Brothers_Conflict BY Cck Lalchhuanawmi (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Brothers_Conflict BY Cck Lalchhuanawmi (Completed)

Unread post by Ngaia » April 2nd, 2023, 4:49 pm

8s0txaum.jpg
Papuia- Tlema si lam kai tawh tia an fiam ve thin, fel em em, an fak rawn luai luai, khawtlang leh thil danga inhmang leh an chhawr tangkai

Zoa- a ni hi chu harhvang lam pawl deuh, khawtlang leh thildang pawha a tawk chauha inhmang an star rawn

Rt-a— a ni hi chu khirh uchuak, chawhmeh thak ngam lo, thak ngam lo hrim hrim, faina lamah pawh fai veng, lehkha thiam tak, tawng tam lo ngawichawi leh lutuk

Bibi- an farnu neihchhun leh an duat rawn em em, an chhungkaw naute, chimawm thiam leh harh tak.

Lalrinsiami- awmpui ve mai, Bibi nena intithiam lo reng, a hnuah erawh chhan eng emaw tak avanga inngeih leh em em.

Lalrinsiami hian engtin nge Brothers Conflict a chawh chhuah ang le?



Brothers Conflict-1
Ziaktu: Cck Lalchhuanawmi

"Hmeli, ka hnek ang che", bak hlar hian ka ti a, ani lah chu a nui huah huah ang lawi a, ka va ngei tak, henu chimawm thiam dan hi chu aw.

Ka hmuh hunah chuan a chak dawn lo lutuk, sual thei lutuk mai.

"Ka ṭhian, ka hmangaih che", ka va ti a, " Lesbian", min lo tih chu, ka va haw tak a ni. Lo lesbian pawh ni ila ani kher hi chu ka van ngaizawng awm lo tak.

" Lunglei ho chuan Ṭ in uar lutuk a Isua pawh Ṭhuama in ti mi kha?",

" Hmeli, Pathian thute hi fiamthu nana hman loh tur", ka lo nuih let ve vak vak a, hei kher hi chu a haw ve thei nia, Lunglei lam ho hrim hrim hi chuan an hua ni berin ka hria.

Rei tawk fang kan inhnial fiam leh hrep hnuah kan inbiakna kan titawp a, sana ka en chu zing lam dar khat a lo ri der tawh, Lalhmachhuani biak hi chu hun hian min daih ṭhin lo.

Alarm dar ngaah set-in ka muhil zui ve mai bawk.

Ka hna thar tur awmna hmun panin phel pheng phungin ka tlan hlawk hlawk a, hei hi lawm chhangchhiat lutuk hi chu, fa u ber lo nih bawk nen, nau panga chuang lai neih nen, kan chhang a la khât zui. Kan te ber phei hi chu ka fapa ni tura ngai te zu han awm a, nuthlawi emaw min titawk lah bo lo.

Ka sam hui ṭha sawk sawkin ka ṭawn a, kawngka hawngin, " In awm em?", ka ti dim dai a, " Awm e, lo lut rawh", nêm lutuk hian min lo chhawn a, ka thawhna hmasaa kan pi aiin a ṭawng a nêm daih, bakah a naupan hmel zawk bawk.

An ina hnathawk tur ka nih thu ka sawi a, " Tu nge i hming?",

" Lalrinsiami", ka kut ka sik niap niap pah a, a zahawm lutuk, kei heti mai ka ni bawk si a, a zahawm ngawih ngawih. Min en dun dun a, a nui ta hak hak, " I va pawr chip chep ve aw, i hmanhmawh lutuk a nih kha", a ti ta reuh va, sawi tur ber pawh hre loin ka nui ve ta ringawt.

An in len dan pawh tawk tiu teu tak a ni, min fanpuiin min hrilh neuh neuh pah zel a.

Inhnuaiah hian pindan pahnih awmin anmahni leh an fapa pakhat pindan a ni a, hetah choka lamah pindan pakhat a awm bawk a, store room chu sawi ngai loa awm chiang sa.

Inchung lamah pindan pali awm ve thungin an fate pathum an awm a, pindan palina chu an nî, ka pu tur farnu a duh hun huna riaka riak lo tan an dah.

Pindan chhung tinah kan lut vek lo naa, " Nakinah i la lut zing dawn lutuk, i la phun i la phun mai ang", nui sun sun chungin a ti a.

Pi Lawmi a ni a, a la ṭhalai bawk a Nu Lawm tia koh ka duh zawk thu ka sawi a, a nui hak hak, Nu Lawmi tih takah a nui duh phian.

A hmel hmuh a nuam a, a nui deuh sâng reng bawk.

Chawhma chhung zawng chu thiltih dan tur inhrilh nan kan hmang a, a hahthlak ka ti.

Fa pali neiin a naupang ber hmeichhia tih loh chu mipa vek an ni awm e, Nu Lawmi a hmelṭhain a la ṭhalai bawk a, an pa hi ka hmu chak tawh.

Nula hmelṭha deuh chuan pasal dulkiar deuh leh hmelṭha vak lo an nei duh an ti ziah lehnghal.

Ka lo hlauthawng nasa mai.

Kei chu an dulkiar lo se, chuan an bawp hi khawkher ṭhin lo se ka duh, mipa bawpkhawkherh leh dulkiar hi chu ka ngai thei lo, ka dream-ah a tel ngai lo hrim hrim.

Ka duhkhirh hmel, ka duhkhirh tak tak lawm.

" U, engtikah nge i lo haw dawn?",

" Ka duh hun hunah ka lo haw thei", a lo ner sawk, hepa tak hi chu ka nautelemin ka va vawm chawrh, " Lo haw tawh lo la ka ti, i thinchhe si", ka melh rawm rawm a, Lalfamkima tak hi chu aw.

Min tihthinrim hi tum ziah mai.

"Eima aisa min lo nai dawn em?", ka pawm bo vek, " Aw", ṭap pur chungin a ti a. " Eima aisate-a hi ka lo tlawh ziah ang", ka ti a. Keipawh ka mittui a tla, kan unau zinga naupang ber, hei hi lawm ka fapa emaw an tih ṭhin.

Ka ngai bik dawn lutuk, ka nau dangte ho hi chuan nuam an ti zawk ngawt ang.

" U, i awm lo tur chu nuam dawn lo e, âng buan buan tur an awm dawn si lo a",

" Lalfamkim", ka au tuar a, an lo nui vak vak. Keipawh ka nui, hahthlak, ka nau te ho hi ka van ngai dawn leh si hlawm.

Ka chhungte ho chu ka han en hlawm a an ngui bam hlawm mai, ka thaw hrawk a, " Hmun hla taka kal tur pawh ka nih loh hi, nangni ho kha chaw ei vat vat r'u, school kal in ngaih kha", an hmaah chuan chawhmeh thleng ho ka nawr hnai sawk sawk a, chechang pawh an awm lo.

An school kal tur kan invai liam hnu chuan ka nu leh ka nau nen inthlah velehin, ka pain taxi-in min thlah a.

" I awm theih dawn loh chuan awm luih kher a ngai lo nia aw, harsatna i neih chuan min hrilh hreh lo la, mamawh i neih pawhin lo sawi zel rawh aw", ka pa chu ka kuah chûng chûng a.

" Nangpawh i service laiin fimkhur tho la aw", ka ti a.

Ṭap chungin kan inthlah fel thei hram, ka mittui hru thuak thuakin door bell ka hmet a.

Nu Lawmi chuan min lo hawnin min hmuh chuan a nui lai a tawp chat a, " I ṭap a ni maw, lo lut rawh", min pawt pahin a ti a.

Ṭah âw deuhin ka ṭah loh thuin ka chhang a, a lo nui ringawt.

Ka choka lama pindan awm tun aṭang chuan ka pindan a ni tawh dawn a, choka bula a awm avangin ṭhing deuh a ni chuang lo, Lalfanu pindan ang chiah a ni.

Hetiangah ka la awm ngai lo, khum lah chu a dup nuam em em a, awngphahte pawh an nalh lutuk, " I duhzawng an nih ka beisei, a nih loh pawhin i thlak thei tho a nia aw", nu Lawmi chuan dam dupin a lo ti a.

" Ka duh lutuk, hetianga lo tih pawh a ngai lo sin le", kimki chiaiin ka ti a. Kawng lehlamah chuan a zahthlak zawk, a lawmawm rualin.

Ka nau te ho ka hrechhuak uar uar, Ramtei phei chuan nuam a ti dawn lutuk.

Tlai ei rawngbawl a hun ta!

Nu Lawmi chuan min pui pahin min hrilh zel a, ka lo chhinchhiah keuh keuh. Ka lu burah hian awm rei leh tak ang maw.

"Chaw kan ei tam ngai vak lo a, vawiin aṭang i pa Zau-a te an zin chhuak leh bawk nen", nui saih pahin nu Lawmi chuan a ti a.

Khi sak sak pahin ka lo bu ve nghauh nghauh ringawt.

Doorbell a lo ri tleng tleng, " An lo haw tawh a nih chu", ti pahin kawngka lam Nu Lawmi chuan a pan a. Kei erawh alu kan(kang) ka lo vil.

" Nu, vanlalfather-a engtikah nge a lo haw dawn", a âw fiak dan chu pui tak a ni. Bibi a nih hmel, " Hei hi maw?", ka phu dawrh chu nui ri huah huahin a zui nghal.

Ka hnung lam ka hawi a, hmeichhe naupang uniform ha hi a lo ding kawisawi inkuangkuah kual a, Bibi a nih ngei dawn hi.

" Min tiphu lutuk alawm", âw khur dar dar chungin ka ti a, " In diet ve hlek chu i ngai a nih kha", vei nui saihin a ti a, chiang tawkin min la en kiau zui.

Min tihlau zawk e a, in diet ve hlek ka ngai a, chu nu mai mai chu. Ka thau tih te chu ka hre ve reng, thau uchuak pawh ka ni lo.

A kalsawn leh daih a, ner sawkin alu kan lai chu ka chawk let mial mial.

Bai siamna tur tui kan chhuan a so tawh avangin dawhkana bawkbawn kan dah ban tuma ka inher chu, " Awi!", tiin, ka phu leh dawrh!

Mahse, a phu ve miah lo, tui a in khawlh khawlh lai chawl miah loin a in khawlh khawlh a, ka lûng zawn dawmin ka chil ka lo lem khawlh khawlh.

A in zo chu min lo en a, ka lungphu a rang lutuk!

Engmah sawi loin ani pawh a kal leh nghal.

Rt-a a nih ngei dawn kha, uniform a hak danah, aw Lalpa, thin a va phu duh ve.

Bibi chu a pa biain a ri chel chul a, eng hnathawk nge a nih ka hre miah lo nu Lawmi pawh hi, kan hre chho zel mai ang chu.

Rt-a chu a pindan aṭang a lo la chhuak miah lo a luh aṭang, Bibi erawh inchung leh inhnuai, kawngpui aṭanga in kawm kar thlengin a hruat chhuak vek tawh. A cute reuh mai mai.

Doorbell a lo ri leh a ka va hawng chuuuuuuuu, ka â thei mai dawn!!!

Ka hmaah a kut lo vaiin, " I ṭha em?", ka harh zawk, ka va zak tak.

" Awmpui thar maw?", ka lo bu zeuh. A ṭhat thu sawiin inchhungah a lo lut a. Bibiin a lo pan nghal vat. Papuia nge Zoa ni ang le?

Awiiii, hmelṭha lutuk, ka ṭap thei takngial dawn.

Nu Lawmi chuan Bibi hnenah a u call turin a ti a, " Papui, chaw kan eisan dawn che", tiin, call a cut nghal daih, ka van beng chak reuh mai mai tak.

A nih chuan nichin ami kha Zoa zawk. Papuia pawh chu eng ang tak ni ang maw.

Chaw kan ei a, ka, ka bulah Zoa a ṭhu a, ka hmaah Rt-a, awiii boruak a lum lutuk, arukin ka khur der der.

Rt-a chuan Bibi thlengah chawhmeh a dah sak zel a, chutiangin Zoa pawhin. A rukin ka en zeuh zeuh ṭhin a, lalfanu ang maiin an en ni ber.

" Siami", mak tih hmel deuhin Bibi chu ka en hû a, " Lalhmunmawii chu, i u tur a nih hi", nu Lawmin a lo khak vat.

Bibi chuan a nu hnenah ngaihdam a dil a, keipawhin, " A ho lutuk", khi sak sak chungin ka ti a.

Dik takin he nau hi a chaltlai reuh dawn tlat. Naupang fing phakar hi chu ka ngaih theih loh zawng tak.

Mahse, awi a nuṭa te hiiiii....Lalhmachhuani ka hrilh chak tawh lutuk.


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 2nd, 2023, 4:49 pm

Brothers Conflict-2
Ziaktu: Cck Lalchhuanawmi

Artui leh tomato ka kang a, hei hi Bibi leh Rt-a te pai tur ni ta se, hmeh tur nen a daih reng mai.

" I hming chu",

" Lalrinsiami", chawhmeh bel ka en leh daih a, ka sa pup pup mai. " Engtin nge an koh ṭhin che?", ta deuh deuh chuan aw, " An duh dan danin min ko mai", ka tiril a tikhur thei.

Kalsawn a la tum lo, ka bulah chuan dingin eng eng emawni min zawt a, tawi fel deuhin ka lo chhang ṭhin a, ka âw khur a lan loh nan ka insehruh ṭang ṭang zel bawk.

" Papui, i van tho hma", aw Lalpa! Ka lawm e.

Bibi lo kalin an kalsawn ta daih a, ka lawmzia chu.

Chaw ei naah pawh Bibi a ṭawng char char a, Papuia leh Zoan an lo ṭawngpui, Rt-a erawh ngawi rengin chaw a ei a, Bibi thlengah a khat mawi tawkin chawhmeh a dah sak reng bawk.

Mahse, an pathum hian an hmel chiang fakin ka la hmu lo, ka en ngam lo a ni ber. Lalfapa pathumin min hual ni maiin ka inhria.

" Aw, ngati nge bawrh bawrh nge?", Nu Lawmi chuan ka hnung chum dat dat pahin a ti a.

" Ṭha deuha chaw ṭhial tur a sin", ti pahin Papuian tui min lo pe. A va hahthlak ṭhin tak, chaw hak hun pawh ni lo.

Chaw eina ka tihfel vek hnuah inchungah chhoin pindan tinah ka lut a. Papuia leh Zoa chuan suk tur tlem an lo dah a, Bibi erawh secondhand thin tur a hnutchhiah emaw tih mai tur a ni.

Inhnuai lamah keng thlain ka su ta vek a, washing machine an hmuchhuak hi chu ka lawm ṭhin teh a sin, chauh a tihnêp phah a.

Inchung pindan pakhat te tein ka tifai leh a, pindan ruak erawh Nu Lawmin tihfai nitin a ngaih loh thu a sawi bawk a, inrinnia tihfai atan ka dah ta mai.

Papuia leh Zoa pindan chu mipa tih takah an che fel lutuk lem lo, Bibi pindan phei chu Hnawmtinphurinu a cheng emaw tih mai tur a ni.

" A chauh thlak duh a sin", ṭhuthlenga ka ṭhu hnawk chu Nu Lawmi chuan a lo ti a. Ka inperh tho rang teh a sin.

" A ho lutuk, ṭhu rawh ṭhu rawh", thuawih takin ka ṭhu leh a, ka hnial phal thlawt lo, tlawmngaih chhuah lo hrih phawt ang.

Nu Lawmin an pindan a lo tihfel ve tawh thu leh a chhuah lawk tur thu sawiin, nui sen sen chungin min chhuahsan a. Peihlo tawkin spicy noodles ka chhum a, ka la kham lo zui, bawm khat chauh chu a tlem ve em bawk a ni.

Inhnuai lam chu Rt-a leh Nu Lawmi te pindan tihfel a ngai lo bawk a, ka thaw huai mai.

Kuta chhuat nawh a ngai lo bawk a, lehlamah chuan hah a nêp phah deuh. Mahse, tunlaiah chuan inchhungah eng bur bur te nge mawni an hung thluah a, inchhung cheimawina atana an tih ho hi tihfai nep nep a ngai a, hetiang hi chu a hahthlak.

Thaw hrawkin, " Achhuani a lo thinrim em lo ang chu maw, zing aṭang ka la be lo char char a nia", ka ti a.

Ka hnung aṭang, " Tunah khan be vat rawh", tih lo chhuak chuan min tiphu nasain chhuatah ka ṭhu sawp hnawk nghal.

Ka lung dawm leh vang vangin muangchangin thâwk ka la a, " I ṭha maw?", ka hmaah lo ṭhu kunin min ngaihtuah hmel takin min lo en a.

Tawnzau var leh boxer dum hain a thlan te chu a hmai sirah an luang thla ngiai ngiai a, chiang taka a hmel ka hmuhna.

Awww Lalpa! Ka lung phu nasa lutuk chu an thlawk chhuak thei hial dawn.

Awiii, hmelṭha lutuk, ka thi dawn!

Ka thlêk ngawih ngawih a, suangtuahna neiin Pangpar nalh tak tak awmna hmunah inkai rialin kan lo tlan a, ka hmaah tlanin min lo nuih ṭhin a movie ang chiahin chu pawh slow motion ngatin mawle!

" I ṭha em?", ka hmai beng dat dat paha min thing nawk nawk paha a lo tih leh chuan ka harhchhuak chiang teh a sin.

Ka zak lutuk chu khuk ral daih ka duh rum rum, " Ka ṭha, ka ṭha", ka hmai hup pahin bathroom-ah ka tlan lut daih.

" Mi â nu, a hun leh hmun te hi hriat ṭhin tur", tiin, ka chal ka beng dat dat a. A âtthlak lutuk, ka ngaihtuahna te kha hre phei se chu, ka chhe vek a ni mai.

Bibi leh Rta school bang lo haw chu nui sâng chungin ka lo chhawn a, Rta chu biak hleih theih pawh a ni lo, en pawh min en lo, ka ṭawng pawh hre lo ang hmakin a awm.

Bibi erawh, " Siami, aw, I mean, Usiam, Apple juice ka in duh, min lo pe", hei ha.

Ka hrethiam hram hram mai ang.

" Bibi",

" Uuu", Zoa leh Bibi chu an inkuah chung chung a, " Ngati nge school i kal loh?", Bibi chuan Zoa beng pawt pahin a ti a. " Min thlah phawt la ka sawi ang, a nâ lutuk", Zoa chuan mit chhing sawk sawk chungin a ti a.

Bibi chu Apple juice pein rang lutukin an awmna aṭang ka kalsawn nghal, chhun lama Zoa bula ka awmdan avang khan ka la zak chem chem. Amah phei kha chuan hre kil kel lo mah se, ka ngaihtuah apiang hian ka zak lutuk ringawt.

Chawi ei naah ka bulah a ṭhu bawk si, ka khup an inkhawng hlawk hlawk.

Chaw ka bar ṭeuh ṭeuh ringawt chu, " Usiam, i mukbang em ni?", he nu hi chu awwww.

" Bibi, Rs, inthlahrung loin ei ṭeuh ṭeuh rawh", Papuian a lo ti vat. Teh duah chuan min koh dan chu, Rs.

Ka va en a, a lo nui sun sun, awiiiiii.

Ka mittui an lo chhuak hum hum, a va buaithlak tak e aw.

Thleng ka sil laiin, " Rs?",

" Ei", ka hnung hawi zawkin ka thleng silah ka bur lehnghal.

"Thawmhnaw i suk dawnin Zoa nena kan thawmhnaw hi chu i hriat hran theih nan a hrangin su ṭhin mai rawh aw, tichuan buaina a awm lo ang", Papuian a tih chuan ka hawi let hû a.

" Ka dah pawlh elaw? Ka chhinchhiah ve vek chuan ka hria sin", a lo khi sak.

" Awle", ka ti chuai raih.

" Aw, buai nuai nuai pawh a ṭha ve reng reng alawm, tiraw Usiam", Zoan a lo ti ve leh.

Ka bing mup mup.

Zoa ka hmu emaw a âw ka hriat hi chuan ka la dik thei lo.

" Usiam, i ṭhiannu chu i be ta em?", hnungchhawn zawngin ka lu ka thing nar nar. Min han û ve tlat chu aw.

Ka mut hmunah ṭha taka awm a, ngaihtuahna ṭullo tak tak ngaihtuah tawh lo tur leh, chhel leh huaisen taka awm turin ka infuih mawlh mawlh a.

Achhuani ngaihdam dilin mangṭhana thu nen ka thawn a, ka muhil zui nghal.

" A ni thei lo", ti niah niah chungin bathroom ka pan a, ka zawi ngawih ngawih. " Mumang mai mai alawm", tiin, ka inthiam chawp. Ka mumangah Zoa nen kan lo innei, a rapthlak a sin.

Eng ngaihtuahna te nge ka put pawh ka hre tawh lo.

Ni hnih chauh ka la awm a, ngaihtuahna ṭha lo ka pu nghal thei a nia, " I rapthlak em em lutuk", ti pahin ka inbeng sawk sawk a.

" Zak thei lo em em lutuk", ka ti leh dap dap, hringnun tak hi chu aw.

Kan kum te hi a lo tam ve ta a niang, hringnun kan han tih ve tak chu, zahpuiawm lutuk a, " Ka ning", ti hrawk pahin ka chawhmeh chhuan ka chawi sawn.

" Eng maw?", thum dutin Papuian a lo ti nghal, ka bel chawi ka thloh lo chauh. Mak bawrh bawrh ṭhin lutuk.

Ka hmai si chetah min lo en, a mitmeng a fiah si, hei pawh a hmel chiang takin ka hmu ta e!

Tawlhsawn ka tum a ka thei der lo lehnghal, " Nizan i mu ṭha lo ni maw, i sam a la pawr chhip chhep em mai", ti pahin ka bengah a zep ṭha mial mial.

Korea film angin music romantic a rawn ri nghal chuai chuai a, Papuia hmel light-in a chhun a pangpar an thlawk nghal chuai chuai bawk.

Awiiii, van nuam tak.

" Rs, ngati nge khatia i awm?", kut beng thawmah ka meng chhuak rang teh a sin. Dawhkan bulah Papuia chu a lo awm daih, awiii ka zak leh ta.

Ka hmai hupin, " Ngati mah", ka ti thla ngawt a. Tuna ka ngaihtuahna kha hre phei se chu, " Engmah ngaihtuah ve tawh suh", mahni leh mahni ka inhau hrep, awmzia awm tak ang maw!


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 2nd, 2023, 4:49 pm

Brothers Conflict-3
Ziaktu: Cck Lalchhuanawmi

Lalpa le! Ka awmna la rei lo chung hian thil ṭha lo pui pui ka ngaihtuah chu nia, mahse; thil ṭha lo pawh a ni lo, suangtuahna neih te chu a thiang vek, ngati nge hmelṭha deuha an pian ni, kha daih kha sin.

Khumah chuan ka let ka let a, whatsaap-ah lutin group ka hawng kual vel mai mai, ṭawng pawh ka ṭawng lo, ka ṭawng a nih vaih chuan zankhuain nawi kha ni leh dawn a, huiii, nawi chhe thei ve ṭhin bawk sia maw.

"Asiam, net pack a zo a, kan la thun mai thei lo a chumi hma chu bye phawt aw", Achhuani message chu ka chhiar ṭha leh ngat a, kan inbiakna ho pawh ka chhiar kual mai mai. Kan inbiakna hi ka delete ngai lo hrim hrim a, "storage is full", tih min lo hrilh hma hi chu ka delete ngai lo.

Ka clear ngai lo a ni mah zawk, Achhuani leh ka chhungte nena kan inbiakna bik ho hi.

Achhuani biak theih a ni dawn lo a, a khawharthlak leh dawn lutuk.

" Nu Lawm, ngaih loh lamah ngai lo la, eng nga tinge Rta pindanah kan luh theih loh", inthlahrung takin ka zawt a, ka hre chak em a ni.

A lo nui saih a, " Ani hi chu a tet lai aṭang tawhin a danglam bik a, a paliana a chhun an ti ṭhin alawm. A paliana pawh amah ang chiah hi a nia, a boral hma mai pawh a", Nu Lawmi chuan a ti a.

"A nih chuan maw, tuin nge a pindan hi tifelfai ṭhin?",

" Awww, amahin mawle, ni tak e, a pindanah i la lut miah lo tak e. Bathroom te tak te a awm nghal a, in tenau ang a ni mai. Pindanah a inkhung chawt a, chaw ei turin a lo chhuak a, a thawmhnaw pawh amahin a su a, chhuat pawh a nawt thlap zel. A pa pawh hian a hrilh ve ṭhin a, mahse; a sawt chuang lo", Nu Lawmi chuan a ti dap dap a.

Ka hriat duh tak ka la hre kim loin ka inhria ni.

Zawhna ka neih ang ang lah ka zawt ngam chiah bawk si lo, " Thak hi a ngam bawk si lo", ka ti chu Nu Lawmi a nui nghal uar uar.

Ngaihna hre lo zetin ka nui ve mai bawk a, " I awih lo zawk ang, Sawhthing pawh a ei ngam lo", nui uar uar chunga Nu Lawmin a tih leh chuan ka nui chhuak ve ta hawk hawk a.

" Sawhthing te chu", ka sawi zawm thei tawh lo, Rta chuan a tilui a ni hrim hrim ang. Sawhthing takngial pawh ei ngam loh chu.

Rta leh Bibi an lo haw chuan Apple juice ka lo thlit sak a, Bibi chuan inthlak hmain tv enin juice a in leh mial mial, Rta erawh juice awmna no kengin a pindanah a lut nghal.

Ni tak e, a inah a haw zawk alawm. A mak ngawt mai, hetiang mihring an awm ngai pawh ka ring lo a sin le.

Mak lutuk ringawt, chutih rual erawh a pindan min luh chak tir zo vek thung.

" Usiam, naktuk chu ka ṭhiannu a lo leng dawn a, khawngaihin thil pakhat min tihsak teh aw", Zoa hmel en ngam lo chuan, " Eng nge ka tih tur chu?", bung nghutin ka lo ti.

Âtthlak mang e, mahse; amah bikah hi chuan ka zam chhe em a ni. Ṭhiannu te chu a la nei ang ta nghal a, ka phu lohzia min hriatchian tir ngawih ngawih.

" Momo i siam thiam ang tiraw?", inthlahrun hmel takin a ti a. Ka thiam loh thua chhan ka van chak tak, mahse; ka chhang lo ang.

Ka thiam thua chhangin tui deuha ka siam sak tur thu ka hrilh. Lawmthu sawi pahin ka darah a kut a lo nghat. Thil dik loin min fan leh ṭan, " Keipawh", ti hrawkin ka pît chhuak a, ka pindan kawngka ka khar zui nghal. Mak min ti ngawt ang, khur hlawk hlawk chungin khum ka pan a.

" Mipa râwp lutuk angin nih hi i awm, insiamṭhat tum rawh", mahni leh mahni ka han inhau hrep leh hrih.

Ka huphurh ber ni kan thleng ta, inrinni hi ka huphurh ber, kan awm kim vek ni tur a ni dawn si a.

Engtin nge ni ang?

Ner sawk sawkin ka insawh tau nghawng nghawng, khum aṭanga thawha pindan aṭanga chhuah a ngai dawn tho tho chu ni si.

" Rs, kei chu thawmhnaw suk tur ka nei hrih lo a, tihfai pawh a ngai lo ang aw", Papuia chuan a ti a. Ka lo bu zeuh. Ngati nge ni ang aw.

" Usiam, engtik nge i birthday? Min lo hrilh teh, cherna damdawi i ei tur ka present duh che", ka va han chhu lawl chak eeeeeeeee.

" Bibi, a mak ṭhin em mai", dam dupin Nu Lawmi chuan a lo ti a. Tun ṭum chu nuih pawh ka nui peih tawh lo. Zirtirna eng emaw tak pek a ngai dawn a ni.

"Takah Siam, vawiin chu i pa Zaua a lo haw dawn a, Bibi nen hmuak turin kan kal dawn nia aw, Papuia leh Zoa te chhuahna tur in nei ve em?", Nu Lawmin a tih chuan, " Kei chu ka chhuak dawn lo, inleng ka nei dawn", Zoan a lo ti nghal.

Papuia lo inrawlh ve vatin, " I ex te ho hi inleng i neihchhun an ni bawk sia, lo leng mawlh teh se, Rta khan a duh duh lo thing kual ve sela", a ti a.

An nui kur kur hlawm.

Rta arukin ka va en zeuh, a hmel a danglam eih lo a, a danglam chu sawi loh ṭawng pawh a ṭawng lo. Robot ang chiah, a ṭhu fel at zel bawk si.

" Usiam, khawngaihin ka pindan hi min tihfel sak hmasak ber rawh aw, ka inbual lawk ang", ngen ngawl deuhin a lo ti a.

Ka la en ngam chuang lo, ka huai ve ṭhin tehreng nen, mipa te chu ka insualpui hmiah hmiah ṭhin kha a nia, ka ning a!

Papuia pindan ka lut chu a lo hnawk nasa mai a, hei vang hi ni mai thei ni, a inthlahrung a ni hrim hrim.

Upa ber nih hi chu, ka hriatthiampui vawng vawng em mai.

Ka tihfel sak tho, a sawi angin suk tur erawh a nei lo.

Bibi pindan chu sawi loa lum, he nau hi chu ka enkawl deuh hlek a ngai dawn a ni.

Momo siama ka buai laiin door bell a lo ri ta, Zoa ṭhiannu a ni ngei ang.

Huphurh tak siin kawng ka va hawng a, ka rin loh deuhin mipa a lo ni daih!

" Uai, awmpui thar maw", a nui sai, " Zoa hi lo be ṭha lutuk suh aw", ti pahin inchhungah a lut.

A kal dan chu a nu em em mai lehnghal.

Ani hi, ka duh thei lo, tuai a ni lo ang, a ni thei lo hrim hrim. Khaiiii.

Zoa lo chhukin chupa chuan, " Awiii, Zote, ka ngai tawh lutuk che", tiin, a kuah chung chung.

A kuah pawh ni lo, a chul kual ni berin ka hria, awiiiiiii. A mawng a la ṭham sak zui.

" Ka duh thei lo", tia au ṭhawtin ka hmai ka hup a ka ṭhu hnawk. Ka ten lutuk.

Hmai hup chungin chokaah ka phei daih, no lutuk maia, " Nih phawts awmpui thar", chemtein ka va vit lo chauh, ka ten lutuk.

Dawhkanah momo leh thingpui inthli sain ka dah a, momo plate khat leh thingpui Rta kawngka bulah dahin ka kik a, chhuat nawhna, hmunphiah leh a ruhna lain ka pindanah ka lut daih.

Pa Zaua pawh tluang takin a lo haw a, Bibi nen an inpawm deuh chawt a ni ber.

Khawiah nge a zin a, engvanga zin nge a nih pawh ka hre chuang lo, tluang takin a lo haw lawm ve phawt ila ni mai.

Mahse, ka lo rindan dulkiar leh hmelṭha vak lo tura ka tih kha a lo ni miah lo. Biak a nuam em em a, a fel hmel em em bawk.

Tarmit a la vuah zui, a ti lang ṭha em em lehnghal.

Nu Lawmi nen inkawp tur ngawih ngawih ni awma hmelṭha leh dul pawh kiar lo a ni. Hriselna a ngaihpawimawh hmel tlat.

Ani ang kuma tianga awm thei chu.

Hei vang hi niang an fate pawh an hmelṭhata an hleitlin em em!

Mahse e, Zoa hi, ka ui lutuk.

Pa Zaua chuan a zinna aṭang thil min lo hawn ve a, " I duhzawng awm ang tur ka hre si lo a, bengbeh hi ka lo lei tawp mai, i duhzawng a nih loh pawhin nakinah i duhzawng min hrilh ang a kan la lei dawn nia",

" A, chutiang a ngai lo, hei pawh hi tih tawh laiin, ka lawm lutuk, ka lawm lutuk ringawt", zaizir meuhin rang lutukin ka lo ti vat a. Inthlahrunna a zual mai mai.

" Awwww ih maw father, Usiami tan chuan cherna damdawi i lo lei lo nih kha, van pawi tak",

" Bibi, Rs, hrethiam rawh aw", Papuian a lo ti vat.

Bu nghut pahin Papuia ka va en a, nui sun sun chungin min lo en.

Aw Lalpa! Ka tuiral leh ta.

Chawlhni inkhawm vawikhatna tur, ka peih lo tawp ta ni.

Hmelhriatsa neih loh phei chuan.

" Siam, kan lo han kal hmasa mai ang aw, Biak in awmna i hria tiraw?", Nu Lawmin a lo tih chuan, " Awle, aw ka hria lawm", ka lo ti a.

" Usiam, kawr lian deuh ha lo la aw", chhan pawh ka chhang peih lo.

Pindan aṭanga ka chhuak chu inchung lam aṭang Papuia smart deuhin a lo chhuk thla a, a hnungah Zoa a kal ve chhet chhet.

Rta pawh kamis dum nen a pindan aṭang a lo chhuak ṭual ṭual, min lo en kiau a, chiang deuha a hmel ka hmu ve chu!

Papuia leh Zoa angin ngo lem lo mah se, a hrawk bawk a hmuh ve theih tawh a, a pa zawk daih.

Chhuatah ka ṭhu hnawk a, " Aw Lalpa, suangtuahna ram aṭang hian min harhchhuah tir hram rawh aw", ka rilruin ka ti a.

Harh chu ka ngai a ni.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 2nd, 2023, 4:49 pm

Brothers Conflict-4
Ziaktu: Cck Lalchhuanawmi

" Siami chu nimin kha kan rualin kan lo hruai lo che ni, ṭhian i la nei dawn bawk si lo mahni chauha kal chu a zahthlak ve dawn bawk em a ni", Pa Zaua chuan a ti a.

Nu Lawmi pawhin, " Ni ngawt tak, ngaihtuahna chang ka lo hre miah lo lawm le", a ti a.

Keimah zawk ka inthlahrung, " Lehpekah chuan ka inkhawm tawh ang, nimin kha chu",

" I in diet ṭan dawn maw?", Bibiin a lo ti hmanhmawh. No lo deuhin ka va melh, a lo ṭhen ṭha.

Thau hi min ti e, in diet min sawi hmuh reng bawk a, ka va han in diet awm lo tak, dam chhung tawi tea tlem te tea chaw ei te chu a, rapthlak lutuk.

"Usiami inkhawm dan tura kan buai a nih chuan ka rualin a kal thei reng a lawm, a nih loh pawhin heiii, Dawrpui KṬP President a ṭhu luau a lawm", Papuia kawk pahin nui hak hak chungin Zoan a lo ti.

An nui dar dar hlawm a, Rta tih loh chu, " Nakumah chuan Pavalai President a ni tawh dawn", pa Zauan a lo ti ve leh.

" Niminah chauh lawm kan pian le, min chhuah upa em mai", kiai sak pahin Papuia chuan a ti a.

A hmel khawngaihthlak deuh chu ka lainat lutuk. Ni e, upa te an ti mai mai a, a kum zat hriat ka chak ngawt mai, chuti teh luaa upa chu a nih ka ring lo.

"Usiam, ngati nge Papuia i en char char a?",

"Eng, eng maw? Ka en char char lo", rang lutuk bah ki kawi nuaiin ka ti a.

"A ho lutuk, i duh tawkin min en rawh", Papuian a la ti ta deuh deuh. " Chutiang engmah a awm lo", zaizir meuhin ka ti a. An awih chiah lo nge an nui dar dar hlawm.

Zoan, " Usiam, Papuia ka thik dawn tlat", ner sawkin a ti ve leh.

Bibi vanga ka zah ziah chu. Ka sa pup pup a, chaw ei lai a nih avangin thawh daih a mawi bawk si lo, chaw ka la ei zo si lo, zak leh harsa ti tak chungin ka nui lui ve ta mai mai a.

A ruk tak chuan ka hlim veng veng tho, a chhan ka hre bik lo. A nuam reuh, mahse; Zoa chu ka hmuh dan a dang vek tawh. Huiiii...

Pa Zaua chu JE a lo nia, mahse; JE hi eng nge a nih a, eng hna nge an thawh pawh ka hre miah lo.

Hre lo anga awm ka duh bawk si lo, ve ngei a.

Private car neiin driver pawh an nei thlap, Bibi leh Rta te School a thlah fel hnuah Pa Zaua a lo hruai leh ṭhin a. A changa traffic jam avanga a tlai chuan taxi hmangin Office a kal ve mai.

Papuia chu Zirtirtu a ni a, ka en hian a khirh ngawtin ka ring. A zirlai thuawih lo deuh te chu a hrem ziah ka ring bawk.

"Achhuan, ka ngai che nia, online thei vat vat tawh rawh", tih ka thawn leh.

Message sang chuang a awm tawh.

Rta. POV...
"Bro, khawngaihin inchungah lo chho lawk teh a", Computer ka on chiah chu Zoa message a lo awm nghal.

A bialnu rinawm leh rinawm loh fiah nan trick min hai tir a tum leh ni hrim hrim ang.

Lu thing nar nar chungin pindan aṭang ka chhuak a, awmpuinuin chhuat a lo nawt tlauh tlauh.

Zan dar sawm a ni tawh sia, tun ang hunah chhuat han nawh.

Ngaihsak lem loin inchungah ka chho a, Bibi bathroom aṭanga lo chhuak nen kan intawk, " Ngati nge tun ang hunah i thawh?", tiin, ka zawt a.

Meng mang hlei loa min lo panin ka banah a vuan a, " U, ka pum a nuam lo a", pangchang takin a ti a.

Kan duat rawn tih a hre ve kiau bawk si a.

A pindan thleng ka pua a, fel taka mut tirin ka chhuahsan a.

Zoa pindanah kalin, " Lehkha zir ka la ngai a nia aw", ka ti lut a.

Ka rin ang ngeiin, "Bro, hna min thawh sak lawk teh",

" Ka hrilh ka hrilh che kha, nangmah pawhin account lem te siamin i ti ve thei reng a lawm", bung deuh nghut nghutin ka ti a.

A lo ner nasa lutuk. A, engpawh nise, " A ṭha lawm", ka ti chu min lo kuah chung.

Lo namsawnin information min pe vat tura hrilhin ka chhuahsan a. Reilote Bibi ka en zuai.

Sir Tepuia chuan min koin, " Rintluang, kumin chu Science-ah Topper turin ka ring dawn che a nia aw", ka lo bu nghat.

Sir Tepuia vang liau liau hian Science pawh hi zir ka ni a, Computer Science ngat. A nuam ka ti.

Computer hi nupuiah ka la nei ang!

Zoa POV...
"Hmanni kha chu, in awmpui thar kha ka khawngaih lutuk", a nui huah huah a, a ke a leng vak vak bawk.

Pepsi can ka in mial mial, " A thuhrimah awmpui thar in nei tih pawh i sawi lo a, khawiah nge Lalnui kha a awm tak?",

"Lalruatfel, ngawi ve mai mai teh", dawhkan hnuai aṭang a keah ka va tlawh. Min en kar chungin, " Awmpui Hunter", ke leng vak vaka pum dawmin a nui leh vak vak a.

Tho lawkin a ṭhutna chawpin ka tlawh thlu ṭhuai, a ṭawng tam leh lutuk ṭhin hi buaithlak.

Classroom pana ka kal hnak hnak chu min lo um zuiin, " Tuna mi hi ngati nge a van thau, i kah duh ang chi a ni bawk si lo a, awmpui tur dang ka lo zawn sak mai dawn che u mi", min kuah pahin a ti a. Ding chawta enin, ka kiai sak.

"Zo, zanin chu RV lamah vung ila?",

"Ngawi teh, inhlawh ka ngai, ka hman tlat lo", tia ka chhang chu an hmel a dul hlawm nghal ruak ruak. Ka tel lo hi chuan engmah an ti thei lo.

Dintluangi lo kal chhet chhet chu huiin a âwm kawh lahah chuan ka hmai ka phum a, a mawng poh vah mai ka ṭham nghek chu a kat dawrh.

Pawt hnai leh sauhin ka bula awm te chu ka en hrek hrek hlawm a, nui ver ver chungin an kal sawn dual dual.

Ham bai bai chungin inhnuaiah ka chhuk a, insukna khawl a ri vu vu mai.

Rinsiami a insu a ni ngei ang. Bathroom panin ka kal chhar chhar a, bathroom bul ka thlen chuan insukna khawl ri karah zai rat rat thawm ka hre ta.

"Snapping one two, where are you? Your still in my heart", Rinsiami chu a zai vak vak a.

Insukna khawl a rik tawp chuan, " Ruah a sur palh ang e", ka ti chu, a ding khawng luah kha a phu nasa ngang mai. Bucket inhung ṭha hle hle ho an tlu rem rum mai alawm.

Ka nu awmna ka zawt chu thaw hlawp hlawp chungin, " A chhuak lawk", a ti a.

Ka inthiamlo leh hnuhnawh chu ngaihdam ka han dil leh hrih, khatianga a phut nasat ka rin loh vang a ni.

Chokaah kalin chaw ka ei a, rei vak loah Rinsiami a lo lang ve nghal.

Mahse, ngati nge mawni a tîm deuh tlatin ka hria, min hlau deuh reuh nge mawni.

Ni dawn tak e, Ruatfela chet dan vel khan a la tibuai a ni hrim hrim ang.

"Usiam, ka ṭhiannu kha eng nge an i tih?", mak ti deuhin min lo en zawk a, hmun dang a melh lehnghal. "A ṭha", sehchilh deuh takin min lo chhang.

Ka lo nui hak, " Tak tak maw?", ka ti leh ngat.

A hmui hnuai seh kawi niah chunga ka lam lo hawi ṭual ṭualin, " A tenawm lutuk", ti hlakin bathroom lam panin a tlan vawn vawn nghal.

Nui tet tet chungin chaw ka ei mial mial a, thawmhnaw, khawlin a nuai tawh ho bawma lo pawm chhuakin inchungah a chho a.

Ka chaw eina ka tihfel hnuin keipawh class kal turin ka insiam.

Ka tlan chhuak tur side glass ka en zeuh chu Rinsiamin min lo bih dek dek lai a lo lang.

Kiai saka ban vaiin, " Usiam, ni hman nuam aw", tiin, ka vai lauh lauh a, ka tlan nghal.

"Dintluangi leh Bawnga sawi thawm chu a dik nge dik lo?", ṭhu thlain ka thaw hrawk a, " Dik lo", Ruatfela a thaw huai mai. Kei ai pawhin a lawm hmel zawk daih.

Hepa tak hi chu aw.

Dintluangi ka bulah lo ṭhuin, " Zo, zanin chu ka ṭhiannu Feli birthday party-ah kal ila, min kalpui rawh aw please-in", a mitmeng fiah kâk chuan min melh ralh a.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 2nd, 2023, 4:49 pm

Brothers Conflict-5
Ziaktu: Cck Lalchhuanawmi

Lalrinsiami POV...
Lalhmachhuani online thei har lutuk chuan lunglen tawh sa nak alaiin, lunglen a ti zual ngawih ngawih.

Suk tur a awm loh avangin tlemin a zia deuh, chhuat nawh leh pindan tihfel kha a ni mai a.

Pindan tihfelfai turah pawh Rta leh Nu Lawmi te pindan a tel lo a, ka rin danin Nu Lawmi hi chuan nupa pindan em chu a ti a nih ka ring deuh.

Mahse, a hman loh chang erawh ka han tifel ve bawk ṭhin a, chutah pawh tihfel tur a awm mang ṭhin lo zawk.

Rta pindan ber hi ni ka luh chak chu!

A pindan hi eng ang nge a nih ang tih ka ngaihtuah, a hnawk em em lo phawt ang a.

Nu Lawmi sawi hmangah mi chimlim tak a ni a, a fai reng dawn tih chu chiang sa.

"Rs, vawiin i lo buai em?",

"Buai lo e, nangmah zawk i buai em?", tiin, nui sun sun chungin ka lo zawt let a.

Papuia bulah hi chuan ka hahdam sawng sawng zel. Amah lah a ṭawng a damin a nun a nêm bawk si a.

"School ban veleh KṬP hnatlannaah ka tlang nghal a lawm le, i buai phah ta a nih hi", inthiam lo tih hriat takin a ti a. "A ho lutuk, buai te chu kan hna a lawm", ka lo ti a.

Ka mut hmain ka chhungte nen kan inbia a, ka lungleng lutuk chu ṭap ṭeuh chungin ka be hlawm a, " A va buaithlak tak e aw", ka nuin a ti thla ngawt zel.

Ka nuin kan inbiakna a titawp ringawt.

Inphih fai turin bathroom panin ka kal a, " Usiam, kha rul", ka hlau lutuk chu dawhkan chungah ka lawn kai vat.

Bibi nui thler duai duai ka hre ta, hlauhna mai bakah thinrimna leh zahna chuan min tuam up up nghal.

Muangchangin dawhkan aṭang ka chhuk a, Nu Lawmi te awm lo se chu aw, ka va han beng dawn chiang tak.

He nau sual dan hi chu aw.

" Bibi, i Usiami i tihlau a lawm", nui hak hak chungin Pa Zauan a ti a. Pa Zaua lam lam pawh chuan ka ngei.

Nui lui sak sak chungin ka hawi chhuak de de a, Zoa pawh a lo nui ver ver, min hmuh veleh a ka a hup ngei a.

Ka lu hiat nuah nuah ringawt chungin bathroom-ah ka lut daih.

Ka zak lutuk chu au vak vak ka chak ber mai.

A tuk chaw ei naah Bibi bawk chuan a sawi chhuak ta.

Papuian, "Rs, i van hlau awm ve, rul te chu rah hrual mai mai tur a lawm", a ti a. Ka lo nui ringawt, ka ngei lek lek dawn a, mahse; ka ngei phal leh lo. Papuia a ni tlat a.

Zoa pawh chuan, " I thlawk haw dawn ta emaw ka ti hman lawm", nui huah huah chungin a lo ti ve leh. " Sawi tawh lo ang u", kun ngaih chungin ka ti a, ka chaw ka let ka let kual tawh.

An ngawi ve mai a, Zoa erawh a nui tut tut reng tho.

Nu Lawmi hi chu housewife kan tih ang chi kha a ni a, kan pahnihin kan awm nitin a, a changa a leng chhuak ṭhin tih leh kan bazar tih loh chu inah hian a awm ve reng zel.

"Ka nu, ka kal nia aw", Zoa chuan a ti a.

Nu Lawmin, " Lo ding lawk teh",

" Eng nge ni? Ka tlai palh ang e", Zoa chuan a ti a. Nu Lawmin, " Dindini kha chaw ei turin lo hruai ta che", a ti chu ka phu deuh awrh!

Ka phutna chhan pawh hre hawt lo i chuan.

Zoa kal hnu chuan Nu Lawmin, "Siami, vawiin chu ka nuam lo riau a, ka'n mu lawk ang e aw", a ti a.

"A ho lutuk, va mu hahdam sawng sawng rawh", ka ti a. Nui sun sun chungin an pindan a pan a, a duhawm thur thur ngawt mai.

Inchung tifai turin ka chho leh a, bathroom tifai phawtin Papuia pindanah ka lut a.

A lo fel thlip thlep mai, ka hrilhhai lek lek zawk. Chhuat chiah nawh fai a ngai.

Ka hlim veng veng, mipa nih vang ngawta chet hnawk tur tih pawh a awm chuang lo.

Awi! Pheikhawk bawmah pheikhawk an lo let phung mai. An picnic emaw tih mai tur a ni. Che fel thlip thlep chu a ni lo a nih hi. Ka sut leh nghal dawn mawni, a, che fel ni mai rawh se.

Papuia chu ngaidam mai ang.

Zoa pindan ka lut ve leh chu, "Ah my Good!", tiin, ka au ṭhawt!

A engtizia em em nge mawni, Bibi pindan tihfel nen a inang reng dawn lawm.

A fai vur bawk si, a pindan lah hnawk ropui.

Bibi pindan pawh Zoa pindan nen danglamna awm chuang lo.

In tihfelfai ringawt pawh hnapuia neih tham a tling, a chauh theih ngei mai.

Snap hla ngaithla chungin ka tihtur ka ti tlauh tlauh a, hneawm lutuk loin ka hna ka tlingtla ve thei mai.

"Zanin chu programme a khat vek a lawm le, a peihawm lo ṭhin mang e", Papuia chuan a ti dap dap a. Ka lo khawngaih lutuk.

Ṭhalai pawl hrang hrang bakah khawtlangah nihna hrang hrang a chelh ve zut bawk si a.

"Kan koa mawhphurhna tla hi chu theihtawp han chhuah hram hram ila, hriat loh karin kan tlingtla ve mai", Pa Zauan a lo ti. "Takah, Zoa khan Bike leina tur ka intuak dawn a ti em kha", tiin, Nu Lawmi a zawt leh nghal.

Nu Lawmin a lo chhang thuai a, "Engzah nge a khawl tlin tawh?",

"Ka hre miah lo, an duh changkan bakah a man to to an ti ve ṭhin bawk si a", Nu Lawmi chuan a ti muang fan raih a, a rukin ka lo pawmpui nasa.

Pa Zaua chuan Papuia bulah, "Car leina tur i tuak ve em kha?",

"Tuak ve e, ka lei thei ṭep tawh", nui var chungin Papuian a lo ti.

Ka lo lungawilo pui, Pa Zauan a hlawh tam dawn tehlul nen, eng nga tinge a leisak mai loh le.

Chaw ei kham ve leh Papuia a chhuak nghal a, a hnu rei vak loah Zoa bal paw phuau chungin a rawn lut ve nghal.

Pa Zauan an pindanah Zoa chu a ko nghal a, keiin a chaw ei tur ka lo siam sak.

Bibi lahin desert a lo ti kawi sawi.

Rei vak loah Zoa chu mittui tla pur chungin a lo chhuak ta mai!

Nu Lawmin, " A pain Bike leina tur a pe a nih kha", a ti a.

Kei pawh chuan ka lo lawmpui leh hnuhnawh. Pa Zaua chu ka lo ringchhe hma mah mah a ni.

"Lal fapa pathum chennaah ka awm a, chu pawh awmpui angin; a fairy tale reuh tiraw? Mahse maw, awi nakinah call-in ka hrilh zawk ang che, ka type peih lo a thui dawn lutuk a, type sen a ni lo, voice pawh ka peih lo, muttui leh phawt mai le", thaw hrawk chungin ka type a.

Ka lung a leng tawh em mai.

Chhungte ngaih bakah ka ṭhian biak ve ber lah biak theih lohna a rei tawh bawk si.

Ṭawngṭaiin ka muhil siai siai a.

"Morning", nui sang chungin Rta tui lo in khawlh khawlh chu ka ti a.

A che chang eih lo, en pawh min en lo a, ka ṭawng hre awm pawhin a lang lo. A ngeiawm tak tak a ni.

Ner sawk sawkin ka phun su su a, ka rel a ni mah zawk.

Vawilehkhatah a hahchhiau thut mai le!

Ka kâ(mouth) ka hup vat a, ka meng phawk hru nghal, ka rel avanga hahchhiau chu a ni lo hrim hrim.

Zoa POV...
Ka pa bulah lawmthu ka sawi ṭha leh ngat, ka inhlawhna aṭang a la daih loh chu sawi loh, Bike leina daih chiah lo a chuangin min pe a, ka lawm zia hi ka sawi thiam lo zawk.

Ka inhlawhna hman a ngai dawn lo ta nih hi.

"Papuia pawh pe ve la pa",Bibiin a ti lang lang a, ka lo ṭan lutuk. Ka naute Duati hi chu aw.

Papuia ka va en a, a lo khi sup. Ka u hi chu a tlawmngai thei lutuk a, a inkhawlna aṭangin lei ngei a tum dawn.

"Kei chu a ngai lo, taxi a awm tho a, chubakah Zama rual pawhin a kal theih tho a lawm", nui var chungin a ti a.

Kha maw, ka u nge nge hi chu.

"Bawiha, nang i computer te a la ṭha hlawm maw?", ka pain a tih chuan a lo bu nghut. Ka nau hi chu aw, a chang chuan hnek thluk tawp hi lawm ka chak ṭhin.

Mahse, ka nau a ni bawk sia, a awm dan hi chu ngaiah kan nei tawh, kei erawh chuan ngaia neih sak hi har ka ti thei khawp.

A hre chiang lo te chuan induh an ti zel a, ka bulah an sawi leh nge nge zel.

Siamin Papuia a melh no leh zeuh ṭhin chu ka man chiang teh e.

"Lalruatfel, lo kal teh", rang takin a lo kal nghal.

Ka bike chahbi pein, " Engmah siam ṭhat ngai a awm lo, a chaw man tur chiah a ni mai", ka ti a. A hrilhhai lutuk chu ṭawngna chang pawh a hre lo.

"Ka pe che nih kha, tun aṭang chuan i duh i duh i phur kual dawn nia, mahse; tlukpui lo turin fimkhurna chang hria la aw", a âwma va hnek khauh chungin ka ti a.

Mittui tling pamin min lo kuah nghal, ka pain bike leina tur min peka mittui tling pama ka kuah lai min tihre chhuak zawk mai.

"Ka lawm lutuk, ka lawm takzet, ka lawm ngawih ngawih, ka lawm em em lutuk, ka chunga i ṭhatna hi ka theihnghilh ngai lo ang", ṭap ṭeuh chungin Ruatfela chuan a ti a.

"Engmah a nih loh kha",

"A ni lawm, mahni bike ngei han khalh ve tur chu, ka ngaihtuah thiam lo zawk", a ti a.

Amah ai pawhin ka lawm zawk, ka ṭhian neihchhun liau liau hi tihsak ka nei tlem em a sin.

Ka bike thar nen chuan in lam ka pan a.

Ka hmeichhe phurh hmasak ber tur chu ka Nu a ni, Dintluangin chuan hmasak ber a duh a keiin ka lo hnar thung.

Hmeichhe chuang hmasa ber tur chu ka Nu a ni tur a ni, bike hmasa kan lei hlimah pawh ka Nu ka phur hmasa ber.

Ka bike hmasa Ruatfela ka pek tak kha ka intuak ṭang ṭangna aṭanga ka lei a ni a, tuna mi erawh ka pa min lei sak a ni tawh thung.

Mahse, ngaihṭha takin ka khalh ziai ziai dawn.

In ka thlen rual rualin, " Ka nu, ka nu", tiin, ka nu ka au vak vak a.

A lo tlan chhuak thuai, bike thar nena in kawta min hmu chu a nui nghal ver ver a, "E, khawi lam tlangval nge?",

"Dawrpui tlangval, ride i duh em?",

"Dawrpui tlangval hmelṭha hleitling sawmna te chu kan hnar thei nang", ka nu nge nge.

Mahse, a chuang zei lo lutuk ṭhin hi kan ding kan ding leh zut dawn nih hi.

A hmasa berah a lawn thei leh lawk lo, "A ṭhutna hi a sang em nih hi", a tih ka ring reng a ni.

A chuang ve thei ta mai a, Siami pawhin nui sun sun chungin min lo thlir.

Siami te nen invaiin ka nu chu ka tlan chhuah pui ta a.

Bibi lo haw hunah ka tlan pui ve leh ang.

Chumi hnuah Rta ramhuai speed-in ka tlanpui leh ang, eng Science theory emaw te hmang khan min zilh leh hrep dawn a ni.

"Duati, zanin kha ka beisei sang dawn che a nia", tiin, Dintluangi ka va text.

"Yes, muah", min lo text let nghal.

Thisen a lum lohna pawh a rei ta lawm le, che vak ila ni mai.

"Zo, cd hi khawiah nge kan lei ang?",

"A ngaiah a ni leh mai alawm", ka lo ti sam et.

A lei ngam loh thu a rawn sawi leh, "Aw, keiman ka lei mai ang, lungngai suh", ka ti a.

Phurh tur a neih theih dawn leh dawn loh ka zawt, a neih theih tur thu a sawi vat, "Zo, thla thum hnua min phuar pawh pawi ti loin zanin chu che tak tak ang aw", ka lo nui hak hak a.

Lalruatfela nge nge, ni e; che tak tak ila...


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 2nd, 2023, 4:50 pm

Brothers Conflict-6
Ziaktu: Cck Lalchhuanawmi

Rta POV...
"My boy, lo chho lawk teh", ka van ning tak.

Peih lo tawkin ka chho hnak hnak a, awmpuinuin chhuat a lo nawt leh tlauh tlauh.

Thaw hrawkin ka chek tlawk tlawk nghal a, a pindan ka luh peih loh chhan hi chu a hnawk thei em a ni.

Ka u a lo la haw lo ni ngei ang, a pindan a reh em mai, a awm hi chuan a ri bung bung ve zel a.

"My boy, Dintluangi hi ṭhen ka duh a, hna min lo thawh sak leh mai ta che", ka en tlawk tlawk ringawt.

"Khati khan min en vak suh, ka ning tawh lawm, a thar ka duh leh tawh", bei a va dawng ṭhin ve. "My boy, engmah i sawi dawn lo mi?", ka lo bu nghut.

Ka thawhsak dawn leh dawn loh min zawt leh a, kutzungpui tipir va chungin ka nuih sak a, "A va ṭha em, i duh apiang ka leisak ang che, ka money lai tak leh ka thilphal lai tak", nui ver ver chungin a ti a.

Zohmangaiha tak hi chu aw...

"Dindini chu lo lenpui la", ka nuin a tih chuan, "A buai thei lutuk, leng mai mai hman a ni lo", Zoa chuan a ti lang lang a.

Ka uin, " Ex Dindini a ni leh ta mi?", a lo ti vat a, "Teuh lo mai", âw sang vahin Zoan a ti lehnghal.

Kei erawh hawi chhuak lem loin chaw ka ei mial mial a, Bibi thlengah chawhmeh ka dah sak leh zauh ṭhin.

Ka pa pawh chuan fiam zuiin an nui dar dar hlawm a.

Sir Tepuia leh miss Daisy-te nui ri hak hak ka hria chu ka phu deuh awrh! Ka lo muthlu reng chu niin.

Kan section kan tam tham em avangin min hmu thei lo a ni ang, miss Mapuiin min hau miah lo, lecture a lo pe mial mial. Intuai pawk pawkin ka ngaithla chhunzawm ve mai bawk a.

Ka ṭhutpuite muthlu pawh ka nek sawk sawk hlawm a, tep chuap chuap chungin an lo tho ṭual ṭual.

"Rt, zanin chu rank min lo push pui teh a", Muana chuan a ti a. Ka dar chhin hakin zung turin ka kal nghal.

Zoa hna pawh ka la thawk lo tak e.

Bibi bawk kan nghak, a muang fal thei sia aw.

Uzama pawh chuan a dan pangngaiin sana a en ru leh zauh zauh. Extra class an kal ṭhin pawh ni si lo hi, zirlai an lo chhuah sup sup hnu pawh hian muangchangin a ṭhiannu nen an lo kal hnak hnak ve chauh zel.

An nui bâwk bâwk a, a chang chuan an hmuhnawm ka ti ṭhin.

Bibi a hmuhnawm lehzual, a ṭhang duhawm tak tak a ni.

"Papuia chu aw, a nihna eng emaw ber hi bang mai se a ṭha ang", ka pa chuan a ti charh charh a. "School-ah nilengin an au bengchheng a, ban veleh a chhuak lehnghal ṭhin a, a hah rimtawng thei lutuk, zingah lah a tho hma thei bawk si", a ti leh a.

Ka nu pawh chuan, "A ni ngawt mai, engmah hi a sawi ngai lem lo naa, a hah tih chu hriat reng reng, a fel leh lutuk hi a buaithlak", a ti a.

Bibi inrawlh velehin, "Keipawh ka fel ve tho lawm", a tih ka ring reng a. A hmui a tisawi niah leh dawn.

"Siami, naktuk chu Zama nen va bazar ula aw",

"Zing lamah em ni?",

"Ni lo e, chaw ei khamah, in lam tihtur chu ka lo ti mai ang, mipui zi muai muai kara awm ka thei thlawt lo", ka nu chuan a ti zawi sap a.

Zoan, " Usiam, keimah nen kan bazar dawn em ni ang?", a ti chu a rukin ka lo ner salh.

Computer hmaah ka ṭhu ren rawn a, "My boy, ka hmu duh che nia", kawngka kik kar kar pahin a rawn ti a. Tunge sawi a ngai lo.

Kawngka ka va hawng chu a lo awm leh tawh lo. A pindanah a chho nge hman nge mawni.

"E, Rt, hei thei ei tur", awmpuinuin plate keng chungin a lo ti chu ka la a. Zoa ka melh ru deuh a, ka hmu mai lo. Pindanah ka lut lehnghal.

Muana chu biain rank push turin kan inbuatsaih ṭan a, chutih laiin, "My boy, come on man!", headphone la thlain ka dah chawrh.

Lalrinsiami POV...
Zoan Rta a koh dan chu ka nuih a tiza tlat, a koh duatna a ni ve awm bawk sia.

'My boy' han tih kher, ṭha takin a ko ve thei awm tho sia, nui sun sun chungin ka lo en a.

Rtan a pindan kawngka a hawng chiah tihah, "My boy, lo chho vat teh", Zoan a ti nghal a, inchung lamah a chhohpui nal nal.

Rtan engmah pawh a sawi ve hman hleinem.

"Bibi, lehkha zir ṭan tawh ila", Pa Zauan a tih chuan, "Awle pa", Bibi a inper tho nghal nal. A duh hi chuan a fel mawle hei pawh.

Nu Lawmi pawh telin an pathumin Bibi pindan lam panin an inzui chho hlawk hlawk a, an nui bâwk bâwk a ka chhungte min tingai lutuk.

Chhuat ka nawt thuak thuak a, Nu Lawmi te an lo inchhaih thla chu hre lo angin ka awm a, Nu Lawmin zawi sapa, "Siami a awm reng hi i tizahthlak lutuk", a tih pawh chu hre rengin ka haider lui tlat a ka tihtur ka ti mial mial.

Pindanah an lut ta nge nge a, ka rilru a kawi nghal.

"Kha Rs, i la meng a ni maw?", Papuia lo ti lut chu ka lo ka ho a, sana ka en chu sawmpakhat dawn a lo ni der.

"Ngati em em nge a?", tiin, ka zawt let ve leh.

A inbualfai chhungin chaw ei ka lo siam sak a, chawhmeh dai vek tawh chu ka chhuang lum leh sawk sawk.

Hmanhmawh lai hi chuan gas pawh a alh muang.

Papuia chaw ei lai chu ka en zeuh zeuh a, keimah zawk ka lo lai.

Korea drama music a ri leh chuai chuai tawh!

Ka thaw hrawk a, "Rs, i ṭha maw?",

"Aw, aw, ka ṭha lutuk", bah nuaiin ka ti a, "I mut duh tawh chuan lo va mu rawh, keimah pawhin ka ti thei tho a nia", kimki chiaiin a lo ti leh.

A hmel zawng zawng nen, awiii; tinge maw kei lah hi.

Ka mut duh loh thu leh a ṭhat vek thu zaizir meuhin ka hrilh a, a lo nui saih.

Ka thluak a tibuai lehnghal, a nui kher kher a ni aw.

Zingah chuan dal hâng ka chhum a, Papuian hawp bawrh bawrh sela a chauh pawh a zia deuh ang.

Ngati nge committee te hi a tam thei em em le, rel tur a hriatthlak mai mai.

Nu Lawmin bazar tura min tih inrinni law lawah a tih leh si avangin kan in lama phei lawk ka dil a, a lo phal nasa mai.

Papuia POV...
"Ka hre lo le, kumin chu kum dang aiin kan nawi ru tlat a, ka beiseina a sang lutuk lo", Tluangi chuan a ti dap dap a, sahdah a hmuam zui zat.

Sahdah hi chu a pawimawh a ni, "Lalpapui, nui vur vur reng suh, ka nghei dawn chuang lo",

"Nula senior phanchang tawh hi chu e, mahni pawha mikhual te tana ar talh ngam ngat chin", Mamawian a lo ti ve leh. Tluangi a ter leh zat, "In ninawm e, nangni pahnih kha e, kei aiin in senior tih lo hre ve mai mai teh u", a ti a.

Mamawia nen inenin kan nui dun hak a, "Kha maw, a dik in tih em kha, in nuih dan te hre hraw kha a", Tluangi a ṭhu ṭhen ṭhaw.

A tawpah zawng kan nui ho leh vek.

Zama call-in hruai ka ngaih loh thu ka hrilh a, mahnia ke neih ve hunah chuan aw, aw aw.

Kan nei thei ve ṭep tawh lawm le, lungngai lo phawt ang, furpui hmaa neih hman ve erawh a ngai dawn a ni.

"Papui, math hi min lo pui",

"Puitu i neih ṭhat em kha", a ner kawisawi nghal. Lo kalin ka pawm a, kei nena inzirtir chu kan ṭap pur leh dawn nih hi.

A thiam loh lai ka zawt a, a kun deuh lap; ngati nge mawni.

"Bibi, i thiam loh lai sawi la, khawi chapter thleng nge in zir tawh?", tiin, ka zawt leh a, min chhang chuang lo.

Nâ a neih leh neih loh ka zawt a, a lu a thing bawk si.

"Papui?",

"Aw, sawi rawh",

"Au Puipuii ka ngai", a mittui a tla nghal zawih zawih, min lo kuahin nghet takin ka kuah a, a hnung chul heuh heuh pahin, "Au Puipuii chu keipawhin ka ngai lutuk a lawm", ka ti sap a.


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)