THURÛK_99 By Floria Laldansangi (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: THURÛK_99 By Floria Laldansangi (Completed)

Unread post by Ngaia » October 2nd, 2022, 10:37 pm

THURÛK_99

By

Floria Laldansangi

Chapter < 13 >


"Sawmte...." A rawn ti sep. A aw chhuak leh hmelah chuan min hmu chu mak a tih zia a thup seng lo niin ka hria.


"I..i lo hawng a?" A ti ban zui niah bawk.

Ka bu nghat, "i lo dam em?" A bula a fanu ni ngei tur ṭhu ve chu ka nuih zui seih bawk a.


"Dam alawm. Rinfel..." A tawp dat a, "kanpa in i lo haw thu hi a hre tawh em?" Kum 6 lai a liam tawh, Rinfela nun aṭanga inthiar fihlim tura min tih zana a mitmenga hlauhthawnna ang kha ka la hmu thei.



"Umm, a hriatna a la rei lo," ka ti ta hrâm.


Za lo tih hriat taka nuilui sakin, "engmah a sawi si lo va," a ti zawi leh sap.


"I fanu kha em ni?"


"A nih hi. Engtia rei nge awm i tum?"


"Hna ka nei thar a, ka awm reng tawh ang," a hmel chu ṭap tur hmel a pu lek lek zawkin ka hria. A lo inthlak danglam ta deuh nge. Mahse, nu hmelṭha tak a ni a, a la hmelṭha viau bawk.


"Hna..hna i nei a. College kha i kal chhuak em?"


"Pathian zarah ka zirlai ka zo ve e. U Cindy, ka kalsan ang che u, tûkṭhuan pawh ka la ei si lo va," ka awmdan lai ru tak mai, boruak ip churh chu tlân chhiatsan ka duh. Hetiang boruak hi ka zo ve lo.


"Aw..aw...kal rawh, kal rawh, kan la inhmu leh dâwn nia Sawmte," ka bu nghat a, helmet chu la in ka chhuak zui vat. A aw nêm diai pawh a la danglam lo a nih kha!


Bike a ka lawn a, ka tlân chhuah thleng chuan U Cindy-i chuan min enzui a ni tih side-mirror aṭang chuan ka hmu reng bawk.

A mitmeng leh min enzui danah kha chuan Rinfela nen kan hnathawhna hmun a in ang a ni tih a hriat chuan a läwm hauh lo ang le.
.
.
.
.
"Anuuuu....." Inchhung ka luh rualin ka fapa-in mi lo kuah nghal chawt. Mi hi a ngai thei bîk a nia. A u zawk hi chu ka tel lo pawh hian a tlei tawh khawp a. Hei erawh a la tlei ve thei meuh lo.


"In ah te in awm a, school in kal nange?" Ka ṭhu hniam a. A hmai lah chu a bal niah mai lehnghal.


"Kan school-ah maw Mapuii Nu maw khitah vanramah a kal chuan kan miss ten inhaw thei an tia," uar zet a tiin,"ohh orange..." Ka kuta serthlum ka khai chu a chelh zui chat.


"Keipawh ka duh, keipawh...." An inchuh leh dâwn e.


"U Sawmte, chaw i ei hmasa dâwn em?"


"Ka inbual hmasa ang e," tiin room lam ka pan tur chu an unau ei tur inchuh râk chu en lehin, "eiin ah huam hap loh tur ka tih kha aw, a Malsawm lo. Rinhlua phei chu ei hnem miah suh i kua a zût leh ang," ka tih zawh rualin,"bawihtea lawm," a lo ti hlar. A hminga koh hi a tuar na thei a nia.


Nui vur vur a Bathroom lam pan tlangin ka inphelh nghal sawk sawk, inbualfai a, puar peng pawn a mut vang vang bak châk ka nei tawh lo hrim hrim.


Ka inbual sawk sawk a, ka inbual zo ka chhuah leh chuan berh nuaihin ka fate pahnihin chhuatah serthlum an lo ṭhut chilh leh hmiah mai ni. Kan bawn thei a nia.

"Inpum a nâ ang e aw," chaw chu ka ei nghal mawlh mawlh bawk. A ṭam tawngkhawng ve êm a ni.


"Anu nizanah maw..."


"Keiman ka sawi dawn..." A u in a ti dek dek chu a rawn rak leh chel chul tawh. Tihsual a nei a ni tih ka hre nghal. Tihsual a neih hi chuan min tlawn pahin amah hian thiam deuh hian min hrilh hi a duh kher zel.



"Nizanah..."


"Emma...." A kâa serthlum khat tut chuan a ṭap nghal uah uah.


"A mak e!!! Inhau reng suh u. Ei zo rawh i kâ a mi te kha, i hâk ang," a kâ a chip zui hmak, mittui tla miah lo te hian a ṭap thiam a.


"Nimin ah U Nungi te anrawn lêng," Ruati'n a rawn ti sep.


"Min nghak chhuak si lova a âng leh hrep lo maw?" Chaw ei tuam tuam chung chuan ka nui zui ruh ruh.


"Ân pawh ka hre lo. Sophia-i zawk khan a ngaih thu che a sawi a," ka lo nui var var. Ani hi chuan min ngai fal bîk ṭhin a.


"Keipawhin ka ngai tho a," Andrew-a en chuan ka nui chhuak hak.


Ka chaw ei kham mut chhuak ta lutuk chu room ka pan vat, khumah chuan ka bawk thlawp a, mit ka chhing zui diar diar bawk.


Ka fapa rawn lut leh khuma rawn lawn pawh chu ka ngaihsak peih rih lo.


"Anu...."

"Umm... Bawihte, reilote ka mu lawk thei ang em?" Ka chau tih piah lam a ni, he hna ka thawh aṭanga a vawikhat nan a ruala ruang pahnih postmortem ka neihna a ni a, ka fapa sawidan takin, ka taksa chauh ni lo, ka thluak thleng hian a na ngut ngut mai.


"Anu..min en la..." Min sawi dat dat. A thusawi laia en kher loh hi chuan a sawi tur hi a sawi mai duh ngai lo.


"Tikhan sawi mai la, ka che sawn peih si lo va..." Ka hawina lamah amah rawn insawn in, "meng mah la," ka mit min mentir a tum zui zat. Nui chhuak ta hak hak chuan, "umm, sawi rawh le," a sam tuaiin ka kuai hniam a ka fawp zui chawk. Ti em ema fa duhawm ka nei hi Pathian khian mal minsawm bik a nia nge!


"Nizanah maw?" Min en kiau a, "umm tirawh," nui chungin, "umm," kan han intihsak leh lailawk a.


"Ka mutna ah ruah a lo sur ve tawp a nih chu!" Amah zawk chuan mak tih hmel deuha ti chhuak ve hliai in, a meng lui deuh kawk a.


Taksa nâ leh rawl tak chunga a za zeta nui chhuakin, "i U mutna ah a sur ve em?" Ka nui zui khak khak.


A lu a thing mût mût a, "ka mutnaah chiah a sur," a nui ve sun sun tho, amah pawhin a thusawi chu a awih lo a ni ang.


"Zun i cheh a nih kha aw Lalrinhlu," Emma-i room rawn lutin a ti hlak, "zingah ka huh vek a, ka rimchhe vek," a ti leh zat bawk.


A nau lahin zun cheh duh bik lo, "ka cheh lo aw, ruah a sur alawm," bak zet hian a ti let ve ṭhat.


Nui kiah kiahin, "khum pakhatah ruahsur bîkna a awm a ni maw," a la bu nghat ngat zui. Ka fapa thluak lutuk hi chu aw!


A hnara piai zauhin, "i lo mu ve dâwn em?" A bu nghat.


"Keipawh ka mu ve duh," a U a rawn lawn ve bawk a.

"Khumah ruah sur tir tawh loh tur aw," ka nui vur vur.

"Aih, a chang chauhin lawm a sur," a ti zui ang vur vur a. Kan duhnaah hi chuan kan fing ṭhin mah mah chu a ni e!!
.
.
.
"Anu...tho tawh rawh," ka fanu min sawi dat datna chu chiang lo ruaiin ka hria.


"Nu...mi an lo lêng a nia," a tih leh takah chuan zi mar ṭalh ṭalhin ka hmel ka siam danglam vêl a, ka fanu a nui zui khak khak, zi mar paha nui chung a meng chhuakin, "dar engzah nge?" Ka ti chhuak zat.


Ka fate hi sana endan ka zirtir ṭhin, kan Lalrinhlua hi chuan a la thiam chiah lo va, Emma-i erawhin a thiam viau tawh thung.

"Dar 6 leh.... 5, 10, 15, 20...dar 6 leh minutes 20 a ri tawh. Tho tawh rawh nu...." Ka kutah a rawn chelha min pawt ve ṭauh ṭauh, ṭhu chhuak hlawlin, "ka tho e, ka tho e, tunge maw rawn lêng le," ka sam tuai mam thuak thuak a bâwk leh tawp chuan ka hmai ka tuai zui puat a. Khum sira tui inchhawp in khawlh khawlh chuan ka chhuak zui vat.


"U Tete..." Tukverh bula ding a thlang lam hawi deuh vang vang ka hmuh rualin ka ti chhuak sap.


A rawn inher a, thle hâ hian, "naupang sual tak ini," a ṭap ṭep. Keipawh ka mittui a rawn hnam sawk tho.


Pan hnai vat chuan ka kuah thlawp a, nghet taka min kuah letin, "engtin nge kan chungah khatiang khan i chet theih le?" A ṭah aw ṭuau, keimah tak pawh ka hrawk a rawn na nghal et et mai.


"Ka tihpalh..." Harsa lam lek lek hian ka ti chhuak sap a, inla hrangin a mittui hru zauha ka dara beng thakin, "kum 6 chhung min be lovin i awm thei a nia," ṭah chhuak insum tih hriat tak, aw lawi deuh rut hian a ti leh hlak. Ka lo ṭah nuih hak hak.


Ka fate rawn inûm rak chu enin, "ka chhuang lutuk che," mittui tling pamin min rawn melh ralh, a nui hak bawk.

"Ka Nu eng nge a an?" Sofa-ah chuan ka ṭhut thlak pui a.


"Kar leh khian a retire tawh dawn a, a rawn haw ve ṭep tawh."


"Engtin nge nangmah i awm zawk? Rai chung khan engtin nge bul i va ṭan? Mintih mangan zia i hria em? I U thlalak enin ngaihdam ka dil chamchi reng tih te i hria em?" Min hau pah pah bawk a.


A kut khur deuh dar dar chu la-in ka hum vang vang a, "ka tihpalh U Tete. Duhthlan tur dang ka nei khan ka hre lo va tin ni," ka ti sep sep.


"I ngaihtuahna tawi zia i hria em? Ka Nu khan i duh lo chung a tihtlaksak che i ring tak tak em ni? A tu tur anni dawn a, min pek kha i ring tak tak em ni?" A mittui a tla nghal zung zung.


Ka mittui ka khap per ve sak sak. U Tetei enin, "mahse a tum sia lawm," ka ti chhuak ṭuak a.


"Hmeichhe finin tui khur râl a kâi lo' tih zawng zawng i nei a nih hi. I Nu a ni a, thil i ti sual a, thinrimin a hau ang che chu. Sawi te pawh a sawi ṭhaih ang che chu..." A ngawih deuh vang vang a, a mittui hru hulin, a chil a lem khalh a, "i bo hnu khan a ṭawng tam lovin, a hmel a hlim thei meuh tawh lo. Zawn ngaihna che kan hre si lo. Zan pawh a mumal thei hleinem," a tih zawm leh sep sep. Ka Nu awmdan a sawi takah chhan ka inthiam lo thar zual takzet.


"Tunah eng nge amah a an hrim hrim?"


"Ka Nu chu i hriat kha, a ngaihtuahna leh rilru a awm a ti lang ve ngai lo tih," ka lo nui sak, hmeichhe lu zo tak, tlawm nih duh ngai lo kha a ni ve hrim hrim a.


U Tetei nen titi luam chuan, dar 10 dawnah a haw tur chu ka thlah a.

"Takin a, ka theihnghilh dâwn. Hmanni chu ka hna kal chhungin kan in ah lut an lo awm a," a rawn ti chhuak hliai a. Mak ti zet hian ka lo en hau thung.


"Bo te a awm em? Engtin nge an luh theih a?"


"Bo a awm âwm ka hre lo. Thildang laktum pawh an ang lo, naupang harhin engtin tin emaw an lut a nih ka ring. I U bungrua tlem a zawng an haidarha a bâk an khawih lem lo," a ti awlsam leh mai a.


"Zawn annei a ni lo'ng maw?" Ka lo ti sep.

Scooty-a chuang zuiin, "nei lo ang, nei nise i U bungraw hlui an khawih dâwn em ni? Karleh ka Nu avrawn haw dâwn chu aw. Chaw rawn ei phei ang che u," ti leh duahin a tinung zui a, kan invai liam chu ka rilruin "engmah bo bawk si lo, eng nge maw an duh ang le?" Ka ti sep sep. Naupangin tala ṭhalai hawlh hawn ngaihna a awm dawnin ka hre tlat zi lo va.


"Anu, Lalrinhlua hi min hnek a nia...." Inchhung lam chu ka hawi ta vat a.


"Reilote pawh hi in inngeih lo..." Ti lang langin inchhung lam ka pan zui a. Kawngkhar ka luh dâwn chuan min thlir rengtu awm ang a ka hriat avangin ka'n hawi let leh a, ka hawi kual ve tak nâ chu, a thim lutuk a engmah a hmuh tak tak theih loh.


A vawh deuh vang te pawh a ni ang, Ber thla a ni tawh a, zanlamah chuan a vawt deuh sung sung tawh tlat.

"Ka ta a nih hi, hmeichhe thil.." A U Barbie a lo chuh ve leh e.

"Mipa inih kha Barbie chu i chuhpui reng le," ka lama rawn tlân a min kuah chawt chuan, "min infiampui duh lo alawm," a U lam en chuan a ti hlar.


Ka nui hak a, "dar 10 a ri tawh dawn, in hmai phih ula, ha te nawtin mut a hun," Emma-i chuan Barbie vel chu a khung nghauh nghauh a, "ka kawm tawh dâwn lo che Lalrinhlu," a ti nang nang bawk. Inkawm tawh lo hi antum zing bawk sia.


Ka U nen khan kan inhauh leh tih ṭah âwm pawh ka hre ngai lo. Kan kum a inthlau ve hrim hrim bawk a, kum 13 ngawtin kan inthlau a nia.


"Unau chu inngeih dial dial a awm tur. In unau pawh in inngeih loh chuan engtin mge midangin an kawm theih ang che u. Nangpawh i U tibuai reng zel suh. Mu turin inbuatsaih rawh u, Ruati lo pui mai ta che, hna tlem ka nei a, ka'n thawk zo lawk ang e," ka ti zui zat zat.
.
.
.

"Emma, min kuah nghet rawh aw, i tla palh ang e," ka tlân chhuak tur chuan ka ti leh zat. Ka hmaa Andrew-a ka ṭhut tirin ka hnungah Emma-i, muangchang chuan kan tlân chhuak ta riai riai.


Naupang phurhnen chuan tlân chak a har khawp mai.


"School-ah tumah tihbuai loh tur, inhauh loh tur. I U tibuai tawh lo bawk la. Zirtirtu te thusawi ngaihthlak a, an thusawi zawm tur, in nula, tlangval tawh," an thawmhnaw chu ka siamṭha pah mawlh mawlh a.

"Anmah niin min tibuai alawm," Andrew-an a rawn ti zat. A inla pa thei ang reng bawk sia.


"Anu...i phakar hrim hrim," ka fapa in a ti zui chu ka en a, ka meng zau lui kal bawk.


A hmui ti pawrh tarh hian, "inah naute min tia, school-ah tlangval minti leh a," a ti niah niah chu ka nui chhuak leh ta hak hak.

"Pawnah chuan in nula, tlangval a, inah chuan ka fa duat te inni ve a," nui chunga tih leh, "Zirtirtu ten naupang sual chu an vaw ṭhin a nia. Vuak ngai leh hauh ngai a awm loh tur aw, kal ru le," an biangah fawp ve vein ka kal tir a, an luh thleng chuan ka thlir liam.

"Eng nga tinge ka Pa bike i khalh?" Ka sira naupang kum 10 emaw 11 bawr vêl leka upa chu ka en chhuk vat.


"Keimah maw?" Ti deuh haw chuan a kawhna lam chu ka en vat a, "i pa...." Ka ti hman zet. Hmeichhe naupangin rum tak maia min enna chu en chhukin, "aw! U Hruaia fanu ini maw? I Pa thawhpui ka nia, ka hmang lawk a nih hi," ka tih takah chuan min la melh ram ram chungin, "Apa bialnu i ni lo maw?" A ti leh nghat. Ka nui hak a ka lu la thing vat bawk.



"Chu school ṭan a hun, kal tawh rawh," a inher a, min rawn en chho lehin, "apa ngaizawng vaih teh..." Tih leh a tlân lut zui nghal nal nal. Andrew-a nen an mizia.in ang riau in ka hre lehnghal.

Ka hnathawhna lam pan chuan ka in khalh chhuak ve leh vat a. Hna tamtak phei chu ka nei lo. Paper work tlem ka la nei ve.

Bike ka hun ṭhat rual, helmet pawh ka phelh hmain inhau ri ni âwm tak ka hriat chuan ka hawi zui vat a.

"Duhtawk teh, i sawi angin Malsawmkimi duh ni ila tunthlenga ka neih chhan tur che a awm lo," Rinfela aw a ni.


Muangchangin helmet chu ka phelh a, ka thlang lam, car park-naa an nupaa ding dun chu ka hmu zui zat.


"A nih chuan inthawk dun tih hi kumkhuaa zep i tum em ni?" U Cindy-i chuan a ti let ṭuau, a ṭap lo chauh bawk.


"Ka zep lo, ka hnathawhpui te chanchin ka sawi i hre tawh ngai em ni? Ani pawh ka thawhpui pakhat ve mai a ni," Rinfela chuan hrilhfiah a tum takzet tih a hriat.



"Thawhpui satliah," a nui hul hak, "hmeichhia, kum tamtak hmangaihtu che leh i mutpui theih hial a nih saw, i theihnghilh em ni?" A aw chhuakah chuan min ten hmel takzet.


Ka chal ka lo ti chuar ve nak, kan mu dun tih Rinfela hian a hrilh em maw ni?


"Kha i thil hmuh kha sawi chhuak fo suh ka ti che a ni lo'm ni?"


"I mutpui ngei sia lawm," ten hmel zet hian a ti let ṭhat.


"vawikhat, vawikhat chauh a ni. Hmeichhe lepchiah ang mai khan chhuah fo suh," Rinfela chuan a ti deuh hrawk a.


"Hmeichhe dang a ang lo ti reng chungin i mutpui thei tho a ni lo'm ni?" A ner zui nawk.


Ka hnunglamah thawm ka hriat zui nak nak avangin inherin ka pensawn ta vat a.


A lo hmu ngei a nih kha, a tirah engmah hre lo leh thleng lo ang maia a awm thei kha a fakawm letling hle mai. Tin, U Cindy-i dinhmun pawh ka hrethiam takzet bawk.

Chutih rualin kum 6 lai a vei tawh a, hmalam a pan a hun ve tawh viau chuan ka hria.


"Sawmte...Sawmte...." Step a ka chho tur U Zemawia'n mi lo ko vat. Ka lam pana rawn tlân ti tih chu mak ti deuh hian ka lo en a, "coffee hi in teh nang," ka nui chhuak hak. Pawimawh deuh emaw tih laia.


"Ka in dâwn chiah kan Nu-in min rawn call a, 'i invaih chuan sofa-ah i mu ang' a rawn ti bau mai sia," a nui huah huah.


Nui khak khak a a coffee chu la in, "i lungin a hua em ni?" Ka in zui zauh. Lung hrisel tak neih loh chuan coffee hi chu in miah loh a himber rêng a ni. Thawk thleng hian a tibuai thei tlat a.


"Hua ang chu maw le, insum hi har ka ti ve ṭhin sia."


"Sir. Ka rin aiin innu thu i awih daih," a nau ten anrawn fiam zui zauh a.


"Nupui te thu hi han awih em em ila inchhung a hlim a ni mai," dik inti deuh chuan a nui zui ang huah huah bawk a.


"Ka lawm e aw U Ze. Coffee rawn lei hman pawhin ka khawsa lo va."


"Doctor-i chu Ṭpa i zui ve dâwn emaw tia."


"Kan tel ve lo," ti let lang langin autopsy room lam ka pan chho vat. Ṭpa training-na lamah a kala awmrei pawh ka ngai lo ang, tlai lamah Lalnunpuii rawn len a tumnen tih zawh vat ka ngai.


Dawhkan bula bench awmah chuan ṭhu thla in, muangchanga coffee in pah chuan kan case khawih zawh chiah chu uluk tak leh kim chang takin file-ah ka ziak thla mawlh mawlh a.


"Lalpa!!" Ka phu zawk a, ka tawlh nghal dawrh bawk.


Thaw zui kawk chuan, "Lalrinfel..." Ti ṭhatin thawh ka tum a, ka bânbula rawn chelha alama min pawt hnai chuan, "che suh," tih leh min en zui rûn rûn bawk.



"Awmsawn rawh," ka namsawn a, ka ding zui zat. Min si chetin ngawi renga a rawn ṭhut hnuah a bulah min la pawt hnai zui a nia. Annu nen keimah vangin an inhau zo chiah tih a theihnghilh em maw ni?


"Malsawm, min huatna ila nei em ni? Engvanga ka lak aṭanga tlanchhe reng nge inih?" Zawk zamah a.



"Huatna ka nei lo che, ka haw reng reng lo che. Tunah emaw hmanah pawh," chiang zet a tiin ka coffee chu ka in zo a. Min en vung vung bawk.


"Tih tur i neih loh chuan chhuak rawh," ka tih zawm zat.


"Hahdamna ka mamawh mai chauh a ni," a rawn ti sup.



"Kawppui nei tawh i ni a, hahdam i mamawh chuan i kawppui lakah zawng rawh, hetah ni lovin," ka lo ti vat.


"I bula ka hahdam ṭhin ang hian tu lakah mah ka hahdam ngai si lo va," a nui zui suk, a zat hmel viau loh.


"Tin, ka ngai hle bawk che," a tih zawm leh sup bawk a.

Beidawng zeta enin, "Rinfel, hmeichhia, hmangaih ṭhintu che kha ka ni tawh lo," ka ti chhuak hap.


A rawn ding a, "Hruaitluanga nen inzawmna inneih tâk vang em ni?" A rawn ti deuh khur khur. A aw chhuak chu nichin maia a aw ri nen danglam tak a ni.


"Engthu nge i sawi?"


"Ka hmu che u alawm, in inkuah lai kha," a ner zui nawk.

"Engtik..." Tih ka tum zuai a, Rinfela laka ka rilru put hmang min zawh zan khan kan inkuah titih chu a nih kha maw.


"A zawhna ang chiah kha ka nei? Ka lakah hian eng rilru nge ila put?" Min rawn hnaih a.


Lo tawlh hnungin, "engmah, ilakah hian eng rilru mah ka pu tawh lo, ka thawhpui pakhat ve mai ini bawk," chiang zeta enin ka ti chhuak a.


"I chiang amaw? A nih si chuan engvanga min hêl reng nnge inih?" Mahni inrin tawkna in a khat.


"Ka hêl lo che. Hnaih chhan tur che ka neih loh vang zawk a ni," min rawn hnaih leh zual a, ka hnungah dawhkan a awm avangin, ka tawlh thei tawh si lo chu a awmah ka lo nam let vat.


"Keiaia Hruaia i thlan tak vang em ni?" A ti leh chu nam sawn dawtin, "Lalrinfel, ka lak aṭang hian eng chiah nge i duh? Ka ti chhuak thlawt. Engvanga hetiang a awm hi nge a nih ka hrethiam lo a ni. A nupui a hmangaih viau bawk si a.


"I hrethiam lo tak tak em ni? Mipa dang kutah ka hlan thei lo che tih hi," awih lo lutuk hian ka lo nui hul hak, ka hmaa mipa kum 7 chuang ka lo hmangaih ṭhin, a fa hial ka hrinsak mipa chu rapthlak ti lutuk hian ka en ngawih ngawih.


"I tenawm takzet Lalrinfel," ka ti chhuak thlawt. A bak sawi mai tur pawh ka hre lo. Hetiang ṭawngkam hi Lalrinfela lakah ka hmang ang tih lah ka suangtuahpha ngai hek lo.


"Ni e. Ka tenawm, mipa dang tan ka phal ngai lo che tih i hria a ni lo'm ni?" A ti leh. Ka thinrim inmung khawm chuan minti khur mai dâwn.


"I hmei ni duh tur khawpa hmeichhe tenawm leh hnuaihnungah min ngai em ni?" Ka aw pawh a khur lek lek tawh.


"I nih loh vang alawm ka hahdamna leh ka inbun ruahna hmeichhia, ka kianga awmtura ka duh che ni," sawi tîmna pawh a nei lo chu a mak ka tiin minti thinrim zual takzet a, hmeichhe lepchiah lutuk ang a min ngaihna te, a hmei ni duh tur khawpa min ngaihna te chuan ben minti chakin, ka ben mai lohnan ka in hum ruh ngat ngat bawk.


A vawikhatnan, a vawikhatnan tak meuh meuh he mipa ka lo hmangaih ṭhin kha ka inchhir a ni. Hetiang tak hian ka lakah a huangtau dawn a ni tih hria ila, emaw a hringnunah substitute hmeichhia ang lekin min ngai ang tih rin ngaihna ka hre lo hrim hrim.


Nge ni a, a chau ve takzet a, a lo inthlak danglam ve ta zawk?



Thinrim khur ru dar dara ṭawng ka tum mêk laiin kawngkhar a rawn ri rawk, U Hruaia hmel chang rût mai ka hmuh rualin ka tum leh duh vang pawh ni miah lovin ka biang a rawn lum thla pup a, rang lutukin ka hru zui tawk bawk.


Rinfela chu inherin U Hruaia hmel a hmuh takah chuan a thaw chhuak hawk a, min rawn en lehin, "kan inbe leh dawn nia," tih leh inher chuan kawngkhar lam a pan vat.


U Hruaia zawn a thlen chuan, a ding dat a, a en chho zui rûn bawk.


U Hruaia erawhin mitmeng dur khupin min en ding ngur thung.


"Rinfel, i kuang lo nawr tum suh ang che," U Hruaia aw chang rût mai chuan ka thisen kal lai anti ding nghal ṭhuapin nia ka hriat ni.


"I tán eng nge a nih? Kan pahnih inkar a nih hi .." U Hruaia chuan Lalrinfela chu a en zui vut a, a mit ti zîm sulhin, "ka nunnaah i kut i rawlh ngam a nih chuan han tum chhin la," zawi tak si, khauh leh nghet churh hian a ti chhuak nghut nghut. A aw ah chuan vauna ka hre tel bawk.

Amah lah chu ngeng ngulh leh pawisak nei lo zet hian a thle zui buk lehnghal. Ka tán chauh pawh ni lo Lalrinfela tan pawh nawr luih a har hmel takzet.


Rinfela chu tawlh hnung zui hrutin min rawn en a, engmah sawi zui ta lo chuan a pen chhuak nghal zat.


Ka lo thaw chhuak hawk thei, ka inthla dul zui hnak a, Lalrinfela vanga ka insan mar zia ka taksa na nghal ṭhûmah chuan ka hre thei bawk.


"Ka lawm e," ka bula rawn ding rûn mai U Hruaia chu mit hnawm chapin ka melh chho ralh.


"Lawmthu min hrilh suh," a ti sup a. Uluk zawka min en chungin, "mipa dang vangin i mittui ti tla tawh suh ang che," fiah zet a tih leh, "ka thusawi kha i hrethiam em?" A tih zawm sup sup. A aw chu Lalrinfela a biaklai ang lo takin a dap lrh hlup tawh. Thûm dût si hian, min tihnat belh a hläu emaw tih mai tur a ni tawh zawk.


Hrethiam chiah lo va thle deuh hâa enin, "eng maw?" Ka ti chhuak haw bawk a.

A chal ti chuar deuh tupin, a thaw chhuak ham ham a, "tun aṭang chuan ka duhdanin ka che tawh dâwn," dam dup maia a tih leh chuan ka bo tulh tulh. Engthu nge a sawi ka hrethiam ta lo hrim hrim.


"Eng maw?" Ât hmel deuh hian ka ti leh a, engmah sawi zui tawh lo va a ngawih rûn rûn takah chuan, "chhuak rawh hna ka thawk dâwn," ka inhersan zet tawh.

Min la en reng bawk nen, alam hawi lehin, "i bike a ngaiah ka dah a nia," tih leh ka bag chu ka ban a, chahbi la chhuakin, "ka lawm e," ka ti zui sep.


Chet tumna pawh a nei lo, min en rengna lah chuan minti zâm lehnghal der der tawh. Hepa hian min en tlang hi a tum ṭhin em maw ni?


"Ti..tikhan min en rûn rûn zel suh," ka dang a awk lek lek alawm a.


A kut chu la in ka dah a, a lo nui suk, nichina Rinfela a biaklai kha chuan a vai thlu fua mai ang tih hlauhawm khawpin a hmel kha a rum a nia.


Minutes tam pawh liam loah a nui leh ang suk suk a.

"Kal rawh rawh.." Ti leh chuan amah tawh hlau deuha pensawnin ka hna ka zawm leh sawk sawk.


Ka taksa za mer merah erawh min la en reng a ni tih ka hre thei thung.

"Chhuak tawh rawh..." Ti leh hlar a ka inher chu a lo nui zui huk a, "nimina case report kha i zawh chuan min rawn pe ang che, ennawn ka duh," nuihza insum deuh chung a ti zui sup supin a inher zui ve ta vut, a taksa nalh tak mai, lian thelh thulh pên chhuak chu chhan awm lêm lo chuan ka nuih zui ve ta sen sen ringawt a!

<><>~>~><>

Note : Naktuk rinni zan aw.🥰😢


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 2nd, 2022, 10:38 pm

THURÛK_99

By

Floria Laldansangi


Chapter < 14 >


"I va awm rei ve?"


"Nia, thildang ka'n ti pah maw le, eng nge i va kalna a an?" Ṭpa ka bulah rawn dingin ka laptop chu a rawn bih zui zauh a.


"A ngai. Tun ṭum case chu ka rilruin Mizoramah hian nupa uire inṭhen mai thei si lo hi engzât tak awm ang maw tih min ngaihtuah chhuah tir. Kum hmasa lama a pasalin a nupui a sahlum te kha," a rawn ti duah a.

Laptop chu khupin, "a nia sin, in uire san hi chu a dan a dang êm a ni. Tun case ami hi engtia a thah nge i hria em?" A lo bu nghat a.


"Hruaipuia a Hotel room-ah a luh chilh a, wire khan a rek a, rek hlum lovin chhuatah a chal a tauh tir a ni âwm e. Annu kha chu a damdawi ei tur kha a zo tiin a hrilh a, a ai awh, a in ang chiah a lei thu a sawi a, mahse injection ngai tiin, amah ngeiin a jection. A hmangaih si a, a nupui nen fa annei har lutuk leh nupui uire reng kha fa nei thei lo ah inngaiin a rilru a buai niin ka hria, naktuk hian doctor-in an va hmu ang," Ṭpa thusawi chu ka lo buk khum nghauh nghauh a, rawn nui deuh thutin, "a ṭawng lawk duh lo kha, U Hruaia thinrim a tâwng a, a hläu ta lutuk kha a khawngaih thlak zawk alawm," a nui zui huk huk.


Kha vang kha a nia ka en zawh duh loh ni?


"I haw ve nghal emaw ka tia," ka bag-ah ka inkhung khawm sap sap.

"Ka let leh, i haw dawn em ni?" Ka bu nghat.

"Ka hna ka'n zo ve lawk ang, a nih.." A tih chuan ka kut vai zauhin ka chhuak zui a.
.
.
.
"Awi! Ni a sa si, pawnah te in awm ni?"

"Tete.." Sophia-in min rawn pan vat.

"Khawia bike nge kha i neih a?" Ka fapa chuan min ngaihsak lo nasa mai.


"Anupuiin a lo leisak bîk a. Anu ka duh ve," Emma-in a lo ti ṭiau, Andrew-a hi chu A Nupuii fapa bîk hi a nia, fapa anneih loh avang hian U Nungi te nupa hian an atchilh tawp a.

"Nula in nau te thil awh te chu a," ka ti chu a ner nasa ngang mai.

"Tete.." Sophia chu ka en a, lai deuh ṭet ṭet chunga nui sen senin, "bialpa ka nei a sin," a ti zui sa sa bawk, nui hakin, "khawi a mi nge?" Ka ti vat a.


"Apu te inthlang ami," a biang a la tai ang têk zui a.

"Keipawh Delhi-ah ka nei ve? Tiraw Emma?" Andrew-an lo ti vat.


"Rawn lut vat teh, i blind date kal chungchang te chu details inrawn sawi teh," U Nungi aw ka hriat rualin Lalnunpuii leh Rinrini nui ri ka hre zui zat.


"Nisaah awmrei suh u aw, Sophia-i i nau te hi enzui la," Inchhung lam ka pan zat.


"Rawn lut vat rawh," inchhung ka luh rualin an lo nui ṭhû hlawm.


"Lalnunpui, zawngi..." Ka ti lut chu a nui zui uar uar a.



"I chawh ngawt mai, kum 6 chhung i bo vang a nih kha," tih leh a nui zui leh uar uar.


Nui ve ta ṭhû chuan, "a thaw uih lutuk mawlh kha ka luak teuh lutuk. Zankhuain ruang kan khawih a, kawchhung kan hawnga en hrep hnuah kaw ruah laiin hmazawn aṭanga a rawn chhem huk zel kha chu, ka ti thei meuh lo a ni, chil a rial nghal rawih rawih mai alawm," ka uar pawh a ni lo, a nihna diktak a ni. A hmel leh inthuam dan kha chu a kum rualah chuan a smart ve viau nâ.


"Awii tunge a?" U Nungi'n hriat chak tawk hian a lo ti a, Lalnunpuii leh Rinrini erawh ṭawng tur an awm rih lo, an dir tlawk tlawk.



"Joseph-a, a ni leh lo, Stephen-a zawk, ka Pu te rual a nih ka ring," ka tih leh phei chuan ring lutuk hian Lalnunpuii te pahnih an lo nui thler duar duar a.


"U Nung, ka Pa te kawmthlanga awm ṭhin kha," Lalrini'n nuihna avanga thawchham lek lek tih hriat tak hian a rawn ti chhuak a.


U Nungi nui ṭhuin, "Tunge ka la hre chuang lo," a ti leh.


"Awi i ninawm aw, annu pawh tlema ṭhâm ṭhen deuh, 'sumo dinglaiin min su' ti tlat tu kha," Lalrini bawkin nui chungin a rawn ti leh a.


U Nungi chu nui ṭhu chungin a ngawi vung vunga, "awi!! Pu Stephen-a maw? Kan naupanlai aṭanga kan Pu tawh?" Rawn ti hluaiin anni ai aiin a rawn nui ring a, a khek zawk hialin ka hria.


Lalnunpuii mittui tlaphung leh pum dawm chungin, "awi ka thawchham, ka thaw thei lo. A kekawr tight tawkah sanitizer lian tawk mai an ak puak pawng zel bawk a," tih leh a dir lehnghal char char.


Keipawh chu nui chhuak ta khak khakin, "kutah taksa pum daih a rawn sawr chhuak bawk a, a tawpah phei chuan chibai ka tum leh pawh khan a haidera a tlânin a tlân chhia," nui khek khek chung chuan ka ti zat zat.



"A hausa a nia aw, annu damlai phei chuan a duat thiam ve thei sia, 'ṭhahluani' tikhan a ko kher zel a, keini tleirawl ât zual lai lo nichho nen, i U te ho nen khan an vengah Pu Stephen-a chhaihbuai tur hrim hrim khan kan va kal vang vang zel. Bengchheng lah kha a ti thei miah lo va," nui bawk bawk pah chuan U Nungi'n a ti a, "burah lung kan thun a, an in zawn kan thlen khan tlân chhe pahin kan thing ri chiam zel, min vawmzui nasa thei lutuk," la nui reng chung chuan Rinrini'n a lo ti ve zat bawk.



Ka blind date kal chu kan hlimpui ta phian mai.

"Thildang sawiteh ang u," a nuihna mittui tla hru hul paha thaw deuh kawk kawkin, "nizanah Cindy-in min rawn text a, i haw thu ka hriat leh hriat loh min rawn zawt a, ka hriat thuin ka lo chhang mai sia, 'engah nge min hrilh loh' a rawn ti chiam ringawt a, ka reply buai peih lo," Lalnunpuii'n a rawn ti zui hlak hlak.


"Min rawn zawt ve alawm, keichu ka lo ti, 'a rawn haw leh haw loh hrilh hre tur chein kan inpawh lo êm alawm,' ka lo ti deuh hmak a, emoji mittui tla lai min rawn thawnleta ka reply leh ta lem lo," Rinrini'n a lo ti ve zat.

"Engah nge a rawn haw leh haw loh pawh chu a lo buai ve ngawt a, a pasal a ring lo viau a nih leh veng sela a ni mai alawm," U Nungi'n a lo ti hlak hlak.


U Cindy-i demna ka la nei ve thei lo, tukkina Lalrinfela chezia ka hmuh hnuah ngat phei chuan rintlakin a awm lo tih a hriat theih.


"U Cindy-i pawh dem tur a awm lo alawm," ka lo ti sep, min enzui haw hlawmin, "zep i nei em?" Lalnunpuii'n a rawn ti zui hlak.


"Zep han nei leh teh aw, damchhung piahlam thlengin nia kan inṭhianna hi tawp dawn ni," a rawn tih zawm hlak hlak.


Lo nuiin, "tukkin khan Rinfela nen kan inbia a," ka ti ta sep.

"Eng nge a sawi, che nawi leh viau lo maw?" Rinrini'n a lo ti zat.


Za vak lo va nuiin, kan inbiak dan chu ka sawi zui siam siam a, "awi a zakthei lo mange, keimah hian ka la zilh dawn alawm," Lalnunpuii'n a rawn ti chhuak hlak.


"Rinfela hi chu a rilru a chhia pawh a ni lo, a ma ât ât hian a â tawp a. Bakah, naupantet aṭanga mipa dang i nunah an tel ngai si lova, i nunah mipa dang han lakluh i nei ngai si lo nen, amah chauha i hmangaih leh ngaihsak nih kha ngaiah a nei niin ka hria. A mamawh hun che a piangah a kiangah i awm a, ngaihzawng ṭhenin, a nu leh pa te nen inti thiam lo sela i hnen bawkah a rawn tlân lut a, kha kha amah chauha dâwn kumkhua a tumna hian midang lakah a thlah liam thei lo che niin alang," Rinrini'n a rawn ti siam siam.


Lalnunpuii a lo bu nghat nghat a, "a dik viau mai, a hmangaih che a, nupuiah leh a kawppui a tan a duh che pawh a ni lo, a mamawh hunah che a kianga i awm lo tur kha a ngai ngam lo a nih chu; Mahse, a hmasial thlak êm mai. Mipa puitling a ni tawh a, hrethiam a, thudik hmachhawn ngam tur a ni tawh," U Nungi'n a rawn ti ve duah.


Ka lo bu nghat a, "a hma a sial ngai lo a sin maw le," ka la ti hrâm. Ka ti tak tak bawk. Rinfela ka hriat ṭhin kha chu rilru tluangtlam tak, vei leh ngaihtuah zui engmah nei lem lo, ui nei bawk si lo a ma awm awma awm ve tawp kha a ni ṭhin si a.


"Chaw ei ru aw," ka ti zawm ta hliai.


"A awihawmloh, kan pasalte engtin nge?" Lalnunpuii enin, "vawikhat te mai mai, an inchhum ve ang chu," ka ti chu an nui zui hak hlawm a.



"A chi loh ang," Rinrini'n a rawn ti ve vat.


"Call ula sawi mai rawh u, bawngsa rep thau tha lutuk kan nei ṭeuh a nia," ka tih takah chuan Lalnunpuii leh U Nungi an meng deuh awk, anhnar thei lo tih hi ka hre ve e!!!



"Kanpa ka'n bia ang e," Lalnunpuii'n an pa a call zui chu kan lo nui hak.



"Ka'n be ve ang a ni mai alawm," tih leh Rinrini'n Hmaa a call zui zat.


Lalnunpuii chuan a be tlâng lo nge message a type mawlh mawlh, "Dear, Sawmtei te in ah chaw ka ei dawn a sin," min rawn melh a, loud speaker a on zui zat.


"Nuthlawi in ah inlêng dek deka chaw ei intum nghal a," a rawn ti lang lang.


"Malsawm, kan nu kha i lo hruaisual ang e aw," a rawn ti zui zat.


Rinrini lama âwn hnaiin, "neihlei lo, nghei hlei lo va awmdan ka zirtir dawn," ka ti let chu, "ka hnek ang che," a rawn ti nghal dût dût. Kan lo nui hak hak hlawm.

"A nih chuan department dinner neihna tur lamah ka kal ve mai a niang chu," a rawn ti ve leh mai bawk a.


Kan ṭhian ho chaw ei leh titi tui nen, an pasalte rawn thlen hnu pawhin zan dar 12 rik thuakah an haw darh ve ta hlawm a.
.
.
.
"Anu, tho tawh la, school kan kal dawn," ka fanu in min sawi dat dat.


"Bawihte, vawiin chu i U Ruati inthlah tir rawh u, ka mut a chhuak êm mai," mut la chhuak tak chuan ka tu chhuak a, a thaw vei hak chu ka hre thei.


Ka biangah an rawn fawp tih ka hriat chuan mit chhing reng chung chuan ka nui zui sen sen bawk a.

Engtia rei nge ka mut ka hre lo, zing chaw pawh ei lovin ka mu tlang a ni ngei ang, kawngkhar inchum dawt dawt riin min ti harh a, mut rei luat avanga taksa zawi leh lu na deuh bur chuan ka ṭhu chhuak hlawl.


"Malsawm, i awm tih ka hria, kawngkhar hi hawng rawh Malsawmkimi..." Rinfela aw ṭeng zet mai ka hriat chuan ka harh kawk, tuivawta leih ang hlauh ka ni.


Khum aṭang chuan ka zuangthla ti tih a, pajamas nena ka tlân chhuah rualin kawngkhar a rawn in pawt hawng ṭhuai bawk.


Ruati'n kawngkhar a kalh thei lo tih ka hre chhuak har mah mah a ni.


"Chhuak rawh..." Ka ti ṭhat, kawngkhar lamah chuan ka ding zui at bawk a.

Ani erawh inchhunga rawn lut vutin, "dawt pakhat pawh tel lovin min chhang ang che, tu fate annih?" A ti khur khur.

"I thusawi awmzia ka hre lo, ka in aṭang hian chhuak rawh police ka call hma in," a nui hawk, a rapawm mah mah.


"Ko rawh. Phiangsen che hian Malsawmkim, tu fate nge annih?" A ti leh hrawk hrawk. Chutah zet zawng a zawhna awmzia chu ka beng awmna ka chian tlukin ka chiang a, ka thuruk phawrh a ni tih hai rual loh vin ka hmu thiam nghal bawk.



"I thusawi awmzia ka hre lo chhuak rawh.. " Ka aw erawh a ring ta lo viau, ka khur nghal ti tih bawk, ka pajamas chu nghet takin ka ṭhambet nghal ngat ngat a.

"Malsawmkim...." Ka dar tawn tawn a rawn chelh chuan min thing nawk nawk, ka lu a hai nghal muai muai thei.


"Mi â emaw minti em ni? Ka hmai zawnah chuan a ti leh hrawk, ka lo ip chawih.


Thin phu zawih zawih chuan ka inhum ruh ngar ngar a, "min thlah rawh..." Ti ṭhatin min vawnna ka phih thla sawk.


"Ka fate, ka fate, buaina i nei em ni?" A au ang chiah chuan ka au khum let tawn tawn.


Nasa min tih hmel tak hian min en ngur ngur a, "ka fate anni em?" A aw chhuak chu a harsat hmel takzet.


"I fate ni lovin, ka fate, ka fate chauh anni," ka ti chhuak leh vak. Ka thaw zui kawk kawk bawk.


Engthil nge ka hmachhawn zel dâwn ka hrethiam tawh lo va, ka hmalam hun thim leh pik zia erawh ka hrethiam thung.


"Engvanga zep nge inih?" Ka lakah chuan alawm loh hmel takzet. A mitmengah phei chuan min thah pawh a pawi sak loh hmel mah mah zawk.


"Hrilh chhan tur che ka nei lo, ka fate anni a, engvangin nge ka hrilh ang che ni?"

"Ka fate anni ve tih i hre lo em ni? Ka tel ova an pian i ring em ni?" A rawn ti let hrawk.

Lalrinfela melh nghekin, "piang e, ka pai tirh, an pian dâwn leh an pian hnu thlengin annunah i tel ve lo," ka ti chhuak tawn tawn.

"Thiam loh min chan miah suh, nau i pai tih ngawihbo puitu inih kha," a aw ah chuan mindemna bak hriat tur a awm lo.

Za lo lutuk hian ka nui chhuak hak, ka mangan ruk lutuk vang a ni mah zawk.

Lalrinfela melh chho khai chungin, "hrilh ta che ila engthil nge itih ang? Mahni thinlung pawh hrethiam lo tu mipa khan engthil nge itih theih i rin? Nupui nei mai tawh tur, a ruala hmeichhe pahnih i raitir hnuah engtin nge thuthlukna i siam ang. Rinfel, i nun sawi loh, in nupa nun ata ka bo hmak thei hi lawmthu min hrilh zawk tur chu i ni. I thei lo a nih chuan kan nun ata hi kalbo rawh," a tawp lam chu ka sehchilh lo chauh, thinrimna, hlauhna leh huatna nen ka riat chhuak nawk nawk.


"Teuh lo, ka fate anni a, annun ata kalbo chu a hnai lo mai, ka hnenah ka la ngei ang."


"LALRINFEL..."


"AW! Lalrinfela ka nih chhung chuan ka chân ring suh Malsawm, fa nei tura ka beih nasat zia i hria em? Tunah fa ka nei a, engvangin nge ka kalbo ang ni?" A rawn ti leh chhur chhur.


Ka khur chhuak lek lek tawh, "ka nun zatve tawpah khan ka âtpui che a; a zatve dangah erawh ka duhdan leh ka thlazar hnuaiah ka fate nen kan nung ang . I tel ve lohna, i thuhnuaia awm a ngaih lohnaah. Min vau suh, hmangaih ṭhintu che hmeichhia kha chu i nun hmasa a mi a ni tawh. I ngam ngam rawn ti la, i thlen chin a piang ka thleng ngam. Hmeichhiain eng angin nge an fate an humhim ngam ka entir ang che. I tlân a nih chuan ka thlawk ang tih hi ring tawp rawh," ka thaw a chham lo chauh, ka thaw zui nghal kawk kawk.


A mitmeng leh a kut a hum ruhdanah min ben a châk zia a lang reng.


"Malsawm, ka ṭhut mai mai ring suh ang che," a aw chhuak tin chu in vauna a ni bawk.

Min kal pel vukin, na zet chuan kawngkhar a khar ri zui bur bawk a, mit chhing sawkin ka lo ip chawih bawk.


A car tlân chhuak ri ka hriat rualin chhuatah ka ṭhu thla hnawk a, ka mittui rawn far zui kauh kauh chu ka khap let nghal vat vat.


"Ni lo...." Tih leh ka phone ka dap, pajamas nen ka la awm avangin, innem tho rawk rawk chuan room-ah ka tlân lut a, ka phone khum bul a mi chu ka ban rawk rawk.


An school-ah a kal vaih chuan....ka ngaihtuah ngam lo zawk!

"Ruati khawnge i awm?"

"Kawmthlang dawrah, ka rawn..." Ka off zui nghal.


"Tunge..." Ka ti hman, U Hruaia ka hre chhuak zawk, ka phone chu khur deuh dar dar hian ka thai thla a, hetiang tak hian ka la hlauthawng ngai miah lo, ka pai tirh, ka pai lai, ka chenna in leh min hringtu ka Nu ngei ka chhuahsanlai pawhin mahni inrin tawkna in ka khat a, mahse tunah hian, tunah hian ka zâm nasa lutuk mah mah a ni.


"U Hruai, min pui rawh..." Rei pawh a ring lo, ka aw te chu a khur chhuak lo chauh.

"Chiai suh Myla, muangchang khan sawi rawh," a rawn ti vut a, mit chhing sawk a thaw lain ka thaw chhuak ham ham.


"Rin..Rinfela'n ka fate a hria a..." Ka mittui a rawn hnam zui ṭiam ṭiam.


"Ka hria e," tih leh phone chu a ri zui tut tut, eng nge a tih dawn ka hre lo mah se a puihna ka dil rawih a, ka rin a ngai a ni.


Ka thawmhnaw chu ka thlak sawk sawk a, ka chhuak tur leh Ruati rawn lut kan in tawk chiah.


Ka kalna tur min zawh pawh chu ka chhang ta lo, a tlânin ka tlân chhuak dawr dawr.


Taxi zawng pah si chuan kawngpuiah chuan ka pên thla hlawk hlawk a.


"Chuang rawh," ka ding dawt. U Hruaia hmel ka hmuh chuan ka hnuk a ulh mai dâwnin ka hria, engtin nge tunah a rawn thlen theih zawk. Ka biakna pawh a la rei si lo va.


Chet mai nachang pawh ka hre lo, amah chu a rawn chhuak vut a, dam dupa min rawn chelhin, "hlauthawng suh," a ti zawi sup a, car min kal hualpui chuan kawngkhar hawngin ka chuang lut ve ta vata, khar nat hlauh hmel tak hian a khar zui khap.

"Myla..." Ka kut ka malpui chunga nghet taka ka ka suihbeh chu a rawn hum hnan thut a, ka lo phu zuk mai.


A lo thaw huk a, ka kut a hum chu hmer salhin min rawn en deuh vung vung a, ka lo thaw chhuak ham ham.


"Min ring rawh," ti leh supin a tlân chhuak zui zat. Engvanga ring nge ka nih ka hre lo mah se ka duh emaw duh lo emaw hepa hnaihah hian ka him a ni tih hial rual lohvin ka chhungrilah hian ka hre thei.


Kawng tluangin gear a thlak chhung tih loh chu ka kut chu a hûm vung vung reng a, hûm tlat lo se ka hlauhthawnna a reh mai pawh ka ring hek lo.



Ka fate school kan thlen chuan ka rin lawk ang chiahin school gate hmaah Lalrinfela car ka hmu zui zat. Chhuah ka tum chu U Hruaia'n ka bânah chelhin, "hahdam rawh, naupang school an rawn la bân loh saw," a ti sup sup. Ṭawng ka tum zuai a, mahse buaina siam aiin car chhung lo nghah chu ṭhaa ka hriat ve tâk avangin ka ṭhu let dat a.


Lalrinfela pawhin kan awmna lam a rawn melh leh ṭhin, a hmelah lah chuan naupang lak ngei a tum emaw tih mai tur a ni lehnghal.


Ka fate school bâng har ka tihber ṭum a ni hial ang. School lam chu ka hawi sek bawk a.


"Myla.." U Hruaia lam ka hawi vat, ka mitah enin mit ti zîm sûta min lo em chuan, "hahdam rawh, mipa anni a, mawi lo takin a che lo ang," ka lu ka lo thing mat mat.


"Kan inchhungah ngei min rawn luhchilh a nia, Rinfela ka hriat ṭhin kha a ni tawh lo. Mualpho pawh a pawi sa hauh lo ang," ka ti zui sep sep. Ka ti tak tak bawk. Fa nei tura a beih nasat thu a sawi lehnghal a, fa a nei tih tunah a inhre tawh lehnghal!


Tlai dar 3 rik dâwn chuan car a ṭangin ka chhuak vat a. U Hruaia pawh a rawn chhuak ve vut tho.

Naupang school aṭangin an rawn chhuak sang sang a, ka fate hmel ka hmuh rualin ka pan vat.

Lalrinfela'n kan lam pan a rawn tum chu U Hruaia a hmaah dingin, "car-ah hruai lut rawh," a rawn ti sup.


Bu nghatin, "car-ah lut rawh u, car-ah..." Tih leh ka pensawn pui hlawk hlawk.


Ka fate mitmenga mak tihna chu ka hmu reng bawk.


"I inrawlhna tur a ni lo Hruaia. Helai hi kan hnathawhna a ni lo tih i theihnghilh em ni?" Rinfela chuan a ti khur khur.


"I hriatreng a ṭha zawk lo'ng maw?" Muang ban sup hian a ti let a, a thle zui buk bawk. A chezia engkimah chuan Lalrinfela chu a thêngthâwngah a thawh hmel viau loh.


"Kal ang U Hruai," naupang ka luh tir hnuah ka au zui vat.

Lalrinfela mitmeng chu min thah chaknain a khat. Bakah, a kut ram zia ka hriaa kut a thawh mai ka hläu tak tak.


"Ka fate annih sawh.. Malsawm, hetiang zawng hian em ni i chet dawn?"


"Naupang ti hläu zawngin awm lo la a ni mai," ka ti let hlak, naupang school hruai ve dang ho in min en haw haw hlawm lehnghal.


Rinfela âwmah beng thuk thukin, "mipa inih kha, mipa angin che rawh," dam dupa tih leh a rawn inher vut. Rinfela mitmenga tlawmna chu ka hmu chiang viau mai.


Ka fate bulah chuan ka ṭhu lut ve vat a, "anu tunge sawipa saw?" Emma-i enin ka thaw chhuak ham ham, engtia sawi tur nge ka hre hek lo.


Mak tak maiin an ṭawng theih tirh aṭangin vawikhat mah a pa chanchin hi min la zawt miah lo, pa han awhna pawh annei lo emaw tih mai tur anni.


"Tunge pizza ei duh?" U Hruaia'n a rawn tih takah chuan Andrew-an, "keimah, mahse Uncle tunge inih a?" U Hruaia car khalh chhuak chu a thlek zui hâ a.


Darthlalang aṭanga rawn melh zawkin, "tunge inih min hrilh hmasa la," naupang biakte chu a hmel en aiin a thiam fu lehnghal a. Hepa hian mize mak deuh hi chu a nei a ni.


"Keichu anu fapa Andrew-a," min kawkin a âwm a kawk leh a, "a nih nang ve?"A ti leh zat. A hriat duh a hriat hma chuan a zawt ngat ngat peih tih a hre lo a ni.



A chhandan tur hriat tumin ka lo en ve ran a, ka mitah min rawn en zawkin, a khi suk, eng nge maw a ngaihtuah le?


"I nu bialpa," zawi sup hian a ti a nih chu!


"U Hruai!" Ka lo ti nghal vat. A nuk suk duh lek lehnghal ka fate chu ka en nghal vat.


"Ohh! Sophia-i pawhin bialpa a nei, keipawh bialnu ka nei a, anu nangpawhin i nei," Andrew-a chu mak ti fe hian ka en.


"Ka duh ve," Emma-in a rawn ti vat. Ka fate hian thinrimna chang anhre lo em maw ni le? An thikthute hi a chhe lo zawk nge? Thikthu chhe rual anni tawh chuan ka hre si a.


"A ni hleinem," ka ti tak nâ-in U Hruaia an en leh daih lehnghal a.


"Naupang bulah dawt sawi suh," ka'n ti thla ngawt a. Ka fate ber lah chuan an ngaihsak zui lem hlei lo va.
.
.
.
"Apa..." Order kan nghah laiin hmeichhe naupang hi kan bulah a rawn ding a, min rawn melh leh ta ram ram mai.

"Hi!" Hmeichhe pakhat, a nupui nge a nupui hlui ni ang tih ka lo ngaihtuah hman. Mahse, "nupui ka nei lo," a tih kha maw. A nupui hlui a ni ngei ang.


"Hi..." Ka ti let sap.


"Apa ngaizawng suh ka tih kha i hre lo ami?" A ti nghal tan tan.

"Shanel..." U Hruaia'n a lo ti hluk.

"Eng nge inrawn tih dawn?" Hmeichhe ding ve chu a melh chho rulh a.


"Pizza dawrah Pizza bak a awm em ni? Hruaia nau Zodini ka nia, Sawmtei i ni ang maw?" A kut a rawn lek chhuak zat. A rukin ka lo thaw zui ham ham lehnghal. A nupui hlui a nih ka lo ring lutuk nge ni? Ka zahpuiawm mange.


Bu nghatin ka lo chibai ve vat a.


"Ni!" Shanel-i chuan a rawn ti chhuak vak, a rak a ni mah zawk.


"Au vak vak suh, dawrah an au vak vak ngai lo. Tiraw nu?" Andrew-an a lo ti hlar.


"Bawihte.." Ka khap vat.


"Duh leh ka au ang, i Nu hi ka pa bialnu atan ka duh lo," a ti leh tuar tuar.

"Anu bialpa alawm," Andrew-a lah hi insual peih at reng.


"A ni lo ka tih kha," ka fapa chu kâ chu ka hup zui vat.


Ka hawi kual nghal thuak thuak, awm ve dang ho chu kan ṭhutna lamah an rawn hawi ta ṭhap lehnghal.


"Shanel..." U Hruaia aw chu a ring lo, mar tak a ni. A khauh fuk mai a, ṭawng leh ngamna chi a ni lo hrim hrim. Ka fate pawhin a thinrim tih an hrethiam a ni chek ang chu, min rawn nek zui ṭalh ṭalh mai.


A fanu pawh a bâng chuang lo, a mittui a parawl nghal ṭiam ṭiam thei.


"Shanel, i nungchang a mawi lo lutuk. I pa hi naupang a ni lo, Pizza pawh ka lei lo ang che," U Hruaia nau chuan ti hlak hlakin min rawn en a, "remchangah kanla inkawm dawn nia, thuruk ka hrilh ṭeuh ang che," nelawm deuha nui var vara tih leh, "min rawn zui rawh," a vahnu chu a pawhin a pawt chhuak dat dat.



U Hruaia ṭhu ngawi ngul mai chu ka en zui vat a, "ei rawh u," kan pizza order rawn thleng chiah chu kan hmaah a rawn nawr hnai zat.


"U Hruai," min rawn en zawk.


"Umzui rawh, i fanu khan hriatsual nei a nih kha. Naupang rilru thianghlim a nia, a rilru a nâ ang."


Luhlul zet hian a lu a thing vut a, "naupang a ni tawh lo," ti sup hian, pizza chu la in a kaihzui deuh hmawk a, "ei rawh," a ti zui sup bawk. A luhlul tih piahlamin hei pawh hi a luhlul tih a hriat.


Apa luhlul a chhun dâwn a nih hi!


<>~><>~><>

~ HRUAIA..POV ~


"Shanel, kawngkhar hi hawng rawh."


"Nangpawhin min duh tawh lo, anu pawhin kei aiin pasal a nei duh zawk a, nangpawhin bialnu i nei," ka thaw hawlh.



"Ama awm awm khan awm tir mai mai rawh. Kha chahbi," Zodini chahbi min pek chu la in ka hawng zui a.



Min hnung chhawn zawngin a ṭhu zui at bawk.


"Ka hrilh tawh che a ni lo'm ni. Ka tlangval lai aṭangin hmeichhe hmangaih ka nei ka tih kha," ka ti sup sup.



"Mahse, ka pa ini tawh alawm," ṭap pur hian a rawn ti chhuak a, ka lo nui suk.


"Ka la ni reng dawn alawm."


Min melh vei ram ram, "ka duh chuang lo," a ṭap nghal pur.



Ka phone a rawn rik takah chuan thlem zui ta lovin ka thawhsan a.


"Sir,Ricky-a notebook kha a awmna chin hriat a ni."


"Khawiah?"


"Financial Minister Rokima, i thawhpui Rinfela Pa kutah," ka thaw hulh, ka rin lawk a ni.


"An in ah lut turin min duh em?"


"Ka kutah dah rawh, file bo chungchang kha eng nge dinhmun?" Ricky-a postmortem-na file bo kha hmuh ngei ka ngai.



"Ka hre lo Sir."


"Ka hria e. Zanin chu Myla-i enzui ang che. Lalrinfela hmel i hmu a nih chuan handcuff bun tirin lockup ah dah rawh," ka duh aiin Lalrinfela hian a huang a pel ang a, ka duh loh thleng min nawr ang tih ka hläu ṭhin. Myla-i chungchangah ngat phei chuan mipa ang pawhin ka insum zo ṭhin si lo va.


"Sir, Ahmedabad lama ralthuam kan mansak hi engtia ti turin nge min duh? Police kutah kan dah dâwn em ni?"


"Tikhan dah rih rawh se, thuleh a awm hma chu," ti leh supin phone chu ka off zui zat. Rinfela Pa ralthuam tawlh ruk kan man vawikhatna a ni lo, police kut-a kan hlan a piangin karkhat pawh a tlin hmain ralthuam chawpa chhuah anni ṭhin.


Ka computer chu On-in Ricky-a case hlui ho chu ka en nawn leh a, ka email dawn chu ka open vat, "inrawlh thük suh, i ṭhianpa ang a tawp i duh loh chuan," tihte mai hi a ni.


Ka kiai zui suk, hläu ni ila bul ka ṭan hauh lo ang. Autopsy (postmortem) result an thlakna pawh fiahna ka zawng hmu ngei bawk ang!


"A chhiat loh kha," Computer ka khup vat.


"Kawngkhar kik rawh," a lo nui awr awr.


"I thuruk hrilh ka chak tawh."


"Zodintluang..." Ka ti hluk.


Nui awr awrin, "eng nge, tleirawl zûn khan a phuar na ve êm che alawm," a la ti zui ar ar a.


Ka lo thaw hulh a, "chhuak rawh hna ka thawk dawn."



Ner nang nangin, "bem tlu vat la a ni mai, bialpa a neihsa leh hma che in, ngaihzawng lamah hi chuan satel hi i ang a," ti lwh zat zat chuan a chhuak zui ve mai.


Ka nui ta suk a, tun ṭum chu chhuah ka tum bik hauh lo, nupuia neih ngei ka tum bawk!!


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 2nd, 2022, 10:38 pm

THURÛK_99

BY

Floria Laldansangi


Chapter < 15 >

<><>~>~>

"A fanu chu a va nasa reuh tak," Lalnunpuii'n a rawn ti lang lang. Call pawh hian a aw hi chu a bengchheng fal nalh zel. "Ralte bengchheng" tih zawng zawng hi a nei zo va.


"A thikthu a pe chhe ve a nih dâwn chu, chhungkaw keh chhiaah hi chuan tumahin naupang tawrh ai nasa an tuar ngai lo. Naupang hi a tuar berte anni ṭhin. Anu in pasal dang a lo nei tawh nen, tunah phei chuan a rai nghe nghein ka hria, chutianga a fanu a awm pawh chu a âwm lo hran lo," U Nungi'n a rawn ti deuh duah a.

"Ka Nu te an inṭhen pawh khan ka nih ve tho kha, hmangaih loh leh ngaihsak loh, duh loh bikah khan kan inngai deuh tlat a, ka hrethiam lutuk," Rinrini'n a rawn ti ve zat.


"Hruaia lakah chuan feelings i nei lo tak tak maw?" Lalnunpuii hi chu ka beng pawp châk ṭhin.


"I nin awm Lalnunpui," ka lo ti hlak chu an rawn nui hak hlawm a, ka lo nui ve vur vur tho.


Mahse, U Hruaia ka ngaihtuahnaah a rawn lang zui zat, a bula ka awm khan engti zawng emaw takin ka thla a muang a, a mi chelhna khan, mahni pawh inthunun zo lo khawp kha min thunun tlatin ka hre bawk.


"Rinfela te zawk chu a ni, fimkhur viau rawh. Harsatna phei chu a inthuah duh si. Cindy-in a hre tawh ngei ang a, Nu Rpi te nupa ni bawk, tu an awh dan lah chu a namai bawk si lo," Rinrini'n a rawn ti zat zat.


Ka ngaihtuah nasat poh leh engtia tih chi nge ka hre lo tulh tulh. An hma rawn lak dan dana lo do let tawp chi nge tih te min ngaihtuah chhuah tir.

"Rini sawi chu a dik viau mai. Chutih rualin han fimkhur ngaihna vak a awm pawhin ka hre lo, engtia rawn hria nge maw a nih reng reng ni," U Nungi'n rawn tiin, "a theih chuan Rinfela te pawh ṭha takin biak tum zawk la, naupang chungchang phei chu thil tih vut vut chi a ni pawhin ka hre lo. Naupang lâk a tum tlat phei chuan naupang inti mangang mai mai. An rilru tihbuai kha a hlauhawm a nia," a tih zawm leh siam siam.


Ṭhu chunga inbiak theih chu tunah chuan ka beisei ngam lo hrim hrim, Lalrinfela mitmengah khan min huat hmel takzet si a.


"Kanpa ka lo biak tir dâwn em ni?"

"A ngaithla dâwn lo rapthlak lutuk a," Lalnunpuii'n uar fahran hian a lo ti zat. Hmaa biak mai mai chi pawh a ni lo, Rinfela te zawng a tih lohnaah chuan a luhlul ve ngar ngar êm mai.


"A pawi e, Lalrinfela lakah kher kher i rai hi chu," Lalnunpuii'n a rawn tih chuan an lo nui hak hak hlawm. Keimah tak pawh chu za zetin ka nui chhuak hak hak a.


"Lalrinfela bak in tih tir a tum loh lai kha a nia," U Nungi'n a rawn ti zat.


Nui awr awr chungin, "a pawi khawp mai. Bakah, ka lo duh lutuk khan pawisak min neih loh tir a, hmangaihna kha thianghlimnaa ka fiah chuan a hriat thiam ka lo ring kha a pawi a ni. Ka hriat chhuah chu, thianghlimna hmanga hmangaihna kan fiah rualin kan thianghlimna pawh a tawp a ni tih hi a ni," a tawp lam erawh ka thutak viau mai.


"Ka mu dâwn. Ka off dawn a nia," ka ti leh ta daih. Ka mut a chhuak viau tak tak bawk.


"Awi! Zingah i tho tlai a ni lo'm ni?"


"Tlai e mah se ka thil tawn velin minti chau," ka nui zui khek khek.


"Chhetak e aw! Hnaah buai leh viau la ka ti hle mai," Lalnunpuii bawkin a rawn tih chuan an lo nui hak.



"Mi te thi turin i duh tihna em ni?" Ka ti chu nui uar uarin, "awi! Chutiang lam pawh a ni lo," a nui zui tak awr awr a.


"Lawkin, mut hmain, 'Myla' tih hi inhre ngai em?" Ka'n ti leh lailawk a.

"Eng nga tan nge?"

"Ka hre duh mai mai."


"I fanu hming thlak i tum em ni?" Lalnunpuii ât fal theih zia hi chu.



"Tum lo, tum lo," a la nui awr awr zui.


"Ka hriat sual loh chuan, 'hmeichhe khawngaihna ngah leh huaisen' sawina niin ka hria," Lalnunpuii bawkin a rawn tih zawm zat. U Hruaia hian min ko fo si a, a chhan hriat ka châk deuh riau.


"Ka out dawn a nia, muttui u," tih leh kan in mangṭha diat diat hlawm a.

Mut tak pawh ka muhil thei ta chuang lo, Lalrinfela a rawn kal ang a, buaina a rawn siam ang tih hläu ru reng rengin ka fate ka vêng tlaivar a ni ber.


"Vawiin chu ka chawlh tir mai dâwn em maw ni le?" Chaw ei lai chuan ka ti leh ṭhin.


"School-ah ka nghak mai ang U Sawmte, ngaihtuah lutuk duh suh. Bakah, an Pa a nia, naupang ti hlau zawng chuan a rawn awm kher dâwn em ni?" Ruati en chuan ka thaw ham ham. A awm loh hrâm ka beisei kei pawhin.


"U Hruai..."

"Ohh, anu bialpa.." Andrew-a kut ka chelh chu ka sawi dat. A ni lo tih tih pawh a.


U Hruaia chu a khi suk a, "chuang ru, ka thlah ang che u," zingkara a hmel ka hmu mah mak ka tih nak alaiin, kan nufa min rawn hruai turin a rawn kal tih sawi miah suh se.


"A hmaah ka chuang duh."

"Ka duh ve tho," ka fate ka kaihna aṭang chhuakin an tlân zui daih lehnghal.

"Eng nge i rawn tih dawn?" Ka zawhna atthlak zia a mit tih zîm nghal sût danah ka hre nghal.


"Kan nufa min rawn hruai tur ringawtin in i rawn kal lo tiraw?" Ka'n ti hnuhnawh leh a.


"Kal e," ti supin, "lut rawh," car kawngkhar a hawng zui zat.


Eng nge maw a hriat le? A fanu te khan min au khum leh chiam ang e.


Ka chet mai loh avangin car lamah chuan a thle buk a, naupang lah chu an lawn fel der tawh lehnghal.


"Ruati..." Ruati ding chu lut tur a tiin, ka zui ve ta nge nge a. Nui suk chunga car kawngkhar khar datin, amah pawh chu a ṭhu lut zat.


"Helaiah hian ka ṭhu char char thei ang em?" Andrew-a lah chu phur sarh sarh viau lehnghal, ka duh der lo.


"Ka ṭhu ve duh tho Lalrinhlu," Emma-in a lo ti hlar.


Hnehsawh taka steering herh kuala kawngpui lama inherin, "i nu seat a ni si a. I nu dil u la," a ti sup sup chu Ruati a lo nui ru khak khak.


"Dawt sawi ziah suh," ka lo ti zui hlak, a nui suk suk duh lek zel lehnghal, an awih zo vek tak tak dawn.


"Anu chuan a phal tiraw anu?" Ka lam a rawn hawi a, a nui nui ang vur vur zui lehnghal! Ka fate ho hi U Hruaia fanu ang khan awmse ka ti ve takzet.

.
.
.

"School-ah sual loh tur...."

"Zirtirtu te thuawih tur, anu nitin i sawi," ka sawi zawh hmaa Emma-in a lo tih chuan nuiin, "umm, theihnghilh loh tur lut ru," an lut chu ka enzui reng a.


"Ruati, tunlai chu i hah deuh dâwn a nih hi. Rinfela emaw puitling i hriat loh hrim hrimin naupang rawn lak an tum chuan mim rawn call vat rawh aw," ka ti mawlh mawlh.


"Ngaihtuah suh U Sawmte..." Ka bu nghat.


U Hruaia dinna lam chu ka pan a, ka pên lâi lek leka mi lo enna chu, "tikhan min en suh," ka tih khum hlak, a nui nghawr dawt a, mitko san awkin car kawngkhar chu a hawng ve leh mai bawk.


"Nimina ka thusawi kha i hria em?" Kan tlân chhuah tawh hnu fe ah a rawn ti sup.

"Engber kha maw?"


"Ka bialnu..."

"Fiamthu thawh ziah suh," ka lo tihlar.


Car chu kawngsir lam a panpui a, ding dawta seat belt a phelh rak rak chu, phawk fe hian ka lo en haw thung.


Ka lama rawn âwn hnai ta duai chuan, "fiamthu thawh hmel ka pu em tih en rawh," a ti sup sup.


Lalpa! Min hnaih lutuk, ka sa nghal pup pup hi eng nge a awmzia ni ngai?

"Awm..awmsawn rawh U Hruai," ka dik lo a nia!


"Ka mitah en rawh Myla," ka hmai bulah a rawn thaw lum ham ham a, ka mur er er lehnghal!


"Awmsawn phawt teh, ka thaw thei lo."

"Teuh lo lutuk," a ti dam sup.


"Aw, i fiamthu lo," tih leh a âwmah ka namsawn ṭauh ṭauh chu nui ri hukin a inla hrang ta vut a, ka thaw zui kawk kawk.


U Hruaia lam ka melh chu nui suk suk chung hian car a ti nung leh a, kei erawh ka lungphu rang lutuk leh thawk lak rang ta lutuk chu tih pangai tumin mit ka'n chhing deuh vang vang. Hetiang tak hian mipa vangin ka lungphu a rang ang tih ngaihna ka hre lo hrim hrim.


Station kan thlen chuan rang lutukin kawngkhar ka hawng rawk rawk a, a zuanin ka zuangthla ti tih. Ka hnung lama a nui ri huk huk pawh ka hre reng. Station-a ka tlân lut te chu atthlak viau mah se a ṭul miau si a.

"Sawmte, pangpar i dawng a nia," dawhkana pangpar ka hmuh rualin tu hnen aṭanga ka dawn nge a nih ka hre nghal.


"Inchhungah kan dah hman rih lo a nih kha," inla zei deuh hian U Ze'an a rawn ti nui vur vur bawk a.

Pangpar chu la in pawnlam ka pan lehnghal, car a Francis-a lut chiah chu ka hmu hman zuai, a la tlân chhuak daih lehnghal.

Ka pangar ken chu enin ka thaw ta hak ringawt a. "Lalrinfela pawh buaithlak nak alaiin," ka ti zui nang nang.


U Hruaia ka lama rawn pên pawk pawk chu en haw in, "eng nge kha ta ṭanga i rawn chhuah teh nulh ni?" A car park lohna lama aṭang a rawn chhuah teh nulh nulh chu!


"Sazu ka um haw," ti supin ka kuta pangpar chu a en zui rûn rûn a.


"Aaa! Pek let ka tum a," eng vanga insawifiah ve ringawt nge maw ka nih le? A ṭulna a awm dêr si lo.


"A ṭul lo," a thinrim ta emaw tih tura aw ki bül hluka tiin, a pawt thla deuh sawk a, kan sir lama bawlhhlawh bawm inhungah chuan a vawm lut zat, a la lut chiang em em zui.


"Eng nge..."


"Lut rawh," min pawt lut nghal dawt dawt, a tukkhuma en chho chuan ka nui ta sen sen ringawt a.


Kawngkhar zawn kan thlen chuan min chelh chu ka pawt let dat a, "ngaihdan dik lo annei ang," tih leh ka tlân lut nghal ti tih. A thaw ri huk kha ka hre hman tho.
.
.
.
Nilengin a khat tawkin Ruati ka call leh ṭhin, an lunch break-ah te chuan naupang ho Ruati phone aṭangin ka be bawk a.

"Anu, tinge min va be zing ve, break tê zawkah pawh min lo bia. Min ngai nghal viau ami, ka ngai ve rih lo che?" Andrew-a lah chuan engmah hrethiam lo vin min ning emaw tih mai turin a la ti ang nung nung zui a.


"Eng nge? Sawi tur i nei em ni?" Zing aṭangin min enin a nui leh ang vur vur zel a.


"Kan sp nen hian in inngaizawng tiraw?" Teh hlawl a.


"A awihawmloh..." Ka ti chhuak rang lutuk mah mah.

A nui vur vur a, "i bialpa hlui zingkarah khan a rawn kal a, car park-naah, sp khuan, 'ka hmeichhe nunah i rawn inlan leh a nih chuan a nung chungin ka phum ang che' a tia lawm," nui kur kur paha a tih chuan mak ti fe hian ka lo en a.


Car park na lam aṭanga a rawn chhuak, "sazu" a tih kha Francis-a a sawina ni a ni lo'ng chu maw?


"Zep duh suh," a la ti ang deuh deuh zui a.


"Ka zep lo," ti mah ila a hmel leh mitmengah min ring dâwn lo tih ka hriat avangin ka ngawi zui ta daih.



"Ila en zui dâwn em ni?" Ṭpa haw tur glass kawngkhar bulah a ding a rawn hawi let leh, ka lo bu nghat.


Kan office hi autopsy room peng, a indanna glass, kawngkhar engkim glass vek a ni a, a phui ṭha viau, en mai chuan ṭhenkhat chuan, mitthi ruang bula dawhkan nei turah te hian min ngai ngawt zel a, office hran hi kan nei ve thlap sia.


"Haw hmasa rawh," ka tih takah chuan a kut vaiin a chhuak zui zat.
.
.
.

"U Ze.... Khawnge U Zea?"


"Eng nge ni?" A rawn lut chiah, case hlui in record ho hi ka hai a, helai phêk hi a inpawt thla dai a ang? I hria em?"


"Khawimaw?" A en zui thuak thuak a.

"Ka van hre mai bik lo ve maw le. Kum 6 lai a liam hlawm tawh si a," a en deuh vung vung.


"A hunlai hi Captain Ricky-a hunlai kha niin alang, hei a signature te pawh a awm nual hi. Eng ngatan nge itih hrim hrim a?" File khup chuan min en a.


"Ka en nawn hlawm mai mai, zirbelh tur te ka neih takin," ka ti ta sep sep. Ka U case khawih tawh ho a tam zawk a bo bakah, ama autopsy result in record ve miah lo chu a mak hle mai.


"MALSAWMKIM...." Aw ṭeng zet mai ka hriat rual deuh thawin ka hmaah U Cindy-i a rawn ding zui a.


"U..." Ka ti hman chauh a ni, beng kiu vawng vawngin min beng thle sawk. Ka bîng nghal mup mup thei.


"Engthil nge maw itih le?" U Zea'n a lo ti thuai a, "i ṭha em Sawmte?" Min rawn ngaihven nghal vat.


"Ka ṭha.." Ti sepa hawi chhuakin ka hmai thip ta vawng vawng leh lu hai nghal muai muai chuan ka mit a ti vai lek lek.


U Cindy-i chu ka en kalh a, "Sawmte, ka pasal hi kum 7 chhung i lo hmangaih tawh a ni tih ka hria; Mahse, engtin nge a fa i pai theih zawk?" A aw chhuak leh aw ki, thusawi duhdanah chuan a pasal ngaizawng ka ang takzet.


Ka mit sirin midang min nenna, mak tihna leh ṭhâwnna pawh chu ka hmu ru reng bawk a.



"Ka pasal a ni tih i hre lo em ni?" A mittui a tla zawih zawih. Kei erawh mittui farkhat pawh ka nei lo thung.


"Cindy, a tawk min rawn zui rawh.." Rinfela rawn lutin annu chu a pawt zui a.


U Hruaia a rawn lut ve chiah bawk, ka bul cheta a rawn ding zui vutin, "i biang hi tu tih nge?" A aw vawt ruih mai chu hlauhawm rawng a kai mah mah zawk.


"Ka zawhna che chu min chhang rawh. Engvanga ka pasal hi la umzui nge inih?" Ka thiam ka intihna a ni lo mah se a ṭawngkam hmantin mai chuan pawmlai nei kawp ang maiin min chhuah a, sawi mai tur minti vai zawk. Tin, chhanlet duh viau mah ila, ka hnathawhna a ni a, buaina tihpunlun lah ka duh hek lo.


"Rinfel, i hmeichhia kha hruai chhuak rawh. Hmeichhia a ni tih theihnghilh khawp a, ka theh chhuah hmain," U Hruaia'n ka biang sa vut vut mai en ngur chung chuan a ti ta khur khur mai, a ww chhuak lah chu a chang ṭha in, a mar fia fia viau bawk.


A kut phah lian tak mai a, dam raih leh tihnat belh hlau tak hian ka biang sa vung vung chu a rawn hup zui bawk a. Ka melh chho vat. A mitmeng thim dur khup leh chala thisen zâm pawng ṭawlh ṭawlhah chuan thinrim insum nasa tak ang takzet!


"MALSAWMKIM..."



"CHHUAK RAWH!!!" Ka lo ip zui chawih a, ka mit ka chhing sawk bawk, ka tirilah min manin ka khur ru nghal zawih zawih thei. Keimah ang chiahin U Cindy-i mitmeng khup leh hlauh avanga dâng nghal lawp lawp chu chiang takin ka hmu bawk.


U Hruaia ka hriatna hi a la rei lo mah se ka hmaah, ka hmuh theihah inthunun zo lovin vawikhatmah a la awm ngai lo.


A thawk lak chu a ringin, a bek leh khabe ruh lian ṭha tak chu a pawng zual ṭawlh ṭawlh a.

Thu a sawi tam lovin, vawikhat warning a pek tawh erawh a vawihnihna a thlen nawn tir ngai lo tih chiang takin a lang thei.


"Min rawn zui rawh..." Rinfela'n a pawt zui dawt dawt.


"Inhna thawk rawh u," U Hruaia'n bul zetin a ti zawm hluk bawk a. Amah pawh chu a pensawn vut bawk.


Ni e, ani pawhin kawplai nei ngaizawng emaw minti a ni ngei ang.



Ka file ken chu nghet taka kuahin hmai sa hut hutin autopsy room lamah chuan ka let chho hnak hnak a. Mim enzui na te chuan ka ṭah a ti chhuak viau lehnghal!


Ka file ken ho chu ka dahlet sawk sawk, ka riluin, "Sawmte, pawmlai nei i ngaizawng lo, zahna tur i nei lo," tiin ka infuih mawlh mawlh a; Mahse, U Hruaia thawhpuite mita zawhna tamtak kha ka hmu ru reng si.


"Myla..." Ka phu nasa lutuk!


"Thawm nei ta che," ti hlak chuan ka chhunzawm mawlh mawlh.


"Chhim thlipui ang mai, i rawn lang ang thut thut a, min ṭhawng thut thut a," thinrim deuh chuan ka ti hlak hlak. Ka biang nâ nen ka ṭah a rawn chhuak et et ringawt lehnghal.


"i nunah inrawlh tam turin min duh i tihna em ni?" Min en rûn rûn.


"Ka nunah ni lo, min ṭhawng thut tawh suh ka tihna a nih chu. Nanglo pawhin min ṭhawng nasa ka hne," a tawplam chu ka ṭah aw ṭuau tawh, ka mittui ka khap per sak sak tawh bawk. Engvanga U Hruaia chu vin ta vak vak nge maw ka nih le? Tihsual a neih sawi loh, ka thlavang a hauhna hle zawk si a.


"Ka hria e..." Ka kawngah hnehsawh lutukin a kut hrawlpui mai chu a rawn zen kual a, a lamah min pawt hnai hrawkin, a taksa si chet chuan min kuah bei nghal thlawp bawk.


Mittui vanga mit hnawm chap chuan ka meng phar awn awn a, ka lungphu zawn a sa nghal pup pup bawk.



"U...U..U Hruai...." ka ti bah nawk nawk. Ka thisen kal lai chu a chawl zui ta ṭhuap a, ka lung erawh a ri ring zual tulh tulh thung.

"Tun aṭang chuan ka duhdanin ka che tawh dawn ka tih kha," nghet churh leh ti
ngei dâwn tih hriat tak si, zawi leh vawt raih hian a ti nghet bau mai.


Ka dang ro ta halhah leh kawchhung khur ru der derah chuan ka ṭawng chhuak thei lo, ka thaw lak a buai titih dêr bawk.


"Min thlah teh..." Ka ti chhuak se se chauh, ka lei duh ang pawhin ka hmang thei ta lo em maw ni?


Chair chu a pawt hnai a, ṭhu thlain, a malah min pawt ṭhu zui zat.

"Eng.."


"Che suh..." Tih leh a kutah vur a lo keng reng chu niin. Hmuh pawh ka lo hmu lo hrim hrim a.


"U Hruai.." Ka hmai tihnat hläu tih hriat taka a dep chu ngun taka a hmelṭha tak, dam leh ta ruih chu ka en a, ka mittui bawk a rawn hnai leh tawh. Hetiang a dimdawihna ka dawn khat vangte pawh a ni ang e. A chetze dam ruih mai chuan ka ṭah a ti chhuak zual et et mai.


"Engvanga benglet lo nge inih?" Ka mitah a rawn en zawk, ka hmai bawk chu en lehin, eng emaw hi sawiin a phun hluk a, "a pasal zawk khi ka sawn chhuak dâwn em niang?" A fiamthu tih ka hre reng. Mimal thil leh hna a thliar hrang thiam lutuk mah mah.


Ka ṭah nuih hak a, amah pawh a rawn nui ve huk huk tho.


"Ka benglet a nih chuan, amah ang chiah ka ni dâwn a sin. Tharumin eng buaina mah a chingfel ngai si lo va. Bakah, ka hnathawhna leh ka thawhpuite ka zah a ngai lawm," ka ti chhuak sep sep.


Mit ti zîm leh ta sûta min enin, a khi ta suk a, a hmelah chuan min chhuan hmel viau lehnghal, "ka venghim tawh ang che," dam raih maia tiin, a khi leh suk. Mak tak maiin ka ringhlel miah lo bawk.


Ka mittui bawk rawn hnai leh chu hawisawnin ka khap let vat vat, a hmaah hian duh aiin ka zuau dâwn tlata ka inhriat ni!


"Myla.." Ka khabe ah a rawn chelha, a lama min kuai her lehin, "ka hmaah chuan hmeichhe chak tak ang a i lan a ngai lo, i chak lohnaa chelh tur che in ka awm reng tawh dâwn," dam leh vawt ruih maia a tih leh sup sup chuan, kan inrin hmain ka biang a rawn lum thla pup, a nui zuk a, dimtein a lo hru hul zui vat bawk.



"Ohh!!! Ka tihpalh u...." Rang lutukin U Hruaia mal aṭang chuan ka inla hrang vat.


"I ṭha em tih rawn zawh che ka tum a," a aw nuihza ri chu ka hre thei.


"Kan ṭha..." U Zea ka chhan hmain U Hruaia'n a lo ti bul nghut. A aw chang ni lo a hmel pawh a inthlak leh daih tawh, a nelawm miah loh bawk!


"Tihbuai che u ka tum bik lo a ni," a rawn inhera a nui zui vur vur. Laizet hian U Zea chu ka lo en ve kar bawk.


"Ka hawsan dâwn che u," ka ti ta vat a, U Zea lah chu inti zei thei deuh hian a mitko san ak akin, a la nui vur vur zel lehnghal.


"Ka thlah dâwn che nia," U Hruaia a rawn ding ve vut a.


"Ahh!! Ahhh!! I hman hmel loh, tun ṭum chu amahin haw tir phawt mai rawh. A bo lo ang," U Zea'n a lo ti vat.


U Zea chu a en rûn rûn a, "taxi ka ko dâwn em?" A rawn ti ta sup bawk.

Ka lu lo thing vatin, "keimahin ka inbuaipui thei," tih leh ka bag chu la in, "naktukah kan inhmu dâwn nia U Ze," tiin U Hruaia ka melh zui ralh bawk a, ka pên chhuak nghal hlawk hlawk. Zahthlak lutuk hian! A zawnin zahna ka insiam a ni ber alawm le!!
.
.
.
"I va rawn let har," inchhung ka luh rualin U Nungi leh Lalnunpuii hmel ka hmu zat.



"Eng nge inrawn tih dawn?"


"Kawmchhakah ba ka rawn lam," Lalnunpuii'n a lo ti vat a.


"Kan haw hnai tawh sia, ka rawn lêng," U Nungi'n a lo ti ve bawk a.


"I hmai chu, tu innge beng che a?" Ka hmai chu ka khawih zeuh.


"Tunge beng che? Lalrinfela em ni?" U Nungi'n a rawn ti ve vat.


"Ni lo, U Cindy-i. Thil hriatsual a nei a nih hmel."

"An va han zak lo nupa tak. An in ah keimah ngei ka va lut ang e," Lalnunpuii chu thwh a tum mai.


"A hriatsual ka tih kha," ka pawt let a, a bulah ka ṭhu ve zat.


"Dawt sawi hi i thiam lo rapthlak si," U Nungi'n a lo ti ve zat a. Ka nui vur vur ta ringawt. Thiam lo ve tak chu ka ni!


"An lo van mak nupa em em ve aw, hei leh chen hi Lalrinfela nen kan inkawm tawh, hetiang a nih hi ka ringpha lo hrim hrim. Â ka tiin, i thinlung a hmu thiam lo kha ka dem ṭhin a, tunah chuan i lo nei ang emaw in lo inngaizawng ang tih ka hläu tawh zawk," Mapuii'n a ti leh tân tân.

"I inchhir lo maw?" Ka fate lehkha zirna lam en chuan U Nungi'n a ti sap.


Ka nui a, ka lu thingin, "vawikhat tê mah anni ka neih avangin ka la inchhir chhin lo; Mahse, ka zep lo, Rinfela'n ka laka rilru a put dan ka hriat chian hnu hian, ka lo hmangaih kha ka inchhir ru lek lek ṭhin. Mahse, ka fate Pa a nihnaah erawh kan inkarah eng inhuatna mah awm lo se ka ti," ka ti chhuak sep sep. Ka ti tak tak bawk. Ka fate vang erawhin vawikhat pawh i chhirna leh ka thiltih tawhah dik lo intihna ka la nei tlat lo.


"A buaithlak chho dâwn a ang khawp mai, Rinfela nu leh pa anrawn ni ve leh ang a. Henghi kan rinlawk vang a nia i U Ṭhaa nen pawh insawn lo tura kan tih kan tih che ni, i luhlul ve ropui bawk si a," U Nungi'n min hau pah pah bawk a.


"Châm rih turin min duh em? Rinfela te pangai taka biakpui tur che in," a ti leh zat. Ka thaw chhuak ham ham a, biak pawh kan inbe thei ngût ang emaw chu!


"Nu Rpi leh Pa Roa bia ila, an hrethiam em em ang," U Nungi enin, "min ngaihtuah suh," ka ti leh sep. Ka nui lui säng bawk a.


"Buaina i neih chuan min rawn hrilh hlawm ang che. Cindy-i chu ka khamkhat tho ang. A zakthei lo êm mai." Lalnunpuii chu a ding zui hluai a.


"U Nung, kan haw dâwn em ni, chaw ei a hun dawn," a tih zawm zat.



"Bawihpui, kan haw dâwn a sin," zanin chu eng hria ni maw ka haw pawh hre lo ang hmakin lehkha a zir malh malh mai. Ka call zing lutuk kha min ning a nih ka ring.


"Anupui, ka zui haw ve dâwn che u em?" Kan nui hak hak.


"Shillong i ngai em ni?" Anupui chu a rawn kuah leh chat tawh.


"School chawlh hunah minzui thla dâwn nia aw," a tih chuan a ner ang nawng nawng a.



An haw tur kawngkhar lam ka panpui chu ka phone a rawn rik avangin ka ding leh lailawk a.

U Hruaia hming ka hmuh avangin Mapuii leh U Nungi ka melh ralh, "hello..." Ka lai ringawt chu a va zia lo deuh tak!


"I hmai..." A tih chiah ka hre hman, Lalnunpuii'n ka phone chu rawn phih thlain, "U Hruai, kan Malsawmi hian a duh thu che a sawi palh a nia....."


"LALNUNPUI....." A off zui daih lehnghal!

"I â mi!" Ka ti nghek, awi minti zak.


"Engtin nge ka hmachhawn tawh ang a," ka ṭap ṭep nghal. Ka phone chu ka en vung vung ringawt a. Call leh chi lah ni dêr lo.


"Kawng ka hawnsak che a nih kha," tih leh amah lah chu a chhuak zui daih. U Nungi lah chu a la nui vur vur zui a.


"A hrim hrim kan SP hi a hmel pawh ka la hmu lo, putar te hi a ni lo maw?" Lalnunpuii bawkin kawngpui kan pan lai chuan a rawn ti chhuak a. A la nui reng, ka ngei lutuk!

"Palian thek thuk, inkhai fithla thlerh thlawrh mai, taksa inphiar fat, hmel ena thinchhiat hmel tak, dam ruih mai a nia. Mizo mipaah Hruaia tluka zaidam hi chu an tam lo khawp ang, heichen hi ka hre ve tawh a, a thinrim vawikhat chiah ka la hria. A hna aṭang an suspend nghe nghe," U Nungi'n ti duahin a nui zui ruh ruh bawk a. Hnaa suspend ngai khawpin eng em em nge maw a thinrimpui chu ni?


"Let tawh rawh, Ruati'n chaw ei a siam kha," kawngpui kan thlen chuan Mapuii'n a lo ti vat.


"A nih, U Nungi te haw hma in chaw ei khawm ang u aw, tun Rinni hi tin zawn ang u," ka tih chuan an bu nghat nghat a, ka fapa-in chaw ei tura min rawn auh tak lang langah chuan ka let ve vat.



"I ril a ṭam tawh em ni?" Chaw ei peih a ni tawh bawknen kut silin ka kil nghal rak rak. Keimah tak pwh ka ril a ṭam tih ka hre chiah.


"Anu bialpa motor lianpui ang kha ka duh ve e," ka fapa chu ka en vat.


"Puitling chauhin an nei, tiraw Nu?" Emma-in a lo ti vat.


"Anu min lei ve la," a la ti ang heu zui a. A chaw a chawhmeh chawm sakin, "i tlangval ang a, i hlawhin i la inlei ang chu, pawisa ka nei ve hleinem. Fai deuhin ei rawh u aw."


"Ruati, kumin Christmas chu burma ah maw hman i tum a?" A lo bu nghat.


"Thlakhat hun minpe la ka ti deuh a," a rawn ti sep. Lo bu nghat nghatin, "ni e, i haw lo rei tawh a, November thlaah naupang school an chawlh chuan i haw chho dawn nia," ka tih chuan läwm tih hriat tak hian a rawn nui var var.



"Kan kal ve dâwn em anu?"

Emma-i enin, "kal dâwn em ni? I nupuii te bulah Christmas hman intum a ni lo'm ni?"


"Keichu school kal ka peih tawh lo e," Andrew-an a rawn ti chhuak nang nang.


"school i kal loh vin eng nge itih ang a?" Ruati'n a rawn ti vat.


"Pheikhawk chhia ka siam mai ang," ka chaw ei ka hâk ṭhelh.


"Lalrinhlu, khawi aṭanga i hriat nge?" Ka nuih a za si, thinrim bawk si. A hnathawh duh sawiah ka thinrim pawh a ni lo, tun aṭanga school bâna hnathawh a tumna chu ka ngei lutuk.


"Ka ṭhianpa thar pawhin a chak alawm," a rawn ti let hlar chu ka nui leh ta ngawt. A hahthlak thei lutuk hepa hi chu.


"Lehkha i zir peih loh va, i thiam loh chuan i hna hmabak tur a nih chu, chaw kha ei rawh," ka ti ta ngawt a. A thluak tereuhteah hian school kal loh dan ringawt mai eng eng emaw hi a lo ngaihtuah ve a!


Kan chaw ei kham thleng ka sengfelpui laiin ka phone bawk a rawn ri leh, "hello.." Ka tih rualin aw thûm dût mai, vawt ruih hian, "pawnah rawn chhuak teh...." Tih ri ka hriat chuan ka khawng nghal at, rang lutukin kawngkhar lam ka hawi vat bawk a.


Ka phone chu en ṭha lehin, "Ruati..." Ka ti zet, ka hmunphiah lai chhunzawm tir ka tum chu keimahin ka phiat zo ta law law a.


Ka chuah vat chuan Lalnunpuii thusawi kha tak tak emaw te a tih ka hläu.


"Khawnge i kal dâwn?" Ka fate tv en anrawn hawi vat, Ruati enin, "pawnah boruak ka'n dawng ang e," tih leh ka chhuah ka tum a, "ka dawng duh ve,". "Keipawh.." Rawn thaawh an rual, "dawng lo ang, inhritlang ang, tv kha en rawh u," ti vat chuan nu ber chu ka tlân chhuak nghal daih. A va hahthlak thei tak! Bialpa hmu ru tur te pawh ka ang alawm!


Kan in lam, kawngsira car ngheng chunga kuangkuah up a lo ding U Hruaia chu pan vatin, "eng nge i rawn tih dâwn?" Ka ti thla nghal ngawt.


"I ṭhiannu ṭawngkam ka rawn um zui."


"I â mi," ka ti nghal vak. Naupang pawh a ni tawh lo fiamthu a ni tih teh hriat ve tur a nia.


"Aw..." Ti bul supin, ka bânah a rawn chelh a, a lama min pawt chuan car ngheng data min din tirin ka dar tawn tawnah a chelh zat.


A khabe hnuai aṭang phawk fe hian ka en chho a, "U Hruai, hetiang hian min fiam ṭhin suh. Tleirawl fiam rual ka ni tawh lo. Fa pahnih lai nei ka ni tawh," hahdam deuha sawi ka tumnen duh aiin ka ṭawng rang mah mah.


"Malsawmkim, engvanga ka fiamthu hi ring fo nge maw inih hrep le?" Lungawi lo tih hriat lutuk hian a rawn ti hluk hluk a.



A thinrim deuha ka hriat vang nge, kan inhnaih lutuk vang zawk, ka lungphu lah chu a rawn rang ang ta dawt dawt zui a.


"Ka mitah en rawh," a rawn ti leh sup.

Ka melh chho kiau a, "i fa neih hma pawhin lo duh tawh si che ila," a ti sup chu ka thle deuh hâ mai.


"Min hre lo..." Ka tih rualin a rawn kûn hniam zual a, kan hmai insi lek leka rawn kûnin, ka beng bulah, "chu erawh i hresual a ni Bawihi," a aw zawi raih mai chu ka kawchhung sawi loh taksa pumin ka za chhuakin, ka mur nghal er er thei. Zawi tak si a a nui ri zui suk phei chuan ka kaihza thâ a ti zawiin, lungphu rang lutuk avanga thlan ru zui dap dap chuan, ka thlanfim a rawn bawl chhuak lo chauh bawk.


A inla hrang hlek a, "ka hmeichhia ni rawh Myla?" A tih zui leh sup chuan, ṭawng sawi loh ka lei hi phuarbeh ang tlat a ni, thawk lak nachang pawh ka hre tawh lovin ka hria.


"U Hruai..." Ka ti chhuak thei ṭawk, boruak ka hip kawk a, thaw chhuak turin min hnaih lutuk, a âwmah namin, a tawlh hnung ve ta hrut tho.


Ka thaw chhuak kawk kawk chu, hmel hlim sarh mai hian min lo en reng thung a.


Ka lungphu rang lutuk vang hian ka thawk lak a buai lek lek ṭhin.


"Fa pahnih ka nei tawh tih i hre lo em ni?" 5mins dâwn lai ka ngawih hnuah ka ti chhuak thei ta chauh a.


"Kei pawhin ka nei," dam deuh hian a lo ti sup, pawn light inkhaina zawna ding kakin a ipte a zen zui ap bawk a. Eng zawhna pawh chhan a inring ni berin ka hria.


"Engvanga min duh nge inih ka hre hauh lo," ka'n ti thla leh ringawt a. Rin a la har ve êm a sin.


"Bakah, i fanu pawhin min duh lo hrim hrim," ka ti leh zat.


"Duh tur chein chhan ka neih a ngai em ni," a thle buk a, "ka fanu thuhnuai a awm ka niin i hria em?" A tih zawm leh sup. Ka lu ka lo thing vat ringawt.


Kan indin hlat chinah chuan tlêmin ka zia deuh a, ṭawng pawh ka ṭawng thei ta alawm.


A mitah en chho kalhin, "Hmeichhe fel leh thianghlim tak ka ni lo va, pasal nei lovin fa pahnih ka nei bawk," a lo bu nghut nghut.


"Sàwn anni ka tihna a nih chu," ka tih leh rualin,"i fate..." A lo ti bul nghut. Ka fate 'sàwn' ka ti chu a läwm lo zawk emaw tih mai tur a ni.

"I duh angin ka hmangaih che emaw duh ve ve thei lo maithei che a. Kei lo hmeichhe ṭha tamtak duhtu i nei âwm tho bawk sia."


"Malsawmkimi anni hleinem," tum loh deuha ka nuih chu le! Nuih a la hun lo. Amah lah chu interview nei ang maiin che miah lovin a ding kak a, a nghet bur mai bawk si.


"Hmangaihtu nih ka peih tawh lo va, hmangaih nih ka duh tawk dâwn sia."


"Min hmangaih ka phut lo, ka hmangaih che chuan a tawk. Ka hmangaihna in i duh emaw duh lo emaw min hmangaih turin a siam dâwn che," mahni inrin tawkna a khat hian a ti nghet leh churh. A va han inring tawk mai mai tak!


"A..a...a nih, i fanu hi ka fate aiin hmangaih bîk ta la..." Ka ti dek dek chu, "Chutiang a thleng hauh lo ang," a lo ti bul hluk hluk.


Nui ta vur vur leh a aia thutak zawkin, "buaina ka ngahin, buaina in a zuiin min zui a, ka la hmachhawn zel bawk dâwn, chung zawng zawng chu i hria a ni lo'm ni?"


"Ka venghim ang che ka tih tawh kha," vawt ruih leh nghet churh maia tiin a ipte aṭanga a kut la chhuakin mi rawn pan hnai a, "interview ka pe zo tawh bawk a, ka ta ini thei tawh em?" A mitmeng rilruih mai leh aw thûm dût mai, mize dam ruih mai leh pawn light eng, zan boruak chu a inhmehin, a inrem takzet.


"Kan inhre chiang....." Ka tih leh chiah chu ka khabe ah chawi kâng salhin, "Bawihi, zawhna i ngah takzet," mit a siai zauh a, dam hlup leh mawi lutuka khi zui suk hian, ka hmui bul cheta rawn kûn hniamin, "ka hre chiang che' ka tih kha. Min ringawt rawh Myla," ka hmui bula phun sup supin, ka hmui chu a rawn delh nghal riai riai.


Ding khawng nghal awtin, a car chu ka nekbet nghal ngar bawk.


Dimtea min fawp reng chungin a nui suk a, "inthlah dul rawh ka hmangaih," ti zui leh raih chuan ka kawngah a kut rawlhin alamah min pawt hnai salh bawk.


Ka taksa chu electric shock ang mai hi ka ni, ka mur chhuak nghal er er ka ti dâwn nge, a mi fawhna duhthawh tak si, dam ruih mai chuan min ti ṭek chuai chuai zawk pawh ka hre lo.


Mahse, ka thinlung zawng zawngin a mi fawhna chu nuam ka tiin, ka dawngsawng ṭha hle a, ka kâ chhunga a lei zei taka a chet kual tirna chuan rei tak min din tir mai mai thei teuh lo, a kawngah chelh letin, ka hmui ka ti che ve ta riai riai a, a hmui chhah lam lek lek fawh nuam tak mai, a hmel en aia nêm thak mai chu ka fawp let ta tán tán chu, a lo nui ri suk. Ni e, ka ṭang rei lo êm a ni!

Mahse, min dem suh u, ka hmaa mipa, min duh thu sawitu, 'ka hmangaih' tia min ko tu mipa awmchhun hi, hnar atan chuan a uiawm mah mah a tin ni. A lakah chuan tu hmeichhia mah rei tak an ṭan ka ring hauh lo bawk!!!!


<><>~>~>~>

Note : Naktuk Thawhleh zan aw💚


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 2nd, 2022, 10:38 pm

THURÛK_99


By


Floria Laldansangi


Chapter ~ 16~

<><><><>~><>


"Anu muhil tawh rawh, i che peih lutuk," ka mu nui vur vur leh ka che sek chu ka fanu ka ti harh a ni ngei ang. Aw ṭial ṭuak hian a rawn ṭawng niah niah mai.


"Umm, tihpalh ka mu dawn e," ka ti nui ṭhü tak nâ-in, ka mut lah chu a chhuak dêr lo. Naupang thilthar nei ang maiin ka nui leh ang vur vur zel a.


Mit ka chhin a piang lahin U Hruaia min fawhna dam ruih mai, tui em em kha ka feel thei nghal zel mai bawk si. Chu chuan phurna leh zahna, nuam tihna avangin ka ṭim leh er er ṭhin. Zanin zet zawng chhin khat pawh ka chhing dâwn lo a nih hi.


Ka ngaihtuahna hlimpui a, ka hmui khawih niap niap chunga ka nuih sen sen laiin message ka dawng ri rak. Rang lutukin ka phone chu ka ban zui a.

U Hruaia message, "muttui le Myla," tih ringawt chu naupang ang maiin ka leng ka ta chiam ringawt lehnghal. K fate an rawn chik nghal ṭiah ṭiah. Ti tak hian nutling hi zahna leh hlim lutukna inpawlh neih a, tawn avangin zan muthilh theih loh phahnan a hman theih tih reng ka hre lo.
.
.
.

"Nizanah mumang i nei fuh deuh em ni?" Ruati chu ka en vat. Ka fate rawn tho chu ka en zui lehnghal a.

"Tinge?" Tiin, "inhmai phih nghal rawh u aw," ka tih zawm zat.


"I nui reng mai a, i hmel lah chu tleirawl ngaihzawng neihlim ang mai a eng phet phet bawk si," nui chunga a ti leh duah chu ka biang tawn tawna chelhin, "chuti em ni? Ka period dâwna ka hmelṭha zual deuh a nih hi," ka ti thla ngawt tak nâ-in chhungrilah erawh a chhan berah tu emaw hming a lam vei nghal vawng vawng ringawt sia.


"Anu..."


Ka fapa chu ka melh zauh a, ka chaw chu ka ei zawm leh malh malh, "ka lu a nâ e," Ruati a lo nui sa. Emma-i pawhin a hrethiam a ni ang, a nau chu a nuih ve ta ringawt a.


"I thluakah hian eng nge maw awm ṭhin le Lalrinhlu le?" A mangan thlak tak tak a ni hepa hi chu. Ani ang rual heti em ema school kal peih lo hi ka hre ngai lo reng reng. Lehkha a thiam thei lo lah a ni bawk si lo.


Mita hmu a min hriatpui tu tán lo chuan a school kal peih loh lutuk hi sawi pawh ni ila awihawmah pawh a chang ṭhin lo.


"Ka thluak..." Awlsam deuha a rawn ti chu Ruati a lo nui phuh ṭhawt, a nui chhuak nghal uar uar.


Nui ve ta ngawt chuan, "thinrim dâwn a thinrim theih si loh hian mi hi i siam thiam bawk si," ka to zui nang nang.

"Thinrim lo mai la. Apa Ṭhaa'n thinrim tam chuan vun a chuar duh a ti, anupuii a hrilh, ka hre vek," ala ti zet zet zui a, mifa chu nise a ruka kuk fawk hi ka châk thei ngawt ang.

"Mintih thinrim fo chuan ka vun a chuar ang a, ka tar ang a, min enkawl a ngai ang a, hna i thawh a ngai bawk ang a," ka ti zat zat.



A lo ner nang nang a, Emma-i erawhin, "keichu thu ka awih," a lo ti vei vat bawk. A U mize zatve tal hi neih ve tur a nia kan Lalrinhlua beuhbauh ṭhin hi chu!


A ṭawng tam ang zat lah hian engmah hi a ti peih lo.



"Anu bialpa kha lo kal leh se aw," chhuak tura kan insiam, a bag ka ah tirlai chuan a rawn ti chhuak deuh vawng vawng.


"A motor chuan i chak vang," Emma-in a lo ti zat.


"Kal ru le," ka ding zui a. Ka thawmhnaw hak chu nidang zawng aiin ka inbih ngun lehnghal.


"I nalh i nalh," Ruati a lo nui khak khak, nuihlet vur vurin, "kal ang," ka ti zui sep.


"Anu bialpa...."Andrew-a hlim khek zui raih raih chu ka hre zui zat. Rang lutuka ka bag la in ka tlân chhuak ve nghal a.


U Hruaia hmel ka hmuh rualin ka nui lehnghal var var.


"Morning Myla ..." A bul ka thlen rualin ka beng bulah a rawn ti zawi sup a. Lai ru deuh tak chaun dulah ka nghawk zauh, a la nui huk huk zui.

"Anu bialpa, a hmaah hian ka ṭhu leh duh."



"Vawiin chu i nu i ṭhut tir dawn em niang?" Min rawn en a.


"Mahse ka ṭhu ve duh sia," Andrew-a lah chu a inla duhawm vêl ngei em maw ni? A mit ankhap ang zek zek bawk a. Mitlawn te lah hi duhthusamin a thiam.

"I khalh zawk dâwn em niang?" U Hruaia'n a tih rualin, "a ṭul lo," ka lo ti vat. Andrew-a lah lawm narawh, "ka duh, ka duh," a ti nghal chûl. Thil ṭul miah lo a tihhmuh chu le!


"Anu bialpa, nitin i lo kal dâwn ami?" Steering chu a chelh vei ang ran a.


"Lo kal reng aiin, i nu hi minpe mai la," U Hruaia'n a ti sup. A aw ki lah chu a la thutak em em zui. Nutlingpui mintih laih hi a tum reng em maw ni.



"Reilote nei la, minpe leh la," ka fapa at zia hi chu aw! Kan vai ta nuih ta hak hak. Amah pawh chu a nui ve vur vur tho. Kan hahthlak a ni.



Nui reng chungin, "min accident pui chuan inchak lo ang," a sir aṭang ka lo ve sek bawk. Ruati nuihlah hi a za thei kar kar bawk si.


"Drew-a, Pa ti mai la," Ruati'n a rawn tih chuan, "Ruati..." Ka lo khak vat, ka sa nghal pup lehnghal.


U Hruaia'n min rawn en a, a nui deuh suk chu lai zet hian ka lo nuihlet ringawt bawk.


"Mahse, pa kan nei ve si lo va," Emma-in a lo ti vat. Ka nui hmel a reh riai riai. Heihi ka faten an vawikhat pa neih loh ansawina a ni.


Mak tak maiin, ka âwm chhung hi a rawn na veng veng nia maw le.


Tukverh lam ka hawi ta vat a, mit chhingin zawitein ka thaw chhuak ham ham bawk.


Ka kut, ka mal chung ka dah chu kut lum thar thar leh lian takin a rawn hum takah chuan ka hawi vat a, mitmeng hahdam dap a min enna chuan a kâ ang si lovin, thu tamtak a sawi a, ka hahdam hliah hliah bawk.


"Emma, i Pa chu ka ni thei ang em?" U Hruaia chu ka en kawk.


"U Hruai...." Zawi tak hian ka lo ti zui sap bawk a.


A rawn khi suk a, "Andrew, nang eng nge i ngaihdan?" A ti leh sup.


Ka fate chhanna nghak ru tak chuan thinphu dep dep hian ka ngaithla ran a, an chhan hma pawhin ka rilruin U Hruaia zawhna siam chu ka dem hman hrâm bawk.


"Au, duh mai ila. Pa kan nei chuang si loh hi," Andrew-an, Emma-i thil a dil a piangin a U ṭhin, a nih loh chuan "Emma" tiin a ko mai zel a nia, 'Pa' tia koh chu anduh reuh em maw ni?


"In homework inti zo em?" Emma-in a chhan hmain ka ti ta daih. An chhanna ka hre ngam chiah lo niin ka inhria.


Naupang rilru kan tibuai dâwnin ka hre tlat bawk. Drew-a ringawt hi chu a awlsam em em a, Emma zawk hi a ṭawngtam lovin, a kum phu lovin engkimah thil a ngaihtuah mûk zawk si a. Ka tih chiai ka hläu a ni, Rinfela hian an pa a nih thu a rawn sawi ngei dâwn tih ka hriatna nen chuan tuna Pa tih lam chungchang sawipui loh chu ka duh ber.


"Keichu ka ti zo vek a, Andrew chu a ti zo lo," Emma-in a rawn ti vat.

U Hruaia zawhna kha chu chhan a tum lo niin ka hria. Pawi ka ti rih viau lo bawk.


"Ka ti zo ve reng, tiraw Au Ruat?" Ti lo bîk nih tirlah hi a tuarna thei bawk sia.


An school kan thlen a, an luh dâwn chuan, "Anu bialpa, naktukah pawh lo kal leh rawh aw," Andrew-an a ti deuh mawlh mawlh bawk.
.
.
.
"I läwm lo em?" Naupang school kan thlah zo, thui fe kan tlân hnuah ka ti sep a.


Min rawn en zawk, a nui a, "naupang ka nih tawh lo hi Myla," ka lo thaw huai chu a hrethiam a ni ang ka kut a rawn chelh leh a, a mitmeng thük leh dam raih maiah chuan a ṭhat thu a sawi ni maiin ka hria.


Ka nui ta sen sen, thu hi a sawitam ngai lo, mahse a mitmeng leh khawihnaah hian rinhlelh tur erawh a awm ngai miah lo thung.


"Min lo nghak rawh, kan lut tlâng dâwn nia," car din rualin a ti sup.

Seat belt phelhin ka en nghal vat a, "a awihawmloh," ka ti chhuak haw bawk.

Kan in ngaizawng dek deka kan thawhpuite hmuha luh dun nghal te chu ka duh teuh lo.

A mit ti zîmsût hian min rawn en a, "ka bialnu nen hna kaltlang ka duh mai chauh a ni," a ti zui sup sup.

Ka lu ka lo thin khum vat vat, "a chi loh, kan thup rih ang," chhuah tumin ka inher a, ka dara rawn chelh min kuai let nawkin, ka biang tawn tawna chelh chuan na deuhin min fawp nghal vak, ka hmui hnuailam a seh zauh chu ka rak zui ṭhat bawk.


Inla hrang vutin, ka hmui ka dawm vat chu a kutzungpuiin a rawn tawk zui zauh a, "eng nge min seh kher," ka ti zui hlar. A thip phian lehnghal.



Nui suk duh lekin, "seal ka nemkai a nih kha," a la ti zui dût dût zui. Ka melh ram ramna chu a haider hmiah bawk. A chang chuan a ngeiawm ve thei dâwn viau hi a.


"Lut hmasa rawh, pawnlamah hna tlem ka nei," a rawn tih leh takah chuan bu nghatin, ka chhuak ve ta vat a, ka luh dawn chuan hawileta car chhung aṭanga min la en rengtu chu ka kut vaiin kal turin ka ti a, ka lut zui ve vat bawk.


Mahse, Lalrinfela'n ka lam a rawn pan pawk pawk ka hmuh chuan ka ding dat.


"Inbia ang," ka bânah rawn chelh a tum chu ka lo dahsawn vat a, "kal rawh," ka ti let ta sep. Kan thawhpuite min en hrek hrekna chu nuam ka ti dêr lo.


"Eng nge i duh?" A hmaa ka ṭhut rualin ka ti nghal tawl, ka aw chhuak pawh a nelawm viau loh bawk.


"In tur i duh em?" Min rawn en a, chhan ka tum loh êm avangin, "hna hmanhmawh thlak inei lo tih ka hria," tih leh, "Americano no 2 leh mango cheese cake," min rawn en a, "i ngaina tih ka hria," a tih zawm zat. A la hre ve reng a nih hi!


"I sawi duh sawi mai rawh," ka kuangkuah zui at.


"Ṭhu chunga inbiak ṭulin i hre lo em ni?" Ka biang chu thlêk deuhin, "eng nge i biangchu a an?" A ti zui leh zat bawk a.


Inhau leh inhnial lo va inbiak a duhna avangin a rukin ka thaw chhuak ta ham ham a, ka ṭang ru ṭung pawh inthlah dulin, "ka ṭha," ka ti ta sep.


"Naupang chungchang hi kan sawi a ṭha in i hria em?" Ka ngawi deuh rauh rauh a.


"Engtia tih nge i tum?" A rawn tih leh takah chuan a mitah enin, "engtin nge ni ang? Ka fate annia. I hriat leh hriat loh vin danglamna a nei hleinem, chhungkaw nei ini a, keipawhin ka nei bawk," ka rilru a awm dik tak a ni.


"Chutiang ka sawi lo, naupang ho hi ka bulah lak duh ta ila," ka en kawk mai.


"Tum buai duh suh Rinfel," a bak sawi mai tur ka hre lo.


"An unauin ka la ang ka tih loh kha," a lo ti zui sup. Mak ti zet hian ka en ngawih ngawih.

"Tu emaw zawk zawk kan kawl ve ang chu," a tih chuan ka kawchhung hi a hmaia ben chakin a za nghal mer mer thei.

"Bungrua an ni lo," ka ti chang fak. Engtin ngw bungrua ang maia a fate a chhuah theih ni.


"Chu chu ka sawi tum a ni lo tih i hriat kha, an pahniha enkawl kan duh mah se i remti dâwn lo a ni lo'm ni?" Mit ka lo chhing sawk, ka inthunun nasat zia chu pui tak a ni. Ka thaw chhuak ham ham a. Thinrimna avanga ṭah chhuak ṭeu chuan ka nui hul hak.


"I hre ta sa sa, phatkual emaw inlak aṭanga bo pui emaw tumna ka nei tawh lo. Inhmu duh a, in inlamah te pawh inhruai haw duh a nih chian rem tih loh chhan tur ka nei hek lo. Mahse, ka fate ṭhen hran emaw, ka lak aṭanga lâk hran emaw tum duh suh, ka thlen tir ngai dâwn lo," ka ṭawng ka sehchilh lo chauh. Ka kawchhung hi a sa pup pup nia maw le!


"Malsawm, ka tan emaw naupang tán pawh thil hi a harsa zawng hian tinge maw i siam ṭhin le?"



"Ka siam a ni lo, inbualah dah duh ni ila, a tirin ka hril ngei ang che. Kan nufa tan thil ti harsa zawk suh."


"Hruaitluanga nen inzawmna inneih hi ka hriat loh i ring em ni?" A rawn ti chang fal.


Phat ka tum zet a, puitling pawmlai pawh nei lo, ngaihzawng ka neih chu sual ni pawhin ka hre lo.


"He thilah hian U Hruaia a tel chhan ka hre lo."


"Tel tehreng e, ka fate anni tih ka hriat rualin pahrawn tawrh tir ka tum lo."


"Ti chuan, nuhrawn antawrh i phal itihna em ni?" Ka malchungah ka kut ka hum ruh ngar ngar.


"Cindy-i lo pawhin an enkawl thei, ka nu leh pa an awm a, keipawhin," Lalrinfela hmaia ka ben sawk lohnan ka theih tawp piahlam takzet zet a ni ka chhuah ni.


Mit ka chhing leh sawk a, inthunun tum taka thaw chhuak leh ham hamin, "Rinfel, ka sawi kha ila hria em? Nangnen hian tawpna hlimawm loh neih ka duh loh thu ka sawi kha. Tunthlengin a la ni reng. Ka naupai thu ka sawi loh avangin min dem thei a, mahse khang hunah khan let leh pawh ni ila, ka duhthlanna a la ngai reng ang. Vawitam i lakah zawhna ka siam a, chhanna ngai chiah ka dawng ṭhin, chuvanga sawi lo ka ni bawk. Ka fate hi ka engkim anni a, eng vang mahin i hnena dah tumna ka nei lo. Hmanah emaw tunah pawh," thaw deuh kawkin ka ding zui a, "Rinfel, engvanga lo duh em em ṭhin che nge ka nih ka hrethiam ngai lo, mahse tunah chuan ka hre tawh, hmanah kha chuan mipa rilru tluangtlam leh hriatthiamna ngah tak, rilru thianghlim, ka natna tura engthil mah ti ngai lo, engtiklai pawha ka himna leh hlimna duhtu inih ṭhin avangin ka duh ṭhin che. Tunthleng pawhin ka la fak chein, ka nuna mipa hmasaber inih hi ka la inchhir chhin lo. Chuvangin, tawpna kan neih tawhsa hi tihdanglam tum suh, thawnthu a tawpna hlimawm lo ka huat zia i hriat kha. Ka nun hmasaah emaw tuna ka nunah pawh a la ni reng," ti leh duah chuan ngawi ngula min en tu chu pensawn san mai ka tum a.


Dawhkana coffee chu enin, ka bag aṭanga pawisa phawrh chhuak chuan, "tu hnen aṭang mah.. Ni lo, i lak aṭang hian engthilmah hi a thlawna dawn ka tum tawh lo," tiih dawhkanah chuan pawisa chu dahin ka pensawn nghal vat bawk. Ka ke pên te chu thinrim insumna avangin a khur lek lek a, ka hmui leh thaw dân erawh chiang takin a khur chhuak thung!


Ka thusawi zawng zawng kha a mal tetein ngaihtuah se ka ti takzet. A fa ka pai thu ka hrilh loh avanga min dem duh a nih chuan demna ka nei lo, a âwm ve rêngah ka ngai. Chutih rualin, khatih hunlai khan hrilh theih mihring a ni em tih inngaihtuah ve se ka ti takzet bawk!

.
.
.
Station ka luh chuan U Zea'n file pawm ṭun chungin, "Sawmte....." Ka lam a rawn pan a, record hlui ho min haisak tura ka tih kha a nih ka ring ringawt bawk.


"Sawmte, Captain Rinfela nen hian in inngaizawng tak tak em ni?" Tea'n a tih rualin, U Zea'n a file pawm lohna lam chuan a hnungzangah a rawn beng ri thlawrh a, "mipa si hmeichhia ang maia zawhna i siam, hna va thawk rawh," ti hluk chuan, "hengho hi aw, a ṭhen hi chu case an khawih record pawh ni chiah lo, record siam chawp te pawh a awm ang," ka kutah a rawn dah zui dat a.


Lawmthu sawiin, Tea kalsawn chu, "Rinfela nen hian inzawmna kan nei lo. Kan nei ṭhin, mahse inṭhian ṭhatna, naupanlai aṭanga inkawm, seilian dun kan ni a, inhriat angin kan tleirawl chhuah hian keimah zawkin ka duh hle bawk. Mahse, nupui a neih hnuah inzawmna kan nei tawh lo. Tin, fa erawh ka nei, phir mipa leh hmeichhia anni bawk," ka en kual a, "Zawhna inla nei em?" An mita zawhna tamtak leh hmeichhe mak tak ang a min enna chu ka haider maithei, mahse ka thawhpui dangte dinhmun khirh taka dah erawh ka duh lo thung!


"Min hrethiam rawh Sawmte, nuam lo tih phahnan i lo hmang ang e," Tea chuan inthiam loh hmel deuh hian a rawn ti let vat a, nuisangin, "ni lo ve, nimina thilthleng vang pawh khan insawifiahna neih chu ka ngai alawm. U Ze, ka läwm lutuk," ti zui sepin Autopsy room lam chu ka pan zui ta vat a.


U Zea'n a nau te a hau zui chu ka hre hman hrâm bawk.


"Tunlai chu case hlui i hai i hai mai a," Ṭpa chu ka melh zauh.

Nuiin, "enzau te hi a ṭha ve hrim hrim a," ka ti chu a awih vak lo a ni ang, a ner nawk mai.


Vawiina case record hlui ka hmuh ṭhenkhat a Rinfela Pa hming ka hmu leh nulh ṭhin leh Smuggling vanga zawhna zawh tura station-a koh a lo ni fo tawh chu a mak ka ti takzet. Mahse, fiahna engmah a awm ngai lo bawk.


"Tunlai sns thu lêng vêl hi i hre ve em?" Ka harh deuh zawk.


Ka lu thingin, "social media, a bikin Fb vel hi ka lut ta meuh lo," ka ti zat. Emma-i te unau ka pai tirh aṭang khan social media hmang hman khan ka khawsa meuh lo. Bakah, kum a tam ṭan a ni ang a nawmna ka pawh tawh lo êm mai.


"Tunlai chu he sex video hi a rawn viral leh a," ka hmaah a phone chu a rawn dah a, lo bihin, ka chal ka lo ti chuar deuh nawng bawk.


"A va la naupan hmel ve. Mipa hmel lah hi a lang ve ngai lo."


"A mualpho ve dâwn a sin," nui ruh ruha a phone la letin, a phone rawn ri chu a pick-up zui a, a chhuak zui vut bawk.


Ka hrethiam lo a ni, inngaizawng emaw zawng lo emaw tunlai mipa hian engtia an sex hmanglai video a cover duh tlat ṭhin nge maw annih le? Hmeichhia lah kan â. Arghhhh tumah sawisel thei pawh ka ni lo, kei ngei pawhin ka thianghlimna hmang ngeiin ka mipa hmangaihna kha ka hlawhchhuah ka lo inring ve tawh kha a nia!


"Eng nge i ngaihtuah ni?"


"U Hruai!" Ti nghek chuan thaw kawkin, "thawm nei ṭhin rawh," ka ti zui hlar bawk. A mak theu dût dût lutuk mai!!


Ka hnunglama ding a, ka kawnga kut rawn rawlhtu mipa rim pa hrak mai chu ka hip kawk bawk a.


Thaw hulh hian, "Rinfela nen khan eng nge insawi?" Ka beng bulah a rawn ṭawng lum ham ham chu ka za mer mer thei. Ka file keu lai pawh ka tawp ta rêng a.


Muangchanga a lam hawia inherin, dawhkan chu nghengin, a bân sei leh hrawl ṭha tak chuan ka chhuah theih lohna dawkan chu a namkhalh ran bawk.


A bân inkar a ding a, melh chho ralhin, "i hria amaw?" Ka ti chhuak deuh hâ.


A hria tih sawinana a mitko san awkin, "engthu nge a hrilh che?" A ti leh sup. Engtin nge maw engkim hi a lo hriat theih ṭhin ni?


"Naupang lak a duh thu a sawi a. Mahse, engpawh thleng dawnse ka lak tir dawn lo, ka fate anni a, engvangin nge ka lak aṭangin an kalbo tehlul ang ni?" Ka thaw zui kawk.


Lalrinfela hmel a tumruhna ka mitthlaa a rawn lan phei chuan thinrimna in min tuam leh lek lek ṭhin.


Eng emaw sawi hian a phun hluk a, "reilote hun minpe rawh, a tibuai leh tawh lo ang che," a kut lehlam chuan ka biang hi a rawn dawm zui a, a nui zui suk bawk.


"Eng nge tih i tum?"


"Eng nge ka tih tum ngaihtuah suh. Ka venghim ang che ka tih tawh kha. Nangmah chauh ni lo, i fate nen," nghet churh maia ti dam leh ruihin, a kutzungpuiin ka hmui a tuai zauh a, min rawn fawh tuma a rawn kûn hniam chu a âwmah lo namlet vatin, "midangin min hmu ang. Hnathawhna a nih hi," ka ti sa sa chu a thaw chhuak hawk.


"Vawikhat chauh," a rawn âwn hnai leh, nui chungin, "teuh lo," tih leh inhersan ka tum a ka che deuh chu, "Bawihi... Vawikhat...."


Nui awr awrin, "awm ṭha rawh Lalhruaitluang..." A lam hawiin ka ti ar ar.


Nui ve suk sukin, "ka bialnu pawh ka duh hunah ka fawp thei lo a nia," a ti sup sup leh a hmel ti läwm lo lui vel chu ka nuih ta khak khak.


"Ohhh!" U Hruaia chu ka namsawn vat. Ding ṭha ve vual vual chuan a ipte a zen zui rûn bawk a.


"Ṭp, rawn luh hun i hre lo hle mai," a ti vawt raih. Ṭpa lah inthiam chiah lo nuihza deuh a nui vur vurin, "tihpalh Sir. Mahse case thar kan nei," kan pahnih a min melh tawn zek zek chuan a ti zui vur vur. A mitko min la san khum ang zek zek zui!

Lalhruaitluanga vang vek, rei kan thup theih pawh la ring nek lo ve a!!


Ṭpa instruments box khai nulha a pên chhuak enin, U Hruaia'n ka lai hmel a nuih ruk suk suk chu melh ram ram pahin, "kal rawh," tih leh ka phone la in ka chhuak zui ve vat. Ka hnungah min rawn zui ve vut bawk a.


"Sawmte, min rawn zui ta che," U Zea chuan en pawh min en lo, U Hruaia nui ṭhûin a en daih sia.


"Min zui dâwn," ka bânah rawn chelh a rual, U Zea a nui hawk hawk. Keilahin Lalhruaitluanga inthup thiam lo lutuk ka lo melh chho nghek. Kan thup rei dâwn lo takzet a ni.


"Kan thup rih ang ka tih kha," kan tlân chhuah tawh hnuah ka ti hlak chu a rum nghut a, "aw' ka tih loh kha," a ti duh lek lehnghal, thup a tum ve lo hrim hrim tihlah a lang reng.


Ka hmui tih pawrh khum vak chuan ka hawisawn deuh hmak a.


"Myla..." Hnar tum datin, "hna leh mimal nun ka thliar thiam, ka bialnu ini tih erawh khawiahmah thup tumna ka nei lo," a rawn ti leh sup sup. A aw ah chuan ka hawi tau deuh hmak min thlemna ri a hriat theih.


"Myla, min en la....." Ka kut a rawn chelh.


"Pasal pawh nei lo va fa pawm ngaihzawn hi i zak lo em ni?" Amah ka ngaihtuah vang a ni reng sia. Diktak chuan kan dinhmun a inthlau lutuk mah mah. Ani chu nupui neia inṭhen a, pathlawi a ni a. Kei erawh ngaihzawng pawh ni lo laka sàwnpai mai ka ni si a.


Car chu kawngsira tiding tuarin, ka bu lawp. A thaw ri hrawih a, "sawi leh teh," a aw zawi leh vawt raih mai, bul tak chuan min ti hläu mah mah zawk.


"Ka sawi sual..."


"Vawikhatmah sawi tawh suh ang che," min hrilh pawh a ni lo, thu minpe a ni mah zawk.


Ka chhan mai loh avangin thaw chhuak leh hrawihin, "ka thusawi chu i hria em?" Tun maia a aw bul leh chang zet aiin hriat a nuam leh tawh zawk. A aw tlema a dam leh takah chuan inthiam leh chiah lo vin ka bu ta nghat a, ka nuih ta sen sen bawk.


Thaw chhuak ham hamin, a kut hrawl tak mai, min chelh leh khawih a pianga ka thlamuanna tizualtu chuan ka biang a rawn dawm vawng vawng a, "tu vang mahin i inrintawkna hloh ngaih suh ang che. Theihnghilh suh, i inrintawkna i hloh rualin, nangmah leh nangmah pawh i inhloh a ni tih hi. I hrethiam em Myla?" Pa-in a fanu hnenah a nihna ang a lang a, huaisen taka a ring tun at a khawvel hmachhawn tura a fuih ang mai a ni.


Ka ṭhutna lama rawn hnaiin, ka chalah a hmui lum ther thera fawp vang vang chuan, "ka hmangaih che ka tih kha," zawi tak si, dam leh thük raih a tiin, a nui ri suk a, melh chho kiau vin ka nuih let ta sen sen. A thusawi chu rinhlelhna pakhat mah ka nei miah lo lehnghal


Thaw ham ham a inla hrang vutin car chu a tinung lehnghal a, a tlân chhuak chu alam hawiin ka en reng. Chet nachang ka hre lo a ni mah zawk.



Thu tam tak a sawi ngai lo tih ka hria mah se ka chala min fawhna khan maktak maiin thutam tak a sawiin, ka laka a rilru put hmang chiang takin a lantir a ni tih ka thinlung hian a pawm hmiah.


"Min en reng chuan kan tum ram kan thleng thei hauh lo ang Myla," a nui zui huk a, rang tawka ṭhu ṭhain hmalam ka hawi vat, ka hmai lah chu a rawn sa nghal hat hat.

Min rawn enin a nui hawk hawk, a nui ri chuan a car chhung zau tak chauh ni lo, ka kawchhung thlengin a fan thla rawih rawih thei hial lehnghal!


"Khatiang hmel kha mipa dang hmaah tilang hauh suh ang che," a tih zawm leh dût chuan a lam hawiin, ka biang sa ru deuh hat hat chu ka dawm a, "eng maw?" Ka ti chhuak sep.


Mit zîm sulh hian min rawn en a, "i lai hmel duhawm tak kha. I hrethiam em?" Ka lo hmui hnuailam ka lo ti pawrh vak.


"Thu minpe reng suh," tih leh ka hawisawn leh deuh hmak, ka nui ru sen sen tho. Duhawm mintitu hmasaber a ni miau a.


Thu minpe lo tura ka ti chu nge ni a, laih luat avanga ka mize naupang chhia ta deuh thut chuan a nuih ti za ni, a rawn nui ri leh hawk hawk lehnghal!


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 2nd, 2022, 10:38 pm

THURÛK_99

BY

Floria Laldansangi


Chapter < 17 >

<~~~~~~~~~>


"Sir..." U Hruaia chibai an lo bûk chu a kut vai zauhin, "a chhungte dang an awm lo em ni?" A ti zui sup.

Tleirawl kum 14 vêl, mittui nena lo ding leh Paber ni âwm tak ṭap pur lam chu kan hawi a, "Nuber nikhaw hre lovin a awm a, damdawi in an panpui deuh chiah, ruang chu huan lamah."

"Min zui dâwn em?" U Hruaia chu ka melh chho ralh. Bu nghutin min kal hmasak tir zat bawk.


An in awmna lah chu Falkland-ah pawh a kilkhawr tak takah an awm a, an in dinhmun en mai pawhin chhungkaw khawsak harsa tak an ni tih lah hriat reng reng.


Theihai kung säng ve taka hmeichhe ruang lo inkhai zar mai lam chu ka pan hnai vat. Ṭpa'n thla a lo la mawlh mawlh bawk.


Glove bun a, mask vuah chuan ruang chu ka en kual a, a hmel chu hmuh tawhna ka nei a ni. Ka hre chhuak zo mai lo, a in awhhlumna bul vel pawh chu ka en kual zui dan dan bawk.


A ruang an lak thlak hnuah a taksaah hliam dang a awm leh awm loh en thuak thuakin, "a boralna a rei deuh tawh a nih hi," U Hruaia chuan min en zui run a.


Glove phelh a, mask phelh pah chuan, "chhunlama in awkhlum," sana ka bih zauh, "tunah dar 4:35pm a ni a, a thih hun hi dar 12pm vel a ni. Ṭp, damdawi ei lai a nei em tih i zawt em?" Ka tih zawm zat.


U Hruaia mitmeng chu ka hrethiam lo, ka hnathawk hawiher vel chu hmuhnawm min tih hmelin min chhuan hmel takzet tih erawh kei mimawl pawh hian ka hmu thei thung!


"Ma'am...." Constable pakhatin damdawi min rawn pek chu la in, "Xanax.." Ka ti sep.


"Depression damdawi a ni lo'm ni?" Ka bu nghat a, ruang chu enin, "panic disorder nei hian an ei tlângpui," ka ti leh sep. Depression neitur chuan a la naupang mah mah.

"Chief, mitthi hi video ka entir che a hmeichhia kha a nia," Ṭpa chu ka en vat.

"Video chu ka en thei ang em?" U Hruaia'n a rawn ti sup. Ṭpa nen an inbiak laiin in lamah chuan ka let chho leh a.



Inchhung pawh ka thlen hmain U Hruaia a rawn lut vut a, an pafa hmaa phone lek chhuakin, "heihi hriat innei em?" A zawhdan teh tawp chu, mi lusun laiin.

"U Hruai..." Ka khap vat, a thaw ta huk a, "video chungchang hi eng nge hriat inneih?" A ti ṭha leh sup. Ka lo nui sen ssn thung.


"Kan hria alawm ka Pu. Khavang khan depression an tia mawni, rilru lam harsatna te a neihphah hial a sin," Paber chu a ṭap zui fep fep. Fa chân hi engtiang a nâ ni ang maw?


"F.I.R pawh kan thehlut, mahse min buaipui duh lo va, a changleh, 'a duha sex a hmang alawm. A ngam alawm, mualpho pawh a inhuam tur alawm,' te min lo tihsan a. A fel ka tibik lo ka U hi mah se ka Pu hetianga mualphona leh Mizoram mipui lak aṭanga hmuhsitna, diriamna dawng tur hian a sual bîk viau lo a sin," an fapa chuan a lo ti sep sep bawk.


"Fiahna ka nei lo nâ chu, fake ac aṭanga post chhuak a, share kualtu hi a bialpa hlui, a sex hmanpui kha a nih ka ring," a ṭap zui ṭuau bawk.


"Tunge a bialpa hlui chu. Video a mipa hi a ni em?" Ka lo ti vat. U Hruaia leh midangin min lo en vat bawk. Ka zawt duhthawh deuh em maw ni?

Mittui nen min rawn melh kual a, a mitmeng a khup leh vat. Paber pawh chu a mitmengah a ṭawng chhuak ngam lovin hlauh a nei tih a hriat theih.


"In kâ in ân loh chuan in fanu thihna hi chhui theih a ni lo," U Hruaia'n a lo ti bul nghut. A kutah ka sik ve leh vat bawk. A aw chhuak hi midang tan hian a bul thei lutuk. Dam dup si hian a bul hmuk zel a. Bakah, thupe hj a ang thei lutuk bawk.


"Ka hre chiang bîk lo a nia aw," a fapa chuan anti leh tete a. Ka lo bu nghat, min melh kual hrek hrekin, "Education Minister Pu Chhanhima fapa teber Isaac-a. Ka u nen an inngaizawng ṭhin a, mahse thla hmasa khan an inṭhen a. Police bulah pawh ka sawi tho; Mahse, fake ac a ni a, chhui ngaihna a awm loh thuin min chhang zel a," a ti leh sap sap.


Thil awmdan chu a lang reng, Minister fapa-in thil a tisual a, chhui chhuah erawh a har viau ang. An khawsak hetiang mai hi a ni ve si a. Christian ram chu kan ni tho a nia! A rapthlak zawk!


"Chuan ka Pu, ka U pawh an school aṭangin an hnawhchhuah phah bawk a," a ti leh a tawp lam chu ka hre mumal lo. Ka lo thaw ve kawk mai. Zilh hau leh hremna tawk se chuan ka hrethiam, engtin nge an hnawhchhuah theih zawk le?



"Myla, U Zea te rualin let mai ta che," a rawn ti vut chu en chho vatin ka bu nghat a, "Rinfel, Tea min rawn zui rawh u. U Zea helai chu i kutah awm rawh se," ti zung zungin a pen chhuak nghal pawk pawk.


Rinfela leh Tea'n an umzui vat. An chhuah dâwn sawi loh kan thlen tirh aṭang Rinfela min enna ka haider lui char char kha a nia. Min en ni viau ṭhin lo bawk nen, haider mai loh chu!


"Helai chu kan zo thawkhat bawk a, kan let dâwn em ni?" Kan lo bu nghat hlawm.

"Ahh..Ka Pu i fanu-in depression a nei iti a, he damdawi hi doctor chawh a ni ang chu maw?" Ka ipte aṭang damdawi chu phawrhin ka entir a, alo bu nghat nghat, "ni e, a ei ṭan deuh chauh a ni," a ti ban chuap a.

"Appointment insiamna lehkha emaw doctor inhmuhna lehkha ka enthei ang em?"


"Mama kan khumbulah khan a awm kha."

A fapa chu an room, kawngkhar puan phel pakhata anzar phuiah chuan lutin a rawn let vat.

Ka lo la vat a, "R & R Clinic..." A fapa chu ka en a. Lo bu nghatin, "an clinic-ah khan Psychologist Doctor ṭhu a awm ve bawk a," a lo ti vat a.


"Ka lawm e," ti sepin,"kan kal dâwn em ni?" Ka ti zet tawh, "U Ze, station-a kan let hmain R&R clinic ah hian kan pêng lawk dawn em ni?" Ka ti leh a.


"I tih dan dan le," a lo ti ve mai bawk.



"R & R Clinic te chuan Aizawl vengtin deuh thawah clinic annei a nia, eng nge a va kalna vêng," U Zea car khalh chu ka melh zauh a, ka kuta lehkha chu en lehin, "zarkawt," ka ti sep bawk.


Clinic kan thleng chuan U Zea car park nghak ta lovin Ṭpa nen kan lut hmasa a.

"Puih theihna che u ka nei em?" Receptionist nula hian nuisangin min lo chhawn vat a, "he doctor hi kan hmu duh a," lehkha chu ka hmuh tir zat.


"A pawi hle mai, appointment tel lo chuan inhmu thei lo ang."


Police kan nih thu ka lo sawi theihnghilh a ni, "police kan nia," Ṭpa zawkin nui vur vura a badge hmuh chuan a rawn ti vat. Ka lo ṭhen vak thung.


"Engthil nge ni?" Kan hawi vat. Doctor coat var ha, palian ve thek thuk mai, U Hruaia nen an sän zawng a inchen khawp ang, ani erawh kum 50 ralkai tawh a nih avangin a taksa erawh U Hruaia angin a khal viau tawh lo. Mahse, putar hmelṭha tak a ni. A lian ṭha thelh thulh bawk si a. Tin, a fin hmel viau bawk!


"Doctor..." Receptionist-in a tih laiin, "Police, psychologist Doctor Lalnunsanga hmuh kan duh deuh a," ka tih khalh vat. U Zea a rawn lut ve chiah bawk a.

"Zea engthil nge ni?" Doctor chuan ka zawhna pawh a chhang lo. U Zea rawn ding chu a en zui deuh rûnin a coat hak chu a phelh zui a.


"U Muan, i makpa damlo enkawl zinga a mi mahni inti hlum an awm a, a chanchin tlem han hriat kan duh deuh maw le," U Zea nen inhresa hlauh a tihzia viau hi.


"Sawmte, heihi Dr. Rammuanawma, R & R Clinic neitu. Psychologist Doctor kan hmuh tur hi a nau pasal a ni bawk a, minpui thei ang," a ti nghal zung zung.

"A ṭul teh duah lo mange," Dr. Chu a ṭawng mawh hmel ve takzet. U Hruaia ang tur chi.


"Nunsanga a la awm em?" Receptionist chu a enzui nghal a.

"Aw, awm e."

"Nangni pafa pawh chu khawnge maw in inbo chhawk le?" Inchung aṭanga aw rawn chhuakah chuan ka hawi zui vat. Nutling, tefel et mai, nulat lai pawha lian lutuk lo tur, mahse nu hmelṭha veng mai rawn chhukin a nuisanga, "ka ril a ṭam a nia. Inmak pafa e," a ti leh zat chu ka lo en ran a.



"Haw thei e, Zea inchungah ala awm a nih chu," tih leh annu ningei tur chu dimdawih deuh hian a chelh a, "phone ka hmang lawk dâwn ka tih kha," Dr. Chuan a ti deuh sup sup. Annu a lah chuan nui chungin, "hre hek lo, khawnge Thlamuanpuia pawh chu?" Chhuak pahin a ti leh hlak. Nupa inhmangaih tak anni tih a hriat theih. An inpawh hmel takzet.



"Chho ila," Ṭpa'n a rawn tih takah chuan, "aw..ahh.." Ti deuh nuahin ka zui chho nghal vat. An clinic chu rin aiin a zau vin a lianzek mai.


"Dr. Lalnunsanga psychologist," tih intarna chu U Zea'n kik kharh kharhin, "lo lut rawh," a rawn ti ve vat bawk a.

"E khai! Tehhlawh che chuan Zea. Eng nge ni?" Haw tumin a lo insiam ve mêk tih a hriat.


"I dam lo chungchangah biak lawk che kan duh a."


"Tu ka dam lo nge ni? Lo lut rawh u, lo lut rawh u," a mah pawh chu sofa-ah a ṭhu thla zat.

"Lalngaihawmi, kum 17 mi, Falkland veng," ka lo ti vat.

"Aw ka hria e," a lo ti vat.


"Eng depression vanga rawn pan che nge a nih le?"

"Umm, panic disorder bakah, Anxiety kha a nei nasa a, karhnih a tling lo deuh ang a kan in enkawl ṭanna hi. Tinge tehdaih chuan?"


"A boral a," U Zea'n a ti sup.


"E khai! Engtia boral nge, naktuk khi a appointment neih ni a ni tak a sin," a ti leh hluai.


"In awkhlum. I biak hnuhnungberin amahah eng emaw danglamna i hria em?" Ka lo ti vat.

Ngawi deuh vung vungin, "a case hi a serious reuh viau a, mahse nimin piah kan inbiak kha chuan engmah chutianga han danglam a awm lêm lo a! Min rawn hmuh tirh khan hetiang a thlen hi ka hläu zawk a; Mahse, a hnuah erawh hmeichhe inthunun thei tak leh fimkhur tak niin ka hria a, tlem chuan ka hahdam deuh a. A zia lo hle mai," a ti leh duah.

"A harsatna tawn te a hrilh che em? Engtiangin nge a dawnsawn?"

"Ummm...inhriat tawh chu ka ring a, mental lam buaina a neih chhanber chu video kha a ni a," a tho zui nulh a, a computer chu la in, "video hi en u la, in hriatthiam ka ring," tih leh a rawn play zat.

A chet vel dan, a ṭawng dan, thawk lak engkim chu uluk takin ka en a, Panic attack mao ni lo, Anxiety a nei nasa tih a hriat takzet, "nau a pai em?" Ka ti sep.


"Chu erawh a sawi lang hauh lo. In hriat angin in enkawl hlim chauh kan ni a, zawhna chhan pawh a la harsat khawp mai. A sawitam ber erawh 'engtin nge ka nun ka hman tawh ang,' tih a ni," Dr. Chuan a rawn tih leh chuan ka bu nghat.


"Kan lawm lutuk," Computer chu ka khup a, ka ding zui zat. U zea te pawh rawn dingin lawmthu sawi mawlh mawlh chuan inzui chhuah kan tum a, kawngkhar rawn inhawng ri rakin, "Pate, ka Nu te an haw tawh em ni?" Aw thûm dût mai, nichina Dr. Rammuanawma ang zet mai tlangval a rawn dak duk duk.

"Haw daih tawh e, min phur haw law law rawh, ka car siam turin ka dah. Ka haw vat loh chuan i nï a lo âng leh nasa dawn," Dr chu a rawn ding ve a, nui huk hukin, "chhuak rual ang u," a ti zui zat.


Inhnuai kan inzui thla chu Doctor-an, "I nu in, 'Thlamuanpuia vahcheh lutuk hi chu, a ngal khawn a ngai a ni' a tih nasat kha," tlangval chu a lo nui huk huk, "U Dini ṭhin hi a," a ti awlsam et bawk a. Nufa inpawh tak annih ka ring. A U mai bawk si a.
.
.
.
"Inkalna eng nge a an?" Station kan luh rualin U Hruaia'n a lo ti sup. Ka lu ka thing a, autopsy room lam pan chhohnaa dingin, "IPS address inla chhui em ni?" Ka ti sep. A bu nghut a, "kan hmu har lo ang," tih leh Tea'n a rawn koh avangin a pensawn vut, keipawh Autopsy room lamah kan chho nghal a.


Ruang chu ka en kual a, "Ṭp, a thisen kha test hmasa rawh aw," ka ti zat.

In awkhlum a nih avangin, a taksa hawn a ngai hran lo; Mahse, engvanga in awkhlum nge a nih tih erawh a taksain min hrilh ang chu.

Ka rin lawk ang chiahin, a taksaah nau chhiatna hnu hma mai bakah, Vaginal Bleeding a nei bawk.


"Chief..." Thisen leh zun test results chu ka la, ka en deuh vang vang.

"I ring dik, nau a ti tla a nih hmel," Ṭpa'n a lo ti vat.



Bu nghat nghatin, "Xanaz bakah mifepristone (abortion pills), Ibuprofen leh prostaglandin e2. Nau a ti tla a nih chuan Ibuprofen hi a lo berah 600mg a ei ngai bawk ang a. Vaginal Bleeding nei lo chi a ni hauh lo.." Ka ti chhuak sep sep.


Ka thaw chhuak ham ham, nula tleirawl hmelṭha tak ruang, vun dâng bel mai, vawh hmel tak chu ka thlir vang vang bawk a, ka khawngaih ru riau bawk.


An chhungkaw dinhmun enin a nau tihtlak thu leh, a nau tihtlakna side effect neih sawi ngam si lo, enkawlna ṭha dawn mumal loh kar a, a video leakout bawknen thih a thlang ta niin alang.


Report nena inhnuai ka chhuk chuan, tlangval pakhat hi U zea hmaah a lo ṭhu ran a, a bulah a nu ni ngei turin, "a duha a rai a, tumahin sex hmang turin annawr lui hleinem. Ani thihnaah chuan engvang phiangsena ka fapa rawn man nge innih? A damlai maha min tihbuai nak alaiin, thih hnu lehzela min tihbuai," a lo âng tawn tawn.

Midang ho erawhin an ngaihsak lem lo, U Hruaia office lam an bik duk duk thung.

Tunge maw rawn kal ni? Tea, hawkdak ber pawhin a ngaihsak zawk chu!

"Tunge a?" Ka ti sep. U Hruaia office pawh hi darthlalang a nih avangin a hmuh theih vek a, parda a pawt pharh te a nih ngawt loh chuan.

"Commissioner..." Tea'n a lo ti sep.


"Eng nge a rawn tih...." Ka ti hman chauh a ni, "shitt..." Tih leh uluk zawkin ṭawng chu an ngaithla a.


"Case a tawp...." A tih chiah chu ka hre ve hman. Commissioner chu a ding zui a, "Hruaia vawikhat iti sual tawh, tunge man a, man loh tur hre rual ini tawh," a tih leh chuan thil awmzia ka man thiam nghal.


Tlangval ṭhutna lam chu a en leh, a nu lah chu a hawi vah, a bulah lawyer ni âwm tak a lo awm ve bawk a nih saw.

Commissioner chu rawn chhuakin, kan lo awmsawn sap sap a. Pitar lam chu panin, "pawi ka ti hle mai, nangmah ngei i rawn thlen a ngai a," a la tizui dût dût zui.


"Hmeichhe pakhat khawloh vang mai mai a helai hmun kan thleng hi kan hre rei ang," a lo ti deuh hlak hlak. U Hruaia lam chu ka hawi, dawhkan nem hian a kûn deuh ngar. A bâna thisen zâm erawh ka hmu chiang viau thung.


"U Ze heihi result a nih hi," tiin result chu ka hmuh a.


"I bialnu hian nau a pai tih i hria ang chu tiraw? Kum tling lo sex hmanpui hi an duh emaw duh lo emaw pawngsual case a ni tih pawh?" Tlangval ṭhu chu ka melh ran.


"Tunge inih a?"A nu zawkin min lo chhang hlar.


Ka nui a, "medical examiner...." U Hruaia chu engtik laiin nge ka bul a rawn thlen ka hre lo, ka en chho vat.

"Inrawlh suh," a rawn ti zui sup a.


Ka kuta paper chu pawt thlain dawhkana daha min pawhsawn a tum chu lo tal sawn vatin, "ka Pi, Minister nupui leh fapa innih ka pawi sa ve lem lo va, mi fate teh theihna chikima i teh hnuah, i fapa ngeiin thil a rawn tisual ve a, mawhphurhna lakdan zirtir aiin a tihsual i thuppui leh ang lawi a, vawiin ni hian helai hmun aṭang hian inchhuak him pial a ni mahnâ, phuba la ṭhin kan Pathian khian a en ve tho che u a ni tih theihnghilh suh ang che u. Tin, tlangval nangpawh, kumkhua in i chhungrilah inthiam lohna in a zui dâwn che, i hlim ngut ang emaw chu," ka thaw nghal hawk thei, ka duh ai tam ka sawi tâk chu.



"Kan nufa ânchhia min lawh tur hian tunge inih?" A rawn ti tuar, ka hmaaah U Hruaia a rawn ding zui rûn a. Ka bânah a chelh rûn bawk.

A sira tawlh leh ngatin, "ânchhia ka lawh lo che u. Dan chungah inleng a ni thei, Pathian chunga lêng kan awm lo ka tihna a nih chu," ka ti leh ve leh ngat. Ka lei hi ven har ka ti. Mirethei zawkte chungah thihna pawh thleng hial mah se thil tisual lo ang maia an la hawi vah chu kei misual fanu hian en liam har ka ti takzet.



Midang ho vin mak tih hmel taka min en hau laiin kan minister nupui erawhin mitmeng lah phat phatin min en thung a, ṭawng tuma a kâ a an leh zuai zuai laiin, "he case chu a tawp ka tih kha," Commissioner zawkin a rawn ti bul churh a, "Hruaia case hi khar ang che," a rawn ti leh zat.


A fapa Isaac-a tih video post darhtu leh mitthi bialpa ni bawk chu rawn dingin, "haw ang Nu," a ti zawi sup. A aw chhuak leh kûn tlat danah a tihsual a zahpui ve a nih ka ring.


Thinrim zeta Nu berin a fapa a pawt chhuak dawr dawr chu kan enzui reng. Commissioner chu ka lam rawn hawiin, a rawn nui vur vur ringawt lehnghal. Amah hi a ni sia case ti tawp tura titu ka thusawi te kha haw ve hle tur niin ka hre si a.


An chhuah rualin U Hruaia lam ka hawi chho tur chu inher vutin a office ah a lut zui vut a. A ngaihna hre lo lutuk chuan U Zea lam ka hawi â heu bawk.


"Lut rawh," U Zea'n lo ti supin, "midang pawh inhnaah let rawh u, tihfel ngai tifel zung zung ula, min transfer darh lo turah ngai ang," a nui zui huk huk.


U Hruaia office chu ka pan hnai den den a, "rawn lut rawh," kawngkhar ka thlen dawnin a rawn ti bul hluk.

Tihsual ka neih âwm ka hre tawp si lo va, engvanga thinrim ngawt nge maw a nih le?

U Zea lam chu ka'n hawileh rih, a lo nui ruh ruh, ka mitmeiin a awmzia ka zawta a lu min thin khum mat mat chauh a ni.


"U Hruai..."Lutin ka ti zui den den a, parda zarphui nghal sawk sawkin, kawngkhar chu a khar nghal dawt a, ka ding khawng at.

A chetvel thlamuan thlak loh deuh chu ka en kiau a, han hlauhna em emna erawh ka nei chuang miah lo, min vin a, min hrawk ka rin loh lutuk vang zawk a ni ang.


A chhip sam tuai puat hian, a thaw ri hraih a, "engthil nge itih kha i hria em?" A aw chu a nelawm miah loh, vin erawh a ni chuang lo.

"Thudik ka sawi mai chauh alawm," ka ti leh ngat. Dak vahin ka en kar bawk a. Thaw leh hawk hian, "Malsawm..." A ti zet, a hmai a tuai puat a, thinrim insum tih hriat tak bek pawng ṭalh ṭalh leh chala thisen zâm pawng ṭalh chungin, "Myla, tunge annih i hria a ni lo'm ni?" A ti bul hulh.


"Hria e, Minister fapa emaw nupui pawh nise an fapa in thil a tisual miau alawm. Tualthattu nen eng nge an danglam na," ka rilru diktak a ni.


"I hläu a ni tih sawi suh Lalhruai..." Ka ti leh nghal dek dek chu, "i tán a ni, i tán..." Ka dar tawn tawnah a rawn chelh, a mit sen rûm leh thip tak chuan minti hläu titih nghal, ka thawk ka hip let vat a, mit ka khap vat vat bawk.



Thaw zui hawkin, "tihpalh Myla, vin che kha ka tum a ni lo," a aw a nêm leh deuh vang nge ka mittui rawn hnai ṭiam ṭiam. Chutianga nêm tak pawh a ni lo, a la chang rût tho.


Tihsual ka neih ka hre lo va, thudik ka sawi avanga min sawnbo dâwn a nih pawhin pawi tihna ka nei hek lo.


"Min thlah rawh," tal chhuah tumin ka tal phat phat, ka aw lah chu engti zia nge, hetiang hian ka awm ngai dêr si lo va, a rawn ṭial ruai ringawt mai!


"Tihpalh, tihpalh ka tih kha..." A lamah min pawt hnaiin, min thlah tum lo lutuk chuan nghet lutukin min kuahbet a, ka chhipa a hmui nghat lum vung vunga thaw chhuak ham hamin, "vin che kha ka tum a ni lo," a ti leh sup sup.


A Âwm khauh zetah chuan sik lui vakin, a nui chhuak hawk a, a inla hrang nghal vut, nui huk hukin, ka biang tawn tawna a rawn chelh chuan mit hnawm chapin ka lo melh chho ram ram. Ani pawh a mitmeng a la thip viau bawk, mahse thinrimna erawh hmuh tjr a tam tawh lo thung.


"Tihsual ka nei pawh a ni lo va engvanga min vin vak nge inih?" Ka ti deuh hlar bawk.


La nui reng chungin, "thil hi i hmuh ang hian a awlsam lo alawm," dam dupa ti supin, a nui hmel chu a reh riai riai a, thaw chhuak leh ham ham chuan, a kutzungpuia ka hmui tuai zuiin, "Myla, i U case pawh hi i chhui tawh lo thei ang em?" A ti dam raih.


"Ka chhui tih i hria amaw?" Ka lo ti chhuak. Ka ât hmel viau ani ang mifing lutukin file hlui ka khawm ka khawm khan a hrethiam daih tawh ang chu!

A bu nghut a, "tawpsan rawh," a ti leh sup chu ka lu ka lo thing vat vat, "a autopsy record pawh a awm lo a nia, dik lo hi chu a awm alawm," ka ti chhuak niah niah.


"Bakah, chhan awm lovin engmah ka bansan ngai lo," ka ti leh hrâm bawk.

Luhlul mintih hmel deuha min thlek deuh vung vungin a mit a ti zîm ta sulh a, mitmeng dam ruiha min en chungin, "i luhlul takzet a ni," a kiai zui suk bawk. Ka vawikhat hristna pawh a ni lo, luhlul mintitu hmasaber lah a ni hek lo.

A phone rawn rik takah chuan ka chalah fawp zauhin, "ka thlah haw ang che," a ti sup.


"Ka han inthlak hmasa ang," tih leh ka chhuak ve vat a. U Zea lam pan leh vatin, "U Ze, case inkhar tak tak dawn em ni? Mitthi chhungte khan F.I.R an thehlut tho si a," ka ti sa sa.


Min rawn en a, "Sawmte, commissioner meuh a inrawlh chuan tih theih kan nei lo alawm. Bakah..." A chawl dat U Hruaia office lam melhin, "kan home minister leh Hruaia inkar hi a ṭha lutuk lo va, hman kumah a fapa upa zawk aman avangin, an man zana Zarkawt PS a duty zawng zawng an transfer chhuak vek mai a, Hruaia leh a ṭhianpa phei chu indona hmunah andah nghe nghe, kum 4 vêl chu a awm ang, a ṭhianpa erawh vanduai thlak takin hel kutah a boral a," a ti sup sup.


A office lam chu ka en zui ve vang vang a, "a thinrim chhan i hrethiam tawh em? Kan station tán a ngawih a ngai. A hma ang a thil a thlen leh a hläu a nih kha. Commissioner kha rawn kal lo se chuan fake ac hmanga midang tih mualpho case in jail chu a dah tho ang," a tih leh ang lawi a.


"Commissioner zawkin a nih kha case close tura ti," ka lo ti hlak chu a lu a lo thing vat a, â min tih hmel deuh a nui chungin, "Hruaia thlavang a rawn hauh zawk a nih kha," a tih chuan ka hrethiam chiah lo mah se U Hruaia thinrim chhan erawh ka hre thiam ta viau.



"Rilru tina lutuk suh. I chungah te chuan a thinrim rei teuh lo," ka darah a rawn beng thuk thuk. Ngaihdam min dil leh tawh tih a hre lo a ni ngei ang. Nui sen senin, "ka ṭha, ka han inthlak ang e," tih leh ka tlân chho zui vat bawk.
.
.
.
"I lungawi tawh em?" In lam kan pan laiin a rawn ti sup a.

Alam hawiin, "min vin tawh suh ang che," ka ti deuh nghat chu hmalam en rûn chunga a kamsir chuar zui tapa rawn nuiin, min rawn en zawk, hmalam bawk hawi lehnghalin, "ka hria e," thuawi deuh chuan a ti dam leh ta sup a. Ka nui ta var var.


Diktak chuan nichin pawh khan min vin leh hrawk kha a tum a ni bîk lo tih ka hria, ka lo luhlul ve khanglang lutuk kha, a thinrim sa leh buaina ka tawh a hlauh luatah a inthunun zo lo tih ka hrereng. Mahse, ngaihdam min dil ri kha hriat a nuam ka ti!

A tihdan ṭhin ang bawkin, kan inkawng tluanin ka kut a chelh ran reng a, gear a thlak chhung tih loh erawh a thlah lo hrim hrim, ka him riau a ka inhriat rualin ngaiah ka nei ang tih erawh ka hläu viau.



"Lo lut kawi la," in kawta car a din rualin ka ti sap. Min rawn thlek deuh vung vunga mawi lutuk a kiai suk chuan, ka sam ka hmai rawn zartu ka bengah zep ṭha a, ka biang chul zauhin, "ṭum dangah zawk le. Hna tlem ka la nei a," a ti zui sup sup.


Hrethiam taka bu nghatin kawngkhar hawn mai ka tum a, nui vur vura a lama inher lehin, mitko san akin, "eng nge?" Tih en a min lo enin a lo thle bak chu, "lo hnai teh," ka kut ṭangin ka hui zauh zauh va, a rawn âwn hnai ve mai bawk.

A biang tawn tawna ka chelh chu a meng zau lui deuh awk a, a nui ri zui suk bawk, a hmuia fawp deuh vang vang a inla hrang vatin, "goodnight kiss a nih kha," tih leh rang tawka zuang chhuakin, kawngkhar khar chuan inchhung lamah ka tlan zui nal nal bawk a, a nui hawk hawk ri erawh ka hre hman.


Ka zak viau dâwn emaw ka tia, zahah pawh a kal lem chuang lo, ka bialpa ka fawp a ni mai a, zakthei lo pawh ka inti chuang lo ve!


"Anu...." Ka luh rualin Andrew-an mi lo kuah vat.


"Anu, eng nge 'sàwn fa chu'" ka fapa zawhna avangin ka ṭhu hniam vat.

"Khawi aṭanga i hriat nge?" Ka ti nghal vat bawk a.


"Hman a mi pizza kan ei laia hmeichhe au vak vak khan Emma-i nen 'phir unau sàwn' a ti vak vak a. Tiraw Emma," a U chu a enzui vat, Emma-i lah chuan a rawn ngaihsak lo, a homework a tihlai hi chuan engmah hi a ngaihtuah ṭhin lo.


"Bawihte, chutianga a tih leh che chuan, in zirtirtu te hrilh ang che, i hrethiam em?" A bu nghat nghat. U Hruaia fanu mah nise ka haw lek lek a ni. Naupang ṭawngkam atán a mawi loh bakah khawi aṭanga a hriat nge ka hre châk khawp mai.


"I homework va ti ve rawh, ka'n inbual ang e," ka ti zui sap a. Ka phone chu phawrhin U Hruaia biak ka tum zet, a hria a nih chuan a fanu a hau dâwn tih ka hriat avangin, muangchangin ka dahthla leh riai riai.


"U Sawmte, ka hresual maithei a mah se enteh sàwn titu hmeichhe naupang leh Emma-i te Pa fanu hi an inkawm niin ka hria, school khatah an lut a," a rawn tih chuan hrethiam lo deuh hian Ruati chu ka en a.

"Rinfela fanu..." Ka ti zet tawh, mahse U Cindy-i fanu a nih ring nghalin ngaihdan ka siamthiam nghal bawk.


"Ka hrethiam e," ka ti sep a, room lam ka pan zui vat.


Nutlingin engtin nge naupang bulah chutiang thu chu a sawi theih tih ka ngaihtuah pawhin mak ka ti. Hmeichhe fing tak niin ka hre si a.


Rilru na ru tak, tina duh si lo chuan ka inbual ta sawk sawk, ka ngaihtuahna ata lah chu ka dahbo thei dêr lo. Engtin nge a fanu a fuihpawrh tih ngawtin ka rilru a luah lehnghal.


"Anu mi an lo lêng.." Emma-i rawn lut chu ka sam chhem ro pahin ka en a, "tute nge?" A lu a thing mat mat.


"Ka lo chhuak ang."

Ka hmaia moisturizer hnawih nawk nawka ka sam ṭawn ṭha sawk sawkin ka chhuak vat a.



U Cindy-i leh Lalrinfela bakah, mipa pakhat tunge a nih ka hriat lem loh lo ṭhu ka hmuh rualin ka ding dawt.


Muangchangin Lalrinfela'n ka fapa a pawmna lam chu ka pan hnai a, an hma sofa-a ṭhu thla in, "eng nge inrawn tih dawn?" Ka ti nghal tlawng bawk.


"In i neih nawm hi Sawmte," U Cindy-i nuisang chu ka läwm teh viau lo, nichin maia ka fapa thusawi ka ngaihtuah let phei chuan nam chhuah rawk rawk a nia ka nâp ni.


"Ka lawm e." Ka ti ta tho va.


"Heihi Lawyer a nih hi, naupang chungchangah ka rawn hruai a," Rinfela'n Drew-a pawm pah chuan a ti sup.


"Bawihte i U te ho nen kawmthlang dawrah thil zu lei rawh u," ka fapa chu ka lamah ka hui a.


"Cheng 5 minpe dâwn mi?" A lo ti vat, a pa kuahna aṭanga talpitin min rawn pan zui a, "Ruati lo zu chhuahpui rawh. Kal ru..." Ka kal tir zat.


An chhuah fel rualin, "eng nge induh?" Ka ti leh fak.


"Heihi naupang chungchanga inremna kan siam a ni a," tih leh paper hi ka hmaah a rawn nawr hnai a. Ka melh zawk, pakhat chauh tana custody nei tura inremna a ni tih ka hmuh chuan ka sa phat, mahse ka inhum ruh a, an lama paper nawr letin, "eng inremna mah siampui che u ka tum lo," ka ti zui zat bawk. Ka kawchhung rawn sa pup pup chu ka inthunun thei lo ang tih ka hläu takzet.


"Inremna min neihpui thei lo a nih chuan an pahniha full custody nei turin court kan thlen a ngai dâwn a nia," an lawyer chu ka ner khum nawk, ka hlauh hi an ring em maw ni?


"Rawn ti rawh u, hnehna i chanpui em kan en dâwn nia," ka ti nghat bawk a.


"Thlenga i buaipui nghal mai dâwn nia," U Cindy-i a lo ti no nghal a, an lawyer chu bu nghatin, "a nih chuan ka kalsan ang che u," a tho zui vat bawk.



A chhuah rualin, "kum 9 an tlin hma chuan duh an thlang thei lo tih i hria a ni lo'm Malsawm?" Rinfela'n a rawn tih hluk. Ka chhang buai peih lo, ka fate venghim turin an duhthlanna ka mamawh lo, ka chakna leh theihna hmangin ka venghim thei.


"Delhi lama inkhawsak ṭhin dan tlem ka chhui a," min rawn en rûn, "Andrew-a hrisel lo zawk tih ka hria, kan awmpui ang. I tán pawh a hahdam deuh ang a," Lalrinfela thusawi chu awih loh tum viau mah ila a sawi miau si a, ṭang ṭung hian ka en ngar ngar.


Engtin nge mipa rilru thianghlim ṭhin lutuk kha hetiang taka mahni hmasiala a chhuah theih ni?


"Ka fate hi ka pe dawn hauh lo che. Bungrua an ni lo ka tih tawh kha," chang fal hian ka ti let a, ka mal chungah nghet takin ka kut ka inhum ruh bawk. Thinrima ka ân khum a nih chuan chak lo zawk ka ni dâwn tih ka inhriatna chuan ka thinrimna thup hram hram turin min inchelhbeh tir ngar ngar.


"I tan pawh naupang pahnih enkawl chu a hahthlak lo em ni?"

"Hahthlak ti dawn ni ila an piantirh khan ka pe ngei ang che. Ni lo, ka rai laiin ka hrilh zawk ang che. Hre rawh Rinfel, nangchu ka thlah thei che a, ka fate erawh ka thawk ṭek ṭek chhung chu ka thlazar hnuaiah an awm dâwn," ka ti leh fak fak. Ka thinrim lutuk chu ka kawchhung a khawngin, ka khur chhuak lo chauh.


"Ni e, i rai tih min hrilh ni la hetiang dinhmunah hian kan ding hauh lo ang," a aw ah chuan mindemna bak hriat tur a awm lo.


"Ka rai tih kha sawi ila, i nupui ni mai tur rai ve mêk kalsanin min thlan i ring takzwt em ni? Chutiang chu ka thlen tir i ring em ni?" Ka ṭawng ka sehchilh lo chauh tawh.


"Duhthlan theihna hun minpe turin ka ti lo che em ni?" Ka ben lohnan ka insum theihna piahlamin ka inhumbet.


"Lalrinfel, nangni naupai theih leh theih lohah buaina ka nei lo; Mahse, ka fate hmaah nang emaw i nupui emaw pawh hemi chungchang avanga ka hmu leh che u a nih chuan i hmaa ṭhuin ṭha taka ka biak che ring suh u. Ka duh loh chinah chuan ka nasa a nia," a tawp lam chu ka thinrim luatah ka ṭawng bah deuh nawk nawk. Chutiang taka ka thinrim chu ka la hre ngai lo. Zakthei lo tia sawi mai hian a fiah lo zawk!


"Sàwn tih hmingput tir ngawt ai chuan a ṭha zâwk lo'm ni?" U Cindy-i a rawn ti liam puat. Ka sa phat.


"Eng maw i sawi?" Ka ti chhuak ta khar khar.

"I lei veng rawh Cindy," Lalrinfela'n a lo ti ve hluk.

"Ka sawisual em ni?" Tih leh min rawn en a. A hmela hnehtu intihna chu min runluihna niin ka hria.


"Sàwn tih hming put aiin, kan bulah awm sela, Nu leh Pa karah seilianin, midang hmuhsitna pawh andawn a ngai miah lo ang," zahna, tîmna leh min hmaizahna chhete mah nei lovin a rawn ti dam diai chu ka en ngawt ngawt. Zakthei lo hi hrilhfiah dâwn ila, U Cindy-i hi ka hmang ngei ang.

Tin, ka thin tirim a, minti tawt a, ben mai duhna minti nei zualtu chu tudang ni lovin, Lalrinfela hmel leh mitmenga a nupui a thlawp lutukna lang chhuak mawlh chu a ni.



"Cindy, U ang a ka la koh chhan che chu, keiaia khaw êng i hmuh hmasak vang chauh a ko che ka ni, ka zah vang che a ni lo," ka sehchilh deuh nawk nawk.


"Kum 6 liamta khan kan in ah ngei min rawn kal chilhin, ka ṭhianpa, i pasal pawh la ni lo, i bialpa nun aṭanga inthiar fihlim turin min hrilh a nih kha. Khatihlai khan ka rai thu sawiin emaw Lalrinfela kha duhthlanna lo pe ni ila, a thlan che i ring em? Sàwnpai zawk i ni lo ang tih tunge sawi thei...." Ka ṭawng a bah lo chuah.


Ka thaw kawk a, "ka dai chin inhre lo va, ka tawrhna inhmu hek lo, chuvangin min nawrlui suh u, induh aiin ka nasa ang e. Ka fate tán chuan nangni chuah ni lo, khawvêl pawh ka do ngam a nia," ban chap hian ka ti chhuak leh, ka thaw chhuak zui ham ham bawk. Ka kawchhung, ka âwm chu thinrimna inmin hnawhbet a, au khum chiam ila a reh ngei ka ring zawk hial.


Lalrinfela hmel danglam zawk zawk leh Cindy-in a pasal a melh zawk zawk chu enin, "theihnghilh suh Cindy, vawiin a i pasal bula i mut theih chhan leh 'sàwn fa leh sàwnpai dinhmuna i din loh chhan hi tudang ni lovin keimah ka ni. I pasal ni lovin," ka ti leh fak fak.


Lalrinfela chu a ding vut a, engmah sawi lova chhuah a tum chu, "Lalrinfel, nangpawh i nupui lei kha venpui ang che, ka fate school-a 'sàwn fa' tia a fanu hmuhsitna dawng turin ka fate aia an ṭhat bikna a hre lo," ka ti leh fak fak chu Lalrinfela'n mitmeng thim rap maia a nupui a enna chu ka hmu reng, an nupa inkara inhauhna thlen tir ka tum lo, mahse ka fate a tih mualphona leh diriamna chhanglet tur hian ka tlak duah a ngai ve hran lo tih erawh hre ve rawh se.


An chhuak tur Cindy-in Rinfela kut a chelh tur chu, Rinfela'n a lo phih let sawk, an in um chhuak dawr dawr.


Ka thaw chhuak nghal kawk kawk. Ka taksa na kham nghal ut utah chuan ka tum ai nasain ka inhum ruhin, ka lo insum a ni tih ka hre chhuak nghal rum rum bawk!


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 2nd, 2022, 10:38 pm

THURÛK_99

BY

Floria Laldansangi


Chapter < 18 >

<><><>~><>


HRUAIA....POV


"Lut rawh..." Glass rawn rik rualin ka ti a.


"Malsawmkimi ka ni lo," ka sawi ngai sawinawn ka duh lo tih hriat tirnan ka en zui rûn. A rawn ṭhu lut ta vat.


"Malsawmi vangin tunang hunah min kaitho tihna em ni?" A malah file ka theh thla a, "en rawh," ka ti leh sup. Zan dar 10 pawh a la ri lo, mut hun pawh a ni lo tih kan hria.


"Heihi engthil nge?" A en zui a.

"I pa sum ei ruk zat record a nih kha," Lalrinfela enin ka thle bak a, "20**-20** matric Tribal scholarship 2nd installment dawng tura tih zirlai 17505-ah, zirlai 10504-in an dawng a, chung 10504 te pawh chuan andawn turzat an dawng chuang lo. Chung sum zawng zawng chu khawiah nge a luh i rin?" Ka khi suk a, hmalam enin, "i pa leh a thurualpui te bank account-ah a lut ka ti lo a nia," ka ti leh sup sup


"Min vau tihna em ni?"


"Ka vau lo che, inremna siampui che ka tum mai chuah a ni."


"Heihi in vauna iti lo amaw?"


"Chu erawh i ngaihdan le," ka thle buk.


"Heihi...." A paper lek chuah chu ka en a, "kum 2 liamtaa i Pa heroine anman i cover sakna evidence a nih kha. Ka sawisual lo a ni lo'm ni?"


"Eng nge i duh Hruaia?"


"Full custody Malsawmi pe rawh," a nui hul hak a, "hmeichhe pakhat tan heng zawng zawng hi i chhui tihna em ni?"


"Hmeichhe pakhat ni lovin ka nunna ka tih tawh kha," ka lo ti hluk. Hmeichhe satliah mai mai ang a a sawi chu ka duh chai lo.



"Engvangin nge inremna ka siampui ang che ni? Ka hlauh i ring em ni?" Ka mitko ka san awk.

Cigarette phawrha ṭanin, "min hlau turin ka ti hleinem che," hip zui vang vangin, "ka hmeichhe chanvo pek ka tum mai chauh a ni," ka kiai suk.


"I hmeichhia..." A chawl dut a, "ka fate chu ka kutah ka dah ngei ang, naupang vang ni lovin nang leh Malsawmkimi vangin," a sehchilh rap rap.


"I fate hmanruaah hmang suh mipa inih kha," ka ti dap dup.


"Mipa...nangpawhin Pa takin min vau ani lo'm ni?" Ka lo nui huk a, "ka vau lo che...ka tih tawh kha, inremna siam dun ka duh mai chauh a ni," a lam hawia thle leh bakin, "Myla-i lo ka nunah mi tumah ka nghak ngai lo, naktuk zingdar 8 rik hmain duhthlanna siam ang che. Full custody i pe dawn nge CBI kutah ka hlan dâwn," ti sup supin, "chhuak rawh," ka ti zui sup bawk.


A chhuaha car kawngkhar a khar rualin, "i pa ralthuam Nuai 100 chuangman ka kutah a awm tih i hrilh tel dâwn nia," car chhung aṭang chuan ka ti leh a.


Lalrinfela Pa te ang, sum leh hming ṭhatna duh, alanga ram hmangaih mualpho hlau si tán chuan, engpawh ti dâwn se a hming hliau lohna a nih dâwn phawt chuan, an fapa saw full custody pe turin a nawr ngei dawn tih ka hre chiang lutuk tlat. Ner nawkin ka tlân chhuak zui a.


Engpawh nise kum tamtak chhung Rokima corruption leh smuggling-na evidence zawnga ka neih hnuah, Malsawmkimi vang bawkin ka plan ka thlak leh chu a nih hi.

He hmeichhe telve tawhna hi chuan, kei kum 40 ral kai tawh pawh hian, ka thuthlukna siam tawh sa angin ka kal thei meuh ṭhin lo chu a nih ber hi maw!
.
.
.
.
"Pa...."

"Shanel, i Tv en lai off la hetah rawn kal teh," couch-ah chuan ka ṭhu thla a.

"Eng nge?" Tv pawh a off chuang lo.


"Tv kha off rawh..."


"Ninawm.. Nge?"

"Vawiinah Andrew-a te unau engtin nge i koh?" Ka ti bul sup, ka fanu kum 11 leka upa mitmeng dang zawk chu ka en rûn.


"Engtin mah." Min bum a ring em ni?


"Dawt sawi ka duh lo ka tih kha," ka lo ti leh hluk.


"Nana-i Nu in 'phir unau sàwn' a tia, kan ti ve alawm," a ti niah niah.


"Zanin ah sofa-ah i mu ang, i nu te karlehah anrawn haw dawn, i nu te bulah i awm tawh bawk ang."

"Ka duh lo, nangma bulah alawm ka awm duh," a ṭap zui nghal.


"Engthil nge ni a?" Ka thaw hulh, ka fanu ṭap en chungin, "ka sawi tawh, 'ka inchhungah nungchang mawi hre lo, midang zahna nei lo an awm thei lo ' tiin, tuna i mizia hi ka pawm thei lo," ka ti leh sup sup a.


"Anu bulah ka awm duh lo Ani..."


"Engthil nge?" Ka nau-in a rawn ti sa sa.


"Sawmtei fate sàwn tiin a lo ko a nih kha," ka ti bul hluk. Ka fanu mah nise ka ngaidam thei lo, ka inchhungah hetiang mize nei an awm ka phal hek lo.


"Tu in nge zirtir che a, vawikhatmah chutiang ṭawngkam kan nei ngai lo. Naktukah ngaihdam dil ang che. Keipawhin ka ngaihdam theih loh mizia leh ṭawngkam a nih chu," a hau zui malh malh.


"Nana-i nu sawi alawm," a ti ṭiau.

"Nana-i.." Min rawn en a, "naktukah Nana-i nu chu keimahin ka va hmu ang e, naupang a fuihpawrh a nih ngat chuan a chak lo ang," ka nau enin ka nui ta suk ringawt, a ti leh duh tak tak dawn tih ka hriat vang a ni.



"I room-ah chho tawh rawh, a tlai tawh," Shanel-i a tir chho zui, min melh hrek hrek chuan a chho ve nal nal a.


"Bawihtei hi hriatthiam a ngai ve tho a nia. U Priscilla-i lahin pasal a nei a, nangin tunah ngaihzawng i nei ve leh a, atan chuan a mangan thlak dâwn êm a sin."


"Mu tawh rawh nangpawh, a tlai tawh," tho zui nulhin, ka ti zui ta sup.

"Sawmtei neih i duh tak tak phei chuan Bawihtei chauh ni lo, ka Nu pawh i hmachhawn a ngai dâwn a nia, thlatharah anrawn chho dawn," room lam pana ka pên chho nulh nulh chu nui chungin min rawn au zui lang lang a, ka kut lek chhuak zauhin, "ka hloh nawn leh duh i ring em ni?" Ti supin ka khi suk bawk.

Vawikhat an duh hmeichhia leh suangtuah ṭhin mo atan ka neihsak tawh a, a vawihnihna erawh ka hmeichhe hmangaih ngei ka nei dâwn. Tû ngaihdan mah ka zawt lo va, hrilh hriat erawh ka mawhphurhna a ni thung!


<><>~><>

SAWMTEI...POV


"I mu ṭha nange?" Ka lu na ut ut mai chu ka hmet leh deuh ngat ngat ṭhin.



"Chhinkhat pawh ka chhing thei hleinem," ka ti sap. Tui min rawn pek chu ka in zui khalh khalh bawk a.


Lalrinfela te nupa ka ngaihtuah nasat bakah engtia hmalak chi nge tih ka ngaihtuah nasain U Tetei te ka va be hial a. Lawyer ṭha deuh min ngaihtuahpui turte in ka va tih tak chiam kha.


"Anu, naktuka lo lêngte khan maw, 'apa chu keimah,' a tia," sofa-a ka ṭhu chu min rawn nek ṭalh ṭalh. Heipawh hi a U Sophia-i ang maiin, "nimin" tih tur hi a ti naktuk tlat zel mai a.


"Engtin nge i chhan?" Ka mal chunga rawn bawk lut chuan ka hmel en theih turin a zangthal a, "min en la," ka mit kham lutuk ka hmeh lai chu ka kut a dahsawn zet, "apa kan nei lo alawm' ka ti," uar zeta a tih chuan thatchhe deuhin ka nui ta hak hak.


"Anu tinge mi zawng zawngin apa nih anduh a?"

Ka fapa mitmeng pawisawi lo tak chu enin, "tunge duh ve a?" A biangah chuan ka fawp zui nawk nawk a, "min fawp vak vak suh," a lo ti hlar, ka seh hrep zawk dâwn em maw ni?


"Tlangval anfawp ngai lo," tih zawm lehin min namsawn vat. Ka nui chhuak hak hak, "tlangval ini duh lo emaw tia?" A ner nawng nawng a.


Ka mal aṭanga tho chhuakin, "kan Miss-in a sawi alawm, sipai chuan silai leh tank te an nei tak tak a, ka tlangval vat vat a ngai," a sawi uar bawk si.



"Sipai nih i duh em ni?" A bu nghat nghat.

"Sipai nitur chuan lehkha thiam a ngai a sin."


"Lehkha ka zir tawh dâwn alawm Anu. School pawh ka kal char char tawh dawn a; Mahse maw, a chang chuan ka lu a hai leh tho ang a mah se ka kal tho ang," ka lo nui hak hak, an Miss chu a fing hle mai, ka fapa takngial pawhin school kal ṭhat a tum ve tawh a nia.


"Saw i U a rawn thawh saw, i hmai va phih ula, school kal tura insiam a hun dawn," a tlân sawn nghal tar tar. An unaua bathroom a an lut chu enin ka nui ta sen sen a.


Nizan khan thil tam tak ka ngaihtuah, mahse ka fate nui hmel ka hmuh a, an nui ri hriatin "eng nge ka hlauh ang ni?" Tiin ka ngaihtuah leh ṭhin.


Ka fate rawn in um chhuak chu nui sen senin ka en vang vang, minti ṭap tambertu anni a, chutiang bawkin minti hlimbertu, chakna, tumruhna leh huaisenna minpetu anni tih ka hre bawk!


"Vawiin chu anu bialpa a lo kal lo a nih hi," an school kal tur ka thlah tur chu Andrew-an a ti niah niah. U Hruaia sawi takah chuan nizan khan a message pawh ka reply ta lem lo va.

Taxi ka koh a rawn thlen chuan lut vatin, an school lam kan pan a, "anu motor hi lei ve mai ila," Emma-i enin, "a to a lawm," ka ti sap chu, "pawisa i ngah êm kha," Drew-an a lo ti zat. Driver chu a lo nui vur vur.

Hausa deuh turah hian min ngaita ṭhin a!
.
.
.
"Sawmte..." Naupang school lama an luh rualin taxi ah luh leh mai ka tum a.

"Ohhh..." Hruaia nau ka lam pana rawn nuisang chu ka lo en haw ringawt.


"Min la hria em?" Ka bu nghat.

"Zodini... Eng nge henglaiah te itih ve ni?" Ka tih zawh rualin a vahnu a lut ve a ni tih ka hre chhuak leh si.


"Ka vahnu ka rawn thlah. Hna i kal dâwn em ni?" Ka lu ka lo thing vat a, "thlaihnah vel leiin ka bazaar ang chu ka ti," taxi kawngkhar chu kharin driver chu pawisa ka pe ta ringawt a. Han kalsan mai chi niin ka hre lo.


"Kan lo nghak reng che u a," ka en deuh he haw mai.

"Khawnge kal i tum ka thlah ang che. In office lamah em ni?" A ti zung zung, chhanna hun pawh ka nei meuh lo.


"Aaa!! Ni lo ve, chawhmeh vel leiin ka bazaar ang chu ka ti deuh, naktuk ṭhian ho chaw ei khawm kan tum a," tiin,"min lo nghak iti em ni?" Ka ti leh zat.


"Aw nghak e," tih leh, "i kalna tur sawila, ka hruai ang che, kalpahin kan titi dawn nia," a ti leh säng a.


"A chi dâwn em ni," ka ti tak nâ-in ka thusawi pawh a ngaithla leh tawh chuang lo, a car awmna lam chu a pan ta vah vah ringawt a. Ka zui ve leh ta vat tho.


"Shanel-i ṭawngkam vangin ngaihdam dil che u kan tum a," car khalh pah chuan min rawn melh zauh.


"Eng ṭawngkam maw?" Ka lo ti vat mah se ka hre chhuak leh si, "naupang annih kha," ka tih zawm leh a.


A lu thingin, "pawi ka ti tak tak, khatiang ṭawngkam kha a hriatah kan hmang ngai lo a nia, " a rawn ti leh.


Lo nuihin, "khawi emawah a hria ang a a sawi ve mai mai a ni ang. Naupang hi chu hriat ang ang sawi mai ṭhin hi an nia," ka ti liam leh mai. Cindy-i ṭawngkam a ni tih ka hriat tawh avangin an nau han dem vakna tur pawh ka hre lo.


"Engtin nge i hriat hrim hrim a?" Ka tih zawm leh.



"Nizanah ka U a rawn hawnga, sawi lo se ka hre miah lo ang. Mahse, lungngai suh vawiinah ngaihdam a dil ngei ngei ang," a ti leh zung zung. Kei erawhin U Hruaia'n engtin nge a hriat tihlam daih ka lo ngaihtuah zui. Engmah ka sawi si lo va.


"Thildang ka zawt thei ang che ngem?"

"Sawmte..."


"Aw.. Ka tihpalh, thildang ka lo ngaihtuah hman a. Eng nge ni?"


"Ka U hi i duh ve tak tak em?" A nui sen sen. Traffic-ah chuan kan ding a, mitmu de sar sarin min rawn en ang zui a, henu hi ngainat a harsa dâwn lo tawp mai. Bakah, U Hruaia kum zat ngaihtuahin kei aiin a upat ka ring a, a hmel erawh ala naupangin, a chezia pawh a naupang chhiain a duhawm viau lehnghal.



A zawhna chu ka ngaihtuah rauh rauh, ka nunah Rinfela tih loh mipa ka duh leh hmangaih ka la tawng ngai lo va, eng ang chiah nge U Hruaia lakah hian rilru ka put ka hrethiam mai lo; Mahse, zep rual lohvin, a kianga awm nuam ka ti a, a thlazar hnuaiah chuan ka himbik riau hian ka inhre ṭhin.


"Ka hrethiam che mah se ani chuan a duhna a rei tawh lutuk che a nia," a fiamthu tih ka hriat avangin ka nuihsan mai.

"Ring tawp rawh," tih zawm lehin a tlân chhuak zui a.


"Ka ring alawm," ka duh aiin ka chhang rang, a rawn nui khak khak, keipawh chu nui ve tawpin, "ka hmangaihlet pawh phut lo, a hmangaihna chauh pawh ring tawk em emtu a ni a, ka thinlung zawng zawngin ka ring," ka ti zui ta duah, ka ngaihdan dik tak a ni bawk. U Hruaia ka mitthlaah a rawn lang zui a, ka nui zui sen sen.


"Ohh! Ka hrethiam e," kan nui dun hak hak.


"Thil ka zawt ve thei che ang em?"

"Umm..."


"I U taksaah hliam ka hmu nual a, ka tih awmzia chu a âwm bawr velah," a mitko san ak akin, "taksa in inhmuhsak tawh elo?" A nui zui ruh ruh.

"Chutiang lam a ni lo, a hliam ka tihfai sak khan ka hmu a, ka zawt ngam chiah lo va," ka ti vat. Âwm leh nak velah khan chema vihna ang deuh deuh te a awm thluah kha a nia.


"Umm..a ṭhen kha chu Dantewada a awmlaia a neih a nia. A âwm lungphu zawn deuh chiah a mi kha chu kum 6 liamta vel niin ka hria...umm.... ka hriat sual loh chuan 20** kum,.November thla vel a nih ka ring Delhi aṭanga a rawn haw lamah misual kut a tuar a, ICU ah pawh thla 2 lai alawm a awm a. Chumi ṭum chuan a thi dâwn emaw kan ti nghe nghe," a rawn ti siam siam.

A sawi kum leh thla vel chu college ka luh ṭan leh hun vel chiah a ni.


"Damdawi in ah a awm rei em?"


"Thla 2 ICU ah a awm hnuah ward pangai kan awm pawh kha thla 6 chuang a ni. Rei ve pangai a nih chu," car chu a ding dat a.


Lawmthu sawia chhuah ka tum laiin, "ka lei pui ang che," tih leh amah chu a chhuak zui thar. Ka hawi haw mai.


"Lo chhuak rawh," a la ti zawk lehnghal, nui ta ngawt chuan ka chhuak ve ta vat a.


Bazaar-pui vêla kan bazaar dun te chu, ka zui zawk emaw tih mai tur a ni.

"Chawhmeh lei i thiam lo," a ti mai a, bazaar-a ṭhu titi pui pahin an hniam ve zel bawk a. Nui ṭhu in kan inzui nileng chu a ni ber.



"Ka U a nih hi..." Thil ei tura restaurant kan luh rualin a phone a rawn ri zat.


"Hel..." A ti hman,"keimah minbe duh pawh ini nange? Ka bulah a awm.." Ti hlak chuan nui chungin phone chu min rawn pe a, "a be duh che," a ti zat bawk.


"Hello..."


"Engvanga call pickup thei lo nge inih?" A lawm hmel viau loh. Ka bag a phone chu phawrhin ka ka en vat a, "ka lo silent a nih hi," a thaw zui hulh.


"Pawimawh a awm em ni?"


"Pawimawh a awm chauhin em ni ka bialnu hi ka biak theih ni?" A ti sup sup. A va hnial hrat reuh tak.


"Ni lo ve," ka nui ta ringawt. A titau ve deuh zawk em maw ni?

A nui ri ve suk chu ka hre thei, "ka ngai che," zawi leh dam raih maia a rawn tih chuan ka kawchhung a za nghal mer mer thei. Phone aṭang pawha lai ru zet chuan ka nui sen sen a.


"I biang ti tai miah suh," a rawn ti zawi leh sup chu ka tum loh deuhin ka nui chhuak, zak leh deuhin, "ka dah dawn, thil kan ei dawn," ka ti zui nghal a. Amah pawh rawn nui huk hukin, "zanah ka rawn hmu ang che," ti leh supin a off zui zat. Zodini lo nui var var chu lai lek lekin a phone ka pe let a. A la nui ri zui ang khek khek zui.

Kan ei tur chah a rawn thleng chiah, "Sawmte..." Cindy-i kan dawhkan bulah a rawn ding ka hmuh chuan ka duh miah loh vin ka thaw hawk mai. Tunlai chu hemi te nupa hmel hi chhangthawp hne in ka hne takzet a ni.


Ka thaw hawk chu Zodini'n min rawn en a, Cindy-i lam pawh chu ka hawi mawi peih ta lo law law. Nuihder vel kha ka thiam ve âwm si lo.


"Ohh! Shanel-i Nî tiraw inih?"

"Um ni e, Nana-i nu ini ang chu maw? Tukkinah hmuh che ka tum a, ka hmu si lo che a. Lo ṭhu ve rawh," Zodini chu kan boruak hre miah lo mah nise ka ngei ṭep.


"Ṭhu lo ang, kanpa Nu nen kan rawn kal a," a nuisang bawk. Ka ei tur ka chawk mawlh mawlh thung. Ka ngaihsak peih lo. Nu Rpi eraah ka hmu châk viau thung.


"A nih chu a, hrilh duh che ka nei a sin le," tih leh a hawi chho a, Zodini chu ka melh vat.


Cindy-i lam hawiin, "ka vahnu ṭawngkam mawi lo tak i lo zirtir tih ka hriaa ka lawm viau lo a nia. Chuan a theih hrâm chuan Nana-i pawh ka vahnu lo kawmtir tawh suh, i fanu thu rawn hrilhsak che i duh ka ring lo va, nangmahin zirtirna dik i pe dawn nia," nui säng leh dam diaia a tih chuan mit ka lo khap fak fak.


Cindy-i hmel sawi tur hre lo hawihai lutuk chu nuih a za ru mah mah zawk. Zodini lahin dam diai maiin a hnehsawh bawk si.


"I rawn ṭhut dâwn loh chuan awmsawn rawh, waiter i dâl," a tih leh zat a ei tur lam a hawi zui hmak bawk. A rukin ka lo nui ru sen sen. Cindy-i mitmeng thip ram mai, sawitur hre bawk si lo chu ka melh leh ṭhin, min rawn melh deuh hrawk chu ka lo nuih ṭhu ta ringawt a.


"Sawmte, lo lên kan tum a sin," Nu Rpi a rawn lang zui hlawl, ding vata chibai vatin, "inhmuh lohna a rei ta hle mai. Indam em? Pa Roa a dam maw?" Ka ti zung zung, a fapa leh a mo hi hmu peih lo viau mah ila, Nu Rpi te nupa erawh ka ngai ve reng. Nu leh Pa tluk hial a ka ngainat anni si a. Ka nu ai mahin ka ngaina ang chu.


"Dam e, awi minti mangang alawm. Ka ngaih zia che i hre lo em ni," tih leh, "ka tute ka hmu chak tawh lutuk bawk, zaninah i Pa Roa a rawn thleng dawna kan lo lêng ang," a mitmeng ah chuan dawt a sawi lo tih ka hmu thei.

"Heihi.." Zodini chu a en a.


Ka kâ ka âng hman zuai chauh, "a pasal hual nau," a lo ti vat. Ka meng kawk, Zodini chu ka en hraw bawk, min la haider hmiah zui a.

"Myla....."

"Eng nge hetah i rawn tih?" Nu Rpi hnung aṭanga ka bula rawn pheiin ka kawngah inti neitu tak hian a rawn kuah zui rûn a.


"I pasal hual chu em ni?" Nu Rpi'n a ti vat.


"Ni e, Rinfela Nu ini ang maw?" Ka kâ ka âng hman lo, hemite unau hi eng nge an hriat a?


U Hruaia nâkah chuan ka nghawk zauh, a haider hmiah a, ka kawng a chelhna chu a la hmer zui salh ringawt lehnghal!


"Nu, Rinfela te nen hna anthawk ho a, an SP a nih hi. Rin aiin Sawmtei hian thiam thil a lo ngah, kanpa fate pawm chung pawhin Lunghlu dum lian a chelhbet thei a nia," a ti leh kher, a aw chhuak zawng zawng nen chuan ka ngei tawk a tling lutuk.


"Ṭhu ve rawh u..." Zodini a a insawn rak rak a la nui ṭhû zui.


"Ṭhu la," ti supin chair chu a pawt chhuak a, min thut tirin ka sirah a ṭhu thla ve zat. Nu Rpi te pawh kan bulah rawn ṭhu ve mai chuan, "Sawmtei te chu hmeichhe fel tak a nia, a phu lutuk alawm," a nui var var. Nu Rpi hi chuan ka chanchin a chhe zawngin vawikhat pawh a sawi dawn lo tih, ka beng awmna ka chian tluk hian ka chiang ve êm mai.


"U eng nge i ei ve dawn?"

"Kan nu ei ang hi?" Ka lo ṭek chuaiin ka hria. Thawk ngaihna minti hre lo he mihring hian!

"Cindy, i hresual a nih chu, keimah zawk hi ka nia lunghlu chelhtu chu," a ti zawi zui sup sup.


"Duat viau rawh aw. I vannei hle mai, naupang kan bulah an awm phei chuan..."


"Nu Rp, i hresual a ang, a fate nena neih ka tum tih i hre lo palh ang e," U Hruaia bawkin a lo ti bul hluk a, "U Hruai," ka lo ti vat. Min enin a khi suk duh lek lehnghal.


"A nih chu a! Engtik nge inneih intum ni?" Nu Rpi chu a läwm hmel viau loh, a tuten mipa dang Pa anti tur chu a ngai ngam lo a ni ang, a mitmeng thlenga dul ta hnak chu ka hmu thiam reng.


"Thlatharah ka Nu te Mizoramah anrawn chho dawn a, a hun tur kan sawi ang," Zodini pawh chu ka thlek haw haw ringawt. An inthurual em maw ni le?


"A nih tak chu maw le! Ka lawmpui hle mai che Sawmte," a ti ban chap. A tira a aw zangvah leh phursarh kha hriat tur a awm tawh miah lo chuan min inti thlahrung rum rum mai.


Thil ei paha Emma-i te unau chanchin vêl kan sawi luam hnuah kan inthlah fel a.


"Ka thlah lo mai ang che a neitu a rawn thleng tawh tho a," Zodini chu a nui ruh ruh a.


"I thil lei ho car-ah ka va sawn ang e," ti supin a pensawn vut. Kan thil ei lai pawhin ka melhna a haider char char heipui lellul pawh hi.


"Zodin, kan innei dawn iti ngawt a," a U pensawn hnuah ka ti sep. Ka läwm vak lo tih a hre theiin ka ring.


A rawn nui vur vur a, "Cindy-i ṭawngkam kha ka ngei êm alawm," a lo ti ve et zui.


Nu Rpi hmel ngui ta raih mai kha hmuh hrehawm ka ti tlat. A tu neih thu anhre chauh a, pasal nei mai tur ang leh mioa dang thlazar hnuaia awm nghal tur ang a a ngai khan a rilru a ti na ve a nih ka ring.


"I hman em?" Ka luhna tur kawngkhar a hawng zui zat.


"Lut rawh, ka dawrah rawnla lêng tak tak la," ka bu nghat. Kan invai liam rualin, "nge dawt i sawi?" Ka ti lehnghal tawng bawk.

"Dawt ka sawi em ni?" A rawn ti sup a, min rawn en zawk a, hmalam a en leh daih bawk.

Kan thil ei hun atlai êm avangin, restaurant kan chhuahsan pawhin khua a thim thet thet tawh. Tuhah traffic jam nen, in kan thlen meuh chuan zan dar 8 a pel daihin ka ring.

"Sawi kha, kan inneih tur thu," a lo thaw hulh a, "dawt a nih loh chu," a lo ti hul huk.


"Chutiang...."

"Myla, ngaihzawn ringawt tumna che ka nei lo. Nupuiah ka nei dawn che," fiah zet mai hian a rawn ti chhuak hluk hluk. Zanin chu eng nge maw a hriat le.

"Min vin kher a ngai lo," ka lo ti hlar. Min vin deuha ka hriat hi chuan ka tuarna tlat zel. Lalrinfela pawhin min vin hrawk hrawk zel sia, ka chhanglet tawn tawna hepa min vin hi chu ka la na tlat.


"Ka vin lo che..." A thaw ham ham a, "vin," tih leh tukverh lam ka hawi zui hmak bawk.


"Myla, kan ṭha em?" Ka chhang peih lo, nge min vin ni!


"Bawihi..." A rawn ti leh hap a, thaw leh halhin, "ok..ok..ka tihpalh....min en la," dam raiha a tih takah chuan alam hawiin, "ka thusawi ngaithla tawh ang che," ka ti leh.

Mitko san ukin, "sawila ka hmangaih," a tih vawh raih chuan ka lo ṭim leh er er tawh. Hahthlak thei!


"Inneih sawinan chuan ala hma mah mah ka ti. Kan inhre chauh a, bul kan ṭan chauh a," ka ti sep sep a. Hmalam enin ngun takin car a khalh thung, a hmaiphel chauh ka hmuh vang nge eng nge a ngaihtuah tih pawh ka hre thei lo.

Car chu, kawngsir motor tam lohna laiah chuan a her kual a, ti ding dutin a thaw chhuak ham ham. Sawisual ka nei leh em maw ni?


"Myla, engvanga ka hriat chauh hmeichhia nupuia duh tura ngai nge inih?" A rawn ti hul huk.



"Ka hre nang," ka lo ti sep.


Ka lam rawn hawiin, "ka sawi tawh kha, keichuan hman aṭang ka ngaizawng tawh che," a ti leh sup sup.

"Inneihna sawinan a la hma tho tho," ka lu ka thing mat mat a, "min nei duh ngei tih pawh i chiang em ni? I inchhir....." Ka sawi zo hman lo, ka tukkhumah chelhin ka hmui chu, a hmuiin a rawn chilh hmiah mai. Ka meng kawk a, tal sawn pawh ka tum lem chuang lo.


Na zeta min fawpin a inla hrang vut a, ka thaw zui kawk kawk.


"Eng nge...." Ka ti chhuak hlar hman.


"Kum sawmpakaw chhung ka nghak tawh che, ka nghak nula che a nih chu!" A ti bul nghut nghut.


"Maw?" Ka âng hau mai.


A thaw chhuak hawk a, ka mitah tak rawn enin, "kum 15 inihin ka duh daij tawh che ka ti a nih chu. Chuvangin, ilaka ka rilru put hmang hi ringhlel ngai tawh suh," a ti leh sup sup.


Ka thisen kal lai chu anchawl ṭhuap a, ka hmaa mipa hmelṭha leh lian tak, mize dam ruih mai, hian kum sawmpakaw chhung min duh tawh thu a sawi chu a fiamthu emaw tih entumin ka thlek leh ṭhin. Mahse fiamthu thawh hmel lah a pu bawk si lo.


"U Hruai..." Ka ti chhuak sap. Mak ka ti lutuk a ka la awih thei lo. Ni lo, ring turin ka thluak hian a man meuh lo zawk.


Dimte hian ka biang a rawn dawm a, mawi lutuk a kiai suk chuan, "Bawihi, naupang mai inih laiin keichuan ka duh tawh che," a nui ri suk a, "i U pawh khan a hria a sin maw le," a ti leh sup.

A lama min kuai hnaiin, mipain hmeichhia a hmangaih tak, duat taka a fawp ang mai hian min fawp leh vawng vawng a. A chal leh ka chal insik tirin, "nupui atan ka nei ngei bawk ang che," a ti nghet leh churh.


Kei erawh ka lungphu rang bawk si, thawklak buai bawk si, a thusawi la ring phal chiah si lo nen ka thluak a buai nuaih avangin engmah reng reng ka sawi thei tawh lo.


A inla hrang a, ka hmui a kut zungpui a tuai zauhin, ka hnarah a fawp leh zauh, nui ri leh sukin a ṭhu ṭha a, "khatia min en reng chuan ka fawp leh ngei ang che," mit khap lêk lo vin U Hruaia ka lo en chu niin.


Ka ṭhu ṭha ve vat, a lo nui huk huk, kei erawhin mak ka la ti lutuka ka nuih a za ve thei lo, ka lungphu pawh a la dik loh mai bakah, ka ngaihtuahna pawh a la fim ve thei meuh lo.

Ani ang mipa famkim lutuk hian kum sawmpakaw chhung min lo duh tawh a nih chu! Kum pawh ka tlin hma, kum 15 ka nihin min duh. Chutiang khawpa rei chu mihring a induh theih dâwn em ni?


Min fiam em tih en tuma ka thlek leh ngial pawhin ka hre thei lo.


Kan thlan chhuah hnu pawhin ka thlek leh ṭhin. "Keizawng awih har ka ti êm mai," a rawn nui hawk hawk, ka kut a rawn chelh a, la kanga a hmuia nawr vang vang a seh zauh chuan, "ring rawh. I samzai zat ka hre lo a ni thei, i tel tawhna engmah hriat loh ka nei lo," mahni inrin tawknaa khat hian a rawn ti chhuak sup sup. Ka ngaihtuahna ka sawi chhuak a ni tih ka hre chiah bawk.


Za vak lo hian ka nui a, "ring tur che in hun ka mamawhin ka hria," ka ti ta sep chu nui reng chungin, "damchhung hun i nei," min rawn en a, "a takin i hmu bawk ang," a ti leh sup. Ka nui ta sen sen, ka duh emaw duh lo emaw ka rin ngei chu a ngai dâwn a nih hi.

Amah pawh chu nui leh suk ṭhinin car chu a khalh pah reng a, side glass chu a en leh ṭhin.


Eng emaw sawi hian a phun hluk a, "Myla invuan nghet rawh," tih leh gear thlakin a speed a sân ta thut mai, nghet takin ka invuanbet nghal ṭau chuan lungphu nghal zawih zawihin U Hruaia chu mangang lutukin ka en a.


"Eng nge thil awmzia?" Ka tinhman chauh a ni, kan hmaah êng var pup maiin min rawn chhun a, "Myla...." U Hruaia aw ka hriat leh darthlalang keh ri chuai chu a inzui nghal.


Hmalamah ka bu lawp a, seat hnungah ka let dawt, ka hrat leh chu kan ri zui dawt dawt chu a ni.


Ka khaw hmuh a mitsulh a, "Myla...Bawihi.." Engtin nge ka taksa a awm ka hre lo, ka bâna min pawttu an awm erawh ka hre thung.

"Myla..." U Hruaia aw chu ka hre leh vuai vuai ṭhin.


"Min tihlau maih suh.." Sehchilh deuh tak hian a ti leh sup sup a. A vawikhatnan U Hruaia aw khur ka hria, mahse chiang tak erawhin ka hre lo thung.


"Sir..." Tu emawin a tih ri leh, "that rawh.." U Hruaia'n a ti hrawk chu ka hriat hnunber a ni a, nghet taka ka taksa a kuahbehna lum vung vung pawh a reh riai riai a, ka rilru fim ka neih chhun chuan, "ka thi dawn a nih hi," tih min hrilh sap sap bawk!!!

<><>~>~>

Note : Naktuk rinni zan aw💚


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)