He Is My Girlfriend BY Lalcyi Renthlei Euricka-Era (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

He Is My Girlfriend BY Lalcyi Renthlei Euricka-Era (Completed)

Unread post by Ngaia » January 4th, 2023, 12:35 pm

9okmvy5h.jpg
He Is My Girlfriend


Chapter 1:





Bella-i pov:





"Retreat,retreat" kan Alucard chuan a rawn ti leh tawh.Lehlam pâwl te an ṭha vak bik lo tih a hrethiam lo ani ngei ang. "Kan hneh ang," ka ti lui ve tlat.Lehlam pâwl ten Chou Chou hmang mahse,India number 1 ka nihna hi ka lan tir leh khawp ang.






"Min rawn zui ru," tiin hma ka hruai a,Nana leh Zilong ten min rawn zui ve nghal.Kan Alucard chu a kal hrang leh nalh mai,a ho em mai,a awm awmin lo awm vel mai mai teh se.






Zaninah a vawi li na atân hnehna kan chang leh ta.Kan Alucard chuan min rawn invite leh a,ka accept duh tawh lo.A them tlaw em mai. "India number 1 nimahla,ka thinlungah i number 1 ve chuang lo" a rawn ti deuh kher.Ve lutuk hian,ani number 1 nih ka duh bik reng reng lo.Hakuna Matata tiin ala indah zui a.Ama thlalak pawh hmang lovin,sakei lem ala dah zui.A hmelchhe ngawt ang.






"Chhuanawm,lehkha zir lovin games khêl ziah suh." Ka nu'n a rawn ti leh ta.Room ka kalh ṭha ve thlap khan ka hre sia.






"Dah tawh rawh,i pa alo haw mek ania." Atih takah chuan rang lutukin ka phone ka off nghal.Khuma ka zirlai bu keu sa chu ka ban vat a,ring takin ka chhiar lang lang mai.







"I thiam thei thlawt lo em ni,zan thum ngawt angai char char i chhiar ania." Ka nu chuan tiin ka lehkhabu ken lai chu min chhuhsak a.Kan zir chin chu ka thiam chhuak vek tawh,zir tur dang ka hriat tawh thlawt loh avangin ka ennawn leh ani reng sia.






"Hei chu i u kut ziak anih hi,khawiahnge i notebook." A mittui a tling leh tawh.Ni e,ka thiam loh te pawh ani ve ang.Zep loh chuan ka u ka ngai ve em ani,min kalsanna ala rei lo bawk nen,a kut ziak ngei ka chhiar hian ka thiam thei bikin ka hria.






"Nu,tikhan awm zêl lo la.Ka u kut ziak hi chhiar a nuam bik alawm,ka kut ziak te chu chhiar a harsa thei si.Ka thiam theih loh phah vek." Inthlahrung ru tak chuan ka ti a.A mittui a khap lêt sawk,ka van khawngaih thei tak,hnem dan vak ka hre ṭhin silo.







Ka hming chu hre tawh tho mah ula,ka ká ngeia ka sawi in la hriat loh takin.Isabella Lalchhuanawmi ka ni a,tûnah hian kum 19 na ka hmang mek.LLB first Semester ni ve in,Shillong Law College ah ka lut a.Mahse ka tui teh chiam lo,ka pa lungawi nân ka lût ve mai mai.Ka ban bul tê hlê mahse,Boxing ka tui tlat a,a rukin ka practice fo.Thlahnih liam ta ah khan ka u ti mai ila,ka phîr pui,kei aia minute sawmhnih chauha upa chu kan chân a.Ka tuar na khawp mai,kei ai mah chuan ka nu hian a tuar na zawk ang,a hming sawi lan pawhin a mittui a tling nghal zêl,ka pa hian sawi lan a phal tawh lo bur.A hming pawh Billy Lalawmpuia ani nghe nghe,hming mawi tak ani.







Tichuan kan chhungkaw fa mal ka ni ta a.Hei vang tak hian ka pa pawhin ka lakah beiseina a nei sang.Ka nu hi Tibetan niin,a laiah hming pawh Dolma Gyari ani.Ka pa ve thung chu Mizo leh Emiratis ti mai ila,Dubaia Arab mi leh sa pem khawm zing ami,thlah pawlh ani a.Ka pi,ka pa nu hian a pai laiin ka pu a tlân bosan,Lungleiah ka pa chu a piang ta ani.Ka pi chuan Malsawmkima tiin a hming a phuah saka,hnamah pawh ka pu hnam nilovin ka pi hnam 'Sailo' tih chu kan chhawm ta ni.







Ti zawng kha sawi lang rih mai ang,nakinah a dang chu in hre chho zel dawn ania.





"Isabella Lalchhuanawm,study roomah min rawn hmu rawh." Kha kha ka pa chu ani.A lung ka ti awi lo,ka pha lo.He thilah hian ka nu takngial pawh râwn lovin keima thu in thu ka ti tlang pawp.Ka nu'n a hriat hunah a rilru ana dâwn tih ka hria.Mahse,he thil hi ka tih ngei angai.Ka u kha mahni a intihlum tur khawpin a thluak a nu tlat lo.





"Engthilnge i tih leh tak,i pa kalh zawngin awm suh ka tih che kha." Ka nu chu thinrim takin a phun ru leh sur sur.Ka pa mitmei hi a veng ve ṭhin sia. "Hahdam rawh nu,a ṭha leh vek mai ang." Tiin ka pa study room lam chu ka pan san a.





"Hei hi sawifiah rawh" college aṭanga ka banna lehkha chuan ka luh rual rualin min vawm nghal.Lehkha chu ka chhar a, "pa,khawngaihin min phal sak hram rawh." Ngên ngawl tak chuan ka dil,phal lo pawh nise,tihdan dang ka zawng mai ang.






"Ka sawi tawh anilawmni,college i chhuah san tur ani lo.Kha lehkha kha ka tan engtihnamah anilo." Thupêk a chhuah leh ta,tuna ka thil tih tum hi sawi ta ila,min that duh hial ang.







"Mahse pa,ka tui hlawl lo,ka thiam lo si.First Semester chauh ala ni bawka,ka subject lâk hi ka thlak duh ê." A rilru hmin tum tak chuan pangchang zetin ka ti.Mahse,ka hmin zo dâwn lo ava ang ve,thi rawh tih melhin min melh tlat.







"Dân i zir angai,ka sumdawnna rochun tu tur i nia,i tan chauh nilo,kan chhungkaw tan a pawimawh lutuk." A sawidan ki chu ka hrethiam lutuk.Mahse,ka u thattu ka zawn hmuh hmasak phawt loh chuan dân chungchang chu sirah hnawl rih ang.






"Awle,ka hria e" ka hneh zo dâwn lo tih ka hriat avangin a lungawi nân ka ti ve tawp.Mahse a fanu lung len zia hi ka la hmuh tir anga,thil ṭha ka ti dâwn tih ka hriat tîr ngei bawk ang.






Ka room ah ka lût a,ka u alo awm leh reng tawh.Min lo nuih khum suk,za vak lovin ka nuih khum ve a. "Chuan,i kal dawn ta em?" Beisei nei zet chuan alo ti.Ka lu ka bu nghat a, "hrechhuak thei la'ng chuan ka pa thin tih rim kher angai lo tur mawle." Tiin ka bag lian tak chu ka la chhuak a.






"A mak ani,engmah ka hrechhuak thei lo.Engkim kha mumang kan theihnghilh tak,hriatchhuah tuma nasa taka kan bei ang maiin hriat chhuah theih silovin a awm tlat." Rilru buai hmel tak chuan ati a.Ka lo chek hlak, "thlarau ini tawh sia,zawn chhuah a har dâwn lo asin." Ei lo tak chuan ka ti ve leh.A ner nghal nâng a, "thlarau chauh ni tawh mahila,mihringte khawvelah ka la awm hi.Sawifiah pawh ni ila,i thluaka games chauh awm kha chuan a ngaihtuah pha leh chuang lovang." Thluak hmang tur hian min ti ve ziah,a thluak a hmang thiam bik tawp silo.Games chauh ngaihtuah ni ila,tunah pawh college chhuahsanin,ka pui tawp nang.






Bag ruak khai chung chuan a roomah ka lut leh a.A thawmhnaw ka khung nghal mawlh mawlh. "Kha kha chu ka ha ngai lo,a mawi lo si,dah lêt rawh.Aw hei hi a nalh,ka nu min lei sak kha ania." Tiin alo ṭawng leh zawt zawt.Ka thiltih lai chawlin,rum takin ka melh a,a tukhum hiatin min nuih vur vur. "Thlarau chauh inih tawh kha,i thawmhnaw ka ha duh chu lawm hle rawh.Ka duh duh ka thlang ang." Ka ti chang fak.





Room pawn lamah thawm kan hre nghal zat a.A thawmhnaw bâwm ka khar nghal.






"Chhuanawm,nangmah ini em?" Ka nu chuan room kawngka a rawn kik dat dat a.Ka aw thian kharhin, "aw,zanin chu hetah hian ka mu dâwn." Kawngka pawh hawn sak lem lo chuan ka ti ta ringawt.Ka u alo nui dir leh char char.






"Awle,thawh tlai awih loh aw.Muttui le" nelawm tak chuan a ti a.Ka thaw nghal hawk, "muttui le" tiin ka u thawmhnaw bawm chu ka hawng leh ta a.






Ka inkhung fel hnuah,ka bag chu tukverhah ka vawm chhuak nghal.Ka room ah lut leh in,ka credit card leh ka la phiarna chu ka ak ṭha ṭat a.






Dar 10 chauh ala ni a,ka pa ala mu dâwn lo nasa. "Bill,engtinnge kan tih dâwn?" Room kawngkaa dâk de de chung chuan ka phun ru sar sar.






"Thlarauah chang ve mai rawh,a awlsam ber." Ka beng bulah a rawn phun ri ve sur sur.Khawih thei chu ni ila,ka nghawk sawk tawh ang mawle.






"Kal teh,i ṭangkai lo si" melh kha kha pah chuan ka ti a.Ka ṭhiannu Hlutei lah chuan min lo call sek lehnghal.






A call chhang lovin, "ka hman ṭep" tiin message ka thawn tawp. "Tah hian zuang thla mai rawh." Ka u chuan tukverh bula ding chungin alo ti. "Thluak thawl pa,mihring ka nih hi.Ka thi dâwn asin." Ka ti bak hlar,ninawm mi rilru hah naklaiin,a tih theih ang apiang ti thei turin min ngai ziah mai.






"I thi lovang,nunna hi derthawng tak anga lang ni siin,chunglamin a hun atih lovah chuan fei ru ve tak ani asin." A thutak ta lutuk chu ka awm thiam lo dâwn dâwn mai.







"Bill,kawng dang dap mai ang,kawngkapui aṭang chuan ka chhuak thei dâwn lo." Room kawngka kalh pah chuan ka ti a.A ngawi vung vung.







"Bedsheet kha zawm vek rawh,i uai thla mai dâwn ania." Kawng dang a hre tawh bik lo aniang,innghahna a nei chau rau ta riau.







A sawi ang chuan ka bedsheet kawl zawng zawng chu suih takin ka suih zâwm ta vek.Mahse buaina awm leh ta chu khawiah nge ka thlun tak ang,khuma ka thlun chuan a rawn tawlh ka hlau bawk si.







"Hey gamer kawngkaah sawn thlung rawh." Ka u chuan alo ti leh hluk.Kawngka pawhin min dáwl zawh ka ring love a.





"Bill,lo pawt thei la,a ṭha tur," Ka ti zuai raih.Hrehawm ati ve tho aniang min chhan a tum miah lo,hnuai lam a bih ngur mai.





"Ventilation a awm alâwm" phur tak chuan ka ti chhuak hluai. "Ka ngaihtuah chhuah anih kha" ama thusawi ngei pawh a awih lo tih chu a nuihmel aṭang chuan a hriat ngawih ngawih.






Ka chhang buai peih lo,computer bula chair chu la in,ventilation leh tukverh chu ka hawnga,thing in kham pheiah chuan bedsheet chu thlung in,a ngheh loh ka hlau lutuk chuan ka suih thuah hrep mai.






Ka laptop leh charger chu bag ah khung leh in,credit card chauh ken ai chuan tiin ka purse pawh ka khung tel bawk a.






Tichuan tukverh aṭang chuan muangchangin ka tawlh thla riai riai.Leiah ka ṭum chat a,ka u room tukverh aṭanga ka bag theh thlâk chu ban in,thawm dim thei ang berin gate ka pan ta.






"A kim lo,chhiar chiang leh rawh" kawt zawla Sidar kung phên aṭang chuan ka pa aw ka hria.Min hmuh hlauin leiah ka bawk nghal a.Gate pan leh tuma ka vah phei lai tak chuan mipa rum hrâwk ka hre leh.Chu veleh pen thawm ka hre zawm zat a,min hmuh ka hlau chuan Sidar kung lamah chuan hmanhmawh takin ka vak phei.






Mahse,ka vak thui ngam tawh lo.A chhan chu ka bul lawkah mi pakhat thi chhâwngin alo let reng a.Ka pa erawh a awm tawh lo.







"Chi ai suh,muangchang hman ini tawh lo ania.Ka pa ṭhuihhruai te an rawn lan hmain kal vat rawh." Ka u chuan a rawn ti hrâwk.Ni e,chi ai hman ka nilo,Mahse engtinnge ka bulah mi thichhawnga let reng an awm laiin ka kalsan theih ang.






"Bella,hmanhmawh rawh" a au in a au tawh.In thing harhin,mittui tla phung chuan gate lam panin ka tlân phei a.Dim taka ka hawn hnuah ka chhuak thei hram e.






Gate nghengin ka thaw hlawp hlawp a. "Ka pa'n a that tiraw," tha khur zawih zawih chung chuan ka ti.Ka lungphu ala rang kher mai. "Chutiang ngaihtuah suh,an hmuh hma che in kal vat rawh." Ka u chuan gate chhûng lam bih ngur ngur chung chuan ati a.






"Bill,ka pa'n tual a that" phîr nimahila hmeichhia zawk na na na chu rilru a no bik ania nge. "Bella,nakinah kan sawi dawn ania.Tunah chuan I hmanhmawh angai." Atih leh takah chuan Hlutei nena kan inhmuhna tur hmun Polo Park lam pan chuan ka tlân leh ta a.Ka bag ah a rit bawk nen,ka tlân sawt lo khawp mai.






Ka phone ah rawn ri chhen chu ka phawrh chhuak,Hlutei alo ni hlauh.Ka ding leh rih a,thawk la leh te te in phone chu ka chhang ta a.





"Bella,ilo chhuak tawh em.Warden ka hmaizah tawh lutuk ania." A rawn ti nghal lang lang.






"Aw,chhuak tawh,ka lo thleng ṭep." Tiin phone ka dah a.Polo Park pan chuan ka kal leh hlawk hlawk mai. "Ka pen ang hian pen ve ta che,kei aiin i te chhe lo,pen hlawk ve deuh tur chu ini." Ninawm min tur ve seka,ka bag ah rit zia pawh a hre leh tawp lovang.





Thlan tla hluamin park chu ka thleng a,min nghak rei lutuk chu ka inthlahrung viau mai.





"Bella,min ring em" tiin a nui sâng.Hetianga a nuih tawh hi chuan thil engemaw tak tih rûk a tum tihna ani ṭhin.





Engthilnge atih dâwn pawh hre hawt lo chuan,ka lu ka lo bu ve mai. "Anih chuan,kal ang,khawvel chungah chuang dun ang." Tiin kan piah lawka scooty eng awmnaah chuan min kai phei a.






"Kan risk dâwn tihna maw," ka ti hé haw.Scooty a neih awm ka hrelo reng reng.





"Warden phalna thlapin mawle," tiin khalh thiam ang hrimin chahbi chu a ti vir zui a. "Awle,a ṭha e,keiman ka lo khalh ang." A chahbi chhuhsak ka tum chu a phal ta tlat lo.






"Zanin chu keiman ka khalh ang," ati miau mai sia,ṭhiante han rin loh tlat chu a tih chiin ka hre bawk silo. "Mm muangchangin tlân ang aw" ka tih leh hrâm kha.





"Hey gamer,keichu ka chuang ve duh lo ania.Kan sawt euh euh palh ang." Ka u lah chuan alo ti ve sek.Midang awm lai hian min be ve ziaha,chhan chi ani tawh ṭhin silo,ka melh rum thei ania.





Hlutei hnungah chuan ka bag pawm chungin ka chuang ve ṭai mai. "I chuang dawn tak tak maw,a mit a kalh deuh ania,kawng kawi pawh a hmu nghil vek mai ang.Chuang duh suh" ka u bawk chuan a rawn ti leh. "Lo buai suh" ka ti vin ta ṭhat,ka insum hman thalwt lo.





"Ka buai hleinem,min ring tawp rawh," ka ṭhiani lah chuan amah ka bia emaw alo ti. "Hmanhmawh ang", ka ti ta ringawt.





Scooty chu a tinung hlarh hlarh a,ka inrin hmain kan thlawk thut.Kei aia ringin ala au zui.Kan tlân zui vawk vawk a,hetiang em ema kawng kualah hian ka la tlân ngai lo.






An hostel kawtah kan ding dâwn emaw tih laiin a tlân tlang daih lehnghal. "Khawiah nge kan kal dawn?" Ka bag ka pawmna lamah ka ban a kham vek tawh.






"Bella,ka ding thiam tawh lo ania" mangang tak chuan a rawn ti ta mai. "A break kha hmet rawh" min tluk pui ka hlau tawh lutuk chuan ka ti vin tuar. "Khawiah nge a awm,khawilai hi nge ka hmeh dâwn?" tiin a rak chúl mai.Mi in hungna bang kan su nghal chawrh.






"I ṭha em?" Ka u chuan alo ti nghal vat.Ka kiu ka sawh pilh ve a,a bak na ka nei lo.Chhang lem lovin,Hlutei chu ka buaipui nghal a.A chal a sawh nge ni a lo dawm vang vang mai.






"A chhe nasa angem le?" scooty lêt bám en chung chuan ati vawng vawng.Amah pawh buaipui ta lo chuan scooty chu ka endik nghal a.A glass hma alo keh vek.







"Keiman ka chawi dawn ania" a thlaphang hmel ka hmuh chuan ka ti nghal vat. "A theih loh,keima khalh ania,keiman ka chawi ang." Ati teh tlat a.Ka hnial peih lo,nakinah a account ah ka thawn tho ang.






Emerald Girls Hostel-ah chuan keiman ka khalh thleng ta a.An warden alo thinrim viau dâwn emaw tih laiin,a scooty ai mah chuan kan nat leh nat loh min lo zawt nghal a.Scooty siam man erawh kan tum tho angai ang.






"Midangin an hmuh hma cheu in lût vat rawh u." A scooty chhe siamna man tur pek kan tum chu hnar in,room lam pan tur chuan a nawrin min nawr.






"Naktukah ka pe mai ang che" Hlutei chuan tiin,a room lam chu min pan pui nghal a.A roommate a mutthilh tawh avângin ṭawng pawh kan ṭawng ring ngam lo.






Naktuk chawhma lama chhuak tur ka nih avângin kan hliam te kan silfai hnuah kan mu ta ringawt.Naktuk zing chu kan tho sil ve ṭhum dâwn anih hi.






"Rock a bye baby in the tree top,when the wind blows,the cradle will rock." Ka u in zantin min awih mut ṭhin na hla chu sa leh in,ka phone switch off in ka chhing ta diar diar a.












"Bella,i tlai dawn ania,tho tawh rawh." Hlutei chuan min rawn sawi harh.Rin ang ngeiin ka sil ṭhum mai.






Ka in hnawh puar hnuah parlour ah kalin ka sam chu ka u sam ang chiahin ka tan tîr a.Tunah chuan ka nghawnga khuavang awm bak kan danglamna hmuh tur a awm tawh lo.E ni tak,amah ai hian tlemin ka te hret.Mahse,hmeichhe te zawk zawk chu ka ni hauh lo.






Hlutei te hostelah lêt leh in,ka insiam nghal sawk sawk a.Thlawhna ka nan hman loh hlau in,chhuah pawh ka chhuak hma ngei mai.






Delhi ka thlen chuan sim dang ka lei nghal a.Ka u boralna,a hostel awmnaah ngei ka lut ve dawn ta.Public toiletah lutin,a thawmhnaw ka khung zing ami ka duh ber chu ka ha a.Ka hnute a lan loh loh nan ka hrêng rek hle bawk.







Thla hmasa khan hostel neitu ka biak fel vek tawh avangin,ka u room hluiah ngei chuan ka in suan lut.Warden leh Hostel neitu ten min hmuh chuan thlarau hmu ang maiin an dang nghal sawt sawt nia mawle.Ka dem hran lo,mitthi anga an ngaih hmel ang chiah ka pu sia,a hming ang chiah chiah ka hmang zui leh ta nghal a.Mahse ka adhar lemah ka pa hming ka thlak avangin tlem chuan an hlauhna a zia ve deuh. "Buaina i neih chuan min lo ko vat dâwn ania.Hei hi Shibli Boys Hostel dân aw." Warden chuan lehkhaa hostel dân in ziah chhuahna min pêk pah chuan tiin an pahnih chuan min chhuahsan ta a.






A thih hnuah khan a roomah tumah an awm duh loh avangin an dah ruak tawp kha ania,a sulhnu te pawh khawih danglam lohin ala awm tih theih ani.






Room chhung tifaiin hun ka hmang a,ka mutna tur khum ka siam ṭhat laiin, "inbumna ani maithei asin,hmeichhe aw ang deuhin khawl a ṭawng tîr aniang.Hmeichhia lehnghal,number one ani thei lo hrim hrim,fighter ala hmang zui ania." Ka room pawn lamah chuan mipa pakhat hian ati lung lung mai.Ka u ka zawng nghal vat,Delhi ka thlen aṭangin hmuh tur a awm lo reng reng.






Ngaih ṭha zân lo chuan lukham cast chu ka thun a.Room kawngka a rawn rik rual chuan ka hawi chhuak vat.Tlangval pakhat ka Kum rualpui vel ni awm tak,a mitmeng aṭang ringawt pawha a lerh tih hriat ngawih ngawih chu a trolly nen a rawn lût hlawl mai.







"Oh,roommate i nei dâwn anih hi.Chibai ṭha chi,hei i roommate tur Simba..ni leh lo.Hruaizela anih ve mai mai hi." Tlangvâl pakhat hmelṭha leh nelawm hmel zet mai,a hnung aṭangin a rawn in zep lût a.A mitmeng ringawt pawh a hmuhnawm tawk naklaiin min la nuih sang zuia,ka nuna vawikhatna atân,mipa ka vawikhat hmuhnaa hmelṭha ka tih awmchhun ani chiang mai,ala pa em em zui.












Hruaizela pov:






Roommate ka nei dâwn lo,ti khan min hrilh ve sia.Min lo bum reng animaw!







"Simba,i inluah ai kha chuan a zia deuh lo maw.Khawhar hnêm tu tur i nei dâwn bawk a." Thianpa Sky-a lah hi a thawveng chi tih takah ka thlir loh lam zawngin thil alo thlir leh daih mai.






"Billy aw,roommate ka nei dâwn tih ka hre miah lo." A lungawi lo ve tho anih hi,room ruak dang a awm tawh bawk silo.Anih nih phawt mai teh ang.







"Kan ṭhian thar tur hian hrawk bawk a nei lian lo ania,fîmkhur tur." Ka bungrua ka dah fel lai chuan ka dara rawn beng pahin Sky-a chuan ati a.Alo chîk fal leh hle mai,ka ṭhiana nge nge,paw lawh deuh anga lang si hian a fimkhur ru ve ṭhin ania.







Khum min siam pui leh thlap a,kan zawh hnuah in tih fai hmain thil ei tura chhuah kan tum a.







"Ṭhianpa,Billy nge Bill,engtinnge kan koh ang che " Sky-a bawk chuan tiin,a dang nal tak hmangin kawm tlangnel a tum leh dawn anih hmel.







"Bill" tih tawpa chhangin,lehkha bu a bih san daih. "Awle,Pride Land ah i kal tawh em?" kan in hriat tirha a zawhna ang bawk a zawt leh ta.Eng hming tak phuah sak leh ang maw.






"Kal ngai lo," alo ti ram leh hmak.Kawm tlangnel a har viau ang.Mahse a mitmeng a nalh,mipa si nu rukna riau a nei bawk.Khai leh, mahni an pui ngaizawng chi alo ni reng lo maw?







"Ava buaithlak dawn ve,mahse lungngai suh.Pride Land ah ka lo lawm a che,Timon tihin min ko miah lo la,nangpawh Rafiki tiin ka ko miah lovang che." A fiamthu thawh chuan kawng ro a su vak dâwn lo a ang.A biak mek sawn a ngaihsak eih lo.






"Min ko em ni?" Duhzuala kan Pumbaa a rawn lang hlawl.Ka lo nuih suk a,room chhûngah rawn lûtin, "engtinnge anih theih,he roomah ngei hian i thi tawh sia." Mak tih hmel takin kan ṭhian thar chu a rawn en hô mai.






"Pumbaa,kan Mufasa chu a kal tawh.Hei chu Rafiki anih hi,tiraw ṭhianpa." Sky-a chuan ti leh in,Pumbaa tukhumah a ben sak zauh.






"Simba,kan rooma rawn riah i duh em?" Pumbaa chuan ati nghal zat.Khum ka nei ve renga,engahnge room dangah ka riah daih ang.Sky-an engahmah a ngai silo,engngatinge kan ṭhian thar chu a rawn hlauh bik tlat ni.






"Guys thil ei teh ang u,ril a ṭam ṭan," kan boruak uap lutuk tih zia nân ka ti ta ringawt.Ka ṭhiante pahnih chuan min pawm pui kher mai.






Pumbaa nen chuan kan in zui chhuak a, Sky-a nghah angai leh ta. "Timon,halwa kan ei zawh san dâwn che ania." Kawngka hawng pah chuan ati leh a.






"Rafiki a tel loh te chuan kan kim nang" tiin kan ṭhian thar chu a rawn kai phei.A peih lo chung chung a kai lui tih hriat takin a tum bur leh ta nghal a.







Taimoor Nagar a restaurant lar ber pawl, 'Friends Colony East' ah kan chawl ho a.Kan ṭhian thar chuan nut cracker cake a lam mauh mai.Keiin chicken biryani ka lam thung a,Pumbaa leh Sky-a ten chole puri an lam bawk.







"Simba,sausage fawp lawk ila" Sky-an eitur ei laklawh lai takin a rawn ti thut.Ava hun lo ṭhin tak,thil ei laklawh lai hian ati fo mai.






"Ei zo phawt ang u,kan ṭhiana pawhin ala ei zawh loh hi." Pumbaa chuan tiin ka byriani ei lai chu a rawn hawp nghal pûk a.






"Feel vang vang phawt loh chuan ka ei thei tawh lo.Bill,i lokal ve duh em?" Sky-a chuan kan ṭhian thar nuih sung pah chuan a zawt leh.Ṭawng lovin a lu a thing ringawt.






"Ei zo phawt ang,nakinah kan ti dâwn ania." Tiin keia pawh chuan ka thil ei lai ka chhunzawm san hmiah.







"Rukru,ka bag a la daih ania," kan piah lawka ṭhu hmeichhe pakhat Bihari ni awm tak hi a rawn au chûl a.A bag la tu lah chu a mawng phe pawh kan hmu hman mang lo.





In hrilh kher ngai lovin kan ṭhian ho chuan kan um thut.Thil ei zo hlim kan ni bawka,tlan chak chu a har ṭalh mai.






Pumbaa nen kan rukru um mek chu kan hlauh ta der.Let leh tuma kan in her rual chuan Sky-a leh rukru pa chu kan hmu ngal a.Kawng an rawn kân ve mek.






"A mit a kalh alawm,in tlanna lamah chuan a tlân lo tawp ang." Sky-an rukru pa kuah bet chung chuan alo ti.







Pumbaa nen kan pui vat a,khawih lova restaurant a lêt pui mai kan tum chu kan ṭhiana lung a awi leh tlat lo.






"Bag hi la ula,lo va lêt rawh u," tiin hmeichhe bag a rûk sak chu min pe a. "Khawih na lutuk suh aw," Pumbaa chuan tiin restaurant lamah min kuah phei.






Kan ṭhian thar chu a ṭhutna ngaiah thil thleng engmah hre lo ang maiin a ei tur chauh ngaihtuahin alo la ṭhu.Phumbaa chuan bag chu a neitu bulah a dah a,a rawn ṭhu ve nghal zat.






"Duhzuala ka nia, engtinnge ka koh ve dâwn che." Kan ṭhian thar chu bia in,a ṭhut hnaih sawt sawt.Room chhûngah kha chuan a hlau viau khan ka hre sia, rukru kan um a,a thisen a lum laklawh ani maithei ani.






"Bill" kan ṭhian thar chuan ti leh hmukin,tissue chuan a hmui a hru leh thlap.Mipa in cheng vawng tak ka chen pui dâwn animaw,hrawn a nuam hauh lovang le.






"In hming pawh a in ang,min en teh,Bill,i piang nawn leh nge,room chhunga in awk hlum kha nangmah i nilo zawk." Pumbaa bawk chuan kan ṭhian thar bianga dawm chung chuan ati leh lung lung mai.






Kan ṭhian thar chuan a kut phih thlâk sak hlawkin, "ka ṭhian nih i duh chuan min dek suh." Alo ti ram leh hmak.






"In aw a in ang lo,in in ang lutuk,han en ve mah teh." tiin a phone a phawrh chhuak a.Tuna ka room luah thara in awk hlum an sawi bawk kha em ni tuna a sawi leh mek hi.A phone chu lak sakin thlalak a tih lan mek chu ka en ve a.An in ang kher mai,mahse kan ṭhian thar hian hrawk bawk a nei te zawk tlat,a nghâwngah khuavang a nei bawk.






"Anilo" tiin Pumbaa phone chu ka pe a.Sky-an rukru pa kha restaurant chhûngah a rawn hnuk lût ve mek bawk.Khawih na lo tur khan kan chah si a,a khawih thi leh hnuang tawh.







Restaurant neitupa a rawn chhuak vat,rûkru pa chu a thih tawh a ring nge ni,a mar te alo deh sak thuai a. "Bawiha,Police koh phawt tur asin" tiin pawi tih hmel tak hian Sky-a chu a melh a.Kan ṭhiana lah chu ngaihsam tih takah kan bulah rawn ṭhut sanin, "a chet theih chhung chu Police pawh ko mahila,a tlânchhuak leh zel tho ang.Ala thawk ve ṭék ṭék kha, Police koh a hun chiah." Tiin a phone a phawrh chhuak a.A khawih tu ber chuan Police a call leh hmiah mai.







Police lo thlen hnuah pawh a in sawi fel leh vek a.Him pialin Hostel lam kan pan leh ta.







"Vawiin chu class kan kal lo ta sa sa,game hnih khat chu bei leh ila." Pumbaa chuan ka khuma bawk pah chuan a ti a.Thiam mang silo hian,khelh hi a ti ve ziaha,chhan a ngai leh ziah.







"Ti ang u" Sky-an tukverh bula sausage fawp khu hluah hluah pah chuan alo ti bawk.Gusion a hmang ṭhina,India number 2 ani mek bawk.Kei leh Pumbaa hi chu legend chauh kan la nia,kan ṭhiana chu tluk lo vai vai tak kan ni.Ti chung hian kan tlaivar ve ṭhak ṭhak ṭhin ania.







Kan pathum chuan khumah kan ṭhu dal a.Kan phone lek vahin,mobile legend khel tur chuan kan in ring leh ṭhap tawh.






"Number 1 hi a online miah lo,a tellovin rank kan push thei dâwn em ni?" beidawn hmel takin Pumbaa chuan ati leh bui bui mai. " Engahnge in lungngaih,Number 2 ka awm hi." Sky-an alo ti nghal zat.






Kan ṭhian thar chu ngawi rengin bathroomah a lut zui daih a.Sky-an chik takin alo thlir zui vung vung mai.A chanchin a hrekim leh ṭep tawh ang.










"Number 1 a online,invite nghal ang." Pumbaa chuan ati hluai,a invite nghal tak tak.Sky-a hian luahlan daih se ka ti,hmeichhia lehnghal,a in luling leh vak dâwn anih hi.









🌸





(Type thui ka tum loh tehreng nen,zan kar thlakin ka ti dâwn sia,tlema thui ve deuh hlek lo chuan in khawhar a hnem zo lo palh ang😊Changtupa te hming in phuah ho hi,The Lion King ami changtute hming kha aw)


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 4th, 2023, 12:36 pm

He Is My Girlfriend


Chapter 2:



Bella-i pov:





Hmuh phâk renga games an khelh chuan ka buai vek zêl.Chhungrilah hian min tur et et ṭhin a.An hmuh laia khelh chu ka inthlahrung ve rih bawk sia.Bathroom aṭang hian khel ve tawp ila animai.Mahse a vawt ve reng,kawrlum tal ka lo ha lût lo ani.






Hêng ho lah hi thlakhat vel chauh kan la khel ho a.An khelh apiangin min rawn sâwm ve ziah.Duzz ti a in dahin min rawn sawmna chu ka lo pawm sak tawp.Luh ruala min sâwm tu an lo awm nghal ṭhin hi chu a phur awm sarh zêl.






Alucard,Gusion,Tigreal leh Vale an thlang zui a.Pakhat phei chu Gusion bikah number 1 nihna a hauh lehnghal.Kan va ṭha dâwn ṭhah ṭhah ve.Hetiang anihchuan,ka hman thiam pakhat number 1 ka nihna tho,Miya ka thlang mai ang.






Kan khel ṭana,a engahmah hmain Alucard lah chuan min fiam nghal zur zur mai.Hepa ve ziah hi,kan khelh dun apiangin Alucard hlir ala hmang. "Game chhunga luh dâwn chuan biahthu di te inhlan ve phawt ila" a rawn ti zui a.Ka chhang lo chiang asin.Min fiam chhungin ka savage khalh ta daih.Ka bulah a han kal tlat lehnghala, "turret chhak lamah han kal rawh,kan chak lo ange." Ka ṭawng ring ngam bawk silo,zawi tê chuan a tih tur ka hrilh ringawt.A laiah midang pathum an in zui bawk si,hetiang chuan an base pawh kan bei thei lovang.







Min pui hneh ve viau mahse,chhak lam kan vên ṭhat loh chuan kan base ah an rawn luh a hlauhawm ve tho sia,chhak lamah chuan ka chho ta ringawt. "Min rawn zui tawh suh,dawihzep lutuk." Ka hnunga min zui a tum chu ka lo hau hrep. "Alucard ka nih hi,engahnge Miya i hman kher," a la ti zawk zamah. Chhang buai lovin ka kalsan a.Min lo la bi tum zui,ka hneh dâwn lo ṭan,hnungtawlh ka tum lai takin Tigreal a rawn tlân hlauh.Alucard pawhin min rawn pui leh bawk a.An zarah ka nung ve hram hrâm ani ber e.







"Kan bei tlang dawn nge kan lêt dâwn?" Alucard chuan a rawn ti leh reuh a.Lehlam pawlah,Layla leh Zilong chiah dam an awm tawha.Midang an nun leh hmaa kan beih vat vat angai.








"Second 10 bak hun kan nei tawh lo, lêt lovang." Ka thu an ngaichanga ka hriat avang chuan ka ti ve tawp. "I chau dâwn lutuk asin" Alucard bawk chuan a rawn ti leh. "Zâwlaidi rim a nam deuh em ni Simba." Gusion in a rawn tih chuan ka phu zawk.





Simba maw!





Tuna ka khelh pui te hi room chhunga awm mek te saw an ni tihna em ni?






"Engnge in tih reng,hmanhmawh ta che u." Vale in a rawn tih chuan ka in sang mar nghal. "Pride Land mi leh sa te u,bei ang u le" Gusion ṭawng ring lutuk chu earphone aṭang lo pawhin ka hre pha.Sky-a aw ngei ani.







Kan vai chuan kan bei leh ta a,Rei beih angai lo,kan hneh leh ta.Tun ṭum chu Tigreal hnenah lawmthu sawi ka ngai.Alucard hi chu ka hriat chian em avangin biak loh law law a fin thlâk zawk.







"Bill,i zo ṭep tawh em?" Bathroom kawngka rawn chum tu an awm takah chuan game dang ka khel hman tawh lo.Kham lo tak chungin ka chhuak ta ringawt.






Khuma ṭhu te pahnih chuan min lo en hú a, "phit ṭha thei nange,a hel lutuk animaw." Sky-an alo ti nghal zat,min nuih leh vur vur tawh.Hmelṭha in pa viau mahse,Alucard ṭhianpa anih vang hrim hrimin ka be ṭha peih lo.Hmeichhe rilru hi chu a buaithlak thei ania.







"Khel tawh lovang,ka number 1 ber a online leh tawh lo." Duhzuala'n lungawi lo hmel pu chungin alo ti hmuk.A number 1 sawi chu keimah ka nih mai hmel.Simba chu bathroom aṭanga rawn chhuakin,a hnar a rawn tuai zeuh. "Ṭhiana,ava hel ngar ngar ve.I ṭhu rei bawka,duhthusamin a rim pawh a tak ṭha e." Nui ruh ruh chung chuan tiin,a ṭhiante pahnih a siai leh zeuh.






He pa hian ka inthiar emaw ati tak tak animaw.Keipawhin kha thil rimchhe lutuk kha ka tuar ngar ngar zawk ani reng sia.







"Chaw ei ala hun silo,beng thek thek mai ang u."Sky-a chuan ka zah a hlauh vang ni hauh silovin thu a rawn thlâk a,ka lo lawm ru hle.







"Pawisa chawi lovin ti tawh ang u,pathum chauh kan ni sia,hne lamah a kal lek lek zel ania." Duhzuala'n alo ti nghal zat.Kei leh Simba erawh kan ngawi tlat thung a.An thusawi awmzia ka hre miau lova,bakah min nêl nghal lutuka ka awm thiam lo.







Ka pa khan ṭhian kawm a phal vak ngai lova,College kal dawn pawhin min thlah thlap a,bânah lên kawina hun pawh awm lovin min rawn hruai leh thlap ṭhin kha ania.Ṭhian pawh ka neih tlem phah,Hlutei leh Sunita-i te bak ka kawm lo.Chupawh higher leh college a ka luh rualpui te an nih vang chauhin kawm a phal a.Ka lên chhuah a phal lova,ka ṭhiante an rawn leng zawk ṭhin.Ka hun tam zawk chu inah hmangin ka u nen kan inkawm tam ber ang ka ring.







Tûnah heti taka ka tana in hawng te ka tawng ta mai chu,Tangled movie a Rapunzel,a tanna hmun aṭanga a chhuak zalen ang mai khan ka in chan.Mahse nêl nghal bawrh bawrh erawh ka ngam chiah lo,mipa an ni bawk sia,ka thuruk an hriat vaih chuan ka thil chhui naah hian min tibuai lovang tih tuinnge sawi thei.







Duhzuala hian Bill-a tak tak emaw min tiin,min hlau nghal kha ania,ka u thihnaah inhnamhnawih lo mahse a ruang a hmu chiang hle tih a hriat a.Sky-a hian min hmuhin,ka u nen in ang min tih awm ka hre lova,rinhlelh a hnekin min kawm nêl a tum nghal em em bawk.A inhnamhnawih lo anih vêk pawhin ka u ka nilo tih a hrechiang saah ka ngai.Simba ve thung hi chuan engmah a hrelo tak tak a ang.Ka roomah a rawn in sawn lût ve chiah bawk nen, Sky-an a biak dan aṭang khan a hma in in a luah anih hmel a.Ka u pawh a hrelo tak tak anih hmel.Mahse ngaihṭha taka awm na chi ani hauh lo.In ring renga awm angai dâwn tlat.







"Bill,lens i vuah tiraw,north east ah khatiang mitmeng nei kha chu an vang viau ang." Duhzuala'n chik taka min en pahin alo ti.Ni e,lens vuah emaw min ti châwk,mahse ka vuah lo,ka nu mitmeng ka chhun ve a.Ka u mitmeng pawh kha a mawi asin,kei aiin mithmul a nei sei zawk lehnghal.






"Chaw ei hmain kan beng thek thek dâwn lo em ni?" Sky-an a rawn tih leh takah chuan Duhzuala a tho nghal tharh.Engnge an ben dâwn ka hriat loh avangin inchungah boruak dawng tura chhoh ka tum. "Bill,i tel ve angai,a lungthu kimin kan ti ang chu." Sky-a bawk chuan alo ti leh tawh.Hruaizela alo khi ve suk a,Duhzuala playing card nen a rawn lût leh hlawl.Ben thek thek an tih chu card den tihna animaw.






"Ka thiam lo" tiin chhuah ka la tum fan. "Mihring chauh lo chu zirtir kan ngai hleinem,lo ṭhu rawh,kan zirtir ang che." Tiin Sky-an khum awl lai chu a beng leh thak thak.






Simba beh sheet chu an pawt mar a,ka khum bula chair chu Duhzuala'n a chawi phei. "Lo ṭhu rawh,ṭhian vek kan nih hi,Mizo awmchhun ho hi chu in lungrual teh ang u." Duhzuala'n tiin chair ah chuan min pawt ṭhu leh hnawk.







Tihngaihna vak ka hrelo,mipa nih hi ka thiam loh bakah ka tuina ani teh chiam lo anih hi.Ka u lah hi hmuh tur a awm tawh bawk silo,ka mamawh tehreng nen,khawiahnge a kal bo daih ang le.






Ka hmaah card chu an rawn dah ve zel a,an kaih pharh angin ka kai pharh ve ta ngawt.An han deng a,ka hun a thlen chuan an den ang rawng ka neih zînga number tam ber chu ka deng ve ringawt,an in en nghal hrek hrek mai.







"Ka peih tawh lo" Simba chuan ti hmukin a card a paih thla ṭhuai.Ka thiam lo viau emawni. "Simba,zah ngai,hakuna matata" Sky-an alo ti nghal zat. "Zawng tuar ai Ngau in ka tuar char char a.Missionary ka nih lo hi" ati leh hluk hluk.Duhzuala'n a aw alo thian khurh a, "Chhetri-a bulah kal tawh ang u,chaw ei a hun dâwn." Tiin inhnuaia chhuk a rawt nghal thuai a. "Chhuk ru,nakinah ka ei mai ang" tiin ka khum lamah ka phei san. "Nangmah chauhin i awm ngam em ni?" Duhzuala bawk chuan a rawn ti leh,an hlauh ber hi ka u ani tih hria se chuan min kawm duh miah lovang mawle.Chhang lovin mit ka chhin san hmak.







An thawm a reh tak hnuah,an chhuak vek tawh emaw tiin ka meng leh a.Sky-an hnai set sawtah min lo en,ka phu zawk lehnghal.







"Min hlau suh" tiin a nui sung a,ka hawi kual nghal,amah chauh a awm takah chuan ka thaw a veng huai mai.Simba boruak rit lutuk khan min ti chau zo.







"Bill nge Bella?" chik taka min en chung chuan tiin ka chhânna a nghak.Mak ka ti,vawiinah kan in hre ve chauha,engtinnge min rinhlelh nghal theih.Ka rin ang kha alo ni tak tak zawk anilomaw.







"Bill" ka aw ti thum chawp chuan ka ti ve a.A awih loh hmêl ngang mai,a nui chhuak hawk. "Bill chu a thi tawh,chuan nang hi a phir pui kha ini tiraw?" Engtinnge a hriat,ka u nen an in hre ṭhin tihna em ni.Hlauh em em vang pawh ni hauh lovin ka tha a khur ringawt.







"Tunge inih?" Ka aw thleng chuan a khur chhuak nia mawle. "Kei ve mai mai hi maw, Vanengmawia,Sky ti a an koh ṭhin.Billy Lalawmpuia ṭhianpa." A ti chang ta fak mai,a nui hmel a bo vek a,tawrhna leh thinrimna a mitmengah chuan ka hmu nghalin ka hria.







"Ka u nen in in kawm ṭhin amaw?" Ka u khan a sawi ngai lo,a awm hran hnuah pawh zantin kan in video call ziaha,roommate a nei lova,ṭhian kawm a neih awm a sawi miah lo bawk.






"Thla thum chhung chiah a rawn awm a,kei leh Duhzuala bak ṭhian ala nei lo." Atih leh takah chuan ka sa phat mai.A ruang la tura kan kal khan an hmel ka hmu miah lova,ka u kha hmangaihtu neilo ang maiin,he roomah hian a ruang kha puanin an lo khuh tawp anih kha.







"Ṭhian,a ṭhian maw" tiin ka nui ro hak,kutthlak ka chakna chuan min tur et et tawh. "Hahdam rawh Bawihi,I u kha keinipawhin mahni a intihlum anih kan ring bik lo." Ati dam leh thlap,ka inrin hmain a biangah ka beng.A dawm nghal vawng vawng a, "i kutthlak ava na ve,taekwando i thiam hrim hrim." Tiin ka kut chu la in a thlêk zui vang vang.Pawh thlâk ka tum,a vuan nghet sauh, "zawn chhuah ve i duh tho tiraw." Ka kut hum chung chuan tiin nelawm tak hian min nuih leh suk mai.












"Ka zawng nasa lutuk che,oh,guys man to man chu a chi lovang." Duhzuala rawn lût chuan a rawn ti nghal lung lung. "Thurûk chu thuhruk tlat tur" Sky-a chuan ti zawi sap in,ka kut chu a thlah zui a.







"Hello Pumbaa engnge i mamawh," a thutak hmel paih bo in,thawven hmel takin a ṭhianpa bulah chuan a lang leh lawi a.Hepa hi zirchian tham nun a nei tlatin ka hria.Hmeichhia ka ni tih pawh ka sawi ngai lovin a hre nghal ania,nge kei hi mipa angin ka lang miah lo zawk.Ka u thawmhnaw ka hâk mai piah lamah ka sam thlengin mipa sam ang chiah ka pu ve tho sia.Hmeichhe aw nu hnáp ka nei hranpa lova, tih thum chawp pawh angai vak lo, chuti chung chuan ka la ti thum lui zêl bawk ania, engtinnge hmeichhia ka ni tih a hriat nghal theih.








"Sausage chu," Duhzuala'n lo tiin,a kut a dawh nghal zat.Sky-an a kekawr Ipte dap leh ruk rukin,silk cut bawm a rawn phawrh chhuak. "Sí hnem lutuk suh aw,lei sa ka nei tawh lo ania," tiin ciggarete bâwm chu hawngin pakhat a pe a. "I duh ve em?" Duhzuala'n ṭan pah chuan a rawn ti. "A zu ngai lo," ka chhan hmain Sky-an min lo chhan khalh,min siai suk lehnghal,ka lungphu a rang leh tawh hle.







"Chhuk ang u,Simba khua a har ang,vai ho kârah hi chuan in ngaihsak angai ania." Sky-a bawk chuan tiin Duhzuala nen chuan min kuah chhuak a.Ei ka tum lo zet naa chutia min hruai ve takah chuan ka ei ve ta ringawt.Paneer min la pe khawm zui a,ka ei tak ṭeuh kha.








Kan ti nek nek a,khua a thim ve der mai.Rilruah Shillong lam an rawn lang leh a,ka lung a leng nghal der.Ka nu mawlh khan min ngaihtuah dâwn lutuk,ka pa erawh chu a thinrim a in hrosa leh kúk kúk tawh ang.








"Lehkha zir hmain game khat chu ti leh zuai ila." Duhzuala'n tiin a phone a rawn lek lang leh va mai.Ka châk ve reng,mahse Sky-a tih loh chuan ka nihna an la hriat hmel siloh,ka khelh pui ve chuan min hrechhuak dâwn sia.Sky-a rilru ang an put ve loh phei chuan ka thil tum ka hlawhtling thei dawnin ka hrelo.







An pathum chuan an khel ho leh ta a.Thawm bengchheng kâra awm ai chuan tiin inchungah ka chhoh san ta daih.Boruak a thawvengin,hah a dam sawng sawng mai.Ṭhutna tur ka hmuh mai loh avangin rot chungah chuan ka ṭhut ta ngawt.Hreh ru tak chungin ka nu number ka hmet chhuak a,ka call ta.






"Hello"
"Nu"
"Awi Lalpa,ka naute khawiahnge i awm" ka mittui a rawn tling nghal,a luan chhuah loh nan ka in sum hrâm hrâm a.
"Ka pa a awm hnai em?"
"I chhuah tukah khan a zin daih alawm,i awmloh thu pawh kala hrilh lo.Hruai i ngai dawn em?" Thawk ka la leh kâwk,ka nu mal tur zia chu kei aia hrechiang an awm lovang.
"Nu,tûnah chuan ka lo la haw thei lo," ṭap insum tak chuan ka ti chhuak a.A reh leh vang vang hnuah, "I pa'n a hriat chuan a pawi dawn ania.Ka naute,tûnah lo haw mai rawh." A in sût ri ka hre zawm zat.
"Ka zawh hunah ka lo haw dawn ania,lo in enkawl ṭha la,chaw thlah suh aw." Min chhán leh hmain ka dah ta ringawt.A aw ka hriat reng chuan ka haw leh duh tak tak ang tih ka hlauh vang ani.









"U,khawiahnge i awm,keimah chauh chuan min awmtîr suh." Vana arsi thlir chung chuan ka phun chhuak sap.







"An mawi tiraw," Sky-a aw ka hriat rual chuan ka phu zawk,ka hawi lêt rang kher mai.Zial zu khu hlut hlut chungin ka bulah a rawn ṭhu ve a.







"Arsi te hi mawina tinrêng fawm tura duan an ni a.Zûn an neiin ngaih an na duh bik asin." Arsi thlir vawng vawng pah chuan ati zawi sup a.Zanin chu kei chauh nilo,ani pawh hi a lung a lêng ve ani ngei ang.







"Ka u kha tu thah nge anih i rin?" ka nihna a hre tawh tho tiin ka inthup kual duh tawh lo.A zial fawp leh zauhin, "ka hrelo le,Pumbaa nen kan hmu hmasa bera.Chhan kan tum ve nasa,mahse kan tlai hret ani." Pawi tih hmel tak hian a kûn nghal lâp a,a rawn nui ro leh hak mai.







"Ngaihzawng nei hman lovin a kal daih sia.Vanah kawppui a han zawng ve tawh mai ang chu." Tiin za lo tak hian a nui leh a.Ka nuih a za ve lo,ka u kher lo pawh mitthi tawh fiamthu thawh nana hman hi ka ngaithei der lo.








"Fiamthu anih kha, fiamthu" min nuih sung pah chuan ati leh a.Za lo takin ka lo khi ve sak. "Holmes i hre ngai em?" Ka mita min en chung chuan ati leh.Ka lu ka lo thing ringawt. "Ti teh Bella,ṭawng ring rawh,a êng lo si i hmel ka hmu ṭha thei lo ania." Nui sâng chuan ati leh a,kan chhak lawkah light a awma,a êng em em zui.Min fiam mai mai nge,a khawhmuh a fiah lo zawk pawh ka hre love a.







"Holmes chu engnge?" Ka ṭawng ri ve ta.A zial zuk chu cement ah a nawr a,ka lam rawn hawi leh in, "I u thattu te an nih ka ring." Atih chuan hriatchian ka duhna chuan ka dang a ti nal zo. "Tute nge an nih,khawia mi nge,engtinnge i hriat?" ka ti nghal zung zung.A nui chhuak hawk a, "a ṭha,ka bulah chuan khatiang khan ṭawng bawrh bawrh rawh." tiin a nui leh hawk hawk.Zawhna mitmeng nen ka melh kiau a, "I u kan hmuh khan chhuatah name card ka chhar a,ka dah ṭha nghe nghe.Police te pawh ka hrilh a,mahse hma an la duh lo.Ka chhui zela,mahse ka hmuhchhuah chu thilmak tak ani." Tiin van lam chu a thlir leh vang vang a.








"Engnge i hmuhchhuah chu,he hostelah hian an awm ve tihna em ni?" ka ti leh zung zung mai.Thawk ala leh hawk a, "Gang pâwl pakhat ania,hostela an awm leh awm loh chu ka hrelo.I u khan zial a zu ngai lova,mahse a roomah khan ciggarete bung pahnih a awm." Atih leh takah chuan ka u thattu chu zial zu mi ani ngei tih a hriat nghal a.Ka u khan hostel a luh hlim vel bak engmah hriat a nei tawh lo kha ania.Tlem tal hriat belh nei se chuan a ngaihtuah chhuak thei maithei asin le.









"Hey,man to man in in biahthu suh u ka tih kha." Duhzuala aw ka hre zawm leh zat.A hnungah Simba a rawn kal leh bawk a,hoodie dum lukhum lian tak nei a rawn haa,a lang pa hliah hliah.Kan bulah an rawn ṭhu ve nghal a,zial an ṭan leh tawh.








Kan ngawih vang vang hnuah,a aw thian leh khurh in, "Chutichuan Chawngmawii chuan Hrangchhuana a ngaih ém avangin an luhkapuiah ṭhu in,thla êng a thlir vang vang a, 'In another life,I would be your girl' tih hla chu a sa a." Simba chuan tiin Duhzuala alo nui khur ngar ngar. "Nui rawh,fiamthu a thawh ve anihkha," Sky-an min nghawk zeuh pah chuan tiin a khi ve sâng mai.A fiamthu thawh ai mah chuan Duhzuala nui chu kan nuih pui ani mah zawk.









"I ṭhen leh tawh em ni?," Sky-an Simba dara beng sak pah chuan ati a.Duhzuala nui tawp thei lo chu a ke in ava chhir zauh bawk. "Hmangaih tlat loh chuan kawp reng a chi nang,kan inṭhen dawn tho tho,chuvangchuan min ṭhen hmain ka ṭhen." Alo ti sam êt.A mitmeng lerh lutuk nen hian a in rem chiah,hmangaihna awmzia pawh a hriatthiam ka ring lo.







"Hmangaih neih reng hi chuan midang kawp san loh a ṭha asin." Duhzuala'n nui ruh ruh chungin alo ti ve leh a.Sky-a leh Simba te in enin an ner nghal nâng mai.Kan Duhzuala pawh hian kawp alo ching ve reng a ang,a ṭhiante an ner nasa êm mai.









"Ila hrilh lo tiraw," Sky-an Simba melh chung chuan ati leh a. "Hrilh lo,a rem thei dâwn chuang lova,bakah ani chu ka ṭhian ṭha ania.Ṭhian anga awm hi a ṭha zawk." Rilru ipik hmel tak chuan tiin van lam hawiin a thaw chhuak leh hawk mai.Duh rûk deuh chu a nei ngei anih dawn hi,engnge a rem loh na chhan. ka buai lohna turah ka buai peih lo.








"Shhh,thawm ka hria ania," Duhzuala'n alo ti vat,kan hawi phâwk hrâ hlawm mai.Ke pen thawm ka hre ve nghal zat,kan lamah a rawn hnai zêl a. "Tlan ang" Sky-an ka kut min rawn vawn sak nghal.Inhnuai lam panin kan tlan nghal vat a, "nangni ho kha,lo ding teh u" english in mipa pakhat chuan tiin hnunglamah min rawn ûmzui bawk.








"Hmanhmawh ru,min um pha ange,a tlanchak si,cheetah ani hial lo maw." Duhzuala'n min rawn tlân pêlin a ti lung lung mai.Step tawp kan thleng a, room lo awm hmasa berah chuan min kai lût a.Min um zui tu thawm pawh a rawn ri ṭak ṭak mai.Kawngka nghengin kan thaw dun hlawp hlawp a. "Tunge?" kan room luhna ber kher chu a luah tu a palian ropui si,min rawn pan hnai deuh deuh a, "bro,chukchu a awm ania" Sky-a chuan tiin a hmaa chhuatah chuan na takin a ṭum bur mai.Chukchu reng reng ka hmu ve lo. "Theh chhuak vat rawh,chukchu ka hua ania." Chu pa chuan tiin Tamil ṭawngin a râk zui nawk nawk mai.









Pawn lama thawm kan hre tawh lo bawk a,ka kutah rawn kai lehin,min chhuah pui ta a.Room thleng min thlah hnuah,ka number min dil zui.Ka pe ve mai bawk a, "mang mei le" tiin a khi suk a,min siai leh zauhin a chhuak zui ta.







"Ka lût hmasa dâwn ania,nge ka rualin i rawn ti ve nghal law law dâwn." Simba chuan towel keng chungin bathroom a pan nghal a. "I zawhah animai" ti ve in,kawngka ka kalh ṭha nghal.









Ka thawmhnaw hak tur ka lak chhuah laiin Simba phone khuma a dah chu a rawn ri ral ral.Ngaihsak lovin ka thiltih lai ka chhunzawm a.A rawn ri nawn leh,amah a rawn chhuah mai loh avangin a phone chu ka ban ta ringawt.Saibawihtei ti a a save hming chu a rawn lang a.Ka la dawn chiah tih ah, "la suh" ti hlukin phone chu min chhuhsak nghal.A ṭhen tak a sawi kha anih ka ring ve ta ngawt a.A inbual zawh takah chuan keipawh inbual turin bathroom ka pan ve ta a.















Hruaizela pov:






Ka biak chak ngawih ngawih ka biak ngam siloh missed call lo lang vá chu ka en zui vawng vawng.Ka ngaih zual hunah hmu turin ka haw angai leh ngei ang.Ṭhian angin awm mahila, ka laka a rilru put hmang hrethiam lo tur khawpin ka á bik lova,keipawhin insum zo lovin ka lan tir fo réng bawk.Mahse kan tân engtikahmah a rem ngai dawn lo tih ka hriatna hian min delh rit lehin,ka hlat phah ṭhin.








Zanin chu zir lo leh phawt ang,kawr ha peih lovin,boxer chauh ha in ka mu leh ta ringawt.Chén pui nei mahila,ze thup chunga hrehawm ti taka awm ai chuan nihna ang ang hian lang ila a ṭha zawk.Engnge pawi vak,ani pawh mipa tho alawm anih le.









Number 1 nih tumin,ka assassin hman thiam Lancelot hmangin ka khel leh a.Tun ṭum chu ka ṭhian te an tel lo bawka,in lak hero a theih dawn e.Hrep tak chuan engtinnge hetiang thiam lo lutuk,legend anih theih zawk.Amah vangin kan chak loh phah mai dâwn.








Kan chak dâwn chuang lo ti rilruin,Bill-a inbual zo chu ka phone ka pe tawp. "Lo chhunzawm mai rawh,ka inthiar dâwn" tiin ciggarete leh lighter la in bathroom ka pan san a.A khelh khelhin lo khel chhunzawm ve tawh mai rawh se,chak lo pawh ni ila,ka khelh ani tawh chuang lo.









Commot a ka ṭhut rên râwn a, thil ngaihtuah chhuah ka nei.Kan room chhunga in awk hlum kha,engvanga a nunna hial lâk, duh nge anih ang.Ceiling fan ah alo inkhai an ti kha ania,ka ṭhiante pahnih hi a hmu hmasa pâwl an ni bawk a.Pumbaa sawidan phei kha chuan a hrâng lehnghal ani awm e.A hrâng tak tak anih chuan a room hluiah kan awm si a,zan reiah hian a rawn che thut angem?Ka ngaihtuahna mawlmang lutuk chu ka nuih pui suk.









Ngaihtuah lai mekin current a rawn thim thut,ka phu chiang asin.Mipa ka ni alawm tiin ka in ti pachang lui a.Mahse phone ka keng lût silo,duhai chuan a thim mah mah ani.Ka zial chu ka ti thi vat a,lighter talh alh chunga bathroom ka hawng chiah chu ka hmaa lo ding chuan min ti phu leh chiama,ka au chhuak nghal ṭhawt.










"Mipa ve si,I va dawih ve," ka hmaa ding Bill-a chuan alo ti zawi sup. "I chak em?" ka hlauhna thup tum tak chuan zah zelah ka zawt ta ringawt.A zawr zawr nen kei aiin a huai tur ani lo hrim hrim.









"Chak e" tih tawpin min chhang leh.Ka awih lo lutuk chu ka nuih a za,keipawhin kan chak ka beisei loh laia hnehna lo chan kha a theih loh hrim hrim.A hrethiam lo angah ka ngaih sak ta ringawt.










"Kha" ti leh hlukin ka phone chu min pe a. "I hriat tur pakhat,thim thamah i hmai chhun zawngin éng keng tawh suh." Tiin ka phone light ka on nghal a.Engtinmah min chhang lo.








Ka khumah chuan ka bawk thlawp a, zan khatna ani bawk nen, mut ka harsat dâwn tih ka hriat avangin lehkha bih leh zuai ka tum, mahse current a êng thei miah lo.








Ka chên pui lah chu bang kil lam hawiin a mu teh tlata, biak a chakawm loh ngawih ngawih.








Sky-a ka call ta ringawta, rang takin alo la. "Current a ṭha i ti sia," ka ti nghal thawr.A rawn nui leh hawk a, "bro dar 10 a pelh tawh hi,an shut down ve ang chu" a rawn ti ta mai. "I sawi tel si lova" ka ti ve leh,sawi tel se chuan ka in luah kha ka chhuah san hauh lovang mawle. "Ti teh ka ṭhian,engkim hi kan hriat lâwk sa chuan thil thleng tur a thleng kim thei nang." A rawn ti sam leh êt.Emergency light lei angai dâwn anih hi ti rilruin phone chu ka dah ta a.









Khawhar hnêmah tiin games khelh ka tum leh.Mahse vawiin nilêngin ka charge tawh lova, battery ka nei tlem tlat.Ka phone chu lukham bulah ka dah ta ringawta,ngaihtuahna kawmin ka mu meng ta kur mai.








Room pawn lamah thawm ka hre leh ṭhin a.Mutthilh tumin ka in let leh,mahse thawm bawk chu a rawn ri nawn leh ṭhin.








Bill-a khum ka en leh a,a khum hi pawn lama êng rawn lûtin a chhun pha chiah chiah.A mut dan ngaiin alo la mu a,in sawn hlim ve tho ani bawka,a chau ve viau ang.Mahse keichu pawn lama thawm chuan ka beng a ti kham tlat.Ngaihtuahnaah Pumbaa thil sawi bawk kha ka ngaihtuah chhuak leh a,hei hi a sawi fo ṭhin kha animai lo maw.








Phone light on in,bathrooma chhuat nawhna chu ka la hmasa a.Light off leh in,thawm dim thei ang berin kawngka chu zim te in ka hawng.Thim thamah chuan mi pakhat ruangâm ka hmu nghal zat a.Ka chhuat nawhna ken a hmawr buk lam chuan ka nawr nghal sawk mai.







"Hey Simba keimah" Pumbaa aw ani,ka hawlh na mang si lova,a rui zawk emawni,a pai chhawn chhawn mai. "Simba ka nilo" tiin ka nawr lui leh hrâm.Han fiam chhin hrim hrim kha ka chak ve a.







"Hruaizel,a tawk viau e" tih leh min bawh a rual nghal.Kawngka bulah chuan min bawh thal rum a,min khawih chhunzawm dawn emaw tih laiin a vawih min barh,avan tenawm tak. "Zanlai thlifîm anih kha" tiin a tho zui a. "Hmela léh,va e rawh" tiin ka chil ka chhak nghal ṭhuai.







"Ka earphone a chhiaa,min lo hawh tîr teh." A phone light a ti êng nghal a.Kan thawm a rin tehlul nen Bill-a lah chu a mut dan ngai bawkin alo la mu ngar ngar.A mangchhe lo ve hle mai.








"I duh chu la la,chhuak vat rawh,ka mu duh ania," Bill-a a bih ngur ngur chu ka tei thei der lo. "Simba,an in an na hi sawi tur a tam mai.A thla chu ani lovanga,a rawn nung leh pawh ani maithei." Tiin a phun leh sur sur a. "Shhh engmah sawi tawh suh,kha hei hi la la,naktukah kan inhmu dawn ania.Class ṭhulh tawh loh tur," tiin ka earphone chu a kutah ka hmeh bêl chawt chawt a,ka nawr chhuak nghal.








Hmêl in ang deuh hi chu an awm ve a, Bill-a leh room luah tu hlui kha lo in ang viau pawh nise,amah ani tihna ani kher lo.A rawn luah thar ve chauha,a awm ti nuam lo zawnga awm ka duh lo bawk.








Ka phone lah chu vawiina ka ṭhen tak leh kar hmasaa ka ṭhen ten an rawn call sek avangin ka switch off ta ringawt.Han block êm chu a hmeichhe hna in ka hre ve deuha,tihian thlakhat vel a liam hnuah chuan an reh ve leh mai ang.Hmeichhia te hi engnge maw an hriat ṭhin ni,ṭhen an nih tawh te chuan intih buai sek loh tur ania,mahni nihna hi hriat chian ṭhin tur.An rilru tina tu ka ni a,mipa ṭha ka nih loh zia te hi an hre mai lo emawni.Zûn ngah ta fam chu ka zûnah an uai laklawh te pawh ani mahna.









A hmaa ka buai fo ṭhin angin ka lu a rawn hai leh ngut ngut tawh.Ka beng a kiu leh vawng vawng a.Ka khaw hmuh a fiah lovin,engkim chu a buai leh ta vek mai.Khumah chuan ka let tawp a,ka beng hupin ka chhing leh vang vang.A hmaa ka hriat ṭhin ang tho, "Holmes" ti a,mipa aw in min koh na ri chu ka hre zawm leh zat.He thil hi engvanga awm teh hrep nge anih?kei hian pawi ka khawih leh angem? Tih chu ka ngaihtuahna luah khat tu ani leh ta.









🌸



(Thawhṭan zanah kan in hmu leh ṭheuh dawn ania,chhiar nuam vek ule😊)


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 4th, 2023, 12:36 pm

He Is My Girlfriend



Chapter 3:





Bella-i pov:





Khum lehlama mu Simba rum ri chuan min ti harh. Mut ṭhat tumin, ka in let a, mahse a rum ri bawk chu ka hre leh ṭhin. A mu buai anih ringin sawi harh tumin ka tho chhuak a. Mahse, na tih hmel tak hian alo vial ngawng ngawng mai. Current a awm silo, ka phone chu ka la vat a, flash light ka on nghal.








Ka'n enchiang chu thlanin alo bual chhuak vek a, alo ṭhen tlawk tlawk mai. "Simba, i harh em?" ka tihngaihna hrelo chuan ka sawi nawk nawk a. Ka biakna chu hria ang pawhin a lang lo, a eng ber nge na ka hre bawk si lova, Sky-a ka call ta ringawt. A la thei miah lo lehnghal.







Midang pun tura chhuah ka tum chu ka kutah nghet takin alo vuan a. "Min pui rawh" a ti seh chilh nawk mai. "I engnge na,i pum a na em ni?" a thlan tla nasa lutuk avâng chuan a pum a na anih ka ring ta ngawt.







Min chhang tawh lova, ka kut vuan tur pawhin tha a nei tawh lo. A thaw dép dép a, dawt sawi ang hlauh, na nei ang pawhin a lang leh tawh lo. Tui takin a muhil leh daih. Ka mit vai emaw ka mumang aniang ti dawn ila, ka hmu chiang ropui si. Angaihna ka hrelo hle ani.







"Gamer" Simba ka en reng lai chuan ka khum awmna lamah ka u aw ka hre thut.
Ka hawi phei nghal a, a mitmeng de sar chuan min lo en in, "lo mu tawh rawh,i chau lutuk ang" tiin khum chu a melh pah zawk a. "Khawiah nge I kal bo daih,keimah chauhin min chin fel tîr i tum em ni?" ka lungawi lo ani tih hi hre ve hrim hrim se ka duh, ka ngaiin ka la thlâkhlelh zia te hria se, a kal a hun hma chu ka kiangah awm reng se ka ti.







"Kawng ka bo alawm, tûnah chuan ka zawng hmu leh ta che." Min ngai ve tho tih a mitmengah chuan a hriat ngawih ngawih. "Bill, kuah che ka chak, inhmu thei reng chunga in khawih theih miah loh hi sawifiah theih si loh, thil hrehawm tak ani." A hmaa ding chung chuan tiin ngai em em in a hmel, ṭha zet chu ka en zui vawng vawng. Ka nu chhûl ka ṭawm pui, manganna leh hlimna ka ṭawm pui ṭhin, ka ṭhian ṭha ber leh ka nun ruak luah khattu ka phîr pui hian chhûngrila ka sûn na hi min ṭawm pui ve in ka ring tlat ani.








"Bella, hmeichhe huaisen tak inih kha, khatiang thu kha i ká aṭang a chhuak tur anilo. Ni e, kei chu ka thi tawh, Siam tu'n min siam tirh ata khawvel khata ka chên pui ṭhin. Ka hmel ang chiah pu, thinlung hmunkhat ni bawk ṭhin kha, tûnah chuan kan khawvel a dang tawh. Ka khawvel thara kal lovin i kianga châm tluka châk ka nei lo. Mahse, chu chu chunglam rorêl dân ani miau si lova. Ka kal a hun hma chu i bulah ka awm reng ang, he thu hian hun reilote tal chu hnem ve che rawh se." Ni e, phîr kan ni a, ngaih pawh kan in ngai, keimah ang bawkin tûnah pawh hian hrehawm ati ve tih chu a hmêlah a lang chhuak vek a. Thawveng taka nun hmang ṭhin, a ṭul hunah chuan ka u a nihna lantira, mi puitling tak ni ṭhin pawh tûnah chuan thihnain min dang ta si a. A dinhmun hrechiangin, a theihtawp chuan min hnem ve. Mahse mittui hi luang chhuak tura duan ani miau a, a luanna tur diktakah a rawn luang leh nge nge ṭhin.









"Kum 7 kan nih laia thlarau i hmuh avanga ka pa'n a vuak vak che kha ila hria em?" hun kal tawh sawiin, za lo tak hian a nui ro hak a. Ka mittui hru hulin, khumah chuan ka ṭhu thla ve, "khata ṭang khan vawikhatmah ka sawi tawh ngai lo. Nangchu i fing hma bik ê, engtinnge hmu miah lo anga i lan char char theih bik." Simba a rawn harh ka hlauh avangin ka ṭawng ring ngam lo.









"Ka hmuh thu ka sawi khan ka hmuh loh phah dawn chuang hleinem." Alo ti sam leh êt mai. Ka mut chhuak a reh tawh bawk nen, ka u ka la ngai tho sia, titi pui ka duh avangin bulcony ah ka chhuak ta ringawt. Min rawn zui ve zêl bawk a.







"Holmes tih hming i hre ngai em?" Kan thu kal lai thlâkin ka kal chhan ber thawk turin hma ka la ṭan a. "Hre lo, thu hriat i nei tawh em ni?" bang bo tak chuan ati leh hé háw. Ka lu lo bu nghatin, "I ṭhianpa Sky-an i thih zan khan I roomah Holmes tih hming inziahna card a chhar a. Ciggarete bung te pawh a hmu tel bawk. Ṭhian i neih thu min hrilh miah lo." Thil engkim kan in hrilh tawn ṭhina, a ṭhian thar tawn thu min hrilh lo tih hrechhuakin ka thinrim thar leh thut.









"Â hrilh che ka tum laiin thil a thleng leh thut anih kha. Min hriat kha, thla thum tal ka kawm tlin loh chu ṭhianah ka pawm ve tak tak lo." Atih leh takah chuan tlemin ka lung a awi ve ta deuh. "Bill, Holmes chu Gang hming ania, han ngaihtuah chiang teh. I hriat pawh ni lo chuan an that ngawt thei lovang che." Kan thu ngaiah ka lêt leh ta.








A ngaihtuah ve vang vang a, a hmui pet leh zeuhin, "ka pa hmelma te an ni maithei. Vawikhat chu class ka kal tur min zui ru tu an awm tlata ka hriat avangin, Sky-a nen class kal lovin kan châng tawh. An zinga pakhat chu kan man nghe nghe. Ka pa el pui te an ni awm e. Mahse, Holmes tih tak chu ka vawikhat hriatna ani." Ngaihtuah muk tak chuan ati thawp leh sup a.








"Ka pa hian a hriat i ring em?" Kei aiin ka pa nên an in be fal ngun zawka, ka hriat ve loh hriat a neih ka ring tlat. "Hria ang, a sumdawnna a zau a, hmelma pawh a ngah, Bella, he hostelah hian min that anih chuan, nangpawh an la rawn zawng hmu vat ang che. Min pui turin ka ti ve ngawt che a, a hlauhawm dawn ania. Ṭhian thlang fimkhur la, Sky-a hnaihah awm reng ang che." Thutak deuh chuan ati leh a. In ka chhuah san aṭang khan buaina ka tawk dâwn tih ka hre daih tawh. Tualthattu pawh he hmunah ngei hian a awm anih chuan, a thah tâk hmel ang chiah ka pu bawk nen, min chhui chiang anga, min bi tum dawn tih pawh ka hria. Chu hun chu ka nghâk zawk mai ani.








"Pawisa i nei em?" thu dang a rawn sawi leh daih. Ka credit card ah tlêm a zawng a awm anga, chu bak neih ka nei miah lo. "Thudik zawn chhuah chhûng a rei dawn chuang em ni. Thlahnih daih tur chu ka la nei." Ka tih chuan a chek hluk a,
"Room hi an la khawih danglam lo anih chuan, i khum hnuaia carpet saw keu la, ka card a awm ang. Mahse i games thil vel lei nân i hman chuan ka pen ang che." Tiin a nui leh suk. Thlarau ani tih a theihnghilh leh tawh animaw, a pen chu ana tawh lo viau ang.









"Mu tawh rawh, naktukah engnge thleng dawn engmah kan hrelo. Mut kham lova awm chu tha a ṭhum duh." Kawmthlang lam thlir vung vung pah chuan ati thawp leh sup. "Zanin chu a kí ti hniam deuh rawh aw," zantin min awih mut ṭhinna hla sa zawi deuh tura tiin roomah ka lut leh ta a. Simba alo la mu tui hle, nichin khan a mang lamah tibuai tu a nei nge nianga na a nei hrim hrim tih pawh ka hrethiam ta hauh lo.








Khumah chuan ka mu leh ta a, Hlutei ka number thar ka la hrilh loh avangin whatsApp ah lûtin, ka number thar lo save tur chuan mesage ka hnut chhuah a.







Dân ngaite in ka u chuan min awi leh ṭan ta. Hetiang hian kum tam tak a zai ri hre thei ila ka ti, chung lam ami khian ka lak aṭangin la hrang lo hram se tih chu ka ṭawngṭaina ani.







"Anilo,keimah ka ni lo," Simba aw ani, mit men a harsat em avangin ka in let leh rih a. "Ka ni lo,ka ni ngai lovang" ring taka a rawn tih leh takah chuan ka harh chiang tawh hle. Bathroom chhûng aṭang chuan a rawn au leh chiama, a in hrosa ani zawk mah ang chu. "Buaina a nei anilomaw" Bill-a pawh chuan alo ti ve a. "Va en chhin teh, nizânah pawh a buai tawhin ka hria" zi mar ṭaih ṭaih chung chuan tiin ka phone ka khawih san.







Hlutei message alo awm vâng tawha, "Lo haw vat rawh, ka ngai tawh che." Ka nuih sak, haw chu ka châk tawh reng, mahse engmah ka la ching fel silo. "Sunita-i lo hrilh ve mai rawh aw, a number ka nei lo ania." Ti a thawn leh in, bathroom aṭanga ka u rawn phei chu ka lo en hâ a.







"Rilru lam chian lohna a nei anilomaw," ngaihṭhat loh hmel tak chuan a rawn ti. Ka hriat bik loh avangin ka dar ka lo san khum âk. Room kawngka an rawn kik nghal zat. Mut lai lo chuan a reh tak tak dâwn lo anih hi.








Kawngka ka hawng a, hmel ngai bawk, Duhzuala leh Sky-a an lo lang nghal a. "Morning, i mumang a nuam deuh animaw" Sky-an lo ti nghalin, ka chhânna pawh ngaihsak lem lo chuan an rawn lût tlang nghal a.








"Simba, kan lokal e, Open Sesame" Duhzuala'n bathroom kawngka chum pah chuan ati zawm zat.







"Engtia rei nge a awm tawh?" Sky-an min zâwt leh a. Ka u ka melh nghal hú mai, "ai mit thlawn aṭangin ti rawh" thutak deuh hian alo ti a. "Ai mit thlawn aṭangin" ka ti nghal zat. "Bill, uanna hun anilo ania" Duhzuala'n lungawi lo tih hriat tak hian alo ti hmuk. "Hrethiam rawh, nizânah mangpui a mang lova," Sky-an lo tiin min siai khum leh suk mai.







"I tuiral dawn" ka u chuan ka beng bulah a rawn ti leh sur sur. "Chian lohna a nei em ni?" zawh bik pawh nei lo chuan ka ti leh a. Ka u ka melh rum leh hle tawh. Nui duh miah lovin ala faifuk rût rût zui a.







"Engnge khatia in lo chum vak vak, ka sik chhuak ṭha thei hleinem. Mi heiden rial laia khawvel tawp tur ang maia thawm in lo neih." Simba chuan bathroom kawngka rawn hawng pahin a rawn ti chhuak lung lung mai.







A ṭhiante hrilh hai takin min siam tih a hre miah lo anih hmel. Duhzuala phei chuan ká ho hian a en a, a chal a khawih sak ringawt. "Simba, tu zûn nge I phurh suala, khati vaka i rak. Khuai bu la zo hlim hmel i rawn pu chhuak lehnghal."
Ati nuah nuah mai, Simba hmel bui lûk chu keipawhin mak ka ti.







"Tûr ei zo hlim hmel pu chung khân ka nuih ve e min tia law, lokal teh, i mit ka lo thlak sak ang che." Simba lungawi lo chuan tiin khum lamah an in kuah phei nawk nawk mai.







"Min lo zui la, thil sawidun lawk ang hmiang," Sky-a chuan tiin a ṭhiante pahnih khuma in chai chu nuih suk leh sukin, a chhuak zui a. "Va zui rawh, hriat a neih belh maithei asin, zawng pahnih saw ka'n in fiam pui ve ange" ka u chuan lo ti ve in, Simba te awmna lamah chuan phur takin a tlân phei. Engtin tak in fiam pui ve ang maw.








Sky-a chu ka zui ve ta a, a laptop tinungin, ka u thih zâna a room chhung awmdan, thla a lâk chu min entira. Zial bung pahnih chhuata rah hrual hrep tawh chu ka hmu ve nghal zat. "Wills Classic Mild Ciggarete anih hi, rim a nei ve lem lo. Bâwm khat ringawt pawh hi ₹350 vel bawr ania, a zu tu hi hostelah an awm ka ring lo. Mi nei nung tak anih loh vêk pawhin, rûk ru ani tal ang." Atih chuan ngaihtuahnaah ka pa hmelma, ka u in a sawi kha a rawn lang nghal a. "Holmes chu Gang pâwl pakhat iti a, khawiah nge an awm i hria em?" thlalak dang en pah chuan ka zawt nghal mawlh mawlh.








"An awmna ka hrelo, mahse zawn hmuh dan kawng a awm ang," atih chuan beiseina nen ka melh nghal vat. "I u id lem ka kawl alawm, bar ah lo chuan hmuh tur an vang ang. Zanah kan pahnih chauhin kan kal dawn ania." Tiin ka u thihna chungchanga hma kan lak dân tûr chu a rel fel leh ta. Ka tawng lovang tih ka hlau, awm lo se chuan kawng dap dan ka hre dâwn silo.








"Class kal angai sia, chaw ei phawt ila tiraw," a laptop off pah chuan tiin, min nuih leh sâng tawh. Kan pahnih chauhin kan awm bawk sia, a mitmeng thiltithei takin min en reng chuan ka lungphu hi a thlawk chhuak mai dawnin ka hria. "I dam lo em ni, i va tai ve" tiin ka pang a rawn dek zui. Ka tawlh sawn nghal dawrha, "ka ril a ṭam tawh, kal vat ang" tih leh tlân ka rual nghal. Duh zawng te bula awmdan ka lo zir hmasa lo chu a pawi ngawt mai. Ṭhing min ti ru ngawt ang.








Kan room chhung ka lût chu a thlarau ber alo bengchheng ber a. Simba te ṭhian dun lah chuan thlarau a awm ve ani tih pawh hre miah lovin an la in fiam tui em em lehnghal. "I tlan chak lutuka, i hniak i theihnghilh daih alawm," Sky-an ka beng bulah a rawn ti sur sur mai. Ka hawi lêt vat a, ka chapal thla engmah ka hmu lo. "Zawng zawng duh suh, i hniak chu heta hi" tiin amah a in kâwk vah mai. Duhawm takin min nuih leh a, a mitmeng de sar, pawi sawi lo tih hriat ngawih ngawih chuan min ti zâm chhe lo chauh.







Lai chung chungin ka nuih lêt ve tawp a. Ka aw thian leh kharh in, "Simba,chaw ei a hun" tiin kut ka beng zawm zat. "Engnge chanchin," ka u chuan a rawn ti nghal vat a. Midang an awm ve bawk si,
chhan lovah ka tlâk ta ringawt.








"Hringnun hi ava wow love, phuloh malsawmna te hi dawng ve thut ila. Pride Land hi chu a vul tawh viau ang." Duhzuala'n Simba nghâwnga rawn kuah phei pah chuan a ti lung lung mai. "Thawvenna ṭha chi, Ralte bengchheng ho aia aw bâwm ṭha i neih kha phuloh malsawmna chu anih kha.." Sky-an lo tih sanin inhnuaiah kan in zui thla hlawm a.








"I va ang ve,mahse i nilo.Rawn lût thar ini tiraw?" Tamil hmel pu, tleirawl pakhat chuan min rawn be hlawl. "Prem, mi thar hi lawm viau suh," Duhzuala'n alo ti hmanhmawh. "Fîmkhur rawh aw, I hmel ang hi ka pu anih chuan kan khuaah ka haw vang vang tawh ang." Ka beng bulah chuan rawn tiin, kan piaha ṭhutnaah chuan a ṭhiante chaw ei a zawm ve nghal a. "Hmel chhuan tur i neih loh vang alawm ka pa'n inah a khung char char che." Ka u lah chuan a rawn ti zui a. Hmelṭha leh chhia lam a sawi pawhin ka hrelo, thil engemaw hriat a nei ve ah ka ngai. A ṭhian te be pahin min la melh zauh zauh zui a, awm a nuam duh teh chiam lo.








"Prem-a anih kha, Sikkim aṭanga lokal" Sky-an ka melh tak rengah chuan alo ti. "Simba, rawn lut thar rau rau ah pawh lar tur bik hi chu awm ve ania. I inthlahrung ve deuh em?" Duhzuala'n Simba melh ralh ralh chung chuan ati leh a. Simba a rum nghut, a chaw ei lai chauh ngaihsakin midang titi a tuipui a zawm ve duh ṭhak lo.








"Vawiin chu ṭhulh leh mai ila, game li nga vel khelh ava chakawm ve." Stepa kan chhoh laiin Duhzuala'n a ti leh rauh a. A ṭhiante pahnih chuan an thlawp zân lo anih hmel, an sawi zui pui duh miah lova, ani pawh a ngawi zui ve mai.








Keipawh hun khawhral lova ka tih tur tih vat angai. Sky-a thurâwn chu pawm viau mahila, hostel chhûngah pawh chhui tur chu a awm ka ring.







"Games khêl rêng rênga hun in hman ṭhin vang hi alawm in puitlin theih loh. In chhungten harsa takin in zirna tur an tuaka,nangni lahin it's my life in tia. Zirlai ngaihsak lovin phone in bih hnem zawka, hetiang te chuan in ram pawh khian hma a sawn har ang." Ka u chuan alo ti ve lauh lauh a, tumah lah chuan a ṭawng an hre thei der silo, a rak thlawn mai mai ani.







"Dar 3:30 ah kan bang dawn, lo chhuak suh aw." Sky-an rawn ti sup in, Duhzuala nen an room lam panin an phei a.


"Bill, games i khel ngai em?" Simba chuan bathroom pan pah chuan min zâwt leh hlawl mai. "Khel ngai lo ti rawh," ka u in alo ti vat. "I khelh ngai loh chuan khel ve rawh, nizâna min khelh sak kha, ilo chak tak tak ania. I thiam zawng tak aniang." A mitmeng lerh tak chuan min en in, a nui suk a. A nui hmel mawlh kha, a ha a varin a rual ṭha si, avan mawi tak. "Hey gamer, keimah chauh min ngaihtuah rawh." Ka u bawk chuan alo ti leh. Simba ka en reng tih ka hrechhuak ve chiah, mak tih hmel takin min lo thlêk hú a, Sky-a a tluk lo tiin ka in thing harh vat. "Ka khel hman lo," tiin khum lam ka pan san daih.








Ka phone a rawn ri zawm zat a, ka nu hming a lan avangin bulcony ah ka chhuak phei a. "I lak pawhin i awmna sawi miah suh," ka u chuan alo ti pawr leh hle tawh. Ka nu call chu ka la ta a, "Chhuanawm, i pa alo haw dawn, i lo haw vat angai ania." A aw aṭang chuan ka pa chu alo haw tawh a ang. "Nu, ka tih tur ka la zo lo, ka lo haw vat dâwn alawm." Tih leh phone dah ka rual nghal. Ka pa alo haw tawh chiang lutuk, ka chunga a thinrimna ka nu chungah a hri thla ang tih ka hlau. Ka u thihna chhan hi zawng chhuak vat ila ka van ti tak. Ka nu'n a rawn call nawn leh, ka pa tih tir anih ringin la lovin ka switch off ta ringawt.









"I sim ila thlâk lo em ni?" Ka u chuan ati zawi leh sup. "Thlak tawh e," ka ti liam puat. A ṭawng leh hma chuan lo ṭawng khalhin, "chaw einaa min lo be tu kha i hre ṭhin tiraw?" tiin ka zâwt nghal a. Kawmthlang lam thlir chung chuan a in ngaihtuah leh rih. "Ka hre maithei, i ringhlel deuh em ni?" ati leh a. Ka lu lo bu in, "hriat a nei ang, ka zawn hmuh angai." Tiin room kawngkhar ka pan nghal.








"Engmah hriat lo nei lo ta se, engtinnge i tih ang. Ka kutah i dah ringawt ange, ka ngam miah lo ania." Min rawn zuitu ka u chuan ati leh zawt zawt. Ka chhang peih lo, a room awmna ka hriat loh avangin Sky-a te room ka pan ringawt.








Kawngka ka hawn rual chuan an lo au nghal tuar.Ka thil hmuh avang chuan ka ip chawi a. "Kik hmasa ta che," Duhzuala chuan a kekawr ha ṭha chawt chawt chungin alo ti vin ṭhawt. Ka hmu hman vek tawh, mipa ho hi engnge maw an hriat le, saruak ngal ngatin engtinnge an awm ngam zawk. Hmeichhia ka nihna hrelo a awm avângin zak lo ang deuh chuan ka âwm ka ti khauh lui a.








"Khawiah nge Prem-a room a awm?" aw thum thei ang ber chuan ka ti. Sky-a alo meng dur nasa mai. "Inchungah han chho leh rawh, a piah berah a awm ang." Duhzuala'n alo ti nghal zat. "Min hmu hman lo tiraw," Sky-an alo zawi leh sup a. Ka nuih ringawta, kawngka ka khar zui nghal.








Inchungah chho in, Prem-a room chu ka zawng nghal a. A piah ber ah chuan pheiin, kawngka ka kik dat dat. Lût tura min tih hnuah ka luh ve tawp a, chhuak turin alo in duang fel ât tawh.








"Chaw einaa i sawi kha, min hrilh chiang deuh thei angem?" peh hel lovin ka zawt nghal thâwr mai. A mit ko a san zuka, "an bei tawh che em ni?" atih chuan hriat a nei ngei ani tih ka hrethiam ta. "Bei lo, mahse min beih thut takin tute nge an nih ka hre duh, lo in vên nan." Ka ti ta ringawt.








"Holmes an nih kha, Delhi chauh nilo India ah chuan gang lian pawl tak an nia. I ṭhian kawmte zingah pawh khan an tel ve maithei. An in thukru hnehsawha, zanah chauh an che ṭhin." Mi pawh ngaihsak ṭha mang lo chuan tiin, a bag ah turah zirlaibu a khung mawlh mawlh a.







"Engtinnge zânah chauh an che ṭhin tih i hriat." A bulah kal hnaiin ka zâwt leh, "engzatnge an nih zawt bawk rawh, min thattute an nih phei chuan thildang lâk an neih leh leh neih loh te zawt la." Ka u in alo ti leh zuah zuah. Ka tihngaihna hrelo chuan ka melh leh hrâwk ringawt.







"I hmel ang pu mi pakhat a rawn luh aṭanga thla hnih hnuah kan hostel bulah khuan car dum a ding ṭhin. A room pawnah mi pahnih an awm ṭhin bawk, mahse hmai kawr an vuah. Ka tlai dawn, chhuak tawh rawh." Ati nghal zung zung. Ka u chu ka melh leh a, engmah ala hrechhuak lo aniang, a hawi â ruai mai.







"A room a an lût lai i hmu tawh em?" chhuah dawn chuan ka zawt leh zuai. "Hmu lo, mahse a thih zan khan an awm rei. I ṭhian kawm te lakah khan fîmkhur ang che." Tiin kawngka hawngin min nawr chhuak.







Ka ṭhian kawmte chu an fel in, an rilru a zau a. Ka u thihnaah pawh rinhlelh an neih ve ngei kha. An laka ka fimkhur ve kher a ṭulna ka hrelo, Sky-a tih loh chuan hmeichhia ka ni tih hrelo se, chu bak chu fimkhurna tur ka neih awm ka hrelo.







"Ka pa hmelma te chu an nih ka ring, an nih loh chuan min thah an duhna chhan tur ka hrelo." Stepa kan chhuak lai chuan ka u in a ti leh a. Keipawhin an nih ka ring ta ber. Mahse mak ka tih chu, Sky-a leh Duhzuala ten an hmu hmasa ber a, room bul lawka awm te hian thawm an hre miah lo tihna em ni?








"I room bul ami te hian an hre ve angem?" room thlen thlâk dâwnah chuan ka zawt leh a. "Hre lovang, an drinks ṭhin a, hmeichhia an hruai lût ru fo mai." Ngaihsam deuh chuan tiin roomah a lût tlang leh daih.








Chutiang anih chuan, warden hian a veng hneh tawk lo tihna. Gang an nih tak tak chuan thawm awm miah lovin an that thei ang. Hostel chhunga awm te hian amaha intihlum anilo tih chu an rin vek ka ring bawk. Sawi chhuah ngam lohna chhan chu an nei chiang ani.







Kawngka ka hawng dâwn chiaha, Simba a rawn chhuak thut. Perfume a in kap nasa êm em lehnghal. Ka hnar ka tuai nghal vat a, "hmeichhe duh chi" tiin a nui suk. A hmeichhe sawi zingah chuan ka tello phawt e.







Bathroom ah ka lût tlang nghal a, ka u lo luh a tum ve leh ringawt. "Ka en dâwn chuang lo che," dan ka tum pawhin a ti teh tlata. Ka ṭuah tawh em avângin ka dang buai hman tawh lo. Commot ah ka ṭhu nghal a, min hnungchhawn zawngin a ding. "Kum 12 kan nih laia i santén kha ila hria em?" tiin a nui khur dur dur. Ka ngaihtuah laiin, "i pum a na lutuka, inthiar tur pawhin i thawh theih loh kha. Ka chawi sawn dawn che lahin na iti zêl sia, khumah i cheh tawp kha." Nui pah chuan a sawi a, a sawi zo hleithei lo, a nui dir char char mai. Ka mitthlaah a rawn lang uar uar a, ka mittui a tla ringawt. Ka phir pui ni chung hian kei aiin a puitlinga, khang hunah khan kîr leh ka chak. Min buaipui nasat theih zia kha, ka bed sheet thleng khan min suk sak vek a. Ka nu a chhâwk zangkhai thei hle anih kha.







"Wills Classic ciggarete anih hi, a to asin. I room mate chu ava hausa ve" a dinna bula toothbrush dahna chu a thlêk leh rên râwn. Wills Classic, ni e, he ciggarete ngei hi Sky-an ka u thih zan khan a hmu tak e.







Ka mawng ka silfai vat a, tho chhuakin toothbrush dahnaa ciggarete bâwm lo awm chu ka la nghal a. A chhûngah lighter alo awm tel bawk.










"Bill, ka ciggarete ka theihnghilh em?" Ti a bathroom kawngka rawn kik tu chu Simba ani. "Ciggarete maw?" Ka ti zuai raih. "Ka tlai dawn, a awm chuan lo khawih suh ang che. Midang zuk ka phal lo ania." Tiin a thawm a reh leh ta daih a. Ciggarete bâwm chu ka ennawm leh ṭhin, a chhung ami chu la in, lighter awm sa chuan ka tinunga, rim a neih leh neih loh hriat nân ka zu chhin a. Rim a nei lo tak tak, Prem-a thusawi te ka ngaihtuah chiang leh a, ka ṭhian kawm ah fimkhur turin min ti kha ania. Simba hi kan chhui lai mekah hian alo tel ve reng angem? Ni lo, a tel thei lo, to viau mahse a inthuam dan en hian heng mai mai hi chu a zu pha ve ang.







Ka zial zuk lai chu ti hlumin, bathroom aṭang chuan ka chhuak ta a. Ka thawmhnaw thlakin, bar kalna tur mipa thuamhnaw lei turin ka chhuak zui.











Hruaizela pov:






Global college aṭanga hostel hnai ber pawlah ka insawn tawh bawk a. Tlai a har ṭalh tawh mai. Ti chung hian kumtluang par pawhin a nghah chhuah zawh loh kan Pumbaa chu ala tlai reng tho. A room mate Sky-a pawhin nghak peih lovin a kalsan tawp ṭhin kha ania. Kan tih ṭhin dânin, Sidar buk bulah chuan kan nghak leh rên râwn a. Class ṭan dâwnah thlan tla hluamin a rawn tlân thleng ve chauh zêl.








"Hey mut duh, chaw i ei tui thei ropui si. In paih thawl nan hun i mamawh hnem thei lutuk. Ei vak vak tawh suh ang che" Sky-an alo ti nghal bawrh bawrh. "Lehkha i thiam thei chet chut si," tiin ka lo tuihnih ve kher a. A haw ngam lo, mahni nihna hi chu haw lo ngam ila a ṭha mai.







"Min lo be buai sek alawm, hmeichhe ho hman zia hi," ti nuah nuahin class min pan san daih. "A di hlui nen an in be ṭha leh tawh aniang," Sky-an ka dara rawn kuah pah chuan ati a, a hriat hlau takin kan nui ru char char. A hnungah chuan kan zui ve ta a, kan subject lâk a in ang bawk a, classah pawh kan ṭhu ho ṭhin.






A hnung ber dawtah chuan kan ṭhu leh a, hnam dang hmeichhia te lah hi mitmeng nalh viau e ti lo hian an ke a bal zêk a. An thluak ṭha viau mahse an ke bawk hian ati bam leh vek zêl.







"Saw ke phah mawi'in a melh si leh sap tawh che ania." Pumbaa chuan kan piaha ṭhu hmeichhe pakhat melh zawk pah chuan ati leh tawh. Ka melh peih lo, tel tak rim a nam leh tho ang.








"Lalduhzuala ding rawh," Sir Kumara'n a tarmit kar aṭanga rawn melhin a ko leh nalh mai. Kan zîngah chuan a hming lam thiam ber ania, a tawrh phah fo dawn anih hi.








"Computer engeenering pawimawhna sawi rawh le?" tiin a zawt leh a. Pumbaa chu a ngawi rauh rauh a, "ná, Sir, keimah chauh min zâwt ṭhin a. Ka ṭhianpa hi zawt ve tawh rawh, a thiam lutuk." Atih chuan ka aw ka lo thian nghal, a laiah ka lo ṭhu kher kher ani.








"Tunge i ṭhianpa chu a hming?" Sir pawh chu zawhna ngai a zawt tlang dawn emaw tih laiin vawiin chu a tho fuh deuh animaw.








"Lalhruaizela, a class kal zât aia bialnu nei tam zawk. Nitin hmeichhe phone number thar haw pui thei, a hmui pawh a virgin tawh lo." Kan Pumbaa mai mai chu'h, avan ṭul lo ṭhin. Midang an nuih dur dur laiin a ke ka rah sak a, a na ve viau ang. Ban hunah ka hnek chiang viau ang mawle.








"Aw ding ta che," Sir chuan a la ti deuh deuh a. A zawhna chu ka thiam ang tawkin ka chhang ve, a bu nghut nghut a, "tlaivarin zir ang che," ati leh daih.







Ka ṭhutnaah Duhzuala bawk chuan a kut tum lo hum ruhin alo nghat khanglang. Ka ṭhu thla chiaha, a point takah ka sawh zui. Ṭe chhuak ngam silovin ka rum tak nghut kha.







Break ah Saizami nen kan inbe zuaia, a aw ka hriat hian ka hahdam ṭhin. Class chhûng boruak te rawn sawiin, Chhemawla leh Thankima te chunga a lungawi lohna thleng chuan a rawn report leh thlap. Nui chungin ka lo chhang a, in enkawl ṭha tura tiin kan inbiakna ka ti tawp leh ta.








"Kha zawng kha maw?" Sky-an alo ti hú. Ka khi suk a, "tun atân chuan a tawk rih viau e," tiin ka chhang mai. Ni e, a tawk rih ti tawh mai ang, ngaih zual changa biak bak tih theih ka nei silo alawm le.







Chawhnu class pawh mutthluk theih loh khawpa strict kan hmachhawn leh a. A thusawi kan hre ṭha thei silo, a ninawm tluan zak.








Class bânah Pumbaa chuan a nau piancham ami tur lei a duh avangin bazarah ka kal pui a. Sky-a erawh a hnaah kal angaih tawh avângin min rawn zâwm thei lo. Ani hi Home a seilian ani a, anu pawh chuti tho. A zirna tur zatve hi chu aman thawkchhuakin, hna pawh a zawng nasa ṭhin. Kan kumin ala pha chiah lo bawka, hna sang la thawk thei lo mahse, part time in bar ah te thawkin, a ṭul chuan a muṭia mai ṭhin. Thawh hreh a neih lohna lai tak hi ka ngaihsânna ani ve tlat.








"Ka u hian a phal leh lovanga" ṭhiana'n hmeichhe kawrfual khup khuh chen vel khai pharh chung chuan ati a. "Pumbaa I u thu ani tawh hleinem, mawi itih chuan lei sak hmiah rawh, a ho lutuk." En pawh en ṭha lo chuan ka lo tih sak ve mai. "U atân Police strict lutuk nei ve ta la, kha thu kha i sawi miah lovang," tiin a kawr en lai chu a dah leh a. Ka ngawi mai, mi chhungkaw chungchanga lo inrawlh ve vak kha Hruaizela dânah a awm ve lo. Ka nun hi chu a hakuna matata ruih mai ani.







A duh ang a lei hnuah kan thawn leh a. A tlai tawh bawk nen, hostela paneer hmeh ai chuan tiin street food in kan in hnawh puar.








Thim hnuah hostel chu kan thleng ve chauha, Bill-a a awm lo. A ṭhiante nen an inhmu ve anih ringin Pumbaa te roomah ka phei a. Sky-a pawh alo awm lo, "hemite pahnih hi an in biahthu anilomaw." Atih chuan ka nui chhuak hawk. Mahni anpui kawp ching ṭhian ka kawm ngai lova, Sky-a pawh hi chutiang mi chu anilo tawp ang. Nghah pahin games kan khel a, zanin chu ka fighter hmanthiam Alucard hmangin Delhi number 1 tal nih ka'n tum teh ang. Games khelh tawh chuan zirlai lam a lang tawh lo. Karleh test tur pawh kan tlai lam um pawng par leh mai aniang chu.








"Tukinah ruang an chhar leh tawh kha, kan hostel thlang lawkah lehnghal." Pumbaa chuan tiin kan game khelh lai chu a khel chhunzawm mawlh mawlh.








"Hmeichhia nge mipa," ngaihsak vak lo chuan ka zawt mawi hnai ve a. "Hmeichhia mawle, a lu ah hliam a nei, a beng lehlam a bo bawk. A ril a chhuak vek bawka, ramsa beihna anih te an rin mai mai kha." Atih leh takah chuan ka games khelh lam ka rilruah a awm tawh lo. "Ni lo, ka tih anilo" ka rilru chuan ka in hrilh nawn mawlh mawlh. Ka kut ka en a, kha hmeichhe ril hai darh tu kha he kut ngei hi ani si. Ka lu a rawn na leh ngut ngut tawh. Ka bengah lah chuan, "Holmes" mipa aw ka hriat ṭhin bawk chuan a rawn ti leh nghut nghut a. "Mi pangngai ka ni," tiin ka ṭawng chhuak ta ringawt.





"Sky-a ten buaina an tawk, hmanhmawh rawh," Pumbaa chuan ka buai leh buai loh lam ngaihtuah lovin room aṭang chuan min kai chhuak a.







🌸



( "Zantin lo dah la, i regu tawh lo lutuka a nuam lo"
te in ti mai mai, zan kâr thlâk pawh hian ka zo ṭha mang lo😆 khawngaihin min lo hrethiam hram ru. Ka theih ang tawk chuan ziah thui ve pawh ka tum, mahse harsatna ka nei a, tunlai chu ka ti hleithei tlat lo mai. Tihian chawl khawmuang lovin, muangchangin kal bek bek ila, chhiar muang deuh te pawhin min rawn um pha ve anga. Ka'n dam deuh anga, theihtawp chuan regu ka lo tum dawn ania😊)


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 4th, 2023, 12:36 pm

He Is My Girlfriend


Chapter 4:




Hruaizela pov:





Ka lu na lutuk avâng chuan step ah ka ṭhu leh rih a. "Simba, kan kal vat angai ania, ana viau em ni?" Pumbaa chuan hmanhmawh hmel taka tiin ka lu ka dawm vawng vawng chu min rawn dawm pui ve ringawt.





"Holmes" mipa aw bawk chuan rawn ti lehin, ka ning lutuk chu ka au chhuak ṭhawt. "Â tui leh mei inkârah ka ding, Simba engtinnge niang, lo han mu mai la. Kan ṭhiante nen kan lo lêt hunah damdawiinah kan kal pui che anga. Nge, damdawiinah ka kalpui phawt che anga, chumi hnuah kan ṭhiante bulah ka kal dâwn. Hei hi tiraw lei lai rapa awm an tih ṭhin kha." Mi lunat naklaiin thu mumal lo lutuk a rawn sawi chhen. Ka thisen a rawn lum leh ṭan a, awmngaihna ka hrelo leh ta. "Holmes tiin min ko rawh" ka duh vang pawh ni miah lovin ka kâ chu amahin a ṭawng ka ti dâwn nge, min thunun tu an awm ka ti dâwn?






"Simba, i meng sen vek ania, lo han mu rawh. Damdawi ei theihnghilh lo la." Ti a kal a tum chu ka pawt lêt dawrh. Tha chak tak ka nei tih rêng ka hrelo. "Holmes mi leh sa te chu thisen châkin an tuihal tur ani." Ka kâ bawk chu ka vêng seng lo ani ber e. Ka aw lah nise, a thum ṭha nangiang. Eng ka ti ta nge, hetia ka awm leh tak mai le, in thunun ka ngai, ka kutin khawih a châk em em hi ka ṭhianpa ani asin.






"Simba i harh em, nangmah ini miah lo ania. Ti teh ṭhiana, harh tum rawh." Ka biangah a rawn beng sawk sawka, tlem chuan ka harh ta deuh e. "A dik dâwn lo tlat," tiin roomah min chhoh san leh a. Dan ka tum lo, ka rilru insual buai nasa lutuk avâng hian ka chau ngawih ngawih.







Ka chhîpah tui a rawn luang thlaa, ka thlan sa lutuk leh ka thisen lum pup pup chu zawi zawiin a reh chho ṭan. "Simba, i ṭha em, pangngai tum teh aw." Pumbaa aw ka hriat chuan ka thinlung so but but chu tui ang maiin a nêm ṭan a. Nizânah pawh khan tu emaw kut ka vawn avangin hetiang chiah hian ka nêm tawh tak e. Kha kut kha tu kut nge ka hre miah lo lehnghal.






"Ṭhiana, i harh tawh em?" min rawn thing leh nawk a. Ka harh ta kâwk mai. "Khawiah nge ka awm?" Ka hawi kual nghal ruai mai. "Awle, film chan lam chu duhtawk teh ang, kan ṭhiante puih an ngai. Kan tlai palh hlauh ange." Min kai tho pah chuan tiin stepah min chhuk pui leh hlawk hlawk.






"Khawiah maw kan kal dawn, eng buaina nge an tawh. Bill-a a ṭha em?" pawn kan chhuak chu ka thluak a fim leh deuh tawh bawka ka zawt nghal zung zung.






"Night club ah kan kal dawn, Bill-a chauh I ngaihtuaha, kan ṭhian pa kumhlun zawk Sky-a ngaihtuah tel ve ta che." Ati leh hluk. A phone a khawih mual mual a, uber a ko dawn anih ka ring ta ngawt a.







"Sky-a chu a ngaihtuah awm loh, Bill-a zawk kha, a der dep ve em alawm, a zawr si. Tumah a hnek tlu zo lovang." Ka tih chuan a rawn nui chhuak hawk. Ka darah a rawn beng thauh thauh a, "a hmel hi hmeichhe hmel atân a awhawm tiraw, Bill-a hmasa zâwk pawh kha hmeichhe hmelṭhatin a hmelṭhaa.....hey kal suh, motor ka ko." Tiin kawngsirah chuan min pawt ding nghal a.







"Nangpawh vani an rah ang maiin I hmui a sen huam renga, hmeichhia ang mai, khawi maw ka'n fawp chhin, a nem nge nem lo." A kawr awm ṭham pah chuan fawh tumin ka din chilh rûn mai.







"Zawnga, hmela, ngaua, thlawk bo rawh.Het ka duh lo, Simba ,man to man chu ka ten teh mai ania." Min nam ṭawk ṭawk pahin a au khawk rum rum. A nghâwnga kuai bu lawp chung chuan ka nui hawk hawk a. Leiah chuan a chil a chhak nghal ṭhawt ṭhawt, "zawng chhangban, ka hmêl hi a fiamthu vak em ni?" a phun leh hluk hluk, tal sawn a tum chu ka kuah bet tlata, "fiamthu bâwm alawm inih, relax Bawiha, hakuna matata." A hnunga beng thak thak pah chuan ka ti a. A phone a rawn ri leh nghal zat.







"Hello, Sky, kan lokal mek, angaiah in la awm em?" Ati nghal zung zung a. A motor koh pawh a rawn thleng chiah. "Aw lo awm tlat ru, tualthah loh tur aw, a theih theih kha na takin lo khawih ula animai." Motor chhunga lût pah chuan tiin a bulah ka ṭhu lût ve bawk a.






A phone a dah hnuah hawi vual vualin a fai fuk nghal rût rût a, a rawn uih nghal huk mai. Ngaua chu le'h!






Tukverh ka hawng nghal vat a, driver pawh engmah sawi ngam silovin a rawn hawi lêt zuk zuk. "Paih thawl hmasa ta che," ka hnar hup chung chuan tiin, ka melh nghal hrâwk. "Dal bomb anih kha," tiin alo khi hui mai. "Dal kan ei loh kha," tukverhah dâk chhuakin chil ka chhak, "vai ho alu chop ah te chuan dal them a tel ziah alawm." Alo ti sam leh êt.






"Ṭhinga, bawrhsaibe heh ropui si," nuih insum ṭeuh chung chuan ka ti a. A aw rawn thian khurhin, "gas tho ania, nakinah boruak thianghlim hip tur a awm tawh loh hunah phei chuan, kan la hmang ṭangkai dawn ania aw, hakuna matata." Ka mal rawn beng thauh thauh chung chuan ti leh in, "hakuna matata" a kut phar hluai chung chuan a aw chu a thâm kual vel a.






Ṭhiana ve hi zawng bei ti dawng lo tawk chiah hian a ngaihtuahna a sêng thiama, a bula awm chuan kan fing huih zêl mai ani.





"Tûnah dar 9 chauh ala ni a, Night Club a in hawng tawh em ni, khawi Night Club ah nge kan kal dawn." Kawng ka bo deuh avâng chuan ka ti leh a. "Eros Hotel, Night Club ah ngat mawle, Sky-an a thawhna a sawna." Ngaihsam deuh chuan ti lehin, motora kan hla ngaihthlak chu a thlâk kual vel a. "Chupawhnise, in hawn ala hun hleinem," ka ti veleh, dar 10 aṭangin an hâwng tlangpuia, tun anga buaina lo tawh chu mak ka ti ve deuh ani.






"Ka hre tawh bik lo, Sky-an buaina a tawh chuan thil serious tak ani tihna ani tawh mai. I kál ni lovin, i lu bur tereuhtea awm i thluak hralh kal tak tur khan ngaihtuah ve rawh." Min la ti lêt zui a, a thluak hi ania, hralh kal tur chu.




A u Police S.I ania, tluk lo vai vai tak hi ani ringawt. Mahse, a nau ala ngaihtuah tal a, ngaihdam dan kawng kawng chu a awm ve mai.





Eros Hotel, Night Club chu kan thlenga, an la hawng lo nasa. "Engtinnge kan luh ang," kawngkhar melh rauh rauh pah chuan a rawn ti zawi sup.







"Sky-a call leh rawh, hetah lo zawk hian ani maithei asin." Ka lo ti ve vat a. Bu nghutin, a phone a phawrh chhuak nghal, "hei lo Eros Night Club dang a awm em ni?" a call dâwn emaw tih tawh laiin a rawn ti leh hû mai. Ka lo chek hluka, "Night Club dangah an awm zawk ani maithei, ka tihna anih chu." Tiin a phone ka chhuh sak. Password alo la dah zui.








"Engnge password," ka ti leh hluka, "ehê Duhzuala" nui ruh ruh chunga atih chuan ka hawi chhuak nghal. "Khawiah maw?" Duhzuala a tih ni awm tak chu ka zawng nghal a. A chek ve hluk a, a hmaa lungte chhir pah chuan, "Simba, use your formula, ehê Duhzuala, a inzawm vekin chhu rawh." Atih leh takah chuan a password a sawina ani tih ka man ve chiah. Room khatah kan chêng dûn ang tih ava hlauhawm êm, min be â lo chauh tawh anih ber hi.








A password ka chhut zawh hnuah Sky-a chu ka call leh a. "Hei min chhanchuak tu tur te an lokal dâwn ka tih kha maw. In hmu vek em? Mi bawn lutuk, Fighter leh Assassin an nih hi, tank pawh a tel lenghal." Ka ṭawng hma hauhin alo ti nghal zung zung, ka bang bo leh kher mai.







"Sky, khawiah nge in awm?" Ka ti ve ta hram a. "Tute nge in nih, inbumna kan duh lo, a ranglamin hêng sazu pahnih hi rawn hruai chhuak nghal rawh u." Urdu ṭawng a rawn hmang tlat, a kum a naupang chhia tawh hauh lovang.







"Khawiah nge in awm..." Ka sawi zawh hmain, "kan ṭhiante kha in kut hmawr pawha in khawih anih chuan gas ka hnim tir ang che u, a upa tawh tehmai ania." Pumbaa chuan ka phone ken lai min chhuhsakin alo ti chang ve fak mai. A vo pûm hi chu ana ve alawm, a tak ramah chuan mumang ang chauh ani leh lawi a.







Phone a dah hnuah, "kal ang" tiin min hui leh zauh. A hnungah ka zui ve ta ringawt. Eros Night Club ah chuan an lo awm tak tak aniang, kawngkhar chu a chum nghal bur bur, "ṭhiana, ṭhian chhan thih ngamna nun i nei tiraw?" a innghahna ka ni tih chu phat rual lovin a mitmenga beiseina lo lang aṭang chuan ka man thiam nghal a. Ka lu lo bu nghutin, "hakuna matata" ka lo ti thawp sup. A khi suka, "Hey dumka ho kha, lo hawng vat rawh u" kawngkhar chum pah chuan a au leh lung lung.







Pen thawm ka hre zawm zata, kawngkhar zâwnah a tawp chat. Reiloteah an rawn hawng nghal a, palian tak, sun-glass dum vuah hian min lo chhuk en rún mai. "Hey, bro, i dam ṭha maw?" Pumbaa chuan nêm takin alo ti leh daih. A vo pûm bak ana lo ka tih rêng kha.








Eng sawi set set lovin Pumbaa chhîp samah chuan a ṭhuai nghal a, inchhungah a nawr lût rawk rawk mai. Min rawn khawih ve a tum chu, "ke ka nei, ka kal thei reng," ka lo ti chang fak.







Min khawih lêm lovin, ka luh theih nân kawng min kian ve mai a. Counter hmaa Sky-a mi pahnihin an man beh chu ka va hmu nghal. "Sky, engnge awmzia?" midangin an hriatthiam loh nan kan ṭawng chuan ka zawt nghal a.








"Huau huau lawm lutuk hi chu alo ṭha lo anih hi." Sky-a chuan tiin, a hmui thi chu a hru pah zauh. Bill-a ka zawng nghal a, "mawng ping ho hian an man, saw lai roomah sawn an hruai lût." Sky-a bawk chuan lo tiin, chêt in ring tur chuan min mitmei pah bawk a.








Hmuh theih chinah chuan mi pasarih lai an awm a. Room chhûngah engzatnge awm ka hre hauh lo. Mahse kan hneh thei tih ka chiang.







"Pumbaa, kan motto kha engnge ni kha'h" chêt in ring rân chuan dinhmun siam ṭha in ka zawt a. "Hakuna matata" ani pawh chêt lâk a in ring thawkhat viau chuan ka hria.







"Kha lo zawk kha, indona mual ami zawk alawm ka zawh che." Ka hnung lama mi pahnih min pan hnai tu te melh ralh pah chuan ka ti leh. "Pangang pawh phengphehlepah a chang thei," a aw a khur lek lek mai, a zâm chhe nghal der emawni.








"Hey street boys, in ṭawng khan inbe chhen suh u. Min tibuai hmasatute in ni a, bulṭan tu ni mah ula, tawpna siam tu chu keimahni chauh kan ni ang." Sky-a man bula ding sun-glass dum vuah tho chuan alo ti thum dût.









"Ngawi teh u, mipa leh mipa kan ti dâwn anilawmni, in silai leh chemtê, talhtum thleng khan dah vek rawh u, in va pa lo ve." Ka ti leh hrâm a. An in melh hruk hruk hlawma, an hmanraw ken lai chu muangchangin an thlâk thla zui ta hlawm a. Chu veleh, "Pride Land" ti chhuak hrâwk in, ka ban phak lawka ka hnung ami ten an hmanraw ken an dah tak talhtum chu chhar nghalin, chêt ka la ṭan ta a.








Chu veleh ka ṭhiante pahnih pawh che ve nghalin, games khelh ang mai mai chu ani hauh lo tih kan hre fiah kuar kuar awm e, kan che ṭha rei lo tawp mai.







Darkar a liam hma hauhin chhuatah chuan kan ṭhian ho in kan tlu ta rum mai le. Na taka khawih thamah min ngai lo nge ni, rin aiin an duhtawk hma phian lehnghal.








"Guys in la thaw em?" Pumbaa chuan thawk la hrawk hrawk chungin a rawn ti a. A tu amah chuan in kai tho ta ngé pawh kan ti chuang lem hlei lova. "Keichu ka ṭha, Simba, ila thaw tiraw?" Sky-a chuan ka hnar zâwna a kut rawn dah pah chuan ati a. "Ka ṭha, kan tho thei angem?" Ka lo ti ve nghal.







Chu veleh room chhung, Bill-a awmna lamah chuan thawm ri ka hre leh ta a. Ka ngaithla chianga, insual thawm ngei ani. "Bill-a ani em?" Pumbaa pawhin a hre ve ani ngei ang, in beng kâng ṭuah ṭuah pah chuan ati chhâng ṭuau mai.







Kut min thlaktute zing ami pakhat, pa lian ve tak mai chuan Pumbaa chhîp samah a ṭhuai sak leh a. A bekah na takin a hnek leh chawrh. Pumbaa chu kan bulah bawk a rawn tlu leh thlawrh a.







"Zawng ho, in na dâwn" Sky-a chuan tiin a in perh tho nghal zat. A hnaih bera ding chu a kap ah a pet sak nghal zawt a, keipawh in beng kâng ve in, thih tha tak meuhin vai pa lian tak tak ho chu ka hma chhawn ve ta. Ka hma ami ka khawih lai takin ka hnung aṭangin min rawn rêk thut a, ka kiu a ka nghawk pawhin awmzia a awm der lo.








"Che tawh suh u" Bill-a aw chu silai riin a zawm nghal a, a reh ta ṭhiap mai. "A che hmasa apiang in thi ang." Tiin a pistol ken lai chuan a tin kual a. A hnar aṭanga thi lo chhuak a káa luang thla mêk chu a hru nghal tâwk. Tumah kah fuh a nei lo nge ni, silai kahna hliam nei ka hmu miah lo lehnghal. A hnunga in sual huai hmel tak pakhat rawn chhuak chuan zah hmêl tak hian a en a, engthil nge thleng teh hrep ni. "Ka ṭhiante kha thlah vat rawh u," ati fiak leh ṭhat a, "thlah rawh u" a hnunga ding chuan a rawn ti ve nghal zat. Chu veleh chung pa lian tak tak te chuan muangchangin min thlah ve ta. "Sky, Pumbaa kha kai tho la, chhuak vat rawh u. Simba, hma hruai rawh," a rorêl ang chuan kan in sa seng ta hlawm a. Midang ho a pistol ken a tin reng chung chuan kawngka lamah a rawn hnungtawlh ve zel bawk.







Kawngka chu a kut lehlam chuan a khar leh a. A pistol ken lai chu paihin, "tlân ang" tiin ka kutah a rawn kai thut, eng sawi lovin ka tlân ve ta ringawt.







Mipui kârah chuan kan in zep ve zela, ka kut a thlah miah lo. Thil mak tak a thleng, he ka ṭhianpa kut hi nizâna ka vawn kha ani thei angem? A kut hian thil a ti thei ani mai lo maw, ka lungphu a ti su dup dup reng mai. Kan tlan hah vang erawh ani hauh lo.








"Lawkin, engnge kan tlân chhiat chhan?" Kan hnunga tlân Pumbaa chuan thaw hlawp hlawpin a rawn ti. Ni e, chu chu ka zawhna ani ve bawk, kan tlânchhiat chhan ka hre miah lo. Street food an zawrhna piahah chuan kan ding leh rih a, "min lo um zui maitheia," Bill-a chuan a rawn ti zawi sap. Ka kut a vawn chu ka lo en reng a, a hrechhuak ve ta aniang, rang takin min thlah nghal. Khup dawmin thawk kan la leh hawk hawk a. "Pawisa in pai em, ka ril a ṭam ania." Pumbaa bawk chuan a rawn ti leh.







"Chaw eitui, tlai chaw i ei lo em ni?" a bula ding Sky-an alo ti thum dût. "Chhe tê bak kan ei hleinem, a rim tuina lêng vel chuan a zêm buai velo cheu em ni?" street food awmna lam melh vang vang pah chuan ati leh a. "Pawisa ka pai alawm, ei ang u," Bill-an alo tih ve takah chuan momo leh egg roll chuan kan in hnawh puar leh ta hlawma.







"Simba, chîk chîk teh, saw mite pahnih saw an in biahthu in ka hre tlat. Keichu man to man hi ka hmu peih lo ania." Kan hmaa kut in suih riala kal te pahnih chu a en leh vung vung mai.







Chutia a sawi takah chuan ani thei mai lo'ng maw te ka ti ve deuha. Kan thil ei lai aṭang tawh khan an in mit mei deuh renga. Chu chauh anilo, engvanginnge an pahnih chauhin Club ah an kal, he mite pahnih hian thuruk an nei ani. Pumbaa rinhlelhna hi a dik anih vaih chuan a pawi khawp ang.







Hostel kan thleng a, gate an lo khar tawh. Mahse Bill-an warden a be thei hlauha, a zarah mahni khum lumah ṭheuh kan mu leh thei dâwn e. Club chhunga thil thleng kha ka la hrethiam lo, Bill-a hian engtinnge kha pa kha a hmin theih. Insual thawm te kha ka hre ngei si a, a hnar pawh a thi rêng bawka, mahse thawm a nat ang aia a in hliam nasa lo hi thil mak tak ani. Zawr deuh si hian tha hrui alo ngah zêk nge ni ang, ka hrethiam ta hauh lo.







"Bill, i hnar thi kha...." ka sawi lai mêkin a rawn leh hawi vat a. Alo fai leh vek tawh, ka hmu sual zawk tihna em ni?





"Zanin chu kan ri berh berh dâwn em ni?" Kan room kan luh rual chuan Sky-an a kekawr kawnga a dah Royal Stag bur lian chu a rawn phawrh chhuak a. Pumbaa chuan lo chhuh vat in, "hetiang i neih te chuan a vei lam tur kan lo lei lo ani. A seh hel mah mah deuh chu ani?" zu bur tuai pah chuan ati bui bui mai.





"Chips ka nei asin, khawiah nge kan tih dawn," Bill-an alo ti ve leh, "zu in thei hmel i put loh kha, lo mu mai mai rawh." Ka tih chuan a hmui a ti pawrh tarh a, hmeichhe hmuha ka'n hmuh tlat chu le. "Hruaizel i à tawh" ka rilru chuan tiin ka biangah ka beng leh ringawt.







"Zanin te chu kan ti ho dal dal ang chu, sem sem dam dam." Sky-an lo tiin, a darah a kuah nghal a. An in endan chu ka ril rem zawng ani tlat lo. Pumbaa thusawi vang nge rinhlelhna meipui a in chhep alh hluah hluah mai.







"A hmaa kan hman bang kha ala awm, ka va la lawk ange." Pumbaa chuan tiin a zu um ken lai chu min hnawn a, "lo hawng miah suh," ti leh hramin a chhuak zui ta a.







"Bathlarah ti mai ang u, Simba extension leh charger nen rawn chhuak ve nghal rawh." Sky-an tiin an pahnih chuan bathlarah an chhuak zui nghal a. A sawi ang chuan extension zam chhuakin, ka phone chu ka charge paha, Spotify ah lût in, ka playlist ami chu ka play ṭan ta.



Pumbaa lo lêt leh chuan kawngka kalh ṭha in, bathlarah chuan min rawn zâwm ve a. Kan pali chuan ṭhu bial laih in, dispo no ah chuan ka thli chhuak ta kerh kerh mai. Tui nena pawlh hi chuan luak ati chhuak duh, bakah a pa lo, chuvangchuan a tak ṭha thei ang bera in ka duh ṭhin.







Bill-a zarah a vei lam a awm ta bawka, sausage nen kan tlai khawp mai. Sky-a chuan ka hla play lai rawn ti tawpin, "zo fa te thlúng lu ti hai tu tur kan play ange" tiin a phone ami chu a play ta zawk a.







"Zantiang alo her a, chhawrthla arkai par tlanin, Lengi leh val rualte kan léng e. Chu aia mawi zawk chu, I chhingmitah hmangaihna par ka hmu asin, âw lêng her mawi."







Tih hla chu vawithum lai a play nawn a. Tu sak nge pawh ka hriat siloh, zûn nei ru tak niin, zawl khaw tleitir min ngaih tîr vawng vawng mai.







Ka khawharna min hriatpui ni awm takin thla chuan ka ṭhutna lai chu a rawn chhun bik riau ni ten ka hria a. Ka taksa hetah awm mahse, ka thinlung erawh a rûka ka vei ve em em kiangah a awm si. Chawlhtui ning zu pawh hian ka khawharna min chhâwk thei meuh lo chu anih hi.









Pumbaa chuan no khat a rawn thli leh a, ka lo tlak leh nghal pap. Sausage chu pak khu leh hluah hluah in, kan piah lawka Sky-a leh Bill-a te pahnih in hmel duh hmel taka in en paha an in nuih leh ṭhin chu hnawk ka ti ṭan riau.







"Pride Land ah hian mahni an pui kawp kha kan rem ti lovin ka hria, ani em Pumbaa." Sky-a te pahnih melh rûn chung chuan ka ti chang ta fak, an ngai hua anih tâk leh kan rinhlelhna hi a dik tihna animai. "A dik, Simba nge nge I sawi ṭha ṭhin e. Mahse maw bro, ka sil lutuk, zanin chu khawngaih mittui tla in i khumah ka lo mu ve mai ang aw." Tiin room chhûngah chuan a pai lût chhawk chhawk mai. Kan Pumbaa ṭhin hi chu'h, no engzatnge a in teh chai ni.







Sky-a te pahnih lah chu ka awm ve tih pawh hrelo ang maiin, zawi tê tê in an titi a. Ka en reng chuan buaina a chhuak dawna ka hriat vangin, no khat in leh in ka luh san ta daih.






Phone light on in, mut ka tum chu khum tlângah Pumbaa chuan a rawn bum ruih mai. Hrep tak chuan, a zawh tawk aia tam a in leh anih chiah hi. Ka ṭhian anihna vang liau liauin ten pawh sawi lovin ka thian fai leh ta a. Amah vângin bed sheet pawh thlâk angaih phah.







A kilah chuan ka nawr phei a, phone light off in, ka insum zawh ngang loh avangin ka vei ruk ve em em Saizami chu whatsApp ah ka biaa. Mahse min chhang lo, minute sawm vel ka nghah hnuah ka call ta ringawta.








"Aw Hruaizel, i biak tum hi a muhil tawha, naktukah lo be leh mai ta che." Mipa aw ka hriat rual chuan ka in perh tho nghal a.





"Tunge i nih?" Ka ti vin leh hrâwk.






"Ava mak e âw, Hruaizel, ka aw hi hre hrang ve tawh rawh. Keimah Vawk pu, a vawk vulh lai te duat em em tu, Pahlira pu, i hre tawh em?" a rawn tih takah Saizami u ani tih ka hrethiam ta a. Kan inbiak ngun tawh tehreng nen a aw hi ka hre hrang thei lo.





"A mutna a rei tawh em?" Ka ti zawm leh zat a. "Rei vak lo, rawn bengchheng suh, tuipui sen a kân dawna, thawm bengchheng hi a allergy ania." Rawn ti zawi supin, a nui leh kur kur mai.







"Aw anih chuan, naktukah ka lo be leh mai dawn ania." Ti a dah ka tum chu a rawn ṭawng leh a, "I buai leh tawh em ni? Doctor chu i pan ta em?" A rawn ti leh a. Thawk ka la hawk, "pan lo, ka lo haw hunah i ṭhianpa ka pan mai ang." Tiin ka chhang ve a, ka buai rûkna hi ka chenpui ka chhûngte ngei pawhin an hmuh thiam loh laiin ani chuan alo hmu thiam bika, an ina ka lên ngun vang pawh ani mahna. Doctor anihna chu dah ṭha ta ila, mi chîk thei tak, mi in zir mi ngang ania. Zêp theih anih tak silovah chuan ka harsatna thlen nan ka hmang mai ṭhin. A vawk chanchin sawi pahin, ka buaina neih te ka hneh theih dan tur min hrilh ve ṭhin bawk.








"Awle, damdawi kha ei ṭha la, i buai zuala i hriat chuan rawn haw chho vat ang che. Ṭhianpa Psychiatrist legend ka nei ka tih tawh kha." Min ngaihtuah hmel tak chuan a rawn ti leh a.







Ka haw chhoh vat tur thu hrilhin kan inbiakna chu kan ti tawp ta. Darkar chanve dâwn kan inbiaa, ka harh nghal kâwkin ka hria. Hostela ka insawn hma khan ka haw chho zuai tawh a, test kan neih dawn avangin rei pawh châm hman lovin ka lêt leh ta kha ania. Saizami tak pawh ka hmu hman mang lo. Ka haw chhoh leh hunah chuan an inah pawh chaw ka ei leh thei tawh ang chu.








Zun lam thiarin bathroomah ka lût leh zuaia. Khuma ka mut leh hnuah pawh Sky-a te pahnih chu an lo la lût lo fo mai. Chu chen chen engnge an tih, hriat tumin thawm dim thei ang berin khum aṭang chuan ka tho chhuak ṭhem ṭhem a.







Min hnungchhawn zawnga dingin an lo titi tui khawp mai. An thusawi hriat ka duh avâng chuan tlemin ka hnaih leh hreta, ka beng ka dawh ta va mai.






"Ka pa hmelma te emaw ka tia, mahse a thawhpui te zawk an lo ni sia. Ka awmna hrilh lo turin ka ngèn ringawt. Chuan maw, Holmes chu an ni ngeia, mahse an thah anih loh thu an sawi tlat. Keipawhin an thah anih ka ring bik lo, ka pa thawhpuite an nih bakah tual an thah ngai loh thu leh drugs bak an tawlh rûk loh thu an sawi a." Bill-a thusawi chu engnge anih ka hrethiam leh ta lo tawp mai. Mahse, thil pakhat ka buaipui rûk reng Holmes tih hming a kâ aṭangin a chhuak tlat. Bill-a hi tunge anih? Holmes atih te chu Club a kan beih te kha em ni? Kha mite kha an nih chuan kei nen hian inzawmna kan nei tihna em ni?








He mite pahnih hian thuruk chu an lo nei chiang anih hi. Mahse, kan rinhlelh ang zawng chuan an awm lova,hei ringawt pawh hian rilru chu a ti hlim ve deuh e.




Eng thu ah tak buai dûn ang maw, kan hriat ve ṭula an hriat hunah min hrilh ve mai turah ngai teh ang.






Dar a tlai zela, naktuka class kal ka duh avangin ka mut san leh ta. Ka mut hnu lawkah an rawn lût ve a, "mut theih loh phah nan hmang suh aw, theihtawp kan chhuah anga, kan ching fel thei em em ang." Sky-an zawi te in a ti. Ka harh tih an hriat ka hlauh avangin ka chhing der ta ringawt.







Sky-a chhuah hnuah Bill-an kawngka va kalh nghalin, a khumah chuan a mu leh a. Ka beng bulah tak Pumbaa a rawn hnar, zanin chu tui takin ka mu dâwn lo tawp mai.








Bella-i pov:






"Simba, class kal angai, tho rawh." Ka piah ami te in ko thawm chuan min van ti harh chiang ve. Ka in tam silo, ka lu a na tho mawle.







"Bill, morning, i hakuna matata em?" Pumbaa chuan min lo be nghal mawlh mawlh. "Morning" tih chauha chhangin, bathroom ka pan san a. Ha ka nawh laiin bathroom kawngka an rawn chum leh tawh. Mipa kâra khawsak chu ngaia neih a har dâwn hle mai.







Ha nâwt pah chuan ka hawng ve mai a, "a ṭuah tawh lutuk" Simba biang tai tûkin a rawn lût nghal rawk rawk. Kawngka pawh a khar leh lem hlei lova.







"Ka nawh zawh hun te nghak be phawt la," kawngka kalh pah chuan ka ti a. Commot ah alo ṭhu fel der tawh. "Min en lo la animai, a ho lutuk, mipa vek tho kan nih hi." A la sang ri ṭuah ṭuah zui.







Engmah kan la ei bawk silo, ka kaw ruak lutuk chuan a rim chu ka ti thei der lo. Hmanhmawh takin ka ha nawhna chu ka tleuh fai a, ka kam ṭhuah sawk sawkin ka chhuak zui nghal.








"Nizân khan engemaw ka hria ania aw, Bill, ka ṭhian inih avangin ka sawi ang. Pride Land chhûngah hian mahni an pui inkawp kan rem ti lo bur." Pumbaa chuan alo ti thawp sup. Sky-a nen min ringhlel deuh tihna em ni?







"Pumbaa, lungngai suh, i ngaih ang kha anilo." Ti ve hmukin, bathlara kan chêtna hnuhma ti fai turin ka chhuak zui a. "Anih chuan, engnge awmzia, kan hriat ve loh tur thil a awm zawk em ni?" Ka hnungah min rawn zui ve zêl a.







"Awm hran lo, lo buai duh suh," ka ti leh hmak. Zu um leh dispo te chu sarangah ka khum khawm a, kan chips eina thleng chuan ka thian fai vek.







"Awle, engkim hi a hakuna matata vek tur ani." Tiin min luh san leh a. Nizân thil thleng te ka ngaihtuaha, ka zak ve ringawt. Engnge ka hriata, mipa hlang bulah ka in ve rikngawt. Ka nu chuan hria se, engtin tak min ti leh ang maw.







Ka kum 18 piancham lawmnaa grape wine chhe te ka in pawh khan kar khat ngawt pawna chhuah a rem ti lo kha ania. Vânneih a siamin, a bulah ka awm lo hlauh. Mahse mipa kâra ka in ve hrim hrim kha ka in ten tlat, inbual fai vat angai ani.







"Sky-a bawk i ngaihtuah animaw, keimah min ngaihtuah rawh ka tih che kha." Ka u aw ka hriat rual chuan ka hawi chhuak nghal. "Khawiah nge I bo leh daih, nizân khan ngatinge i lokal ve loh." Ka ti chhuak hrâwk. Sky-a nen chauh kan kal phah a, ka pa thawh puite lo nilo phei se chuan ka ruangin kan in lam a pan mek tawh ang.







"Thlarau khawvel te chu i hrethiam pha lovang. Engnge chanchin?" Alo ti zawm zat. Chhuanlamah a khawvel a hmang ṭangkai ziah lehnghal, duh duhna-ah an kal thei lo emawni.







"Holmes chu an inti a, mahse kan zawn tak an nilo. Room-a ciggarete Sky-an a hmuh ang pawh kha an zu ngei a, room pâwna awm ṭhin te pawh kha an nia. Vên him che an duh vanga awm an nih thu an sawia..." Ka sawi zawh hmain, "mmm anih dawn chu, thil hriat chhuah ka nei. Prem-a nen khan kan in kawm nêl ve hmana, ka mut hun leh ka chhuah hun a hre vek zêl. Hriat a nei tih chu a chianga, amah ani maithei bawk. Mahse khitiang pa tê lutuk khian engtikahmah min that lovang." Ati ve nuah nuah mai. Nimin kha chuan a hlauh thu kha a sawi nasa sia.







"Bill, va inbual ve rawh, a ṭhing rim nam chung kha chuan chaw ei i tum lovang tiraw." Simba chuan nui ruh ruh chungin alo ti. Ka ṭawng kha alo hre pha angem le?







"I hria em?" Ka ti ve tawp, khuma ṭhu Pumbaa melh leh rulhin, "kan hria em?" tiin a zâwt lêt daih a. Pumbaa chuan a dar alo san zuk, "kan hre lo tih na anih chu." Tiin a nui leh sun sun. Ngaih ṭha zân lo chuan ka lût ve a, ka hâk thlâk tur la in bathroomah ka lût ve nghal.







A ciggarete chu a awmdan ngai bawkin alo awm leh a. Nizâna a awmdan ngaihtuah kha chuan ka u thihna chungchangah a inhnamhnawih ka ring lo. Hriat theih chinah an ṭhian ho hian mi thawveng leh harh vang tak, nihna ang anga lang chhuak an ni maiin ka hria, misual chu an ni lo.






Ka inbual zo a, ka hnute chu a lan hlau takin ka hrêng rêk leh. Ka u tshirt lian tak chu ka ha leh a, ka chawn lang lo turin ka u kekawr tlawn chu ka ha leh hnuk mai. Darthlalangah chuan ka sam ka siam rem leh a, ka thawmhnaw bal pawm chunga chhuah ka tum chu, hnung lama thaw hrâwk hrâwk ri ka hriat chuan min ṭhawngin, chêt nachang pawh hre tawh lovin ka ding chawt mai.







Hawi lêt duh lovin ka u ka ko a, ka au ring ngam silo. Mahse a hre pha tho aniang, a rawn lût thuai a. "Oh my God, thlahrâng, thlahrâng a awm ania." A thlarau zawk chu hlau hlawpin a au tuar tuar mai. Ka ei lo lutuk chuan ka melh hrâwk a, "hmeichhia nge mipa?" Ka ti bak hlar mai.







"Hmeichhia, en ve suh, a ril a awrh hnuang aniang. Awi Lalpa, ka râp lutuk, min chhan rawh." Tiin a râk leh chûl a.







"Over viau suh, mipa inih kha" ka ti vin leh hrâwk. A hmui hup leh in, "hawi lêt miah suh, chhuak vat rawh." A aw pangngai ka hre leh thei ta e. A sawi ang chuan hawi lêt lovin ka chhuak nghal hmak.







Pumbaa alo awm tawh lova, Simba class kal turin alo insiam mek. Bathrooma ka thil tawn vang nge, ka taksa chak lo zawk pawh ka hrethiam tawh lo. Ka thawk chu a tawp mai dawnin ka hria, ka áwmah hian min hnawh tu a awm tlata, ka kal hleithei tawh lo.







"Bella, i ṭha em?" ka u chuan mangang takin a rawn ti a. Min khawih a tum ṭhin, min khawih fuh thei silo, a mangang chuan Simba a ko leh ringawta. Simba lah chu min hnungchhawn zawnga dingin, a thiltih lai a chhunzawm mawlh mawlh.Thei leh thei lovin khum chu ka pan phei a, mahse ka pen ṭha thei tawh lo, ka âwma min hnawhtu chu a rawn zual zela, ka thawk a buai zual tawlh tawlh. "Bill" Simba aw chu ka hre rêi ruai, min rawn pan mek tih pawh ka hria, pen luih hrâm tumin ka ke tih chet ka tum, mahse ka thei tawh lo. Ka tha a zawi nghal veka, thawk leh khatah a rawn thim nghal mup mai.








🍁


(Zirtawp zanah kan inhmu leh ṭheuh dawn ania😊)


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 4th, 2023, 12:36 pm

He Is My Girlfriend

Chapter 5


Hruaizela pov:



"Bill, i ṭha em? Engtinnge i awm?" Ka sawi nawk nawka, a harh thei miah lo mai. A thawk a mumal tawh lova, midang pun hmasa lovin cpr ka pe a. Khat hnih thum a awmah ka thiam ang tawkin ka nem, a kâah ka thaw lût bawk. Ala harh thei chuang lo, ka nem nawn leh a, awmzia a awm deuh nan tiin a kawr phelh sak ka tum leh a. Khai leh hei hi enge!









"Hrep tak chuan," ka ti chhuak hrawk.Ka bul lawka nikhaw hre lova let reng chuan min ti á lo chauh ani.






Ani nen hian room khatah cheng dunin, ka bulah chuan mipa angin a awm ṭhîn anih kha. Ka unaupa leh ka ṭhianpa anga ka ngaih hi hmeichhia alo ni reng amaw. Ka awih thei lo, Hruaizel tuna i hmuh mek hi mumang mai ani. Bill-a hian engtikah mah a bum ngai lovang che.








Harh chhuah tumin ka hmai ka beng, vawi thum lai ka beng nawn. Mahse, ka mumang ani lo, tuna ka bula nikhaw hre lova let reng hi ka hriat Billy Lalawmpuia, ka roommate ngei kha ani.








Warden ka hrilh dawn nge, keimahin damdawiinah ka kalpui zawk dâwn. "Simba, buaina a awm em ni, lo hawng vat teh" Sky-a aw ka hriat rual chuan ka aw ka thian nghal. "Awm lo, hakuna matata" a ngaihṭhat nan ka ti leh ringawt. A thawm a reh takah chuan Bill-a chu ka kawrlum in a hmai ka khuh sak a, damdawiin pan turin rang takin ka pawm chhuak.







"Bill-a maw, engtinnge a awm?" Sky-an mangang takin alo ti, chhân pawh chhâng lovin step ah ka pawm thlaa, ka hnungah ka ṭhiante pahnihin min rawn zui bawk.








Taxi phar tur kan hmuh mai loh avangin Pumbaa uber koh chu kan nghak leh rih a. "A la thaw tiraw?" ka ṭhiante pahnih chuan a khat tawkin an rawn ti sek. Uber alo thleng thei silo, ka mangang chuan ka hnungah ka paw ta ringawta. Ke in kan awmna aṭanga damdawiin hnai ber ka pan pui hlawk hlawk.








"Simba, ka lo paw ve tawh ang, kan in puak chhâwk hlawm mai dâwn ania." Sky-a chuan tiin Bill-a chu a rawn ban a. "Ka la hah hleinem, Pumbaa uber chu alo thleng ṭep tawh em?" Ka ti nghal vat. Sky-a hian a paw ve anih chuan hmeichhia ani tih a hriat mai ka ring. Chu chu Bill-a oh nilo a hming diktak pawh ka hrelo, tuna ka puak mek hian midangin a nihna an hriat a duh ka ring tlat lo ani. Hmeichhe huaisen tak ka ti dâwn nge, hmeichhe mawl tak ka ti zawk dâwn? Engpawhchunise a zawr ang aiin a rit hrep mai.









"Simba, ding rawh, motor a rawn thleng dâwn." Pumbaa chuan thaw hlawp hlawp chungin a ti a, a ei theih ang ai hian a hah hma hrep a. Hnung lama motor rawn tlân ri ka hriat rual chuan ka ding ve mai, Pumbaa motor koh anih ngei ka beisei.







"Hmanhmawh ang u, tuman nizâna kan thil in kha sawi loh tur." Enge maw a ngaihtuaha chutiang thu te a rawn sawi. "Pumbaa, i kâ aṭang a chhuak anih loh chuan kan lei hi chu rawn veng tel duh suh. I lei kha veng ṭha la a tawk." Sky-an alo ti hlauh. Motor ah chuan kan ṭhu lût a, a hnungah Sky-a nen chuangin Bill-a chu ka dar nghengin ka ṭhut tîr tlata, ka vêng pah reng mai.








"Simba, ala thaw em? chhiat tawhnaa zualko hi ka thiam lo ania." Driver bula ṭhu Pumbaa chuan rawn leh hawi meuhin a ti nuah nuah. "I kâ kha chip la, a thi lo animai." Ka chhân hmain, Sky-an alo ti leh a. Mangan laia thu mak tak tak a rawn sawi chhen chu ṭhian ṭha card a neihna hian a hum zo angem hriat a har ṭalh tawh.








Damdawiin hnai ber, Sunrise Hospital, lian puia in ziak kuau chu kan hmu ta a. Motor aṭang chuan chhukin, Bill-a chu ka paw leh a, damdawiin chhûngah chuan ka tlân luh pui ve tawp. Vai damdawiina la kal ngai lo ṭheuh kan ni bawk nen kan bang bo hlawm khawp mai. Nurse pakhat la naupan hmel tak hian Mizo ṭawngin min rawn be hlauh mai a, kan chanchin ka lo hrilh hnuah, "min lo zui rawh u," tiin hma a hruai ta a. Hmelhriat loh karah kan hnam pui kan tawng hlauh
chu a vânneih thlâk teh e.








Vai doctor thau zet hian a rawn endika, oxygen pe turin nurse chu a tîr nghal, a mit tih kau sakin light te chuan a chhun leh a, min melh kual rulh rulh takah chuan Bill-a nihna a puan zâr hlauin, ka ṭhiante pahnih chu lehkha lo va tifel turin ka tîr ta ringawt. An kal liam hnuah doctor chuan thawk la leh hawkin, a bula ding kan hnam pui nurse chu Bill-a kawr phelh turin ati ta mai. Ka mit ka lo hup vat a, "pawnah lo va chhuak mai ta che, nakinah kan lo ko leh zawk dâwn che ania." Nurse in a tih takah chuan rang lutukin ka chhuak nghal a, ka ṭhiante pahnih nen kan in tawk leh hlawl. "Engmah lehkha lak tur ala awm hleinem, Simba i formula a dik tawk lo." Pumbaa chuan lungawi lo tih hriat tak hmel pu chung hian alo ti bui bui a.












"Engnge a an?" Sky-an ngaihtuah hmel takin alo ti nghal. "A ṭha ang, ngaih ti ṭha phawt ang u." Bang ngheng chung chuan ka ti zawi sup. "A chhûngte kan ko duh angem?" Pumbaa bawk chuan a rawn ti leh hluai, a aw ki ti zawi deuh tûrin ka lo hrilh nghal vat.









A kâ chip hmân pah hian zai zirin Bill-a chhûngte kan hrilh dawn leh dawn loh chu a phone nen ṭang kawpin ala sawi zêl a. "Hrilh rih lovang, Simba inbe lawk ang." Sky-a chuan tiin, kan piah lawka ṭhutna awl chu a pan nghal a.









"Lo kal sawn miah suh ang che," Pumbaa chu ti leh in, Sky-a chu ka zui ve a. "Engtinnge khatiang khan a awm theih? I room mate ania, nangmah chauh in ngaihtuah lovin i chhungkua, i chên pui angin en la ka duh khawp mai." Min dem nge, min fuih zawk pawh ka thliar hrang thiam lo. "Ṭhiana, ka chên pui ania, kei aiin i hrechiang zawk ava ang ve," Ka ti ve ta a. Za lo tak hian a nui hawk a, "pianpui unau ka nei lo tih i hriat kha. Min hnaih tute chu ka chi leh kuang angin ka ên ṭhin tih pawh i hriat ka ring bawk e. Ni reilote kan bulah la khawsa mahse, inpawh tlang taka awm ho hi a ṭha." Thutak deuha atih leh takah chuan hmeichhia ani tih a hriat rûk ka ring ta tlat. Ni e, ni reilotê chauh kan la in hria, mahse thuruk nei ang maiin an in be fal ngun hle anih kha.










"I hre vek tawh tiraw?" ka zawt ta phawng mai. Ka zawt sual lo turah ngai ang. A lu bu nghutin, "chhan ṭha tak a nei tih lo hre phawt rawh...." a sawi zawh hma in, "engmaw i hriat chu, ti teh u ṭhiante u, Pride Land anih hi, thurûk a awm tur ani lo." Pumbaa chuan kan hnung lam aṭangin a rawn ti hlawl.









"Ni e, zêp tawh lo mai teh ang, Pride Land a thu kan theh luh hi chu khawiah mah a chhuak tawh dâwn chuang lova. Pumbaa, kan Bill-a hi hmeichhia ania.." Pumbaa chu a meng phar nghal awn mai. "Engnge a chhan, lesbian anilo tiraw?" a aw rawl a ring fal leh ta.









"Bill-a hmasa kha a phîr pui, chuan tuna kan Bill-a hi Bella ani." Sky-an ati leh dap dap a. A hming tak ka hre ve ta, mipa anga a rawn luh nachhan pawh ka hrethiam ta in ka hria.








"Kha zawng kha maw? a zo dêr tihna em ni, ava ho awm ve." Pumbaa chuan alo ti rauh a, sawi lan ngai lo pawha lang fiah sa hi engtinnge a hriatthiam theih loh. A thluak hi chu a uiawm mange.









Sky-a pawhin a ning ve deuh aniang, a chek hluka, "hei vang hi alawm bawrhsaibe ei tam lo tura ka tih che. Bill-a thih chhan zawng chhuak turin a lokal. Chu chu i bawrhsaibe thluakah khan châm rawh se," a ti vin ve hluk mai.









"Ava mak awm ve, kan Rafiki chu naupan laia ka en ṭhin Gena ava ang dâwn ve. Bill-a thih dân kha keipawhin mak ka la ti reng." A tawpah chuan a hrethiam ve ta.









"Theihtawpa kan puih ve angai ang, Bill-a kha kan ṭhianpa ve tho ani tih kha in thinlungah lian em em phawt mai sela." Sky-an ti leh in, Duhzuala alo bu nghut nghut a.










"In lungngai anih kha, ka awm alâwm, ka nu thihnaa mawh phur tu pawh man anih theih chuan engvanginnge kan ṭhianpa thihna a mawh phur tu chu kan man theih loh bik ang. An sawi fo ṭhin, S.I Lalduhawma nau ka nih hi." In ti thei tak chuan tiin, a hawi sang vah a. A awm lo hran lo, a chhuan em em a u hi Mizorama kan Police chhuan vawr ani tlat. Thla hmasa lawka anu thihnaa mawhphurtu a zawn chhuah pawh khan Zoram mipuite min ṭhawng hlê anih kha.










"I u chu engnge a an tawh, i rawn chhuk thlak san daih sia. I nau nen chauh an awm tihna em ni?" Sky-a chuan alo ti ve bawk a. "A ṭha chho zel ang, damdawi mum lian a nei a, a ngaihtuah awm loh." Ngaihsam tak chuan alo ti liam puat.








"Damdawi mum lian chu dolo leh mum uk?" Sky-an alo fiam leh zauh, dam lo buaipuia kal e tilo chuan kan hlim leh ta phian a.









Nurse in min koh leh takah chuan Bella-i ngaihtuahnaah a rawn awm leh ta. Ka chhuah san hma khan oxygen nên ala awm rup sia, tûnah lém oxygen hip tawh lovin khumah chauh hmel takin alo ṭhu leh ang lawi a. Min hmuh rual chuan hlauthawng hmel pu leh nghalin, pan hnaih inthlahrunawm khawp chuan alo in kil tawih leh nghal a.








"Bella, a ho lutuk, this world is not our home. A Mizo ṭawng tak phei chuan he khawvel hi kan khual zin kawng ani. Chuvangchuan hlauthawng duh suh, Pride Land ah i rawn lût a, kan mi leh sa ini tawh. Kan hrethiam vek che, hakuna matata, everythings gonna be alright. Lawmthu min hrilh duh suh, no problem." Bawrhsaibe a heh bawka, a dang pawh a nal ṭha narawh. Ṭawng na hun kan chang lo reng reng. A ṭawng chawhpawlh lah chu kan boruak nen a in rem lo ropui.








"Na ila nei em, engtinnge i awm?" Sky-an ngaihtuah hmel tak chuan tiin, a bulah a ṭhu thla nghal zat. "Ka ṭha, kan haw thei," Bella-i chuan tiin khum aṭanga thawh mai a tum chu a tluk leh hlau in a kut ka lo vawn sak vat a. "Simba ka ṭha a tih kha" Sky-an atih pawh chuan thlah ka tum lo. A tlu lai hmu tu ka ni a, ka room mate ani bawka, min ṭhawng leh thut ang tih ka hlau ani.








A damdawiin lekha vel kan tih fel hnuah kan chhuak ta ṭham ṭham a. Admit ni chungin hun nei a in tih loh avangin kan haw pui dâwn ani. Hostel lamah kan in enkawl chhunzawm tawh mai aniang chu.








"Bella, i sentut kha hrêng rêk lo mahla, a lan chuang miah loh kha. Nangmah i inti hrehawm mai mai, damdawiin pan te angaih phah a." Lungkham nei lo kan Pumbaa chuan a rawn ti leh lung lung a. Vânneih thlâk takin kan ṭawng hrethiam lo vai ho kârah kan awm hlauha, Mizo kârah chuan awm ila, zahna kan hmachhawn zing khawp ang.









"Chuan engtinnge hma kan lák ang, eng chen nge in kal tawh?" Pumbaa titi ho lam zet chu tuihnih tlâk loh a ka ruat avangin kan ṭhian te pahnih chu ka zawt ta phawng mai. Bill-a tak tak chu ka hriat ngai ani lo na in, Bella-i phîr pui anihnaah puih ve ngei chu ka duh ani.









"Holmes ho kha kan ringhlela, mahse ka pa thawhpuite an lo ni leh sia, rinhlelh tur dang pawh kan hre tawh rih lo." Beidawn hmel tak hian Bella-i chuan alo ti zawi sap a. Holmes bawk chu a sawi leh ta, he hming hian ka lungphu a ti rang ṭhin. "Holmes chu kha mite kha maw, an hming aṭang chuan an bawn hmel nen, an va bawn si love." Pumbaa chuan lo ti leh in, a nui ruh ruh zui a. Kan hneh loh zia kha a hre leh tawh lo emawni.








Kan ti ti chhungin hostel pawh kan thleng ve ta der mai. Rin aiin damdawiinah hun kan hmang rei a, class pawh kan ṭhulh fel ta ringawt. Internal exam a hnai tawha, assignment tih tur pawh kan ngah viau. Hun awl hnawh khah nan hmang leh ila animai.









Bella-i chu a chau hle aniang, khum a deh rualin a muhil nghal a. Zawhna pawh ka zawt tam hman lo, alo harh hunah ka zawt tawh mai ang chu. Assignment tih hmain, Sawmtei nen kan in be leh zuai a. Mizoram aṭanga thil min lo thawn tur te sawiin, ka tshirt a hak haw pawh min lo thawn tel dâwn ani awm e. Saizami khan ha tawh lo tur khan min duh viaua, mahse Sawmtei hak hnu anih vang ni maiin ka hria. A thikthu a chhe ve a, thik loh tur a thik mai mai ani. Sawmtei nen kan inbiak zawh hnuah, kan ṭhian ho group ti mai ila, Saizami te ho nen group hran kan siam ve a. Hmeichhe pali leh mipa pathum kan awma ka lan loh pawhin an bengchheng thei khawp mai. Group ah chuan lût a, an thu khel mek chu Saizami buaina tawh chungchang ani. Café kâng chungchangah rinhlelh alo kai ve ani awm a, amah Saizami berin a sawi ṭha duh lo te chuan rilru a ti kal thui duh viau. A mumang vang bawk kha anih leh ka ring ta ngawt a. Amah be hmasa lovin a u zawk ka be hmiah, thu ka hre kim chang thei zawk ang chu.















"Chutiang thu ho mai mai ah i rilru lo tibuai duh suh. Ka awm alâwm, engkim ka ching fel leh vek mai ang. Nangmah kha in ngaihtuah zawk rawh." Ṭha deuh chuan a rawn ti a. Ni e, ka ring tawk, a nau ania, midang zawng aiin a ngaihtuah leh dawn tih ka hria. Hah pawh a dam ve deuh e.









Kan inbiak tawp dâwn lamah ka rilru tibuai ṭhin tu Holmes chungchang chu ka hrilh leh a. Mak ati ve viau mai, a ngawih leh vang vang hnuah, a ṭhianpa number min pêk tur thu leh Amah nena sawi dun tur chuan min ti leh ta zawk a. Chanchin in hrilh leh tura tiin kan inbiakna kan ti tawp leh ta.









A ṭhianpa number chu min rawn pe nghal a. Biak ṭan dân tur pawh ka hrelo, alo buai viau phei chuan min buaipui ṭha hman lovanga, ka in theh dere mai mai ang tih chu ka hlau hle ani.








Mahse ka buaina a rei tawh a, ka tleirawl chhuah hlim phei kha chuan tualthattu ka ni intih theih tur khawp khan ka buai fo anih kha. Chhûngte bula ka sawi lahin mangchhia neiah min chhuah leh tawp a, fapa mal nimahila ka tan hun nei lova an buai reng avangin tun hnuah pawh hrilh lovah ka tlâk ta mai ṭhin.









Bathlarah chhuakin, U Rinzama ṭhianpa chu ka call ta ringawt. Ka harsatna ka sawi chuan in hawng takin min lo ngaihthlak sak a. "A pawimawh ber chu nangmah i in hriat chianna kha ani. I rilru tibuai thei leh i nihna zawng zawng hlauh vek khawpa harsatna i neih chuan darthlalangah in en ṭhin la, keimah ka ni, ka hneh thei, ka chak tawk, tiin darthlalanga i hmuh nangmah ngei mai kha in hrilh nawn ṭhin rawh. I hman remchan hunah min lo pan ngei ngei ang che, test kan nei dâwn ania." Tiin min chah a, ka la tih ngai miah loh ani bawk a, ka ṭhat pui ngei ka beisei. Ni e, mahni inrintawkna ka mamawh ani.









"Holmes" hnung lam aṭanga rawn ti tu avang chuan ka phu zawk mai. Ka phone chu ka off nghal a, ka leh hawi rang viau. Bella-i alo ding reng a, ngun thluk taka min en in, "Holmes mi leh sa ini ve em ni, nge nangmah hi Holmes dik tak ilo ni reng zawk" dam thlap si, nelawm loh ru tak hian ati a. Chhân dân tur ka hrelo, ka thluak a rawn nu leh but but tawh. Engvang teh hrepa Holmes ti a min ko nge anih, kha hming khân engtiang chiahin nge min tihbuai a hre tawp lovang.











Bella-i pov:





Min chhang lova a hawi buai nghal vek chuan rinhlelhna ati zual. Ka pa te thawhpui zing ami chu ani lo tih ka chiang, mahse Holmes hming hawh tu, a phena tualthattu ani lovang tih tuinnge sawi thei.







"Bella, rilru lam chian lohna a nei ani zawk lo maw. A awmdan saw, mi pangngai awmdan tur ani tlat lo." Ka u chuan ati ve sur sur a. Rilru lam chian lohna alo neih chuan a rinhlelhawm leh zual ang. Buai hmel taka a awm phei chuan hual chêp anih zia a lan tir ni maiin ka hria.









"Holmes diktak ini tiraw, i hmai kawr vuah i phelh a hun tawh e." Ti a Police phone ka tum chu ka nghawng ah min rawn rêk nghal a, ka phone ken lai ka thlauh nghal. Ramsa ko ham ang maia mengin, a thaw ri hrâwk hrâwk mai. Ka hrawk bawk chu a nawr tlum mai dawnin ka hria, a bânah chuan ka ham ṭawk ṭawk a, a ban sek phiar takah chuan a thisen zâm a pawng ṭawlh ṭawlh a, thah ngei tuma min melhin, a in seh ruh ngang mai.








Ka u in min puih tumin a hnung lam aṭangin a hnek ṭhelh uai uai bawk a. Min that tawh ngei dâwn anih hi ka tih rilrûk tawh hnuah, Sky-an a bekah a rawn hnek chawrh a, min thlah rang viau.









Chhuatah chuan ka ṭhu hnawk a, ka khuh nghal bawrh bawrh, ka chil a rial vek lehnghal.








Ka piah ami te insual chu ngawi rengin ka thlîr a. "A ai na in khawih ta che, kha a ke a thawh dawn ania." Engmah ti thei lo, ka u chuan Sky-a chu chêt dan tur alo hrilh mawlh mawlh.








"Sky, engnge awmzia?" Pumbaa aw ka hriaa, hawi pawh ka hawi chhuak peih lo, ka zawi ngawih ngawih.









A ṭhiante pahnih in sual chu rawn ṭhelh a tuma, Simba tha chak lutuk chu an hneh lo lek lek mai. An pahnih chuan chhuatah a rêk bet a, "Holmes in ti buai amaw" tiin a au chhuak hrâwk. A ṭhiante pahnih che thei lova a khawih te chu a thah mai ka hlauh avangin ka khum bula lehkhabu ka dahna dawhkân tê chu ka la lawk a, Simba lu ah chuan ka tha neih zawng zawng sâwm khawmin ka vaw pawp, chhuatah a tlu ta hnawk mai. Chu veleh a ṭhiante pahnih chu ka sawi harh a, a khawih na hman hle ani, men pawh an meng ṭha thei meuh lo.









"Gamer, a rawn harh leh hma in phuar bet rawh. Warden ko bawk la, police kutah dah rawh se." Ka u chuan alo ti nghal thuai a. Ka in thing harh a, ka bed sheet chu hlipin, Simba kut leh ke chu ka phuar ta a.









Warden pawh ko hmasa lovin Sky-a te ṭhian dun chu ka buaipui leh rih. An hliama hnawih tur ka nei bawk silo, tuiin ka hru fai ringawta, ka lip gloss ka hnawih sak tawp.









Warden koh ka tum chu Sky-an a rem ti tlat lo. "Kan ṭhianpa ania, kan hrechiang." A nâk dawm pah chuan ati a, "buaina a nei anih hi, damdawiinah kalpui zawk ang u." Pumbaa pawhin alo ti ve bawk.









Ka u chu mit meiin ka râwn nghal a, "chu pawh chu a ṭha tho, a ṭhiante hian keini aiin an hrechiang zawk ang...." A sawi zo thei lo, na tih hmel takin a ṭhen tlawk tlawka, a lu a dawm pah bawk. "Engngatinge, engtinnge i awm?" mangang tak chuan tiin khawih ka tum chu ka khawih fuh thei silo, ka ṭap lo chauh tawh.









"Bella, kan ṭha, Simba chu damdawiinah kan hruai ang." Sky-an anmahni ka bia emaw tiin min lo chhang a. Kei erawh ka u na tuar hmel chuan min ti á lo chauh.









"Ka ṭha mai ang, a rawn na thut mai mai. Ka kal a hun ṭep tawh aniang." Ka u chuan tiin, a na tuar hmel chu thup tumin a nui lui hram hram a. Ka mangang lutuk chu ka rilru in ka ṭawngṭai ta ringawt.









"Bella, room hi lo chhuah san suh aw, chanchin kan rawn hrilh leh dawn che ania." Hruaizela chu an zawn chhuak a, chhan pawh ka chhang lo, kawngka ka khar nghal a, ka u chu ka ngaihven leh vat.









"Ala na em, engtia tih tur nge?" Ka phone ka zawng nghal ruai a, ka u min chhânna pawh ngaihsak lovin ka nu ka phone tawp. A rawn lâk rual chuan, "Nu, Bill-a hi a ṭha lo ania, engtinnge ka tih dâwn?" ka ti phawng mai, ka mittui rawn tla chu ka hru nghal vat.









"Isabella, khawiahnge i awm, rawn haw nghal rawh." Ka pa thinrim aw ka hre nghal zat. Ka u chu ka melh leh a, hlim hmel a pu lui tih ka hria, a na tawrh hi ka ngawih bo pui thei thlawt lo ani.









"Pa, min ngaithla rawh, tûnah hian ka u in buaina a....." Ka sawi zawh hma hauhin, "i u chu a thi tawh, a ṭha em?Chuan thlarau i hmuh thu ka hre duh lo bawk. A rang thei ang berin rawn haw rawh." Tiin thupek khauh tak a chhuah leh a. Ka chhang duh tawh lo, eng pawh sawi ila, a thu a thlak dâwn chuang lo. Phone chu ka off hmak a, min kalsan hlau takin ka u chu thlahlel takin ka melh vawng vawng.










"Hey Gamer, ka ṭha ka tih kha, thil hriatchhuah ka nei. Prem-a han hmu rawh, ka thih ni tak kha ka hrechhuak thei lo na in, a hmaa thil thleng ka hrechhuak. Sum lamah harsatna a neih thu min hrilh a, hna pawh ka zawn pui nasa. Kan awmdun laiin a phone ah rawn be tu an awma, khata ṭang khan a zia a inthlak, a nu kál thlâk nan sum tam tak an mamawha, a mamawh ang pe tu tur a hmuh thu leh thil engemaw tih sak tura an duh thu a sawi a. Holmes chungchang pawh kan sawidun, min that tute an nih ka ring lo tawp mai. Ka thih hma zan khân a roomah pawh ka riak in ka hria, engemaw hriat a nei ang." A lu na pawh sawi tawh lovin a thil hriat chhuah ang ang chu min hrilh vek a.









Prem-a room ah chuan ka chho nghal, mahse alo awm lo. Class ala kal anih ka ring. Chhuk tuma ka in her rual chuan mi pakhat Mizo ang deuh hi a rawn phei a. Prem-a room a kal a tum ve tho aniang.









"Tunge i zawn?" Hindi a min biak takah chuan Mizo ani lo tih ka hrethiam a. Prem-a hmuh ka duh thu in ka lo chhang ve mai. "Class a kal, khawngaihin i kalsawn thei em." Tiin room hawnna chahbi ni awm tak chu a rawn lek lang vah a. Kawng lo kian in, "alo haw har angem?" Ka ti leh hrâm. "Ka hre lo" tih chauha min chhang in, kawngka hawngin min luh san ta daih a.









"Room mate a nei thar animaw, a hma chuan amah chauhin a luah a. Kha chu mi thar anih kha." Ka u in alo ti nghal zat. Step-ah chuan alo haw hun nghakin ka ṭhu rên râwn a. "Room ah nghâk zawk ila, ramhuai an lokal ange" ka bula ṭhu pah chuan a ti zawi sup. Hlauh a nei, thlarau dang ka hmu lova, engnge a hlauh ka hre thei mai lo.









"Bill, buaina hi kan chin fel hnuah engtinnge i awm ang? I bo hlen daih angem?" zawhna awm ang lo tak chu ka zawt leh a. A hlauhna a zia deuh te ka ring. A nui chhuak hawk, "i bulah ka awm reng dawn, chung lam khian min ko mahse, no, ka ti tlat ang." Hawi pawh hawi chhuak ngam lo chuan ati a.









Thlarau dang an awm silo, engnge i hlauh a?" ka insum zo leh ta lo. Chiang taka min rawn en in, "he lai hmun hian engtin emaw min ti danglam dawnin ka hria. Ka rit lúk mai, a chhan pawh ka hrelo." Atih leh takah chuan awm pui reng na chi a niin ka hre ta lo. Thlarau awm nuam lo ka vawikhat hriatna, he hmunah hian sûlhnu a ngah vang te pawh ani maithei ani.










Kan room pana kan chhuk laiin, Prem-a chu a rawn chho ve mek a. "Biak lawk che ka duh, hun min siam sak hram rawh." Ngênngawl tak chuan ka dil a. A sana bih leh zauh in, "minute sawm hun i nei" tin step-ah chuan a ṭhu thla a. Minute reilote pawh nise ka lawm tho e.









"Bill-a nên khân in in kawm ṭhin tiraw." Ka ti nghal thawr, din reng chu a mawi lova ka hriat avangin a bulah chuan ka ṭhu thla ve a. "Kan in kawm tam lo," tih zawngin min chhang. "Min enthla tu an awmin ka hria, a hmaa Bill-a ti buai tute tho kha an ni maithei." Ka tih chuan a rawn hawi chhuak rang kher mai. A meng phawk nghal hrú a, "in hmu tam lo ang, puih theihna che ka nei lo." Tiin a room lam panin a tlân chho nghal hlawk hlawk. "Holmes ho kha a hlau aniang, ti buai tawh rih lo mai rawh, kan ching fel vat tho ang." Ka u chuan tiin room lam pan chuan a chhuk ve nghal a. Thil dik lo a awm, engvanginnge hlau hlawpa a tlanchhiat, hriat a nei anih loh pawhin in hnamhnawihna a nei ani. Ka u hian hriat belh leh se ka van ti em.









Hma lak zel dân tur ngaihtuah chung chuan ka chhuk ve a, sazu thi uih rim ni awm tak, thisen rim nena in chawh pawlh, thil rim thang uih huam ka hriat chuan ding chawtin, ka hnar ka lên kual a. Chu rim chu inchung lam aṭanga rawn chhuak ni ngeiin ka hria. Pen khat ka pen leh a, thaw ri hrâwk hrâwk thâwm ka hre leh ta. Ka hawi lêt vat a, inchung lam aṭanga rawn chhukna step-ah chuan hmeichhe pakhat sam sei tak, kawr fual hring bal tak ha in step-ah chuan a rawn vak thla. A nghâwngah chuan a ril a awrh hnuang a, a lei sei taka chhuahin a mit var vek chuan min rawn melh hû mai. Chêt sawn ngaihna ka hre tawh lo, ka tha a khur nghal zawih zawih a, zûn ka cheh lek lek in ka hria. Kum 19 ka ni tawh chung pawhin ngaiah ka nei thei lo, ka mit hian thil rapthlâk tak tak avan hmu ngun ta êm.










Ka hmaah tak ril awrh hnuang chung chuan a rawn ding a. Min rawn hnaihin, min hnim dun dun mai. Hmu lo ang deuhin ka awm lui a, mahse ka hmaah ngei a awm si, hmuh loh der chu thil harsa tak ani.










"Het, kal bo rawh, helai hmun hi chhuahsan vang vang rawh." Ka u chuan rawn tiin chu nu chu a au khum chiam a. "I hrethiam lo animaw, vai ṭawngin thlawk bo rawh." Ati leh a, a hrethiam awm lo ê.









"I kawngkhar a in hawng tawh, kal bo zawk rawh." Chu nu chuan tiin elh sen tak hian a nuih khum a. Ka hawi lêt a, room kawngkhar tih loh chu engmah ka hmu ve lo, thlarau khawvela kawngkhar ani ngei anga, ka u hi a kal a hun ṭep tawh tihna em ni.









"Ka nau hi tibuai lovin thlawk bo rawh." A hriatthiam theih turin ka u chuan a vin leh hrâwk. "Ni lo, min puih angai, ka pa piancham lawmnaah thilpek ngei ngei ka duh. Chu chu ka tih theih hnuhnung ber ani." Ṭah aw tak meuh chuan min ngên a. Ka u pawhin tihngaihna a hrelo, thawk a la leh hawk a, "tih sak mai rawh, i tih sak vat loh chuan a hmel chhe bum ro ve sia, hmuh nawn fo angai ang, lung ṭhalo min neih tir palh ange." A tawpah chuan ati ve ta. Ka pi boral ta khan thalrau vâkvai te ṭanpui turin ka nu leh pate hriat lovin min fuih fo ṭhin. Chu chu chhawm nung zêlin, ka u nen hian kan ṭanpui nasa, nu leh pate thil duh loh ber anih avangin a rûk thei ang berin kan ti ṭhin.









"Khawiah nge in awm?" Hlauhna zawng zawng thukru in ka zawt ve a. "A hla lo, Nala road ah i kal zêl anga, ICICI atm booth alo awm anga, chumi chhak lawka apartment ah chuan kan awm. Chhâwng thumna B6 ah i lût dâwn ania." Zaidam tak chuan ati leh dap dap a. A hmel hmuh hrehawm ka tih em avangin ka en duh tawh lo, a rim mawlh mai hian min ti na zo dâwn.












Room ah lût in, ka sling bag thuhrûk chhûngah purse dahin ka in ak chhuak a. Thlarau pahnih nen chuan kan in zui ve hnak hnak mai. "I pa chu engnge i pêk dâwn?" Kan kal thui hma chuan ka zawt leh a, an awmna a sawi hi kan hostel aṭangin a hla vak lova ke a kal mai a ṭha in ka hria, motor chuang lovin, a pa thil pek tur lei nân ka hmang mai ang.










"Geranium ṭiak i lei sak dawn ania, a pangpar huana a phun tur," atih chuan ka nui chhuak hawk. "I pa chuan pangpar huan a nei amaw?" nui chung chuan ka ti leh a, ka u in a aw alo thian khurh, ka hmui ka chip nghal a, nuih erawh ala za, a ri lovin ka la nui khur char char. Hmu hauh silovin a pa hmêl tur ka mitthlâa, pangpar huan nei tur chuan duhaiin ka suangtuah pa mah mah ani.










"Ka nu a boral tawha, keimah chiah fa an nei. Nupui dang nei tawh lovin min ṭul pui a." Inthlahrung taka a tih chuan ka nui tawp hmak mai. A rilru ka tina angem tih ka ngaihtuah nghal a, ka inthiam lo leh hnuhnawh. A hmaa ka lo hlauh avâng pawh khan ka in thiam lo ngawih ngawih.









Geranium ṭiak lah chu a vang hrep a, kan zawn fê hnuah pangpar dawr pakhat hmaa poly pot an lo hun chhuah dal ah chuan kan hmu fuh hlauh. Pot lai ka lei sak a, an apartment lam chu kan pan leh ta a.









A sawi ang chuan ICICI atm booth chhak lama building lian pui, Shreya tih gate bula lo in tar kuau chhûngah chuan kan lut ho a. Kalna tur min hrilh zêlin, apartment chhâwng thumna, B6 door bell chu ka hmet ri ral ral. Rei vak lovah putar pakhat a sam leh khabe hmul var vek tawh hian a rawn hawng a.









"Ka pu, i piancham ka lawm pui a che, hei hi i fanu in pe tur che in min ti a." Ka tih chuan ka thil ken chu a melh ngut ngut, "Bawihi, i hre sual anilomaw, ka fanu chu nimin zing khan a ruang an chhar alawm, vuina hun pawh kan la hmang zo lo." Ti a kawngka a hawng zau chu an chhûngkhat te ni awm tak lo ṭhu khawm dal chu ka hmu nghal zat. "Raj Gupta, Little Golden School headmaster ni lai mek i nih chuan ka hre sual love. I pianchamah i fanu a boral avangin i sûn viau ang tih ka hria. Ka pu, hei hi i fanu in i tana a tih theih hnuhnung ber ani. Khawngaihin pawm sak hram rawh." Ngên ngawl tak chuan ka ti leh a, chutianga ka hrechiang chu mak ati hran lo, headmaster ani miau a, tupawhin an hre turah angai te pawh ani mahna. Engtinnge a fanu nen kan in tawn? a pangpar tur ka zawn hmuh sak dan te pawh min zâwt buai miah lovin a fanu in a thil pek tur min ken tîr chu ngawi reng in a la a. Lawmthu pawh min hrilh lem lo, kawngka a khar dâwna a mittui khap per sak erawh ka hmu hman e. Ala hlim chhawn êm a, a hun lovah ka kal pawh ani mahna.













Tikhan hna khat chu kan zo leh ta a, an apartment kan chhuah san hnuah a thih dan ka zawt leh a. "Zawh kher angai hran lo, a ril chhuak vek te hi i hmu lo em ni. Motor in a chîl anih loh pawhin, a tla aniang chu." Ka u chuan nin hmel takin alo ti. Chu nu lah chuan min chhân tum lovin, an apartment ngawt chu a en a. A pa amah chauha hnutchhiah chu hrehawm ati ve pawh ani maithei ani.








"Ṭhiannu, motor in a chîl che em ni?" Midangin ka ṭawng an hriat loh nan a bul hnaiah kalin ka zawt. A lu a thing a, "thah ka ni" atih rual chuan a kâ aṭangin thi a rawn chhuak nghal. "Min lo hruai tu turte an lokal dâwn, Holmes hnaih suh, bawihi Holmes hnaih suh." Tiin a râk chiam a, mit khap kar lovah a bo nghal daih mai. "Meidilah a tla dâwn anilomaw, ramhuai ho in an lo hruaiin ka hria, a kalna kha a thim lutuk." Ka u chuan hlauhthawn hmel takin a ti a. Thlarau khawvel zawng zawng hi hmu ve thei ila ka ti ṭhin mange.









Holmes tih hming bawk a sawi leh a, Holmes kut tuara thi anih hmel. Simba hi ka rinhlelh ang kha anih tak tak chuan kei hi sakei pûk chhûngah ka lût ava nimai awm ve!








🌸


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » January 4th, 2023, 12:36 pm

He Is My Girlfriend


Chapter 6🌸



Bella-i pov:




"Gamer, kal chhet chhet suh, ka pen ang hian pen ve pawk pawk ta che. Hun i khawhral hnem tawh lutuk." Ka u in a tih chuan ka ngaihtuahna kal kual nasa lutuk kawng ro su bawk si lo chu ka thinrim pui hlur mai.







"Kal bauh bauh la animai alawm," ka ti vin hlar a, ka kal tau phei nghawng nghawng chu nuih in sum ṭeuhin min lo thlêk. "Pads kawl sa i nei em?" ka hmaah chuan hnungtawlh chungin a kal a, a khi vur vur reng mai. "Kawl lo, ala hun hleinem," en pawh en lêm lo chuan ka ti vin hlar a. Lei sa neih loh chuan chet chhiat hun a thleng thut thei, ka awmpui te lah mipa vek an ni sia, han ban sak mai tur a awm dâwn miah lo.







"Lei haw ang che, ka thawmhnaw i ha sia, ka kekawrte chu i ha tel lovang tiraw." Nui vur vur chung chuan ati leh a. Kekawrte leh zêl hak sak turah min ngai emawni, ka size leh a size a in ang lo hrim hrim.





Ei chawp dawr in hawngah chuan pads chu ka lei ta nge nge a, chanchin bu ah min fun sak thlap.







Chau hnâpin hostel kan thleng a, room chhung kan luh rual chuan ka phone a rawn ri. Number save ka nei tlem a, tuna min lo call tu pawh hi ka save loh zing ami ani. Ka pa number pawh ka save avângin min lo call tu chu ngaih ngam takin ka chhang ve mai a.







"Rafiki, kan lo haw dawn chiah e, kan ṭha ania, min lo ngaihtuah lutuk suh aw." Sky-a aw ani, a chau dâwn tih ka hria, kei min buaipui zawh hnuah an ṭhianpa an kal pui leh ania. Damdawiin ngaia an kal phei chuan doctor leh nurse ten mak an lo ti viau ang.







"Engnge in an, in hliam te kha an lo buaipui cheu em?" Khuma ṭhu thla pah chuan ka ti ve bawk. Thawk a la hawk a, "buaipui e, Mizo nurse fel deuh kan tawng a, kan vânnei khawp mai. Thil i ei tawh em?" a rawn ti zawm zat. Ka pum ka dawm nghal vat a, ka rilṭam zia ka hre ve chiah. "La ei lo, eitur ka lo chah dâwn ania, lo thleng phawt ula." Ka ti ve ta a, keimah vangin class pawh kal thei lovin an awm a, vawiin na na na chu eitur ka'n lei sak ve ange.







Phone dah in, an rawn lêt hma chuan ka lo inbual fai a. Ka hnute hrên beh leh ka tum chu doctor thusawi ka hrechhuak. Ka hrên rêk lutuk vanga damdawiin pan a ngaih leh ka hlauh avangin ka hrêng duh ta lova, Pumbaa sawi ang deuh khan hrên beh chu alo ngai lo tak tak anih hi, ka u kawr lian tak tak ka ha tho a, bra chhah hrêng lo ila a fuh animai. Darthlalangah chuan ka in en vang vang a, ka hmêl engkimah chuan ka u hmel ka hmu, min kalsan hun ala thleng ngei dâwn, engtinnge kei hi ka awm ve tak ang? Khawharna chuan min tuam hlup hlup a, bathroom bang nghengin ka ṭap ta ringawt.







"Hey Gamer, pads i vuah em?" ka u chuan ka ṭah chhan hre miah lovin a rawn ti a. "Bill, kal lo mai la" ka hmui hup in ka ṭap khur zawih zawih, min kalsan ka phal thlawt lo ani. "I thla hlawh i la tawh dawn anih kha Bella, ho te te ah ṭah loh tur. In ti chak rawh, min ngaih châng apiangin darthlalangah in en ṭhin la, min hmu mai ang." Ati zawi ve sup a, hrehawm ati ve tho ang, min kalsan a duh bik lo tih ka hria alawm. Min ṭhen hrang tu hi tupawh nise, dân in ka duh ang thlapa ro a rêl lo anih chuan ka kut hian thisen ala chhuah ve lovang tih tuinnge sawi thei.








"Rafiki, Bella, i zo ṭep tawh em?" Pumbaa aw ka hriat rual chuan ka mittui ka hru hul nghal vat a, "ka zo ṭep," ti a chhangin, ka hmai ka phih nawn leh. Ka awm rei pawhin ka hre silova, an rawn thleng rang hle mai.







Bathroom aṭanga ka chhuah chuan an vaiin min lo en ṭhap a. Ka hmai phih a fai lo emaw tiin ka biang te chu ka khawih ringawt. "Mmm kha ngei kha ani kan Rafiki chu, kan bulah chuan i nihna ang angin lang rawh." Pumbaa chuan lo ti leh in, ka âwm zâwn chu an en bik riau in ka hre lehnghal.








"Eitur chu..." Pumbaa'n a tih chuan ka la chah lo tih ka hrechhuak chiah. "A pawi lo, nakinah kan ei dawn ania." Sky-an alo ti nghal vat, ka inthlahrung zo vek.








Simba inthlahrung hmel ka hmuh chuan a laka ka rilru put hmang kha ka thlak phah eih lo. Ka lu khuhna towel chu hlip in, ka pan hnai a, "Holmes, Police ka ko dâwn. Ka unaupa i that anih chuan thudik tak vek sawi ang che, zahngaihna tlêm ka lan tir mahna." Ka thinrim lutuk chu ka tha a khur hlawk hlawk mai.








"Bella, in beng dai rawh. Kan Simba hi i ngaih ang kha anilo. Mental illness chikhat delirium a vei a, a thil tih ni miah silo, ama tih emaw in tih tlat chang a nei ang. Chu chuan a thluak ti buaiin, ani emaw a intih tlatna ang mizia khan a awm mai ṭhin. Hriatthiam angai, damdawi an chawha, a zia chho zel mai ang." Sky-an zaidam takin alo ti a, dawt min hrilh lo tih ka hria, mahse chutiang natna chu lo nei pawh nise, engvanginnge Holmes anga a in hriat tlat.







"Ka u kha i hre ṭhin tiraw?" in hum ruh ṭeuh chung chuan ka ti leh khawl. Ipik hmel tak hian thawk ala kâwk a, "Bella, i u kha ka hre ngai lo. Sky-a te nên hian kan inkawm ṭhin tih chu ka pha lo, mahse veng hranah daih in ka luah, he hostelah hian ka lêng ngai lova, ka ṭhiante hi an lo lêng zawk ṭhin. College lamah nise, kan kalna a in ang bawk silo, ka tan chuan hriat ngaihna a vâng. Ka ṭhiante hian a hming leh a chanchin te chu sawi lan zeuh zeuh châng an nei, mahse, amah a rawn lan ngai miau loh avangin ka ngaihsak lem lo." Thutak zet chuan tiin a kawr chung chu a phelh thawl a, lum tih hmel takin a kut chuan a in zap leh bawk, kan room hian ni kan hmu ṭha bik emaw ka ti hial.











"Anih chuan, Holmes diktak chu tunge nita? Chu pawh chu i hre lo tiraw, tunge Holmes hmingchhala a ṭhiante kut thlâk ngai. I thluak chian loh vang vek kha aniang tiraw." Elh sen tak chuan ka ti seh chilh nawk a, ka kut ka hum ruh tawh hle.








"Gamer, a thluak a buai ṭhin chuan a kekawrte rawng a hre hrang angem le." Ka u in a khabe tuai nauh nauh pah chuan alo ti zawi sup, Simba chu a en ve reng bawk a. Thu ho deuh rawn sawi chhuak mahse, engemaw ngaihtuah chu a nei tih ka chiang. Hetiang chiah hian kan kum 15 na piancham kan lawm zâna thilpek ka dawn pakhat bo ta min zawn chhuah sak pawh khan ati tawh. Midang zawng kha chuan kan ina hnathawk U Marry kha kan ringhlel vek anih kha, mahse ani chuan thil ho lam tak sawi chhuak pahin ngaihtuahna a lo sêng nasa hle a. Darkar tam pawh a liam hmain, a ru tu chu ka pa ṭhuihhruai ani tih a hai lang bawk. A thluak a ṭhat bik êm avâng hian engeener ni turin ka pa pawhin a duh rêng bawk a. Mahse vanduaina in a nang chîng leh sia, duhthlang thei dinhmunah a ding ta lo ani.











"En teh Bella, kan ṭhianpa lam kan ṭang vang ngawr ngawr anilo ania. Holmes chu Night club a kan insual pui te kha an ni. Simba bulah hian I u boral hlima hming in ziahna card ka hmuh thu kha ka hrilh tawha, a ngaihtuahna a luah hneh avangin a natna rawn chhuah apiangin a thluak su in amah ani emaw a inti animai. Hriatthiam tum hram rawh, kan ṭhianpa hian tual a that ngai lo. A thisen pawhin a ngam lo, ka unaupa diktak ang ania." Sky-an thutak zet chuan alo ti ve bawk a, Simba hmelah chuan inthiamlohna lang chhuak hial mahse ka nêm nghal thei miah lo.









"Kan vaiin min thah a tum kha," ka tih rual chuan, "fa lâk ania" rang lutukin alo ti nghal. "Hey Timon, fa lâk anih thu sawi lang ziah suh. Simba hi chu ramhnuaia kan chhar ania, kan hmuh hmasak ber phei kha chuan nu hnute kham lo hmêl a pu a. A pawr ve ang reng sia, kan awp keu nawn leh alawm. Mahse tumah kan la hrilh lo, Rafiki hian hre ve mai mai se, kan hakuna matata leh animai." Pumbaa chuan duat takin Simba lu chûl hliau hliau pah chuan ati a. Kan Simba lah chu naupang thuawih ang hlauh, ngawi rengin alo dawh ve mai bawk a. Ka thinrimna a kiang ta deuh e, rinhlelh loh tur ka ringhlelah ngai rih mai ang. Thudik ka zawng hmu ṭep tawhin ka hria.










Ka u a rawn ṭe thut, na tih hmel takin a lu chu a dâwm leh tawh a, "a na leh tawh em ni, damdawi i ei thei angem." Khuma ka theh ka bag chu hai rawk rawkin, nachhawkna mum hnih chauh lo awm tawh hi ka hmu chhuak hlawl. Tui in tur ka inchhawp sa chu ban nghalin, "kha ei vat rawh" tiin damdawi leh tui chu pek ka tum a. Thlarau ani tak e, ka bula a awm reng avang hian a thi tawh tih ka theihnghilh leh ṭhin.









"Bella, tunge i biak a, i ṭha em?" Sky-a aw ka hriat rual chuan ka u vangin ka mittui a tla leh ta. Ka hmaa na tuar mek ka u, mittui tla chunga ka melh tlawk tlawk lai chuan min kuai her in, min kuah nghal a. "Ṭap rawh, i duhtawka ringin ṭap rawh," ati dam thlap a, midang an awm leh awm loh pawh ngaihtuah lo chuan ka'n ṭap tak tak mai anih kha.








ka bâng har an ti deuh nge Simba leh Pumbaa te chuan min rawn kuah ve tawp a, an in sut ve hruih hruih in ka hria.








"Duhtawk ru, ka hrechhuak tawh ania," ka u rawn au leh chuan min ti phu zawk. Ka van bâng chiang tak.








Simba te ṭhian ho lah chuan min thlah nachang hre lovin ka la ṭap emaw tiin an in hrût ri leh hruih ṭhin a. Chutianga rei tawk fang kan awm hnuah chuan, "a zo tawh em, ka ṭah chhuak a reh tawh keichu." Pumbaa chuan lo tiin min thlah ve mai a, a ṭhiante pahnih pawh chuan min thlah ve nghal in, "i ṭha tawh tiraw, ala chhuak em?" min ngaihtuah hmel takin Simba chuan alo ti ve bawk. Ka lu ka bu nghat a, ka u thusawi ngaithla turin ka in peih fel leh diam tawh.







"Mahse, engngatinge kan ṭah? Bella, nichin khan tunge i biak?" Pumbaa chuan lo ti leh in, ṭhawn nawn ngai tawh lovin a meng phawk hrû lehnghal.








"Ka u kan bulah hian a awm ve alawm, thil hriat chhuah a nei a, ngaithla lawk ang u." Ka tih chuan an pathumin an in melh tawn zawk zawk a, khat hnih thum chhiar pawh angailo, "thlahrâng" ti a râk teng tung in, min tlanchhuah san daih.








"Hey, lo lêt ru, thlahrâng an awm lo. Keimah ka nih hi, in ṭhianpa Bill-a." Ka u chuan tiin a um zui ve bawk a. A va hahthlâk, kei aiin an upa vek sia, thlahrâng hlau rual pawh an ni tawh emawni.







Um zui tuma ka chhuak tur chu an rawn in ûm lût leh a. Kawngkaah an rawn in bawh thlu rawk rawk. "Kum engzatnge in nih?" nuih in sum ṭeuh chung chuan ka lo ti a, kaih thawh pawh ka tum lem lo.







"Kum 22 leh thla hnihna chiah," Pumbaa chuan min lo chhang rang hle. An in kai tho sap sap a, "thlahrâng a awm ka ti hleinem, ka u a awm ve ka ti mai alawm. Engahnge in rak chiam?" thinrim der ka tuma, mahse Pumbaa mitmenga hlauhna tak tak ka hmuh chuan thinrim ai mahin nuih lam a kal tawh zâwk.







"Mitthi tawh te chu thlahrâng an ni mai lo em ni? Duh leh kan hlau ang, nangpawh i chapal khing bo se i duh dâwn bik em ni?" Pumbaa bawk chuan ati leh nuah nuah. A ke kan en rual ṭhap a, a chapal khing alo bun miah lo, a ke zungṭang lah chu a ti kak ṭui zui a. "Ke phah mawi, roomah va zawng rawh, va sil fai bawk la. I hming hi Pumbaa ni lovin, kê Nâma ti tawh zâwk ila a ṭha ang." Sky-an nui ruh ruh chung chuan ati a, Simba lah chu a hnar a hup teh tlata, a uih viau emawni.







"Chuti zawng chuan maw kan tih dâwn, nangpawh i ha nâwt rawh, Thâw Nâma inih kha. Simba nangpawh va inbual fai rawh, i kap ah tum loh lutukin ka hmai ka phûm lehnghal, a rimchhe ropui si, Kap Nâma inih kha. Tumah in hmusit thei bîk kan awm lo, Pride Land anih hi, hakuna matata." Thaw hlawi hlawi pah chuan zâm duh miah lovin a chhang lêt hmiah hmiah mai.







"Huiham, dar engzatnge?" zawh bik nei lovin Simba chuan a rawn ti chhuak hluai. "Dar 5 a pêl tawh," ka phone en pah chuan ka lo chhang vat.







"Mmm eng rim rim emaw kan nam ta sa sa, Vala ti ang aw." Phur tak chuan tiin an zui chhuak leh ta diak. Khawiah tak kal dawn chu ni maw. "Simba natna vei ang kha in kai chhawn theih thil ani em?" ka u in mak tih hmel takin alo ti. An thluak ala fîm tawk lo anih ka ring, an thlahrâng hlauh vâng bak ani lovang.







"Bill, min hrilh tawh rawh, midang awm loh laia i sawi loh chuan min lo tibuai leh chhen mai ang." Khuma ṭhu phei pah chuan ka ti a, room chhung hnawk chu nakinah ka thian fai mai ang. Ka u a pawimawh zawk tlat.







"Min that tu ka hre tawh," khum bula tei kual pah chuan ati a, ka ṭawng ve hmain a sawi chhunzawm leh. "Ka pa phone nghal rawh, tualthattute an tlân chhiat hmain kan man angai ang. Sky-a te ṭhian ho kha an rawn lêt leh hunah i thurualpui dawn ania." Ati leh dap dap a, a sawi ang chuan ka pa chu ka phone ta a, a la rang viau. "Pa, a rang thei ang berin Delhi ah rawn kal rawh u, ka u thattu kan zawng hmu tawh." Thawk ala kâwk a, rei vak lo a reh hnuah, "Isabella, thudik i sawi em? Mi thiam ber ber te pawhin amaha intihlum anga an sawi laiin nang hian thah anih ila ring cheu amaw?" min awih sak leh dawn lo tih ka hria, ka rilru ana eih lo, thudik a lang chhuak dawna, ka chungah rinna pawh a nghat ngam tawh ngei ang.










"Pa, i fanu ka nih hi, ka thusawi i ring lo anih chuan engnge ka tih theih lo en ang che." Min chhan leh hmain ka dah hmak. Ka pa ani a, ka zah ve lutuk, ka thusawi a awih dâwn chuan khatianga tih ve hmak kha angai.








"Tualthattu chu tunge?" in kuangkuah chunga min lo en reng tu ka u chu ka melh ve kalh a. "Prem-a leh a ṭhianpa, tuna a room mate ni mek khi. Khami zân khan Sky-a te an lên chhuah hlanin a room mate nen an rawn lêng a. Ciggarete pawh kha a ṭhianpa zuk ani. Zu ka in ngai lo tih i hriat kha, min in luih tir an tum ve a, mahse an hlawhchham. Ka khum bula tui bottle ka dah ah khan damdawi an pawlh aniang, ka in zo a ka tha a zawi nghal vek. Chuan khatiang thil kha a thleng ta ani." Atih chuan ka in perh tho nghal. Inchungah chhoh nghal ka tum a, "Bella, nangmah chauhin kal suh, a hlauhawm ang. Kan ṭhian te rawn lêt phawt rawh se." Ka u chuan kawngka bulah dingin alo ti a, an hlauhawm maithei, mahse thinlung keh sawm tawh hian tumah hlauh ka nei lo.










Min dang sa teh mahse, thlarau anih miau avangin a duh angin min dang hleithei bik lo. Kawngka aṭanga ka chhuak chu Simba te ṭhian ho nen kan in tawk leh chiah. Eng sawi lovin room chhûngah chuan min nawr lût leh a, "hmeichhia nimahla, Pride Land ah chuan mipa ini. Vala'n ningzu tui a dâwn leh ta ti ang u aw." Pumbaa chuan lo ti lung lungin, room kawngka chu a kalh ṭha hmiah lehnghal. Avan hun lo ṭhin tak.











Simba chuan ka kalsawn hlau ang hrimin min pawt bet tlat a. "Vala hi ka mirror break chuai ania, khawi maw I tan liau liau tih kha han play teh u. Room chhunga thang khawk rum rum khawp khan ka mirror break hi min tawrh pui ru." Tiin Pumbaa bawk chuan a phone chu phawrh chhuakin, woofer nen thlung zawmin, ring mang khengin a play a. A chapal khing bo pawh ala hmu lo nge ni, a ke lehlam bal tak nen chuan a lam kual a. Sky-an kil khatah zu alo thli bawk, an thawveng si, kei ka ipik ngawih ngawih nen kan boruak hip ava in ang lo tak em.









"Duhtawk ru," ka tum aia ringin ka au. Chu veleh Sky-an Pumbaa hla play chu a ti tawp thuai a. "Rafiki, kan boruak hip ang hi hip ve rawh, hakuna matata." Pumbaa bawk chuan thawveng takin alo ti. Simba min vawnna chu ka theh thla pawp a, "ka u thattu min man pui ula, kan party dâwn ania." Zaidam deuh zâwk chuan ka ti ve leh a, min en hû hlawm mai.








"Tualthattu i hre tawh em ni?" Sky-an alo ti nghal vat. Ka lu ka bu nghuta, "tunge?" Simba chuan thinrim ha seh chilh nawk chuan a rawn ti ve.









"Prem-a leh a room mate, ka u in a hrechhuak vek tawh." Ka sawi zawh rual chuan Sky-a leh Simba te chu hmanhmawh takin an tlân chhuak nghal a. Pumbaa leh ka u nen an hnungah kan zui ve.










Prem-a te room kan thlen hma chuan na tuar thawm ka hre nghal zat. Pumbaa nen kan in en nghal hâw a, room ah chuan kan tlan lut ve nghal.




Awi Lalpa leh!



*** Zawmna






Hruaizela pov:





"Ṭhiana i khawih nasa mah mah ania, inpuang thei lo tur khawp chuan khawih suh." Sky-a ti za lutuk chu ka dang hrâm hrâm a, ti chung pawh hian hmel hmuh tlak awm tawh lo khawpin a khawih tawh.







"Sky, a tawk tawh" Bella-i aw ka hriat chuan ka hawi chhuak vat. Hlauhthawn hmel tak hian Sky-a chu melhin, min rawn pan phei hlawk hlawk a.








Ka ṭhiana lah chuan tu thusawi mah a ngaithla lo, engngatinge thisen chhuah hi nuam atih em em le!






"Sky, duh tawk rawh," Bella-i hlauthawng hmel ka hmuh chuan ka ti vat a. Hria ang pawhin a lang lo, Pumbaa chuan min lo pui ve in, kan pawt sawn a. Prem-a hmai chu thi in a bual nuai mai.







"Awi Lalpa, a pawi lutuk, Sky, kutthlak lo tur i ni asin." Bella-i mita hrehawm tihna chu kei chauh hian em ni hmu thiam.








Prem-a chu ka buaipui vat a, Bella-in bathroom aṭang tui a rawn chawi chhuak bawk. Ka kawr hlipin tuiah chuan ka chiaha, Prem-a hmai chu hru fai nghalin, Bella-i phone hmang tur chu ka lo dang vat a. A hliam kan tih dam phawt loh chuan Sky-a hi jail ah a tan ve mai ka hlau ani.







Lungawi lo tih hriat tak hian min melh kiau a, "damdawiina hruai vat loh chuan an thi mai ang. Min lo dang suh," tiin a phone ka chhuhsak chu a rawn ban vat.







Damdawiin lam rêng ngaihtuahnaah alo awm lo. Police hnênah a report dawn emaw tiin ngaihtuahna ka lo sêng nasa hman deuh ani.







"Bella, hahdam rawh, ka enkawl dam thei." Sky-an zaidam takin a rawn ti a. Ngaihdan ka siam thiam tawh lo, Bella-i thuthlukna ah ka innghat hmiah mai.







"Engtin, Sky, i that ṭep anih hi, engtinnge i enkawl dam theih ang?" Thinrim tak hian alo ti ve a. Hmeichhe dang chu nise an ṭap tawh ngei ang.







"Pumbaa, kan roomah zuk kal la, first aid bâwm kha zuk la rawh, hmanhmawh in." Thawk ala leh ham ham a, a in beng dai ve deuhin ka hria. Pumbaa chu a tlân chhuak nghal a, Prem-a ṭhianpa ka khawih hrep tawh chhuata let reng chu ka buaipui ve bawk a, ka khawih na hran lo, a hmui leh hnar thi bak enkawl zui vak ngai a awm ka hrelo.








Tualthattu an ni tih kan hriat khan kan thin a rim dun em ani. Ka ṭhianpa hi ka dem hran lo, ka ṭhian pawh ni ve lem lo, thah anih avanga ka thin a rim chuan ani phei chu kei aiin a thinrimna a sang dâwn tih ka hria. A insum zo lo pawh kha a awm ve reng e.






Pumbaa rawn lêt leh chuan first aid bâwm chu a rawn pawm lût a. Sky-an lo lak sak vatin, Prem-a hliam chu a enkawl sak nghal. "Guys, room ah lo zuk chhuk rawh u, ka tih tur ka tih zawh hunah ka rawn chhuk ve dâwn ania." A thiltih lai chawl miah lo chuan ati zawm leh zat. Bella-i hmela lungawilohna lang chhuak chu tih vak ngaihna ka hre bik lo.







"Bella, room ah ka rawn hruai thla anga, Police kan koh hmain kan duh ang zawhna kan zawt dâwn ania, a ṭha em?" En pawh en lêm lo chuan ati a, a lungawi dâwn lo tih a hrethiam ve pawh ani mahna.








Chhang lovin a chhuak ta daih a, Pumbaa nen chuan kan ṭhianpa hi chhuah san mai chi ah kan ruat lo. A thisen ala lum tih ka hria, insum zo lovin kut a thlâk leh ang tih hlauhna in ka khat.







"Pride Land ah chuan kan in ring tawn vek ani lawm ni. Bella-i kha lo zuk buaipui zâwk rawh u, nakinah he mite pahnih hi ka rawn chhuk pui dâwn ania."
Ati leh a, engngatinge mi pahnih kal pawh kal ṭha thei lo chu amah chauha buaipui a tum tlat, a ṭhiante hi eng angah nge min ngaih, min ring tawk lo ve khanglang zawk anilomaw.








"Sky, ṭhian kan nih hi, kan in pui tawn vek ang." Pumbaa chuan tiin, Prem-a ṭhianpa chhuata mu zawk chu a rawn tung tho nawlh a. Lo pui ve vatin, khumah chuan kan mut tîr ve ta a.







"Bella-i lo zuk buaipui ula, min pui animai. He mite hi chu ka kutah dah rawh u, an rawn harh har lovang." Thupe aw tak chuan ati leh a, "kan lo nghak ve mai ang." Ka tih takah chuan min rawn melh zauh a, khi leh suk in, "ka insum zawh loh in ring leh chu ani êm lovang chu maw, thluak thunun thei lo khawpa mawl ka ni ve hleinem." Min elhsenna ṭawngkam chuan ka thin a khei zawk.






Ka che phuta, a kawr âwmah ṭhamin, "tûnah khan engmaw i sawi, kei hi mi mawl angah min chhuah tihna em ni." Thinrim tak chuan ka ti hrâwk a. "Ṭhiante u, kei chu haw mai ka duh, Pathian hi lokal tawh mai rawh se, kan in ngeih lo si." Pumbaa lah chuan alo ti sek.







"Haw la animai lawm" thinrim takin Sky-a nen kan ti rual leh hrâwk a. "Ka haw ang, ka haw khawp ang, khua a khên hunah kalna tur hre lova in vahvaih leh pawhin, min rawn zawng tawh suh ang che u, ka awm tawh lovang." Ti bui buiin a chhuak zui ta daih a.







"Ṭhiana, min thlah tawh la," Sky-an nui sungin alo ti leh a. A mitmenga vertherna lang tlat hi ka thluak buai ṭhin avanga hmu sual mai mai ka ni angem?









"In elhsenna hi ka pai dam thei lo tih i hriat kha. Ka beng ti kham zawnga i ṭawng leh anih chuan ka kut hi a awm mai mai tawh lovang." A kawr âwm ka ṭham chu ka thlah sawk a. Min chhang tawh lo mahse min ngaihnêpna mitmeng chu ka hmuh hmaih hauh lo. Kum thum chuang zet ṭhian kan ni tawha, hetianga min en zui dawn anih chuan engnge thleng zêl ang a hriat tawh hauh lo.








"Awle, ṭhiana Pride Land anih hi, in ngaidam tawn zêl teh ang." Zaidam tak chuan ati a, lung ala awi famkim thei chuang lo, mahse kan boruak tawn nen a in rem tawh chiah loh avangin ka tha ka ti zal ve ta deuh a.







"Pumbaa leh Bella-i te kha lo zuk awmpui rawh, ka rawn chhuk har lovang. Kalo chhuk hma chu Police lo ko su aw." Thu pe aw tak chuan ati leh a, "khawih belh tawh suh ang che, an na tawk tawh viau e." Ka ti ve a, inhnuaiah chuan ka chhuk san ta.








Pumbaa chu a lungawi lo viau aniang, kan room kilah amahin alo in a, Mizoram aṭanga ka chhungte min lo thawn zing ami wa toki alo hmu fuh hlauh lehnghal, chu nen chuan alo hmeh a, ka ṭhut pui duh ta lem lo.








Bathroom lamah thawm a awm leh rak rak ṭhin a. Bella-i ka hmuh zawh tak si lovah chuan amah anih ka ring ta ngawt.














"Simba, chaw pawh kan la ei lo ania, zuk ei ve ang u." A zu in lai dah ṭha in bathlar lamah chuan a rawn chhuak ve a. Nizân hmasa lawka thil thleng, hmeichhe pakhat keima thah ngei ni a ka hriat, ruang an chharna chu ka thlîr reng. Vawiin khan test kan ti nuala, result chhuak chinah kha chuan thluak lam fel lohna ka lo nei reng. Kha vang kha em ni, hei leh chen ka lo buai tawh?







Simba, ka biak che chu," lungawi lo tih hriat tak hian min melh khui khui a. A chhîp sam lo tuai sakin, "Bella-i ko la, zuk ei ang u. Sky-a chu a hman hunah lo ei ve mai rawh se." Zaidam tak chuan ka ti ve a, kei aiin a thla in a naupang a, thla chauh nimahse kum thlenga in thlau kan ang ṭhin. Duat rawn alo nih tawh ṭhin vang pawh ani mahna.








Hlauthawng tak hian a rawn lêt leh, thaw hlawp hlawp pah hian bathroom chu a kâwk a. "Rafiki, ni lo, Bella-i amahin a inbe char char. A u kha a awm ve tak tak anilomaw." A khup dawm meuh chuan thawk ala leh rih a.










Chutiang anih chuan tukina biak nei ni awm taka bathroom chhunga a awm kha ka hriat sual alo ni miah lo aniang maw. Pumbaa darah nawr in, bathroom chu ka pan pui a, a hlau aniang, ka kut a vuan bet ṭui mai.








Ka ngaithla chiang ve a, engnge a sawi hriat hleihtheih siloh hian a phun ri leh sap sap a. Keimah ang tho hian thluak lam natna alo nei ve anilomaw!







"Bella, lo hawng teh," bathroom kawngka chum chung chuan ka ti a. Phun sap sap thawm a reh hnu reiloteah a rawn hawng ve mai. Ṭap zo hlim hmel a pu a, a mittui ala hru hul kim lo bawk. A hnar a tai hlar bawk nen a in sût ri leh hruih a, "engnge i tih? tunge i biak kha?" bathroom chhûng chu ka endik ve nghal a, tumah ka hmu ve lem lo.







"Ka ril a ṭam" a rawn ti chhâng ṭiau a, Pumbaa pawhin a pum alo dawm nghal. Ni e, vawiin nilêngin engmah kan la ei lo hlawm a, kan ril a ṭam tlâng hlawm ani ange.







Inhnuaiah chaw ei turin kan chhuk ve ta a, "Duhzual, nangmahni em ni thawm bengchheng tak siam te kha." Warden pakhat upat hmel ve tawh tak chuan alo ti a. Pumbaa chuan a chhâng mai dâwn emaw tih laiin min rawn mitmei leh rih. Lo chek hlukin, "a thleng nawn tawh lovang," tiin ka lo chhân sak tawp.








Kan piahah chuan a thleng nen a phei a, keini pawh kan ṭhutna tur lam kan pan ve bawk.







"Bella, i u chu a awm tak tak em ni?" Pumbaa chuan hawi kual hruk hruk pah chuan a zawt a. Bella-in hrehawm atih hlauin ka lo kheuh zauh. "A na, Simba i kut tin hlep rawh, hmeichhia chauhin kut tin zuah tur." Ring tak chuan ati leh lung lung, chhîp thlâk zawt châk chang ka ngah mawle, ka ṭhian ani mai pawha.







Chaw kan ei lai pawh chuan Bella-i hmela lungngaihna awm chu ala châm reng a. Biak lahin min chhân chu khawilam, engmah hrelo ang maiin a chaw ei lai chauh a ngaihtuah. A u thihna chhui chhuah ani tawh dawna, engvanga lungngai tlat nge anih ka hrethiam lo hle. Hmeichhe rilru ang pu ve miau hek lo, kei lah chuan ka lo thawven pui hlê si a.






Chaw kan eikhama, rooma kan chho chu Sky-a alo awm reng tawh a. Kan misual te pahnih pawh ka khumah an kut leh ke phuar sakin alo mut tîr.






"Bro, zuk ei ve nghal rawh, kan lo veng ang." Pumbaa chuan in la fel takin a ti nghal zat. Ka khuma mu te pahnih ka en chiang chu kan khawih na hnuhma hmuh tur mumal alo awm tawh lova, an lo harh ṭha tawh hlê bawk.








"Engtinnge i tih?" ringhlel tak chuan ka zawt a, ka thil hmuh ka awih loh êm avangin ka en chîk hle. Duk pawh a duk eih lova, an hmuiah erawh khawihna hnuhma tlêm a zawng langin, a thi ve sar sar mai.


Bella-i pawhin a rawn en ve vat a, mak ti takin kan in en hô. Sky-a lah chuan, "damdawi ṭha chi ka nei alawm" tiin vei nei lem lo tak hian a nui sung a. A nuih ruala a mit rawng inthlâk zeuh chu ka lo hmu leh hman pêk a, chîk taka ka en leh chuan a hmaa a mitmeng pangngai tho alo la pu. Ka natna bawk chu ka chhuanlam leh ta ringawt.








"Sawi rawh u, Bill-a kha engvanginnge in thah?" Bella-i chuan a rawn ti vin hlar. A hma angin a aw ati thum lui tawh lo bawka, a aw pangngai chu alo nalh ru phian mai.









Prem-a chuan chhang duh lovin a ṭhianpa chu a melh zuk zuk a. A biangah ka beng ri thlawrh. "In sawi lo anih chuan Police te kutah hlân lo cheu in, in ruang kan dah ṭha dâwn ania." Pumbaa chuan pawr takin a rawn ti ve a.









"Min ngaidam rawh u, khami zan khan kan rui lutuka, zu leh damdawi kan tih pawlh sia. Kan in hnial buai khan khati khan kan ti ta mai ani. Min man chhuah hlau in, kan khuaah ka haw zui nghal a. Tûn thlengin kan ṭhianpa chunga kan thil tih kha kan la in thiam thei lo." Prem-a chuan ṭap pur chungin a ti a. Sky-a a melh leh zuk zuk bawk.








"Bella, Police ko tawh rawh." Sky-a bawk chuan alo ti a, Bella-i thinrim lutuk tha khur dar dar chu ka hriatthiam pui khawp mai. Eng ka ti ta nge, ka in rin hma hauhin a kut ka lo vawn sak reng tawh a, a mit meng pawh râma mittui tling pam chu alo chhuah huna hruk hul sak turin ka lo in ring hle tawh bawk.








"Simba, khati te chuan Police a call thei nâng. Thlah teh, i phone ah pawh biak sên loh i neih tawh kha." Pumbaa chuan nuih vur vur pahin a lo ti sup, ka harh chhuak chiang ngang mai. Bella-i hmela mak tihna ka hmuh rual chuan ka thlah nghal a, ka tukhum hiat nauh nauh chung hian, "nang chuan call duh suh, i nihna an hriat i duh lo anilawmni. Keimah ka'n call ange," tiin ka phone chu ka phawrh chhuak vata, kan awmna aṭanga station hnai ber tur ni a ka hriat 'Zakir kir Nagar Police Station' chu google nen ṭang kawpin ka be ta a.









Nghah chhûng a rei lo, an rawn thlen rual chuan hostel neitunu leh warden te an rawn lût ve bawk a. Thil awmzia kan lo hrilh hriat hnuah Police ten koh in ring renga awm tura min tiin, Prem-a te ṭhian dun chu an hruai chhuak ta a.





Room aṭanga hruai chhuah an nih dawna, Prem-an Sky-a a melh dan khan ka rilru a ti buai hlê. Tualthattu ni miah lovin, tualthattu diktak zawkin a vo angah ka ngai leh thut a. Sky-a leh Bella-i te hlim taka an inbia ka hmuh leh chuan ka ṭhianpa chu tualthattu anih ka ring phal silo. Bâkah khami zan khan ka inah an pahnihin an rawn leng alawm, tualthattu chu ani lovang. Ka thluak sukna lam a dik lo anih hmel.








Mahse engnge ka hmuh saw, Sky-a leh Bella-i te an in fawp maw!







Sawifiah hleih theih loh khawpa na in ka thinah min vit sawk mai.









🌸



(In comment chhiar a nuam ṭhin, ka lawm lutuk e😊)


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)