HEIHAM! : ANOTHER LOVE BY Un Sammy (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

HEIHAM! : ANOTHER LOVE BY Un Sammy (Completed)

Unread post by Ngaia » March 12th, 2023, 5:44 pm

v5ck0w0x.jpg
HEIHAM!
by Sammy♤




ENJOYY🥂🤍



You give me feeling i can't put into word♡




Victor & Tracy



CH☆1





"Min ti țap nasa lutuk" Sangbawihi chuan țap pur chung chuan a ti a. "Enge ni aaa ?" ka nu chuan a lo ti vat.



"Ka pa lehkhabu thar kha maw le. Ka chhiar a" Sangbawihi chuan a ti leh a. Tleirawl rilru no pu țan a ni bawk a, ka pa lehkhabu tlangzarh thar ber 'Riakmaw' tih kha a chhiar ve a, a țahpui niawm tak a ni.



"Engtin nge a ziah a ?" ka nu chuan a tarmit kar ațanga Sangbawihi melh ha pah chuan a ti a.



"Tleirawl pakhat chanchin ania..." a tih lai chuan "A tawpah a bialpa in a thihsan em ni ?" la hre lo ang tak chuan ka lo ti a.



"Aih chutiang lam ni lo. Aaaa.. ka sawi thiam lo, chhiar ve rawh u. Ka pa ziah tawh ah chuan a la țha ber" tiin ka pa chu a fak zawm leh a.



"Kan lo thleng eee" tih ri leh naupang rawn ri niah niah thawm chu a rawn inzui lut a.



Alfreda, Liliani leh Christian-a te chuan ka nu chu an rawn bawh nghal chung a, an hnungah Jerome-a an school bag khaiin a rawn kal bawk a.



"Api kha enge vawiin test na a inhmuh kha sawi teh ule" Jerome-a chuan ka bula rawn țhut thlak pah chuan a ti a.



Alfreda leh Liliani chuan "Api test naah star mark ka hmu" tiin an miss in a fak dan vel chu an sawi a, Christian-a chuan a ti țha ve vak lo nge ka bulah chuan a rawn kal a, "A û star mark ka hmu ve lova mahse Christmas hunah thil min leipui tho rawh aw" a rawn ti a, Jerome-a chu a rawn nui hak.



Ka nu leh ka pa hian Jerome-a leh keiin kum 10 kan tlin hnu kum 11na kan hman lai in Sangbawihi leh Nubawihi hi an rawn piang leh a, Jerome-a nen kan duh ang ngeiin farnu chu kan han nei a, phir ve tho an ni a, Jerome-an Sangbawihi a chang a, keiin Nubawihi ka awm bawk a.



Mahse kan han len tak tak hnuah zirna leh hna lam vang te in kan awm hrang ta thluah a.



Christian-a hi piang tawh lo tura tar lam fa an sawi anga rawn piang leh kha a ni a, a û te a țhen pathlawi leh nula senior dawn dawn kan awm hnuah Jerome-a fate aia kum hnih leka upa hret turin a rawn piang a, Jerome-a fate nen an inkawm tawk ral ral viau tho mai.



Jerome-a hian kum 22 lek a nih in nupui a nei a, phir neih hi inthlah chhawn thil a ni deuh dawn nge; phir Alfreda leh Liliani a nei a, mahse vanduaithlak takin an pian hnu kum hnih lekah an nu in accident in a boral san a. Ti hian hmeichhe dang pawh melh leh tawh lovin hna a thawk a, a fate tan a inpumpek tawp mai ni.



Chuan kei ve hi Victor-a a hmelțha zawk chan chang ta kha ka ni.



Kum 26 lai ka ni ve ta a, mahse Jerome-a ang in nupui neih lam chu hnai lo tak a ni. Ka ngaihsak loh piahlamah ka chhungte ah hian ka la hlim tawk a, ka la mamawh lo ni ber. Bakah tlangval senior pawh ka la ni êm hleinem a!



"Bawihtea te school a ka va kal hi chuan an miss sawn Victor-a chungchang hi min zawt nasa thei khawp mai" Jerome-a chuan min rawn nghawk zeuh pah chuan a ti a.



"Tu ber kha nge? Keichu an duh phawt a an mahni an fel bawk hi chuan palai tirh te hi ania ka duh" ka nu chuan a rawn ti a.



"Anu hi â thei viau suh. Tunlaiah duh loh chung nupui pasal an inneih tir ngai lo" Sangbawihi chuan a lo ti ve a.



"I û te hi chuan duh lo tak tak a nei lo, i pa nen 'Nei rawh' kan ti chuan a nei mai ang. Ka fapa sial em em kha ania" ka nu chuan a ti a.



"Kha kha kha lo kal ru le, i pi khan i patea a fak leh dawn. Keini chu room ah va intifai daih ang u" Jerome-a chuan nui chungin a fate chu a ko va, an pafa thum chuan an lut diak.


"Sangbawih nangpawh i nau hi han bual ve teh vawiin chu, a tlai tak tak hma in han bual rawh" a ti a, Sangbawihi pawh chu Christian-a nen chuan ka nu te room lamah an inkai lut vat.


"Fiamthu a la zel lo hian nupui neih lam te hi ngaihsak ve teh" ka nu chuan a rawn ti a.



"Aaaa... a la hun lo aniang" ka lo ti liam puat.



"Hunlo a awm thei lo, han ngaihsak ve deuh la. Tun ațanga i ngaihtuah loh chuan i ti i tia nga, i nei lo hlen mai ang. I nau te ho school miss chu a țha lo em ni ?" a rawn tih chuan ka ner sak a. Ka mitthla ah nu tereuhtê, ting alh, nasat hmel deuha make-up hmang țhin Christian-a te miss Nunpuii chu a rawn lang nghal.



"Aaaa nu, ani saw chu sawi lul lovang. Hna te hi han hmu fel ve phawt ila, hna chiangkuang tak pawh neih hmaa nupui ringawt sawi te chu" ka ti a.



"MCS kher hi hna pangngai emaw hi i tia. I û pawh zirtirtu ania, a fate a chawm zawh êm hi. Eng hna pawh hi taima tak leh nuam ti taka thawh chuan hna pangngai leh puitling vek a ni a. Forest department pawh hi a țha lutuk, ti hian i papuia hnuaiah hian kal zel la, tunah nghet lo mah se nakinah i service rei dan a zir in promotion emaw a ngheh hun te pawh i nei anga" ka nu chuan a rawn ti leh a.



"Mahse MCS Officer nih ve kher kha ka duh bawk sia" ka tih leh chuan "Aw ah! I duh duh ni rawh, mahse i faten i û fate an rawn ngam dawn lo anih hi" thâwk hak pah chuan ka nu chuan a ti leh a, ka nuihtlawn ta mai mai.



Ka papuia( ka pa û) ai forest department lamah Guard ka kal ve rih a, guard ațang chuan a nghet nghah leh promotion hun chu damrei thil nghah vet vet tak a ni. MCS (Mizoram civil sevice) exam paper fill up vek tawh a, interview tura ka tlin chu ka inring viau a.



Ni e, hna dang hi chu ka hmu nual mai a. Mahse lo tum leh nih châk tak mai kha ka nei ve bawk si a. Mahse result han nghak phawt ila, tun țum ka tling tawh lo anih chuan hna dang kan ngaihtuah ve te pawh a ni tawh ang chu.



"Engtikah i chhuk leh dawn ?" ka nu chuan a rawn ti leh a, "Ka hre lo, papuia chawlh ang zat chawlh chu a nuam lo. Guard mai mai ka ni bawk si a" ka ti a. Ka papuia hi Kolasib lamah DFO in a awm a, guard chauh chu ni mah ila ranger ho thawh ang bak bak hi ka thawk ka ti mai. Hna indaih lohna a nâ a, Tlawng leh rel kawng pawh ber Bairabi lamah pawh rel rawn thlen hun changa zuk riah zeuh zeuh chang ka ngah.



Tunah hian ka pa lehkhabu publish leh nimin piaha Alfreda leh Liliani te unau birthday lawm avangin ka haw chho a ni a, a rang lama chhuk thlak leh vat chu ka ngai.


"Rawn haw reng lo tur hian in te luah la a țha ang. Heiha.... i pa hi duhai hian in chhun mah mah, i papuia saw han chhun ula chuan kawng engkimah in han țhat via via dawn nen" ka nu bawk chuan a rawn ti leh a.



"Aaa ti chung pawh hian ka luck lutuk" ka ti chu "Luck tak tak ni la ngaihzawn tur zawng rawh kan ti kan ti lovang" tiin min tin deuh uai uai.



"Rawng va bawl ve rawh, țawngthei ropui si" a ti leh a, "Aw le ka nu duhtak" a ngei dan deuha țawngin choka ah ka lut hmak.



Atei rawngbawl chu ka va pui a, ka pui ti ila purunvar ka kheh ve ringawt.


Rawngbawl sawi hi chuan purunvar hi kheh ngei ngei turah ka ngai tawp a, ka kheh loh chuan rawngbawla ka inngai ve thei der lo.
.
.
.
Zanriah kil laiin ka papui an min rawn call a, Wagon rawn thlen dawn avangin zanin la la a Bairabi lama chhuk thlak angaih thu a rawn sawi.


Ranger pahnih chiah an awm a, R.O (Range Officer) an awm si lo nen kei khu lama che țhang leh hindi thiam ve ber ka nih avangin Kolasib lama Ranger te ai chuan tiin min rawn ko a ni mai ang chu.


Chaw chu ei sawk sawk in ka insiam sawk sawk a, a lo ber ah nithum vel tal ka cham leh ka rin avangin thawmhnaw tlem ka keng a, thu khawmuan pawh nei lovin Bairabi lam pan in ka inkhalh chhuak nghal vang vang.


Thlen thlak chu ka peih lo hle a. Rest house, tihfai mang loh a mahni tehtlawnga awm angai anga a hmun awmna a reh reih rawih bawk si. Kolasib ka thlen thlak tawh zet hnuah 'Nubawihi emaw Sangbawihi ka lo hruai ve lo a aw' ka ti rilru neuh neuh.


><><><><><><><><><><><


Bairabi ka thleng thla a, Rest House chowkidar te kaitho chawp leh in ka bag chu ka dah tawp rih a, chauh pawh sawi hman lohin rel station lamah ka lim phei leh nghal puat.



Thawh țan nghal an tih miau avangin Ranger awm pahnih Mapuia leh Te-a te chu an lo buai hle a, tihfel ngai leh en fel ngai kan en felfai zawh meuh chuan zinglam dar 4 a ri țep.



Rest House lam pan chuan ka inkhalh chhuak leh a, chowkidar te chuan ka bag leh Rest House chahbi chu an varanda țhutthlengah riang tawkin an lo dah a, la in Rest House lam pan chuan ka phun nui nang nang.



Kal fo tawh mah ila ka tlangnel theih loh chhan chu he Chowkidar te chhungkua vang hi ka ti mai.



Mikhual ka nih vang hrim hrim nge an mahni pawh hian min be lova, keipawhin ka be bik bawk hek lova, an nula te min en dan re raw hi ka ngaina lo tlat.


In sil thuak thuak in ka mu zui a, mahse ka va han muhil rei lo ber.



Pawn lama naupang ri nak nak thawm ka hria a, sana ka en chuan dar 6 leh a chanve chiah.



An reh vat ringin ka mu lui a, mahse țap chiau vawn vawn leh in au thawm hlir hi a ni mai.


Hauh tum in ka tho chhuak a, mahse kawngkhar ka hawn hma chuan hmeichhe âw nu zet hian "Kal ru kal ru, mi mu an awm laiin an bengchheng ngai lo" a tih ri ka hria a, "A hneawm ngawt mai ni. Haw darh vek rawh u. Zing kar kar ah hian rawn rak vak zel suh u, ka khai mai ang cheu" hmeichhe aw nelawm vak lo hian a rawn ti ve bawk a, a âw ah chuan chowkidar fanu te zing ami kha a ni tih ka hre thei.



Naupang thawm ri nak nak leh an thawm hla tial tial chu ka hria a, an kal ta niin ka hria.


Mut leh tumin khum lamah ka let leh zet a, mahse hmeichhe aw nu zet bawk khan dam deuh hian "Țawng hlawk hlawk zel suh, hmeichhia inih kha a mawi lo" a tih thawm ka hre leh a. A eng chuan min mawlh ni maw ka hmu châk tlat.


Pakhat chuan a chhang bul bul a, an rawn hnai zel.



Ka awmna room bul chiah chu choka a ni a, pawn lam ațanga tala a kalh thlap anih vangin hawn tum awm chuan a ri rak rak a.



Kawngkhar kalhna chu hawngin tlemte hian ka hawng a, pawn lam chu ka bih dek dek.


Ka rin dan chiahin pakhat chu chowkidar fanu chu a ni a, mahse pakhat zawk hmel chu min hnungchhawn zawnga ding anih vangin ka hmu thei lo.


"Zingah te hian tho hma ve ula, mikhual te hi chaw te in ei tir ve ngai em ?" chunu bawk chuan a ti leh a.


"A ninawm, ei tir tir ngai lo. Lo kal ve ziah lehnghal a ka ning ania" Chowkidar fanu chuan a ti hlak hlak a, "Nula in ni ve tawh......" an luh zui daih avang chuan an țawng ka hre thei tawh lo.



Chutia karkhat lek lek chama ka kal ve țhin chu min lo ning viau tih ka hriat chuan ka thinrim dawn dawn a. 'Harsatna ka siam loh tehreng nen' ka ti rilru nauh nauh a, eng ang nungchang pu chiah nge maw an nih ang aw ka ti vang vang.



An rawn chhuak leh a, chu nu hmel chu ka hmu thei ta.


A aw nù ang ang in a hmel pawh a nù viau a, mahse han hmelțhat vur na a nei lo. Hmel thu ah chuan chowkidar fanu chu a hmelțha zawk viau a, mahse a mizia leh țawngkam ka hriat mawi loh em avang khan ka hmu țha tehchiam chuang lo.



Aaaa! Enge maw ka ngaihtuah le? Mut ka mamawh mut.



Kawngka chu kalh in ka mu leh a. Rei loa muhil lehnghal in ka harh chuan dar 8 leh chanve a ri der.



Tho in ka intifai a, papuia chu call in chinchâng ka hrilh zung zung a, eng emaw ei tur in ka inkhalh chhuak leh nghal.
.
.
.
Chhun lamah station lamah awm leh in hnawthawh dan kan en fel leh a, rin ai taka an thawh chak avangin naktuk lamah chuan Kolasib lama ka chhoh leh mai thei ka beisei.



Tlai lamah chuan Te-a quarter lamah rawngbawl turin Mapuia nen ka pathum in kan phei a. Mapuia leh Te-a chuan an khiat a, keiin rawng ka bawl thung.



Ka nu in kan têtlai ațanga ruihhlo leh sual kawhmawhbawlna lam reng reng khawih lo leh a chhin takngial pawha khawih lo tura min tih nasat țhin em avangin hetiang lamah hian ka fihlim viau.



"Nangte hi Nancy te unau a tu emaw ber saw lo englo ve tawh lo maw ?" Mapuia chuan a rawn ti a. Za vak lova nuiin "Ahh! A awm lo thei emai" ka ti hluk.



"Rest House kher i tih țhin danah hian eng emaw chu a awm ang" Te-a chuan nui țha chung hian a rawn ti veleh a.



"Aa aaa aa.... Chutiang lam pawn ka en lo" ka ti veleh ringawt.



"Tak tak a, i lo thei anih chuan intihtheih nana tihpui chi pawh an ni lo!" Mapuia chuan a ti a, ka melh ralh.



"An hmel saw chu a țha hlawm maw le. Mahse tu amah sawn Tracy an tluk thei lo" Mapuia chuan ngaihtuah muk hmel zeta a mapui beng thuk thuk in a ti a.



"Hah....An hming pawh ka hre ve hlawm lo ve" ka lo ti a.



"Tracy chu chowkidar nau fanu ania. An in ah pawh khan a kal ve zeuh zeuh. Mapuia pui hian a âtchilh bur mai a hei" Te-a chuan a ti a, a nui huk huk.



An hmeichhe sawi chu ngaihruat leh mitthla dan ka thiam lo a, engmah ka hriat ve lem loh avangin sawi zui pui vak tur lah la hre hek lo.



"Nakinah ka len pui ang che, nau pawh a nei lawm" Mapuia chuan a ti a, Te-an a lo thlit sak chu a tlak deuh pap.


><><><><><><><><><><><><


Ka rin dang ang ngeiin nihnih leh zanthum hnuah Kolasib lamah ka chho thei a, mahse Aizawl lam ațanga ka lehkha dawn avang chuan Bairabi lamah ka chhuk thlak leh vat a ngai thung.



Aizawl lam ațang chuan transfer a ni a, Bairabi lamah vang vang a ni.



Ka ngaihtuah a, ka huphurh lawk hle a. Khu lama in luah meuha awm tur chuan ka inhuam mang lo a ni ber e.


Aizawl lamah chanchin hrilhin ka haw chho leh phawt a, ka nu chuan ka awm hran hi rem a lo ti nasa mai a. Ka pa lah in ka nu thu chu pawm vek.



Mahni in ka han chhuahsan dawn meuh chuan hmeichhe pasal nei tur ang maiin ka men pur mai a. Ka la puitlin tawk loh zia ka inhre thar awn awn.



Kei ni lo Phunchawng lam ațangin forester dang an rawn dah belh bawk a, Ailawng lam R.O sawn thlak a rawn ni dawn bawk.



Tlawng lui ațanga teak tam tham tak an la lai man anih avangin tum ai hma in Bairabi lamah bawk ka chhuk leh a, buai a na char char hle mai.


Papuian min rawn ho bawk a, ramri hnaih bawk, a khaw mipui te lo sual kawhmawhbawl bawl nen hah hi a na ngawih ngawih mai ni.


Ka in luah tur chu tihfel vek a ni tawh a, mahse R.O rawn insawn hma chuan R.O quarter ah chuan ka awm rih a. Ka buai thei nen kan chowkidar nula ten chaw ei ah pawh min sawm ngai lo nen chaw ka nghei ta zeuh zeuh lehnghal.


Heiham!


><><><><><><><><><><><



Karhnih zet R.O quater ka luah hnuah R.O a rawn chhuk tak si avangin ka inluah turah chuan ka insawn ta pauh a.



Țhenawmte pawh hre hman mang lovin ka chhuak reng a. Ka nu in min han awmpui ren rawn a, ka nu tellova ka pa engmah ni lo chuan a rawn ko haw leh vat.



Thing leh mau, a bik in teak thing. Plantaion (Forest ram) ami bakah mahni thing pawh, permit nen lova lo zai an tam a, chainsaw lah permit tel lova kawl an tam a. Zan rei tak takah tlawng lui lamah kan kal reng a, mumal taka ka mut lohna a rei tawh hle.
.
.
.
Tlai khat chu khaw en laiin ka haw ve teh mial a, ka in luah chu hla deuh tak ațangin ka thlek vang vang a. In inphel pui ka nei tih ka hre chiah.

A awmna vel chu ka han bel chiang ve a, ka inluah bulah chuan in rel lian ve tak a awm a. A piah deuha țhenawm pahnih leh inhnung lamah pakhat ka nei tih ka hre veleh chiah bawk a.


Mahse ka țhenawm te pawh chu ka hre lova, ka nu in 'hei i țhenawm nula hi a fel khawp mai' a tih bak kha an mahni hriat leh inbiak hlawm lah kan nei lo. A zia lo lam hret a ni.


Thaw haka in lam ka pan chuan kan țhenawm ațang chuan hmeichhe pakhat a rawn chhuak a. En lem lo chuan ka tala chu ka hawng a, mahse ka luh hma chuan ka bul maia dingin min rawn bia a.


"Vawiin chu i rawn haw hma ve a ni maw ?" a ti a.


Hawi chhuak in ka en a, a nui deuh sâng.


Ka en reng a. Rest House ka riah țum a naupang bengchheng lo hau tu aw nù zet kha ka țhenawm a nih ka ring lo reng reng.


"Aaa, i rawn haw tlai leh ka lo ring a rawng ka lo bawl kep che a" a tih leh chuan harh zawk in "Aah aa aw.... a va lawmawm ve" ka ti a.


"Haha.... chaw ei chu kan peih vek tawh a. I hahdam deuh hnuah i rawn phei mai dawn nia aw" a ti leh a, a hmel hmuh leh a aw hriat chu a hahdamthlak viau mai.


"Aw le, ka lawm lutuk e" ka ti a, "Țhenawm neih ve man alawm. E chuan, tui i neih loh chuan hei pawn tanky ami hi a hman theih aw. Vawiinah tui a chhuak a, chawi sak che kha ka duh viau a, mahse i in i kalh sia. Inthlahrung lovin helai ami hi i hmang mai dawn nia" a ti leh a, a țawng dan lah chu tui min chawi sak theih loh avanga inthiamloh ang zawk tak a ni.



"Chuan Tracy ka nia" a ti a, a mitmeng dum fiah zet chuan min en reng a. "Victora" tia ka nuih let ve takah chuan lungawi hmel takin an in ah chuan a lut ta a.


In ah ka lut a, rawng chu ka bawl dawn nge ka ei phei mai ang tih ka ngaihtuah nghal.


Chutia rawng min lo bawl kep nachang a ahria chu a tihzia in bengvar ka ti viau a. Mahse va ei ringawt lah chu ka inthlahrung ve khanglang bawk si.



Aa... engpawhnise nula fel tak zawng anih phawt kha.
.
.
.
Ka intihfai hnu chuan țhu muang in ka nu ka bia a. Țhenawm te nena kan in chu playwood țha vak lo chi a dai dan mai mai anih avangin lehlam thawm pawh chu ka hre thei vek.



Christian-a te miss vawiina a hmuh ve thu a sawi a, a rawn fak vel luam. Ka nu mitah hi chuan mi țha lo tak tak hi an awm lo, mahse a huat zawng an ni anih chuan an mizia a țha lo ve hle tihna a ni mai.



Kawngkhar chu a rawn ri rak a, pawn lam ațang chuan mipa naupang kum 12 vel tur hi a rawn dâk lut a.


"A pa Victor, a û in chaw ei ang u a ti" a rawn ti a.


"E aw... ka lo kal e" tiin ka tho thurh a, țhenawm te inah chuan ka lut phei ve rawih.


Nu ber emaw, pa ber hmuh ka inbeisei nen Tracy leh a nau te niawm tak min rawn ko tu naupang bakah khan tleirawl pahnih leh mipa naupang pakhat a awm lo awm a.



"Kan naui te pahnih hi hostel kal leh an ngai sia, duh ai hma in kan ei a ngai anih hi. A pawi em lo ang chu" Tracy chuan a lo ti a.



"Pawi lo e..... Khawnge...." midang hi tih ka tum zet a, mahse a mawi a ka hriat chiah loh avangin "Rawng te min lo bawl kep a a lawmawm lutuk ringawt" ka ti a.



"Keini chhung chu ti zawng hi kan ni mai. Ka nu a la awm a, mahse a zin lai ania. Kha kan tlangval te kha kan thlamuanpui ve teh ania" Tracy chuan a ti leh bawrh bawrh a, a țawng duh lutuk leh min țha sa ang tak maia min biak theih avang chuan ka en deuh vang vang.



Ei dawn chuan a țawngțai thlap a, chaw ei chhung zawng a mi a treat dan leh a nau te a biak dan chuan mi caring tak a ni tih a hriat theih a, fate enkawl a va thiam dawn em tih ka ngaihtuah daih.


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 12th, 2023, 5:44 pm

HEIHAM!
by Sammy♤


Ch☆2


Victora Pov.

"Keini chhung chu ti zawng hi kan ni mai. Ka nu a la awm a, mahse a zin lai ania. Kha kan tlangval te kha kan thlamuanpui ve teh ania" Tracy chuan a ti leh bawrh bawrh a, a țawng duh lutuk leh min țha sa ang tak maia min biak theih avang chuan ka en deuh vang vang.



Ei dawn chuan a țawngțai thlap a, chaw ei chhung zawng a mi a treat dan leh a nau te a biak dan chuan mi caring tak a ni tih a hriat theih a, fate enkawl a va thiam dawn em tih ka ngaihtuah daih.


Kan eikham hnu chuan ka inthlahrung deuh chuan han tihfel pui ka tum a, Tracy chuan "E e ee.... Nula kan tam hi. Lo țhu mai mai teh" a ti hluk a, ngawi reng chuan ka țhu ta daih.



"Mate thleng kha chu tikhan lo dah mai rawh u. In tlai hma in kal vat rawh u" Tracy chuan a nau tleirawl te pahnih hmun ti fel hnenah chuan a ti a, mipa naupang min rawn ko tu kha kuhva lei turin a tir nghal zat.



An che zia chu a mak ka ti a, Tracy thusawi an awih lutuk leh hnial an nei miah lo chu mak ka ti.



Sangbawihi emaw Nubawihi chu thil ti dawn se phun nang nang chung hian an ti țhin a. Tracy nau tleirawlte pahnih chu an phun awm ka hre lo reng reng. Nge ni a, ka la hriatchian vak loh vang zawk ni.



"Nau i nei fel hle mai a" ka ti a, a nui seih.



"I awm a an zia an la chhuah lo mai mai anih hi" a ti ringawt a, "Zanin i duty leh dawn em ?" amah bawk chuan a rawn ti leh.



"Duty lo ang. Zanin chu hei kan awl ve thei anih hi" ka ti veleh mai bawk a. Sawi zui tur chu vang tak a ni.



Ka hrawk ka thian kharh a, "Aaa..." ka ti hman chauh tih in kawngka lamah thawm a rawn awm a.


"Kan lo leng dawn" tiin Mapuia leh Te-a chu an rawn lut hlawl.



"Ehe! Victora pawh zuk awm reng in"
Te-a chuan a ti a, ka nui țha ringawt.



Mapui an a mi duh nia a sawi Tracy chu ka țhenawmnu Tracy ngei hi a ni tih ka rin hriat nghal a.



Tracy chuan "Lo leng rawh u" tiin a lo chiauau vat a, Te-a te pahnih chu mikhual lo tak hian an ri deuh phar phar. Mapuia phei chu Tracy bulah a țhu nghal thak.



"Victora teh daih hi hetah enge i tih ve reng reng ?" Mapuia chuan a ti a, "Aww nula a rim ve a ni mai a" Te-a chuan a lo ti a.



"In inhria em ni? Eee... i inhre tak ang in thawk tho alawm le a" Tracy chuan a ti a.



"In in berkhera hmuh ka beisei loh lutuk vangin mak ka han ti mai mai maw le" Mapuia chuan a rawn ti leh.



"Haha nia... Keipawh min ti phu dawn dawn alawm. Hei lehlam hi ka luah a" ka ti a, "Ni tak maw? Quater ințawm mai kha i duh bawk si lo" Te-a chuan a ti a, ka nuih țhen sak ringawt.



Ka ding uai a, "Teh uai uai chuan...." Tracy chuan min lo melh ralh.


"Ka va mu nge, tih țhan loh hna ka khawih sia. Awl ve zan hian ka va mu hma nge" ka ti a.


"A la hma nen. Mahse ni e va mu hahdam rawh. In hah ve thei si a" Tracy chuan a lo ti a.



"Chhaste biak a ngai niang" Te-a chuan a lo ti a, chhang buai tawh lo in kan in mangțha a ka chhuak zui.



In ka luh chuan a reh țhuap mai a, bang lehlam ațanga Mapuia te nui thawm chu ri ring tak a ni.



Kawngka chu kalh in țhutthlengah chuan ka țhu a. Kan in lamah khan kan ri ve nak nak țhin kha ania. Thawm a han reh duk vang chuan nge ka lung a leng ve deuhin ka hria.



Ka nu ka call a, Tracy in rawng min lo bawl kep leh ka chaw ei chungchang vel ka sawi chuan a han fak leh hluak a. In enkawl uluk turin min rawn chah mawlh mawlh bawk.



Ka nu nen kan inbiak zawh chuan ngawi reng in ka țhu a, bang lehlama thawm leh ka sana inchek ri chu thawm awm a ni mai.



"Ka zial a zo tawh a, min zial leh la" Mapuia tih ri chu ka hria a.... Zozial a zúk lai ka hre ngai hauh lo.



"I zial zíal tur chiah hian mi hi i hrechhuak a" Tracy a ni thung.



Mi titi lo ngaihthlak chu a mawi loh em avangin room ah ka lut a. Mu turin ka khum chu ka siamrem sauh sauh.



Ka mu a, hla play in ka ching riai riai. Ka chau ve bawk aniang rei lo ah ka muhil nghal mai.



Hmeichhe țawng vak vak ri in min ti harh a, "Zaktheilonu" tih țhat ri avang chuan ka meng kawk.



"Enge? I nihna sawi chuan na i ti leh si em ni ?" Tracy aw ri chu ka hria a, khumah chuan ka țhu chhuak ut. Tun ang hunah tu nen tak chuan thawm dim lo zeta inhnial ni ang maw ka ti a, thawm ngaichang chuan ka beng ka chhi kar.



"Engangah hian nge i in ngaih a ? I nu min chhang let ve thei tur hian dikna neiin i inhria em?" Hmeichhe dang aw ri la hre leh a. Tracy nui thawm ka hriat leh rual in a ri no chek a, kawngkhar inhawng thawm a awm a, na zet a inkhar riin a zui nghal zat.



Thawm chu ka ngaithla vang vang a, enge hriat ka beisei pawh ka hre lo mahse uluk deuh chuan boruak awmdan chu ka ngaichang ve deuh tawp.



Nufa hi an inhau ve thei ngai ang tih ka ring ngai lova, tun ang zah reh ah tawh lehnghal mak ka ti lutuk.



Chutah chhuak zeta țap thawm ka hria a, Tracy ngei a ni tih pawh ka hria.



Chhuak zet hian a țap hawm hawm a, boruak chu nuam lo hi ka lo ti ve em em tawp mai.


Va thawh a, va hnem chu ka duh a, mahse a theih ngawt bawk si loh.



Nichin maia hmeichhia kha Tracy nu niawm tak chu a ni a, mahse engvanga nufa fa zan rei tawha inhau nge maw an nih ni.



Mutthilh leh tum chuan ka mu thla leh riai riai a, mahse Tracy țap ri chu ka hre lo thei lo.
.
.
.

Zing ka harh chuan ni a chhuak tawh a, dar 7 chauh a ni chung pawn ni chu a lang chiang lutuk tlat tawh.



Ka tho chhuak a, zik mar al al pah pawn ka chhuak chuan Tracy chu ka hmu a. Hlim hmel taka nui sangin min lo bia a.



"Morning" ka ti let hei hram.



"Nizan te i mutui em ?" a tih chuan "Aw mutui lutuk" ka ti a, nizana a țap chu ka hrechhuak chawpchilh nghal.



A hmel chu ka en chiang a, a mit bawr vel chu țap tih engmah a hriat loh reng reng. Nge ni a, kei hian Tracy te nilo țhenawmte thawm dang hi ka hria emaw ni zawk ni.



Inchhungah ka lut leh a, engmah ngaihtuah zui duh lo in rawng chu ka inbawl ve mawlh mawlh.



Chhun lamah chuan hna țul pawimawh em em a awm loh avangin office lama ka kal zuai a, ka haw leh vat.


Țhutthlengah bawp phut hlarh hlarh a ka mut laiin ka kawngka chu a rawn inhawng a.


"Victor" Tracy chuan a rawn ti dam dap.


"Aw eng nge ni ?"


"Inkhel ka en dawn a, i lo kal ve duh em ?" a rawn ti a.


"Eng inkhel maw ?" tiin ka tho chhuak.


Tracy chu rawn lut in "Aaa inkhel han tih ah khan ka naute kha an school an inkhel dawn a, ka lo sawm ve mai mai che. Mahse i duh leh mu hahdam zawk mai rawh" a ti a, ngun deuhin a țawng laia a awmdan leh a hmel te chu ka lo en reng.


Zawmna ☆☆☆☆☆☆☆



"Khawilaiah nge an inkhelh dawn a ?" tiin ka țhu chhuak a.


"Kan veng field ah. Mu rawh mu rawh..." tia chhuah leh mai a tum chu "Min lo nghak rawh, tihtur ka nei chuang hleinem" tiin ka zui chhuak a, pawn lamah kawngkhar chu lock in field lam pan chuan kan inzui hna hna.


Inkhel hi world cup ah pawh ka ram țan ve te khel zan tih loh hi chuan ka en em em ka hre lova , ka thiam lo chu a ni chuang lo na ka tui lo ve tawp. Mahse Tracy bula kal chu ka chak tlat a, a nau inkhel en tur anih avang chuan keimahah hian ka lo phûr in a nau chu ka lo lawmpui ve em em ringawt.


Ka nu in a sawi țhin a, eng thil pawh kan tih a min țawiawmtu, kan lam an țang tlat a ni tih kan hriat hian a nuam in chakna thar hi min pe leh țhin a ti a, kan tet deuh lai pawh khan school activities hrang hranh leh eng eng emaw ka tel ve na apiangah khan min rawn telpui țhin a. Tun thleng hian kan thil tih apianga min support loh leh min țawiawm loh a neih hi ka hre lo. MCS exam tur te kha min han khak hluai țhin mah se min fuih tlat tu chu amah bawk zel a ni.


Field kan thleng a, thingtlang tih takah an field chu hmun zawl duai hi a ni ve ringawt a ni mai a. A sir vela naupang ke hrut a kal te chuan an hrut khu luih luih.


Pavilion ah min țhutpui a, a la lum em em zui.


A nau te chu an lo inkhel mek a, keiin pangngai deuha ka en liam mai mai laiin Tracy erawh ball awmna apiang a melh kual ve char char.


A nau te lamin an tih goal chuan "Goallll" tia au in a kut a lo beng a, a hlim reuh em avang chuan ka ben pui ve tawp.


"I nau position saw i hria em ?" ka tih chuan min rawn en zawk a, field lam chu en leh vang vang in min rawn en leh a. Nui sen sen in "Hre miah nang, inkhelh hi ball pet goal tur ani tih leh lehlam lehlam team te hi ka hre hrang a, abak hriat ka nei lo" a rawn ti heu mai.


Mak ti deuhin ka en a, hrethiam miah lovin tikhan hmuhnawm ti deuhin a en ve reng anih chu.


"Tuna an khelh zawng zawng kha i hre lo maw, tu saw nge striker, tu saw nge defender leh midfielder te i hre miah lo maw ?" ka ti leh.


"Hre lo" tiin amah chu za deuh hian a nui a, "Ka hre rei thei lo lawm" a ti a, ka hui pap.


Kum 20 chuang ka ni ve tawh a, Tracy ang hi ka la hmu hlawl lo.


Inkhelh an țan leh chuan ka lo hrilhfiah zel a, offside leh foul theih dan hrang hrang te chu ka hrilh a, hre fiah nghal zel niawm chuan a lu a bu nghat nghat ve zel bawk.




A nau te nen chuan kan haw rual a, an team an chak avangin an lawm viau mai.


An hnung deuha kal in Tracy in a nau te pahnih a sir ve ve a kal a kuah chu ka en a, zan lam thawm ka ngaihtuah chhuak a, kha thawm kha ka hresual nge zawk nge maw ni ka deuh.


Mak ka tih chu Tracy hi nula a ni tawh a, a nau mipa te pahnih lah hi kum 12 vel lek. Chutah tleirawl pahnih a nei bawk a. Ka hrethiam tehnuai lo.



Ngaihtuah zui vak chu ka duh lo. Ka hriat leh hmuh chinah chuan nula fel tak zawng a ni e.


In kan thleng a, Tracy chuan "Lo lut rawh, eitur kan siam dawn nia" a ti a, hnial lo chuan ka lut veleh mai bawk.


Tracy chu eitur siam in a che nghal mawlh mawlh a, a nau te pahnih chuan T.v on in en lem chuang lo chuan football chungchang chu min sawipui daih.


An kum ngaihtuaha an hriat viau danah chuan an tui hle anih ka ring a, kan ti ti rei deuh hnu phei chuan primary an nih laia an sport naa an dawn medal te chu intithei takin min hmuh a. An medal dawn ka hmuh chuan ka naupan lai khan medal engmah ka dawng ve lo tih leh sport lamah khan ka inham ve vak lo tih ka hrechhuak zut zut.


Naupang na na na chu han biak țhat deuh chuan mi an nel nghal a, an hming leh kum zat ka zawh chuan ka rin dan chiah in kum 12 ve ve an ni a.


Tracy in "Ka naute" tia a auh a auh zawk chu Hmangaihsanga niin, "Ka tawite" tia a auh a auh zawk chu Hmingsangpuia ni thung.



Phir an nih chu ka ring mai a, ka rindan avang chuan nge an hmel te pawh chu ka hmu in ang ta deuh.


An nih tum ka zawh chuan Hmingsangpuia zawk chuan "Sang tak nih ka tum hran lo. Nupui fanau te țha taka chawm leh enkawl thei a ni tawp" a ti a, a rawn sawichhuah leh a hmel chu ka en a, a kum zat nen lam ka chhut nghal.



Kei tlangval pumpa pawhin nupui neih ngai leh mamawh lo hle a ka la inhriat laiin; engtin nge mipa naupang mai mai in chutiang ngaihdan te chu a rawn neih nghal theih ni.



"Nupui te i tia bialnu pawh i nei tawh em ni ?" fiamthu a lak tum chuan ka ti a.



"Nei lo e, mahse ka tlangval țep tawh a. A û pawn hun te chu mit khap kar lekin a ral zung zung mai a ti alawm" a tih chuan ka khap fuk fuk ringawt.



Tracy che surh surh lam chu ka en a, hetiang taka fate enkawl țha leh puitling taka chhuahtu an nu hi ka hmu chak ngawt mai.



Hmangaihsanga ka zawh ve thung chuan "Keichu police officer ka ni anga, a û lo nuih țhin tute kha ka jail ah ka dah vek ang" a ti a, a sawi chu hrethiam chiah lo mah ila "Ava țha ve" ka ti puat.




"Leeee... a ei theih e" tiin Tracy chuan a eitur siam chu tray in a rawn chawi phei a.



Centre table a rawn hun veleh chuan "Yess pani puri" tiin a nau te pahnih chuan an ban nghal a.



"Papawr phek leh alu pawh ka kang ania" tiin a va la leh.



Tracy nau te pahnih tihdan chu en in pani puri papawr chu la in an tihdan chuan ka ti ve a, ka vawikhat ei na a ni a, a tui ve reuh lutuk.



A hming te chu hre ve mah ila vawikhatmah ka la ei lo va, papawr leh alu Tracy in ka kang a tih pawh chu ka la ei ngai chuang lo.




"A tui lutuk i va siam thiam" tiin ka kutzungpui pahnih chu ka ti pir vah a, a nau te pahnih pawh chuan an rawn ti pir ve vah.



"Tiang siam te chu ka hnehsawh ve em" Tracy chuan intihtheih hmel zet hian a rawn ti leh a, amah vek chuan "Papawr phek leh alu kha ei rawh a tui lutuk" a ti a.


"An ei pawlh țhin em ni ?" ka ti heu.



"Ti hian ti rawh" tiin Hmangaihsanga zawk chuan papawr phek chu a la a, a chungah alu chu dahin hmarcha a dah tel bawk a, zau tawka angin a ei a. Tui tih hmel tawkin a țhial tuam tuam




Ka chil lem khawlh in a tihdan chuan ka ti ve a, a lo tui phian.



Tracy nau te pahnih nen chuan kan ei fai vek a, Tracy chuan a ei ve mang lo.



Nuam lo ka ti deuh chuan papawr lei leh nan tiin pawisa pek ka tum a, a la duh țhak lo lehnghal.




Tlai ah chuan chaw ka chhum lai in Mapuian min rawn call a, tlawng lui lamah report a awm avanga kal a ngaih thu a rawn sawi.




Phun hlukin ka insiam nghal sawk sawk a, ka chaw chhum vawikhat chauh la phit chu off in ka kalsan leh ta tawp.



R.O hovin kan kal a, lawng engine hmang vek anih vangin lawng chuan te chu a nuam phian.



Darkar 1 leh chanve dawn zet kan tlan hnuah a hmun chi kan thleng a. Chainsaw ri hre nghal zat in lawng ațang chuan chhukin ramngaw ril lam kan pan nghal a.



Kal țhan na tih hriat takin kawng chu a bel hun a. Kan lut thuk deuh a, chiansaw ri chu a tawp a, thawm areh zui vang vang.




Thlen hlat zel phei chuan lei pawng chho deuh ațanga hnuailama thing lumna niawm tak hian thing leh hnim te chu a pe bel hen hun a.




Hawi zau deuhin kan kal darh deuh a, Mapuia chuan "Helamah hian ka hmu e" tiin a rawn au lauh lauh.




Kan kal khawm leh chuan Mapuia chuan mi pahnih hnathawh thuama inthuam leh chainsaw hi a lo țhutchilh ran a.




"Khawnge midang ?" Te-a chuan a lo ti vat.




"Midang an awm lo ka pu" pakhat chuan a ti puam ţalh a, R.O nen chuan kan lo ngawi kar a, Mapuia leh Te-a chuan ti țhang tih hriat lutukin eng eng emaw an zawt a, an ni lah chuan engmah an sawi țha duh bik der lo.




"Engpawhnise thing leh chainsaw hi la phawt ila" tiin Mapuia chuan R.O chu a zawt a, "A țha ang. Khawi veng ah nge in awm reng reng ?" Kan mi man te pahnih chu a zawh zawm zat.




"Ramtharvengah ve ve" pakhat zawk chuan a ti a.




"Le.... In thing zai sa hi lawng lamah pu thla ru le, in la zai hnem em em zui" tiin Mapuia chuan chainsaw chu pu nawlhin lawng lam chu a pan a, kei engmah la hre ve lo chuan ka zui tharh.




"Thing kha a tam si a, a leng dawn em ni lawngah hian" ka ti a.




"Kha an mahni lawng ken ah pawh khan kan dah dawn nia. An lo zai hnem hman si a, kan put thlak pui chu an ngai ang, anih loh chuan kan tlai lutuk ang" a ti a. Ka lu bu nghatin kan chho leh a.




An thing zai sa han put chu ka huphurh ngang mai.




Thing file lian pui pui a ni a, helaia ka thawh tirh a ka put ve lawp lawp țhin kha chu char-tin leh char-char chauh te an ni a, hetiang ang lian lutuk hi ka la pu ngai lo hrim hrim.




Ka han pu ve chu ka nak ruh thla te hi a ri țhawt țhawt nimai hian ka hria a, a rit dan lah chu pui tak a ni.



Hetianga rit chawi reng țhing hian jym kan an mamawh lo nasa lutuk ringawt.



Lawng pakhat kan dah khah hnu chuan Te-a chuan a khalh haw a, R.O pawh a haw thla ve nghal.



Mapuia leh ni pahnih nen chuan lawng pakhat chu kan dahkhat leh a. Mi pahnih zinga pakhat zawk chuan lawng engine chu a khalh a, kei nen kan haw thla ve leh.




Khaw kai kan thlen hnu chuan kan han țhu chawl vang vang a, hlawh neia unload leh tur kan han zawn viau pawhin an vang lutuk. Keimahni bawk chuan kan pu chhuak leh.




Zan dar kua velah zo thei hramin chau zawp hnep in ka haw a. Ka chauh dan chu chau satliah a ni lo, a zawr hian ka zawr vek.



Hna rum thawk ngai lo ka ni a, hetah a khawmi te tan kha chuan hna rum pawh a ni lo thei. Mahse nu te duat hleuh hleuh kei ang tan chuan a rum lutuk.




In ka luh hnu rei loah Hmingsangpuia rawn lang a, "Apa Victor a û in chaw lo ei rawh a ti" a rawn ti a.




Ka nui lui suk a, "Aw le, ka intifai anga ka rawn kal ang" ka ti a, a lu bu nghatin a kal lehnghal.




Chauh zawr hnep hnuah rawngbawl chawp ngai lova ei mai theih tur a awm tih ka hriatna chuan min ti thatho veleh deuh a. Chauh nen rilțam reh dawn tawh lama rawng bawl țhat leh vel kha chu a peihawm hlawl loh alawm.




Ka inbual nghal a, ka dar te chu ka lo ti pilh lehnghal a, a thip vei phian.




Ka intihfai zawh hnuah Tracy in lamah chuan ka lut phei a, a inthlahrun awm rualin nula bengvar leh fel tak ka țhenawm chu nuam ka ti ru viau lawi a.




In chhung ka luh rual deuh thawin Tracy chuan "I hman tawh em ni? Lo țhu la chaw ei chu ka'n siam ang che" chu a ti a. A che nghal vat vat.




Ka țhu a, "A inthlahrunawm khawp mai" ka ti sup.




"A ho mai mai e. Kan țangkai ve theih na nih hi. I chau viau lo maw ?" tiin min zawh zawm zat a.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 12th, 2023, 5:44 pm

"A chauhthlak ve viau mai. Mahse nakinah chuan thawh dan ka thiam tawh ang" ka ti let veleh mai.




Mahni chuan ka ei a, a nau ten chaw an ei a, ani'n eng eng emaw tiin choka ah chuan a tawi hrut hrut.




Ka ei kham chuan ngawi rengin ka ei hmun chu tih fel ka tum a, mahse Tracy bawk chu ka chet khalh hman lo.




Nuam lo ka tih em vang chuan thlengsil chu ka chuh lui ta tlat a, rem a ti hram bawk.




A nau te pahnih chuan T.v an en a, a nau tleirawl pakhat zawk pawh kha awm ve in phone a sik mual mual.




An chhungkaw chungchang chu zawh chian ka chak a, mahse thil rem leh mawi a ni in ka hre chiah si lo.




Ka in lama phei a, mahni chauh a awm ai chuan tiin ka țhu ve ta rih a.




A nau pakhat chu tirin kuhva ka lei tir a, a vawikhat nan ka ei ve ngei a, ka la rui zui.




Ka thlan vek a, a lum tawh sa nen ni sa hnuai a ding ang char char ka ni.




"Chini va ei rawh" Tracy chuan a ti a, "Engatan ?" ka lo ti ha.




"A reh dawn lawm" a tih chuan tho vutin chini chu ka ei a, "A reh loh hi" fian thum zet ka ei hnuah chuan ka ti a.




"Aww a reh nghal ngawt bik nang. A hma in i rui ngai em ?" a tih chuan "Ka la ei lo" ka ti a. Min nuih ringawt.




"A lum hle mai", ka ti deuh chhen a. Tracy chuan min nuih min nuih.




Thil hrechhuak zawk in ka, "Ehe!" hluai a.




"Tracy naute te pahnih kha min 'pa' tawh miah suh u" ka ti deuh hluk. Min koh apiangin min pa a, la intih naupan ve nen a dik thei lo hrim hrim.





"Tinge ?" an ti rual țhawt a, Tracy nau tleirawl chuan en pawh min rawn en chuang si lo hian "Tunlai mipa ho hi, nupui fanau nei reng si hian tlangval ang mai hian in han awm a. In fate rual zetin an han pa cheu a in han duh lo em em a" a ti a, "Engaa ?" tiin ka hawi hei ringawt.





"Lalrindik" Tracy chuan a lo ti chang fak a.




"Pa ka ni lo nia" ka ti puam deuh țalh a, ka awm chu nuam lo zual vek.





"A pa Victor tlangval i ni maw ?" Hmangaihsanga zawk chuan a rawn ti.




"Aw ni e. Ka tlangval ve țan chauh a" ka ti a, pa emaw min ti chu ka lawm lo viau tawh a, ka kuhva ruih pawh a reh vek.





"Rinte mi pa ka ni miah lo nia, chuvang chuan min û rawh u" ka ti a. "Ka awih chuang lo" ti nghutin an pindan lamah a lut daih.





"Aaaa hrethiam teh. Mi rinna hi a tlachham a, bakah tawn a lo nei ve zeuh tawh bawk nen" Tracy chuan a lo ti a. Tleirawl țan lek si in khatiang taka mi rinna a neih loh mai chu; eng tak chu tawng ang maw ka ti rilru rauh rauh.





"Nupui ka nei emaw in lo ti hrim hrim em ni a ?" ka tih chuan Tracy chuan a lu a bu nghat nghat a.





"Zanah te hian i rawn leng țha duh lo thei si a, i nupui fanau te i ngai anga i be ve țhin ni turah ka ngai" a tih chuan ka nui ro hak a, nupui nei hmel pawh ka pu reng reng emaw ni.





"Be ngai nang a! Nupui nei ila chuan ka awmpui ang, mahse kan hmu zo ve zi lo va" ka tih chuan a rawn nui a.





"Anih AuVictor, bialnu i nei em ?" Hmangaihsanga chuan a rawn ti hlawl.






"Aaaa....." ka ti fan raih a, Tracy chu ka melh zawk zawk. Mahse ani chu kan thusawi pawh hre ve awm lo chuan khawilam ațanga rawn lang nge pawh hriat loh vaihlo a lo zial mawlh mawlh.





"I nei lo mi ?" Hmangaihsanga bawk chuan a lo ti a, "Hahaa.... tuman min duh ve lo ka tih kha" ka ti a, za lo tawk a nui lui chung chuan Tracy chu ka melh leh zawk zawk a. Ngaihzawng ka nei lo tih chu hria se ka duh hi a ni tawp.





"Le le le.... Lehkha zir tawh rawh u. Vawiinah inhah si a, zanin chu rei lo te in zir dawn nia" Tracy chuan a rawn ti a, "AuVictor lo la haw suh aw" Hmangaihsanga chuan tiin lehkha zir tur chuan pindan lamah an lut nghal hmak.





A nau te ho an awm loh takah chuan kan țhu ngawi ta reng a, han sawi tur hi ka hre hlawl lo a ni e.




Nakinah chuan Tracy chuan "Kan khua chu nuam i tih dawn hmel em ?" a rawn ti zang vah a, "Țhenawmah nula fel deuh i awm a nuam chu a ni mai e" ka ti a, a nui deuh seih.




"Karhnih vel ngawt i awm tawh a țhiante i nei nual tawh ang a ?" a tih leh chuan "Teuh lo, nangni chhungkua leh Mapuia te pahnih saw ka hriat in ni mai" ka ti a, a nuam țan riauin ka hria.





"Chuti si i va tlei ve ?" a tih chuan "Tinge ?" ka ti a.





"Aa ka sawi ve mai mai. UMapuia te saw chu in lam ngai hian an haw deuh reng țhin bakah an chhungte hian an rawn awmpui deuh reng țhin a" a rawn ti duah.





"Lung te hi chu leng ve țhin e. Mahse awmpui tur ka nei ve lo va" ka ti a.





"Aaaa,,,, awmpui i mamawh hleihem. Kan awm alawm" tiin ka mitah tak a rawn en a, min a rawn nui sen sen.





Awwww.... a va han nui mawi tak. A nui ka hmuh vang chuan ka nui ve ringawt.







"Hmana lo awmpuitu che kha i nu em ni ?" a ti leh a.




"Aw, i fel zia a sawi tak asin" ka ti a, a rawn nui nghal hak hak.





"I țhenawma ka awm dawn vangin min fak mai mai anih chu. Mahse kei chuan a fel in hmelțha ka ti. Chuan i nu nih ai chuan i û ni se a âwm zawk ang" tiin min rawn nui leh a, boruak chu a nuam țan tlat.





"I nu a hmelțha sia, nangpawh i hmelțha a, i pa pawh a hmelțhat ka ring. Ka ring dik em ?" a rawn ti leh a.





"Aaa ka hre lo. Ka pa hi chu a hmelțha vak pawh ka ti lo" ka pa hmel mitthla chung chuan ka ti a.




"Anih chuan hmelțha i inti lo a ni maw ?" a rawn tih leh chuan "Ti e! Aa ka sawi awmzia chu ka hmelțha i ti lo em ni ?" chal ti chuar tapin ka ti a.





"Ti e... mahse i nu kha i chhun vak si lo va, i pa hmelchhia i ti leh sia" a ti a.




"Aaa.... ka sawi awmzia chu ka nu in ka pa hmelțha a ti lo va" ka ti ban chap a.




"Aaaa ngaihtuah thui duh suh, i hmel ațang khan an hmelțha dawn tih ka chiang sa" a rawn ti a, amah chu a nui ver ver.




Ka biang chu ka'n chul a, ka khabe ruh kual chu ka tuai thuak thuak. Ka nu in "I khabe ruh kual leh i mitmengah i pa i chhun" a tih kha ka hre chhuak deuh zawk.




Tracy chu ka en a, engmah ka sawi zui tawh lo vang nge a ngawi ta daih mai.





"Aaa.... Hmel sawi sawi dawn te chuan nangmah hi nia hmelțha chu" ka ti ve rawk a, a rawn nui hak hak.





"Min fak ve kher a ngai lo ania. Mahse han sawi teh, saw laia nula nen khan englo hi a awm deuh em ni ?" a ti a.




"Tu chu mawww ?" ka ti hluai. A sawi chu ka hre lo va, a awmzia ka hre map lo bawk.





"Mi sawi ka hria a" a tih leh chuan "A eng chu ? Enge i sawi awmzia hi ?" ka ti leh ha.





"Vawiinah tui lo pe tu che kha" a rawn tih chuan ka ngawi vang vang a, vawiina tui min rawn pe tu ka ngaihtuah nghal rauh rauh.





"Eee.... Kha tleirawl kha maw? Chu chu engtin nge ?" ka ti leh.




"Aaa ka rawn sawi mai mai anih kha. Vawiinah in thing putnaah khan ka rawn kal a, ka rawn hmu fuh lutuk cheu a" a ti a.




"Chutiang engmah a awm lo nia. Mapuia khan tui lei tur in a tir a, min rawn pe mai anih kha. Tunge anih pawh ka hre lo" insawifiah tum tak chuan ka ti a, Tracy chu a nui ringawt.





"Tak tak, kan engmah a awm lo" ka tih leh chuan "Awww.... Insawifiah kher a ngai hleinem" tiin a nui leh.





Nia tinge ka insawifiah ve rik ngawt?






"Mahse ka hrilh ang che mi hi an țawngthei a, mikhual i lo ni si nen i awmdan engkim hi an en ru kar ang. I nihna lo pui pui te an put tir țhin che anga, i hmelțha vei phian nen i hmelhriat miah lo nen pawh an hmehbel zel ang che" a rawn ti a, a sawi zawh chuan a reh duk. Nuam ka ti ve deuhna kha a reh vek mai.





Tracy chu ka en leh zauh zauh țhin a, han sawi tur hi la hre eih lo reng reng. Mahse biak ve ngei chu ka duh bawk si a, ka hrawk ka thian ri leh kharh ringawt țhin.




A mizia hi a mak ka ti reuh a, hmel nelawm tak pu si hian a zuamawm mawlh bawk si lo va, a zahawm ru zek.




Vaihlo chu a zial mawlh mawlh a, a nau te chuan a chang in an rawn chhiar ri leh zauh țhin a, a reh leh vang vang țhin. An zir peih lo ve hle ania nga, rawn chhuak se ka va ti tak.





Nakin deuhah chuan hrawk thian leh kharhin Tracy chu ka en a, min ngaihtuah lo hmel nasa.





"I van zial thiam em em" ka ti tawl a, eng emaw sawi kha ka duh ve si a, sawi tur kha ka hre si lo va.





"Ka zirtir ve ang che, i duh em ?" tia min rawn en in a nui seih.




Awwww.... a nuih hian a va han hmelțha tak.




"Ka thiam ve dawn em ni ?" nui țha chung chuan ka ti a.






"Thiam ang, hetah lo țhu rawh" tiin a bul țhutna chu a beng thak thak.





Phur deuh chuan ka țhu phei a, vaihlo lehkha chu min pe a, a thleh dan ațangin min zir tir.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 12th, 2023, 5:45 pm

HEIHAM!
by Sammy♤



Ch☆3




Vawk ngek thawm chuan min ti harh a, ka zir mar al al..



"Zorinsang" ti ri țhawt vang chuan ka phu zawk.




Ka puan chu hlim pawpin ka tho chhuak a, pawn lama ri deuh nak nak chu en tumin kawngkhar chu hawngin ka dak chhuak a, ka dah chhuah rual chuan ka in hnaih a thir barel an hun chu tu emaw hian a rawn vawm ri chawrh a, ka phu leh zawk.




"Min thlah rawh" Tracy te in chhung lam ațang chuan Tracy aw chuan a rawn ti chhuak țhat chu ka hre veleh a, chhuakin ka va lut phei țhuai.




Nu pakhat hian Tracy chu a lo kek thur bem mai a, Tracy chuan chunu kehna chu vuanin thlah tur chuan a lo ti ve bawk.




Hmangaihsanga leh Hmingsangpuia chu țhutthlengah țhuin țap ri ngam chiah si lo hian an lo insut ri faih faih a. Thil awmzia chu ka va han hre lo tak.




"Eee! Ka pi thlah teh. Kut thawh lo zawngin i sawifel ang u" tiin a kut chu Tracy sam ațang chuan lak thlak sak ka tum a, thlah duh lo in a lo țang nasa mai.




"Ka pi, thlah la" ka ti dam dap a, min en chho hra chung chuan "Tunge inih? Ka fanu ania ka duh leh a sam chu ka pawt kawlh vek ang" a ti țeng per chhuai a, ka chhing sawk. A thaw rim chu hai rual lohin zu țhing rim a ni.




"Aaaaa" tiin ka ner sak a, "Ka pi" ka ti leh chiah chu "Ngawi rawh" tiin ka hmaiah chuan min rawn beng ri no chak.




"Nu!!" Tracy chuan a ti țhat a, a nau te pahnih chu an rawn țap nghal ruah ruah.




Ka biang chu dawm in Tracy nu chu ka en a, mak ka ti lutuk. Mahni fate chutianga a sawisa mai chu mak ka tih tawh laiin kei min beng ve chu awih a harsa ka ti hial zawk.





"Ka pi thlah teh" nelawm vak loh a tiin pawh hran leh chu ka tum a, a kut pahnih chuan a Tracy sam chu a la țham sak sauh sauh zui a.




Hmeichhia niin kei ai upa fe ni ngat lo se chuan ka hnek thlu tawp tawh ang.




"I fanu anih takzet chuan thlah ta che maw le" ka ti ve ta țhat a, nufa an ni a. Chhungkua an ni a, an chhungkaw chungchanga inrawlh chu ka duh lo. Mahse eng buaina pawh nei se, tharum ai chuan țawngkam zel hian sawifel zawk se. Tracy a tih dan chuan min ti lawm lo anih ber chu.




"U kan rawn la kim lo mai" tiin Tracy nau tleirawl pahnih chu an rawn lut a, Rindiki zawkin chutia kan lo awm a hmuh chuan pawr em em mai hian "Thlah nghal rawh" a rawn ti a, a nu chu a hnunglam ațangin a rawn kek ve nghal a, rak chel chulin Tracy nu pawh chuan Tracy chu a thlah a, Rindiki chuan a nu chu a namtlu chawrh.




"Zaktheilonu" tiin Tracy nu chuan Rindiki chu rawn khawih leh a tum a, mahse dan tuma ka chet chhuah hma chuan Rindiki chuan a tha neih zawng zawng nimai tur hian a nu hmaiah chuan a hnek ri no chawk a, a nu chu a mu zawi hnawk.




"Nu" tiin Tracy nau tleirawl pakhat chuan a nu chu a zuk buaipui nghal a, Tracy erawh chu a ding ngawi reng.




"I țha em ?" Tracy chu ka zawt a, mahse min chhang lo in "Zoi i nau te pahnih nen va leng rawh u" a ti a, a nu buaipuitu chu a rawn ding a, a nau te pahnih chu ko in an chhuak nghal.





Tracy chuan a nu chu melh chhuk run hian "Tho rawh" a ti chang fak a, ka lo ding reng ringawt.




Amak ka ti lutuk. An awmzia chu a mak ka ti a, Tracy nu in khatia a fate a ti phal kha mak ka tih laiin Rindikin a nu khati tak maia a sual ngam kha mak ka ti viau bawk a. Mak tiin ka ding ka heu ringawt mai ni.





"Rindik tho la, va thlah rawh. A pasal in a lo zawng leh tawh ang" Tracy in a rawn tih leh phei chuan ka meng kawk kawk a, Tracy nu chuan pasal dang a um san anih ka ring nghal tawp.





"A pasal a rawn lang țep ang amaha rawn kal ania, amahin haw rawh se" a lo ti veleh hmak.





Tracy chuan min rawn en in a nui sang a, a nui lui tih chiang takin ka hria. A sam a thur bum a, a hnar chu a rawn thi chhuak țiam țiam.




"I țha em ?" tia khawih ka tum chu a tawlh hnung dat a, "Zingkar karah kan tibuai che a, min hrethiam dawn nia" a ti a, vawikhat min nuih lui leh sakin pindanah chuan a lut nghal daih.




Ka chhuak a, ka inah chuan lutin awmze nei lovin ka vei tuak chhen.





A awmzia ka hre lo, awm thiam har hi ka ti em em ringawt a. Tracy te chhung chu hriat chian duhna in min tuam hlup hlup a ni ber.





A reh ruih a, ka țhutthlengseiah chuan ka țhut ngawi kar.





A reh vang vang hnuah chuan lungchhe vankaia țap thawm a rawn awm a, chiang takin Tracy a ni tih ka hria a, a țap ri chuan lung a ti chhe ve hial mai.




Awm hle hle chu har ka ti a, an inah chuan ka va lut veleh ringawt.




Ka luh rual chuan Rindiki chuan "Rawng ka bawl kep che nia aw UVictor" a lo ti var a, nizana min biak dan leh tukina a nungchang kha chu pu ngai lo ang hmak a ni.




"Aaaa kan bawl ve thei alawm" te chu ka ti liam puat a.




"I û chu a țha em le? A hnar te kha a thi sia" ka tih chuan, "Hlauthawng suh, a țha vek mai ang" ngaihtuah loh hmel deuh hian a ti liam puat.




"Aaa.... Nichina mi kha i nu a ni em ?" ka ti sup a, "Țawng ring suh" tiin a rawn phun let veleh sep.




"Pawnah inbia ang" tiin a chhuak a, ka zui nghal.




Barel ngheng chuan a ding a, ngaihtuah thui hmel fe hian hma lam a thlir vung vung a, keipawh chu ka ding ngawi reng.





"Ka u saw i biak a, a hmel i hmuh leh hunah tukin a thil thleng kha hre lo ang hmakin i awm dawn nia" a rawn a, ka țawng ve hma chuan, "Hmuh leh che hi a zak dawn lutuk a. Diktak chuan keipawh hian ka zak, ka chanchin sawi tur pawh hi a sawitu nih a inchhuanawm loh hle a, mahse helaia i awm ve reng dawn anih chuan hre turin ka duh che a" a rawn ti leh dap dap a, țawng lo chuan ka ngawi ta reng.





"Sawi țan har ka ti. A mualpho thlak ka ti a, nu te zah lo leh hlau lo angin nangpawhin min hmu ngei ang. Mahse ka nu a ni ve lo ania" a rawn tih chuan ka meng deuh kawk a, zawhna erawh ka zawt duh lo.





"Ka u te nen hian inzawmna pakhat mah kan nei lova, kan inzawm dan hnai ber chu a pa hrawn fanu ka nih vena hi ni mai" a ti leh.




"Kum sarih ka nih laiin ania, ka u pawh hi kum 15 vel lek a la ni. A nu leh ka pa hi an inneih a, an inah hian kan awm ho a. Mahse a nu hi nichin mai thil thleng ațang pawh khan nu țha tak a ni lo tih i hriatthiam ve mai ka ring.




Ka pa nen chuan fa nei, nu ber leh pa ber anni tih i hre lek lovin nuam an tawl a, ka u hian a nau te zawng zawng hi min retheih pui țhin" a chawl dak a, a dak vang vang, a țap niin ka hria.





"Pathiana tlu lut lo na na na chu ka pa te chu an ințhen vat reng a, min uap tur a kan ngaih ten mahni tal tal a min han talsan mai kha chu thla hi a muang lovin hahdam hi a har țhin asin.





Nichina khatia ka rawn chet ngam nachhan chu ka nu a ni ve miau lo va, chuvang chuan ka khawih ngam anih kha.





Pasal dang nei leh in min la rawn tibuai fo va, ka u hi chuan engtin pawhin rawn awm ve sawi a nei ngai lo. A nu anih a hria a, kut thlak pawh ni se a ti let ngai lo" a ti țiau a. A mittui hru chu en in ka lo thaw hak.





Ka lo hah a, chutiang em em naupang tawrh atan chuan rapthlak ka tiin ka vanneih zia ka chhut let neuh neuh.





"Mi zawng zawng hian nungchang țha lo leh zirtirna dawng ngai lo turah min ngai a, nangpawhin chutiang chu i neih ka ring. Mahse a rei telh telh anga, min hrechiang telh telh mai ang" a ti a, a thaw hak.




Sawi ve tur ka hre lo va, ka ding ngawi reng ringawt a. Tracy chu ka rilruah awm reng bawk.




"Ka u hi enge i hmuh dan ni ve hrim hrim" min rawn en a nui lui sang chuan a ti a, "Aaa....." ka ti ban chap.





"Zanah te hian ka u hian in leng a neih ve ngai loh hi i hria nga, mak i ti em ?" a tih chuan ka ngaihtuah chhuak thut a, Tracy hian kei emaw Mapuia te tih loh in leng a neih hi ka hre ngai hauh lo.





"Nula fel leh hmelțha tak ni si hian a to lo teh asin" a ti a, a ngawi leh dat.





"Hmanah chuan ngaihzawng a nei ve țhin a, mahse chu chuan a bum a, nupui dang a neih san a" a tih chuan ka ner sak a, hetiang mipa vang hian alawm mipa kan mualpho țhin.





"Nizan lama ka țawngkam vang khan min ngaidam dawn nia, venthawn ka neih vang ania. Bialnu i nei em ?" a rawn ti ta daih.




Ka en a, chiang deuh hian min lo en ve a. Chu tleirawlte chuan min en lai țep.


"Nei lo" ka ti sap a, a nui seih.




"Kan u tur i ni lo ang tih pawh a sawi theih miah lo ania" a ti nui ver ver a, chu thu a sawi hma a a thusawi te kha chu sawi lo leh hre ngai lo ang maiin a nui a ni.




"AuVictor vawiinah kan picnic dawn a lo kal ve la" Hmangaihsanga rawn ti ri chu ka hria a, an unau thumin kan lam pan chuan an rawn kal mek.





"In school dawn. Chaw ei ang u" Rindiki chuan tiin inchhungah a lut a, Hmingsangpuia leh Hmangaihsanga chu ka bulah chuan an rawn ding ve a.




"Kan school banah nia kan tih dawn, i lo kal ve duh em ?" a tih chuan "Hna laklawh ka nei si a, nakinah picnic spot-ah kan kal zawk dawn nia" ka ti a.




"Mahse kan khuaah awm ve hleinem" Hmangaihsanga chuan a lo ti.




"Khaw dangah ka hruai dawn cheu nia" ka tih chuan phur hmel takin "Aw tak tak aw" an ti a, pinky promise thlap hnu chuan kan lut a.




Dawhkan chu kan kil țhap a, Tracy chu țap lo ang maiin a hmel chu a awm a, a hnar leh a mit chu sen ve deuh lo phei se chuan a țap tih a hriat miah lo.




Nuam lo hi ka ti deuh a, ka hman ve reng pawha chutia chaw ei reng mai chu ka inthlahrung deuh.





Chaw ei kham chuan naupang pahnih chu school turin an insiam a, kuhva ei chuan ka țhu veleh rih a, ka rui tawh bik em lo.




Boruak chu a pangngai vek a, keimah chu pangngai lo awm chhun ka ni ang.




"Vawiin tlai chu Rinte bazar i la" ka tih chuan "Dar engzat velah ?" Rindiki chuan a lo ti a.




"Ka hre nang, tlai lamah bazar an la hawng ve ngai em ?" ka tih chuan, "An khar hma thei lutuk a, a tlai berah dar 3 a ni mai" a tih veleh.




"Anih chuan ka rawn haw hma anga, min bazar pui rawh aw" ka ti a, a lu a bu nghat nghat.




"Vawiin lam eng nge in thawh dawn UVictor ?" Tracy chuan pangngai deuh tak hian a ti a, "Min u suh, Victor min ti mai rawh. Min u khan ka upat hmel bik riauin ka hria" ka ti a.



"Aw kei aiin i upa bawk sia" a tih chuan "Mahse ka la upa em em hleinem, i nau te hi chuan min u se nang chuan min u suh" ka ti a, "Aw le, i duh kher kher ve sia. Vawiinah chuan eng ber maw in thawh dawn a ?" a rawn ti leh a.




"Lui dung lamah ram vel en fel tura kal leh kha an ti deuh a, a chiang lo" ka tih chuan, "Kal hlauh ula ka ti e, in ruala kal ve ka duh" a tih chuan, "Khawiah maw ?" ka ti a.




"Kan huan tlawh lawk ka duh a" a ti a, "Eheu! Khi lamah huan in nei a ?" ka ti let a.




"Aw, ar hmai tiat lek kan nei ve a. Hmanni deuh khan kuhva kan phun lut ve a an țhat leh țhat loh en ka duh deuh a. In kal dawn chuan min hrilh rawh aw" a ti a, "Nia ka rawn hrilh dawn che nia" ka ti ve mai.




Ka in lamah chuan pheiin ka insiam a, in chu kalh țha in ka chhuak nghal mai.




Mapuia te quater lam ka pan a, ka va thlen chuan chaw an lo ei ve mek.




Vawiin thawh tur vel ka zawh chuan lui dung lama kal chu an ti a, Tracy ka hre chhuak zawk.




Tracy-in kan ruala kal ve a duh thu chu ka sawi a, kan pathum chauh kan nih dawn avangin pawi an ti hran lo.





Tracy chu a kal ve theih thu sawi a phone ka tum chuan a phone number ka nei lo tih ka hrechhuak a, mawl in ti zetin ka phun hluk.




"Ka awmna veng lam ațang tho khan kan kal dawn em ?" ka tih chuan "Aw" an ti a, kan veng lam ațanga kan kal dawn tho chuan Tracy nen kan lo nghah tur thu sawiin ka inkhalh phei leh.



In-ah chuan Tracy chuan vaihlo bawk chu a lo zial leh a, lui lamah kan kal dawn thu ka sawi chuan tho vatin a insiam nghal zung zung.




Kan chhuah dawn chuan a nau te chu in nghak țha tur in leh an nau te school bang rawn haw huna in a awm ngei ngei tur chuan a chah mawlh mawlh a, Mapuia te kan nghahna tur lam pan chuan kan kal nghal.




Dawrah chuan eng eng emaw chu a lei kawi a, a rawn chhuah leh chuan "Tinge i lei a ?" ka lo ti ha.




"Rilțam huna ei-ah. Lui kal hian ril hi a țam ve reuh zek zel a" a ti a, "Anih chuan ka'n lei ve nge" tia dawr a luh ka tum chu, "A ngai lo, hei ka lei kep vek tawh cheu" a ti a. "Kan kham lo palh ang" ka tih pawh chuan "I puar khawp tur chu ka lei lawm" a tih tlat avangin ka lei ta lo.




Mapuia te chu kan nghak ren rawn a, an rei reuh phian lehnghal.




Hre chhuak zawkin a number chu ka dil a, țha tak chuan a sawi ve mai a.




"Nuimawii tiin ka save dawn aw ?" ka tih chuan, "A! A eng vang ngawt chuan ?" a rawn ti a.




"I nui mawi ka ti lawm. E mahse, lo thîk tu hi an awm mai anga" ka ti leh a, "I over mai mai reuh e a, save țha mai mai rawh" nui chungin ka dara ben taih pah chuan a ti a, ka nui ve suk suk.




"Aww.... Mapuia te Puia lo deuh te pawh khan min lo thîk thei a" ka tih leh chuan "Ahaaa! Nang zawk hi i bula ka ding ringawt te hi min thîk tu an tam ang chu aw" a ti a, "Han fiam viau che ka tuma mahse Mapuia bulah i vui palh ang, Mapuia ka ngam lo nasa mai sia" ka ti a.



"Ninawm, UMapuia nen kan inkarah engmah awm lo" a rawn ti a, amah chu a nui nui mai lehnghal.




"A awm ang, kha Mapuia sawi chuan i nui i nui mai lawm" ka ti a.




"A! I ngaihdan dan kha ngai teh, i ngai dik dawn bawk si lo va" a ti a, țawng leh ka tum lai chuan Mapuia te an rawn thlen avangin engmah chu ka sawi ta lo.




Kal tur chuan lawng ah chuan kan lut sap sap a, lawng engine khawih thiam ber Te-a chuan a han khawih. Eng hrui emaw hi a vet kual a, a pawt leh vak. A rawn ri țuk țuk a, mahse rei lo-ah a tawp leh daih.




Chutiang chuan vawithum vel a tih hnu ah a nung thei a, mahse a rawn ti țuk țuk a, vawilehkhatah tawp hmakin a rawn khu chum chum.




"Tinge a ?" Mapuia chuan a ti a, "Ka hre lo" tih ngawtin Te-a chuan a chhang a, a ngaihna hre ve map lovin ka lawngah chuan ka țhu tawp.




"A chhia. Kan kal thei lo" Te-a chuan a rawn ti a, "Vawiin chu a rem lo aniang, let ang u" a ti a, a ding a, lawng ațang chuan a chhuak nalh.




Kan chhuak a, lawng engine a chhiat tak avang chuan kal thei lovin kan let hna hna.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 12th, 2023, 5:45 pm

Lui lamah a kal theih tak loh avang chuan tih tur a awm lo chu a ni mai a, Tracy nen in lamah kan inzui let.



"Tracy ka lo leng dawn nia aw" tiin Mapuia chu a rawn au a, "Lo leng rawh u" Tracy chuan a ti țha mai.



In kan thlen leh hnu chuan ka mu ta vel mai mai a, Mapuia te chu an rawn len leh len loh chu ka lo ngaichang ve kar tho.



Tlai lama bazar chu hrechhuakin ka tho a, Tracy te inah chuan va lutin, "Bazar ila" i va ti thawr a. Mahse a lo reh duk.



"Tracy" ka han ti a, hla deuh tak ațangin a rawn ei lauh.



"Khawnge in awm a ?" tiin ka hawi kual a, "Choka tukverhah khan lo dak rawh" a rawn ti.



An choka tukverhah chuan ka va dak a, ar awmna tur hrim hrima hungkual chhungah ar chaw a lo theh.


"Ar te in nei elaw ?" ka tih chuan, "Aw Masi huna ei tur" a rawn ti nui ver ver a.



"Compound a va zau ve" hawi kual valh valh chung chuan ka lo ti daih.



"Zau hleinem a!" tiin ka awmna lam chu a rawn kal a, tukverhah chuan a ban rawn kham in a ar chaw chuk mek te lam chu a en a.



"En ve teh, sawlaia a dum țial saw Saiar a ang asin" a ti a, "Saiar i hmu tawh em ni ?" ka tih chuan, "Eeee... Saiar hmu hman lo tur khawpin ka naupang lo. Kan naupan lai chuan kan khuaah hian Saiar a tam lutuk asin" a rawn ti a.



Ka hmui tipawrhin, "A awihawm loh e...." ka ti a, "Awihawm e.... Kum engzat nge inih ?" a rawn ti daih a.



"26 chauh, nang kum engzat? Keiai i naupan chu ka ring a" ka tih chuan, "Hriat ve kher kher angai lo" a ti a, inchhungah a rawn lut ve nghal.


"Khawnge i nau te hi, bazar ang u rawn tih ka tum a" ka tih chuan, "An awm, ka tir lawk a" a ti a.



"E! Ka number i save veleh miah lo a" ka tih chuan, "WhatsApp ah min rawn bia la ka lo save dawn nia" a ti țha veleh mai.



"Nia ka rawn bia ang che. Mahse lo thik tur an awm dawn chuan ka rawn be peih lo che" ka ti a, tinge maw han chhaih deuh chu ka chak tlat reng ni.



"I over anih chu. I number ka neih i duh loh leh min rawn be lo la" huatawm ni miah si lo hian a rawn ti a, sawi zawm vak dan ka hriat loh avang chuan, "Țawngkam te lah hi i varak tui thiam a, i vawikhat țawngah hian ka dang zel mai" ka ti a, min en in a nui tawp.



"Nangpawh, i pa i chhuna nula lamah i harvang dawn anih hi" a rawn tih leh chuan, "Hmmn engtin nge ka pa i hriat ?" ka ti a.



"I pa te chu a lar em mai. Duati Zorema kha" a tih chuan ka en a, ka pa a hre ve chu a mak hran lo. Mahse a fapa ka ni tih a hria chu a mak ve deuh hlek.



"Hmeichhia te chuan duh zawng tak te chhui hi chu kan hnehsawh alawm. Farnu pahnih i nei tih te pawh ka hre vek" a ti leh a, ka melh ha ringawt.



A țawngkam chuan beisei a nei ve deuhin ka hria a, min iai bik lem lo a nih ber chu.



"Nang hi min chhui tak tak em ni a ?" ka tih chuan nui chung hian, "I â sia(h), in a awm mai mai hian ka chhui tak tak che i ring em ?" a rawn ti leh lawi si a. Chal ti chuar tapa ka en chu nui ver ver in a lu a thing mat mat.



"I sual ve sia" ti deuh nghutin ka țhu a, a nau te chu ngawi rengin ka lo nghak ran.



Pawn lamah chuan thawm a rawn awm nak nak a, Zoi leh Rindiki chu an rawn lut a, an hnungah an țhiante niawm tak hmeichhe pahnih leh mipa pathum vel an rawn lut tel bawk.



An țhiannu pakhat chuan zamna nei map lo va min en in, "Mikhual in nei elaw Zoi ?" a han ti a, "Mikhual hi lawm viau suh Lalremsang" an țhianpa pakhat chuan a lo ti ve bawk.



"Enge in tih dawn a ?" Tracy chuan a lo ti a, "Eng ti dawn lo e. Eitur siam mai mai kan tum a" tiin Zoi chuan a chhang a.



"Kha i UVictor-a khan bazar puiah a lo sawm cheu a" Tracyin a tih leh chuan, "Aha! Ka theihngilh daih" Rindiki chuan a rawn ti hluai a, "A pawi lo, a pawi lo. I û nen kan kal mai ang" ka ti a, Tracy chu ka melh zauh.



"Nia, keini ai chuan lei tur pawh a hre daih zawk" Rindiki chuan a ti a, a țhiante chu tih tur a hrilh zawm zat.



"Kal i la" Tracy lam hawia ka tih chuan, "Veleh ringawt zel hian aw. Bazar dawr pawh an la hawng kim lovang" a ti a, "Aww kal hma ila, hmun dangah te pawh min len pui anga" ka tih leh chuan, "Aw, bag ka'n la lawk nge" tiin pindan lamah chuan a lut a, bag khai nen a rawn chhuak leh.



"Kal ang le ?" tiin a chhuak vut a, kan chhuah hmasak a a tihdan bawkin a nau te chu in lo nghak țha turin a chah mawlh mawlh.



"Enge lei i duh a ?" a tih chuan, "Ka hre lo, a hmun thleng phawt i la" ka ti mai a.



"Nia, bialnu lei tur tepawh an nei ang. Kan lei dawn nia" a tih chuan ka va han ngei mai mai tak.



"Ka luck lutuk" ka han ti ngawt a, ka bula kal lah chu ngeiawm tawk lekin a nui ringawt.


Kan han bazar chu uite leh a pi inzui hi kan ni hawt.



Vai hi an tam em em khawp a, vairam a hnaih vang te pawh a ni ang.



"Hreawm i ti em ?" Tracy chuan a ti deuh reng a, "Aih" ka lo ti ve reng bawk.



Rindiki sawi dan takah lei tur a hre viau a, țangkai lo erawh a ni miah chuang lo.



Bazar pui a sawm zawk si hian ka bazar pui hi a ni ringawt zawk a, mi han dawr(h) leh indawn vel chu thiam tak a ni. Ka nu bazar ka zui țhin te pawh ka hrechhuak.



Kan lei kim thawkhat viaua a hriat hnuah min chawlh pui a, a lum a ti ve viau aniang ice-cream min han ei pui phawt a.


"Mapuia chu a rawn leng nange ?" ice-cream ei paha ka han ti chu, "A rawn leng lo tih i hriat ve reng hi" a rawn ti khauh va, "I țawngthei telh telh" melh ram ram paha ka tih chuan, "Ka ngainat loh zawngte bulah chuan ka țawngthei lo ania" nui ver ver a a rawn tih leh chuan ka nui ve suk suk a, min haw lo a ni tih thu chu hriat nuam tak a ni miau alawm.



"Ka hrechiang telh telh che nga i zùnah hian ka uai daih mai nga" ka tih leh lah chuan inringtawk tak hian, "Min hrechiang apiangin ka zùn uai na an ti. Min hrechiang duh suh i chhuak thei lo mai ang" a rawn ti veleh zel a, ka dang leh der.




"Bialnu lei tur kan hmu si lova zanin chu i țhu hawihil leh then mai dawn ni maw ?" kan ngawih tak vang vang hnua a rawn tih leh chuan, "Țawngthei viau suh" ka ti hluk a, min runluih emaw tih turin pawi sawi lo zetin min nuih ver ver.



In kan let leh hnu chuan a nau te ho chu an lo la awm țhap a, ka bawngsa lei chu, "Hetah siam ila ei ang u" ka tih tlat avangin Tracy chuan a siam nghal a. Kei fan hnuaiah ka țhu veng veng.



Ka phone en a ka țhu reng lai chu Rindiki te țhian zamna nei map lo kha ka bulah hian a rawn țhu vei that a.



"I mit hmul a van mawi em em" hnai fahrana min rawn enin a rawn ti a, ka hamhawih lek lek.




"Aa... i va ti lawmawm ve" tihpah chuan ka țhu hla hret a, min rawn țhut hnaih veleh zelin ka kut chu a la a, "I kut te hi a van mawi, i thisen zam lang hi a mawi tawp. A lian țha si" tiin a kut nen chuan a teh vel a, a la naupan dawn tehreng nen mi zahna a nei map lo mai.




"Lalremsang mawl viau țhin suh" tiin Rindiki chuan a rawn khak a, ka bula țhu lah chuan, "A ho" a lo ti duh lek.




"Zungbun i bun lova nupui i la nei lo ni maw ?" a tih leh chuan ka kut chu ka lasawn a, "Nupui chu nei lo, mahse bialnu chu nei" tiin ka tho a, Tracy din na lamah chuan ka kal daih.




"Tui tawkin ka'n siam ange" Tracyin min hmuh chuan a lo ti nghal var a, sitting room lama kan thusawi ri kha a hre pha lo a ang.
.
.
.

Tlai chaw ei kham chuan leng tawh lovin ka inah ka awm a, a lum ka tih avangin boxer nen chauh awmin sitting room-ah fan hnuaiah ka țhu a, ka nuin Christian-a leh Alfred-a te unau video min lo thawn ho chu ka en a, ka nui suk suk.



Dar 9 a rik pawh chuan mut chu la chhuak lo tak a ni.



Pawnah chhuakin ka han ding vang vang a, in hnung lama vawk nguk ri leh zeuh țhin tih loh chu a reh viau mai.




Exam results leh interview ka rilruah rawn lang a, interview tura kohna dawng har riauin ka inhria. Nge ni kei hi written-ah pawh ka tling lo zawk ni.




Tling lo tura ka inngaih chuan bei chu a dawng ru ve riau tawh a, tlangval fa nei deh duah rual tawhin hna nghet la neih theih loh chu a zia lo ka ti hle bawk.




Mahse ka hna nghet neih leh neih loh chu ka thiamloh a ni lo va, ka tling thei ta ngang lo anih chuan hna dang zawngin nupui neih lamte ka ngaihtuah tawh anga. Hah... ka tling anih pawhin nupui neih tho chu ania ka ngaihtuah tur, mahse nupui ber tur hi engtin nge ni ang?



Tracy te in lam chu ka hawi a, an mu vek tawh nge thawm a reh țhiap mai.



Tracy chu ka ngaihtuah rauh rauh a, ka ngaihtuah chian pauh leh țha ka ti zual a. Rei tak la inhre lo mah ila nitina ka hriatchian zelna hian belhchian a dawl hle tih min ti hrechiang si.



Ka nu ka call a, 'Hello' pawh a rawn tih hma in, "Malsawmzual i pa bulah mu turin lut rawh" a ti ri țhak a, Christian-a nui ar ar thawm ka hre zawm a, ka nui hak.



"Aw hello Bawiha" ka nu chuan a rawn ti dam diai thung a, "Nu" ka han ti ngawt a.


"Eih aaaaa" a rawn ti dam diai a. Ka nu țawngkam chuan tukin lama Tracy te chungchang chu ka ngaihtuah thleng rang kher mai.



Ka call chhan tak pawh sawi ta lo chuan, "Nu" ka han ti leh ngawt a. Ahma ang bawkin a rawn ei dam leh diai.




"Thil lian tak tisual ta ila thinrim avangin min vin angem ?" ka han ti a, zawhna mawlmang tak a ni.



"Eng nge ni a? Thil i ti sual em ni ?" a rawn ti vat.




"Tisual lo e, mahse min chhang teh. Ruihlo lamah tlanin, mipat hmeichhiatna kawngah tal khawlo ta ila" ka tih leh chuan a ngawi vang vang a, min chhang dawn lo emaw ka tih hnuah, "Ka hre lo. Mahse tupawhin kan tisual thei a, țawngkam vin tak leh țawngkam mawi lo tak taka ințawng khum chuan a siamțhat dawn loh che avangin ka vin lo che anga, ka dem hek lovang che. Mahse nu in a tih tur ang takin ka zilh ang che nga, i nu ka nihna anga ka zilhna che chu i zawm dawn tih ka hriat avangin" a rawn ti dap dap a, ka thaw hak. Ka zawh danin a zir lo nge ka chhanna dawn duh ang ka dawng lo. Mahse sawi kher erawh ka tum tawh hran lo.




"Tinge tun ang zanah min rawn call reng reng? Thil i lo tisual tak tak te hi ania nge ?" a tih chuan, "Engmah ka ti sual lo, hmeichhe chungchang rawn sawipui che ka tum a" ka ti a, Tracy te in lam chu ka thlek leh vang vang.




"Mahse nakinah ka hrilh zawk ang che" ka ti leh sup chu ka nu chuan, "Tunah sawi teh. Bialnu i nei em ni? A hmelțha em ?" a rawn ti nghal chung mai a. Ka mit ka chhing a, Tracy nui hmel chu a rawn lang, "A hmelțha lutuk" ka ngawi vang vang a, "Mahse bialpa a neiin ka hria" ka ti zawi sup a.




"Aw.... Mahse Bawiha i duh viau anih pawhin mi inkarah chuan tlazep duh aw" ka nu chuan a rawn ti dam leh dap a, "Ka hria lawm nu"




"A tlai tawh si a dah ang aw" ka tih zawm a, "Aw le.... Inenkawl țha la, muttui suk suk" a rawn ti a, phone chu kan dah nghal.




Van lam thlirin ka ding ngawi reng a, hna țha, hna nghet ka neih hma chuan nupui neih emaw hmeichhe lam ka ngaihsak lo ang kha ka inti țhin kha ania, mahse Tracy meuh ka han tawn chuan 'ka bialnu ni ta se' tiin ka inngaihtuah ta fo mai.




Ka din leh deuh vang vang hnuah ka lut a, mut tumin pindan lam ka pan tawh.



Mut hmunah chuan phone khawihin message ka check a, Nubawihin a thlalak min rawn dilna chu mu dawn tawh e ti lo chuan selfie leh lawp lawpin ka pe a, ngatan nge a tih phei chu ka hre hauh lo.




*i va han hmelțha tak, ka u chu ni lo la ka star viau ang che* tia min rawn reply chuan ka nui a, *a tlai tawh, mu tawh rawh* tiin ka reply thung.




Kan farnu pahnih te hian an nuța te hi țha hi min ti hlarh hlarh lutuk a, 'ka u chu ni lo la ka star ang che* tih hi mi fiam nan tak hian an nei lehnghal a, mi hriata mawi tak a ni lo a, nakinah ka la hau deuh ang.




Ka mut theihloh thu status ka tum lai chuan Tracy status chu ka hmu a, ka en ta phawt.




*Buh mal vui ngâwkin, thing tlu kar nun ang chauhin ka awm ve hram hram a. Rih artui phur ang mai ni mah ila; Liandova te unau tan maha bungbu zangkhua hi ka tan a la bungbu ve ang* zan tir lama a up a ni a, a thusawi erawh ka hrethiam lo hle thung.




Tun maia a rawn up chu ka en a, Daduhi hla Ka Hlan Ngam Lo Che tih kha a rawng hmang ngei.




Tunge a duh ruk chu ni ang tiin ka ngaihtuah nghal rauh rauh a, a rawn online zawm zat avang chuan ka va message a.



"Amak Mapuia nen kan ni lo" tih chu min rawn reply dan a ni.


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » March 12th, 2023, 5:45 pm

"Awihawm loh ve e" tiin ka reply a, ka mu rem sat sat.



"Ania lawm. I awih loh leh amah i zawt dawn nia" tiin min rawn reply leh a, "I sawi bawk sia, in ni lo angah ka ngai ang" ka ti leh a.



"Nia" a rawn ti ringawt.



Reply dan tur ka hre tawh lo va, aman min rawn message chhunzawm tawh bik si loh avang chuan ka phone chu ka off a, mutthilh tum chuan ka chhing ta hmak.
.
.
.
In awm mai mai chu kan hna anih rih avangin ka mu vel mai mai a, a hahthlak lai kha chuan a hahthlak viau a, hahdam hunah erawh a hahdamthlak leh hle bawk a, hna zawng zawngah a nuam pawl chu a ni ve chiang a ni.




Tlai lamah Tracy inbul phiat lai bulah chuan ka ding ve reng a, a hmun phiat mai mai te chu hmuhnawm ka ti vek tawh mai ni.



"Ding reng lo khan min lo tihpui ve la" a tih chuan, "Ti hian nupui tlak i nih leh nih loh ka lo en zawk ang che" ka ti a, "Ve a, keite chu nupui tlak ka nia. Nang hi pasal tlak i nih loh vang hian nupui tur i hmu zo lo te hi a ni lo maw ?" a rawn ti a, min rawn en chuang lo chuan a tih lai chu a tih zawm mawlh mawlh tho.



"Neih tur chu an tam, ka nei duh lo mai mai lawm" ka ti ve leh.



"I kum ngaihtuah hi chuan nei tawh tur chu i ni, i luck vak lo hi ni lo maw ?" a rawn tih leh a, rawn hawi chhuakin ni in a chhun vang chuan nge a meng set set.




"Ka luck lutuk, ka duh zawng tak hi ka la hmu lo mai mai lawm" ka ti a. "Duh zawng hmuh zawh loh chu luck lo tihna a ni mai lo em ni ?" a rawn ti leh khauh va, ka dang der mai.




"I țawngthei sia" ka ti leh ngawt.
.
.
.

Ni a liam zung zung a, Tracy chu ka hrechiang telh telh a, ka ngaina telh telh a, ka duh telh telh a, mahse ka hriatchian telh telhna chuan amah min zahtir a, ka duh angin ka hnaih ngam lo.




Mei nei taka ka fiam a, țawngkam ka neih chang hi chuan a hrethiam țhin hian ka hria a, min chhan let danah pawh hian min duh lo bik lo tih ka hria. Mahse ka hriatthiam theih loh lai ber chu Mapuia nen kan ni lo a tih ni ațang chiah khan Mapuia a rawn leng ziah a, hna awl lai a ni bawk nen a rawn lawr chhen mai ni. Tracy lahin tumah biak chhiat a nei si lo va, Mapuia chu a duh emaw ni aw tih mai turin a nuih seuh seuh țhin lehnghal.




Mahni tawkah chuan ngaihdan fahrah te te neiin ka buai ve em em a, eng kawng mah chu tih kuak ka nei hlei law.
.
.
.

Ka nu a dam lova, ka pa hna thila zin angai si nen ka haw dawn a, zingkara chhuah ka tum avangin ka insiam mawlh mawlh.



Inken haw vak a ngaih loh avangin rucksag-ah eng eng emaw ka dah a, ka duhtawk mai.



Fan hnuaiah țhuin lehlama Tracy leh Mapuia te nui leh hak țhin chu ka ngaithla reng a, an inngaihzawn loh reng hi ka ring lo.



A khat tawkin ka thaw leh hawk zel a, Tracyin midang a duh tura ka ngaihtuah chuan ka lung hi a hma ai a rawn phu rang a, a thip zek zek thei.




"UVictor" tiin Rindiki a rawn tei lut hlawl a, ka țhut lohna țhutthlengah chuan a țhu tharh.




"Engmah i ti chuang si lova, rawng leng ve ta che" a ti a, "Aa ka peih lo" ka lo ti țha mai.




"Naktukah i haw chuan engtikah nge i rawn chhuk leh ang" a ti a, "Ka hre lo le, ni li vel han cham ka tum kha ania" ka ti a.



"Englo UVictor....." a rawn ti hluai a, ka mit ko ka san ak a, a ngawi leh ang lawi a.



"Au Tracy nen hian in.... aaaaa in inngaizawng lo em ni ?" sawi hreh hmel tak hian ahma ai zawi tak hian a rawn ti a.



"Ni lo e" ka lu thing mat mat pah chuan ka ti a, "Anih Au Tracy hi i duh hrim hrim em ?" a tih leh chuan, "Aw duh e" ka ti tlang nghal tawp a, Rindiki chu a khap fak fak.




"Anih chuan tinge duh si chu i bem loh a ?" a ti a, "Mapuia awm ve reng saw" tia ka chhan chuan, "UMapuia te chuan nupui a nei țep tawh, an nuin naute a nei țep a, nau neih zawhah law law an inneih dawn" a rawn tih chuan kawng hi ka hmu eng nghal vek nimai hian ka hria.



"Mahse UVictor thil ka hrilh ang che. I duh tak tak lo anih chuan tibuai duh suh. Ka u hian kumhnih khat lek inngaihzawn ang kha duh lo a, pasal a neih thleng rak a ni mai" a rawn ti a, ka ngawi rauh rauh.




"Ka iai hleinem, nupui atan pawh. Ka duh lawm i u hi" ka ti leh a, mahse amah min rawn tiphur bertu chu beidawn hmel zetin, "Thil hi i hre lova, chuvanga la iai lo mai mai i nih kha" a tia, "Muttui aw, tluang deuhin i han kal dawn nia" tiin a chhuak daih.



Enge han iai em emna tur ka hre lo. Engpawhnise Mapuia nen an ni lo tih a chiang a, ka han haw phawt anga, ka chhuk leh hunah pangngai deuhin a laka ka rilru put dan ka hrilh ngei ngei ang.



><><><><><><><><><><><><




Ka nu bula awm chu hmeichhe chungchang hlir min sawi pui a, Tracy chungchang sawi tuma ka phone zan ami kha min zawt deuh ngar ngar.



Mahse engmah ka sawi lo va, ka ngawi reng tawp mai ni.




Christian-a leh ka nuin min ngai em em mai a, Christian-an min hmuh loh chuan min zawng reng a, ka nu lahin a bula ka awm loh chuan min au reng bawk a, ka kawi duan duan zel reng mai ni.




Tlaikhat ka nu nena kan awm lai chuan ka ngaihtuahna ka lo sawi chhuak palh a, ka nu chuan, "Mi inkarah inrawlh suh ka tih kha aw" a rawn ti nghal chat.




"Ka inrawlh lo" ka ti vat a, "Bialpa a nei lo lawm" ka ti leh.



"Ka chhuk thlak leh hunah a laka ka rilru put dan hrilh ka duh a, engtin nge ka tih ang ?" ka tih chuan, "A hmeichhia chuan a duh ve ngawt dawn che em ni ?" a ti a, "Aw ti ila ka chiang lo. Mahse a nungchang hi chuan min hnar lo alawm" ka ti a, ka thaw hak.




"Ka rilru hah nih hi nu. Tiang em em hian mihring hi a induh theih ka ring ngai lo. Hmangaihna a ni angem ?" tiin ka nu chu ka en a, "Ka hre lo le, hmangaihna te chu a tirah a piang nghal bik lova. Engtiang chiahin chunu chu i duh a ?" ka nu chuan a rawn ti a.




"Ka sawi thiam lo. Ahma kha chuan ka mit ka chhin hian nang te, ka pa te, ka nau te ho ka mitthlaah in rawn lang a, mahse tunah chuan amah hlir a lang tawh. A nui hmel ka mitthla ringawt pawhin ka hlim in ka nui ve zel thei a. Min hmuh a, min nuih loh emaw min be miah lo anih chuan pawimawh lo riauin ka inngai a, ka awm a nawm loh phah țhin" ka ti a, ka thaw hak.




"Ka rilru put hmang ka sawi hunah min hnawl ka hlau. MCS exam tlin loh ai pawh khan ka nei lo ang tih hi ka hlau tawh a ni" ka tih leh chuan ka nu chu a rawn, "Heiham!" hluai a, ka en chu chiang fahran hian min lo en ve a.




"Tinge chutiang khawpa duh si chu i duh thu chu i hrilh loh a? Jerome-a pawn a duh a, a neih nalh mai a. I duh anih chuan duh lo che pawh ni se a duh theih hun che nghak mai rawh. Mi inkarah inrawlh suh ka tih kha ka sut leh. Nupa an nih loh a, nula tlangval inngaizawng satliah an nih chuan inrawlh rawh. Keipawh i pa hian min duh ngai miah lo a, bialnu duh em em a neih lai rengin kan innei a, nghak fan fan lo ila chuan in piang dawn miah lo" a rawn ti a, "Nuuuu! Mi inkarah i inrawlh ve tho chu" ka tih chuan, "Mi inkarah inrawlh pawh ka inti phal lo, i pa nakruh bo ka nia, aneitu hnenah kan inpe ka ti mai sin" ka nu lah chuan ngaihsam hmel fe hian a la ti zui a.




"Anih chuan ka la hian engtin nge a duh em em theih che a ?" ka ti leh a, "Dawhtheihna mawle Bawiha, dawhtheihna hi hmangaihna kawngah chuan thil pawimawh ber pakhat a ni lawm" a rawn ti a, ka lu ka bu nghat nghat.




"Anih nu nupuiah neih duh dawn ta ila thingtlang nula tiin mo atan i duh lo angem ?" ka ti leh a. Ka nu chuan min kuk a, "I nu hi khawpui nula ka ni ngai lo tih hi hre reng rawh" a rawn ti a, ka nuih tlawn ta vel.



Kan in ka awm chhung zawng chuan Tracy ngawt ka ngaihtuah a, a vawikhat nana in awm ka ning ta viau mai. Chhuk thlak vat ka duh a, ka sawi dan tur pawh ngaihtuah hleithei lo hian ka duh thu chu hrilh ka chak zek zek mai a. Amah lo duh tu nih chu ka inchhuang zawk hial hian ka hria.


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)