HEIHAM! : ANOTHER LOVE BY Un Sammy (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: HEIHAM! : ANOTHER LOVE BY Un Sammy (Completed)

Unread post by Ngaia » March 12th, 2023, 5:50 pm

HEIHAM : ANOTHER LOVE
by Sammy





#a tawp dan a lungawi loh thlak em a, min lo hau teh u. Tunah hian hauh hrep ka mamawh emai......






Ch-25 Last chapter









"Inthen vat rawh u, i la naupang a, ani ang pathlawi mai mai lo kawp. A aia tha an tam lutuk...." ka nuin a rawn tih leh phei chuan ka mittui a parawl kuang tawh.








"Chu lo rengah, fa a neih tawh phei chuan eng emaw thutah afate aiin a thlang dawn lo hrim hrim che a, a fate pawh i hmangaihpui thei bawk hek lo anga, in hlim dawn chuang lo" ka nu chuan a ti a, ka mittui chu a luang lum thla pap mai.









"In ngaih ang em em khan a tha lo miah lo asin" ka ti sep a, kun chalin ka mittui tla leh tur chu ka dang hram hram.










Keiin a ka duh a ka vei em em, ka chhungte'n a an hmuh dan chuan min ti lawm lo a, a chhe zawng ringawt a an ngai te chuan ka rilru a ti nain a tan ka thinrim em em bawk.











"I ngaih ang ngawt hi thil thlen dan leh kal dan a ni vek lo. I fanuin a duh a, a tana tha nia a pawm chuan a tha a ni mai" ka pa chuan min tan zawng chuan a rawn sawi a.










"Nang uire a nupui fanau te pawh enkawl tha thei lo kha ngawi mai mai rawh. A tirah i tih dikloh anih hi. I bulah a awm a, i nupui leh fanu te tih duhdah sawn i awm tir a" ka nu chuan aw ki sang tha tak chuan a ti a. Ka pa lahin, "A khanglang a, thil zawng zawng then dik loh chhan hi chu nangmah vek. Thil hi i duhdan leh i ngaihdan anga kal vek leh kal tur a ni lo tih hi hrethiam ve tawh ta che maw le.... I nun i tihchhiat kha duhtawk la, i fate nun hi chu hahdam takin hman tir rawh" nem lo zet hian a ti veleh a, ka nu a pawr telh telh bawk.










Chutia keimah vanga ka nu leh pa, hun kal tawh thleng thlenga an han inhnial zawm chu ka chhungril hi a rum vawng vawng a ni ber e.










Bawiha chu room atanga rawn chhuakin, ka nu leh ka pa chu ngawi turin a rawn ti a, kei tih ngaihna hre lo chu ka tap tawp.










Ka nu leh ka pa chu thinrim deuhin an ngawi a, ka nuin, "Hei pawh hi nangmah ang chiah, nu leh pa zahna pakhat pawh nei lovin min vin ngam hi" pawr fe a a tih leh chu ka pa pawhin thinrim aw vin tak hian, "Duhtawk tawh teh, i fapa te meuhin thelh ngaih han nih hi zahah te pawh la ta che. I a takzet tawh anih hi" ka pa chuan a ti thak a.











"Chhuak vek rawh u, min awmbosan vek rawh u. Tumah hi ka mamawh lo che u" tiin ka nu chuan ka pa leh Bawiha chu a nawr nawk nawk a, keipawh chu min pawt tho lawpin pawnah kan pafa thum chuan min hnawt chhuak diak a, na zeta kawngka chu kharin a kalh ri zui nghal rawk rawk.










"Tap suh!!" Bawiha lah chuan ka tap insut chu min hau a, "I u vin suh" ka pain a lo ti vat a, kan boruak teh nuai chuan thawk lak a ti har takzet.










"Saw lamah haw phawt teh ang u, i nu chu tikhan amahin awm rih se a lungawi hma ber ang" ka pa chuan a ti a, amah chu a kal nulh a, keini unau erawh chu kan ding reng.









"Lo kal rawh u" ka pa chuan a rawn ti a, Bawiha chuan min rawn kuahin kan kal a, ka pa in lama kal pawh chu ka va han phur tehchiam lo em.










Thil zawng zawng hi keimah vanga thleng vek nimaiin ka hria a, chutihrual erawhin ka nu mize chu mak ka tiin tunhnaia a nunchang zawng zawng nen chuan ka nu chu ahma ka nu ang kha a nih loh zia ka hre bawk.









"Lo va kal ula, keichu sawtah kal lawkna tur ka nei a" Bawiha chuan a rawn ti reuh a, "Khawiah maw kalna tur i neih a ?" ka pa chuan a lo ti vat.









"Ka rei dawn lo" tiin thil dangah chhang lovin a kal nulh.









Ka pa chu a thaw hawk a, "Engtia thil hi thleng dik lo chho zel nge anih pawh ka hre hrep love" a ti zawi sup ri chu ka hre phak.









Ka pa in kan thlen hnu chuan ka room ni thin lam chu ka pan nghal a, khumah chuan zawi zetin ka thu a, ka pa rawn lang ve zat.










Ka bulah chuan rawn thuin khup a dawm a, a beng thuk thuk.









"Huiha! Thil hi a hahthlak anih hi tiraw" a ti a, a thaw hawk.









"I thianpa chu tunge ni reng reng a..?" a ti a, chhang loa ka ngawih reng vang chuan nge, "A hming te" a tih leh.









Thawk la vang vangin ka thaw chhuak leh hawk a.









"Jerome-a nia, in ngaihin a sual miah lo sin" ka ti zawi sap.









"Nia, ka ring alawm. Mahse i nu hi hrethiam hram hram rawh aw, i nu hi chu dawhthei leh hriatthiamna nena en angai a. Hei vang hi ania i nu hi ngawi renga ka ngaihven reng thin" tiin a chawl dat a, kei chu ka lo ngawi reng.









"I nu hian a rin dan hi thin thlen dan emaw a ti a. Lo thleng tura a ngaihruat hi lo thleng ngei tur emaw a ti thin. Amah pawh hian chiang takin a inhria a, mahse a mizia mak lutuk hi a sim thei lo. Hei vang hian alawm i nu khan a awmpui duh thin loh chhan che" a rawn ti leh a, ka la ngawi reng.









Enge kan chhungkaw chunga thleng leh thil kal dan pawh hi ka hrethiam tawh nuai lo. Keimah ngei pawh hi ka inhrethiam tawh lo a ni ber mai.









"I nu hi chu en liam mai mai la, mahse hua in zah lo kher lo la. Nun hi thil tha leh kan duh zawng tihnan a tawi em a, chuvangin i hlim theih dan tur leh nuam i tih dan berin hmang rawh" a ti a, a ngawih leh vang vang hnuah a tho a, "Hahdam deuhin mu phawt rawh" a ti a, a chhuak zui.









Ngawi reng chuan ka thu a, thil tamtak ka ngaihtuah.








Pangngai takin nun ka hmang chho tawh tura ka inngaih laiin buaina bawk.









Buaipui tham loh leh tereuhte angin lang mah se thil dang lo pal hrep tawh tu tan hian a harsa si a ni.







Ka nu hian ka film chan vel hi lo hre chhuakin min hau se, kut hial min thlak mah se ka pal dai zel thei zawk anga. Mahse tun erawh Jerome-a kher, mipa ka hriat tawh zawnga famkim leh tha ka tih ber. Ka duh leh vei em em nen min pawh then hlawk a han tum ania.








Hlim taka nui a chhawnin, "Aw lee" ka ti thei lo.








A har em a ni!!








><><><><><><><><><








A thaw hak a, "Ka tihpalh lutuk" tiin min kuah nghet sauh sauh.









"Inthen ka duh lo ania....." tap pur chung chuan ka ti a, ka tah nasat lutuk avangin ka aw pawh chhuak tha thei tawh lo.









"Shhhh!!! I bulah ka awm reng dawn ka tih tawh kha. Bang tawh rawh le..." tiin ka sam chu a chul a.









"I pa hnenah chuan palai ka tir anga, a rem ti lo anih chuan ka ru bo tho ang che" tia inla hrangin ka dar tawn tawnah chuan a vuan a, chiang deuhin min en.










"Ka hmangaihte hi chan ka duh lo ngai lova, ka neih nan che chuan engpawh ka ti mai ang. Min ring tawp rawh" a ti a, "Immm" la tap tiau chung chuan ka ti a. Ka biang chu tuai hulin ka sam chu a hui mam a, ka biang chu fawpin ka beng bulah chuan, "Ka hmangaih che nia. Hre reng rawh, ka hmangaih lutuk che" a ti zawi sup a, keipawh chu ka nui ve sak.

.
.
.
.

A sawi ang ngeiin palai chu a rawn tir nghal a, ka pa chuan beidawnga a lo siam nghal ka rin teh lul nen inneih ni tur nen lam a lo sawi pui daih mai a, mak ka ti takzet.









Palai an haw hnuin ka roomah ka pa rawn lut a, pasal neih chu ka duh chiah em tih te min zawtin ka duhthlanna chu dik chiahah ka hriat leh hriat loh te min zawt a, thil chu chiang taka ngaihtuah nawn turin min ti a, mahse Jerome-a chu neih ngei ka duh thu ka hrilh pawp.









Ka thuthluknaah hian ka nu a lawm dawn lo tih ka chiang a. Mahse eng pawh tawk dawn ila Jerome-a ka neih dawn phawt chuan a pawi lo.







><><><><><><><><><







Jerome-a nen ka nu hmu turin kan kal a, ka huphurh lutuk. Jerome-a nen chuan engtiang chiahin nge min lo dawn sawn ang kan hre lo a, a lawm lo hmel tur ngawt ka mitthlaah a awm a, kal leh lo mai ka duh rum rum.









Mahse ka bul ami chu a inringtawk em em mai a, chu chuan tlemin min ti thlamuang ve deuh.









Ka nu in kan thlen chuan a lo reh thiap mai a, room lama thawm kan hriat chu kan ngaithla tawp.









"Nu" ka han ti a, room atang chuan, "Aw... In lo thleng tawh a" tiin min rawn chhawn a, mak ti deuhin Jerome-a nen chuan kan in en ha mai.









Ka nu chu room atang chuan a rawn chhuak a, a rawn nui sang zui.









"Thu rawh u, room ka tifai a" tiin thu tur te chuan min han ti a, ngaih tha lo lek lek zawk chuan ka thu a.










"Nu...." ka han ti leh chu ka nu chuan min lo dangin, "Ka hrethiam alawm.... Ka phal ania, keimah atangin rem lohna awm lo" a rawn ti a, ka nu chu ka en tawp.









"In lawm lo em mi inneih ka phal sak cheu chu" a rawn ti a, "Ka lawm e....I fanu hi tha takin ka enkawl a, rilru nain ka siam ngai hauh lo ang" Jerome-a chuan a rawn ti chhuak a, kei chu ka la hawi heu mai.









Ka rin loh dan lutukin ka nu chuan min lo chhawn a, ka lawm hi a ni tawp.








Pangngai takin nileng chuan ka nu inah chuan kan awm a, tlai a kan haw pawh chuan kan hlim dun vur vur viau mai.








><><><><><><><>< Time skip








Darthlalangah chuan ka in en a, mawi ka inti. Tun ai baka inhmuh hmelthat hi ka la nei hauh lo.









Ka phone a rawn ri a, Jerome-a ni tih ka hriat chuan ka nui hak.









Ka lak rual chuan, "Hman dang chuan inneih dawn hian inhmuh emaw, inbiak an phal ngai lo sin" ka ti a, "Chuvang chuan alawm hman danga kan piang lo hi ka lawm em em" a rawn ti ve zat.








"Ka ngai tawh che a ka rawn phone tawp che nih hi" a tih chuan, "I over lutuk a" ka ti a, "Dawt ka sawi lo, i aw ka hre chak a" naupangchhia zet hian a rawn ti a, ka khi deuh var var.









"Anih chuan dah tawh ila, ka aw i hre tawh tho bawk a" ka tih veleh chuan, "Aih.... Ka ngai che min ti ve phawt teh" rawn ti.









"Immm keipawn ka ngai che lawm" ka ti ve ta nge nge a, thil a rawn sawi leh nuah nuah hnuah amah chuan a dah a, ka khi sang reng mai.









Biakin pan hun a ni a, ka pa leh Bawiha nen biakin lam panin kan kal a, awih har ka la ti zawk hial mai.








Pasal ka nei ve mai tur chu ka la in awih lo. Chumai bakah hetia buaina awm lova ka nei thei dawn mai hi mak ka tiin ka lawm em em bawk.








Biakin kan thlen chuan mipui an tam hle tih ka hre thei a, Biakin a len teh lul an khat hmur mai.








Ka pa chuan min kai lut a, mi zawng zawng mit chu ka chungah a tla a. Ka thin chuan lungphu hran a nei emaw tih tur khawpin a phu nasa a, ka kut chu ka hum ruh vak.








Hun serh chu kan tan a, ka tang lutuk chu a hreawm zawk.









Nakinah chuan din tir niin thutiam lak a hun a, Pastor-in, "Judy leh Jerome-a te pumkhata siam hi a rem lohna hria kan awm em?" a ti ta a.









"Hria kan awm loh...." Pastor-in a ti hman chauh ti chuan, ka nu ngei mai chu a rawn ding chhuak ta.








><><><><><><>< 4 years later









Author's pov.









"Apaa" tia tap bai baiin Victor-a fanu tê chuan a pa lam chu a pan phei chawn chawn a.









"Ka tha mut mutte hetah lo kal rawh" tia Jerome-a lo koh penna lam chu hawiin tap der tawh tih hriat tak chuan a pan phei a.









"Ka thu mut mutte hi tunge lo hau le aw" tiin Jerome-an a pawm kang a, an inchhaih vel lai tak chuan ar in lam atangin Tracy-in Victor-a rawn au va, kawngkapui lam atangin, "Apaaa" tih thawm rawn awmin Judy leh Alfred-a an rawn lut ve chiah bawk.









"Bawiha lo tlan rawh, anutei nen ar kan man dawn ania aw" tiin Victor-a chuan a lo ko peng vat a, Alfred-a chuan a school bag dah thla rawkin Victor-a chu a zui chhuak ve nghal vat bawk.








Thutthleng seiah chuan Judy chu hah zetin a thu a, a lum zia sawiin a dul puar luah tawh chu a hlim lang tung tung a.









Chu veleh Jerome-a pawm Victora fanu chu tal pitin Judy bulah chuan a va phei vat a, "Ama helaia naute hi engtikah nge a lo chhuah dawn" muang ban fiah chiah lo chuan a va ti a, Judy chu a lo nui hak.









"Nakinah Christmas anih leh hunah...." tia a han chhan chuan naupang engmah la hrethiam lo lah chuan, "Aw pa pa tihnaah khan maw ?" a lo la ti a, Judy te nupa chuan an nuih pui hak hak.








Lehlamah ve thung chuan Alfred-a leh Victor-a chu ar man tum chuan an lo buai hle a, an man mai thei der lo.








An bulah Tracy chu lo dingin a phun hlak hlak a, "Tukinah ka sawi ka sawi a, tlaiah man a har dawn, chhuah ve lo mai rawh ka ti ka tia..... In man loh leh kan hmeh lo tawp anga nimai" a lo ti mek.









"Engah nge i thinrim mai le ka duat, kan man theih loh leh talh sa kan lei mai dawn lawm" Victor-a chuan annh chhaih ti tih chuan a ti a, Tracy lahin an pa chu zing atanga a sawi loh dan hlir a awm avang chuan ngei zetin a lo en.









A tawp a tawpah chuan beidawngin an lut a, "Nangmahni hi ka talh dawn cheu maw ni le" tia Tracy-in a en kur vang chuan Victor-a leh Alfred-a chu sitting room lamah an tlan phei a, Jerome-ate nupa erawh an room lamah an lo lut tawh thung.








"Bawihte i nu va inthlak tir rawh le " Victor-a chuan tiin Alfred-a chu a tir lut a, Jerome-an Judy ke chu a lo hmeh sak mek.








"Apa ar kan man thei lo" tiin Alfred-a chu amah chuan a a school form chu a phelh ve a.








"Nakinah keimah nen kan man dawn nia, apatea sawn engmah thiam a nei hleinem..." Victor-a hriat phak tur kher chuan a ti a, "Nia mahse fa chu ka nei hmeltha khawp mai" Victor-a chuan rawn ti veleh a, an sawi hre pha ve tu Judy leh Tracy chu awm hmunah an lo nui ve suk suk mai.









Jerome-a chuan annu chu a en a, diktak chuan a khawngaih ve thin. Anu phal lo chung lo nei lui lo ila tih tehin a inngaihtuah fo a, a nupui chu a phu dangin duat a inti tawk lova, hreawm pawh a ti.









"Enge naute hmingah kan sak ang aw.." a rilru ang pu lo zetin Judy chuan a rawn ti chhuak a, "Keichu hming mawi tih em em pawh ka nei lo. Bakah mipa nge hmeichhia kan neih dawn kan hre si lo a" a rawn ti leh.










Jerome-a chuan a nupui chu en vang vangin, "Ka tihpalh" a han ti ngawt a, "Timaww?" Judy lahin a lo ti ha.









"Kei min nei lo la chuan tiang hian i awm a ngai awm tawp si lo. Min ngaidam rawh aw, neih loh che ka hlauh ......" a tih lai chuan Judy chuan a lo dang vat a.










"Mi â pa..... I bulah hian ka hlim a ni tih hi i hmu thiam lo em ni. Ka hmangaih che a, min hmangaih bawk a, thil dang kan mamawh em mi ?" a ti a, Jerome-a chu rawn nui hakin, "Ni e.... Kan inhmangaih alawm, chu chu a pawimawh ber" tiin Judy chu a fawp zauh.









Zanriah kil hunah chuan an chhungkaw awmchhun te chuan dawhkan an kil thap a, Victor-a fanu pawhin a thleng a chaw chu baw nuaiin a bar ve a.










Chaw ei kham chuan an han thu khawm a, "Nau neih hi a hnai tawh si a, hetah neih chu i duh amaw ?" Tracy chuan Judy chu a han zawt a, "Helai pawh a tha tho lawm ni..." Judy chuan a lo ti vat.









"That chu tha ve reng ang. Mahse i vawikhatna tur te a ni sia, eng emaw palh lo thleng thut se hmunpui zawk na na na chu a tha a" Tracy chuan a ti leh a.









"Nia a ni tho mai. Mahse aizawl lama chhuk chuan helamah kan rawn let thei dawn lo mai ang" Judy chuan a ti a, Tracy pawh chuan a lu a bu nghat nghat.








Jerome-a leh Judy te nupa hian Victor-ate chhung an zawm ve ngawt kha ania. An chhungten koh haw tum viau mah se Jerome-a hian a duh tlat lova, chu vanga Aizawl lam kal hreh tlat pawh hi an ni.









"Aaa.... Khawiah pawh nei se tha taka nei turin inbeisei phawt ang u. Nangni nupa pawh thil ni lo lo ngaihtuah lo khan puitling deuhin inngaihtuah ula, induhthlanna chu nangmahni tan vek ania...." tiin a u te nupa chu a zilh zawm zat a.









Eng eng emaw an sawi hnuah chuan an nui ho ta dar dar a.








🦋 Khawvel kan dam chhung hian harsatna leh buaina te hi kan tawh tur a ni a, chutihrual erawhin hlimna leh lawmna te pawh hi kan tawn vek tur a ni.

Thih hnu piahlam hi hringnun ai hian a nawmna a awm chuang lo va. Eng buaina leh harsatna pawh tawk ila, kan hmaah heng kan harsatna tawh ten min kiansan an tum lo emaw tih tur ang mai hian hlimna hian min kiansian tum hauh lovin min la hel ve dawn a; chumi thleng thei tur chuan huaisen takin i lo awm dawn nia 🦋


Show post links
Top



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)