba tawh ni awm a, taxi service a tluang lutuk lo bawk nen, an inluahna neitu ten hnawhchhuah an tum a, kalna tur an hre mai bik si lo chuan a taxi hi hralh mai a tum ni awm a.
Khami zan khan a passenger hnuhnung ber tur ka ni tep a ni. Professor, aw upuia khan lo tanpuiin a bate a pek sak a, chubakah inluah tur dangte a la zawnsak zui, a fate pawh a school aw kan school-ah a thlawnin an kal bawk a, a nupui pawhhnathawh turte a hmuh sak bawk a.
Ka pasal hi chu ka chhuang a sin!
Bazarah chuan ka vak ka vak a, thei leh chawhmeh tur anhnah tih ang rengte leiin ka inkhai bawr nasa mai a.
Ka hmaa thawmhnaw dawra ka mi hmuh ka han enchiang chu, professor Madiki hian upuia chu kamis leh T-shirt hian a lo teh mawlh mawlh a, an hlim hmel em em mai lehnghal.
Chutah video kha ka hrechhuak zawk!
Chutah video kha ka hrechhuak zawk!
31 zan a ni a, ka lo chho leh ang a ti na a, a nu leh paten chho tawh lo mai turin an ti a ni awm a. Chuvang chuan ka ute bulah ka kal leh mai a ngai dawn a ni.
Pa Mawia chuan Lawipu vengah min lo hruai vang vang a, dar 10 a pel thuak tawhin ka hria. Ka ute mangthain kan tlan haw ta a, ka rilruin professor nena urlawk zan kan hmante chu ka ngaihtuah rauh rauh a.
Number hriat ngai loh hnen atang chuan video ka lo dawng a, ka han en chu professor leh hmeichhe pakhat lo infawp ngawng ngawng lai hi lo niin!
Hmeichhia zawk chu ruak deuh thaw hian a lo awm a, video tawite mah nise a hmel ka hmu chiang lutuk, professor Madiki ngei a ni! Faka sawi ang khan an bulah a chhuk ve ni ngei ang. Ka nghilh dup a, ka awmdan chu ka sawi thiam lo, ka thin zawnah hian eng emaw hian min chhun sup sup ni ber hian ka hria.


Min lo thawntu ber lah chuan min block zui nghal! Video chu ka delete nghal daih a, ka phone ka hmer ngawt ngawt. Ka àwm, ka taksa englai pawh chu a na vel vekin ka hria, na lo lai reng an awmlo. Inhaler ka hip leh vang vang thin a, pa Mawia chuan ka dinhmun min lo zawt reng bawk, chhang chuang loin ka ngawi ngul thung.
" Kan thleng e", pa Mawia chuan a ti a, mangthain min liamsan veleh ta a. Khur hlawk hlawk chung chuan inchhungah ka lut a, chuta ka thu hriat zet chu, " Lalhmangaihi ka pai laia tihtlak ka rawt kha lo pawm ve ni la chu tunah pawh hian buaina a awm lo mai tur ", a ti vin thawt mai a, ka nu àw ngei a ni.
Ka pa pawh chuan, " Inneih an sawi lai khan tlanbo mai tur che u kha nia", a ti ve leh a, ka han ngaithla chiang a, an lo inneih luih tir chu niin, an chetsual avangin ka nuin min pai ta a, min paih hialte an lo tum!
" Tunah chuan a tawk ta, a tawk tawh lutuk, khapa Lalhlimpuia inti emawni thusawi vang maia hetia that der hi ka hne tawh lutuk", ka nu chuan a ti leh a.
Khur hlawk hlawk chung chuan pawnah ka chhuak leh a, ka pen leh tur chiah chu ka thingthi nghal chawrh, ka khup chu a nat leh nat loh pawh ka hre tawh lo. Professor chu ka call a, a ri ral thak zel, ka mittui avang chuan khua pawh ka hmu vai ruai, ka call leh thin a, a ri ral thak zel.
Ka nu suitcase nen lo chhuak chu ka hmu a, min hmu lo a ni ngei ang mipa pakhat nen hian car varah chuangin an tlan liam ta a. A thleng ta ngei e, inthen mai tura ka duhna chu atakah a chang ta, fahrah ka ni ta chiang e! Chutah halpuah a lo ri nghal chuah chuah a, ' happy new year' tih leh ' kum thar chibai' tih chu a ri leh nghal bawrh bawrh.

A tawp nan tiin professor chu ka call leh a, a ri leh ral ral a ri ral leh mai tura ka ngaih avangin dah ka han tum a, chutah, " Hello", a àw hriat ringawt pawh hian lung hi a phu dup dup thei. Thei leh thei lo hian, " Kum thar chibai", ka han ti a, " Engtik nge ilo chhoh leh thei ang? ", engmah hre lo anga awm chu a harsa lutuk.
Min lo chhanna chuan min tina lehzual lutuk, ka biakna chhan tur a awm tawh loh thu leh, keimahah a duhtawk a hmu thu, hmeichhe hlutna nei tawh lo ka nih thu min hrilh! Ka bíng mup mup hian ka hria, hmeichhe àw hian, " Bawiha, hmanhmawh rawh, a vawt ka ti tawh lutuk a nia", professor Madiki a ni ngei ang, call a in cut nghal.
Mi pakhat hian min su thlu chawrh a, ka ngaihtuahna atang ka harh chhuak nghal, ka thil khai te pawh a tla darh nuai mai. Pa Mawia chuan min lo pui vat a, " Hmai", ka hawi phei chu upuia leh professor Madiki te an lo ding vang mai a. Engmah ngaihtuah hlei lo chuan ka tlan ringawt, upuia chuan min lo umzui ni chek ang chu, taxi-a ka luha ka hawi pheiin ka hmu!

In ka thlen chuan kan pindanah tlan lutin kawngkhar ka kalh nghal a. Ka nuin min kohna pawh ka hre reng, mahse ka ngaihtuahna a buai, kalna tur pawh hre chuang lo chuan suitcase-ah ka thawmhnaw leh bawihtei thawmhnaw ka vawm lut ve hmiah hmiah ringawt.
" Hmai, hmai lo hawng teh ", upuia a ni, ka thiltih lai chu ka tihzawm mial mial thung. Kawngkhar ri rawk leh, " Hmai", tih chu a inrual! Upuia chuan ka kut lo man chawtin, " Engthil nge i tih a, khawia kal nge i tum? ", a ti vin hlar a, a thinrim tih a hmuh theih.
" Ka hre lo, ka hre lo", ka ti tham chhalh a, ka àw pawh ka hre thei chang chang.
" Ka hre lo", tih leh amah kuah ka rual lehnghal zat a. Ka kut pahnih chu hmer vawng vawngin ka hmaah chuan a thingthi ta a. " Eng nge i tih, tho vat rawh", ka ti khar khar a, hetia tlawm taka a awm hi ka duh lo, ka duh lo takzet.
" Hmai, min ngaidam rawh"
" In.in.in mu dun em? ", ka zawhna pawh chu kei ngei pawh hian ka awih lo hial zawk. A chhanna hriat ka huphurh rualin ka nghakhlel tho bawk. " Aih, mu dun lo", ka thaw huaiin ka hria. " Hmai, beiseiawma ka lan avangin ka lo pan che a, mahse, mahse beidawnna maiah a chang leh ta si a, ka thlah thei tawh bawk si lo che a khatia ka tih mai kha a ngai ta a ni".
A hmaah chuan thingthi vein ka kuah vawng vawng a, ni e hun liam tawh hnu kaihthawh leh thin hian awmzia awm lo. Hun harsa tak kan paltlang ve ve a, Tunah chuan hlim taka hun hman hi kan mamawh ber chu a ni.
" Min hrilh tal tur che lawm"
" Ka tihpalh, Hmai ka hmangaih lutuk che".



Ka nu kha keimah ang thoin a hmangaih bulah chuan a hlim tawh ngei ang, chutiangin ka pa pawhin a hmangaih ber nen an innei tawh a. Professor Madiki pawh ngaihhnathiamna ka nei tawh, ka pa hmangaih ber, ka nuhrawn a ni mai ang chu, a fanu a lo ni a.
Tunah hian ka pindan ni thin kha a pindan a lo ni ta a, thil inher kual dan hi a mak takzet a ni.
Kan inneih thlalak bawihtei nen kan en a, chumi zawhah ama pual a thlalak dahna bik kan en leh a, vawiin upuia lo haw tur chu surprise eng emaw hian a hmuak tlat.
" Ka Rohlui chu a muhil alaw? ", zawi sap hian a lo ti lut a, ka lo bu zeuh. Ka mal chungah a muhil siai siai a kan Rohlui chu. Upuia chuan pawm lawkin amah chu ka mal chungah a lo mu a, bawihtei chu a àwmah a bei tir daih a.
" Naktuk chu complex lamah leng ang u hmiang? ", a ti a. Complex tih takah chuan Govt. Complex-a Lianrikhuma Science College tih saw Faka pa college din chu a ni a, keipawh ka zir ve kha, lo va zir ve ula, mahse professor Lalhlimpuia chu hmuh inring duh tawh suh u aw.
Chuan Chawlhhmuna St. James School ah sawn in fate lo kal tir ve ngei bawk ula. E takah, Govt. Complex bawkah khan Delight Cafe, ka hnathawhna hmunah sawn lo va chawl ve thin ula.
Chuan free advice, ka thawhpui thin Remi kha a bialpain nupui dang a neihsan avangin tunah hian hnemtu a mamawh em em bawk a ni.
" I va ngawi ve, i duh lo a mi? "
" Aw, ih, ka duh alawm. Bawihtei pawhin nuam a ti ngawt ang", nui saih chung hian ka ti a. " Ti dawn lutuk, a nu leh pa inchhaina hmun a ni miau a", ka melh rawm rawm a, a kiai sak duh chauh.
" Upui, nau ka pai", a meng phar kàwk!


*** HRINGNUN THAWNTHU HIAN TAWPNA A NEI LOVA NITIN MAI HIAN HRINGNUN THAWNTHU HI A INTAN ZAWK A NI ***

*** A TAWP TA ***


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)