UMAPUIA BY Sammy (Completed)

[Ngaia]

UMAPUIA
by Sammy







Ch >< 1
( Khuh hawnna )







"Chaw ei theih nia..." tiin ka au lauh a, chaw chu ka khawrh zawm nghal zat.







"He buhtlei hi hman a har sia maw...." tiin ka phun nang nang a, cooker tlangah buhtlai chu ka han khawng chawrh a, "Thin te hi a chhe ve hlak hlak sia e...." tiin ka u chu a rawn thu hmasa ber a, ka nu leh ka pa bakah ka ni leh Sangtea chu an rawn thu zawm ve vat bawk.







Keini chhungkua hi pasarih lai kan ni a, kan unau hnih leh ka nu leh pa, ka ni pasal nei tawh rawn kir leh leh a fapa te bakah ka pi tar tawh tak nen kan ni niai.





"Dar engzatah maw in chhuah dawn ?" ka pa chuan ka u chu a zawt a, "Dar 11 ah khan an tia, mahse 12 dawnah kan chhuak leh hman hram ang ka ring, Tluanga hi chu a hmanhmawh lo ve thin em a" ka u chuan a ti duah a, "Khi lamah fel takin han awm phawt la Lawmi chhungte pawh an lungawi har lovang, inthlahdah deuh khan han khawsa lo la" ka pa chuan a ti leh a, ka u chu a bu nghut nghut.








"Kan palai te vawihnih ngawt an kal thlawn tawh a an lungawi rih mai dawn lo chu anih hi" ka nu'n a rawn tih chuan, "Aaaa.... Kan tir zing lutuk te pawh a ni ang, han rial deuh ila an lungawi em em ang. Chaw kha ei teh u" ka pa chuan a rawn ti dam thluam a, engmah sawi zawm tawh lovin chaw chu kan ei zawm mawlh mawlh.








Chaw kan han ei kham sang sang hlawm a, ka ni chuan ka pi chaw pe in kan naupang neih chhun erawh inrinni a ni bawk a arpa sen ang maiin a kawh chhuak leh vut tawh.






Tihfel ngai ka tihfel hnuah ka û insiam chu ka enfel pui a. Tlangval, nupui nei tura inkhâp inkhâp tawh si hi buaipui vek a la ngai a, en pui thlap thlap loh chuan engmah hi a inkhung kim hlei thei lo.






Ka û hi doctor a ni ve a, Aizawl lam daih a post anih vangin zirna a zawh hnuah pawh mahni inchhung lumah hun a hmang tam hman meuh lo a ni e.






Tuna a rawn haw pawh hi ka thiannu Lawmi, tawng pawh ka tawng theih hma atang hauh a ka thiantha ber nen engtik laiin nge an lo inngaihzawn pawh hriat loh kha an lo inru ve ringawt a, Lawmi rawn dah pah a rawn haw a ni ber.







Insiam fel meuh chuan kal a hun dawn dawn a, "Lo kal rawh ka thlah ang che..." tiin ka û bag chu ka pu nawlh a, "Mate bag tê hi lo khai zawk rawh" ka û'n a'n tih chuan ka bag put chu ka dahthla a, ka û bag sawi chu ka khai vat.







"Awww i khua a har dawn mang e. Kar hmasa vel kha chuan Lawm tawngtheii nen nun in han chen vel kha ania...." tia chhaih pahin ka chhuak a, kan khaw sumo counter awm chhun lam chu ka pan nghal.






Kan khua hi thingtlang khaw lian lem lo tak a ni a, mahse a pui ve fu thung.






A chengten kan zir ka ti dawn nge a khaw thleng a rem hrim hrim ka ti zawk dawn ni khawpui lam hi kan ngai bik hauh lova, mahse vawikhatmah Aizawl ka la zin loh vang hi chuan a remchan veleh ka la zin ve ngei ngei ang.






Ka û chu highschool a kal atangin Aizawl-ah a awm char char a. Kei thung chu kan khuaah highschool ka zawh hnuin khaw thenawma higher-ah ka kal leh a, ka pass chhuah hnuah pawh khaw thenawma college-ah bawk ka kal leh a, khaw thenawmah chuan B.A pass thleng ka kal tluan zak a, khaw thenawm tih loh hi chu kan khaw chhuahsan zawng hian ka la kal ve lo hrim hrim.







M.A zir zawm ka duh ve laiin kan khaw primary school-ah indaih lohna vangin ka thawk leh ta daih a, tun kumah pawh a kum thum nan ka la thawk ve mek zel bawk.







Ka û bag chu sumo counter-ah chuan ka dah a, amah pawh nghak lovin Lawmi te in lam chu ka pan san ta daih.







Lawmi nen hian kan tette atangin kan inkawm tawh ka tih kha, a thiantha ber e ti lo hian ka û nena an han inru ngawt mai kha chu mak ka ti ber hial awm e.






Lawmi hi tawng pawng pawng, nui huau huau, thawm na, tawng na zet leh rilru chhe chuang miah si lo a ni a, ka û erawh ngawi dâk, tawng tam lo chi a ni a, ka û mah ni se ka chhuang thin viau ania, mahse hetia an lo inrai thawt thawt te hi chu mak ka ti thlawt alawm.






Lawmi te in ka thlen dawn tepah Lawmi te kawmthlangpa Pa Tanpui ramkal tur nen kan intawk a, ka kalna tur min zawh chuan Lawmi te in a ka kal tur thu chuan ka chhang tha mai a, "Aw nangni thiandun hi chu(h)!" nui chung chuan a ti hluk.






Keini thiandun min hrechiang bawk a, khatianga ti awm tak reng pawh kha a ni. Kan tleirawl chhuah tirh hian Lawmi nen kan i kawm nasa zualin kan inngai a, an in a ka kal loh leh kan in-ah a rawn kal a, tun thleng hian kan dam phawt chuan kan inkartawn chhawk a ni ber.






Lawmi te in ka thlen chuan kawngkhar ka kan dik dat dat a, tunge awm ka hriat hmasak duh vang a ni. Lawmi chhungte hi Lawmi leh ka û chungchangah hian an lawm vak lova, ka û hi an duh lo anih ka ring a, mahse chutiang chuan tawngkam an thlah chuang bik si lova, hei vang hian an in chuankai hi nuam lo ka ti ve deuh a, tunah pawh hian a pa awm chuan ka haw leh daih ang.







"Tunge, kik lo khan lo lut ve mai ta che...." Lawmi âw ngei mai chuan a rawn ti hlur a, aman min rawn chhan danah amah chauhin a awm ni ang, khi var varin ka lut a, min melh no lo nasa.







"Enge khatia i rawn kik kher a....?" tiin chhuat nawt chuan a kun kût kût a, "Khawnge i chhungte ?" tiin ka lo hawikual thung.







"Ka that a, an sa ka rep vek tawh....!" a rawn tih chuan, "I tawngkam hi chu awwww.... Nau pai lai i nih kha" chek hlakin ka lo ti a, "Ni tak!.... Ka inveng hman thlawt thin lo, ka hmui te hi ka chep thla zawk mai dawn mawni" tiin a hmui chu a piai a, thaw hakin chair-ah chuan ka thu thla hnak.






"Tak takin ka chhungte chu an leng a" Lawmi chuan a rawn ti tha mai a, hah hmel zetin a chhuat nawt chu a ding ngil a.







"Mate en teh ka pum len chak dan hi, mipa aniang" a pum han chul kual pah chuan a ti a, "I rai hma atangin i dul a kiar sa hrim hrim" ka lo tih chuan a ner nang a, "Teuh lo.... Ka dul a thepin ka kawng te a fek a, ka chhiatloh vang alawm i û pawhin min duh" a ti a, ka chek leh hlak.







"Tak tak a thla nga ni ve dawn tawh a, a len a hun tawh. Eee! tlaiah sub-center ah min kalpui teh a" a ti zawm nghal zat. Thla li dawn lai chu a nau pai a lo zep tihna nia, leh lam kawi zawng tak chuan ka khawngaih reuh.







"Nia ka kalpui dawn che nia" chu ka ti tha veleh mai bawk a.







"Enteh tlaiah enge i siam dawn ?" Lawmin a tih leh chuan, "Ka hre lo, ka nu te chul fangin an rawn hawn mai ang" ka lo ti sam et a, "Vawksa rep kan nei, tlaiah saum nen ka bai anga i rawn suak dawn nia.... Awi sawi takah chuan ka'n rep leh lawk" a tih zawm pat a, tawng hi chu a duh in a chak a ni.






Fridge chu va hawngin a va hai rak rak a, a vawksa rep sawi chu polythene a dahin a rawn khai chhuak.







"Vawkchaw chhumna meiah sawn ka'n rep lum leh nge" tiin pawn a chhuah pui a, ka lo zui ve zel.







"Awiii ka ning lutuk, saw kan ar a um leh tawh! Immm.... Ka vawm dawn" tiin lung a chhar a, an ar lo um mek tu ui chu a vawm a, a vawm fu bawk a, ui chu beleuh tuarin mei khup zul zul chuan a tlansawn vang vang.






A thawmnat rawl ring thinchhiat tawh sa nen rai thinchhiat te a nei ve khanglang bawk sia, ran zawng zawngte thleng hian an tawrhhlehawm vek!






"Ehee! Thenawm thar kan nei dawn ava ang ve a saw ?" tia a hawina lam chu ka hawi ve vat a, patling pahnih hian pick-up atangin inchhung bungrua tih vel chu an lo thiar thla mek a, patling vek pakhat hian mipa naupang pawm chungin a lo en reng thung.







"Anih dawn saw..." ka lo ti hap a, "Eee saw enteh, tlangval te pawh an awmin ka hria. Eeee i bialpa atan a tha dawn lutuk" a rawn tih chuan a darah ka beng chawrh a, a nui nghal uar uar.







"Ti hian ka rep tharlam leh anga tlaiah tui tawkin ka bei anga i rawn suak dawn nia" ti pah chuan a vawksa chu tûlah chuan a thil mawlh mawlh a.







"Mate i nu in rawn len a phal em ni ?" a tih chuan ka nui hak, "Chul an fang ka tih ka tih chu" ka tih chuan, "Chupawh nise innghak innei lo, va haw rawh. I ni in i pi buaipui angai nga, nula nih chuan in a awm tam tur" a rawn ti leh a, "Enge a... Haw turin min va duh ve ?" ka tih chuan, "Awww, tlaiah sub-center ah te min kalpui dawn sia chhun a i len chuan min kalpui thei lo ang tih ka hlau alawm" a tih chuan, "Nia... Ka va haw nge" ka ti a, "Aw haw rawh haw rawh.... Mahse tlaiah chuan hman tum la" a ti leh sawk sawk a, haw tura min duh dan em em chu a ngaihthatthlak lo zawk dawn dawn a ni.






"Aw ka haw dawnnn" tia ka inher chuan ka û ka hmu nghal chat a, hnunglam hawi lehin Lawmi chu ka melh nghek, hei vang anih leu luau hi haw tura min lo duh ni.






"Ka awm ve khan insawi tur a dal ami ?" ka ti a, "Kal vat mai teh!" Lawmi chuan a ti leh hluk a, ka û pawh chu a nui vur vur. An pahniha ei lo deuh hmel ka hmuh hnuah in lam pan chuan ka kal ta hna hna.






Lawmi leh ka û awmdan ka ngaihtuah let chuan ka khi var var a, Lawmi'n a a thiantha ber ka ni chunga min zah der ve lutuk chu ka lawm riau. Ngaihzawng aneih reng rengin ka hriatpui thlip thlep thin a, an thusawi zawng zawng leh an awmdan thlengin. Mahse tunah erawh, a thiantha ber û nen han inkawp meuh chuan a dan a dang ania nge!







In ka thlen chuan ka ni leh ka pi chu loving room-ah an lo thu dun a, ka ni in korean serial nizan lama a en zawh loh a en laiin ka pi erawhin kawmthlang lam a Sangtea te thianho infiam ri laih laih chu a thlir reng.







"I û te chu an chhuak tawh em ni ?" ka ni chuan a lo ti a, an la chhuah loh thu chuan ka lo chhang tha mai a.







Ka phone chu khawihin Lawmi kap deuhin whatsapp status chu ka up a, a hmuh hunah a thinrim leh ang chu!







Tih tur a awm chuang lo tiin ka puan zai sa chu thui turin ka intintuah a, puanthui khawl vel chu ka inrem mawlh mawlh.






Puan thui lam hi ka chem kalna nge ni zir mang lovin ka thiam viau a, awm hmuna hak tur bakah ka sunday kawr te hi keimahin ka inthui vek zel.






Ngawi renga kan thut thap laiin Pa Hriatpuia, ka ni pasal hlui nita chu a rawn lut hlawl a, ka ni lah chuan lo uksak duh eih lo.






Kei chuan thingpui te lo pein Pa Hriatpuia pawh chuan ka ni chu a be duh bik miah lova, ngawi reng chuan a thu ve leh kar.







Ka ni leh Pa Hriatpuia hi kan tleirawl chhuah tirh hian an inneih a, nupa inngeih taka kum li lai an awm hnuah Pa Hriatpuia hian ka ni ngaihzawng a lo neihsan pek a. Ka ni chuan 'ka hmangaih tawk lo che niang ka ngaidam thei lo che' ti hmakin an inthen ta ania, an inthen atangin kum hnih lai aliam leh tawh a, Pa Hriatpuia hian rawn hel leh deuh thin mah se ka ni erawh hi chuan a hawi tawh thak lo thung.







Pa Hriatpuia chuan school chungchang te min zawt a, tha tak chuan ka chhang ve mai zel bawk a. Achang chuan ka khawngaih deuh thin a, ka ni nen an inthen hnuah amahin a parawl ve rek rek a, a khua har a Sangtea riah puia ka ni a rawn dil chang te hian ka ni lah hian a phal thak thin lo a, kil khat atanga lo khawngaih ringawt loh tih theih ka nei der si lo.








Kan titi lai chuan ka pa chu rawn lut hlawl a, "Ee Hriatpuia chu i lo leng a ni maw? Mate tui vawt mi han lak teh..." chhuat a thut thluan duai pah chuan a rawn ti a, tho vatin tui vawt chu ka va lak.







"In feh emaw ka tia ?" tihpahin tui vawt chu ka pe a, in nghal khawlh khawlhin ka ni chuan fan a lo on sak bawk.







"I nu kha amahin a kal ta nih kha. Kei chu hmarveng lamah kuhva kungin a delh chhiat i pu Tawnate in ka zuk en a" a ti a, a thaw deuh hulh.







"A chhe nasa em? Nizan thli kha a na ve zek a ?" Pa Hriatpuia chuan a lo ti a, ka pa chuan, "An in thlang lam a vaw chhe deuh a, naktuk lamah V.C leh Y.M.A hnatlangin han thawm tha ila kan tia" a ti a, Pa Hriatpuia chu a bu nghut nghut.







Ka pa hi a hmingin V.C member a ni ve a, mahni hna pawh ngaihsak hmasa lova khawtlang tan a phe buai thin lutuk hi chu a chang hian a ngeiawm lek lek zek a. Mahse amah hian hengte hi ka hna anih bakah midang tan malsawmna kan nih ve theih dan ania a ti mai zel.







Zu in ve zeuh zeuh thin e ti lo hian buaina a siam ngai hauh lova, a rui buai ngai hek lova, pa zaidam leh tha a nihna tak hi nia ka û pawhin a chhun fuh em em ni.







"I nu pawh a lo haw dawn tawh ang, a inbualna tur tuilum te kha chuan sak rawh aw, eng ang pawhin lum mah se tuilum kha a rawn ti leh kher dawn ania" ka pa chuan a ti leh a, nakina ka chhuan tur thuin ka chhang leh mai.







A tlai tak tak hmain ka ni in ka pi intihfai pui a, ka pa leh Pa Hriatpuia pawh eng eng emaw an sawi hnuah an inzui ve leh.







Dar 2 velah chuan indal fel ka tum a, Lawmi kha sub-center lamah kalpui angai dawn si a tiin ka inrem tha sat sat.







Ka indahfel dawn lai chuan kawngkhar an rawn kik a, a âw atang pawha pa len hmel deuh hian, "URemate in a ni em ?" a rawn ti dut a, "Aw ni e lo leng rawh u" tiin ka lo chhawn vat.







Zing lama ka hmuh Lawmi te inbul a pa pakhat naupang pawmtu kha a naupang pang nen an rawn lut a, kan inhmu chu mak kan inti ve ve nge pawh ka hre lo kan in en reng.







"Mate towel kan theihnghilh min rawn pe teh..." ka ni in a rawn tih takah chuan harhin thu tur chuan ka han ti a, towel chu lain ka ni chu ka va pe a, ka pi nen chuan an rawn inkai chhuak.






Lawmite inbul ami bawk chu an thu run a, a mipa naupang zawk chuan in chu a enkual a, a mipa puitling zawk chuan min en reng nimai hian ka hria a, ka awm a ti nuam lo deuh.







"Thingpui te in duh em ?" ka han ti ngawt a, ka mawl zia ka hrechhuak nghal. Tuin nge maw an vawikhat lennaah 'aw duh e' ti nghal ang ni.







"Hehh... Thingpui ka rawn pe ang cheu aw" tiin choka lamah chuan ka lut phei vut a, ka thaw hak.






Eng mi pawh nise a mi uap a na ngaih ngaih khawp mai. Rawn insawn thar tur an nia nga, ka pa an rawn be duh te pawh a ni ngei ang.







Thingpui leh kan chhang neih sa chu ka chawi chhuak a, chutia lo inhrai ringawt chu a dik chiah em ka ti deuh a, mahse nula tan chuan inleng te lo tih tlangnel tum te kha a mawi miau bawk si a.







"Kha in rawh u, nichin khan bungrua inthiar niawm tak te kha ka hmu a, sawlai kha in rawn luah dawn em ni ?" nelawm thei ang ber chuan ka ti a.







"Imm kan tum a, i pa hi a awm nange ?" a puitling zawk chuan amah che lawih khawpa thum hian a rawn ti a, a tawng thum ve hrim hrim nge a ti lui zawk ni.







"Aw nichin mai khan an rawn chhuak a, in rawn tawk lo em ni ?" tiin a puitling zawk chu ka en a, min lo en ve reng avang chuan a mitah tak ka melh fu lehnghal a, mahse hawisawn duh bik loin ka en lui a. A mitmeng chu a dam thluam a, mi pawi sawi a hlauh hmel ngawih ngawih.







"Kan rawn hmu hman lo vel chiah chia anih hmel. Puitling in awm lo em ni ?" a ti thum leh chhak a, ka thingpui pek chu min en reng chung chuan a dawt ri khulh.







"Hei puitling ka nih hi!" ka tih chuan a meng awk a, hawisawnin, "Aaa i nu emaw...?" a rawn ti leh.







"Aw ka nu pawh chul fangin a feh daih a" ka ti leh a, ka û awmna pawh chu ka hrilh law law zawk dawn emaw ni.







Ka ni chu pindan atangin a rawn chhuak a, "Ehee! Mapuia te chu engtikin in rawn chhoh a ?" kan thutthleng sei a thu luahpa hmelhriat hmel tak chuan a rawn ti a, mi uap na zet Mapuia chuan, "Tukinah khan... In lo dam maw ?" a ti veleh a, an inbia chu ka lo en reng.






"Dam tawk tawk e, kha kha i fapa kha em ni ?" tiin ka ni chuan mipa naupang chu a en a, "Anih hi..." Mapuia chuan a ti bul hmuk. A tawngdan chu a pawisawi ta mai te pawh kan ang zawk.







"A va lian ve tawh ve.... A chhun viau che anih hi i tetlai chiah chiah" tiin mipa naupang chu ka ni chuan a han chhaih vel a, kei ka lo bo khawp mai.







Chutianga ka niin a naupan lai a hriat khawp khawp chu hre ve awm tak ka ni a, vawiin niloah hian ka hmuh awm ka la hre si lova, ka ni lah chuan a fa neih te thleng thlengin lo hre vek. Nge nia nga ka ni ngaihzawng hlui zawk hi ani le?







"Mate i hman tawh em ?" tia rawn au lang langin Lawmi chu a rawn lut a, "Aw ka hman a ni mai" tiin ka ni chu kan kalna tur ka han hrilh chawp a.







"Mate hei vawksa rep hi, lo suak loin siam veleh zawk si mai rawh u" Lawmin a tih chuan ka ni chuan a lo chhaih a, Lawmi a'n lai der ve vel a, zahpuiawm hian a!







"Va kal rawh u, damdawi ei tur an tih kha tha takin ei la aw Lawmi" ka ni chuan a ti a, Lawmi pawh chuan bu nghut nghutin kan chhuak zui.







Kan kal hla deuh ta maw tihin Lawmi chu a phi nghal cheng a, "Mate tunge in ina lo thu kha, kan inbula rawn insawn tlangval ka tih kha a ni chiang lutuk...." a tih chuan, "Tlangval a ni lo! Naupang kha a fapa anih kha" ka lo ti a.







"Aaahh! Naupang kha a fapa maw? A hmel kha a la naupan hmel hmel nen" Lawmin a rawn tih chuan, "Awiii... A naupan loh kha, a hmel rum dan kha. A âw phei chu a thum hlauhawm lutuk, kan inmelh fuh a ka mur chhuak vek thei...." tiin ka ner nang a.







"Eee! Eye contact kha bul tanna tha lutuk anih kha. In inngaizawng dawn chiang lutuk. I û nen pawh hian eye contact atangin lawm ti hian kan awm tan chhoh tak" meng kual rulh rulh paha a tih chuan chek hlak hlakin ka en a, "I zakthei lo!" ka ti hluk.







"Enge.... Pasal ka nei tep tawh sia nang i single reng bawk sia i leng tar ang tih ka hlau alawm" a rawn tih chuan ka hnar ka tum dat a, chhang duh tawh lo chuan ka kal pen thauh thauh.






Nei ngai lo mah ila ka leng tar awm bik lo emaiii!







Sub-center atanga in lam kan pan leh hnu chuan Lawmi chu a ngawi chawi deuh riau a, a ngawih dâk hian a ngaihthatthlak loh zawk hial mai.







"Tinge i va tawng lo ve ?" ka tih chuan, min rawn melh zawk a, a thaw hak.







"Mate min hua em ?" a rawn ti a, "Tinge ka huat ngawt ang che ?" ka lo ti let.






"I û nen kan chungchang hi, ka zep rei sia, i laka zep kha hreawm ka ti thei sin aw" a rawn ti leh a, "Inkawp tura ka rin loh ber mai pahnih in inru a, i rai thu i'n sawi kha chu mak ka tia, ka rilru kha chu na ve bawk alawm" ka ti ve hap a. A ni reng bawk a, ka û nena an chungchang a zep tlat bakah nau a pai ti pawh ka hriat atangin kar hnih chiah a la liam a, tunah a nau pai lah thla nga tling dawn tawh a, ka tan chuan a thian ka nihna anga engmah min hrilh lo chu a rilru nat thlak ve lawm.







"Mahse thil liam tawh ania, a ho emai. Ngaihtuah la, kan inah i rawn mo anga kan awmdun thei tawh nga tha zawk lawm... Mahse kan mo i ni dawn bawka ka ti rethei viau ang che" ka ti a.







"A khanglang a che! I û nupui tur ka nih hi min û nghal rawh" a ti a, "I zaktheilo!" tiin a tukkhumah chuan ka nam bu lawp a, a rawn nui zui uar uar.







"Tak takin kan inneih hunah chuan...." thutak zetin a rawn ti a, "I nu saw hmun leh hmunah ka rel thin ang....." a ti a, ka nuih pui ve ta hak.







Ka nu hi Lawmi hian a ngei thlawt a, ngei han tihah khan a haw tel chuang lo nain, ka leng tur te, ka thil engkim ti tur hi min khap peihin min lo sawisel peih thin lutuk a, kan tleirawl chhuah atang tawhin ka nu hi chu ka tan a la ngei ngar ngar!







Zoramchhana vibe ka tih kha ka sut leh e!.... UMapuia hi chu eng ang pawh lo ni dawn se Kan Zoramchhana ne pawh a tluk pha dawn teuh lo ania!


Show post links
Top

[Ngaia]

UMAPUIA
by Sammy






Ch><2







In ka haw chuan Mapuia te chu an lo la awm a, ka nu pawh a rawn haw tawhin ka pa pawh a awm bawk a, ka ni erawh ka hmu lo thung.







"Khawnge i kal a ?" ka nu chuan a lo ti nghal a, "Lawmi nen sub-center ah kan kal a" ka ti a, "Hei i UMapuia te hian chaw an lo ei dawn a rawngbawl kep an ngai aw" ka nu chuan a ti a, "Aaa... Ti lo teh ang u. Min hrethiam rawh u..." UMapuia chuan a rawn ti vat a, a thusawi chu ka lo pawm tawp.







Hetia a thu ringawt pawh hi a mi uap a na nia, a ruala dawhkan ka kil ve phei chuan chaw pawh ka bar ngam nang. Bakah ka nu pawh chaw ei a insawm nghal ngawt zel mai, mikhual te ania zak pawh a zak ve thei.







"I in mihran riau mai ka ti, anih i ei duh loh pawhin i buai awm rih si a Matei hian lo pui che rawh se" ka nu chuan a ti leh a, a hmuh theih loh lam atang chuan ka melh nghek a, nge maw mi duh lo chung chaw ei, in puih tih velah a buai viau le. An ni chuan lo hre tha pawh ni se keiin tunge anih pawh ka hre ve lova, hmelhriat loh mipa lehnghal va puih tawp ka duh teuh lo. Min sual dawn ta ang se awiii..... A pa lian sia ka hneh dawn lo lutuk! Teuh lo, ka pui dawn lo reng reng.







Mapuia chu a nui hawk a, ka en chuan min lo en ve karin a nui a, a nui hmel leh a mitmeng dam thlup chu a inhmeh kher mai.







"In mi ngaihtuahnaah ka lawm viau a chutihrual erawh chuan min ngaihtuah lutuk duh suh u, UMamuani te'n min bawl kep vek tawh a, thenawm tur tlangval hoin min pui ve nak nak hlawm a tihfel ngai ang chu kan tifel vek tawh bawk a" a ti dam thluam a, "Imm nia.... a fel vek tawh chuan a tha nimai lawm. Mahse naktuk chawlhni zing kha chu helamah in rawn ei phei ngei ngei angai dawn nia" ka pa chuan a rawn ti veleh a, chutah ka pa vêk chuan, "Kal rawh u, in nufa khan rawng va bawl rawh u" tiin min hnawt kiang ta daih a, ka lawm rilru hle zawk.







Ka nu nen chuan rawng chu kan bawl nghal mawp mawp a. Ka nu chuan lo halna lam a rawn tlawh haw thu te sawiin mangkhawh zawh lamah chuan thlai leh buh chin a duh vat thu te chu a sawi luam a, ngawi rengin ka nu thusawi chu ka lo ngaithla ve melh melh.








Zanriah kan kil lai chuan ka pa te chuan Mapuia chungchang chu a sawi a, an sawi an sawi takah chuan amah tak chu hre viau lo mah hre lo tawp chu ka lo ni bik lo.







Ka hriat ve dan pawh Mapuian nupui aneih hi ka ni pasal neih nen khan a inrual deuhthaw a, ka ni khan nei hmasa zawkin ka pa te pawh UMapuia nupui neihnaah khan an kal nghe nghe a, a hunlaia ka pain 'Mapuia nupui man tur ka tum' tia a intihtheih thin em vang khan a ni ka hriat ni.







Chaw ei thleng sil pah chuan ka ngaihtuah neuh neuh a, Mapuia te ka lo ti ve ngawt a, ka ni ruala nupui nei kha chu kei aiin a upa fe dawn chiang lutuk. Bakah ka pa pawh 'URem' atia, nupui a neih nachang a hriat chuan keite chu ka la intinula tan dek dek dawn chauh ania, kei aiin a u feeeeee!








Chutia mahni ngaihtuahna kawma thleng ka sil lai chuan Y.M.A information atangin chhiat tawh thu an rawn puang a, ka rin loh lutukin Pa Tanpuia hming chu an rawn lam tlat.







Tlangau chu ka ngaithla chiang a, ka hresual bawk si lo. Tukin te khan dam deuh khan kan la inhmu sia, avan mak tak!







"Chu Mate mitthi kan nei anih chu !" ka pa chuan a rawn ti a, "Nia, amak khawp mai. Pa Tanpuia chu tukin te khan dam deuhin kan inhmu reng sia" chutia Pa Tanpuia thih thu an rawn puang thut mak ka tihna chu ka sawi chhuak ve a. Mihringte hian kan chin kan hriat loh zia chu ka ngaihtuah nghal neuh neuh.







"Intifelfai ula, i ni nen in rawn kal ve dawn nia, ka lo va phei hmasa nge" tiin ka pa chu a chhuak nghal a, keipawn thleng chu sil zovin puan bih tur ka ni rawn lak chhuah sa chu lain ka ni nen chuan kan chhuak zui veleh.








Kan thlen chuan an lo tam tawh viau a, inchhung lamah phei chuan an khat hmur tawh.







Keini khaw te angah chuan chhiat that tawh pawhin kan hre nghal zung zung zel a, information centre a an rawn puan atanga hre ve chauh chu a tlai pawl, a hre har pawl kan ni tlangpui.







Tlangval thenkhatin Y.M.A thutthleng an rawn remah chuan ka ni nen chuan kan thu a, nula leh tlangval thenkhatin thingpui lumna tur vel chu an han buaipui bawk a, keini erawh chu kan thu reng.






"Mate kan tlaivar dawn em ?" ka ni chuan a rawn ti sa sa a, "I tih dan dan" ka tih chuan, "Dar hnih velah kan haw dawn nia" a rawn ti leh a, ka lu ka bu nghat.







Zai kar lakah an tap thawm ka hre leh thin chuan ka lung a lo tichhia a, ka mittui chu ka hru zeuh zeuh.







Kei hi ka tahbelh reuh a, nge ka rilru no vang pawh ka hre lo. Ka chhungte boral ve tur anga ka han ngaihtuah ringawt te hian ka tah a chhuak em em a, hetia min chhungkaw pa ber an sun te hi ka pa hi boral ve ta ang se tiin ka ngaihtuah leh hmanhmawh a, ka tah a chhuak tun mai.







"A tap leh ringawt tawh..." ka ni chuan a ti a, ka mittui chu hru tawkin ka zai zawm veleh.







"Mate ka zung lawk dawn aw" ka ni chuan tiin a tho nghal a, kan thutnaah chuan kan school a thawk ve tho khaw dang atanga rawn awm Sir Jacob-a leh a thenawmpa Zira te an lo thu veleh chiah bawk.







"Kan rawn sawm dawn che a i lo kal daih tawh a" Sir Jacob-a chuan a rawn ti a, "Nia, kan hriat veleh ka ni nen kan kal nghal a" ka lo ti ve mai bawk a. Engmah sawi tawh lem lovin kan zai chhunzawm veleh.








Dar 12 a rik meuh chuan ka ham bai bai tawh a, phur lo zet chuan ka la zai ve zel tho a.







"Mate thingpui hi in in(drink) lum rawh" tiin ka ni chuan thingpui min rawn pe a, ka lo ban ve mai.







"Miss Ruatpui chu a muta chhuak tawh nimaw ?" Sir Jacob-an a tih chuan ka nui ringawt a, ka ni thingpui min pek chu ka dawt ri khulh.







Khua a la vawt bawk a, thingpui sa ver vawr han in chu nuam tak a ni.







"Mate..." tia ka hnunga min rawn kheuh zeuh chu ka en vat a, ka pa lek.







"I lo va haw mai dawn em ni Mate" a ti sar sar a, "Tinge.... Nangmah kha haw hmasa zawk la" ka tih chuan, "I mut a chhuah tho chuan i haw duh zawk lo em ni ?" ka pa bawkin a tih leh chuan, "Aih... Nangmah kha va haw la va mu hahdam zawk rawh" ka lo ti leh vat a, "Aw anih chuan kan haw mai ang, duh leh khawvar hma deuh hlekin rawn haw ula" a tih leh hram chuan tawngkaa chhang tawh lovin ka lu chu ka bu ta nghat a, ka pa pawh chu a kalsawn zui a, kal ve miah lo tura ka rin UMapuia nen chuan an kal dun ta ral ral mai.







"Mate kan kal harh lawk dawn em ni ?" ka niin a rawn tih chuan ka en ha a, "Thingpui hian min ti harh tawh lutuk" ka lo ti vat.







Rei loah kan zai tan leh a, zing dar 1 velah khawdang atanga Pa Tanpuiate chhung chu an rawn thleng hlawm a, chutia an rawn thleng khawm chu Pa Tanpuia ruang chu an han tah leh a, chutiang karah chuan ka ni nen chuan ka haw ta daih thung.








In kan thlen chuan ka pa chu a lo la harh a, mu nghal tur leh zinga UMapuia te rawngbawl kep tur chuan min chah mawlh mawlh a, keini pawh chu kan mu zui mai.







Zing ka han harh meuh chuan ni a lo tlang sang tawh viau a, ka khum atang chuan thu chhuakin Sangtea chuan ka bul maiah chuan ka phone a lo khawih leh reng tawh bawk.








Pindan atanga ka chhuah chuan cooker a rawn phit nghal zat a, ka rim hriat chu a sual loh chuan ka pain kan ar talhin buh tlem nen a chhum leh ngei a ni.







"Ka ril a va tammmm!" ti hlukin ka zi mar al al a, "Thawh veleh riltam sawi suh, i pa ar puahna saw lo va tifai teh" ka nu chuan choka atanga rawn chhuakin a ti a, "Zingkar atang hian vin hluk hluk zel suh" choka atang bawkin ka ni chuan a rawn ti ve bawk.







"Ni thingpui min lo siam rawh aw ka pa ar puahna chu ka'n tifai lawk nge" ka ni chu ka au let lang lang a, ka pa ar puahna tifai turin kawt zawl lamah chuan ka chhuak nghal.







Pawnah chuan kan kawmchhak leh kawmthlang pa te chu an lo thu a, ka pa ar puahna chu an lo thut bial laih zui.






"Enge maw khatia patling nilum aiin ar hmul in lo thut bial laih a. Tawlhsawn teh u ka lo tifai ange" va ti sawk sawkin tual hmunphiah leh bawlhlawh ruhna chuan ka va tifai a. Kawmthlangpa Pa Hmuna chuan, "Mate in tual zawl hi phiat tel la" a lo ti a, "Awww, Ka pa Hmun lo hmanhmawh suh, nangmah chawp khan ka rawn rut tel vek dawn che lawm" ka ti a, midang chu an lo nui.







Pa Hmuna sawi vang chuan ka phiat ta nghal vek a, in ka luh leh meuh chuan ka nu te chuan chaw ei an lo peih dawn tawh a, ka ni thingpui min siam pawh a dai vek tawh.







"Mate hmarcha lo rawt teh, i pa pawh hi rei lutuk ka va ko teh ang" tiin ka nu chu a chhuak zui nghal a, hmarcha chu ka rawt veleh mai bawk a.







Ka nu leh ka pa chu rei loah an rawn inzui lut a, an hnungah UMapuia te pafa chu an rawn inkai lut ve bawk.








Chhung inkhawm neiin ka nu chu a tawngtai a, hun kan hman zawh hnuin living room chhuatah chuan pher phahin chaw ei chu kan siam hluah a, chaw chu kan ei zawm nghal mawp mawp.







UMapuia te pafa chu an ngawi ngul a, a fapa lah chuan a hmel en ang angin chaw chu a heh lova, fangkhat te tein a ei emaw tih mai tur anih laiin UMapuia chuan a bar lian tawn tawn thei viau.







A fapa a han tih vel danah chuan a duat viau tih a hriat a, a fapa lah chu amah ang lo tak chuan a cher pan thler a, naupang nungchang tha lutuk hi a ni a, tawng pawh a tawng ve mang lo hrim hrim.







"Khite chaw kha ei teuh rawh aw, Mapui nangpawh i lo inthlahrung vel nge hei chaw atam ania" chaw bel changtu ka pa chuan a ti a, "E inthlahrung lo ve" UMapuia chuan a ti mai bawk.







Chaw chu tam lo te ka ei, a nihna takah chuan kan chaw ei te vang chuan a ni zawk a, chaw ei kha an ti nuam lo. Mahse keimah chu ka inkhawm dawn tho a ka ei tawk anih zawngin ka dul a kiar leh kang anga, thingtlang khuaa kan chhiat loh ni veah ka chhelo ve thei lo palh ang tiin ka inhnem ta vel ngawt.







Ka kut ka sil lai chuan UMapuia fapa te chu a thleng chawiin a rawn phei ve a, "Mate Khitea kha a kut lo sil sak ve rawh" ka pa chuan a rawn ti lauh.







"Khitea maw i hming ?" tiin a kut chu ka sil sak a, "Aih mahse apu sawn sakhi nen in inang emai Khitea ni rawh min tia" a rawn ti muang ban charh a, ka meng awk.







Ka pa reng reng hi a! Mi fa duat lai sakhi nena inang lo tih reng reng a, a hahthlak thin eeee! A ruk chuan UMapuia pawh saw a lawm miah lo ang.







"I inkhawmnaah min hruai ve dawn ami ?" min melh kuau pah chuan a ti leh a, "I lo kal ve duh em ni ?" tiin a kut chu ka hruk hul sak leh thlap.







Chutih lai chuan UMapuia chu a rawn kham veleh a, "Khawi ka lo buaipui tawh ang chu" a rawn ti bul hmuk a, tinge maw a tawng ka hriat hian a thinrim hmel reng thin ni.







"UMapui inkhawm te i tum em ?" nelawm thei ang bera biain ka en chho ha a, min lo melh chhun run mai.







Ka biakna pawh hre lo ang map chuan tak run hian min en a, kei ka thu tung a, ani a ding luah bawk si a, a mitmeng hi dam ru phian lo se zawng a rapawm lek lek lam a ni e.







"Tum chu tum ve e" a duhtawk min en ta maw tiah chuan a rawn ti chhuak ve hram a, biak zawm chu a phurawm fahran lo kher mai.







Sawi tur hre tawh lo chuan ka nui ta tawp a, choka atang chuan chhuakin pindan ka pan tlang parh.







Pindan ka luh veleh chuan thaw hakin ka pindan pawn lam chu ka en vang vang a, ka thaw chhuak leh hak.







Awi awi awiii ka be tawh dawn lo reng reng! A fapa kha hnaih a phal lo zawk nge ka niin a zawh tirh phat atang khan a lawm loh hmel ngawih ngawih.







Ka almirah atang chuan ka thawmhnaw hak tur khai chhuakin ka puan bih tur nen chuan ka la chhuak nghal a, chaw ei hmun tifel turin pindan atang chuan ka chhuak leh.








"Mate i inkhawm dawn chuan insiam rawh, ka lo tifel mai ang" ka ni chuan a ti a, "Inkhawm i tum lo ringawt em ni ?" ka tih chuan, "Vawiin chu kan tlar kan chawlh leh lawk mai ang, i nau kha lo silfai la lo inthlakpui ve bawk teh" ka ni chuan a tih zawm zat a, Sangtea chaw ei kham chiah chu a lo inhlip nghal sawt sawt.







Engmah sawi tawh lem lovin Sangtea chu bathroom-ah chuan ka kai lut a, a kut leh ke vel ka sil hnuah chhuah tirin keimah chu ka insilfai ve nghal a. Bathroom atanga ka chhuah leh chuan UMapuia te pafa chhuak ka hmu hman hram a ni e.








Sangtea chu amaha lo inhru ve in a chawn leh ban velah chuan lotion te a lo inhnawih ve a, a thawmhnaw hak tur la chhuakin inkhawm tur chuan ka siam nghal mawlh mawlh a, a harh ve bawk sia kan invin leh hrawk thin.








"I pi pheikhawk va inbun tir rawh" tiin ka nu lamah ka tir phei a, ka nu bulah chuan a vui ve nuah nuah.







Keipawh chu insiam zawm ve nghalin ka insiam zawh hmain dar a rawn ri a, ka phe buai vek.







"Ni i inkhawm dawn loh chuan i bag dum hi ka khai dawn aw" tiin pindan atang chuan ka chhuak a, "Khai rawh khai rawh, chhuak vat vat teh u" ka ni chuan a lo ti hluk a, ka pi chaw pek tur niawm tak chu a chawi bawk.








"Aw ka kal dawn, nu khawi thawhlawm tur" tiin ka nu hmaah chuan ka kut chu ka dawh a, "Pawisa ka nei lo" ka nu chuan a lo ti deuh hmak.







"Amak eee! Khawnge ka pa, chawlhni zing te hi chuan thawhlawm tur pawisa ti nawi thin rawh u" ka ti hlak hlak a, inkhawm kal tur e tilo chuan ka ka âwki a nem lo viau mai.







"Mate kha ka lo pe ang che" ka pi chuan a rawn ti ban chuap a, a pawnfen chhunglama ipte a siam chu zen rak rakin polythene bawk hi a rawn la chhuak a, "Kha hei..." tiin sawmhnih hnah zawr tawh lam hi polythene bawk atang chuan a rawn la chhuak a, ka lo la vat.







"Hlawh ka lak hunah damdawi tha deuh ka lei dawn che nia" ka tih chuan ka pi chu a pawisa bag ve polythene bawk that leh pah chuan a nui ve vun vun a, inkhawm tur chuan ka chhuak zui nghal.







Lawmi chuan biakin kawtah min lo nghak a, puan a han bih chuan a dul puar chu a lang ve tawh viau.







Inkhawm ban hnuah Lawmi zun chhuak lutuk chu biakin hnung thingkung tamna lam pan chuan a tlan nghal chawn chawn a, biakin kawt lamah chuan ka lo nghak ran.







Lawmi nghaka ka din reng lai chuan, "I la haw dawn lo em ni ?" ka hnunglam atang chuan a rawn ti thum chhak a, a âw atang chuan tunge anih ka hre chiang viau mai.






Inherin UMapuia te pafa chu ka hmachhawn a, ka rin loh dan deuha ka hmuh vang chuan ka meng awk.






Sneaker pangngai tak leh kamiz a hma kilhna pahnih phelh a, duhdah zeta a ban thlep a inbilh lut ve tat tur si a inkhawm chu hmuh ka inbeisei nen coat suit dum dak hlak chu a ha a, tie nen a inthuam zahawm khup khup khawp mai.







Chutiang bawkin Khitea pawh chu apa ang chiahin coat suit nen a inchei ve zuar a, an mawi fapa viau mai.







Ka han hawi kual a, an mawi lutuk chu kan khaw biakin nen chuan a inhmeh lo lek lek zawk a ni. Keini ang thingtlang takah chuan kamiz hak an duhtawk mai a, coar suit hi nei a mang an awm pawh ka ring lo. Aaa.. mahse an ni zawng mizoram khawpui ber atanga rawn chuang chhuak an ni a, keia thingtlang kilkhawr a awm phone hmai tereuhte a khawvel kal dan lo hre ve zeuh zeuh thin hian incheina lam hi ka hre lo ve em a, an inhmeh pafa tihzawng chu ka hriat a ni mai e.







"I haw dawn em ?" nelawm fahran lova a rawn tih leh chuan ka ner sak a, min be chak lo anih te chuan min biak luih loh mai tur ania.







"Ka thiannu ka nghak a" nelawm tak chuan ka ti lui veleh ta tho a, UMapuia chu a kiai suk anih chu!







"Awiii! Ka thinrim lutuk ka va in zun khum ?" tiin Lawmi chu a rawn ner phei nang nang a, ka bula UMapuia te ding a hmuh chuan a insiamtha rang kher mai.







"Ehe! Kan thenawm tlangvaltea te chu..." tiin Khitea chu a lawm a, chutia Lawmin a han lawm chuan Khitea nu hi a rawn kal ve lo tihna mi le ka lo ti rilru neuh neuh.







Lawmi chu a rawn leng a, ka nu leh ka pa chu UMapuia in lamah an leng phei thung. Enge kan inlaichin dan hi ka hre chiah lo nain ka pa tena an tih chhungkhat viau danah kan pian ve hma atang pi leh pute emaw atanga inlaichin kan nih te pawh ka ring.







Lawmi chuan intithei takin badam kang tur a rawn keng a, amah chuan phur deuhin a kang sar sar.







Pa Hriatpuia pawh a tihdan ngaiin a rawn leng a, ka ni pawn a lo melh no lo leh viau pek.







"Aww Lawmi han vannei zia hi! Hreawm taka hrawn ngai lo inah i han lawi bik dawn nia" Pa Hriatpuia chuan a rawn ti zauh a, Lawmi chuan rang fahran hian, "Hrawn tur awm lo a? Nakin lawka ka nu nimai tur hi a tawrhhlehawm zia i hre lo a ni. Tunah pawh a awm loh avangin ka leng ngam chauh anih hi" a lo ti a, Pa Hriatpuia chu a nui huah huah.






Thingpui te lumin Lawmi badam kan chu kan ei tlang a, kan ei laiin Sir Jacob-a chu a rawn lang veleh hlawl.






Ani pui pawh hian kan khua hi nuam a ti lutuk a, school chawlh lai pawhin a haw ngai mang lo.






"Sir Jacob-a chu min chang si lova ka thiannu laka tlaktlum i tum tan a ni maw ?" tia Lawmin a lo fiam chuan hawi vual vualin a lu chu a tuai vut vut a, kan lo nui dar dar.






School registration book min rawn dil dawn hi a lo ni a, ka lo pe ve mai.






"School luh ahnaih tawh nen addmission ti hi an a tlem riau mai" a tih chuan dik ka lo ti viau a, thingtlang lama nu leh pa ten a fate zirna kan ngai pawimawh lo lutuk hi chu a manganthlak zawk.






"Nakinah hman deuh hlek hunah in tin hi luh chhuah leh tawp ila tha ang" Sir Jacob-an rawn tih chuan ka lo pawmpui viau a, in tin a zirlai naupang khawma luh chhuah hi kum dangah pawh naupang an tlem emaw tam emaw, zirna ngaisang tura inzirtirna ni pah fawmin kan ti tawh thin.







Sir Jacob-a chhuah hnu chuan Lawmi bawk chuan, "Sir Jacob-a hi a hmeltha ka ti. Mate han ngaizawng vel ta la ani pawh hian a iai bik miah lo ang che" a rawn ti leh zat zat.






"Aaa... Tinge nang hi ngaihzawng ringawt!" ka ti hluk a, Lawmi chu a nui uar uar.






"I len tar ka hlauh ang hian nang hian i hlau ve bawk..." a rawn tih leh lai chuan a kâah chuan badam chu ka vawm lut a, a thial zui chuap chuap.







Kar a han liam leh meuh chuan ka buai ve leh viau tawh a, school luh a hnaih tawh avangin school thil vel buaipui ka ngai a, hma sawn em em si lovin ka buai nileng ve thak thak thin.







Thlai chi thlak a hun tawh avangin ka nu leh pa chu nitin lo lamah an kal a, ka ni pawh ka pi leh Sangtea awm pahin in a nghak nileng ve thak thak thin.







Sir Jacob-a nen chuan in tin tlawh chhuak tur chuan kan thawk chhuak ta nge nge a, nikhatah a veng te te a kalin chutia han intlawh chhuah meuh chuan zirlai naupang pawh kan pung viau mai.







A tawp ber ni chu Lawmi te veng lam kan kal ni a ni a, Lawmite chu Sir Jacob-a chuan a fiam leh hlauin min kaltlang pui hmak.







UMapuia te in kan luh dawn chiah chuan a inluah neitu fanu Cicii chu a rawn chhuak a, "Ee nangni in ni maw ?" ti hlukin an in lam a pan nghal a, kei chu, "UMapui" tiin ka dak lut de de.






Ka beisei lawk ang ngeiin UMapuia chuan min lo melh leh run tawh a, tun tum a mitmeng erawh a thip tha viau mai.






Chutia eng a mah hma a min lo melh ringawt chu ka zam ru viau a, ka chil ka lem ri khawlh.






"Kan lo leng lawk dawn a" tiin kawngka chu ka hawng zau a, tim daiin ka lut a, Sir Jacob-a pawh chuan min rawn zui lut ve bawk.





Ads click leh comment kha aw


Show post links
Top

[Ngaia]

UMAPUIA
by Sammy







Ch >< 3






"Enge ni ta ?" a mitmeng ang lo pui chuan a tawng dam leh ang lawi a.







"School naupang survey kan nei a, chutiang vel chu tiraw Sir Jacob" tiin Sir Jacob-a chu ka en a, UMapuia min enna vanga ka zam lutuk chu ka inhaw zawk.







"Nia, naupang in awm vein kan hria a, school luh tir te i tum hnai tawh em ?" Sir Jacob-a chuan pangngai tak chuan a han ti a.







"Kum li chauh a la ni a, class 1 zirlai chu a zir thei lo ang" UMapuian a tih chuan, "Nursery section pawh kan nei ania aw UMapui" ka lo ti vat a, min rawn en leh run tawh.






"Nia kum li anih tawh chuan nursery section vel kal ahun chiah anih chu tiraw ?" Sir Jacob-a chuan a han ti nelawm viau nain kan mi biak a hian intihnelawm tih lam chu a tum ve hmel loh viau.






"Hhjmmh" a rum nge a 'imm' pawh ka hre lo, amah lah chu a che lawih bawk sia.







"Gov't hnuai anih vangin a thlawn vek ania, i fapa chu ziak lut ve ang aw" Sir Jacob-a chuan a ti leh a, "School kal dan han sawi phawt teh u" UMapuia chuan a lo ti leh hmuk a, keichu pawna lo va awm mai teh ka duh.







"Nursery bik hi chu zing dar 9-ah tanin chhun dar 12-ah kan bang a, nursery-ah hi chuan alphabet rhymes leh number te, mahni hming ziah thiam ang chi te kan inzirtir....." a tih lai chuan, "Dar 12-ah chuan a buaithlak dawn viau mai. Hna ka thawh changin tunge ka fapa lo buaipui ang ?" UMapuia chuan a rawn ti leh khauh va, Sir Jacob-a chuan tihngaihna hriat loh hmel zetin min rawn en.







Kei erawh chuan a tawngkam kha ka lo ngaithla chiang hle a, a nupui nen an inthen tihna mi niang le? A thu sawi danah chuan nu tel lova fa enkawl a ang tlat.







"UMapui khalam te chu lungngai lo la" ka han ti veleh a, min en runna chu engahmah ngai lo ang chuan ka lang tlat.







"Keipawh school-ah ka thawk a, ka lo ngaihven theih bakah ka ni te leh ka nu te pawh an awm bawk a..." ka tih chuan a rum nghut.







"Pa" Khitea mu tho hlim tih hriat taka mit nuai chawt chawt a rawn kal chu a lo pawm nawlh a, chutia an han inpawm ka hmuh chuan ka chhungrilah hian eng emaw tak UMapuia khawngaihna a rawn awm a, engvang nge tih lah chu ka hre der lo.







"Inthlahrun tih vel kha chu ngaihtuah duh suh, ka pa pawhin kan inchhûn zia a sawi ngun viau kha" tiin register bu chu ka keu a.







"Khite enge I hming le ?" tiin Khitea chu ka nuih ver ver a, UMapuia pawh chuan a rem ti aniang engmah a sawi tawh lo.








"Lalrinpuia" amah UMapuia zawk chuan a rawn ti thum dut a, ka zawh ngai hran lo chuan a pianni leh thla te chu a rawn sawi vek.








"Aw le.... April ni 10-ah school luh ania, kan in ah lehkhabu vel kha chu a lak theih dawn a, form vel pawh ka bulah i lo tehpui dawn nia aw" ka ti a, kan chhuak zui nghal.








"I va hlau lo zawk ve a ?" Sir Jacob-an a tih chuan, "Eng maw ?" ka lo ti a, "Amah kha, Mapuia i tih pa kha. A mitmeng te kha a hlauhawm ren run lutuk a" nui paha a tih chuan ka nui ve seih a, engmah chu ka sawi zawm tawh lem lo.







Kan zawh meuh chuan tlai dar 4 a ri dawn tawh a, leng kawi tawh lovin in ka tlang nghal.







Ka thlen veleh lah chuan ka nuin UMapuia te chawhmeh suah turin min lo tir nghal a, ka phun nang nang.







Chawhmeh plate chawi chungin UMapuia te in lam chu ka pan a, ka va thlen chuan amah a lo awm lova, a inluahna neitu Nu Mamuani fanu Cici-i bawk chuan rawng a lo bawl surh surh.







"Ee UMapuia awm nange ?" ka ti a, Khitea chu pindan lam niawm atanga chuan a rawn chhuak leh hlawl.







"Aw awm lo, enge ni ?" Cici-i chuan inti chhungkhatnu deuh hian a ti a, a hmuh loh lamah chuan ka ner ru nang nang.







"Hei chawhmeh ka lo suah dawn a" ka tih chuan, "Ee... A ni maw, a va lawmawm ve" tiin ka chawhmeh plate chu a ruak a, enge maw ka hriat ni chutia a intinu ka ti mai, chutiang vela a awm chu ka ngei tlat.







"Anute Mate auSangsanga a awm em ?" Khitea chuan a lo ti a, "Aw awm e i lo leng duh em ni ?" ka ti a, a lu chu a bu nghat nghat.







"Cici Khitea hi ka hruai phei anga UMapuia bulah chuan lo sawi mai rawh aw...." ka ti a, "Aw nia, mahse a leng rei hman tawh lo ang" a ti a, ner sak sakin Khitea chu ka kai a, kawngka kan chhuak tur chuan UMapuia tin tui kawt chu kan tawk.







"Eee i lo haw chuan ka chhuk thla mai dawn aw" Cici-i chuan a lo ti var a, Cici-i chu a chhuak nghal daih.







A tui kawh a nghah thlak thleng chu ka han nghak te te a, min rawn melh leh khui tawh.







"UMapui Khitea hi lo leng se pawi i ti em ?" ka ti a, "A tlai tawh viau asin" a kawng dawm a thawk halh pah chuan a ti a, "Khua a thim har tawh lawm, ka rawn thlah leh ang" ka tih chuan a bu ta nghat a, a tui tin chu khaiin a tuibel hunah chuan a chhung a, "Eee kha chawhmeh ka lo suah che nia...." tiin Khitea chu ka chhuahpui nghal.







Ka naupang kaih chu a inchhuih leh khut thin a, a cher reuh sia, a nuihzatthlak reuh lutuk.







In ka thlenpui chuan thutthlengah chuan a thu fel then reuh a, ka ni lo biak na chu a chhang fel et zel.






Sangtea nen chuan inkawm zuiin an tlai phian a, kum hnih laiin inthlau mahse an inkawm thei phian.






Ka sawi ang ngeiin ka va thlah leh thlap a, a inchhuih leh khut khut avang chuan ka pawm ta ringawt.







An in Kan thlen chuan a lo reh leh thiap tawh a, ka kal hian a reh thiap thei hle mai.






"UMapui" ka ko a, bathroom lam atang chuan thawm a rawn awm. A inbual anih chu ka ring a, Khitea chu ka kai lut.






UMapuia chu towel vengin a rawn chhuak chiah a, kan inhmu chiang ngang ngang khawp mai.







A âwm, hnute bul deuhah chuan tattoo thu ziak a nei a, mahse ka va chhiar pha lo.






A kut phah len ang angin a ban puam chu a lian a, a dar a pharh hlai hlup a, hmanlai mipa pian tha an sawi ang takin a kawng a fek thla rat a, chungte chu kawr a hak loh hian a lang chiang khawp mai.







Hrawk a rawn then kharh takah chuan ka harh zawk a, mit khap miah lovin ka lo en anih chu! Zahthlak zawk hian!







"Hahahh..... Hei ka lo thlah leh thlap ania" ka zahzelah chuan ka ti ta ngawt a, ka mi biak pa ber lah chu a bu nghut a, a duhtawk em em mai.







"Ka haw leh nghal mai ang, chaw ei tui u" tiin min chhanna pawh nghak lo chuan a tlanin ka tlan chhuak a ni ber.







In ka thlen dawn hnaih chuan pangngai takin ka thaw thei hram a, kan inhmuh apianga min melh run run zel hi chuan awm a ti nuam lo thin khawp mai. A mitmeng nelawm ruk riauna kha a chezia vel hian a phawk chhuak fu lo ni hian ka hre ber.






><><><><><><><><><><><






Y.M.A hnatlang kan nei a, nimin Good friday a thli leh ruah sur avanga vanduai tawk chhung hnih ngawt kan awm avangin thawk thei zawng zawng kan thawk chhuak a ni ber ang chu.







Chhung khat chu an inchung chu thli na lutukin a phawk hlawk a, chhung dang erawh thingkungin a vuak chhiat bawk a ni.






Thawh bikna lam nei lovin nula thenkhat chu thingpui lumah kan tang a, zing khawvar hma thlenga ruah a sur avangin chet vel a nuam lovin a diak per pur a, ni a sa tha tho si nen nuam lem lo tak a ni.






A thenin sawhchiar an siam laiin kenin thingpui sem tur chu kan lo buaipui char char a, lehlam tak chuan khawtlanga thil tih dul dul chu a nuam khawp mai.







Ka ni chuan min rawn phone a, "Mate Chhimveng lamah thingpui leh sawhchiar kha rawn keng leh la" a rawn ti lawng lawng a, ka ni pawh hi a rawl ring ve a, a thusawi te hi miin an hre lo ang tih hlau niawm hian a tawng lawng lawng thin.







"Aww ka rawn keng ang" ti let ve lauhin phone chu ka dah a, Y.M.A tray lian tha zetah chuan Y.M.A no var ngeia thingpui sen thlum leh ar sawhchiar chu chawiin Chhimveng lam chu ka pan vang vang.








"Ka lo thleng e, a la chang lo khan rawn la va ru ka keng let leh daih dawn nia" ka ti lang lang a.







"Kan nula thingpui lum chu kan lo in ang chu" tiin UHruaia chuan thingpui chu a lo ban vat a, midang chuan an rawn ban veleh sap sap.







"Khawnge kan mistiri ber Mapuia kha? Thingpui leh sawhchiar kha a la chang ve miah lo nia" UHruaia bawk chuan a rawn ti leh a, ka hawikual nghal rulh rulh.






"Khu khuta khu a thut khu, nang nulaah zuk pe law law teh" UHruaia bawk chuan thingkung tlu an lum sawnna lam hawi chuan a ti a, ka hawi thla ve vut.






UMapuia chuan midang zawng zawng hnungchawnin thlang lam chu a hawi ngur a, a rawn khik chhoh mam mam danah zial a zu anih ka ring a, midang zawngin daihlim diak lo deuh lai chawlh nan an rawn pan tawk tawk laiin a ni thung chu midum pangpar kungin a hliah ve tawk a, lungawi hmel takin a thu veuh veuh tho.






Tray chawi chung chuan a awmna lam chu ka pan thla a, "Kha kha khaaa..." tiin ka zuk tlu tep lehnghal.







"I thu thlang lutuk a" ka tih hluk chuan ka tray chawi lai chu lain, "Fimkhur rawh" a ti nghut a, nisa hliah ve tu ber midum pangpar kung vawn chhan chuan ka thleng thla hram.







"Kha thingpui leh sawhchiar ka rawn lak che" tiin thuthmun chu ka rem a, tray chu min rawn pe leh vat.







"I va inlahrang reng reng ve a?" tiin thingpui te chu ka pe a, a dawt ri nghal khulh mai.








"Aaa no khat i in chhung a va rei lo ve, a dang pawh hi a in theih nia" ka lo ti zung zung.







Ka pain, "I UMapuia hi a fel nen hian a Khawngaihthlak ka tia. Ti hian mahni hrin loh fa a enkawl tawp a, chuta karah a nau hian a la zah lo ngam ania....." tia UMapuia sual loh zia te leh a chungchang tlem ang a zawng min hrilh avang khan hlau chung chung hian a nel theih ang ber a awm ka tum thin a, mahse amah hian nel hi a duh lo nge ka hrethiam lo. Mi hi a chhang bun nghut nghut a, kei tak phei chuan ka he tawng zo ngai mang lo.





"I ar buhchiar chu ka lo ei ve ang chu" a rawn ti hmasa ve teh khiah a, sawhchiar chu ka lo pe vat.







"Buhchiar a ni lo, sawhchiar anih kha" ka tih chuan a nui suk a, min chhang lem lo thung.







A mizia hi a ngeng nge a nelawm loh ve hrim hrim ka hre lo nain misual a ni lo tih erawh chu kan inhriat chhung reiloteah hian ka chiang viau.







Ka pa sawi duh loh chung ka hriat chak em avanga ka zawt sek sekin a chanchin tlem min hrilh atang khan amah hriatchian zel hi ka chak a, amah hnaih taka awm ka duh ber niin ka hria.







Ka pa khan nupui a neih dawn teah a nupui tur khan a then a ni awm a, tunah a nauin nupui neiin a nau te nupa in an pafa hnawk an tih vanga helama rawn insawn anih thu a sawi a, a fapa chungchang erawh hi chu ka zawh ngial pawhin a sawi duh thak lo.







Hre kim kilh kelh lo mah ila ka hriat chin hian amah min lainat tir a, nupui atan hiala a neih duh hmeichhia chu a hmangaih hle ka ring a. Chutiang a tawng chu ka khawngaihin eng emaw ka chhungril fan rawih rawihtu amah, a chungchangah hian a awm ni berin ka hria.







Chhun chawlh a zawha ei in na kan tih fel hnu chuan ka haw ta daih a, Khitea pawh kan in ah chuan a lo awm leh vang a, Sangtea pawh leng lovin in a awm tam phaha a tha viau mai.







Ka intihfai hnuin rawngbawl hma tiin Lawmite in ah ka leng phei a, amah chiahin a lo awm leh tawh.








Ka u nen an inbiak lai takin ka va thleng a, ka û lah chuan a mut duh chhuanlamin call a rawn cut hmak zui.







"Mate tunlai chu i û hi ka ngai thei lutuk a, i û chauh a ni pawhin ka hre lo ka lung hi a leng thei lutuk. Sava hram mai mai te hian ka lung an ti leng, ka tah te an ti chhuak thin. Ka chhungte lah hi mahni chauh hian min awmtir tlawng zel a" thawk chhuah halh pah chuan a ti a, a hmel chu a uang lo ve kher mai.







"I rai vang aniang..." ka tih chuan, "Ani tho anga, mahse ka lung hi a leng ve hrim hrim, i û ka ngai...." a rawn ti leh a.







"Aaa keichu khatiang ngaihzawng nei lunglen vel kha ka hrethiam pha lo!" ka ti hluk.







"I hrethiam pha reng nang nei ngai hek lo che, heti hrim hrim chuan i leng tar dawn khawp mai" nichin maia lungleng taka tawng khan a rawn ti leh hlar tawh a, mood te hi inthlak rang zat zat khawp mai.








"Niminah ka nu'n sarzuk min rawn hawn teuh a, ei ang aw. A tui tawp.." amah bawk chuan thawh pah chuan a ti a, chi thak nen sarzuk chu thlangraah a rawn chhawp hnawk mai.







A sen mawi hlawm si a, itawm tik tek hlawm tak a ni.







"Ei rawh Mate, ka chi thak siam kha a tui lutuk mahse ei teuh suh aw" tihpahin pakhat chu a hmawm a.







"Min huphurh tihna mi a ?" lawm lo zeta ka tih chuan, "Huphurh lo, i kua tha lo ang tih ka hlau alawm. Thei i ei hian tui in chintawk hi i hre si lova i kua that loh zia hi" a ti hlar a, rawn sawi dik viau bawk sia.







Thei tur ka ei ve hian chi hi ka liak vak vak zel a, tui in tawk hi ka nei leh si lo nen ka kua hi tha lo ngei ngei.








"Ka ei hnem deuha i hriat chuan min lo hau rawh aw" tiin pakhat chu chi thakah chuan ka nawr tawk a, ka hmawm nghal zat.







Mit chhing meuhin ka ka ei a, chi a al thak a, a sarzuk lah chu a thlum thur bawk a, ka lu ka thing leh uih thin.







"A tui tiraw ?" Lawmi chuan a lo ti a, "Aw mahse a thlum thur al thak a eng ber nge ka feel pawh ka hre lo" ka tih chuan a rawn nui hak.








"Eee ka zawt ang che ka tia ka theihnghilh daih. Hmanniah vawk chaw nawi Nu Biaki te inah ka la a, an nupain i chungchang te an lo sawi" a tih chuan ka phawk hra a. Nu Biaki a tih te hi Highschool kan kal laia ka bialpa ve thin Dika nu leh pa an ni a, Dika kan kan inkawp lai khan kan la naupang viau a, bakah tleirawl at ngaihzawng an bak kha a ni lo a, tunah Dika phei chu phai lamah eng zirin nge a awm daih tawh. Anni nupa chuan an fapa nena kan inngaihzawn lai chanchin an sawi awm der si lova, chutia ka chanchin an sawi anga ka hriat chu amak deuh.







"An sawi chu a hre chiang lo nain Cici-i te pawh an sawi a, an fapa nupui atan tunge tha ber ang tih an sawi vel anih ka ring" Lawmin thutak lo zeta nui paha a tih chuan ka nui ve ta ngawt.








"Hmm.... An fapa tana nupui tur lo thlan vak kha a tul lo e, phaiah te a awm a, khawpuiah duhzawng te pawh a nei ve nga" ka tih chuan, "Ee nang hi first love chu an theihnghilh mai mai thei lo an tih kha i lo la duh deuh hi nilo maw ?" meng kual zuk zuk pah chuan a ti a, sarzuk a hmuam pawng lawng bawk nen a va han hmelchhe reuh tak!








"Nangpawhin I first love chu i la theihnghilh bik lo a ni maw ?" ka tih let chuan, "Keite chu thuran a nia, bakah ka first love pawh ka hre tawh lo. Sawi teh Dika chu i la ngaihtuah ve hrim hrim ami a ?" a rawn ti leh a, zawhna chhan hel thiam tak a ni.








"Tleirawl ât lai anih kha, kan highschool kal hunlai ve te kha chuan kut inkaih pawh a zahthlak ania, infawh te phei kha chu khawi lamah, Dika hi ka duh tawh lo hrim hrim a, ka ngaihtuah ngai lo hrim hrim bawk" ka ti a, ka sarzuk ei chu ka siai suk suk.








"Eeee! Ka hre ta!" tiin Lawmi chu a nui khi hui mai a, "Enge ?" ka tih chuan tifuh intih hmel zet hian, "Aww tumah i la kiss lo. Dika chiah ngaihzawng i la nei a, tunah khan in inkiss loh thu i sawi ngei bawk a" tiin a nui har har a, ngaihtuah lovin ka lo inpuang leh ringawt tawh tih ka hrechhuak.








"Infawh a zahthlak thu ka sawi ringawt anih kha, bakah Dika lo fawh ringawt tur te chu an tam emai" ka ti teh ngawt a, "An tam ami.... Vengchhak..." a tih chiah chuan ka ding hluai a, "Ka haw dawn, vawiin hnatlang ka chau riau a ka va mu hahdam teh ang" ka ti a, sarzuk chu ka kut pahnih a thamin Lawmin engmah a sawi hman hma chuan a ka chhuak nghal nal nal.








Mahse a thu rawn sawi chhuah hman tep chu ka ngaihtuah zui a, ka kawng kal chu ka thinrim tun thei.








Vengchhakah hian tlangval senior un lutuk, ka pa te ai pawhin a upa maithei, tu leh pa nei loh avanga 'pu' tia la koh loh chauh tawh hian min ngaizawng pek a, keini ang tan ngaizawng dertu neih chu lawmawm viau mah se ani ber kher chu a lawm awm loh!








Nitin zantin hi a rawn lang kur zut reng a, mipa ngaihsak loh chi lo ni nen min han be tha deuh te hi ka thin a rim tun zel a, ka ni hnenah ei tur leinan te tiin pawisa a lo pe thin a, engmah la lovin ka ni ka hman tir vek zel.








Tun hnu hian a sim deuh a, tunah phei chuan a rawn leng ngai ta mang lova, ka lawm viau. Mahse a chanchin, a hming ka hriat ringawt pawh hian ka thinrim tun thei zel tho.







In ka thlen chuan ka sarzuk tham haw chu ei leh te te in hmanhmawh lo zet chuan rawng ka bawl zawm a, ka nu nau awm chu a phun leh hluk thin a, ka awmhmun atangin ka lo nuih reng.








"Dal kha chhum rawh aw, i piin dal hang a hawp chak" ka nu chuan a rawn ti a, dal chhum chu ka siam mawlh mawlh.








Rawng ka bawl zawh thuakah ka ni chu a rawn haw a, a tawlh thluk thu sawiin a rawn ani pawh chu a rawn ang haw hlak hlak a, keini chhung hi an cheh hi kan thanem ang reng a, ka pa leh Sangtea hian kan phun thawm te hi chu ngaiah an nei tawh zawk.







Tlaiah chuan UMapuian Khitea a rawn lam lawk loh avang chuan Sangtea ka bawlh rual chuan ka bual ve a, an pahnih chuan ruak veka bualin Sangtea chu a awm tha mai a, Khitea zawk chu zakin a inhup chaih chaih mai.







"A zahthlak loh ee!" ka tih chuan, "Apa in hmeichhia hmuh tir lo tur atia" a rawn ti reuh a, ka nuih ka za viau. Chutiang thu ber kher UMapuia kâ atanga chhuak a ni chu a awihawm loh dawn zawk zawk a, a sawi dan tur nen mitthlain ka nui hak hak.







An pahniha ka bawlh zawh hnu chuan Khitea chu towel-in ka tuam hlan a, thutthlengah ke then leuh leuhin a thu hle hle.







"Anute Mate in in hi a nuam e" a rawn ti leh a, "Lo awm daih mai la" nui chunga ka tih chuan, "Apa in a phal lova" a rawn ti leh a, ka nui leh hak hak.








"Kan in a rawn awm i dil em ni ?" ka tih chuan, "Khuma kan mut laiin ka dil a, mahse mahni in theuhah awm tur a ti a" a ti leh a, a thil sawi chu amah vek chuan hriatthiam loh hmel setin a hawi vual vual.







"I pa chuan a sawi dik chiah anih chu. Mipa phei chu mahni in ah awm reng tur, nakinah nupui leh fate i la ne a, i pa te i awmpui reng anga...." ka ti a, ani kum li mi lekin ka thusawi hriatthiam loh hmel zeta min en chuan ka sawi zawm ta lo.







Hmanhmawh lovin kal bek bek ang aw... Chuan comment leh ads click kha pawimawh


Show post links
Top

[Ngaia]

UMAPUIA
by Sammy







Ch >< 4







Zanriah ei zawh hnu lam daih pawha UMapuia a rawn lan tak loh avang chuan Khitea thlah phei tur chuan ka pa nen chuan kan chhuak.








Ka pa chu kan v.c te in ah a peng kawi a, nghak lovin kan kalsan thung.








An in kan va thlen chuan a reh leh thiap tawh a, "Pa" Khitea chuan thawm dang ka chhuah hmain a ti a, pindan lam atang chuan thawm a rawn awm.







"UMapui" ka han ti a, a reh vang vang mai bawk si.







Pindan atang chuan thawm a rawn awm leh thin a, ka ngaih chu a tha lo kher mai.






UMapuia hi a chhuak lawk anga midang hi an lo lut em ni ang tih te ka ngaihtuah a, thawm dim tak chuan inchhungah chuan ka lut them them a, Khitea chuan min lo zui ve bawk.






Choka luh dawna an tun tuikawhna chu ka la a, lek vain pindan chu ka pa leh tham tham.







"Tunge awm ?" tiin pindan kawngkhar chu ka nam hawng a, rum ri hawk ri chu ka hre zawm zat.







"Tunge...." tia ka lut chu ka beisei loh deuhin UMapuia khuma mu hi ka va hmu a, puan a lo inkhuh hlun lehnghal.







"Eheee!! Tinge UMapui ?" tiin ka pan phei a, "Pa.." tiin Khitea chuan min rawn tlanpel a, khumah chuan UMapuia bawh chuan a va lawn tharh.







Khawsik tlun tih hriat tak hian a lo khur hlawk hlawk a, "Awii! Engtin nge hetia i awm theih a ?" tiin ka bawh ve nghal rawk.







"Damdawi in nei em ?" tia inthing harh leh zawkin damdawi chu ka zawng a, ka hmu der lo.








"Mapuiii" ka pa âw chuan a rawn ti lung lung a, "Pa UMapuia dam lo!" ka lo ti nghal chul.







"A dam lo a ?" awih lo tih hriat zeta ka pa in rawn ti lutin UMapuia chu a rawn hmu ve a, "Ee Mapui engtin nge i awm ?" UMapuia awmdan a hmuh chuan a rawn ti zawm ve zat.







"I Nu Mamuanite in ah zuk kal la nachhawkna zuk dil rawh, a tlun nasa anih hi" tiin UMapuia chu ka pa chuan a bawh a, Khitea pawh chuan a pa chu a lo bawh ve ran.







Tlan chhuak nghalin Nu Mamuanite in ah chuan damdawi chu ka zuk dil a, ngaihtuah ber niawm chuan Cici-i chu lo phi cheng.






Damdawi keng chuan amah chu a tlan chho daih a, a hnungzang a lung a vawm thum duk chu ka chak a ni.







UMapuian damdawi a ei hnu chuan a rawn zia deuh a, Cici-i bawk chu ahma anga inti chhungkhatnu deuh hian kan pafa chuan lawmthu te min hrilh vel a, ka ei lo lutuk chu ka ner nang nang a, Lawmi awm phei se chuan engtin emaw tak a ti leh fak tawh ang.







"A va buaithlak ve aw..." ka pa chuan a ti deuh vang vang a, "Pa riah pui la, Khitea hi chu kan riah pui mai nga" ka tih chuan ka pa chu a ngawi vung vung a, "Ka buaipui thiam hleinem" a rawn ti hlawl.







"Aaa lungngai suh u, a rawn zia mai ang. Damdawi a ei tawh kha" Cici-i chuan a rawn ti leh a, tunah hian Lawmi awm se hnawt haw daih se ka van ti tak.







"Engpawhnise amah hi a awmdan han ngaichang phawt teh ang u" ka pa bawk chuan a ti leh a, amah vekin, "Engtia damlo thei nge maw a nih reng reng ni ?" a ti zui nuah nuah.







Khitea chu pindan atanga chhuahpuiin an thutthlengseiah chuan ka thut pui a, UMapuia damlo chu keipawhin mak ka ti viau mai. Vawiin lamah kha chuan a pangngai viau khan ka hre si a, a pian en pawha dam lo ve thei tur niawm miah lo a han dam lo chu a awih awm loh lek lek zawk a ni e.







"Anute Mate apa naktukah lo dam leh mai ang..." Khitean a tih chuan ka ngaithla liam puat a, "Ahma pawhin a dam lo vak a, chuan a tukah a dam leh daih" min ngheng paha a tih chuan a hmain hetiang hian a awm thin leh thin loh ka zawt a, chhanna mumal ka beisei lo viau laiin, "Aw mahse a lo dam leh thin" a rawn ti leh then a, kan ngawi ta rauh rauh.







Tumah inbe lo chuan kan awm a, Cici-i phei chu a haw leh daih tawh.







Darkar chanve dawn kan thut hnuah Khitea chu min nghengin a muhil a, a la naupang bawk a, a pa dam lo chu a ngaihven hmel ve tehchiam lo khawp mai.







Keipawh chu ka lo muhil a ni ang ka pa chuan min rawn ko harh a, Khitea nen chuan inngheng rialin kan lo mutui viau hi a lo ni.







Ka han hawi chhuak â phuang a, thaw hakin ka sam chu ka tuai puat.







"Kan phei dawn em ni hei i UMapuia pawh a tha tawh a" a tih chuan ka hawi â vek a, "I harh em ?" tiin ka pa chuan ka darah rawn sawi leh.







"Immm engtin nge Khitea hi ka tih dawn ?" tiin ka thaw hak a, "Khawi ka lo la ang... Ka tibuai thin lutuk cheu a zia lo khawp mai" rawn ti tu chu UMapuia ngei a ni.







"I dam lo ni lawm ni ?" ka ti ha a, "Ka dam leh tawh" a lo ti bul hmuk.







"Ava mak ve" ka ti let hluai a, Khitea chu pawm sawnin keipawh chu ka tho chhuak nghal.







"Anih kan phei phawt ang aw" ka pa chuan tiin kan inkai chhuak a, in lam kan pan nghal nal nal.







"Pa UMapuia kha a dam tawh tak tak ami ?" ka tih chuan, "Aw.... Eng emaw chang hian a tlun leh hluah thin a, dam lo pangngai a ni lo" ka pa chuan a ti tha mai a, mak ka lo ti viau. Pa lian tha viau mah se hriselna kawngah harsatna a nei ve tho anih dawn kha.








"A buaithlak thin awm. Nupui te nei se, inchhung vel enkawlpui tur atan te pawh" ka thusawi leh a khawsik tlun vel ka ngaihtuah chuan UMapuia chu ka khawngaih zual ve ngawt.








"Ni e, i ni te hi han duh hlauh se. Mahse i ni leh amah Mapuia pawh hi nupui pasal ngaihsak lo laklawh an ni ve ve tawh si a..... Aaa, tiang lamah hi chuan an ngaihsak loh piah lamah an hmu zo tawh lo a ni ve ang" ka pa chuan a rawn ti duah a, a tawngkam teh duah chu ka pa thusawi a an loh em avangin ka nui hak hak.








In kan thlen tepah chuan, "UMapuia chua ngaihtuahawm loh ang maw ?" ka ti leh hram a, "Ngaihtuahawm loh, hahdam deuhin mu teh" tiin ka pa chuan min ti a, in kan thlen erawh chuan ka nu a lo teu hlar mai. Ka pa vhu a hau a, kei erawh ka pindanah ka lut nghal hmak.







Muthilh ka han tum zet a, Cici-i awmdan kha ka ngaihtuah chhuak zel a, Lawmi ka hrilh loh chuan ka mu thei dawn lo tlat.







Lawmi chu whatsaap-ah ka va text a, Cici-i over ka tih zia vel chu ka va sawi duah a, ani lah chuan min lo tuihnih thiam si a, thinrim tunin darkar hnih vel Cici-i chungchang chu kan sawi leh a, ka mu ve ta hram.






><><><><><><><><><







School luh a hun chho tan a, school luhni hmasa ber chuan UMapuia pawin Khitea chu a rawn hruai ve a, nu leh pa dang pawh tel mah se naupang te tak te te zingah chuan a thu lian fal nalh bik a, ka hmuh chuan ka nui leh hak thin.








"Tun kum chu zirlai kan that hmel viau hi maw ?" Sir Jacob-a chuan ka bula rawn kal pahin a ti a, "Ni e... Tumah hi kum laihawl velah chawl lo se ka ti khawp mai" ka lo ti ve bawk.







Class te kan rem zawh hnu chuan ani khatna ni bawk a kan bang nghal mai a, kan ban chuan chawhnu dar 2 chauh a la ni.

.
.
.
.



Zanah ka pi nen chauhin kan awm a, midang chu ka nutei Mamit lama awm te an rawn zin avangin an leng vek thung.







Keini chu chhungte tih vak tur nei lovin kan bul viau a, ka pain min hrilh thin dan chuan ka pa chhungte hian ka nu hi mo atan an duh lova, ka pain a nei lui anih chuan tuithlar hial pawi an tih loh thu an sawi chungin ka pain ka nu a nei lui a, tuna kan awmna khua pawh hi ka nu te khua zawk a ni.







Ka nu sawi dan velehin ka pa hian a chhungte hi an inneih atangin vawikhatmah a la be leh lova, tlawh a zin a sawi ve pawhin ka pain, 'ka nupui ka hmangaih em em pawh mo atana en thei lo tute biak a hmuh a tulna ka hre lo' a ti hmuk zel a. Keini pawhin tun thlengin ka pi leh pu, ka pa chhungte lam reng reng hriat kan neih loh phah.







UMapuiate chu an rawn leng a, sawm ngai miah lova an rawn leng ve hlawl chu mak ka lo ti viau mai.







"Zanin chu kawmthlangnuin a rawn vil lo deuh che ni maw in rawn luh ve nawlh danah hian..." ka lo ti hlut a, ani chu a kiai suk duh chauh. Biak tlangnel tum pawh hian a rul te te min chhan loh leh a kiai ang suk chauh zel a, a bulah hian ngampat a har ngang ngang khawp mai.








"Zanin chu ka chhungte an leng vek a, mahse leng ve reng rih rawh u aw" ka pa vanga rawn leng anih ka rin deuh avang chuan ka ka ti ta a, "Nangmah vang tak zawka rawn leng kan nia" a tih chhum thuk chuan ka hawi chhuak zawk a, a mitmeng dam zet chuan min lo melh leh run tawh.







"Aa...aw anih chu..." a mit melhna vanga zam ru zet chuan ka ti a, ka hawisawn nghal bawk.







Heihi alawm abula ka ngampat theih loh nachhan dang chu. Tihpalh thil thu a ka melh fu chang pawhin ka chhungril zawng zawng hriat a phawrh chhuah tum niawm mai hian min lo melh tak run leh thin.








"Naktukah i pa te zui ve ka duh si a, Bawihtea hi i kutah ka dah dawn ania aw" a rawn ti thum leh chhak a, "Aw nia, ka lo ngaihtuah thei lutuk ang" ka ti hliai a, mit en leh run ka rin avang chuan ka hawi chhuak tawh lo hrim hrim.







"Imm" a ti thum leh dut a, t.v thawm tih loh chu thawm dang a awm tawh lo hrim hrim.







Sawi tur ka hre lova, hria pawh ni ila hepa hmek hmuk hian engtin teh vak min chhang leh dawn chuang lo. Biak loh pawh hi a pawi lo, ka tawng tam loh hian UMapuia pawh hian min nel hmel zawk daih.







Ka phone rawn rik tak tlengah chuan ka phone chu ka en vat a, Lawmi leh Sir Jacob-a message a lo awm ve khanglang.







Kei hi ka luck lo ve reuh va, nge ka zei lo lutuk zawk pawh ka hre lo. Min ngaizawng ru a phone kal tlanga hma rawn la te hi ka chhan dan tur hre lo lutuk hian ka insawi buai leh nawk thin a, hmanah pawh ka duh ruk ve deuh lakah ka insawi bam vek tawh. Hetiang ka nih vang hian be tu ka nei lova, biak ka nei lem lo.







Lawmi message chu ka en hmasa a, *Ka leng dawn* tih hi a lo ni. Leng tura a rawn chhuah leh daih tawha ka rin avang chuan ka reply ta kher lova, Sir Jacob-a message chu ka en leh.







*Enge i tih ?* tih te hi a lo ni. Ka thut mai mai thuin ka reply a UMapuia hrawk then kharh riah chuan ka phone chu dahin ka hawi chhuak a, tun tum chu min lo melh lo ve teh khiah.







"Khite vawiin khan nuam i ti em ?" a reh duk aiah chuan tiin Khitea chu ka zawt a, "Imm..." tihpahin ka bulah chuan a rawn kal phei a, ka mal rawn bawh deuh thlapin min en chho kiau mai.







"Apa in spider-man lem bag min lei a, chuan pencil pawh pahnih ka nei" intihtheih hmel takin a kuttang pahnih chu a rawn lek chhuak ve a, a thil neih chu ka hre lo ang tih a hlauh hmel takzet.







"Imm bag thar te i nei tawh sia tha deuha lehkha zir tur" ka tih chuan phur zetin, "Immh... Abc pawh ka thiam tawh.. a,b,c,d,e,f....." a ti a, amah chu a nui heuh heuh.







"Khati zawng kha em ni ?" ka tih chuan, "Imm" tia nui heuh heuhin a bu nghat nghat a, "Eee i va thiam ve!" tiin ka nui hak hak.







"Anute Mate..." Khitean a tih leh hliai lai chuan, "Lalruatpui!" Lawmi ngei mai chuan a rawn ti fiak thak a, a ri zui rawk rawk.








Ui beleuh tuar ri ka hria zawm zat a, kawngkhar chu pawt hawng ri rawkin Lawmi ngei mai chu hmel tang hru hian a rawn lut.







"Kha ui kha ka ngei lutuk!" a rawn ti nghal hluk a, UMapuia amah hnungchhawn zawnga thu a hmuh chuan a ding chut a, min melhin ngeiawm zet hian a nui a, a mit ko a san ak.







"Lawmi i lo leng a ni maw ?" ka pi chuan a lo ti a, UMapuia ka va en chu kan inmelh fu leh chat tawh.







Hawi sawn pah chuan a nui suk a, a awihawm loh zawk a ni!








Khitea chu ka kapkara inzepin a thu a, ka kut chu a khal niap niap.







Lawmi chuan eng enge maw a sawi zat zat reng a, Cici-i chu a rel hlawk nasa kher mai.








UMapuia chu ka va melh leh zeuh thin a, thutthleng ngengchhanah a ban pahnih chu a kham diai a, a bawp phut hlarh hlarhin amah chauh pawhin thutthleng pakhat chu a luah hneh viau mai. T.v lam ngawt chu en in kan thusawi pawh chu a hriat hmel lem lo a, mahse Lawmi chu insum deuh tur chuan ka mit mei zeuh zeuh tho.







Cici-in ka û chanchin a sawi lar lar lai chuan UMapuia chu a ding thut a, "Ruatpui khawilam nge in bathroom ?" min rawn melhin a ti bung leh hmuk a, a thusawi thenkhat te hi chua awki thlak deuh se chuan ngaihthlak a nuam ve thin ang maw le.







"Choka lamah sawn..." tiin ka thle bak a, a kekawr ipte pahnih zena a dar chhin akin choka lam chu a pan.







"Mate biak ka tum ngial pawhin ka be ngam lo" Lawmi chuan a rawn ti hlawl a, ka en ha mai chu ka dara bengin, "Khatin min en suh, biak kha ka va tum ve deuh reuh a nuam lo a tih kha ka hlau va, mahse keimahni min ngaihsak anga a lan loh bakah biak kha a phurawm lo ve e" a ti nang nang a, ka nui hak.








"Khitea pa chu tawngtam lo mah se a fel lutuk" tiin Khitea muthlu lak lak chu ka pawm tha a, "Ve ngawt ngawt a, fel mah se a tawng tlem leh lutuk a...." Lawmin a tih leh nui nui chu ka nuih hak hak.







Ani meuhin a a biak ngam loh tur khawpa rorum anih ka hre lova, nge ama hnena UMapuia chungchang ka thlen thin dan a lo dawng sawng dik lo anga, a lo hmu nelawmloh sa ve a ni ngat ang.








"A e niang a rei tawh e tiraw ?" Lawmin a rawn tih leh sa sa chuan ka nui leh hak hak a, "Ka e dawn a ti zak ve niang, nula te kan awm sia" a tih leh phei chuan ka nui nasa lutuk, a hmel awmdan zawng zawng nen chuan a nuihzatthlak a ni tawp.








"E pawh nise a pawi hleinem" nui chunga ka tih chuan, "A thing eee!" a rawn ti fan leh raih a, amah pawh chu a nui hak.








UMapuia a rawn chhuah leh chuan Lawmi chuan a lo en kar a, "Tla tha thei maw?" a lo tia nih chu!








Awi awi ka lo zak lutuk chu ka beng atanga ka taksa aaa ka sa chhuak vek.








UMapuia lah chuan keimah chu min lo en daih mai bawk si a, Lallawmzuali tawngthei lutuk hi chu ka la beng hrep ang. Ahma zawnga be ngam mang si lo khatia lo tih kher kher mai.








UMapuia chu za lo tih hriat tak hian a nui suk a, a chhang lem lo.








Thutthleng dang awl reng si chi ka sirah chuan a rawn thu thla a, zial rim a rawn nam hak danah zial a va zu anih ka ring a, chu chu sawi kher lova hrethiam turin min duha ka ngai hmak.








"Ka lo pawm dawn em ni ?" ahma ai chuan a tawng hriat a nuam deuh; mahse, kan inthuthnaih mah mah a ni.







Thu pangngai ngat ila chuan kan dar vel chu a insi ngei anga, ka thaw tha thei lo vel maithei a ni.








"A la mu nghet lo ang" tia amah ka en chu kan hmai a insi lo chauh, hahdam hmel zeta thuin a awm pharh hlai zet chu ka lam a rawn hawi vah a. Min kuah se, a awmah hian bei hlu hlu ila a va thlamuanthlak dawn tak. Aaa ka ngaihtuah teh hrep chu!








"A harh palh ang" ti leh sepin ka hawisawn a, hriatthiam har zeta min melhna kha ka hriatthiam loh lutuk avangin ka zam pui a, a rawn thaw chhuak hawk thaw lum te chu ka feel thei.








Engvanga hetia awm chiam nge ka nih ka hre lova, thutthleng danga a thut lai pawhin ka pangngai tho a, 'UMapuia hi mihring pangngai ve tho a ni, zam na tur a awm lo' mahni chu ka inhrilh nawn reng a. Mahse,,,, duh ai chuan kan inthut hnaih a ni.








Lawmin aw a thian kharh a, "UMapui Khitea nu hi a rawn chhuk chho ve dawn lo em ni ?" a rawn ti leh pek.








A malpuiah chuan ka sik vak a, "Anaaa!" a lo la ti vak zui.









"Aw dawn lo" UMapuia chuan a ti mai a, nuam lo ka lo ti ru viau mai.








"Ka pa te chu an rawn haw har reuh hle mai a" Lawmin eng eng emaw a sawi leh hlau chuan ka ti a, "Chhungte hmuh khat deuh chu an thlakhlelhawm thin alawm" ka bula thu chuan a rawn ti dut.








"Anih UMapui tinge helamah in rawn insawn daih a ?" Lawmi bawk chuan a ti leh a, ka mitmeiin khap viau mah ila a hrethiam lo der tlat.








"Chhan vak a awm lo. Mahni khawh hlui ania" UMapuia chuan a malpui ben thuk thuk pahin a ti a, a chhanna lah chu pakhatnu lah chuan a duhkhawp loh hmel viau mai lehnghal.








"In kawmthlangnu khu ka lo venthawn pui che, i inluah hi an ta ni lehnghal a, an nufa khuan mikhual chhuah lo hi an nia. Kherh tlat che a tum dawn chuan Matei hi i ngaizawng daih dawn nia!" a tih chuan ka ip chawih a, Lallawmzuali ka huat dan chu pui tak a ni.







Amah lah chu sawi tha intih hmel zetin a inkuangkuah vei than a, t.v lam chu a en hmak bawk.







UMapuia nui hawk ri chu ka hria a, min lo en leh run tawh.







"Lawmi kha chu a tawng ve mai mai nih kha, a kâ hi kaw zau ve a" tiin za lo tak chuan ka nui a, ani chuan min nuih leh suk ringawt.








"Chu i thiannu chu min pe phal viau dawn a ni maw ?" min en kanin Lawmi en chuan a ti a, kei chu ka khawh hmu te hi a phe vek tawhin ka hria. Khatiang a a zawh let ka beisei lova, nuih kha a duhtawk leh viau ka ring a ni a.








"Phal e phal e, a len tar hi ka hlauh pui mah nak lai a" Lawmin a tih leh hlek phei chuan keichu khutah ka awm tawh!







Lallawmzuali hi nakinah ka va han beng dawn chiang tak em!







Lawmi leh UMapuia chu ka chungchang sawiin an ti ti zui a, UMapuia chu a nui leh huk thin a, Lawmi lah chuan ka chanchin chu sawi nuam a ti sia, an inkarah ka thu bawk nen keimah hi khûtah ka awma ni tawp!






Lawmi chu a haw hmasa a, UMapuia nen chuan kan thu ngawi ta rauh rauh.







Sawi tur ka hriat loh sa tawh naklaiin Lawmi thusawi zozai avang khan ka hriatloh zual phah a, UMapuia han biak vel chu ka phur zan lo khawp mai.







Dar 9 a ri tep tawha ka chhungte lah hi rawn haw an tum lo emaw ni.







"I hria tiraw ?" UMapuian a rawn tih thum dut chuan, "Engmaw ?" ka ti a, en hreh viau mah ila min biaka hawisawn hmak chu a mawi a ka hriat chiah loh avangin hreh tak chuan ka en a, hlimna, lawmna, aaaa chutiang inpawlh vel nawk hmel chuan min lo en.







"Nupui ka nei lo tih hi ?" a rawn tih chuan ka meng awk a, zawhna mawlmang tak a ni nangin chhanna harsa tak a ni.






Zan lama ka rawn dah loh hi chuan zingah hian en tawp ula, a dik vek mai ang. Chuan ads click leh comment kha aw


Show post links
Top

[Ngaia]

UMAPUIA
by Sammy








Ch >< 5








"Nupui ka nei lo tih hi ?" a rawn tih chuan ka meng awk a, zawhna mawlmang tak a ni nangin chhanna harsa tak a ni.







Hria nih ka duh si lova, chhan loh tawp lah chu tih chi a ni miah bawk si lo, "Aaa i nei lo mi? Chutiang lam ka ngaihtuah lo" ti niah niahin hnuailam ka melh daih a, "Imm" a ti nghat a, nichina a awmdan nen a inperhsan leh ta lutuk chu ka melh zawk a, ani lah inngaihtuah muk hmel zetin hmalam a en vung vung.








Kawngkhar pawn lamah chuan thawm a rawn awm a, "He nau harh lutuk hi chu maw ?" ka ni ti hlak hlak ri chu kawngkhar hawng riin a zawm zat a, "E! In lo leng a ni maw ?" ka ni chuan a rawn ti lut hluai a, Sangtea chu dim lo zet hian a rawn kai lut tel bawk a, ka pa chuan a rawn hau bawk.








"A harh si, sual si..." ka ni chuan a ti hlak hlak a, "Sangte ka bulah hian lo thu daih teh" tiin ka pa chuan thuthmun a rem a, Sangtea chu mittui parawl kuangin ka pa bulah chuan a thu.








"In lo leng zan berkherin kan lo leng chhuak daih si a...." ka pa chuan a ti a, "Aaa hei Ruatpui hian min hrilh alawm" UMapuia chuan a ti dut a, thu dang a sawi zawm hreh hmel viau lehnghal.








"Thingpui ka'n lum ange, kan nula ve hian thingpui lum nachang che a lo hre leh awm tawp si lo" ka nu chuan a ti a, a sawi ang tak rengin thingpui lum nachang ka lo hre miah lo.







"Ka in tawh lo mai ang. Bawihtea hi ka va haw pui tawh nge" UMapuia chuan Khitea ka pawm chu a rawn ban vut a, Khitea chu a lo tal deuh a, mahse harh lo chuan a muhil zawm leh nghal.








"Awii hetah riak ve mai ula, a mutui sia a khawngaihthlak" ka nu chuan a rawn ti leh pek a, ka melh nghal hraw. Tunge maw mahniin riah chhuahsan duh tawp bik ang ni?








UMapuia chuan chhang lovin a nui ringawt a, hnehsawh zetin Khitea chu a hnungah a hlang kai a, amah chu a kun deuh tawi mai.







A pa lian si a, a nau puak lah chu a cherin a ngo puak reuh si a, ka ni khan UMapuia tetlai a chhun thu kha a sawi a, hetianga UMapuia a tetlaia a awm anih ngat chuan a thang tha ve hle a ni ngat ang.








Khitea chu te that thatin a rawn tal deuh a, UMapuian din ngil a'n tum chuan Khitea chu a rawn eu tlat a, a hnungah chuan ka lo dawm vat.







An awmdan chu an khawngaihthlak pafa hnup hnup lutuk.







"Awww a harsa zawngin i ti anih kha, puakpuan thleh that kan la neih kha mate va la rawh" ka ni chuan a lo ti a, mahse amah chu tho vutin a pindanah chuan a lut nulh.








"Khawi mate pua la i UMapuia te hi va thlah rawh" tiin ka ni chuan puakpuan chu min dawn bah tir a, UMapuian engmah a sawi hma chuan Khitea chu lain ka hnungah chuan a rawn dah nghal a, ka lo paw tha mai bawk.








UMapuia nen chuan an in lam pan chuan kan inzui phei ta nge nge a, mahse kan inbe lo ve chiang khawp mai.








In chu kan thleng a, Khitea chu khumah dim zetin ka melh a, UMapuia erawh chu in neitu zawk ni siin pindanah chuan a rawn lut ve duh thak lo.







Khitea ka mut fel hnu chuan ka thaw hak a, nau puak, awih mut tihvel hi ka zei lo ve sia, ka tih harh hlau lutuk nalamah ka tang vek kha anih kha, ka thaw chhuak ham ham.







Pindan chhung chu ka'n en kual a, a felfai reuh phian.







Ahma UMapuia damloh lai khan ka lo en chiang lova, ka han enchian chuan ka rin ai zekin a felfaiin bungraw rem dan vel chu hmuh anuam viau mai.








Thing almirah pahnih lian lutuk lo a inhung a, thing drawer pakhat leh full mirror pakhat a inhung ve bawk a, pheikhawk remna thing hmang a siam bawkah chuan an pafa pheikhawk chu a inrem fel thlap a, ka pheikhawk remna nen ka ngaihtuah chuan ka zak ru kher mai.








Nula zawkin pheikhawk duhdah zetin ka rem a, ka rem hnan vel mai mai ni a, mipa zawk a fel thlap mai a, tumahin min hriatpui lo mah se ka zak ru viau tho.








Pindan atanga ka chhuah chuan ka chhuah hun nghak niawm hian UMapuia chu thutthleng nghenchhan dawmin a lo ding ran a, a din danin a zir viau vang nge a awmbawr leh banpuam vel chu ka hmu lian viau lehnghal a.







Thinrimin min han beng ta se ka thal tawp anga, mahse duh leh duat taka min kuah anih erawh chuan a nghet cherh chawrh dawn si a, ka thlah mai mai thei tawh hauh lo ang!..... Awww.... Enge maw ka ngaihtuah thin hi ni? Kei hi ka â takngial dawn anih hi.








"Thosilen ka zar thla nghal vek aw" ka ti sep a, a lu bu nghatin, "Ka thlah ang che" a ti bung leh nghut.







A hmaah chuan kalin Lawmite inthleng chu inbe miah lo hian kan kal a, Khitea mu kha ka ngaihtuah ve tho si avangin let tur chuan ka ti a, "muttui" tia ka thlahna pawh min buk khum ringawt a, a kal chu ka thlir zui vung vung tawp.







A lu bu lova a tawng chuan a thi dawn aniang, 'muttui' emaw 'nangpawh le" han tih mai mai pawh har a ti nia, a inla pe ve zawk emaw ni?







Phun nang nang chung chuan ka haw a, in ka thlen chuan ka pa te chuan t.v an la en a, kei pindan panin ka mu nghal hmak.


.
.
.
.


Karkhat a liam leh zet a, Lawmi chhungte hnenah ka pa'n kan hriatpui lohin palai a lo tir leh a, mahse tun tumah erawh an rem thei ve ta hlauh thung.






A hmanhmawh hnawh a an lo tang tawh zawk a, Lawmi dul a len ve zel bawk si avangin thlathar ni 3-ah inneih chu an sawi fel nghal a, inbuatsaih nan thlakhat tha pawh kan nei tawh lo anih chu!







Ka û pawh chawlh lain rawn haw a tum a, mahse ka pain 'inneih hma kar hnih velah i rawn haw chauh dawn nia, doctor te i ni a, helaia awm mai mai rih ai chuan tangkai tak khan awm phawt rawh' a tih tlat avangin ka û pawh chu a rawn haw duh ta bik lo.







Mitin mai chuan mahni hna theuh thawkin kan phe vat vat thin a, keipawh school lamah kal nitinin Khitea pawh ka ngaihsak viau thin a. Biak leh sawm hmasak ngai hlek lova UMapuian kan ina rawn leng a min rawn biak hmasak nachhan kha a ni a, ka ngaihsak lo phal lo hrim hrim.








Amah a fel reuh si a, a nungchang zim zem pawh hian ngaihsak a phu ve hrim hrim bawk.






><><><><><><><><>><><






Hun a liam ve zel a, UMapuia nen pawh ahma ai chuan kan inbe ngun deuh tawh a. Mahse Khitea chungchang anih loh chuan ka la be tawng zo ngai mang chuang lo.







Keilah pek hian enge ka hriat ni, heti khawpa min biak chak loh hmel mihring hi biak ve tawh lo mai awm tak hi nia. Mahse a mi melh dan a zam viau thin e tilo chuan biak hi ka chak zek zek zel a, pangngai taka min chhan ve ka beisei vang a ni pakhat maithei.







Sunday chawhnu a ni a, kei leh ka pi in ah kan awm a, midang zawng an leng chhuak thung.







Naupang homework ka check loh ho chu ka check mawlh mawlh a, chutihlaiin Lawmi a rawn dak lut nawlh.








"Mate i chhungte an awm em ?" a rawn ti sar sar a, a meng kual rulh rulh bawk a, nghate mit lawk a ang lutuk.








"Awm lo lo leng rawh" ka tih chuan a rawn lut nghal a, "Thil ka rawn hrilh dawn che, Laldika rawn haw" tihpahin ka bulah chuan a rawn thu a, "A rawn haw nimai lawm" ka lo ti satliah mai a, Dika rawn haw chu ka ngaipawimawh lo ve e.








"A nu thusawi ka rawn hre leh tawh nia aw...." a tih chuan amah chu ka en zeuh a, thutak ve hmel deuh hian min lo en.







"Enge a sawi a ?" ka ti ve ta nge nge a, "Ka hre tam lo, mahse 'a û te an inneih dawn a, i rawn haw fu lutuk. Amah saw ngaizawng leh la' a tih ri ka hria a, nangmah i ni chiang lutuk" a ti barh barh a.








"Ka awih lo, thil hi i hriat aia uarin sawi i ching ve sia" ka tih chuan lawm loh hmel zet hian, "Awih rawh... Lo ngai reng rawh zaninah rawn leng hrim hrim ang" a ti leh a, "Lo leng se tha lawm, ka len tar i hlauh em kha nangpawn" ka tih chuan a teu hlar a.








"Mate UMapuia nen hian inkawp mai ula" a tih chuan ka phawk hra a, a hmui hup sakin, "Chup... Khatiang kha sawi tawh reng reng suh" ka ti bung nghat a, a thu rawn sawi avang khan ka thisen zam te hi a kal dik lo zo nghal vekin ka hria.








Biak pawh ka biak tawng zawh ngai loh nena inkawp maw? Awi awi awi, sakei leh chaichim.... Aaaa, ka ngaihtuah peih lo. Ka ngaihtuah chhin zawng pawh hian ka sa pup pup a, thip zeta a mi melhna ngawt mitthlain ka mur uai uai thei.








"UMapuia ai chuan Dika chu a tha zawk lo em ni? Tlangval ania, thiam thil neiin hna a nei a, min chawm zo dawn lutuk" ka tih lar lar lai chuan kawngkhar chu an rawn kik a, "Lo lut rawh" ka tih zawm pat.









"Ruatpui i pa a awm em ?" ka mihring beisei loh lutukin a rawn ti lut a, ka meng phawk viau a, chhan mai nachang pawh ka hre lo. Ka thusawi kha a rawn hre hman angem tih ka ngaihtuah a, mahse a hmelah khian chuan engmah a hriat hmel si loh.








"Aih awm lo, a leng chhuak a" Lawmin a lo tih takah chuan ka harh zawk a, "Aa aw... Aa... Enge ni ta ?" ka ti bah nak.








"Amah a awm si loh chuan i kutah ka dah mai ang, i pa i lo pe dawn nia" tiin envelope min pe a, enge a nih ang ka rin hriat thiam lo.







"Thu ve rih la" kal leh nghal a tum chu Lawmi chuan a lo ti a, "Bawihtea ka kalsan si a ka thu kawi lo mai nge" tiin UMapuia chu a chhuak zui.







"Lawm ka thusawi kha a hriat i ring em ?" ka tih chuan, "Eng kha ?" a lo ti ha a.







"Aww UMapuia ai chuan Dika chu tha zawk tih vel ka sawi lai kha..." ka ti a, "Hria se tha zawk lawm, i duh chuang lova a lo duh ru che anih chuan a ruk vekin a bansan thei che nga" a ti sam et a, a ban puamah chuan ka beng. Sawi awm ang lo thei lutuk!







"Chutiang lam ni lo, a nuam lo alawm" ka tih chuan, "Nuam lo i ti satliah lo nge...." tiin chimawm tak hian min melh a, ka la lai ringawtin zui.







"I ninawm" ti hlukin homework chu ka check zawm hmak.








"Mate Laldika chu i lo ngaizawng leh nge aw... Ka duh lo teh ania. Hna tha nei mah se a chhungte an sual si, amah lah sawn zu in zeuh zeuh a ching bawk si" thutak zeta a rawn tih leh chuan, "Lungngai suh, Laldika hi duh ila chuan highschool kan kal lai atang khan kan la inkawp char char ang chu" ka lo ti ve a. UMapuia bawk ka rilruah rawn lutin nichin a ka thusawi te kha a hria ngem ka ti a, a hriatloh hram chu ka beisei rualin a hriat ka ring viau bawk si.







"Mawh Mate, UMapuia hi duh mai rawh" hei lah hi, ti ve chhen.







"Amak...!" ka ti hluk a, "Engmah hi i hrethiam lo nih hi" a tih leh chuan, "Engee ?" ka ti vak.








"UMapuia hian a duh che! I chik ve lo em ni ?" a tih chuan, "Ka chik ngai lo. Bakah UMapuia hi min hmehbel tum reng reng suh ang che. Hetia a chanchin sawi leh a bul hnai, a mitmengah ringawt te hian ka zamin ka thin a phu vak vak thei ania" ka tih chuan a chek tlak tlak a.








"I la nau deuh a ni tiraw inngaihzawnna kawngah hian" a ti hluai a, ka chhang lo.








"Love story te hi ngaihthlak a, movie te hi en tur che nia. Inzirna tur a tam ve a, i thu tawp ringawt a i leng tar dawn chiang lutuk" a ti leh hmuar hmuar a, "I mak eee!" ka lo ti ngawt.







"Ka ning a! Ka haw dawn, nakinah ka rawn lawi hunah a grass root atangin ka hrilh ang che" tiin a tho a, biak leh hman hma chuan a chhuak nghal nal nal.







"Mate" ka pi chuan a rawn ti ban chap a, "Imm thingpui i duh em ni pi ?" ka lo ti vat.








"Duh lo e, bialpa te hi i nei lo em ni ?" ka pi pawh chu awwww...







"Pi a la hun lo e" ka ti nang nang a, ka pi chu a nui ve hak.







"Hun lo a awm hleinem, tunah i thiannu pawhin a neih tawh dawn hi" a tih chuan sawi tur ka hre tawh lo.







"Mapuia chu tha i ti lo em ni ?" ka tih chuan ka pi chu ka melh kawk a, enge maw an hriat tak luai luai ni?







"Pi nang leh zel chuan sawi lo la" ka ti a, ka pi lah chuan, "Mapuia melh dan che hi i hmu thiam lo em ni ?" a ti leh a, a mitmeng thip tak bak kha ka hmu thak lo.








"Duhna, awhna mitmengin nih hi a melh thin che. A ngaihven tih che hi Lawmi nena an intiti tum pawh khan a chian viau kha" a tih leh chuan, "Ka pi hii...." ka ti hliai a, engmah ngaihsak lova a lo thu mai mai emaw tih lai hian ka hriat ai ai a ril leh tam a lo hre daih zel.








"Mapuia hi a tawngduh lo i ti tiraw ?" a tih chuan aw tih nan ka lu ka bu nghat a.








"Ngaihtuah let la, Lawmin i chanchin a sawi chiah khan a tawng ve duhin nuih pawh a nuih nasat kha, i chanchin chiahin khatianga nui leh tawng tam khan a siam ania" a ti leh chuar chuar a, Lawmin ka chanchin a sawi laia zak taka an inkara ka lo thut ker lai chu ka ngaihtuah chhuak a. Ka pi ngaihtuah ang hian ka lo la ngaihtuah ve ngai lo hrim hrim. Khatia ka chanchin zawng zawng a bula phawrh vek anih takah khan ka lo zak ru hle zawk ania.









"Mi hi kan lan dan hi ka nihdan a nih thin loh avangin Mapuia pawh hian a landan loh pui rilru leh thinlung a pu nia..." ka piin a tih lai mek chuan ka nu leh ka pa an rawn haw a, "Nakinah kan sawi zawm dawn nia, thingpui chu min va lum teh" ka pi chuan a ti ta daih.








Thingpui lum pah chuan ka ngaihtuah a, ka pi takngial pawhin a lo hmuh thiam chuan engtiang chiahin nge UMapuia hian min en ni? Ka chik ngai lova, a mitmeng thip tak bak hmuh ka neih ngai loh avangin ngaihzawng lam hawi phei chuan min en ka ring lo bur.








Lawmi sawi chauh anih kha chuan a ngaihruat kual velah ka ngaih sak mai thei a, mahse ka pi meuh pawhina a sawi chuan Lawmi ngaihruatna chauh zawng a ni dawn der si lo.








UMapuia hian min lo duh reng tihna mi le?






Dah hun mumal ka nei lo hi ka inthiamlo ve tho nia aw


Show post links
Top

[Ngaia]

UMAPUIA
by Sammy







Ch><6








A awmdan te ka han ngaihtuah a, chutiang lam a hawi chuan ka hre thei si lo. Nge ni a, kei hian ka hlauh thinna vang hian ka lo hmu thiam lo zawk ni.







Hun a liam zel a, Lawmi te inneih pawh karkhat chiahin dang tawhin ka û pawh a rawn haw tawh a, ka nu te lam atanga chhungkhat kual pawh kim viau tawhin ka pa lama chhungte erawh tu amah biak pawh kan nei lo.







UMapuia chu ka chik ve viau pawhin ka pi leh Lawmi hmuhdan ang khan ka hmu thei meuh loa, nge ka thlir na tlang hi a dang viau zawk pawh ka hre nek lo.







Ka nin ber tak erawh chu Dikan min birh tlut tlut ta mai hi a ni. Zing chhun zan awmin in ka awm loh pawhin a rawn leng reng a, haw tura tih fak fak chang lah ka ngah a, ka nu lah hian lo la tan ziah lehnghal.

.
.
.
.


Ka û Lawmi te in lamah a leng phei a, UMapuia te an rawn leng bawk a, ka pa nen choka lamah an thli dun kerh kerh.







UMapuian zu a in ve chu mak ka ti a, keimahah hian hnual rawihna a awm ve ringawt chu mak ka tiin eng emaw tak hian a lakah ka lawm lo viau ringawt bawk.







Khitea leh sangtea chu chhun lamah an harh bawk a, an muhil hma leh viau a, Khitea muhil chu ka pawm bet leh reng tawh.








Ka ni in fb lama chhelo deuhin a lo biak thu phur zeta a sawi suah suah lai chuan kawngkhar chu a rawn inpawt hawng a, "Ka rawn leng dawn.." tiin Dika bawk chu a rawn lut.








"Lo leng rawh" ka lo ti bung nghut a, ka nu chuan engtin emaw min lo mitmei leh hman tawh, nge maw a lo chhan viau thin ni.








"Laldika chu kai tha lek lek tawh ve ?" ka ni chuan a lo ti a, "Harh fimin khapui kha a hmachhawn ngam si loh a ?" ka nu bula thut pahin Dika chuan a ti a, ka ngei lutuk chu ka lo ner nasa.








Dika a thu fel chiah ang tih chuan choka lamah chair ri rawk rawk thawm chu ka hria a, UMapuia chu a rawn lang nghal.







A mitmeng a sen rum a, cargo dum dum da lam tawh hain t-shirt bodyfit tawng a ha a, bata slipper bunin a mitmeng bawk chu uluk zetin ka en a, ahma zawnga hlau hle si tinge tun ataka ka hlauh loh tak viau chu ka hre lova, a mitmeng lah chu rem ram viau e ti lo chuan a tlanchhe deuh hian ka hre lehnghal!








Ka sir lam thutthleng ban lamah chuan leng leh leng lo hian a rawn intawlh vei kak a, a pa lian si a, kei Khite pawm nen ka ka ke ka hlang lo thei si lo. A dar chhin akin fel zetin a bawp chipchai inkarah chuan a kut chu a dah a, a cute vei reuh zek a!








"Mate lo tawlh rawh, i UMapuia kha a hreawm ang" tiin ka ni chu a thu sawn a, "Chhelo deuh kha ka va be leh nge" tiin a nui ar ar a, pindan lamah a lut zui.








"A hreawm em ?" amah zawk chuan a rawn ti hleuh a, "Hreawm lo" ka lo ti vei hmak a, ka tawlh sawn deuh. Enge maw ka thinrim ngawt chhan ka hre miah lo.









"Enge i thawh thin a ?" Dika chuan UMapuia melh ram chung chuan a ti a, UMapuia chu a nui su dawt a, "Ele mistiri ka nia" a ti ringawt a, a chhang chhum bung lutuk chu a zawt tu ka ni ang tih ka hlau zawk.









"Eee Dika pawh rawn leng a ni maw ?" tiin ka pa chu choka lam atangin a rawn chhuak phei ve a, ka nu chu a zial bur dilin torch light lian tha nelh nawlh chu a la a, street light tih ang reng chi te kan khuaah a la awm loh avangin thla a en fe loh chuan torch light pai chhuah hi thil tul ngei ngei a ni.







"Kawmthlangah khuan ka zuk tei lut veleh nge" tiin tumah ngaihsak tawh chuang lo chuan a chhuak nghal nulh a, ka nu chuan leng rei tawh lo turin a au zui lang lang.









"Engtikah nge phai lamah chuan i chhuk leh ang Dika ?" ka nu chuan a ti a, "Ka chhuk har ang, nupui neih tum deuh reuh a rawn haw ka nia" a ti a, awmze nei zeta min melh na chu ka hrethiam lo der tlat.








"E! Chutiang lam daih maw? Khawilam nula nge neih i rilruk a ?" ka nu'n a tih leh chuan, Dika chu a han nui thle bak a, a va han hmelchhe chiang tak.








"Cici-i nen khuan an sawi tlat cheu, ti deuh huk dawn hnai riauin ka hria" engmah a sawi hma chuan ka lo tih khalh a, "La na tur an awm loh chuan ti huk maithei" lawm hmel vak lova Dikan a rawn tih chuan, "Awm lovang" ka lo ti leh vat a, ka bula thu pa chu a nui su leh dat.








"Aaa awm ang awm ang.... Kan khaw tlangval to berin nupui i'n neih chuan a ruk a na tak tak tur an tam dawn emai" a lo ti a, ka ner sak. Lo ngawih ve hle hle thin awm hi nia.








"Ka lo pawm tawh dawn em ni ?" UMapuia chuan a rawn ti dut a, a mitmeng chu a zu in vanga ka ngai a, a harh hlawl lo.








"A ngai lo, i haw duh tawh mi ?" ka lo ti deuh hmak a, "Haw turin min duh mi ?" rawn ti let veleh khauh va, chhang lo chuan ka melh ram ram ringawt.







"Tak tak a, Bawihtea kha a khawngaihthlak, ka va mut pui tawh nge ?" tiin a rawn ban a, ka lo hnial ta bik lo.







"A nu in lamah a awm em ni ?" Dika chuan a rawn ti a, "Nu a nei lo!" UMapuia chuan chang fek fawk hian a ti a, ka lo ip chawih thei.








"Mate i UMapuia te kha va thlah la" ka nu'n a tih chuan hnial eih lovin ka ding nghal a, ka chhuahpui nghal. Dika zu rui bula awm reng ai chuan kawng awiha lum thla zawk dawn pawh ni ila ka la duh fe.









Pawn kan chhuah chuan a thim mup mai a, thenawm te inchhuh light chauh chuan en phak thui lo tak a ni.







Ka phone light chu ka on a, UMapuia kaln tur chu ka lo en.







"UMapui ka lo paw zawk anga min lo en la ?" ka tih chuan, "A ngai lo" a ti nghut.








"I tlu nge ?" ka tih chuan, "I'm the man!" a rawn ti a, ka nui chhuak teuh kher mai. Amah ang lo tak mai pawh ni lo amah midang daihin tawng an thlah ang vel a ni.








"UMapui" ka'n ti ngawt a, "Imm" tiin a rawn inher mut. A pa lian si a, a lo kai ve sek bawk nen a tluk chu ka hlau hle ni.







"I tlu nge" ka ti leh ngawt a, a rawn ri chu ka hre thei.








An in kan thlen chuan let leh mai ka tum a, mahse UMapuia chuan 'thil sawi duh ka nei' tiin min chelh leh rih.








"Arsi tam sia thla hi a eng lo reng reng" tiin kawngka biang nghengin van lam chu ka thlir a, "Thla pawhin eng chhuah theih loh hun a nei ve lawm" tiin kawngka biang nghengin ka din dan chiahin a rawn ding ve a, kan mit chu intawng chiang kher mai.








Nichina rui hmel ang kha a pu tawh hauh lo va, a khabe ruh kual chu thinrimna nei ang maiin a che rulh rulh a, a khabe hmul tam tham lo zet chu keimah min kawk zawng hian a awm sang a, a mita ka en chuan hriatthiam harsa zetin min lo en.







"Enge ?" ka han ti leh ngawt a, ka dang chua ro hulh.







A hma ang chiah khan ka awm a, a mi uapna na zet ang kha ka hre leh tawh.








Ka sa pup pup a, a mi melhna vang chuan ngaihtuah ber pawh neih harsa ka ti ta khawp mai.








"Min en reng lo la ?" ka ti ta thlawt a, amah pawh chu a rawn nui ta hawk.








"Mate..." a tih chuan ka en leh zawk a, ahma in ka hming char charin min ko thin.








"Kan kum hi a inthlau mah mah i ti ve em ?" a tih chuan a ngaihna ka hre lo viau a.








"Ka ngaina tlat bawk si che a!" a tih leh chuan engkim hi a reh thuap nimai hian ka hria a, ka lungphu ri ring lutuk tih loh chu hriat reng reng ka nei lova, ka khap fak fak.








Chhan ka tum a, chhan dan tur ka hre lo. Hria pawh ni ila ka dang ro lutuk avang chuan ka chhang thei kher lovang.








"Ka... A.. UMapui..." ka ti bah nak a, ka ban rekah manin alamah chuan min pawt a, ka ban chu a darah a dah rem nghal thlap.








Ka en a, min lo en ve kar si avang chuan ka hawisawn nghal a, "UMapui.... A zahthlak" tiin ka inlahrang a, "Ka haw.... muttui aw" tiin ka tlan nghal vang vang.








Lawmite in zawn ka thlen chuan Lawmin min lo au ding a, "Ka starpa te in ah i kal mi? I û pawh a kal chiah" a ti a, "Lawmi" ka ti vak.








Ka thin phu rang lutuk chu a la reh thei lova, ka kawchhungah hian za mur mur te hi a awmin ka hria.








"Enge ?" vin fahran hian a lo ti veleh a, "Aaaa ka haw dawn" tiin ka tlan leh nghal nal nal.







Ka thu hriat khan min deng lutuk nge ka chiai vek! Ka pangngai lo. Amah UMapuia kha ka hmuh ngam leh tawh pawh ka ring lo ve!








"Mate..." Ka û min koh ri ah chuan ka ding a, ka lo tlan pel tawh.







"A thim nen khatia i tlan chuan i tlu nga sin" a ti a, a ni chu fimkhur takin a phone light nen a rawn kal a, a va han pa lo ve chiang tak.







Ka ding a, ka û chu ka lo nghak.






"U Dika a lo leng a" ka tih chuan, "Chuti chu tinge i lo chhuah a ?" tiin ka darah a rawn kuah.







"Mipa in hmeichhe hnenah 'ka ngaina che' in tih hi enge awmzia ?" kal pah chuan ka ti a, ka sawi zawng te chuan UMapuian a sawi lai chu ka mitthla a, ka thin a phu dup dup thei.







"Aw kan ngaina tihna nimai lawm" a tih chuan ka û chu ka melh vut a, ka la inchhuih khut zui.








"Chutiang lo awmze dang a nei lo mi ?" ka ti leh a, "Neih chu nei e, tunge chutiang thu chu hrilh reng reng che a" nui put put chung chuan a ti a, "Mi te te in" ka tih chuan, "A te chiah maw..?" chimawm zet hian a rawn ti a, "Ninawm!" ka ti hluk.








"Anih leh i thianpa fanu nen inkawp ta ula, mahse i thianpa fanu chu nang ai a naupang ta, i duh dawn tho angem i thianpa fanu anih chuan? Mahse i thianpa chu nang ai upa ni tho ta se, chuan a fanu nen an inkarah i kum chu a awm ta.... Awiii ka sawi buai vek mahse i hrethiam tho em ka sawi awmzia chu ?" ka ti bah nak nak a, ka û chu ka melh kuau.








"Hria e hria e, 'ka ngaina che' titu thlengin ka hre vek" nui chung bawk chuan a ti a, "U!" ka ti vak a, ka tawngkam thiam loh a leiah a ka sawi chhuak vek a ni ringawt.








"Enge.... Nakinah ka hre dawn tho tho a" tiin a nui a, "A nuihzatthlak loh nia aw" tiin ka tum bar a, kan inkawt chu kan thleng.








"Awww i va han luck tak em! Inchhungah nghaktu i nei bawk a, nichin lawkah ngaina tu che i nei bawk a" awmze nei zet chuan a ti a, a ngeiawm lutuk chu ka tah a chhuak zawk.








Dika kha a lo haw tawh angem le? A haw chu ka la ring si lova, keimah zawk hi ka va han haw peih lo tak!








"U lut hmasa la, Dika kha a la haw loh chuan min lo hrilh la Lawmite in ah ka leng dawn" ka tih chuan, "Eee! Chutiangin nula in an awm ngai lo" ka û in a tih chuan, "Zu a rui a..." ka ti leh hman chauh tiin, "Ka awm hi" tiin in chhungah min kuah lut nghal hmak.








Ka beisei ang ngeiin Dika chu a lo la thu run a, ka pa pawh a awm tawh bakah ka ni pawh a rawn thu chhuak leh tawh.








"I va rawn haw hma ve ?" ka pa chuan a lo ti a, ka û chu Dika bula thut thlak pahin, "Lawmi a mu hma duh a... Mate nangpawh va mu rawh zingah Lawmi nen tih tur in neih kha" a ti a, a thusawi hnial lo chuan pindanah ka lut nghal hmak.








Ka û hi ka pa anga zaidam tawpkhawk ka tih tawh kha, khatianga nelawm vak lova mu tura min ti kha chu ka mi duh tak pawh rawn leng se a thusawi ka hnial hauh lovang. Dika ka ngainat loh thu ka sawi avangin midang te nuta(nutra) angin awmdan mawi min hrilh ve chiam lova, ngawi rengin ka duhdan min zawm sak a, keiin a thusawi ka awih mai ni.








Ka khumah chuan muin ka tum loh pawhin UMapuia bawk chu ka ngaihtuah lo thei lova, thu tam leh ril tak a sawi lo nain a thusawi chu ka rilruah a cham veng veng mai a, chutihrual erawhin awih har ka ti.








A mitmenga min ngainatna lang ngai hauh lovin min ngainat thu a sawi a, a cheziaah lah min ngainatna a lan ka hre ngai hek lo. Nge ni a kei hian min ngainat dan hi ka lo ngai kawi zawk ni dawn ni?


.
.
.
.



Ka û te inneih tluang takin kan hmang zo va, mo thian a ka tang thei lo erawh kei aiin Lawmi chu a thinrim zawk daih.







Ka û chuan UMapuia chu thianah a hmang a, mo neitu ai pawhin mit a la zawk!






Khaw lian zawk zawk kan ni lo bawk a, dan khatna ni lo mah se khaw pum deuhthaw chuan inneih kan lawm a, a nuam tham khawp mai.







UMapuia nen chuan khami zan atang khan kan inbe pangngai ta hauh lova, Lawmi ka hrilh ve chuan 'i chhang pangngai lova ani tan beisei ngam chi pawh i nih loh chu' a ti a, a sawi awmzia ka hre lo viau a. Engtia ka chhan pangngai loh viau lah chu ka hre der si lo.








Ka ni leh Lawmi chuan min sawipui viau mah se UMapuia nena inkawp tur anga ka han insuangtuah vel chuan a ni theiin ka hre ngang lo. A khaikhawm nana ka sawi thiam dan ber chuanin UMapuia hi ka duh lo!







Chutiang boruak kan nih tak nuai vang chuan nge ahma aiin ka lakah a nelawmloh zawk a, an in ah ka kal ngai mang tawh lova, ka kal pawhin Cici-i a lo awm ve thin a, ka mi ngei lutuk a lo awm thin avangin ka haw leh vat thin.







Tlai khat an in a chawhmeh suah turin an in ah ka kal a, Cici-in rawng a lo bawl leh pek a, ka chawhmeh suah tur nen ka let leh thak phah.







Tinge Cici-i hi ka huat em em ka hre bik lova, Sir Jacob-a bulah pawh ka sawi hial!








Lawmin, "Chhan a awm a ni lo maw ?" tiin ka hrilh chuan min la chhaih zui a, UMapuia ka duh loh thu chu ka sawi khum nghek.








"Anih chuan i duh lo tih fiah nan ngaihzawng nei rawh!" Lawmi chuan a ti leh a, ka thinrim bawk si nen chuan, "Ka nei khawp ang, UMapuia ka duh lo chiang lutuk" ka ti hmuar hmuar a, Dika rawn lit fu leh chiah bawk si chu, "Dika tun atang hian kan inkawp!" ka lo ti nghal tawng.







Naktuk zanah pawh awm dawn aw


Ads click leh comment


Show post links
Top