MARRIAGE WITHOUT LOVE BY Te-i MrsAmbrose (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: MARRIAGE WITHOUT LOVE BY Te-i MrsAmbrose (Completed)

Unread post by Ngaia » February 16th, 2023, 8:40 pm

Marriage Without Love
By; Te-i Mrs Ambrose


Chapter 25






"Naupai chu maw a hreawm lo, min ti hlim veng veng ṭhin, chuan min hmuh ang hian ka ngeih em em zawk a, nangmah kha vulh thau deuh i ngai anih kha" ka tih chuan a rawn nui suk a, "Nangmah berin hreawm i tih loh chuan a ṭha, naktuk lamah kan in check up tir dawn nia" a tih chuan ka bu nghat nghat a.







Khumah ka ṭhu a, ani ka mal khamin a mu thung a, "Pa ka ni tawh dawn, thil mak tak a ni, ka chi a chak vak lo emaw ka tia, i rai har ka ti em a, mahse hei tunah chuan i rai tawh a, pa ka ni dawn reng tawh reng sia" a tih chuan ka nuichhuak hak mai, thil a sawi tlang leh lutuk thin a, ka lo zakzum ru bawk nen, ka laiin ka sen ṭan ṭan zel.






Ka pum a rawn chul a, "Naute, lo piang thuai la, kan nghakhlel tawh lutuk che ania, anu pum chhung kha chu a thim emai, lo piang thuai la, khawvel en i lo hmuh ni aṭang apa hian ka hrual ang che" a tih chuan ka melh a, "a ngai lo nasa mai" ka ti nghal vak.






"A ngai reng, a sual ka phal reng reng hleinem, mahse a fel erawh chuan ka awi hliau hliau zel ang a, ka fa nih chu nuam a ti ngawt ang" a rawn tih chuan ka nui ringawt.






Zan kan mu a, ka lo thlakthleh ṭhin em em in a min han kuah leh a, a ban ka kham leh takah chuan ka famkim leh viau tawh, ani Zosangliana lah chuan ka dul la lang miah lo chu a chul a chul a, a be seuh seuh reng a, a khat tawkin "Thil mak, kei Zosangliana hi pa ka ni ve tawh dawn" a ti leh ṭhin.






Rei pawh kan mut hmain mutchhuak chuan min rawn zem leh chiai chiai a, ka pasal hlimna avang chuan kei pawh ka hlim ngang mai, ka muthilh lai zawng pawh khan ka nuih vur vur ka ring.






Zing ka harh chuan a ngai te bawkin ni a chhuak fel leh der tawh, mut ka han duh dan em em hi vawkpui mut tak hian ka mu a, mumang lah ka nei ngai lo, kei aia mutui hi chu an vang ve khawp mai.







Ka inphih fai hnuin inhnuai lamah ka chhuk a, an zavai chuan ṭhutkhawmnaah an lo ṭhu vek a, awmpui ho pawn engmah ti lovin an ṭhu ve ṭhap, thil thleng a awm nge ni? Ngaih chu a ṭha lem lo khawp nai.





"Ka Duatbikte, lo ṭhu ve nghal la" Zosangliana'n a rawn tih chuan a bulah chuan ka va ṭhu ve nghal a, ka ṭhut fel rualin Zosangliana beng bulah zawi tein "Engati nge? Hetianga chhungkaw puma kan awm âwm ka hre ngai si lo va" ka va ti sar sar.







"Thil pawimawh tawk kan puang dawn alawm" a rawn ti a, Zosangliana chu a ding nghal a, "Hetia kan inkoh khawm chhan ber... ka nupui a rawn tho ve ta bawk a, ka sawi tawh ang a" a tih chuan ka inthlahrung ve pah reng, ka tho tlai ṭhin lutuk hi chi tlem tala thawhhmat ka tum a ngai, zing thawhtlai lutuk hi chu sim daih chi a ni.







"Ka nupui Sawmsawmi hian nau a pai a, he thu lawmawm lutuk hi kan zaivaia hriata sawichhuah ka duh vanga zing a zinga inko khawm chuk chuk kan ni, chuan in hmuh angin ka nupui hian rai hi a ngeih a, ei a duh sawtin mut a duh sawt viau bawk a, engkimah in hriatthiam ṭhin a ngai dawn a, a thin a lo chhe deuh anih pawhin in dawh liam mai zel a ngai dawn a, eng kawngah pawh nau pai anih avangin hriatthiamna sang tak in nei ṭhin dawn nia" a ti dap dap a, an hmelah mak tihna leh hlimna a inpawlh nuk mai a, Rosy erawh a meng thip ṭha ngang mai.







Pa Zama chuan "Pu ka ni ve tawh dawn nih chu, ka tu hmel hmuh a chakawm tawh hle mai" phur lutuk mai hian a rawn ti a, zing aṭang boruak chu a fuh cher cher khawp mai. Min lawmpui thu min hrilh hlawm cham chi a, a nuam takzet.







Rosy pawn midang ho awm ve si avangin phur hmel lutuk chuan min lawmpui thu leh nau chu hrisel taka hring ngei turin duhsakna min hlan ve cham chi mai, ka luak hi a chhuak takzet, ka raihuat ber kher pawh hi ka lo ngei sa nen, ka han raihuat phei chuan ka luakkhum lo chauh zel.







Tukṭhuan kan ei a, kan boruak chu a ṭhain a nuam lutuk, Pa Zama lah chuan naute chungchang hlir a sawi a, a phur nghal em em a, kum hnih anih aṭanga a bula mu tura a duh thu chenin a sawi a, kan nui reng mai a ni.








Chaw ei kham chuan kan nupa in kan insiam a, damdawiin lama in check up tir tura kal tum kan ni. Ka thawmhnaw ho lah chu ka tawt deuh vek tawh mai a, chutih lai chuan kawngka an rawn kik karh a, Rohluzuala a rawn lang nghal bawk.








"Sawmte, hei naute nu in naute a oai avanga lawmpuina" tiin bawm hi a rawn lek a, engtin nge a lei hman tih pawh ka hre lo. Ka la a, "Ka lawm e, engtin nge i lei hman zawk a" ka tih chuan "thuruk ania" tiin a chhuak nghal daih.







A thil min pek chu ka hawn chak em avangin ka hawng nghal a, kawrfual a lo awm reng, ka en a, tuna ka size nen hian a inmil tawk viauin ka hria, a nalh takzet a, ka drawer ah uluk takin ka dah a, "hmanhmawh deuh ila" Zosangliana'n a tih chuan






"ka inpeih a ni mai, kal nghal mai ang aw" ka ti nghal var a, kan pahnih chuan pindan aṭanga inzui chhuakin damdawiin lam kan pan a, Zosangliana chuan kawng tluanin ka kut a hum reng a, thla hi a muang takzet.






Kan in check up tir a, kan fa chuan a thlahnihna a hmang ve mek bawk, kan pahniha kan hlimna hi eng nen maha thleng ka phal lo. Doctor chuan indim turin min chah awl lova, keipawn indim chu ka tum nasa ve viau mai.







Doctor cabin kan chhuahsan hnuin kan haw mai dawn emaw ka tia, mahse dawr lamah min kalpuiin thawmhnaw min en kual pui hrep a, a hmeichhia ai chuan a mipa zawk hi duhkhirh zawkah a ṭang a, a thil thlan han uluk dan em em chu pui tak a ni.







"A ngai tawh lo" ka tih lahin "a ngai, i thawmhnaw pawh i hak theih mumal tawh lo saw, i dul a rawn puar hunah phei chuan i buai viau mai ang, i pasalin ka buaipui a, ka bazar pui lai che hian 'ka pasal ka hmangaih em em pa, ka lawm e' ti ringawt mai rawh" a rawn tih chuan ka nui ringawt.







Thawmhnaw tam lutuk min leisak a, ka inthlahrung lek lek zawk, chu a chhapah naute thawmhnaw a pawl a lei ṭeuh zui, mipa a awt ve hrim hrim nge, mipa a nih a ring tih pawh ka hrethiam lo. A khi reng a,, tlang khi ang mai a ni.






Dawr kan luhna hmeichhia ho-in an en nasa a, a ṭhenin thlalakpuiah an sawm deuh reng a, ka thik a, ka hne bawk, ka luak te hi a lo chhuak hman ṭun zel. Dawr pakhatah phei chuan dawr neituin a number hial a dil a, kei ka lung ni tawh lo bawk nen Zosangliana chuan min melh vang vang a hmeichhia a number lo diltu hnenah chuan







"Phone ka nei lo" a ti sup, ka nuichhuak hak nghe nghe, a awihawm loh ve em a tin ni, mahse ka lawm viau, chu hmeichhia lah chuan a number neih ngei tumin engtin tin emaw a tikual chhen a, a chang leh hmelhriat ṭha lutuk ang mai hian nui chungin a beng a,, a nui ri har har zel.







Ka ngei lutuk hi ka keh vak vakte ka chak, mahse chutia a tih avang maia va insualpui lah chu a ho deuh si, thawmhnaw pawh ka en ṭha peih meuh tawh lo, chu a chhapah dawr nghaktunu, Zosangliana be chhen tu khan







"I pian a ṭhing awm e, i kawr lei ho kha naunei tur hovin an hak chi anih kha" a rawn tih chuan ka sat tawh tehlul nen, Lava-ah min thlak a ni ber hian ka hria. Mahse ka tawng hmain Zosangliana chuan "Ka nupui khan nau a pai reng a, a dul a lan huna a hak tur ka leisak lawk anih hi" lawm vak lo aw ka a a tih chuan dawr neitu chu enin ka khi suk mai.







Chutia Zosangliana berin a tih takah chuan a ngawi chiang kher asin, a hmelah erawh zahna zuk lang hauh lova mawle, hmeichhe nasa ve tak chu a ni ngei ang, a make-up a chhah ṭha emai.







Dawr aṭang chuan kan chhuak a, Zosangliana chuan ka kut a kai reng a, ke-in kan tei kual char char a, bazar piah lamah motor kha chu a dah a, tunah chulam pan chuan kan let mek. "I chau tawh em?" min tih chuan lu ka thing mai a, ice cream dawr ka hmuh chuan ka kalpel thei hauh lo.







"Zosang, saw ice cream dawr" tiin dawr chu ka kawk a, a khi deuh suk a, "ka hmu e" tiin a hmalam pan chuan a kal leh mai, a kawr hmawrah ka chelh a, "Sual suh aw, ice cream ka ei chak ania" ka ti deuh hmak, " I ei chak thu i sawi si lo alawm" a rawn tih chuan ka ngei deuh tun mai.







"Ka ngei lutul che, ice cream pawh ka ei chak tawh lo, "haw ang, naute hi a mut a chhuak" ti hmakin motor awmna lamah chuan ka kal hmawk hmawk, thawk leh khatah ka kang awk mai, "titauh leh lungawiloh hi i hrat dawn riauin ka hria, i thikthu lah a chhe si" a rawn ti a, ka thin hi a tihrim belh mai mai.







"ka haw duh, min chawi kang suh" ka tih chuan a nuichhuak huk, kan awmna hi hmun reh deuhna lai a ni chu a lawmawm kher mai, chuti ni lo se, miin hmuhnawm thlir tak hian min thlir mek ngei ang.







Engtin tin emaw tiin dawrah chuan kan inhnuk thei hram a, ka duh lo ka tal nasat lain "Naute hmel kha i ti chhe vek ang" a tih loh leh "Rual ban mang lo emaw, rual aia ngah kutke a nei ang e, tal vak vak suh" min ti ziah lehnghal.







A nih tak tak ka hlau si nen ka tal ṭha ngam meuh lo, ka hmaah Ice cream tuihmel zet an lo chhawp chuan nichina ka thinrimna kha a dai nghal vek, ka ei ṭun ṭun a, a tui takzet. Zosangliana erawh chuan min en reng a, ka lai dawn lek lek.






Mahse lai hman pawh ka ni meuh lo, ei tur ka la ngah emai, Zosangliana chuan "thlem i awlsam dawn khawp mai" a tih chuan a ngaihna hre mang lo chuan ka en ha a, "Ice cream nen a thlem ṭhin tur inih hi" a rawn tih leh chuan ka nui tawp.







Dawr aṭang kan chhuah dawnin ka ice cream duhzawng tam fe min lei sak leh a, "zanah i eichak thut takin" a tih chuan ka lawm ngang mai hetiang hlimna hi ka tawn ka inring ngai lo, mahse ka pasal leh nau pai mak avangin ka rin loh, ka neih ka rin ngai lo hlimna ka nei chu a ni si, ka hlimna chuan van a tawng lek lek a ni.







In kan thleng a, kan pindan kan luh meuh chuan ka chauhzia ka hrechhuak chiah a, insil sawk sawkin khumah ka mu hlan a, khum ka deh chiah chuan mutchhuakin min rawn zem nghal .







Ka bulah Zosangliana pawh a rawn mu a, a ban a rawn dah rualin ka kham nghal vat, a nui suk a, "I chau hle a ni maw?" a rawn tih chuan ka lu chu uar takin ka bu a, "anih chuan muhil la, naute pawh a mutchhuak i tih kha" nui pah hian a rawn ti a, ka chhing ve nghal mai.







Zosangliana ngeiin min kuah tawh hi chuan ka thlamuang em em zel tawh mai a,Zosangliana chuan ka oum chu rawn chulin "Naute lo chhuak vat rawh aw, kan nghakhlel tawh lutuk che ania, a nu leh pa tana fa duhawm ber tur tê, lo chhuak vat rawh aw" tiin ka pum lam ami chu a be mawlh mawlh a.







keipawh hian lo piang vat vat se tih hi ka duh a, a hmel mawlh chu hmuh ka chak tawh a mi. Zosangliana chuan ka chal a rawn fawp zeuh a, "Ka Duatbikte, muttui aw, naute pawh tiamin" a rawn ti a, keipawhin mut chu ka harsat lo khawp mai. Ka muhil nghal thuai a.






(Nimin khan inkhawm kan bang har deuh a,, inkhawm banah chhung inkhawm hun darkar khat chuang kan hmang leh si a, a lo tlai tawh deuh nen kan rawn dah ta lo anih kha aw😁)

(School kan tan tawh a, hun awl a tlem a, a sei thei ngang lo a ni e, exam lah a hnai tawh si, ka buai nuaih mai🥺😩)


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2023, 8:40 pm

Marriage Without Love
By; Te-i Mrs Ambrose



Chapter 26






Ka naupai thu an hriat vek hnu chuan kawng engkimah min awl an tum a, a nuam lo leh lek lek zel, ei, in leh mut bak engmah ka tih hi an phal meuh lo. Ka ei duh zawng erawh englai pawhin min siamsak peih vek hlawm, a bikin Nupuii.







Nau ka pai tih a hriat hnu phei kha chuan kei ai mahin a phur emaw tih mai chang ka ngah. Eitur ṭha ni a a hriat, naute tana hrisel a hriat thar apiang min hrilh ve zel a, a phur fal lutuk hi kan nui dun leh tawp zel mai.







Zosanga leh Rohlua pawh an phur a, pakhatin "thilmak, kei hi pa ka ni dawn" a ti reng a, pakhat lahin "Kei hi patea ka ni ve dawn tawh reng sia, ka senior viau em le?" a ti ve reng bawk. Eitur min leisak dun reng a, Zosangliana phei chuan naute thawmhnaw in kan nupa pindan a tikhat vek ṭep tawh.







Inchhunga awm ho zawng zawng chuan min duat em em vek, awmpuite pawh kei aia awm hmasa vek an ni a, min duat ve viau zel, Rosy erawhin a lang ruamah min duhsak em em si kha a lang lo lamah erawh eng rilru nge a put pawh ka hrethiam lo. A ṭha lam a ni lo tih bak engmah ka hre lo.







Room-a ka mu ka harh rual chuan Zosangliana insiam mawlh mawlh chu ka hmuh hmasak ber a ni. "Zo, eng nge i tih dawn a?" ka tih chuan a rawn hawi a, "Lunglei lamah ka kal leh a ngai a, hna lamah buaina a awm anih ka ring" a tih chuan zin lo turin ka duh nghal em em ringawt.







"I kal lo thei mai lo em ni?" ka ti zawi sep a, ka mitah chiang takin min rawn en a, "tun chiah hi a ni tawh ang, kan sumdawnna kan hawn tirh a ni a, ka buaipui ngei ngei a ngai, a lehpek a awm leh anih chuan keimah nilovin ka naute ka tir tawh zawk ang, nang leh ka fa kha ka zinsan tawh dawn lo che u" a rawn ti dam dup a.







Mah se, ka lung erawh a la ni zan lo, ka tum deuh bur mai a, insiampui pawh ka phur lo zo, ka bul lamah a rawn kal phei a, ka hnung lam aṭang min rawn kuah a, ka lungawi vak lo emaw ka ti a, mahse min kuah rual deuh thawin ka lo ngheng nghal mai.







Zosangliana chuan ka chhip a fawp vang vang a, "Tun chiah hi ka kalsan che ang a, a lehpek a awm tawh lovang, ti tau suh aw" a rawn ti a, ka hmin zan lo "Engtia rei nge i zuk cham ang?" ka tih chuan "Nithum vel chauh a ni ang" a rawn ti nghal a. Ka thu nghil nghal at mai







a lam ka hawi a, "Nithum vel chauh nilovin ni thum lai anih chu" uar lutuka ka tih chuan a nui hawk hawk a, ka ngei leh ṭeuh tawh mai, "Aw, anih ka Duatbikpui nithum lai ka zuk cham ang a, ka kalsan leh tawh lovang che u" a rawn ti ṭha leh a. Hna chu a hna a ni miau si a, ka chelh duh ta lem lo.







A insiam chu ka pui a, a khat tawkin "lo let leh vat rawh aw" ka ti deuh chhen, midang chu ni se, ka sawi zing lutuk hi min ning tawh hial ang, mahse Zosangliana erawh chuan nui chungin a rawn haw leh vat tur thuin min chhang zel a.







A kal hnu chuan ka ruak huai a, ka lung hi a leng nghal em em, a kal aṭang minute nga em pawh a la ral lova, mahse ka ngaih tawh em avang chuan ka call ta tawp, ani pawhin a rawn la har hran lo "Ka Duatbikte, min ngai tawh em ni?" a rawn ti nghal a, "Aw, a reh lutuk" ka ti zawi sep mai, ka pangchang lutuk in ninawm min tih ka hlau ve ṭhin lutuk.







Mahse ani kha zawng, ka pasal min hmangaih em em tu Zosangliana kha a ni miau a, ka pangchan pauh leh min duat zual a, a nuam thei em em ringawt, hei vang tak hian ka pangchang a, ani lah chuan ka panchan hian min duat nuam a ti zual viau nge ni? A nupui nih tluka nuam hi a awm tawh kher awm love.







Rei fe kan inbia a,, naute nen a tawpah min mangṭha thei tawh hram a, ka ngui leh viau tawh, ka naupai hi ngeih viau mah ila, ka rilru no ta lutuk hi chu a buaithlak zawng a ni e.







Inhnuai lamah ka va chhuk a, kapa chuan min hui vat, a lam pan chuan ka va kal a, "Bawihi, awm nawm lo rukna te i neih chuan sawi hreh suh aw, i pasal lakah chiah hian thilthleng i hrilh ṭhin a, ka tan a nuam chiah ṭhin lo, i lakah ka inthlahrun phah lek lek ṭhin" a rawn ti a,








"Pa, chutiangin i inthlahrun nan ka pasal chauh thil ka lo hrilh ṭhin a ni maw? Ka dawn a tawi a, ka lakah chutiang rilru i put pawh ka lo ring ngai lova, kei chuan ka pa ang tak takin ka ngai che ania, ka ngainat loh vang lam che a ni lo ania" ka ti nghal a.







"Hmanah khan pasal i nei reng chungin i pasal nau Rohlua neihtir che ka tum kha a ni si a, keipawhin nuam ti lo mah ila, ka fapa tana khatiang ti kha ka ni a, chuan ka monu i la nih theih dawn tho avanga khatiang a ti ta kha ka ni a, khami hnu aṭang kha chuan kan inhlat sawt ta viau a







keipawh i pa diktak ang chiah ka ni a,,ka mo angin ka en lo che a, ka fanu angin ka en che tih hi hre reng la, theinghilh ngai suh aw, i pa angin min ngai la, ka lakah inthlahrung ngai lo turin ka duh che aw" a tih chuan ka bu nghat nghat a.







Ka kutah ice cream tui hmel zet hi a rawn hmehbel a, "Ice cream hi tui i ti lutuk tih ka hria ania, i tan liau liaua ka lei hi i kutah ngei ka pe ang che" a tih chuan ka nui sen sen mai, "Pa, ka lawm lutuk aw" tiin choka lam ka pan nghal a, ice cream chu fridge-ah chuan uluk takin ka va dah a.







Chhun lam ai mah chuan zan lamah ice cream ka ei chak zawk avanga dah ṭha ka ni. Nupuii eirawng bawl chu ka pui ve a, mahse chawhmeh bak ka chan min phal lo, a over hi ka tia, mahse chhete tala ka che ve thei chu a lawmawm ka ti viau tho mai.








Zanriah kan ei a, puar el awlin ka ei leh a, eikham chuan kan pindan lamah lut mai lovin ka pa bulah chuan ka va ṭhu ve a, tv kan en dun melh melh a, hmeichhia e ti lo chuan Ultimate ka en chu ka ṭan lam a chan a ṭhat lovin ka lo ṭang leh ṭeuh zel.








An inhnek zawh meuh chuan ka chau hnawp mai, kapa phei kha chuan "nangmah nen hian en ziah i la a ṭha ang, en pui i nuam , i ṭang nasa ṭhin si, i rilru i pe tih a hriat emai, Zosanga leh Rohlua saw chuan Barbie film en se an inhmeh tawk chiah" a tih chuan ka nui hak mai.







Ultimate an en duh loh em avanga amah chauha a en ṭhin thute chu a sawi a, ka pa(ama pa tak tak kha) film en chak apiang chu en ve hram hram ka duh ṭhin a, amah chauha tv a en mai mai pawh ka phal ṭhin loh avanga ultimate pawh en tui ta viau kha ka ni a.







Tuna ka pa lah hian tv enpuitu a nei ngai thin lo nen kapa(a pa diktak tho😂) ka lo enpui ṭhin kha a ṭangkai khawp mai. Ka pasalpa pawhin nuam a ti a, mahni maia en ai chuan a nuam zawk hrim hrim bawk a, a ṭha lamah ka ngai a, a nuam kan ti dun phian.







Zan tlai a lo nih meuh chuan kapa in min mutsan a, keipawh mut mai tum chuan ka intintuah a, ice cream kapa in min pek kha ka hrechhuak a, zan tlai tawhah ice cream ei tur chuan choka lam ka pan ṭhem ṭhem.







Ice cream chu a lo awm ngei a, la chhuakin tui ti em em chuan ka ei melh melh, ka eizawh chuan lungawi lutukin kan pindan lam ka pan a, ka pasal awm si lo chu a vawt deuh reuh kher mai, mahse mut erawh ka harsat lo, reilote khuma ka zal hnu chuan ka muhil zui ta der.







Zing lamah chuan ka pum na lutukin vangin ka harh a, ka pum lah chu a nâ a reh mai dawn emaw ka tih laiin reh aiin a nat belh tawlh tawlh a,ka thlan te a tla hluam tawh, khawfing a chahna a rei tawh a, midang pawh an thawh tawh ka ring.







Ka pum na lutuk vang chuan awm ngaihna ka hre der lo, ka thochhuak a, ka pum dawm chung tak meuh meuh chuan bualin lam ka pan a, ka thlen dawn lai chuan hnuai lam aṭangin thisen a rawn put a, ka hlauhthawng lutuk chu ka au vak a, thiput lah chu a tam telh telh a, a hnu chuan engmah ka hre zui ta lo.







Ka harh leh chuan damdawiin khumah ka lo mu reng a, ka pa, Rohlua, Rosy leh Nupuii chu ka hmu a, ka rinloh lutukin Zosanga ka hmu bawk,a hmelah chuan thinrimna, natna leh lungngaihna ka hmuh pawlh nawk mai, kei lah ka kim lo riau a, damdawiina ka mut chhan ka hriatchhuah chuan hlauhthawnna in min man nghal der.







Ka pum chu ka chul zeuh a, a ruak ka huai hian ka hria, a hma ang khan ka pum ka khawih chuan feeling ka nei thei tawh lo, chu chuan ka hlauhthawnna a rawn belhchhah a, "naute, ka naute kha a ṭha em?" ka ti nghal chul a, naute chu a ṭhat thu min hrilh se ka duh takzet.







An zavai mai chuan lainat hmel lutukin min en hlawm, Zosanga tiam lovin, ani chu a hmel ka chhiar thiam lo, midang min melhna chuan ka thla chu a timuang lo zual a. Keilah ka ruak huai bawk nen "khawngaihin naute a ṭhat thu tu emaw tal khan min hrilh teh u" hlauhthawng lutuk chuan ka ti a.







Mahse min rawn chhanna zet chuan min ti â lo chauh, nau ka chhiat anih chu "a ni theilo, ka fa kha ka pumah a la awm, min kalsan reng reng lo, naute chu hetah ka pumah hian a la awm alawm" tiin ka au vak a, tuman engmah an sawi lo.







An zavai mai chuan min en tawp a, Zosanga tal saw chuan naute a ṭhat thu min hrilh se ka ti takzet, mahse a ngawi char char mai si, ka awmdan a mumal lova, a hnu chuan doctor ten min chiu mu ta tawp.







Ka harh leh pawhin a ngai tho, natna, ka fa ka chan avanga ka natna chuan a ngai ang khan min rawn tuam leh a, ka lung zawn hi vih ang maiin a nã, eng vanga ka naute chuan min kalsan nge a nih.







Zosanga chu a chhuak a, Nupuii chuan min khawngaih hmel lutuk hian min melh ngawt ngawt a, tuna tak hi chuan ka pasal bak tumah mamawh ka nei lo, mahse ani erawhin vawikhatmah min la be lo thung a, nau ka chhiat avang hian min dem nge, a tawrh lutuk avangin min be lo zawk tih pawh ka hrethiam lo.







Nupuii chu ka en a, "Engtin nge damdawiinah hian ka lo awm a, chuan engtin nge Zosanga pawh a rawn thlen hman?" tih a ka zawh chuan "tukin dar nga bawr vel khan i rak thawm kha in pindan zawna ka kal lai khan ka hria a, thil tlu dawp thawm khan a zui bawk si a, hmanhmawh lutukin inhnuai lamah ka tlan a







Pu Zama leh U Rohlua lo ṭhu reng kiangah chuan thil ka hriat ang ang chu ka sawi a, in nupa room lam pan khan kan lo chho a,, chhung lam aṭangin a inkalh tlat a, kan ko che a, mahse min chhang thei si lo, kawngka kha u Rohlua'n a tichhe ta ngawt a







kan loh luh chuan chhuata thisen nena inchiahpiah nuaia i lo let reng kan hmu che a, damdawiin lam kan rawn panpui nghal che anih kha, Pu Zosanga erawh Rosy khan a call niin ka hria, a rang a rangin a rawn haw nghal alawm" a ti a.







Damdawiinah chuan zankhat ka riak a, a tukah kan in lamah kan haw a, pindan kan thlen chuan Zosanga chu a ngawi reng a, a che mawlh mawlh tawp, vawtkhat mah ka harh aṭang khan min la be lo reng reng, chu chuan ka rilru natna a belh nasa sauh.







"Zo, naute avang khan min ngei viau em ni? Ka duh vang reng a ni lo asin" ka tih chuan chiang lutukin min rawn en chat a, a nui nghal suk bawk, mahse a hmel erawh kan inneih hlim ang maia hlauhawm kha a ni thung a.






" 'Ka duh vang reng a ni lo' i ti a maw?" tiin a nui leh huk a, a hmel chu a hlauhawm ngang mai "aw, naute kha ka duh vang" ka sawi zawh hmain kut a rawn vai hluk a "Malsawmsang, dawt min hrilh tum reng reng suh, ka dawhtheihna a pan ania, dawt ka ngaithla peih lo" a ti hmuk, a bek lah a pawng ṭawlh ṭawlh bawk a.







Ka hmingpum ngeia min koh avang chuan ka rilru a nâ a, ka hrethiam lo bawk, ka biangah mittui a rawn luang nghal a, ka naute ka channa a la rei lo, Zosangliana lehzel ina hetianga min tih hi chuan ka natna hi a thuahhnih takzet.







Ṭawng pawh ka ṭawng thei lo, ka rilru na lutuk leh Zosangliana thusawi ka hrethiam lo lutuk chuan awrawl chhuah meuha ṭahkhum a, aukhum nghek mak mai chak "Ka hmaah hian i mittui kha ti tla vel suh, ka fa kha keimah chauhin ka sûn, nang erawhin i sûn tak tak hauh lo







Kei aia Rohluzuala chu i hnaih duh zawk chuan hnaih mai la, ka fa kha i tihtlak kher a ngai em ni? Ani avang khan i kal duh chuan chelh che ka tum dawn lo asin, tinge ka fa khan i kawng a dal i hlauh avang ngawta i paih bo, keimah pawhin ka enkawl thei reng asin" rilru natna aw a khat chuan a rawn tichhuak a, ka hrethiam lo lutuk, eng thil nge a sawi awmzia kha? Kei hi ka mumang ramah ka cheng zawk em ni?


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2023, 8:41 pm

Marriage Without Love
By;Te-i Mrs Ambrose



Chapter 27






Zosangliana chu ka en ngawt ngawt tawp a, "He in aṭanga i chhuah loh chhan hi ka khawngaih vang che anih hi, a tirin keiman i hna ka tihtawp sak che a, chhungte i neih loh avanga chhuak lo mai mai i ni, mahse a hma ang kha kan nih leh ring tawh suh, ka fa titlatu hi ka nupui atan ka pawm che ring miah suh" a rawn ti leh a.






"A tawk viau e, kan fa kan chan kha nang ai mahin ka tuar tih hre ve rawh, a paitu ka ni a, ka puma nunna nei, insiam mek ṭhin a awm ta lo chu engtin chiah nge ka awm i hre lo, i duh duh khan min puh suh" ka ti vak, ngainobei lo lutuk hian a rawn nui a, tunah tak hi chuan hmana Zosangliana leh Malsawmsangi mi pahnih inhal em emte kha kan ni leh ta maiin ka hria.







"I duh vang reng a titla i ni lo a maw, chuti si, eng vanga i puma nau tihtlakna damdawi kha Doctor ten hmu si nge an nih?" a tih chuan sawi leh tur reng reng ka hre lo, ka pumah nau tihtlakna damdawi hmuh a nia maw! Mahse, mahse kei chuan ka eitur ka uluk a, nau tihtlakna phei chu ka ei lo chiang khawp mai.







"I puma nau tihtlakna damdawi hmuh anih thu hi kei chauhin ka hria, midangin an hriat ve hunah chuan engtin chiah nge an awm i rin? Enteh maw, tlang tak khan kei ni lova Rohluzuala i duh zawk thu kha min hrilh mai thei lo em ni? Kan fa titla kher lo khan" a tir lamah rumthaihna aw lang mahse, a tawp lamay erawh natna aw a chhuak thung a.








"Kei leh Rohluzuala hian eng inlaichinna mah kan nei lo, engmah min zawt fiah hmasa lovin min rinhlelh tawh loh tur thu i sawi a ni lawm ni? Tinge tunah engmah min zawt si lova thutlukna i siam ringawt" ka tih chuan a ipte a zen ngar ngar chu a phawrh a, thlalak pakhat chu a lo hum khawr vek mai.







Ka en chuan hman zana Rohluzuala pindana tui bottle ka lak ni ami kha a ni. "Zan engzata tam chiah nge i luh ṭhin ka hre lo, mipa thawmhnaw zawk chhuatah paithlak vek a ni a, pakhatin zan mut kawr sexy zet, a dar zat en lah khan zanlai a ni bawk a, eng chiah nge khatah khan i tih? Zanlaiah ka nupui hian mut kawr pan te nen ka nau pindan lam a pan a maw!?" a tih chuan sawi tur reng reng ka hre lo.







A sawi ang ngeiin Rohluzuala thawmhnaw chu chhuatah a inpaih darh a, kei lah mutkawr nen chauh ka awm a, Rohluzuala puan ka pawh hlim lai a ni, a takah chuan ka sin ṭhattir kha ania, "Awmze nei lova ka rinhlelh mai mai che ring suh, thlalak pawh hi vawi engzata tam nge edit a nih leh nih loh ka en i hria em? Mahse rilru tina tu lek, a tak ngei chu a nih si kha, nupui uire ka duh hleinem" a tih chuan ka na veng veng.







Min tihdan kher kher chu, "Insawifiahna pawh min pe hmasa lovin thutlukna i siam fel leh der tawh a?" rilru natna nen ka sawichhuak a, "a ngai tawh chuang em ni? Mahse ka ṭhen che ring miah suh, nang thlah zalen che a, ka nau nena hlim taka in awm kha ring suh ang che







ka ṭhen hauh lo ang che a, he inah i awm reng ang, ka nupui angin, mahse ka nupui tak, ka hmeichhe hmangaih Sawmsawmi angah khan inngai hauh suh ang che, pawn lamah ka nupui, mi hriata ka nupui ni mah la, a tak, kan pahniha hriatah erawh sal leh a pu bak kan ni lovang" a tih chuan ka melh ngawt ngawt tawh.







Ka fa ka chan avanga ka nat tawh nen, tunah Zosangliana ṭawngkam lehzel han dawn chu a nat dan hi sawifiah thiam a har takzet. "a hma ang bawk khan thutlukna i siam leh ta, eng vangin nge thutlukna siam hi i awlsam em em? Fa ka chan hlim hlawl a, tunah i ka aṭang thu ngaihnawm loh zet min fah cham chi bawk a, thudik hi hriat a, chhui hmasak tum ve ta che" ka tih chuan a ngawi reng







"ka thil tihsual ber chu maw, ka zin dawna nang leh ka fa ka mangṭha che u kha a ni.Mangṭha tih hian awmzia pakhat chiah a nei tih nangmah aṭang hian ka hre thar a, ka fa chu hmu tawh ngai lo turin khami ni khan ka lo mangṭha reng a, chuan nang pawh ka nuna ka hmeichhe hmangaih i nih ṭhinna ata kha ka mangṭha ve bawk che a, inhnaih takah awm mah ila, a hma ang khan kan awm tawh dawn lo, in pahniha ka mangṭha che u khan hetiang lam hawi a nih ka ring hauh lo" a ti chhuak sup a.







"Hmeichhe ṭha, nupui ṭha ber, hmangaih phu hliah hliah angah ka ngai che, mahse ka dik lo nasa a ni, a hma a ka ngaih ang che khan gold digger chu ka ti tawh hauh lovang che, mahse call girl ang bakin ka ngai thei tawh lo che







a hmain kei, tunah ka nau, a lehpekah tunge ni leh ang" a tih chuan engtikin nge ka kut ka lekchhuah ka hre lo, Zosangliana hmai chu a ri ṭhawt , "khatiang khan min puh tawh suh, hmana Zosangliana, thutlukna siam awlsam, ngaihdan ang apiang a tak emaw ti bur ang lek kha i ni" ka tih chuan a nui a







"ka lo ring che a, ka hmangaih bawk che a, ka inchhir mek a nih hi, hmangaih lo che ila chuan tunah hian ka fa ka chan avang chauhin ka na ang a, a ziaawm deuh tur, mahse ka lo hmangaih kher kher che a, phatsan ka nih avangin ka na mek anih hi, a hria em? Mipa hi na thei lo kan ni lo, helai, he thinlung nang hmangaihna phutpui ṭhintu hi a na ve takzet asin" tiin a chhuak nghal daih a.







Ka biangah mittui a luang thla nghal, thutlukna chu a siam leh ta, chhuah mai ka duh, ka pasalin min ring miau lova, eng nge ka awm ve rengna chhan tur, ka luggage ka la a, ka thawmhnaw ka khung mawlh mawlh, mahse thil pakhat hriat chhuah ka nei thut, ka fa kha, tihtlak ngei anih chuan he ina tu emaw ber thiltih hi a ni ang a, ka chhuak thei lo .







Ka thawmhnaw chu ka khung leh ta zawk a, ka naute chunga khatiang ti tu kha ka zawnchhuah phawt a ngai, ka hriatchhuah hunah chuan ka awm zel dan tur chu Khuanu chungah ka nghat tawp tawh ang.








Zosangliana min tihdan hi, hmeichhe dang chu ni se an chhuahsan tawh ang, mahse kei erawh chuan ka chhuahsan hauh lovang, thudik ka hailan ngei a ngai.







Min tih dan avang khan ka hmangaihna a nep phah lo, a hmuh ang kha hmu ve ila, kei pawhin ka ringhlel tho ang, mahse fa ti tla duh anga min ngai erawh kha chu nâ ka ti.







Pindan chu ka enkual vel a, naute kan neih dawn avanga kan phur zia kha, ka pasal Zosangliana pawhin min duat em em a, kan pindana naute thil ho chuan ka mittui a ko chiang kher mai.







Ka pum ka dawm a "Naute anu hi min dem ngawt ang ringaw ka venghim zo si lo che a, ka tihpalh aw" ka ti chhuak sep a, ka biangah mittui a luang ngiai nguai, ka fa khan thla hnih leh a chanve vel bak min awmpui lo a. Thlan lung siama phum chu khawi lamah, ka pumah kut leh ke pawh a neih hmain tu emaw sualna avangin ka chan ta kha a nia.







Nu tan chuan a na takzet asin, eng vanga ka fa chungah kher che nge a nih? A pawi a sawi lova, tu pawi sawithei mah a ni lo ka pumah ka thisen ringin a rawn insiam a, engati nge min laksak kher, khuarel chhiatna avanga chan ka ni lo hi a na lehzual ka ti.







Tuna ka chunga he thil ti tu hi ka hriatchhuah hunah chuan a nuam sa lo khawp ang, "Naute, i chunga hetiang thil ti tu ka hriatchhuah hunah chuan a tuar ve khawp ang, anu in ka venhim theih loh avang che khan min lo ngaidam ang che aw" ka tichhuak a.







Ka bungraw pawimawh bik dahna ka hawng a, Zosangliana'n naute pheikawk duhawm zet a lei kha ka hmu hmasa ber a, ka la a, kan lei laia kan hlimdun zia kha. Khatih lai kha chuan hlimna zawng zawng kan nei a, mahse tunah chuan kan hlim em em chhan kan fa kha a awm ve ta lo.







Naute pheikawk chu ka la chhuak a, ka en ngawih ngawih, chu tih lai chuan kawngka an lo kik a, lut turin ka ti nghal, ka rinloh lutukin Rosy a lo lut a, ka en reng "Naute avang khan pawi ka tihpui lutuk che" a rawn ti a, a hmel ka chhiar thiam lo.







Tunah chuan ka na em a, a hmel chhiar a, eng nge a ngaihtuah tih pawh ka ngaihven peih meuh lo, ka bu zeuh ringawt a, "sawi nuam chu i tih ka ring lo, mahse engtia naute kha chan ngawt nge i nih?" a rawn ti leh a, a mitah chiang takin ka en a







Ani Rosy hian Zosangliana nena min inṭhen tir a tum reng ṭhin a, ani hian ka fa kha a dahṭha a ni thei mai ang em? Ka eiturah damdawi a telh nge, tui in turah a lo telh zawk ni ang. Rohluzuala pawh damdawi ṭha lo a pe duh a nia, kei a hmela en a a en phei hi chu min pe hreh dawn lo chiang lutuk.







"Nang hi em ni ka ei tura nau tihtlakna telh tu chu?" ka ti nghal ṭhat, a meng buai nak mai, "Nang hian Zosangliana nena min inzhentir i tum reng a, kha vang kha em ni ka fa ka chhiat ngei nana ka eitura damdawi i telh? Ka fa kha lak kher a ngai em ni?







Rohluzuala damdawi i thlaksak tih chiang takin ka hre tawh a, Rohluzuala i u ang mai pawh nang hian damdawi i pe duh anih chuan kei phei chu min pek i huphurh dawn lo lutuk, ka fa khan i pawi a sawi em ni? Eng vanga khatianga che kher kha nge i nih?







Rohluzuala nena kan thlalak i thawn kha a tawk, ka naute lehzel lak bo kha a ngai em ni?Eng ang hmeichhia nge i nih? Finfiahna ka neih hunah chuan nang hian i tuar khawp ang, ka fa min laksak man hi ka thungrul ngei ang che" ka tikhum tawn tawn.







Engmah a sawi lova, chu chuan ka thinrim a belhchhah chiang kher mai, "I thiltih kha ka hriat loh i ring em ni? He inah hian nang lo tumah rinhlelh tur an awm lo" ka ti khum leh a, "I duh duha i puh tur ka nilo, eng finfiahna mah i hmu lovang, chuan tuman an rin che ring bawk suh" tiin min chhuahsan nghal a.







Ka natna kha thinrimna in a rawn thlak a, Rosy lo chu tumah rinhlelh tur an awm lo, ani hian Zosangliana vangin a tir aṭang khan min haw em em a, ani lo ka fa tina duh tur an awm lo.







Ka inseh ruh ṭeuh a, engtin nge finfiahna chu ka neih theih ang, ka lu a rawn hai a, ka taksa a chak lem lo bawk nen, khum lamah chuan ka pai phei titih a, khum ka thlen chuan ka bawk thlawp.







Ka men chuan zan a lo ni der tawh, ka bula mu a min kuah ṭhin tu, a ban min khamtir ṭhintu ka pasal Zosangliana chu hmuh tur reng reng a awm lo. Ka naute ka chan a, min hnem tu tura ka duh ber lah chuan min hlat tlat si.







Ka phatsan angin a ngai a, naute ka titla angin a ngai bawk, min hua a, min hnaih duh lo bawk a, a hma ang khan ka nat lai hian min kuah leh se tih ka duh takzet, mahse ani erawh a hla veng veng mai si. Ka nat chang kha chuan ka dam leh hma zawng min kuah reng peih ṭhin kha ania.







Thutlukna a siam awlsam lutuk ṭhin avang hian ka na fo zawng anih hi. Keima Zosangliana diktak ang khan thil awmzia min zawh hnuin thutlukna siam leh sela, tuna kan awm hran a, kan inhlat ang hian kan inhlat kher ka ring lo. Ka bianga mittui lo luang chu ka hru a.







"Intichak rawh, anih loh chuan eng thil mah i haichhuak thei lovang" tiin ka infuih a, nau ka chhiat dawn zana thil thleng kha ka ngaihtuah a . Chhun lamah engmah ka ei lova, zanriah ka ei leh ice cream ka ei bak engthil dang mah ka hrelo. Anih chuan kha ice cream-ah khan damdawi an lo telh tihna em ni?







Fridge-ah ka dah tawp kha a ni si a, he thil titu hi Rosy bak an ni hauh lovang a, mahse a sawi ang khan ka puh ngawt thei lo, tuman min awi lovang , finfiahna ka neih hmasak phawt a ngai. Chu erawh a harsa khawp ang le, finfiahna hi ka nei thei ang nge, nei lovin heti hian engmah hre thei lovin ka awm reng zawk ang le?


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2023, 8:41 pm

Marriage Without Love
By; Te-i Mrs Ambrose



Chapter 28







Zanlai a pelh thlengin Zosangliana chu a rawn lang lo, înah a awm si lo va, khawiah nge a awm tak ang? Min huat avanga rawn haw duh lo em ni a nih? Ka phone ka la chhuak a, ka call chuan a ring ral ral a, mahse chhangtu awm lovin a ring ral ṭhak.







Ka call nawn leh a, a lak pawh ka rin tawh loh hnuah a rawn la hram a, min lo chhangtu erawh amah Zosangliana a ni hauh lo. "Tunge ka biak?" ka ti nghal a, ka hlauthawng ringawt bawk. Lehlam a mi chuan







"Ms, Jacob ka nia, min hriat ber dan tur chuan Zosanga ṭhianpa" a rawn ti a, chutia a tih chuan ka thaw huai, "amah kha khawiah nge a awm?" ka tih leh chuan lehlam ami chu a ngawi deuh ren rawn a, "Kan înah, zu a in a, a rui nawi lutuk, a rawn thleng thei lovang, ka rawn hruai haw i duh nge, heta riak turin i duh zawk?" a tih chuan ka ngaihtuah rauh rauh a.








"A harsat lem loh chuan min rawn hruai haw sak thei ang em?" ka ti a, lehlam ami chuan darkar chan ve hnuah a rawn thlen mai theih tur thuin min chhang a, an rawn thlen dawna min lo phone leh tur thu a sawi hnuah call chu kan titawp a.







Ka tho chhuak a, ka vei kual sek, zu a in awm ka hre ngai lo a, mahse tunah erawh zu a in thu a ṭhianpa in min hrilh a, eng ang rilru chiah nge a put ang, chuan thlalak kha tuin nge thawn ang? Rosy leh tho em ni?







Pawn lama motor lo tlan thawm ka hriat chuan hmanhmawh deuhin pindan aṭang chuan ka chhuak a, mahse thawm erawh ka dim viau, kawngkapui chu ka va hawng a, Zosangliana chu rui lutuk din pawh ding hleithei lovin a ṭhianpa chuan a kuah a, a thle leh buk ṭhin.







A ṭhianpa Jacob-a'n min lo hmuh a "a va rui ve" ka ti chhuak ringawt, sawi tur dang ka hre lo, naute kan chan ngei a, mahse heti zawng khera a rilru natna chhawk a tum hi chu. Ka thinrim viau dawn a, mahse awmzia a nei thui dawn chuang si lo.







Zosangliana chu ka va kuah a, "lut ang aw" ka tih chuan min rawn en a, a nui sup a, "lut ang, naute pawh ka ngai tawh alawm" a tih chuan ka lung zawn hi a na veng veng. A ṭhianpa chuan min lo puih a tum a, mahse "a ngai lo, ka lo buaipui thei tawh mai ang, ka lawm lutuk ania i rawn hruai haw a" ka tih chuan a bu nghat a.







"Naute in chan chu pawi ka tihpui lutuk che u ania, Zosanga pawh a ziaawm thuai mai ang, i naupai a hriat khan a phur a, a lawm em a, tunah in chan ta mai hi a tuar thiam lova, engpawh lo sawi se, tuar hram hram rawh aw, a nu diktakin he in a chhuahsan aṭang khan a nun a nguai a, a nui hmel te kha hmuh a khat asin" a tih chuan mak ka ti ka meng zau deuh kawk mai.







"Eng nge i sawi awmzia kha?" ka tih chuan "I hria emaw ka tia? ka sawi thui lo ang a, Zosangliana leh Rohluzuala hi unau diktak an ni lova, kum ruk mi vel lek a nih laiin a pa hian an înah hmeichhe dang a rawn hruailut a, a nu diktak hi chhuahtir a ni a, chuan a nu thar hian fa a rawn chhawm bawk, chu chu tudang nilovin Rohluzuala hi a ni.







Rohluzuala hi Pa Zama fapa diktak tho a ni a, a awmzia chu Pa Zama hian Zosanga nu kha kum eng emaw chen chu a lo phatsan tawh tihna a nia, Zosanga mal zia ka hriatpui a, tunah chhungkua in din ve thei tawh dawn a, mahse khatiang thil kha a thleng leh ta si a, a tuarthiam lo em anih kha.








Zosangliana hi chu thinlung nghet tak nei, chhel tak ni mahse, a hmangaih te avang chuan a na awlsam ṭhin a, a hmangaih te tel vena a nih chuan bum pawh a awlsam ṭhin a, tun dinhmunah hi chuan dawh hram hram tur che-in ka chah duh che, nang lehzelin i hriatthiampui loh chuan tumah hrethiamtu tur an awm lovang" a tih chuan ka bu nghat a.







Zosangliana chungchang ka hriat thar chuan min ṭhawng takzet. A nu thi ta kha a nu diktakah ka ngai mai ṭhin kha ania, mipa dang chu ni se, Rohluzuala hi an haw hle ang, mahse Zosangliana erawh chuan a hmangaih em em a, a duat bawk a, kan thlalak a hmuh a nat em em chhan ka hrethiam chiah.







Mipa dang nena kan thlalak chu hmu ta se, engkim min zawt fiah ang, mahse a nau hmangaih em em leh keimah thlalak kher kha chuan a ṭhawngin a natpui bik dawn lutuk, a hmangaih te avanga a thinlung hliam awlsam tak kha kei leh a nau thlalak a hmuh meuh kha chuan a nâ hle reng anih kha, 'bum a awlsam' a ṭhianpa in a tih ang ngei khan kan thlalak kha chuan a bum chiang em tak anih kha.







A nupui leh a nau thlalak a hmu a, ka fa ka chhiat thuin a den leh mai bakah nau kha tihtlak a ni tih a hre lehzel a, a tawrh dan tur chu ka hriatthiampui deuh kuar mai. Ka ṭhen mai a hlau a, mahse a thil hrait avang khan min haw bawk. Chuti chung chuan mal taka ka kalsan kha chu a hlau em em lawi.







Pindan kan thlen chuan ka chau hnawk, Zosangliana chuan eng nge a sawi tih pawh hriat mang si lo hian a phun leh bul bul ṭhin. Ka beng ka dawh hnai a, a thusawi ka hriat chuan ka mittui a far fep.







"Naute, i ṭha ania, i na miah lo, nang chu inu hmangaih em em tu che pumah i la awm alawm" kan fa kha eng vanga min tihtlak sak kher nge an nih? Zosangliana chu a pheikawk ka phelh sak a, "hawh, inbual phawt rawh aw" tiin bualin lamah ka kai a, a thawmhnaw ka phelsak a, a la rui viau nge chet pawh a tum hauh lo.







Keiman mipa puitling tawh ka bual ta tawp chu ania, tui ka leih chuan a phu zawk, a hnu chuan a rawn harh deuh. Rui chunga muttir chu ka duh lo, zanin hian engkim sawifiah ka duh avanga inbual tura ti ka ni.







Naktukah chuan a ngaithla duh lo emaw a ni ang a, kei ka dawhtheihna a lo pan ve tho nen, tunah hi chuan eng ang pawhin min lo ti se, a chungchang ka hriat avang khan a nat ṭhin dantur ka hriatpui a , naute avang leh keimah vangin a na bawk a. Tun ka dinhmuhah hi chuan kei aia dawhthei an awm hauh lovang.






Zosangliana pawh inbual zawh chuan a fim ve ta deuh. Mahse a lo in tam bawk a ni ang, a pangai rih hauh lo. A thawmhnaw ka haktir a, khuma mut tirin ka kuah nghal a, ani erawhin min kuah hauh lo.







A rawn harhfim deuh a ni tih nemnghet turin "Min tawk miah suh" a rawn ti vawt deuh ruih. Mahse lu ka thing a, "ka insawifiahna hi ngaithla phawt la, chuti chunga min la rin ngang loh chuan he in hi ka chhuahsan ang a, kan naute chunga pawi khawihtu pawh ka chhui hma hauhin he in hi ka chhuahsan ang" ka ti a.







Naute chungchang ka sawi chuan a ṭang ṭeuh mai. Ka kuahna chu a hnar tawh lova, mahse min kuah let hauh lo.Hnemtu a mamawh tih ka hriat avanga tunah pawh hian kuah ka ni. Kan fa kan chan kha kan tuar dun viau, mahse kei ai mahin Zosangliana hian hnem a ngai zawk.







Mipa a nih avang hian na thei lo a ni lova, mahse mipa a nih avangin a ti lang lo mai a ni. Thinlung a nei ve a, keini hmeichhia te ang tho hian an na ve ṭhin, mahse an lantir ngai lo, mipa in a natna a lantir tawh hi chuan a na tawh lutuk a, a tawrh theih tawh ngang lovang a ni.







Engkim chu a tir aṭangin ka hrilh a, Rohluzuala ka hnaih tak chhante, a room a ka luh chhan te, naute ka tihtlak a nih loh zia te chu ka hrilh vek. Naute chungchang ka sawi lai chuan a inhum ruh ṭeuh.







Keipawh kan naute chungchang ka sawi meuh chuan ka mittui a tla leh tawh, Zosangliana chuan ka nat laia a tih ṭhin dan ang chiah khan min pawm hlun a, ka mittui chu min hruk sakin "Tihpalh, engkim avang khan kan naute kan chan khan ka thluak a fim lova nang leh ka nau thlalak ka hmuh lehzel ka chuan ka nâ lutuk kha thluak fim ka hmang thei lo a, i natna tur thu tamtak ka sawi bawk a, engkim avang khan min ngaidam dawn nia







kan fa kan chan a, i tawrhna hnem a hnekin ka lo tihnat belh che a, pasal laktlak loh tak ka ni mahse maw, i pasal hian min hlat chu ka hlau em em lawi a, engkim avang khan min ngaidam rawh aw Ka Duatbikte, a thleng nawn tawh lovang







tunah pawh hian a zawldawh zawkah ṭang lo la chuan" tiin a ngawi a, "ka la dem chein ka hlat reng ang che, ka nupui i ni hi ka lawm takzet, kan fa hmasa ber chu kan chan a, ka hnem lo che a, mahse tunah chuan i kiangah ka awm zel tawh ang a, hnem i ngaih apiangin i bulah hnem tur chein ka awm reng ang a, tunah ka kuah ang che hian nghet takin ka kuah tawh ang che" a rawn ti a, ka hmui a fawp zeuh bawk.







A hmaa min tihdan kha a nâ a, mahse ka theinghilh tawh a, Zosangliana hi ka ngaidam fel vek tawh bawk, a rilru nat lai ber leh bum a awlsam berna laiah an khawih fuh a, chuvanga min ringhlel a, khatianga min ṭawngkhum mai kha a ni.







"Ka Duatbikte min ngaidam ang tiraw?" a tih chuan ka bu nghat a, "ka ngaidam daih tawh che, mahse thleng nawn tawh suh se aw" ka tih chuan aw tih nan ka hmui a fawp vang vang a, "ka hmangaih che ka taksa peng i ni a, ka ringin eng kawngah pawh ka thlawp zel tawh ang che" a rawn ti a.






Khumah min kuah in a ban bawk min khamtir leh tawh a, a khat tawkin ka chal a fawp reng. Ka ning lova, ka thlamuan pui em em zawk.



ZAWMNA




Zing ka harh chuan Zosangliana'n min lo la kuah reng a, ka thla hi a muang hle ringawt. Kan inkar a fel leh ta chuan ka awm a tinuam a, heti hi chuan rilru pawh a veng deuh tawh ang a, ka tan thil engkim hi tih a awlsam tawh zawk ngei ang.







Zosangliana ka en reng lai chuan "Keipawhin ka hmangaih che alawm, khati em em khan min en uluk suh, ka lai ang e" a rawn ti thut a, ka phu nghek lo chauh, "i harh te chuan men ve tal awm che" ka ti a, "ka la meng dawn alawm" tih ringawtin min chhang a, mahse a meng chuang hauh lo.







"Ih maw, Nimina Jacob thilsawi kha" ka tih chiah chuan "ka chungchang engkim chu i hre vek tur a nia lawm, kan pahniha inkarah chuan eng thuruk mah a awm hauh lovang, nunhlui kan inhriat sak vek ang a, kan inkarah chuan engmah zep kan nei ve lovang" a rawn ti a.







A lu chungah a kut dahin a thaw deuh ham ham a, "Ka chanchin nawlpui chu Jacob khan a hrilh tawh che ang kha a ni, kum ruk mi ka ni a, ka nu nena kan infiam laiin ka pa a rawn haw a, rei tak min chhuahsan ṭhin avangin ka nu nen kan ngai ṭhin hle, chutia a rawn haw ta chu kan nufa khan kan lawm takzet.







Mahse kan hlimna khan minute hnih em pawh a daih lo, ka pa chuan hmeichhe dang a rawn hruai haw a, ka nu chhuak turin a ti bawk, ka nu khan a ngaihna a hre lova, mak a ti takzet a, engmah buaina pawh an nei lo, mahse khati khan in aṭanga pet chhuah a ni a.







Ka nu kha vawitekhat mah a ṭap lo, a ṭhawng em a, ka nu chu a bungrua nena thehchhuah a ni a, khatih laia tihtheih ka nei lo kha ka inhaw takzet. Kanu zuichhuah ve mai ka tum a, mahse kapa chuan a phal lo, ka tihluih tlat avangin kut min thlak hial a, pindahah min kalkhung bawk.







Ka nu ka au lawm lawm a, mahse min chhang thei tawh lo, pawn lama chhuahtir a ni tawh miau a, kanu khan ka pa hnenah engmah thiam lohna nei lovin ngaihdam a dil mawlh mawlh a, ka pa erawh chuan engah mah a ngai lo.







Pindanah khan nihnih ngawt kalkhum ka ni a, ka chhuaha ka nu awmna hriat ka tum meuh kha chuan engkim kha a tlai zo vek tawh a, ka nu chuan khawi lam nge a pan tih takngial pawh ka hre lo, nitin ka ṭap a, ka ṭah lai ka pa ina min hmuh chuan kut min thlak fo a,








kut min thlak leh ka hlauh avang khan ka ṭap ṭha ngam ngai lova, a ruk hlirin tumahin min hmuh lohna turah ka ṭap ṭhin, Rohluzuala a rawn lan tirh khan ka hua a, naupang tê e tilo khan ka haw so bawrh bawrh ṭhin.








Mahse ani erawh kha chuan min hnaih lui tlat a, eitur a neih lahin min sem loh ni a nei ngai lo, ka hnar phawhin ka bulah a dah a, a tlansan leh mai ṭhin, ka awm loh laia eitur a neih ho pawh min dah hram hram ṭhin a, ka ṭap lai min hmuh apiangin min hném thiam loh avangin ka bulah ṭhuin min ṭahpui leh tawp ṭhin.








Ka tan chuan hlat reng a, huat reng theih pawh a ni lo, min ngaina tu huat tlat tum har zia chu i hriat ve tho ka ring. Ni a ral a, keipawhin Rohluzuala chu ka nau ang mai in ka en thei tawh a, ka hmangaih em em a, ka chhungkaw neihchhun angin ka ngai tawp, anu pawh ka lakah a ṭha a, a fapa Rohluzuala ai mahin min duat ṭhin.







An nufain ka chungah an ṭha a ka ngaina takzet, mahse kapa erawh kha chu ka haw em em ṭhin a, ani pawhin a thinrim chang chuan kutthak hnawih nan min hmang fo, ka nu thar leh Rohluzuala khan ka thlavang an hauh ṭhin, an ni kha awm lo se chuan in kha ka chhuahsan ngei ang" a tih chuan ka lo khawngaih em em ringawt.







Ka pa pawh chuan a ti mak ka ti, Zosangliana'n a nu a zui duh chuan zui tir mai se, khatianga hrem a, kutthak hnawih nana a hmang kha chu a ti awm lo ka ti ngawih ngawih. Chuan Zosangliana'n Rohluzuala a hmangaih a, a duat em em chhan chu ka hrethiam tawh hle.







"Kapa ina ka nu min zuitir phal lo kha ka thinrim a, ka pa kha ka haw ngawih ngawih ṭhin asin, tun thlengin ka nu ka la zawng hmu lo, a thi nge a dam tih pawh ka hre lo, ka nu ka ngaihtuah chang hi chuan ka pa hi ka haw ngawih ngawih ṭhin, mahse ka pa, min hringtu pa kha a ni miau a, haw viau mah ila, ka thinlungah a tana hmun awm hi a nepinna zim phah lova, ka hmangaihna pawh a hma ai khan tla hniam tawh mahse, ka la hmangaih em em tho.







A natna hi vei lo se chuan ka chhuahsan ngei ang, mahse kapa thi mek, a natna in a ei mek hi chhuahsan ka duh lova, ka awm hram hram a ni. Ka nau min hmangaih em em tu nei mah ila, ka thinlung hi a ruak ṭhin lutuk, kanu hmun ruak kha a zau a, tuman a hnawhkhah theih ka ring ngai lo.







Mahse i lo lang a, ka nu hmun ruak kha i rawn luah a, ka thinlung mal taka inhre thin kha nangmah avangin a famkim tawhin ka hre ṭhin" a rawn ti a, min en reng bawk. "Ih maw, i nu i zui thei lo kha pawi ka tihpui che, mahse i zui loh avang hian ka lawm" ka tih chuan min en reng







"I nu kha zui la, nang leh kei hi nupa kan ni dawn em ni? Ka nuna mipa pahnihna i ni a, a pakhatna chu tu dang nilovin ka pa kha a ni. Mipa leh hmeichhe kara Hmangaihna khawngah erawh engkimah a hmasa ber i ni, i nu i zui lo kha ka tan malsawmna a ni" ka tih chuan min enin a nui sup. "Thil a êng lamah ka thlir theih nan i ṭawngchhuak a ni ringawt alawm" tiin min nuih sup a.







Kan thochhuak a, inhnuai lamah kan inzui thla a, choka lam ka pan laiin Zosangliana erawh ṭhutkhawmna lam bawk a pan leh, ka pasal Zosangklliana hi ka chhuang takzet a, a hma ai mahin ka zah bawk, kei chu ni ila, ka pa hi ka haw ngawih ngawih ang, mahse ani erawh chuan haw ve ṭhin mahse, lantir a hnekin a huatna kha hmangaihna hnentir hram hramin tun thlengin a pa a la chenpui thei a, ka chhuang takzet. Choka ka thlen chuan nidanga ka hmuh ngailoh Nupuii hmelah chuan thinrimna leh natna ka hmu.







A lam ka pan nghal a, "Nupuii tinge?" ka ti ringawt, "ih engmah" a ti ringawt a, zawhna zawhbelh ka tum laiin choka piaha bathroom aṭangin Rosy a lo chhuak a, a mit a sen deuh ram mai a, tunlai tak hi Rosy hi a cher sawt riauin ka hria A thiltih ka hailan a hlau a ni mahna. Nupuii chuan Rosy chu thip lutukin a melh a, heti hian Nupuii hian Rosy hi a melh ngam ngai lo, eng chiah nge an inkarah hian thleng le?


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2023, 8:41 pm

Marriage Without Love
By; Te-i Mrs Ambrose



Chapter 29






Nupuii ka nghawk zeuh chuan a phu dawrh a, tukina a awmdan hi a mak ka ti. Rosy chu a pindan lamah a lut a, "Nupui, thil thleng a awm em ni?" tiin ka melh a, "awm hran lo" tiin rawng bawk a bawl chhunzawm leh a, kei pawhin engmah ka zawt tawh lova, ka pui ve nghal mawlh mawlh.






Tukṭhuan ei a hun chuan dawhkan kan kil ṭhap, Rosy erawh a rawn tel ve lo, tunlai a awmdan hi a mak sawt riau, nau ka chhiat hma karkhat vel aṭang tawh khan amah a inthlak hlawk kha ania, a ṭawngtlem a, a hma anga mi tirh zet zette kha a sim chiang viau a, a chhan awm ang ka hre hauh lo.






Zosangliana chu hna kal turin a insiam a, keiin ka pui ve bawk, a kal dawnin nghet takin ka kawngah a kuah a, "ka rawn haw vat ang, lo thawk rim lo la, min pui turin kan dawr lamah i rawn kal duh hun apiangah rawn kal rawh aw" a tih chuan ka bu nghat.







Chhun lamah chuan eng vak ka ti lo, zanriah bawl hun velah chuan ka va pui ve a, chutih lai chuan Nupuii ka bulah a rawn ding a, "Enteh maw u Ms, in naute kha U Rosy tihtlak anih ka ring. Hman zanah khan ice cream kha a thun leh lai ka hmu a, i tan hriat nuam anih ka rin mai loh avangin ka sawi duh lova, mahse naute avang tal pawh khan ka sawi a ngaiin ka hria.







A hun lo taka khawvel chhuahsan a ni si a" a rawn tih chuan ka meng zau kawk mai, "i chiang em?" ka ti nghal thuai a, lu a bu nghat a, "a room-ah sawn eng emaw chu i hmuh theih ngei ka ring. mahse tunlai chu a pindanah sawn a tawm chawt a" a rawn ti leh a, "finfiahna neih a harsa hle ang em le?" ka ti hap a.








" a har chu ka ring" Nupuii pawh chuan a rawn ti ve sep a, chutia kan ti ti lai chuan Rosy pindan aṭanga thil tla keh ri kan a rawn chhuak a, hmanhmawh takin Rosy pindan lamah chuan kan va lut a, mahse kan thil hmuh avang erawhin a ngaihna vak kan hre lo.







Nupuii chuan a kut a hum ngawt ngawt ringawt. Rohluzuala chuan chhuata Rosy ṭhu chu a kuahbet a, a bulah pot chu keh chiang viau a lei pawh a baw nuaih mai a, Nupuii chu a chhuak nghal a, Rohluzuala hi a duh ve em a, ka hrethiam mai.







"Tinge a?" Rohluzuala en pah chuan ka ti a, "a rilru a buai deuh a nih hi, khawngaihin awmpui lo tir la hmun hi lo phiahtir mai ta che" a rawn ti a, "a ngai kher lo, keiman ka lo phiat ang, Rosy chu khumah khan muttir la, tunlai chu a chauh hmel ṭhin tlat a, mu hahdam se, a zia sawng sawng mai ang" tiin ka chhuak a.







Pindan aṭanga ka chhuah chuan hmunphiah chu ka la nghal a, mahse ka lut rih mai lo Rosy mut ngheh hun ka nghak a ni deuh ber mai, finfiahna hi film ang vela awlsam taka hmuh chi a ni hauh lo, thil thleng tawh phei kha chu ka tan hriatchhuah har tak tur a ni.







Lo hre ta teh reng pawh ni ila, ka beng bakin thudik chu ka hre thei hauh lovang. CCTV nena finfiahna neih thei chi a ni lo a, ka fa khatia min laksak tu kha hriatchhuah ka duh mai a ni, ka hriat huna a laka ka chetdan tur erawh ka hrethiam rih hauh lo.







Rei deuh fe hnuah chuan Rosy pindan lamah chuan ka va lut leh a, ka luh dawn, kawngka ka hawn laia ka thil hmuh avang chuan ka meng zau deuh kawk mai, Rohluzuala chuan Rosy muhil mek chu a chalah fawp zeuhin a ding mar a, a rawn chhuak nghal.






Tunlai kan boruak hi engmah ka hrethiam ve hauh lo. Rohluzuala hian Rosy hi a duh em ni? Damdawi dik lo a pe ṭhin tih hria se chuan khatiang khan a che kher ang em le?






Pindana ka luh chuan hmun phiat nghal mai lovin pindan chu ka enkual a, damdawi khehna kawr hlui emaw, damdawi ka zawng deuh a ni ber. Bawlhhlawhbawm ka bih chuan damdawi kawr chu ka hmu ta ngei a, damdawi kawra inziak ka hmuh ngat phei chuan ka meng zau kawk. Mahse Rosy rawn khuh avang chuan bawlhhlawhbawm chu ka hlat thuai a.






Chhuata pangpar hunna kehdarh chu ka phiat sawk sawk a, pindan chu ka chhuahsan ta nghal. Zanriah ei dawnah Zosangliana a rawn haw a, pindan lamah ka zui chho ve nghal. Pindan ka luh rualin min rawn kuah nghal a






"ka ngai tawh che" ka beng bulah a rawn ti zawi sup a, ka beng a rawn nul bawk, a awmdan chuan eng nge a duh tih ka hrethiam khawp mai, "zanriah ei a hun ṭep" ka tih chuan a kiai suk a, a coat hak chu phelhin cough lamah a va theh phei a, necktie pawh a theh leh nghal bawk.






A kamiz kilhna chu a phelh a, ka en reng, ka dik lo ve dawn tlat, ka kawngah rawn chelhin min melh chhuk run a, "Ṭep chauh ala nih chu" tiin ka dul a zut haih haih. Ami khawihna avang chuan ka sa chhuak vek a, Zosangliana chuan ṭawng ka tum chiah chuan ka hmui chu a rawn kharhnan hmak mai.




☆♡☆




Zanriah ei dawnah kan han inbual dun leh a, Zosangliana hmelah chuan lungawina ka hmu a, keipawh a lungawi hmel avang chuan ka lungawi ve em em ringawt, bualin aṭanga kan chhuah hnuin Zosangliana chu ka en deuh vang vang a






"Zosang, Rohluzuala nena kan thlalak kha i paih tawh em?" ka tih chuan min en ren rawn a "aw, ka paih tawh" a tih chuan pawi ti lutukin ka chek tlak, "khawiah" ka tih hluai chuan kan pindana bawlhhlawhbawm chu a kawk a, ka thaw deuh huai mai.







Inhnuai lamah kan nupa chuan kan inzui thla a, chaw chu ei mai thei turin an lo chhawp mek a, ka pui ve nghal a, ka pa a ṭhut hnuin midang kan ṭhu ve chauh, chaw kan bar mawlh mawlh laiin Rohluzuala chuan







"Pa, Rosy hi a nuam vak lova, kei lah han buaipui ngai ka ni tawh bawk lo nen Rosy hi haw tawh mai se ka tia, kan în hi chu a lo tal tamna ni mahse, dam loh lai hi chuan an în ngeia a awm khan a tan a hahdamthlak dawn a, kan în ah hi chuan a thawk a pik riau mai a, zanin la lâ hian an în lamah ka thlah dawn asin" a tih chuan ka pa chuan a lo hnial hran lo.






"Ni e, dam loh lai chuan a nu leh pa pawh a ngai zual viau tak ang. An chhungkaw naute kha ania, nang mah avangin a rawn awm a, a fel ngawt asin, han hruai haw phawt nai la, a tan pawn dam sam lo reng chunga heta awm chu a nuam bik lovang " a rawn ti ve charh charh a.







Rohluzuala chu a kham hmasa berah a ṭang a, kapa chuan "Rosy haw hmain ṭawngtaina nen kan thlah phawt dawn nia, tunlai hi a nuam lo riau mai a, kan chhungkaw boruak lah a ṭha tehchiam lo bawk nen, Rosy tan pawn a hreawm alawm, mahse ka ṭawngtai hma chu hawnpui rih suh la aw" a tih chuan Rohluzuala chu a bu nghat nghat a.






Rosy pindan lamah a lut nghal a, keini pawh kan ei sawk sawk a, eikhamin ka pa chuan ṭawngtaina a nei a, a ṭawngtai zawhin Rosy chuan a bungrua vel a va pack a, ka va pui ve a, a chauh ṭhin em avanga va pui mai ka ni.







A pindanah chuan danglam teh chiam a awm lo, mahse bawlhhlawhbawm erawh kha chu a phai vek tawh, engkinin nge a va paihchhuah ni? Rosy-i'n thawmhnaw a khung mawlh mawlh chu ka va pui ve a, engmah thu ngaihnobei lo sawi a nei lova, keipawh ka ṭawng hek lo.







A thawmhnaw kan khung lai chuan Rohluzuala a vei thauh thauh a, eng emaw ngaihtuah nei hi a ang, Rosy thawmhnaw kan thunfel hnu chuan a luggage chu a khai a, pawnah a chhuahpui nghal daih. Rosy pawh chuan a zui ve a, he mite pahnih hi ka hrethiam lo.






A hma kha chuan an in be reng ṭhin a, tunah lem mihran ang hlakin engmah an sawi lo a, an in melh ringawt ṭhin kha ania, chhun lamah lah Rohluzuala'n a chal a fawhsak a, zanah erawh hi chuan an inkar a dang leh riau a. A, ka hrethiam lo, ka buaina tur pawh a ni lo.






Kan nupa pindan lamah ka lut a, bawlhhlawhbawm ka hriatchhuah chuan bawlhhlawhbawm kan dahna lam ka pan a, paper Zosangliana'n a paih bak engmah ka paih ve ngai loh avangin kuta zen mai pawh a pawi lo khawp. Thlalak lo inhum khawr vek chu ka va hmu a, ka lachhuak a, uluk takin ka en vang vang.






Thlalak hnuaiah chuan a thlalak ni leh a phone hming a inziak kiau a, he kan nupa inkara buaina siam tumtu hi chuan tihsual tlem a nei deuh a ni.Phone hming chu ka en ngawt ngawt a, hetiang phone hi tuin nge hmang kha aw?






Zosangliana a lo lut a, chutia thlalak ka en reng min hmuh chuan "Eng thil nge i ngaihtuah vung vung? Dik lo a awm em? " a rawn ti nghal a, "awm lo, thlalak lo thawntu che hi ka hriat vat thei mial takin ka tia" ka ti ringawt.






Zosangliana chuan min kai a, khumah min ṭhuttirin "ngaihtuah ngut ngut lo la, zawi zawiin engkim chu a rawn lang zel mai ang, i hahpui lutuk ang" a rawn ti dam dup. "Mu hahdam ang aw, i thluak tereuhte kha i seng nasa lutuk" a rawn tih zawm leh zat a, khumah min nem mu nghal bawk.







"Ala hma lutuk, dar riat em pawh ala rik loh hi" ka tih lai chuan a rawn inthawlh fel hman der, "kan mut rei leh ka kuah rei thei che a ni mai" a tih rualin min rawn kuah nghal a, "ih maw, kan inkara buaina thlen tumtu leh kan fa pawisawi lo chunga khatiang thil titu kha hrechhuak ta ila, engtin nge i tih ang?" ka tih chuan a ngawi rauh rauh a.






"Ka hre mai thei bik lo, a hun a lo thlen hunah chuan tihtur ka hre mahna, mahse tunah chuan engmah ka hre lo, engtin nge ka tih ang a, engtin nge ka tih loh ang tih thlengin engmah ka hre lo" a rawn ti a, keipawh a sawi ang hian engtia tih a, tih loh tur nge tih pawh ka hrethiam lo.




☆♡☆




Zing ka harh a, Zosangliana erawh a lo tho daih tawh a nih hmel e, nimin khatia kan mu kha rei kan mut hmain ka lo muhil daih a, keiin a hma ka ti ka tia, ka muhil awlsam leh em em sia. Inhnuai lamah ka va chhuk ve a, eirawng an lo bawl mawlh mawlh.







Rohluzuala chu ngui leh thinrim hmel deuh ṭun hian chokaah a ṭhu reng a, a dar ka ben zeuh chuan a phu deuh dawrh a, "eng ngaihtuah che chuan" ka ti a, ka nuih bawk, ani erawh chuan min nuih let ve hauh lo.







"Nang chuan engkim i hre tawh a, Nang lo chu sawipui tur dang ka hre lo" tiin pawn lamah min kai chhuak a, Zosangliana'n a thik mawlh ka hlau e a. Pawnah chuan kan ding dun a, van lam a thlir vawng vawng hnuin "Rosy khan kha ka buai lai zawng khan damdawi min lo pe ṭhin tih ka hre tawh a" a tih chuan mak ka ti ngei mai.







"Engtin" ka ti ringawt a, Rohluzuala chu a thaw hawk, "nimin khan min hrilh a, nang pawhin i hriat daih tawh thu te pawh a sawi a, chuan amah hlat turin min ti a, a thil lo tih tawh avanga hremna ka pek duh chuan hmachhawn tura a inpeih vek thu a sawi bawk a" a tih leh lek phei mak ka ti takzet tawh.







"Eng vanga a tana pawi tur chu sawi mai nge a nih le?" tiin ka phun sep, ka thusawi chu Rohluzuala'n a lo hria a ni ngei ang, "Ka duh thu ka hrilh a, min hnaih a duh loh avangin ka chunga a thil lo tih tawh zawng zawng, a kip a kawiin a sawi a, pot pawh a vawmkeh nghe nghe kha" tiin min rawn chhang a.







"Ka chungah khatiang thil kha ti mahse, ka la duh tho a, ani erawh kha chuan ka rilru ang a pu ve lo nge? Sawmte, engtin nge ka tih ang, a hmeichhiat pui i ni a, a rilru awm ang chu i hriat ka ring, engtin nge ka tih zel dawn? I puihna ka mamawh takzet a ni" a rawn ti sup a.







"Mahse Rohlu, Rosy chuan hman aṭang tawhin mipa pakhat duh em em a nei a ni lawm ni? I hre ṭhin tho a, tlang takin ka sawi ang a, Rosy hian i u a duh ṭhin êm kha" ka tih chuan "a duh ṭhin ngei a, mahse a duh tawh hleinem, chu chu chiang takin ka hria" a tih chuan ka thaw hak mai.







Rosy hian Zosangliana hi duh tawh lo sela chuan thlalak kha Zosangliana a thawn dawn em ni? Engtia Rohluzuala hian Rosy hi duh daih thei nge a nih zawk le? A chunga a thiltih a hre tawh lehnghal.






"Rosy chungchangah kher kher hi chuan thurawn emaw, fuihna eng lam hawi mah chhakchhuah tur ka nei hauh lo, chu lovah maw, i lakah chuan tlang takin ka sawi mai ang a, Rosy hian Zosangliana a duh tawh lo hi ka ring lo" ka ti a, chuta Rohluzuala'n min lo chhanletna avang chuan ka meng zau kawk a.







Mak ka tihna ka thup hman lova, ka thil hriat zet zawng,ka hria ang tih pawh a ka la ngaihtuah chhin ngai loh a ni!



ZAWMNA



Thil ka ngaihtuah let a, Rosy pindana bawlhhlawhbawm chhunga ka thil hmuh ka ngaihtuah phei kha chuan Rohluzuala sawi chu a dik ngeiin ka hria. Mahse engtin te daih nge chutiang chu a nih theih!?







Sawi tur ka hre lo, a mak a, a mak tih hian a mak ka tihna a sawifiah zo meuh lo zawng a ni.Rohluzuala chuan "a chang chuan min duh ve ṭhin thovin ka hria a, mahse ka chiang ngam ṭhin si lo, ka laka a thiltih vangah khan ka ngai a, a lo nih phei chuan kei chuan ka ngaidam fel vek tih hi hria sela ka duh" a rawn ti a.






Sawi tur ka la hre meuh lo, ka thluak hi a mang duk mai, ka ngawi rauh rauh a, "A, i chunga a thiltih avanga hnaih ngam lo che ni a i hriat chuan nangman hnaih lui tlat la, ṭawngkaa sawi ringawt lovin i chet danin i ngaihdam zia lantir la,








a duh ve tak tak che anih chuan rei a hlat lovang che," ka tih chuan a khi suk a, "ka lawm e, Rosy chuan min la pawm vat tho chu a ngai ngei ang" tiin phur hmel lutukin inchhung lamah a lut a.








Ka va luh ve chuan Zosangliana chuan min en reng a, a mitmengah chuan zawhna ka hmu, "a falin ka la hrilh ang che" hmuiphunin ka ti a, a lo bu ve mai. Tukṭhuan ei khamah Zosangliana chu pindan lamah a insiam a, min lo auh chuan ka va phei vat a.







"Zanin chu zanriah ei chhuak ang aw" a ti a, ka bu nghat nghat a, "Rohlua nena in thilsawi chu?" tiin mithmul a kan euh a, Rohluzuala'n a thil min hrilh ho ka hrilh ve chuan mak chu a tih ve hmel khawp mai "Engtin nge a nih daih theih le" a ti ve ringawt a, sawitur dang a hre bik lo anih hmel e.






Chhun lamah chuan Nupuii nen kan bazar a, chawhhmeh kan en laiin Nupuii chuan "U Rosy hian i hriatchhuah vat a hlau emaw ni le? A haw chuk chukna hian chhan eng emaw chu a neih ka ring deuh" a tih chuan rindan ka nei thiam teh chiam lo.







"Nupui, nang hian Rohluzuala hi i duh viau a, ani hian i lamah awn lovin hmeichhe dang lamah awn zawk ta se, engtin nge i awm ang? " ka tih chuan a ngawi deuh ren rawn a, "amahin min duh miau loh chuan tihtheih a awm hleinem" a rawn ti a, ka khawngaih ve viau mai.






Tlai lamah Zosangliana chu a rawn haw a, "Ka Duatbikte, insiam nghal la, kan chhuah dawn kha" a tih chuan zanriah ei dun kan tum thu kha ka hrechhuak chiah, "ka lo theinghilh daih, ka va insiam ang e" tiin pindan lamah ka va insiam vat a.







Ka chhuah chuan Zosangliana chuan "i nalh lutuk" ka beng bulah a rawn ti sup a, "ka pa te pawh ka la hrilh hleinem" ka tih chuan Zosangliana chu a khi suk a, "ka hrilh vek tawh alawm," a rawn ti a, pawnah kan inzuichhuak a.







Restaurant nawmhmel zet hmaah hian a ding a, kan chhuk a, restaurant kil lama ṭhutthleng nawm hmel zet lamah chuan min kai a, a nalh takzet a, bati (candle)sen lian chi an chhi ṭeuh a, Rose sen leh balloon sen in kan ṭhutna leh a bul vel chu a khat a ni ringawt.







"A mawi lutuk" ka ti hluai a, ṭhutthleng chu Zosangliana'n min pawhchhuah sak a, ka ṭhu nghal a, Zosangliana pawh a rawn ṭhu nghal a, reilote hnuah eitur an rawn dah a, ka ei tui khawp mai.






"A va special ve, vawiin ni hian special bikna a nei em ni?" eitur ka ei zawhin ka zawt a, Zosangliana chuan ka kut chu rawn lain a hum vang vang a "a hma khan hmangaihna vang ni lovin kan pate contract vanga innei mai mai kan ni a, mahse kha contract vanga inneihna kha tunah chuan kan duh vang ngei leh kan inhmangaihna avanga innei tih a kan inhriattawn ka duh






midang ngaiah chuan kan inneihna a rei tawh, mahse keini tan erawh vawiin hi kan inneih ni a ni a, kan pa te thu tel lo, keimahni duhthlanna ngei, tihluihna tello inneihna" a tih chuan ka bu ve nghat nghat mai.







Kan fa hmasa ber kha kan chan a, kan tluang lova, mahse tun a chin chu vanduaina hian min tlakbuak tawh loh ka beisei. Zosangliana chuan ṭhi nalh zet hi min rawn awrh tir a, "ka hmangaih che ania" a rawn ti nghal sup, ka hlim takzet "kei pawhin ka hmangaih che" ka ti let ve nghal a.





☆♡☆




A ngai te bawkin Zosangliana chu hna lamah a buai leh viau tawh a, kei in lamah ka thluak ka seng nasa a, tunah chuan engkim ka hre vek tawh a, finfiahna ka nei ṭha tawk lo, mahse finfiahna neih leh neih loh hian ka kawng chu a dal hauh lovang.







Nupuii ka bulah a rawn ding a, "Engkim ka hrechhuak vek tawh,, tunah chuan an zavaia kohkhawm a, thudik hailan a ni tawh mai" ka tih chuan Nupuii chu a bu nghat nghat a.







"Engtin nge finfiahna i neih theih?" a rawn ti a, engtin lem ka chhang lo, "ka bei nasa a, ka chhui ve nasa alawm, Detective tak tak anga ka inngaih lek lek chang a tam" fiamthu-a ka tih chuan a rawn nui ve ringawt a, "U Rosy chu a mi?" a rawn ti a, "ni maithei, ni lo maithei, nang pawhin ka hrechhuak thei hi mak i ti ang, a laka hetia ka chet a ngai hi ka inthiam lo ve lutuk, mahse ka fa avang tal pawhin ka tih a ngai si a ni" ka ti hap.







Midang hriata a hming sawi lan hi la duh lova, mahse ka tih ngei a ngai si, ka fa avang tal pawh khan hetia ka tih hi a ngai, kei pawhin ka hriat tirh khan min thawng, amah a nih ka ring lo em a, mahse kan laina hnai leh ṭhiante hian kan hmelmaa kan ngaihte ai daihin min lo tina zawk ṭhin a nih hi.






Chhun dar khat bawr velah chuan ka pa leh awmpui dang ho tihloh chu kan kim vek, Rosy pawh rawn kal turin ka ti a, a taksa pawh a hma angin a ṭha thei rih lo, hei chu a nihna dan tur reng a ni. Lo sualin ka chungah hawihawm lo ṭhin viau mahse, tunah chuan a rilru thlak hlawk a ni tawh a, hmana hmeichhe chapo leh zahna nei lo, hmeichhe sual tih a ka lo sawi ve ṭhin Rosy kha tunah chuan a danglam hlak tawh.







Chuan Rohluzuala nen pawh an inhnaih viau tawh a, Rosy chhungte pawhin palai an la hmuh vat ka ring, Rohluzuala hian palai tirh a duh tawh thu a sawi reng a, an la innei thuaiin ka ring a ni.






Nupuii chu ka en a, ani erawhin Rosy leh Rohluzuala ṭhudun chu a melh ngawt ngawt a, a hmelah thikna leh thinrimna bak engmah hmuhtur dang a awm lo "Nupui, tuna heta kan awmkhawm chhan hi chiang takin i hria a, kan nupa chungah leh ka fa chunga khatianga i che kha tun thlengin mak ka la ti







ka ṭhian angin ka ngai che a, ṭhian mai ni lo, nau angin ka en che asin, mahse nang chuan ka fa kha ka chhiat theih nan ka eiturah damdawi i telh a, chuan i thiltihsual thup nan Rosy i puh deuh bawk a, i mak ka ti a, min tina hle bawk, tinge ka fa chungah khatiang thil kha i tih theih zawk a?" ka tih chuan Nupuii chuan min lo en rang kher mai.







A hmelah chuan thudik ka hriat avanga mak a tihna bak engdang mah a lang lo, kei pawhin Nupuii kher kher hi chu ka ringhlel ngai lova, rinhlelh ngaiah pawh ka ruat hek lo, mahse ani ngei hi ka fa min tihtlaksaktu leh Zosangliana nena kan inkar tihchhiat tumtu kha a lo ni reng si a!



(Heti thleng hi ni rih rawh se aw, zanah engkim kan sawifiah ang, 🤗)


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » February 16th, 2023, 8:41 pm

Marriage Without Love
By: Te-i Mrs Ambrose


Chapter 30





(Zawmna la chhiar lo ho kha chuan han chhiar leh ula aw😅 29 ah khan zawmna a awm)





Nupuii chuan min en reng ringawt a, engmah a sawi hauh lo, "Engmah sawi tur i nei lo em ni?" Zosangliana chuan a rawn ti vawt ruih, a hmelah thinrimna nasa tak ka hmu. Rosy leh Rohluzuala pawhin mak an tihna an hmelah an thup thei thlawt lo.







"Engtin nge i hriat theih?" chu thu chauh chu a ni Nupuii ka aṭang chhuak chu. "A hma zawng khan ka ringhlel ngai lo che a, rinhleh ngaiah pawh ka ruat hek lo che, mahse tihsual i nei tlat, naute ka chhiat thu kha kei, Zosangliana leh Rosy chiah hian kan hria.







Rosy pawhin a hriat chhan chu nau ka chhiat tirha ama tih a nih ka rinhlelh nasat em avanga a laka thinrim lutuk avanga sawi ka ni, mahse nang khan ka fa kha vanduaina vang ni lova damdawi vanga chan ka ni tih i hre chat a, khatah pawh khan ka la ringhlel phal chuang lo che,







mahse ka rinhlelh loh avang che in ka ring che tina erawh a ni lo, i pindan ka dap ṭumin nau tihtlakna damdawi kha i lukham hnuaiah ka hmu a, nang hian nau i pai lo a, eng atan nge naute tihtlakna damdawi kha i kawl tih chu a hriat nghal vek.







Chu mai bakah nang hian Zosangliana hnenah kei leh Rohluzuala thlalak kha i thawn a, i tihsual leh chu maw, i phone a a ni leh phone hming inziak kha i tihlan leh vang a ni, i phone ang hi he inah tumahin kan hmang hauh lo" ka tih chuan a rawn thaw deuh hak a.







A hmel chu ka chhiar thiam hauh lo, "Ka ring che a, eng vanga hetianga che hi nge i nih?" ka tih chuan a rawn ṭapchhuak a, "U Ms, kei pawhin i chunga khatianga chet kha ka tum bik lo asin, hmeichhe sual tak chu ka ni alawm, a chhan chu kha damdawi kha Rosy tana telh ka ni.







Rosy naute tihtlak ka tum avanga damdawi ka telh hrim hrim pawh khan hmeichhe sual ka nih zia chu a tilang tawh, mahse ka mipa duh, he îna ka rawn awmtirh aṭanga ka mipa duh ngawih ngawih a ka vei em em fa Rosy ina a pai thu an pahniha inbiakna aṭanga ka hriat khan ka thik lutuk a, u Rohlua pawh theinghilh ka tum ziah a, mahse ka thei ngai silo, keimaha thikna kha a lianin a ṭhang chho zel a, ka lo suangtuah ngai loh, thawnthu leh film vel chauha thleng tura ka ngaih sualna khan min rawn thlem a, naute pawisawi lo hi ka thikthu chhiatna avangin tihtlaksak ka tum ang tih ka ngaihtuah ngai hauh lo.







Mahse kha ice cream ah khan nau tihtlakna chu ka telh a, Rosy ei ngei turin ka pe a, mahse ka tihsual leh tak chu maw, nangin i rai avanga ice cream i duh ang khan Rosy chuan a duh ve hauh lo, a ei mai ka ring a, ani khan ṭha taka a lak ve mai avangin ngaihṭha tak khan ka kalsan a,







mahse a ni erawh chuan ei lo khan fridge-ah a lo khung daih a, keiin ka lo thlithlai zui ta lova, chuan nangin kha ice cream kha i lo ei ta mai si a, ka inthiam lo lutuk a, thudik kha hrilh mai che ka duh, mahse ka ngam lo,







thudik ka hrilh che chuan ka thil lo tih kha keiman ka hailang mai mai dawn a, chu vang chuan ngawih ka chuh ta zawk a, khatianga ka che ta khan a aia sual thuk zawkah min hruailut a, U Rosy ka thik ṭhin em avang khan i nau titlatu-a i ngaih theih nan khatiang khan thil engkim ka hrilhin U Rosy ka rinhleh thu ka hrilh ṭhin che a, mahse ka thil tihsual chu i sawi ang khan i nau pai kha tihtlak a ni tih hria ang a ka lo awm kha a ni.







Ka sual tih ka hria, ngaihdam tlak pawh ka ni lo, hmangaihna hi a duhawm a, hlimna thlentu, nun ti famkimtu a ni ṭhin, mahse thil engkim hian thlirna chihnih a nei vek, chutiangin hmangaihna duhawm tak kha ka tan chuan tûr, hmelma tenawm leh lungngaihna min thlentu bak a ni lo.






Hmangaihna chu a dawhthei a, ngil a nei a, a itsik lova, a uang lova, a chemawi lo lova tih zawng zawng kha kei chuan a letling zawngin ka thlentir vek, ka itsik a, ka chemawi lo bawk a, 'ka hmangaih chu maw; a hlimna ka duhsak ber' kan tih ṭhin hi dawt a nihzia ka hrechiang tawh







ka kiang ni lova a hlim hmel ka hmuh hian 'a hlimna ka duhsak ber' kei ngei pawh ina ka lo tih ṭhin chu ka rilru tak tak anih loh zia ka hrethiamin ka hrefiah asin, 'ka tel lova a hlim ai chuan a hlimna ka tichhe zawk mai ang' chutiang rilru chhia chu ka pu a, ngaihtuah loh ka tum pawhin ka ngaihtuahna hian a sual lam bak min ngaigtuah tir meuh lo,







ka thil lo tihah khan insawifiahna tur ka nei lo, ka thiamloh liau liau a ni a, khang ka thiltih zawng zawngah khan ngaihdam dilna pawh chhakchhuah ka tum lem lo, a chhan chu ngaihdam thlak ka ni miau lo, engmah insawifiahna tur ka nei lo" ṭap deuh hlawp hlawp chung hian a ti a.






Thil pakhat hriatthiam loh ka la nei cheu "anih eng vanga kei leh Rohluzuala thlalak kha Zosangliana thawn nge i nih?" ka ti a, a mittui a hru a,, mahse a tlak belh zel tho. Ka khawngaih viau a, mahse tunah tak hi chuan hnemna ṭawngka chhakchhuah tur pakhat mah ka nei lo.






"U Rosy vang tho a ni, kei chuan in aṭanga a chhuah thuai kha ka duh a, nang leh Pu Zosanga chu in inhmangaih zia ka hria a, thlalak avanga in lo buai ta anih pawhin rei in buai dawn lo tih ka hria a, kha thlalak lo thawntu kha Rosy ni a i ngaih chuan nang hian engmah ti lova i chhuah mai mai ka rin loh avanga khatianga in thla ka lo lak ruk kha pu Zosanga thawn ta ka ni" a ti a, kan zavai chuan engmah sawi tur kan nei tawh lo a nih hmel e.






"in hremna engkim chu ka tuar vek mai ang, in naute pawisawilo in a tuar tawh a, midang laka ka thiltih tum hrim hrim kha a dik lo tih ka hria, chuvang chuan police kutah min hlan pawh ni ula, engmah ka sawi nawi lovang, U Ms, min ngaidam la, engtik lai pawhin u angin ka en reng ṭhin che, naute avang khan ka tihpalh takzet.







A theih hram chuan min ngaidam dawn nia, chuan nangpawh u Rosy, i chunga chet ka tum dan avang khan min ngaihdam hram dawn nia, naute kha ,ha taka i hrin nan tun aṭang chuan ka lo ṭawngtai tawh ṭhin zawk ang, a sual leh rilru chhe zawnga ngaihtuah tawh lovin. Ka thiam lo tak zet zet a ni, a theih hram chuan min ngaidam dawn nia" tiin leiah a ṭhingṭhi a, Rosy chu nau pai tih takah a rilru a nem khawp mai.






A mittui a tla nasa ve viau, tunah hian nau kha ka pai ve ila chuan, ngaigtuah pawh ka ngaigtuah zawm thiam mai tawh lo, Rosy chuan "kei chu ka lo sual ṭhin em a, min huat pawhin a awm viau asin, engkim in hre vek tawh a, ka zep lovang






u Zosanga ka duh em avangin Rohluzuala hi hmanruaah ka hmang a, a ngaihzawn a cham rilru nat lai khan damdawi, mi â ho an pek ṭhin ka pe a, ka duh dan danin thu ka pe kual a, a chhan chu ka thu a awih khan an chhungkuaah ka tlaktlum phah mai bakah u Zosanga pawn Rohlua avangin min biak tam phah a, ka tan chuan kha ringawt pawh kha lawmna tham a tling tawk em em.






Mahse, khati khan u Rohlua kha ram dangah a kal a, rinloh lutukin u Zosanga leh Msi an inneih phah a, khami hnu aṭang phei kha chuan u Rohlua kha a hma ai maha a buai zual nan damdawi dose ka tisang a, a changin ka pe lo bawk, khatia ka tih khan u Rohlua chu a buai viau ta reng a






he inah thleng ka rawn awm phah ve ta kha ania, kei pawh hmeichhe sual tak chu ka ni, tuna hian nau pai lo phei ila chuan a hmaa ka mizia kha ka paihin ka la ring lo.






Mahse ka rinloh deuh maiin hun a lo rei a, u Zosanga'n Msi a hmangaih telh telh tih ka hriat khan ka thik lova, nâ ka ti em em hran lo, a chhan chu eng lai pawha ka buaipui tam em em u Rohlua kha ka vei ṭan tawh tlat a.






A mumal loh nana ka pek ṭhin damdawi Msi'n damdawi pangaia a thlak tak hnu phei kha chuan u Rohlua mize diktak, keiin damdawi ka pek hmaa a mize ngai ka hmuh leh lek phei kha chuan a hma ai mahin ka vei a, amah u Rohlua hian engtin min min duh tih pawh ka hre lo, mahse in duh ve ve ta nafam, in hmu reng a, inhnaih em em ta kha chu kan lo chesual ta nge nge a.







A hmaa damdawi ka lo pe ṭhin kha ka inchhir ṭan a, mahse inchhir a sawt der si lo, a hriatchhuah hunah min huat ka hlau a, a lakah pawh ka inthlahrun phah ṭhin. Msi'n zana tui bottle a damdawi ka phul a hmuh kha u Rohlua damdawi ka lo pek ṭhinin nghawng ṭha lo a kawchhung lama a neih thut takin ti a venna atana ka phulsak a ni.







U Rohlua lakah ka inthiam lohna a nasa zel a, ani lahin ka rai tih a hriat khan nupuia min neih a duh thu a sawi cham chi a, a laka ka inthlahrunna a rawn belhchhah mai bakah hmeichhe sual ka nih zia min inhriatthar tir a.
Mahse ani hian ka thiltih ka hrilh vek tawh hnuin min la pawm mai bakah inngaihtuah nawn hauh lovin ka thiltih avang khan min ngaidam nghal vek a, kei anga hmeichhe sual pawh min ngaidam a,






keimah ngaituah hi chuan Nupuii hi chu a fel lutuk alawm, u Rohlua'n kei a chunga khati khawpa pawi lo sawihnem tawh tu pawh min ngaihdam laiin keiin tinge Nupuii hi ka ngaidam loh bik ang, kei chuan ka ngaidam fel vek" a rawn ti a






Nupuii hmela lawmna chu tu mahin kan hmuhhmaihin ka ring hauh lo.Kei pawhin ka haw lova, mahse khatiang rilru a put leh mawlh ka hlau. Ka bula ding Zosangliana chu ka en a "thutlukna chu i ta a ni e, kei chuan ka haw lova, ka ngaidam vek tawh bawk, hremna chu i duh duh i pe thei.






Kan naute chungchang kal zel a ni a, naute pa inih angin kan nau chhiat chhana a bulpui ber hremna pe tur chuan dikna i nei, eng ang pawhin lo ti la, engmah ka sawi lovang, i thu vek a ni e" ka ti a, Zosangliana chu a ngawi reng a, engmah a sawi hauh lo.



ZAWMNA






Zosangliana chuan Nupuii chu a en vang vang a, "Engtia awm zui zel nge i rilruk?" a tih sup chuan Nupuii chuan chhan mai dan tur a hre hauh lo "ih ka pu, engmah ka sawi mai thei lo, hremna min pek duh a zir vek a nimai, engmah sawinawi thei ka ni hleinem, in duh chuan ka tang ang a, min hnawhchhuah pawhin ka chhuak mai ang








ka thil lo tih tawh avang kha tunah ka inchhir ve chiah, a hma zawng khan keimahah nuam tih lohna awm ve mahse, inchhirna tak tak erawh ka nei ngai lo, mahse ka thiltihsual in hriat hnua min ngaihdamna avang hian ka inchhir a, khatiang rilru ka lo pu kha ka in haw lutuk, mahse engkim ka thlentir zo vek tawh si.







Naute tihtlak ka tum khan ka pawi engmah a sawi lova, kei hian khawvel êng hmuh ve chaka an nu pum chhunga lo insiam mek te chungah khan pawi lian tak ka khawih a ni, pakhat chu ka sualna avangin in chan a, pakhat lah dahṭhat leh mai ka tum ṭhin bawk, khang naute te kha lo piang se, an nun a ṭhain an nu te ang maia rilru ṭha an ni ngei ang.







U Ms, in naute kha maw ṭawng thei chu ni se min dem thu a sawi ngeiin ka ring, lungmuang takin i pumah a awm a, a insiam puitling mek zel a, keia thikthuchhiatna avangin khawvel a chhuahsan ta mai si a, kut min thlak la, ka ankhum bawrh bawrh bawk la, ka tan chuan a nuam zawk ngei ang, tun a chin chu maw, keimahah sualna awm zawng zawng kha thi vek thei dawn lo mahse, a inlan leh tawh hauh lovang" mittui nen chu thu chu a sawi a.







Kan zavai mai chuan Zosangliana thutlukna chu kan nghak vek, ani hian engtin nge a tih ang tih ka ngaihruat thiam hauh lo, naute kha kei ai mahin a thlahlel zawk a, chhungkaw din tluka duh kha a neilo, a nun mal bik em em ṭhin khankei leh kan naute khan kan luahhneh hman em em a, a nun a hlimna chuai tawh ṭhin kha tihthar a ni leh a.







A phur a, hmahun tam tak, keimah leh kan naute te nena kan chendun ho huntur a suangtuah fo a, beiseina tam tak a nei a, mahse khang ho kha thawk leh khatah tihchhiat a ni a, a beiseina lo hmehthimsaktu hi engtin chiah nge a tih ang tih ngaihruat dan pawh ka hre lo.







"Engtin mah ka ti dawn lo che a, hremna pawh pek che ka tum hek lo, i inchhirna khan i nunah rah ṭha chhuah zawk sela, ti nawn tawh lo turin insiamṭhat nan hmang ang che, sualna in eng rahṭha mah a chhuah loh zia i hrechiang tawh a, tun a chin chu nula fel leh rilru tluang tak kha i ni leh tawh zawk dawn nia" a tih chuan Nupuii chu a ṭapchhuak leh ta tawp.







"Ka lawm lutuk in zavaia chungah, tun aṭang chuan engthil sual mah ka ti leh tawh miah lovang, chuan maw u Rosy, in inneih a, heta in awm anih chuan in naute kha min pawmtir ve hram rawh aw" a ti a, Rosy pawh a bu ve nghat nghat mai.




☆♡☆





Rohluzuala leh Rosy inkar pawh an chhungte ve ve in kan hre tawh a, Zanin hian palai an va kal dawn a, an inkarah naute a awm tawh miau avangin a rem loh chu kan ring hran lo.








Zan dar sarih a pel tawh a, chokaah kei, Rohlua leh Nupuii kan awm ho mek a, Zosangliana erawh tunah hna pawimawh tak, Lunglei lama an dawr hawn chungchanga buaina a awn deuh avangin Langlei lamah a awm thung. Rohluzuala chu a vei kual sek a, "Enteh u, Rosy chhungte'n kei hi min lo pawm lo ta se" a ti sek a, "tinge an remtih loh ngawt ang ni, naute tihfahrah an phal nang" ka ti a, a bu nghat nghat a.








"Mahse min lo duh lo ṭal ta se, ka luhkhung duh mai ang, hmeichhia pawhin mipa a luhkhung chuan kei a mipa zawk hian tinge ka luhkhung lo bik ang ni" a tih chuan Nupuii nen kan in en a, kan nui chiam mai.








"An duh loh che chuan kan rukpui dawn che nia, zawhte leh hmeichhe ruk chu a thian vek kha" ka ti a, min rawn ṭhuthnaih a, "Aw, kan ru mai dawn nia, ka luhkhung chuan ka pazawn hian min hlap khuang zawk zawk duh palh ang" a rawn ti a, a hlauhthawn dan em em hi ka khawngaih zawk.







Rohluzuala chuan Rosy a call a, loud speaker a dah turin kan ti nghal a, a dah ve mai, a call chu Rosy chuan a lo chhang hma kher mai, "Rose, an inrem thei dawn em? I chhungte'n an rem tih loh chuan insiam la, Sawmtei te nen kan lo ru ang che" a tih chuan lehlam a mi Rosy chu a rawn nui nasa viau mai.







"An rem tih hmel viau asin, a ṭul chuan min lo ru dawn nia" tiin nui chungin a rawn chhanglet a, "Lo luhkhung che a tum thawt thawt a, u Sawmtei hian ru zawk tur che in thu a lo kawhmuh a" Nupuii chuan a ti a, kan zavai mai chuan kan hlimtlang viau mai.








Palai ho pawhin thu lawmawm tak an lo hawn a, Rohluzuala mawlh chu a ni, inneih ni tur thlengin an ruat fel vek tawh, Rosy dul a lan hma ngeia inneih an ti a, inpuahchah nan thla khat vel bak kan nei lo, dan khatna tlin lo mahse, chhungkaw hausa a mi ve ve ta chu chhungte'n inneihna chu tihropui an tum khawp mai.








Kan pindana ka luh chuan Zosangliana ka ngai lo thei lo, ani awm lo hi chuan engmah hi a kim thei tak tak lo, Nupuii te bula ka awn laiin pangai mah ila, mahni a ka awm meuh hi chuan a hma zawnga ka ngaihna langchhuak lo zawng zawng ho kha an lo thar a,, ka ngai viau zel.







Ka inbual a, ka chhuah chuan ka phone ri a lo tawp chiah a, ka en chuan ka mi ngaih em em, ka pasal Zosangliana a ni, a rawn call leh nghal a, ka lak rualin "I inbual rei lutuk" a lo ti nghal a, mak ka ti khawp mai, "engtin nge i hriat?" ka tih chuan a rawn nui sup a, "kan pindanah khan CCTV ka dah tir alawm" a rawn tih chuan ka hawikual nasa mai.








"hawikual lawl lawl suh" nui chungin a rawn ti a, mahse ka la hawi lawl lawl tho, khawiah nge CCTV chu a dahtir ang le? "Ka Duatbikte ka ti mai mai anih kha, inah eng CCTV mah ka dahtir lo, i thiltih hun ka hrechiang a, ka lo fiam mai mai che anih kha" a tih chuan ka ngei ru ṭeuh mai.








"I ti tak tak emaw ka tia lawm" ka tih chuan a rawn nui sup a, "engtikah nge i rawn thlen dawn, ka ngai tawh che ania" ka tih chuan lehlam ami chuan "keipawn ka ngai tawh lutuk che, kuah che ka chak a, i taksa si cheta awm ka duh" a rawn ti sup.








"Nithum vel hnuah chuan ka rawn haw thei maiin ka ring, min ngai viau tawh em ni?" a rawn ti a, lu ka bu nghat nghat. Rohluzuala palai tirhte thu rawn hawn te chu ka hrilh ve a, Rohluzuala awmdan ka sawi lai chuan a nui ve suk suk mai.








Ka ngai tawh lutuk takzet, chutia kan inbiak lai chuan hmeichhe aw ka hre leh zeuh ṭhin. Phone kan dah dawn lai chuan hmeichhe aw ina "U Zosang, kawr jipper hi ka phelh thei lo ania,,min lo pui la" a rawn ti a, ka sa pup pup a, ka rilruah phatsan ka ni tih bak engdang mah a lang hauh lo.








" Eng thu nge ka hriat kha? Nang hian hmeichhe dang i awmpui a maw! I duh duh khan awm rawh, min rawn ngaihtuah hauh suh, i duh duh khan hmeichhe dang chu khawsakpui ang che" thinrim leh rilru nâ lutuk chuan ka ti a, Zosangliana ina "Nilo, i hresual" a tih chiah tiin







"insawifiah a ngai lo, i duh duh khan awm rawh, keiin helamah ka nghak che a, ka ngai em em bawk che a, nang khalamah nuam chenin i lo awm mai mai a, in hmangaih vang ni lova innei kan ni tih i lantir chiang khawp mai, kan inneih hlim khan keimah avanga i nun i duh dana i hman theihloh thu i sawi a nih kha,







khatih laiaka zalenna pek che kha i la hre reng a ni ang hmeichhe dang i awmpui danah" ka tih laiin Zosangliana chuan "I hresual anih" a tih chuan ka phone ka dah hmak, a rawn call nawn a, mahse ka dah hmak a, ka phone ka switch off zui bawk







Ka mittui ka biangah a rawn luang thla a, ka ṭap nghal hlawp hlawp, ka rilruah phatsan ka ni tih bak engdang mah a lang lo. In atanga chhuahte ka duh nghal rum rum. Mahse zan a rei tawh a, tunah chuan taxi pawh ka hmu tawh mang lovang, naktukah la lâ he in hi ka chhuahsan ang.


(chhun lama dah ka tum kha ania, mahse ka nauin kha phone a en a,, ka lo dah hman lo a ni 😅)


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)