REMRUATSANGA BY Papuii Sailo (Completed)

[Ngaia]

REMRUATSANGA
Chapter - 19



Inneih darkar a hnai zel a, ka thiannu ai mah chuan ka zam zawk hialin ka hria.Mi tam zawkin Biak In an pan sap sap tan a, naupang pawh Remruata rualin nichin deuh lawk khan an kal ve tawh. Keini erawh min hruaitu tur motor a lo la thlen loh deuh avangin Zawmi te in lamah kan la awm thung. Biak In leh a chhehvel chu mihring hlirin an khat a ni ber. Ka hriat ve chinah kan khuaa inneihnaah chuan mihring an la tam ber hial mai thei a ni. Ti ila, kan khuaah hian innei khât tawk hi chu awm ve reng mah se, Kohhran Dan puitlinga innei hi an khat pharh a, chuvangte pawh chu a ni ve mai thei, Dan puitlinga inneih leh neih loh hi chu kan ngaih hlut dante hi a dang ve deuh thin tlat a.



Thutiam an chham lai chuan ka rilruin Pathian hnenah kumkhuaa nupa kawp chawi rem tak an nih reng theih nan ka lo dilsak ve mawlh mawlh.Inneih hunserh a zo a, Biak In kawtah thlalakna in a chhunzawm a, pheikhawk sang ka bun khat bawk nen ka ke chu a kham ru tawh viau.



"Remruata sawn i lak atangin mit ala sawn hlei theilo reng reng " Zawmi chuan min rawn hrilh ru sa sa a, ka nui hak ringawt.Kan hma zawnah tak naupangte nen dingin thlalak tirh atang tawh khan min en uluk char char viau bawk a tin ni. Ka va hawi fuh apiangin kan mit a intawng ziah. A phone te khan thla te kha min laksakin ka hria, nichin khan a rawn lek ve va va kha maw.



" Kan thian hoin a hranpa in mo thian hi kan lakpui duh ania aw " TKP hoin min lak pui zawh chuan Pekan nui thaw chung hian Zawmi a hrilh a, a sawi hre pha ho chu an nui dar dar hlawm mai.



" Thla lakpui man ka inchhiar to asin pawisa innei daih dawn em ni? " Ka lo ti let a. " Cheng 5 chiah ka ak, abak chu installment-in ni mai se " Uang zet hian a ti a, thla la tur dang an rawn din leh tawh avangin ka chhang zui tawh lo.



Remruata leh kan fate rawn din hun a thlen ve chuan hmeichhe thenkhat keimahni lam hawi chunga phun sar sar te ho chu ka hmuh hmaih lo.An sawi tur awm ang ka hrethiam mai; mahse,eng he huah ka ngai lemlo. Remruata nen kan chungchangah hian mi sawi ka hlawh tih chu bengngawng leh mitdel ka nih bik loh avang hian ka hai bik lo. Hmaichhanah ngei mei net zet zeta min fiamtu pawh ka tawng ve fo, thil an hriat kim tawk loh vangah ngaiin tun thlengin mênah ka la thlak thei zel thung.



U Rammuana nen kan inthen hnu deuh lawkah Remruata a rawn lang a, kan In a a riah te kha lo hre tawk an awm bawk nen ngaihzawng ka neih vanga U Rammuana nen inthenah khaw chhung mi tam zawk hian min ngai in thu an zel din kual a, thenkhat chuan ka nunhlui nen lam an sawi chhuak bawk.


" I mawi " Mi si chet chunga rawn din pah chuan a ti sup a, nui var var chunga en chhoin " Ka lawm e " Ka ti chu mawi zeta nui chungin ka kawngah a rawn hmer zui salh a, camera lam a melh nghal daih. Naupang erawh Zawmi leh Zomuana hmaah an ding vâng mai.



Remruata chu a lokal lo ang tih a hlauhawm tak tak a ni. Naupang a buaipui chawt a, nilengin ka faten min tibuai hauh lo. Mo hruainaah pawh "Naupang hi an kal peih vaklo aniang, he lamah ka lo awmpui mai ang " Tiin Zawmi te in lamah a lo awm pui a, an pa bula awm an ni bawk a ka ngaihtuah hran lo.



" Ka mu der der chak tawh e, in leng ho hi haw har lo se " An nupa khum tura leh thlak dawp pahin a ti siam siam a,a chau viau ang, keipawh ka chau khawp mai. A bungraw rem fel nghal ngei ngei ngai chi rem felin a cousin thenkhatte ho nen kan awm a, inleng ho in 'mo thar hmel hmuh a chakawm e' an tih avangin a khat tawkin an rawn ko leh thin a. Bed room leh sitting room a kartawn sek reng mai.



"Zomuanan a mut mai mai tir awmlo che e... Zing lam dar 2 velah 'ka la khamlo' a ti ve dut dut mai ang a'h " Zawmi cousin senior ve deuh tawh U Hriatin a rawn tih chuan an nui zui dar dar a.



Zawmin " Ka peihlo ka tih chuan ka peihlo a ni tawp mai, min ti lui theilo hrim hrim. Bakah min duat lutuk, ka chau ka tih te chuan min hrethiam leh mai ang, zanin chauh innei tur kan ni hlei nem maw? " Nui duh hauhlo a a tih chuan " I va han zamlo ham ham tak " Nui uar uar chungin an lo ti sap sap hlawm mai.



Chutiang lam mawlh sawi a kan rik dar dar lai chuan Remruata hnen atangin call ka dawng a, haw har min ti deuh tawh anih ka ring. An bengchhen deuh avangin pawn lamah ka chhuah tê tê hnuah ka chhang chauh. Ka rin ang ngeiin " In lo haw dawn hnai tawh em? " Tiin min rawn zawt. Min thlahtu tur ber Zomuana ala hman loh deuh thu ka hrilh chuan "Ka lo hruai ang che " Tiin phone a dah nghal daih.



Inchhunga ka luh leh chuan Zawmi hnenah ka haw tur thu leh naktuk lama ka kal leh tur thu sawiin ka bungrua ka zawng khawm pah zung zung a, Remruata kha a rawn thlen har ka rin loh avanga hmanhmawh deuh ka ni.



" Ngati rum rum nge Zomuana nen kan thlah ang che ka tih kha, Zomuana pawh ala hman silo " A lo ti deuh haw.



" Naupang an sual bâk deuh aniang, Remruatan min lo phone a, min hruai turin a lokal mekin ka ring " Ka tih lai mekin Zomuana nau Zorini ahmaa a u bula Zawmi lo hek tawhtu ka tih khan " U Duh, engtin nge Remruata hi i chhai thlûk theih bik a? Fa i nei tawh bawk sia a mak e " A rawn tichhuak phawng a, a thil rawn sawi dan teh tawp chu mak ka tih rualin ka hamhaih hle bawk.



" Zorin! " Zawmin a lo khap vat nâ in " Amak em alawm, ka thiante pawhin an hre chak raps... Bakah Remruata khan bialnu chhelo deuh a nei thin leh nghal " A ti leh zat zat.



" A bialnu chhelo deuh ai chuan a duh zawk tihna a ni mai alawm, chutah chuan buaina i nei em ni? " Zawmi bawk chuan a ti chang ta fak.



" Ka buai pawh ka tih loh kha, ka hre chaka ka zawt a ni mai alawm. Bakah U Duhi pawh a thinrim lo a, eng nge ilo thinrim ringawt. Hrim hrimah Remruata ang tlangval chhelo lutukin nuthlawi fa pahnih nei tawh a duh tlatte chu a mak em alawm " Ala ti zuah zuah chu kan en thap mai. Helai room-a awm khawm zingah hian a naupang ber mai pawh nilo in a u Zomuana rualte vek kan ni ania. A chaltlai reuh ka ti ru khawp. Zawmi chu chhang tawhlo turin ka signal a, a mo thar zanah buaina a chhuak chiam ang tih ka hlau a ni.



" I hre chaka i zawt anih pawhin tawngkam mawi deuh a awm alawm. Chu lo-ah nuthlawi fa pahnih nei te kha itia, nang pawh zan hnih khat leka nuthlawi dinhmuna ding ve thei hmeichhia ve tho inih kha. Tuman hma hun kan hre lo a, tu dinhmun mah hi hmusit taka tawngkhum thei kan nilo ania Zorin " U Hriatin a rawn tih ve takah chuan Zorini chu a ngawi ta dâk a, a hawi kual hrek hrek a a chhuak zui ta daih. An ngei thu leh chaltlai an tih thu an sawi zui sap sap mai.



" Kal rawh, Remruata chu a lo thleng tel tawh ang. Ka thlah ang che " Boruak thlak tumin Zawmin a rawn ti ta hluai a. Kan inzui chhuak min hmuh rualin "I haw dawn tawh em ni? " Tiin min lo zawt sap sap hlawm a, Zomuana pawh rawn ding vatin kan pathum chuan kan inzui chhuak a. Zomuana chuan riak ve mai turin a mawiah min sawm der ka ti mai. Ka riah chhuah theih loh zia hrechiang tute an ni si a. Rei vaklo hnuah Remruata pawh a rawn thleng zui mai a, kan tlan chhuah dawn chuan Zawmin " Naktukah chuan lokal hma vak pawh angai kherlo aw, i hman hun hun kha ka pawm vek a nia. Chuan nichin thil kha theihnghilh la tui tawkin mu ang che. I tha ber ania " Tiin min rawn kuah vang vang a, ka tan hi chuan a hlu thin a ni. Zorini nen keimah vangin buaina an nei zui ang tih erawh ka hlau viau.



" Naupang an sual em ni a? " Kan tlan chhuah hnu deuh chuan ka zawt a.


" Suallo ve, an chau deuh aniang an muhil daih tawh.Adina leh nula khawharin Inah an awmpui " A thil sawi chuan a nuih a ti za nge a nui zui suk suk mai.



" Min rawn phone bawk sia an sual deuh anih ka ring a, Hlima hi min hmulo hian a awm rei thei vaklo bawk nen " Ka tih chuan " Ka ngai ve tawh che lawm " A lo ti sup a, ka nui nghal var var.



" Chuan... Nichina thil thleng theihnghilh daih tur kha ka hre ve chak, ka hriat chi anih chuan " A tih zawm leh zat.



" A ho lutuk, naupang pakhatin nuthlawi fa pahnih nei tawh zûna i uai tlat dan a hre chaka min zawt mai mai maw le, bialnu hlui chhelo deuh i nei thin tih te pawh min hrilh a " La nui var var chung chuan ka chhang a, Zorini min zawh lai khan min thawng viau nangin eng teh uala ka ngai leh tawh lem lo.



" A fate nu zûna a uai lohin tu zûnah nge a uai ang tiin i chhanglo em ni? " Tia min zawh chuan nui ringawt. Bawihpuia te unau hringtupa ngei a ni tih hi kan chhungkaw ho bakah Zawmi te chhung bakin an hre lo a, miin an hrelo ang tih hlau awm hrima sawi darh chiam tul kan tilo bawk. Nakinah thu dil chu an la hre ve vek hlawm mai turah ka ngai.



" I bialnu hlui chhelo deuh chu ka hre chak lutuk a chutiang ngaihtuah chhuahna chang ka lo hre miahlo " Ka ti chu " Tu ber nge ni ang aw.. Ka bialnu te an chhelo thei hlawm lutuk a " Nui duh miahlo hian a ti a, a fiamthu tih hre tho mah ila ka ner nasa viau.



Inneih boruak a zo a, nunphung pangngai kan zawh leh tan a, Remruata nen pawh kan inkar ala kal pangngai reng. Thinrima han inhauh vel kan nei ngai miahlo leh kan inkawp tluang chho lutuk hi a chang chuan ka ngaih a tha lo deuh thin. Inhauh erawh ka duh tihna a ni chuang hauh lo. Tuna kan inkar boruak hi a nuam a, a thlamuanthlak em em bawk. Naupang pawhin 'Pa ' tiin an ko ve ve tawh. Kum tawp exam a hnaih leh tawh avangin lehkha kan zir ngawrh viau aa, râl atangon Remruata lahin a rawn vil hneh viau bawk. U Rammuana pawh Zawmi man hlanni bak kha a rawn lang leh tawh miahlo a, chutih laiin video neih dan kawng erawh kan la dap char char thung.


Tlai khat an school bang chu Hlima zawk tap pur chungin Adinan a rawn pawm hawng a, In an lo thlen lai te chuanin ala tap uar viau. A chhan ka zawh chuan a mawngah ui in a lo seh chu niin. A sehna lai la en sak vat a, a huam hma chu a lian hranlo nâ in tlemte in a thi ser ser a, ka nu khan " Ui in mi a seh a, a thi chuan Ui chu a â lo tihna " A tih avangin ka hahdam deuh huai, jection erawh lak tho chu angai ang.



" Tute Uiin nge seh reng reng a? " Tia Adina ka zawh chuan an school kawng ami Pu Ramhluna te Ui anih thuin min chhang a, ka thin a rim nghal teuh mai. A neituten 'ui fing' tia an sawi â deuh kha anih ngei dawn chu. Kan school kal turte hi mi a lo bauh nghek nghek zel.Naupang phei chuan an hlau thei viau. Chutih laiin anmahni hian hauh a hnekin " A zaidam lutuk engtin mah a tilo ang che u, hlau duh suh u. A lo lawm ve che u anih hi " An ti thla rawk zel leh nghal a. Ui zaidamin mi abauh vak vak ngai pawh ka hre lo.



Jection lak hrim hrim a tha kan tih avangin Adinan u Thazuala bike han hawh sakin khaw thenawm PHC kan pan a, vawi thum jection chawin vawi khat chu anmahniin an jection nghal a. Na a ti viau, ka thin hi a rim ru tûn mai. "Ui chu a chhaih hmasa em" Tia ka zawh khan Mala khan an kawng kallai a seh ringawt thu kha a sawi bawk nen. Chuta karah Pu Ramhluna te chhung chu in kan thlen hnuah pawh tumah reng an rawn lang zui miahlo te chu mak ka ti viau.



A tuk lama pu Ramhluna nupui tawngkam ka hre leh zel phei chu ka thinrim ang reng "Kan ui thiam lohna a awm lo, kan verandah-a a bawk hle hle lai an rawn vawm a. Kan lo thlun loh ni tak a ni bawk nen an chhaih kawlh hmasa anih kha. Pawisa kan chawipui nachhan tur a awmlo reng reng " Tiin nu pakhat bulah a lo sawi a, kei min hrilh leh si. Engamah hmaa pawisa a sawi chhuah nghal danah pawisa kan chawi tir an hlau hle anih ka ring. Kan phut miahlo a sin maw le! Ka fapa lo seh tu an ui anih angin a hmingin thupha chawina chhete tal an rawn neih ve kan beisei chauh kha a nia.


Chumi zan chuan Pu Ramhluna te chhung mak ka tih luata ka lung dam theilo Remruata hnenah inhrithlain ka ang hrep a, ani pawh zan hmasa lama dam deuh si kha thupha vawikhat pawh an rawn chawilo tih leh Pi Nuni tawngkam a hriat chuan a rawn thinrim viau.Zan hmasa te kha chuan "Â.. Kan fate thiamloh hmasakte pawh a ni thei, naupang hi chu an harh ve a. Pawisa rawn chawipui che u an tum pawhin lo la suh u, keiman ka lo thawn ang " Ti si kha zaninah chuan "Nangmahni in kal hreh pawhin Pa Mafela emaw kha tir ula, vawi khat jection man chu chawi tir ngei ngei rawh u " A rawn ti nghut nghut mai. Adina ngaihdan a lo ni ve chiah bawk.



Remruata nen kan inbiak zawh chuan U Rammuana nu hnen atangin call ka dawng hlawl a, eng tak rawn sawi tum chu ni maw? Tia ngaihtuah chunga ka pick up rualin thinrim aw rawl vin lutuk ka hre hmasa ber.



" Lalduhsang, nang hian kan chhungkuaa buaina i rawn thlen nasat zia hi i hria em? Anchhia inih hi anchhia " A rawn ti nghal tawn tawn a, chuti taka a rawn thinrim chiam chu ka hamhaih nasa mai.


" I sawi awmzia ka hre hauhlo mai " Ka ti dêk dêk chu " I tlangval nen nuam in tawl a, helaia i buaina chawh chhuahte chu i hre duh tawp nang " A ti zui leh phiar phiar.



" Anih chuan thil awmzia min han hrilh ta che ka nu , tun ang zanrei tawha thinrim hrawk phiar tun chunga min rawn ankhum na chhante hi " Dam dapa ka tih laiin " Ila hre dawn chauh, ka en liam mai mai dawnlo che " Ti hmarh hmarh chungin a off zui nghal hmak lawi.


Thil awmzia hriattumin Ateteii message ka thawn a, min rawn chhan mai loh danah a mu tawh anih ringin zing lama zawh mai tumin mu turin ka inbuatsaih a, khati taka ka nu rawn thinrim khan ka rilru a luah reng mai. U Rammuana hian buaina a siam leh em mawni le.. Kei min rawn ankhum chiam danah U Rammuana kaihhnawih bak a nih ka ring vak lo. An chhungkua nena buaina neih erawh ka khamin ka peih tawhlo viau.



A tûk lamah erawh U Thanteii hnen atangin thil thleng ka hriaa U Rammuanan Ateteii kut lo thlakin damdawi In hial a lut a, Ateteii pa thinrimin U Rammuana lakah case a file a ni awm e. " Kut a thlak chhan Rammuana kan zawhin nangmah vang anih thu ringawt sawiin thil dang engmah a sawi duh silo a, Ateteii kut a thlak chhan tur awm ang i hria em? Keini chu kan bangbo khawp mai. A duat viau thin khan ka hre si a " A rawn ti duah a.Keipawhin Ateteii ber kher damdawi In luh ngai hial khawpa a siam chu min thawng tak zet. U Thanteii sawi angin U Rammuana hian a duat a, thil pawh a tihsak nasa a, Ateteii pawhin a nel viau reng bawk kha a ni si.


Ka hriat bik loh thua chhangin Ateteii dinhmun chu ka zawt zui zat a, Damdawi ina an awm thu leh ala harh loh thu a sawi a, a sawisa nasa viau tihna em mawni dawn le?


U Rammuanan Ateteii a sawisak chhan tur awm ang ka ngaihtuah ngial hnuah la rilruah thil pakhat a rawn lut zawk. Kei,sawi tel ve ka nih a, Ateteiin kut hial a tawrh phah anih chuan a file thuhruk hawn a tumna lamah man a tawk a ni thei mai ang em? Chutiang a lo nih teh chuan inrawlhna ka nei mai pawh nilo in keimah vanga kut tuar a ni dawn tihna a ni. Engkim hre tur ber Ateteii lah nikhua hrelo in a awm daih bawk si.



Nilengin ka rilru a nuam thei lo, an chhungkaw hnai tak laka case hial an file phah duhna chhan chu hliam tenau mai mai a ni dawnlo tih a chiang reng a, chu tak chuan ka awm a tinuam theilo. A aia thalo zawkte a thleng anih phei chuan. Nilo, chutiang em chu a thlenglo turah ngai ang.



Pa Mafela leh Adina rawn inzui lut chu Adina chuan "Ui fing ka hriat tawha ala â ber ka ti ka tia, a neitute ngaihtuah khan lo fing chi ni nghallo chuan " A rawn ti lut bul bul a, thil awmzia ka lo zawt vat. Pu Ramhluna te inah an va kal kha a nia.



" Thupha chu hreh deuh chungin an chawi hram a, pawisa chawi tel chu Pi Nuni khan hreh ngar ngar tak a ni " Adina chuan a ti mai a, Kohhran leh khawtlanga inhmang chhungkua viau si an mak ka ti tak tak.



" Ran vulh hi chu buaithlak deuh mai asin, kei ka vulh duh tawh loh nachhan pawh a ni. Kohhrana rawngbawltu, upa, Pastor tih vel tan phei hi chuan vulh chi ah pawh ka ruat tawh lo. Kan kawta ui a bawh rūn chuan thlarau lama tuihal leh nun khawhar tanpui ngai ngawih ngawih ten min rawn pan ngam loh phah ve thei tlat. A neituten a fel lutuk ti eng ang mah ila a nêllo tu tan hi chuan ngaihngam taka han awm hi har deuh mai a nia " Pa Mafela chuan a ti dap dap a, ka ngaihdan chiah a ni.



Rei vaklo a awm leh hnuah a haw chho zui a, pu Ramhluna te pawh pawisa chawi tir kha kan tum ber anih loh avangin kan ngaidam zui ta mai. Ngaihdam dil an hreh bawk si a, midang seh tawhlo turin veng tha tawh se ka tihpui viau.


Remruata nena kan inbiak chuan engtin nge a hriat ka hre lo, U Rammuana te chanchin chu min rawn zawt a." Ka hre chiang vak biklo, Ateteii damdawi In hial lut khawpin a sawisaa, Pa Maman (Ateteii pa) case a file tih bak " Tiin ka lo chhang a.


" A sawisak chhan awm ang tur rin deuh i nei em? " A tih chuan Video min zawn sak chung chang leh nizan lamah U Rammuana nu in min rawn biakte chu hrilhin " Ka rindan chu a dikin i ring em? Lo inrawlh tir ve loh tawp tur hi a nia, thil thalo zawk a chungah thleng se engtin nge ni ang? " Tiin ka zawt let a.


" Lungngai lo la, eng thil thalo mah a thlenglo ang, naktukah Damdawi In lamah chuan chanchin hre turin lo va kal ka tum dawn nia. Hlima chu eng nge a an? "A rawn ti zawm zat.


" A dam tha, tlangval lutuk. I hritlang chu eng nge i an tawh zawk? " Ka tih veleh a rawn khuh lui nghal kharh kharh kher chu ka nui ri hak. Naupan(g) chhiat thlak lutuk.


" Over viau zel suh Remruatsang " Ka ti nghal hlak. Kar hmasa chhung zawng khan hritlang khawsikin a bet ve reng a, na lutuk ni lo mah se ngaihtuah ana ve duh viau.



" Min duat turin rawn zin la ka dam nghal var var " Nghal zet hian a ti a. Lâi duh tawh bik miahlo in "Min lo hruai la " Tiin ka chhaih let a, a thawng deuh nge " Eng maw han sawi nawn leh lawk teh " a rawn ti hluai, chu veleh "Eng maw i sawi? I tawng ka hre theilo "tia tawng deuh lung lung chungin line ka cut daih a, a rawn call leh nghal zat nangin ka ring quit tir thak, a lungawilo awmdan tur vel ngaihtuahin keimahin ka nui ka nui mai.


Zirtawpni tuka tukthuan kan kil laiin Ateteii pa, Pa Mama hnen atangin call ka dawng ta hlawl a. A pawimawh ka rin avangin ka puar deuh tawh tho bawk nen ka kham zui nghal sawk sawk. Ka rin ang ngeiin Ateteii leh U Rammuana chungchangah ka hming a rik ve miau avangin thil awmzia min rawn zawh tuma min rawn call a lo ni.


Rammuanawma hian a suahsual rah hi seng ngei se ka duh avangin zep nei hauhlo in engkim ka hrilh ta vek a, video hmanga min vau dan leh Ateteiin min puih a tumna lama hetiang thleng ta kan nih ka rin thu te ka sawi laite chuan thawk ala leh hawlh thin.



" Pa Mam, a zialo ka tiin ka inthiamlo tak zet, lo ngen miahlo tur ka nia. Hetiang hi kan thlenglo mai tur " Tiin thupha ka chawi luam a,



" E.. Duhte.. Inthiamlo duh reng reng suh, hei, Bawihteii pawh a tha chho zel ania. Kan misual tenawma chuan a sual man a hmu ngei ang, chutihrualin nang pawh Aizawl lamah i rawn phei angai thut maithei ania aw " A rawn tih chuan puih theihna ka neih phawt chuan puih ka inhuam thua chhangin kan inbiakna kan titawp zui a. Rammuanawman a sual man a hmuhna tur anih phawt chuan eng hunah pawh Aizawl phei turin ka inpeih reng.



Adina hnenah pawh thil awmzia sawiin Aizawl phei thut angaih mai theih thu te chu ka hrilh ve a, "Puih theihna i neih phawt chuan i phei dawn nia " A tih ve tak kha.


Pathianni-ah chuan Pa Mama chuan min rawn call lehin a tuk thawhtanni lama ka phei theih leh phei theih loh min rawn zawt a, "ilo phei theih dawn chuan fare pawh kan lo tum vek ang" A ti tak nâ in chu erawh ngai ka tilo khawp. Adina ka rawn a, " Tihfel hma kha a tha alawm, ticket kan ngaihtuah nghal ang e" A lo ti then a, thawhtannia Aizawl phei tumin ticket kan cut chawp nghal chuk chuk mai.


Police station-ah te kal thut angaih mai theih avangin naupang tello in keimahin ka kal dawn a, Nu Mapuii te va phone-in Aizawl ka phei tur thu te chu ka va hrilh a, an dan ngaiin an lo inhanwg leh khawp mai. Remruata erawh surprise ve hrim hrim ka duh avangin engmah ka hrilh duhlo a, Duhsaki hnenah pawh Remruata lo hrilh lo turin ka chah ngun viau.



Naupang hnenah fel taka lo awm turin ka chah mawlh mawlh a, ka cham chen tur ka hrelo nângin ni hnih aia rei chu a nih ka ringlo ve tawp. Ni hnih khat chauh ni mah se aputea hoa an awm tur erawh ngaihtuah an na duh dawn riau. Mipa phei hi chu fel viau thin mah se ngaih sam na chin hi an nei thin si.



Zing dar 6:30-ah kan khua atangin kan chhuak a, Thenzawl thlen hma zawng chu a sawhin kan sawt phei a ni ringawt.Kawng chhiat zia chu hrehawm tak a ni. Thenzawlah tukthuan kan ei hnuah kan tlan zawm leh a, Aizawl lampang kawng chu a tha leh viau lawi si.



Chawhnu herah Aizawl kan lut a, counter-ah Bawihpuiin min lo nghak thlap a, min hmuh rualin min kuah nghal chung chung mai. " Awii.. Bawihtea te i rawn hruai tel ve thei lo chu ka van ngei tak, ka hmuh chak tawh nen " A ti nghal siam siam a, kan inhmuh lohna a rei ve leh hlek tawh nen kan inhmuh hnuhnun ber aiin a lo thau belh hlek. Mawilo khawp erawh a ni lo, a ti lang zahawm sauh zawkin ka hria.



" Remruata chu engtik nge i hrilh ang? An In ah kan va surprise dawn mi? " Amah bawk chuan a ti leh a, an In a va kal kher chu ka ngam lo nasa.



" Zanah ka hrilh ang ka ti deuh a, naktuk pawh ni zawk mai thei. Takin tlaiah emaw zanah Ateteii kan turin min kalpui hman angem? " Tiin ka zawt a.


" Tun tlaiah tut tut chuan i peih dawn mi? Motor i chuang chau awm si. Mahse, zanah hla kan zir dawn a, nangmaha i kal hreh loh chuan thlah chu ka thlah thei tho che a,nge kalpui kher i duh? " Atih chuan " Min thlah theih tho dawn chuan zanina kal nghal chu ka duh deuh a " Ka ti a.



" Anih chuan a tha tho lawm, tunah chuan haw phawt ang. Ka nu'n a nghakhlel tawh lutuk che " Tih leh scooty a lawn a rual a, a nui zui hak hak.


In kan thlen rualin Adina phone-in chanchin ka hrilh a, naupang an rawn rak teng tung mai. Zanriah eikham hnu lawkah Damdawi In lam panin kan inphur chhuak a, a bialpa neih thar chanchin a sawi pah mawlh mawlh a, motor ri beng chheng nen a tawng ring leng lawng viau. Haw lam erawh an ban ala hun dawn loh avangin taxi-a emaw a ka haw mai angai dawn a ni.



Ateteii awmna ward ka thlen chuan kawngka atangin ka thli thlai hmasa tê tê a, khum piah berah an lo awm chu niin.Khumah thu mu deuh hian a lo awm a, a mit a chhing tlat a a muhil nge ka hre lo. A bulah anu a thu ve ran bawk. Pan pheiin an bul ka thlen rual chuan "Nu, Hming eng nge in an? " Tiin ka va bia a, a rawn hawi chhuak nghal thuai.




" Ehe! Duhteii teh hlawl chu.. Ka beisei loh deuha ka hmuh che chu! lo thu rawh ilo thlenna a rei tawh em? " Ti sawk sawkin a rawn ding chhuak a, min han chibai leh rih. Eitur ka ken sak ka pek chuan " Awii ava lawmawm leh zel ve, rawn keng duh kher mah ta che " A ti leh siam siam a, ani hi chu nu nelawm tak kha a ni reng a ni.



" Au Duh, i lokal elo? " Ateteii tawng riah chuan ka en vat a, a che tur chu Nu Hmingi chuan a lo pui vat a, na a nei nge mawni a ner deuh sak sak mai.



" Eng nge i an tawh? I tha zel em? " Ka tih chuan nui tawi tak chung hian " Ka tha tawh lutuk, Damdawi In pawh kan chhuahsan thei tep tawh " A ti a, U Rammuanan a hnekna nge a insawhna ka hrelo a hmai chu a duk kual deuh raih mai.



Naupang chanchinte sawia kan titi luam hnu chuan Nu Hmingi chuan "Duhte, i awm tho bawk a, ka va intifai lawk ang e aw " Tiin bathroom lam min luhsan a, chu veleh Duhteii chu thut hnaih deuhin a nu awmlaia zawh nuam ka tih chiah loh thil thlen dan chu ka zawt a.



Tihian a sawi ta a, " Khami ni khan a rawn rui haw lutuk a, sitting room-ah khan a mu a, a chatthla zuia ka hriat avangin room-ah ka lut a,E...chuan chumi hmain a file password kha ka hrechhuak tawh a, mahse, hun remchang mai ka hmu theilo a. Tunlai chu college-ah a ken loh leh amah In-ah a awm zel avang hian. Chuan khami ni khan a remchangah la in room-ah ka lut a. Enteh maw au Duh, khami file-ah khan video bawlhhlawh leh hmeichhe thlalak sexy deuh hlir hlir a awm maw le! Video kha chu ka en miahlo a, amak lutuk thlalak ho erawh chu kan hmelhriatte pawh an awm nuk mai. Tute nge an nih erawh min zawt kher lo la. Chuan, 'Ka nupui' tia save pakhat hi a awm a, i sawi kha chu chu anih ka ring a. Delete ka tum lai takin Au Muanan min rawn phawk a, mouse ah kha chuan ka click hman ngei chuan ka hria, mahse, ka click fuh em ka hre lo. Khatia video delete ka lo tum min man chhuak kha a zu rui nen a thinrim lutuk a, kut min thlak zui nghalin tawngkam chhe pui puiin min ankhum a, ka hmaite hi min hnekna anih hi. Chuan min nam tlukna lamah ka ban rek hi room-a dawhkanah khan ka hlap a, a ruh hi a khi an tia. A rui bawk si nen khan pawisak a neilo a ni berin ka hria, ka tluk tawh hnua chhuata ka mu te kha min chhir zui leh bawk a, ka hlauhthawn lutuk na lamah khan aniang nikhua ka hrelo zui a, ka harh leh chuan amah pawh a lo awm tawhlo. " A sawi chhung zawng chuan ka tang teuh mai. A In atanga min hnawhchhuah ni a a chet dante kha ka mitthlaah a rawn lang uar uar a, ani tleirawl mai, chutah pawh anu leh pate fanu duat hauh pawh an hauh phallohin chuti taka kut a han tuar chu a thlaphang ngawtin ka ring.



" A pawi ka ti tih bak sawi tur pawh ka hre lo, a pawi ka ti tak zet. " Ka tih chuan " I thiam loh a ni miahlo ania, ka duhthlannaa puih thlang che ka nih kha. Bakah, U Rammuanan a sual man a hmuh phah dawn hi. Apa chuan a tlem berah kum 2 chu a tang hrim hrim ang a tia " A ti sap sap a.



" I nuteii(Rammuana nu) ten engtin nge an tih? An lokal ve tawh em? " Ka lo ti thung.



" U Thanteii leh Patea chu an rawn kal tawh, nuteii chu a lo la kal ve lo. Hmanniah anu nen phone atangin an inhau hrep mai. Anu hi a lung a dam thei thlawtlo " A ti leh mai a. Ateteii nu leh u Rammuana nu hi thisen zawm unau an ni a, Ateteii nu hi a upa zawk.Ateteii hi an tar lam fa, tlai khaw hnuaa an neih leh a nih avangin an unauah a naupang fal nalh a. A u te ho chuan hna an nei vek tawh.



Inkan hun a tawp avangin inhmu leh tura inthlah chungin kan in mangthaa nu Hmingin ground floor thleng min thlah a, dar 8:30 ala rilo deuh a, taxi service ala tam dawn a hawna tur chu a lungngaihthlak lem loh. In ka thlen hunah law law Remruata pawh Aizawl ka awm thu hrilh ka tum. Zanriah eikhama kan inbiak khan ka buai thu leh Zawmi te ina leng tur anga insawiin mut dawna ka biak tur thu ka hrilh ringawt kha a nia.



Rei vakloah Taxi pawh ka hmu thuai a, haw kawngah chuan ka ngaihtuahna a kal thui ngei mai. Mihring lo inthlak danglam nasat theih zia ka ti dawn nge kan zia kan lo thup theih zia hi ka ti zawk dawn ni. U Rammuana atang hian a lang chiang hle in ka hria. Ka hriat thin Rammuana kha chu tunah hian hmuh tur a awm tawhlo. A mize tha lam char char min hmuh tir a, mahse, chû a mize tha zawk phenah chuan a mize pakhat zawk ramhuai zia hi a lo biru char char reng si.



In ka thlen chuan Nu Mapuii te pawh an lo la meng a, ka kalna chanchin min lo zawt luam. Nu Hming khan naktuk lamah police ho in ka statement an lak tur thu kha min hrilh tak a, mahse khawiah nge tih a sawi miah lo.



Remruata nen kan inbiak chuan a hritlang thar leh nge a aw chu a ni deuh tuak a, amah ka zawhin "I lo zin loh chuan ka dam dawnlo ka tih kha " A ti tlat leh nghal.



" Naupang chhia.. " Ka ti sap a, a nui deuh hak ri chu ka hre thei. Ka rilrua thil lo lut thut vangin "Ka dah lawk dawn, ka lo video call ang che" Ka ti a, line cut in ka video call zui zat.



A hmel ka hmuh rualin " I khua sik leh em ni? " Ka ti nghal hluai. A sam a thur siang a, a mitmeng a sen ram bawk. A chauh hmel reuh lutuk.


" Tlaiah khan a sik leh a " A ti chu ka chek tlak tlak.



" Thil ka hmuh ang che" tiin khum atangin ka tho zui a, tukverh lam panin Aizawl khawpui eng iar chu la kualin " Khaw nge ka awm? Ring rawh le " Ka ti chu phone a rawn bih hnai ngang mai.



" Khaw nge i awm? In khua chu a nilo phawt a... Khatianga In tamna tur chu.. Aizawlah i awm tih min hrilh hauh suh " A ti zui hluai a, ka hmel tilangin "Surprise" Ka ti zawi sap. Kei ka nuih var var laiin ani erawh a phawk deuh hra mai.


Harhchhuak thut ni awm hrim hian "Khaw nge i awm? Duhsaki te Inah a ni em? Ka lokal dawn " Tiin a tho zui niin ka hria, video call-ah chuan ceiling chiah alang a, amah lah chu a ri zui rawk rawk. " A tlai tawh lokal lo ang, i dam that loh kha naktukah kan inhmu dawn nia " Ka ti chu chhanna ka dawn loh avangin " Remruat.. Ila awm em? Lokal suh aw.. I damloh zual phah ang. Naktukah kan inhmu dawn nia " Ka ti leh lang lang.
Hmuh chu ka hmu chak lutuk, mahse, zan a tlai tawh a. Tlaiah lawk pawh a khuasik leh bawk si nen a damloh zual phah ang tih ka hlau.



Phone-ah chuan a hmel rawn langin "Reilote hnuah kan inhmu dawn nia " A nui zui suk a,phone a off zui nghal daih. Rawn kal ngei chu a tum anih hmel e.



Rawn thlen nan hun a rawn hmang rei dawnlo tih ka hriat avangin in ha lum sawk sawkin pawn lamah lo nghah tumin ka chhuak zui a, zan dar 10 dawn a inchhung lum atanga chhuah chuan a vawt deuh suk mai. Minute 5 vel ka din hnuah chuan ka bulah motor a rawn ding thi ta duk a, hawichhuakin driver seat a thu pa chu ka melh zui nghal ram ram. A mit ko min lo san khum zauh duh chauh.



Motor atanga rawn chhukin ka hma zawnah tak a rawn ding a, " I Aizawl rawn kal tur pawh min hrilh lo maw? " A ti deuh hmuk. A âw ka chhuak erawh thinrim nilo in titau rawng a kai deuh.



" Ka hrilh che in ka surprise thei dawn che em ni? " Nui var var chungin ka chhang a, a phun zui hluka a sawi tak erawh ka hre thei lo. Nghet zetin min kuah bet zui a, keipawn ka lo kuah let ve vat. Chutia a taksa ngei ka tawk leh thei chu ka thla a muangin ka ngai thar veng veng mai. Tawng miah silo in nghet zeta inkuah chung chuan kan inngaih thu kan inhrilh tawn mawlh mawlh ni berin ka hria.




Amah zawk chu in la hrang hmasain " A vawt emai, motor-ah lut ang " Ti supin motor lam panin min kai a, a hnung seat hawngin a lut hmasa a,lut ve a a bula thut mai ka tum chu a mal chungah min pawt thuin " Tah khan thu rawh, ka lam lo hawi la " A ti a, ka ner deuh nang nâ in min tilui leh tlat dawn tih ka hriat vangin ka insiamrem zui ve nghal mai a, inhmatawnin kan thu ta ran mai.



" Min lo kuah la " A tih sup rualin a nghawngah ka kut pahnih ka suih zawm thuai a,ani pawhin ka tih ang chiahin ka kawngah a kut pahnih a suih zawm ve nghal. Kan inmelh hnai set sawt viau.



" Eng vanga i Aizawl lokal tur chu min hrilh lo maw inih? " A tih rualin " Ka surprise dawn che ka tih kha, bakah vawiinah ka lo thleng chiah. Chuan naktuka ka lo hrilh zawklo che hi ka inchhir " Ka ti nang nang.



" Eng vangin" Pakhat lah chuan a lo ti hmuk. A chhan a hre ve reng sia.



" Zan reiah i rawn chhuak a, i damloh zual phah ang a sin. Lo hrilh miah loh tur che a nia " Ka tih laia ka mawng a lo tham zeuh avang chuan ka thu ngil nghal auh a. Ka melh ram ram laiin nuihza insum tih hriat taka min melh chungin " Hremna anih kha, a dang pawh ka la pe dawn che. Hmannia ka call i hang-up man leh i rawn kal tur min hrilh loh vangin " A ti sup sup.



" A fair lo " Ka ti hluk chu ka tukhumah a kut dahin alamah min nem hnaia min fawp zui nghal hmiah. A tirah chuan dam dapin a che a, a duh thawh chho tial tial. A inlakhran dawnah ka hmui a seh tel zeuh chu ka insum hmanlo, ka rak deuh that a a nui zui hawk hawk.




Zanah ka dah thei thlawt thinlo ka muthlu zel mai🥴vawikhata chapter full-a dah nghal phei chu angaihna a awm lo.Chapter full tur chuan ni kar danah dah zel angai dawn si a, tihian zantin(Tuk tin a ni zawk mah maithei ) dah kan tum ziah mai zawk dawn nia. Morning vek u


Show post links
Top

[Ngaia]

REMRUATSANGA
Chapter - 20



" A changtunu lo phei chuan a changtupa pawh kan hmu ve nawlh mai alawm " Remruata rawn lut mek chu Bawihpuiin a lo fiam thuai a, Nu Mapuii te an awm ve reng bawk nen ka lâi lutuk chu ka biang a sa hat hat thei nia.



" Damlo kan nachang pawh hre hleilo " Pakhatin a lo ti hluk chu Bawihpuii a ner nang nang a, Nu Mapuiin an sirah a lo nuih ru char char.



" Rawn kan che ka tum reng... Ka tum ni takin ka hmanlo zel alawm " A ti nawi niai a, "I hman loh ni takah i tum zel vang a nih chu " Remruatan a lo ti leh.



" Ninawm, i tawngthei ropui si ka hnial peih lo che. I dam loh leh hunah i hne hlui khawpin ka rawn kan dawn che nia " A ti leh tan tan chu " Dam lo tawh suh in tih chu awmlo maw? I dam loh leh hunah te itih " Pakhatin a lo ti khauh. A chhang dang hneh lutuk chu ka nuih a za viau.



" Fiam fiam teh suh, i ti tap leh ringawt ang " Nui huah huah chungin Nu Mapuii a lo inrawlh a. Remruata pawh a kiai suk suk mai.



" Chuan, i zia deuh tawh em ni? " Atih zawm leh zat a, " Ka hritlang hi ala reh fel chiahlo tih mai loh chu ka dam tawh a ni mai " Remruatan a tih chuan "nimin tlaiah pawh ila khua sik reng sia " Ka lo ti rilru hmanhmawh.


Rei awm tawhlo in Damdawi In lam pan turin kan inzui chhuak a, " Keimah pawhin ka kal thei tho sia, i lokal ve kher duh a, i damloh zual phah chuan nuam ka ti dawn miahlo ania " Kal pah chuan ka ti mawlh mawlh. Nizanah vawiin lam ka hun hman dan tur leh ka phei chhan vel te ka hrilh khan " Helam i awm chhung chu ka bulah i awm deuh chawt ang" A ti a, a fiamthu anih ka ring a;mahse, hei a ti tak tak dawn a ang dawn riau.



" Ka damloh zual leh i cham rei deuh anga a nimai a " A ti liam puat chu ka melh zui ram ram a a kiai suk duh chauh.



Damdawi In kan thlen chuan Pa Maman min lo be nghal var a, ka phei thei chu a lawm thu te min hrilh luam. Ateteii chuan Remruata nen min hmu chu mak a ti tih a hmelah ka hmu thei. U Rammuana leh a chhungte tawngkam vel atangin Remruata hi Bawihpuia te pa a ni tih a hre tawh em chu ka hre lo a, lo hre ta pawh ni se kan inkar thu hi a hre dawnlo chiang a mak a ti pawh chu a awm viau.



Darkar chanve vel kan awm tawh mai thei tihah chuan Police ho an rawn lang ta tham tham. Hmannia kan inbiakna kha Pa Mama khan lo record-in tukin lam khan police-ah a thehlut chiah a, chumi chungchang thua kei leh Ateteii thu min rawn zawh fiah tura rawn kal an ni. Ateteii min hrilh danin FIR thehluh anih hlim khan u Rammuana chu police lamin an la nghal a, ka hming pawh a ri ve ngei. Mahse, keimah vanga thleng angin tuman police bulah chuan tawngkam an lo neilo a ni awm a, chuvanga police lam pawhin min ko lo an ni. Tunah kan phone call record avangin ka tel ve lo thei ta lo.



Thu min zawh kar lakah pawh chuan Ateteii chu an zawt ve zeuh zeuh bawk a, kan bula awm ve reng leh u Rammuana nena kan inkar hrechiangtu a ni bawk a, kan inthen chhan te leh hnawhchhuah ka nih ni a ka chunga u Rammuana chet dante thleng chuan loh theih loha sawi chhuah a ni ta vek a. Thil thar sawichhuah anih leh takah chuan nimin lawka thleng ang maiin ka mitthlaah ka hmu zut zut a, khami ni a ka mangan zia leh naupang ho thla bar hmel rawn inlar te avang chuan ka insehruh tawlh tawlh. Remruatan ka kut a rawn hum takah chuan hawi chhuakin ka en a, tawngkain sawilo mah se a mitmeng ringawt pawh chuan thlamuanna nasa tak min pe.



An duhtawk hnuah an kal leh a tawp a, engtin nge hma an lak zui zel dawn ka hre lo. Rammuanawman hremna a hmuh phawt chuan ka lawm a ni mai, thlamuang takin ka awm thei tawh bawk ang a.



" Tunkar chu cham rih mai la " Atih chuan ka nui ringawt, Mampuii te in lam kan pan mek a, naute thar en tura kal ka ni.



" Nui ringawt lo khan min chhang la " Amah bawkin a rawn tih leh takah chuan " I fate i ngaihtuahlo em ni? " Nui hak hak chung hian ka chhang a.



" Hetah rawn awm phei leh tawh mai rawh u " Chu erawh a thutak ta viau. A rilru tur hi a zawng zawng chuan ka hriatthiam puilo nâ in tlem ang a zawng chu ka hrethiam pha ve in ka hria. Nupa la nilo mah ila karah fa an awm tawh a, a hmuh leh khawih phaka a fate an awmlo ringawt pawh hringtu tan chuan a hrehawm ang, chutah kei ka lo ni ve bawk nen. Khaw kar kawng a thui tham avangin inhmuh reng theih a ni lo a, phone atangin inbiain inhmu thei reng mah ila hmaichhan ngeia inhmuh nen chuan a inang thei lo.


"Keipawn ka chak " Ka ti sep.


"Anih chuan lo phei rawh u, engkim ka ngaihtuah ang. Hetiang reng hi chu ka ning tawh, palai rawn tirh ka tum lahin min hnial zel bawk si. " A ti zui hluk hluk.


"Chutiang ngawt a ni thei biklo alawm, Adina amah chauhin a awm dawn asin. Bakah kan khaw lamah naupangin school an kal bawk nen an school kalna thlak sak reng chi a nilo alawm " A dam thei ang berin ka sawi a, tawng sual ka hlau viau.



" Anih chuan palai ka rawn tir dawn " Thawk ka la ta halh, engtin nge maw ka hrilhfiah dawn ni?



" Remruat, i rilru tur chu ka hrethiam alawm. Mahse, pasal nei thei ka ni rih lo " Ka tih lai mekin " Min neih hi i tum miahlo zawk niin ka hria "a lo ti hmuk chu ka en dawrh. Chutiang chu a ni miah lo.



" Chutiang a nilo, a hma pawhin ka sawi tawh kha, hmanni lawkah ka pa a boral a. Kum tal a vei hma loh chuan pasal neih ka tum lo ka tih kha, mi hmuhah a mawi pawh a mawi dawnlo. Keimahni kan inzirchiang pah bawk ang a, ka inpeih hun chu min nghak thei mailo em ni? " Tiin ka zawt a,



" I tidik alawm, ka nghak ang che. " A ti ta sup chu ka hahdam huai. Mahse a hmel landan la dik chiahlo deuha ka hriat avangin "Chuan, engkim a tha em? Ka tih awmzia chu i landanah khan i lungawi chiah loh hmel deuh " Ka ti leh kher. Motor a ti ding zui a, a chhanna nghakin ka en reng. Chutah ka lam rawn hawiin a kutin ka sam tla hniang chu ka bengah a rawn zep a, ka lo melh kiau chu min nuih suk chungin ka chalah a rawn fawp a. A inlakhran hnuah " Ka tihpalh, engkim a tha vek.Ka thlakhlelh em vang cheu ah ngai rawh. Ka nghak thei che alawm, i inpeih veleh kan innei nghal ang. Midang i melh a thianglo tihna anih chu " Ka chalah na lo tein a tauh zui bap chu nui hak chungin ka bu zui nghat nghat.



Mampuiin min hmuh chuan min lo lawm thiam leh viau.An pa hnaah a kal avangin an nufa hoin an lo awm a, Puipuii erawh a muhil thung. Nau ka enna ka pe te chu lawmthu min hrilh hlut mai. Mipa a nei a, thla khat ala tlinglo deuh hlek. Fa an nei thiam ka tikhawp mai. Hmanah khan "Fa ka neih hunah chuan fa hmasa zawkah hmeichhia nei ila, a dawtah mipa" Tiin ka suangtuah ve thin. Tun thleng hian fanu ka awhna ala reh lo, ka awhna chhan em em pawh hrelo hian ka awt ve tawp.Ka fapa te hi ka duhlo e tihna a ni hauhlo thung. Anni te hi chu ka khawvel an ni a, an awmlo ang tih ka hlau em em bawk.




" Engtikah nge i haw leh ang? Zanin tlai chu zanriah lo ei la " Tiin min sawm a, ka chhan hmain Remruatan " Kan inah a ei dawn " A lo ti then.



" Euu... Monu interview tur maw? " Mampuii chuan min fiam a, " A ti ve mai mai anih kha " Ka lo ti thung.



" Ka ti mai mai miah lo, ka nu leh pa ten an ring che. " A lo ti leh khauh chu ka en a, a fiamthu emaw ka tih kha a lo thutak ang reng bawk si. Engmah min hrilh miah si lo.


" Leh ringawt a, ka duh teuhlo mai " Ka ti hluai chu Mampuii a lo nui hak.


" Ka nu hauh i duh loh chuan i lokal ngei ngei angai " Pakhata lah chuan a ti ta bur leh nghal. Kan khuaa an lokal kha chuan kan inbe ve luam nangin a hrana an ina chaw ei tura va kal kher chu'h... Remruata bialnu angin a nih hmel dawn bawk si.



" Va kal rawh a zahthlak loh, bakah ka nu leh pa ka fak thil nilo se zak hmanin an siam miahlo ang che tih ka sawi ngam. A bialnu hluite ho pawh an ngam pa thei lutuk " A sawi tawp lamah chuan nui var var chungin Remruata a melh ralh.



" Zothanpui dawt phuah belh kher kha a tullo ania " Tih leh a lu a nem kun a rual a, "I mawl thei lutuk, hnute ka pek hi " Mampuiin a lo ti teu hlar.



" Ehe, Bawihte ilo tho tawh elo? " A tih rualin a hawina lam ka en a, room kawngkhar bulah thur bamin Puipuii a lo ding reng. Mampuiin naute a pawn avangin ka va ngaihven vata min lo duh ve mai bawk. A thawh phan vang nge ka pawm ang angin a thu ngawi hle hle a, a zun a chhuak em tih ka zawh lahin a lu a thing nar nar mai.



" A u te hi angai ve aniang, a khat tawkin Mala te an lo zin rei (har tih tur, ka ziak sual lui) tawh e hi a ti leh nulh zel " Mampuii chuan a ti siam siam a, A u te rual ni si hi Puipuii hian a û duh thaklo. An hming hian a ko vei nalh zel, a lawmawm letling phian zawk.



" An pa hi min chhun fuh khawp a, keimah ang chiahin zûn an ngah. Kan ngaihawm pafa ania" Remruatan a lo ti leh hmanhmawh chu a ner nasa ngang mai. Kan awm chhung zawng chuan an unau chu an inchhaih buai tluan zak a ni thaw thang. Chu chuan an unau inpawh zia leh a inzawmna that zia a tilang ka ti.



In a kan let chuan Nu Mapuii office alo bang tawh a, kan kalna chanchin te chu ka hrilh ve luam. Ani pawhin " Inchhungkhat anni bawk si a, a tu a ve ve tan pawh a nuamlo viau ang. Mahse, misual hi chu kan chhung khat an nih vang ngawta enliam mai hi a tha lo. Thil an tisual anih chuan hremna pawh an hmu tur a ni " A ti a, a dik ka ti viau. Chhungkaw mi leh sa an nih avanga kan inngaihdam zel hian sual huang kan zauh bel zel thin.



Nu Mapuii bulah chuan an in lamah zanriah ka ei tur thu chu a sawi leh. Ka zak asin maw le. An in lam kan pan lai te pawh chuan ka huphurh zia mawlh ka la sawi.Mahse, kan thleng chu Mampuii sawi ang deuh tak tak kha Remruata nu zawk chuan min be seuh seuh reng a,apa pawhin min be khat tawk reng tho. Remruata nena kan inkar min zawt miahlo mah se an hai biklo tih ka hria. Ka huphurh ang aiin nuam ka ti zui ta phian.



A tukah tih tur em em ka neih tawh loh avangin Remruatan min thlah phei a, ala dam kawr bawk si nen angailo tiin ka hnial nasa viau nangin "Lunglei lam branch-ah tihtur ka nei hrim hrim " A ti ve tlat. Aizawl atangin kan chhuah hma vak loh bakah kan tlan chak lem lo bawk nen thim thet thetah khua kan lut chauh a, keimah chauh nilo a an pa an hmu tel ve chu naupang an lawm nasa mai. Eng nge kan hawn tih min zawtin an rak teng tung a, tlem viau e tilo chuan kan ri chel chul mai.



" I chau em?Khawsik tur awm angin i awm miahlo tak tak maw? " Ka zawt zing tawh a ti bawk aniang a nui nghal hawk hawk. Thutphahah inngheng rialin kan thu a, naupang an muhil tawh a, Adina lah a leng daih bawk.



" Naktukah motor i khalh leh dawn bawk si, mu tawh rawh i chau lutuk ang " Tia ka awm hrang deuh hluai chu min pawt let leh rang khawp. " Awm mai mai rawh, ka la ngai rih che " A ti zui sup.


"Damdawi ei i hreh nen damloh leh i hlau lo em ni? " A nui suk a, anu khan niminah khan a sawi a damdawi tui in/ei phei chu thih hrehin a hreh tih. Damdawi a ei that duh loh vang a ni a hritlang pawh a reh hleih theih miah loh.



"Damdawi pawh ei ila ka dam dawn chuanglo" A ti chu " Eng vangin maw? " Ka lo ti thuai.


" Lunglenna hi damdawiin min hnem thei hlei nem " Hepa hi a thutak emaw ka tia min fiam leh tawh.


" I chhe lutuk " Ka ti chiam ringawt.Natna eng nge maw tak a nei emaw tia ka hlauhthawn ruk hman nen.



December thla kan chuangkai chho a, naupang pawhin school an chawl tawh.Krismas boruak a intham chho tan a ni bawk a, mitin mahni tawkah kan inbuatsaih nasa mup mup viau. Keini chhung pawh kan theihtawpin kan inbuatsaih ve a, naupangin in chei an chak tlat avangin Aizawl lam ami Bawihpuii ka chah a, zan lamah chuan kan êng de mawi chhei chhuai zel.



Zan khat Peka rawn lengin " Hnih li zan chu ar kan rawn kang dawn ania " a tih chuan " A tullo, in bialnu te nen kang rawh u. Min rawn tibuai reng reng suh u " Ka lo ti hlak hlak a, kan innel tawh bawk a kan infiam na thei fak fak viau. Huat enah hian a tu amah mah hian kan en hlei lo a.



" Hmeichhe kan pui chu a buaithlak kan peihlo, a buai zawng zawng kan tum vek a, ei leh sil chiah an thiam a. An heh thei si " A ti bul bul chu ka nuih a za ngang mai.



" Hmeichhia ve tho alawm ka nih "


" Nangte chu kan thianpa alawm inih, bakah Ar min puah pui thiam dawn a, ka thiamlo ti suh hmanniah pawh in Ar i sêr tih ka hria a nia " Ka chhan hma hma chuan a ti zuah zuah.



" Iva han chhe zeh zuah tak, kan pa i dil thiam leh thiam loh a ni mai " Nui sang chunga ka tih chuan min ei loh hmel fê hian " Tenawm reuh " A lo ti hluk.



" A phal chuan a rem tihna ni mai. A rem tih loh erawh chuan theih loh bur ang kha aw " Ka ti leh zel phei chu a ner nasa tawh lutuk.



" Kan rawn kal tho ang, mahni In a tih kan peihlo vek a hmun dang kan hre lo.Kan mamawh zawng zawng kan rawn intum vek ang a, a ei chiah i tum dawn nia " Ka rem tih loh hlauh zeta min tlawn ta titih chu ka nui chhuak ta hawk hawk.



" In kan zawhah zaikhawmnaa in kal dawn chuan ka phal ang " Ka tih lai mekin " Kal ang, kal ang. Kan kumtin dan alawm chung te chu, inau te ho hi khaw khat tlangval fel kan ni tih i hriat kha " A lo ti zat zat. A sawi dik lo hran miahlo, kohhranah pawh thalai fellowship tih velah zai hruaitu an ni thin a.Chhiat tawhni khuaah lah la naupang viau hlawm e ti lo hian anni thianho hming hi a tha lam zawnga ri tam pawl tak a ni thin.



Remruatan Aizawl lama naupang ho bazar pui turin min ti tak nain an unaua an damloh avangin a rem thei ta lo a,amah lo bazarin a lo lei vek a, an pi leh pute leisak nen krismas karin a rawn dah a, kan bula krismas hman a chak zia a sawi zauh chu ka sawi zui pui duh vak lo, sawi puiin sawmna aw ka chhak chhuak ila chu a rawn hmang leh duh tak tak ang. Tiang hunpui hi chu chhungkaw kima hman ngei hi a hlu bika ka hriat avangin a nu leh pa te nen hmang ngei se ka duhpui, tuman kan hma hun kan hre lawklo a a kum lehah chhungkaw kimin an hmang ho leh thei ang em tih pawh hriat a ni si lo.



Peka te thianho in hnih li zana kan In a Ar rawn kan an tum thu chu ka hrilh a, kan inkawm nel tih a hre ve bawk nen a ngaih kawih chu ka ring chuanglo nâ in han hrilh loh tawp chu nakinah a hriat leh tho si chuan buaina a awm palh thuaah ka inveng lawk a ni ber ang chu. Lehlamah mipa rual an ni bawk si nen, rawlthar rual an chhungte pawh ni silo te nen an bialnuten hnih li zanah Ar an kang ho tih an hriat chuan tu pa fa mah hi an lawm zawk zawk miahlo ang.



Remruata hnen atang chuan ka rin loh deuh chhanna ka hmu " Ka ring tawk che a, anni lakah chuan ngaihthat lohna ka nei miahlo bawk. Anni aiin min thlang tih ka hrechiang bawk a;mahse, anni rawlthar rual chuan zan rei an êm ngei ang a, naupang an awm si a, a chi dawn em ni? " A ti deuh duah. Min ringtawk tih a sawi chhuah fo hian keimahah hian thawk a awm thin.Mipa dang lakah heheu san lo tura pehhel deuh taka min hrilhna nimai zel hian ka hria. Tin, min rintawk zia a sawi fo hian keimah pawh hi alakah ka ngheh phah ka ti lo thei lo.



" Ka hre biklo le, anmahni thianho khan an In a tih an duhlo vek nen Peka khan min ngenngawl ve ang reuh lutuk a ka hnial hreh deuh hlek " Ka ti niah niah. Miin ngen ngawl deuh taka min ngen hi chuan han hnial hi ka thiam vak thin lo a, Peka pawh kha kan inngam tlaka khatiang khan ka chhang a ni mai a. Midang chu ni se khatiangin ka ti ngam teuh lo.



" An ngam tlak che a an dil che anih chuan lo phalloh tung chi a ni bawk silo a, thawm erawh dim deuh se. Naupang mutui lai an ti harh ka hriat vaih chuan min hmachhawn angai dawn tih hrilh la " A kiai zui suk suk chu " Kan intawnglo ang tih ka hlau " Ka tum loh deuhin ka tichhuak hlawl.



" A chhan sawi tel nghal ka phut " A rawn ti zawm zat chu ka lâi leh deuh si. Mahse, inti huaisen luiin "Hmanah chuan dream tam tak ka nei ve thin. Chutiang bawkin ka ngaihzawng emaw ka pasal tur atan pawh dream ka nei thin bawk " Chawl datin ka nui hak a, " Ka mipa dream thin ang zawng zawng chu nangmah hian inei vek. Mipa, innghahna tlak mai piah lamah chhungkaw hlutna hria, keimah min hrethiama engkim a min dawm thiamtu. Ho tê tê a thinrimna zawng reng thin mipa thikthu chhe tak nilo min ring tawk em emtu. Chutiang zawng zawng chu i nei vek " Ka ti sap sap a, ka sawi chhung zawngin ngunthlûk zetin min en a, a mitmenga lungawi hliah hliahna lang chhuak chu ka chhiar thei.



" Ka hmangaih ang chiah chein min hmangaih tihna a ni thei em? " A tawng zawi hle nâ in ka chhunglam nghawr nghing dawt tur khawpin a ring tawk hle thung. Chhanglo in ka ngawi rengreng, sawi tur ka hre mailo a tin ni.



" I rilru a insual buai tih ka hre mai.Min chhan kher ka phutlo ania.Kei ngei pawn ka chiang biklo; mahse, i laka ka rilru put hmang leh ka awmdan hi hmangaihna anih loh chuan hmangaihna nau tal aniang " A thil sawi tawp lampang chu ka nuih pui hak, ani pawh a then ve sak mai.



" Hmangaihna nau... Ka vawikhat hriatna " Ka tih chuan "Hmangaihna ni tep, ni pha chiah silo kha a ni mai " A lo ti.Thil hi a hre mak sak thei si.



" Hmangaihna nau chu lo upa vat vatin a û rawn tluk vat se ka ti " Nui seih chunga ka tih chuan fawh hlak ka hlawh.



Krismas tukah chuan inkhawm turin kan insiam sang sang a, ka nu leh ka pa ka ngai thar khawp mai.Kan chhungkaw kim thapa inkhawm ve in thla te han la ho ve thei ni ila a nawm dawn tehlul nen.



Hunpui a ni bawk a inkhawm pawh kan tha hnem khawp mai. Biak In chhungah kan lenglo hial. Thuhrilhtu lahin thuchah a sawi tha bawk a, mutthlu pawh kan awm mang lo.Inkhawm ban lam chuan Adinan tukin lamah "Biak In chhungah thla la ve reng reng ang u " a tih lawk tawh angin thla lak tumin ka fapa te nen chuan kan inzui phei tham tham a.Thla lak tum ve dang ho pawh an lo awm teuh mai. Zawmi leh a chhungkaw thar te pawh an lo awm ve, min hmuh rualin min lo hui zeuh a, a bula ka din rualin "Kan pahnihin la ve ang aw" A lo ti var a, kan la zel mai aniang chu.



" Taka, nizanah Peka te thian ho i kâwi khawm em ni? " Midang hriat hlau ni awm takin ka beng bulah min rawn zawt sâ sâ.


" Ka kâwi khawm em em pawh an ni lem lo, Ar rawn kan nan an hmang. Ti nge min zawh? " Ka lo ti ang he haw. Engtin nge maw hriat pawh a lo hriat ni ka hrilh miah si lo. Mahse, kan khua angah hi chuan cctv kal thei hi an tam khawp a, chung atangte pawh chuan a ni mai thei a ni.



" Â.. Biak In chhunga sawi chi loh emai nakinah kan lo peng hawng ang a ka hrilh dawn che nia " A ti leh lawi si, ka beng a ti vir ting a!


Thla lak tum ve an tam bawk a, kan nghak rei ngang mai.Naupangin an nin thu an sawi an sawi hnuah kan la ve thei hram a, kan zawh veleh kan nufa ho chuan kan inzui haw nghal nal nal. Adina erawh tihfel tur neuh neuh an nei a, a awm khaw tlai dawn thung.


Zawmi te nupa chu anmahni Zawmi te In lama an pen zawh hnuah an rawn peng ta ngei a, Zomuana erawh an thu deuh chiah tihin Biak In lamah an mamawh vangin an rawn phone a a chhuak zui leh nghal daih.



" Tukinah Zorinin a sawi a, a sawi ti ila min zawt a ni mah ang chu 'U Duhteii leh Remruata kha an inthen tawh mi? Nizanah pawh Peka te Ar kan puiah te a sawm ' a ti a, ilo sawm reng reng em ni? " A sawi danah Zorini thil sawi chu a awih vak biklo tih a chiang reng.


" Zorini chuan a hre thawi anih chu, ka sawm hlei nem " Ka lo ti mai a, ani lahin " Ka awih vaklo hrim hrim a sawi dan atang reng khan, 'Peka te nen chuan kan ho kan tum reng a, mahse U Duhteiin a sawm luih tlat avangin an hnial hrehin an kan pui ta daih a' te kha a tia. Nangmah hrechiang tu che tan chuan a thusawi kha a nuihzatthlak zawk " A ti thên bawk. Zorini chuan dawt chu a lo sawi darh leh vak tawh ang em tih ka ngaihtuah,a tawng chak ve ropui si. Tak tak emaw ti pawl kha an lo awm leh ngei ang a, nuthlawi zaktheilo thanin ka thang leh vak mai ang.



Ka hlauh ang ngeiin Zorini chuan a lo sawi tak tak a, chu pawh Peka min rawn hrilh a ni. Anmahni vanga ka thang mawilo chu thupha rawn chawiin a inthlahrun thu min rawn hrilh luam a, ngaihdam min rawn dil chu ka duh loh avangin " Tihsual i nei em ni? Engah nge i rawn chawi ve ringawt? " Ka lo ti let zêk a, a hamhaih nasa mai.



"Keimahni vangin dawtin an puh che sia, nuam ka tilo.Dik tak chuan Zorini te thianho khan min sawm a, 'hmeichhia kan kàn pui peih lo' kan tia, in Inah kan ti leh tho si kha an thik che ang a dawt an sawi kual ta vak aniang. Hauh an ngai a ni, a zahthlak e mai " A rawn ti deuh duah chu " Hauh kher pawh angai lo,thudik a nilo tih kan hre chiang a. Nakinah thudik te chu a lang leh mai ang" Tiin ka rilru dik takin ka lo chhang, mite hian dawt hian min puh fo mah se a tawpah thudik a lang leh nge nge thin tih hi ka ngaihdan a ni. A dik pawhin ka hria, chutih rualin kan dikna a lan chhuah theih nan tawngkam kan neih ve ngei ngei a tul hun hi chu a awm thung.


Show post links
Top

[Ngaia]

REMRUATSANGA
CHAPTER - 21

Ruaitheh tlai chuan Zawmi te nupa in leng ve ang u an tih tlat avangin ka fate leh anni nupa nen,lenna tur dang hre chuang ta lo chu, school tlang lamah kan chho ve mai mai a, an lo tam ngang mai. Hei hi chu kan khaw kumtin dan a ni thîn. School tlang hi a hmun a remin a zau bakah tlema a lo fianrial ve deuh bawk nen hian tiang nikhua hi chuan leng khaw thawng an tam thei khawp. Kumhlui thlah tlaiah pawh kan kal khawmna thin ber a ni.


Tih tur em em a awm chuan loh avangin kan kal kual vel mai mai a, ka rin loh deuh deuh ti ila hmeichhe naupang â rual lek tia an chhungten an la ngaih tur ho an ngaihzawng ni ngei turte nena lo terek fal ve ka hmu nual mai. A then phei chu ka hriatchian ve deuh te pawh an ni.Tunlai naupang ho ngaihzawng hre hma tawh lutuk hi chu amak ngawt mai.



Zawmin "Thla la ve reng reng ang u" atih avangin ka in dap a, ka phone ka kenglo tih ka hre chhuak chiah. Ruai theh tura kan kal dawn khan ka bag-ah khan ka khung ve reng khan ka hre sia.Remruata khan chaw in eikham hun awm velah ka lo bia ang che min ti leh nghal a, a rawn phone tawh hial mai thei a ni.


Thla kan lak mawlh mawlh laiin Peka te thian ho an rawn lang a, Zawmin kan vaia thla min laksak turin a lo tir nghal zat. An thla la tur lah chu an han bei uluk em em mai leh nghal a, pakhat hmeh chhung pawh rei tak a ni. Min insiamthat tir reng chu an tilui niin ka hria. Zawmi lahin "Lalduhsang, sipai ang maiin ding khawng luah zel mah ta che " Min lo ti ve sek bawk. Thla lak dawna han in pose kual vel hi ka zah zawng tak a ni tlat pek a, attention position a din deuh tawp bak ka thiam lo.



" U Duhte, in nufa thum khan kan thianho nen la ve ang u. U Zawm, lo hmet ve rawh " Puipuian a rawn ti. Ka peih tawhlo asin maw le aw! Bakah ka phone ka kenglo hian min ti hmanhmawh ru deuh tlat. Haw vat vat ka duh." Ti vat vat ru, ka ning tawh ania " Ka ti deuh hlar chu min nuih vur vur hlawm mai.



Rawn peng kawi tawhlo in Zawmi te an haw tlang a, naupang pahnih lah Pa Mafelan a lo ko peng daih bawk.In ka luh rualin thil dang tilo in ka phone ka zawng hmasa phawt. Khumah ka lo kalsan daih chu niin. Remruata min lo call na vawi 15 lai a awm chu ka inthiamlo kher mai. Khuma let thla tap chungin ka call back zui thuai.



"Phone i va la theilo ve " Rei pawh a ring hmaa min rawn chhan danah ka call back hun a chang char char emaw tih tur a ni.


"Ka phone In ah ka theihnghilh daih a" Inthiam lo ru tak hian ka chhang a, " I haw tlai chhan te " A rawn ti zawi sup.


" Tlangah kan leng kawi a, kan haw dawn tepah phone ka theihnghilh tih ka hre chiah. " Ka tih chuan " Kan maw ? Tu te nen " Tiin min rawn zawt let khauh


Min ringhlel ni awm hrima min zawh avang chuan "Zawmi te nupa leh keini nufa bak;mahse, tlangah chuan an awm teuh tho. Tlangval chhelo deuh deuhte pawh an awm " Ka ti fiam a, ka nui zui hak hak.


" Anih ka ring, ruaitheh zawha inbiak kan tum lawk i theihnghilh thak danah nuam iti hle a ni ang " Dam dapa a rawn tih chuan " Hmeltha hmuh te chu a nuam a lawm, an la awm teuhin ka hria ka han kal leh nghe nghe dawn maw ni " Ka lo ti leh.


" I duh a thu le " Tih leh phone off a rual ta daih chu ka hawi lawl lawl mai. A awmdan teh thut chuan min ti hamhaih a, a ngaihna ka hre lo hle.Eng nge maw awmzia ni dawn le? Min fiam anih ringin ka call back vat a, a ring quit thak takah chuan ka awm a nuam ta miah lo. Ala duhlo lui anih loh chuan minute khat pawh ala rallo kan inbiak atangin, pick up theih loh nachhan tur a awmlo hrim hrim.


Ani hi ka leng kawi kha a thinrim em maw ni dawn le? Nge ni a, ka fiamthu kha a la thu tak zawk? Mahse, ka nuih danah te khan ka fiamthu tih chu a hre ve tho chuan ka ring, bakah nidanga kan infiam thin dan tho a ni si. Remruatsang le! Ka rilru iva tibuai tak! A lak hma chu tiin ka call nawn char char a, a chang phei chuan a ring zawh hmain ka hmet tawp a, ka call tha leh thin. Mahse, ka call pakhat mah zuk chhang miahlo chuan!



A thinrim chhan tur awm ang ka ngaihtuahin khati zat min rawn call na ka chhan theih loh vang leh ka len kawi vang kha anih ka ring ber. A bak puh tur dang a awm lo. Chutihrualin ka phone ka theihnghilh thu ka hrilh vek a, theihnghilh lui ka ni lo a, han thinrimna chhan tur vak awmin ka hre bawk si lo. A chhan hre tur a ka phone a la duhlo chu a che naupang chhia ka tiin a tullo ka ti viau.


Min be peihlo na ná na chu tiin ka call zui duh ta rih biklo, min biak peih hunah kan sawifel tawh ang a ni mai.Ka rilru erawh a nuamlo hle thung.


Naupangin zaikhawm an chak ve tlat avangin zaikhawm tura kan insiam te chu ka phur fahranlo khawp mai. Ka kal pui loh chuan zan a ni nen ka ngaihtuah tho bawk si. Dar 7 velah zaikhawmna hmun kan thleng a, an lo zai tui mup mup tawh viau. Thutna awl lo awmah thuthmun kan rem ve thuai a, midang tui tak taka an zai a, an lam mup mup lai pawhin Remruatsanga vangin ka awm a nuam thei meuhlo. A khat tawkin ka bag a ka phone chu ka zuk bih ru leh zauh zauh thin.


"Anu, ka lam ve chak e.. " Min rawn nek tâlh tâlh chunga Hliman atih chuan ka nui deuh hak. Lam tual lam ka hawi a, a thianpa ka va hmuh chuan a lam chak chhan ka hre mai. Ani hi chu hruai sual awl chi, thunun nuam bawk si kan tih ang chi kha a ni a, a thiante leh a hmelhriat te tih ang hi chu tih ve hi a chak tlat zel.


" Va lam ve la " Ka tih chuan " Ka zak a" A ti lawi bawk si.


" A zahthlak loh Mika te pawh an lam saw, i nau nen khan va lam ve ula " Ka tih laiin "Nangman min lampui la" A ti ta khauh. Chhan mai dan tur ka hre lo. A chhan chu ka piantirh ata vawikhat mah ka la lam ngai lo miau. Kan naupan laiin ka pa avangin kohhranah kan tel tam ngailo a ka tleirawl chhuah hnuah lah hmun dang dangah ka awm a, ka inkhawm ngai manglo tih theih a ni. Nau ka pai zui bawk nen lam chu sawi loh kohhranah hrim hrim hian ka tel tamlo khawp.


Adina erawh hi chu a tel tam a, thalaiah te pawh a inhmang viau. Ka pa pawh kha a hun tawp lamah kha chuan Kohhranah a tal tam. Keimah ber hi ka tello lak lawh a, U Rammuana nen kan inneih lai khan Pathianni zing leh Hunpui velah ka inkhawm ve tawk. Kohhran belh hi chu a tha tih chu ka hria; mahse, ka tim laklawh a, va inhman thut vel kha ka zak deuh tlat. Chu loah Zawmi nen kan inkawp thei tak tak tawh bawk silo nen. Ani nen inthurual thei ila chu a zia deuhin ka ring.



" Anu.. Ka lam ve chak " Hlima bawkin a rawn ti leh sur sur chu "Aputea bulah sawn va kal la, va sawm rawh " Tiin Adina thutna lam chu ka kawhhmuh ta ringawt.


" Aih, nangman min lam pui rawh " A ti tlat reuh chu ka fapa mah ni se ka ngei ru hle tawh. Ka zaikhawm pui pawh tih tawha lam kher kher chu anu hian ka ngamlo nasa lutuk tih a hre lo em maw ni.


" Ka ke ana a, ka lam thei lo alawm " Ka tih lahin " A na lo, bai pawh i bai lo " Ti nui nui chungin a thu tum deuh hmak tawh. Ka fapa pawh ni se lam pui kher chu ka ti thei thlawt lo.


Kan haw hnu thlengin ala biak tawng that theih vak loh, a che reng reng pawh a ti deuh sawk sawk a, thinrim a hnekin chutia ka lam pui loh avanga a thinrim chu a duhawm ka ti zawk tlat nia.


An mutthilh hnuah whatsapp ah lutin Remruata nenah kan chat-ah ka lut thuai a, a last seen chu tlai dar 4:38 daih tawh a ni. Ka text ang nge text lo ang tih ka inngaihtuah fe hnuah " I la thinrim em ni? " Tih chu ka type zet tawh. A rawn online tak kulhah chuan ka delete leh vek. Min lo biak ring deuhin status ka view kual a. Ka view zawh vek hnuah pawh online reng siin min la rawn be chuang lo chu insum thei nganglo in "I awmdan hi eng nge awm zia? " Tiin ka va zawt ta nge nge.Mahse, a hma ang thoin chhanna ka dawng leh lo. Eng thil nge maw i hriat chu le Remruatsang?A tawk e, min biak hma chu biak ka tum tawh miahlo ang che.



Hliman min ko chunga min rawn sawi dat datah chuan phak chual hian ka meng a, nizan khan ka inngaihtuahna lamah ka meng rei ta phian nen men a har hrep mai.


" I va tho hma teh tlat ve Bawihpui? " Ka ti tham chhal, ani hi chuan tuk dangah min thawh khalh khat khawp.


" Nu, putea khumah sawn ramhuai a mu ve sin" Atih chuan ka nui hawk.


" A ni tak tak, amah chiahin a mu lo, Nânau pawn a hmu " A tih lai mekin Mala a rawn tlan lut a" Ânu, putea khumah ramhuai a awm " A rawn ti lut ve bawk. Thu chhuakin " Ramhuai chu engtin nge a awm? " Tiin ka zawt a.


" Ih maw? A hmel chu ka hmu lo. Mahse, a ke tin a sei lutuk " Uar zet hian Hliman a ti a, eng ramhuai tak hmu unau ang maw?


" Ramhuai chu khawiah tak maw a awm? " Nuih insum tak hian ka ti leh.


" Putea khumah a awm ve alawm, putean Nânau nen min biak lai pawhin puanin a inkhuh tlat a, chuan putea kha a lo sik a, Putea pawn "Ana,min sik suh " te a ti " A ti leh zel chu ka rilruah thil dang daih a rawn awm.



" Bawihpui, Ramhuai chu putea bulah a mu ve a, a ke tin a sei bawk maw? " Tiin ka zawt nawn leh ngat. Bu nghat nghat chungin "Aw.. Nangma ke ang khan a awm " A ti a, chutah khum atangin ka tho zui nghal vat.



Ka naua hian nupui a ru tihna a ni thei ang em?




Inphihfaiin eirel ka tan zui nghal mawlh mawlh a, Adina erawh ka tibuai duh rih lo. A rawn thawh chhuah hunah engkim a chiang mai ang. Naupang lah chuan a khat tawkin "Anu, ramhuai kha ala awm ang ang em? " Tiin min zawt reng a,ramhuaia an ngaih miau avangin aputea pindanah erawh an lut ngam tawh lo.



Dar 7:30 pelh hret velah Adina a rawn tho chhuak a, naupang bawk chuan a khumah ramhuai a mu tiin an lo hrilh leh. Ka mit sir ru zeuh a, a mitmeng pha deuh duiah chuan ka rin a dik tih ka hre nghal mai. Dawhkana chawhmeh siam tur ka buatsaih malh malh chu ka hmaah rawn thu thlain tim dâiin "U " A rawn ti zawi sap. A zam apianga a tih thin danin a tukhum sam a tuai a tuai leh tawh bawk.



" Bawihpuia te unauin i khumah ramhuai ke tin sei a mu ve tih an sawi a" Nui duh miahlo in a mitah ka en kal a, a inthlahrun hmel viau.



" Ih... Kan tum lawk pawh a ni lo " A ti hmasa te te a, " In puk lawk em ni? Ka lo ti thung. Lu thing nghut nghut chung hian a nui hawk a, " Apa zu ruiin a hnawt chhuak a, anu'n a chhan ngam bawk silo. A pute an zin daih bawk si, a mangangin nizan zanlaiah min rawn phone a " A ti zui charh charh.



" I hruai haw tih a nu chuan a hria em? " Tiin ka lo zawt.


" Ka hre lo le, an inbulah ka hruai lai khan a awm lo a, Pu Kiamlova te in bulah amah chauhin a lo awm a, anu a hrilh em ka hre lo. " A ti a.



" A harh tawh chuan va hruai phawt teh, amah chauha lo thawh chu a zak ang. " Tiin thil dang ka tih san a, ani pawh a pindan lamah a lut zui ve nghal. Ka nauin nupui a rawn hruai haw chu engtia lo dawn sawn tur nge ka hrethiam mai rih lo.



An rawn inzui chhuah chuan Dawngi chuan en pawh min en tha ngam lo, hmeichhe hmeltha tak tia sawi tur a ni lo a, tha hang ngaihno bei an tih ang chi kha a ni. Adina aiin kum 2 velin a naupang zawk a; mahse, a naupan ngaihtuahin a puitlingin a fel viau lawi. Apa boral hnuin a nu hian tuna amah hnawt chhuaktu apa hi nei lehin zu heh zet mai, ancheh bawk si, sual bawk si an tih ang chi kha a ni a.A hriate sawi ka hriat ve thinah Dawngi pawh hi kutthlak zeuh zeuh a ching a ni awm e. Thudik anih ngei pawh ka ring. Keipawhin tum khat chu a hau lai ka hre ve tawh. A ânchhiat zia chu rapthlak zawk tak a ni. A lakah Dawngi a fel a, a zahthiam teh lul nen.



" Adinan thil awmzia a lo sawi a, tihian inhruai angin nge in kal dawn a rawn riak satliah angin " Ka tih chuan Dawngi chu a sen deuh ap ap mai.Min chhan a tum laiin " Palai tirh ka duh U, an inchhungah sawn a hrehawm lutuk. Chuvangin a let ka rem ti tawh lo. " Adina chuan a lo tih khalh a.



" Nangin i duh a, nupui neih i inpeih tawh anih te chuan i thu vek alawm. Mahse, Dawngi duh dan hi a ni ve em tih a pawimawh ve tho ania. " Ka ti a, amah Adina a inhuam phawt chuan kei chuan hnialna em em ka nei lo tak tak. A hmingin hna a nei ve tawha, atana tha leh tha lo thliar hrang turin puitling a ni tawh bawk a. Lo inrawlh ka tum ve lem lo.



" A duh alawm. Nizana ka hruai haw dawnin kan sawi sa vek a, a rem tihna thlapin kan rawn inzui haw. A rang thei ang bera palai tirh ka duh " A ti leh charh charh a.



" Chaw ei phawt ila, eikhamah ka ni te leh papuia te ho ka va hrilh dawn nia. Annin thil kalphung an hria ang " Tiin chaw ei ka siam zui nghal a. Dawngin min lo pui nghal vat. Kan chaw ei lai chuan naupang chuan an nel sa tawh avangin an be siam siam reng a, ramhuai bawk kha an sawi chhuak leh chu puitling pathum chu kan nui ru tut tut hlawm mai.



Ka ni te in a ka va kal chuan "Aw... An inneih duhte chuan hnialna chhan tur kan neilo a, chutihrualin Dan khatna in han ti thei hram se a tha tur ania. Kohhran thalaiah active member ve ve an ni si a, miin an sawi duh dawn emai. Mahse, a nih tur ang ang a ni tawh a. Dawngi a chhungten an lo lam hunah palaiin kan bawh zui ve nghal dawn nia. " A lo ti luam a, mi chuan an sawi duh leh dawn tih chu chiang sa a ni. Mahse, an dinhmunin a zir miau bawk si lo. Chu loah keima ngaihdanah chuan Dan khatnaa inneih theih hi chu a thain a zahawm ngei a, mahse, eng ang dan pawhin innei mah ila kan inneihna in kumkhua a daih chuan a tha ka ti vek mai.


Remruatsanga ala reh zel a,patling pui si a titau kual vel hi ka nuih aza deuh tlat.A thinrim chhan ber lah ka hrechiang mang bawk silo.Kei lah hi mi han thlem a, han biak seuh seuh vel hi ka thiam loh zawng tak a ni bawk si. Mampuii hi ka va be tawp zawk mai dawn em maw ni? Mahse, kan inkar buaina pawh ching fel theilo nih chu tlawmah ka la rilru ve tho si. Dik tak chuan pangngai taka ngaihzawng ka neih vawikhatna ang a ni a, zeilo chi lo nih bawk nen inngaihzawnna boruak vel hi ka hrethiam vak lo. U Rammuana nen kan inneih hmaa kan inngaihzawn dan ve te kha chu min rawn rim tawp a, kei lah ka fate buaipuiin ka buai reng a, kan inkarah tumah an awm ngai loh avang khan intihthiam loh leh î kan nei ngailo. A hmingin inkawp hming kan pu ve a a ni mai.



Chhun thingpui in a kan thut thap laiin Zawmi a rawn lut a, a inthuam danah a zaikhawm anih ka ring. Ani hi chu tluk loh rim hi a nam thin ka tih tawh kha. "Mo thar ka rawn lawm dawn" Tiin a nui pat pat a, Adina a melh pah reng danah tih zah a tum leh tawh a ni ang.


" Thingpui i in ve duh chuan nopuiah khan siam sa a awm ania" Ka lo ti thuai a.Zaikhawmna lama a in zawh chiah thuin min chhang thung.


"Engtin nge ilo hriat leh hman bik a? " Adinan a chuan a zawt a, ka rilrua lo awm chiah a ni.


" Nizanah hmutu che u an awm aniang, zaikhawmna lamah thingpui kan in lai khan an sawi ka hria a, fiah turin ka rawn chhuk nghal " A ti a, Adina a ngawih rauh rauh laiin Dawngin " Ka van zak tak " A lo ti sep. A rilru tur awm chu ka hriatthiam pui deuh,Kohhran thalai member active ve ve an ni a, an tih atana mawi loh zia an hre ve ve ang a, inruk kher hi chu an rilruah pawh a awm ngai bik kher lo ang. Inru anga kallo in zingah khan haw leh thei reng chu a ni a, mahse, Adinan a phal tawh bau silo. Chutihrualin nizana hmu tu an lo awm miau chuan sawisep an kai dawn tho tho tihna nia, inru anga an kal zui pawh hi a thatna a mual mual chu a awm tho.


Zaikhawmna lamah meuh an sawi chuan hre tu an tam tawh dawn tihna ania, ngaihdan mak fe fe nei an awm rualin thudik hre miah silo a, an ngaihdan dâna zeldin zui chiam an awm leh ngei bawk ang. Chu chu mihring mizia a ni, thudik kan hriat hma hian kan hmuh danin kan lo teh ve chiamin kan sawi chhuak phawng phawng a, thenkhatin thudik ang hrimin an lo sawi darh leh tawh thin si a.Dawt thu a than chiam phah thin nachhan a ni.



" Hrim hrimin in puk lawk em ni? " Zawmi pawhin a ti ve chiah, mitam zawk ngaihdan tur pawh chu tho chu.


Adina chuan zinga a sawi bawk kha Zawmi chu a hrilh ve leh a, a bu nghat nghat mai. "I pute chu thil awmzia i hrilh ve tawh hrim hrim em Dawng? Engtik nge lo hawn an tum? " Tiin a zawt zui zat.


Dawngin " Ka la hrilh ngam chiah lo a, mahse, ka nu'n a phone chu ka ring deuh tho. An tum dan chuan kumthar lama lo haw an tum deuh a. " A lo ti a.


" Ipa hi chu a buaithlak ve ngawt mai, inu chuan a lo phone tawh hrim hrim che em? " A ti leh zel.


" Ka phone ka off daih alawm, diktak chuan nizan khan ka nu vanga ka pa nen pawh inhau kan nia, ka pa zurui rawn haw kha a lo hau a, ka pa khan kut a thlak a, chumi ka lo chhan chu keimahah a tuan a, tawngkam chhe deuh deuha min ankhum bakah kut min thlak ve hial a. Ka nu khan min tan ve dawn emaw ka tih laiin min hau let zawk daih a,Ka pa a pawngpawrh zui ta reng a, min hnawhchhuah lai pawhin ka nu chuan tawngkam khat mah a chhak chhuak lo hrim hrim. Chung avang chuan ka rilru anat bakah a chungah ka thinrim ve lutuk a,biak pawh ka duh rih lo." A ti zui sep sep a, a zah hmel viau bawk. Adina pawh a thawn danah ala hrilh bik miahlo tih ka hre thei mai.



Dawngi nu hi zu in ve zeuh zeuh thin tho a ni a, chuvangte pawh chu a ni ang a unaute pawn an mil meuh lo. Dawngi hi apu in an in a awm tura a duh laiin a nu hian a phal tlat lo a, thenkhat chuan inchhung khur chet a peih loh vangah an puh sak. Adik na chen te pawh a awm ang, inchhung khura a che turh turh hi hmuh tur a awm khat ve viau.



Zanriah kan kil lai chuan Lalhlimpuian Dawngi en he haw chungin " Au Dawng tinge kan inah hian ilo awm ve reng a? " A ti ta mai! Dawngi a hawihai nasa teh e. Kan va hahthlak bet but thin tak.


"Bawihpui, au Dawng tih tawh loh tur, 'apite' tih tawh tur aw " Adinan a lo tih chuan " Ngatinge? Apite tih chu a mawilo e... " Ala ti zui niah niah. Pakhat lah a lâi nasa tawh mai. Ka fate hian an ti zak chho zeuh zeuh dawn niin a lang riau.



" Remruatsang, eng chen nge thinrim i tum? Ka dawhtheihna a zo tep tawh ania. " Zan dar 7 velah chuan ka va ti leh ta nge nge. Chhanna ka dawn leh loh chuan ka be tawh bik miahlo tak tak ang. Aputea te nen sitting room lamah naupang pahnih an awm daih avangin keimahin kan khumah kan insawh tau ka insawh tau ringawt. A khat tawkin ka phone ka en deuh sek reng.


Darkar chanve vel liam hnuah " Ka thinrim em ni? " A rawn ti, ka va han ngei mai mai tak.


" I thinrim lo em ni? " Tih ka type lai te chuan ka phone ka hmet deuh sawk sawk.


" Thinrimna chhan tur a awm chuan thinrim ang " Hepa hi eng nge a hriat a?


" Nizan atanga vawiin nilenga i biak theih loh chhante leh ka call bakah ka message zawng zawng chhan let ka nih loh chhan te????????? " Ka ti a, pehhel kual vel vak ka peih lo. Call a rawn lut zui a, ka lak rualin " Sawi rawh " Ka ti bul deuh hmak chu a rawn nui ri hawk.


" Nuihzatthlak a awm lo Remruatsang " Ka thinrim lek lek tawh.


" Tu emaw hi ka biak loh vangin a lungleng a titau em ni? " Nuih insum tak hian a rawn ti a, ka phone ka melh nghek ringawt.


" Tunge nizana phone dah tau hmak tu kha? " Ka tih chuan " Pum lamin ro a rel chuan hmangaih berte pawh biak a harsa talh " Nui hawk hawk chung hian a rawn ti a, " Remruatsang min bawl em ni? " Ka ti pawr hlar. Ka nuih a za ve hauh lo.


" Sorry, ka thinrim emaw iti em ni? " Thutak deuh zawk hian a rawn ti ta a.


" Phone i dah hmaa i tawngkam kha ngaihtha deuha awm na chi a ni loh kha, ka call leh message in chhanletna a dawng bawk silo " Ka tih lai mekin " Ka thiam loh a nih chu, nimin ruaithehnaah vawksa ka tem ve khanglang a, ka kua a thuah zui a... Ka mu zawi zui reng a lawm.Nichin deuh atang khan ka harh tha peih deuh chiah. " A ti a.


" I thinrim miahlo tihna a ni em? Ka awm iti nuamlo lutuk a? " Ka ti ve ta nge nge.


" Nimin kha chuan ka fiam mai mai che anih kha, ka sawi fo thin kha ka ring che tih.Keimahlo mipa dang engah mah i ngailo tih ka hria, mahse.. I bula ka awm theih loh laia an awm thei bik kha chu ka thik hle " Atih chuan ka nui ru ver ver tawh.


"Mahse, thil awmzia min lo hrilh tal tur che lawm, whatsapp-ah te pawh i online reng " Amah dem aw ka zeta ka tih leh chuan a rawn nui leh hawk a. Anau in a phone a chhiat avangin a phone a hman sak daih thu a rawn sawi chuan ka sawi kual zui ta bik loPangngai takin kan inbe zui a, a kawthalo pawh a zia tawh viau a ni awm e. A thinrim emaw tiin rilru hah deuhin ka lo awm ve a, bathroom lam panin a lo tlan zak zak chu a ni sia.Amah ka ngaihtuah hian ka nuih a za, kawthalo ve thei hmel pawh a put loh nen hian.


Show post links
Top

[Ngaia]

REMRUATSANGA

CHAPTER - 22

Dawngi pawh ni nga zet kan inah a awm ve tawh, nimin khan hruai haw tumin a nu a rawn kal ve ngei a, Dawngin"I pasalin min hnawtchhuak tawh a, rawn haw leh na chhan tur ka nei tawh hlei nem. Ka thlavang hauh ngamlo tu nu ka nei che hi ka inkhawngaih tak zet bawk. Ka haw dawn pawhin ka pute bulah bak ka haw tawh dawn lo, chuvangin min rawn hruai pawh tum buai duh tawh suh. " A lo tih khum a, a nu lakah a lungawi lo rih ngang a ni ang e tiin engmah ka sawi ve duh lo. Adina nen erawh eng nge an sawi dun ka hre lo a;mahse, Adina pawh hian anu te bula haw tawh tur chuan a phal vak bik lo.



Remruatsanga hnena Adina te inruk thu ka sawi tum lahin a rawn lungawilo ve ringawt. " Nge maw an lo inruk thawt thawt le aw, nakkum lamah te chuan kan innei ang chu ka lo ti a sin " A rawn ti bui bui.


" Ve thla rawk che hian a, inneih ka duh ngawt dawn mi? Nge ilo tum ve ringawt " Ka tih laiin " Inneih i duhlo hian inru tur hian ilo ti nilo maw? " Ala rawn ti ta deuh deuh. Lalhlimpuia hian amah vek hi anih hi a lo chhun, an rilru a awm apiang hi an sawi chhuak phawng phawng ringawt zel mai.


Tunge mahni naute ngei nupui ru turin ti tut tut duh ang?


Kum khat chhunga ni tawp ber ni kan thlen chuan zing kar atangin Lalsangzuali Sailo zai hmun tinah an play ri chuah chuah hlawm a, keini chhung pawh kan bang bik chuang lo.Zanah chhangban kangin tlemte e ti lo chuan kan ri ve laih laih reng a, Adina leh Dawngi pawh an heti ta si a, inah an inkhung tlawk tlawk reng mai.Dawngi rai avanga inru ta ah an ngai fur hlawm a, thudik kan hriaa,nakin lawkah a rai leh rai loh a hriat mai dawn bawk a, engah vak kan ngai lemlo tlang a ni. Sawi pawh kan sawi ngai meuh lo.



" Ehe! In phatsanna rim ka hria " An rawn pen luh rualin Pekan a ti lang lang a, a hnar a len kual pah kher bawk.


" Keipawh ka hmu thei " Tiin Puipuian a lo zawm vat chu ka ner nang nang a, Adina leh Dawngi nuih a lo za hle thung.


"In chhe em mai a, in ei ve chak chuan per khat cheng 5 zel aw " Chhang kang paha ka ti liam puat chu Peka bawkin "Nuthlawi zawng zawngah sum i lawm ber aw....U Duhsang " A ti a, kan nui ta dar dar.


" In zaikhawm dawn mi? " Zawh bik pawh nei em em lo chuan ka ti a.


" Dawn ti ila kan fatu dawn " A tih lai mekin Hluzualan " Kei chu kan kohhran ho hian kan thian ho hi tlangval senior ni turin min chher hriam tan ni ber ka hria, tuna tlangval senior kan neih ho pawh hi an rawlthar tan atanga fatu ni thang thah" A lo ti pek. Amah lah chu a nuih duh miah lo leh nghal.


" I zei viaute chuan i leng rei lo hrim hrim " Dawngin a lo ti ve zauh.


" A ti ve mai mai anih kha, thenawm khua zawng zawngah a hûng vek mihringa hian " Pekan a tih chuan Hluzuala chu a khi hui mai.


Fatu tur an nih miau avangin ka chhang kan per khat theuh an lak hnuah, rei awm tawhlo in an chhuak ta diak. Kumtinin kan kohhran hi chuan kumhlui thlah zan hian zaikhawmna in lamah sawhchiar te nen kumhlui an thlah thin a, thalai pawh hmun dang danga interek hrang lo in ni 31 zanah hi chuan zaikhawmna lamah an tel vek thin.



Naupang ho mu hma se ka duh avangin kan chhang kan pawh dar 9 velah chuan kan ei fel vek tawh. Anmahni lah chuan tlaivar an lo tum ve em em ringawt. Khuma ka mutpui hnuah pawh an ninhlei sek reng a, thawnthu ka hrilh hnu rei vakloah erawh an muhil zui nghal mai.


Hotel lamah programme a neih avangin Remruata nen pawh zan tira kan inbiak bak kan la inbe leh ta miah lo.Ani telin a zûn hian min phuar telh telh a, amahah ka intulut thuk telh telh a, tunah phei chuan kan inbiak loh rei hlek hian ka awm thiam tawh der lo.Ka ngai em em reng thin chungin ka ngaih thu han sawi kur duam erawh ka hreh leh hle thung. Hei hi chu ka mizia ve reng a ni.Duh huam huam ang a lan te, a tello a awm theilo anga lan te hi zahah ka la tlat, keimah ang hi tam tak an awm ve tho in ka ring.



Ka phone ka en khat tawk reng a, ka nghah ber erawh a last seen pawh zan tira kan inbiak lai ami daih kha ala ni.Ka mut ala chhuak bawk silo chuan nidanga ka tih ngai hleih loh mi status chu ka en ta ringawt, en tur phei chu a tam hran lo. Ka en chhuah dap hnuah pawh ala online loh avangin mut san mai ka tum a, whatsapp atanga ka chhuak chiah tihin number hriat loh atang hian thlalak ka dawng leh rih. Krismas ruaitheh tlaia kan thlalak ho kha "min lo thawn ve rawh u" ka tih avangin Peka thiante tu emaw ber number anih ringin ka hawng vat. Mahse, ka beisei loh lam zawk a ni.


Ka phone screen chu ka en deuh vang vang a, min lo thawntu hian eng vanga Bawihpuii leh Remruata inhnaih taka ding chunga an nui dun lai thlalak hi min rawn thawn nge anih tih ka ngaihtuah. Time stamp atanga a landan chuan zanin a mi a nih hmel.


" Tu nge aw? " Tiin ka reply. Rei vakloah thu danga min rawn chhanglo in thlalak bawk min rawn thawn leh a, chutah thung chuan an lam dun a, an hlim dun hmel kher mai. Thikna rilru ka pu tur chu duh lo in ka phone ka khup thawk a. Rilru erawh chuan an inkarah thian aia thuk inzawmna a awm tawh thin tih a hre ru kar si. Mahse, ka unaunu leh ka bialpa rinhlelh chu ka duh hauh lo. Thiantha ber an nih thu ka bulah an sawi ve ve a, dawt min hrilh dawnlo tih ka chiang bawk. Min rawn thawntu hian ka rilru tih buai tumin a rawn thawn nge a rawn thawn sual ka hre lo a,chutih rualin a number ka neih miah loh chuan min rawn thawn sual anih ka ring lo tawp.Dp a neilo a, a last seen engkim a hide vek bawk.



Chumi zan atang chuan a khat tawkin Remruata leh Bawihpuii te thlalak chu a khat tawkin ka dawng ta reng a, an chhuak dun lai te, thil an ei dun lai te, englai pawhin a zui reng emaw tih mai tur zawk a ni.Thlalak a rawn thawn bak engmah thu a rawn belh ngai lo a, keipawhin ka chhang let ngailo bawk. Remruata nen kan inbiak dan a ngai reng a, rinhlelhawmin a awm ngai hek lo.An thlalak ka dawn thin thu ka hrilh lo va, a chhan pawh zana kan inbiak hian kan ni hman dan kan inhrilh thin a, chutah chuan Bawihpuii nen an inhmuh thu a sawi thin vang a ni. Kei erawhin a sawi hmain chhun lamah an inhmuh thu ka hre daih tawh thin thung.


Dawngi pu te an lo hawng a, Dawngi pawh a haw ta rih. Kei ni lamin palai nen kan umzui thuai a, an len vawi khatnaah chuan chhungkaw dang tih ang tho in "chhungkua kan lo inrawn khawm ang e" Tiin tha takin min thlah a. An inkawp ngheh ve zia hre chiang ve tute tho an ni a, remlohna tur an neih ka ringlo ve ringawt.


Mi sawi ka hriat leh danin Dawngi haw zan khan Dawngi chungchangah a nu leh a pute an inhau a ni awm a, a pasalin Dawngi a hnawt chhuak kha a pu thin a rim hle ni awm a ni.


Adina mawlh hian an rem theih loh mawlh hi a hlau a, palai kal tum hnihnaah pawh chuan amah ang lo takin a phi deuh sek reng a, ka nuih liam mai mai thung. Vanneihthlak takin kal nawn leh ngailo turin a hun leh ni an rawn ruat ta nghal vek a, inneih buatsaih nan thla hnih tha chu kan la nei e.


Mo nei turin a theih ang angin kan inbuatsaih chho a, In te pawh kan remchan danin kan siksawi ve hlek hlek.Adina hian ka pa kha a chhun a, mistiri hna eng eng emaw hi chu a thiam ve nial nual a.Hlawhfa em em la lo in amahin a khawih deuh vek thei a, a zia ang reng phian. Mahse, amah hi a hah lutuk ang tih ka hlauthawng thin.



" Vawiin chu ka ngai hle mai che " Ril ruiha a rawn tih chuan ka awm hi a nuam veng veng.Mahse, rei a nilo. Chhun lama ka thlalak dawn ka hriat chhuah rualin ka tum tha leh rih.


" Vawiinah eng nge itih? " Ka ti chuai raih.


" Thian hluite nen reunion kan nei a, nizan pawn ka hrilh che kha " A ti ve mai a.Nizan lama a sawi hre lo ka ni miahlo, vawiin lama ka thlalak dawn vang zawk a zawt ka ni. Tum danga Bawihpuii nena an thlalak dawng char char thin khan vawiin chu hmeichhe dang nena an thlalak ka dawng a, ka awm thiam meuh lo a ni. Tui cheng zo hlim tih hriat takin pool sirah an thu dun a, an inthut hnaih thawkhat viau. Hmeichhia zawk chuan Remruata darah a kut nghatin mawi zet hian a nui a, Remruata pawn nuam a tih hmel hle. Ka hmuh tirh khan engah mah ngaih loh ka tum kha ania;mahse ka awl deuh hlek changin ka lo ngaihtuah leh veng veng thin.


Remruata ka ringhlel tihna nilo in hmeichhe dang nena hlim hmel taka an awm dun ka hmuh ngai loh avangin ka hmu thut chu ka awm thiamlo a ni ber.


" Umm...Bawihpuii a kal ve lo mi? " ka ti a, a hna lamah emergency a awm thut avangin a kal ve loh thuin min chhang thung. Keimahah danglam a awm tih a hriat ka hlauh avangin " A nuam em thian hluite nena inhmuh chu? I chau viaulo maw? " Ka ti leh hnuhnawh.


"Kan inhmukhawm lohna a rei tawh sia, a nuam khawp mai. Tui ka cheng nasa deuh nen ka chau ve deuh chuan ka hria; mahse, i aw ka hriat rual khan ka chauh zah ve chu a reh " A rawn ti duah, a inla zei thei a nia.


" Chuti chu i chauh a reh hmak theih nan kan inbe tlaivar mai dawn em ni? " Ka tih chuan a rawn nui ta hawk hawk. A dan ngaiin ka ni hman dan min zawt leh a, naupang chanchin nen. Ka rilruah a thih theih ngang loh avangin kan inbiakna kan titawp tep tih chuan " Vawiin chuan nula bulah i awm em? " Pehhel deuh tak hian ka zawt ta nge nge.


" Awm ta ila engtin nge min tih ang? " Nuih insum zet hian min rawn chhang.


" Tlangval dang ka melh san daih ang che " Ka tih chuan a nuih a za ngang mai.

" Nula bulah ka awm silo a, tlangval dang chu melh lo mai rawh aw Phirte nu " La nui reng chung hian a rawn ti.Tun hnai hian "Phirte nu" Min tih hi a ching thar tlat pek.


" Dawheh " Ka lo ti hlak chu "Dawheh lo lutuk" A lo ti.


" Nula bulah nuam ti deuhin i thut vel kha " Ka ti leh zel.

" Vawiinah hmeichhia an awm lo " A rawn ti, ava han dawheh tak. Hmeichhia nen an thu dun lai ka nei reng chunga hmeichhia an awm loh thu a sawi chu ka thinrim deuh thut a " Whatsapp-ah thlalak ka lo thawn ang che " Tih leh phone dah ka rual nghal daih.


WhatsApp-ah lutin thlalak chu ka thawn a, a blue tick nghal kalh. A rawn sawifiah dawn emaw ka tih laiin "Khawi atanga i neih nge? " A rawn ti a. "Mipa vek in kal tak tak maw? " A zawhna chhanglo in ka ti thung.


Call a rawn lut zawm zat a, chhanglo in phone ka silent a bathroom-ah ka luh san daih. Ka inngaihtuah fim deuh hnu chuan ka awm dan chu a naupan chhiat thlak ka ti leh hnuhnawh deuh.Thlalak ka lo thawn kher te chu ka inchhir. Ka sawi hma chu kha thlalak ka neihna kha min zawt leh ngei ang a.Engtin nge ka chhan ang? Ka thinrim thut thil tih vang vek, "Nula bulah i awm em? " Te kha lo ti dâwk dâwk lo ila, lo mangtha daih tur hi a nia.


Ka phone ka en leh chuan a hnen atang vekin missed call 5 leh message a lo tlar dal a.Notification bar atanga a message ka chhiar theih chinah chuan "Khawi atangin nge thlalak kha i neih? "

"Tu nge rawn thawn che? "

" Naupang chhia angin awm suh Duhi "

"Phone la rawh " Tih te a ni nawk. Chhanglo in phone ka silent a, khum sirah ka dah ta daih. Naktuk lamah ka be tawh mai ang.


" Anu... Ka pum a na " Tap tuau chunga Malan min rawn sawi chuan thawh phan pawh awmlo in ka harh nghal kawk. A na ti a lo vial ngawih ngawih ka hmuh chuan " Bawihte.. Khawilai tak nge na? " Tiin ka zawt vat. Tawngka pawha min chhanglo chuan a dul dinglam a nak ruh hnuai chu a khawih a.


" Damdawi ei rawh aw.. Ka va la lawk ang, " Ka tih chuan a lu a thing leh nasa tawh. Damdawi ei a hreh lutuk hi a lawm buaithlak thin. Amah lah chu a tap tuau reng bawk si. " Ka pua ang che, i duh em? " Ka tihin a duh bawk silo a, pawm pawh a duh chuang lo.Khumah a mu kawm ngal a, ka kal san hlau ni awm hrimin ka kut ah min chelh bet tlat bawk.


Sana ka en a, zing dar 3 : 14 chiah chiah a ni. Ka kal sawn a phal miau loh avang leh damdawi ei se ka duh avangin Adina ka phone harh ta ringawt a, rei riallo in a rawn lang zui nghal vat. " Damdawi dahnaah khan nachhawkna a awm, lo ban nghal mai teh. Chuan chini lo la tel bawk la. " Tiin ka hrilh zung zung a, a che ve vat vat. Hlima erawh thawm kan nei reng chung pawhin a che eih lo hrim hrim. A mu nghet thei a nia.


" Bawihte, damdawi hi ei rawh le.. Chuan i pum na kha a dam dawn alawm " Ka ti a, na a ti ve ngang aniang a rawn che tuah tuah. Ka lainat lutuk hi ka tah pui lo chauh, thlanin a bual huh hliam dan atangin pum na satliah ringawt a ni lo tih a hriat. Mahse, tun ang zing dar 3 tlangah beiseina nen nachhawkna inpek bak tih theih dang a awm chuang bawk silo.Theih chu ni se a tawrh ai ka tuar mai tur.



" Anu... Ala na reng... " Nachhawkna a ei atangin darkar chanve a liam leh tawh. Ala chhawk theilo, ana ti tap chungin a vial ngawih ngawih reng si. A pum lamah fello a awm anih ringin ka mangang ru tawh viau.


" Din, Afeli zu kaitho mai teh a.. Jection mai teh se.. Ka khawngaih em mai " Tiin ka hrilh a, Afeli chu kan khuaa health worker ni lai a ni. Muang changlo in ani pawh a va insiam zui sawk sawk a, a vawt deuh vur bawk nen tun ang huna chhuah chu a chak awm zawk zawk loh viau. Vengthlang lamah an la awm daih zui leh nghal.



" Bawihte, ana ala zia miahlo a mi? " Ka tih chuan a bu nghat nghat a, a insût leh hraih thin. Pum na hi a nei zeuh zeuh thin a;mahse, tun hnai erawh a sawi khat tawh viau asin maw le.


" Anu... Apa phone la... " Min tih chuan " I ngai em ni? " Ka lo ti vat. A bu leh nghat nghat reuh a, ala muttui ka rin viau rualin a fapa in a biak duh miau si chuan kan phone harh mai aniang chu. Ka phone ka ban zui a, a missed call a lo awm sa, ka mut san daih hnu pawh khan a lo la call tho chu niin. Mut dawna kan inthlah dan ka ngaihtuahnaah a rawn lut rauh rauh. Ka call a, a ring deuh vang vang hnuah phak deuh chual hian "Hello " A rawn ti thum chhak.


"Remruat... " Ka tih sep rualin Malan "Apa... " Tap tuau hian a lo ti a, a bula thu ka ni bawk nen Remruata chuan a hrechiang viau a ni ang, " Ngatinge a? Eng thil nge thleng? " Fiah kek kawk hian a rawn ti a, tun lawka a tho phang aw te kha chu bo hneh tak a ni.


" Mala hi a pum a na a, a be chak che aniang 'Apa phone rawh ' min tia " Ka ti a.


" Engtik atangin? Ana a ti viau em? Damdawi te i pe lo mi? " A ti leh zung zung.


Dar 3 pelh hret vela min kaih thawh thu leh nachhawkna ka pe tawh chung pawh a ala chhawk loh thu leh Adinan Afeli a koh mek thu ka hrilh chuan "Ka lo phei dawn " A rawn ti. A fapa chu a ngaihtuah tak zet anih hmel.


" Lo phei kher duh suh a buaithlak mai mai. Check-up nei turin lokal ka rilruk deuh zawk a " Ka ti a, khua te han var phawt se, a rem chuan vawiin lama kal nghal tut tut pawh ka pawi ti vak lo.


" Anih chuan vawiin lamah rawn phei nghal mai rawh u, khawi amah chu ka lo bia ang " A ti a, Mala bulah phone dah hnaiin speaker ka on zui a. Apa aw a hria chu a a rilru a no thar a, a tap leh pur tawh. Lehlam ami lah chuan a fapa bula a awm theilo chu hrehawm a ti tih hriat reng reng. Mahse, a fapa chu ral khat atangin a rawn thlamuan a, a bulah awm miahlo mah se chu thil chu a fapa chuan a thlamuan pui hneh lutuk tho.


Adina te an rawn thleng a, nachhawknaa Afelin a jection hnu rei vakloah chuan a muhil thei ta hlauh. A na a tih lai bawr vel ka sawi chuan Afelin " A rilphir lam pang anih ka van ring e, a theih chuan a rang thei ang berin check-up neih pui thei ula tha ka ti. A vung te pawh a ni thei a" Tiin min rawn a. Tun ang zing kar khaw vawh zual lai taka kan zu kaitho chung pawhin a hmel hmuh a nuam sar tho mai. Khaw var thlengin a awm zui ve ta reng a, Mala pawh a rawn harh leh ta rih lo. Vawiin lama Aizawl kal turin thu kan titlu fel ta bawk.


Zing dar 7 velah a pum bawk a rawn nat leh avangin sumo a kal kan tum pawh kan thulh leh a, U Thazualan an motor in min hruai dawn a ni. Hliman kal ve a ngen deuh zet nangin a nau damlo bawk nen a buaithlak ka rin deuh avangin a putea nen an lo awm dawn a ni.


Remruata nen chanchin inhrilhin kan inbe zeuh zeuh a, anu leh pate pawn an rawn ngaihtuah ngaihtuah ngang mai.Pum na a ni kher kher bawk nen motor nghawrah a pum na a ti si, kawng tluanin a chiau hiar phei a ni hawt.Thil a ei mumal bawk silo nen motor a rui tel zui phei chu khawngaih thlak tak a ni.Aizawl khaw chhung kan luh te phei chuan a chetin a che peih tawhlo hrim hrim.


A fapa awm dan a hmu chiah chu Remruata chuan a lainat ngang mai.Anu nen an ni a, keilah chu Mala min luak khumna nen ka rimtui lemlo viau. Damdawi Inah lut phawt ang an tih avangin kan lut ta rawih phawt a, Doctor-in investigation hrang hrang neiin test tur ang ang te kan test nghal a, Remruata a tlan kual zak zak mai.A tawi zawngin sawi ta mai ila Result atanga a lan dan chuan a ril phir chu a lo ni tak tak a, Doctor chuan a vûn nasat mai bakah puak keh thei dinhmunah a din avangin a rang thei ang bera zai nghal a tul thu a sawi a. Zai meuh a sawi kai chu rilru a bing mup mup thei. Zai pui hmachhawn tur chuan ala nau deuh mah mah a sin.


" Ka nu leh Thazuala hian lo awmpui rih se kan in lamah mamawh lamin kan kal lawk dawn em ni? Intihfai te pawh i duh ka ring" Remruata chuan a ti a, anu in " Nia, Duhte va kal rawh u, i rilru kha tihah lutuk lo bawk la, Bawihtea pawh an zai ang a, a tha leh mai dawn alawm" A lo ti ve bawk.Ka ringlo tihna nilo in han kalsan daih chu ka hreh ru ang reng hle. Nachhawkna a an jection leh avangin a muhil rih a, a lo harh huna ka awm loh chuan min zawng ngei awm sia. Mahse, intihfai bakah min admit avangin mamawh lam chu kan ngai ngei bawk si.


" Ka hrethiam lo, kan kal hlana a lo harh chuan.. " Ka tih nawi niaih laiin Remruata bawkin " Kan rei dawn lo, a harh hmain let leh hman kan tum dawn nia " A lo ti a. Rilru nuamlo deuh chungin aw ka pawh ta hram.



An in lam pana kan tlan lai chuan kan tawng tamlo dun kher mai. Ka kut pakhat a vuan reng a,a khat tawkin a hmuiah a nawr bet leh vang vang thin. Sawilo mah se kan dinhmun hi a beisei bik loh zia a mitmeng atang leh a chezia atangin ka chhiar thei. Inbia in titi dun lo mah ila kan rilrua awm a inang viau tho in ka ring.



Adinan min lo call chuan chanchin ka la hrilh miahlo tih ka hrechhuak " Aw, Din, kan buai lutuk a chanchin ka lo hrilh theihnghilh daih che " Inthiamlo zet hian ka ti a, " Umm.. A Thazualan min lo hrilh tawh alawm, amah eng nge a an hrim hrim a " A ti a.



" Nachhawkna in a chhawk a, a muhil rih a. Chumi chhungin hei, Remruata nen an in lamah mamawh la turin kan kal mek a " Ka ti leh a. Naktuk lama an zai dawn avangin ani pawh ral khat atang chuan a ti deuh nge Bawihpuia hruaia rawn phei ve a tum tak kha.


Remruata te in kan thlen chuan tumah an lo awm lo a, rei awm thei kan nih loh avangin a che nghal zung zung a.Keipawh ka intihfai zawh chuan ka zang deuh hawkin ka in hria.


" Lokal teh " Tia a ban a rawn phar chhuah chuan ka lo ban ve mai a. A awma nghet zetin min kuah bet zui nghal hlun. Ka lo kuah let ve nghal vat bawk. " Hahdam thei ang berin awm tum la, rilru tih hah vak vak khan awmzia a neilo ania. Bawihtea pawh naktukah an zai ang a, a dam tha vat mai ang. " Tiin min hnem a,a tawng zawng chuan min nghawr dar dar mai.


" Ka hre lo....Ala naupang si a, zai meuh hmachhawn tur chuan.. Thil pakhat lek pawh a kal sual chuan... Ka hlauthawng a ni " Ka ti hap. Hahdam deuha awm chu ka duh;mahse, ka hahdam tak tak hlei theilo. Nu, ka dinhmun a ding tawh te chuan an hrethiam ang. Ka fapa, kum 10 êm pawh la tlinglo in zai a hma chhawn dawn a ni a, thil pakhat lek pawh tih sual a awm chuan thil pawi tak a thleng thei tih rilru in a hre kar a, ngaihtuah loh tum pawhin a ngaihtuah loh theih loh.

Min kuahna phelin ka biang a rawn khuap a, amah en thei turin min kuai dak a, " Engkim tithei Pathian kan nei alawm, a zarah eng thil mah a thlenglo ang.Tawngtai la, a bak chu Pathian kutah innghat tawp rawh " A ti sup sup a, Pathian hian ka dilna a chhang ngailo tih a hre ve lo a ni.Ka ngaihtuahna avang chuan ka mittui a rawn tling nghal piau a. A awmah ka hmai ka thukru nghal daih.

Pathian awm chu ka ring, a awm tih ka chiang bawk. Mahse, a hnena ka thil dil te ka dil loh ang zelin chhanna min pe thin.

"Ti rawh, kan pahnihin tawngtai ila, amaha rinna nghat chunga diltu te chu a chhang thin. " A ti a. Ka dil loh chhanna bawk ka dawng leh ang tih ka hlau thawng a, mahse, ani lo chu innghahna ka nei chuang silo. Ka fapa, damna pe theitu pawh amah chauh a ni.


Show post links
Top

[Ngaia]

REMRUATSANGA

CHAPTER - 23


Damdawi in kan thlen chuan Bawihtea pawh a lo harh tawh a, a pi nen an lo inpawm hlun ka hmuh chuan ka nui chhuak hak. Remruatan " Tlangval chu a lo harh tawh elo? A pum chu na ala ti em? " Tiin a nu chu a zawt a. An bulah a thu thla pah nghal zat.



" A na tawh rihlo a tia lawm hei, a tlangval rih lutuk. A rawn harh hlim khan anu a hmu silo a hawihai deuh tih mai loh chu " Nui hak hak chung hian a chhang a.


" Duhte, keipawh ka kal rih phawt mai dawn maw ni. Mamawh in neih chuan rawn sawi hreh lo ula, naktuk lamah pawh ka rawn kal leh tho ang kal chu " U Thazualan a tih chuan lawmthu ka thiam ang tawkin ka sawi a. An chhungkua kan nei hi kan vannei ngawt mai. Kan tan chuan vantirhkoh dik tak an ni. A haw tur ka thlah laite chuan mamawh kan neih chuan hrilh zel turin min la chah mawlh mawlh. Mission venga a pute hnenah a innghat dawn a ni.


" I phone lo la lawk teh " Ka luh leh ruala Remruatan a lo tih chuan ka pe ve mai a, ka lock hran loh avangin a thai zui nghal mual mual.


Mala hnena a riltam em tih ka zawh chuan a bu nghat nghat mai, a awm ve viau e. Zing atangin engmah mu malin a la ei lo a, a motor rui a luak nasa bawk nen. Naktuk zai tur anih avang zan dar 9 hnu lamah engmah ei an phallo zui dawn leh nghal.


A eitur lam tura dawra kal ka tum chu Remruatan " Ka lokal ve ang " Tih leh thawh a rual a, hnialna hman pawh a awmlo kawngka atangin min nawr chhuak nghal dawr dawr. Anu lo nui hak hak ri ka hriat chuan ka zak viau.


" Khawi teh, min thlah teh. Lokal ve kher pawh angai lo. " Ka tih hlak hlak na pawh chu engah mah ngailo in min la nawr dat dat reng a, step-ah kan chhuk thla dawn emaw ka tih laia Damdawi In hnung lam panna lamah min nawr phei daih chu "Hey, helamah eng nge kan tih dawn? Helamah eng leina tur mah a awm hlei nem " Ka ti chul a, kan kal pelh lam ka hawi let tawk tawk chu " Kal mai mai teh, inbiak kan ngai " A ti hluk.


" Bawihtea a ril a tam tawh kha, nakinah kan inbe mai dawn nia. Khaw maw min thlah teh " Ka tal a, ka dar a vawnna a thlah zui ve mai. Amah hmachhawn zawnga ka inher rualin " Eng nge i sawi duh chu tah hian sawi mai rawh " Ka ti a.


" Thlalak.. " A tih lai mekin " Nakinah kan sawi thei mai lo em ni? Nge ni a i fapa riltam saw i hmu miahlo zawk? Zing atangin mumalin engmah ala ei hlei nem " Tiin ka lo tawng khalh a, a fapa, riltama a awm laia thlalak a ngai pawimawh zawk chuan ka thin a ti rim hlur.


" A ril a tam tih ka hre lo " Inthiam loh hmel zeta min en chunga a ti chu rum zet hian ka melh nghek. Ka duh loh loh ka sawi ang tih ka hlauh avangin ka kalsan ta zawk a. Min rawn zui ta bik lo. A ngaihsak viau emaw ka tih laia a fapa riltam a hre lo chuan min ti na riau tlat pek.


Dawr atanga ka let leh chuan room-ah a lo awm ve tawh a, Bawihtea khum sir-ah a thu nângin ka melh duh miahlo a, thil ka eitir laia a lo chhaih zuk zuk pawh chu ka hre lo der hmiah. Anu chuan ka awmdan chu a hrethiam ang tih ka hlauh avangin pangngai thei ang berin awm ka tum a, chhung lamah erawh ka hah tung mai.


Thil a ei fel deuh chiah tihin Remruata pa a rawn thleng ve a, ani pawhin a tupa chu a rawn ngaihtuah ngang mai. Mahse, in lamah tumah an awm loh avangin eirel ngai bawk nen naktuk lama rawn kal leh tum chungin dar 4 rik hma deuhin an haw ta a.Remruata erawh riah ve a tum miau avangin a la thu run mai.Haw tur tih ka tum lem lo, a riah ve theih loh a hlauh avanga cabin book kha a ni miau a. Biak ka chak rih miau loh avangin an pafa infiam bulah pawh awm lo a in la hrangin long chair an hunah chuan phone ka khawih san daih a, ka mit sir zeuh zeuh thung. A pum ana rihlo a ni bawk a Bawihtea pawh a harh ve peih rih viau.


Chanchin inhrilhin Zawmi nen whatsapp-ah kan inbia a, Remruata chunga ka lungawi loh thu leh ka lungawi loh chhan ka hrilh chuan min vui pui ve ka rin laiin ka beisei loh deuhin min rawn chhang. " A pa pawh ni se mihring ve tho a nia, a hre lo palh ve thei alawm. Chutianga i thinrim khum ringawtte chuan hrehawm ti deuhin i siam ang a sin. I â thei lutuk " Min rawn ti zek. Ka ngaihtuah a, a sawi chu dik riau hian ka hre leh hnuhnawh.Bawihtea hnena a riltam em tih ka zawh khan tawng ka nilo in zai zir in min chhang ringawt anih kha. Remruata lahin ka phone a khawih daih bawk a.


An pafa lam ka hawi chu Remruatan min lo melh kur avangin rang zetin ka hawi let leh nghal. A chunga ka lungawi lohna te kha a bo duak tawh nangin lungawi angin ka awm duh rihlo a, zanriah kan ei thlengin kan inbe tam lo viau. An pafa in an tawng reng a, a kar laka min biakin a rul tawk te te in ka chhang a, Remruata nen chuan kan inthlithlai dun ve ve tih ka hai lo. A landan chuan chhun lama thil thleng kha sawi chhuaktu nih kan hreh ve ve niin ka hria.


Bawihtea a mutthilh hnu chuan a hrehawm kher mai, ngawi rengin Bawihtea bulah a thu reng a, ka tawng khum dan vang kha nge ni. Khami hnuah khan Bawihtea a kalsan leh tawhlo hrim hrim. Chutia inbe lo a awm dun reng chu hrehawm ka tih avangin biak tumin ka hrawk ka thian hmasa kharh kharh a, chiang zeta min rawn en avang chuan ka lâi leh titih der. A awm lohna lam hawiin ka inher vut a, a nui thum deuh hak chu zawi viau mah se ka hre chiang viau.


" Sawi duh i neih chuan sawi la " Zawi deuh tak hian a ti a, amah hmu thei tura inherin " Ka tihpalh " Ka ti ta sep. Chutah mawi zet hian a kiai sak a, " Engvangin? " Tiin min zawt.


" I hria alawm, chhuna Bawihtea i ngaihsak tawk lo ang a ka inngaihtir che avang khan ka tihpalh." Ka tih laiin "Ka ngaihsak tawklo a lawm " A ti a,


"Nilo, Remruat, khatiang khan ngai suh. Ka tihpalh tak tak. I ngaihsak zia leh an tan thil itih sak hnem zia hrechiang bertu ka ni a lawm. " Ka lo ti leh zung zung. A ni reng bawk a, In khat chu sawi loh khaw hmunah pawh awmlo kan ni chung pawhin a ngaihsak em em reng a, a chang chuan hna avanga chhungkaw pa ber awm bo in a nupui fanaute ral khat atanga a ngaihtuah em em reng thin hi kan ang ka ti hial thin a nih kha. Mahse, keimah vangin a fapa a ngaihsak tawklo ni a inngaihna a nei a, chu chu a nih loh zia hriattir ngei ka duh. Khawvela pa tha ber a ni lo mai thei;mahse keini nufa tan chuan ani tluk an awm lo thung. Piang nawn leh dawn pawh ni ila ka fate pa ni turin amah tho hi ka thlang ang.


" Ka thu pha chawina pawm sak ka ni dawn em? " Kan boruak rit luk tih zangkhai tumin ka nui sang a, " Ka zawhna te min chhan that dawn chuan ka pawm ang " A ti nâ in pawm a ni tawh tih a mit meng de sar sar atang chuan ka hre thei.


" I duh ang chhanna ka nei ang e maw? " Ka tih chuan nui hawk hawk chungin min rawn pan a, long chair inhungah chuan min thut thlak puiin hnung lam atangin min kuah deuh hlun a, ka nghawng zawna a rawn thaw lum ham ham chuan min ti mur sung sung thei.



Bawihtea an zai lai chuan pawn lamah Remruata te nufa leh U Thazuala nen kan nghak thap a, midang ho erawh hna thulh thei an nih hlawm miau loh avangin zai zawh lamah rawn lan an tum hlawm. Adina leh Hlima pawh kan inbiak hnuhnun ber kha chuan Aizawl kan lo lut tep kha a ti mai a, an rawn thleng har vak tawhlo turah ka ngai. A khat tawkin Remruatan min tawng thlamuan reng a, a zawng zawngin hahdam lo mah ila eng emaw chen chu min chhawk viau.



Pathian zarah Bawihtea pawh tluang takin an zai zo va.In zai ber a zo chu ka zang deuh hawk. An zaina erawh naupang harh rual lek ala ni si a, ka dim thiam pui viau angai dawn a ni. Adina te pawh an lo thleng tawh a, Hlima chuan khuma a nau,engmah hre lo a mu bam chu en in a khawngaih thu a sawi leh thin. Nu Mapuii te nupa bakah Remruata pa a lo thleng ve bawk nen kan cabin-ah chuan kan awm deuh laih laih mai.Nu Mapuii te ina innghah an tum laiin Hlima erawh Remruata nu leh pa ten "kan bulah awm rawh se" An tih deuh tlat avangin an riah pui dawn a.Awmdan tur kan inhrilh ngun leh malh malh viau.



Bawihpuii a lo thlen chuan Remruata ka en vata, ani'n min lo en ve chiah bawk.Ka phone a check khan thlalak min lo thawn thintu nena kan chat kha ala clear miau loh avangin Bawihpuii nena an thlalak zawnh zawng kha a hmu tel ve vek a, nizan khan engvanga hrilh lo nge ka nih tih min zawt anih kha. Ka rilru dik taka chhangin "Min phatsan duhna rilru in put ka ring lo ve ve a, thian satliah ngawt nilo in thiantha ber in ni bawk a, in lakah rilru zau tak ka put angaihna chen a awm a. Lo thik tlat ta ila in inkarah engmah a awm chuan bawk siloh chuan keimah mai bakah inpahnih tan pawh a nuam dawn lo a, kan keh darh vek zawk ka hlau a ni. " Ka ti a nih kha. Bawihpuii lo zawk re-union ni ami hmeichhia kha a bialnu hlui tho a ni a, tunah erawh hmeichhia khan kawppui nghet a nei ve tho a ni awm e. Tunge thlalak min lo thawn thintu kha a hre bik lo a. Kei ka rin danin Remruata hun hmanna tam zawk thlalak min rawn thawn theih danah amah hrechiang tu tak chu anih ka ring.



" Remruat, zanin chu ka lo riah chhawk ve dawn che mi? " Bawihpuiin a tih chuan pakhat chuan a lo rem tilo na sa, "Damdawi In a awm chhung zawng ka riak ve dawn " A ti deuh bur.



" An nufa ho hian kan char bet duh nghal lo ang tih a sawi theih loh Bawihpui " Remruata nu, Nu Mahruaiin a lo tih chuan an nui dar dar hlawm a. Bawihpuii bawkin " Hma ala har lutuk a, Adinan a chet khalh daih sia kumin pawh a thlawi leh rih dawn a ni" Nui pat pat chung hian a ti a.



" Adina te zawh veleh kan ti ve nghal dawn a lawm. Thlawi reng ka tum teuh lo, Upa in an duhlo tih ringawt " Thutak zeta Remruatan a tih rualin Nu Mahruaiin "I â thei lung lung em mai, Upa in an duh loh hu chu tih luih loh tur. Ti lui, ngaihbel theih tur tinga vanduaina in a tlak buak sawi tur ting hi an awm ve leh zauh thin. Kan dam ang a, kum khat te chu a rei hlei nem " Dam dap hian a ti a.


" A tuartu in nilo a, in hre lo mai mai anih kha " Remruatan a tih hluk chuan ka lo zak hle. Puitling ho chuan an nuih dar dar hlawm a, Nu Mapuiin " Chutia neih vat vat i duh chuan kan in a awm nghet turin kan char bet nghal zawk dawn em ni? Tichuan in khata lut leh chhuak an nilo mai dawn a " A lo ti a.



" Chutiang chuan a tha viau tak ang, Nu Mapuii te inah chuan awm nghal mai rawh u " Beisei nei zet hian min en a, ava han mawl mai mai tak. Nu Mapuii khan a fiam mai mai tih a hre miahlo em maw ni.


" Ka makpa atan ka duh reng reng lo che aw,mipa dang tha deuh ka zawn sak dawn "Bawihpuiin a lo ti zauh


" Puitling inbiak laiin naupang an lo tawng ve sek ngailo Lalduhsak, fel deuhin lo ngawi mai mai rawh. Nu Mapuii, in inah chuan awm se kuminah kan innei thei tak tak dawn em? " Beisei nei fe hianatih zawm zat. Inneih vat vat a duh lutukna lama a rilru fim a hmang hlei thei lo chu a tha lamah ka ngai mai.


" I nu Mapuii khan a fiam mai mai che anih kha Bawiha " A pa in a ti ta nge nge. Chutah, keimah min rawn en a, lu ka lo buk khum zeuh a. Nichina a phur hmel zawng zawng kha chawp leh chilhin a bo nghal vek thei.


Bawihtea an zai atangin ni 3 a liam leh tawh a, an zaina avangin a duh ang angin a awm theilo hrehawm a ti tih mai loh chu harsatna em em kan nei lem lo.Nitin a pi leh pu ten an rawn tlawh ziah a, Nu Mahruaii tak phei chu "chhun lamah chuan ka lo chhawk ang che " Tiin Hlima nen an pîtu in an rawn awm nileng chawt zel. A pute Adinan a haw phei san tawh a, ani erawh a pi leh pu ten an la ngai ve bawk nen kan rualin a haw dawn a ni.



" Nu, nangmah chauhin elo i awm? Khaw nge an kal daih a? " Room ka luh ruala Nu Mahruaii chiah ka hmuh avang chuan ka zawt vat a.


" Ka hre lo, Bawiha khan 'kan chhuah harh pui ang e' kha atia an pafa thumin an inzui chhuak a nih kha. Phone chhin teh an bo rei tawh riau mai " A ti a, ka phone phawrhin Remruata ka call a, room chhungah a ri rang rang mai.


" Kan zawng chhin ang e aw, pawn boruak dâia an awm rei chuan Bawihtea kha a hritlang ang tih ka hlau deuh " Tiin an pafa thum zawng tur chuan ka chhuak a, an vang phian leh nghal. Kan cabin-a rawn duty thin zing a mi nurse ka hmuh chuan alo hmuh leh hmuh loh ka zawt ta chawt a, Inchung lama an chho a hmuh thu a lo sawi hlauh.


Inchung ka han thlen chhoh a ka thil hmuh chu ka awih theilo zawk. An pafa thum chuan Damdawi In atanga hla lutuk lo a JCB in lei a laih chu hmuhnawm ti lutukin an lo thlir anih chu. Mipa naupang pahnih chu ka hrethiam, Remruata ber pawh chuan mit khap lêk lo in a ni a thlir. An thutna bula ka va kal hnaih takah chuan ka thawm hriain Pa ber a rawn hawi chhuak hram a, naupang pahnih erawhin hmuhnawm an tibawk a niang, ka thawm hre ve awm ang pawhin an awm lo.



" Chhuk ila, Mala hi a hritlang ang tih a hlauhawm " Ka ti a, " Ala hmuhnawm asin" Nui suk chung hian min chhang a. Naupang hnenah erawh chhuk a hun tawh thu a hrilh ta tho. Hliman "ka la en chak e... " A ti nui nui a, " Kan awm reng chuan Nânau a dam har phah ang a, kawm tur i neilo reng dawn asin " Ka tih takah chuan a awlsam viau lawi.


Kan chhuk chuan Bawihpuii leh hmeichhe pakhat hi an lo awm ve a, min hnung chhawn zawng a a thut avangin tu nge anih ka hre thei lo. " In lo chhuak daih a " Bawihpuiin a ti nang nang.


" Ka chhuah harh pui lawk a " Remruata chuan a ti mai a. Hmeichhe pakhat awm ve bula kal hnaih pah chuan " Hei, Angie nen hian kan rawn inhmu rem chang a, chanchin ka hrilh a a rawn kal ve a nih hi " Bawihpuii chuan a ti leh bawrh bawrh.


" Bawihpuiin sawilo se chu ka hre miah dawnlo tihna ania, iti awm ang lo emai. Thiante tal chu hrilh ve tur che lawm " Hmeichhia khan a lo ti ve a. Bawihtea ka mut that tir avangin a hmel ka la hmu lo fo.


" Kan ni deuh teh thuta inhrilh vakna hun a awmlo alawm " A tih laiin " An zai zawh hnu lamah tal te pawh " A lo ti leh hram. Nu Mahruaii a awm tho avangin Remruata te thutna lamah chuan ka phei ve a, hmeichhia awm ve pawh kha a hmel ka hmu chiang ta. Ka hmuh hnu ang riauin hriatna ka nei a, ka hmuh tawhna erawh ka hre chhuak mai thei lo.


Tih tur an nei ni a insawiin rei tak an awmlo a, an kal hnuah erawh an tawng duh dun a ni bawk a, a reh hawk thei. Remruata bulah " Ka hmu hnu a ang " Ka tih chuan " Hmu tawh ang, thlalak ami kha alawm " Awlsam zet hian min chhang a. A ni dawn tak e, ka bialnu hlui a tih nghe nghe kha.


" I bialnu hlui pahnih a ruala i hmu chu tek deuh chhuai te a awm em? " Nu Mahruaii hriat phak loh tur chuan ka fiam a, min chhanglo in min en run run mai.


Damdawi In atanga kan chhuah ni chuan Remruata a biak tawng hleih theih meuh lo. A buaithlak tak tak a ni. Kan khuaa haw rihlo a, an in lama awm rih turin min duh a. Keiin " A mawi lo, Bawihtea pawh a dam tha chak a, Pathian zarah eng em kan ti lo ang. " Tiin ka hnial thung. Biak pawhin a rul tawk lekin min chhang deuh hmuk hmuk zel a, nu Mahruai'n " A ngaihtuah vang cheu ah ngai la, awm nawm loh phah nan hmang duh suh. Mipa ho hi chu an buaithlak a nia. Han awm thei rih ula keipawhin ka duh viau a nia; mahse, i rilru tur ka hrethiam a, ka nawr lui ngamlo che u " A ti a.


Keipawhin han awm khaw muan rih chu ka rilru chhung ril tak chuan a chak. Ka fate enkawl an hahthlak e tihna ni lo in tun ni reilote chhunga min chhawk zang khai ringawt pawh kha ka tan chuan a hahdam thlak tak zet. Nimahsela, an in a han awm rih kha a mawi lohna chin tam tak a awm si, bakah, anmahni fel viau mah se keiman inthlahrunna chen tam tak ka nei dawn tih ka hria.



Remruatan " Keiman ka dah ang che u, sumo-a hawn a ngai lo" A ti deuh bur a, a lungawi vaklo nen ka hnial buai duh ta lo. Zing kara damdawi in atanga chhuak kan nih avangin an inah tukthuan kan ei te te a. Thleng ka sil lai chuan ka bulah rawn kalin " Hetah chuan awm rih mai rawh u, ka ringlo che tihna ni lo in ka hmuh phakah ngei awm rih se ka duh. " A rawn ti leh.



" A tih chi ber loh alawm. Keipawn i thlazar hnuaia awm rih tluka thlakhleh ka nei bik hlei nem; mahse, a mawi lohna chin a awm a. Bakah i nu leh pa te pawh an zahawm alawm " Ka ti a.



" Ka nu leh paah chuan buaina a awm lo tih i hriat kha " Ti sapin ka hnunglam atangin min rawn kuah a, midang sitting room lamah an awm daih avangin min rawn hmu thei dawnlo tih ka hriaa, ka lo sawisel hran biklo. Nilo se chu midang hmuh a hetianga awm vel hi ka zah zawng tak.



"Buaina a awmlo tih ringawt a ni lo, an fel lutuk, ka tan pawh an tha lutuk tih chu ka hria. Mahse, innei kan la nilo a. Ka chungah tha in fel viau mah se ka tan a nuam lo. " Ka la ti fan. Ka rilru ka thlak dawnlo tih a hria nge min chhang zui ta lo.


A tawi zawngin Remruatan kan khuaah min thlaha zan khat a riah hnuin a let leh tawh a. Thil mak deuh chu kan awmdun loh atang chiahin thlalak min rawn thawntu hnen atang khan message ka dawng leh tan. Tun tum erawh thlalak ni tawhlo in Remruata kalsan tur leh ka phu loh thu min rawn sawi khum thin.Call pangngaia call in switch off a in ti tlat zel a, whatsapp-ah call theih lohin a insiam bawk.


Tum khat chu Angie leh Remruata thlalak dunna min rawn thawn a, chu erawh tun hnai a mi a nilo tih Remruata lan dan atangin ka hre thei thung. Chu thlalak a rawn thawn telah chuan " Amah hi chu i hmuh tawh kha, Remruata first love a nia tun thlengin Remruata pawh hian ala theihnghilh miah lo tih lo hre mai mai la. " A rawn ti a, thlalak min rawn thawn thintu chu Bawihpuii a ni angem tih ka ngaihtuah phah hial. Angie rawn kal puitu kha amah a ni miau. A hma zawnga Remruata nena an inzui chhuahna apiang thlalak ka dawn zel dan leh Remruata nen kan inkarah engmah a thlen siloh avanga Angie nen an thlalak min rawn thawn hnuah Damdawi In ah khan a rawn hruai leh niin ka ngai a. Ka ngaihtuah nasat poh leh amahah a tawp zel thin chuan ka rilru a ti hrehawm khawp mai. Remruata hnenah ka sawi ang nge sawilo ang tih pawh ka ngaihtuah nasa viau. A haw hnua min rawn text thin dan kha chu ka hrilh zel thin. Engahmah ngai lo tur leh a zawn chhuah tur thuin min chhang a nih kha. Tun tum a mi hi hrilhin Bawihpuii ka rinhlelh thu sawi ila engtin nge a ngaih ang, a thiantha ber leh ka unaunu ni bawk chu a rin chhiat phal ka ring bik lo.


Remruata nen kan inbiak lai pawh chuan chu thil ringawt chuan ka rilru a tih buai avangin ka lo chhang tha vak thin lo nge. " I rilru tibuai tu an awm leh tawh em ni? Nge Bawihtea a dam tha lo zawk? Ka lakah zep nei thin suh ka tih che kha " A rawn ti hlawl a. Engmah a awm loh thu leh ka nawm sam vak loh thuin ka chhang ta ringawt.


" In enkawl tha la, naktuk lamah vitamin leh thil dang ka lo thawn dawn che nia.Keimah pawh ka lo zin thei tep " A tih mek laiin " Engtikah? " Ka lo ti thuai. A nui hak a " Min ngaih dan a zirin a ni mai, min ngaih viau leh ka lokal hma a ni mai " In la zei vel thei lutuk.


" Anih tunah hian ka ngai ngawih ngawih che ti ta ila " Ka ti ve zel. Dawt muhlum erawh a nilo, ka ngai tak tak.

"Chuti chu tunah hian ka rawn kal nghal ava ngaih hmel ve,i duh ang em? " A nuih danah min fiam tih ka hre mai.

" Hriatthiamna sang tak nen zanin tut tuta i rawn kal nghal chu ngai lo mai rawh se, ka fate.. " Ka tih mek laiin " I fate chauh an nih bik loh kha aw" A rawn ti. A rawn sawi dan teh tawl avang chuan ka nuilo thei lo. Naupang titau hi a ang lutuk tlat.


Rei tawk fang kan inbiaa, a rang thei ang bera rawn kal a tum thu kha a sawi a.Rawn kal vat vat se ka ti hle. Hmaichhan ngeia titi dun kan mamawh.


Inneih hun a hnai telh telh a, kan theihtawpin kan inbuatsaih ve zel bawk a, Bawihtea pawh a dam chho ve zel nen, kan chhungkua pawh kan hlim lai tak a ni.Adina thianten inchhung sik sawi velah min rawn pui neuh neuh an awm reng a, vawiin pawh pathum laiin min rawn pui leh a. An inngam tlang si a, a khat tawkin an insawisa tawn reng hlawm nen kan hlim dar dar viau. Chhun thingpui in a kan chawlh lai takin kan kawt lamah thawm a awm huk avangin kan tho suau hlawm a. A landan chuan thil tisual an man ni awm tak a ni. Patling pakhat hian "A hmaa kan thil bo thin zawng zawng pawh kha nangmah bak hi ini lo ang, ka report dawn khawp che " A ti lung lung a. Kan va chhuah lai tak chuan misual tia an hling chu leiah thuin an lo din hual laih a, a hmel en pawhin ala naupang hle tih a hriat.


"Pa Tai, eng nge thil awmzia ni a? " Tiin Adina thianpa Rina chuan kan hnaih ber a mi chu a han zawt a. "Hei, Pu Khama te in a rawk lai kan phawk a, a tlanchhia kan rawn innang ching a nih hi " Pu Taia chuan a ti a. A chek zui tlat tlat.



Rei awmlo in an mi man chu Pu Khama te in lamah an chhoh pui ta a,Adina te thianho chuan an sawi zui nak nak.Rinan "A hma khan ka naute nen hian an inkawm ve thin a, damdawi a tih tak avang khan an inkawm zui ta lo a.A chhungte khan home-ah khan an dah reng a, fel viau tawh turah ka lo ngai ania " A ti nuah nuah a.


" Home-a in dah ringawt pawh hi a ni ber lo ka ti kei,Anmahniah tumna tak tak a awm loh chuan an home awm laiin han tha ve mah se, an rawn chhuak a, an hmuh phaka a awm chiah hian an lung a len a. Reiloteah ngai an awh leh zel tho. Chutihrualin that hlen phah ta hi chu an awm ve tho bawk a " Maruatan a lo ti ve thung.


" Adik alawm, an chhungte tan pawh hian deal thiam hi an har viau ta ve ang.Keini a tawnglo te hian chuti chuan enkawl se, chutichuan ti zawk se tiin kan lo sawi ve thin mai pawh a.Han hrawn ve chhin chiah ila a tam zawk hi chu eng a ruai kan ni bik lo vang " Titu chu Rina bawk a ni.


" Chuvang tak chuan tette atanga inkaihhruaina tha neih hi a pawimawh em a sin. Ka ti mai mai a, tunlai naupang sual khura an luh hma em em nachhan hi chu nu leh pa mawhphurhna a niin ka hria. An tette, thil hrethiam rual an nih hma atangin an fate an in thunun tir a, an duh ang apiang an tah ai chuan tiin an tihsak a. Kan duat tur chu a ni nameuh mai; mahse kan fate kan inthunun tir tur a nilo ka ti ve tlat. Fate thunun tur zawk ni si, an faten an thunun let hlauh zawk a 'A duh ang tih sak loh chuan a chuti khati thin' an tihte hi a! An naupan laia an enkawl dik loh rah ka ti mai. Tereuhte a nih atang khan a duh zawng zawng a nei theilo tih hriattir se la, an heti lo tawp ang. Nu leh pa tam takin 'Kan faten min hlau lo' an han ti phei hi chu kei, ka dem ngawih ngawih. " An thianho a a ngawi chawi ber Bda pawh a insum thei ta nganglo ania nge.


" Generation no/zuau lutuk siamtute pawh nu leh pa te tho maw le, tu leh fate hau phallo te hi an tam ta lutuk a. Dimdawi thei ang ber hian an enkawl a, chu ai chuan khawvel hi fight a ngai a ni tih kan inzir tam te hi a ngai. Kum naupang te a mahni intihlum kan tam ta lutuk te hi! " Ti hluk hluk chungin Maruata chu a tho hluai a, pawnah a chhuak zui daih chu kan inmelh hrek hrek hlawm ringawt.


"Ngati nge a? " Ka ngaih thalo in a thiante chu ka zawt a. A awmdan kha awmdan pangngai a nilo tlat a tin ni.


"A bialnu hlui a hrechhuak anih dawn kha " Rina chuan a lo ti mai a. Ka hriat zawm chak avangin dil chhut deuh zawk hian ka zawt a. A sawi dan chuan nikum hmasa lam khan Maruata hi class 12 zirlai naupang nen inngaizawngin, a ngaihzawng chu tuna an sawi ang chi nu leh pate duat sual, a duh apiang an tihsak. An fa mal, hauh pawh an hauh phal loh ang chi kha a ni awm e. Rina sawi zel danin inchhung khura a duh duh dana awm thin na nâ na chuan Maruata chu a duh ang anga tih kawi a tum thin a, chu chu Maruatan a ngai thei bau silo. A then ta a, chu nu rilruna chu a inawkhlum a, a thih hlim bawr vel chuan Maruata pawhin hrehawm a ti viau ni awm a ni.



Keipawh hian ka ngaihtuah fo, tunlaia thalai intihlum tam ta lutuk hi eng nge a chhan ni ang tih hi? Kei ngei pawh ka tleirawl lai khan ka lo tum ve fo tawh a nih kha. A chhan ni ber a ka puh chu mahni inkhawngaihna a ni. Mite aia hrehawm tuar nasa bik leh chaklo bik riaua inngaihna te. Hmangaihtu nei ve lo ni a inngaihna ten min tibuai a, Vanduai berah kan indah fo thin. Chu erawh khawvel kan dai zim lutuk vang a ni tih tun hnu hian ka hre chhuak. Khawvelah hian vanduai ber emaw kan intih lai pawh hian keini aia vanduai leh harsatna tawk nasa hi an lo tam lutuk ringawt. Thenkhat phei chu an nunah hian lawmna tur reng reng a awmlo ang tih theih hial tur khawp a vanduai te pawh an lo kat nuk. Mahse, chung mite chuan keini ang a mahni nunna lak mai tumlo in an nunna turin an fight chhuak thin.



Naupang sikul rawn bang chu an rawn ti dak mai. Eng dang vang a ni lo, an intibal lutuk tlat. Ka tawng duh miah loh avangin an unau chuan an inmelh deuh ralh ralh a. Tawng miahlo in an mitmei hmang hian an inbe thiam tlat zel.


Malan " Balu-ah motor kan khalh a " Min nuih tlawn ver ver chung hian a ti a, a thawk vakin a hre lo nge a u a nghawk zauh a " Nia, anu min ngaidam rih lawk la. Nakinah min hau mai rawh homework kan ngah lutuk " Tih leh room lam pana a nau pawh a rual chu a nuih loh theih tawh loh. Aputea te thian ho hnathawk pawh an nui hui huk hlawm mai.


" I fate hi chu an len hunah an la bawn viau ang maw le, tun atang rengin an fing tlat " La nui tha chungin Rinan a lo ti chu an lo tuihnih liam liam hlawm a. Hlima te unau rawn chhuak leh chu an bag an rawn dap ve nghal rak rak avangin homework an nei leh neih loh ka en pui nghal thuai. Kan nitin hun hman dan chu heti reng hi a ni rih mai. Sikul lama chaw ka chhum ve thin erawh kha chu kan buai ve bawk nen bansan leh ta daih. Tihian in lamah an sikul bang ka lo nghak a. An rawn haw apiangin sikul a an ni hman dan ka lo zawt thin. Tum khat ka zawt tur erawh Mala hian "Engmah a thleng lo, nimin ang tho " Tiin ka zawh hma hauhin min tih khalh pek a. Ka nuih a za bawk si, chhan vak ngaihna ka hre lo ka hawi lawl lawl mai.


" Remruata nen in inkar hi i tihtawp thuai loh chuan i na dawn ania. I nat tam tak tak hma hian kalsan zawk rawh " Ka message dawn chu ka chhiar nawn tlut tlut a, chu ai mah chuan ka thlalak dawn tel Bawihpuii leh Remruata infawp lai chuan a ni ka rilru a tibuai ni.


Show post links
Top

[Ngaia]

REMRUATSANGA
CHAPTER - 24


Thlalak chu ka ennawn leh thin. Ngaihtuah tur ber ka hre lo a, phatsan ni angin ka inngai phal hek lo. Nilo, Remruata ka ring chhe phallo a ni mah zawk ang. Min phatsan turin ka dah phallo a, ka dah chhin ngai lo bawk. Tunah pawh hian engkim amah zawh hmasak phawt a chumi hnuah thutlukna siam chauh ka duh.Chutihrualin kei aiin Bawihpuii a thlan zawk thu min hrilh ang tih ka hlau a ni.Mahni infuih pah mawlh mawlh chung leh ka huaisenna sawm khawmin thlalak chu Remruata ka forward a, ka phone ka switch off nghal,min chhanna tur ka hriat ngam loh vang a ni ber ang chu.


Ka inngaihtuah tlaivar deuh thak tih theih a ni. Khaw var tawh hnuah ka chhing ve sek a. Naupang thawmah ka harh hma leh viau. Ka lu a nat ut ut bakah ka mit a thial ûrh a, ei rawngbawl vak angailo chu a tih zia phian. Ka chhungte chhuah vek hnuah ka lu na lutuk chu ka mu leh ta tawp a. Ka muhil dawn siar siar tih a kan kawngka an rawn kik chu ka ngei hle. Chhangtu an awm loh chuan an kalsawn ve leh mai ka rin avangin ka mu rem sauh sauh.Mahse, kal sawn chu sawi loh kawngkhar chu a chumin an rawn chum titih tawh. Ner nang chungin peih lo zetin ka tho chhuak ta nge nge a.Kawngkhar lah chu a ri reng bawk nen lu na a ti zual. Room atanga ka chhuah rualin " Ka lo hawng dawn" Ka ti lang lang a, a reh ve nghal mai bawk. Kawngkhar ka hawng chiah erawh Remruata nen kan inhmachhawn ran mai.


" Eng nge ilo tih dawn? "


" I damlo em ni? " Kan inzawt rual chiah. In chhanglo tawn ve ve in kan in din chilh ran a, tawng leh tum awm pawhin kan awm tawh lo. A rawn lang teh thut chu mak ka ti. Zing dar 9 tlanga rawn thleng leh nghal phei chu a rawn chhuak hma viau ang.



" Tihian kan ding reng dawn nge? " A tih chuan chhanglo in ka inher a, thutkhawmna lam ka pan san ta daih. Min rawn zui ve nghal tho tih a ke pen ri ah chuan ka hre thei.Inhmatawnin kan thu ran a, ka tawng peih thlawt loh avangin biak pawh ka tum leh hran chuang lo.


" Tinge i phone i off? " Tiin min zawt te te a. Chhanglo in ka ner deuh sak ringawt chu " Min ring em? " A ti leh.


" Keimah ka inrin tluk zetin ka ring che." Ka ti a, " Anih chuan eng nga ti nge biak tlang theih loh a i awm? " A lo ti khauh.Chhan mai dan tur ka hre lo. Mahse, ka phone ka off chhan kha chu ka rin loh vang a ni chiah pawhin ka hre lo.


" Thlalak kha Bawihpuii ka thawn ve a.. "

" Maw? Tinge i thawn? " Sawi pawh a sawi zawh hma chuan ka lo ti hluai. A chhan pawh heng thil hi Bawihpuii tih a nih ka rin miau vang a ni.


" Hetianga keini 3 min then hran tumtu hi ka hriat chhuah duh vang " A tih laiin " Heng thil titu hi Bawihpuii a ni lo ang tih i hria em ni? " Insum hmanlo in ka lo ti a, chik fe a min en chungin " Thil hriat i nei em ni? " Tiin min zawt ta chiah. Thu danga chhang lo in room lama ka phone dah la tur chuan ka kal a. Lukham hnuaia ka phone dah chu la chhuakin power ka on a, Remruata min rawn call tumna message a rawn thleng a, vawi 100 chuang dawn min rawn call chu niin. Room atanga chhuakin phone chu Remruata ka pe a, thlalak min lo thawn thintu nena kan chat chu en tura hrilhin ka thutna ngai bawkah chuan ka thu thla leh. Min rawn tih dan ka hrilh vek thin avangin a thai deuh puat puat a. Rei en pawh ngailo in a en zo thuai.


" Heng thilti tu hi Bawihpuii anih i ring a maw? " Phone a dah hnu chuan min zawt a. Ka buk nghat rualin a nui hak chu ka hrethiam lo viau. Chutah " Hetiang ti duh tur chi a nilo tih ka hrechiang. " A ti a, ka sawi reng kha a thiantha ber chu a ring chhe phallo ang tih.


" Mihring hi a in hriat chian tak tak theih loh " Engvanga chu thu chu sawi chhuak nge ka nih ka hre lo. Keipawhin Bawihpuii tih a nih ringhlel chung tho siin ka ring ngam tak tak biklo anih kha.


" I laizawnnu ngei i ringhlel a maw? " Tia min zawh chuan " Amah bak ni thei tur an awm hlei nem, nge ni a in pahnih hian in inthurual zawk? " Ka rilru nilo pui pui hlir ka sawi chhuak chu inhrethiam tawh bik lo. Nizana an infawp lai thlalak ka hmuh vang te pawh kha a ni mah na.


" Lalduhsang.. "


" Remruat, in inkawp leh duh a nih chuan hetianga min chhaih kual lo hian min hrilh tawp zawk rawh u.Tha takin min hrilh u la, ka inthiarfihlim mai ang " A lu min thin khum nghut nghut chungin " Nakinah kan sawk leh dawn nia inngaihtuah harh hmasak i mamawh anih kha " A ti ta daih.


" Aih tunah sawi fel ang " Ka ti ve tlat.


" A tha lawm, i tih dan dan le. Ka sawi ang a, ngun deuhin lo ngaithla la. " A chawl dat a, chiang zeta min rawn en chungin " Thlalak a mi kha kei leh Bawihpuii ngei kan ni. Mahse,tun hnai ami nilo in kan inkawp lai a mi, nang nena kan intawn nawn leh hma daih a mi tawh a ni. Kha thlalak rawn thawntu che khan engtin nge a neih theih ka hre lo. Keipawhin a tir chuan nangmah ang tho in Bawihpuii ka ringhlel ve hman, chuvanga thlalak kha thawn ka ni bawk.Mahse amah a ni lo " A tih chuan lo pawt chatin " Engtin nge a nilo tih i hriat? " Tiin ka lo zawt.



"Duhsaki dawt sawi thiam loh zia te chu i hre ve tho ang chu? " Min thlek deuh ha a, ka nui hak mai. Bawihpuii dawt sawi thiam loh zia chu ka hre ve ngei a lawm. Hmaichhanah emaw hmel inhmu miahlo chung pawhin dawt a sawi chuan a dang a awk loh leh rang zet zetin a tawng thin.


" Mi pakhat chu rinhlelh ka nei " A tih chuan ka phawk deuh hra. Tunge ka zawh hmain amah bawk chuan " Mahse, ka chian hunah ka hrilh ang che " A ti chu ka ngei ru ang reng. A tu tak chu ringhlel ni maw?



Naupang lo bangin an pa an hmu chu an khel chul a, an lo ngai viau a ni ang an kal hlat san phal meuh lo.


"Riah chu i tum tak tak em ni? " Zanriah eikham hnuah pawh haw tum âwma a lan loh avang chuan ka zawt leh ta nge nge.


"Mi zawh sek le, haw ka tum loh chuan ka riak dawn tihna ni mai lawm" Naupang chhaih pah chuan mi chhang liam puat a. Zanriah ei dawna vawikhat ka zawh bak ka la zawt tawp silo. Chu pawh chhanna min pek loh avanga tuna zawt nawn leh chauh ka ni.


" A lo nih tak chu " Ti fân vakin pindan lamah a mutbu tur entumin ka luh san ta daih a. Min ngaihven zui lem hlei lo a, mutbu te nen ka inpawm chhuah leh tun chuan naupangin " Apa bulah kan mu dawn" An lo ti var a, an ngai ve ngang a ni ang. A bula awm dan mawlh an zawng reng mai.


" Euuu....ava fair lo ve...Apa lokal chuan ka bulah pawh in mu peih tawhlo a ni maw? " Ka nur der nang a, Hliman " Apa haw veleh i bulah kan mu leh char char dawn alawm " A tih laiin Malan " Anu, lo mu ve la apa bulah " Tiin min sawm thung. Ka nui hak a, Remruata ka en chuan chuan mitmeng de sawr sawr chung hian min lo melh ve chiah.


" A chep palh ang, nangmahni chauh mu mai rawh u " Ka tih chuan a lo nui nghawr dat.


" Zau deuhin mutna i phah ang a " Hliman a lo ti khauh. Induhin in haw lo viau mah ila fate hmuhah tak ngial pawh hian uchuakin kan infiam ngailo, inhnimhnaih lutuk tih vel phei chu kan nei ngailo. Chuvang nge maw ni an bula mu ve tura min sawm pawh chu ka zak deuh tung mai. Bakah thil pawi va ti dawnlo mah ila chutia chhungkua ang maia chhuata mut vei thap chu Adina hmai eng pawh zah ana, min sawisel dawnlo tih chu ka hria.Mahse, keimahin nuamlo tihna chen ka nei. Naupang pawh chuan min sawm ngawrh viau mah se chhuanlam fahrah te te nen ka hnial tlat a, chuti taka an bula mu tura min duh leh min sawm ngawrh chu mak ka ti ru viau zawk. A tawpah phei chuan ka chhuanlam siam tur hre tawhlo in "I pa in in pahnih chauhin a mutpui duh che u lawm " Ka ti ta ringawt. Min pui tura Remruata ka mitmei lah chu a nui suk duh chauh. Chutah Hlima bawkin " A nilo, amahin sawm tlat rawh u min ti lawm " A ti ta mai. Phawk zetin Remruata ka en a, lehlam hawi chunga a phun deuh sup chu eng nge a sawi ka hre thei lo. Min rawn nuih tlawn sawng chu ka lo melh let hrep. A lo fuih pawrh vang anih chiah hi khati taka an lo ngen ngawl ni.


" Mu tawh rawh u, zan a rei tawh. Zingah in tho theilo palh ang " Ti hap chungin ka mutna siam chu ka beng pah thak thak a, naupang pahnih an rawn mu thla rang viau. Inphih fai tumin tui khawihna lam ka pan a, Remruatan min rawn zui ve nghal chu ka hre lo der lui tlat. Ka hmai ka phih tur ka bula a ding ve reng chu " I hmai i phih ve dawn em ni? Ti hmasa la " Ka ti vel chu chhanna ka dawnglo chiang kher mai.



" Kan bula mut ve ringawt chu eng nge a pawi viau na? " Hmai ka phih mawlh mawlh lai chuan a ti thum dut dut a, ka hmai nuai mial mial chungin " Ka duh lo a ni mai, bakah nupa pawh kan la nilo a. Adina hmai zah a na " Ka ti zuah zuah.


" Engmah kan ti dawn chuang hlei nem, nupa kan la nih loh chungchangah chuan i duhthlanna a lawm " Tih tanin a tang ve tlat. Ka chhan hmain amah bawk chuan " Kan bula i mut duh loh leh naupang mutthilh hnuah i bulah ka rawn insawn mai a niang chu " Ti leh supin faifuk rat rat chungin an mutna tur ka phah lamah a phei zui nghal vut.


Adina te inneih ni pawh a thleng ve ta reng mai.A duh ber nei tur a ni bawk a, mitmeng nung sârhah chuan a hlim zia a hriat theih. Dan puitling an tlin loh avangin kan kohhran hall-ah an innei a.Mahse,ka beisei phak bakin mihring an tam daih. Kan chhungkaw member kan pung tur chu kan nufaho kan phur viau. A khat tawkin Remruatan "Anni aia ti hmasa daih tur kan nia, i luhlul vang vek" A ti leh sup thîn chu ka nuih liam mai mai tawh. Inneihna hmang tura a rawn kal hi a nui hmel kan hmu khat khawp. Kul muk deuhin a awm reng a, a tawpah zawi te tein min chhuahchhal leh
sup thîn.



Inneih hun a zo va, mo ka nei ve ta reng mai. Mahse, mo ai mah chuan nau ang tak takin ka en a, ani pawh u nei ta lo chu min u chei ngawih ngawih bawk. Hmeichhe kawm tur ka nei ve ta chu a hma lak chuan danglam tak a ni.A zawng zawngin hrilh lo mah ila, ka rilru a buai deuh changa han insawi thawlna tur a lo awm ringawt pawh ka nawm phah huai huai thei.



Tlai khat Dawngi nen eirawng kan bawl dun mawlh mawlh laiin Remruata hnen atangin message ka dawng a, "Ka hre tawh" Tih zawng a ni. Mahse, a sawi tum ka hre chiang. Dawngi hnenah ka bai chhuan lo vil lawk tura tiin room lamah ka lut zui a.Remruata ka call nghal vat, a ring chhung te chuan ka tha a khur ru der der thei.


" I rin a dik lo" Phone a lak ruala a rawn tih chuan thaw huai chungin "Lalpa ka lawm e" Ka ti chhuak sep.


" Anih, Bawihpuii a nih loh chuan tunge a nih? " Hre chak deuh tak hian ka zawt a, thlalak min lo thawn thin tu Bawihpuii a nilo chu ka hahdam huai thei tak tak nia. Kan hriat chhuah hma zawng khan amah ringhlel duh chiah silo chunga rinhlelhna ka pai reng si khan awm nuamin mi siam lo a, amah pawh biak hrehawm ka ti. Adina te inneihna hmang tura a rawn kal ve tum pawh khan ka hmel hmaiah ti langlo mah ila, ka tawt ru tun reng a, Remruata nena an inhnaih deuh nia ka hriatin ka awm a nuam thei meuh lo anih kha.


" Angie.. " A rawn tih chuan ka hre lo dawn lek lek;mahse, tu dang nilo kha nula hmeltha tak, Remruatan ka bialnu hlui a tih ngei kha a ni.


" Ava mak " Ka tichhuak sep, amak tih bak chu sawi vak tur ka hre lo tak tak.Min rawn tawng khum thin dan leh a chet lak duh dan ka ngaihtuah letin hmeltha in hausak hmel viau mah se ka hmu hniam ngawih ngawih.


" Bawihpuii hnenah ngaihdam i dil angai ang, i ringhlel kha a lawm vaklo ania " Nui deuh tut tut chung hian a ti a, ka chhan let hmain line a cut zui daih leh nghal. Ani hi Bawihpuii hnenah a lo sawi tihna emaw ni le? Ka inngaihtuah mek laiin Bawihpuii ngei mai chuan min rawn phone.


"Hello" Ka tih rualin "Lalduhsang, i laizawn angin min en tak tak em? " A rawn ti tawng. Chhan dan tur hre lo a ka riat nawi vel mai mai chu " A tirah engkim min hrilh ni la, kan hrechhuak hma tur ania, i laizawn angin min en lo nge a tir atang khan min ringhlel zawk " Dam dap hian a ti a, ka zak ru deuh chem chem.


" Chutiang a ni lo, Bawihpui.. Ih.. " Ka ti nawi nuaih laiin " I rilru tur chu ka hrethiam che, Remruata ka la duh ni a ngaiin ka lak atanga la hrang niin i inngai a, i inthiamlo ngei ang. Mahse, ka sawi kha Remruata nen chuan thian tura piang kan ni a, keipawhin thian ang bakin ka lo hmangaih ngai reng renglo tih ka hre chhuak " Zang khai zetin a ti leh lang lang a, sawi ve tur reng reng ka hre lo.


Amah zawk chuan ka ringhlel tih a hriatna a rei tawh thu leh Remruata hnen atanga hria anih thu te, Remruatan thlalak min rawn thawn thintu zawn chhuah pui tura a sawm thu te chenin a rawn sawi a. Mi tlang lutuk tih takah amah ka ringhlel tih a hriat tirh a, min ngei ruk thu te nen lam a inpuang leh vek. Kan inbiak tawp dawnah "Buaina emaw ka lakah lungawi lohna i nei emaw anih chuan engkim min hrilh vek zel tawh ang che. Remruata nena in inkar buaina pawh ni se engmah min hrilh hreh suh, Remruata vanga unau inpawh tak kan nihna thin kha a chhiat ka duh lo. Rawn tibuaitu che u an awm leh anih pawhin min hrilh hmasa ber rawh, in inkarah khan tumah an inrawlh ka remti lo.Khawvela nupa inhmeh ber tur in nih kha. " Tiin tawp a khar a, thu min pe a ni bawk a, ka zawm loh hlau niawm fahranin a aw pawh a khauh tha viau. A nelawmna erawh a bo phah chuang lo.


Ka rilru kam tu ber buaina kan ching fel a, Remruata nen buaina kan nei ngai lo va, kan chhungkua kan dam tlangin kan hlim tlan bawk vang nge hun a kal chak riaua ka hriat ni, kum chanve kan hmang leh der tawh. Thingtlangah chuan thawh tur dang awm vak ta lo chu Dawngi nen inrawt phur chawpin chuktuah huan zau lo te kan siam ve a, a tha duh reuh em em mai leh nghal a. Kan chhungkaw ei chawp bakah hralh ve hlek hlek chang te pawh kan nei.


Fur lai tih takah ruah a sur nitin deuh thaw a, naupang sikul kal an khawngaih thlak chho leh viau. A bikin Mala, min chhun avangin tek tla leh khawpui ri hi a hlau em em a, ngaihtuah hi a na zual lo thei bik thin lo. Tum khat pawh sikula an awm laiin ruah a sur buan buan a, khawpui a ri nasa bawk si nen apute Adinan a lo theihnghilh palh hlauh a, an class-ah a lo tap nasa chu niin. Hliman office-ah hruaina chang a lo hre hlauh zawk a. Khata tang phei kha chuan zinga an sikul dawn hian "Anu, khawpui a ri leh ngem? " Tiin min zawt ziah zel. An kal hma atanga ruah a tlak suar suar phei chuan kalloh tawp a ni mai.



" U.. Enteh, Adina te thawhpui miss Baby hian Adina hi a ngaizawng deuhin ka hria, a rawn be reng zel tunlai chu " Dawngi thil sawi chuan ka beng a verh zar mai.


"Adina bulah i sawilo em ni? " Ka lo ti vat a, " Nizanah fiamthu deuhin 'a ngaizawng che a nilo maw? A lo be zing riau che' ka tia, a nui ringawt a" A ti leh niah niah. Miss Baby chu khaw dang a mi a ni a, nuthlawi a ni nghe nghe in ka hria. Vengchhak lamah in a luah a,amah a felin mi biangbiak a thiam bawk nen tlangval thenkhat hi an leng lut fo.



" Zirlai kaihhnawih chhuanlam a hmang hian a rawn be zing riau a, Adina hi chuan a duh lo tih chu a hmaa a tawngkam atangin ka hre tho a, mahse, mi pasal a ni tih hre reng chunga a lo be reng zel hi a mak ka ti. " A sawi chhuah danah a rawn be zing viau anih ka ring ve ringawt.


" Adina bulah chuan tha deuhin sawi leh hrim hrim rawh, a lo bia anih chuan kei nin sawi theih vak kan neilo a, Adina a pawimawh anih chu, keimah pawhin ka lo hrilh hrim hrim dawn nia " Ka tih chuan a sawi zui ta lo.


Ka ngaihdan chuan nupui/pasal an nei tih hre reng chunga be tute hi ka thiam miah lo chungin anni ai mah chuan an kawppui te phatsan duhna rilru pu tute hi ka thiam loh nasa zawk. Eng ang pawn lo be nasa in lo lêm vel mah se,a lo dawn sawn danin a zir a, akawppui phatsan tumna rilru a put miau loh chuan tuman an be lui reng peih lo ang tih hi ka chiang. Be lui tang tang tu te chu an lo awm ve zeuh tho mah na.



Pathianni tuk ka zing tho chu ka lu a na ut ut a, ka khua a sik ru ser ser bawk nen engmah pawh ti peihlo in ka mu leh ta ringawt a. Chaw pawh ka ei peih lo, min inkhawm san an hreh viau nangin kal turin ka tih avangin inkhawm turin an chhuak diak a, Biak In an thleng vel chiah ang tiha ka tlun zui nghal chu ka lokal tir ta chu ka inchhir ram ram mai. Damdawi ei turin ka tho chhuak peih der lo a, phone dawn lahin ka phone awmna pawh ka hre tawh lo.Mahse,vanneihthlak zetin Dawngi a rawn let leh ta hlauh, " Ka rilru a nuam thei ngang lo a, ka rawn let " Pindan rawn luh paha a rawn ti lut lang lang chu ka khur nasa, vawt ti bawk si chuan chhan pawh ka chhang peih lo. Ka awmdan chu min rawn hmu thuaiin " Awii... I tlunna a rei tawh em? Puan kan phawrh belh lawk aw, ka rawn let lo ang tih ava hlauhawm tak " Tih pahin a che nghal zung zung a, ka inlukhuh miau avangin amah erawh ka hmu thei lo. Nachhawkna te min eitirin, puan min rawn sin belh tir a, tlem chuan a zia ta deuh hlek. Nachhawkna in min chhawk hnu phei chuan ka lo muhil zui nghal daih ni tur a ni. Ka harh leh meuh chuan Ni a lo chawhnu ruih tawh.


" U Remruatan a rawn phone a, i damlo tih Bawihpuian a hrilh a, a ngaihtuah khawp mai che. " Bathroom atanga ka chhuak Adinan min lo hrilh thuai a, mi ngaihtuah a pe na thei si. Ngah nge maw an lo hrilh kher ni.


" A rawn phei leh nghal rum rum duh mailo maw? " Nui kur kur chungin Dawngin min lo fiam zui zat.


Ka harh deuh hnu chuan ka bia a, min rawn ngaihtuah khawp mai.Inenkawl tha turin min chah ngun malh malh viau. Hotel lamah an buai zual lai chu nilo se min ngaihtuah vangin a rawn kal ang tih a tawng dan atangin ka chiang.


"Naupang kha inbawhbuai tir lutuk lo in Adina te kutah khan dah rih la, damlo inih kha mu mai mai ang che " A ti chu ka nuih aza viau, In la thu vel lutuk mai.


‌" Mut mai mai ai chuan min duattu tur ka mamawh khawp mai tunah tak chuan " Ka fiam chak tlat, a ruk chuan ka nui pat pat reng a, engtin tak min chhang ang maw tia ka ngaihtuah mek laiin thawk a la deuh halh a, chutah " Palai ka rawn tir mai dawn mi? " Thutak zet hian a rawn ti leh ta mai.



‌Ka fiam sual tih ka inhre chawp chilh nghal, englai pawhin min ngaihtuah em em reng tih ka hre reng a, lo sawi loh tawp tur hi ka nia. Ka inthiam lo chuan "Ka fiam mai mai che anih kha, min ngaihtuah lutuk suh aw ka dam ve leh thuai mai ang." Ka ti a;mahse, ka thil sawi zawh chiah pawh chu ka inchhir leh nghal tho. Amah nei duh lo ka ang lutuk.



"Min neih hi i duh ve tak taklo ni hian ka hre thîn" A rawn ti ta chiah reng.


" Chutiang a ni lo.. "Ka tih mek laiin " Anih chuan eng nge? A hma atang tawhin palai ka sawi rik apiangin ila sawi nawi char char " A ti deuh hluk hluk a, a thinrim niin ka hria.


"Chutiang a nilo , kum thar veleh kan innei nghal dawn nia " Ka ti chhuak hlawl. A phur hmel ta kher mai "I thusawi sut hlek suh ang che, kum thar veleh kan innei ang.Thla 5 chhung inbuatsaihna hun i nei tihna a nih chu. I thusawia i din loh chuan sakeiin a seh dawn che ania" A thusawi naupang chhia zet avang chuan a nuih loh theih loh.Inneih chungchang mawlh a sawi zawm a, thu dangah a peng hlei thei meuh lo a ni.


Nithum zet ka dam loh hnuah chuan tlemin ka zia ve leh ta deuh a, khawsik pawh ka nei tawh lo. Ka taksa erawh chaw mumala ka ei that loh avangin ala chau rih viau. Vanduaithlak deuhin Hlima a damloh chhunzawm ve ta leh nghal a, a tlun hlarh hlarh reng a, tum danga a damlo ang lo takin tun tum chu a pangchang riau leh nghal. A khat tawkin a tap leh ringawt thîn. Kan nufa in kan mu deuh char char a ni thaw thang, Dawngi lo awm hman hlauh chu a tih zia tak tak a ni.


Hlima tap ri avangin ka muhil chu ka harh hlawl a, chhuak lutuk hian a tap hlawp hlawp a, amah lah chu a muhil reng bawk si. Mang tha lo a mang anih ringin tih harh ka tum a, a harh thei lawk bawk si lo. A hminga ko mawlh mawlh chunga ka sawi leh dar dat hnu chuan vai ruai hian a rawn meng a, rei vaklo chu a hawi â deuh ruai. Mahse, rei a ni lo; ka nghawnga min kuah bet tlat chungin chhuak zet hian a inhnit zui leh hlawp hlawp.

"Anu, ka hlau,min tanpui rawh " A thusawi pawh chu a sawi tha hlei thei lo. Heti em em a hlauthawng tur hian a mumangah eng tak hmu ang maw?


"Bawihpui, i bulah ka awm reng a lawm. Engmah hlauh tur a awm lo. I mumangah eng nge i hmuh min hrilh teh le? " A hnungah ka chul pah hauh hauh a. Chutih lai tak chuan Dawngi rawn lut ve in " Ngatinge? A tlun leh em ni? " Hlauhthawn hmel fe hian a rawn ti a. Adina pawh a rawn lang zui thuai.



A muhil a rawn tah chhuah thu ka hrilh lai pawh chuan Hlima chu ala inhnit hlawp hlawp mai.Adinan "Bawihpui, i mumangah eng nge i hmuh? Eng nge i hlauh min hrilh la, keiman ka chhan dawn che alawm " Dam diai hian a ti a. A putea thusawi chu hria awm pawhin a awm lo.


" A khua a sik leh hrim hrim em? " Dawngin a tih chuan a pang ka deh sak vat a, a dai dap mai. A mumangah thil rapthlak deuh a tawng a nih ka ring ta ber. A sawi chhuak thiam tawh lo a ni ang. Adina te nupa pawh an awm ve ta reng rih a, a tah a ban deuh hnu chuan "Anu.. Aputea nen min veng tlat dawn ti raw? " A rawn ti reuh a, kan lo tawng thlamuan nghal vat.


" Peka putea khan chemte in min vih a tum a " A ti leh sep. A mumangah a hmu anih ka ring.


" Bawihpui, Peka putea chuan engtin mah a ti dawn hlei nem che. Mumang mai mai anih kha, bakah aputea leh ani te nen kan veng tlat dawn che lawm, i tui a hal em? " Dawngin a lo ti vat, A tap nasa bawk sia a dang a ro hiam reuh tak ang. A lu a buk nghat nghat avangin tui la turin Dawngi a chhuak zui a, keini nufa erawh kan la inpawm reng. Mala a rawn zi tuah tuah a, ner nung chunga rawn thu chhuakin "A bengchheng lutuk" A rawn ti tial ruan chu ka nui chhuak hak. A harh har ka lo ti rilru tawh reng a ni.



" Anu... " Min en kiau chungin Hlima bawkin a ti leh, a mittui a lo tling leh pam tawh.


"Peka putea khan chemte in min vit dawnlo tiraw? " A mittui a tling leh pam tawh.


" Peka putea chu i mumangah i hmu em ni? " Tiin ka zawt ta a, a buk nghat avangin "Engtin nge i hmuh a? " Ka ti leh.


" A hma ang khan chemte in tah hian min tin a, i nu i hrilh chuan ka vit dawn che min ti a " A nghawng a khawih a, 'a hma ang khan' a tih avang chuan "Bawihpui, Peka putea chuan a hmain i nghawngah chemte in a tin tawh che mi? " Ka lo ti thung.


" Aw.. A hma khan Peka te inah " A ti leh mai a. Peka putea chu Valngo tiin kan ko mai zel a, Bawihpuia te unau pawh hi a duat ve viau. Mahse, Bawihpuia sawi hi a dik a niha chemte nena naupang a lo fiam anih chuan ka hau ngei ngei ang.Fiamthu pawh ni se, hriamhrei nena naupang fiam ka duh hauh lo.


" Chu chu engtikin nge? " Chik zawka hriat ka duh.


" I dam loh lai khan " A ti a, " Ngati nge chemte in i nghawngah a tin che a? " Ka ti leh zel.


Aputea leh kei min melh dun ralh ralh phawt a, a sawi mai dawn emaw ka tih laiin ka awmah hmai a phum ta daih.


"Bawihpui, ka zawhna che min chhang rawh. Ngatinge Peka putea chuan chemte in i nghawngah a tin che? Thil sual iti em ni? " Ka awma a biru chu pawh then ka tum a, ka kawra tham betin a tang ve tlat.


" Hlima ka zawhna che chu chhang rawh, thil pawh i khawih vang a ni em? " Chang deuh faka ka tih leh chuan " Peka putean sawi a phallo a lawm" Tap tuau chung hian a ti leh tawh. A awmdan hi ka ngaih a ti tha miah tawh lo.


" Bawihpui, nu te bulah chuan engmah zep loh tur ka tih kha.Min hrilh rawh le, min hrilh loh chuan Peka putea lakah ka veng thei dawnlo che asin " Dam zawk hian ka ti a, Adina te nupa in kan nufa inthlem chu min lo ngaichang ve ran bawk.



" Peka putea khan ka mawngah thil a thun a, na ka ti lutuk a ka tap a" A ti ta mai. Ka fapa thusawi chuan min thawng lo ka tih chuan dawt chiang takin ka sawi a ni ang,khawvela ka thil beisei loh ber te zing a mi a ni.Adina te nupa pawn min rawn hnaih nghal ruak ruak mai. Eng thil nge a sawi zawh chiah kha?


"Bawihpui, peka putea chuan engtin maw a tih che han sawi leh teh." Ka hlauthawng lutuk chu ka aw thlengin a khur vek thei hial. Ka fapa hian khuaikhem a tawk tihna em ni? Thudik ni lul suh se.


" Ka kekawr min hlih sak a, ka mawngah a tilte a thun a " Ka insehruh nghal tawlh tawlh. Amah chu nghet zetin ka kuah ngawt ngawt a, eng thil nge thleng ta hi? Ka mittui a luang nghal zawih zawih a, ka tah rik loh nan ka heh ka pet fan fan thung. Adina thawk la hulh ri leh Dawngi chek hlak thawm chuan ka fapa thusawi kha keimah chauhin ka hre lo a ni tih min hriattir. Engtin nge a nih theih? A dam loh chhan te leh a khat tawka a tah reng chhan te kha? LALPA, ka fapa chungah hian eng thil nge thleng?.


" Khaw nge ka phone? " Tih leh ka phone dap ka rual a, ka mittui vangin engmah ka hmu fiah thei lo. Dawngin min rawn pe a, ka call tum number ka hmet chhuak tur te chu ka tha a khurh nasat luatah ka hmet fuh hlei thei lo.


"Remruat.... " Phone a lak rualin chu bak engmah ka sawi thei lo, ka tap chhuak hawk a, Dawngin Hlima a lo la hrang nghal vat.


" Engati nge i tah? Eng thil nge thleng? " Min ngaihtuahnaa khat aw ri ka hriat chuan ka rilru a na zual sauh. A fapa chunga thil thleng hi hre ve se engtin nge a awm ang? Ka tah khum rawih rawih a, tun ang zan rei tawha ka tah khum chiam chu a hamhaih viau ta ve ang?


"Remruat... " Ka ti leh


"Aw.. Ka ngaithla che, i chungah eng nge thleng? engvangin nge i tah? "


" Tunah... A rang thei ang berin i lokal thei ang em? Ni lo, i lokal ngei ngei angai... Ka sawi chu i hria tiraw? I lokal ang em? " Ka ti bah deuh nawk nawk a. Phone atang chuan a fapa chanchin hi ka hrilh ngam lo a ni.


" Eng nge thleng sawi phawt teh, in tha tiraw? " A tih pawh chuan " Kan tha; mahse, a rang thei ang berin lokal vat rawh. Ilo thlen hunah engkim i hre mai ang" Ka ti tlat. A rawn kal nghal tur thu sawiin ngaih tha vaklo chung chuan phone a dah ta hram.



Ka fapa muhil chu ka en thin. Ka va han na ngawih ngawih tak em! Naupang fing tak a ni a, a chunga thil thleng sawi chhawng thiam rual a ni ve tawh bawk. Tin, Valngoa a hlauh dan atang reng khan dawt a nih hi ka ringlo hul hual. Puitling tam tak pawhin a nihna tur ang thlapa sex kan hman pawhin ngaiah kan nei theilo a ni a, chutih laiin ka fapa kum 8 êm pawh la tlinglo hian a mawngah pawngsual a tawk a nih chu.A sualtu lah ka mi beisei loh ber a ni. Ka fate duattu ni a ka lo ngaih ve thin leh a bula ngaihngam taka ka awm tir thin khan ka fapa chungah ngei hetiang thil hi a ti duh a nia. Tunah hian an in a va kala va thah hial mai ka duh; mahse, Adinan "U Remruata lo thleng phawt rawh se " Tiin min dang tlat a, chuti nilo se zawng tu emaw zawk zawk kan thi tawh ang.



Zing khawvar tan tirha kan kawta motor thawm a rawn awm takah chuan kan phawk nghal hra hlawm mai.Naupang pahnih kha chu an muhil leh mai a, keini 3 erawh kan thu tlaivar ta thak. Kawngkhar hawn sak turin Dawngi a tho chhuak thuai a, ka mittui a hnai leh kuar tawh.



Thil awmzia kan hrilh zawh chuan Remruata pawh a fapa chunga thil thleng chuan a thawngin, a thin a rim bawk tih hai ruallohin a hmelah a lang nghal thei. Ngawi ngul chungin Hlima muhil lai chu a thlir ngawih ngawih a, a inhum ruh leh ngawt ngawt thîn.Adina te nupa in min chhuahsan a, kan inhaw ta emaw tih mai turin inbiak kan tumlo ve ve.Sawi tur thlawt ka hre lo a tin ni, ka rilruah thil tam tak a awm a, kan fapa chunga thil thlengah hian Remruata hian min dem ang tih pawh ka ring.Keimah tak pawh hi ka indem hluah hluah, ka fapa hi ngaihtuah tawk tur ka ni a sin.Ka lo damlo kher te chu a pawi ka ti ngawih ngawih. Damlo ila chuan tiang hi a thleng awm tawp silo tiin ka insawh tau ka insawh tau ringawt a, awmzia a awm der bawk si lo. Hun thununtu niin hun her let thei ni ila a tha tur.


Show post links
Top