1500 MILES BY Duata Khualchhawn (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

1500 MILES BY Duata Khualchhawn (Completed)

Unread post by Ngaia » April 9th, 2023, 11:35 am

55u9oxvb.jpg

🌹🌺1500 MILES🌺🌹
(Action, romance, funny, crime, investigation, revenge.)
✍️ Duata Khualchhâwn.
Prologue/Trailer. (Repost)
"Ani thingtlâng nula ve mai kha i eng nge a niha heti fakauva i ngaihven tâk," tiin Pu Sangkima chu a thinrim kher mai. Kawngka bula ding a fapa Brandon Zomuansanga chu rum zet hian a melh a, Brandon-a farnu Anabel Hmingthansangi leh an awmpui nula pahnihte phei chu ṭawng pawh an ṭawng ngam lo. Chutah Brandon-a chuan, "Ani kha maw ka pa, ka hmeichhe hmangaih a nih kha! Nang chuan ka nu i chân tawh a, ka hmeichhe hmangaih lehzêl hi chu min lâk bosak tum buai duh suh." tih leh chhuah tuma a inher chiah, "Ka hmeichhe hmangaih a? Nang hian ka thu i hnial ve ngam tawh a ni maw? Hei hi hre rawh, i chhuak a nih chuan rawn kîr tawh hlek suh ang che. Ka tuithlâr nghâl che a ni mai," ti vîn leh ṭhatin a thinrim luatah a aw pawh a khûr deuh hial! "I thu thu le!" tiin Brandon-a chu a chhuak lui ta a.
—————
Ni khat chu an dâwr kawngka hnaihah ṭhuin Brandon-a chuan Vânglainî chanchinbu a chhiar a, a phone ri tleng tleng a pick hnua a thu hriat chuan a ti thinrim kher mai. Ding chhuak nghâl zawkin, "Eng a? Ka farnu a pâwngsual a maw? Ka that dâwn chiang lutuk," inseh ruh ṭawlh ṭawlha tih leh an dâwr aṭanga chhuah chu a rual a, hmanhmawh takin a Car dahna lam a pan zui hlawk hlawk. New Delhi designing Company liana thawk mêk a farnu Anabel Hmingthansangi chu, a ṭhian ṭha tak leh a mi rin êm êm mai Sanjay Yadav-a'n Hotel-ah pâwngsualin a lo tlân bo nghâl a lo ni.
Brandon-a hi kum 5 chhung India chhuanvâwr National Security Guard(NSG), Black Cat Commando-ah a lo ṭang tawh a, zan khat chu Indian Army aṭanga NSG rawn zawm ve Vikash Shukla Mumbai-a chêng, a pa Army Officer a nihna chapopui tak mai leh, hmârchhak state-te hmusit êm emtu nên an thu inhmu lovin camp-ah an insual a, thiam thilah Vikash-a hian a khan loh êm avângin Brandon-a hian sawp hrepin, thichhâwngin a awm hial! A Commando puite'n huaisen taka a thlavâng an hauh tlat avânga Jail bang zût lo mai a ni a, ei leh in tlêm pea thla khat pumhlûm an hrem hnuah, ngaihhnathiamna sang berin NSG(Black Cat Commando) aṭang hian an hnawt chhuak zui ta a ni.
—————
Maêngi chuan a ṭhiannu Remi(Remruatpuii) ṭhu ngui nghiai mai chu a lo hnêm ve mawlh mawlh a, "Ka ṭhian, chhel takin awm rawh aw. Kan nuna mi bîk kan tawnte hi kan chhungte leh mi nazawng hian an hmuin an hre thiam ve ṭhîn lo va. Hrehawm tam tak tawrh hnua awm dûn leh theite pawh an awm a nia, nupui/pasal dang neia inṭhen hlen tate chu awm ve tho mah se, i thinlunga amah i thlang tlat ang khân U Brandon-a pawh hian hmeichhe dang a thlan ka ring lo. Nakînah chuan tûna in thil tawnte hi ngaihnawm ti taka in la sawi dun hi ka ring tlat a ni." a ti dap dap a. Remi chuan hlim luih tum taka nui sakin, "Ni e, ka beisei. Mahse, ka hlauthâwng a ni ka ṭhian. Keimah vângin an chhungkaw hlimna a chhiat phah a, kei thingtlâng nula a kâra hmeithai fanu mai lehnghâl tân hi chuan a sang mah mah a ni. Nî leh thla bâkah arsi tam tak an awm a, nî tel lo chuan khaw êng kan hmu thei lo va, chhûn hun kan hmang thei lo. Mahse, zânah chuan thla tel lo pawhin arsi chhiar sên lohte khian Vân khi an ti mawi thei tho. Kei chuan an vaiin ka dîl lo, thla chauh a ni ka thlan. Engati nge Pathian khian phal taka min pêk ve mai loh le?" a mittui hru paha nui sakin a ti chuai raih mai.
—————
Brandon-a leh Remi hi awm dûn thei ve tak ang maw? An inkâra hmangaihna chak tak hian Brandon-a pa, Pu Sangkima thinlung hi a hneh thei ang em? Hun rei tak inhmu miah lova an awm hran a ngai dâwn nge, hun rei tak hnuah an intawng leh dâwn? Nge ni a, kumkhua atân an inṭhen hlen zâwk ang tih hi ngaihtuah tham tak a ni âwm e.



🌺🌹1500 MILES.🌹🌺
(Action, romance, funny, crime, investigation, revenge.)

✍️ Duata Khualchhâwn.

BUNG 1-NA.

"Eng a? Ka farnu a pâwngsual a maw? Ka that dâwn chiang lutuk," tih leh phone chu off nghâlin, an dâwr lianpui aṭang chuan a chhuak nghâl a, thinrim inseh ruh ṭawlh ṭawlhin Brandon-a chuan hmanhmawh takin a car dahna lam a pan zui hlawk hlawk. Mizo tlangvâl hleitling pâwl tak fit 5 leh inches 10-a sang niin, a pian pawh zahpuiawm loh leh ṭawng tam lo tak a ni a; khabe zum lam deuh leh mit meng fiah kâk mai, lu ban invuah nghet tlet tlawt hmêl chhe lêm lo tak a ni. An dâwra thawk ve mi dangte chuan ngawi rengin an thlîr ringawt a, thil awmzia zawh chian hman a ni lo bawk nên, a farnu Anabel-i(belbel-i) pâwngsual a ni chu pawi an tihpui tak zet. Brandon-a'n a car dahna a thlen rual chuan car kawngkhâr hawngin an in lam panin a inkhalh hâw nghâl a, a hâwn kawngah chuan thinrim tih hriat taka inseh ruh ṭawlh ṭawlhin, car steering chu a hmer leh ngawt ngawt ṭhîn.

A farnu neih chhun New Delhi-a designing company lian taka thawk mêk, a farnu ṭhian ṭha tak leh mi rin êm êm nia a hriat Sanjay Yadav-a'n a lo pâwngsual mai chu rin harsa a ti a; chu tak chu a thinrimna ti so sangtu ber a ni bawk. Chawhma dâr 11 vêl a ni a, Aizâwl khawpui chu mihring leh lîrthei vei vâk tam hle mah se, Traffic Jam-ah tâng khawmuang lovin an in chu a inkhalh thleng a, in chhung a luh rual chuan a pa(Pu Sangkima) leh contractor pu Hmingliana-te lo tîtî mêk pawh chuan an lo thlîr deuh vang vang mai. Sitting room lama Brandon-a rawn phei mêk chu pu Sangkima chuan, "Mâma i va thinrim hmêl êm êm ve, thil dik lo a awm em ni? Eng thil nge ni ta?" tiin a lo zâwt vat a, inseh ruh ṭeuhin, "Belbel-i a pâwngsual, kha vai hmêlchhephaka khân," tiin Brandon-a pawh chu a ding zui. Chu thu a hriat rual rual chuan pu Sangkima pawh chu phâwk zet hian a ding chhuak nghâl zawk a, "Eng a? Belbel-i chu tuin maw pâwngsual a?" tih leh Brandon-a pan hnaih chu a rual zui bawk. Brandon-a chuan, "New Delhi-a a ṭhianpa Sanjay Yadav khân, that turin Delhi-ah ka kal nghâl dâwn." a ti ram hmak.

"Ngawi teh mâma, Sanjay Yadav chu belbel-i chawlh hmangin a rawn hruai ve kha em ni?"

"Aw ni e, ka pa thu tam sawina hun kan nei lo, ka insiam nghâl ang e."

Brandon-a'n a room a pan chhoh lai chuan pu Sangkima erawh, a rilru nâ leh thinrim tih theih nei si lo chu sofa-ah chuan chal dawmin a ṭhu zui hnawk ringawt. Pu Hminga chuan, "A va'n pawi ve aw! Kha vai tlangvâl kha a fel hmêl ka lo tih nên, a zia lo êm mai. Kei pawh ka va hâw phei phawt ang e," tih leh kawngka pan a rual nghâl a, ṭawngkam ṭha paw'n an inthlah hlei thei tawh lo. Rei vak lovah Brandon-a chu luggage nên hmanhmawh takin a rawn chhuk zui leh hlawk hlawk a, "Ka pa, ka kal nghâl aw." tia kal tlang mai a tum chu, "Mâma, ka rilru a na kher mai. I nau, i farnu neih chhun chanchin hian min ṭhâwng tak zet a ni. Eng pawh ni se, tluang takin va kal la, fing takin i che dâwn nia. Ka fapa Brandon Zomuansanga, India sawrkâr chhuanvâwr Black Cat commando-a huaisen ber i nih ṭhin kha!" thinrim tih hriat taka seh chilh rap rap chunga pu Sangkima'n a tih chuan Brandon-a pawh rawn hawi lêtin, "Aw le ka pa, ka mission hi ka hlen leh ngei ang." nui hul hak paha tih leh chhuah a rual ta a ni.

A thawmhnawte car-a a load fel hnu chuan Lengpui Airport lam panin a inkhalh chhuak leh nghâl a, a farnu thlabar leh zak lutuk tur te, hrehawm a ti lutuk turte a ngaihtuah kai leh meuh chuan Commando-a training khirh leh hrehawm tin rêng tuar chhuak a, ramhnuai sa hrâng leh râl hmaa zâm ngai lo, black cat commando-a ṭangte pawhina an zah êm êm mi seh hel Brandon-a meuh pawh a khap per ve sak sak mai. Ni e, kum 5 chhung National Security Guard(NSG), (black cat commando)-ah hian Brandon-a hi a ṭang tawh a, kha'ng kum 5 chhung khân mission hlauhawm tak tak, sawrkâr tâna mi hnawksak êm êm leh an lu man an tawktarh hial wanted-te man an nihna kawngah a che ṭha hle. A huaisenin râl rêl a thiam bâkah, an training-naa an zir duh tâwk mai lova mahni pawha inzir peih mi a ni bawk nên, hand to hand combat(kut leh ke hmanga insual) lah a thiamin a che rang êm êm a; hei tak hi commando-a ṭang vete paw'n an hlauh rûkna ber a ni. NSG hi group hnih Special Action Group(SAG) leh Special Ranger Group(SRG)-ah ṭhen an ni a, SAG-ah zâwk Brandon-a hi a ṭang nghe nghe! Mission an neih apianga an Team captain-in a râwn ber leh a rin ber a ni bawk a, hetia NSG aṭanga an bân tâk chhanah pawh hian an Captain hi a lungawi lo hle.

Indian Army aṭanga NSG rawn zawm ve Vikash Shukla Mumbai-a chêng, a pa Army officer nihna chhuanga chapo tak mai leh, hmârchhak state-te hmusit êm êmtu nên an thu inhmu lovin, Brandon-a nên hian camp-ah an insual hrep a, thiam thilah Vikash-a hian a khan loh êm avângin Brandon-a hian sawp hrepin thichhâwngin a awm hial! An buai chhan hriatpuitu a commando puite'n rinawm taka a thlavang an hauh tlat avânga Jail bang zût lo mai a ni a, thla khat pumhlûm ei leh in tlêm pein na taka an hrem hnu-ah a pawi khawih avânga ngaihhnathiamna sang berin, NSG aṭang hian an hnawt chhuak zui kha a ni. Ram leh sawrkâr tâna mi hnawksak zual hel-ho leh smuggler-te hlauh rawn niin, amah vâng hian NSG Black Cat Commando hi khawvêla commando ṭha berte zînga mi niin an sawi hial ṭhîn a, a hmêlmate dimna nei hauh lova sawisa ṭhîn a nih avâng pawh hian 'Brandon the terrible—Brandon ropuia/râpthlâk-a' tiin he'ng mi hnawksakte hian a chanchin an sawi ṭhîn. An team captain pawh hian Brandon-a an hnawh chhuah hnu lawk khân zah tak chungin Commando hotu lu ber hnênah, "Sir, hruaitu ropui leh huaisen Sakeibaknei in hnawt chhuak a ni." a ti hial a nih kha! Hei hi a ni hring nun chu! Thil ṭha tam tak kan tihte hi thil sual pakhat lek kan tih pawh hian a hliah khuh hneh êm êm ṭhîn.

Tichuan le, chawhnu dâr 2:30 vêlah Brandon-a chuan Lengpui Airport chu a thleng ve leh ta. Dâr 3:00-a chhuak tur Indian Airlines 305 ticket a lâk fel hnu chuan thlawhtheihna chhuah hun chu a nghâk ta a, a ngaihtuahna erawh a kal thui hle. Chutia thil tam tak a ngaihtuah vang vang lai chuan Indian Airlines 305 passenger-te hriattîrna an lo puang dum dum a, an lût kim ta tihah thlawhtheihna chu a hma lam kawng ngîl takah chuan tlân chhuak zâl zâlin, rei vak lovah Mizoram chu an thlawh chhuahsan ta luah luah mai a ni. Hetih laiin Belbel-i erawh, New Delhi-a City Hospital-ah a ṭhiannu Elaine-i'n a awmpui reng tawh a, khatia pâwngsual a nihna tur khân Sanjay Yadav-a'n a birthday lawmna ni pah fâwmin lên chhuahpuiah company neitute a lo dîl a, an lo inpawh tlâng bawk nên an lo rem ti ve mai kha a ni. Tichuan, hlim taka nui dûn var varin an chhuak dûn ta a, hotel-ah châwla an tîtî leh barh barh hnu chuan black dog(wine) an khiat pah bawk.

Anabel-i nula hmêl chhe lo tak mai leh hleitling ve tâwk tak, pian nalh bawk si chuan Sanjay Yadav-a zu rûi deuh tawh rilru chu sex châknaah thlâksakin a kut a hlei ṭan ta viau mai a, a tîrah chuan a fiam mai maiah ngaiin Anabel-i pawh hian, "Sanjay i fiamthu a sang ṭhîn êm mai, duh tâwk teh." tiin a la nui sang kha a ni. Sanjay-a chuan a duh aia a nêl mah mah leh ni danga a awm dân nên a inpersan tâk êm avâng chuan, "Sanjay, hnaah ka kîr leh phawt ang e, zâna i birthday lawmnaah chuan ka rawn kal hman ka ring tawh lo," tih leh Anabel-i chhuah tum chu Sanjay Yadav hian pawm betin a hmangaih thute a hrilh zui mawlh mawlh mai. Anabel-i lahin ṭhian ang bâka a ngaih loh thu leh ṭhian ṭha tak anga inkawp a duh zâwk thu a hrilh chu, Sanjay Yadav thinrim leh lu kai tawh chuan Anabel-i pangti lum a deh rual chuan inthunun zo tawh lovin a pâwngsual ta a, a rei deuh chinah Sanjay-a room ep chiaha awm state danga mi tlangvâl pakhat rawn hâwin an thâwm a lo hre hlauh a, kawngkhâr hawn a tum lahin chhung lamah a lo inkalh tlat bawk si; hotel-a thawkte call vatin an buai zui mam mam a, kawngkhâr kalhna an tih chhiat hnu-a an luh meuh chuan an tlâi deuh ta a ni.

Sanjay Yadav chu tukverhah chhuakin hotel corridor zawhin a lo insaseng hman a, hmanhmawh taka hotel chu chhuahsanin a car chuan a tlân chhuak nghâl vang vang. Chutia Anabel-i thawmhnaw ṭet deuh hrup leh a hmai duk deuh churh te, ṭap zawih zawih chunga a taksa lang tam tur vênga puana a lo inkhuh ve ṭâwk ṭâwk an buaipui lai takin a ṭhiannu Elaine-i khân a rawn call hlauh a, hotel-a thawk hmeichhe pakhatin a pick chuan thil awmzia hrilh nghâlin, Elaine-i chu a rawn kal ta kha a ni. He'ng zawng zawng hi a hriat hunah Brandon-a hi engtiang takin thinrim ang maw! A farnu a hmangaih êm êm; keh thei dawma a dawm ṭhin chunga tenawm taka chêt thawhtu lakah hian engtiang takin nge a chêt ve ang? Ram leh sawrkâr tâna mi hnawksakte paw'n an ṭih rûk 'Brandon the terrible' tia hming lem an pêk hian a farnu thlavang hauh turin New Delhi a rawn pan mêk a ni si a!

Chhunzawm leh tur.

(Huisss! In chhiar châk ang hûin ka ziak ngaihnawm si lo vang tih ka hlau khawp mai. Ṭawngkam hman dik loh deuh leh, hemi thawnthu ti ngaihnawmtu atâna thil changkâng deuh a hming ka hriat si loh te, an incheina chungchângte pawh a ni ang chu; ṭha zâwk leh dik zâwk in hriat chuan min hrilh hreh lo ula aw. A ngaihnawm dâwn em? Hmêlṭha-ho🙊😁🙆🙈🙈)


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:35 am

🌹🌺1500 MILES.🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 2.

Zân dâr 6:30 vêlah Indian Airlines 305 chu New Delhi Airport-ah a ṭum ta. Passenger-te pawh an chhuk sang sang a, piah deuha anmahni lo hmuaktute paw'n nui var varin bân an lo vai lauh lauh bawk. Chutih laiin, Brandon-a erawh thinrimna nasa tak pai chungin a luggage chu a rawn hnûk chhuak ve mêk a, mi ṭhenkhat hlim sahawk kârah chuan ngawi rengin bungraw check-na lam a pan ding nghâl. An bungruate an check fel hnu chuan piah deuha taxi lo ding ṭhap lam chu pan a rual leh, New Delhi lam pan tura Taxi driver pakhat chu be nghâlin, an inpeih hnu chuan Airport chu an tlân chhuahsan ta a ni. Kum 5 chhung Commando-a ṭang tawh a ni bawka Hindi pawh a thiam tawh viau, a khât mawi tâwkin taxi driver nên pawh chuan an inbe deuh reng a, chu taxi driver lah chu pa tâwi dul kiar leh chal ngalh deuh, fiamthu duh tak a ni bawk nên a bula awm a nuam dâwn hle hian a hria a; a ei zawnnaa lungawi tâwk tak a ni ang tih pawh Brandon-a hian a ring thiam mai.

New Delhi an pan lai chuan Elaine-i kha a call leh phawt a, City Hospital-a Belbel-i nên an awm thu a lo hrilh chuan New Delhi a rawn thlen tawh thute a hrilh ve leh hnu-ah phone chu a off a, City Hospital pan tlang turin driver chu a hrilh zui. Chutia City Hospital an pan lai chuan a mi phurh pa chu ṭawng tlêm a ti deuh nge, taxi driver chuan melh zuk zukin, "Tlangvâl, Brandon-a maw i hming kha? Ka hriat ve chite a nih chuan eng ti tura rawn kal nge maw i nih le? City Hospital min pantîr daih sia, i hlim loh hmêl riauva ka hriat chu ni!" inthlahrung tak hian a lo ti a, Brandon-a erawhin a chhâng nghâl mai lo. A chhâng tawh dâwn lo emaw a tih hnu-ah, "Aw ni e, ka farnu dam lo ka kan lawk dâwn. I bula awm a nuam hle mai." Brandon-a'n a tih chuan taxi driver chu a nui var vâr a, New Delhi nawmzia leh mawiziate chu a sawi zui leh par par, Brandon-a chuan a ning lek lek ṭhîn. Lîrthei vei vâk leh mihring tam êm êm mai insûlpêl zut zut te, building lian leh sang tak tak êng tuarhte chu an mawi kher mai. Anni pawh tluang taka tlân zêlin City Hospital chu an thleng ve leh ta. A bungraw phurhte lâksak pahin driver chu a la tîtî nui hak hak a, Brandon-a'n fare a pêk hnu-a a kal leh dâwn chuan, "I farnu chu Pathianin a ti dam leh êm êm ang. Mangṭha le!" tiin a tlân zui leh ta a ni.

Damdawi in duty hnênah pâwngsual tâwk Anabel-i u a nih thu a hrilh hnu chuan, hmanhmawh takin Anabel-i awmna ward lam pan chuan an inzui chho a, Police-te paw'n Sanjay Yadav chu an zawn mêk thu te, Anabel-i kâ aṭang ngeia thu chiang zâwk hriat tuma an ngaihven reng thute duty pa chuan a hrilh zui mawlh mawlh. 3rd floor an thlen chuan vei lamah kal lehin Belbel-i awmna ward hran bîk chu an thleng ta. Kawngka bulah chuan New Delhi Police Inspector Rajesh Kumar leh police dang palite pawh an lo ṭhu ṭhap a, Brandon-a an hmuh rual chuan rawn ding sap sapin Inspector Rajesh chuan, "Black cat commando Brandon kha i ni em? I farnu em ni?" tiin a lo zâwt vat. A hriat sual loh thu Brandon-a'n a hrilh hnu chuan an inzui lût nghâl a, ward chhung an luh hnu chuan tukverh lam hawia a farnu Belbel-i lo ṭhu ngawi reng chu hmu nghâlin, a lainatna leh thinrimnate chu a inzât vêl viau âwm e! Elaine-i chuan, "E...i lo thleng tawh maw Brandon." tiin mittui a hru zauh.

A ṭhiannu Elaine-i'n a u hming a lam rîk rual chuan Belbel-i pawh a rawn hawi ve nghâl a, a u hmêl a hmuh rual rual chuan lungchhe vânkaia ṭap hawm hawmin, "Ka uuu...." a'n ti vawng vawng mai chu Brandon-a chuan kuah thlawpin a farnu hmai chu a âwmah a phûm a, mittui luang ngiai ngiaia a nau sam chu chûl heuh heuh pah hian, "Ka nau duh tak min ngaidam mawlh teh, i u hi ka rawn tlâi deuh a ni." tiin Brandon-a pawh a inti pachang thei bîk lo. Chutah Belbel-i chuan ṭap hawm hawm pah hian, "Engah nge min rawn chhan loh? Ka u min pui rawh tiin ka au lawm lawm che asin. Kha pa kha a thih ka duh, a thih ka duh," tiin a ṭap hawm hawm mai. A farnu lungchhe pangchang aw meuh chuan Brandon-a meuh pawh a vêl nawn leh a ni ber. Khatih laia a hming a lam nasat turzia te, mangang leh thlabar taka ṭanpuitu a au lawm lawm tur te, a farnuin a mamawh lai taka a awm thei lote chu a ngaihtuah leh meuh chuan a thinlung chu a sat hian a sa a; mittui luang zawih zawihin Brandon-a chuan ha chang a ṭhial bap bap ringawt mai a ni.

Hetih lai hian doctor leh nurse pathumte pawh an lo awm ve tawh a, a lungchhe zual a zia hnu chuan, "Mâmi, hei inspector-te hi thil thlen dân kimchang takin hrilh ta che. Eng mah hlauh tur a awm tawh lo a nia, an nghâk rei tawh êm mai che." Brandon-a'n a tih chuan Belbel-i erawh a la ngawi reng a, a en ngai enin a mittui chu a luang leh zâwih ṭhîn. Inspector Rajesh chuan Havildar chu ziak thei mai turin a signal nghâl a, Anabel-i chu an ngai châng zui. Minute 3 dâwn a ngawih vang vang hnuah Sanjay Yadav-a'n a pâwngsual dân kimchang tak chu inseh ruh ṭeuh leh ṭah insûm tak chungin a sawi fai ta vek a, chu'ng thu an hriat hnu chuan police-te chu an chhuak ta a ni. Police-te chhuah hnu chuan a farnu lâk chhuah chu doctor hnênah Brandon-a chuan a dîl nghâl a, test result engkim peih fel a ni tawh bawk nên, doctor rem tihna ngeiin Belbel-i chu Elaine-i nên chuan an hruai chhuak ta a ni. City Hospital an chhuahsan hnu chuan auto pakhat rawn tlân mêk chu pharin an chuang nghâl a, New Delhi hotel changkâng takte zînga mi Pride Plaza Hotel lam panin an tlân leh ta a.

Zân dâr 9 vêlah hotel chu thlengin, room an book fel hnu-ah elevator-in room number 120 chu an pan ta a, Belbel-i thil tawnin a zir lo bawk nên an inbe tam lo hle. Room number 120 an thlen chuan room service mipa chuan duhsakna hlânin a lêt leh nghâl a, anni pathum pawh chu an ṭhu hahdam veng veng zui. Minute 3 vêl an ngawih vang vang hnu chuan, "Bestie, va inbual fai la i mu hahdam dâwn nia," Elaine-i'n a tih chuan Belbel-i pawh chu thu âwih takin a insiam ve mai a, bathroom-a a luh hnu chuan, "Elaine, ka nau tâna i inpêkna zawng zawngah hian ka lâwm tak zet. Naktûkah hian hâw nghâl mai sela, kei chu hna ka zawh hunah ka hâw ve mai ang." Brandon-a chuan tiin lâwm thu a hrilh zui mawlh mawlh, Elaine-i chuan, "Brandon, lâwm thu sawi kha a ngai rêng rêng lo. Ka ṭhiani hi ka lainat êm mai, kha vaipa kha ka haw ngawih ngawih. Naktûkah chuan ka zui hâw ang ka tia, kan President paw'n min rem tihsak ta a nih kha. Eng pawh ni se, ka thawmhnaw vêl ka va la lawk anga ka rawn kîr leh dâwn nia," tih leh din a rual a, a apartment lam pan turin Elaine-i chu a chhuak zui.

Elaine-i hi India rama IT company lian pakhat Wipro company New Delhi-ah thawkin, tûnah hian Site manager ni lai a ni a; nula hleitling tak niin Belbel-i nên pawh hian an inchen viau. Khabe zum lam biang chum deuh, mit meng zîm lam hmêl chhe lo tak leh a pian pawh zahpuiawm loh tak a ni a, Belbel-i ai mah hian a pian a nalh zâwk âwm e! Hleh thlâk hlim hlawl ang maia a hmui sen ham mai pan lam deuh leh a khabe phîr taihte hian a hmêlṭhatna an ti chiang a, nula ze zâwi deuh a ni bawk nên mipate ngainat loh theih loh a ni ti ila ka sawi sual êm lo ang chu!

Pride Plaza Hotel room number 120 chhungah chuan, Brandon-a chuan tukverh lam hawiin New Delhi khawpui mawi tak mai chu a lo thlîr veng veng a, a rilru a kawm melh melh lai chuan Belbel-i inbual zo pawh a rawn chhuak ve chiah. A mit menga thinrimna hmuh theih si, hmêl hlim sâng si hian Brandon-a chuan, "Mâmi, hei zanriah hi han ei phawt la i mu hahdam dâwn nia, chaw ei lova awm chu a ṭha lo," tiin chair a lo hûn remsak zui. Belbel-i chuan, "Aaa...u, ka ei châk lo e, naktûkah ka ei mai ang." a tih chuan, "Tlêm tal ei rawh. Ei châk vak loh paw'n tlêm tal ei hrâm tur," a tih tlat avângin Belbel-i paw'n hnial buai tawh lovin zanriah chu a ei ta a, puar khawp erawh a ei thei hauh lo. Chutah Brandon-a chuan, "Mâmi, naktûkah hian i hâw dâwn nia aw, Elaine-i'n zui hâw che a tuma puitling takin i awm dâwn nia." a'n ti a, Belbel-i chuan a lu bu nghatin a ei kham hnu chuan a mu zui nghâl a, zân dâr 10 pawh a hnai tawh hle. Sofa-ah Brandon-a chu ṭhu hahdamin mit a chhîng vang vang a, chutih lai tak chuan a phone a lo ring ral ral mai, a en nâk chuan a hlauhthâwn ang ngei ngeiin a ṭhianpa Freddie-a call a lo ni. A pick hnu chuan...

Hello, Ṭhiana.

Hmêla eng mah min hrilh lovin i kal a maw? Phone i switch off tlat lehnghâl a, nang hian engah mah min ngai lo ti raw?

Ni lo e ṭhianpa, ka hamhaih luatah ka lo hrilh theihnghilh daih che u a ni. Ka tihpalh tak zet.

Tûnah khawiah nge in awm? Hei Airport kan rawn chhuahsan mêk.

Eng a? In rawn kal tak tak alaw?

Khatiang min zawh buai a ngai lo, khawiah nge in awm?

Pride Plaza Hotel, room no. 120-ah.

Aw le, kan rawn thleng vat ang.

Hetia an inbiak lai hian a ṭhian dang pathumte chuan vui awkâ hian an rawn ṭim rawn luai luai a, an ṭhianho zînga lian ber Luahpuia phei chuan, "Hmêlphak, ka bin khawp ang che. Ka lak ata hi khawiah mah i biru thei chuang lo vang, " a lo ti thûm bul bul a nih kha! Hetih lai hian New Delhi police ṭhenkhatte erawh, Sanjay Yadav-a pa Suhash Yadav-a, a fapa chêt thawh chungchâng hrilha zawhna tlêm an zawh hnu-ah duty indah thlapin, New Delhi police rualin Sanjay Yadav chu an zawng pah reng bawk a; a ṭûl huna duty inthlâk zêlin an buai mam mam hle.

Khatia Anabel-i a pâwngsual hnu-a Sanjay Yadav-a tlânchhia khân a pa a call vat a, dâwt leh thu dik inpawlhin Anabel-i nêna zu an in dun thu te, Anabel-i zu rûiin sexy taka taka a lâm khum dân te, chutia hlim taka hun an hman laia Anabel-i zâwkin a rawn fawh hmasak thu leh sex an hman dun tâk thute a hrilh a, a hnu-a Anabel-i harh fîmin chutianga an khawsa dûn chu duh leh si lovin, pâwngsual case a siamsak tur thu a hrilh tâk avânga rawn hâw ngam tawh lo a nih thute chu ṭap der chungin a lo hrilh a, a thu sawite chu a pa Suhash Yadav lah hian a lo âwih vek mai si; a rang thei ang bera India ram chhuahsan vat tur te, Anabel-i'n dâwta a puhna chu a khin lêt tur thu leh a case a tâwp fel hnu-a a hrilh leh tur thu bâkah, ram pâwn a hla thei ang bera kal bo vat turin thu a lo râwn hmiah mai a; he an pafa thu thlun tenawm tak hian engtiang chiahin nge a vuak lêt ang tih an ngaihtuah thleng tawh hauh lo a nih hmêl!

Zân dâr 11 a ri dâwn hnai tihah Luahpuia-te chuan Pride Plaza Hotel chu an rawn thleng a, an kal chhan hotel receptionist-te an hrilh hnu-ah room no 120 panin an kal leh nghâl. An thlen dâwn hnaihah Brandon-a rawn chhuak ve chiah chu an tâwk a, ṭhian ṭha vuina awkâ nên an ri barh barh zui. Room chhung an luh hnu chuan Brandon-a, Freddie-a, Zodina, Rinpuia leh Luahpuia-te chu an han ṭhu châwl a, chanchin eng mah hrilh lova Brandon-a'n a kalsan chu an vui nasa hle. Minute 5 hnu-ah erawh khunkhan deuh zâwka tîtî-in, eng ruahmanna nge a neih tihte an zâwt leh rih. Naktûka Belbel-i leh Elaine-i an hâw tur thu Brandon-a chuan a hrilh hlawm a, chumi hnu-ah chuan ruahmanna pângngai tak nên Sanjay Yadav chu chhui a tum thu a hrilh leh hnu chuan, "Lu ruh keh rawp khawpin ka chûm dâwn," Luahpuia'n a lo ti thûm dût mai. Nui hul hak hlawmin ruahmanna ṭha an hriat ang angte an han sawi leh rih a, tui taka Belbel-i muhîl laite chu an va thlîr leh rih, an thinrim lutuk chu an inseh ruh ve ṭawlh ṭawlh mai a ni.

Brandon-a'n, "In buai ve teh lul nên in rawn kal hman ka ring lo va, ka phût lo hrim hrim bawk che u. Mahse, in hmêl ka hmu erawh ka lâwmin ka thla a muang siai siai a nia," a tih chuan, "Ai kal ka ruai, eng mah buaina tur a awm lo." Freddie-a high school zirtîrtu chuan a lo ti vat a, "Kan restaurant leh hotel-te chu a enkawltu hlawhfa kan ngah alâwm," Zodina'n a lo ti ve leh. Chutah le, Rinpuia leh Luahpuia-te chu inmelh zukin, "Keini paw'n helper dang kan chhawr, ti raw Bro?" Rinpuia'n a tih chuan Luahpuia a lo bu zui nghauh nghauh. Tîtî nui leh var var ṭhînin Pride Plaza Hotel-ah chuan an riak ta a ni. Freddie-a leh Zodina pawh hi an tê chhe hauh lo va, fit 5 leh inchi 8 an tling, Rinpuia hi pa tâwi sa muk thau lam deuh a ni a, Luahpuia erawh thau chum deuh buang kan tih ang hi niin, fit 6 a hawlh hial! Pu Hmingliana (contractor) kha Rinpuia pa hi a ni a, a pa contract-ah Luahpuia hi hna a hmuhsak bawk. Rilru ṭhansan tih an hmuh chhuahna ni âwma mawi hian an rilru pawh a mâwlmang dûn bawk a, mi inang sa inang na nâ nâ chu an inkawp rem hle. Rawtna mâwlmang tak pawh tu emaw zâwk hian sawi chhuak se an inthlâwp nghâl êm êm ṭhîn.

A tûk zirtâwpnî khua a lo vâr a, tûkṭhuan ei kham hnu dâr 10 rîk hma deuhin Elaine-i pawh hotel a rawn thleng ve leh chiah. Body fit Coat sen suit hnuaia kamis ang deuh kawr dum a hâkte leh high heels dum a bunte nên chuan a chhe lo kher mai. Room a rawn luh rualin, "Nizân khân ka buai deuha ka rawn lêt hman ta ngang lo a ni. I awm tho sia ka tia ka inthiam chawp tawp a,"
inthlahrung deuh taka Brandon-a en pah chuan a'n ti a, mi dang lo awm vete pawh chu a en phâwk ang reng hle. Brandon-a chuan inthlahrunna tur a awm loh thu-a chhângin ṭhu hahdam turin a lo hrilh ve nghâl a, Luahpuia-te nên pawh hian an inpawh tlâng tawh viau. Minute 10 vêl tîtî paha an ṭhut hahdam hnu chuan Airport lam pan turin an chhuak ta a ni. An awmna aṭangin a hla lutuk lo bawka darkar chanve vêl an tlân vang vang hnu-ah Airport chu thlengin, chawhma dâr 11 flight ticket an lâk fel hnu chuan thlawhtheihna chhuah hun chu an nghâk tawp tawh. Tîtî paha mipui zi huai huai an thlîr doh doh lai chuan chawhma dâr 11 pawh a lo ri ve leh ta. Passenger-te last call an lo puang dum dum tawh a, Elaine-i leh Anabel-i pawh kal ve nghâlin Brandon-a-te nên chuan an invai lauh lauh bawk.

Tichuan, Anabel-i leh Elaine-i chu Mizoram lam panin an thlâwk hâw ta vang vang a. Brandon-a chuan thlawhtheihna thlâwk lai thlîr vang vang pah chuan, "Ti kha chuan tu mah vênthâwn tur an awm ta lo, vawiin aṭang hian sa chu kan pêl ṭan thei tawh e." a ti sap a, a ṭhiante paw'n an thlâwpzia lantîr nân lu an lo bu nghat nghat hlawm a.

Chhunzawm leh tur.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:35 am

🌹🌺1500 MILES🌺🌹
(Action, romance funny, crime, investigation, revenge.)

✍️ Duata Khualchhâwn.

CHAPTER — 3.

Airport aṭangin Brandon-a-te ṭhianho chu taxi-in an kîr leh a, an chuanna taxi hi Brandon-a'n City Hospital pan nâna a hman tâk kha a ni. Driver Kalam-a pawh chu a ngai tê bawkin a tîtî nui leh var var a, Brandon-a bâk a thu sawi hre thiam awm ve hek lo; a ṭhiante chu an lo bengngawng nuih ve ṭhaw ringawt. Luahpuia leh Rinpuia lahin a hma seat-a ṭhu Brandon-a chu, "Bro, eng nge a sawi?" tih an inzawh chhâwk sek a, driver chu an melh leh zuk zuk ṭhîn. Brandon-a lahin, "Palian deuhte hi an ât hmêl a ti," a lo ti chu an inseh ruh titih nghâl. Freddie-a leh Zodin-a an lo nui dîr tlek tlek a, Luahpuia ngaih dân ni lo deuh chuan, "Hrilh rawh, a taxi steering hmuam tut khawp khân ka chûm mai ang." a lo ti thûm leh dût mai chu an nui dar dar mai a ni.

New Delhi khawpui an lût ṭan mêk tihah Brandon-a chuan, "Police Station kan pan phawt dâwn em ni? Thil ṭangkai deuhte pawh hriat an nei mial maithei asin." a tih chuan ṭha an ti tlânga Police Station lam pan chuan an tlân ta par par a. Vaiho tam lutuk leh motor tam lutukte chu thlîr kual thuak thuak pahin Luahpuia chuan, "E khai le(h)! Hetiang khawp hian vaiho hi an lo tam a ni maw? Mizoram pumpui chu sawi loh Aizâwlah chauh pawh an tam tawh nên, kan tâna hnawksak deuhte chu ren hauh loh tur a nih hi!" a ti thûm leh bul bul mai. Chu veleh Rinpuia'n, "Kan hâw dâwnah pakhat ve ve tal vêl ang aw," a lo ti ve leh chu an va phûr dûn leh tak! Mak ti lo rual a ni lo, Luahpuia hi Mizoram pâwna a vawi khat kalna a ni tlat a ni.

Minute 20 vêl an tlân hnuah New Delhi Police Station chu an thleng a, inbe tam tawh lovin Police Station chu an pan ding nghâl. Inspector Rajesh-a'n a lo hmuh chuan, "Brandon, i ṭhiante maw? Lo ṭhu rawh u." tiin a lo be vat a, an ṭhut fel hnu chuan, "In rawn kal chhan chu ka hre thiam mai. Eng nge hriat in duh ber?" a lo tih zawm leh zat. Brandon-a chuan, "Inspector, Sanjay Yadav chu New Delhi-ah hian a la awm ang em? Engtin nge hma in lâk rêng rêng le?" a'n ti a, "A la awm ang. Report kan dawn rual khân New Delhi chhuahna kawng leh Airport-ah pawh duty kan insiam nghâl vek a, a thlalâk tlângzarhin Police-te zawn lai a nih thu kan theh darh bawk. Chuan, Sanjay Yadav hian khawpui hi a la chhuahsan hman lo tih chu kan rin dân ber a ni a; khawi laiah emaw a bihrûk kan ring ta ber." a tih dap dap hnu chuan, "A lâwmawm e inspector. Chuan, he investigation-ah hian keini hi min telh ve theih chuan kan lâwm viau ang. Kan tel ve theih dân chu a awm ang em?" tiin Brandon-a chuan a zâwt leh a, inspector Rajesh chuan, "Commissioner-te ka lo be dâwn nia, a theih mai ka ring. I tân chuan tel ve chu a har hauh lo vang. Mahse, i ṭhiante hi eng nge an din hmun? Mission an nei ve tawh em?" a tih lai chuan a thu sawi awmzia chu Freddie-a'n a lo zâwt vat a, inspector Rajesh-a'n a rawn melh zuk zuk dânah khân thil awmzia a man thiam tlat a ni. Brandon-a'n inspector Rajesh-a thu sawi a hrilh hnu chuan, "Inspector min lo hre thiam la, kan farnu chunga tenawm taka chêt thawhtu chhuinaah hian keini pawh hi kan tel ve ngei a ngai ang. Nunna thâp pawh ngai dâwn mah se, chutiang huam chuan hei leh chen hi kan rawn kal vang vang a nih hi!" tih Freddie-a chuan English-in a'n hrilh a, inspector Rajesh chuan, "Ka hre thiam e. Theih tâwp ka lo chhuah dâwn nia. Chuan, Sanjay Yadav-a-te inah kan va kal phawt dâwn em ni?" a lo tih chuan ṭha an ti tlâng ta a ni.

Chhûn dâr 12 a pêl hlek tihah Sanjay Yadav-a-te in lam pan chuan an tlân chhuak ta a, buaithlâk leh êm êm chu Luahpuia leh Rinpuia'n Gypsy seat pângngai an chang ve lo hi a ni. Anni pahnih hi zawng, zirna aia tharum hman nuam ti mi kha an ni a; hindi tlêm a zâwng chu Rinpuia hian thiam ve mah se, vaiho han biak a râlah chuan a thiamin a daih ngang si lo va, Luahpuia lah ni se chuti hlauh. High school an kai ve dêk dêka school chawlhsan daih kha an ni a, tûnah pawh hian misual an mante an ṭhuttîrna ṭhîn, Gypsy rear seat(seat inhawi tawn)-ah khân an ṭhu dum ngûk mai a nih hi! Inspector Rajesh-a leh an ṭhiante tîtî chu ngawi rengin an thlîr kual daw daw ringawt mai a ni.

Traffic signal light ngai chânga an din zawk ṭhin avângin, chawhnu dâr 1 rîk dâwn ṭêpah Sanjay Yadav-a-te in chu an thleng a, an in concrete chhâwng hnih lo ding luah mai leh campus phûl hring dup te, an campus hungna thir rinawm tak maite chu an thlîr kual thuak thuak zui. Police 10 duty-te chuan inspector Rajesh chu salute an lo pe sap sap a, Suhash Yadav awm leh awm loh a zâwt nghâl. A awm thu an hrilh hnu chuan in chhung lamah an lût zui a, an in chhung pawh chu a thianghlimin hmuh a nuam kher mai. Sitting room an thlen chuan Suhash Yadav leh a nupui bâkah mi pahnihte lo tîtî mêk chu an va hmu a, anni paw'n an rawn hmu ve nghâl bawk. Chuta Suhash Yadav mit menga lâwm lohna awm chu Brandon-a chuan a hmuh hmaih hauh lo.

Chutah inspector Rajesh chuan, "Mr. Suhash, hei hi Anabel-i unaupa a ni a, anni hi a ṭhiante an ni. Eng emaw han zawh lawk che an duh a nih ka ring," a tih chuan, "Eng nge min zawh duh? Ka fapa thil tih kha eng mah ka hriatpui lo." a lo ti bûl nghâl hmuk mai. Mi pahnih awm vete chu chhuak turin a signal zui a, Brandon-a leh a ṭhiante chu melh kual den den hlawmin, "Ṭhu rawh u, eng nge min zawh duh chu?" a lo ti leh hmuk. Brandon-a chuan, "I fapain a thil tih man kha a hmu dâwn tih hrilh che ka duh a, i tel ve loh hrâm ka beisei," a ti ve ngat. Chutia a in chhung ngeia vaukhânna thu Brandon-a'n a chhâk chhuak ta mai chu Suhash Yadav ngaih dân a ni ta lo. Thinrim insûm deuh taka rawn din chhuah pahin, "Ka in chhungah ngei nang ve mai hian mi rawn vau a maw? Kha thilah khân ka fapa thiam lohna a awm lo aw, i farnu lepchiah tak khân bul a ṭan hmasa a nih kha!"

Chu thu a sawi zo chiah chu a bek a ri lawlh a, ṭhutthlêngah a bawk zui thlawrh. Inspector leh a ṭhiante'n Brandon-a chu an khap bet vat a, kut a la hûm ruh ngat ngat mai. Suhash Yadav-a nupui Rashi Yadav-i phei chu a ṭê ṭhat a, a pasal chu buaipui vatin a ṭap titih nghâl. Bek dawm vawng vawng chunga Suhash Yadav-a rawn ṭhu ṭha leh mêk chu, "I fapa dawheh zet chu ka lak aṭang hian a biru reng thei lo vang tih hre rawh. Chuan, nang pawh hi inrawlhna i nei ve a nih ngat chuan ka rawn hmu leh ang che." tih Brandon-a chuan a hrilh zui leh. A mit menga thinrimna nasa tak chu Suhash Yadav hian rei a en ngam tawh tlat lo, chhuat bihin a ṭhu ngawi reng ringawt a, anni pawh chu rei awm lovin an chhuak zui ve leh ta a ni.

Nî pawh a hniam zêl a, tlâi dâr 3 a nih chuan Pride Plaza Hotel-ah Brandon-a-te ṭhianho chu an kim leh ṭhap tawh. Hetia a ṭhiante rawn kal ve hi ṭhian ṭha tih âwm rêng ni mah se, kawng lehlamah chuan Brandon-a hi an ti khawr ṭût a, a duh ang paw'n a che thei rih meuh lo ti ila a dik tho âwm e! Hotel an pan hma hian a contact number inspector Rajesh kha pein, chanchin thar an hriat apiang rawn hrilh ve zêl turin a chah zui a nih kha. Zân hun a lo inher chhuak a, zanriah an ei kham deuh chiah tihah Brandon-a'n phone call a dawng a, a pick hnu chuan inspector Rajesh a call a lo ni. An inbiak zawh hnu chuan, "Police Station-ah kan kal a ngai," tih leh din a rual a, a ṭhiante pawh chu an insiam zui mawlh mawlh. Hotel aṭanga an chhuah hnuah taxi pharin Police Station lam chu an pan ta a.

Zâna New Delhi khawpui hmun hrang hrang êng tuarh maite chu Luahpuia chuan mawi hi a'n ti leh êm êm khawp a; "A va'n mawi eee..." ti thûm dûtin 'Pa huihphai kawng bo' ang mai hian a hawi leh hû hû ṭhîn. Zân dâr 8 vêlah Police Station chu thlengin an lût zui nghâl a, inspector Rajesh chuan Police meeting room-ah an panga chuan a hruai zui nghâl. Meeting room an luh hnu chuan Police officer rual an lo ṭhu ṭhup mai a, an zahawm rem rem hle mai. Commissioner chuan ṭha taka lo biain ṭhu turin a hrilh a, an ṭhut fel hnu chuan Sanjay Yadav chhuinaa tel ve chu an inhuam tak tak em tih te, silaia inkahna pawh a thlen theih thute leh zawhna hrang hrang a zâwt a, a theih hrâm chuan a nung chung ngeia man a, a thil sual tih chu dân hmanga hrem ngei an duh thute a sawi leh dap dap hnu chuan, eng pawh an chungah thleng se anmahni duh thlanna a nih thu leh New Delhi Police-te'n mawh an phurh loh tur thu Freddie-a chuan sawi vein, lehkhaa hming an sign thlap hnu chuan inspector Rajesh-te nên meeting room chu an chhuahsan leh ta a ni. Brandon-a chuan a nau pâwngsualna hotel chu hmuh a duh thu inspector Rajesh chu a hrilh leh a, chu hotel lam pan tur chuan Police Gypsy chu an pan ding leh nghâl a.

Hetia an buai map map lai hian, Anabel-i leh Elaine-i khân zân dâr 6:30 vêlah Belbel-i-te in an lût ve chiah hi a ni. Ṭhenawmte leh chhungkhat hnaite pawh an lo awm ve nual bawk. Chuta Belbel-i'n an in chhung a rah rual chuan pu Sangkima chuan rawn pan vatin, "Ka fanu, ka va'n lainat tak che êm! Tûnah chuan i in i rawn thleng ta, thlamuang takin awm hahdam tawh rawh aw. Elaine bawihi, a room-ah han hruai chho lawk ang hmiang, nang pawh hahdam rih la a ṭha ang." a tih tâkah chuan Elaine-i paw'n a lo rem ti ve mai bawk. A room an pan lai chuan khatia a pa hnemna ṭawngkam avâng te, mi dang lo awm vete avânga a zah luat vâng pawh a ni ngei ang, Belbel-i chu a insût leh feih feih nghâl a, mi dangte chu melh pawh melh ṭha ngam lovin a kun chal ringawt mai a nih kha. A room an luh hnu chuan, "Belbel bawihtê, chhel takin awm la, i thiam loh a ni lo tih kan hre vek a nia, kha vai tlâktlai-lova kha chu i u-in a dah ṭha mai ang. A dah ṭhat hma loh chu a rawn hâw dâwn lo. Chuan, hei i ṭhiannu hi a hrilhhai lutuk ang e, inti pachang hrâm hrâm rawh. Nakinah pângngai takin kan tîtî leh dâwn nia aw," Pu Sangkima chuan ti dap dapin a chhuahsan leh ta a nih kha.

Zân dâr 9:30 vêlah Anabel-i pâwngsual tawhna, New Delhi-a hotel lâr pâwl tak mai 'ibis hotel' chu Brandon-a-te paw'n an thleng ve leh ta. Hotel lian ṭha hem hawm tak mai a ni a, a khât mawi tâwkin lût leh chhuak an awm deuh reng bawk. Receptionist-te hnênah Hotel manager hmuh an duh thu inspector Rajesh-a'n a hrilh hnu chuan, anni paw'n an call nghâl a, rei lo têah Hotel manager Morris Singh pawh a rawn thleng e. Inspector Rajesh chuan thil awmzia hrilhin an han inchibai laih laih hlawm a, Sanjay Yadav room lam pan turin Elevator-ah an lût zui ta a ni.

Sanjay Yadav-a room an thlen chuan kawngkhâr an tih chhiat leh, room chhung lama an sûlhnute chu a ngai ngaiin an lo la dah ṭhap a, tu mah luh an la phal lo hi a ni. Room chhunga thil awm dânte chu uluk fahran hian an en kual hlawm a, chutih lai chuan Morris Singh chuan pawi a tih thu te, a hotel pawh a hming chhiat thu leh Sanjay Yadav chu a huatzia thute a sawi ve mawlh mawlh mai. Minute 15 chhung vêl an en kual hnu chuan, thil ṭangkai eng mah an hmu lêm lo bawka an chhuak zui leh. Morris Singh chuan Sanjay Yadav-a case chin fel a nih hma loh chu he room number 143 hi siam ṭhat emaw, tih danglam emaw a tum loh thu a hrilh hnu-ah 'ibis hotel' chu an chhuahsan leh ta a ni.

Zân thim thu neihna luahlân turin a tûk khua a lo vâr a, zîng dâr 7 a nih meuh chuan New Delhi khawpui chu mihring leh lîrtheite pawh an tam leh tawh hle. Chûngte chu a room tukverh aṭangin Brandon-a chuan a thlîr reng a, a rilru pawh a kal thui kher mai. Chutih lai chuan a ṭhiante pawh rawn lût sap sapin, coffee an rawn hûm lût far bawk. Zodina chuan, "Good morning Bro, coffee hi in ve phawt la, thil eng emaw han hrilh duh che kan nei a nia," tih leh coffee pêk chu a rual a, an ṭhu zui sap sap. Coffee vawi khat a lem khalh hnu chuan, "A tui hle mai Bro. Eng nge min hrilh duh chu?" hmêl hlim sang hian Brandon-a chuan a tih zawm leh zat.

Chu veleh an ṭhianho zînga upa ber a ni bawk nên, Zodina chuan aw a then kharh kharh hnu chuan, "Aw le, ngun deuhin lo ngaithla teh. He lai hmuna kan awm chhan hi chu sawi ngai lovin kan hre tlâng vek a, hei erawh hi chu i la hriat ngai loh thil a ni maithei. Belbel-i hi i farnu chauh a ni bîk lo va, kan farnu a ni ve tho. A chunga tenawm taka chêt thawhtu hi kan man hma loh chuan tu mah hian kan hâwnsan dâwn lo che. Inkah a ngai a nih leh kan inkâp ang a, insah a ngai a nih leh kan insât mai ang. Mi awm ṭha duh lo, ram leh hnam tâna mi hnawksakte then fai hna kan thawhnaah hian, tual kan lo that ta a nih pawhin anmahni ang kan ni ve ta tihna a ni hek lo. Kan chungah a chhe ber pawh thleng se keimahni duh thlanna a ni a; inthiam lo hauh suh ang che. Kan hlawhtlin ngei pawh ka beisei a, chu vâng chuan kan hlawhtling ngei dâwn tih entîr nân," tia a coffee no chu rawn lek kângin an cheers zui hmak mai. Chutah Brandon-a chuan, "In chungah hian ka lâwm tak zet. Mi tam tak nunna ka lo la tawh a, pawi sawi lote'n an tawrh natzia pawh ka hmu tam ta; he mission hi kan zawh hunah chuan, nun hlui zawng zawng kalsanin nun tharin bul kan ṭan ṭha leh dâwn nia," a ti ve bawk a, tîti dangahte pakaiin tûkṭhuan ei kham hnu-ah Police Station-a kal turin thu an dah zui bawk.

Nî a sang zêl a, tûkṭhuan an ei kham hnu chuan Police Station lam panin an kal leh ta. Duh anga thil tih zung zung theih a ni si lo, Police-te zâi ngai taka an chêt rih a ngai miau si; hetiang huna dawhtheihna neih a pawimawhzia hre chiang bertu chu Brandon-a ngei hi a ni bawk. Dâr 10:30 vêlah Police Station chu an thleng a, inspector Rajesh-a paw'n a lo be ṭha leh hle. Freddie-a, Zodina, Luahpuia leh Rinpuia-te chu Police-te'n silai kah an zirna hmuna training tlêm tal nei turin a hrilh nghâl a, Zodina'n Luahpuia leh Rinpuia-te chu silai kah an zir tur thu a hrilh hnu chuan an va phûr dûn leh sûrh sûrh tak! "Kei chu target lem ai chuan Police tak tak kah chhin ka châk," Luahpuia chuan a ti nui sûng a, Rinpuia lahin, "Kan inang chiah," a lo ti ve leh. Nui var var chungin Police-te silai kah zirna lam chu an pan ta a ni.

Sub inspector leh Police dangte'n a ṭhiante an kalpui lai chu thlîr vang vangin, "Inspector, tu mah saw hloh ka duh hauh lo a nia, an tel ve ngai lova he thil hi chin fel theih ni se ka ti khawp mai." Brandon-a'n a tih chuan inspector Rajesh chuan, "Ka hre thiam e. An training chhung hian keini pahnih hian kan chhui bing deuh dâwn nia," a lo ti a, Brandon-a chuan a ruahmanna chu ṭha a tih thu hrilhin, a nau thawhna Designing Company-a kal a duh thu chu a hrilh tlang leh nghâl a, chumi pan tur chuan Gypsy King lam chu an pan dûn leh ta a ni.

Chhunzawm leh tur.

(Huisss! Ngaihnawm loh in ti âwm sia, an la chhui ṭan dâwn chiaha a la ngaihnawm thei tak tak lo a ni hmêlṭha-ho. Ngaihnawm in tih leh tih loh comment lamah min lo hrilh vek r'u aw🙊🙈😁🙆)


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:36 am

🌹🌺1500 MILES🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 4.

Brandon-a leh inspector Rajesh-te chu Anabel-i thawhna designing company pan chuan an tlân zêl a, mipui leh lîrthei vei vâkte chu hmuhnawm tham an ni. Sanjay Yadav chungchângte sawiin, a bihrûkna âwm nia a ngaihte inspector Rajesh chuan a hrilh pah bawk a, chumi hmun chu a naute nên an en fel tawh thu leh Sanjay Yadav emaw, a thu rualpui âwm ang pawh an hmuh loh thute a hrilh zui mawlh mawlh. "I huaisenin i inpêknaah ka lâwm tak zet inspector. Mahse, tûnah hi chuan mahni invênna tur pawhin hmanrua eng mah kan kawl si lo va, mamawh huna hman mai theih turin silai leh chemtê tal emaw chu kan kawl ve min rem tihsak thei ang em? A ṭûl huna che mai thei turin," Brandon-a'n a tih chuan, "Thei mai ang. Training han zo phawt se in mamawh chu in kawl vek dâwn nia." inspector Rajesh chuan a lo ti ve bawk.

Rin aiin a lo hla nek mai a, lîrthei dangte leh Traffic signal light ngai châng paha tlân an ni bawk nên, chawhma dâr 11:30 pelh hlekah Anabel-i thawhna designing company chu an thleng ve chiah. An hma lawka building lian ṭha ve tâwk tak chu thlîr vang vangin, ground floor tih loh chhâwng 4 lek nei ni mah se building chu a lianin a zau ṭha hle tih Brandon-a paw'n a hre chiang viau a ni. Building hma lam a chhâwng chung bera 'BLACKBERRYS' tih lo intar vâ mai leh, kawngkapui chung chiaha 'KEEP RISING' tih lo inziak kuau maite chu an thlîr leh hnu chuan lût turin an pan ding ta a.

Building chhung an luh hnu chuan nula hmêl chhe lo tak hian nui sângin a lo be sawk sawk a, an rawn kal chhante chu a zâwt zung zung bawk. Inspector Rajesh chuan President hmuh an duh thu a lo hrilh ve nghâl a, nula chuan, "Aw le, min lo zui rawh u." a tih rualin an piah lawka waiting shed lam pan chu a rual a, anni pahnih paw'n an zui vat. Nulain an President phone-a a biak lai chuan building chhung chu ropui a ti deuh nge Brandon-a chu a lo hawi kual leh zak zak ṭhîn a, chu building design-tu chu architect thiam tak a ni ngei ang tih a ring thiam bawk. Rei lo têah nula chu rawn pheiin President office-a kal tur leh, amah chuan a hruai tur thu a lo hrilh chuan elevator lam an pan zui leh nghâl a, an luh hnu chuan President office lam pan chuan an tawlh chho zâl zâl mai. Elevator aṭanga an chhuah hnu, President office awmna an pan lai chuan hna thawkte paw'n an lo en duh ang reng viau, President office an thleng ṭêp tihah nula chuan a kîrsan leh ta a ni. Inspector Rajesh-a'n President office kawngkhâr mawi danglam zet bula doorbell a hmeh rîk ral ral hnu chuan, lût turin mipa aw hian a lo hrilh a, an lût zui ve mai bawk.

An hmêl a lo hmuh rual rualin President Rajnath Kumar chuan a lo lâwm thiam kher mai. A tarmit la thlaa nui sang hian, "Inspector Rajesh, lo ṭhu rawh u. I dam ṭha maw? Chuan, he tlangvâl hi tu nge ni?" tih a lo zâwt zung zung a, rin ai taka a lo be ṭha chu Brandon-a rin loh lam daih a ni. Inspector Rajesh chuan, "Ka dam ṭha e. Nang i dam ṭha maw? Ani hi i designer Anabel-i unaupa Brandon a nih hi!" a tih chuan, "Aw a ni dâwn tak! Anabel-i khân a thlalâk min hmuhtîr tak kha. Chuan, ka dam ṭha e. Anabel-i chu ka lainat tak zet, Sanjay Yadav kha khatiang khân a lakah a khawsa dâwn tih hre lâwk ila chuan, Anabel-i chhuah kha ka phalsak hauh lo vang. Eng pawh ni se, i dam ṭha maw Bawiha? Anabel-i pawh a ṭhat chhoh zêl ka beisei a nia," a tih chuan a mit meng leh hmêl chîk taka lo entu Brandon-a paw'n a ti mai mai lo tih a hmu thiam nghâl bawk.

Chutah Brandon-a chuan, "Ka dam ṭha e. Sir, pawi i tih loh chuan zawhna han zawh che ka va duh êm; Sanjay Yadav chungchâng hi!" a tih zawm leh nghâl a, zâwt tura a lo tih hnu chuan, "Ka hriat sual loh chuan Sanjay Yadav nên hian in inpawh viau niin ka lo hria a; keini ai chuan hriat pawh i hre chiang zâwk ngei ang. A ṭhian hnai deuhte emaw, a ngainat zâwngte leh a tei chhuah tam deuh berna hmun te, amah zawn hmuh a awlsam zâwkna tur min hrilh theihte i neih beiseiin kan rawn pan tawp che a ni." a ti dap dap a.

Rajnath Kumar chu a ngawih deuh vang vang hnu-ah, "Chutiangin ka hre chiang lutuk bîk lo. A pa Suhash Yadav saw Iron and Steel industry neitu a ni tih chu inspector Rajesh hian a hrilh tawh chein ka ring a, an hausain lâr pawh an lâr khawp mai, chu chu Sanjay Yadav hian a enkawl deuh ber ka ring. Chu bâkah chuan an in aia hotel vêla riah nuam ti mi niin, night club leh bar vêla nuam tâwl ngaina mi a ni. Anabel-i nên an inhriat hnu pawh khân vawi tam lên chhuahpuiah min rawn dîl ṭhîn a, chutih lai chuan ka phalsak ngai lo thung.

Mahse, a lo kal chânga a mizia ka chîk chet chet khân a inthlâk tawh a nih ringin, a birthday lawmnaa Anabel-i lên chhuahpui tur leh, a birthday cake vêl a leipui hnua a rawn hruai kîr leh nghâl tur thu min hrilh a, minute 30 ral hmaa rawn hruai kîr leh turin ka hrilh nghe nghe! Tichuan, kha thu thin ṭhâwng zet kha kan hre ta a ni. Ka rin dân chuan tûnah hian New Delhi hi a chhuahsan loh chuan, mi awm ṭha duh lo deuhte emaw, gangster-ho emaw a thu rualpui ka ring ta ber. A himna tur a duh ber dâwn avângin pawisa hmanga a hmin fel dêr tawh ka ring. A bâk chu hriat leh rin dân pawh ka nei lo a ni e. Anabel-i awm ta lo erawh kan company tân hian chânna nasa tak a ni. A inpeih hun hunah a rawn zawm leh thei reng a nia," a tih dap dap hnu chuan, "New Delhi hi chu a chhuahsan hman lo vang. Kum liam taa gangster-ho awm ṭhinna kha en nawn leh hrim hrim a ngai a nih chu! Kan en tawh chinah chuan eng mah beisei ti sangtu thil kan hmu hauh lo." inspector Rajesh chuan a lo tih zawm ve nghâl a, Brandon-a paw'n ṭha a tih rualin ngaihtuahna dang a lo nei daih thung. Rajnath Kumar chu lâwm thute an hrilh hnuah an chhuak zui leh ta a ni.

An motor dahna an thleng ṭêp tihah Brandon-a chuan call a dawng a, a en chu number ringawt a ni. A pick hnu chuan...

HELLO! (Gypsy King hlat deuhah a kal zui nghâl.)

Nang khân ka pa kut i lo thlâk vêl a maw! I farnu nêna hun rangkachak kan hmang dûn kha i thinrim viau em ni?

Sanjay Yadav, thi turin lo inbuatsaih ang che.

Wow! Ka va hlau ve, en teh ka khûr der der nia! Khatih laia i farnu nuam ti râwlte kha ka bengah hian a la châm reng asin. Ka tân chuan engkim mai hi sumdâwnna thil a nia, ngai thu tak vak duh suh. (A nuihsawh pah bawk a.)

A ni maw? Kan inhmuh hunah ka tân chuan mi mal thil a ni tih ka hrilh dâwn che nia.

Aw dam dap si, a dawngtu tâna lâwmna tur pakhat mah awm si lo hian Brandon-a chuan a ti thâwp sap a, phone chu off nghâlin Gypsy King chu a pan ve leh ta a ni.

A ṭhu lût chiah inspector Rajesh chuan rawn call-tu chu a lo zâwt nghâl a, Sanjay Yadav a nih thu tlang takin a hrilh ve mai bawk. Anabel-i nên an inhriat tirh khân Sanjay Yadav contact number hi a la ve a, hetiang a lo nih tâkah chuan Brandon-a hian a call tlang thei ta lo a nih kha. Chutah inspector Rajesh-a'n, "Kan zawng hmu êm êm ang lungngai suh. Zanin aṭangin kan rinhlelhna hmunte kan dap chhuak vek dâwn nia," a lo tih chuan, "Ni e, ka lâwm tak zet inspector. Chuan, hei chawhnu dâr 1 pawh a hnai ta bawk a, nangmahin Police Station chu va pan mai ta che. New Delhi boruak thiang tak hi han hîp vêl ka châk riau mai. Ka ṭhiante hnênah khân Commando hmunpui ka pan lawk tih i lo hrilh mai dâwn nia." a'n ti dap dap a, a rilru leh tum dik tak chu a hriat thiampui tih hriat tak hian, "I duh ang chuan le! Fîmkhur la," inspector Rajesh-a'n lo ti vein, Gypsy King aṭanga a chhuah hnu-ah inspector Rajesh chu a tlân chhuak ta nghâl a.

Hetih laiin, Luahpuia-te pawh hand to hand combat zirin an lo ri leh that that tawh a, thlan sa hlup khawpin an lo bei ngawrh ang reng viau. An instructor lah 5th steps blackbelt a ni bawka Luahpuia-te chuan an khan lo hle. Freddie-a nên an inbeih fiam lai chuan, "Aizâwl tlangvâlte sualpui nên a inang lo va, ka che ṭha duh lo mai mai a ni," Luahpuia chuan a lo ti thûm leh dût a, Zodina leh Rinpuia an lo nui suk. Silai kah an zir lai pawh khân Luahpuia leh Rinpuia nuam ti lutukin an target ve ve an kâp chhe hnehsawh hle. Sub inspector-in a khap meuh chuan target pakhat kah nân silai(MP5) Magazine khat an kâp zo dêr a nih kha!

Nî her liamin zân hun a lo inher chhuak ve leh ta. Hotel-a Brandon-a a rawn kîr leh mai si lo chu Luahpuia chuan a call ṭhîn, a switch off tlat si. Rilru helhkam ṭungin zanriah an ei a, Brandon-a chungchâng chu sawiin zanriah pawh an ei tui thei lo. Inspector Rajesh khân commando-te hmunpuia a kal thu a hrilh avâng khân tlêm chuan an ngaih ngam deuh mah se, eng ti tura kal nge a nih ang? An hnawh chhuah tâk a nih avângin a va kal duh chu an ring chiah si lo. Chutiang vêl an sawi sep sep lai chuan Luahpuia phone a lo ring a, an en nâk chuan Brandon-a call a lo ni. Rang fahrana pick nghâlin Luahpuia chuan, "Khawiah nge i awm? Phone hi i switch off ziah maia i châk lo khawp ang. Rawn hâw rawh, zanin dâr 9 aṭangin mission kan nei dâwn." a ti ram deuh hmak. Brandon-a chuan a rawn hâw dâwn chiah tih a hrilh hnu-ah phone chu an dah zui leh a.

Akbar's road New Delhi footpath-ah Brandon-a chuan dingin vâna arsite chu a thlîr doh doh a, tlêma hmun fâl deuh laiahte chuan zawn rûk nei pahin a va tei kual leh ṭhîn. T-shirt dark grey bântlâwn leh Cargo kekawr dum hain, sneaker dum a bun bawk a, a chhîp sam tâwi tê a zuahte nên chuan a inhmeh viau. Chutia a tei kual chuan kawngpui aṭanga one way chhim lam hawi chu zawh a rilrûk a, mite kal zen zen lohna tih hriat takin mi dang vei vâk pawh an khât pharh mai. Kawngpuia lîrthei tlân an tlêm lai takin a pêng ta nalh a, street light an vuah ṭhenkhatte phei chu êng ṭha mang lovin a de leh zuai zuai ṭhîn.

One way chu thui vak lo a zawh hnu chuan ding lamah lo kâwiin, vei lam kawng sîra car dum an dah a kal pêl tur chuan car hnung dârthlalang a en zawk a, a hnunga mi pakhat hmai tuam rawn kalin chem sei deuh phawrha a rawn pan chak sauh a hmuh rual chuan a inher vat. Chu pa chuan a chem sei ken lai chuan a rawn vai zui nghâl. Brandon-a chuan eu zawk pahin chu pa nâkah chuan a tlawh ve nghâl a, duh thâla a tlawh theih bîk loh avângin chu pa chu a pên li vêl a kat deuh nak nak ringawt. Ṭan hmun siam ṭha dûn sauh sauha an inveh zui leh mêk tihah, chemte keng tho mi dang pahnih thim zîng aṭang chuan an rawn chhuak leh tlat mai le! An mit mengah chuan dama chhuah an tum hmêl loh hle. Ṭawngkam ṭhaa chin felpui chi an ni lo tih a hre chiang bawka Brandon-a pawh a inring pên pâwn kher mai. Chutah le, a vei lama mi chêt rawn la chiah chu hnaih phei thutin, a lu ruh sah keh rawp tuma a chem sei deuh a rawn vai thla chiah Brandon-a chuan a kut vei lamin a bânrêkah a lo man chat a, a hrawk bâwka a kut ding lam zungṭanga sawh a'n rual mai chu, chu pa chu kâ âng zuaiin a khuh bawrh bawrh a, a hrawk dawmin a ṭhingṭhi ta hnak mai. Khatih laia Brandon-a che rang lutuk kha mi pahnihte chu an phu zuk tih bâk chêt an la ve hman lo.

Chutia an ṭhianpa nunna nei tawh lo tih hriat taka bawkkhup reng an hmuh chuan, thinrim tih hriat taka Brandon-a chu melh tûr khui chungin an rawn veh hnai ve leh. Brandon-a chuan a mi thah pa chem sei chu hûmin a kut vei lamin a lo hui lauh lauh zui. Chutah zet chuan anni pahnih pawh chu ṭê ṭhat pahin an rawn che chhuak nghâl a, a ding lama mi chem rawn vai chu dang tleu pahin Brandon-a chu ding lamah a vir nghâl zawk a, chu pa pawh chu a hrawk aṭanga thisen chik chhuak zuai zuai hupa khûr ngar ngarin a tlu ve leh nghâl, pakhat zâwk chuan chem a vai thlâwn tlat. Brandon-a lah chuan nui sang hian, "I theih tâwp chhuah rawh aw." a ti zâwi sap. Pakhat la dam chuan rûm hakin a chem chu a rawn vai chhuak pawp pawp a, Brandon-a lahin a lo khak per zat zat mai si; chu pa thinrim lah chuan awmze nei mang lo hian a lo vai hmiah hmiah a, a rei chinah phei chuan a thaw a sa phat tawh.

Chutah Brandon-a chuan, "Han che hmasa leh la," ti sapin a lo nuih sang zui a, chu pa thinrim leh tum fuh thei si lo chuan a lu thlâwk lawp khawpa sah tumin a rawn che chhuak leh a, chu chu a chem vai tâwpna a ni ta a ni. A chem rawn vai chu Brandon-a chuan ding lamah a lo la leu a, a tukkhuma chem phêk zâwnga hlap siah mai leh a malpuia thâi zeuh a'n rual mai zawng, chu pa chu ṭê ṭhatin a tlu tur chu car bangah a intauh ri bur. A chem pawh chu hûm nghet zo tawh hek lo le, a bul lawkah chuan a thlauh ri bal a, a lu hai bawk si leh malpui nâ ti bawk si chu a lu leh malpui dawm tawnin a vial zui ngâwng ngâwng mai. Mi dang a hmuh tâk lohah chuan Brandon-a chuan inspector Rajesh chu a call nghâl a, a awmna hmunte a hrilh hnu-ah chu pa chu phit tho lawpin, kawngpui hnaih deuha building hlui lam tawh kâwm kâr thim laiah a ṭhutpui hmak. Chu pa na ti lah chu rûm dar darin a ṭhen chawk chawk reng mai a ni.

Zân dâr 8.30 vêlah inspector Rajesh leh police râlthuam keng mi 30 bâkah, Luahpuia-te chu an rawn
thleng ve chiah, darkar chanve an rawn thang. Chutia kawng sîra Police 30 rual leh motor siren êng sen ri ral ral nêna an ding khup mai chu kawngpuia lîrthei khalhtute paw'n an rawn en leh vawng vawng ṭhîn. Piah deuha Brandon-a thisen kai luaia lo ding an hmuh rual chuan an pan vat, a ṭhiante phei chu an hmanhmawh zual kher mai. A inhliam leh hliam lohte zâwt zung zungin an bêl chiang vat vat a, Luahpuia phei chu a meng rum ûl tawh mai a ni. Chuta a mi thahte pahnih leh a man tâkte hmêl an hmu chiah chu, "Hêng mite hi alâwm kum hmasa lama kan man tâk lohte chu! Sanjay Yadav mi tirhte an nih ka ring," inspector Rajesh chuan tiin, an ruang chu a hlâwmtîr nghâl a, an mi man pa hliam tuar pawh chu dîm lêm lo takin an phit zui dawt dawt. Luahpuia leh Rinpuia chuan chu pa na ti han ṭê ṭhat ṭhat chu rum zet hian an melh a, "Ka hmaah rawn ding la chuan êk cheh vek khawpin ka sawp ang che maw le!" Luahpuia'n a lo ti thûm leh dût mai. An inpeih fel hnu chuan, "Brandon, i hriat duh ber i hre tawh tih ka hria; zanin hian kan zo fel law law dâwn em ni?" inspector Rajesh-a'n a lo tih chuan, "Ni e, a dam rei mah mah tawh a ni." Brandon-a chuan a lo ti hmak.

Khatia inspector Rajesh-te a lo nghah lai khân a mi hliam pa kâ aṭangin Sanjay Yadav bihrûkna te, a mi tirhte an ni tih Brandon-a hian a hre tawh a, kha minute 30 chhung kha chu a rei mah mah zâwk âwm e; minute 15 lekah a lo dâwp chhuak hman tlat a ni. Rajnath Kumar-a'n gangster-ho leh mi awm ṭha duh lote inphen nân Sanjay Yadav khân a hman a rin thu a hrilh hma daih, New Delhi chhuahna kawng leh Airport thlenga Police duty an insiam thu inspector Rajesh-a'n a hrilh aṭang tawha a rin rûk deuh kha a ni a. Police-te kianga a awm tam lutuk chuan hun an khawh ral tam dâwna hriain, amah tawktarha inhmangin ti khân New Delhi kawtthlêr reh laite fanga tla hrang ta kha a ni. Blackberrys building an chhuahsan ata tawh kha'ng mite khân an lo enthla ve reng bawk a nih kha.

Tichuan, Sanjay Yadav chu a bihrûkna aṭanga phit chhuak tur leh, a sangawizawnpuite chimih barh tumin Police 5-te'n mi ruang leh an mi man pa an phurh liam mêk lai chuan, Police-te râlthuam chu Brandon-a leh a ṭhiante chuan an lo inbel ve sap sap bawk a.

Chhunzawm leh tur.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:36 am

🌹🌺1500 MILES🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 5.

An hman tur râlthuamte an pai fel chiah tihah Brandon-a'n call a dawng leh a, a en nâk chuan number ringawt a ni leh tlat. Piah deuha phei pahin a pick nghâl a.

Hello!

I ṭha maw Brandon? I la dam chu ka lâwm hle mai.

Nang ka thah hma loh che chuan thi hman ka ni tlat lo.

Aw a ni maw? Tûnah chuan i hmuh phâk lohah ka awm daih tawh sia engtin nge ni ang? Hahdam takin awm tawh mai rawh. Nge, min thah theih nân ka rawn hmu zâwk mai dâwn che em ni? (Sanjay Yadav chuan a lo nuihsawh leh hak hak zui.)

Ni lo e, khawi hmunah pawh awm mah la, i awmna chu he khawvêl piah lam pawh ni se ka rawn zawng hmu tho ang che.

I tum ruhna leh huaisenna kha ka zah hle mai, ka ngaisang che aw. Min zawn hmuh ngei theih nân duhsakna ka hlân a che. (A lo nui leh hak hak.)

Mangṭha le Sanjay Yadav.

Phone a off hnu chuan hawi lêt nghâlin inspector Rajesh leh a ṭhiante chu a melh kual den den a, "Eng nge kan la nghah? Kal ila," tih leh motor pan a rual zui.

Akbar's road aṭang chuan New Delhi khawthlang lam pan tur chuan an tlân chhuak ta nghâl a, zân dâr 9 pawh a pêl leh dêr tawh. Khawthlang lam panna hnai zâwk zawhin an tlân par par a, an hmabâk a la ko ang reng bawka biak pawh an inbe tlêm hle. Hetih lai hian New Delhi khawthlang lamah erawh Sanjay Yadav chu, a sum tam tak hmanga mi ngawhngawl-ho a hui khâwmte kiangah inti thu nei fahran leh, Police duty-te an inthlahdah lai chuha New Delhi chhuahsan tuma ruahmanna neiin, a ṭhuihruai mi 10-te chu chin bih fiah turin a tîr a, an rawn kîr leh huna chanchin kimchang tak an rawn hawn a beisei bawk nên, rei lo têa New Delhi chhuahsan turah inngaiin a lo thawveng viau mai.

Hetia a lo thawveng viau pawh hi eng dang vâng a ni lo, a mi tirhte phone-a a biak hnuhnun ber khân, airport panna kawnga Police duty-te'n mi dang rinhlelhawm an man thu an hrilh tlat alâwm le! Hetih lai hian hmun danga enthlatu pangate erawh, an beidawng deuh a ni ngei ang, an hmunpui lamah hian an kîr leh mêk thung. Chutia Police duty-te berin an mi mante an phur phei dâwn chiah tih a hriat chuan, Police duty-te an awm tawh dâwn lo tih chu ngaihtuah zuiin, zalên takin India ram chu a chhuahsan thei dâwn tih a hre chiang hle. A incheina leh a hmêlte chu a ti danglam ang a, a hote'n passport lem an kawl hmang chuan India ram chu a chhuahsan vang vang thei tawh dâwn a ni. Iron and steel industry neitu fapa a lo ni kher bawk nên, a hmêl hi Police-te paw'n an hre chiang êm êm a; airport pantute lo check thlap thlaptu an ni bawk si.

Khatia Anabel-i a pâwngsual hnua car-a a tlân chhiat khân, flight ticket la tur leh hêng mite thamna tur hi pawisa a pai tam tâwk lo tih hriain bank hnai ber lamah a tlân nghâl a, mahse, bank dâwrtu an tam êm avângin ATM a pan zui leh vat. Hetianga a buai nak nak chhung hian darkar 1 dâwn a khawh ral hman a, pawisa a lâk fel hnu chuan Police-te an lo duty hman tlat tawh. Mahse, tûnah hian a ruahmanna a hlawhtling ngei dâwna hriain, Sanjay Yadav lah chuan chanchin chiang taka an rawn thlen leh hun a lo nghâk vang vang a, a hote'n airport chu a pan theih tawh tih an rawn hrilh hunah, ani pawh chhuak mai thei turin a inpeih vek tawh bawk.

Chutia a mi tirhte'n a khât tâwka airport-a Police duty-te an va thlîr leh ṭhîn chu Sub inspector Nikhil Kapoor chuan a lo chîk ru khiau tawh mai a, airport lama kalte an tam lutuk lo bawk nên an car dum chuan a mit a la tlat tawh a ni. Civil dress-a inthuam police dangte chu motor dingte phênah a hrilh ru sar sar nghâl a, ruahmanna thar neiin civil dress-a inthuam Police-te chu Police uniform pângngai hate nên mi rinhlelhawm manin an man zui, Gypsy hnungah nawr lût rawk rawka phur phei nghâlin, Police Car-in a zui ve bawk. Chûng misual 5-te pawh chu an hlawhtling ngei dâwna inhriain an lo nui var var mai. Chutah le, Police Car leh Gypsy chu tlân tlang ta mai lovin an hmaah tak an va ding chat a, an chhuah ruala silaia tin chungin car dum aṭanga rawn chhuak tur chuan Sub inspector Nikhil Kapoor chuan thu a pe fiak ṭhak zui. Chu kher kher chu an rin loh leh beisei loh lutuk thil a nih avângin, anni panga hamhaih lah chu Car aṭanga chhuah nachâng an hre mai lo.

Sub inspector Nikhil Kapoor chuan an rawn chhuah duh loh chuan kah chilhah a vau zui leh hmiah mai si, Police ṭhenkhatin torchlight-in an chhun kuau bawk si a le; hreh zet chungin an rawn chhuak zui sap sap a, an zînga pakhat hlauthâwng deuh chuan a chemte pai phawrh leh Police pakhat vai chu a rual zui. Mahse, a malpuiah Sub inspector chuan lo kâp siahin mi dangte chu a tin leh nghâl a, "Chêt thawh leh duh in awm em?" a ti zâwi sap zui. Police 10 laiin silaia an tin ṭhap avâng chuan chêt la ngam awm tawh hek lo, an ding ngawi reng ringawt mai a ni. Chu lai hmuna mi dang awm vete pawh chu pistol puak ṭhuai avâng khân an phu deuh zawk a, ṭi hrâ chung hian an rawn hawi zui ṭhap. Chêt latu tih loh misual palite pistol leh chemte pai ṭheuh an theh thlâktîr hnu chuan an man zui ta a, hêng mite chanchin rawn hrilh leh hun hi a ni Sanjay Yadav-a'n a lo nghah kha! An fîmkhur tâwk loh man an têl ta a nih hi!

Tûnah chuan zân dâr 10 a ri dâwn hnai ta. New Delhi khawthlang lam panna kawng pawh chu a chhe sâwt ta viau mai a, Police-te leh Brandon-a-te ṭhianho pawh chu motor chhungah an âwn leh bâwih bâwih ṭhîn. Chutiang huna Police Gypsy leh SWAT(Police motor lian) khawthlang lam pana rawn tlân chu mite paw'n an en duh hle. Thui vak lo an tlân leh hnu chuan an ding ta a, Sanjay Yadav bihrûkna building hlui lam tawh chhâwng 1 lek nei chu an thleng a ni mai e. Motor aṭanga an chhuk fel hnu chuan building chu hual tumin an che zui leh sang sang a, mahse, chutia building an hual ṭan dâwn chiah tihah chuan mi pahnih rawn chhuakte chuan an rawn hmu hmasa ta tlat.

Chu veleh, "Police!" tia au vakin an pistol pai an chuh nghâl a, silai a puah zawt zawt hnu chuan chu mite pahnih chu an thi chiang tawh hle. Khatia Police tia au thâwm leh silai puak rî a hriat rual khân, Sanjay Yadav chuan a zu in lai phuh ṭhawtin building aṭanga tlân chhuah tumin a tho zui nghâl a, a chhâwng zâwka awm a ni bawka kawngka lehlam hawngin, step chu mi pangate nên chuan an rap ṭha hman mang lo a ni ber e, kawtthlêr thim lamah an tlânchhe nghâl par par. Chu erawh Sanjay Yadav-a tih sual lian berte zînga mi a ni.

Inspector Rajesh chuan building chu hual tur leh fîmkhur turin a au lauh lauh a, Brandon-a a zawng chu a hmu tawh hauh lo. Chutah le, building chhung chu Police 10 bâkah Luahpuia-te ṭhianho nên chuan an lût nghâl a, misualho lah an chî-ai zui bâkah an lu kai tâwk chiahin zu an lo in hman bawk nên, an hmunpui rawn luh chhuah tumte chu duh aiin an rawn ngam mah mah a ni. Chu building hlui deuh tawh light pawh awm ṭha mang lo chhungah chuan silai puak zawt zawtin a de zuai zuai bawk a, rawn hualtu lamte'n an rawn luh chilh zui ve leh bawk nên misual lam chu an hek hiau hiau hle. Fîmkhur taka invêng pah zêlin Police-te leh Luahpuia-te chuan building chhâwng chung zâwk chu an lût chho leh a, tu mah an lo awm tawh lo. Chuta chin chu uluk zâwkin building leh a chhunga thil awmte chu an en fel ta a, silai AK47 5 leh Pistol 3, pawisa tam ang reng tak leh damdawi bâkah passport lemte an hmu nual mai.

An mi thah tâkte chu an en fel leh zung zung a, Sanjay Yadav a tel ve lo tih inspector Rajesh leh Zodina-te ṭhianho pawh hian an hre chiang viau a ni. Ruang chaicheh an thlâk fuh bawka anni lam chu nun chân chu sawi loh, tu mah inhliam pawh awm lova chûng misualte suahsualna khawvêl an tih tâwpsak thei chu an lâwm khawp mai. Pâwna an chhuah leh hnu chuan, "Inspector, khawiah nge Brandon-a hi?" Freddie-a'n a tih chuan a ṭhiante pawh chu an rawn phâwk ang reng viau. Inspector Rajesh chuan a piah kawtthlêr thim lam chu thlîr paha nui sang hian, "A zo fel law law dâwn. Ka awm ve chuan a nung chunga man tura tih ka ni sia, chu vâng chuan hetah hian ka lo nghâk ang e." a ti hmak. Anni ṭhian li pawh chuan hre thiam takin kawtthlêr thim deuh ruih lam chu an thlîr ve vang vang zui.

Khatia Police-te'n mi pahnih an kah lai khân Brandon-a erawh building hnaih lamah a lo pût ru daih tawh a, Sanjay Yadav leh mi pangate tlân chhuak kha a hmu hman chiah bawk. One way chhe zeta an tlânchhia chu a ûm zui nghâl a, tlân chak par par tak a ni. Commando a chhuahsanna a la rei loh bâkah taksa fitness ngai pawimawh mi a ni bawk nên, Sanjay Yadav leh a hote hian fitness-ah pha hek lo le; rei vak lovah chuan a ûm pha dâwn hnai ta mai. Remchâng apiang phên pahin Sanjay Yadav-a hote chu pistol-in a kâp zui nghâl a, a ṭhelh ngai hauh lo leh nghâl. A kah fuh ṭhinna lah hnuk thlah theihna laiah zêl a ni chat chat mai si; Sanjay Yadav a va han mangang kher êm!

A hote chuan han kâp lêt ve ṭhîn mah se, motor chhia leh in bangte chu inphen nân a hman thiam êm avângin an kâp fuh thei ve si lo; hmun dang aiin chu lai kawtthlêr one way chu a thim deuh ruih bîk bawk sia, khawi laiah nge Brandon-a chu a bihrûk tih hre turin hmu chiang thei hlawm hek lo le; a awmna hmasa lam an chân lahin an sîr lam aṭangin a lo kâp leh daih ṭhîn sia an tâl buai hlawm kher mai. Tûnah chuan Sanjay Yadav hian mi pahnih chiah vêngtu a nei tawh. Motor chhia pakhat phênah an pathum chuan tawm ve leh nghâlin, an hah bawk si chu an thaw hlawi hlawi a, chu lai hmun thim ruihte chu Brandon-a tân duhthusâm a ni thung.

Building hluite chu Sanjay Yadav chuan a melh kual zung zung a, han bihrûk nân chuan duh hle mah se Brandon-a a lo awm reng ang tih a hlauthâwng bawk si; a thil sual tih leh Brandon-a a ṭawng khum dân te, a nuihsawh laite kha a mitthlaah an rawn lang chuai chuai a, a hote pahnih leh Brandon-a an inkah leh hunah tlânchhiat thut leh bihrûk chu a tum ruh hle thung. Chutiang vêl a ngaihtuah lai chuan, tlânchhiat a tumna lam aṭang chuan Pistol a lo puak leh ṭhuai a, a ding lama mi zâwk chu ṭê ṭhatin a bawk zui leh thlawrh.

Silai rawn puahna lam chu a ho pakhat nên chuan an han kâp zui ve nghâl ṭhuai ṭhuai a, tu mah an kâp fuh lo tih chu inhrilh an ngai lo chiang hle. Fîmkhur taka an awmna chu sawnin remchâng apiang chu an phên pah zêl a, Car sen chhia bul an thlen chuan an ṭhu dûn leh nghâl. An ṭhu fel chiah tihah an rin loh lam aṭanga silai a lo puah leh rualin, Sanjay Yadav vêngtu awm chhun chu a sîr tlûk leh nawk mai. Chutah zet chuan Police-te'n an hual bet tawh a nih ringin, Sanjay Yadav chuan Brandon-a chu a hmaa rawn inlan turin a au zui lauh lauh a, mahse, khuavâng kal lai ang maiin kawtthlêr chu a rehin a reh tlawk tlawk.

Chu veleh a tawmna aṭang chuan chhuakin insaseng a la tum fan a, hawi kual zak zakin a pistol pawh chu a hûm thlan dup tawh. A hnung lam hawi lêtin a kal pah zêl bawk a, chutianga a hma lam a en chiah a hmai si deuh thaw-a Brandon-a a lo ding thut mai chu, barakhaih hlim ang maia meng bial kâwkin a tawlh lêt dâwrh mai. Chuta Brandon-a kah a tum chu a che rang tâwk tlat lo. A banrêka tlang thawih khawpin Brandon-a chuan chemtêin a lo vit a, a pistol hûm lai chu a ṭhiahsak zui nghâl. Sanjay Yadav-a na ti leh Brandon-a kut rang lutuk mak a ti bawk si chu, phâwk zeta Brandon-a chu enin a râk ruai ruai ringawt mai a ni. Chutia a banrêk dawma a inher chiah chu a malpuiah chemte hmâwr chuan Brandon-a'n a va pir leh zauh. Ṭê leh ṭhatin a bawp vei lam chu a bâi suih suih zui.

A hnunga Brandon-a chu thlêk zauh zauh pahin, bâi zui auh auh chung chuan insaseng tumin a la hmanhmawh ve viau mai. Vawi thumnaa a hawi lêt leh chuan amah rawn zuitu Brandon-a chu a hmu leh tawh hauh lo. Chutiang a nih tâkah chuan a hawi kual nghâl ruai ruai a, a hawi theih lam zawng zawng a hawi viau pawhin Brandon-a rêng rêng a hmu si lo; kal leh tuma a inher chiah a hmaah tak Brandon-a chu a lo ding leh reng tawh. Chutah zet chuan phu leh zawkin, "Na nang kha, mihring i ni lo, ramhuai i nih kha! Min pui rawh uuu... ramhuai ramhuai..." tiin Sanjay Yadav chu ṭap titih hian a au lauh lauh zui. Tu mah rêngin ṭanpui an tum dêr si lo. Chu lai hmun bakberh taka khawsa vete paw'n an awmna hmun aṭangin an thlîr ngawi reng ringawt mai a ni.

Chutia ṭanpuitu au-va a hawi ruai ruai lai chuan, a kerêkah la lawkin Brandon-a chuan a phit thal ṭhuai a, tlêma hmun êng deuh lama hnuh phei a rual zui. Chutah chuan a hmaiah Brandon-a'n vawi li a'n hnek chawrh chawrh mai chu, Sanjay Yadav chu hnâr leh hmui thi sûng chungin a zal titih dêr! Brandon-a chuan, "Min that tura mi i rawn tîr a nih rau rau chuan, mi lâk tlâk deuhte rawn tirh tur che alâwm," a ti zâwi sap a, a kawnghren phelhsak rawk rawkin a kekawr leh kekawrtê phih hlihsak a rual zui. "Hei hi ka farnu tân," tih leh Sanjay Yadav-a black diamond chu hrâwm nawkin a hlehsak hmak mai. Chu kher kher chu a na thawkhat hle tih hriat tak hian Sanjay Yadav chu rawn ṭhu hlawlin a sarâk nghâl ruai ruai a, a ṭap pûr bawk. A kap chu dawma a vial ngawl ngawl lai chuan, tîm leh ih pawh nei hauh lovin Brandon-a chuan a hrawkah chemtêin a vit leh thawih. Thisen rawn chik chhuak zuai zuaiin Sanjay Yadav chu a thaw ri hrawih hrawih a, khûr dar dara a ke a leng uih uih hnu chuan a chatthla zui ta a ni.

Brandon-a thinrim kal tluangin Sanjay Yadav-a hrawka chemtê a vih luh chu a hriam lam kar a rual leh zet zawng, Sanjay Yadav-a hrawk chu a kau hawk a, thisen rawn chik zuaiin a rawn khawh chhuak zuai zuai a ni ber. Thisen râp leh ṭih mi a ni lo bawka a che râwvâ viau rêng a nih hi! Thâwk a lâk ham ham hnu-ah Sanjay Yadav-a ruang chu inspector Rajesh hmuh atân a pu phei zui hmak. An tlânchhe thui lutuk hman lo bawk a, minute 10 vêlah inspector Rajesh-te awmna chu a thleng zui ve leh mai bawk. Anni paw'n an rawn thlîr ṭhap a, Brandon-a mi ruang put chu tu nge tih an ring thiam vek bawk nên, an hmêl hmuh a hrehawm lêm loh. Gypsy hnaiha inspector Rajesh dinna lam chu ngawi rengin a pan tlang a, a ṭhiante leh Police dangte paw'n an lo en ve reng ringawt.

A ṭhiante leh Police-te chuan street light êng hnuaia Brandon-a, thisen kai luai chunga mi ruang a pu vu vu mai chu an râp deuh tih an mit mengah chuan a hriat reng mai. A ruang put chu inspector Rajesh-a hmaah keuh dawpin, a râlthuamte chu a dah thla sap sap a, inspector Rajesh chu pan hnaih leh a kut khing hnih lek chhuah vah chu a rual zui. Chutah inspector Rajesh chuan, "Tualthattu chu dam chhung lung in tân emaw khai hlum ni turin Dân hmanga hrem theih a ni. Mahse, keini Police-te chuan a chhan kan chhui a, kan zir a, hriat chhuah kan tum ṭhîn. Tual i thah chhan hi ka hria e Brandon, kan zavai hian kan hre vek. Tuin emaw ka farnu hi pâwngsual ve ta se, chu mi chuan min nuihsawha min deusawh bâkah min thah tumin mi dang rawn tîr bawk se, i tih ang tho hian ka tih ve ka ring. Nangmah vâng hian misualte tawmkûk kan hriat phah a, an hnawksak leh tak tak hmain kan chimih theia a lâwmawm tak zet." a tih dap dap hnu chuan, "Salute!" ti fiak ṭhak zuiin a inkhêng khawng ta vah mai.

Chu veleh Police dangte pawh chuan Salute an lo pe sap sap a, Freddie-a leh Zodina bâkah Luahpuia leh Rinpuia-te pawh inmelh zukin, nui sûng chung hian Brandon-a chu Salute an pe ve ta a nih kha. Mi ruangte senghawi turin Police-te chu an che leh vat vat a, anni ṭhianho erawh hlawhtlinna duhawm tak nên Mizorama hâwn chiah an hmabâk ta a ni e.

Chhunzawm leh tur.


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:36 am

🌹🌺1500 MILES🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 6.

Police-te'n misual 30 vêl ruangte hmun khata an dah fel hnu, minute 15 vêlah ruang phur motor lian pathum leh Police motor panga an rawn thleng a, inspector Rajesh-a'n ruang phur tur bîkte hi a chah an ni. Police tam zâwkin an rawn zui bawk nên chu lai hmunah chuan an awm ṭhup mai a, ruangte an hlân fel leh hnu-ah Police Station lam panin an tlân chhuak ta nghâl a.

Chutia an tlân mêk lai chuan, "Inspector, keini hi chu Hotel kawtah khân kan chhuk mai ang chu?" Brandon-a'n a tih chuan inspector Rajesh chuan, "Ni e, tûnah chuan zân rei lam a ni tawh si a, kan hotute'n lâwm thu an hrilh duh che u emaw, hemi chungchângah hian han biak lawk che u an duh a nih chuan naktûk lamah ka rawn hrilh mai dâwn che nia. Chuan, nichin lawk khân Sub inspector Nikhil Kapoor leh a hote'n Suhash Yadav industry-a damdawi an man thu mi rawn hrilh a, a tlêm chhe lo viau a ni âwm e! A hlawhfa te, damdawi siamtu leh an hmanrua chenin an man vek. Sanjay Yadav kan man hnu-a va belh chian ka tum kha a nia, a lâwmawm tak tak a ni." hmêl hlim sanga a tih dap dap hnu-ah, Freddie-a leh Zodina chu English-in a hrilh zui ve leh nghâl a, Zodina'n Luahpuia leh Rinpuia a hrilh ve leh chu, "Chawh lutuk chawh lutuk. Amah pawh saw khai hlum nghâl rawh se," Luahpuia'n lo ti thûm bul bulin, "Dik chiah, kei phei chuan ka mob rule châk a nia," Rinpuia'n a lo ti ve leh. He mite pahnih tak hi chu aw!

Zân tlâi lam tawha New Delhi khawpui mawi takte chu mit ti tleitu leh ti tlaitu an va tling teh lul êm! Mizoram pâwn a kal hmasakna ber a ni bawk nên Luahpuia phei chuan mawi a tiin ropui a ti kher mai. Ngawi renga thlîr kual doh doh pah hian, "A mawi hle mai. Texas kawtthlêra awm ang mai ka ni," a'n ti thûm leh dût mai chu a ṭhiante chuan an lo nuih dar dar a, a thu sawi chu inspector Rajesh an hrilh ve chuan ani pawh a nui ve var var mai. A rei deuh hnu chuan an Pride Plaza Hotel kawt chu an thleng ta a, zanlai dâr 12 pawh a pêl dêr tawh. Hotel an luh hnu chuan duty-te hnênah inspector Rajesh-a'n thil awmzia a hrilh zung zung a, Brandon-a thawmhnaw thisen kai luai mai erawh chu hmuh nuam an ti lêm lo tih a hriat viau. Gypsy seat-a thisen a kai loh nân, a seat chu sarânga tuamin Brandon-a hian a ṭhut hnan ta a nih kha. Tichuan, a tûk lawka hlawhtlinna duhawm nên Mizorama hâwng tawh turin, an room lam pan tur chuan elevator-ah an lût zui leh ta a ni.

Rilru luahtu pakhat chu Sanjay Yadav-a'n Anabel-i a pâwngsual hnu-a a bihrûk khân, New Delhi a chhuahsan vat theihna tur kawng chauh kha ngaihtuah ta se a ti fuh zâwk ngei ang, a chhuahsan thei lo vang tih a sawi lâwk theih âwm lo ve. A thil tih sual lian tak pakhat leh chu Brandon-a that tura mi a tîr leh kher kha a ni. Mi pathum a tirhte khân an thah theih mai a ring a, Brandon-a a hre chiang tâwk lo kha a tân chuan a pawi ta a ni. Khatiang khawpa Brandon-a a tih thinrim tawh avâng khân, mi pathum a tirhte khân an that thei lo a nih pawhin Brandon-a zâwk khân a lo thah vek kha a ring a, mahse, râl ram leh hmun ṭihbaiawm tak te, ramhnuai bâkah ram chhung leh ram pâwna mission hlauhawm tak tak leh buaina nasa tak kârah pawh râlthuam chelek thiam mai ni lo va, rilru fîm tak pu tura training ṭha tin rênga hrual hrep tawh Brandon-a erawhin, a sa pêl lai hniak hloh tum hauh lovin remchângah a lo hmang chat mai si; a awmna hrilh turin khâng mi pathumte kha a tîr zâwk hlauh thei tih Sanjay Yadav khân a ngaihtuah thleng tlat lo. A himna a duh luatah Brandon-a thah tuma a va bei hmasa leh kher kha hremhmunah inchhîrin a indawm kun ve tlawk tlawk mahna le!

"Ka lak ata hi kal bo tawh rawh." ti ni âwm fahranin zân thim chhah mup mai chu, a tûk khaw vâr chuan chhak tlânga tûrni êng fân raih mai tha leh zung hmangin a rawn hnawt kiang a; New Delhi khawpui pawh a rawn chhun de ser ser mai. Lîrthei leh mipui vei vâkte'n kawtthlêr tin mawiin hmuhnawm tham an ni a, mahni seh seh mual hranah ti ni âwm takin an tum ram an pan sang sang bawk. Chutih laiin, Pride Plaza Hotel lian leh changkâng taka room number 120 chhunga Brandon-a muhîl lai chu, a lukham bula smartphone a dah rawn ri ral ral chuan ti harhin a pick zui nghâl a, tûkṭhuan ei khama Police Station-a rawn kal turin inspector Rajesh khân a lo hrilh a ni.

An inbiak zawh hnu chuan Brandon-a pawh chu a tho zui nghâl a, hmai phiha ha a nawh fai leh hnu chuan a room tukverh hawngin, New Delhi boruak thiang vawt deuh raih mai chu a hîp zui vang vang mai. A dâr hlai ṭha tak thlâwp zata a bânbul tê chhe lo tak leh, a âwm bâwr pâwng deuh hnuai chiaha a Sixpack val kalh mai te, a kâwng fêk ti chiangtu a khêl leh malpui lian tâwk tak invuah fuh tak maite chuan, tlangvâl pian thiam tak a ni tih ngawi reng siin an puang chhuak a ni ber e! A Jogger pant dum hâk tâwn mar tâwk chiaha a mawngtam leh a bawp invuah fuh lutukte hi hmuh hrehawm a ni hauh lo. Minute 3 vêl tukverh zâwna a din veng veng hnu chuan a ṭhiante chu an la tho lo a nih a ring a, a tâwnzau dum chu ha nghâlin a room aṭang chuan a chhuak zui nghâl.

Nî a sang zêl a, tûkṭhuan an ei kham hnu-ah Police Station-a kal tur chuan an insiam zui leh mawlh mawlh. Brandon-a khân va kai tho hlawm lo se chuan Luahpuia leh Rinpuia phei hi chu an mu nilêng ṭhak thei ang. Brandon-a room-a an inhmuh khâwm lai pawh khân nizân lama misual an beih dân te, anni paw'n mi 3 ve ve chu an kah hlum ve thute leh, Police-te'n an vên deuh tlat avânga kâp hlum tam lo an nih thute sawiin an inti thei hle. Chu mai chu duh tâwk lovin, an silai hman UMP leh pistol an paite kha inspector Rajesh dîl an tum thu an la sawi zui, Brandon-a, Freddie leh Zodina-te paw'n an nuih var var ringawt a nih kha. An inpeih hnu chuan Hotel chu chhuahsanin, Police Station pan tur chuan rei vak lovah Constable-in Gypsy-in a rawn hruai zui a.

Police Station pana an tlân laite chuan, "Vaiho tamzia hi!" Luahpuia chuan a lo ti thûm leh dût ṭhîn a, a ṭhiante chu an nui leh hak hak ṭhîn. Constable lo bengngawng nuih ve ṭhaw ṭhînte chu an nuih ti za zualtu a ni tawh si; chutah Luahpuia phawk chhuakin, "Kha pawh kha vai, vai ngawt kan chuanpui a!" a lo ti zui leh, an nuih chhan Constable-in a zawh lahin an ṭhianpa lianpui mai hian a ngaihsân thu an hrilh hlauh a, Constable chu a lâwm ve êm êm mai a ni. Hetianga nui leh hak hak chung hian Police Station chu dâr 10 pelh hlekah an thleng a, campus an luh laite chuan Luahpuia leh Rinpuia-te chu an inla Hero nghâl hle.

Rawn hmu hmasatu New Delhi Police-te paw'n kut thing meuhin chibai an lo bûk zêl a, an lo lâwm thiam khawp mai. Inspector Rajesh Kumar leh Sub inspector Nikhil Kapoor-te paw'n nui sanga lo lâwmin chibai an lo bûk bawk a, meeting room-ah an kalpui nghâl bawk. Police Officer rualte paw'n hmêl hlim sângin an thawh hona chungchângah te, Suhash Yadav damdawi hmanga a lo sumdâwnna an man chhuah phah avângte khân lâwm thu an lo hrilh mawlh mawlh a, Sanjay Yadav pawh a chungchâng ngaihtuah buai ngai lova an dah ṭha mai kha a pawi loh thu an hrilh zui. Inspector Rajesh Kumar hian Brandon-a hi engkim a hriatpui miau alâwm le!

Chutia an inbiak zawh hnu chuan Suhash Yadav hmuh a duh thu Brandon-a chuan a sawi tlang tawp a, an lo rem tih tâkah chuan inspector Rajesh Kumar chuan a hruai zui leh ta a ni. Suhash Yadav awmna an thlen chuan a tânna Jail bang nghêngin a lo ṭhu ngui nghiai a, ani pawh chuan a rawn hmu zui ve mai bawk. Chutah thinrim zeta Brandon-a chu melh tûr khui chungin a rawn ding chhuak a, "Nang khân kei hi min ti chhe vek tawhah lo inngai rêng rêng suh. Mi leh sa tam tak ka nei, hetah hian rei ka awm hauh lo vang. Ka fapa nunna i lâksak a, a thisen kha a thlâwnin a luang ral hauh lo vang tih ka tiam a che. Heta ṭang hian kal bo nghâl rawh." a lo ti ram hmak. Brandon-a chuan nui sang hian, "I awm rei leh rei loh tur chungchâng chu nang leh keia sawi theih a ni lo. Eng nge ka hrilh che kha? Ka rawn hmu leh ang che ka tih kha i la hria em? Chuan, hei ka rawn hmu leh che a nih hi! Heta i awm hi ka lak aṭangin i him phah a nia, tûnah chuan mission kan zo tawh bawka kan hâw tawh ang e. Dam rei i duh chuan he lai hmun hi i tân a him ber." tih leh inseh ruh ṭalha Jail kawngkhâr tlawh thut a'n rual mai zawng, Suhash Yadav chu phu zawkin a meng bial kâwk mai. Tichuan, airport lam pan turin an kal zui leh ta a ni.

New Delhi Airport thleng thlah turin inspector Rajesh leh police 10-te'n an zui ve bawk a, an tlân laia vai nula chhe lo deuh an hmuh apiangin Luahpuia leh Rinpuia chuan an chhaih zui lauh lauh bawk. India Gate an thlen dâwnah meuh chuan Luahpuia phei chu a hawi âng phuau tawh mai a ni.

Chawhma dâr 11 a pêl hlek tihah Airport chu an thleng ta a, dâr 12-a chhuak tur flight Ticket an la zui nghâl. Chumi hnu eng eng emaw sawia an tîtî leh laiin an chuanna tur flight passenger-te hriattîrna an rawn puang ta dum dum a, duhsakna inhlân tawna an kal ṭan chiah tihah Luahpuia chu inspector Rajesh bulah a va lêt leh a, eng khaw sawi set set lovin Rinpuia'n a zui ve nghâl zat. Mi dangte'n an thlîr ṭhap lai chuan, "Inspector, me janta hu!" inspector Rajesh-a va chibai pahin Luahpuia chuan a ti thûm dût a, a inhup nui pût pût zui, Rinpuia paw'n nui sûng chungin, "Inspector, Mumbai se Aiye Mera dos!" a va ti ve leh. Anni pahnih hi chu New Delhi Police-te pawh hian an hre thiam tawh viau, inspector Rajesh leh police dang te, Brandon-a, Freddie-a leh Zodina-te pawh an lo nui var var a; Zodina nuihza bawk si chuan, "A va ṭûl lo tak!" a lo ti hluk a nih kha. New Delhi Police-te'n an lâwmzia entîr nâna pawisa tlêm chhe lo tak an pêk ṭheuhte nên, Mizoram pan tur chuan thlawhtheihna chu pan ding nghâlin, hlim takin an invai liam ta a.

Hetih lai hian Belbel-i erawh, a room-ah inkhung hmakin a tawm chawt a ni ber a; a room corridor-a a ṭhut chângte hian a en ngai en tlawk tlawkin a mittui a hru leh zauh ṭhîn. A mipa hmangaih, a pasal duh tak tâna thianghlimna hlan tur a nei ve ta lo chuan a rilru a ti na zual hle. Chuta ṭang chuan vai rêng rêng huatnain a khat ṭan a, a hriat rengna aṭanga nawh reh a duh êm êm leh a ten hluah hluah Sanjay Yadav hmêl erawh a hmu chiang ṭhîn si; tih ngaihna dang awm ta lo chu a inseh ruh ve ṭalh ṭalh ringawt mai a ni. An awmpui nula pahnihte'n a room-ah hian chaw an pe mai ṭhîn a, a pa leh a ṭhiannu Elaine-i chiahin an awmpui thei. Mi dangte chu a be peih lo mai ni lovin a bula rei an awm pawh a duh lo hrim hrim. Thil tam tak ngaihtuahin a rilru a kâwm melh melh ṭhîn a ni ber a, Mizo tlangvâlte engah vak a lo ngai lo ṭhîn te, a thiamna leh theihna a lo chapopui ve ṭhinte chu ngaihtuah kaiin, pasal atâna a duh hauh loh ṭhian ṭha tak nia a lo hriat si, amah care thiam tak ni ṭhîn Sanjay Yadav laka a thianghlimna a hloh tâk dânte khân an vêl nawn a ni ber mai. Hetianga hun leh nî a hmang ral zêl a nih chuan, Anabel Hmingthansangi hi hmuh tur a awm lo thuai ang tih pawh hi ngaihtuah tham tak a ni âwm e!

Thlang lenkâwlah tûrnî her liamin, zân hun nuam tak a lo ni ve leh ta. Inrinni zân a ni bawka Biak In tina dâr rîte chu an inchhâwn ri bal bal a, inkhâwm turte pawh an lâwina Kohhran Biak In lam panin an kal sang sang mai. September thla tâwp lam a ni a, favâng thla êng no nghelh mai leh arsi pawntote paw'n vân zâwl an mâwi leh ṭhap tawh. Chûngte chuan Anabel-i chhung ril natna erawh an ti dam zo si lo va, lunglêng ngawih ngawih paw'n an siam thei tawh hek lo. Pu Sangkima chuan inkhâwm lova a fanu awmpui chu ṭha zâwkin a hria a, Brandon-a-te hmuah pah a ni mai ti rilruin Belbel-i room lam pan chuan a chho zui ta a ni. A thlen rual chuan kawngkhâr chu kik karh karhin, "Belbel, keimah." a tih hnu rei vak lovah Anabel-i paw'n kawngkhâr chu a rawn hawng ve mai bawk. An inzui luh hnu chuan, "Belbel, i u-te pawh an rawn hâw mêk a nih chu! Hetia indawm kun reng ringawt hi a ṭha ngai lo a nia, kan awmpui nulate paw'n an khawngaih lutuk che a; an be ngam lo mai che a ni. An fel teh lul nên hetiang i nih tâkah chuan kan in hi hrehawm an ti teh mai a nia, ka hre thiam reng. I room-a an rawn kal châng hi chuan nang paw'n ṭha takin lo be ṭhîn tawh la a ṭha ang." ti dap dapin a fuih pah bawk a, minute 15 hnu-ah a chhuahsan leh rih a.

Zân dâr 8 a rîk chuan vêng hrang hranga inkhâwmte pawh bâng ṭan tawhin, mahni in lam an pan leh sang sang mai. Nula leh tlangvâl ṭhenkhat Biak In kawta han ding khawmuangte pawh an awm nual a, eng eng emaw sawiin an nui leh var var ṭhîn. Chutih laiin, tlangvâl pakhat chuan a hmaa nula pahnih kalte chu pan chak sauh pah hian, "Maêng, in va hmanhmawh ve," a'n ti nui sang a, nula pahnihte pawh chu an rawn hawi rual ang reng.

Chutah Maêngi chuan, "E he! U Ricky-a chu eng tikah nge i rawn hâw a? I dam ṭha maw?" nui sanga tih leh din an rual zui. "Vawiin chawhnu lam khân ka rawn thleng ve chiah, ka dam ṭha e. In dam tha zâwk maw? Hei hi i ṭhiannu em ni?" Ricky-a chuan tiin Maêngi bula nula hleitling ve tâwk tak, hmai bial lam hmêl chhe lo tak mai chu a en deuh vang vang mai. Maêngi chuan, "Aw ni e, Remi a nih hi! Chuan, keini pawh kan dam ṭha e. Khawi, inchibai ila, kan inhmu khât sia," a tih zawm leh zat. An inchibai lai chuan, "Remi chu i va chhe lo ve, min hre thiam la, tûn hmain ka hmu ngai hauh lo che." Ricky-a'n a tih chuan Remi chuan nui sakin, "I ti zahthlâk e a! Kei chu thingtlâng aṭanga college kala rawn awm ka nia," tiin an khaw hmingte chu a hrilh nghâl a, an kal zawm leh. Chutianga tîtî pah chuan kawngpui an thleng nghâl a ni mai e. Motor kawng sîra mi in light êngte leh street light êng hnuaiah chuan Ricky-a chuan Remi chu hmêlṭha a ti deuh nge a va melh leh zuk zuk ṭhîn. "Nih, U Ricky mangṭha mut tui aw, kan kalsan mai ang che." Maêngi chuan tiin an inmangṭha a, a Scooty dahna lam chu Remi nên chuan an pan zui ta a ni.

Hetih lai hian Brandon-a-te ṭhianho paw'n an in an lût ve chiah a, ṭhenawm hnaite pawh an ina lêng an lo awm ve bawk. Pu Sangkima leh mi dang lo awm vete chuan nui sang hian an lo be sawm vat vat a, anni ṭhianho pawh chu sitting room-ah chuan an ṭhu zui ve nghâl. An hahdam deuh ta tihah an awmpui nula pahnih, Sâwmi leh Hruaii-te'n thingpui tui tak an lo siamsak a, dam taka an inhmu leh chu an lâwm thu an sawi ve sap sap mai. Brandon-a-te in chhung hi rawng vâr hnawih a ni bawk a, in chhung ti mawi tura milem leh thil chi hrang hrang an târte nên pawh an inchawih hle.

An zinna chanchin leh an chêt lâk dânte Pu Sangkima chuan zâwt nghâlin, an hmuipui pu Zodina'n an training chungchânga bul a ṭan chu an lo nui suk suk nghâl. Sawi zawm zêlin mi pathumin Brandon-a an beih rawn dân te, chumi hnu-a Sanjay Yadav bihrûkna hmun an luh chhuah dân zawng zawngte kha a'n sawi dap dap mai zawng, ngaihnawm an ti tlâng bawk a ni ang Zodina chu ngawi rengin an en ṭhap. A sawi zo chiah Luahpuia nuam ti lutukin insual an zirnaa an instructor a bin hrep thu a lo sawi zawm ve nghâl a, Rinpuia'n a mawng a kawm ve thu a lo sawi leh phei chu an nui leh dar dar ṭhîn a nih kha. He mite pahnih dawthei lutuk hi chu(h)!

Chhunzawm leh tur.


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)