1500 MILES BY Duata Khualchhawn (Completed)

Episode nei ho a hlawm a dahkhawmna
Ngaia
Site Admin
Posts: 25813
Joined: April 30th, 2016, 4:07 pm

Re: 1500 MILES BY Duata Khualchhawn (Completed)

Unread post by Ngaia » April 9th, 2023, 11:40 am

🌹🌺1500 MILES🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 19.

August thla an hman zawh leh meuh chuan favâng boruak thengthaw nuam tak an hmang ṭan leh ta. September ni 3(Thawhleh) zân a lo inher chhuak a, pu Sangkima pawh ṭhenawm hnai rawn lêngte nên tîtî-in an nui ho leh dar dar ṭhîn. Belbel-i designing centre changtlun tawhzia te, a hmêl leh pian zahpuiawm loh tak a ni bawk nên model/celeb ang maia a lâr tawhziate leh, a thawh rimna bâkah hun khirh leh harsa tak a pal tlang theite hi an fak âwl lo a ni mai a. Chutiang thu ngaihthlâk nuam a hria chu, a kâ pawh zen ila min seh lo vang tih tur hian pu Sangkima pawh chu a nui sang reng tawh mai a ni. Brandon-a chungchâng an sawi chhuah erawh chuan hmêl hlim sang si hian, "Ani kha chu ngaihtuahawm a ni hlei nêm, a awm awmin awm teh se," tiin thu dang a sawipui zui daih ṭhîn.

Chutianga an tîtî barh barh lai chuan zân dâr 9:30 a ri dâwn hnai tawh. An in lêngte pawh chu tho zuiin an hâw sap sap a, ṭawngkam ṭhain han chelh ve mah se anni chuan, "Zan danga sawi tur khêk nân pawh kan hâw rih phawt ang e." tiin an inmangṭha ta a nih kha. Mi dang an awm tawh lo bawka Belbel-i pawh sitting room-ah chuan rawn chhuk vein a pa TV en lai chu, "Pa, tûnah chuan ka designing centre hi foreign-ah pawh an lo hre ve nual tawh asin. Hei en la, ka kut chhuak leh ka instructor-te kut chhuak pawh mawi an tih thu min lo hrilh ve sap sap mai." nui sanga tih leh a pa entîr chu a rual bawk a, pu Sangkima paw'n a lawmpui thiam kher mai. Pathianin rem a tih chuan nakina a hun tawn tur duhawm tak takte sawi dûnin an nui var var a, Belbel-i lahin a pa chu a tîtî-pui thiam bawk nên, Brandon-a a awm ve lo tih rêng rêng hre lo ang maiin an hlim viau a ni.

"I nu kha la dam ve se a lâwm dân tur hi aw, Belbel. Vânram aṭang khian chhuang tak chung chea a lo thlîr ṭhin che ka ring. Kei paw'n ka chhuang lutuk che a nia," nui sanga pu Sangkima'n a lo tih chuan, "Ni e pa, kei paw'n ka ngai thar ṭhîn. Mahse, hêngte hian lâwmna leh hlimna famkim min pe chuang si lo; tûna kan chhungkaw din hmun ka ngaihtuah châng hi chuan, ka nu leh ka u-te hmun ruak hi a lo zau hle tih ka hre thar ṭhîn a; i ngai ve ṭhîn em?" Belbel-i'n a ti chu pu Sangkima a ngawi deuh vang vang a.

I nu chu ka ngai ṭhîn khawp mai Belbel. (A ṭhu kûn deuh chal bawk.)

Nih, ka u hi?

Belbel, tûnah chuan nang chauh hi ka neih chhun i ni tawh. Nang chuan i u anga min phatsan ve loh hrâm ka beisei a nia.

A phatsan ngai lo che asin, pa. Nih, hmangaih neih hi sual ni ta se, kan rin Pathian pawh khi mi sual a ni ve dâwn tihna em ni? Pathian chu hmangaihna a ni tih ziak a nih kha!

Belbel, khatiangin Pathian thu an la kawi ngai lo. Pathian hmangaihna leh mihringte hmangaihna hi chu a hrang daih, tehkhin chi pawh a ni lo.

Nih kei hi, i hriat angin U Zodina nên kan inhmangaih êm êm a; ka chanchin chhe ber a hriat hnu paw'n min la pawm êm êm si a nih hi! Min iai ve ta se, a nih loh paw'n mipa dangte hian min ten hluah hluah ta se i rilru a na ve tho lo ang maw?

Nangina i thlan hmangaihna leh i u-in a thlan hmangaihna hi inang hek lo. Nang chu i pasal vâng hian i la zahawmin i la mawi dâwn a, i la ropui zêl bawk ang. Mahse, i u ve kha chu ama zahawmna tur leh ropuina tur pawh thlîr thiam lo a nih kha hre ta che. I ṭhiannu Elaine-i paw'n a duhin a hmangaih êm êm a; anni ang mi lian leh thlahtu aṭang rênga mi ṭha chhungkua, mite zah kai an nih saw. Nikum chawlh hmanga a rawn hâwn ṭum pawh kha i la hria em? I u chanchin a hriat ruala a mit menga natna awmte kha; a eng chu nge maw a hriata Elaine-i hnâwla thingtlâng nula ve mai kha a thlan zâwk theih le ka ti. Sawi tam tawh lo teh ang Belbel, han mu hahdam rawh. (Pu Sangkima chu a thinrim ṭan leh titih dêr tawh.)

Ni e, ka hria alâwm. A tîr chuan kei paw'n pawm har ka ti, ka u duh thlanna hi! Mahse, i sawi zahawmna, mawina leh ropuinate hi hmangaihnaah hian a awm ve bawk lo em ni? A awm tih chu i hre chiang viauin ka ring. (Belbel-i chu a mittui a parawl ṭan bawk.)

Awm te chu awm e. Mahse, hmangaihna vânga zahawm chawp ai chuan, mi zahawm sa hmangaiha innei tate chu mite paw'n khîtah an en ang chu! Duh tâwk teh ang. Han mu hahdam rawh Belbel, a nih loh chuan i lakah ṭawngkam nâ ka chhâk chhuak palh ang e.

Pu Sangkima awm dânah chuan tîtî-pui zêl chi niin Belbel-i chuan a hre ta lo va. Pa rilru chak leh luhlul tih takah hnial khân a hre thei viau bawk nên, a mittui hru zauhin Belbel-i chuan a room panin a chhohsan ta a ni.

Ni e, nikuma Elaine-i chawlh hmanga a rawn hâwn ṭum khân Belbel-i designing centre pawh hi a tlawh zing viau a, mitthi tho leh lawm tak hian an inlâwm dûn a ni ber mai. Brandon-a chanchin Belbel-i'n a hrilh aṭang daih tawhin a rilru a na tawh a, mahse, hmeichhe zir sang leh rilru puitling tih takah tawrh dân pawh a thiam viau rualin, chhung rilah erawh a na ve vawng vawng a nih kha. Belbel-i zirlaite leh a instructor-te paw'n Elaine-i chu chhe lo an ti hle a, "Miss, i ṭhiannu kha a va'n chhe lo êm êm! In chhe lo dûn si, in hleitling bawk sia in inhmeh tawp. A dress-te kha keini tân chuan lei ve mai mai theih pawh a nih loh kha!" an ti sep sep ṭhîn rêng a ni.

Belbel-i paw'n nui sangin a ṭhiannu chu a chhuang thiam viau. "Tu nge chhe lo in tih zâwk?" a tih fiam ṭumah pawh Elaine-i'n vote a hmu tam zâwk tlat. Belbel-i'n fiamthu ti tak deuh a, "Het! Mahni Miss-te vote nachâng pawh in hre na nge? Ka vaw zâwk dâwn che u maw ni le!" a'n ti vêlte kha an nui ar ar hlawm a nih kha. A kal leh dâwna Elaine-i'n, "Bestie, 'chan loh tur dî' an tih ṭhin kha kei paw'n ka nei va ta a nih hi! Mahse, inthiam lo duh suh aw, hmangaihna hi chu kan thu hnuaia awm a ni miau si lo va; i pa nên pawh lo inrem vat se, hlim takin lo awm ang che u. Chuan, an inneih dâwnah min lo hrilh ve la, chawlh lain ka rawn thlâwk hâw vang vang ang." nui sanga a tih khân Belbel-i paw'n a khawngaihin han hnem dân erawh a hre lo tak zet.

Chawlh hmanga Aizâwla a awm chhung pawh khân Brandon-a hi hmuh a châk ṭhîn hle. Khâng kum liam taahte khân Whatsapp-ah an inbe ve zeuh zeuh ṭhîn a, Elaine-i hian a be CK thei ang reng viau. Brandon-a lah mi zei hawi lo tih takah a nui liam vêl mai mai a, chutih lai tak chuan Remi hi a tawng ti ila a fiah ber âwm e. Hetia Remi nên an inzui hnu phei hi chuan Elaine-i paw'n a be khât ta hle a; a farnu ṭhian ṭha ber a ni bawk nên Brandon-a pawh hian ṭha takin a chhâng ve mai ṭhîn kha a ni. Commando aṭanga hnawh chhuah ve mai a nih bâkah, a farnu mualphonain an chhungkua a tlâk buak hnu phei kha chuan Elaine-i hi phû lo lehzuala inhriain, Elaine-i pawh hian ngamtlâk fiamin a fiam mai maiah a ngai a ni ber.

September ni 6(Zirtâwpnî) a lo nih chuan, Remi leh Maêngi pawh Graduation day cm Variety programme Vânapa Hall-a an hman dâwn avângin, tûkṭhuan ei kham hnu dâr 9:30 vêlah Maêngi'n scooty-in a rawn lam a, Remi a inpeih hnu chuan an chhuak zui ta a ni. Vânapa Hall lam pan chuan tlân nghâl vang vangin, first class-a an pass ve ve chu an lâwmzia te, class kal dûn tawh lo tura an awm hrang tur leh, he an Graduation Day hun hmang tura an inphur chhuak leh hi scooty-a an inphurh hnuhnung ber tur a nih an rin thute an sawi sep sep a, nui leh var var ṭhîn mah se an lung erawh a lêng sa hle tih a hriat theih tho mai.

Vânapa Hall an va thlen hnu chuan College student-te pawh an lo phu mur mur tawh a, kawngpuia lîrthei khalhtute leh passenger-te paw'n an rawn thlîr leh doh doh ṭhîn. Chuta Remi leh Maêngi an lo hmuh rual chuan a hmei a pain an rawn thlîr deuh ṭhap a, inbe sep sepin Remi chu an en duh bîk kher mai. A sam dum hlap mai chu a chhîpvir zâwnah ṭâwn vahin a tukkhumah a kûl raih a, Belbel-i'n suit dum a pêk tâk hnuaia kamis body fit sen a hâkte leh high heels sen a bunte nên hian Remi hi a lo nalh leh ziai ziai êm a tin ni. Eyebrow tlêm a inhnawihte leh a hmui sen saa hnawihsen a hnawih lehte nên phei hi chuan maw, Rem-loh-nei-lovi a ni ringawt. Mipate mit meng ker kawr hi asin nuihzatthlâk zâwk chu; an chilthlî a far lo chauh a nih hi! Remi ṭalh ṭalh hi chu aw! Maêngi pawh a pual têt ang angin a inchei thiam ve viau bawk.

Tichuan, rei lo têah programme an ṭan ta a, Principal-in lecturer-te ai awha thu sawiin, an College result ṭha tak avânga lâwm thu a sawi dap dap hnuah, zirna sang zâwk zir chhunzawm turte leh eng kawng pawh zawh se, mahni kea ding thei tura fuihna thu chahte a sawi leh hnu chuan tûna graduate tate an ngaih tur thu te, anni ang student ṭha tak tak an nei thei hi lecturer-te nên pawh an inchhuanzia thute a sawi leh a, a sawi zawhah kut lo bêng dar darin Certificate hlanna hun an hmang zui leh nghâl bawk. Certificate hlan turte stage-ah ko chhuak vekin an ding khat hmur mai a, 1st Semester zirlai a hmei a pain Remi chu an en duh bîk ti ila a sual tam âwm lo e!

Graduate-te Certificate an hlan zawh hnuah Mizo Ṭawng Humhalhtu Pawl hotupa ber leh Khuallian ni bawk, pu Hualkûnga thu sawi turin an sâwm chhunzawm leh a. Chuta pu Hualkunga'n lehkha an zir ve laia a chêt chhiatna te, love letter thlum ṭha mangkhêng an ziah kûr ve ngiai nguai thute leh, thu hlimawm tak tak sawia bul a ṭan meuh chu student-te an thûm leh huk ṭhîn. Love letter an ziah thupuia sâp ṭawng hman ve ngei an duh si; an hriat leh thiamnain a phâk si loh avânga hawrawppui vek a, "DEAREST LOVE OF THE WORLD TOBACCO!" tih an ziah uluk ṭhinzia leh, an bialnute'n mittui luang zawih zawih chunga an chhiar ve ṭhin thu a sawite chu an lâwm lehzual a, an nuihza zualpui a zia ta maw tihah Mizo ṭawng chungchâng ti hian a sawi zui ta a ni.

Aw le, vawiina zirlai duhawm tak tak, lehkha thiam leh sâp ṭawng thiam tak takte u; hei hi ka chah teh ang che u. Tûnlai khawvêl changkâng zêlah hian mi tinin biakfung(smartphone) kan hûm tawh a ni mai a, kan nei thei a nih phawt chuan kan nei tur a ni, neih loh tur ka ti hauh lo. Mahse, hei hian kan hnam ṭawng a dik lo zâwngin a nghawng nasa tak zet. Mizo ṭawng ti dazat zâwnga thu kan inthawn(message) dân chu in hre vek ang a, sikul naupang tam takte'n tûnah hian Mizo subject exam chhânna atân pawh hawrawp dik lo baksaka ziah hi an uar ta khawp mai. Chu chuan kan ṭawng hi a ti boral tial tial a, kan hnam ṭawng dik tak hi kan hloh palh ang tih a hlauhawm hle a ni.

Kan hnam ṭawng kan hloh vaih chuan hnam boral kan ni mai dâwn a, he Mizo hnam tlêm tê humhalh tur hian ram rî-a va duty kher a ngai lo, a ṭûl tâwp a nih loh chuan hnam dangte thisen va chhuah kher pawh a ngai hek lo. Kan hnam ṭawng hi hawrawp dik takin lo ziak ṭhîn ula; dik takin lo hmang ṭhîn teh u aw. He kan ram kan hnam hum him tur hian Mizo ṭawng dik taka hman leh ziah hi lo uar sauh sauh rawh u. Chu i thil tih ropui tak avâng chuan mi zawng zawngin an hre lo maithei che a; mahse, tute emaw chuan hnam damna tura lungphûm pawimawh i nihna hi an la rawn hre ngei ngei ang. Chutah chuan i chanchin hi mite'n rei tak rawn hril mawlh teh se, ka lâwm e!

A sawi ngaihnawm thiam bawka Vânapa Hall chu the hmeh ang mai hian a reh ṭhap a, a sawi zawh hnu chuan kut bêng dur durin an thâwm a na ham ham hle. Chumi hnu chuan Variety Programme an hman chhunzawm leh ta a ni.

Nî a liam leh deuh a, September ni 15 zân chu khua a thiangin boruak a dâi nuam tâwk hle mai. Zân dâr 7 a ri dâwn hnai tihah Luahpuia-te putu chuan TV-ah Nursery Rhymes an lo en a, naupang hla hrang hrangte en chhunzawm zêlin an tui viau. Primary-a kan zir ṭhin 'Mary had a little lamb' tih kha sakpuiin an lo lâm dûr dûr mai. Pu Nunsanga-te nupa leh Biaktei'n lo nuih var varin kut an lo benpui ve bawk a, an va inhmeh putu tak êm! Sangpuia'n, "A putê, eng nge Mizo ṭawngin a awmzia?" a tih chuan, Mary'n tilte lem tak tê a nei, tilte lem tilte lem tihna," Luahpuia'n a lo ti nui sûng a, Sangpuia âwih lo hmêl hi a ât hmêl lehzual asin aw! Biaktei paw'n nui chung hian Luahpuia chu, "I dawthei e, a ni lo lovin hrilh suh Sikul-ah pawh a thiam thei lo ber a nih tawh kha!" a lo ti zui hlaih hlaih. Chutah nui vur vur chunga Luahpuia'n, "Uai! Ka tupa hian min chhûn a nih chu!" a lo ti thûm leh dût mai chu Biaktei chuan a ngei hmêl kher mai. Sangpuia hi kum 6 ni ve tawhin pawl 1 a zir ve tawh a ni.

Zân dâr 8 a ri dâwn hnai tawh tihah Brandon-a pawh a lo inpeih fel at tawh a, achangtunu berin hmun danga lên phal hek lo; a hna thawk a chauh deuh avânga zan hnih ngawt a lêng ta lo pawh kha Remi a titau titih tlat tawh. September ni 12 Remi birthday zân khân ṭhi nalh deuh present-in an ṭhiante nên an hlim dar dar viau a; chumi hnu zan hnih chu lêng chhuak peih ngang lovin a ṭhiante'n a in luahah an lêng ta a nih kha. Rei lo têah a ṭhiante an rawn thleng tih hriat takin lîrthei ri cher cher chu a hre zui. Chuta a ṭhiante rawn lûtin Brandon-a lo inpeih fel vek tawh an hmuh rual chuan,
"Uai! I lo va inpeih et awt tawh ve, zan hnih i nghei dêk dêk chu i ṭuah nghâl hle a ni maw?" tia Zodina'n a lo fiam chu an nui dar dar mai. Zahmawh rawng kai deuha an fiam zui barh barhin an thûm leh hak ṭhîn a, rei awm khawmuang tawh lovin an chhuak ta a ni.

"Mit ti tlai pahin zanin chu i kual deuh teh ang u." Zodina bawkin a lo tih chuan ṭha an ti tlâng ve leh mai a, Freddie-a Bike-a Brandon-a chu chuang vein an tlân chhuak zui, Brandon-a Car khalh chhuah kher hi ṭûl an ti lo pawh a ni mahna! An tlân zêla Vânapa Hall an thleng chu a hmei a pain kawng sîr remchâng laiah an lo awm ṭeuh mai a, tute nge an nih tih pawh an hre chiang viau a ni. Chutah Luahpuia chuan, "Ei zawnna nuamsa-i-te leh an hlawhfate!" a lo ti thûm sup chu Rinpuia paw'n nui suk chungin, "Talent-ti-pung-thiami-te!" a lo ti ve leh. Chutia nui sûng chunga an tlân lai chuan a hmasa bera Freddie-a leh Brandon-a inphurte chuan, hmeichhe pakhat pai deuh nak nak chunga kawng kân tum chu an su teuh kher mai, anni pawh chu an tlu teuh hle.

Chutih lai tak chuan mi pakhat lian ve deuh mai T-shirt dum ha hian, "Hey Zâwnga, i hmu na nge? Ka nula kha han su nâ la chuan i case a sang khawp ang." tia rawn pan hnaiin Freddie-a Bike ke hma lam a tlawh leh kher chu a rual a, chu kher kher chu a tih sual lian tak a ni. A bek ri no chawk nghâlin motor kawngah chuan a let hawl hawl zui a, Brandon-a'n a pan leh lai chuan mipa dang awm vete chuan, "Hei, Victor-a an khawih rawn a nia," tiin an rawn tlân khâwm ve zung zung bawk. Ṭawngkam ṭhaa chin felpui chi ni tawh hek lo le; Vânapa Hall zâwn motor kawngah chuan mi 10 rualte leh Brandon-a-te ṭhian 5 chu an insual buai ta nuaih nuaih a. Thinrim râwl leh mihring tisa ri leh chawrh chawrh ṭhîn te, an ṭhiante fuihna ṭawngkamte nên an ri luai luai tawh mai a ni.

Mahse, an tam hneh zâwk avânga rawn ba sa ngam ngawttu mi 10 rualte chu an chêt a fuh rei tlat lo. An bitum ṭheuhte an khawih thlu leh chiah mi dang pahnihte na tuar râk ruai ruai mai an va en chu Brandon-a, Zodina, Freddie-a leh Rinpuia-te pawh an nui ve suk mai. An nuihzat hi eng dang a ni lo, tham lo zet hian Luahpuia'n mi pahnih bengah pawtin a lo vir kualpui chuai chuai mai chu niin. Vir kualpui pah chuan fa zilh tak hian a zilh zui ṭhat ṭhat a, chu mite pahnih na ti lah chu ṭhen chawk chawkin an dingdihlîp awt awt bawk. Mi dangte lah chuan chhan chu sawi loh, an mi hmachhawn ṭhian 5-te chu sual chhunzawm leh an ngam tawh lo a ni chêk ang chu; hmai khem thi nuaih chungin an melh tlawk tlawk ringawt a nih kha.

Chutih lai chuan an ṭhian hnai deuhte ni ngei tur mi 7-te chuan Victor-a chu rawn ko lauh lauhin an rawn tlân ve leh mai si; thinrim engphiarin Brandon-a-te ṭhianho chu an rawn pan zui zat. Kut tuar hmasatute zînga mi 5-te pawh an rawn pâwr thar ve leh bawk nên an tam hneh leh deuh tawh. Ṭawngkam chhe tin rênga ṭawng khum pahin an ri zui leh chawrh chawrh a, Brandon-a-te ṭhianho pawh an him kim tawh bîk tlat lo. Mahse, chûng rawn thleng tharte pawh chuan an mi beihte chu an duh angin an sawp thei bîk lo va, insual an lo thiam phian bâkah an zînga pa lianpui mai chu an ṭih ru tawh a ni ber mai. A chhan chu amah hnaih hmasatu apiang Luahpuia hian a chûm thal ṭhuai ṭhuai tlat a ni. Vânapa Hall bul lawka One way chhuk deuhah pawh an innawr let thla hawl hawl tawh mai a, pakhatin a hnung lam aṭanga Brandon-a khawih a tum a hmuh rualin Luahpuia a va tlân phei.

Chhuk zâwnga tlân a ni bawk nên chu pa bul a thlen rual chuan a sneaker bun chu a phah a lo nâl nge ni, hma lamah a tleng thut a, chu pain a lo hmuh rual chuan a ke rêk hnaihah Luahpuia tawlh thlu ke lengin a va tlawh chawrh. Luahpuia tha pêk a na bawk nên chu pa bawkkhup zâwnga rawn tlu phar huang mai chuan, tîm leh ih pawh nei hauh lovin Luahpuia hmuiah tak a zuk fâwp thawih lehnghâl a, rang fahrana nam lêng lawp pahin Luahpuia chuan, "Thuuiiii...ka ten lutuk ka ten lutuk, thuuiiii...hmêlvarung." tia a pan leh chiah Zodina'n a bânah rawn vuanin, "Big Man, Police-te rawn thlen hmain kal vat ang." a lo tih takah chuan thinrim zeta chil chhâk phurh phurhin an kal nghâl vat, hmanhmawh takin Remi-te in lam pan chuan an tlân chhuak leh ta a ni. Sual rawntute hi ṭhenkhat chu an lo rûi viau mai a, ṭhenkhat chu an deh khirh ve ang reng viau thung. Chu tak chu an sih hnipna a nih vâng pawh a ni chêk ang Brandon-a-te ṭhianho tân rei lutuk beih an ngai hlawm tlat lo.

Luahpuia chuan a khât tâwka a hmui tuai leh thuak ṭhînin chil a chhâk deuh reng mai a, hetih lai kher khera Luahpuia thinrim hmêl zet hi chu Tubohliana khân a ang tawh zâwk ngei ang. An mit ko leh kamsîr vêlte pawh duk ve deuh churin a thi ve bawk nên an thinrim tak zet. Hand to hand combat lo zir silawng ve tawh an ni hlauha rin aiin an che thei ta rêng a nih hi! Chutia thui vak lo an tlân leh hnu chuan Remi-te in panna an thleng ve leh mai bawk a, an hmai duk deuh chur leh an t-shirt ṭet deuh hrupte nên chuan inen nui suk suk hlawmin Remi-te in pan chuan an chhuk zui leh. Mahse, Remi-te in an zuk thlen chuan a ngaihna hre lo zetin an hawi ka hau mai le!

Chhunzawm leh tur.


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:41 am

🌹🌺1500 MILES🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 20.

Remi-te in luah lo inkalh ṭhap mai an hmu chu Brandon-a ngaih a ṭha thei lo, an vêng aṭanga Remi-te an insawn dâwnah pawh Remi'n eng mah a hrilh tawh lo kha a ni a; tûnah pawh hian chanchin eng mah hrilh lovin Remi-te hi hmun dangah an insawn leh a nih te a ring rum rum mai. A ṭhiante paw'n a ngaihna hre lo zetin an rin dânte an lo sawi zui ve nak nak bawk a, chutih lai chuan Remi chu call tumin Brandon-a'n phone phawrh a rual ve bawk. Vawi thum a call hnu paw'n a tlang thei ta tlat lo mai le! Thinrim ru ṭunga a call leh pawhin a la tlang thei chuang lo. A ngaihtuah vang vanga Maêngi call chu fuh berin a hre ta a ni. Maêngi a call hnu rei lo têah a lo pick a...

Hello! U Brandon.

Maêng, khawiah nge Remi-te hi an awm? An in a inkalh tlat.

U Brandon, hmaichhana hrilh che a ṭha zâwk ang. Khawiah nge kan inhmuh ang?

Engati nge? Eng nge thil awmzia? (Brandon-a chu a phâwk tawh kher mai.)

MC kawtah khân inhmu ila engkim ka hrilh ang che. Rei lo la aw.

Aw le.

Brandon-a'n a ṭhiante chu Maêngi nêna an inbiak dân a hrilh chuan anni pawh MC lam pan turin an inpeih nghâl a ni mai e. "Eng nge thil awmzia hi ni ta ang aw? Zanin chu kan thil tawn a lâwmawm loh ṭhîn hle mai a, kal nghâl ang u hmiang." Zodina'n a lo tih chuan an inphur chhuak zui zat.

MC pana an tlân lai chuan Brandon-a erawh a rilru a kal thui kher mai. Hlauhthâwnnain a chhung ril chu an luah khat a, Maêngi ṭawngkam leh aw-ah khân chanchin lâwmawm a hrilh a ring lo bur bawk si. "Eng vângin nge a zâwna zan hnih kha ka lo lên loh le?" ti rilruin Remi nên whatsapp-a an inbiak laite kha a hre chhuak uar uar a, a titau deuh a ni tih pawh a hre thar leh hnuhnawh. A nih chuan Remi hian an khuaah a hâwnsan em ni ang? Nge ni a, hmun dangah an insawn leh zâwk tihte chu a rilru luahtute an ni. Vâna arsi de sep septe chu thlîr vang vangin a rilru chuan duh thu a sâm mawlh mawlh ringawt a, a ngaihtuahna vâk kual vêl chuan a pa pawh a hriat chhuahtîr chiang hle. Chuta chin chu inseh ruh ṭawlh ṭawlhin a thaw leh hak ṭhîn.

Thui lo tê an tlân leh hnu chuan MC pawh an thleng ve leh ta. Mi dang lo ṭhu vete pawh an lo awm ve nual a, an din fel hnuah Maêngi chu call zui nghâlin MC an thleng chiah tih a hrilh zui, piah deuhah Maêngi chuan a lo nghâk reng tawh zâwk a ni. An inhmuh rual chuan inpan ve vein nui hmêl pu hrâm hrâm mah se, Maêngi nui hmêl chu lem chang mai mai a ni tih Brandon-a hian a hre chiang viau thung. Maêngi'n, "Saw laiah sawn ṭhu ila," a tih chuan an inzui phei leh a, an bul hnaih lutuka ṭhu an awm lo bawka ti hian Maêngi chuan Remi chanchin chu a hrilh ta a ni.

Englo a nia U Brandon, kei paw'n ka hrilh ngam lawk loh chhan che chu, Remi hian min ngên nasa êma kei paw'n hrilh loh che ka tiam vâng a ni. Mahse, tûnah chuan a awm lo tih i hre tawh thova engkim ka hrilh tlang law law ang che. Result a chhuah hnu lawk khân sumdâwnna lam buaipuiin Remi khân hna a zawng ve a, an chhungkaw din hmun chu nang paw'n i hre tawh tho va. A bîk takin a nuin hah taka a lo châwm ve ṭâwk ṭawknate chhâwk zângkhai tur leh, an khawsak a nawm ve theih deuh beiseiin a nia sumdâwnna lam hi buaipui a tum.

Tûnlaiah hmêlhriat neih ṭhat loh chuan sawrkâr hna hmuh a harsa sia, ani pawh i lakah a inthlahrung khawp mai. Chuan, a birthday kan lawm hnu lawk khân chu a hna dîlna chu an lo approved hlauh a, tûn thla ni 19 khân interview a ngaih thu an rawn hrilh ta thut sia, a patea-te nupa rawn kalin an khaw lama hna an laklawh deuh avângin an awmpui hman lo bawk nên, Hminghmingi pawh a pate'n an rawn hruai ringawt ta a nih kha; thu chiang eng mah pawh min hrilh hman bîk lo. Bâkah, hetia in lo intawn hnu hian i pain Mo atâna a iai thu te, in inhnial phah fo tihte kha a hre ve a, hrehawm a ti ṭhîn khawp mai. Mahse, tûna a kal bo chhanah hian i pa kan mawhpuh hauh lo a nia aw!

Tin, khatia an insawn hnu-a i rilru nat avânga rûi chunga i va lêng ṭhîn te, i pa laka i lungawi lohna i sawi chhuah zeuh chângte khân hrehawm a ti thei lutuk asin. A kal dâwn zânah pawh ti hian min hrilh a, "Kei chu thingtlâng nula a kâra hmeithai fanu ve mai ka ni a, ka tân chuan U Brandon-a hi a sang mah mah a ni. Ka thinlung zawng zawng hian ka hmangaih a, a tân chuan ka nunna pawh hi ka hlân phal.

Mahse, hetianga hrehawm taka nun a hmang ṭhîn hi hmuh hrehawm ka ti a, keimah vânga a pa nên pawh inrem thei ta lo an ni tih ka hria; a nih chuan keimah vâng bawk hian an inrem thei leh mahna! Keimah ni lo, khawpui nula ṭha leh hausa tak, amah phû êm êmtu tawng turin ka duhsak tak zet a ni. Chutiang hmeichhia amah hmangaih theitu nêna hlim taka nun hman hi a phû a, kei chu ka chan phâk ngai loh tur ka hmangaih lak aṭang hian ka lo inthiar fihlîm mai ang e. Mahse, kumkhuain ka hmangaih reng ang." mittui luang zawih zawiha tiin a la nui sang asin. A sawi ang diak diak chuan ka sawi thiam tawh lo a ni.

(Maêngi paw'n a mittui a hru zauh a,sawi zawm lehin...) A thawhna tur pawh min hrilh duh lo va, nangmah ka hrilh che a hlau a nih ka ring," a tih zawm leh. Chutah zet chuan mi seh hel Brandon-a meuh paw'n a mittui a dang zo ta lo. Vanvadâka arsite a thlîr deuh vang vang hnu-ah a maimit chhîng leh a, a mittui hru zauhin vawi khat tê mah a ṭawng chhuak lo. Chutih lai chuan, "U Brandon, nangma'n min ngen tlat avângin i pain a tuithlâr thu che kha ka hrilh lo zâwk a, khami zân khân hrilh chu ka châk lutuk. Mahse, nangmah ka zah êm che avângin ka hrilh ngam lo a ni." Maêngi'n a lo ti leh, thaw hak pahin Brandon-a chuan, "Ka hre thiam e, Maêng, ka lâwm tak zet. Ṭhian ṭha leh rinawm tak i ni." tia a mittui hru leh zauhin a ṭhiante awmna lam a pan zui zat. A ṭhiante'n chanchin an lo zawh chuan, "Bro, khawi maw chahbi?" tih leh Freddie-a helmet chu khum sawk sawkin chahbi chu a la leh vat a, "Khawiah nge i kal dâwn?" an lo ti ti sap sap chu, "Chinghne berâm vun sin ka va lip ang e." tih leh Freddie-a Bike-a tlân chhuah chu a rual zui bawk.

Chu veleh Zodina'n, "E khai le(h)! An inah a kal dâwn a ni ang. A pa a ngaihtuahawm tlat, ûm zui vat ang u." a lo tih chuan hmanhmawh takin an tlân chhuak ve nghâl a, Brandon-a erawh an hmu phâk tawh hauh lo. Chutia speed sang ang reng taka an tlân tâkah chuan pu Sangkima in chu a hla lutuk lo bawk nên, rei vak lovah an thleng dâwn chu a ni dêr. Chutih lai chuan Brandon-a paw'n Bike chu ti dingin, an in lam chu hmanhmawh zeta a han pan chho leh mêk hi an va hmu hman a, han au ṭhîn mah se Brandon-a chu din khawmuan a tum lo khawp mai. Hetih lai hian zân dâr 9:30 pawh a pêl tawh.

Thinrim zeta Brandon-a an ina a lût chuan sitting room-a an awmpui nulate TV lo en mêk leh, a pa leh Belbel-i eng eng emaw sawia tîtî lai a hmuh hnu rei lo têah Belbel-i paw'n a lo hmu ve nghâl bawk. Chutah vîn zet hian Brandon-a chuan, "Ti khân i lâwm tawh em? Nuam i ti em? Tûnah chuan i duhthusâm chu a thleng dik ta. I chak aw, i chak." a ti ta phiar phiar mai. Pu Sangkima chuan phâwk ang reng tak leh thinrim tih hriat taka rawn enin, "A eng chu nge maw i hriata khatia mi rawn ṭawng khum rîkngawt? Khatianga min ṭawng khum tur khân tu nge i nih?"

Kei hi maw? Pa duhâm leh pamham tak fapa ni ṭhîn maw le! Mahse, tûnah chuan i duh ang ngeiin nang nêna kan inzawmna chu a chat tawh. Pa ṭha tak anga lem chan pawh hi sim tawh rawh.

A khanglâng che chuan! Eng nge ka duhâmna leh ka pamhamna? Sawi rawh Zomuansang. Tu thuin nge ka in chhung hi i rawn rah? Tuin nge phalna pe che? (An thinrim dûn bawka an râwl pawh fiak ṭhak ṭhak tak a ni.)

Nang ang sum leh pai Pathian mi, mi hnuaihnung zâwkte hmusita hnuaichhiah chîng, mahni thisen zawmte pawh tuithlâr duh hial khawpa mi nun râwngah a chhuah tawh che a nih hi! I lâwm em? Hnehna hlado chu min han chham khum ta che. I chak a ni lo'm ni?

Thu awmze nei lo hmang khân mi rawn chhimbu dâwi lo mai teh. Eng thilah chuan nge ka chak? Hriat thiam theih turin sawi ta che.

Aw a ni maw? Ka'n hrilh ang che. Ani chu a kal bo tawh, ka lak aṭanga hla takah a kal bo tawh. Chu chu i duhthusâm a ni lo'm ni? I chak chiang kher mai. Ka hmeichhe hmangaih chu tlâwm mah se kei chu ka hmêlmate lakah ka tlâwm ve ngai lo. Hei hi ka'n hrilh leh ang che. Nang hian kei hi kumkhua atân min hloh ve nghâl tih hre rawh. Kumkhua mai ni lo, chatuan thlengin...

Brandon-a thinrim leh rilru na bawk si chuan a mittui hru zauhin a chhuak zui leh nghâl a, a ṭhiante pawh khân an khap bet hlei thei meuh lo. An awmpui nulate bâkah Belbel-i chu inhnît feih feihin mittui an lo hru ve sat sat bawk a, "A pawi" tih hian a pawizia hi a hrilh fiah sêng tawh lo a ni e. An thâwm a na bawka ṭhenawm hnaite paw'n pu Sangkima in chu an rawn pan zui sang sang a, ngawi rengin pâwnah an ding ṭhap ringawt. Chutih laiin, Brandon-a chu Freddie-a Bike bawk chuan a in luah lam panin a tlân chhuak leh nghâl a, a ṭhiante paw'n ngawi rengin an ûm zui ve leh ta a nih kha.

Pu Sangkima-te pafa buai lehzual êm êmna kârah hian heti hian ti teh ang. Remi kal bo hma zânah khân kîr leh lawk ang aw! Engtin chiah nge an ṭhian dûna thu an thlun tih pawh hriat chian theih a ni mahna!

Zân dâr 8 vêlah Maêngi hian Remi-te in hi a thleng a, chutah chuan Remi nên tîtî-in an tak vei fu bawk a nih kha. Remi khân India ram pâwna company pakhatah hna ruak hmuin a dîl ve ta râwi mai a, dîl hun chhung chawlhkâr hnih a ral hman tihah a rin loh takin an lo approved ve hlauh mai. Chumi hnu lawk September ni 19-ah interview nghâl tur a nih thu an lo chhuah si a, Maêngi hi a call vat kha a ni. A va thlen hnuah Maêngi hian a lawmpui thute hrilh vein Brandon-a chungchâng pawh an sawi zui a, a kal bosan chuan Brandon-a hi a ngaihtuahawm viau ang tih Maêngi pawh hian a hrilh nghe nghe!

Mahse, an chhungkaw khawsakin a zir miau loh avâng leh, amah vânga Brandon-a-te pafa inkâra khî awm pawh hi a kal bo hnu chuan a inzawm zui ve mai a rin thu te, Brandon-a rilru nâ leh amah vânga an chhungkaw hlimna chhe ta mai hi pawi a ti bawk si, ṭha tê têa ṭhen zui mai erawh a theih tawh bîk loh thute Remi hian hrilh siam siamin a mittui pawh a parawl râm a, khawi hmunah pawh kal bosan mah se, Khuanu samsuih an nih ngai chuan an intawn leh ngei a rin thute sawiin kalsan mai chu har a ti ve hle.

Maêngi paw'n chelh luih ngawt ngaihna hre bîk hek lo le! "Lalṭhian, chhel takin awm rawh aw! Kan nuna mi bîk kan tawnte hi kan chhungte leh mi nazawng hian an hmuin an hre thiam phâk ve ṭhîn lo va; i thinlunga amah i thlang tlat ang khân U Brandon-a pawh hian hmeichhe dang a thlan ka ring lo. Nupui pasal dang neia inṭhen hlen tate chu awm ve tho mah se, hun rei tak hnua awm dûn leh theite pawh an awm ve tho a nia. Nakînah chuan tûna in harsatna tawhte hi ngaihnawm ti taka in la sawi dun leh hi ka ring tlat a ni." tiin a hnêm ve mawlh mawlh.

Remi paw'n a mittui hru zauha nui sakin, "Ni e, ka beisei, mahse, ka hlauthâwng a ni ka ṭhian. Kei, thingtlâng nula a kâra hmeithai fanu ve mai leh nghâl tân hi chuan a sang mah mah a ni. Nî bâkah khian thla leh arsi tam tak an awm a, nî tel lo chuan khaw êng kan hmu thei lova chhûn hun kan hmang thei hauh lo. Zânah pawh thla tel lovin arsi chhiar sên lohte khian vân khi an ti mawi thei tho va, kei chuan an vâi khian ka dîl lo, thla chauh a ni ka thlan. Engah nge Pathian khian phal taka min pêk ve mai loh le!" a ti chuai raih mai. Remi ṭawngkam aṭang chuan Brandon-a chân hlen a hlauhzia pawh Maêngi hian a hriat thiampui êm êm si a; mittui hru zauha inhnît feih feihin an inkuah vawng vawng ringawt mai a nih kha!

Ni e, chhungkaw lungrual tak pawt ṭhen a, an hlimna ti chhiaa inhmêlmâktîr theitu, mite chakna ber leh chak lohna ber ni bawk. Lungngaihna leh harsatna tin rêng pawh tawrh huama huaisenna petu, sawi sên a ni âwm lo ve! Hêng zawng zawng thlentîr theitu chu hmangaihna hi a ni a; ti danglam theitu pawh hmangaihna bawk hi a ni. Chutah chuan hmangaihna thil tih theihzia leh chakzia a chiang thawkhat viau ngei ang. Mahse, he hmangaihna chak takin tih theih loh a neihte zînga langsâr êm êm mai chu, hun koh kîr leh chelh din hi a ni!

Tûnah chuan Remi a kal bo aṭangin nî pawh a liam tam ve leh deuh tawh a, October ni 23(ninganî) a lo her chhuak ve leh ta reng mai. Mipui mimir nun zalên leh hlim taka nun phung pângngai hmang mêktu te, khawi emaw laia contract hna thawkte leh mahni hna ṭûl hrang hrang thawktute chu hmuhnawm tham an nih laiin, chûng mite chu Brandon-a tân chuan mi awhawm tâwp an ni tawh a, an hmangaihte kâia kawtthlêra tei chhuakte leh Restaurant-a châwlte lah an thîkawm êm êm bawk. He Zâwlkhawpui zau leh nuam ve tâwk tak hi, fahrah vâk vâi leh a hmeichhe hmangaihin mal leh khawhar taka a hnutchhiah tâk, Brandon Zomuansanga tân erawh hremhmun tem lâwkna ni ringawt tawhin, a nui hmêl mawi tak te, a ṭhiante nêna fiamthu an nuihpui bâwk bâwk ṭhinte pawhin hlimna an pe zo tawh lo va; dam lai lu a sûn ni tin zan tin a ni ber mai e.

Chu bâkah Brandon-a hian, a suangtuahnaa Remi hmêl leh an sûlhnute a tak ang chiaha tawna hriat a duh avângin a in luah a sawn a, Remi-te in luah tê fel at kha luahtu dang an awm lo bawk nên a luah zui ta a ni. Hminghmingi nu leh pate khân in dang luah tur an hmu tawh a ni ngei ang. Chhungkuaa han luah atân chuan a tê ve bawk si a, a neitute hnênah pawh in dang luah an duh thu an hrilh tlang ta a nih kha. Chutah chuan Brandon-a chu amaha khawsa ve nâw nâw-in chhûn leh zân hun a hmang ral ve tawp a ni ber. A lei kawppui ṭhiante'n a mamawh hunah an thlahthlam ngai lo va, a kiangah an awm reng ṭhîn tih hian ṭhian ṭhate hlutzia hi phawk chhuak famkim chiah lo mah se, a tâna an inpêkna erawh a ti chiang viau tho âwm e!

Heti a nih lai hian Brandon-a erawh a nun a chhe sâwt tawh viau, zu leh sa tlânin chaw a ei tlêm ṭhîn hle. Ho tê têah mi dangte kut thlâk a awlsam ta viau bawk a, a pawi thui tak tak hma leh Police-te beng a thlen hmaa a ṭhiante'n an tlân chhiatpui ṭhin avângin a la him hrâm hrâm ti ila a fiah ber ang. Khâng kum liam taa mihring thisen lum khawiha a chêt dân râwvâ tak vângte pawh kha a ni mahna; tûna a din hmun hian a zir ang reng bawk nên, thisen lum a kuta a kâi loh rei deuh chuan kim lo riauva inhre tawhin, a thinrimna leh rilru natna hrîk thlâkna tur hi a zawng ru reng ringawt tawh mai a ni.

October ni 25(Inrinnî) chhûn dâr 11:30 pelhah Luahpuia-te putu MC-a tei lûtte pawh hâwn tumin an lo inbuatsaih ve mêk a, Sangpuia chawlhni thuamhnaw lei tura kal an ni. An inthuam dân pawh inang chiahin an lawmawm dûn viau. T-shirt(Adidas) dum bân bûl ve ve hain Jeans kekawr an ha bawk a, sneaker dum(Adidas tho) an bunte nên hian an inhmeh ang reng. Sangpuia lah hi a pute Luahpuia ang maia chum buang mai a ni bawk a, an vun rawng a inang lo hi an danglamna awm chhun a ni mai âwm e! An hmêl hriatte paw'n nui var varin an lo fiam ṭhîn rêng a nih kha.

Chutia hâwn tuma an kal lai chuan dâwr pakhat zâwn an thleng chiah, "Luahpui," tiin hmeichhe pakhat hian a rawn ko va, chuta Luahpuia hawi phei chuan, "E heee! Cassie chu! Eng nge i tih a?" tih leh din a rual zui. Nui sang hian Cassie chuan, "Eng vak ti lo e. Hei ka ṭhiannu hi ka lêng lawk a, in hâw dâwn tawh a ni maw?"

Umm...hei pui hi ka'n hâwnpui tawh ang e, a intih tlangvâl theih loh? (Luahpuia pawh a nui ve sang bawk.)

(Cassie-te ṭhian dûn pawh chu an lo nui ve sak a.) I tupa kha a ni em? In va inhmeh putu tak! E takin a... Lalṭhian hei Luahpuia hi alâwm ngaihsânawm deuh ka tih kha...nikuma putar mitdel guitar perhsaka zâipui bawktu kha...rualbanlo leh mi chanhai dangte a ṭanpui lai pawh ka hmu nual tawh asin.

A ni dâwn tak, ka hmuh tawh hnu ang ka ti rêng a ni. Khawi, lo inchibai ila Luahpui. Lalnunfeli ka nia, Feli tih emaw Felfel tiin min ko ṭhîn a, i duh dânin min ko mai dâwn nia. (Feli pawh chu a nui sang a, nula hmêlchhe lêm lo tak a ni ve bawk.)

Khatia Cassie'n ngaihsânawm a tih thu a sawi kha Luahpuia hi a lo zak ru viau. An inchibai hnu chuan lêng ṭhu rih turin an sâwm zui a, Sangpuia chhuanlamin Luahpuia chuan hâwn tlang nghâl a duh thuin a chhâng ve bawk.

A nih, kan kal phawt ang e Cassie, Feli. Lo inenkawl ṭha ula. Sangpuia hi a ril pawh a ṭâm tawh ang.

Aputê, ih maw, ka ril a ṭâm lo. (Sangpuia'n a ti chu Cassie leh Feli'n an va lâwm tak!)

Kha, a ril a ṭâm loh tawp kha! I chhuanlam mai mai. (Tiin Luahpuia chu nui hak hakin an fiam zui lehnghâl a. Nui suk pahin Luahpuia chuan...)

Kal rawh mi â...ka ril a ṭâm i tih reng kha. (Sangpuia tukkhuma ben zeuh a rual bawk.)

Ka ti bawk lo. Ka ril a ṭâm lo. (Cassie leh Feli an nui nasa tawh hle.)

Kal mai teh mâwlmuk, chhawkûng.

Nui var varin an kal zui ta a ni. A nihna takah chuan Luahpuia lâi leh zâm bawk si khân Cassie leh Feli-te kianga rei lo tê awm pawh kha a hreh vâng zâwk a ni reng sia; khatianga Sangpuia'n a lo tih lai khân a ngei ru tak zet. In an thlen rual rualin an insual nghâl mai ang tih pawh hlauhawm tak a ni.

Thlang lenkâwlah tûrnî a her liam a, inkhâwm bân hnu zân dâr 8 vêl a nih chuan Brandon-a pawh, Remi hnêna a thinlunga hmangaih biahthu a phawrh chhuahna bathlâr thlang lamah ngei khân ṭhuin, vân lam leh mi in hrang hrangte chu a lo thlîr kual leh doh doh ṭhîn. A huaisenna zawng zawng bâkah a ṭhiante huaisenna tlêm pûk belha a hmangaih thu Remi a hrilh lai te, a nui hmêlte leh an hun hman dânte kha nimin lawka thil thleng ang maiin a hmu chiang hle. A vei lama ding chunga Remi nui var var laite kha a hmu chiang lehzual a, a tak hmuha khawih theih ni si lovin Remi sakruang chu a thlîr vawng vawng a ni ber.

Chutianga nun hman leh mittui luanga suangtuahna rama chên reng chu duh khawp tling hek lo le! Amah chu infuih sauh sauhin kut a hûm ruh ngat ngat a, "Kei min kalsan a, natna leh hrehawm tin rêng tuar tura min hnutchhiahtu hi ka hriat rengna tur che a awm bîk lo ve. I awmna hmunah chuan i mipa duhthusâm tawng mawlh la, pasal ṭha tak i nei dâwn nia. I hria em Remruatpui? Nang hian a der maiin min lo hmangaih a nih hi le!" ti rilru vawng vawngin a inseh ruh leh ṭalh ṭalh ṭhîn. Mahse, a infuih ang ngawt chuan a theihnghilh thei mai si lo, a mitthlaah Remi chu lang chiang tulh tulhin, thil dang ngaihtuah a tum paw'n a thei lo chiang lutuk ringawt.

A tâwp a tâwpah chuan, "Remruatpui, khawiah nge maw i awm le?" a ti leh sap a.

Chhunzawm leh tur.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:41 am

🌹🌺1500 MILES🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 21.

Ni tam liama thla 4 a vei leh hnu chuan kum thar, march ni 12 an chuang kai ve leh ta. Hetia Brandon-a nun hman dân khirh leh hrehawm tak hi a farnu Belbel-i leh a ṭhiante pawh hian an tawrhpui tak zet a, Belbel-i phei chuan a designing centre aṭanga a hlawh ṭhenkhat pe ru ṭhînin, chu chu Brandon-a sum hmuhna ber a ni tawh ti ila a fiah ber âwm e! A ṭhiante'n pêk an tum chuan a duh ngai lo va, a hriat lohin a lukham hnuaiahte an dah luihsak mai ṭhîn bawk. Hna a thawh peih tawh loh mai bâkah a natna chhâwk thei nia a hriat zû leh saah a tlân a ni ber tawh a, a taksa hrisêlna leh fitness erawh a theih tâwp chuan ti ve fo mah se, a tâwpah chuan zû bawkin hmâwr a bâwk leh nge nge ṭhîn.

A pa mai ni lo, hmeichhe dang amah hnaih deuhtute huatnain a khat ṭan a, mite dampui leh natpui ve ṭhin hmangaihna hi tûn atân chuan a natpui rih miau a ni. Tlangvâl hmêlchhe lêm lo leh pian pawh zahpuiawm loh tak, hleitling ve tâwk tak ni na nâ nâ chu in a luahna vêng nula ṭhenkhatte paw'n an haw lêm lo khawp mai. An biak ṭhat deuh paw'n a rûl tâwk lekin a chhâng a, a mize cool ruih vâng hian duh viau mah se, a ṭawngkam bung nghut vâng hian hmeichhe dangte hian an hnaih ṭhat ngam loh phah ti ila, a laka hmeichhiate rilru put hmang a phawk chhuak chiang ber ang. Natna, thinrimna leh eng tik lai pawha mi tih buai peih rengnate'n a rilru hi an luah khat tawh a ni mai e.

March ni 12 chawhma dâr 11 vêl a nih chuan, ina tawm reng ringawt chu a ning ve deuh pawh a ni mahna, lêng chhuak turin a insiam zui mawlh mawlh a, a t-shirt(dark grey) bân tlâwn leh Cargo dum bâkah Timberland-te bawk khân a inthuam leh at tawh. A in luah chhak lawk one way sîr, remchâng laia a Car dah chu khalh chhuak lovin hrisêl nân pawh a ṭha alâwm a ti nge, ke ngata a vah vaihna Zâwlkhawpui hi fan a rilrûk a ni. Mi vei vâk thlîr a rem deuh bawk nên, a hla lutuk lo bawka MC lam panin a chhuak chho ve tawp.

Chutia a tei chhuak ta chu muang mara kal zêlin a in luahna vêng pawh a chhuahsan tawh a, hmeichhe ṭhenkhat a tawhte lah chuan an lo en duh ṭhîn viau leh nghâl. One way zawha thui lo tê a kal leh hman tihah a hma lawka nupa inhau thâwm chu a hre ta a, mi ṭhenkhatte pawh chumi in zâwn one way-ah chuan an lo ding deuh ṭhap mai. Nupa thinrima inhnial bawrh bawrh kâra kut inthlâk thâwmte pawh a hre tawh hial! Chutia a kal mêk lai chuan nutling pakhat hi hmai duk deuh chura rawn tlân chhuakin, "Min pui r'u khawngaihin, min sawisa hlum thei mai ang." ṭap chunga ti lawm lawmin a sam leh a thawmhnaw hâkte pawh chu an pawr deuh fap bawk. A hnung chiaha a pasal ni ngei tur pa thau lam tâwnzau dum leh kekawr bûl dum ha, chemte hmâwr zum kenga rawn ûmtu a hmuh rual chuan Brandon-a pawh a ding zui zat.

Chutah le, chu nu hlau hlawpa rawn tlânchhia chuan Brandon-a chu a bânah a va vuan chawt a, "Ṭhianpa, khawngaihin min pui hrâm rawh. Ani sawn min that duh mai ang, khawngaihin min hum rawh khawngaih takin," thaw hlawp hlawp paha ti zawt zawtin Brandon-a hnungah chuan a ding khûr zui hlawk hlawk. A pasal lah chuan meng dur khup chung leh vîn zet hian, "Zâwngchhe nu, ka lak aṭang hian tu mahin an hum thei chuang lo ang che. Tûnah hian rawn kal nghâl rawh," ti tuarhin a rawn pan zui zêl bawk a, a nupui lah chuan khûr hlawk hlawk hian Brandon-a chu vuan tlatin, ṭanpui turin a ngên lawm lawm bawk. Brandon-a hamhaih lah chuan sawi tur rêng hre lovin a ding ve reng ringawt a, chu pa pawh chuan a rawn hnaih sâwt tawh viau. Rei lo têah a rawn thleng zui a ni mai e.

A nupui bân vuana phih dawt pah hian, "Tu mahin nang hi an hum dâwn lo che. Ka pawisa kha engtin nge i hman zawh theih? Min rulh hma loh chu ka sawisa dâwn che." tiin an nu sama keh a rual zui. Zu rim a nam huam dânah a pawisa pawh chu zu leina tura a tih, an nuin mamawh lei nân a lo hmansak a nih pawh a rinawm ta kher mai. Chu nu lah chuan Brandon-a bân chu vuan ve tlatin ṭanpui turin a lo la ngên lawm lawm a, chutah chuan Brandon-a pawh chu a harh chhuak zawk. Patling ṭhenkhatte'n inbeng dâi tura an lo tih pawhin chu pa chuan a ngaithla duh dêr si lo; a khât tâwka lîrthei rawn tlâna chuangte paw'n an en duh hlawm kher mai.

Chu veleh Brandon-a chuan, "Ka pu, in nupa buaina chu ka hre hauh lo nâ a; mahse, khatiang êm êma nupuite chunga chêt thawh kha chu a ṭha lo a nia." a ti dêk dêk a, "I hriat loha hnu, lo inrawlh lo la ti nia, chu chu i tân a ṭha ang aw!" chu pa chuan ti ram hmakin a vau zui khur khur. Chutia mi dangte hmuh leh hriata chu pain vaukhânna thu a lo chhâk chhuak chu Brandon-a ngaih dân a pêl ve ta tlat. Inseh ruh ṭalhin chu pain a nupui sama kêka a phit leh chiah a banrêkah man chatin a herh zui a, chu pa pawh chu aiah ṭhatin Brandon-a chu a en phâwk nghâl hle. Chumi rual chiah chuan Brandon-a'n a nam thal ta ṭhuai mai.

Chu pa nupui hmaah chuan ding leh ngatin, "Ka tâna ṭha leh ṭha lo chu keima'n ka hria; nang khân min vau ve khanglâng a maw? I chêt dânah hian pa huaisen tak chu i ni lo tih a chiang khawp mai." Brandon-a'n a tih lai chuan rawn tho ve leh tawhin, "Kan nupa buaina kâra rawn inrawlh tur hian tu nge i nih? Nang kha ka chemtê hian thah hrehna che ka nei lo tih hre rawh." a lo ti vîn ve leh ṭhat.

Han tum chhin la...

Eh eh eee...ka ngam lo emaw i ti elo?

Tih leh Brandon-a chu vih tumin a che ta mai. A banrêka lo man leh chatin ding lama herh Brandon-a chuan a rual nghâl a, chu pa aiah ṭhat ruala hnuai lama elh leh a hnungzânga nawr chhoh a'n rual mai chu dingdihlîp awt awtin a ṭhen zui chawk chawk. A chemte ken a thlauh chu kawng sîrah chhuih phei zuiin Brandon-a chuan, "I nun ka hlut viauna chhan tur hi pakhat tal mi'n hrilh teh. Nang hian min thah theih i inring tak tak alaw? Sawi rawh, i nun ka hlut viauna chhan tur chu?" a ti vîn ṭhat ṭhat mai.

Chu lai hmuna mite pawh chuan phâwk ang reng tak hian an thlîr reng ringawt a, chu pa lah chu thinrim bawk siin a ṭhen sak sak ringawt mai a ni. Brandon-a thinrim zual thut chuan chu pa chu kuai her lawpin a beka a'n hnek zui leh chawrh mai chu a va thal chiang tak; thinrim zet hian a vîn zui leh ṭhat ṭhat bawk a.

Chu pa luhai a inthin deuh nawk nawk lai chuan, "Hei hi hre rawh mi mâwl pa, i chêt thawh dân kha attempt to murder case-a tâng thei i ni tih i hria em? Hei pawh hi hre reng ang che. In nupa buaina kârah ka rawn inrawlh lo va, nutling pakhat thlabâr ka ṭanpuina ngêntu ka ṭanpui mai a ni, ka hum mai a ni. I in chhung a ni lo tih hi i hre na nge? Chuan, min thah i duh a, mihring nunna lâk i duh a nih phawt chuan kei hi a hmasa ber ka ni ang, ka lo nghâk reng ang che." a tih mêk laiin Police Gypsy leh chu pa nupui chhungte pawh chu an rawn thleng ve bawk a, a nupui nu leh pate chuan thinrim engphiarin an mâkpa zu heh êm êm mai chu an ân khum zui hlawih hlawih. Chumi hnu-a an fanuin Brandon-a'n a hum thu a hrilh chuan Brandon-a chu lâwm thute an hrilh zui ve leh a, a pasal chu Police-te'n an la zui hmak a nih kha!

An fanu hmai duk chur leh kamsîr thî ser ser chu in chhungah kuah lûtin a thawmhnawte an siamtîr leh zung zung hnuah, an fate pahnih mipa leh hmeichhia kum 8 leh kum 5 mi vêl turte nên an hâwnpui nghâl bawk. Brandon-a lâwm thu an rawn hrilh leh lawm lawm hnuah MC lam pan turin ani pawh chu a kal zui ve leh ta a ni. An zînga nula awm vete'n Brandon-a an melh dân ser sawr hi aw! Ani lahin vawi khat tê pawh melh nachâng a hre ve dêr si lo; Lalbrandon-a tak hi chu(h)!

Chhûn dâr 12 a ri ṭêp tihah Zodina paw'n Belbel-i designing centre a inkhalh thleng ve chiah. Belbel-i whatsapp status a hmuh khân a rilru hahzia a hria a, an restaurant-a a buaina kalsanin a han pan ta a nih hi! Belbel-i designing centre hi chhâwng hnih nei niin, ground floor chu rawn lût tharte class atân bîk an hmang a, a chung chiah chu puan leh thawmhnaw design hrang hrang ṭhui zirna atân hmangin, a chhâwng chung ber chu an kut chhuakte zawrhna leh meeting room atân an hmang deuh ber. Zodina'n ground floor-a instructor nula panga-te chu Belbel-i awm leh awm loh a zâwt hlawm a, nula pakhat chuan 1st floor-a a awm loh chuan 2nd floor emaw a room-ah emaw a awm a rin thu a lo hrilh ve bawk.

Hmanhmawh ang reng takin 1st floor lam panin a chho zui leh nghâl a, chutah chuan Belbel-i pawh a instructor-te nên an zirlaite chu an lo vil lai hi a han hmu ta a ni. Nui sanga Belbel-i vei kual vêl chu thlîrin a en uluk ang reng viau. Rei vak lo a thlîr hnu chuan, "Miss Belbel-i a awm em? Pawimawhah han biak lawk ka va duh êm!" tiin a instructor-te chu a en zui daih a, anni paw'n Belbel-i nên en tawn zak zak pahin an lo nui sang mai. Chu veleh, "Awi! Suala rawn lût vat rawh. Min hmuh reng kha!" tiin Belbel-i chu a lo nui tûm deuh bâr bâr a, Zodina chu a melh rum ang reng hle. Zodina chuan nui sak pah hian, "E...i lo awm reng a ni maw Miss? Ka hmu lo che alâwm, tihpalh." tih leh luh a rual zui bawk. Belbel-i chuan rum ang reng taka lo melhin, "Hmm..." a lo ti ner nâng nâng a nih kha!

Belbel-i room lam panin an inzui chho nghâl a, Zodina chuan a fiam nui hak hak pah bawk. Chhâwng chung ber an thlen hnu chuan, "Belbel, ka rin ai daihin student i ngaha ka zâm lek lek a ni." Zodina'n a tih chuan, "Nia, Pathian zârah ka vânnei a ni ber mai. Chuan, engah nge i lo zâm vêl a? I lêrh vâng a nih kha!" Belbel-i chuan tia melh râmin a hawi tau zui hmak, einch! Nui sak pah hian Zodina chuan, "Anni aia chhe lo nang ka hmu dâwn bawk si chea maw le!" tih leh Belbel-i kâwnga va kuah chu a rual bawk.

Hmm...kei aia chhe lo an tam sia i lâi a nih kha!

Teuh lo, nang aia chhe lo i hmu nual pawh a ni maithei; mahse, kei chuan ka hmu ve lo. (Tih leh Belbel-i hmuia fawh zeuh a rual a, an nui dûn var var mai.)

Nih, paa eng ti tur berin nge i lo kal?

(Zodina chu a chek hluk a.) Eng ti tura rawn kal nge ka nih i hre lo maw? Beli le(h)! Ka ngai chea ka hmuh châk vâng che a nih hi ka rawn kal. (Tûm deuh hmuka Belbel-i a kuahna thlah a tum chu Belbel-i'n a lo chelh vat a, a nui zui sak.)

Ka hre renga ka zâwt kher che a nih kha haha...

Ka âwih lo lutuk Bel-i...khawibêl. (Belbel-i chu a nui hak hak a, rum zeta Zodina chu melh zui lehin...)

Khatin mi'n ko leh vaih teh i châk lo viau ang.

Hetianga inrunluih pah hian an infiam nui var var a, an hmêl hmuh a va nuam êm! Rei vak lovah tak deuh zâwkin an tîtî chhunzawm leh a. A whatsapp status a hmuh thu Zodina'n a hrilh chuan...

Ni e U Zodin, ka rilru hi a hah tak zet a ni. Tûna ka u leh ka pate dinhmun thlîr hi chuan nang nên pawh hian kan innei har ngawt ang. Mahse, inneih i duh hun hunah kei chu ka inpeih a ni mai aw!

Ka nu leh pate pawh engkim ka hrilh tawh a, ka thu tiam ang khân i u leh i pate inrem hun hunah le!

Mahse, lo inrem thei lo ta se.

An inrem leh êm êm ang lungngai suh.

Engtin nge i hriat?

Min ring tawp mai rawh Belbel. Chuan, i rilru ti hah lutuk lo la, i u pawh a dam ṭha a nia.

Aw le, nang aia rin tlâk leh rinawm an awm hlei nêm, ka ring tâwk tak zet che.

Chuan...

Chuan, eng nge? (Belbel-i hre thiam lo mit meng phâwk ang reng tak chu ngei hmêl zeta en pahin Zodina chu a va kûn hniam a.)

Chuuaannn....

Belbel-i paw'n a hre thiam ve ta tih hriat zeta nui sêihin a va fâwp zui vawng vawng a, an uar vak rih lo. Eisshh...

An chhuk leh dâwn chuan piah deuha thawmhnaw an khaite chu Zodina chuan nalh a tih thute sawiin an han ding leh rih a, Belbel-i'n lâwm thute a hrilh hnuah an chhuk zui ve leh mai bawk. Chutia an chhuk thlâk lai chuan, "Hetianga i inchei fo chuan miin an ru bo ang che tih ka hlau a nia," Zodina'n a ti zeuh chu Belbel-i paw'n nui sakin, "Nang pawh i ni ve tho aw! Hmeichhe dangte han melh eng emaw vaih teh i châk dâwn lo lutuk." ti vein an nui dûn leh var var a, ground floor an thlen hnu-a Zodina chhuak tur chuan ring deuh tak hian, "In Miss chhe lo lutuk hi lo vêng deuh teh u aw! Pasal ûm a tum tih min hrilh a nia," a ti chu mi dangte pawh an lo nui hak, Belbel-i paw'n nui tûm sak pah hian, "Awi! Suala chimawm pa," tih leh chum tuma a tin chiah Zodina chu nui var vara tlân chhuakin, a Bike chuan a inkhalh hâw zui ta a ni.

Tûnah chuan dâr 12:30 pawh pêl tawhin, mi ṭhenkhat restaurant-a châwlte pawh an chhuak zui sang sang a, lîrthei leh mipui vei vâk insûlpêl zut zutte thlîr pahin Brandon-a pawh MC kawtah chuan a ṭhu ve rân mai. Kawchhung tih daih nâna cold drinks a khât tâwka in leh zeuh ṭhînin, tu emaw hmuh a beisei nge ni a hawi ruai ruai bawk a, a chângin a en ngai a en leh veng veng ṭhîn. Chu MC kawt pawh chu Remi nên inkâi riala an lo vei vah ṭhinna hmun kha a ni ve tho si a; a mitthlaah Remi nên an inkaih laite leh a nui hmêl pawi sawi lo takte kha a hmu nawn awn awn mai a ni.

A hmêl leh pian bâkah a inthuamnate chuan an zir bawk a, motor kawng hnaih lama ṭhu nula chhe lo ve tak takte paw'n rawn thlîr leh ṭhînin an tîtî nui leh var var ṭhîn. Brandon-a hriat loh hian a thla pawh an la ru nasa tawh hle. An zînga nula pakhat chuan, "A pian saw a inphut mawi tâwk asin. A hmêlṭha lutuk lova a pa thung. Chuan, a dress saw a inhmeh bawk, a khabe zum deuh leh a nghâwng invuah dânte saw a dik zaih mai. Mahse, thinrimna nei a ang ka ti, a mit meng leh a hawi her rêng rêngah sawn thil dik lo a awm tlatin ka hria!" a lo ti dap dap a, a ṭhian pathumte pawh chuan an lo sawi zui ve nak nak bawk. "Ka hmuh tawh hnu a ang ka ti, khawi emaw laiah chuan ka hmu tawh ang. A hmêl saw ka hriat hnu a ni tlat." pakhatin a lo tih ve leh chuan an infiam nui ar ar hlawm a. Anni mai hi ni lovin, hmeichhe dangte paw'n Brandon-a chu enin eng eng emaw chu an sawi ve sep sep tho mai.

Tichuan, nî a liam zêla march thla pawh an hmang zo dâwn ta. Zan khat chu a suangtuahna vah vaihpuia hun leh nî a hman ralna ber, a in luahah Brandon-a pawh awm leh tawhin zu a lo in khawlh khawlh a, a in luah chhunga Remi sûlhnute chu ngawi renga thlîr kualin a inseh ruh ṭalh ṭalh bawk. Hemi zân hi chuan a ṭhiante an rawn lang miah lo va, zu in tur a nei bawk nên Brandon-a paw'n pawi a ti lêm lo. Mahse, chutia zu ina a ṭhut reng lai chuan a beisei loh lutukin Belbel-i a rawn lang hlawl. Phâwk zeta a u zu in chu rawn enin, "Awi! U mâm zu i in alaw? Ti nge hetiang êm êma i danglam tawh a? Rilru hahna tur min siam belh tawh lo hrâm teh khawngaih takin," tih leh Brandon-a hnaih deuha ṭhut a rual zui ve mai bawk.

Brandon-a chuan la chhâng mai lovin zu chu a in leh khawlh khawlh a, a mit meng leh a awm dân vêlah chuan a rûi deuh tawh tih pawh a hriat hle. A hmui chu tuai thuak pah hian, "Belbel, keimah vâng hian i rilru ti hah suh; kei chu ka ṭha alâwm. E chuan maw...i awhawmzia hi i hria em? Nang chuan nakin lawkah pasal i nei dâwn a, i hmangaih kiangah hlim takin i la awm dâwn. I u ve hi chu maw, a hmeichhe hmangaih pawh vêng him zo lo, a kalsan tâk leh a pain a duh loh mi sual, a tuithlâr hial ka nih hi!" tiin zu chu a thli zui leh kerh kerh a, mittui nên Belbel-i'n a en reng lai chuan a in zui leh khawlh khawlh mai. A mittui hru zeuhin Belbel-i chuan, "U mâm, ka pa nên in inrem leh hma loh chu pasal ka nei dâwn hlei nêm. U Zodina paw'n chutiang chuan min hrilh asin. Remi nên in inneih hnuah kan innei ve chauh ang." dam dap hian a lo ti a, Brandon-a chuan a en ka hau ringawt.

Chutah nui sakin Brandon-a chuan, "Ka pa nêna inrem maw? Remi nêna inneih maw? Ni lo e Belbel, chu chu a thleng ngai lo vang. Thleng thei ngai lo tur nghah hi thil dik a ni lo." a ti nuah nuah a, a rûi ṭawngkam chuan Belbel-i chu a dêng dawt a ni ber.

Mahse, nang paw'n beidawng lo turin min fuih ṭhin kha! Tûnah i beidawng leh dâwn si a maw?

Belbel, kan thil tawn a zir hian beidawn mai a finthlâk châng a awm ve a nia. Nih leh Zodina hian eng mah hrilh lo chein kal bosan che sela, ka pain Zodina hi duh lo bawk sela, engtin chiah nge i rilru a awm ang? Reh rî a ring an tih ṭhin kha ka hre thiam ve chiah, a ring mai a ni lo, a bengchheng mah mah tawh a nih hi!

U, Remi nên hian in intawng leh ngei ang tih chu ka tiam ngam lo che. Mahse, kum 10 hnu-a intawng leh te pawh an awm ve tho asin. Hetiang hian Remi'n hmu che sela i duh dâwn em ni? Beidawng mai suh khawngaihin, ka beidawn hlauva min fuih nasatzia kha i theihnghilh ta em ni? (Belbel-i chuan inhnît feihin a mittui a hru leh zauh.)

Fuihtu hi fuih ka ngai a, hruaitu hi hruai ka ngai ve ṭhîn rêng alâwm Belbel. Mahse, khawi kawngah mah nang chuan min hruai thei lo vang.

(Belbel-i chu a thaw hak a.) Bejdtmah la kei chu nangmahah hian ka beidawng ve ngai dâwn lo a nia, u. Chu chu hre reng rawh. Chuan, hei i ta tur...

Tiin Belbel-i chuan kekawr leh t-shirt nalh deuhte bâkah pawisa tam ang reng tak a pe bawk a, Brandon-a chuan la duh lovin han ṭang ve viau mah se, "I la duh lo a nih chuan ka pa angin min hmêlmâk ve taah ka ngai ang." Belbel-i'n a ti tlat sia, a pawm ve ta nge nge a ni. Zu in tawh lo tur leh inenkawl ṭha tura a chah leh hnu chuan Belbel-i chu hâwn tumin a ding zui a, kawngka lam a pan lai chuan...

Belbel... (Ani pawh a hawi lêt leh. Brandon-a chu a rawn pai phei deuh nak nak a.)

Ka lâwm e. Piang nawn leh theiin duh thlang thei dâwn ta ila, i u tho nih hi ka thlang ngei ang. (Brandon-a chu a nui sang bawk.)

(Belbel-i pawh a nui sak) Kei paw'n i nau, i farnu nih hi ka thlang fan ang. Chuan, mi chak leh huaisen, tum ruh êm êm ka u Brandon Zomuansanga kha hmuh leh ka beisei tlat dâwn a nia.

A tih hnuah an inmangṭha ta a, a mittui hru leh zeuhin Belbel-i chuan a chhuahsan ta a ni.

Rûn lui paw'n leh luan zai a rêl lo ang bawkin hun leh nîte paw'n kîr zai rêl lovin an her liam ve zêl a, tûnah chuan April thla an chuang kai ve leh ta reng mai. Eng tih mah tui ta lo chu Brandon-a pawh inah a tawm deuh chawt a ni mai a, ni khat chu inah awm leh tawpin ṭhuthlêngseiah youtube enin a ṭhu reng ringawt. Chuta a thil hmuh chuan a ṭhâwng ang reng viau a, thinrim inseh ruh ṭawlh ṭawlh hian a en zui zêl bawk. Pitar pakhat ruang chhar a nih thu leh a thattu nia rinhlelh Chakma pahnihte thlalâk, Police-te'n an lo târ lan chu enin a thinrim kher mai.

Aizâwl khawpui mai ni lo, Mizoram hi ka ram, ka neih chhun, ka ta a ni tih lo au chhuahpui ve lawm lawm ṭhîntu Brandon-a chuan, "Hnam dangho hian Mizote hi min ngam mah mah tawh a ni. Hnam dangte ṭhianah i siam ang u tih kha tûnah chuan a ngamawm fahran tawh loh. Nangni ang mi hnawksak-ho hi chu rei suahsual rawng bâwl turin dam rei lo ula a ṭha ber. Ka ram chhungah ngei thisen in rawn chhuah ngam a maw? In thil tih man têl turin lo inring mawlh rawh u. Pitar khawngaihthlâk tak lakah zahngaihna chhe tê pawh in nei lo va, ka lak aṭang hian lainatna hmuh inbeisei hlek suh ang che u." ti rilru vawng vawngin a inseh ruh ṭawlh ṭawlh.

Khâng hun liam taah te khân thih dân pângngai lo deuh mi ruang chhar te, pasalin a sawisak hlumte pawh a hre zauh ṭhîn a, mahse, a dinhmunin a zir loh êm avâng hian a ngaihven lutuk lo. A demawm lutuk lo vang, a chhan chu min ti buai tur hian kan kiangah mi tam tak an awm kher a ngai lo va, kan thinlunga mi pakhat lek awm pawh hi a tâwk viau ṭhîn rêng a ni. Tûnah chuan a thinrim hrîk thlâkna tur dapa hun leh nî a hman mêk lai a ni bawk a, remchâng a tawng fuh dâwn a nih hmêl ta riau mai. Tho zui zatin a hmanraw dahna lam chu a pan ta a.

Chhunzawm leh tur.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:41 am

🌹🌺1500 MILES🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 22.

Brandon-a chu bedroom-ah lût zuiin Almira hnuai bera suitcase ang deuh tool box dum tê fel at chu a la chhuak a, a khumah dahin a hawng zui zat. A chhungah chuan Commando-a a ṭan laia a ngainat leh a hman thiam êm êm thîrzum kawm, kutphah bawk chen vêl tur a sîr tawn hriam ṭha zet pahnih a lo awm a, a fawng hmâwr chu zungchal rawlhna tur tâwka kuain, a hûmna laia chemte fawng ang deuh, nylon dum hûm nuam tâwk tura vuah chu a mûm tliang hlarh bawk. Commando-te beihpui thlâknaah pawh a pai ngei ngei ṭhin, chemte pângngai aia a hman thiam zâwk kha a ni a; chûng a hmanruate a hmuh rual chuan a nun hluite pawh a hre chhuak leh kuar kuar mai.

Hun eng emaw chen chu hmang lovin dah ṭha tawh mah se, râlthuam chelek training chhuak ngat leh duhthusâma thiam a ni bawk nên, a fawng hmâwr kuaa a zungchal rawlh lûta a han vilik chhin fua fua chu a la rangin a nalh tak zet. Hêng a hmanruate hi alâwm pu Biakzuala fapa kal latu vai palite thah nâna a hman kha! Tin, Commando-a a ṭan lai khân Delhi Minister pakhat, Independence Day hmang tura Aizâwla a kal ṭumin, a kaiza vêng tura a thlante zîngah Brandon-a hi a tel ve a, chumi ṭuma a pai tâk leh an in a tlawh zawk ṭuma a dah ṭhat tâk kha a ni. V.I.P Bodyguard a nih miau avângin Airport Security-te tân pawh ken phal loh theih a ni miau lo alâwm le! Brandon-a phei hi chuan 'ka Bahhnuktê' tiin a sawi mai ṭhîn.

Tichuan, nî liamin hun a ral zêla April thla chawlhkâr hmasa ber, chawlhkâr tâwp lam an thleng ve leh ta reng mai. Zirtâwp zân dâr 10 a ri dâwn hnai tawh tihah pu Sangkima pawh mu turin bedroom a pan ve mêk a, a in aṭanga a hnawh chhuah tâk leh a tuithlâr tâk, a fapa Brandon Zomuansanga sûlhnute chu enin a ding leh veng veng ṭhîn. Tuithlârin a in aṭangin hnawt chhuak hial tawh mah se, a rîla rah a hmangaih êm êm; kha leh chen hun leh nî a hman ralpui ṭhin leh a lo chhuan ve êm êm ṭhin kha a nih miau avângin, a thinlung hriat rengna aṭang hian a hnawt chhuak famkim thei bîk lo ti ila a fiah ber âwm e!

Brandon-a room luah lumtu rêng rêng awm ta lo leh reh ṭhiap mai te, hun rei tak a room kawngkhâr khâra hawngtu awm ta lo chu ngawi rengin a thlîr a, Brandon-a chawlh hmanga a awm laia zân a mut dâwn leh, zîng a thawh apianga a fapa hmêl hlim sang mai a hmuhna ṭhîn kha ni miau hek le; Brandon-a room kawngkhâr ringawt pawh chuan an pafa thawnthu ngaihnawm leh ngaihawm tak a pai miau atin ni. Muangchânga inherin Brandon-a room lam chu a pan zui a, room kawngkhâr kalhna chu herh hawngin a chhung lam chu a thlîr veng veng mai. Room chhungah chuan Brandon-a hmuh tur chu sawi loh, a thawmhnaw zawng zawng pawh awm lova ruak huai mai a thlîr lai chuan Belbel-i a room aṭangin a lo chhuak ve chiah.

Belbel-i tui bottle ruak kenga sitting room-a chhuk tur hawi phei chuan, piah deuha a pain a u Brandon-a room a lo thlîr veng veng chu a hmu a, ding zui zatin a pa chu a en ve reng mai. Rei lo tê a en hnu chuan thâwm dîm taka pan pheiin, "Pa, i ngai ve tho ti raw?" a va ti zâwi sap. Chu veleh pu Sangkima chu a rawn inher a, Belbel-i chu ena nui sang chung hian, "Belbel, nu ni-a fa i neih ve hunah engtiang chiahin nge ka hmangaih che tih hi i hre thiam ve chauh ang. Ka'n mu hahdam ang e, nang pawh meng rei lo la," tih leh kal tuma a inher chiah, "Pa, engtia rei nge lem i chan dâwn? Ka u hi i tuithlâr tak tak lo ti raw? I awm dânah khân engkim ka hre thiam vek asin." Belbel-i'n a ti ve leh.

Belbel, lem ka chang hlei nêm. Nakinah kan la sawi ṭha dâwn nia, ka'n mu phawt ang e.

Pa, ka mitah tak hian en la thu dik min hrilh ta che. Ka u hi nang paw'n i theihnghilh thei tak tak bîk lo ti raw?

Theihnghilh theih mai loh mihring hi an awm ve hrim hrim alâwm, Belbel. Hun rei leh rei loh lam a ni lo, kum tam liam pawh ni se kan thinlunga mi bîkte hi chu an danglam a ni. In unau hi he khawvêla pa pakhat ka nih vena tura Pathianin min pêk in ni a; mahse, tûnah chuan nang chauh hi ka neih chhun i ni tawh. Ti khân a chiang mai em? Mu hahdam rawh kei pawh ka mu ang e.

Pu Sangkima chuan bedroom pan a rual zui. Belbel-i chuan a pa chu thlîr zui vang vangin a mittui pawh a parawl leh râm tawh a, a pa leh a u-te mizia a hre chiang si; a u hi kumkhua atân an inah hian a rawn kîr tawh lo mai ang tih a hlauthâwng bawk nên, a mittui chu hru zauhin sitting room lamah chuan a chhuk zui ve leh ta a nih kha! Dik tak chuan pu Sangkima hian Brandon-a room hi thlîr vawng vawng châng a nei fo va, pa inthup thiam leh fîmkhur, luhlul ve tâwk tak ni bawk chu khâng kum liam taah khân Belbel-i hian a hmu ngai lo mai zâwk a ni.

Tichuan, zân rei tial tialin zanlai dâr 12 pawh a ri dâwn hnai tawh tihah, Brandon-a pawh a Car chhungah ṭhuin pitar thattu ni-a rinhlelh chakma pahnih te, chawlhkâr lai hâwla a hmuh zeuhna vêng tlabirh deuhah a lo châng ru leh khiau tawh a; a hmuh laiin a tân chêt lâk a rem mai lo bawk nên, "Ramsate chu an ngampatna khân leh mualah bawk kalin an tla leh ṭhîn" tih hi a hre chiang bawk a, an vah chhuahna tur ni-a a rinhlelh deuhte enin a tlân kual leh zuai ṭhîn bawk. Kha pitar an thah tâk chungchâng thu chiang zâwk Police-te sawi a hriat aṭang khân, anmahni ngei chu an ni tih hai rual lohin a chiang êm êm a; ama chana a dah chhin phei chuan a thinrim tak zet.

Ni e, kha pitar kha nikum Krismas dâwna tar pension lâwmman la ve thei lo, kum thar march thla tâwp lama la ve chiah a lo ni a; a fanu nula senior ve lam tawh nên chauha khawsa an ni nghe nghe! A fanu hian thlai khâr chhâwngin a zuar ve ṭhîn a, chu chu sum an hmuh vena ber a ni bawk. Amah hi pitar la chakvak ang reng tak niin, upa lutuk a la ni lo bawka in chhung sekrek khawihah pawh a la ṭangkai hle.

Chu pitarin upa lâwmman(ka'n ti mai ang e) a lâk ve pawh khân a tlâi tawh ang reng viau a, khua a thim dâwn hnai tawh. A fanu thlai zuarin zân dâr 8 vêl thleng tal a thil zawrhte chu ṭhutpui a duh thu a hrilh a nih kha! Chumi hun remchâng chu khâng mi sual chakma pahnihte khân an nang fuh ta a ni. Pitar ina an luh dâwn hian chhak deuha nu pakhat inthiar zo rawn hawi thlain a lo hmu a, anni chakma pahnihte lah chuan rinhlelh an kâi loh nân an hmêl an thup lêm lo bawk nên, kawmchhak nu pawh chuan an kawmthlangte chhungkhat hnai chu an nih ringin engah vak a lo ngai lo kha a ni. Mahse, a fanu zân dâr 8 thleng tal thlai zawrh tum kha a inhralh ṭhat theih leh si loh avângin zân dâr 7 vêlah a hâw zui ve ta a; chutah chuan pitar chu an lo that fel dêr tawh a nih kha.

Chûng thilte a ngaihtuah chuan Brandon-a chu inseh ruh ṭawlh ṭawlhin a thinrim kher mai. Chawlhkâr tîr lam kha chu Police-te'n mi sual pahnihte zawn hnapui hi an thawh avângin, a sa pêl laite hi an tawmim tlat dâwn tih a hre chiang êm êm a; chu vâng chuan ani pawh hian chawlhkâr liam ta leh chawlhkâr thar tîr lam kha chu a zawng teh chiam lo. Mahse, Police-te hriat lohah a mit leh beng a chhi ve kar thung a, hetia Police-te thâwm a reh deuh ta tih hian a hma aia nasain a zawng ru ve char char mai a ni. A beisei rûk ang ngeiin chawlhkâr lai hâwlah khân hmuh pawh a hmu ngei a, zan rei lama rawn tei chhuak ni mah se a tân chêt lâk a rem tlat lo. Tichuan, an kal ṭhinna leh an tei luhna leh chhuahna ṭhinte hriat tuma zui ru zêlin, tûnah chuan a hriat duh âwm engkim a hre kim thawkhat tawh bawka a inpeih tawh et awt hle.

Tûnah chuan zanlai dâr 12:30 pawh a pêl ta. Chutia ngawi renga a chân lai chuan hun âwl hnawh khah nân Remi nêna an thlalâkte chu a en leh zeuh ṭhîn a, chu chuan a rilru hruai thui zêlin a mitthlaah Remi sakruang duhawm êm êm mai chu a rawn lang leh zut zut mai. Zan khat an pahnih chiaha bathlâr thlang lama an ṭhut laia Remi'n, "U Brandon, kal bosan ta che ila engtin nge i awm ang? I pa lahin Mo atân min iai bawk sia kan inneih theih hmêl bawk si lo va. Kei chu ngaihtuahawm ka ni lo a nia aw!" fiamthu ti tak deuha a tih laite kha hre chhuak uai uaiin a ngaihtuah zui neuh neuh a, Remi nui hmêlte kha ngun taka a ngaihtuah leh meuh chuan, a mit menga takna leh beidawnna inpawlh, a hriat thiam lohna tura Remi'n a thup ve ṭâwk ṭâwkte kha a hmu chiang ta hle.

Chutah zet chuan, "Remi, i fiamthu phêna thu tak awm kha ka lo hmu thiam lo a ni ti raw? Khawngaihin min ngaidam hrâm ang che. Keimah ang mipa zei hawi lo lutuk min tawng hi i vân a duai a ni. Mahse, i vânduaina chu ka tân vânneihna a ni si; lo dam ṭha reng ang che aw!" ti rilru vawng vawngin thâwk a la zui hak. Chutih lai tak chuan a mi duhte pahnih ni âwm tak, thang âwk chhuak hlim ang maia hawi deuh zak zak chunga one way chhim lam aṭanga rawn phei mêk leh, vêng mawng lam pana an chhuk thla tur chiah chu a hmu fuh leh ta chiah mai le! Chu veleh a car aṭang chuan chhuak nghâlin, Sakeiin a sa seh tur uluk taka veh ṭhêm ṭhêm ang mai hian, remchâng apiang phên pahin chu mite pahnih hnungah chuan a zui thla ve zat.

Thui vak lo a zui thlâk hnu chuan piah deuha street light hlui lam tawh zâwnah dingin, hnung lam leh sîr lam an hawi kual leh zak zak hnuah an mask vuahte chu an lo hlîp tawh a, sikret ṭana kuhva hring an ei zui leh lai chuan an piah mi kâwm kâr thim lai aṭang chuan, Keipui rilṭâmin a pum hnawh puarna tura a sa seh tur a lo en rân ang mai hian Brandon-a chuan a lo en ve reng bawk. Mahse, a hmun hma vêl chu duhthusâm a la ni tlat lo, duh aiin a êng a, a la ual-au hrat a ni. Street light hnuaiah chuan a mi zawnte ngei an ni tih a hre tawh bawk nên, an chhuk thlâkna tur ni-a a hriata chhuk khalh turin a tawlh kiang leh rih a.

Chu mite pahnih pawh chu chakma ṭawnga tîtî barh barhin an chhuk zui ve leh mai bawk. Kuhva ṭhial paha sikret pak khu hlat hlatin an tîtî nui leh sak ṭhîn a, zan rei lam tawh a nih avângin an tîtî erawh a zâwi viau. Thawveng ang reng taka thui lo tê an chhuk thlâk leh hnu chuan in pawh a hma aiin a lo khât pharh tawh a, a chhe sâwt hlawm viau bawk. Street light an hlat tawh bawk nên kawng pawh chu black top loh a ni bawka khuar dâi sual leh zauh ṭhînin an innuih tawn suk suk mai. Chutia an chhuk leh deuh chiah an hma lam kawng sîra mi pakhat lo ṭhu reng leh, sikret lo pak khu ve hlat hlat an hmuh rual chuan ding detin an en zui reng a, an inmelh tawn leh zuk.

Chutih lai tak chuan, "E...ṭhiante u, kuhva in nei em? Ka lo ei zo hman pek alâwm maw le!" rûi awkâ deuha a lo tih tâkah chuan anni pahnih pawh chu an pângngai ve leh mai a nih hmêl. Pakhat zâwk chuan, "Aw nei e, kha ka lo ṭheh ang che." tiin pan hnaih chu an rual zui a, an mi hmuh pa lah chu a rawn pai deuh khut khut bawk. An hmaah tak chuan rawn ding bu lûk lûkin, "Ka lâwm e, chuan...engati nge in va hâw tlâi ve? In khiat ve tho em ni? Black dog nge Royal stag?" a lo tih leh chuan chakma pahnihte pawh chuan nui var varin, "Vodka ngat le! Ṭhianpa, he laiah hian kan va hmu ngai lo che ve," kuhva ṭhehtu lo zâwk chuan a lo tih zawm leh.

Nia, ka pain min hnawt chhuak a... Kalna tur dang ka hre si lova hetah hian ka ṭhu ringawt a ni. (Kuhva chu Brandon-a chuan a ṭhial mêk bawk a, a thim deuh nên duh angin a hmêl chu hmu chiang thei lo mah se, thima an awm rei deuh hnu chuan tlêmin an hmu chiang thei deuh.)

A nih chu, a pawi hle mai. Nih, kan hmanhmawh ang reng sia kan kalsan phawt ang che ṭhianpa. (Kal tuma an inher ṭan chiah tihah.)

Chuan...ka pain min hnawt chhuak hi pawi viau mah se, a aia pawi pakhat a awm.

Eng nge ni?

Pitar in that kha!

Eng a?

Phâwk zeta Brandon-a an en lai chuan a kut a rawn phe zuai a, an hrawk aṭanga thisen lum rawn chik puat puat chu hupin an thaw ri zui hrawih hrawih mai. In khâtna lai tak a ni bawk nên an thaw rî bawrh bawrh vâng chuan harh thei tur awm hek lo le! An tlûk hnu-a ke an leng at at lai chuan hmutu an awm leh awm loh Brandon-a chuan thlîthlaiin a hawi kual zak zak a, rawn hmutu an awm lo tih a chian hnu-ah chu mite pahnih chatthla tawh chu tîm leh ih pawh nei hauh lovin, an taksa chu a Bahhnuktê hriam leh hmâwr zum ṭha zet chuan a pir thlêr leh zung zung bawk. A Jacket dum leh a kuta thisen lum a kai leh chu engtin emaw tak hian nuam a ti ru tlat. An ruang pawh seng hawi lovin a chhohsan zui leh hmak mai a nih kha!

A Car dahna a han thlen chuan a inkhalh hâw nghâl a, zîng lam dâr 1:30 pelhah a in luah pawh a inkhalh thleng ve leh mai bawk. In chhung a luh hnu chuan kawngkhâr kalh zuiin sikret pak khu hlat hlat pah chuan tui khawihna lam a pan zui leh a; a bahhnuktê leh a kuta thisen kaite chu a sil fai zung zung hnu-ah a Jacket pawh chu a hlîp nghâl a, bathroom-ah lûtin bucket-ah a Jacket chu dah leh tui leih hnan a rual bawk. Chumi hnu chuan a sikret chu bawlhhlawh bâwmah paihin a room-ah hâm bâi bâi pahin a lût zui a, a tûk chanchinthara a chêt thawh dân chungchâng ngaithla turin rei lo têah a muhîl zui ta a ni.

Tichuan, nî a liam ve zêla tûnah chuan June thla an chuang kai ve leh ta. Chanchinthar mai ni lo, chanchinbu hrang hranga pitar thattu ni ngeia rinhlelh leh Police-te zawn lai, April thla chawlhkâr tâwp lama thah an nih chungchâng khân Aizâwl khaw mite tîtî a luah hneh leh viau kha a ni a; Police-te lahin tu tih nge tih an hre thei mai si lova an lu pawh a hai ang reng hle. Kawng lehlamah chuan rei deuh mi sual hnu chhui hah ngai lova dah ṭhat an ni ta kha lâwmawm viau mah se, mi sualte pahnih ruang an hmuh kha râwng taka sawisak niin an hria a; khatiang khawpa sawisak ni si an hmêl a him pial erawh kha chu mak an ti tak zet. Ṭhalai phawk zual deuhte lahin, "A City Hunter chêt ruih mai." an lo ti ve sep sep bawk a nih kha.

Police-te meeting-naah pawh an mi zawn laite dah ṭha ṭhîntu chungchâng hi an sawi nasa viau kha a ni. Ṭhenkhatin ṭha an tih mai laiin ṭhenkhatin Police-te hming hliauna a nih theih thu te, hetianga tualthah ringawt hi dân phal loh a ni hrim hrim tiha ṭan khawh an awm ve bawk a, a titu chu chhui ve ṭhîn mah se Vântirhkoh sûlhnu chhui ang hlauh an ni mai si; a tâwpah chuan an ṭhat en liam ve ta ringawt mai a ni.

Nî tlêm a liam leh hnu chuan June ni 18 ninga nî(Father's Day ni bawk.) an thleng ve leh ta reng mai. An ṭhiante whatsapp status-a an pate thlalâk leh thla an lâk dunte post sup supin an wish thlum thei viau a; a ṭhiante status-ah pawh Brandon-a hian a hmu ve reng bawk. Mother's Day a lo thlen apianga hawi hil ṭhîn kha a ni a, tûn Father's Day-ah pawh hian a pa thlalâk post-a wish thei a ni tawh si lo; 'Pate nî(Father's Day) hi a tân chuan fahrah vâk vai mai a ni ta tih a hriat chian lehzualna tur mai a ni ta a nih hi! Belbel-i status a view chuan a pa thlalâk leh an pathuma thla an lâk a lo status chu a en vang vang a, hlim taka an nuih ho laite kha hre chhuak kuar kuarin a ngai thar ve vawng vawng bawk.

Chutah chiah chuan a pain a thihsan tâk a hmangaih Remi a hre chhuak chiang kher mai. Tûnah hian lungchhe takin khawi laiah emaw a lo ṭap kerh kerh ang em? A mittui hrûksaka hnêm turin tu nge a kiangah awm ta ang? Lungchim taka kuaha a sam chûlsak heuh heuhtu nih leh a châk thar êm êm a; a ngaihtuah thui deuh chuan Remi chu a lainat tak zet a ni. Chûn leh zua awp loh hrai riang vâi nih natzia leh hrehawmzia hre thiam tur hian ani paw'n a nu a lo chân ve tawh kha a ni a, an natna leh hrehawmnate inṭâwm thei tura an nuna mi hlu takte hloh ve ve an ni miau alâwm le! He nî Father's Day hi pa nei tawh lote ang chiaha fahrah a nihna hriat thartîrtu mai niin, mi ṭhenkhat an hringtu pa hloh tawhte status chuan a thinlung an vit ngawt ngawt a, chûng mite nên chuan chhung rila inzawm tharin huang khatah an awm tlâng ta a ni ber.

Amah a inkhawngaihna ai chuan 'Ka pa' tia koh tur nei ve tawh lo, Vânramah chauh a hmuh tawh tur a pa ngaia Remi lungchhe mittui luang tur chu a lainat zâwk a, ani paw'n 'Ka pa' tia koh tur nei ve tawh lo mah se, a hmangaih hmeichhe rilru no leh âwm nêm zâwk Remi rilru nâ leh hrehawm taka awm tur chu a thinlungah a lian zâwk tlat a ni. A rilru chuan, "Remi, nang tal hi ka kiangah la awm ni la chuan khawvêla fahrah hlim ber ka ni mai tur! Ka hmuha ka khawih phâkah awm lo mah la ka thinlung hi chuan a hlat ngai dâwn lo che a nih hi! Pasal ṭha tak i lo nei ta a nih pawhin kei hian i hriat rengna kil khat lek tal ka luah ve reng ka beisei a nia. Lo him la, lo hlim la, lo dam ṭha reng ang che. Vânramah kan lo intawng leh a nih chuan i pa chu min hmêl hriattîr ve rawh aw!" ti vawng vawngin a mittui parawl chu a hru zauh bawk.

Chutih laia mak a tih rûk êm êm erawh Luahpuia status up rêng rêng lo chu a ni. Kum liam taahte khân Luahpuia status hian a hnuk an vit ṭhîn viau kha a ni a; fahrah dik tak ni tura a nu leh pa chân tawh bîk kha a ni miau atin ni! Mahse, Luahpuia chuan fahrah ni lo turin chhungkaw thar, khawvêl thar nuam tak a nei tawh a, chutah chuan a hlimin nuam pawh a ti viau. Chutih rualin, hringtu nu leh pate erawh kan tâna an hlut bîkna leh an danglamna hre chiangtu a ni bawk a, hemi nî pawh hian a ṭhian ṭha êm êm mai Luahpuia hian, a hringtu nu leh pa ngai thar vawng vawng chungin hna a thawk leh mêk tawh em ni ang? A dam ṭha lo nge ni a, Father's Day hi a theihnghilh zâwk ni ang le tihte ngaihtuah zuiin Luahpuia chu a khawngaih thar leh vawng vawng mai.

A tâwpah chuan, a buai deuh anga a whatsapp hman lo pawh a ni maithei tihte a ngaihtuah zui leh a, zân hun a la awm bawka ngai châng rih phawt teh ang tia phone chu dah rihin, zanriah buatsaih turin a tho chhuak zui ta a ni.

Chhunzawm leh tur.


Show post links
Top

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:41 am

🌹🌺1500 MILES🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 23.

Thlangtiang sûl zuia tûrni her liam nguai nguai lai kha tlâng bawk ngawi ngulin a pum hmawm tâkah chuan, zân thim thu neihna chuan Zoram dung leh vâng fang chhuakin a luah khat a, nikîr khuangruah nuar paw'n kian zai rêl rihin vân pawh a thiang kûk mai. He fûr khaw thiang tak hnuaia arsi kawp chawi vânglai chheute paw'n vân zâwl an mawi leh ṭhap tawh a, thil siam manhla tak zawng an va ni chiang êm! Siamtu finna leh them thiamzia mihring ṭawnga hrilh fiah sên rual loh, a thlâwna hringfate'n kan hmu thei ringawt pawh hi kan nihlawh mang e. Mihring siam chawp thil mawi leh ropuite chu man chawia ente a ngai a, pawisa tam tak sênga leite a ngai miau a ni. A kut chhuak vân chei mawi tura Nî, Thla leh Arsi-te siam nachâng a hre lehzêl hi Pathian finna ropuizia hi aw! Vân silhfênte khi siam ve lo ta se a ho viau maithei a nia. Ni e, "Vân mawina daingûlahte khian ṭang ve thei teh rêng ila aw!" a ṭawngṭai thu chhamah Pu James Dokhûma paw'n a lo tih nghe nghe kha maw le!

Chu zân boruak thiang leh vawt deuh raih hnuaiah chuan, Aizâwl khawpui pawh zan dang zawng aiin a mawi emaw tih tur hi a ni a; motor kawng leh kawtthlêr ṭhenkhata mihring leh lîrthei vei vâkte nên phei chuan hmuhnawm lehzual tak a ni. Zân dâr 7 a nih chuan a phone ri tleng tleng chu Brandon-a chuan a pick vat a, Luahpuia'n an ina rawn kal turin a lo hrilh zui. "Tûnah hmanhmawh takin rawn kal nghâl rawh." tih leh phone off a rual daih sia a chhan zawh hman a ni tlat lo. Brandon-a pawh chu ngaih ṭha zân lova insiam mawlh mawlhin a chhuak ve nghâl a, a Car dahna a han thlen chuan Luahpuia-te in lam panin a inkhalh chhuak zui ta a ni.

Chutia Luahpuia-te in pana a tlân lai chuan a rilru a kal thui kher mai. Luahpuia chhungte dam lo serious deuh an awm a nih te a ring rum rum a, Luahpuia'n hmanhmawh tura a lo chah kha a bangbo ang reng viau. Zân dâr 7:30 vêlah Luahpuia-te in chu inkhalh thlengin, a Car aṭanga hmanhmawh taka chhuah leh kawngka lam pan a rual zui zat.

Kawngkhâr a kik karh karh hnu rei lo têah Biaktei'n a lo hawng a, a hmêlah chuan rilru hahna hmuh tur a awm si lo; Brandon-a in chhunga a lût chuan a ṭhiante pali leh Pu Nunsanga-te nupa lo ṭhu ṭhapte chu a en kual nghâl zung zung. Chu veleh Luahpuia'n a kutphah hlaipui bêng thuk thuk pah a, "Huhuuiii... Fapa tlân bo a rawn thleng e. Ti khân han ṭhu hahdam ve phawt teh," a lo tih tâkah chuan Brandon-a pawh a thaw deuh huai mai. A ṭhiante chu thil awmzia a zâwt ṭhîn, anni lahin an hriat bîk loh thuin an lo chhâng si; pu Nunsanga-te chhung lahin hmêl hlim sang hian an rawn thlîr a, anni chhung pawh hian Luahpuia thil tum erawh an hre bîk hauh lo.

A mi duhte an kim tâkah chuan Luahpuia chu a lo ding a, Zodina-te chuan Committee meeting tur ang an inti tawh lutuk. Chutah Luahpuia chuan a ngaihna hre lo zeta a chhungte leh a ṭhiante'n an rawn thlîr ṭhap lai chuan, "Aw le, ka koh khâwm chhan che u chu....ih englo... Vawiin hi Father's Day a ni a, ka theihnghilh emaw in ti maithei. Ka nutei leh ka patea tân hian thil ho tê han tih ve ka duh a, kum danga ka la tih ngai loh a ni." tia bul a ṭan chu hmêl hlim sangin an thlîr veng veng mai.

Luahpuia chuan rawn sawi zawm lehin, "He lai hmuna awmte hi min hre chiangtute vek in ni a, he ka thil tih tum vâng hian zan eng emaw zât chu ka muhîl ṭha thei tawh lo," a lo ti chu an nui nghâl hak. Amah pawh chu a nui sûng lehnghâl a, a ṭawngkam thiam lohzia hre chiangtute an ni bawk nên, a inbuatsaihna lamah a muhîl mang lo vang tih chu an âwih tlâng khawp mai. Chutia an thlîr ṭhap lai chuan Luahpuia chuan a kekawr iptê aṭanga a phone phawrhin, Father's Day-a a patea tân bîk liau liauva a thu ziah chu a chhiar zui ta a ni.

"He khawvêla fahrah pakhat ni ve tura ka nu leh pa ka chân hnu khân, ka nunah 'Pa' nihna chanvo chelhin i rawn lût a, ka patê. I rîla rah i hrai i hmangaihna ang bawk hmangaihna min pein min enkawl sei lian a, min hringtu ka nu leh pate ngai hman lêk lova min siamin ka nutei nên hian an ai in awh zo tak zet. Ka nutê nang pawh, nu hmangaihna thûkzia ka hriat thiam ve theih nân ka nunah 'Nu' chan i rawn chang a, nangmahni vâng hian Father's Day leh Mother's Day a lo thlen châng pawhin ka hawi hil ngai lo; mahse, ka nu leh pate kha ka ngai ve ṭhîn.

Ka patê, ka pa hmun ruak luah khat tura 'Pa' nihna chanvo i chelh ngam hi i huaisen ka ti, khawvêla pa huaisen ber i ni, ka nutei pawh chutiang bawkin. Min hmangaihna, min enkawlna leh engkim ka tâna in tihte ka ngaihtuah hian, eng mah vûina tur ka nei lo va; hêng bâk hi chu ka nu leh pate hnênah pawh khân dîl belh tur ka hre tawh âwm lo ve. Chu vâng chuan ka patê, vawiin 'Pate nî, Father's Day chibai ka bûk a che. (Chhiar paha a chhungte a en kual pah chuan mittui fîm tling piau chunga an lo thlîr nui sang chu a hmu chiang hle.)

A tâwpna ber atân chuan, ka nutê, ka patê, ka hmangaih che u. Biaktei leh Sangpuia-te pawh ka hmangaih che u. Chuan, ka lei kawppui ṭhian te, ka hlimna leh lungngaihna min ṭâwmpui thiam êm êm ka tawng che u hi ka nihlawh kumkhua tawh dâwn a nih hi! Mi hausa fate hi an lo chapo vek lo tih pawh ka hre chiang ta. Chuan, hetiang chhungkaw thar nei leh tur hi chuan fahrah nih leh pawh ka inhuam sak mai. Ka nutê, ka patê, in chungah ka lâwm tak zet e." a mittui hru zauha Luahpuia'n a lo ti nui sang mai chu hmuh a va nuam si êm! Rinpuia phei chuan mittui a hru zing malh malh hle.

Chutah pu Nunsanga chuan a mittui hru ve zauhin, "Bawiha, tûn aṭang chuan ka patê tiin min ko tawh lo la, 'ka pa' tiin min ko tawh rawh aw, i nutei pawh 'ka nu' tiin i ko dâwn nia. Kan fapa dik tak i ni tih hi ringhlel ngai suh ang che. Engtianga rei nge 'ka nu, ka pa' tia min koh châk êm êm hian i lo awm ṭhin ang le? Kan lo hre har lutuka i nu nên hian min ngaidam dâwn nia." hnuk ulh ṭeuha ti dap dapin Luahpuia chu a va kuah zui vawng vawng. Mi dangte pawh chuan mittui fîm tling piau chunga nui sangin an chibai sap sap a, a ṭhiante chuan Luahpuia chu entawn tlâk an tih thute chhâk chhuakin an hmêl hmuh a nuam kher mai. Brandon-a mit sen râm leh bui deuh chûkte chuan, Luahpuia kam chhuak avâng khân a inti pachang thei bîk lo tih an ti chiang viau a ni.

Hetiang hian hlim takin hun leh nîte an hmang ral ve zêl a, nî leh thla tam liama kumte hial a lo vei hnu chuan, Remi kal bo aṭanga chhûtin kum thumna an hmang leh mêk a ni. Chutih laiin Cassie leh Luahpuia pawh an inhnîm hnai sâwt ve tawh viau. Luahpuia hian hausakna, hmêl leh pianah chhuan tur êm êm nei lo mah se, tubohliana ang êm êma hmelchhia kha chu a ni bîk lo va, a chhung ril ṭhatna hian Cassie thinlung hi a hneh ti ila a dik ber ang. Pu Sangkima sumdâwnna leh Belbel-i designing centre-te pawh a hma aiin an lian lehzual tawh a, foreign aṭanga rawn tlawhtute pawh Belbel-i hian a tawng zeuh zeuh tawh. Mafela-te ṭhianho pawhin Brandon-a ngai tak chungin pu Sangkima dâwrah chuan an la thawk ve zêl chu a ni a; a sûlhnute pawh thlîr nin tih an nei ngai lo.

Heti a nih lai hian Brandon-a erawh a ṭhiante hian hmuh zawh loh châng an nei zeuh zeuh tawh a, a ṭhiante hi a pâwl khât sâwt ta hle. Pu Sangkima sumdâwnna tluang chho lah chu a fapa Brandon-a lakah pawh hian a khauh leh sauh emaw tih tur hi a ni a; sawrkâr mi liante leh mikhual duhawm tak tak in lêng a nei thei ta viau bawk nên, a nun pawh hi a hlimin a nui sang reng thei tlat a ni. Kawng lehlamah chuan Brandon-a thu sawi kha a dikna chen a awm ve tlat, tûnlai khawvêl changkâng takah hian pu Sangkima pawh hian neih belh zêl duhna rilru puin, ṭhenawm hnaite leh a hlawhfate tih lâwm dân lah a thiam mai sia; hêng a milen lehzualna hian a thinlunga Brandon-a awm hi an hliah hneh deuh tih a ti chiang hle. Mihring thinlung duhâmzia tak hi chu aw!

Belbel-i pawh a hma aia a buai lehzual tâk avângin a pa pawh hi a tîtî-pui hman meuh lo va, a hman chânga a u chungchâng a sawipui lahin pu Sangkima lah hian, "Belbel, ka sawi tawh kha... A duh thlanna a nia, ngaihdam min dîla a rawn kîr leh a nih chuan ka ngaidam thei mahna!" a ti fel thân zêl a nih kha. Chutiang chu a pa chhânna leh rilru a nih miau avângin, Belbel-i beidawng ve deuh tawh pawh hi a room-a a ṭah kerh kerh ṭum pawh a tam tawh hle. A u Brandon-a a call lahin phone a switch off loh leh a ring ral ṭhak ṭhak châng a awm bawk a, Zodina-te nên a in luaha an va kal ṭumah pawh Brandon-a hi hmuh turin a awm lo fo ti ila a fiah ber âwm e! Buaithlâk ta ber chu mi luhlul ve ve an in-ep tlat hi a ni.

Chutiang chuan hun leh nîte an ral zêl a, favâng boruak theng thâwt lai a ni. Zan khat chu Luahpuia'n a rilru put hmang hrilh tumin Cassie chu a call a, Cassie-te compound zau ṭha taka ṭhutna nuam deuhah khân ṭhut dun a duh thu a hrilh nui sûng a nih kha.

A nihna takah chuan Luahpuia hian phû lo a intih êm avângin ṭhian angin a en ve tawp a ni ber. Mahse, a ṭhiante'n an rîmpui ṭuma Cassie awm dân aṭanga engkim hre thiam vek an ni bawk nên, bêm ngei ngei turin Luahpuia hi vau titih thlêm titih fuih titih hnek titih pêt titih bin titih, (a la tam mai)-a an nawr luih tlat avânga hetia bêm tum mâwl ve tawp hi a ni a; Cassie'n a yes loh vaih chuan Luahpuia hian a chûm awk duh mai ang tih pawh a hlauhawm viau. Luahpuia inchei ve pawh khân a thawmhnaw a va thlâk zing tak!

Zân dâr 8 vêlah Cassie-te in lam pan chuan an inkhalh phei ta a, sum a lâk luh hnem ve bâkah a pa Nunsanga chowkidar hlawhte nên Luahpuia pawh hian Bullet a lei ve tawh nghe nghe! Chutia Brandon-a tel lova an ṭhian li-a an feh chhuak chu Luahpuia huphurh leh phûr ru tho bawk si, a neih ve phâk pawha a rin ngai loh Bullet a han khalh ve ta chu a lâwm bawk nên a lo nui leh vur vur ṭhîn.

Thui mawi tâwk an tlân hnu-ah Cassie-te in chu an thleng a, an lîrtheite an dah fel hnu chuan, "Bro, zanin bâk hi chance ṭha i nei tawh lo maithei a nia, zei vak a ngai lo, tlang takin hrilh tawp mai rawh. Hetah hian kan lo nghâk mai ang che aw!" Zodina'n a lo ti chu Luahpuia pawh a bu nghauh nghauh mai. Tichuan le, ama huaisenna ringawt hmanga a bêm ngam loh Cassie chu, a ṭhiante fuihna leh huaisenna pêk belhte hmang ngeia bêm turin a pan zui ta a ni.

Cassie-te varanda a va thlen rual chuan second 5 vêl a ding deuh vang vang a, a lu thak lopui hiat sut sutin a thaw leh hak ṭhîn. Chutah inti confi deuh hian kawngkhâr chu a kik zui karh karh a, lût tura rawn hrilhtu chu an awmpui nula a ni tih a hre nghâl. Luahpuia pawh chu lût ve maiin a hawi nghâl ruai ruai a, "Ih...Cassie a awm na nge? Ka pi leh pute...awh khaih! I pi leh pute pawh...a nu leh pate ka tihna..." a ti duah mai. An awmpui nula Mahriati paw'n nui var varin, "Ka pi leh pute chu an lêng chhuak a, u Cassie chu a room-ah a awm ang, ka han ko ang e. Lo ṭhu rawh u Luahpui." a lo ti zung zung. Cassie a han koh hnu rei lo têah nui sangin Cassie pawh a rawn chhuk zui ve mai bawk. T-shirt eng leh kekawr ṭial a hâkte nên chuan Luahpuia paw'n a en ning thei mawlh lo.

Rei vak lo an tîtî hnu chuan pâwnah chhuak zuiin, zan dang pawha an lo ṭhut dun ṭhinna lam chu an pan dûn ta a; an nui dûn sang tawh mai. Cassie-te in sir zâwl laia ṭhutna dûp nuam ang reng tak, khaw thlîr pah rem em em êm bawk si leh ṭhenawm hnaite'n an rawn hmuh mai theih lohnaah ngei chuan ṭhu dûn lehin, zâna Aizâwl khawpui êng tuarh maite chu mawi an tih thute sawiin an ding deuh vang vang. Luahpuia chu a thil tumin a mawlh na deuh nge ni a tak deuh rûn mai a, ngawi rengin Cassie chu a melh leh zuk ṭhîn. Aizâwl khawpui an hmuh theih chin thlîra Cassie tîtî siam siam paha nui leh var var ṭhîn chu Luahpuia chuan hmuhnawm a ti tak zet. Chutah Luahpuia chuan, "Cassie," a'n ti thûm dût a, Cassie paw'n beiseina mit meng de ser ser nên lo chhâwn no sapin a nui sang bawk.

A lung chu a taksa pâwnah a rawn phu chhuak dâwna hriain Luahpuia chuan a huaisenna zawng zawng sâwm khâwmin, "Ih...min duh ve em tih chu ka hre lova kei chuan ka phû lo êm che a ni. Chuan...ih...kan dinhmun a inthlau bawk sia ka rilru a hah tak zet huiisss... I dam ṭha rêng rêng em?" a'n ti kawkalh nuaih mai chu Cassie pawh a nui sak. "Luahpui, eng nge sawi i tum ber? Eng nge min hrilh i duh? Chiang deuhin han sawi la..." Cassie chuan nui sang hian a lo melh ralh bawk. Luahpuia chuan melh lêt ve zuk zukin a aw a'n thian leh kharh kharh a, a thlan a sa titih dâwn ta mai. An piah lawk remchâng lai aṭanga rawn thlîr rengtu Zodina, Freddie-a leh Rinpuia-te pawh an nuih a za tawh lutuk. An ṭawng an hre pha ve vek bawk nên hmui an lo pet ngar ngar. Chutih laia Luahpuia'n, "Ka hrilh leh lo mai dâwn che maw ni! Mahse, Zodina-te'n hrilh tawp rawh min tia min nghâk reng a..." a la ti ta deuh deuh.

Chutah zet chuan Rinpuia ngaih dân a pêl deuh ta a ni ngei ang. "Huhuhuuu... Mâwllian le(h)! Saw mihring saw ka vaw hlum dâwn." Rinpuia'n a ti chu Zodina leh Freddie-a an nui khûr char char. Luahpuia nula mi lo lutuk chu Cassie chuan a lâwm kher mai, a fiam châk tlat. "Chu, i ṭhiante'n hrilh rawh an tih che chu eng nge? Hrilh rawh an tih vâng chauh chein maw ka laka i rilru put hmang min hrilh i tum ni?" a lo ti leh phei chu Luahpuia a buai tawh tak zet, Cassie pawh nuih a la insûm hrâm hrâm a ni. A lu hiat nuah nuaha tuai thuak thuak pahin Luahpuia chuan, "Aw, aih... Keima'n hrilh che ka duh hrim hrim. Ka duh che. Ih...ka hmangaih bawk che."

Tak tak maw? (Cassie chu a nuih a la za reng.)

Aw, tak tak! Chuan, i dâwn lungrûk min hrilh ve la...hehe...

Luahpui, kei paw'n ka duh lutuk che, ka hmangaih bawk che tih hi ka chiang tawh a ni. I thinlung ṭhatna kha khawvêl hausakna sum leh pai hmanga lei theih a ni lo va. Ka mipa zawn rûk ṭhin chu ka tawng ta che a nih hi! (Zak deuh leh tak deuha Cassie chuan tiin a hawi sawn leh zauh. Chu veleh Luahpuia chuan a kutphah hlaipui mai chu bêng thuk thuk pahin...)

Khawi nge...i han infâwp ve dâwn chhin ang hmiang. (Tih leh Cassie lam chu hawiin a en nui sûng a, Cassie paw'n nui sakin a chhoh melh ve rân bawk. Chu veleh Luahpuia chu kûn hniamin Cassie nên chuan an infâwp ve vawng vawng a, a hnungah a kut pahnih chu a suih daih. A fair ve êm Luahpuia hi chu!)

Rei lo tê inkuah chiala tîtî-in an ṭhu dûn a, an nui leh dûn leh sak ṭhîn bawk. Khatia an infawh lai khân Rinpuia âwih lo lutuk kha a lo meng phâwk ang reng hle. A ṭhen ṭhaw hmêlte nên phei chuan a ât hmêl ver vur asin aw!

Zân dâr 9:30 pelhah Luahpuia pawh a rawn nui phei sung a, a ṭhiante paw'n nui var varin chanchin an lo zâwt vat. Engkim a fel tawh tih Luahpuia'n a hrilh chu an lawmpui thiam kher mai. Chutah Rinpuia'n, "Vawi khat mah kut hnung suih chungin mahni bialnu te kiss tawh suh ang che Zeilopa..." a lo ti chu an nui hak hlawm a nih kha. Tichuan, Brandon-a hmuh tumin a in luah lam panin an tlân chhuak zui ta a ni.

Zân dâr 10 a pêl hlek tihah Brandon-a in luah pawh chu an thleng ve leh mai bawk. An chhuk thlâk leh hnu chuan Belbel-i hâwn tuma rawn kîr leh mêk an tâwk a, a u Brandon-a a awm loh thu a lo hrilh chuan anni paw'n tih ngaihna an hre bîk lo. Belbel-i lungngaih hmêl fahrana ngui deuh bâr chu Zodina chuan pan hnaia a kuah vawng vawngin, "Rei lo tê i nghâk lawk ang u hmiang. Belbel-i pawh lungngai lo la, hêng zawng zawng hi nakinah chuan a la tâwp vek ang." nui sanga tiin Belbel-i lo nui lui ve chu a hmuiah a chuk zeuh bawk. An boruak pik churh tih zia nân Freddie-a'n, "In awm dân mai mai hi aw! Min han awhthîk vêla in la hre viau ang. Nei lo kan ni bîk lo a nia," vui awkâ deuha a lo ti fiam chu an nui var var hlawm a nih kha.

Tûnah chuan zân dâr 11 pawh a ri dâwn hnai ta. Brandon-a chu rawn hâw har an tih thu sawia an la awm reng lai chuan ani pawh a rawn thleng ve chiah. Car a dah fel hnu-a a rawn chhuk chu a pai thla deuh nak nak bawk a, a in lam pan chuan a rawn phei zui ve leh. Chuta a farnu leh a ṭhiante a hmu chu mak tih hmêl zeta en chung hian, "E...ṭhiante u, Belbel-i pawh maw! E eng nge in lo tih dâwn?" a'n ti nui sang chu Belbel-i leh a ṭhiante erawh an lâwm vak lo tih a hriat. Freddie-a chuan, "Eng dang nge kan rawn tih chuan ang? Rawn hmu tur chein kan rawn kal a nih hi!" a lo ti deuh hmak. "Aw, a ni maw? Lo kal r'u..." tih leh a in pan tlang chu a rual a, anni paw'n ngawi rengin an zui ve leh mai bawk.

In chhung an luh hnu chuan an han ṭhu sap sap hlawm a, Belbel-i chuan a u chu en vawng vawng pah a, "U mâm, zu in tawh suh ka tih kha...ti nge rilru hahna tur hi min la siam reng mai le! Hei i ṭhiante pawh i ti mangang a nia aw, hmuh che tumin vawi tam kan rawn kal a, kan hmuh apiang chein zu i rûi reng bawk sia a hrehawm teh a nia," a tih chuan mi dangte paw'n an lo thlâwp zui sap sap. Chutah Brandon-a chuan, "Tûnah chuan dam chhan neiin ka inhre tawh lo, ka nun hi ka ninga dam hi ka thlahlel tawh vak lo a ni. Mahse, mahni intih hlum mai chu ka tum lêm lo a nia," a ti a, Belbel-i chuan mittui hru zauhin, "Kei hi i dam chhan chu ka ni mai lo'm ni. I ṭhiante pawh hi en la, anni pawh hi i dam chhan an ni bawk. Kei ka thih vâng hian hlim takin nun hmang thei dâwn la chuan, a hma khân ka nunna hi ka ti tâwp daih tawh ang. Khawngaih takin hetiang hi chuan awm tawh lo teh, u mâm. Khawngaih takin," lehlam hawiin a inhnît feih a, mittui a hru leh mawlh mawlh.

Brandon-a chu zilh paha rei vak lo an tîtî hnu chuan hâwn tumin an tho zui sap sap a, pawisa hlawha insual pawh bânsan turin an chah zui bawk. Ni e, khâng hun liam taah te khân Brandon-a hi Street Fighting Challenge-ah telin pawisa a lo hlawh ve nual tawh hi a ni a; tûnah phei hi chuan hretu pawh an awm ve nual tawh nghe nghe! Mahse, sawrkâr hriatpuina tel lova he in-elna hi buatsaih a nih avângin, Aizâwl khawpui pâwn hla vak lova warehouse-ah zan rei lamah an kal khâwm ṭhîn a ni. Hemi zân pawh hian fight a nei hma hlauh a, hnehna a chan hnu-a rawn hâw a ni chiah bawk.

Hetiang a nih chuan îtsîktu leh fin kherek chhuahte avânga nun chân mai thei dinhmunah a ding ta reng mai. Hmangaihnain a hliam tawh mipa thinlung sak leh luhlul hi chhung rila a hliam na tak pai hian, a thahrui leh thiamnate an la chiah hnip zo vang tih pawh a hlauhthâwnawm ta rum rum a nih hi le!

Chhunzawm leh tur.


Show post links
Top

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 9th, 2023, 11:41 am

🌹🌺1500 MILES🌺🌹
(Action, romance, funny, crime, investigation, revenge.)

✍️ Duata Khualchhâwn.

CHAPTER — 24.

Thlang tlâi lenkâwl a lo hnîm a, zan thima lei hrik hrâm rî leh perhpâwng chiri thâwm te, vârṭian lâwma bawh-ar pau rî inchhâwn leh thliai thliai ṭhînte pawh kumin a liampui zêl a, Remi kal bo aṭanga kum hnih a liam leh hnu chuan a tîr aṭanga chhûtin kum 5 a lo tling ve ta dêr mai. A in luah bathlâr khawhar chu fahrah vâk vâi Brandon-a tân chuan a chawlhna ber niin, mi dangte hmuh loha a mittui a hrûk ṭhinna hmun, ti buaitu dang rêng rêng awm lova a in-awm tleina ber a ni ta. Ni e, hmun fianrial hi tu emaw tân chuan a chawlh hahdamna, a natna mittui luang mite'n an hmuh lohna tura a bihrûkna leh, a inhnemhnânna ber a ni ṭhîn rêng a ni. Hnêmtu ṭawngkam tam tak aia ngawi renga ngaithlatu an mamawhna hmun, hre thiamtu an hlut lehzualna a ni a; chutah chuan 'awm ṭhîn' ngaia 'awm ve ta lo' zûn an ṭahpui châng a awm bawk.

Chutiang nun neitu chu fahrah vâk vâi ni ta Brandon Zomuansanga hi a ni a, a mittui tla a ṭhiante'n an la hmuh ngai loh kha ni mah se, hring nun bung thar kaia hmangaihna bu chhah êm êm mai keua chhiartu a ni ta bawk a, a chhiar zawh theih loh leh a duh hun huna a khup ngawt theih ni bîk lo chu, hmangaihna vâng hian a mittui pawh a luang hnem ve ta hle. Harh fîma a awmin a nâ a, a chahthlâk lai leh a muthilh lai hi a tâna damna awm chhun a nih miau avângin, eng mah ngaihtuah hman lova awm chu a duhthusâm ber a ni. Chu vâng chuan hetianga nun hman hi a duh rêng vâng ni hauh lo mah se, a hun tawngin he ruam thimah hian hnûk lûtin an thlang zâwk a ni ti ila a fiah ber âwm e! Remi hmêl hmuh chu sawi loh, a thâwm-thang-va rêng rêng hriat tur a awm ta lo chu a rilru hahna ber a ni bawk.

Ina a awm chângte hian Remi a rawn luh hlawl ringa kawngka a thlîr vawng vawng châng leh, a kawngkhâr kik rîte hriat beiseia chhûn leh zân hun a hman ral ṭum pawh a tam tawh viau. Belbel-i leh a ṭhiante ti buai lova sum a lâk luhna ber Street Fighting Challenge pawh a bânsan hlei thei tawh meuh lo a ni mai a, Remi a ngaih luat vâng leh a pa vânga a natnate chhâwktu ṭha tak a lo ni bawk nên bânsan mai a la tum hmêl loh hle. Chutih rualin, a ṭhianpa Luahpuia chhâi thar dî tawng ta kha a lawmpui êm êm a; amah ai pawha zei lo ve leh chhâwngina hmeichhe ṭha leh fel tak, Cassie a chhâi thlu ve kha a âwih lo hial zâwk a nih kha.

Tûnah chuan a ṭhiante paw'n kawppui an nei kim ta. An hlimpui ber leh Brandon-a ti nui ve suk suk thei pakhat chu Rinpuia nuthlawi ngaizâwng hi a ni. Rinpuia lah mi phawk leh dawr dap fiamthu lam sawi nuam ti mi a ni bawk nên, a nuthlawi ngaihzâwn nêna an khawsak dân khaw lo ang reng tak a'n sawi tak tak ṭhîn hi chu, nulate tân phei chuan ngaihthlâk ve reng ngam pawh a ni lo vang. A ṭhiante hi awhthîk hlawm a ni ber mai e. A ṭhiante'n thlah tura an fuih lahin Rinpuia hian, "Aw... Eng mah lah hi in hre ve dêr si lova maw! Nula tam takte ai hian an thianghlim zâwk a nia. Nula virgin ni âwm taka awm, sihhnip ru viau site ai chuan nuthlawi invawng fel takte hi an thianghlim ka ti zâwk daih. Chhan hrang hrang avânga pasal ṭhen an ni a, chu vâng erawh chuan mipa nazawng lakah an inphalrai ngawt bîk lo. Min duat thei hliau hliau mai sia maw!" tia a'n sawi chhunzawm tak tak hi chu an nui ho leh dar dar ṭhîn a nih kha.

Hetiang hian hun leh nîte an hmang ral zêl a. Remi kal bo aṭanga kum 5 liam hnu, kum 6-na May thla an hmang ve leh mêk tawh a ni. May ni 15 Zirtâwp zân chuan Brandon-a-te pawh an ṭhianhovin an lêng chhuak a, a ṭhiante paw'n an voh dîte rîm lovin Brandon-a hi an vêng a ni ber mai e. Aizâwl khawpui hmun hrang hrang fang kualin nuam pawh an ti viau. Zân dâr 10 a pelh hnu-a vêng pakhat an tlân leh lai chuan an beisei loh thil an tawng ta tlat. An hma zâwn main road-ah chuan tlangvâl rual an lo insual nasa mai a, anni hâwn tum an ni bawk nên an ngei ru tak zet. Motor tlân hleih theih loha an buai nuaih avângin anni pawh chu an ding ve ta ringawt a nih kha. Kawng sîr remchâng laia an Bike-te an dah fel hnu chuan, chu buaina chu tu chawh chhuah nge tih an hriat loh chu an thlîr zui veng veng.

Thinrim inhrosa râwl leh ṭawngkam chhe tin rêng nên ri luai luaiin, mihring tisa ri leh chawrh ṭhînte pawh an hre chiang hle. Patling ṭhenkhatte leh NGO-a hruaitute paw'n an khap dâi hlei thei meuh lo. Mahse, chutia NGO hruaitute meuh an rawn lan tâkah chuan rei vak lovah an khap dâi thei ve mai a, ṭawngkam erawh chuan an la invau zui khur khur thung. Thinrim taka tlangvâl ṭhenkhat rawn pheite'n Brandon-a-te ṭhianhovin an lo en ṭhap an hmuh rual chuan, pakhat thinrim kal tluang chuan a ngai thei lo deuh a ni ngei ang, "Engah nge khatia min rawn en ṭhap a? Hmuhnawm min va ti âwm ve," a lo ti deuh hmuk. Anni chuan chhân pawh tum lêm lova Bike an dahna lam an pan leh mêk tihah, "Hei, mi mâwl-ho, in beng a ngawng em ni? Ka biak che u kha in hre na nge?" pakhatin a lo ti leh kher chu Brandon-a ngaih dân a pêl ve ta tlat.

Chu pa chu hmai si deuhthaw-a va din chilh pahin, "Min ti lui hlek suh." a ti ram ve hmak mai. Chu veleh mi dangte chuan, "E heu! I va huai âwm ve, buai i inpeih ve reng a ni maw?" tiin an rawn din hual titih nghâl. Chu veleh Zodina a rawn inrawlh vat a, "He laiah hian buaina siam tuma rawn kal kan ni lo, hâw ula keini pawh kan hâw ang. Bro, kal ang le!" tih leh Brandon-a pawh chu a rual zui a, kal mai tuma Brandon-a inher lai taka an hmuhsitna ṭawngkamte leh nuihsawhnate chu a pâi dâi thei ngang lo a ni ang e. A hnaih bera mi chu a'n hnek thal ṭhuai mai a, chuta chin chu ṭha tê têa sawi fel theih ni tawh hek lo; anni ṭhian nga leh tlangvâl 10 chuang laite chu an ri zui ve leh ta chawrh chawrh mai. Piah deuha JAC hruaitute hâwn tum tawhte pawh an rawn tlân phei ve leh nghâl a, thinrim zet hian tâwp turin an rawn au zui ṭhat ṭhat bawk.

Chûng tlangvâl rualte chuan an rin ang ngawtin mi 5 lekte chu an sawp hlei thei bîk meuh lo. An zînga palianpui mai chu an khan lo lehzual ti ila Luahpuia thinrim an dâwl zawh lohzia a chiang viau âwm e! JAC hruaitute an rawn thleng ṭêp tihah tlangvâl pakhat chuan a chemte pai rûk chu phawrhin Brandon-a vih a tum ta mai, chu chu Luahpuia'n lo hmu hman hlauhin, "Brandon!" tih ṭhawt leh tlân phei a rual a, Brandon-a a rawn hawi meuh chuan a bul lawka mi Luahpuia'n a lo rêk âng chawi chawi leh a hnek let tawp chu hmuin a nui sak. Mahse, JAC hruaitute an rawn tlân thleng zui bawk nên anni ṭhian 5 chu chêt chhunzawm tum an awm tawh lo va; tlangvâl ṭhenkhat rawn insiam rem ve leh mêkte chu JAC hruaitute chuan an hlap ṭhu hnawk hnawk zui. "In pawi sawi lopui han sual rawn leh kher kha a ngai em ni? Police-te kutah kan pe dâwn che u." pakhatin a tih laiin Police-te pawh an rawn thleng ve chiah.

Chutih lai chuan, Luahpuia chu a nâk nêm dawmin a ṭhingṭhi zawi ta hnak mai. A ṭhiante'n an hmuh rual chuan, "Bro, engati nge? Luahpui, an vit che alaw? Zâwngchhe-ho chu(h)!" Rinpuia chuan ti vîn ṭhatin, Luahpuia nâk nêm aṭanga thisen rawn chhuak zaih zaih chu a theih ang angin a huppui bawk. Luahpuia pawh ṭhen sak sakin Rinpuia nghêng chuan a ṭhu a, "Pakhat sawn min vit khanglânga maw le!" tiin a la inseh ruh ṭalh ṭalh mai. Brandon-a hlauthâwng mangang bawk si chu, "Ambulance ko r'u...." ti chûlin a t-shirt hâk lai chu hlih leh pawh thlêr zung zung a rual a; Luahpuia hliam chu a remchân dân ang anga tuamsakin an be mawlh mawlh bawk. Mahse, a rei deuh chinah chuan Luahpuia chu a chauh bâkah thisen a hloh hnem tâk êm avângin a ṭawng peih tawh meuh lo, thisen lum lai tak a ni bawk nên rin aiin thî a chhuak duh tlat. Police-te nên chuan an buai zui a ni ber tawh.

Rei vak lovah Ambulance chu rawn thlengin Luahpuia chu an zâwn lût vat a, JAC hruaitute chu an Bike-te lo vênsak mai tura chahin hmanhmawh zetin an awmna aṭanga damdawi in hnai ber Greenwood Hospital an panpui ta a ni. Ambulance chhungah anni ṭhian li chuan ko mawlh mawlhin an mittui pawh a parawl pûr tawh a, Luahpuia erawh ṭawng chu sawi loh a mitmu a la ti che ve ralh ralh peih ṭâwk a ni tawh mai si; hetiang a nih chuan an ṭhianpa hi Vânramah chauh an hmu thei tawh dâwn a nih hmêl hle mai le!

Greenwood Hospital an thlen rual chuan hmanhmawh zetin Luahpuia chu an hlâng chhuak a, stretcher chuan an nawr zui nghâl par par. Nurse duty-te'n an rawn hmuh rual chuan hmanhmawh zeta rawn tlân chhuak ve nghâlin, Luahpuia nîkhaw hre lova awm tawh leh thisen hloh hnem tawh si chu ICU lamah an nawr phei ta a ni. An ṭhianpa an hmangaih êm êm, a ṭhiante mai ni lo mi dangte tân pawha inpe zo tak mai, chutianga thih hlauhawma a awm tâkah chuan mipa rual ni mah se mittui an dang zo tawh lo va; ICU kawngkhâr bul ṭhutthlêngah chuan inseh ruh ṭawlh ṭawlhin an ṭhu ṭhap ringawt. Chutah Zodina chuan Luahpuia chhungte call vatin chanchin a hrilh zung zung a, an nu leh pate pawh chanchin hrilhin an be zui sap sap hlawm.

Minute 10 vêl a ral ang tihah an chhungte leh Luahpuia chhungte pawh indawt zatin an rawn thleng zui ve sap sap bawk. Pi Dingpuii leh Biaktei phei chu an ṭap feih feih tawh mai a ni. Sangpuia pawh kum 11-na hmang ve mêkin a pute Luahpuia a la ang chhunzawm zêl a, ani paw'n mittui a hru âwl lo a ni mai e. Chuta Brandon-a'n a pa hmêl a hmuh rual chuan thinrim mit meng sen râma melh râwm râwmin, rei en lova a hawi sawn leh daih chuan inbeng daih a tum hrâm hrâm tih a ti chiang viau a ni. Rei vak lova Cassie-te chhungkua an rawn thleng zui ve leh phei chu an lungchhiat a va zual teh lul êm! Pu Nunsanga-te chhung chu an thiam ang angin an han hnêm ve mawlh mawlh tak nâ a; a hnêmtute hmêlah chuan thlamuanna rêng rêng hmuh tur a awm chuang hauh lo.

A u Brandon-a thinrim mit meng a hmu chiang bawk nên Belbel-i paw'n a be ṭha ngam meuh lo va, rei pawh en ngam lovin ICU lam hawia a pa ding nên chuan a melh tawn zak zak ringawt. A chhan chu hetiang êm êma a u thinrim hmêl hi a la hmu ngai tlat lo a ni. Brandon-a chuan hmun danga kal sawn daih duh hial mah se, amah vânga tûn dinhmun thleng ta a ṭhianpa hliam na tak tuar hi kalsan erawh a tum lo chiang vet vet hle. An ṭhianhova an nun hluite chhui kîra indawm kun tlawk tlawkin, an mitthlaah Luahpuia nui hmêl leh an khawsak dân hlimawm tak takte kha an hmu chuai chuai ang tih a chiang mai si; an ṭhianpa hi a thi a nih vaih chuan a chhe ber pawh thlen huamin an inseh ruh nasa tak zet.

Inbe tam lova minute 20 vêl an nghah vang vang hnu-ah, Doctor leh Nurse palite ICU aṭanga rawn chhuak chu pan hnai nghâl ruak ruakin chanchin an zâwt vat a, chhânna hun pawh awm mang lovin an lo zâwt bawrh bawrh bawk nên Doctor(mipa) chuan thâwk la hakin a melh kual den den zui. Brandon-a leh a ṭhiante chuan an din hual titih nghâl a, Brandon-a phei chuan Doctor chu din chilh hmakin, "Doctor, eng nge chanchin? Kan ṭhianpa chu a nun in chhan him thei em? Thi thei a la ni lo a nia aw!" tiin a meng phâwk viau bawk. Chutah Doctor chuan, "Ni e, kan theih tâwp chu kan chhuah a, mahse..." ti-a a châwl det chu an lo hlauthâwng kher mai.

Doctor chuan rawn sawi zawm lehin, "Vânneihthlâk takin a nunna chu kan chhan thei hrâm e." a lo ti mai chu Brandon-a-te ṭhianho lâwm lutuk leh lungchhe bawk si chu an ṭah nuih hak. Doctor leh Nurse-te lo nui var var chu kuah zui vawng vawngin lâwm thu an hrilh mawlh mawlh bawk. An zînga hmeichhe awm vete paw'n nui var varin mittui an lo hru ve sap sap bawk a, hemi zâna an hlimna leh lâwmna hi lei theih ni ta se a man a to viau ngei ang le! Hmêl hlim sanga Doctor-in nakin deuha a biak theih mai tur thute hrilha duhsakna a hlan leh hnu chuan, thinlung lâwmnaa khat chungin hlim takin an inmangṭha rih ta a nih kha.

Tichuan, nî leh thlate a liam tam ve leh deuh ta tihah favâng boruak theng thâw pawh an hîp leh vang vang tawh. Luahpuia pawh kha chawlhkâr khat hnu-ah Greenwood Hospital aṭangin a chhuak ta kha a ni a; a vittu pawh kha Case siamsak duh lovin, "A thinrim a inthunun zo lo ve palh a nih kha!" tiin Police-te beng hriatah ngei a ngaidam zui ta kha a ni. A chhan chu Police-te'n a vittu kha mana Luahpuia an hmuhtîr ṭumin, ngaihdam a dîl urhsûn bâkah a mit menga inchhîrna tak tak a hmu thiam miau bawk nên, ṭawngkama vau titih leh na deuh taka a zilh hlak hnu-ah a ngaihdam thu a chhâk chhuak zui ta a nih kha.

Heti a nih lai hian Brandon-a nun dân erawh hahthlâk an tiin an vêng deuh chawt a ni ber mai. Thil duhawm lo a tawn apiang lahin a pa chu a puh thlu zui hmak si; a pa a huatna nasatzia hi uar takin sawi dâwn ta ila, tuipui kama ṭiau vaivut zât ang an ni ngei ang le! Chu chuan a hma aia thin ram leh zu-a ṭuan nasat lehzualnaah hruai lûtin, a in luahnate leh JAC-ho mit pawh a ti kham ṭan tawh hle.

September ni 11 Remi birthday zân a ni a, zân dâr 11 a pêl tawh tihah Brandon-a zu rûi pawh a in luahah a ṭhiante'n zilhin an hâwnsan ve leh deuh chiah hi a ni. A hmai duk deuh chur leh thi khâr inpawlh nuaihte chuan a sum hmuhna ber ni bawk, Street Fighting Challenge chu a la bânsan lohzia an ti chiang viau âwm e. Kawr pawh ha lovin kekawr bûl dum a ha a, ṭhutthlêngsei nghenchhanin chhuata ṭhu zawi hnuang chung chuan a khât tâwkin zû chu a in leh khawlh khawlh ṭhîn. Rûi awkâ tih hriat tak a, "Re Remruatpui... Nang hian pasal i nei tawh ti raw? Nang hmeichhe lêrhkawh nu... I hlim em? I pasal chuan a duat viau ang che maw!" tiin a in chhung vêl chu a en kual ruai ruai bawk. Chutah a lu chu thing nâ nâin, "Ni lo, hmeichhe lêrhkawh i ni lo Remruatpui. Na naktûk i birthday a ni tak! Khawiah nge maw i awm le?" a ti zuai raih a, no-ah zû chu a thli zui leh kerh kerh mai.

Zân dâr 11.30 pawh a ri dâwn hnai ta. Chutia zu in leh tuma a dâk chhuak deuh chu a meng bial ta kâwk kâwk mai le! Kawngka bula Remi lo ding ngawi reng leh a lâwm vak lo tih hriat zeta amah a lo en reng mai a hmu chiah mai chu, hmuh thiang lo hmu ang maia phâwk zetin a âng deuh huau bawk a, a mit vâi a nih ringin a mitte chu a nuai leh rih. Uluk fahrana a en leh pawhin a mit vâi mai mai ni lovin, a first love Remruatpuii ngei a ni tih chu a hre chiang ta. Chu veleh, "E he! Re Remi...nang maw? Eng nge i lo tih dâwn? Awh ka tihpalh...i lo kîr leh a ni maw?" a ti bah nawk a, a rûi viau tawh emaw tih laiin a ding chhuak rang kher mai.

A zu no dawm chunga Remi hmachhawn zâwng chuan a ding ka deuh hau mai a, va pan hnaih mai a tum chu a zu no dawm lai Remi'n a lo en zeuh a hmuh rual chuan ding bu deuh lûk lûkin, a zu no dawm chu en ve zeuh leh Remi va en chu a rual leh a, Remi lah chuan ṭawngkam khat maha la chhâng lovin a lo melh ngar ngar mai si; thukru ngawt dâwn se a lo hmu hman vek tawh si a le; a tih ngaihna hre lo chuan a kut vei lama a lu thak lopui hiat nuah nuah pahin Remi chu a melh zuk zuk a, hnungchhawn zâwnga inher bu dâwrin zû chu a tlâk leh rih. Dawhkâna zu no ruak dah leh Remi va en a rual leh chu, chhuata a zu bottle dah Remi chuan enin amah chu no lo fahran hian a lo melh zui leh si. Chu veleh a zu bottle chu chhîn vatin a herh zui vat vat bawk a, a taksa phêna herh nghet sauh sauhin Remi chu a va melh leh zuk zuk ṭhîn.

A chhîn nghet ta maw tihah Remi melh zak zak chungin thuhrûkna tur zawng chuan a che zui leh vat vat mai. A kalna lam apiangah Remi lahin no lo fahran hian a lo en zui zêl bawk si; Brandon-a a che buai tawh lutuk. Gas dahna hnuaite hawngin a bih ṭhîn, thuhrûkna tur remchâng a hmu mai si lo; chutia zu thuhrûkna zawnga a phe vat vat chuan bêlbâwm bula Brite pâwl tê fel at chu a hmu fuh ta a; rang zeta a chhîn hawn leh a zu ûm dah chu a rual nghâl. Chuta chin chu a thaw deuh ham ham a, "Ka fihlîm ta e!" ti hmêl pu chunga nui sang hian, "Remi, eng tik khân nge i lo hâw? Chuan, i lo luh lai ka hre lo rêng rêng? Tun lawk khân i lo thleng chiah em ni? E...Aw a ni tak, i lo thleng deuh chiah tak e." za lo taka nui chunga tiin, Remi chuan a zu thuhrûkna en leh amah a rawn melh zui leh chiah a hmu zui ve leh mai bawk.

Chutah le, Brandon-a ngaih ṭha lovin a zu thuhrûkna Brite pâwl a en chiang chu a pangah, "BUHFAI ṬHAM LALPA CHANPUAL!" tih a lo inziak kuau mai chu niin, chuta Remi a va en leh chu Remi chuan a lo melh rum sâwt tawh kher mai. Inthlahrung taka a lu hiat sut sut pahin Brandon-a chuan, "Ih...a ruak alâwm, buhfai ṭham pawh a awm lo hrim hrim," tih leh Remi a va en chu a mittui parawl râm pawh a hmu tel ta. Chu veleh Brandon-a'n, "I ngawi renga a nuam lo e, Remi. Ti nge i ṭap ringawt dâwn alaw? I ṭahna turin engtin mah ka tih loh che kha..." tih leh va pan hnaih deuh a rual chiah tihah thinrim awkâ tih hriat tak hian, "Dawheh pa, dâwt sawi thiam pa...khâng hun zawng zawngah khân nang hian dâwt min lo hrilh a maw?" Remi chuan a lo ti hlaih hlaih mai.

Remi...(Brandon-a'n a lo ti dêk dêk a.)

Ṭawng suh Zomuansang. Lem chang thiam pa...Hetiang khawpa lem chan thiam i nih te chuan film industry hi luh chilh law law ta che.

A mittui hru zauhin Remi thinrim bawk si chu a thaw ham ham a, Brandon-a chu rum ang reng takin a melh zui râm râm mai. Kum tam tak liam taa a ke hliam Brandon-a'n damdawi a hnawihsak ṭuma a inthuamna, kamis body fit sen leh pawnfên dumte kha ha lehin, M&F pheikhawk sen ngat a bun bawk a, a awm bona ram boruak chu a ngeih tih hriat zetin a no sen deuh têk bawk. A hma ai khân tlêm chuan a thau ve lam hlek a nih hi! Chutih rualin a piannalh ve tâwk takte kha an bo chuang hauh lo va; a kamis sen hâk pawh chu a tâwt ve lam hlek tawh tih hriat viau mah se, a hma ai khân a inhmeh lehzual emaw tih tur hi niin, a chhe lo sawt tih hian Remi nihnate hi an fûn kim ber ang.

Remi thinrim kal tluangin a ân khum hlaih hlaih lai chuan Brandon-a erawhin chhuat a bih reng ringawt a, hmangaihtu thinlung atanga chhuak an nih miau avângin chûng ṭawngkamte chu an dam tlat alâwm le! Chutih laiin, Brandon-a chu Commando-a a ṭan laia 'Vishram position' hian kut hnung suiha ding kâk hah bawkin, a khât tâwkin Remi chu a va melh leh zuk zuk ṭhîn. Tûnah chuan a rûi pawh a reh titih tawh a ni ang. Remi chuan rawn pan hnai pahin, "Eng vânga dâwt min hrilh nge i nih? Mawhhh...eng vângin nge lem i chan?" tiin a hmaah tak a rawn ding a, mittui nên a melh chho rân bawk.

Ka hmangaih êm vâng che a ni, Remi. Ka tihpalh.

Hahhh...min hmangaih êm vângin dâwt min hrilh a maw? Lem i chang a maw?

Aa...ih...i rilru tih hah ka duh lo va... Chuan, pasal i nei tawh em? Mipa dang hmangaih emaw pawh!

Hmangaih dang emaw pasal nei tawh ni ila i hnênah hian ka rawn kîr i ring em ni mâwllian, mi mâwl pa...

Hehe...

Nui suh Zomuansang.

Remi thinrim bawk si chuan ṭawngkam pawh a duh tui thei tawh meuh lo. Chutah aw dam deuh hian...

Vawi khat mah dâwt min hrilh tawh lo la, lem chang tawh bawk suh ang che. I hria em? Chuan, ka ngai thei lutuk che asin, u Brandon. (Remi chu a mittui a luang leh zaih zaih mai.)

Kei paw'n ka ngai ṭhîn tak zet che, Remi. Vawi khat mah min kal bosan tawh suh ang che.

Brandon-a chuan tiin Remi chu a kuah zui vawng vawng. Lâwmna leh lungchhiat mittui inpawlhin an inkuah zui ta vawng vawng a, an lung pawh a ruala phu dûn dap dapin chhung rilah a thara suih zawm leh an ni ta. An awm dânah pawh hian an inthlâkhlelh tawhzia chu hai rual a ni âwm lo ve!

Chhunzawm leh tur.


Show post links
Top

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)