MARRIAGE WITHOUT LOVE BY Te-i MrsAmbrose (Completed)

[Ngaia]

Marriage Without Love
By; Te-i Mrs Ambrose


Chapter 13






Mahni chauh chuan ka ding reng, Zosangliana awm dan tehthut khan mi a tihamhaih em a, chet chang nachang pawh ka la hre meuh lo. Chutih lai chuan kawngka a ri khep a, lo lut mek ka hmuh chuan engmah ka sawi lova, ka en reng ringawt.







Ani pawn engmah a sawi lova, a rawn lut a, ka din reng a hmuh chuan ka kut a la a, ka thingthla nghal, a rawn chelh zui tawh lem lo. "Sawmi, ṭhu phawt teh ang" tiin couch an hunna lamah a va kal nghal a, keipawn ka zui ve a.







Kan ṭhutfel hnu chuan kan in en ta ran "Sawmi, kha inneih maicham lo thleng lova ka kalsan daih vang che khan ka tihpalh a ni" a rawn ti a, a inthiamloh hmel takzet. "Engah mah ngai suh, ka theinghilh vek tawh" ka ti a, ka ká maiin ka sawi a ni lova, ka thinlung tak takin a ni ka sawi ni.







Rohluzuala hian kha inneih maicham kha lo thleng se chuan tuna Zosangliana laka ka awmdan hian ka awm kher lovang. Ani ka duh kha ka tisual ang em ka hrelo. Mahse, tunah rih chuan inchhir chhan ka la neilo a, amah Rohluzuala ka neilo pawh hi ka la lawm viau.







Rohluzuala chuan min en vang vang a, "Sawmi ka nupui ni turin ka duh che" a rawn ti a, a thusawi awi lo lutuk chuan ka nui ringawt "I â em ni? I u nupui ka nih hi, inṭhen em pawh kan inṭhen hmain min neih i duh thu i sawi a, eng ang mipa nge i nih? Hmeichhe khawlo leh pasal nei lawr dun dun duh angah min ngai em ni?







I unaupa pawn kan inneih tirhin sum chiah duh angin min ngai a, chuan nang a nau hian pasal nei lai reng chu nupuia i duh thu i sawi leh bawk a, min en la, hmeichhe lawi lo leh lepchiah tak angin min ngai em ni?" ka ti fak, ka thinrim lutuk hi ka khur thei hial a ni.







Heng Sailo unau ho hian eng hmeichhe hmuhin nge min hmuh bik? Pakhatin a tirin sum duh lutuk hmeichhia angin min ngai a, a nau lahin pasal ka nei reng chungin nupuia min neih a duh thu a sawi bawk a, ka nun hi infiamna leh chawhkawi mai mai chi a ni hauh lo. Heng Sailo unau hian an hrelo nge? Kei hi toys angah min ngai zawk.







"Sawmi, i ngai kawi anih kha" a rawn ti dam thluam a, kei erawh ṭawng pawh ka ṭawng tawhlo. A sawitur chu eng pawh ni se ka nghak tawp mai a ni. "Ka u nen chuan in la inṭhen vat dawn tho a" a tih chuan ngawi theilo chiang tak mai ka ni.







"Nang hian ka rilru i hria em ni? Pasal ka ṭhen duh leh duh loh i hria em ni!? Eng vanga duh duha ka laka in ngaihdan siam thin nge in nih" ka ti kha fak, "Sawmi tihthinrim che ka tum lo, ka thusawi hi ngaithla zo phawt rawh" a rawn ti leh a, kei erawh ka ngaihtuahna te hi a fim lo zo vek.







Ka thluakte hi a vung mai dawnin ka hria, hetiang em a inzah lohna hi heng unau lak aṭang hian ka dawng ang tih ka ngaihtuah hauh lo. "Sawmi ngaithla rawh, ka u nen hian in la inṭhen thuai dawn, thla khat vel bak in innei tawh hauh lovang" a rawn ti a, ka melh nghek ringawt.






"Hre rawh Rohluzual, ka pasal nau i nih vanga i laka dawhthei mai nai chauh ka nih hi.Kei leh i u hi kan inṭhen hauh lovang lo inṭhen ta tehreng pawh ni ila, nang hi chu ka nei chuang lovang che" ka ti khum nghek.






"Chuan hei hi hre bawk la, i rawn lan hma khan i u nen kan inkarah engmah a thleng lo, mahse i rawn haw ta cheng a, kan nupa inkar a khi phawk mai ania, eng chiah nge nang hian i rawn hawpui, i rawn let leh hi ka lawm lo che a ni hauh lo , mahse i rawn let hma nena kan boruak erawh i rawn thlak hlawk mai a.







Kha inneih maicham lo thleng ngamlo, mualphona hmachhawn tura ramdang min pansan lai khan i u hian ka mualpho lutuk loh nan leh in company avang sawn min nei a, min ngaina lova, keipawn ka ngaina hek lo, mahse ka laka i tih ngaihtuah hi chuan i u chu a ṭha mah mah







nangin dawizep taka min kalsan ang khan min kalsan ve dawn lova, chuan kan inkarah lo inrawlh hauh suh, a hmaa chhungte zahna tur pawh dawn lova min neih hlauh ngawih ngawih a ram dang pan si khan eng vanga tun ataka min neih suh leh si nge i nih?" tiin ka melh reng.







"Nangmah vangin" tih chiahin min chhang a, ka nui ringawt, "Sawmi, kha inneih maicham kha nang ka neih duh vang chea kalsan a ram dang pan ka ni" a rawn tih chuan awi lo lutukin ka nui ri hak. Ani Rohluzuala erawh chu a hmel a chhiar theih loh.







"Nang hi kan inneih dawn nihnih la awmah khan ka hmu che a, nang ka hmuh aṭang che khan 'Love at first sight' tih kha ka awi nghal hmiah, ka kalpel hnu che pawhin ka mitthlaah i cham reng a, ka rilruah i cham reng a







lak chhuah che ka tum pawhin ka thei hauh lo, ka nupui ni turin ka duh che a, nupui nei mai tawh tur ka ni tih min theinghilh tir der a, ka nupui i nih ngei ka duh a, ka nupui tur a hmel pawh ka hmuhlo neiha, nang chan che ai chuan tiin inneih maicham kha ka kalsan,







khami ni khan ka nupui tur hmel kha vawikhat tal hmu ila, ka kalsan hauh lovang che, mahse ka hmu miau silo che a, nang neih duh vang chein inneih maicham ka kalsan ngei a, a chhan chu ka nupui tur kha ka hmeichhe vawikhat hmuhnaa ka hmangaih nghal leh ka nupui tura ka duh em em kha i ni tih ka hre miau lo a ni.







Ram danga ka awm chhung zawng khan ka mitthlaah nangmah chauh i awm ṭhin, Mizoram lama lo let, ka hmeichhe hmangaih kha hmuh a, nupuia neih kha ka duh, mahse ka rawn let leh erawh khan min ṭhawng hle







ka hmeichhe hmangaih kha ka u nupui a lo ni reng a, maicham ka kalsan kha ka inchhir zia i hrethiam kher lovang, ka thil tih zawnga ka inchhir ber chu ka nupui tur hmel hmu hmasa lova ramdang ka pan ta kha a ni" a rawn ti a, a thusawi chu awi tur nge, awi loh tur tih takngial pawh ka hrelo.







"Sawmi, ka u nen hian innei tur in nilo, keimah nena innei tur zawk kan ni, chu thil chu ka u pawh hian a hrechiang a, chuvanga ka neih che pawh phal a ni" a rawn ti a, a vawi tamtakna atan a zat vang ni hauh lovin ka nui leh ta.







"Nang nen chuan innei tur kan ni ngei mai, mahse kan innei miau lova, i u nen kan innei a, i u nupui ka ni tawh, chuvang chuan min neih chu tum buai duh suh" tiin thawh mai ka tum a, mahse a thu rawn sawi leh avang chuan din ka tum tawh chu ka tawp chiang khawp mai.








"Kei hian ka nei ngei ang che, ka u nen in inkarah hmangaihna, induhna tih a awmlo bawk a, ka nei thuai ang che" a tih chuan "I hresual, duhna chu a awm teh meuh mai, hmangaihna pawh a awmlo ka ti ngamlo" tiin room chu ka chhuahsan nghal a.








Nupuii hmel lan dan, ka laka a danglam ta riau-te kha ka hrethian ta chiah, a mipa duhin a nupui atan min duh miau a, a tan chuan a nâ dawn lutuk. Ka hrethiam lutuk, mahse ani kha keima chunga lungawilo ngawt tur a niin ka hrelo.







Ka thaw hawk a, tukina ka hlima, ka lawm teh reng nen, he în ka thleng chiah erawh ka tawt up up mai. Inchung zawla Zosangliana ṭhu reng chu ka hmu a, chu lam pan chuan ka kal nghal. A kut pahniha suihzawmin a ṭhu kun reng a, ka thawm a hriat chuan a rawn hawichhuak hram a.








Min hmuh chuan engmah a sawilo a, a ngawi ngul mai a, "Eng vanga i nau chu nei tura min ti nge inih? Chuan eng vanga i awmdan hi danglam ta vek nge anih?" tiin ka en reng, a thaw hawk a, "min kiansan nan, ka nau sawn a hmangaih che a, chuan nang hi a nupui tur i ni, ka nupui tur nilovin" a ti zawi ruih a.







"Duh thlan theihna pawh ka neilo a maw, nangin i nau hnenah chuan kei hi 'i nei thei ang' i ti a, ka thutlukna pawh i ngaichang dawn eih lo a maw?" ka ti leh a, a ngawi reng a, "Sawmsawm, nei la, i inchhir lovang" tih ringawt a rawn sawi a, a kun leh daih







"Ani neiha ka inchhir loh ai chuan nang neih che hi ka duh zawk, i hria em? Inthen ka duhlo" ka ti vak a, a rawn hawi rang khawp mai "kan inthen ngei ang" a hnu fe chuan a rawn tichhuak hram a. "Mipa thu zawk chu hmeichhia te'n kan zawm tur a ni ngei mai, mahse i thu rawn sawi hi chu ka pawmin ka zawm hauh lovang, nang hian min duh thu i sawi a







I nau a rawn lang ta cheng a, kha duhna tiha i sawi kha khawiah nge a awm tak, min duh anih takzet chuan min chelh ngei tur a ni" ka ti a, a ngawi ngul a, "Nang hian min duh thu min hrilh a, i mi duhna hrethiamin ka duh ve che a, mahse i laka hetiang feeling ka neih hnu hian nangin min hlat a, pasal dang min neihtir i tum a maw!?







Zosanglian, duhna leh hmangaihna hi infiamna a ni lova, inchhaina mai mai a ni hek lo. Mi pakhat duh chu a har lo, mahse duh tawh hnua theihngilh tum erawh a harsa takzet tih i hria a ni lawm ni? I nau hi nei ta ila, awlsam taka ka theingilh theih che i ring em? A chhana chu maw, teuhlo tih hi a ni ringawt.







Midang duh hi a har lo ka ti tiraw, mahse mi duh tak takna hi a piang zen zen lova, a pian chhunah chuan a piang awlsam a ni thei e, mahse midang duh lehna pianchhuah chu a har zakzet tawh, nupa kan ni a, engmah zep ka tum lem lo







ka duh che a, ka zep lo, mahse nangin i nau min neihtir i tum a, i nau kuta min hlan i tum a, chu chu em ni i mi duhna-in a hrin chhuah chu, chuan ka duhna che-in a hrinchhuah ve thung hi pasal dang neih maw ni dawn






Zosanglian rinngam tlak ni ta che, ka tana lungpui ni a ka kulbing ni turin ka duh che, mahse tun hun ngaihtuah hi chuan i derdep lutuk mah mah" tiin amah chu ka en reng a, a rawn thaw hawk "Sawmsawm, ka duh che, ka duh lutuk che, mahse kan inkar chu a chah tawh a ngai, ka nau leh ka nupui inkara duh ka thlan a ngai a, nang nilovin ka nau ka thlang zawk miau a, kan inkar chu a tawp a ngai tawh a ni" a ti a, ka biangah mittui a luang thla nghal.







Zosangliana chuan min rawn kuah a, "Sawmsawm, i hriatthiam a ngai, Rohlu-a hi a hmeichhe hmangaih khan kum li kal ta khan a boral san a, khata ṭang khan a mumal tak tak thei tawhlo a, hmeichhe lamah phei chuan tumah hnimhnaih a duh ngailo mahse nang i lo lang a







kha ka unaupa, hmangaihna awmzia hre tawh lo khawpa hmangaihna avanga buai khan nangmah avangin hmangaihna awmzia a hriat leh phah a, hmeichhe hnaih duh tawh ngailo khan nang chu hnaih che a chak tlat a, ka duh che ka duh nameuh mai che mahse ka nau tan i pawimawh zawk, kei chu ka kiang mai ang" a rawn ti a.







"Nang hian i nau tan kei hi min that a ni ringawt, hetia i tih kher hi a ngai em ni? I nau tan i duhna chu i dahṭha a, chuan nang duhtu che pawh chem lovin ka lu i la ringawt bawk a, I nau tan min duhna leh ka duhna che hi i hlan kher a ngai em ni?






Ani pawn hmangaih chu a nei leh maithei asin, kan inkar tihchhiat kher ka duh lo" naupang chhia zet hian a ngen hian ka ngen a ni ringawt. "Sawmsawm, i hriatthiam a ngai, ka nau tan hian i pawimawh lutuk" a rawn ti a, min kuah nghet hle "I tan ka pawimawh ve lo em ni?" ka tih chuan a ṭang ṭeuh.







"I pawimawh, i pawimawh lutuk takzet, mahse nangmah vanga ka nau nun a chhiat leh ka duh lo" tiin min nawr hla deuh a, "
rawh Sawmsawm , min duhna chu a la kiang mai ang, mahse ka nau-in a hmangaihna che erawh a kiang kher ang em ka hrelo, ka duhna che min chhang let a , min duh ve hi ka lawm lutuk, mahse, a rem lo a ni ngei ang







chuan nichina ka ṭawngkam avang khan ka tihpalh, khatia ka tih che khan i thinrim ang a, min kalsan i duh mai ka rin vang a ni, min ngaidam la, mahse tuna i chunga ka thiltih avang erawh hi chuan min ngaidam lo la, min haw em em la, min huat chuan kha i duhna lo piang ve mek kha a reh thuai mai ang" a ti a, ka chal fawp leh zeuhin






"A tawp nan thil ka ngen ang che, ka nau hi nei ngei ang che aw" a ti a, ka muttui min hruksakin "hmeichhe chak tak inih kha" a tih zawm leh zat a "I hmuh lai ngeiin kei hian pasal dang ka nei ang maw!? I hmu thei meuh ang maw" tiin ka en reng.







"Theilo ang" a ti zawi sup a, "Chuti si, i nau chuan hmangaihtu tha tak a la tawng mai ang, engmah min sawipui tawh suh, ka ngaithla duh lo" tiin inchung zawl aṭang chuan ka chhukthla a, ka mittui lah chu eng nge a chhuah chhan tih pawh hre der silo hian a tla ve chhen mai a.







Inhnuai ka thlen chuan Pa Zama chuan min en reng, sawitur ngah viau hmel hi a pu a, mahse ani pawh be lovin ka chhuak a, pawna taxi ka hmuh hmasak ber pharin thlanmual lam pan turin ka ti nghal a.






Thlammual ka thlen chuan ka chhuk a, chuan man ka pek hnuin ka nu thlan lamah chuan ka chhuk a, ka nu thlan ka thlen chuan ka ṭhu thla hnawk "nu,, min pui teh, engtin nge ka awm chhoh zel dawn" tiin van lam ka en chho a, vawiina Zosangliana chet dan khan amah min hlattir a hnekin a lamah min hip bet zawk tlat.






Mipa hmangaihna neilo emaw ka tih khan a nau a hmangaih zia leh a chhungril thatzia ka hriat phah a, a nau nei ngei turin min ti mahse a ṭawngkam chhuak ho khan a lam min awn tir zawk tlat.







"Nu Zosangliana khan maw, a nau pasala min neihtir a tum a, mahse ka duh lo, pasal ka nei anih chuan amah Zosangliana chauh saw ka duh, midang ka duh lo, nu min pui hram teh, ka pasal nau ka neih chuan miten engtin nge min ngaih ang? Pasal dang ka nei duh lo" tiin ka thaw hawk a.







Zosangliana ka ngaihtuah lah hian hlat chu hla tak a ni, hnaih ka chak zet zet zawk, a nau chu ka khawngaih lo a nilo, mahse a nau saw pasal atan chuan ka duh kher lo. Duhna leh khawngaihna hi thil inhnaih tak a ni, mahse a inang miau lo a ni.







Ka duh lo chungin pasal vawikhat ka nei tawh a, ka pasal chu ka duh ṭan a, mahse a ṭumhnihna atan ka duh lo chung bawkin pasal min neihtir an tum leh a, a lehpekah hi chu thutiam a awm tawhlo a, pasal neih leh ka duh tawh lo.







Zosangliana nen hian kan lo inṭhen ta anih chuan pasal dang ka nei duh tawh lo, ka pa enkawla ka nun puma buai ka duh zawk, thlana awm reng thu a awm silo. În lam pan chuan ka haw leh ta nge nge a, în ka thlen rual chuan Pa Zama'n min biak a duhthu a sawi nghal a.







Library room lamah min hruai a, kan luhfel hnu chuan "Sawmte, Rohlu-a hi nei turin kan duh che a" a rawn tih chuan za lo lutukin ka nuichhuak hak "Pa Zam, ka pa ṭhianpa i nihna ang leh ka pasala pa i nihna ang chuan ka zah lutuk che a, i thu hnial pawh ka duh hek lo, mahse tuna i sawi erawh kha chu ka hnial thla nghal che ni rawh se" ka ti tawp.







"Pa Zam, kei chuan ka pian ve manah pasal pakhat chiah ka nei ang, Zosangliana nen hian kan lo inṭhen anih chuan pasal dang nei tawh lovin ka awm mai ang, min hrethiam dawn nia" tiin chhuah mai ka tum a, mahse a thu rawn sawi avang chuan ka ding leh chat.






"Zirtawp ni hian Zosanga nen inthen ang" a rawn ti a a lam ka hawi leh nghal a, amah bawk chuan "Sawmte, Zosanga nen hian ṭhen kher che u ka duh lo, mahse Rohluzuala hi ngaihtuah la, nangmah avanga rawn pangai ta vek a ni a, a tan nangmah aia damdawi ṭha an awm lo







Zosanga chuan a nau tan a phal che a, khawngaihin nei mai rawh" a rawn ti a, "Pa Zam, Rohlu-a chu a damfel tawh, enkawl ngai a ni lova, ani hian hmangaih dang a la nei mai ang, ka mualpho tur zia hi min ngaihtuah pui ve ula, miin engtin nge min sawi ang" ka ti a, kawngka a lo inhawng a, a chanchim kan sawi mek Rohlu-a chu a rawn lut a.







"Pa hrilh duh suh u, ka la nei tho ang" a rawn ti a, ka melh reng, a zam lo hi ka ti ngawih ngawih, a u mupui a nei duh reng reng pawh hi rilru lama rualban lohna chikhatah ka ngai hmak. Chuan Pa Zama leh Zosangliana pawh hian Rohlu-a hi an khawngaih dan leh an duat dan a diklo a ni.


(Le, Zosangliana leh Rohluzuala hian Ms-i hi an inchuh dawn nge? Ms-i hian a pasal then lo va chelh reng a tum zawk dawn le??)


Show post links
Top

[Ngaia]

Marriage Without Love
By; Te-i Mrs Ambrose




Chapter 14






Pa Zama library room chu ka chhuahsan a, kan nupa room lamah ka kal a, Zosangliana pawh a lo awm vang mai, "Zosanglian biak che ka duh" ka ti nghal a, "sawi la" a rawn ti a, ka han thaw ham ham phawt a






"Nang ka neih chhan che chu kapa hnena ka thuthiam vang a ni. Kapa hian natna a nei tih chu i hriat ve kha, kapa vang chauha pasal nei kha ka ni. Kapa chuan ka damchhung zawnga ka pasal kianga awm reng turin thu min tiam tir a, chumi avanga a hma zawng pawha kalsan lo che ka ni.







Nang nen hian kan lo inthen ta anih chuan i nau hi ka neih beisei suh ang che, kei chuan ka thutiam vangin a hma aṭang khan ka kalsan lo mai che a, mahse, tuna kal tura min ti lawm lawm chung pawha ka kalsan loh chuan che chu ka thutiam vang nilovin miin a mi duh a chelh ṭhinna angin ka chelh bet lui hram hram zawk che a ni.






A tir khan nang aia huat leh ten ka nei lo, ka zep lo, ka haw ngawih ngawih ṭhin che, khatia haw em em chung che khan ka laka ṭhat i chhuah chang chuan awiawmloh khawpin ka nem leh ṭhin. Keipawn ka intipaukhauh tawh ang ka ti ṭhin w, mahse i lakah kha chuan dawl zawr khan ka zawr leh nge nge zel.






Thutiam vanga nei che mah ni ila, tunah chuan thutiam vang chauh a ni tawh lo a, a chhan chu i hriat kha, duhna a lo tel ve tawh vang a ni. Naktuk hian min ṭhen i tum a ni tiraw, zanin chuan chelh ngei che ka tum, mahse, naktuk a lo thlen a, ka chelh zawh loh che chuan court kan kal hunah chuan inngaihtuah buai lovin he inneihna thu kan tiam hi ka pawt chat ang.






Zanin hian ka duhna avang chein i laka tlawm taka awmin inṭhen lohna kawng ka dap a , nang hian i nau i la thlan zawk fo chuan kei pawhin engah mah min ngailo tu hi ka chelhbet lovang che.






Chapona ka nei ve a chu ka chapona chuan tawk a tih chin a thlen chuan ka thuthiam kha hrelo derin ka kalsan ang che, ka pa pawn min dem em em lovang, zanin hian in ngaituah ang che a chhan chu kei hian naktuka i thutlukna apiang pawm tura thutlukna ka siam vang a ni.






Min neih i duh chuan i thutlukna chu ka pawmpui che ang a, min ṭhen i duh pawhin i thutlukna chu ka pawm tho ang che, zanin atan chuan thutlukna chu i ta a ni e" tiin khumah ka mu nghal hmak a.






Ka sawi tam bawk a, ka thaw huai, hman zawnga ka neihchhan ka hrilh ngai loh kha zaninah ka hrilh ta chu a nia ka lung zawn lah chu a na veng veng zui.Rei ngial ka mut hnu chuan ka thawk chu a rawn pangngai deuh a eng vanga rawn nâ thut nge a nih? Naktuk hian thil ṭhalo a thleng dawn nge ni? Keimahah hlauhthawnna a awm tlat.






Chutia mu reng ta chu mutchhuakin min rawn zem a, ka muhil siai siai, ka mumangah chuan ka pa ka lo hmu a, kawr var thianghlim zet hi a ha a, a bulah ka nu a awm ve bawk, kapa chuan "Bawihte, kan ngai lutuk che alawm, kan rawn tlawh che anih hi" a rawn ti a, a nui hmel chu a hahdamthlak takzet






Ka nu pawh chuan "Bawihi, chak takin lo awm la, i pa nen kan chhuan tlak hmeichhia ni zel ang che aw" a rawn ti a, ka nu leh pa lama pen chu ka tum a, mahse ka thei hauh lo. Ka ke chu charbeh tlat ang hian a awm.






Ka bulah chuan Zosangliana a rawn ding a, ka kut chu a rawn hum vang vang a, "Sawmsawm, ka chelh reng ang che" a rawn ti a, ka nuih ver ver chutih lai chuan ka nu leh pa chuan "Bawihte, kan thla a muang tawh e, i pasal kiangah khan awm reng rawh aw" an lo ti a, an ral ta ghal daih a.






Ka harh chuan darthum vel a lo ni a, ka lung chu a leng veng veng, ka nu kha khatianga chiangin mangah ka la hmu ngailo, ka ngai takzet. Kapa pawh ka ngai tho, ka tlawh ngei ang.






Khum ka en chuan Zosangliana chu a lo mu ve reng a, mahse sîk khat pawh min si lo anih hmel e. Keipawh ka mu ṭha leh a, ani in sîk pawh min sîkloh chuan ka tawk bik hauh lovang. Ka mu ṭha leh chu ka mu harlo khawp nai.






Ka phone ri avang chuan ka harh a, ka en chuan U Rote-i a lo ni, zing zinga min call chu mak ka ti ru takzet. Phone ka lak rual chuan a rawn ṭap nghal a "Ms, i pa a awm tawhlo" a rawn ti a, ka nui ringawt.






"U Rote, zing zingah chuan fiamthu lo thawh mah ta che kapa chungchang ala ni zui" lungawi vak lo chuan ka ti a, mahse ka lung erawh a su dup dup.






"Ms, lo kal thuai rawh,i pa hi rawn kai tho teh, tuktin min kaitho ṭhintu kha tukin chuan ka kaitho let ve a, mahse tho tur a awm tawhlo" a rawn ti leh a, ka biangah mittui a luang nghal. "U Rote, thihna hi fiamthuna chu a nilo ania" ka tih khum vak.






Ka thawmah chuan Zosangliana chu a rawn harh a, mittui nena ka thu min hmuh chuan min lo kuah nghal a, lehlamah U Rote-i chuan "Ms, dawt nise ka ti takzet, mahse i pa chu mitthi a ni tawh miau a, tunah in an sing sa mek, lo kal thuai rawh" a rawn ti leh a, ka ngaihtuah a tawi tak mai.







Ka biangah chuan mittui chu q luang ve ngei a, mahse kapa thih thu min rawn hrilh vanga luang a ni lo, a chhan chu kapa kha a la dam miau a ni. "U Rote, ka dah aw, min rawn fiamna mai mai anih thu i rawn sawi hun ka nghak ang, ka pa chu a la dam miau a" tiin phone dah mai ka tum a






mahse Zosangliana chuan min chhuhin a bengah a chuktuah nghal a an inbiakna chu ka ral hriat ringawt. Kapa chu a thi theilo ang, ka bianga mittui tla chu ka hru a, mahse a dang a rawn tlakbelh zel tho.






Zosangliana chuan phone chu a dah hunin min kuahna chu a thlah a, ka mittui min hruksakin "Sawmsawm, insiam phawt ila, in în lamah chuan kan kal dawn nia" a rawn ti a, kei erawh chet changna chang pawh ka hrelo. Ka awm mawl tawp.






Kapa thih thu an sawi kha awilo mah ila ka tha erawh a ti bo zova ngaihtuahna a tawi tak mai a ni. Zosangliana chuan min pawm tho nawlh a, ka hmai vel min phihsak vek a, ka thawmhnaw min thlaksak bawk, ka zak lova, ka ngaihtuahna hi a mang vek.






Inhnuai lamah min chhukthlak pui a , Pa Zama a hmuh chuan "Pa, Sawmsawmi pa chu nizan a mu kha an kaitho zo lo anih chu" a ti a, ka sa nghal em em ringawt, "Zosanglian, ka pa chu tho zo lo nilovin a tho peih rihlo zawk mai anih kha" ka ti vak, ani erawhin min chhang hauh lo.






Motor chu amahin khalh lovin driver a khalh tir a, a hnung lama min ṭhutpuiin min kuah reng a, engmah a sawilo, sawi pawh nise ka hre fum fe kher lovang. Kan in kan thlen chuan pawnah mi an vei/vai suau suau a, chu chuan ka lungphu chu a rawn tirang sauh.






Inchhung lama ka luh chuan in vel chu an lo ṭhiat mek a ,hutkhawmna pindan aṭang chuan ,ap thawm a rawn chhuak a, chu lam chu ka pan nghal a, khumah chuan ka pa chu a lo mu reng a, veng dang lama kan chhungte chuan kapa chu kilin an lo ṭap hawm hawm hlawm a.






Kapa lam chu ka pan a "tumah kha ṭap tawh suh u, kapa hi ṭah ngai a nilo" ka ti vak a, mahse ṭap thawm a rin bleh mai mai, ka awm zawn hi a na em em a, kapa chu ka en a, a mittui hmel ngang mai.






"Pa lo tho rawh, ka u leh ka nite hian mitthi ang maia bawisawm chein an ṭah vak hi, lo hau teh" tiin kapa chu ka thing nawk nawk, mahse min chhang hauhlo a, ka hlauhthawnna a nasa telh tleh.






"Pa, i thi tawh an tih hi, mitthi tih chu i duh em ni? Lo hau hram teh mawh" tiin kapa kut chu ka chelh a, mahse a lo vawt thler mai, "U Rote, puan lo la rawh kapa hian vawt a ti lutuk, a vawt thler ania" ka ti a, U Rote-i chu a ṭap vak ringawt a, mahse puan pawh a rawn la chuang lo.






Ka ni Lawmi chuan "Ka u, tho teh maw, i fanu i tih mangan em hi" tiin kapa chu a rawn kuah a, a ṭap hawm hawm, kapa chuan tu kohna mah min chhang tawhlo a chhan awmchhun chu chunglam kohna chuah a ni.







Kapa thi thu chu awi duhlo hle mah ila, engkim chuan kapa thih tawh thu min hrilh a ka mumang kha ka hre chhuak a ka biangah mittui a zur zung zung "Nu tinge kapa kha nimin zana i hruai daih a, kapa lo hi neih ka nei em ni? Nu kapa kha min pe let leh rawh" tiin ka pa chu ka kuah a.







"Pa, mangṭha-na thu pawi kan la sawi loh kha, tinge i kal daih, i fanu hi min mangtha lovin i kal daih a, lo let leh la, mangṭha-na thu pawh sawi hmasa lova i kal chu ka duhlo a, ka phal hek lo" tiin ka pa ruang chu ka bawh a, ka ṭap hawm hawm.







"Pa, 'ka inenkawl ṭha ang, rei tak ka dam ang i tih kha' tinge rinloh lutuka min kalsan, min thawn dan hian mi a deng na emai enkawl pawh ka la enkawl loh che kha" ka ti a, mahse ka pa erawh chuan min chhang lova. A mit min chhinsan reng.







Khawvela ka neih chhun ka pa chuan min kalsan ta tih chu awi a harsa a, mahse thudik a ni miau si, min hmangaiha, ka hmahun ngaihtuah reng reng a nun chhiar ṭhin ka pa khan thlamuang takin min chawlhsan tawh .







Ani chu natna leh hreawmna awm tawh lohnaah ka nu kiangah a kal tawh a, lawmpui tur ka ni mahse, ka pawm dam thei lova, kapa chu ka lawmpui tak tak theilo. Kapa thlana an zalh thleng chuan mumal ka nei meuh lo. Zosangliana chuan min hnaih duh hmel takin min en reng ṭhin tih ka hria.







Mahse ani ngaihven hman ka nilo, kapa chu ka nu thlan kiangah an zalh a, midang an haw sup sup a, kei erawhin kapa an zalhna leivung thar tak chu ka en reng.







Mipui an ṭin zawh chuan rawl chhuah meuhin ka ṭap a, nichin zawng khan ka ṭap theilo a, ka awm a hnawh reng a, mahse tunah chuan ka ṭapchhuak ve thei ta a ka nu thlan chungah chuan ka ṭhu a kapa an zalhna chu ka en reng






"Pa i kal hma emai i fanu hian nang lo chu neih a neilo asin, min ngaihtuah ve miah lo em ni? Ka nu chauh i ngaihtuah a, pasal chu min neihtir tawh ngei a chuan kei pawhin ka duh a, ka hmangaih hialin ka hria, mahse ani ka pasal kha chu ka neih ho zingah ka chhiar tel theilo.







A chhan chu vawiina inṭhen tum kha kan ni a, ka pasal nena kan lo inṭhen tak pawhin pa ka la nei alawm tiha inthlamuan tum khan vawiinah ka chan ta si che a.







Nang lo chu neih dang ka nei hleinem, tinge min kalsan, pasal min neihtir hnuin nang chuan i chawlh hahdamna tur hmun i pan a min ngaihtuah ve lo em ni? Ka pasal nen kan inṭhen chuan tunge ka belh tak ang.







Nang lo chu neih ka neih loh zia hre ber tur i ni asin, mal leh khawhar taka awm turin nang chuan min kalsan ta anih hi" ka ti a, ka pa an zalhna chu ka melh ngawt ngawt.







"Pa, i chungah ka lawm e aw, min enkawl seilenna te, engkim avang hian, mahse ka enkawl hman lo che erawh hi chu pawi ka ti takzet a ni. Chuan ka thutiam pawh ka tih puitlin theihloh hmel bawk a, ka pasal kianga ka damchhunga awm turin ka tiam che a







mahse ka theih hmel siloh, i fanu hi min lo dem lutuk lo hram ang che aw, pa thlamuang takin ka nu nen chuan lo awm ula, in fanu hi tlu ve ṭhin mahse, a tho leh zel tih in hriat kha aw" tiin van lam ka thlir chho a, mit ka chhing vang vang.







Ka men leh chian ka hmaah Zosangliana a lo ding reng a, ka bulah lo ṭhuin a mal chungah min pawm ṭhu a "I hria em, i mangan niin hetianga kuah tur che a min tih kha" tiin nget lutuk chuan min kuah a, ka thla a muang nghal suai suai.







Ka khabe a rawn dawm a, ka hmuiah a rawn fawp vang vang a, min thlah hnuin "neih ka neilo ti tawh ngai suh ang che, i neihchhun ka ni ang a, i kiangah ka awm reng ang" a rawn ti nghet churh a.







"Sawmsawm i tan chuan engkim ka ti thei, ka nau neihtir che ka tum tawhlo a, ka ṭhen hek lovang che, englai pawhin i kiangah ka awm reng ang, i tan pasal ṭha ber ka ni ang" a rawn ti a, ka en reng. Kapa ka sun avanga min hnemna ṭawngka mai mai chu a ang hauh lo.






"Hei hi hre reng rawh, i tan anih chuan midang rilru tihnat pawh ka hreh lo va, i rilru natna ka thlen dawn ai chuan hmeichhe tamtak rilru hliam sak chu ka hreh hauh lo, hmeichhe dang vanga kan inkar a buai ka duh dawn lova, ka chán ai che chuan mi dang tihnat chu ka thlang zawk ang






I neihchhun ka ni ang a, ka nau nen kan inchuh che ngai mahse, ka ta chuah i ni ang chhungte tuithlar pawh nangmah vang chuan ka tuar mai ang, ka nau chu ka khawngaih ngei a, mahse ka nau avangin i rilru ka tibuai-in ka tina tawh lovang.






ka nau nena kan inchuh che a ngaih pawhin ka nau tan ka kian mai mai hauh lovang che, tun atang chuan ka ta chauh i ni tawh ang, ka ta chauh, Malsawmsangi hi Zosangliana ta chauh i ni tawh ang"

(ho in tih leh anih chuan a ngaihna ka hre tawh bik lo,)


Show post links
Top

[Ngaia]

Marriage Without Love
By; Te-i Mrs Ambrose



Chapter 15






Zosangliana POV;






Sawmsawmi chu ka kuah reng, ani hian a pa a chan avangin a tuar thiamlo dawn em a, a kiangah a vawn theih turin ka awm reng ang, ani hi ṭhen ka tum buai tawh lo, ani nena min ṭhen theitu awmchhun chu thihna leh Pathian chauh an ni ang.






Ka nau chuan hmangaih dang a nei leh thei mai ang, Sawmsawm hi chu atan ka phal lo, Sawmsawmi thusawi zawng zawng kha ka hre vek, ani hmeichhia zawk pawn min chelh reng a tum laiin keiin ka thlah ang maw, a teuh lo mai, min thlah tum mahse, tunah chuan keimah zawk hian ka chelh tlat tawh ang.






A pasal leh a khawvel neihchhun ka ni ang, ani tan anih chuan tupawh tihnat ka hreh hauh lovang, he hmeichhia pawn lama hmeichhe chak, thinchhia leh luhlul hi chhung lamah chuan nunnem, derdep leh hmangaihna mamawh tak a ni tih ka hre tawh a, kei hian ka theih anga nasa in ka hmangaih ang.






Tunah khan hmangaih thu ka sawi em ni? Ka lo hmangaih a ni mahna, he hmeichhia lo hi chuan tu mahin ka mit an la lova, ani chauh hi a ni ka vawikhat hmuhnaa ka thlir nawn leh awmchhun chu.






Ka hmeichhe pawn lai chu a thaw sak sak a, ka en chuan min nghengin a lo muhil reng, a ṭap chau tawngkhawng a ni ngei ang, a hmuiah ka fawp zeuh a, nghet lutukin ka kuah a, ani min thlahtir tur hi chuan ṭek leh rial pawh an hman a ngai hial ang.






Sawmsawmi chu ka pawm a, ka dinchhuah fel hnu chuan Pa Ngura thlan chu ka en vang vang a, "Pa Ngur, i fanu hi ṭha takin ka enkawl ngei ang, i kalsan hnua nun nuam leh innghahna tlak leh belh tlak a hmuh theih nan pasal i nei tir a, Sawmsawmi tan chuan a kulhbing nghet tak leh a phaw-ah ka ṭang reng ang, nghet takin ka chelh ang a, chuan ka thlah hek lovang, thlamuang takin i chawl dawn nia" tiin thlan chu ka hnungchhawn a.






Kawngpui ka thlen chhoh chuan Driver hnenah kan in lama inkhalh nghal turin ka ti a, a rawn bu nghat a, motor-ah chuan Sawmsawmi chu ka pawm lut a, ka ṭhut rem rualin Sawmsawmi chuan min lo kuah nghal a, ka khi suk mai.






Kan tlan chhung zawng chuan Sawmsawmi chu a harh lova, în lama ka pawm luh chuan kapa leh Rohlu-a chuan min en dun reng, an mahni pawh be lo chuan Sawmsawmi chu kan room lamah ka hruai phawt a, khumah mutin ka mut fel tur hnuin ka chhuak a.







Ka pa leh Rohlu-a chuan min en reng a, ka pa chuan "apa sun hlim hlawl mah nise, inṭhen thuai ula ka ti a ni, a nun a chauh laia a kianga amah hnem tura Rohlu-a hi a awm reng chuan a duh ve thuai mai ang" a ti a "a theih loh" ka ti fak, ka rin ai takin ka aw chhuak a rum lehnghal.







"Eng vangin maw?" kapa chuan a lo ti a, "Sawmsawmi hi ka ṭhen dawn lo" tiin ka pa chu ka en ran, ka pa pawh chuan khawdang min hawisan bik lo va "Engvang ngawtin nge i ṭhen lovang, i ṭhen ngei tur a ni" a rawn ti a, "a pasal ka nihna angin ṭhen ka duh leh duh loh chu ka thu a ni,






Sawmsawmi hian kei lo chu tumah dang a nei tawh lo, kei lehzel chuan ka kalsan hauh lovang" ka ti a, chhuah nghal mai ka tum a Rohlu-a chuan "ka pa, ka sawi kha, ka u hian a ṭhen tak tak thei chuang lovang ka tih kha" a rawn ti a, ka pa chuan "Zodanglian, ding rawh" a rawn ti vawt raih.






Ka pen lai chu ka ding ve mai a, ka pa lam chu ka hawi a "I nupui saw nge i duh company-a thuneitu ber nih" tiin min zawt a, "a chiang mai a ni lawm ni?" tiin ka kiai suk. Kapa chuan min melh thip khawp mai "Zodanglian, nang hian i nau pawh khawngaihna i nei na nge? I nau hian hmangaih a nei a lawmpui a hnekin a hmangaih chu neihtir i duhlo a maw?" a rawn ti fak a.







"ka nupui saw nautelem, infiamna mai mai a ni hleinem, duh duha phar kawi tur a ni lo a, a niin duhthlana a siam a a duhthlana siam chu ka zahsak a, ani in min neih a duh reng laiin ka thlah ang maw?" tiin ka en reng, ka nau Rohlu-a chuan






"I nupui mah nise, ka la chhuhsak ang che" a rawn ti a, a la nui suk zui "I theih chuan le, i u hi i hneh thei meuh ang maw? Nang hian min khúm lai ka la hre lo va, min hneh ngai hek lovang, ka nupui hi inchuh tur a nilo, ka ta, ka neih thil chu ka hauh nat zia i hria kha, min chhuhsak thei ang emaw chu" tiin ka nuih suk a.






"Zodanglian, khatiang khan i nau ti suh" kapa chuan a lo ti fak a, "kan duatsual tawh anih hi, tu-in nge mahni u te nupui duh a, nupuia neih tum ngai" ka ti fak a, kapa chu ngawi chiang tak a ni.






Rohlu-a zawk chuan "Ka nupui tur anih kha, nangin i lo neih avanga in lak eng emaw viau kha a ngailo, ka neih tur a ni a, ka nei dawn khawp" a rawn ti a "I tlanchhiatsan tih theinghilh suh, ani saw nangin neih hlau zetin i tlanbosan a, keiin ka nei tawh a, ka nupui, ka nunna pawimawh ber a ni tawh" tiin ka kalsan hmak.






Kan nupa room lama ka let chuan Sawmsawmi kha a lo harh tawh a, a mittui a tla ngiai ngiai a, a lamah pen thuaiin ka kuah a, a rawn ṭapchhuak nghal a, a chhipah ka fawh sak vang vang.






Malsawmsangi POV;






Kapa chu ka en reng a, a ban min rawn vai khum lauh lauh a, a lama pen ka tum ṭhin, mahse ka thei der silo, kapa chu ka nuin a bana a rawn kai a, an ral riai riai a, ka mengchhuak a, ka mumang a ni. Kapa a awm ve tawh lo fahrah mai chauh ka ni tawh.






Ka biangah chuan mittui a rawn lung nghal a, ka awmna chu ka en a, kei leh Zodanglian pindan bik a ni, mahse ani Zodanglian pawh hmuhtur a awm lo, ani pawh khan min kalsan ve ni ngei ang.






Mahni inkhawngaihna chuan min rawn tuam a, kapa ka chan a, chuan ka pasal pawh ka chan leh dawnin ka hria, kapa kha la dam se zawng, ka na lutukin ka ring lo. Kawngka a lo inhawng a, Zodangliana chu a rawn lut a, khuma ka ṭhu min hmuh rual chuan min rawn pan a, min khuah nghal tawp a, kei ka ṭapchhuak hak.






"Sawmsawm a ṭha, a ṭha vek ang, i bulah ka awm reng ṭhin dawn, i pa chu thlamuang takin a chawl tawh, i kiangah ka awm tih a hria a, thlamuang takin mit a chhinsan ngam che a, kei pawh i pa-in min rinna ang ngeiin i bulah awmin i chakna hnar ka ni zel ang" a rawn ti a.





"Kapa ang khan min kalsan ve thut suh aw" ka ti ṭiau a, ka rilru no lutuk chu mak min ti ve ngeiin ka ring. "Min ring la, min ring sual lovang, min chelh la, min chelhna aia nghetin ka chelh ang che, min hmangaih la, hmangaihna tawp chin nei lovin ka hmangaih ang che" a rawn ti a, ka chal a fawp leh zeuh a.






Ka thla a muang nghal veng veng, inhnuai lamah min chhukpui a, awmpuite hnenah chuan ei siam turin a ti a, an rawn siam zung zung a, ṭhutthlenga min ṭhuttirin "Sawmsawm, chaw hi ei rawh le" a rawn ti a, ka ril a ṭam lo ngang mai.






"Ka ril a ṭam lo" ka ti sep a, "Ei lui rawh, i chauh thawngkhawng hma khan,, zing aṭang engmah i la ei lo" a rawn ti a, chaw chu ka en reng a, amah bawk chuan "Ka barh che i phut em ni?" a rawn ti a, lu ka thing vak.






Chaw chu ka ei lui a, tlemte bak ka ei lo, ka hrawk lamah a chhuk thei lo a, a tang zel a, Zodangliana pawn tihngaihna hrelo lutukin a thaw halh a, "A pawi love, i ei theih tawh loh chuan room-ah chho mai ang" a ti a, thleng vel seng ka tum chuan a phal hauh lo.






"midang an tam, nang chuan hahdam i mamawh" tiin min kaitho a, ka kutah a rawn chelh a, kan hawilet chiah chuan Rohlu-a kan hmu nghal, min en reng a "ka nupui la ni tur nu, i hriselna i ngai pawimawh dawn nia" a rawn ti a, ka ngei lutuk hi a ni tawp.






Zodangliana chuan ka kut chu a rawn hmer na sauh a, a hmel ka en a, ka chhiar thiam lo, engmah a sawilo a, a ngawi reng a,, kan room lamah min letpui a, ka kut a hmerna chu na tak a ni. Room kan luh rual chuan "Zosang, ka ban kha a nâ" ka ti chhuak sep a, min rawn en vut.






Ka kut chu a thlah nghal a "Ka tihpalh" a rawn ti sup , ka kut ka tuai heuh heuh, a sen vek a, a duk ka ring, ka kut chu a rawn la a, a phun hluk a "ka tihpalh a ni" a rawn ti a, khumah min ṭhuttirin ka kut chu a chhem heuh heuh a.






Keiin ka en reng, ani hi awmlo se hetiang hian ka ziaawm hauh lovang, rei ngial kan ṭhut hnu chuan "Sawmsawm, intifai ila, kan mu tawh mai dawn em ni?" a rawn ti a, ka bu nghat a, kei ka intifai hmasa a, ka intihfai zawh hnuin amah a lut ve a.






A rawn chhuah hnu reilotah kan mu, a ban min kham tirin lehlamin min kuah leh a, ka chal fawp zeuhin "Muttui le" a rawn ti, mit ka chhing a ka muhil siai siai.







Zing ka harh chuan Zodangliana chuan min lo la kuah reng a, a hmel ṭha tak ti a sawi tur ni silo a pa tak leh zun nei ngawih ngawih chu ka en reng, a khabe hmul to siar siar chuan a ti lang pa lehzualin a inhmeh em em a, ka en lai reng chuan






"kei ai chuan i ṭha zawk" a rawn ti a, ka phu dawrh mai, kan thawhchhuah chuan inhnuai lamah kan chhuk a, midang chuan min be hauh lo Zodangliana pawh an be bik lova, an awmdan chu mak ka ti.







"Zodanglian tinge an awmdan hi a mak hlawm e" ka ti a, a rawn nui suk a, "ka hre bik lo le" tih chauhin min chhang a, rinloh lutukin choka aṭang Rosy-i a lo chhuak a, ka en reng "Tukchhuan nuam ule" a lo ti var a, mahse nuih pawh ka nuih eih lo.






"U Zosang, ka rawn awm tawh dawn" tiin Zodangliana banah chuan a rawn kuah thuak thuak a, "eng maw i lo tih ang a? Nu leh pa leh în i neih reng kha" Zosangliana chuan a ti a, Rosy chuan






"U Rohlu-a kha ka lo awmpui dawn, a damdawi ei lai ka buaipui sak dawn a" tiih Rosy chuan a chhang a, ṭawng pawh ka la ṭawng velo, chu tih lai chuan Rohlu-a a rawn lang a "he inah hian Rosy hi a thuneitu ber anga en tur a ni" chhiahhlawh ho hriat ngei tur chuan a ti a, ka ner nang mai.






Min hmuh chuan "Rosy, he inah hian mi pakhat chiah i zah a ngai, chu chu ka nupui ni mai tur Sawmi hi a ni" a ti a, ka ngei lutuk hi ka luak te a chhuak hial zawk, Zodangliana chuan






"Ka nupui tan pasal pakhat a tawk chiah" a rawn ti a, Rosy khan "Ni e, U Zosang, nang hi kiang la, U Rohlu-a leh Ms-i an innei mai dawn alawm" nui har har chung chuan a lo ti a, "kian ngai an awm chuan midang le" Zosangliana chuan a ti a, Rosy chu ka en a, ka nuih sak .






Rohlu-a bawk khan "Sawmi, ka u nen chuan in inṭhen ṭep tawh ang aw" a rawn ti a, 'damdawi ei lai mai mai kha ṭawng tam suh' tih chu chak tak ka ni "Nia, a hnai a ni mahna, kan inṭhen hunah meuh chuan nang pawhin fa nula leh tlangval i nei ṭeuh tawh mai ang" ka ti a,






Zosangliana lam hawiin "ka lu a na" ka ti a, min ngaihtuah hmel zeta min enin "lo kal rawh, i mu tlem a ni ang room lamah chho leh mai ang" tiih ka banah a rawn kai a Rohlu-a leh Rosy hian ka lu te an ti na vek thei hial.






Room kan luh chuan Zosangliana chuan damdawi min pe, "lu na satliah tho ania, ka ei lo mai ang" tiin ka hnar a, mahse a lo duh hauh lo, tui chu thlitchhuah mai a tum a, mahse a lo zo vek. "Tui ka va thun lawk ang, khumah khan lo ṭhu la" tiin min chhuahsan a, a chhuah rual deuhthawin Rosy a lo lut nghal.







"Hmeichhe zaktheilo, Zosangliana hi ka pasal tur chauh anih hi, then nghal thuai la a ṭha a ni mai" a rawn ti a, ka nuih ringawt. "Ka pasal ania, ka ṭhen leh ṭhen loh tur thu chu ka thutluknaah a innghat" ka ti a, min melh no loh zia chu pui tak a ni.







"In la inṭhen tho ang, Zosangliana sawn a khawngaih vang che-a la ṭhenlo che anih hi" a rawn ti leh a, "min khawngaihna chuan hmangaihna a pai tel ka ring" ka ti a, a tui ken laiin min theh nghal ṭhawt,






"Rosy eng thil nge i tih kha?" Zosangliana aw fiak thak kan hre nghal a, Rosy mitmeng chu danglam chak tak a ni. "Ihh, U Zosang, ani hian i sum vanga nei che anih thu a sawi a, chuan i nau Rohlu-a pawh a nei leh tur thu te a sawi alawm" tiin dawt awiawm loh uchuak chu a phuah a. Ka nui ringawt.






Zosangliana chuan "Chhuak nghal rawh, ka nupui hi i kut hmawr pawhin khawih tum tawh ngai suh, anih loh chuan hmeichhia ini tih ka theinghilh ang" a ti fiak ṭhat a, Rosy chuan min melh hrep chungin min chhuahsan a.







Zosangliana chu ka bulah a rawn ṭhu a "I ṭha tiraw" a rawn ti a, ka bu nghat nghat "ka laka paukhauh tak leh hlauh nei lo anga i awm ang khan midang kiangah pawh awm thin ang che" a rawn ti a, ka nui seih a, a lakah khan ka lo paukhauh hmel ve a nih dawn hi .







"Inthlak rawh aw" tiin ka thawmhnaw bawm a hai a, kawr ka inthlak tur chu min lo pe a, washroom lamah chuan inthlak turin ka va lut a, Zosangliana awmdan chu ka ngaihtuah a mahni in ka khi ver ver.






Ani hian min ngaihtuah ve tak takin ka hria, ka tan chuan innghahna tlak tak chu a ni ngei ang, mahse Rosy leh Rohlu-a avang erawhin kan la buai-in kan inbakaih leh zeuh zeuh hlawm ṭhin ka ring. He mite pahnih hi awmdun tam lo se a ṭha ang. Nun an tih harsat belh. An pahnih belbawm hi chuan buaina tlang an ni ringawt ang.


Show post links
Top

[Ngaia]

Marriage Without Love
By; Te-i Mrs Ambrose



Chapter 16






Zosangliana chuan tui chu min rawn pe a, damdawi min pe nghal bawk, ka ei a, ka ei zawhin khumah ka mu a, min en reng a, "Sawmsawm, he îna i awm hian i thawk a pik viau ṭhin em?" tiin min zawt a, lu ka thing ner ner ringawt.







A hreawm awm pawhin ka hre lo a a nuam pawhin ka hre hek lo, Zosangliana chuan puan min sin ṭhat tir a, "tikhan lo mu la, ka rawn ngaihven leh thuai ang che" tiin min chhuahsan a, ka mit ka chhing a, chiang lutukin ka pa hmel a lo lang a, min kalsan dan teh thut khan min ṭhawng em a, awi a harsa a, amah Zosangliana avang hian ka pangai mai mai zawk pawh a.







Awn lo ngat sela chuan buaipui ka ngaih hial ka ring, Zosangliana ka ngaihtuah zel takah chuan ka thaw ipik lutuk kha a reh ṭan a, ka pa-in pasal min neihtir kha tunah chuan ka hrethiamin ka lawm viau tawh a ni. Pasal neilo ila, tunah hian belh tur ka nei tawh dawn lova, mahni chauha awmin ka pa ka sun na viau awm si a.







Khuma ka mu kha ka lo muhil ni ngei tur a ni, ka bula mipa phun bul bul thawm avang chuan ka harh a, ka men rual chuan chiang lutukin Rohluzuala ka hmu a,, min en lem lo nain hmeichhe pakhat hming a lam nawn tluk tluk.






Utuk takin, a thusawi hriat tum ngei chuan ka beng ka chhi a, tu emaw hming lamin a phun bul bul, "Ruatsang" a tih mawlh mawlh a, tunge Ruatsangi a tih chu ni ang ka harh tih a hriat chuan min en a, "Nang hi Ruatsangi i nilo, eng vanga Ruatsangi anga awm der nge i nih" tiin min rawn thing nawk.






A chet dan chu a mak em a, engmah sawina chang pawh ka hrelo, "Nang hi Ruatsangi i nilo, eng vanga amah anga rawn awm nge i nih? Kal bo rawh, Ruatsangi kha ko rawh, chhuak rawh, Ruatsangi min kohsak rawh" a thusawi chu a inkawkalh nuai mai.






Mi â hi a ang berin ka hria, "Min thlah rawh" ka ti a, ka hlau deuh uluk takin min en a "Ruatsang" tiin min rawn kuah leh tawp a, ka ang huau ringawt, "Rohlu, min tlah rawh, Ruatsangi ka nilo" ka tih chuan rang lutukin min thlah a, min nam nghal bawk, khuma ka ṭhu chu leiah ka tla thla tawp a, ka rak nghal ṭhat bawk, "Rohluzual, eng thil nge i tih kha?" Zosangliana aw fiak ṭhak in a rawn ti hrawk a, ka tlak na-ah ka kiu ka tauh a, a na ka ti lutuk chu ka ṭhen tlawk tlawk.







Zosangliana chuan min rawn pan a, min kaithoin ka kut chu a rawn en ve a, Rohluzuala lam a hawi a, "Engthil chiah nge i tih i hria em?" a ti vawt ruih a Rohluzuala erawh a ngawi reng a, a hnu chuan "Ka u, kha hmeichhia khan Ruatsangi lem a chang alawm" a rawn ti a, Zosangliana hmel chu a dang nghal hlawk.







A nau chu a en reng a, tun maia a hmela thinrimna nasa tak langchhuak kha a bo nghal vek, "I ṭha em?" tiin Rohluzuala chu aw nem tak hian a bia a, Rohluzuala erawhin lu a thing a, "Ruatsangi ka duh" a rawn ti a, kei erawhin ka hrethiam hauh lo.






"Rosy, hmanhmawhin lo lut rawh" Zosangliana chu a au vak a, Rosy pawh a rawn lang har lo "A damdawi kha va pe thuai rawh, hruaichhuak la, keipawh ka rawn lang har lovang" a ti a, Rosy chuan Rohluzuala chu a banah a kai a, Rohluzuala erawh a duh lovin a ṭang nasa mai.






"U Rohlu, kal ang, pawnah sawn Ruatsangi a awm alawm" Rosy-i'n a tih chuan thuawi takin a zui a, Zosangliana chuan min rawn en a "I ṭha em?" tiin min zawt a "Aw ka ṭha" ka ti a, ka kiu chu a en a, a thaw hawk







"A duk ngei dawn anih kha, khumah hian lo mu la, Rohluzuala kha ka va buaipui lawk ang a, ka rawn let leh ang" tiin kal mai a tum a, a banah ka man a "tinge? Engmah ka hrethiam ve lo ania" ka ti a, "ka rawn let leh hunah engkim, a chehpakai aṭangin ka hrilh ang che, room hi lo chhuahsan suh aw" tiin a chhuak a.







Rohluzuala awm dan chu ka ngaihtuah a, a che maksak lutuk kha ka hlau zawk a ni, thlahrang leh ramhuai chu ka hlau, mahse chung ho ai mah chuan mihring hi ka hlau zawk, huai leh hrang lam chuan min khawih thei lo, mahse kan anpui ngei mihring hi chuan min khawih na thei tlat a ni.






Rohluzuala awmdan kha chu ka rap lam lek lek a ni, amah a fîm hmel hlawl lova, a tichiang turin a ṭawng zawng zawng pawh kha a in kalh nuai bawk. Ka kiu chuan min rawn tur et et a, ka en chuan a lo duk kual raih.






Chutia ka ban la thlek lai chuan Zosangliana a rawn lut a, ka bulah rawn ṭhu nghalin ka ban chu a la kang a, "A na em?" a rawn ti a, "Na lutuk lo" ka ti sep, tihngaihna vak a awm si lo a, ka ban chu a dahthla a, ka kut a rawn hum a, "ka nau aiawhin ngaihdam ka dil a che, engthil chiah nge thleng a?" tiin min en ran a, thil thlen dan chu ka sawi a, a bu nghat nghat a







"Rohlu-a leh Ruatsangi te kha college an kallai aṭang tawha inkawp tawh an ni a, an inhmangaih em em a, ṭhenhran theih loh khawpa inhmangaih an ni. A bikin ka nau Rohluzuala phei kha chuan a atchilh lo chauh ṭhin






Anni inhmangaih ve ve ta nafam kha chuan în khat ngeia chen dun an duh a, keini pawn kan lo hnial hran lova, an inneih tur thu tarchhuah a ni a, sawmna pawh sem fel vek tawh a ni, mahse an inneih dawn tuk,Monu chuan biak în a rawn pan laiin an motor chuanna leh truck a insu a, a hmunah Ruatsangi kha a boral nghal a






Ka nau chu a hamhaih a, Ruatsangi a thi tih kha a awi ve hauh lo, mahse a ruang ngei a hmuh tak si-ah kha chuan awilo chi ni hek lo le, a tuar hle a, zanah te hian ouan nen thlanmual lam a pan ṭhin a, 'Ruatsangi khan vawt a ti a, min kuah rawh a rawn ti reng a, ka va riahpui dawn' te hi a ti ṭhin







kan manbeh chang a tam a, damdawiia chiu mut chang kan ngah bawk, a harh apiangin Ruatsangi a zawng a, a ko a, a au reng a, a chhungte leh ṭhiante tan chuan hmuh harsa tak a ni. Ruatsangi'n a boral san hnu khan mu leh mal a nei ngailo a, mahni a phun bul bul chang te, mi â ang maia awm chang pawh a ngah.







Zan a mu theilo ber hi buaina a ni a, sleeping pills kan eitir ringawt a, sleeping pills lah kha mum thum tal a bar loh chuan hna a thawk mumal ngai lo, a kum tel te meuh kan buaipui a, pills a eihnem ṭhin avangin a taksa a chhiat mai bakah a addict titih bawk a, mahse hun a liam a, a zia chho zel a






hmeichhia erawh a ngaihven tawh ngailo a, vawi te khat pawh a melh ngailo. Innei tura kan tih che u pawh khan a pawm lutuk lo, mahse company tan tiin a hnuah khan a pawm a, keini-in Rohluzuala nei tura kan duh chhan che chu, a nun ruak lutuk kha a kian deuh kan ring a






mahse innei ta lovin Mizoram a chhuahsan a, a rawn let leh khan hmangaih a neih thu kan hria a, ka pa lawm zia chu sawifiah thiam pawh a ni lo. Mahse vanduai thlak takin a hmeichhe hmangaih chu ka nupui i lo ni si a,







Ani in a neih che ka phal lo a, chelh tlat che ka duh a, mahse Rohlu-a awmdan ngaihtuah hi chuan thawk hi a zíng ṭhin a ni. Damdawi eilai a nei a, chu chuan a chhawk deuh a, mahse vawiina a awmdan khan mi chu a ṭhawng ve deuh a ni, eng vanga mi â ang maia rawn che leh nge a nih ka hrelo.






Ani chuan a neih che chuan a nun a ṭhat phah ka ring a, mahse ka phal lo che a, nang chu ka nupui chauh ni turin ka duh che, tun ṭum hi chu mahni hmasial takin ka nau meuh pawh ngaihtuah lovin nangmah nena kan inkar chiah ngaihtuah ka duh.







Ka nau hian a hmuh reng che chuan a duhna che leh a hmangaihna che a reh mai lovang, chuvang chuan în dang mai ka a
duh," a rawn ti a, amah bawk chuan "Sawmsawm, mahni hma ka sial viau em? Nang nen chuan engthil mah thleng ka phal lo a ni" a rawn ti a, a hmelah pawh nuam a ti lutuk lo tih chu a lang chiang reng.







In dan chu ka duh ve lutuk, mahse mo sual lutuk ang maia pasal neih hlima indan chu ka duh lo, mahse he în-ah ve hi chuan mo ,ha ka ni thei ngai dawn silo "Ihh" ka ti ringawt a, thutlukna ka la siam thei lo a ni ber mai.







Zosangliana chuan ka chal a fawp zeuh a "ngaihtuah duh suh, i dam deuh hnu-ah kan ngaihtuah dawn nia" a rawn ti a, ka bu nghat nghat a, mit ka chhing a ka awm hi a nuam mang lo, ka lu a na deuh ngut ngut.






Nilengin zing a,ang khum ka chhuahsan hauh lova, inthlahrun chu a na ve khawp mai mah se taksa berin a tlin si lova, inthlahrung chung chungin khum ka chhuahsan lo. Zosangliana chuan a khat tawkin ka ṭhat deuh leh deuh loh thu chu min zawt reng a.






Min ngaihtuah ve tak tak tih ka hriatna chuan min ti hlim a, awm nuam lo viau si kha chhung lam erawh a thla a muang a, ngaihtuah deuhtu a nei tih a hriat vang nge a hlim ru veng veng mai.






Zan a lo ni a, zing aṭang thil ka ei lova, mahse ka ká hian ei chakna chhete mah a nei silo. Khumah chuan ka ṭhu mu a, Zosangliana chu a rawn lut a, "Sawmsawm, thil ei lui hram rawh a, ngaihtuah i nat tawh nen, ei tur leh zel i ei loh chuan zan mu pawh i chhing thei lo ang" a rawn ti a, ka nui chhuak hak mai.






Zosangliana'n min ngaihtuah zeta thu a sawi lai ngaihtlak chu a nawm dan a dangdai em a ni.Awmpui ho hnena ei tur rawn keng turin a hrilh a, "choka lamah chhuk ila, chutah chuan ka ei ve mai ang, room-a ei chu a" ka ti niah niah, Zosangliana chuan lu a thing nghut a






"che tam suh, i dam fel hnu-ah inhnuai lamah chaw chu kan kil za ho dawn nia" a ti a, Nupuii khan ei tur a rawn keng a, min rawn nuih sang a, mahse min be zui lem lo. Zosangliana chuan min barh a tum tlat a, kei lahin ka lo duh lo nasa mai.





Dam lo na lutuk pawh la ni lo va, pindana chaw ei pawh tih tawh nak laia han inbarh leh zel chu ka duh bau lo. "Sawmsawm ang rawh, ka barg ang che" a ti a, lu ka thing nghut nghut "I duh loh chuan zaninah i bulah ka mu lovang" a rawn ti a, rin loh lutukin ka nui chhuak hak mai.






Min vo na chu a na lo mah mah a ni, mahse eng tin tin emaw tiin chaw chu kan inbarh ta nge nge a, a ngaihsakna dawngtu nih nawm zia chu, a zawngchhang awlsam hle-in ka ring.






Zan kan mu a, a dan ngai te-in a ban min khamtirin lehlamin min kuah leh a, a nuam a, a thlazar hnuaia awm chu a thlamuan thlak takzet . Ka mut dawn chuan "Sawmsawm, Rosy i hmuh hian i ningin i awm a tinuam lo viau ṭhin em? " tiin min zawt a






"Tinge chutiangte min zawh a? " tiin ka en kar a, "sawi phawt la" a rawn ti a "Zep lo chuan maw, amah saw ka hne" ka ti a, a rawn nui sup. "Kan indan vat a ngai anih chu, ka nau enkawl tur chuan Rosy aia tha an awm lo, keini tan chuan biakchhiat ngam pawh a ni lo" a ti a.







'Nidang zawng pawha an biak chhiat ngai loh pawh kha a awm ve ta reng a nih chu' rirlu chuan a ti ru rauh rauh a, ka ngaihtuahna ka kawm lai khan ka lo muhil nge? Zing ni chhuakin ka hmai a rawn chhun avang chuan ka harh a.






Ka awm nuam lo kha a kiang tawh a, ka mutna chu ka en a, Zosangliana chu hmuh tur a awm tawh hauh lo. Inphih faiin inhnuai lamah ka chhuk a, sitting room lama Zosangliana a coat suit nena induang zaiha ṭhu chu ka va hmu nghal.






Hna a kal leh tawh dawn tak e, choka lamah ka lut a, Rohluzuala ka hmu nghal a, ani pawn min lo hmu ve bawk, "Sawmi i tho nuam bawk maw?" tiin min en, nimina a chet dan kha ka ngaihtuah let lo thei lo. Niminah mi â ang mai khan a awm a, vawiinah a pangai leh viau tawh a.






Hepa hian rilru lamah rual a ban chiah lo niin ka ring ta ber. Ka chhan mai loh avang chuan a mithmul a kán zeuh a, lu ka bu nghat ringawt. Rohluzuala leh Rosy tluka biak chak loh hi ka nei tawh awm kher love.






Rosy ka ngaihtuah chhuah rual chuan Rosy chu a rawn lang ve nghal a, chokaa awmpui ho chu a tir kual zat zat a, a inla thu hle a, ka ngei tawk a lo tling em em .Rosy chuan "Mo ve si, hnathawh pawh tum lo mai, nangni awmpui ho tal hi che mai ru aw" a tih chuan "An buai ve em kha, nangmahin hna i hriat tam viau chuan thawk ve mai rawh" ka tihkhum a, a rawn nui suk mai.





"He ina mo upa zawk tih tur ka ti anih hi" a rawn ti a, ka sa zak mai
"Mo nilovin mi i enkawl dawn anih kha, nang chu nurse pakhat ang lek alawm i nih! Pasal nei silo hian mo tih tur chu engtin nge i tihtheih ang ni? I sawi awm lo thei emai" ka ti a, kan in melh thip khawp mai.






Chutih lai chuan Zosangliana a rawn lut a, inla fel fahranin Rosy chuan rawn biak a tum a, ka a ang zuai, mahse Zosangliana chu a rawn ṭawng hmasa a "I tho nuam maw?" tiin ka chhip a rawn fawp zeuh a, lu ka bu nghat nghat.






"hna kal hmat ka ngai a, i duh chuan company lamah i duh duh hunah i rawn kal dawn nia, emaw, in in lamah pawh" a ti a, ka bu leh zeuh ringawt. Zosangliana chuan midang pawh be lem lo chuan choka chu a chhuahsan a, hna lama kal nghal mai a tum avangin ka va zui chhuak ve a.






Pawnah chuan "Sawmsawm, he ina awm hi hreawm i tih viau chuan nuam i tihna lamah kal mai rawh aw, ka kiangah pawh tiamin" a rawn ti a, ka nuih seih. A bolero a la chhuak a, hna kal turin a chhuak a, ka ruak huai mai.







Îna Rohluzuala leh Rosy te ho nena awm chu ka peih bau lo, pawnah chuan Nupuii chu a rawn chhuak a, "U Ms, U Rohlu-a'n lut turin a ti che a" a rawn ti a, ka thaw hawk, hepa hi ka ning, ka ṭawngkhum nghek mai hi ka ring. Mahse a rilru lamah a rual a ban silo, a hahthlak ve ngawt mai.


(Rohluzuala hian Ms-i neih nan lem a chang nge? A â tak tak zawk le? )


Show post links
Top

[Ngaia]

Marriage Without Love
By; Te-i Mrs Ambrose



Chapter 17






Inchhung lama ka luh chuan Rohluzuala leh Rosy chuan min lo en dun rân a, an nui dun sâng bawk, mahse an nui hmel erawh hlimna leh lawmna vang a ni hauh lo, an nui hmel chu ka ten lutuk. Rohluzuala zawk chuan "Bawihte, i pasal ber a awm ta si lo a, tu-in nge ka lalna huang aṭang hian rawn chhan ang che,






zawngkam ṭha chitin rengin neih ka duh thu che ka sawi tawh a, neih ngei che ka tum avangin min hlauh a min ṭih hlau reng rengin ka mize chhe lai ka thup a, mah se nang hi chu ṭhatnaa hneh chi pawh i nilo, tharum hmanga lak chi i ni zawk" a rawn ti a, rapthlak ti zetin ka en reng, Rosy lah a la nui sang reng.






"In pahniha ka hmuh che u hian ka chau ngawih ngawih, Rohluzual chiang takin hei hi hre rawh, nang nen hian kan innei ngai lovang, i rilru lama rualbân lohna avanga hrethiam mai mai che ka nih hi" ka ti fak, a rilru rualban lohna kha sawi ka tum pawh a ni lo.






Mi laka ṭawngkam chhe phuhchhuah fo hi ka duh lo, mahse Rosy leh Rohluzuala bulah erawh sawi loh a har ṭlah thung. "He rilru lama rual ka ban lohna tak hian alawm ka nupui a siam dawn che" a rawn ti leh a, khawngaih chi pawh a ni lo, hetiang ho hi chu mental hospital-a dah hmak chi an ni.

"








"Awh, U Rohlu, i nupui-ah siam thuai teh, kei pawhin i u ka neih chak tawhzia i hriat kha" Rosy chuan a lo ti ve a, pawhsawm vek hi ka chak takzet Rohluzual chu enin "Nang damlo, chuan Rosy nang damlo enkawltu ni bawk, tinge hetiang mi pangai chenna a in awm ve reng, in tan Mental hospital a awm alawm, chutah chuan awm u la, in rawn dam mai ang" tiin inchung lamah ka chhoh san a.







Kha mite nen khan in khata kan chen reng chuan ka â thei mai ang, tukṭhuan pawh ka ei lova, Rohluzuala leh Rosy hmuh ka peih lo vang a ni ber.Mah se Nupuii chuan chaw chu ka room lama min rawn pe a, ka bulah a ṭhu reng a, sawi tur nei, mahse sawi ngam chiah si lo hmel hi a pu a






"Nupui, sawi tur i neih chuan sawi la" tiin ka en a, a rawn thaw ham ham phawt a "ih maw, U Ms, Rohlu-a saw ka duh lutuk a" a tih chuan "thu lawmawm anih chu" ka lo ti var a, "chulam pawh chu a nilo, Rosy sawn U Rohlu-a chungah thil tih a neiin ka hria" a rawn ti leh a, ka en reng ringawt.






"Hman aṭanga ka thil zep tawh chu hrilh che ka duh a, U Rohlu-a hi ka duh thei lutuk mahse ani erawh chuan Ruatsangi bak kha tu dang mah a ngaihtuah ngai lo, chuan nangni kha inneih tir che u an tum a, nâ ka ti ve lutuk, chuan ngaihtuahna ṭha lo pui pui ka nei a, inneihtir loh che u kha ka tum tawp a, kawng hrang hrang ka dap a, mahse ka hre mai thei silo






Mah se U Rohlu-a room ka tihfai ṭum khan Ruatsangi thlalak a dahṭhat reng kha ka hmu a , ngaituahna thar ka nei ta a, sim card leiin U Rohlu-a chu ka bia a, Ruatsangi a la dam reng thu leh damdawiina nikhaw hre lova rei tak a awm tawh thu chu in inneih dawn tuk khan ka va hrilh a address pawh ka thawn nghal a






chuan ka duh ang ngeiin U Rohlu-a inneih inring rana lo chhuak khan inneih maicham lo thleng ta lovin ram dang a pan ta a , min hriatchhuah loh nan sim pawh la tichhe nghal a" a rawn ti a, Nupuii chu ka en reng ringawt, engmah sawi ve tur ka hre hauh lo






"Min ngaidam dawn nia, kei hian i pasal tur kha ram danga ka tirh avangin" a rawn ti a, "Nupui a pawi lo, kei chuan Zosangliana ka nei hi ka lawm lutuk, a nau ka duh lova, midang ka duh hek lo, ka tan chuan amah Zosangliana saw a tawk lutuk" ka ti a, a rawn nuilui sak a






"mak ka tih deuh chu maw U Rohlu-a a rawn let leh khan a duh thu che a rawn sawi phawng a, Mizoram a chhuahsan chhan kha chiang takin ka hria, mahse ani chuan nang a neih duh avang che a Mizoram chhuahsan a nih thu a sawi daih a, Ruatsangi vanga Mizoram chhuahsan khan a rawn let leh meuh chuan a lo hmangaih der che a" a ti a, sawi tur reng reng ka hre hauh lo.






Nupuii chu reilote hnu chuan pindan chu a chhuahsan a, kei erawhin a thusawi kha ka ngaihtuah ngut ngut, Rohluzuala chungchangah hian chhui tham fe thuruk a inzep em ni? Engmah ka hrethiam nek lo. Zawhna a rawn lang zut zut a, mahse a chhanna erawh a lang tel ve silo.






Ka phone a lo ri a, ka en chuan Zosangliana a ni, ka nui ver ver mai, phone call chu ka chhang a, "Sawmsawm he lamah i rawn kal hman ang em, ka hnawthawna lamah hian?" a rawn ti a, a aw a dik chiah lo "Aw le" (A tir zawnga 'Awle' ka tih ho kha chu in hrethiam mai dawn nia, a tam sia hun thawl tak ka neih loh lai chuan edit hman a ni ngang lo, 'awle' tih hian Crocodile sawina chiah a ni tih ka hriatna a la rei lova, )ti a chhangin ka eitur min lo chhawpsak chu ka ei a, ka ei kham chuan inhnuai lamah ka eina chu ka va keng thla a.






Ka eina chu ka sil a, ka let dawn, kailawna chhoh ka tum lai chuan Rosy khan hnung lam aṭangin "I buai dawn a nih hmel e" a rawn ti a, a thusawi bengkhawn lo zet chuan chhoh mai ka tum a, mahse a thu rawn sawi leh avang chuan ka ding chawt "Zosangliana-te company lamah i kal dawn tih ka hria, i che buai ve khawp ang le" a rawn ti a ka hawilet a






"Mi kal kawnga hnim zâm ang maia lo zam chhen leh mi bihbuai chhen hi i hnapui ber em ni? Engtik ni-ah emaw i zung chawpa phawia kawng aṭanga hla taka paih sawn i la ni ang" tiin ka chhohsan a, Zosangliana'n min rawn call tih a hria nge? Henu hian ruahmanna siama Zosangliana nena min pawhṭhen phet a tum zawk?






Ka insiam a, ka insiam zawh chuan Zosangliana te company lam pan chuan ka kal a, ka thlen chuan ama office bik lam chu ka pan nghal a, ka luh chuan a thutthleng nghenchhan chu nghengin a lo vanvadak a, "ka rawn thleng" ka tih chuan min lo en a






"I lak aṭanga thuchiang hriat phawt lova rinhleh che ka duh tawh lo" a rawn ti a, a lam pan chuan ka pen a, ka hmaah chuan thlakak pakhat hi a rawn dah a, ka en chuan keimah leh ka thianpa Israel-a kan ni "tunge kha mipa kha?" tiin min en reng a






"Ka thianpa Israel-a a nih hi" ka ti a, "inkungkhaihna dang in nei lo a ni tiraw?" tiin min zawt leh a, ka bu nghat nghat "ka bulah hian lo kal teh" tiin min hui a, a dawhkan chu helin a bulah a hmaah tak chuan ka ding ṭa ka bana min pawtin a mal chungah chuan ka va ṭhuthla chawrh.






Ka kawngah a rawn kuah nghal a, a dar ka khabe-a nghatin "I insawifiahna ngaihthla hmasa lova rinhleh che ka duh tawh lo ka tih kha, a hma-in ka lo ringsual tawh che a, ka tihsual ngai kha tihsual nawn ka tum hauh lo. He mipa hian in inkawp thu min hrilh a, nang hian min phatsan ngai hauh lovang tiraw?" a rawn ti a, mak ka ti chu ka meng phawk chiang kher mai






"Israel-a chuan chutiang chu a sawi a maw?" tiin a lamah ka inher a, lu a rawn bu nghat a "ka ringhlel phal tawh lo che, mahse ka rinna che erawh hi chu i tihchhiat loh hram ka beisei" a rawn ti a, ka kuah a "min rin avangin ka lawm e" ka ti sep a, "mahse, Israel-a chuan eng vanga chutia kan inkawp anga lo sawi nge anih le?" ka ti a, keimah bawk chuan






"engtin nge hetah min ko a ni tih hi Rosy-i'n a hriat?" ka ti a, "ka hrelo" tih chauhin min chhang, a chiang reng e Rosy hian dawt sawi turin Israel-a kha a lo ti a ni ngei ang, henu hian zirtirna a la hmu khawp ang. Mahse tun ṭumah erawh hi chuan a lakah lawmna chhan pakhat ka nei. Amah avangin Zosangliana'n min ring hle a ni tih ka hriat phah a.






Zosangliana chuan "haw tawh lo mai rawh, nilengin ka kiangah i awm dawn nia" a rawn ti a, ka mi hmuh chak loh em em te hnaiha awm reng ai chuan ka pasal kianga awm chu ka thlang zawk daih a ni. Lu ka bu nghat nghat a, ka hmuia rawn fawp zeuhin "I fel lutuk e" a rawn ti a, ka nuih seih.






A mal chunga ka ,hu reng chu ka chhuk thla a, cough lam ka pan a, oangpar pot a rose sen mawi zet lo inkhawi chu ka la a, Zosangliana lam hawiin "ka khál dawn" ka ti a, a rawn nuihchhuak chiang kher mai "thil khál rual chu i ni tawh lo mawle, mahse i duh miau chuan i thu vek" a rawn ti a, ka nuih ver ver.






Awmngaihna hrelo lutukin pot a rose chu ka khâwi ṭha sek, a ṭhen a hnah ka pawt ṭil bawk a, hei hi chu naupangte ka nih lai a,anga ka tih ṭhin dan a ni , ka nu leh pa chuan nui chungin pangpar ka khawi ṭha sek ṭhin hi min lo en tawp mai zel.






Chutia ka nu leh pa ka hriatchhuah takah chuan ia pangpar khâwi ṭhat sek chu a dahna dik takah ka dah a, ka hmel a lo ngui viau nge Zosangliana chuan min rawn pan a "Dik lo a awm en ni?" tiin ka bula rawn ṭhu-in ka kut a rawn vuan a, lu ka thing nghut a, "ka nu leh pa ka hrechhuak a, chuvang mai chu, dik lo a
awm lo" ka ti a.






A lama min pawtin nghet lutukin min kuah a "I nu leh pa i ngaihna chu ka chhawk sak thei kher lovang che, i nu leh pa-in i nuna an mahni hriatrengna an hnutchhiah sak che, i lung tilengtu te hi ka tihbo sak theilo che a, thei pawh ni ila, ka tih hauh lo tur a ni, mahse i nunna i nu leh pa ngaihna hmun ruak erawh ka luahkhah sak thei che, i phal chuan" a rawn ti a.






"I luah tawh reng alawm,a tir kha chuan ka thinlungah hian hmun pahnih a awm ṭhin, chu chu ka nu leh pa tan a ni, mahse an ni chuan min liamsan tawh a, kha ka thinlunga hmun pahnih awmah khan nang chu pakhat ni siin ka thinlung a hmun ruak pahnih awm kha i rawn luahkhat ve ve a, hei vang hian alawm ka tana i special em em" ka ti a,






min rawn nuih suk a, "nang chu special hian i hlut bikzia hi a sawifiah thei kher lovang, nupui duhawm, ṭawngthei leh nghal ru zet ka nei che a, ka nau rual te lek leh pumraw lama chhuan tur nei lo, ka taksa hmun thum a ṭhena hmun khat tiat ve chang chang hian ka nunah chuan hmun i luah zau-in i lang lian tqkzet" a rawn ti a ka ngei dawn dawn mai.






A sawi ang em em a tê kha chu ka ni lo, "min sawi te mah mah" ka ti a, rawn kiai sukin ka kut chu a rawn hum bo nghal a, "i te ve em alawm, hetia ka nupui kut vawn hi a nuam a ni , ka vuan nge ka hum bo tih pawh hriat loh" a rawn ti a, ka melh ram ram mai.






Ka bula Zosangliana a rawn ṭhut hnu khan hna a thawk leh ta miah lo, a mal chungah min pawmin a darah lu ka nghat a mit ka chhing vang vang, Zosangliana chuan ka sam chu min chul sak hliau hliau a, ka mut hi a chhuak takzet.






Men pawh ka meng hleithei lova, a hnu chuan ka mut chhuak lutuk avang chuan ka muhil ta nge nge a, mang nuam lutuk ka la mang zui. Mahse kawngka inhawng thawm avang chuan ka harh a mit ka meng dawn chiah tiha Zosangliana aw in a






"Shtt,, ka nupui a mu mek, i ti harh ang e thawm dim rawh" a ti sur sur ri ka hriat avang chuan meng lovin ka chhing tlat, mipa dang aw ina "tihpalh Boss, mahse kan thawmhnaw hralhchhuah tur ho hi i endik phawt a ngai dawn a" ṭawng rin hlau lutukin a ti ve a.






"Tunah chuan che chang thei pawh ka nilo, ka hna dang zawng aia pawimawh ka ti mek, hna kha chu ka nupui harh hunah" Zosangliana chuan a ti a, ka nui ver ver lo chauh a ni. Kawngka dim taka an khar thawm ka hriat hnu chuan ka meng diar diar a






ka hawichhuah chuan Zosangliana nen kan in melh chat "Afternoon" a rawn ti a, ni suk chen a lo ni der tawh, mu rei chu ka inti ve thlawt "ka mu rei sia, i taksa a kham em" ka ti a, nuam hi ka ti chiah lo, lu a rawn bu nghat a






"ka nghawng hi a nâ" a rawn ti a a kut leh mal a nat ka rin laia a nghawng daih a na chu mak ka ti, mak ka tih hmel a hmuh chuan "ring kham vek khawpin ka thlir che a" a rawn tih chuan ka nuihchhuak hak mai.






Reilote kan awm leh hnuin kan haw a, kan inbe lova mahse ka kut chu a hum reng, a nuam hi ka ti veng veng in kan thleng a, kan luh chuan Rosy-i'n mak tih hmel lutukin min lo en a, a plan a flop kha a ringlo ngang a nih ka ring.






Ani hian kan inṭhen tawh turah min ngai a ni ngei ang "I khabe a tla ang e" ka tih chuan min melh rum hrep a, Zosangliana hnenah "U Zosang, U Rohlu-a'n hmuh che a duh a" a hmel nena inperhsan lutukin a aw a rawn chhuak a, ka ner sak ringawt.






Zosangliana chuan engmah sawi lovin Rohluzuala room lam chu a pan a, Rosy chuan min lo hnaihin "I vannei rih mai mai anih dawn kha, a petchhuah tawh che ka ring asin" a ti a "kei leh ka pasal inkar hi chu a ṭha lutuk tlat, min pawt hrang hauh lovang, 'saruh nge ruh zawk i ruh' tihah hian sa ruh chu a ruh zawk a, nang chu i mualpho tam loh nan beidawng la, kan nupa inkarah lo inrawlh phet tum tawh suh" ka ti khum sak.




(Story kha rawn dah hmat ka tum viau nangin naktukah competition-ah ka tel ngei a ngai si a, ka rawn dah hma thei ta lo a ni, naktuka ka paint-na turah hian inthlahrung chung chungin in mi duhsakna ka phut ania, )


Show post links
Top

[Ngaia]

Marriage Without Love
By: Te-i Mrs Ambrose



Chapter 18






Rosy nen chuan kan inhmelh thip zak zak khawp mai, mahse room lam aṭanga thawm a rawn chhuah avang chuan Rohluzuala room lamah chuan kan va tlan a, kan luh chuan Rohluzuala chu chhutah a lo let reng a, a kam sir a thi bawk, a rawn thochhuak a, Zosangliana chu a rawn melh nghal chat.






Rosy chu a tlanphei a, a va buaipui nghal a, kei pawhin Zosangliana chu ka va en a, a lo inhum ruh ngawt ngawt tih ka va hmu thei nghal mai, ani Rohluzuala sawn eng tak lo sawi ang maw? Zosangliana hian a nau kut a thlak mai mai dawn lo tih chu ka hria, hetia kut meuh a thlak hi chuan a thinrim viau vang a ni ngei ang.






A lam ka pan a, a kut a hum ngawt ngawt chu ka va vuan a, min rawn en zawk a, a mitmenga thinrimna pawh a dai deuh engmah sawi lovin ka kaichhuak a, ani pawn min zui ve mai bawk, kan pindan lamah ka luhpui a, ka tih ang angin a awm ve tawp mai.






"Engthil nge thleng zawh che ka tum lo, mahse i sawi duh erawh chuan ngaithla turin ka awm reng ania, tunah chuan i thinrimna kha i beng daih phawt a ngai, thinrim bengdaihna ṭha deuh chu tui vawt thlir thlera inbual" ka ti a, a rawn nui suk mai.






A coat ka phelhsak a, a towel tur la-in bathroom lamah ka va nawr dat dat, "i rawn chhuah hunah chuan i dai sawng sawng mai ang" ka ti a, "thinrimna han bual daih chu a" tiin bualin lamah chuan a lut a, ka nui ringawt, ka pa tih ṭhin dan a ni a, Zosangliana ka apply tir ve a nimai ni.






A thawmhnaw bawm ka hawng a, kawr hak nuam deuh tura ka rin chu ka thlansak a, khumah ka dahsak hnuin room ka chhuahsan a, inhnuai lamah chhukin eirawng bawl ka pui a, Nupuii nen kan ti ti dun barh barh a , Zosangliana'n a nau kut a thlak mai chu mak a tih hmel khawp mai.






"En teh, i nun hi kawng hniha thlir chuan lehlam zawngin a nawm hmel a, lehlam zawng erawh chuan thawk a ipik hmel bawk a, Sailo thlah Aizawl mai nilova Mizorama hmelṭha a lang pha ngat unau te'n an inchuh che ania, miin hre ve se an thik ngawt ang che" a rawn ti a, chutiang lam chu ka ngaihtuah ngai hauh lo.






Ka tan chuan mi pakhat a tawk a, mi lar leh hmelṭha tak takte inkara awm a, nun buaichuar tak neih ka duh lo, nun mawlmang tak, hahdam thlak em em si hi nei ila, chu chu ka tan chuan a tawk em em a ni.






Zosangliana chu a rawn chhuk a, ka kawr lakchhuahsak kha a ha a, a nuam hi ka ti ru ve em em, min en a, min lo nuih suk a, pawn lamah a chhuak nghal a, Nupuii chuan "A mizia hi a thlak sawt e" a ti vawng vawng mai.






Chutia kan ti ti lai chuan Rosy kha a lo kal a, ka biang a rawn beng a, llka thle sawk mai "Hmeli nang hian U Zosanga leh U Rohlu-a inkar i rawn tichhia a ni, Pa Zama'n a hriat hunah chuan i chawh ve khawp ang" a rawn ti a ka biang dawm chungin ka en reng






"I tih loh tawp tur i ti a ni, nang hian Sailo unau ho avang hian i inla buai hle a ni tiraw, he in aṭang hian nang nge kei chhuak kan la hria ang" tiin ka en kar a, ka kalsawn nghal bawk.






Ka chhuah chuan pawna Zosangliana lo thu kun ngul chu ka va hmu a, a lam panin ka kal nghal a, min lo hmu ve lem lo, a kut ka va hum sak a, min lo en chho a, "Sawmsawm, lo ṭhu rawh" tiin a bula ṭhutna chu beng thek thek a.






Ka ṭhu thla ve mai a, ka ṭhut fel rualin min lo kuah nghal a "Chan che ka duh lo tih hi i hria tiraw?" a rawn ti sup a, "ka hria alawm, chuan min chan lovang, englai pawhin i kiangah ka awm reng ang" ka ti a, nghet lutuk tak maiin min kuah reng.






Reilote hnuah chuan min thlahin ka mitah tak min en a "Ka rilru hi ka hrethiam lo, nangmah chan hlauh lutuk vangin ka nau nen kan inkar a khik phah a, ka pa nen kan inhlat ta viau bawk, he inah hian ka hrang hlawk nimai hian ka hria, mahse ka kianga i awm chhung chuan pawi ka ti lo, ka kut vuana chak taka awm tura min fuih chhung chu i kiangah englai pawhin ka hlim ang a chhan chu ka hmangaih tawh che ni-a ka hriat vang a ni" a tih chuan ka lung a rawn phu rang chiang kher mai.






Ka hmelah ka awmdan a lang fiah viau nge Zosangliana chu a rawn nui sup a, ala pa em em zuiz ka chal a fawp zeuh a "I duhawm lutuk, hei vang hian alawm hmangaih loh che i har" a rawn ti a, ka lung a phu zaih zaih mai, ka hlim ru veng veng bawk.






"Sawmsawm, he in aṭang hian chhuak ila, in dang ang aw, chutah chuan nang leh kei chuah kan awm ang a, buaina awm lovin, nang leh kei chauh, hlimna zawng zawng nen" a tih chuan ka nui ver ver "kan inah insuan ang aw, chutah chuan ka naupan lai sulhnu zawng zawng a awm vek a, tihriral mai ka phal lo" ka ti a, a rawn bu nghat a






"i thu vek" a rawn ti a, a nuam veng veng, "lo kal rawh le, lut tawh ang aw" tiin a thochhuak a, a kut min rawn pe nghal, ka lo vuan ve nghal mai a, inchhung lamah chuan kan lut a, Rosy-i'n min lo melh leh rawm rawm tawh mai, he in ka chhuahsan chakna chhan pakhat zing ami chu Rosy-i hi a ni.






Zosangliana chuan choka lamah min lo zui lut a, "eng nge choka lamah i rawn tih dawn?" tiin ka en a, "ka zui che ang a, chuan i che vel ka lo thlir bawk ang" a tih chuan hmui ka pet sawi nang nang mai "a ṭullo emai a" ka ti a, min nuih mai mai ringawt.







Choka lamah chuan min lo zui a rawng ka bawl lai chu dawhkana kut nghat meuh hian min lo en a, ka che a khawr ṭun mai, a hnu chuan Zosangliana chu ka melh rawm rawm a "Min en char char a, ka che khawr vek alawm, va chhuak phawt teh" ka ti ta thlawt a, a rawn nui chhuak hawk hawk mai.






"thlir nin i har" a lo ti duh lek chauh a Nupuii a nui ri hak lehnghal an pahnih chuan ka ngei tak tak a ni. Nupuii chuan Zosangliana bulah ṭhutthleng chu a pawtchhuak, a ṭhu ve nghal. Ka eirawng bawl chu min lo en ve a, "Pu Zosang, i nupui hi a ṭha chhing chheng e" a ti a, hmui ka petsawi vak mai.






"Nia, a ṭha chiang alawm" Zosangliana chuan a rawn ti ve a, hmui ka pet sawi nang nang mai, mi awm lai renga han infak vel chu a, chutih lai chuan Rohluzuala leh Rosy an rawn inzui lut a "eng em em nge in tih? Zanriah ei a hun der tawh a, zanriah pawh in la peih lo a maw! Nang awmpui kha eng vanga u Zosanga bula ṭhu ve ngawt nge i nih?" Rosy chuan a ti nghal zat zat.






Nupuii chuan inthlahrung takin a ṭhutna chu thawhsan a tum a"Nupui ṭhu rawh" ka ti a, kei leh Rosy chu min tawn sek "Rosy Nupuii hi keiman chawl turin ka ti anih hi, chutia i ril a tam chuan lo kal la, rawng lo inbawl rawh" ka ti hmak.






"Rawngbawl tura lo awm ni lovin u Rohlu-a buaipui tura awm ka nia" nui sawng chung hian a rawn ti a "Chuti, sawi theih i nei lo anih chu, i tihturah chiah khan i rilru pe rawh, keiin a ṭul leh hnathawh tur ṭul chu ka hrilh vek mai ang" tiin ka nuih let ve sawng mai.






Henu hi ka ngawih bosan thei lo reng reng, chhan let fak fak lo hi chuan a huangtau belh mai mai ṭhin , inhnialna teunau a chhuah ngei ngei a ngai ziah. Thip lutuka min melin "U Rohlu ani saw nei thuai teh, ka ning" a tichhuak a, "ngawi hmak rawh" Zosangliana'n a ti fak. A awm a ni tih a theinghilh a ni ngei ang.




"khati khan Rohluzuala kha fuih emaw, nawr sek sek ching suh ang che, anih loh chuan kan chhungkaw tana i tangkaina hi hre lo derin ka petchhuak ang che" Zosangliana bawk chuan a ti chang bawl mai. Rosy chuan engmah a sawi tawh lo, mahse kei erawh min la melh thip ṭha viau.






"Zanriah chu i bawl fel tawh em? " chokaa lo luh pahin pa Zama chuan a rawn ti a, kan boruak kha a hre ve lo a nih hmel e "aw, pa Zam, kan khawrh nghal mai ang aw" tiin kan che zung zung a, Rosy chuan lo puih ve pawh a tum hauh lo.






Chaw chu kan ei a, engmah kan sawi hlawm lo Rohluzuala lo thlen hmaa Zosangliana nen an inbiak tam ṭhin nen, tunah chuan in hre lo ang hmakin biak pawh an inbe eih lo. Chu chuan ka awm a tinuam lo ve em em ringawt.






Chaw kan ei kham chuan kan eina vel chu ka sengpui a, chutih laiin Zosangliana te erawh ṭhutkhawmna pindan lamah pa Zama te nen a ṭhu dial thung. Ka sengfelpui hnu chuan ṭhutkhawmna pindan lam chu ka va pan ve a






Zosangliana bulah chuan ka va ṭhu thla a, "Pa, pa Ngura ber a awm tawh silo a, in ruaka dah reng chu ṭha-in ka hrelo, Sawmsawmi pawh hian tihriral mai a phal lova , a nun zawng zawng a hmanna in leh a nunhlui hlimawm tak tak awmna hmun kha a ni ve miau a, kan va insuan lut mai dawn em ni?" tiin a pa chu a en a.






"Chuti ngawt tur chu a nilo deuh ang a, in saw chu midang luah tir mai rawh u" a lo ti lek chauh a, indan chu a hmel aṭang pawhin a duh lo tih a hriat reng reng "Midangin an luah ai chuan amah in neitu Sawmsawmi'n a enkawl chu a ṭha zawk alawm" Zosangliana chuan a ti let ve a.






A kut ka va chelh a, tuman an hmu lem lovang, Zosangliana chuan min rawn en a, lu ka thing nghat nghat mai, apa nen an buai phah mai mai ang, a phal loh hmel ropui nai si a, Zosangliana erawh chuan 'hahdam rawh' min ti ni awm hrimin min en a, mahse ka hahdam der lo.






Ka hlauh ang ngei ngeiin pa Zama chuan "he in aṭang hian in chhuak lovang, kan tan mualphona a ni mai mai a ni, in chhuak lui a nih ngat erawh chuan kan mihran nghal ang che u, company lama in property, he in leh lo a in ro zawng zawng in chan vek ang" a ti a.






Zosangliana erawh chuan pawi a tih hmel loh khawp mai mahse kei erawh chuan pawi ka ti , keimah avanga a engkim a chhungte chena a chan ka duh lo "Zosang, sawi duh tawh lo mai rawh" a beng bulah ka va ti ru sep a, lu ka thing zeuh bawk.






Thusawi tuma a ang uk tawh chu a ka a chip leh a "Pa Zam kan chhohsan tawh mai ang che u aw" tiin Zosangliana chu ka kai hrang nghal a, pindan lam ka panpui vang vang, Zosangliana chuan engmah a sawi lo a, a rawn chho ṭha ve mai, mahse a hmel leh Pa Zama hmelah chuan hlimna lang tur a awm hauh lo.






Pindana kan luh chuan "Zosang, keimah avangin i chhungte nen buaina i neih ka duhlo ania, i pa in a phal lo anih chuan in chu kan in dang lo mai ang, keimah vang chuan eng buaina mah nei lo la ka duh, kei chu i kiang anih phawt chuan ka awm thei vek" ka ti dap dap a.






Ka chal lo fawp zeuhin " i awm thei dawn anih chuan a ṭha vek, engkimah i thu ber, chhuah i duh pawhin kan chhuak mai ang, i hlim loha hrehawm i tih ai chuan kan chhuak ang, kei chu mipa ka ni a, engkim ka pai dai awlsam bik l, mahse hmeichhia chu in ni ve lo hrehawm i tih chuan min hrilh la, i tan chuan vanram tlafual pawh ka siamsak thei ang che, Eden huan pawh ka zawnsak ang che" a tawp lam a rawn fiamthu avang chuan ka nui chhuak hak.






"Sawmsawm, ka nupui i ni a, ka taksa peng pakhat i ni tawh, ka taksa peng a nat ka phallo, nang i nat ai chuan keimah ka na zawk ang, i tan i awmphaw ka ni ang a, i innghahna kulh ka ni bawk, nangmah avanga tawrhna a awm dawn anih chuan chu chuan ka hmangaihna che a ti pung sauh zawk ang" a rawn ti a ka thla a muangin ka hlim ru em em.


(Zanthum story ziah ka chawl tawh a, sports, advance Christmas tih vel nen phone ka en hman ngai lova, information pawh ka rawn pe thei ta lo a, min hre thiam dawn nia. Nimin khan story rawn dah ka tum a, mahse kan khuaah ka chhuk a, signal ka nei mai lova, signal awmna lam ka pan vang vang a, Story hi ka rawn dah a ni hi aw Regu em em kha kan tum leh tawh dawn nia aw)


Show post links
Top